madhyodbhave bhuva ilāvṛtanāmni varṣe
gaurīpradhānavanitājanamātrabhāji |
śarveṇa mantranutibhiḥ samupāsyamānaṃ
Verse 1
saṅkarṣaṇātmakamadhīśvara saṃśraye tvām ||1||
bhadrāśvanāmaka ilāvṛtapūrvavarṣe
bhadraśravobhiḥ ṛṣibhiḥ pariṇūyamānam |
kalpāntagūḍhanigamoddharaṇapravīṇaṃ
Verse 2
dhyāyāmi deva hayaśīrṣatanuṃ bhavantam ||2||
dhyāyāmi dakṣiṇagate harivarṣavarṣe
prahlādamukhyapuruṣaiḥ pariṣevyamāṇam |
uttuṅgaśāntadhavalākṛtimekaśuddha-
Verse 3
jñānapradaṃ narahariṃ bhagavan bhavantam ||3||
varṣe pratīci lalitātmani ketumāle
līlāviśeṣalalitasmitaśobhanāṅgam |
lakṣmyā prajāpatisutaiśca niṣevyamāṇaṃ
Verse 4
tasyāḥ priyāya dhṛtakāmatanuṃ bhaje tvām ||4||
ramye hyudīci khalu ramyakanāmni varṣe
tadvarṣanāthamanuvaryasaparyamāṇam |
bhaktaikavatsalamamatsarahṛtsu bhāntaṃ
Verse 5
matsyākṛtiṃ bhuvananātha bhaje bhavantam ||5||
varṣaṃ hiraṇmayasamāhvayamauttarāha-
māsīnamadridhṛtikarmaṭhakāmaṭhāṅgam |
saṃsevate pitṛgaṇapravaro'ryamā yaṃ
Verse 6
taṃ tvāṃ bhajāmi bhagavan paracinmayātman ||6||
kiñcottareṣu kuruṣu priyayā dharaṇyā
saṃsevito mahitamantranutiprabhedaiḥ |
daṃṣṭrāgraghṛṣṭaghanapṛṣṭhagariṣṭhavarṣmā
Verse 7
tvaṃ pāhi bijñanuta yajñavarāhamūrte ||7||
yāmyāṃ diśaṃ bhajati kimpuruṣākhyavarṣe
saṃsevito hanumatā dṛḍhabhaktibhājā |
sītābhirāmaparamādbhutarūpaśālī
Verse 8
rāmātmakaḥ parilasan paripāhi viṣṇo ||8||
śrīnāradena saha bhāratakhaṇḍamukhyai-
stvaṃ sāṅkhyayoganutibhiḥ samupāsyamānaḥ |
ākalpakālamiha sādhujanābhirakṣī
Verse 9
nārāyaṇo narasakhaḥ paripāhi bhūman ||9||
plākṣe'rkarūpamayi śālmala indurūpaṃ
dvīpe bhajanti kuśanāmani vahnirūpam |
krauñce'mburūpamatha vāyumayaṃ ca śāke
Verse 10
tvāṃ brahmarūpamapi puṣkaranāmni lokāḥ ||10||
sarvairdhruvādibhiruḍuprakarairgrahaiśca
pucchādikeṣvavayaveṣvabhikalpyamānaiḥ |
tvaṃ śiṃśumāravapuṣā mahatāmupāsyaḥ
Verse 11
sandhyāsu rundhi narakaṃ mama sindhuśāyin ||11||
pātālamūlabhuvi śeṣatanuṃ bhavantaṃ
lolaikakuṇḍalavirājisahasraśīrṣam |
nīlāmbaraṃ dhṛtahalaṃ bhujagāṅganābhi-
Verse 12
rjuṣṭaṃ bhaje hara gadān gurugehanātha ||12||
Sanskrit — Devanagari (original)
मध्योद्भवे भुव इलावृतनाम्नि वर्षे
गौरीप्रधानवनिताजनमात्रभाजि ।
शर्वेण मन्त्रनुतिभिः समुपास्यमानं
सङ्कर्षणात्मकमधीश्वर संश्रये त्वाम् ॥1॥
भद्राश्वनामक इलावृतपूर्ववर्षे
भद्रश्रवोभिः ऋषिभिः परिणूयमानम् ।
कल्पान्तगूढनिगमोद्धरणप्रवीणं
ध्यायामि देव हयशीर्षतनुं भवन्तम् ॥2॥
ध्यायामि दक्षिणगते हरिवर्षवर्षे
प्रह्लादमुख्यपुरुषैः परिषेव्यमाणम् ।
उत्तुङ्गशान्तधवलाकृतिमेकशुद्ध-
ज्ञानप्रदं नरहरिं भगवन् भवन्तम् ॥3॥
वर्षे प्रतीचि ललितात्मनि केतुमाले
लीलाविशेषललितस्मितशोभनाङ्गम् ।
लक्ष्म्या प्रजापतिसुतैश्च निषेव्यमाणं
तस्याः प्रियाय धृतकामतनुं भजे त्वाम् ॥4॥
रम्ये ह्युदीचि खलु रम्यकनाम्नि वर्षे
तद्वर्षनाथमनुवर्यसपर्यमाणम् ।
भक्तैकवत्सलममत्सरहृत्सु भान्तं
मत्स्याकृतिं भुवननाथ भजे भवन्तम् ॥5॥
वर्षं हिरण्मयसमाह्वयमौत्तराह-
मासीनमद्रिधृतिकर्मठकामठाङ्गम् ।
संसेवते पितृगणप्रवरोऽर्यमा यं
तं त्वां भजामि भगवन् परचिन्मयात्मन् ॥6॥
किञ्चोत्तरेषु कुरुषु प्रियया धरण्या
संसेवितो महितमन्त्रनुतिप्रभेदैः ।
दंष्ट्राग्रघृष्टघनपृष्ठगरिष्ठवर्ष्मा
त्वं पाहि बिज्ञनुत यज्ञवराहमूर्ते ॥7॥
याम्यां दिशं भजति किम्पुरुषाख्यवर्षे
संसेवितो हनुमता दृढभक्तिभाजा ।
सीताभिरामपरमाद्भुतरूपशाली
रामात्मकः परिलसन् परिपाहि विष्णो ॥8॥
श्रीनारदेन सह भारतखण्डमुख्यै-
स्त्वं साङ्ख्ययोगनुतिभिः समुपास्यमानः ।
आकल्पकालमिह साधुजनाभिरक्षी
नारायणो नरसखः परिपाहि भूमन् ॥9॥
प्लाक्षेऽर्करूपमयि शाल्मल इन्दुरूपं
द्वीपे भजन्ति कुशनामनि वह्निरूपम् ।
क्रौञ्चेऽम्बुरूपमथ वायुमयं च शाके
त्वां ब्रह्मरूपमपि पुष्करनाम्नि लोकाः ॥10॥
सर्वैर्ध्रुवादिभिरुडुप्रकरैर्ग्रहैश्च
पुच्छादिकेष्ववयवेष्वभिकल्प्यमानैः ।
त्वं शिंशुमारवपुषा महतामुपास्यः
सन्ध्यासु रुन्धि नरकं मम सिन्धुशायिन् ॥11॥
पातालमूलभुवि शेषतनुं भवन्तं
लोलैककुण्डलविराजिसहस्रशीर्षम् ।
नीलाम्बरं धृतहलं भुजगाङ्गनाभि-
र्जुष्टं भजे हर गदान् गुरुगेहनाथ ॥12॥