Narayaniyam Dashaka 91 - Bhaktimahattvam — Sinhala Script

ශ්රීකෘෂ්ණ ත්වත්පදෝපාසනමභයතමං බද්ධමිථ්යාර්ථදෘෂ්ටේ-

ර්මර්ත්යස්යාර්තස්ය මන්යේ ව්යපසරති භයං යේන සර්වාත්මනෛව .

යත්තාවත් ත්වත්ප්රණීතානිහ භජනවිධීනාස්ථිතෝ මෝහමාර්ගේ

ධාවන්නප්යාවෘතාක්ෂඃ ස්ඛලති න කුහචිද්දේවදේවාඛිලාත්මන් ..1..

භූමන් කායේන වාචා මුහුරපි මනසා ත්වද්බලප්රේරිතාත්මා

යද්යත් කුර්වේ සමස්තං තදිහ පරතරේ ත්වය්යසාවර්පයාමි .

ජාත්යාපීහ ශ්වපාකස්ත්වයි නිහිතමනඃකර්මවාගින්ද්රියාර්ථ-

ප්රාණෝ විශ්වං පුනීතේ න තු විමුඛමනාස්ත්වත්පදාද්විප්රවර්යඃ ..2..

භීතිර්නාම ද්විතීයාද්භවති නනු මනඃකල්පිතං ච ද්විතීයං

තේනෛක්යාභ්යාසශීලෝ හෘදයමිහ යථාශක්ති බුද්ධ්යා නිරුන්ධ්යාම් .

මායාවිද්ධේ තු තස්මින් පුනරපි න තථා භාති මායාධිනාථං

තං ත්වාං භක්ත්යා මහත්යා සතතමනුභජනීශ භීතිං විජහ්යාම් ..3..

භක්තේරුත්පත්තිවෘද්ධී තව චරණජුෂාං සඞ්ගමේනෛව පුංසා-

මාසාද්යේ පුණ්යභාජාං ශ්රිය ඉව ජගති ශ්රීමතාං සඞ්ගමේන .

තත්සඞ්ගෝ දේව භූයාන්මම ඛලු සතතං තන්මුඛාදුන්මිෂද්භි-

ස්ත්වන්මාහාත්ම්යප්රකාරෛර්භවති ච සුදෘඪා භක්තිරුද්ධූතපාපා ..4..

ශ්රේයෝමාර්ගේෂු භක්තාවධිකබහුමතිර්ජන්මකර්මාණි භූයෝ

ගායන් ක්ෂේමාණි නාමාන්යපි තදුභයතඃ ප්රද්රුතං ප්රද්රුතාත්මා .

උද්යද්ධාසඃ කදාචිත් කුහචිදපි රුදන් ක්වාපි ගර්ජන් ප්රගාය-

න්නුන්මාදීව ප්රනෘත්යන්නයි කුරු කරුණාං ලෝකබාහ්යශ්චරේයම් ..5..

භූතාන්යේතානි භූතාත්මකමපි සකලං පක්ෂිමත්ස්යාන් මෘගාදීන්

මර්ත්යාන් මිත්රාණි ශත්රූනපි යමිතමතිස්ත්වන්මයාන්යානමානි .

ත්වත්සේවායාං හි සිද්ධ්යේන්මම තව කෘපයා භක්තිදාර්ඪ්යං විරාග-

ස්ත්වත්තත්ත්වස්යාවබෝධෝ(අ)පි ච භුවනපතේ යත්නභේදං විනෛව ..6..

නෝ මුහ්යන් ක්ෂුත්තෘඩාද්යෛර්භවසරණිභවෛස්ත්වන්නිලීනාශයත්වා-

ච්චින්තාසාතත්යශාලී නිමිෂලවමපි ත්වත්පදාදප්රකම්පඃ .

ඉෂ්ටානිෂ්ටේෂු තුෂ්ටිව්යසනවිරහිතෝ මායිකත්වාවබෝධා-

ජ්ජ්යෝත්ස්නාභිස්ත්වන්නඛේන්දෝරධිකශිශිරිතේනාත්මනා සඤ්චරේයම් ..7..

භූතේෂ්වේෂු ත්වදෛක්යස්මෘතිසමධිගතෞ නාධිකාරෝ(අ)ධුනා චේ-

ත්ත්වත්ප්රේම ත්වත්කමෛත්රී ජඩමතිෂු කෘපා ද්විට්සු භූයාදුපේක්ෂා .

අර්චායාං වා සමර්චාකුතුකමුරුතරශ්රද්ධයා වර්ධතාං මේ

ත්වත්සංසේවී තථාපි ද්රුතමුපලභතේ භක්තලෝකෝත්තමත්වම් ..8..

ආවෘත්ය ත්වත්ස්වරූපං ක්ෂිතිජලමරුදාද්යාත්මනා වික්ෂිපන්තී

ජීවාන් භූයිෂ්ඨකර්මාවලිවිවශගතීන් දුඃඛජාලේ ක්ෂිපන්තී .

ත්වන්මායා මාභිභූන්මාමයි භුවනපතේ කල්පතේ තත්ප්රශාන්ත්යෛ

ත්වත්පාදේ භක්තිරේවේත්යවදදයි විභෝ සිද්ධයෝගී ප්රබුද්ධඃ ..9..

දුඃඛාන්යාලෝක්ය ජන්තුෂ්වලමුදිතවිවේකෝ(අ)හමාචාර්යවර්යා-

ල්ලබ්ධ්වා ත්වද්රූපතත්ත්වං ගුණචරිතකථාද්යුද්භවද්භක්තිභූමා .

මායාමේනාං තරිත්වා පරමසුඛමයේ ත්වත්පදේ මෝදිතාහේ

තස්යායං පූර්වරඞ්ගඃ පවනපුරපතේ නාශයාශේෂරෝගාන් ..10..

Roman (IAST) Transliteration

śrīkṛṣṇa tvatpadopāsanamabhayatamaṃ baddhamithyārthadṛṣṭe-

rmartyasyārtasya manye vyapasarati bhayaṃ yena sarvātmanaiva |

yattāvat tvatpraṇītāniha bhajanavidhīnāsthito mohamārge

dhāvannapyāvṛtākṣaḥ skhalati na kuhaciddevadevākhilātman ||1||

bhūman kāyena vācā muhurapi manasā tvadbalapreritātmā

yadyat kurve samastaṃ tadiha paratare tvayyasāvarpayāmi |

jātyāpīha śvapākastvayi nihitamanaḥkarmavāgindriyārtha-

prāṇo viśvaṃ punīte na tu vimukhamanāstvatpadādvipravaryaḥ ||2||

bhītirnāma dvitīyādbhavati nanu manaḥkalpitaṃ ca dvitīyaṃ

tenaikyābhyāsaśīlo hṛdayamiha yathāśakti buddhyā nirundhyām |

māyāviddhe tu tasmin punarapi na tathā bhāti māyādhināthaṃ

taṃ tvāṃ bhaktyā mahatyā satatamanubhajanīśa bhītiṃ vijahyām ||3||

bhakterutpattivṛddhī tava caraṇajuṣāṃ saṅgamenaiva puṃsā-

māsādye puṇyabhājāṃ śriya iva jagati śrīmatāṃ saṅgamena |

tatsaṅgo deva bhūyānmama khalu satataṃ tanmukhādunmiṣadbhi-

stvanmāhātmyaprakārairbhavati ca sudṛḍhā bhaktiruddhūtapāpā ||4||

śreyomārgeṣu bhaktāvadhikabahumatirjanmakarmāṇi bhūyo

gāyan kṣemāṇi nāmānyapi tadubhayataḥ pradrutaṃ pradrutātmā |

udyaddhāsaḥ kadācit kuhacidapi rudan kvāpi garjan pragāya-

nnunmādīva pranṛtyannayi kuru karuṇāṃ lokabāhyaścareyam ||5||

bhūtānyetāni bhūtātmakamapi sakalaṃ pakṣimatsyān mṛgādīn

martyān mitrāṇi śatrūnapi yamitamatistvanmayānyānamāni |

tvatsevāyāṃ hi siddhyenmama tava kṛpayā bhaktidārḍhyaṃ virāga-

stvattattvasyāvabodho'pi ca bhuvanapate yatnabhedaṃ vinaiva ||6||

no muhyan kṣuttṛḍādyairbhavasaraṇibhavaistvannilīnāśayatvā-

ccintāsātatyaśālī nimiṣalavamapi tvatpadādaprakampaḥ |

iṣṭāniṣṭeṣu tuṣṭivyasanavirahito māyikatvāvabodhā-

jjyotsnābhistvannakhendoradhikaśiśiritenātmanā sañcareyam ||7||

bhūteṣveṣu tvadaikyasmṛtisamadhigatau nādhikāro'dhunā ce-

ttvatprema tvatkamaitrī jaḍamatiṣu kṛpā dviṭsu bhūyādupekṣā |

arcāyāṃ vā samarcākutukamurutaraśraddhayā vardhatāṃ me

tvatsaṃsevī tathāpi drutamupalabhate bhaktalokottamatvam ||8||

āvṛtya tvatsvarūpaṃ kṣitijalamarudādyātmanā vikṣipantī

jīvān bhūyiṣṭhakarmāvalivivaśagatīn duḥkhajāle kṣipantī |

tvanmāyā mābhibhūnmāmayi bhuvanapate kalpate tatpraśāntyai

tvatpāde bhaktirevetyavadadayi vibho siddhayogī prabuddhaḥ ||9||

duḥkhānyālokya jantuṣvalamuditaviveko'hamācāryavaryā-

llabdhvā tvadrūpatattvaṃ guṇacaritakathādyudbhavadbhaktibhūmā |

māyāmenāṃ taritvā paramasukhamaye tvatpade moditāhe

tasyāyaṃ pūrvaraṅgaḥ pavanapurapate nāśayāśeṣarogān ||10||

Sanskrit — Devanagari (original)

श्रीकृष्ण त्वत्पदोपासनमभयतमं बद्धमिथ्यार्थदृष्टे-

र्मर्त्यस्यार्तस्य मन्ये व्यपसरति भयं येन सर्वात्मनैव ।

यत्तावत् त्वत्प्रणीतानिह भजनविधीनास्थितो मोहमार्गे

धावन्नप्यावृताक्षः स्खलति न कुहचिद्देवदेवाखिलात्मन् ॥1॥

भूमन् कायेन वाचा मुहुरपि मनसा त्वद्बलप्रेरितात्मा

यद्यत् कुर्वे समस्तं तदिह परतरे त्वय्यसावर्पयामि ।

जात्यापीह श्वपाकस्त्वयि निहितमनःकर्मवागिन्द्रियार्थ-

प्राणो विश्वं पुनीते न तु विमुखमनास्त्वत्पदाद्विप्रवर्यः ॥2॥

भीतिर्नाम द्वितीयाद्भवति ननु मनःकल्पितं च द्वितीयं

तेनैक्याभ्यासशीलो हृदयमिह यथाशक्ति बुद्ध्या निरुन्ध्याम् ।

मायाविद्धे तु तस्मिन् पुनरपि न तथा भाति मायाधिनाथं

तं त्वां भक्त्या महत्या सततमनुभजनीश भीतिं विजह्याम् ॥3॥

भक्तेरुत्पत्तिवृद्धी तव चरणजुषां सङ्गमेनैव पुंसा-

मासाद्ये पुण्यभाजां श्रिय इव जगति श्रीमतां सङ्गमेन ।

तत्सङ्गो देव भूयान्मम खलु सततं तन्मुखादुन्मिषद्भि-

स्त्वन्माहात्म्यप्रकारैर्भवति च सुदृढा भक्तिरुद्धूतपापा ॥4॥

श्रेयोमार्गेषु भक्तावधिकबहुमतिर्जन्मकर्माणि भूयो

गायन् क्षेमाणि नामान्यपि तदुभयतः प्रद्रुतं प्रद्रुतात्मा ।

उद्यद्धासः कदाचित् कुहचिदपि रुदन् क्वापि गर्जन् प्रगाय-

न्नुन्मादीव प्रनृत्यन्नयि कुरु करुणां लोकबाह्यश्चरेयम् ॥5॥

भूतान्येतानि भूतात्मकमपि सकलं पक्षिमत्स्यान् मृगादीन्

मर्त्यान् मित्राणि शत्रूनपि यमितमतिस्त्वन्मयान्यानमानि ।

त्वत्सेवायां हि सिद्ध्येन्मम तव कृपया भक्तिदार्ढ्यं विराग-

स्त्वत्तत्त्वस्यावबोधोऽपि च भुवनपते यत्नभेदं विनैव ॥6॥

नो मुह्यन् क्षुत्तृडाद्यैर्भवसरणिभवैस्त्वन्निलीनाशयत्वा-

च्चिन्तासातत्यशाली निमिषलवमपि त्वत्पदादप्रकम्पः ।

इष्टानिष्टेषु तुष्टिव्यसनविरहितो मायिकत्वावबोधा-

ज्ज्योत्स्नाभिस्त्वन्नखेन्दोरधिकशिशिरितेनात्मना सञ्चरेयम् ॥7॥

भूतेष्वेषु त्वदैक्यस्मृतिसमधिगतौ नाधिकारोऽधुना चे-

त्त्वत्प्रेम त्वत्कमैत्री जडमतिषु कृपा द्विट्सु भूयादुपेक्षा ।

अर्चायां वा समर्चाकुतुकमुरुतरश्रद्धया वर्धतां मे

त्वत्संसेवी तथापि द्रुतमुपलभते भक्तलोकोत्तमत्वम् ॥8॥

आवृत्य त्वत्स्वरूपं क्षितिजलमरुदाद्यात्मना विक्षिपन्ती

जीवान् भूयिष्ठकर्मावलिविवशगतीन् दुःखजाले क्षिपन्ती ।

त्वन्माया माभिभून्मामयि भुवनपते कल्पते तत्प्रशान्त्यै

त्वत्पादे भक्तिरेवेत्यवददयि विभो सिद्धयोगी प्रबुद्धः ॥9॥

दुःखान्यालोक्य जन्तुष्वलमुदितविवेकोऽहमाचार्यवर्या-

ल्लब्ध्वा त्वद्रूपतत्त्वं गुणचरितकथाद्युद्भवद्भक्तिभूमा ।

मायामेनां तरित्वा परमसुखमये त्वत्पदे मोदिताहे

तस्यायं पूर्वरङ्गः पवनपुरपते नाशयाशेषरोगान् ॥10॥