Narayaniyam Dashaka 81 - Narakasuravadham Tatha Subhadraharanam — Sinhala Script

ස්නිග්ධාං මුග්ධාං සතතමපි තාං ලාලයන් සත්යභාමාං

යාතෝ භූයඃ සහ ඛලු තයා යාජ්ඤසේනීවිවාහම් .

පාර්ථප්රීත්යෛ පුනරපි මනාගාස්ථිතෝ හස්තිපුර්යාං

සශක්රප්රස්ථං පුරමපි විභෝ සංවිධායාගතෝ(අ)භූඃ ..1..

භද්රාං භද්රාං භවදවරජාං කෞරවේණාර්ථ්යමානාං

ත්වද්වාචා තාමහෘත කුහනාමස්කරී ශක්රසූනුඃ .

තත්ර ක්රුද්ධං බලමනුනයන් ප්රත්යගාස්තේන සාර්ධං

ශක්රප්රස්ථං ප්රියසඛමුදේ සත්යභාමාසහායඃ ..2..

තත්ර ක්රීඩන්නපි ච යමුනාකූලදෘෂ්ටාං ගෘහීත්වා

තාං කාලින්දීං නගරමගමඃ ඛාණ්ඩවප්රීණිතාග්නිඃ .

භ්රාතෘත්රස්තාං ප්රණයවිවශාං දේව පෛතෘෂ්වසේයීං

රාජ්ඤාං මධ්යේ සපදි ජහෘෂේ මිත්රවින්දාමවන්තීම් ..3..

සත්යාං ගත්වා පුනරුදවහෝ නග්නජින්නන්දනාං තාං

බධ්වා සප්තාපි ච වෘෂවරාන් සප්තමූර්තිර්නිමේෂාත් .

භද්රාං නාම ප්රදදුරථ තේ දේව සන්තර්දනාද්යා-

ස්තත්සෝදර්යා වරද භවතඃ සා(අ)පි පෛතෘෂ්වසේයී ..4..

පාර්ථාද්යෛරප්යකෘතලවනං තෝයමාත්රාභිලක්ෂ්යං

ලක්ෂං ඡිත්වා ශඵරමවෘථා ලක්ෂ්මණාං මද්රකන්යාම් .

අෂ්ටාවේවං තව සමභවන් වල්ලභාස්තත්ර මධ්යේ

ශුශ්රෝථ ත්වං සුරපතිගිරා භෞමදුශ්චේෂ්ටිතානි ..5..

ස්මෘතායාතං පක්ෂිප්රවරමධිරූඪස්ත්වමගමෝ

වහන්නඞ්කේ භාමාමුපවනමිවාරාතිභවනම් .

විභින්දන් දුර්ගාණි ත්රුටිතපෘතනාශෝණිතරසෛඃ

පුරං තාවත් ප්රාග්ජ්යෝතිෂමකුරුථාඃ ශෝණිතපුරම් ..6..

මුරස්ත්වාං පඤ්චාස්යෝ ජලධිවනමධ්යාදුදපතත්

ස චක්රේ චක්රේණ ප්රදලිතශිරා මඞ්ක්ෂු භවතා .

චතුර්දන්තෛර්දන්තාවලපතිභිරින්ධානසමරං

රථාඞ්ගේන ඡිත්වා නරකමකරෝස්තීර්ණනරකම් ..7..

ස්තුතෝ භූම්යා රාජ්යං සපදි භගදත්තේ(අ)ස්ය තනයේ

ගජඤ්චෛකං දත්වා ප්රජිඝයිථ නාගාන්නිජපුරීම් .

ඛලේනාබද්ධානාං ස්වගතමනසාං ෂෝඩශ පුනඃ

සහස්රාණි ස්ත්රීණාමපි ච ධනරාශිං ච විපුලම් ..8..

භෞමාපාහෘතකුණ්ඩලං තදදිතේර්දාතුං ප්රයාතෝ දිවං

ශක්රාද්යෛර්මහිතඃ සමං දයිතයා ද්යුස්ත්රීෂු දත්තහ්රියා .

හෘත්වා කල්පතරුං රුෂාභිපතිතං ජිත්වේන්ද්රමභ්යාගම-

ස්තත්තු ශ්රීමදදෝෂ ඊදෘශ ඉති ව්යාඛ්යාතුමේවාකෘථාඃ ..9..

කල්පද්රුං සත්යභාමාභවනභුවි සෘජන් ද්ව්යෂ්ටසාහස්රයෝෂාඃ

ස්වීකෘත්ය ප්රත්යගාරං විහිතබහුවපුර්ලාලයන් කේලිභේදෛඃ .

ආශ්චර්යාන්නාරදාලෝකිතවිවිධගතිස්තත්ර තත්රාපි ගේහේ

භූයඃ සර්වාසු කුර්වන් දශ දශ තනයාන් පාහි වාතාලයේශ ..10..

Roman (IAST) Transliteration

snigdhāṃ mugdhāṃ satatamapi tāṃ lālayan satyabhāmāṃ

yāto bhūyaḥ saha khalu tayā yājñasenīvivāham |

pārthaprītyai punarapi manāgāsthito hastipuryāṃ

saśakraprasthaṃ puramapi vibho saṃvidhāyāgato'bhūḥ ||1||

bhadrāṃ bhadrāṃ bhavadavarajāṃ kauraveṇārthyamānāṃ

tvadvācā tāmahṛta kuhanāmaskarī śakrasūnuḥ |

tatra kruddhaṃ balamanunayan pratyagāstena sārdhaṃ

śakraprasthaṃ priyasakhamude satyabhāmāsahāyaḥ ||2||

tatra krīḍannapi ca yamunākūladṛṣṭāṃ gṛhītvā

tāṃ kālindīṃ nagaramagamaḥ khāṇḍavaprīṇitāgniḥ |

bhrātṛtrastāṃ praṇayavivaśāṃ deva paitṛṣvaseyīṃ

rājñāṃ madhye sapadi jahṛṣe mitravindāmavantīm ||3||

satyāṃ gatvā punarudavaho nagnajinnandanāṃ tāṃ

badhvā saptāpi ca vṛṣavarān saptamūrtirnimeṣāt |

bhadrāṃ nāma pradaduratha te deva santardanādyā-

statsodaryā varada bhavataḥ sā'pi paitṛṣvaseyī ||4||

pārthādyairapyakṛtalavanaṃ toyamātrābhilakṣyaṃ

lakṣaṃ chitvā śapharamavṛthā lakṣmaṇāṃ madrakanyām |

aṣṭāvevaṃ tava samabhavan vallabhāstatra madhye

śuśrotha tvaṃ surapatigirā bhaumaduśceṣṭitāni ||5||

smṛtāyātaṃ pakṣipravaramadhirūḍhastvamagamo

vahannaṅke bhāmāmupavanamivārātibhavanam |

vibhindan durgāṇi truṭitapṛtanāśoṇitarasaiḥ

puraṃ tāvat prāgjyotiṣamakuruthāḥ śoṇitapuram ||6||

murastvāṃ pañcāsyo jaladhivanamadhyādudapatat

sa cakre cakreṇa pradalitaśirā maṅkṣu bhavatā |

caturdantairdantāvalapatibhirindhānasamaraṃ

rathāṅgena chitvā narakamakarostīrṇanarakam ||7||

stuto bhūmyā rājyaṃ sapadi bhagadatte'sya tanaye

gajañcaikaṃ datvā prajighayitha nāgānnijapurīm |

khalenābaddhānāṃ svagatamanasāṃ ṣoḍaśa punaḥ

sahasrāṇi strīṇāmapi ca dhanarāśiṃ ca vipulam ||8||

bhaumāpāhṛtakuṇḍalaṃ tadaditerdātuṃ prayāto divaṃ

śakrādyairmahitaḥ samaṃ dayitayā dyustrīṣu dattahriyā |

hṛtvā kalpataruṃ ruṣābhipatitaṃ jitvendramabhyāgama-

stattu śrīmadadoṣa īdṛśa iti vyākhyātumevākṛthāḥ ||9||

kalpadruṃ satyabhāmābhavanabhuvi sṛjan dvyaṣṭasāhasrayoṣāḥ

svīkṛtya pratyagāraṃ vihitabahuvapurlālayan kelibhedaiḥ |

āścaryānnāradālokitavividhagatistatra tatrāpi gehe

bhūyaḥ sarvāsu kurvan daśa daśa tanayān pāhi vātālayeśa ||10||

Sanskrit — Devanagari (original)

स्निग्धां मुग्धां सततमपि तां लालयन् सत्यभामां

यातो भूयः सह खलु तया याज्ञसेनीविवाहम् ।

पार्थप्रीत्यै पुनरपि मनागास्थितो हस्तिपुर्यां

सशक्रप्रस्थं पुरमपि विभो संविधायागतोऽभूः ॥1॥

भद्रां भद्रां भवदवरजां कौरवेणार्थ्यमानां

त्वद्वाचा तामहृत कुहनामस्करी शक्रसूनुः ।

तत्र क्रुद्धं बलमनुनयन् प्रत्यगास्तेन सार्धं

शक्रप्रस्थं प्रियसखमुदे सत्यभामासहायः ॥2॥

तत्र क्रीडन्नपि च यमुनाकूलदृष्टां गृहीत्वा

तां कालिन्दीं नगरमगमः खाण्डवप्रीणिताग्निः ।

भ्रातृत्रस्तां प्रणयविवशां देव पैतृष्वसेयीं

राज्ञां मध्ये सपदि जहृषे मित्रविन्दामवन्तीम् ॥3॥

सत्यां गत्वा पुनरुदवहो नग्नजिन्नन्दनां तां

बध्वा सप्तापि च वृषवरान् सप्तमूर्तिर्निमेषात् ।

भद्रां नाम प्रददुरथ ते देव सन्तर्दनाद्या-

स्तत्सोदर्या वरद भवतः साऽपि पैतृष्वसेयी ॥4॥

पार्थाद्यैरप्यकृतलवनं तोयमात्राभिलक्ष्यं

लक्षं छित्वा शफरमवृथा लक्ष्मणां मद्रकन्याम् ।

अष्टावेवं तव समभवन् वल्लभास्तत्र मध्ये

शुश्रोथ त्वं सुरपतिगिरा भौमदुश्चेष्टितानि ॥5॥

स्मृतायातं पक्षिप्रवरमधिरूढस्त्वमगमो

वहन्नङ्के भामामुपवनमिवारातिभवनम् ।

विभिन्दन् दुर्गाणि त्रुटितपृतनाशोणितरसैः

पुरं तावत् प्राग्ज्योतिषमकुरुथाः शोणितपुरम् ॥6॥

मुरस्त्वां पञ्चास्यो जलधिवनमध्यादुदपतत्

स चक्रे चक्रेण प्रदलितशिरा मङ्क्षु भवता ।

चतुर्दन्तैर्दन्तावलपतिभिरिन्धानसमरं

रथाङ्गेन छित्वा नरकमकरोस्तीर्णनरकम् ॥7॥

स्तुतो भूम्या राज्यं सपदि भगदत्तेऽस्य तनये

गजञ्चैकं दत्वा प्रजिघयिथ नागान्निजपुरीम् ।

खलेनाबद्धानां स्वगतमनसां षोडश पुनः

सहस्राणि स्त्रीणामपि च धनराशिं च विपुलम् ॥8॥

भौमापाहृतकुण्डलं तददितेर्दातुं प्रयातो दिवं

शक्राद्यैर्महितः समं दयितया द्युस्त्रीषु दत्तह्रिया ।

हृत्वा कल्पतरुं रुषाभिपतितं जित्वेन्द्रमभ्यागम-

स्तत्तु श्रीमददोष ईदृश इति व्याख्यातुमेवाकृथाः ॥9॥

कल्पद्रुं सत्यभामाभवनभुवि सृजन् द्व्यष्टसाहस्रयोषाः

स्वीकृत्य प्रत्यगारं विहितबहुवपुर्लालयन् केलिभेदैः ।

आश्चर्यान्नारदालोकितविविधगतिस्तत्र तत्रापि गेहे

भूयः सर्वासु कुर्वन् दश दश तनयान् पाहि वातालयेश ॥10॥