Narayaniyam Dashaka 61 - Viprapatnyanugraham — Tamil Script

ததஶ்ச வ்ரு'ந்தாவநதோऽதிதூரதோ

வநம் கதஸ்த்வம் கலு கோபகோகுலைஃ ।

ஹ்ரு'தந்தரே பக்ததரத்விஜாங்கநா-

கதம்பகாநுக்ரஹணாக்ரஹம் வஹந் ॥1॥

ததோ நிரீக்ஷ்யாஶரணே வநாந்தரே

கிஶோரலோகம் க்ஷுதிதம் த்ரு'ஷாகுலம் ।

அதூரதோ யஜ்ஞபராந் த்விஜாந் ப்ரதி

வ்யஸர்ஜயோ தீதிவியாசநாய தாந் ॥2॥

கதேஷ்வதோ தேஷ்வபிதாய தேऽபிதாம்

குமாரகேஷ்வோதநயாசிஷு ப்ரபோ ।

ஶ்ருதிஸ்திரா அப்யபிநிந்யுரஶ்ருதிம்

ந கிஞ்சிதூசுஶ்ச மஹீஸுரோத்தமாஃ ॥3॥

அநாதராத் கிந்நதியோ ஹி பாலகாஃ ।

ஸமாயயுர்யுக்தமிதம் ஹி யஜ்வஸு ।

சிராதபக்தாஃ கலு தே மஹீஸுராஃ

கதம் ஹி பக்தம் த்வயி தைஃ ஸமர்ப்யதே ॥4॥

நிவேதயத்வம் க்ரு'ஹிணீஜநாய மாம்

திஶேயுரந்நம் கருணாகுலா இமாஃ ।

இதி ஸ்மிதார்த்ரம் பவதேரிதா கதா-

ஸ்தே தாரகா தாரஜநம் யயாசிரே ॥5॥

க்ரு'ஹீதநாம்நி த்வயி ஸம்ப்ரமாகுலா-

ஶ்சதுர்விதம் போஜ்யரஸம் ப்ரக்ரு'ஹ்ய தாஃ ।

சிரந்த்ரு'தத்வத்ப்ரவிலோகநாக்ரஹாஃ

ஸ்வகைர்நிருத்தா அபி தூர்ணமாயயுஃ ॥6॥

விலோலபிஞ்சம் சிகுரே கபோலயோஃ

ஸமுல்லஸத்குண்டலமார்த்ரமீக்ஷிதே ।

நிதாய பாஹும் ஸுஹ்ரு'தம்ஸஸீமநி

ஸ்திதம் பவந்தம் ஸமலோகயந்த தாஃ ॥7॥

ததா ச காசித்த்வதுபாகமோத்யதா

க்ரு'ஹீதஹஸ்தா தயிதேந யஜ்வநா ।

ததைவ ஸஞ்சிந்த்ய பவந்தமஞ்ஜஸா

விவேஶ கைவல்யமஹோ க்ரு'திந்யஸௌ ॥8॥

ஆதாய போஜ்யாந்யநுக்ரு'ஹ்ய தாஃ புந-

ஸ்த்வதங்கஸங்கஸ்ப்ரு'ஹயோஜ்சதீர்க்ரு'ஹம் ।

விலோக்ய யஜ்ஞாய விஸர்ஜயந்நிமா-

ஶ்சகர்த பர்த்ரு'நபி தாஸ்வகர்ஹணாந் ॥9॥

நிரூப்ய தோஷம் நிஜமங்கநாஜநே

விலோக்ய பக்திம் ச புநர்விசாரிபிஃ

ப்ரபுத்ததத்த்வைஸ்த்வமபிஷ்டுதோ த்விஜை-

ர்மருத்புராதீஶ நிருந்தி மே கதாந் ॥10॥

Roman (IAST) Transliteration

tataśca vṛndāvanato'tidūrato

vanaṃ gatastvaṃ khalu gopagokulaiḥ |

hṛdantare bhaktataradvijāṅganā-

kadambakānugrahaṇāgrahaṃ vahan ||1||

tato nirīkṣyāśaraṇe vanāntare

kiśoralokaṃ kṣudhitaṃ tṛṣākulam |

adūrato yajñaparān dvijān prati

vyasarjayo dīdiviyācanāya tān ||2||

gateṣvatho teṣvabhidhāya te'bhidhāṃ

kumārakeṣvodanayāciṣu prabho |

śrutisthirā apyabhininyuraśrutiṃ

na kiñcidūcuśca mahīsurottamāḥ ||3||

anādarāt khinnadhiyo hi bālakāḥ |

samāyayuryuktamidaṃ hi yajvasu |

cirādabhaktāḥ khalu te mahīsurāḥ

kathaṃ hi bhaktaṃ tvayi taiḥ samarpyate ||4||

nivedayadhvaṃ gṛhiṇījanāya māṃ

diśeyurannaṃ karuṇākulā imāḥ |

iti smitārdraṃ bhavateritā gatā-

ste dārakā dārajanaṃ yayācire ||5||

gṛhītanāmni tvayi sambhramākulā-

ścaturvidhaṃ bhojyarasaṃ pragṛhya tāḥ |

cirandhṛtatvatpravilokanāgrahāḥ

svakairniruddhā api tūrṇamāyayuḥ ||6||

vilolapiñchaṃ cikure kapolayoḥ

samullasatkuṇḍalamārdramīkṣite |

nidhāya bāhuṃ suhṛdaṃsasīmani

sthitaṃ bhavantaṃ samalokayanta tāḥ ||7||

tadā ca kācittvadupāgamodyatā

gṛhītahastā dayitena yajvanā |

tadaiva sañcintya bhavantamañjasā

viveśa kaivalyamaho kṛtinyasau ||8||

ādāya bhojyānyanugṛhya tāḥ puna-

stvadaṅgasaṅgaspṛhayojjhatīrgṛham |

vilokya yajñāya visarjayannimā-

ścakartha bhartṛnapi tāsvagarhaṇān ||9||

nirūpya doṣaṃ nijamaṅganājane

vilokya bhaktiṃ ca punarvicāribhiḥ

prabuddhatattvaistvamabhiṣṭuto dvijai-

rmarutpurādhīśa nirundhi me gadān ||10||

Sanskrit — Devanagari (original)

ततश्च वृन्दावनतोऽतिदूरतो

वनं गतस्त्वं खलु गोपगोकुलैः ।

हृदन्तरे भक्ततरद्विजाङ्गना-

कदम्बकानुग्रहणाग्रहं वहन् ॥1॥

ततो निरीक्ष्याशरणे वनान्तरे

किशोरलोकं क्षुधितं तृषाकुलम् ।

अदूरतो यज्ञपरान् द्विजान् प्रति

व्यसर्जयो दीदिवियाचनाय तान् ॥2॥

गतेष्वथो तेष्वभिधाय तेऽभिधां

कुमारकेष्वोदनयाचिषु प्रभो ।

श्रुतिस्थिरा अप्यभिनिन्युरश्रुतिं

न किञ्चिदूचुश्च महीसुरोत्तमाः ॥3॥

अनादरात् खिन्नधियो हि बालकाः ।

समाययुर्युक्तमिदं हि यज्वसु ।

चिरादभक्ताः खलु ते महीसुराः

कथं हि भक्तं त्वयि तैः समर्प्यते ॥4॥

निवेदयध्वं गृहिणीजनाय मां

दिशेयुरन्नं करुणाकुला इमाः ।

इति स्मितार्द्रं भवतेरिता गता-

स्ते दारका दारजनं ययाचिरे ॥5॥

गृहीतनाम्नि त्वयि सम्भ्रमाकुला-

श्चतुर्विधं भोज्यरसं प्रगृह्य ताः ।

चिरन्धृतत्वत्प्रविलोकनाग्रहाः

स्वकैर्निरुद्धा अपि तूर्णमाययुः ॥6॥

विलोलपिञ्छं चिकुरे कपोलयोः

समुल्लसत्कुण्डलमार्द्रमीक्षिते ।

निधाय बाहुं सुहृदंससीमनि

स्थितं भवन्तं समलोकयन्त ताः ॥7॥

तदा च काचित्त्वदुपागमोद्यता

गृहीतहस्ता दयितेन यज्वना ।

तदैव सञ्चिन्त्य भवन्तमञ्जसा

विवेश कैवल्यमहो कृतिन्यसौ ॥8॥

आदाय भोज्यान्यनुगृह्य ताः पुन-

स्त्वदङ्गसङ्गस्पृहयोज्झतीर्गृहम् ।

विलोक्य यज्ञाय विसर्जयन्निमा-

श्चकर्थ भर्तृनपि तास्वगर्हणान् ॥9॥

निरूप्य दोषं निजमङ्गनाजने

विलोक्य भक्तिं च पुनर्विचारिभिः

प्रबुद्धतत्त्वैस्त्वमभिष्टुतो द्विजै-

र्मरुत्पुराधीश निरुन्धि मे गदान् ॥10॥