Narayaniyam Dashaka 58 - Davagnisamrakshanam Tatha Rituvarnanam — Grantha Script

𑌤𑍍𑌵𑌯𑌿 𑌵𑌿𑌹𑌰𑌣𑌲𑍋𑌲𑍇 𑌬𑌾𑌲𑌜𑌾𑌲𑍈𑌃 𑌪𑍍𑌰𑌲𑌮𑍍𑌬-

𑌪𑍍𑌰𑌮𑌥𑌨𑌸𑌵𑌿𑌲𑌮𑍍𑌬𑍇 𑌧𑍇𑌨𑌵𑌃 𑌸𑍍𑌵𑍈𑌰𑌚𑌾𑌰𑌾𑌃 ।

𑌤𑍃𑌣𑌕𑍁𑌤𑍁𑌕𑌨𑌿𑌵𑌿𑌷𑍍𑌟𑌾 𑌦𑍂𑌰𑌦𑍂𑌰𑌂 𑌚𑌰𑌨𑍍𑌤𑍍𑌯𑌃

𑌕𑌿𑌮𑌪𑌿 𑌵𑌿𑌪𑌿𑌨𑌮𑍈𑌷𑍀𑌕𑌾𑌖𑍍𑌯𑌮𑍀𑌷𑌾𑌮𑍍𑌬𑌭𑍂𑌵𑍁𑌃 ॥1॥

𑌅𑌨𑌧𑌿𑌗𑌤𑌨𑌿𑌦𑌾𑌘𑌕𑍍𑌰𑍗𑌰𑍍𑌯𑌵𑍃𑌨𑍍𑌦𑌾𑌵𑌨𑌾𑌨𑍍𑌤𑌾𑌤𑍍

𑌬𑌹𑌿𑌰𑌿𑌦𑌮𑍁𑌪𑌯𑌾𑌤𑌾𑌃 𑌕𑌾𑌨𑌨𑌂 𑌧𑍇𑌨𑌵𑌸𑍍𑌤𑌾𑌃 ।

𑌤𑌵 𑌵𑌿𑌰𑌹𑌵𑌿𑌷𑌣𑍍𑌣𑌾 𑌊𑌷𑍍𑌮𑌲𑌗𑍍𑌰𑍀𑌷𑍍𑌮𑌤𑌾𑌪-

𑌪𑍍𑌰𑌸𑌰𑌵𑌿𑌸𑌰𑌦𑌮𑍍𑌭𑌸𑍍𑌯𑌾𑌕𑍁𑌲𑌾𑌃 𑌸𑍍𑌤𑌮𑍍𑌭𑌮𑌾𑌪𑍁𑌃 ॥2॥

𑌤𑌦𑌨𑍁 𑌸𑌹 𑌸𑌹𑌾𑌯𑍈𑌰𑍍𑌦𑍂𑌰𑌮𑌨𑍍𑌵𑌿𑌷𑍍𑌯 𑌶𑍗𑌰𑍇

𑌗𑌲𑌿𑌤𑌸𑌰𑌣𑌿𑌮𑍁𑌞𑍍𑌜𑌾𑌰𑌣𑍍𑌯𑌸𑌞𑍍𑌜𑌾𑌤𑌖𑍇𑌦𑌮𑍍 ।

𑌪𑌶𑍁𑌕𑍁𑌲𑌮𑌭𑌿𑌵𑍀𑌕𑍍𑌷𑍍𑌯 𑌕𑍍𑌷𑌿𑌪𑍍𑌰𑌮𑌾𑌨𑍇𑌤𑍁𑌮𑌾𑌰𑌾-

𑌤𑍍𑌤𑍍𑌵𑌯𑌿 𑌗𑌤𑌵𑌤𑌿 𑌹𑍀 𑌹𑍀 𑌸𑌰𑍍𑌵𑌤𑍋𑌽𑌗𑍍𑌨𑌿𑌰𑍍𑌜𑌜𑍃𑌮𑍍𑌭𑍇 ॥3॥

𑌸𑌕𑌲𑌹𑌰𑌿𑌤𑌿 𑌦𑍀𑌪𑍍𑌤𑍇 𑌘𑍋𑌰𑌭𑌾𑌙𑍍𑌕𑌾𑌰𑌭𑍀𑌮𑍇

𑌶𑌿𑌖𑌿𑌨𑌿 𑌵𑌿𑌹𑌤𑌮𑌾𑌰𑍍𑌗𑌾 𑌅𑌰𑍍𑌧𑌦𑌗𑍍𑌧𑌾 𑌇𑌵𑌾𑌰𑍍𑌤𑌾𑌃 ।

𑌅𑌹𑌹 𑌭𑍁𑌵𑌨𑌬𑌨𑍍𑌧𑍋 𑌪𑌾𑌹𑌿 𑌪𑌾𑌹𑍀𑌤𑌿 𑌸𑌰𑍍𑌵𑍇

𑌶𑌰𑌣𑌮𑍁𑌪𑌗𑌤𑌾𑌸𑍍𑌤𑍍𑌵𑌾𑌂 𑌤𑌾𑌪𑌹𑌰𑍍𑌤𑌾𑌰𑌮𑍇𑌕𑌮𑍍 ॥4॥

𑌅𑌲𑌮𑌲𑌮𑌤𑌿𑌭𑍀𑌤𑍍𑌯𑌾 𑌸𑌰𑍍𑌵𑌤𑍋 𑌮𑍀𑌲𑌯𑌧𑍍𑌵𑌂

𑌦𑍃𑌶𑌮𑌿𑌤𑌿 𑌤𑌵 𑌵𑌾𑌚𑌾 𑌮𑍀𑌲𑌿𑌤𑌾𑌕𑍍𑌷𑍇𑌷𑍁 𑌤𑍇𑌷𑍁 ।

𑌕𑍍𑌵 𑌨𑍁 𑌦𑌵𑌦𑌹𑌨𑍋𑌽𑌸𑍗 𑌕𑍁𑌤𑍍𑌰 𑌮𑍁𑌞𑍍𑌜𑌾𑌟𑌵𑍀 𑌸𑌾

𑌸𑌪𑌦𑌿 𑌵𑌵𑍃𑌤𑌿𑌰𑍇 𑌤𑍇 𑌹𑌨𑍍𑌤 𑌭𑌾𑌣𑍍𑌡𑍀𑌰𑌦𑍇𑌶𑍇 ॥5॥

𑌜𑌯 𑌜𑌯 𑌤𑌵 𑌮𑌾𑌯𑌾 𑌕𑍇𑌯𑌮𑍀𑌶𑍇𑌤𑌿 𑌤𑍇𑌷𑌾𑌂

𑌨𑍁𑌤𑌿𑌭𑌿𑌰𑍁𑌦𑌿𑌤𑌹𑌾𑌸𑍋 𑌬𑌦𑍍𑌧𑌨𑌾𑌨𑌾𑌵𑌿𑌲𑌾𑌸𑌃 ।

𑌪𑍁𑌨𑌰𑌪𑌿 𑌵𑌿𑌪𑌿𑌨𑌾𑌨𑍍𑌤𑍇 𑌪𑍍𑌰𑌾𑌚𑌰𑌃 𑌪𑌾𑌟𑌲𑌾𑌦𑌿-

𑌪𑍍𑌰𑌸𑌵𑌨𑌿𑌕𑌰𑌮𑌾𑌤𑍍𑌰𑌗𑍍𑌰𑌾𑌹𑍍𑌯𑌘𑌰𑍍𑌮𑌾𑌨𑍁𑌭𑌾𑌵𑍇 ॥6॥

𑌤𑍍𑌵𑌯𑌿 𑌵𑌿𑌮𑍁𑌖𑌮𑌿𑌵𑍋𑌚𑍍𑌚𑍈𑌸𑍍𑌤𑌾𑌪𑌭𑌾𑌰𑌂 𑌵𑌹𑌨𑍍𑌤𑌂

𑌤𑌵 𑌭𑌜𑌨𑌵𑌦𑌨𑍍𑌤𑌃 𑌪𑌙𑍍𑌕𑌮𑍁𑌚𑍍𑌛𑍋𑌷𑌯𑌨𑍍𑌤𑌮𑍍 ।

𑌤𑌵 𑌭𑍁𑌜𑌵𑌦𑍁𑌦𑌞𑍍𑌚𑌦𑍍𑌭𑍂𑌰𑌿𑌤𑍇𑌜𑌃𑌪𑍍𑌰𑌵𑌾𑌹𑌂

𑌤𑌪𑌸𑌮𑌯𑌮𑌨𑍈𑌷𑍀𑌰𑍍𑌯𑌾𑌮𑍁𑌨𑍇𑌷𑍁 𑌸𑍍𑌥𑌲𑍇𑌷𑍁 ॥7॥

𑌤𑌦𑌨𑍁 𑌜𑌲𑌦𑌜𑌾𑌲𑍈𑌸𑍍𑌤𑍍𑌵𑌦𑍍𑌵𑌪𑍁𑌸𑍍𑌤𑍁𑌲𑍍𑌯𑌭𑌾𑌭𑌿-

𑌰𑍍𑌵𑌿𑌕𑌸𑌦𑌮𑌲𑌵𑌿𑌦𑍍𑌯𑍁𑌤𑍍𑌪𑍀𑌤𑌵𑌾𑌸𑍋𑌵𑌿𑌲𑌾𑌸𑍈𑌃 ।

𑌸𑌕𑌲𑌭𑍁𑌵𑌨𑌭𑌾𑌜𑌾𑌂 𑌹𑌰𑍍𑌷𑌦𑌾𑌂 𑌵𑌰𑍍𑌷𑌵𑍇𑌲𑌾𑌂

𑌕𑍍𑌷𑌿𑌤𑌿𑌧𑌰𑌕𑍁𑌹𑌰𑍇𑌷𑍁 𑌸𑍍𑌵𑍈𑌰𑌵𑌾𑌸𑍀 𑌵𑍍𑌯𑌨𑍈𑌷𑍀𑌃 ॥8॥

𑌕𑍁𑌹𑌰𑌤𑌲𑌨𑌿𑌵𑌿𑌷𑍍𑌟𑌂 𑌤𑍍𑌵𑌾𑌂 𑌗𑌰𑌿𑌷𑍍𑌠𑌂 𑌗𑌿𑌰𑍀𑌨𑍍𑌦𑍍𑌰𑌃

𑌶𑌿𑌖𑌿𑌕𑍁𑌲𑌨𑌵𑌕𑍇𑌕𑌾𑌕𑌾𑌕𑍁𑌭𑌿𑌃 𑌸𑍍𑌤𑍋𑌤𑍍𑌰𑌕𑌾𑌰𑍀 ।

𑌸𑍍𑌫𑍁𑌟𑌕𑍁𑌟𑌜𑌕𑌦𑌮𑍍𑌬𑌸𑍍𑌤𑍋𑌮𑌪𑍁𑌷𑍍𑌪𑌾𑌞𑍍𑌜𑌲𑌿𑌂 𑌚

𑌪𑍍𑌰𑌵𑌿𑌦𑌧𑌦𑌨𑍁𑌭𑍇𑌜𑍇 𑌦𑍇𑌵 𑌗𑍋𑌵𑌰𑍍𑌧𑌨𑍋𑌽𑌸𑍗 ॥9॥

𑌅𑌥 𑌶𑌰𑌦𑌮𑍁𑌪𑍇𑌤𑌾𑌂 𑌤𑌾𑌂 𑌭𑌵𑌦𑍍𑌭𑌕𑍍𑌤𑌚𑍇𑌤𑍋-

𑌵𑌿𑌮𑌲𑌸𑌲𑌿𑌲𑌪𑍂𑌰𑌾𑌂 𑌮𑌾𑌨𑌯𑌨𑍍 𑌕𑌾𑌨𑌨𑍇𑌷𑍁 ।

𑌤𑍃𑌣𑌮𑌮𑌲𑌵𑌨𑌾𑌨𑍍𑌤𑍇 𑌚𑌾𑌰𑍁 𑌸𑌞𑍍𑌚𑌾𑌰𑌯𑌨𑍍 𑌗𑌾𑌃

𑌪𑌵𑌨𑌪𑍁𑌰𑌪𑌤𑍇 𑌤𑍍𑌵𑌂 𑌦𑍇𑌹𑌿 𑌮𑍇 𑌦𑍇𑌹𑌸𑍗𑌖𑍍𑌯𑌮𑍍 ॥10॥

Roman (IAST) Transliteration

tvayi viharaṇalole bālajālaiḥ pralamba-

pramathanasavilambe dhenavaḥ svairacārāḥ |

tṛṇakutukaniviṣṭā dūradūraṃ carantyaḥ

kimapi vipinamaiṣīkākhyamīṣāmbabhūvuḥ ||1||

anadhigatanidāghakrauryavṛndāvanāntāt

bahiridamupayātāḥ kānanaṃ dhenavastāḥ |

tava virahaviṣaṇṇā ūṣmalagrīṣmatāpa-

prasaravisaradambhasyākulāḥ stambhamāpuḥ ||2||

tadanu saha sahāyairdūramanviṣya śaure

galitasaraṇimuñjāraṇyasañjātakhedam |

paśukulamabhivīkṣya kṣipramānetumārā-

ttvayi gatavati hī hī sarvato'gnirjajṛmbhe ||3||

sakalahariti dīpte ghorabhāṅkārabhīme

śikhini vihatamārgā ardhadagdhā ivārtāḥ |

ahaha bhuvanabandho pāhi pāhīti sarve

śaraṇamupagatāstvāṃ tāpahartāramekam ||4||

alamalamatibhītyā sarvato mīlayadhvaṃ

dṛśamiti tava vācā mīlitākṣeṣu teṣu |

kva nu davadahano'sau kutra muñjāṭavī sā

sapadi vavṛtire te hanta bhāṇḍīradeśe ||5||

jaya jaya tava māyā keyamīśeti teṣāṃ

nutibhiruditahāso baddhanānāvilāsaḥ |

punarapi vipinānte prācaraḥ pāṭalādi-

prasavanikaramātragrāhyagharmānubhāve ||6||

tvayi vimukhamivoccaistāpabhāraṃ vahantaṃ

tava bhajanavadantaḥ paṅkamucchoṣayantam |

tava bhujavadudañcadbhūritejaḥpravāhaṃ

tapasamayamanaiṣīryāmuneṣu sthaleṣu ||7||

tadanu jaladajālaistvadvapustulyabhābhi-

rvikasadamalavidyutpītavāsovilāsaiḥ |

sakalabhuvanabhājāṃ harṣadāṃ varṣavelāṃ

kṣitidharakuhareṣu svairavāsī vyanaiṣīḥ ||8||

kuharatalaniviṣṭaṃ tvāṃ gariṣṭhaṃ girīndraḥ

śikhikulanavakekākākubhiḥ stotrakārī |

sphuṭakuṭajakadambastomapuṣpāñjaliṃ ca

pravidadhadanubheje deva govardhano'sau ||9||

atha śaradamupetāṃ tāṃ bhavadbhaktaceto-

vimalasalilapūrāṃ mānayan kānaneṣu |

tṛṇamamalavanānte cāru sañcārayan gāḥ

pavanapurapate tvaṃ dehi me dehasaukhyam ||10||

Sanskrit — Devanagari (original)

त्वयि विहरणलोले बालजालैः प्रलम्ब-

प्रमथनसविलम्बे धेनवः स्वैरचाराः ।

तृणकुतुकनिविष्टा दूरदूरं चरन्त्यः

किमपि विपिनमैषीकाख्यमीषाम्बभूवुः ॥1॥

अनधिगतनिदाघक्रौर्यवृन्दावनान्तात्

बहिरिदमुपयाताः काननं धेनवस्ताः ।

तव विरहविषण्णा ऊष्मलग्रीष्मताप-

प्रसरविसरदम्भस्याकुलाः स्तम्भमापुः ॥2॥

तदनु सह सहायैर्दूरमन्विष्य शौरे

गलितसरणिमुञ्जारण्यसञ्जातखेदम् ।

पशुकुलमभिवीक्ष्य क्षिप्रमानेतुमारा-

त्त्वयि गतवति ही ही सर्वतोऽग्निर्जजृम्भे ॥3॥

सकलहरिति दीप्ते घोरभाङ्कारभीमे

शिखिनि विहतमार्गा अर्धदग्धा इवार्ताः ।

अहह भुवनबन्धो पाहि पाहीति सर्वे

शरणमुपगतास्त्वां तापहर्तारमेकम् ॥4॥

अलमलमतिभीत्या सर्वतो मीलयध्वं

दृशमिति तव वाचा मीलिताक्षेषु तेषु ।

क्व नु दवदहनोऽसौ कुत्र मुञ्जाटवी सा

सपदि ववृतिरे ते हन्त भाण्डीरदेशे ॥5॥

जय जय तव माया केयमीशेति तेषां

नुतिभिरुदितहासो बद्धनानाविलासः ।

पुनरपि विपिनान्ते प्राचरः पाटलादि-

प्रसवनिकरमात्रग्राह्यघर्मानुभावे ॥6॥

त्वयि विमुखमिवोच्चैस्तापभारं वहन्तं

तव भजनवदन्तः पङ्कमुच्छोषयन्तम् ।

तव भुजवदुदञ्चद्भूरितेजःप्रवाहं

तपसमयमनैषीर्यामुनेषु स्थलेषु ॥7॥

तदनु जलदजालैस्त्वद्वपुस्तुल्यभाभि-

र्विकसदमलविद्युत्पीतवासोविलासैः ।

सकलभुवनभाजां हर्षदां वर्षवेलां

क्षितिधरकुहरेषु स्वैरवासी व्यनैषीः ॥8॥

कुहरतलनिविष्टं त्वां गरिष्ठं गिरीन्द्रः

शिखिकुलनवकेकाकाकुभिः स्तोत्रकारी ।

स्फुटकुटजकदम्बस्तोमपुष्पाञ्जलिं च

प्रविदधदनुभेजे देव गोवर्धनोऽसौ ॥9॥

अथ शरदमुपेतां तां भवद्भक्तचेतो-

विमलसलिलपूरां मानयन् काननेषु ।

तृणममलवनान्ते चारु सञ्चारयन् गाः

पवनपुरपते त्वं देहि मे देहसौख्यम् ॥10॥