Narayaniyam Dashaka 23 - Dakshacharitam Tatha Chitraketupakhyanam — Tamil Script

ப்ராசேதஸஸ்து பகவந்நபரோ ஹி தக்ஷ-

ஸ்த்வத்ஸேவநம் வ்யதித ஸர்கவிவ்ரு'த்திகாமஃ ।

ஆவிர்பபூவித ததா லஸதஷ்டபாஹு-

ஸ்தஸ்மை வரம் ததித தாம் ச வதூமஸிக்நீம் ॥1॥

தஸ்யாத்மஜாஸ்த்வயுதமீஶ புநஸ்ஸஹஸ்ரம்

ஶ்ரீநாரதஸ்ய வசஸா தவ மார்கமாபுஃ ।

நைகத்ரவாஸம்ரு'ஷயே ஸ முமோச ஶாபம்

பக்தோத்தமஸ்த்வ்ரு'ஷிரநுக்ரஹமேவ மேநே ॥2॥

ஷஷ்ட்யா ததோ துஹித்ரு'பிஃ ஸ்ரு'ஜதஃ குலௌகாந்

தௌஹித்ரஸூநுரத தஸ்ய ஸ விஶ்வரூபஃ ।

த்வத்ஸ்தோத்ரவர்மிதமஜாபயதிந்த்ரமாஜௌ

தேவ த்வதீயமஹிமா கலு ஸர்வஜைத்ரஃ ॥3॥

ப்ராக்ஶூரஸேநவிஷயே கில சித்ரகேதுஃ

புத்ராக்ரஹீ ந்ரு'பதிரங்கிரஸஃ ப்ரபாவாத் ।

லப்த்வைகபுத்ரமத தத்ர ஹதே ஸபத்நீ-

ஸங்கைரமுஹ்யதவஶஸ்தவ மாயயாஸௌ ॥4॥

தம் நாரதஸ்து ஸமமங்கிரஸா தயாலுஃ

ஸம்ப்ராப்ய தாவதுபதர்ஶ்ய ஸுதஸ்ய ஜீவம் ।

கஸ்யாஸ்மி புத்ர இதி தஸ்ய கிரா விமோஹம்

த்யக்த்வா த்வதர்சநவிதௌ ந்ரு'பதிம் ந்யயுங்க்த ॥5॥

ஸ்தோத்ரம் ச மந்த்ரமபி நாரததோऽத லப்த்வா

தோஷாய ஶேஷவபுஷோ நநு தே தபஸ்யந் ।

வித்யாதராதிபதிதாம் ஸ ஹி ஸப்தராத்ரே

லப்த்வாப்யகுண்டமதிரந்வபஜத்பவந்தம் ॥6॥

தஸ்மை ம்ரு'ணாலதவலேந ஸஹஸ்ரஶீர்ஷ்ணா

ரூபேண பத்தநுதிஸித்தகணாவ்ரு'தேந ।

ப்ராதுர்பவந்நசிரதோ நுதிபிஃ ப்ரஸந்நோ

தத்வாऽऽத்மதத்த்வமநுக்ரு'ஹ்ய திரோததாத ॥7॥

த்வத்பக்தமௌலிரத ஸோऽபி ச லக்ஷலக்ஷம்

வர்ஷாணி ஹர்ஷுலமநா புவநேஷு காமம் ।

ஸங்காபயந் குணகணம் தவ ஸுந்தரீபிஃ

ஸங்காதிரேகரஹிதோ லலிதம் சசார ॥8॥

அத்யந்தஸங்கவிலயாய பவத்ப்ரணுந்நோ

நூநம் ஸ ரூப்யகிரிமாப்ய மஹத்ஸமாஜே ।

நிஶ்ஶங்கமங்கக்ரு'தவல்லபமங்கஜாரிம்

தம் ஶங்கரம் பரிஹஸந்நுமயாபிஶேபே ॥9॥

நிஸ்ஸம்ப்ரமஸ்த்வயமயாசிதஶாபமோக்ஷோ

வ்ரு'த்ராஸுரத்வமுபகம்ய ஸுரேந்த்ரயோதீ ।

பக்த்யாத்மதத்த்வகதநைஃ ஸமரே விசித்ரம்

ஶத்ரோரபி ப்ரமமபாஸ்ய கதஃ பதம் தே ॥10॥

த்வத்ஸேவநேந திதிரிந்த்ரவதோத்யதாऽபி

தாந்ப்ரத்யுதேந்த்ரஸுஹ்ரு'தோ மருதோऽபிலேபே ।

துஷ்டாஶயேऽபி ஶுபதைவ பவந்நிஷேவா

தத்தாத்ரு'ஶஸ்த்வமவ மாம் பவநாலயேஶ ॥11॥

Roman (IAST) Transliteration

prācetasastu bhagavannaparo hi dakṣa-

stvatsevanaṃ vyadhita sargavivṛddhikāmaḥ |

āvirbabhūvitha tadā lasadaṣṭabāhu-

stasmai varaṃ daditha tāṃ ca vadhūmasiknīm ||1||

tasyātmajāstvayutamīśa punassahasraṃ

śrīnāradasya vacasā tava mārgamāpuḥ |

naikatravāsamṛṣaye sa mumoca śāpaṃ

bhaktottamastvṛṣiranugrahameva mene ||2||

ṣaṣṭyā tato duhitṛbhiḥ sṛjataḥ kulaughān

dauhitrasūnuratha tasya sa viśvarūpaḥ |

tvatstotravarmitamajāpayadindramājau

deva tvadīyamahimā khalu sarvajaitraḥ ||3||

prākśūrasenaviṣaye kila citraketuḥ

putrāgrahī nṛpatiraṅgirasaḥ prabhāvāt |

labdhvaikaputramatha tatra hate sapatnī-

saṅghairamuhyadavaśastava māyayāsau ||4||

taṃ nāradastu samamaṅgirasā dayāluḥ

samprāpya tāvadupadarśya sutasya jīvam |

kasyāsmi putra iti tasya girā vimohaṃ

tyaktvā tvadarcanavidhau nṛpatiṃ nyayuṅkta ||5||

stotraṃ ca mantramapi nāradato'tha labdhvā

toṣāya śeṣavapuṣo nanu te tapasyan |

vidyādharādhipatitāṃ sa hi saptarātre

labdhvāpyakuṇṭhamatiranvabhajadbhavantam ||6||

tasmai mṛṇāladhavalena sahasraśīrṣṇā

rūpeṇa baddhanutisiddhagaṇāvṛtena |

prādurbhavannacirato nutibhiḥ prasanno

datvā''tmatattvamanugṛhya tirodadhātha ||7||

tvadbhaktamauliratha so'pi ca lakṣalakṣaṃ

varṣāṇi harṣulamanā bhuvaneṣu kāmam |

saṅgāpayan guṇagaṇaṃ tava sundarībhiḥ

saṅgātirekarahito lalitaṃ cacāra ||8||

atyantasaṅgavilayāya bhavatpraṇunno

nūnaṃ sa rūpyagirimāpya mahatsamāje |

niśśaṅkamaṅkakṛtavallabhamaṅgajāriṃ

taṃ śaṅkaraṃ parihasannumayābhiśepe ||9||

nissambhramastvayamayācitaśāpamokṣo

vṛtrāsuratvamupagamya surendrayodhī |

bhaktyātmatattvakathanaiḥ samare vicitraṃ

śatrorapi bhramamapāsya gataḥ padaṃ te ||10||

tvatsevanena ditirindravadhodyatā'pi

tānpratyutendrasuhṛdo maruto'bhilebhe |

duṣṭāśaye'pi śubhadaiva bhavanniṣevā

tattādṛśastvamava māṃ pavanālayeśa ||11||

Sanskrit — Devanagari (original)

प्राचेतसस्तु भगवन्नपरो हि दक्ष-

स्त्वत्सेवनं व्यधित सर्गविवृद्धिकामः ।

आविर्बभूविथ तदा लसदष्टबाहु-

स्तस्मै वरं ददिथ तां च वधूमसिक्नीम् ॥1॥

तस्यात्मजास्त्वयुतमीश पुनस्सहस्रं

श्रीनारदस्य वचसा तव मार्गमापुः ।

नैकत्रवासमृषये स मुमोच शापं

भक्तोत्तमस्त्वृषिरनुग्रहमेव मेने ॥2॥

षष्ट्या ततो दुहितृभिः सृजतः कुलौघान्

दौहित्रसूनुरथ तस्य स विश्वरूपः ।

त्वत्स्तोत्रवर्मितमजापयदिन्द्रमाजौ

देव त्वदीयमहिमा खलु सर्वजैत्रः ॥3॥

प्राक्शूरसेनविषये किल चित्रकेतुः

पुत्राग्रही नृपतिरङ्गिरसः प्रभावात् ।

लब्ध्वैकपुत्रमथ तत्र हते सपत्नी-

सङ्घैरमुह्यदवशस्तव माययासौ ॥4॥

तं नारदस्तु सममङ्गिरसा दयालुः

सम्प्राप्य तावदुपदर्श्य सुतस्य जीवम् ।

कस्यास्मि पुत्र इति तस्य गिरा विमोहं

त्यक्त्वा त्वदर्चनविधौ नृपतिं न्ययुङ्क्त ॥5॥

स्तोत्रं च मन्त्रमपि नारदतोऽथ लब्ध्वा

तोषाय शेषवपुषो ननु ते तपस्यन् ।

विद्याधराधिपतितां स हि सप्तरात्रे

लब्ध्वाप्यकुण्ठमतिरन्वभजद्भवन्तम् ॥6॥

तस्मै मृणालधवलेन सहस्रशीर्ष्णा

रूपेण बद्धनुतिसिद्धगणावृतेन ।

प्रादुर्भवन्नचिरतो नुतिभिः प्रसन्नो

दत्वाऽऽत्मतत्त्वमनुगृह्य तिरोदधाथ ॥7॥

त्वद्भक्तमौलिरथ सोऽपि च लक्षलक्षं

वर्षाणि हर्षुलमना भुवनेषु कामम् ।

सङ्गापयन् गुणगणं तव सुन्दरीभिः

सङ्गातिरेकरहितो ललितं चचार ॥8॥

अत्यन्तसङ्गविलयाय भवत्प्रणुन्नो

नूनं स रूप्यगिरिमाप्य महत्समाजे ।

निश्शङ्कमङ्ककृतवल्लभमङ्गजारिं

तं शङ्करं परिहसन्नुमयाभिशेपे ॥9॥

निस्सम्भ्रमस्त्वयमयाचितशापमोक्षो

वृत्रासुरत्वमुपगम्य सुरेन्द्रयोधी ।

भक्त्यात्मतत्त्वकथनैः समरे विचित्रं

शत्रोरपि भ्रममपास्य गतः पदं ते ॥10॥

त्वत्सेवनेन दितिरिन्द्रवधोद्यताऽपि

तान्प्रत्युतेन्द्रसुहृदो मरुतोऽभिलेभे ।

दुष्टाशयेऽपि शुभदैव भवन्निषेवा

तत्तादृशस्त्वमव मां पवनालयेश ॥11॥