𑌕𑌦𑌾𑌪𑌿 𑌜𑌨𑍍𑌮𑌰𑍍𑌕𑍍𑌷𑌦𑌿𑌨𑍇 𑌤𑌵 𑌪𑍍𑌰𑌭𑍋 𑌨𑌿𑌮𑌨𑍍𑌤𑍍𑌰𑌿𑌤𑌜𑍍𑌞𑌾𑌤𑌿𑌵𑌧𑍂𑌮𑌹𑍀𑌸𑍁𑌰𑌾 ।
𑌮𑌹𑌾𑌨𑌸𑌸𑍍𑌤𑍍𑌵𑌾𑌂 𑌸𑌵𑌿𑌧𑍇 𑌨𑌿𑌧𑌾𑌯 𑌸𑌾 𑌮𑌹𑌾𑌨𑌸𑌾𑌦𑍗 𑌵𑌵𑍃𑌤𑍇 𑌵𑍍𑌰𑌜𑍇𑌶𑍍𑌵𑌰𑍀 ॥1॥
𑌤𑌤𑍋 𑌭𑌵𑌤𑍍𑌤𑍍𑌰𑌾𑌣𑌨𑌿𑌯𑍁𑌕𑍍𑌤𑌬𑌾𑌲𑌕𑌪𑍍𑌰𑌭𑍀𑌤𑌿𑌸𑌙𑍍𑌕𑍍𑌰𑌨𑍍𑌦𑌨𑌸𑌙𑍍𑌕𑍁𑌲𑌾𑌰𑌵𑍈𑌃 ।
𑌵𑌿𑌮𑌿𑌶𑍍𑌰𑌮𑌶𑍍𑌰𑌾𑌵𑌿 𑌭𑌵𑌤𑍍𑌸𑌮𑍀𑌪𑌤𑌃 𑌪𑌰𑌿𑌸𑍍𑌫𑍁𑌟𑌦𑍍𑌦𑌾𑌰𑍁𑌚𑌟𑌚𑍍𑌚𑌟𑌾𑌰𑌵𑌃 ॥2॥
𑌤𑌤𑌸𑍍𑌤𑌦𑌾𑌕𑌰𑍍𑌣𑌨𑌸𑌮𑍍𑌭𑍍𑌰𑌮𑌶𑍍𑌰𑌮𑌪𑍍𑌰𑌕𑌮𑍍𑌪𑌿𑌵𑌕𑍍𑌷𑍋𑌜𑌭𑌰𑌾 𑌵𑍍𑌰𑌜𑌾𑌙𑍍𑌗𑌨𑌾𑌃 ।
𑌭𑌵𑌨𑍍𑌤𑌮𑌨𑍍𑌤𑌰𑍍𑌦𑌦𑍃𑌶𑍁𑌸𑍍𑌸𑌮𑌨𑍍𑌤𑌤𑍋 𑌵𑌿𑌨𑌿𑌷𑍍𑌪𑌤𑌦𑍍𑌦𑌾𑌰𑍁𑌣𑌦𑌾𑌰𑍁𑌮𑌧𑍍𑌯𑌗𑌮𑍍 ॥3॥
𑌶𑌿𑌶𑍋𑌰𑌹𑍋 𑌕𑌿𑌂 𑌕𑌿𑌮𑌭𑍂𑌦𑌿𑌤𑌿 𑌦𑍍𑌰𑍁𑌤𑌂 𑌪𑍍𑌰𑌧𑌾𑌵𑍍𑌯 𑌨𑌨𑍍𑌦𑌃 𑌪𑌶𑍁𑌪𑌾𑌶𑍍𑌚 𑌭𑍂𑌸𑍁𑌰𑌾𑌃 ।
𑌭𑌵𑌨𑍍𑌤𑌮𑌾𑌲𑍋𑌕𑍍𑌯 𑌯𑌶𑍋𑌦𑌯𑌾 𑌧𑍃𑌤𑌂 𑌸𑌮𑌾𑌶𑍍𑌵𑌸𑌨𑍍𑌨𑌶𑍍𑌰𑍁𑌜𑌲𑌾𑌰𑍍𑌦𑍍𑌰𑌲𑍋𑌚𑌨𑌾𑌃 ॥4॥
𑌕𑌸𑍍𑌕𑍋 𑌨𑍁 𑌕𑍗𑌤𑌸𑍍𑌕𑍁𑌤 𑌏𑌷 𑌵𑌿𑌸𑍍𑌮𑌯𑍋 𑌵𑌿𑌶𑌙𑍍𑌕𑌟𑌂 𑌯𑌚𑍍𑌛𑌕𑌟𑌂 𑌵𑌿𑌪𑌾𑌟𑌿𑌤𑌮𑍍 ।
𑌨 𑌕𑌾𑌰𑌣𑌂 𑌕𑌿𑌞𑍍𑌚𑌿𑌦𑌿𑌹𑍇𑌤𑌿 𑌤𑍇 𑌸𑍍𑌥𑌿𑌤𑌾𑌃 𑌸𑍍𑌵𑌨𑌾𑌸𑌿𑌕𑌾𑌦𑌤𑍍𑌤𑌕𑌰𑌾𑌸𑍍𑌤𑍍𑌵𑌦𑍀𑌕𑍍𑌷𑌕𑌾𑌃 ॥5॥
𑌕𑍁𑌮𑌾𑌰𑌕𑌸𑍍𑌯𑌾𑌸𑍍𑌯 𑌪𑌯𑍋𑌧𑌰𑌾𑌰𑍍𑌥𑌿𑌨𑌃 𑌪𑍍𑌰𑌰𑍋𑌦𑌨𑍇 𑌲𑍋𑌲𑌪𑌦𑌾𑌮𑍍𑌬𑍁𑌜𑌾𑌹𑌤𑌮𑍍 ।
𑌮𑌯𑌾 𑌮𑌯𑌾 𑌦𑍃𑌷𑍍𑌟𑌮𑌨𑍋 𑌵𑌿𑌪𑌰𑍍𑌯𑌗𑌾𑌦𑌿𑌤𑍀𑌶 𑌤𑍇 𑌪𑌾𑌲𑌕𑌬𑌾𑌲𑌕𑌾 𑌜𑌗𑍁𑌃 ॥6॥
𑌭𑌿𑌯𑌾 𑌤𑌦𑌾 𑌕𑌿𑌞𑍍𑌚𑌿𑌦𑌜𑌾𑌨𑌤𑌾𑌮𑌿𑌦𑌂 𑌕𑍁𑌮𑌾𑌰𑌕𑌾𑌣𑌾𑌮𑌤𑌿𑌦𑍁𑌰𑍍𑌘𑌟𑌂 𑌵𑌚𑌃 ।
𑌭𑌵𑌤𑍍𑌪𑍍𑌰𑌭𑌾𑌵𑌾𑌵𑌿𑌦𑍁𑌰𑍈𑌰𑌿𑌤𑍀𑌰𑌿𑌤𑌂 𑌮𑌨𑌾𑌗𑌿𑌵𑌾𑌶𑌙𑍍𑌕𑍍𑌯𑌤 𑌦𑍃𑌷𑍍𑌟𑌪𑍂𑌤𑌨𑍈𑌃 ॥7॥
𑌪𑍍𑌰𑌵𑌾𑌲𑌤𑌾𑌮𑍍𑌰𑌂 𑌕𑌿𑌮𑌿𑌦𑌂 𑌪𑌦𑌂 𑌕𑍍𑌷𑌤𑌂 𑌸𑌰𑍋𑌜𑌰𑌮𑍍𑌯𑍗 𑌨𑍁 𑌕𑌰𑍗 𑌵𑌿𑌰𑍋𑌜𑌿𑌤𑍗।
𑌇𑌤𑌿 𑌪𑍍𑌰𑌸𑌰𑍍𑌪𑌤𑍍𑌕𑌰𑍁𑌣𑌾𑌤𑌰𑌙𑍍𑌗𑌿𑌤𑌾𑌸𑍍𑌤𑍍𑌵𑌦𑌙𑍍𑌗𑌮𑌾𑌪𑌸𑍍𑌪𑍃𑌶𑍁𑌰𑌙𑍍𑌗𑌨𑌾𑌜𑌨𑌾𑌃 ॥8॥
𑌅𑌯𑍇 𑌸𑍁𑌤𑌂 𑌦𑍇𑌹𑌿 𑌜𑌗𑌤𑍍𑌪𑌤𑍇𑌃 𑌕𑍃𑌪𑌾𑌤𑌰𑌙𑍍𑌗𑌪𑌾𑌤𑌾𑌤𑍍𑌪𑌰𑌿𑌪𑌾𑌤𑌮𑌦𑍍𑌯 𑌮𑍇 ।
𑌇𑌤𑌿 𑌸𑍍𑌮 𑌸𑌙𑍍𑌗𑍃𑌹𑍍𑌯 𑌪𑌿𑌤𑌾 𑌤𑍍𑌵𑌦𑌙𑍍𑌗𑌕𑌂 𑌮𑍁𑌹𑍁𑌰𑍍𑌮𑍁𑌹𑍁𑌃 𑌶𑍍𑌲𑌿𑌷𑍍𑌯𑌤𑌿 𑌜𑌾𑌤𑌕𑌣𑍍𑌟𑌕𑌃 ॥9॥
𑌅𑌨𑍋𑌨𑌿𑌲𑍀𑌨𑌃 𑌕𑌿𑌲 𑌹𑌨𑍍𑌤𑍁𑌮𑌾𑌗𑌤𑌃 𑌸𑍁𑌰𑌾𑌰𑌿𑌰𑍇𑌵𑌂 𑌭𑌵𑌤𑌾 𑌵𑌿𑌹𑌿𑌂𑌸𑌿𑌤𑌃 ।
𑌰𑌜𑍋𑌽𑌪𑌿 𑌨𑍋 𑌦𑍃𑌷𑍍𑌟𑌮𑌮𑍁𑌷𑍍𑌯 𑌤𑌤𑍍𑌕𑌥𑌂 𑌸 𑌶𑍁𑌦𑍍𑌧𑌸𑌤𑍍𑌤𑍍𑌵𑍇 𑌤𑍍𑌵𑌯𑌿 𑌲𑍀𑌨𑌵𑌾𑌨𑍍 𑌧𑍍𑌰𑍁𑌵𑌮𑍍 ॥10॥
𑌪𑍍𑌰𑌪𑍂𑌜𑌿𑌤𑍈𑌸𑍍𑌤𑌤𑍍𑌰 𑌤𑌤𑍋 𑌦𑍍𑌵𑌿𑌜𑌾𑌤𑌿𑌭𑌿𑌰𑍍𑌵𑌿𑌶𑍇𑌷𑌤𑍋 𑌲𑌮𑍍𑌭𑌿𑌤𑌮𑌙𑍍𑌗𑌲𑌾𑌶𑌿𑌷𑌃 ।
𑌵𑍍𑌰𑌜𑌂 𑌨𑌿𑌜𑍈𑌰𑍍𑌬𑌾𑌲𑍍𑌯𑌰𑌸𑍈𑌰𑍍𑌵𑌿𑌮𑍋𑌹𑌯𑌨𑍍 𑌮𑌰𑍁𑌤𑍍𑌪𑍁𑌰𑌾𑌧𑍀𑌶 𑌰𑍁𑌜𑌾𑌂 𑌜𑌹𑍀𑌹𑌿 𑌮𑍇 ॥11॥
Roman (IAST) Transliteration
kadāpi janmarkṣadine tava prabho nimantritajñātivadhūmahīsurā |
mahānasastvāṃ savidhe nidhāya sā mahānasādau vavṛte vrajeśvarī ||1||
tato bhavattrāṇaniyuktabālakaprabhītisaṅkrandanasaṅkulāravaiḥ |
vimiśramaśrāvi bhavatsamīpataḥ parisphuṭaddārucaṭaccaṭāravaḥ ||2||
tatastadākarṇanasambhramaśramaprakampivakṣojabharā vrajāṅganāḥ |
bhavantamantardadṛśussamantato viniṣpataddāruṇadārumadhyagam ||3||
śiśoraho kiṃ kimabhūditi drutaṃ pradhāvya nandaḥ paśupāśca bhūsurāḥ |
bhavantamālokya yaśodayā dhṛtaṃ samāśvasannaśrujalārdralocanāḥ ||4||
kasko nu kautaskuta eṣa vismayo viśaṅkaṭaṃ yacchakaṭaṃ vipāṭitam |
na kāraṇaṃ kiñcidiheti te sthitāḥ svanāsikādattakarāstvadīkṣakāḥ ||5||
kumārakasyāsya payodharārthinaḥ prarodane lolapadāmbujāhatam |
mayā mayā dṛṣṭamano viparyagāditīśa te pālakabālakā jaguḥ ||6||
bhiyā tadā kiñcidajānatāmidaṃ kumārakāṇāmatidurghaṭaṃ vacaḥ |
bhavatprabhāvāvidurairitīritaṃ manāgivāśaṅkyata dṛṣṭapūtanaiḥ ||7||
pravālatāmraṃ kimidaṃ padaṃ kṣataṃ sarojaramyau nu karau virojitau|
iti prasarpatkaruṇātaraṅgitāstvadaṅgamāpaspṛśuraṅganājanāḥ ||8||
aye sutaṃ dehi jagatpateḥ kṛpātaraṅgapātātparipātamadya me |
iti sma saṅgṛhya pitā tvadaṅgakaṃ muhurmuhuḥ śliṣyati jātakaṇṭakaḥ ||9||
anonilīnaḥ kila hantumāgataḥ surārirevaṃ bhavatā vihiṃsitaḥ |
rajo'pi no dṛṣṭamamuṣya tatkathaṃ sa śuddhasattve tvayi līnavān dhruvam ||10||
prapūjitaistatra tato dvijātibhirviśeṣato lambhitamaṅgalāśiṣaḥ |
vrajaṃ nijairbālyarasairvimohayan marutpurādhīśa rujāṃ jahīhi me ||11||
Sanskrit — Devanagari (original)
कदापि जन्मर्क्षदिने तव प्रभो निमन्त्रितज्ञातिवधूमहीसुरा ।
महानसस्त्वां सविधे निधाय सा महानसादौ ववृते व्रजेश्वरी ॥1॥
ततो भवत्त्राणनियुक्तबालकप्रभीतिसङ्क्रन्दनसङ्कुलारवैः ।
विमिश्रमश्रावि भवत्समीपतः परिस्फुटद्दारुचटच्चटारवः ॥2॥
ततस्तदाकर्णनसम्भ्रमश्रमप्रकम्पिवक्षोजभरा व्रजाङ्गनाः ।
भवन्तमन्तर्ददृशुस्समन्ततो विनिष्पतद्दारुणदारुमध्यगम् ॥3॥
शिशोरहो किं किमभूदिति द्रुतं प्रधाव्य नन्दः पशुपाश्च भूसुराः ।
भवन्तमालोक्य यशोदया धृतं समाश्वसन्नश्रुजलार्द्रलोचनाः ॥4॥
कस्को नु कौतस्कुत एष विस्मयो विशङ्कटं यच्छकटं विपाटितम् ।
न कारणं किञ्चिदिहेति ते स्थिताः स्वनासिकादत्तकरास्त्वदीक्षकाः ॥5॥
कुमारकस्यास्य पयोधरार्थिनः प्ररोदने लोलपदाम्बुजाहतम् ।
मया मया दृष्टमनो विपर्यगादितीश ते पालकबालका जगुः ॥6॥
भिया तदा किञ्चिदजानतामिदं कुमारकाणामतिदुर्घटं वचः ।
भवत्प्रभावाविदुरैरितीरितं मनागिवाशङ्क्यत दृष्टपूतनैः ॥7॥
प्रवालताम्रं किमिदं पदं क्षतं सरोजरम्यौ नु करौ विरोजितौ।
इति प्रसर्पत्करुणातरङ्गितास्त्वदङ्गमापस्पृशुरङ्गनाजनाः ॥8॥
अये सुतं देहि जगत्पतेः कृपातरङ्गपातात्परिपातमद्य मे ।
इति स्म सङ्गृह्य पिता त्वदङ्गकं मुहुर्मुहुः श्लिष्यति जातकण्टकः ॥9॥
अनोनिलीनः किल हन्तुमागतः सुरारिरेवं भवता विहिंसितः ।
रजोऽपि नो दृष्टममुष्य तत्कथं स शुद्धसत्त्वे त्वयि लीनवान् ध्रुवम् ॥10॥
प्रपूजितैस्तत्र ततो द्विजातिभिर्विशेषतो लम्भितमङ्गलाशिषः ।
व्रजं निजैर्बाल्यरसैर्विमोहयन् मरुत्पुराधीश रुजां जहीहि मे ॥11॥
kadāpi janmarkṣadine tava prabho nimantritajñātivadhūmahīsurā |
mahānasastvāṃ savidhe nidhāya sā mahānasādau vavṛte vrajeśvarī ||1||
tato bhavattrāṇaniyuktabālakaprabhītisaṅkrandanasaṅkulāravaiḥ |
vimiśramaśrāvi bhavatsamīpataḥ parisphuṭaddārucaṭaccaṭāravaḥ ||2||
tatastadākarṇanasambhramaśramaprakampivakṣojabharā vrajāṅganāḥ |
bhavantamantardadṛśussamantato viniṣpataddāruṇadārumadhyagam ||3||
śiśoraho kiṃ kimabhūditi drutaṃ pradhāvya nandaḥ paśupāśca bhūsurāḥ |
bhavantamālokya yaśodayā dhṛtaṃ samāśvasannaśrujalārdralocanāḥ ||4||
kasko nu kautaskuta eṣa vismayo viśaṅkaṭaṃ yacchakaṭaṃ vipāṭitam |
na kāraṇaṃ kiñcidiheti te sthitāḥ svanāsikādattakarāstvadīkṣakāḥ ||5||
kumārakasyāsya payodharārthinaḥ prarodane lolapadāmbujāhatam |
mayā mayā dṛṣṭamano viparyagāditīśa te pālakabālakā jaguḥ ||6||
bhiyā tadā kiñcidajānatāmidaṃ kumārakāṇāmatidurghaṭaṃ vacaḥ |
bhavatprabhāvāvidurairitīritaṃ manāgivāśaṅkyata dṛṣṭapūtanaiḥ ||7||
pravālatāmraṃ kimidaṃ padaṃ kṣataṃ sarojaramyau nu karau virojitau|
iti prasarpatkaruṇātaraṅgitāstvadaṅgamāpaspṛśuraṅganājanāḥ ||8||
aye sutaṃ dehi jagatpateḥ kṛpātaraṅgapātātparipātamadya me |
iti sma saṅgṛhya pitā tvadaṅgakaṃ muhurmuhuḥ śliṣyati jātakaṇṭakaḥ ||9||
anonilīnaḥ kila hantumāgataḥ surārirevaṃ bhavatā vihiṃsitaḥ |
rajo'pi no dṛṣṭamamuṣya tatkathaṃ sa śuddhasattve tvayi līnavān dhruvam ||10||
prapūjitaistatra tato dvijātibhirviśeṣato lambhitamaṅgalāśiṣaḥ |
vrajaṃ nijairbālyarasairvimohayan marutpurādhīśa rujāṃ jahīhi me ||11||
🕉️ This is the original Sanskrit rendered in Grantha script.
Pronunciation is identical to the Sanskrit Devanagari version.