Narayaniyam Dashaka 64 - Govindapattabhishekam — Gujarati Script

આલોક્ય શૈલોદ્ધરણાદિરૂપં પ્રભાવમુચ્ચૈસ્તવ ગોપલોકાઃ ।

વિશ્વેશ્વરં ત્વામભિમત્ય વિશ્વે નન્દં ભવજ્જાતકમન્વપૃચ્છન્ ॥1॥

ગર્ગોદિતો નિર્ગદિતો નિજાય વર્ગાય તાતેન તવ પ્રભાવઃ ।

પૂર્વાધિકસ્ત્વય્યનુરાગ એષામૈધિષ્ટ તાવત્ બહુમાનભારઃ ॥2॥

તતોઽવમાનોદિતતત્ત્વબોધઃ સુરાધિરાજઃ સહ દિવ્યગવ્યા।

ઉપેત્ય તુષ્ટાવ સ નષ્ટગર્વઃ સ્પૃષ્ટ્વા પદાબ્જં મણિમૌલિના તે ॥3॥

સ્નેહસ્નુતૈસ્ત્વાં સુરભિઃ પયોભિર્ગોવિન્દનામાઙ્કિતમભ્યષિઞ્ચત્ ।

ઐરાવતોપાહૃતદિવ્યગઙ્ગાપાથોભિરિન્દ્રોઽપિ ચ જાતહર્ષઃ ॥4॥

જગત્ત્રયેશે ત્વયિ ગોકુલેશે તથાઽભિષિક્તે સતિ ગોપવાટઃ ।

નાકેઽપિ વૈકુણ્ઠપદેઽપ્યલભ્યાં શ્રિયં પ્રપેદે ભવતઃ પ્રભાવાત્ ॥5॥

કદાચિદન્તર્યમુનં પ્રભાતે સ્નાયન્ પિતા વારુણપૂરુષેણ ।

નીતસ્તમાનેતુમગાઃ પુરીં ત્વં તાં વારુણીં કારણમર્ત્યરૂપઃ ॥6॥

સસમ્ભ્રમં તેન જલાધિપેન પ્રપૂજિતસ્ત્વં પ્રતિગૃહ્ય તાતમ્ ।

ઉપાગતસ્તત્ક્ષણમાત્મગેહં પિતાઽવદત્તચ્ચરિતં નિજેભ્યઃ ॥7॥

હરિં વિનિશ્ચિત્ય ભવન્તમેતાન્ ભવત્પદાલોકનબદ્ધતૃષ્ણાન્ ॥

નિરીક્ષ્ય વિષ્ણો પરમં પદં તદ્દુરાપમન્યૈસ્ત્વમદીદૃશસ્તાન્ ॥8॥

સ્ફુરત્પરાનન્દરસપ્રવાહપ્રપૂર્ણકૈવલ્યમહાપયોધૌ ।

ચિરં નિમગ્નાઃ ખલુ ગોપસઙ્ઘાસ્ત્વયૈવ ભૂમન્ પુનરુદ્ધૃતાસ્તે ॥9॥

કરબદરવદેવં દેવ કુત્રાવતારે

નિજપદમનવાપ્યં દર્શિતં ભક્તિભાજામ્ ।

તદિહ પશુપરૂપી ત્વં હિ સાક્ષાત્ પરાત્મા

પવનપુરનિવાસિન્ પાહિ મામામયેભ્યઃ ॥10॥

Roman (IAST) Transliteration

ālokya śailoddharaṇādirūpaṃ prabhāvamuccaistava gopalokāḥ |

viśveśvaraṃ tvāmabhimatya viśve nandaṃ bhavajjātakamanvapṛcchan ||1||

gargodito nirgadito nijāya vargāya tātena tava prabhāvaḥ |

pūrvādhikastvayyanurāga eṣāmaidhiṣṭa tāvat bahumānabhāraḥ ||2||

tato'vamānoditatattvabodhaḥ surādhirājaḥ saha divyagavyā|

upetya tuṣṭāva sa naṣṭagarvaḥ spṛṣṭvā padābjaṃ maṇimaulinā te ||3||

snehasnutaistvāṃ surabhiḥ payobhirgovindanāmāṅkitamabhyaṣiñcat |

airāvatopāhṛtadivyagaṅgāpāthobhirindro'pi ca jātaharṣaḥ ||4||

jagattrayeśe tvayi gokuleśe tathā'bhiṣikte sati gopavāṭaḥ |

nāke'pi vaikuṇṭhapade'pyalabhyāṃ śriyaṃ prapede bhavataḥ prabhāvāt ||5||

kadācidantaryamunaṃ prabhāte snāyan pitā vāruṇapūruṣeṇa |

nītastamānetumagāḥ purīṃ tvaṃ tāṃ vāruṇīṃ kāraṇamartyarūpaḥ ||6||

sasambhramaṃ tena jalādhipena prapūjitastvaṃ pratigṛhya tātam |

upāgatastatkṣaṇamātmagehaṃ pitā'vadattaccaritaṃ nijebhyaḥ ||7||

hariṃ viniścitya bhavantametān bhavatpadālokanabaddhatṛṣṇān ||

nirīkṣya viṣṇo paramaṃ padaṃ taddurāpamanyaistvamadīdṛśastān ||8||

sphuratparānandarasapravāhaprapūrṇakaivalyamahāpayodhau |

ciraṃ nimagnāḥ khalu gopasaṅghāstvayaiva bhūman punaruddhṛtāste ||9||

karabadaravadevaṃ deva kutrāvatāre

nijapadamanavāpyaṃ darśitaṃ bhaktibhājām |

tadiha paśuparūpī tvaṃ hi sākṣāt parātmā

pavanapuranivāsin pāhi māmāmayebhyaḥ ||10||

Sanskrit — Devanagari (original)

आलोक्य शैलोद्धरणादिरूपं प्रभावमुच्चैस्तव गोपलोकाः ।

विश्वेश्वरं त्वामभिमत्य विश्वे नन्दं भवज्जातकमन्वपृच्छन् ॥1॥

गर्गोदितो निर्गदितो निजाय वर्गाय तातेन तव प्रभावः ।

पूर्वाधिकस्त्वय्यनुराग एषामैधिष्ट तावत् बहुमानभारः ॥2॥

ततोऽवमानोदिततत्त्वबोधः सुराधिराजः सह दिव्यगव्या।

उपेत्य तुष्टाव स नष्टगर्वः स्पृष्ट्वा पदाब्जं मणिमौलिना ते ॥3॥

स्नेहस्नुतैस्त्वां सुरभिः पयोभिर्गोविन्दनामाङ्कितमभ्यषिञ्चत् ।

ऐरावतोपाहृतदिव्यगङ्गापाथोभिरिन्द्रोऽपि च जातहर्षः ॥4॥

जगत्त्रयेशे त्वयि गोकुलेशे तथाऽभिषिक्ते सति गोपवाटः ।

नाकेऽपि वैकुण्ठपदेऽप्यलभ्यां श्रियं प्रपेदे भवतः प्रभावात् ॥5॥

कदाचिदन्तर्यमुनं प्रभाते स्नायन् पिता वारुणपूरुषेण ।

नीतस्तमानेतुमगाः पुरीं त्वं तां वारुणीं कारणमर्त्यरूपः ॥6॥

ससम्भ्रमं तेन जलाधिपेन प्रपूजितस्त्वं प्रतिगृह्य तातम् ।

उपागतस्तत्क्षणमात्मगेहं पिताऽवदत्तच्चरितं निजेभ्यः ॥7॥

हरिं विनिश्चित्य भवन्तमेतान् भवत्पदालोकनबद्धतृष्णान् ॥

निरीक्ष्य विष्णो परमं पदं तद्दुरापमन्यैस्त्वमदीदृशस्तान् ॥8॥

स्फुरत्परानन्दरसप्रवाहप्रपूर्णकैवल्यमहापयोधौ ।

चिरं निमग्नाः खलु गोपसङ्घास्त्वयैव भूमन् पुनरुद्धृतास्ते ॥9॥

करबदरवदेवं देव कुत्रावतारे

निजपदमनवाप्यं दर्शितं भक्तिभाजाम् ।

तदिह पशुपरूपी त्वं हि साक्षात् परात्मा

पवनपुरनिवासिन् पाहि मामामयेभ्यः ॥10॥