Narayaniyam Dashaka 34 - Shriramavataram — Sinhala Script

ගීර්වාණෛරර්ථ්යමානෝ දශමුඛනිධනං කෝසලේෂ්වෘශ්යශෘඞ්ගේ

පුත්රීයාමිෂ්ටිමිෂ්ට්වා දදුෂි දශරථක්ෂ්මාභෘතේ පායසාග්ර්යම් .

තද්භුක්ත්යා තත්පුරන්ධ්රීෂ්වපි තිසෘෂු සමං ජාතගර්භාසු ජාතෝ

රාමස්ත්වං ලක්ෂ්මණේන ස්වයමථ භරතේනාපි ශත්රුඝ්නනාම්නා ..1..

කෝදණ්ඩී කෞශිකස්ය ක්රතුවරමවිතුං ලක්ෂ්මණේනානුයාතෝ

යාතෝ(අ)භූස්තාතවාචා මුනිකථිතමනුද්වන්ද්වශාන්තාධ්වඛේදඃ .

නෘණාං ත්රාණාය බාණෛර්මුනිවචනබලාත්තාටකාං පාටයිත්වා

ලබ්ධ්වාස්මාදස්ත්රජාලං මුනිවනමගමෝ දේව සිද්ධාශ්රමාඛ්යම් ..2..

මාරීචං ද්රාවයිත්වා මඛශිරසි ශරෛරන්යරක්ෂාංසි නිඝ්නන්

කල්යාං කුර්වන්නහල්යාං පථි පදරජසා ප්රාප්ය වෛදේහගේහම් .

භින්දානශ්චාන්ද්රචූඩං ධනුරවනිසුතාමින්දිරාමේව ලබ්ධ්වා

රාජ්යං ප්රාතිෂ්ඨථාස්ත්වං ත්රිභිරපි ච සමං භ්රාතෘවීරෛස්සදාරෛඃ ..3..

ආරුන්ධානේ රුෂාන්ධේ භෘගුකුල තිලකේ සඞ්ක්රමය්ය ස්වතේජෝ

යාතේ යාතෝ(අ)ස්යයෝධ්යාං සුඛමිහ නිවසන් කාන්තයා කාන්තමූර්තේ .

ශත්රුඝ්නේනෛකදාථෝ ගතවති භරතේ මාතුලස්යාධිවාසං

තාතාරබ්ධෝ(අ)භිෂේකස්තව කිල විහතඃ කේකයාධීශපුත්ර්යා ..4..

තාතෝක්ත්යා යාතුකාමෝ වනමනුජවධූසංයුතශ්චාපධාරඃ

පෞරානාරුධ්ය මාර්ගේ ගුහනිලයගතස්ත්වං ජටාචීරධාරී.

නාවා සන්තීර්ය ගඞ්ගාමධිපදවි පුනස්තං භරද්වාජමාරා-

න්නත්වා තද්වාක්යහේතෝරතිසුඛමවසශ්චිත්රකූටේ ගිරීන්ද්රේ ..5..

ශ්රුත්වා පුත්රාර්තිඛින්නං ඛලු භරතමුඛාත් ස්වර්ගයාතං ස්වතාතං

තප්තෝ දත්වා(අ)ම්බු තස්මෛ නිදධිථ භරතේ පාදුකාං මේදිනීං ච

අත්රිං නත්වා(අ)ථ ගත්වා වනමතිවිපුලං දණ්ඩකං චණ්ඩකායං

හත්වා දෛත්යං විරාධං සුගතිමකලයශ්චාරු භෝඃ ශාරභඞ්ගීම් ..6..

නත්වා(අ)ගස්ත්යං සමස්තාශරනිකරසපත්රාකෘතිං තාපසේභ්යඃ

ප්රත්යශ්රෞෂීඃ ප්රියෛෂී තදනු ච මුනිනා වෛෂ්ණවේ දිව්යචාපේ .

බ්රහ්මාස්ත්රේ චාපි දත්තේ පථි පිතෘසුහෘදං වීක්ෂ්ය භූයෝ ජටායුං

මෝදාත් ගෝදාතටාන්තේ පරිරමසි පුරා පඤ්චවට්යාං වධූට්යා ..7..

ප්රාප්තායාඃ ශූර්පණඛ්යා මදනචලධෘතේරර්ථනෛර්නිස්සහාත්මා

තාං සෞමිත්රෞ විසෘජ්ය ප්රබලතමරුෂා තේන නිර්ලූනනාසාම් .

දෘෂ්ට්වෛනාං රුෂ්ටචිත්තං ඛරමභිපතිතං දූෂණං ච ත්රිමූර්ධං

ව්යාහිංසීරාශරානප්යයුතසමධිකාංස්තත්ක්ෂණාදක්ෂතෝෂ්මා ..8..

සෝදර්යාප්රෝක්තවාර්තාවිවශදශමුඛාදිෂ්ටමාරීචමායා-

සාරඞ්ග සාරසාක්ෂ්යා ස්පෘහිතමනුගතඃ ප්රාවධීර්බාණඝාතම් .

තන්මායාක්රන්දනිර්යාපිතභවදනුජාං රාවණස්තාමහාර්ෂී-

ත්තේනාර්තෝ(අ)පි ත්වමන්තඃ කිමපි මුදමධාස්තද්වධෝපායලාභාත් ..9..

භූයස්තන්වීං විචින්වන්නහෘත දශමුඛස්ත්වද්වධූං මද්වධේනේ-

ත්යුක්ත්වා යාතේ ජටායෞ දිවමථ සුහෘදඃ ප්රාතනෝඃ ප්රේතකාර්යම් .

ගෘහ්ණානං තං කබන්ධං ජඝනිථ ශබරීං ප්රේක්ෂ්ය පම්පාතටේ ත්වං

සම්ප්රාප්තෝ වාතසූනුං භෘශමුදිතමනාඃ පාහි වාතාලයේශ ..10..

Roman (IAST) Transliteration

gīrvāṇairarthyamāno daśamukhanidhanaṃ kosaleṣvṛśyaśṛṅge

putrīyāmiṣṭimiṣṭvā daduṣi daśarathakṣmābhṛte pāyasāgryam |

tadbhuktyā tatpurandhrīṣvapi tisṛṣu samaṃ jātagarbhāsu jāto

rāmastvaṃ lakṣmaṇena svayamatha bharatenāpi śatrughnanāmnā ||1||

kodaṇḍī kauśikasya kratuvaramavituṃ lakṣmaṇenānuyāto

yāto'bhūstātavācā munikathitamanudvandvaśāntādhvakhedaḥ |

nṛṇāṃ trāṇāya bāṇairmunivacanabalāttāṭakāṃ pāṭayitvā

labdhvāsmādastrajālaṃ munivanamagamo deva siddhāśramākhyam ||2||

mārīcaṃ drāvayitvā makhaśirasi śarairanyarakṣāṃsi nighnan

kalyāṃ kurvannahalyāṃ pathi padarajasā prāpya vaidehageham |

bhindānaścāndracūḍaṃ dhanuravanisutāmindirāmeva labdhvā

rājyaṃ prātiṣṭhathāstvaṃ tribhirapi ca samaṃ bhrātṛvīraissadāraiḥ ||3||

ārundhāne ruṣāndhe bhṛgukula tilake saṅkramayya svatejo

yāte yāto'syayodhyāṃ sukhamiha nivasan kāntayā kāntamūrte |

śatrughnenaikadātho gatavati bharate mātulasyādhivāsaṃ

tātārabdho'bhiṣekastava kila vihataḥ kekayādhīśaputryā ||4||

tātoktyā yātukāmo vanamanujavadhūsaṃyutaścāpadhāraḥ

paurānārudhya mārge guhanilayagatastvaṃ jaṭācīradhārī|

nāvā santīrya gaṅgāmadhipadavi punastaṃ bharadvājamārā-

nnatvā tadvākyahetoratisukhamavasaścitrakūṭe girīndre ||5||

śrutvā putrārtikhinnaṃ khalu bharatamukhāt svargayātaṃ svatātaṃ

tapto datvā'mbu tasmai nidadhitha bharate pādukāṃ medinīṃ ca

atriṃ natvā'tha gatvā vanamativipulaṃ daṇḍakaṃ caṇḍakāyaṃ

hatvā daityaṃ virādhaṃ sugatimakalayaścāru bhoḥ śārabhaṅgīm ||6||

natvā'gastyaṃ samastāśaranikarasapatrākṛtiṃ tāpasebhyaḥ

pratyaśrauṣīḥ priyaiṣī tadanu ca muninā vaiṣṇave divyacāpe |

brahmāstre cāpi datte pathi pitṛsuhṛdaṃ vīkṣya bhūyo jaṭāyuṃ

modāt godātaṭānte pariramasi purā pañcavaṭyāṃ vadhūṭyā ||7||

prāptāyāḥ śūrpaṇakhyā madanacaladhṛterarthanairnissahātmā

tāṃ saumitrau visṛjya prabalatamaruṣā tena nirlūnanāsām |

dṛṣṭvaināṃ ruṣṭacittaṃ kharamabhipatitaṃ dūṣaṇaṃ ca trimūrdhaṃ

vyāhiṃsīrāśarānapyayutasamadhikāṃstatkṣaṇādakṣatoṣmā ||8||

sodaryāproktavārtāvivaśadaśamukhādiṣṭamārīcamāyā-

sāraṅga sārasākṣyā spṛhitamanugataḥ prāvadhīrbāṇaghātam |

tanmāyākrandaniryāpitabhavadanujāṃ rāvaṇastāmahārṣī-

ttenārto'pi tvamantaḥ kimapi mudamadhāstadvadhopāyalābhāt ||9||

bhūyastanvīṃ vicinvannahṛta daśamukhastvadvadhūṃ madvadhene-

tyuktvā yāte jaṭāyau divamatha suhṛdaḥ prātanoḥ pretakāryam |

gṛhṇānaṃ taṃ kabandhaṃ jaghanitha śabarīṃ prekṣya pampātaṭe tvaṃ

samprāpto vātasūnuṃ bhṛśamuditamanāḥ pāhi vātālayeśa ||10||

Sanskrit — Devanagari (original)

गीर्वाणैरर्थ्यमानो दशमुखनिधनं कोसलेष्वृश्यशृङ्गे

पुत्रीयामिष्टिमिष्ट्वा ददुषि दशरथक्ष्माभृते पायसाग्र्यम् ।

तद्भुक्त्या तत्पुरन्ध्रीष्वपि तिसृषु समं जातगर्भासु जातो

रामस्त्वं लक्ष्मणेन स्वयमथ भरतेनापि शत्रुघ्ननाम्ना ॥1॥

कोदण्डी कौशिकस्य क्रतुवरमवितुं लक्ष्मणेनानुयातो

यातोऽभूस्तातवाचा मुनिकथितमनुद्वन्द्वशान्ताध्वखेदः ।

नृणां त्राणाय बाणैर्मुनिवचनबलात्ताटकां पाटयित्वा

लब्ध्वास्मादस्त्रजालं मुनिवनमगमो देव सिद्धाश्रमाख्यम् ॥2॥

मारीचं द्रावयित्वा मखशिरसि शरैरन्यरक्षांसि निघ्नन्

कल्यां कुर्वन्नहल्यां पथि पदरजसा प्राप्य वैदेहगेहम् ।

भिन्दानश्चान्द्रचूडं धनुरवनिसुतामिन्दिरामेव लब्ध्वा

राज्यं प्रातिष्ठथास्त्वं त्रिभिरपि च समं भ्रातृवीरैस्सदारैः ॥3॥

आरुन्धाने रुषान्धे भृगुकुल तिलके सङ्क्रमय्य स्वतेजो

याते यातोऽस्ययोध्यां सुखमिह निवसन् कान्तया कान्तमूर्ते ।

शत्रुघ्नेनैकदाथो गतवति भरते मातुलस्याधिवासं

तातारब्धोऽभिषेकस्तव किल विहतः केकयाधीशपुत्र्या ॥4॥

तातोक्त्या यातुकामो वनमनुजवधूसंयुतश्चापधारः

पौरानारुध्य मार्गे गुहनिलयगतस्त्वं जटाचीरधारी।

नावा सन्तीर्य गङ्गामधिपदवि पुनस्तं भरद्वाजमारा-

न्नत्वा तद्वाक्यहेतोरतिसुखमवसश्चित्रकूटे गिरीन्द्रे ॥5॥

श्रुत्वा पुत्रार्तिखिन्नं खलु भरतमुखात् स्वर्गयातं स्वतातं

तप्तो दत्वाऽम्बु तस्मै निदधिथ भरते पादुकां मेदिनीं च

अत्रिं नत्वाऽथ गत्वा वनमतिविपुलं दण्डकं चण्डकायं

हत्वा दैत्यं विराधं सुगतिमकलयश्चारु भोः शारभङ्गीम् ॥6॥

नत्वाऽगस्त्यं समस्ताशरनिकरसपत्राकृतिं तापसेभ्यः

प्रत्यश्रौषीः प्रियैषी तदनु च मुनिना वैष्णवे दिव्यचापे ।

ब्रह्मास्त्रे चापि दत्ते पथि पितृसुहृदं वीक्ष्य भूयो जटायुं

मोदात् गोदातटान्ते परिरमसि पुरा पञ्चवट्यां वधूट्या ॥7॥

प्राप्तायाः शूर्पणख्या मदनचलधृतेरर्थनैर्निस्सहात्मा

तां सौमित्रौ विसृज्य प्रबलतमरुषा तेन निर्लूननासाम् ।

दृष्ट्वैनां रुष्टचित्तं खरमभिपतितं दूषणं च त्रिमूर्धं

व्याहिंसीराशरानप्ययुतसमधिकांस्तत्क्षणादक्षतोष्मा ॥8॥

सोदर्याप्रोक्तवार्ताविवशदशमुखादिष्टमारीचमाया-

सारङ्ग सारसाक्ष्या स्पृहितमनुगतः प्रावधीर्बाणघातम् ।

तन्मायाक्रन्दनिर्यापितभवदनुजां रावणस्तामहार्षी-

त्तेनार्तोऽपि त्वमन्तः किमपि मुदमधास्तद्वधोपायलाभात् ॥9॥

भूयस्तन्वीं विचिन्वन्नहृत दशमुखस्त्वद्वधूं मद्वधेने-

त्युक्त्वा याते जटायौ दिवमथ सुहृदः प्रातनोः प्रेतकार्यम् ।

गृह्णानं तं कबन्धं जघनिथ शबरीं प्रेक्ष्य पम्पातटे त्वं

सम्प्राप्तो वातसूनुं भृशमुदितमनाः पाहि वातालयेश ॥10॥