𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌨𑍍𑌦𑌰𑌕𑌾𑌣𑍍𑌡𑌮𑍍 ।
𑌅𑌥 𑌷𑌟𑍍𑌪𑌞𑍍𑌚𑌾𑌶𑌸𑍍𑌸𑌰𑍍𑌗𑌃 ।
𑌤𑌤𑌸𑍍𑌤𑍁 𑌶𑌿𑌂𑌶𑍁𑌪𑌾𑌮𑍂𑌲𑍇 𑌜𑌾𑌨𑌕𑍀𑌂 𑌪𑌰𑍍𑌯𑍁𑌪𑌸𑍍𑌥𑌿𑌤𑌾𑌮𑍍 ।
𑌅𑌭𑌿𑌵𑌾𑌦𑍍𑌯𑌾𑌬𑍍𑌰𑌵𑍀𑌦𑍍𑌦𑌿𑌷𑍍𑌟𑍍𑌯𑌾 𑌪𑌶𑍍𑌯𑌾𑌮𑌿 𑌤𑍍𑌵𑌾𑌮𑌿𑌹𑌾𑌕𑍍𑌷𑌤𑌾𑌮𑍍 ॥ 1 ॥
𑌤𑌤𑌸𑍍𑌤𑌂 𑌪𑍍𑌰𑌸𑍍𑌥𑌿𑌤𑌂 𑌸𑍀𑌤𑌾 𑌵𑍀𑌕𑍍𑌷𑌮𑌾𑌣𑌾 𑌪𑍁𑌨𑌃 𑌪𑍁𑌨𑌃 ।
𑌭𑌰𑍍𑌤𑍃𑌸𑍍𑌨𑍇𑌹𑌾𑌨𑍍𑌵𑌿𑌤𑌂 𑌵𑌾𑌕𑍍𑌯𑌂 𑌹𑌨𑍁𑌮𑌨𑍍𑌤𑌮𑌭𑌾𑌷𑌤 ॥ 2 ॥
𑌕𑌾𑌮𑌮𑌸𑍍𑌯 𑌤𑍍𑌵𑌮𑍇𑌵𑍈𑌕𑌃 𑌕𑌾𑌰𑍍𑌯𑌸𑍍𑌯 𑌪𑌰𑌿𑌸𑌾𑌧𑌨𑍇 ।
𑌪𑌰𑍍𑌯𑌾𑌪𑍍𑌤𑌃 𑌪𑌰𑌵𑍀𑌰𑌘𑍍𑌨 𑌯𑌶𑌸𑍍𑌯𑌸𑍍𑌤𑍇 𑌬𑌲𑍋𑌦𑌯𑌃 ॥ 3 ॥
𑌶𑌰𑍈𑌸𑍍𑌤𑍁 𑌸𑌙𑍍𑌕𑍁𑌲𑌾𑌂 𑌕𑍃𑌤𑍍𑌵𑌾 𑌲𑌙𑍍𑌕𑌾𑌂 𑌪𑌰𑌬𑌲𑌾𑌰𑍍𑌦𑌨𑌃 ।
𑌮𑌾𑌂 𑌨𑌯𑍇𑌦𑍍𑌯𑌦𑌿 𑌕𑌾𑌕𑍁𑌤𑍍𑌸𑍍𑌥𑌸𑍍𑌤𑌤𑍍𑌤𑌸𑍍𑌯 𑌸𑌦𑍃𑌶𑌂 𑌭𑌵𑍇𑌤𑍍 ॥ 4 ॥
𑌤𑌦𑍍𑌯𑌥𑌾 𑌤𑌸𑍍𑌯 𑌵𑌿𑌕𑍍𑌰𑌾𑌨𑍍𑌤𑌮𑌨𑍁𑌰𑍂𑌪𑌂 𑌮𑌹𑌾𑌤𑍍𑌮𑌨𑌃 ।
𑌭𑌵𑌤𑍍𑌯𑌾𑌹𑌵𑌶𑍂𑌰𑌸𑍍𑌯 𑌤𑌥𑌾 𑌤𑍍𑌵𑌮𑍁𑌪𑌪𑌾𑌦𑌯 ॥ 5 ॥
𑌤𑌦𑌰𑍍𑌥𑍋𑌪𑌹𑌿𑌤𑌂 𑌵𑌾𑌕𑍍𑌯𑌂 𑌪𑍍𑌰𑌶𑍍𑌰𑌿𑌤𑌂 𑌹𑍇𑌤𑍁𑌸𑌂𑌹𑌿𑌤𑌮𑍍 ।
𑌨𑌿𑌶𑌮𑍍𑌯 𑌹𑌨𑍁𑌮𑌾𑌂𑌸𑍍𑌤𑌸𑍍𑌯𑌾 𑌵𑌾𑌕𑍍𑌯𑌮𑍁𑌤𑍍𑌤𑌰𑌮𑌬𑍍𑌰𑌵𑍀𑌤𑍍 ॥ 6 ॥
𑌕𑍍𑌷𑌿𑌪𑍍𑌰𑌮𑍇𑌷𑍍𑌯𑌤𑌿 𑌕𑌾𑌕𑍁𑌤𑍍𑌸𑍍𑌥𑌃 𑌹𑌰𑍍𑌯𑍃𑌕𑍍𑌷𑌪𑍍𑌰𑌵𑌰𑍈𑌰𑍍𑌵𑍃𑌤𑌃 ।
𑌯𑌸𑍍𑌤𑍇 𑌯𑍁𑌧𑌿 𑌵𑌿𑌜𑌿𑌤𑍍𑌯𑌾𑌰𑍀𑌨𑍍 𑌶𑍋𑌕𑌂 𑌵𑍍𑌯𑌪𑌨𑌯𑌿𑌷𑍍𑌯𑌤𑌿 ॥ 7 ॥
𑌏𑌵𑌮𑌾𑌶𑍍𑌵𑌾𑌸𑍍𑌯 𑌵𑍈𑌦𑍇𑌹𑍀𑌂 𑌹𑌨𑍁𑌮𑌾𑌨𑍍 𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌗𑌮𑌨𑌾𑌯 𑌮𑌤𑌿𑌂 𑌕𑍃𑌤𑍍𑌵𑌾 𑌵𑍈𑌦𑍇𑌹𑍀𑌮𑌭𑍍𑌯𑌵𑌾𑌦𑌯𑌤𑍍 ॥ 8 ॥
𑌤𑌤𑌸𑍍𑌸 𑌕𑌪𑌿𑌶𑌾𑌰𑍍𑌦𑍂𑌲𑌃 𑌸𑍍𑌵𑌾𑌮𑌿𑌸𑌨𑍍𑌦𑌰𑍍𑌶𑌨𑍋𑌤𑍍𑌸𑍁𑌕𑌃 ।
𑌆𑌰𑍁𑌰𑍋𑌹 𑌗𑌿𑌰𑌿𑌶𑍍𑌰𑍇𑌷𑍍𑌠𑌮𑌰𑌿𑌷𑍍𑌟𑌮𑌰𑌿𑌮𑌰𑍍𑌦𑌨𑌃 ॥ 9 ॥
𑌤𑍁𑌙𑍍𑌗𑌪𑌦𑍍𑌮𑌕𑌜𑍁𑌷𑍍𑌟𑌾𑌭𑌿𑌰𑍍𑌨𑍀𑌲𑌾𑌭𑌿𑌰𑍍𑌵𑌨𑌰𑌾𑌜𑌿𑌭𑌿𑌃 ।
𑌸𑍋𑌤𑍍𑌤𑌰𑍀𑌯𑌮𑌿𑌵𑌾𑌮𑍍𑌭𑍋𑌦𑍈𑌃 𑌶𑍃𑌙𑍍𑌗𑌾𑌨𑍍𑌤𑌰𑌵𑌿𑌲𑌮𑍍𑌬𑌿𑌭𑌿𑌃 ॥ 10 ॥
𑌬𑍋𑌧𑍍𑌯𑌮𑌾𑌨𑌮𑌿𑌵 𑌪𑍍𑌰𑍀𑌤𑍍𑌯𑌾 𑌦𑌿𑌵𑌾𑌕𑌰𑌕𑌰𑍈𑌶𑍍𑌶𑍁𑌭𑍈𑌃 ।
𑌉𑌨𑍍𑌮𑌿𑌷𑌨𑍍𑌤𑌮𑌿𑌵𑍋𑌦𑍍𑌧𑍂𑌤𑍈𑌰𑍍𑌲𑍋𑌚𑌨𑍈𑌰𑌿𑌵 𑌧𑌾𑌤𑍁𑌭𑌿𑌃 ॥ 11 ॥
𑌤𑍋𑌯𑍗𑌘𑌨𑌨𑌿𑌸𑍍𑌸𑍍𑌵𑌨𑍈𑌰𑍍𑌮𑌨𑍍𑌦𑍍𑌰𑍈𑌃 𑌪𑍍𑌰𑌾𑌧𑍀𑌤𑌮𑌿𑌵 𑌪𑌰𑍍𑌵𑌤𑌮𑍍 ।
𑌪𑍍𑌰𑌗𑍀𑌤𑌮𑌿𑌵 𑌵𑌿𑌸𑍍𑌪𑌷𑍍𑌟𑍈𑌰𑍍𑌨𑌾𑌨𑌾𑌪𑍍𑌰𑌸𑍍𑌰𑌵𑌣𑌸𑍍𑌵𑌨𑍈𑌃 ॥ 12 ॥
𑌦𑍇𑌵𑌦𑌾𑌰𑍁𑌭𑌿𑌰𑌤𑍍𑌯𑍁𑌚𑍍𑌚𑍈𑌰𑍂𑌰𑍍𑌧𑍍𑌵𑌬𑌾𑌹𑍁𑌮𑌿𑌵 𑌸𑍍𑌥𑌿𑌤𑌮𑍍 ।
𑌪𑍍𑌰𑌪𑌾𑌤𑌜𑌲𑌨𑌿𑌰𑍍𑌘𑍋𑌷𑍈𑌃 𑌪𑍍𑌰𑌾𑌕𑍍𑌰𑍁𑌷𑍍𑌟𑌮𑌿𑌵 𑌸𑌰𑍍𑌵𑌤𑌃 ॥ 13 ॥
𑌵𑍇𑌪𑌮𑌾𑌨𑌮𑌿𑌵 𑌶𑍍𑌯𑌾𑌮𑍈𑌃 𑌕𑌮𑍍𑌪𑌮𑌾𑌨𑍈𑌶𑍍𑌶𑌰𑌦𑍍𑌵𑌨𑍈𑌃 ।
𑌵𑍇𑌣𑍁𑌭𑌿𑌰𑍍𑌮𑌾𑌰𑍁𑌤𑍋𑌦𑍍𑌧𑍂𑌤𑍈𑌃 𑌕𑍂𑌜𑌨𑍍𑌤𑌮𑌿𑌵 𑌕𑍀𑌚𑌕𑍈𑌃 ॥ 14 ॥
𑌨𑌿𑌶𑍍𑌶𑍍𑌵𑌸𑌨𑍍𑌤𑌮𑌿𑌵𑌾𑌮𑌰𑍍𑌷𑌾𑌦𑍍𑌘𑍋𑌰𑍈𑌰𑌾𑌶𑍀𑌵𑌿𑌷𑍋𑌤𑍍𑌤𑌮𑍈𑌃 ।
𑌨𑍀𑌹𑌾𑌰𑌕𑍃𑌤𑌗𑌮𑍍𑌭𑍀𑌰𑍈𑌰𑍍𑌧𑍍𑌯𑌾𑌯𑌨𑍍𑌤𑌮𑌿𑌵 𑌗𑌹𑍍𑌵𑌰𑍈𑌃 ॥ 15 ॥
𑌮𑍇𑌘𑌪𑌾𑌦𑌨𑌿𑌭𑍈𑌃 𑌪𑌾𑌦𑍈𑌃 𑌪𑍍𑌰𑌕𑍍𑌰𑌾𑌨𑍍𑌤𑌮𑌿𑌵 𑌸𑌰𑍍𑌵𑌤𑌃 ।
𑌜𑍃𑌮𑍍𑌮𑍍𑌭𑌮𑌾𑌣𑌮𑌿𑌵𑌾𑌽𑌕𑌾𑌶𑍇 𑌶𑌿𑌖𑌰𑍈𑌰𑌭𑍍𑌰𑌮𑌾𑌲𑌿𑌭𑌿𑌃 ॥ 16 ॥
𑌕𑍂𑌟𑍈𑌶𑍍𑌚 𑌬𑌹𑍁𑌧𑌾 𑌕𑍀𑌰𑍍𑌣𑍈𑌶𑍍𑌶𑍋𑌭𑌿𑌤𑌂 𑌬𑌹𑍁𑌕𑌨𑍍𑌦𑌰𑍈𑌃 ।
𑌸𑌾𑌲𑌤𑌾𑌲𑌾𑌶𑍍𑌵𑌕𑌰𑍍𑌣𑍈𑌶𑍍𑌚 𑌵𑌂𑌶𑍈𑌶𑍍𑌚 𑌬𑌹𑍁𑌭𑌿𑌰𑍍𑌵𑍃𑌤𑌮𑍍 ॥ 17 ॥
𑌲𑌤𑌾𑌵𑌿𑌤𑌾𑌨𑍈𑌰𑍍𑌵𑌿𑌤𑌤𑍈𑌃 𑌪𑍁𑌷𑍍𑌪𑌵𑌦𑍍𑌭𑌿𑌰𑌲𑌙𑍍𑌕𑍃𑌤𑌮𑍍 ।
𑌨𑌾𑌨𑌾𑌮𑍃𑌗𑌗𑌣𑌾𑌕𑍀𑌰𑍍𑌣𑌂 𑌧𑌾𑌤𑍁𑌨𑌿𑌷𑍍𑌯𑌨𑍍𑌦𑌭𑍂𑌷𑌿𑌤𑌮𑍍 ॥ 18 ॥
𑌬𑌹𑍁𑌪𑍍𑌰𑌸𑍍𑌰𑌵𑌣𑍋𑌪𑍇𑌤𑌂 𑌶𑌿𑌲𑌾𑌸𑌞𑍍𑌚𑌯𑌸𑌙𑍍𑌕𑌟𑌮𑍍 ।
𑌮𑌹𑌰𑍍𑌷𑌿𑌯𑌕𑍍𑌷𑌗𑌨𑍍𑌧𑌰𑍍𑌵𑌕𑌿𑌨𑍍𑌨𑌰𑍋𑌰𑌗𑌸𑍇𑌵𑌿𑌤𑌮𑍍 ॥ 19 ॥
𑌲𑌤𑌾𑌪𑌾𑌦𑌪𑌸𑌙𑍍𑌘𑌾𑌤𑌂 𑌸𑌿𑌂𑌹𑌾𑌧𑍍𑌯𑍁𑌷𑌿𑌤𑌕𑌨𑍍𑌦𑌰𑌮𑍍 ।
𑌵𑍍𑌯𑌾𑌘𑍍𑌰𑌸𑌙𑍍𑌘𑌸𑌮𑌾𑌕𑍀𑌰𑍍𑌣𑌂 𑌸𑍍𑌵𑌾𑌦𑍁𑌮𑍂𑌲𑌫𑌲𑌦𑍍𑌰𑍁𑌮𑌮𑍍 ॥ 20 ॥
𑌤𑌮𑌾𑌰𑍁𑌰𑍋𑌹 𑌹𑌨𑍁𑌮𑌾𑌨𑍍 𑌪𑌰𑍍𑌵𑌤𑌂 𑌪𑌵𑌨𑌾𑌤𑍍𑌮𑌜𑌃 ।
𑌰𑌾𑌮𑌦𑌰𑍍𑌶𑌨𑌶𑍀𑌘𑍍𑌰𑍇𑌣 𑌪𑍍𑌰𑌹𑌰𑍍𑌷𑍇𑌣𑌾𑌭𑌿𑌚𑍋𑌦𑌿𑌤𑌃 ॥ 21 ॥
𑌤𑍇𑌨 𑌪𑌾𑌦𑌤𑌲𑌾𑌕𑍍𑌰𑌾𑌨𑍍𑌤𑌾 𑌰𑌮𑍍𑌯𑍇𑌷𑍁 𑌗𑌿𑌰𑌿𑌸𑌾𑌨𑍁𑌷𑍁 ।
𑌸𑌘𑍋𑌷𑌾𑌸𑍍𑌸𑌮𑌶𑍀𑌰𑍍𑌯𑌨𑍍𑌤 𑌶𑌿𑌲𑌾𑌶𑍍𑌚𑍂𑌰𑍍𑌣𑍀𑌕𑍃𑌤𑌾𑌸𑍍𑌤𑌤𑌃 ॥ 22 ॥
𑌸 𑌤𑌮𑌾𑌰𑍁𑌹𑍍𑌯 𑌶𑍈𑌲𑍇𑌨𑍍𑌦𑍍𑌰𑌂 𑌵𑍍𑌯𑌵𑌰𑍍𑌧𑌤 𑌮𑌹𑌾𑌕𑌪𑌿𑌃 ।
𑌦𑌕𑍍𑌷𑌿𑌣𑌾𑌦𑍁𑌤𑍍𑌤𑌰𑌂 𑌪𑌾𑌰𑌂 𑌪𑍍𑌰𑌾𑌰𑍍𑌥𑌯𑌨𑍍 𑌲𑌵𑌣𑌾𑌮𑍍𑌭𑌸𑌃 ॥ 23 ॥
𑌅𑌧𑌿𑌰𑍁𑌹𑍍𑌯 𑌤𑌤𑍋 𑌵𑍀𑌰𑌃 𑌪𑌰𑍍𑌵𑌤𑌂 𑌪𑌵𑌨𑌾𑌤𑍍𑌮𑌜𑌃 ।
𑌦𑌦𑌰𑍍𑌶 𑌸𑌾𑌗𑌰𑌂 𑌭𑍀𑌮𑌂 𑌮𑍀𑌨𑍋𑌰𑌗𑌨𑌿𑌷𑍇𑌵𑌿𑌤𑌮𑍍 ॥ 24 ॥
𑌸 𑌮𑌾𑌰𑍁𑌤 𑌇𑌵𑌾𑌽𑌕𑌾𑌶𑌂 𑌮𑌾𑌰𑍁𑌤𑌸𑍍𑌯𑌾𑌤𑍍𑌮𑌸𑌮𑍍𑌭𑌵𑌃 ।
𑌪𑍍𑌰𑌪𑍇𑌦𑍇 𑌹𑌰𑌿𑌶𑌾𑌰𑍍𑌦𑍂𑌲𑍋 𑌦𑌕𑍍𑌷𑌿𑌣𑌾𑌦𑍁𑌤𑍍𑌤𑌰𑌾𑌂 𑌦𑌿𑌶𑌮𑍍 ॥ 25 ॥
𑌸 𑌤𑌦𑌾 𑌪𑍀𑌡𑌿𑌤𑌸𑍍𑌤𑍇𑌨 𑌕𑌪𑌿𑌨𑌾 𑌪𑌰𑍍𑌵𑌤𑍋𑌤𑍍𑌤𑌮𑌃 ।
𑌰𑌰𑌾𑌸 𑌸𑌹 𑌤𑍈𑌰𑍍𑌭𑍂𑌤𑍈𑌃 𑌪𑍍𑌰𑌵𑌿𑌶𑌨𑍍𑌵𑌸𑍁𑌧𑌾𑌤𑌲𑌮𑍍 ॥ 26 ॥
𑌕𑌮𑍍𑌪𑌮𑌾𑌨𑍈𑌶𑍍𑌚 𑌶𑌿𑌖𑌰𑍈𑌃 𑌪𑌤𑌦𑍍𑌭𑌿𑌰𑌪𑌿 𑌚 𑌦𑍍𑌰𑍁𑌮𑍈𑌃 ।
𑌤𑌸𑍍𑌯𑍋𑌰𑍁𑌵𑍇𑌗𑍋𑌨𑍍𑌮𑌥𑌿𑌤𑌾𑌃 𑌪𑌾𑌦𑌪𑌾𑌃 𑌪𑍁𑌷𑍍𑌪𑌶𑌾𑌲𑌿𑌨𑌃 ॥ 27 ॥
𑌨𑌿𑌪𑍇𑌤𑍁𑌰𑍍𑌭𑍂𑌤𑌲𑍇 𑌰𑍁𑌗𑍍𑌣𑌾𑌶𑍍𑌶𑌕𑍍𑌰𑌾𑌯𑍁𑌧𑌹𑌤𑌾 𑌇𑌵 ।
𑌕𑌨𑍍𑌦𑌰𑌾𑌨𑍍𑌤𑌰𑌸𑌂𑌸𑍍𑌥𑌾𑌨𑌾𑌂 𑌪𑍀𑌡𑌿𑌤𑌾𑌨𑌾𑌂 𑌮𑌹𑍗𑌜𑌸𑌾𑌮𑍍 ॥ 28 ॥
𑌸𑌿𑌂𑌹𑌾𑌨𑌾𑌂 𑌨𑌿𑌨𑌦𑍋 𑌭𑍀𑌮𑍋 𑌨𑌭𑍋 𑌭𑌿𑌨𑍍𑌦𑌨𑍍 𑌸 𑌶𑍁𑌶𑍍𑌰𑍁𑌵𑍇 ।
𑌤𑍍𑌰𑌸𑍍𑌤𑌵𑍍𑌯𑌾𑌵𑍃𑌤𑍍𑌤𑌵𑌸𑌨𑌾 𑌵𑍍𑌯𑌾𑌕𑍁𑌲𑍀𑌕𑍃𑌤𑌭𑍂𑌷𑌣𑌾𑌃 ॥ 29 ॥
𑌵𑌿𑌦𑍍𑌯𑌾𑌧𑌰𑍍𑌯𑌃 𑌸𑌮𑍁𑌤𑍍𑌪𑍇𑌤𑍁𑌸𑍍𑌸𑌹𑌸𑌾 𑌧𑌰𑌣𑍀𑌧𑌰𑌾𑌤𑍍 ।
𑌅𑌤𑌿𑌪𑍍𑌰𑌮𑌾𑌣𑌾 𑌬𑌲𑌿𑌨𑍋 𑌦𑍀𑌪𑍍𑌤𑌜𑌿𑌹𑍍𑌵𑌾 𑌮𑌹𑌾𑌵𑌿𑌷𑌾𑌃 ॥ 30 ॥
𑌨𑌿𑌪𑍀𑌡𑌿𑌤𑌶𑌿𑌰𑍋𑌗𑍍𑌰𑍀𑌵𑌾 𑌵𑍍𑌯𑌚𑍇𑌷𑍍𑌟𑌨𑍍𑌤 𑌮𑌹𑌾𑌹𑌯𑌃 ।
𑌕𑌿𑌨𑍍𑌨𑌰𑍋𑌰𑌗𑌨𑍍𑌧𑌰𑍍𑌵𑌯𑌕𑍍𑌷𑌵𑌿𑌦𑍍𑌯𑌾𑌧𑌰𑌾𑌸𑍍𑌤𑌦𑌾 ॥ 31 ॥
𑌪𑍀𑌡𑌿𑌤𑌂 𑌤𑌂 𑌨𑌗𑌵𑌰𑌂 𑌤𑍍𑌯𑌕𑍍𑌤𑍍𑌵𑌾 𑌗𑌗𑌨𑌮𑌾𑌸𑍍𑌥𑌿𑌤𑌾𑌃 ।
𑌸 𑌚 𑌭𑍂𑌮𑌿𑌧𑌰𑌃 𑌶𑍍𑌰𑍀𑌮𑌾𑌨𑍍𑌬𑌲𑌿𑌨𑌾 𑌤𑍇𑌨 𑌪𑍀𑌡𑌿𑌤𑌃 ॥ 32 ॥
𑌸𑌵𑍃𑌕𑍍𑌷𑌶𑌿𑌖𑌰𑍋𑌦𑌗𑍍𑌰𑌃 𑌪𑍍𑌰𑌵𑌿𑌵𑍇𑌶 𑌰𑌸𑌾𑌤𑌲𑌮𑍍 ।
𑌦𑌶𑌯𑍋𑌜𑌨𑌵𑌿𑌸𑍍𑌤𑌾𑌰𑌸𑍍𑌤𑍍𑌰𑌿𑌂𑌶𑌦𑍍𑌯𑍋𑌜𑌨𑌮𑍁𑌚𑍍𑌛𑍍𑌰𑌿𑌤𑌃 ॥ 33 ॥
𑌧𑌰𑌣𑍍𑌯𑌾𑌂 𑌸𑌮𑌤𑌾𑌂 𑌯𑌾𑌤𑌃 𑌸 𑌬𑌭𑍂𑌵 𑌧𑌰𑌾𑌧𑌰𑌃 ।
𑌸 𑌲𑌿𑌲𑌙𑍍𑌘𑌯𑌿𑌷𑍁𑌰𑍍𑌭𑍀𑌮𑌂 𑌸𑌲𑍀𑌲𑌂 𑌲𑌵𑌣𑌾𑌰𑍍𑌣𑌵𑌮𑍍 ॥ 34 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌨𑍍𑌦𑌰𑌕𑌾𑌣𑍍𑌡𑍇 𑌷𑌟𑍍𑌪𑌞𑍍𑌚𑌾𑌶𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe sundarakāṇḍam |
atha ṣaṭpañcāśassargaḥ |
tatastu śiṃśupāmūle jānakīṃ paryupasthitām |
abhivādyābravīddiṣṭyā paśyāmi tvāmihākṣatām || 1 ||
tatastaṃ prasthitaṃ sītā vīkṣamāṇā punaḥ punaḥ |
bhartṛsnehānvitaṃ vākyaṃ hanumantamabhāṣata || 2 ||
kāmamasya tvamevaikaḥ kāryasya parisādhane |
paryāptaḥ paravīraghna yaśasyaste balodayaḥ || 3 ||
śaraistu saṅkulāṃ kṛtvā laṅkāṃ parabalārdanaḥ |
māṃ nayedyadi kākutsthastattasya sadṛśaṃ bhavet || 4 ||
tadyathā tasya vikrāntamanurūpaṃ mahātmanaḥ |
bhavatyāhavaśūrasya tathā tvamupapādaya || 5 ||
tadarthopahitaṃ vākyaṃ praśritaṃ hetusaṃhitam |
niśamya hanumāṃstasyā vākyamuttaramabravīt || 6 ||
kṣiprameṣyati kākutsthaḥ haryṛkṣapravarairvṛtaḥ |
yaste yudhi vijityārīn śokaṃ vyapanayiṣyati || 7 ||
evamāśvāsya vaidehīṃ hanumān mārutātmajaḥ |
gamanāya matiṃ kṛtvā vaidehīmabhyavādayat || 8 ||
tatassa kapiśārdūlaḥ svāmisandarśanotsukaḥ |
āruroha giriśreṣṭhamariṣṭamarimardanaḥ || 9 ||
tuṅgapadmakajuṣṭābhirnīlābhirvanarājibhiḥ |
sottarīyamivāmbhodaiḥ śṛṅgāntaravilambibhiḥ || 10 ||
bodhyamānamiva prītyā divākarakaraiśśubhaiḥ |
unmiṣantamivoddhūtairlocanairiva dhātubhiḥ || 11 ||
toyaughananissvanairmandraiḥ prādhītamiva parvatam |
pragītamiva vispaṣṭairnānāprasravaṇasvanaiḥ || 12 ||
devadārubhiratyuccairūrdhvabāhumiva sthitam |
prapātajalanirghoṣaiḥ prākruṣṭamiva sarvataḥ || 13 ||
vepamānamiva śyāmaiḥ kampamānaiśśaradvanaiḥ |
veṇubhirmārutoddhūtaiḥ kūjantamiva kīcakaiḥ || 14 ||
niśśvasantamivāmarṣādghorairāśīviṣottamaiḥ |
nīhārakṛtagambhīrairdhyāyantamiva gahvaraiḥ || 15 ||
meghapādanibhaiḥ pādaiḥ prakrāntamiva sarvataḥ |
jṛmmbhamāṇamivā'kāśe śikharairabhramālibhiḥ || 16 ||
kūṭaiśca bahudhā kīrṇaiśśobhitaṃ bahukandaraiḥ |
sālatālāśvakarṇaiśca vaṃśaiśca bahubhirvṛtam || 17 ||
latāvitānairvitataiḥ puṣpavadbhiralaṅkṛtam |
nānāmṛgagaṇākīrṇaṃ dhātuniṣyandabhūṣitam || 18 ||
bahuprasravaṇopetaṃ śilāsañcayasaṅkaṭam |
maharṣiyakṣagandharvakinnaroragasevitam || 19 ||
latāpādapasaṅghātaṃ siṃhādhyuṣitakandaram |
vyāghrasaṅghasamākīrṇaṃ svādumūlaphaladrumam || 20 ||
tamāruroha hanumān parvataṃ pavanātmajaḥ |
rāmadarśanaśīghreṇa praharṣeṇābhicoditaḥ || 21 ||
tena pādatalākrāntā ramyeṣu girisānuṣu |
saghoṣāssamaśīryanta śilāścūrṇīkṛtāstataḥ || 22 ||
sa tamāruhya śailendraṃ vyavardhata mahākapiḥ |
dakṣiṇāduttaraṃ pāraṃ prārthayan lavaṇāmbhasaḥ || 23 ||
adhiruhya tato vīraḥ parvataṃ pavanātmajaḥ |
dadarśa sāgaraṃ bhīmaṃ mīnoraganiṣevitam || 24 ||
sa māruta ivā'kāśaṃ mārutasyātmasambhavaḥ |
prapede hariśārdūlo dakṣiṇāduttarāṃ diśam || 25 ||
sa tadā pīḍitastena kapinā parvatottamaḥ |
rarāsa saha tairbhūtaiḥ praviśanvasudhātalam || 26 ||
kampamānaiśca śikharaiḥ patadbhirapi ca drumaiḥ |
tasyoruvegonmathitāḥ pādapāḥ puṣpaśālinaḥ || 27 ||
nipeturbhūtale rugṇāśśakrāyudhahatā iva |
kandarāntarasaṃsthānāṃ pīḍitānāṃ mahaujasām || 28 ||
siṃhānāṃ ninado bhīmo nabho bhindan sa śuśruve |
trastavyāvṛttavasanā vyākulīkṛtabhūṣaṇāḥ || 29 ||
vidyādharyaḥ samutpetussahasā dharaṇīdharāt |
atipramāṇā balino dīptajihvā mahāviṣāḥ || 30 ||
nipīḍitaśirogrīvā vyaceṣṭanta mahāhayaḥ |
kinnaroragandharvayakṣavidyādharāstadā || 31 ||
pīḍitaṃ taṃ nagavaraṃ tyaktvā gaganamāsthitāḥ |
sa ca bhūmidharaḥ śrīmānbalinā tena pīḍitaḥ || 32 ||
savṛkṣaśikharodagraḥ praviveśa rasātalam |
daśayojanavistārastriṃśadyojanamucchritaḥ || 33 ||
dharaṇyāṃ samatāṃ yātaḥ sa babhūva dharādharaḥ |
sa lilaṅghayiṣurbhīmaṃ salīlaṃ lavaṇārṇavam || 34 ||
ityārṣe śrīmadrāmāyaṇe vālmīkīya ādikāvye sundarakāṇḍe ṣaṭpañcāśassargaḥ ||
Sanskrit — Devanagari (original)
श्रीमद्वाल्मीकीय रामायणे सुन्दरकाण्डम् ।
अथ षट्पञ्चाशस्सर्गः ।
ततस्तु शिंशुपामूले जानकीं पर्युपस्थिताम् ।
अभिवाद्याब्रवीद्दिष्ट्या पश्यामि त्वामिहाक्षताम् ॥ 1 ॥
ततस्तं प्रस्थितं सीता वीक्षमाणा पुनः पुनः ।
भर्तृस्नेहान्वितं वाक्यं हनुमन्तमभाषत ॥ 2 ॥
काममस्य त्वमेवैकः कार्यस्य परिसाधने ।
पर्याप्तः परवीरघ्न यशस्यस्ते बलोदयः ॥ 3 ॥
शरैस्तु सङ्कुलां कृत्वा लङ्कां परबलार्दनः ।
मां नयेद्यदि काकुत्स्थस्तत्तस्य सदृशं भवेत् ॥ 4 ॥
तद्यथा तस्य विक्रान्तमनुरूपं महात्मनः ।
भवत्याहवशूरस्य तथा त्वमुपपादय ॥ 5 ॥
तदर्थोपहितं वाक्यं प्रश्रितं हेतुसंहितम् ।
निशम्य हनुमांस्तस्या वाक्यमुत्तरमब्रवीत् ॥ 6 ॥
क्षिप्रमेष्यति काकुत्स्थः हर्यृक्षप्रवरैर्वृतः ।
यस्ते युधि विजित्यारीन् शोकं व्यपनयिष्यति ॥ 7 ॥
एवमाश्वास्य वैदेहीं हनुमान् मारुतात्मजः ।
गमनाय मतिं कृत्वा वैदेहीमभ्यवादयत् ॥ 8 ॥
ततस्स कपिशार्दूलः स्वामिसन्दर्शनोत्सुकः ।
आरुरोह गिरिश्रेष्ठमरिष्टमरिमर्दनः ॥ 9 ॥
तुङ्गपद्मकजुष्टाभिर्नीलाभिर्वनराजिभिः ।
सोत्तरीयमिवाम्भोदैः शृङ्गान्तरविलम्बिभिः ॥ 10 ॥
बोध्यमानमिव प्रीत्या दिवाकरकरैश्शुभैः ।
उन्मिषन्तमिवोद्धूतैर्लोचनैरिव धातुभिः ॥ 11 ॥
तोयौघननिस्स्वनैर्मन्द्रैः प्राधीतमिव पर्वतम् ।
प्रगीतमिव विस्पष्टैर्नानाप्रस्रवणस्वनैः ॥ 12 ॥
देवदारुभिरत्युच्चैरूर्ध्वबाहुमिव स्थितम् ।
प्रपातजलनिर्घोषैः प्राक्रुष्टमिव सर्वतः ॥ 13 ॥
वेपमानमिव श्यामैः कम्पमानैश्शरद्वनैः ।
वेणुभिर्मारुतोद्धूतैः कूजन्तमिव कीचकैः ॥ 14 ॥
निश्श्वसन्तमिवामर्षाद्घोरैराशीविषोत्तमैः ।
नीहारकृतगम्भीरैर्ध्यायन्तमिव गह्वरैः ॥ 15 ॥
मेघपादनिभैः पादैः प्रक्रान्तमिव सर्वतः ।
जृम्म्भमाणमिवाऽकाशे शिखरैरभ्रमालिभिः ॥ 16 ॥
कूटैश्च बहुधा कीर्णैश्शोभितं बहुकन्दरैः ।
सालतालाश्वकर्णैश्च वंशैश्च बहुभिर्वृतम् ॥ 17 ॥
लतावितानैर्विततैः पुष्पवद्भिरलङ्कृतम् ।
नानामृगगणाकीर्णं धातुनिष्यन्दभूषितम् ॥ 18 ॥
बहुप्रस्रवणोपेतं शिलासञ्चयसङ्कटम् ।
महर्षियक्षगन्धर्वकिन्नरोरगसेवितम् ॥ 19 ॥
लतापादपसङ्घातं सिंहाध्युषितकन्दरम् ।
व्याघ्रसङ्घसमाकीर्णं स्वादुमूलफलद्रुमम् ॥ 20 ॥
तमारुरोह हनुमान् पर्वतं पवनात्मजः ।
रामदर्शनशीघ्रेण प्रहर्षेणाभिचोदितः ॥ 21 ॥
तेन पादतलाक्रान्ता रम्येषु गिरिसानुषु ।
सघोषास्समशीर्यन्त शिलाश्चूर्णीकृतास्ततः ॥ 22 ॥
स तमारुह्य शैलेन्द्रं व्यवर्धत महाकपिः ।
दक्षिणादुत्तरं पारं प्रार्थयन् लवणाम्भसः ॥ 23 ॥
अधिरुह्य ततो वीरः पर्वतं पवनात्मजः ।
ददर्श सागरं भीमं मीनोरगनिषेवितम् ॥ 24 ॥
स मारुत इवाऽकाशं मारुतस्यात्मसम्भवः ।
प्रपेदे हरिशार्दूलो दक्षिणादुत्तरां दिशम् ॥ 25 ॥
स तदा पीडितस्तेन कपिना पर्वतोत्तमः ।
ररास सह तैर्भूतैः प्रविशन्वसुधातलम् ॥ 26 ॥
कम्पमानैश्च शिखरैः पतद्भिरपि च द्रुमैः ।
तस्योरुवेगोन्मथिताः पादपाः पुष्पशालिनः ॥ 27 ॥
निपेतुर्भूतले रुग्णाश्शक्रायुधहता इव ।
कन्दरान्तरसंस्थानां पीडितानां महौजसाम् ॥ 28 ॥
सिंहानां निनदो भीमो नभो भिन्दन् स शुश्रुवे ।
त्रस्तव्यावृत्तवसना व्याकुलीकृतभूषणाः ॥ 29 ॥
विद्याधर्यः समुत्पेतुस्सहसा धरणीधरात् ।
अतिप्रमाणा बलिनो दीप्तजिह्वा महाविषाः ॥ 30 ॥
निपीडितशिरोग्रीवा व्यचेष्टन्त महाहयः ।
किन्नरोरगन्धर्वयक्षविद्याधरास्तदा ॥ 31 ॥
पीडितं तं नगवरं त्यक्त्वा गगनमास्थिताः ।
स च भूमिधरः श्रीमान्बलिना तेन पीडितः ॥ 32 ॥
सवृक्षशिखरोदग्रः प्रविवेश रसातलम् ।
दशयोजनविस्तारस्त्रिंशद्योजनमुच्छ्रितः ॥ 33 ॥
धरण्यां समतां यातः स बभूव धराधरः ।
स लिलङ्घयिषुर्भीमं सलीलं लवणार्णवम् ॥ 34 ॥
इत्यार्षे श्रीमद्रामायणे वाल्मीकीय आदिकाव्ये सुन्दरकाण्डे षट्पञ्चाशस्सर्गः ॥
śrīmadvālmīkīya rāmāyaṇe sundarakāṇḍam |
atha ṣaṭpañcāśassargaḥ |
tatastu śiṃśupāmūle jānakīṃ paryupasthitām |
abhivādyābravīddiṣṭyā paśyāmi tvāmihākṣatām || 1 ||
tatastaṃ prasthitaṃ sītā vīkṣamāṇā punaḥ punaḥ |
bhartṛsnehānvitaṃ vākyaṃ hanumantamabhāṣata || 2 ||
kāmamasya tvamevaikaḥ kāryasya parisādhane |
paryāptaḥ paravīraghna yaśasyaste balodayaḥ || 3 ||
śaraistu saṅkulāṃ kṛtvā laṅkāṃ parabalārdanaḥ |
māṃ nayedyadi kākutsthastattasya sadṛśaṃ bhavet || 4 ||
tadyathā tasya vikrāntamanurūpaṃ mahātmanaḥ |
bhavatyāhavaśūrasya tathā tvamupapādaya || 5 ||
tadarthopahitaṃ vākyaṃ praśritaṃ hetusaṃhitam |
niśamya hanumāṃstasyā vākyamuttaramabravīt || 6 ||
kṣiprameṣyati kākutsthaḥ haryṛkṣapravarairvṛtaḥ |
yaste yudhi vijityārīn śokaṃ vyapanayiṣyati || 7 ||
evamāśvāsya vaidehīṃ hanumān mārutātmajaḥ |
gamanāya matiṃ kṛtvā vaidehīmabhyavādayat || 8 ||
tatassa kapiśārdūlaḥ svāmisandarśanotsukaḥ |
āruroha giriśreṣṭhamariṣṭamarimardanaḥ || 9 ||
tuṅgapadmakajuṣṭābhirnīlābhirvanarājibhiḥ |
sottarīyamivāmbhodaiḥ śṛṅgāntaravilambibhiḥ || 10 ||
bodhyamānamiva prītyā divākarakaraiśśubhaiḥ |
unmiṣantamivoddhūtairlocanairiva dhātubhiḥ || 11 ||
toyaughananissvanairmandraiḥ prādhītamiva parvatam |
pragītamiva vispaṣṭairnānāprasravaṇasvanaiḥ || 12 ||
devadārubhiratyuccairūrdhvabāhumiva sthitam |
prapātajalanirghoṣaiḥ prākruṣṭamiva sarvataḥ || 13 ||
vepamānamiva śyāmaiḥ kampamānaiśśaradvanaiḥ |
veṇubhirmārutoddhūtaiḥ kūjantamiva kīcakaiḥ || 14 ||
niśśvasantamivāmarṣādghorairāśīviṣottamaiḥ |
nīhārakṛtagambhīrairdhyāyantamiva gahvaraiḥ || 15 ||
meghapādanibhaiḥ pādaiḥ prakrāntamiva sarvataḥ |
jṛmmbhamāṇamivā'kāśe śikharairabhramālibhiḥ || 16 ||
kūṭaiśca bahudhā kīrṇaiśśobhitaṃ bahukandaraiḥ |
sālatālāśvakarṇaiśca vaṃśaiśca bahubhirvṛtam || 17 ||
latāvitānairvitataiḥ puṣpavadbhiralaṅkṛtam |
nānāmṛgagaṇākīrṇaṃ dhātuniṣyandabhūṣitam || 18 ||
bahuprasravaṇopetaṃ śilāsañcayasaṅkaṭam |
maharṣiyakṣagandharvakinnaroragasevitam || 19 ||
latāpādapasaṅghātaṃ siṃhādhyuṣitakandaram |
vyāghrasaṅghasamākīrṇaṃ svādumūlaphaladrumam || 20 ||
tamāruroha hanumān parvataṃ pavanātmajaḥ |
rāmadarśanaśīghreṇa praharṣeṇābhicoditaḥ || 21 ||
tena pādatalākrāntā ramyeṣu girisānuṣu |
saghoṣāssamaśīryanta śilāścūrṇīkṛtāstataḥ || 22 ||
sa tamāruhya śailendraṃ vyavardhata mahākapiḥ |
dakṣiṇāduttaraṃ pāraṃ prārthayan lavaṇāmbhasaḥ || 23 ||
adhiruhya tato vīraḥ parvataṃ pavanātmajaḥ |
dadarśa sāgaraṃ bhīmaṃ mīnoraganiṣevitam || 24 ||
sa māruta ivā'kāśaṃ mārutasyātmasambhavaḥ |
prapede hariśārdūlo dakṣiṇāduttarāṃ diśam || 25 ||
sa tadā pīḍitastena kapinā parvatottamaḥ |
rarāsa saha tairbhūtaiḥ praviśanvasudhātalam || 26 ||
kampamānaiśca śikharaiḥ patadbhirapi ca drumaiḥ |
tasyoruvegonmathitāḥ pādapāḥ puṣpaśālinaḥ || 27 ||
nipeturbhūtale rugṇāśśakrāyudhahatā iva |
kandarāntarasaṃsthānāṃ pīḍitānāṃ mahaujasām || 28 ||
siṃhānāṃ ninado bhīmo nabho bhindan sa śuśruve |
trastavyāvṛttavasanā vyākulīkṛtabhūṣaṇāḥ || 29 ||
vidyādharyaḥ samutpetussahasā dharaṇīdharāt |
atipramāṇā balino dīptajihvā mahāviṣāḥ || 30 ||
nipīḍitaśirogrīvā vyaceṣṭanta mahāhayaḥ |
kinnaroragandharvayakṣavidyādharāstadā || 31 ||
pīḍitaṃ taṃ nagavaraṃ tyaktvā gaganamāsthitāḥ |
sa ca bhūmidharaḥ śrīmānbalinā tena pīḍitaḥ || 32 ||
savṛkṣaśikharodagraḥ praviveśa rasātalam |
daśayojanavistārastriṃśadyojanamucchritaḥ || 33 ||
dharaṇyāṃ samatāṃ yātaḥ sa babhūva dharādharaḥ |
sa lilaṅghayiṣurbhīmaṃ salīlaṃ lavaṇārṇavam || 34 ||
ityārṣe śrīmadrāmāyaṇe vālmīkīya ādikāvye sundarakāṇḍe ṣaṭpañcāśassargaḥ ||
🕉️ This is the original Sanskrit rendered in Grantha script.
Pronunciation is identical to the Sanskrit Devanagari version.