Narayaniyam Dashaka 83 - Paundrakavadham - Dninidavadham — Sinhala Script

රාමේ(අ)ථ ගෝකුලගතේ ප්රමදාප්රසක්තේ

හූතානුපේතයමුනාදමනේ මදාන්ධේ .

ස්වෛරං සමාරමති සේවකවාදමූඪෝ

දූතං න්යයුඞ්ක්ත තව පෞණ්ඩ්රකවාසුදේවඃ ..1..

නාරායණෝ(අ)හමවතීර්ණ ඉහාස්මි භූමෞ

ධත්සේ කිල ත්වමපි මාමකලක්ෂණානි .

උත්සෘජ්ය තානි ශරණං ව්රජ මාමිති ත්වාං

දූතෝ ජගාද සකලෛර්හසිතඃ සභායාම් ..2..

දූතේ(අ)ථ යාතවති යාදවසෛනිකෛස්ත්වං

යාතෝ දදර්ශිථ වපුඃ කිල පෞණ්ඩ්රකීයම් .

තාපේන වක්ෂසි කෘතාඞ්කමනල්පමූල්ය-

ශ්රීකෞස්තුභං මකරකුණ්ඩලපීතචේලම් ..3..

කාලායසං නිජසුදර්ශනමස්යතෝ(අ)ස්ය

කාලානලෝත්කරකිරේණ සුදර්ශනේන .

ශීර්ෂං චකර්තිථ මමර්දිථ චාස්ය සේනාං

තන්මිත්රකාශිපශිරෝ(අ)පි චකර්ථ කාශ්යාම් ..4..

ජාල්යේන බාලකගිරා(අ)පි කිලාහමේව

ශ්රීවාසුදේව ඉති රූඪමතිශ්චිරං සඃ .

සායුජ්යමේව භවදෛක්යධියා ගතෝ(අ)භූත්

කෝ නාම කස්ය සුකෘතං කථමිත්යවේයාත් ..5..

කාශීශ්වරස්ය තනයෝ(අ)ථ සුදක්ෂිණාඛ්යඃ

ශර්වං ප්රපූජ්ය භවතේ විහිතාභිචාරඃ .

කෘත්යානලං කමපි බාණ්රරණාතිභීතෛ-

ර්භූතෛඃ කථඤ්චන වෘතෛඃ සමමභ්යමුඤ්චත් ..6..

තාලප්රමාණචරණාමඛිලං දහන්තීං

කෘත්යාං විලෝක්ය චකිතෛඃ කථිතෝ(අ)පි පෞරෛඃ .

ද්යූතෝත්සවේ කිමපි නෝ චලිතෝ විභෝ ත්වං

පාර්ශ්වස්ථමාශු විසසර්ජිථ කාලචක්රම් ..7..

අභ්යාපතත්යමිතධාම්නි භවන්මහාස්ත්රේ

හා හේති විද්රුතවතී ඛලු ඝෝරකෘත්යා.

රෝෂාත් සුදක්ෂිණමදක්ෂිණචේෂ්ටිතං තං

පුප්ලෝෂ චක්රමපි කාශිපුරීමධාක්ෂීත් ..8..

ස ඛලු විවිදෝ රක්ෂෝඝාතේ කෘතෝපකෘතිඃ පුරා

තව තු කලයා මෘත්යුං ප්රාප්තුං තදා ඛලතාං ගතඃ .

නරකසචිවෝ දේශක්ලේශං සෘජන් නගරාන්තිකේ

ඣටිති හලිනා යුධ්යන්නද්ධා පපාත තලාහතඃ ..9..

සාම්බං කෞරව්යපුත්රීහරණනියමිතං සාන්ත්වනාර්ථී කුරූණාං

යාතස්තද්වාක්යරෝෂෝද්ධෘතකරිනගරෝ මෝචයාමාස රාමඃ .

තේ ඝාත්යාඃ පාණ්ඩවේයෛරිති යදුපෘතනාං නාමුචස්ත්වං තදානීං

තං ත්වාං දුර්බෝධලීලං පවනපුරපතේ තාපශාන්ත්යෛ නිෂේවේ ..10..

Roman (IAST) Transliteration

rāme'tha gokulagate pramadāprasakte

hūtānupetayamunādamane madāndhe |

svairaṃ samāramati sevakavādamūḍho

dūtaṃ nyayuṅkta tava pauṇḍrakavāsudevaḥ ||1||

nārāyaṇo'hamavatīrṇa ihāsmi bhūmau

dhatse kila tvamapi māmakalakṣaṇāni |

utsṛjya tāni śaraṇaṃ vraja māmiti tvāṃ

dūto jagāda sakalairhasitaḥ sabhāyām ||2||

dūte'tha yātavati yādavasainikaistvaṃ

yāto dadarśitha vapuḥ kila pauṇḍrakīyam |

tāpena vakṣasi kṛtāṅkamanalpamūlya-

śrīkaustubhaṃ makarakuṇḍalapītacelam ||3||

kālāyasaṃ nijasudarśanamasyato'sya

kālānalotkarakireṇa sudarśanena |

śīrṣaṃ cakartitha mamarditha cāsya senāṃ

tanmitrakāśipaśiro'pi cakartha kāśyām ||4||

jālyena bālakagirā'pi kilāhameva

śrīvāsudeva iti rūḍhamatiściraṃ saḥ |

sāyujyameva bhavadaikyadhiyā gato'bhūt

ko nāma kasya sukṛtaṃ kathamityaveyāt ||5||

kāśīśvarasya tanayo'tha sudakṣiṇākhyaḥ

śarvaṃ prapūjya bhavate vihitābhicāraḥ |

kṛtyānalaṃ kamapi bāṇraraṇātibhītai-

rbhūtaiḥ kathañcana vṛtaiḥ samamabhyamuñcat ||6||

tālapramāṇacaraṇāmakhilaṃ dahantīṃ

kṛtyāṃ vilokya cakitaiḥ kathito'pi pauraiḥ |

dyūtotsave kimapi no calito vibho tvaṃ

pārśvasthamāśu visasarjitha kālacakram ||7||

abhyāpatatyamitadhāmni bhavanmahāstre

hā heti vidrutavatī khalu ghorakṛtyā|

roṣāt sudakṣiṇamadakṣiṇaceṣṭitaṃ taṃ

puploṣa cakramapi kāśipurīmadhākṣīt ||8||

sa khalu vivido rakṣoghāte kṛtopakṛtiḥ purā

tava tu kalayā mṛtyuṃ prāptuṃ tadā khalatāṃ gataḥ |

narakasacivo deśakleśaṃ sṛjan nagarāntike

jhaṭiti halinā yudhyannaddhā papāta talāhataḥ ||9||

sāmbaṃ kauravyaputrīharaṇaniyamitaṃ sāntvanārthī kurūṇāṃ

yātastadvākyaroṣoddhṛtakarinagaro mocayāmāsa rāmaḥ |

te ghātyāḥ pāṇḍaveyairiti yadupṛtanāṃ nāmucastvaṃ tadānīṃ

taṃ tvāṃ durbodhalīlaṃ pavanapurapate tāpaśāntyai niṣeve ||10||

Sanskrit — Devanagari (original)

रामेऽथ गोकुलगते प्रमदाप्रसक्ते

हूतानुपेतयमुनादमने मदान्धे ।

स्वैरं समारमति सेवकवादमूढो

दूतं न्ययुङ्क्त तव पौण्ड्रकवासुदेवः ॥1॥

नारायणोऽहमवतीर्ण इहास्मि भूमौ

धत्से किल त्वमपि मामकलक्षणानि ।

उत्सृज्य तानि शरणं व्रज मामिति त्वां

दूतो जगाद सकलैर्हसितः सभायाम् ॥2॥

दूतेऽथ यातवति यादवसैनिकैस्त्वं

यातो ददर्शिथ वपुः किल पौण्ड्रकीयम् ।

तापेन वक्षसि कृताङ्कमनल्पमूल्य-

श्रीकौस्तुभं मकरकुण्डलपीतचेलम् ॥3॥

कालायसं निजसुदर्शनमस्यतोऽस्य

कालानलोत्करकिरेण सुदर्शनेन ।

शीर्षं चकर्तिथ ममर्दिथ चास्य सेनां

तन्मित्रकाशिपशिरोऽपि चकर्थ काश्याम् ॥4॥

जाल्येन बालकगिराऽपि किलाहमेव

श्रीवासुदेव इति रूढमतिश्चिरं सः ।

सायुज्यमेव भवदैक्यधिया गतोऽभूत्

को नाम कस्य सुकृतं कथमित्यवेयात् ॥5॥

काशीश्वरस्य तनयोऽथ सुदक्षिणाख्यः

शर्वं प्रपूज्य भवते विहिताभिचारः ।

कृत्यानलं कमपि बाण्ररणातिभीतै-

र्भूतैः कथञ्चन वृतैः सममभ्यमुञ्चत् ॥6॥

तालप्रमाणचरणामखिलं दहन्तीं

कृत्यां विलोक्य चकितैः कथितोऽपि पौरैः ।

द्यूतोत्सवे किमपि नो चलितो विभो त्वं

पार्श्वस्थमाशु विससर्जिथ कालचक्रम् ॥7॥

अभ्यापतत्यमितधाम्नि भवन्महास्त्रे

हा हेति विद्रुतवती खलु घोरकृत्या।

रोषात् सुदक्षिणमदक्षिणचेष्टितं तं

पुप्लोष चक्रमपि काशिपुरीमधाक्षीत् ॥8॥

स खलु विविदो रक्षोघाते कृतोपकृतिः पुरा

तव तु कलया मृत्युं प्राप्तुं तदा खलतां गतः ।

नरकसचिवो देशक्लेशं सृजन् नगरान्तिके

झटिति हलिना युध्यन्नद्धा पपात तलाहतः ॥9॥

साम्बं कौरव्यपुत्रीहरणनियमितं सान्त्वनार्थी कुरूणां

यातस्तद्वाक्यरोषोद्धृतकरिनगरो मोचयामास रामः ।

ते घात्याः पाण्डवेयैरिति यदुपृतनां नामुचस्त्वं तदानीं

तं त्वां दुर्बोधलीलं पवनपुरपते तापशान्त्यै निषेवे ॥10॥