Narayaniyam Dashaka 55 - Kaliyanartanam — Malayalam Script

അഥ വാരിണി ഘോരതരം ഫണിനം

പ്രതിവാരയിതും കൃതധീര്ഭഗവന് ।

ദ്രുതമാരിഥ തീരഗനീപതരും

വിഷമാരുതശോഷിതപര്ണചയമ് ॥1॥

അധിരുഹ്യ പദാമ്ബുരുഹേണ ച തം

നവപല്ലവതുല്യമനോജ്ഞരുചാ ।

ഹ്രദവാരിണി ദൂരതരം ന്യപതഃ

പരിഘൂര്ണിതഘോരതരങ്ഗ്ഗണേ ॥2॥

ഭുവനത്രയഭാരഭൃതോ ഭവതോ

ഗുരുഭാരവികമ്പിവിജൃമ്ഭിജലാ ।

പരിമജ്ജയതി സ്മ ധനുശ്ശതകം

തടിനീ ഝടിതി സ്ഫുടഘോഷവതീ ॥3॥

അഥ ദിക്ഷു വിദിക്ഷു പരിക്ഷുഭിത-

ഭ്രമിതോദരവാരിനിനാദഭരൈഃ ।

ഉദകാദുദഗാദുരഗാധിപതി-

സ്ത്വദുപാന്തമശാന്തരുഷാഽന്ധമനാഃ ॥4॥

ഫണശൃങ്ഗസഹസ്രവിനിസ്സൃമര-

ജ്വലദഗ്നികണോഗ്രവിഷാമ്ബുധരമ് ।

പുരതഃ ഫണിനം സമലോകയഥാ

ബഹുശൃങ്ഗിണമഞ്ജനശൈലമിവ ॥5॥

ജ്വലദക്ഷി പരിക്ഷരദുഗ്രവിഷ-

ശ്വസനോഷ്മഭരഃ സ മഹാഭുജഗഃ ।

പരിദശ്യ ഭവന്തമനന്തബലം

സമവേഷ്ടയദസ്ഫുടചേഷ്ടമഹോ ॥6॥

അവിലോക്യ ഭവന്തമഥാകുലിതേ

തടഗാമിനി ബാലകധേനുഗണേ ।

വ്രജഗേഹതലേഽപ്യനിമിത്തശതം

സമുദീക്ഷ്യ ഗതാ യമുനാം പശുപാഃ ॥7॥

അഖിലേഷു വിഭോ ഭവദീയ ദശാ-

മവലോക്യ ജിഹാസുഷു ജീവഭരമ് ।

ഫണിബന്ധനമാശു വിമുച്യ ജവാ-

ദുദഗമ്യത ഹാസജുഷാ ഭവതാ ॥8॥

അധിരുഹ്യ തതഃ ഫണിരാജഫണാന്

നനൃതേ ഭവതാ മൃദുപാദരുചാ ।

കലശിഞ്ജിതനൂപുരമഞ്ജുമില-

ത്കരകങ്കണസങ്കുലസങ്ക്വണിതമ് ॥9॥

ജഹൃഷുഃ പശുപാസ്തുതുഷുര്മുനയോ

വവൃഷുഃ കുസുമാനി സുരേന്ദ്രഗണാഃ ।

ത്വയി നൃത്യതി മാരുതഗേഹപതേ

പരിപാഹി സ മാം ത്വമദാന്തഗദാത് ॥10॥

Roman (IAST) Transliteration

atha vāriṇi ghorataraṃ phaṇinaṃ

prativārayituṃ kṛtadhīrbhagavan |

drutamāritha tīraganīpataruṃ

viṣamārutaśoṣitaparṇacayam ||1||

adhiruhya padāmburuheṇa ca taṃ

navapallavatulyamanojñarucā |

hradavāriṇi dūrataraṃ nyapataḥ

parighūrṇitaghorataraṅggaṇe ||2||

bhuvanatrayabhārabhṛto bhavato

gurubhāravikampivijṛmbhijalā |

parimajjayati sma dhanuśśatakaṃ

taṭinī jhaṭiti sphuṭaghoṣavatī ||3||

atha dikṣu vidikṣu parikṣubhita-

bhramitodaravārininādabharaiḥ |

udakādudagāduragādhipati-

stvadupāntamaśāntaruṣā'ndhamanāḥ ||4||

phaṇaśṛṅgasahasravinissṛmara-

jvaladagnikaṇograviṣāmbudharam |

purataḥ phaṇinaṃ samalokayathā

bahuśṛṅgiṇamañjanaśailamiva ||5||

jvaladakṣi parikṣaradugraviṣa-

śvasanoṣmabharaḥ sa mahābhujagaḥ |

paridaśya bhavantamanantabalaṃ

samaveṣṭayadasphuṭaceṣṭamaho ||6||

avilokya bhavantamathākulite

taṭagāmini bālakadhenugaṇe |

vrajagehatale'pyanimittaśataṃ

samudīkṣya gatā yamunāṃ paśupāḥ ||7||

akhileṣu vibho bhavadīya daśā-

mavalokya jihāsuṣu jīvabharam |

phaṇibandhanamāśu vimucya javā-

dudagamyata hāsajuṣā bhavatā ||8||

adhiruhya tataḥ phaṇirājaphaṇān

nanṛte bhavatā mṛdupādarucā |

kalaśiñjitanūpuramañjumila-

tkarakaṅkaṇasaṅkulasaṅkvaṇitam ||9||

jahṛṣuḥ paśupāstutuṣurmunayo

vavṛṣuḥ kusumāni surendragaṇāḥ |

tvayi nṛtyati mārutagehapate

paripāhi sa māṃ tvamadāntagadāt ||10||

Sanskrit — Devanagari (original)

अथ वारिणि घोरतरं फणिनं

प्रतिवारयितुं कृतधीर्भगवन् ।

द्रुतमारिथ तीरगनीपतरुं

विषमारुतशोषितपर्णचयम् ॥1॥

अधिरुह्य पदाम्बुरुहेण च तं

नवपल्लवतुल्यमनोज्ञरुचा ।

ह्रदवारिणि दूरतरं न्यपतः

परिघूर्णितघोरतरङ्ग्गणे ॥2॥

भुवनत्रयभारभृतो भवतो

गुरुभारविकम्पिविजृम्भिजला ।

परिमज्जयति स्म धनुश्शतकं

तटिनी झटिति स्फुटघोषवती ॥3॥

अथ दिक्षु विदिक्षु परिक्षुभित-

भ्रमितोदरवारिनिनादभरैः ।

उदकादुदगादुरगाधिपति-

स्त्वदुपान्तमशान्तरुषाऽन्धमनाः ॥4॥

फणशृङ्गसहस्रविनिस्सृमर-

ज्वलदग्निकणोग्रविषाम्बुधरम् ।

पुरतः फणिनं समलोकयथा

बहुशृङ्गिणमञ्जनशैलमिव ॥5॥

ज्वलदक्षि परिक्षरदुग्रविष-

श्वसनोष्मभरः स महाभुजगः ।

परिदश्य भवन्तमनन्तबलं

समवेष्टयदस्फुटचेष्टमहो ॥6॥

अविलोक्य भवन्तमथाकुलिते

तटगामिनि बालकधेनुगणे ।

व्रजगेहतलेऽप्यनिमित्तशतं

समुदीक्ष्य गता यमुनां पशुपाः ॥7॥

अखिलेषु विभो भवदीय दशा-

मवलोक्य जिहासुषु जीवभरम् ।

फणिबन्धनमाशु विमुच्य जवा-

दुदगम्यत हासजुषा भवता ॥8॥

अधिरुह्य ततः फणिराजफणान्

ननृते भवता मृदुपादरुचा ।

कलशिञ्जितनूपुरमञ्जुमिल-

त्करकङ्कणसङ्कुलसङ्क्वणितम् ॥9॥

जहृषुः पशुपास्तुतुषुर्मुनयो

ववृषुः कुसुमानि सुरेन्द्रगणाः ।

त्वयि नृत्यति मारुतगेहपते

परिपाहि स मां त्वमदान्तगदात् ॥10॥