કલ્યતાં મમ કુરુષ્વ તાવતીં કલ્યતે ભવદુપાસનં યયા ।
સ્પષ્ટમષ્ટવિધયોગચર્યયા પુષ્ટયાશુ તવ તુષ્ટિમાપ્નુયામ્ ॥1॥
બ્રહ્મચર્યદૃઢતાદિભિર્યમૈરાપ્લવાદિનિયમૈશ્ચ પાવિતાઃ ।
કુર્મહે દૃઢમમી સુખાસનં પઙ્કજાદ્યમપિ વા ભવત્પરાઃ ॥2॥
તારમન્તરનુચિન્ત્ય સન્તતં પ્રાણવાયુમભિયમ્ય નિર્મલાઃ ।
ઇન્દ્રિયાણિ વિષયાદથાપહૃત્યાસ્મહે ભવદુપાસનોન્મુખાઃ ॥3॥
અસ્ફુટે વપુષિ તે પ્રયત્નતો ધારયેમ ધિષણાં મુહુર્મુહુઃ ।
તેન ભક્તિરસમન્તરાર્દ્રતામુદ્વહેમ ભવદઙ્ઘ્રિચિન્તકા ॥4॥
વિસ્ફુટાવયવભેદસુન્દરં ત્વદ્વપુઃ સુચિરશીલનાવશાત્ ।
અશ્રમં મનસિ ચિન્તયામહે ધ્યાનયોગનિરતાસ્ત્વદાશ્રયાઃ ॥5॥
ધ્યાયતાં સકલમૂર્તિમીદૃશીમુન્મિષન્મધુરતાહૃતાત્મનામ્ ।
સાન્દ્રમોદરસરૂપમાન્તરં બ્રહ્મ રૂપમયિ તેઽવભાસતે ॥6॥
તત્સમાસ્વદનરૂપિણીં સ્થિતિં ત્વત્સમાધિમયિ વિશ્વનાયક ।
આશ્રિતાઃ પુનરતઃ પરિચ્યુતાવારભેમહિ ચ ધારણાદિકમ્ ॥7॥
ઇત્થમભ્યસનનિર્ભરોલ્લસત્ત્વત્પરાત્મસુખકલ્પિતોત્સવાઃ ।
મુક્તભક્તકુલમૌલિતાં ગતાઃ સઞ્ચરેમ શુકનારદાદિવત્ ॥8॥
ત્વત્સમાધિવિજયે તુ યઃ પુનર્મઙ્ક્ષુ મોક્ષરસિકઃ ક્રમેણ વા ।
યોગવશ્યમનિલં ષડાશ્રયૈરુન્નયત્યજ સુષુમ્નયા શનૈઃ ॥9॥
લિઙ્ગદેહમપિ સન્ત્યજન્નથો લીયતે ત્વયિ પરે નિરાગ્રહઃ ।
ઊર્ધ્વલોકકુતુકી તુ મૂર્ધતઃ સાર્ધમેવ કરણૈર્નિરીયતે ॥10॥
અગ્નિવાસરવલર્ક્ષપક્ષગૈરુત્તરાયણજુષા ચ દૈવતૈઃ ।
પ્રાપિતો રવિપદં ભવત્પરો મોદવાન્ ધ્રુવપદાન્તમીયતે ॥11॥
આસ્થિતોઽથ મહરાલયે યદા શેષવક્ત્રદહનોષ્મણાર્દ્યતે ।
ઈયતે ભવદુપાશ્રયસ્તદા વેધસઃ પદમતઃ પુરૈવ વા ॥12॥
તત્ર વા તવ પદેઽથવા વસન્ પ્રાકૃતપ્રલય એતિ મુક્તતામ્ ।
સ્વેચ્છયા ખલુ પુરા વિમુચ્યતે સંવિભિદ્ય જગદણ્ડમોજસા ॥13॥
તસ્ય ચ ક્ષિતિપયોમહોઽનિલદ્યોમહત્પ્રકૃતિસપ્તકાવૃતીઃ ।
તત્તદાત્મકતયા વિશન્ સુખી યાતિ તે પદમનાવૃતં વિભો ॥14॥
અર્ચિરાદિગતિમીદૃશીં વ્રજન્ વિચ્યુતિં ન ભજતે જગત્પતે ।
સચ્ચિદાત્મક ભવત્ ગુણોદયાનુચ્ચરન્તમનિલેશ પાહિ મામ્ ॥15॥
Roman (IAST) Transliteration
kalyatāṃ mama kuruṣva tāvatīṃ kalyate bhavadupāsanaṃ yayā |
spaṣṭamaṣṭavidhayogacaryayā puṣṭayāśu tava tuṣṭimāpnuyām ||1||
brahmacaryadṛḍhatādibhiryamairāplavādiniyamaiśca pāvitāḥ |
kurmahe dṛḍhamamī sukhāsanaṃ paṅkajādyamapi vā bhavatparāḥ ||2||
tāramantaranucintya santataṃ prāṇavāyumabhiyamya nirmalāḥ |
indriyāṇi viṣayādathāpahṛtyāsmahe bhavadupāsanonmukhāḥ ||3||
asphuṭe vapuṣi te prayatnato dhārayema dhiṣaṇāṃ muhurmuhuḥ |
tena bhaktirasamantarārdratāmudvahema bhavadaṅghricintakā ||4||
visphuṭāvayavabhedasundaraṃ tvadvapuḥ suciraśīlanāvaśāt |
aśramaṃ manasi cintayāmahe dhyānayoganiratāstvadāśrayāḥ ||5||
dhyāyatāṃ sakalamūrtimīdṛśīmunmiṣanmadhuratāhṛtātmanām |
sāndramodarasarūpamāntaraṃ brahma rūpamayi te'vabhāsate ||6||
tatsamāsvadanarūpiṇīṃ sthitiṃ tvatsamādhimayi viśvanāyaka |
āśritāḥ punarataḥ paricyutāvārabhemahi ca dhāraṇādikam ||7||
itthamabhyasananirbharollasattvatparātmasukhakalpitotsavāḥ |
muktabhaktakulamaulitāṃ gatāḥ sañcarema śukanāradādivat ||8||
tvatsamādhivijaye tu yaḥ punarmaṅkṣu mokṣarasikaḥ krameṇa vā |
yogavaśyamanilaṃ ṣaḍāśrayairunnayatyaja suṣumnayā śanaiḥ ||9||
liṅgadehamapi santyajannatho līyate tvayi pare nirāgrahaḥ |
ūrdhvalokakutukī tu mūrdhataḥ sārdhameva karaṇairnirīyate ||10||
agnivāsaravalarkṣapakṣagairuttarāyaṇajuṣā ca daivataiḥ |
prāpito ravipadaṃ bhavatparo modavān dhruvapadāntamīyate ||11||
āsthito'tha maharālaye yadā śeṣavaktradahanoṣmaṇārdyate |
īyate bhavadupāśrayastadā vedhasaḥ padamataḥ puraiva vā ||12||
tatra vā tava pade'thavā vasan prākṛtapralaya eti muktatām |
svecchayā khalu purā vimucyate saṃvibhidya jagadaṇḍamojasā ||13||
tasya ca kṣitipayomaho'niladyomahatprakṛtisaptakāvṛtīḥ |
tattadātmakatayā viśan sukhī yāti te padamanāvṛtaṃ vibho ||14||
arcirādigatimīdṛśīṃ vrajan vicyutiṃ na bhajate jagatpate |
saccidātmaka bhavat guṇodayānuccarantamanileśa pāhi mām ||15||
Sanskrit — Devanagari (original)
कल्यतां मम कुरुष्व तावतीं कल्यते भवदुपासनं यया ।
स्पष्टमष्टविधयोगचर्यया पुष्टयाशु तव तुष्टिमाप्नुयाम् ॥1॥
ब्रह्मचर्यदृढतादिभिर्यमैराप्लवादिनियमैश्च पाविताः ।
कुर्महे दृढममी सुखासनं पङ्कजाद्यमपि वा भवत्पराः ॥2॥
तारमन्तरनुचिन्त्य सन्ततं प्राणवायुमभियम्य निर्मलाः ।
इन्द्रियाणि विषयादथापहृत्यास्महे भवदुपासनोन्मुखाः ॥3॥
अस्फुटे वपुषि ते प्रयत्नतो धारयेम धिषणां मुहुर्मुहुः ।
तेन भक्तिरसमन्तरार्द्रतामुद्वहेम भवदङ्घ्रिचिन्तका ॥4॥
विस्फुटावयवभेदसुन्दरं त्वद्वपुः सुचिरशीलनावशात् ।
अश्रमं मनसि चिन्तयामहे ध्यानयोगनिरतास्त्वदाश्रयाः ॥5॥
ध्यायतां सकलमूर्तिमीदृशीमुन्मिषन्मधुरताहृतात्मनाम् ।
सान्द्रमोदरसरूपमान्तरं ब्रह्म रूपमयि तेऽवभासते ॥6॥
तत्समास्वदनरूपिणीं स्थितिं त्वत्समाधिमयि विश्वनायक ।
आश्रिताः पुनरतः परिच्युतावारभेमहि च धारणादिकम् ॥7॥
इत्थमभ्यसननिर्भरोल्लसत्त्वत्परात्मसुखकल्पितोत्सवाः ।
मुक्तभक्तकुलमौलितां गताः सञ्चरेम शुकनारदादिवत् ॥8॥
त्वत्समाधिविजये तु यः पुनर्मङ्क्षु मोक्षरसिकः क्रमेण वा ।
योगवश्यमनिलं षडाश्रयैरुन्नयत्यज सुषुम्नया शनैः ॥9॥
लिङ्गदेहमपि सन्त्यजन्नथो लीयते त्वयि परे निराग्रहः ।
ऊर्ध्वलोककुतुकी तु मूर्धतः सार्धमेव करणैर्निरीयते ॥10॥
अग्निवासरवलर्क्षपक्षगैरुत्तरायणजुषा च दैवतैः ।
प्रापितो रविपदं भवत्परो मोदवान् ध्रुवपदान्तमीयते ॥11॥
आस्थितोऽथ महरालये यदा शेषवक्त्रदहनोष्मणार्द्यते ।
ईयते भवदुपाश्रयस्तदा वेधसः पदमतः पुरैव वा ॥12॥
तत्र वा तव पदेऽथवा वसन् प्राकृतप्रलय एति मुक्तताम् ।
स्वेच्छया खलु पुरा विमुच्यते संविभिद्य जगदण्डमोजसा ॥13॥
तस्य च क्षितिपयोमहोऽनिलद्योमहत्प्रकृतिसप्तकावृतीः ।
तत्तदात्मकतया विशन् सुखी याति ते पदमनावृतं विभो ॥14॥
अर्चिरादिगतिमीदृशीं व्रजन् विच्युतिं न भजते जगत्पते ।
सच्चिदात्मक भवत् गुणोदयानुच्चरन्तमनिलेश पाहि माम् ॥15॥
kalyatāṃ mama kuruṣva tāvatīṃ kalyate bhavadupāsanaṃ yayā |
spaṣṭamaṣṭavidhayogacaryayā puṣṭayāśu tava tuṣṭimāpnuyām ||1||
brahmacaryadṛḍhatādibhiryamairāplavādiniyamaiśca pāvitāḥ |
kurmahe dṛḍhamamī sukhāsanaṃ paṅkajādyamapi vā bhavatparāḥ ||2||
tāramantaranucintya santataṃ prāṇavāyumabhiyamya nirmalāḥ |
indriyāṇi viṣayādathāpahṛtyāsmahe bhavadupāsanonmukhāḥ ||3||
asphuṭe vapuṣi te prayatnato dhārayema dhiṣaṇāṃ muhurmuhuḥ |
tena bhaktirasamantarārdratāmudvahema bhavadaṅghricintakā ||4||
visphuṭāvayavabhedasundaraṃ tvadvapuḥ suciraśīlanāvaśāt |
aśramaṃ manasi cintayāmahe dhyānayoganiratāstvadāśrayāḥ ||5||
dhyāyatāṃ sakalamūrtimīdṛśīmunmiṣanmadhuratāhṛtātmanām |
sāndramodarasarūpamāntaraṃ brahma rūpamayi te'vabhāsate ||6||
tatsamāsvadanarūpiṇīṃ sthitiṃ tvatsamādhimayi viśvanāyaka |
āśritāḥ punarataḥ paricyutāvārabhemahi ca dhāraṇādikam ||7||
itthamabhyasananirbharollasattvatparātmasukhakalpitotsavāḥ |
muktabhaktakulamaulitāṃ gatāḥ sañcarema śukanāradādivat ||8||
tvatsamādhivijaye tu yaḥ punarmaṅkṣu mokṣarasikaḥ krameṇa vā |
yogavaśyamanilaṃ ṣaḍāśrayairunnayatyaja suṣumnayā śanaiḥ ||9||
liṅgadehamapi santyajannatho līyate tvayi pare nirāgrahaḥ |
ūrdhvalokakutukī tu mūrdhataḥ sārdhameva karaṇairnirīyate ||10||
agnivāsaravalarkṣapakṣagairuttarāyaṇajuṣā ca daivataiḥ |
prāpito ravipadaṃ bhavatparo modavān dhruvapadāntamīyate ||11||
āsthito'tha maharālaye yadā śeṣavaktradahanoṣmaṇārdyate |
īyate bhavadupāśrayastadā vedhasaḥ padamataḥ puraiva vā ||12||
tatra vā tava pade'thavā vasan prākṛtapralaya eti muktatām |
svecchayā khalu purā vimucyate saṃvibhidya jagadaṇḍamojasā ||13||
tasya ca kṣitipayomaho'niladyomahatprakṛtisaptakāvṛtīḥ |
tattadātmakatayā viśan sukhī yāti te padamanāvṛtaṃ vibho ||14||
arcirādigatimīdṛśīṃ vrajan vicyutiṃ na bhajate jagatpate |
saccidātmaka bhavat guṇodayānuccarantamanileśa pāhi mām ||15||
🕉️ This is the original Sanskrit rendered in Gujarati script.
Pronunciation is identical to the Sanskrit Devanagari version.