Mooka Panchashati Arya Satakam — Sinhala Script

Meaning —

Verse 1

කාරණපරචිද්රූපා කාඤ්චීපුරසීම්නි කාමපීඨගතා .
කාචන විහරති කරුණා කාශ්මීරස්තබකකෝමලාඞ්ගලතා ..1..

kāraṇaparacidrūpā kāñcīpurasīmni kāmapīṭhagatā |
kācana viharati karuṇā kāśmīrastabakakomalāṅgalatā ||1||

Verse 2

කඤ්චන කාඤ්චීනිලයං කරධෘතකෝදණ්ඩබාණසෘණිපාශම් .
කඨිනස්තනභරනම්රං කෛවල්යානන්දකන්දමවලම්බේ ..2..

kañcana kāñcīnilayaṃ karadhṛtakodaṇḍabāṇasṛṇipāśam |
kaṭhinastanabharanamraṃ kaivalyānandakandamavalambe ||2||

Verse 3

චින්තිතඵලපරිපෝෂණචින්තාමණිරේව කාඤ්චිනිලයා මේ .
චිරතරසුචරිතසුලභා චිත්තං ශිශිරයතු චිත්සුඛාධාරා ..3..

cintitaphalaparipoṣaṇacintāmaṇireva kāñcinilayā me |
ciratarasucaritasulabhā cittaṃ śiśirayatu citsukhādhārā ||3||

Verse 4

කුටිලකචං කඨිනකුචං කුන්දස්මිතකාන්ති කුඞ්කුමච්ඡායම් .
කුරුතේ විහෘතිං කාඤ්ච්යාං කුලපර්වතසාර්වභෞමසර්වස්වම් ..4..

kuṭilakacaṃ kaṭhinakucaṃ kundasmitakānti kuṅkumacchāyam |
kurute vihṛtiṃ kāñcyāṃ kulaparvatasārvabhaumasarvasvam ||4||

Verse 5

පඤ්චශරශාස්ත්රබෝධනපරමාචාර්යේණ දෘෂ්ටිපාතේන .
කාඤ්චීසීම්නි කුමාරී කාචන මෝහයති කාමජේතාරම් ..5..

pañcaśaraśāstrabodhanaparamācāryeṇa dṛṣṭipātena |
kāñcīsīmni kumārī kācana mohayati kāmajetāram ||5||

Verse 6

පරයා කාඤ්චීපුරයා පර්වතපර්යායපීනකුචභරයා .
පරතන්ත්රා වයමනයා පඞ්කජසබ්රහ්මචාරිලෝචනයා ..6..

parayā kāñcīpurayā parvataparyāyapīnakucabharayā |
paratantrā vayamanayā paṅkajasabrahmacārilocanayā ||6||

Verse 7

ඓශ්වර්යමින්දුමෞලේරෛකත්ම්යප්රකෘති කාඤ්චිමධ්යගතම් .
ඓන්දවකිශෝරශේඛරමෛදම්පර්යං චකාස්ති නිගමානාම් ..7..

aiśvaryamindumauleraikatmyaprakṛti kāñcimadhyagatam |
aindavakiśoraśekharamaidamparyaṃ cakāsti nigamānām ||7||

Verse 8

ශ්රිතකම්පසීමානං ශිථිලිතපරමශිවධෛර්යමහිමානම් .
කලයේ පටලිමානං කඤ්චන කඤ්චුකිතභුවනභූමානම් ..8..

śritakampasīmānaṃ śithilitaparamaśivadhairyamahimānam |
kalaye paṭalimānaṃ kañcana kañcukitabhuvanabhūmānam ||8||

Verse 9

ආදෘතකාඤ්චීනිලයමාද්යාමාරූඪයෞවනාටෝපාම් .
ආගමවතංසකලිකාමානන්දාද්වෛතකන්දලීං වන්දේ ..9..

ādṛtakāñcīnilayamādyāmārūḍhayauvanāṭopām |
āgamavataṃsakalikāmānandādvaitakandalīṃ vande ||9||

Verse 10

තුඞ්ගාභිරාමකුචභරශෘඞ්ගාරිතමාශ්රයාමි කාඤ්චිගතම් .
ගඞ්ගාධරපරතන්ත්රං ශෘඞ්ගාරාද්වෛතතන්ත්රසිද්ධාන්තම් ..10..

tuṅgābhirāmakucabharaśṛṅgāritamāśrayāmi kāñcigatam |
gaṅgādharaparatantraṃ śṛṅgārādvaitatantrasiddhāntam ||10||

Verse 11

කාඤ්චීරත්නවිභූෂාං කාමපි කන්දර්පසූතිකාපාඞ්ගීම් .
පරමාං කලාමුපාසේ පරශිවවාමාඞ්කපීඨිකාසීනාම් ..11..

kāñcīratnavibhūṣāṃ kāmapi kandarpasūtikāpāṅgīm |
paramāṃ kalāmupāse paraśivavāmāṅkapīṭhikāsīnām ||11||

Verse 12

කම්පාතීචරාණාං කරුණාකෝරකිතදෘෂ්ටිපාතානාම් .
කේලීවනං මනෝ මේ කේෂාඤ්චිද්භවතු චිද්විලාසානාම් ..12..

kampātīcarāṇāṃ karuṇākorakitadṛṣṭipātānām |
kelīvanaṃ mano me keṣāñcidbhavatu cidvilāsānām ||12||

Verse 13

ආම්රතරුමූලවසතේරාදිමපුරුෂස්ය නයනපීයූෂම් .
ආරබ්ධයෞවනෝත්සවමාම්නායරහස්යමන්තරවලම්බේ ..13..

āmratarumūlavasaterādimapuruṣasya nayanapīyūṣam |
ārabdhayauvanotsavamāmnāyarahasyamantaravalambe ||13||

Verse 14

අධිකාඤ්චි පරමයෝගිභිරාදිමපරපීඨසීම්නි දෘශ්යේන .
අනුබද්ධං මම මානසමරුණිමසර්වස්වසම්ප්රදායේන ..14..

adhikāñci paramayogibhirādimaparapīṭhasīmni dṛśyena |
anubaddhaṃ mama mānasamaruṇimasarvasvasampradāyena ||14||

Verse 15

අඞ්කිතශඞ්කරදේහාමඞ්කුරිතෝරෝජකඞ්කණාශ්ලේෂෛඃ .
අධිකාඤ්චි නිත්යතරුණීමද්රාක්ෂං කාඤ්චිදද්භුතාං බාලාම් ..15..

aṅkitaśaṅkaradehāmaṅkuritorojakaṅkaṇāśleṣaiḥ |
adhikāñci nityataruṇīmadrākṣaṃ kāñcidadbhutāṃ bālām ||15||

Verse 16

මධුරධනුෂා මහීධරජනුෂා නන්දාමි සුරභිබාණජුෂා .
චිද්වපුෂා කාඤ්චිපුරේ කේලිජුෂා බන්ධුජීවකාන්තිමුෂා ..16..

madhuradhanuṣā mahīdharajanuṣā nandāmi surabhibāṇajuṣā |
cidvapuṣā kāñcipure kelijuṣā bandhujīvakāntimuṣā ||16||

Verse 17

මධුරස්මිතේන රමතේ මාංසලකුචභාරමන්දගමනේන .
මධ්යේකාඤ්චි මනෝ මේ මනසිජසාම්රාජ්යගර්වබීජේන ..17..

madhurasmitena ramate māṃsalakucabhāramandagamanena |
madhyekāñci mano me manasijasāmrājyagarvabījena ||17||

Verse 18

ධරණිමයීං තරණිමයීං පවනමයීං ගගනදහනහෝතෘමයීම් .
අම්බුමයීමින්දුමයීමම්බාමනුකම්පමාදිමාමීක්ෂේ ..18..

dharaṇimayīṃ taraṇimayīṃ pavanamayīṃ gaganadahanahotṛmayīm |
ambumayīmindumayīmambāmanukampamādimāmīkṣe ||18||

Verse 19

ලීනස්ථිති මුනිහෘදයේ ධ්යානස්තිමිතං තපස්යදුපකම්පම් .
පීනස්තනභරමීඩේ මීනධ්වජතන්ත්රපරමතාත්පර්යම් ..19..

līnasthiti munihṛdaye dhyānastimitaṃ tapasyadupakampam |
pīnastanabharamīḍe mīnadhvajatantraparamatātparyam ||19||

Verse 20

ශ්වේතා මන්ථරහසිතේ ශාතා මධ්යේ ච වාඩ්භනෝ(අ)තීතා .
ශීතා ලෝචනපාතේ ස්ඵීතා කුචසීම්නි ශාශ්වතී මාතා ..20..

śvetā mantharahasite śātā madhye ca vāḍbhano'tītā |
śītā locanapāte sphītā kucasīmni śāśvatī mātā ||20||

Verse 21

පුරතඃ කදා න කරවෛ පුරවෛරිවිමර්දපුලකිතාඞ්ගලතාම් .
පුනතීං කාඤ්චීදේශං පුෂ්පායුධවීර්යසරසපරිපාටීම් ..21..

purataḥ kadā na karavai puravairivimardapulakitāṅgalatām |
punatīṃ kāñcīdeśaṃ puṣpāyudhavīryasarasaparipāṭīm ||21||

Verse 22

පුණ්යා කා(අ)පි පුරන්ධ්රී පුඞ්ඛිතකන්දර්පසම්පදා වපුෂා .
පුලිනචරී කම්පායාඃ පුරමථනං පුලකනිචුලිතං කුරුතේ ..22..

puṇyā kā'pi purandhrī puṅkhitakandarpasampadā vapuṣā |
pulinacarī kampāyāḥ puramathanaṃ pulakaniculitaṃ kurute ||22||

Verse 23

තනිමාද්වෛතවලග්නං තරුණාරුණසම්ප්රදායතනුලේඛම් .
තටසීමනි කම්පායාස්තරුණිමසර්වස්වමාද්යමද්රාක්ෂම් ..23..

tanimādvaitavalagnaṃ taruṇāruṇasampradāyatanulekham |
taṭasīmani kampāyāstaruṇimasarvasvamādyamadrākṣam ||23||

Verse 24

පෞෂ්ටිකකර්මවිපාකං පෞෂ්පශරං සවිධසීම්නි කම්පායාඃ .
අද්රාක්ෂමාත්තයෞවනමභ්යුදයං කඤ්චිදර්ධශශිමෞලෛඃ ..24..

pauṣṭikakarmavipākaṃ pauṣpaśaraṃ savidhasīmni kampāyāḥ |
adrākṣamāttayauvanamabhyudayaṃ kañcidardhaśaśimaulaiḥ ||24||

Verse 25

සංශ්රිතකාඤ්චීදේශේ සරසිජදෞර්භාග්යජාග්රදුත්තංසේ .
සංවින්මයේ විලීයේ සාරස්වතපුරුෂකාරසාම්රාජ්යේ ..25..

saṃśritakāñcīdeśe sarasijadaurbhāgyajāgraduttaṃse |
saṃvinmaye vilīye sārasvatapuruṣakārasāmrājye ||25||

Verse 26

මෝදිතමධුකරවිශිඛං ස්වාදිමසමුදායසාරකෝදණ්ඩම් .
ආදෘතකාඤ්චීඛේලනමාදිමමාරුණ්යභේදමාකලයේ ..26..

moditamadhukaraviśikhaṃ svādimasamudāyasārakodaṇḍam |
ādṛtakāñcīkhelanamādimamāruṇyabhedamākalaye ||26||

Verse 27

උරරීකෘතකාඤ්චිපුරීමුපනිෂදරවින්දකුහරමධුධාරාම් .
උන්නම්රස්තනකලශීමුත්සවලහරීමුපාස්මහේ ශම්භෝඃ ..27..

urarīkṛtakāñcipurīmupaniṣadaravindakuharamadhudhārām |
unnamrastanakalaśīmutsavalaharīmupāsmahe śambhoḥ ||27||

Verse 28

ඒණශිශුදීර්ඝලෝචනමේනඃපරිපන්ථි සන්තතං භජතාම් .
ඒකාම්රනාථජීවිතමේවම්පදදූරමේකමවලම්බේ ..28..

eṇaśiśudīrghalocanamenaḥparipanthi santataṃ bhajatām |
ekāmranāthajīvitamevampadadūramekamavalambe ||28||

Verse 29

ස්මයමානමුඛං කාඤ්චීභයමානං කමපි දේවතාභේදම් .
දයමානං වීක්ෂ්ය මුහුර්වයමානන්දාමෘතාම්බුධෞ මග්නාඃ ..29..

smayamānamukhaṃ kāñcībhayamānaṃ kamapi devatābhedam |
dayamānaṃ vīkṣya muhurvayamānandāmṛtāmbudhau magnāḥ ||29||

Verse 30

කුතුකජුෂි කාඤ්චිදේශේ කුමුදතපෝරාශිපාකශේඛරිතේ .
කුරුතේ මනෝවිහාරං කුලගිරිපරිබෘඪකුලෛකමණිදීපේ ..30..

kutukajuṣi kāñcideśe kumudataporāśipākaśekharite |
kurute manovihāraṃ kulagiriparibṛḍhakulaikamaṇidīpe ||30||

Verse 31

වීක්ෂේමහි කාඤ්චිපුරේ විපුලස්තනකලශගරිමපරවශිතම් .
විද්රුමසහචරදේහං විභ්රමසමවායසාරසන්නාහම් ..31..

vīkṣemahi kāñcipure vipulastanakalaśagarimaparavaśitam |
vidrumasahacaradehaṃ vibhramasamavāyasārasannāham ||31||

Verse 32

කුරුවින්දගෝත්රගාත්රං කූලචරං කමපි නෞමි කම්පායාඃ .
කූලඞ්කෂකුචකුම්භං කුසුමායුධවීර්යසාරසංරම්භම් ..32..

kuruvindagotragātraṃ kūlacaraṃ kamapi naumi kampāyāḥ |
kūlaṅkaṣakucakumbhaṃ kusumāyudhavīryasārasaṃrambham ||32||

Verse 33

කුඩූමලිතකුචකිශෝරෛඃ කුර්වාණෛඃ කාඤ්චිදේශසෞහාර්දම් .
කුඞ්කුමශෝණෛර්නිචිතං කුශලපථං ශම්භුසුකෘතසම්භාරෛඃ ..33..

kuḍūmalitakucakiśoraiḥ kurvāṇaiḥ kāñcideśasauhārdam |
kuṅkumaśoṇairnicitaṃ kuśalapathaṃ śambhusukṛtasambhāraiḥ ||33||

Verse 34

අඞ්කිතකචේන කේනචිදන්ධඞ්කරණෞෂධේන කමලානාම් .
අන්තඃපුරේණ ශම්භෝරලඞ්ක්රියා කා(අ)පි කල්ප්යතේ කාඤ්ච්යාම් ..34..

aṅkitakacena kenacidandhaṅkaraṇauṣadhena kamalānām |
antaḥpureṇa śambhoralaṅkriyā kā'pi kalpyate kāñcyām ||34||

Verse 35

ඌරීකරෝමි සන්තතමූෂ්මලඵාලේන ලලිතං පුංසා .
උපකම්පමුචිතඛේලනමුර්වීධරවංශසම්පදුන්මේෂම් ..35..

ūrīkaromi santatamūṣmalaphālena lalitaṃ puṃsā |
upakampamucitakhelanamurvīdharavaṃśasampadunmeṣam ||35||

Verse 36

අඞ්කුරිතස්තනකෝරකමඞ්කාලඞ්කාරමේකචූතපතේඃ .
ආලෝකේමහි කෝමලමාගමසංලාපසාරයාථාර්ථ්යම් ..36..

aṅkuritastanakorakamaṅkālaṅkāramekacūtapateḥ |
ālokemahi komalamāgamasaṃlāpasārayāthārthyam ||36||

Verse 37

පුඤ්ජිතකරුණමුදඤ්චිතශිඤ්ජිතමණිකාඤ්චි කිමපි කාඤ්චිපුරේ .
මඤ්ජරිතමෘදුලහාසං පිඤ්ජරතනුරුචි පිනාකිමූලධනම් ..37..

puñjitakaruṇamudañcitaśiñjitamaṇikāñci kimapi kāñcipure |
mañjaritamṛdulahāsaṃ piñjaratanuruci pinākimūladhanam ||37||

Verse 38

ලෝලහෘදයෝ(අ)ස්ති ශම්භෝර්ලෝචනයුගලේන ලේහ්යමානායාම් .
ලලිතපරමශිවායාං ලාවණ්යාමෘතතරඞ්ගමාලායාම් ..38..

lolahṛdayo'sti śambhorlocanayugalena lehyamānāyām |
lalitaparamaśivāyāṃ lāvaṇyāmṛtataraṅgamālāyām ||38||

Verse 39

මධුකරසහචරචිකුරෛර්මදනාගමසමයදීක්ෂිතකටාක්ෂෛඃ .
මණ්ඩිතකම්පාතීරෛර්මඞ්ගලකන්දෛර්මමාස්තු සාරූප්යම් ..39..

madhukarasahacaracikurairmadanāgamasamayadīkṣitakaṭākṣaiḥ |
maṇḍitakampātīrairmaṅgalakandairmamāstu sārūpyam ||39||

Verse 40

වදනාරවින්දවක්ෂෝවාමාඞ්කතටීවශංවදීභූතා .
පූරුෂත්රිතයේ ත්රේධා පුරන්ධ්රිරූපා ත්වමේව කාමාක්ෂි ..40..

vadanāravindavakṣovāmāṅkataṭīvaśaṃvadībhūtā |
pūruṣatritaye tredhā purandhrirūpā tvameva kāmākṣi ||40||

Verse 41

බාධාකරීං භවාබ්ධේරාධාරාද්යම්බුජේෂු විචරන්තීම් .
ආධාරීකෘතකාඤ්චී බෝධාමෘතවීචිමේව විමෘශාමඃ ..41..

bādhākarīṃ bhavābdherādhārādyambujeṣu vicarantīm |
ādhārīkṛtakāñcī bodhāmṛtavīcimeva vimṛśāmaḥ ||41||

Verse 42

කලයාම්යන්තඃ ශශධරකලයා(අ)ඞ්කිතමෞලිමමලචිද්වලයාම් .
අලයාමාගමපීඨීනිලයාං වලයාඞ්කසුන්දරීමම්බාම් ..42..

kalayāmyantaḥ śaśadharakalayā'ṅkitamaulimamalacidvalayām |
alayāmāgamapīṭhīnilayāṃ valayāṅkasundarīmambām ||42||

Verse 43

ශර්වාදිපරමසාධකගුර්වානීතාය කාමපීඨජුෂේ .
සර්වාකෘතයේ ශෝණිමගර්වායාස්මෛ සමර්ප්යතේ හෘදයම් ..43..

śarvādiparamasādhakagurvānītāya kāmapīṭhajuṣe |
sarvākṛtaye śoṇimagarvāyāsmai samarpyate hṛdayam ||43||

Verse 44

සමයා සාන්ධ්යමයූඛෛඃ සමයා බුද්ධයා සදෛව ශීලිතයා .
උමයා කාඤ්චීරතයා න මයා ලභ්යතේ කිං නු තාදාත්ම්යම් ..44..

samayā sāndhyamayūkhaiḥ samayā buddhayā sadaiva śīlitayā |
umayā kāñcīratayā na mayā labhyate kiṃ nu tādātmyam ||44||

Verse 45

ජන්තෝස්තව පදපූජනසන්තෝෂතරඞ්ගිතස්ය කාමාක්ෂි .
වන්ධෝ යදි භවති පුනඃ සින්ධෝරම්භස්සු බම්භ්රමීති ශිලා ..45..

jantostava padapūjanasantoṣataraṅgitasya kāmākṣi |
vandho yadi bhavati punaḥ sindhorambhassu bambhramīti śilā ||45||

Verse 46

කුණ්ඩලි කුමාරි කුටිලේ චණ්ඩි චරාචරසවිත්රි චාමුණ්ඩේ .
ගුණිනි ගුහාරිණි ගුහ්යේ ගුරුමූර්තේ ත්වාං නමාමි කාමාක්ෂි ..46..

kuṇḍali kumāri kuṭile caṇḍi carācarasavitri cāmuṇḍe |
guṇini guhāriṇi guhye gurumūrte tvāṃ namāmi kāmākṣi ||46||

Verse 47

අභිදාකෘතිර්භිදාකෘතිරචිදාකෘතිරපි චිදාකෘතිර්මාතඃ .
අනහන්තා ත්වමහන්තා භ්රමයසි කාමාක්ෂි ශාශ්වතී විශ්වම් ..47..

abhidākṛtirbhidākṛtiracidākṛtirapi cidākṛtirmātaḥ |
anahantā tvamahantā bhramayasi kāmākṣi śāśvatī viśvam ||47||

Verse 48

ශිව ශිව පශ්යන්ති සමං ශ්රීකාමාක්ෂීකටාක්ෂිතාඃ පුරුෂාඃ .
විපිනං භවනමමිත්රං මිත්රං ලෝෂ්ටං ච යුවතිබිම්බෝෂ්ඨම් ..48..

śiva śiva paśyanti samaṃ śrīkāmākṣīkaṭākṣitāḥ puruṣāḥ |
vipinaṃ bhavanamamitraṃ mitraṃ loṣṭaṃ ca yuvatibimboṣṭham ||48||

Verse 49

කාමපරිපන්ථිකාමිනි කාමේශ්වරි කාමපීඨමධ්යගතේ .
කාමදුඝා භව කමලේ කාමකලේ කාමකෝටි කාමාක්ෂි ..49..

kāmaparipanthikāmini kāmeśvari kāmapīṭhamadhyagate |
kāmadughā bhava kamale kāmakale kāmakoṭi kāmākṣi ||49||

Verse 50

මධ්යේහෘදයං මධ්යේනිටිලං මධ්යේශිරෝ(අ)පි වාස්තව්යාම් .
චණ්ඩකරශක්රකාර්මුකචන්ද්රසමාභාං නමාමි කාමාක්ෂීම් ..50..

madhyehṛdayaṃ madhyeniṭilaṃ madhyeśiro'pi vāstavyām |
caṇḍakaraśakrakārmukacandrasamābhāṃ namāmi kāmākṣīm ||50||

Verse 51

අධිකාඤ්චි කේලිලෝලෛරඛිලාගමයන්ත්රතන්ත්රමයෛඃ .
අතිශීතං මම මානසමසමශරද්රෝහිජීවනෝපායෛඃ ..51..

adhikāñci kelilolairakhilāgamayantratantramayaiḥ |
atiśītaṃ mama mānasamasamaśaradrohijīvanopāyaiḥ ||51||

Verse 52

නන්දති මම හෘදි කාචන මන්දිරයන්තී නිරන්තරං කාඤ්චීම් .
ඉන්දුරවිමණ්ඩලකුචා බින්දුවියන්නාදපරිණතා තරුණී ..52..

nandati mama hṛdi kācana mandirayantī nirantaraṃ kāñcīm |
induravimaṇḍalakucā binduviyannādapariṇatā taruṇī ||52||

Verse 53

ශම්පාලතාසවර්ණං සම්පාදයිතුං භවජ්වරචිකිත්සාම් .
ලිම්පාමි මනසි කිඤ්චන කම්පාතටරෝහි සිද්ධභෛෂජ්යම් ..53..

śampālatāsavarṇaṃ sampādayituṃ bhavajvaracikitsām |
limpāmi manasi kiñcana kampātaṭarohi siddhabhaiṣajyam ||53||

Verse 54

අනුමිතකුචකාඨින්යාමධිවක්ෂඃපීඨමඞ්ගජන්මරිපෝඃ .
ආනන්දදාං භජේ තාමානඞ්ගබ්රහ්මතත්වබෝධසිරාම් ..54..

anumitakucakāṭhinyāmadhivakṣaḥpīṭhamaṅgajanmaripoḥ |
ānandadāṃ bhaje tāmānaṅgabrahmatatvabodhasirām ||54||

Verse 55

ඓක්ෂිෂි පාශාඞ්කුශධරහස්තාන්තං විස්මයාර්හවෘත්තාන්තම් .
අධිකාඤ්චි නිගමවාචාං සිද්ධාන්තං ශූලපාණිශුද්ධාන්තම් ..55..

aikṣiṣi pāśāṅkuśadharahastāntaṃ vismayārhavṛttāntam |
adhikāñci nigamavācāṃ siddhāntaṃ śūlapāṇiśuddhāntam ||55||

Verse 56

ආහිතවිලාසභඞ්ගීමාබ්රහ්මස්තම්බශිල්පකල්පනයා .
ආශ්රිතකාඤ්චීමතුලාමාද්යාං විස්ඵූර්තිමාද්රියේ විද්යාම් ..56..

āhitavilāsabhaṅgīmābrahmastambaśilpakalpanayā |
āśritakāñcīmatulāmādyāṃ visphūrtimādriye vidyām ||56||

Verse 57

මූකෝ(අ)පි ජටිලදුර්ගතිශෝකෝ(අ)පි ස්මරති යඃ ක්ෂණං භවතීම් .
ඒකෝ භවති ස ජන්තුර්ලෝකෝත්තරකීර්තිරේව කාමාක්ෂි ..57..

mūko'pi jaṭiladurgatiśoko'pi smarati yaḥ kṣaṇaṃ bhavatīm |
eko bhavati sa janturlokottarakīrtireva kāmākṣi ||57||

Verse 58

පඤ්චදශවර්ණරූපං කඤ්චන කාඤ්චීවිහාරධෞරේයම් .
පඤ්චශරීයං ශම්භෝර්වඤ්චනවෛදග්ධ්යමූලමවලම්බේ ..58..

pañcadaśavarṇarūpaṃ kañcana kāñcīvihāradhaureyam |
pañcaśarīyaṃ śambhorvañcanavaidagdhyamūlamavalambe ||58||

Verse 59

පරිණතිමතීං චතුර්ධා පදවීං සුධියාං සමේත්ය සෞෂුම්නීම් .
පඤ්චාශදර්ණකල්පිතමදශිල්පාං ත්වාං නමාමි කාමාක්ෂි ..59..

pariṇatimatīṃ caturdhā padavīṃ sudhiyāṃ sametya sauṣumnīm |
pañcāśadarṇakalpitamadaśilpāṃ tvāṃ namāmi kāmākṣi ||59||

Verse 60

ආදික්ෂන්මම ගුරුරාඩාදික්ෂාන්තාක්ෂරාත්මිකාං විද්යාම් .
ස්වාදිෂ්ඨචාපදණ්ඩාං නේදිෂ්ඨාමේව කාමපීඨගතාම් ..60..

ādikṣanmama gururāḍādikṣāntākṣarātmikāṃ vidyām |
svādiṣṭhacāpadaṇḍāṃ nediṣṭhāmeva kāmapīṭhagatām ||60||

Verse 61

තුෂ්යාමි හර්ෂිතස්මරශාසනයා කාඤ්චිපුරකෘතාසනයා .
ස්වාසනයා සකලජගද්භාසනයා කලිතශම්බරාසනයා ..61..

tuṣyāmi harṣitasmaraśāsanayā kāñcipurakṛtāsanayā |
svāsanayā sakalajagadbhāsanayā kalitaśambarāsanayā ||61||

Verse 62

ප්රේමවතී කම්පායාං ස්ථේමවතී යතිමනස්සු භූමවතී .
සාමවතී නිත්යගිරා සෝමවතී ශිරසි භාති හෛමවතී ..62..

premavatī kampāyāṃ sthemavatī yatimanassu bhūmavatī |
sāmavatī nityagirā somavatī śirasi bhāti haimavatī ||62||

Verse 63

කෞතුකිනා කම්පායාං කෞසුමචාපේන කීලිතේනාන්තඃ .
කුලදෛවතේන මහතා කුඩ්මලමුද්රාං ධුනෝතු නඃප්රතිභා ..63..

kautukinā kampāyāṃ kausumacāpena kīlitenāntaḥ |
kuladaivatena mahatā kuḍmalamudrāṃ dhunotu naḥpratibhā ||63||

Verse 64

යූනා කේනාපි මිලද්දේහා ස්වාහාසහායතිලකේන .
සහකාරමූලදේශේ සංවිද්රූපා කුටුම්බිනී රමතේ ..64..

yūnā kenāpi miladdehā svāhāsahāyatilakena |
sahakāramūladeśe saṃvidrūpā kuṭumbinī ramate ||64||

Verse 65

කුසුමශරගර්වසම්පත්කෝශගෘහං භාති කාඤ්චිදේශගතම් .
ස්ථාපිතමස්මින්කථමපි ගෝපිතමන්තර්මයා මනෝරත්නම් ..65..

kusumaśaragarvasampatkośagṛhaṃ bhāti kāñcideśagatam |
sthāpitamasminkathamapi gopitamantarmayā manoratnam ||65||

Verse 66

දග්ධෂඩධ්වාරණ්යං දරදලිතකුසුම්භසම්භෘතාරුණ්යම් .
කලයේ නවතාරුණ්යං කම්පාතටසීම්නි කිමපි කාරුණ්යම් ..66..

dagdhaṣaḍadhvāraṇyaṃ daradalitakusumbhasambhṛtāruṇyam |
kalaye navatāruṇyaṃ kampātaṭasīmni kimapi kāruṇyam ||66||

Verse 67

අධිකාඤ්චි වර්ධමානාමතුලාං කරවාණි පාරණාමක්ෂ්ණෝඃ .
ආනන්දපාකභේදාමරුණිමපරිණාමගර්වපල්ලවිතාම් ..67..

adhikāñci vardhamānāmatulāṃ karavāṇi pāraṇāmakṣṇoḥ |
ānandapākabhedāmaruṇimapariṇāmagarvapallavitām ||67||

Verse 68

බාණසෘණිපාශකාර්මුකපාණිමමුං කමපි කාමපීඨගතම් .
ඒණධරකෝණචූඩං ශෝණිමපරිපාකභේදමාකලයේ ..68..

bāṇasṛṇipāśakārmukapāṇimamuṃ kamapi kāmapīṭhagatam |
eṇadharakoṇacūḍaṃ śoṇimaparipākabhedamākalaye ||68||

Verse 69

කිං වා ඵලති මමාන්යෞර්බිම්බාධරචුම්බිමන්දහාසමුඛී .
සම්බාධකරී තමසාමම්බා ජාගර්ති මනසි කාමාක්ෂී ..69..

kiṃ vā phalati mamānyaurbimbādharacumbimandahāsamukhī |
sambādhakarī tamasāmambā jāgarti manasi kāmākṣī ||69||

Verse 70

මඤ්චේ සදාශිවමයේ පරිශිවමයලලිතපෞෂ්පපර්යඞ්කේ .
අධිචක්රමධ්යමාස්තේ කාමාක්ෂී නාම කිමපි මම භාග්යම් ..70..

mañce sadāśivamaye pariśivamayalalitapauṣpaparyaṅke |
adhicakramadhyamāste kāmākṣī nāma kimapi mama bhāgyam ||70||

Verse 71

රක්ෂ්යෝ(අ)ස්මි කාමපීඨීලාසිකයා ඝනකෘපාම්බුරාශිකයා .
ශ්රුතියුවතිකුන්තලීමණිමාලිකයා තුහිනශෛලබාලිකයා ..71..

rakṣyo'smi kāmapīṭhīlāsikayā ghanakṛpāmburāśikayā |
śrutiyuvatikuntalīmaṇimālikayā tuhinaśailabālikayā ||71||

Verse 72

ලීයේ පුරහරජායේ මායේ තව තරුණපල්ලවච්ඡායේ .
චරණේ චන්ද්රාභරණේ කාඤ්චීශරණේ නතාර්තිසංහරණේ ..72..

līye puraharajāye māye tava taruṇapallavacchāye |
caraṇe candrābharaṇe kāñcīśaraṇe natārtisaṃharaṇe ||72||

Verse 73

මූර්තිමති මුක්තිබීජේ මූර්ධ්නි ස්තබකිතචකෝරසාම්රාජ්යේ .
මෝදිතකම්පාකූලේ මුහුර්මුහුර්මනසි මුමුදිෂා(අ)ස්මාකම් ..73..

mūrtimati muktibīje mūrdhni stabakitacakorasāmrājye |
moditakampākūle muhurmuhurmanasi mumudiṣā'smākam ||73||

Verse 74

වේදමයීං නාදමයීං බින්දුමයීං පරපදෝද්යදින්දුමයීම් .
මන්ත්රමයීං තන්ත්රමයීං ප්රකෘතිමයීං නෞමි විශ්වවිකෘතිමයීම් ..74..

vedamayīṃ nādamayīṃ bindumayīṃ parapadodyadindumayīm |
mantramayīṃ tantramayīṃ prakṛtimayīṃ naumi viśvavikṛtimayīm ||74||

Verse 75

පුරමථනපුණ්යකෝටී පුඤ්ජිතකවිලෝකසූක්තිරසධාටී .
මනසි මම කාමකෝටී විහරතු කරුණාවිපාකපරිපාටී ..75..

puramathanapuṇyakoṭī puñjitakavilokasūktirasadhāṭī |
manasi mama kāmakoṭī viharatu karuṇāvipākaparipāṭī ||75||

Verse 76

කුටිලං චටුලං පෘථුලං මෘදුලං කචනයනජඝනචරණේෂු .
අවලෝකිතමවලම්බිතමධිකම්පාතටමමේයමස්මාභිඃ ..76..

kuṭilaṃ caṭulaṃ pṛthulaṃ mṛdulaṃ kacanayanajaghanacaraṇeṣu |
avalokitamavalambitamadhikampātaṭamameyamasmābhiḥ ||76||

Verse 77

ප්රත්යඞ්මුඛ්යා දෘෂ්ටයා ප්රසාදදීපාඞ්කුරේණ කාමාක්ෂ්යාඃ .
පශ්යාමි නිස්තුලමහෝ පචේලිමං කමපි පරශිවෝල්ලාසම් ..77..

pratyaṅmukhyā dṛṣṭayā prasādadīpāṅkureṇa kāmākṣyāḥ |
paśyāmi nistulamaho pacelimaṃ kamapi paraśivollāsam ||77||

Verse 78

විද්යේ විධාතෘවිෂයේ කාත්යායනි කාලි කාමකෝටිකලේ .
භාරති භෛරවි භද්රේ ශාකිනි ශාම්භවි ශිවේ ස්තුවේ භවතීම් ..78..

vidye vidhātṛviṣaye kātyāyani kāli kāmakoṭikale |
bhārati bhairavi bhadre śākini śāmbhavi śive stuve bhavatīm ||78||

Verse 79

මාලිනි මහේශචාලිනි කාඤ්චීඛේලිනි විපක්ෂකාලිනි තේ .
ශූලිනි විද්රුමශාලිනි සුරජනපාලිනි කපාලිනි නමෝ(අ)ස්තු ..79..

mālini maheśacālini kāñcīkhelini vipakṣakālini te |
śūlini vidrumaśālini surajanapālini kapālini namo'stu ||79||

Verse 80

දේශික ඉති කිං ශඞ්කේ තත්තාදෘක්තව නු තරුණිමෝන්මේෂඃ .
කාමාක්ෂි ශූලපාණේඃ කාමාගමසමයදීක්ෂායාම් ..80..

deśika iti kiṃ śaṅke tattādṛktava nu taruṇimonmeṣaḥ |
kāmākṣi śūlapāṇeḥ kāmāgamasamayadīkṣāyām ||80||

Verse 81

වේතණ්ඩකුම්භඩම්බරවෛතණ්ඩිකකුචභරාර්තමධ්යාය .
කුඞ්කුමරුචේ නමස්යාං ශඞ්කරනයනාමෘතාය රචයාමඃ ..81..

vetaṇḍakumbhaḍambaravaitaṇḍikakucabharārtamadhyāya |
kuṅkumaruce namasyāṃ śaṅkaranayanāmṛtāya racayāmaḥ ||81||

Verse 82

අධිකාඤ්චිතමණිකාඤ්චනකාඤ්චීමධිකාඤ්චි කාඤ්චිදද්රාක්ෂම් .
අවනතජනානුකම්පාමනුකම්පාකූලමස්මදනුකූලාම් ..82..

adhikāñcitamaṇikāñcanakāñcīmadhikāñci kāñcidadrākṣam |
avanatajanānukampāmanukampākūlamasmadanukūlām ||82||

Verse 83

පරිචිතකම්පාතීරං පර්වතරාජන්යසුකෘතසන්නාහම් .
පරගුරුකෘපයා වීක්ෂේ පරමශිවෝත්සඞ්ගමඞ්ගලාභරණම් ..83..

paricitakampātīraṃ parvatarājanyasukṛtasannāham |
paragurukṛpayā vīkṣe paramaśivotsaṅgamaṅgalābharaṇam ||83||

Verse 84

දග්ධමදනස්ය ශම්භෝඃ ප්රථීයසීං බ්රහ්මචර්යවෛදග්ධීම් .
තව දේවි තරුණිමශ්රීචතුරිමපාකෝ න චක්ෂමේ මාතඃ ..84..

dagdhamadanasya śambhoḥ prathīyasīṃ brahmacaryavaidagdhīm |
tava devi taruṇimaśrīcaturimapāko na cakṣame mātaḥ ||84||

Verse 85

මදජලතමාලපත්රා වසනිතපත්රා කරාදෘතඛානිත්රා .
විහරති පුලින්දයෝෂා ගුඤ්ජාභූෂා ඵණීන්ද්රකෘතවේෂා ..85..

madajalatamālapatrā vasanitapatrā karādṛtakhānitrā |
viharati pulindayoṣā guñjābhūṣā phaṇīndrakṛtaveṣā ||85||

Verse 86

අඞ්කේ ශුකිනී ගීතේ කෞතුකිනී පරිසරේ ච ගායකිනී .
ජයසි සවිධේ(අ)ම්බ භෛරවමණ්ඩලිනී ශ්රවසි ශඞ්ඛකුන්ඩලිනී ..86..

aṅke śukinī gīte kautukinī parisare ca gāyakinī |
jayasi savidhe'mba bhairavamaṇḍalinī śravasi śaṅkhakunḍalinī ||86||

Verse 87

ප්රණතජනතාපවර්ගා කෘතබහුසර්ගා සසිංහසංසර්ගා .
කාමාක්ෂි මුදිතභර්ගා හතරිපුවර්ගා ත්වමේව සා දුර්ගා ..87..

praṇatajanatāpavargā kṛtabahusargā sasiṃhasaṃsargā |
kāmākṣi muditabhargā hataripuvargā tvameva sā durgā ||87||

Verse 88

ශ්රවණචලද්වේතණ්ඩා සමරෝද්දණ්ඩා ධුතාසුරශිඛණ්ඩා .
දේවි කලිතාන්ත්රෂණ්ඩා ධෘතනරමුණ්ඩා ත්වමේව චාමුණ්ඩා ..88..

śravaṇacaladvetaṇḍā samaroddaṇḍā dhutāsuraśikhaṇḍā |
devi kalitāntraṣaṇḍā dhṛtanaramuṇḍā tvameva cāmuṇḍā ||88||

Verse 89

උර්වීධරේන්ද්රකන්යේ දර්වීභරිතේන භක්තපූරේණ .
ගුර්වීමකිඤ්චනාර්ති ඛර්වීකුරුෂේ ත්වමේව කාමාක්ෂි ..89..

urvīdharendrakanye darvībharitena bhaktapūreṇa |
gurvīmakiñcanārti kharvīkuruṣe tvameva kāmākṣi ||89||

Verse 90

තාඩිතරිපුපරිපීඩනභයහරණ නිපුණහලමුසලා .
ක්රෝඩපතිභීෂණමුඛී ක්රීඩසි ජගති ත්වමේව කාමාක්ෂි ..90..

tāḍitaripuparipīḍanabhayaharaṇa nipuṇahalamusalā |
kroḍapatibhīṣaṇamukhī krīḍasi jagati tvameva kāmākṣi ||90||

Verse 91

ස්මරමථනවරණලෝලා මන්මථහේලාවිලාසමණිශාලා .
කනකරුචිචෞර්යශීලා ත්වමම්බ බාලා කරාබ්ජධෘතමාලා ..91..

smaramathanavaraṇalolā manmathahelāvilāsamaṇiśālā |
kanakarucicauryaśīlā tvamamba bālā karābjadhṛtamālā ||91||

Verse 92

විමලපටී කමලකුටී පුස්තකරුද්රාක්ෂශස්තහස්තපුටී .
කාමාක්ෂි පක්ෂ්මලාක්ෂී කලිතවිපඤ්චී විභාසි වෛරිඤ්චී ..92..

vimalapaṭī kamalakuṭī pustakarudrākṣaśastahastapuṭī |
kāmākṣi pakṣmalākṣī kalitavipañcī vibhāsi vairiñcī ||92||

Verse 93

කුඞ්කුමරුචිපිඞ්ගමසෘක්පඞ්කිලමුණ්ඩාලිමණ්ඩිතං මාතඃ .
ශ්රීකාමාක්ෂි තදීයසඞ්ගමකලාමන්දීභවත්කෞතුකඃ
ජයති තව රූපධේයං ජපපටපුස්තකවරාභයකරාබ්ජම් ..93..

kuṅkumarucipiṅgamasṛkpaṅkilamuṇḍālimaṇḍitaṃ mātaḥ |
śrīkāmākṣi tadīyasaṅgamakalāmandībhavatkautukaḥ
jayati tava rūpadheyaṃ japapaṭapustakavarābhayakarābjam ||93||

Verse 94

කනකමණිකලිතභූෂාං කාලායසකලහශීලකාන්තිකලාම් .
කාමාක්ෂි ශීලයේ ත්වාං කපාලශූලාභිරාමකරකමලාම් ..94..

kanakamaṇikalitabhūṣāṃ kālāyasakalahaśīlakāntikalām |
kāmākṣi śīlaye tvāṃ kapālaśūlābhirāmakarakamalām ||94||

Verse 95

ලෝහිතිමපුඤ්ජමධ්යේ මෝහිතභුවනේ මුදා නිරීක්ෂන්තේ .
වදනං තව කුවයුගලං කාඤ්චීසීමාං ච කේ(අ)පි කාමාක්ෂි ..95..

lohitimapuñjamadhye mohitabhuvane mudā nirīkṣante |
vadanaṃ tava kuvayugalaṃ kāñcīsīmāṃ ca ke'pi kāmākṣi ||95||

Verse 96

ජලධිද්විගුණිතහුතබහදිශාදිනේශ්වරකලාශ්විනේයදලෛඃ .
නලිනෛර්මහේශි ගච්ඡසි සර්වෝත්තරකරකමලදලමමලම් ..96..

jaladhidviguṇitahutabahadiśādineśvarakalāśvineyadalaiḥ |
nalinairmaheśi gacchasi sarvottarakarakamaladalamamalam ||96||

Verse 97

සත්කෘතදේශිකචරණාඃ සබීජනිර්බීජයෝගනිශ්රේණ්යා .
අපවර්ගසෞධවලභීමාරෝහන්ත්යම්බ කේ(අ)පි තව කෘපයා ..97..

satkṛtadeśikacaraṇāḥ sabījanirbījayoganiśreṇyā |
apavargasaudhavalabhīmārohantyamba ke'pi tava kṛpayā ||97||

Verse 98

අන්තරපි බහිරපි ත්වං ජන්තුතතේරන්තකාන්තකෘදහන්තේ .
චින්තිතසන්තානවතාං සන්තතමපි තන්තනීෂි මහිමානම් ..98..

antarapi bahirapi tvaṃ jantutaterantakāntakṛdahante |
cintitasantānavatāṃ santatamapi tantanīṣi mahimānam ||98||

Verse 99

කලමඤ්ජුලවාගනුමිතගලපඤ්ජරගතශුකග්රහෞත්කණ්ඨ්යාත් .
අම්බ රදනාම්බරං තේ බිම්බඵලං ශම්බරාරිණා න්යස්තම් ..99..

kalamañjulavāganumitagalapañjaragataśukagrahautkaṇṭhyāt |
amba radanāmbaraṃ te bimbaphalaṃ śambarāriṇā nyastam ||99||

Verse 100

ජය ජය ජගදම්බ ශිවේ ජය ජය කාමාක්ෂි ජය ජයාද්රිසුතේ .
ජය ජය මහේශදයිතේ ජය ජය චිද්ගගනකෞමුදීධාරේ ..100..

jaya jaya jagadamba śive jaya jaya kāmākṣi jaya jayādrisute |
jaya jaya maheśadayite jaya jaya cidgaganakaumudīdhāre ||100||

Verse 101

ආර්යාශතකං භක්ත්යා පඨතාමාර්යාකටාක්ෂේණ .
නිස්සරති වදනකමලාද්වාණී පීයූෂධෝරණී දිව්යා ..101..

āryāśatakaṃ bhaktyā paṭhatāmāryākaṭākṣeṇa |
nissarati vadanakamalādvāṇī pīyūṣadhoraṇī divyā ||101||

.. ඉති ආර්යාශතකං සම්පූර්ණම් ..

Sanskrit — Devanagari (original)

कारणपरचिद्रूपा काञ्चीपुरसीम्नि कामपीठगता ।

काचन विहरति करुणा काश्मीरस्तबककोमलाङ्गलता ॥1॥

कञ्चन काञ्चीनिलयं करधृतकोदण्डबाणसृणिपाशम् ।

कठिनस्तनभरनम्रं कैवल्यानन्दकन्दमवलम्बे ॥2॥

चिन्तितफलपरिपोषणचिन्तामणिरेव काञ्चिनिलया मे ।

चिरतरसुचरितसुलभा चित्तं शिशिरयतु चित्सुखाधारा ॥3॥

कुटिलकचं कठिनकुचं कुन्दस्मितकान्ति कुङ्कुमच्छायम् ।

कुरुते विहृतिं काञ्च्यां कुलपर्वतसार्वभौमसर्वस्वम् ॥4॥

पञ्चशरशास्त्रबोधनपरमाचार्येण दृष्टिपातेन ।

काञ्चीसीम्नि कुमारी काचन मोहयति कामजेतारम् ॥5॥

परया काञ्चीपुरया पर्वतपर्यायपीनकुचभरया ।

परतन्त्रा वयमनया पङ्कजसब्रह्मचारिलोचनया ॥6॥

ऐश्वर्यमिन्दुमौलेरैकत्म्यप्रकृति काञ्चिमध्यगतम् ।

ऐन्दवकिशोरशेखरमैदम्पर्यं चकास्ति निगमानाम् ॥7॥

श्रितकम्पसीमानं शिथिलितपरमशिवधैर्यमहिमानम् ।

कलये पटलिमानं कञ्चन कञ्चुकितभुवनभूमानम् ॥8॥

आदृतकाञ्चीनिलयमाद्यामारूढयौवनाटोपाम् ।

आगमवतंसकलिकामानन्दाद्वैतकन्दलीं वन्दे ॥9॥

तुङ्गाभिरामकुचभरशृङ्गारितमाश्रयामि काञ्चिगतम् ।

गङ्गाधरपरतन्त्रं शृङ्गाराद्वैततन्त्रसिद्धान्तम् ॥10॥

काञ्चीरत्नविभूषां कामपि कन्दर्पसूतिकापाङ्गीम् ।

परमां कलामुपासे परशिववामाङ्कपीठिकासीनाम् ॥11॥

कम्पातीचराणां करुणाकोरकितदृष्टिपातानाम् ।

केलीवनं मनो मे केषाञ्चिद्भवतु चिद्विलासानाम् ॥12॥

आम्रतरुमूलवसतेरादिमपुरुषस्य नयनपीयूषम् ।

आरब्धयौवनोत्सवमाम्नायरहस्यमन्तरवलम्बे ॥13॥

अधिकाञ्चि परमयोगिभिरादिमपरपीठसीम्नि दृश्येन ।

अनुबद्धं मम मानसमरुणिमसर्वस्वसम्प्रदायेन ॥14॥

अङ्कितशङ्करदेहामङ्कुरितोरोजकङ्कणाश्लेषैः ।

अधिकाञ्चि नित्यतरुणीमद्राक्षं काञ्चिदद्भुतां बालाम् ॥15॥

मधुरधनुषा महीधरजनुषा नन्दामि सुरभिबाणजुषा ।

चिद्वपुषा काञ्चिपुरे केलिजुषा बन्धुजीवकान्तिमुषा ॥16॥

मधुरस्मितेन रमते मांसलकुचभारमन्दगमनेन ।

मध्येकाञ्चि मनो मे मनसिजसाम्राज्यगर्वबीजेन ॥17॥

धरणिमयीं तरणिमयीं पवनमयीं गगनदहनहोतृमयीम् ।

अम्बुमयीमिन्दुमयीमम्बामनुकम्पमादिमामीक्षे ॥18॥

लीनस्थिति मुनिहृदये ध्यानस्तिमितं तपस्यदुपकम्पम् ।

पीनस्तनभरमीडे मीनध्वजतन्त्रपरमतात्पर्यम् ॥19॥

श्वेता मन्थरहसिते शाता मध्ये च वाड्भनोऽतीता ।

शीता लोचनपाते स्फीता कुचसीम्नि शाश्वती माता ॥20॥

पुरतः कदा न करवै पुरवैरिविमर्दपुलकिताङ्गलताम् ।

पुनतीं काञ्चीदेशं पुष्पायुधवीर्यसरसपरिपाटीम् ॥21॥

पुण्या काऽपि पुरन्ध्री पुङ्खितकन्दर्पसम्पदा वपुषा ।

पुलिनचरी कम्पायाः पुरमथनं पुलकनिचुलितं कुरुते ॥22॥

तनिमाद्वैतवलग्नं तरुणारुणसम्प्रदायतनुलेखम् ।

तटसीमनि कम्पायास्तरुणिमसर्वस्वमाद्यमद्राक्षम् ॥23॥

पौष्टिककर्मविपाकं पौष्पशरं सविधसीम्नि कम्पायाः ।

अद्राक्षमात्तयौवनमभ्युदयं कञ्चिदर्धशशिमौलैः ॥24॥

संश्रितकाञ्चीदेशे सरसिजदौर्भाग्यजाग्रदुत्तंसे ।

संविन्मये विलीये सारस्वतपुरुषकारसाम्राज्ये ॥25॥

मोदितमधुकरविशिखं स्वादिमसमुदायसारकोदण्डम् ।

आदृतकाञ्चीखेलनमादिममारुण्यभेदमाकलये ॥26॥

उररीकृतकाञ्चिपुरीमुपनिषदरविन्दकुहरमधुधाराम् ।

उन्नम्रस्तनकलशीमुत्सवलहरीमुपास्महे शम्भोः ॥27॥

एणशिशुदीर्घलोचनमेनःपरिपन्थि सन्ततं भजताम् ।

एकाम्रनाथजीवितमेवम्पददूरमेकमवलम्बे ॥28॥

स्मयमानमुखं काञ्चीभयमानं कमपि देवताभेदम् ।

दयमानं वीक्ष्य मुहुर्वयमानन्दामृताम्बुधौ मग्नाः ॥29॥

कुतुकजुषि काञ्चिदेशे कुमुदतपोराशिपाकशेखरिते ।

कुरुते मनोविहारं कुलगिरिपरिबृढकुलैकमणिदीपे ॥30॥

वीक्षेमहि काञ्चिपुरे विपुलस्तनकलशगरिमपरवशितम् ।

विद्रुमसहचरदेहं विभ्रमसमवायसारसन्नाहम् ॥31॥

कुरुविन्दगोत्रगात्रं कूलचरं कमपि नौमि कम्पायाः ।

कूलङ्कषकुचकुम्भं कुसुमायुधवीर्यसारसंरम्भम् ॥32॥

कुडूमलितकुचकिशोरैः कुर्वाणैः काञ्चिदेशसौहार्दम् ।

कुङ्कुमशोणैर्निचितं कुशलपथं शम्भुसुकृतसम्भारैः ॥33॥

अङ्कितकचेन केनचिदन्धङ्करणौषधेन कमलानाम् ।

अन्तःपुरेण शम्भोरलङ्क्रिया काऽपि कल्प्यते काञ्च्याम् ॥34॥

ऊरीकरोमि सन्ततमूष्मलफालेन ललितं पुंसा ।

उपकम्पमुचितखेलनमुर्वीधरवंशसम्पदुन्मेषम् ॥35॥

अङ्कुरितस्तनकोरकमङ्कालङ्कारमेकचूतपतेः ।

आलोकेमहि कोमलमागमसंलापसारयाथार्थ्यम् ॥36॥

पुञ्जितकरुणमुदञ्चितशिञ्जितमणिकाञ्चि किमपि काञ्चिपुरे ।

मञ्जरितमृदुलहासं पिञ्जरतनुरुचि पिनाकिमूलधनम् ॥37॥

लोलहृदयोऽस्ति शम्भोर्लोचनयुगलेन लेह्यमानायाम् ।

ललितपरमशिवायां लावण्यामृततरङ्गमालायाम् ॥38॥

मधुकरसहचरचिकुरैर्मदनागमसमयदीक्षितकटाक्षैः ।

मण्डितकम्पातीरैर्मङ्गलकन्दैर्ममास्तु सारूप्यम् ॥39॥

वदनारविन्दवक्षोवामाङ्कतटीवशंवदीभूता ।

पूरुषत्रितये त्रेधा पुरन्ध्रिरूपा त्वमेव कामाक्षि ॥40॥

बाधाकरीं भवाब्धेराधाराद्यम्बुजेषु विचरन्तीम् ।

आधारीकृतकाञ्ची बोधामृतवीचिमेव विमृशामः ॥41॥

कलयाम्यन्तः शशधरकलयाऽङ्कितमौलिममलचिद्वलयाम् ।

अलयामागमपीठीनिलयां वलयाङ्कसुन्दरीमम्बाम् ॥42॥

शर्वादिपरमसाधकगुर्वानीताय कामपीठजुषे ।

सर्वाकृतये शोणिमगर्वायास्मै समर्प्यते हृदयम् ॥43॥

समया सान्ध्यमयूखैः समया बुद्धया सदैव शीलितया ।

उमया काञ्चीरतया न मया लभ्यते किं नु तादात्म्यम् ॥44॥

जन्तोस्तव पदपूजनसन्तोषतरङ्गितस्य कामाक्षि ।

वन्धो यदि भवति पुनः सिन्धोरम्भस्सु बम्भ्रमीति शिला ॥45॥

कुण्डलि कुमारि कुटिले चण्डि चराचरसवित्रि चामुण्डे ।

गुणिनि गुहारिणि गुह्ये गुरुमूर्ते त्वां नमामि कामाक्षि ॥46॥

अभिदाकृतिर्भिदाकृतिरचिदाकृतिरपि चिदाकृतिर्मातः ।

अनहन्ता त्वमहन्ता भ्रमयसि कामाक्षि शाश्वती विश्वम् ॥47॥

शिव शिव पश्यन्ति समं श्रीकामाक्षीकटाक्षिताः पुरुषाः ।

विपिनं भवनममित्रं मित्रं लोष्टं च युवतिबिम्बोष्ठम् ॥48॥

कामपरिपन्थिकामिनि कामेश्वरि कामपीठमध्यगते ।

कामदुघा भव कमले कामकले कामकोटि कामाक्षि ॥49॥

मध्येहृदयं मध्येनिटिलं मध्येशिरोऽपि वास्तव्याम् ।

चण्डकरशक्रकार्मुकचन्द्रसमाभां नमामि कामाक्षीम् ॥50॥

अधिकाञ्चि केलिलोलैरखिलागमयन्त्रतन्त्रमयैः ।

अतिशीतं मम मानसमसमशरद्रोहिजीवनोपायैः ॥51॥

नन्दति मम हृदि काचन मन्दिरयन्ती निरन्तरं काञ्चीम् ।

इन्दुरविमण्डलकुचा बिन्दुवियन्नादपरिणता तरुणी ॥52॥

शम्पालतासवर्णं सम्पादयितुं भवज्वरचिकित्साम् ।

लिम्पामि मनसि किञ्चन कम्पातटरोहि सिद्धभैषज्यम् ॥53॥

अनुमितकुचकाठिन्यामधिवक्षःपीठमङ्गजन्मरिपोः ।

आनन्ददां भजे तामानङ्गब्रह्मतत्वबोधसिराम् ॥54॥

ऐक्षिषि पाशाङ्कुशधरहस्तान्तं विस्मयार्हवृत्तान्तम् ।

अधिकाञ्चि निगमवाचां सिद्धान्तं शूलपाणिशुद्धान्तम् ॥55॥

आहितविलासभङ्गीमाब्रह्मस्तम्बशिल्पकल्पनया ।

आश्रितकाञ्चीमतुलामाद्यां विस्फूर्तिमाद्रिये विद्याम् ॥56॥

मूकोऽपि जटिलदुर्गतिशोकोऽपि स्मरति यः क्षणं भवतीम् ।

एको भवति स जन्तुर्लोकोत्तरकीर्तिरेव कामाक्षि ॥57॥

पञ्चदशवर्णरूपं कञ्चन काञ्चीविहारधौरेयम् ।

पञ्चशरीयं शम्भोर्वञ्चनवैदग्ध्यमूलमवलम्बे ॥58॥

परिणतिमतीं चतुर्धा पदवीं सुधियां समेत्य सौषुम्नीम् ।

पञ्चाशदर्णकल्पितमदशिल्पां त्वां नमामि कामाक्षि ॥59॥

आदिक्षन्मम गुरुराडादिक्षान्ताक्षरात्मिकां विद्याम् ।

स्वादिष्ठचापदण्डां नेदिष्ठामेव कामपीठगताम् ॥60॥

तुष्यामि हर्षितस्मरशासनया काञ्चिपुरकृतासनया ।

स्वासनया सकलजगद्भासनया कलितशम्बरासनया ॥61॥

प्रेमवती कम्पायां स्थेमवती यतिमनस्सु भूमवती ।

सामवती नित्यगिरा सोमवती शिरसि भाति हैमवती ॥62॥

कौतुकिना कम्पायां कौसुमचापेन कीलितेनान्तः ।

कुलदैवतेन महता कुड्मलमुद्रां धुनोतु नःप्रतिभा ॥63॥

यूना केनापि मिलद्देहा स्वाहासहायतिलकेन ।

सहकारमूलदेशे संविद्रूपा कुटुम्बिनी रमते ॥64॥

कुसुमशरगर्वसम्पत्कोशगृहं भाति काञ्चिदेशगतम् ।

स्थापितमस्मिन्कथमपि गोपितमन्तर्मया मनोरत्नम् ॥65॥

दग्धषडध्वारण्यं दरदलितकुसुम्भसम्भृतारुण्यम् ।

कलये नवतारुण्यं कम्पातटसीम्नि किमपि कारुण्यम् ॥66॥

अधिकाञ्चि वर्धमानामतुलां करवाणि पारणामक्ष्णोः ।

आनन्दपाकभेदामरुणिमपरिणामगर्वपल्लविताम् ॥67॥

बाणसृणिपाशकार्मुकपाणिममुं कमपि कामपीठगतम् ।

एणधरकोणचूडं शोणिमपरिपाकभेदमाकलये ॥68॥

किं वा फलति ममान्यौर्बिम्बाधरचुम्बिमन्दहासमुखी ।

सम्बाधकरी तमसामम्बा जागर्ति मनसि कामाक्षी ॥69॥

मञ्चे सदाशिवमये परिशिवमयललितपौष्पपर्यङ्के ।

अधिचक्रमध्यमास्ते कामाक्षी नाम किमपि मम भाग्यम् ॥70॥

रक्ष्योऽस्मि कामपीठीलासिकया घनकृपाम्बुराशिकया ।

श्रुतियुवतिकुन्तलीमणिमालिकया तुहिनशैलबालिकया ॥71॥

लीये पुरहरजाये माये तव तरुणपल्लवच्छाये ।

चरणे चन्द्राभरणे काञ्चीशरणे नतार्तिसंहरणे ॥72॥

मूर्तिमति मुक्तिबीजे मूर्ध्नि स्तबकितचकोरसाम्राज्ये ।

मोदितकम्पाकूले मुहुर्मुहुर्मनसि मुमुदिषाऽस्माकम् ॥73॥

वेदमयीं नादमयीं बिन्दुमयीं परपदोद्यदिन्दुमयीम् ।

मन्त्रमयीं तन्त्रमयीं प्रकृतिमयीं नौमि विश्वविकृतिमयीम् ॥74॥

पुरमथनपुण्यकोटी पुञ्जितकविलोकसूक्तिरसधाटी ।

मनसि मम कामकोटी विहरतु करुणाविपाकपरिपाटी ॥75॥

कुटिलं चटुलं पृथुलं मृदुलं कचनयनजघनचरणेषु ।

अवलोकितमवलम्बितमधिकम्पातटममेयमस्माभिः ॥76॥

प्रत्यङ्मुख्या दृष्टया प्रसाददीपाङ्कुरेण कामाक्ष्याः ।

पश्यामि निस्तुलमहो पचेलिमं कमपि परशिवोल्लासम् ॥77॥

विद्ये विधातृविषये कात्यायनि कालि कामकोटिकले ।

भारति भैरवि भद्रे शाकिनि शाम्भवि शिवे स्तुवे भवतीम् ॥78॥

मालिनि महेशचालिनि काञ्चीखेलिनि विपक्षकालिनि ते ।

शूलिनि विद्रुमशालिनि सुरजनपालिनि कपालिनि नमोऽस्तु ॥79॥

देशिक इति किं शङ्के तत्तादृक्तव नु तरुणिमोन्मेषः ।

कामाक्षि शूलपाणेः कामागमसमयदीक्षायाम् ॥80॥

वेतण्डकुम्भडम्बरवैतण्डिककुचभरार्तमध्याय ।

कुङ्कुमरुचे नमस्यां शङ्करनयनामृताय रचयामः ॥81॥

अधिकाञ्चितमणिकाञ्चनकाञ्चीमधिकाञ्चि काञ्चिदद्राक्षम् ।

अवनतजनानुकम्पामनुकम्पाकूलमस्मदनुकूलाम् ॥82॥

परिचितकम्पातीरं पर्वतराजन्यसुकृतसन्नाहम् ।

परगुरुकृपया वीक्षे परमशिवोत्सङ्गमङ्गलाभरणम् ॥83॥

दग्धमदनस्य शम्भोः प्रथीयसीं ब्रह्मचर्यवैदग्धीम् ।

तव देवि तरुणिमश्रीचतुरिमपाको न चक्षमे मातः ॥84॥

मदजलतमालपत्रा वसनितपत्रा करादृतखानित्रा ।

विहरति पुलिन्दयोषा गुञ्जाभूषा फणीन्द्रकृतवेषा ॥85॥

अङ्के शुकिनी गीते कौतुकिनी परिसरे च गायकिनी ।

जयसि सविधेऽम्ब भैरवमण्डलिनी श्रवसि शङ्खकुन्डलिनी ॥86॥

प्रणतजनतापवर्गा कृतबहुसर्गा ससिंहसंसर्गा ।

कामाक्षि मुदितभर्गा हतरिपुवर्गा त्वमेव सा दुर्गा ॥87॥

श्रवणचलद्वेतण्डा समरोद्दण्डा धुतासुरशिखण्डा ।

देवि कलितान्त्रषण्डा धृतनरमुण्डा त्वमेव चामुण्डा ॥88॥

उर्वीधरेन्द्रकन्ये दर्वीभरितेन भक्तपूरेण ।

गुर्वीमकिञ्चनार्ति खर्वीकुरुषे त्वमेव कामाक्षि ॥89॥

ताडितरिपुपरिपीडनभयहरण निपुणहलमुसला ।

क्रोडपतिभीषणमुखी क्रीडसि जगति त्वमेव कामाक्षि ॥90॥

स्मरमथनवरणलोला मन्मथहेलाविलासमणिशाला ।

कनकरुचिचौर्यशीला त्वमम्ब बाला कराब्जधृतमाला ॥91॥

विमलपटी कमलकुटी पुस्तकरुद्राक्षशस्तहस्तपुटी ।

कामाक्षि पक्ष्मलाक्षी कलितविपञ्ची विभासि वैरिञ्ची ॥92॥

कुङ्कुमरुचिपिङ्गमसृक्पङ्किलमुण्डालिमण्डितं मातः ।

श्रीकामाक्षि तदीयसङ्गमकलामन्दीभवत्कौतुकः

जयति तव रूपधेयं जपपटपुस्तकवराभयकराब्जम् ॥93॥

कनकमणिकलितभूषां कालायसकलहशीलकान्तिकलाम् ।

कामाक्षि शीलये त्वां कपालशूलाभिरामकरकमलाम् ॥94॥

लोहितिमपुञ्जमध्ये मोहितभुवने मुदा निरीक्षन्ते ।

वदनं तव कुवयुगलं काञ्चीसीमां च केऽपि कामाक्षि ॥95॥

जलधिद्विगुणितहुतबहदिशादिनेश्वरकलाश्विनेयदलैः ।

नलिनैर्महेशि गच्छसि सर्वोत्तरकरकमलदलममलम् ॥96॥

सत्कृतदेशिकचरणाः सबीजनिर्बीजयोगनिश्रेण्या ।

अपवर्गसौधवलभीमारोहन्त्यम्ब केऽपि तव कृपया ॥97॥

अन्तरपि बहिरपि त्वं जन्तुततेरन्तकान्तकृदहन्ते ।

चिन्तितसन्तानवतां सन्ततमपि तन्तनीषि महिमानम् ॥98॥

कलमञ्जुलवागनुमितगलपञ्जरगतशुकग्रहौत्कण्ठ्यात् ।

अम्ब रदनाम्बरं ते बिम्बफलं शम्बरारिणा न्यस्तम् ॥99॥

जय जय जगदम्ब शिवे जय जय कामाक्षि जय जयाद्रिसुते ।

जय जय महेशदयिते जय जय चिद्गगनकौमुदीधारे ॥100॥

आर्याशतकं भक्त्या पठतामार्याकटाक्षेण ।

निस्सरति वदनकमलाद्वाणी पीयूषधोरणी दिव्या ॥101॥

॥ इति आर्याशतकं सम्पूर्णम् ॥

🕉️ This is the original Sanskrit rendered in Sinhala script. Pronunciation is identical to the Sanskrit Devanagari version. It is a transliteration, not a translation — see “Meaning” for translations where available.

මූක පඤ්ච ශති 1 - ආර්ය ශතකම්