Narayaniyam Dashaka 48 - Nalakubara-manigrivayoh Shapamoksham — Tamil Script

முதா ஸுரௌகைஸ்த்வமுதாரஸம்மதை-

ருதீர்ய தாமோதர இத்யபிஷ்டுதஃ ।

ம்ரு'துதரஃ ஸ்வைரமுலூகலே லக-

ந்நதூரதோ த்வௌ ககுபாவுதைக்ஷதாஃ ॥1॥

குபேரஸூநுர்நலகூபராபிதஃ

பரோ மணிக்ரீவ இதி ப்ரதாம் கதஃ ।

மஹேஶஸேவாதிகதஶ்ரியோந்மதௌ

சிரம் கில த்வத்விமுகாவகேலதாம் ॥2॥

ஸுராபகாயாம் கில தௌ மதோத்கடௌ

ஸுராபகாயத்பஹுயௌவதாவ்ரு'தௌ ।

விவாஸஸௌ கேலிபரௌ ஸ நாரதோ

பவத்பதைகப்ரவணோ நிரைக்ஷத ॥3॥

பியா ப்ரியாலோகமுபாத்தவாஸஸம்

புரோ நிரீக்ஷ்யாபி மதாந்தசேதஸௌ ।

இமௌ பவத்பக்த்யுபஶாந்திஸித்தயே

முநிர்ஜகௌ ஶாந்திம்ரு'தே குதஃ ஸுகம் ॥4॥

யுவாமவாப்தௌ ககுபாத்மதாம் சிரம்

ஹரிம் நிரீக்ஷ்யாத பதம் ஸ்வமாப்நுதம் ।

இதீரேதௌ தௌ பவதீக்ஷணஸ்ப்ரு'ஹாம்

கதௌ வ்ரஜாந்தே ககுபௌ பபூவதுஃ ॥5॥

அதந்த்ரமிந்த்ரத்ருயுகம் ததாவிதம்

ஸமேயுஷா மந்தரகாமிநா த்வயா ।

திராயிதோலூகலரோதநிர்துதௌ

சிராய ஜீர்ணௌ பரிபாதிதௌ தரூ ॥6॥

அபாஜி ஶாகித்விதயம் யதா த்வயா

ததைவ தத்கர்பதலாந்நிரேயுஷா ।

மஹாத்விஷா யக்ஷயுகேந தத்க்ஷணா-

தபாஜி கோவிந்த பவாநபி ஸ்தவைஃ ॥7॥

இஹாந்யபக்தோऽபி ஸமேஷ்யதி க்ரமாத்

பவந்தமேதௌ கலு ருத்ரஸேவகௌ ।

முநிப்ரஸாதாத்பவ்தங்க்ரிமாகதௌ

கதௌ வ்ரு'ணாநௌ கலு பக்திமுத்தமாம் ॥8॥

ததஸ்தரூத்தாரணதாருணாரவ-

ப்ரகம்பிஸம்பாதிநி கோபமண்டலே ।

விலஜ்ஜிதத்வஜ்ஜநநீமுகேக்ஷிணா

வ்யமோக்ஷி நந்தேந பவாந் விமோக்ஷதஃ ॥9॥

மஹீருஹோர்மத்யகதோ பதார்பகோ

ஹரேஃ ப்ரபாவாதபரிக்ஷதோऽதுநா ।

இதி ப்ருவாணைர்கமிதோ க்ரு'ஹம் பவாந்

மருத்புராதீஶ்வர பாஹி மாம் கதாத் ॥10॥

Roman (IAST) Transliteration

mudā suraughaistvamudārasammadai-

rudīrya dāmodara ityabhiṣṭutaḥ |

mṛdudaraḥ svairamulūkhale laga-

nnadūrato dvau kakubhāvudaikṣathāḥ ||1||

kuberasūnurnalakūbarābhidhaḥ

paro maṇigrīva iti prathāṃ gataḥ |

maheśasevādhigataśriyonmadau

ciraṃ kila tvadvimukhāvakhelatām ||2||

surāpagāyāṃ kila tau madotkaṭau

surāpagāyadbahuyauvatāvṛtau |

vivāsasau keliparau sa nārado

bhavatpadaikapravaṇo niraikṣata ||3||

bhiyā priyālokamupāttavāsasaṃ

puro nirīkṣyāpi madāndhacetasau |

imau bhavadbhaktyupaśāntisiddhaye

munirjagau śāntimṛte kutaḥ sukham ||4||

yuvāmavāptau kakubhātmatāṃ ciraṃ

hariṃ nirīkṣyātha padaṃ svamāpnutam |

itīretau tau bhavadīkṣaṇaspṛhāṃ

gatau vrajānte kakubhau babhūvatuḥ ||5||

atandramindradruyugaṃ tathāvidhaṃ

sameyuṣā mantharagāminā tvayā |

tirāyitolūkhalarodhanirdhutau

cirāya jīrṇau paripātitau tarū ||6||

abhāji śākhidvitayaṃ yadā tvayā

tadaiva tadgarbhatalānnireyuṣā |

mahātviṣā yakṣayugena tatkṣaṇā-

dabhāji govinda bhavānapi stavaiḥ ||7||

ihānyabhakto'pi sameṣyati kramāt

bhavantametau khalu rudrasevakau |

muniprasādādbhavdaṅghrimāgatau

gatau vṛṇānau khalu bhaktimuttamām ||8||

tatastarūddāraṇadāruṇārava-

prakampisampātini gopamaṇḍale |

vilajjitatvajjananīmukhekṣiṇā

vyamokṣi nandena bhavān vimokṣadaḥ ||9||

mahīruhormadhyagato batārbhako

hareḥ prabhāvādaparikṣato'dhunā |

iti bruvāṇairgamito gṛhaṃ bhavān

marutpurādhīśvara pāhi māṃ gadāt ||10||

Sanskrit — Devanagari (original)

मुदा सुरौघैस्त्वमुदारसम्मदै-

रुदीर्य दामोदर इत्यभिष्टुतः ।

मृदुदरः स्वैरमुलूखले लग-

न्नदूरतो द्वौ ककुभावुदैक्षथाः ॥1॥

कुबेरसूनुर्नलकूबराभिधः

परो मणिग्रीव इति प्रथां गतः ।

महेशसेवाधिगतश्रियोन्मदौ

चिरं किल त्वद्विमुखावखेलताम् ॥2॥

सुरापगायां किल तौ मदोत्कटौ

सुरापगायद्बहुयौवतावृतौ ।

विवाससौ केलिपरौ स नारदो

भवत्पदैकप्रवणो निरैक्षत ॥3॥

भिया प्रियालोकमुपात्तवाससं

पुरो निरीक्ष्यापि मदान्धचेतसौ ।

इमौ भवद्भक्त्युपशान्तिसिद्धये

मुनिर्जगौ शान्तिमृते कुतः सुखम् ॥4॥

युवामवाप्तौ ककुभात्मतां चिरं

हरिं निरीक्ष्याथ पदं स्वमाप्नुतम् ।

इतीरेतौ तौ भवदीक्षणस्पृहां

गतौ व्रजान्ते ककुभौ बभूवतुः ॥5॥

अतन्द्रमिन्द्रद्रुयुगं तथाविधं

समेयुषा मन्थरगामिना त्वया ।

तिरायितोलूखलरोधनिर्धुतौ

चिराय जीर्णौ परिपातितौ तरू ॥6॥

अभाजि शाखिद्वितयं यदा त्वया

तदैव तद्गर्भतलान्निरेयुषा ।

महात्विषा यक्षयुगेन तत्क्षणा-

दभाजि गोविन्द भवानपि स्तवैः ॥7॥

इहान्यभक्तोऽपि समेष्यति क्रमात्

भवन्तमेतौ खलु रुद्रसेवकौ ।

मुनिप्रसादाद्भव्दङ्घ्रिमागतौ

गतौ वृणानौ खलु भक्तिमुत्तमाम् ॥8॥

ततस्तरूद्दारणदारुणारव-

प्रकम्पिसम्पातिनि गोपमण्डले ।

विलज्जितत्वज्जननीमुखेक्षिणा

व्यमोक्षि नन्देन भवान् विमोक्षदः ॥9॥

महीरुहोर्मध्यगतो बतार्भको

हरेः प्रभावादपरिक्षतोऽधुना ।

इति ब्रुवाणैर्गमितो गृहं भवान्

मरुत्पुराधीश्वर पाहि मां गदात् ॥10॥