2.4 - Deva Manushyah Pitarah - Krishna Yajurveda Taittiriya Samhita Pathah — Kannada Script

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ಚತುರ್ಥಃ ಪ್ರಶ್ನಃ - ಇಷ್ಟಿವಿಧಾನಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,

ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ದೇ॒ವಾ ಮ॑ನು॒ಷ್ಯಾಃ᳚ ಪಿ॒ತರ॒ಸ್ತೇ᳚-ಽನ್ಯತ॑ ಆಸ॒ನ್ನಸು॑ರಾ॒ ರಕ್ಷಾಗ್ಂ॑ಸಿ ಪಿಶಾ॒ಚಾಸ್ತೇ᳚ ಽನ್ಯತ॒ಸ್ತೇಷಾ᳚-ನ್ದೇ॒ವಾನಾ॑ಮು॒ತ ಯದಲ್ಪಂ॒-ಲೋಁಹಿ॑ತ॒ಮಕು॑ರ್ವ॒-ನ್ತ-ದ್ರಕ್ಷಾಗ್ಂ॑ಸಿ॒ ರಾತ್ರೀ॑ಭಿರಸುಭ್ನ॒-ನ್ತಾನ್-ಥ್ಸು॒ಬ್ಧಾ-ನ್ಮೃ॒ತಾನ॒ಭಿ ವ್ಯೌ᳚ಚ್ಛ॒-ತ್ತೇ ದೇ॒ವಾ ಅ॑ವಿದು॒ರ್ಯೋ ವೈ ನೋ॒-ಽಯ-ಮ್ಮ್ರಿ॒ಯತೇ॒ ರಕ್ಷಾಗ್ಂ॑ಸಿ॒ ವಾ ಇ॒ಮ-ಙ್ಘ್ನ॒ನ್ತೀತಿ॒ ತೇ ರಕ್ಷಾ॒ಗ್॒ಸ್ಯುಪಾ॑ಮನ್ತ್ರಯನ್ತ॒ ತಾನ್ಯ॑ಬ್ರುವ॒ನ್. ವರಂ॑-ವೃಁಣಾಮಹೈ॒ ಯ- [ಯತ್, ಅಸು॑ರಾ॒ನ್ ಜಯಾ॑ಮ॒] 1

-ದಸು॑ರಾ॒ನ್ ಜಯಾ॑ಮ॒ ತನ್ನಃ॑ ಸ॒ಹಾಸ॒ದಿತಿ॒ ತತೋ॒ ವೈ ದೇ॒ವಾ ಅಸು॑ರಾನಜಯ॒-ನ್ತೇ-ಽಸು॑ರಾನ್ ಜಿ॒ತ್ವಾರಕ್ಷಾ॒ಗ್॒ಸ್ಯಪಾ॑ನುದನ್ತ॒ ತಾನಿ॒ ರಕ್ಷಾ॒ಗ್॒ಸ್ಯನೃ॑ತಮ ಕ॒ರ್ತೇತಿ॑ ಸಮ॒ನ್ತ-ನ್ದೇ॒ವಾ-ನ್ಪರ್ಯ॑ವಿಶ॒-ನ್ತೇ ದೇ॒ವಾ ಅ॒ಗ್ನಾವ॑ನಾಥನ್ತ॒ ತೇ᳚-ಽಗ್ನಯೇ॒ ಪ್ರವ॑ತೇ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ॒-ನ್ನಿರ॑ವಪನ್ನ॒ಗ್ನಯೇ॑ ವಿಬಾ॒ಧವ॑ತೇ॒-ಽಗ್ನಯೇ॒ ಪ್ರತೀ॑ಕವತೇ॒ ಯದ॒ಗ್ನಯೇ॒ ಪ್ರವ॑ತೇ ನಿ॒ರವ॑ಪ॒ನ್॒. ಯಾನ್ಯೇ॒ವ ಪು॒ರಸ್ತಾ॒-ದ್ರಕ್ಷಾ॒ಗ್॒- [ಪು॒ರಸ್ತಾ॒-ದ್ರಕ್ಷಾ॒ಗ್ಂ॑ಸಿ, ಆ॒ಸ॒ನ್ತಾನಿ॒ ತೇನ॒] 2

-ಸ್ಯಾಸ॒ನ್ತಾನಿ॒ ತೇನ॒ ಪ್ರಾಣು॑ದನ್ತ॒ ಯದ॒ಗ್ನಯೇ॑ ವಿಬಾ॒ಧವ॑ತೇ॒ ಯಾನ್ಯೇ॒ವಾಭಿತೋ॒ ರಕ್ಷಾ॒ಗ್॒ಸ್ಯಾಸ॒-ನ್ತಾನಿ॒ ತೇನ॒ ವ್ಯ॑ಬಾಧನ್ತ॒ ಯದ॒ಗ್ನಯೇ॒ ಪ್ರತೀ॑ಕವತೇ॒ ಯಾನ್ಯೇ॒ವ ಪ॒ಶ್ಚಾ-ದ್ರಕ್ಷಾ॒ಗ್॒ಸ್ಯಾಸ॒-ನ್ತಾನಿ॒ ತೇನಾಪಾ॑ನುದನ್ತ॒ ತತೋ॑ ದೇ॒ವಾ ಅಭ॑ವ॒-ನ್ಪರಾಸು॑ರಾ॒ ಯೋ ಭ್ರಾತೃ॑ವ್ಯವಾ॒ನ್-ಥ್ಸ್ಯಾ-ಥ್ಸ ಸ್ಪರ್ಧ॑ಮಾನ ಏ॒ತಯೇಷ್ಟ್ಯಾ॑ ಯಜೇತಾ॒ಗ್ನಯೇ॒ ಪ್ರವ॑ತೇ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇದ॒ಗ್ನಯೇ॑ ವಿಬಾ॒ಧವ॑ತೇ॒- [ವಿಬಾ॒ಧವ॑ತೇ॒, ಅ॒ಗ್ನಯೇ॒ ಪ್ರತೀ॑ಕವತೇ॒] 3

-ಽಗ್ನಯೇ॒ ಪ್ರತೀ॑ಕವತೇ॒ ಯದ॒ಗ್ನಯೇ॒ ಪ್ರವ॑ತೇ ನಿ॒ರ್ವಪ॑ತಿ॒ ಯ ಏ॒ವಾಸ್ಮಾ॒ಚ್ಛ್ರೇಯಾ॒ನ್-ಭ್ರಾತೃ॑ವ್ಯ॒ಸ್ತ-ನ್ತೇನ॒ ಪ್ರಣು॑ದತೇ॒ ಯದ॒ಗ್ನಯೇ॑ ವಿಬಾ॒ಧವ॑ತೇ॒ ಯ ಏ॒ವೈನೇ॑ನ ಸ॒ದೃನ್ತ-ನ್ತೇನ॒ ವಿ ಬಾ॑ಧತೇ॒ ಯದ॒ಗ್ನಯೇ॒ ಪ್ರತೀ॑ಕವತೇ॒ ಯ ಏ॒ವಾಸ್ಮಾ॒-ತ್ಪಾಪೀ॑ಯಾ॒-ನ್ತ-ನ್ತೇನಾಪ॑ ನುದತೇ॒ ಪ್ರ ಶ್ರೇಯಾಗ್ಂ॑ಸ॒-ಮ್ಭ್ರಾತೃ॑ವ್ಯ-ನ್ನುದ॒ತೇತಿ॑ ಸ॒ದೃಶ॑-ಙ್ಕ್ರಾಮತಿ॒ ನೈನ॒-ಮ್ಪಾಪೀ॑ಯಾನಾಪ್ನೋತಿ॒ ಯ ಏ॒ವಂ ಁವಿ॒ದ್ವಾನೇ॒ತಯೇಷ್ಟ್ಯಾ॒ ಯಜ॑ತೇ ॥ 4 ॥

(ವೃ॒ಣಾ॒ಮ॒ಹೈ॒ ಯತ್ - ಪು॒ರಸ್ತಾ॒-ದ್ರಕ್ಷಾಗ್ಂ॑ಸಿ- ವಪೇದ॒ಗ್ನಯೇ॑ ವಿಬಾ॒ಧವ॑ತ - ಏ॒ವಂ - ಚ॒ತ್ವಾರಿ॑ ಚ) (ಅ. 1)

ದೇ॒ವಾ॒ಸು॒ರಾ-ಸ್ಸಂಯಁ॑ತ್ತಾ ಆಸ॒-ನ್ತೇ ದೇ॒ವಾ ಅ॑ಬ್ರುವ॒ನ್॒. ಯೋ ನೋ॑ ವೀ॒ರ್ಯಾ॑ವತ್ತಮ॒ಸ್ತಮನು॑ ಸ॒ಮಾರ॑ಭಾಮಹಾ॒ ಇತಿ॒ ತ ಇನ್ದ್ರ॑ಮಬ್ರುವ॒-ನ್ತ್ವಂ-ವೈಁ ನೋ॑ ವೀ॒ರ್ಯಾ॑ವತ್ತಮೋ-ಽಸಿ॒ ತ್ವಾಮನು॑ ಸ॒ಮಾರ॑ಭಾಮಹಾ॒ ಇತಿ॒ ಸೋ᳚-ಽಬ್ರವೀ-ತ್ತಿ॒ಸ್ರೋ ಮ॑ ಇ॒ಮಾಸ್ತ॒ನುವೋ॑ ವೀ॒ರ್ಯಾ॑ವತೀ॒ಸ್ತಾಃ ಪ್ರೀ॑ಣೀ॒ತಾಥಾ-ಸು॑ರಾನ॒ಭಿ ಭ॑ವಿಷ್ಯ॒ಥೇತಿ॒ ತಾ ವೈ ಬ್ರೂ॒ಹೀತ್ಯ॑ಬ್ರುವನ್ನಿ॒ಯಮಗ್ಂ॑ ಹೋ॒ಮುಗಿ॒ಯಂ-ವಿಁ॑ಮೃ॒ಧೇಯ-ಮಿ॑ನ್ದ್ರಿ॒ಯಾವ॒ತೀ- [-ಮಿ॑ನ್ದ್ರಿ॒ಯಾವ॒ತೀ, ಇತ್ಯ॑ಬ್ರವೀ॒ತ್ತ] 5

-ತ್ಯ॑ಬ್ರವೀ॒ತ್ತ ಇನ್ದ್ರಾ॑ಯಾಗ್ಂ ಹೋ॒ಮುಚೇ॑ ಪುರೋ॒ಡಾಶ॒ಮೇಕಾ॑ದಶಕಪಾಲ॒-ನ್ನಿರ॑ವಪ॒ನ್ನಿನ್ದ್ರಾ॑ಯ ವೈಮೃ॒ಧಾಯೇ-ನ್ದ್ರಾ॑ಯೇನ್ದ್ರಿ॒ಯಾವ॑ತೇ॒ ಯದಿನ್ದ್ರಾ॑ಯಾಗ್ಂ ಹೋ॒ಮುಚೇ॑ ನಿ॒ರವ॑ಪ॒ನ್ನಗ್ಂಹ॑ಸ ಏ॒ವ ತೇನಾ॑ಮುಚ್ಯನ್ತ॒ ಯದಿನ್ದ್ರಾ॑ಯ ವೈ ಮೃ॒ಧಾಯ॒ ಮೃಧ॑ ಏ॒ವ ತೇನಾಪಾ᳚ಘ್ನತ॒ಯದಿನ್ದ್ರಾ॑ಯೇನ್ದ್ರಿ॒ಯಾವ॑ತ ಇನ್ದ್ರಿ॒ಯಮೇ॒ವ ತೇನಾ॒-ಽಽತ್ಮನ್ನ॑ದಧತ॒ ತ್ರಯ॑ಸ್ತ್ರಿಗ್ಂಶತ್ಕಪಾಲ-ಮ್ಪುರೋ॒ಡಾಶ॒-ನ್ನಿರ॑ವಪ॒-ನ್ತ್ರಯ॑ಸ್ತ್ರಿಗ್ಂಶ॒ದ್ವೈ ದೇ॒ವತಾ॒ಸ್ತಾ ಇನ್ದ್ರ॑ ಆ॒ತ್ಮನ್ನನು॑ ಸ॒ಮಾರ॑ಭಂಯಁತ॒ ಭೂತ್ಯೈ॒ [ಭೂತ್ಯೈ᳚, ತಾಂ-ವಾಁವ] 6

ತಾಂ-ವಾಁವ ದೇ॒ವಾ ವಿಜಿ॑ತಿ-ಮುತ್ತ॒ಮಾ-ಮಸು॑ರೈ॒-ರ್ವ್ಯ॑ಜಯನ್ತ॒ಯೋ ಭ್ರಾತೃ॑ವ್ಯವಾ॒ನ್ಥ್- ಸ್ಯಾ-ಥ್ಸ ಸ್ಪರ್ಧ॑ಮಾನ ಏ॒ತಯೇಷ್ಟ್ಯಾ॑ ಯಜೇ॒ತೇನ್ದ್ರಾ॑ಯಾಗ್ಂ ಹೋ॒ಮುಚೇ॑ ಪುರೋ॒ಡಾಶ॒ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒ದಿನ್ದ್ರಾ॑ಯ ವೈಮೃ॒ಧಾಯೇನ್ದ್ರಾ॑ಯೇನ್ದ್ರಿ॒ಯಾವ॒ತೇ-ಽಗ್ಂ ಹ॑ಸಾ॒ ವಾ ಏ॒ಷ ಗೃ॑ಹೀ॒ತೋ ಯಸ್ಮಾ॒ಚ್ಛ್ರೇಯಾ॒-ನ್ಭ್ರಾತೃ॑ವ್ಯೋ॒ಯದಿನ್ದ್ರಾ॑ಯಾಗ್ಂ ಹೋ॒ಮುಚೇ॑ ನಿ॒ರ್ವಪ॒ತ್ಯಗ್ಂಹ॑ಸ ಏ॒ವ ತೇನ॑ ಮುಚ್ಯತೇಮೃ॒ಧಾ ವಾ ಏ॒ಷೋ॑-ಽಭಿಷ॑ಣ್ಣೋ॒ ಯಸ್ಮಾ᳚-ಥ್ಸಮಾ॒ನೇಷ್ವ॒ನ್ಯ-ಶ್ಶ್ರೇಯಾ॑ನು॒ತಾ- [ಶ್ರೇಯಾ॑ನು॒ತ, ಅ-ಽಭ್ರಾ॑ತೃವ್ಯೋ॒] 7

-ಽಭ್ರಾ॑ತೃವ್ಯೋ॒ ಯದಿನ್ದ್ರಾ॑ಯ ವೈಮೃ॒ಧಾಯ॒ ಮೃಧ॑ ಏ॒ವ ತೇನಾಪ॑ ಹತೇ॒ಯದಿನ್ದ್ರಾ॑ಯೇನ್ದ್ರಿ॒ಯಾವ॑ತ ಇನ್ದ್ರಿ॒ಯಮೇ॒ವ ತೇನಾ॒ತ್ಮ-ನ್ಧ॑ತ್ತೇ॒ ತ್ರಯ॑ಸ್ತ್ರಿಗ್ಂಶತ್ಕಪಾಲ-ಮ್ಪುರೋ॒ಡಾಶ॒-ನ್ನಿರ್ವ॑ಪತಿ॒ ತ್ರಯ॑ಸ್ತ್ರಿಗ್ಂಶ॒ದ್ವೈ ದೇ॒ವತಾ॒ಸ್ತಾ ಏ॒ವ ಯಜ॑ಮಾನ ಆ॒ತ್ಮನ್ನನು॑ ಸ॒ಮಾರ॑ಭಂಯಁತೇ॒ ಭೂತ್ಯೈ॒ ಸಾ ವಾ ಏ॒ಷಾ ವಿಜಿ॑ತಿ॒ರ್ನಾಮೇಷ್ಟಿ॒ರ್ಯ ಏ॒ವಂ-ವಿಁ॒ದ್ವಾನೇ॒ತಯೇಷ್ಟ್ಯಾ॒ ಯಜ॑ತ ಉತ್ತ॒ಮಾಮೇ॒ವ ವಿಜಿ॑ತಿ॒-ಮ್ಭ್ರಾತೃ॑ವ್ಯೇಣ॒ ವಿ ಜ॑ಯತೇ ॥ 8 ॥

(ಇ॒ನ್ದ್ರಿ॒ಯಾವ॑ತೀ॒ - ಭೂತ್ಯಾ॑ - ಉ॒ತೈ - ಕಾ॒ನ್ನ ಪ॑ಞ್ಚಾ॒ಶಚ್ಚ॑) (ಅ. 2)

ದೇ॒ವಾ॒ಸು॒ರಾ-ಸ್ಸಂಯಁ॑ತ್ತಾ ಆಸ॒-ನ್ತೇಷಾ᳚-ಙ್ಗಾಯ॒ತ್ರ್ಯೋಜೋ॒ ಬಲ॑ಮಿನ್ದ್ರಿ॒ಯಂ-ವೀಁ॒ರ್ಯ॑-ಮ್ಪ್ರ॒ಜಾ-ಮ್ಪ॒ಶೂನ್-ಥ್ಸ॒ಗೃಂಹ್ಯಾ॒ ಽಽದಾಯಾ॑-ಪ॒ಕ್ರಮ್ಯಾ॑ತಿಷ್ಠ॒-ತ್ತೇ॑-ಽಮನ್ಯನ್ತ ಯತ॒ರಾನ್. ವಾ ಇ॒ಯಮು॑ಪಾವ॒ರ್ಥ್ಸ್ಯತಿ॒ ತ ಇ॒ದ-ಮ್ಭ॑ವಿಷ್ಯ॒ನ್ತೀತಿ॒ ತಾಂ-ವ್ಯಁ॑ಹ್ವಯನ್ತ॒ ವಿಶ್ವ॑ಕರ್ಮ॒ನ್ನಿತಿ॑ ದೇ॒ವಾ ದಾಭೀತ್ಯಸು॑ರಾ॒-ಸ್ಸಾ ನಾನ್ಯ॑ತ॒ರಾಗ್ಶ್ಚ॒-ನೋಪಾವ॑ರ್ತತ॒ ತೇ ದೇ॒ವಾ ಏ॒ತ-ದ್ಯಜು॑ರಪಶ್ಯ॒ನ್ನೋಜೋ॑-ಽಸಿ॒ ಸಹೋ॑-ಽಸಿ॒ ಬಲ॑ಮಸಿ॒ [ಬಲ॑ಮಸಿ, ಭ್ರಾಜೋ॑-ಽಸಿ] 9

ಭ್ರಾಜೋ॑-ಽಸಿ ದೇ॒ವಾನಾ॒-ನ್ಧಾಮ॒ ನಾಮಾ॑-ಽಸಿ॒ ವಿಶ್ವ॑ಮಸಿ ವಿ॒ಶ್ವಾಯು॒-ಸ್ಸರ್ವ॑ಮಸಿ ಸ॒ರ್ವಾಯು॑ರಭಿ॒ಭೂರಿತಿ॒ ವಾವ ದೇ॒ವಾ ಅಸು॑ರಾಣಾ॒ಮೋಜೋ॒ ಬಲ॑ಮಿನ್ದ್ರಿ॒ಯಂ-ವೀಁ॒ರ್ಯ॑-ಮ್ಪ್ರ॒ಜಾ-ಮ್ಪ॒ಶೂನ॑ವೃಞ್ಜತ॒ ಯ-ದ್ಗಾ॑ಯ॒ತ್ರ್ಯ॑ಪ॒ಕ್ರಮ್ಯಾತಿ॑ಷ್ಠ॒-ತ್ತಸ್ಮಾ॑ದೇ॒ತಾ-ಙ್ಗಾ॑ಯ॒ತ್ರೀತೀಷ್ಟಿ॑ಮಾಹು-ಸ್ಸಂವಁಥ್ಸ॒ರೋ ವೈ ಗಾ॑ಯ॒ತ್ರೀ ಸಂ॑ವಁಥ್ಸ॒ರೋ ವೈ ತದ॑ಪ॒ಕ್ರಮ್ಯಾ॑ತಿಷ್ಠ॒-ದ್ಯದೇ॒ತಯಾ॑ ದೇ॒ವಾ ಅಸು॑ರಾಣಾ॒ಮೋಜೋ॒ ಬಲ॑ಮಿನ್ದ್ರಿ॒ಯಂ-ವೀಁ॒ರ್ಯ॑- [ಬಲ॑ಮಿನ್ದ್ರಿ॒ಯಂ-ವೀಁ॒ರ್ಯ᳚ಮ್, ಪ್ರ॒ಜಾ-ಮ್ಪ॒ಶೂ-] 10

-ಮ್ಪ್ರ॒ಜಾ-ಮ್ಪ॒ಶೂ-ನವೃ॑ಞ್ಜತ॒ ತಸ್ಮಾ॑ದೇ॒ತಾಗ್ಂ ಸಂ॑ವಁ॒ರ್ಗ ಇತೀಷ್ಟಿ॑ಮಾಹು॒ರ್ಯೋ ಭ್ರಾತೃ॑ವ್ಯವಾ॒ನ್ಥ್ಸ್ಯಾ-ಥ್ಸಸ್ಪರ್ಧ॑ಮಾನ ಏ॒ತಯೇಷ್ಟ್ಯಾ॑ ಯಜೇತಾ॒ಗ್ನಯೇ॑ ಸಂವಁ॒ರ್ಗಾಯ॑ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ತ್ತಗ್ಂಶೃ॒ತಮಾಸ॑ನ್ನಮೇ॒ತೇನ॒ ಯಜು॑ಷಾ॒-ಽಭಿ ಮೃ॑ಶೇ॒ದೋಜ॑ ಏ॒ವ ಬಲ॑ಮಿನ್ದ್ರಿ॒ಯಂ-ವೀಁ॒ರ್ಯ॑-ಮ್ಪ್ರ॒ಜಾ-ಮ್ಪ॒ಶೂ-ನ್ಭ್ರಾತೃ॑ವ್ಯಸ್ಯ ವೃಙ್ಕ್ತೇ॒ ಭವ॑ತ್ಯಾ॒ತ್ಮನಾ॒ ಪರಾ᳚ಸ್ಯ॒ ಭ್ರಾತೃ॑ವ್ಯೋ ಭವತಿ ॥ 11

(ಬಲ॑ಮಸ್ಯೇ॒ - ತಯಾ॑ ದೇ॒ವಾ ಅಸು॑ರಾಣಾ॒ಮೋಜೋ॒ ಬಲ॑ಮಿನ್ದ್ರಿ॒ಯಂ-ವೀಁ॒ರ್ಯಂ॑ - ಪಞ್ಚ॑ಚತ್ವಾರಿಗ್ಂಶಚ್ಚ) (ಅ. 3)

ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ॒ ತಾ ಅ॑ಸ್ಮಾ-ಥ್ಸೃ॒ಷ್ಟಾಃ ಪರಾ॑ಚೀರಾಯ॒-ನ್ತಾ ಯತ್ರಾವ॑ಸ॒-ನ್ತತೋ॑ ಗ॒ರ್ಮುದುದ॑ತಿಷ್ಠ॒-ತ್ತಾ ಬೃಹ॒ಸ್ಪತಿ॑ಶ್ಚಾ॒ನ್ವವೈ॑ತಾ॒ಗ್ಂ॒ ಸೋ᳚-ಽಬ್ರವೀ॒-ದ್ಬೃಹ॒ಸ್ಪತಿ॑ರ॒ನಯಾ᳚ ತ್ವಾ॒ ಪ್ರತಿ॑ಷ್ಠಾ॒ನ್ಯಥ॑ ತ್ವಾ ಪ್ರ॒ಜಾ ಉ॒ಪಾವ॑ರ್ಥ್ಸ್ಯ॒ನ್ತೀತಿ॒ ತ-ಮ್ಪ್ರಾತಿ॑ಷ್ಠ॒-ತ್ತತೋ॒ ವೈ ಪ್ರ॒ಜಾಪ॑ತಿ-ಮ್ಪ್ರ॒ಜಾ ಉ॒ಪಾವ॑ರ್ತನ್ತ॒ ಯಃ ಪ್ರ॒ಜಾಕಾ॑ಮ॒-ಸ್ಸ್ಯಾ-ತ್ತಸ್ಮಾ॑ ಏ॒ತ-ಮ್ಪ್ರಾ॑ಜಾಪ॒ತ್ಯ-ಙ್ಗಾ᳚ರ್ಮು॒ತ-ಞ್ಚ॒ರು-ನ್ನಿರ್ವ॑ಪೇ-ತ್ಪ್ರ॒ಜಾಪ॑ತಿ- [-ನಿರ್ವ॑ಪೇ-ತ್ಪ್ರ॒ಜಾಪ॑ತಿಮ್, ಏ॒ವ ಸ್ವೇನ॑] 12

-ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ᳚ ಪ್ರ॒ಜಾ-ಮ್ಪ್ರಜ॑ನಯತಿಪ್ರ॒ಜಾಪ॑ತಿಃ ಪ॒ಶೂನ॑ಸೃಜತ॒ ತೇ᳚-ಽಸ್ಮಾ-ಥ್ಸೃ॒ಷ್ಟಾಃ ಪರಾ᳚ಞ್ಚ ಆಯ॒-ನ್ತೇ ಯತ್ರಾವ॑ಸ॒-ನ್ತತೋ॑ ಗ॒ರ್ಮುದುದ॑ತಿಷ್ಠ॒-ತ್ತಾ-ನ್ಪೂ॒ಷಾ ಚಾ॒ನ್ವವೈ॑ತಾ॒ಗ್ಂ॒ ಸೋ᳚-ಽಬ್ರವೀ-ತ್ಪೂ॒ಷಾ-ಽನಯಾ॑ ಮಾ॒ ಪ್ರತಿ॒ಷ್ಠಾಥ॑ ತ್ವಾ ಪ॒ಶವ॑ ಉ॒ಪಾವ॑ರ್ಥ್ಸ್ಯ॒ನ್ತೀತಿ॒ ಮಾ-ಮ್ಪ್ರತಿ॒ಷ್ಠೇತಿ॒ ಸೋಮೋ᳚-ಽಬ್ರವೀ॒-ನ್ಮಮ॒ ವಾ [-ಮಮ॒ ವೈ, ಅ॒ಕೃ॒ಷ್ಟ॒ಪ॒ಚ್ಯಮಿತ್ಯು॒ಭೌ] 13

ಅ॑ಕೃಷ್ಟಪ॒ಚ್ಯಮಿತ್ಯು॒ಭೌ ವಾ॒-ಮ್ಪ್ರತಿ॑ಷ್ಠಾ॒ನೀತ್ಯ॑ಬ್ರವೀ॒-ತ್ತೌ ಪ್ರಾತಿ॑ಷ್ಠ॒-ತ್ತತೋ॒ ವೈ ಪ್ರ॒ಜಾಪ॑ತಿ-ಮ್ಪ॒ಶವ॑ ಉ॒ಪಾವ॑ರ್ತನ್ತ॒ ಯಃ ಪ॒ಶುಕಾ॑ಮ॒-ಸ್ಸ್ಯಾ-ತ್ತಸ್ಮಾ॑ ಏ॒ತಗ್ಂ ಸೋ॑ಮಾಪೌ॒ಷ್ಣ-ಙ್ಗಾ᳚ರ್ಮು॒ತ-ಞ್ಚ॒ರು-ನ್ನಿರ್ವ॑ಪೇ-ಥ್ಸೋಮಾಪೂ॒ಷಣಾ॑ವೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮೈ॑ ಪ॒ಶೂ-ನ್ಪ್ರಜ॑ನಯತ॒-ಸ್ಸೋಮೋ॒ ವೈ ರೇ॑ತೋ॒ಧಾಃ ಪೂ॒ಷಾ ಪ॑ಶೂ॒ನಾ-ಮ್ಪ್ರ॑ಜನಯಿ॒ತಾ ಸೋಮ॑ ಏ॒ವಾಸ್ಮೈ॒ ರೇತೋ॒ ದಧಾ॑ತಿ ಪೂ॒ಷಾ ಪ॒ಶೂ-ನ್ಪ್ರಜ॑ನಯತಿ ॥ 14 ॥

(ವ॒ಪೇ॒-ತ್ಪ್ರ॒ಜಾಪ॑ತಿಂ॒ - ಁವೈ - ದಧಾ॑ತಿ ಪೂ॒ಷಾ - ತ್ರೀಣಿ॑ ಚ) (ಅ. 4)

ಅಗ್ನೇ॒ ಗೋಭಿ॑ರ್ನ॒ ಆ ಗ॒ಹೀನ್ದೋ॑ ಪು॒ಷ್ಟ್ಯಾ ಜು॑ಷಸ್ವ ನಃ । ಇನ್ದ್ರೋ॑ ಧ॒ರ್ತಾ ಗೃ॒ಹೇಷು॑ ನಃ ॥ ಸ॒ವಿ॒ತಾ ಯ-ಸ್ಸ॑ಹ॒ಸ್ರಿಯ॒-ಸ್ಸ ನೋ॑ ಗೃ॒ಹೇಷು॑ ರಾರಣತ್ । ಆ ಪೂ॒ಷಾ ಏ॒ತ್ವಾ ವಸು॑ ॥ ಧಾ॒ತಾ ದ॑ದಾತು ನೋ ರ॒ಯಿಮೀಶಾ॑ನೋ॒ ಜಗ॑ತ॒ಸ್ಪತಿಃ॑ । ಸ ನಃ॑ ಪೂ॒ರ್ಣೇನ॑ ವಾವನತ್ ॥ ತ್ವಷ್ಟಾ॒ ಯೋ ವೃ॑ಷ॒ಭೋ ವೃಷಾ॒ ಸ ನೋ॑ ಗೃ॒ಹೇಷು॑ ರಾರಣತ್ । ಸ॒ಹಸ್ರೇ॑ಣಾ॒ಯುತೇ॑ನ ಚ ॥ ಯೇನ॑ ದೇ॒ವಾ ಅ॒ಮೃತ॑- [ಅ॒ಮೃತ᳚ಮ್, ದೀ॒ರ್ಘಗ್ಗ್ ಶ್ರವೋ॑ ದಿ॒ವ್ಯೈರ॑ಯನ್ತ ।] 15

-ನ್ದೀ॒ರ್ಘಗ್ಗ್ ಶ್ರವೋ॑ ದಿ॒ವ್ಯೈರ॑ಯನ್ತ । ರಾಯ॑ಸ್ಪೋಷ॒ ತ್ವಮ॒ಸ್ಮಭ್ಯ॒-ಙ್ಗವಾ᳚ಙ್ಕು॒ಲ್ಮಿ-ಞ್ಜೀ॒ವಸ॒ ಆ ಯು॑ವಸ್ವ ॥ ಅ॒ಗ್ನಿ ರ್ಗೃ॒ಹಪ॑ತಿ॒-ಸ್ಸೋಮೋ॑ ವಿಶ್ವ॒ವನಿಃ॑ ಸವಿ॒ತಾ ಸು॑ಮೇ॒ಧಾ-ಸ್ಸ್ವಾಹಾ᳚ ॥ ಅಗ್ನೇ॑ ಗೃಹಪತೇ॒ ಯಸ್ತೇ॒ ಘೃತ್ಯೋ॑ ಭಾ॒ಗಸ್ತೇನ॒ ಸಹ॒ ಓಜ॑ ಆ॒ಕ್ರಮ॑ಮಾಣಾಯ ಧೇಹಿ॒ ಶ್ರೈಷ್ಠ್ಯಾ᳚ತ್ಪ॒ಥೋ ಮಾ ಯೋ॑ಷ-ಮ್ಮೂ॒ರ್ಧಾ ಭೂ॑ಯಾಸ॒ಗ್ಗ್॒ ಸ್ವಾಹಾ᳚ ॥ 16 ॥

(ಅ॒ಮೃತ॑ - ಮ॒ಷ್ಟಾತ್ರಿಗ್ಂ॑ಶಚ್ಚ) (ಅ. 5)

ಚಿ॒ತ್ರಯಾ॑ ಯಜೇತ ಪ॒ಶುಕಾ॑ಮ ಇ॒ಯಂ-ವೈಁ ಚಿ॒ತ್ರಾ ಯದ್ವಾ ಅ॒ಸ್ಯಾಂ-ವಿಁಶ್ವ॑-ಮ್ಭೂ॒ತಮಧಿ॑ ಪ್ರ॒ಜಾಯ॑ತೇ॒ ತೇ ನೇ॒ಯಞ್ಚಿ॒ತ್ರಾ ಯ ಏ॒ವಂ-ವಿಁ॒ದ್ವಾಗ್ ಶ್ಚಿ॒ತ್ರಯಾ॑ ಪ॒ಶುಕಾ॑ಮೋ॒ ಯಜ॑ತೇ॒ ಪ್ರ ಪ್ರ॒ಜಯಾ॑ ಪ॒ಶುಭಿ॑ ರ್ಮಿಥು॒ನೈ ರ್ಜಾ॑ಯತೇ॒ ಪ್ರೈವಾಗ್ನೇ॒ಯೇನ॑ ವಾಪಯತಿ॒ ರೇತಃ॑ ಸೌ॒ಮ್ಯೇನ॑ ದಧಾತಿ॒ ರೇತ॑ ಏ॒ವ ಹಿ॒ತ-ನ್ತ್ವಷ್ಟಾ॑ ರೂ॒ಪಾಣಿ॒ ವಿ ಕ॑ರೋತಿಸಾರಸ್ವ॒ತೌ ಭ॑ವತ ಏ॒ತದ್ವೈ ದೈವ್ಯ॑-ಮ್ಮಿಥು॒ನ-ನ್ದೈವ್ಯ॑ಮೇ॒ವಾಸ್ಮೈ॑ [-ದೈವ್ಯ॑ಮೇ॒ವಾಸ್ಮೈ᳚, ಮಿ॒ಥು॒ನ-ಮ್ಮ॑ದ್ಧ್ಯ॒ತೋ] 17

ಮಿಥು॒ನ-ಮ್ಮ॑ದ್ಧ್ಯ॒ತೋ ದ॑ಧಾತಿ॒ ಪುಷ್ಟ್ಯೈ᳚ ಪ್ರ॒ಜನ॑ನಾಯ ಸಿನೀವಾ॒ಲ್ಯೈ ಚ॒ರುರ್ಭ॑ವತಿ॒ ವಾಗ್ವೈ ಸಿ॑ನೀವಾ॒ಲೀ ಪುಷ್ಟಿಃ॒ ಖಲು॒ ವೈ ವಾಕ್ಪುಷ್ಟಿ॑ಮೇ॒ವ ವಾಚ॒ಮುಪೈ᳚ತ್ಯೈ॒ನ್ದ್ರ ಉ॑ತ್ತ॒ಮೋ ಭ॑ವತಿ॒ ತೇನೈ॒ವ ತನ್ಮಿ॑ಥು॒ನಗ್ಂ ಸ॒ಪ್ತೈತಾನಿ॑ ಹ॒ವೀಗ್ಂಷಿ॑ ಭವನ್ತಿ ಸ॒ಪ್ತ ಗ್ರಾ॒ಮ್ಯಾಃ ಪ॒ಶವಃ॑ ಸ॒ಪ್ತಾರ॒ಣ್ಯಾ-ಸ್ಸ॒ಪ್ತ ಛನ್ದಾಗ್॑ಸ್ಯು॒-ಭಯ॒ಸ್ಯಾ-ವ॑ರುದ್ಧ್ಯಾ॒ ಅಥೈ॒ತಾ ಆಹು॑ತೀ ರ್ಜುಹೋತ್ಯೇ॒ತೇ ವೈ ದೇ॒ವಾಃ ಪುಷ್ಟಿ॑ಪತಯ॒ಸ್ತ ಏ॒ವಾ ಸ್ಮಿ॒-ನ್ಪುಷ್ಟಿ॑-ನ್ದಧತಿ॒ ಪುಷ್ಯ॑ತಿ ಪ್ರ॒ಜಯಾ॑ ಪ॒ಶುಭಿ॒ರಥೋ॒ ಯದೇ॒ತಾ ಆಹು॑ತೀ ರ್ಜು॒ಹೋತಿ॒ ಪ್ರತಿ॑ಷ್ಠಿತ್ಯೈ ॥ 18 ॥

(ಅ॒ಸ್ಮೈ॒ - ತ ಏ॒ವ - ದ್ವಾದ॑ಶ ಚ) (ಅ. 6)

ಮಾ॒ರು॒ತಮ॑ಸಿ ಮ॒ರುತಾ॒ಮೋಜೋ॒-ಽಪಾ-ನ್ಧಾರಾ᳚-ಮ್ಭಿನ್ಧಿ ರ॒ಮಯ॑ತ ಮರುತ-ಶ್ಶ್ಯೇ॒ನಮಾ॒ಯಿನ॒-ಮ್ಮನೋ॑ಜವ ಸಂ॒-ವೃಁಷ॑ಣಗ್ಂ ಸುವೃ॒ಕ್ತಿಮ್ ॥ ಯೇನ॒ ಶರ್ಧ॑ ಉ॒ಗ್ರಮವ॑-ಸೃಷ್ಟ॒ಮೇತಿ॒ ತದ॑ಶ್ವಿನಾ॒ ಪರಿ॑ ಧತ್ತಗ್ಗ್ ಸ್ವ॒ಸ್ತಿ । ಪು॒ರೋ॒ವಾ॒ತೋ ವರ್ಷ॑ಞ್ಜಿ॒ನ್ವರಾ॒ವೃ-ಥ್ಸ್ವಾಹಾ॑ ವಾ॒ತಾವದ್- ವರ್ಷ॑ನ್ನು॒ಗ್ರರಾ॒ವೃ-ಥ್ಸ್ವಾಹಾ᳚ ಸ್ತ॒ನಯ॒ನ್ ವರ್ಷ॑-ನ್ಭೀ॒ಮರಾ॒ವಥ್ಸ್ವಾಹಾ॑ ಽನಶ॒ನ್ಯ॑ವ॒ಸ್ಫೂರ್ಜ॑ನ್-ದಿ॒ದ್ಯು-ದ್ವರ್ಷ॑ನ್-ತ್ವೇ॒ಷರಾ॒ವೃ-ಥ್ಸ್ವಾಹಾ॑ ಽತಿರಾ॒ತ್ರಂ॒-ವಁರ್ಷ॑-ನ್ಪೂ॒ರ್ತಿರಾ॒ವೃ- [-ಪೂ॒ರ್ತಿರಾ॒ವೃತ್, ಸ್ವಾಹಾ॑ ಬ॒ಹು] 19

-ಥ್ಸ್ವಾಹಾ॑ ಬ॒ಹು ಹಾ॒ಯಮ॑ವೃಷಾ॒ದಿತಿ॑ ಶ್ರು॒ತರಾ॒ವೃ-ಥ್ಸ್ವಾಹಾ॒ ಽಽತಪ॑ತಿ॒ ವರ್ಷ॑ನ್-ವಿ॒ರಾಡಾ॒ವೃ-ಥ್ಸ್ವಾಹಾ॑ ಽವ॒ಸ್ಫೂರ್ಜ॑ನ್-ದಿ॒ದ್ಯು-ದ್ವರ್ಷ॑-ನ್ಭೂ॒ತರಾ॒ವೃ-ಥ್ಸ್ವಾಹಾ॒ಮಾನ್ದಾ॒ ವಾಶಾ॒-ಶ್ಶುನ್ಧ್ಯೂ॒ರಜಿ॑ರಾಃ । ಜ್ಯೋತಿ॑ಷ್ಮತೀ॒-ಸ್ತಮ॑ಸ್ವರೀ॒-ರುನ್ದ॑ತೀ॒-ಸ್ಸುಫೇ॑ನಾಃ । ಮಿತ್ರ॑ಭೃತಃ॒, ಕ್ಷತ್ರ॑ಭೃತ॒-ಸ್ಸುರಾ᳚ಷ್ಟ್ರಾ ಇ॒ಹ ಮಾ॑-ಽವತ ॥ವೃಷ್ಣೋ॒ ಅಶ್ವ॑ಸ್ಯ ಸ॒ನ್ದಾನ॑ಮಸಿ॒ ವೃಷ್ಟ್ಯೈ॒ ತ್ವೋಪ॑ ನಹ್ಯಾಮಿ ॥ 20 ॥

(ಪೂ॒ರ್ತಿರಾ॒ವೃ-ದ್- ದ್ವಿಚ॑ತ್ವಾರಿಗ್ಂಶಚ್ಚ) (ಅ. 7)

ದೇವಾ॑ ವಸವ್ಯಾ॒ ಅಗ್ನೇ॑ ಸೋಮ ಸೂರ್ಯ ॥ ದೇವಾ᳚-ಶ್ಶರ್ಮಣ್ಯಾ॒ ಮಿತ್ರಾ॑ವರುಣಾ-ಽರ್ಯಮನ್ನ್ ॥ ದೇವಾ᳚-ಸ್ಸಪೀತ॒ಯೋ ಽಪಾ᳚-ನ್ನಪಾದಾಶುಹೇಮನ್ನ್ । ಉ॒ದ್ನೋ ದ॑ತ್ತೋದ॒ಧಿ-ಮ್ಭಿ॑ನ್ತ್ತ ದಿ॒ವಃ ಪ॒ರ್ಜನ್ಯಾ॑ದ॒ನ್ತರಿ॑ಕ್ಷಾತ್-ಪೃಥಿ॒ವ್ಯಾಸ್ತತೋ॑ ನೋ॒ ವೃಷ್ಟ್ಯಾ॑-ಽವತ ॥ ದಿವಾ॑ ಚಿ॒ತ್ತಮಃ॑ ಕೃಣ್ವನ್ತಿ ಪ॒ರ್ಜನ್ಯೇ॑ನೋ-ದವಾ॒ಹೇನ॑ । ಪೃ॒ಥಿ॒ವೀಂ-ಯಁ-ದ್ವ್ಯು॒ನ್ದನ್ತಿ॑ ॥ ಆಯ-ನ್ನರಃ॑ ಸು॒ದಾನ॑ವೋ ದದಾ॒ಶುಷೇ॑ ದಿ॒ವಃ ಕೋಶ॒ಮಚು॑ಚ್ಯವುಃ । ವಿ ಪ॒ರ್ಜನ್ಯಾ᳚-ಸ್ಸೃಜನ್ತಿ॒ ರೋದ॑ಸೀ॒ ಅನು॒ ಧನ್ವ॑ನಾ ಯನ್ತಿ [ ] 21

ವೃ॒ಷ್ಟಯಃ॑ ॥ ಉದೀ॑ರಯಥಾ ಮರುತ-ಸ್ಸಮುದ್ರ॒ತೋ ಯೂ॒ಯಂ-ವೃಁ॒ಷ್ಟಿಂ-ವಁ॑ರ್ಷಯಥಾ ಪುರೀಷಿಣಃ । ನ ವೋ॑ ದಸ್ರಾ॒ ಉಪ॑ ದಸ್ಯನ್ತಿ ಧೇ॒ನವ॒-ಶ್ಶುಭಂ॑-ಯಾಁ॒ತಾಮನು॒ ರಥಾ॑ ಅವೃಥ್ಸತ ॥ ಸೃ॒ಜಾ ವೃ॒ಷ್ಟಿ-ನ್ದಿ॒ವ ಆ-ಽದ್ಭಿ-ಸ್ಸ॑ಮು॒ದ್ರ-ಮ್ಪೃ॑ಣ ॥ ಅ॒ಬ್ಜಾ ಅ॑ಸಿ ಪ್ರಥಮ॒ಜಾ ಬಲ॑ಮಸಿ ಸಮು॒ದ್ರಿಯ᳚ಮ್ ॥ ಉನ್ನ॑ಮ್ಭಯ ಪೃಥಿ॒ವೀ-ಮ್ಭಿ॒ನ್ಧೀದ-ನ್ದಿ॒ವ್ಯ-ನ್ನಭಃ॑ । ಉ॒ದ್ನೋ ದಿ॒ವ್ಯಸ್ಯ॑ ನೋ ದೇ॒ಹೀಶಾ॑ನೋ॒ ವಿಸೃ॑ಜಾ॒ ದೃತಿ᳚ಮ್ ॥ ಯೇ ದೇ॒ವಾ ದಿ॒ವಿಭಾ॑ಗಾ॒ ಯೇ᳚-ಽನ್ತರಿ॑ಕ್ಷ ಭಾಗಾ॒ ಯೇ ಪೃ॑ಥಿ॒ವಿ ಭಾ॑ಗಾಃ । ತ ಇ॒ಮಂ-ಯಁ॒ಜ್ಞಮ॑ವನ್ತು॒ ತ ಇ॒ದ-ಙ್ಕ್ಷೇತ್ರ॒ಮಾ ವಿ॑ಶನ್ತು॒ ತ ಇ॒ದ-ಙ್ಕ್ಷೇತ್ರ॒ಮನು॒ ವಿ ವಿ॑ಶನ್ತು ॥ 22 ॥

(ಯ॒ನ್ತಿ॒ - ದೇ॒ವಾ - ವಿಗ್ಂ॑ಶ॒ತಿಶ್ಚ॑) (ಅ. 8)

ಮಾ॒ರು॒ತಮ॑ಸಿ ಮ॒ರುತಾ॒ಮೋಜ॒ ಇತಿ॑ ಕೃ॒ಷ್ಣಂ-ವಾಁಸಃ॑ ಕೃ॒ಷ್ಣತೂ॑ಷ॒-ಮ್ಪರಿ॑ ಧತ್ತ ಏ॒ತದ್ವೈ ವೃಷ್ಟ್ಯೈ॑ ರೂ॒ಪಗ್ಂ ಸರೂ॑ಪ ಏ॒ವ ಭೂ॒ತ್ವಾ ಪ॒ರ್ಜನ್ಯಂ॑-ವಁರ್ಷಯತಿರ॒ಮಯ॑ತ ಮರುತ-ಶ್ಶ್ಯೇ॒ನಮಾ॒ಯಿನ॒ಮಿತಿ॑ ಪಶ್ಚಾದ್ವಾ॒ತ-ಮ್ಪ್ರತಿ॑ ಮೀವತಿ ಪುರೋವಾ॒ತಮೇ॒ವ ಜ॑ನಯತಿ ವ॒ರ್॒ಷಸ್ಯಾ ವ॑ರುದ್ಧ್ಯೈ ವಾತನಾ॒ಮಾನಿ॑ ಜುಹೋತಿ ವಾ॒ಯುರ್ವೈ ವೃಷ್ಟ್ಯಾ॑ ಈಶೇ ವಾ॒ಯುಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॑ ಪ॒ರ್ಜನ್ಯಂ॑-ವಁರ್ಷಯತ್ಯ॒ಷ್ಟೌ [ವರ್ಷಯತ್ಯ॒ಷ್ಟೌ, ಜು॒ಹೋ॒ತಿ॒ ಚತ॑ಸ್ರೋ॒ ವೈ] 23

ಜು॑ಹೋತಿ॒ ಚತ॑ಸ್ರೋ॒ ವೈ ದಿಶ॒ಶ್ಚತ॑ಸ್ರೋ-ಽವಾನ್ತರದಿ॒ಶಾ ದಿ॒ಗ್ಭ್ಯ ಏ॒ವ ವೃಷ್ಟಿ॒ಗ್ಂ॒ ಸ-ಮ್ಪ್ರ ಚ್ಯಾ॑ವಯತಿ ಕೃಷ್ಣಾಜಿ॒ನೇ ಸಂಯೌಁ॑ತಿ ಹ॒ವಿರೇ॒ವಾಕ॑ರನ್ತರ್ವೇ॒ದಿ ಸಂಯೌಁ॒ತ್ಯ ವ॑ರುದ್ಧ್ಯೈ॒ ಯತೀ॑ನಾಮ॒ದ್ಯಮಾ॑ನಾನಾಗ್ಂ ಶೀ॒ರ್॒ಷಾಣಿ॒ ಪರಾ॑-ಽಪತ॒ನ್ತೇ ಖ॒ರ್ಜೂರಾ॑ ಅಭವ॒ನ್-ತೇಷಾ॒ಗ್ಂ॒ ರಸ॑ ಊ॒ರ್ಧ್ವೋ॑-ಽಪತ॒ತ್-ತಾನಿ॑ ಕ॒ರೀರಾ᳚ಣ್ಯ-ಭವನ್-ಥ್ಸೌ॒ಮ್ಯಾನಿ॒ ವೈ ಕ॒ರೀರಾ॑ಣಿ ಸೌ॒ಮ್ಯಾ ಖಲು॒ ವಾ ಆಹು॑ತಿ ರ್ದಿ॒ವೋ ವೃಷ್ಟಿ॑-ಞ್ಚ್ಯಾವಯತಿ॒ ಯತ್ಕ॒ರೀರಾ॑ಣಿ॒ ಭವ॑ನ್ತಿ [ ] 24

ಸೌ॒ಮ್ಯಯೈ॒ವಾ-ಽಽಹು॑ತ್ಯಾ ದಿ॒ವೋ ವೃಷ್ಟಿ॒ಮವ॑ ರುನ್ಧೇ॒ ಮಧು॑ಷಾ॒ ಸಂ-ಯೌಁ᳚ತ್ಯ॒ಪಾಂ-ವಾಁ ಏ॒ಷ ಓಷ॑ಧೀನಾ॒ಗ್ಂ॒ ರಸೋ॒ ಯನ್ಮದ್ಧ್ವ॒ದ್ಭ್ಯ ಏ॒ವೌಷ॑ಧೀಭ್ಯೋ ವರ್ಷ॒ತ್ಯಥೋ॑ ಅ॒ದ್ಭ್ಯ ಏ॒ವೌಷ॑ಧೀಭ್ಯೋ॒ ವೃಷ್ಟಿ॒ನಿ-ನ್ನ॑ಯತಿ॒ ಮಾನ್ದಾ॒ ವಾಶಾ॒ ಇತಿ॒ ಸಂಯೌಁ॑ತಿ ನಾಮ॒ಧೇಯೈ॑ರೇ॒ವೈನಾ॒ ಅಚ್ಛೈ॒ತ್ಯಥೋ॒ ಯಥಾ᳚ ಬ್ರೂ॒ಯಾದಸಾ॒ ವೇಹೀತ್ಯೇ॒ವಮೇ॒ವೈನಾ॑ ನಾಮ॒ಧೇಯೈ॒ರಾ - [ನಾಮ॒ಧೇಯೈ॒ರಾ, ಚ್ಯಾ॒ವ॒ಯ॒ತಿ॒ ವೃಷ್ಣೋ॒] 25

ಚ್ಯಾ॑ವಯತಿ॒ ವೃಷ್ಣೋ॒ ಅಶ್ವ॑ಸ್ಯ ಸ॒ನ್ದಾನ॑ಮಸಿ॒ ವೃಷ್ಟ್ಯೈ॒ ತ್ವೋಪ॑ ನಹ್ಯಾ॒ಮೀತ್ಯಾ॑ಹ॒ ವೃಷಾ॒ ವಾ ಅಶ್ವೋ॒ ವೃಷಾ॑ ಪ॒ರ್ಜನ್ಯಃ॑ ಕೃ॒ಷ್ಣ ಇ॑ವ॒ ಖಲು॒ ವೈ ಭೂ॒ತ್ವಾ ವ॑ರ್ಷತಿ ರೂ॒ಪೇಣೈ॒ವೈನ॒ಗ್ಂ॒ ಸಮ॑ರ್ಧಯತಿ ವ॒ರ್॒ಷಸ್ಯಾ ವ॑ರುದ್ಧ್ಯೈ ॥ 26 ॥

(ಅ॒ಷ್ಟೌ - ಭವ॑ನ್ತಿ - ನಾಮ॒ಧೇಯೈ॒ರೈ - ಕಾ॒ನ್ನ ತ್ರಿ॒ಗ್ಂ॒ಶಚ್ಚ॑) (ಅ. 9)

ದೇವಾ॑ ವಸವ್ಯಾ॒ ದೇವಾ᳚-ಶ್ಶರ್ಮಣ್ಯಾ॒ ದೇವಾ᳚-ಸ್ಸಪೀತಯ॒ ಇತ್ಯಾ ಬ॑ದ್ಧ್ನಾತಿ ದೇ॒ವತಾ॑ಭಿರೇ॒ವಾನ್ವ॒ಹಂ-ವೃಁಷ್ಟಿ॑ಮಿಚ್ಛತಿ॒ ಯದಿ॒ ವರ್ಷೇ॒ತ್-ತಾವ॑ತ್ಯೇ॒ವ ಹೋ॑ತ॒ವ್ಯಂ॑-ಯಁದಿ॒ ನ ವರ್ಷೇ॒ಚ್ಛ್ವೋ ಭೂ॒ತೇ ಹ॒ವಿರ್ನಿರ್ವ॑ಪೇದಹೋರಾ॒ತ್ರೇ ವೈ ಮಿ॒ತ್ರಾವರು॑ಣಾವಹೋರಾ॒ತ್ರಾಭ್ಯಾ॒-ಙ್ಖಲು॒ ವೈ ಪ॒ರ್ಜನ್ಯೋ॑ ವರ್ಷತಿ॒ ನಕ್ತಂ॑-ವಾಁ॒ ಹಿ ದಿವಾ॑ ವಾ॒ ವರ್ಷ॑ತಿ ಮಿ॒ತ್ರಾವರು॑ಣಾವೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಾ॑ [ತಾವೇ॒ವಾಸ್ಮೈ᳚, ಅ॒ಹೋ॒ರಾ॒ತ್ರಾಭ್ಯಾಂ᳚-] 27

ಅಹೋರಾ॒ತ್ರಾಭ್ಯಾ᳚-ಮ್ಪ॒ರ್ಜನ್ಯಂ॑ ಁವರ್ಷಯತೋ॒-ಽಗ್ನಯೇ॑ ಧಾಮ॒ಚ್ಛದೇ॑ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇನ್ಮಾರು॒ತಗ್ಂ ಸ॒ಪ್ತಕ॑ಪಾಲಗ್ಂ ಸೌ॒ರ್ಯಮೇಕ॑ಕಪಾಲಮ॒ಗ್ನಿರ್ವಾ ಇ॒ತೋ ವೃಷ್ಟಿ॒ಮುದೀ॑ರಯತಿ ಮ॒ರುತಃ॑ ಸೃ॒ಷ್ಟಾ-ನ್ನ॑ಯನ್ತಿ ಯ॒ದಾ ಖಲು॒ ವಾ ಅ॒ಸಾವಾ॑ದಿ॒ತ್ಯೋ ನ್ಯಂ॑-ರ॒ಶ್ಮಿಭಿಃ॑ ಪರ್ಯಾ॒ವರ್ತ॒ತೇ-ಽಥ॑ವರ್ಷತಿಧಾಮ॒ಚ್ಛದಿ॑ವ॒ ಖಲು॒ ವೈ ಭೂ॒ತ್ವಾ ವ॑ರ್ಷತ್ಯೇ॒ತಾ ವೈ ದೇ॒ವತಾ॒ ವೃಷ್ಟ್ಯಾ॑ ಈಶತೇ॒ ತಾ ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾ [ಭಾಗ॒ಧೇಯೇ॒ನೋಪ॑ ಧಾವತಿ॒ ತಾಃ, ಏ॒ವಾಸ್ಮೈ॑] 28

ಏ॒ವಾಸ್ಮೈ॑ ಪ॒ರ್ಜನ್ಯಂ॑-ವಁರ್ಷಯನ್ತ್ಯು॒ತಾ ವ॑ರ್ಷಿಷ್ಯ॒ನ್ ವರ್ಷ॑ತ್ಯೇ॒ವ ಸೃ॒ಜಾ ವೃ॒ಷ್ಟಿ-ನ್ದಿ॒ವ ಆ-ಽದ್ಭಿ-ಸ್ಸ॑ಮು॒ದ್ರ-ಮ್ಪೃ॒ಣೇತ್ಯಾ॑ಹೇ॒ಮಾಶ್ಚೈ॒ವಾ-ಮೂಶ್ಚಾ॒ಪ-ಸ್ಸಮ॑ರ್ಧಯ॒ತ್ಯಥೋ॑ ಆ॒ಭಿರೇ॒ವಾ-ಮೂರಚ್ಛೈ᳚ತ್ಯ॒ಬ್ಜಾ ಅ॑ಸಿ ಪ್ರಥಮ॒ಜಾ ಬಲ॑ಮಸಿ ಸಮು॒ದ್ರಿಯ॒ಮಿತ್ಯಾ॑ಹ ಯಥಾಯ॒ಜುರೇ॒ವೈತ-ದುನ್ನ॑-ಮ್ಭಯ ಪೃಥಿ॒ವೀಮಿತಿ॑ ವರ್ಷಾ॒ಹ್ವಾ-ಞ್ಜು॑ಹೋತ್ಯೇ॒ಷಾ ವಾ ಓಷ॑ಧೀನಾಂ-ವೃಁಷ್ಟಿ॒ವನಿ॒ಸ್ತಯೈ॒ವ ವೃಷ್ಟಿ॒ಮಾ ಚ್ಯಾ॑ವಯತಿ॒ ಯೇ ದೇ॒ವಾ ದಿ॒ವಿಭಾ॑ಗಾ॒ ಇತಿ॑ ಕೃಷ್ಣಾಜಿ॒ನಮವ॑ ಧೂನೋತೀ॒ಮ ಏ॒ವಾಸ್ಮೈ॑ ಲೋ॒ಕಾಃ ಪ್ರೀ॒ತಾ ಅ॒ಭೀಷ್ಟಾ॑ ಭವನ್ತಿ ॥ 29 ॥

(ಅ॒ಸ್ಮೈ॒ - ಧಾ॒ವ॒ತಿ॒ ತಾ - ವಾ - ಏಕ॑ವಿಗ್ಂಶತಿಶ್ಚ ) (ಅ. 10)

ಸರ್ವಾ॑ಣಿ॒ ಛನ್ದಾಗ್॑ಸ್ಯೇ॒ತಸ್ಯಾ॒-ಮಿಷ್ಟ್ಯಾ॑-ಮ॒ನೂಚ್ಯಾ॒ನೀತ್ಯಾ॑ಹು-ಸ್ತ್ರಿ॒ಷ್ಟುಭೋ॒ ವಾ ಏ॒ತದ್ವೀ॒ರ್ಯಂ॑-ಯಁ-ತ್ಕ॒ಕುದು॒ಷ್ಣಿಹಾ॒ ಜಗ॑ತ್ಯೈ॒ ಯದು॑ಷ್ಣಿಹ-ಕ॒ಕುಭಾ॑ವ॒ನ್ವಾಹ॒ ತೇನೈ॒ವ ಸರ್ವಾ॑ಣಿ॒ ಛನ್ದಾ॒ಗ್॒ಸ್ಯವ॑ ರುನ್ಧೇ ಗಾಯ॒ತ್ರೀ ವಾ ಏ॒ಷಾ ಯದು॒ಷ್ಣಿಹಾ॒ ಯಾನಿ॑ ಚ॒ತ್ವಾರ್ಯದ್ಧ್ಯ॒ಕ್ಷರಾ॑ಣಿ॒ ಚತು॑ಷ್ಪಾದ ಏ॒ವ ತೇ ಪ॒ಶವೋ॒ಯಥಾ॑ ಪುರೋ॒ಡಾಶೇ॑ ಪುರೋ॒ಡಾಶೋ-ಽದ್ಧ್ಯೇ॒ವಮೇ॒ವ ತ-ದ್ಯದ್-ಋ॒ಚ್ಯದ್ಧ್ಯ॒ಕ್ಷರಾ॑ಣಿ॒ ಯಜ್ಜಗ॑ತ್ಯಾ [ಯಜ್ಜಗ॑ತ್ಯಾ, ಪ॒ರಿ॒ದ॒ದ್ಧ್ಯಾದನ್ತಂ॑-] 30

ಪರಿದ॒ದ್ಧ್ಯಾದನ್ತಂ॑-ಯಁ॒ಜ್ಞ-ಙ್ಗ॑ಮಯೇ-ತ್ತ್ರಿ॒ಷ್ಟುಭಾ॒ ಪರಿ॑ ದಧಾತೀನ್ದ್ರಿ॒ಯಂ-ವೈಁ ವೀ॒ರ್ಯ॑-ನ್ತ್ರಿ॒ಷ್ಟುಗಿ॑ನ್ದ್ರಿ॒ಯ ಏ॒ವ ವೀ॒ರ್ಯೇ॑ ಯ॒ಜ್ಞ-ಮ್ಪ್ರತಿ॑ಷ್ಠಾಪಯತಿ॒ ನಾನ್ತ॑-ಙ್ಗಮಯ॒ತ್ಯಗ್ನೇ॒ ತ್ರೀ ತೇ॒ ವಾಜಿ॑ನಾ॒ ತ್ರೀ ಷ॒ಧಸ್ಥೇತಿ॒ ತ್ರಿವ॑ತ್ಯಾ॒ ಪರಿ॑ ದಧಾತಿ ಸರೂಪ॒ತ್ವಾಯ॒ ಸರ್ವೋ॒ ವಾ ಏ॒ಷ ಯ॒ಜ್ಞೋ ಯ-ತ್ತ್ರೈ॑ಧಾತ॒ವೀಯ॒-ಙ್ಕಾಮಾ॑ಯ-ಕಾಮಾಯ॒ ಪ್ರಯು॑ಜ್ಯತೇ॒ ಸರ್ವೇ᳚ಭ್ಯೋ॒ ಹಿ ಕಾಮೇ᳚ಭ್ಯೋ ಯ॒ಜ್ಞಃ ಪ್ರ॑ಯು॒ಜ್ಯತೇ᳚ ತ್ರೈಧಾತ॒ವೀಯೇ॑ನ ಯಜೇತಾಭಿ॒ಚರ॒ನ್-ಥ್ಸರ್ವೋ॒ ವಾ [ಸರ್ವೋ॒ ವೈ, ಏ॒ಷ] 31

ಏ॒ಷ ಯ॒ಜ್ಞೋ ಯ-ತ್ತ್ರೈ॑ಧಾತ॒ವೀಯ॒ಗ್ಂ॒ ಸರ್ವೇ॑ಣೈ॒ವೈನಂ॑-ಯಁ॒ಜ್ಞೇನಾ॒ಭಿ ಚ॑ರತಿ ಸ್ತೃಣು॒ತ ಏ॒ವೈನ॑ಮೇ॒ತಯೈ॒ವ ಯ॑ಜೇತಾಭಿಚ॒ರ್ಯಮಾ॑ಣ॒-ಸ್ಸರ್ವೋ॒ ವಾ ಏ॒ಷ ಯ॒ಜ್ಞೋ ಯ-ತ್ತ್ರೈ॑ಧಾತ॒ವೀಯ॒ಗ್ಂ॒ ಸರ್ವೇ॑ಣೈ॒ವ ಯ॒ಜ್ಞೇನ॑ ಯಜತೇ॒ ನೈನ॑ಮಭಿ॒ಚರ᳚ನ್-ಥ್ಸ್ತೃಣುತ ಏ॒ತಯೈ॒ವ ಯ॑ಜೇತ ಸ॒ಹಸ್ರೇ॑ಣ ಯ॒ಕ್ಷ್ಯಮಾ॑ಣಃ॒ ಪ್ರಜಾ॑ತಮೇ॒ವೈನ॑-ದ್ದದಾತ್ಯೇ॒ತಯೈ॒ವ ಯ॑ಜೇತ ಸ॒ಹಸ್ರೇ॑ಣೇಜಾ॒ನೋ-ಽನ್ತಂ॒-ವಾಁ ಏ॒ಷ ಪ॑ಶೂ॒ನಾ-ಙ್ಗ॑ಚ್ಛತಿ॒ [-ಗ॑ಚ್ಛತಿ, ಯ-ಸ್ಸ॒ಹಸ್ರೇ॑ಣ॒] 32

ಯ-ಸ್ಸ॒ಹಸ್ರೇ॑ಣ॒ ಯಜ॑ತೇ ಪ್ರ॒ಜಾಪ॑ತಿಃ॒ ಖಲು॒ ವೈ ಪ॒ಶೂನ॑ಸೃಜತ॒ ತಾಗ್ಸ್ತ್ರೈ॑ಧಾತ॒ ವೀಯೇ॑-ನೈ॒ವಾಸೃ॑ಜತ॒ ಯ ಏ॒ವಂ-ವಿಁ॒ದ್ವಾಗ್ ಸ್ತ್ರೈ॑ಧಾತ॒ವೀಯೇ॑ನಪ॒ಶುಕಾ॑ಮೋ॒ ಯಜ॑ತೇ॒ ಯಸ್ಮಾ॑ದೇ॒ವ ಯೋನೇಃ᳚ ಪ್ರ॒ಜಾಪ॑ತಿಃ ಪ॒ಶೂನಸೃ॑ಜತ॒ ತಸ್ಮಾ॑ದೇ॒ವೈನಾ᳚ನ್-ಥ್ಸೃಜತ॒ ಉಪೈ॑ನ॒ಮುತ್ತ॑ರಗ್ಂ ಸ॒ಹಸ್ರ॑-ನ್ನಮತಿ ದೇ॒ವತಾ᳚ಭ್ಯೋ॒ ವಾ ಏ॒ಷ ಆ ವೃ॑ಶ್ಚ್ಯತೇ॒ ಯೋ ಯ॒ಕ್ಷ್ಯ ಇತ್ಯು॒ಕ್ತ್ವಾ ನ ಯಜ॑ತೇ ತ್ರೈಧಾತ॒ವೀಯೇ॑ನ ಯಜೇತ॒ ಸರ್ವೋ॒ ವಾ ಏ॒ಷ ಯ॒ಜ್ಞೋ [ಯ॒ಜ್ಞಃ, ಯ-ತ್ತ್ರೈ॑ಧಾತ॒ವೀಯ॒ಗ್ಂ॒] 33

ಯ-ತ್ತ್ರೈ॑ಧಾತ॒ವೀಯ॒ಗ್ಂ॒ ಸರ್ವೇ॑ಣೈ॒ವ ಯ॒ಜ್ಞೇನ॑ ಯಜತೇ॒ ನ ದೇ॒ವತಾ᳚ಭ್ಯ॒ ಆ ವೃ॑ಶ್ಚ್ಯತೇ॒ ದ್ವಾದ॑ಶಕಪಾಲಃ ಪುರೋ॒ಡಾಶೋ॑ ಭವತಿ॒ ತೇ ತ್ರಯ॒ಶ್ಚತು॑ಷ್ಕಪಾಲಾ-ಸ್ತ್ರಿಷ್ಷಮೃದ್ಧ॒ತ್ವಾಯ॒ ತ್ರಯಃ॑ ಪುರೋ॒ಡಾಶಾ॑ ಭವನ್ತಿ॒ ತ್ರಯ॑ ಇ॒ಮೇ ಲೋ॒ಕಾ ಏ॒ಷಾಂ-ಲೋಁ॒ಕಾನಾ॒ಮಾಪ್ತ್ಯಾ॒ ಉತ್ತ॑ರ-ಉತ್ತರೋ॒ ಜ್ಯಾಯಾ᳚-ನ್ಭವತ್ಯೇ॒ವಮಿ॑ವ॒ ಹೀಮೇ ಲೋ॒ಕಾ ಯ॑ವ॒ಮಯೋ॒ ಮದ್ಧ್ಯ॑ ಏ॒ತದ್ವಾ ಅ॒ನ್ತರಿ॑ಕ್ಷಸ್ಯ ರೂ॒ಪಗ್ಂ ಸಮೃ॑ದ್ಧ್ಯೈ॒ ಸರ್ವೇ॑ಷಾಮಭಿಗ॒ಮಯ॒ನ್ನವ॑ ದ್ಯ॒ತ್ಯಛ॑ಬಣ್ಟ್ಕಾರ॒ಗ್ಂ॒ ಹಿರ॑ಣ್ಯ-ನ್ದದಾತಿ॒ ತೇಜ॑ ಏ॒ವಾ- [ಏ॒ವ, ಅವ॑ ರುನ್ಧೇ] 34

-ಽವ॑ ರುನ್ಧೇ ತಾ॒ರ್ಪ್ಯ-ನ್ದ॑ದಾತಿ ಪ॒ಶೂನೇ॒ವಾವ॑ ರುನ್ಧೇ ಧೇ॒ನು-ನ್ದ॑ದಾತ್ಯಾ॒ಶಿಷ॑ ಏ॒ವಾವ॑ ರುನ್ಧೇ॒ ಸಾಮ್ನೋ॒ ವಾ ಏ॒ಷ ವರ್ಣೋ॒ ಯದ್ಧಿರ॑ಣ್ಯಂ॒-ಯಁಜು॑ಷಾ-ನ್ತಾ॒ರ್ಪ್ಯಮು॑ಕ್ಥಾಮ॒ದಾನಾ᳚-ನ್ಧೇ॒ನುರೇ॒ತಾನೇ॒ವ ಸರ್ವಾ॒ನ್॒. ವರ್ಣಾ॒ನವ॑ ರುನ್ಧೇ ॥ 35 ॥

(ಜಗ॑ತ್ಯಾ - ಽಭಿ॒ಚರ॒ನ್-ಥ್ಸರ್ವೋ॒ ವೈ - ಗ॑ಚ್ಛತಿ - ಯ॒ಜ್ಞ - ಸ್ತೇಜ॑ ಏ॒ವ - ತ್ರಿ॒ಗ್ಂ॒ಶಚ್ಚ॑) (ಅ. 11)

ತ್ವಷ್ಟಾ॑ ಹ॒ತಪು॑ತ್ರೋ॒ ವೀನ್ದ್ರ॒ಗ್ಂ॒ ಸೋಮ॒ಮಾ-ಽಹ॑ರ॒-ತ್ತಸ್ಮಿ॒ನ್ನಿನ್ದ್ರ॑ ಉಪಹ॒ವಮೈ᳚ಚ್ಛತ॒ ತ-ನ್ನೋಪಾ᳚ಹ್ವಯತ ಪು॒ತ್ರ-ಮ್ಮೇ॑-ಽವಧೀ॒ರಿತಿ॒ ಸ ಯ॑ಜ್ಞವೇಶ॒ಸ-ಙ್ಕೃ॒ತ್ವಾ ಪ್ರಾ॒ಸಹಾ॒ ಸೋಮ॑ಮಪಿಬ॒-ತ್ತಸ್ಯ॒ ಯದ॒ತ್ಯಶಿ॑ಷ್ಯತ॒ ತ-ತ್ತ್ವಷ್ಟಾ॑-ಽಽಹವ॒ನೀಯ॒ಮುಪ॒ ಪ್ರಾವ॑ರ್ತಯ॒-ಥ್ಸ್ವಾಹೇನ್ದ್ರ॑ಶತ್ರುರ್ವರ್ಧ॒ಸ್ವೇತಿ॒ ಸ ಯಾವ॑ದೂ॒ರ್ಧ್ವಃ ಪ॑ರಾ॒ವಿದ್ಧ್ಯ॑ತಿ॒ ತಾವ॑ತಿ ಸ್ವ॒ಯಮೇ॒ವ ವ್ಯ॑ರಮತ॒ ಯದಿ॑ ವಾ॒ ತಾವ॑-ತ್ಪ್ರವ॒ಣ- [ತಾವ॑-ತ್ಪ್ರವ॒ಣಮ್, ಆಸೀ॒ದ್ಯದಿ॑] 36

-ಮಾಸೀ॒ದ್ಯದಿ॑ ವಾ॒ ತಾವ॒ದದ್ಧ್ಯ॒ಗ್ನೇರಾಸೀ॒-ಥ್ಸ ಸ॒ಮ್ಭವ॑ನ್ನ॒ಗ್ನೀಷೋಮಾ॑ವ॒ಭಿ ಸಮ॑ಭವ॒-ಥ್ಸ ಇ॑ಷುಮಾ॒ತ್ರಮಿ॑ಷುಮಾತ್ರಂ॒-ವಿಁಷ್ವ॑ಙ್ಙವರ್ಧತ॒ ಸ ಇ॒ಮಾಂ-ಲೋಁ॒ಕಾನ॑ವೃಣೋ॒ದ್ಯ-ದಿ॒ಮಾಂ-ಲೋಁ॒ಕಾನವೃ॑ಣೋ॒-ತ್ತ-ದ್ವೃ॒ತ್ರಸ್ಯ॑ ವೃತ್ರ॒ತ್ವ-ನ್ತಸ್ಮಾ॒ದಿನ್ದ್ರೋ॑-ಽಬಿಭೇ॒ದಪಿ॒ ತ್ವಷ್ಟಾ॒ ತಸ್ಮೈ॒ ತ್ವಷ್ಟಾ॒ ವಜ್ರ॑ಮಸಿಞ್ಚ॒-ತ್ತಪೋ॒ ವೈ ಸ ವಜ್ರ॑ ಆಸೀ॒-ತ್ತಮುದ್ಯ॑ನ್ತು॒-ನ್ನಾಶ॑ಕ್ನೋ॒ದಥ॒ ವೈ ತರ್ಹಿ॒ ವಿಷ್ಣು॑- [ವಿಷ್ಣುಃ॑, ಅ॒ನ್ಯಾ] 37

-ರ॒ನ್ಯಾ ದೇ॒ವತಾ॑ ಽಽಸೀ॒-ಥ್ಸೋ᳚-ಽಬ್ರವೀ॒-ದ್ವಿಷ್ಣ॒ವೇಹೀ॒ದಮಾ ಹ॑ರಿಷ್ಯಾವೋ॒ ಯೇನಾ॒ಯಮಿ॒ದಮಿತಿ॒ಸ ವಿಷ್ಣು॑ಸ್ತ್ರೇ॒ಧಾ-ಽಽತ್ಮಾನಂ॒-ವಿಁನ್ಯ॑ಧತ್ತ ಪೃಥಿ॒ವ್ಯಾ-ನ್ತೃತೀ॑ಯಮ॒ನ್ತರಿ॑ಕ್ಷೇ॒ ತೃತೀ॑ಯ-ನ್ದಿ॒ವಿ ತೃತೀ॑ಯ-ಮಭಿಪರ್ಯಾವ॒ರ್ತಾ-ದ್ಧ್ಯಬಿ॑ಭೇ॒ದ್ಯತ್-ಪೃ॑ಥಿ॒ವ್ಯಾ-ನ್ತೃತೀ॑ಯ॒ಮಾಸೀ॒-ತ್ತೇನೇನ್ದ್ರೋ॒ ವಜ್ರ॒ಮುದ॑ಯಚ್ಛ॒-ದ್ವಿಷ್ಣ್ವ॑ನುಸ್ಥಿತ॒-ಸ್ಸೋ᳚-ಽಬ್ರವೀ॒ನ್ಮಾ ಮೇ॒ ಪ್ರ ಹಾ॒ರಸ್ತಿ॒ ವಾ ಇ॒ದ- [ವಾ ಇ॒ದಮ್, ಮಯಿ॑ ವೀ॒ರ್ಯ॑-ನ್ತ-ತ್ತೇ॒] 38

-ಮ್ಮಯಿ॑ ವೀ॒ರ್ಯ॑-ನ್ತ-ತ್ತೇ॒ ಪ್ರದಾ᳚ಸ್ಯಾ॒ಮೀತಿ॒ ತದ॑ಸ್ಮೈ॒ ಪ್ರಾಯ॑ಚ್ಛ॒-ತ್ತ-ತ್ಪ್ರತ್ಯ॑ಗೃಹ್ಣಾ॒ದಧಾ॒ ಮೇತಿ॒ ತ-ದ್ವಿಷ್ಣ॒ವೇ-ಽತಿ॒ ಪ್ರಾಯ॑ಚ್ಛ॒-ತ್ತ-ದ್ವಿಷ್ಣುಃ॒ ಪ್ರತ್ಯ॑ಗೃಹ್ಣಾ-ದ॒ಸ್ಮಾಸ್ವಿನ್ದ್ರ॑ ಇನ್ದ್ರಿ॒ಯ-ನ್ದ॑ಧಾ॒ತ್ವಿತಿ॒ ಯದ॒ನ್ತರಿ॑ಕ್ಷೇ॒ ತೃತೀ॑ಯ॒ಮಾಸೀ॒-ತ್ತೇನೇನ್ದ್ರೋ॒ ವಜ್ರ॒ಮುದ॑ಯಚ್ಛ॒-ದ್ವಿಷ್ಣ್ವ॑ನುಸ್ಥಿತ॒-ಸ್ಸೋ᳚-ಽಬ್ರವೀ॒ನ್ಮಾ ಮೇ॒ ಪ್ರಹಾ॒ರಸ್ತಿ॒ ವಾ ಇ॒ದ- [ವಾ ಇ॒ದಮ್, ಮಯಿ॑ ವೀ॒ರ್ಯ॑-ನ್ತ-ತ್ತೇ॒] 39

-ಮ್ಮಯಿ॑ ವೀ॒ರ್ಯ॑-ನ್ತ-ತ್ತೇ॒ ಪ್ರ ದಾ᳚ಸ್ಯಾ॒ಮೀತಿ॒ ತದ॑ಸ್ಮೈ॒ ಪ್ರಾಯ॑ಚ್ಛ॒-ತ್ತ-ತ್ಪ್ರತ್ಯ॑ಗೃಹ್ಣಾ॒-ದ್ದ್ವಿರ್ಮಾ॑-ಽಧಾ॒ ಇತಿ॒ ತ-ದ್ವಿಷ್ಣ॒ವೇ-ಽತಿ॒ ಪ್ರಾಯ॑ಚ್ಛ॒-ತ್ತ-ದ್ವಿಷ್ಣುಃ॒ ಪ್ರತ್ಯ॑ಗೃಹ್ಣಾದ॒ಸ್ಮಾಸ್ವಿನ್ದ್ರ॑ ಇನ್ದ್ರಿ॒ಯ-ನ್ದ॑ಧಾ॒ತ್ವಿತಿ॒ ಯದ್ದಿ॒ವಿ ತೃತೀ॑ಯ॒ಮಾಸೀ॒-ತ್ತೇನೇನ್ದ್ರೋ॒ ವಜ್ರ॒ಮುದ॑ಯಚ್ಛ॒-ದ್ವಿಷ್ಣ್ವ॑ನುಸ್ಥಿತ॒-ಸ್ಸೋ᳚-ಽಬ್ರವೀ॒ನ್ಮಾ ಮೇ॒ ಪ್ರಹಾ॒ರ್ಯೇನಾ॒ಹ- [ಪ್ರಹಾ॒ರ್ಯೇನಾ॒ಹಮ್, ಇ॒ದಮಸ್ಮಿ॒ ತ-ತ್ತೇ॒] 40

-ಮಿ॒ದಮಸ್ಮಿ॒ ತ-ತ್ತೇ॒ ಪ್ರದಾ᳚ಸ್ಯಾ॒ಮೀತಿ॒ ತ್ವೀ(3) ಇತ್ಯ॑ಬ್ರವೀ-ಥ್ಸ॒ನ್ಧಾ-ನ್ತು ಸನ್ದ॑ಧಾವಹೈ॒ ತ್ವಾಮೇ॒ವ ಪ್ರವಿ॑ಶಾ॒ನೀತಿ॒ ಯನ್ಮಾ-ಮ್ಪ್ರ॑ವಿ॒ಶೇಃ ಕಿ-ಮ್ಮಾ॑ ಭುಞ್ಜ್ಯಾ॒ ಇತ್ಯ॑ಬ್ರವೀ॒-ತ್ತ್ವಾಮೇ॒ವೇನ್ಧೀ॑ಯ॒ ತವ॒ ಭೋಗಾ॑ಯ॒ ತ್ವಾ-ಮ್ಪ್ರವಿ॑ಶೇಯ॒ಮಿತ್ಯ॑ಬ್ರವೀ॒-ತ್ತಂ-ವೃಁ॒ತ್ರಃ ಪ್ರಾವಿ॑ಶದು॒ದರಂ॒-ವೈಁ ವೃ॒ತ್ರಃ, ಕ್ಷು-ತ್ಖಲು॒ ವೈ ಮ॑ನು॒ಷ್ಯ॑ಸ್ಯ॒ ಭ್ರಾತೃ॑ವ್ಯೋ॒ ಯ [ಭ್ರಾತೃ॑ವ್ಯೋ॒ ಯಃ, ಏ॒ವಂ-ವೇಁದ॒ ಹನ್ತಿ॒] 41

ಏ॒ವಂ-ವೇಁದ॒ ಹನ್ತಿ॒ ಕ್ಷುಧ॒-ಮ್ಭ್ರಾತೃ॑ವ್ಯ॒-ನ್ತದ॑ಸ್ಮೈ॒ ಪ್ರಾಯ॑ಚ್ಛ॒ತ್ತ-ತ್ಪ್ರತ್ಯ॑ಗೃಹ್ಣಾ॒ತ್- ತ್ರಿರ್ಮಾ॑-ಽಧಾ॒ ಇತಿ॒ ತ-ದ್ವಿಷ್ಣ॒ವೇ-ಽತಿ॒ ಪ್ರಾಯ॑ಚ್ಛ॒-ತ್ತ-ದ್ವಿಷ್ಣುಃ॒ ಪ್ರತ್ಯ॑ಗೃಹ್ಣಾದ॒ಸ್ಮಾಸ್ವಿನ್ದ್ರ॑ ಇನ್ದ್ರಿ॒ಯ-ನ್ದ॑ಧಾ॒ತ್ವಿತಿ॒ ಯತ್ತ್ರಿಃ ಪ್ರಾಯ॑ಚ್ಛ॒-ತ್ತ್ರಿಃ ಪ್ರ॒ತ್ಯಗೃ॑ಹ್ಣಾ॒-ತ್ತ-ತ್ತ್ರಿ॒ಧಾತೋ᳚ಸ್ತ್ರಿಧಾತು॒ತ್ವಂ-ಯಁ-ದ್ವಿಷ್ಣು॑ರ॒ನ್ವತಿ॑ಷ್ಠತ॒ ವಿಷ್ಣ॒ವೇ-ಽತಿ॒ ಪ್ರಾಯ॑ಚ್ಛ॒-ತ್ತಸ್ಮಾ॑ದೈನ್ದ್ರಾವೈಷ್ಣ॒ವಗ್ಂ ಹ॒ವಿರ್ಭ॑ವತಿ॒ ಯದ್ವಾ ಇ॒ದ-ಙ್ಕಿಞ್ಚ॒ ತದ॑ಸ್ಮೈ॒ ತ-ತ್ಪ್ರಾಯ॑ಚ್ಛ॒-ದೃಚ॒-ಸ್ಸಾಮಾ॑ನಿ॒ ಯಜೂಗ್ಂ॑ಷಿ ಸ॒ಹಸ್ರಂ॒-ವಾಁ ಅ॑ಸ್ಮೈ॒ ತ-ತ್ಪ್ರಾಯ॑ಚ್ಛ॒-ತ್ತಸ್ಮಾ᳚-ಥ್ಸ॒ಹಸ್ರ॑ದಕ್ಷಿಣಮ್ ॥ 42 ॥

(ಪ್ರ॒ವ॒ಣಂ - ಁವಿಷ್ಣು॒- ರ್ವಾ ಇ॒ದ- ಮಿ॒ದ - ಮ॒ಹಂ - ಁಯೋ - ಭ॑ವ॒ - ತ್ಯೇಕ॑ ವಿಗ್ಂಶತಿಶ್ಚ) (ಅ. 12)

ದೇ॒ವಾ ವೈ ರಾ॑ಜ॒ನ್ಯಾ᳚-ಜ್ಜಾಯ॑ಮಾನಾ-ದಬಿಭಯು॒-ಸ್ತಮ॒ನ್ತರೇ॒ವ ಸನ್ತ॒-ನ್ದಾಮ್ನಾ ಽಪೌ᳚ಮ್ಭ॒ನ್-ಥ್ಸ ವಾ ಏ॒ಷೋ-ಽಪೋ᳚ಬ್ಧೋ ಜಾಯತೇ॒ ಯ-ದ್ರಾ॑ಜ॒ನ್ಯೋ॑ ಯದ್ವಾ ಏ॒ಷೋ-ಽನ॑ಪೋಬ್ಧೋ॒ ಜಾಯೇ॑ತ ವೃ॒ತ್ರಾ-ನ್ಘ್ನಗ್ಗ್ ಶ್ಚ॑ರೇ॒ದ್ಯ-ಙ್ಕಾ॒ಮಯೇ॑ತ ರಾಜ॒ನ್ಯ॑ಮನ॑ಪೋಬ್ಧೋ ಜಾಯೇತ ವೃ॒ತ್ರಾ-ನ್ಘ್ನಗ್ಗ್ ಶ್ಚ॑ರೇ॒ದಿತಿ॒ ತಸ್ಮಾ॑ ಏ॒ತಮೈ᳚ನ್ದ್ರಾ ಬಾರ್ಹಸ್ಪ॒ತ್ಯ-ಞ್ಚ॒ರು-ನ್ನಿರ್ವ॑ಪೇದೈ॒ನ್ದ್ರೋ ವೈ ರಾ॑ಜ॒ನ್ಯೋ᳚ ಬ್ರಹ್ಮ॒ ಬೃಹ॒ಸ್ಪತಿ॒ ರ್ಬ್ರಹ್ಮ॑ಣೈ॒ವೈನ॒-ನ್ದಾಮ್ನೋ॒-ಽಪೋಮ್ಭ॑ನಾ-ನ್ಮುಞ್ಚತಿ ಹಿರ॒ಣ್ಮಯ॒-ನ್ದಾಮ॒ ದಕ್ಷಿ॑ಣಾ ಸಾ॒ಕ್ಷಾದೇ॒ವೈನ॒-ನ್ದಾಮ್ನೋ॒-ಽಪೋಮ್ಭ॑ನಾ-ನ್ಮುಞ್ಚತಿ ॥ 43 ॥

(ಏ॒ನಂ॒ - ದ್ವಾದ॑ಶ ಚ) (ಅ. 13)

ನವೋ॑ನವೋ ಭವತಿ॒ ಜಾಯ॑ಮಾ॒ನೋ-ಽಹ್ನಾ᳚-ಙ್ಕೇ॒ತುರು॒ಷಸಾ॑ ಮೇ॒ತ್ಯಗ್ರೇ᳚ । ಭಾ॒ಗ-ನ್ದೇ॒ವೇಭ್ಯೋ॒ ವಿದ॑ಧಾತ್ಯಾ॒ಯ-ನ್ಪ್ರಚ॒ನ್ದ್ರಮಾ᳚ಸ್ತಿರತಿ ದೀ॒ರ್ಘಮಾಯುಃ॑ ॥ ಯಮಾ॑ದಿ॒ತ್ಯಾ ಅ॒ಗ್ಂ॒ಶುಮಾ᳚ಪ್ಯಾ॒ಯಯ॑ನ್ತಿ॒ ಯಮಕ್ಷಿ॑ತ॒-ಮಕ್ಷಿ॑ತಯಃ॒ ಪಿಬ॑ನ್ತಿ । ತೇನ॑ ನೋ॒ ರಾಜಾ॒ ವರು॑ಣೋ॒ ಬೃಹ॒ಸ್ಪತಿ॒ರಾ ಪ್ಯಾ॑ಯಯನ್ತು॒ ಭುವ॑ನಸ್ಯ ಗೋ॒ಪಾಃ ॥ಪ್ರಾಚ್ಯಾ᳚-ನ್ದಿ॒ಶಿ ತ್ವಮಿ॑ನ್ದ್ರಾಸಿ॒ ರಾಜೋ॒ತೋದೀ᳚ಚ್ಯಾಂ-ವೃಁತ್ರಹನ್ ವೃತ್ರ॒ಹಾ-ಽಸಿ॑ । ಯತ್ರ॒ ಯನ್ತಿ॑ ಸ್ರೋ॒ತ್ಯಾಸ್ತ- [ಯನ್ತಿ॑ ಸ್ರೋ॒ತ್ಯಾಸ್ತತ್, ಜಿ॒ತ-ನ್ತೇ॑] 44

-ಜ್ಜಿ॒ತ-ನ್ತೇ॑ ದಕ್ಷಿಣ॒ತೋ ವೃ॑ಷ॒ಭ ಏ॑ಧಿ॒ ಹವ್ಯಃ॑ ॥ ಇನ್ದ್ರೋ॑ ಜಯಾತಿ॒ ನ ಪರಾ॑ ಜಯಾತಾ ಅಧಿರಾ॒ಜೋ ರಾಜ॑ಸು ರಾಜಯಾತಿ । ವಿಶ್ವಾ॒ ಹಿ ಭೂ॒ಯಾಃ ಪೃತ॑ನಾ ಅಭಿ॒ಷ್ಟೀರು॑ಪ॒ಸದ್ಯೋ॑ ನಮ॒ಸ್ಯೋ॑ ಯಥಾ-ಽಸ॑ತ್ ॥ ಅ॒ಸ್ಯೇದೇ॒ವ ಪ್ರರಿ॑ರಿಚೇ ಮಹಿ॒ತ್ವ-ನ್ದಿ॒ವಃ ಪೃ॑ಥಿ॒ವ್ಯಾಃ ಪರ್ಯ॒ನ್ತರಿ॑ಕ್ಷಾತ್ । ಸ್ವ॒ರಾಡಿನ್ದ್ರೋ॒ ದಮ॒ ಆ ವಿ॒ಶ್ವಗೂ᳚ರ್ತ-ಸ್ಸ್ವ॒ರಿರಮ॑ತ್ರೋ ವವಕ್ಷೇ॒ ರಣಾ॑ಯ ॥ ಅ॒ಭಿ ತ್ವಾ॑ ಶೂರ ನೋನು॒ಮೋ-ಽದು॑ಗ್ಧಾ ಇವ ಧೇ॒ನವಃ॑ । ಈಶಾ॑ನ- [ಈಶಾ॑ನಮ್, ಅ॒ಸ್ಯ] 45

-ಮ॒ಸ್ಯ ಜಗ॑ತ-ಸ್ಸುವ॒ರ್ದೃಶ॒ಮೀಶಾ॑ನಮಿನ್ದ್ರ ತ॒ಸ್ಥುಷಃ॑ ॥ ತ್ವಾಮಿದ್ಧಿ ಹವಾ॑ಮಹೇ ಸಾ॒ತಾ ವಾಜ॑ಸ್ಯ ಕಾ॒ರವಃ॑ । ತ್ವಾಂ-ವೃಁ॒ತ್ರೇಷ್ವಿ॑ನ್ದ್ರ॒ ಸತ್ಪ॑ತಿ॒-ನ್ನರ॒ಸ್ತ್ವಾ-ಙ್ಕಾಷ್ಠಾ॒ಸ್ವರ್ವ॑ತಃ ॥ ಯದ್ದ್ಯಾವ॑ಇನ್ದ್ರತೇಶ॒ತಗ್ಂ ಶ॒ತ-ಮ್ಭೂಮೀ॑ರು॒ತ ಸ್ಯುಃ । ನ ತ್ವಾ॑ ವಜ್ರಿನ್-ಥ್ಸ॒ಹಸ್ರ॒ಗ್ಂ॒ ಸೂರ್ಯಾ॒ ಅನು॒ ನ ಜಾ॒ತಮ॑ಷ್ಟ॒ ರೋದ॑ಸೀ ॥ ಪಿಬಾ॒ ಸೋಮ॑ಮಿನ್ದ್ರ॒ ಮನ್ದ॑ತು ತ್ವಾ॒ ಯನ್ತೇ॑ ಸು॒ಷಾವ॑ ಹರ್ಯ॒ಶ್ವಾದ್ರಿಃ॑ । 46

ಸೋ॒ತುರ್ಬಾ॒ಹುಭ್ಯಾ॒ಗ್ಂ॒ ಸುಯ॑ತೋ॒ ನಾರ್ವಾ᳚ ॥ ರೇ॒ವತೀ᳚ರ್ನ-ಸ್ಸಧ॒ಮಾದ॒ ಇನ್ದ್ರೇ॑ ಸನ್ತು ತು॒ವಿವಾ॑ಜಾಃ । ಕ್ಷು॒ಮನ್ತೋ॒ ಯಾಭಿ॒ರ್ಮದೇ॑ಮ ॥ ಉದ॑ಗ್ನೇ॒ ಶುಚ॑ಯ॒ಸ್ತವ॒ , ವಿ ಜ್ಯೋತಿ॒ಷೋ,ದು॒ ತ್ಯ-ಞ್ಜಾ॒ತವೇ॑ದಸಗ್ಂಸ॒ಪ್ತ ತ್ವಾ॑ ಹ॒ರಿತೋ॒ ರಥೇ॒ ವಹ॑ನ್ತಿ ದೇವ ಸೂರ್ಯ । ಶೋ॒ಚಿಷ್ಕೇ॑ಶಂ-ವಿಁಚಕ್ಷಣ ॥ ಚಿ॒ತ್ರ-ನ್ದೇ॒ವಾನಾ॒ಮುದ॑ಗಾ॒ದನೀ॑ಕ॒-ಞ್ಚಕ್ಷು॑ರ್ಮಿ॒ತ್ರಸ್ಯ॒ ವರು॑ಣಸ್ಯಾ॒-ಽಗ್ನೇಃ । ಆ-ಽಪ್ರಾ॒ ದ್ಯಾವಾ॑ಪೃಥಿ॒ವೀ ಅ॒ನ್ತರಿ॑ಕ್ಷ॒ಗ್ಂ॒ ಸೂರ್ಯ॑ ಆ॒ತ್ಮಾ ಜಗ॑ತಸ್ತ॒ಸ್ಥುಷ॑- [ಜಗ॑ತಸ್ತ॒ಸ್ಥುಷಃ॑, ಚ ।] 47

-ಶ್ಚ ॥ ವಿಶ್ವೇ॑ ದೇ॒ವಾ ಋ॑ತಾ॒ವೃಧ॑ ಋ॒ತುಭಿ॑ರ್-ಹವನ॒ಶ್ರುತಃ॑ । ಜು॒ಷನ್ತಾಂ॒-ಯುಁಜ್ಯ॒-ಮ್ಪಯಃ॑ ॥ ವಿಶ್ವೇ॑ ದೇವಾ-ಶ್ಶೃಣು॒ತೇಮಗ್ಂ ಹವ॑-ಮ್ಮೇ॒ ಯೇ ಅ॒ನ್ತರಿ॑ಕ್ಷೇ॒ ಯ ಉಪ॒ ದ್ಯವಿ॒ಷ್ಠ । ಯೇ ಅ॑ಗ್ನಿಜಿ॒ಹ್ವಾ ಉ॒ತ ವಾ॒ ಯಜ॑ತ್ರಾ ಆ॒ಸದ್ಯಾ॒ಸ್ಮಿ-ನ್ಬ॒ರ್॒ಹಿಷಿ॑ ಮಾದಯದ್ಧ್ವಮ್ ॥ 48 ॥

(ತ - ದೀಶಾ॑ನ॒ - ಮದ್ರಿ॑ - ಸ್ತ॒ಸ್ಥುಷ॑ - ಸ್ತ್ರಿ॒ಗ್ಂ॒ಶಚ್ಚ॑) (ಅ. 14)

(ದೇ॒ವಾ ಮ॑ನು॒ಷ್ಯಾ॑ - ದೇವಸು॒ರಾ ಅ॑ಬ್ರುವನ್ - ದೇವಾಸು॒ರಾಸ್ತೇಷಾ᳚-ಙ್ಗಾಯ॒ತ್ರೀ - ಪ್ರ॒ಜಾಪ॑ತಿ॒ಸ್ತಾ ಯತ್ರಾ-ಽ - ಗ್ನೇ॒ ಗೋಭಿಃ॑ - ಚಿ॒ತ್ರಯಾ॑ - ಮಾರು॒ತಂ - ದೇವಾ॑ ವಸವ್ಯಾ॒ ಅಗ್ನೇ॑ - ಮಾರು॒ತಮಿತಿ॒ - ದೇವಾ॑ ವಸವ್ಯಾ॒ ದೇವಾ᳚-ಶ್ಶರ್ಮಣ್ಯಾಃ॒ - ಸರ್ವಾ॑ಣಿ॒ - ತ್ವಷ್ಟಾ॑ ಹ॒ತಪು॑ತ್ರೋ - ದೇ॒ವಾ ವೈ ರಾ॑ಜ॒ನ್ಯಾ᳚ನ್ - ನವೋ॑ನವ॒ - ಶ್ಚತು॑ರ್ದಶ )

(ದೇ॒ವಾ ಮ॑ನು॒ಷ್ಯಾಃ᳚ - ಪ್ರ॒ಜಾ-ಮ್ಪ॒ಶುನ್ - ದೇವಾ॑ ವಸವ್ಯಾಃ - ಪರಿದ॒ಧ್ಯದಿ॒ದ- ಮಸ್ಮ್ಯ॒ - ಷ್ಟಾ ಚ॑ತ್ವಾರಿಗ್ಂಶತ್ )

(ದೇ॒ವಾ ಮ॑ನು॒ಷ್ಯಾ॑, ಮಾದಯಧ್ವಂ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ಚತುರ್ಥಃ ಪ್ರಶ್ನ-ಸ್ಸಮಾಪ್ತಃ ॥

Roman (IAST) Transliteration

kṛṣṇa yajurvedīya taittirīya saṃhitāyā-ndvitīyakāṇḍe caturthaḥ praśnaḥ - iṣṭividhānaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

de॒vā ma̭nu॒ṣyāḥ᳚ pi॒tara॒ste᳚-'nyata̭ āsa॒nnasṷrā॒ rakṣāgṃ̭si piśā॒cāste᳚ 'nyata॒steṣā᳚-nde॒vānā̭mu॒ta yadalpaṃ॒-lo~hi̭ta॒makṷrva॒-nta-drakṣāgṃ̭si॒ rātrī̭bhirasubhna॒-ntān-thsu॒bdhā-nmṛ॒tāna॒bhi vyau᳚ccha॒-tte de॒vā a̭vidu॒ryo vai no॒-'ya-mmri॒yate॒ rakṣāgṃ̭si॒ vā i॒ma-ṅghna॒ntīti॒ te rakṣā॒g॒syupā̭mantrayanta॒ tānya̭bruva॒n. varaṃ̭-vṛ~ṇāmahai॒ ya- [yat, asṷrā॒n jayā̭ma॒] 1

-dasṷrā॒n jayā̭ma॒ tannaḥ̭ sa॒hāsa॒diti॒ tato॒ vai de॒vā asṷrānajaya॒-nte-'sṷrān ji॒tvārakṣā॒g॒syapā̭nudanta॒ tāni॒ rakṣā॒g॒syanṛ̭tama ka॒rteti̭ sama॒nta-nde॒vā-nparya̭viśa॒-nte de॒vā a॒gnāva̭nāthanta॒ te᳚-'gnaye॒ prava̭te puro॒ḍāśa̭ma॒ṣṭāka̭pāla॒-nnira̭vapanna॒gnayḙ vibā॒dhava̭te॒-'gnaye॒ pratī̭kavate॒ yada॒gnaye॒ prava̭te ni॒rava̭pa॒n॒. yānye॒va pu॒rastā॒-drakṣā॒g॒- [pu॒rastā॒-drakṣā॒gṃ̭si, ā॒sa॒ntāni॒ tena॒] 2

-syāsa॒ntāni॒ tena॒ prāṇṷdanta॒ yada॒gnayḙ vibā॒dhava̭te॒ yānye॒vābhito॒ rakṣā॒g॒syāsa॒-ntāni॒ tena॒ vya̭bādhanta॒ yada॒gnaye॒ pratī̭kavate॒ yānye॒va pa॒ścā-drakṣā॒g॒syāsa॒-ntāni॒ tenāpā̭nudanta॒ tato̭ de॒vā abha̭va॒-nparāsṷrā॒ yo bhrātṛ̭vyavā॒n-thsyā-thsa spardha̭māna e॒tayeṣṭyā̭ yajetā॒gnaye॒ prava̭te puro॒ḍāśa̭ma॒ṣṭāka̭pāla॒-nnirva̭peda॒gnayḙ vibā॒dhava̭te॒- [vibā॒dhava̭te॒, a॒gnaye॒ pratī̭kavate॒] 3

-'gnaye॒ pratī̭kavate॒ yada॒gnaye॒ prava̭te ni॒rvapa̭ti॒ ya e॒vāsmā॒cchreyā॒n-bhrātṛ̭vya॒sta-ntena॒ praṇṷdate॒ yada॒gnayḙ vibā॒dhava̭te॒ ya e॒vainḙna sa॒dṛnta-ntena॒ vi bā̭dhate॒ yada॒gnaye॒ pratī̭kavate॒ ya e॒vāsmā॒-tpāpī̭yā॒-nta-ntenāpa̭ nudate॒ pra śreyāgṃ̭sa॒-mbhrātṛ̭vya-nnuda॒teti̭ sa॒dṛśa̭-ṅkrāmati॒ naina॒-mpāpī̭yānāpnoti॒ ya e॒vaṃ ~vi॒dvāne॒tayeṣṭyā॒ yaja̭te || 4 ||

(vṛ॒ṇā॒ma॒hai॒ yat - pu॒rastā॒-drakṣāgṃ̭si- vapeda॒gnayḙ vibā॒dhava̭ta - e॒vaṃ - ca॒tvāri̭ ca) (a. 1)

de॒vā॒su॒rā-ssaṃya~̭ttā āsa॒-nte de॒vā a̭bruva॒n॒. yo no̭ vī॒ryā̭vattama॒stamanṷ sa॒māra̭bhāmahā॒ iti॒ ta indra̭mabruva॒-ntvaṃ-vai~ no̭ vī॒ryā̭vattamo-'si॒ tvāmanṷ sa॒māra̭bhāmahā॒ iti॒ so᳚-'bravī-tti॒sro ma̭ i॒māsta॒nuvo̭ vī॒ryā̭vatī॒stāḥ prī̭ṇī॒tāthā-sṷrāna॒bhi bha̭viṣya॒theti॒ tā vai brū॒hītya̭bruvanni॒yamagṃ̭ ho॒mugi॒yaṃ-vi~̭mṛ॒dheya-mi̭ndri॒yāva॒tī- [-mi̭ndri॒yāva॒tī, itya̭bravī॒tta] 5

-tya̭bravī॒tta indrā̭yāgṃ ho॒mucḙ puro॒ḍāśa॒mekā̭daśakapāla॒-nnira̭vapa॒nnindrā̭ya vaimṛ॒dhāye-ndrā̭yendri॒yāva̭te॒ yadindrā̭yāgṃ ho॒mucḙ ni॒rava̭pa॒nnagṃha̭sa e॒va tenā̭mucyanta॒ yadindrā̭ya vai mṛ॒dhāya॒ mṛdha̭ e॒va tenāpā᳚ghnata॒yadindrā̭yendri॒yāva̭ta indri॒yame॒va tenā॒-''tmanna̭dadhata॒ traya̭strigṃśatkapāla-mpuro॒ḍāśa॒-nnira̭vapa॒-ntraya̭strigṃśa॒dvai de॒vatā॒stā indra̭ ā॒tmannanṷ sa॒māra̭bhaṃya~ta॒ bhūtyai॒ [bhūtyai᳚, tāṃ-vā~va] 6

tāṃ-vā~va de॒vā viji̭ti-mutta॒mā-masṷrai॒-rvya̭jayanta॒yo bhrātṛ̭vyavā॒nth- syā-thsa spardha̭māna e॒tayeṣṭyā̭ yaje॒tendrā̭yāgṃ ho॒mucḙ puro॒ḍāśa॒mekā̭daśakapāla॒-nnirva̭pe॒dindrā̭ya vaimṛ॒dhāyendrā̭yendri॒yāva॒te-'gṃ ha̭sā॒ vā e॒ṣa gṛ̭hī॒to yasmā॒cchreyā॒-nbhrātṛ̭vyo॒yadindrā̭yāgṃ ho॒mucḙ ni॒rvapa॒tyagṃha̭sa e॒va tena̭ mucyatemṛ॒dhā vā e॒ṣo̭-'bhiṣa̭ṇṇo॒ yasmā᳚-thsamā॒neṣva॒nya-śśreyā̭nu॒tā- [śreyā̭nu॒ta, a-'bhrā̭tṛvyo॒] 7

-'bhrā̭tṛvyo॒ yadindrā̭ya vaimṛ॒dhāya॒ mṛdha̭ e॒va tenāpa̭ hate॒yadindrā̭yendri॒yāva̭ta indri॒yame॒va tenā॒tma-ndha̭tte॒ traya̭strigṃśatkapāla-mpuro॒ḍāśa॒-nnirva̭pati॒ traya̭strigṃśa॒dvai de॒vatā॒stā e॒va yaja̭māna ā॒tmannanṷ sa॒māra̭bhaṃya~te॒ bhūtyai॒ sā vā e॒ṣā viji̭ti॒rnāmeṣṭi॒rya e॒vaṃ-vi~॒dvāne॒tayeṣṭyā॒ yaja̭ta utta॒māme॒va viji̭ti॒-mbhrātṛ̭vyeṇa॒ vi ja̭yate || 8 ||

(i॒ndri॒yāva̭tī॒ - bhūtyā̭ - u॒tai - kā॒nna pa̭ñcā॒śacca̭) (a. 2)

de॒vā॒su॒rā-ssaṃya~̭ttā āsa॒-nteṣā᳚-ṅgāya॒tryojo॒ bala̭mindri॒yaṃ-vī~॒rya̭-mpra॒jā-mpa॒śūn-thsa॒gṛṃhyā॒ ''dāyā̭-pa॒kramyā̭tiṣṭha॒-ttḙ-'manyanta yata॒rān. vā i॒yamṷpāva॒rthsyati॒ ta i॒da-mbha̭viṣya॒ntīti॒ tāṃ-vya~̭hvayanta॒ viśva̭karma॒nniti̭ de॒vā dābhītyasṷrā॒-ssā nānya̭ta॒rāgśca॒-nopāva̭rtata॒ te de॒vā e॒ta-dyajṷrapaśya॒nnojo̭-'si॒ saho̭-'si॒ bala̭masi॒ [bala̭masi, bhrājo̭-'si] 9

bhrājo̭-'si de॒vānā॒-ndhāma॒ nāmā̭-'si॒ viśva̭masi vi॒śvāyu॒-ssarva̭masi sa॒rvāyṷrabhi॒bhūriti॒ vāva de॒vā asṷrāṇā॒mojo॒ bala̭mindri॒yaṃ-vī~॒rya̭-mpra॒jā-mpa॒śūna̭vṛñjata॒ ya-dgā̭ya॒trya̭pa॒kramyāti̭ṣṭha॒-ttasmā̭de॒tā-ṅgā̭ya॒trītīṣṭi̭māhu-ssaṃva~thsa॒ro vai gā̭ya॒trī saṃ̭va~thsa॒ro vai tada̭pa॒kramyā̭tiṣṭha॒-dyade॒tayā̭ de॒vā asṷrāṇā॒mojo॒ bala̭mindri॒yaṃ-vī~॒rya̭- [bala̭mindri॒yaṃ-vī~॒rya᳚m, pra॒jā-mpa॒śū-] 10

-mpra॒jā-mpa॒śū-navṛ̭ñjata॒ tasmā̭de॒tāgṃ saṃ̭va~॒rga itīṣṭi̭māhu॒ryo bhrātṛ̭vyavā॒nthsyā-thsaspardha̭māna e॒tayeṣṭyā̭ yajetā॒gnayḙ saṃva~॒rgāya̭ puro॒ḍāśa̭ma॒ṣṭāka̭pāla॒-nnirva̭pe॒ttagṃśṛ॒tamāsa̭nname॒tena॒ yajṷṣā॒-'bhi mṛ̭śe॒doja̭ e॒va bala̭mindri॒yaṃ-vī~॒rya̭-mpra॒jā-mpa॒śū-nbhrātṛ̭vyasya vṛṅkte॒ bhava̭tyā॒tmanā॒ parā᳚sya॒ bhrātṛ̭vyo bhavati || 11

(bala̭masye॒ - tayā̭ de॒vā asṷrāṇā॒mojo॒ bala̭mindri॒yaṃ-vī~॒ryaṃ̭ - pañca̭catvārigṃśacca) (a. 3)

pra॒jāpa̭tiḥ pra॒jā a̭sṛjata॒ tā a̭smā-thsṛ॒ṣṭāḥ parā̭cīrāya॒-ntā yatrāva̭sa॒-ntato̭ ga॒rmududa̭tiṣṭha॒-ttā bṛha॒spati̭ścā॒nvavai̭tā॒gṃ॒ so᳚-'bravī॒-dbṛha॒spati̭ra॒nayā᳚ tvā॒ prati̭ṣṭhā॒nyatha̭ tvā pra॒jā u॒pāva̭rthsya॒ntīti॒ ta-mprāti̭ṣṭha॒-ttato॒ vai pra॒jāpa̭ti-mpra॒jā u॒pāva̭rtanta॒ yaḥ pra॒jākā̭ma॒-ssyā-ttasmā̭ e॒ta-mprā̭jāpa॒tya-ṅgā᳚rmu॒ta-ñca॒ru-nnirva̭pe-tpra॒jāpa̭ti- [-nirva̭pe-tpra॒jāpa̭tim, e॒va svena̭] 12

-me॒va svena̭ bhāga॒dheye॒nopa̭ dhāvati॒ sa e॒vāsmai᳚ pra॒jā-mpraja̭nayatipra॒jāpa̭tiḥ pa॒śūna̭sṛjata॒ te᳚-'smā-thsṛ॒ṣṭāḥ parā᳚ñca āya॒-nte yatrāva̭sa॒-ntato̭ ga॒rmududa̭tiṣṭha॒-ttā-npū॒ṣā cā॒nvavai̭tā॒gṃ॒ so᳚-'bravī-tpū॒ṣā-'nayā̭ mā॒ prati॒ṣṭhātha̭ tvā pa॒śava̭ u॒pāva̭rthsya॒ntīti॒ mā-mprati॒ṣṭheti॒ somo᳚-'bravī॒-nmama॒ vā [-mama॒ vai, a॒kṛ॒ṣṭa॒pa॒cyamityu॒bhau] 13

a̭kṛṣṭapa॒cyamityu॒bhau vā॒-mprati̭ṣṭhā॒nītya̭bravī॒-ttau prāti̭ṣṭha॒-ttato॒ vai pra॒jāpa̭ti-mpa॒śava̭ u॒pāva̭rtanta॒ yaḥ pa॒śukā̭ma॒-ssyā-ttasmā̭ e॒tagṃ so̭māpau॒ṣṇa-ṅgā᳚rmu॒ta-ñca॒ru-nnirva̭pe-thsomāpū॒ṣaṇā̭ve॒va svena̭ bhāga॒dheye॒nopa̭ dhāvati॒ tāve॒vāsmai̭ pa॒śū-npraja̭nayata॒-ssomo॒ vai rḙto॒dhāḥ pū॒ṣā pa̭śū॒nā-mpra̭janayi॒tā soma̭ e॒vāsmai॒ reto॒ dadhā̭ti pū॒ṣā pa॒śū-npraja̭nayati || 14 ||

(va॒pe॒-tpra॒jāpa̭tiṃ॒ - ~vai - dadhā̭ti pū॒ṣā - trīṇi̭ ca) (a. 4)

agne॒ gobhi̭rna॒ ā ga॒hīndo̭ pu॒ṣṭyā jṷṣasva naḥ | indro̭ dha॒rtā gṛ॒heṣṷ naḥ || sa॒vi॒tā ya-ssa̭ha॒sriya॒-ssa no̭ gṛ॒heṣṷ rāraṇat | ā pū॒ṣā e॒tvā vasṷ || dhā॒tā da̭dātu no ra॒yimīśā̭no॒ jaga̭ta॒spatiḥ̭ | sa naḥ̭ pū॒rṇena̭ vāvanat || tvaṣṭā॒ yo vṛ̭ṣa॒bho vṛṣā॒ sa no̭ gṛ॒heṣṷ rāraṇat | sa॒hasrḙṇā॒yutḙna ca || yena̭ de॒vā a॒mṛta̭- [a॒mṛta᳚m, dī॒rghagg śravo̭ di॒vyaira̭yanta |] 15

-ndī॒rghagg śravo̭ di॒vyaira̭yanta | rāya̭spoṣa॒ tvama॒smabhya॒-ṅgavā᳚ṅku॒lmi-ñjī॒vasa॒ ā yṷvasva || a॒gni rgṛ॒hapa̭ti॒-ssomo̭ viśva॒vaniḥ̭ savi॒tā sṷme॒dhā-ssvāhā᳚ || agnḙ gṛhapate॒ yaste॒ ghṛtyo̭ bhā॒gastena॒ saha॒ oja̭ ā॒krama̭māṇāya dhehi॒ śraiṣṭhyā᳚tpa॒tho mā yo̭ṣa-mmū॒rdhā bhṷ̄yāsa॒gg॒ svāhā᳚ || 16 ||

(a॒mṛta̭ - ma॒ṣṭātrigṃ̭śacca) (a. 5)

ci॒trayā̭ yajeta pa॒śukā̭ma i॒yaṃ-vai~ ci॒trā yadvā a॒syāṃ-vi~śva̭-mbhū॒tamadhi̭ pra॒jāya̭te॒ te ne॒yañci॒trā ya e॒vaṃ-vi~॒dvāg ści॒trayā̭ pa॒śukā̭mo॒ yaja̭te॒ pra pra॒jayā̭ pa॒śubhi̭ rmithu॒nai rjā̭yate॒ praivāgne॒yena̭ vāpayati॒ retaḥ̭ sau॒myena̭ dadhāti॒ reta̭ e॒va hi॒ta-ntvaṣṭā̭ rū॒pāṇi॒ vi ka̭rotisārasva॒tau bha̭vata e॒tadvai daivya̭-mmithu॒na-ndaivya̭me॒vāsmai̭ [-daivya̭me॒vāsmai᳚, mi॒thu॒na-mma̭ddhya॒to] 17

mithu॒na-mma̭ddhya॒to da̭dhāti॒ puṣṭyai᳚ pra॒jana̭nāya sinīvā॒lyai ca॒rurbha̭vati॒ vāgvai si̭nīvā॒lī puṣṭiḥ॒ khalu॒ vai vākpuṣṭi̭me॒va vāca॒mupai᳚tyai॒ndra ṷtta॒mo bha̭vati॒ tenai॒va tanmi̭thu॒nagṃ sa॒ptaitāni̭ ha॒vīgṃṣi̭ bhavanti sa॒pta grā॒myāḥ pa॒śavaḥ̭ sa॒ptāra॒ṇyā-ssa॒pta chandāg̭syu॒-bhaya॒syā-va̭ruddhyā॒ athai॒tā āhṷtī rjuhotye॒te vai de॒vāḥ puṣṭi̭pataya॒sta e॒vā smi॒-npuṣṭi̭-ndadhati॒ puṣya̭ti pra॒jayā̭ pa॒śubhi॒ratho॒ yade॒tā āhṷtī rju॒hoti॒ prati̭ṣṭhityai || 18 ||

(a॒smai॒ - ta e॒va - dvāda̭śa ca) (a. 6)

mā॒ru॒tama̭si ma॒rutā॒mojo॒-'pā-ndhārā᳚-mbhindhi ra॒maya̭ta maruta-śśye॒namā॒yina॒-mmano̭java saṃ॒-vṛ~ṣa̭ṇagṃ suvṛ॒ktim || yena॒ śardha̭ u॒gramava̭-sṛṣṭa॒meti॒ tada̭śvinā॒ pari̭ dhattagg sva॒sti | pu॒ro॒vā॒to varṣa̭ñji॒nvarā॒vṛ-thsvāhā̭ vā॒tāvad- varṣa̭nnu॒grarā॒vṛ-thsvāhā᳚ sta॒naya॒n varṣa̭-nbhī॒marā॒vathsvāhā̭ 'naśa॒nya̭va॒sphūrja̭n-di॒dyu-dvarṣa̭n-tve॒ṣarā॒vṛ-thsvāhā̭ 'tirā॒traṃ॒-va~rṣa̭-npū॒rtirā॒vṛ- [-pū॒rtirā॒vṛt, svāhā̭ ba॒hu] 19

-thsvāhā̭ ba॒hu hā॒yama̭vṛṣā॒diti̭ śru॒tarā॒vṛ-thsvāhā॒ ''tapa̭ti॒ varṣa̭n-vi॒rāḍā॒vṛ-thsvāhā̭ 'va॒sphūrja̭n-di॒dyu-dvarṣa̭-nbhū॒tarā॒vṛ-thsvāhā॒māndā॒ vāśā॒-śśundhyū॒raji̭rāḥ | jyoti̭ṣmatī॒-stama̭svarī॒-runda̭tī॒-ssuphḙnāḥ | mitra̭bhṛtaḥ॒, kṣatra̭bhṛta॒-ssurā᳚ṣṭrā i॒ha mā̭-'vata ||vṛṣṇo॒ aśva̭sya sa॒ndāna̭masi॒ vṛṣṭyai॒ tvopa̭ nahyāmi || 20 ||

(pū॒rtirā॒vṛ-d- dvica̭tvārigṃśacca) (a. 7)

devā̭ vasavyā॒ agnḙ soma sūrya || devā᳚-śśarmaṇyā॒ mitrā̭varuṇā-'ryamann || devā᳚-ssapīta॒yo 'pā᳚-nnapādāśuhemann | u॒dno da̭ttoda॒dhi-mbhi̭ntta di॒vaḥ pa॒rjanyā̭da॒ntari̭kṣāt-pṛthi॒vyāstato̭ no॒ vṛṣṭyā̭-'vata || divā̭ ci॒ttamaḥ̭ kṛṇvanti pa॒rjanyḙno-davā॒hena̭ | pṛ॒thi॒vīṃ-ya~-dvyu॒ndanti̭ || āya-nnaraḥ̭ su॒dāna̭vo dadā॒śuṣḙ di॒vaḥ kośa॒macṷcyavuḥ | vi pa॒rjanyā᳚-ssṛjanti॒ roda̭sī॒ anu॒ dhanva̭nā yanti [ ] 21

vṛ॒ṣṭayaḥ̭ || udī̭rayathā maruta-ssamudra॒to yū॒yaṃ-vṛ~॒ṣṭiṃ-va~̭rṣayathā purīṣiṇaḥ | na vo̭ dasrā॒ upa̭ dasyanti dhe॒nava॒-śśubhaṃ̭-yā~॒tāmanu॒ rathā̭ avṛthsata || sṛ॒jā vṛ॒ṣṭi-ndi॒va ā-'dbhi-ssa̭mu॒dra-mpṛ̭ṇa || a॒bjā a̭si prathama॒jā bala̭masi samu॒driya᳚m || unna̭mbhaya pṛthi॒vī-mbhi॒ndhīda-ndi॒vya-nnabhaḥ̭ | u॒dno di॒vyasya̭ no de॒hīśā̭no॒ visṛ̭jā॒ dṛti᳚m || ye de॒vā di॒vibhā̭gā॒ ye᳚-'ntari̭kṣa bhāgā॒ ye pṛ̭thi॒vi bhā̭gāḥ | ta i॒maṃ-ya~॒jñama̭vantu॒ ta i॒da-ṅkṣetra॒mā vi̭śantu॒ ta i॒da-ṅkṣetra॒manu॒ vi vi̭śantu || 22 ||

(ya॒nti॒ - de॒vā - vigṃ̭śa॒tiśca̭) (a. 8)

mā॒ru॒tama̭si ma॒rutā॒moja॒ iti̭ kṛ॒ṣṇaṃ-vā~saḥ̭ kṛ॒ṣṇatṷ̄ṣa॒-mpari̭ dhatta e॒tadvai vṛṣṭyai̭ rū॒pagṃ sarṷ̄pa e॒va bhū॒tvā pa॒rjanyaṃ̭-va~rṣayatira॒maya̭ta maruta-śśye॒namā॒yina॒miti̭ paścādvā॒ta-mprati̭ mīvati purovā॒tame॒va ja̭nayati va॒r॒ṣasyā va̭ruddhyai vātanā॒māni̭ juhoti vā॒yurvai vṛṣṭyā̭ īśe vā॒yume॒va svena̭ bhāga॒dheye॒nopa̭ dhāvati॒ sa e॒vāsmai̭ pa॒rjanyaṃ̭-va~rṣayatya॒ṣṭau [varṣayatya॒ṣṭau, ju॒ho॒ti॒ cata̭sro॒ vai] 23

jṷhoti॒ cata̭sro॒ vai diśa॒ścata̭sro-'vāntaradi॒śā di॒gbhya e॒va vṛṣṭi॒gṃ॒ sa-mpra cyā̭vayati kṛṣṇāji॒ne saṃyau~̭ti ha॒vire॒vāka̭rantarve॒di saṃyau~॒tya va̭ruddhyai॒ yatī̭nāma॒dyamā̭nānāgṃ śī॒r॒ṣāṇi॒ parā̭-'pata॒nte kha॒rjūrā̭ abhava॒n-teṣā॒gṃ॒ rasa̭ ū॒rdhvo̭-'pata॒t-tāni̭ ka॒rīrā᳚ṇya-bhavan-thsau॒myāni॒ vai ka॒rīrā̭ṇi sau॒myā khalu॒ vā āhṷti rdi॒vo vṛṣṭi̭-ñcyāvayati॒ yatka॒rīrā̭ṇi॒ bhava̭nti [ ] 24

sau॒myayai॒vā-''hṷtyā di॒vo vṛṣṭi॒mava̭ rundhe॒ madhṷṣā॒ saṃ-yau~᳚tya॒pāṃ-vā~ e॒ṣa oṣa̭dhīnā॒gṃ॒ raso॒ yanmaddhva॒dbhya e॒vauṣa̭dhībhyo varṣa॒tyatho̭ a॒dbhya e॒vauṣa̭dhībhyo॒ vṛṣṭi॒ni-nna̭yati॒ māndā॒ vāśā॒ iti॒ saṃyau~̭ti nāma॒dheyai̭re॒vainā॒ acchai॒tyatho॒ yathā᳚ brū॒yādasā॒ vehītye॒vame॒vainā̭ nāma॒dheyai॒rā - [nāma॒dheyai॒rā, cyā॒va॒ya॒ti॒ vṛṣṇo॒] 25

cyā̭vayati॒ vṛṣṇo॒ aśva̭sya sa॒ndāna̭masi॒ vṛṣṭyai॒ tvopa̭ nahyā॒mītyā̭ha॒ vṛṣā॒ vā aśvo॒ vṛṣā̭ pa॒rjanyaḥ̭ kṛ॒ṣṇa i̭va॒ khalu॒ vai bhū॒tvā va̭rṣati rū॒peṇai॒vaina॒gṃ॒ sama̭rdhayati va॒r॒ṣasyā va̭ruddhyai || 26 ||

(a॒ṣṭau - bhava̭nti - nāma॒dheyai॒rai - kā॒nna tri॒gṃ॒śacca̭) (a. 9)

devā̭ vasavyā॒ devā᳚-śśarmaṇyā॒ devā᳚-ssapītaya॒ ityā ba̭ddhnāti de॒vatā̭bhire॒vānva॒haṃ-vṛ~ṣṭi̭micchati॒ yadi॒ varṣe॒t-tāva̭tye॒va ho̭ta॒vyaṃ̭-ya~di॒ na varṣe॒cchvo bhū॒te ha॒virnirva̭pedahorā॒tre vai mi॒trāvarṷṇāvahorā॒trābhyā॒-ṅkhalu॒ vai pa॒rjanyo̭ varṣati॒ naktaṃ̭-vā~॒ hi divā̭ vā॒ varṣa̭ti mi॒trāvarṷṇāve॒va svena̭ bhāga॒dheye॒nopa̭ dhāvati॒ tāve॒vāsmā̭ [tāve॒vāsmai᳚, a॒ho॒rā॒trābhyāṃ᳚-] 27

ahorā॒trābhyā᳚-mpa॒rjanyaṃ̭ ~varṣayato॒-'gnayḙ dhāma॒cchadḙ puro॒ḍāśa̭ma॒ṣṭāka̭pāla॒-nnirva̭penmāru॒tagṃ sa॒ptaka̭pālagṃ sau॒ryameka̭kapālama॒gnirvā i॒to vṛṣṭi॒mudī̭rayati ma॒rutaḥ̭ sṛ॒ṣṭā-nna̭yanti ya॒dā khalu॒ vā a॒sāvā̭di॒tyo nyaṃ̭-ra॒śmibhiḥ̭ paryā॒varta॒te-'tha̭varṣatidhāma॒cchadi̭va॒ khalu॒ vai bhū॒tvā va̭rṣatye॒tā vai de॒vatā॒ vṛṣṭyā̭ īśate॒ tā e॒va svena̭ bhāga॒dheye॒nopa̭ dhāvati॒ tā [bhāga॒dheye॒nopa̭ dhāvati॒ tāḥ, e॒vāsmai̭] 28

e॒vāsmai̭ pa॒rjanyaṃ̭-va~rṣayantyu॒tā va̭rṣiṣya॒n varṣa̭tye॒va sṛ॒jā vṛ॒ṣṭi-ndi॒va ā-'dbhi-ssa̭mu॒dra-mpṛ॒ṇetyā̭he॒māścai॒vā-mūścā॒pa-ssama̭rdhaya॒tyatho̭ ā॒bhire॒vā-mūracchai᳚tya॒bjā a̭si prathama॒jā bala̭masi samu॒driya॒mityā̭ha yathāya॒jure॒vaita-dunna̭-mbhaya pṛthi॒vīmiti̭ varṣā॒hvā-ñjṷhotye॒ṣā vā oṣa̭dhīnāṃ-vṛ~ṣṭi॒vani॒stayai॒va vṛṣṭi॒mā cyā̭vayati॒ ye de॒vā di॒vibhā̭gā॒ iti̭ kṛṣṇāji॒namava̭ dhūnotī॒ma e॒vāsmai̭ lo॒kāḥ prī॒tā a॒bhīṣṭā̭ bhavanti || 29 ||

(a॒smai॒ - dhā॒va॒ti॒ tā - vā - eka̭vigṃśatiśca ) (a. 10)

sarvā̭ṇi॒ chandāg̭sye॒tasyā॒-miṣṭyā̭-ma॒nūcyā॒nītyā̭hu-stri॒ṣṭubho॒ vā e॒tadvī॒ryaṃ̭-ya~-tka॒kudu॒ṣṇihā॒ jaga̭tyai॒ yadṷṣṇiha-ka॒kubhā̭va॒nvāha॒ tenai॒va sarvā̭ṇi॒ chandā॒g॒syava̭ rundhe gāya॒trī vā e॒ṣā yadu॒ṣṇihā॒ yāni̭ ca॒tvāryaddhya॒kṣarā̭ṇi॒ catṷṣpāda e॒va te pa॒śavo॒yathā̭ puro॒ḍāśḙ puro॒ḍāśo-'ddhye॒vame॒va ta-dyad-ṛ॒cyaddhya॒kṣarā̭ṇi॒ yajjaga̭tyā [yajjaga̭tyā, pa॒ri॒da॒ddhyādantaṃ̭-] 30

parida॒ddhyādantaṃ̭-ya~॒jña-ṅga̭maye-ttri॒ṣṭubhā॒ pari̭ dadhātīndri॒yaṃ-vai~ vī॒rya̭-ntri॒ṣṭugi̭ndri॒ya e॒va vī॒ryḙ ya॒jña-mprati̭ṣṭhāpayati॒ nānta̭-ṅgamaya॒tyagne॒ trī te॒ vāji̭nā॒ trī ṣa॒dhastheti॒ triva̭tyā॒ pari̭ dadhāti sarūpa॒tvāya॒ sarvo॒ vā e॒ṣa ya॒jño ya-ttrai̭dhāta॒vīya॒-ṅkāmā̭ya-kāmāya॒ prayṷjyate॒ sarve᳚bhyo॒ hi kāme᳚bhyo ya॒jñaḥ pra̭yu॒jyate᳚ traidhāta॒vīyḙna yajetābhi॒cara॒n-thsarvo॒ vā [sarvo॒ vai, e॒ṣa] 31

e॒ṣa ya॒jño ya-ttrai̭dhāta॒vīya॒gṃ॒ sarvḙṇai॒vainaṃ̭-ya~॒jñenā॒bhi ca̭rati stṛṇu॒ta e॒vaina̭me॒tayai॒va ya̭jetābhica॒ryamā̭ṇa॒-ssarvo॒ vā e॒ṣa ya॒jño ya-ttrai̭dhāta॒vīya॒gṃ॒ sarvḙṇai॒va ya॒jñena̭ yajate॒ naina̭mabhi॒cara᳚n-thstṛṇuta e॒tayai॒va ya̭jeta sa॒hasrḙṇa ya॒kṣyamā̭ṇaḥ॒ prajā̭tame॒vaina̭-ddadātye॒tayai॒va ya̭jeta sa॒hasrḙṇejā॒no-'ntaṃ॒-vā~ e॒ṣa pa̭śū॒nā-ṅga̭cchati॒ [-ga̭cchati, ya-ssa॒hasrḙṇa॒] 32

ya-ssa॒hasrḙṇa॒ yaja̭te pra॒jāpa̭tiḥ॒ khalu॒ vai pa॒śūna̭sṛjata॒ tāgstrai̭dhāta॒ vīyḙ-nai॒vāsṛ̭jata॒ ya e॒vaṃ-vi~॒dvāg strai̭dhāta॒vīyḙnapa॒śukā̭mo॒ yaja̭te॒ yasmā̭de॒va yoneḥ᳚ pra॒jāpa̭tiḥ pa॒śūnasṛ̭jata॒ tasmā̭de॒vainā᳚n-thsṛjata॒ upai̭na॒mutta̭ragṃ sa॒hasra̭-nnamati de॒vatā᳚bhyo॒ vā e॒ṣa ā vṛ̭ścyate॒ yo ya॒kṣya ityu॒ktvā na yaja̭te traidhāta॒vīyḙna yajeta॒ sarvo॒ vā e॒ṣa ya॒jño [ya॒jñaḥ, ya-ttrai̭dhāta॒vīya॒gṃ॒] 33

ya-ttrai̭dhāta॒vīya॒gṃ॒ sarvḙṇai॒va ya॒jñena̭ yajate॒ na de॒vatā᳚bhya॒ ā vṛ̭ścyate॒ dvāda̭śakapālaḥ puro॒ḍāśo̭ bhavati॒ te traya॒ścatṷṣkapālā-striṣṣamṛddha॒tvāya॒ trayaḥ̭ puro॒ḍāśā̭ bhavanti॒ traya̭ i॒me lo॒kā e॒ṣāṃ-lo~॒kānā॒māptyā॒ utta̭ra-uttaro॒ jyāyā᳚-nbhavatye॒vami̭va॒ hīme lo॒kā ya̭va॒mayo॒ maddhya̭ e॒tadvā a॒ntari̭kṣasya rū॒pagṃ samṛ̭ddhyai॒ sarvḙṣāmabhiga॒maya॒nnava̭ dya॒tyacha̭baṇṭkāra॒gṃ॒ hira̭ṇya-ndadāti॒ teja̭ e॒vā- [e॒va, ava̭ rundhe] 34

-'va̭ rundhe tā॒rpya-nda̭dāti pa॒śūne॒vāva̭ rundhe dhe॒nu-nda̭dātyā॒śiṣa̭ e॒vāva̭ rundhe॒ sāmno॒ vā e॒ṣa varṇo॒ yaddhira̭ṇyaṃ॒-ya~jṷṣā-ntā॒rpyamṷkthāma॒dānā᳚-ndhe॒nure॒tāne॒va sarvā॒n॒. varṇā॒nava̭ rundhe || 35 ||

(jaga̭tyā - 'bhi॒cara॒n-thsarvo॒ vai - ga̭cchati - ya॒jña - steja̭ e॒va - tri॒gṃ॒śacca̭) (a. 11)

tvaṣṭā̭ ha॒tapṷtro॒ vīndra॒gṃ॒ soma॒mā-'ha̭ra॒-ttasmi॒nnindra̭ upaha॒vamai᳚cchata॒ ta-nnopā᳚hvayata pu॒tra-mmḙ-'vadhī॒riti॒ sa ya̭jñaveśa॒sa-ṅkṛ॒tvā prā॒sahā॒ soma̭mapiba॒-ttasya॒ yada॒tyaśi̭ṣyata॒ ta-ttvaṣṭā̭-''hava॒nīya॒mupa॒ prāva̭rtaya॒-thsvāhendra̭śatrurvardha॒sveti॒ sa yāva̭dū॒rdhvaḥ pa̭rā॒viddhya̭ti॒ tāva̭ti sva॒yame॒va vya̭ramata॒ yadi̭ vā॒ tāva̭-tprava॒ṇa- [tāva̭-tprava॒ṇam, āsī॒dyadi̭] 36

-māsī॒dyadi̭ vā॒ tāva॒daddhya॒gnerāsī॒-thsa sa॒mbhava̭nna॒gnīṣomā̭va॒bhi sama̭bhava॒-thsa i̭ṣumā॒trami̭ṣumātraṃ॒-vi~ṣva̭ṅṅavardhata॒ sa i॒māṃ-lo~॒kāna̭vṛṇo॒dya-di॒māṃ-lo~॒kānavṛ̭ṇo॒-tta-dvṛ॒trasya̭ vṛtra॒tva-ntasmā॒dindro̭-'bibhe॒dapi॒ tvaṣṭā॒ tasmai॒ tvaṣṭā॒ vajra̭masiñca॒-ttapo॒ vai sa vajra̭ āsī॒-ttamudya̭ntu॒-nnāśa̭kno॒datha॒ vai tarhi॒ viṣṇṷ- [viṣṇuḥ̭, a॒nyā] 37

-ra॒nyā de॒vatā̭ ''sī॒-thso᳚-'bravī॒-dviṣṇa॒vehī॒damā ha̭riṣyāvo॒ yenā॒yami॒damiti॒sa viṣṇṷstre॒dhā-''tmānaṃ॒-vi~nya̭dhatta pṛthi॒vyā-ntṛtī̭yama॒ntari̭kṣe॒ tṛtī̭ya-ndi॒vi tṛtī̭ya-mabhiparyāva॒rtā-ddhyabi̭bhe॒dyat-pṛ̭thi॒vyā-ntṛtī̭ya॒māsī॒-ttenendro॒ vajra॒muda̭yaccha॒-dviṣṇva̭nusthita॒-sso᳚-'bravī॒nmā me॒ pra hā॒rasti॒ vā i॒da- [vā i॒dam, mayi̭ vī॒rya̭-nta-tte॒] 38

-mmayi̭ vī॒rya̭-nta-tte॒ pradā᳚syā॒mīti॒ tada̭smai॒ prāya̭ccha॒-tta-tpratya̭gṛhṇā॒dadhā॒ meti॒ ta-dviṣṇa॒ve-'ti॒ prāya̭ccha॒-tta-dviṣṇuḥ॒ pratya̭gṛhṇā-da॒smāsvindra̭ indri॒ya-nda̭dhā॒tviti॒ yada॒ntari̭kṣe॒ tṛtī̭ya॒māsī॒-ttenendro॒ vajra॒muda̭yaccha॒-dviṣṇva̭nusthita॒-sso᳚-'bravī॒nmā me॒ prahā॒rasti॒ vā i॒da- [vā i॒dam, mayi̭ vī॒rya̭-nta-tte॒] 39

-mmayi̭ vī॒rya̭-nta-tte॒ pra dā᳚syā॒mīti॒ tada̭smai॒ prāya̭ccha॒-tta-tpratya̭gṛhṇā॒-ddvirmā̭-'dhā॒ iti॒ ta-dviṣṇa॒ve-'ti॒ prāya̭ccha॒-tta-dviṣṇuḥ॒ pratya̭gṛhṇāda॒smāsvindra̭ indri॒ya-nda̭dhā॒tviti॒ yaddi॒vi tṛtī̭ya॒māsī॒-ttenendro॒ vajra॒muda̭yaccha॒-dviṣṇva̭nusthita॒-sso᳚-'bravī॒nmā me॒ prahā॒ryenā॒ha- [prahā॒ryenā॒ham, i॒damasmi॒ ta-tte॒] 40

-mi॒damasmi॒ ta-tte॒ pradā᳚syā॒mīti॒ tvī(3) itya̭bravī-thsa॒ndhā-ntu sanda̭dhāvahai॒ tvāme॒va pravi̭śā॒nīti॒ yanmā-mpra̭vi॒śeḥ ki-mmā̭ bhuñjyā॒ itya̭bravī॒-ttvāme॒vendhī̭ya॒ tava॒ bhogā̭ya॒ tvā-mpravi̭śeya॒mitya̭bravī॒-ttaṃ-vṛ~॒traḥ prāvi̭śadu॒daraṃ॒-vai~ vṛ॒traḥ, kṣu-tkhalu॒ vai ma̭nu॒ṣya̭sya॒ bhrātṛ̭vyo॒ ya [bhrātṛ̭vyo॒ yaḥ, e॒vaṃ-ve~da॒ hanti॒] 41

e॒vaṃ-ve~da॒ hanti॒ kṣudha॒-mbhrātṛ̭vya॒-ntada̭smai॒ prāya̭ccha॒tta-tpratya̭gṛhṇā॒t- trirmā̭-'dhā॒ iti॒ ta-dviṣṇa॒ve-'ti॒ prāya̭ccha॒-tta-dviṣṇuḥ॒ pratya̭gṛhṇāda॒smāsvindra̭ indri॒ya-nda̭dhā॒tviti॒ yattriḥ prāya̭ccha॒-ttriḥ pra॒tyagṛ̭hṇā॒-tta-ttri॒dhāto᳚stridhātu॒tvaṃ-ya~-dviṣṇṷra॒nvati̭ṣṭhata॒ viṣṇa॒ve-'ti॒ prāya̭ccha॒-ttasmā̭daindrāvaiṣṇa॒vagṃ ha॒virbha̭vati॒ yadvā i॒da-ṅkiñca॒ tada̭smai॒ ta-tprāya̭ccha॒-dṛca॒-ssāmā̭ni॒ yajūgṃ̭ṣi sa॒hasraṃ॒-vā~ a̭smai॒ ta-tprāya̭ccha॒-ttasmā᳚-thsa॒hasra̭dakṣiṇam || 42 ||

(pra॒va॒ṇaṃ - ~viṣṇu॒- rvā i॒da- mi॒da - ma॒haṃ - ~yo - bha̭va॒ - tyeka̭ vigṃśatiśca) (a. 12)

de॒vā vai rā̭ja॒nyā᳚-jjāya̭mānā-dabibhayu॒-stama॒ntare॒va santa॒-ndāmnā 'pau᳚mbha॒n-thsa vā e॒ṣo-'po᳚bdho jāyate॒ ya-drā̭ja॒nyo̭ yadvā e॒ṣo-'na̭pobdho॒ jāyḙta vṛ॒trā-nghnagg śca̭re॒dya-ṅkā॒mayḙta rāja॒nya̭mana̭pobdho jāyeta vṛ॒trā-nghnagg śca̭re॒diti॒ tasmā̭ e॒tamai᳚ndrā bārhaspa॒tya-ñca॒ru-nnirva̭pedai॒ndro vai rā̭ja॒nyo᳚ brahma॒ bṛha॒spati॒ rbrahma̭ṇai॒vaina॒-ndāmno॒-'pombha̭nā-nmuñcati hira॒ṇmaya॒-ndāma॒ dakṣi̭ṇā sā॒kṣāde॒vaina॒-ndāmno॒-'pombha̭nā-nmuñcati || 43 ||

(e॒naṃ॒ - dvāda̭śa ca) (a. 13)

navo̭navo bhavati॒ jāya̭mā॒no-'hnā᳚-ṅke॒turu॒ṣasā̭ me॒tyagre᳚ | bhā॒ga-nde॒vebhyo॒ vida̭dhātyā॒ya-npraca॒ndramā᳚stirati dī॒rghamāyuḥ̭ || yamā̭di॒tyā a॒gṃ॒śumā᳚pyā॒yaya̭nti॒ yamakṣi̭ta॒-makṣi̭tayaḥ॒ piba̭nti | tena̭ no॒ rājā॒ varṷṇo॒ bṛha॒spati॒rā pyā̭yayantu॒ bhuva̭nasya go॒pāḥ ||prācyā᳚-ndi॒śi tvami̭ndrāsi॒ rājo॒todī᳚cyāṃ-vṛ~trahan vṛtra॒hā-'si̭ | yatra॒ yanti̭ sro॒tyāsta- [yanti̭ sro॒tyāstat, ji॒ta-ntḙ] 44

-jji॒ta-ntḙ dakṣiṇa॒to vṛ̭ṣa॒bha ḙdhi॒ havyaḥ̭ || indro̭ jayāti॒ na parā̭ jayātā adhirā॒jo rāja̭su rājayāti | viśvā॒ hi bhū॒yāḥ pṛta̭nā abhi॒ṣṭīrṷpa॒sadyo̭ nama॒syo̭ yathā-'sa̭t || a॒syede॒va prari̭rice mahi॒tva-ndi॒vaḥ pṛ̭thi॒vyāḥ parya॒ntari̭kṣāt | sva॒rāḍindro॒ dama॒ ā vi॒śvagū᳚rta-ssva॒rirama̭tro vavakṣe॒ raṇā̭ya || a॒bhi tvā̭ śūra nonu॒mo-'dṷgdhā iva dhe॒navaḥ̭ | īśā̭na- [īśā̭nam, a॒sya] 45

-ma॒sya jaga̭ta-ssuva॒rdṛśa॒mīśā̭namindra ta॒sthuṣaḥ̭ || tvāmiddhi havā̭mahe sā॒tā vāja̭sya kā॒ravaḥ̭ | tvāṃ-vṛ~॒treṣvi̭ndra॒ satpa̭ti॒-nnara॒stvā-ṅkāṣṭhā॒svarva̭taḥ || yaddyāva̭indrateśa॒tagṃ śa॒ta-mbhūmī̭ru॒ta syuḥ | na tvā̭ vajrin-thsa॒hasra॒gṃ॒ sūryā॒ anu॒ na jā॒tama̭ṣṭa॒ roda̭sī || pibā॒ soma̭mindra॒ manda̭tu tvā॒ yantḙ su॒ṣāva̭ harya॒śvādriḥ̭ | 46

so॒turbā॒hubhyā॒gṃ॒ suya̭to॒ nārvā᳚ || re॒vatī᳚rna-ssadha॒māda॒ indrḙ santu tu॒vivā̭jāḥ | kṣu॒manto॒ yābhi॒rmadḙma || uda̭gne॒ śuca̭ya॒stava॒ , vi jyoti॒ṣo,du॒ tya-ñjā॒tavḙdasagṃsa॒pta tvā̭ ha॒rito॒ rathe॒ vaha̭nti deva sūrya | śo॒ciṣkḙśaṃ-vi~cakṣaṇa || ci॒tra-nde॒vānā॒muda̭gā॒danī̭ka॒-ñcakṣṷrmi॒trasya॒ varṷṇasyā॒-'gneḥ | ā-'prā॒ dyāvā̭pṛthi॒vī a॒ntari̭kṣa॒gṃ॒ sūrya̭ ā॒tmā jaga̭tasta॒sthuṣa̭- [jaga̭tasta॒sthuṣaḥ̭, ca |] 47

-śca || viśvḙ de॒vā ṛ̭tā॒vṛdha̭ ṛ॒tubhi̭r-havana॒śrutaḥ̭ | ju॒ṣantāṃ॒-yu~jya॒-mpayaḥ̭ || viśvḙ devā-śśṛṇu॒temagṃ hava̭-mme॒ ye a॒ntari̭kṣe॒ ya upa॒ dyavi॒ṣṭha | ye a̭gniji॒hvā u॒ta vā॒ yaja̭trā ā॒sadyā॒smi-nba॒r॒hiṣi̭ mādayaddhvam || 48 ||

(ta - dīśā̭na॒ - madri̭ - sta॒sthuṣa̭ - stri॒gṃ॒śacca̭) (a. 14)

(de॒vā ma̭nu॒ṣyā̭ - devasu॒rā a̭bruvan - devāsu॒rāsteṣā᳚-ṅgāya॒trī - pra॒jāpa̭ti॒stā yatrā-' - gne॒ gobhiḥ̭ - ci॒trayā̭ - māru॒taṃ - devā̭ vasavyā॒ agnḙ - māru॒tamiti॒ - devā̭ vasavyā॒ devā᳚-śśarmaṇyāḥ॒ - sarvā̭ṇi॒ - tvaṣṭā̭ ha॒tapṷtro - de॒vā vai rā̭ja॒nyā᳚n - navo̭nava॒ - ścatṷrdaśa )

(de॒vā ma̭nu॒ṣyāḥ᳚ - pra॒jā-mpa॒śun - devā̭ vasavyāḥ - parida॒dhyadi॒da- masmya॒ - ṣṭā ca̭tvārigṃśat )

(de॒vā ma̭nu॒ṣyā̭, mādayadhvaṃ)

|| hariḥ̭ om ||

|| kṛṣṇa yajurvedīya taittirīya saṃhitāyā-ndvitīyakāṇḍe caturthaḥ praśna-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय संहिताया-न्द्वितीयकाण्डे चतुर्थः प्रश्नः - इष्टिविधानं

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

दे॒वा म॑नु॒ष्याः᳚ पि॒तर॒स्ते᳚-ऽन्यत॑ आस॒न्नसु॑रा॒ रक्षाग्ं॑सि पिशा॒चास्ते᳚ ऽन्यत॒स्तेषा᳚-न्दे॒वाना॑मु॒त यदल्पं॒-लोँहि॑त॒मकु॑र्व॒-न्त-द्रक्षाग्ं॑सि॒ रात्री॑भिरसुभ्न॒-न्तान्-थ्सु॒ब्धा-न्मृ॒तान॒भि व्यौ᳚च्छ॒-त्ते दे॒वा अ॑विदु॒र्यो वै नो॒-ऽय-म्म्रि॒यते॒ रक्षाग्ं॑सि॒ वा इ॒म-ङ्घ्न॒न्तीति॒ ते रक्षा॒ग्॒स्युपा॑मन्त्रयन्त॒ तान्य॑ब्रुव॒न्. वरं॑-वृँणामहै॒ य- [यत्, असु॑रा॒न् जया॑म॒] 1

-दसु॑रा॒न् जया॑म॒ तन्नः॑ स॒हास॒दिति॒ ततो॒ वै दे॒वा असु॑रानजय॒-न्ते-ऽसु॑रान् जि॒त्वारक्षा॒ग्॒स्यपा॑नुदन्त॒ तानि॒ रक्षा॒ग्॒स्यनृ॑तम क॒र्तेति॑ सम॒न्त-न्दे॒वा-न्पर्य॑विश॒-न्ते दे॒वा अ॒ग्नाव॑नाथन्त॒ ते᳚-ऽग्नये॒ प्रव॑ते पुरो॒डाश॑म॒ष्टाक॑पाल॒-न्निर॑वपन्न॒ग्नये॑ विबा॒धव॑ते॒-ऽग्नये॒ प्रती॑कवते॒ यद॒ग्नये॒ प्रव॑ते नि॒रव॑प॒न्॒. यान्ये॒व पु॒रस्ता॒-द्रक्षा॒ग्॒- [पु॒रस्ता॒-द्रक्षा॒ग्ं॑सि, आ॒स॒न्तानि॒ तेन॒] 2

-स्यास॒न्तानि॒ तेन॒ प्राणु॑दन्त॒ यद॒ग्नये॑ विबा॒धव॑ते॒ यान्ये॒वाभितो॒ रक्षा॒ग्॒स्यास॒-न्तानि॒ तेन॒ व्य॑बाधन्त॒ यद॒ग्नये॒ प्रती॑कवते॒ यान्ये॒व प॒श्चा-द्रक्षा॒ग्॒स्यास॒-न्तानि॒ तेनापा॑नुदन्त॒ ततो॑ दे॒वा अभ॑व॒-न्परासु॑रा॒ यो भ्रातृ॑व्यवा॒न्-थ्स्या-थ्स स्पर्ध॑मान ए॒तयेष्ट्या॑ यजेता॒ग्नये॒ प्रव॑ते पुरो॒डाश॑म॒ष्टाक॑पाल॒-न्निर्व॑पेद॒ग्नये॑ विबा॒धव॑ते॒- [विबा॒धव॑ते॒, अ॒ग्नये॒ प्रती॑कवते॒] 3

-ऽग्नये॒ प्रती॑कवते॒ यद॒ग्नये॒ प्रव॑ते नि॒र्वप॑ति॒ य ए॒वास्मा॒च्छ्रेया॒न्-भ्रातृ॑व्य॒स्त-न्तेन॒ प्रणु॑दते॒ यद॒ग्नये॑ विबा॒धव॑ते॒ य ए॒वैने॑न स॒दृन्त-न्तेन॒ वि बा॑धते॒ यद॒ग्नये॒ प्रती॑कवते॒ य ए॒वास्मा॒-त्पापी॑या॒-न्त-न्तेनाप॑ नुदते॒ प्र श्रेयाग्ं॑स॒-म्भ्रातृ॑व्य-न्नुद॒तेति॑ स॒दृश॑-ङ्क्रामति॒ नैन॒-म्पापी॑यानाप्नोति॒ य ए॒वं ँवि॒द्वाने॒तयेष्ट्या॒ यज॑ते ॥ 4 ॥

(वृ॒णा॒म॒है॒ यत् - पु॒रस्ता॒-द्रक्षाग्ं॑सि- वपेद॒ग्नये॑ विबा॒धव॑त - ए॒वं - च॒त्वारि॑ च) (अ. 1)

दे॒वा॒सु॒रा-स्संयँ॑त्ता आस॒-न्ते दे॒वा अ॑ब्रुव॒न्॒. यो नो॑ वी॒र्या॑वत्तम॒स्तमनु॑ स॒मार॑भामहा॒ इति॒ त इन्द्र॑मब्रुव॒-न्त्वं-वैँ नो॑ वी॒र्या॑वत्तमो-ऽसि॒ त्वामनु॑ स॒मार॑भामहा॒ इति॒ सो᳚-ऽब्रवी-त्ति॒स्रो म॑ इ॒मास्त॒नुवो॑ वी॒र्या॑वती॒स्ताः प्री॑णी॒ताथा-सु॑रान॒भि भ॑विष्य॒थेति॒ ता वै ब्रू॒हीत्य॑ब्रुवन्नि॒यमग्ं॑ हो॒मुगि॒यं-विँ॑मृ॒धेय-मि॑न्द्रि॒याव॒ती- [-मि॑न्द्रि॒याव॒ती, इत्य॑ब्रवी॒त्त] 5

-त्य॑ब्रवी॒त्त इन्द्रा॑याग्ं हो॒मुचे॑ पुरो॒डाश॒मेका॑दशकपाल॒-न्निर॑वप॒न्निन्द्रा॑य वैमृ॒धाये-न्द्रा॑येन्द्रि॒याव॑ते॒ यदिन्द्रा॑याग्ं हो॒मुचे॑ नि॒रव॑प॒न्नग्ंह॑स ए॒व तेना॑मुच्यन्त॒ यदिन्द्रा॑य वै मृ॒धाय॒ मृध॑ ए॒व तेनापा᳚घ्नत॒यदिन्द्रा॑येन्द्रि॒याव॑त इन्द्रि॒यमे॒व तेना॒-ऽऽत्मन्न॑दधत॒ त्रय॑स्त्रिग्ंशत्कपाल-म्पुरो॒डाश॒-न्निर॑वप॒-न्त्रय॑स्त्रिग्ंश॒द्वै दे॒वता॒स्ता इन्द्र॑ आ॒त्मन्ननु॑ स॒मार॑भंयँत॒ भूत्यै॒ [भूत्यै᳚, तां-वाँव] 6

तां-वाँव दे॒वा विजि॑ति-मुत्त॒मा-मसु॑रै॒-र्व्य॑जयन्त॒यो भ्रातृ॑व्यवा॒न्थ्- स्या-थ्स स्पर्ध॑मान ए॒तयेष्ट्या॑ यजे॒तेन्द्रा॑याग्ं हो॒मुचे॑ पुरो॒डाश॒मेका॑दशकपाल॒-न्निर्व॑पे॒दिन्द्रा॑य वैमृ॒धायेन्द्रा॑येन्द्रि॒याव॒ते-ऽग्ं ह॑सा॒ वा ए॒ष गृ॑ही॒तो यस्मा॒च्छ्रेया॒-न्भ्रातृ॑व्यो॒यदिन्द्रा॑याग्ं हो॒मुचे॑ नि॒र्वप॒त्यग्ंह॑स ए॒व तेन॑ मुच्यतेमृ॒धा वा ए॒षो॑-ऽभिष॑ण्णो॒ यस्मा᳚-थ्समा॒नेष्व॒न्य-श्श्रेया॑नु॒ता- [श्रेया॑नु॒त, अ-ऽभ्रा॑तृव्यो॒] 7

-ऽभ्रा॑तृव्यो॒ यदिन्द्रा॑य वैमृ॒धाय॒ मृध॑ ए॒व तेनाप॑ हते॒यदिन्द्रा॑येन्द्रि॒याव॑त इन्द्रि॒यमे॒व तेना॒त्म-न्ध॑त्ते॒ त्रय॑स्त्रिग्ंशत्कपाल-म्पुरो॒डाश॒-न्निर्व॑पति॒ त्रय॑स्त्रिग्ंश॒द्वै दे॒वता॒स्ता ए॒व यज॑मान आ॒त्मन्ननु॑ स॒मार॑भंयँते॒ भूत्यै॒ सा वा ए॒षा विजि॑ति॒र्नामेष्टि॒र्य ए॒वं-विँ॒द्वाने॒तयेष्ट्या॒ यज॑त उत्त॒मामे॒व विजि॑ति॒-म्भ्रातृ॑व्येण॒ वि ज॑यते ॥ 8 ॥

(इ॒न्द्रि॒याव॑ती॒ - भूत्या॑ - उ॒तै - का॒न्न प॑ञ्चा॒शच्च॑) (अ. 2)

दे॒वा॒सु॒रा-स्संयँ॑त्ता आस॒-न्तेषा᳚-ङ्गाय॒त्र्योजो॒ बल॑मिन्द्रि॒यं-वीँ॒र्य॑-म्प्र॒जा-म्प॒शून्-थ्स॒गृंह्या॒ ऽऽदाया॑-प॒क्रम्या॑तिष्ठ॒-त्ते॑-ऽमन्यन्त यत॒रान्. वा इ॒यमु॑पाव॒र्थ्स्यति॒ त इ॒द-म्भ॑विष्य॒न्तीति॒ तां-व्यँ॑ह्वयन्त॒ विश्व॑कर्म॒न्निति॑ दे॒वा दाभीत्यसु॑रा॒-स्सा नान्य॑त॒राग्श्च॒-नोपाव॑र्तत॒ ते दे॒वा ए॒त-द्यजु॑रपश्य॒न्नोजो॑-ऽसि॒ सहो॑-ऽसि॒ बल॑मसि॒ [बल॑मसि, भ्राजो॑-ऽसि] 9

भ्राजो॑-ऽसि दे॒वाना॒-न्धाम॒ नामा॑-ऽसि॒ विश्व॑मसि वि॒श्वायु॒-स्सर्व॑मसि स॒र्वायु॑रभि॒भूरिति॒ वाव दे॒वा असु॑राणा॒मोजो॒ बल॑मिन्द्रि॒यं-वीँ॒र्य॑-म्प्र॒जा-म्प॒शून॑वृञ्जत॒ य-द्गा॑य॒त्र्य॑प॒क्रम्याति॑ष्ठ॒-त्तस्मा॑दे॒ता-ङ्गा॑य॒त्रीतीष्टि॑माहु-स्संवँथ्स॒रो वै गा॑य॒त्री सं॑वँथ्स॒रो वै तद॑प॒क्रम्या॑तिष्ठ॒-द्यदे॒तया॑ दे॒वा असु॑राणा॒मोजो॒ बल॑मिन्द्रि॒यं-वीँ॒र्य॑- [बल॑मिन्द्रि॒यं-वीँ॒र्य᳚म्, प्र॒जा-म्प॒शू-] 10

-म्प्र॒जा-म्प॒शू-नवृ॑ञ्जत॒ तस्मा॑दे॒ताग्ं सं॑वँ॒र्ग इतीष्टि॑माहु॒र्यो भ्रातृ॑व्यवा॒न्थ्स्या-थ्सस्पर्ध॑मान ए॒तयेष्ट्या॑ यजेता॒ग्नये॑ संवँ॒र्गाय॑ पुरो॒डाश॑म॒ष्टाक॑पाल॒-न्निर्व॑पे॒त्तग्ंशृ॒तमास॑न्नमे॒तेन॒ यजु॑षा॒-ऽभि मृ॑शे॒दोज॑ ए॒व बल॑मिन्द्रि॒यं-वीँ॒र्य॑-म्प्र॒जा-म्प॒शू-न्भ्रातृ॑व्यस्य वृङ्क्ते॒ भव॑त्या॒त्मना॒ परा᳚स्य॒ भ्रातृ॑व्यो भवति ॥ 11

(बल॑मस्ये॒ - तया॑ दे॒वा असु॑राणा॒मोजो॒ बल॑मिन्द्रि॒यं-वीँ॒र्यं॑ - पञ्च॑चत्वारिग्ंशच्च) (अ. 3)

प्र॒जाप॑तिः प्र॒जा अ॑सृजत॒ ता अ॑स्मा-थ्सृ॒ष्टाः परा॑चीराय॒-न्ता यत्राव॑स॒-न्ततो॑ ग॒र्मुदुद॑तिष्ठ॒-त्ता बृह॒स्पति॑श्चा॒न्ववै॑ता॒ग्ं॒ सो᳚-ऽब्रवी॒-द्बृह॒स्पति॑र॒नया᳚ त्वा॒ प्रति॑ष्ठा॒न्यथ॑ त्वा प्र॒जा उ॒पाव॑र्थ्स्य॒न्तीति॒ त-म्प्राति॑ष्ठ॒-त्ततो॒ वै प्र॒जाप॑ति-म्प्र॒जा उ॒पाव॑र्तन्त॒ यः प्र॒जाका॑म॒-स्स्या-त्तस्मा॑ ए॒त-म्प्रा॑जाप॒त्य-ङ्गा᳚र्मु॒त-ञ्च॒रु-न्निर्व॑पे-त्प्र॒जाप॑ति- [-निर्व॑पे-त्प्र॒जाप॑तिम्, ए॒व स्वेन॑] 12

-मे॒व स्वेन॑ भाग॒धेये॒नोप॑ धावति॒ स ए॒वास्मै᳚ प्र॒जा-म्प्रज॑नयतिप्र॒जाप॑तिः प॒शून॑सृजत॒ ते᳚-ऽस्मा-थ्सृ॒ष्टाः परा᳚ञ्च आय॒-न्ते यत्राव॑स॒-न्ततो॑ ग॒र्मुदुद॑तिष्ठ॒-त्ता-न्पू॒षा चा॒न्ववै॑ता॒ग्ं॒ सो᳚-ऽब्रवी-त्पू॒षा-ऽनया॑ मा॒ प्रति॒ष्ठाथ॑ त्वा प॒शव॑ उ॒पाव॑र्थ्स्य॒न्तीति॒ मा-म्प्रति॒ष्ठेति॒ सोमो᳚-ऽब्रवी॒-न्मम॒ वा [-मम॒ वै, अ॒कृ॒ष्ट॒प॒च्यमित्यु॒भौ] 13

अ॑कृष्टप॒च्यमित्यु॒भौ वा॒-म्प्रति॑ष्ठा॒नीत्य॑ब्रवी॒-त्तौ प्राति॑ष्ठ॒-त्ततो॒ वै प्र॒जाप॑ति-म्प॒शव॑ उ॒पाव॑र्तन्त॒ यः प॒शुका॑म॒-स्स्या-त्तस्मा॑ ए॒तग्ं सो॑मापौ॒ष्ण-ङ्गा᳚र्मु॒त-ञ्च॒रु-न्निर्व॑पे-थ्सोमापू॒षणा॑वे॒व स्वेन॑ भाग॒धेये॒नोप॑ धावति॒ तावे॒वास्मै॑ प॒शू-न्प्रज॑नयत॒-स्सोमो॒ वै रे॑तो॒धाः पू॒षा प॑शू॒ना-म्प्र॑जनयि॒ता सोम॑ ए॒वास्मै॒ रेतो॒ दधा॑ति पू॒षा प॒शू-न्प्रज॑नयति ॥ 14 ॥

(व॒पे॒-त्प्र॒जाप॑तिं॒ - ँवै - दधा॑ति पू॒षा - त्रीणि॑ च) (अ. 4)

अग्ने॒ गोभि॑र्न॒ आ ग॒हीन्दो॑ पु॒ष्ट्या जु॑षस्व नः । इन्द्रो॑ ध॒र्ता गृ॒हेषु॑ नः ॥ स॒वि॒ता य-स्स॑ह॒स्रिय॒-स्स नो॑ गृ॒हेषु॑ रारणत् । आ पू॒षा ए॒त्वा वसु॑ ॥ धा॒ता द॑दातु नो र॒यिमीशा॑नो॒ जग॑त॒स्पतिः॑ । स नः॑ पू॒र्णेन॑ वावनत् ॥ त्वष्टा॒ यो वृ॑ष॒भो वृषा॒ स नो॑ गृ॒हेषु॑ रारणत् । स॒हस्रे॑णा॒युते॑न च ॥ येन॑ दे॒वा अ॒मृत॑- [अ॒मृत᳚म्, दी॒र्घग्ग् श्रवो॑ दि॒व्यैर॑यन्त ।] 15

-न्दी॒र्घग्ग् श्रवो॑ दि॒व्यैर॑यन्त । राय॑स्पोष॒ त्वम॒स्मभ्य॒-ङ्गवा᳚ङ्कु॒ल्मि-ञ्जी॒वस॒ आ यु॑वस्व ॥ अ॒ग्नि र्गृ॒हप॑ति॒-स्सोमो॑ विश्व॒वनिः॑ सवि॒ता सु॑मे॒धा-स्स्वाहा᳚ ॥ अग्ने॑ गृहपते॒ यस्ते॒ घृत्यो॑ भा॒गस्तेन॒ सह॒ ओज॑ आ॒क्रम॑माणाय धेहि॒ श्रैष्ठ्या᳚त्प॒थो मा यो॑ष-म्मू॒र्धा भू॑यास॒ग्ग्॒ स्वाहा᳚ ॥ 16 ॥

(अ॒मृत॑ - म॒ष्टात्रिग्ं॑शच्च) (अ. 5)

चि॒त्रया॑ यजेत प॒शुका॑म इ॒यं-वैँ चि॒त्रा यद्वा अ॒स्यां-विँश्व॑-म्भू॒तमधि॑ प्र॒जाय॑ते॒ ते ने॒यञ्चि॒त्रा य ए॒वं-विँ॒द्वाग् श्चि॒त्रया॑ प॒शुका॑मो॒ यज॑ते॒ प्र प्र॒जया॑ प॒शुभि॑ र्मिथु॒नै र्जा॑यते॒ प्रैवाग्ने॒येन॑ वापयति॒ रेतः॑ सौ॒म्येन॑ दधाति॒ रेत॑ ए॒व हि॒त-न्त्वष्टा॑ रू॒पाणि॒ वि क॑रोतिसारस्व॒तौ भ॑वत ए॒तद्वै दैव्य॑-म्मिथु॒न-न्दैव्य॑मे॒वास्मै॑ [-दैव्य॑मे॒वास्मै᳚, मि॒थु॒न-म्म॑द्ध्य॒तो] 17

मिथु॒न-म्म॑द्ध्य॒तो द॑धाति॒ पुष्ट्यै᳚ प्र॒जन॑नाय सिनीवा॒ल्यै च॒रुर्भ॑वति॒ वाग्वै सि॑नीवा॒ली पुष्टिः॒ खलु॒ वै वाक्पुष्टि॑मे॒व वाच॒मुपै᳚त्यै॒न्द्र उ॑त्त॒मो भ॑वति॒ तेनै॒व तन्मि॑थु॒नग्ं स॒प्तैतानि॑ ह॒वीग्ंषि॑ भवन्ति स॒प्त ग्रा॒म्याः प॒शवः॑ स॒प्तार॒ण्या-स्स॒प्त छन्दाग्॑स्यु॒-भय॒स्या-व॑रुद्ध्या॒ अथै॒ता आहु॑ती र्जुहोत्ये॒ते वै दे॒वाः पुष्टि॑पतय॒स्त ए॒वा स्मि॒-न्पुष्टि॑-न्दधति॒ पुष्य॑ति प्र॒जया॑ प॒शुभि॒रथो॒ यदे॒ता आहु॑ती र्जु॒होति॒ प्रति॑ष्ठित्यै ॥ 18 ॥

(अ॒स्मै॒ - त ए॒व - द्वाद॑श च) (अ. 6)

मा॒रु॒तम॑सि म॒रुता॒मोजो॒-ऽपा-न्धारा᳚-म्भिन्धि र॒मय॑त मरुत-श्श्ये॒नमा॒यिन॒-म्मनो॑जव सं॒-वृँष॑णग्ं सुवृ॒क्तिम् ॥ येन॒ शर्ध॑ उ॒ग्रमव॑-सृष्ट॒मेति॒ तद॑श्विना॒ परि॑ धत्तग्ग् स्व॒स्ति । पु॒रो॒वा॒तो वर्ष॑ञ्जि॒न्वरा॒वृ-थ्स्वाहा॑ वा॒तावद्- वर्ष॑न्नु॒ग्ररा॒वृ-थ्स्वाहा᳚ स्त॒नय॒न् वर्ष॑-न्भी॒मरा॒वथ्स्वाहा॑ ऽनश॒न्य॑व॒स्फूर्ज॑न्-दि॒द्यु-द्वर्ष॑न्-त्वे॒षरा॒वृ-थ्स्वाहा॑ ऽतिरा॒त्रं॒-वँर्ष॑-न्पू॒र्तिरा॒वृ- [-पू॒र्तिरा॒वृत्, स्वाहा॑ ब॒हु] 19

-थ्स्वाहा॑ ब॒हु हा॒यम॑वृषा॒दिति॑ श्रु॒तरा॒वृ-थ्स्वाहा॒ ऽऽतप॑ति॒ वर्ष॑न्-वि॒राडा॒वृ-थ्स्वाहा॑ ऽव॒स्फूर्ज॑न्-दि॒द्यु-द्वर्ष॑-न्भू॒तरा॒वृ-थ्स्वाहा॒मान्दा॒ वाशा॒-श्शुन्ध्यू॒रजि॑राः । ज्योति॑ष्मती॒-स्तम॑स्वरी॒-रुन्द॑ती॒-स्सुफे॑नाः । मित्र॑भृतः॒, क्षत्र॑भृत॒-स्सुरा᳚ष्ट्रा इ॒ह मा॑-ऽवत ॥वृष्णो॒ अश्व॑स्य स॒न्दान॑मसि॒ वृष्ट्यै॒ त्वोप॑ नह्यामि ॥ 20 ॥

(पू॒र्तिरा॒वृ-द्- द्विच॑त्वारिग्ंशच्च) (अ. 7)

देवा॑ वसव्या॒ अग्ने॑ सोम सूर्य ॥ देवा᳚-श्शर्मण्या॒ मित्रा॑वरुणा-ऽर्यमन्न् ॥ देवा᳚-स्सपीत॒यो ऽपा᳚-न्नपादाशुहेमन्न् । उ॒द्नो द॑त्तोद॒धि-म्भि॑न्त्त दि॒वः प॒र्जन्या॑द॒न्तरि॑क्षात्-पृथि॒व्यास्ततो॑ नो॒ वृष्ट्या॑-ऽवत ॥ दिवा॑ चि॒त्तमः॑ कृण्वन्ति प॒र्जन्ये॑नो-दवा॒हेन॑ । पृ॒थि॒वीं-यँ-द्व्यु॒न्दन्ति॑ ॥ आय-न्नरः॑ सु॒दान॑वो ददा॒शुषे॑ दि॒वः कोश॒मचु॑च्यवुः । वि प॒र्जन्या᳚-स्सृजन्ति॒ रोद॑सी॒ अनु॒ धन्व॑ना यन्ति [ ] 21

वृ॒ष्टयः॑ ॥ उदी॑रयथा मरुत-स्समुद्र॒तो यू॒यं-वृँ॒ष्टिं-वँ॑र्षयथा पुरीषिणः । न वो॑ दस्रा॒ उप॑ दस्यन्ति धे॒नव॒-श्शुभं॑-याँ॒तामनु॒ रथा॑ अवृथ्सत ॥ सृ॒जा वृ॒ष्टि-न्दि॒व आ-ऽद्भि-स्स॑मु॒द्र-म्पृ॑ण ॥ अ॒ब्जा अ॑सि प्रथम॒जा बल॑मसि समु॒द्रिय᳚म् ॥ उन्न॑म्भय पृथि॒वी-म्भि॒न्धीद-न्दि॒व्य-न्नभः॑ । उ॒द्नो दि॒व्यस्य॑ नो दे॒हीशा॑नो॒ विसृ॑जा॒ दृति᳚म् ॥ ये दे॒वा दि॒विभा॑गा॒ ये᳚-ऽन्तरि॑क्ष भागा॒ ये पृ॑थि॒वि भा॑गाः । त इ॒मं-यँ॒ज्ञम॑वन्तु॒ त इ॒द-ङ्क्षेत्र॒मा वि॑शन्तु॒ त इ॒द-ङ्क्षेत्र॒मनु॒ वि वि॑शन्तु ॥ 22 ॥

(य॒न्ति॒ - दे॒वा - विग्ं॑श॒तिश्च॑) (अ. 8)

मा॒रु॒तम॑सि म॒रुता॒मोज॒ इति॑ कृ॒ष्णं-वाँसः॑ कृ॒ष्णतू॑ष॒-म्परि॑ धत्त ए॒तद्वै वृष्ट्यै॑ रू॒पग्ं सरू॑प ए॒व भू॒त्वा प॒र्जन्यं॑-वँर्षयतिर॒मय॑त मरुत-श्श्ये॒नमा॒यिन॒मिति॑ पश्चाद्वा॒त-म्प्रति॑ मीवति पुरोवा॒तमे॒व ज॑नयति व॒र्॒षस्या व॑रुद्ध्यै वातना॒मानि॑ जुहोति वा॒युर्वै वृष्ट्या॑ ईशे वा॒युमे॒व स्वेन॑ भाग॒धेये॒नोप॑ धावति॒ स ए॒वास्मै॑ प॒र्जन्यं॑-वँर्षयत्य॒ष्टौ [वर्षयत्य॒ष्टौ, जु॒हो॒ति॒ चत॑स्रो॒ वै] 23

जु॑होति॒ चत॑स्रो॒ वै दिश॒श्चत॑स्रो-ऽवान्तरदि॒शा दि॒ग्भ्य ए॒व वृष्टि॒ग्ं॒ स-म्प्र च्या॑वयति कृष्णाजि॒ने संयौँ॑ति ह॒विरे॒वाक॑रन्तर्वे॒दि संयौँ॒त्य व॑रुद्ध्यै॒ यती॑नाम॒द्यमा॑नानाग्ं शी॒र्॒षाणि॒ परा॑-ऽपत॒न्ते ख॒र्जूरा॑ अभव॒न्-तेषा॒ग्ं॒ रस॑ ऊ॒र्ध्वो॑-ऽपत॒त्-तानि॑ क॒रीरा᳚ण्य-भवन्-थ्सौ॒म्यानि॒ वै क॒रीरा॑णि सौ॒म्या खलु॒ वा आहु॑ति र्दि॒वो वृष्टि॑-ञ्च्यावयति॒ यत्क॒रीरा॑णि॒ भव॑न्ति [ ] 24

सौ॒म्ययै॒वा-ऽऽहु॑त्या दि॒वो वृष्टि॒मव॑ रुन्धे॒ मधु॑षा॒ सं-यौँ᳚त्य॒पां-वाँ ए॒ष ओष॑धीना॒ग्ं॒ रसो॒ यन्मद्ध्व॒द्भ्य ए॒वौष॑धीभ्यो वर्ष॒त्यथो॑ अ॒द्भ्य ए॒वौष॑धीभ्यो॒ वृष्टि॒नि-न्न॑यति॒ मान्दा॒ वाशा॒ इति॒ संयौँ॑ति नाम॒धेयै॑रे॒वैना॒ अच्छै॒त्यथो॒ यथा᳚ ब्रू॒यादसा॒ वेहीत्ये॒वमे॒वैना॑ नाम॒धेयै॒रा - [नाम॒धेयै॒रा, च्या॒व॒य॒ति॒ वृष्णो॒] 25

च्या॑वयति॒ वृष्णो॒ अश्व॑स्य स॒न्दान॑मसि॒ वृष्ट्यै॒ त्वोप॑ नह्या॒मीत्या॑ह॒ वृषा॒ वा अश्वो॒ वृषा॑ प॒र्जन्यः॑ कृ॒ष्ण इ॑व॒ खलु॒ वै भू॒त्वा व॑र्षति रू॒पेणै॒वैन॒ग्ं॒ सम॑र्धयति व॒र्॒षस्या व॑रुद्ध्यै ॥ 26 ॥

(अ॒ष्टौ - भव॑न्ति - नाम॒धेयै॒रै - का॒न्न त्रि॒ग्ं॒शच्च॑) (अ. 9)

देवा॑ वसव्या॒ देवा᳚-श्शर्मण्या॒ देवा᳚-स्सपीतय॒ इत्या ब॑द्ध्नाति दे॒वता॑भिरे॒वान्व॒हं-वृँष्टि॑मिच्छति॒ यदि॒ वर्षे॒त्-ताव॑त्ये॒व हो॑त॒व्यं॑-यँदि॒ न वर्षे॒च्छ्वो भू॒ते ह॒विर्निर्व॑पेदहोरा॒त्रे वै मि॒त्रावरु॑णावहोरा॒त्राभ्या॒-ङ्खलु॒ वै प॒र्जन्यो॑ वर्षति॒ नक्तं॑-वाँ॒ हि दिवा॑ वा॒ वर्ष॑ति मि॒त्रावरु॑णावे॒व स्वेन॑ भाग॒धेये॒नोप॑ धावति॒ तावे॒वास्मा॑ [तावे॒वास्मै᳚, अ॒हो॒रा॒त्राभ्यां᳚-] 27

अहोरा॒त्राभ्या᳚-म्प॒र्जन्यं॑ ँवर्षयतो॒-ऽग्नये॑ धाम॒च्छदे॑ पुरो॒डाश॑म॒ष्टाक॑पाल॒-न्निर्व॑पेन्मारु॒तग्ं स॒प्तक॑पालग्ं सौ॒र्यमेक॑कपालम॒ग्निर्वा इ॒तो वृष्टि॒मुदी॑रयति म॒रुतः॑ सृ॒ष्टा-न्न॑यन्ति य॒दा खलु॒ वा अ॒सावा॑दि॒त्यो न्यं॑-र॒श्मिभिः॑ पर्या॒वर्त॒ते-ऽथ॑वर्षतिधाम॒च्छदि॑व॒ खलु॒ वै भू॒त्वा व॑र्षत्ये॒ता वै दे॒वता॒ वृष्ट्या॑ ईशते॒ ता ए॒व स्वेन॑ भाग॒धेये॒नोप॑ धावति॒ ता [भाग॒धेये॒नोप॑ धावति॒ ताः, ए॒वास्मै॑] 28

ए॒वास्मै॑ प॒र्जन्यं॑-वँर्षयन्त्यु॒ता व॑र्षिष्य॒न् वर्ष॑त्ये॒व सृ॒जा वृ॒ष्टि-न्दि॒व आ-ऽद्भि-स्स॑मु॒द्र-म्पृ॒णेत्या॑हे॒माश्चै॒वा-मूश्चा॒प-स्सम॑र्धय॒त्यथो॑ आ॒भिरे॒वा-मूरच्छै᳚त्य॒ब्जा अ॑सि प्रथम॒जा बल॑मसि समु॒द्रिय॒मित्या॑ह यथाय॒जुरे॒वैत-दुन्न॑-म्भय पृथि॒वीमिति॑ वर्षा॒ह्वा-ञ्जु॑होत्ये॒षा वा ओष॑धीनां-वृँष्टि॒वनि॒स्तयै॒व वृष्टि॒मा च्या॑वयति॒ ये दे॒वा दि॒विभा॑गा॒ इति॑ कृष्णाजि॒नमव॑ धूनोती॒म ए॒वास्मै॑ लो॒काः प्री॒ता अ॒भीष्टा॑ भवन्ति ॥ 29 ॥

(अ॒स्मै॒ - धा॒व॒ति॒ ता - वा - एक॑विग्ंशतिश्च ) (अ. 10)

सर्वा॑णि॒ छन्दाग्॑स्ये॒तस्या॒-मिष्ट्या॑-म॒नूच्या॒नीत्या॑हु-स्त्रि॒ष्टुभो॒ वा ए॒तद्वी॒र्यं॑-यँ-त्क॒कुदु॒ष्णिहा॒ जग॑त्यै॒ यदु॑ष्णिह-क॒कुभा॑व॒न्वाह॒ तेनै॒व सर्वा॑णि॒ छन्दा॒ग्॒स्यव॑ रुन्धे गाय॒त्री वा ए॒षा यदु॒ष्णिहा॒ यानि॑ च॒त्वार्यद्ध्य॒क्षरा॑णि॒ चतु॑ष्पाद ए॒व ते प॒शवो॒यथा॑ पुरो॒डाशे॑ पुरो॒डाशो-ऽद्ध्ये॒वमे॒व त-द्यद्-ऋ॒च्यद्ध्य॒क्षरा॑णि॒ यज्जग॑त्या [यज्जग॑त्या, प॒रि॒द॒द्ध्यादन्तं॑-] 30

परिद॒द्ध्यादन्तं॑-यँ॒ज्ञ-ङ्ग॑मये-त्त्रि॒ष्टुभा॒ परि॑ दधातीन्द्रि॒यं-वैँ वी॒र्य॑-न्त्रि॒ष्टुगि॑न्द्रि॒य ए॒व वी॒र्ये॑ य॒ज्ञ-म्प्रति॑ष्ठापयति॒ नान्त॑-ङ्गमय॒त्यग्ने॒ त्री ते॒ वाजि॑ना॒ त्री ष॒धस्थेति॒ त्रिव॑त्या॒ परि॑ दधाति सरूप॒त्वाय॒ सर्वो॒ वा ए॒ष य॒ज्ञो य-त्त्रै॑धात॒वीय॒-ङ्कामा॑य-कामाय॒ प्रयु॑ज्यते॒ सर्वे᳚भ्यो॒ हि कामे᳚भ्यो य॒ज्ञः प्र॑यु॒ज्यते᳚ त्रैधात॒वीये॑न यजेताभि॒चर॒न्-थ्सर्वो॒ वा [सर्वो॒ वै, ए॒ष] 31

ए॒ष य॒ज्ञो य-त्त्रै॑धात॒वीय॒ग्ं॒ सर्वे॑णै॒वैनं॑-यँ॒ज्ञेना॒भि च॑रति स्तृणु॒त ए॒वैन॑मे॒तयै॒व य॑जेताभिच॒र्यमा॑ण॒-स्सर्वो॒ वा ए॒ष य॒ज्ञो य-त्त्रै॑धात॒वीय॒ग्ं॒ सर्वे॑णै॒व य॒ज्ञेन॑ यजते॒ नैन॑मभि॒चर᳚न्-थ्स्तृणुत ए॒तयै॒व य॑जेत स॒हस्रे॑ण य॒क्ष्यमा॑णः॒ प्रजा॑तमे॒वैन॑-द्ददात्ये॒तयै॒व य॑जेत स॒हस्रे॑णेजा॒नो-ऽन्तं॒-वाँ ए॒ष प॑शू॒ना-ङ्ग॑च्छति॒ [-ग॑च्छति, य-स्स॒हस्रे॑ण॒] 32

य-स्स॒हस्रे॑ण॒ यज॑ते प्र॒जाप॑तिः॒ खलु॒ वै प॒शून॑सृजत॒ ताग्स्त्रै॑धात॒ वीये॑-नै॒वासृ॑जत॒ य ए॒वं-विँ॒द्वाग् स्त्रै॑धात॒वीये॑नप॒शुका॑मो॒ यज॑ते॒ यस्मा॑दे॒व योनेः᳚ प्र॒जाप॑तिः प॒शूनसृ॑जत॒ तस्मा॑दे॒वैना᳚न्-थ्सृजत॒ उपै॑न॒मुत्त॑रग्ं स॒हस्र॑-न्नमति दे॒वता᳚भ्यो॒ वा ए॒ष आ वृ॑श्च्यते॒ यो य॒क्ष्य इत्यु॒क्त्वा न यज॑ते त्रैधात॒वीये॑न यजेत॒ सर्वो॒ वा ए॒ष य॒ज्ञो [य॒ज्ञः, य-त्त्रै॑धात॒वीय॒ग्ं॒] 33

य-त्त्रै॑धात॒वीय॒ग्ं॒ सर्वे॑णै॒व य॒ज्ञेन॑ यजते॒ न दे॒वता᳚भ्य॒ आ वृ॑श्च्यते॒ द्वाद॑शकपालः पुरो॒डाशो॑ भवति॒ ते त्रय॒श्चतु॑ष्कपाला-स्त्रिष्षमृद्ध॒त्वाय॒ त्रयः॑ पुरो॒डाशा॑ भवन्ति॒ त्रय॑ इ॒मे लो॒का ए॒षां-लोँ॒काना॒माप्त्या॒ उत्त॑र-उत्तरो॒ ज्याया᳚-न्भवत्ये॒वमि॑व॒ हीमे लो॒का य॑व॒मयो॒ मद्ध्य॑ ए॒तद्वा अ॒न्तरि॑क्षस्य रू॒पग्ं समृ॑द्ध्यै॒ सर्वे॑षामभिग॒मय॒न्नव॑ द्य॒त्यछ॑बण्ट्कार॒ग्ं॒ हिर॑ण्य-न्ददाति॒ तेज॑ ए॒वा- [ए॒व, अव॑ रुन्धे] 34

-ऽव॑ रुन्धे ता॒र्प्य-न्द॑दाति प॒शूने॒वाव॑ रुन्धे धे॒नु-न्द॑दात्या॒शिष॑ ए॒वाव॑ रुन्धे॒ साम्नो॒ वा ए॒ष वर्णो॒ यद्धिर॑ण्यं॒-यँजु॑षा-न्ता॒र्प्यमु॑क्थाम॒दाना᳚-न्धे॒नुरे॒ताने॒व सर्वा॒न्॒. वर्णा॒नव॑ रुन्धे ॥ 35 ॥

(जग॑त्या - ऽभि॒चर॒न्-थ्सर्वो॒ वै - ग॑च्छति - य॒ज्ञ - स्तेज॑ ए॒व - त्रि॒ग्ं॒शच्च॑) (अ. 11)

त्वष्टा॑ ह॒तपु॑त्रो॒ वीन्द्र॒ग्ं॒ सोम॒मा-ऽह॑र॒-त्तस्मि॒न्निन्द्र॑ उपह॒वमै᳚च्छत॒ त-न्नोपा᳚ह्वयत पु॒त्र-म्मे॑-ऽवधी॒रिति॒ स य॑ज्ञवेश॒स-ङ्कृ॒त्वा प्रा॒सहा॒ सोम॑मपिब॒-त्तस्य॒ यद॒त्यशि॑ष्यत॒ त-त्त्वष्टा॑-ऽऽहव॒नीय॒मुप॒ प्राव॑र्तय॒-थ्स्वाहेन्द्र॑शत्रुर्वर्ध॒स्वेति॒ स याव॑दू॒र्ध्वः प॑रा॒विद्ध्य॑ति॒ ताव॑ति स्व॒यमे॒व व्य॑रमत॒ यदि॑ वा॒ ताव॑-त्प्रव॒ण- [ताव॑-त्प्रव॒णम्, आसी॒द्यदि॑] 36

-मासी॒द्यदि॑ वा॒ ताव॒दद्ध्य॒ग्नेरासी॒-थ्स स॒म्भव॑न्न॒ग्नीषोमा॑व॒भि सम॑भव॒-थ्स इ॑षुमा॒त्रमि॑षुमात्रं॒-विँष्व॑ङ्ङवर्धत॒ स इ॒मां-लोँ॒कान॑वृणो॒द्य-दि॒मां-लोँ॒कानवृ॑णो॒-त्त-द्वृ॒त्रस्य॑ वृत्र॒त्व-न्तस्मा॒दिन्द्रो॑-ऽबिभे॒दपि॒ त्वष्टा॒ तस्मै॒ त्वष्टा॒ वज्र॑मसिञ्च॒-त्तपो॒ वै स वज्र॑ आसी॒-त्तमुद्य॑न्तु॒-न्नाश॑क्नो॒दथ॒ वै तर्हि॒ विष्णु॑- [विष्णुः॑, अ॒न्या] 37

-र॒न्या दे॒वता॑ ऽऽसी॒-थ्सो᳚-ऽब्रवी॒-द्विष्ण॒वेही॒दमा ह॑रिष्यावो॒ येना॒यमि॒दमिति॒स विष्णु॑स्त्रे॒धा-ऽऽत्मानं॒-विँन्य॑धत्त पृथि॒व्या-न्तृती॑यम॒न्तरि॑क्षे॒ तृती॑य-न्दि॒वि तृती॑य-मभिपर्याव॒र्ता-द्ध्यबि॑भे॒द्यत्-पृ॑थि॒व्या-न्तृती॑य॒मासी॒-त्तेनेन्द्रो॒ वज्र॒मुद॑यच्छ॒-द्विष्ण्व॑नुस्थित॒-स्सो᳚-ऽब्रवी॒न्मा मे॒ प्र हा॒रस्ति॒ वा इ॒द- [वा इ॒दम्, मयि॑ वी॒र्य॑-न्त-त्ते॒] 38

-म्मयि॑ वी॒र्य॑-न्त-त्ते॒ प्रदा᳚स्या॒मीति॒ तद॑स्मै॒ प्राय॑च्छ॒-त्त-त्प्रत्य॑गृह्णा॒दधा॒ मेति॒ त-द्विष्ण॒वे-ऽति॒ प्राय॑च्छ॒-त्त-द्विष्णुः॒ प्रत्य॑गृह्णा-द॒स्मास्विन्द्र॑ इन्द्रि॒य-न्द॑धा॒त्विति॒ यद॒न्तरि॑क्षे॒ तृती॑य॒मासी॒-त्तेनेन्द्रो॒ वज्र॒मुद॑यच्छ॒-द्विष्ण्व॑नुस्थित॒-स्सो᳚-ऽब्रवी॒न्मा मे॒ प्रहा॒रस्ति॒ वा इ॒द- [वा इ॒दम्, मयि॑ वी॒र्य॑-न्त-त्ते॒] 39

-म्मयि॑ वी॒र्य॑-न्त-त्ते॒ प्र दा᳚स्या॒मीति॒ तद॑स्मै॒ प्राय॑च्छ॒-त्त-त्प्रत्य॑गृह्णा॒-द्द्विर्मा॑-ऽधा॒ इति॒ त-द्विष्ण॒वे-ऽति॒ प्राय॑च्छ॒-त्त-द्विष्णुः॒ प्रत्य॑गृह्णाद॒स्मास्विन्द्र॑ इन्द्रि॒य-न्द॑धा॒त्विति॒ यद्दि॒वि तृती॑य॒मासी॒-त्तेनेन्द्रो॒ वज्र॒मुद॑यच्छ॒-द्विष्ण्व॑नुस्थित॒-स्सो᳚-ऽब्रवी॒न्मा मे॒ प्रहा॒र्येना॒ह- [प्रहा॒र्येना॒हम्, इ॒दमस्मि॒ त-त्ते॒] 40

-मि॒दमस्मि॒ त-त्ते॒ प्रदा᳚स्या॒मीति॒ त्वी(3) इत्य॑ब्रवी-थ्स॒न्धा-न्तु सन्द॑धावहै॒ त्वामे॒व प्रवि॑शा॒नीति॒ यन्मा-म्प्र॑वि॒शेः कि-म्मा॑ भुञ्ज्या॒ इत्य॑ब्रवी॒-त्त्वामे॒वेन्धी॑य॒ तव॒ भोगा॑य॒ त्वा-म्प्रवि॑शेय॒मित्य॑ब्रवी॒-त्तं-वृँ॒त्रः प्रावि॑शदु॒दरं॒-वैँ वृ॒त्रः, क्षु-त्खलु॒ वै म॑नु॒ष्य॑स्य॒ भ्रातृ॑व्यो॒ य [भ्रातृ॑व्यो॒ यः, ए॒वं-वेँद॒ हन्ति॒] 41

ए॒वं-वेँद॒ हन्ति॒ क्षुध॒-म्भ्रातृ॑व्य॒-न्तद॑स्मै॒ प्राय॑च्छ॒त्त-त्प्रत्य॑गृह्णा॒त्- त्रिर्मा॑-ऽधा॒ इति॒ त-द्विष्ण॒वे-ऽति॒ प्राय॑च्छ॒-त्त-द्विष्णुः॒ प्रत्य॑गृह्णाद॒स्मास्विन्द्र॑ इन्द्रि॒य-न्द॑धा॒त्विति॒ यत्त्रिः प्राय॑च्छ॒-त्त्रिः प्र॒त्यगृ॑ह्णा॒-त्त-त्त्रि॒धातो᳚स्त्रिधातु॒त्वं-यँ-द्विष्णु॑र॒न्वति॑ष्ठत॒ विष्ण॒वे-ऽति॒ प्राय॑च्छ॒-त्तस्मा॑दैन्द्रावैष्ण॒वग्ं ह॒विर्भ॑वति॒ यद्वा इ॒द-ङ्किञ्च॒ तद॑स्मै॒ त-त्प्राय॑च्छ॒-दृच॒-स्सामा॑नि॒ यजूग्ं॑षि स॒हस्रं॒-वाँ अ॑स्मै॒ त-त्प्राय॑च्छ॒-त्तस्मा᳚-थ्स॒हस्र॑दक्षिणम् ॥ 42 ॥

(प्र॒व॒णं - ँविष्णु॒- र्वा इ॒द- मि॒द - म॒हं - ँयो - भ॑व॒ - त्येक॑ विग्ंशतिश्च) (अ. 12)

दे॒वा वै रा॑ज॒न्या᳚-ज्जाय॑माना-दबिभयु॒-स्तम॒न्तरे॒व सन्त॒-न्दाम्ना ऽपौ᳚म्भ॒न्-थ्स वा ए॒षो-ऽपो᳚ब्धो जायते॒ य-द्रा॑ज॒न्यो॑ यद्वा ए॒षो-ऽन॑पोब्धो॒ जाये॑त वृ॒त्रा-न्घ्नग्ग् श्च॑रे॒द्य-ङ्का॒मये॑त राज॒न्य॑मन॑पोब्धो जायेत वृ॒त्रा-न्घ्नग्ग् श्च॑रे॒दिति॒ तस्मा॑ ए॒तमै᳚न्द्रा बार्हस्प॒त्य-ञ्च॒रु-न्निर्व॑पेदै॒न्द्रो वै रा॑ज॒न्यो᳚ ब्रह्म॒ बृह॒स्पति॒ र्ब्रह्म॑णै॒वैन॒-न्दाम्नो॒-ऽपोम्भ॑ना-न्मुञ्चति हिर॒ण्मय॒-न्दाम॒ दक्षि॑णा सा॒क्षादे॒वैन॒-न्दाम्नो॒-ऽपोम्भ॑ना-न्मुञ्चति ॥ 43 ॥

(ए॒नं॒ - द्वाद॑श च) (अ. 13)

नवो॑नवो भवति॒ जाय॑मा॒नो-ऽह्ना᳚-ङ्के॒तुरु॒षसा॑ मे॒त्यग्रे᳚ । भा॒ग-न्दे॒वेभ्यो॒ विद॑धात्या॒य-न्प्रच॒न्द्रमा᳚स्तिरति दी॒र्घमायुः॑ ॥ यमा॑दि॒त्या अ॒ग्ं॒शुमा᳚प्या॒यय॑न्ति॒ यमक्षि॑त॒-मक्षि॑तयः॒ पिब॑न्ति । तेन॑ नो॒ राजा॒ वरु॑णो॒ बृह॒स्पति॒रा प्या॑ययन्तु॒ भुव॑नस्य गो॒पाः ॥प्राच्या᳚-न्दि॒शि त्वमि॑न्द्रासि॒ राजो॒तोदी᳚च्यां-वृँत्रहन् वृत्र॒हा-ऽसि॑ । यत्र॒ यन्ति॑ स्रो॒त्यास्त- [यन्ति॑ स्रो॒त्यास्तत्, जि॒त-न्ते॑] 44

-ज्जि॒त-न्ते॑ दक्षिण॒तो वृ॑ष॒भ ए॑धि॒ हव्यः॑ ॥ इन्द्रो॑ जयाति॒ न परा॑ जयाता अधिरा॒जो राज॑सु राजयाति । विश्वा॒ हि भू॒याः पृत॑ना अभि॒ष्टीरु॑प॒सद्यो॑ नम॒स्यो॑ यथा-ऽस॑त् ॥ अ॒स्येदे॒व प्ररि॑रिचे महि॒त्व-न्दि॒वः पृ॑थि॒व्याः पर्य॒न्तरि॑क्षात् । स्व॒राडिन्द्रो॒ दम॒ आ वि॒श्वगू᳚र्त-स्स्व॒रिरम॑त्रो ववक्षे॒ रणा॑य ॥ अ॒भि त्वा॑ शूर नोनु॒मो-ऽदु॑ग्धा इव धे॒नवः॑ । ईशा॑न- [ईशा॑नम्, अ॒स्य] 45

-म॒स्य जग॑त-स्सुव॒र्दृश॒मीशा॑नमिन्द्र त॒स्थुषः॑ ॥ त्वामिद्धि हवा॑महे सा॒ता वाज॑स्य का॒रवः॑ । त्वां-वृँ॒त्रेष्वि॑न्द्र॒ सत्प॑ति॒-न्नर॒स्त्वा-ङ्काष्ठा॒स्वर्व॑तः ॥ यद्द्याव॑इन्द्रतेश॒तग्ं श॒त-म्भूमी॑रु॒त स्युः । न त्वा॑ वज्रिन्-थ्स॒हस्र॒ग्ं॒ सूर्या॒ अनु॒ न जा॒तम॑ष्ट॒ रोद॑सी ॥ पिबा॒ सोम॑मिन्द्र॒ मन्द॑तु त्वा॒ यन्ते॑ सु॒षाव॑ हर्य॒श्वाद्रिः॑ । 46

सो॒तुर्बा॒हुभ्या॒ग्ं॒ सुय॑तो॒ नार्वा᳚ ॥ रे॒वती᳚र्न-स्सध॒माद॒ इन्द्रे॑ सन्तु तु॒विवा॑जाः । क्षु॒मन्तो॒ याभि॒र्मदे॑म ॥ उद॑ग्ने॒ शुच॑य॒स्तव॒ , वि ज्योति॒षो,दु॒ त्य-ञ्जा॒तवे॑दसग्ंस॒प्त त्वा॑ ह॒रितो॒ रथे॒ वह॑न्ति देव सूर्य । शो॒चिष्के॑शं-विँचक्षण ॥ चि॒त्र-न्दे॒वाना॒मुद॑गा॒दनी॑क॒-ञ्चक्षु॑र्मि॒त्रस्य॒ वरु॑णस्या॒-ऽग्नेः । आ-ऽप्रा॒ द्यावा॑पृथि॒वी अ॒न्तरि॑क्ष॒ग्ं॒ सूर्य॑ आ॒त्मा जग॑तस्त॒स्थुष॑- [जग॑तस्त॒स्थुषः॑, च ।] 47

-श्च ॥ विश्वे॑ दे॒वा ऋ॑ता॒वृध॑ ऋ॒तुभि॑र्-हवन॒श्रुतः॑ । जु॒षन्तां॒-युँज्य॒-म्पयः॑ ॥ विश्वे॑ देवा-श्शृणु॒तेमग्ं हव॑-म्मे॒ ये अ॒न्तरि॑क्षे॒ य उप॒ द्यवि॒ष्ठ । ये अ॑ग्निजि॒ह्वा उ॒त वा॒ यज॑त्रा आ॒सद्या॒स्मि-न्ब॒र्॒हिषि॑ मादयद्ध्वम् ॥ 48 ॥

(त - दीशा॑न॒ - मद्रि॑ - स्त॒स्थुष॑ - स्त्रि॒ग्ं॒शच्च॑) (अ. 14)

(दे॒वा म॑नु॒ष्या॑ - देवसु॒रा अ॑ब्रुवन् - देवासु॒रास्तेषा᳚-ङ्गाय॒त्री - प्र॒जाप॑ति॒स्ता यत्रा-ऽ - ग्ने॒ गोभिः॑ - चि॒त्रया॑ - मारु॒तं - देवा॑ वसव्या॒ अग्ने॑ - मारु॒तमिति॒ - देवा॑ वसव्या॒ देवा᳚-श्शर्मण्याः॒ - सर्वा॑णि॒ - त्वष्टा॑ ह॒तपु॑त्रो - दे॒वा वै रा॑ज॒न्या᳚न् - नवो॑नव॒ - श्चतु॑र्दश )

(दे॒वा म॑नु॒ष्याः᳚ - प्र॒जा-म्प॒शुन् - देवा॑ वसव्याः - परिद॒ध्यदि॒द- मस्म्य॒ - ष्टा च॑त्वारिग्ंशत् )

(दे॒वा म॑नु॒ष्या॑, मादयध्वं)

॥ हरिः॑ ओम् ॥

॥ कृष्ण यजुर्वेदीय तैत्तिरीय संहिताया-न्द्वितीयकाण्डे चतुर्थः प्रश्न-स्समाप्तः ॥