Narayaniyam Dashaka 3 - Uttamabhaktasya Gunah — Sinhala Script

පඨන්තෝ නාමානි ප්රමදභරසින්ධෞ නිපතිතාඃ

ස්මරන්තෝ රූපං තේ වරද කථයන්තෝ ගුණකථාඃ .

චරන්තෝ යේ භක්තාස්ත්වයි ඛලු රමන්තේ පරමමූ-

නහං ධන්යාන් මන්යේ සමධිගතසර්වාභිලෂිතාන් ..1..

ගදක්ලිෂ්ටං කෂ්ටං තව චරණසේවාරසභරේ(අ)-

ප්යනාසක්තං චිත්තං භවති බත විෂ්ණෝ කුරු දයාම් .

භවත්පාදාම්භෝජස්මරණරසිකෝ නාමනිවහා-

නහං ගායං ගායං කුහචන විවත්ස්යාමි විජනේ ..2..

කෘපා තේ ජාතා චේත්කිමිව න හි ලභ්යං තනුභෘතාං

මදීයක්ලේශෞඝප්රශමනදශා නාම කියතී .

න කේ කේ ලෝකේ(අ)ස්මින්නනිශමයි ශෝකාභිරහිතා

භවද්භක්තා මුක්තාඃ සුඛගතිමසක්තා විදධතේ ..3..

මුනිප්රෞඪා රූඪා ජගති ඛලු ගූඪාත්මගතයෝ

භවත්පාදාම්භෝජස්මරණවිරුජෝ නාරදමුඛාඃ .

චරන්තීශ ස්වෛරං සතතපරිනිර්භාතපරචි -

ත්සදානන්දාද්වෛතප්රසරපරිමග්නාඃ කිමපරම් ..4..

භවද්භක්තිඃ ස්ඵීතා භවතු මම සෛව ප්රශමයේ-

දශේෂක්ලේශෞඝං න ඛලු හෘදි සන්දේහකණිකා .

න චේද්ව්යාසස්යෝක්තිස්තව ච වචනං නෛගමවචෝ

භවේන්මිථ්යා රථ්යාපුරුෂවචනප්රායමඛිලම් ..5..

භවද්භක්තිස්තාවත් ප්රමුඛමධුරා ත්වත් ගුණරසාත්

කිමප්යාරූඪා චේදඛිලපරිතාපප්රශමනී .

පුනශ්චාන්තේ ස්වාන්තේ විමලපරිබෝධෝදයමිල-

න්මහානන්දාද්වෛතං දිශති කිමතඃ ප්රාර්ථ්යමපරම් ..6..

විධූය ක්ලේශාන්මේ කුරු චරණයුග්මං ධෘතරසං

භවත්ක්ෂේත්රප්රාප්තෞ කරමපි ච තේ පූජනවිධෞ .

භවන්මූර්ත්යාලෝකේ නයනමථ තේ පාදතුලසී-

පරිඝ්රාණේ ඝ්රාණං ශ්රවණමපි තේ චාරුචරිතේ ..7..

ප්රභූතාධිව්යාධිප්රසභචලිතේ මාමකහෘදි

ත්වදීයං තද්රූපං පරමසුඛචිද්රූපමුදියාත් .

උදඤ්චද්රෝමාඤ්චෝ ගලිතබහුහර්ෂාශ්රුනිවහෝ

යථා විස්මර්යාසං දුරුපශමපීඩාපරිභවාන් ..8..

මරුද්ගේහාධීශ ත්වයි ඛලු පරාඤ්චෝ(අ)පි සුඛිනෝ

භවත්ස්නේහී සෝ(අ)හං සුබහු පරිතප්යේ ච කිමිදම් .

අකීර්තිස්තේ මා භූද්වරද ගදභාරං ප්රශමයන්

භවත් භක්තෝත්තංසං ඣටිති කුරු මාං කංසදමන ..9..

කිමුක්තෛර්භූයෝභිස්තව හි කරුණා යාවදුදියා-

දහං තාවද්දේව ප්රහිතවිවිධාර්තප්රලපිතඃ .

පුරඃ ක්ලෘප්තේ පාදේ වරද තව නේෂ්යාමි දිවසා-

න්යථාශක්ති ව්යක්තං නතිනුතිනිෂේවා විරචයන් ..10..

Roman (IAST) Transliteration

paṭhanto nāmāni pramadabharasindhau nipatitāḥ

smaranto rūpaṃ te varada kathayanto guṇakathāḥ |

caranto ye bhaktāstvayi khalu ramante paramamū-

nahaṃ dhanyān manye samadhigatasarvābhilaṣitān ||1||

gadakliṣṭaṃ kaṣṭaṃ tava caraṇasevārasabhare'-

pyanāsaktaṃ cittaṃ bhavati bata viṣṇo kuru dayām |

bhavatpādāmbhojasmaraṇarasiko nāmanivahā-

nahaṃ gāyaṃ gāyaṃ kuhacana vivatsyāmi vijane ||2||

kṛpā te jātā cetkimiva na hi labhyaṃ tanubhṛtāṃ

madīyakleśaughapraśamanadaśā nāma kiyatī |

na ke ke loke'sminnaniśamayi śokābhirahitā

bhavadbhaktā muktāḥ sukhagatimasaktā vidadhate ||3||

muniprauḍhā rūḍhā jagati khalu gūḍhātmagatayo

bhavatpādāmbhojasmaraṇavirujo nāradamukhāḥ |

carantīśa svairaṃ satataparinirbhātaparaci -

tsadānandādvaitaprasaraparimagnāḥ kimaparam ||4||

bhavadbhaktiḥ sphītā bhavatu mama saiva praśamaye-

daśeṣakleśaughaṃ na khalu hṛdi sandehakaṇikā |

na cedvyāsasyoktistava ca vacanaṃ naigamavaco

bhavenmithyā rathyāpuruṣavacanaprāyamakhilam ||5||

bhavadbhaktistāvat pramukhamadhurā tvat guṇarasāt

kimapyārūḍhā cedakhilaparitāpapraśamanī |

punaścānte svānte vimalaparibodhodayamila-

nmahānandādvaitaṃ diśati kimataḥ prārthyamaparam ||6||

vidhūya kleśānme kuru caraṇayugmaṃ dhṛtarasaṃ

bhavatkṣetraprāptau karamapi ca te pūjanavidhau |

bhavanmūrtyāloke nayanamatha te pādatulasī-

parighrāṇe ghrāṇaṃ śravaṇamapi te cārucarite ||7||

prabhūtādhivyādhiprasabhacalite māmakahṛdi

tvadīyaṃ tadrūpaṃ paramasukhacidrūpamudiyāt |

udañcadromāñco galitabahuharṣāśrunivaho

yathā vismaryāsaṃ durupaśamapīḍāparibhavān ||8||

marudgehādhīśa tvayi khalu parāñco'pi sukhino

bhavatsnehī so'haṃ subahu paritapye ca kimidam |

akīrtiste mā bhūdvarada gadabhāraṃ praśamayan

bhavat bhaktottaṃsaṃ jhaṭiti kuru māṃ kaṃsadamana ||9||

kimuktairbhūyobhistava hi karuṇā yāvadudiyā-

dahaṃ tāvaddeva prahitavividhārtapralapitaḥ |

puraḥ klṛpte pāde varada tava neṣyāmi divasā-

nyathāśakti vyaktaṃ natinutiniṣevā viracayan ||10||

Sanskrit — Devanagari (original)

पठन्तो नामानि प्रमदभरसिन्धौ निपतिताः

स्मरन्तो रूपं ते वरद कथयन्तो गुणकथाः ।

चरन्तो ये भक्तास्त्वयि खलु रमन्ते परममू-

नहं धन्यान् मन्ये समधिगतसर्वाभिलषितान् ॥1॥

गदक्लिष्टं कष्टं तव चरणसेवारसभरेऽ-

प्यनासक्तं चित्तं भवति बत विष्णो कुरु दयाम् ।

भवत्पादाम्भोजस्मरणरसिको नामनिवहा-

नहं गायं गायं कुहचन विवत्स्यामि विजने ॥2॥

कृपा ते जाता चेत्किमिव न हि लभ्यं तनुभृतां

मदीयक्लेशौघप्रशमनदशा नाम कियती ।

न के के लोकेऽस्मिन्ननिशमयि शोकाभिरहिता

भवद्भक्ता मुक्ताः सुखगतिमसक्ता विदधते ॥3॥

मुनिप्रौढा रूढा जगति खलु गूढात्मगतयो

भवत्पादाम्भोजस्मरणविरुजो नारदमुखाः ।

चरन्तीश स्वैरं सततपरिनिर्भातपरचि -

त्सदानन्दाद्वैतप्रसरपरिमग्नाः किमपरम् ॥4॥

भवद्भक्तिः स्फीता भवतु मम सैव प्रशमये-

दशेषक्लेशौघं न खलु हृदि सन्देहकणिका ।

न चेद्व्यासस्योक्तिस्तव च वचनं नैगमवचो

भवेन्मिथ्या रथ्यापुरुषवचनप्रायमखिलम् ॥5॥

भवद्भक्तिस्तावत् प्रमुखमधुरा त्वत् गुणरसात्

किमप्यारूढा चेदखिलपरितापप्रशमनी ।

पुनश्चान्ते स्वान्ते विमलपरिबोधोदयमिल-

न्महानन्दाद्वैतं दिशति किमतः प्रार्थ्यमपरम् ॥6॥

विधूय क्लेशान्मे कुरु चरणयुग्मं धृतरसं

भवत्क्षेत्रप्राप्तौ करमपि च ते पूजनविधौ ।

भवन्मूर्त्यालोके नयनमथ ते पादतुलसी-

परिघ्राणे घ्राणं श्रवणमपि ते चारुचरिते ॥7॥

प्रभूताधिव्याधिप्रसभचलिते मामकहृदि

त्वदीयं तद्रूपं परमसुखचिद्रूपमुदियात् ।

उदञ्चद्रोमाञ्चो गलितबहुहर्षाश्रुनिवहो

यथा विस्मर्यासं दुरुपशमपीडापरिभवान् ॥8॥

मरुद्गेहाधीश त्वयि खलु पराञ्चोऽपि सुखिनो

भवत्स्नेही सोऽहं सुबहु परितप्ये च किमिदम् ।

अकीर्तिस्ते मा भूद्वरद गदभारं प्रशमयन्

भवत् भक्तोत्तंसं झटिति कुरु मां कंसदमन ॥9॥

किमुक्तैर्भूयोभिस्तव हि करुणा यावदुदिया-

दहं तावद्देव प्रहितविविधार्तप्रलपितः ।

पुरः क्लृप्ते पादे वरद तव नेष्यामि दिवसा-

न्यथाशक्ति व्यक्तं नतिनुतिनिषेवा विरचयन् ॥10॥