Narayaniyam Dashaka 72 - Akruragokulayatra — Tamil Script

கம்ஸோऽத நாரதகிரா வ்ரஜவாஸிநம் த்வா-

மாகர்ண்ய தீர்ணஹ்ரு'தயஃ ஸ ஹி காந்திநேயம் ।

ஆஹூய கார்முகமகச்சலதோ பவந்த-

மாநேதுமேநமஹிநோதஹிநாதஶாயிந் ॥1॥

அக்ரூர ஏஷ பவதங்க்ரிபரஶ்சிராய

த்வத்தர்ஶநாக்ஷமமநாஃ க்ஷிதிபாலபீத்யா ।

தஸ்யாஜ்ஞயைவ புநரீக்ஷிதுமுத்யதஸ்த்வா-

மாநந்தபாரமதிபூரிதரம் பபார ॥2॥

ஸோऽயம் ரதேந ஸுக்ரு'தீ பவதோ நிவாஸம்

கச்சந் மநோரதகணாம்ஸ்த்வயி தார்யமாணாந் ।

ஆஸ்வாதயந் முஹுரபாயபயேந தைவம்

ஸம்ப்ரார்தயந் பதி ந கிஞ்சிதபி வ்யஜாநாத் ॥3॥

த்ரக்ஷ்யாமி வேதஶதகீதகதிம் புமாம்ஸம்

ஸ்ப்ரக்ஷ்யாமி கிம்ஸ்விதபி நாம பரிஷ்வஜேயம் ।

கிம் வக்ஷ்யதே ஸ கலு மாம் க்வநு வீக்ஷிதஃ ஸ்யா-

தித்தம் நிநாய ஸ பவந்மயமேவ மார்கம் ॥4॥

பூயஃ க்ரமாதபிவிஶந் பவதங்க்ரிபூதம்

வ்ரு'ந்தாவநம் ஹரவிரிஞ்சஸுராபிவந்த்யம் ।

ஆநந்தமக்ந இவ லக்ந இவ ப்ரமோஹே

கிம் கிம் தஶாந்தரமவாப ந பங்கஜாக்ஷ ॥5॥

பஶ்யந்நவந்தத பவத்விஹ்ரு'திஸ்தலாநி

பாம்ஸுஷ்வவேஷ்டத பவச்சரணாங்கிதேஷு ।

கிம் ப்ரூமஹே பஹுஜநா ஹி ததாபி ஜாதா

ஏவம் து பக்திதரலா விரலாஃ பராத்மந் ॥6॥

ஸாயம் ஸ கோபபவநாநி பவச்சரித்ர-

கீதாம்ரு'தப்ரஸ்ரு'தகர்ணரஸாயநாநி ।

பஶ்யந் ப்ரமோதஸரிதேவ கிலோஹ்யமாநோ

கச்சந் பவத்பவநஸந்நிதிமந்வயாஸீத் ॥7॥

தாவத்ததர்ஶ பஶுதோஹவிலோகலோலம்

பக்தோத்தமாகதிமிவ ப்ரதிபாலயந்தம் ।

பூமந் பவந்தமயமக்ரஜவந்தமந்த-

ர்ப்ரஹ்மாநுபூதிரஸஸிந்துமிவோத்வமந்தம் ॥8॥

ஸாயந்தநாப்லவவிஶேஷவிவிக்தகாத்ரௌ

த்வௌ பீதநீலருசிராம்பரலோபநீயௌ ।

நாதிப்ரபஞ்சத்ரு'தபூஷணசாருவேஷௌ

மந்தஸ்மிதார்த்ரவதநௌ ஸ யுவாம் ததர்ஶ ॥9॥

தூராத்ரதாத்ஸமவருஹ்ய நமந்தமேந-

முத்தாப்ய பக்தகுலமௌலிமதோபகூஹந் ।

ஹர்ஷாந்மிதாக்ஷரகிரா குஶலாநுயோகீ

பாணிம் ப்ரக்ரு'ஹ்ய ஸபலோऽத க்ரு'ஹம் நிநேத ॥10॥

நந்தேந ஸாகமமிதாதரமர்சயித்வா

தம் யாதவம் ததுதிதாம் நிஶமய்ய வார்தாம் ।

கோபேஷு பூபதிநிதேஶகதாம் நிவேத்ய

நாநாகதாபிரிஹ தேந நிஶாமநைஷீஃ ॥11॥

சந்த்ராக்ரு'ஹே கிமுத சந்த்ரபகாக்ரு'ஹே நு

ராதாக்ரு'ஹே நு பவநே கிமு மைத்ரவிந்தே ।

தூர்தோ விலம்பத இதி ப்ரமதாபிருச்சை-

ராஶங்கிதோ நிஶி மருத்புரநாத பாயாஃ ॥12॥

Roman (IAST) Transliteration

kaṃso'tha nāradagirā vrajavāsinaṃ tvā-

mākarṇya dīrṇahṛdayaḥ sa hi gāndineyam |

āhūya kārmukamakhacchalato bhavanta-

mānetumenamahinodahināthaśāyin ||1||

akrūra eṣa bhavadaṅghriparaścirāya

tvaddarśanākṣamamanāḥ kṣitipālabhītyā |

tasyājñayaiva punarīkṣitumudyatastvā-

mānandabhāramatibhūritaraṃ babhāra ||2||

so'yaṃ rathena sukṛtī bhavato nivāsaṃ

gacchan manorathagaṇāṃstvayi dhāryamāṇān |

āsvādayan muhurapāyabhayena daivaṃ

samprārthayan pathi na kiñcidapi vyajānāt ||3||

drakṣyāmi vedaśatagītagatiṃ pumāṃsaṃ

sprakṣyāmi kiṃsvidapi nāma pariṣvajeyam |

kiṃ vakṣyate sa khalu māṃ kvanu vīkṣitaḥ syā-

ditthaṃ nināya sa bhavanmayameva mārgam ||4||

bhūyaḥ kramādabhiviśan bhavadaṅghripūtaṃ

vṛndāvanaṃ haraviriñcasurābhivandyam |

ānandamagna iva lagna iva pramohe

kiṃ kiṃ daśāntaramavāpa na paṅkajākṣa ||5||

paśyannavandata bhavadvihṛtisthalāni

pāṃsuṣvaveṣṭata bhavaccaraṇāṅkiteṣu |

kiṃ brūmahe bahujanā hi tadāpi jātā

evaṃ tu bhaktitaralā viralāḥ parātman ||6||

sāyaṃ sa gopabhavanāni bhavaccaritra-

gītāmṛtaprasṛtakarṇarasāyanāni |

paśyan pramodasariteva kilohyamāno

gacchan bhavadbhavanasannidhimanvayāsīt ||7||

tāvaddadarśa paśudohavilokalolaṃ

bhaktottamāgatimiva pratipālayantam |

bhūman bhavantamayamagrajavantamanta-

rbrahmānubhūtirasasindhumivodvamantam ||8||

sāyantanāplavaviśeṣaviviktagātrau

dvau pītanīlarucirāmbaralobhanīyau |

nātiprapañcadhṛtabhūṣaṇacāruveṣau

mandasmitārdravadanau sa yuvāṃ dadarśa ||9||

dūrādrathātsamavaruhya namantamena-

mutthāpya bhaktakulamaulimathopagūhan |

harṣānmitākṣaragirā kuśalānuyogī

pāṇiṃ pragṛhya sabalo'tha gṛhaṃ ninetha ||10||

nandena sākamamitādaramarcayitvā

taṃ yādavaṃ taduditāṃ niśamayya vārtām |

gopeṣu bhūpatinideśakathāṃ nivedya

nānākathābhiriha tena niśāmanaiṣīḥ ||11||

candrāgṛhe kimuta candrabhagāgṛhe nu

rādhāgṛhe nu bhavane kimu maitravinde |

dhūrto vilambata iti pramadābhiruccai-

rāśaṅkito niśi marutpuranātha pāyāḥ ||12||

Sanskrit — Devanagari (original)

कंसोऽथ नारदगिरा व्रजवासिनं त्वा-

माकर्ण्य दीर्णहृदयः स हि गान्दिनेयम् ।

आहूय कार्मुकमखच्छलतो भवन्त-

मानेतुमेनमहिनोदहिनाथशायिन् ॥1॥

अक्रूर एष भवदङ्घ्रिपरश्चिराय

त्वद्दर्शनाक्षममनाः क्षितिपालभीत्या ।

तस्याज्ञयैव पुनरीक्षितुमुद्यतस्त्वा-

मानन्दभारमतिभूरितरं बभार ॥2॥

सोऽयं रथेन सुकृती भवतो निवासं

गच्छन् मनोरथगणांस्त्वयि धार्यमाणान् ।

आस्वादयन् मुहुरपायभयेन दैवं

सम्प्रार्थयन् पथि न किञ्चिदपि व्यजानात् ॥3॥

द्रक्ष्यामि वेदशतगीतगतिं पुमांसं

स्प्रक्ष्यामि किंस्विदपि नाम परिष्वजेयम् ।

किं वक्ष्यते स खलु मां क्वनु वीक्षितः स्या-

दित्थं निनाय स भवन्मयमेव मार्गम् ॥4॥

भूयः क्रमादभिविशन् भवदङ्घ्रिपूतं

वृन्दावनं हरविरिञ्चसुराभिवन्द्यम् ।

आनन्दमग्न इव लग्न इव प्रमोहे

किं किं दशान्तरमवाप न पङ्कजाक्ष ॥5॥

पश्यन्नवन्दत भवद्विहृतिस्थलानि

पांसुष्ववेष्टत भवच्चरणाङ्कितेषु ।

किं ब्रूमहे बहुजना हि तदापि जाता

एवं तु भक्तितरला विरलाः परात्मन् ॥6॥

सायं स गोपभवनानि भवच्चरित्र-

गीतामृतप्रसृतकर्णरसायनानि ।

पश्यन् प्रमोदसरितेव किलोह्यमानो

गच्छन् भवद्भवनसन्निधिमन्वयासीत् ॥7॥

तावद्ददर्श पशुदोहविलोकलोलं

भक्तोत्तमागतिमिव प्रतिपालयन्तम् ।

भूमन् भवन्तमयमग्रजवन्तमन्त-

र्ब्रह्मानुभूतिरससिन्धुमिवोद्वमन्तम् ॥8॥

सायन्तनाप्लवविशेषविविक्तगात्रौ

द्वौ पीतनीलरुचिराम्बरलोभनीयौ ।

नातिप्रपञ्चधृतभूषणचारुवेषौ

मन्दस्मितार्द्रवदनौ स युवां ददर्श ॥9॥

दूराद्रथात्समवरुह्य नमन्तमेन-

मुत्थाप्य भक्तकुलमौलिमथोपगूहन् ।

हर्षान्मिताक्षरगिरा कुशलानुयोगी

पाणिं प्रगृह्य सबलोऽथ गृहं निनेथ ॥10॥

नन्देन साकममितादरमर्चयित्वा

तं यादवं तदुदितां निशमय्य वार्ताम् ।

गोपेषु भूपतिनिदेशकथां निवेद्य

नानाकथाभिरिह तेन निशामनैषीः ॥11॥

चन्द्रागृहे किमुत चन्द्रभगागृहे नु

राधागृहे नु भवने किमु मैत्रविन्दे ।

धूर्तो विलम्बत इति प्रमदाभिरुच्चै-

राशङ्कितो निशि मरुत्पुरनाथ पायाः ॥12॥