ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪ್ರಥಮಕಾಣ್ಡೇ ಪ್ರಥಮಃ ಪ್ರಶ್ನಃ - ದರ್ಶಪೂರ್ಣಮಾಸೌ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಇ॒ಷೇ ತ್ವೋ॒ರ್ಜೇ ತ್ವಾ॑ ವಾ॒ಯವಃ॑ ಸ್ಥೋಪಾ॒ಯವಃ॑ ಸ್ಥ ದೇ॒ವೋ ವಃ॑ ಸವಿ॒ತಾ ಪ್ರಾರ್ಪ॑ಯತು॒ ಶ್ರೇಷ್ಠ॑ತಮಾಯ॒ ಕರ್ಮ॑ಣ॒ ಆ ಪ್ಯಾ॑ಯದ್ಧ್ವಮಘ್ನಿಯಾ ದೇವಭಾ॒ಗ-ಮೂರ್ಜ॑ಸ್ವತೀಃ॒ ಪಯ॑ಸ್ವತೀಃ ಪ್ರ॒ಜಾವ॑ತೀ-ರನಮೀ॒ವಾ ಅ॑ಯ॒ಕ್ಷ್ಮಾ ಮಾ ವಃ॑ ಸ್ತೇ॒ನ ಈ॑ಶತ॒ ಮಾ-ಽಘಶಗ್ಂ॑ಸೋ ರು॒ದ್ರಸ್ಯ॑ ಹೇ॒ತಿಃ ಪರಿ॑ ವೋ ವೃಣಕ್ತು ಧ್ರು॒ವಾ ಅ॒ಸ್ಮಿ-ನ್ಗೋಪ॑ತೌ ಸ್ಯಾತ ಬ॒ಹ್ವೀ-ರ್ಯಜ॑ಮಾನಸ್ಯ ಪ॒ಶೂ-ನ್ಪಾ॑ಹಿ ॥ 1 ॥
(ಇ॒ಷೇ - ತ್ರಿಚ॑ತ್ವಾರಿಗ್ಂಶತ್ ) (ಅ. 1)
ಯ॒ಜ್ಞಸ್ಯ॑ ಘೋ॒ಷದ॑ಸಿ॒ ಪ್ರತ್ಯು॑ಷ್ಟ॒ಗ್ಂ॒ ರಕ್ಷಃ॒ ಪ್ರತ್ಯು॑ಷ್ಟಾ॒ ಅರಾ॑ತಯಃ॒ ಪ್ರೇಯ-ಮ॑ಗಾದ್ಧಿ॒ಷಣಾ॑ ಬ॒ರ್॒ಹಿರಚ್ಛ॒ ಮನು॑ನಾ ಕೃ॒ತಾ ಸ್ವ॒ಧಯಾ॒ ವಿತ॑ಷ್ಟಾ॒ ತ ಆ ವ॑ಹನ್ತಿ ಕ॒ವಯಃ॑ ಪು॒ರಸ್ತಾ᳚-ದ್ದೇ॒ವೇಭ್ಯೋ॒ ಜುಷ್ಟ॑ಮಿ॒ಹ ಬ॒ರ್॒ಹಿ-ರಾ॒ಸದೇ॑ ದೇ॒ವಾನಾ᳚-ಮ್ಪರಿಷೂ॒ತಮ॑ಸಿ ವ॒ರ್॒ಷವೃ॑ದ್ಧಮಸಿ॒ ದೇವ॑ಬರ್ಹಿ॒ರ್ಮಾ ತ್ವಾ-ಽ॒ನ್ವ-ಮ್ಮಾ ತಿ॒ರ್ಯ-ಕ್ಪರ್ವ॑ ತೇ ರಾದ್ಧ್ಯಾಸಮಾಚ್ಛೇ॒ತ್ತಾ ತೇ॒ ಮಾ ರಿ॑ಷ॒-ನ್ದೇವ॑ಬರ್ಹಿ-ಶ್ಶ॒ತವ॑ಲ್ಶಂ॒-ವಿಁ ರೋ॑ಹ ಸ॒ಹಸ್ರ॑ವಲ್ಶಾ॒ [ಸ॒ಹಸ್ರ॑ವಲ್ಶಾಃ, ವಿ ವ॒ಯಗ್ಂ ರು॑ಹೇಮ] 2
ವಿ ವ॒ಯಗ್ಂ ರು॑ಹೇಮ ಪೃಥಿ॒ವ್ಯಾ-ಸ್ಸ॒ಮ್ಪೃಚಃ॑ ಪಾಹಿ ಸುಸ॒ಮ್ಭೃತಾ᳚ ತ್ವಾ॒ ಸಮ್ಭ॑ರಾ॒ಮ್ಯದಿ॑ತ್ಯೈ॒ ರಾಸ್ನಾ॑-ಽಸೀನ್ದ್ರಾ॒ಣ್ಯೈ ಸ॒ನ್ನಹ॑ನ-ಮ್ಪೂ॒ಷಾ ತೇ᳚ ಗ್ರ॒ನ್ಥಿ-ಙ್ಗ್ರ॑ಥ್ನಾತು॒ ಸ ತೇ॒ ಮಾ-ಽಽ ಸ್ಥಾ॒ದಿನ್ದ್ರ॑ಸ್ಯ ತ್ವಾ ಬಾ॒ಹುಭ್ಯಾ॒ಮುದ್ಯ॑ಚ್ಛೇ॒ ಬೃಹ॒ಸ್ಪತೇ᳚-ರ್ಮೂ॒ರ್ಧ್ನಾ ಹ॑ರಾಮ್ಯು॒ರ್ವ॑ನ್ತರಿ॑ಕ್ಷ॒ಮನ್ವಿ॑ಹಿ ದೇವಙ್ಗ॒ಮಮ॑ಸಿ ॥ 3 ॥
(ಸ॒ಹಸ್ರ॑ವಲ್ಶಾ - ಅ॒ಷ್ಟಾತ್ರಿಗ್ಂ॑ಶಚ್ಚ) (ಅ. 2)
ಶುನ್ಧ॑ದ್ಧ್ವ॒-ನ್ದೈವ್ಯಾ॑ಯ॒ ಕರ್ಮ॑ಣೇ ದೇವಯ॒ಜ್ಯಾಯೈ॑ ಮಾತ॒ರಿಶ್ವ॑ನೋ ಘ॒ರ್ಮೋ॑-ಽಸಿ॒ ದ್ಯೌರ॑ಸಿ ಪೃಥಿ॒ವ್ಯ॑ಸಿ ವಿ॒ಶ್ವಧಾ॑ಯಾ ಅಸಿ ಪರ॒ಮೇಣ॒ ಧಾಮ್ನಾ॒ ದೃಗ್ಂಹ॑ಸ್ವ॒ ಮಾ ಹ್ವಾ॒-ರ್ವಸೂ॑ನಾ-ಮ್ಪ॒ವಿತ್ರ॑ಮಸಿ ಶ॒ತಧಾ॑ರಂ॒-ವಁಸೂ॑ನಾ-ಮ್ಪ॒ವಿತ್ರ॑ಮಸಿ ಸ॒ಹಸ್ರ॑ಧಾರಗ್ಂ ಹು॒ತ-ಸ್ಸ್ತೋ॒ಕೋಹು॒ತೋ ದ್ರ॒ಫ್ಸೋ᳚ ಽಗ್ನಯೇ॑ ಬೃಹ॒ತೇ ನಾಕಾ॑ಯ॒ ಸ್ವಾಹಾ॒ ದ್ಯಾವಾ॑ಪೃಥಿ॒ವೀಭ್ಯಾ॒ಗ್ಂ॒ ಸಾ ವಿ॒ಶ್ವಾಯು॒-ಸ್ಸಾ ವಿ॒ಶ್ವವ್ಯ॑ಚಾ॒-ಸ್ಸಾ ವಿ॒ಶ್ವಕ॑ರ್ಮಾ॒ ಸ-ಮ್ಪೃ॑ಚ್ಯದ್ಧ್ವ-ಮೃತಾವರೀ-ರೂ॒ರ್ಮಿಣೀ॒ರ್ಮಧು॑ಮತ್ತಮಾ ಮ॒ನ್ದ್ರಾ ಧನ॑ಸ್ಯ ಸಾ॒ತಯೇ॒ ಸೋಮೇ॑ನ॒ ತ್ವಾ-ಽಽತ॑ನ॒ಚ್ಮೀನ್ದ್ರಾ॑ಯ॒ ದಧಿ॒ ವಿಷ್ಣೋ॑ ಹ॒ವ್ಯಗ್ಂ ರ॑ಕ್ಷಸ್ವ ॥ 4 ॥
(ಸೋಮೇ॑ - ನಾ॒ಷ್ಟೌ ಚ॑) (ಅ. 3)
ಕರ್ಮ॑ಣೇ ವಾ-ನ್ದೇ॒ವೇಭ್ಯಃ॑ ಶಕೇಯಂ॒-ವೇಁಷಾ॑ಯ ತ್ವಾ॒ ಪ್ರತ್ಯು॑ಷ್ಟ॒ಗ್ಂ॒ ರಕ್ಷಃ॒ ಪ್ರತ್ಯು॑ಷ್ಟಾ॒ ಅರಾ॑ತಯೋ॒ ಧೂರ॑ಸಿ॒ ಧೂರ್ವ॒ ಧೂರ್ವ॑ನ್ತ॒-ನ್ಧೂರ್ವ॒ ತಂ-ಯೋಁ᳚-ಽಸ್ಮಾ-ನ್ಧೂರ್ವ॑ತಿ॒ ತ-ನ್ಧೂ᳚ರ್ವ॒ಯಂ-ವಁ॒ಯ-ನ್ಧೂರ್ವಾ॑ಮ॒ಸ್ತ್ವ-ನ್ದೇ॒ವಾನಾ॑ಮಸಿ॒ ಸಸ್ನಿ॑ತಮ॒-ಮ್ಪಪ್ರಿ॑ತಮ॒-ಞ್ಜುಷ್ಟ॑ತಮಂ॒-ವಁಹ್ನಿ॑ತಮ-ನ್ದೇವ॒ಹೂತ॑ಮ॒-ಮಹ್ರು॑ತಮಸಿ ಹವಿ॒ರ್ಧಾನ॒-ನ್ದೃಗ್ಂಹ॑ಸ್ವ॒ ಮಾ ಹ್ವಾ᳚-ರ್ಮಿ॒ತ್ರಸ್ಯ॑ ತ್ವಾ॒ ಚಕ್ಷು॑ಷಾ॒ ಪ್ರೇಕ್ಷೇ॒ ಮಾ ಭೇರ್ಮಾ ಸಂ-ವಿಁ॑ಕ್ಥಾ॒ ಮಾ ತ್ವಾ॑ - [ಮಾ ತ್ವಾ᳚, ಹಿ॒ಗ್ಂ॒ಸಿ॒ಷ॒ಮು॒ರು] 5
ಹಿಗ್ಂಸಿಷಮು॒ರು ವಾತಾ॑ಯ ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವೇ᳚-ಽಶ್ವಿನೋ᳚-ರ್ಬಾ॒ಹುಭ್ಯಾ᳚-ಮ್ಪೂ॒ಷ್ಣೋ ಹಸ್ತಾ᳚ಭ್ಯಾ-ಮ॒ಗ್ನಯೇ॒ ಜುಷ್ಟ॒-ನ್ನಿರ್ವ॑ಪಾಮ್ಯ॒ಗ್ನೀಷೋಮಾ᳚ಭ್ಯಾ-ಮಿ॒ದ-ನ್ದೇ॒ವಾನಾ॑ಮಿ॒ದಮು॑ ನ-ಸ್ಸ॒ಹ ಸ್ಫಾ॒ತ್ಯೈ ತ್ವಾ॒ ನಾರಾ᳚ತ್ಯೈ॒ ಸುವ॑ರ॒ಭಿ ವಿ ಖ್ಯೇ॑ಷಂ-ವೈಁಶ್ವಾನ॒ರ-ಞ್ಜ್ಯೋತಿ॒-ರ್ದೃಗ್ಂಹ॑ನ್ತಾ॒-ನ್ದುರ್ಯಾ॒ ದ್ಯಾವಾ॑ಪೃಥಿ॒ವ್ಯೋ- ರು॒ರ್ವ॑ನ್ತರಿ॑ಕ್ಷ॒ ಮನ್ವಿ॒-ಹ್ಯದಿ॑ತ್ಯಾ ಸ್ತ್ವೋ॒ಪಸ್ಥೇ॑ ಸಾದಯಾ॒ಮ್ಯಗ್ನೇ॑ ಹ॒ವ್ಯಗ್ಂ ರ॑ಕ್ಷಸ್ವ ॥ 6 ॥
( ಮಾ ತ್ವಾ॒ - ಷಟ್ಚ॑ತ್ವಾರಿಗ್ಂಶಚ್ಚ ) (ಅ. 4)
ದೇ॒ವೋ ವಃ॑ ಸವಿ॒ತೋ-ತ್ಪು॑ನಾ॒ತ್ವಚ್ಛಿ॑ದ್ರೇಣ ಪ॒ವಿತ್ರೇ॑ಣ॒ ವಸೋ॒-ಸ್ಸೂರ್ಯ॑ಸ್ಯ ರ॒ಶ್ಮಿಭಿ॒ರಾಪೋ॑ ದೇವೀರಗ್ರೇಪುವೋ ಅಗ್ರೇಗು॒ವೋ-ಽಗ್ರ॑ ಇ॒ಮಂ-ಯಁ॒ಜ್ಞ-ನ್ನ॑ಯ॒ತಾಗ್ರೇ॑ ಯ॒ಜ್ಞಪ॑ತಿ-ನ್ಧತ್ತ ಯು॒ಷ್ಮಾನಿನ್ದ್ರೋ॑ ಽವೃಣೀತ ವೃತ್ರ॒ತೂರ್ಯೇ॑ ಯೂ॒ಯಮಿನ್ದ್ರ॑-ಮವೃಣೀದ್ಧ್ವಂ-ವೃಁತ್ರ॒ತೂರ್ಯೇ॒ ಪ್ರೋಕ್ಷಿ॑ತಾ-ಸ್ಸ್ಥಾ॒ಗ್ನಯೇ॑ ವೋ॒ ಜುಷ್ಟ॒-ಮ್ಪ್ರೋಕ್ಷಾ᳚ಮ್ಯ॒ಗ್ನೀಷೋಮಾ᳚ಭ್ಯಾ॒ಗ್ಂ॒ ಶುನ್ಧ॑ದ್ಧ್ವ॒-ನ್ದೈವ್ಯಾ॑ಯ॒ ಕರ್ಮ॑ಣೇ ದೇವಯ॒ಜ್ಯಾಯಾ॒ ಅವ॑ಧೂತ॒ಗ್ಂ॒ ರಕ್ಷೋ-ಽವ॑ಧೂತಾ॒ ಅರಾ॑ತ॒ಯೋ-ಽದಿ॑ತ್ಯಾ॒ಸ್ತ್ವಗ॑ಸಿ॒ ಪ್ರತಿ॑ ತ್ವಾ - [ಪ್ರತಿ॑ ತ್ವಾ, ಪೃ॒ಥಿ॒ವೀ ವೇ᳚ತ್ತ್ವಧಿ॒ಷವ॑ಣಮಸಿ] 7
ಪೃಥಿ॒ವೀ ವೇ᳚ತ್ತ್ವಧಿ॒ಷವ॑ಣಮಸಿ ವಾನಸ್ಪ॒ತ್ಯ-ಮ್ಪ್ರತಿ॒ ತ್ವಾ-ಽದಿ॑ತ್ಯಾ॒ಸ್ತ್ವಗ್ವೇ᳚ತ್ತ್ವ॒ಗ್ನೇಸ್ತ॒ನೂರ॑ಸಿ ವಾ॒ಚೋ ವಿ॒ಸರ್ಜ॑ನ-ನ್ದೇ॒ವವೀ॑ತಯೇ ತ್ವಾ ಗೃಹ್ಣಾ॒ಮ್ಯದ್ರಿ॑ರಸಿ ವಾನಸ್ಪ॒ತ್ಯ-ಸ್ಸ ಇ॒ದ-ನ್ದೇ॒ವೇಭ್ಯೋ॑ ಹ॒ವ್ಯಗ್ಂ ಸು॒ಶಮಿ॑ ಶಮಿ॒ಷ್ವೇಷ॒ಮಾ ವ॒ದೋರ್ಜ॒ಮಾ ವ॑ದ ದ್ಯು॒ಮದ್ವ॑ದತ ವ॒ಯಗ್ಂ ಸ॑ಙ್ಘಾ॒ತ-ಞ್ಜೇ᳚ಷ್ಮ ವ॒ರ್॒ಷವೃ॑ದ್ಧಮಸಿ॒ ಪ್ರತಿ॑ ತ್ವಾ ವ॒ರ್॒ಷವೃ॑ದ್ಧಂ-ವೇಁತ್ತು॒ ಪರಾ॑ಪೂತ॒ಗ್ಂ॒ ರಕ್ಷಃ॒ ಪರಾ॑ಪೂತಾ॒ ಅರಾ॑ತಯೋ॒ ರಕ್ಷ॑ಸಾ-ಮ್ಭಾ॒ಗೋ॑ ಽಸಿ ವಾ॒ಯುರ್ವೋ॒ ವಿ ವಿ॑ನಕ್ತು ದೇ॒ವೋ ವಃ॑ ಸವಿ॒ತಾ ಹಿರ॑ಣ್ಯಪಾಣಿಃ॒ ಪ್ರತಿ॑ ಗೃಹ್ಣಾತು ॥ 8 ॥
( ತ್ವಾ॒ - ಭಾ॒ಗ - ಏಕಾ॑ದಶ ಚ ) (ಅ. 5)
ಅವ॑ಧೂತ॒ಗ್ಂ॒ ರಕ್ಷೋ-ಽವ॑ಧೂತಾ॒ ಅರಾ॑ತ॒ಯೋ-ಽದಿ॑ತ್ಯಾ॒ಸ್ತ್ವಗ॑ಸಿ॒ ಪ್ರತಿ॑ ತ್ವಾ ಪೃಥಿ॒ವೀವೇ᳚ತ್ತು ದಿ॒ವ-ಸ್ಸ್ಕ॑ಮ್ಭ॒ನಿರ॑ಸಿ॒ ಪ್ರತಿ॒ ತ್ವಾ-ಽದಿ॑ತ್ಯಾ॒ಸ್ತ್ವಗ್ವೇ᳚ತ್ತು ಧಿ॒ಷಣಾ॑-ಽಸಿ ಪರ್ವ॒ತ್ಯಾ ಪ್ರತಿ॑ ತ್ವಾ ದಿ॒ವ-ಸ್ಸ್ಕ॑ಮ್ಭ॒ನಿರ್ವೇ᳚ತ್ತು ಧಿ॒ಷಣಾ॑-ಽಸಿ ಪಾರ್ವತೇ॒ಯೀ ಪ್ರತಿ॑ ತ್ವಾ ಪರ್ವ॒ತಿರ್ವೇ᳚ತ್ತು ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವೇ᳚-ಽಶ್ವಿನೋ᳚-ರ್ಬಾ॒ಹುಭ್ಯಾ᳚-ಮ್ಪೂ॒ಷ್ಣೋಹಸ್ತಾ᳚ಭ್ಯಾ॒ಮಧಿ॑ ವಪಾಮಿಧಾ॒ನ್ಯ॑ಮಸಿ ಧಿನು॒ಹಿ ದೇ॒ವಾ-ನ್ಪ್ರಾ॒ಣಾಯ॑ ತ್ವಾ ಽಪಾ॒ನಾಯ॑ ತ್ವಾ ವ್ಯಾ॒ನಾಯ॑ ತ್ವಾ ದೀ॒ರ್ಘಾಮನು॒ ಪ್ರಸಿ॑ತಿ॒ಮಾಯು॑ಷೇಧಾ-ನ್ದೇ॒ವೋ ವಃ॑ ಸವಿ॒ತಾ ಹಿರ॑ಣ್ಯಪಾಣಿಃ॒ ಪ್ರತಿ॑ ಗೃಹ್ಣಾತು ॥ 9 ॥
(ಪ್ರಾ॒ಣಾಯ॑ ತ್ವಾ॒ - ಪಞ್ಚ॑ದಶ ಚ) (ಅ. 6)
ಧೃಷ್ಟಿ॑ರಸಿ॒ ಬ್ರಹ್ಮ॑ ಯ॒ಚ್ಛಾಪಾ᳚ಗ್ನೇ॒ ಽಗ್ನಿಮಾ॒ಮಾದ॑-ಞ್ಜಹಿ॒ ನಿಷ್ಕ್ರ॒ವ್ಯಾದಗ್ಂ॑ ಸೇ॒ಧಾ-ಽಽದೇ॑ವ॒ಯಜಂ॑-ವಁಹ॒ ನಿರ್ದ॑ಗ್ಧ॒ಗ್ಂ॒ ರಕ್ಷೋ॒ ನಿರ್ದ॑ಗ್ಧಾ॒ ಅರಾ॑ತಯೋ ಧ್ರು॒ವಮ॑ಸಿ ಪೃಥಿ॒ವೀ-ನ್ದೃ॒ಗ್ಂ॒ಹಾ-ಽಽಯು॑-ರ್ದೃಗ್ಂಹ ಪ್ರ॒ಜಾ-ನ್ದೃಗ್ಂ॑ಹ ಸಜಾ॒ತಾನ॒ಸ್ಮೈ ಯಜ॑ಮಾನಾಯ॒ ಪರ್ಯೂ॑ಹ ಧ॒ರ್ತ್ರಮ॑ಸ್ಯ॒ನ್ತರಿ॑ಕ್ಷ-ನ್ದೃಗ್ಂಹ ಪ್ರಾ॒ಣ-ನ್ದೃಗ್ಂ॑ಹಾಪಾ॒ನ-ನ್ದೃಗ್ಂ॑ಹ ಸಜಾ॒ತಾನ॒ಸ್ಮೈ ಯಜ॑ಮಾನಾಯ॒ ಪರ್ಯೂ॑ಹ ಧ॒ರುಣ॑ಮಸಿ॒ ದಿವ॑-ನ್ದೃಗ್ಂಹ॒ ಚಕ್ಷು॑- [ಚಕ್ಷುಃ॑, ದೃ॒ಗ್ಂ॒ಹ॒ ಶ್ರೋತ್ರ॑-ನ್ದೃಗ್ಂಹ] 10
ರ್ದೃಗ್ಂಹ॒ ಶ್ರೋತ್ರ॑-ನ್ದೃಗ್ಂಹ ಸಜಾ॒ತಾನ॒ಸ್ಮೈ ಯಜ॑ಮಾನಾಯ॒ ಪರ್ಯೂ॑ಹ॒ ಧರ್ಮಾ॑ಸಿ॒ ದಿಶೋ॑ ದೃಗ್ಂಹ॒ ಯೋನಿ॑-ನ್ದೃಗ್ಂಹ ಪ್ರ॒ಜಾ-ನ್ದೃಗ್ಂ॑ಹ ಸಜಾ॒ತಾನ॒ಸ್ಮೈ ಯಜ॑ಮಾನಾಯ॒ ಪರ್ಯೂ॑ಹ॒ ಚಿತಃ॑ ಸ್ಥ ಪ್ರ॒ಜಾಮ॒ಸ್ಮೈ ರ॒ಯಿಮ॒ಸ್ಮೈ ಸ॑ಜಾ॒ತಾನ॒ಸ್ಮೈ ಯಜ॑ಮಾನಾಯ॒ ಪರ್ಯೂ॑ಹ॒ ಭೃಗೂ॑ಣಾ॒ಮಙ್ಗಿ॑ರಸಾ॒-ನ್ತಪ॑ಸಾ ತಪ್ಯದ್ಧ್ವಂ॒-ಯಾಁನಿ॑ ಘ॒ರ್ಮೇ ಕ॒ಪಾಲಾ᳚ನ್ಯುಪಚಿ॒ನ್ವನ್ತಿ॑ ವೇ॒ಧಸಃ॑ । ಪೂ॒ಷ್ಣಸ್ತಾನ್ಯಪಿ॑ ವ್ರ॒ತ ಇ॑ನ್ದ್ರವಾ॒ಯೂ ವಿ ಮು॑ಞ್ಚತಾಮ್ ॥ 11 ॥
(ಚಕ್ಷು॑ - ರ॒ಷ್ಟಾಚ॑ತ್ವಾರಿಗ್ಂಶಚ್ಚ) (ಅ. 7)
ಸಂ-ವಁ॑ಪಾಮಿ॒ ಸಮಾಪೋ॑ ಅ॒ದ್ಭಿರ॑ಗ್ಮತ॒ ಸಮೋಷ॑ಧಯೋ॒ ರಸೇ॑ನ॒ ಸಗ್ಂ ರೇ॒ವತೀ॒-ರ್ಜಗ॑ತೀಭಿ॒-ರ್ಮಧು॑ಮತೀ॒-ರ್ಮಧು॑ಮತೀಭಿ-ಸ್ಸೃಜ್ಯದ್ಧ್ವಮ॒ದ್ಭ್ಯಃ ಪರಿ॒ ಪ್ರಜಾ॑ತಾ-ಸ್ಸ್ಥ॒ ಸಮ॒ದ್ಭಿಃ ಪೃ॑ಚ್ಯದ್ಧ್ವ॒-ಞ್ಜನ॑ಯತ್ಯೈ ತ್ವಾ॒ ಸಂ-ಯೌಁ᳚ಮ್ಯ॒ಗ್ನಯೇ᳚ ತ್ವಾ॒-ಽಗ್ನೀಷೋಮಾ᳚ಭ್ಯಾ-ಮ್ಮ॒ಖಸ್ಯ॒ ಶಿರೋ॑-ಽಸಿ ಘ॒ರ್ಮೋ॑-ಽಸಿ ವಿ॒ಶ್ವಾಯು॑ರು॒ರು ಪ್ರ॑ಥಸ್ವೋ॒ರು ತೇ॑ ಯ॒ಜ್ಞಪ॑ತಿಃ ಪ್ರಥತಾ॒-ನ್ತ್ವಚ॑-ಙ್ಗೃಹ್ಣೀಷ್ವಾ॒ನ್ತರಿ॑ತ॒ಗ್ಂ॒ ರಕ್ಷೋ॒-ಽನ್ತರಿ॑ತಾ॒ ಅರಾ॑ತಯೋದೇ॒ವಸ್ತ್ವಾ॑ ಸವಿ॒ತಾ ಶ್ರ॑ಪಯತು॒ ವರ್ಷಿ॑ಷ್ಠೇ॒ ಅಧಿ॒ ನಾಕೇ॒-ಽಗ್ನಿಸ್ತೇ॑ ತ॒ನುವ॒-ಮ್ಮಾ-ಽತಿ॑ ಧಾ॒ಗಗ್ನೇ॑ ಹ॒ವ್ಯಗ್ಂ ರ॑ಕ್ಷಸ್ವ॒ ಸ-ಮ್ಬ್ರಹ್ಮ॑ಣಾ ಪೃಚ್ಯಸ್ವೈಕ॒ತಾಯ॒ ಸ್ವಾಹಾ᳚ ದ್ವಿ॒ತಾಯ॒ ಸ್ವಾಹಾ᳚ ತ್ರಿ॒ತಾಯ॒ ಸ್ವಾಹಾ᳚ ॥ 12 ॥
(ಸ॒ವಿ॒ತಾ - ದ್ವಾವಿಗ್ಂ॑ಶತಿಶ್ಚ) (ಅ. 8)
ಆ ದ॑ದ॒ ಇನ್ದ್ರ॑ಸ್ಯ ಬಾ॒ಹುರ॑ಸಿ॒ ದಕ್ಷಿ॑ಣ-ಸ್ಸ॒ಹಸ್ರ॑ಭೃಷ್ಟಿ-ಶ್ಶ॒ತತೇ॑ಜಾ ವಾ॒ಯುರ॑ಸಿ ತಿ॒ಗ್ಮತೇ॑ಜಾಃ॒ ಪೃಥಿ॑ವಿ ದೇವಯಜ॒ - ನ್ಯೋಷ॑ದ್ಧ್ಯಾಸ್ತೇ॒ ಮೂಲ॒-ಮ್ಮಾ ಹಿಗ್ಂ॑ಸಿಷ॒-ಮಪ॑ಹತೋ॒-ಽರರುಃ॑ ಪೃಥಿ॒ವ್ಯೈ ವ್ರ॒ಜ-ಙ್ಗ॑ಚ್ಛ ಗೋ॒ಸ್ಥಾನಂ॒-ವಁರ್ಷ॑ತು ತೇ॒ ದ್ಯೌರ್ಬ॑ಧಾ॒ನ ದೇ॑ವ ಸವಿತಃ ಪರ॒ಮಸ್ಯಾ᳚-ಮ್ಪರಾ॒ವತಿ॑ ಶ॒ತೇನ॒ ಪಾಶೈ॒ರ್ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯ-ಞ್ಚ॑ ವ॒ಯ-ನ್ದ್ವಿ॒ಷ್ಮಸ್ತಮತೋ॒ ಮಾ ಮೌ॒ಗಪ॑ಹತೋ॒-ಽರರುಃ॑ ಪೃಥಿ॒ವ್ಯೈ ದೇ॑ವ॒ಯಜ॑ನ್ಯೈ ವ್ರ॒ಜಂ- [ವ್ರ॒ಜಮ್, ಗ॒ಚ್ಛ॒ ಗೋ॒ಸ್ಥಾನಂ॒-ವಁರ್ಷ॑ತು] 13
ಗ॑ಚ್ಛ ಗೋ॒ಸ್ಥಾನಂ॒-ವಁರ್ಷ॑ತು ತೇ॒ ದ್ಯೌರ್ಬ॑ಧಾ॒ನ ದೇ॑ವ ಸವಿತಃ ಪರ॒ಮಸ್ಯಾ᳚-ಮ್ಪರಾ॒ವತಿ॑ ಶ॒ತೇನ॒ ಪಾಶೈ॒ರ್ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯ-ಞ್ಚ॑ ವ॒ಯ-ನ್ದ್ವಿ॒ಷ್ಮಸ್ತಮತೋ॒ ಮಾ ಮೌ॒ಗಪ॑ಹತೋ॒-ಽರರುಃ॑ ಪೃಥಿ॒ವ್ಯಾ ಅದೇ॑ವಯಜನೋ ವ್ರ॒ಜ-ಙ್ಗ॑ಚ್ಛ ಗೋ॒ಸ್ಥಾನಂ॒-ವಁರ್ಷ॑ತು ತೇ॒ ದ್ಯೌರ್ಬ॑ಧಾ॒ನ ದೇ॑ವ ಸವಿತಃ ಪರ॒ಮಸ್ಯಾ᳚-ಮ್ಪರಾ॒ವತಿ॑ ಶ॒ತೇನ॒ ಪಾಶೈ॒ರ್ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯ-ಞ್ಚ॑ ವ॒ಯ-ನ್ದ್ವಿ॒ಷ್ಮಸ್ತಮತೋ॒ ಮಾ- [ಮಾ, ಮೌ॒ಗ॒ರರು॑ಸ್ತೇ॒ ದಿವ॒-ಮ್ಮಾ] 14
ಮೌ॑ಗ॒ರರು॑ಸ್ತೇ॒ ದಿವ॒-ಮ್ಮಾ ಸ್ಕಾ॒ನ್॒. ವಸ॑ವಸ್ತ್ವಾ॒ ಪರಿ॑ ಗೃಹ್ಣನ್ತು ಗಾಯ॒ತ್ರೇಣ॒ ಛನ್ದ॑ಸಾರು॒ದ್ರಾಸ್ತ್ವಾ॒ ಪರಿ॑ ಗೃಹ್ಣನ್ತು॒ ತ್ರೈಷ್ಟು॑ಭೇನ॒ ಛನ್ದ॑ಸಾ-ಽಽದಿ॒ತ್ಯಾಸ್ತ್ವಾ॒ ಪರಿ॑ ಗೃಹ್ಣನ್ತು॒ ಜಾಗ॑ತೇನ॒ ಛನ್ದ॑ಸಾ ದೇ॒ವಸ್ಯ॑ ಸವಿ॒ತು-ಸ್ಸ॒ವೇ ಕರ್ಮ॑ ಕೃಣ್ವನ್ತಿ ವೇ॒ಧಸ॑ ಋ॒ತಮ॑ಸ್ಯೃತ॒ಸದ॑ನ-ಮಸ್ಯೃತ॒ಶ್ರೀರ॑ಸಿ॒ ಧಾ ಅ॑ಸಿ ಸ್ವ॒ಧಾ ಅ॑ಸ್ಯು॒ರ್ವೀ ಚಾಸಿ॒ ವಸ್ವೀ॑ ಚಾಸಿ ಪು॒ರಾ ಕ್ರೂ॒ರಸ್ಯ॑ ವಿ॒ಸೃಪೋ॑ ವಿರಫ್ಶಿ-ನ್ನುದಾ॒ದಾಯ॑ ಪೃಥಿ॒ವೀ-ಞ್ಜೀ॒ರದಾ॑ನು॒ರ್ಯಾಮೈರ॑ಯನ್ ಚ॒ನ್ದ್ರಮ॑ಸಿ ಸ್ವ॒ಧಾಭಿ॒ಸ್ತಾ-ನ್ಧೀರಾ॑ಸೋ ಅನು॒ದೃಶ್ಯ॑ ಯಜನ್ತೇ ॥ 15 ॥
(ದೇ॒ವ॒ಯಜ॑ನ್ಯೈ ವ್ರ॒ಜಂ - ತಮತೋ॒ ಮಾ - ವಿ॑ರಫ್ಶಿ॒ನ್ - ನೇಕಾ॑ದಶ ಚ) (ಅ. 9)
ಪ್ರತ್ಯು॑ಷ್ಟ॒ಗ್ಂ॒ ರಕ್ಷಃ॒ ಪ್ರತ್ಯು॑ಷ್ಟಾ॒ ಅರಾ॑ತಯೋ॒ ಽಗ್ನೇ-ರ್ವ॒-ಸ್ತೇಜಿ॑ಷ್ಠೇನ॒ ತೇಜ॑ಸಾ॒ ನಿ-ಷ್ಟ॑ಪಾಮಿ ಗೋ॒ಷ್ಠ-ಮ್ಮಾ ನಿರ್ಮೃ॑ಕ್ಷಂ-ವಾಁ॒ಜಿನ॑-ನ್ತ್ವಾ ಸಪತ್ನಸಾ॒ಹಗ್ಂ ಸ-ಮ್ಮಾ᳚ರ್ಜ್ಮಿ॒ ವಾಚ॑-ಮ್ಪ್ರಾ॒ಣ-ಞ್ಚಕ್ಷು॒-ಶ್ಶ್ರೋತ್ರ॑-ಮ್ಪ್ರ॒ಜಾಂ-ಯೋಁನಿ॒-ಮ್ಮಾ ನಿರ್ಮೃ॑ಕ್ಷಂ-ವಾಁ॒ಜಿನೀ᳚-ನ್ತ್ವಾ ಸಪತ್ನಸಾ॒ಹೀಗ್ಂ ಸ-ಮ್ಮಾ᳚ರ್ಜ್ಮ್ಯಾ॒ಶಾಸಾ॑ನಾ ಸೌಮನ॒ಸ-ಮ್ಪ್ರ॒ಜಾಗ್ಂ ಸೌಭಾ᳚ಗ್ಯ-ನ್ತ॒ನೂಮ್ । ಅ॒ಗ್ನೇರನು॑ವ್ರತಾ ಭೂ॒ತ್ವಾ ಸ-ನ್ನ॑ಹ್ಯೇ ಸುಕೃ॒ತಾಯ॒ ಕಮ್ ॥ ಸು॒ಪ್ರ॒ಜಸ॑ಸ್ತ್ವಾ ವ॒ಯಗ್ಂ ಸು॒ಪತ್ನೀ॒ರುಪ॑- [ಸು॒ಪಥ್ನೀ॒ರುಪ॑, ಸೇ॒ದಿ॒ಮಿ॒ ।] 16
ಸೇದಿಮ । ಅಗ್ನೇ॑ ಸಪತ್ನ॒ದಮ್ಭ॑ನ॒-ಮದ॑ಬ್ಧಾಸೋ॒ ಅದಾ᳚ಭ್ಯಮ್ ॥ ಇ॒ಮಂ-ವಿಁಷ್ಯಾ॑ಮಿ॒ ವರು॑ಣಸ್ಯ॒ ಪಾಶಂ॒ ಁಯ-ಮಬ॑ದ್ಧ್ನೀತ ಸವಿ॒ತಾ ಸು॒ಕೇತಃ॑ । ಧಾ॒ತು-ಶ್ಚ॒ ಯೋನೌ॑ ಸುಕೃ॒ತಸ್ಯ॑ ಲೋ॒ಕೇ ಸ್ಯೋ॒ನ-ಮ್ಮೇ॑ ಸ॒ಹ ಪತ್ಯಾ॑ ಕರೋಮಿ ॥ ಸಮಾಯು॑ಷಾ॒ ಸಮ್ಪ್ರ॒ಜಯಾ॒ ಸಮ॑ಗ್ನೇ॒ ವರ್ಚ॑ಸಾ॒ ಪುನಃ॑ । ಸ-ಮ್ಪತ್ನೀ॒ ಪತ್ಯಾ॒-ಽಹ-ಙ್ಗ॑ಚ್ಛೇ॒ ಸಮಾ॒ತ್ಮಾ ತ॒ನುವಾ॒ ಮಮ॑ ॥ ಮ॒ಹೀ॒ನಾ-ಮ್ಪಯೋ॒-ಽಸ್ಯೋಷ॑ಧೀನಾ॒ಗ್ಂ॒ ರಸ॒ಸ್ತಸ್ಯ॒ ತೇ-ಽಕ್ಷೀ॑ಯಮಾಣಸ್ಯ॒ ನಿ- [ನಿಃ, ವ॒ಪಾ॒ಮಿ॒ ಮ॒ಹೀ॒ನಾಂ] 17
ರ್ವ॑ಪಾಮಿ ಮಹೀ॒ನಾ-ಮ್ಪಯೋ॒-ಽಸ್ಯೋಷ॑ಧೀನಾ॒ಗ್ಂ॒ ರಸೋ-ಽದ॑ಬ್ಧೇನ ತ್ವಾ॒ ಚಕ್ಷು॒ಷಾ-ಽವೇ᳚ಕ್ಷೇ ಸುಪ್ರಜಾ॒ಸ್ತ್ವಾಯ॒ ತೇಜೋ॑-ಽಸಿ॒ ತೇಜೋ-ಽನು॒ ಪ್ರೇಹ್ಯ॒ಗ್ನಿಸ್ತೇ॒ ತೇಜೋ॒ ಮಾ ವಿ ನೈ॑ದ॒ಗ್ನೇ-ರ್ಜಿ॒ಹ್ವಾ-ಽಸಿ॑ ಸು॒ಭೂರ್ದೇ॒ವಾನಾ॒-ನ್ಧಾಮ್ನೇ॑ಧಾಮ್ನೇ ದೇ॒ವೇಭ್ಯೋ॒ ಯಜು॑ಷೇಯಜುಷೇ ಭವ ಶು॒ಕ್ರಮ॑ಸಿ॒ ಜ್ಯೋತಿ॑ರಸಿ॒ ತೇಜೋ॑-ಽಸಿ ದೇ॒ವೋ ವಃ॑ ಸವಿ॒ತೋ-ತ್ಪು॑ನಾ॒ತ್ವಚ್ಛಿ॑ದ್ರೇಣ ಪ॒ವಿತ್ರೇ॑ಣ॒ ವಸೋ॒-ಸ್ಸೂರ್ಯ॑ಸ್ಯ ರ॒ಶ್ಮಿಭಿಃ॑ ಶು॒ಕ್ರ-ನ್ತ್ವಾ॑ ಶು॒ಕ್ರಾಯಾ॒-ನ್ಧಾಮ್ನೇ॑ಧಾಮ್ನೇ ದೇ॒ವೇಭ್ಯೋ॒ ಯಜು॑ಷೇಯಜುಷೇ ಗೃಹ್ಣಾಮಿ॒ ಜ್ಯೋತಿ॑ಸ್ತ್ವಾ॒ ಜ್ಯೋತಿ॑ಷ್ಯ॒ರ್ಚಿಸ್ತ್ವಾ॒-ಽರ್ಚಿಷಿ॒ ಧಾಮ್ನೇ॑ಧಾಮ್ನೇ ದೇ॒ವೇಭ್ಯೋ॒ ಯಜು॑ಷೇಯಜುಷೇ ಗೃಹ್ಣಾಮಿ ॥ 18 ॥
(ಉಪ॒ - ನೀ - ರ॒ಶ್ಮಿಭಿಃ॑ ಶು॒ಕ್ರಗ್ಂ - ಷೋಡ॑ಶ ಚ) (ಅ. 10)
ಕೃಷ್ಣೋ᳚-ಽಸ್ಯಾಖರೇ॒ಷ್ಠೋ᳚-ಽಗ್ನಯೇ᳚ ತ್ವಾ॒ ಸ್ವಾಹಾ॒ ವೇದಿ॑ರಸಿ ಬ॒ರ್॒ಹಿಷೇ᳚ ತ್ವಾ॒ ಸ್ವಾಹಾ ॑ಬ॒ರ್॒ಹಿರ॑ಸಿ ಸ್ರು॒ಗ್ಭ್ಯಸ್ತ್ವಾ॒ ಸ್ವಾಹಾ॑ ದಿ॒ವೇ ತ್ವಾ॒-ಽನ್ತರಿ॑ಕ್ಷಾಯ ತ್ವಾ ಪೃಥಿ॒ವ್ಯೈ ತ್ವಾ᳚ ಸ್ವ॒ಧಾ ಪಿ॒ತೃಭ್ಯ॒ ಊರ್ಗ್ಭ॑ವ ಬರ್ಹಿ॒ಷದ್ಭ್ಯ॑ ಊ॒ರ್ಜಾ ಪೃ॑ಥಿ॒ವೀ-ಙ್ಗ॑ಚ್ಛತ॒ ವಿಷ್ಣೋ॒-ಸ್ಸ್ತೂಪೋ॒-ಽಸ್ಯೂರ್ಣಾ᳚ಮ್ರದಸ-ನ್ತ್ವಾ ಸ್ತೃಣಾಮಿ ಸ್ವಾಸ॒ಸ್ಥ-ನ್ದೇ॒ವೇಭ್ಯೋ॑ ಗನ್ಧ॒ರ್ವೋ॑-ಽಸಿ ವಿ॒ಶ್ವಾವ॑ಸು॒-ರ್ವಿಶ್ವ॑ಸ್ಮಾ॒ದೀಷ॑ತೋ॒ ಯಜ॑ಮಾನಸ್ಯ ಪರಿ॒ಧಿರಿ॒ಡ ಈ॑ಡಿ॒ತ ಇನ್ದ್ರ॑ಸ್ಯ ಬಾ॒ಹುರ॑ಸಿ॒- [ಬಾ॒ಹುರ॑ಸಿ, ದಕ್ಷಿ॑ಣೋ॒] 19
ದಕ್ಷಿ॑ಣೋ॒ ಯಜ॑ಮಾನಸ್ಯ ಪರಿ॒ಧಿರಿ॒ಡ ಈ॑ಡಿ॒ತೋ ಮಿ॒ತ್ರಾವರು॑ಣೌ ತ್ವೋತ್ತರ॒ತಃ ಪರಿ॑ ಧತ್ತಾ-ನ್ಧ್ರು॒ವೇಣ॒ ಧರ್ಮ॑ಣಾ॒ ಯಜ॑ಮಾನಸ್ಯ ಪರಿ॒ಧಿರಿ॒ಡ ಈ॑ಡಿ॒ತ-ಸ್ಸೂರ್ಯ॑ಸ್ತ್ವಾ ಪು॒ರಸ್ತಾ᳚-ತ್ಪಾತು॒ ಕಸ್ಯಾ᳚ಶ್ಚಿದ॒ಭಿಶ॑ಸ್ತ್ಯಾ ವೀ॒ತಿಹೋ᳚ತ್ರ-ನ್ತ್ವಾ ಕವೇ ದ್ಯು॒ಮನ್ತ॒ಗ್ಂ॒ ಸಮಿ॑ಧೀಮ॒ಹ್ಯಗ್ನೇ॑ ಬೃ॒ಹನ್ತ॑ಮದ್ಧ್ವ॒ರೇ ವಿ॒ಶೋ ಯ॒ನ್ತ್ರೇ ಸ್ಥೋ॒ ವಸೂ॑ನಾಗ್ಂ ರು॒ದ್ರಾಣಾ॑-ಮಾದಿ॒ತ್ಯಾನಾ॒ಗ್ಂ॒ ಸದ॑ಸಿ ಸೀದ ಜು॒ಹೂರು॑ಪ॒ಭೃ-ದ್ಧ್ರು॒ವಾ-ಽಸಿ॑ ಘೃ॒ತಾಚೀ॒ ನಾಮ್ನಾ᳚ ಪ್ರಿ॒ಯೇಣ॒ ನಾಮ್ನಾ᳚ ಪ್ರಿ॒ಯೇ ಸದ॑ಸಿ ಸೀದೈ॒ತಾ ಅ॑ಸದನ್-ಥ್ಸುಕೃ॒ತಸ್ಯ॑ ಲೋ॒ಕೇ ತಾ ವಿ॑ಷ್ಣೋ ಪಾಹಿ ಪಾ॒ಹಿ ಯ॒ಜ್ಞ-ಮ್ಪಾ॒ಹಿ ಯ॒ಜ್ಞಪ॑ತಿ-ಮ್ಪಾ॒ಹಿ ಮಾಂ-ಯಁ॑ಜ್ಞ॒ನಿಯ᳚ಮ್ ॥ 20 ॥
(ಬಾ॒ಹುರ॑ಸಿ - ಪ್ರಿ॒ಯೇ ಸದ॑ಸಿ॒ - ಪಞ್ಚ॑ದಶ ಚ) (ಅ. 11)
ಭುವ॑ನಮಸಿ॒ ವಿ ಪ್ರ॑ಥ॒ಸ್ವಾಗ್ನೇ॒ ಯಷ್ಟ॑ರಿ॒ದ-ನ್ನಮಃ॑ । ಜುಹ್ವೇಹ್ಯ॒ಗ್ನಿಸ್ತ್ವಾ᳚ ಹ್ವಯತಿ ದೇವಯ॒ಜ್ಯಾಯಾ॒ ಉಪ॑ಭೃ॒ದೇಹಿ॑ ದೇ॒ವಸ್ತ್ವಾ॑ ಸವಿ॒ತಾ ಹ್ವ॑ಯತಿ ದೇವಯ॒ಜ್ಯಾಯಾ॒ ಅಗ್ನಾ॑ವಿಷ್ಣೂ॒ ಮಾ ವಾ॒ಮವ॑ ಕ್ರಮಿಷಂ॒-ವಿಁ ಜಿ॑ಹಾಥಾ॒-ಮ್ಮಾ ಮಾ॒ ಸ-ನ್ತಾ᳚ಪ್ತಂ-ಲೋಁ॒ಕ-ಮ್ಮೇ॑ ಲೋಕಕೃತೌ ಕೃಣುತಂ॒-ವಿಁಷ್ಣೋ॒-ಸ್ಸ್ಥಾನ॑ಮಸೀ॒ತ ಇನ್ದ್ರೋ॑ ಅಕೃಣೋ-ದ್ವೀ॒ರ್ಯಾ॑ಣಿ ಸಮಾ॒ರಭ್ಯೋ॒ರ್ಧ್ವೋ ಅ॑ದ್ಧ್ವ॒ರೋ ದಿ॑ವಿ॒ಸ್ಪೃಶ॒ಮಹ್ರು॑ತೋ ಯ॒ಜ್ಞೋ ಯ॒ಜ್ಞಪ॑ತೇ॒-ರಿನ್ದ್ರಾ॑ವಾ॒ನ್-ಥ್ಸ್ವಾಹಾ॑ ಬೃ॒ಹದ್ಭಾಃ ಪಾ॒ಹಿ ಮಾ᳚-ಽಗ್ನೇ॒ ದುಶ್ಚ॑ರಿತಾ॒ದಾ ಮಾ॒ ಸುಚ॑ರಿತೇ ಭಜ ಮ॒ಖಸ್ಯ॒ ಶಿರೋ॑-ಽಸಿ॒ ಸಞ್ಜ್ಯೋತಿ॑ಷಾ॒ ಜ್ಯೋತಿ॑ರಙ್ಕ್ತಾಮ್ ॥ 21 ॥
(ಅಹ್ರು॑ತ॒ - ಏಕ॑ವಿಗ್ಂಶತಿಶ್ಚ) (ಅ. 12)
ವಾಜ॑ಸ್ಯ ಮಾ ಪ್ರಸ॒ವೇನೋ᳚ದ್ಗ್ರಾ॒ಭೇಣೋದ॑ಗ್ರಭೀತ್ । ಅಥಾ॑ ಸ॒ಪತ್ನಾ॒ಗ್ಂ॒ ಇನ್ದ್ರೋ॑ ಮೇ ನಿಗ್ರಾ॒ಭೇಣಾಧ॑ರಾಗ್ಂ ಅಕಃ ॥ ಉ॒ದ್ಗ್ರಾ॒ಭ-ಞ್ಚ॑ ನಿಗ್ರಾ॒ಭ-ಞ್ಚ॒ ಬ್ರಹ್ಮ॑ ದೇ॒ವಾ ಅ॑ವೀವೃಧನ್ನ್ । ಅಥಾ॑ ಸ॒ಪತ್ನಾ॑ನಿನ್ದ್ರಾ॒ಗ್ನೀ ಮೇ॑ ವಿಷೂ॒ಚೀನಾ॒ನ್ ವ್ಯ॑ಸ್ಯತಾಮ್ ॥ ವಸು॑ಭ್ಯಸ್ತ್ವಾ ರು॒ದ್ರೇಭ್ಯ॑ಸ್ತ್ವಾ-ಽಽದಿ॒ತ್ಯೇಭ್ಯ॑ಸ್ತ್ವಾ॒-ಽಕ್ತಗ್ಂ ರಿಹಾ॑ಣಾ ವಿ॒ಯನ್ತು॒ ವಯಃ॑ ॥ ಪ್ರ॒ಜಾಂ-ಯೋಁನಿ॒-ಮ್ಮಾ ನಿರ್ಮೃ॑ಕ್ಷ॒ಮಾ ಪ್ಯಾ॑ಯನ್ತಾ॒ಮಾಪ॒ ಓಷ॑ಧಯೋ ಮ॒ರುತಾ॒-ಮ್ಪೃಷ॑ತಯ-ಸ್ಸ್ಥ॒ ದಿವಂ॑- [ದಿವ᳚ಮ್, ಗ॒ಚ್ಛ॒ ತತೋ॑ ನೋ॒] 22
ಗಚ್ಛ॒ ತತೋ॑ ನೋ॒ ವೃಷ್ಟಿ॒ಮೇರ॑ಯ । ಆ॒ಯು॒ಷ್ಪಾ ಅ॑ಗ್ನೇ॒-ಽಸ್ಯಾಯು॑ರ್ಮೇ ಪಾಹಿ ಚಕ್ಷು॒ಷ್ಪಾ ಅ॑ಗ್ನೇ-ಽಸಿ॒ ಚಕ್ಷು॑ರ್ಮೇ ಪಾಹಿ ಧ್ರು॒ವಾ-ಽಸಿ॒ ಯ-ಮ್ಪ॑ರಿ॒ಧಿ-ಮ್ಪ॒ರ್ಯಧ॑ತ್ಥಾ॒ ಅಗ್ನೇ॑ ದೇವ ಪ॒ಣಿಭಿ॑-ರ್ವೀ॒ಯಮಾ॑ಣಃ । ತ-ನ್ತ॑ ಏ॒ತಮನು॒ ಜೋಷ॑-ಮ್ಭರಾಮಿ॒ ನೇದೇ॒ಷ ತ್ವದ॑ಪಚೇ॒ತಯಾ॑ತೈ ಯ॒ಜ್ಞಸ್ಯ॒ ಪಾಥ॒ ಉಪ॒ ಸಮಿ॑ತಗ್ಂ ಸಗ್ಗ್ಸ್ರಾ॒ವಭಾ॑ಗಾ-ಸ್ಸ್ಥೇ॒ಷಾ ಬೃ॒ಹನ್ತಃ॑ ಪ್ರಸ್ತರೇ॒ಷ್ಠಾ ಬ॑ರ್ಹಿ॒ಷದ॑ಶ್ಚ [ ] 23
ದೇ॒ವಾ ಇ॒ಮಾಂ-ವಾಁಚ॑ಮ॒ಭಿ ವಿಶ್ವೇ॑ ಗೃ॒ಣನ್ತ॑ ಆ॒ಸದ್ಯಾ॒ಸ್ಮಿ-ನ್ಬ॒ರ್॒ಹಿಷಿ॑ ಮಾದಯದ್ಧ್ವಮ॒ಗ್ನೇ-ರ್ವಾ॒ಮಪ॑ನ್ನಗೃಹಸ್ಯ॒ ಸದ॑ಸಿ ಸಾದಯಾಮಿ ಸು॒ಮ್ನಾಯ॑ ಸುಮ್ನಿನೀ ಸು॒ಮ್ನೇ ಮಾ॑ ಧತ್ತ-ನ್ಧು॒ರಿ ಧ॒ರ್ಯೌ॑ ಪಾತ॒ಮಗ್ನೇ॑ ಽದಬ್ಧಾಯೋ ಽಶೀತತನೋ ಪಾ॒ಹಿ ಮಾ॒-ಽದ್ಯ ದಿ॒ವಃ ಪಾ॒ಹಿ ಪ್ರಸಿ॑ತ್ಯೈ ಪಾ॒ಹಿ ದುರಿ॑ಷ್ಟ್ಯೈ ಪಾ॒ಹಿ ದು॑ರದ್ಮ॒ನ್ಯೈ ಪಾ॒ಹಿ ದುಶ್ಚ॑ರಿತಾ॒ದವಿ॑ಷ-ನ್ನಃ ಪಿ॒ತು-ಙ್ಕೃ॑ಣು ಸು॒ಷದಾ॒ ಯೋನಿ॒ಗ್ಗ್॒ ಸ್ವಾಹಾ॒ ದೇವಾ॑ ಗಾತುವಿದೋ ಗಾ॒ತುಂವಿಁ॒ತ್ತ್ವಾ ಗಾ॒ತು ಮಿ॑ತ॒ ಮನ॑ಸಸ್ಪತ ಇ॒ಮ-ನ್ನೋ॑ ದೇವ ದೇ॒ವೇಷು॑ ಯ॒ಜ್ಞಗ್ಗ್ ಸ್ವಾಹಾ॑ ವಾ॒ಚಿ ಸ್ವಾಹಾ॒ ವಾತೇ॑ ಧಾಃ ॥ 24 ॥
(ದಿವಂ॑ - ಚ - ವಿ॒ತ್ತ್ವಾ ಗಾ॒ತುಂ - ತ್ರಯೋ॑ದಶ ಚ) (ಅ. 13)
ಉ॒ಭಾ ವಾ॑ಮಿನ್ದ್ರಾಗ್ನೀ ಆಹು॒ವದ್ಧ್ಯಾ॑ ಉ॒ಭಾ ರಾಧ॑ಸ-ಸ್ಸ॒ಹ ಮಾ॑ದ॒ಯದ್ಧ್ಯೈ᳚ । ಉ॒ಭಾ ದಾ॒ತಾರಾ॑ವಿ॒ಷಾಗ್ಂ ರ॑ಯೀ॒ಣಾಮು॒ಭಾ ವಾಜ॑ಸ್ಯ ಸಾ॒ತಯೇ॑ ಹುವೇ ವಾಮ್ ॥ ಅಶ್ರ॑ವ॒ಗ್ಂ॒ ಹಿ ಭೂ॑ರಿ॒ದಾವ॑ತ್ತರಾ ವಾಂ॒-ವಿಁಜಾ॑ಮಾತುರು॒ತ ವಾ॑ ಘಾ ಸ್ಯಾ॒ಲಾತ್ । ಅಥಾ॒ ಸೋಮ॑ಸ್ಯ॒ ಪ್ರಯ॑ತೀ ಯು॒ವಭ್ಯಾ॒ಮಿನ್ದ್ರಾ᳚ಗ್ನೀ॒ ಸ್ತೋಮ॑-ಞ್ಜನಯಾಮಿ॒ ನವ್ಯ᳚ಮ್ ॥ ಇನ್ದ್ರಾ᳚ಗ್ನೀ ನವ॒ತಿ-ಮ್ಪುರೋ॑ ದಾ॒ಸಪ॑ತ್ನೀರಧೂನುತಮ್ । ಸಾ॒ಕಮೇಕೇ॑ನ॒ ಕರ್ಮ॑ಣಾ ॥ ಶುಚಿ॒-ನ್ನು ಸ್ತೋಮ॒-ನ್ನವ॑ಜಾತ-ಮ॒ದ್ಯೇನ್ದ್ರಾ᳚ಗ್ನೀ ವೃತ್ರಹಣಾ ಜು॒ಷೇಥಾ᳚ಮ್ ॥ 25 ॥
ಉ॒ಭಾ ಹಿ ವಾಗ್ಂ॑ ಸು॒ಹವಾ॒ ಜೋಹ॑ವೀಮಿ॒ ತಾ ವಾಜಗ್ಂ॑ ಸ॒ದ್ಯ ಉ॑ಶ॒ತೇ ಧೇಷ್ಠಾ᳚ ॥ ವ॒ಯಮು॑ ತ್ವಾ ಪಥಸ್ಪತೇ॒ ರಥ॒-ನ್ನ ವಾಜ॑ಸಾತಯೇ । ಧಿ॒ಯೇ ಪೂ॑ಷನ್ನಯುಜ್ಮಹಿ ॥ ಪ॒ಥಸ್ಪ॑ಥಃ॒ ಪರಿ॑ಪತಿಂ-ವಁಚ॒ಸ್ಯಾ ಕಾಮೇ॑ನ ಕೃ॒ತೋ ಅ॒ಭ್ಯಾ॑ನಡ॒ರ್ಕಮ್ । ಸನೋ॑ ರಾಸಚ್ಛು॒ರುಧ॑ಶ್ಚ॒ನ್ದ್ರಾಗ್ರಾ॒ ಧಿಯ॑ನ್ಧಿಯಗ್ಂ ಸೀಷಧಾತಿ॒ ಪ್ರ ಪೂ॒ಷಾ ॥ ಕ್ಷೇತ್ರ॑ಸ್ಯ॒ ಪತಿ॑ನಾ ವ॒ಯಗ್ಂ ಹಿ॒ತೇನೇ॑ವ ಜಯಾಮಸಿ । ಗಾಮಶ್ವ॑-ಮ್ಪೋಷಯಿ॒ತ್ನ್ವಾ ಸ ನೋ॑ [ಸ ನಃ॑, ಮೃ॒ಡಾ॒ತೀ॒ದೃಶೇ᳚ ।] 26
ಮೃಡಾತೀ॒ದೃಶೇ᳚ ॥ ಕ್ಷೇತ್ರ॑ಸ್ಯ ಪತೇ॒ ಮಧು॑ಮನ್ತ-ಮೂ॒ರ್ಮಿ-ನ್ಧೇ॒ನುರಿ॑ವ॒ ಪಯೋ॑ ಅ॒ಸ್ಮಾಸು॑ ಧುಕ್ಷ್ವ । ಮ॒ಧು॒ಶ್ಚುತ॑-ಙ್ಘೃ॒ತಮಿ॑ವ॒ ಸುಪೂ॑ತ-ಮೃ॒ತಸ್ಯ॑ ನಃ॒ ಪತ॑ಯೋ ಮೃಡಯನ್ತು ॥ ಅಗ್ನೇ॒ ನಯ॑ ಸು॒ಪಥಾ॑ ರಾ॒ಯೇ ಅ॒ಸ್ಮಾನ್. ವಿಶ್ವಾ॑ನಿ ದೇವ ವ॒ಯುನಾ॑ನಿ ವಿ॒ದ್ವಾನ್ । ಯು॒ಯೋ॒ದ್ಧ್ಯ॑ಸ್ಮ-ಜ್ಜು॑ಹುರಾ॒ಣಮೇನೋ॒ ಭೂಯಿ॑ಷ್ಠಾ-ನ್ತೇ॒ ನಮ॑ಉಕ್ತಿಂ-ವಿಁಧೇಮ ॥ ಆ ದೇ॒ವಾನಾ॒ಮಪಿ॒ ಪನ್ಥಾ॑-ಮಗನ್ಮ॒ ಯಚ್ಛ॒ಕ್ನವಾ॑ಮ॒ ತದನು॒ ಪ್ರವೋ॑ಢುಮ್ । ಅ॒ಗ್ನಿ-ರ್ವಿ॒ದ್ವಾನ್-ಥ್ಸ ಯ॑ಜಾ॒- [ಸ ಯ॑ಜಾತ್, ಸೇದು॒ ಹೋತಾ॒ ಸೋ] 27
ಥ್ಸೇದು॒ ಹೋತಾ॒ ಸೋ ಅ॑ದ್ಧ್ವ॒ರಾನ್-ಥ್ಸ ಋ॒ತೂನ್ ಕ॑ಲ್ಪಯಾತಿ ॥ ಯದ್ವಾಹಿ॑ಷ್ಠ॒-ನ್ತದ॒ಗ್ನಯೇ॑ ಬೃ॒ಹದ॑ರ್ಚ ವಿಭಾವಸೋ । ಮಹಿ॑ಷೀವ॒ ತ್ವದ್ರ॒ಯಿಸ್ತ್ವದ್ವಾಜಾ॒ ಉದೀ॑ರತೇ ॥ ಅಗ್ನೇ॒ ತ್ವ-ಮ್ಪಾ॑ರಯಾ॒ ನವ್ಯೋ॑ ಅ॒ಸ್ಮಾನ್-ಥ್ಸ್ವ॒ಸ್ತಿಭಿ॒ರತಿ॑ ದು॒ರ್ಗಾಣಿ॒ ವಿಶ್ವಾ᳚ । ಪೂಶ್ಚ॑ ಪೃ॒ಥ್ವೀ ಬ॑ಹು॒ಲಾ ನ॑ ಉ॒ರ್ವೀ ಭವಾ॑ ತೋ॒ಕಾಯ॒ ತನ॑ಯಾಯ॒ ಶಂ-ಯೋಃ ಁ॥ ತ್ವಮ॑ಗ್ನೇ ವ್ರತ॒ಪಾ ಅ॑ಸಿ ದೇ॒ವ ಆ ಮರ್ತ್ಯೇ॒ಷ್ವಾ । ತ್ವಂ-ಯಁ॒ಜ್ಞೇಷ್ವೀಡ್ಯಃ॑ ॥ ಯದ್ವೋ॑ ವ॒ಯ-ಮ್ಪ್ರ॑ಮಿ॒ನಾಮ॑ ವ್ರ॒ತಾನಿ॑ ವಿ॒ದುಷಾ᳚-ನ್ದೇವಾ॒ ಅವಿ॑ದುಷ್ಟರಾಸಃ । ಅ॒ಗ್ನಿಷ್ಟ-ದ್ವಿಶ್ವ॒ಮಾ ಪೃ॑ಣಾತಿ ವಿ॒ದ್ವಾನ್. ಯೇಭಿ॑-ರ್ದೇ॒ವಾಗ್ಂ ಋ॒ತುಭಿಃ॑ ಕ॒ಲ್ಪಯಾ॑ತಿ ॥ 28 ॥
(ಜು॒ಷೇಥಾ॒ಮಾ - ಸ ನೋ॑ - ಯಜಾ॒ - ದಾ - ತ್ರಯೋ॑ವಿಗ್ಂಶತಿಶ್ಚ) (ಅ. 14)
(ಇ॒ಷೇ ತ್ವಾ॑ - ಯ॒ಜ್ಞಸ್ಯ॒ - ಶುನ್ಧ॑ಧ್ವಂ॒ - ಕರ್ಮ॑ಣೇ ವಾಂ - ದೇ॒ವೋ-ಽವ॑ಧೂತಂ॒ - ಧುಷ್ಟಿಃ॒ - ಸಂ-ವಁ॑ಪಾ॒- ಮ್ಯಾ ದ॑ದೇ॒ - ಪ್ರತ್ಯು॑ಷ್ಟಂ॒ - ಕೃಷ್ಣೋ॑-ಽಸಿ॒ - ಭುವ॑ನಮಸಿ॒ - ವಾಜ॑ಸ್ಯೋ॒ಭಾ ವಾಂ॒ - ಚತು॑ರ್ದಶ )
(ಇ॒ಷೇ - ದೃಗ್ಂ॑ಹ॒ - ಭುವ॑ನ - ಮ॒ಷ್ಟಾವಿಗ್ಂ॑ಶತಿಃ )
(ಇ॒ಷೇ ತ್ವಾ॑, ಕ॒ಲ್ಪಯಾ॑ತಿ)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪ್ರಥಮಕಾಣ್ಡೇ ಪ್ರಥಮಃ ಪ್ರಶ್ನ-ಸ್ಸಮಾಪ್ತಃ ॥
Roman (IAST) Transliteration
kṛṣṇa yajurvedīya taittirīya saṃhitāyā-mprathamakāṇḍe prathamaḥ praśnaḥ - darśapūrṇamāsau
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
i॒ṣe tvo॒rje tvā̭ vā॒yavaḥ̭ sthopā॒yavaḥ̭ stha de॒vo vaḥ̭ savi॒tā prārpa̭yatu॒ śreṣṭha̭tamāya॒ karma̭ṇa॒ ā pyā̭yaddhvamaghniyā devabhā॒ga-mūrja̭svatīḥ॒ paya̭svatīḥ pra॒jāva̭tī-ranamī॒vā a̭ya॒kṣmā mā vaḥ̭ ste॒na ī̭śata॒ mā-'ghaśagṃ̭so ru॒drasya̭ he॒tiḥ pari̭ vo vṛṇaktu dhru॒vā a॒smi-ngopa̭tau syāta ba॒hvī-ryaja̭mānasya pa॒śū-npā̭hi || 1 ||
(i॒ṣe - trica̭tvārigṃśat ) (a. 1)
ya॒jñasya̭ gho॒ṣada̭si॒ pratyṷṣṭa॒gṃ॒ rakṣaḥ॒ pratyṷṣṭā॒ arā̭tayaḥ॒ preya-ma̭gāddhi॒ṣaṇā̭ ba॒r॒hiraccha॒ manṷnā kṛ॒tā sva॒dhayā॒ vita̭ṣṭā॒ ta ā va̭hanti ka॒vayaḥ̭ pu॒rastā᳚-dde॒vebhyo॒ juṣṭa̭mi॒ha ba॒r॒hi-rā॒sadḙ de॒vānā᳚-mpariṣū॒tama̭si va॒r॒ṣavṛ̭ddhamasi॒ deva̭barhi॒rmā tvā-'॒nva-mmā ti॒rya-kparva̭ te rāddhyāsamācche॒ttā te॒ mā ri̭ṣa॒-ndeva̭barhi-śśa॒tava̭lśaṃ॒-vi~ ro̭ha sa॒hasra̭valśā॒ [sa॒hasra̭valśāḥ, vi va॒yagṃ rṷhema] 2
vi va॒yagṃ rṷhema pṛthi॒vyā-ssa॒mpṛcaḥ̭ pāhi susa॒mbhṛtā᳚ tvā॒ sambha̭rā॒myadi̭tyai॒ rāsnā̭-'sīndrā॒ṇyai sa॒nnaha̭na-mpū॒ṣā te᳚ gra॒nthi-ṅgra̭thnātu॒ sa te॒ mā-'' sthā॒dindra̭sya tvā bā॒hubhyā॒mudya̭cche॒ bṛha॒spate᳚-rmū॒rdhnā ha̭rāmyu॒rva̭ntari̭kṣa॒manvi̭hi devaṅga॒mama̭si || 3 ||
(sa॒hasra̭valśā - a॒ṣṭātrigṃ̭śacca) (a. 2)
śundha̭ddhva॒-ndaivyā̭ya॒ karma̭ṇe devaya॒jyāyai̭ māta॒riśva̭no gha॒rmo̭-'si॒ dyaura̭si pṛthi॒vya̭si vi॒śvadhā̭yā asi para॒meṇa॒ dhāmnā॒ dṛgṃha̭sva॒ mā hvā॒-rvasṷ̄nā-mpa॒vitra̭masi śa॒tadhā̭raṃ॒-va~sṷ̄nā-mpa॒vitra̭masi sa॒hasra̭dhāragṃ hu॒ta-ssto॒kohu॒to dra॒phso᳚ 'gnayḙ bṛha॒te nākā̭ya॒ svāhā॒ dyāvā̭pṛthi॒vībhyā॒gṃ॒ sā vi॒śvāyu॒-ssā vi॒śvavya̭cā॒-ssā vi॒śvaka̭rmā॒ sa-mpṛ̭cyaddhva-mṛtāvarī-rū॒rmiṇī॒rmadhṷmattamā ma॒ndrā dhana̭sya sā॒taye॒ somḙna॒ tvā-''ta̭na॒cmīndrā̭ya॒ dadhi॒ viṣṇo̭ ha॒vyagṃ ra̭kṣasva || 4 ||
(somḙ - nā॒ṣṭau ca̭) (a. 3)
karma̭ṇe vā-nde॒vebhyaḥ̭ śakeyaṃ॒-ve~ṣā̭ya tvā॒ pratyṷṣṭa॒gṃ॒ rakṣaḥ॒ pratyṷṣṭā॒ arā̭tayo॒ dhūra̭si॒ dhūrva॒ dhūrva̭nta॒-ndhūrva॒ taṃ-yo~᳚-'smā-ndhūrva̭ti॒ ta-ndhū᳚rva॒yaṃ-va~॒ya-ndhūrvā̭ma॒stva-nde॒vānā̭masi॒ sasni̭tama॒-mpapri̭tama॒-ñjuṣṭa̭tamaṃ॒-va~hni̭tama-ndeva॒hūta̭ma॒-mahrṷtamasi havi॒rdhāna॒-ndṛgṃha̭sva॒ mā hvā᳚-rmi॒trasya̭ tvā॒ cakṣṷṣā॒ prekṣe॒ mā bhermā saṃ-vi~̭kthā॒ mā tvā̭ - [mā tvā᳚, hi॒gṃ॒si॒ṣa॒mu॒ru] 5
higṃsiṣamu॒ru vātā̭ya de॒vasya̭ tvā savi॒tuḥ pra̭sa॒ve᳚-'śvino᳚-rbā॒hubhyā᳚-mpū॒ṣṇo hastā᳚bhyā-ma॒gnaye॒ juṣṭa॒-nnirva̭pāmya॒gnīṣomā᳚bhyā-mi॒da-nde॒vānā̭mi॒damṷ na-ssa॒ha sphā॒tyai tvā॒ nārā᳚tyai॒ suva̭ra॒bhi vi khyḙṣaṃ-vai~śvāna॒ra-ñjyoti॒-rdṛgṃha̭ntā॒-nduryā॒ dyāvā̭pṛthi॒vyo- ru॒rva̭ntari̭kṣa॒ manvi॒-hyadi̭tyā stvo॒pasthḙ sādayā॒myagnḙ ha॒vyagṃ ra̭kṣasva || 6 ||
( mā tvā॒ - ṣaṭca̭tvārigṃśacca ) (a. 4)
de॒vo vaḥ̭ savi॒to-tpṷnā॒tvacchi̭dreṇa pa॒vitrḙṇa॒ vaso॒-ssūrya̭sya ra॒śmibhi॒rāpo̭ devīragrepuvo agregu॒vo-'gra̭ i॒maṃ-ya~॒jña-nna̭ya॒tāgrḙ ya॒jñapa̭ti-ndhatta yu॒ṣmānindro̭ 'vṛṇīta vṛtra॒tūryḙ yū॒yamindra̭-mavṛṇīddhvaṃ-vṛ~tra॒tūrye॒ prokṣi̭tā-ssthā॒gnayḙ vo॒ juṣṭa॒-mprokṣā᳚mya॒gnīṣomā᳚bhyā॒gṃ॒ śundha̭ddhva॒-ndaivyā̭ya॒ karma̭ṇe devaya॒jyāyā॒ ava̭dhūta॒gṃ॒ rakṣo-'va̭dhūtā॒ arā̭ta॒yo-'di̭tyā॒stvaga̭si॒ prati̭ tvā - [prati̭ tvā, pṛ॒thi॒vī ve᳚ttvadhi॒ṣava̭ṇamasi] 7
pṛthi॒vī ve᳚ttvadhi॒ṣava̭ṇamasi vānaspa॒tya-mprati॒ tvā-'di̭tyā॒stvagve᳚ttva॒gnesta॒nūra̭si vā॒co vi॒sarja̭na-nde॒vavī̭taye tvā gṛhṇā॒myadri̭rasi vānaspa॒tya-ssa i॒da-nde॒vebhyo̭ ha॒vyagṃ su॒śami̭ śami॒ṣveṣa॒mā va॒dorja॒mā va̭da dyu॒madva̭data va॒yagṃ sa̭ṅghā॒ta-ñje᳚ṣma va॒r॒ṣavṛ̭ddhamasi॒ prati̭ tvā va॒r॒ṣavṛ̭ddhaṃ-ve~ttu॒ parā̭pūta॒gṃ॒ rakṣaḥ॒ parā̭pūtā॒ arā̭tayo॒ rakṣa̭sā-mbhā॒go̭ 'si vā॒yurvo॒ vi vi̭naktu de॒vo vaḥ̭ savi॒tā hira̭ṇyapāṇiḥ॒ prati̭ gṛhṇātu || 8 ||
( tvā॒ - bhā॒ga - ekā̭daśa ca ) (a. 5)
ava̭dhūta॒gṃ॒ rakṣo-'va̭dhūtā॒ arā̭ta॒yo-'di̭tyā॒stvaga̭si॒ prati̭ tvā pṛthi॒vīve᳚ttu di॒va-sska̭mbha॒nira̭si॒ prati॒ tvā-'di̭tyā॒stvagve᳚ttu dhi॒ṣaṇā̭-'si parva॒tyā prati̭ tvā di॒va-sska̭mbha॒nirve᳚ttu dhi॒ṣaṇā̭-'si pārvate॒yī prati̭ tvā parva॒tirve᳚ttu de॒vasya̭ tvā savi॒tuḥ pra̭sa॒ve᳚-'śvino᳚-rbā॒hubhyā᳚-mpū॒ṣṇohastā᳚bhyā॒madhi̭ vapāmidhā॒nya̭masi dhinu॒hi de॒vā-nprā॒ṇāya̭ tvā 'pā॒nāya̭ tvā vyā॒nāya̭ tvā dī॒rghāmanu॒ prasi̭ti॒māyṷṣedhā-nde॒vo vaḥ̭ savi॒tā hira̭ṇyapāṇiḥ॒ prati̭ gṛhṇātu || 9 ||
(prā॒ṇāya̭ tvā॒ - pañca̭daśa ca) (a. 6)
dhṛṣṭi̭rasi॒ brahma̭ ya॒cchāpā᳚gne॒ 'gnimā॒māda̭-ñjahi॒ niṣkra॒vyādagṃ̭ se॒dhā-''dḙva॒yajaṃ̭-va~ha॒ nirda̭gdha॒gṃ॒ rakṣo॒ nirda̭gdhā॒ arā̭tayo dhru॒vama̭si pṛthi॒vī-ndṛ॒gṃ॒hā-''yṷ-rdṛgṃha pra॒jā-ndṛgṃ̭ha sajā॒tāna॒smai yaja̭mānāya॒ paryṷ̄ha dha॒rtrama̭sya॒ntari̭kṣa-ndṛgṃha prā॒ṇa-ndṛgṃ̭hāpā॒na-ndṛgṃ̭ha sajā॒tāna॒smai yaja̭mānāya॒ paryṷ̄ha dha॒ruṇa̭masi॒ diva̭-ndṛgṃha॒ cakṣṷ- [cakṣuḥ̭, dṛ॒gṃ॒ha॒ śrotra̭-ndṛgṃha] 10
rdṛgṃha॒ śrotra̭-ndṛgṃha sajā॒tāna॒smai yaja̭mānāya॒ paryṷ̄ha॒ dharmā̭si॒ diśo̭ dṛgṃha॒ yoni̭-ndṛgṃha pra॒jā-ndṛgṃ̭ha sajā॒tāna॒smai yaja̭mānāya॒ paryṷ̄ha॒ citaḥ̭ stha pra॒jāma॒smai ra॒yima॒smai sa̭jā॒tāna॒smai yaja̭mānāya॒ paryṷ̄ha॒ bhṛgṷ̄ṇā॒maṅgi̭rasā॒-ntapa̭sā tapyaddhvaṃ॒-yā~ni̭ gha॒rme ka॒pālā᳚nyupaci॒nvanti̭ ve॒dhasaḥ̭ | pū॒ṣṇastānyapi̭ vra॒ta i̭ndravā॒yū vi mṷñcatām || 11 ||
(cakṣṷ - ra॒ṣṭāca̭tvārigṃśacca) (a. 7)
saṃ-va~̭pāmi॒ samāpo̭ a॒dbhira̭gmata॒ samoṣa̭dhayo॒ rasḙna॒ sagṃ re॒vatī॒-rjaga̭tībhi॒-rmadhṷmatī॒-rmadhṷmatībhi-ssṛjyaddhvama॒dbhyaḥ pari॒ prajā̭tā-sstha॒ sama॒dbhiḥ pṛ̭cyaddhva॒-ñjana̭yatyai tvā॒ saṃ-yau~᳚mya॒gnaye᳚ tvā॒-'gnīṣomā᳚bhyā-mma॒khasya॒ śiro̭-'si gha॒rmo̭-'si vi॒śvāyṷru॒ru pra̭thasvo॒ru tḙ ya॒jñapa̭tiḥ prathatā॒-ntvaca̭-ṅgṛhṇīṣvā॒ntari̭ta॒gṃ॒ rakṣo॒-'ntari̭tā॒ arā̭tayode॒vastvā̭ savi॒tā śra̭payatu॒ varṣi̭ṣṭhe॒ adhi॒ nāke॒-'gnistḙ ta॒nuva॒-mmā-'ti̭ dhā॒gagnḙ ha॒vyagṃ ra̭kṣasva॒ sa-mbrahma̭ṇā pṛcyasvaika॒tāya॒ svāhā᳚ dvi॒tāya॒ svāhā᳚ tri॒tāya॒ svāhā᳚ || 12 ||
(sa॒vi॒tā - dvāvigṃ̭śatiśca) (a. 8)
ā da̭da॒ indra̭sya bā॒hura̭si॒ dakṣi̭ṇa-ssa॒hasra̭bhṛṣṭi-śśa॒tatḙjā vā॒yura̭si ti॒gmatḙjāḥ॒ pṛthi̭vi devayaja॒ - nyoṣa̭ddhyāste॒ mūla॒-mmā higṃ̭siṣa॒-mapa̭hato॒-'raruḥ̭ pṛthi॒vyai vra॒ja-ṅga̭ccha go॒sthānaṃ॒-va~rṣa̭tu te॒ dyaurba̭dhā॒na dḙva savitaḥ para॒masyā᳚-mparā॒vati̭ śa॒tena॒ pāśai॒ryo᳚-'smā-ndveṣṭi॒ ya-ñca̭ va॒ya-ndvi॒ṣmastamato॒ mā mau॒gapa̭hato॒-'raruḥ̭ pṛthi॒vyai dḙva॒yaja̭nyai vra॒jaṃ- [vra॒jam, ga॒ccha॒ go॒sthānaṃ॒-va~rṣa̭tu] 13
ga̭ccha go॒sthānaṃ॒-va~rṣa̭tu te॒ dyaurba̭dhā॒na dḙva savitaḥ para॒masyā᳚-mparā॒vati̭ śa॒tena॒ pāśai॒ryo᳚-'smā-ndveṣṭi॒ ya-ñca̭ va॒ya-ndvi॒ṣmastamato॒ mā mau॒gapa̭hato॒-'raruḥ̭ pṛthi॒vyā adḙvayajano vra॒ja-ṅga̭ccha go॒sthānaṃ॒-va~rṣa̭tu te॒ dyaurba̭dhā॒na dḙva savitaḥ para॒masyā᳚-mparā॒vati̭ śa॒tena॒ pāśai॒ryo᳚-'smā-ndveṣṭi॒ ya-ñca̭ va॒ya-ndvi॒ṣmastamato॒ mā- [mā, mau॒ga॒rarṷste॒ diva॒-mmā] 14
maṷga॒rarṷste॒ diva॒-mmā skā॒n॒. vasa̭vastvā॒ pari̭ gṛhṇantu gāya॒treṇa॒ chanda̭sāru॒drāstvā॒ pari̭ gṛhṇantu॒ traiṣṭṷbhena॒ chanda̭sā-''di॒tyāstvā॒ pari̭ gṛhṇantu॒ jāga̭tena॒ chanda̭sā de॒vasya̭ savi॒tu-ssa॒ve karma̭ kṛṇvanti ve॒dhasa̭ ṛ॒tama̭syṛta॒sada̭na-masyṛta॒śrīra̭si॒ dhā a̭si sva॒dhā a̭syu॒rvī cāsi॒ vasvī̭ cāsi pu॒rā krū॒rasya̭ vi॒sṛpo̭ viraphśi-nnudā॒dāya̭ pṛthi॒vī-ñjī॒radā̭nu॒ryāmaira̭yan ca॒ndrama̭si sva॒dhābhi॒stā-ndhīrā̭so anu॒dṛśya̭ yajante || 15 ||
(de॒va॒yaja̭nyai vra॒jaṃ - tamato॒ mā - vi̭raphśi॒n - nekā̭daśa ca) (a. 9)
pratyṷṣṭa॒gṃ॒ rakṣaḥ॒ pratyṷṣṭā॒ arā̭tayo॒ 'gne-rva॒-steji̭ṣṭhena॒ teja̭sā॒ ni-ṣṭa̭pāmi go॒ṣṭha-mmā nirmṛ̭kṣaṃ-vā~॒jina̭-ntvā sapatnasā॒hagṃ sa-mmā᳚rjmi॒ vāca̭-mprā॒ṇa-ñcakṣu॒-śśrotra̭-mpra॒jāṃ-yo~ni॒-mmā nirmṛ̭kṣaṃ-vā~॒jinī᳚-ntvā sapatnasā॒hīgṃ sa-mmā᳚rjmyā॒śāsā̭nā saumana॒sa-mpra॒jāgṃ saubhā᳚gya-nta॒nūm | a॒gneranṷvratā bhū॒tvā sa-nna̭hye sukṛ॒tāya॒ kam || su॒pra॒jasa̭stvā va॒yagṃ su॒patnī॒rupa̭- [su॒pathnī॒rupa̭, se॒di॒mi॒ |] 16
sedima | agnḙ sapatna॒dambha̭na॒-mada̭bdhāso॒ adā᳚bhyam || i॒maṃ-vi~ṣyā̭mi॒ varṷṇasya॒ pāśaṃ॒ ~ya-maba̭ddhnīta savi॒tā su॒ketaḥ̭ | dhā॒tu-śca॒ yonaṷ sukṛ॒tasya̭ lo॒ke syo॒na-mmḙ sa॒ha patyā̭ karomi || samāyṷṣā॒ sampra॒jayā॒ sama̭gne॒ varca̭sā॒ punaḥ̭ | sa-mpatnī॒ patyā॒-'ha-ṅga̭cche॒ samā॒tmā ta॒nuvā॒ mama̭ || ma॒hī॒nā-mpayo॒-'syoṣa̭dhīnā॒gṃ॒ rasa॒stasya॒ te-'kṣī̭yamāṇasya॒ ni- [niḥ, va॒pā॒mi॒ ma॒hī॒nāṃ] 17
rva̭pāmi mahī॒nā-mpayo॒-'syoṣa̭dhīnā॒gṃ॒ raso-'da̭bdhena tvā॒ cakṣu॒ṣā-'ve᳚kṣe suprajā॒stvāya॒ tejo̭-'si॒ tejo-'nu॒ prehya॒gniste॒ tejo॒ mā vi nai̭da॒gne-rji॒hvā-'si̭ su॒bhūrde॒vānā॒-ndhāmnḙdhāmne de॒vebhyo॒ yajṷṣeyajuṣe bhava śu॒krama̭si॒ jyoti̭rasi॒ tejo̭-'si de॒vo vaḥ̭ savi॒to-tpṷnā॒tvacchi̭dreṇa pa॒vitrḙṇa॒ vaso॒-ssūrya̭sya ra॒śmibhiḥ̭ śu॒kra-ntvā̭ śu॒krāyā॒-ndhāmnḙdhāmne de॒vebhyo॒ yajṷṣeyajuṣe gṛhṇāmi॒ jyoti̭stvā॒ jyoti̭ṣya॒rcistvā॒-'rciṣi॒ dhāmnḙdhāmne de॒vebhyo॒ yajṷṣeyajuṣe gṛhṇāmi || 18 ||
(upa॒ - nī - ra॒śmibhiḥ̭ śu॒kragṃ - ṣoḍa̭śa ca) (a. 10)
kṛṣṇo᳚-'syākhare॒ṣṭho᳚-'gnaye᳚ tvā॒ svāhā॒ vedi̭rasi ba॒r॒hiṣe᳚ tvā॒ svāhā ̭ba॒r॒hira̭si sru॒gbhyastvā॒ svāhā̭ di॒ve tvā॒-'ntari̭kṣāya tvā pṛthi॒vyai tvā᳚ sva॒dhā pi॒tṛbhya॒ ūrgbha̭va barhi॒ṣadbhya̭ ū॒rjā pṛ̭thi॒vī-ṅga̭cchata॒ viṣṇo॒-sstūpo॒-'syūrṇā᳚mradasa-ntvā stṛṇāmi svāsa॒stha-nde॒vebhyo̭ gandha॒rvo̭-'si vi॒śvāva̭su॒-rviśva̭smā॒dīṣa̭to॒ yaja̭mānasya pari॒dhiri॒ḍa ī̭ḍi॒ta indra̭sya bā॒hura̭si॒- [bā॒hura̭si, dakṣi̭ṇo॒] 19
dakṣi̭ṇo॒ yaja̭mānasya pari॒dhiri॒ḍa ī̭ḍi॒to mi॒trāvarṷṇau tvottara॒taḥ pari̭ dhattā-ndhru॒veṇa॒ dharma̭ṇā॒ yaja̭mānasya pari॒dhiri॒ḍa ī̭ḍi॒ta-ssūrya̭stvā pu॒rastā᳚-tpātu॒ kasyā᳚ścida॒bhiśa̭styā vī॒tiho᳚tra-ntvā kave dyu॒manta॒gṃ॒ sami̭dhīma॒hyagnḙ bṛ॒hanta̭maddhva॒re vi॒śo ya॒ntre stho॒ vasṷ̄nāgṃ ru॒drāṇā̭-mādi॒tyānā॒gṃ॒ sada̭si sīda ju॒hūrṷpa॒bhṛ-ddhru॒vā-'si̭ ghṛ॒tācī॒ nāmnā᳚ pri॒yeṇa॒ nāmnā᳚ pri॒ye sada̭si sīdai॒tā a̭sadan-thsukṛ॒tasya̭ lo॒ke tā vi̭ṣṇo pāhi pā॒hi ya॒jña-mpā॒hi ya॒jñapa̭ti-mpā॒hi māṃ-ya~̭jña॒niya᳚m || 20 ||
(bā॒hura̭si - pri॒ye sada̭si॒ - pañca̭daśa ca) (a. 11)
bhuva̭namasi॒ vi pra̭tha॒svāgne॒ yaṣṭa̭ri॒da-nnamaḥ̭ | juhvehya॒gnistvā᳚ hvayati devaya॒jyāyā॒ upa̭bhṛ॒dehi̭ de॒vastvā̭ savi॒tā hva̭yati devaya॒jyāyā॒ agnā̭viṣṇū॒ mā vā॒mava̭ kramiṣaṃ॒-vi~ ji̭hāthā॒-mmā mā॒ sa-ntā᳚ptaṃ-lo~॒ka-mmḙ lokakṛtau kṛṇutaṃ॒-vi~ṣṇo॒-ssthāna̭masī॒ta indro̭ akṛṇo-dvī॒ryā̭ṇi samā॒rabhyo॒rdhvo a̭ddhva॒ro di̭vi॒spṛśa॒mahrṷto ya॒jño ya॒jñapa̭te॒-rindrā̭vā॒n-thsvāhā̭ bṛ॒hadbhāḥ pā॒hi mā᳚-'gne॒ duśca̭ritā॒dā mā॒ suca̭rite bhaja ma॒khasya॒ śiro̭-'si॒ sañjyoti̭ṣā॒ jyoti̭raṅktām || 21 ||
(ahrṷta॒ - eka̭vigṃśatiśca) (a. 12)
vāja̭sya mā prasa॒veno᳚dgrā॒bheṇoda̭grabhīt | athā̭ sa॒patnā॒gṃ॒ indro̭ me nigrā॒bheṇādha̭rāgṃ akaḥ || u॒dgrā॒bha-ñca̭ nigrā॒bha-ñca॒ brahma̭ de॒vā a̭vīvṛdhann | athā̭ sa॒patnā̭nindrā॒gnī mḙ viṣū॒cīnā॒n vya̭syatām || vasṷbhyastvā ru॒drebhya̭stvā-''di॒tyebhya̭stvā॒-'ktagṃ rihā̭ṇā vi॒yantu॒ vayaḥ̭ || pra॒jāṃ-yo~ni॒-mmā nirmṛ̭kṣa॒mā pyā̭yantā॒māpa॒ oṣa̭dhayo ma॒rutā॒-mpṛṣa̭taya-sstha॒ divaṃ̭- [diva᳚m, ga॒ccha॒ tato̭ no॒] 22
gaccha॒ tato̭ no॒ vṛṣṭi॒mera̭ya | ā॒yu॒ṣpā a̭gne॒-'syāyṷrme pāhi cakṣu॒ṣpā a̭gne-'si॒ cakṣṷrme pāhi dhru॒vā-'si॒ ya-mpa̭ri॒dhi-mpa॒ryadha̭tthā॒ agnḙ deva pa॒ṇibhi̭-rvī॒yamā̭ṇaḥ | ta-nta̭ e॒tamanu॒ joṣa̭-mbharāmi॒ nede॒ṣa tvada̭pace॒tayā̭tai ya॒jñasya॒ pātha॒ upa॒ sami̭tagṃ saggsrā॒vabhā̭gā-ssthe॒ṣā bṛ॒hantaḥ̭ prastare॒ṣṭhā ba̭rhi॒ṣada̭śca [ ] 23
de॒vā i॒māṃ-vā~ca̭ma॒bhi viśvḙ gṛ॒ṇanta̭ ā॒sadyā॒smi-nba॒r॒hiṣi̭ mādayaddhvama॒gne-rvā॒mapa̭nnagṛhasya॒ sada̭si sādayāmi su॒mnāya̭ sumninī su॒mne mā̭ dhatta-ndhu॒ri dha॒ryaṷ pāta॒magnḙ 'dabdhāyo 'śītatano pā॒hi mā॒-'dya di॒vaḥ pā॒hi prasi̭tyai pā॒hi duri̭ṣṭyai pā॒hi dṷradma॒nyai pā॒hi duśca̭ritā॒davi̭ṣa-nnaḥ pi॒tu-ṅkṛ̭ṇu su॒ṣadā॒ yoni॒gg॒ svāhā॒ devā̭ gātuvido gā॒tuṃvi~॒ttvā gā॒tu mi̭ta॒ mana̭saspata i॒ma-nno̭ deva de॒veṣṷ ya॒jñagg svāhā̭ vā॒ci svāhā॒ vātḙ dhāḥ || 24 ||
(divaṃ̭ - ca - vi॒ttvā gā॒tuṃ - trayo̭daśa ca) (a. 13)
u॒bhā vā̭mindrāgnī āhu॒vaddhyā̭ u॒bhā rādha̭sa-ssa॒ha mā̭da॒yaddhyai᳚ | u॒bhā dā॒tārā̭vi॒ṣāgṃ ra̭yī॒ṇāmu॒bhā vāja̭sya sā॒tayḙ huve vām || aśra̭va॒gṃ॒ hi bhṷ̄ri॒dāva̭ttarā vāṃ॒-vi~jā̭māturu॒ta vā̭ ghā syā॒lāt | athā॒ soma̭sya॒ praya̭tī yu॒vabhyā॒mindrā᳚gnī॒ stoma̭-ñjanayāmi॒ navya᳚m || indrā᳚gnī nava॒ti-mpuro̭ dā॒sapa̭tnīradhūnutam | sā॒kamekḙna॒ karma̭ṇā || śuci॒-nnu stoma॒-nnava̭jāta-ma॒dyendrā᳚gnī vṛtrahaṇā ju॒ṣethā᳚m || 25 ||
u॒bhā hi vāgṃ̭ su॒havā॒ joha̭vīmi॒ tā vājagṃ̭ sa॒dya ṷśa॒te dheṣṭhā᳚ || va॒yamṷ tvā pathaspate॒ ratha॒-nna vāja̭sātaye | dhi॒ye pṷ̄ṣannayujmahi || pa॒thaspa̭thaḥ॒ pari̭patiṃ-va~ca॒syā kāmḙna kṛ॒to a॒bhyā̭naḍa॒rkam | sano̭ rāsacchu॒rudha̭śca॒ndrāgrā॒ dhiya̭ndhiyagṃ sīṣadhāti॒ pra pū॒ṣā || kṣetra̭sya॒ pati̭nā va॒yagṃ hi॒tenḙva jayāmasi | gāmaśva̭-mpoṣayi॒tnvā sa no̭ [sa naḥ̭, mṛ॒ḍā॒tī॒dṛśe᳚ |] 26
mṛḍātī॒dṛśe᳚ || kṣetra̭sya pate॒ madhṷmanta-mū॒rmi-ndhe॒nuri̭va॒ payo̭ a॒smāsṷ dhukṣva | ma॒dhu॒ścuta̭-ṅghṛ॒tami̭va॒ supṷ̄ta-mṛ॒tasya̭ naḥ॒ pata̭yo mṛḍayantu || agne॒ naya̭ su॒pathā̭ rā॒ye a॒smān. viśvā̭ni deva va॒yunā̭ni vi॒dvān | yu॒yo॒ddhya̭sma-jjṷhurā॒ṇameno॒ bhūyi̭ṣṭhā-nte॒ nama̭uktiṃ-vi~dhema || ā de॒vānā॒mapi॒ panthā̭-maganma॒ yaccha॒knavā̭ma॒ tadanu॒ pravo̭ḍhum | a॒gni-rvi॒dvān-thsa ya̭jā॒- [sa ya̭jāt, sedu॒ hotā॒ so] 27
thsedu॒ hotā॒ so a̭ddhva॒rān-thsa ṛ॒tūn ka̭lpayāti || yadvāhi̭ṣṭha॒-ntada॒gnayḙ bṛ॒hada̭rca vibhāvaso | mahi̭ṣīva॒ tvadra॒yistvadvājā॒ udī̭rate || agne॒ tva-mpā̭rayā॒ navyo̭ a॒smān-thsva॒stibhi॒rati̭ du॒rgāṇi॒ viśvā᳚ | pūśca̭ pṛ॒thvī ba̭hu॒lā na̭ u॒rvī bhavā̭ to॒kāya॒ tana̭yāya॒ śaṃ-yoḥ ~|| tvama̭gne vrata॒pā a̭si de॒va ā martye॒ṣvā | tvaṃ-ya~॒jñeṣvīḍyaḥ̭ || yadvo̭ va॒ya-mpra̭mi॒nāma̭ vra॒tāni̭ vi॒duṣā᳚-ndevā॒ avi̭duṣṭarāsaḥ | a॒gniṣṭa-dviśva॒mā pṛ̭ṇāti vi॒dvān. yebhi̭-rde॒vāgṃ ṛ॒tubhiḥ̭ ka॒lpayā̭ti || 28 ||
(ju॒ṣethā॒mā - sa no̭ - yajā॒ - dā - trayo̭vigṃśatiśca) (a. 14)
(i॒ṣe tvā̭ - ya॒jñasya॒ - śundha̭dhvaṃ॒ - karma̭ṇe vāṃ - de॒vo-'va̭dhūtaṃ॒ - dhuṣṭiḥ॒ - saṃ-va~̭pā॒- myā da̭de॒ - pratyṷṣṭaṃ॒ - kṛṣṇo̭-'si॒ - bhuva̭namasi॒ - vāja̭syo॒bhā vāṃ॒ - catṷrdaśa )
(i॒ṣe - dṛgṃ̭ha॒ - bhuva̭na - ma॒ṣṭāvigṃ̭śatiḥ )
(i॒ṣe tvā̭, ka॒lpayā̭ti)
|| hariḥ̭ om ||
|| kṛṣṇa yajurvedīya taittirīya saṃhitāyā-mprathamakāṇḍe prathamaḥ praśna-ssamāptaḥ ||
Sanskrit — Devanagari (original)
कृष्ण यजुर्वेदीय तैत्तिरीय संहिताया-म्प्रथमकाण्डे प्रथमः प्रश्नः - दर्शपूर्णमासौ
ओ-न्नमः परमात्मने, श्री महागणपतये नमः,
श्री गुरुभ्यो नमः । ह॒रिः॒ ओम् ॥
इ॒षे त्वो॒र्जे त्वा॑ वा॒यवः॑ स्थोपा॒यवः॑ स्थ दे॒वो वः॑ सवि॒ता प्रार्प॑यतु॒ श्रेष्ठ॑तमाय॒ कर्म॑ण॒ आ प्या॑यद्ध्वमघ्निया देवभा॒ग-मूर्ज॑स्वतीः॒ पय॑स्वतीः प्र॒जाव॑ती-रनमी॒वा अ॑य॒क्ष्मा मा वः॑ स्ते॒न ई॑शत॒ मा-ऽघशग्ं॑सो रु॒द्रस्य॑ हे॒तिः परि॑ वो वृणक्तु ध्रु॒वा अ॒स्मि-न्गोप॑तौ स्यात ब॒ह्वी-र्यज॑मानस्य प॒शू-न्पा॑हि ॥ 1 ॥
(इ॒षे - त्रिच॑त्वारिग्ंशत् ) (अ. 1)
य॒ज्ञस्य॑ घो॒षद॑सि॒ प्रत्यु॑ष्ट॒ग्ं॒ रक्षः॒ प्रत्यु॑ष्टा॒ अरा॑तयः॒ प्रेय-म॑गाद्धि॒षणा॑ ब॒र्॒हिरच्छ॒ मनु॑ना कृ॒ता स्व॒धया॒ वित॑ष्टा॒ त आ व॑हन्ति क॒वयः॑ पु॒रस्ता᳚-द्दे॒वेभ्यो॒ जुष्ट॑मि॒ह ब॒र्॒हि-रा॒सदे॑ दे॒वाना᳚-म्परिषू॒तम॑सि व॒र्॒षवृ॑द्धमसि॒ देव॑बर्हि॒र्मा त्वा-ऽ॒न्व-म्मा ति॒र्य-क्पर्व॑ ते राद्ध्यासमाच्छे॒त्ता ते॒ मा रि॑ष॒-न्देव॑बर्हि-श्श॒तव॑ल्शं॒-विँ रो॑ह स॒हस्र॑वल्शा॒ [स॒हस्र॑वल्शाः, वि व॒यग्ं रु॑हेम] 2
वि व॒यग्ं रु॑हेम पृथि॒व्या-स्स॒म्पृचः॑ पाहि सुस॒म्भृता᳚ त्वा॒ सम्भ॑रा॒म्यदि॑त्यै॒ रास्ना॑-ऽसीन्द्रा॒ण्यै स॒न्नह॑न-म्पू॒षा ते᳚ ग्र॒न्थि-ङ्ग्र॑थ्नातु॒ स ते॒ मा-ऽऽ स्था॒दिन्द्र॑स्य त्वा बा॒हुभ्या॒मुद्य॑च्छे॒ बृह॒स्पते᳚-र्मू॒र्ध्ना ह॑राम्यु॒र्व॑न्तरि॑क्ष॒मन्वि॑हि देवङ्ग॒मम॑सि ॥ 3 ॥
(स॒हस्र॑वल्शा - अ॒ष्टात्रिग्ं॑शच्च) (अ. 2)
शुन्ध॑द्ध्व॒-न्दैव्या॑य॒ कर्म॑णे देवय॒ज्यायै॑ मात॒रिश्व॑नो घ॒र्मो॑-ऽसि॒ द्यौर॑सि पृथि॒व्य॑सि वि॒श्वधा॑या असि पर॒मेण॒ धाम्ना॒ दृग्ंह॑स्व॒ मा ह्वा॒-र्वसू॑ना-म्प॒वित्र॑मसि श॒तधा॑रं॒-वँसू॑ना-म्प॒वित्र॑मसि स॒हस्र॑धारग्ं हु॒त-स्स्तो॒कोहु॒तो द्र॒फ्सो᳚ ऽग्नये॑ बृह॒ते नाका॑य॒ स्वाहा॒ द्यावा॑पृथि॒वीभ्या॒ग्ं॒ सा वि॒श्वायु॒-स्सा वि॒श्वव्य॑चा॒-स्सा वि॒श्वक॑र्मा॒ स-म्पृ॑च्यद्ध्व-मृतावरी-रू॒र्मिणी॒र्मधु॑मत्तमा म॒न्द्रा धन॑स्य सा॒तये॒ सोमे॑न॒ त्वा-ऽऽत॑न॒च्मीन्द्रा॑य॒ दधि॒ विष्णो॑ ह॒व्यग्ं र॑क्षस्व ॥ 4 ॥
(सोमे॑ - ना॒ष्टौ च॑) (अ. 3)
कर्म॑णे वा-न्दे॒वेभ्यः॑ शकेयं॒-वेँषा॑य त्वा॒ प्रत्यु॑ष्ट॒ग्ं॒ रक्षः॒ प्रत्यु॑ष्टा॒ अरा॑तयो॒ धूर॑सि॒ धूर्व॒ धूर्व॑न्त॒-न्धूर्व॒ तं-योँ᳚-ऽस्मा-न्धूर्व॑ति॒ त-न्धू᳚र्व॒यं-वँ॒य-न्धूर्वा॑म॒स्त्व-न्दे॒वाना॑मसि॒ सस्नि॑तम॒-म्पप्रि॑तम॒-ञ्जुष्ट॑तमं॒-वँह्नि॑तम-न्देव॒हूत॑म॒-मह्रु॑तमसि हवि॒र्धान॒-न्दृग्ंह॑स्व॒ मा ह्वा᳚-र्मि॒त्रस्य॑ त्वा॒ चक्षु॑षा॒ प्रेक्षे॒ मा भेर्मा सं-विँ॑क्था॒ मा त्वा॑ - [मा त्वा᳚, हि॒ग्ं॒सि॒ष॒मु॒रु] 5
हिग्ंसिषमु॒रु वाता॑य दे॒वस्य॑ त्वा सवि॒तुः प्र॑स॒वे᳚-ऽश्विनो᳚-र्बा॒हुभ्या᳚-म्पू॒ष्णो हस्ता᳚भ्या-म॒ग्नये॒ जुष्ट॒-न्निर्व॑पाम्य॒ग्नीषोमा᳚भ्या-मि॒द-न्दे॒वाना॑मि॒दमु॑ न-स्स॒ह स्फा॒त्यै त्वा॒ नारा᳚त्यै॒ सुव॑र॒भि वि ख्ये॑षं-वैँश्वान॒र-ञ्ज्योति॒-र्दृग्ंह॑न्ता॒-न्दुर्या॒ द्यावा॑पृथि॒व्यो- रु॒र्व॑न्तरि॑क्ष॒ मन्वि॒-ह्यदि॑त्या स्त्वो॒पस्थे॑ सादया॒म्यग्ने॑ ह॒व्यग्ं र॑क्षस्व ॥ 6 ॥
( मा त्वा॒ - षट्च॑त्वारिग्ंशच्च ) (अ. 4)
दे॒वो वः॑ सवि॒तो-त्पु॑ना॒त्वच्छि॑द्रेण प॒वित्रे॑ण॒ वसो॒-स्सूर्य॑स्य र॒श्मिभि॒रापो॑ देवीरग्रेपुवो अग्रेगु॒वो-ऽग्र॑ इ॒मं-यँ॒ज्ञ-न्न॑य॒ताग्रे॑ य॒ज्ञप॑ति-न्धत्त यु॒ष्मानिन्द्रो॑ ऽवृणीत वृत्र॒तूर्ये॑ यू॒यमिन्द्र॑-मवृणीद्ध्वं-वृँत्र॒तूर्ये॒ प्रोक्षि॑ता-स्स्था॒ग्नये॑ वो॒ जुष्ट॒-म्प्रोक्षा᳚म्य॒ग्नीषोमा᳚भ्या॒ग्ं॒ शुन्ध॑द्ध्व॒-न्दैव्या॑य॒ कर्म॑णे देवय॒ज्याया॒ अव॑धूत॒ग्ं॒ रक्षो-ऽव॑धूता॒ अरा॑त॒यो-ऽदि॑त्या॒स्त्वग॑सि॒ प्रति॑ त्वा - [प्रति॑ त्वा, पृ॒थि॒वी वे᳚त्त्वधि॒षव॑णमसि] 7
पृथि॒वी वे᳚त्त्वधि॒षव॑णमसि वानस्प॒त्य-म्प्रति॒ त्वा-ऽदि॑त्या॒स्त्वग्वे᳚त्त्व॒ग्नेस्त॒नूर॑सि वा॒चो वि॒सर्ज॑न-न्दे॒ववी॑तये त्वा गृह्णा॒म्यद्रि॑रसि वानस्प॒त्य-स्स इ॒द-न्दे॒वेभ्यो॑ ह॒व्यग्ं सु॒शमि॑ शमि॒ष्वेष॒मा व॒दोर्ज॒मा व॑द द्यु॒मद्व॑दत व॒यग्ं स॑ङ्घा॒त-ञ्जे᳚ष्म व॒र्॒षवृ॑द्धमसि॒ प्रति॑ त्वा व॒र्॒षवृ॑द्धं-वेँत्तु॒ परा॑पूत॒ग्ं॒ रक्षः॒ परा॑पूता॒ अरा॑तयो॒ रक्ष॑सा-म्भा॒गो॑ ऽसि वा॒युर्वो॒ वि वि॑नक्तु दे॒वो वः॑ सवि॒ता हिर॑ण्यपाणिः॒ प्रति॑ गृह्णातु ॥ 8 ॥
( त्वा॒ - भा॒ग - एका॑दश च ) (अ. 5)
अव॑धूत॒ग्ं॒ रक्षो-ऽव॑धूता॒ अरा॑त॒यो-ऽदि॑त्या॒स्त्वग॑सि॒ प्रति॑ त्वा पृथि॒वीवे᳚त्तु दि॒व-स्स्क॑म्भ॒निर॑सि॒ प्रति॒ त्वा-ऽदि॑त्या॒स्त्वग्वे᳚त्तु धि॒षणा॑-ऽसि पर्व॒त्या प्रति॑ त्वा दि॒व-स्स्क॑म्भ॒निर्वे᳚त्तु धि॒षणा॑-ऽसि पार्वते॒यी प्रति॑ त्वा पर्व॒तिर्वे᳚त्तु दे॒वस्य॑ त्वा सवि॒तुः प्र॑स॒वे᳚-ऽश्विनो᳚-र्बा॒हुभ्या᳚-म्पू॒ष्णोहस्ता᳚भ्या॒मधि॑ वपामिधा॒न्य॑मसि धिनु॒हि दे॒वा-न्प्रा॒णाय॑ त्वा ऽपा॒नाय॑ त्वा व्या॒नाय॑ त्वा दी॒र्घामनु॒ प्रसि॑ति॒मायु॑षेधा-न्दे॒वो वः॑ सवि॒ता हिर॑ण्यपाणिः॒ प्रति॑ गृह्णातु ॥ 9 ॥
(प्रा॒णाय॑ त्वा॒ - पञ्च॑दश च) (अ. 6)
धृष्टि॑रसि॒ ब्रह्म॑ य॒च्छापा᳚ग्ने॒ ऽग्निमा॒माद॑-ञ्जहि॒ निष्क्र॒व्यादग्ं॑ से॒धा-ऽऽदे॑व॒यजं॑-वँह॒ निर्द॑ग्ध॒ग्ं॒ रक्षो॒ निर्द॑ग्धा॒ अरा॑तयो ध्रु॒वम॑सि पृथि॒वी-न्दृ॒ग्ं॒हा-ऽऽयु॑-र्दृग्ंह प्र॒जा-न्दृग्ं॑ह सजा॒तान॒स्मै यज॑मानाय॒ पर्यू॑ह ध॒र्त्रम॑स्य॒न्तरि॑क्ष-न्दृग्ंह प्रा॒ण-न्दृग्ं॑हापा॒न-न्दृग्ं॑ह सजा॒तान॒स्मै यज॑मानाय॒ पर्यू॑ह ध॒रुण॑मसि॒ दिव॑-न्दृग्ंह॒ चक्षु॑- [चक्षुः॑, दृ॒ग्ं॒ह॒ श्रोत्र॑-न्दृग्ंह] 10
र्दृग्ंह॒ श्रोत्र॑-न्दृग्ंह सजा॒तान॒स्मै यज॑मानाय॒ पर्यू॑ह॒ धर्मा॑सि॒ दिशो॑ दृग्ंह॒ योनि॑-न्दृग्ंह प्र॒जा-न्दृग्ं॑ह सजा॒तान॒स्मै यज॑मानाय॒ पर्यू॑ह॒ चितः॑ स्थ प्र॒जाम॒स्मै र॒यिम॒स्मै स॑जा॒तान॒स्मै यज॑मानाय॒ पर्यू॑ह॒ भृगू॑णा॒मङ्गि॑रसा॒-न्तप॑सा तप्यद्ध्वं॒-याँनि॑ घ॒र्मे क॒पाला᳚न्युपचि॒न्वन्ति॑ वे॒धसः॑ । पू॒ष्णस्तान्यपि॑ व्र॒त इ॑न्द्रवा॒यू वि मु॑ञ्चताम् ॥ 11 ॥
(चक्षु॑ - र॒ष्टाच॑त्वारिग्ंशच्च) (अ. 7)
सं-वँ॑पामि॒ समापो॑ अ॒द्भिर॑ग्मत॒ समोष॑धयो॒ रसे॑न॒ सग्ं रे॒वती॒-र्जग॑तीभि॒-र्मधु॑मती॒-र्मधु॑मतीभि-स्सृज्यद्ध्वम॒द्भ्यः परि॒ प्रजा॑ता-स्स्थ॒ सम॒द्भिः पृ॑च्यद्ध्व॒-ञ्जन॑यत्यै त्वा॒ सं-यौँ᳚म्य॒ग्नये᳚ त्वा॒-ऽग्नीषोमा᳚भ्या-म्म॒खस्य॒ शिरो॑-ऽसि घ॒र्मो॑-ऽसि वि॒श्वायु॑रु॒रु प्र॑थस्वो॒रु ते॑ य॒ज्ञप॑तिः प्रथता॒-न्त्वच॑-ङ्गृह्णीष्वा॒न्तरि॑त॒ग्ं॒ रक्षो॒-ऽन्तरि॑ता॒ अरा॑तयोदे॒वस्त्वा॑ सवि॒ता श्र॑पयतु॒ वर्षि॑ष्ठे॒ अधि॒ नाके॒-ऽग्निस्ते॑ त॒नुव॒-म्मा-ऽति॑ धा॒गग्ने॑ ह॒व्यग्ं र॑क्षस्व॒ स-म्ब्रह्म॑णा पृच्यस्वैक॒ताय॒ स्वाहा᳚ द्वि॒ताय॒ स्वाहा᳚ त्रि॒ताय॒ स्वाहा᳚ ॥ 12 ॥
(स॒वि॒ता - द्वाविग्ं॑शतिश्च) (अ. 8)
आ द॑द॒ इन्द्र॑स्य बा॒हुर॑सि॒ दक्षि॑ण-स्स॒हस्र॑भृष्टि-श्श॒तते॑जा वा॒युर॑सि ति॒ग्मते॑जाः॒ पृथि॑वि देवयज॒ - न्योष॑द्ध्यास्ते॒ मूल॒-म्मा हिग्ं॑सिष॒-मप॑हतो॒-ऽररुः॑ पृथि॒व्यै व्र॒ज-ङ्ग॑च्छ गो॒स्थानं॒-वँर्ष॑तु ते॒ द्यौर्ब॑धा॒न दे॑व सवितः पर॒मस्या᳚-म्परा॒वति॑ श॒तेन॒ पाशै॒र्यो᳚-ऽस्मा-न्द्वेष्टि॒ य-ञ्च॑ व॒य-न्द्वि॒ष्मस्तमतो॒ मा मौ॒गप॑हतो॒-ऽररुः॑ पृथि॒व्यै दे॑व॒यज॑न्यै व्र॒जं- [व्र॒जम्, ग॒च्छ॒ गो॒स्थानं॒-वँर्ष॑तु] 13
ग॑च्छ गो॒स्थानं॒-वँर्ष॑तु ते॒ द्यौर्ब॑धा॒न दे॑व सवितः पर॒मस्या᳚-म्परा॒वति॑ श॒तेन॒ पाशै॒र्यो᳚-ऽस्मा-न्द्वेष्टि॒ य-ञ्च॑ व॒य-न्द्वि॒ष्मस्तमतो॒ मा मौ॒गप॑हतो॒-ऽररुः॑ पृथि॒व्या अदे॑वयजनो व्र॒ज-ङ्ग॑च्छ गो॒स्थानं॒-वँर्ष॑तु ते॒ द्यौर्ब॑धा॒न दे॑व सवितः पर॒मस्या᳚-म्परा॒वति॑ श॒तेन॒ पाशै॒र्यो᳚-ऽस्मा-न्द्वेष्टि॒ य-ञ्च॑ व॒य-न्द्वि॒ष्मस्तमतो॒ मा- [मा, मौ॒ग॒ररु॑स्ते॒ दिव॒-म्मा] 14
मौ॑ग॒ररु॑स्ते॒ दिव॒-म्मा स्का॒न्॒. वस॑वस्त्वा॒ परि॑ गृह्णन्तु गाय॒त्रेण॒ छन्द॑सारु॒द्रास्त्वा॒ परि॑ गृह्णन्तु॒ त्रैष्टु॑भेन॒ छन्द॑सा-ऽऽदि॒त्यास्त्वा॒ परि॑ गृह्णन्तु॒ जाग॑तेन॒ छन्द॑सा दे॒वस्य॑ सवि॒तु-स्स॒वे कर्म॑ कृण्वन्ति वे॒धस॑ ऋ॒तम॑स्यृत॒सद॑न-मस्यृत॒श्रीर॑सि॒ धा अ॑सि स्व॒धा अ॑स्यु॒र्वी चासि॒ वस्वी॑ चासि पु॒रा क्रू॒रस्य॑ वि॒सृपो॑ विरफ्शि-न्नुदा॒दाय॑ पृथि॒वी-ञ्जी॒रदा॑नु॒र्यामैर॑यन् च॒न्द्रम॑सि स्व॒धाभि॒स्ता-न्धीरा॑सो अनु॒दृश्य॑ यजन्ते ॥ 15 ॥
(दे॒व॒यज॑न्यै व्र॒जं - तमतो॒ मा - वि॑रफ्शि॒न् - नेका॑दश च) (अ. 9)
प्रत्यु॑ष्ट॒ग्ं॒ रक्षः॒ प्रत्यु॑ष्टा॒ अरा॑तयो॒ ऽग्ने-र्व॒-स्तेजि॑ष्ठेन॒ तेज॑सा॒ नि-ष्ट॑पामि गो॒ष्ठ-म्मा निर्मृ॑क्षं-वाँ॒जिन॑-न्त्वा सपत्नसा॒हग्ं स-म्मा᳚र्ज्मि॒ वाच॑-म्प्रा॒ण-ञ्चक्षु॒-श्श्रोत्र॑-म्प्र॒जां-योँनि॒-म्मा निर्मृ॑क्षं-वाँ॒जिनी᳚-न्त्वा सपत्नसा॒हीग्ं स-म्मा᳚र्ज्म्या॒शासा॑ना सौमन॒स-म्प्र॒जाग्ं सौभा᳚ग्य-न्त॒नूम् । अ॒ग्नेरनु॑व्रता भू॒त्वा स-न्न॑ह्ये सुकृ॒ताय॒ कम् ॥ सु॒प्र॒जस॑स्त्वा व॒यग्ं सु॒पत्नी॒रुप॑- [सु॒पथ्नी॒रुप॑, से॒दि॒मि॒ ।] 16
सेदिम । अग्ने॑ सपत्न॒दम्भ॑न॒-मद॑ब्धासो॒ अदा᳚भ्यम् ॥ इ॒मं-विँष्या॑मि॒ वरु॑णस्य॒ पाशं॒ ँय-मब॑द्ध्नीत सवि॒ता सु॒केतः॑ । धा॒तु-श्च॒ योनौ॑ सुकृ॒तस्य॑ लो॒के स्यो॒न-म्मे॑ स॒ह पत्या॑ करोमि ॥ समायु॑षा॒ सम्प्र॒जया॒ सम॑ग्ने॒ वर्च॑सा॒ पुनः॑ । स-म्पत्नी॒ पत्या॒-ऽह-ङ्ग॑च्छे॒ समा॒त्मा त॒नुवा॒ मम॑ ॥ म॒ही॒ना-म्पयो॒-ऽस्योष॑धीना॒ग्ं॒ रस॒स्तस्य॒ ते-ऽक्षी॑यमाणस्य॒ नि- [निः, व॒पा॒मि॒ म॒ही॒नां] 17
र्व॑पामि मही॒ना-म्पयो॒-ऽस्योष॑धीना॒ग्ं॒ रसो-ऽद॑ब्धेन त्वा॒ चक्षु॒षा-ऽवे᳚क्षे सुप्रजा॒स्त्वाय॒ तेजो॑-ऽसि॒ तेजो-ऽनु॒ प्रेह्य॒ग्निस्ते॒ तेजो॒ मा वि नै॑द॒ग्ने-र्जि॒ह्वा-ऽसि॑ सु॒भूर्दे॒वाना॒-न्धाम्ने॑धाम्ने दे॒वेभ्यो॒ यजु॑षेयजुषे भव शु॒क्रम॑सि॒ ज्योति॑रसि॒ तेजो॑-ऽसि दे॒वो वः॑ सवि॒तो-त्पु॑ना॒त्वच्छि॑द्रेण प॒वित्रे॑ण॒ वसो॒-स्सूर्य॑स्य र॒श्मिभिः॑ शु॒क्र-न्त्वा॑ शु॒क्राया॒-न्धाम्ने॑धाम्ने दे॒वेभ्यो॒ यजु॑षेयजुषे गृह्णामि॒ ज्योति॑स्त्वा॒ ज्योति॑ष्य॒र्चिस्त्वा॒-ऽर्चिषि॒ धाम्ने॑धाम्ने दे॒वेभ्यो॒ यजु॑षेयजुषे गृह्णामि ॥ 18 ॥
(उप॒ - नी - र॒श्मिभिः॑ शु॒क्रग्ं - षोड॑श च) (अ. 10)
कृष्णो᳚-ऽस्याखरे॒ष्ठो᳚-ऽग्नये᳚ त्वा॒ स्वाहा॒ वेदि॑रसि ब॒र्॒हिषे᳚ त्वा॒ स्वाहा ॑ब॒र्॒हिर॑सि स्रु॒ग्भ्यस्त्वा॒ स्वाहा॑ दि॒वे त्वा॒-ऽन्तरि॑क्षाय त्वा पृथि॒व्यै त्वा᳚ स्व॒धा पि॒तृभ्य॒ ऊर्ग्भ॑व बर्हि॒षद्भ्य॑ ऊ॒र्जा पृ॑थि॒वी-ङ्ग॑च्छत॒ विष्णो॒-स्स्तूपो॒-ऽस्यूर्णा᳚म्रदस-न्त्वा स्तृणामि स्वास॒स्थ-न्दे॒वेभ्यो॑ गन्ध॒र्वो॑-ऽसि वि॒श्वाव॑सु॒-र्विश्व॑स्मा॒दीष॑तो॒ यज॑मानस्य परि॒धिरि॒ड ई॑डि॒त इन्द्र॑स्य बा॒हुर॑सि॒- [बा॒हुर॑सि, दक्षि॑णो॒] 19
दक्षि॑णो॒ यज॑मानस्य परि॒धिरि॒ड ई॑डि॒तो मि॒त्रावरु॑णौ त्वोत्तर॒तः परि॑ धत्ता-न्ध्रु॒वेण॒ धर्म॑णा॒ यज॑मानस्य परि॒धिरि॒ड ई॑डि॒त-स्सूर्य॑स्त्वा पु॒रस्ता᳚-त्पातु॒ कस्या᳚श्चिद॒भिश॑स्त्या वी॒तिहो᳚त्र-न्त्वा कवे द्यु॒मन्त॒ग्ं॒ समि॑धीम॒ह्यग्ने॑ बृ॒हन्त॑मद्ध्व॒रे वि॒शो य॒न्त्रे स्थो॒ वसू॑नाग्ं रु॒द्राणा॑-मादि॒त्याना॒ग्ं॒ सद॑सि सीद जु॒हूरु॑प॒भृ-द्ध्रु॒वा-ऽसि॑ घृ॒ताची॒ नाम्ना᳚ प्रि॒येण॒ नाम्ना᳚ प्रि॒ये सद॑सि सीदै॒ता अ॑सदन्-थ्सुकृ॒तस्य॑ लो॒के ता वि॑ष्णो पाहि पा॒हि य॒ज्ञ-म्पा॒हि य॒ज्ञप॑ति-म्पा॒हि मां-यँ॑ज्ञ॒निय᳚म् ॥ 20 ॥
(बा॒हुर॑सि - प्रि॒ये सद॑सि॒ - पञ्च॑दश च) (अ. 11)
भुव॑नमसि॒ वि प्र॑थ॒स्वाग्ने॒ यष्ट॑रि॒द-न्नमः॑ । जुह्वेह्य॒ग्निस्त्वा᳚ ह्वयति देवय॒ज्याया॒ उप॑भृ॒देहि॑ दे॒वस्त्वा॑ सवि॒ता ह्व॑यति देवय॒ज्याया॒ अग्ना॑विष्णू॒ मा वा॒मव॑ क्रमिषं॒-विँ जि॑हाथा॒-म्मा मा॒ स-न्ता᳚प्तं-लोँ॒क-म्मे॑ लोककृतौ कृणुतं॒-विँष्णो॒-स्स्थान॑मसी॒त इन्द्रो॑ अकृणो-द्वी॒र्या॑णि समा॒रभ्यो॒र्ध्वो अ॑द्ध्व॒रो दि॑वि॒स्पृश॒मह्रु॑तो य॒ज्ञो य॒ज्ञप॑ते॒-रिन्द्रा॑वा॒न्-थ्स्वाहा॑ बृ॒हद्भाः पा॒हि मा᳚-ऽग्ने॒ दुश्च॑रिता॒दा मा॒ सुच॑रिते भज म॒खस्य॒ शिरो॑-ऽसि॒ सञ्ज्योति॑षा॒ ज्योति॑रङ्क्ताम् ॥ 21 ॥
(अह्रु॑त॒ - एक॑विग्ंशतिश्च) (अ. 12)
वाज॑स्य मा प्रस॒वेनो᳚द्ग्रा॒भेणोद॑ग्रभीत् । अथा॑ स॒पत्ना॒ग्ं॒ इन्द्रो॑ मे निग्रा॒भेणाध॑राग्ं अकः ॥ उ॒द्ग्रा॒भ-ञ्च॑ निग्रा॒भ-ञ्च॒ ब्रह्म॑ दे॒वा अ॑वीवृधन्न् । अथा॑ स॒पत्ना॑निन्द्रा॒ग्नी मे॑ विषू॒चीना॒न् व्य॑स्यताम् ॥ वसु॑भ्यस्त्वा रु॒द्रेभ्य॑स्त्वा-ऽऽदि॒त्येभ्य॑स्त्वा॒-ऽक्तग्ं रिहा॑णा वि॒यन्तु॒ वयः॑ ॥ प्र॒जां-योँनि॒-म्मा निर्मृ॑क्ष॒मा प्या॑यन्ता॒माप॒ ओष॑धयो म॒रुता॒-म्पृष॑तय-स्स्थ॒ दिवं॑- [दिव᳚म्, ग॒च्छ॒ ततो॑ नो॒] 22
गच्छ॒ ततो॑ नो॒ वृष्टि॒मेर॑य । आ॒यु॒ष्पा अ॑ग्ने॒-ऽस्यायु॑र्मे पाहि चक्षु॒ष्पा अ॑ग्ने-ऽसि॒ चक्षु॑र्मे पाहि ध्रु॒वा-ऽसि॒ य-म्प॑रि॒धि-म्प॒र्यध॑त्था॒ अग्ने॑ देव प॒णिभि॑-र्वी॒यमा॑णः । त-न्त॑ ए॒तमनु॒ जोष॑-म्भरामि॒ नेदे॒ष त्वद॑पचे॒तया॑तै य॒ज्ञस्य॒ पाथ॒ उप॒ समि॑तग्ं सग्ग्स्रा॒वभा॑गा-स्स्थे॒षा बृ॒हन्तः॑ प्रस्तरे॒ष्ठा ब॑र्हि॒षद॑श्च [ ] 23
दे॒वा इ॒मां-वाँच॑म॒भि विश्वे॑ गृ॒णन्त॑ आ॒सद्या॒स्मि-न्ब॒र्॒हिषि॑ मादयद्ध्वम॒ग्ने-र्वा॒मप॑न्नगृहस्य॒ सद॑सि सादयामि सु॒म्नाय॑ सुम्निनी सु॒म्ने मा॑ धत्त-न्धु॒रि ध॒र्यौ॑ पात॒मग्ने॑ ऽदब्धायो ऽशीततनो पा॒हि मा॒-ऽद्य दि॒वः पा॒हि प्रसि॑त्यै पा॒हि दुरि॑ष्ट्यै पा॒हि दु॑रद्म॒न्यै पा॒हि दुश्च॑रिता॒दवि॑ष-न्नः पि॒तु-ङ्कृ॑णु सु॒षदा॒ योनि॒ग्ग्॒ स्वाहा॒ देवा॑ गातुविदो गा॒तुंविँ॒त्त्वा गा॒तु मि॑त॒ मन॑सस्पत इ॒म-न्नो॑ देव दे॒वेषु॑ य॒ज्ञग्ग् स्वाहा॑ वा॒चि स्वाहा॒ वाते॑ धाः ॥ 24 ॥
(दिवं॑ - च - वि॒त्त्वा गा॒तुं - त्रयो॑दश च) (अ. 13)
उ॒भा वा॑मिन्द्राग्नी आहु॒वद्ध्या॑ उ॒भा राध॑स-स्स॒ह मा॑द॒यद्ध्यै᳚ । उ॒भा दा॒तारा॑वि॒षाग्ं र॑यी॒णामु॒भा वाज॑स्य सा॒तये॑ हुवे वाम् ॥ अश्र॑व॒ग्ं॒ हि भू॑रि॒दाव॑त्तरा वां॒-विँजा॑मातुरु॒त वा॑ घा स्या॒लात् । अथा॒ सोम॑स्य॒ प्रय॑ती यु॒वभ्या॒मिन्द्रा᳚ग्नी॒ स्तोम॑-ञ्जनयामि॒ नव्य᳚म् ॥ इन्द्रा᳚ग्नी नव॒ति-म्पुरो॑ दा॒सप॑त्नीरधूनुतम् । सा॒कमेके॑न॒ कर्म॑णा ॥ शुचि॒-न्नु स्तोम॒-न्नव॑जात-म॒द्येन्द्रा᳚ग्नी वृत्रहणा जु॒षेथा᳚म् ॥ 25 ॥
उ॒भा हि वाग्ं॑ सु॒हवा॒ जोह॑वीमि॒ ता वाजग्ं॑ स॒द्य उ॑श॒ते धेष्ठा᳚ ॥ व॒यमु॑ त्वा पथस्पते॒ रथ॒-न्न वाज॑सातये । धि॒ये पू॑षन्नयुज्महि ॥ प॒थस्प॑थः॒ परि॑पतिं-वँच॒स्या कामे॑न कृ॒तो अ॒भ्या॑नड॒र्कम् । सनो॑ रासच्छु॒रुध॑श्च॒न्द्राग्रा॒ धिय॑न्धियग्ं सीषधाति॒ प्र पू॒षा ॥ क्षेत्र॑स्य॒ पति॑ना व॒यग्ं हि॒तेने॑व जयामसि । गामश्व॑-म्पोषयि॒त्न्वा स नो॑ [स नः॑, मृ॒डा॒ती॒दृशे᳚ ।] 26
मृडाती॒दृशे᳚ ॥ क्षेत्र॑स्य पते॒ मधु॑मन्त-मू॒र्मि-न्धे॒नुरि॑व॒ पयो॑ अ॒स्मासु॑ धुक्ष्व । म॒धु॒श्चुत॑-ङ्घृ॒तमि॑व॒ सुपू॑त-मृ॒तस्य॑ नः॒ पत॑यो मृडयन्तु ॥ अग्ने॒ नय॑ सु॒पथा॑ रा॒ये अ॒स्मान्. विश्वा॑नि देव व॒युना॑नि वि॒द्वान् । यु॒यो॒द्ध्य॑स्म-ज्जु॑हुरा॒णमेनो॒ भूयि॑ष्ठा-न्ते॒ नम॑उक्तिं-विँधेम ॥ आ दे॒वाना॒मपि॒ पन्था॑-मगन्म॒ यच्छ॒क्नवा॑म॒ तदनु॒ प्रवो॑ढुम् । अ॒ग्नि-र्वि॒द्वान्-थ्स य॑जा॒- [स य॑जात्, सेदु॒ होता॒ सो] 27
थ्सेदु॒ होता॒ सो अ॑द्ध्व॒रान्-थ्स ऋ॒तून् क॑ल्पयाति ॥ यद्वाहि॑ष्ठ॒-न्तद॒ग्नये॑ बृ॒हद॑र्च विभावसो । महि॑षीव॒ त्वद्र॒यिस्त्वद्वाजा॒ उदी॑रते ॥ अग्ने॒ त्व-म्पा॑रया॒ नव्यो॑ अ॒स्मान्-थ्स्व॒स्तिभि॒रति॑ दु॒र्गाणि॒ विश्वा᳚ । पूश्च॑ पृ॒थ्वी ब॑हु॒ला न॑ उ॒र्वी भवा॑ तो॒काय॒ तन॑याय॒ शं-योः ँ॥ त्वम॑ग्ने व्रत॒पा अ॑सि दे॒व आ मर्त्ये॒ष्वा । त्वं-यँ॒ज्ञेष्वीड्यः॑ ॥ यद्वो॑ व॒य-म्प्र॑मि॒नाम॑ व्र॒तानि॑ वि॒दुषा᳚-न्देवा॒ अवि॑दुष्टरासः । अ॒ग्निष्ट-द्विश्व॒मा पृ॑णाति वि॒द्वान्. येभि॑-र्दे॒वाग्ं ऋ॒तुभिः॑ क॒ल्पया॑ति ॥ 28 ॥
(जु॒षेथा॒मा - स नो॑ - यजा॒ - दा - त्रयो॑विग्ंशतिश्च) (अ. 14)
(इ॒षे त्वा॑ - य॒ज्ञस्य॒ - शुन्ध॑ध्वं॒ - कर्म॑णे वां - दे॒वो-ऽव॑धूतं॒ - धुष्टिः॒ - सं-वँ॑पा॒- म्या द॑दे॒ - प्रत्यु॑ष्टं॒ - कृष्णो॑-ऽसि॒ - भुव॑नमसि॒ - वाज॑स्यो॒भा वां॒ - चतु॑र्दश )
(इ॒षे - दृग्ं॑ह॒ - भुव॑न - म॒ष्टाविग्ं॑शतिः )
(इ॒षे त्वा॑, क॒ल्पया॑ति)
॥ हरिः॑ ओम् ॥
॥ कृष्ण यजुर्वेदीय तैत्तिरीय संहिताया-म्प्रथमकाण्डे प्रथमः प्रश्न-स्समाप्तः ॥
kṛṣṇa yajurvedīya taittirīya saṃhitāyā-mprathamakāṇḍe prathamaḥ praśnaḥ - darśapūrṇamāsau
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
i॒ṣe tvo॒rje tvā̭ vā॒yavaḥ̭ sthopā॒yavaḥ̭ stha de॒vo vaḥ̭ savi॒tā prārpa̭yatu॒ śreṣṭha̭tamāya॒ karma̭ṇa॒ ā pyā̭yaddhvamaghniyā devabhā॒ga-mūrja̭svatīḥ॒ paya̭svatīḥ pra॒jāva̭tī-ranamī॒vā a̭ya॒kṣmā mā vaḥ̭ ste॒na ī̭śata॒ mā-'ghaśagṃ̭so ru॒drasya̭ he॒tiḥ pari̭ vo vṛṇaktu dhru॒vā a॒smi-ngopa̭tau syāta ba॒hvī-ryaja̭mānasya pa॒śū-npā̭hi || 1 ||
(i॒ṣe - trica̭tvārigṃśat ) (a. 1)
ya॒jñasya̭ gho॒ṣada̭si॒ pratyṷṣṭa॒gṃ॒ rakṣaḥ॒ pratyṷṣṭā॒ arā̭tayaḥ॒ preya-ma̭gāddhi॒ṣaṇā̭ ba॒r॒hiraccha॒ manṷnā kṛ॒tā sva॒dhayā॒ vita̭ṣṭā॒ ta ā va̭hanti ka॒vayaḥ̭ pu॒rastā᳚-dde॒vebhyo॒ juṣṭa̭mi॒ha ba॒r॒hi-rā॒sadḙ de॒vānā᳚-mpariṣū॒tama̭si va॒r॒ṣavṛ̭ddhamasi॒ deva̭barhi॒rmā tvā-'॒nva-mmā ti॒rya-kparva̭ te rāddhyāsamācche॒ttā te॒ mā ri̭ṣa॒-ndeva̭barhi-śśa॒tava̭lśaṃ॒-vi~ ro̭ha sa॒hasra̭valśā॒ [sa॒hasra̭valśāḥ, vi va॒yagṃ rṷhema] 2
vi va॒yagṃ rṷhema pṛthi॒vyā-ssa॒mpṛcaḥ̭ pāhi susa॒mbhṛtā᳚ tvā॒ sambha̭rā॒myadi̭tyai॒ rāsnā̭-'sīndrā॒ṇyai sa॒nnaha̭na-mpū॒ṣā te᳚ gra॒nthi-ṅgra̭thnātu॒ sa te॒ mā-'' sthā॒dindra̭sya tvā bā॒hubhyā॒mudya̭cche॒ bṛha॒spate᳚-rmū॒rdhnā ha̭rāmyu॒rva̭ntari̭kṣa॒manvi̭hi devaṅga॒mama̭si || 3 ||
(sa॒hasra̭valśā - a॒ṣṭātrigṃ̭śacca) (a. 2)
śundha̭ddhva॒-ndaivyā̭ya॒ karma̭ṇe devaya॒jyāyai̭ māta॒riśva̭no gha॒rmo̭-'si॒ dyaura̭si pṛthi॒vya̭si vi॒śvadhā̭yā asi para॒meṇa॒ dhāmnā॒ dṛgṃha̭sva॒ mā hvā॒-rvasṷ̄nā-mpa॒vitra̭masi śa॒tadhā̭raṃ॒-va~sṷ̄nā-mpa॒vitra̭masi sa॒hasra̭dhāragṃ hu॒ta-ssto॒kohu॒to dra॒phso᳚ 'gnayḙ bṛha॒te nākā̭ya॒ svāhā॒ dyāvā̭pṛthi॒vībhyā॒gṃ॒ sā vi॒śvāyu॒-ssā vi॒śvavya̭cā॒-ssā vi॒śvaka̭rmā॒ sa-mpṛ̭cyaddhva-mṛtāvarī-rū॒rmiṇī॒rmadhṷmattamā ma॒ndrā dhana̭sya sā॒taye॒ somḙna॒ tvā-''ta̭na॒cmīndrā̭ya॒ dadhi॒ viṣṇo̭ ha॒vyagṃ ra̭kṣasva || 4 ||
(somḙ - nā॒ṣṭau ca̭) (a. 3)
karma̭ṇe vā-nde॒vebhyaḥ̭ śakeyaṃ॒-ve~ṣā̭ya tvā॒ pratyṷṣṭa॒gṃ॒ rakṣaḥ॒ pratyṷṣṭā॒ arā̭tayo॒ dhūra̭si॒ dhūrva॒ dhūrva̭nta॒-ndhūrva॒ taṃ-yo~᳚-'smā-ndhūrva̭ti॒ ta-ndhū᳚rva॒yaṃ-va~॒ya-ndhūrvā̭ma॒stva-nde॒vānā̭masi॒ sasni̭tama॒-mpapri̭tama॒-ñjuṣṭa̭tamaṃ॒-va~hni̭tama-ndeva॒hūta̭ma॒-mahrṷtamasi havi॒rdhāna॒-ndṛgṃha̭sva॒ mā hvā᳚-rmi॒trasya̭ tvā॒ cakṣṷṣā॒ prekṣe॒ mā bhermā saṃ-vi~̭kthā॒ mā tvā̭ - [mā tvā᳚, hi॒gṃ॒si॒ṣa॒mu॒ru] 5
higṃsiṣamu॒ru vātā̭ya de॒vasya̭ tvā savi॒tuḥ pra̭sa॒ve᳚-'śvino᳚-rbā॒hubhyā᳚-mpū॒ṣṇo hastā᳚bhyā-ma॒gnaye॒ juṣṭa॒-nnirva̭pāmya॒gnīṣomā᳚bhyā-mi॒da-nde॒vānā̭mi॒damṷ na-ssa॒ha sphā॒tyai tvā॒ nārā᳚tyai॒ suva̭ra॒bhi vi khyḙṣaṃ-vai~śvāna॒ra-ñjyoti॒-rdṛgṃha̭ntā॒-nduryā॒ dyāvā̭pṛthi॒vyo- ru॒rva̭ntari̭kṣa॒ manvi॒-hyadi̭tyā stvo॒pasthḙ sādayā॒myagnḙ ha॒vyagṃ ra̭kṣasva || 6 ||
( mā tvā॒ - ṣaṭca̭tvārigṃśacca ) (a. 4)
de॒vo vaḥ̭ savi॒to-tpṷnā॒tvacchi̭dreṇa pa॒vitrḙṇa॒ vaso॒-ssūrya̭sya ra॒śmibhi॒rāpo̭ devīragrepuvo agregu॒vo-'gra̭ i॒maṃ-ya~॒jña-nna̭ya॒tāgrḙ ya॒jñapa̭ti-ndhatta yu॒ṣmānindro̭ 'vṛṇīta vṛtra॒tūryḙ yū॒yamindra̭-mavṛṇīddhvaṃ-vṛ~tra॒tūrye॒ prokṣi̭tā-ssthā॒gnayḙ vo॒ juṣṭa॒-mprokṣā᳚mya॒gnīṣomā᳚bhyā॒gṃ॒ śundha̭ddhva॒-ndaivyā̭ya॒ karma̭ṇe devaya॒jyāyā॒ ava̭dhūta॒gṃ॒ rakṣo-'va̭dhūtā॒ arā̭ta॒yo-'di̭tyā॒stvaga̭si॒ prati̭ tvā - [prati̭ tvā, pṛ॒thi॒vī ve᳚ttvadhi॒ṣava̭ṇamasi] 7
pṛthi॒vī ve᳚ttvadhi॒ṣava̭ṇamasi vānaspa॒tya-mprati॒ tvā-'di̭tyā॒stvagve᳚ttva॒gnesta॒nūra̭si vā॒co vi॒sarja̭na-nde॒vavī̭taye tvā gṛhṇā॒myadri̭rasi vānaspa॒tya-ssa i॒da-nde॒vebhyo̭ ha॒vyagṃ su॒śami̭ śami॒ṣveṣa॒mā va॒dorja॒mā va̭da dyu॒madva̭data va॒yagṃ sa̭ṅghā॒ta-ñje᳚ṣma va॒r॒ṣavṛ̭ddhamasi॒ prati̭ tvā va॒r॒ṣavṛ̭ddhaṃ-ve~ttu॒ parā̭pūta॒gṃ॒ rakṣaḥ॒ parā̭pūtā॒ arā̭tayo॒ rakṣa̭sā-mbhā॒go̭ 'si vā॒yurvo॒ vi vi̭naktu de॒vo vaḥ̭ savi॒tā hira̭ṇyapāṇiḥ॒ prati̭ gṛhṇātu || 8 ||
( tvā॒ - bhā॒ga - ekā̭daśa ca ) (a. 5)
ava̭dhūta॒gṃ॒ rakṣo-'va̭dhūtā॒ arā̭ta॒yo-'di̭tyā॒stvaga̭si॒ prati̭ tvā pṛthi॒vīve᳚ttu di॒va-sska̭mbha॒nira̭si॒ prati॒ tvā-'di̭tyā॒stvagve᳚ttu dhi॒ṣaṇā̭-'si parva॒tyā prati̭ tvā di॒va-sska̭mbha॒nirve᳚ttu dhi॒ṣaṇā̭-'si pārvate॒yī prati̭ tvā parva॒tirve᳚ttu de॒vasya̭ tvā savi॒tuḥ pra̭sa॒ve᳚-'śvino᳚-rbā॒hubhyā᳚-mpū॒ṣṇohastā᳚bhyā॒madhi̭ vapāmidhā॒nya̭masi dhinu॒hi de॒vā-nprā॒ṇāya̭ tvā 'pā॒nāya̭ tvā vyā॒nāya̭ tvā dī॒rghāmanu॒ prasi̭ti॒māyṷṣedhā-nde॒vo vaḥ̭ savi॒tā hira̭ṇyapāṇiḥ॒ prati̭ gṛhṇātu || 9 ||
(prā॒ṇāya̭ tvā॒ - pañca̭daśa ca) (a. 6)
dhṛṣṭi̭rasi॒ brahma̭ ya॒cchāpā᳚gne॒ 'gnimā॒māda̭-ñjahi॒ niṣkra॒vyādagṃ̭ se॒dhā-''dḙva॒yajaṃ̭-va~ha॒ nirda̭gdha॒gṃ॒ rakṣo॒ nirda̭gdhā॒ arā̭tayo dhru॒vama̭si pṛthi॒vī-ndṛ॒gṃ॒hā-''yṷ-rdṛgṃha pra॒jā-ndṛgṃ̭ha sajā॒tāna॒smai yaja̭mānāya॒ paryṷ̄ha dha॒rtrama̭sya॒ntari̭kṣa-ndṛgṃha prā॒ṇa-ndṛgṃ̭hāpā॒na-ndṛgṃ̭ha sajā॒tāna॒smai yaja̭mānāya॒ paryṷ̄ha dha॒ruṇa̭masi॒ diva̭-ndṛgṃha॒ cakṣṷ- [cakṣuḥ̭, dṛ॒gṃ॒ha॒ śrotra̭-ndṛgṃha] 10
rdṛgṃha॒ śrotra̭-ndṛgṃha sajā॒tāna॒smai yaja̭mānāya॒ paryṷ̄ha॒ dharmā̭si॒ diśo̭ dṛgṃha॒ yoni̭-ndṛgṃha pra॒jā-ndṛgṃ̭ha sajā॒tāna॒smai yaja̭mānāya॒ paryṷ̄ha॒ citaḥ̭ stha pra॒jāma॒smai ra॒yima॒smai sa̭jā॒tāna॒smai yaja̭mānāya॒ paryṷ̄ha॒ bhṛgṷ̄ṇā॒maṅgi̭rasā॒-ntapa̭sā tapyaddhvaṃ॒-yā~ni̭ gha॒rme ka॒pālā᳚nyupaci॒nvanti̭ ve॒dhasaḥ̭ | pū॒ṣṇastānyapi̭ vra॒ta i̭ndravā॒yū vi mṷñcatām || 11 ||
(cakṣṷ - ra॒ṣṭāca̭tvārigṃśacca) (a. 7)
saṃ-va~̭pāmi॒ samāpo̭ a॒dbhira̭gmata॒ samoṣa̭dhayo॒ rasḙna॒ sagṃ re॒vatī॒-rjaga̭tībhi॒-rmadhṷmatī॒-rmadhṷmatībhi-ssṛjyaddhvama॒dbhyaḥ pari॒ prajā̭tā-sstha॒ sama॒dbhiḥ pṛ̭cyaddhva॒-ñjana̭yatyai tvā॒ saṃ-yau~᳚mya॒gnaye᳚ tvā॒-'gnīṣomā᳚bhyā-mma॒khasya॒ śiro̭-'si gha॒rmo̭-'si vi॒śvāyṷru॒ru pra̭thasvo॒ru tḙ ya॒jñapa̭tiḥ prathatā॒-ntvaca̭-ṅgṛhṇīṣvā॒ntari̭ta॒gṃ॒ rakṣo॒-'ntari̭tā॒ arā̭tayode॒vastvā̭ savi॒tā śra̭payatu॒ varṣi̭ṣṭhe॒ adhi॒ nāke॒-'gnistḙ ta॒nuva॒-mmā-'ti̭ dhā॒gagnḙ ha॒vyagṃ ra̭kṣasva॒ sa-mbrahma̭ṇā pṛcyasvaika॒tāya॒ svāhā᳚ dvi॒tāya॒ svāhā᳚ tri॒tāya॒ svāhā᳚ || 12 ||
(sa॒vi॒tā - dvāvigṃ̭śatiśca) (a. 8)
ā da̭da॒ indra̭sya bā॒hura̭si॒ dakṣi̭ṇa-ssa॒hasra̭bhṛṣṭi-śśa॒tatḙjā vā॒yura̭si ti॒gmatḙjāḥ॒ pṛthi̭vi devayaja॒ - nyoṣa̭ddhyāste॒ mūla॒-mmā higṃ̭siṣa॒-mapa̭hato॒-'raruḥ̭ pṛthi॒vyai vra॒ja-ṅga̭ccha go॒sthānaṃ॒-va~rṣa̭tu te॒ dyaurba̭dhā॒na dḙva savitaḥ para॒masyā᳚-mparā॒vati̭ śa॒tena॒ pāśai॒ryo᳚-'smā-ndveṣṭi॒ ya-ñca̭ va॒ya-ndvi॒ṣmastamato॒ mā mau॒gapa̭hato॒-'raruḥ̭ pṛthi॒vyai dḙva॒yaja̭nyai vra॒jaṃ- [vra॒jam, ga॒ccha॒ go॒sthānaṃ॒-va~rṣa̭tu] 13
ga̭ccha go॒sthānaṃ॒-va~rṣa̭tu te॒ dyaurba̭dhā॒na dḙva savitaḥ para॒masyā᳚-mparā॒vati̭ śa॒tena॒ pāśai॒ryo᳚-'smā-ndveṣṭi॒ ya-ñca̭ va॒ya-ndvi॒ṣmastamato॒ mā mau॒gapa̭hato॒-'raruḥ̭ pṛthi॒vyā adḙvayajano vra॒ja-ṅga̭ccha go॒sthānaṃ॒-va~rṣa̭tu te॒ dyaurba̭dhā॒na dḙva savitaḥ para॒masyā᳚-mparā॒vati̭ śa॒tena॒ pāśai॒ryo᳚-'smā-ndveṣṭi॒ ya-ñca̭ va॒ya-ndvi॒ṣmastamato॒ mā- [mā, mau॒ga॒rarṷste॒ diva॒-mmā] 14
maṷga॒rarṷste॒ diva॒-mmā skā॒n॒. vasa̭vastvā॒ pari̭ gṛhṇantu gāya॒treṇa॒ chanda̭sāru॒drāstvā॒ pari̭ gṛhṇantu॒ traiṣṭṷbhena॒ chanda̭sā-''di॒tyāstvā॒ pari̭ gṛhṇantu॒ jāga̭tena॒ chanda̭sā de॒vasya̭ savi॒tu-ssa॒ve karma̭ kṛṇvanti ve॒dhasa̭ ṛ॒tama̭syṛta॒sada̭na-masyṛta॒śrīra̭si॒ dhā a̭si sva॒dhā a̭syu॒rvī cāsi॒ vasvī̭ cāsi pu॒rā krū॒rasya̭ vi॒sṛpo̭ viraphśi-nnudā॒dāya̭ pṛthi॒vī-ñjī॒radā̭nu॒ryāmaira̭yan ca॒ndrama̭si sva॒dhābhi॒stā-ndhīrā̭so anu॒dṛśya̭ yajante || 15 ||
(de॒va॒yaja̭nyai vra॒jaṃ - tamato॒ mā - vi̭raphśi॒n - nekā̭daśa ca) (a. 9)
pratyṷṣṭa॒gṃ॒ rakṣaḥ॒ pratyṷṣṭā॒ arā̭tayo॒ 'gne-rva॒-steji̭ṣṭhena॒ teja̭sā॒ ni-ṣṭa̭pāmi go॒ṣṭha-mmā nirmṛ̭kṣaṃ-vā~॒jina̭-ntvā sapatnasā॒hagṃ sa-mmā᳚rjmi॒ vāca̭-mprā॒ṇa-ñcakṣu॒-śśrotra̭-mpra॒jāṃ-yo~ni॒-mmā nirmṛ̭kṣaṃ-vā~॒jinī᳚-ntvā sapatnasā॒hīgṃ sa-mmā᳚rjmyā॒śāsā̭nā saumana॒sa-mpra॒jāgṃ saubhā᳚gya-nta॒nūm | a॒gneranṷvratā bhū॒tvā sa-nna̭hye sukṛ॒tāya॒ kam || su॒pra॒jasa̭stvā va॒yagṃ su॒patnī॒rupa̭- [su॒pathnī॒rupa̭, se॒di॒mi॒ |] 16
sedima | agnḙ sapatna॒dambha̭na॒-mada̭bdhāso॒ adā᳚bhyam || i॒maṃ-vi~ṣyā̭mi॒ varṷṇasya॒ pāśaṃ॒ ~ya-maba̭ddhnīta savi॒tā su॒ketaḥ̭ | dhā॒tu-śca॒ yonaṷ sukṛ॒tasya̭ lo॒ke syo॒na-mmḙ sa॒ha patyā̭ karomi || samāyṷṣā॒ sampra॒jayā॒ sama̭gne॒ varca̭sā॒ punaḥ̭ | sa-mpatnī॒ patyā॒-'ha-ṅga̭cche॒ samā॒tmā ta॒nuvā॒ mama̭ || ma॒hī॒nā-mpayo॒-'syoṣa̭dhīnā॒gṃ॒ rasa॒stasya॒ te-'kṣī̭yamāṇasya॒ ni- [niḥ, va॒pā॒mi॒ ma॒hī॒nāṃ] 17
rva̭pāmi mahī॒nā-mpayo॒-'syoṣa̭dhīnā॒gṃ॒ raso-'da̭bdhena tvā॒ cakṣu॒ṣā-'ve᳚kṣe suprajā॒stvāya॒ tejo̭-'si॒ tejo-'nu॒ prehya॒gniste॒ tejo॒ mā vi nai̭da॒gne-rji॒hvā-'si̭ su॒bhūrde॒vānā॒-ndhāmnḙdhāmne de॒vebhyo॒ yajṷṣeyajuṣe bhava śu॒krama̭si॒ jyoti̭rasi॒ tejo̭-'si de॒vo vaḥ̭ savi॒to-tpṷnā॒tvacchi̭dreṇa pa॒vitrḙṇa॒ vaso॒-ssūrya̭sya ra॒śmibhiḥ̭ śu॒kra-ntvā̭ śu॒krāyā॒-ndhāmnḙdhāmne de॒vebhyo॒ yajṷṣeyajuṣe gṛhṇāmi॒ jyoti̭stvā॒ jyoti̭ṣya॒rcistvā॒-'rciṣi॒ dhāmnḙdhāmne de॒vebhyo॒ yajṷṣeyajuṣe gṛhṇāmi || 18 ||
(upa॒ - nī - ra॒śmibhiḥ̭ śu॒kragṃ - ṣoḍa̭śa ca) (a. 10)
kṛṣṇo᳚-'syākhare॒ṣṭho᳚-'gnaye᳚ tvā॒ svāhā॒ vedi̭rasi ba॒r॒hiṣe᳚ tvā॒ svāhā ̭ba॒r॒hira̭si sru॒gbhyastvā॒ svāhā̭ di॒ve tvā॒-'ntari̭kṣāya tvā pṛthi॒vyai tvā᳚ sva॒dhā pi॒tṛbhya॒ ūrgbha̭va barhi॒ṣadbhya̭ ū॒rjā pṛ̭thi॒vī-ṅga̭cchata॒ viṣṇo॒-sstūpo॒-'syūrṇā᳚mradasa-ntvā stṛṇāmi svāsa॒stha-nde॒vebhyo̭ gandha॒rvo̭-'si vi॒śvāva̭su॒-rviśva̭smā॒dīṣa̭to॒ yaja̭mānasya pari॒dhiri॒ḍa ī̭ḍi॒ta indra̭sya bā॒hura̭si॒- [bā॒hura̭si, dakṣi̭ṇo॒] 19
dakṣi̭ṇo॒ yaja̭mānasya pari॒dhiri॒ḍa ī̭ḍi॒to mi॒trāvarṷṇau tvottara॒taḥ pari̭ dhattā-ndhru॒veṇa॒ dharma̭ṇā॒ yaja̭mānasya pari॒dhiri॒ḍa ī̭ḍi॒ta-ssūrya̭stvā pu॒rastā᳚-tpātu॒ kasyā᳚ścida॒bhiśa̭styā vī॒tiho᳚tra-ntvā kave dyu॒manta॒gṃ॒ sami̭dhīma॒hyagnḙ bṛ॒hanta̭maddhva॒re vi॒śo ya॒ntre stho॒ vasṷ̄nāgṃ ru॒drāṇā̭-mādi॒tyānā॒gṃ॒ sada̭si sīda ju॒hūrṷpa॒bhṛ-ddhru॒vā-'si̭ ghṛ॒tācī॒ nāmnā᳚ pri॒yeṇa॒ nāmnā᳚ pri॒ye sada̭si sīdai॒tā a̭sadan-thsukṛ॒tasya̭ lo॒ke tā vi̭ṣṇo pāhi pā॒hi ya॒jña-mpā॒hi ya॒jñapa̭ti-mpā॒hi māṃ-ya~̭jña॒niya᳚m || 20 ||
(bā॒hura̭si - pri॒ye sada̭si॒ - pañca̭daśa ca) (a. 11)
bhuva̭namasi॒ vi pra̭tha॒svāgne॒ yaṣṭa̭ri॒da-nnamaḥ̭ | juhvehya॒gnistvā᳚ hvayati devaya॒jyāyā॒ upa̭bhṛ॒dehi̭ de॒vastvā̭ savi॒tā hva̭yati devaya॒jyāyā॒ agnā̭viṣṇū॒ mā vā॒mava̭ kramiṣaṃ॒-vi~ ji̭hāthā॒-mmā mā॒ sa-ntā᳚ptaṃ-lo~॒ka-mmḙ lokakṛtau kṛṇutaṃ॒-vi~ṣṇo॒-ssthāna̭masī॒ta indro̭ akṛṇo-dvī॒ryā̭ṇi samā॒rabhyo॒rdhvo a̭ddhva॒ro di̭vi॒spṛśa॒mahrṷto ya॒jño ya॒jñapa̭te॒-rindrā̭vā॒n-thsvāhā̭ bṛ॒hadbhāḥ pā॒hi mā᳚-'gne॒ duśca̭ritā॒dā mā॒ suca̭rite bhaja ma॒khasya॒ śiro̭-'si॒ sañjyoti̭ṣā॒ jyoti̭raṅktām || 21 ||
(ahrṷta॒ - eka̭vigṃśatiśca) (a. 12)
vāja̭sya mā prasa॒veno᳚dgrā॒bheṇoda̭grabhīt | athā̭ sa॒patnā॒gṃ॒ indro̭ me nigrā॒bheṇādha̭rāgṃ akaḥ || u॒dgrā॒bha-ñca̭ nigrā॒bha-ñca॒ brahma̭ de॒vā a̭vīvṛdhann | athā̭ sa॒patnā̭nindrā॒gnī mḙ viṣū॒cīnā॒n vya̭syatām || vasṷbhyastvā ru॒drebhya̭stvā-''di॒tyebhya̭stvā॒-'ktagṃ rihā̭ṇā vi॒yantu॒ vayaḥ̭ || pra॒jāṃ-yo~ni॒-mmā nirmṛ̭kṣa॒mā pyā̭yantā॒māpa॒ oṣa̭dhayo ma॒rutā॒-mpṛṣa̭taya-sstha॒ divaṃ̭- [diva᳚m, ga॒ccha॒ tato̭ no॒] 22
gaccha॒ tato̭ no॒ vṛṣṭi॒mera̭ya | ā॒yu॒ṣpā a̭gne॒-'syāyṷrme pāhi cakṣu॒ṣpā a̭gne-'si॒ cakṣṷrme pāhi dhru॒vā-'si॒ ya-mpa̭ri॒dhi-mpa॒ryadha̭tthā॒ agnḙ deva pa॒ṇibhi̭-rvī॒yamā̭ṇaḥ | ta-nta̭ e॒tamanu॒ joṣa̭-mbharāmi॒ nede॒ṣa tvada̭pace॒tayā̭tai ya॒jñasya॒ pātha॒ upa॒ sami̭tagṃ saggsrā॒vabhā̭gā-ssthe॒ṣā bṛ॒hantaḥ̭ prastare॒ṣṭhā ba̭rhi॒ṣada̭śca [ ] 23
de॒vā i॒māṃ-vā~ca̭ma॒bhi viśvḙ gṛ॒ṇanta̭ ā॒sadyā॒smi-nba॒r॒hiṣi̭ mādayaddhvama॒gne-rvā॒mapa̭nnagṛhasya॒ sada̭si sādayāmi su॒mnāya̭ sumninī su॒mne mā̭ dhatta-ndhu॒ri dha॒ryaṷ pāta॒magnḙ 'dabdhāyo 'śītatano pā॒hi mā॒-'dya di॒vaḥ pā॒hi prasi̭tyai pā॒hi duri̭ṣṭyai pā॒hi dṷradma॒nyai pā॒hi duśca̭ritā॒davi̭ṣa-nnaḥ pi॒tu-ṅkṛ̭ṇu su॒ṣadā॒ yoni॒gg॒ svāhā॒ devā̭ gātuvido gā॒tuṃvi~॒ttvā gā॒tu mi̭ta॒ mana̭saspata i॒ma-nno̭ deva de॒veṣṷ ya॒jñagg svāhā̭ vā॒ci svāhā॒ vātḙ dhāḥ || 24 ||
(divaṃ̭ - ca - vi॒ttvā gā॒tuṃ - trayo̭daśa ca) (a. 13)
u॒bhā vā̭mindrāgnī āhu॒vaddhyā̭ u॒bhā rādha̭sa-ssa॒ha mā̭da॒yaddhyai᳚ | u॒bhā dā॒tārā̭vi॒ṣāgṃ ra̭yī॒ṇāmu॒bhā vāja̭sya sā॒tayḙ huve vām || aśra̭va॒gṃ॒ hi bhṷ̄ri॒dāva̭ttarā vāṃ॒-vi~jā̭māturu॒ta vā̭ ghā syā॒lāt | athā॒ soma̭sya॒ praya̭tī yu॒vabhyā॒mindrā᳚gnī॒ stoma̭-ñjanayāmi॒ navya᳚m || indrā᳚gnī nava॒ti-mpuro̭ dā॒sapa̭tnīradhūnutam | sā॒kamekḙna॒ karma̭ṇā || śuci॒-nnu stoma॒-nnava̭jāta-ma॒dyendrā᳚gnī vṛtrahaṇā ju॒ṣethā᳚m || 25 ||
u॒bhā hi vāgṃ̭ su॒havā॒ joha̭vīmi॒ tā vājagṃ̭ sa॒dya ṷśa॒te dheṣṭhā᳚ || va॒yamṷ tvā pathaspate॒ ratha॒-nna vāja̭sātaye | dhi॒ye pṷ̄ṣannayujmahi || pa॒thaspa̭thaḥ॒ pari̭patiṃ-va~ca॒syā kāmḙna kṛ॒to a॒bhyā̭naḍa॒rkam | sano̭ rāsacchu॒rudha̭śca॒ndrāgrā॒ dhiya̭ndhiyagṃ sīṣadhāti॒ pra pū॒ṣā || kṣetra̭sya॒ pati̭nā va॒yagṃ hi॒tenḙva jayāmasi | gāmaśva̭-mpoṣayi॒tnvā sa no̭ [sa naḥ̭, mṛ॒ḍā॒tī॒dṛśe᳚ |] 26
mṛḍātī॒dṛśe᳚ || kṣetra̭sya pate॒ madhṷmanta-mū॒rmi-ndhe॒nuri̭va॒ payo̭ a॒smāsṷ dhukṣva | ma॒dhu॒ścuta̭-ṅghṛ॒tami̭va॒ supṷ̄ta-mṛ॒tasya̭ naḥ॒ pata̭yo mṛḍayantu || agne॒ naya̭ su॒pathā̭ rā॒ye a॒smān. viśvā̭ni deva va॒yunā̭ni vi॒dvān | yu॒yo॒ddhya̭sma-jjṷhurā॒ṇameno॒ bhūyi̭ṣṭhā-nte॒ nama̭uktiṃ-vi~dhema || ā de॒vānā॒mapi॒ panthā̭-maganma॒ yaccha॒knavā̭ma॒ tadanu॒ pravo̭ḍhum | a॒gni-rvi॒dvān-thsa ya̭jā॒- [sa ya̭jāt, sedu॒ hotā॒ so] 27
thsedu॒ hotā॒ so a̭ddhva॒rān-thsa ṛ॒tūn ka̭lpayāti || yadvāhi̭ṣṭha॒-ntada॒gnayḙ bṛ॒hada̭rca vibhāvaso | mahi̭ṣīva॒ tvadra॒yistvadvājā॒ udī̭rate || agne॒ tva-mpā̭rayā॒ navyo̭ a॒smān-thsva॒stibhi॒rati̭ du॒rgāṇi॒ viśvā᳚ | pūśca̭ pṛ॒thvī ba̭hu॒lā na̭ u॒rvī bhavā̭ to॒kāya॒ tana̭yāya॒ śaṃ-yoḥ ~|| tvama̭gne vrata॒pā a̭si de॒va ā martye॒ṣvā | tvaṃ-ya~॒jñeṣvīḍyaḥ̭ || yadvo̭ va॒ya-mpra̭mi॒nāma̭ vra॒tāni̭ vi॒duṣā᳚-ndevā॒ avi̭duṣṭarāsaḥ | a॒gniṣṭa-dviśva॒mā pṛ̭ṇāti vi॒dvān. yebhi̭-rde॒vāgṃ ṛ॒tubhiḥ̭ ka॒lpayā̭ti || 28 ||
(ju॒ṣethā॒mā - sa no̭ - yajā॒ - dā - trayo̭vigṃśatiśca) (a. 14)
(i॒ṣe tvā̭ - ya॒jñasya॒ - śundha̭dhvaṃ॒ - karma̭ṇe vāṃ - de॒vo-'va̭dhūtaṃ॒ - dhuṣṭiḥ॒ - saṃ-va~̭pā॒- myā da̭de॒ - pratyṷṣṭaṃ॒ - kṛṣṇo̭-'si॒ - bhuva̭namasi॒ - vāja̭syo॒bhā vāṃ॒ - catṷrdaśa )
(i॒ṣe - dṛgṃ̭ha॒ - bhuva̭na - ma॒ṣṭāvigṃ̭śatiḥ )
(i॒ṣe tvā̭, ka॒lpayā̭ti)
|| hariḥ̭ om ||
|| kṛṣṇa yajurvedīya taittirīya saṃhitāyā-mprathamakāṇḍe prathamaḥ praśna-ssamāptaḥ ||
🕉️ This is the original Sanskrit rendered in Kannada script.
Pronunciation is identical to the Sanskrit Devanagari version.