𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡𑌮𑍍 ।
𑌅𑌥 𑌤𑍃𑌤𑍀𑌯𑌸𑍍𑌸𑌰𑍍𑌗𑌃 ।
𑌵𑌚𑍋 𑌵𑌿𑌜𑍍𑌞𑌾𑌯 𑌹𑌨𑍁𑌮𑌾𑌨𑍍 𑌸𑍁𑌗𑍍𑌰𑍀𑌵𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌪𑌰𑍍𑌵𑌤𑌾𑌦𑍃𑌶𑍍𑌯𑌮𑍂𑌕𑌾𑌤𑍍𑌤𑍁 𑌪𑍁𑌪𑍍𑌲𑍁𑌵𑍇 𑌯𑌤𑍍𑌰 𑌰𑌾𑌘𑌵𑍗 ॥ 1 ॥
𑌕𑌪𑌿𑌰𑍂𑌪𑌂 𑌪𑌰𑌿𑌤𑍍𑌯𑌜𑍍𑌯 𑌹𑌨𑍁𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌭𑌿𑌕𑍍𑌷𑍁𑌰𑍂𑌪𑌂 𑌤𑌤𑍋 𑌭𑍇𑌜𑍇 𑌶𑌠𑌬𑍁𑌦𑍍𑌧𑌿𑌤𑌯𑌾 𑌕𑌪𑌿𑌃 ॥ 2 ॥
𑌤𑌤𑌸𑍍𑌸 𑌹𑌨𑍁𑌮𑌾𑌨𑍍𑌵𑌾𑌚𑌾 𑌶𑍍𑌲𑌕𑍍𑌷𑍍𑌣𑌯𑌾 𑌸𑍁𑌮𑌨𑍋𑌜𑍍𑌞𑌯𑌾 ।
𑌵𑌿𑌨𑍀𑌤𑌵𑌦𑍁𑌪𑌾𑌗𑌮𑍍𑌯 𑌰𑌾𑌘𑌵𑍗 𑌪𑍍𑌰𑌣𑌿𑌪𑌤𑍍𑌯 𑌚 ॥ 3 ॥
𑌆𑌬𑌭𑌾𑌷𑍇 𑌤𑌦𑌾 𑌵𑍀𑌰𑍗 𑌯𑌥𑌾𑌵𑌤𑍍𑌪𑍍𑌰𑌶𑌶𑌂𑌸 𑌚 ।
𑌸𑌮𑍍𑌪𑍂𑌜𑍍𑌯 𑌵𑌿𑌧𑌿𑌵𑌦𑍍𑌵𑍀𑌰𑍗 𑌹𑌨𑍁𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌉𑌵𑌾𑌚 𑌕𑌾𑌮𑌤𑍋 𑌵𑌾𑌕𑍍𑌯𑌂 𑌮𑍃𑌦𑍁 𑌸𑌤𑍍𑌯𑌪𑌰𑌾𑌕𑍍𑌰𑌮𑍗 ॥ 4 ॥
𑌰𑌾𑌜𑌰𑍍𑌷𑌿𑌦𑍇𑌵𑌪𑍍𑌰𑌤𑌿𑌮𑍗 𑌤𑌾𑌪𑌸𑍗 𑌸𑌂𑌶𑌿𑌤𑌵𑍍𑌰𑌤𑍗 ।
𑌦𑍇𑌶𑌂 𑌕𑌥𑌮𑌿𑌮𑌂 𑌪𑍍𑌰𑌾𑌪𑍍𑌤𑍗 𑌭𑌵𑌨𑍍𑌤𑍗 𑌵𑌰𑌵𑌰𑍍𑌣𑌿𑌨𑍗 ॥ 5 ॥
𑌤𑍍𑌰𑌾𑌸𑌯𑌨𑍍𑌤𑍗 𑌮𑍃𑌗𑌗𑌣𑌾𑌨𑌨𑍍𑌯𑌾𑌂𑌶𑍍𑌚 𑌵𑌨𑌚𑌾𑌰𑌿𑌣𑌃 ॥ 6 ॥
𑌪𑌮𑍍𑌪𑌾𑌤𑍀𑌰𑌰𑍁𑌹𑌾𑌨𑍍𑌵𑍃𑌕𑍍𑌷𑌾𑌨𑍍 𑌵𑍀𑌕𑍍𑌷𑌮𑌾𑌣𑍗 𑌸𑌮𑌨𑍍𑌤𑌤𑌃 ।
𑌇𑌮𑌾𑌂 𑌨𑌦𑍀𑌂 𑌶𑍁𑌭𑌜𑌲𑌾𑌂 𑌶𑍋𑌭𑌯𑌨𑍍𑌤𑍗 𑌤𑌪𑌸𑍍𑌵𑌿𑌨𑍗 ॥ 7 ॥
𑌧𑍈𑌰𑍍𑌯𑌵𑌨𑍍𑌤𑍗 𑌸𑍁𑌵𑌰𑍍𑌣𑌾𑌭𑍗 𑌕𑍗 𑌯𑍁𑌵𑌾𑌂 𑌚𑍀𑌰𑌵𑌾𑌸𑌸𑍗 ।
𑌨𑌿𑌃𑌶𑍍𑌵𑌸𑌨𑍍𑌤𑍗 𑌵𑌰𑌭𑍁𑌜𑍗 𑌪𑍀𑌡𑌯𑌨𑍍𑌤𑌾𑌵𑌿𑌮𑌾𑌃 𑌪𑍍𑌰𑌜𑌾𑌃 ॥ 8 ॥
𑌸𑌿𑌂𑌹𑌵𑌿𑌪𑍍𑌰𑍇𑌕𑍍𑌷𑌿𑌤𑍗 𑌵𑍀𑌰𑍗 𑌮𑌹𑌾𑌬𑌲𑌵𑌿𑌕𑍍𑌰𑌮𑍗 ।
𑌶𑌕𑍍𑌰𑌚𑌾𑌪𑌨𑌿𑌭𑍇 𑌚𑌾𑌪𑍇 𑌗𑍃𑌹𑍀𑌤𑍍𑌵𑌾 𑌶𑌤𑍍𑌰𑍁𑌸𑍂𑌦𑌨𑍗 ॥ 9 ॥
𑌶𑍍𑌰𑍀𑌮𑌨𑍍𑌤𑍗 𑌰𑍂𑌪𑌸𑌮𑍍𑌪𑌨𑍍𑌨𑍗 𑌵𑍃𑌷𑌭𑌶𑍍𑌰𑍇𑌷𑍍𑌠𑌵𑌿𑌕𑍍𑌰𑌮𑍗 ।
𑌹𑌸𑍍𑌤𑌿𑌹𑌸𑍍𑌤𑍋𑌪𑌮𑌭𑍁𑌜𑍗 𑌦𑍍𑌯𑍁𑌤𑌿𑌮𑌨𑍍𑌤𑍗 𑌨𑌰𑌰𑍍𑌷𑌭𑍗 ॥ 10 ॥
𑌪𑍍𑌰𑌭𑌯𑌾 𑌪𑌰𑍍𑌵𑌤𑍇𑌨𑍍𑌦𑍍𑌰𑍋𑌽𑌯𑌂 𑌯𑍁𑌵𑌯𑍋𑌰𑌵𑌭𑌾𑌸𑌿𑌤𑌃 ।
𑌰𑌾𑌜𑍍𑌯𑌾𑌰𑍍𑌹𑌾𑌵𑌮𑌰𑌪𑍍𑌰𑌖𑍍𑌯𑍗 𑌕𑌥𑌂 𑌦𑍇𑌶𑌮𑌿𑌹𑌾𑌗𑌤𑍗 ॥ 11 ॥
𑌪𑌦𑍍𑌮𑌪𑌤𑍍𑌰𑍇𑌕𑍍𑌷𑌣𑍗 𑌵𑍀𑌰𑍗 𑌜𑌟𑌾𑌮𑌣𑍍𑌡𑌲𑌧𑌾𑌰𑌿𑌣𑍗 ।
𑌅𑌨𑍍𑌯𑍋𑌨𑍍𑌯𑌸𑌦𑍃𑌶𑍗 𑌵𑍀𑌰𑍗 𑌦𑍇𑌵𑌲𑍋𑌕𑌾𑌦𑌿𑌵𑌾𑌗𑌤𑍗 ॥ 12 ॥
𑌯𑌦𑍃𑌚𑍍𑌛𑌯𑍇𑌵 𑌸𑌮𑍍𑌪𑍍𑌰𑌾𑌪𑍍𑌤𑍗 𑌚𑌨𑍍𑌦𑍍𑌰𑌸𑍂𑌰𑍍𑌯𑍗 𑌵𑌸𑍁𑌨𑍍𑌧𑌰𑌾𑌮𑍍 ।
𑌵𑌿𑌶𑌾𑌲𑌵𑌕𑍍𑌷𑌸𑍗 𑌵𑍀𑌰𑍗 𑌮𑌾𑌨𑍁𑌷𑍗 𑌦𑍇𑌵𑌰𑍂𑌪𑌿𑌣𑍗 ॥ 13 ॥
𑌸𑌿𑌂𑌹𑌸𑍍𑌕𑌨𑍍𑌧𑍗 𑌮𑌹𑍋𑌤𑍍𑌸𑌾𑌹𑍗 𑌸𑌮𑌦𑌾𑌵𑌿𑌵 𑌗𑍋𑌵𑍃𑌷𑍗 ।
𑌆𑌯𑌤𑌾𑌶𑍍𑌚 𑌸𑍁𑌵𑍃𑌤𑍍𑌤𑌾𑌶𑍍𑌚 𑌬𑌾𑌹𑌵𑌃 𑌪𑌰𑌿𑌘𑍋𑌪𑌮𑌾𑌃 ।
𑌸𑌰𑍍𑌵𑌭𑍂𑌷𑌣𑌭𑍂𑌷𑌾𑌰𑍍𑌹𑌾𑌃 𑌕𑌿𑌮𑌰𑍍𑌥𑌂 𑌨 𑌵𑌿𑌭𑍂𑌷𑌿𑌤𑌾𑌃 ॥ 14 ॥
𑌉𑌭𑍗 𑌯𑍋𑌗𑍍𑌯𑌾𑌵𑌹𑌂 𑌮𑌨𑍍𑌯𑍇 𑌰𑌕𑍍𑌷𑌿𑌤𑍁𑌂 𑌪𑍃𑌥𑌿𑌵𑍀𑌮𑌿𑌮𑌾𑌮𑍍 ।
𑌸𑌸𑌾𑌗𑌰𑌵𑌨𑌾𑌂 𑌕𑍃𑌤𑍍𑌸𑍍𑌨𑌾𑌂 𑌵𑌿𑌨𑍍𑌧𑍍𑌯𑌮𑍇𑌰𑍁𑌵𑌿𑌭𑍂𑌷𑌿𑌤𑌾𑌮𑍍 ॥ 15 ॥
𑌇𑌮𑍇 𑌚 𑌧𑌨𑍁𑌷𑍀 𑌚𑌿𑌤𑍍𑌰𑍇 𑌶𑍍𑌲𑌷𑍍𑌣𑍇 𑌚𑌿𑌤𑍍𑌰𑌾𑌨𑍁𑌲𑍇𑌪𑌨𑍇 ।
𑌪𑍍𑌰𑌕𑌾𑌶𑍇𑌤𑍇 𑌯𑌥𑍇𑌨𑍍𑌦𑍍𑌰𑌸𑍍𑌯 𑌵𑌜𑍍𑌰𑍇 𑌹𑍇𑌮𑌵𑌿𑌭𑍂𑌷𑌿𑌤𑍇 ॥ 16 ॥
𑌸𑌮𑍍𑌪𑍂𑌰𑍍𑌣𑌾 𑌨𑌿𑌶𑌿𑌤𑍈𑌰𑍍𑌬𑌾𑌣𑍈 𑌸𑍍𑌤𑍂𑌣𑌾𑌶𑍍𑌚 𑌶𑍁𑌭𑌦𑌰𑍍𑌶𑌨𑌾𑌃 ॥ 17 ॥
𑌜𑍀𑌵𑌿𑌤𑌾𑌨𑍍𑌤𑌕𑌰𑍈𑌰𑍍𑌘𑍋𑌰𑍈 𑌶𑍍𑌶𑍍𑌵𑌸𑌦𑍍𑌭𑌿𑌰𑌿𑌵 𑌪𑌨𑍍𑌨𑌗𑍈𑌃 ।
𑌮𑌹𑌾𑌪𑍍𑌰𑌮𑌾𑌣𑍗 𑌵𑌿𑌸𑍍𑌤𑍀𑌰𑍍𑌣𑍗 𑌤𑌪𑍍𑌤𑌹𑌾𑌟𑌕𑌭𑍂𑌷𑌿𑌤𑍗 ॥ 18 ॥
𑌖𑌡𑌗𑌾𑌵𑍇𑌤𑍗 𑌵𑌿𑌰𑌾𑌜𑍇𑌤𑍇 𑌨𑌿𑌰𑍍𑌮𑍁𑌕𑍍𑌤𑌾𑌵𑌿𑌵𑌪𑌨𑍍𑌨𑌗𑍗 ।
𑌏𑌵𑌂 𑌮𑌾𑌂 𑌪𑌰𑌿𑌭𑌾𑌷𑌨𑍍𑌤𑌂 𑌕𑌸𑍍𑌮𑌾𑌦𑍍𑌵𑍈 𑌨𑌾𑌭𑌿𑌭𑌾𑌷𑌥𑌃 ॥ 19 ॥
𑌸𑍁𑌗𑍍𑌰𑍀𑌵𑍋 𑌨𑌾𑌮 𑌧𑌰𑍍𑌮𑌾𑌤𑍍𑌮𑌾 𑌕𑌶𑍍𑌚𑌿𑌦𑍍𑌵𑌾𑌨𑌰𑌯𑍂𑌥𑌪𑌃 ।
𑌵𑍀𑌰𑍋 𑌵𑌿𑌨𑌿𑌕𑍃𑌤𑍋 𑌭𑍍𑌰𑌾𑌤𑍍𑌰𑌾 𑌜𑌗𑌦𑍍𑌭𑍍𑌰𑌮𑌤𑌿 𑌦𑍁𑌃𑌖𑌿𑌤𑌃 ॥ 20 ॥
𑌪𑍍𑌰𑌾𑌪𑍍𑌤𑍋𑌽𑌹𑌂 𑌪𑍍𑌰𑍇𑌷𑌿𑌤𑌸𑍍𑌤𑍇𑌨 𑌸𑍁𑌗𑍍𑌰𑍀𑌵𑍇𑌣 𑌮𑌹𑌾𑌤𑍍𑌮𑌨𑌾 ।
𑌰𑌾𑌜𑍍𑌞𑌾 𑌵𑌾𑌨𑌰𑌮𑍁𑌖𑍍𑌯𑌾𑌨𑌾𑌂 𑌹𑌨𑍁𑌮𑌾𑌨𑍍𑌨𑌾𑌮 𑌵𑌾𑌨𑌰𑌃 ॥ 21 ॥
𑌯𑍁𑌵𑌾𑌭𑍍𑌯𑌾𑌂 𑌸𑌹 𑌧𑌰𑍍𑌮𑌾𑌤𑍍𑌮𑌾 𑌸𑍁𑌗𑍍𑌰𑍀𑌵𑌸𑍍𑌸𑌖𑍍𑌯𑌮𑌿𑌚𑍍𑌛𑌤𑌿 ।
𑌤𑌸𑍍𑌯 𑌮𑌾𑌂 𑌸𑌚𑌿𑌵𑌂 𑌵𑌿𑌤𑍍𑌤𑌂 𑌵𑌾𑌨𑌰𑌂 𑌪𑌵𑌨𑌾𑌤𑍍𑌮𑌜𑌮𑍍 ॥ 22 ॥
𑌭𑌿𑌕𑍍𑌷𑍁𑌰𑍂𑌪𑌪𑍍𑌰𑌤𑌿𑌚𑍍𑌛𑌨𑍍𑌨𑌂 𑌸𑍁𑌗𑍍𑌰𑍀𑌵𑌪𑍍𑌰𑌿𑌯𑌕𑌾𑌮𑍍𑌯𑌯𑌾 ।
𑌋𑌷𑍍𑌯𑌮𑍂𑌕𑌾𑌦𑌿𑌹 𑌪𑍍𑌰𑌾𑌪𑍍𑌤𑌂 𑌕𑌾𑌮𑌗𑌂 𑌕𑌾𑌮𑌰𑍂𑌪𑌿𑌣𑌮𑍍 ॥ 23 ॥
𑌏𑌵𑌮𑍁𑌕𑍍𑌤𑍍𑌵𑌾 𑌤𑍁 𑌹𑌨𑍁𑌮𑌾𑌂𑌸𑍍𑌤𑍗 𑌵𑍀𑌰𑍗 𑌰𑌾𑌮𑌲𑌕𑍍𑌷𑍍𑌮𑌣𑍗 ।
𑌵𑌾𑌕𑍍𑌯𑌜𑍍𑌞𑍗 𑌵𑌾𑌕𑍍𑌯𑌕𑍁𑌶𑌲𑌃 𑌪𑍁𑌨𑌰𑍍𑌨𑍋𑌵𑌾𑌚 𑌕𑌿𑌞𑍍𑌚𑌨 ॥ 24 ॥
𑌏𑌤𑌚𑍍𑌛𑍍𑌰𑍁𑌤𑍍𑌵𑌾 𑌵𑌚𑌨𑍍𑌤𑌸𑍍𑌯 𑌰𑌾𑌮𑍋 𑌲𑌕𑍍𑌷𑍍𑌮𑌣𑌮𑌬𑍍𑌰𑌵𑍀𑌤𑍍 ।
𑌪𑍍𑌰𑌹𑍃𑌷𑍍𑌟𑌵𑌦𑌨𑌶𑍍𑌶𑍍𑌰𑍀𑌮𑌾𑌨𑍍𑌭𑍍𑌰𑌾𑌤𑌰𑌂 𑌪𑌾𑌰𑍍𑌶𑍍𑌵𑌤𑌃 𑌸𑍍𑌥𑌿𑌤𑌮𑍍 ॥ 25 ॥
𑌸𑌚𑌿𑌵𑍋𑌽𑌯𑌂 𑌕𑌪𑍀𑌨𑍍𑌦𑍍𑌰𑌸𑍍𑌯 𑌸𑍁𑌗𑍍𑌰𑍀𑌵𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌤𑌮𑍇𑌵 𑌕𑌾𑌙𑍍𑌕𑍍𑌷𑌮𑌾𑌣𑌸𑍍𑌯 𑌮𑌮𑌾𑌨𑍍𑌤𑌿𑌕𑌮𑍁𑌪𑌾𑌗𑌤𑌃 ॥ 26 ॥
𑌤𑌮𑌭𑍍𑌯𑌭𑌾𑌷 𑌸𑍗𑌮𑌿𑌤𑍍𑌰𑍇 𑌸𑍁𑌗𑍍𑌰𑍀𑌵𑌸𑌚𑌿𑌵𑌂 𑌕𑌪𑌿𑌮𑍍 ।
𑌵𑌾𑌕𑍍𑌯𑌜𑍍𑌞𑌂 𑌮𑌧𑍁𑌰𑍈𑌰𑍍𑌵𑌾𑌕𑍍𑌯𑍈𑌸𑍍𑌸𑍍𑌨𑍇𑌹𑌯𑍁𑌕𑍍𑌤𑌮𑌰𑌿𑌨𑍍𑌦𑌮 ॥ 27 ॥
𑌨𑌾𑌨𑍃𑌗𑍍𑌵𑍇𑌦𑌵𑌿𑌨𑍀𑌤𑌸𑍍𑌯 𑌨𑌾𑌯𑌜𑍁𑌰𑍍𑌵𑍇𑌦𑍍𑌧𑌾𑌰𑌿𑌣𑌃 ।
𑌨𑌾𑌸𑌾𑌮𑌵𑍇𑌦𑌵𑌿𑌦𑍁𑌷𑌶𑍍𑌶𑌕𑍍𑌯𑌮𑍇𑌵𑌂 𑌵𑌿𑌭𑌾𑌷𑌿𑌤𑍁𑌮𑍍 ॥ 28 ॥
𑌨𑍂𑌨𑌂 𑌵𑍍𑌯𑌾𑌕𑌰𑌣𑌂 𑌕𑍃𑌤𑍍𑌸𑍍𑌨𑌮𑌨𑍇𑌨 𑌬𑌹𑍁𑌧𑌾 𑌶𑍍𑌰𑍁𑌤𑌮𑍍 ।
𑌬𑌹𑍁 𑌵𑍍𑌯𑌾𑌹𑌰𑌤𑌾𑌽𑌨𑍇𑌨 𑌨 𑌕𑌿𑌞𑍍𑌚𑌿𑌦𑌪𑌶𑌬𑍍𑌦𑌿𑌤𑌮𑍍 ॥ 29 ॥
𑌨 𑌮𑍁𑌖𑍇 𑌨𑍇𑌤𑍍𑌰𑌯𑍋𑌰𑍍𑌵𑌾𑌪𑌿 𑌲𑌲𑌾𑌟𑍇 𑌚 𑌭𑍍𑌰𑍁𑌵𑍋𑌸𑍍𑌤𑌥𑌾 ।
𑌅𑌨𑍍𑌯𑍇𑌷𑍍𑌵𑌪𑌿 𑌚 𑌗𑌾𑌤𑍍𑌰𑍇𑌷𑍁 𑌦𑍋𑌷𑌸𑍍𑌸𑌂𑌵𑌿𑌦𑌿𑌤𑌃 𑌕𑍍𑌵𑌚𑌿𑌤𑍍 ॥ 30 ॥
𑌅𑌵𑌿𑌸𑍍𑌤𑌰𑌮𑌸𑌨𑍍𑌦𑌿𑌗𑍍𑌧𑌮𑌵𑌿𑌲𑌮𑍍𑌬𑌿𑌤𑌮𑌦𑍍𑌰𑍁𑌤𑌮𑍍 ।
𑌉𑌰𑌸𑍍𑌥𑌂 𑌕𑌣𑍍𑌠𑌗𑌂 𑌵𑌾𑌕𑍍𑌯𑌂 𑌵𑌰𑍍𑌤𑌤𑍇 𑌮𑌧𑍍𑌯𑌮𑍇 𑌸𑍍𑌵𑌰𑍇 ॥ 31 ॥
𑌸𑌂𑌸𑍍𑌕𑌾𑌰𑌕𑍍𑌰𑌮𑌸𑌮𑍍𑌪𑌨𑍍𑌨𑌾𑌮𑌦𑍍𑌰𑍁𑌤𑌾𑌮𑌵𑌿𑌲𑌮𑍍𑌬𑌿𑌤𑌾𑌮𑍍 ।
𑌉𑌚𑍍𑌚𑌾𑌰𑌯𑌤𑌿 𑌕𑌲𑍍𑌯𑌾𑌣𑍀𑌂 𑌵𑌾𑌚𑌂 𑌹𑍃𑌦𑌯𑌹𑌾𑌰𑌿𑌣𑍀𑌮𑍍 ॥ 32 ॥
𑌅𑌨𑌯𑌾 𑌚𑌿𑌤𑍍𑌰𑌯𑌾 𑌵𑌾𑌚𑌾 𑌤𑍍𑌰𑌿𑌸𑍍𑌥𑌾𑌨𑌵𑍍𑌯𑌞𑍍𑌜𑌨𑌸𑍍𑌥𑌯𑌾 ।
𑌕𑌸𑍍𑌯 𑌨𑌾𑌰𑌾𑌧𑍍𑌯𑌤𑍇 𑌚𑌿𑌤𑍍𑌤𑌮𑍁𑌦𑍍𑌯𑌤𑌾𑌸𑍇𑌰𑌰𑍇𑌰𑌪𑌿 ॥ 33 ॥
𑌏𑌵𑌂 𑌵𑌿𑌧𑍋 𑌯𑌸𑍍𑌯 𑌦𑍂𑌤𑍋 𑌨 𑌭𑌵𑍇𑌤𑍍𑌪𑌾𑌰𑍍𑌥𑌿𑌵𑌸𑍍𑌯 𑌤𑍁 ।
𑌸𑌿𑌦𑍍𑌧𑍍𑌯𑌨𑍍𑌤𑌿 𑌹𑌿 𑌕𑌥𑌂 𑌤𑌸𑍍𑌯 𑌕𑌾𑌰𑍍𑌯𑌾𑌣𑌾𑌂 𑌗𑌤𑌿𑌯𑍋𑌽𑌨𑌘 ॥ 34 ॥
𑌏𑌵𑌂 𑌗𑍁𑌣𑌗𑌣𑍈𑌰𑍍𑌯𑍁𑌕𑍍𑌤𑌾 𑌯𑌸𑍍𑌯 𑌸𑍍𑌯𑍁𑌃 𑌕𑌾𑌰𑍍𑌯𑌸𑌾𑌧𑌕𑌾𑌃 ।
𑌤𑌸𑍍𑌯 𑌸𑌿𑌧𑍍𑌯𑌨𑍍𑌤𑌿 𑌸𑌰𑍍𑌵𑌾𑌽𑌰𑍍𑌥𑌾 𑌦𑍂𑌤𑌵𑌾𑌕𑍍𑌯𑌪𑍍𑌰𑌚𑍋𑌦𑌿𑌤𑌾𑌃 ॥ 35 ॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌸𑍗𑌮𑌿𑌤𑍍𑌰𑌿𑌸𑍍𑌸𑍁𑌗𑍍𑌰𑍀𑌵𑌸𑌚𑌿𑌵𑌂 𑌕𑌪𑌿𑌮𑍍 ।
𑌅𑌭𑍍𑌯𑌭𑌾𑌷𑌤 𑌵𑌾𑌕𑍍𑌯𑌜𑍍𑌞𑍋 𑌵𑌾𑌕𑍍𑌯𑌜𑍍𑌞𑌂 𑌪𑌵𑌨𑌾𑌤𑍍𑌮𑌜𑌮𑍍 ॥ 36 ॥
𑌵𑌿𑌦𑌿𑌤𑍗 𑌨𑍗 𑌗𑍁𑌣𑌾 𑌵𑌿𑌦𑍍𑌵𑌨𑍍𑌤𑍍𑌸𑍁𑌗𑍍𑌰𑍀𑌵𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌤𑌮𑍇𑌵 𑌚𑌾𑌽𑌵𑌾𑌂 𑌮𑌾𑌰𑍍𑌗𑌾𑌵𑌸𑍍𑌸𑍁𑌗𑍍𑌰𑍀𑌵𑌂 𑌪𑍍𑌲𑌵𑌗𑍇𑌶𑍍𑌵𑌰𑌮𑍍 ॥ 37 ॥
𑌯𑌥𑌾 𑌬𑍍𑌰𑌵𑍀𑌷𑌿 𑌹𑌨𑍁𑌮𑌾𑌨𑍍𑌸𑍁𑌗𑍍𑌰𑍀𑌵𑌵𑌚𑌨𑌾𑌦𑌿𑌹 ।
𑌤𑌤𑍍𑌤𑌥𑌾 𑌹𑌿 𑌕𑌰𑌿𑌷𑍍𑌯𑌾𑌵𑍋 𑌵𑌚𑌨𑌾𑌤𑍍𑌤𑌵 𑌸𑌤𑍍𑌤𑌮 ॥ 38 ॥
𑌤𑌤𑍍𑌤𑌸𑍍𑌯 𑌵𑌾𑌕𑍍𑌯𑌂 𑌨𑌿𑌪𑍁𑌣𑌂 𑌨𑌿𑌶𑌮𑍍𑌯 𑌪𑍍𑌰𑌹𑍃𑌷𑍍𑌟𑌰𑍂𑌪𑌃 𑌪𑌵𑌨𑌾𑌤𑍍𑌮𑌜𑌃 𑌕𑌪𑌿𑌃 ।
𑌮𑌨𑌸𑍍𑌸𑌮𑌾𑌧𑌾𑌯 𑌜𑌯𑍋𑌪𑌪𑌤𑍍𑌤𑍗 𑌸𑌖𑍍𑌯𑌂 𑌤𑌦𑌾 𑌕𑌰𑍍𑌤𑍁𑌮𑌿𑌯𑍇𑌷 𑌤𑌾𑌭𑍍𑌯𑌾𑌮𑍍 ॥ 39 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡𑍇 𑌤𑍃𑌤𑍀𑌯𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe kiṣkindhākāṇḍam |
atha tṛtīyassargaḥ |
vaco vijñāya hanumān sugrīvasya mahātmanaḥ |
parvatādṛśyamūkāttu pupluve yatra rāghavau || 1 ||
kapirūpaṃ parityajya hanumānmārutātmajaḥ |
bhikṣurūpaṃ tato bheje śaṭhabuddhitayā kapiḥ || 2 ||
tatassa hanumānvācā ślakṣṇayā sumanojñayā |
vinītavadupāgamya rāghavau praṇipatya ca || 3 ||
ābabhāṣe tadā vīrau yathāvatpraśaśaṃsa ca |
sampūjya vidhivadvīrau hanumānmārutātmajaḥ |
uvāca kāmato vākyaṃ mṛdu satyaparākramau || 4 ||
rājarṣidevapratimau tāpasau saṃśitavratau |
deśaṃ kathamimaṃ prāptau bhavantau varavarṇinau || 5 ||
trāsayantau mṛgagaṇānanyāṃśca vanacāriṇaḥ || 6 ||
pampātīraruhānvṛkṣān vīkṣamāṇau samantataḥ |
imāṃ nadīṃ śubhajalāṃ śobhayantau tapasvinau || 7 ||
dhairyavantau suvarṇābhau kau yuvāṃ cīravāsasau |
niḥśvasantau varabhujau pīḍayantāvimāḥ prajāḥ || 8 ||
siṃhaviprekṣitau vīrau mahābalavikramau |
śakracāpanibhe cāpe gṛhītvā śatrusūdanau || 9 ||
śrīmantau rūpasampannau vṛṣabhaśreṣṭhavikramau |
hastihastopamabhujau dyutimantau nararṣabhau || 10 ||
prabhayā parvatendro'yaṃ yuvayoravabhāsitaḥ |
rājyārhāvamaraprakhyau kathaṃ deśamihāgatau || 11 ||
padmapatrekṣaṇau vīrau jaṭāmaṇḍaladhāriṇau |
anyonyasadṛśau vīrau devalokādivāgatau || 12 ||
yadṛcchayeva samprāptau candrasūryau vasundharām |
viśālavakṣasau vīrau mānuṣau devarūpiṇau || 13 ||
siṃhaskandhau mahotsāhau samadāviva govṛṣau |
āyatāśca suvṛttāśca bāhavaḥ parighopamāḥ |
sarvabhūṣaṇabhūṣārhāḥ kimarthaṃ na vibhūṣitāḥ || 14 ||
ubhau yogyāvahaṃ manye rakṣituṃ pṛthivīmimām |
sasāgaravanāṃ kṛtsnāṃ vindhyameruvibhūṣitām || 15 ||
ime ca dhanuṣī citre ślaṣṇe citrānulepane |
prakāśete yathendrasya vajre hemavibhūṣite || 16 ||
sampūrṇā niśitairbāṇai stūṇāśca śubhadarśanāḥ || 17 ||
jīvitāntakarairghorai śśvasadbhiriva pannagaiḥ |
mahāpramāṇau vistīrṇau taptahāṭakabhūṣitau || 18 ||
khaḍagāvetau virājete nirmuktāvivapannagau |
evaṃ māṃ paribhāṣantaṃ kasmādvai nābhibhāṣathaḥ || 19 ||
sugrīvo nāma dharmātmā kaścidvānarayūthapaḥ |
vīro vinikṛto bhrātrā jagadbhramati duḥkhitaḥ || 20 ||
prāpto'haṃ preṣitastena sugrīveṇa mahātmanā |
rājñā vānaramukhyānāṃ hanumānnāma vānaraḥ || 21 ||
yuvābhyāṃ saha dharmātmā sugrīvassakhyamicchati |
tasya māṃ sacivaṃ vittaṃ vānaraṃ pavanātmajam || 22 ||
bhikṣurūpapraticchannaṃ sugrīvapriyakāmyayā |
ṛṣyamūkādiha prāptaṃ kāmagaṃ kāmarūpiṇam || 23 ||
evamuktvā tu hanumāṃstau vīrau rāmalakṣmaṇau |
vākyajñau vākyakuśalaḥ punarnovāca kiñcana || 24 ||
etacchrutvā vacantasya rāmo lakṣmaṇamabravīt |
prahṛṣṭavadanaśśrīmānbhrātaraṃ pārśvataḥ sthitam || 25 ||
sacivo'yaṃ kapīndrasya sugrīvasya mahātmanaḥ |
tameva kāṅkṣamāṇasya mamāntikamupāgataḥ || 26 ||
tamabhyabhāṣa saumitre sugrīvasacivaṃ kapim |
vākyajñaṃ madhurairvākyaissnehayuktamarindama || 27 ||
nānṛgvedavinītasya nāyajurveddhāriṇaḥ |
nāsāmavedaviduṣaśśakyamevaṃ vibhāṣitum || 28 ||
nūnaṃ vyākaraṇaṃ kṛtsnamanena bahudhā śrutam |
bahu vyāharatā'nena na kiñcidapaśabditam || 29 ||
na mukhe netrayorvāpi lalāṭe ca bhruvostathā |
anyeṣvapi ca gātreṣu doṣassaṃviditaḥ kvacit || 30 ||
avistaramasandigdhamavilambitamadrutam |
urasthaṃ kaṇṭhagaṃ vākyaṃ vartate madhyame svare || 31 ||
saṃskārakramasampannāmadrutāmavilambitām |
uccārayati kalyāṇīṃ vācaṃ hṛdayahāriṇīm || 32 ||
anayā citrayā vācā tristhānavyañjanasthayā |
kasya nārādhyate cittamudyatāserarerapi || 33 ||
evaṃ vidho yasya dūto na bhavetpārthivasya tu |
siddhyanti hi kathaṃ tasya kāryāṇāṃ gatiyo'nagha || 34 ||
evaṃ guṇagaṇairyuktā yasya syuḥ kāryasādhakāḥ |
tasya sidhyanti sarvā'rthā dūtavākyapracoditāḥ || 35 ||
evamuktastu saumitrissugrīvasacivaṃ kapim |
abhyabhāṣata vākyajño vākyajñaṃ pavanātmajam || 36 ||
viditau nau guṇā vidvantsugrīvasya mahātmanaḥ |
tameva cā'vāṃ mārgāvassugrīvaṃ plavageśvaram || 37 ||
yathā bravīṣi hanumānsugrīvavacanādiha |
tattathā hi kariṣyāvo vacanāttava sattama || 38 ||
tattasya vākyaṃ nipuṇaṃ niśamya prahṛṣṭarūpaḥ pavanātmajaḥ kapiḥ |
manassamādhāya jayopapattau sakhyaṃ tadā kartumiyeṣa tābhyām || 39 ||
ityārṣe śrīmadrāmāyaṇe vālmīkīya ādikāvye kiṣkindhākāṇḍe tṛtīyassargaḥ ||
Sanskrit — Devanagari (original)
श्रीमद्वाल्मीकीय रामायणे किष्किन्धाकाण्डम् ।
अथ तृतीयस्सर्गः ।
वचो विज्ञाय हनुमान् सुग्रीवस्य महात्मनः ।
पर्वतादृश्यमूकात्तु पुप्लुवे यत्र राघवौ ॥ 1 ॥
कपिरूपं परित्यज्य हनुमान्मारुतात्मजः ।
भिक्षुरूपं ततो भेजे शठबुद्धितया कपिः ॥ 2 ॥
ततस्स हनुमान्वाचा श्लक्ष्णया सुमनोज्ञया ।
विनीतवदुपागम्य राघवौ प्रणिपत्य च ॥ 3 ॥
आबभाषे तदा वीरौ यथावत्प्रशशंस च ।
सम्पूज्य विधिवद्वीरौ हनुमान्मारुतात्मजः ।
उवाच कामतो वाक्यं मृदु सत्यपराक्रमौ ॥ 4 ॥
राजर्षिदेवप्रतिमौ तापसौ संशितव्रतौ ।
देशं कथमिमं प्राप्तौ भवन्तौ वरवर्णिनौ ॥ 5 ॥
त्रासयन्तौ मृगगणानन्यांश्च वनचारिणः ॥ 6 ॥
पम्पातीररुहान्वृक्षान् वीक्षमाणौ समन्ततः ।
इमां नदीं शुभजलां शोभयन्तौ तपस्विनौ ॥ 7 ॥
धैर्यवन्तौ सुवर्णाभौ कौ युवां चीरवाससौ ।
निःश्वसन्तौ वरभुजौ पीडयन्ताविमाः प्रजाः ॥ 8 ॥
सिंहविप्रेक्षितौ वीरौ महाबलविक्रमौ ।
शक्रचापनिभे चापे गृहीत्वा शत्रुसूदनौ ॥ 9 ॥
श्रीमन्तौ रूपसम्पन्नौ वृषभश्रेष्ठविक्रमौ ।
हस्तिहस्तोपमभुजौ द्युतिमन्तौ नरर्षभौ ॥ 10 ॥
प्रभया पर्वतेन्द्रोऽयं युवयोरवभासितः ।
राज्यार्हावमरप्रख्यौ कथं देशमिहागतौ ॥ 11 ॥
पद्मपत्रेक्षणौ वीरौ जटामण्डलधारिणौ ।
अन्योन्यसदृशौ वीरौ देवलोकादिवागतौ ॥ 12 ॥
यदृच्छयेव सम्प्राप्तौ चन्द्रसूर्यौ वसुन्धराम् ।
विशालवक्षसौ वीरौ मानुषौ देवरूपिणौ ॥ 13 ॥
सिंहस्कन्धौ महोत्साहौ समदाविव गोवृषौ ।
आयताश्च सुवृत्ताश्च बाहवः परिघोपमाः ।
सर्वभूषणभूषार्हाः किमर्थं न विभूषिताः ॥ 14 ॥
उभौ योग्यावहं मन्ये रक्षितुं पृथिवीमिमाम् ।
ससागरवनां कृत्स्नां विन्ध्यमेरुविभूषिताम् ॥ 15 ॥
इमे च धनुषी चित्रे श्लष्णे चित्रानुलेपने ।
प्रकाशेते यथेन्द्रस्य वज्रे हेमविभूषिते ॥ 16 ॥
सम्पूर्णा निशितैर्बाणै स्तूणाश्च शुभदर्शनाः ॥ 17 ॥
जीवितान्तकरैर्घोरै श्श्वसद्भिरिव पन्नगैः ।
महाप्रमाणौ विस्तीर्णौ तप्तहाटकभूषितौ ॥ 18 ॥
खडगावेतौ विराजेते निर्मुक्ताविवपन्नगौ ।
एवं मां परिभाषन्तं कस्माद्वै नाभिभाषथः ॥ 19 ॥
सुग्रीवो नाम धर्मात्मा कश्चिद्वानरयूथपः ।
वीरो विनिकृतो भ्रात्रा जगद्भ्रमति दुःखितः ॥ 20 ॥
प्राप्तोऽहं प्रेषितस्तेन सुग्रीवेण महात्मना ।
राज्ञा वानरमुख्यानां हनुमान्नाम वानरः ॥ 21 ॥
युवाभ्यां सह धर्मात्मा सुग्रीवस्सख्यमिच्छति ।
तस्य मां सचिवं वित्तं वानरं पवनात्मजम् ॥ 22 ॥
भिक्षुरूपप्रतिच्छन्नं सुग्रीवप्रियकाम्यया ।
ऋष्यमूकादिह प्राप्तं कामगं कामरूपिणम् ॥ 23 ॥
एवमुक्त्वा तु हनुमांस्तौ वीरौ रामलक्ष्मणौ ।
वाक्यज्ञौ वाक्यकुशलः पुनर्नोवाच किञ्चन ॥ 24 ॥
एतच्छ्रुत्वा वचन्तस्य रामो लक्ष्मणमब्रवीत् ।
प्रहृष्टवदनश्श्रीमान्भ्रातरं पार्श्वतः स्थितम् ॥ 25 ॥
सचिवोऽयं कपीन्द्रस्य सुग्रीवस्य महात्मनः ।
तमेव काङ्क्षमाणस्य ममान्तिकमुपागतः ॥ 26 ॥
तमभ्यभाष सौमित्रे सुग्रीवसचिवं कपिम् ।
वाक्यज्ञं मधुरैर्वाक्यैस्स्नेहयुक्तमरिन्दम ॥ 27 ॥
नानृग्वेदविनीतस्य नायजुर्वेद्धारिणः ।
नासामवेदविदुषश्शक्यमेवं विभाषितुम् ॥ 28 ॥
नूनं व्याकरणं कृत्स्नमनेन बहुधा श्रुतम् ।
बहु व्याहरताऽनेन न किञ्चिदपशब्दितम् ॥ 29 ॥
न मुखे नेत्रयोर्वापि ललाटे च भ्रुवोस्तथा ।
अन्येष्वपि च गात्रेषु दोषस्संविदितः क्वचित् ॥ 30 ॥
अविस्तरमसन्दिग्धमविलम्बितमद्रुतम् ।
उरस्थं कण्ठगं वाक्यं वर्तते मध्यमे स्वरे ॥ 31 ॥
संस्कारक्रमसम्पन्नामद्रुतामविलम्बिताम् ।
उच्चारयति कल्याणीं वाचं हृदयहारिणीम् ॥ 32 ॥
अनया चित्रया वाचा त्रिस्थानव्यञ्जनस्थया ।
कस्य नाराध्यते चित्तमुद्यतासेररेरपि ॥ 33 ॥
एवं विधो यस्य दूतो न भवेत्पार्थिवस्य तु ।
सिद्ध्यन्ति हि कथं तस्य कार्याणां गतियोऽनघ ॥ 34 ॥
एवं गुणगणैर्युक्ता यस्य स्युः कार्यसाधकाः ।
तस्य सिध्यन्ति सर्वाऽर्था दूतवाक्यप्रचोदिताः ॥ 35 ॥
एवमुक्तस्तु सौमित्रिस्सुग्रीवसचिवं कपिम् ।
अभ्यभाषत वाक्यज्ञो वाक्यज्ञं पवनात्मजम् ॥ 36 ॥
विदितौ नौ गुणा विद्वन्त्सुग्रीवस्य महात्मनः ।
तमेव चाऽवां मार्गावस्सुग्रीवं प्लवगेश्वरम् ॥ 37 ॥
यथा ब्रवीषि हनुमान्सुग्रीववचनादिह ।
तत्तथा हि करिष्यावो वचनात्तव सत्तम ॥ 38 ॥
तत्तस्य वाक्यं निपुणं निशम्य प्रहृष्टरूपः पवनात्मजः कपिः ।
मनस्समाधाय जयोपपत्तौ सख्यं तदा कर्तुमियेष ताभ्याम् ॥ 39 ॥
इत्यार्षे श्रीमद्रामायणे वाल्मीकीय आदिकाव्ये किष्किन्धाकाण्डे तृतीयस्सर्गः ॥
śrīmadvālmīkīya rāmāyaṇe kiṣkindhākāṇḍam |
atha tṛtīyassargaḥ |
vaco vijñāya hanumān sugrīvasya mahātmanaḥ |
parvatādṛśyamūkāttu pupluve yatra rāghavau || 1 ||
kapirūpaṃ parityajya hanumānmārutātmajaḥ |
bhikṣurūpaṃ tato bheje śaṭhabuddhitayā kapiḥ || 2 ||
tatassa hanumānvācā ślakṣṇayā sumanojñayā |
vinītavadupāgamya rāghavau praṇipatya ca || 3 ||
ābabhāṣe tadā vīrau yathāvatpraśaśaṃsa ca |
sampūjya vidhivadvīrau hanumānmārutātmajaḥ |
uvāca kāmato vākyaṃ mṛdu satyaparākramau || 4 ||
rājarṣidevapratimau tāpasau saṃśitavratau |
deśaṃ kathamimaṃ prāptau bhavantau varavarṇinau || 5 ||
trāsayantau mṛgagaṇānanyāṃśca vanacāriṇaḥ || 6 ||
pampātīraruhānvṛkṣān vīkṣamāṇau samantataḥ |
imāṃ nadīṃ śubhajalāṃ śobhayantau tapasvinau || 7 ||
dhairyavantau suvarṇābhau kau yuvāṃ cīravāsasau |
niḥśvasantau varabhujau pīḍayantāvimāḥ prajāḥ || 8 ||
siṃhaviprekṣitau vīrau mahābalavikramau |
śakracāpanibhe cāpe gṛhītvā śatrusūdanau || 9 ||
śrīmantau rūpasampannau vṛṣabhaśreṣṭhavikramau |
hastihastopamabhujau dyutimantau nararṣabhau || 10 ||
prabhayā parvatendro'yaṃ yuvayoravabhāsitaḥ |
rājyārhāvamaraprakhyau kathaṃ deśamihāgatau || 11 ||
padmapatrekṣaṇau vīrau jaṭāmaṇḍaladhāriṇau |
anyonyasadṛśau vīrau devalokādivāgatau || 12 ||
yadṛcchayeva samprāptau candrasūryau vasundharām |
viśālavakṣasau vīrau mānuṣau devarūpiṇau || 13 ||
siṃhaskandhau mahotsāhau samadāviva govṛṣau |
āyatāśca suvṛttāśca bāhavaḥ parighopamāḥ |
sarvabhūṣaṇabhūṣārhāḥ kimarthaṃ na vibhūṣitāḥ || 14 ||
ubhau yogyāvahaṃ manye rakṣituṃ pṛthivīmimām |
sasāgaravanāṃ kṛtsnāṃ vindhyameruvibhūṣitām || 15 ||
ime ca dhanuṣī citre ślaṣṇe citrānulepane |
prakāśete yathendrasya vajre hemavibhūṣite || 16 ||
sampūrṇā niśitairbāṇai stūṇāśca śubhadarśanāḥ || 17 ||
jīvitāntakarairghorai śśvasadbhiriva pannagaiḥ |
mahāpramāṇau vistīrṇau taptahāṭakabhūṣitau || 18 ||
khaḍagāvetau virājete nirmuktāvivapannagau |
evaṃ māṃ paribhāṣantaṃ kasmādvai nābhibhāṣathaḥ || 19 ||
sugrīvo nāma dharmātmā kaścidvānarayūthapaḥ |
vīro vinikṛto bhrātrā jagadbhramati duḥkhitaḥ || 20 ||
prāpto'haṃ preṣitastena sugrīveṇa mahātmanā |
rājñā vānaramukhyānāṃ hanumānnāma vānaraḥ || 21 ||
yuvābhyāṃ saha dharmātmā sugrīvassakhyamicchati |
tasya māṃ sacivaṃ vittaṃ vānaraṃ pavanātmajam || 22 ||
bhikṣurūpapraticchannaṃ sugrīvapriyakāmyayā |
ṛṣyamūkādiha prāptaṃ kāmagaṃ kāmarūpiṇam || 23 ||
evamuktvā tu hanumāṃstau vīrau rāmalakṣmaṇau |
vākyajñau vākyakuśalaḥ punarnovāca kiñcana || 24 ||
etacchrutvā vacantasya rāmo lakṣmaṇamabravīt |
prahṛṣṭavadanaśśrīmānbhrātaraṃ pārśvataḥ sthitam || 25 ||
sacivo'yaṃ kapīndrasya sugrīvasya mahātmanaḥ |
tameva kāṅkṣamāṇasya mamāntikamupāgataḥ || 26 ||
tamabhyabhāṣa saumitre sugrīvasacivaṃ kapim |
vākyajñaṃ madhurairvākyaissnehayuktamarindama || 27 ||
nānṛgvedavinītasya nāyajurveddhāriṇaḥ |
nāsāmavedaviduṣaśśakyamevaṃ vibhāṣitum || 28 ||
nūnaṃ vyākaraṇaṃ kṛtsnamanena bahudhā śrutam |
bahu vyāharatā'nena na kiñcidapaśabditam || 29 ||
na mukhe netrayorvāpi lalāṭe ca bhruvostathā |
anyeṣvapi ca gātreṣu doṣassaṃviditaḥ kvacit || 30 ||
avistaramasandigdhamavilambitamadrutam |
urasthaṃ kaṇṭhagaṃ vākyaṃ vartate madhyame svare || 31 ||
saṃskārakramasampannāmadrutāmavilambitām |
uccārayati kalyāṇīṃ vācaṃ hṛdayahāriṇīm || 32 ||
anayā citrayā vācā tristhānavyañjanasthayā |
kasya nārādhyate cittamudyatāserarerapi || 33 ||
evaṃ vidho yasya dūto na bhavetpārthivasya tu |
siddhyanti hi kathaṃ tasya kāryāṇāṃ gatiyo'nagha || 34 ||
evaṃ guṇagaṇairyuktā yasya syuḥ kāryasādhakāḥ |
tasya sidhyanti sarvā'rthā dūtavākyapracoditāḥ || 35 ||
evamuktastu saumitrissugrīvasacivaṃ kapim |
abhyabhāṣata vākyajño vākyajñaṃ pavanātmajam || 36 ||
viditau nau guṇā vidvantsugrīvasya mahātmanaḥ |
tameva cā'vāṃ mārgāvassugrīvaṃ plavageśvaram || 37 ||
yathā bravīṣi hanumānsugrīvavacanādiha |
tattathā hi kariṣyāvo vacanāttava sattama || 38 ||
tattasya vākyaṃ nipuṇaṃ niśamya prahṛṣṭarūpaḥ pavanātmajaḥ kapiḥ |
manassamādhāya jayopapattau sakhyaṃ tadā kartumiyeṣa tābhyām || 39 ||
ityārṣe śrīmadrāmāyaṇe vālmīkīya ādikāvye kiṣkindhākāṇḍe tṛtīyassargaḥ ||
🕉️ This is the original Sanskrit rendered in Grantha script.
Pronunciation is identical to the Sanskrit Devanagari version.