କଦାପି ଜନ୍ମର୍କ୍ଷଦିନେ ତଵ ପ୍ରଭୋ ନିମନ୍ତ୍ରିତଜ୍ଞାତିଵଧୂମହୀସୁରା ।
ମହାନସସ୍ତ୍ଵାଂ ସଵିଧେ ନିଧାଯ ସା ମହାନସାଦୌ ଵଵୃତେ ଵ୍ରଜେଶ୍ଵରୀ ॥1॥
ତତୋ ଭଵତ୍ତ୍ରାଣନିଯୁକ୍ତବାଲକପ୍ରଭୀତିସଙ୍କ୍ରନ୍ଦନସଙ୍କୁଲାରଵୈଃ ।
ଵିମିଶ୍ରମଶ୍ରାଵି ଭଵତ୍ସମୀପତଃ ପରିସ୍ଫୁଟଦ୍ଦାରୁଚଟଚ୍ଚଟାରଵଃ ॥2॥
ତତସ୍ତଦାକର୍ଣନସମ୍ଭ୍ରମଶ୍ରମପ୍ରକମ୍ପିଵକ୍ଷୋଜଭରା ଵ୍ରଜାଙ୍ଗନାଃ ।
ଭଵନ୍ତମନ୍ତର୍ଦଦୃଶୁସ୍ସମନ୍ତତୋ ଵିନିଷ୍ପତଦ୍ଦାରୁଣଦାରୁମଧ୍ଯଗମ୍ ॥3॥
ଶିଶୋରହୋ କିଂ କିମଭୂଦିତି ଦ୍ରୁତଂ ପ୍ରଧାଵ୍ଯ ନନ୍ଦଃ ପଶୁପାଶ୍ଚ ଭୂସୁରାଃ ।
ଭଵନ୍ତମାଲୋକ୍ଯ ଯଶୋଦଯା ଧୃତଂ ସମାଶ୍ଵସନ୍ନଶ୍ରୁଜଲାର୍ଦ୍ରଲୋଚନାଃ ॥4॥
କସ୍କୋ ନୁ କୌତସ୍କୁତ ଏଷ ଵିସ୍ମଯୋ ଵିଶଙ୍କଟଂ ଯଚ୍ଛକଟଂ ଵିପାଟିତମ୍ ।
ନ କାରଣଂ କିଞ୍ଚିଦିହେତି ତେ ସ୍ଥିତାଃ ସ୍ଵନାସିକାଦତ୍ତକରାସ୍ତ୍ଵଦୀକ୍ଷକାଃ ॥5॥
କୁମାରକସ୍ଯାସ୍ଯ ପଯୋଧରାର୍ଥିନଃ ପ୍ରରୋଦନେ ଲୋଲପଦାମ୍ବୁଜାହତମ୍ ।
ମଯା ମଯା ଦୃଷ୍ଟମନୋ ଵିପର୍ଯଗାଦିତୀଶ ତେ ପାଲକବାଲକା ଜଗୁଃ ॥6॥
ଭିଯା ତଦା କିଞ୍ଚିଦଜାନତାମିଦଂ କୁମାରକାଣାମତିଦୁର୍ଘଟଂ ଵଚଃ ।
ଭଵତ୍ପ୍ରଭାଵାଵିଦୁରୈରିତୀରିତଂ ମନାଗିଵାଶଙ୍କ୍ଯତ ଦୃଷ୍ଟପୂତନୈଃ ॥7॥
ପ୍ରଵାଲତାମ୍ରଂ କିମିଦଂ ପଦଂ କ୍ଷତଂ ସରୋଜରମ୍ଯୌ ନୁ କରୌ ଵିରୋଜିତୌ।
ଇତି ପ୍ରସର୍ପତ୍କରୁଣାତରଙ୍ଗିତାସ୍ତ୍ଵଦଙ୍ଗମାପସ୍ପୃଶୁରଙ୍ଗନାଜନାଃ ॥8॥
ଅଯେ ସୁତଂ ଦେହି ଜଗତ୍ପତେଃ କୃପାତରଙ୍ଗପାତାତ୍ପରିପାତମଦ୍ଯ ମେ ।
ଇତି ସ୍ମ ସଙ୍ଗୃହ୍ଯ ପିତା ତ୍ଵଦଙ୍ଗକଂ ମୁହୁର୍ମୁହୁଃ ଶ୍ଲିଷ୍ଯତି ଜାତକଣ୍ଟକଃ ॥9॥
ଅନୋନିଲୀନଃ କିଲ ହନ୍ତୁମାଗତଃ ସୁରାରିରେଵଂ ଭଵତା ଵିହିଂସିତଃ ।
ରଜୋଽପି ନୋ ଦୃଷ୍ଟମମୁଷ୍ଯ ତତ୍କଥଂ ସ ଶୁଦ୍ଧସତ୍ତ୍ଵେ ତ୍ଵଯି ଲୀନଵାନ୍ ଧ୍ରୁଵମ୍ ॥10॥
ପ୍ରପୂଜିତୈସ୍ତତ୍ର ତତୋ ଦ୍ଵିଜାତିଭିର୍ଵିଶେଷତୋ ଲମ୍ଭିତମଙ୍ଗଲାଶିଷଃ ।
ଵ୍ରଜଂ ନିଜୈର୍ବାଲ୍ଯରସୈର୍ଵିମୋହଯନ୍ ମରୁତ୍ପୁରାଧୀଶ ରୁଜାଂ ଜହୀହି ମେ ॥11॥
Roman (IAST) Transliteration
kadāpi janmarkṣadine tava prabho nimantritajñātivadhūmahīsurā |
mahānasastvāṃ savidhe nidhāya sā mahānasādau vavṛte vrajeśvarī ||1||
tato bhavattrāṇaniyuktabālakaprabhītisaṅkrandanasaṅkulāravaiḥ |
vimiśramaśrāvi bhavatsamīpataḥ parisphuṭaddārucaṭaccaṭāravaḥ ||2||
tatastadākarṇanasambhramaśramaprakampivakṣojabharā vrajāṅganāḥ |
bhavantamantardadṛśussamantato viniṣpataddāruṇadārumadhyagam ||3||
śiśoraho kiṃ kimabhūditi drutaṃ pradhāvya nandaḥ paśupāśca bhūsurāḥ |
bhavantamālokya yaśodayā dhṛtaṃ samāśvasannaśrujalārdralocanāḥ ||4||
kasko nu kautaskuta eṣa vismayo viśaṅkaṭaṃ yacchakaṭaṃ vipāṭitam |
na kāraṇaṃ kiñcidiheti te sthitāḥ svanāsikādattakarāstvadīkṣakāḥ ||5||
kumārakasyāsya payodharārthinaḥ prarodane lolapadāmbujāhatam |
mayā mayā dṛṣṭamano viparyagāditīśa te pālakabālakā jaguḥ ||6||
bhiyā tadā kiñcidajānatāmidaṃ kumārakāṇāmatidurghaṭaṃ vacaḥ |
bhavatprabhāvāvidurairitīritaṃ manāgivāśaṅkyata dṛṣṭapūtanaiḥ ||7||
pravālatāmraṃ kimidaṃ padaṃ kṣataṃ sarojaramyau nu karau virojitau|
iti prasarpatkaruṇātaraṅgitāstvadaṅgamāpaspṛśuraṅganājanāḥ ||8||
aye sutaṃ dehi jagatpateḥ kṛpātaraṅgapātātparipātamadya me |
iti sma saṅgṛhya pitā tvadaṅgakaṃ muhurmuhuḥ śliṣyati jātakaṇṭakaḥ ||9||
anonilīnaḥ kila hantumāgataḥ surārirevaṃ bhavatā vihiṃsitaḥ |
rajo'pi no dṛṣṭamamuṣya tatkathaṃ sa śuddhasattve tvayi līnavān dhruvam ||10||
prapūjitaistatra tato dvijātibhirviśeṣato lambhitamaṅgalāśiṣaḥ |
vrajaṃ nijairbālyarasairvimohayan marutpurādhīśa rujāṃ jahīhi me ||11||
Sanskrit — Devanagari (original)
कदापि जन्मर्क्षदिने तव प्रभो निमन्त्रितज्ञातिवधूमहीसुरा ।
महानसस्त्वां सविधे निधाय सा महानसादौ ववृते व्रजेश्वरी ॥1॥
ततो भवत्त्राणनियुक्तबालकप्रभीतिसङ्क्रन्दनसङ्कुलारवैः ।
विमिश्रमश्रावि भवत्समीपतः परिस्फुटद्दारुचटच्चटारवः ॥2॥
ततस्तदाकर्णनसम्भ्रमश्रमप्रकम्पिवक्षोजभरा व्रजाङ्गनाः ।
भवन्तमन्तर्ददृशुस्समन्ततो विनिष्पतद्दारुणदारुमध्यगम् ॥3॥
शिशोरहो किं किमभूदिति द्रुतं प्रधाव्य नन्दः पशुपाश्च भूसुराः ।
भवन्तमालोक्य यशोदया धृतं समाश्वसन्नश्रुजलार्द्रलोचनाः ॥4॥
कस्को नु कौतस्कुत एष विस्मयो विशङ्कटं यच्छकटं विपाटितम् ।
न कारणं किञ्चिदिहेति ते स्थिताः स्वनासिकादत्तकरास्त्वदीक्षकाः ॥5॥
कुमारकस्यास्य पयोधरार्थिनः प्ररोदने लोलपदाम्बुजाहतम् ।
मया मया दृष्टमनो विपर्यगादितीश ते पालकबालका जगुः ॥6॥
भिया तदा किञ्चिदजानतामिदं कुमारकाणामतिदुर्घटं वचः ।
भवत्प्रभावाविदुरैरितीरितं मनागिवाशङ्क्यत दृष्टपूतनैः ॥7॥
प्रवालताम्रं किमिदं पदं क्षतं सरोजरम्यौ नु करौ विरोजितौ।
इति प्रसर्पत्करुणातरङ्गितास्त्वदङ्गमापस्पृशुरङ्गनाजनाः ॥8॥
अये सुतं देहि जगत्पतेः कृपातरङ्गपातात्परिपातमद्य मे ।
इति स्म सङ्गृह्य पिता त्वदङ्गकं मुहुर्मुहुः श्लिष्यति जातकण्टकः ॥9॥
अनोनिलीनः किल हन्तुमागतः सुरारिरेवं भवता विहिंसितः ।
रजोऽपि नो दृष्टममुष्य तत्कथं स शुद्धसत्त्वे त्वयि लीनवान् ध्रुवम् ॥10॥
प्रपूजितैस्तत्र ततो द्विजातिभिर्विशेषतो लम्भितमङ्गलाशिषः ।
व्रजं निजैर्बाल्यरसैर्विमोहयन् मरुत्पुराधीश रुजां जहीहि मे ॥11॥
kadāpi janmarkṣadine tava prabho nimantritajñātivadhūmahīsurā |
mahānasastvāṃ savidhe nidhāya sā mahānasādau vavṛte vrajeśvarī ||1||
tato bhavattrāṇaniyuktabālakaprabhītisaṅkrandanasaṅkulāravaiḥ |
vimiśramaśrāvi bhavatsamīpataḥ parisphuṭaddārucaṭaccaṭāravaḥ ||2||
tatastadākarṇanasambhramaśramaprakampivakṣojabharā vrajāṅganāḥ |
bhavantamantardadṛśussamantato viniṣpataddāruṇadārumadhyagam ||3||
śiśoraho kiṃ kimabhūditi drutaṃ pradhāvya nandaḥ paśupāśca bhūsurāḥ |
bhavantamālokya yaśodayā dhṛtaṃ samāśvasannaśrujalārdralocanāḥ ||4||
kasko nu kautaskuta eṣa vismayo viśaṅkaṭaṃ yacchakaṭaṃ vipāṭitam |
na kāraṇaṃ kiñcidiheti te sthitāḥ svanāsikādattakarāstvadīkṣakāḥ ||5||
kumārakasyāsya payodharārthinaḥ prarodane lolapadāmbujāhatam |
mayā mayā dṛṣṭamano viparyagāditīśa te pālakabālakā jaguḥ ||6||
bhiyā tadā kiñcidajānatāmidaṃ kumārakāṇāmatidurghaṭaṃ vacaḥ |
bhavatprabhāvāvidurairitīritaṃ manāgivāśaṅkyata dṛṣṭapūtanaiḥ ||7||
pravālatāmraṃ kimidaṃ padaṃ kṣataṃ sarojaramyau nu karau virojitau|
iti prasarpatkaruṇātaraṅgitāstvadaṅgamāpaspṛśuraṅganājanāḥ ||8||
aye sutaṃ dehi jagatpateḥ kṛpātaraṅgapātātparipātamadya me |
iti sma saṅgṛhya pitā tvadaṅgakaṃ muhurmuhuḥ śliṣyati jātakaṇṭakaḥ ||9||
anonilīnaḥ kila hantumāgataḥ surārirevaṃ bhavatā vihiṃsitaḥ |
rajo'pi no dṛṣṭamamuṣya tatkathaṃ sa śuddhasattve tvayi līnavān dhruvam ||10||
prapūjitaistatra tato dvijātibhirviśeṣato lambhitamaṅgalāśiṣaḥ |
vrajaṃ nijairbālyarasairvimohayan marutpurādhīśa rujāṃ jahīhi me ||11||
🕉️ This is the original Sanskrit rendered in Oriya script.
Pronunciation is identical to the Sanskrit Devanagari version.