Narayaniyam Dashaka 73 - Shrikrishnasya Mathurayatra — Grantha Script

𑌨𑌿𑌶𑌮𑌯𑍍𑌯 𑌤𑌵𑌾𑌥 𑌯𑌾𑌨𑌵𑌾𑌰𑍍𑌤𑌾𑌂 𑌭𑍃𑌶𑌮𑌾𑌰𑍍𑌤𑌾𑌃 𑌪𑌶𑍁𑌪𑌾𑌲𑌬𑌾𑌲𑌿𑌕𑌾𑌸𑍍𑌤𑌾𑌃 ।

𑌕𑌿𑌮𑌿𑌦𑌂 𑌕𑌿𑌮𑌿𑌦𑌂 𑌕𑌥𑌂 𑌨𑍍𑌵𑌿𑌤𑍀𑌮𑌾𑌃 𑌸𑌮𑌵𑍇𑌤𑌾𑌃 𑌪𑌰𑌿𑌦𑍇𑌵𑌿𑌤𑌾𑌨𑍍𑌯𑌕𑍁𑌰𑍍𑌵𑌨𑍍 ॥1॥

𑌕𑌰𑍁𑌣𑌾𑌨𑌿𑌧𑌿𑌰𑍇𑌷 𑌨𑌨𑍍𑌦𑌸𑍂𑌨𑍁𑌃 𑌕𑌥𑌮𑌸𑍍𑌮𑌾𑌨𑍍 𑌵𑌿𑌸𑍃𑌜𑍇𑌦𑌨𑌨𑍍𑌯𑌨𑌾𑌥𑌾𑌃 ।

𑌬𑌤 𑌨𑌃 𑌕𑌿𑌮𑍁 𑌦𑍈𑌵𑌮𑍇𑌵𑌮𑌾𑌸𑍀𑌦𑌿𑌤𑌿 𑌤𑌾𑌸𑍍𑌤𑍍𑌵𑌦𑍍𑌗𑌤𑌮𑌾𑌨𑌸𑌾 𑌵𑌿𑌲𑍇𑌪𑍁𑌃 ॥2॥

𑌚𑌰𑌮𑌪𑍍𑌰𑌹𑌰𑍇 𑌪𑍍𑌰𑌤𑌿𑌷𑍍𑌠𑌮𑌾𑌨𑌃 𑌸𑌹 𑌪𑌿𑌤𑍍𑌰𑌾 𑌨𑌿𑌜𑌮𑌿𑌤𑍍𑌰𑌮𑌣𑍍𑌡𑌲𑍈𑌶𑍍𑌚 ।

𑌪𑌰𑌿𑌤𑌾𑌪𑌭𑌰𑌂 𑌨𑌿𑌤𑌮𑍍𑌬𑌿𑌨𑍀𑌨𑌾𑌂 𑌶𑌮𑌯𑌿𑌷𑍍𑌯𑌨𑍍 𑌵𑍍𑌯𑌮𑍁𑌚𑌃 𑌸𑌖𑌾𑌯𑌮𑍇𑌕𑌮𑍍 ॥3॥

𑌅𑌚𑌿𑌰𑌾𑌦𑍁𑌪𑌯𑌾𑌮𑌿 𑌸𑌨𑍍𑌨𑌿𑌧𑌿𑌂 𑌵𑍋 𑌭𑌵𑌿𑌤𑌾 𑌸𑌾𑌧𑍁 𑌮𑌯𑍈𑌵 𑌸𑌙𑍍𑌗𑌮𑌶𑍍𑌰𑍀𑌃 ।

𑌅𑌮𑍃𑌤𑌾𑌮𑍍𑌬𑍁𑌨𑌿𑌧𑍗 𑌨𑌿𑌮𑌜𑍍𑌜𑌯𑌿𑌷𑍍𑌯𑍇 𑌦𑍍𑌰𑍁𑌤𑌮𑌿𑌤𑍍𑌯𑌾𑌶𑍍𑌵𑌸𑌿𑌤𑌾 𑌵𑌧𑍂𑌰𑌕𑌾𑌰𑍍𑌷𑍀𑌃 ॥4॥

𑌸𑌵𑌿𑌷𑌾𑌦𑌭𑌰𑌂 𑌸𑌯𑌾𑌚𑍍𑌞𑌮𑍁𑌚𑍍𑌚𑍈𑌃 𑌅𑌤𑌿𑌦𑍂𑌰𑌂 𑌵𑌨𑌿𑌤𑌾𑌭𑌿𑌰𑍀𑌕𑍍𑌷𑍍𑌯𑌮𑌾𑌣𑌃 ।

𑌮𑍃𑌦𑍁 𑌤𑌦𑍍𑌦𑌿𑌶𑌿 𑌪𑌾𑌤𑌯𑌨𑍍𑌨𑌪𑌾𑌙𑍍𑌗𑌾𑌨𑍍 𑌸𑌬𑌲𑍋𑌽𑌕𑍍𑌰𑍂𑌰𑌰𑌥𑍇𑌨 𑌨𑌿𑌰𑍍𑌗𑌤𑍋𑌽𑌭𑍂𑌃 ॥5॥

𑌅𑌨𑌸𑌾 𑌬𑌹𑍁𑌲𑍇𑌨 𑌵𑌲𑍍𑌲𑌵𑌾𑌨𑌾𑌂 𑌮𑌨𑌸𑌾 𑌚𑌾𑌨𑍁𑌗𑌤𑍋𑌽𑌥 𑌵𑌲𑍍𑌲𑌭𑌾𑌨𑌾𑌮𑍍 ।

𑌵𑌨𑌮𑌾𑌰𑍍𑌤𑌮𑍃𑌗𑌂 𑌵𑌿𑌷𑌣𑍍𑌣𑌵𑍃𑌕𑍍𑌷𑌂 𑌸𑌮𑌤𑍀𑌤𑍋 𑌯𑌮𑍁𑌨𑌾𑌤𑌟𑍀𑌮𑌯𑌾𑌸𑍀𑌃 ॥6॥

𑌨𑌿𑌯𑌮𑌾𑌯 𑌨𑌿𑌮𑌜𑍍𑌯 𑌵𑌾𑌰𑌿𑌣𑌿 𑌤𑍍𑌵𑌾𑌮𑌭𑌿𑌵𑍀𑌕𑍍𑌷𑍍𑌯𑌾𑌥 𑌰𑌥𑍇𑌽𑌪𑌿 𑌗𑌾𑌨𑍍𑌦𑌿𑌨𑍇𑌯𑌃 ।

𑌵𑌿𑌵𑌶𑍋𑌽𑌜𑌨𑌿 𑌕𑌿𑌂 𑌨𑍍𑌵𑌿𑌦𑌂 𑌵𑌿𑌭𑍋𑌸𑍍𑌤𑍇 𑌨𑌨𑍁 𑌚𑌿𑌤𑍍𑌰𑌂 𑌤𑍍𑌵𑌵𑌲𑍋𑌕𑌨𑌂 𑌸𑌮𑌨𑍍𑌤𑌾𑌤𑍍 ॥7॥

𑌪𑍁𑌨𑌰𑍇𑌷 𑌨𑌿𑌮𑌜𑍍𑌯 𑌪𑍁𑌣𑍍𑌯𑌶𑌾𑌲𑍀 𑌪𑍁𑌰𑍁𑌷𑌂 𑌤𑍍𑌵𑌾𑌂 𑌪𑌰𑌮𑌂 𑌭𑍁𑌜𑌙𑍍𑌗𑌭𑍋𑌗𑍇 ।

𑌅𑌰𑌿𑌕𑌮𑍍𑌬𑍁𑌗𑌦𑌾𑌮𑍍𑌬𑍁𑌜𑍈𑌃 𑌸𑍍𑌫𑍁𑌰𑌨𑍍𑌤𑌂 𑌸𑍁𑌰𑌸𑌿𑌦𑍍𑌧𑍗𑌘𑌪𑌰𑍀𑌤𑌮𑌾𑌲𑍁𑌲𑍋𑌕𑍇 ॥8॥

𑌸 𑌤𑌦𑌾 𑌪𑌰𑌮𑌾𑌤𑍍𑌮𑌸𑍗𑌖𑍍𑌯𑌸𑌿𑌨𑍍𑌧𑍗 𑌵𑌿𑌨𑌿𑌮𑌗𑍍𑌨𑌃 𑌪𑍍𑌰𑌣𑍁𑌵𑌨𑍍 𑌪𑍍𑌰𑌕𑌾𑌰𑌭𑍇𑌦𑍈𑌃 ।

𑌅𑌵𑌿𑌲𑍋𑌕𑍍𑌯 𑌪𑍁𑌨𑌶𑍍𑌚 𑌹𑌰𑍍𑌷𑌸𑌿𑌨𑍍𑌧𑍋𑌰𑌨𑍁𑌵𑍃𑌤𑍍𑌤𑍍𑌯𑌾 𑌪𑍁𑌲𑌕𑌾𑌵𑍃𑌤𑍋 𑌯𑌯𑍗 𑌤𑍍𑌵𑌾𑌮𑍍 ॥9॥

𑌕𑌿𑌮𑍁 𑌶𑍀𑌤𑌲𑌿𑌮𑌾 𑌮𑌹𑌾𑌨𑍍 𑌜𑌲𑍇 𑌯𑌤𑍍 𑌪𑍁𑌲𑌕𑍋𑌽𑌸𑌾𑌵𑌿𑌤𑌿 𑌚𑍋𑌦𑌿𑌤𑍇𑌨 𑌤𑍇𑌨 ।

𑌅𑌤𑌿𑌹𑌰𑍍𑌷𑌨𑌿𑌰𑍁𑌤𑍍𑌤𑌰𑍇𑌣 𑌸𑌾𑌰𑍍𑌧𑌂 𑌰𑌥𑌵𑌾𑌸𑍀 𑌪𑌵𑌨𑍇𑌶 𑌪𑌾𑌹𑌿 𑌮𑌾𑌂 𑌤𑍍𑌵𑌮𑍍 ॥10॥

Roman (IAST) Transliteration

niśamayya tavātha yānavārtāṃ bhṛśamārtāḥ paśupālabālikāstāḥ |

kimidaṃ kimidaṃ kathaṃ nvitīmāḥ samavetāḥ paridevitānyakurvan ||1||

karuṇānidhireṣa nandasūnuḥ kathamasmān visṛjedananyanāthāḥ |

bata naḥ kimu daivamevamāsīditi tāstvadgatamānasā vilepuḥ ||2||

caramaprahare pratiṣṭhamānaḥ saha pitrā nijamitramaṇḍalaiśca |

paritāpabharaṃ nitambinīnāṃ śamayiṣyan vyamucaḥ sakhāyamekam ||3||

acirādupayāmi sannidhiṃ vo bhavitā sādhu mayaiva saṅgamaśrīḥ |

amṛtāmbunidhau nimajjayiṣye drutamityāśvasitā vadhūrakārṣīḥ ||4||

saviṣādabharaṃ sayācñamuccaiḥ atidūraṃ vanitābhirīkṣyamāṇaḥ |

mṛdu taddiśi pātayannapāṅgān sabalo'krūrarathena nirgato'bhūḥ ||5||

anasā bahulena vallavānāṃ manasā cānugato'tha vallabhānām |

vanamārtamṛgaṃ viṣaṇṇavṛkṣaṃ samatīto yamunātaṭīmayāsīḥ ||6||

niyamāya nimajya vāriṇi tvāmabhivīkṣyātha rathe'pi gāndineyaḥ |

vivaśo'jani kiṃ nvidaṃ vibhoste nanu citraṃ tvavalokanaṃ samantāt ||7||

punareṣa nimajya puṇyaśālī puruṣaṃ tvāṃ paramaṃ bhujaṅgabhoge |

arikambugadāmbujaiḥ sphurantaṃ surasiddhaughaparītamāluloke ||8||

sa tadā paramātmasaukhyasindhau vinimagnaḥ praṇuvan prakārabhedaiḥ |

avilokya punaśca harṣasindhoranuvṛttyā pulakāvṛto yayau tvām ||9||

kimu śītalimā mahān jale yat pulako'sāviti coditena tena |

atiharṣaniruttareṇa sārdhaṃ rathavāsī pavaneśa pāhi māṃ tvam ||10||

Sanskrit — Devanagari (original)

निशमय्य तवाथ यानवार्तां भृशमार्ताः पशुपालबालिकास्ताः ।

किमिदं किमिदं कथं न्वितीमाः समवेताः परिदेवितान्यकुर्वन् ॥1॥

करुणानिधिरेष नन्दसूनुः कथमस्मान् विसृजेदनन्यनाथाः ।

बत नः किमु दैवमेवमासीदिति तास्त्वद्गतमानसा विलेपुः ॥2॥

चरमप्रहरे प्रतिष्ठमानः सह पित्रा निजमित्रमण्डलैश्च ।

परितापभरं नितम्बिनीनां शमयिष्यन् व्यमुचः सखायमेकम् ॥3॥

अचिरादुपयामि सन्निधिं वो भविता साधु मयैव सङ्गमश्रीः ।

अमृताम्बुनिधौ निमज्जयिष्ये द्रुतमित्याश्वसिता वधूरकार्षीः ॥4॥

सविषादभरं सयाच्ञमुच्चैः अतिदूरं वनिताभिरीक्ष्यमाणः ।

मृदु तद्दिशि पातयन्नपाङ्गान् सबलोऽक्रूररथेन निर्गतोऽभूः ॥5॥

अनसा बहुलेन वल्लवानां मनसा चानुगतोऽथ वल्लभानाम् ।

वनमार्तमृगं विषण्णवृक्षं समतीतो यमुनातटीमयासीः ॥6॥

नियमाय निमज्य वारिणि त्वामभिवीक्ष्याथ रथेऽपि गान्दिनेयः ।

विवशोऽजनि किं न्विदं विभोस्ते ननु चित्रं त्ववलोकनं समन्तात् ॥7॥

पुनरेष निमज्य पुण्यशाली पुरुषं त्वां परमं भुजङ्गभोगे ।

अरिकम्बुगदाम्बुजैः स्फुरन्तं सुरसिद्धौघपरीतमालुलोके ॥8॥

स तदा परमात्मसौख्यसिन्धौ विनिमग्नः प्रणुवन् प्रकारभेदैः ।

अविलोक्य पुनश्च हर्षसिन्धोरनुवृत्त्या पुलकावृतो ययौ त्वाम् ॥9॥

किमु शीतलिमा महान् जले यत् पुलकोऽसाविति चोदितेन तेन ।

अतिहर्षनिरुत्तरेण सार्धं रथवासी पवनेश पाहि मां त्वम् ॥10॥