Narayaniyam Dashaka 58 - Davagnisamrakshanam Tatha Rituvarnanam — Sinhala Script

ත්වයි විහරණලෝලේ බාලජාලෛඃ ප්රලම්බ-

ප්රමථනසවිලම්බේ ධේනවඃ ස්වෛරචාරාඃ .

තෘණකුතුකනිවිෂ්ටා දූරදූරං චරන්ත්යඃ

කිමපි විපිනමෛෂීකාඛ්යමීෂාම්බභූවුඃ ..1..

අනධිගතනිදාඝක්රෞර්යවෘන්දාවනාන්තාත්

බහිරිදමුපයාතාඃ කානනං ධේනවස්තාඃ .

තව විරහවිෂණ්ණා ඌෂ්මලග්රීෂ්මතාප-

ප්රසරවිසරදම්භස්යාකුලාඃ ස්තම්භමාපුඃ ..2..

තදනු සහ සහායෛර්දූරමන්විෂ්ය ශෞරේ

ගලිතසරණිමුඤ්ජාරණ්යසඤ්ජාතඛේදම් .

පශුකුලමභිවීක්ෂ්ය ක්ෂිප්රමානේතුමාරා-

ත්ත්වයි ගතවති හී හී සර්වතෝ(අ)ග්නිර්ජජෘම්භේ ..3..

සකලහරිති දීප්තේ ඝෝරභාඞ්කාරභීමේ

ශිඛිනි විහතමාර්ගා අර්ධදග්ධා ඉවාර්තාඃ .

අහහ භුවනබන්ධෝ පාහි පාහීති සර්වේ

ශරණමුපගතාස්ත්වාං තාපහර්තාරමේකම් ..4..

අලමලමතිභීත්යා සර්වතෝ මීලයධ්වං

දෘශමිති තව වාචා මීලිතාක්ෂේෂු තේෂු .

ක්ව නු දවදහනෝ(අ)සෞ කුත්ර මුඤ්ජාටවී සා

සපදි වවෘතිරේ තේ හන්ත භාණ්ඩීරදේශේ ..5..

ජය ජය තව මායා කේයමීශේති තේෂාං

නුතිභිරුදිතහාසෝ බද්ධනානාවිලාසඃ .

පුනරපි විපිනාන්තේ ප්රාචරඃ පාටලාදි-

ප්රසවනිකරමාත්රග්රාහ්යඝර්මානුභාවේ ..6..

ත්වයි විමුඛමිවෝච්චෛස්තාපභාරං වහන්තං

තව භජනවදන්තඃ පඞ්කමුච්ඡෝෂයන්තම් .

තව භුජවදුදඤ්චද්භූරිතේජඃප්රවාහං

තපසමයමනෛෂීර්යාමුනේෂු ස්ථලේෂු ..7..

තදනු ජලදජාලෛස්ත්වද්වපුස්තුල්යභාභි-

ර්විකසදමලවිද්යුත්පීතවාසෝවිලාසෛඃ .

සකලභුවනභාජාං හර්ෂදාං වර්ෂවේලාං

ක්ෂිතිධරකුහරේෂු ස්වෛරවාසී ව්යනෛෂීඃ ..8..

කුහරතලනිවිෂ්ටං ත්වාං ගරිෂ්ඨං ගිරීන්ද්රඃ

ශිඛිකුලනවකේකාකාකුභිඃ ස්තෝත්රකාරී .

ස්ඵුටකුටජකදම්බස්තෝමපුෂ්පාඤ්ජලිං ච

ප්රවිදධදනුභේජේ දේව ගෝවර්ධනෝ(අ)සෞ ..9..

අථ ශරදමුපේතාං තාං භවද්භක්තචේතෝ-

විමලසලිලපූරාං මානයන් කානනේෂු .

තෘණමමලවනාන්තේ චාරු සඤ්චාරයන් ගාඃ

පවනපුරපතේ ත්වං දේහි මේ දේහසෞඛ්යම් ..10..

Roman (IAST) Transliteration

tvayi viharaṇalole bālajālaiḥ pralamba-

pramathanasavilambe dhenavaḥ svairacārāḥ |

tṛṇakutukaniviṣṭā dūradūraṃ carantyaḥ

kimapi vipinamaiṣīkākhyamīṣāmbabhūvuḥ ||1||

anadhigatanidāghakrauryavṛndāvanāntāt

bahiridamupayātāḥ kānanaṃ dhenavastāḥ |

tava virahaviṣaṇṇā ūṣmalagrīṣmatāpa-

prasaravisaradambhasyākulāḥ stambhamāpuḥ ||2||

tadanu saha sahāyairdūramanviṣya śaure

galitasaraṇimuñjāraṇyasañjātakhedam |

paśukulamabhivīkṣya kṣipramānetumārā-

ttvayi gatavati hī hī sarvato'gnirjajṛmbhe ||3||

sakalahariti dīpte ghorabhāṅkārabhīme

śikhini vihatamārgā ardhadagdhā ivārtāḥ |

ahaha bhuvanabandho pāhi pāhīti sarve

śaraṇamupagatāstvāṃ tāpahartāramekam ||4||

alamalamatibhītyā sarvato mīlayadhvaṃ

dṛśamiti tava vācā mīlitākṣeṣu teṣu |

kva nu davadahano'sau kutra muñjāṭavī sā

sapadi vavṛtire te hanta bhāṇḍīradeśe ||5||

jaya jaya tava māyā keyamīśeti teṣāṃ

nutibhiruditahāso baddhanānāvilāsaḥ |

punarapi vipinānte prācaraḥ pāṭalādi-

prasavanikaramātragrāhyagharmānubhāve ||6||

tvayi vimukhamivoccaistāpabhāraṃ vahantaṃ

tava bhajanavadantaḥ paṅkamucchoṣayantam |

tava bhujavadudañcadbhūritejaḥpravāhaṃ

tapasamayamanaiṣīryāmuneṣu sthaleṣu ||7||

tadanu jaladajālaistvadvapustulyabhābhi-

rvikasadamalavidyutpītavāsovilāsaiḥ |

sakalabhuvanabhājāṃ harṣadāṃ varṣavelāṃ

kṣitidharakuhareṣu svairavāsī vyanaiṣīḥ ||8||

kuharatalaniviṣṭaṃ tvāṃ gariṣṭhaṃ girīndraḥ

śikhikulanavakekākākubhiḥ stotrakārī |

sphuṭakuṭajakadambastomapuṣpāñjaliṃ ca

pravidadhadanubheje deva govardhano'sau ||9||

atha śaradamupetāṃ tāṃ bhavadbhaktaceto-

vimalasalilapūrāṃ mānayan kānaneṣu |

tṛṇamamalavanānte cāru sañcārayan gāḥ

pavanapurapate tvaṃ dehi me dehasaukhyam ||10||

Sanskrit — Devanagari (original)

त्वयि विहरणलोले बालजालैः प्रलम्ब-

प्रमथनसविलम्बे धेनवः स्वैरचाराः ।

तृणकुतुकनिविष्टा दूरदूरं चरन्त्यः

किमपि विपिनमैषीकाख्यमीषाम्बभूवुः ॥1॥

अनधिगतनिदाघक्रौर्यवृन्दावनान्तात्

बहिरिदमुपयाताः काननं धेनवस्ताः ।

तव विरहविषण्णा ऊष्मलग्रीष्मताप-

प्रसरविसरदम्भस्याकुलाः स्तम्भमापुः ॥2॥

तदनु सह सहायैर्दूरमन्विष्य शौरे

गलितसरणिमुञ्जारण्यसञ्जातखेदम् ।

पशुकुलमभिवीक्ष्य क्षिप्रमानेतुमारा-

त्त्वयि गतवति ही ही सर्वतोऽग्निर्जजृम्भे ॥3॥

सकलहरिति दीप्ते घोरभाङ्कारभीमे

शिखिनि विहतमार्गा अर्धदग्धा इवार्ताः ।

अहह भुवनबन्धो पाहि पाहीति सर्वे

शरणमुपगतास्त्वां तापहर्तारमेकम् ॥4॥

अलमलमतिभीत्या सर्वतो मीलयध्वं

दृशमिति तव वाचा मीलिताक्षेषु तेषु ।

क्व नु दवदहनोऽसौ कुत्र मुञ्जाटवी सा

सपदि ववृतिरे ते हन्त भाण्डीरदेशे ॥5॥

जय जय तव माया केयमीशेति तेषां

नुतिभिरुदितहासो बद्धनानाविलासः ।

पुनरपि विपिनान्ते प्राचरः पाटलादि-

प्रसवनिकरमात्रग्राह्यघर्मानुभावे ॥6॥

त्वयि विमुखमिवोच्चैस्तापभारं वहन्तं

तव भजनवदन्तः पङ्कमुच्छोषयन्तम् ।

तव भुजवदुदञ्चद्भूरितेजःप्रवाहं

तपसमयमनैषीर्यामुनेषु स्थलेषु ॥7॥

तदनु जलदजालैस्त्वद्वपुस्तुल्यभाभि-

र्विकसदमलविद्युत्पीतवासोविलासैः ।

सकलभुवनभाजां हर्षदां वर्षवेलां

क्षितिधरकुहरेषु स्वैरवासी व्यनैषीः ॥8॥

कुहरतलनिविष्टं त्वां गरिष्ठं गिरीन्द्रः

शिखिकुलनवकेकाकाकुभिः स्तोत्रकारी ।

स्फुटकुटजकदम्बस्तोमपुष्पाञ्जलिं च

प्रविदधदनुभेजे देव गोवर्धनोऽसौ ॥9॥

अथ शरदमुपेतां तां भवद्भक्तचेतो-

विमलसलिलपूरां मानयन् काननेषु ।

तृणममलवनान्ते चारु सञ्चारयन् गाः

पवनपुरपते त्वं देहि मे देहसौख्यम् ॥10॥