Narayaniyam Dashaka 39 - Yogamaya Pradurbhavam Tatha Gokule Krishnajanmotsavam — Sinhala Script

භවන්තමයමුද්වහන් යදුකුලෝද්වහෝ නිස්සරන්

දදර්ශ ගගනෝච්චලජ්ජලභරාං කලින්දාත්මජාම් .

අහෝ සලිලසඤ්චයඃ ස පුනරෛන්ද්රජාලෝදිතෝ

ජලෞඝ ඉව තත්ක්ෂණාත් ප්රපදමේයතාමායයෞ ..1..

ප්රසුප්තපශුපාලිකාං නිභෘතමාරුදද්බාලිකා-

මපාවෘතකවාටිකාං පශුපවාටිකාමාවිශන් .

භවන්තමයමර්පයන් ප්රසවතල්පකේ තත්පදා-

ද්වහන් කපටකන්යකාං ස්වපුරමාගතෝ වේගතඃ ..2..

තතස්ත්වදනුජාරවක්ෂපිතනිද්රවේගද්රවද්-

භටෝත්කරනිවේදිතප්රසවවාර්තයෛවාර්තිමාන් .

විමුක්තචිකුරෝත්කරස්ත්වරිතමාපතන් භෝජරා-

ඩතුෂ්ට ඉව දෘෂ්ටවාන් භගිනිකාකරේ කන්යකාම් ..3..

ධ්රුවං කපටශාලිනෝ මධුහරස්ය මායා භවේ-

දසාවිති කිශෝරිකාං භගිනිකාකරාලිඞ්ගිතාම් .

ද්විපෝ නලිනිකාන්තරාදිව මෘණාලිකාමාක්ෂිප-

න්නයං ත්වදනුජාමජාමුපලපට්ටකේ පිෂ්ටවාන් ..4..

තතඃ භවදුපාසකෝ ඣටිති මෘත්යුපාශාදිව

ප්රමුච්ය තරසෛව සා සමධිරූඪරූපාන්තරා .

අධස්තලමජග්මුෂී විකසදෂ්ටබාහුස්ඵුර-

න්මහායුධමහෝ ගතා කිල විහායසා දිද්යුතේ ..5..

නෘශංසතර කංස තේ කිමු මයා විනිෂ්පිෂ්ටයා

බභූව භවදන්තකඃ ක්වචන චින්ත්යතාං තේ හිතම් .

ඉති ත්වදනුජා විභෝ ඛලමුදීර්ය තං ජග්මුෂී

මරුද්ගණපණායිතා භුවි ච මන්දිරාණ්යේයුෂී ..6..

ප්රගේ පුනරගාත්මජාවචනමීරිතා භූභුජා

ප්රලම්බබකපූතනාප්රමුඛදානවා මානිනඃ .

භවන්නිධනකාම්යයා ජගති බභ්රමුර්නිර්භයාඃ

කුමාරකවිමාරකාඃ කිමිව දුෂ්කරං නිෂ්කෘපෛඃ ..7..

තතඃ පශුපමන්දිරේ ත්වයි මුකුන්ද නන්දප්රියා-

ප්රසූතිශයනේශයේ රුදති කිඤ්චිදඤ්චත්පදේ .

විබුධ්ය වනිතාජනෛස්තනයසම්භවේ ඝෝෂිතේ

මුදා කිමු වදාම්යහෝ සකලමාකුලං ගෝකුලම් ..8..

අහෝ ඛලු යශෝදයා නවකලායචේතෝහරං

භවන්තමලමන්තිකේ ප්රථමමාපිබන්ත්යා දෘශා .

පුනඃ ස්තනභරං නිජං සපදි පායයන්ත්යා මුදා

මනෝහරතනුස්පෘශා ජගති පුණ්යවන්තෝ ජිතාඃ ..9..

භවත්කුශලකාම්යයා ස ඛලු නන්දගෝපස්තදා

ප්රමෝදභරසඞ්කුලෝ ද්විජකුලාය කින්නාදදාත් .

තථෛව පශුපාලකාඃ කිමු න මඞ්ගලං තේනිරේ

ජගත්ත්රිතයමඞ්ගල ත්වමිහ පාහි මාමාමයාත් ..10..

Roman (IAST) Transliteration

bhavantamayamudvahan yadukulodvaho nissaran

dadarśa gaganoccalajjalabharāṃ kalindātmajām |

aho salilasañcayaḥ sa punaraindrajālodito

jalaugha iva tatkṣaṇāt prapadameyatāmāyayau ||1||

prasuptapaśupālikāṃ nibhṛtamārudadbālikā-

mapāvṛtakavāṭikāṃ paśupavāṭikāmāviśan |

bhavantamayamarpayan prasavatalpake tatpadā-

dvahan kapaṭakanyakāṃ svapuramāgato vegataḥ ||2||

tatastvadanujāravakṣapitanidravegadravad-

bhaṭotkaraniveditaprasavavārtayaivārtimān |

vimuktacikurotkarastvaritamāpatan bhojarā-

ḍatuṣṭa iva dṛṣṭavān bhaginikākare kanyakām ||3||

dhruvaṃ kapaṭaśālino madhuharasya māyā bhave-

dasāviti kiśorikāṃ bhaginikākarāliṅgitām |

dvipo nalinikāntarādiva mṛṇālikāmākṣipa-

nnayaṃ tvadanujāmajāmupalapaṭṭake piṣṭavān ||4||

tataḥ bhavadupāsako jhaṭiti mṛtyupāśādiva

pramucya tarasaiva sā samadhirūḍharūpāntarā |

adhastalamajagmuṣī vikasadaṣṭabāhusphura-

nmahāyudhamaho gatā kila vihāyasā didyute ||5||

nṛśaṃsatara kaṃsa te kimu mayā viniṣpiṣṭayā

babhūva bhavadantakaḥ kvacana cintyatāṃ te hitam |

iti tvadanujā vibho khalamudīrya taṃ jagmuṣī

marudgaṇapaṇāyitā bhuvi ca mandirāṇyeyuṣī ||6||

prage punaragātmajāvacanamīritā bhūbhujā

pralambabakapūtanāpramukhadānavā māninaḥ |

bhavannidhanakāmyayā jagati babhramurnirbhayāḥ

kumārakavimārakāḥ kimiva duṣkaraṃ niṣkṛpaiḥ ||7||

tataḥ paśupamandire tvayi mukunda nandapriyā-

prasūtiśayaneśaye rudati kiñcidañcatpade |

vibudhya vanitājanaistanayasambhave ghoṣite

mudā kimu vadāmyaho sakalamākulaṃ gokulam ||8||

aho khalu yaśodayā navakalāyacetoharaṃ

bhavantamalamantike prathamamāpibantyā dṛśā |

punaḥ stanabharaṃ nijaṃ sapadi pāyayantyā mudā

manoharatanuspṛśā jagati puṇyavanto jitāḥ ||9||

bhavatkuśalakāmyayā sa khalu nandagopastadā

pramodabharasaṅkulo dvijakulāya kinnādadāt |

tathaiva paśupālakāḥ kimu na maṅgalaṃ tenire

jagattritayamaṅgala tvamiha pāhi māmāmayāt ||10||

Sanskrit — Devanagari (original)

भवन्तमयमुद्वहन् यदुकुलोद्वहो निस्सरन्

ददर्श गगनोच्चलज्जलभरां कलिन्दात्मजाम् ।

अहो सलिलसञ्चयः स पुनरैन्द्रजालोदितो

जलौघ इव तत्क्षणात् प्रपदमेयतामाययौ ॥1॥

प्रसुप्तपशुपालिकां निभृतमारुदद्बालिका-

मपावृतकवाटिकां पशुपवाटिकामाविशन् ।

भवन्तमयमर्पयन् प्रसवतल्पके तत्पदा-

द्वहन् कपटकन्यकां स्वपुरमागतो वेगतः ॥2॥

ततस्त्वदनुजारवक्षपितनिद्रवेगद्रवद्-

भटोत्करनिवेदितप्रसववार्तयैवार्तिमान् ।

विमुक्तचिकुरोत्करस्त्वरितमापतन् भोजरा-

डतुष्ट इव दृष्टवान् भगिनिकाकरे कन्यकाम् ॥3॥

ध्रुवं कपटशालिनो मधुहरस्य माया भवे-

दसाविति किशोरिकां भगिनिकाकरालिङ्गिताम् ।

द्विपो नलिनिकान्तरादिव मृणालिकामाक्षिप-

न्नयं त्वदनुजामजामुपलपट्टके पिष्टवान् ॥4॥

ततः भवदुपासको झटिति मृत्युपाशादिव

प्रमुच्य तरसैव सा समधिरूढरूपान्तरा ।

अधस्तलमजग्मुषी विकसदष्टबाहुस्फुर-

न्महायुधमहो गता किल विहायसा दिद्युते ॥5॥

नृशंसतर कंस ते किमु मया विनिष्पिष्टया

बभूव भवदन्तकः क्वचन चिन्त्यतां ते हितम् ।

इति त्वदनुजा विभो खलमुदीर्य तं जग्मुषी

मरुद्गणपणायिता भुवि च मन्दिराण्येयुषी ॥6॥

प्रगे पुनरगात्मजावचनमीरिता भूभुजा

प्रलम्बबकपूतनाप्रमुखदानवा मानिनः ।

भवन्निधनकाम्यया जगति बभ्रमुर्निर्भयाः

कुमारकविमारकाः किमिव दुष्करं निष्कृपैः ॥7॥

ततः पशुपमन्दिरे त्वयि मुकुन्द नन्दप्रिया-

प्रसूतिशयनेशये रुदति किञ्चिदञ्चत्पदे ।

विबुध्य वनिताजनैस्तनयसम्भवे घोषिते

मुदा किमु वदाम्यहो सकलमाकुलं गोकुलम् ॥8॥

अहो खलु यशोदया नवकलायचेतोहरं

भवन्तमलमन्तिके प्रथममापिबन्त्या दृशा ।

पुनः स्तनभरं निजं सपदि पाययन्त्या मुदा

मनोहरतनुस्पृशा जगति पुण्यवन्तो जिताः ॥9॥

भवत्कुशलकाम्यया स खलु नन्दगोपस्तदा

प्रमोदभरसङ्कुलो द्विजकुलाय किन्नाददात् ।

तथैव पशुपालकाः किमु न मङ्गलं तेनिरे

जगत्त्रितयमङ्गल त्वमिह पाहि मामामयात् ॥10॥