📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 73 - 𑌶𑍍𑌰𑍀𑌕𑍃𑌷𑍍𑌣𑌸𑍍𑌯 𑌮𑌥𑍁𑌰𑌾𑌯𑌾𑌤𑍍𑌰𑌾
Narayaniyam Dashaka 73 - Shrikrishnasya Mathurayatra
Vishnu Grantha
𑌨𑌿𑌶𑌮𑌯𑍍𑌯 𑌤𑌵𑌾𑌥 𑌯𑌾𑌨𑌵𑌾𑌰𑍍𑌤𑌾𑌂 𑌭𑍃𑌶𑌮𑌾𑌰𑍍𑌤𑌾𑌃 𑌪𑌶𑍁𑌪𑌾𑌲𑌬𑌾𑌲𑌿𑌕𑌾𑌸𑍍𑌤𑌾𑌃 ।
𑌕𑌿𑌮𑌿𑌦𑌂 𑌕𑌿𑌮𑌿𑌦𑌂 𑌕𑌥𑌂 𑌨𑍍𑌵𑌿𑌤𑍀𑌮𑌾𑌃 𑌸𑌮𑌵𑍇𑌤𑌾𑌃 𑌪𑌰𑌿𑌦𑍇𑌵𑌿𑌤𑌾𑌨𑍍𑌯𑌕𑍁𑌰𑍍𑌵𑌨𑍍 ॥1॥
𑌕𑌰𑍁𑌣𑌾𑌨𑌿𑌧𑌿𑌰𑍇𑌷 𑌨𑌨𑍍𑌦𑌸𑍂𑌨𑍁𑌃 𑌕𑌥𑌮𑌸𑍍𑌮𑌾𑌨𑍍 𑌵𑌿𑌸𑍃𑌜𑍇𑌦𑌨𑌨𑍍𑌯𑌨𑌾𑌥𑌾𑌃 ।
𑌬𑌤 𑌨𑌃 𑌕𑌿𑌮𑍁 𑌦𑍈𑌵𑌮𑍇𑌵𑌮𑌾𑌸𑍀𑌦𑌿𑌤𑌿 𑌤𑌾𑌸𑍍𑌤𑍍𑌵𑌦𑍍𑌗𑌤𑌮𑌾𑌨𑌸𑌾 𑌵𑌿𑌲𑍇𑌪𑍁𑌃 ॥2॥
𑌚𑌰𑌮𑌪𑍍𑌰𑌹𑌰𑍇 𑌪𑍍𑌰𑌤𑌿𑌷𑍍𑌠𑌮𑌾𑌨𑌃 𑌸𑌹 𑌪𑌿𑌤𑍍𑌰𑌾 𑌨𑌿𑌜𑌮𑌿𑌤𑍍𑌰𑌮𑌣𑍍𑌡𑌲𑍈𑌶𑍍𑌚 ।
𑌪𑌰𑌿𑌤𑌾𑌪𑌭𑌰𑌂 𑌨𑌿𑌤𑌮𑍍𑌬𑌿𑌨𑍀𑌨𑌾𑌂 𑌶𑌮𑌯𑌿𑌷𑍍𑌯𑌨𑍍 𑌵𑍍𑌯𑌮𑍁𑌚𑌃 𑌸𑌖𑌾𑌯𑌮𑍇𑌕𑌮𑍍 ॥3॥
𑌅𑌚𑌿𑌰𑌾𑌦𑍁𑌪𑌯𑌾𑌮𑌿 𑌸𑌨𑍍𑌨𑌿𑌧𑌿𑌂 𑌵𑍋 𑌭𑌵𑌿𑌤𑌾 𑌸𑌾𑌧𑍁 𑌮𑌯𑍈𑌵 𑌸𑌙𑍍𑌗𑌮𑌶𑍍𑌰𑍀𑌃 ।
𑌅𑌮𑍃𑌤𑌾𑌮𑍍𑌬𑍁𑌨𑌿𑌧𑍗 𑌨𑌿𑌮𑌜𑍍𑌜𑌯𑌿𑌷𑍍𑌯𑍇 𑌦𑍍𑌰𑍁𑌤𑌮𑌿𑌤𑍍𑌯𑌾𑌶𑍍𑌵𑌸𑌿𑌤𑌾 𑌵𑌧𑍂𑌰𑌕𑌾𑌰𑍍𑌷𑍀𑌃 ॥4॥
𑌸𑌵𑌿𑌷𑌾𑌦𑌭𑌰𑌂 𑌸𑌯𑌾𑌚𑍍𑌞𑌮𑍁𑌚𑍍𑌚𑍈𑌃 𑌅𑌤𑌿𑌦𑍂𑌰𑌂 𑌵𑌨𑌿𑌤𑌾𑌭𑌿𑌰𑍀𑌕𑍍𑌷𑍍𑌯𑌮𑌾𑌣𑌃 ।
𑌮𑍃𑌦𑍁 𑌤𑌦𑍍𑌦𑌿𑌶𑌿 𑌪𑌾𑌤𑌯𑌨𑍍𑌨𑌪𑌾𑌙𑍍𑌗𑌾𑌨𑍍 𑌸𑌬𑌲𑍋𑌽𑌕𑍍𑌰𑍂𑌰𑌰𑌥𑍇𑌨 𑌨𑌿𑌰𑍍𑌗𑌤𑍋𑌽𑌭𑍂𑌃 ॥5॥
𑌅𑌨𑌸𑌾 𑌬𑌹𑍁𑌲𑍇𑌨 𑌵𑌲𑍍𑌲𑌵𑌾𑌨𑌾𑌂 𑌮𑌨𑌸𑌾 𑌚𑌾𑌨𑍁𑌗𑌤𑍋𑌽𑌥 𑌵𑌲𑍍𑌲𑌭𑌾𑌨𑌾𑌮𑍍 ।
𑌵𑌨𑌮𑌾𑌰𑍍𑌤𑌮𑍃𑌗𑌂 𑌵𑌿𑌷𑌣𑍍𑌣𑌵𑍃𑌕𑍍𑌷𑌂 𑌸𑌮𑌤𑍀𑌤𑍋 𑌯𑌮𑍁𑌨𑌾𑌤𑌟𑍀𑌮𑌯𑌾𑌸𑍀𑌃 ॥6॥
𑌨𑌿𑌯𑌮𑌾𑌯 𑌨𑌿𑌮𑌜𑍍𑌯 𑌵𑌾𑌰𑌿𑌣𑌿 𑌤𑍍𑌵𑌾𑌮𑌭𑌿𑌵𑍀𑌕𑍍𑌷𑍍𑌯𑌾𑌥 𑌰𑌥𑍇𑌽𑌪𑌿 𑌗𑌾𑌨𑍍𑌦𑌿𑌨𑍇𑌯𑌃 ।
𑌵𑌿𑌵𑌶𑍋𑌽𑌜𑌨𑌿 𑌕𑌿𑌂 𑌨𑍍𑌵𑌿𑌦𑌂 𑌵𑌿𑌭𑍋𑌸𑍍𑌤𑍇 𑌨𑌨𑍁 𑌚𑌿𑌤𑍍𑌰𑌂 𑌤𑍍𑌵𑌵𑌲𑍋𑌕𑌨𑌂 𑌸𑌮𑌨𑍍𑌤𑌾𑌤𑍍 ॥7॥
𑌪𑍁𑌨𑌰𑍇𑌷 𑌨𑌿𑌮𑌜𑍍𑌯 𑌪𑍁𑌣𑍍𑌯𑌶𑌾𑌲𑍀 𑌪𑍁𑌰𑍁𑌷𑌂 𑌤𑍍𑌵𑌾𑌂 𑌪𑌰𑌮𑌂 𑌭𑍁𑌜𑌙𑍍𑌗𑌭𑍋𑌗𑍇 ।
𑌅𑌰𑌿𑌕𑌮𑍍𑌬𑍁𑌗𑌦𑌾𑌮𑍍𑌬𑍁𑌜𑍈𑌃 𑌸𑍍𑌫𑍁𑌰𑌨𑍍𑌤𑌂 𑌸𑍁𑌰𑌸𑌿𑌦𑍍𑌧𑍗𑌘𑌪𑌰𑍀𑌤𑌮𑌾𑌲𑍁𑌲𑍋𑌕𑍇 ॥8॥
𑌸 𑌤𑌦𑌾 𑌪𑌰𑌮𑌾𑌤𑍍𑌮𑌸𑍗𑌖𑍍𑌯𑌸𑌿𑌨𑍍𑌧𑍗 𑌵𑌿𑌨𑌿𑌮𑌗𑍍𑌨𑌃 𑌪𑍍𑌰𑌣𑍁𑌵𑌨𑍍 𑌪𑍍𑌰𑌕𑌾𑌰𑌭𑍇𑌦𑍈𑌃 ।
𑌅𑌵𑌿𑌲𑍋𑌕𑍍𑌯 𑌪𑍁𑌨𑌶𑍍𑌚 𑌹𑌰𑍍𑌷𑌸𑌿𑌨𑍍𑌧𑍋𑌰𑌨𑍁𑌵𑍃𑌤𑍍𑌤𑍍𑌯𑌾 𑌪𑍁𑌲𑌕𑌾𑌵𑍃𑌤𑍋 𑌯𑌯𑍗 𑌤𑍍𑌵𑌾𑌮𑍍 ॥9॥
𑌕𑌿𑌮𑍁 𑌶𑍀𑌤𑌲𑌿𑌮𑌾 𑌮𑌹𑌾𑌨𑍍 𑌜𑌲𑍇 𑌯𑌤𑍍 𑌪𑍁𑌲𑌕𑍋𑌽𑌸𑌾𑌵𑌿𑌤𑌿 𑌚𑍋𑌦𑌿𑌤𑍇𑌨 𑌤𑍇𑌨 ।
𑌅𑌤𑌿𑌹𑌰𑍍𑌷𑌨𑌿𑌰𑍁𑌤𑍍𑌤𑌰𑍇𑌣 𑌸𑌾𑌰𑍍𑌧𑌂 𑌰𑌥𑌵𑌾𑌸𑍀 𑌪𑌵𑌨𑍇𑌶 𑌪𑌾𑌹𑌿 𑌮𑌾𑌂 𑌤𑍍𑌵𑌮𑍍 ॥10॥
Roman (IAST) Transliteration
niśamayya tavātha yānavārtāṃ bhṛśamārtāḥ paśupālabālikāstāḥ |
kimidaṃ kimidaṃ kathaṃ nvitīmāḥ samavetāḥ paridevitānyakurvan ||1||
karuṇānidhireṣa nandasūnuḥ kathamasmān visṛjedananyanāthāḥ |
bata naḥ kimu daivamevamāsīditi tāstvadgatamānasā vilepuḥ ||2||
caramaprahare pratiṣṭhamānaḥ saha pitrā nijamitramaṇḍalaiśca |
paritāpabharaṃ nitambinīnāṃ śamayiṣyan vyamucaḥ sakhāyamekam ||3||
acirādupayāmi sannidhiṃ vo bhavitā sādhu mayaiva saṅgamaśrīḥ |
amṛtāmbunidhau nimajjayiṣye drutamityāśvasitā vadhūrakārṣīḥ ||4||
saviṣādabharaṃ sayācñamuccaiḥ atidūraṃ vanitābhirīkṣyamāṇaḥ |
mṛdu taddiśi pātayannapāṅgān sabalo'krūrarathena nirgato'bhūḥ ||5||
anasā bahulena vallavānāṃ manasā cānugato'tha vallabhānām |
vanamārtamṛgaṃ viṣaṇṇavṛkṣaṃ samatīto yamunātaṭīmayāsīḥ ||6||
niyamāya nimajya vāriṇi tvāmabhivīkṣyātha rathe'pi gāndineyaḥ |
vivaśo'jani kiṃ nvidaṃ vibhoste nanu citraṃ tvavalokanaṃ samantāt ||7||
punareṣa nimajya puṇyaśālī puruṣaṃ tvāṃ paramaṃ bhujaṅgabhoge |
arikambugadāmbujaiḥ sphurantaṃ surasiddhaughaparītamāluloke ||8||
sa tadā paramātmasaukhyasindhau vinimagnaḥ praṇuvan prakārabhedaiḥ |
avilokya punaśca harṣasindhoranuvṛttyā pulakāvṛto yayau tvām ||9||
kimu śītalimā mahān jale yat pulako'sāviti coditena tena |
atiharṣaniruttareṇa sārdhaṃ rathavāsī pavaneśa pāhi māṃ tvam ||10||
InfoLyter.in — Sacred Vedic Knowledge Portal · Free forever