Muka Pancha Shati 3 - Stuti Shatakam — Sinhala Script

පාණ්ඩිත්යං පරමේශ්වරි ස්තුතිවිධෞ නෛවාශ්රයන්තේ ගිරාං

වෛරිඤ්චාන්යපි ගුම්ඵනානි විගලද්ගර්වාණි ශර්වාණි තේ .

ස්තෝතුං ත්වාං පරිඵුල්ලනීලනලිනශ්යාමාක්ෂි කාමාක්ෂි මාං

වාචාලීකුරුතේ තථාපි නිතරාං ත්වත්පාදසේවාදරඃ ..1..

තාපිඤ්ඡස්තබකත්විෂේ තනුභෘතාං දාරිද්ර්යමුද්රාද්විෂේ

සංසාරාඛ්යතමෝමුෂේ පුරරිපෝර්වාමාඞ්කසීමාජුෂේ .

කම්පාතීරමුපේයුෂේ කවයතාං ජිහ්වාකුටීං ජග්මුෂේ

විශ්වත්රාණපුෂේ නමෝ(අ)ස්තු සතතං තස්මෛ පරඤ්ජ්යෝතිෂේ ..2..

යේ සන්ධ්යාරුණයන්ති ශඞ්කරජටාකාන්තාරචන්රාර්භකං

සින්දූරන්ති ච යේ පුරන්දරවධූසීමන්තසීමාන්තරේ .

පුණ්ය.ං යේ පරිපක්කයන්ති භජතාං කාඤ්චීපුරේ මාමමී

පායාසුඃ පරමේශ්වරප්රණයිනීපාදෝද්භවාඃ පාංසවඃ ..3..

කාමාඩම්බරපූරයා ශශිරුචා කම්රස්මිතානාං ත්විෂා

කාමාරේරනුරාගසින්ධුමධිකං කල්ලෝලිතං තන්වතී .

කාමාක්ෂීති සමස්තසජ්ජනනුතා කල්යාණදාත්රී නෘණාං

කාරුණ්යාකුලමානසා භගවතී කම්පාතටේ ජෘම්භතේ ..4..

කාමාක්ෂීණපරාක්රමප්රකටනං සම්භාවයන්තී දෘශා

ශ්යාමා ක්ෂීරසහෝදරස්මිතරුචිප්රක්ෂාලිතාශාන්තරා .

කාමාක්ෂීජනමෞලිභූෂණමණිර්වාචාං පරා දේවතා

කාමාක්ෂීති විභාති කාපි කරුණා කම්පාතටින්යාස්තටේ ..5..

ශ්යාමා කාචන චන්ද්රිකා ත්රිභුවනේ පුණ්යාත්මනාමානනේ

සීමාශූන්යකවිත්වවර්ෂජනනී යා කාපි කාදම්බිනී .

මාරාරාතිමනෝවිමෝහනවිධෞ කාචිතත්තමඃකන්දලී

කාමාක්ෂ්යාඃ කරුණාකටාක්ෂලහරී කාමාය මේ කල්පතාම් ..6..

ප්රෞඪධ්වාන්තකදම්බකේ කුමුදිනීපුණ්යාඞ්කුරං දර්ශයන්

ජ්යෝත්ස්නාසඞ්ගමනේ(අ)පි කෝකමිථුනං මිශ්රං සමුද්භාවයන් .

කාලින්දීලහරීදශාං ප්රකටයන්කම්රාං නභස්යද්භුතාං

කශ්චින්නේත්රමහෝත්සවෝ විජයතේ කාඤ්චීපුරේ ශූලිනඃ ..7..

තන්ද්රාහීනතමාලනීලසුෂමෛස්තාරුණ්යලීලාගෘහෛඃ

තාරානාථකිශෝරලාඤ්ඡිතකචෛස්තාම්රාරවින්දේක්ෂණෛඃ .

මාතඃ සංශ්රයතාං මනෝ මනසිජප්රාගල්භ්යනාඩින්ධමෛඃ

කම්පාතීරචරෛර්ඝනස්තනභරෛඃ පුණ්යාඞ්කරෛඃ ශාඞ්කරෛඃ ..8..

නිත්යං නිශ්චලතාමුපේත්ය මරුතාං රක්ෂාවිධිං පුෂ්ණතී

තේජස්සඤ්චයපාටවේන කිරණානුෂ්ණද්යුතේර්මුෂ්ණතී .

කාඤ්චීමධ්යගතාපි දීප්තිජනනී විශ්වාන්තරේ ජෘම්භතේ

කාචිච්චිත්රමහෝ ස්මෘතාපි තමසාං නිර්වාපිකා දීපිකා ..9..

කාන්තෛඃ කේශරුචාං චයෛර්භ්රමරිතං මන්දස්මිතෛඃ පුෂ්පිතං

කාන්ත්යා පල්ලවිතං පදාම්බුරුහයෝර්නේත්රත්විෂා පත්රිතම් .

කම්පාතීරවනාන්තරං විදධතී කල්යාණජන්මස්ථලී

කාඤ්චීමධ්යමහාමණිර්විජයතේ කාචිත්කෘපාකන්දලී ..10..

රාකාචන්ද්රසමානකාන්තිවදනා නාකාධිරාජස්තුතා

මූකානාමපි කුර්වතී සුරධනීනීකාශවාග්වෛභවම් .

ශ්රීකාඤ්චීනගරීවිහාරරසිකා ශෝකාපහන්ත්රී සතාම්

ඒකා පුණ්යපරම්පරා පශුපතේරාකාරිණී රාජතේ ..11..

ජාතා ශීතලශෛලතඃ සුකෘතිනාං දෘශ්යා පරං දේහිනාං

ලෝකානාං ක්ෂණමාත්රසංස්මරණතඃ සන්තාපවිච්ඡේදිනී .

ආශ්චර්යං බහු ඛේලනං විතනුතේ නෛශ්චල්යමාබිභ්රතී

කම්පායාස්තටසීම්නි කාපි තටිනී කාරුණ්යපාථෝමයී ..12..

ඓක්යං යේන විරච්යතේ හරතනෞ දම්භාවපුම්භාවුකේ

රේඛා යත්කචසීම්නි ශේඛරදශාං නෛශාකරී ගාහතේ .

ඖන්නත්යං මුහුරේති යේන ස මහාන්මේනාසඛඃ සානුමාන්

කම්පාතීරවිහාරිණා සශරණාස්තේනෛව ධාම්නා වයම් ..13..

අක්ෂ්ණෝශ්ච ස්තනයෝඃ ශ්රියා ශ්රවණයෝර්බාහ්වෝශ්ච මූලං ස්පෘශන්

උත්තංසේන මුඛේන ච ප්රතිදිනං ද්රුහ්යන්පයෝජන්මනේ .

මාධුර්යේණ ගිරාං ගතේන මෘදුනා හංසාඞ්ගනාං හ්රේපයන්

කාඤ්චීසීම්නි චකාස්ති කෝ(අ)පි කවිතාසන්තානබීජාඞ්කුරඃ ..14..

ඛණ්ඩං චාන්ද්රමසං වතංසමනිශං කාඤ්චීපුරේ ඛේලනං

කාලායශ්ඡවිතස්කරීං තනුරුචිං කර්ණජපේ ලෝචනේ .

තාරුණ්යෝෂ්මනඛම්පචං ස්තනභරං ජඞ්ඝාස්පෘශං කුන්තලං

භාග්යං දේශිකසඤ්චිතං මම කදා සම්පාදයේදම්බිකේ ..15..

තන්වානං නිජකේලිසෞධසරණිං නෛසර්ගිකීණාං ගිරාං

කේදාරං කවිමල්ලසූක්තිලහරීසස්යශ්රියාං ශාශ්වතම් .

අංහෝවඤ්චනචුඤ්චු කිඤ්චන භජේ කාඤ්චීපුරීමණ්ඩනං

පර්යායච්ඡවි පාකශාසනමණේඃ පෞෂ්පේෂවං පෞරුෂම් ..16..

ආලෝකේ මුඛපඞ්කජේ ච දධතී සෞධාකරීං චාතුරීං

චූඩාලඞ්ක්රියමාණපඞ්කජවනීවෛරාගමප්රක්රියා .

මුග්ධස්මේරමුඛී ඝන්සතනතටීමූර්ච්ඡාලමධ්යාඤ්චිතා

කාඤ්චීසීමනි කාමිනී විජයතේ කාචිජ්ජගන්මෝහිනී ..17..

යස්මින්නම්බ භවත්කටාක්ෂරජනී මන්දේ(අ)පි මන්දස්මිත-

ජ්යෝත්ස්නාසංස්නපිතා භවත්යභිමුඛී තං ප්රත්යහෝ දේහිනම් .

ද්රක්ෂාමාක්ෂිකමාධුරීමදභරව්රීඩාකරී වෛඛරී

කාමාක්ෂි ස්වයමාතනෝත්යභිසෘතිං වාමේක්ෂණේව ක්ෂණම් ..18..

කාලින්දීජලකාන්තයඃ ස්මිතරුචිස්වර්වාහිනීපාථසි

ප්රෞඪධ්වාන්තරුචඃ ස්ඵුටාධරමහෝලෞහිත්යසන්ධ්යෝදයේ .

මණික්යෝපලකුණ්ඩලාංශුශිඛිනි ව්යාමිශ්රධූමශ්රියඃ

කල්යාණෛකභුවඃ කටාක්ෂසුෂමාඃ කාමාක්ෂි රාජන්ති තේ ..19..

කලකලරණත්කාඤ්චී කාඤ්චීවිභූෂණමාලිකා

කචභරලසච්චන්ද්රා චන්ද්රාවතංසසධර්මිණී .

කවිකුලගිරඃ ශ්රාවංශ්රාවං මිලත්පුලකාඞ්කුරා

විරචිතශිරඃකම්පා කම්පාතටේ පරිශෝභතේ ..20..

සරසවචසාං වීචී නීචීභවන්මධුමාධුරී

භරිතභුවනා කීර්තිර්මූර්තිර්මනෝභවජිත්වරී .

ජනනි මනසෝ යෝග්යං භෝග්යං නෘණාං තව ජායතේ

කථමිව විනා කාඤ්චීභූෂේ කටාක්ෂතරඞ්ගිතම් ..21..

භ්රමරිතසරිත්කූලෝ නීලෝත්පලප්රභයා(අ)(අ)භයා

නතජනතමඃඛණ්ඩී තුණ්ඩීරසීම්නි විජෘම්භතේ .

අචලතපසාමේකඃ පාකඃ ප්රසූනශරාසන-

ප්රතිභටමනෝහාරී නාරීකුලෛකශිඛාමණිඃ ..22..

මධුරවචසෝ මන්දස්මේරා මතඞ්ගජගාමිනඃ

තරුණිමජුෂස්තාපිච්ඡාභාස්තමඃපරිපන්ථිනඃ .

කුචභරනතාඃ කුර්යුර්භද්රං කුරඞ්ගවිලෝචනාඃ

කලිතකරුණාඃ කාඤ්චීභාජඃ කපාලිමහෝත්සවාඃ ..23..

කමලසුෂමාක්ෂ්යාරෝහේ විචක්ෂණවීක්ෂණාඃ

කුමුදසුකෘතක්රීඩාචූඩාලකුන්තලබන්ධුරාඃ .

රුචිරරුචිභිස්තාපිච්ඡශ්රීප්රපඤ්චනචුඤ්චවඃ

පුරවිජයිනඃ කම්පාතීරේ ස්ඵුරන්ති මනෝරථාඃ ..24..

කලිතරතයඃ කාඤ්චීලීලාවිධෞ කවිමණ්ඩලී-

වචනලහරීවාසන්තීනාං වසන්තවිභූතයඃ .

කුශලවිධයේ භූයාසුර්මේ කුරඞ්ගවිලෝචනාඃ

කුසුමවිශිඛාරාතේරක්ෂ්ණාං කුතූහලවිභ්රමාඃ ..25..

කබලිතතමස්කාණ්ඩාස්තුණ්ඩීරමණ්ඩලමණ්ඩනාඃ

සරසිජවනීසන්තානානාමරුන්තුදශේඛරාඃ .

නයනසරණේර්නේදීයංසඃ කදා නු භවන්ති මේ

තරුණජලදශ්යාමාඃ ශම්භෝස්තපඃඵලවිභ්රමාඃ ..26..

අචරමමිෂුං දීනං මීනධ්වජස්ය මුඛශ්රියා

සරසිජභුවෝ යානං ම්ලානං ගතේන ච මඤ්ජුනා .

ත්රිදශසදසාමන්නං ඛින්නං ගිරා ච විතන්වතී

තිලකයති සා කම්පාතීරං ත්රිලෝචනසුන්දරී ..27..

ජනනි භුවනේ චඞ්ක්රම්යේ(අ)හං කියන්තමනේහසං

කුපුරුෂකරභ්රෂ්ටෛර්දුෂ්ටෛර්ධනෛරුදරම්භරිඃ .

තරුණකරුණේ තන්ද්රාශූන්යේ තරඞ්ගය ලෝචනේ

නමති මයි තේ කිඤ්චිත්කාඤ්චීපුරීමණිදීපිකේ ..28..

මුනිජනමනඃපේටීරත්නං ස්ඵුරත්කරුණානටී-

විහරණකලාගේහං කාඤ්චීපුරීමණිභූෂණම් .

ජගති මහතෝ මෝහව්යාධේර්නෘණාං පරමෞෂධං

පුරහරදෘශාං සාඵල්යං මේ පුරඃ පරිජෘම්භතාම් ..29..

මුනිජනමෝධාම්නේ ධාම්නේ වචෝමයජාහ්නවී-

හිමගිරිතටප්රාග්භාරායාක්ෂරාය පරාත්මනේ .

විහරණජුෂේ කාඤ්චීදේශේ මහේශ්වරලෝචන-

ත්රිතයසරසක්රීඩාසෞධාඞ්ගණාය නමෝ නමඃ ..30..

මරකතරුචාං ප්රත්යාදේශං මහේශ්වරචක්ෂුෂාම්

අමෘතලහරීපූරං පාරං භවාඛ්යපයෝනිධේඃ .

සුචරිතඵලං කාඤ්චීභාජෝ ජනස්ය පචේලිමං

හිමශිඛරිණෝ වංශස්යෛකං වතංසමුපාස්මහේ ..31..

ප්රණමනදිනාරම්භේ කම්පානදීසඛි තාවකේ

සරසකවිතෝන්මේෂඃ පූෂා සතාං සමුදඤ්චිතඃ .

ප්රතිභටමහාප්රෞඪප්රෝද්යත්කවිත්වකුමුද්වතීං

නයති තරසා නිද්රාමුද්රාං නගේශ්වරකන්යකේ ..32..

ශමිතජඩිමාරම්භා කම්පාතටීනිකටේචරී

නිහතදුරිතස්තෝමා සෝමාර්ධමුද්රිතකුන්තලා .

ඵලිතසුමනෝවාඤ්ඡා පාඤ්චායුධී පරදේවතා

සඵලයතු මේ නේත්රේ ගෝත්රේශ්වරප්රියනන්දිනී ..33..

මම තු ධිෂණා පීඩ්යා ජාඩ්යාතිරේක කථං ත්වයා

කුමුදසුෂමාමෛත්රීපාත්රීවතංසිතකුන්තලාම් .

ජගති ශමිතස්තම්භාං කම්පානදීනිලයාමසෞ

ශ්රියති හි ගලත්තන්ද්රා චන්ද්රාවතංසසධර්මිණීම් ..34..

පරිමලපරීපාකෝද්රේකං පයෝමුචි කාඤ්චනේ

ශිඛරිණි පුනර්ද්බෛධීභාවං ශශින්යරුණාතපම් .

අපි ච ජනයන්කම්බෝර්ලක්ෂ්මීමනම්බුනි කෝ(අ)ප්යසෞ

කුසුමධනුෂඃ කාඤ්චීදේශේ චකාස්ති පරාක්රමඃ ..35..

පුරදමයිතුර්වාමෝත්සඞ්ගස්ථලේන රසජ්ඤයා

සරසකවිතාභාජා කාඤ්චීපුරෝදරසීමයා .

තටපරිසරෛර්නීහාරාද්රේර්වචෝභිරකෘත්රිමෛඃ

කිමිව න තුලාමස්මච්චේතෝ මහේශ්වරි ගාහතේ ..36..

නයනයුගලීමාස්මාකීනාං කදා නු ඵලේග්රහීං

විදධති ගතෞ ව්යාකුර්වාණා ගජේන්ද්රචමත්ක්රියාම් .

මරතකරුචෝ මාහේශානා ඝනස්තනනම්රිතාඃ

සුකෘතවිභවාඃ ප්රාඤ්චඃ කාඤ්චීවතංසධුරන්ධරාඃ ..37..

මනසිජයශඃපාරම්පර්යං මරන්දඣරීසුවාං

කවිකුලගිරාං කන්දං කම්පානදීතටමණ්ඩනම් .

මධුරලලිතං මත්කං චක්ෂුර්මනීෂිමනෝහරං

පුරවිජයිනඃ සර්වස්වං තත්පුරස්කුරුතේ කදා ..38..

ශිථිලිතතමෝලීලාං නීලාරවින්දවිලෝචනාං

දහනවිලසත්ඵාලාං ශ්රීකාමකෝටිමුපාස්මහේ .

කරධෘතසච්ඡූලාං කාලාරිචිත්තහරාං පරාං

මනසිජකෘපාලීලාං ලෝලාලකාමලිකේක්ෂණාම් ..39..

කලාලීලාශාලා කවිකුලවචඃකෛරවවනී-

ශරජ්ජ්යෝත්ස්නාධාරා ශශධරශිශුශ්ලාඝ්යමුකුටී .

පුනීතේ නඃ කම්පාපුලිනතටසෞහාර්දතරලා

කදා චක්ෂුර්මාර්ගං කනකගිරිධානුෂ්කමහිෂී ..40..

නමඃ ස්තාන්නම්රේභ්යඃ ස්තනගරිමගර්වේණ ගුරුණා

දධානේභ්යශ්චූඩාභරණමමෘතස්යන්දි ශිශිරම් .

සදා වාස්තවේභ්යඃ සුවිධභුවි කම්පාඛ්යසරිතේ

යශෝව්යාපාරේභ්යඃ සුකෘතවිභවේභ්යෝ රතිපතේඃ ..41..

අසූයන්තී කාචින්මරකතරුචෝ නාකිමුකුටී-

කදම්බං චුම්බන්තී චරණනඛචන්ද්රාංශුපටලෛඃ .

තමෝමුද්රාං විද්රාවයතු මම කාඤ්චීර්නිලයනා

හරෝත්සඞ්ගශ්රීමන්මණිගෘහමහාදීපකලිකා ..42..

අනාද්යන්තා කාචිත්සුජනනයනානන්දජනනී

නිරුන්ධානා කාන්තිං නිජරුචිවිලාසෛර්ජලමුචාම් .

ස්මරාරේස්තාරල්යං මනසි ජනයන්තී ස්වයමහෝ

ගලත්කම්පා ශම්පා පරිලසති කම්පාපරිසරේ ..43..

සුධාඩිණ්ඩීරශ්රීඃ ස්මිතරුචිෂු තුණ්ඩීරවිෂයං

පරිෂ්කුර්වාණාසෞ පරිහසිතනීලෝත්පලරුචිඃ .

ස්තනාභ්යාමානම්රා ස්තබකයතු මේ කාඞ්ක්ෂිතතරුං

දෘශාමෛශානීනාං සුකෘතඵලපාණ්ඩිත්යගරිමා ..44..

කෘපාධාරාද්රෝණී කෘපණධිෂණානාං ප්රණමතාං

නිහන්ත්රී සන්තාපං නිගමමුකුටෝත්තංසකලිකා .

පරා කාඤ්චීලීලාපරිචයවතී පර්වතසුතා

ගිරාං නීවී දේවී ගිරිශපරතන්ත්රා විජයතේ ..45..

කවිත්වශ්රීකන්දඃ සුකෘතපරිපාටී හිමගිරේඃ

විධාත්රී විශ්වේෂාං විෂමශරවීරධ්වජපටී .

සඛී කම්පානද්යාඃ පදහසිතපාථෝජයුගලී

පුරාණෝ පායාන්නඃ පුරමථනසාම්රාජ්යපදවී ..46..

දරිද්රාණා මධ්යේ දරදලිතතාපිච්ඡසුෂමාඃ

ස්තනාභෝගක්කාන්තාස්තරුණහරිණාඞ්කාඞ්කිතකචාඃ .

හරාධීනා නානාවිබුධමුකුටීචුම්බිතපදාඃ

කදා කම්පාතීරේ කථය විහරාමෝ ගිරිසුතේ ..47..

වරීවර්තු ස්ථේමා ත්වයි මම ගිරාං දේවි මනසෝ

නරීනර්තු ප්රෞඪා වදනකමලේ වාක්යලහරී .

චරීචර්තු ප්රජ්ඤාජනනි ජඩිමානඃ පරජනේ

සරීසර්තු ස්වෛරං ජනනි මයි කාමාක්ෂි කරුණා ..48..

ක්ෂණාත්තේ කාමාක්ෂි භ්රමරසුෂමාශික්ෂණගුරුඃ

කටාක්ෂව්යාක්ෂේපෝ මම භවතු මෝක්ෂාය විපදාම් .

නරීනර්තු ස්වෛරං වචනලහරී නිර්ජරපුරී-

සරිද්වීචීනීචීකරණපටුරාස්යේ මම සදා ..49..

පුරස්තාන්මේ භූයඃප්රශමනපරඃ ස්තාන්මම රුජාං

ප්රචාරස්තේ කම්පාතටවිහෘතිසම්පාදිනි දෘශෝඃ .

ඉමාං යාච්ඤාමූරීකුරු සපදි දූරීකුරු තමඃ-

පරීපාකං මත්කං සපදි බුධලෝකං ච නය මාම් ..50..

උදඤ්චන්තී කාඤ්චීනගරනිලයේ ත්වත්කරුණයා

සමෘද්ධා වාග්ධාටී පරිහසිතමාධ්වී කවයතාම් .

උපාදත්තේ මාරප්රතිභටජටාජූටමුකුටී-

කුටීරෝල්ලාසින්යාඃ ශතමඛතටින්යා ජයපටීම් ..51..

ශ්රියං විද්යාං දද්යාජ්ජනනි නමතාං කීර්තිමමිතාං

සුපුත්රාන් ප්රාදත්තේ තව ඣටිති කාමාක්ෂි කරුණා .

ත්රිලෝක්යාමාධික්යං ත්රිපුරපරිපන්ථිප්රණයිනි

ප්රණාමස්ත්වත්පාදේ ශමිතදුරිතේ කිං න කුරුතේ ..52..

මනඃස්තම්භං ස්තම්භං ගමයදුපකම්පං ප්රණමතාං

සදා ලෝලං නීලං චිකුරජිතලෝලම්බනිකරම් .

ගිරාං දූරං ස්මේරං ධෘතශශිකිශෝරං පශුපතේඃ

දෘශාං යෝග්යං භෝග්යං තුහිනගිරිභාග්යං විජයතේ ..53..

ඝනශ්යාමාන්කාමාන්තකමහිෂි කාමාක්ෂි මධුරාන්

දෘශාං පාතානේතානමෘතජලශීතානනුපමාන් .

භවෝත්පාතේ භීතේ මයි විතර නාථේ දෘඪභව-

න්මනශ්ශෝකේ මූකේ හිමගිරිපතාකේ කරුණයා ..54..

නතානාං මන්දානාං භවනිගලබන්ධාකුලධියාං

මහාන්ධ්යාං රුන්ධානාමභිලෂිතසන්තානලතිකාම් .

චරන්තීං කම්පායාස්තටභුවි සවිත්රීං ත්රිජගතාං

ස්මරාමස්තාං නිත්යං ස්මරමථනජීවාතුකලිකාම් ..55..

පරා විද්යා හෘද්යාශ්රිතමදනවිද්යා මරකත-

ප්රභානීලා ලීලාපරවශිතශූලායුධමනාඃ .

තමඃපූරං දූරං චරණනතපෞරන්දරපුරී-

මෘගාක්ෂී කාමාක්ෂී කමලතරලාක්ෂී නයතු මේ ..56..

අහන්තාඛ්යා මත්කං කබලයති හා හන්ත හරිණී

හඨාත්සංවිද්රූපං හරමහිෂි සස්යාඞ්කුරමසෞ .

කටාක්ෂව්යාක්ෂේපප්රකටහරිපාෂාණපටලෛඃ

ඉමාමුච්චෛරුච්චාටය ඣටිති කාමාක්ෂි කෘපයා ..57..

බුධේ වා මූකේ වා තව පතති යස්මින්ක්ෂණමසෞ

කටාක්ෂඃ කාමාක්ෂි ප්රකටජඩිමක්ෂෝදපටිමා .

කථඞ්කාරං නාස්මෛ කරමුකුලචූඩාලමුකුටා

නමෝවාකං බ්රූයුර්නමුචිපරිපන්ථිප්රභෘතයඃ ..58..

ප්රතීචීං පශ්යාමඃ ප්රකටරුචිනීවාරකමණි-

ප්රභාසධ්රීචීනාං ප්රදලිතෂඩාධාරකමලාම් .

චරන්තීං සෞෂුම්නේ පථි පරපදේන්දුප්රවිගල-

ත්සුධාර්ද්රාං කාමාක්ෂීං පරිණතපරඤ්ජ්යෝතිරුදයාම් ..59..

ජම්භාරාතිප්රභෘතිමුකුටීඃ පාදයෝඃ පීඨයන්තී

ගුම්ඵාන්වාචාං කවිජනකෘතාන්ස්වෛරමාරාමයන්තී .

ශම්පාලක්ෂ්මීං මණිගණරුචාපාටලෛඃ ප්රාපයන්තී

කම්පාතීරේ කවිපරිෂදාං ජෘම්භතේ භාග්යසීමා ..60..

චන්ද්රාපීඩාං චතුරවදනාං චඤ්චලාපාඞ්ගලීලාං

කුන්දස්මේරාං කුචභරනතාං කුන්තලෝද්ධූතභෘඞ්ගාම් .

මාරාරාතේර්මදනශිඛිනං මාංසලං දීපයන්තීං

කාමාක්ෂීං තාං කවිකුලගිරාං කල්පවල්ලීමුපාසේ ..61..

කාලාම්භෝදප්රකරසුෂමාං කාන්තිභිස්තිර්ජයන්තී

කල්යාණානාමුදයසරණිඃ කල්පවල්ලී කවීනාම් .

කන්දර්පාරේඃ ප්රියසහචරී කල්මෂාණාං නිහන්ත්රී

කාඤ්චීදේශං තිලකයති සා කාපි කාරුණ්යසීමා ..62..

ඌරීකුර්වන්නුරසිජතටේ චාතුරීං භූධරාණාං

පාථෝජානාං නයනයුගලේ පරිපන්ථ්යං විතන්වන් .

කම්පාතීරේ විහරති රුචා මෝඝයන්මේඝශෛලීං

කෝකද්වේෂං ශිරසි කලයන්කෝ(අ)පි විද්යාවිශේෂඃ ..63..

කාඤ්චීලීලාපරිචයවතී කාපි තාපිච්ඡලක්ෂ්මීඃ

ජාඩ්යාරණ්යේ හුතවහශිඛා ජන්මභූමිඃ කෘපායාඃ .

මාකන්දශ්රීර්මධුරකවිතාචාතුරී කෝකිලානාං

මාර්ගේ භූයාන්මම නයනයෝර්මාන්මථී කාපි විද්යා ..64..

සේතුර්මාතර්මරතකමයෝ භක්තිභාජාං භවාබ්ධෞ

ලීලාලෝලා කුවලයමයී මාන්මථී වෛජයන්තී .

කාඤ්චීභූෂා පශුපතිදෘශාං කාපි කාලාඤ්ජනාලී

මත්කං දුඃඛං ශිථිලයතු තේ මඤ්ජුලාපාඞ්ගමාලා ..65..

ව්යාවෘණ්වානාඃ කුවලයදලප්රක්රියාවෛරමුද්රාං

ව්යාකුර්වාණා මනසිජමහාරාජසාම්රාජ්යලක්ෂ්මීම් .

කාඤ්චීලීලාවිහෘතිරසිකේ කාඞ්ක්ෂිතං නඃ ක්රියාසුඃ

බන්ධච්ඡේදේ තව නියමිනාං බද්ධදීක්ෂාඃ කටාක්ෂාඃ ..66..

කාලාම්භෝදේ ශශිරුචි දලං කෛතකං දර්ශයන්තී

මධ්යේසෞදාමිනි මධුලිහාං මාලිකාං රාජයන්තී .

හංසාරාවං විකචකමලේ මඤ්ජුමුල්ලාසයන්තී

කම්පාතීරේ විලසති නවා කාපි කාරුණ්යලක්ෂ්මීඃ ..67..

චිත්රං චිත්රං නිජමෘදුතයා භර්ත්සයන්පල්ලවාලීං

පුංසාං කාමාන්භුවි ච නියතං පූරයන්පුණ්යභාජාම් .

ජාතඃ ශෛලාන්න තු ජලනිධේඃ ස්වෛරසඤ්චාරශීලඃ

කාඤ්චීභූෂා කලයතු ශිවං කෝ(අ)පි චින්තාමණිර්මේ ..68..

තාම්රාම්භෝජං ජලදනිකටේ තත්ර බන්ධූකපුෂ්පං

තස්මින්මල්ලීකුසුමසුෂමාං තත්ර වීණානිනාදම් .

ව්යාවෘන්වානා සුකෘතලහරී කාපි කාඤ්චිනගර්යාම්

ඓශානී සා කලයතිතරාමෛන්ද්රජාලං විලාසම් ..69..

ආහාරාංශං ත්රිදශසදසාමාශ්රයේ චාතකානාම්

ආකාශෝපර්යපි ච කලයන්නාලයං තුඞ්ගමේෂාම් .

කම්පාතීරේ විහරතිතරාං කාමධේනුඃ කවීනාං

මන්දස්මේරෝ මදනනිගමප්රක්රියාසම්ප්රදායඃ ..70..

ආර්ද්රීභූතෛරවිරලකෘපෛරාත්තලීලාවිලාසෛඃ

ආස්ථාපූර්ණෛරධිකචපලෛරඤ්චිතාම්භෝජශිල්පෛඃ .

කාන්තෛර්ලක්ෂ්මීලලිතභවනෛඃ කාන්තිකෛවල්යසාරෛඃ

කාශ්මල්යං නඃ කබලයතු සා කාමකෝටී කටාක්ෂෛඃ ..71..

ආධූන්වන්ත්යෛ තරලනයනෛරාඞ්ගජීං වෛජයන්තීම්

ආනන්දින්යෛ නිජපදජුෂාමාත්තකාඤ්චීපුරායෛ .

ආස්මාකීනං හෘදයමඛිලෛරාගමානාං ප්රපඤ්චෛඃ

ආරාධ්යායෛ ස්පෘහයතිතරාමදිමායෛ ජනන්යෛ ..72..

දූරං වාචාං ත්රිදශසදසාං දුඃඛසින්ධෝස්තරිත්රං

මෝහක්ෂ්වේලක්ෂිතිරුහවනේ ක්රූරධාරං කුඨාරම් .

කම්පාතීරප්රණයි කවිභිර්වර්ණිතෝද්යච්චරිත්රං

ශාන්ත්යෛ සේවේ සකලවිපදාං ශාඞ්කරං තත්කලත්රම් ..73..

ඛණ්ඩීකෘත්ය ප්රකෘතිකුටිලං කල්මෂං ප්රාතිභශ්රී-

ශුණ්ඩීරත්වං නිජපදජුෂාං ශූන්යතන්ද්රං දිශන්තී .

තුණ්ඩීරාඛ්යෛ මහති විෂයේ ස්වර්ණවෘෂ්ටිප්රදාත්රී

චණ්ඩී දේවී කලයති රතිං චන්ද්රචූඩාලචූඩේ ..74..

යේන ඛ්යාතෝ භවති ස ගෘහී පූරුෂෝ මේරුධන්වා

යද්දෘක්කෝණේ මදනනිගමප්රාභවං බෝභවීති .

යත්ප්රීත්යෛව ත්රිජගදධිපෝ ජෘම්භතේ කිම්පචානඃ

කම්පාතීරේ ස ජයති මහාන්කශ්චිදෝජෝවිශේෂඃ ..75..

ධන්යා ධන්යා ගතිරිහ ගිරාං දේවි කාමාක්ෂි යන්මේ

නින්ද්යාං භින්ද්යාත්සපදි ජඩතාං කල්මෂාදුන්මිෂන්තීම් .

සාධ්වී මාධ්වීරසමධුරතාභඤ්ජිනී මඤ්ජුරීතිඃ

වාණීවේණී ඣටිති වෘණුතාත්ස්වර්ධුනීස්පර්ධිනී මාම් ..76..

යස්යා වාටී හෘදයකමලං කෞසුමී යෝගභාජාං

යස්යාඃ පීඨී සතතශිශිරා ශීකරෛර්මාකරන්දෛඃ .

යස්යාඃ පේටී ශ්රුතිපරිචලන්මෞලිරත්නස්ය කාඤ්චී

සා මේ සෝමාභරණමහිෂී සාධයේත්කාඞ්ක්ෂිතානි ..77..

ඒකා මාතා සකලජගතාමීයුෂී ධ්යානමුද්රාම්

ඒකාම්රාධීශ්වරචරණයෝරේකතානාං සමින්ධේ .

තාටඞ්කෝද්යන්මණිගණරුචා තාම්රකර්ණප්රදේශා

තාරුණ්යශ්රීස්තබකිතතනුස්තාපසී කාපි බාලා ..78..

දන්තාදන්තිප්රකටනකරී දන්තිභිර්මන්දයානෛඃ

මන්දාරාණාං මදපරිණතිං මථ්නතී මන්දහාසෛඃ .

අඞ්කූරාභ්යාං මනසිජතරෝරඞ්කිතෝරාඃ කුචාභ්යා-

මන්තඃකාඤ්චි ස්ඵුරති ජගතාමාදිමා කාපි මාතා ..79..

ත්රියම්බකකුටුම්බිනීං ත්රිපුරසුන්දරීමින්දිරාං

පුලින්දපතිසුන්දරීං ත්රිපුරභෛරවීං භාරතීම් .

මතඞ්ගකුලනායිකාං මහිෂමර්දනීං මාතෘකාං

භණන්ති විබුධෝත්තමා විහෘතිමේව කාමාක්ෂි තේ ..80..

මහාමුනිමනෝනටී මහිතරම්යකම්පාතටී-

කුටීරකවිහාරිණී කුටිලබෝධසංහාරිණී .

සදා භවතු කාමිනී සකලදේහිනාං ස්වාමිනී

කෘපාතිශයකිඞ්කරී මම විභූතයේ ශාඞ්කරී ..81..

ජඩාඃ ප්රකෘතිනිර්ධනා ජනවිලෝචනාරුන්තුදා

නරා ජනනි වීක්ෂණං ක්ෂණමවාප්ය කාමාක්ෂි තේ .

වචස්සු මධුමාධුරීං ප්රකටයන්ති පෞරන්දරී-

විභූතිෂු විඩම්බනාං වපුෂි මාන්මථීං ප්රක්රියාම් ..82..

ඝන්සතනතටස්ඵුටස්ඵුරිතකඤ්චුලීචඤ්චලී-

කෘතත්රිපුරශාසනා සුජනශීලිතෝපාසනා .

දෘශෝඃ සරණිමශ්නුතේ මම කදා නු කාඤ්චීපුරේ

පරා පරමයෝගිනාං මනසි චිත්කුලා පුෂ්කලා ..83..

කවීන්ද්රහෘදයේචරී පරිගෘහීතකාඤ්චීපුරී

නිරූඪකරුණාඣරී නිඛිලලෝකරක්ෂාකරී .

මනඃපථදවීයසී මදනශාසනප්රේයසී

මහාගුණගරීයසී මම දෘශෝ(අ)ස්තු නේදීයසී ..84..

ධනේන න රමාමහේ ඛලජනාන්න සේවාමහේ

න චාපලමයාමහේ භවභයාන්න දූයාමහේ .

ස්ථිරාං තනුමහේතරාං මනසි කිං ච කාඤ්චීරත-

ස්මරාන්තකකුටුම්බිනීචරණපල්ලවෝපාසනාම් ..85..

සුරාඃ පරිජනා වපුර්මනසිජාය වෛරායතේ

ත්රිවිෂ්ටපනිතම්බිනීකුචතටී ච කේලීගිරිඃ .

ගිරඃ සුරභයෝ වයස්තරුණිමා දරිද්රස්ය වා

කටාක්ෂසරණෞ ක්ෂණං නිපතිතස්ය කාමාක්ෂි තේ ..86..

පවිත්රය ජගත්ත්රයීවිබුධබෝධජීවාතුභිඃ

පුරත්රයවිමර්දිනඃ පුලකකඤ්චුලීදායිභිඃ .

භවක්ෂයවිචක්ෂණෛර්ව්යසනමෝක්ෂණෛර්වීක්ෂණෛඃ

නිරක්ෂරශිරෝමණිං කරුණයෛව කාමාක්ෂි මාම් ..87..

කදා කලිතඛේලනාඃ කරුණයෛව කාඤ්චීපුරේ

කලායමුකුලත්විෂඃ ශුභකදම්බපූර්ණාඞ්කුරාඃ .

පයෝධරභරාලසාඃ කවිජනේෂු තේ බන්ධුරාඃ

පචේලිමකෘපාරසා පරිපතන්ති මාර්ගේ දෘශෝඃ ..88..

අශෝධ්යමචලෝද්භවං හෘදයනන්දනං දේහිනාම්

අනර්ඝමධිකාඤ්චි තත්කිමපි රත්නමුද්ද්යෝතතේ .

අනේන සමලඞ්කෘතා ජයති ශඞ්කරාඞ්කස්ථලී

කදාස්ය මම මානසං ව්රජති පේටිකාවිභ්රමම් ..89..

පරාමෘතඣරීප්ලුතා ජයති නිත්යමන්තශ්චරී

භුවාමපි බහිශ්චරී පරමසංවිදේකාත්මිකා .

මහද්භිරපරෝක්ෂිතා සතතමේව කාඤ්චීපුරේ

මමාන්වහමහම්මතිර්මනසි භාතු මාහේශ්වරී ..90..

තමෝවිපිනධාවිනං සතතමේව කාඤ්චීපුරේ

විහාරරසිකා පරා පරමසංවිදුර්වීරුහේ .

කටාක්ෂනිගලෛර්දෘඪං හෘදයදුෂ්ටදන්තාවලං

චිරං නයතු මාමකං ත්රිපුරවෛරිසීමන්තිනී ..91..

ත්වමේව සති චණ්ඩිකා ත්වමසි දේවි චාමුණ්ඩිකා

ත්වමේව පරමාතෘකා ත්වමපි යෝගිනීරූපිණී .

ත්වමේව කිල ශාම්භවී ත්වමසි කාමකෝටී ජයා

ත්වමේව විජයා ත්වයි ත්රිජගදම්බ කිං බ්රූමහේ ..92..

පරේ ජනනි පාර්වති ප්රණතපාලිනි ප්රාතිභ-

ප්රදාත්රි පරමේශ්වරි ත්රිජගදාශ්රිතේ ශාශ්වතේ .

ත්රියම්බකකුටුම්බිනි ත්රිපදසඞ්ගිනි ත්රීක්ෂණේ

ත්රිශක්තිමයි වීක්ෂණං මයි නිධේහි කාමාක්ෂි තේ ..93..

මනෝමධුකරෝත්සවං විදධතී මනීෂාජුෂාං

ස්වයම්ප්රභවවෛඛරීවිපිනවීථිකාලම්බිනී .

අහෝ ශිශිරිතා කෘපාමධුරසේන කම්පාතටේ

චරාචරවිධායිනී චලති කාපි චින්මඤ්ජරී ..94..

කලාවති කලාභෘතෝ මුකුටසීම්නි ලීලාවති

ස්පෘහාවති මහේශ්වරේ භුවනමෝහනේ භාස්වති .

ප්රභාවති රමේ සදා මහිතරූපශෝභාවති

ත්වරාවති පරේ සතාං ගුරුකෘපාම්බුධාරාවති ..95..

ත්වයෛව ජගදම්බයා භුවනමණ්ඩලං සූයතේ

ත්වයෛව කරුණාර්ද්රයා තදපි රක්ෂණං නීයතේ .

ත්වයෛව ඛරකෝපයා නයනපාවකේ හූයතේ

ත්වයෛව කිල නිත්යයා ජගති සන්තතං ස්ථීයතේ ..96..

චරාචරජගන්මයීං සකලහෘන්මයීං චින්මයීං

ගුණත්රයමයීං ජගත්ත්රයමයීං ත්රිධාමාමයීම් .

පරාපරමයීං සදා දශදිශාං නිශාහර්මයීං

පරාං සතතසන්මයීං මනසි චින්මයීං ශීලයේ ..97..

ජය ජගදම්බිකේ හරකුටුම්බිනි වක්ත්රරුචා

ජිතශරදම්බුජේ ඝනවිඩම්බිනි කේශරුචා .

පරමවලම්බනං කුරු සදා පරරූපධරේ

මම ගතසංවිදෝ ජඩිමඩම්බරතාණ්ඩවිනඃ ..98..

භුවනජනනි භූෂාභූතචන්ද්රේ නමස්තේ

කලුෂශමනි කම්පාතීරගේහේ නමස්තේ .

නිඛිලනිගමවේද්යේ නිත්යරූපේ නමස්තේ

පරශිවමයි පාශච්ඡේදහස්තේ නමස්තේ ..99..

ක්වණත්කාඤ්චී කාඤ්චීපුරමණිවිපඤ්චීලයඣරී-

ශිරඃකම්පා කම්පාවසතිරනුකම්පාජලනිධිඃ .

ඝනශ්යාමා ශ්යාමා කඨිනකුචසීමා මනසි මේ

මෘගාක්ෂී කාමාක්ෂී හරනටනසාක්ෂී විහරතාත් ..100..

සමරවිජයකෝටී සාධකානන්දධාටී

මෘදුගුණපරිපේටී මුඛ්යකාදම්බවාටී .

මුනිනුතපරිපාටී මෝහිතාජාණ්ඩකෝටී

පරමශිවවධූටී පාතු මාං කාමකෝටී ..101..

ඉමං පරවරප්රදං ප්රකෘතිපේශලං පාවනං

පරාපරචිදාකෘතිප්රකටනප්රදීපායිතම් .

ස්තවං පඨති නිත්යදා මනසි භාවයන්නම්බිකාං

ජපෛරලමලං මඛෛරධිකදේහසංශෝෂණෛඃ ..102..

.. ඉති ස්තුතිශතකං සම්පූර්ණම් ..

Roman (IAST) Transliteration

pāṇḍityaṃ parameśvari stutividhau naivāśrayante girāṃ

vairiñcānyapi gumphanāni vigaladgarvāṇi śarvāṇi te |

stotuṃ tvāṃ pariphullanīlanalinaśyāmākṣi kāmākṣi māṃ

vācālīkurute tathāpi nitarāṃ tvatpādasevādaraḥ ||1||

tāpiñchastabakatviṣe tanubhṛtāṃ dāridryamudrādviṣe

saṃsārākhyatamomuṣe purariporvāmāṅkasīmājuṣe |

kampātīramupeyuṣe kavayatāṃ jihvākuṭīṃ jagmuṣe

viśvatrāṇapuṣe namo'stu satataṃ tasmai parañjyotiṣe ||2||

ye sandhyāruṇayanti śaṅkarajaṭākāntāracanrārbhakaṃ

sindūranti ca ye purandaravadhūsīmantasīmāntare |

puṇya.ṃ ye paripakkayanti bhajatāṃ kāñcīpure māmamī

pāyāsuḥ parameśvarapraṇayinīpādodbhavāḥ pāṃsavaḥ ||3||

kāmāḍambarapūrayā śaśirucā kamrasmitānāṃ tviṣā

kāmāreranurāgasindhumadhikaṃ kallolitaṃ tanvatī |

kāmākṣīti samastasajjananutā kalyāṇadātrī nṛṇāṃ

kāruṇyākulamānasā bhagavatī kampātaṭe jṛmbhate ||4||

kāmākṣīṇaparākramaprakaṭanaṃ sambhāvayantī dṛśā

śyāmā kṣīrasahodarasmitaruciprakṣālitāśāntarā |

kāmākṣījanamaulibhūṣaṇamaṇirvācāṃ parā devatā

kāmākṣīti vibhāti kāpi karuṇā kampātaṭinyāstaṭe ||5||

śyāmā kācana candrikā tribhuvane puṇyātmanāmānane

sīmāśūnyakavitvavarṣajananī yā kāpi kādambinī |

mārārātimanovimohanavidhau kācitattamaḥkandalī

kāmākṣyāḥ karuṇākaṭākṣalaharī kāmāya me kalpatām ||6||

prauḍhadhvāntakadambake kumudinīpuṇyāṅkuraṃ darśayan

jyotsnāsaṅgamane'pi kokamithunaṃ miśraṃ samudbhāvayan |

kālindīlaharīdaśāṃ prakaṭayankamrāṃ nabhasyadbhutāṃ

kaścinnetramahotsavo vijayate kāñcīpure śūlinaḥ ||7||

tandrāhīnatamālanīlasuṣamaistāruṇyalīlāgṛhaiḥ

tārānāthakiśoralāñchitakacaistāmrāravindekṣaṇaiḥ |

mātaḥ saṃśrayatāṃ mano manasijaprāgalbhyanāḍindhamaiḥ

kampātīracarairghanastanabharaiḥ puṇyāṅkaraiḥ śāṅkaraiḥ ||8||

nityaṃ niścalatāmupetya marutāṃ rakṣāvidhiṃ puṣṇatī

tejassañcayapāṭavena kiraṇānuṣṇadyutermuṣṇatī |

kāñcīmadhyagatāpi dīptijananī viśvāntare jṛmbhate

kāciccitramaho smṛtāpi tamasāṃ nirvāpikā dīpikā ||9||

kāntaiḥ keśarucāṃ cayairbhramaritaṃ mandasmitaiḥ puṣpitaṃ

kāntyā pallavitaṃ padāmburuhayornetratviṣā patritam |

kampātīravanāntaraṃ vidadhatī kalyāṇajanmasthalī

kāñcīmadhyamahāmaṇirvijayate kācitkṛpākandalī ||10||

rākācandrasamānakāntivadanā nākādhirājastutā

mūkānāmapi kurvatī suradhanīnīkāśavāgvaibhavam |

śrīkāñcīnagarīvihārarasikā śokāpahantrī satām

ekā puṇyaparamparā paśupaterākāriṇī rājate ||11||

jātā śītalaśailataḥ sukṛtināṃ dṛśyā paraṃ dehināṃ

lokānāṃ kṣaṇamātrasaṃsmaraṇataḥ santāpavicchedinī |

āścaryaṃ bahu khelanaṃ vitanute naiścalyamābibhratī

kampāyāstaṭasīmni kāpi taṭinī kāruṇyapāthomayī ||12||

aikyaṃ yena viracyate haratanau dambhāvapumbhāvuke

rekhā yatkacasīmni śekharadaśāṃ naiśākarī gāhate |

aunnatyaṃ muhureti yena sa mahānmenāsakhaḥ sānumān

kampātīravihāriṇā saśaraṇāstenaiva dhāmnā vayam ||13||

akṣṇośca stanayoḥ śriyā śravaṇayorbāhvośca mūlaṃ spṛśan

uttaṃsena mukhena ca pratidinaṃ druhyanpayojanmane |

mādhuryeṇa girāṃ gatena mṛdunā haṃsāṅganāṃ hrepayan

kāñcīsīmni cakāsti ko'pi kavitāsantānabījāṅkuraḥ ||14||

khaṇḍaṃ cāndramasaṃ vataṃsamaniśaṃ kāñcīpure khelanaṃ

kālāyaśchavitaskarīṃ tanuruciṃ karṇajape locane |

tāruṇyoṣmanakhampacaṃ stanabharaṃ jaṅghāspṛśaṃ kuntalaṃ

bhāgyaṃ deśikasañcitaṃ mama kadā sampādayedambike ||15||

tanvānaṃ nijakelisaudhasaraṇiṃ naisargikīṇāṃ girāṃ

kedāraṃ kavimallasūktilaharīsasyaśriyāṃ śāśvatam |

aṃhovañcanacuñcu kiñcana bhaje kāñcīpurīmaṇḍanaṃ

paryāyacchavi pākaśāsanamaṇeḥ pauṣpeṣavaṃ pauruṣam ||16||

āloke mukhapaṅkaje ca dadhatī saudhākarīṃ cāturīṃ

cūḍālaṅkriyamāṇapaṅkajavanīvairāgamaprakriyā |

mugdhasmeramukhī ghansatanataṭīmūrcchālamadhyāñcitā

kāñcīsīmani kāminī vijayate kācijjaganmohinī ||17||

yasminnamba bhavatkaṭākṣarajanī mande'pi mandasmita-

jyotsnāsaṃsnapitā bhavatyabhimukhī taṃ pratyaho dehinam |

drakṣāmākṣikamādhurīmadabharavrīḍākarī vaikharī

kāmākṣi svayamātanotyabhisṛtiṃ vāmekṣaṇeva kṣaṇam ||18||

kālindījalakāntayaḥ smitarucisvarvāhinīpāthasi

prauḍhadhvāntarucaḥ sphuṭādharamaholauhityasandhyodaye |

maṇikyopalakuṇḍalāṃśuśikhini vyāmiśradhūmaśriyaḥ

kalyāṇaikabhuvaḥ kaṭākṣasuṣamāḥ kāmākṣi rājanti te ||19||

kalakalaraṇatkāñcī kāñcīvibhūṣaṇamālikā

kacabharalasaccandrā candrāvataṃsasadharmiṇī |

kavikulagiraḥ śrāvaṃśrāvaṃ milatpulakāṅkurā

viracitaśiraḥkampā kampātaṭe pariśobhate ||20||

sarasavacasāṃ vīcī nīcībhavanmadhumādhurī

bharitabhuvanā kīrtirmūrtirmanobhavajitvarī |

janani manaso yogyaṃ bhogyaṃ nṛṇāṃ tava jāyate

kathamiva vinā kāñcībhūṣe kaṭākṣataraṅgitam ||21||

bhramaritasaritkūlo nīlotpalaprabhayā''bhayā

natajanatamaḥkhaṇḍī tuṇḍīrasīmni vijṛmbhate |

acalatapasāmekaḥ pākaḥ prasūnaśarāsana-

pratibhaṭamanohārī nārīkulaikaśikhāmaṇiḥ ||22||

madhuravacaso mandasmerā mataṅgajagāminaḥ

taruṇimajuṣastāpicchābhāstamaḥparipanthinaḥ |

kucabharanatāḥ kuryurbhadraṃ kuraṅgavilocanāḥ

kalitakaruṇāḥ kāñcībhājaḥ kapālimahotsavāḥ ||23||

kamalasuṣamākṣyārohe vicakṣaṇavīkṣaṇāḥ

kumudasukṛtakrīḍācūḍālakuntalabandhurāḥ |

rucirarucibhistāpicchaśrīprapañcanacuñcavaḥ

puravijayinaḥ kampātīre sphuranti manorathāḥ ||24||

kalitaratayaḥ kāñcīlīlāvidhau kavimaṇḍalī-

vacanalaharīvāsantīnāṃ vasantavibhūtayaḥ |

kuśalavidhaye bhūyāsurme kuraṅgavilocanāḥ

kusumaviśikhārāterakṣṇāṃ kutūhalavibhramāḥ ||25||

kabalitatamaskāṇḍāstuṇḍīramaṇḍalamaṇḍanāḥ

sarasijavanīsantānānāmaruntudaśekharāḥ |

nayanasaraṇernedīyaṃsaḥ kadā nu bhavanti me

taruṇajaladaśyāmāḥ śambhostapaḥphalavibhramāḥ ||26||

acaramamiṣuṃ dīnaṃ mīnadhvajasya mukhaśriyā

sarasijabhuvo yānaṃ mlānaṃ gatena ca mañjunā |

tridaśasadasāmannaṃ khinnaṃ girā ca vitanvatī

tilakayati sā kampātīraṃ trilocanasundarī ||27||

janani bhuvane caṅkramye'haṃ kiyantamanehasaṃ

kupuruṣakarabhraṣṭairduṣṭairdhanairudarambhariḥ |

taruṇakaruṇe tandrāśūnye taraṅgaya locane

namati mayi te kiñcitkāñcīpurīmaṇidīpike ||28||

munijanamanaḥpeṭīratnaṃ sphuratkaruṇānaṭī-

viharaṇakalāgehaṃ kāñcīpurīmaṇibhūṣaṇam |

jagati mahato mohavyādhernṛṇāṃ paramauṣadhaṃ

puraharadṛśāṃ sāphalyaṃ me puraḥ parijṛmbhatām ||29||

munijanamodhāmne dhāmne vacomayajāhnavī-

himagiritaṭaprāgbhārāyākṣarāya parātmane |

viharaṇajuṣe kāñcīdeśe maheśvaralocana-

tritayasarasakrīḍāsaudhāṅgaṇāya namo namaḥ ||30||

marakatarucāṃ pratyādeśaṃ maheśvaracakṣuṣām

amṛtalaharīpūraṃ pāraṃ bhavākhyapayonidheḥ |

sucaritaphalaṃ kāñcībhājo janasya pacelimaṃ

himaśikhariṇo vaṃśasyaikaṃ vataṃsamupāsmahe ||31||

praṇamanadinārambhe kampānadīsakhi tāvake

sarasakavitonmeṣaḥ pūṣā satāṃ samudañcitaḥ |

pratibhaṭamahāprauḍhaprodyatkavitvakumudvatīṃ

nayati tarasā nidrāmudrāṃ nageśvarakanyake ||32||

śamitajaḍimārambhā kampātaṭīnikaṭecarī

nihataduritastomā somārdhamudritakuntalā |

phalitasumanovāñchā pāñcāyudhī paradevatā

saphalayatu me netre gotreśvarapriyanandinī ||33||

mama tu dhiṣaṇā pīḍyā jāḍyātireka kathaṃ tvayā

kumudasuṣamāmaitrīpātrīvataṃsitakuntalām |

jagati śamitastambhāṃ kampānadīnilayāmasau

śriyati hi galattandrā candrāvataṃsasadharmiṇīm ||34||

parimalaparīpākodrekaṃ payomuci kāñcane

śikhariṇi punardbaidhībhāvaṃ śaśinyaruṇātapam |

api ca janayankamborlakṣmīmanambuni ko'pyasau

kusumadhanuṣaḥ kāñcīdeśe cakāsti parākramaḥ ||35||

puradamayiturvāmotsaṅgasthalena rasajñayā

sarasakavitābhājā kāñcīpurodarasīmayā |

taṭaparisarairnīhārādrervacobhirakṛtrimaiḥ

kimiva na tulāmasmacceto maheśvari gāhate ||36||

nayanayugalīmāsmākīnāṃ kadā nu phalegrahīṃ

vidadhati gatau vyākurvāṇā gajendracamatkriyām |

maratakaruco māheśānā ghanastananamritāḥ

sukṛtavibhavāḥ prāñcaḥ kāñcīvataṃsadhurandharāḥ ||37||

manasijayaśaḥpāramparyaṃ marandajharīsuvāṃ

kavikulagirāṃ kandaṃ kampānadītaṭamaṇḍanam |

madhuralalitaṃ matkaṃ cakṣurmanīṣimanoharaṃ

puravijayinaḥ sarvasvaṃ tatpuraskurute kadā ||38||

śithilitatamolīlāṃ nīlāravindavilocanāṃ

dahanavilasatphālāṃ śrīkāmakoṭimupāsmahe |

karadhṛtasacchūlāṃ kālāricittaharāṃ parāṃ

manasijakṛpālīlāṃ lolālakāmalikekṣaṇām ||39||

kalālīlāśālā kavikulavacaḥkairavavanī-

śarajjyotsnādhārā śaśadharaśiśuślāghyamukuṭī |

punīte naḥ kampāpulinataṭasauhārdataralā

kadā cakṣurmārgaṃ kanakagiridhānuṣkamahiṣī ||40||

namaḥ stānnamrebhyaḥ stanagarimagarveṇa guruṇā

dadhānebhyaścūḍābharaṇamamṛtasyandi śiśiram |

sadā vāstavebhyaḥ suvidhabhuvi kampākhyasarite

yaśovyāpārebhyaḥ sukṛtavibhavebhyo ratipateḥ ||41||

asūyantī kācinmarakataruco nākimukuṭī-

kadambaṃ cumbantī caraṇanakhacandrāṃśupaṭalaiḥ |

tamomudrāṃ vidrāvayatu mama kāñcīrnilayanā

harotsaṅgaśrīmanmaṇigṛhamahādīpakalikā ||42||

anādyantā kācitsujananayanānandajananī

nirundhānā kāntiṃ nijarucivilāsairjalamucām |

smarārestāralyaṃ manasi janayantī svayamaho

galatkampā śampā parilasati kampāparisare ||43||

sudhāḍiṇḍīraśrīḥ smitaruciṣu tuṇḍīraviṣayaṃ

pariṣkurvāṇāsau parihasitanīlotpalaruciḥ |

stanābhyāmānamrā stabakayatu me kāṅkṣitataruṃ

dṛśāmaiśānīnāṃ sukṛtaphalapāṇḍityagarimā ||44||

kṛpādhārādroṇī kṛpaṇadhiṣaṇānāṃ praṇamatāṃ

nihantrī santāpaṃ nigamamukuṭottaṃsakalikā |

parā kāñcīlīlāparicayavatī parvatasutā

girāṃ nīvī devī giriśaparatantrā vijayate ||45||

kavitvaśrīkandaḥ sukṛtaparipāṭī himagireḥ

vidhātrī viśveṣāṃ viṣamaśaravīradhvajapaṭī |

sakhī kampānadyāḥ padahasitapāthojayugalī

purāṇo pāyānnaḥ puramathanasāmrājyapadavī ||46||

daridrāṇā madhye daradalitatāpicchasuṣamāḥ

stanābhogakkāntāstaruṇahariṇāṅkāṅkitakacāḥ |

harādhīnā nānāvibudhamukuṭīcumbitapadāḥ

kadā kampātīre kathaya viharāmo girisute ||47||

varīvartu sthemā tvayi mama girāṃ devi manaso

narīnartu prauḍhā vadanakamale vākyalaharī |

carīcartu prajñājanani jaḍimānaḥ parajane

sarīsartu svairaṃ janani mayi kāmākṣi karuṇā ||48||

kṣaṇātte kāmākṣi bhramarasuṣamāśikṣaṇaguruḥ

kaṭākṣavyākṣepo mama bhavatu mokṣāya vipadām |

narīnartu svairaṃ vacanalaharī nirjarapurī-

saridvīcīnīcīkaraṇapaṭurāsye mama sadā ||49||

purastānme bhūyaḥpraśamanaparaḥ stānmama rujāṃ

pracāraste kampātaṭavihṛtisampādini dṛśoḥ |

imāṃ yācñāmūrīkuru sapadi dūrīkuru tamaḥ-

parīpākaṃ matkaṃ sapadi budhalokaṃ ca naya mām ||50||

udañcantī kāñcīnagaranilaye tvatkaruṇayā

samṛddhā vāgdhāṭī parihasitamādhvī kavayatām |

upādatte mārapratibhaṭajaṭājūṭamukuṭī-

kuṭīrollāsinyāḥ śatamakhataṭinyā jayapaṭīm ||51||

śriyaṃ vidyāṃ dadyājjanani namatāṃ kīrtimamitāṃ

suputrān prādatte tava jhaṭiti kāmākṣi karuṇā |

trilokyāmādhikyaṃ tripuraparipanthipraṇayini

praṇāmastvatpāde śamitadurite kiṃ na kurute ||52||

manaḥstambhaṃ stambhaṃ gamayadupakampaṃ praṇamatāṃ

sadā lolaṃ nīlaṃ cikurajitalolambanikaram |

girāṃ dūraṃ smeraṃ dhṛtaśaśikiśoraṃ paśupateḥ

dṛśāṃ yogyaṃ bhogyaṃ tuhinagiribhāgyaṃ vijayate ||53||

ghanaśyāmānkāmāntakamahiṣi kāmākṣi madhurān

dṛśāṃ pātānetānamṛtajalaśītānanupamān |

bhavotpāte bhīte mayi vitara nāthe dṛḍhabhava-

nmanaśśoke mūke himagiripatāke karuṇayā ||54||

natānāṃ mandānāṃ bhavanigalabandhākuladhiyāṃ

mahāndhyāṃ rundhānāmabhilaṣitasantānalatikām |

carantīṃ kampāyāstaṭabhuvi savitrīṃ trijagatāṃ

smarāmastāṃ nityaṃ smaramathanajīvātukalikām ||55||

parā vidyā hṛdyāśritamadanavidyā marakata-

prabhānīlā līlāparavaśitaśūlāyudhamanāḥ |

tamaḥpūraṃ dūraṃ caraṇanatapaurandarapurī-

mṛgākṣī kāmākṣī kamalataralākṣī nayatu me ||56||

ahantākhyā matkaṃ kabalayati hā hanta hariṇī

haṭhātsaṃvidrūpaṃ haramahiṣi sasyāṅkuramasau |

kaṭākṣavyākṣepaprakaṭaharipāṣāṇapaṭalaiḥ

imāmuccairuccāṭaya jhaṭiti kāmākṣi kṛpayā ||57||

budhe vā mūke vā tava patati yasminkṣaṇamasau

kaṭākṣaḥ kāmākṣi prakaṭajaḍimakṣodapaṭimā |

kathaṅkāraṃ nāsmai karamukulacūḍālamukuṭā

namovākaṃ brūyurnamuciparipanthiprabhṛtayaḥ ||58||

pratīcīṃ paśyāmaḥ prakaṭarucinīvārakamaṇi-

prabhāsadhrīcīnāṃ pradalitaṣaḍādhārakamalām |

carantīṃ sauṣumne pathi parapadendupravigala-

tsudhārdrāṃ kāmākṣīṃ pariṇataparañjyotirudayām ||59||

jambhārātiprabhṛtimukuṭīḥ pādayoḥ pīṭhayantī

gumphānvācāṃ kavijanakṛtānsvairamārāmayantī |

śampālakṣmīṃ maṇigaṇarucāpāṭalaiḥ prāpayantī

kampātīre kavipariṣadāṃ jṛmbhate bhāgyasīmā ||60||

candrāpīḍāṃ caturavadanāṃ cañcalāpāṅgalīlāṃ

kundasmerāṃ kucabharanatāṃ kuntaloddhūtabhṛṅgām |

mārārātermadanaśikhinaṃ māṃsalaṃ dīpayantīṃ

kāmākṣīṃ tāṃ kavikulagirāṃ kalpavallīmupāse ||61||

kālāmbhodaprakarasuṣamāṃ kāntibhistirjayantī

kalyāṇānāmudayasaraṇiḥ kalpavallī kavīnām |

kandarpāreḥ priyasahacarī kalmaṣāṇāṃ nihantrī

kāñcīdeśaṃ tilakayati sā kāpi kāruṇyasīmā ||62||

ūrīkurvannurasijataṭe cāturīṃ bhūdharāṇāṃ

pāthojānāṃ nayanayugale paripanthyaṃ vitanvan |

kampātīre viharati rucā moghayanmeghaśailīṃ

kokadveṣaṃ śirasi kalayanko'pi vidyāviśeṣaḥ ||63||

kāñcīlīlāparicayavatī kāpi tāpicchalakṣmīḥ

jāḍyāraṇye hutavahaśikhā janmabhūmiḥ kṛpāyāḥ |

mākandaśrīrmadhurakavitācāturī kokilānāṃ

mārge bhūyānmama nayanayormānmathī kāpi vidyā ||64||

seturmātarmaratakamayo bhaktibhājāṃ bhavābdhau

līlālolā kuvalayamayī mānmathī vaijayantī |

kāñcībhūṣā paśupatidṛśāṃ kāpi kālāñjanālī

matkaṃ duḥkhaṃ śithilayatu te mañjulāpāṅgamālā ||65||

vyāvṛṇvānāḥ kuvalayadalaprakriyāvairamudrāṃ

vyākurvāṇā manasijamahārājasāmrājyalakṣmīm |

kāñcīlīlāvihṛtirasike kāṅkṣitaṃ naḥ kriyāsuḥ

bandhacchede tava niyamināṃ baddhadīkṣāḥ kaṭākṣāḥ ||66||

kālāmbhode śaśiruci dalaṃ kaitakaṃ darśayantī

madhyesaudāmini madhulihāṃ mālikāṃ rājayantī |

haṃsārāvaṃ vikacakamale mañjumullāsayantī

kampātīre vilasati navā kāpi kāruṇyalakṣmīḥ ||67||

citraṃ citraṃ nijamṛdutayā bhartsayanpallavālīṃ

puṃsāṃ kāmānbhuvi ca niyataṃ pūrayanpuṇyabhājām |

jātaḥ śailānna tu jalanidheḥ svairasañcāraśīlaḥ

kāñcībhūṣā kalayatu śivaṃ ko'pi cintāmaṇirme ||68||

tāmrāmbhojaṃ jaladanikaṭe tatra bandhūkapuṣpaṃ

tasminmallīkusumasuṣamāṃ tatra vīṇāninādam |

vyāvṛnvānā sukṛtalaharī kāpi kāñcinagaryām

aiśānī sā kalayatitarāmaindrajālaṃ vilāsam ||69||

āhārāṃśaṃ tridaśasadasāmāśraye cātakānām

ākāśoparyapi ca kalayannālayaṃ tuṅgameṣām |

kampātīre viharatitarāṃ kāmadhenuḥ kavīnāṃ

mandasmero madananigamaprakriyāsampradāyaḥ ||70||

ārdrībhūtairaviralakṛpairāttalīlāvilāsaiḥ

āsthāpūrṇairadhikacapalairañcitāmbhojaśilpaiḥ |

kāntairlakṣmīlalitabhavanaiḥ kāntikaivalyasāraiḥ

kāśmalyaṃ naḥ kabalayatu sā kāmakoṭī kaṭākṣaiḥ ||71||

ādhūnvantyai taralanayanairāṅgajīṃ vaijayantīm

ānandinyai nijapadajuṣāmāttakāñcīpurāyai |

āsmākīnaṃ hṛdayamakhilairāgamānāṃ prapañcaiḥ

ārādhyāyai spṛhayatitarāmadimāyai jananyai ||72||

dūraṃ vācāṃ tridaśasadasāṃ duḥkhasindhostaritraṃ

mohakṣvelakṣitiruhavane krūradhāraṃ kuṭhāram |

kampātīrapraṇayi kavibhirvarṇitodyaccaritraṃ

śāntyai seve sakalavipadāṃ śāṅkaraṃ tatkalatram ||73||

khaṇḍīkṛtya prakṛtikuṭilaṃ kalmaṣaṃ prātibhaśrī-

śuṇḍīratvaṃ nijapadajuṣāṃ śūnyatandraṃ diśantī |

tuṇḍīrākhyai mahati viṣaye svarṇavṛṣṭipradātrī

caṇḍī devī kalayati ratiṃ candracūḍālacūḍe ||74||

yena khyāto bhavati sa gṛhī pūruṣo merudhanvā

yaddṛkkoṇe madananigamaprābhavaṃ bobhavīti |

yatprītyaiva trijagadadhipo jṛmbhate kimpacānaḥ

kampātīre sa jayati mahānkaścidojoviśeṣaḥ ||75||

dhanyā dhanyā gatiriha girāṃ devi kāmākṣi yanme

nindyāṃ bhindyātsapadi jaḍatāṃ kalmaṣādunmiṣantīm |

sādhvī mādhvīrasamadhuratābhañjinī mañjurītiḥ

vāṇīveṇī jhaṭiti vṛṇutātsvardhunīspardhinī mām ||76||

yasyā vāṭī hṛdayakamalaṃ kausumī yogabhājāṃ

yasyāḥ pīṭhī satataśiśirā śīkarairmākarandaiḥ |

yasyāḥ peṭī śrutiparicalanmauliratnasya kāñcī

sā me somābharaṇamahiṣī sādhayetkāṅkṣitāni ||77||

ekā mātā sakalajagatāmīyuṣī dhyānamudrām

ekāmrādhīśvaracaraṇayorekatānāṃ samindhe |

tāṭaṅkodyanmaṇigaṇarucā tāmrakarṇapradeśā

tāruṇyaśrīstabakitatanustāpasī kāpi bālā ||78||

dantādantiprakaṭanakarī dantibhirmandayānaiḥ

mandārāṇāṃ madapariṇatiṃ mathnatī mandahāsaiḥ |

aṅkūrābhyāṃ manasijataroraṅkitorāḥ kucābhyā-

mantaḥkāñci sphurati jagatāmādimā kāpi mātā ||79||

triyambakakuṭumbinīṃ tripurasundarīmindirāṃ

pulindapatisundarīṃ tripurabhairavīṃ bhāratīm |

mataṅgakulanāyikāṃ mahiṣamardanīṃ mātṛkāṃ

bhaṇanti vibudhottamā vihṛtimeva kāmākṣi te ||80||

mahāmunimanonaṭī mahitaramyakampātaṭī-

kuṭīrakavihāriṇī kuṭilabodhasaṃhāriṇī |

sadā bhavatu kāminī sakaladehināṃ svāminī

kṛpātiśayakiṅkarī mama vibhūtaye śāṅkarī ||81||

jaḍāḥ prakṛtinirdhanā janavilocanāruntudā

narā janani vīkṣaṇaṃ kṣaṇamavāpya kāmākṣi te |

vacassu madhumādhurīṃ prakaṭayanti paurandarī-

vibhūtiṣu viḍambanāṃ vapuṣi mānmathīṃ prakriyām ||82||

ghansatanataṭasphuṭasphuritakañculīcañcalī-

kṛtatripuraśāsanā sujanaśīlitopāsanā |

dṛśoḥ saraṇimaśnute mama kadā nu kāñcīpure

parā paramayogināṃ manasi citkulā puṣkalā ||83||

kavīndrahṛdayecarī parigṛhītakāñcīpurī

nirūḍhakaruṇājharī nikhilalokarakṣākarī |

manaḥpathadavīyasī madanaśāsanapreyasī

mahāguṇagarīyasī mama dṛśo'stu nedīyasī ||84||

dhanena na ramāmahe khalajanānna sevāmahe

na cāpalamayāmahe bhavabhayānna dūyāmahe |

sthirāṃ tanumahetarāṃ manasi kiṃ ca kāñcīrata-

smarāntakakuṭumbinīcaraṇapallavopāsanām ||85||

surāḥ parijanā vapurmanasijāya vairāyate

triviṣṭapanitambinīkucataṭī ca kelīgiriḥ |

giraḥ surabhayo vayastaruṇimā daridrasya vā

kaṭākṣasaraṇau kṣaṇaṃ nipatitasya kāmākṣi te ||86||

pavitraya jagattrayīvibudhabodhajīvātubhiḥ

puratrayavimardinaḥ pulakakañculīdāyibhiḥ |

bhavakṣayavicakṣaṇairvyasanamokṣaṇairvīkṣaṇaiḥ

nirakṣaraśiromaṇiṃ karuṇayaiva kāmākṣi mām ||87||

kadā kalitakhelanāḥ karuṇayaiva kāñcīpure

kalāyamukulatviṣaḥ śubhakadambapūrṇāṅkurāḥ |

payodharabharālasāḥ kavijaneṣu te bandhurāḥ

pacelimakṛpārasā paripatanti mārge dṛśoḥ ||88||

aśodhyamacalodbhavaṃ hṛdayanandanaṃ dehinām

anarghamadhikāñci tatkimapi ratnamuddyotate |

anena samalaṅkṛtā jayati śaṅkarāṅkasthalī

kadāsya mama mānasaṃ vrajati peṭikāvibhramam ||89||

parāmṛtajharīplutā jayati nityamantaścarī

bhuvāmapi bahiścarī paramasaṃvidekātmikā |

mahadbhiraparokṣitā satatameva kāñcīpure

mamānvahamahammatirmanasi bhātu māheśvarī ||90||

tamovipinadhāvinaṃ satatameva kāñcīpure

vihārarasikā parā paramasaṃvidurvīruhe |

kaṭākṣanigalairdṛḍhaṃ hṛdayaduṣṭadantāvalaṃ

ciraṃ nayatu māmakaṃ tripuravairisīmantinī ||91||

tvameva sati caṇḍikā tvamasi devi cāmuṇḍikā

tvameva paramātṛkā tvamapi yoginīrūpiṇī |

tvameva kila śāmbhavī tvamasi kāmakoṭī jayā

tvameva vijayā tvayi trijagadamba kiṃ brūmahe ||92||

pare janani pārvati praṇatapālini prātibha-

pradātri parameśvari trijagadāśrite śāśvate |

triyambakakuṭumbini tripadasaṅgini trīkṣaṇe

triśaktimayi vīkṣaṇaṃ mayi nidhehi kāmākṣi te ||93||

manomadhukarotsavaṃ vidadhatī manīṣājuṣāṃ

svayamprabhavavaikharīvipinavīthikālambinī |

aho śiśiritā kṛpāmadhurasena kampātaṭe

carācaravidhāyinī calati kāpi cinmañjarī ||94||

kalāvati kalābhṛto mukuṭasīmni līlāvati

spṛhāvati maheśvare bhuvanamohane bhāsvati |

prabhāvati rame sadā mahitarūpaśobhāvati

tvarāvati pare satāṃ gurukṛpāmbudhārāvati ||95||

tvayaiva jagadambayā bhuvanamaṇḍalaṃ sūyate

tvayaiva karuṇārdrayā tadapi rakṣaṇaṃ nīyate |

tvayaiva kharakopayā nayanapāvake hūyate

tvayaiva kila nityayā jagati santataṃ sthīyate ||96||

carācarajaganmayīṃ sakalahṛnmayīṃ cinmayīṃ

guṇatrayamayīṃ jagattrayamayīṃ tridhāmāmayīm |

parāparamayīṃ sadā daśadiśāṃ niśāharmayīṃ

parāṃ satatasanmayīṃ manasi cinmayīṃ śīlaye ||97||

jaya jagadambike harakuṭumbini vaktrarucā

jitaśaradambuje ghanaviḍambini keśarucā |

paramavalambanaṃ kuru sadā pararūpadhare

mama gatasaṃvido jaḍimaḍambaratāṇḍavinaḥ ||98||

bhuvanajanani bhūṣābhūtacandre namaste

kaluṣaśamani kampātīragehe namaste |

nikhilanigamavedye nityarūpe namaste

paraśivamayi pāśacchedahaste namaste ||99||

kvaṇatkāñcī kāñcīpuramaṇivipañcīlayajharī-

śiraḥkampā kampāvasatiranukampājalanidhiḥ |

ghanaśyāmā śyāmā kaṭhinakucasīmā manasi me

mṛgākṣī kāmākṣī haranaṭanasākṣī viharatāt ||100||

samaravijayakoṭī sādhakānandadhāṭī

mṛduguṇaparipeṭī mukhyakādambavāṭī |

muninutaparipāṭī mohitājāṇḍakoṭī

paramaśivavadhūṭī pātu māṃ kāmakoṭī ||101||

imaṃ paravarapradaṃ prakṛtipeśalaṃ pāvanaṃ

parāparacidākṛtiprakaṭanapradīpāyitam |

stavaṃ paṭhati nityadā manasi bhāvayannambikāṃ

japairalamalaṃ makhairadhikadehasaṃśoṣaṇaiḥ ||102||

|| iti stutiśatakaṃ sampūrṇam ||

Sanskrit — Devanagari (original)

पाण्डित्यं परमेश्वरि स्तुतिविधौ नैवाश्रयन्ते गिरां

वैरिञ्चान्यपि गुम्फनानि विगलद्गर्वाणि शर्वाणि ते ।

स्तोतुं त्वां परिफुल्लनीलनलिनश्यामाक्षि कामाक्षि मां

वाचालीकुरुते तथापि नितरां त्वत्पादसेवादरः ॥1॥

तापिञ्छस्तबकत्विषे तनुभृतां दारिद्र्यमुद्राद्विषे

संसाराख्यतमोमुषे पुररिपोर्वामाङ्कसीमाजुषे ।

कम्पातीरमुपेयुषे कवयतां जिह्वाकुटीं जग्मुषे

विश्वत्राणपुषे नमोऽस्तु सततं तस्मै परञ्ज्योतिषे ॥2॥

ये सन्ध्यारुणयन्ति शङ्करजटाकान्तारचन्रार्भकं

सिन्दूरन्ति च ये पुरन्दरवधूसीमन्तसीमान्तरे ।

पुण्य.ं ये परिपक्कयन्ति भजतां काञ्चीपुरे माममी

पायासुः परमेश्वरप्रणयिनीपादोद्भवाः पांसवः ॥3॥

कामाडम्बरपूरया शशिरुचा कम्रस्मितानां त्विषा

कामारेरनुरागसिन्धुमधिकं कल्लोलितं तन्वती ।

कामाक्षीति समस्तसज्जननुता कल्याणदात्री नृणां

कारुण्याकुलमानसा भगवती कम्पातटे जृम्भते ॥4॥

कामाक्षीणपराक्रमप्रकटनं सम्भावयन्ती दृशा

श्यामा क्षीरसहोदरस्मितरुचिप्रक्षालिताशान्तरा ।

कामाक्षीजनमौलिभूषणमणिर्वाचां परा देवता

कामाक्षीति विभाति कापि करुणा कम्पातटिन्यास्तटे ॥5॥

श्यामा काचन चन्द्रिका त्रिभुवने पुण्यात्मनामानने

सीमाशून्यकवित्ववर्षजननी या कापि कादम्बिनी ।

मारारातिमनोविमोहनविधौ काचितत्तमःकन्दली

कामाक्ष्याः करुणाकटाक्षलहरी कामाय मे कल्पताम् ॥6॥

प्रौढध्वान्तकदम्बके कुमुदिनीपुण्याङ्कुरं दर्शयन्

ज्योत्स्नासङ्गमनेऽपि कोकमिथुनं मिश्रं समुद्भावयन् ।

कालिन्दीलहरीदशां प्रकटयन्कम्रां नभस्यद्भुतां

कश्चिन्नेत्रमहोत्सवो विजयते काञ्चीपुरे शूलिनः ॥7॥

तन्द्राहीनतमालनीलसुषमैस्तारुण्यलीलागृहैः

तारानाथकिशोरलाञ्छितकचैस्ताम्रारविन्देक्षणैः ।

मातः संश्रयतां मनो मनसिजप्रागल्भ्यनाडिन्धमैः

कम्पातीरचरैर्घनस्तनभरैः पुण्याङ्करैः शाङ्करैः ॥8॥

नित्यं निश्चलतामुपेत्य मरुतां रक्षाविधिं पुष्णती

तेजस्सञ्चयपाटवेन किरणानुष्णद्युतेर्मुष्णती ।

काञ्चीमध्यगतापि दीप्तिजननी विश्वान्तरे जृम्भते

काचिच्चित्रमहो स्मृतापि तमसां निर्वापिका दीपिका ॥9॥

कान्तैः केशरुचां चयैर्भ्रमरितं मन्दस्मितैः पुष्पितं

कान्त्या पल्लवितं पदाम्बुरुहयोर्नेत्रत्विषा पत्रितम् ।

कम्पातीरवनान्तरं विदधती कल्याणजन्मस्थली

काञ्चीमध्यमहामणिर्विजयते काचित्कृपाकन्दली ॥10॥

राकाचन्द्रसमानकान्तिवदना नाकाधिराजस्तुता

मूकानामपि कुर्वती सुरधनीनीकाशवाग्वैभवम् ।

श्रीकाञ्चीनगरीविहाररसिका शोकापहन्त्री सताम्

एका पुण्यपरम्परा पशुपतेराकारिणी राजते ॥11॥

जाता शीतलशैलतः सुकृतिनां दृश्या परं देहिनां

लोकानां क्षणमात्रसंस्मरणतः सन्तापविच्छेदिनी ।

आश्चर्यं बहु खेलनं वितनुते नैश्चल्यमाबिभ्रती

कम्पायास्तटसीम्नि कापि तटिनी कारुण्यपाथोमयी ॥12॥

ऐक्यं येन विरच्यते हरतनौ दम्भावपुम्भावुके

रेखा यत्कचसीम्नि शेखरदशां नैशाकरी गाहते ।

औन्नत्यं मुहुरेति येन स महान्मेनासखः सानुमान्

कम्पातीरविहारिणा सशरणास्तेनैव धाम्ना वयम् ॥13॥

अक्ष्णोश्च स्तनयोः श्रिया श्रवणयोर्बाह्वोश्च मूलं स्पृशन्

उत्तंसेन मुखेन च प्रतिदिनं द्रुह्यन्पयोजन्मने ।

माधुर्येण गिरां गतेन मृदुना हंसाङ्गनां ह्रेपयन्

काञ्चीसीम्नि चकास्ति कोऽपि कवितासन्तानबीजाङ्कुरः ॥14॥

खण्डं चान्द्रमसं वतंसमनिशं काञ्चीपुरे खेलनं

कालायश्छवितस्करीं तनुरुचिं कर्णजपे लोचने ।

तारुण्योष्मनखम्पचं स्तनभरं जङ्घास्पृशं कुन्तलं

भाग्यं देशिकसञ्चितं मम कदा सम्पादयेदम्बिके ॥15॥

तन्वानं निजकेलिसौधसरणिं नैसर्गिकीणां गिरां

केदारं कविमल्लसूक्तिलहरीसस्यश्रियां शाश्वतम् ।

अंहोवञ्चनचुञ्चु किञ्चन भजे काञ्चीपुरीमण्डनं

पर्यायच्छवि पाकशासनमणेः पौष्पेषवं पौरुषम् ॥16॥

आलोके मुखपङ्कजे च दधती सौधाकरीं चातुरीं

चूडालङ्क्रियमाणपङ्कजवनीवैरागमप्रक्रिया ।

मुग्धस्मेरमुखी घन्सतनतटीमूर्च्छालमध्याञ्चिता

काञ्चीसीमनि कामिनी विजयते काचिज्जगन्मोहिनी ॥17॥

यस्मिन्नम्ब भवत्कटाक्षरजनी मन्देऽपि मन्दस्मित-

ज्योत्स्नासंस्नपिता भवत्यभिमुखी तं प्रत्यहो देहिनम् ।

द्रक्षामाक्षिकमाधुरीमदभरव्रीडाकरी वैखरी

कामाक्षि स्वयमातनोत्यभिसृतिं वामेक्षणेव क्षणम् ॥18॥

कालिन्दीजलकान्तयः स्मितरुचिस्वर्वाहिनीपाथसि

प्रौढध्वान्तरुचः स्फुटाधरमहोलौहित्यसन्ध्योदये ।

मणिक्योपलकुण्डलांशुशिखिनि व्यामिश्रधूमश्रियः

कल्याणैकभुवः कटाक्षसुषमाः कामाक्षि राजन्ति ते ॥19॥

कलकलरणत्काञ्ची काञ्चीविभूषणमालिका

कचभरलसच्चन्द्रा चन्द्रावतंससधर्मिणी ।

कविकुलगिरः श्रावंश्रावं मिलत्पुलकाङ्कुरा

विरचितशिरःकम्पा कम्पातटे परिशोभते ॥20॥

सरसवचसां वीची नीचीभवन्मधुमाधुरी

भरितभुवना कीर्तिर्मूर्तिर्मनोभवजित्वरी ।

जननि मनसो योग्यं भोग्यं नृणां तव जायते

कथमिव विना काञ्चीभूषे कटाक्षतरङ्गितम् ॥21॥

भ्रमरितसरित्कूलो नीलोत्पलप्रभयाऽऽभया

नतजनतमःखण्डी तुण्डीरसीम्नि विजृम्भते ।

अचलतपसामेकः पाकः प्रसूनशरासन-

प्रतिभटमनोहारी नारीकुलैकशिखामणिः ॥22॥

मधुरवचसो मन्दस्मेरा मतङ्गजगामिनः

तरुणिमजुषस्तापिच्छाभास्तमःपरिपन्थिनः ।

कुचभरनताः कुर्युर्भद्रं कुरङ्गविलोचनाः

कलितकरुणाः काञ्चीभाजः कपालिमहोत्सवाः ॥23॥

कमलसुषमाक्ष्यारोहे विचक्षणवीक्षणाः

कुमुदसुकृतक्रीडाचूडालकुन्तलबन्धुराः ।

रुचिररुचिभिस्तापिच्छश्रीप्रपञ्चनचुञ्चवः

पुरविजयिनः कम्पातीरे स्फुरन्ति मनोरथाः ॥24॥

कलितरतयः काञ्चीलीलाविधौ कविमण्डली-

वचनलहरीवासन्तीनां वसन्तविभूतयः ।

कुशलविधये भूयासुर्मे कुरङ्गविलोचनाः

कुसुमविशिखारातेरक्ष्णां कुतूहलविभ्रमाः ॥25॥

कबलिततमस्काण्डास्तुण्डीरमण्डलमण्डनाः

सरसिजवनीसन्तानानामरुन्तुदशेखराः ।

नयनसरणेर्नेदीयंसः कदा नु भवन्ति मे

तरुणजलदश्यामाः शम्भोस्तपःफलविभ्रमाः ॥26॥

अचरममिषुं दीनं मीनध्वजस्य मुखश्रिया

सरसिजभुवो यानं म्लानं गतेन च मञ्जुना ।

त्रिदशसदसामन्नं खिन्नं गिरा च वितन्वती

तिलकयति सा कम्पातीरं त्रिलोचनसुन्दरी ॥27॥

जननि भुवने चङ्क्रम्येऽहं कियन्तमनेहसं

कुपुरुषकरभ्रष्टैर्दुष्टैर्धनैरुदरम्भरिः ।

तरुणकरुणे तन्द्राशून्ये तरङ्गय लोचने

नमति मयि ते किञ्चित्काञ्चीपुरीमणिदीपिके ॥28॥

मुनिजनमनःपेटीरत्नं स्फुरत्करुणानटी-

विहरणकलागेहं काञ्चीपुरीमणिभूषणम् ।

जगति महतो मोहव्याधेर्नृणां परमौषधं

पुरहरदृशां साफल्यं मे पुरः परिजृम्भताम् ॥29॥

मुनिजनमोधाम्ने धाम्ने वचोमयजाह्नवी-

हिमगिरितटप्राग्भारायाक्षराय परात्मने ।

विहरणजुषे काञ्चीदेशे महेश्वरलोचन-

त्रितयसरसक्रीडासौधाङ्गणाय नमो नमः ॥30॥

मरकतरुचां प्रत्यादेशं महेश्वरचक्षुषाम्

अमृतलहरीपूरं पारं भवाख्यपयोनिधेः ।

सुचरितफलं काञ्चीभाजो जनस्य पचेलिमं

हिमशिखरिणो वंशस्यैकं वतंसमुपास्महे ॥31॥

प्रणमनदिनारम्भे कम्पानदीसखि तावके

सरसकवितोन्मेषः पूषा सतां समुदञ्चितः ।

प्रतिभटमहाप्रौढप्रोद्यत्कवित्वकुमुद्वतीं

नयति तरसा निद्रामुद्रां नगेश्वरकन्यके ॥32॥

शमितजडिमारम्भा कम्पातटीनिकटेचरी

निहतदुरितस्तोमा सोमार्धमुद्रितकुन्तला ।

फलितसुमनोवाञ्छा पाञ्चायुधी परदेवता

सफलयतु मे नेत्रे गोत्रेश्वरप्रियनन्दिनी ॥33॥

मम तु धिषणा पीड्या जाड्यातिरेक कथं त्वया

कुमुदसुषमामैत्रीपात्रीवतंसितकुन्तलाम् ।

जगति शमितस्तम्भां कम्पानदीनिलयामसौ

श्रियति हि गलत्तन्द्रा चन्द्रावतंससधर्मिणीम् ॥34॥

परिमलपरीपाकोद्रेकं पयोमुचि काञ्चने

शिखरिणि पुनर्द्बैधीभावं शशिन्यरुणातपम् ।

अपि च जनयन्कम्बोर्लक्ष्मीमनम्बुनि कोऽप्यसौ

कुसुमधनुषः काञ्चीदेशे चकास्ति पराक्रमः ॥35॥

पुरदमयितुर्वामोत्सङ्गस्थलेन रसज्ञया

सरसकविताभाजा काञ्चीपुरोदरसीमया ।

तटपरिसरैर्नीहाराद्रेर्वचोभिरकृत्रिमैः

किमिव न तुलामस्मच्चेतो महेश्वरि गाहते ॥36॥

नयनयुगलीमास्माकीनां कदा नु फलेग्रहीं

विदधति गतौ व्याकुर्वाणा गजेन्द्रचमत्क्रियाम् ।

मरतकरुचो माहेशाना घनस्तननम्रिताः

सुकृतविभवाः प्राञ्चः काञ्चीवतंसधुरन्धराः ॥37॥

मनसिजयशःपारम्पर्यं मरन्दझरीसुवां

कविकुलगिरां कन्दं कम्पानदीतटमण्डनम् ।

मधुरललितं मत्कं चक्षुर्मनीषिमनोहरं

पुरविजयिनः सर्वस्वं तत्पुरस्कुरुते कदा ॥38॥

शिथिलिततमोलीलां नीलारविन्दविलोचनां

दहनविलसत्फालां श्रीकामकोटिमुपास्महे ।

करधृतसच्छूलां कालारिचित्तहरां परां

मनसिजकृपालीलां लोलालकामलिकेक्षणाम् ॥39॥

कलालीलाशाला कविकुलवचःकैरववनी-

शरज्ज्योत्स्नाधारा शशधरशिशुश्लाघ्यमुकुटी ।

पुनीते नः कम्पापुलिनतटसौहार्दतरला

कदा चक्षुर्मार्गं कनकगिरिधानुष्कमहिषी ॥40॥

नमः स्तान्नम्रेभ्यः स्तनगरिमगर्वेण गुरुणा

दधानेभ्यश्चूडाभरणममृतस्यन्दि शिशिरम् ।

सदा वास्तवेभ्यः सुविधभुवि कम्पाख्यसरिते

यशोव्यापारेभ्यः सुकृतविभवेभ्यो रतिपतेः ॥41॥

असूयन्ती काचिन्मरकतरुचो नाकिमुकुटी-

कदम्बं चुम्बन्ती चरणनखचन्द्रांशुपटलैः ।

तमोमुद्रां विद्रावयतु मम काञ्चीर्निलयना

हरोत्सङ्गश्रीमन्मणिगृहमहादीपकलिका ॥42॥

अनाद्यन्ता काचित्सुजननयनानन्दजननी

निरुन्धाना कान्तिं निजरुचिविलासैर्जलमुचाम् ।

स्मरारेस्तारल्यं मनसि जनयन्ती स्वयमहो

गलत्कम्पा शम्पा परिलसति कम्पापरिसरे ॥43॥

सुधाडिण्डीरश्रीः स्मितरुचिषु तुण्डीरविषयं

परिष्कुर्वाणासौ परिहसितनीलोत्पलरुचिः ।

स्तनाभ्यामानम्रा स्तबकयतु मे काङ्क्षिततरुं

दृशामैशानीनां सुकृतफलपाण्डित्यगरिमा ॥44॥

कृपाधाराद्रोणी कृपणधिषणानां प्रणमतां

निहन्त्री सन्तापं निगममुकुटोत्तंसकलिका ।

परा काञ्चीलीलापरिचयवती पर्वतसुता

गिरां नीवी देवी गिरिशपरतन्त्रा विजयते ॥45॥

कवित्वश्रीकन्दः सुकृतपरिपाटी हिमगिरेः

विधात्री विश्वेषां विषमशरवीरध्वजपटी ।

सखी कम्पानद्याः पदहसितपाथोजयुगली

पुराणो पायान्नः पुरमथनसाम्राज्यपदवी ॥46॥

दरिद्राणा मध्ये दरदलिततापिच्छसुषमाः

स्तनाभोगक्कान्तास्तरुणहरिणाङ्काङ्कितकचाः ।

हराधीना नानाविबुधमुकुटीचुम्बितपदाः

कदा कम्पातीरे कथय विहरामो गिरिसुते ॥47॥

वरीवर्तु स्थेमा त्वयि मम गिरां देवि मनसो

नरीनर्तु प्रौढा वदनकमले वाक्यलहरी ।

चरीचर्तु प्रज्ञाजननि जडिमानः परजने

सरीसर्तु स्वैरं जननि मयि कामाक्षि करुणा ॥48॥

क्षणात्ते कामाक्षि भ्रमरसुषमाशिक्षणगुरुः

कटाक्षव्याक्षेपो मम भवतु मोक्षाय विपदाम् ।

नरीनर्तु स्वैरं वचनलहरी निर्जरपुरी-

सरिद्वीचीनीचीकरणपटुरास्ये मम सदा ॥49॥

पुरस्तान्मे भूयःप्रशमनपरः स्तान्मम रुजां

प्रचारस्ते कम्पातटविहृतिसम्पादिनि दृशोः ।

इमां याच्ञामूरीकुरु सपदि दूरीकुरु तमः-

परीपाकं मत्कं सपदि बुधलोकं च नय माम् ॥50॥

उदञ्चन्ती काञ्चीनगरनिलये त्वत्करुणया

समृद्धा वाग्धाटी परिहसितमाध्वी कवयताम् ।

उपादत्ते मारप्रतिभटजटाजूटमुकुटी-

कुटीरोल्लासिन्याः शतमखतटिन्या जयपटीम् ॥51॥

श्रियं विद्यां दद्याज्जननि नमतां कीर्तिममितां

सुपुत्रान् प्रादत्ते तव झटिति कामाक्षि करुणा ।

त्रिलोक्यामाधिक्यं त्रिपुरपरिपन्थिप्रणयिनि

प्रणामस्त्वत्पादे शमितदुरिते किं न कुरुते ॥52॥

मनःस्तम्भं स्तम्भं गमयदुपकम्पं प्रणमतां

सदा लोलं नीलं चिकुरजितलोलम्बनिकरम् ।

गिरां दूरं स्मेरं धृतशशिकिशोरं पशुपतेः

दृशां योग्यं भोग्यं तुहिनगिरिभाग्यं विजयते ॥53॥

घनश्यामान्कामान्तकमहिषि कामाक्षि मधुरान्

दृशां पातानेतानमृतजलशीताननुपमान् ।

भवोत्पाते भीते मयि वितर नाथे दृढभव-

न्मनश्शोके मूके हिमगिरिपताके करुणया ॥54॥

नतानां मन्दानां भवनिगलबन्धाकुलधियां

महान्ध्यां रुन्धानामभिलषितसन्तानलतिकाम् ।

चरन्तीं कम्पायास्तटभुवि सवित्रीं त्रिजगतां

स्मरामस्तां नित्यं स्मरमथनजीवातुकलिकाम् ॥55॥

परा विद्या हृद्याश्रितमदनविद्या मरकत-

प्रभानीला लीलापरवशितशूलायुधमनाः ।

तमःपूरं दूरं चरणनतपौरन्दरपुरी-

मृगाक्षी कामाक्षी कमलतरलाक्षी नयतु मे ॥56॥

अहन्ताख्या मत्कं कबलयति हा हन्त हरिणी

हठात्संविद्रूपं हरमहिषि सस्याङ्कुरमसौ ।

कटाक्षव्याक्षेपप्रकटहरिपाषाणपटलैः

इमामुच्चैरुच्चाटय झटिति कामाक्षि कृपया ॥57॥

बुधे वा मूके वा तव पतति यस्मिन्क्षणमसौ

कटाक्षः कामाक्षि प्रकटजडिमक्षोदपटिमा ।

कथङ्कारं नास्मै करमुकुलचूडालमुकुटा

नमोवाकं ब्रूयुर्नमुचिपरिपन्थिप्रभृतयः ॥58॥

प्रतीचीं पश्यामः प्रकटरुचिनीवारकमणि-

प्रभासध्रीचीनां प्रदलितषडाधारकमलाम् ।

चरन्तीं सौषुम्ने पथि परपदेन्दुप्रविगल-

त्सुधार्द्रां कामाक्षीं परिणतपरञ्ज्योतिरुदयाम् ॥59॥

जम्भारातिप्रभृतिमुकुटीः पादयोः पीठयन्ती

गुम्फान्वाचां कविजनकृतान्स्वैरमारामयन्ती ।

शम्पालक्ष्मीं मणिगणरुचापाटलैः प्रापयन्ती

कम्पातीरे कविपरिषदां जृम्भते भाग्यसीमा ॥60॥

चन्द्रापीडां चतुरवदनां चञ्चलापाङ्गलीलां

कुन्दस्मेरां कुचभरनतां कुन्तलोद्धूतभृङ्गाम् ।

मारारातेर्मदनशिखिनं मांसलं दीपयन्तीं

कामाक्षीं तां कविकुलगिरां कल्पवल्लीमुपासे ॥61॥

कालाम्भोदप्रकरसुषमां कान्तिभिस्तिर्जयन्ती

कल्याणानामुदयसरणिः कल्पवल्ली कवीनाम् ।

कन्दर्पारेः प्रियसहचरी कल्मषाणां निहन्त्री

काञ्चीदेशं तिलकयति सा कापि कारुण्यसीमा ॥62॥

ऊरीकुर्वन्नुरसिजतटे चातुरीं भूधराणां

पाथोजानां नयनयुगले परिपन्थ्यं वितन्वन् ।

कम्पातीरे विहरति रुचा मोघयन्मेघशैलीं

कोकद्वेषं शिरसि कलयन्कोऽपि विद्याविशेषः ॥63॥

काञ्चीलीलापरिचयवती कापि तापिच्छलक्ष्मीः

जाड्यारण्ये हुतवहशिखा जन्मभूमिः कृपायाः ।

माकन्दश्रीर्मधुरकविताचातुरी कोकिलानां

मार्गे भूयान्मम नयनयोर्मान्मथी कापि विद्या ॥64॥

सेतुर्मातर्मरतकमयो भक्तिभाजां भवाब्धौ

लीलालोला कुवलयमयी मान्मथी वैजयन्ती ।

काञ्चीभूषा पशुपतिदृशां कापि कालाञ्जनाली

मत्कं दुःखं शिथिलयतु ते मञ्जुलापाङ्गमाला ॥65॥

व्यावृण्वानाः कुवलयदलप्रक्रियावैरमुद्रां

व्याकुर्वाणा मनसिजमहाराजसाम्राज्यलक्ष्मीम् ।

काञ्चीलीलाविहृतिरसिके काङ्क्षितं नः क्रियासुः

बन्धच्छेदे तव नियमिनां बद्धदीक्षाः कटाक्षाः ॥66॥

कालाम्भोदे शशिरुचि दलं कैतकं दर्शयन्ती

मध्येसौदामिनि मधुलिहां मालिकां राजयन्ती ।

हंसारावं विकचकमले मञ्जुमुल्लासयन्ती

कम्पातीरे विलसति नवा कापि कारुण्यलक्ष्मीः ॥67॥

चित्रं चित्रं निजमृदुतया भर्त्सयन्पल्लवालीं

पुंसां कामान्भुवि च नियतं पूरयन्पुण्यभाजाम् ।

जातः शैलान्न तु जलनिधेः स्वैरसञ्चारशीलः

काञ्चीभूषा कलयतु शिवं कोऽपि चिन्तामणिर्मे ॥68॥

ताम्राम्भोजं जलदनिकटे तत्र बन्धूकपुष्पं

तस्मिन्मल्लीकुसुमसुषमां तत्र वीणानिनादम् ।

व्यावृन्वाना सुकृतलहरी कापि काञ्चिनगर्याम्

ऐशानी सा कलयतितरामैन्द्रजालं विलासम् ॥69॥

आहारांशं त्रिदशसदसामाश्रये चातकानाम्

आकाशोपर्यपि च कलयन्नालयं तुङ्गमेषाम् ।

कम्पातीरे विहरतितरां कामधेनुः कवीनां

मन्दस्मेरो मदननिगमप्रक्रियासम्प्रदायः ॥70॥

आर्द्रीभूतैरविरलकृपैरात्तलीलाविलासैः

आस्थापूर्णैरधिकचपलैरञ्चिताम्भोजशिल्पैः ।

कान्तैर्लक्ष्मीललितभवनैः कान्तिकैवल्यसारैः

काश्मल्यं नः कबलयतु सा कामकोटी कटाक्षैः ॥71॥

आधून्वन्त्यै तरलनयनैराङ्गजीं वैजयन्तीम्

आनन्दिन्यै निजपदजुषामात्तकाञ्चीपुरायै ।

आस्माकीनं हृदयमखिलैरागमानां प्रपञ्चैः

आराध्यायै स्पृहयतितरामदिमायै जनन्यै ॥72॥

दूरं वाचां त्रिदशसदसां दुःखसिन्धोस्तरित्रं

मोहक्ष्वेलक्षितिरुहवने क्रूरधारं कुठारम् ।

कम्पातीरप्रणयि कविभिर्वर्णितोद्यच्चरित्रं

शान्त्यै सेवे सकलविपदां शाङ्करं तत्कलत्रम् ॥73॥

खण्डीकृत्य प्रकृतिकुटिलं कल्मषं प्रातिभश्री-

शुण्डीरत्वं निजपदजुषां शून्यतन्द्रं दिशन्ती ।

तुण्डीराख्यै महति विषये स्वर्णवृष्टिप्रदात्री

चण्डी देवी कलयति रतिं चन्द्रचूडालचूडे ॥74॥

येन ख्यातो भवति स गृही पूरुषो मेरुधन्वा

यद्दृक्कोणे मदननिगमप्राभवं बोभवीति ।

यत्प्रीत्यैव त्रिजगदधिपो जृम्भते किम्पचानः

कम्पातीरे स जयति महान्कश्चिदोजोविशेषः ॥75॥

धन्या धन्या गतिरिह गिरां देवि कामाक्षि यन्मे

निन्द्यां भिन्द्यात्सपदि जडतां कल्मषादुन्मिषन्तीम् ।

साध्वी माध्वीरसमधुरताभञ्जिनी मञ्जुरीतिः

वाणीवेणी झटिति वृणुतात्स्वर्धुनीस्पर्धिनी माम् ॥76॥

यस्या वाटी हृदयकमलं कौसुमी योगभाजां

यस्याः पीठी सततशिशिरा शीकरैर्माकरन्दैः ।

यस्याः पेटी श्रुतिपरिचलन्मौलिरत्नस्य काञ्ची

सा मे सोमाभरणमहिषी साधयेत्काङ्क्षितानि ॥77॥

एका माता सकलजगतामीयुषी ध्यानमुद्राम्

एकाम्राधीश्वरचरणयोरेकतानां समिन्धे ।

ताटङ्कोद्यन्मणिगणरुचा ताम्रकर्णप्रदेशा

तारुण्यश्रीस्तबकिततनुस्तापसी कापि बाला ॥78॥

दन्तादन्तिप्रकटनकरी दन्तिभिर्मन्दयानैः

मन्दाराणां मदपरिणतिं मथ्नती मन्दहासैः ।

अङ्कूराभ्यां मनसिजतरोरङ्कितोराः कुचाभ्या-

मन्तःकाञ्चि स्फुरति जगतामादिमा कापि माता ॥79॥

त्रियम्बककुटुम्बिनीं त्रिपुरसुन्दरीमिन्दिरां

पुलिन्दपतिसुन्दरीं त्रिपुरभैरवीं भारतीम् ।

मतङ्गकुलनायिकां महिषमर्दनीं मातृकां

भणन्ति विबुधोत्तमा विहृतिमेव कामाक्षि ते ॥80॥

महामुनिमनोनटी महितरम्यकम्पातटी-

कुटीरकविहारिणी कुटिलबोधसंहारिणी ।

सदा भवतु कामिनी सकलदेहिनां स्वामिनी

कृपातिशयकिङ्करी मम विभूतये शाङ्करी ॥81॥

जडाः प्रकृतिनिर्धना जनविलोचनारुन्तुदा

नरा जननि वीक्षणं क्षणमवाप्य कामाक्षि ते ।

वचस्सु मधुमाधुरीं प्रकटयन्ति पौरन्दरी-

विभूतिषु विडम्बनां वपुषि मान्मथीं प्रक्रियाम् ॥82॥

घन्सतनतटस्फुटस्फुरितकञ्चुलीचञ्चली-

कृतत्रिपुरशासना सुजनशीलितोपासना ।

दृशोः सरणिमश्नुते मम कदा नु काञ्चीपुरे

परा परमयोगिनां मनसि चित्कुला पुष्कला ॥83॥

कवीन्द्रहृदयेचरी परिगृहीतकाञ्चीपुरी

निरूढकरुणाझरी निखिललोकरक्षाकरी ।

मनःपथदवीयसी मदनशासनप्रेयसी

महागुणगरीयसी मम दृशोऽस्तु नेदीयसी ॥84॥

धनेन न रमामहे खलजनान्न सेवामहे

न चापलमयामहे भवभयान्न दूयामहे ।

स्थिरां तनुमहेतरां मनसि किं च काञ्चीरत-

स्मरान्तककुटुम्बिनीचरणपल्लवोपासनाम् ॥85॥

सुराः परिजना वपुर्मनसिजाय वैरायते

त्रिविष्टपनितम्बिनीकुचतटी च केलीगिरिः ।

गिरः सुरभयो वयस्तरुणिमा दरिद्रस्य वा

कटाक्षसरणौ क्षणं निपतितस्य कामाक्षि ते ॥86॥

पवित्रय जगत्त्रयीविबुधबोधजीवातुभिः

पुरत्रयविमर्दिनः पुलककञ्चुलीदायिभिः ।

भवक्षयविचक्षणैर्व्यसनमोक्षणैर्वीक्षणैः

निरक्षरशिरोमणिं करुणयैव कामाक्षि माम् ॥87॥

कदा कलितखेलनाः करुणयैव काञ्चीपुरे

कलायमुकुलत्विषः शुभकदम्बपूर्णाङ्कुराः ।

पयोधरभरालसाः कविजनेषु ते बन्धुराः

पचेलिमकृपारसा परिपतन्ति मार्गे दृशोः ॥88॥

अशोध्यमचलोद्भवं हृदयनन्दनं देहिनाम्

अनर्घमधिकाञ्चि तत्किमपि रत्नमुद्द्योतते ।

अनेन समलङ्कृता जयति शङ्कराङ्कस्थली

कदास्य मम मानसं व्रजति पेटिकाविभ्रमम् ॥89॥

परामृतझरीप्लुता जयति नित्यमन्तश्चरी

भुवामपि बहिश्चरी परमसंविदेकात्मिका ।

महद्भिरपरोक्षिता सततमेव काञ्चीपुरे

ममान्वहमहम्मतिर्मनसि भातु माहेश्वरी ॥90॥

तमोविपिनधाविनं सततमेव काञ्चीपुरे

विहाररसिका परा परमसंविदुर्वीरुहे ।

कटाक्षनिगलैर्दृढं हृदयदुष्टदन्तावलं

चिरं नयतु मामकं त्रिपुरवैरिसीमन्तिनी ॥91॥

त्वमेव सति चण्डिका त्वमसि देवि चामुण्डिका

त्वमेव परमातृका त्वमपि योगिनीरूपिणी ।

त्वमेव किल शाम्भवी त्वमसि कामकोटी जया

त्वमेव विजया त्वयि त्रिजगदम्ब किं ब्रूमहे ॥92॥

परे जननि पार्वति प्रणतपालिनि प्रातिभ-

प्रदात्रि परमेश्वरि त्रिजगदाश्रिते शाश्वते ।

त्रियम्बककुटुम्बिनि त्रिपदसङ्गिनि त्रीक्षणे

त्रिशक्तिमयि वीक्षणं मयि निधेहि कामाक्षि ते ॥93॥

मनोमधुकरोत्सवं विदधती मनीषाजुषां

स्वयम्प्रभववैखरीविपिनवीथिकालम्बिनी ।

अहो शिशिरिता कृपामधुरसेन कम्पातटे

चराचरविधायिनी चलति कापि चिन्मञ्जरी ॥94॥

कलावति कलाभृतो मुकुटसीम्नि लीलावति

स्पृहावति महेश्वरे भुवनमोहने भास्वति ।

प्रभावति रमे सदा महितरूपशोभावति

त्वरावति परे सतां गुरुकृपाम्बुधारावति ॥95॥

त्वयैव जगदम्बया भुवनमण्डलं सूयते

त्वयैव करुणार्द्रया तदपि रक्षणं नीयते ।

त्वयैव खरकोपया नयनपावके हूयते

त्वयैव किल नित्यया जगति सन्ततं स्थीयते ॥96॥

चराचरजगन्मयीं सकलहृन्मयीं चिन्मयीं

गुणत्रयमयीं जगत्त्रयमयीं त्रिधामामयीम् ।

परापरमयीं सदा दशदिशां निशाहर्मयीं

परां सततसन्मयीं मनसि चिन्मयीं शीलये ॥97॥

जय जगदम्बिके हरकुटुम्बिनि वक्त्ररुचा

जितशरदम्बुजे घनविडम्बिनि केशरुचा ।

परमवलम्बनं कुरु सदा पररूपधरे

मम गतसंविदो जडिमडम्बरताण्डविनः ॥98॥

भुवनजननि भूषाभूतचन्द्रे नमस्ते

कलुषशमनि कम्पातीरगेहे नमस्ते ।

निखिलनिगमवेद्ये नित्यरूपे नमस्ते

परशिवमयि पाशच्छेदहस्ते नमस्ते ॥99॥

क्वणत्काञ्ची काञ्चीपुरमणिविपञ्चीलयझरी-

शिरःकम्पा कम्पावसतिरनुकम्पाजलनिधिः ।

घनश्यामा श्यामा कठिनकुचसीमा मनसि मे

मृगाक्षी कामाक्षी हरनटनसाक्षी विहरतात् ॥100॥

समरविजयकोटी साधकानन्दधाटी

मृदुगुणपरिपेटी मुख्यकादम्बवाटी ।

मुनिनुतपरिपाटी मोहिताजाण्डकोटी

परमशिववधूटी पातु मां कामकोटी ॥101॥

इमं परवरप्रदं प्रकृतिपेशलं पावनं

परापरचिदाकृतिप्रकटनप्रदीपायितम् ।

स्तवं पठति नित्यदा मनसि भावयन्नम्बिकां

जपैरलमलं मखैरधिकदेहसंशोषणैः ॥102॥

॥ इति स्तुतिशतकं सम्पूर्णम् ॥