ദൂര്വാസാസ്സുരവനിതാപ്തദിവ്യമാല്യം
ശക്രായ സ്വയമുപദായ തത്ര ഭൂയഃ ।
നാഗേന്ദ്രപ്രതിമൃദിതേ ശശാപ ശക്രം
കാ ക്ഷാന്തിസ്ത്വദിതരദേവതാംശജാനാമ് ॥1॥
ശാപേന പ്രഥിതജരേഽഥ നിര്ജരേന്ദ്രേ
ദേവേഷ്വപ്യസുരജിതേഷു നിഷ്പ്രഭേഷു ।
ശര്വാദ്യാഃ കമലജമേത്യ സര്വദേവാ
നിര്വാണപ്രഭവ സമം ഭവന്തമാപുഃ ॥2॥
ബ്രഹ്മാദ്യൈഃ സ്തുതമഹിമാ ചിരം തദാനീം
പ്രാദുഷ്ഷന് വരദ പുരഃ പരേണ ധാമ്നാ ।
ഹേ ദേവാ ദിതിജകുലൈര്വിധായ സന്ധിം
പീയൂഷം പരിമഥതേതി പര്യശാസ്ത്വമ് ॥3॥
സന്ധാനം കൃതവതി ദാനവൈഃ സുരൌഘേ
മന്ഥാനം നയതി മദേന മന്ദരാദ്രിമ് ।
ഭ്രഷ്ടേഽസ്മിന് ബദരമിവോദ്വഹന് ഖഗേന്ദ്രേ
സദ്യസ്ത്വം വിനിഹിതവാന് പയഃപയോധൌ ॥4॥
ആധായ ദ്രുതമഥ വാസുകിം വരത്രാം
പാഥോധൌ വിനിഹിതസര്വബീജജാലേ ।
പ്രാരബ്ധേ മഥനവിധൌ സുരാസുരൈസ്തൈ-
ര്വ്യാജാത്ത്വം ഭുജഗമുഖേഽകരോസ്സുരാരീന് ॥5॥
ക്ഷുബ്ധാദ്രൌ ക്ഷുഭിതജലോദരേ തദാനീം
ദുഗ്ധാബ്ധൌ ഗുരുതരഭാരതോ നിമഗ്നേ ।
ദേവേഷു വ്യഥിതതമേഷു തത്പ്രിയൈഷീ
പ്രാണൈഷീഃ കമഠതനും കഠോരപൃഷ്ഠാമ് ॥6॥
വജ്രാതിസ്ഥിരതരകര്പരേണ വിഷ്ണോ
വിസ്താരാത്പരിഗതലക്ഷയോജനേന ।
അമ്ഭോധേഃ കുഹരഗതേന വര്ഷ്മണാ ത്വം
നിര്മഗ്നം ക്ഷിതിധരനാഥമുന്നിനേഥ ॥7॥
ഉന്മഗ്നേ ഝടിതി തദാ ധരാധരേന്ദ്രേ
നിര്മേഥുര്ദൃഢമിഹ സമ്മദേന സര്വേ ।
ആവിശ്യ ദ്വിതയഗണേഽപി സര്പരാജേ
വൈവശ്യം പരിശമയന്നവീവൃധസ്താന് ॥8॥
ഉദ്ദാമഭ്രമണജവോന്നമദ്ഗിരീന്ദ്ര-
ന്യസ്തൈകസ്ഥിരതരഹസ്തപങ്കജം ത്വാമ് ।
അഭ്രാന്തേ വിധിഗിരിശാദയഃ പ്രമോദാ-
ദുദ്ഭ്രാന്താ നുനുവുരുപാത്തപുഷ്പവര്ഷാഃ ॥9॥
ദൈത്യൌഘേ ഭുജഗമുഖാനിലേന തപ്തേ
തേനൈവ ത്രിദശകുലേഽപി കിഞ്ചിദാര്തേ ।
കാരുണ്യാത്തവ കില ദേവ വാരിവാഹാഃ
പ്രാവര്ഷന്നമരഗണാന്ന ദൈത്യസങ്ഘാന് ॥10॥
ഉദ്ഭ്രാമ്യദ്ബഹുതിമിനക്രചക്രവാലേ
തത്രാബ്ധൌ ചിരമഥിതേഽപി നിര്വികാരേ ।
ഏകസ്ത്വം കരയുഗകൃഷ്ടസര്പരാജഃ
സംരാജന് പവനപുരേശ പാഹി രോഗാത് ॥11॥
Roman (IAST) Transliteration
dūrvāsāssuravanitāptadivyamālyaṃ
śakrāya svayamupadāya tatra bhūyaḥ |
nāgendrapratimṛdite śaśāpa śakraṃ
kā kṣāntistvaditaradevatāṃśajānām ||1||
śāpena prathitajare'tha nirjarendre
deveṣvapyasurajiteṣu niṣprabheṣu |
śarvādyāḥ kamalajametya sarvadevā
nirvāṇaprabhava samaṃ bhavantamāpuḥ ||2||
brahmādyaiḥ stutamahimā ciraṃ tadānīṃ
prāduṣṣan varada puraḥ pareṇa dhāmnā |
he devā ditijakulairvidhāya sandhiṃ
pīyūṣaṃ parimathateti paryaśāstvam ||3||
sandhānaṃ kṛtavati dānavaiḥ suraughe
manthānaṃ nayati madena mandarādrim |
bhraṣṭe'smin badaramivodvahan khagendre
sadyastvaṃ vinihitavān payaḥpayodhau ||4||
ādhāya drutamatha vāsukiṃ varatrāṃ
pāthodhau vinihitasarvabījajāle |
prārabdhe mathanavidhau surāsuraistai-
rvyājāttvaṃ bhujagamukhe'karossurārīn ||5||
kṣubdhādrau kṣubhitajalodare tadānīṃ
dugdhābdhau gurutarabhārato nimagne |
deveṣu vyathitatameṣu tatpriyaiṣī
prāṇaiṣīḥ kamaṭhatanuṃ kaṭhorapṛṣṭhām ||6||
vajrātisthiratarakarpareṇa viṣṇo
vistārātparigatalakṣayojanena |
ambhodheḥ kuharagatena varṣmaṇā tvaṃ
nirmagnaṃ kṣitidharanāthamunninetha ||7||
unmagne jhaṭiti tadā dharādharendre
nirmethurdṛḍhamiha sammadena sarve |
āviśya dvitayagaṇe'pi sarparāje
vaivaśyaṃ pariśamayannavīvṛdhastān ||8||
uddāmabhramaṇajavonnamadgirīndra-
nyastaikasthiratarahastapaṅkajaṃ tvām |
abhrānte vidhigiriśādayaḥ pramodā-
dudbhrāntā nunuvurupāttapuṣpavarṣāḥ ||9||
daityaughe bhujagamukhānilena tapte
tenaiva tridaśakule'pi kiñcidārte |
kāruṇyāttava kila deva vārivāhāḥ
prāvarṣannamaragaṇānna daityasaṅghān ||10||
udbhrāmyadbahutiminakracakravāle
tatrābdhau ciramathite'pi nirvikāre |
ekastvaṃ karayugakṛṣṭasarparājaḥ
saṃrājan pavanapureśa pāhi rogāt ||11||
Sanskrit — Devanagari (original)
दूर्वासास्सुरवनिताप्तदिव्यमाल्यं
शक्राय स्वयमुपदाय तत्र भूयः ।
नागेन्द्रप्रतिमृदिते शशाप शक्रं
का क्षान्तिस्त्वदितरदेवतांशजानाम् ॥1॥
शापेन प्रथितजरेऽथ निर्जरेन्द्रे
देवेष्वप्यसुरजितेषु निष्प्रभेषु ।
शर्वाद्याः कमलजमेत्य सर्वदेवा
निर्वाणप्रभव समं भवन्तमापुः ॥2॥
ब्रह्माद्यैः स्तुतमहिमा चिरं तदानीं
प्रादुष्षन् वरद पुरः परेण धाम्ना ।
हे देवा दितिजकुलैर्विधाय सन्धिं
पीयूषं परिमथतेति पर्यशास्त्वम् ॥3॥
सन्धानं कृतवति दानवैः सुरौघे
मन्थानं नयति मदेन मन्दराद्रिम् ।
भ्रष्टेऽस्मिन् बदरमिवोद्वहन् खगेन्द्रे
सद्यस्त्वं विनिहितवान् पयःपयोधौ ॥4॥
आधाय द्रुतमथ वासुकिं वरत्रां
पाथोधौ विनिहितसर्वबीजजाले ।
प्रारब्धे मथनविधौ सुरासुरैस्तै-
र्व्याजात्त्वं भुजगमुखेऽकरोस्सुरारीन् ॥5॥
क्षुब्धाद्रौ क्षुभितजलोदरे तदानीं
दुग्धाब्धौ गुरुतरभारतो निमग्ने ।
देवेषु व्यथिततमेषु तत्प्रियैषी
प्राणैषीः कमठतनुं कठोरपृष्ठाम् ॥6॥
वज्रातिस्थिरतरकर्परेण विष्णो
विस्तारात्परिगतलक्षयोजनेन ।
अम्भोधेः कुहरगतेन वर्ष्मणा त्वं
निर्मग्नं क्षितिधरनाथमुन्निनेथ ॥7॥
उन्मग्ने झटिति तदा धराधरेन्द्रे
निर्मेथुर्दृढमिह सम्मदेन सर्वे ।
आविश्य द्वितयगणेऽपि सर्पराजे
वैवश्यं परिशमयन्नवीवृधस्तान् ॥8॥
उद्दामभ्रमणजवोन्नमद्गिरीन्द्र-
न्यस्तैकस्थिरतरहस्तपङ्कजं त्वाम् ।
अभ्रान्ते विधिगिरिशादयः प्रमोदा-
दुद्भ्रान्ता नुनुवुरुपात्तपुष्पवर्षाः ॥9॥
दैत्यौघे भुजगमुखानिलेन तप्ते
तेनैव त्रिदशकुलेऽपि किञ्चिदार्ते ।
कारुण्यात्तव किल देव वारिवाहाः
प्रावर्षन्नमरगणान्न दैत्यसङ्घान् ॥10॥
उद्भ्राम्यद्बहुतिमिनक्रचक्रवाले
तत्राब्धौ चिरमथितेऽपि निर्विकारे ।
एकस्त्वं करयुगकृष्टसर्पराजः
संराजन् पवनपुरेश पाहि रोगात् ॥11॥
dūrvāsāssuravanitāptadivyamālyaṃ
śakrāya svayamupadāya tatra bhūyaḥ |
nāgendrapratimṛdite śaśāpa śakraṃ
kā kṣāntistvaditaradevatāṃśajānām ||1||
śāpena prathitajare'tha nirjarendre
deveṣvapyasurajiteṣu niṣprabheṣu |
śarvādyāḥ kamalajametya sarvadevā
nirvāṇaprabhava samaṃ bhavantamāpuḥ ||2||
brahmādyaiḥ stutamahimā ciraṃ tadānīṃ
prāduṣṣan varada puraḥ pareṇa dhāmnā |
he devā ditijakulairvidhāya sandhiṃ
pīyūṣaṃ parimathateti paryaśāstvam ||3||
sandhānaṃ kṛtavati dānavaiḥ suraughe
manthānaṃ nayati madena mandarādrim |
bhraṣṭe'smin badaramivodvahan khagendre
sadyastvaṃ vinihitavān payaḥpayodhau ||4||
ādhāya drutamatha vāsukiṃ varatrāṃ
pāthodhau vinihitasarvabījajāle |
prārabdhe mathanavidhau surāsuraistai-
rvyājāttvaṃ bhujagamukhe'karossurārīn ||5||
kṣubdhādrau kṣubhitajalodare tadānīṃ
dugdhābdhau gurutarabhārato nimagne |
deveṣu vyathitatameṣu tatpriyaiṣī
prāṇaiṣīḥ kamaṭhatanuṃ kaṭhorapṛṣṭhām ||6||
vajrātisthiratarakarpareṇa viṣṇo
vistārātparigatalakṣayojanena |
ambhodheḥ kuharagatena varṣmaṇā tvaṃ
nirmagnaṃ kṣitidharanāthamunninetha ||7||
unmagne jhaṭiti tadā dharādharendre
nirmethurdṛḍhamiha sammadena sarve |
āviśya dvitayagaṇe'pi sarparāje
vaivaśyaṃ pariśamayannavīvṛdhastān ||8||
uddāmabhramaṇajavonnamadgirīndra-
nyastaikasthiratarahastapaṅkajaṃ tvām |
abhrānte vidhigiriśādayaḥ pramodā-
dudbhrāntā nunuvurupāttapuṣpavarṣāḥ ||9||
daityaughe bhujagamukhānilena tapte
tenaiva tridaśakule'pi kiñcidārte |
kāruṇyāttava kila deva vārivāhāḥ
prāvarṣannamaragaṇānna daityasaṅghān ||10||
udbhrāmyadbahutiminakracakravāle
tatrābdhau ciramathite'pi nirvikāre |
ekastvaṃ karayugakṛṣṭasarparājaḥ
saṃrājan pavanapureśa pāhi rogāt ||11||
🕉️ This is the original Sanskrit rendered in Malayalam script.
Pronunciation is identical to the Sanskrit Devanagari version.