Muka Pancha Shati 5 - Mandasmita Shatakam — Sinhala Script

බධ්නීමෝ වයමඤ්ජලිං ප්රතිදිනං බන්ධච්ඡිදේ දේහිනාං

කන්දර්පාගමතන්ත්රමූලගුරවේ කල්යාණකේලීභුවේ .

කාමාක්ෂ්යා ඝනසාරපුඤ්ජරජසේ කාමද්රුහශ්චක්ෂුෂාං

මන්දාරස්තබකප්රභාමදමුෂේ මන්දස්මිතජ්යෝතිෂේ ..1..

සධ්රීචේ නවමල්ලිකාසුමනසාං නාසාග්රමුක්තාමණේ-

රාචාර්යාය මෘණාලකාණ්ඩමහසාං නෛසර්ගිකාය ද්විෂේ .

ස්වර්ධුන්යා සහ යුධ්වේන හිමරුචේරර්ධාසනාධ්යාසිනේ

කාමාක්ෂ්යාඃ ස්මිතමඤ්ජරීධවලිමාද්වෛතාය තස්මෛ නමඃ ..2..

කර්පූරද්යුතිචාතුරීමතිතරාමල්පීයසීං කුර්වතී

දෞර්භාග්යෝදයමේව සංවිදධතී දෞෂාකරීණාං ත්විෂාම් .

ක්ෂුල්ලානේව මනෝජ්ඤමල්ලිනිකරාන්ඵුල්ලානපි ව්යඤ්ජතී

කාමාක්ෂ්යා මෘදුලස්මිතාංශුලහරී කාමප්රසූරස්තු මේ ..3..

යා පීනස්තනමණ්ඩලෝපරි ලසත්කර්පූරලේපායතේ

යා නීලේක්ෂණරාත්රිකාන්තිතතිෂු ජ්යෝත්ස්නාප්රරෝහායතේ .

යා සෞන්දර්යධුනීතරඞ්ගතතිෂු ව්යාලෝලහංසායතේ

කාමාක්ෂ්යාඃ ශිශිරීකරෝතු හෘදයං සා මේ ස්මිතප්රාචුරී ..4..

යේෂාං ගච්ඡති පූර්වපක්ෂසරණිං කෞමුද්වතඃ ශ්වේතිමා

යේෂාං සන්තතමාරුරුක්ෂති තුලාකක්ෂ්යාං ශරච්චන්ද්රමාඃ .

යේෂාමිච්ඡති කම්බුරප්යසුලභාමන්තේවසත්ප්රක්රියාං

කාමාක්ෂ්යා මමතාං හරන්තු මම තේ හාසත්විෂාමඞ්කුරාඃ ..5..

ආශාසීමසු සන්තතං විදධතී නෛශාකරීං ව්යාක්රියාං

කාශානාමභිමානභඞ්ගකලනාකෞශල්යමාබිභ්රතී .

ඊශානේන විලෝකිතා සකුතුකං කාමාක්ෂි තේ කල්මෂ-

ක්ලේශාපායකරී චකාස්ති ලහරී මන්දස්මිතජ්යෝතිෂාම් ..6..

ආරූඪස්ය සමුන්නතස්තනතටීසාම්රාජ්යසිංහාසනං

කන්දර්පස්ය විභෝර්ජගත්ත්රයප්රාකට්යමුද්රානිධේඃ .

යස්යාශ්චාමරචාතුරීං කලයතේ රශ්මිච්ඡටා චඤ්චලා

සා මන්දස්මිතමඤ්ජරී භවතු නඃ කාමාය කාමාක්ෂි තේ ..7..

ශම්භෝර්යා පරිරම්භසම්භ්රමවිධෞ නෛර්මල්යසීමානිධිඃ

ගෛර්වාණීව තරඞ්ගිණී කෘතමෘදුස්යන්දාං කලින්දාත්මජාම් .

කල්මාෂීකුරුතේ කලඞ්කසුෂමාං කණ්ඨස්ථලීචුම්බිනීං

කාමාක්ෂ්යාඃ ස්මිතකන්දලී භවතු නඃ කල්යාණසන්දෝහිනී ..8..

ජේතුං හාරලතාමිව ස්තනතටීං සඤ්ජග්මුෂී සන්තතං

ගන්තුං නිර්මලතාමිව ද්විගුණිතාං මග්නා කෘපාස්ත්රෝතසි .

ලබ්ධුං විස්මයනීයතාමිව හරං රාගාකුලං කුර්වතී

මඤ්ජුස්තේ ස්මිතමඤ්ජරී භවභයං මථ්නාතු කාමාක්ෂි මේ ..9..

ශ්වේතාපි ප්රකටං නිශාකරරුචාං මාලින්යමාතන්වතී

ශීතාපි ස්මරපාවකං පශුපතේඃ සන්ධුක්ෂයන්තී සදා .

ස්වාභාව්යාදධරාශ්රිතාපි නමතාමුච්චෛර්දිශන්තී ගතිං

කාමාක්ෂි ස්ඵුටමන්තරා ස්ඵුරතු නස්ත්වන්මන්දහාසප්රභා ..10..

වක්ත්රශ්රීසරසීජලේ තරලිතභ්රූවල්ලිකල්ලෝලිතේ

කාලිම්නා දධතී කටාක්ෂජනුෂා මාධුව්රතීං ව්යාපෘතිම් .

නිර්නිද්රාමලපුණ්ඩරීකකුහනාපාණ්ඩිත්යමාබිභ්රතී

කාමාක්ෂ්යාඃ ස්මිතචාතුරී මම මනඃ කාතර්යමුන්මූලයේත් ..11..

නිත්යං බාධිතබන්ධුජීවමධරං මෛත්රීජුෂං පල්ලවෛඃ

ශුද්ධස්ය ද්විජමණ්ඩලස්ය ච තිරස්කර්තාරමප්යාශ්රිතා .

යා වෛමල්යවතී සදෛව නමතාං චේතඃ පුනීතේතරාං

කාමාක්ෂ්යා හෘදයං ප්රසාදයතු මේ සා මන්දහාසප්රභා ..12..

ද්රුහ්යන්තී තමසේ මුහුඃ කුමුදිනීසාහාය්යමාබිභ්රතී

යාන්තී චන්ද්රකිශෝරශේඛරවපුඃසෞධාඞ්ගණේ ප්රේඞ්ඛණම් .

ජ්ඤානාම්භෝනිධිවීචිකාං සුමනසාං කූලඞ්කෂාං කුර්වතී

කාමාක්ෂ්යාඃ ස්මිතකෞමුදී හරතු මේ සංසාරතාපෝදයම් ..13..

කාශ්මීරද්රවධාතුකර්දමරුචා කල්මාෂතාං බිභ්රතී

හංසෞධෛරිව කුර්වතී පරිචිතිං හාරීකෘතෛර්මෞක්තිකෛඃ .

වක්ෂෝජන්මතුෂාරශෛලකටකේ සඤ්චාරමාතන්වතී

කාමාක්ෂ්යා මෘදුලස්මිතද්යුතිමයී භාගීරථී භාසතේ ..14..

කම්බෝර්වංශපරම්පරා ඉව කෘපාසන්තානවල්ලීභුවඃ

සම්ඵුල්ලස්තබකා ඉව ප්රසෘමරා මූර්තාඃ ප්රසාදා ඉව .

වාක්පීයූෂකණා ඉව ත්රිපථගාපර්යායභේදා ඉව

භ්රාජන්තේ තව මන්දහාසකිරණාඃ කාඤ්චීපුරීනායිකේ ..15..

වක්ෂෝජේ ඝනසාරපත්රරචනාභඞ්ගීසපත්නායිතා

කණ්ඨේ මෞක්තිකහාරයෂ්ටිකිරණව්යාපාරමුද්රායිතා .

ඕෂ්ඨශ්රීනිකුරුම්බපල්ලවපුටේ ප්රේඞ්ඛත්ප්රසූනායිතා

කාමාක්ෂි ස්ඵුරතාං මදීයහෘදයේ ත්වන්මන්දහාසප්රභා ..16..

යේෂාං බින්දුරිවෝපරි ප්රචලිතෝ නාසාග්රමුක්තාමණිඃ

යේෂාං දීන ඉවාධිකණ්ඨමයතේ හාරඃ කරාලම්බනම් .

යේෂාං බන්ධුරිවෝෂ්ඨයෝරරුණිමා ධත්තේ ස්වයං රඤ්ජනං

කාමාක්ෂ්යාඃ ප්රභවන්තු තේ මම ශිවෝල්ලාසාය හාසාඞ්කුරාඃ ..17..

යා ජාඩ්යාම්බුනිධිං ක්ෂිණෝති භජතාං වෛරායතේ කෛරවෛඃ

නිත්යං යාං නියමේන යා ච යතතේ කර්තුං ත්රිණේත්රෝත්සවම් .

බිම්බං චාන්ද්රමසං ච වඤ්චයති යා ගර්වේණ සා තාදෘශී

කාමාක්ෂි ස්මිතමඤ්ජරී තව කථං ජ්යෝත්ස්නේත්යසෞ කීර්ත්යතේ ..18..

ආරුඪා රභසාත්පුරඃ පුරරිපෝරාශ්ලේෂණෝපක්රමේ

යා තේ මාතරුපෛති දිව්යතටිනීශඞ්කාකරී තත්ක්ෂණම් .

ඕෂ්ඨෞ වේපයති භ්රුවෞ කුටිලයත්යානම්රයත්යානනං

තාං වන්දේ මෘදුහාසපූරසුෂමාමේකාම්රනාථප්රියේ ..19..

වක්ත්රේන්දෝස්තව චන්ද්රිකා ස්මිතතතිර්වල්ගු ස්ඵුරන්තී සතාං

ස්යාච්චේද්යුක්තිමිදං චකෝරමනසාං කාමාක්ෂි කෞතූහලම් .

ඒතච්චිත්රමහර්නිශං යදධිකාමේෂා රුචිං ගාහතේ

බිම්බෝෂ්ඨද්යුමණිප්රභාස්වපි ච යද්බිබ්බෝකමාලම්බතේ ..20..

සාදෘශ්යං කලශාම්බුධේර්වහති යත්කාමාක්ෂි මන්දස්මිතං

ශෝභාමෝෂ්ඨරුචාම්බ විද්රුමභවාමේතාද්භිදාං බ්රූමහේ .

ඒකස්මාදුදිතං පුරා කිල පපෞ ශර්වඃ පුරාණඃ පුමාන්

ඒතන්මධ්යසමුද්භවං රසයතේ මාධුර්යරූපං රසම් ..21..

උත්තුඞ්ගස්තනකුම්භශෛලකටකේ විස්තාරිකස්තූරිකා-

පත්රශ්රීජුෂි චඤ්චලාඃ ස්මිතරුචඃ කාමාක්ෂි තේ කෝමලාඃ .

සන්ධ්යාදීධිතිරඤ්ජිතා ඉව මුහුඃ සාන්ද්රාධරජ්යෝතිෂා

ව්යාලෝලාමලශාරදාභ්රශකලව්යාපාරමාතන්වතේ ..22..

ක්ෂීරං දූරත ඒව තිෂ්ඨතු කථං වෛමල්යමාත්රාදිදං

මාතස්තේ සහපාඨවීථිමයතාං මන්දස්මිතෛර්මඤ්ජුලෛඃ .

කිං චේයං තු භිදාස්ති දෝහනවශාදේකං තු සඤ්ජායතේ

කාමාක්ෂි ස්වයමර්ථිතං ප්රණමතාමන්යත්තු දෝදුහ්යතේ ..23..

කර්පූරෛරමෘතෛර්ජගජ්ජනනි තේ කාමාක්ෂි චන්ද්රාතපෛඃ

මුක්තාහාරගුණෛර්මෘණාලවලයෛර්මුග්ධස්මිතශ්රීරියම් .

ශ්රීකාඤ්චීපුරනායිකේ සමතයා සංස්තූයතේ සජ්ජනෛඃ

තත්තාදෘඞ්මම තාපශාන්තිවිධයේ කිං දේවි මන්දායතේ ..24..

මධ්යේගර්භිතමඤ්ජුවාක්යලහරීමාධ්වීඣරීශීතලා

මන්දාරස්තබකායතේ ජනනි තේ මන්දස්මිතාංශුච්ඡටා .

යස්යා වර්ධයිතුං මුහුර්විකසනං කාමාක්ෂි කාමද්රුහෝ

වල්ගුර්වීක්ෂණවිභ්රමව්යතිකරෝ වාසන්තමාසායතේ ..25..

බිම්බෝෂ්ඨද්යුතිපුඤ්ජරඤ්ජිතරුචිස්ත්වන්මන්දහාසච්ඡටා .

කල්යාණං ගිරිසාර්වභෞමතනයේ කල්ලෝලයත්වාශු මේ .

ඵුල්ලන්මල්ලිපිනද්ධහල්ලකමයී මාලේව යා පේශලා

ශ්රීකාඤ්චීශ්වරි මාරමර්දිතුරුරෝමධ්යේ මුහුර්ලම්බතේ ..26..

බිභ්රාණා ශරදභ්රවිභ්රමදශාං විද්යෝතමානාප්යසෝ

කාමාක්ෂි ස්මිතමඤ්ජරී කිරති තේ කාරුණ්යධාරාරසම් .

ආශ්චර්යං ශිශිරීකරෝති ජගතීශ්චාලෝක්ය චෛනාමහෝ

කාමං ඛේලති නීලකණ්ඨහෘදයං කෞතූහලාන්දෝලිතම් ..27..

ප්රේඞ්ඛත්ප්රෞඪකටාක්ෂකුඤ්ජකුහරේෂ්වත්යච්ඡගුච්ඡායිතං

වක්ත්රේන්දුච්ඡවිසින්ධුවීචිනිචයේ ඵේනප්රතානායිතම් .

නෛරන්තර්යවිජෘම්භිතස්තනතටේ නෛචෝලපට්ටායිතං

කාලුෂ්යං කබලීකරෝතු මම තේ කාමාක්ෂි මන්දස්මිතම් ..28..

පීයූෂං තව මන්ථරස්මිතමිති ව්යර්ථෛව සාපප්රථා

කාමාක්ෂි ධ්රුවමීදෘශං යදි භවේදේතත්කථං වා ශිවේ .

මන්දාරස්ය කථාලවං න සහතේ මථ්නාති මන්දාකිනී-

මින්දුං නින්දති කීර්තිතේ(අ)පි කලශීපාථෝධිමීර්ෂ්යායතේ ..29..

විශ්වේෂාං නයනෝත්සවං විතනුතාං විද්යෝතතාං චන්ද්රමා

විඛ්යාතෝ මදනාන්තකේන මුකුටීමධ්යේ ච සම්මාන්යතාම් .

ආඃ කිං ජාතමනේන හාසසුෂමාමාලෝක්ය කාමාක්ෂි තේ

කාලඞ්කීමවලම්බතේ ඛලු දශාං කල්මාෂහීනෝ(අ)ප්යසෞ ..30..

චේතඃ ශීතලයන්තු නඃ පශුපතේරානන්දජීවාතවෝ

නම්රාණාං නයනාධ්වසීමසු ශරච්චන්ද්රාතපෝපක්රමාඃ .

සංසාරාඛ්යසරෝරුහාකරඛලීකාරේ තුෂාරෝත්කරාඃ

කාමාක්ෂි ස්මරකීර්තිබීජනිකරාස්ත්වන්මන්දහාසාඞ්කුරාඃ ..31..

කර්මෞඝාඛ්යතමඃකචාකචිකරාන්කාමාක්ෂි සඤ්චින්තයේ

ත්වන්මන්දස්මිතරෝචිෂාං ත්රිභුවනක්ෂේමඞ්කරානඞ්කුරාන් .

යේ වක්ත්රං ශිශිරශ්රියෝ විකසිතං චන්ද්රාතපාම්භෝරුහ-

ද්වේෂෝද්ධේෂෝණචාතුරීමිව තිරස්කර්තුං පරිෂ්කුර්වතේ ..32..

කුර්යුර්නඃ කුලශෛලරාජතනයේ කූලඞ්කෂං මඞ්ගලං

කුන්දස්පර්ධනචුඤ්චවස්තව ශිවේ මන්දස්මිතප්රක්රමාඃ .

යේ කාමාක්ෂි සමස්තසාක්ෂිනයනං සන්තෝෂයන්තීශ්වරං

කර්පූරප්රකරා ඉව ප්රසෘමරාඃ පුංසාමසාධාරණාඃ ..33..

කම්රේණ ස්නපයස්ව කර්මකුහනාචෝරේණ මාරාගම-

ව්යාඛ්යාශික්ෂණදීක්ෂිතේන විදුෂාමක්ෂීණලක්ෂ්මීපුෂා .

කාමාක්ෂි ස්මිතකන්දලේන කලුෂස්ඵෝටක්රියාචුඤ්චුනා

කාරුණ්යාමෘතවීචිකාවිහරණප්රාචුර්යධුර්යේණ මාම් ..34..

ත්වන්මන්දස්මිතකන්දලස්ය නියතං කාමාක්ෂි ශඞ්කාමහේ

බිම්බඃ කශ්චන නූතනඃ ප්රචලිතෝ නෛශාකරඃ ශීකරඃ .

කිඤ්ච ක්ෂීරපයෝනිධිඃ ප්රතිනිධිඃ ස්වර්වාහිනීවීචිකා-

බිබ්වෝකෝ(අ)පි විඩම්බ ඒව කුහනා මල්ලීමතල්ලීරුචඃ ..35..

දුෂ්කර්මාර්කනිසර්ගකර්කශමහස්සම්පර්කතපතං මිල-

ත්පඞ්කං ශඞ්කරවල්ලභේ මම මනඃ කාඤ්චීපුරාලඞ්ක්රියේ .

අම්බ ත්වන්මෘදුලස්මිතාමෘතරසේ මඞ්ක්ත්වා විධූය ව්යථා-

මානන්දෝදයසෞධශෘඞ්ගපදවීමාරෝඪුමාකාඞ්ක්ෂති ..36..

නම්රාණාං නගරාජශේඛරසුතේ නාකාලයානාං පුරඃ

කාමාක්ෂි ත්වරයා විපත්ප්රශමේන කාරුණ්යධාරාඃ කිරන් .

ආගච්ඡන්තමනුග්රහං ප්රකටයන්නානන්දබීජානි තේ

නාසීරේ මෘදුහාස ඒව තනුතේ නාථේ සුධාශීතලඃ ..37..

කාමාක්ෂි ප්රථමානවිභ්රමනිධිඃ කන්දර්පදර්පප්රසූඃ

මුග්ධස්තේ මෘදුහාස ඒව ගිරිජේ මුෂ්ණාතු මේ කිල්බිෂම් .

යං ද්රෂ්ටුං විහිතේ කරග්රහ උමේ ශම්භුස්ත්රපාමීලිතං

ස්වෛරං කාරයති ස්ම තාණ්ඩවවිනෝදානන්දිනා තණ්ඩුනා ..38..

ක්ෂුණ්ණං කේනචිදේව ධීරමනසා කුත්රාපි නානාජනෛඃ

කර්මග්රන්ථිනියන්ත්රිතෛරසුගමං කාමාක්ෂි සාමාන්යතඃ .

මුග්ධෛර්ද්රුෂ්ටුමශක්යමේව මනසා මූඪසය මේ මෞක්තිකං

මාර්ගං දර්ශයතු ප්රදීප ඉව තේ මන්දස්මිතශ්රීරියම් ..39..

ජ්යෝත්ස්නාකාන්තිභිරේව නිර්මලතරං නෛශාකරං මණ්ඩලං

හංසෛරේව ශරද්විලාසසමයේ ව්යාකෝචමම්භෝරුහම් .

ස්වච්ඡෛරේව විකස්වරෛරුඩුගුණෛඃ කාමාක්ෂි බිම්බං දිවඃ

පුණ්යෛරේව මෘදුස්මිතෛස්තව මුඛං පුෂ්ණාති ශෝභාභරම් ..40..

මානග්රන්ථිවිධුන්තුදේන රභසාදාස්වාද්යමානේ නව-

ප්රේමාඩම්බරපූර්ණිමාහිමකරේ කාමාක්ෂි තේ තත්ක්ෂණම් .

ආලෝක්ය ස්මිතචන්ද්රිකාං පුනරිමාමුන්මීලනං ජග්මුෂීං

චේතඃ ශීලයතේ චකෝරචරිතං චන්ද්රාර්ධචූඩාමණේඃ ..41..

කාමාක්ෂි ස්මිතමඤ්ජරීං තව භජේ යස්යාස්ත්විෂාමඞ්කුරා-

නාපීනස්තනපානලාලසතයා නිශ්ශඞ්කමඞ්කේශයඃ .

ඌර්ධ්වං වීක්ෂ්ය විකර්ෂති ප්රසෘමරානුද්දාමයා ශුණ්ඩයා

සූනුසුතේ බිසශඞ්කයාශු කුහනාදන්තාවලග්රාමණීඃ ..42..

ගාඪාශ්ලේෂවිමර්දසම්භ්රමවශාදුද්දාමමුක්තාගුණ-

ප්රාලම්බේ කුචකුම්භයෝර්විගලිතේ දක්ෂද්විෂෝ වක්ෂසි .

යා සඛ්යේන පිනහ්යති ප්රචුරයා භාසා තදීයාං දශාං

සා මේ ඛේලතු කාමකෝටි හෘදයේ සාන්ද්රස්මිතාංශුච්ඡටා ..43..

මන්දාරේ තව මන්ථරස්මිතරුචාං මාත්සර්යමාලෝක්යතේ

කාමාක්ෂි ස්මරශාසනේ ච නියතෝ රාගෝදයෝ ලක්ෂ්යතේ .

චාන්ද්රීෂු ද්යුතිමඤ්ජරීෂු ච මහාන්ද්වේෂාඞ්කුරෝ දෘශ්යතේ

ශුද්ධානාං කථමීදෘශී ගිරිසුතේ(අ)තිශුද්ධා දශා කථ්යතාම් ..44..

පීයූෂං ඛලු පීයතේ සුරජනෛර්දුග්ධාම්බුධිර්මථ්යතේ

මාහේශෛශ්ච ජටාකලාපනිගඩෛර්මන්දාකිනී නහ්යතේ .

ශීතාංශුඃ පරිභූයතේ ච තමසා තස්මාදනේතාදෘශී

කාමාක්ෂි ස්මිතමඤ්ජරී තව වචෝවෛදග්ධ්යමුල්ලඞ්ඝතේ ..45..

ආශඞ්කේ තව මන්දහාසලහරීමන්යාදෘශීං චන්ද්රිකා-

මේකාම්රේශකුටුම්බිනි ප්රතිපදං යස්යාඃ ප්රභාසඞ්ගමේ .

වක්ෂෝජාම්බුරුහේ න තේ රචයතඃ කාඤ්චිද්දශාං කෞඞ්මලී-

මාස්යාම්භෝරුහමම්බ කිඤ්ච ශනකෛරාලම්බතේ ඵුල්ලතාම් ..46..

ආස්තීර්ණාධරකාන්තිපල්ලවචයේ පාතං මුහුර්ජග්මුෂී

මාරද්රෝහිණි කන්දලත්ස්මරශරජ්වාලාවලීර්ව්යඤ්ජතී .

නින්දන්තී ඝනසාරහාරවලයජ්යෝත්ස්නාමෘණාලානි තේ

කාමාක්ෂි ස්මිතචාතුරී විරහිණීරීතිං ජගාහේතරාම් ..47..

සූර්යාලෝකවිධෞ විකාසමධිකං යාන්තී හරන්තී තම-

ස්සන්දෝහං නමතාං නිජස්මරණතෝ දෝෂාකරද්වේෂිණී .

නිර්යාන්තී වදනාරවින්දකුහරාන්නිර්ධූතජාඩ්යා නෘණාං

ශ්රීකාමාක්ෂි තව ස්මිතද්යුතිමයී චිත්රීයතේ චන්ද්රිකා ..48..

කුණ්ඨීකුර්යුරමී කුබෝධඝටනාමස්මන්මනෝමාථිනීං

ශ්රීකාමාක්ෂි ශිවඞ්කරාස්තව ශිවේ ශ්රීමන්දහාසාඞ්කුරාඃ .

යේ තන්වන්ති නිරන්තරං තරුණිමස්තම්බේරමග්රාමණී-

කුම්භද්වන්ද්වවිඩම්බිනි ස්තනතටේ මුක්තාකුථාඩම්බරම් ..49..

ප්රේඞ්ඛන්තඃ ශරදම්බුදා ඉව ශනෛඃ ප්රේමානිලෛඃ ප්රේරිතා

මජ්ජන්තෝ මන්දනාරිකණ්ඨසුෂමාසින්ධෞ මුහුර්මන්ථරම් .

ශ්රීකාමාක්ෂි තව ස්මිතාංශුනිකරාඃ ශ්යාමායමානශ්රියෝ

නීලාම්භෝධරනෛපුණීං තත ඉතෝ නිර්නිද්රයන්ත්යඤ්ජසා ..50..

ව්යාපාරං චතුරානනෛකවිහෘතෞ ව්යාකුර්වතී කුර්වතී

රුද්රාක්ෂග්රහණං මහේශි සතතං වාගූර්මිකල්ලෝලිතා .

උත්ඵුල්ලං ධවලාරවින්දමධරීකෘත්ය ස්ඵුරන්තී සදා

ශ්රීකාමාක්ෂි සරස්වතී විජයතේ ත්වන්මන්දහාසප්රභා ..51..

කර්පූරද්යුතිතස්කරේණ මහසා කල්මාෂයත්යානනං

ශ්රීකාඤ්චීපුරනායිකේ පතිරිව ශ්රීමන්දහාසෝ(අ)පි තේ .

ආලිඞ්ගත්යතිපීවරාං ස්තනතටීං බිම්බාධරං චුම්බති

ප්රෞඪං රාගභරං ව්යනක්ති මනසෝ ධෛර්යං ධුනීතේතරාම් ..52..

වෛශද්යේන ච විශ්වතාපහරණක්රීඩාපටීයස්තයා

පාණ්ඩිත්යේන පචේලිමේන ජගතාං නේත්රෝත්සවෝත්පාදේන .

කාමාක්ෂි ස්මිතකන්දලෛස්තව තුලාමාරෝඪුමුද්යෝගිනී

ජ්යෝත්ස්නාසෞ ජලරාශිපෝෂණතයා දූෂ්යාං ප්රපන්නා දශාම් ..53..

ලාවණ්යාම්බුජිනීමෘණාලවලයෛඃ ශෘඞ්ගාරගන්ධද්විප-

ග්රාමණ්යඃ ශ්රුතිචාමරෛස්තරුණිමස්වාරාජ්යතේජෝඞ්කුරෛඃ .

ආනන්දාමෘතසින්ධුවීචිපෘෂතෛරාස්යාබ්ජහංසෛස්තව

ශ්රීකාමාක්ෂි මථාන මන්දහසිතෛර්මත්කං මනඃකල්මෂම් ..54..

උත්තුඞ්ගස්තනමණ්ඩලීපරිචලන්මාණික්යහාරච්ඡටා-

චඤ්චච්ඡෝණිමපුඤ්ජමධ්යසරණිං මාතඃ පරිෂ්කුර්වතී .

යා වෛදග්ධ්යමුපෛති ශඞ්කරජටාකාන්තාරවාටීපත-

ත්ස්වර්වාපීපයසඃ ස්මිතද්යුතිරසෞ කාමාක්ෂි තේ මඤ්ජුලා ..55..

සන්නාමෛකජුෂා ජනේන සුලභං සංසූචයන්තී ශනෛ-

රුත්තුඞ්ගස්ය චිරාදනුග්රහතරෝරුත්පත්ස්යමානං ඵලම් .

ප්රාථම්යේන විකස්වරා කුසුමවත්ප්රාගල්භ්යමභ්යේයුෂී

කාමාක්ෂි ස්මිතචාතුරී තව මම ක්ෂේමඞ්කරී කල්පතාම් ..56..

ධානුෂ්කාග්රසරස්ය ලෝලකුටිලභ්රූලේඛයා බිභ්රතෝ

ලීලාලෝකශිලීමුඛං නවවයස්සාම්රාජ්යලක්ෂ්මීපුෂඃ .

ජේතුං මන්මථමර්දිනං ජනනි තේ කාමාක්ෂි හාසඃ ස්වයං

වල්ගුර්විභ්රමභූභෘතෝ විතනුතේ සේනාපතිප්රක්රියාම් ..57..

යන්නාකම්පත කාලකූටකබලීකාරේ චුචුම්බේ න යද්-

ග්ලාන්යා චක්ෂුෂි රූෂිතානලශිඛේ රුද්රස්ය තත්තාදෘශම් .

චේතෝ යත්ප්රසභං ස්මරජ්වරශිඛිජ්වාලේන ලේලිහ්යතේ

තත්කාමාක්ෂි තව ස්මිතාංශුකලිකාහේලාභවං ප්රාභවම් ..58..

සම්භින්නේව සුපර්වලෝකතටිනී වීචීචයෛර්යාමුනෛඃ

සම්මිශ්රේව ශශාඞ්කදීප්තිලහරී නීලෛර්මහානීරදෛඃ .

කාමාක්ෂි ස්ඵුරිතා තව ස්මිතරුචිඃ කාලාඤ්ජනස්පර්ධිනා

කාලිම්නා කචරෝචිෂාං ව්යතිකරේ කාඤ්චිද්දශාමශ්නුතේ ..59..

ජානීමෝ ජගදීශ්වරප්රණයිනි ත්වන්මන්දහාසප්රභාං

ශ්රීකාමාක්ෂි සරෝජිනීමභිනවාමේෂා යතඃ සර්වදා .

ආස්යේන්දෝරවලෝකේන පශුපතේරභ්යේති සම්ඵුල්ලතාං

තන්ද්රාලුස්තදභාව ඒව තනුතේ තද්වෛපරීත්යක්රමම් ..60..

යාන්තී ලෝහිතිමානමභ්රතටිනී ධාතුච්ඡටාකර්දමෛඃ

භාන්තී බාලගභස්තිමාලිකිරණෛර්මේඝාවලී ශාරදී .

බිම්බෝෂ්ඨද්යුතිපුඤ්ජචුම්බනකලාශෝණායමානේන තේ

කාමාක්ෂි ස්මිතරෝචිෂා සමදශාමාරෝඪුමාකාඞ්ක්ෂතේ ..61..

ශ්රීකාමාක්ෂි මුඛේන්දුභූෂණමිදං මන්දස්මිතං තාවකං

නේත්රානන්දකරං තථා හිමකරෝ ගච්ඡේද්යථා තිග්මතාම් .

ශීතං දේවි තථා යථා හිමජලං සන්තාපමුද්රාස්පදං

ශ්වේතං කිඤ්ච තථා යථා මලිනතාං ධත්තේ ච මුක්තාමණිඃ ..62..

ත්වන්මන්දස්මිතමඤ්ජරීං ප්රසෘමරාං කාමාක්ෂි චන්ද්රාතපං

සන්තඃ සන්තතමාමනන්ත්යමලතා තල්ලක්ෂණං ලක්ෂ්යතේ .

අස්මාකං න ධුනෝති තාපකමධිකං ධූනෝති නාභ්යන්තරං

ධ්වාන්තං තත්ඛලු දුඃඛිනෝ වයමිදං කේනෝති නෝ විද්මහේ ..63..

නම්රස්ය ප්රණයප්රරූඪකලහච්ඡේදාය පාදාබ්ජයෝඃ

මන්දං චන්ද්රකිශෝරශේඛරමණේඃ කාමාක්ෂි රාගේණ තේ .

බන්ධූකප්රසවශ්රියං ජිතවතෝ බංහීයසීං තාදෘශීං

බිම්බෝෂ්ඨස්ය රුචිං නිරස්ය හසිතජ්යෝත්ස්නා වයස්යායතේ ..64..

මුක්තානාං පරිමෝචනං විදධතස්තත්ප්රීතිනිෂ්පාදිනී

භූයෝ දූරත ඒව ධූතමරුතස්තත්පාලනං තන්වතී .

උද්භූතස්ය ජලාන්තරාදවිරතං තද්දූරතාං ජග්මුෂී

කාමාක්ෂි ස්මිතමඤ්ජරී තව කථං කම්බෝස්තුලාමශ්නුතේ ..65..

ශ්රීකාමාක්ෂි තව ස්මිතද්යුතිඣරීවෛදග්ධ්යලීලායිතං

පශ්යන්තෝ(අ)පි නිරන්තරං සුවිමලම්මන්යා ජගන්මණ්ඩලේ .

ලෝකං හාසයිතුං කිමර්ථමනිශං ප්රාකාශ්යමාතන්වතේ

මන්දාක්ෂං විරහය්ය මඞ්ගලතරං මන්දාරචන්ද්රාදයඃ ..66..

ක්ෂීරාබ්ධේරපි ශෛලරාජතනයේ ත්වන්මන්දහාසස්ය ච

ශ්රීකාමාක්ෂි වලක්ෂිමෝදයනිධේඃ කිඤ්චිද්භිදාං බ්රූමහේ .

ඒකස්මෛ පුරුෂාය දේවි ස දදෞ ලක්ෂ්මීං කදාචිත්පුරා

සර්වේභ්යෝ(අ)පි දදාත්යසෞ තු සතතං ලක්ෂ්මීං ච වාගීශ්වරීම් ..67..

ශ්රීකාඤ්චීපුරරත්නදීපකලිකේ තාන්යේව මේනාත්මජේ

චාකෝරාණි කුලානි දේවි සුතරාං ධන්යානි මන්යාමහේ .

කම්පාතීරකුටුම්බචඞ්ක්රමකලාචුඤ්චූනි චඤ්චූපුටෛඃ

නිත්යං යානි තව ස්මිතේන්දුමහසාමාස්වාදමාතන්වතේ ..68..

ශෛත්යප්රක්රමමාශ්රිතෝ(අ)පි නමතාං ජාඩ්යප්රථාං ධූනයන්

නෛර්මල්යං පරමං ගතෝ(අ)පි ගිරිශං රාගාකුලං චාරයන් .

ලීලාලාපපුරස්සරෝ(අ)පි සතතං වාචංයමාන්ප්රීණයන්

කාමාක්ෂි ස්මිතරෝචිෂාං තව සමුල්ලාසඃ කථං වර්ණ්යතේ ..69..

ශ්රෝණීචඤ්චලමේඛලාමුඛරිතං ලීලාගතං මන්ථරං

භ්රූවල්ලීචලනං කටාක්ෂවලනං මන්දාක්ෂවීක්ෂාචණම් .

යද්වෛදග්ධ්යමුඛේන මන්මථරිපුං සම්මෝහයන්ත්යඤ්ජසා

ශ්රීකාමාක්ෂි තව ස්මිතාය සතතං තස්මෛ නම්සකුර්මහේ ..70..

ශ්රීකාමාක්ෂි මනෝජ්ඤමන්දහසිතජ්යෝතිෂ්ප්රරෝහේ තව

ස්ඵීතශ්වේතිමසාර්වභෞමසරණිප්රාගල්භ්යමභ්යේයුෂි .

චන්ද්රෝ(අ)යං යුවරාජතාං කලයතේ චේටීධුරං චන්ද්රිකා

ශුද්ධා සා ච සුධාඣරී සහචරීසාධර්ම්යමාලම්බතේ ..71..

ජ්යෝත්ස්නා කිං තනුතේ ඵලං තනුමතාමෞෂ්ණ්යප්රශාන්තිං විනා

ත්වන්මන්දස්මිතරෝචිෂා තනුමතාං කාමාක්ෂි රෝචිෂ්ණුනා .

සන්තාපෝ විනිවාර්යතේ නවවයඃප්රාචුර්යමඞ්කූර්යතේ

සෞන්දර්යං පරිපූර්යතේ ජගති සා කීර්තිශ්ච සඤ්චාර්යතේ ..72..

වෛමල්යං කුමුදශ්රියාං හිමරුචඃ කාන්ත්යෛව සන්ධුක්ෂ්යතේ

ජ්යෝත්ස්නාරෝචිරපි ප්රදෝෂසමයං ප්රාප්යෛව සම්පද්යතේ .

ස්වච්ඡත්වං නවමෞක්තිකස්ය පරමං සංස්කාරතෝ දෘශ්යතේ

කාමාක්ෂ්යාඃ ස්මිතදීධිතේර්විශදිමා නෛසර්ගිකෝ භාසතේ ..73..

ප්රාකාශ්යං පරමේශ්වරප්රණයිනි ත්වන්මන්දහාසශ්රියඃ

ශ්රීකාමාක්ෂි මම ක්ෂිණෝතු මමතාවෛචක්ෂණීමක්ෂයාම් .

යද්භීත්යේව නිලීයතේ හිමකරෝ මේඝෝදරේ ශුක්තිකා-

ගර්භේ මෞක්තිකමණ්ඩලී ච සරසීමධ්යේ මෘණාලී ච සා ..74..

හේරම්බේ ච ගුහේ හර්ෂභරිතං වාත්සල්යමඞ්කූරයත්

මාරද්රෝහිණි පූරුෂේ සහභුවං ප්රේමාඞ්කුරං ව්යඤ්ජයත් .

ආනම්රේෂු ජනේෂු පූර්ණකරුණාවෛදග්ධ්යමුත්තාලයත්

කාමාක්ෂි ස්මිතමඤ්ජසා තව කථඞ්කාරං මයා කථ්යතේ ..75..

සඞ්ක්රුද්ධද්විජරාජකෝ(අ)ප්යවිරතං කුර්වන්ද්විජෛඃ සඞ්ගමං

වාණීපද්ධතිදූරගෝ(අ)පි සතතං තත්සාහචර්යං වහන් .

අශ්රාන්තං පශුදුර්ලභෝ(අ)පි කලයන්පත්යෞ පශූනාං රතිං

ශ්රීකාමාක්ෂි තව ස්මිතාමෘතරසස්යන්දෝ මයි ස්පන්දතාම් ..76..

ශ්රීකාමාක්ෂි මහේශ්වරේ නිරුපමප්රේමාඞ්කුරප්රක්රමමං

නිත්යං යඃ ප්රකටීකරෝති සහජාමුන්නිද්රයන්මාධුරීම් .

තත්තාදෘක්තව මන්දහාසමහිමා මාතඃ කථං මානිතාං

තන්මූර්ධ්නා සුරනිම්නගාං ච කලිකාමින්දෝශ්ච තාං නින්දති ..77..

යේ මාධුර්යවිහාරමණ්ටපභුවෝ යේ ශෛත්යමුද්රාකරා

යේ වෛශද්යදශාවිශේෂසුභගාස්තේ මන්දහාසාඞ්කුරාඃ .

කාමාක්ෂ්යාඃ සහජං ගුණත්රයමිදං පර්යායතඃ කුර්වතාං

වාණීගුම්ඵනඩම්බරේ ච හෘදයේ කීර්තිප්රරෝහේ ච මේ ..78..

කාමාක්ෂ්යා මෘදුලස්මිතාංශුනිකරා දක්ෂාන්තකේ වීක්ෂණේ

මන්දාක්ෂග්රහිලා හිමද්යුතිමයූඛාක්ෂේපදීක්ෂාඞ්කුරාඃ .

දාක්ෂ්යං පක්ෂ්මලයන්තු මාක්ෂිකගුඩද්රාක්ෂාභවං වාක්ෂු මේ

සූක්ෂ්මං මෝක්ෂපථං නිරීක්ෂිතුමපි ප්රක්ෂාලයේයුර්මනඃ ..79..

ජාත්යා ශීතශීතලානි මධුරාණ්යේතානි පූතානි තේ

ගාඞ්ගානීව පයාංසි දේවි පටලාන්යල්පස්මිතජ්යෝතිෂාම් .

ඒනඃපඞ්කපරම්පරාමලිනිතාමේකාම්රනාථප්රියේ

ප්රජ්ඤානාත්සුතරාං මදීයධිෂණාං ප්රක්ෂාලයන්තු ක්ෂණාත් ..80..

අශ්රාන්තං පරතන්ත්රිතඃ පශුපතිස්ත්වන්මන්දහාසාඞ්කුරෛඃ

ශ්රීකාමාක්ෂි තදීයවර්ණසමතාසඞ්ගේන ශඞ්කාමහේ .

ඉන්දුං නාකධුනීං ච ශේඛරයතේ මාලාං ච ධත්තේ නවෛඃ

වෛකුණ්ඨෛරවකුණ්ඨනං ච කුරුතේ ධූලීචයෛර්භාස්මනෛඃ ..81..

ශ්රීකාඤ්චීපුරදේවතේ මෘදුවචස්සෞරභ්යමුද්රාස්පදං

ප්රෞඪප්රේමලතානවීනකුසුමං මන්දස්මිතං තාවකම් .

මන්දං කන්දලති ප්රියස්ය වදනාලෝකේ සමාභාෂණේ

ශ්ලක්ෂ්ණේ කුඞ්මලති ප්රරූඪපුලකේ චාශ්ලෝෂණේ ඵුල්ලති ..82..

කිං ත්රෛස්රෝතසමම්බිකේ පරිණතං ස්රෝතශ්චතුර්ථං නවං

පීයූෂස්ය සමස්තතාපහරණං කිංවා ද්විතීයං වපුඃ .

කිංස්විත්ත්වන්නිකටං ගතං මධුරිමාභ්යාසාය ගව්යං පයඃ

ශ්රීකාඤ්චීපුරනායකප්රියතමේ මන්දස්මිතං තාවකම් ..83..

භූෂා වක්ත්රසරෝරුහස්ය සහජා වාචාං සඛී ශාශ්වතී

නීවී විභ්රමසන්තතේඃ පශුපතේඃ සෞධී දෘශාං පාරණා .

ජීවාතුර්මදනශ්රියඃ ශශිරුචේරුච්චාටනී දේවතා

ශ්රීකාමාක්ෂි ගිරාමභූමිමයතේ හාසප්රභාමඤ්ජරී ..84..

සූතිඃ ශ්වේතිමකන්දලස්ය වසතිඃ ශෘඞ්ගාරසාරශ්රියඃ

පූර්තිඃ සූක්තිඣරීරසස්ය ලහරී කාරුණ්යපාථෝනිධේඃ .

වාටී කාචන කෞසුමී මධුරිමස්වාරාජ්යලක්ෂ්ම්යාස්තව

ශ්රීකාමාක්ෂි මමාස්තු මඞ්ගලකරී හාසප්රභාචාතුරී ..85..

ජන්තූනාං ජනිදුඃඛමෘත්යුලහරීසන්තාපනං කෘන්තතඃ

ප්රෞඪානුග්රහපූර්ණශීතලරුචෝ නිත්යෝදයං බිභ්රතඃ .

ශ්රීකාමාක්ෂි විසෘත්වරා ඉව කරා හාසාඞ්කුරාස්තේ හඨා-

දාලෝකේන නිහන්යුරන්ධතමසස්තෝමස්ය මේ සන්තතිම් ..86..

උත්තුඞ්ගස්තනමණ්ඩලස්ය විලසල්ලාවණ්යලීලානටී-

රඞ්ගස්ය ස්ඵුටමූර්ධ්වසීමනි මුහුඃ ප්රාකාශ්යමභ්යේයුෂී .

ශ්රීකාමාක්ෂි තව ස්මිතද්යුතිතතිර්බිම්බෝෂ්ඨකාන්ත්යඞ්කුරෛඃ

චිත්රාං විද්රුමමුද්රිතාං විතනුතේ මෞක්තීං විතානශ්රියම් ..87..

ස්වාභාව්යාත්තව වක්ත්රමේව ලලිතං සන්තෝෂසම්පාදනං

ශම්භෝඃ කිං පුනරඤ්චිතස්මිතරුචඃ පාණ්ඩිත්යපාත්රීකෘතම් .

අම්භෝජං ස්වත ඒව සර්වජගතාං චක්ෂුඃප්රියම්භාවුකං

කාමාක්ෂි ස්ඵුරිතේ ශරද්විකසිතේ කීදෘග්විධං භ්රාජතේ ..88..

පුම්භිර්නිර්මලමානසෞර්විදධතේ මෛත්රීං දෘඪං නිර්මලාං

ලබ්ධ්වා කර්මලයං ච නිර්මලතරාං කීර්තිං ලභන්තේතරාම් .

සූක්තිං පක්ෂ්මලයන්ති නිර්මලතමාං යත්තාවකාඃ සේවකාඃ

තත්කාමාක්ෂි තව ස්මිතස්ය කලයා නෛර්මල්යසීමානිධේඃ ..89..

ආකර්ෂන්නයනානි නාකිසදසාං ශෛත්යේන සංස්තම්භය-

න්නින්දුං කිඤ්ච විමෝහයන්පශුපතිං විශ්වාර්තිමුච්චාටයන් .

හිංසත්සංසෘතිඩම්බරං තව ශිවේ හාසාහ්වයෝ මාන්ත්රිකඃ

ශ්රීකාමාක්ෂි මදීයමානසතමෝවිද්වේෂණේ චේෂ්ටතාම් ..90..

ක්ෂේපීයඃ ක්ෂපයන්තු කල්මෂභයාන්යස්මාකමල්පස්මිත-

ජ්යෝතිර්මණ්ඩලචඞ්ක්රමාස්තව ශිවේ කාමාක්ෂි රෝචිෂ්ණවඃ .

පීඩාකර්මඨකර්මඝර්මසමයව්යාපාරතාපානල-

ශ්රීපාතා නවහර්ෂවර්ෂණසුධාස්රෝතස්විනීශීකරාඃ ..91..

ශ්රීකාමාක්ෂි තව ස්මිතෛන්දවමහඃපූරේ පරිම්ඵූර්ජති

ප්රෞඪාං වාරිධිචාතුරීං කලයතේ භක්තාත්මනාං ප්රාතිභම් .

දෞර්ගත්යප්රසරාස්තමඃපටලිකාසාධර්ම්යමාබිභ්රතේ

සර්වං කෛරවසාහචර්යපදවීරීතිං විධත්තේ පරම් ..92..

මන්දාරාදිෂු මන්මථාරිමහිෂි ප්රාකාශ්යරීතිං නිජාං

කාදාචිත්කතයා විශඞ්ක්ය බහුශෝ වෛශද්යමුද්රාගුණඃ .

සාතත්යේන තව ස්මිතේ විතනුතේ ස්වෛරාසනාවාසනාම් ..93..

ඉන්ධානේ භවවීතිහෝත්රනිවහේ කර්මෞඝචණ්ඩානිල-

ප්රෞඪිම්නා බහුලීකෘතේ නිපතිතං සන්තාපචින්තාකුලම් .

මාතර්මාං පරිෂිඤ්ච කිඤ්චිදමලෛඃ පීයූෂවර්ෂෛරිව

ශ්රීකාමාක්ෂි තව ස්මිතද්යුතිකණෛඃ ශෛශිර්යලීලාකරෛඃ ..94..

භාෂායා රසනාග්රඛේලනජුෂඃ ශෘඞ්ගාරමුද්රාසඛී-

ලීලාජාතරතේඃ සුඛේන නියමස්නානාය මේනාත්මජේ .

ශ්රීකාමාක්ෂි සුධාමයීව ශිශිරා ස්රෝතස්විනී තාවකී

ගාඪානන්දතරඞ්ගිතා විජයතේ හාසප්රභාචාතුරී ..95..

සන්තාපං විරලීකරෝතු සකලං කාමාක්ෂි මච්චේතනා

මජ්ජන්තී මධුරස්මිතාමරධුනීකල්ලෝලජාලේෂු තේ .

නෛරන්තර්යමුපේත්ය මන්මථමරුල්ලෝලේෂු යේෂු ස්ඵුටං

ප්රේමේන්දුඃ ප්රතිබිම්බිතෝ විතනුතේ කෞතූහලං ධූර්ජටේඃ ..96..

චේතඃක්ෂීරපයෝධිමන්ථරචලද්රාගාඛ්යමන්ථාචල-

ක්ෂෝභව්යාපෘතිසම්භවාං ජනනි තේ මන්දස්මිතශ්රීසුධාම් .

ස්වාදංස්වාදමුදීතකෞතුකරසා නේත්රත්රයී ශාඞ්කරී

ශ්රීකාමාක්ෂි නිරන්තරං පරිණමත්යානන්දවීචීමයී ..97..

ආලෝකේ තව පඤ්චසායකරිපෝරුද්දාමකෞතූහල-

ප්රේඞ්ඛන්මාරුතඝට්ටනප්රචලිතාදානන්දදුග්ධාම්බුධේඃ .

කාචිද්වීචිරුදඤ්චති ප්රතිනවා සංවිත්ප්රරෝහාත්මිකා

තාං කාමාක්ෂි කවීශ්වරාඃ ස්මිතමිති ව්යාකුර්වතේ සර්වදා ..98..

සූක්තිඃ ශීලයතේ කිමද්රිතනයේ මන්දස්මිතාත්තේ මුහුඃ

මාධුර්යාගමසම්ප්රදායමථවා සූක්තේර්නු මන්දස්මිතම් .

ඉත්ථං කාමපි ගාහතේ මම මනඃ සන්දේහමාර්ගභ්රමිං

ශ්රීකාමාක්ෂි න පාරමාර්ථ්යසරණිස්ඵූර්තෞ නිධත්තේ පදම් ..99..

ක්රීඩාලෝලකෘපාසරෝරුහමුඛීසෞධාඞ්ගණේභ්යඃ කවි-

ශ්රේණීවාක්පරිපාටිකාමෘතඣරීසූතීගෘහේභ්යඃ ශිවේ .

නිර්වාණාඞ්කුරසාර්වභෞමපදවීසිංහාසනේභ්යස්තව

ශ්රීකාමාක්ෂි මනෝජ්ඤමන්දහසිතජ්යෝතිෂ්කණේභ්යෝ නමඃ ..100..

ආර්යාමේව විභාවයන්මනසි යඃ පාදාරවින්දං පුරඃ

පශ්යන්නාරභතේ ස්තුතිං ස නියතං ලබ්ධ්වා කටාක්ෂච්ඡවිම් .

කාමාක්ෂ්යා මෘදුලස්මිතාංශුලහරීජ්යෝත්ස්නාවයස්යාන්විතාම්

ආරෝහත්යපවර්ගසෞධවලභීමානන්දවීචීමයීම් ..101..

.. ඉති මන්දස්මිතශතකං සම්පූර්ණම් ..

.. ඉති ශ්රී මූකපඤ්චශතී සම්පූර්ණා ..

..ඖං තත් සත් ..

Roman (IAST) Transliteration

badhnīmo vayamañjaliṃ pratidinaṃ bandhacchide dehināṃ

kandarpāgamatantramūlagurave kalyāṇakelībhuve |

kāmākṣyā ghanasārapuñjarajase kāmadruhaścakṣuṣāṃ

mandārastabakaprabhāmadamuṣe mandasmitajyotiṣe ||1||

sadhrīce navamallikāsumanasāṃ nāsāgramuktāmaṇe-

rācāryāya mṛṇālakāṇḍamahasāṃ naisargikāya dviṣe |

svardhunyā saha yudhvena himarucerardhāsanādhyāsine

kāmākṣyāḥ smitamañjarīdhavalimādvaitāya tasmai namaḥ ||2||

karpūradyuticāturīmatitarāmalpīyasīṃ kurvatī

daurbhāgyodayameva saṃvidadhatī dauṣākarīṇāṃ tviṣām |

kṣullāneva manojñamallinikarānphullānapi vyañjatī

kāmākṣyā mṛdulasmitāṃśulaharī kāmaprasūrastu me ||3||

yā pīnastanamaṇḍalopari lasatkarpūralepāyate

yā nīlekṣaṇarātrikāntitatiṣu jyotsnāprarohāyate |

yā saundaryadhunītaraṅgatatiṣu vyālolahaṃsāyate

kāmākṣyāḥ śiśirīkarotu hṛdayaṃ sā me smitaprācurī ||4||

yeṣāṃ gacchati pūrvapakṣasaraṇiṃ kaumudvataḥ śvetimā

yeṣāṃ santatamārurukṣati tulākakṣyāṃ śaraccandramāḥ |

yeṣāmicchati kamburapyasulabhāmantevasatprakriyāṃ

kāmākṣyā mamatāṃ harantu mama te hāsatviṣāmaṅkurāḥ ||5||

āśāsīmasu santataṃ vidadhatī naiśākarīṃ vyākriyāṃ

kāśānāmabhimānabhaṅgakalanākauśalyamābibhratī |

īśānena vilokitā sakutukaṃ kāmākṣi te kalmaṣa-

kleśāpāyakarī cakāsti laharī mandasmitajyotiṣām ||6||

ārūḍhasya samunnatastanataṭīsāmrājyasiṃhāsanaṃ

kandarpasya vibhorjagattrayaprākaṭyamudrānidheḥ |

yasyāścāmaracāturīṃ kalayate raśmicchaṭā cañcalā

sā mandasmitamañjarī bhavatu naḥ kāmāya kāmākṣi te ||7||

śambhoryā parirambhasambhramavidhau nairmalyasīmānidhiḥ

gairvāṇīva taraṅgiṇī kṛtamṛdusyandāṃ kalindātmajām |

kalmāṣīkurute kalaṅkasuṣamāṃ kaṇṭhasthalīcumbinīṃ

kāmākṣyāḥ smitakandalī bhavatu naḥ kalyāṇasandohinī ||8||

jetuṃ hāralatāmiva stanataṭīṃ sañjagmuṣī santataṃ

gantuṃ nirmalatāmiva dviguṇitāṃ magnā kṛpāstrotasi |

labdhuṃ vismayanīyatāmiva haraṃ rāgākulaṃ kurvatī

mañjuste smitamañjarī bhavabhayaṃ mathnātu kāmākṣi me ||9||

śvetāpi prakaṭaṃ niśākararucāṃ mālinyamātanvatī

śītāpi smarapāvakaṃ paśupateḥ sandhukṣayantī sadā |

svābhāvyādadharāśritāpi namatāmuccairdiśantī gatiṃ

kāmākṣi sphuṭamantarā sphuratu nastvanmandahāsaprabhā ||10||

vaktraśrīsarasījale taralitabhrūvallikallolite

kālimnā dadhatī kaṭākṣajanuṣā mādhuvratīṃ vyāpṛtim |

nirnidrāmalapuṇḍarīkakuhanāpāṇḍityamābibhratī

kāmākṣyāḥ smitacāturī mama manaḥ kātaryamunmūlayet ||11||

nityaṃ bādhitabandhujīvamadharaṃ maitrījuṣaṃ pallavaiḥ

śuddhasya dvijamaṇḍalasya ca tiraskartāramapyāśritā |

yā vaimalyavatī sadaiva namatāṃ cetaḥ punītetarāṃ

kāmākṣyā hṛdayaṃ prasādayatu me sā mandahāsaprabhā ||12||

druhyantī tamase muhuḥ kumudinīsāhāyyamābibhratī

yāntī candrakiśoraśekharavapuḥsaudhāṅgaṇe preṅkhaṇam |

jñānāmbhonidhivīcikāṃ sumanasāṃ kūlaṅkaṣāṃ kurvatī

kāmākṣyāḥ smitakaumudī haratu me saṃsāratāpodayam ||13||

kāśmīradravadhātukardamarucā kalmāṣatāṃ bibhratī

haṃsaudhairiva kurvatī paricitiṃ hārīkṛtairmauktikaiḥ |

vakṣojanmatuṣāraśailakaṭake sañcāramātanvatī

kāmākṣyā mṛdulasmitadyutimayī bhāgīrathī bhāsate ||14||

kamborvaṃśaparamparā iva kṛpāsantānavallībhuvaḥ

samphullastabakā iva prasṛmarā mūrtāḥ prasādā iva |

vākpīyūṣakaṇā iva tripathagāparyāyabhedā iva

bhrājante tava mandahāsakiraṇāḥ kāñcīpurīnāyike ||15||

vakṣoje ghanasārapatraracanābhaṅgīsapatnāyitā

kaṇṭhe mauktikahārayaṣṭikiraṇavyāpāramudrāyitā |

oṣṭhaśrīnikurumbapallavapuṭe preṅkhatprasūnāyitā

kāmākṣi sphuratāṃ madīyahṛdaye tvanmandahāsaprabhā ||16||

yeṣāṃ bindurivopari pracalito nāsāgramuktāmaṇiḥ

yeṣāṃ dīna ivādhikaṇṭhamayate hāraḥ karālambanam |

yeṣāṃ bandhurivoṣṭhayoraruṇimā dhatte svayaṃ rañjanaṃ

kāmākṣyāḥ prabhavantu te mama śivollāsāya hāsāṅkurāḥ ||17||

yā jāḍyāmbunidhiṃ kṣiṇoti bhajatāṃ vairāyate kairavaiḥ

nityaṃ yāṃ niyamena yā ca yatate kartuṃ triṇetrotsavam |

bimbaṃ cāndramasaṃ ca vañcayati yā garveṇa sā tādṛśī

kāmākṣi smitamañjarī tava kathaṃ jyotsnetyasau kīrtyate ||18||

āruḍhā rabhasātpuraḥ purariporāśleṣaṇopakrame

yā te mātarupaiti divyataṭinīśaṅkākarī tatkṣaṇam |

oṣṭhau vepayati bhruvau kuṭilayatyānamrayatyānanaṃ

tāṃ vande mṛduhāsapūrasuṣamāmekāmranāthapriye ||19||

vaktrendostava candrikā smitatatirvalgu sphurantī satāṃ

syāccedyuktimidaṃ cakoramanasāṃ kāmākṣi kautūhalam |

etaccitramaharniśaṃ yadadhikāmeṣā ruciṃ gāhate

bimboṣṭhadyumaṇiprabhāsvapi ca yadbibbokamālambate ||20||

sādṛśyaṃ kalaśāmbudhervahati yatkāmākṣi mandasmitaṃ

śobhāmoṣṭharucāmba vidrumabhavāmetādbhidāṃ brūmahe |

ekasmāduditaṃ purā kila papau śarvaḥ purāṇaḥ pumān

etanmadhyasamudbhavaṃ rasayate mādhuryarūpaṃ rasam ||21||

uttuṅgastanakumbhaśailakaṭake vistārikastūrikā-

patraśrījuṣi cañcalāḥ smitarucaḥ kāmākṣi te komalāḥ |

sandhyādīdhitirañjitā iva muhuḥ sāndrādharajyotiṣā

vyālolāmalaśāradābhraśakalavyāpāramātanvate ||22||

kṣīraṃ dūrata eva tiṣṭhatu kathaṃ vaimalyamātrādidaṃ

mātaste sahapāṭhavīthimayatāṃ mandasmitairmañjulaiḥ |

kiṃ ceyaṃ tu bhidāsti dohanavaśādekaṃ tu sañjāyate

kāmākṣi svayamarthitaṃ praṇamatāmanyattu doduhyate ||23||

karpūrairamṛtairjagajjanani te kāmākṣi candrātapaiḥ

muktāhāraguṇairmṛṇālavalayairmugdhasmitaśrīriyam |

śrīkāñcīpuranāyike samatayā saṃstūyate sajjanaiḥ

tattādṛṅmama tāpaśāntividhaye kiṃ devi mandāyate ||24||

madhyegarbhitamañjuvākyalaharīmādhvījharīśītalā

mandārastabakāyate janani te mandasmitāṃśucchaṭā |

yasyā vardhayituṃ muhurvikasanaṃ kāmākṣi kāmadruho

valgurvīkṣaṇavibhramavyatikaro vāsantamāsāyate ||25||

bimboṣṭhadyutipuñjarañjitarucistvanmandahāsacchaṭā |

kalyāṇaṃ girisārvabhaumatanaye kallolayatvāśu me |

phullanmallipinaddhahallakamayī māleva yā peśalā

śrīkāñcīśvari māramarditururomadhye muhurlambate ||26||

bibhrāṇā śaradabhravibhramadaśāṃ vidyotamānāpyaso

kāmākṣi smitamañjarī kirati te kāruṇyadhārārasam |

āścaryaṃ śiśirīkaroti jagatīścālokya caināmaho

kāmaṃ khelati nīlakaṇṭhahṛdayaṃ kautūhalāndolitam ||27||

preṅkhatprauḍhakaṭākṣakuñjakuhareṣvatyacchagucchāyitaṃ

vaktrenducchavisindhuvīcinicaye phenapratānāyitam |

nairantaryavijṛmbhitastanataṭe naicolapaṭṭāyitaṃ

kāluṣyaṃ kabalīkarotu mama te kāmākṣi mandasmitam ||28||

pīyūṣaṃ tava mantharasmitamiti vyarthaiva sāpaprathā

kāmākṣi dhruvamīdṛśaṃ yadi bhavedetatkathaṃ vā śive |

mandārasya kathālavaṃ na sahate mathnāti mandākinī-

minduṃ nindati kīrtite'pi kalaśīpāthodhimīrṣyāyate ||29||

viśveṣāṃ nayanotsavaṃ vitanutāṃ vidyotatāṃ candramā

vikhyāto madanāntakena mukuṭīmadhye ca sammānyatām |

āḥ kiṃ jātamanena hāsasuṣamāmālokya kāmākṣi te

kālaṅkīmavalambate khalu daśāṃ kalmāṣahīno'pyasau ||30||

cetaḥ śītalayantu naḥ paśupaterānandajīvātavo

namrāṇāṃ nayanādhvasīmasu śaraccandrātapopakramāḥ |

saṃsārākhyasaroruhākarakhalīkāre tuṣārotkarāḥ

kāmākṣi smarakīrtibījanikarāstvanmandahāsāṅkurāḥ ||31||

karmaughākhyatamaḥkacākacikarānkāmākṣi sañcintaye

tvanmandasmitarociṣāṃ tribhuvanakṣemaṅkarānaṅkurān |

ye vaktraṃ śiśiraśriyo vikasitaṃ candrātapāmbhoruha-

dveṣoddheṣoṇacāturīmiva tiraskartuṃ pariṣkurvate ||32||

kuryurnaḥ kulaśailarājatanaye kūlaṅkaṣaṃ maṅgalaṃ

kundaspardhanacuñcavastava śive mandasmitaprakramāḥ |

ye kāmākṣi samastasākṣinayanaṃ santoṣayantīśvaraṃ

karpūraprakarā iva prasṛmarāḥ puṃsāmasādhāraṇāḥ ||33||

kamreṇa snapayasva karmakuhanācoreṇa mārāgama-

vyākhyāśikṣaṇadīkṣitena viduṣāmakṣīṇalakṣmīpuṣā |

kāmākṣi smitakandalena kaluṣasphoṭakriyācuñcunā

kāruṇyāmṛtavīcikāviharaṇaprācuryadhuryeṇa mām ||34||

tvanmandasmitakandalasya niyataṃ kāmākṣi śaṅkāmahe

bimbaḥ kaścana nūtanaḥ pracalito naiśākaraḥ śīkaraḥ |

kiñca kṣīrapayonidhiḥ pratinidhiḥ svarvāhinīvīcikā-

bibvoko'pi viḍamba eva kuhanā mallīmatallīrucaḥ ||35||

duṣkarmārkanisargakarkaśamahassamparkatapataṃ mila-

tpaṅkaṃ śaṅkaravallabhe mama manaḥ kāñcīpurālaṅkriye |

amba tvanmṛdulasmitāmṛtarase maṅktvā vidhūya vyathā-

mānandodayasaudhaśṛṅgapadavīmāroḍhumākāṅkṣati ||36||

namrāṇāṃ nagarājaśekharasute nākālayānāṃ puraḥ

kāmākṣi tvarayā vipatpraśamena kāruṇyadhārāḥ kiran |

āgacchantamanugrahaṃ prakaṭayannānandabījāni te

nāsīre mṛduhāsa eva tanute nāthe sudhāśītalaḥ ||37||

kāmākṣi prathamānavibhramanidhiḥ kandarpadarpaprasūḥ

mugdhaste mṛduhāsa eva girije muṣṇātu me kilbiṣam |

yaṃ draṣṭuṃ vihite karagraha ume śambhustrapāmīlitaṃ

svairaṃ kārayati sma tāṇḍavavinodānandinā taṇḍunā ||38||

kṣuṇṇaṃ kenacideva dhīramanasā kutrāpi nānājanaiḥ

karmagranthiniyantritairasugamaṃ kāmākṣi sāmānyataḥ |

mugdhairdruṣṭumaśakyameva manasā mūḍhasaya me mauktikaṃ

mārgaṃ darśayatu pradīpa iva te mandasmitaśrīriyam ||39||

jyotsnākāntibhireva nirmalataraṃ naiśākaraṃ maṇḍalaṃ

haṃsaireva śaradvilāsasamaye vyākocamambhoruham |

svacchaireva vikasvarairuḍuguṇaiḥ kāmākṣi bimbaṃ divaḥ

puṇyaireva mṛdusmitaistava mukhaṃ puṣṇāti śobhābharam ||40||

mānagranthividhuntudena rabhasādāsvādyamāne nava-

premāḍambarapūrṇimāhimakare kāmākṣi te tatkṣaṇam |

ālokya smitacandrikāṃ punarimāmunmīlanaṃ jagmuṣīṃ

cetaḥ śīlayate cakoracaritaṃ candrārdhacūḍāmaṇeḥ ||41||

kāmākṣi smitamañjarīṃ tava bhaje yasyāstviṣāmaṅkurā-

nāpīnastanapānalālasatayā niśśaṅkamaṅkeśayaḥ |

ūrdhvaṃ vīkṣya vikarṣati prasṛmarānuddāmayā śuṇḍayā

sūnusute bisaśaṅkayāśu kuhanādantāvalagrāmaṇīḥ ||42||

gāḍhāśleṣavimardasambhramavaśāduddāmamuktāguṇa-

prālambe kucakumbhayorvigalite dakṣadviṣo vakṣasi |

yā sakhyena pinahyati pracurayā bhāsā tadīyāṃ daśāṃ

sā me khelatu kāmakoṭi hṛdaye sāndrasmitāṃśucchaṭā ||43||

mandāre tava mantharasmitarucāṃ mātsaryamālokyate

kāmākṣi smaraśāsane ca niyato rāgodayo lakṣyate |

cāndrīṣu dyutimañjarīṣu ca mahāndveṣāṅkuro dṛśyate

śuddhānāṃ kathamīdṛśī girisute'tiśuddhā daśā kathyatām ||44||

pīyūṣaṃ khalu pīyate surajanairdugdhāmbudhirmathyate

māheśaiśca jaṭākalāpanigaḍairmandākinī nahyate |

śītāṃśuḥ paribhūyate ca tamasā tasmādanetādṛśī

kāmākṣi smitamañjarī tava vacovaidagdhyamullaṅghate ||45||

āśaṅke tava mandahāsalaharīmanyādṛśīṃ candrikā-

mekāmreśakuṭumbini pratipadaṃ yasyāḥ prabhāsaṅgame |

vakṣojāmburuhe na te racayataḥ kāñciddaśāṃ kauṅmalī-

māsyāmbhoruhamamba kiñca śanakairālambate phullatām ||46||

āstīrṇādharakāntipallavacaye pātaṃ muhurjagmuṣī

māradrohiṇi kandalatsmaraśarajvālāvalīrvyañjatī |

nindantī ghanasārahāravalayajyotsnāmṛṇālāni te

kāmākṣi smitacāturī virahiṇīrītiṃ jagāhetarām ||47||

sūryālokavidhau vikāsamadhikaṃ yāntī harantī tama-

ssandohaṃ namatāṃ nijasmaraṇato doṣākaradveṣiṇī |

niryāntī vadanāravindakuharānnirdhūtajāḍyā nṛṇāṃ

śrīkāmākṣi tava smitadyutimayī citrīyate candrikā ||48||

kuṇṭhīkuryuramī kubodhaghaṭanāmasmanmanomāthinīṃ

śrīkāmākṣi śivaṅkarāstava śive śrīmandahāsāṅkurāḥ |

ye tanvanti nirantaraṃ taruṇimastamberamagrāmaṇī-

kumbhadvandvaviḍambini stanataṭe muktākuthāḍambaram ||49||

preṅkhantaḥ śaradambudā iva śanaiḥ premānilaiḥ preritā

majjanto mandanārikaṇṭhasuṣamāsindhau muhurmantharam |

śrīkāmākṣi tava smitāṃśunikarāḥ śyāmāyamānaśriyo

nīlāmbhodharanaipuṇīṃ tata ito nirnidrayantyañjasā ||50||

vyāpāraṃ caturānanaikavihṛtau vyākurvatī kurvatī

rudrākṣagrahaṇaṃ maheśi satataṃ vāgūrmikallolitā |

utphullaṃ dhavalāravindamadharīkṛtya sphurantī sadā

śrīkāmākṣi sarasvatī vijayate tvanmandahāsaprabhā ||51||

karpūradyutitaskareṇa mahasā kalmāṣayatyānanaṃ

śrīkāñcīpuranāyike patiriva śrīmandahāso'pi te |

āliṅgatyatipīvarāṃ stanataṭīṃ bimbādharaṃ cumbati

prauḍhaṃ rāgabharaṃ vyanakti manaso dhairyaṃ dhunītetarām ||52||

vaiśadyena ca viśvatāpaharaṇakrīḍāpaṭīyastayā

pāṇḍityena pacelimena jagatāṃ netrotsavotpādena |

kāmākṣi smitakandalaistava tulāmāroḍhumudyoginī

jyotsnāsau jalarāśipoṣaṇatayā dūṣyāṃ prapannā daśām ||53||

lāvaṇyāmbujinīmṛṇālavalayaiḥ śṛṅgāragandhadvipa-

grāmaṇyaḥ śruticāmaraistaruṇimasvārājyatejoṅkuraiḥ |

ānandāmṛtasindhuvīcipṛṣatairāsyābjahaṃsaistava

śrīkāmākṣi mathāna mandahasitairmatkaṃ manaḥkalmaṣam ||54||

uttuṅgastanamaṇḍalīparicalanmāṇikyahāracchaṭā-

cañcacchoṇimapuñjamadhyasaraṇiṃ mātaḥ pariṣkurvatī |

yā vaidagdhyamupaiti śaṅkarajaṭākāntāravāṭīpata-

tsvarvāpīpayasaḥ smitadyutirasau kāmākṣi te mañjulā ||55||

sannāmaikajuṣā janena sulabhaṃ saṃsūcayantī śanai-

ruttuṅgasya cirādanugrahatarorutpatsyamānaṃ phalam |

prāthamyena vikasvarā kusumavatprāgalbhyamabhyeyuṣī

kāmākṣi smitacāturī tava mama kṣemaṅkarī kalpatām ||56||

dhānuṣkāgrasarasya lolakuṭilabhrūlekhayā bibhrato

līlālokaśilīmukhaṃ navavayassāmrājyalakṣmīpuṣaḥ |

jetuṃ manmathamardinaṃ janani te kāmākṣi hāsaḥ svayaṃ

valgurvibhramabhūbhṛto vitanute senāpatiprakriyām ||57||

yannākampata kālakūṭakabalīkāre cucumbe na yad-

glānyā cakṣuṣi rūṣitānalaśikhe rudrasya tattādṛśam |

ceto yatprasabhaṃ smarajvaraśikhijvālena lelihyate

tatkāmākṣi tava smitāṃśukalikāhelābhavaṃ prābhavam ||58||

sambhinneva suparvalokataṭinī vīcīcayairyāmunaiḥ

sammiśreva śaśāṅkadīptilaharī nīlairmahānīradaiḥ |

kāmākṣi sphuritā tava smitaruciḥ kālāñjanaspardhinā

kālimnā kacarociṣāṃ vyatikare kāñciddaśāmaśnute ||59||

jānīmo jagadīśvarapraṇayini tvanmandahāsaprabhāṃ

śrīkāmākṣi sarojinīmabhinavāmeṣā yataḥ sarvadā |

āsyendoravalokena paśupaterabhyeti samphullatāṃ

tandrālustadabhāva eva tanute tadvaiparītyakramam ||60||

yāntī lohitimānamabhrataṭinī dhātucchaṭākardamaiḥ

bhāntī bālagabhastimālikiraṇairmeghāvalī śāradī |

bimboṣṭhadyutipuñjacumbanakalāśoṇāyamānena te

kāmākṣi smitarociṣā samadaśāmāroḍhumākāṅkṣate ||61||

śrīkāmākṣi mukhendubhūṣaṇamidaṃ mandasmitaṃ tāvakaṃ

netrānandakaraṃ tathā himakaro gacchedyathā tigmatām |

śītaṃ devi tathā yathā himajalaṃ santāpamudrāspadaṃ

śvetaṃ kiñca tathā yathā malinatāṃ dhatte ca muktāmaṇiḥ ||62||

tvanmandasmitamañjarīṃ prasṛmarāṃ kāmākṣi candrātapaṃ

santaḥ santatamāmanantyamalatā tallakṣaṇaṃ lakṣyate |

asmākaṃ na dhunoti tāpakamadhikaṃ dhūnoti nābhyantaraṃ

dhvāntaṃ tatkhalu duḥkhino vayamidaṃ kenoti no vidmahe ||63||

namrasya praṇayaprarūḍhakalahacchedāya pādābjayoḥ

mandaṃ candrakiśoraśekharamaṇeḥ kāmākṣi rāgeṇa te |

bandhūkaprasavaśriyaṃ jitavato baṃhīyasīṃ tādṛśīṃ

bimboṣṭhasya ruciṃ nirasya hasitajyotsnā vayasyāyate ||64||

muktānāṃ parimocanaṃ vidadhatastatprītiniṣpādinī

bhūyo dūrata eva dhūtamarutastatpālanaṃ tanvatī |

udbhūtasya jalāntarādavirataṃ taddūratāṃ jagmuṣī

kāmākṣi smitamañjarī tava kathaṃ kambostulāmaśnute ||65||

śrīkāmākṣi tava smitadyutijharīvaidagdhyalīlāyitaṃ

paśyanto'pi nirantaraṃ suvimalammanyā jaganmaṇḍale |

lokaṃ hāsayituṃ kimarthamaniśaṃ prākāśyamātanvate

mandākṣaṃ virahayya maṅgalataraṃ mandāracandrādayaḥ ||66||

kṣīrābdherapi śailarājatanaye tvanmandahāsasya ca

śrīkāmākṣi valakṣimodayanidheḥ kiñcidbhidāṃ brūmahe |

ekasmai puruṣāya devi sa dadau lakṣmīṃ kadācitpurā

sarvebhyo'pi dadātyasau tu satataṃ lakṣmīṃ ca vāgīśvarīm ||67||

śrīkāñcīpuraratnadīpakalike tānyeva menātmaje

cākorāṇi kulāni devi sutarāṃ dhanyāni manyāmahe |

kampātīrakuṭumbacaṅkramakalācuñcūni cañcūpuṭaiḥ

nityaṃ yāni tava smitendumahasāmāsvādamātanvate ||68||

śaityaprakramamāśrito'pi namatāṃ jāḍyaprathāṃ dhūnayan

nairmalyaṃ paramaṃ gato'pi giriśaṃ rāgākulaṃ cārayan |

līlālāpapurassaro'pi satataṃ vācaṃyamānprīṇayan

kāmākṣi smitarociṣāṃ tava samullāsaḥ kathaṃ varṇyate ||69||

śroṇīcañcalamekhalāmukharitaṃ līlāgataṃ mantharaṃ

bhrūvallīcalanaṃ kaṭākṣavalanaṃ mandākṣavīkṣācaṇam |

yadvaidagdhyamukhena manmatharipuṃ sammohayantyañjasā

śrīkāmākṣi tava smitāya satataṃ tasmai namsakurmahe ||70||

śrīkāmākṣi manojñamandahasitajyotiṣprarohe tava

sphītaśvetimasārvabhaumasaraṇiprāgalbhyamabhyeyuṣi |

candro'yaṃ yuvarājatāṃ kalayate ceṭīdhuraṃ candrikā

śuddhā sā ca sudhājharī sahacarīsādharmyamālambate ||71||

jyotsnā kiṃ tanute phalaṃ tanumatāmauṣṇyapraśāntiṃ vinā

tvanmandasmitarociṣā tanumatāṃ kāmākṣi rociṣṇunā |

santāpo vinivāryate navavayaḥprācuryamaṅkūryate

saundaryaṃ paripūryate jagati sā kīrtiśca sañcāryate ||72||

vaimalyaṃ kumudaśriyāṃ himarucaḥ kāntyaiva sandhukṣyate

jyotsnārocirapi pradoṣasamayaṃ prāpyaiva sampadyate |

svacchatvaṃ navamauktikasya paramaṃ saṃskārato dṛśyate

kāmākṣyāḥ smitadīdhiterviśadimā naisargiko bhāsate ||73||

prākāśyaṃ parameśvarapraṇayini tvanmandahāsaśriyaḥ

śrīkāmākṣi mama kṣiṇotu mamatāvaicakṣaṇīmakṣayām |

yadbhītyeva nilīyate himakaro meghodare śuktikā-

garbhe mauktikamaṇḍalī ca sarasīmadhye mṛṇālī ca sā ||74||

herambe ca guhe harṣabharitaṃ vātsalyamaṅkūrayat

māradrohiṇi pūruṣe sahabhuvaṃ premāṅkuraṃ vyañjayat |

ānamreṣu janeṣu pūrṇakaruṇāvaidagdhyamuttālayat

kāmākṣi smitamañjasā tava kathaṅkāraṃ mayā kathyate ||75||

saṅkruddhadvijarājako'pyavirataṃ kurvandvijaiḥ saṅgamaṃ

vāṇīpaddhatidūrago'pi satataṃ tatsāhacaryaṃ vahan |

aśrāntaṃ paśudurlabho'pi kalayanpatyau paśūnāṃ ratiṃ

śrīkāmākṣi tava smitāmṛtarasasyando mayi spandatām ||76||

śrīkāmākṣi maheśvare nirupamapremāṅkuraprakramamaṃ

nityaṃ yaḥ prakaṭīkaroti sahajāmunnidrayanmādhurīm |

tattādṛktava mandahāsamahimā mātaḥ kathaṃ mānitāṃ

tanmūrdhnā suranimnagāṃ ca kalikāmindośca tāṃ nindati ||77||

ye mādhuryavihāramaṇṭapabhuvo ye śaityamudrākarā

ye vaiśadyadaśāviśeṣasubhagāste mandahāsāṅkurāḥ |

kāmākṣyāḥ sahajaṃ guṇatrayamidaṃ paryāyataḥ kurvatāṃ

vāṇīgumphanaḍambare ca hṛdaye kīrtiprarohe ca me ||78||

kāmākṣyā mṛdulasmitāṃśunikarā dakṣāntake vīkṣaṇe

mandākṣagrahilā himadyutimayūkhākṣepadīkṣāṅkurāḥ |

dākṣyaṃ pakṣmalayantu mākṣikaguḍadrākṣābhavaṃ vākṣu me

sūkṣmaṃ mokṣapathaṃ nirīkṣitumapi prakṣālayeyurmanaḥ ||79||

jātyā śītaśītalāni madhurāṇyetāni pūtāni te

gāṅgānīva payāṃsi devi paṭalānyalpasmitajyotiṣām |

enaḥpaṅkaparamparāmalinitāmekāmranāthapriye

prajñānātsutarāṃ madīyadhiṣaṇāṃ prakṣālayantu kṣaṇāt ||80||

aśrāntaṃ paratantritaḥ paśupatistvanmandahāsāṅkuraiḥ

śrīkāmākṣi tadīyavarṇasamatāsaṅgena śaṅkāmahe |

induṃ nākadhunīṃ ca śekharayate mālāṃ ca dhatte navaiḥ

vaikuṇṭhairavakuṇṭhanaṃ ca kurute dhūlīcayairbhāsmanaiḥ ||81||

śrīkāñcīpuradevate mṛduvacassaurabhyamudrāspadaṃ

prauḍhapremalatānavīnakusumaṃ mandasmitaṃ tāvakam |

mandaṃ kandalati priyasya vadanāloke samābhāṣaṇe

ślakṣṇe kuṅmalati prarūḍhapulake cāśloṣaṇe phullati ||82||

kiṃ traisrotasamambike pariṇataṃ srotaścaturthaṃ navaṃ

pīyūṣasya samastatāpaharaṇaṃ kiṃvā dvitīyaṃ vapuḥ |

kiṃsvittvannikaṭaṃ gataṃ madhurimābhyāsāya gavyaṃ payaḥ

śrīkāñcīpuranāyakapriyatame mandasmitaṃ tāvakam ||83||

bhūṣā vaktrasaroruhasya sahajā vācāṃ sakhī śāśvatī

nīvī vibhramasantateḥ paśupateḥ saudhī dṛśāṃ pāraṇā |

jīvāturmadanaśriyaḥ śaśiruceruccāṭanī devatā

śrīkāmākṣi girāmabhūmimayate hāsaprabhāmañjarī ||84||

sūtiḥ śvetimakandalasya vasatiḥ śṛṅgārasāraśriyaḥ

pūrtiḥ sūktijharīrasasya laharī kāruṇyapāthonidheḥ |

vāṭī kācana kausumī madhurimasvārājyalakṣmyāstava

śrīkāmākṣi mamāstu maṅgalakarī hāsaprabhācāturī ||85||

jantūnāṃ janiduḥkhamṛtyulaharīsantāpanaṃ kṛntataḥ

prauḍhānugrahapūrṇaśītalaruco nityodayaṃ bibhrataḥ |

śrīkāmākṣi visṛtvarā iva karā hāsāṅkurāste haṭhā-

dālokena nihanyurandhatamasastomasya me santatim ||86||

uttuṅgastanamaṇḍalasya vilasallāvaṇyalīlānaṭī-

raṅgasya sphuṭamūrdhvasīmani muhuḥ prākāśyamabhyeyuṣī |

śrīkāmākṣi tava smitadyutitatirbimboṣṭhakāntyaṅkuraiḥ

citrāṃ vidrumamudritāṃ vitanute mauktīṃ vitānaśriyam ||87||

svābhāvyāttava vaktrameva lalitaṃ santoṣasampādanaṃ

śambhoḥ kiṃ punarañcitasmitarucaḥ pāṇḍityapātrīkṛtam |

ambhojaṃ svata eva sarvajagatāṃ cakṣuḥpriyambhāvukaṃ

kāmākṣi sphurite śaradvikasite kīdṛgvidhaṃ bhrājate ||88||

pumbhirnirmalamānasaurvidadhate maitrīṃ dṛḍhaṃ nirmalāṃ

labdhvā karmalayaṃ ca nirmalatarāṃ kīrtiṃ labhantetarām |

sūktiṃ pakṣmalayanti nirmalatamāṃ yattāvakāḥ sevakāḥ

tatkāmākṣi tava smitasya kalayā nairmalyasīmānidheḥ ||89||

ākarṣannayanāni nākisadasāṃ śaityena saṃstambhaya-

nninduṃ kiñca vimohayanpaśupatiṃ viśvārtimuccāṭayan |

hiṃsatsaṃsṛtiḍambaraṃ tava śive hāsāhvayo māntrikaḥ

śrīkāmākṣi madīyamānasatamovidveṣaṇe ceṣṭatām ||90||

kṣepīyaḥ kṣapayantu kalmaṣabhayānyasmākamalpasmita-

jyotirmaṇḍalacaṅkramāstava śive kāmākṣi rociṣṇavaḥ |

pīḍākarmaṭhakarmagharmasamayavyāpāratāpānala-

śrīpātā navaharṣavarṣaṇasudhāsrotasvinīśīkarāḥ ||91||

śrīkāmākṣi tava smitaindavamahaḥpūre parimphūrjati

prauḍhāṃ vāridhicāturīṃ kalayate bhaktātmanāṃ prātibham |

daurgatyaprasarāstamaḥpaṭalikāsādharmyamābibhrate

sarvaṃ kairavasāhacaryapadavīrītiṃ vidhatte param ||92||

mandārādiṣu manmathārimahiṣi prākāśyarītiṃ nijāṃ

kādācitkatayā viśaṅkya bahuśo vaiśadyamudrāguṇaḥ |

sātatyena tava smite vitanute svairāsanāvāsanām ||93||

indhāne bhavavītihotranivahe karmaughacaṇḍānila-

prauḍhimnā bahulīkṛte nipatitaṃ santāpacintākulam |

mātarmāṃ pariṣiñca kiñcidamalaiḥ pīyūṣavarṣairiva

śrīkāmākṣi tava smitadyutikaṇaiḥ śaiśiryalīlākaraiḥ ||94||

bhāṣāyā rasanāgrakhelanajuṣaḥ śṛṅgāramudrāsakhī-

līlājātarateḥ sukhena niyamasnānāya menātmaje |

śrīkāmākṣi sudhāmayīva śiśirā srotasvinī tāvakī

gāḍhānandataraṅgitā vijayate hāsaprabhācāturī ||95||

santāpaṃ viralīkarotu sakalaṃ kāmākṣi maccetanā

majjantī madhurasmitāmaradhunīkallolajāleṣu te |

nairantaryamupetya manmathamarulloleṣu yeṣu sphuṭaṃ

premenduḥ pratibimbito vitanute kautūhalaṃ dhūrjaṭeḥ ||96||

cetaḥkṣīrapayodhimantharacaladrāgākhyamanthācala-

kṣobhavyāpṛtisambhavāṃ janani te mandasmitaśrīsudhām |

svādaṃsvādamudītakautukarasā netratrayī śāṅkarī

śrīkāmākṣi nirantaraṃ pariṇamatyānandavīcīmayī ||97||

āloke tava pañcasāyakariporuddāmakautūhala-

preṅkhanmārutaghaṭṭanapracalitādānandadugdhāmbudheḥ |

kācidvīcirudañcati pratinavā saṃvitprarohātmikā

tāṃ kāmākṣi kavīśvarāḥ smitamiti vyākurvate sarvadā ||98||

sūktiḥ śīlayate kimadritanaye mandasmitātte muhuḥ

mādhuryāgamasampradāyamathavā sūkternu mandasmitam |

itthaṃ kāmapi gāhate mama manaḥ sandehamārgabhramiṃ

śrīkāmākṣi na pāramārthyasaraṇisphūrtau nidhatte padam ||99||

krīḍālolakṛpāsaroruhamukhīsaudhāṅgaṇebhyaḥ kavi-

śreṇīvākparipāṭikāmṛtajharīsūtīgṛhebhyaḥ śive |

nirvāṇāṅkurasārvabhaumapadavīsiṃhāsanebhyastava

śrīkāmākṣi manojñamandahasitajyotiṣkaṇebhyo namaḥ ||100||

āryāmeva vibhāvayanmanasi yaḥ pādāravindaṃ puraḥ

paśyannārabhate stutiṃ sa niyataṃ labdhvā kaṭākṣacchavim |

kāmākṣyā mṛdulasmitāṃśulaharījyotsnāvayasyānvitām

ārohatyapavargasaudhavalabhīmānandavīcīmayīm ||101||

|| iti mandasmitaśatakaṃ sampūrṇam ||

|| iti śrī mūkapañcaśatī sampūrṇā ||

||auṃ tat sat ||

Sanskrit — Devanagari (original)

बध्नीमो वयमञ्जलिं प्रतिदिनं बन्धच्छिदे देहिनां

कन्दर्पागमतन्त्रमूलगुरवे कल्याणकेलीभुवे ।

कामाक्ष्या घनसारपुञ्जरजसे कामद्रुहश्चक्षुषां

मन्दारस्तबकप्रभामदमुषे मन्दस्मितज्योतिषे ॥1॥

सध्रीचे नवमल्लिकासुमनसां नासाग्रमुक्तामणे-

राचार्याय मृणालकाण्डमहसां नैसर्गिकाय द्विषे ।

स्वर्धुन्या सह युध्वेन हिमरुचेरर्धासनाध्यासिने

कामाक्ष्याः स्मितमञ्जरीधवलिमाद्वैताय तस्मै नमः ॥2॥

कर्पूरद्युतिचातुरीमतितरामल्पीयसीं कुर्वती

दौर्भाग्योदयमेव संविदधती दौषाकरीणां त्विषाम् ।

क्षुल्लानेव मनोज्ञमल्लिनिकरान्फुल्लानपि व्यञ्जती

कामाक्ष्या मृदुलस्मितांशुलहरी कामप्रसूरस्तु मे ॥3॥

या पीनस्तनमण्डलोपरि लसत्कर्पूरलेपायते

या नीलेक्षणरात्रिकान्तिततिषु ज्योत्स्नाप्ररोहायते ।

या सौन्दर्यधुनीतरङ्गततिषु व्यालोलहंसायते

कामाक्ष्याः शिशिरीकरोतु हृदयं सा मे स्मितप्राचुरी ॥4॥

येषां गच्छति पूर्वपक्षसरणिं कौमुद्वतः श्वेतिमा

येषां सन्ततमारुरुक्षति तुलाकक्ष्यां शरच्चन्द्रमाः ।

येषामिच्छति कम्बुरप्यसुलभामन्तेवसत्प्रक्रियां

कामाक्ष्या ममतां हरन्तु मम ते हासत्विषामङ्कुराः ॥5॥

आशासीमसु सन्ततं विदधती नैशाकरीं व्याक्रियां

काशानामभिमानभङ्गकलनाकौशल्यमाबिभ्रती ।

ईशानेन विलोकिता सकुतुकं कामाक्षि ते कल्मष-

क्लेशापायकरी चकास्ति लहरी मन्दस्मितज्योतिषाम् ॥6॥

आरूढस्य समुन्नतस्तनतटीसाम्राज्यसिंहासनं

कन्दर्पस्य विभोर्जगत्त्रयप्राकट्यमुद्रानिधेः ।

यस्याश्चामरचातुरीं कलयते रश्मिच्छटा चञ्चला

सा मन्दस्मितमञ्जरी भवतु नः कामाय कामाक्षि ते ॥7॥

शम्भोर्या परिरम्भसम्भ्रमविधौ नैर्मल्यसीमानिधिः

गैर्वाणीव तरङ्गिणी कृतमृदुस्यन्दां कलिन्दात्मजाम् ।

कल्माषीकुरुते कलङ्कसुषमां कण्ठस्थलीचुम्बिनीं

कामाक्ष्याः स्मितकन्दली भवतु नः कल्याणसन्दोहिनी ॥8॥

जेतुं हारलतामिव स्तनतटीं सञ्जग्मुषी सन्ततं

गन्तुं निर्मलतामिव द्विगुणितां मग्ना कृपास्त्रोतसि ।

लब्धुं विस्मयनीयतामिव हरं रागाकुलं कुर्वती

मञ्जुस्ते स्मितमञ्जरी भवभयं मथ्नातु कामाक्षि मे ॥9॥

श्वेतापि प्रकटं निशाकररुचां मालिन्यमातन्वती

शीतापि स्मरपावकं पशुपतेः सन्धुक्षयन्ती सदा ।

स्वाभाव्यादधराश्रितापि नमतामुच्चैर्दिशन्ती गतिं

कामाक्षि स्फुटमन्तरा स्फुरतु नस्त्वन्मन्दहासप्रभा ॥10॥

वक्त्रश्रीसरसीजले तरलितभ्रूवल्लिकल्लोलिते

कालिम्ना दधती कटाक्षजनुषा माधुव्रतीं व्यापृतिम् ।

निर्निद्रामलपुण्डरीककुहनापाण्डित्यमाबिभ्रती

कामाक्ष्याः स्मितचातुरी मम मनः कातर्यमुन्मूलयेत् ॥11॥

नित्यं बाधितबन्धुजीवमधरं मैत्रीजुषं पल्लवैः

शुद्धस्य द्विजमण्डलस्य च तिरस्कर्तारमप्याश्रिता ।

या वैमल्यवती सदैव नमतां चेतः पुनीतेतरां

कामाक्ष्या हृदयं प्रसादयतु मे सा मन्दहासप्रभा ॥12॥

द्रुह्यन्ती तमसे मुहुः कुमुदिनीसाहाय्यमाबिभ्रती

यान्ती चन्द्रकिशोरशेखरवपुःसौधाङ्गणे प्रेङ्खणम् ।

ज्ञानाम्भोनिधिवीचिकां सुमनसां कूलङ्कषां कुर्वती

कामाक्ष्याः स्मितकौमुदी हरतु मे संसारतापोदयम् ॥13॥

काश्मीरद्रवधातुकर्दमरुचा कल्माषतां बिभ्रती

हंसौधैरिव कुर्वती परिचितिं हारीकृतैर्मौक्तिकैः ।

वक्षोजन्मतुषारशैलकटके सञ्चारमातन्वती

कामाक्ष्या मृदुलस्मितद्युतिमयी भागीरथी भासते ॥14॥

कम्बोर्वंशपरम्परा इव कृपासन्तानवल्लीभुवः

सम्फुल्लस्तबका इव प्रसृमरा मूर्ताः प्रसादा इव ।

वाक्पीयूषकणा इव त्रिपथगापर्यायभेदा इव

भ्राजन्ते तव मन्दहासकिरणाः काञ्चीपुरीनायिके ॥15॥

वक्षोजे घनसारपत्ररचनाभङ्गीसपत्नायिता

कण्ठे मौक्तिकहारयष्टिकिरणव्यापारमुद्रायिता ।

ओष्ठश्रीनिकुरुम्बपल्लवपुटे प्रेङ्खत्प्रसूनायिता

कामाक्षि स्फुरतां मदीयहृदये त्वन्मन्दहासप्रभा ॥16॥

येषां बिन्दुरिवोपरि प्रचलितो नासाग्रमुक्तामणिः

येषां दीन इवाधिकण्ठमयते हारः करालम्बनम् ।

येषां बन्धुरिवोष्ठयोररुणिमा धत्ते स्वयं रञ्जनं

कामाक्ष्याः प्रभवन्तु ते मम शिवोल्लासाय हासाङ्कुराः ॥17॥

या जाड्याम्बुनिधिं क्षिणोति भजतां वैरायते कैरवैः

नित्यं यां नियमेन या च यतते कर्तुं त्रिणेत्रोत्सवम् ।

बिम्बं चान्द्रमसं च वञ्चयति या गर्वेण सा तादृशी

कामाक्षि स्मितमञ्जरी तव कथं ज्योत्स्नेत्यसौ कीर्त्यते ॥18॥

आरुढा रभसात्पुरः पुररिपोराश्लेषणोपक्रमे

या ते मातरुपैति दिव्यतटिनीशङ्काकरी तत्क्षणम् ।

ओष्ठौ वेपयति भ्रुवौ कुटिलयत्यानम्रयत्याननं

तां वन्दे मृदुहासपूरसुषमामेकाम्रनाथप्रिये ॥19॥

वक्त्रेन्दोस्तव चन्द्रिका स्मितततिर्वल्गु स्फुरन्ती सतां

स्याच्चेद्युक्तिमिदं चकोरमनसां कामाक्षि कौतूहलम् ।

एतच्चित्रमहर्निशं यदधिकामेषा रुचिं गाहते

बिम्बोष्ठद्युमणिप्रभास्वपि च यद्बिब्बोकमालम्बते ॥20॥

सादृश्यं कलशाम्बुधेर्वहति यत्कामाक्षि मन्दस्मितं

शोभामोष्ठरुचाम्ब विद्रुमभवामेताद्भिदां ब्रूमहे ।

एकस्मादुदितं पुरा किल पपौ शर्वः पुराणः पुमान्

एतन्मध्यसमुद्भवं रसयते माधुर्यरूपं रसम् ॥21॥

उत्तुङ्गस्तनकुम्भशैलकटके विस्तारिकस्तूरिका-

पत्रश्रीजुषि चञ्चलाः स्मितरुचः कामाक्षि ते कोमलाः ।

सन्ध्यादीधितिरञ्जिता इव मुहुः सान्द्राधरज्योतिषा

व्यालोलामलशारदाभ्रशकलव्यापारमातन्वते ॥22॥

क्षीरं दूरत एव तिष्ठतु कथं वैमल्यमात्रादिदं

मातस्ते सहपाठवीथिमयतां मन्दस्मितैर्मञ्जुलैः ।

किं चेयं तु भिदास्ति दोहनवशादेकं तु सञ्जायते

कामाक्षि स्वयमर्थितं प्रणमतामन्यत्तु दोदुह्यते ॥23॥

कर्पूरैरमृतैर्जगज्जननि ते कामाक्षि चन्द्रातपैः

मुक्ताहारगुणैर्मृणालवलयैर्मुग्धस्मितश्रीरियम् ।

श्रीकाञ्चीपुरनायिके समतया संस्तूयते सज्जनैः

तत्तादृङ्मम तापशान्तिविधये किं देवि मन्दायते ॥24॥

मध्येगर्भितमञ्जुवाक्यलहरीमाध्वीझरीशीतला

मन्दारस्तबकायते जननि ते मन्दस्मितांशुच्छटा ।

यस्या वर्धयितुं मुहुर्विकसनं कामाक्षि कामद्रुहो

वल्गुर्वीक्षणविभ्रमव्यतिकरो वासन्तमासायते ॥25॥

बिम्बोष्ठद्युतिपुञ्जरञ्जितरुचिस्त्वन्मन्दहासच्छटा ।

कल्याणं गिरिसार्वभौमतनये कल्लोलयत्वाशु मे ।

फुल्लन्मल्लिपिनद्धहल्लकमयी मालेव या पेशला

श्रीकाञ्चीश्वरि मारमर्दितुरुरोमध्ये मुहुर्लम्बते ॥26॥

बिभ्राणा शरदभ्रविभ्रमदशां विद्योतमानाप्यसो

कामाक्षि स्मितमञ्जरी किरति ते कारुण्यधारारसम् ।

आश्चर्यं शिशिरीकरोति जगतीश्चालोक्य चैनामहो

कामं खेलति नीलकण्ठहृदयं कौतूहलान्दोलितम् ॥27॥

प्रेङ्खत्प्रौढकटाक्षकुञ्जकुहरेष्वत्यच्छगुच्छायितं

वक्त्रेन्दुच्छविसिन्धुवीचिनिचये फेनप्रतानायितम् ।

नैरन्तर्यविजृम्भितस्तनतटे नैचोलपट्टायितं

कालुष्यं कबलीकरोतु मम ते कामाक्षि मन्दस्मितम् ॥28॥

पीयूषं तव मन्थरस्मितमिति व्यर्थैव सापप्रथा

कामाक्षि ध्रुवमीदृशं यदि भवेदेतत्कथं वा शिवे ।

मन्दारस्य कथालवं न सहते मथ्नाति मन्दाकिनी-

मिन्दुं निन्दति कीर्तितेऽपि कलशीपाथोधिमीर्ष्यायते ॥29॥

विश्वेषां नयनोत्सवं वितनुतां विद्योततां चन्द्रमा

विख्यातो मदनान्तकेन मुकुटीमध्ये च सम्मान्यताम् ।

आः किं जातमनेन हाससुषमामालोक्य कामाक्षि ते

कालङ्कीमवलम्बते खलु दशां कल्माषहीनोऽप्यसौ ॥30॥

चेतः शीतलयन्तु नः पशुपतेरानन्दजीवातवो

नम्राणां नयनाध्वसीमसु शरच्चन्द्रातपोपक्रमाः ।

संसाराख्यसरोरुहाकरखलीकारे तुषारोत्कराः

कामाक्षि स्मरकीर्तिबीजनिकरास्त्वन्मन्दहासाङ्कुराः ॥31॥

कर्मौघाख्यतमःकचाकचिकरान्कामाक्षि सञ्चिन्तये

त्वन्मन्दस्मितरोचिषां त्रिभुवनक्षेमङ्करानङ्कुरान् ।

ये वक्त्रं शिशिरश्रियो विकसितं चन्द्रातपाम्भोरुह-

द्वेषोद्धेषोणचातुरीमिव तिरस्कर्तुं परिष्कुर्वते ॥32॥

कुर्युर्नः कुलशैलराजतनये कूलङ्कषं मङ्गलं

कुन्दस्पर्धनचुञ्चवस्तव शिवे मन्दस्मितप्रक्रमाः ।

ये कामाक्षि समस्तसाक्षिनयनं सन्तोषयन्तीश्वरं

कर्पूरप्रकरा इव प्रसृमराः पुंसामसाधारणाः ॥33॥

कम्रेण स्नपयस्व कर्मकुहनाचोरेण मारागम-

व्याख्याशिक्षणदीक्षितेन विदुषामक्षीणलक्ष्मीपुषा ।

कामाक्षि स्मितकन्दलेन कलुषस्फोटक्रियाचुञ्चुना

कारुण्यामृतवीचिकाविहरणप्राचुर्यधुर्येण माम् ॥34॥

त्वन्मन्दस्मितकन्दलस्य नियतं कामाक्षि शङ्कामहे

बिम्बः कश्चन नूतनः प्रचलितो नैशाकरः शीकरः ।

किञ्च क्षीरपयोनिधिः प्रतिनिधिः स्वर्वाहिनीवीचिका-

बिब्वोकोऽपि विडम्ब एव कुहना मल्लीमतल्लीरुचः ॥35॥

दुष्कर्मार्कनिसर्गकर्कशमहस्सम्पर्कतपतं मिल-

त्पङ्कं शङ्करवल्लभे मम मनः काञ्चीपुरालङ्क्रिये ।

अम्ब त्वन्मृदुलस्मितामृतरसे मङ्क्त्वा विधूय व्यथा-

मानन्दोदयसौधशृङ्गपदवीमारोढुमाकाङ्क्षति ॥36॥

नम्राणां नगराजशेखरसुते नाकालयानां पुरः

कामाक्षि त्वरया विपत्प्रशमेन कारुण्यधाराः किरन् ।

आगच्छन्तमनुग्रहं प्रकटयन्नानन्दबीजानि ते

नासीरे मृदुहास एव तनुते नाथे सुधाशीतलः ॥37॥

कामाक्षि प्रथमानविभ्रमनिधिः कन्दर्पदर्पप्रसूः

मुग्धस्ते मृदुहास एव गिरिजे मुष्णातु मे किल्बिषम् ।

यं द्रष्टुं विहिते करग्रह उमे शम्भुस्त्रपामीलितं

स्वैरं कारयति स्म ताण्डवविनोदानन्दिना तण्डुना ॥38॥

क्षुण्णं केनचिदेव धीरमनसा कुत्रापि नानाजनैः

कर्मग्रन्थिनियन्त्रितैरसुगमं कामाक्षि सामान्यतः ।

मुग्धैर्द्रुष्टुमशक्यमेव मनसा मूढसय मे मौक्तिकं

मार्गं दर्शयतु प्रदीप इव ते मन्दस्मितश्रीरियम् ॥39॥

ज्योत्स्नाकान्तिभिरेव निर्मलतरं नैशाकरं मण्डलं

हंसैरेव शरद्विलाससमये व्याकोचमम्भोरुहम् ।

स्वच्छैरेव विकस्वरैरुडुगुणैः कामाक्षि बिम्बं दिवः

पुण्यैरेव मृदुस्मितैस्तव मुखं पुष्णाति शोभाभरम् ॥40॥

मानग्रन्थिविधुन्तुदेन रभसादास्वाद्यमाने नव-

प्रेमाडम्बरपूर्णिमाहिमकरे कामाक्षि ते तत्क्षणम् ।

आलोक्य स्मितचन्द्रिकां पुनरिमामुन्मीलनं जग्मुषीं

चेतः शीलयते चकोरचरितं चन्द्रार्धचूडामणेः ॥41॥

कामाक्षि स्मितमञ्जरीं तव भजे यस्यास्त्विषामङ्कुरा-

नापीनस्तनपानलालसतया निश्शङ्कमङ्केशयः ।

ऊर्ध्वं वीक्ष्य विकर्षति प्रसृमरानुद्दामया शुण्डया

सूनुसुते बिसशङ्कयाशु कुहनादन्तावलग्रामणीः ॥42॥

गाढाश्लेषविमर्दसम्भ्रमवशादुद्दाममुक्तागुण-

प्रालम्बे कुचकुम्भयोर्विगलिते दक्षद्विषो वक्षसि ।

या सख्येन पिनह्यति प्रचुरया भासा तदीयां दशां

सा मे खेलतु कामकोटि हृदये सान्द्रस्मितांशुच्छटा ॥43॥

मन्दारे तव मन्थरस्मितरुचां मात्सर्यमालोक्यते

कामाक्षि स्मरशासने च नियतो रागोदयो लक्ष्यते ।

चान्द्रीषु द्युतिमञ्जरीषु च महान्द्वेषाङ्कुरो दृश्यते

शुद्धानां कथमीदृशी गिरिसुतेऽतिशुद्धा दशा कथ्यताम् ॥44॥

पीयूषं खलु पीयते सुरजनैर्दुग्धाम्बुधिर्मथ्यते

माहेशैश्च जटाकलापनिगडैर्मन्दाकिनी नह्यते ।

शीतांशुः परिभूयते च तमसा तस्मादनेतादृशी

कामाक्षि स्मितमञ्जरी तव वचोवैदग्ध्यमुल्लङ्घते ॥45॥

आशङ्के तव मन्दहासलहरीमन्यादृशीं चन्द्रिका-

मेकाम्रेशकुटुम्बिनि प्रतिपदं यस्याः प्रभासङ्गमे ।

वक्षोजाम्बुरुहे न ते रचयतः काञ्चिद्दशां कौङ्मली-

मास्याम्भोरुहमम्ब किञ्च शनकैरालम्बते फुल्लताम् ॥46॥

आस्तीर्णाधरकान्तिपल्लवचये पातं मुहुर्जग्मुषी

मारद्रोहिणि कन्दलत्स्मरशरज्वालावलीर्व्यञ्जती ।

निन्दन्ती घनसारहारवलयज्योत्स्नामृणालानि ते

कामाक्षि स्मितचातुरी विरहिणीरीतिं जगाहेतराम् ॥47॥

सूर्यालोकविधौ विकासमधिकं यान्ती हरन्ती तम-

स्सन्दोहं नमतां निजस्मरणतो दोषाकरद्वेषिणी ।

निर्यान्ती वदनारविन्दकुहरान्निर्धूतजाड्या नृणां

श्रीकामाक्षि तव स्मितद्युतिमयी चित्रीयते चन्द्रिका ॥48॥

कुण्ठीकुर्युरमी कुबोधघटनामस्मन्मनोमाथिनीं

श्रीकामाक्षि शिवङ्करास्तव शिवे श्रीमन्दहासाङ्कुराः ।

ये तन्वन्ति निरन्तरं तरुणिमस्तम्बेरमग्रामणी-

कुम्भद्वन्द्वविडम्बिनि स्तनतटे मुक्ताकुथाडम्बरम् ॥49॥

प्रेङ्खन्तः शरदम्बुदा इव शनैः प्रेमानिलैः प्रेरिता

मज्जन्तो मन्दनारिकण्ठसुषमासिन्धौ मुहुर्मन्थरम् ।

श्रीकामाक्षि तव स्मितांशुनिकराः श्यामायमानश्रियो

नीलाम्भोधरनैपुणीं तत इतो निर्निद्रयन्त्यञ्जसा ॥50॥

व्यापारं चतुराननैकविहृतौ व्याकुर्वती कुर्वती

रुद्राक्षग्रहणं महेशि सततं वागूर्मिकल्लोलिता ।

उत्फुल्लं धवलारविन्दमधरीकृत्य स्फुरन्ती सदा

श्रीकामाक्षि सरस्वती विजयते त्वन्मन्दहासप्रभा ॥51॥

कर्पूरद्युतितस्करेण महसा कल्माषयत्याननं

श्रीकाञ्चीपुरनायिके पतिरिव श्रीमन्दहासोऽपि ते ।

आलिङ्गत्यतिपीवरां स्तनतटीं बिम्बाधरं चुम्बति

प्रौढं रागभरं व्यनक्ति मनसो धैर्यं धुनीतेतराम् ॥52॥

वैशद्येन च विश्वतापहरणक्रीडापटीयस्तया

पाण्डित्येन पचेलिमेन जगतां नेत्रोत्सवोत्पादेन ।

कामाक्षि स्मितकन्दलैस्तव तुलामारोढुमुद्योगिनी

ज्योत्स्नासौ जलराशिपोषणतया दूष्यां प्रपन्ना दशाम् ॥53॥

लावण्याम्बुजिनीमृणालवलयैः शृङ्गारगन्धद्विप-

ग्रामण्यः श्रुतिचामरैस्तरुणिमस्वाराज्यतेजोङ्कुरैः ।

आनन्दामृतसिन्धुवीचिपृषतैरास्याब्जहंसैस्तव

श्रीकामाक्षि मथान मन्दहसितैर्मत्कं मनःकल्मषम् ॥54॥

उत्तुङ्गस्तनमण्डलीपरिचलन्माणिक्यहारच्छटा-

चञ्चच्छोणिमपुञ्जमध्यसरणिं मातः परिष्कुर्वती ।

या वैदग्ध्यमुपैति शङ्करजटाकान्तारवाटीपत-

त्स्वर्वापीपयसः स्मितद्युतिरसौ कामाक्षि ते मञ्जुला ॥55॥

सन्नामैकजुषा जनेन सुलभं संसूचयन्ती शनै-

रुत्तुङ्गस्य चिरादनुग्रहतरोरुत्पत्स्यमानं फलम् ।

प्राथम्येन विकस्वरा कुसुमवत्प्रागल्भ्यमभ्येयुषी

कामाक्षि स्मितचातुरी तव मम क्षेमङ्करी कल्पताम् ॥56॥

धानुष्काग्रसरस्य लोलकुटिलभ्रूलेखया बिभ्रतो

लीलालोकशिलीमुखं नववयस्साम्राज्यलक्ष्मीपुषः ।

जेतुं मन्मथमर्दिनं जननि ते कामाक्षि हासः स्वयं

वल्गुर्विभ्रमभूभृतो वितनुते सेनापतिप्रक्रियाम् ॥57॥

यन्नाकम्पत कालकूटकबलीकारे चुचुम्बे न यद्-

ग्लान्या चक्षुषि रूषितानलशिखे रुद्रस्य तत्तादृशम् ।

चेतो यत्प्रसभं स्मरज्वरशिखिज्वालेन लेलिह्यते

तत्कामाक्षि तव स्मितांशुकलिकाहेलाभवं प्राभवम् ॥58॥

सम्भिन्नेव सुपर्वलोकतटिनी वीचीचयैर्यामुनैः

सम्मिश्रेव शशाङ्कदीप्तिलहरी नीलैर्महानीरदैः ।

कामाक्षि स्फुरिता तव स्मितरुचिः कालाञ्जनस्पर्धिना

कालिम्ना कचरोचिषां व्यतिकरे काञ्चिद्दशामश्नुते ॥59॥

जानीमो जगदीश्वरप्रणयिनि त्वन्मन्दहासप्रभां

श्रीकामाक्षि सरोजिनीमभिनवामेषा यतः सर्वदा ।

आस्येन्दोरवलोकेन पशुपतेरभ्येति सम्फुल्लतां

तन्द्रालुस्तदभाव एव तनुते तद्वैपरीत्यक्रमम् ॥60॥

यान्ती लोहितिमानमभ्रतटिनी धातुच्छटाकर्दमैः

भान्ती बालगभस्तिमालिकिरणैर्मेघावली शारदी ।

बिम्बोष्ठद्युतिपुञ्जचुम्बनकलाशोणायमानेन ते

कामाक्षि स्मितरोचिषा समदशामारोढुमाकाङ्क्षते ॥61॥

श्रीकामाक्षि मुखेन्दुभूषणमिदं मन्दस्मितं तावकं

नेत्रानन्दकरं तथा हिमकरो गच्छेद्यथा तिग्मताम् ।

शीतं देवि तथा यथा हिमजलं सन्तापमुद्रास्पदं

श्वेतं किञ्च तथा यथा मलिनतां धत्ते च मुक्तामणिः ॥62॥

त्वन्मन्दस्मितमञ्जरीं प्रसृमरां कामाक्षि चन्द्रातपं

सन्तः सन्ततमामनन्त्यमलता तल्लक्षणं लक्ष्यते ।

अस्माकं न धुनोति तापकमधिकं धूनोति नाभ्यन्तरं

ध्वान्तं तत्खलु दुःखिनो वयमिदं केनोति नो विद्महे ॥63॥

नम्रस्य प्रणयप्ररूढकलहच्छेदाय पादाब्जयोः

मन्दं चन्द्रकिशोरशेखरमणेः कामाक्षि रागेण ते ।

बन्धूकप्रसवश्रियं जितवतो बंहीयसीं तादृशीं

बिम्बोष्ठस्य रुचिं निरस्य हसितज्योत्स्ना वयस्यायते ॥64॥

मुक्तानां परिमोचनं विदधतस्तत्प्रीतिनिष्पादिनी

भूयो दूरत एव धूतमरुतस्तत्पालनं तन्वती ।

उद्भूतस्य जलान्तरादविरतं तद्दूरतां जग्मुषी

कामाक्षि स्मितमञ्जरी तव कथं कम्बोस्तुलामश्नुते ॥65॥

श्रीकामाक्षि तव स्मितद्युतिझरीवैदग्ध्यलीलायितं

पश्यन्तोऽपि निरन्तरं सुविमलम्मन्या जगन्मण्डले ।

लोकं हासयितुं किमर्थमनिशं प्राकाश्यमातन्वते

मन्दाक्षं विरहय्य मङ्गलतरं मन्दारचन्द्रादयः ॥66॥

क्षीराब्धेरपि शैलराजतनये त्वन्मन्दहासस्य च

श्रीकामाक्षि वलक्षिमोदयनिधेः किञ्चिद्भिदां ब्रूमहे ।

एकस्मै पुरुषाय देवि स ददौ लक्ष्मीं कदाचित्पुरा

सर्वेभ्योऽपि ददात्यसौ तु सततं लक्ष्मीं च वागीश्वरीम् ॥67॥

श्रीकाञ्चीपुररत्नदीपकलिके तान्येव मेनात्मजे

चाकोराणि कुलानि देवि सुतरां धन्यानि मन्यामहे ।

कम्पातीरकुटुम्बचङ्क्रमकलाचुञ्चूनि चञ्चूपुटैः

नित्यं यानि तव स्मितेन्दुमहसामास्वादमातन्वते ॥68॥

शैत्यप्रक्रममाश्रितोऽपि नमतां जाड्यप्रथां धूनयन्

नैर्मल्यं परमं गतोऽपि गिरिशं रागाकुलं चारयन् ।

लीलालापपुरस्सरोऽपि सततं वाचंयमान्प्रीणयन्

कामाक्षि स्मितरोचिषां तव समुल्लासः कथं वर्ण्यते ॥69॥

श्रोणीचञ्चलमेखलामुखरितं लीलागतं मन्थरं

भ्रूवल्लीचलनं कटाक्षवलनं मन्दाक्षवीक्षाचणम् ।

यद्वैदग्ध्यमुखेन मन्मथरिपुं सम्मोहयन्त्यञ्जसा

श्रीकामाक्षि तव स्मिताय सततं तस्मै नम्सकुर्महे ॥70॥

श्रीकामाक्षि मनोज्ञमन्दहसितज्योतिष्प्ररोहे तव

स्फीतश्वेतिमसार्वभौमसरणिप्रागल्भ्यमभ्येयुषि ।

चन्द्रोऽयं युवराजतां कलयते चेटीधुरं चन्द्रिका

शुद्धा सा च सुधाझरी सहचरीसाधर्म्यमालम्बते ॥71॥

ज्योत्स्ना किं तनुते फलं तनुमतामौष्ण्यप्रशान्तिं विना

त्वन्मन्दस्मितरोचिषा तनुमतां कामाक्षि रोचिष्णुना ।

सन्तापो विनिवार्यते नववयःप्राचुर्यमङ्कूर्यते

सौन्दर्यं परिपूर्यते जगति सा कीर्तिश्च सञ्चार्यते ॥72॥

वैमल्यं कुमुदश्रियां हिमरुचः कान्त्यैव सन्धुक्ष्यते

ज्योत्स्नारोचिरपि प्रदोषसमयं प्राप्यैव सम्पद्यते ।

स्वच्छत्वं नवमौक्तिकस्य परमं संस्कारतो दृश्यते

कामाक्ष्याः स्मितदीधितेर्विशदिमा नैसर्गिको भासते ॥73॥

प्राकाश्यं परमेश्वरप्रणयिनि त्वन्मन्दहासश्रियः

श्रीकामाक्षि मम क्षिणोतु ममतावैचक्षणीमक्षयाम् ।

यद्भीत्येव निलीयते हिमकरो मेघोदरे शुक्तिका-

गर्भे मौक्तिकमण्डली च सरसीमध्ये मृणाली च सा ॥74॥

हेरम्बे च गुहे हर्षभरितं वात्सल्यमङ्कूरयत्

मारद्रोहिणि पूरुषे सहभुवं प्रेमाङ्कुरं व्यञ्जयत् ।

आनम्रेषु जनेषु पूर्णकरुणावैदग्ध्यमुत्तालयत्

कामाक्षि स्मितमञ्जसा तव कथङ्कारं मया कथ्यते ॥75॥

सङ्क्रुद्धद्विजराजकोऽप्यविरतं कुर्वन्द्विजैः सङ्गमं

वाणीपद्धतिदूरगोऽपि सततं तत्साहचर्यं वहन् ।

अश्रान्तं पशुदुर्लभोऽपि कलयन्पत्यौ पशूनां रतिं

श्रीकामाक्षि तव स्मितामृतरसस्यन्दो मयि स्पन्दताम् ॥76॥

श्रीकामाक्षि महेश्वरे निरुपमप्रेमाङ्कुरप्रक्रममं

नित्यं यः प्रकटीकरोति सहजामुन्निद्रयन्माधुरीम् ।

तत्तादृक्तव मन्दहासमहिमा मातः कथं मानितां

तन्मूर्ध्ना सुरनिम्नगां च कलिकामिन्दोश्च तां निन्दति ॥77॥

ये माधुर्यविहारमण्टपभुवो ये शैत्यमुद्राकरा

ये वैशद्यदशाविशेषसुभगास्ते मन्दहासाङ्कुराः ।

कामाक्ष्याः सहजं गुणत्रयमिदं पर्यायतः कुर्वतां

वाणीगुम्फनडम्बरे च हृदये कीर्तिप्ररोहे च मे ॥78॥

कामाक्ष्या मृदुलस्मितांशुनिकरा दक्षान्तके वीक्षणे

मन्दाक्षग्रहिला हिमद्युतिमयूखाक्षेपदीक्षाङ्कुराः ।

दाक्ष्यं पक्ष्मलयन्तु माक्षिकगुडद्राक्षाभवं वाक्षु मे

सूक्ष्मं मोक्षपथं निरीक्षितुमपि प्रक्षालयेयुर्मनः ॥79॥

जात्या शीतशीतलानि मधुराण्येतानि पूतानि ते

गाङ्गानीव पयांसि देवि पटलान्यल्पस्मितज्योतिषाम् ।

एनःपङ्कपरम्परामलिनितामेकाम्रनाथप्रिये

प्रज्ञानात्सुतरां मदीयधिषणां प्रक्षालयन्तु क्षणात् ॥80॥

अश्रान्तं परतन्त्रितः पशुपतिस्त्वन्मन्दहासाङ्कुरैः

श्रीकामाक्षि तदीयवर्णसमतासङ्गेन शङ्कामहे ।

इन्दुं नाकधुनीं च शेखरयते मालां च धत्ते नवैः

वैकुण्ठैरवकुण्ठनं च कुरुते धूलीचयैर्भास्मनैः ॥81॥

श्रीकाञ्चीपुरदेवते मृदुवचस्सौरभ्यमुद्रास्पदं

प्रौढप्रेमलतानवीनकुसुमं मन्दस्मितं तावकम् ।

मन्दं कन्दलति प्रियस्य वदनालोके समाभाषणे

श्लक्ष्णे कुङ्मलति प्ररूढपुलके चाश्लोषणे फुल्लति ॥82॥

किं त्रैस्रोतसमम्बिके परिणतं स्रोतश्चतुर्थं नवं

पीयूषस्य समस्ततापहरणं किंवा द्वितीयं वपुः ।

किंस्वित्त्वन्निकटं गतं मधुरिमाभ्यासाय गव्यं पयः

श्रीकाञ्चीपुरनायकप्रियतमे मन्दस्मितं तावकम् ॥83॥

भूषा वक्त्रसरोरुहस्य सहजा वाचां सखी शाश्वती

नीवी विभ्रमसन्ततेः पशुपतेः सौधी दृशां पारणा ।

जीवातुर्मदनश्रियः शशिरुचेरुच्चाटनी देवता

श्रीकामाक्षि गिरामभूमिमयते हासप्रभामञ्जरी ॥84॥

सूतिः श्वेतिमकन्दलस्य वसतिः शृङ्गारसारश्रियः

पूर्तिः सूक्तिझरीरसस्य लहरी कारुण्यपाथोनिधेः ।

वाटी काचन कौसुमी मधुरिमस्वाराज्यलक्ष्म्यास्तव

श्रीकामाक्षि ममास्तु मङ्गलकरी हासप्रभाचातुरी ॥85॥

जन्तूनां जनिदुःखमृत्युलहरीसन्तापनं कृन्ततः

प्रौढानुग्रहपूर्णशीतलरुचो नित्योदयं बिभ्रतः ।

श्रीकामाक्षि विसृत्वरा इव करा हासाङ्कुरास्ते हठा-

दालोकेन निहन्युरन्धतमसस्तोमस्य मे सन्ततिम् ॥86॥

उत्तुङ्गस्तनमण्डलस्य विलसल्लावण्यलीलानटी-

रङ्गस्य स्फुटमूर्ध्वसीमनि मुहुः प्राकाश्यमभ्येयुषी ।

श्रीकामाक्षि तव स्मितद्युतिततिर्बिम्बोष्ठकान्त्यङ्कुरैः

चित्रां विद्रुममुद्रितां वितनुते मौक्तीं वितानश्रियम् ॥87॥

स्वाभाव्यात्तव वक्त्रमेव ललितं सन्तोषसम्पादनं

शम्भोः किं पुनरञ्चितस्मितरुचः पाण्डित्यपात्रीकृतम् ।

अम्भोजं स्वत एव सर्वजगतां चक्षुःप्रियम्भावुकं

कामाक्षि स्फुरिते शरद्विकसिते कीदृग्विधं भ्राजते ॥88॥

पुम्भिर्निर्मलमानसौर्विदधते मैत्रीं दृढं निर्मलां

लब्ध्वा कर्मलयं च निर्मलतरां कीर्तिं लभन्तेतराम् ।

सूक्तिं पक्ष्मलयन्ति निर्मलतमां यत्तावकाः सेवकाः

तत्कामाक्षि तव स्मितस्य कलया नैर्मल्यसीमानिधेः ॥89॥

आकर्षन्नयनानि नाकिसदसां शैत्येन संस्तम्भय-

न्निन्दुं किञ्च विमोहयन्पशुपतिं विश्वार्तिमुच्चाटयन् ।

हिंसत्संसृतिडम्बरं तव शिवे हासाह्वयो मान्त्रिकः

श्रीकामाक्षि मदीयमानसतमोविद्वेषणे चेष्टताम् ॥90॥

क्षेपीयः क्षपयन्तु कल्मषभयान्यस्माकमल्पस्मित-

ज्योतिर्मण्डलचङ्क्रमास्तव शिवे कामाक्षि रोचिष्णवः ।

पीडाकर्मठकर्मघर्मसमयव्यापारतापानल-

श्रीपाता नवहर्षवर्षणसुधास्रोतस्विनीशीकराः ॥91॥

श्रीकामाक्षि तव स्मितैन्दवमहःपूरे परिम्फूर्जति

प्रौढां वारिधिचातुरीं कलयते भक्तात्मनां प्रातिभम् ।

दौर्गत्यप्रसरास्तमःपटलिकासाधर्म्यमाबिभ्रते

सर्वं कैरवसाहचर्यपदवीरीतिं विधत्ते परम् ॥92॥

मन्दारादिषु मन्मथारिमहिषि प्राकाश्यरीतिं निजां

कादाचित्कतया विशङ्क्य बहुशो वैशद्यमुद्रागुणः ।

सातत्येन तव स्मिते वितनुते स्वैरासनावासनाम् ॥93॥

इन्धाने भववीतिहोत्रनिवहे कर्मौघचण्डानिल-

प्रौढिम्ना बहुलीकृते निपतितं सन्तापचिन्ताकुलम् ।

मातर्मां परिषिञ्च किञ्चिदमलैः पीयूषवर्षैरिव

श्रीकामाक्षि तव स्मितद्युतिकणैः शैशिर्यलीलाकरैः ॥94॥

भाषाया रसनाग्रखेलनजुषः शृङ्गारमुद्रासखी-

लीलाजातरतेः सुखेन नियमस्नानाय मेनात्मजे ।

श्रीकामाक्षि सुधामयीव शिशिरा स्रोतस्विनी तावकी

गाढानन्दतरङ्गिता विजयते हासप्रभाचातुरी ॥95॥

सन्तापं विरलीकरोतु सकलं कामाक्षि मच्चेतना

मज्जन्ती मधुरस्मितामरधुनीकल्लोलजालेषु ते ।

नैरन्तर्यमुपेत्य मन्मथमरुल्लोलेषु येषु स्फुटं

प्रेमेन्दुः प्रतिबिम्बितो वितनुते कौतूहलं धूर्जटेः ॥96॥

चेतःक्षीरपयोधिमन्थरचलद्रागाख्यमन्थाचल-

क्षोभव्यापृतिसम्भवां जननि ते मन्दस्मितश्रीसुधाम् ।

स्वादंस्वादमुदीतकौतुकरसा नेत्रत्रयी शाङ्करी

श्रीकामाक्षि निरन्तरं परिणमत्यानन्दवीचीमयी ॥97॥

आलोके तव पञ्चसायकरिपोरुद्दामकौतूहल-

प्रेङ्खन्मारुतघट्टनप्रचलितादानन्ददुग्धाम्बुधेः ।

काचिद्वीचिरुदञ्चति प्रतिनवा संवित्प्ररोहात्मिका

तां कामाक्षि कवीश्वराः स्मितमिति व्याकुर्वते सर्वदा ॥98॥

सूक्तिः शीलयते किमद्रितनये मन्दस्मितात्ते मुहुः

माधुर्यागमसम्प्रदायमथवा सूक्तेर्नु मन्दस्मितम् ।

इत्थं कामपि गाहते मम मनः सन्देहमार्गभ्रमिं

श्रीकामाक्षि न पारमार्थ्यसरणिस्फूर्तौ निधत्ते पदम् ॥99॥

क्रीडालोलकृपासरोरुहमुखीसौधाङ्गणेभ्यः कवि-

श्रेणीवाक्परिपाटिकामृतझरीसूतीगृहेभ्यः शिवे ।

निर्वाणाङ्कुरसार्वभौमपदवीसिंहासनेभ्यस्तव

श्रीकामाक्षि मनोज्ञमन्दहसितज्योतिष्कणेभ्यो नमः ॥100॥

आर्यामेव विभावयन्मनसि यः पादारविन्दं पुरः

पश्यन्नारभते स्तुतिं स नियतं लब्ध्वा कटाक्षच्छविम् ।

कामाक्ष्या मृदुलस्मितांशुलहरीज्योत्स्नावयस्यान्विताम्

आरोहत्यपवर्गसौधवलभीमानन्दवीचीमयीम् ॥101॥

॥ इति मन्दस्मितशतकं सम्पूर्णम् ॥

॥ इति श्री मूकपञ्चशती सम्पूर्णा ॥

॥औं तत् सत् ॥