Narayaniyam Dashaka 64 - Govindapattabhishekam — Sinhala Script

ආලෝක්ය ශෛලෝද්ධරණාදිරූපං ප්රභාවමුච්චෛස්තව ගෝපලෝකාඃ .

විශ්වේශ්වරං ත්වාමභිමත්ය විශ්වේ නන්දං භවජ්ජාතකමන්වපෘච්ඡන් ..1..

ගර්ගෝදිතෝ නිර්ගදිතෝ නිජාය වර්ගාය තාතේන තව ප්රභාවඃ .

පූර්වාධිකස්ත්වය්යනුරාග ඒෂාමෛධිෂ්ට තාවත් බහුමානභාරඃ ..2..

තතෝ(අ)වමානෝදිතතත්ත්වබෝධඃ සුරාධිරාජඃ සහ දිව්යගව්යා.

උපේත්ය තුෂ්ටාව ස නෂ්ටගර්වඃ ස්පෘෂ්ට්වා පදාබ්ජං මණිමෞලිනා තේ ..3..

ස්නේහස්නුතෛස්ත්වාං සුරභිඃ පයෝභිර්ගෝවින්දනාමාඞ්කිතමභ්යෂිඤ්චත් .

ඓරාවතෝපාහෘතදිව්යගඞ්ගාපාථෝභිරින්ද්රෝ(අ)පි ච ජාතහර්ෂඃ ..4..

ජගත්ත්රයේශේ ත්වයි ගෝකුලේශේ තථා(අ)භිෂික්තේ සති ගෝපවාටඃ .

නාකේ(අ)පි වෛකුණ්ඨපදේ(අ)ප්යලභ්යාං ශ්රියං ප්රපේදේ භවතඃ ප්රභාවාත් ..5..

කදාචිදන්තර්යමුනං ප්රභාතේ ස්නායන් පිතා වාරුණපූරුෂේණ .

නීතස්තමානේතුමගාඃ පුරීං ත්වං තාං වාරුණීං කාරණමර්ත්යරූපඃ ..6..

සසම්භ්රමං තේන ජලාධිපේන ප්රපූජිතස්ත්වං ප්රතිගෘහ්ය තාතම් .

උපාගතස්තත්ක්ෂණමාත්මගේහං පිතා(අ)වදත්තච්චරිතං නිජේභ්යඃ ..7..

හරිං විනිශ්චිත්ය භවන්තමේතාන් භවත්පදාලෝකනබද්ධතෘෂ්ණාන් ..

නිරීක්ෂ්ය විෂ්ණෝ පරමං පදං තද්දුරාපමන්යෛස්ත්වමදීදෘශස්තාන් ..8..

ස්ඵුරත්පරානන්දරසප්රවාහප්රපූර්ණකෛවල්යමහාපයෝධෞ .

චිරං නිමග්නාඃ ඛලු ගෝපසඞ්ඝාස්ත්වයෛව භූමන් පුනරුද්ධෘතාස්තේ ..9..

කරබදරවදේවං දේව කුත්රාවතාරේ

නිජපදමනවාප්යං දර්ශිතං භක්තිභාජාම් .

තදිහ පශුපරූපී ත්වං හි සාක්ෂාත් පරාත්මා

පවනපුරනිවාසින් පාහි මාමාමයේභ්යඃ ..10..

Roman (IAST) Transliteration

ālokya śailoddharaṇādirūpaṃ prabhāvamuccaistava gopalokāḥ |

viśveśvaraṃ tvāmabhimatya viśve nandaṃ bhavajjātakamanvapṛcchan ||1||

gargodito nirgadito nijāya vargāya tātena tava prabhāvaḥ |

pūrvādhikastvayyanurāga eṣāmaidhiṣṭa tāvat bahumānabhāraḥ ||2||

tato'vamānoditatattvabodhaḥ surādhirājaḥ saha divyagavyā|

upetya tuṣṭāva sa naṣṭagarvaḥ spṛṣṭvā padābjaṃ maṇimaulinā te ||3||

snehasnutaistvāṃ surabhiḥ payobhirgovindanāmāṅkitamabhyaṣiñcat |

airāvatopāhṛtadivyagaṅgāpāthobhirindro'pi ca jātaharṣaḥ ||4||

jagattrayeśe tvayi gokuleśe tathā'bhiṣikte sati gopavāṭaḥ |

nāke'pi vaikuṇṭhapade'pyalabhyāṃ śriyaṃ prapede bhavataḥ prabhāvāt ||5||

kadācidantaryamunaṃ prabhāte snāyan pitā vāruṇapūruṣeṇa |

nītastamānetumagāḥ purīṃ tvaṃ tāṃ vāruṇīṃ kāraṇamartyarūpaḥ ||6||

sasambhramaṃ tena jalādhipena prapūjitastvaṃ pratigṛhya tātam |

upāgatastatkṣaṇamātmagehaṃ pitā'vadattaccaritaṃ nijebhyaḥ ||7||

hariṃ viniścitya bhavantametān bhavatpadālokanabaddhatṛṣṇān ||

nirīkṣya viṣṇo paramaṃ padaṃ taddurāpamanyaistvamadīdṛśastān ||8||

sphuratparānandarasapravāhaprapūrṇakaivalyamahāpayodhau |

ciraṃ nimagnāḥ khalu gopasaṅghāstvayaiva bhūman punaruddhṛtāste ||9||

karabadaravadevaṃ deva kutrāvatāre

nijapadamanavāpyaṃ darśitaṃ bhaktibhājām |

tadiha paśuparūpī tvaṃ hi sākṣāt parātmā

pavanapuranivāsin pāhi māmāmayebhyaḥ ||10||

Sanskrit — Devanagari (original)

आलोक्य शैलोद्धरणादिरूपं प्रभावमुच्चैस्तव गोपलोकाः ।

विश्वेश्वरं त्वामभिमत्य विश्वे नन्दं भवज्जातकमन्वपृच्छन् ॥1॥

गर्गोदितो निर्गदितो निजाय वर्गाय तातेन तव प्रभावः ।

पूर्वाधिकस्त्वय्यनुराग एषामैधिष्ट तावत् बहुमानभारः ॥2॥

ततोऽवमानोदिततत्त्वबोधः सुराधिराजः सह दिव्यगव्या।

उपेत्य तुष्टाव स नष्टगर्वः स्पृष्ट्वा पदाब्जं मणिमौलिना ते ॥3॥

स्नेहस्नुतैस्त्वां सुरभिः पयोभिर्गोविन्दनामाङ्कितमभ्यषिञ्चत् ।

ऐरावतोपाहृतदिव्यगङ्गापाथोभिरिन्द्रोऽपि च जातहर्षः ॥4॥

जगत्त्रयेशे त्वयि गोकुलेशे तथाऽभिषिक्ते सति गोपवाटः ।

नाकेऽपि वैकुण्ठपदेऽप्यलभ्यां श्रियं प्रपेदे भवतः प्रभावात् ॥5॥

कदाचिदन्तर्यमुनं प्रभाते स्नायन् पिता वारुणपूरुषेण ।

नीतस्तमानेतुमगाः पुरीं त्वं तां वारुणीं कारणमर्त्यरूपः ॥6॥

ससम्भ्रमं तेन जलाधिपेन प्रपूजितस्त्वं प्रतिगृह्य तातम् ।

उपागतस्तत्क्षणमात्मगेहं पिताऽवदत्तच्चरितं निजेभ्यः ॥7॥

हरिं विनिश्चित्य भवन्तमेतान् भवत्पदालोकनबद्धतृष्णान् ॥

निरीक्ष्य विष्णो परमं पदं तद्दुरापमन्यैस्त्वमदीदृशस्तान् ॥8॥

स्फुरत्परानन्दरसप्रवाहप्रपूर्णकैवल्यमहापयोधौ ।

चिरं निमग्नाः खलु गोपसङ्घास्त्वयैव भूमन् पुनरुद्धृतास्ते ॥9॥

करबदरवदेवं देव कुत्रावतारे

निजपदमनवाप्यं दर्शितं भक्तिभाजाम् ।

तदिह पशुपरूपी त्वं हि साक्षात् परात्मा

पवनपुरनिवासिन् पाहि मामामयेभ्यः ॥10॥