Narayaniyam Dashaka 24 - Prahladacharitam — Tamil Script

ஹிரண்யாக்ஷே போத்ரிப்ரவரவபுஷா தேவ பவதா

ஹதே ஶோகக்ரோதக்லபிதத்ரு'திரேதஸ்ய ஸஹஜஃ ।

ஹிரண்யப்ராரம்பஃ கஶிபுரமராராதிஸதஸி

ப்ரதிஜ்ஞமாதேநே தவ கில வதார்தம் மதுரிபோ ॥1॥

விதாதாரம் கோரம் ஸ கலு தபஸித்வா நசிரதஃ

புரஃ ஸாக்ஷாத்குர்வந் ஸுரநரம்ரு'காத்யைரநிதநம் ।

வரம் லப்த்வா த்ரு'ப்தோ ஜகதிஹ பவந்நாயகமிதம்

பரிக்ஷுந்தந்நிந்த்ராதஹரத திவம் த்வாமகணயந் ॥2॥

நிஹந்தும் த்வாம் பூயஸ்தவ பதமவாப்தஸ்ய ச ரிபோ-

ர்பஹிர்த்ரு'ஷ்டேரந்தர்ததித ஹ்ரு'தயே ஸூக்ஷ்மவபுஷா ।

நதந்நுச்சைஸ்தத்ராப்யகிலபுவநாந்தே ச ம்ரு'கயந்

பியா யாதம் மத்வா ஸ கலு ஜிதகாஶீ நிவவ்ரு'தே ॥3॥

ததோऽஸ்ய ப்ரஹ்லாதஃ ஸமஜநி ஸுதோ கர்பவஸதௌ

முநேர்வீணாபாணேரதிகதபவத்பக்திமஹிமா ।

ஸ வை ஜாத்யா தைத்யஃ ஶிஶுரபி ஸமேத்ய த்வயி ரதிம்

கதஸ்த்வத்பக்தாநாம் வரத பரமோதாஹரணதாம் ॥4॥

ஸுராரீணாம் ஹாஸ்யம் தவ சரணதாஸ்யம் நிஜஸுதே

ஸ த்ரு'ஷ்ட்வா துஷ்டாத்மா குருபிரஶிஶிக்ஷச்சிரமமும் ।

குருப்ரோக்தம் சாஸாவிதமிதமபத்ராய த்ரு'டமி-

த்யபாகுர்வந் ஸர்வம் தவ சரணபக்த்யைவ வவ்ரு'தே ॥ 5 ॥

அதீதேஷு ஶ்ரேஷ்டம் கிமிதி பரிப்ரு'ஷ்டேऽத தநயே

பவத்பக்திம் வர்யாமபிகததி பர்யாகுலத்ரு'திஃ ।

குருப்யோ ரோஷித்வா ஸஹஜமதிரஸ்யேத்யபிவிதந்

வதோபாயாநஸ்மிந் வ்யதநுத பவத்பாதஶரணே ॥6॥

ஸ ஶூலைராவித்தஃ ஸுபஹு மதிதோ திக்கஜகணை-

ர்மஹாஸர்பைர்தஷ்டோऽப்யநஶநகராஹாரவிதுதஃ ।

கிரீந்த்ரவக்ஷிப்தோऽப்யஹஹ! பரமாத்மந்நயி விபோ

த்வயி ந்யஸ்தாத்மத்வாத் கிமபி ந நிபீடாமபஜத ॥7॥

ததஃ ஶங்காவிஷ்டஃ ஸ புநரதிதுஷ்டோऽஸ்ய ஜநகோ

குரூக்த்யா தத்கேஹே கில வருணபாஶைஸ்தமருணத் ।

குரோஶ்சாஸாந்நித்யே ஸ புநரநுகாந் தைத்யதநயாந்

பவத்பக்தேஸ்தத்த்வம் பரமமபி விஜ்ஞாநமஶிஷத் ॥8॥

பிதா ஶ்ரு'ண்வந் பாலப்ரகரமகிலம் த்வத்ஸ்துதிபரம்

ருஷாந்தஃ ப்ராஹைநம் குலஹதக கஸ்தே பலமிதி ।

பலம் மே வைகுண்டஸ்தவ ச ஜகதாம் சாபி ஸ பலம்

ஸ ஏவ த்ரைலோக்யம் ஸகலமிதி தீரோऽயமகதீத் ॥9॥

அரே க்வாஸௌ க்வாஸௌ ஸகலஜகதாத்மா ஹரிரிதி

ப்ரபிந்தே ஸ்ம ஸ்தம்பம் சலிதகரவாலோ திதிஸுதஃ ।

அதஃ பஶ்சாத்விஷ்ணோ ந ஹி வதிதுமீஶோऽஸ்மி ஸஹஸா

க்ரு'பாத்மந் விஶ்வாத்மந் பவநபுரவாஸிந் ம்ரு'டய மாம் ॥10॥

Roman (IAST) Transliteration

hiraṇyākṣe potripravaravapuṣā deva bhavatā

hate śokakrodhaglapitadhṛtiretasya sahajaḥ |

hiraṇyaprārambhaḥ kaśipuramarārātisadasi

pratijñamātene tava kila vadhārthaṃ madhuripo ||1||

vidhātāraṃ ghoraṃ sa khalu tapasitvā nacirataḥ

puraḥ sākṣātkurvan suranaramṛgādyairanidhanam |

varaṃ labdhvā dṛpto jagadiha bhavannāyakamidaṃ

parikṣundannindrādaharata divaṃ tvāmagaṇayan ||2||

nihantuṃ tvāṃ bhūyastava padamavāptasya ca ripo-

rbahirdṛṣṭerantardadhitha hṛdaye sūkṣmavapuṣā |

nadannuccaistatrāpyakhilabhuvanānte ca mṛgayan

bhiyā yātaṃ matvā sa khalu jitakāśī nivavṛte ||3||

tato'sya prahlādaḥ samajani suto garbhavasatau

munervīṇāpāṇeradhigatabhavadbhaktimahimā |

sa vai jātyā daityaḥ śiśurapi sametya tvayi ratiṃ

gatastvadbhaktānāṃ varada paramodāharaṇatām ||4||

surārīṇāṃ hāsyaṃ tava caraṇadāsyaṃ nijasute

sa dṛṣṭvā duṣṭātmā gurubhiraśiśikṣacciramamum |

guruproktaṃ cāsāvidamidamabhadrāya dṛḍhami-

tyapākurvan sarvaṃ tava caraṇabhaktyaiva vavṛdhe || 5 ||

adhīteṣu śreṣṭhaṃ kimiti paripṛṣṭe'tha tanaye

bhavadbhaktiṃ varyāmabhigadati paryākuladhṛtiḥ |

gurubhyo roṣitvā sahajamatirasyetyabhividan

vadhopāyānasmin vyatanuta bhavatpādaśaraṇe ||6||

sa śūlairāviddhaḥ subahu mathito diggajagaṇai-

rmahāsarpairdaṣṭo'pyanaśanagarāhāravidhutaḥ |

girīndravakṣipto'pyahaha! paramātmannayi vibho

tvayi nyastātmatvāt kimapi na nipīḍāmabhajata ||7||

tataḥ śaṅkāviṣṭaḥ sa punaratiduṣṭo'sya janako

gurūktyā tadgehe kila varuṇapāśaistamaruṇat |

guroścāsānnidhye sa punaranugān daityatanayān

bhavadbhaktestattvaṃ paramamapi vijñānamaśiṣat ||8||

pitā śṛṇvan bālaprakaramakhilaṃ tvatstutiparaṃ

ruṣāndhaḥ prāhainaṃ kulahataka kaste balamiti |

balaṃ me vaikuṇṭhastava ca jagatāṃ cāpi sa balaṃ

sa eva trailokyaṃ sakalamiti dhīro'yamagadīt ||9||

are kvāsau kvāsau sakalajagadātmā haririti

prabhinte sma stambhaṃ calitakaravālo ditisutaḥ |

ataḥ paścādviṣṇo na hi vaditumīśo'smi sahasā

kṛpātman viśvātman pavanapuravāsin mṛḍaya mām ||10||

Sanskrit — Devanagari (original)

हिरण्याक्षे पोत्रिप्रवरवपुषा देव भवता

हते शोकक्रोधग्लपितधृतिरेतस्य सहजः ।

हिरण्यप्रारम्भः कशिपुरमरारातिसदसि

प्रतिज्ञमातेने तव किल वधार्थं मधुरिपो ॥1॥

विधातारं घोरं स खलु तपसित्वा नचिरतः

पुरः साक्षात्कुर्वन् सुरनरमृगाद्यैरनिधनम् ।

वरं लब्ध्वा दृप्तो जगदिह भवन्नायकमिदं

परिक्षुन्दन्निन्द्रादहरत दिवं त्वामगणयन् ॥2॥

निहन्तुं त्वां भूयस्तव पदमवाप्तस्य च रिपो-

र्बहिर्दृष्टेरन्तर्दधिथ हृदये सूक्ष्मवपुषा ।

नदन्नुच्चैस्तत्राप्यखिलभुवनान्ते च मृगयन्

भिया यातं मत्वा स खलु जितकाशी निववृते ॥3॥

ततोऽस्य प्रह्लादः समजनि सुतो गर्भवसतौ

मुनेर्वीणापाणेरधिगतभवद्भक्तिमहिमा ।

स वै जात्या दैत्यः शिशुरपि समेत्य त्वयि रतिं

गतस्त्वद्भक्तानां वरद परमोदाहरणताम् ॥4॥

सुरारीणां हास्यं तव चरणदास्यं निजसुते

स दृष्ट्वा दुष्टात्मा गुरुभिरशिशिक्षच्चिरममुम् ।

गुरुप्रोक्तं चासाविदमिदमभद्राय दृढमि-

त्यपाकुर्वन् सर्वं तव चरणभक्त्यैव ववृधे ॥ 5 ॥

अधीतेषु श्रेष्ठं किमिति परिपृष्टेऽथ तनये

भवद्भक्तिं वर्यामभिगदति पर्याकुलधृतिः ।

गुरुभ्यो रोषित्वा सहजमतिरस्येत्यभिविदन्

वधोपायानस्मिन् व्यतनुत भवत्पादशरणे ॥6॥

स शूलैराविद्धः सुबहु मथितो दिग्गजगणै-

र्महासर्पैर्दष्टोऽप्यनशनगराहारविधुतः ।

गिरीन्द्रवक्षिप्तोऽप्यहह! परमात्मन्नयि विभो

त्वयि न्यस्तात्मत्वात् किमपि न निपीडामभजत ॥7॥

ततः शङ्काविष्टः स पुनरतिदुष्टोऽस्य जनको

गुरूक्त्या तद्गेहे किल वरुणपाशैस्तमरुणत् ।

गुरोश्चासान्निध्ये स पुनरनुगान् दैत्यतनयान्

भवद्भक्तेस्तत्त्वं परममपि विज्ञानमशिषत् ॥8॥

पिता शृण्वन् बालप्रकरमखिलं त्वत्स्तुतिपरं

रुषान्धः प्राहैनं कुलहतक कस्ते बलमिति ।

बलं मे वैकुण्ठस्तव च जगतां चापि स बलं

स एव त्रैलोक्यं सकलमिति धीरोऽयमगदीत् ॥9॥

अरे क्वासौ क्वासौ सकलजगदात्मा हरिरिति

प्रभिन्ते स्म स्तम्भं चलितकरवालो दितिसुतः ।

अतः पश्चाद्विष्णो न हि वदितुमीशोऽस्मि सहसा

कृपात्मन् विश्वात्मन् पवनपुरवासिन् मृडय माम् ॥10॥