1.3 - Vajapeyabrahmanam - Krishna Yajurveda Taittiriya Brahmana Pathah - Devasurah Sam Yatta — Telugu Script

కృష్ణ యజుర్వేదీయ తైత్తిరీయ బ్రాహ్మణే ప్రథమాష్టకే తృతీయః ప్రపాఠకః - వాజపేయబ్రాహ్మణం

ఓ-న్నమః పరమాత్మనే, శ్రీ మహాగణపతయే నమః,

శ్రీ గురుభ్యో నమః । హ॒రిః॒ ఓమ్ ॥

అనువాకం 1 - పునరాధేయశేషః ఆజ్యభాగయోర్విశేషః

దే॒వా॒సు॒రా-స్సం-యఁ॑త్తా ఆసన్న్ । తే దే॒వా వి॑జ॒య-ము॑ప॒యన్తః॑ । అ॒గ్నీషోమ॑యో-స్తేజ॒స్వినీ᳚స్త॒నూ-స్స-న్న్య॑దధత । ఇ॒దము॑ నో భవిష్యతి । యది॑ నో జే॒ష్యన్తీతి॑ । తేనా॒గ్నీషోమా॒-వపా᳚క్రామతామ్ । తే దే॒వా వి॒జిత్య॑ । అ॒గ్నీషోమా॒-వన్వై᳚చ్ఛన్న్ । తే᳚-ఽగ్ని-మన్వ॑విన్ద-న్నృ॒తుషూ-థ్స॑న్నమ్ । తస్య॒ విభ॑క్తీభి-స్తేజ॒స్వినీ᳚స్త॒నూ-రవా॑రున్ధత ॥ 1 ॥

తే సోమ॒-మన్వ॑విన్దన్న్ । తమ॑ఘ్నన్న్ । తస్య॑ యథా-ఽభి॒జ్ఞాయ॑-న్త॒నూ-ర్వ్య॑గృహ్ణత । తే గ్రహా॑ అభవన్న్ । త-ద్గ్రహా॑ణా-ఙ్గ్రహ॒త్వమ్ । యస్యై॒వం-విఁ॒దుషో॒ గ్రహా॑ గృ॒హ్యన్తే᳚ । తస్య॒ త్వే॑వ గృ॑హీ॒తాః ॥ నానా᳚గ్నేయ-మ్పునరా॒ధేయే॑ కుర్యాత్ । యదనా᳚గ్నేయ-మ్పునరా॒ధేయే॑ కు॒ర్యాత్ । వ్యృ॑ద్ధమే॒వ తత్ ॥ 2 ॥

అనా᳚గ్నేయం॒-వాఁ ఏ॒త-త్క్రి॑యతే । య-థ్స॒మిధ॒-స్తనూ॒నపా॑తమి॒డో బ॒ర్॒హి-ర్య॑జతి ॥ ఉ॒భావా᳚గ్నే॒యా-వాజ్య॑భాగౌ స్యాతామ్ ॥ అనా᳚జ్యభాగౌ-భవత॒ ఇత్యా॑హుః । యదు॒భావా᳚గ్నే॒యావ॒న్వఞ్చా॒వితి॑ । అ॒గ్నయే॒ పవ॑మానా॒యోత్త॑ర-స్స్యాత్ । య-త్పవ॑మానాయ । తేనాజ్య॑ భాగః । తేన॑ సౌ॒మ్యః ॥ బుధ॑న్వత్యాగ్నే॒య-స్యాజ్య॑-భాగస్య పురో-ఽనువా॒క్యా॑ భవతి ॥ 3 ॥

యథా॑ సు॒ప్త-మ్బో॒ధయ॑తి । తా॒దృగే॒వ తత్ ॥ అ॒గ్నిన్య॑క్తాః పత్నీ సంయాఁ॒జానా॒మృచః॑ స్యుః । తేనా᳚గ్నే॒యగ్ం సర్వ॑-మ్భవతి ॥ ఏ॒క॒ధా తే॑జ॒స్వినీ᳚-న్దే॒వతా॒-ముపై॒తీత్యా॑హుః । సైన॑మీశ్వ॒రా ప్ర॒దహ॒ ఇతి॑ ॥ నేతి॑ బ్రూయాత్ । ప్ర॒జన॑నం॒-వాఁ అ॒గ్నిః । ప్ర॒జన॑న-మే॒వోపై॒తీతి॑ ॥ కృ॒తయ॑జు॒-స్సమ్భృ॑త సమ్భార॒ ఇత్యా॑హుః ॥ 4 ॥

న స॒భృన్త్యా᳚-స్సమ్భా॒రాః । న యజుః॑ కా॒ర్య॑మితి॑ ॥ అథో॒ ఖలు॑ । స॒భృన్త్యా॑ ఏ॒వ స॑భాం॒రాః । కా॒ర్యం॑-యఁజుః॑ । పు॒న॒రా॒ధేయ॑స్య॒ సమృ॑ద్ధ్యై ॥ తేనో॑పా॒గ్ం॒శు ప్రచ॑రతి । ఏష్య॑ ఇవ॒ వా ఏ॒షః । య-త్పు॑న-రా॒ధేయః॑ । యథో॑పా॒గ్ం॒శు న॒ష్టమి॒చ్ఛతి॑ ॥ 5 ॥

తా॒దృగే॒వ తత్ ॥ ఉ॒చ్చై-స్స్వి॑ష్ట॒కృత॒ము-థ్సృ॑జతి । యథా॑ న॒ష్టం-విఁ॒త్వా ప్రాహా॒యమితి॑ । తా॒దృగే॒వ తత్ ॥ ఏ॒క॒ధా తే॑జ॒స్వినీ᳚-న్దే॒వతా॒ముపై॒తీత్యా॑హుః । సైన॑మీశ్వ॒రా ప్ర॒దహ॒ ఇతి॑ । తత్తథా॒ నోపై॑తి । ప్ర॒యా॒జా॒నూ॒యా॒జేష్వే॒వ విభ॑క్తీః కుర్యాత్ । య॒థా॒పూ॒ర్వ-మాజ్య॑భాగౌ॒ స్యాతా᳚మ్ । ఏ॒వ-మ్ప॑త్నీ సంయాఁ॒జాః ॥ 6 ॥

త-ద్వై᳚శ్వాన॒రవ॑త్-ప్ర॒జన॑నవత్తర॒-ముపై॒తీతి॑ ॥ తదా॑హుః । వ్యృ॑ద్ధం॒-వాఁ ఏ॒తత్ । అనా᳚గ్నేయం॒-వాఁ ఏ॒త-త్క్రి॑యత॒ ఇతి॑ ॥ నేతి॑ బ్రూయాత్ । అ॒గ్ని-మ్ప్ర॑థ॒మం-విఁభ॑క్తీనాం-యఁజతి । అ॒గ్నిము॑త్త॒మ-మ్ప॑త్నీ సంయాఁ॒జానా᳚మ్ । తేనా᳚గ్నే॒యమ్ । తేన॒ సమృ॑ద్ధ-ఙ్క్రియత॒ ఇతి॑ ॥ 7 ॥

(అ॒రు॒న్ధ॒ - తై॒వ త-ద్- భ॑వతి॒ - సమ్భృ॑తసమ్భార॒ ఇత్యా॑హు - రి॒చ్ఛతి॑ - పత్నీసంయాఁ॒జా - +నవ॑ చ) ( ఆ1)

అనువాకం 2 - వాజపేయస్య విధిః

దే॒వా వై యథా॒దర్శం॑-యఁ॒జ్ఞానాహ॑రన్త । యో᳚-ఽగ్నిష్టో॒మమ్ । య ఉ॒క్థ్య᳚మ్ । యో॑-ఽతిరా॒త్రమ్ । తే స॒హైవ సర్వే॑ వాజ॒పేయ॑-మపశ్యన్న్ । తే । అ॒న్యో᳚న్యస్మై॒ నాతి॑ష్ఠన్త । అ॒హమ॒నేన॑ యజా॒ ఇతి॑ । తే᳚-ఽబ్రువన్న్ । ఆ॒జిమ॒స్య ధా॑వా॒మేతి॑ ॥ 8 ॥

తస్మి॑-న్నా॒జిమ॑ధావన్న్ । త-మ్బృహ॒స్పతి॒-రుద॑జయత్ । తేనా॑యజత । స స్వారా᳚జ్య-మగచ్ఛత్ । తమిన్ద్రో᳚-ఽబ్రవీత్ । మామ॒నేన॑ యాజ॒యేతి॑ । తేనేన్ద్ర॑-మయాజయత్ । సో-ఽగ్ర॑-న్దే॒వతా॑నా॒-మ్పర్యై᳚త్ । అగ॑చ్ఛ॒-థ్స్వారా᳚జ్యమ్ । అతి॑ష్ఠన్తాస్మై॒ జ్యైష్ఠ్యా॑య ॥ 9 ॥

య ఏ॒వం-విఁ॒ద్వాన్. వా॑జ॒పేయే॑న॒ యజ॑తే । గచ్ఛ॑తి॒ స్వారా᳚జ్యమ్ । అగ్రగ్ం॑ సమా॒నానా॒-మ్పర్యే॑తి । తిష్ఠ॑న్తే-ఽస్మై॒ జ్యైష్ఠ్యా॑య ॥ స వా ఏ॒ష బ్రా᳚హ్మ॒ణస్య॑ చై॒వ రా॑జ॒న్య॑స్య చ య॒జ్ఞః ॥ తం-వాఁ ఏ॒తం-వాఁ॑జ॒పేయ॒ ఇత్యా॑హుః । వా॒జాప్యో॒ వా ఏ॒షః । వాజ॒గ్గ్॒ హ్యే॑తేన॑ దే॒వా ఐఫ్సన్న్॑ ॥ సోమో॒ వై వా॑జ॒పేయః॑ । యో వై సోమం॑-వాఁజ॒పేయం॒-వేఁద॑ ॥ 10 ॥

వా॒జ్యే॑వైన॑-మ్పీ॒త్వా భ॑వతి । ఆ-ఽస్య॑ వా॒జీ జా॑యతే ॥ అన్నం॒-వైఁ వా॑జ॒పేయః॑ । య ఏ॒వం-వేఁద॑ । అత్త్యన్న᳚మ్ । ఆ-ఽస్యా᳚న్నా॒దో జా॑యతే ॥ బ్రహ్మ॒ వై వా॑జ॒పేయః॑ । య ఏ॒వం-వేఁద॑ । అత్తి॒ బ్రహ్మ॒ణా-ఽన్న᳚మ్ । ఆ-ఽస్య॑ బ్ర॒హ్మా జా॑యతే ॥ 11 ॥

వాగ్వై వాజ॑స్య ప్రస॒వః । య ఏ॒వం-వేఁద॑ । క॒రోతి॑ వా॒చా వీ॒ర్య᳚మ్ । ఐనం॑-వాఁ॒చా గ॑చ్ఛతి । అపి॑వతీం॒-వాఁచం॑-వఁదతి ॥ ప్ర॒జాప॑తి-ర్దే॒వేభ్యో॑ య॒జ్ఞాన్ వ్యాది॑శత్ । స ఆ॒త్మన్ వా॑జ॒పేయ॑-మధత్త । త-న్దే॒వా అ॑బ్రువన్న్ । ఏ॒ష వావ య॒జ్ఞః । య-ద్వా॑జ॒పేయః॑ ॥ 12 ॥

అప్యే॒వ నో-ఽత్రా॒స్త్వితి॑ । తేభ్య॑ ఏ॒తా ఉజ్జి॑తీః॒ ప్రాయ॑చ్ఛత్ ॥ తా వా ఏ॒తా ఉజ్జి॑తయో॒ వ్యాఖ్యా॑యన్తే । య॒జ్ఞస్య॑ సర్వ॒త్వాయ॑ । దే॒వతా॑నా॒-మని॑ర్భాగాయ ॥ దే॒వా వై బ్రహ్మ॑ణ॒శ్చాన్న॑స్య చ॒ శమ॑ల॒మపా᳚ఘ్నన్న్ । య-ద్బ్రహ్మ॑ణ॒-శ్శమ॑ల॒మాసీ᳚త్ । సా గాథా॑ నారాశ॒గ్గ్॒స్య॑ భవత్ । యదన్న॑స్య । సా సురా᳚ ॥ 13 ॥

తస్మా॒-ద్గాయ॑తశ్చ మ॒త్తస్య॑ చ॒ న ప్ర॑తి॒గృహ్య᳚మ్ । య-త్ప్ర॑తిగృహ్ణీ॒యాత్ । శమ॑ల॒-మ్ప్రతి॑గృహ్ణీయాత్ ॥ సర్వా॒ వా ఏ॒తస్య॒ వాచో ఽవ॑రుద్ధాః । యో వా॑జపేయయా॒జీ । యా పృ॑థి॒వ్యాం-యాఁ-ఽగ్నౌ యా ర॑థన్త॒రే । యా-ఽన్తరి॑క్షే॒ యా వా॒యౌ యా వా॑మదే॒వ్యే । యా ది॒వి యా-ఽఽది॒త్యే యా బృ॑హ॒తి । యా-ఽఫ్సు యౌష॑ధీషు॒ యా వన॒స్పతి॑షు ॥ తస్మా᳚-ద్వాజపేయయా॒జ్యార్త్వి॑జీనః । సర్వా॒ హ్య॑స్య॒ వాచో ఽవ॑రుద్ధాః ॥ 14 ॥

(ధా॒వా॒మేతి॒ - జ్యైష్ఠ్యా॑య॒ - వేద॑ - బ్ర॒హ్మా జా॑యతే-వాజ॒పేయః॒-సురా-ఽఽర్త్వి॑జీన॒ ఏకం॑ చ ) (అ. 2)

అనువాకం 3 - తస్యగ్రహవిశేషాః

దే॒వా వై యద॒న్యై-ర్గ్రహై᳚-ర్య॒జ్ఞస్య॒ నావారు॑న్ధత । తద॑తిగ్రా॒హ్యై॑-రతి॒గృహ్యా-వా॑రున్ధత । తద॑తిగ్రా॒హ్యా॑ణా-మతిగ్రాహ్య॒త్వమ్ ॥ యద॑తిగ్రా॒హ్యా॑ గృ॒హ్యన్తే᳚ । యదే॒వాన్యై-ర్గ్రహై᳚-ర్య॒జ్ఞస్య॒ నావ॑రు॒న్ధే । తదే॒వ తైర॑తి॒గృహ్యా-వ॑రున్ధే ॥ పఞ్చ॑ గృహ్యన్తే । పాఙ్క్తో॑ య॒జ్ఞః । యావా॑నే॒వ య॒జ్ఞః । తమా॒ప్త్వా ఽవ॑రున్ధే ॥ 15 ॥

సర్వ॑ ఐ॒న్ద్రా భ॑వన్తి । ఏ॒క॒ధైవ యజ॑మాన ఇన్ద్రి॒య-న్ద॑ధతి ॥ స॒ప్తద॑శ ప్రాజాప॒త్యా గ్రహా॑ గృహ్యన్తే । స॒ప్త॒ద॒శః ప్ర॒జాప॑తిః । ప్ర॒జాప॑తే॒-రాప్త్యై᳚ ॥ ఏక॑య॒ర్చా గృ॑హ్ణాతి । ఏ॒క॒ధైవ యజ॑మానే వీ॒ర్య॑-న్దధాతి ॥ సో॒మ॒గ్ర॒హాగ్శ్చ॑ సురాగ్ర॒హాగ్శ్చ॑ గృహ్ణాతి । ఏ॒త-ద్వై దే॒వానా᳚-మ్పర॒మమన్న᳚మ్ । య-థ్సోమః॑ ॥ 16 ॥

ఏ॒త-న్మ॑ను॒ష్యా॑ణామ్ । య-థ్సురా᳚ । ప॒ర॒మేణై॒వాస్మా॑ అ॒న్నాద్యే॒నావ॑ర-మ॒న్నాద్య॒-మవ॑రున్ధే ॥ సో॒మ॒గ్ర॒హా-న్గృ॑హ్ణాతి । బ్రహ్మ॑ణో॒ వా ఏ॒త-త్తేజః॑ । య-థ్సోమః॑ । బ్రహ్మ॑ణ ఏ॒వ తేజ॑సా॒ తేజో॒ యజ॑మానే దధాతి । సు॒రా॒గ్ర॒హా-న్గృ॑హ్ణాతి । అన్న॑స్య॒ వా ఏ॒తచ్ఛమ॑లమ్ । య-థ్సురా᳚ ॥ 17 ॥

అన్న॑స్యై॒వ శమ॑లేన॒ శమ॑లం॒-యఁజ॑మానా॒-దప॑హన్తి ॥ సో॒మ॒గ్ర॒హాగ్శ్చ॑ సురాగ్ర॒హాగ్శ్చ॑ గృహ్ణాతి । పుమా॒న్॒. వై సోమః॑ । స్త్రీ సురా᳚ । త-న్మి॑థు॒నమ్ । మి॒థు॒నమే॒వాస్య॒ త-ద్య॒జ్ఞే క॑రోతి ప్ర॒జన॑నాయ । ఆ॒త్మాన॑మే॒వ సో॑మగ్ర॒హై-స్స్పృ॑ణోతి । జా॒యాగ్ం సు॑రా గ్ర॒హైః । తస్మా᳚-ద్వాజపేయయా॒జ్య॑ముష్మి॑ఁల్లో॒కే స్త్రియ॒గ్ం॒ సమ్భ॑వతి । వా॒జ॒పేయా॑-భిజిత॒గ్గ్॒ హ్య॑స్య ॥ 18 ॥

పూర్వే॑ సోమగ్ర॒హా గృ॑హ్యన్తే । అప॑రే సురాగ్ర॒హాః । పు॒రో॒క్షగ్ం సో॑మగ్ర॒హాన్థ్- సా॑దయతి । ప॒శ్చా॒ద॒క్షగ్ం సు॑రాగ్ర॒హాన్ । పా॒ప॒వ॒స్య॒సస్య॒ విధృ॑త్యై ॥ ఏ॒ష వై యజ॑మానః । య-థ్సోమః॑ । అన్న॒గ్ం॒ సురా᳚ । సో॒మ॒గ్ర॒హాగ్శ్చ॑ సురాగ్ర॒హాగ్శ్చ॒ వ్యతి॑షజతి । అ॒న్నాద్యే॑నై॒వైనం॒-వ్యఁతి॑షజతి ॥ 19 ॥

స॒పృఞ్చః॑ స్థ॒ స-మ్మా॑ భ॒ద్రేణ॑ పృ॒ఙ్క్తేత్యా॑హ । అన్నం॒-వైఁ భ॒ద్రమ్ । అ॒న్నాద్యే॑నై॒వైన॒గ్ం॒ సగ్ంసృ॑జతి ॥ అన్న॑స్య॒ వా ఏ॒తచ్ఛమ॑లమ్ । య-థ్సురా᳚ । పా॒ప్మెవ॒ ఖలు॒ వై శమ॑లమ్ । పా॒ప్మనా॒ వా ఏ॑నమే॒తచ్ఛమ॑లేన॒ వ్యతి॑షజతి । య-థ్సో॑మగ్ర॒హాగ్శ్చ॑ సురాగ్ర॒హాగ్శ్చ॑ వ్యతి॒షజ॑తి ॥ వి॒పృచః॑ స్థ॒ వి మా॑ పా॒ప్మనా॑ పృ॒ఙ్క్తేత్యా॑హ । పా॒ప్మనై॒వైన॒గ్ం॒ శమ॑లేన॒ వ్యావ॑ర్తయతి ॥ 20 ॥

తస్మా᳚-ద్వాజపేయయా॒జీ పూ॒తో మేద్ధ్యో॑ దక్షి॒ణ్యః॑ ॥ ప్రాంఉ-ద్ద్ర॑వతి సోమగ్ర॒హైః । అ॒ముమే॒వ తై-ర్లో॒క-మ॒భిజ॑యతి । ప్ర॒త్యఙ్ఖ్సు॑రా గ్ర॒హైః । ఇ॒మమే॒వ తై-ర్లో॒క-మ॒భిజ॑యతి ॥ ప్రతి॑ష్ఠన్తి సోమగ్ర॒హైః । యావ॑దే॒వ స॒త్యమ్ । తేన॑ సూయతే ॥ వా॒జ॒సృద్భ్యః॑ సురాగ్ర॒హాన్. హ॑రన్తి । అనృ॑తేనై॒వ విశ॒గ్ం॒ సగ్ంసృ॑జతి ॥ హి॒ర॒ణ్య॒పా॒త్ర-మ్మధోః᳚ పూ॒ర్ణ-న్ద॑దాతి । మ॒ధ॒వ్యో॑-ఽసా॒నీతి॑ ॥ ఏ॒క॒ధా బ్ర॒హ్మణ॒ ఉప॑ హరతి । ఏ॒క॒ధైవ యజ॑మాన॒ ఆయు॒స్తేజో॑ దధాతి ॥ 21 ॥

(ఆ॒ప్త్వా-ఽవ॑రున్ధే॒ - సోమః॒ - శమ॑లం॒-యఁ-థ్సురా॒ - హ్య॑-స్యైనం॒-వ్యఁతి॑షజతి॒ - వ్యావ॑ర్తయతి - సృజతి చ॒త్వారి॑ చ ) (అ. 3)

అనువాకం 4 - పశవ-స్సప్తదశ

బ్ర॒హ్మ॒వా॒దినో॑ వదన్తి । నాగ్ని॑ష్టో॒మో నోక్థ్యః॑ । న షో॑డ॒శీ నాతి॑రా॒త్రః । అథ॒ కస్మా᳚-ద్వాజ॒పేయే॒ సర్వే॑ యజ్ఞక్ర॒తవో-ఽవ॑రుద్ధ్యన్త॒ ఇతి॑ । ప॒శుభి॒రితి॑ బ్రూయాత్ ॥ ఆ॒గ్నే॒య-మ్ప॒శుమాల॑భతే । అ॒గ్ని॒ష్టో॒మమే॒వ తేనావ॑రున్ధే । ఐ॒న్ద్రా॒గ్నేనో॒క్థ్య᳚మ్ । ఐ॒న్ద్రేణ॑ షోడ॒శినః॑ స్తో॒త్రమ్ । సా॒ర॒స్వ॒త్యా-ఽతి॑రా॒త్రమ్ ॥ 22 ॥

మా॒రు॒త్యా బృ॑హ॒త-స్స్తో॒త్రమ్ । ఏ॒తావ॑న్తో॒ వై య॑జ్ఞక్ర॒తవః॑ । తా-న్ప॒శుభి॑రే॒వా-వ॑రున్ధే ॥ ఆ॒త్మాన॑మే॒వ స్పృ॑ణో-త్యగ్నిష్టో॒మేన॑ । ప్రా॒ణా॒పా॒నా-వు॒క్థ్యే॑న । వీ॒ర్యగ్ం॑ షోడ॒శినః॑ స్తో॒త్రేణ॑ । వాచ॑-మతిరా॒త్రేణ॑ । ప్ర॒జా-మ్బృ॑హ॒త-స్స్తో॒త్రేణ॑ । ఇ॒మమే॒వ లో॒కమ॒భి జ॑యత్యగ్నిష్టో॒మేన॑ । అ॒న్తరి॑క్ష-ము॒క్థ్యే॑న ॥ 23 ॥

సు॒వ॒ర్గం-లోఁ॒కగ్ం షో॑డ॒శినః॑ స్తో॒త్రేణ॑ । దే॒వ॒యానా॑నే॒వ ప॒థ ఆరో॑హ-త్యతిరా॒త్రేణ॑ । నాకగ్ం॑ రోహతి బృహ॒త-స్స్తో॒త్రేణ॑ । తేజ॑ ఏ॒వాత్మ-న్ధ॑త్త ఆగ్నే॒యేన॑ ప॒శునా᳚ । ఓజో॒ బల॑మైన్ద్రా॒గ్నేన॑ । ఇ॒న్ద్రి॒య-మై॒న్ద్రేణ॑ । వాచగ్ం॑ సారస్వ॒త్యా । ఉ॒భావే॒వ దే॑వలో॒క-ఞ్చ॑ మనుష్యలో॒క-ఞ్చా॒భిజ॑యతి మారు॒త్యా వ॒శయా᳚ ॥ స॒ప్తద॑శ ప్రాజాప॒త్యా-న్ప॒శూనాల॑భతే । స॒ప్త॒ద॒శః ప్ర॒జాప॑తిః ॥ 24 ॥

ప్ర॒జాప॑తే॒రాప్త్యై᳚ ॥ శ్యా॒మా ఏక॑రూపా భవన్తి । ఏ॒వమి॑వ॒ హి ప్ర॒జాప॑తి॒-స్సమృ॑ద్ధ్యై ॥ తా-న్పర్య॑గ్నికృతా॒-నుథ్సృ॑జతి ॥ మ॒రుతో॑ య॒జ్ఞమ॑జిఘాగ్ంస-న్ప్ర॒జాప॑తేః । తేభ్య॑ ఏ॒తా-మ్మా॑రు॒తీం-వఁ॒శామాల॑భత । తయై॒వైనా॑-నశమయత్ ॥ మా॒రు॒త్యా ప్ర॒చర్య॑ । ఏ॒తాన్-థ్సఞ్జ్ఞ॑పయేత్ । మ॒రుత॑ ఏ॒వ శ॑మయి॒త్వా ॥ 25 ॥

ఏ॒తైః ప్రచ॑రతి । య॒జ్ఞస్యాఘా॑తాయ ॥ ఏ॒క॒ధా వ॒పా జు॑హోతి । ఏ॒క॒దే॒వ॒త్యా॑ హి । ఏ॒తే । అథో॑ ఏక॒ధైవ యజ॑మానే వీ॒ర్య॑-న్దధాతి ॥ నై॒వా॒రేణ॑ స॒ప్తద॑శశరావే-ణై॒తర్హి॒ ప్రచ॑రతి । ఏ॒త-త్పు॑రోడాశా॒ హ్యే॑తే । అథో॑ పశూ॒నామే॒వ ఛి॒ద్రమపి॑దధాతి ॥ సా॒ర॒స్వ॒త్యోత్త॒మయా॒ ప్రచ॑రతి । వాగ్ వై సర॑స్వతీ । తస్మా᳚-త్ప్రా॒ణానాం॒-వాఁగు॑త్త॒మా । అథో᳚ ప్ర॒జాప॑తావే॒వ య॒జ్ఞ-మ్ప్రతి॑ష్ఠాపయతి । ప్ర॒జాప॑తి॒ర్॒ హి వాక్ ॥ అప॑న్నదతీ భవతి । తస్మా᳚-న్మను॒ష్యా᳚-స్సర్వాం॒-వాఁచం॑-వఁదన్తి ॥ 26 ॥

(అ॒తి॒రా॒త్ర - మ॒న్తరి॑క్షము॒క్థ్యే॑న - ప్ర॒జాప॑తిః - శమయి॒త్వోత్ - త॒మయా॒ ప్రచ॑రతి॒ షట్ చ॑) (అ. 4)

అనువాకం 5 - రథయాజనమ్

సా॒వి॒త్ర-ఞ్జు॑హోతి॒ కర్మ॑ణః కర్మణః పు॒రస్తా᳚త్ ॥ కస్త-ద్వే॒దేత్యా॑హుః । య-ద్వా॑జ॒పేయ॑స్య॒ పూర్వం॒-యఁదప॑ర॒మితి॑ । స॒వి॒తృప్ర॑సూత ఏ॒వ య॑థాపూ॒ర్వ-ఙ్కర్మా॑ణి కరోతి ॥ సవ॑నే సవనే జుహోతి । ఆ॒క్రమ॑ణమే॒వ త-థ్సేతుం॒-యఁజ॑మానః కురుతే । సు॒వ॒ర్గస్య॑ లో॒కస్య॒ సమ॑ష్ట్యై ॥ వా॒చస్పతి॒-ర్వాచ॑మ॒ద్య స్వ॑దాతి న॒ ఇత్యా॑హ । వాగ్వై దే॒వానా᳚-మ్పు॒రా-ఽన్న॑మాసీత్ । వాచ॑మే॒వాస్మా॒ అన్నగ్గ్॑ స్వదయతి ॥ 27 ॥

ఇన్ద్ర॑స్య॒ వజ్రో॑-ఽసి॒ వార్త్ర॑ఘ్న॒ ఇతి॒ రథ॑ము॒పావ॑హరతి॒ విజి॑త్యై ॥ వాజ॑స్య॒ ను ప్ర॑స॒వే మా॒తర॑-మ్మ॒హీమిత్యా॑హ । యచ్చై॒వేయమ్ । యచ్చా॒స్యామధి॑ । తదే॒వా-వ॑రున్ధే । అథో॒ తస్మి॑న్నే॒వోభయే॒-ఽభిషి॑చ్యతే ॥ అ॒ఫ్స్వ॑న్తర॒-మృత॑మ॒ఫ్సు భే॑ష॒జమిత్యశ్వా᳚-న్పల్పూలయతి । అ॒ఫ్సు వా అశ్వ॑స్య॒ తృతీ॑య॒-మ్ప్రవి॑ష్టమ్ । తద॑ను॒వేన॒న్వవ॑ప్లవతే । యద॒ఫ్సు ప॑ల్పూ॒లయ॑తి ॥ 28 ॥

యదే॒వాస్యా॒ఫ్సు ప్రవి॑ష్టమ్ । తదే॒వావ॑రున్ధే ॥ బ॒హు వా అశ్వో॑-ఽమే॒ద్ధ్య-ముప॑గచ్ఛతి । యద॒ఫ్సు ప॑ల్పూ॒లయ॑తి । మేద్ధ్యా॑నే॒వైనా᳚న్ కరోతి ॥ వా॒యుర్వా᳚ త్వా॒ మను॑ర్వా॒ త్వేత్యా॑హ । ఏ॒తా వా ఏ॒త-న్దే॒వతా॒ అగ్రే॒ అశ్వ॑మయుఞ్జన్న్ । తాభి॑రే॒వైనాన్॑. యునక్తి । స॒వస్యోజ్జి॑త్యై ॥ యజు॑షా యునక్తి॒ వ్యావృ॑త్త్యై ॥ 29 ॥

అపా᳚-న్న పాదాశుహేమ॒న్నితి॒ సమ్మా᳚ర్ష్టి । మేద్ధ్యా॑నే॒వైనా᳚న్ కరోతి । అథో॒ స్తౌత్యే॒వైనా॑నా॒జిగ్ం స॑రిష్య॒తః ॥ వి॒ష్ణు॒ క్ర॒మాన్ క్ర॑మతే । విష్ణు॑రే॒వ భూ॒త్వేమాఁల్లో॒కా-న॒భిజ॑యతి ॥ వై॒శ్వ॒దే॒వో వై రథః॑ । అ॒ఙ్కౌ న్య॒ఙ్కావ॒భితో॒ రథం॒-యాఁవిత్యా॑హ । యా ఏ॒వ దే॒వతా॒ రథే॒ ప్రవి॑ష్టాః । తాభ్య॑ ఏ॒వ నమ॑స్కరోతి । ఆ॒త్మనో-ఽనా᳚ర్త్యై ॥ అశ॑మరథ-మ్భావుకో-ఽస్య॒ రథో॑ భవతి । య ఏ॒వం-వేఁద॑ ॥ 30 ॥

(స్వ॒ద॒య॒తి॒ - ప॒ల్పూ॒లయ॑తి॒ - వ్యావృ॑త్త్యా॒ - అనా᳚ర్త్యై॒ ద్వే చ॑) (అ. 5)

అనువాకం 6 - రథధావనమ్

దే॒వస్యా॒హగ్ం స॑వి॒తుః ప్ర॑స॒వే బృహ॒స్పతి॑నా వాజ॒జితా॒ వాజ॑-ఞ్జేష॒మిత్యా॑హ । స॒వి॒తృప్ర॑సూత ఏ॒వ బ్రహ్మ॑ణా॒ వాజ॒ముజ్జ॑యతి ॥ దే॒వస్యా॒హగ్ం స॑వి॒తుః ప్ర॑స॒వే బృహ॒స్పతి॑నా వాజ॒జితా॒ వర్షి॑ష్ఠ॒-న్నాకగ్ం॑ రుహేయ॒మిత్యా॑హ । స॒వి॒తృప్ర॑సూత ఏ॒వ బ్రహ్మ॑ణా॒ వర్షి॑ష్ఠ॒-న్నాకగ్ం॑ రోహతి ॥ చాత్వా॑లే రథచ॒క్ర-న్నిమి॑తగ్ం రోహతి । అతో॒ వా అఙ్గి॑రస ఉత్త॒మా-స్సు॑వ॒ర్గం-లోఁ॒కమా॑యన్న్ । సా॒క్షాదే॒వ యజ॑మాన-స్సువ॒ర్గం-లోఁ॒కమే॑తి ॥ ఆవే᳚ష్టయతి । వజ్రో॒ వై రథః॑ । వజ్రే॑ణై॒వ దిశో॒-ఽభిజ॑యతి ॥ 31 ॥

వా॒జినా॒గ్ం॒ సామ॑ గాయతే । అన్నం॒-వైఁ వాజః॑ । అన్న॑మే॒-వావ॑రున్ధే ॥ వా॒చో వర్ష్మ॑ దే॒వేభ్యో-ఽపా᳚క్రామత్ । త-ద్వన॒స్పతీ॒-న్ప్రావి॑శత్ । సైషా వాగ్-వన॒స్పతి॑షు వదతి । యా దు॑న్దు॒భౌ । తస్మా᳚-ద్దున్దు॒భి-స్సర్వా॒ వాచోతి॑ వదతి ॥ దు॒న్దు॒భీన్-థ్స॒మాఘ్న॑న్తి । ప॒ర॒మా వా ఏ॒షా వాక్ ॥ 32 ॥

యా దు॑న్దు॒భౌ । ప॒ర॒మయై॒వ వా॒చా-ఽవ॑రాం॒-వాఁచ॒మ-వ॑రున్ధే । అథో॑ వా॒చ ఏ॒వ వర్ష్మ॒ యజ॑మా॒నో ఽవ॑రున్ధే ॥ ఇన్ద్రా॑య॒ వాచం॑-వఁద॒తేన్ద్రం॒-వాఁజ॑-ఞ్జాపయ॒తేన్ద్రో॒ వాజ॑మజయి॒-దిత్యా॑హ । ఏ॒ష వా ఏ॒తర్హీన్ద్రః॑ । యో యజ॑తే । యజ॑మాన ఏ॒వ వాజ॒ముజ్జ॑యతి ॥ స॒ప్తద॑శ ప్రవ్యా॒ధానా॒జి-న్ధా॑వన్తి । స॒ప్త॒ద॒శగ్గ్ స్తో॒త్ర-మ్భ॑వతి । స॒ప్తద॑శ సప్తదశ దీయన్తే ॥ 33 ॥

స॒ప్త॒ద॒శః ప్ర॒జాప॑తిః । ప్ర॒జాప॑తే॒-రాప్త్యై᳚ ॥ అర్వా॑-ఽసి॒ సప్తి॑రసి వా॒జ్య॑సీత్యా॑హ । అ॒గ్నిర్వా అర్వా᳚ । వా॒యు-స్సప్తిః॑ । ఆ॒ది॒త్యో వా॒జీ । ఏ॒తాభి॑రే॒వాస్మై॑ దే॒వతా॑భి-ర్దేవర॒థం-యుఁ॑నక్తి ॥ ప్ర॒ష్టి॒వా॒హినం॑-యుఁనక్తి । ప్ర॒ష్టి॒వా॒హీ వై దే॑వర॒థః । దే॒వ॒ర॒థమే॒వాస్మై॑ యునక్తి ॥ 34 ॥

వాజి॑నో॒ వాజ॑-న్ధావత॒ కాష్ఠా᳚-ఙ్గచ్ఛ॒తేత్యా॑హ । సు॒వ॒ర్గో వై లో॒కః కాష్ఠా᳚ । సు॒వ॒ర్గమే॒వ లో॒కం-యఁ॑న్తి ॥ సు॒వ॒ర్గం-వాఁ ఏ॒తే లో॒కం-యఁ॑న్తి । య ఆ॒జి-న్ధావ॑న్తి ॥ ప్రాఞ్చో॑ ధావన్తి । ప్రాంఇ॑వ॒ హి సు॑వ॒ర్గో లో॒కః ॥ చ॒త॒సృభి॒రను॑ మన్త్రయతే । చ॒త్వారి॒ ఛన్దాగ్ం॑సి । ఛన్దో॑భిరే॒వైనా᳚న్-థ్సువ॒ర్గం-లోఁ॒క-ఙ్గ॑మయతి ॥ 35 ॥

ప్ర వా ఏ॒తే᳚-ఽస్మాల్-లో॒కాచ్చ్య॑వన్తే । య ఆ॒జి-న్ధావ॑న్తి । ఉద॑ఞ్చ॒ ఆవ॑ర్తన్తే । అ॒స్మాదే॒వ తేన॑ లో॒కాన్నయ॑న్తి ॥ ర॒థ॒వి॒మో॒చ॒నీయ॑-ఞ్జుహోతి॒ ప్రతి॑ష్ఠిత్యై ॥ ఆ మా॒ వాజ॑స్య ప్రస॒వో జ॑గమ్యా॒దిత్యా॑హ । అన్నం॒-వైఁ వాజః॑ । అన్న॑మే॒వావ॑రున్ధే ॥ య॒థా॒లో॒కం-వాఁ ఏ॒త ఉజ్జ॑యన్తి । య ఆ॒జి-న్ధావ॑న్తి ॥ 36 ॥

కృ॒ష్ణల॑-ఙ్కృష్ణలం-వాఁజ॒సృద్భ్యః॒ ప్రయ॑చ్ఛతి । యమే॒వ తే వాజం॑-లోఁ॒కము॒జ్జయ॑న్తి । త-మ్ప॑రి॒క్రీయా-వ॑రున్ధే ॥ ఏ॒క॒ధా బ్ర॒హ్మణ॒ ఉప॑హరతి । ఏ॒క॒ధైవ యజ॑మానే వీ॒ర్య॑-న్దధాతి ॥ దే॒వా వా ఓష॑ధీష్వా॒జిమ॑యుః । తా బృహ॒స్పతి॒-రుద॑జయత్ । స నీ॒వారా॒న్నిర॑వృణీత । తన్నీ॒వారా॑ణా-న్నీవార॒త్వమ్ ॥ నై॒వా॒రశ్చ॒రు-ర్భ॑వతి ॥ 37 ॥

ఏ॒తద్వై దే॒వానా᳚-మ్పర॒మమన్న᳚మ్ । యన్నీ॒వారాః᳚ । ప॒ర॒మేణై॒వాస్మా॑ అ॒న్నాద్యే॒-నావ॑ర-మ॒న్నాద్య॒మవ॑రున్ధే ॥ స॒ప్తద॑శశరావో భవతి । స॒ప్త॒ద॒శః ప్ర॒జాప॑తిః । ప్ర॒జాప॑తే॒-రాప్త్యై᳚ ॥ క్షీ॒రే భ॑వతి । రుచ॑మే॒వాస్మి॑న్-దధాతి ॥ స॒ర్పిష్వా᳚-న్భవతి మేద్ధ్య॒త్వాయ॑ ॥ బా॒ర్॒హ॒స్ప॒త్యో వా ఏ॒ష దే॒వత॑యా ॥ 38 ॥

యో వా॑జ॒పేయే॑న॒ యజ॑తే । బా॒ర్॒హ॒స్ప॒త్య ఏ॒ష చ॒రుః ॥ అశ్వా᳚న్-థ్సరిష్య॒త-స్స॒స్రుష॒శ్చావ॑-ఘ్రాపయతి । యమే॒వ తే వాజం॑-లోఁ॒కము॒జ్జయ॑న్తి । తమే॒వావ॑రున్ధే ॥ అజీ॑జిపత వనస్పతయ॒ ఇన్ద్రం॒-వాఁజం॒-విఁము॑చ్యద్ధ్వ॒మితి॑ దున్దు॒భీన్. విము॑ఞ్చతి । యమే॒వ తే వాజం॑-లోఁ॒కమి॑న్ద్రి॒య-న్దు॑న్దు॒భయ॑ ఉ॒జ్జయ॑న్తి । తమే॒వా-వ॑రున్ధే ॥ 39 ॥

(అ॒భిజ॑యతి॒ - వా ఏ॒షా వాగ్ - దీ॑యన్తే - ఽస్మై యునక్తి - గమయతి॒ - య ఆ॒జి-న్ధావ॑న్తి - భవతి - దే॒వత॑యా॒ - +-ఽష్టౌ చ॑) (అ. 6)

అనువాకం 7 - యూపారోహణమ్

తా॒ర్ప్యం-యఁజ॑మాన॒-మ్పరి॑ధాపయతి । య॒జ్ఞో వై తా॒ర్ప్యమ్ । య॒జ్ఞేనై॒వైన॒గ్ం॒ సమ॑ర్ధయతి । ద॒ర్భ॒మయ॒-మ్పరి॑ధాపయతి । ప॒విత్రం॒-వైఁ ద॒ర్భాః । పు॒నాత్యే॒వైన᳚మ్ । వాజం॒-వాఁ ఏ॒షో-ఽవ॑రురుథ్సతే । యో వా॑జ॒పేయే॑న॒ యజ॑తే । ఓష॑ధయః॒ ఖలు॒ వై వాజః॑ । య-ద్ద॑ర్భ॒మయ॑-మ్పరిధా॒పయ॑తి ॥ 40 ॥

వాజ॒స్యావ॑-రుద్ధ్యై ॥ జాయ॒ ఏహి॒ సువో॒ రోహా॒వేత్యా॑హ । పత్ని॑యా ఏ॒వైష య॒జ్ఞస్యా᳚న్-వార॒మ్భో-ఽన॑వచ్ఛిత్యై ॥ స॒ప్తద॑శా-రత్ని॒ర్యూపో॑ భవతి । స॒ప్త॒ద॒శః ప్ర॒జాప॑తిః । ప్ర॒జాప॑తే॒రాప్త్యై᳚ ॥ తూ॒ప॒ర-శ్చతు॑రశ్రి-ర్భవతి ॥ గౌ॒ధూ॒మ-ఞ్చ॒షాల᳚మ్ । న వా ఏ॒తే వ్రీ॒హయో॒ న యవాః᳚ । య-ద్గో॒ధూమాః᳚ ॥ 41 ॥

ఏ॒వమి॑వ॒ హి ప్ర॒జాప॑తి॒-స్సమృ॑ద్ధ్యై । అథో॑ అ॒ముమే॒వాస్మై॑ లో॒కమన్న॑వన్త-ఙ్కరోతి ॥ వాసో॑భి-ర్వేష్టయతి । ఏ॒ష వై యజ॑మానః । యద్యూపః॑ । స॒ర్వ॒దే॒వ॒త్యం॑-వాఁసః॑ । సర్వా॑భిరే॒వైన॑-న్దే॒వతా॑భి॒-స్సమ॑ర్ధయతి । అథో॑ ఆ॒క్రమ॑ణమే॒వ తథ్సేతుం॒-యఁజ॑మానః కురుతే । సు॒వ॒ర్గస్య॑ లో॒కస్య॒ సమ॑ష్ట్యై ॥ ద్వాద॑శ వాజప్రస॒వీయా॑ని జుహోతి ॥ 42 ॥

ద్వాద॑శ॒ మాసా᳚-స్సంవఁథ్స॒రః । సం॒వఁ॒థ్స॒రమే॒వ ప్రీ॑ణాతి । అథో॑ సంవఁథ్స॒రమే॒వాస్మా॒ ఉప॑ దధాతి । సు॒వ॒ర్గస్య॑ లో॒కస్య॒ సమ॑ష్ట్యై ॥ ద॒శభిః॒ కల్పై॑ రోహతి । నవ॒ వై పురు॑షే ప్రా॒ణాః । నాభి॑ర్దశ॒మీ । ప్రా॒ణానే॒వ య॑థాస్థా॒న-ఙ్క॑ల్పయి॒త్వా । సు॒వ॒ర్గం-లోఁ॒కమే॑తి । ఏ॒తావ॒ద్వై పురు॑షస్య॒ స్వమ్ ॥ 43 ॥

యావ॑త్-ప్రా॒ణాః । యావ॑దే॒వాస్యాస్తి॑ । తేన॑ స॒హ సు॑వ॒ర్గం-లోఁ॒కమే॑తి ॥ సువ॑ర్దే॒వాగ్ం అ॑గ॒న్మేత్యా॑హ । సు॒వ॒ర్గమే॒వ లో॒కమే॑తి । అ॒మృతా॑ అభూ॒మేత్యా॑హ । అ॒మృత॑మివ॒ హి సు॑వ॒ర్గో లో॒కః । ప్ర॒జాప॑తేః ప్ర॒జా అ॑భూ॒మేత్యా॑హ । ప్రా॒జా॒ప॒త్యో వా అ॒యం-లోఁ॒కః । అ॒స్మాదే॒వ తేన॑ లో॒కాన్నైతి॑ ॥ 44 ॥

సమ॒హ-మ్ప్ర॒జయా॒ స-మ్మయా᳚ ప్ర॒జేత్యా॑హ । ఆ॒శిష॑మే॒వైతా-మాశా᳚స్తే ॥ ఆ॒స॒పు॒టై-ర్ఘ్న॑న్తి । అన్నం॒-వాఁ ఇ॒యమ్ । అ॒న్నాద్యే॑నై॒వైన॒గ్ం॒ సమ॑ర్ధయన్తి । ఊషై᳚-ర్ఘ్నన్తి । ఏ॒తే హి సా॒క్షాదన్న᳚మ్ । యదూషాః᳚ । సా॒క్షాదే॒వైన॑-మ॒న్నాద్యే॑న॒ సమ॑ర్ధయన్తి ॥ పు॒రస్తా᳚త్-ప్ర॒త్యఞ్చ᳚-ఙ్ఘ్నన్తి ॥ 45 ॥

పు॒రస్తా॒ద్ధి ప్ర॑తీ॒చీన॒-మన్న॑మ॒ద్యతే᳚ ॥ శీ॒ర్॒ష॒తో ఘ్న॑న్తి । శీ॒ర్॒ష॒తో హ్యన్న॑మ॒ద్యతే᳚ ॥ ది॒గ్భ్యో ఘ్న॑న్తి । ది॒గ్భ్య ఏ॒వాస్మా॑ అ॒న్నాద్య॒-మవ॑రున్ధతే ॥ ఈ॒శ్వ॒రో వా ఏ॒ష పరాం᳚-ప్ర॒దఘః॑ । యో యూప॒గ్ం॒ రోహ॑తి ॥ హిర॑ణ్యమ॒ద్ధ్య-వ॑రోహతి । అ॒మృతం॒-వైఁ హిర॑ణ్యమ్ । అ॒మృతగ్ం॑ సువ॒ర్గో లో॒కః ॥ 46 ॥

అ॒మృత॑ ఏ॒వ సు॑వ॒ర్గే లో॒కే ప్రతి॑ తిష్ఠతి ॥ శ॒తమా॑న-మ్భవతి । శ॒తాయుః॒ పురు॑ష-శ్శ॒తేన్ద్రి॑యః । ఆయు॑ష్యే॒వేన్ద్రి॒యే ప్రతి॑ తిష్ఠతి ॥ పుష్ట్యై॒ వా ఏ॒త-ద్రూ॒పమ్ । యద॒జా । త్రి-స్సం॑వఁథ్స॒రస్యా॒న్యాన్-ప॒శూ-న్పరి॒ ప్రజా॑యతే ॥ బ॒స్తా॒జి॒న-మ॒ద్ధ్యవ॑ రోహతి । పుష్ట్యా॑మే॒వ ప్ర॒జన॑నే॒ ప్రతి॑తిష్ఠతి ॥ 47 ॥

(ప॒రి॒ధా॒పయ॑తి - గో॒ధూమా॑ - జుహోతి॒ - స్వం - నైతి॑ - ప్ర॒త్యఞ్జ॑-ఙ్ఘ్నన్తి - లో॒కో - +నవ॑ చ (అ. 7)

అనువాకం 8 - అన్నహోమాః, అభిషేకశ్చ

స॒ప్తాన్న॑-హో॒మాఞ్జు॑హోతి । స॒ప్త వా అన్నా॑ని । యావ॑న్త్యే॒వాన్నా॑ని । తాన్యే॒వావ॑రున్ధే । స॒ప్త గ్రా॒మ్యా ఓష॑ధయః । స॒ప్తార॒ణ్యాః । ఉ॒భయీ॑షా॒-మవ॑రుద్ధ్యై ॥ అన్న॑స్యా-న్నస్య జుహోతి । అన్న॑స్యాన్న॒స్యా-వ॑రుద్ధ్యై ॥ య-ద్వా॑జపేయయా॒జ్య-న॑వరుద్ధస్యాశ్ఞీ॒యాత్ ॥ 48 ॥

అవ॑రుద్ధేన॒ వ్యృ॑ద్ధ్యేత । సర్వ॑స్య సమవ॒దాయ॑ జుహోతి । అన॑వరుద్ధ॒-స్యావ॑రుద్ధ్యై ॥ ఔదు॑మ్బరేణ స్రు॒వేణ॑ జుహోతి । ఊర్గ్వా అన్న॑-ముదు॒మ్బరః॑ । ఊ॒ర్జ ఏ॒వాన్నాద్య॒స్యావ॑రుద్ధ్యై ॥ దే॒వస్య॑ త్వా సవి॒తుః ప్ర॑స॒వ ఇత్యా॑హ । స॒వి॒తృ ప్ర॑సూత ఏ॒వైన॒-మ్బ్రహ్మ॑ణా దే॒వతా॑భి-ర॒భిషి॑ఞ్చతి ॥ అన్న॑స్యాన్నస్యా॒భిషి॑ఞ్చతి । అన్న॑స్యాన్న॒స్యావ॑రుద్ధ్యై ॥ 49 ॥

పు॒రస్తా᳚త్-ప్ర॒త్యఞ్చ॑-మ॒భిషి॑ఞ్చతి । పు॒రస్తా॒ద్ధి-ప్ర॑తీ॒చీన॒-మన్న॑మ॒ద్యతే᳚ । శీ॒ర్॒ష॒తో॑-ఽభిషి॑ఞ్చతి । శీ॒ర్॒ష॒తో హ్యన్న॑మ॒ద్యతే᳚ ॥ ఆముఖా॑ద॒న్వవ॑ స్రావయతి । ము॒ఖ॒త ఏ॒వాస్మా॑ అ॒న్నాద్య॑-న్దధాతి ॥ అ॒గ్నేస్త్వా॒ సామ్రా᳚జ్యేనా॒భిషి॑ఞ్చా॒మీత్యా॑హ । ఏ॒ష వా అ॒గ్నే-స్స॒వః । తేనై॒వైన॑-మ॒భిషి॑ఞ్చతి । ఇన్ద్ర॑స్య త్వా॒ సామ్రా᳚జ్యేనా॒భిషి॑ఞ్చా॒మీత్యా॑హ ॥ 50 ॥

ఇ॒న్ద్రి॒య-మే॒వాస్మి॑-న్నే॒తేన॑ దధాతి । బృహ॒స్పతే᳚స్త్వా॒ సామ్రా᳚జ్యేనా॒భిషి॑ఞ్చా॒-మీత్యా॑హ । బ్రహ్మ॒ వై దే॒వానా॒-మ్బృహ॒స్పతిః॑ । బ్రహ్మ॑ణై॒వైన॑-మ॒భిషి॑ఞ్చతి ॥ సో॒మ॒గ్ర॒హాగ్శ్చా॑-వదానీ॒యాని॑ చ॒ర్త్విగ్భ్య॒ ఉప॑ హరన్తి । అ॒ముమే॒వ తై-ర్లో॒క-మన్న॑వన్త-ఙ్కరోతి । సు॒రా॒గ్ర॒హాగ్శ్చా॑-నవదానీ॒యాని॑ చ వాజ॒సృద్భ్యః॑ । ఇ॒మమే॒వ తై-ర్లో॒క-మన్న॑వన్త-ఙ్కరోతి । అథో॑ ఉ॒భయీ᳚ష్వే॒వాభిషి॑చ్యతే ॥ వి॒మా॒థ-ఙ్కు॑ర్వతే వాజ॒సృతః॑ ॥ 51 ॥

ఇ॒న్ద్రి॒యస్యావ॑రుద్ధ్యై ॥ అని॑రుక్తాభిః ప్రాతస్సవ॒నే స్తు॑వతే । అని॑రుక్తః ప్ర॒జాప॑తిః । ప్ర॒జాప॑తే॒రాప్త్యై᳚ । వాజ॑వతీభి॒-ర్మాద్ధ్య॑న్దినే । అన్నం॒-వైఁ వాజః॑ । అన్న॑మే॒వా-వ॑రున్ధే । శి॒పి॒వి॒ష్టవ॑తీభి-స్తృతీయసవ॒నే । య॒జ్ఞో వై విష్ణుః॑ । ప॒శవ॒-శ్శిపిః॑ । య॒జ్ఞ ఏ॒వ ప॒శుషు॒ ప్రతి॑ తిష్ఠతి ॥ బృ॒హదన్త్య॑-మ్భవతి । అన్త॑మే॒వైనగ్గ్॑ శ్రి॒యై గ॑మయతి ॥ 52 ॥

(అ॒శ్ఞీ॒యా - దన్న॑స్యాన్న॒స్యా వ॑రుద్ధ్యా॒ - ఇన్ద్ర॑స్య త్వా॒ సామ్రా᳚జ్యేనా॒భిషి॑ఞ్చా॒ మీత్యా॑హ-వాజ॒సృతః॒ - శిపి॒ స్త్రీణి॑ చ) (అ. 8)

అనువాకం 9 - అతిగ్రాహ్యాః, పఞ్చైన్ద్రాః

నృ॒షద॒-న్త్వేత్యా॑హ । ప్ర॒జా వై నౄన్ । ప్ర॒జానా॑మే॒వైతేన॑ సూయతే । ద్రు॒షద॒మిత్యా॑హ । వన॒స్పత॑యో॒ వై ద్రు । వన॒స్పతీ॑నామే॒వై తేన॑ సూయతే । భు॒వ॒న॒సద॒-మిత్యా॑హ । య॒దా వై వసీ॑యా॒-న్భవ॑తి । భువ॑నమగ॒న్నితి॒ వై తమా॑హుః । భువ॑నమే॒వైతేన॑ గచ్ఛతి ॥ 53 ॥

అ॒ఫ్సు॒షద॑-న్త్వా ఘృత॒సద॒-మిత్యా॑హ । అ॒పామే॒వైతేన॑ ఘృ॒తస్య॑ సూయతే । వ్యో॒మ॒సద॒-మిత్యా॑హ । య॒దా వై వసీ॑యా॒-న్భవ॑తి । వ్యో॑మాగ॒న్నితి॒ వై తమా॑హుః । వ్యో॑మై॒వైతేన॑ గచ్ఛతి ॥ పృ॒థి॒వి॒షద॑-న్త్వా-ఽన్తరిక్ష॒సద॒-మిత్యా॑హ । ఏ॒షామే॒వైతేన॑ లో॒కానాగ్ం॑ సూయతే । తస్మా᳚-ద్వాజపే-యయా॒జీ న క-ఞ్చ॒న ప్ర॒త్యవ॑రోహతి । అపీ॑వ॒ హి దే॒వతా॑నాగ్ం సూ॒యతే᳚ ॥ 54 ॥

నా॒క॒సద॒-మిత్యా॑హ । య॒దావై వసీ॑యా॒-న్భవ॑తి । నాక॑మగ॒న్నితి॒ వై తమా॑హుః । నాక॑మే॒వైతేన॑ గచ్ఛతి ॥ యే గ్రహాః᳚ పఞ్చజ॒నీనా॒ ఇత్యా॑హ । ప॒ఞ్చ॒జ॒నానా॑-మే॒వైతేన॑ సూయతే ॥ అ॒పాగ్ం రస॒ముద్వ॑యస॒-మిత్యా॑హ । అ॒పామే॒వైతేన॒ రస॑స్య సూయతే । సూర్య॑రశ్మిగ్ం స॒మాభృ॑త॒-మిత్యా॑హ సశుక్ర॒త్వాయ॑ ॥ 55 ॥

(గ॒చ్ఛ॒తి॒ - సూ॒యతే॒ - +నవ॑ చ) (అ. 9)

అనువాకం 10 - పిణ్డపితృయజ్ఞః దర్శపూర్ణమాసబ్రాహ్మణశేషః

ఇన్ద్రో వృ॒త్రగ్ం హ॒త్వా । అసు॑రా-న్పరా॒భావ్య॑ । సో॑-ఽమావా॒స్యా᳚-మ్ప్రత్యాగ॑చ్ఛత్ । తే పి॒తరః॑ పూర్వే॒ద్యు-రాగ॑చ్ఛన్న్ । పి॒తౄన్. య॒జ్ఞో॑-ఽగచ్ఛత్ । త-న్దే॒వాః పున॑రయాచన్త । తమే᳚భ్యో॒ న పున॑రదదుః । తే᳚-ఽబ్రువ॒న్ వరం॑-వృఁణామహై । అథ॑ వః॒ పున॑ర్దాస్యామః । అ॒స్మభ్య॑మే॒వ పూ᳚ర్వే॒ద్యుః క్రి॑యాతా॒ ఇతి॑ ॥ 56 ॥

తమే᳚భ్యః॒ పున॑రదదుః । తస్మా᳚త్-పి॒తృభ్యః॑ పూర్వే॒ద్యుః క్రి॑యతే । య-త్పి॒తృభ్యః॑ పూర్వే॒ద్యుః క॒రోతి॑ । పి॒తృభ్య॑ ఏ॒వ త-ద్య॒జ్ఞ-న్ని॒ష్క్రీయ॒ యజ॑మానః॒ ప్రత॑నుతే ॥ సోమా॑య పి॒తృపీ॑తాయ స్వ॒ధా నమ॒ ఇత్యా॑హ । పి॒తురే॒వాధి॑ సోమపీ॒థమవ॑ రున్ధే । న హి పి॒తా ప్ర॒మీయ॑మాణ॒ ఆహై॒ష సో॑మపీ॒థ ఇతి॑ । ఇ॒న్ద్రి॒యం-వైఁ సో॑మపీ॒థః । ఇ॒న్ద్రి॒యమే॒వ సో॑మపీ॒థమవ॑-రున్ధే । తేన᳚న్ద్రి॒యేణ॑ ద్వి॒తీయా᳚-ఞ్జా॒యామ॒భ్య॑శ్ఞుతే ॥ 57 ॥

ఏ॒త-ద్వై బ్రాహ్మ॑ణ-మ్పు॒రా వా॑జశ్రవ॒సా వి॒దామ॑క్రన్న్ । తస్మా॒-త్తే ద్వేద్వే॑ జా॒యే అ॒భ్యా᳚క్షత । య ఏ॒వం-వేఁద॑ । అ॒భి ద్వి॒తీయా᳚-ఞ్జా॒యామ॑శ్ఞుతే ॥ అ॒గ్నయే॑ కవ్య॒వాహ॑నాయ స్వ॒ధా నమ॒ ఇత్యా॑హ । య ఏ॒వ పి॑తృ॒ణామ॒గ్నిః । త-మ్ప్రీ॑ణాతి ॥ తి॒స్ర ఆహు॑తీ-ర్జుహోతి ॥ త్రిర్నిద॑ధాతి ॥ షట్-థ్సమ్ప॑ద్యన్తే ॥ 58 ॥

షడ్వా ఋ॒తవః॑ । ఋ॒తూనే॒వ ప్రీ॑ణాతి ॥ తూ॒ష్ణీ-మ్మేక్ష॑ణ॒-మాద॑ధాతి । అస్తి॑ వా॒ హి ష॒ష్ఠ ఋ॒తుర్న వా᳚ ॥ దే॒వాన్. వై పి॒తౄ-న్ప్రీ॒తాన్ । మ॒ను॒ష్యాః᳚ పి॒తరో-ఽను॒ ప్రపి॑పతే । తి॒స్ర ఆహు॑తీ-ర్జుహోతి । త్రిర్నిద॑ధాతి । షట్-థ్సమ్ప॑ద్యన్తే । షడ్వా ఋ॒తవః॑ ॥ 59 ॥

ఋ॒తవః॒ ఖలు॒ వై దే॒వాః పి॒తరః॑ । ఋ॒తూనే॒వ దే॒వా-న్పి॒తౄ-న్ప్రీ॑ణాతి । తాన్ప్రీ॒తాన్ । మ॒ను॒ష్యాః᳚ పి॒తరో-ఽను॒ ప్రపి॑పతే ॥ స॒కృ॒దా॒చ్ఛి॒న్న-మ్బ॒ర్॒హి-ర్భ॑వతి । స॒కృది॑వ॒ హి పి॒తరః॑ ॥ త్రిర్నిద॑ధాతి । తృ॒తీయే॒ వా ఇ॒తో లో॒కే పి॒తరః॑ । తానే॒వ ప్రీ॑ణాతి ॥ పరాం॒ఆవ॑ర్తతే ॥ 60 ॥

హ్లీకా॒ హి పి॒తరః॑ ॥ ఒష్మణో᳚ వ్యా॒వృత॒ ఉపా᳚స్తే । ఊ॒ష్మభా॑గా॒ హి పి॒తరః॑ ॥ బ్ర॒హ్మ॒వా॒దినో॑ వదన్తి । ప్రాశ్యాం(3)న ప్రాశ్యా(3)మితి॑ । య-త్ప్రా᳚శ్ఞీ॒యాత్ । జన్య॒మన్న॑మద్యాత్ । ప్ర॒మాయు॑క-స్స్యాత్ । యన్న ప్రా᳚శ్ఞీ॒యాత్ । అహ॑వి-స్స్యాత్ ॥ 61 ॥

పి॒తృభ్య॒ ఆవృ॑శ్చ్యేత । అ॒వ॒ఘ్రేయ॑మే॒వ । తన్నేవ॒ ప్రాశి॑త॒-న్నేవాప్రా॑శితమ్ ॥ వీ॒రం-వాఁ॒ వై పి॒తరః॑ ప్ర॒యన్తో॒ హర॑న్తి । వీ॒రం-వాఁ॑ దదతి । ద॒శా-ఞ్ఛి॑నత్తి । హర॑ణభాగా॒ హి పి॒తరః॑ । పి॒తౄనే॒వ ని॒రవ॑దయతే ॥ ఉత్త॑ర॒ ఆయు॑షి॒ లోమ॑ ఛిన్దీత । పి॒తృ॒ణాగ్ హ్యే॑తర్హి॒ నేదీ॑యః ॥ 62 ॥

నమ॑స్కరోతి । న॒మ॒స్కా॒రో హి పి॑తృ॒ణామ్ ॥ నమో॑ వః పితరో॒ రసా॑య । నమో॑ వః పితర॒-శ్శుష్మా॑య । నమో॑ వః పితరో జీ॒వాయ॑ । నమో॑ వః పితర-స్స్వ॒ధాయై᳚ । నమో॑ వః పితరో మ॒న్యవే᳚ । నమో॑ వః పితరో ఘో॒రాయ॑ । పిత॑రో॒ నమో॑ వః । య ఏ॒తస్మి॑న్ ఁలో॒కే స్థ ॥ 63 ॥

యు॒ష్మాగ్స్తే-ఽను॑ । యే᳚-ఽస్మిఁల్లో॒కే । మా-న్తే ను॑ । య ఏ॒తస్మి॑ఁల్లో॒కే స్థ । యూ॒య-న్తేషాం॒-వఁసి॑ష్ఠా భూయాస్త । యే᳚-ఽస్మిఁల్లో॒కే । అ॒హ-న్తేషాం॒-వఁసి॑ష్ఠో భూయాస॒మిత్యా॑హ । వసి॑ష్ఠ-స్సమా॒నానా᳚-మ్భవతి । య ఏ॒వం-విఁ॒ద్వాన్-పి॒తృభ్యః॑ క॒రోతి॑ ॥ ఏ॒ష వై మ॑ను॒ష్యా॑ణాం-యఁ॒జ్ఞః ॥ 64 ॥

దే॒వానాం॒-వాఁ ఇత॑రే య॒జ్ఞాః । తేన॒ వా ఏ॒త-త్పి॑తృలో॒కే చ॑రతి ॥ య-త్పి॒తృభ్యః॑ క॒రోతి॑ । స ఈ᳚శ్వ॒రః ప్రమే॑తోః । ప్రా॒జా॒ప॒త్యయ॒ర్చా పున॒రైతి॑ । య॒జ్ఞో వై ప్ర॒జాప॑తిః । య॒జ్ఞేనై॒వ స॒హ పున॒రైతి॑ । న ప్ర॒మాయు॑కో భవతి ॥ పి॒తృ॒లో॒కే వా ఏ॒త-ద్యజ॑మానశ్చరతి । య-త్పి॒తృభ్యః॑ క॒రోతి॑ । స ఈ᳚శ్వ॒ర ఆర్తి॒మార్తోః᳚ । ప్ర॒జాప॑తి॒-స్త్వావైన॒-న్తత॒ ఉన్నే॑తుమర్హ॒తీత్యా॑హుః । య-త్ప్రా॑జాప॒త్యయ॒ర్చా పున॒రైతి॑ । ప్ర॒జాప॑తిరే॒వైన॒-న్తత॒ ఉన్న॑యతి । నార్తి॒మార్చ్ఛ॑తి॒ యజ॑మానః ॥ 65 ॥

(ఇత్య॑ - శ్ఞుతే - పద్యన్తే - పద్యన్తే॒ షడ్వా ఋ॒తవో॑ - వర్త॒తే-ఽ - హ॑వి-స్స్యా॒న్ - నేదీ॑యః॒ - స్థ - య॒జ్ఞో - యజ॑మానశ్చరతి॒ య-త్పి॒తృభ్యః॑ క॒రోతి॒ పఞ్చ॑ చ) (అ. 10)

(దే॒వా॒సు॒రా అ॒గ్నీషోమ॑యో--ర్ దే॒వా వై యథా॒ దర్శం॑ - దే॒వా వై యద॒న్యై-ర్గ్రహై᳚--ర్ బ్రహ్మవా॒దినో॒ నాగ్ని॑ష్టో॒మో న - సా॑వి॒త్రం - దే॒వస్యా॒హం - తా॒ర్ప్యగ్ం - స॒ప్తాన్న॑హో॒మాన్ - నృ॒షదం॒ - త్వేన్ద్రో॑ వృ॒త్రగ్ం హ॒త్వా దశ॑)

(దే॒వా॒సు॒రా - వా॒జ్యే॑వైనం॒ - తస్మా᳚-ద్వాజపేయయా॒జీ - దే॒వస్యా॒హం - ఁవాజ॒స్యావ॑రుద్ధ్యా- ఇన్ద్రి॒యమే॒వాస్మి॒న్॒. - హ్లీకా॒ హి పి॒తరః॒ పఞ్చ॑షష్టిః)

(దే॒వా॒సు॒రా - యజ॑మానః)

॥ హరిః॑ ఓమ్ ॥

॥ కృష్ణ యజుర్వేదీయ తైత్తిరీయ బ్రాహ్మణే ప్రథమాష్టకే తృతీయః ప్రపాఠక-స్సమాప్తః ॥

Roman (IAST) Transliteration

kṛṣṇa yajurvedīya taittirīya brāhmaṇe prathamāṣṭake tṛtīyaḥ prapāṭhakaḥ - vājapeyabrāhmaṇaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

anuvākaṃ 1 - punarādheyaśeṣaḥ ājyabhāgayorviśeṣaḥ

de॒vā॒su॒rā-ssaṃ-ya~̭ttā āsann | te de॒vā vi̭ja॒ya-mṷpa॒yantaḥ̭ | a॒gnīṣoma̭yo-steja॒svinī᳚sta॒nū-ssa-nnya̭dadhata | i॒damṷ no bhaviṣyati | yadi̭ no je॒ṣyantīti̭ | tenā॒gnīṣomā॒-vapā᳚krāmatām | te de॒vā vi॒jitya̭ | a॒gnīṣomā॒-vanvai᳚cchann | te᳚-'gni-manva̭vinda-nnṛ॒tuṣū-thsa̭nnam | tasya॒ vibha̭ktībhi-steja॒svinī᳚sta॒nū-ravā̭rundhata || 1 ||

te soma॒-manva̭vindann | tama̭ghnann | tasya̭ yathā-'bhi॒jñāya̭-nta॒nū-rvya̭gṛhṇata | te grahā̭ abhavann | ta-dgrahā̭ṇā-ṅgraha॒tvam | yasyai॒vaṃ-vi~॒duṣo॒ grahā̭ gṛ॒hyante᳚ | tasya॒ tvḙva gṛ̭hī॒tāḥ || nānā᳚gneya-mpunarā॒dheyḙ kuryāt | yadanā᳚gneya-mpunarā॒dheyḙ ku॒ryāt | vyṛ̭ddhame॒va tat || 2 ||

anā᳚gneyaṃ॒-vā~ e॒ta-tkri̭yate | ya-thsa॒midha॒-stanū॒napā̭tami॒ḍo ba॒r॒hi-rya̭jati || u॒bhāvā᳚gne॒yā-vājya̭bhāgau syātām || anā᳚jyabhāgau-bhavata॒ ityā̭huḥ | yadu॒bhāvā᳚gne॒yāva॒nvañcā॒viti̭ | a॒gnaye॒ pava̭mānā॒yotta̭ra-ssyāt | ya-tpava̭mānāya | tenājya̭ bhāgaḥ | tena̭ sau॒myaḥ || budha̭nvatyāgne॒ya-syājya̭-bhāgasya puro-'nuvā॒kyā̭ bhavati || 3 ||

yathā̭ su॒pta-mbo॒dhaya̭ti | tā॒dṛge॒va tat || a॒gninya̭ktāḥ patnī saṃyā~॒jānā॒mṛcaḥ̭ syuḥ | tenā᳚gne॒yagṃ sarva̭-mbhavati || e॒ka॒dhā tḙja॒svinī᳚-nde॒vatā॒-mupai॒tītyā̭huḥ | saina̭mīśva॒rā pra॒daha॒ iti̭ || neti̭ brūyāt | pra॒jana̭naṃ॒-vā~ a॒gniḥ | pra॒jana̭na-me॒vopai॒tīti̭ || kṛ॒taya̭ju॒-ssambhṛ̭ta sambhāra॒ ityā̭huḥ || 4 ||

na sa॒bhṛntyā᳚-ssambhā॒rāḥ | na yajuḥ̭ kā॒rya̭miti̭ || atho॒ khalṷ | sa॒bhṛntyā̭ e॒va sa̭bhāṃ॒rāḥ | kā॒ryaṃ̭-ya~juḥ̭ | pu॒na॒rā॒dheya̭sya॒ samṛ̭ddhyai || teno̭pā॒gṃ॒śu praca̭rati | eṣya̭ iva॒ vā e॒ṣaḥ | ya-tpṷna-rā॒dheyaḥ̭ | yatho̭pā॒gṃ॒śu na॒ṣṭami॒cchati̭ || 5 ||

tā॒dṛge॒va tat || u॒ccai-ssvi̭ṣṭa॒kṛta॒mu-thsṛ̭jati | yathā̭ na॒ṣṭaṃ-vi~॒tvā prāhā॒yamiti̭ | tā॒dṛge॒va tat || e॒ka॒dhā tḙja॒svinī᳚-nde॒vatā॒mupai॒tītyā̭huḥ | saina̭mīśva॒rā pra॒daha॒ iti̭ | tattathā॒ nopai̭ti | pra॒yā॒jā॒nū॒yā॒jeṣve॒va vibha̭ktīḥ kuryāt | ya॒thā॒pū॒rva-mājya̭bhāgau॒ syātā᳚m | e॒va-mpa̭tnī saṃyā~॒jāḥ || 6 ||

ta-dvai᳚śvāna॒rava̭t-pra॒jana̭navattara॒-mupai॒tīti̭ || tadā̭huḥ | vyṛ̭ddhaṃ॒-vā~ e॒tat | anā᳚gneyaṃ॒-vā~ e॒ta-tkri̭yata॒ iti̭ || neti̭ brūyāt | a॒gni-mpra̭tha॒maṃ-vi~bha̭ktīnāṃ-ya~jati | a॒gnimṷtta॒ma-mpa̭tnī saṃyā~॒jānā᳚m | tenā᳚gne॒yam | tena॒ samṛ̭ddha-ṅkriyata॒ iti̭ || 7 ||

(a॒ru॒ndha॒ - tai॒va ta-d- bha̭vati॒ - sambhṛ̭tasambhāra॒ ityā̭hu - ri॒cchati̭ - patnīsaṃyā~॒jā - +nava̭ ca) ( ā1)

anuvākaṃ 2 - vājapeyasya vidhiḥ

de॒vā vai yathā॒darśaṃ̭-ya~॒jñānāha̭ranta | yo᳚-'gniṣṭo॒mam | ya u॒kthya᳚m | yo̭-'tirā॒tram | te sa॒haiva sarvḙ vāja॒peya̭-mapaśyann | te | a॒nyo᳚nyasmai॒ nāti̭ṣṭhanta | a॒hama॒nena̭ yajā॒ iti̭ | te᳚-'bruvann | ā॒jima॒sya dhā̭vā॒meti̭ || 8 ||

tasmi̭-nnā॒jima̭dhāvann | ta-mbṛha॒spati॒-ruda̭jayat | tenā̭yajata | sa svārā᳚jya-magacchat | tamindro᳚-'bravīt | māma॒nena̭ yāja॒yeti̭ | tenendra̭-mayājayat | so-'gra̭-nde॒vatā̭nā॒-mparyai᳚t | aga̭ccha॒-thsvārā᳚jyam | ati̭ṣṭhantāsmai॒ jyaiṣṭhyā̭ya || 9 ||

ya e॒vaṃ-vi~॒dvān. vā̭ja॒peyḙna॒ yaja̭te | gaccha̭ti॒ svārā᳚jyam | agragṃ̭ samā॒nānā॒-mparyḙti | tiṣṭha̭nte-'smai॒ jyaiṣṭhyā̭ya || sa vā e॒ṣa brā᳚hma॒ṇasya̭ cai॒va rā̭ja॒nya̭sya ca ya॒jñaḥ || taṃ-vā~ e॒taṃ-vā~̭ja॒peya॒ ityā̭huḥ | vā॒jāpyo॒ vā e॒ṣaḥ | vāja॒gg॒ hyḙtena̭ de॒vā aiphsanṋ || somo॒ vai vā̭ja॒peyaḥ̭ | yo vai somaṃ̭-vā~ja॒peyaṃ॒-ve~da̭ || 10 ||

vā॒jyḙvaina̭-mpī॒tvā bha̭vati | ā-'sya̭ vā॒jī jā̭yate || annaṃ॒-vai~ vā̭ja॒peyaḥ̭ | ya e॒vaṃ-ve~da̭ | attyanna᳚m | ā-'syā᳚nnā॒do jā̭yate || brahma॒ vai vā̭ja॒peyaḥ̭ | ya e॒vaṃ-ve~da̭ | atti॒ brahma॒ṇā-'nna᳚m | ā-'sya̭ bra॒hmā jā̭yate || 11 ||

vāgvai vāja̭sya prasa॒vaḥ | ya e॒vaṃ-ve~da̭ | ka॒roti̭ vā॒cā vī॒rya᳚m | ainaṃ̭-vā~॒cā ga̭cchati | api̭vatīṃ॒-vā~caṃ̭-va~dati || pra॒jāpa̭ti-rde॒vebhyo̭ ya॒jñān vyādi̭śat | sa ā॒tman vā̭ja॒peya̭-madhatta | ta-nde॒vā a̭bruvann | e॒ṣa vāva ya॒jñaḥ | ya-dvā̭ja॒peyaḥ̭ || 12 ||

apye॒va no-'trā॒stviti̭ | tebhya̭ e॒tā ujji̭tīḥ॒ prāya̭cchat || tā vā e॒tā ujji̭tayo॒ vyākhyā̭yante | ya॒jñasya̭ sarva॒tvāya̭ | de॒vatā̭nā॒-mani̭rbhāgāya || de॒vā vai brahma̭ṇa॒ścānna̭sya ca॒ śama̭la॒mapā᳚ghnann | ya-dbrahma̭ṇa॒-śśama̭la॒māsī᳚t | sā gāthā̭ nārāśa॒gg॒sya̭ bhavat | yadanna̭sya | sā surā᳚ || 13 ||

tasmā॒-dgāya̭taśca ma॒ttasya̭ ca॒ na pra̭ti॒gṛhya᳚m | ya-tpra̭tigṛhṇī॒yāt | śama̭la॒-mprati̭gṛhṇīyāt || sarvā॒ vā e॒tasya॒ vāco 'va̭ruddhāḥ | yo vā̭japeyayā॒jī | yā pṛ̭thi॒vyāṃ-yā~-'gnau yā ra̭thanta॒re | yā-'ntari̭kṣe॒ yā vā॒yau yā vā̭made॒vye | yā di॒vi yā-''di॒tye yā bṛ̭ha॒ti | yā-'phsu yauṣa̭dhīṣu॒ yā vana॒spati̭ṣu || tasmā᳚-dvājapeyayā॒jyārtvi̭jīnaḥ | sarvā॒ hya̭sya॒ vāco 'va̭ruddhāḥ || 14 ||

(dhā॒vā॒meti॒ - jyaiṣṭhyā̭ya॒ - veda̭ - bra॒hmā jā̭yate-vāja॒peyaḥ॒-surā-''rtvi̭jīna॒ ekaṃ̭ ca ) (a. 2)

anuvākaṃ 3 - tasyagrahaviśeṣāḥ

de॒vā vai yada॒nyai-rgrahai᳚-rya॒jñasya॒ nāvārṷndhata | tada̭tigrā॒hyai̭-rati॒gṛhyā-vā̭rundhata | tada̭tigrā॒hyā̭ṇā-matigrāhya॒tvam || yada̭tigrā॒hyā̭ gṛ॒hyante᳚ | yade॒vānyai-rgrahai᳚-rya॒jñasya॒ nāva̭ru॒ndhe | tade॒va taira̭ti॒gṛhyā-va̭rundhe || pañca̭ gṛhyante | pāṅkto̭ ya॒jñaḥ | yāvā̭ne॒va ya॒jñaḥ | tamā॒ptvā 'va̭rundhe || 15 ||

sarva̭ ai॒ndrā bha̭vanti | e॒ka॒dhaiva yaja̭māna indri॒ya-nda̭dhati || sa॒ptada̭śa prājāpa॒tyā grahā̭ gṛhyante | sa॒pta॒da॒śaḥ pra॒jāpa̭tiḥ | pra॒jāpa̭te॒-rāptyai᳚ || eka̭ya॒rcā gṛ̭hṇāti | e॒ka॒dhaiva yaja̭māne vī॒rya̭-ndadhāti || so॒ma॒gra॒hāgśca̭ surāgra॒hāgśca̭ gṛhṇāti | e॒ta-dvai de॒vānā᳚-mpara॒mamanna᳚m | ya-thsomaḥ̭ || 16 ||

e॒ta-nma̭nu॒ṣyā̭ṇām | ya-thsurā᳚ | pa॒ra॒meṇai॒vāsmā̭ a॒nnādye॒nāva̭ra-ma॒nnādya॒-mava̭rundhe || so॒ma॒gra॒hā-ngṛ̭hṇāti | brahma̭ṇo॒ vā e॒ta-ttejaḥ̭ | ya-thsomaḥ̭ | brahma̭ṇa e॒va teja̭sā॒ tejo॒ yaja̭māne dadhāti | su॒rā॒gra॒hā-ngṛ̭hṇāti | anna̭sya॒ vā e॒tacchama̭lam | ya-thsurā᳚ || 17 ||

anna̭syai॒va śama̭lena॒ śama̭laṃ॒-ya~ja̭mānā॒-dapa̭hanti || so॒ma॒gra॒hāgśca̭ surāgra॒hāgśca̭ gṛhṇāti | pumā॒n॒. vai somaḥ̭ | strī surā᳚ | ta-nmi̭thu॒nam | mi॒thu॒name॒vāsya॒ ta-dya॒jñe ka̭roti pra॒jana̭nāya | ā॒tmāna̭me॒va so̭magra॒hai-sspṛ̭ṇoti | jā॒yāgṃ sṷrā gra॒haiḥ | tasmā᳚-dvājapeyayā॒jya̭muṣmi̭~llo॒ke striya॒gṃ॒ sambha̭vati | vā॒ja॒peyā̭-bhijita॒gg॒ hya̭sya || 18 ||

pūrvḙ somagra॒hā gṛ̭hyante | apa̭re surāgra॒hāḥ | pu॒ro॒kṣagṃ so̭magra॒hānth- sā̭dayati | pa॒ścā॒da॒kṣagṃ sṷrāgra॒hān | pā॒pa॒va॒sya॒sasya॒ vidhṛ̭tyai || e॒ṣa vai yaja̭mānaḥ | ya-thsomaḥ̭ | anna॒gṃ॒ surā᳚ | so॒ma॒gra॒hāgśca̭ surāgra॒hāgśca॒ vyati̭ṣajati | a॒nnādyḙnai॒vainaṃ॒-vya~ti̭ṣajati || 19 ||

sa॒pṛñcaḥ̭ stha॒ sa-mmā̭ bha॒dreṇa̭ pṛ॒ṅktetyā̭ha | annaṃ॒-vai~ bha॒dram | a॒nnādyḙnai॒vaina॒gṃ॒ sagṃsṛ̭jati || anna̭sya॒ vā e॒tacchama̭lam | ya-thsurā᳚ | pā॒pmèva॒ khalu॒ vai śama̭lam | pā॒pmanā॒ vā ḙname॒tacchama̭lena॒ vyati̭ṣajati | ya-thso̭magra॒hāgśca̭ surāgra॒hāgśca̭ vyati॒ṣaja̭ti || vi॒pṛcaḥ̭ stha॒ vi mā̭ pā॒pmanā̭ pṛ॒ṅktetyā̭ha | pā॒pmanai॒vaina॒gṃ॒ śama̭lena॒ vyāva̭rtayati || 20 ||

tasmā᳚-dvājapeyayā॒jī pū॒to meddhyo̭ dakṣi॒ṇyaḥ̭ || prāṃu-ddra̭vati somagra॒haiḥ | a॒mume॒va tai-rlo॒ka-ma॒bhija̭yati | pra॒tyaṅkhsṷrā gra॒haiḥ | i॒mame॒va tai-rlo॒ka-ma॒bhija̭yati || prati̭ṣṭhanti somagra॒haiḥ | yāva̭de॒va sa॒tyam | tena̭ sūyate || vā॒ja॒sṛdbhyaḥ̭ surāgra॒hān. ha̭ranti | anṛ̭tenai॒va viśa॒gṃ॒ sagṃsṛ̭jati || hi॒ra॒ṇya॒pā॒tra-mmadhoḥ᳚ pū॒rṇa-nda̭dāti | ma॒dha॒vyo̭-'sā॒nīti̭ || e॒ka॒dhā bra॒hmaṇa॒ upa̭ harati | e॒ka॒dhaiva yaja̭māna॒ āyu॒stejo̭ dadhāti || 21 ||

(ā॒ptvā-'va̭rundhe॒ - somaḥ॒ - śama̭laṃ॒-ya~-thsurā॒ - hya̭-syainaṃ॒-vya~ti̭ṣajati॒ - vyāva̭rtayati - sṛjati ca॒tvāri̭ ca ) (a. 3)

anuvākaṃ 4 - paśava-ssaptadaśa

bra॒hma॒vā॒dino̭ vadanti | nāgni̭ṣṭo॒mo nokthyaḥ̭ | na ṣo̭ḍa॒śī nāti̭rā॒traḥ | atha॒ kasmā᳚-dvāja॒peye॒ sarvḙ yajñakra॒tavo-'va̭ruddhyanta॒ iti̭ | pa॒śubhi॒riti̭ brūyāt || ā॒gne॒ya-mpa॒śumāla̭bhate | a॒gni॒ṣṭo॒mame॒va tenāva̭rundhe | ai॒ndrā॒gneno॒kthya᳚m | ai॒ndreṇa̭ ṣoḍa॒śinaḥ̭ sto॒tram | sā॒ra॒sva॒tyā-'ti̭rā॒tram || 22 ||

mā॒ru॒tyā bṛ̭ha॒ta-ssto॒tram | e॒tāva̭nto॒ vai ya̭jñakra॒tavaḥ̭ | tā-npa॒śubhi̭re॒vā-va̭rundhe || ā॒tmāna̭me॒va spṛ̭ṇo-tyagniṣṭo॒mena̭ | prā॒ṇā॒pā॒nā-vu॒kthyḙna | vī॒ryagṃ̭ ṣoḍa॒śinaḥ̭ sto॒treṇa̭ | vāca̭-matirā॒treṇa̭ | pra॒jā-mbṛ̭ha॒ta-ssto॒treṇa̭ | i॒mame॒va lo॒kama॒bhi ja̭yatyagniṣṭo॒mena̭ | a॒ntari̭kṣa-mu॒kthyḙna || 23 ||

su॒va॒rgaṃ-lo~॒kagṃ ṣo̭ḍa॒śinaḥ̭ sto॒treṇa̭ | de॒va॒yānā̭ne॒va pa॒tha āro̭ha-tyatirā॒treṇa̭ | nākagṃ̭ rohati bṛha॒ta-ssto॒treṇa̭ | teja̭ e॒vātma-ndha̭tta āgne॒yena̭ pa॒śunā᳚ | ojo॒ bala̭maindrā॒gnena̭ | i॒ndri॒ya-mai॒ndreṇa̭ | vācagṃ̭ sārasva॒tyā | u॒bhāve॒va dḙvalo॒ka-ñca̭ manuṣyalo॒ka-ñcā॒bhija̭yati māru॒tyā va॒śayā᳚ || sa॒ptada̭śa prājāpa॒tyā-npa॒śūnāla̭bhate | sa॒pta॒da॒śaḥ pra॒jāpa̭tiḥ || 24 ||

pra॒jāpa̭te॒rāptyai᳚ || śyā॒mā eka̭rūpā bhavanti | e॒vami̭va॒ hi pra॒jāpa̭ti॒-ssamṛ̭ddhyai || tā-nparya̭gnikṛtā॒-nuthsṛ̭jati || ma॒ruto̭ ya॒jñama̭jighāgṃsa-npra॒jāpa̭teḥ | tebhya̭ e॒tā-mmā̭ru॒tīṃ-va~॒śāmāla̭bhata | tayai॒vainā̭-naśamayat || mā॒ru॒tyā pra॒carya̭ | e॒tān-thsañjña̭payet | ma॒ruta̭ e॒va śa̭mayi॒tvā || 25 ||

e॒taiḥ praca̭rati | ya॒jñasyāghā̭tāya || e॒ka॒dhā va॒pā jṷhoti | e॒ka॒de॒va॒tyā̭ hi | e॒te | atho̭ eka॒dhaiva yaja̭māne vī॒rya̭-ndadhāti || nai॒vā॒reṇa̭ sa॒ptada̭śaśarāve-ṇai॒tarhi॒ praca̭rati | e॒ta-tpṷroḍāśā॒ hyḙte | atho̭ paśū॒nāme॒va chi॒dramapi̭dadhāti || sā॒ra॒sva॒tyotta॒mayā॒ praca̭rati | vāg vai sara̭svatī | tasmā᳚-tprā॒ṇānāṃ॒-vā~gṷtta॒mā | atho᳚ pra॒jāpa̭tāve॒va ya॒jña-mprati̭ṣṭhāpayati | pra॒jāpa̭ti॒r॒ hi vāk || apa̭nnadatī bhavati | tasmā᳚-nmanu॒ṣyā᳚-ssarvāṃ॒-vā~caṃ̭-va~danti || 26 ||

(a॒ti॒rā॒tra - ma॒ntari̭kṣamu॒kthyḙna - pra॒jāpa̭tiḥ - śamayi॒tvot - ta॒mayā॒ praca̭rati॒ ṣaṭ ca̭) (a. 4)

anuvākaṃ 5 - rathayājanam

sā॒vi॒tra-ñjṷhoti॒ karma̭ṇaḥ karmaṇaḥ pu॒rastā᳚t || kasta-dve॒detyā̭huḥ | ya-dvā̭ja॒peya̭sya॒ pūrvaṃ॒-ya~dapa̭ra॒miti̭ | sa॒vi॒tṛpra̭sūta e॒va ya̭thāpū॒rva-ṅkarmā̭ṇi karoti || sava̭ne savane juhoti | ā॒krama̭ṇame॒va ta-thsetuṃ॒-ya~ja̭mānaḥ kurute | su॒va॒rgasya̭ lo॒kasya॒ sama̭ṣṭyai || vā॒caspati॒-rvāca̭ma॒dya sva̭dāti na॒ ityā̭ha | vāgvai de॒vānā᳚-mpu॒rā-'nna̭māsīt | vāca̭me॒vāsmā॒ annagg̭ svadayati || 27 ||

indra̭sya॒ vajro̭-'si॒ vārtra̭ghna॒ iti॒ ratha̭mu॒pāva̭harati॒ viji̭tyai || vāja̭sya॒ nu pra̭sa॒ve mā॒tara̭-mma॒hīmityā̭ha | yaccai॒veyam | yaccā॒syāmadhi̭ | tade॒vā-va̭rundhe | atho॒ tasmi̭nne॒vobhaye॒-'bhiṣi̭cyate || a॒phsva̭ntara॒-mṛta̭ma॒phsu bhḙṣa॒jamityaśvā᳚-npalpūlayati | a॒phsu vā aśva̭sya॒ tṛtī̭ya॒-mpravi̭ṣṭam | tada̭nu॒vena॒nvava̭plavate | yada॒phsu pa̭lpū॒laya̭ti || 28 ||

yade॒vāsyā॒phsu pravi̭ṣṭam | tade॒vāva̭rundhe || ba॒hu vā aśvo̭-'me॒ddhya-mupa̭gacchati | yada॒phsu pa̭lpū॒laya̭ti | meddhyā̭ne॒vainā᳚n karoti || vā॒yurvā᳚ tvā॒ manṷrvā॒ tvetyā̭ha | e॒tā vā e॒ta-nde॒vatā॒ agre॒ aśva̭mayuñjann | tābhi̭re॒vaināṋ. yunakti | sa॒vasyojji̭tyai || yajṷṣā yunakti॒ vyāvṛ̭ttyai || 29 ||

apā᳚-nna pādāśuhema॒nniti॒ sammā᳚rṣṭi | meddhyā̭ne॒vainā᳚n karoti | atho॒ stautye॒vainā̭nā॒jigṃ sa̭riṣya॒taḥ || vi॒ṣṇu॒ kra॒mān kra̭mate | viṣṇṷre॒va bhū॒tvemā~llo॒kā-na॒bhija̭yati || vai॒śva॒de॒vo vai rathaḥ̭ | a॒ṅkau nya॒ṅkāva॒bhito॒ rathaṃ॒-yā~vityā̭ha | yā e॒va de॒vatā॒ rathe॒ pravi̭ṣṭāḥ | tābhya̭ e॒va nama̭skaroti | ā॒tmano-'nā᳚rtyai || aśa̭maratha-mbhāvuko-'sya॒ ratho̭ bhavati | ya e॒vaṃ-ve~da̭ || 30 ||

(sva॒da॒ya॒ti॒ - pa॒lpū॒laya̭ti॒ - vyāvṛ̭ttyā॒ - anā᳚rtyai॒ dve ca̭) (a. 5)

anuvākaṃ 6 - rathadhāvanam

de॒vasyā॒hagṃ sa̭vi॒tuḥ pra̭sa॒ve bṛha॒spati̭nā vāja॒jitā॒ vāja̭-ñjeṣa॒mityā̭ha | sa॒vi॒tṛpra̭sūta e॒va brahma̭ṇā॒ vāja॒mujja̭yati || de॒vasyā॒hagṃ sa̭vi॒tuḥ pra̭sa॒ve bṛha॒spati̭nā vāja॒jitā॒ varṣi̭ṣṭha॒-nnākagṃ̭ ruheya॒mityā̭ha | sa॒vi॒tṛpra̭sūta e॒va brahma̭ṇā॒ varṣi̭ṣṭha॒-nnākagṃ̭ rohati || cātvā̭le rathaca॒kra-nnimi̭tagṃ rohati | ato॒ vā aṅgi̭rasa utta॒mā-ssṷva॒rgaṃ-lo~॒kamā̭yann | sā॒kṣāde॒va yaja̭māna-ssuva॒rgaṃ-lo~॒kamḙti || āve᳚ṣṭayati | vajro॒ vai rathaḥ̭ | vajrḙṇai॒va diśo॒-'bhija̭yati || 31 ||

vā॒jinā॒gṃ॒ sāma̭ gāyate | annaṃ॒-vai~ vājaḥ̭ | anna̭me॒-vāva̭rundhe || vā॒co varṣma̭ de॒vebhyo-'pā᳚krāmat | ta-dvana॒spatī॒-nprāvi̭śat | saiṣā vāg-vana॒spati̭ṣu vadati | yā dṷndu॒bhau | tasmā᳚-ddundu॒bhi-ssarvā॒ vācoti̭ vadati || du॒ndu॒bhīn-thsa॒māghna̭nti | pa॒ra॒mā vā e॒ṣā vāk || 32 ||

yā dṷndu॒bhau | pa॒ra॒mayai॒va vā॒cā-'va̭rāṃ॒-vā~ca॒ma-va̭rundhe | atho̭ vā॒ca e॒va varṣma॒ yaja̭mā॒no 'va̭rundhe || indrā̭ya॒ vācaṃ̭-va~da॒tendraṃ॒-vā~ja̭-ñjāpaya॒tendro॒ vāja̭majayi॒-dityā̭ha | e॒ṣa vā e॒tarhīndraḥ̭ | yo yaja̭te | yaja̭māna e॒va vāja॒mujja̭yati || sa॒ptada̭śa pravyā॒dhānā॒ji-ndhā̭vanti | sa॒pta॒da॒śagg sto॒tra-mbha̭vati | sa॒ptada̭śa saptadaśa dīyante || 33 ||

sa॒pta॒da॒śaḥ pra॒jāpa̭tiḥ | pra॒jāpa̭te॒-rāptyai᳚ || arvā̭-'si॒ sapti̭rasi vā॒jya̭sītyā̭ha | a॒gnirvā arvā᳚ | vā॒yu-ssaptiḥ̭ | ā॒di॒tyo vā॒jī | e॒tābhi̭re॒vāsmai̭ de॒vatā̭bhi-rdevara॒thaṃ-yu~̭nakti || pra॒ṣṭi॒vā॒hinaṃ̭-yu~nakti | pra॒ṣṭi॒vā॒hī vai dḙvara॒thaḥ | de॒va॒ra॒thame॒vāsmai̭ yunakti || 34 ||

vāji̭no॒ vāja̭-ndhāvata॒ kāṣṭhā᳚-ṅgaccha॒tetyā̭ha | su॒va॒rgo vai lo॒kaḥ kāṣṭhā᳚ | su॒va॒rgame॒va lo॒kaṃ-ya~̭nti || su॒va॒rgaṃ-vā~ e॒te lo॒kaṃ-ya~̭nti | ya ā॒ji-ndhāva̭nti || prāñco̭ dhāvanti | prāṃi̭va॒ hi sṷva॒rgo lo॒kaḥ || ca॒ta॒sṛbhi॒ranṷ mantrayate | ca॒tvāri॒ chandāgṃ̭si | chando̭bhire॒vainā᳚n-thsuva॒rgaṃ-lo~॒ka-ṅga̭mayati || 35 ||

pra vā e॒te᳚-'smāl-lo॒kāccya̭vante | ya ā॒ji-ndhāva̭nti | uda̭ñca॒ āva̭rtante | a॒smāde॒va tena̭ lo॒kānnaya̭nti || ra॒tha॒vi॒mo॒ca॒nīya̭-ñjuhoti॒ prati̭ṣṭhityai || ā mā॒ vāja̭sya prasa॒vo ja̭gamyā॒dityā̭ha | annaṃ॒-vai~ vājaḥ̭ | anna̭me॒vāva̭rundhe || ya॒thā॒lo॒kaṃ-vā~ e॒ta ujja̭yanti | ya ā॒ji-ndhāva̭nti || 36 ||

kṛ॒ṣṇala̭-ṅkṛṣṇalaṃ-vā~ja॒sṛdbhyaḥ॒ praya̭cchati | yame॒va te vājaṃ̭-lo~॒kamu॒jjaya̭nti | ta-mpa̭ri॒krīyā-va̭rundhe || e॒ka॒dhā bra॒hmaṇa॒ upa̭harati | e॒ka॒dhaiva yaja̭māne vī॒rya̭-ndadhāti || de॒vā vā oṣa̭dhīṣvā॒jima̭yuḥ | tā bṛha॒spati॒-ruda̭jayat | sa nī॒vārā॒nnira̭vṛṇīta | tannī॒vārā̭ṇā-nnīvāra॒tvam || nai॒vā॒raśca॒ru-rbha̭vati || 37 ||

e॒tadvai de॒vānā᳚-mpara॒mamanna᳚m | yannī॒vārāḥ᳚ | pa॒ra॒meṇai॒vāsmā̭ a॒nnādye॒-nāva̭ra-ma॒nnādya॒mava̭rundhe || sa॒ptada̭śaśarāvo bhavati | sa॒pta॒da॒śaḥ pra॒jāpa̭tiḥ | pra॒jāpa̭te॒-rāptyai᳚ || kṣī॒re bha̭vati | ruca̭me॒vāsmi̭n-dadhāti || sa॒rpiṣvā᳚-nbhavati meddhya॒tvāya̭ || bā॒r॒ha॒spa॒tyo vā e॒ṣa de॒vata̭yā || 38 ||

yo vā̭ja॒peyḙna॒ yaja̭te | bā॒r॒ha॒spa॒tya e॒ṣa ca॒ruḥ || aśvā᳚n-thsariṣya॒ta-ssa॒sruṣa॒ścāva̭-ghrāpayati | yame॒va te vājaṃ̭-lo~॒kamu॒jjaya̭nti | tame॒vāva̭rundhe || ajī̭jipata vanaspataya॒ indraṃ॒-vā~jaṃ॒-vi~mṷcyaddhva॒miti̭ dundu॒bhīn. vimṷñcati | yame॒va te vājaṃ̭-lo~॒kami̭ndri॒ya-ndṷndu॒bhaya̭ u॒jjaya̭nti | tame॒vā-va̭rundhe || 39 ||

(a॒bhija̭yati॒ - vā e॒ṣā vāg - dī̭yante - 'smai yunakti - gamayati॒ - ya ā॒ji-ndhāva̭nti - bhavati - de॒vata̭yā॒ - +-'ṣṭau ca̭) (a. 6)

anuvākaṃ 7 - yūpārohaṇam

tā॒rpyaṃ-ya~ja̭māna॒-mpari̭dhāpayati | ya॒jño vai tā॒rpyam | ya॒jñenai॒vaina॒gṃ॒ sama̭rdhayati | da॒rbha॒maya॒-mpari̭dhāpayati | pa॒vitraṃ॒-vai~ da॒rbhāḥ | pu॒nātye॒vaina᳚m | vājaṃ॒-vā~ e॒ṣo-'va̭ruruthsate | yo vā̭ja॒peyḙna॒ yaja̭te | oṣa̭dhayaḥ॒ khalu॒ vai vājaḥ̭ | ya-dda̭rbha॒maya̭-mparidhā॒paya̭ti || 40 ||

vāja॒syāva̭-ruddhyai || jāya॒ ehi॒ suvo॒ rohā॒vetyā̭ha | patni̭yā e॒vaiṣa ya॒jñasyā᳚n-vāra॒mbho-'na̭vacchityai || sa॒ptada̭śā-ratni॒ryūpo̭ bhavati | sa॒pta॒da॒śaḥ pra॒jāpa̭tiḥ | pra॒jāpa̭te॒rāptyai᳚ || tū॒pa॒ra-ścatṷraśri-rbhavati || gau॒dhū॒ma-ñca॒ṣāla᳚m | na vā e॒te vrī॒hayo॒ na yavāḥ᳚ | ya-dgo॒dhūmāḥ᳚ || 41 ||

e॒vami̭va॒ hi pra॒jāpa̭ti॒-ssamṛ̭ddhyai | atho̭ a॒mume॒vāsmai̭ lo॒kamanna̭vanta-ṅkaroti || vāso̭bhi-rveṣṭayati | e॒ṣa vai yaja̭mānaḥ | yadyūpaḥ̭ | sa॒rva॒de॒va॒tyaṃ̭-vā~saḥ̭ | sarvā̭bhire॒vaina̭-nde॒vatā̭bhi॒-ssama̭rdhayati | atho̭ ā॒krama̭ṇame॒va tathsetuṃ॒-ya~ja̭mānaḥ kurute | su॒va॒rgasya̭ lo॒kasya॒ sama̭ṣṭyai || dvāda̭śa vājaprasa॒vīyā̭ni juhoti || 42 ||

dvāda̭śa॒ māsā᳚-ssaṃva~thsa॒raḥ | saṃ॒va~॒thsa॒rame॒va prī̭ṇāti | atho̭ saṃva~thsa॒rame॒vāsmā॒ upa̭ dadhāti | su॒va॒rgasya̭ lo॒kasya॒ sama̭ṣṭyai || da॒śabhiḥ॒ kalpai̭ rohati | nava॒ vai purṷṣe prā॒ṇāḥ | nābhi̭rdaśa॒mī | prā॒ṇāne॒va ya̭thāsthā॒na-ṅka̭lpayi॒tvā | su॒va॒rgaṃ-lo~॒kamḙti | e॒tāva॒dvai purṷṣasya॒ svam || 43 ||

yāva̭t-prā॒ṇāḥ | yāva̭de॒vāsyāsti̭ | tena̭ sa॒ha sṷva॒rgaṃ-lo~॒kamḙti || suva̭rde॒vāgṃ a̭ga॒nmetyā̭ha | su॒va॒rgame॒va lo॒kamḙti | a॒mṛtā̭ abhū॒metyā̭ha | a॒mṛta̭miva॒ hi sṷva॒rgo lo॒kaḥ | pra॒jāpa̭teḥ pra॒jā a̭bhū॒metyā̭ha | prā॒jā॒pa॒tyo vā a॒yaṃ-lo~॒kaḥ | a॒smāde॒va tena̭ lo॒kānnaiti̭ || 44 ||

sama॒ha-mpra॒jayā॒ sa-mmayā᳚ pra॒jetyā̭ha | ā॒śiṣa̭me॒vaitā-māśā᳚ste || ā॒sa॒pu॒ṭai-rghna̭nti | annaṃ॒-vā~ i॒yam | a॒nnādyḙnai॒vaina॒gṃ॒ sama̭rdhayanti | ūṣai᳚-rghnanti | e॒te hi sā॒kṣādanna᳚m | yadūṣāḥ᳚ | sā॒kṣāde॒vaina̭-ma॒nnādyḙna॒ sama̭rdhayanti || pu॒rastā᳚t-pra॒tyañca᳚-ṅghnanti || 45 ||

pu॒rastā॒ddhi pra̭tī॒cīna॒-manna̭ma॒dyate᳚ || śī॒r॒ṣa॒to ghna̭nti | śī॒r॒ṣa॒to hyanna̭ma॒dyate᳚ || di॒gbhyo ghna̭nti | di॒gbhya e॒vāsmā̭ a॒nnādya॒-mava̭rundhate || ī॒śva॒ro vā e॒ṣa parāṃ᳚-pra॒daghaḥ̭ | yo yūpa॒gṃ॒ roha̭ti || hira̭ṇyama॒ddhya-va̭rohati | a॒mṛtaṃ॒-vai~ hira̭ṇyam | a॒mṛtagṃ̭ suva॒rgo lo॒kaḥ || 46 ||

a॒mṛta̭ e॒va sṷva॒rge lo॒ke prati̭ tiṣṭhati || śa॒tamā̭na-mbhavati | śa॒tāyuḥ॒ purṷṣa-śśa॒tendri̭yaḥ | āyṷṣye॒vendri॒ye prati̭ tiṣṭhati || puṣṭyai॒ vā e॒ta-drū॒pam | yada॒jā | tri-ssaṃ̭va~thsa॒rasyā॒nyān-pa॒śū-npari॒ prajā̭yate || ba॒stā॒ji॒na-ma॒ddhyava̭ rohati | puṣṭyā̭me॒va pra॒jana̭ne॒ prati̭tiṣṭhati || 47 ||

(pa॒ri॒dhā॒paya̭ti - go॒dhūmā̭ - juhoti॒ - svaṃ - naiti̭ - pra॒tyañja̭-ṅghnanti - lo॒ko - +nava̭ ca (a. 7)

anuvākaṃ 8 - annahomāḥ, abhiṣekaśca

sa॒ptānna̭-ho॒māñjṷhoti | sa॒pta vā annā̭ni | yāva̭ntye॒vānnā̭ni | tānye॒vāva̭rundhe | sa॒pta grā॒myā oṣa̭dhayaḥ | sa॒ptāra॒ṇyāḥ | u॒bhayī̭ṣā॒-mava̭ruddhyai || anna̭syā-nnasya juhoti | anna̭syānna॒syā-va̭ruddhyai || ya-dvā̭japeyayā॒jya-na̭varuddhasyāśñī॒yāt || 48 ||

ava̭ruddhena॒ vyṛ̭ddhyeta | sarva̭sya samava॒dāya̭ juhoti | ana̭varuddha॒-syāva̭ruddhyai || audṷmbareṇa sru॒veṇa̭ juhoti | ūrgvā anna̭-mudu॒mbaraḥ̭ | ū॒rja e॒vānnādya॒syāva̭ruddhyai || de॒vasya̭ tvā savi॒tuḥ pra̭sa॒va ityā̭ha | sa॒vi॒tṛ pra̭sūta e॒vaina॒-mbrahma̭ṇā de॒vatā̭bhi-ra॒bhiṣi̭ñcati || anna̭syānnasyā॒bhiṣi̭ñcati | anna̭syānna॒syāva̭ruddhyai || 49 ||

pu॒rastā᳚t-pra॒tyañca̭-ma॒bhiṣi̭ñcati | pu॒rastā॒ddhi-pra̭tī॒cīna॒-manna̭ma॒dyate᳚ | śī॒r॒ṣa॒to̭-'bhiṣi̭ñcati | śī॒r॒ṣa॒to hyanna̭ma॒dyate᳚ || āmukhā̭da॒nvava̭ srāvayati | mu॒kha॒ta e॒vāsmā̭ a॒nnādya̭-ndadhāti || a॒gnestvā॒ sāmrā᳚jyenā॒bhiṣi̭ñcā॒mītyā̭ha | e॒ṣa vā a॒gne-ssa॒vaḥ | tenai॒vaina̭-ma॒bhiṣi̭ñcati | indra̭sya tvā॒ sāmrā᳚jyenā॒bhiṣi̭ñcā॒mītyā̭ha || 50 ||

i॒ndri॒ya-me॒vāsmi̭-nne॒tena̭ dadhāti | bṛha॒spate᳚stvā॒ sāmrā᳚jyenā॒bhiṣi̭ñcā॒-mītyā̭ha | brahma॒ vai de॒vānā॒-mbṛha॒spatiḥ̭ | brahma̭ṇai॒vaina̭-ma॒bhiṣi̭ñcati || so॒ma॒gra॒hāgścā̭-vadānī॒yāni̭ ca॒rtvigbhya॒ upa̭ haranti | a॒mume॒va tai-rlo॒ka-manna̭vanta-ṅkaroti | su॒rā॒gra॒hāgścā̭-navadānī॒yāni̭ ca vāja॒sṛdbhyaḥ̭ | i॒mame॒va tai-rlo॒ka-manna̭vanta-ṅkaroti | atho̭ u॒bhayī᳚ṣve॒vābhiṣi̭cyate || vi॒mā॒tha-ṅkṷrvate vāja॒sṛtaḥ̭ || 51 ||

i॒ndri॒yasyāva̭ruddhyai || ani̭ruktābhiḥ prātassava॒ne stṷvate | ani̭ruktaḥ pra॒jāpa̭tiḥ | pra॒jāpa̭te॒rāptyai᳚ | vāja̭vatībhi॒-rmāddhya̭ndine | annaṃ॒-vai~ vājaḥ̭ | anna̭me॒vā-va̭rundhe | śi॒pi॒vi॒ṣṭava̭tībhi-stṛtīyasava॒ne | ya॒jño vai viṣṇuḥ̭ | pa॒śava॒-śśipiḥ̭ | ya॒jña e॒va pa॒śuṣu॒ prati̭ tiṣṭhati || bṛ॒hadantya̭-mbhavati | anta̭me॒vainagg̭ śri॒yai ga̭mayati || 52 ||

(a॒śñī॒yā - danna̭syānna॒syā va̭ruddhyā॒ - indra̭sya tvā॒ sāmrā᳚jyenā॒bhiṣi̭ñcā॒ mītyā̭ha-vāja॒sṛtaḥ॒ - śipi॒ strīṇi̭ ca) (a. 8)

anuvākaṃ 9 - atigrāhyāḥ, pañcaindrāḥ

nṛ॒ṣada॒-ntvetyā̭ha | pra॒jā vai nṝn | pra॒jānā̭me॒vaitena̭ sūyate | dru॒ṣada॒mityā̭ha | vana॒spata̭yo॒ vai dru | vana॒spatī̭nāme॒vai tena̭ sūyate | bhu॒va॒na॒sada॒-mityā̭ha | ya॒dā vai vasī̭yā॒-nbhava̭ti | bhuva̭namaga॒nniti॒ vai tamā̭huḥ | bhuva̭name॒vaitena̭ gacchati || 53 ||

a॒phsu॒ṣada̭-ntvā ghṛta॒sada॒-mityā̭ha | a॒pāme॒vaitena̭ ghṛ॒tasya̭ sūyate | vyo॒ma॒sada॒-mityā̭ha | ya॒dā vai vasī̭yā॒-nbhava̭ti | vyo̭māga॒nniti॒ vai tamā̭huḥ | vyo̭mai॒vaitena̭ gacchati || pṛ॒thi॒vi॒ṣada̭-ntvā-'ntarikṣa॒sada॒-mityā̭ha | e॒ṣāme॒vaitena̭ lo॒kānāgṃ̭ sūyate | tasmā᳚-dvājape-yayā॒jī na ka-ñca॒na pra॒tyava̭rohati | apī̭va॒ hi de॒vatā̭nāgṃ sū॒yate᳚ || 54 ||

nā॒ka॒sada॒-mityā̭ha | ya॒dāvai vasī̭yā॒-nbhava̭ti | nāka̭maga॒nniti॒ vai tamā̭huḥ | nāka̭me॒vaitena̭ gacchati || ye grahāḥ᳚ pañcaja॒nīnā॒ ityā̭ha | pa॒ñca॒ja॒nānā̭-me॒vaitena̭ sūyate || a॒pāgṃ rasa॒mudva̭yasa॒-mityā̭ha | a॒pāme॒vaitena॒ rasa̭sya sūyate | sūrya̭raśmigṃ sa॒mābhṛ̭ta॒-mityā̭ha saśukra॒tvāya̭ || 55 ||

(ga॒ccha॒ti॒ - sū॒yate॒ - +nava̭ ca) (a. 9)

anuvākaṃ 10 - piṇḍapitṛyajñaḥ darśapūrṇamāsabrāhmaṇaśeṣaḥ

indro vṛ॒tragṃ ha॒tvā | asṷrā-nparā॒bhāvya̭ | so̭-'māvā॒syā᳚-mpratyāga̭cchat | te pi॒taraḥ̭ pūrve॒dyu-rāga̭cchann | pi॒tṝn. ya॒jño̭-'gacchat | ta-nde॒vāḥ puna̭rayācanta | tame᳚bhyo॒ na puna̭radaduḥ | te᳚-'bruva॒n varaṃ̭-vṛ~ṇāmahai | atha̭ vaḥ॒ puna̭rdāsyāmaḥ | a॒smabhya̭me॒va pū᳚rve॒dyuḥ kri̭yātā॒ iti̭ || 56 ||

tame᳚bhyaḥ॒ puna̭radaduḥ | tasmā᳚t-pi॒tṛbhyaḥ̭ pūrve॒dyuḥ kri̭yate | ya-tpi॒tṛbhyaḥ̭ pūrve॒dyuḥ ka॒roti̭ | pi॒tṛbhya̭ e॒va ta-dya॒jña-nni॒ṣkrīya॒ yaja̭mānaḥ॒ prata̭nute || somā̭ya pi॒tṛpī̭tāya sva॒dhā nama॒ ityā̭ha | pi॒ture॒vādhi̭ somapī॒thamava̭ rundhe | na hi pi॒tā pra॒mīya̭māṇa॒ āhai॒ṣa so̭mapī॒tha iti̭ | i॒ndri॒yaṃ-vai~ so̭mapī॒thaḥ | i॒ndri॒yame॒va so̭mapī॒thamava̭-rundhe | tena᳚ndri॒yeṇa̭ dvi॒tīyā᳚-ñjā॒yāma॒bhya̭śñute || 57 ||

e॒ta-dvai brāhma̭ṇa-mpu॒rā vā̭jaśrava॒sā vi॒dāma̭krann | tasmā॒-tte dvedvḙ jā॒ye a॒bhyā᳚kṣata | ya e॒vaṃ-ve~da̭ | a॒bhi dvi॒tīyā᳚-ñjā॒yāma̭śñute || a॒gnayḙ kavya॒vāha̭nāya sva॒dhā nama॒ ityā̭ha | ya e॒va pi̭tṛ॒ṇāma॒gniḥ | ta-mprī̭ṇāti || ti॒sra āhṷtī-rjuhoti || trirnida̭dhāti || ṣaṭ-thsampa̭dyante || 58 ||

ṣaḍvā ṛ॒tavaḥ̭ | ṛ॒tūne॒va prī̭ṇāti || tū॒ṣṇī-mmekṣa̭ṇa॒-māda̭dhāti | asti̭ vā॒ hi ṣa॒ṣṭha ṛ॒turna vā᳚ || de॒vān. vai pi॒tṝ-nprī॒tān | ma॒nu॒ṣyāḥ᳚ pi॒taro-'nu॒ prapi̭pate | ti॒sra āhṷtī-rjuhoti | trirnida̭dhāti | ṣaṭ-thsampa̭dyante | ṣaḍvā ṛ॒tavaḥ̭ || 59 ||

ṛ॒tavaḥ॒ khalu॒ vai de॒vāḥ pi॒taraḥ̭ | ṛ॒tūne॒va de॒vā-npi॒tṝ-nprī̭ṇāti | tānprī॒tān | ma॒nu॒ṣyāḥ᳚ pi॒taro-'nu॒ prapi̭pate || sa॒kṛ॒dā॒cchi॒nna-mba॒r॒hi-rbha̭vati | sa॒kṛdi̭va॒ hi pi॒taraḥ̭ || trirnida̭dhāti | tṛ॒tīye॒ vā i॒to lo॒ke pi॒taraḥ̭ | tāne॒va prī̭ṇāti || parāṃ॒āva̭rtate || 60 ||

hlīkā॒ hi pi॒taraḥ̭ || òṣmaṇo᳚ vyā॒vṛta॒ upā᳚ste | ū॒ṣmabhā̭gā॒ hi pi॒taraḥ̭ || bra॒hma॒vā॒dino̭ vadanti | prāśyāṃ(3)na prāśyā(3)miti̭ | ya-tprā᳚śñī॒yāt | janya॒manna̭madyāt | pra॒māyṷka-ssyāt | yanna prā᳚śñī॒yāt | aha̭vi-ssyāt || 61 ||

pi॒tṛbhya॒ āvṛ̭ścyeta | a॒va॒ghreya̭me॒va | tanneva॒ prāśi̭ta॒-nnevāprā̭śitam || vī॒raṃ-vā~॒ vai pi॒taraḥ̭ pra॒yanto॒ hara̭nti | vī॒raṃ-vā~̭ dadati | da॒śā-ñchi̭natti | hara̭ṇabhāgā॒ hi pi॒taraḥ̭ | pi॒tṝne॒va ni॒rava̭dayate || utta̭ra॒ āyṷṣi॒ loma̭ chindīta | pi॒tṛ॒ṇāg hyḙtarhi॒ nedī̭yaḥ || 62 ||

nama̭skaroti | na॒ma॒skā॒ro hi pi̭tṛ॒ṇām || namo̭ vaḥ pitaro॒ rasā̭ya | namo̭ vaḥ pitara॒-śśuṣmā̭ya | namo̭ vaḥ pitaro jī॒vāya̭ | namo̭ vaḥ pitara-ssva॒dhāyai᳚ | namo̭ vaḥ pitaro ma॒nyave᳚ | namo̭ vaḥ pitaro gho॒rāya̭ | pita̭ro॒ namo̭ vaḥ | ya e॒tasmi̭n ~lo॒ke stha || 63 ||

yu॒ṣmāgste-'nṷ | ye᳚-'smi~llo॒ke | mā-nte nṷ | ya e॒tasmi̭~llo॒ke stha | yū॒ya-nteṣāṃ॒-va~si̭ṣṭhā bhūyāsta | ye᳚-'smi~llo॒ke | a॒ha-nteṣāṃ॒-va~si̭ṣṭho bhūyāsa॒mityā̭ha | vasi̭ṣṭha-ssamā॒nānā᳚-mbhavati | ya e॒vaṃ-vi~॒dvān-pi॒tṛbhyaḥ̭ ka॒roti̭ || e॒ṣa vai ma̭nu॒ṣyā̭ṇāṃ-ya~॒jñaḥ || 64 ||

de॒vānāṃ॒-vā~ ita̭re ya॒jñāḥ | tena॒ vā e॒ta-tpi̭tṛlo॒ke ca̭rati || ya-tpi॒tṛbhyaḥ̭ ka॒roti̭ | sa ī᳚śva॒raḥ pramḙtoḥ | prā॒jā॒pa॒tyaya॒rcā puna॒raiti̭ | ya॒jño vai pra॒jāpa̭tiḥ | ya॒jñenai॒va sa॒ha puna॒raiti̭ | na pra॒māyṷko bhavati || pi॒tṛ॒lo॒ke vā e॒ta-dyaja̭mānaścarati | ya-tpi॒tṛbhyaḥ̭ ka॒roti̭ | sa ī᳚śva॒ra ārti॒mārtoḥ᳚ | pra॒jāpa̭ti॒-stvāvaina॒-ntata॒ unnḙtumarha॒tītyā̭huḥ | ya-tprā̭jāpa॒tyaya॒rcā puna॒raiti̭ | pra॒jāpa̭tire॒vaina॒-ntata॒ unna̭yati | nārti॒mārccha̭ti॒ yaja̭mānaḥ || 65 ||

(itya̭ - śñute - padyante - padyante॒ ṣaḍvā ṛ॒tavo̭ - varta॒te-' - ha̭vi-ssyā॒n - nedī̭yaḥ॒ - stha - ya॒jño - yaja̭mānaścarati॒ ya-tpi॒tṛbhyaḥ̭ ka॒roti॒ pañca̭ ca) (a. 10)

(de॒vā॒su॒rā a॒gnīṣoma̭yo--r de॒vā vai yathā॒ darśaṃ̭ - de॒vā vai yada॒nyai-rgrahai᳚--r brahmavā॒dino॒ nāgni̭ṣṭo॒mo na - sā̭vi॒traṃ - de॒vasyā॒haṃ - tā॒rpyagṃ - sa॒ptānna̭ho॒mān - nṛ॒ṣadaṃ॒ - tvendro̭ vṛ॒tragṃ ha॒tvā daśa̭)

(de॒vā॒su॒rā - vā॒jyḙvainaṃ॒ - tasmā᳚-dvājapeyayā॒jī - de॒vasyā॒haṃ - ~vāja॒syāva̭ruddhyā- indri॒yame॒vāsmi॒n॒. - hlīkā॒ hi pi॒taraḥ॒ pañca̭ṣaṣṭiḥ)

(de॒vā॒su॒rā - yaja̭mānaḥ)

|| hariḥ̭ om ||

|| kṛṣṇa yajurvedīya taittirīya brāhmaṇe prathamāṣṭake tṛtīyaḥ prapāṭhaka-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय ब्राह्मणे प्रथमाष्टके तृतीयः प्रपाठकः - वाजपेयब्राह्मणं

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

अनुवाकं 1 - पुनराधेयशेषः आज्यभागयोर्विशेषः

दे॒वा॒सु॒रा-स्सं-यँ॑त्ता आसन्न् । ते दे॒वा वि॑ज॒य-मु॑प॒यन्तः॑ । अ॒ग्नीषोम॑यो-स्तेज॒स्विनी᳚स्त॒नू-स्स-न्न्य॑दधत । इ॒दमु॑ नो भविष्यति । यदि॑ नो जे॒ष्यन्तीति॑ । तेना॒ग्नीषोमा॒-वपा᳚क्रामताम् । ते दे॒वा वि॒जित्य॑ । अ॒ग्नीषोमा॒-वन्वै᳚च्छन्न् । ते᳚-ऽग्नि-मन्व॑विन्द-न्नृ॒तुषू-थ्स॑न्नम् । तस्य॒ विभ॑क्तीभि-स्तेज॒स्विनी᳚स्त॒नू-रवा॑रुन्धत ॥ 1 ॥

ते सोम॒-मन्व॑विन्दन्न् । तम॑घ्नन्न् । तस्य॑ यथा-ऽभि॒ज्ञाय॑-न्त॒नू-र्व्य॑गृह्णत । ते ग्रहा॑ अभवन्न् । त-द्ग्रहा॑णा-ङ्ग्रह॒त्वम् । यस्यै॒वं-विँ॒दुषो॒ ग्रहा॑ गृ॒ह्यन्ते᳚ । तस्य॒ त्वे॑व गृ॑ही॒ताः ॥ नाना᳚ग्नेय-म्पुनरा॒धेये॑ कुर्यात् । यदना᳚ग्नेय-म्पुनरा॒धेये॑ कु॒र्यात् । व्यृ॑द्धमे॒व तत् ॥ 2 ॥

अना᳚ग्नेयं॒-वाँ ए॒त-त्क्रि॑यते । य-थ्स॒मिध॒-स्तनू॒नपा॑तमि॒डो ब॒र्॒हि-र्य॑जति ॥ उ॒भावा᳚ग्ने॒या-वाज्य॑भागौ स्याताम् ॥ अना᳚ज्यभागौ-भवत॒ इत्या॑हुः । यदु॒भावा᳚ग्ने॒याव॒न्वञ्चा॒विति॑ । अ॒ग्नये॒ पव॑माना॒योत्त॑र-स्स्यात् । य-त्पव॑मानाय । तेनाज्य॑ भागः । तेन॑ सौ॒म्यः ॥ बुध॑न्वत्याग्ने॒य-स्याज्य॑-भागस्य पुरो-ऽनुवा॒क्या॑ भवति ॥ 3 ॥

यथा॑ सु॒प्त-म्बो॒धय॑ति । ता॒दृगे॒व तत् ॥ अ॒ग्निन्य॑क्ताः पत्नी संयाँ॒जाना॒मृचः॑ स्युः । तेना᳚ग्ने॒यग्ं सर्व॑-म्भवति ॥ ए॒क॒धा ते॑ज॒स्विनी᳚-न्दे॒वता॒-मुपै॒तीत्या॑हुः । सैन॑मीश्व॒रा प्र॒दह॒ इति॑ ॥ नेति॑ ब्रूयात् । प्र॒जन॑नं॒-वाँ अ॒ग्निः । प्र॒जन॑न-मे॒वोपै॒तीति॑ ॥ कृ॒तय॑जु॒-स्सम्भृ॑त सम्भार॒ इत्या॑हुः ॥ 4 ॥

न स॒भृन्त्या᳚-स्सम्भा॒राः । न यजुः॑ का॒र्य॑मिति॑ ॥ अथो॒ खलु॑ । स॒भृन्त्या॑ ए॒व स॑भां॒राः । का॒र्यं॑-यँजुः॑ । पु॒न॒रा॒धेय॑स्य॒ समृ॑द्ध्यै ॥ तेनो॑पा॒ग्ं॒शु प्रच॑रति । एष्य॑ इव॒ वा ए॒षः । य-त्पु॑न-रा॒धेयः॑ । यथो॑पा॒ग्ं॒शु न॒ष्टमि॒च्छति॑ ॥ 5 ॥

ता॒दृगे॒व तत् ॥ उ॒च्चै-स्स्वि॑ष्ट॒कृत॒मु-थ्सृ॑जति । यथा॑ न॒ष्टं-विँ॒त्वा प्राहा॒यमिति॑ । ता॒दृगे॒व तत् ॥ ए॒क॒धा ते॑ज॒स्विनी᳚-न्दे॒वता॒मुपै॒तीत्या॑हुः । सैन॑मीश्व॒रा प्र॒दह॒ इति॑ । तत्तथा॒ नोपै॑ति । प्र॒या॒जा॒नू॒या॒जेष्वे॒व विभ॑क्तीः कुर्यात् । य॒था॒पू॒र्व-माज्य॑भागौ॒ स्याता᳚म् । ए॒व-म्प॑त्नी संयाँ॒जाः ॥ 6 ॥

त-द्वै᳚श्वान॒रव॑त्-प्र॒जन॑नवत्तर॒-मुपै॒तीति॑ ॥ तदा॑हुः । व्यृ॑द्धं॒-वाँ ए॒तत् । अना᳚ग्नेयं॒-वाँ ए॒त-त्क्रि॑यत॒ इति॑ ॥ नेति॑ ब्रूयात् । अ॒ग्नि-म्प्र॑थ॒मं-विँभ॑क्तीनां-यँजति । अ॒ग्निमु॑त्त॒म-म्प॑त्नी संयाँ॒जाना᳚म् । तेना᳚ग्ने॒यम् । तेन॒ समृ॑द्ध-ङ्क्रियत॒ इति॑ ॥ 7 ॥

(अ॒रु॒न्ध॒ - तै॒व त-द्- भ॑वति॒ - सम्भृ॑तसम्भार॒ इत्या॑हु - रि॒च्छति॑ - पत्नीसंयाँ॒जा - +नव॑ च) ( आ1)

अनुवाकं 2 - वाजपेयस्य विधिः

दे॒वा वै यथा॒दर्शं॑-यँ॒ज्ञानाह॑रन्त । यो᳚-ऽग्निष्टो॒मम् । य उ॒क्थ्य᳚म् । यो॑-ऽतिरा॒त्रम् । ते स॒हैव सर्वे॑ वाज॒पेय॑-मपश्यन्न् । ते । अ॒न्यो᳚न्यस्मै॒ नाति॑ष्ठन्त । अ॒हम॒नेन॑ यजा॒ इति॑ । ते᳚-ऽब्रुवन्न् । आ॒जिम॒स्य धा॑वा॒मेति॑ ॥ 8 ॥

तस्मि॑-न्ना॒जिम॑धावन्न् । त-म्बृह॒स्पति॒-रुद॑जयत् । तेना॑यजत । स स्वारा᳚ज्य-मगच्छत् । तमिन्द्रो᳚-ऽब्रवीत् । माम॒नेन॑ याज॒येति॑ । तेनेन्द्र॑-मयाजयत् । सो-ऽग्र॑-न्दे॒वता॑ना॒-म्पर्यै᳚त् । अग॑च्छ॒-थ्स्वारा᳚ज्यम् । अति॑ष्ठन्तास्मै॒ ज्यैष्ठ्या॑य ॥ 9 ॥

य ए॒वं-विँ॒द्वान्. वा॑ज॒पेये॑न॒ यज॑ते । गच्छ॑ति॒ स्वारा᳚ज्यम् । अग्रग्ं॑ समा॒नाना॒-म्पर्ये॑ति । तिष्ठ॑न्ते-ऽस्मै॒ ज्यैष्ठ्या॑य ॥ स वा ए॒ष ब्रा᳚ह्म॒णस्य॑ चै॒व रा॑ज॒न्य॑स्य च य॒ज्ञः ॥ तं-वाँ ए॒तं-वाँ॑ज॒पेय॒ इत्या॑हुः । वा॒जाप्यो॒ वा ए॒षः । वाज॒ग्ग्॒ ह्ये॑तेन॑ दे॒वा ऐफ्सन्न्॑ ॥ सोमो॒ वै वा॑ज॒पेयः॑ । यो वै सोमं॑-वाँज॒पेयं॒-वेँद॑ ॥ 10 ॥

वा॒ज्ये॑वैन॑-म्पी॒त्वा भ॑वति । आ-ऽस्य॑ वा॒जी जा॑यते ॥ अन्नं॒-वैँ वा॑ज॒पेयः॑ । य ए॒वं-वेँद॑ । अत्त्यन्न᳚म् । आ-ऽस्या᳚न्ना॒दो जा॑यते ॥ ब्रह्म॒ वै वा॑ज॒पेयः॑ । य ए॒वं-वेँद॑ । अत्ति॒ ब्रह्म॒णा-ऽन्न᳚म् । आ-ऽस्य॑ ब्र॒ह्मा जा॑यते ॥ 11 ॥

वाग्वै वाज॑स्य प्रस॒वः । य ए॒वं-वेँद॑ । क॒रोति॑ वा॒चा वी॒र्य᳚म् । ऐनं॑-वाँ॒चा ग॑च्छति । अपि॑वतीं॒-वाँचं॑-वँदति ॥ प्र॒जाप॑ति-र्दे॒वेभ्यो॑ य॒ज्ञान् व्यादि॑शत् । स आ॒त्मन् वा॑ज॒पेय॑-मधत्त । त-न्दे॒वा अ॑ब्रुवन्न् । ए॒ष वाव य॒ज्ञः । य-द्वा॑ज॒पेयः॑ ॥ 12 ॥

अप्ये॒व नो-ऽत्रा॒स्त्विति॑ । तेभ्य॑ ए॒ता उज्जि॑तीः॒ प्राय॑च्छत् ॥ ता वा ए॒ता उज्जि॑तयो॒ व्याख्या॑यन्ते । य॒ज्ञस्य॑ सर्व॒त्वाय॑ । दे॒वता॑ना॒-मनि॑र्भागाय ॥ दे॒वा वै ब्रह्म॑ण॒श्चान्न॑स्य च॒ शम॑ल॒मपा᳚घ्नन्न् । य-द्ब्रह्म॑ण॒-श्शम॑ल॒मासी᳚त् । सा गाथा॑ नाराश॒ग्ग्॒स्य॑ भवत् । यदन्न॑स्य । सा सुरा᳚ ॥ 13 ॥

तस्मा॒-द्गाय॑तश्च म॒त्तस्य॑ च॒ न प्र॑ति॒गृह्य᳚म् । य-त्प्र॑तिगृह्णी॒यात् । शम॑ल॒-म्प्रति॑गृह्णीयात् ॥ सर्वा॒ वा ए॒तस्य॒ वाचो ऽव॑रुद्धाः । यो वा॑जपेयया॒जी । या पृ॑थि॒व्यां-याँ-ऽग्नौ या र॑थन्त॒रे । या-ऽन्तरि॑क्षे॒ या वा॒यौ या वा॑मदे॒व्ये । या दि॒वि या-ऽऽदि॒त्ये या बृ॑ह॒ति । या-ऽफ्सु यौष॑धीषु॒ या वन॒स्पति॑षु ॥ तस्मा᳚-द्वाजपेयया॒ज्यार्त्वि॑जीनः । सर्वा॒ ह्य॑स्य॒ वाचो ऽव॑रुद्धाः ॥ 14 ॥

(धा॒वा॒मेति॒ - ज्यैष्ठ्या॑य॒ - वेद॑ - ब्र॒ह्मा जा॑यते-वाज॒पेयः॒-सुरा-ऽऽर्त्वि॑जीन॒ एकं॑ च ) (अ. 2)

अनुवाकं 3 - तस्यग्रहविशेषाः

दे॒वा वै यद॒न्यै-र्ग्रहै᳚-र्य॒ज्ञस्य॒ नावारु॑न्धत । तद॑तिग्रा॒ह्यै॑-रति॒गृह्या-वा॑रुन्धत । तद॑तिग्रा॒ह्या॑णा-मतिग्राह्य॒त्वम् ॥ यद॑तिग्रा॒ह्या॑ गृ॒ह्यन्ते᳚ । यदे॒वान्यै-र्ग्रहै᳚-र्य॒ज्ञस्य॒ नाव॑रु॒न्धे । तदे॒व तैर॑ति॒गृह्या-व॑रुन्धे ॥ पञ्च॑ गृह्यन्ते । पाङ्क्तो॑ य॒ज्ञः । यावा॑ने॒व य॒ज्ञः । तमा॒प्त्वा ऽव॑रुन्धे ॥ 15 ॥

सर्व॑ ऐ॒न्द्रा भ॑वन्ति । ए॒क॒धैव यज॑मान इन्द्रि॒य-न्द॑धति ॥ स॒प्तद॑श प्राजाप॒त्या ग्रहा॑ गृह्यन्ते । स॒प्त॒द॒शः प्र॒जाप॑तिः । प्र॒जाप॑ते॒-राप्त्यै᳚ ॥ एक॑य॒र्चा गृ॑ह्णाति । ए॒क॒धैव यज॑माने वी॒र्य॑-न्दधाति ॥ सो॒म॒ग्र॒हाग्श्च॑ सुराग्र॒हाग्श्च॑ गृह्णाति । ए॒त-द्वै दे॒वाना᳚-म्पर॒ममन्न᳚म् । य-थ्सोमः॑ ॥ 16 ॥

ए॒त-न्म॑नु॒ष्या॑णाम् । य-थ्सुरा᳚ । प॒र॒मेणै॒वास्मा॑ अ॒न्नाद्ये॒नाव॑र-म॒न्नाद्य॒-मव॑रुन्धे ॥ सो॒म॒ग्र॒हा-न्गृ॑ह्णाति । ब्रह्म॑णो॒ वा ए॒त-त्तेजः॑ । य-थ्सोमः॑ । ब्रह्म॑ण ए॒व तेज॑सा॒ तेजो॒ यज॑माने दधाति । सु॒रा॒ग्र॒हा-न्गृ॑ह्णाति । अन्न॑स्य॒ वा ए॒तच्छम॑लम् । य-थ्सुरा᳚ ॥ 17 ॥

अन्न॑स्यै॒व शम॑लेन॒ शम॑लं॒-यँज॑माना॒-दप॑हन्ति ॥ सो॒म॒ग्र॒हाग्श्च॑ सुराग्र॒हाग्श्च॑ गृह्णाति । पुमा॒न्॒. वै सोमः॑ । स्त्री सुरा᳚ । त-न्मि॑थु॒नम् । मि॒थु॒नमे॒वास्य॒ त-द्य॒ज्ञे क॑रोति प्र॒जन॑नाय । आ॒त्मान॑मे॒व सो॑मग्र॒है-स्स्पृ॑णोति । जा॒याग्ं सु॑रा ग्र॒हैः । तस्मा᳚-द्वाजपेयया॒ज्य॑मुष्मि॑ँल्लो॒के स्त्रिय॒ग्ं॒ सम्भ॑वति । वा॒ज॒पेया॑-भिजित॒ग्ग्॒ ह्य॑स्य ॥ 18 ॥

पूर्वे॑ सोमग्र॒हा गृ॑ह्यन्ते । अप॑रे सुराग्र॒हाः । पु॒रो॒क्षग्ं सो॑मग्र॒हान्थ्- सा॑दयति । प॒श्चा॒द॒क्षग्ं सु॑राग्र॒हान् । पा॒प॒व॒स्य॒सस्य॒ विधृ॑त्यै ॥ ए॒ष वै यज॑मानः । य-थ्सोमः॑ । अन्न॒ग्ं॒ सुरा᳚ । सो॒म॒ग्र॒हाग्श्च॑ सुराग्र॒हाग्श्च॒ व्यति॑षजति । अ॒न्नाद्ये॑नै॒वैनं॒-व्यँति॑षजति ॥ 19 ॥

स॒पृञ्चः॑ स्थ॒ स-म्मा॑ भ॒द्रेण॑ पृ॒ङ्क्तेत्या॑ह । अन्नं॒-वैँ भ॒द्रम् । अ॒न्नाद्ये॑नै॒वैन॒ग्ं॒ सग्ंसृ॑जति ॥ अन्न॑स्य॒ वा ए॒तच्छम॑लम् । य-थ्सुरा᳚ । पा॒प्मॆव॒ खलु॒ वै शम॑लम् । पा॒प्मना॒ वा ए॑नमे॒तच्छम॑लेन॒ व्यति॑षजति । य-थ्सो॑मग्र॒हाग्श्च॑ सुराग्र॒हाग्श्च॑ व्यति॒षज॑ति ॥ वि॒पृचः॑ स्थ॒ वि मा॑ पा॒प्मना॑ पृ॒ङ्क्तेत्या॑ह । पा॒प्मनै॒वैन॒ग्ं॒ शम॑लेन॒ व्याव॑र्तयति ॥ 20 ॥

तस्मा᳚-द्वाजपेयया॒जी पू॒तो मेद्ध्यो॑ दक्षि॒ण्यः॑ ॥ प्रांउ-द्द्र॑वति सोमग्र॒हैः । अ॒मुमे॒व तै-र्लो॒क-म॒भिज॑यति । प्र॒त्यङ्ख्सु॑रा ग्र॒हैः । इ॒ममे॒व तै-र्लो॒क-म॒भिज॑यति ॥ प्रति॑ष्ठन्ति सोमग्र॒हैः । याव॑दे॒व स॒त्यम् । तेन॑ सूयते ॥ वा॒ज॒सृद्भ्यः॑ सुराग्र॒हान्. ह॑रन्ति । अनृ॑तेनै॒व विश॒ग्ं॒ सग्ंसृ॑जति ॥ हि॒र॒ण्य॒पा॒त्र-म्मधोः᳚ पू॒र्ण-न्द॑दाति । म॒ध॒व्यो॑-ऽसा॒नीति॑ ॥ ए॒क॒धा ब्र॒ह्मण॒ उप॑ हरति । ए॒क॒धैव यज॑मान॒ आयु॒स्तेजो॑ दधाति ॥ 21 ॥

(आ॒प्त्वा-ऽव॑रुन्धे॒ - सोमः॒ - शम॑लं॒-यँ-थ्सुरा॒ - ह्य॑-स्यैनं॒-व्यँति॑षजति॒ - व्याव॑र्तयति - सृजति च॒त्वारि॑ च ) (अ. 3)

अनुवाकं 4 - पशव-स्सप्तदश

ब्र॒ह्म॒वा॒दिनो॑ वदन्ति । नाग्नि॑ष्टो॒मो नोक्थ्यः॑ । न षो॑ड॒शी नाति॑रा॒त्रः । अथ॒ कस्मा᳚-द्वाज॒पेये॒ सर्वे॑ यज्ञक्र॒तवो-ऽव॑रुद्ध्यन्त॒ इति॑ । प॒शुभि॒रिति॑ ब्रूयात् ॥ आ॒ग्ने॒य-म्प॒शुमाल॑भते । अ॒ग्नि॒ष्टो॒ममे॒व तेनाव॑रुन्धे । ऐ॒न्द्रा॒ग्नेनो॒क्थ्य᳚म् । ऐ॒न्द्रेण॑ षोड॒शिनः॑ स्तो॒त्रम् । सा॒र॒स्व॒त्या-ऽति॑रा॒त्रम् ॥ 22 ॥

मा॒रु॒त्या बृ॑ह॒त-स्स्तो॒त्रम् । ए॒ताव॑न्तो॒ वै य॑ज्ञक्र॒तवः॑ । ता-न्प॒शुभि॑रे॒वा-व॑रुन्धे ॥ आ॒त्मान॑मे॒व स्पृ॑णो-त्यग्निष्टो॒मेन॑ । प्रा॒णा॒पा॒ना-वु॒क्थ्ये॑न । वी॒र्यग्ं॑ षोड॒शिनः॑ स्तो॒त्रेण॑ । वाच॑-मतिरा॒त्रेण॑ । प्र॒जा-म्बृ॑ह॒त-स्स्तो॒त्रेण॑ । इ॒ममे॒व लो॒कम॒भि ज॑यत्यग्निष्टो॒मेन॑ । अ॒न्तरि॑क्ष-मु॒क्थ्ये॑न ॥ 23 ॥

सु॒व॒र्गं-लोँ॒कग्ं षो॑ड॒शिनः॑ स्तो॒त्रेण॑ । दे॒व॒याना॑ने॒व प॒थ आरो॑ह-त्यतिरा॒त्रेण॑ । नाकग्ं॑ रोहति बृह॒त-स्स्तो॒त्रेण॑ । तेज॑ ए॒वात्म-न्ध॑त्त आग्ने॒येन॑ प॒शुना᳚ । ओजो॒ बल॑मैन्द्रा॒ग्नेन॑ । इ॒न्द्रि॒य-मै॒न्द्रेण॑ । वाचग्ं॑ सारस्व॒त्या । उ॒भावे॒व दे॑वलो॒क-ञ्च॑ मनुष्यलो॒क-ञ्चा॒भिज॑यति मारु॒त्या व॒शया᳚ ॥ स॒प्तद॑श प्राजाप॒त्या-न्प॒शूनाल॑भते । स॒प्त॒द॒शः प्र॒जाप॑तिः ॥ 24 ॥

प्र॒जाप॑ते॒राप्त्यै᳚ ॥ श्या॒मा एक॑रूपा भवन्ति । ए॒वमि॑व॒ हि प्र॒जाप॑ति॒-स्समृ॑द्ध्यै ॥ ता-न्पर्य॑ग्निकृता॒-नुथ्सृ॑जति ॥ म॒रुतो॑ य॒ज्ञम॑जिघाग्ंस-न्प्र॒जाप॑तेः । तेभ्य॑ ए॒ता-म्मा॑रु॒तीं-वँ॒शामाल॑भत । तयै॒वैना॑-नशमयत् ॥ मा॒रु॒त्या प्र॒चर्य॑ । ए॒तान्-थ्सञ्ज्ञ॑पयेत् । म॒रुत॑ ए॒व श॑मयि॒त्वा ॥ 25 ॥

ए॒तैः प्रच॑रति । य॒ज्ञस्याघा॑ताय ॥ ए॒क॒धा व॒पा जु॑होति । ए॒क॒दे॒व॒त्या॑ हि । ए॒ते । अथो॑ एक॒धैव यज॑माने वी॒र्य॑-न्दधाति ॥ नै॒वा॒रेण॑ स॒प्तद॑शशरावे-णै॒तर्हि॒ प्रच॑रति । ए॒त-त्पु॑रोडाशा॒ ह्ये॑ते । अथो॑ पशू॒नामे॒व छि॒द्रमपि॑दधाति ॥ सा॒र॒स्व॒त्योत्त॒मया॒ प्रच॑रति । वाग् वै सर॑स्वती । तस्मा᳚-त्प्रा॒णानां॒-वाँगु॑त्त॒मा । अथो᳚ प्र॒जाप॑तावे॒व य॒ज्ञ-म्प्रति॑ष्ठापयति । प्र॒जाप॑ति॒र्॒ हि वाक् ॥ अप॑न्नदती भवति । तस्मा᳚-न्मनु॒ष्या᳚-स्सर्वां॒-वाँचं॑-वँदन्ति ॥ 26 ॥

(अ॒ति॒रा॒त्र - म॒न्तरि॑क्षमु॒क्थ्ये॑न - प्र॒जाप॑तिः - शमयि॒त्वोत् - त॒मया॒ प्रच॑रति॒ षट् च॑) (अ. 4)

अनुवाकं 5 - रथयाजनम्

सा॒वि॒त्र-ञ्जु॑होति॒ कर्म॑णः कर्मणः पु॒रस्ता᳚त् ॥ कस्त-द्वे॒देत्या॑हुः । य-द्वा॑ज॒पेय॑स्य॒ पूर्वं॒-यँदप॑र॒मिति॑ । स॒वि॒तृप्र॑सूत ए॒व य॑थापू॒र्व-ङ्कर्मा॑णि करोति ॥ सव॑ने सवने जुहोति । आ॒क्रम॑णमे॒व त-थ्सेतुं॒-यँज॑मानः कुरुते । सु॒व॒र्गस्य॑ लो॒कस्य॒ सम॑ष्ट्यै ॥ वा॒चस्पति॒-र्वाच॑म॒द्य स्व॑दाति न॒ इत्या॑ह । वाग्वै दे॒वाना᳚-म्पु॒रा-ऽन्न॑मासीत् । वाच॑मे॒वास्मा॒ अन्नग्ग्॑ स्वदयति ॥ 27 ॥

इन्द्र॑स्य॒ वज्रो॑-ऽसि॒ वार्त्र॑घ्न॒ इति॒ रथ॑मु॒पाव॑हरति॒ विजि॑त्यै ॥ वाज॑स्य॒ नु प्र॑स॒वे मा॒तर॑-म्म॒हीमित्या॑ह । यच्चै॒वेयम् । यच्चा॒स्यामधि॑ । तदे॒वा-व॑रुन्धे । अथो॒ तस्मि॑न्ने॒वोभये॒-ऽभिषि॑च्यते ॥ अ॒फ्स्व॑न्तर॒-मृत॑म॒फ्सु भे॑ष॒जमित्यश्वा᳚-न्पल्पूलयति । अ॒फ्सु वा अश्व॑स्य॒ तृती॑य॒-म्प्रवि॑ष्टम् । तद॑नु॒वेन॒न्वव॑प्लवते । यद॒फ्सु प॑ल्पू॒लय॑ति ॥ 28 ॥

यदे॒वास्या॒फ्सु प्रवि॑ष्टम् । तदे॒वाव॑रुन्धे ॥ ब॒हु वा अश्वो॑-ऽमे॒द्ध्य-मुप॑गच्छति । यद॒फ्सु प॑ल्पू॒लय॑ति । मेद्ध्या॑ने॒वैना᳚न् करोति ॥ वा॒युर्वा᳚ त्वा॒ मनु॑र्वा॒ त्वेत्या॑ह । ए॒ता वा ए॒त-न्दे॒वता॒ अग्रे॒ अश्व॑मयुञ्जन्न् । ताभि॑रे॒वैनान्॑. युनक्ति । स॒वस्योज्जि॑त्यै ॥ यजु॑षा युनक्ति॒ व्यावृ॑त्त्यै ॥ 29 ॥

अपा᳚-न्न पादाशुहेम॒न्निति॒ सम्मा᳚र्ष्टि । मेद्ध्या॑ने॒वैना᳚न् करोति । अथो॒ स्तौत्ये॒वैना॑ना॒जिग्ं स॑रिष्य॒तः ॥ वि॒ष्णु॒ क्र॒मान् क्र॑मते । विष्णु॑रे॒व भू॒त्वेमाँल्लो॒का-न॒भिज॑यति ॥ वै॒श्व॒दे॒वो वै रथः॑ । अ॒ङ्कौ न्य॒ङ्काव॒भितो॒ रथं॒-याँवित्या॑ह । या ए॒व दे॒वता॒ रथे॒ प्रवि॑ष्टाः । ताभ्य॑ ए॒व नम॑स्करोति । आ॒त्मनो-ऽना᳚र्त्यै ॥ अश॑मरथ-म्भावुको-ऽस्य॒ रथो॑ भवति । य ए॒वं-वेँद॑ ॥ 30 ॥

(स्व॒द॒य॒ति॒ - प॒ल्पू॒लय॑ति॒ - व्यावृ॑त्त्या॒ - अना᳚र्त्यै॒ द्वे च॑) (अ. 5)

अनुवाकं 6 - रथधावनम्

दे॒वस्या॒हग्ं स॑वि॒तुः प्र॑स॒वे बृह॒स्पति॑ना वाज॒जिता॒ वाज॑-ञ्जेष॒मित्या॑ह । स॒वि॒तृप्र॑सूत ए॒व ब्रह्म॑णा॒ वाज॒मुज्ज॑यति ॥ दे॒वस्या॒हग्ं स॑वि॒तुः प्र॑स॒वे बृह॒स्पति॑ना वाज॒जिता॒ वर्षि॑ष्ठ॒-न्नाकग्ं॑ रुहेय॒मित्या॑ह । स॒वि॒तृप्र॑सूत ए॒व ब्रह्म॑णा॒ वर्षि॑ष्ठ॒-न्नाकग्ं॑ रोहति ॥ चात्वा॑ले रथच॒क्र-न्निमि॑तग्ं रोहति । अतो॒ वा अङ्गि॑रस उत्त॒मा-स्सु॑व॒र्गं-लोँ॒कमा॑यन्न् । सा॒क्षादे॒व यज॑मान-स्सुव॒र्गं-लोँ॒कमे॑ति ॥ आवे᳚ष्टयति । वज्रो॒ वै रथः॑ । वज्रे॑णै॒व दिशो॒-ऽभिज॑यति ॥ 31 ॥

वा॒जिना॒ग्ं॒ साम॑ गायते । अन्नं॒-वैँ वाजः॑ । अन्न॑मे॒-वाव॑रुन्धे ॥ वा॒चो वर्ष्म॑ दे॒वेभ्यो-ऽपा᳚क्रामत् । त-द्वन॒स्पती॒-न्प्रावि॑शत् । सैषा वाग्-वन॒स्पति॑षु वदति । या दु॑न्दु॒भौ । तस्मा᳚-द्दुन्दु॒भि-स्सर्वा॒ वाचोति॑ वदति ॥ दु॒न्दु॒भीन्-थ्स॒माघ्न॑न्ति । प॒र॒मा वा ए॒षा वाक् ॥ 32 ॥

या दु॑न्दु॒भौ । प॒र॒मयै॒व वा॒चा-ऽव॑रां॒-वाँच॒म-व॑रुन्धे । अथो॑ वा॒च ए॒व वर्ष्म॒ यज॑मा॒नो ऽव॑रुन्धे ॥ इन्द्रा॑य॒ वाचं॑-वँद॒तेन्द्रं॒-वाँज॑-ञ्जापय॒तेन्द्रो॒ वाज॑मजयि॒-दित्या॑ह । ए॒ष वा ए॒तर्हीन्द्रः॑ । यो यज॑ते । यज॑मान ए॒व वाज॒मुज्ज॑यति ॥ स॒प्तद॑श प्रव्या॒धाना॒जि-न्धा॑वन्ति । स॒प्त॒द॒शग्ग् स्तो॒त्र-म्भ॑वति । स॒प्तद॑श सप्तदश दीयन्ते ॥ 33 ॥

स॒प्त॒द॒शः प्र॒जाप॑तिः । प्र॒जाप॑ते॒-राप्त्यै᳚ ॥ अर्वा॑-ऽसि॒ सप्ति॑रसि वा॒ज्य॑सीत्या॑ह । अ॒ग्निर्वा अर्वा᳚ । वा॒यु-स्सप्तिः॑ । आ॒दि॒त्यो वा॒जी । ए॒ताभि॑रे॒वास्मै॑ दे॒वता॑भि-र्देवर॒थं-युँ॑नक्ति ॥ प्र॒ष्टि॒वा॒हिनं॑-युँनक्ति । प्र॒ष्टि॒वा॒ही वै दे॑वर॒थः । दे॒व॒र॒थमे॒वास्मै॑ युनक्ति ॥ 34 ॥

वाजि॑नो॒ वाज॑-न्धावत॒ काष्ठा᳚-ङ्गच्छ॒तेत्या॑ह । सु॒व॒र्गो वै लो॒कः काष्ठा᳚ । सु॒व॒र्गमे॒व लो॒कं-यँ॑न्ति ॥ सु॒व॒र्गं-वाँ ए॒ते लो॒कं-यँ॑न्ति । य आ॒जि-न्धाव॑न्ति ॥ प्राञ्चो॑ धावन्ति । प्रांइ॑व॒ हि सु॑व॒र्गो लो॒कः ॥ च॒त॒सृभि॒रनु॑ मन्त्रयते । च॒त्वारि॒ छन्दाग्ं॑सि । छन्दो॑भिरे॒वैना᳚न्-थ्सुव॒र्गं-लोँ॒क-ङ्ग॑मयति ॥ 35 ॥

प्र वा ए॒ते᳚-ऽस्माल्-लो॒काच्च्य॑वन्ते । य आ॒जि-न्धाव॑न्ति । उद॑ञ्च॒ आव॑र्तन्ते । अ॒स्मादे॒व तेन॑ लो॒कान्नय॑न्ति ॥ र॒थ॒वि॒मो॒च॒नीय॑-ञ्जुहोति॒ प्रति॑ष्ठित्यै ॥ आ मा॒ वाज॑स्य प्रस॒वो ज॑गम्या॒दित्या॑ह । अन्नं॒-वैँ वाजः॑ । अन्न॑मे॒वाव॑रुन्धे ॥ य॒था॒लो॒कं-वाँ ए॒त उज्ज॑यन्ति । य आ॒जि-न्धाव॑न्ति ॥ 36 ॥

कृ॒ष्णल॑-ङ्कृष्णलं-वाँज॒सृद्भ्यः॒ प्रय॑च्छति । यमे॒व ते वाजं॑-लोँ॒कमु॒ज्जय॑न्ति । त-म्प॑रि॒क्रीया-व॑रुन्धे ॥ ए॒क॒धा ब्र॒ह्मण॒ उप॑हरति । ए॒क॒धैव यज॑माने वी॒र्य॑-न्दधाति ॥ दे॒वा वा ओष॑धीष्वा॒जिम॑युः । ता बृह॒स्पति॒-रुद॑जयत् । स नी॒वारा॒न्निर॑वृणीत । तन्नी॒वारा॑णा-न्नीवार॒त्वम् ॥ नै॒वा॒रश्च॒रु-र्भ॑वति ॥ 37 ॥

ए॒तद्वै दे॒वाना᳚-म्पर॒ममन्न᳚म् । यन्नी॒वाराः᳚ । प॒र॒मेणै॒वास्मा॑ अ॒न्नाद्ये॒-नाव॑र-म॒न्नाद्य॒मव॑रुन्धे ॥ स॒प्तद॑शशरावो भवति । स॒प्त॒द॒शः प्र॒जाप॑तिः । प्र॒जाप॑ते॒-राप्त्यै᳚ ॥ क्षी॒रे भ॑वति । रुच॑मे॒वास्मि॑न्-दधाति ॥ स॒र्पिष्वा᳚-न्भवति मेद्ध्य॒त्वाय॑ ॥ बा॒र्॒ह॒स्प॒त्यो वा ए॒ष दे॒वत॑या ॥ 38 ॥

यो वा॑ज॒पेये॑न॒ यज॑ते । बा॒र्॒ह॒स्प॒त्य ए॒ष च॒रुः ॥ अश्वा᳚न्-थ्सरिष्य॒त-स्स॒स्रुष॒श्चाव॑-घ्रापयति । यमे॒व ते वाजं॑-लोँ॒कमु॒ज्जय॑न्ति । तमे॒वाव॑रुन्धे ॥ अजी॑जिपत वनस्पतय॒ इन्द्रं॒-वाँजं॒-विँमु॑च्यद्ध्व॒मिति॑ दुन्दु॒भीन्. विमु॑ञ्चति । यमे॒व ते वाजं॑-लोँ॒कमि॑न्द्रि॒य-न्दु॑न्दु॒भय॑ उ॒ज्जय॑न्ति । तमे॒वा-व॑रुन्धे ॥ 39 ॥

(अ॒भिज॑यति॒ - वा ए॒षा वाग् - दी॑यन्ते - ऽस्मै युनक्ति - गमयति॒ - य आ॒जि-न्धाव॑न्ति - भवति - दे॒वत॑या॒ - +-ऽष्टौ च॑) (अ. 6)

अनुवाकं 7 - यूपारोहणम्

ता॒र्प्यं-यँज॑मान॒-म्परि॑धापयति । य॒ज्ञो वै ता॒र्प्यम् । य॒ज्ञेनै॒वैन॒ग्ं॒ सम॑र्धयति । द॒र्भ॒मय॒-म्परि॑धापयति । प॒वित्रं॒-वैँ द॒र्भाः । पु॒नात्ये॒वैन᳚म् । वाजं॒-वाँ ए॒षो-ऽव॑रुरुथ्सते । यो वा॑ज॒पेये॑न॒ यज॑ते । ओष॑धयः॒ खलु॒ वै वाजः॑ । य-द्द॑र्भ॒मय॑-म्परिधा॒पय॑ति ॥ 40 ॥

वाज॒स्याव॑-रुद्ध्यै ॥ जाय॒ एहि॒ सुवो॒ रोहा॒वेत्या॑ह । पत्नि॑या ए॒वैष य॒ज्ञस्या᳚न्-वार॒म्भो-ऽन॑वच्छित्यै ॥ स॒प्तद॑शा-रत्नि॒र्यूपो॑ भवति । स॒प्त॒द॒शः प्र॒जाप॑तिः । प्र॒जाप॑ते॒राप्त्यै᳚ ॥ तू॒प॒र-श्चतु॑रश्रि-र्भवति ॥ गौ॒धू॒म-ञ्च॒षाल᳚म् । न वा ए॒ते व्री॒हयो॒ न यवाः᳚ । य-द्गो॒धूमाः᳚ ॥ 41 ॥

ए॒वमि॑व॒ हि प्र॒जाप॑ति॒-स्समृ॑द्ध्यै । अथो॑ अ॒मुमे॒वास्मै॑ लो॒कमन्न॑वन्त-ङ्करोति ॥ वासो॑भि-र्वेष्टयति । ए॒ष वै यज॑मानः । यद्यूपः॑ । स॒र्व॒दे॒व॒त्यं॑-वाँसः॑ । सर्वा॑भिरे॒वैन॑-न्दे॒वता॑भि॒-स्सम॑र्धयति । अथो॑ आ॒क्रम॑णमे॒व तथ्सेतुं॒-यँज॑मानः कुरुते । सु॒व॒र्गस्य॑ लो॒कस्य॒ सम॑ष्ट्यै ॥ द्वाद॑श वाजप्रस॒वीया॑नि जुहोति ॥ 42 ॥

द्वाद॑श॒ मासा᳚-स्संवँथ्स॒रः । सं॒वँ॒थ्स॒रमे॒व प्री॑णाति । अथो॑ संवँथ्स॒रमे॒वास्मा॒ उप॑ दधाति । सु॒व॒र्गस्य॑ लो॒कस्य॒ सम॑ष्ट्यै ॥ द॒शभिः॒ कल्पै॑ रोहति । नव॒ वै पुरु॑षे प्रा॒णाः । नाभि॑र्दश॒मी । प्रा॒णाने॒व य॑थास्था॒न-ङ्क॑ल्पयि॒त्वा । सु॒व॒र्गं-लोँ॒कमे॑ति । ए॒ताव॒द्वै पुरु॑षस्य॒ स्वम् ॥ 43 ॥

याव॑त्-प्रा॒णाः । याव॑दे॒वास्यास्ति॑ । तेन॑ स॒ह सु॑व॒र्गं-लोँ॒कमे॑ति ॥ सुव॑र्दे॒वाग्ं अ॑ग॒न्मेत्या॑ह । सु॒व॒र्गमे॒व लो॒कमे॑ति । अ॒मृता॑ अभू॒मेत्या॑ह । अ॒मृत॑मिव॒ हि सु॑व॒र्गो लो॒कः । प्र॒जाप॑तेः प्र॒जा अ॑भू॒मेत्या॑ह । प्रा॒जा॒प॒त्यो वा अ॒यं-लोँ॒कः । अ॒स्मादे॒व तेन॑ लो॒कान्नैति॑ ॥ 44 ॥

सम॒ह-म्प्र॒जया॒ स-म्मया᳚ प्र॒जेत्या॑ह । आ॒शिष॑मे॒वैता-माशा᳚स्ते ॥ आ॒स॒पु॒टै-र्घ्न॑न्ति । अन्नं॒-वाँ इ॒यम् । अ॒न्नाद्ये॑नै॒वैन॒ग्ं॒ सम॑र्धयन्ति । ऊषै᳚-र्घ्नन्ति । ए॒ते हि सा॒क्षादन्न᳚म् । यदूषाः᳚ । सा॒क्षादे॒वैन॑-म॒न्नाद्ये॑न॒ सम॑र्धयन्ति ॥ पु॒रस्ता᳚त्-प्र॒त्यञ्च᳚-ङ्घ्नन्ति ॥ 45 ॥

पु॒रस्ता॒द्धि प्र॑ती॒चीन॒-मन्न॑म॒द्यते᳚ ॥ शी॒र्॒ष॒तो घ्न॑न्ति । शी॒र्॒ष॒तो ह्यन्न॑म॒द्यते᳚ ॥ दि॒ग्भ्यो घ्न॑न्ति । दि॒ग्भ्य ए॒वास्मा॑ अ॒न्नाद्य॒-मव॑रुन्धते ॥ ई॒श्व॒रो वा ए॒ष परां᳚-प्र॒दघः॑ । यो यूप॒ग्ं॒ रोह॑ति ॥ हिर॑ण्यम॒द्ध्य-व॑रोहति । अ॒मृतं॒-वैँ हिर॑ण्यम् । अ॒मृतग्ं॑ सुव॒र्गो लो॒कः ॥ 46 ॥

अ॒मृत॑ ए॒व सु॑व॒र्गे लो॒के प्रति॑ तिष्ठति ॥ श॒तमा॑न-म्भवति । श॒तायुः॒ पुरु॑ष-श्श॒तेन्द्रि॑यः । आयु॑ष्ये॒वेन्द्रि॒ये प्रति॑ तिष्ठति ॥ पुष्ट्यै॒ वा ए॒त-द्रू॒पम् । यद॒जा । त्रि-स्सं॑वँथ्स॒रस्या॒न्यान्-प॒शू-न्परि॒ प्रजा॑यते ॥ ब॒स्ता॒जि॒न-म॒द्ध्यव॑ रोहति । पुष्ट्या॑मे॒व प्र॒जन॑ने॒ प्रति॑तिष्ठति ॥ 47 ॥

(प॒रि॒धा॒पय॑ति - गो॒धूमा॑ - जुहोति॒ - स्वं - नैति॑ - प्र॒त्यञ्ज॑-ङ्घ्नन्ति - लो॒को - +नव॑ च (अ. 7)

अनुवाकं 8 - अन्नहोमाः, अभिषेकश्च

स॒प्तान्न॑-हो॒माञ्जु॑होति । स॒प्त वा अन्ना॑नि । याव॑न्त्ये॒वान्ना॑नि । तान्ये॒वाव॑रुन्धे । स॒प्त ग्रा॒म्या ओष॑धयः । स॒प्तार॒ण्याः । उ॒भयी॑षा॒-मव॑रुद्ध्यै ॥ अन्न॑स्या-न्नस्य जुहोति । अन्न॑स्यान्न॒स्या-व॑रुद्ध्यै ॥ य-द्वा॑जपेयया॒ज्य-न॑वरुद्धस्याश्ञी॒यात् ॥ 48 ॥

अव॑रुद्धेन॒ व्यृ॑द्ध्येत । सर्व॑स्य समव॒दाय॑ जुहोति । अन॑वरुद्ध॒-स्याव॑रुद्ध्यै ॥ औदु॑म्बरेण स्रु॒वेण॑ जुहोति । ऊर्ग्वा अन्न॑-मुदु॒म्बरः॑ । ऊ॒र्ज ए॒वान्नाद्य॒स्याव॑रुद्ध्यै ॥ दे॒वस्य॑ त्वा सवि॒तुः प्र॑स॒व इत्या॑ह । स॒वि॒तृ प्र॑सूत ए॒वैन॒-म्ब्रह्म॑णा दे॒वता॑भि-र॒भिषि॑ञ्चति ॥ अन्न॑स्यान्नस्या॒भिषि॑ञ्चति । अन्न॑स्यान्न॒स्याव॑रुद्ध्यै ॥ 49 ॥

पु॒रस्ता᳚त्-प्र॒त्यञ्च॑-म॒भिषि॑ञ्चति । पु॒रस्ता॒द्धि-प्र॑ती॒चीन॒-मन्न॑म॒द्यते᳚ । शी॒र्॒ष॒तो॑-ऽभिषि॑ञ्चति । शी॒र्॒ष॒तो ह्यन्न॑म॒द्यते᳚ ॥ आमुखा॑द॒न्वव॑ स्रावयति । मु॒ख॒त ए॒वास्मा॑ अ॒न्नाद्य॑-न्दधाति ॥ अ॒ग्नेस्त्वा॒ साम्रा᳚ज्येना॒भिषि॑ञ्चा॒मीत्या॑ह । ए॒ष वा अ॒ग्ने-स्स॒वः । तेनै॒वैन॑-म॒भिषि॑ञ्चति । इन्द्र॑स्य त्वा॒ साम्रा᳚ज्येना॒भिषि॑ञ्चा॒मीत्या॑ह ॥ 50 ॥

इ॒न्द्रि॒य-मे॒वास्मि॑-न्ने॒तेन॑ दधाति । बृह॒स्पते᳚स्त्वा॒ साम्रा᳚ज्येना॒भिषि॑ञ्चा॒-मीत्या॑ह । ब्रह्म॒ वै दे॒वाना॒-म्बृह॒स्पतिः॑ । ब्रह्म॑णै॒वैन॑-म॒भिषि॑ञ्चति ॥ सो॒म॒ग्र॒हाग्श्चा॑-वदानी॒यानि॑ च॒र्त्विग्भ्य॒ उप॑ हरन्ति । अ॒मुमे॒व तै-र्लो॒क-मन्न॑वन्त-ङ्करोति । सु॒रा॒ग्र॒हाग्श्चा॑-नवदानी॒यानि॑ च वाज॒सृद्भ्यः॑ । इ॒ममे॒व तै-र्लो॒क-मन्न॑वन्त-ङ्करोति । अथो॑ उ॒भयी᳚ष्वे॒वाभिषि॑च्यते ॥ वि॒मा॒थ-ङ्कु॑र्वते वाज॒सृतः॑ ॥ 51 ॥

इ॒न्द्रि॒यस्याव॑रुद्ध्यै ॥ अनि॑रुक्ताभिः प्रातस्सव॒ने स्तु॑वते । अनि॑रुक्तः प्र॒जाप॑तिः । प्र॒जाप॑ते॒राप्त्यै᳚ । वाज॑वतीभि॒-र्माद्ध्य॑न्दिने । अन्नं॒-वैँ वाजः॑ । अन्न॑मे॒वा-व॑रुन्धे । शि॒पि॒वि॒ष्टव॑तीभि-स्तृतीयसव॒ने । य॒ज्ञो वै विष्णुः॑ । प॒शव॒-श्शिपिः॑ । य॒ज्ञ ए॒व प॒शुषु॒ प्रति॑ तिष्ठति ॥ बृ॒हदन्त्य॑-म्भवति । अन्त॑मे॒वैनग्ग्॑ श्रि॒यै ग॑मयति ॥ 52 ॥

(अ॒श्ञी॒या - दन्न॑स्यान्न॒स्या व॑रुद्ध्या॒ - इन्द्र॑स्य त्वा॒ साम्रा᳚ज्येना॒भिषि॑ञ्चा॒ मीत्या॑ह-वाज॒सृतः॒ - शिपि॒ स्त्रीणि॑ च) (अ. 8)

अनुवाकं 9 - अतिग्राह्याः, पञ्चैन्द्राः

नृ॒षद॒-न्त्वेत्या॑ह । प्र॒जा वै नॄन् । प्र॒जाना॑मे॒वैतेन॑ सूयते । द्रु॒षद॒मित्या॑ह । वन॒स्पत॑यो॒ वै द्रु । वन॒स्पती॑नामे॒वै तेन॑ सूयते । भु॒व॒न॒सद॒-मित्या॑ह । य॒दा वै वसी॑या॒-न्भव॑ति । भुव॑नमग॒न्निति॒ वै तमा॑हुः । भुव॑नमे॒वैतेन॑ गच्छति ॥ 53 ॥

अ॒फ्सु॒षद॑-न्त्वा घृत॒सद॒-मित्या॑ह । अ॒पामे॒वैतेन॑ घृ॒तस्य॑ सूयते । व्यो॒म॒सद॒-मित्या॑ह । य॒दा वै वसी॑या॒-न्भव॑ति । व्यो॑माग॒न्निति॒ वै तमा॑हुः । व्यो॑मै॒वैतेन॑ गच्छति ॥ पृ॒थि॒वि॒षद॑-न्त्वा-ऽन्तरिक्ष॒सद॒-मित्या॑ह । ए॒षामे॒वैतेन॑ लो॒कानाग्ं॑ सूयते । तस्मा᳚-द्वाजपे-यया॒जी न क-ञ्च॒न प्र॒त्यव॑रोहति । अपी॑व॒ हि दे॒वता॑नाग्ं सू॒यते᳚ ॥ 54 ॥

ना॒क॒सद॒-मित्या॑ह । य॒दावै वसी॑या॒-न्भव॑ति । नाक॑मग॒न्निति॒ वै तमा॑हुः । नाक॑मे॒वैतेन॑ गच्छति ॥ ये ग्रहाः᳚ पञ्चज॒नीना॒ इत्या॑ह । प॒ञ्च॒ज॒नाना॑-मे॒वैतेन॑ सूयते ॥ अ॒पाग्ं रस॒मुद्व॑यस॒-मित्या॑ह । अ॒पामे॒वैतेन॒ रस॑स्य सूयते । सूर्य॑रश्मिग्ं स॒माभृ॑त॒-मित्या॑ह सशुक्र॒त्वाय॑ ॥ 55 ॥

(ग॒च्छ॒ति॒ - सू॒यते॒ - +नव॑ च) (अ. 9)

अनुवाकं 10 - पिण्डपितृयज्ञः दर्शपूर्णमासब्राह्मणशेषः

इन्द्रो वृ॒त्रग्ं ह॒त्वा । असु॑रा-न्परा॒भाव्य॑ । सो॑-ऽमावा॒स्या᳚-म्प्रत्याग॑च्छत् । ते पि॒तरः॑ पूर्वे॒द्यु-राग॑च्छन्न् । पि॒तॄन्. य॒ज्ञो॑-ऽगच्छत् । त-न्दे॒वाः पुन॑रयाचन्त । तमे᳚भ्यो॒ न पुन॑रददुः । ते᳚-ऽब्रुव॒न् वरं॑-वृँणामहै । अथ॑ वः॒ पुन॑र्दास्यामः । अ॒स्मभ्य॑मे॒व पू᳚र्वे॒द्युः क्रि॑याता॒ इति॑ ॥ 56 ॥

तमे᳚भ्यः॒ पुन॑रददुः । तस्मा᳚त्-पि॒तृभ्यः॑ पूर्वे॒द्युः क्रि॑यते । य-त्पि॒तृभ्यः॑ पूर्वे॒द्युः क॒रोति॑ । पि॒तृभ्य॑ ए॒व त-द्य॒ज्ञ-न्नि॒ष्क्रीय॒ यज॑मानः॒ प्रत॑नुते ॥ सोमा॑य पि॒तृपी॑ताय स्व॒धा नम॒ इत्या॑ह । पि॒तुरे॒वाधि॑ सोमपी॒थमव॑ रुन्धे । न हि पि॒ता प्र॒मीय॑माण॒ आहै॒ष सो॑मपी॒थ इति॑ । इ॒न्द्रि॒यं-वैँ सो॑मपी॒थः । इ॒न्द्रि॒यमे॒व सो॑मपी॒थमव॑-रुन्धे । तेन᳚न्द्रि॒येण॑ द्वि॒तीया᳚-ञ्जा॒याम॒भ्य॑श्ञुते ॥ 57 ॥

ए॒त-द्वै ब्राह्म॑ण-म्पु॒रा वा॑जश्रव॒सा वि॒दाम॑क्रन्न् । तस्मा॒-त्ते द्वेद्वे॑ जा॒ये अ॒भ्या᳚क्षत । य ए॒वं-वेँद॑ । अ॒भि द्वि॒तीया᳚-ञ्जा॒याम॑श्ञुते ॥ अ॒ग्नये॑ कव्य॒वाह॑नाय स्व॒धा नम॒ इत्या॑ह । य ए॒व पि॑तृ॒णाम॒ग्निः । त-म्प्री॑णाति ॥ ति॒स्र आहु॑ती-र्जुहोति ॥ त्रिर्निद॑धाति ॥ षट्-थ्सम्प॑द्यन्ते ॥ 58 ॥

षड्वा ऋ॒तवः॑ । ऋ॒तूने॒व प्री॑णाति ॥ तू॒ष्णी-म्मेक्ष॑ण॒-माद॑धाति । अस्ति॑ वा॒ हि ष॒ष्ठ ऋ॒तुर्न वा᳚ ॥ दे॒वान्. वै पि॒तॄ-न्प्री॒तान् । म॒नु॒ष्याः᳚ पि॒तरो-ऽनु॒ प्रपि॑पते । ति॒स्र आहु॑ती-र्जुहोति । त्रिर्निद॑धाति । षट्-थ्सम्प॑द्यन्ते । षड्वा ऋ॒तवः॑ ॥ 59 ॥

ऋ॒तवः॒ खलु॒ वै दे॒वाः पि॒तरः॑ । ऋ॒तूने॒व दे॒वा-न्पि॒तॄ-न्प्री॑णाति । तान्प्री॒तान् । म॒नु॒ष्याः᳚ पि॒तरो-ऽनु॒ प्रपि॑पते ॥ स॒कृ॒दा॒च्छि॒न्न-म्ब॒र्॒हि-र्भ॑वति । स॒कृदि॑व॒ हि पि॒तरः॑ ॥ त्रिर्निद॑धाति । तृ॒तीये॒ वा इ॒तो लो॒के पि॒तरः॑ । ताने॒व प्री॑णाति ॥ परां॒आव॑र्तते ॥ 60 ॥

ह्लीका॒ हि पि॒तरः॑ ॥ ऒष्मणो᳚ व्या॒वृत॒ उपा᳚स्ते । ऊ॒ष्मभा॑गा॒ हि पि॒तरः॑ ॥ ब्र॒ह्म॒वा॒दिनो॑ वदन्ति । प्राश्यां(3)न प्राश्या(3)मिति॑ । य-त्प्रा᳚श्ञी॒यात् । जन्य॒मन्न॑मद्यात् । प्र॒मायु॑क-स्स्यात् । यन्न प्रा᳚श्ञी॒यात् । अह॑वि-स्स्यात् ॥ 61 ॥

पि॒तृभ्य॒ आवृ॑श्च्येत । अ॒व॒घ्रेय॑मे॒व । तन्नेव॒ प्राशि॑त॒-न्नेवाप्रा॑शितम् ॥ वी॒रं-वाँ॒ वै पि॒तरः॑ प्र॒यन्तो॒ हर॑न्ति । वी॒रं-वाँ॑ ददति । द॒शा-ञ्छि॑नत्ति । हर॑णभागा॒ हि पि॒तरः॑ । पि॒तॄने॒व नि॒रव॑दयते ॥ उत्त॑र॒ आयु॑षि॒ लोम॑ छिन्दीत । पि॒तृ॒णाग् ह्ये॑तर्हि॒ नेदी॑यः ॥ 62 ॥

नम॑स्करोति । न॒म॒स्का॒रो हि पि॑तृ॒णाम् ॥ नमो॑ वः पितरो॒ रसा॑य । नमो॑ वः पितर॒-श्शुष्मा॑य । नमो॑ वः पितरो जी॒वाय॑ । नमो॑ वः पितर-स्स्व॒धायै᳚ । नमो॑ वः पितरो म॒न्यवे᳚ । नमो॑ वः पितरो घो॒राय॑ । पित॑रो॒ नमो॑ वः । य ए॒तस्मि॑न् ँलो॒के स्थ ॥ 63 ॥

यु॒ष्माग्स्ते-ऽनु॑ । ये᳚-ऽस्मिँल्लो॒के । मा-न्ते नु॑ । य ए॒तस्मि॑ँल्लो॒के स्थ । यू॒य-न्तेषां॒-वँसि॑ष्ठा भूयास्त । ये᳚-ऽस्मिँल्लो॒के । अ॒ह-न्तेषां॒-वँसि॑ष्ठो भूयास॒मित्या॑ह । वसि॑ष्ठ-स्समा॒नाना᳚-म्भवति । य ए॒वं-विँ॒द्वान्-पि॒तृभ्यः॑ क॒रोति॑ ॥ ए॒ष वै म॑नु॒ष्या॑णां-यँ॒ज्ञः ॥ 64 ॥

दे॒वानां॒-वाँ इत॑रे य॒ज्ञाः । तेन॒ वा ए॒त-त्पि॑तृलो॒के च॑रति ॥ य-त्पि॒तृभ्यः॑ क॒रोति॑ । स ई᳚श्व॒रः प्रमे॑तोः । प्रा॒जा॒प॒त्यय॒र्चा पुन॒रैति॑ । य॒ज्ञो वै प्र॒जाप॑तिः । य॒ज्ञेनै॒व स॒ह पुन॒रैति॑ । न प्र॒मायु॑को भवति ॥ पि॒तृ॒लो॒के वा ए॒त-द्यज॑मानश्चरति । य-त्पि॒तृभ्यः॑ क॒रोति॑ । स ई᳚श्व॒र आर्ति॒मार्तोः᳚ । प्र॒जाप॑ति॒-स्त्वावैन॒-न्तत॒ उन्ने॑तुमर्ह॒तीत्या॑हुः । य-त्प्रा॑जाप॒त्यय॒र्चा पुन॒रैति॑ । प्र॒जाप॑तिरे॒वैन॒-न्तत॒ उन्न॑यति । नार्ति॒मार्च्छ॑ति॒ यज॑मानः ॥ 65 ॥

(इत्य॑ - श्ञुते - पद्यन्ते - पद्यन्ते॒ षड्वा ऋ॒तवो॑ - वर्त॒ते-ऽ - ह॑वि-स्स्या॒न् - नेदी॑यः॒ - स्थ - य॒ज्ञो - यज॑मानश्चरति॒ य-त्पि॒तृभ्यः॑ क॒रोति॒ पञ्च॑ च) (अ. 10)

(दे॒वा॒सु॒रा अ॒ग्नीषोम॑यो--र् दे॒वा वै यथा॒ दर्शं॑ - दे॒वा वै यद॒न्यै-र्ग्रहै᳚--र् ब्रह्मवा॒दिनो॒ नाग्नि॑ष्टो॒मो न - सा॑वि॒त्रं - दे॒वस्या॒हं - ता॒र्प्यग्ं - स॒प्तान्न॑हो॒मान् - नृ॒षदं॒ - त्वेन्द्रो॑ वृ॒त्रग्ं ह॒त्वा दश॑)

(दे॒वा॒सु॒रा - वा॒ज्ये॑वैनं॒ - तस्मा᳚-द्वाजपेयया॒जी - दे॒वस्या॒हं - ँवाज॒स्याव॑रुद्ध्या- इन्द्रि॒यमे॒वास्मि॒न्॒. - ह्लीका॒ हि पि॒तरः॒ पञ्च॑षष्टिः)

(दे॒वा॒सु॒रा - यज॑मानः)

॥ हरिः॑ ओम् ॥

॥ कृष्ण यजुर्वेदीय तैत्तिरीय ब्राह्मणे प्रथमाष्टके तृतीयः प्रपाठक-स्समाप्तः ॥