Narayaniyam Dashaka 55 - Kaliyanartanam — Kannada Script

ಅಥ ವಾರಿಣಿ ಘೋರತರಂ ಫಣಿನಂ

ಪ್ರತಿವಾರಯಿತುಂ ಕೃತಧೀರ್ಭಗವನ್ ।

ದ್ರುತಮಾರಿಥ ತೀರಗನೀಪತರುಂ

ವಿಷಮಾರುತಶೋಷಿತಪರ್ಣಚಯಮ್ ॥1॥

ಅಧಿರುಹ್ಯ ಪದಾಮ್ಬುರುಹೇಣ ಚ ತಂ

ನವಪಲ್ಲವತುಲ್ಯಮನೋಜ್ಞರುಚಾ ।

ಹ್ರದವಾರಿಣಿ ದೂರತರಂ ನ್ಯಪತಃ

ಪರಿಘೂರ್ಣಿತಘೋರತರಙ್ಗ್ಗಣೇ ॥2॥

ಭುವನತ್ರಯಭಾರಭೃತೋ ಭವತೋ

ಗುರುಭಾರವಿಕಮ್ಪಿವಿಜೃಮ್ಭಿಜಲಾ ।

ಪರಿಮಜ್ಜಯತಿ ಸ್ಮ ಧನುಶ್ಶತಕಂ

ತಟಿನೀ ಝಟಿತಿ ಸ್ಫುಟಘೋಷವತೀ ॥3॥

ಅಥ ದಿಕ್ಷು ವಿದಿಕ್ಷು ಪರಿಕ್ಷುಭಿತ-

ಭ್ರಮಿತೋದರವಾರಿನಿನಾದಭರೈಃ ।

ಉದಕಾದುದಗಾದುರಗಾಧಿಪತಿ-

ಸ್ತ್ವದುಪಾನ್ತಮಶಾನ್ತರುಷಾಽನ್ಧಮನಾಃ ॥4॥

ಫಣಶೃಙ್ಗಸಹಸ್ರವಿನಿಸ್ಸೃಮರ-

ಜ್ವಲದಗ್ನಿಕಣೋಗ್ರವಿಷಾಮ್ಬುಧರಮ್ ।

ಪುರತಃ ಫಣಿನಂ ಸಮಲೋಕಯಥಾ

ಬಹುಶೃಙ್ಗಿಣಮಞ್ಜನಶೈಲಮಿವ ॥5॥

ಜ್ವಲದಕ್ಷಿ ಪರಿಕ್ಷರದುಗ್ರವಿಷ-

ಶ್ವಸನೋಷ್ಮಭರಃ ಸ ಮಹಾಭುಜಗಃ ।

ಪರಿದಶ್ಯ ಭವನ್ತಮನನ್ತಬಲಂ

ಸಮವೇಷ್ಟಯದಸ್ಫುಟಚೇಷ್ಟಮಹೋ ॥6॥

ಅವಿಲೋಕ್ಯ ಭವನ್ತಮಥಾಕುಲಿತೇ

ತಟಗಾಮಿನಿ ಬಾಲಕಧೇನುಗಣೇ ।

ವ್ರಜಗೇಹತಲೇಽಪ್ಯನಿಮಿತ್ತಶತಂ

ಸಮುದೀಕ್ಷ್ಯ ಗತಾ ಯಮುನಾಂ ಪಶುಪಾಃ ॥7॥

ಅಖಿಲೇಷು ವಿಭೋ ಭವದೀಯ ದಶಾ-

ಮವಲೋಕ್ಯ ಜಿಹಾಸುಷು ಜೀವಭರಮ್ ।

ಫಣಿಬನ್ಧನಮಾಶು ವಿಮುಚ್ಯ ಜವಾ-

ದುದಗಮ್ಯತ ಹಾಸಜುಷಾ ಭವತಾ ॥8॥

ಅಧಿರುಹ್ಯ ತತಃ ಫಣಿರಾಜಫಣಾನ್

ನನೃತೇ ಭವತಾ ಮೃದುಪಾದರುಚಾ ।

ಕಲಶಿಞ್ಜಿತನೂಪುರಮಞ್ಜುಮಿಲ-

ತ್ಕರಕಙ್ಕಣಸಙ್ಕುಲಸಙ್ಕ್ವಣಿತಮ್ ॥9॥

ಜಹೃಷುಃ ಪಶುಪಾಸ್ತುತುಷುರ್ಮುನಯೋ

ವವೃಷುಃ ಕುಸುಮಾನಿ ಸುರೇನ್ದ್ರಗಣಾಃ ।

ತ್ವಯಿ ನೃತ್ಯತಿ ಮಾರುತಗೇಹಪತೇ

ಪರಿಪಾಹಿ ಸ ಮಾಂ ತ್ವಮದಾನ್ತಗದಾತ್ ॥10॥

Roman (IAST) Transliteration

atha vāriṇi ghorataraṃ phaṇinaṃ

prativārayituṃ kṛtadhīrbhagavan |

drutamāritha tīraganīpataruṃ

viṣamārutaśoṣitaparṇacayam ||1||

adhiruhya padāmburuheṇa ca taṃ

navapallavatulyamanojñarucā |

hradavāriṇi dūrataraṃ nyapataḥ

parighūrṇitaghorataraṅggaṇe ||2||

bhuvanatrayabhārabhṛto bhavato

gurubhāravikampivijṛmbhijalā |

parimajjayati sma dhanuśśatakaṃ

taṭinī jhaṭiti sphuṭaghoṣavatī ||3||

atha dikṣu vidikṣu parikṣubhita-

bhramitodaravārininādabharaiḥ |

udakādudagāduragādhipati-

stvadupāntamaśāntaruṣā'ndhamanāḥ ||4||

phaṇaśṛṅgasahasravinissṛmara-

jvaladagnikaṇograviṣāmbudharam |

purataḥ phaṇinaṃ samalokayathā

bahuśṛṅgiṇamañjanaśailamiva ||5||

jvaladakṣi parikṣaradugraviṣa-

śvasanoṣmabharaḥ sa mahābhujagaḥ |

paridaśya bhavantamanantabalaṃ

samaveṣṭayadasphuṭaceṣṭamaho ||6||

avilokya bhavantamathākulite

taṭagāmini bālakadhenugaṇe |

vrajagehatale'pyanimittaśataṃ

samudīkṣya gatā yamunāṃ paśupāḥ ||7||

akhileṣu vibho bhavadīya daśā-

mavalokya jihāsuṣu jīvabharam |

phaṇibandhanamāśu vimucya javā-

dudagamyata hāsajuṣā bhavatā ||8||

adhiruhya tataḥ phaṇirājaphaṇān

nanṛte bhavatā mṛdupādarucā |

kalaśiñjitanūpuramañjumila-

tkarakaṅkaṇasaṅkulasaṅkvaṇitam ||9||

jahṛṣuḥ paśupāstutuṣurmunayo

vavṛṣuḥ kusumāni surendragaṇāḥ |

tvayi nṛtyati mārutagehapate

paripāhi sa māṃ tvamadāntagadāt ||10||

Sanskrit — Devanagari (original)

अथ वारिणि घोरतरं फणिनं

प्रतिवारयितुं कृतधीर्भगवन् ।

द्रुतमारिथ तीरगनीपतरुं

विषमारुतशोषितपर्णचयम् ॥1॥

अधिरुह्य पदाम्बुरुहेण च तं

नवपल्लवतुल्यमनोज्ञरुचा ।

ह्रदवारिणि दूरतरं न्यपतः

परिघूर्णितघोरतरङ्ग्गणे ॥2॥

भुवनत्रयभारभृतो भवतो

गुरुभारविकम्पिविजृम्भिजला ।

परिमज्जयति स्म धनुश्शतकं

तटिनी झटिति स्फुटघोषवती ॥3॥

अथ दिक्षु विदिक्षु परिक्षुभित-

भ्रमितोदरवारिनिनादभरैः ।

उदकादुदगादुरगाधिपति-

स्त्वदुपान्तमशान्तरुषाऽन्धमनाः ॥4॥

फणशृङ्गसहस्रविनिस्सृमर-

ज्वलदग्निकणोग्रविषाम्बुधरम् ।

पुरतः फणिनं समलोकयथा

बहुशृङ्गिणमञ्जनशैलमिव ॥5॥

ज्वलदक्षि परिक्षरदुग्रविष-

श्वसनोष्मभरः स महाभुजगः ।

परिदश्य भवन्तमनन्तबलं

समवेष्टयदस्फुटचेष्टमहो ॥6॥

अविलोक्य भवन्तमथाकुलिते

तटगामिनि बालकधेनुगणे ।

व्रजगेहतलेऽप्यनिमित्तशतं

समुदीक्ष्य गता यमुनां पशुपाः ॥7॥

अखिलेषु विभो भवदीय दशा-

मवलोक्य जिहासुषु जीवभरम् ।

फणिबन्धनमाशु विमुच्य जवा-

दुदगम्यत हासजुषा भवता ॥8॥

अधिरुह्य ततः फणिराजफणान्

ननृते भवता मृदुपादरुचा ।

कलशिञ्जितनूपुरमञ्जुमिल-

त्करकङ्कणसङ्कुलसङ्क्वणितम् ॥9॥

जहृषुः पशुपास्तुतुषुर्मुनयो

ववृषुः कुसुमानि सुरेन्द्रगणाः ।

त्वयि नृत्यति मारुतगेहपते

परिपाहि स मां त्वमदान्तगदात् ॥10॥