Narayaniyam Dashaka 48 - Nalakubara-manigrivayoh Shapamoksham — Kannada Script

ಮುದಾ ಸುರೌಘೈಸ್ತ್ವಮುದಾರಸಮ್ಮದೈ-

ರುದೀರ್ಯ ದಾಮೋದರ ಇತ್ಯಭಿಷ್ಟುತಃ ।

ಮೃದುದರಃ ಸ್ವೈರಮುಲೂಖಲೇ ಲಗ-

ನ್ನದೂರತೋ ದ್ವೌ ಕಕುಭಾವುದೈಕ್ಷಥಾಃ ॥1॥

ಕುಬೇರಸೂನುರ್ನಲಕೂಬರಾಭಿಧಃ

ಪರೋ ಮಣಿಗ್ರೀವ ಇತಿ ಪ್ರಥಾಂ ಗತಃ ।

ಮಹೇಶಸೇವಾಧಿಗತಶ್ರಿಯೋನ್ಮದೌ

ಚಿರಂ ಕಿಲ ತ್ವದ್ವಿಮುಖಾವಖೇಲತಾಮ್ ॥2॥

ಸುರಾಪಗಾಯಾಂ ಕಿಲ ತೌ ಮದೋತ್ಕಟೌ

ಸುರಾಪಗಾಯದ್ಬಹುಯೌವತಾವೃತೌ ।

ವಿವಾಸಸೌ ಕೇಲಿಪರೌ ಸ ನಾರದೋ

ಭವತ್ಪದೈಕಪ್ರವಣೋ ನಿರೈಕ್ಷತ ॥3॥

ಭಿಯಾ ಪ್ರಿಯಾಲೋಕಮುಪಾತ್ತವಾಸಸಂ

ಪುರೋ ನಿರೀಕ್ಷ್ಯಾಪಿ ಮದಾನ್ಧಚೇತಸೌ ।

ಇಮೌ ಭವದ್ಭಕ್ತ್ಯುಪಶಾನ್ತಿಸಿದ್ಧಯೇ

ಮುನಿರ್ಜಗೌ ಶಾನ್ತಿಮೃತೇ ಕುತಃ ಸುಖಮ್ ॥4॥

ಯುವಾಮವಾಪ್ತೌ ಕಕುಭಾತ್ಮತಾಂ ಚಿರಂ

ಹರಿಂ ನಿರೀಕ್ಷ್ಯಾಥ ಪದಂ ಸ್ವಮಾಪ್ನುತಮ್ ।

ಇತೀರೇತೌ ತೌ ಭವದೀಕ್ಷಣಸ್ಪೃಹಾಂ

ಗತೌ ವ್ರಜಾನ್ತೇ ಕಕುಭೌ ಬಭೂವತುಃ ॥5॥

ಅತನ್ದ್ರಮಿನ್ದ್ರದ್ರುಯುಗಂ ತಥಾವಿಧಂ

ಸಮೇಯುಷಾ ಮನ್ಥರಗಾಮಿನಾ ತ್ವಯಾ ।

ತಿರಾಯಿತೋಲೂಖಲರೋಧನಿರ್ಧುತೌ

ಚಿರಾಯ ಜೀರ್ಣೌ ಪರಿಪಾತಿತೌ ತರೂ ॥6॥

ಅಭಾಜಿ ಶಾಖಿದ್ವಿತಯಂ ಯದಾ ತ್ವಯಾ

ತದೈವ ತದ್ಗರ್ಭತಲಾನ್ನಿರೇಯುಷಾ ।

ಮಹಾತ್ವಿಷಾ ಯಕ್ಷಯುಗೇನ ತತ್ಕ್ಷಣಾ-

ದಭಾಜಿ ಗೋವಿನ್ದ ಭವಾನಪಿ ಸ್ತವೈಃ ॥7॥

ಇಹಾನ್ಯಭಕ್ತೋಽಪಿ ಸಮೇಷ್ಯತಿ ಕ್ರಮಾತ್

ಭವನ್ತಮೇತೌ ಖಲು ರುದ್ರಸೇವಕೌ ।

ಮುನಿಪ್ರಸಾದಾದ್ಭವ್ದಙ್ಘ್ರಿಮಾಗತೌ

ಗತೌ ವೃಣಾನೌ ಖಲು ಭಕ್ತಿಮುತ್ತಮಾಮ್ ॥8॥

ತತಸ್ತರೂದ್ದಾರಣದಾರುಣಾರವ-

ಪ್ರಕಮ್ಪಿಸಮ್ಪಾತಿನಿ ಗೋಪಮಣ್ಡಲೇ ।

ವಿಲಜ್ಜಿತತ್ವಜ್ಜನನೀಮುಖೇಕ್ಷಿಣಾ

ವ್ಯಮೋಕ್ಷಿ ನನ್ದೇನ ಭವಾನ್ ವಿಮೋಕ್ಷದಃ ॥9॥

ಮಹೀರುಹೋರ್ಮಧ್ಯಗತೋ ಬತಾರ್ಭಕೋ

ಹರೇಃ ಪ್ರಭಾವಾದಪರಿಕ್ಷತೋಽಧುನಾ ।

ಇತಿ ಬ್ರುವಾಣೈರ್ಗಮಿತೋ ಗೃಹಂ ಭವಾನ್

ಮರುತ್ಪುರಾಧೀಶ್ವರ ಪಾಹಿ ಮಾಂ ಗದಾತ್ ॥10॥

Roman (IAST) Transliteration

mudā suraughaistvamudārasammadai-

rudīrya dāmodara ityabhiṣṭutaḥ |

mṛdudaraḥ svairamulūkhale laga-

nnadūrato dvau kakubhāvudaikṣathāḥ ||1||

kuberasūnurnalakūbarābhidhaḥ

paro maṇigrīva iti prathāṃ gataḥ |

maheśasevādhigataśriyonmadau

ciraṃ kila tvadvimukhāvakhelatām ||2||

surāpagāyāṃ kila tau madotkaṭau

surāpagāyadbahuyauvatāvṛtau |

vivāsasau keliparau sa nārado

bhavatpadaikapravaṇo niraikṣata ||3||

bhiyā priyālokamupāttavāsasaṃ

puro nirīkṣyāpi madāndhacetasau |

imau bhavadbhaktyupaśāntisiddhaye

munirjagau śāntimṛte kutaḥ sukham ||4||

yuvāmavāptau kakubhātmatāṃ ciraṃ

hariṃ nirīkṣyātha padaṃ svamāpnutam |

itīretau tau bhavadīkṣaṇaspṛhāṃ

gatau vrajānte kakubhau babhūvatuḥ ||5||

atandramindradruyugaṃ tathāvidhaṃ

sameyuṣā mantharagāminā tvayā |

tirāyitolūkhalarodhanirdhutau

cirāya jīrṇau paripātitau tarū ||6||

abhāji śākhidvitayaṃ yadā tvayā

tadaiva tadgarbhatalānnireyuṣā |

mahātviṣā yakṣayugena tatkṣaṇā-

dabhāji govinda bhavānapi stavaiḥ ||7||

ihānyabhakto'pi sameṣyati kramāt

bhavantametau khalu rudrasevakau |

muniprasādādbhavdaṅghrimāgatau

gatau vṛṇānau khalu bhaktimuttamām ||8||

tatastarūddāraṇadāruṇārava-

prakampisampātini gopamaṇḍale |

vilajjitatvajjananīmukhekṣiṇā

vyamokṣi nandena bhavān vimokṣadaḥ ||9||

mahīruhormadhyagato batārbhako

hareḥ prabhāvādaparikṣato'dhunā |

iti bruvāṇairgamito gṛhaṃ bhavān

marutpurādhīśvara pāhi māṃ gadāt ||10||

Sanskrit — Devanagari (original)

मुदा सुरौघैस्त्वमुदारसम्मदै-

रुदीर्य दामोदर इत्यभिष्टुतः ।

मृदुदरः स्वैरमुलूखले लग-

न्नदूरतो द्वौ ककुभावुदैक्षथाः ॥1॥

कुबेरसूनुर्नलकूबराभिधः

परो मणिग्रीव इति प्रथां गतः ।

महेशसेवाधिगतश्रियोन्मदौ

चिरं किल त्वद्विमुखावखेलताम् ॥2॥

सुरापगायां किल तौ मदोत्कटौ

सुरापगायद्बहुयौवतावृतौ ।

विवाससौ केलिपरौ स नारदो

भवत्पदैकप्रवणो निरैक्षत ॥3॥

भिया प्रियालोकमुपात्तवाससं

पुरो निरीक्ष्यापि मदान्धचेतसौ ।

इमौ भवद्भक्त्युपशान्तिसिद्धये

मुनिर्जगौ शान्तिमृते कुतः सुखम् ॥4॥

युवामवाप्तौ ककुभात्मतां चिरं

हरिं निरीक्ष्याथ पदं स्वमाप्नुतम् ।

इतीरेतौ तौ भवदीक्षणस्पृहां

गतौ व्रजान्ते ककुभौ बभूवतुः ॥5॥

अतन्द्रमिन्द्रद्रुयुगं तथाविधं

समेयुषा मन्थरगामिना त्वया ।

तिरायितोलूखलरोधनिर्धुतौ

चिराय जीर्णौ परिपातितौ तरू ॥6॥

अभाजि शाखिद्वितयं यदा त्वया

तदैव तद्गर्भतलान्निरेयुषा ।

महात्विषा यक्षयुगेन तत्क्षणा-

दभाजि गोविन्द भवानपि स्तवैः ॥7॥

इहान्यभक्तोऽपि समेष्यति क्रमात्

भवन्तमेतौ खलु रुद्रसेवकौ ।

मुनिप्रसादाद्भव्दङ्घ्रिमागतौ

गतौ वृणानौ खलु भक्तिमुत्तमाम् ॥8॥

ततस्तरूद्दारणदारुणारव-

प्रकम्पिसम्पातिनि गोपमण्डले ।

विलज्जितत्वज्जननीमुखेक्षिणा

व्यमोक्षि नन्देन भवान् विमोक्षदः ॥9॥

महीरुहोर्मध्यगतो बतार्भको

हरेः प्रभावादपरिक्षतोऽधुना ।

इति ब्रुवाणैर्गमितो गृहं भवान्

मरुत्पुराधीश्वर पाहि मां गदात् ॥10॥