Narayaniyam Dashaka 50 - Vatsasura-bakasurayoh Vadham — Grantha Script

𑌤𑌰𑌲𑌮𑌧𑍁𑌕𑍃𑌤𑍍 𑌵𑍃𑌨𑍍𑌦𑍇 𑌵𑍃𑌨𑍍𑌦𑌾𑌵𑌨𑍇𑌽𑌥 𑌮𑌨𑍋𑌹𑌰𑍇

𑌪𑌶𑍁𑌪𑌶𑌿𑌶𑍁𑌭𑌿𑌃 𑌸𑌾𑌕𑌂 𑌵𑌤𑍍𑌸𑌾𑌨𑍁𑌪𑌾𑌲𑌨𑌲𑍋𑌲𑍁𑌪𑌃 ।

𑌹𑌲𑌧𑌰𑌸𑌖𑍋 𑌦𑍇𑌵 𑌶𑍍𑌰𑍀𑌮𑌨𑍍 𑌵𑌿𑌚𑍇𑌰𑌿𑌥 𑌧𑌾𑌰𑌯𑌨𑍍

𑌗𑌵𑌲𑌮𑍁𑌰𑌲𑍀𑌵𑍇𑌤𑍍𑌰𑌂 𑌨𑍇𑌤𑍍𑌰𑌾𑌭𑌿𑌰𑌾𑌮𑌤𑌨𑍁𑌦𑍍𑌯𑍁𑌤𑌿𑌃 ॥1॥

𑌵𑌿𑌹𑌿𑌤𑌜𑌗𑌤𑍀𑌰𑌕𑍍𑌷𑌂 𑌲𑌕𑍍𑌷𑍍𑌮𑍀𑌕𑌰𑌾𑌮𑍍𑌬𑍁𑌜𑌲𑌾𑌲𑌿𑌤𑌂

𑌦𑌦𑌤𑌿 𑌚𑌰𑌣𑌦𑍍𑌵𑌨𑍍𑌦𑍍𑌵𑌂 𑌵𑍃𑌨𑍍𑌦𑌾𑌵𑌨𑍇 𑌤𑍍𑌵𑌯𑌿 𑌪𑌾𑌵𑌨𑍇 ।

𑌕𑌿𑌮𑌿𑌵 𑌨 𑌬𑌭𑍗 𑌸𑌮𑍍𑌪𑌤𑍍𑌸𑌮𑍍𑌪𑍂𑌰𑌿𑌤𑌂 𑌤𑌰𑍁𑌵𑌲𑍍𑌲𑌰𑍀-

𑌸𑌲𑌿𑌲𑌧𑌰𑌣𑍀𑌗𑍋𑌤𑍍𑌰𑌕𑍍𑌷𑍇𑌤𑍍𑌰𑌾𑌦𑌿𑌕𑌂 𑌕𑌮𑌲𑌾𑌪𑌤𑍇 ॥2॥

𑌵𑌿𑌲𑌸𑌦𑍁𑌲𑌪𑍇 𑌕𑌾𑌨𑍍𑌤𑌾𑌰𑌾𑌨𑍍𑌤𑍇 𑌸𑌮𑍀𑌰𑌣𑌶𑍀𑌤𑌲𑍇

𑌵𑌿𑌪𑍁𑌲𑌯𑌮𑍁𑌨𑌾𑌤𑍀𑌰𑍇 𑌗𑍋𑌵𑌰𑍍𑌧𑌨𑌾𑌚𑌲𑌮𑍂𑌰𑍍𑌧𑌸𑍁 ।

𑌲𑌲𑌿𑌤𑌮𑍁𑌰𑌲𑍀𑌨𑌾𑌦𑌃 𑌸𑌞𑍍𑌚𑌾𑌰𑌯𑌨𑍍 𑌖𑌲𑍁 𑌵𑌾𑌤𑍍𑌸𑌕𑌂

𑌕𑍍𑌵𑌚𑌨 𑌦𑌿𑌵𑌸𑍇 𑌦𑍈𑌤𑍍𑌯𑌂 𑌵𑌤𑍍𑌸𑌾𑌕𑍃𑌤𑌿𑌂 𑌤𑍍𑌵𑌮𑍁𑌦𑍈𑌕𑍍𑌷𑌥𑌾𑌃 ॥3॥

𑌰𑌭𑌸𑌵𑌿𑌲𑌸𑌤𑍍𑌪𑍁𑌚𑍍𑌛𑌂 𑌵𑌿𑌚𑍍𑌛𑌾𑌯𑌤𑍋𑌽𑌸𑍍𑌯 𑌵𑌿𑌲𑍋𑌕𑌯𑌨𑍍

𑌕𑌿𑌮𑌪𑌿 𑌵𑌲𑌿𑌤𑌸𑍍𑌕𑌨𑍍𑌧𑌂 𑌰𑌨𑍍𑌧𑍍𑌰𑌪𑍍𑌰𑌤𑍀𑌕𑍍𑌷𑌮𑍁𑌦𑍀𑌕𑍍𑌷𑌿𑌤𑌮𑍍 ।

𑌤𑌮𑌥 𑌚𑌰𑌣𑍇 𑌬𑌿𑌭𑍍𑌰𑌦𑍍𑌵𑌿𑌭𑍍𑌰𑌾𑌮𑌯𑌨𑍍 𑌮𑍁𑌹𑍁𑌰𑍁𑌚𑍍𑌚𑌕𑍈𑌃

𑌕𑍁𑌹𑌚𑌨 𑌮𑌹𑌾𑌵𑍃𑌕𑍍𑌷𑍇 𑌚𑌿𑌕𑍍𑌷𑍇𑌪𑌿𑌥 𑌕𑍍𑌷𑌤𑌜𑍀𑌵𑌿𑌤𑌮𑍍 ॥4॥

𑌨𑌿𑌪𑌤𑌤𑌿 𑌮𑌹𑌾𑌦𑍈𑌤𑍍𑌯𑍇 𑌜𑌾𑌤𑍍𑌯𑌾 𑌦𑍁𑌰𑌾𑌤𑍍𑌮𑌨𑌿 𑌤𑌤𑍍𑌕𑍍𑌷𑌣𑌂

𑌨𑌿𑌪𑌤𑌨𑌜𑌵𑌕𑍍𑌷𑍁𑌣𑍍𑌣𑌕𑍍𑌷𑍋𑌣𑍀𑌰𑍁𑌹𑌕𑍍𑌷𑌤𑌕𑌾𑌨𑌨𑍇 ।

𑌦𑌿𑌵𑌿 𑌪𑌰𑌿𑌮𑌿𑌲𑌤𑍍 𑌵𑍃𑌨𑍍𑌦𑌾 𑌵𑍃𑌨𑍍𑌦𑌾𑌰𑌕𑌾𑌃 𑌕𑍁𑌸𑍁𑌮𑍋𑌤𑍍𑌕𑌰𑍈𑌃

𑌶𑌿𑌰𑌸𑌿 𑌭𑌵𑌤𑍋 𑌹𑌰𑍍𑌷𑌾𑌦𑍍𑌵𑌰𑍍𑌷𑌨𑍍𑌤𑌿 𑌨𑌾𑌮 𑌤𑌦𑌾 𑌹𑌰𑍇 ॥5॥

𑌸𑍁𑌰𑌭𑌿𑌲𑌤𑌮𑌾 𑌮𑍂𑌰𑍍𑌧𑌨𑍍𑌯𑍂𑌰𑍍𑌧𑍍𑌵𑌂 𑌕𑍁𑌤𑌃 𑌕𑍁𑌸𑍁𑌮𑌾𑌵𑌲𑍀

𑌨𑌿𑌪𑌤𑌤𑌿 𑌤𑌵𑍇𑌤𑍍𑌯𑍁𑌕𑍍𑌤𑍋 𑌬𑌾𑌲𑍈𑌃 𑌸𑌹𑍇𑌲𑌮𑍁𑌦𑍈𑌰𑌯𑌃 ।

𑌝𑌟𑌿𑌤𑌿 𑌦𑌨𑍁𑌜𑌕𑍍𑌷𑍇𑌪𑍇𑌣𑍋𑌰𑍍𑌧𑍍𑌵𑌂 𑌗𑌤𑌸𑍍𑌤𑌰𑍁𑌮𑌣𑍍𑌡𑌲𑌾𑌤𑍍

𑌕𑍁𑌸𑍁𑌮𑌨𑌿𑌕𑌰𑌃 𑌸𑍋𑌽𑌯𑌂 𑌨𑍂𑌨𑌂 𑌸𑌮𑍇𑌤𑌿 𑌶𑌨𑍈𑌰𑌿𑌤𑌿 ॥6॥

𑌕𑍍𑌵𑌚𑌨 𑌦𑌿𑌵𑌸𑍇 𑌭𑍂𑌯𑍋 𑌭𑍂𑌯𑌸𑍍𑌤𑌰𑍇 𑌪𑌰𑍁𑌷𑌾𑌤𑌪𑍇

𑌤𑌪𑌨𑌤𑌨𑌯𑌾𑌪𑌾𑌥𑌃 𑌪𑌾𑌤𑍁𑌂 𑌗𑌤𑌾 𑌭𑌵𑌦𑌾𑌦𑌯𑌃 ।

𑌚𑌲𑌿𑌤𑌗𑌰𑍁𑌤𑌂 𑌪𑍍𑌰𑍇𑌕𑍍𑌷𑌾𑌮𑌾𑌸𑍁𑌰𑍍𑌬𑌕𑌂 𑌖𑌲𑍁 𑌵𑌿𑌸𑍍𑌮𑍍𑌰𑍃𑌤𑌂

𑌕𑍍𑌷𑌿𑌤𑌿𑌧𑌰𑌗𑌰𑍁𑌚𑍍𑌛𑍇𑌦𑍇 𑌕𑍈𑌲𑌾𑌸𑌶𑍈𑌲𑌮𑌿𑌵𑌾𑌪𑌰𑌮𑍍 ॥7॥

𑌪𑌿𑌬𑌤𑌿 𑌸𑌲𑌿𑌲𑌂 𑌗𑍋𑌪𑌵𑍍𑌰𑌾𑌤𑍇 𑌭𑌵𑌨𑍍𑌤𑌮𑌭𑌿𑌦𑍍𑌰𑍁𑌤𑌃

𑌸 𑌕𑌿𑌲 𑌨𑌿𑌗𑌿𑌲𑌨𑍍𑌨𑌗𑍍𑌨𑌿𑌪𑍍𑌰𑌖𑍍𑌯𑌂 𑌪𑍁𑌨𑌰𑍍𑌦𑍍𑌰𑍁𑌤𑌮𑍁𑌦𑍍𑌵𑌮𑌨𑍍 ।

𑌦𑌲𑌯𑌿𑌤𑍁𑌮𑌗𑌾𑌤𑍍𑌤𑍍𑌰𑍋𑌟𑍍𑌯𑌾𑌃 𑌕𑍋𑌟𑍍𑌯𑌾 𑌤𑌦𑌾𑌽𑌽𑌶𑍁 𑌭𑌵𑌾𑌨𑍍 𑌵𑌿𑌭𑍋

𑌖𑌲𑌜𑌨𑌭𑌿𑌦𑌾𑌚𑍁𑌞𑍍𑌚𑍁𑌶𑍍𑌚𑌞𑍍𑌚𑍂 𑌪𑍍𑌰𑌗𑍃𑌹𑍍𑌯 𑌦𑌦𑌾𑌰 𑌤𑌮𑍍 ॥8॥

𑌸𑌪𑌦𑌿 𑌸𑌹𑌜𑌾𑌂 𑌸𑌨𑍍𑌦𑍍𑌰𑌷𑍍𑌟𑍁𑌂 𑌵𑌾 𑌮𑍃𑌤𑌾𑌂 𑌖𑌲𑍁 𑌪𑍂𑌤𑌨𑌾-

𑌮𑌨𑍁𑌜𑌮𑌘𑌮𑌪𑍍𑌯𑌗𑍍𑌰𑍇 𑌗𑌤𑍍𑌵𑌾 𑌪𑍍𑌰𑌤𑍀𑌕𑍍𑌷𑌿𑌤𑍁𑌮𑍇𑌵 𑌵𑌾 ।

𑌶𑌮𑌨𑌨𑌿𑌲𑌯𑌂 𑌯𑌾𑌤𑍇 𑌤𑌸𑍍𑌮𑌿𑌨𑍍 𑌬𑌕𑍇 𑌸𑍁𑌮𑌨𑍋𑌗𑌣𑍇

𑌕𑌿𑌰𑌤𑌿 𑌸𑍁𑌮𑌨𑍋𑌵𑍃𑌨𑍍𑌦𑌂 𑌵𑍃𑌨𑍍𑌦𑌾𑌵𑌨𑌾𑌤𑍍 𑌗𑍃𑌹𑌮𑍈𑌯𑌥𑌾𑌃 ॥9॥

𑌲𑌲𑌿𑌤𑌮𑍁𑌰𑌲𑍀𑌨𑌾𑌦𑌂 𑌦𑍂𑌰𑌾𑌨𑍍𑌨𑌿𑌶𑌮𑍍𑌯 𑌵𑌧𑍂𑌜𑌨𑍈-

𑌸𑍍𑌤𑍍𑌵𑌰𑌿𑌤𑌮𑍁𑌪𑌗𑌮𑍍𑌯𑌾𑌰𑌾𑌦𑌾𑌰𑍂𑌢𑌮𑍋𑌦𑌮𑍁𑌦𑍀𑌕𑍍𑌷𑌿𑌤𑌃 ।

𑌜𑌨𑌿𑌤𑌜𑌨𑌨𑍀𑌨𑌨𑍍𑌦𑌾𑌨𑌨𑍍𑌦𑌃 𑌸𑌮𑍀𑌰𑌣𑌮𑌨𑍍𑌦𑌿𑌰-

𑌪𑍍𑌰𑌥𑌿𑌤𑌵𑌸𑌤𑍇 𑌶𑍗𑌰𑍇 𑌦𑍂𑌰𑍀𑌕𑍁𑌰𑍁𑌷𑍍𑌵 𑌮𑌮𑌾𑌮𑌯𑌾𑌨𑍍 ॥10॥

Roman (IAST) Transliteration

taralamadhukṛt vṛnde vṛndāvane'tha manohare

paśupaśiśubhiḥ sākaṃ vatsānupālanalolupaḥ |

haladharasakho deva śrīman viceritha dhārayan

gavalamuralīvetraṃ netrābhirāmatanudyutiḥ ||1||

vihitajagatīrakṣaṃ lakṣmīkarāmbujalālitaṃ

dadati caraṇadvandvaṃ vṛndāvane tvayi pāvane |

kimiva na babhau sampatsampūritaṃ taruvallarī-

saliladharaṇīgotrakṣetrādikaṃ kamalāpate ||2||

vilasadulape kāntārānte samīraṇaśītale

vipulayamunātīre govardhanācalamūrdhasu |

lalitamuralīnādaḥ sañcārayan khalu vātsakaṃ

kvacana divase daityaṃ vatsākṛtiṃ tvamudaikṣathāḥ ||3||

rabhasavilasatpucchaṃ vicchāyato'sya vilokayan

kimapi valitaskandhaṃ randhrapratīkṣamudīkṣitam |

tamatha caraṇe bibhradvibhrāmayan muhuruccakaiḥ

kuhacana mahāvṛkṣe cikṣepitha kṣatajīvitam ||4||

nipatati mahādaitye jātyā durātmani tatkṣaṇaṃ

nipatanajavakṣuṇṇakṣoṇīruhakṣatakānane |

divi parimilat vṛndā vṛndārakāḥ kusumotkaraiḥ

śirasi bhavato harṣādvarṣanti nāma tadā hare ||5||

surabhilatamā mūrdhanyūrdhvaṃ kutaḥ kusumāvalī

nipatati tavetyukto bālaiḥ sahelamudairayaḥ |

jhaṭiti danujakṣepeṇordhvaṃ gatastarumaṇḍalāt

kusumanikaraḥ so'yaṃ nūnaṃ sameti śanairiti ||6||

kvacana divase bhūyo bhūyastare paruṣātape

tapanatanayāpāthaḥ pātuṃ gatā bhavadādayaḥ |

calitagarutaṃ prekṣāmāsurbakaṃ khalu vismrṛtaṃ

kṣitidharagarucchede kailāsaśailamivāparam ||7||

pibati salilaṃ gopavrāte bhavantamabhidrutaḥ

sa kila nigilannagniprakhyaṃ punardrutamudvaman |

dalayitumagāttroṭyāḥ koṭyā tadā''śu bhavān vibho

khalajanabhidācuñcuścañcū pragṛhya dadāra tam ||8||

sapadi sahajāṃ sandraṣṭuṃ vā mṛtāṃ khalu pūtanā-

manujamaghamapyagre gatvā pratīkṣitumeva vā |

śamananilayaṃ yāte tasmin bake sumanogaṇe

kirati sumanovṛndaṃ vṛndāvanāt gṛhamaiyathāḥ ||9||

lalitamuralīnādaṃ dūrānniśamya vadhūjanai-

stvaritamupagamyārādārūḍhamodamudīkṣitaḥ |

janitajananīnandānandaḥ samīraṇamandira-

prathitavasate śaure dūrīkuruṣva mamāmayān ||10||

Sanskrit — Devanagari (original)

तरलमधुकृत् वृन्दे वृन्दावनेऽथ मनोहरे

पशुपशिशुभिः साकं वत्सानुपालनलोलुपः ।

हलधरसखो देव श्रीमन् विचेरिथ धारयन्

गवलमुरलीवेत्रं नेत्राभिरामतनुद्युतिः ॥1॥

विहितजगतीरक्षं लक्ष्मीकराम्बुजलालितं

ददति चरणद्वन्द्वं वृन्दावने त्वयि पावने ।

किमिव न बभौ सम्पत्सम्पूरितं तरुवल्लरी-

सलिलधरणीगोत्रक्षेत्रादिकं कमलापते ॥2॥

विलसदुलपे कान्तारान्ते समीरणशीतले

विपुलयमुनातीरे गोवर्धनाचलमूर्धसु ।

ललितमुरलीनादः सञ्चारयन् खलु वात्सकं

क्वचन दिवसे दैत्यं वत्साकृतिं त्वमुदैक्षथाः ॥3॥

रभसविलसत्पुच्छं विच्छायतोऽस्य विलोकयन्

किमपि वलितस्कन्धं रन्ध्रप्रतीक्षमुदीक्षितम् ।

तमथ चरणे बिभ्रद्विभ्रामयन् मुहुरुच्चकैः

कुहचन महावृक्षे चिक्षेपिथ क्षतजीवितम् ॥4॥

निपतति महादैत्ये जात्या दुरात्मनि तत्क्षणं

निपतनजवक्षुण्णक्षोणीरुहक्षतकानने ।

दिवि परिमिलत् वृन्दा वृन्दारकाः कुसुमोत्करैः

शिरसि भवतो हर्षाद्वर्षन्ति नाम तदा हरे ॥5॥

सुरभिलतमा मूर्धन्यूर्ध्वं कुतः कुसुमावली

निपतति तवेत्युक्तो बालैः सहेलमुदैरयः ।

झटिति दनुजक्षेपेणोर्ध्वं गतस्तरुमण्डलात्

कुसुमनिकरः सोऽयं नूनं समेति शनैरिति ॥6॥

क्वचन दिवसे भूयो भूयस्तरे परुषातपे

तपनतनयापाथः पातुं गता भवदादयः ।

चलितगरुतं प्रेक्षामासुर्बकं खलु विस्म्रृतं

क्षितिधरगरुच्छेदे कैलासशैलमिवापरम् ॥7॥

पिबति सलिलं गोपव्राते भवन्तमभिद्रुतः

स किल निगिलन्नग्निप्रख्यं पुनर्द्रुतमुद्वमन् ।

दलयितुमगात्त्रोट्याः कोट्या तदाऽऽशु भवान् विभो

खलजनभिदाचुञ्चुश्चञ्चू प्रगृह्य ददार तम् ॥8॥

सपदि सहजां सन्द्रष्टुं वा मृतां खलु पूतना-

मनुजमघमप्यग्रे गत्वा प्रतीक्षितुमेव वा ।

शमननिलयं याते तस्मिन् बके सुमनोगणे

किरति सुमनोवृन्दं वृन्दावनात् गृहमैयथाः ॥9॥

ललितमुरलीनादं दूरान्निशम्य वधूजनै-

स्त्वरितमुपगम्यारादारूढमोदमुदीक्षितः ।

जनितजननीनन्दानन्दः समीरणमन्दिर-

प्रथितवसते शौरे दूरीकुरुष्व ममामयान् ॥10॥