Charcha Stavah — Sinhala Script

පඤ්චස්තවි – 2 චර්චාස්තවඃ >>

සෞන්දර්යවිභ්රමභුවෝ භුවනාධිපත්ය-

-සඞ්කල්පකල්පතරවස්ත්රිපුරේ ජයන්ති .

ඒතේ කවිත්වකුමදප්රකරාවබෝධ-

-පූර්ණේන්දවස්ත්වයි ජගජ්ජනනි ප්රණාමාඃ .. 1 ..

දේවි ස්තුතිව්යතිකරේ කෘතබුද්ධයස්තේ

වාචස්පති ප්රභෘතයෝ(අ)පි ජඩී භවන්ති .

තස්මාන්නිසර්ගජඩිමා කතමෝ(අ)හමත්ර

ස්තෝත්රං තව ත්රිපුරතාපනපත්නි කර්තුම් .. 2 ..

මාතස්තථාපි භවතීං භවතීව්රතාප-

-විච්ඡිත්තයේ ස්තුතිමහාර්ණව කර්ණධාරඃ .

ස්තෝතුං භවානි ස භවච්චරණාරවින්ද-

-භක්තිග්රහඃ කිමපි මාං මුඛරී කරෝති .. 3 ..

සූතේ ජගන්ති භවතී භවතී බිභර්ති

ජාගර්ති තත්ක්ෂයකෘතේ භවතී භවානි .

මෝහං භිනත්ති භවතී භවතී රුණද්ධි

ලීලායිතං ජයති චිත්රමිදං භවත්යාඃ .. 4 ..

යස්මින්මනාගපි නවාම්බුජපත්රගෞරීං

ගෞරීං ප්රසාදමධුරාං දෘශමාදධාසි .

තස්මින්නිරන්තරමනඞ්ගශරාවකීර්ණ-

-සීමන්තිනීනයනසන්තතයඃ පතන්ති .. 5 ..

පෘථ්වීභුජෝ(අ)ප්යුදයනප්රභවස්ය තස්ය

විද්යාධර ප්රණති චුම්බිත පාදපීඨඃ .

තච්චක්රවර්තිපදවීප්රණයඃ ස ඒෂඃ

ත්වත්පාදපඞ්කජරජඃ කණජඃ ප්රසාදඃ .. 6 ..

ත්වත්පාදපඞ්කජරජ ප්රණිපාතපූර්වෛඃ

පුණ්යෛරනල්පමතිභිඃ කෘතිභිඃ කවීන්ද්රෛඃ .

ක්ෂීරක්ෂපාකරදුකූලහිමාවදාතා

කෛරප්යවාපි භුවනත්රිතයේ(අ)පි කීර්තිඃ .. 7 ..

කල්පද්රුමප්රසවකල්පිතචිත්රපූජාං

උද්දීපිත ප්රියතමාමදරක්තගීතිම් .

නිත්යං භවානි භවතීමුපවීණයන්ති

විද්යාධරාඃ කනකශෛලගුහාගෘහේෂු .. 8 ..

ලක්ෂ්මීවශීකරණකර්මණි කාමිනීනාං

ආකර්ෂණව්යතිකරේෂු ච සිද්ධමන්ත්රඃ .

නීරන්ධ්රමෝහතිමිරච්ඡිදුරප්රදීපෝ

දේවි ත්වදඞ්ඝ්රිජනිතෝ ජයති ප්රසාදඃ .. 9 ..

දේවි ත්වදඞ්ඝ්රිනඛරත්නභුවෝ මයූඛාඃ

ප්රත්යග්රමෞක්තිකරුචෝ මුදමුද්වහන්ති .

සේවානතිව්යතිකරේ සුරසුන්දරීණාං

සීමන්තසීම්නි කුසුමස්තබකායිතං යෛඃ .. 10 ..

මූර්ධ්නි ස්ඵුරත්තුහිනදීධිතිදීප්තිදීප්තං

මධ්යේ ලලාටමමරායුධරශ්මිචිත්රම් .

හෘච්චක්රචුම්බි හුතභුක්කණිකානුකාරි

ජ්යෝතිර්යදේතදිදමම්බ තව ස්වරූපම් .. 11 ..

රූපං තව ස්ඵුරිතචන්ද්රමරීචිගෞරං

ආලෝකතේ ශිරසි වාගධිදෛවතං යඃ .

නිඃසීමසූක්තිරචනාමෘතනිර්ඣරස්ය

තස්ය ප්රසාදමධුරාඃ ප්රසරන්ති වාචඃ .. 12 ..

සින්දූරපාංසුපටලච්ඡුරිතාමිව ද්යාං

ත්වත්තේජසා ජතුරසස්නපිතාමිවෝර්වීම් .

යඃ පශ්යති ක්ෂණමපි ත්රිපුරේ විහාය

ව්රීඩාං මෘඩානි සුදෘශස්තමනුද්රවන්ති .. 13 ..

මාතර්මුහූර්තමපි යඃ ස්මරති ස්වරූපං

ලාක්ෂාරසප්රසරතන්තුනිභං භවත්යාඃ .

ධ්යායන්ත්යනන්යමනසස්තමනඞ්ගතප්තාඃ

ප්රද්යුම්නසීම්නි සුභගත්වගුණං තරුණ්යඃ .. 14 ..

යෝ(අ)යං චකාස්ති ගගනාර්ණවරත්නමින්දුඃ

යෝ(අ)යං සුරාසුරගුරුඃ පුරුෂඃ පුරාණඃ .

යද්වාමමර්ධමිදමන්ධකසූදනස්ය

දේවි ත්වමේව තදිති ප්රතිපාදයන්ති .. 15 ..

ඉච්ඡානුරූපමනුරූපගුණප්රකර්ෂ

සඞ්කර්ෂිණි ත්වමභිමෘශ්ය යදා බිභර්ෂි .

ජායේත ස ත්රිභුවනෛක ගුරුස්තදානීං

දේවඃ ශිවෝ(අ)පි භුවනත්රයසූත්රධාරඃ .. 16 ..

ධ්යාතාසි හෛමවති යේන හිමාංශුරශ්මි-

-මාලාමලද්යුතිරකල්මෂමානසේන .

තස්යාවිලම්බමනවද්යමනන්තකල්පං

අල්පෛර්දිනෛඃ සෘජසි සුන්දරි වාග්විලාසම් .. 17 ..

ආධාරමාරුතනිරෝධවශේන යේෂාං

සින්දූරරඤ්ජිතසරෝජගුණානුකාරි .

දීප්තං හෘදි ස්ඵුරති දේවි වපුස්ත්වදීයං

ධ්යායන්ති තානිහ සමීහිතසිද්ධිසාර්ථාඃ .. 18 ..

යේ චින්තයන්ත්යරුණමණ්ඩලමධ්යවර්ති

රූපං තවාම්බ නවයාවකපඞ්කපිඞ්ගම් .

තේෂාං සදෛව කුසුමායුධබාණභින්න-

-වක්ෂඃස්ථලා මෘගදෘශෝ වශගා භවන්ති .. 19 ..

ත්වාමෛන්දවීමිව කලාමනුඵාලදේශං

උද්භාසිතාම්බරතලාමවලෝකයන්තඃ .

සද්යෝ භවානි සුධියඃ කවයෝ භවන්ති

ත්වං භාවනාහිතධියාං කුලකාමධේනුඃ .. 20 ..

ශර්වාණි සර්වජනවන්දිතපාදපද්මේ

පද්මච්ඡදද්යුතිවිඩම්බිතනේත්රලක්ෂ්මි .

නිෂ්පාපමූර්තිජනමානසරාජහංසි

හංසි ත්වමාපදමනේකවිධාං ජනස්ය .. 21 ..

උත්තප්තහේමරුචිරේ ත්රිපුරේ පුනීහි

චේතශ්චිරන්තනමඝෞඝවනං ලුනීහි .

කාරාගෘහේ නිගලබන්ධනයන්ත්රිතස්ය

ත්වත්සංස්මෘතෞ ඣටිති මේ නිගලාස්ත්රුටන්ති .. 22 ..

ත්වාං ව්යාපිනීති සුමනා ඉති කුණ්ඩලීති

ත්වාං කාමිනීති කමලේති කලාවතීති .

ත්වාං මාලිනීති ලලිතේත්යපරාජිතේති

දේවි ස්තුවන්ති විජයේති ජයේත්යුමේති .. 23 ..

උද්දාමකාමපරමාර්ථසරෝජඛණ්ඩ-

චණ්ඩද්යුතිද්යුතිමපාසිතෂඩ්විකාරාම් .

මෝහද්විපේන්ද්රකදනෝද්යතබෝධසිංහ-

-ලීලාගුහාං භගවතීං ත්රිපුරාං නමාමි .. 24 ..

ගණේශවටුකස්තුතා රතිසහායකාමාන්විතා

ස්මරාරිවරවිෂ්ටරා කුසුමබාණබාණෛර්යුතා .

අනඞ්ගකුසුමාදිභිඃ පරිවෘතා ච සිද්ධෛස්ත්රිභිඃ

කදම්බවනමධ්යගා ත්රිපුරසුන්දරී පාතු නඃ .. 25 ..

රුද්රාණි විද්රුමමයීං ප්රතිමාමිව ත්වාං

යේ චින්තයන්ත්යරුණකාන්තිමනන්යරූපාම් .

තානේත්ය පක්ෂ්මලදෘශඃ ප්රසභං භජන්තේ

කණ්ඨාවසක්තමෘදුබාහුලතාස්තරුණ්යඃ .. 26 ..

ත්වද්රූපෛකනිරූපණප්රණයිතාබන්ධෝ දෘශෝස්ත්වද්ගුණ-

-ග්රාමාකර්ණනරාගිතා ශ්රවණයෝස්ත්වත්සංස්මෘතිශ්චේතසි .

ත්වත්පාදාර්චනචාතුරී කරයුගේ ත්වත්කීර්තිතං වාචි මේ

කුත්රාපි ත්වදුපාසනව්යසනිතා මේ දේවි මා ශාම්යතු .. 27 ..

ත්වද්රූපමුල්ලසිතදාඩිමපුෂ්පරක්තං

උද්භාවයේන්මදනදෛවතමක්ෂරං යඃ .

තං රූපහීනමපි මන්මථනිර්විශේෂං

ආලෝකයන්ත්යුරුනිතම්බතටාස්තරුණ්යඃ .. 28 ..

බ්රහ්මේන්ද්රරුද්රහරිචන්ද්රසහස්රරශ්මි-

-ස්කන්දද්විපානනහුතාශනවන්දිතායෛ .

වාගීශ්වරි ත්රිභුවනේශ්වරි විශ්වමාතඃ

අන්තර්බහිශ්ච කෘතසංස්ථිතයේ නමස්තේ .. 29 ..

කස්තෝත්රමේතදනුවාසරමීශ්වරායාඃ

ශ්රේයස්කරං පඨති වා යදි වා ශෘණෝති .

තස්යේප්සිතං ඵලති රාජභිරීඩ්යතේ(අ)සෞ

ජායේත ස ප්රියතමෝ මදිරේක්ෂණානාම් .. 30 ..

ඉති ශ්රීකාලිදාස විරචිත පඤ්චස්තව්යාං ද්විතීයඃ චර්චාස්තවඃ .

Roman (IAST) Transliteration

pañcastavi – 2 carcāstavaḥ >>

saundaryavibhramabhuvo bhuvanādhipatya-

-saṅkalpakalpataravastripure jayanti |

ete kavitvakumadaprakarāvabodha-

-pūrṇendavastvayi jagajjanani praṇāmāḥ || 1 ||

devi stutivyatikare kṛtabuddhayaste

vācaspati prabhṛtayo'pi jaḍī bhavanti |

tasmānnisargajaḍimā katamo'hamatra

stotraṃ tava tripuratāpanapatni kartum || 2 ||

mātastathāpi bhavatīṃ bhavatīvratāpa-

-vicchittaye stutimahārṇava karṇadhāraḥ |

stotuṃ bhavāni sa bhavaccaraṇāravinda-

-bhaktigrahaḥ kimapi māṃ mukharī karoti || 3 ||

sūte jaganti bhavatī bhavatī bibharti

jāgarti tatkṣayakṛte bhavatī bhavāni |

mohaṃ bhinatti bhavatī bhavatī ruṇaddhi

līlāyitaṃ jayati citramidaṃ bhavatyāḥ || 4 ||

yasminmanāgapi navāmbujapatragaurīṃ

gaurīṃ prasādamadhurāṃ dṛśamādadhāsi |

tasminnirantaramanaṅgaśarāvakīrṇa-

-sīmantinīnayanasantatayaḥ patanti || 5 ||

pṛthvībhujo'pyudayanaprabhavasya tasya

vidyādhara praṇati cumbita pādapīṭhaḥ |

taccakravartipadavīpraṇayaḥ sa eṣaḥ

tvatpādapaṅkajarajaḥ kaṇajaḥ prasādaḥ || 6 ||

tvatpādapaṅkajaraja praṇipātapūrvaiḥ

puṇyairanalpamatibhiḥ kṛtibhiḥ kavīndraiḥ |

kṣīrakṣapākaradukūlahimāvadātā

kairapyavāpi bhuvanatritaye'pi kīrtiḥ || 7 ||

kalpadrumaprasavakalpitacitrapūjāṃ

uddīpita priyatamāmadaraktagītim |

nityaṃ bhavāni bhavatīmupavīṇayanti

vidyādharāḥ kanakaśailaguhāgṛheṣu || 8 ||

lakṣmīvaśīkaraṇakarmaṇi kāminīnāṃ

ākarṣaṇavyatikareṣu ca siddhamantraḥ |

nīrandhramohatimiracchidurapradīpo

devi tvadaṅghrijanito jayati prasādaḥ || 9 ||

devi tvadaṅghrinakharatnabhuvo mayūkhāḥ

pratyagramauktikaruco mudamudvahanti |

sevānativyatikare surasundarīṇāṃ

sīmantasīmni kusumastabakāyitaṃ yaiḥ || 10 ||

mūrdhni sphurattuhinadīdhitidīptidīptaṃ

madhye lalāṭamamarāyudharaśmicitram |

hṛccakracumbi hutabhukkaṇikānukāri

jyotiryadetadidamamba tava svarūpam || 11 ||

rūpaṃ tava sphuritacandramarīcigauraṃ

ālokate śirasi vāgadhidaivataṃ yaḥ |

niḥsīmasūktiracanāmṛtanirjharasya

tasya prasādamadhurāḥ prasaranti vācaḥ || 12 ||

sindūrapāṃsupaṭalacchuritāmiva dyāṃ

tvattejasā jaturasasnapitāmivorvīm |

yaḥ paśyati kṣaṇamapi tripure vihāya

vrīḍāṃ mṛḍāni sudṛśastamanudravanti || 13 ||

mātarmuhūrtamapi yaḥ smarati svarūpaṃ

lākṣārasaprasaratantunibhaṃ bhavatyāḥ |

dhyāyantyananyamanasastamanaṅgataptāḥ

pradyumnasīmni subhagatvaguṇaṃ taruṇyaḥ || 14 ||

yo'yaṃ cakāsti gaganārṇavaratnaminduḥ

yo'yaṃ surāsuraguruḥ puruṣaḥ purāṇaḥ |

yadvāmamardhamidamandhakasūdanasya

devi tvameva taditi pratipādayanti || 15 ||

icchānurūpamanurūpaguṇaprakarṣa

saṅkarṣiṇi tvamabhimṛśya yadā bibharṣi |

jāyeta sa tribhuvanaika gurustadānīṃ

devaḥ śivo'pi bhuvanatrayasūtradhāraḥ || 16 ||

dhyātāsi haimavati yena himāṃśuraśmi-

-mālāmaladyutirakalmaṣamānasena |

tasyāvilambamanavadyamanantakalpaṃ

alpairdinaiḥ sṛjasi sundari vāgvilāsam || 17 ||

ādhāramārutanirodhavaśena yeṣāṃ

sindūrarañjitasarojaguṇānukāri |

dīptaṃ hṛdi sphurati devi vapustvadīyaṃ

dhyāyanti tāniha samīhitasiddhisārthāḥ || 18 ||

ye cintayantyaruṇamaṇḍalamadhyavarti

rūpaṃ tavāmba navayāvakapaṅkapiṅgam |

teṣāṃ sadaiva kusumāyudhabāṇabhinna-

-vakṣaḥsthalā mṛgadṛśo vaśagā bhavanti || 19 ||

tvāmaindavīmiva kalāmanuphāladeśaṃ

udbhāsitāmbaratalāmavalokayantaḥ |

sadyo bhavāni sudhiyaḥ kavayo bhavanti

tvaṃ bhāvanāhitadhiyāṃ kulakāmadhenuḥ || 20 ||

śarvāṇi sarvajanavanditapādapadme

padmacchadadyutiviḍambitanetralakṣmi |

niṣpāpamūrtijanamānasarājahaṃsi

haṃsi tvamāpadamanekavidhāṃ janasya || 21 ||

uttaptahemarucire tripure punīhi

cetaścirantanamaghaughavanaṃ lunīhi |

kārāgṛhe nigalabandhanayantritasya

tvatsaṃsmṛtau jhaṭiti me nigalāstruṭanti || 22 ||

tvāṃ vyāpinīti sumanā iti kuṇḍalīti

tvāṃ kāminīti kamaleti kalāvatīti |

tvāṃ mālinīti lalitetyaparājiteti

devi stuvanti vijayeti jayetyumeti || 23 ||

uddāmakāmaparamārthasarojakhaṇḍa-

caṇḍadyutidyutimapāsitaṣaḍvikārām |

mohadvipendrakadanodyatabodhasiṃha-

-līlāguhāṃ bhagavatīṃ tripurāṃ namāmi || 24 ||

gaṇeśavaṭukastutā ratisahāyakāmānvitā

smarārivaraviṣṭarā kusumabāṇabāṇairyutā |

anaṅgakusumādibhiḥ parivṛtā ca siddhaistribhiḥ

kadambavanamadhyagā tripurasundarī pātu naḥ || 25 ||

rudrāṇi vidrumamayīṃ pratimāmiva tvāṃ

ye cintayantyaruṇakāntimananyarūpām |

tānetya pakṣmaladṛśaḥ prasabhaṃ bhajante

kaṇṭhāvasaktamṛdubāhulatāstaruṇyaḥ || 26 ||

tvadrūpaikanirūpaṇapraṇayitābandho dṛśostvadguṇa-

-grāmākarṇanarāgitā śravaṇayostvatsaṃsmṛtiścetasi |

tvatpādārcanacāturī karayuge tvatkīrtitaṃ vāci me

kutrāpi tvadupāsanavyasanitā me devi mā śāmyatu || 27 ||

tvadrūpamullasitadāḍimapuṣparaktaṃ

udbhāvayenmadanadaivatamakṣaraṃ yaḥ |

taṃ rūpahīnamapi manmathanirviśeṣaṃ

ālokayantyurunitambataṭāstaruṇyaḥ || 28 ||

brahmendrarudraharicandrasahasraraśmi-

-skandadvipānanahutāśanavanditāyai |

vāgīśvari tribhuvaneśvari viśvamātaḥ

antarbahiśca kṛtasaṃsthitaye namaste || 29 ||

kastotrametadanuvāsaramīśvarāyāḥ

śreyaskaraṃ paṭhati vā yadi vā śṛṇoti |

tasyepsitaṃ phalati rājabhirīḍyate'sau

jāyeta sa priyatamo madirekṣaṇānām || 30 ||

iti śrīkālidāsa viracita pañcastavyāṃ dvitīyaḥ carcāstavaḥ |

Sanskrit — Devanagari (original)

पञ्चस्तवि – 2 चर्चास्तवः >>

सौन्दर्यविभ्रमभुवो भुवनाधिपत्य-

-सङ्कल्पकल्पतरवस्त्रिपुरे जयन्ति ।

एते कवित्वकुमदप्रकरावबोध-

-पूर्णेन्दवस्त्वयि जगज्जननि प्रणामाः ॥ 1 ॥

देवि स्तुतिव्यतिकरे कृतबुद्धयस्ते

वाचस्पति प्रभृतयोऽपि जडी भवन्ति ।

तस्मान्निसर्गजडिमा कतमोऽहमत्र

स्तोत्रं तव त्रिपुरतापनपत्नि कर्तुम् ॥ 2 ॥

मातस्तथापि भवतीं भवतीव्रताप-

-विच्छित्तये स्तुतिमहार्णव कर्णधारः ।

स्तोतुं भवानि स भवच्चरणारविन्द-

-भक्तिग्रहः किमपि मां मुखरी करोति ॥ 3 ॥

सूते जगन्ति भवती भवती बिभर्ति

जागर्ति तत्क्षयकृते भवती भवानि ।

मोहं भिनत्ति भवती भवती रुणद्धि

लीलायितं जयति चित्रमिदं भवत्याः ॥ 4 ॥

यस्मिन्मनागपि नवाम्बुजपत्रगौरीं

गौरीं प्रसादमधुरां दृशमादधासि ।

तस्मिन्निरन्तरमनङ्गशरावकीर्ण-

-सीमन्तिनीनयनसन्ततयः पतन्ति ॥ 5 ॥

पृथ्वीभुजोऽप्युदयनप्रभवस्य तस्य

विद्याधर प्रणति चुम्बित पादपीठः ।

तच्चक्रवर्तिपदवीप्रणयः स एषः

त्वत्पादपङ्कजरजः कणजः प्रसादः ॥ 6 ॥

त्वत्पादपङ्कजरज प्रणिपातपूर्वैः

पुण्यैरनल्पमतिभिः कृतिभिः कवीन्द्रैः ।

क्षीरक्षपाकरदुकूलहिमावदाता

कैरप्यवापि भुवनत्रितयेऽपि कीर्तिः ॥ 7 ॥

कल्पद्रुमप्रसवकल्पितचित्रपूजां

उद्दीपित प्रियतमामदरक्तगीतिम् ।

नित्यं भवानि भवतीमुपवीणयन्ति

विद्याधराः कनकशैलगुहागृहेषु ॥ 8 ॥

लक्ष्मीवशीकरणकर्मणि कामिनीनां

आकर्षणव्यतिकरेषु च सिद्धमन्त्रः ।

नीरन्ध्रमोहतिमिरच्छिदुरप्रदीपो

देवि त्वदङ्घ्रिजनितो जयति प्रसादः ॥ 9 ॥

देवि त्वदङ्घ्रिनखरत्नभुवो मयूखाः

प्रत्यग्रमौक्तिकरुचो मुदमुद्वहन्ति ।

सेवानतिव्यतिकरे सुरसुन्दरीणां

सीमन्तसीम्नि कुसुमस्तबकायितं यैः ॥ 10 ॥

मूर्ध्नि स्फुरत्तुहिनदीधितिदीप्तिदीप्तं

मध्ये ललाटममरायुधरश्मिचित्रम् ।

हृच्चक्रचुम्बि हुतभुक्कणिकानुकारि

ज्योतिर्यदेतदिदमम्ब तव स्वरूपम् ॥ 11 ॥

रूपं तव स्फुरितचन्द्रमरीचिगौरं

आलोकते शिरसि वागधिदैवतं यः ।

निःसीमसूक्तिरचनामृतनिर्झरस्य

तस्य प्रसादमधुराः प्रसरन्ति वाचः ॥ 12 ॥

सिन्दूरपांसुपटलच्छुरितामिव द्यां

त्वत्तेजसा जतुरसस्नपितामिवोर्वीम् ।

यः पश्यति क्षणमपि त्रिपुरे विहाय

व्रीडां मृडानि सुदृशस्तमनुद्रवन्ति ॥ 13 ॥

मातर्मुहूर्तमपि यः स्मरति स्वरूपं

लाक्षारसप्रसरतन्तुनिभं भवत्याः ।

ध्यायन्त्यनन्यमनसस्तमनङ्गतप्ताः

प्रद्युम्नसीम्नि सुभगत्वगुणं तरुण्यः ॥ 14 ॥

योऽयं चकास्ति गगनार्णवरत्नमिन्दुः

योऽयं सुरासुरगुरुः पुरुषः पुराणः ।

यद्वाममर्धमिदमन्धकसूदनस्य

देवि त्वमेव तदिति प्रतिपादयन्ति ॥ 15 ॥

इच्छानुरूपमनुरूपगुणप्रकर्ष

सङ्कर्षिणि त्वमभिमृश्य यदा बिभर्षि ।

जायेत स त्रिभुवनैक गुरुस्तदानीं

देवः शिवोऽपि भुवनत्रयसूत्रधारः ॥ 16 ॥

ध्यातासि हैमवति येन हिमांशुरश्मि-

-मालामलद्युतिरकल्मषमानसेन ।

तस्याविलम्बमनवद्यमनन्तकल्पं

अल्पैर्दिनैः सृजसि सुन्दरि वाग्विलासम् ॥ 17 ॥

आधारमारुतनिरोधवशेन येषां

सिन्दूररञ्जितसरोजगुणानुकारि ।

दीप्तं हृदि स्फुरति देवि वपुस्त्वदीयं

ध्यायन्ति तानिह समीहितसिद्धिसार्थाः ॥ 18 ॥

ये चिन्तयन्त्यरुणमण्डलमध्यवर्ति

रूपं तवाम्ब नवयावकपङ्कपिङ्गम् ।

तेषां सदैव कुसुमायुधबाणभिन्न-

-वक्षःस्थला मृगदृशो वशगा भवन्ति ॥ 19 ॥

त्वामैन्दवीमिव कलामनुफालदेशं

उद्भासिताम्बरतलामवलोकयन्तः ।

सद्यो भवानि सुधियः कवयो भवन्ति

त्वं भावनाहितधियां कुलकामधेनुः ॥ 20 ॥

शर्वाणि सर्वजनवन्दितपादपद्मे

पद्मच्छदद्युतिविडम्बितनेत्रलक्ष्मि ।

निष्पापमूर्तिजनमानसराजहंसि

हंसि त्वमापदमनेकविधां जनस्य ॥ 21 ॥

उत्तप्तहेमरुचिरे त्रिपुरे पुनीहि

चेतश्चिरन्तनमघौघवनं लुनीहि ।

कारागृहे निगलबन्धनयन्त्रितस्य

त्वत्संस्मृतौ झटिति मे निगलास्त्रुटन्ति ॥ 22 ॥

त्वां व्यापिनीति सुमना इति कुण्डलीति

त्वां कामिनीति कमलेति कलावतीति ।

त्वां मालिनीति ललितेत्यपराजितेति

देवि स्तुवन्ति विजयेति जयेत्युमेति ॥ 23 ॥

उद्दामकामपरमार्थसरोजखण्ड-

चण्डद्युतिद्युतिमपासितषड्विकाराम् ।

मोहद्विपेन्द्रकदनोद्यतबोधसिंह-

-लीलागुहां भगवतीं त्रिपुरां नमामि ॥ 24 ॥

गणेशवटुकस्तुता रतिसहायकामान्विता

स्मरारिवरविष्टरा कुसुमबाणबाणैर्युता ।

अनङ्गकुसुमादिभिः परिवृता च सिद्धैस्त्रिभिः

कदम्बवनमध्यगा त्रिपुरसुन्दरी पातु नः ॥ 25 ॥

रुद्राणि विद्रुममयीं प्रतिमामिव त्वां

ये चिन्तयन्त्यरुणकान्तिमनन्यरूपाम् ।

तानेत्य पक्ष्मलदृशः प्रसभं भजन्ते

कण्ठावसक्तमृदुबाहुलतास्तरुण्यः ॥ 26 ॥

त्वद्रूपैकनिरूपणप्रणयिताबन्धो दृशोस्त्वद्गुण-

-ग्रामाकर्णनरागिता श्रवणयोस्त्वत्संस्मृतिश्चेतसि ।

त्वत्पादार्चनचातुरी करयुगे त्वत्कीर्तितं वाचि मे

कुत्रापि त्वदुपासनव्यसनिता मे देवि मा शाम्यतु ॥ 27 ॥

त्वद्रूपमुल्लसितदाडिमपुष्परक्तं

उद्भावयेन्मदनदैवतमक्षरं यः ।

तं रूपहीनमपि मन्मथनिर्विशेषं

आलोकयन्त्युरुनितम्बतटास्तरुण्यः ॥ 28 ॥

ब्रह्मेन्द्ररुद्रहरिचन्द्रसहस्ररश्मि-

-स्कन्दद्विपाननहुताशनवन्दितायै ।

वागीश्वरि त्रिभुवनेश्वरि विश्वमातः

अन्तर्बहिश्च कृतसंस्थितये नमस्ते ॥ 29 ॥

कस्तोत्रमेतदनुवासरमीश्वरायाः

श्रेयस्करं पठति वा यदि वा शृणोति ।

तस्येप्सितं फलति राजभिरीड्यतेऽसौ

जायेत स प्रियतमो मदिरेक्षणानाम् ॥ 30 ॥

इति श्रीकालिदास विरचित पञ्चस्तव्यां द्वितीयः चर्चास्तवः ।