Narayaniyam Dashaka 2 - Bhagavatah Svarupamadhuryam Tatha Bhaktimahattvam — Sinhala Script

සූර්යස්පර්ධිකිරීටමූර්ධ්වතිලකප්රෝද්භාසිඵාලාන්තරං

කාරුණ්යාකුලනේත්රමාර්ද්රහසිතෝල්ලාසං සුනාසාපුටම්.

ගණ්ඩෝද්යන්මකරාභකුණ්ඩලයුගං කණ්ඨෝජ්වලත්කෞස්තුභං

ත්වද්රූපං වනමාල්යහාරපටලශ්රීවත්සදීප්රං භජේ..1..

කේයූරාඞ්ගදකඞ්කණෝත්තමමහාරත්නාඞ්ගුලීයාඞ්කිත-

ශ්රීමද්බාහුචතුෂ්කසඞ්ගතගදාශඞ්ඛාරිපඞ්කේරුහාම් .

කාඤ්චිත් කාඤ්චනකාඤ්චිලාඤ්ච්ඡිතලසත්පීතාම්බරාලම්බිනී-

මාලම්බේ විමලාම්බුජද්යුතිපදාං මූර්තිං තවාර්තිච්ඡිදම් ..2..

යත්ත්ත්රෛලෝක්යමහීයසෝ(අ)පි මහිතං සම්මෝහනං මෝහනාත්

කාන්තං කාන්තිනිධානතෝ(අ)පි මධුරං මාධුර්යධුර්යාදපි .

සෞන්දර්යෝත්තරතෝ(අ)පි සුන්දරතරං ත්වද්රූපමාශ්චර්යතෝ(අ)-

ප්යාශ්චර්යං භුවනේ න කස්ය කුතුකං පුෂ්ණාති විෂ්ණෝ විභෝ ..3..

තත්තාදෘඞ්මධුරාත්මකං තව වපුඃ සම්ප්රාප්ය සම්පන්මයී

සා දේවී පරමෝත්සුකා චිරතරං නාස්තේ ස්වභක්තේෂ්වපි .

තේනාස්යා බත කෂ්ටමච්යුත විභෝ ත්වද්රූපමානෝජ්ඤක -

ප්රේමස්ථෛර්යමයාදචාපලබලාච්චාපල්යවාර්තෝදභූත් ..4..

ලක්ෂ්මීස්තාවකරාමණීයකහෘතෛවේයං පරේෂ්වස්ථිරේ-

ත්යස්මින්නන්යදපි ප්රමාණමධුනා වක්ෂ්යාමි ලක්ෂ්මීපතේ .

යේ ත්වද්ධ්යානගුණානුකීර්තනරසාසක්තා හි භක්තා ජනා-

ස්තේෂ්වේෂා වසති ස්ථිරෛව දයිතප්රස්තාවදත්තාදරා ..5..

ඒවම්භූතමනෝජ්ඤතානවසුධානිෂ්යන්දසන්දෝහනං

ත්වද්රූපං පරචිද්රසායනමයං චේතෝහරං ශෘණ්වතාම් .

සද්යඃ ප්රේරයතේ මතිං මදයතේ රෝමාඤ්චයත්යඞ්ගකං

ව්යාසිඤ්චත්යපි ශීතවාෂ්පවිසරෛරානන්දමූර්ඡෝද්භවෛඃ ..6..

ඒවම්භූතතයා හි භක්ත්යභිහිතෝ යෝගස්ස යෝගද්වයාත්

කර්මජ්ඤානමයාත් භෘශෝත්තමතරෝ යෝගීශ්වරෛර්ගීයතේ .

සෞන්දර්යෛකරසාත්මකේ ත්වයි ඛලු ප්රේමප්රකර්ෂාත්මිකා

භක්තිර්නිශ්රමමේව විශ්වපුරුෂෛර්ලභ්යා රමාවල්ලභ ..7..

නිෂ්කාමං නියතස්වධර්මචරණං යත් කර්මයෝගාභිධං

තද්දූරේත්යඵලං යදෞපනිෂදජ්ඤානෝපලභ්යං පුනඃ .

තත්ත්වව්යක්තතයා සුදුර්ගමතරං චිත්තස්ය තස්මාද්විභෝ

ත්වත්ප්රේමාත්මකභක්තිරේව සතතං ස්වාදීයසී ශ්රේයසී ..8..

අත්යායාසකරාණි කර්මපටලාන්යාචර්ය නිර්යන්මලා

බෝධේ භක්තිපථේ(අ)ථවා(අ)ප්යුචිතතාමායාන්ති කිං තාවතා .

ක්ලිෂ්ට්වා තර්කපථේ පරං තව වපුර්බ්රහ්මාඛ්යමන්යේ පුන-

ශ්චිත්තාර්ද්රත්වමෘතේ විචින්ත්ය බහුභිස්සිද්ධ්යන්ති ජන්මාන්තරෛඃ ..9..

ත්වද්භක්තිස්තු කථාරසාමෘතඣරීනිර්මජ්ජනේන ස්වයං

සිද්ධ්යන්තී විමලප්රබෝධපදවීමක්ලේශතස්තන්වතී .

සද්යස්සිද්ධිකරී ජයත්යයි විභෝ සෛවාස්තු මේ ත්වත්පද-

ප්රේමප්රෞඪිරසාර්ද්රතා ද්රුතතරං වාතාලයාධීශ්වර ..10..

Roman (IAST) Transliteration

sūryaspardhikirīṭamūrdhvatilakaprodbhāsiphālāntaraṃ

kāruṇyākulanetramārdrahasitollāsaṃ sunāsāpuṭam|

gaṇḍodyanmakarābhakuṇḍalayugaṃ kaṇṭhojvalatkaustubhaṃ

tvadrūpaṃ vanamālyahārapaṭalaśrīvatsadīpraṃ bhaje||1||

keyūrāṅgadakaṅkaṇottamamahāratnāṅgulīyāṅkita-

śrīmadbāhucatuṣkasaṅgatagadāśaṅkhāripaṅkeruhām |

kāñcit kāñcanakāñcilāñcchitalasatpītāmbarālambinī-

mālambe vimalāmbujadyutipadāṃ mūrtiṃ tavārticchidam ||2||

yatttrailokyamahīyaso'pi mahitaṃ sammohanaṃ mohanāt

kāntaṃ kāntinidhānato'pi madhuraṃ mādhuryadhuryādapi |

saundaryottarato'pi sundarataraṃ tvadrūpamāścaryato'-

pyāścaryaṃ bhuvane na kasya kutukaṃ puṣṇāti viṣṇo vibho ||3||

tattādṛṅmadhurātmakaṃ tava vapuḥ samprāpya sampanmayī

sā devī paramotsukā cirataraṃ nāste svabhakteṣvapi |

tenāsyā bata kaṣṭamacyuta vibho tvadrūpamānojñaka -

premasthairyamayādacāpalabalāccāpalyavārtodabhūt ||4||

lakṣmīstāvakarāmaṇīyakahṛtaiveyaṃ pareṣvasthire-

tyasminnanyadapi pramāṇamadhunā vakṣyāmi lakṣmīpate |

ye tvaddhyānaguṇānukīrtanarasāsaktā hi bhaktā janā-

steṣveṣā vasati sthiraiva dayitaprastāvadattādarā ||5||

evambhūtamanojñatānavasudhāniṣyandasandohanaṃ

tvadrūpaṃ paracidrasāyanamayaṃ cetoharaṃ śṛṇvatām |

sadyaḥ prerayate matiṃ madayate romāñcayatyaṅgakaṃ

vyāsiñcatyapi śītavāṣpavisarairānandamūrchodbhavaiḥ ||6||

evambhūtatayā hi bhaktyabhihito yogassa yogadvayāt

karmajñānamayāt bhṛśottamataro yogīśvarairgīyate |

saundaryaikarasātmake tvayi khalu premaprakarṣātmikā

bhaktirniśramameva viśvapuruṣairlabhyā ramāvallabha ||7||

niṣkāmaṃ niyatasvadharmacaraṇaṃ yat karmayogābhidhaṃ

taddūretyaphalaṃ yadaupaniṣadajñānopalabhyaṃ punaḥ |

tattvavyaktatayā sudurgamataraṃ cittasya tasmādvibho

tvatpremātmakabhaktireva satataṃ svādīyasī śreyasī ||8||

atyāyāsakarāṇi karmapaṭalānyācarya niryanmalā

bodhe bhaktipathe'thavā'pyucitatāmāyānti kiṃ tāvatā |

kliṣṭvā tarkapathe paraṃ tava vapurbrahmākhyamanye puna-

ścittārdratvamṛte vicintya bahubhissiddhyanti janmāntaraiḥ ||9||

tvadbhaktistu kathārasāmṛtajharīnirmajjanena svayaṃ

siddhyantī vimalaprabodhapadavīmakleśatastanvatī |

sadyassiddhikarī jayatyayi vibho saivāstu me tvatpada-

premaprauḍhirasārdratā drutataraṃ vātālayādhīśvara ||10||

Sanskrit — Devanagari (original)

सूर्यस्पर्धिकिरीटमूर्ध्वतिलकप्रोद्भासिफालान्तरं

कारुण्याकुलनेत्रमार्द्रहसितोल्लासं सुनासापुटम्।

गण्डोद्यन्मकराभकुण्डलयुगं कण्ठोज्वलत्कौस्तुभं

त्वद्रूपं वनमाल्यहारपटलश्रीवत्सदीप्रं भजे॥1॥

केयूराङ्गदकङ्कणोत्तममहारत्नाङ्गुलीयाङ्कित-

श्रीमद्बाहुचतुष्कसङ्गतगदाशङ्खारिपङ्केरुहाम् ।

काञ्चित् काञ्चनकाञ्चिलाञ्च्छितलसत्पीताम्बरालम्बिनी-

मालम्बे विमलाम्बुजद्युतिपदां मूर्तिं तवार्तिच्छिदम् ॥2॥

यत्त्त्रैलोक्यमहीयसोऽपि महितं सम्मोहनं मोहनात्

कान्तं कान्तिनिधानतोऽपि मधुरं माधुर्यधुर्यादपि ।

सौन्दर्योत्तरतोऽपि सुन्दरतरं त्वद्रूपमाश्चर्यतोऽ-

प्याश्चर्यं भुवने न कस्य कुतुकं पुष्णाति विष्णो विभो ॥3॥

तत्तादृङ्मधुरात्मकं तव वपुः सम्प्राप्य सम्पन्मयी

सा देवी परमोत्सुका चिरतरं नास्ते स्वभक्तेष्वपि ।

तेनास्या बत कष्टमच्युत विभो त्वद्रूपमानोज्ञक -

प्रेमस्थैर्यमयादचापलबलाच्चापल्यवार्तोदभूत् ॥4॥

लक्ष्मीस्तावकरामणीयकहृतैवेयं परेष्वस्थिरे-

त्यस्मिन्नन्यदपि प्रमाणमधुना वक्ष्यामि लक्ष्मीपते ।

ये त्वद्ध्यानगुणानुकीर्तनरसासक्ता हि भक्ता जना-

स्तेष्वेषा वसति स्थिरैव दयितप्रस्तावदत्तादरा ॥5॥

एवम्भूतमनोज्ञतानवसुधानिष्यन्दसन्दोहनं

त्वद्रूपं परचिद्रसायनमयं चेतोहरं शृण्वताम् ।

सद्यः प्रेरयते मतिं मदयते रोमाञ्चयत्यङ्गकं

व्यासिञ्चत्यपि शीतवाष्पविसरैरानन्दमूर्छोद्भवैः ॥6॥

एवम्भूततया हि भक्त्यभिहितो योगस्स योगद्वयात्

कर्मज्ञानमयात् भृशोत्तमतरो योगीश्वरैर्गीयते ।

सौन्दर्यैकरसात्मके त्वयि खलु प्रेमप्रकर्षात्मिका

भक्तिर्निश्रममेव विश्वपुरुषैर्लभ्या रमावल्लभ ॥7॥

निष्कामं नियतस्वधर्मचरणं यत् कर्मयोगाभिधं

तद्दूरेत्यफलं यदौपनिषदज्ञानोपलभ्यं पुनः ।

तत्त्वव्यक्ततया सुदुर्गमतरं चित्तस्य तस्माद्विभो

त्वत्प्रेमात्मकभक्तिरेव सततं स्वादीयसी श्रेयसी ॥8॥

अत्यायासकराणि कर्मपटलान्याचर्य निर्यन्मला

बोधे भक्तिपथेऽथवाऽप्युचिततामायान्ति किं तावता ।

क्लिष्ट्वा तर्कपथे परं तव वपुर्ब्रह्माख्यमन्ये पुन-

श्चित्तार्द्रत्वमृते विचिन्त्य बहुभिस्सिद्ध्यन्ति जन्मान्तरैः ॥9॥

त्वद्भक्तिस्तु कथारसामृतझरीनिर्मज्जनेन स्वयं

सिद्ध्यन्ती विमलप्रबोधपदवीमक्लेशतस्तन्वती ।

सद्यस्सिद्धिकरी जयत्ययि विभो सैवास्तु मे त्वत्पद-

प्रेमप्रौढिरसार्द्रता द्रुततरं वातालयाधीश्वर ॥10॥