Valmiki Ramayana Bala Kanda Sarga 6 — Sinhala Script

Meaning —

ශ්රීමද්වාල්මීකීය රාමායණේ බාලකාණ්ඩම් .

අථ ෂෂ්ඨස්සර්ගඃ .

Shloka 1

. තස්යාං පුර්යාමයෝධ්යායාං වේදවිත්සර්වසඞ්ග්රහඃ .
දීර්ඝදර්ශී මහාතේජාඃ පෞරජානපදප්රියඃ .. 1 ..

. tasyāṃ puryāmayodhyāyāṃ vedavitsarvasaṅgrahaḥ |
dīrghadarśī mahātejāḥ paurajānapadapriyaḥ || 1 ||

Shloka 2

ඉක්ෂ්වාකූණාමතිරථෝ යජ්වා ධර්මරතෝ වශී .
මහර්ෂිකල්පෝ රාජර්ෂිස්ත්රිෂු ලෝකේෂු විශ්රුතඃ .. 2 ..

ikṣvākūṇāmatiratho yajvā dharmarato vaśī |
maharṣikalpo rājarṣistriṣu lokeṣu viśrutaḥ || 2 ||

Shloka 3

බලවාන්නිහතාමිත්රෝ මිත්රවාන්විජිතේන්ද්රියඃ .
ධනෛශ්ච සඞ්ග්රහෛශ්චාන්යෛශ්ශක්රවෛශ්රවණෝපමඃ .. 3 ..

balavānnihatāmitro mitravānvijitendriyaḥ |
dhanaiśca saṅgrahaiścānyaiśśakravaiśravaṇopamaḥ || 3 ||

Shloka 4

යථා මනුර්මහාතේජා ලෝකස්ය පරිරක්ෂිතා .
තථා දශරථෝ රාජා වසඤ්ජගදපාලයත් .. 4 ..

yathā manurmahātejā lokasya parirakṣitā |
tathā daśaratho rājā vasañjagadapālayat || 4 ||

Shloka 5

තේන සත්යාභිසන්ධේන ත්රිවර්ගමනුතිෂ්ඨතා .
පාලිතා සා පුරී ශ්රේෂ්ඨා ඉන්ද්රේණේවාමරාවතී .. 5 ..

tena satyābhisandhena trivargamanutiṣṭhatā |
pālitā sā purī śreṣṭhā indreṇevāmarāvatī || 5 ||

Shloka 6

තස්මින්පුරවරේ හෘෂ්ටා ධර්මාත්මානෝ බහුශ්රුතාඃ .
නරාස්තුෂ්ටා ධනෛස්ස්වෛස්ස්වෛරලුබ්ධාස්සත්යවාදිනඃ .. 6 ..

tasminpuravare hṛṣṭā dharmātmāno bahuśrutāḥ |
narāstuṣṭā dhanaissvaissvairalubdhāssatyavādinaḥ || 6 ||

Shloka 7

නාල්පසන්නිචයඃ කශ්චිදාසීත්තස්මින් පුරෝත්තමේ .
කුටුම්බී යෝ හ්යසිද්ධාර්ථෝ(අ)ගවාශ්වධනධාන්යවාන් .. 7 ..

nālpasannicayaḥ kaścidāsīttasmin purottame |
kuṭumbī yo hyasiddhārtho'gavāśvadhanadhānyavān || 7 ||

Shloka 8

කාමී වා න කදර්යෝ වා නෘශංසඃ පුරුෂඃ ක්වචිත් .
ද්රෂ්ටුං ශක්යමයෝධ්යායාන්නාවිද්වාන්න ච නාස්තිකඃ .. 8 ..

kāmī vā na kadaryo vā nṛśaṃsaḥ puruṣaḥ kvacit |
draṣṭuṃ śakyamayodhyāyānnāvidvānna ca nāstikaḥ || 8 ||

Shloka 9

සර්වේ නරාශ්ච නාර්යශ්ච ධර්මශීලාස්සුසංයතාඃ .
උදිතාශ්ශීලවෘත්තාභ්යාං මහර්ෂය ඉවාමලාඃ .. 9 ..

sarve narāśca nāryaśca dharmaśīlāssusaṃyatāḥ |
uditāśśīlavṛttābhyāṃ maharṣaya ivāmalāḥ || 9 ||

Shloka 10

නාකුණ්ඩලී නාමකුටී නාස්රග්වී නාල්පභෝගවාන් .
නාමෘෂ්ටෝ නානුලිප්තාඞ්ගෝ නාසුගන්ධශ්ච විද්යතේ .. 10 ..

nākuṇḍalī nāmakuṭī nāsragvī nālpabhogavān |
nāmṛṣṭo nānuliptāṅgo nāsugandhaśca vidyate || 10 ||

Shloka 11

නාමෘෂ්ටභෝජී නාදාතා නාප්යනඞ්ගදනිෂ්කධෘක් .
නාහස්තාභරණෝ වා(අ)පි දෘශ්යතේ නාප්යනාත්මවාන් .. 11 ..

nāmṛṣṭabhojī nādātā nāpyanaṅgadaniṣkadhṛk |
nāhastābharaṇo vā'pi dṛśyate nāpyanātmavān || 11 ||

Shloka 12

නානාහිතාග්නිර්නායජ්වා න ක්ෂුද්රෝ වා න තස්කරඃ .
කශ්චිදාසීදයෝධ්යායාන්න ච නිර්වෘත්තසඞ්කරඃ .. 12 ..

nānāhitāgnirnāyajvā na kṣudro vā na taskaraḥ |
kaścidāsīdayodhyāyānna ca nirvṛttasaṅkaraḥ || 12 ||

Shloka 13

ස්වකර්මනිරතා නිත්යං බ්රාහ්මණා විජිතේන්ද්රියාඃ .
දානාධ්යයනශීලාශ්ච සංයතාශ්ච පරිග්රහේ .. 13 ..

svakarmaniratā nityaṃ brāhmaṇā vijitendriyāḥ |
dānādhyayanaśīlāśca saṃyatāśca parigrahe || 13 ||

Shloka 14

න නාස්තිකෝ නානෘතකෝ න කශ්චිදබහුශ්රුතඃ .
නාසූයකෝ න චා(අ)ශක්තෝ නාවිද්වාන්විද්යතේ තදා .. 14 ..

na nāstiko nānṛtako na kaścidabahuśrutaḥ |
nāsūyako na cā'śakto nāvidvānvidyate tadā || 14 ||

Shloka 15

නාෂඩඞ්ගවිදත්රාසීන්නාව්රතෝ නාසහස්රදඃ .
න දීනඃ ක්ෂිප්තචිත්තෝ වා ව්යථිතෝ වා(අ)පි කශ්චන .. 15 ..

nāṣaḍaṅgavidatrāsīnnāvrato nāsahasradaḥ |
na dīnaḥ kṣiptacitto vā vyathito vā'pi kaścana || 15 ||

Shloka 16

කශ්චින්නරෝ වා නාරී වා නාශ්රීමාන්නාප්යරූපවාන් .
ද්රෂ්ටුං ශක්යමයෝධ්යායාං නාපි රාජන්යභක්තිමාන් .. 16 ..

kaścinnaro vā nārī vā nāśrīmānnāpyarūpavān |
draṣṭuṃ śakyamayodhyāyāṃ nāpi rājanyabhaktimān || 16 ||

Shloka 17

වර්ණේෂ්වග්ර්යචතුර්ථේෂු දේවතාතිථිපූජකාඃ .
කෘතජ්ඤාශ්ච වදාන්යාශ්ච ශූරා වික්රමසංයුතාඃ .. 17 ..

varṇeṣvagryacaturtheṣu devatātithipūjakāḥ |
kṛtajñāśca vadānyāśca śūrā vikramasaṃyutāḥ || 17 ||

Shloka 18

දීර්ඝායුෂෝ නරාස්සර්වේ ධර්මං සත්යං ච සංශ්රිතාඃ .
සහිතාඃ පුත්රපෞත්රෛශ්ච නිත්යං ස්ත්රීභිඃ පුරෝත්තමේ .. 18 ..

dīrghāyuṣo narāssarve dharmaṃ satyaṃ ca saṃśritāḥ |
sahitāḥ putrapautraiśca nityaṃ strībhiḥ purottame || 18 ||

Shloka 19

ක්ෂත්රං බ්රහ්මමුඛං චාසීද්වෛශ්යාඃ ක්ෂත්රමනුව්රතාඃ .
ශූද්රාස්ස්වධර්මනිරතාස්ත්රීන්වර්ණානුපචාරිණඃ .. 19 ..

kṣatraṃ brahmamukhaṃ cāsīdvaiśyāḥ kṣatramanuvratāḥ |
śūdrāssvadharmaniratāstrīnvarṇānupacāriṇaḥ || 19 ||

Shloka 20

සා තේනේක්ෂ්වාකුනාථේන පුරී සුපරිරක්ෂිතා .
යථා පුරස්තාන්මනුනා මානවේන්ද්රේණ ධීමතා .. 20 ..

sā tenekṣvākunāthena purī suparirakṣitā |
yathā purastānmanunā mānavendreṇa dhīmatā || 20 ||

Shloka 21

යෝධානාමග්නිකල්පානාං පේශලානාමමර්ෂිණාම් .
සම්පූර්ණා කෘතවිද්යානාං ගුහා කේසරිණාමිව .. 21 ..

yodhānāmagnikalpānāṃ peśalānāmamarṣiṇām |
sampūrṇā kṛtavidyānāṃ guhā kesariṇāmiva || 21 ||

Shloka 22

කාම්භෝජවිෂයේ ජාතෛර්බාහ්ලීකෛශ්ච හයෝත්තමෛඃ .
වනායුජෛර්නදීජෛශ්ච පූර්ණා හරිහයෝත්තමෛඃ .. 22 ..

kāmbhojaviṣaye jātairbāhlīkaiśca hayottamaiḥ |
vanāyujairnadījaiśca pūrṇā harihayottamaiḥ || 22 ||

Shloka 23

වින්ධ්යපර්වතජෛර්මත්තෛඃ පූර්ණා හෛමවතෛරපි .
මදාන්විතෛරතිබලෛර්මාතඞ්ගෛඃ පර්වතෝපමෛඃ .. 23 ..

vindhyaparvatajairmattaiḥ pūrṇā haimavatairapi |
madānvitairatibalairmātaṅgaiḥ parvatopamaiḥ || 23 ||

Shloka 24

ඓරාවතකුලීනෛශ්ච මහාපද්මකුලෛස්තථා .
අඤ්ජනාදපි නිෂ්පන්නෛර්වාමනාදපි ච ද්විපෛඃ .. 24 ..

airāvatakulīnaiśca mahāpadmakulaistathā |
añjanādapi niṣpannairvāmanādapi ca dvipaiḥ || 24 ||

Shloka 25

භද්රෛර්මන්ද්රෛර්මෘගෛශ්චෛව භද්රමන්ද්රමෘගෛස්තථා .
භද්රමන්ද්රෛර්භද්රමෘගෛර්මෘගමන්ද්රෛශ්ච සා පුරී .
නිත්යමත්තෛස්සදා පූර්ණා නාගෛරචලසන්නිභෛඃ .. 25 ..

bhadrairmandrairmṛgaiścaiva bhadramandramṛgaistathā |
bhadramandrairbhadramṛgairmṛgamandraiśca sā purī |
nityamattaissadā pūrṇā nāgairacalasannibhaiḥ || 25 ||

Shloka 26

සා යෝජනේ ච ද්වේ භූයඃ සත්යනාමා ප්රකාශතේ .
යස්යාං දශරථෝ රාජා වසන් ජගදපාලයත් .. 26 ..

sā yojane ca dve bhūyaḥ satyanāmā prakāśate |
yasyāṃ daśaratho rājā vasan jagadapālayat || 26 ||

Shloka 27

තාං පුරීං ස මහාතේජා රාජා දශරථෝ මහාන් .
ශශාස ශමිතාමිත්රෝ නක්ෂත්රාණීව චන්ද්රමාඃ .. 27 ..

tāṃ purīṃ sa mahātejā rājā daśaratho mahān |
śaśāsa śamitāmitro nakṣatrāṇīva candramāḥ || 27 ||

Shloka 28

තාං සත්යනාමාං දෘඪතෝරණාර්ගලාං ගෘහෛර්විචිත්රෛරුපශෝභිතාං ශිවාම් .
පුරීමයෝධ්යාං නෘසහස්රසඞ්කුලාං ශශාස වෛ ශක්රසමෝ මහීපතිඃ .. 28 ..

tāṃ satyanāmāṃ dṛḍhatoraṇārgalāṃ gṛhairvicitrairupaśobhitāṃ śivām |
purīmayodhyāṃ nṛsahasrasaṅkulāṃ śaśāsa vai śakrasamo mahīpatiḥ || 28 ||

ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාණ්ඩේ ෂෂ්ඨස්සර්ගඃ ..

Sanskrit — Devanagari (original)

श्रीमद्वाल्मीकीय रामायणे बालकाण्डम् ।

अथ षष्ठस्सर्गः ।

. तस्यां पुर्यामयोध्यायां वेदवित्सर्वसङ्ग्रहः ।

दीर्घदर्शी महातेजाः पौरजानपदप्रियः ॥ 1 ॥

इक्ष्वाकूणामतिरथो यज्वा धर्मरतो वशी ।

महर्षिकल्पो राजर्षिस्त्रिषु लोकेषु विश्रुतः ॥ 2 ॥

बलवान्निहतामित्रो मित्रवान्विजितेन्द्रियः ।

धनैश्च सङ्ग्रहैश्चान्यैश्शक्रवैश्रवणोपमः ॥ 3 ॥

यथा मनुर्महातेजा लोकस्य परिरक्षिता ।

तथा दशरथो राजा वसञ्जगदपालयत् ॥ 4 ॥

तेन सत्याभिसन्धेन त्रिवर्गमनुतिष्ठता ।

पालिता सा पुरी श्रेष्ठा इन्द्रेणेवामरावती ॥ 5 ॥

तस्मिन्पुरवरे हृष्टा धर्मात्मानो बहुश्रुताः ।

नरास्तुष्टा धनैस्स्वैस्स्वैरलुब्धास्सत्यवादिनः ॥ 6 ॥

नाल्पसन्निचयः कश्चिदासीत्तस्मिन् पुरोत्तमे ।

कुटुम्बी यो ह्यसिद्धार्थोऽगवाश्वधनधान्यवान् ॥ 7 ॥

कामी वा न कदर्यो वा नृशंसः पुरुषः क्वचित् ।

द्रष्टुं शक्यमयोध्यायान्नाविद्वान्न च नास्तिकः ॥ 8 ॥

सर्वे नराश्च नार्यश्च धर्मशीलास्सुसंयताः ।

उदिताश्शीलवृत्ताभ्यां महर्षय इवामलाः ॥ 9 ॥

नाकुण्डली नामकुटी नास्रग्वी नाल्पभोगवान् ।

नामृष्टो नानुलिप्ताङ्गो नासुगन्धश्च विद्यते ॥ 10 ॥

नामृष्टभोजी नादाता नाप्यनङ्गदनिष्कधृक् ।

नाहस्ताभरणो वाऽपि दृश्यते नाप्यनात्मवान् ॥ 11 ॥

नानाहिताग्निर्नायज्वा न क्षुद्रो वा न तस्करः ।

कश्चिदासीदयोध्यायान्न च निर्वृत्तसङ्करः ॥ 12 ॥

स्वकर्मनिरता नित्यं ब्राह्मणा विजितेन्द्रियाः ।

दानाध्ययनशीलाश्च संयताश्च परिग्रहे ॥ 13 ॥

न नास्तिको नानृतको न कश्चिदबहुश्रुतः ।

नासूयको न चाऽशक्तो नाविद्वान्विद्यते तदा ॥ 14 ॥

नाषडङ्गविदत्रासीन्नाव्रतो नासहस्रदः ।

न दीनः क्षिप्तचित्तो वा व्यथितो वाऽपि कश्चन ॥ 15 ॥

कश्चिन्नरो वा नारी वा नाश्रीमान्नाप्यरूपवान् ।

द्रष्टुं शक्यमयोध्यायां नापि राजन्यभक्तिमान् ॥ 16 ॥

वर्णेष्वग्र्यचतुर्थेषु देवतातिथिपूजकाः ।

कृतज्ञाश्च वदान्याश्च शूरा विक्रमसंयुताः ॥ 17 ॥

दीर्घायुषो नरास्सर्वे धर्मं सत्यं च संश्रिताः ।

सहिताः पुत्रपौत्रैश्च नित्यं स्त्रीभिः पुरोत्तमे ॥ 18 ॥

क्षत्रं ब्रह्ममुखं चासीद्वैश्याः क्षत्रमनुव्रताः ।

शूद्रास्स्वधर्मनिरतास्त्रीन्वर्णानुपचारिणः ॥ 19 ॥

सा तेनेक्ष्वाकुनाथेन पुरी सुपरिरक्षिता ।

यथा पुरस्तान्मनुना मानवेन्द्रेण धीमता ॥ 20 ॥

योधानामग्निकल्पानां पेशलानाममर्षिणाम् ।

सम्पूर्णा कृतविद्यानां गुहा केसरिणामिव ॥ 21 ॥

काम्भोजविषये जातैर्बाह्लीकैश्च हयोत्तमैः ।

वनायुजैर्नदीजैश्च पूर्णा हरिहयोत्तमैः ॥ 22 ॥

विन्ध्यपर्वतजैर्मत्तैः पूर्णा हैमवतैरपि ।

मदान्वितैरतिबलैर्मातङ्गैः पर्वतोपमैः ॥ 23 ॥

ऐरावतकुलीनैश्च महापद्मकुलैस्तथा ।

अञ्जनादपि निष्पन्नैर्वामनादपि च द्विपैः ॥ 24 ॥

भद्रैर्मन्द्रैर्मृगैश्चैव भद्रमन्द्रमृगैस्तथा ।

भद्रमन्द्रैर्भद्रमृगैर्मृगमन्द्रैश्च सा पुरी ।

नित्यमत्तैस्सदा पूर्णा नागैरचलसन्निभैः ॥ 25 ॥

सा योजने च द्वे भूयः सत्यनामा प्रकाशते ।

यस्यां दशरथो राजा वसन् जगदपालयत् ॥ 26 ॥

तां पुरीं स महातेजा राजा दशरथो महान् ।

शशास शमितामित्रो नक्षत्राणीव चन्द्रमाः ॥ 27 ॥

तां सत्यनामां दृढतोरणार्गलां गृहैर्विचित्रैरुपशोभितां शिवाम् ।

पुरीमयोध्यां नृसहस्रसङ्कुलां शशास वै शक्रसमो महीपतिः ॥ 28 ॥

इत्यार्षे श्रीमद्रामायणे वाल्मीकीय आदिकाव्ये बालकाण्डे षष्ठस्सर्गः ॥

🕉️ This is the original Sanskrit rendered in Sinhala script. Pronunciation is identical to the Sanskrit Devanagari version. It is a transliteration, not a translation — see “Meaning” for translations where available.

1.6 බාලකාණ්ඩ - ෂෂ්ඨ සර්ගඃ