Narayaniyam Dashaka 9 - Brahmanah Tapah Tatha Lokasrishtih — Oriya Script

ସ୍ଥିତସ୍ସ କମଲୋଦ୍ଭଵସ୍ତଵ ହି ନାଭିପଙ୍କେରୁହେ

କୁତଃ ସ୍ଵିଦିଦମମ୍ବୁଧାଵୁଦିତମିତ୍ଯନାଲୋକଯନ୍ ।

ତଦୀକ୍ଷଣକୁତୂହଲାତ୍ ପ୍ରତିଦିଶଂ ଵିଵୃତ୍ତାନନ-

ଶ୍ଚତୁର୍ଵଦନତାମଗାଦ୍ଵିକସଦଷ୍ଟଦୃଷ୍ଟ୍ଯମ୍ବୁଜାମ୍ ॥1॥

ମହାର୍ଣଵଵିଘୂର୍ଣିତଂ କମଲମେଵ ତତ୍କେଵଲଂ

ଵିଲୋକ୍ଯ ତଦୁପାଶ୍ରଯଂ ତଵ ତନୁଂ ତୁ ନାଲୋକଯନ୍ ।

କ ଏଷ କମଲୋଦରେ ମହତି ନିସ୍ସହାଯୋ ହ୍ଯହଂ

କୁତଃ ସ୍ଵିଦିଦମ୍ବୁଜଂ ସମଜନୀତି ଚିନ୍ତାମଗାତ୍ ॥2॥

ଅମୁଷ୍ଯ ହି ସରୋରୁହଃ କିମପି କାରଣଂ ସମ୍ଭ୍ଵେ-

ଦିତି ସ୍ମ କୃତନିଶ୍ଚଯସ୍ସ ଖଲୁ ନାଲରନ୍ଧ୍ରାଧ୍ଵନା ।

ସ୍ଵଯୋଗବଲଵିଦ୍ଯଯା ସମଵରୂଢଵାନ୍ ପ୍ରୌଢଧୀ -

ସ୍ତ୍ଵଦୀଯମତିମୋହନଂ ନ ତୁ କଲେଵରଂ ଦୃଷ୍ଟଵାନ୍ ॥3॥

ତତଃ ସକଲନାଲିକାଵିଵରମାର୍ଗଗୋ ମାର୍ଗଯନ୍

ପ୍ରଯସ୍ଯ ଶତଵତ୍ସରଂ କିମପି ନୈଵ ସନ୍ଦୃଷ୍ଟଵାନ୍ ।

ନିଵୃତ୍ଯ କମଲୋଦରେ ସୁଖନିଷଣ୍ଣ ଏକାଗ୍ରଧୀଃ

ସମାଧିବଲମାଦଧେ ଭଵଦନୁଗ୍ରହୈକାଗ୍ରହୀ ॥4॥

ଶତେନ ପରିଵତ୍ସରୈର୍ଦୃଢସମାଧିବନ୍ଧୋଲ୍ଲସତ୍-

ପ୍ରବୋଧଵିଶଦୀକୃତଃ ସ ଖଲୁ ପଦ୍ମିନୀସମ୍ଭଵଃ ।

ଅଦୃଷ୍ଟଚରମଦ୍ଭୁତଂ ତଵ ହି ରୂପମନ୍ତର୍ଦୃଶା

ଵ୍ଯଚଷ୍ଟ ପରିତୁଷ୍ଟଧୀର୍ଭୁଜଗଭୋଗଭାଗାଶ୍ରଯମ୍ ॥5॥

କିରୀଟମୁକୁଟୋଲ୍ଲସତ୍କଟକହାରକେଯୂରଯୁଙ୍-

ମଣିସ୍ଫୁରିତମେଖଲଂ ସୁପରିଵୀତପୀତାମ୍ବରମ୍ ।

କଲାଯକୁସୁମପ୍ରଭଂ ଗଲତଲୋଲ୍ଲସତ୍କୌସ୍ତୁଭଂ

ଵପୁସ୍ତଦଯି ଭାଵଯେ କମଲଜନ୍ମେ ଦର୍ଶିତମ୍ ॥6॥

ଶ୍ରୁତିପ୍ରକରଦର୍ଶିତପ୍ରଚୁରଵୈଭଵ ଶ୍ରୀପତେ

ହରେ ଜଯ ଜଯ ପ୍ରଭୋ ପଦମୁପୈଷି ଦିଷ୍ଟ୍ଯା ଦୃଶୋଃ ।

କୁରୁଷ୍ଵ ଧିଯମାଶୁ ମେ ଭୁଵନନିର୍ମିତୌ କର୍ମଠା-

ମିତି ଦ୍ରୁହିଣଵର୍ଣିତସ୍ଵଗୁଣବଂହିମା ପାହି ମାମ୍ ॥7॥

ଲଭସ୍ଵ ଭୁଵନତ୍ରଯୀରଚନଦକ୍ଷତାମକ୍ଷତାଂ

ଗୃହାଣ ମଦନୁଗ୍ରହଂ କୁରୁ ତପଶ୍ଚ ଭୂଯୋ ଵିଧେ ।

ଭଵତ୍ଵଖିଲସାଧନୀ ମଯି ଚ ଭକ୍ତିରତ୍ଯୁତ୍କଟେ-

ତ୍ଯୁଦୀର୍ଯ ଗିରମାଦଧା ମୁଦିତଚେତସଂ ଵେଧସମ୍ ॥8॥

ଶତଂ କୃତତପାସ୍ତତଃ ସ ଖଲୁ ଦିଵ୍ଯସଂଵତ୍ସରା-

ନଵାପ୍ଯ ଚ ତପୋବଲଂ ମତିବଲଂ ଚ ପୂର୍ଵାଧିକମ୍ ।

ଉଦୀକ୍ଷ୍ଯ କିଲ କମ୍ପିତଂ ପଯସି ପଙ୍କଜଂ ଵାଯୁନା

ଭଵଦ୍ବଲଵିଜୃମ୍ଭିତଃ ପଵନପାଥସୀ ପୀତଵାନ୍ ॥9॥

ତଵୈଵ କୃପଯା ପୁନସ୍ସରସିଜେନ ତେନୈଵ ସଃ

ପ୍ରକଲ୍ପ୍ଯ ଭୁଵନତ୍ରଯୀଂ ପ୍ରଵଵୃତେ ପ୍ରଜାନିର୍ମିତୌ ।

ତଥାଵିଧକୃପାଭରୋ ଗୁରୁମରୁତ୍ପୁରାଧୀଶ୍ଵର

ତ୍ଵମାଶୁ ପରିପାହି ମାଂ ଗୁରୁଦଯୋକ୍ଷିତୈରୀକ୍ଷିତୈଃ ॥10॥

Roman (IAST) Transliteration

sthitassa kamalodbhavastava hi nābhipaṅkeruhe

kutaḥ svididamambudhāvuditamityanālokayan |

tadīkṣaṇakutūhalāt pratidiśaṃ vivṛttānana-

ścaturvadanatāmagādvikasadaṣṭadṛṣṭyambujām ||1||

mahārṇavavighūrṇitaṃ kamalameva tatkevalaṃ

vilokya tadupāśrayaṃ tava tanuṃ tu nālokayan |

ka eṣa kamalodare mahati nissahāyo hyahaṃ

kutaḥ svididambujaṃ samajanīti cintāmagāt ||2||

amuṣya hi saroruhaḥ kimapi kāraṇaṃ sambhve-

diti sma kṛtaniścayassa khalu nālarandhrādhvanā |

svayogabalavidyayā samavarūḍhavān prauḍhadhī -

stvadīyamatimohanaṃ na tu kalevaraṃ dṛṣṭavān ||3||

tataḥ sakalanālikāvivaramārgago mārgayan

prayasya śatavatsaraṃ kimapi naiva sandṛṣṭavān |

nivṛtya kamalodare sukhaniṣaṇṇa ekāgradhīḥ

samādhibalamādadhe bhavadanugrahaikāgrahī ||4||

śatena parivatsarairdṛḍhasamādhibandhollasat-

prabodhaviśadīkṛtaḥ sa khalu padminīsambhavaḥ |

adṛṣṭacaramadbhutaṃ tava hi rūpamantardṛśā

vyacaṣṭa parituṣṭadhīrbhujagabhogabhāgāśrayam ||5||

kirīṭamukuṭollasatkaṭakahārakeyūrayuṅ-

maṇisphuritamekhalaṃ suparivītapītāmbaram |

kalāyakusumaprabhaṃ galatalollasatkaustubhaṃ

vapustadayi bhāvaye kamalajanme darśitam ||6||

śrutiprakaradarśitapracuravaibhava śrīpate

hare jaya jaya prabho padamupaiṣi diṣṭyā dṛśoḥ |

kuruṣva dhiyamāśu me bhuvananirmitau karmaṭhā-

miti druhiṇavarṇitasvaguṇabaṃhimā pāhi mām ||7||

labhasva bhuvanatrayīracanadakṣatāmakṣatāṃ

gṛhāṇa madanugrahaṃ kuru tapaśca bhūyo vidhe |

bhavatvakhilasādhanī mayi ca bhaktiratyutkaṭe-

tyudīrya giramādadhā muditacetasaṃ vedhasam ||8||

śataṃ kṛtatapāstataḥ sa khalu divyasaṃvatsarā-

navāpya ca tapobalaṃ matibalaṃ ca pūrvādhikam |

udīkṣya kila kampitaṃ payasi paṅkajaṃ vāyunā

bhavadbalavijṛmbhitaḥ pavanapāthasī pītavān ||9||

tavaiva kṛpayā punassarasijena tenaiva saḥ

prakalpya bhuvanatrayīṃ pravavṛte prajānirmitau |

tathāvidhakṛpābharo gurumarutpurādhīśvara

tvamāśu paripāhi māṃ gurudayokṣitairīkṣitaiḥ ||10||

Sanskrit — Devanagari (original)

स्थितस्स कमलोद्भवस्तव हि नाभिपङ्केरुहे

कुतः स्विदिदमम्बुधावुदितमित्यनालोकयन् ।

तदीक्षणकुतूहलात् प्रतिदिशं विवृत्तानन-

श्चतुर्वदनतामगाद्विकसदष्टदृष्ट्यम्बुजाम् ॥1॥

महार्णवविघूर्णितं कमलमेव तत्केवलं

विलोक्य तदुपाश्रयं तव तनुं तु नालोकयन् ।

क एष कमलोदरे महति निस्सहायो ह्यहं

कुतः स्विदिदम्बुजं समजनीति चिन्तामगात् ॥2॥

अमुष्य हि सरोरुहः किमपि कारणं सम्भ्वे-

दिति स्म कृतनिश्चयस्स खलु नालरन्ध्राध्वना ।

स्वयोगबलविद्यया समवरूढवान् प्रौढधी -

स्त्वदीयमतिमोहनं न तु कलेवरं दृष्टवान् ॥3॥

ततः सकलनालिकाविवरमार्गगो मार्गयन्

प्रयस्य शतवत्सरं किमपि नैव सन्दृष्टवान् ।

निवृत्य कमलोदरे सुखनिषण्ण एकाग्रधीः

समाधिबलमादधे भवदनुग्रहैकाग्रही ॥4॥

शतेन परिवत्सरैर्दृढसमाधिबन्धोल्लसत्-

प्रबोधविशदीकृतः स खलु पद्मिनीसम्भवः ।

अदृष्टचरमद्भुतं तव हि रूपमन्तर्दृशा

व्यचष्ट परितुष्टधीर्भुजगभोगभागाश्रयम् ॥5॥

किरीटमुकुटोल्लसत्कटकहारकेयूरयुङ्-

मणिस्फुरितमेखलं सुपरिवीतपीताम्बरम् ।

कलायकुसुमप्रभं गलतलोल्लसत्कौस्तुभं

वपुस्तदयि भावये कमलजन्मे दर्शितम् ॥6॥

श्रुतिप्रकरदर्शितप्रचुरवैभव श्रीपते

हरे जय जय प्रभो पदमुपैषि दिष्ट्या दृशोः ।

कुरुष्व धियमाशु मे भुवननिर्मितौ कर्मठा-

मिति द्रुहिणवर्णितस्वगुणबंहिमा पाहि माम् ॥7॥

लभस्व भुवनत्रयीरचनदक्षतामक्षतां

गृहाण मदनुग्रहं कुरु तपश्च भूयो विधे ।

भवत्वखिलसाधनी मयि च भक्तिरत्युत्कटे-

त्युदीर्य गिरमादधा मुदितचेतसं वेधसम् ॥8॥

शतं कृततपास्ततः स खलु दिव्यसंवत्सरा-

नवाप्य च तपोबलं मतिबलं च पूर्वाधिकम् ।

उदीक्ष्य किल कम्पितं पयसि पङ्कजं वायुना

भवद्बलविजृम्भितः पवनपाथसी पीतवान् ॥9॥

तवैव कृपया पुनस्सरसिजेन तेनैव सः

प्रकल्प्य भुवनत्रयीं प्रववृते प्रजानिर्मितौ ।

तथाविधकृपाभरो गुरुमरुत्पुराधीश्वर

त्वमाशु परिपाहि मां गुरुदयोक्षितैरीक्षितैः ॥10॥