ஶ்ரீமத்வால்மீகீய ராமாயணே அரண்யகாண்டம் ।
அத ஸப்தவிம்ஶஸ்ஸர்கஃ ।
கரம் து ராமாபிமுகம் ப்ரயாந்தம் வாஹிநீபதிஃ ।
ராக்ஷஸஸ்த்ரிஶிரா நாம ஸந்நிபத்யேதமப்ரவீத் ॥ 1 ॥
மாம் நியோஜய விக்ராந்த ஸந்நிவர்தஸ்வ ஸாஹஸாத் ।
பஶ்ய ராமம் மஹாபாஹும் ஸம்யுகே விநிபாதிதம் ॥ 2 ॥
ப்ரதிஜாநாமி தே ஸத்யமாயுதம் சாஹமாலபே ।
யதா ராமம் வதிஷ்யாமி வதார்ஹம் ஸர்வரக்ஷஸாம் ॥ 3 ॥
அஹம் வாஸ்ய ரணே ம்ரு'த்யுரேஷ வா ஸமரே மம ।
விநிவ்ரு'த்ய ரணோத்ஸாஹாந்முஹூர்தம் ப்ராஶ்நிகோ பவ ॥ 4 ॥
ப்ரஹ்ரு'ஷ்டோ வா ஹதே ராமே ஜநஸ்தாநம் ப்ரயாஸ்யஸி ।
மயி வா நிஹதே ராமம் ஸம்யுகாயோபயாஸ்யஸி ॥ 5 ॥
கரஸ்த்ரிஶிரஸா தேந ம்ரு'த்யுலோபாத்ப்ரஸாதிதஃ ।
கச்ச யுத்யேத்யநுஜ்ஞாதோ ராகவாபிமுகோ யயௌ ॥ 6 ॥
த்ரிஶிராஶ்ச ரதேநைவ வாஜியுக்தேந பாஸ்வதா ।
அப்யத்ரவத்ரணே ராமம் த்ரிஶ்ரு'ங்க இவ பர்வதஃ ॥ 7 ॥
ஶரதாராஸமூஹாந்ஸ மஹாமேக இவோத்ஸ்ரு'ஜந் ।
வ்யஸ்ரு'ஜத்ஸத்ரு'ஶம் நாதம் ஜலார்த்ரஸ்ய து துந்துபேஃ ॥ 8 ॥
ஆகச்சந்தம் த்ரிஶிரஸம் ராக்ஷஸம் ப்ரேக்ஷ்ய ராகவஃ ।
தநுஷா ப்ரதிஜக்ராஹ விதுந்வந்ஸாயகாந் ஶிதாந் ॥ 9 ॥
ஸ ஸம்ப்ரஹாரஸ்துமுலோ ராமத்ரிஶிரஸோர்மஹாந் ।
பபூவாதீவ பலிநோஸ்ஸிம்ஹகுஞ்ஜரயோரிவ ॥ 10 ॥
ததஸ்த்ரிஶிரஸா பாணைர்லலாடே தாடிதஸ்த்ரிபிஃ ।
அமர்ஷீ குபிதோராமஸ்ஸம்ரப்தமிதமப்ரவீத் ॥ 11 ॥
அஹோ விக்ரமஶூரஸ்ய ராக்ஷஸஸ்யேத்ரு'ஶம் பலம் ।
புஷ்பைரிவ ஶரைர்யஸ்ய லலாடேऽஸ்மிந்பரிக்ஷதஃ ॥ 12 ॥
மமாபி ப்ரதிக்ரு'ஹ்ணீஷ்வ ஶராம்ஶ்சாபகுணாச்ச்யுதாந் ।
ஏவமுக்த்வா து ஸம்ரப்தஶ்ஶராநாஶீவிஷோபமாந் ॥ 13 ॥
த்ரிஶிரோவக்ஷஸி க்ருத்தோ நிஜகாந சதுர்தஶ ।
சதுர்பிஸ்துரகாநஸ்ய ஶரைஃ ஸந்நதபர்வபிஃ ॥ 14 ॥
ந்யபாதயத தேஜஸ்வீ சதுரஸ்தஸ்ய வாஜிநஃ ।
அஷ்டபிஸ்ஸாயகைஸ்ஸூதம் ரதோபஸ்தாந்ந்யபாதயத் ॥ 15 ॥
ராமஶ்சிச்சேத பாணேந த்வஜம் சாஸ்ய ஸமுச்ச்ரிதம் ।
ததோ ஹதரதாத்தஸ்மாதுத்பதந்தம் நிஶாசரம் ॥ 16 ॥
பிபேத ராமஸ்தம் பாணைர்ஹ்ரு'தயே ஸோऽபவஜ்ஜடஃ ।
ஸாயகைஶ்சாப்ரமேயாத்மா ஸாமர்ஷஸ்தஸ்ய ரக்ஷஸஃ ॥ 17 ॥
ஶிராம்ஸ்யபாதயத்ராமோ வேகவத்பிஸ்த்ரிபிஶ்ஶிதைஃ ।
ஸ பூமௌ ருதிரோத்காரீ ராமபாணாபிபீடிதஃ ॥ 18 ॥
ந்யபதத்பதிதைஃ பூர்வம் ஸ்வஶிரோபிர்நிஶாசரஃ ।
ஹதஶேஷாஸ்ததோ பக்நா ராக்ஷஸாஃ கரஸம்ஶ்ரயா ॥ 19 ॥
த்ரவந்தி ஸ்ம ந திஷ்டந்தி வ்யாக்ரத்ரஸ்தா ம்ரு'கா இவ ।
தாந்கரோ த்ரவதோ த்ரு'ஷ்ட்வா நிவர்த்ய ருஷிதஸ்ஸ்வயம் ॥ 20 ॥
இத்யார்ஷே ஶ்ரீமத்ராமாயணே வால்மீகீய ஆதிகாவ்யே அரண்யகாண்டே ஸப்தவிம்ஶஸ்ஸர்கஃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha saptaviṃśassargaḥ |
kharaṃ tu rāmābhimukhaṃ prayāntaṃ vāhinīpatiḥ |
rākṣasastriśirā nāma sannipatyedamabravīt || 1 ||
māṃ niyojaya vikrānta sannivartasva sāhasāt |
paśya rāmaṃ mahābāhuṃ saṃyuge vinipātitam || 2 ||
pratijānāmi te satyamāyudhaṃ cāhamālabhe |
yathā rāmaṃ vadhiṣyāmi vadhārhaṃ sarvarakṣasām || 3 ||
ahaṃ vāsya raṇe mṛtyureṣa vā samare mama |
vinivṛtya raṇotsāhānmuhūrtaṃ prāśniko bhava || 4 ||
prahṛṣṭo vā hate rāme janasthānaṃ prayāsyasi |
mayi vā nihate rāmaṃ saṃyugāyopayāsyasi || 5 ||
kharastriśirasā tena mṛtyulobhātprasāditaḥ |
gaccha yudhyetyanujñāto rāghavābhimukho yayau || 6 ||
triśirāśca rathenaiva vājiyuktena bhāsvatā |
abhyadravadraṇe rāmaṃ triśṛṅga iva parvataḥ || 7 ||
śaradhārāsamūhānsa mahāmegha ivotsṛjan |
vyasṛjatsadṛśaṃ nādaṃ jalārdrasya tu dundubheḥ || 8 ||
āgacchantaṃ triśirasaṃ rākṣasaṃ prekṣya rāghavaḥ |
dhanuṣā pratijagrāha vidhunvansāyakān śitān || 9 ||
sa samprahārastumulo rāmatriśirasormahān |
babhūvātīva balinossiṃhakuñjarayoriva || 10 ||
tatastriśirasā bāṇairlalāṭe tāḍitastribhiḥ |
amarṣī kupitorāmassaṃrabdhamidamabravīt || 11 ||
aho vikramaśūrasya rākṣasasyedṛśaṃ balam |
puṣpairiva śarairyasya lalāṭe'sminparikṣataḥ || 12 ||
mamāpi pratigṛhṇīṣva śarāṃścāpaguṇāccyutān |
evamuktvā tu saṃrabdhaśśarānāśīviṣopamān || 13 ||
triśirovakṣasi kruddho nijaghāna caturdaśa |
caturbhisturagānasya śaraiḥ sannataparvabhiḥ || 14 ||
nyapātayata tejasvī caturastasya vājinaḥ |
aṣṭabhissāyakaissūtaṃ rathopasthānnyapātayat || 15 ||
rāmaściccheda bāṇena dhvajaṃ cāsya samucchritam |
tato hatarathāttasmādutpatantaṃ niśācaram || 16 ||
bibheda rāmastaṃ bāṇairhṛdaye so'bhavajjaḍaḥ |
sāyakaiścāprameyātmā sāmarṣastasya rakṣasaḥ || 17 ||
śirāṃsyapātayadrāmo vegavadbhistribhiśśitaiḥ |
sa bhūmau rudhirodgārī rāmabāṇābhipīḍitaḥ || 18 ||
nyapatatpatitaiḥ pūrvaṃ svaśirobhirniśācaraḥ |
hataśeṣāstato bhagnā rākṣasāḥ kharasaṃśrayā || 19 ||
dravanti sma na tiṣṭhanti vyāghratrastā mṛgā iva |
tānkharo dravato dṛṣṭvā nivartya ruṣitassvayam || 20 ||
ityārṣe śrīmadrāmāyaṇe vālmīkīya ādikāvye araṇyakāṇḍe saptaviṃśassargaḥ ||
Sanskrit — Devanagari (original)
श्रीमद्वाल्मीकीय रामायणे अरण्यकाण्डम् ।
अथ सप्तविंशस्सर्गः ।
खरं तु रामाभिमुखं प्रयान्तं वाहिनीपतिः ।
राक्षसस्त्रिशिरा नाम सन्निपत्येदमब्रवीत् ॥ 1 ॥
मां नियोजय विक्रान्त सन्निवर्तस्व साहसात् ।
पश्य रामं महाबाहुं संयुगे विनिपातितम् ॥ 2 ॥
प्रतिजानामि ते सत्यमायुधं चाहमालभे ।
यथा रामं वधिष्यामि वधार्हं सर्वरक्षसाम् ॥ 3 ॥
अहं वास्य रणे मृत्युरेष वा समरे मम ।
विनिवृत्य रणोत्साहान्मुहूर्तं प्राश्निको भव ॥ 4 ॥
प्रहृष्टो वा हते रामे जनस्थानं प्रयास्यसि ।
मयि वा निहते रामं संयुगायोपयास्यसि ॥ 5 ॥
खरस्त्रिशिरसा तेन मृत्युलोभात्प्रसादितः ।
गच्छ युध्येत्यनुज्ञातो राघवाभिमुखो ययौ ॥ 6 ॥
त्रिशिराश्च रथेनैव वाजियुक्तेन भास्वता ।
अभ्यद्रवद्रणे रामं त्रिशृङ्ग इव पर्वतः ॥ 7 ॥
शरधारासमूहान्स महामेघ इवोत्सृजन् ।
व्यसृजत्सदृशं नादं जलार्द्रस्य तु दुन्दुभेः ॥ 8 ॥
आगच्छन्तं त्रिशिरसं राक्षसं प्रेक्ष्य राघवः ।
धनुषा प्रतिजग्राह विधुन्वन्सायकान् शितान् ॥ 9 ॥
स सम्प्रहारस्तुमुलो रामत्रिशिरसोर्महान् ।
बभूवातीव बलिनोस्सिंहकुञ्जरयोरिव ॥ 10 ॥
ततस्त्रिशिरसा बाणैर्ललाटे ताडितस्त्रिभिः ।
अमर्षी कुपितोरामस्संरब्धमिदमब्रवीत् ॥ 11 ॥
अहो विक्रमशूरस्य राक्षसस्येदृशं बलम् ।
पुष्पैरिव शरैर्यस्य ललाटेऽस्मिन्परिक्षतः ॥ 12 ॥
ममापि प्रतिगृह्णीष्व शरांश्चापगुणाच्च्युतान् ।
एवमुक्त्वा तु संरब्धश्शरानाशीविषोपमान् ॥ 13 ॥
त्रिशिरोवक्षसि क्रुद्धो निजघान चतुर्दश ।
चतुर्भिस्तुरगानस्य शरैः सन्नतपर्वभिः ॥ 14 ॥
न्यपातयत तेजस्वी चतुरस्तस्य वाजिनः ।
अष्टभिस्सायकैस्सूतं रथोपस्थान्न्यपातयत् ॥ 15 ॥
रामश्चिच्छेद बाणेन ध्वजं चास्य समुच्छ्रितम् ।
ततो हतरथात्तस्मादुत्पतन्तं निशाचरम् ॥ 16 ॥
बिभेद रामस्तं बाणैर्हृदये सोऽभवज्जडः ।
सायकैश्चाप्रमेयात्मा सामर्षस्तस्य रक्षसः ॥ 17 ॥
शिरांस्यपातयद्रामो वेगवद्भिस्त्रिभिश्शितैः ।
स भूमौ रुधिरोद्गारी रामबाणाभिपीडितः ॥ 18 ॥
न्यपतत्पतितैः पूर्वं स्वशिरोभिर्निशाचरः ।
हतशेषास्ततो भग्ना राक्षसाः खरसंश्रया ॥ 19 ॥
द्रवन्ति स्म न तिष्ठन्ति व्याघ्रत्रस्ता मृगा इव ।
तान्खरो द्रवतो दृष्ट्वा निवर्त्य रुषितस्स्वयम् ॥ 20 ॥
इत्यार्षे श्रीमद्रामायणे वाल्मीकीय आदिकाव्ये अरण्यकाण्डे सप्तविंशस्सर्गः ॥
śrīmadvālmīkīya rāmāyaṇe araṇyakāṇḍam |
atha saptaviṃśassargaḥ |
kharaṃ tu rāmābhimukhaṃ prayāntaṃ vāhinīpatiḥ |
rākṣasastriśirā nāma sannipatyedamabravīt || 1 ||
māṃ niyojaya vikrānta sannivartasva sāhasāt |
paśya rāmaṃ mahābāhuṃ saṃyuge vinipātitam || 2 ||
pratijānāmi te satyamāyudhaṃ cāhamālabhe |
yathā rāmaṃ vadhiṣyāmi vadhārhaṃ sarvarakṣasām || 3 ||
ahaṃ vāsya raṇe mṛtyureṣa vā samare mama |
vinivṛtya raṇotsāhānmuhūrtaṃ prāśniko bhava || 4 ||
prahṛṣṭo vā hate rāme janasthānaṃ prayāsyasi |
mayi vā nihate rāmaṃ saṃyugāyopayāsyasi || 5 ||
kharastriśirasā tena mṛtyulobhātprasāditaḥ |
gaccha yudhyetyanujñāto rāghavābhimukho yayau || 6 ||
triśirāśca rathenaiva vājiyuktena bhāsvatā |
abhyadravadraṇe rāmaṃ triśṛṅga iva parvataḥ || 7 ||
śaradhārāsamūhānsa mahāmegha ivotsṛjan |
vyasṛjatsadṛśaṃ nādaṃ jalārdrasya tu dundubheḥ || 8 ||
āgacchantaṃ triśirasaṃ rākṣasaṃ prekṣya rāghavaḥ |
dhanuṣā pratijagrāha vidhunvansāyakān śitān || 9 ||
sa samprahārastumulo rāmatriśirasormahān |
babhūvātīva balinossiṃhakuñjarayoriva || 10 ||
tatastriśirasā bāṇairlalāṭe tāḍitastribhiḥ |
amarṣī kupitorāmassaṃrabdhamidamabravīt || 11 ||
aho vikramaśūrasya rākṣasasyedṛśaṃ balam |
puṣpairiva śarairyasya lalāṭe'sminparikṣataḥ || 12 ||
mamāpi pratigṛhṇīṣva śarāṃścāpaguṇāccyutān |
evamuktvā tu saṃrabdhaśśarānāśīviṣopamān || 13 ||
triśirovakṣasi kruddho nijaghāna caturdaśa |
caturbhisturagānasya śaraiḥ sannataparvabhiḥ || 14 ||
nyapātayata tejasvī caturastasya vājinaḥ |
aṣṭabhissāyakaissūtaṃ rathopasthānnyapātayat || 15 ||
rāmaściccheda bāṇena dhvajaṃ cāsya samucchritam |
tato hatarathāttasmādutpatantaṃ niśācaram || 16 ||
bibheda rāmastaṃ bāṇairhṛdaye so'bhavajjaḍaḥ |
sāyakaiścāprameyātmā sāmarṣastasya rakṣasaḥ || 17 ||
śirāṃsyapātayadrāmo vegavadbhistribhiśśitaiḥ |
sa bhūmau rudhirodgārī rāmabāṇābhipīḍitaḥ || 18 ||
nyapatatpatitaiḥ pūrvaṃ svaśirobhirniśācaraḥ |
hataśeṣāstato bhagnā rākṣasāḥ kharasaṃśrayā || 19 ||
dravanti sma na tiṣṭhanti vyāghratrastā mṛgā iva |
tānkharo dravato dṛṣṭvā nivartya ruṣitassvayam || 20 ||
ityārṣe śrīmadrāmāyaṇe vālmīkīya ādikāvye araṇyakāṇḍe saptaviṃśassargaḥ ||
🕉️ This is the original Sanskrit rendered in Tamil script.
Pronunciation is identical to the Sanskrit Devanagari version.