Dashakam 1 - Bhagavatah Svarupam Tatha Mahatmyam — Sinhala Script

සාන්ද්රානන්දාවබෝධාත්මකමනුපමිතං කාලදේශාවධිභ්යාං

නිර්මුක්තං නිත්යමුක්තං නිගමශතසහස්රේණ නිර්භාස්යමානම් .

අස්පෂ්ටං දෘෂ්ටමාත්රේ පුනරුරුපුරුෂාර්ථාත්මකං බ්රහ්ම තත්වං

තත්තාවද්භාති සාක්ෂාද් ගුරුපවනපුරේ හන්ත භාග්යං ජනානාම් .. 1 ..

ඒවන්දුර්ලභ්යවස්තුන්යපි සුලභතයා හස්තලබ්ධේ යදන්යත්

තන්වා වාචා ධියා වා භජති බත ජනඃ ක්ෂුද්රතෛව ස්ඵුටේයම් .

ඒතේ තාවද්වයං තු ස්ථිරතරමනසා විශ්වපීඩාපහත්යෛ

නිශ්ශේෂාත්මානමේනං ගුරුපවනපුරාධීශමේවාශ්රයාමඃ .. 2 ..

සත්ත්වං යත්තත් පරාභ්යාමපරිකලනතෝ නිර්මලං තේන තාවත්

භූතෛර්භූතේන්ද්රියෛස්තේ වපුරිති බහුශඃ ශ්රූයතේ ව්යාසවාක්යම්.

තත් ස්වච්ඡ්ත්වාද්යදාච්ඡාදිතපරසුඛචිද්ගර්භනිර්භාසරූපං

තස්මින් ධන්යා රමන්තේ ශ්රුතිමතිමධුරේ සුග්රහේ විග්රහේ තේ .. 3 ..

නිෂ්කම්පේ නිත්යපූර්ණේ නිරවධිපරමානන්දපීයූෂරූපේ

නිර්ලීනානේකමුක්තාවලිසුභගතමේ නිර්මලබ්රහ්මසින්ධෞ .

කල්ලෝලෝල්ලාසතුල්යං ඛලු විමලතරං සත්ත්වමාහුස්තදාත්මා

කස්මාන්නෝ නිෂ්කලස්ත්වං සකල ඉති වචස්ත්වත්කලාස්වේව භූමන් .. 4 ..

නිර්ව්යාපාරෝ(අ)පි නිෂ්කාරණමජ භජසේ යත්ක්රියාමීක්ෂණාඛ්යාං

තේනෛවෝදේති ලීනා ප්රකෘතිරසතිකල්පා(අ)පි කල්පාදිකාලේ.

තස්යාඃ සංශුද්ධමංශං කමපි තමතිරෝධායකං සත්ත්වරූපං

ස ත්වං ධෘත්වා දධාසි ස්වමහිමවිභවාකුණ්ඨ වෛකුණ්ඨ රූපං..5..

තත්තේ ප්රත්යග්රධාරාධරලලිතකලායාවලීකේලිකාරං

ලාවණ්යස්යෛකසාරං සුකෘතිජනදෘශාං පූර්ණපුණ්යාවතාරම්.

ලක්ෂ්මීනිශ්ශඞ්කලීලානිලයනමමෘතස්යන්දසන්දෝහමන්තඃ

සිඤ්චත් සඤ්චින්තකානාං වපුරනුකලයේ මාරුතාගාරනාථ ..6..

කෂ්ටා තේ සෘෂ්ටිචේෂ්ටා බහුතරභවඛේදාවහා ජීවභාජා-

මිත්යේවං පූර්වමාලෝචිතමජිත මයා නෛවමද්යාභිජානේ.

නෝචේජ්ජීවාඃ කථං වා මධුරතරමිදං ත්වද්වපුශ්චිද්රසාර්ද්රං

නේත්රෛඃ ශ්රෝත්රෛශ්ච පීත්වා පරමරසසුධාම්භෝධිපූරේ රමේරන්..7..

නම්රාණාං සන්නිධත්තේ සතතමපි පුරස්තෛරනභ්යර්ථිතාන -

ප්යර්ථාන් කාමානජස්රං විතරති පරමානන්දසාන්ද්රාං ගතිං ච.

ඉත්ථං නිශ්ශේෂලභ්යෝ නිරවධිකඵලඃ පාරිජාතෝ හරේ ත්වං

ක්ෂුද්රං තං ශක්රවාටීද්රුමමභිලෂති ව්යර්ථමර්ථිව්රජෝ(අ)යම්..8..

කාරුණ්යාත්කාමමන්යං දදති ඛලු පරේ ස්වාත්මදස්ත්වං විශේෂා-

දෛශ්වර්යාදීශතේ(අ)න්යේ ජගති පරජනේ ස්වාත්මනෝ(අ)පීශ්වරස්ත්වම්.

ත්වය්යුච්චෛරාරමන්ති ප්රතිපදමධුරේ චේතනාඃ ස්ඵීතභාග්යා-

ස්ත්වං චාත්මාරාම ඒවේත්යතුලගුණගණාධාර ශෞරේ නමස්තේ..9..

ඓශ්වර්යං ශඞ්කරාදීශ්වරවිනියමනං විශ්වතේජෝහරාණාං

තේජස්සංහාරි වීර්යං විමලමපි යශෝ නිස්පෘහෛශ්චෝපගීතම්.

අඞ්ගාසඞ්ගා සදා ශ්රීරඛිලවිදසි න ක්වාපි තේ සඞ්ගවාර්තා

තද්වාතාගාරවාසින් මුරහර භගවච්ඡබ්දමුඛ්යාශ්රයෝ(අ)සි..10..

Roman (IAST) Transliteration

sāndrānandāvabodhātmakamanupamitaṃ kāladeśāvadhibhyāṃ

nirmuktaṃ nityamuktaṃ nigamaśatasahasreṇa nirbhāsyamānam |

aspaṣṭaṃ dṛṣṭamātre punarurupuruṣārthātmakaṃ brahma tatvaṃ

tattāvadbhāti sākṣād gurupavanapure hanta bhāgyaṃ janānām || 1 ||

evandurlabhyavastunyapi sulabhatayā hastalabdhe yadanyat

tanvā vācā dhiyā vā bhajati bata janaḥ kṣudrataiva sphuṭeyam |

ete tāvadvayaṃ tu sthirataramanasā viśvapīḍāpahatyai

niśśeṣātmānamenaṃ gurupavanapurādhīśamevāśrayāmaḥ || 2 ||

sattvaṃ yattat parābhyāmaparikalanato nirmalaṃ tena tāvat

bhūtairbhūtendriyaiste vapuriti bahuśaḥ śrūyate vyāsavākyam|

tat svacchtvādyadācchāditaparasukhacidgarbhanirbhāsarūpaṃ

tasmin dhanyā ramante śrutimatimadhure sugrahe vigrahe te || 3 ||

niṣkampe nityapūrṇe niravadhiparamānandapīyūṣarūpe

nirlīnānekamuktāvalisubhagatame nirmalabrahmasindhau |

kallolollāsatulyaṃ khalu vimalataraṃ sattvamāhustadātmā

kasmānno niṣkalastvaṃ sakala iti vacastvatkalāsveva bhūman || 4 ||

nirvyāpāro'pi niṣkāraṇamaja bhajase yatkriyāmīkṣaṇākhyāṃ

tenaivodeti līnā prakṛtirasatikalpā'pi kalpādikāle|

tasyāḥ saṃśuddhamaṃśaṃ kamapi tamatirodhāyakaṃ sattvarūpaṃ

sa tvaṃ dhṛtvā dadhāsi svamahimavibhavākuṇṭha vaikuṇṭha rūpaṃ||5||

tatte pratyagradhārādharalalitakalāyāvalīkelikāraṃ

lāvaṇyasyaikasāraṃ sukṛtijanadṛśāṃ pūrṇapuṇyāvatāram|

lakṣmīniśśaṅkalīlānilayanamamṛtasyandasandohamantaḥ

siñcat sañcintakānāṃ vapuranukalaye mārutāgāranātha ||6||

kaṣṭā te sṛṣṭiceṣṭā bahutarabhavakhedāvahā jīvabhājā-

mityevaṃ pūrvamālocitamajita mayā naivamadyābhijāne|

nocejjīvāḥ kathaṃ vā madhurataramidaṃ tvadvapuścidrasārdraṃ

netraiḥ śrotraiśca pītvā paramarasasudhāmbhodhipūre rameran||7||

namrāṇāṃ sannidhatte satatamapi purastairanabhyarthitāna -

pyarthān kāmānajasraṃ vitarati paramānandasāndrāṃ gatiṃ ca|

itthaṃ niśśeṣalabhyo niravadhikaphalaḥ pārijāto hare tvaṃ

kṣudraṃ taṃ śakravāṭīdrumamabhilaṣati vyarthamarthivrajo'yam||8||

kāruṇyātkāmamanyaṃ dadati khalu pare svātmadastvaṃ viśeṣā-

daiśvaryādīśate'nye jagati parajane svātmano'pīśvarastvam|

tvayyuccairāramanti pratipadamadhure cetanāḥ sphītabhāgyā-

stvaṃ cātmārāma evetyatulaguṇagaṇādhāra śaure namaste||9||

aiśvaryaṃ śaṅkarādīśvaraviniyamanaṃ viśvatejoharāṇāṃ

tejassaṃhāri vīryaṃ vimalamapi yaśo nispṛhaiścopagītam|

aṅgāsaṅgā sadā śrīrakhilavidasi na kvāpi te saṅgavārtā

tadvātāgāravāsin murahara bhagavacchabdamukhyāśrayo'si||10||

Sanskrit — Devanagari (original)

सान्द्रानन्दावबोधात्मकमनुपमितं कालदेशावधिभ्यां

निर्मुक्तं नित्यमुक्तं निगमशतसहस्रेण निर्भास्यमानम् ।

अस्पष्टं दृष्टमात्रे पुनरुरुपुरुषार्थात्मकं ब्रह्म तत्वं

तत्तावद्भाति साक्षाद् गुरुपवनपुरे हन्त भाग्यं जनानाम् ॥ 1 ॥

एवन्दुर्लभ्यवस्तुन्यपि सुलभतया हस्तलब्धे यदन्यत्

तन्वा वाचा धिया वा भजति बत जनः क्षुद्रतैव स्फुटेयम् ।

एते तावद्वयं तु स्थिरतरमनसा विश्वपीडापहत्यै

निश्शेषात्मानमेनं गुरुपवनपुराधीशमेवाश्रयामः ॥ 2 ॥

सत्त्वं यत्तत् पराभ्यामपरिकलनतो निर्मलं तेन तावत्

भूतैर्भूतेन्द्रियैस्ते वपुरिति बहुशः श्रूयते व्यासवाक्यम्।

तत् स्वच्छ्त्वाद्यदाच्छादितपरसुखचिद्गर्भनिर्भासरूपं

तस्मिन् धन्या रमन्ते श्रुतिमतिमधुरे सुग्रहे विग्रहे ते ॥ 3 ॥

निष्कम्पे नित्यपूर्णे निरवधिपरमानन्दपीयूषरूपे

निर्लीनानेकमुक्तावलिसुभगतमे निर्मलब्रह्मसिन्धौ ।

कल्लोलोल्लासतुल्यं खलु विमलतरं सत्त्वमाहुस्तदात्मा

कस्मान्नो निष्कलस्त्वं सकल इति वचस्त्वत्कलास्वेव भूमन् ॥ 4 ॥

निर्व्यापारोऽपि निष्कारणमज भजसे यत्क्रियामीक्षणाख्यां

तेनैवोदेति लीना प्रकृतिरसतिकल्पाऽपि कल्पादिकाले।

तस्याः संशुद्धमंशं कमपि तमतिरोधायकं सत्त्वरूपं

स त्वं धृत्वा दधासि स्वमहिमविभवाकुण्ठ वैकुण्ठ रूपं॥5॥

तत्ते प्रत्यग्रधाराधरललितकलायावलीकेलिकारं

लावण्यस्यैकसारं सुकृतिजनदृशां पूर्णपुण्यावतारम्।

लक्ष्मीनिश्शङ्कलीलानिलयनममृतस्यन्दसन्दोहमन्तः

सिञ्चत् सञ्चिन्तकानां वपुरनुकलये मारुतागारनाथ ॥6॥

कष्टा ते सृष्टिचेष्टा बहुतरभवखेदावहा जीवभाजा-

मित्येवं पूर्वमालोचितमजित मया नैवमद्याभिजाने।

नोचेज्जीवाः कथं वा मधुरतरमिदं त्वद्वपुश्चिद्रसार्द्रं

नेत्रैः श्रोत्रैश्च पीत्वा परमरससुधाम्भोधिपूरे रमेरन्॥7॥

नम्राणां सन्निधत्ते सततमपि पुरस्तैरनभ्यर्थितान -

प्यर्थान् कामानजस्रं वितरति परमानन्दसान्द्रां गतिं च।

इत्थं निश्शेषलभ्यो निरवधिकफलः पारिजातो हरे त्वं

क्षुद्रं तं शक्रवाटीद्रुममभिलषति व्यर्थमर्थिव्रजोऽयम्॥8॥

कारुण्यात्काममन्यं ददति खलु परे स्वात्मदस्त्वं विशेषा-

दैश्वर्यादीशतेऽन्ये जगति परजने स्वात्मनोऽपीश्वरस्त्वम्।

त्वय्युच्चैरारमन्ति प्रतिपदमधुरे चेतनाः स्फीतभाग्या-

स्त्वं चात्माराम एवेत्यतुलगुणगणाधार शौरे नमस्ते॥9॥

ऐश्वर्यं शङ्करादीश्वरविनियमनं विश्वतेजोहराणां

तेजस्संहारि वीर्यं विमलमपि यशो निस्पृहैश्चोपगीतम्।

अङ्गासङ्गा सदा श्रीरखिलविदसि न क्वापि ते सङ्गवार्ता

तद्वातागारवासिन् मुरहर भगवच्छब्दमुख्याश्रयोऽसि॥10॥