1.6 - Santva Sinchami Yajusha - Krishna Yajurveda Taittiriya Samhita Pathah — Kannada Script

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪ್ರಥಮಕಾಣ್ಡೇ ಷಷ್ಠಃ ಪ್ರಶ್ನಃ - ಯಾಜಮಾನಕಾಣ್ಡಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,

ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಸ-ನ್ತ್ವಾ॑ ಸಿಞ್ಚಾಮಿ॒ ಯಜು॑ಷಾ ಪ್ರ॒ಜಾಮಾಯು॒ರ್ಧನ॑-ಞ್ಚ । ಬೃಹ॒ಸ್ಪತಿ॑ಪ್ರಸೂತೋ॒ ಯಜ॑ಮಾನ ಇ॒ಹ ಮಾ ರಿ॑ಷತ್ ॥ ಆಜ್ಯ॑ಮಸಿ ಸ॒ತ್ಯಮ॑ಸಿ ಸ॒ತ್ಯಸ್ಯಾದ್ಧ್ಯ॑ಕ್ಷಮಸಿ ಹ॒ವಿರ॑ಸಿ ವೈಶ್ವಾನ॒ರಂ-ವೈಁ᳚ಶ್ವದೇ॒ವ-ಮುತ್ಪೂ॑ತಶುಷ್ಮಗ್ಂ ಸ॒ತ್ಯೌಜಾ॒-ಸ್ಸಹೋ॑-ಽಸಿ॒ ಸಹ॑ಮಾನಮಸಿ॒ ಸಹ॒ಸ್ವಾರಾ॑ತೀ॒-ಸ್ಸಹ॑ಸ್ವಾರಾತೀಯ॒ತ-ಸ್ಸಹ॑ಸ್ವ॒ ಪೃತ॑ನಾ॒-ಸ್ಸಹ॑ಸ್ವ ಪೃತನ್ಯ॒ತಃ । ಸ॒ಹಸ್ರ॑ವೀರ್ಯಮಸಿ॒ ತನ್ಮಾ॑ ಜಿ॒ನ್ವಾಜ್ಯ॒ಸ್ಯಾಜ್ಯ॑ಮಸಿ ಸ॒ತ್ಯಸ್ಯ॑ ಸ॒ತ್ಯಮ॑ಸಿ ಸ॒ತ್ಯಾಯು॑- [ಸ॒ತ್ಯಾಯುಃ॑, ಅ॒ಸಿ॒ ಸ॒ತ್ಯಶು॑ಷ್ಮಮಸಿ] 1

-ರಸಿ ಸ॒ತ್ಯಶು॑ಷ್ಮಮಸಿ ಸ॒ತ್ಯೇನ॑ ತ್ವಾ॒-ಽಭಿ ಘಾ॑ರಯಾಮಿ॒ ತಸ್ಯ॑ ತೇ ಭಕ್ಷೀಯ ಪಞ್ಚಾ॒ನಾ-ನ್ತ್ವಾ॒ ವಾತಾ॑ನಾಂ-ಯಁ॒ನ್ತ್ರಾಯ॑ ಧ॒ರ್ತ್ರಾಯ॑ ಗೃಹ್ಣಾಮಿ ಪಞ್ಚಾ॒ನಾ-ನ್ತ್ವ॑ರ್ತೂ॒ನಾಂ-ಯಁ॒ನ್ತ್ರಾಯ॑ ಧ॒ರ್ತ್ರಾಯ॑ ಗೃಹ್ಣಾಮಿ ಪಞ್ಚಾ॒ನಾ-ನ್ತ್ವಾ॑ ದಿ॒ಶಾಂ-ಯಁ॒ನ್ತ್ರಾಯ॑ ಧ॒ರ್ತ್ರಾಯ॑ ಗೃಹ್ಣಾಮಿ ಪಞ್ಚಾ॒ನಾ-ನ್ತ್ವಾ॑ ಪಞ್ಚಜ॒ನಾನಾಂ᳚-ಯಁ॒ನ್ತ್ರಾಯ॑ ಧ॒ರ್ತ್ರಾಯ॑ ಗೃಹ್ಣಾಮಿ ಚ॒ರೋಸ್ತ್ವಾ॒ ಪಞ್ಚ॑ಬಿಲಸ್ಯ ಯ॒ನ್ತ್ರಾಯ॑ ಧ॒ರ್ತ್ರಾಯ॑ ಗೃಹ್ಣಾಮಿ॒ ಬ್ರಹ್ಮ॑ಣಸ್ತ್ವಾ॒ ತೇಜ॑ಸೇ ಯ॒ನ್ತ್ರಾಯ॑ ಧ॒ರ್ತ್ರಾಯ॑ ಗೃಹ್ಣಾಮಿ ಕ್ಷ॒ತ್ರಸ್ಯ॒ ತ್ವೌಜ॑ಸೇ ಯ॒ನ್ತ್ರಾಯ॑ [ ] 2

ಧ॒ರ್ತ್ರಾಯ॑ ಗೃಹ್ಣಾಮಿ ವಿ॒ಶೇ ತ್ವಾ॑ ಯ॒ನ್ತ್ರಾಯ॑ ಧ॒ರ್ತ್ರಾಯ॑ ಗೃಹ್ಣಾಮಿ ಸು॒ವೀರ್ಯಾ॑ಯ ತ್ವಾ ಗೃಹ್ಣಾಮಿ ಸುಪ್ರಜಾ॒ಸ್ತ್ವಾಯ॑ ತ್ವಾ ಗೃಹ್ಣಾಮಿ ರಾ॒ಯಸ್ಪೋಷಾ॑ಯ ತ್ವಾ ಗೃಹ್ಣಾಮಿ ಬ್ರಹ್ಮವರ್ಚ॒ಸಾಯ॑ ತ್ವಾ ಗೃಹ್ಣಾಮಿ॒ ಭೂರ॒ಸ್ಮಾಕಗ್ಂ॑ ಹ॒ವಿರ್ದೇ॒ವಾನಾ॑-ಮಾ॒ಶಿಷೋ॒ ಯಜ॑ಮಾನಸ್ಯ ದೇ॒ವಾನಾ᳚-ನ್ತ್ವಾ ದೇ॒ವತಾ᳚ಭ್ಯೋ ಗೃಹ್ಣಾಮಿ॒ ಕಾಮಾ॑ಯ ತ್ವಾ ಗೃಹ್ಣಾಮಿ ॥ 3 ॥

(ಸ॒ತ್ಯಾಯು॒-ರೋಜ॑ಸೇ ಯ॒ನ್ತ್ರಾಯ॒-ತ್ರಯ॑ಸ್ತ್ರಿಗ್ಂಶಚ್ಚ) (ಅ. 1)

ಧ್ರು॒ವೋ॑-ಽಸಿ ಧ್ರು॒ವೋ॑-ಽಹಗ್ಂ ಸ॑ಜಾ॒ತೇಷು॑ ಭೂಯಾಸ॒-ನ್ಧೀರ॒ಶ್ಚೇತ್ತಾ॑ ವಸು॒ವಿದು॒ಗ್ರೋ᳚-ಽಸ್ಯು॒ಗ್ರೋ॑-ಽಹಗ್ಂ ಸ॑ಜಾ॒ತೇಷು॑ ಭೂಯಾಸ-ಮು॒ಗ್ರಶ್ಚೇತ್ತಾ॑ ವಸು॒ವಿದ॑ಭಿ॒-ಭೂರ॑ಸ್ಯಭಿ॒ಭೂರ॒ಹಗ್ಂ ಸ॑ಜಾ॒ತೇಷು॑ ಭೂಯಾಸಮಭಿ॒ಭೂಶ್ಚೇತ್ತಾ॑ ವಸು॒ವಿ-ದ್ಯು॒ನಜ್ಮಿ॑ ತ್ವಾ॒ ಬ್ರಹ್ಮ॑ಣಾ॒ ದೈವ್ಯೇ॑ನ ಹ॒ವ್ಯಾಯಾ॒ಸ್ಮೈ ವೋಢ॒ವೇ ಜಾ॑ತವೇದಃ ॥ ಇನ್ಧಾ॑ನಾಸ್ತ್ವಾ ಸುಪ್ರ॒ಜಸಃ॑ ಸು॒ವೀರಾ॒ ಜ್ಯೋಗ್ಜೀ॑ವೇಮ ಬಲಿ॒ಹೃತೋ॑ ವ॒ಯ-ನ್ತೇ᳚ ॥ ಯನ್ಮೇ॑ ಅಗ್ನೇ ಅ॒ಸ್ಯ ಯ॒ಜ್ಞಸ್ಯ॒ ರಿಷ್ಯಾ॒- [ರಿಷ್ಯಾ᳚ತ್, ದ್ಯದ್ವಾ॒] 4

-ದ್ಯದ್ವಾ॒ ಸ್ಕನ್ದಾ॒-ದಾಜ್ಯ॑ಸ್ಯೋ॒ತ ವಿ॑ಷ್ಣೋ । ತೇನ॑ ಹನ್ಮಿ ಸ॒ಪತ್ನ॑-ನ್ದುರ್ಮರಾ॒ಯುಮೈನ॑-ನ್ದಧಾಮಿ॒ ನಿರ್-ಋ॑ತ್ಯಾ ಉ॒ಪಸ್ಥೇ᳚ । ಭೂ-ರ್ಭುವ॒-ಸ್ಸುವ॒ರುಚ್ಛು॑ಷ್ಮೋ ಅಗ್ನೇ॒ ಯಜ॑ಮಾನಾಯೈಧಿ॒ ನಿಶು॑ಷ್ಮೋ ಅಭಿ॒ದಾಸ॑ತೇ । ಅಗ್ನೇ॒ ದೇವೇ᳚ದ್ಧ॒ ಮನ್ವಿ॑ದ್ಧ॒ ಮನ್ದ್ರ॑ಜಿ॒ಹ್ವಾ-ಮ॑ರ್ತ್ಯಸ್ಯ ತೇ ಹೋತರ್ಮೂ॒ರ್ಧನ್ನಾ ಜಿ॑ಘರ್ಮಿ ರಾ॒ಯಸ್ಪೋಷಾ॑ಯ ಸುಪ್ರಜಾ॒ಸ್ತ್ವಾಯ॑ ಸು॒ವೀರ್ಯಾ॑ಯ॒ ಮನೋ॑-ಽಸಿ ಪ್ರಾಜಾಪ॒ತ್ಯ-ಮ್ಮನ॑ಸಾ ಮಾ ಭೂ॒ತೇನಾ ವಿ॑ಶ॒ ವಾಗ॑ಸ್ಯೈ॒ನ್ದ್ರೀ ಸ॑ಪತ್ನ॒ಕ್ಷಯ॑ಣೀ [ ] 5

ವಾ॒ಚಾ ಮೇ᳚ನ್ದ್ರಿ॒ಯೇಣಾ ವಿ॑ಶ ವಸ॒ನ್ತಮೃ॑ತೂ॒ನಾ-ಮ್ಪ್ರೀ॑ಣಾಮಿ॒ ಸ ಮಾ᳚ ಪ್ರೀ॒ತಃ ಪ್ರೀ॑ಣಾತು ಗ್ರೀ॒ಷ್ಮಮೃ॑ತೂ॒ನಾ-ಮ್ಪ್ರೀ॑ಣಾಮಿ॒ ಸ ಮಾ᳚ ಪ್ರೀ॒ತಃ ಪ್ರೀ॑ಣಾತು ವ॒ರ್॒ಷಾ ಋ॑ತೂ॒ನಾ-ಮ್ಪ್ರೀ॑ಣಾಮಿ॒ ತಾ ಮಾ᳚ ಪ್ರೀ॒ತಾಃ ಪ್ರೀ॑ಣನ್ತು ಶ॒ರದ॑ಮೃತೂ॒ನಾ-ಮ್ಪ್ರೀ॑ಣಾಮಿ॒ ಸಾ ಮಾ᳚ ಪ್ರೀ॒ತಾ ಪ್ರೀ॑ಣಾತು ಹೇಮನ್ತಶಿಶಿ॒ರಾವೃ॑ತೂ॒ನಾ-ಮ್ಪ್ರೀ॑ಣಾಮಿ॒ ತೌ ಮಾ᳚ ಪ್ರೀ॒ತೌ ಪ್ರೀ॑ಣೀತಾ-ಮ॒ಗ್ನೀಷೋಮ॑ಯೋ-ರ॒ಹ-ನ್ದೇ॑ವಯ॒ಜ್ಯಯಾ॒ ಚಕ್ಷು॑ಷ್ಮಾ-ನ್ಭೂಯಾಸಮ॒ಗ್ನೇರ॒ಹ-ನ್ದೇ॑ವಯ॒ಜ್ಯಯಾ᳚-ಽನ್ನಾ॒ದೋ ಭೂ॑ಯಾಸ॒- [ಭೂ॑ಯಾಸಮ್, ದಬ್ಧಿ॑ರ॒ಸ್ಯದ॑ಬ್ಧೋ] 6

-ನ್ದಬ್ಧಿ॑ರ॒ಸ್ಯದ॑ಬ್ಧೋ ಭೂಯಾಸಮ॒ಮು-ನ್ದ॑ಭೇಯ-ಮ॒ಗ್ನೀಷೋಮ॑ಯೋ-ರ॒ಹ-ನ್ದೇ॑ವಯ॒ಜ್ಯಯಾ॑ ವೃತ್ರ॒ಹಾ ಭೂ॑ಯಾಸಮಿನ್ದ್ರಾಗ್ನಿ॒ಯೋರ॒ಹ-ನ್ದೇ॑ವಯ॒ಜ್ಯಯೇ᳚ನ್ದ್ರಿಯಾ॒ವ್ಯ॑ನ್ನಾ॒ದೋ ಭೂ॑ಯಾಸ॒ಮಿನ್ದ್ರ॑ಸ್ಯಾ॒-ಽಹ-ನ್ದೇ॑ವಯ॒ಜ್ಯಯೇ᳚ನ್ದ್ರಿಯಾ॒ವೀ ಭೂ॑ಯಾಸ-ಮ್ಮಹೇ॒ನ್ದ್ರಸ್ಯಾ॒-ಽಹ-ನ್ದೇ॑ವಯ॒ಜ್ಯಯಾ॑ ಜೇ॒ಮಾನ॑-ಮ್ಮಹಿ॒ಮಾನ॑-ಙ್ಗಮೇಯಮ॒ಗ್ನೇ-ಸ್ಸ್ವಿ॑ಷ್ಟ॒ಕೃತೋ॒-ಽಹ-ನ್ದೇ॑ವಯ॒ಜ್ಯಯಾ ಽಽಯು॑ಷ್ಮಾನ್. ಯ॒ಜ್ಞೇನ॑ ಪ್ರತಿ॒ಷ್ಠಾ-ಙ್ಗ॑ಮೇಯಮ್ ॥ 7 ॥

(ರಿಷ್ಯಾ᳚-ಥ್ಸಪತ್ನ॒ಕ್ಷಯ॑ಣ್ಯ-ನ್ನಾ॒ದೋ ಭೂ॑ಯಾಸ॒ಗ್ಂ॒-ಷಟ್ತ್ರಿಗ್ಂ॑ಶಚ್ಚ) (ಅ. 2)

ಅ॒ಗ್ನಿರ್ಮಾ॒ ದುರಿ॑ಷ್ಟಾ-ತ್ಪಾತು ಸವಿ॒ತಾ-ಽಘಶಗ್ಂ॑ಸಾ॒ದ್ಯೋ ಮೇ-ಽನ್ತಿ॑ ದೂ॒ರೇ॑-ಽರಾತೀ॒ಯತಿ॒ ತಮೇ॒ತೇನ॑ ಜೇಷ॒ಗ್ಂ॒ ಸುರೂ॑ಪವರ್ಷವರ್ಣ॒ ಏಹೀ॒ಮಾ-ನ್ಭ॒ದ್ರಾ-ನ್ದುರ್ಯಾಗ್ಂ॑ ಅ॒ಭ್ಯೇಹಿ॒ ಮಾಮನು॑ವ್ರತಾ॒ ನ್ಯು॑ ಶೀ॒ರ್॒ಷಾಣಿ॑ ಮೃಢ್ವ॒ಮಿಡ॒ ಏಹ್ಯದಿ॑ತ॒ ಏಹಿ॒ ಸರ॑ಸ್ವ॒ತ್ಯೇಹಿ॒ ರನ್ತಿ॑ರಸಿ॒ ರಮ॑ತಿರಸಿ ಸೂ॒ನರ್ಯ॑ಸಿ॒ ಜುಷ್ಟೇ॒ ಜುಷ್ಟಿ॑-ನ್ತೇ-ಽಶೀ॒ಯೋಪ॑ಹೂತ ಉಪಹ॒ವ- [ಉಪಹ॒ವಮ್, ತೇ॒-ಽಶೀ॒ಯ॒ ಸಾ ] 8

-ನ್ತೇ॑-ಽಶೀಯ॒ ಸಾ ಮೇ॑ ಸ॒ತ್ಯಾ-ಽಽಶೀರ॒ಸ್ಯ ಯ॒ಜ್ಞಸ್ಯ॑ ಭೂಯಾ॒ದರೇ॑ಡತಾ॒ ಮನ॑ಸಾ॒ ತಚ್ಛ॑ಕೇಯಂ-ಯಁ॒ಜ್ಞೋ ದಿವಗ್ಂ॑ ರೋಹತು ಯ॒ಜ್ಞೋ ದಿವ॑-ಙ್ಗಚ್ಛತು॒ ಯೋ ದೇ॑ವ॒ಯಾನಃ॒ ಪನ್ಥಾ॒ಸ್ತೇನ॑ ಯ॒ಜ್ಞೋ ದೇ॒ವಾಗ್ಂ ಅಪ್ಯೇ᳚ತ್ವ॒ಸ್ಮಾಸ್ವಿನ್ದ್ರ॑ ಇನ್ದ್ರಿ॒ಯ-ನ್ದ॑ಧಾತ್ವ॒ಸ್ಮಾನ್ರಾಯ॑ ಉ॒ತ ಯ॒ಜ್ಞಾ-ಸ್ಸ॑ಚನ್ತಾಮ॒ಸ್ಮಾಸು॑ ಸನ್ತ್ವಾ॒ಶಿಷ॒-ಸ್ಸಾ ನಃ॑ ಪ್ರಿ॒ಯಾ ಸು॒ಪ್ರತೂ᳚ರ್ತಿರ್ಮ॒ಘೋನೀ॒ ಜುಷ್ಟಿ॑ರಸಿ ಜು॒ಷಸ್ವ॑ ನೋ॒ ಜುಷ್ಟಾ॑ ನೋ- [ಜುಷ್ಟಾ॑ ನಃ, ಅ॒ಸಿ॒ ಜುಷ್ಟಿ॑-ನ್ತೇ] 9

-ಽಸಿ॒ ಜುಷ್ಟಿ॑-ನ್ತೇ ಗಮೇಯ॒-ಮ್ಮನೋ॒ ಜ್ಯೋತಿ॑-ರ್ಜುಷತಾ॒ಮಾಜ್ಯಂ॒-ವಿಁಚ್ಛಿ॑ನ್ನಂ-ಯಁ॒ಜ್ಞಗ್ಂ ಸಮಿ॒ಮ-ನ್ದ॑ಧಾತು । ಬೃಹ॒ಸ್ಪತಿ॑-ಸ್ತನುತಾಮಿ॒ಮನ್ನೋ॒ ವಿಶ್ವೇ॑ ದೇ॒ವಾ ಇ॒ಹ ಮಾ॑ದಯನ್ತಾಮ್ ॥ ಬ್ರದ್ಧ್ನ॒ ಪಿನ್ವ॑ಸ್ವ॒ ದದ॑ತೋ ಮೇ॒ ಮಾ ಕ್ಷಾ॑ಯಿ ಕುರ್ವ॒ತೋ ಮೇ॒ ಮೋಪ॑ ದಸ-ತ್ಪ್ರ॒ಜಾಪ॑ತೇ-ರ್ಭಾ॒ಗೋ᳚-ಽಸ್ಯೂರ್ಜ॑ಸ್ವಾ॒-ನ್ಪಯ॑ಸ್ವಾ-ನ್ಪ್ರಾಣಾಪಾ॒ನೌ ಮೇ॑ ಪಾಹಿ ಸಮಾನವ್ಯಾ॒ನೌ ಮೇ॑ ಪಾಹ್ಯುದಾನವ್ಯಾ॒ನೌ ಮೇ॑ ಪಾ॒ಹ್ಯಕ್ಷಿ॑ತೋ॒-ಽಸ್ಯಕ್ಷಿ॑ತ್ಯೈ ತ್ವಾ॒ ಮಾ ಮೇ᳚ ಕ್ಷೇಷ್ಠಾ ಅ॒ಮುತ್ರಾ॒ಮುಷ್ಮಿ॑ನ್ ಁಲೋ॒ಕೇ ॥ 10 ॥

(ಉ॒ಪ॒ಹ॒ವಂ-ಜುಷ್ಟಾ॑ನ-ಸ್ತ್ವಾ॒ ಷಟ್ ಚ॑) (ಅ. 3)

ಬ॒ರ್॒ಹಿಷೋ॒-ಽಹ-ನ್ದೇ॑ವಯ॒ಜ್ಯಯಾ᳚ ಪ್ರ॒ಜಾವಾ᳚-ನ್ಭೂಯಾಸ॒-ನ್ನರಾ॒ಶಗ್ಂಸ॑ಸ್ಯಾ॒ಹ-ನ್ದೇ॑ವಯ॒ಜ್ಯಯಾ॑ ಪಶು॒ಮಾ-ನ್ಭೂ॑ಯಾಸಮ॒ಗ್ನೇ-ಸ್ಸ್ವಿ॑ಷ್ಟ॒ಕೃತೋ॒-ಽಹ-ನ್ದೇ॑ವಯ॒ಜ್ಯಯಾ-ಽಽಯು॑ಷ್ಮಾನ್. ಯ॒ಜ್ಞೇನ॑ ಪ್ರತಿ॒ಷ್ಠಾ-ಙ್ಗ॑ಮೇಯಮ॒ಗ್ನೇರ॒ಹ-ಮುಜ್ಜಿ॑ತಿ॒-ಮನೂಜ್ಜೇ॑ಷ॒ಗ್ಂ॒ ಸೋಮ॑ಸ್ಯಾ॒ಹ - ಮುಜ್ಜಿ॑ತಿ॒-ಮನೂಜ್ಜೇ॑ಷಮ॒ಗ್ನೇರ॒ಹ-ಮುಜ್ಜಿ॑ತಿ॒-ಮನೂಜ್ಜೇ॑ಷ-ಮ॒ಗ್ನೀಷೋಮ॑ಯೋರ॒ಹ-ಮುಜ್ಜಿ॑ತಿ॒-ಮನೂಜ್ಜೇ॑ಷ-ಮಿನ್ದ್ರಾಗ್ನಿ॒ಯೋರ॒ಹ-ಮುಜ್ಜಿ॑ತಿ॒-ಮನೂಜ್ಜೇ॑ಷ॒-ಮಿನ್ದ್ರ॑ಸ್ಯಾ॒-ಽಹ- [-ಮಿನ್ದ್ರ॑ಸ್ಯಾ॒-ಽಹಮ್, ಉಜ್ಜಿ॑ತಿ॒ಮನೂಜ್ಜೇ॑ಷಂ] 11

-ಮುಜ್ಜಿ॑ತಿ॒ಮನೂಜ್ಜೇ॑ಷ-ಮ್ಮಹೇ॒ನ್ದ್ರಸ್ಯಾ॒ಹಮುಜ್ಜಿ॑ತಿ॒- ಮನೂಜ್ಜೇ॑ಷಮ॒ಗ್ನೇ-ಸ್ಸ್ವಿ॑ಷ್ಟ॒ಕೃತೋ॒-ಽಹ ಮುಜ್ಜಿ॑ತಿ॒-ಮನೂಜ್ಜೇ॑ಷಂ॒-ವಾಁಜ॑ಸ್ಯ ಮಾ ಪ್ರಸ॒ವೇನೋ᳚-ದ್ಗ್ರಾ॒ಭೇಣೋದ॑ಗ್ರಭೀತ್ । ಅಥಾ॑ ಸ॒ಪತ್ನಾ॒ಗ್ಂ॒ ಇನ್ದ್ರೋ॑ ಮೇ ನಿಗ್ರಾ॒ಭೇಣಾಧ॑ರಾಗ್ಂ ಅಕಃ ॥ ಉ॒ದ್ಗ್ರಾ॒ಭ-ಞ್ಚ॑ ನಿಗ್ರಾ॒ಭ-ಞ್ಚ॒ ಬ್ರಹ್ಮ॑ ದೇ॒ವಾ ಅ॑ವೀವೃಧನ್ನ್ । ಅಥಾ॑ ಸ॒ಪತ್ನಾ॑ನಿನ್ದ್ರಾ॒ಗ್ನೀ ಮೇ॑ ವಿಷೂ॒ಚೀನಾ॒ನ್ ವ್ಯ॑ಸ್ಯತಾಮ್ ॥ ಏಮಾ ಅ॑ಗ್ಮನ್ನಾ॒ಶಿಷೋ॒ ದೋಹ॑ಕಾಮಾ॒ ಇನ್ದ್ರ॑ವನ್ತೋ [ಇನ್ದ್ರ॑ವನ್ತಃ, ವ॒ನಾ॒ಮ॒ಹೇ॒ ಧು॒ಕ್ಷೀ॒ಮಹಿ॑] 12

ವನಾಮಹೇ ಧುಕ್ಷೀ॒ಮಹಿ॑ ಪ್ರ॒ಜಾಮಿಷ᳚ಮ್ ॥ ರೋಹಿ॑ತೇನ ತ್ವಾ॒-ಽಗ್ನಿ-ರ್ದೇ॒ವತಾ᳚-ಙ್ಗಮಯತು॒ ಹರಿ॑ಭ್ಯಾ॒-ನ್ತ್ವೇನ್ದ್ರೋ॑ ದೇ॒ವತಾ᳚-ಙ್ಗಮಯ॒ತ್ವೇತ॑ಶೇನ ತ್ವಾ॒ ಸೂರ್ಯೋ॑ ದೇ॒ವತಾ᳚-ಙ್ಗಮಯತು॒ ವಿ ತೇ॑ ಮುಞ್ಚಾಮಿ ರಶ॒ನಾ ವಿ ರ॒ಶ್ಮೀನ್ ವಿ ಯೋಕ್ತ್ರಾ॒ ಯಾನಿ॑ ಪರಿ॒ಚರ್ತ॑ನಾನಿ ಧ॒ತ್ತಾದ॒ಸ್ಮಾಸು॒ ದ್ರವಿ॑ಣಂ॒-ಯಁಚ್ಚ॑ ಭ॒ದ್ರ-ಮ್ಪ್ರ ಣೋ᳚ ಬ್ರೂತಾ-ದ್ಭಾಗ॒ಧಾ-ನ್ದೇ॒ವತಾ॑ಸು ॥ ವಿಷ್ಣೋ᳚-ಶ್ಶಂ॒ಯೋಁರ॒ಹ-ನ್ದೇ॑ವಯ॒ಜ್ಯಯಾ॑ ಯ॒ಜ್ಞೇನ॑ ಪ್ರತಿ॒ಷ್ಠಾ-ಙ್ಗ॑ಮೇಯ॒ಗ್ಂ॒ ಸೋಮ॑ಸ್ಯಾ॒ಹ-ನ್ದೇ॑ವಯ॒ಜ್ಯಯಾ॑ [ದೇ॑ವಯ॒ಜ್ಯಯಾ᳚, ಸು॒ರೇತಾ॒] 13

ಸು॒ರೇತಾ॒ ರೇತೋ॑ ಧಿಷೀಯ॒ ತ್ವಷ್ಟು॑ರ॒ಹ-ನ್ದೇ॑ವಯ॒ಜ್ಯಯಾ॑ ಪಶೂ॒ನಾಗ್ಂ ರೂ॒ಪ-ಮ್ಪು॑ಷೇಯ-ನ್ದೇ॒ವಾನಾ॒-ಮ್ಪತ್ನೀ॑ರ॒ಗ್ನಿ-ರ್ಗೃ॒ಹಪ॑ತಿ-ರ್ಯ॒ಜ್ಞಸ್ಯ॑ ಮಿಥು॒ನ-ನ್ತಯೋ॑ರ॒ಹ-ನ್ದೇ॑ವಯ॒ಜ್ಯಯಾ॑ ಮಿಥು॒ನೇನ॒ ಪ್ರಭೂ॑ಯಾಸಂ-ವೇಁ॒ದೋ॑-ಽಸಿ॒ ವಿತ್ತಿ॑ರಸಿ ವಿ॒ದೇಯ॒ ಕರ್ಮಾ॑-ಽಸಿ ಕ॒ರುಣ॑ಮಸಿ ಕ್ರಿ॒ಯಾಸಗ್ಂ॑ ಸ॒ನಿರ॑ಸಿ ಸನಿ॒ತಾ-ಽಸಿ॑ ಸ॒ನೇಯ॑-ಙ್ಘೃ॒ತವ॑ನ್ತ-ಙ್ಕುಲಾ॒ಯಿನಗ್ಂ॑ ರಾ॒ಯಸ್ಪೋಷಗ್ಂ॑ ಸಹ॒ಸ್ರಿಣಂ॑-ವೇಁ॒ದೋ ದ॑ದಾತು ವಾ॒ಜಿನ᳚ಮ್ ॥ 14 ॥

(ಇನ್ದ್ರ॑ಸ್ಯಾ॒ಹ-ಮಿನ್ದ್ರ॑ವನ್ತಃ॒-ಸೋಮ॑ಸ್ಯಾ॒ಹ-ನ್ದೇ॑ವಯ॒ಜ್ಯಯಾ॒-ಚತು॑ಶ್ಚತ್ವಾರಿಗ್ಂಶಚ್ಚ) (ಅ. 4)

ಆ ಪ್ಯಾ॑ಯತಾ-ನ್ಧ್ರು॒ವಾ ಘೃ॒ತೇನ॑ ಯ॒ಜ್ಞಂಯಁ॑ಜ್ಞ॒-ಮ್ಪ್ರತಿ॑ ದೇವ॒ಯದ್ಭ್ಯಃ॑ । ಸೂ॒ರ್ಯಾಯಾ॒ ಊಧೋ-ಽದಿ॑ತ್ಯಾ ಉ॒ಪಸ್ಥ॑ ಉ॒ರುಧಾ॑ರಾ ಪೃಥಿ॒ವೀ ಯ॒ಜ್ಞೇ ಅ॒ಸ್ಮಿನ್ನ್ ॥ ಪ್ರ॒ಜಾಪ॑ತೇ-ರ್ವಿ॒ಭಾನ್ನಾಮ॑ ಲೋ॒ಕಸ್ತಸ್ಮಿಗ್ಗ್॑ಸ್ತ್ವಾ ದಧಾಮಿ ಸ॒ಹ ಯಜ॑ಮಾನೇನ॒ ಸದ॑ಸಿ॒ ಸನ್ಮೇ॑ ಭೂಯಾ॒-ಸ್ಸರ್ವ॑ಮಸಿ॒ ಸರ್ವ॑-ಮ್ಮೇ ಭೂಯಾಃ ಪೂ॒ರ್ಣಮ॑ಸಿ ಪೂ॒ರ್ಣ-ಮ್ಮೇ॑ ಭೂಯಾ॒ ಅಕ್ಷಿ॑ತಮಸಿ॒ ಮಾ ಮೇ᳚ ಕ್ಷೇಷ್ಠಾಃ॒ ಪ್ರಾಚ್ಯಾ᳚-ನ್ದಿ॒ಶಿ ದೇ॒ವಾ ಋ॒ತ್ವಿಜೋ॑ ಮಾರ್ಜಯನ್ತಾ॒-ನ್ದಕ್ಷಿ॑ಣಾಯಾ- [ದಕ್ಷಿ॑ಣಾಯಾಮ್, ದಿ॒ಶಿ] 15

ನ್ದಿ॒ಶಿ ಮಾಸಾಃ᳚ ಪಿ॒ತರೋ॑ ಮಾರ್ಜಯನ್ತಾ-ಮ್ಪ್ರ॒ತೀಚ್ಯಾ᳚-ನ್ದಿ॒ಶಿ ಗೃ॒ಹಾಃ ಪ॒ಶವೋ॑ ಮಾರ್ಜಯನ್ತಾ॒ಮುದೀ᳚ಚ್ಯಾ-ನ್ದಿ॒ಶ್ಯಾಪ॒ ಓಷ॑ಧಯೋ॒ ವನ॒ಸ್ಪತ॑ಯೋ ಮಾರ್ಜಯನ್ತಾಮೂ॒ರ್ಧ್ವಾಯಾ᳚-ನ್ದಿ॒ಶಿ ಯ॒ಜ್ಞ-ಸ್ಸಂ॑ವಁಥ್ಸ॒ರೋ ಯ॒ಜ್ಞಪ॑ತಿ-ರ್ಮಾರ್ಜಯನ್ತಾಂ॒-ವಿಁಷ್ಣೋಃ॒ ಕ್ರಮೋ᳚-ಽಸ್ಯಭಿಮಾತಿ॒ಹಾ ಗಾ॑ಯ॒ತ್ರೇಣ॒ ಛನ್ದ॑ಸಾ ಪೃಥಿ॒ವೀಮನು॒ ವಿ ಕ್ರ॑ಮೇ॒ ನಿರ್ಭ॑ಕ್ತ॒-ಸ್ಸ ಯ-ನ್ದ್ವಿ॒ಷ್ಮೋ ವಿಷ್ಣೋಃ॒ ಕ್ರಮೋ᳚-ಽಸ್ಯಭಿಶಸ್ತಿ॒ಹಾ ತ್ರೈಷ್ಟು॑ಭೇನ॒ ಛನ್ದ॑ಸಾ॒ ಽನ್ತರಿ॑ಕ್ಷ॒ಮನು॒ ವಿ ಕ್ರ॑ಮೇ॒ ನಿರ್ಭ॑ಕ್ತ॒-ಸ್ಸ ಯ-ನ್ದ್ವಿ॒ಷ್ಮೋ ವಿಷ್ಣೋಃ॒ ಕ್ರಮೋ᳚-ಽಸ್ಯರಾತೀಯ॒ತೋ ಹ॒ನ್ತಾ ಜಾಗ॑ತೇನ॒ ಛನ್ದ॑ಸಾ॒ ದಿವ॒ಮನು॒ ವಿ ಕ್ರ॑ಮೇ॒ ನಿರ್ಭ॑ಕ್ತ॒-ಸ್ಸ ಯ-ನ್ದ್ವಿ॒ಷ್ಮೋ ವಿಷ್ಣೋಃ॒ ಕ್ರಮೋ॑-ಽಸಿ ಶತ್ರೂಯ॒ತೋ ಹ॒ನ್ತಾ-ಽಽನು॑ಷ್ಟುಭೇನ॒ ಛನ್ದ॑ಸಾ॒ ದಿಶೋ-ಽನು॒ ವಿ ಕ್ರ॑ಮೇ॒ ನಿರ್ಭ॑ಕ್ತ॒-ಸ್ಸ ಯ-ನ್ದ್ವಿ॒ಷ್ಮಃ ॥ 16 ॥

(ದಕ್ಷಿ॑ಣಾಯಾ - ಮ॒ನ್ತರಿ॑ಕ್ಷ॒ಮನು॒ ವಿ ಕ್ರ॑ಮೇ॒ ನಿರ್ಭ॑ಕ್ತ॒-ಸ್ಸ ಯ-ನ್ದ್ವಿ॒ಷ್ಮೋ ವಿಷ್ಣೋ॒- ರೇಕಾ॒ನ್ನತ್ರಿ॒ಗ್ಂ॒ಶಚ್ಚ॑) (ಅ. 5)

ಅಗ॑ನ್ಮ॒ ಸುವ॒-ಸ್ಸುವ॑ರಗನ್ಮ ಸ॒ನ್ದೃಶ॑ಸ್ತೇ॒ ಮಾ ಛಿ॑ಥ್ಸಿ॒ ಯತ್ತೇ॒ ತಪ॒ಸ್ತಸ್ಮೈ॑ ತೇ॒ ಮಾ-ಽಽ ವೃ॑ಕ್ಷಿ ಸು॒ಭೂರ॑ಸಿ॒ ಶ್ರೇಷ್ಠೋ॑ ರಶ್ಮೀ॒ನಾಮಾ॑ಯು॒ರ್ಧಾ ಅ॒ಸ್ಯಾಯು॑ರ್ಮೇ ಧೇಹಿ ವರ್ಚೋ॒ಧಾ ಅ॑ಸಿ॒ ವರ್ಚೋ॒ ಮಯಿ॑ ಧೇಹೀ॒ದಮ॒ಹಮ॒ಮು-ಮ್ಭ್ರಾತೃ॑ವ್ಯಮಾ॒ಭ್ಯೋ ದಿ॒ಗ್ಭ್ಯೋ᳚-ಽಸ್ಯೈ ದಿ॒ವೋ᳚-ಽಸ್ಮಾದ॒ನ್ತರಿ॑ಕ್ಷಾದ॒ಸ್ಯೈ ಪೃ॑ಥಿ॒ವ್ಯಾ ಅ॒ಸ್ಮಾದ॒ನ್ನಾದ್ಯಾ॒ನ್ನಿರ್ಭ॑ಜಾಮಿ॒ ನಿರ್ಭ॑ಕ್ತ॒-ಸ್ಸ ಯ-ನ್ದ್ವಿ॒ಷ್ಮಃ ॥ 17 ॥

ಸ-ಞ್ಜ್ಯೋತಿ॑ಷಾ-ಽಭೂವಮೈ॒ನ್ದ್ರೀ-ಮಾ॒ವೃತ॑-ಮ॒ನ್ವಾವ॑ರ್ತೇ॒ ಸಮ॒ಹ-ಮ್ಪ್ರ॒ಜಯಾ॒ ಸ-ಮ್ಮಯಾ᳚ ಪ್ರ॒ಜಾ ಸಮ॒ಹಗ್ಂ ರಾ॒ಯಸ್ಪೋಷೇ॑ಣ॒ ಸ-ಮ್ಮಯಾ॑ ರಾ॒ಯಸ್ಪೋಷ॒-ಸ್ಸಮಿ॑ದ್ಧೋ ಅಗ್ನೇ ಮೇ ದೀದಿಹಿ ಸಮೇ॒ದ್ಧಾ ತೇ॑ ಅಗ್ನೇ ದೀದ್ಯಾಸಂ॒-ವಁಸು॑ಮಾನ್. ಯ॒ಜ್ಞೋ ವಸೀ॑ಯಾ-ನ್ಭೂಯಾಸ॒ಮಗ್ನ॒ ಆಯೂಗ್ಂ॑ಷಿ ಪವಸ॒ ಆ ಸು॒ವೋರ್ಜ॒ಮಿಷ॑-ಞ್ಚ ನಃ । ಆ॒ರೇ ಬಾ॑ಧಸ್ವ ದು॒ಚ್ಛುನಾ᳚ಮ್ ॥ ಅಗ್ನೇ॒ ಪವ॑ಸ್ವ॒ ಸ್ವಪಾ॑ ಅ॒ಸ್ಮೇ ವರ್ಚಃ॑ ಸು॒ವೀರ್ಯ᳚ಮ್ ॥ 18 ॥

ದಧ॒ತ್ಪೋಷಗ್ಂ॑ ರ॒ಯಿ-ಮ್ಮಯಿ॑ । ಅಗ್ನೇ॑ ಗೃಹಪತೇ ಸುಗೃಹಪ॒ತಿರ॒ಹ-ನ್ತ್ವಯಾ॑ ಗೃ॒ಹಪ॑ತಿನಾ ಭೂಯಾಸಗ್ಂ ಸುಗೃಹಪ॒ತಿರ್ಮಯಾ॒ ತ್ವ-ಙ್ಗೃ॒ಹಪ॑ತಿನಾ ಭೂಯಾ-ಶ್ಶ॒ತಗ್ಂ ಹಿಮಾ॒ಸ್ತಾಮಾ॒ಶಿಷ॒ಮಾ ಶಾ॑ಸೇ॒ ತನ್ತ॑ವೇ॒ ಜ್ಯೋತಿ॑ಷ್ಮತೀ॒-ನ್ತಾಮಾ॒ಶಿಷ॒ಮಾ ಶಾ॑ಸೇ॒-ಽಮುಷ್ಮೈ॒ ಜ್ಯೋತಿ॑ಷ್ಮತೀ॒-ಙ್ಕಸ್ತ್ವಾ॑ ಯುನಕ್ತಿ॒ ಸ ತ್ವಾ॒ ವಿಮು॑ಞ್ಚ॒ತ್ವಗ್ನೇ᳚ ವ್ರತಪತೇ ವ್ರ॒ತಮ॑ಚಾರಿಷ॒-ನ್ತದ॑ಶಕ॒-ನ್ತನ್ಮೇ॑-ಽರಾಧಿ ಯ॒ಜ್ಞೋ ಬ॑ಭೂವ॒ ಸ ಆ [ಸ ಆ, ಬ॒ಭೂ॒ವ॒ ಸ] 19

ಬ॑ಭೂವ॒ ಸ ಪ್ರಜ॑ಜ್ಞೇ॒ ಸ ವಾ॑ವೃಧೇ । ಸ ದೇ॒ವಾನಾ॒ಮಧಿ॑ಪತಿ-ರ್ಬಭೂವ॒ ಸೋ ಅ॒ಸ್ಮಾಗ್ಂ ಅಧಿ॑ಪತೀನ್ ಕರೋತು ವ॒ಯಗ್ಗ್ ಸ್ಯಾ॑ಮ॒ ಪತ॑ಯೋ ರಯೀ॒ಣಾಮ್ ॥ ಗೋಮಾಗ್ಂ॑ ಅ॒ಗ್ನೇ-ಽವಿ॑ಮಾಗ್ಂ ಅ॒ಶ್ವೀ ಯ॒ಜ್ಞೋ ನೃ॒ವಥ್ಸ॑ಖಾ॒ ಸದ॒ಮಿದ॑ಪ್ರಮೃ॒ಷ್ಯಃ ।ಇಡಾ॑ವಾಗ್ಂ ಏ॒ಷೋ ಅ॑ಸುರ ಪ್ರ॒ಜಾವಾ᳚-ನ್ದೀ॒ರ್ಘೋ ರ॒ಯಿಃ ಪೃ॑ಥುಬು॒ದ್ಧ್ನ-ಸ್ಸ॒ಭಾವಾನ್॑ ॥ 20 ॥

(ದ್ವಿ॒ಷ್ಮಃ-ಸು॒ವೀರ್ಯ॒ಗ್ಂ॒-ಸ ಆ-ಪಞ್ಚ॑ತ್ರಿಗ್ಂಶಚ್ಚ) (ಅ. 6)

ಯಥಾ॒ ವೈ ಸ॑ಮೃತಸೋ॒ಮಾ ಏ॒ವಂ-ವಾಁ ಏ॒ತೇ ಸ॑ಮೃತಯ॒ಜ್ಞಾ ಯದ್ದ॑ರ್ಶಪೂರ್ಣಮಾ॒ಸೌ ಕಸ್ಯ॒ ವಾ-ಽಹ॑ ದೇ॒ವಾ ಯ॒ಜ್ಞಮಾ॒ಗಚ್ಛ॑ನ್ತಿ॒ ಕಸ್ಯ॑ ವಾ॒ ನ ಬ॑ಹೂ॒ನಾಂ-ಯಁಜ॑ಮಾನಾನಾಂ॒-ಯೋಁ ವೈ ದೇ॒ವತಾಃ॒ ಪೂರ್ವಃ॑ ಪರಿಗೃ॒ಹ್ಣಾತಿ॒ ಸ ಏ॑ನಾ॒-ಶ್ಶ್ವೋ ಭೂ॒ತೇ ಯ॑ಜತ ಏ॒ತದ್ವೈ ದೇ॒ವಾನಾ॑-ಮಾ॒ಯತ॑ನಂ॒-ಯಁದಾ॑ಹವ॒ನೀಯೋ᳚-ಽನ್ತ॒ರಾ-ಽಗ್ನೀ ಪ॑ಶೂ॒ನಾ-ಙ್ಗಾರ್ಹ॑ಪತ್ಯೋ ಮನು॒ಷ್ಯಾ॑ಣಾ-ಮನ್ವಾಹಾರ್ಯ॒ಪಚ॑ನಃ ಪಿತೃ॒ಣಾಮ॒ಗ್ನಿ-ಙ್ಗೃ॑ಹ್ಣಾತಿ॒ ಸ್ವ ಏ॒ವಾಯತ॑ನೇ ದೇ॒ವತಾಃ॒ ಪರಿ॑ [ದೇ॒ವತಾಃ॒ ಪರಿ॑, ಗೃ॒ಹ್ಣಾ॒ತಿ॒ ತಾ-ಶ್ಶ್ವೋ] 21

ಗೃಹ್ಣಾತಿ॒ ತಾ-ಶ್ಶ್ವೋ ಭೂ॒ತೇ ಯ॑ಜತೇ ವ್ರ॒ತೇನ॒ ವೈ ಮೇದ್ಧ್ಯೋ॒ -ಽಗ್ನಿ-ರ್ವ್ರ॒ತಪ॑ತಿ-ರ್ಬ್ರಾಹ್ಮ॒ಣೋ ವ್ರ॑ತ॒ಭೃ-ದ್ವ್ರ॒ತ-ಮು॑ಪೈ॒ಷ್ಯ-ನ್ಬ್ರೂ॑ಯಾ॒ದಗ್ನೇ᳚ ವ್ರತಪತೇ ವ್ರ॒ತ-ಞ್ಚ॑ರಿಷ್ಯಾ॒ಮೀತ್ಯ॒ಗ್ನಿ-ರ್ವೈ ದೇ॒ವಾನಾಂ᳚-ವ್ರಁ॒ತಪ॑ತಿ॒ಸ್ತಸ್ಮಾ॑ ಏ॒ವ ಪ್ರ॑ತಿ॒ಪ್ರೋಚ್ಯ॑ ವ್ರ॒ತಮಾ ಲ॑ಭತೇ ಬ॒ರ್॒ಹಿಷಾ॑ ಪೂ॒ರ್ಣಮಾ॑ಸೇ ವ್ರ॒ತಮುಪೈ॑ತಿ ವ॒ಥ್ಸೈರ॑ಮಾವಾ॒ಸ್ಯಾ॑ಯಾಮೇ॒ತದ್ಧ್ಯೇ॑ತಯೋ॑-ರಾ॒ಯತ॑ನಮುಪ॒ಸ್ತೀರ್ಯಃ॒ ಪೂರ್ವ॑ಶ್ಚಾ॒ಗ್ನಿರಪ॑ರ॒ಶ್ಚೇತ್ಯಾ॑ಹು-ರ್ಮನು॒ಷ್ಯಾ॑ [-ರ್ಮನು॒ಷ್ಯಾಃ᳚, ಇನ್ನ್ವಾ] 22

ಇನ್ನ್ವಾ ಉಪ॑ಸ್ತೀರ್ಣ-ಮಿ॒ಚ್ಛನ್ತಿ॒ ಕಿಮು॑ ದೇ॒ವಾ ಯೇಷಾ॒-ನ್ನವಾ॑ವಸಾನ॒-ಮುಪಾ᳚ಸ್ಮಿ॒ಞ್ಛ್ವೋ ಯ॒ಕ್ಷ್ಯಮಾ॑ಣೇ ದೇ॒ವತಾ॑ ವಸನ್ತಿ॒ ಯ ಏ॒ವಂ-ವಿಁ॒ದ್ವಾನ॒ಗ್ನಿ-ಮು॑ಪಸ್ತೃ॒ಣಾತಿ॒ ಯಜ॑ಮಾನೇನ ಗ್ರಾ॒ಮ್ಯಾಶ್ಚ॑ ಪ॒ಶವೋ॑-ಽವ॒ರುದ್ಧ್ಯಾ॑ ಆರ॒ಣ್ಯಾಶ್ಚೇತ್ಯಾ॑ಹು॒-ರ್ಯ-ದ್ಗ್ರಾ॒ಮ್ಯಾನು॑ಪ॒ವಸ॑ತಿ॒ ತೇನ॑ ಗ್ರಾ॒ಮ್ಯಾನವ॑ ರುನ್ಧೇ॒ ಯದಾ॑ರ॒ಣ್ಯಸ್ಯಾ॒-ಽಶ್ಞಾತಿ॒ ತೇನಾ॑ರ॒ಣ್ಯಾನ್. ಯದನಾ᳚ಶ್ವಾ-ನುಪ॒ವಸೇ᳚-ತ್ಪಿತೃದೇವ॒ತ್ಯಃ॑ ಸ್ಯಾದಾರ॒ಣ್ಯಸ್ಯಾ᳚-ಶ್ಞಾತೀನ್ದ್ರಿ॒ಯಂ- [ಶ್ಞಾತೀನ್ದ್ರಿ॒ಯಮ್, ವಾ ಆ॑ರ॒ಣ್ಯಂ-] 23

-ಁವಾ ಆ॑ರ॒ಣ್ಯ-ಮಿ॑ನ್ದ್ರಿ॒ಯ-ಮೇ॒ವಾ-ಽಽತ್ಮ-ನ್ಧ॑ತ್ತೇ॒ ಯದನಾ᳚ಶ್ವಾ-ನುಪ॒ವಸೇ॒-ತ್ಕ್ಷೋಧು॑ಕ-ಸ್ಸ್ಯಾ॒ದ್ಯ-ದ॑ಶ್ಞೀ॒ಯಾದ್ರು॒-ದ್ರೋ᳚-ಽಸ್ಯ ಪ॒ಶೂನ॒ಭಿ ಮ॑ನ್ಯೇತಾ॒-ಽಪೋ᳚-ಽಶ್ಞಾತಿ॒ ತನ್ನೇವಾ॑ಶಿ॒ತ-ನ್ನೇವಾ-ಽನ॑ಶಿತ॒-ನ್ನ ಕ್ಷೋಧು॑ಕೋ॒ ಭವ॑ತಿ॒ ನಾಸ್ಯ॑ ರು॒ದ್ರಃ ಪ॒ಶೂನ॒ಭಿ ಮ॑ನ್ಯತೇ॒ ವಜ್ರೋ॒ ವೈ ಯ॒ಜ್ಞಃ, ಕ್ಷು-ತ್ಖಲು॒ ವೈ ಮ॑ನು॒ಷ್ಯ॑ಸ್ಯ॒ ಭ್ರಾತೃ॑ವ್ಯೋ॒ ಯದನಾ᳚-ಽಶ್ವಾನುಪ॒ವಸ॑ತಿ॒ ವಜ್ರೇ॑ಣೈ॒ವ ಸಾ॒ಕ್ಷಾ-ತ್ಕ್ಷುಧ॒-ಮ್ಭ್ರಾತೃ॑ವ್ಯಗ್ಂ ಹನ್ತಿ ॥ 24 ॥

(ಪರಿ॑-ಮನು॒ಷ್ಯಾ॑-ಇನ್ದ್ರಿ॒ಯಗ್ಂ-ಸಾ॒ಕ್ಷಾತ್-ತ್ರೀಣಿ॑ ಚ) (ಅ. 7)

ಯೋ ವೈ ಶ್ರ॒ದ್ಧಾಮನಾ॑ರಭ್ಯ ಯ॒ಜ್ಞೇನ॒ ಯಜ॑ತೇ॒ ನಾಸ್ಯೇ॒ಷ್ಟಾಯ॒ ಶ್ರದ್ದ॑ಧತೇ॒-ಽಪಃ ಪ್ರ ಣ॑ಯತಿ ಶ್ರ॒ದ್ಧಾ ವಾ ಆಪಃ॑ ಶ್ರ॒ದ್ಧಾಮೇ॒ವಾ-ಽಽರಭ್ಯ॑ ಯ॒ಜ್ಞೇನ॑ ಯಜತ ಉ॒ಭಯೇ᳚-ಽಸ್ಯ ದೇವಮನು॒ಷ್ಯಾ ಇ॒ಷ್ಟಾಯ॒ ಶ್ರದ್ದ॑ಧತೇ॒ ತದಾ॑ಹು॒ರತಿ॒ ವಾ ಏ॒ತಾ ವರ್ತ್ರ॑-ನ್ನೇದ॒ನ್ತ್ಯತಿ॒ ವಾಚ॒-ಮ್ಮನೋ॒ ವಾವೈತಾ ನಾತಿ॑ ನೇದ॒ನ್ತೀತಿ॒ ಮನ॑ಸಾ॒ ಪ್ರ ಣ॑ಯತೀ॒ಯಂ-ವೈಁ ಮನೋ॒- [ಮನಃ॑, ಅ॒ನಯೈ॒ವೈನಾಃ॒] 25

-ಽನಯೈ॒ವೈನಾಃ॒ ಪ್ರ ಣ॑ಯ॒ತ್ಯ-ಸ್ಕ॑ನ್ನಹವಿ-ರ್ಭವತಿ॒ ಯ ಏ॒ವಂ-ವೇಁದ॑ ಯಜ್ಞಾಯು॒ಧಾನಿ॒ ಸ-ಮ್ಭ॑ರತಿ ಯ॒ಜ್ಞೋ ವೈ ಯ॑ಜ್ಞಾಯು॒ಧಾನಿ॑ ಯ॒ಜ್ಞಮೇ॒ವ ತಥ್ಸ-ಮ್ಭ॑ರತಿ॒ ಯದೇಕ॑ಮೇಕಗ್ಂ ಸ॒ಮ್ಭರೇ᳚ತ್-ಪಿತೃದೇವ॒ತ್ಯಾ॑ನಿ ಸ್ಯು॒ರ್ಯ-ಥ್ಸ॒ಹ ಸರ್ವಾ॑ಣಿ ಮಾನು॒ಷಾಣಿ॒ ದ್ವೇದ್ವೇ॒ ಸಮ್ಭ॑ರತಿ ಯಾಜ್ಯಾನುವಾ॒ಕ್ಯ॑ಯೋರೇ॒ವ ರೂ॒ಪ-ಙ್ಕ॑ರೋ॒ತ್ಯಥೋ॑ ಮಿಥು॒ನಮೇ॒ವಯೋ ವೈ ದಶ॑ ಯಜ್ಞಾಯು॒ಧಾನಿ॒ ವೇದ॑ ಮುಖ॒ತೋ᳚-ಽಸ್ಯ ಯ॒ಜ್ಞಃ ಕ॑ಲ್ಪತೇ॒ ಸ್ಫ್ಯ- [ಕ॑ಲ್ಪತೇ॒ ಸ್ಫ್ಯಃ, ಚ॒ ಕ॒ಪಾಲಾ॑ನಿ] 26

-ಶ್ಚ॑ ಕ॒ಪಾಲಾ॑ನಿ ಚಾಗ್ನಿಹೋತ್ರ॒ಹವ॑ಣೀ ಚ॒ ಶೂರ್ಪ॑-ಞ್ಚ ಕೃಷ್ಣಾಜಿ॒ನ-ಞ್ಚ॒ ಶಮ್ಯಾ॑ ಚೋ॒ಲೂಖ॑ಲ-ಞ್ಚ॒ ಮುಸ॑ಲ-ಞ್ಚ ದೃ॒ಷಚ್ಚೋಪ॑ಲಾ ಚೈ॒ತಾನಿ॒ ವೈ ದಶ॑ ಯಜ್ಞಾಯು॒ಧಾನಿ॒ ಯ ಏ॒ವಂ-ವೇಁದ॑ ಮುಖ॒ತೋ᳚-ಽಸ್ಯ ಯ॒ಜ್ಞಃ ಕ॑ಲ್ಪತೇ॒ ಯೋ ವೈ ದೇ॒ವೇಭ್ಯಃ॑ ಪ್ರತಿ॒ಪ್ರೋಚ್ಯ॑ ಯ॒ಜ್ಞೇನ॒ ಯಜ॑ತೇ ಜು॒ಷನ್ತೇ᳚-ಽಸ್ಯ ದೇ॒ವಾ ಹ॒ವ್ಯಗ್ಂ ಹ॒ವಿ-ರ್ನಿ॑ರು॒ಪ್ಯಮಾ॑ಣಮ॒ಭಿ ಮ॑ನ್ತ್ರಯೇತಾ॒-ಽಗ್ನಿಗ್ಂ ಹೋತಾ॑ರಮಿ॒ಹ ತಗ್ಂ ಹು॑ವ॒ ಇತಿ॑ [ ] 27

ದೇ॒ವೇಭ್ಯ॑ ಏ॒ವ ಪ್ರ॑ತಿ॒ಪ್ರೋಚ್ಯ॑ ಯ॒ಜ್ಞೇನ॑ ಯಜತೇ ಜು॒ಷನ್ತೇ᳚-ಽಸ್ಯ ದೇ॒ವಾ ಹ॒ವ್ಯಮೇ॒ಷ ವೈ ಯ॒ಜ್ಞಸ್ಯ॒ ಗ್ರಹೋ॑ ಗೃಹೀ॒ತ್ವೈವ ಯ॒ಜ್ಞೇನ॑ ಯಜತೇ॒ ತದು॑ದಿ॒ತ್ವಾ ವಾಚಂ॑-ಯಁಚ್ಛತಿ ಯ॒ಜ್ಞಸ್ಯ॒ ಧೃತ್ಯಾ॒ ಅಥೋ॒ ಮನ॑ಸಾ॒ ವೈ ಪ್ರ॒ಜಾಪ॑ತಿ-ರ್ಯ॒ಜ್ಞಮ॑ತನುತ॒ ಮನ॑ಸೈ॒ವ ತ-ದ್ಯ॒ಜ್ಞ-ನ್ತ॑ನುತೇ॒ ರಕ್ಷ॑ಸಾ॒-ಮನ॑ನ್ವವಚಾರಾಯ॒ ಯೋ ವೈ ಯ॒ಜ್ಞಂ-ಯೋಁಗ॒ ಆಗ॑ತೇ ಯು॒ನಕ್ತಿ॑ ಯು॒ಙ್ಕ್ತೇ ಯು॑ಞ್ಜಾ॒ನೇಷು॒ ಕಸ್ತ್ವಾ॑ ಯುನಕ್ತಿ॒ ಸ ತ್ವಾ॑ ಯುನ॒ಕ್ತ್ವಿ-( ) -ತ್ಯಾ॑ಹ ಪ್ರ॒ಜಾಪ॑ತಿ॒-ರ್ವೈ ಕಃ ಪ್ರ॒ಜಾಪ॑ತಿನೈ॒ವೈನಂ॑-ಯುಁನಕ್ತಿ ಯು॒ಙ್ಕ್ತೇ ಯು॑ಞ್ಜಾ॒ನೇಷು॑ ॥ 28 ॥

(ವೈಮ॒ನಃ-ಸ್ಫ್ಯ-ಇತಿ॑-ಯುನ॒ಕ್ತ್ವೇ-ಕಾ॑ದಶ ಚ) (ಅ. 8)

ಪ್ರ॒ಜಾಪ॑ತಿ-ರ್ಯ॒ಜ್ಞಾನ॑ಸೃಜತಾ-ಗ್ನಿಹೋ॒ತ್ರ-ಞ್ಚಾ᳚ಗ್ನಿಷ್ಟೋ॒ಮ-ಞ್ಚ॑ ಪೌರ್ಣಮಾ॒ಸೀ-ಞ್ಚೋ॒ಕ್ಥ್ಯ॑-ಞ್ಚಾಮಾವಾ॒ಸ್ಯಾ᳚-ಞ್ಚಾತಿರಾ॒ತ್ರ-ಞ್ಚ॒ ತಾನುದ॑ಮಿಮೀತ॒ ಯಾವ॑ದಗ್ನಿಹೋ॒ತ್ರ-ಮಾಸೀ॒-ತ್ತಾವಾ॑ನಗ್ನಿಷ್ಟೋ॒ಮೋ ಯಾವ॑ತೀ ಪೌರ್ಣಮಾ॒ಸೀ ತಾವಾ॑ನು॒ಕ್ಥ್ಯೋ॑ ಯಾವ॑ತ್ಯಮಾವಾ॒ಸ್ಯಾ॑ ತಾವಾ॑ನತಿರಾ॒ತ್ರೋ ಯ ಏ॒ವಂ-ವಿಁ॒ದ್ವಾನ॑ಗ್ನಿಹೋ॒ತ್ರ-ಞ್ಜು॒ಹೋತಿ॒ ಯಾವ॑ದಗ್ನಿಷ್ಟೋ॒ಮೇನೋ॑ ಪಾ॒ಪ್ನೋತಿ॒ ತಾವ॒ದುಪಾ᳚-ಽಽಪ್ನೋತಿ॒ ಯ ಏ॒ವಂ-ವಿಁ॒ದ್ವಾ-ನ್ಪೌ᳚ರ್ಣಮಾ॒ಸೀಂ-ಯಁಜ॑ತೇ॒ ಯಾವ॑ದು॒ಕ್ಥ್ಯೇ॑ನೋಪಾ॒ಪ್ನೋತಿ॒ [ಯಾವ॑ದು॒ಕ್ಥ್ಯೇ॑ನೋಪಾ॒ಪ್ನೋತಿ॑, ತಾವ॒ದುಪಾ᳚-ಽಽಪ್ನೋತಿ॒] 29

ತಾವ॒ದುಪಾ᳚-ಽಽಪ್ನೋತಿ॒ ಯ ಏ॒ವಂ-ವಿಁ॒ದ್ವಾನ॑ಮಾವಾ॒ಸ್ಯಾಂ᳚-ಯಁಜ॑ತೇ॒ ಯಾವ॑ದತಿರಾ॒ತ್ರೇಣೋ॑ಪಾ॒ಪ್ನೋತಿ॒ ತಾವ॒ದುಪಾ᳚-ಽಽಪ್ನೋತಿ ಪರಮೇ॒ಷ್ಠಿನೋ॒ ವಾ ಏ॒ಷ ಯ॒ಜ್ಞೋ-ಽಗ್ರ॑ ಆಸೀ॒-ತ್ತೇನ॒ ಸ ಪ॑ರ॒ಮಾ-ಙ್ಕಾಷ್ಠಾ॑ಮಗಚ್ಛ॒-ತ್ತೇನ॑ ಪ್ರ॒ಜಾಪ॑ತಿ-ನ್ನಿ॒ರವಾ॑ಸಾಯಯ॒-ತ್ತೇನ॑ ಪ್ರ॒ಜಾಪ॑ತಿಃ ಪರ॒ಮಾ-ಙ್ಕಾಷ್ಠಾ॑ಮಗಚ್ಛ॒-ತ್ತೇನೇನ್ದ್ರ॑-ನ್ನಿ॒ರವಾ॑ಸಾಯಯ॒-ತ್ತೇನೇನ್ದ್ರಃ॑ ಪರ॒ಮಾ-ಙ್ಕಾಷ್ಠಾ॑ಮಗಚ್ಛ॒-ತ್ತೇನಾ॒-ಽಗ್ನೀಷೋಮೌ॑ ನಿ॒ರವಾ॑ಸಾಯಯ॒-ತ್ತೇನಾ॒ಗ್ನೀಷೋಮೌ॑ ಪ॒ರಮಾ-ಙ್ಕಾಷ್ಠಾ॑ಮಗಚ್ಛತಾಂ॒-ಯಁ [ಕಾಷ್ಠಾ॑ಮಗಚ್ಛತಾಂ॒-ಯಃ, ಁಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ] 30

ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ ಪರ॒ಮಾಮೇ॒ವ ಕಾಷ್ಠಾ᳚-ಙ್ಗಚ್ಛತಿ॒ ಯೋ ವೈ ಪ್ರಜಾ॑ತೇನ ಯ॒ಜ್ಞೇನ॒ ಯಜ॑ತೇ॒ ಪ್ರ ಪ್ರ॒ಜಯಾ॑ ಪ॒ಶುಭಿ॑-ರ್ಮಿಥು॒ನೈ-ರ್ಜಾ॑ಯತೇ॒ ದ್ವಾದ॑ಶ॒ ಮಾಸಾ᳚-ಸ್ಸಂವಁಥ್ಸ॒ರೋ ದ್ವಾದ॑ಶ ದ್ವ॒ನ್ದ್ವಾನಿ॑ ದರ್ಶಪೂರ್ಣಮಾ॒ಸಯೋ॒ಸ್ತಾನಿ॑ ಸ॒ಮ್ಪಾದ್ಯಾ॒ನೀತ್ಯಾ॑ಹು-ರ್ವ॒ಥ್ಸ-ಞ್ಚೋ॑ಪಾವಸೃ॒ಜತ್ಯು॒ಖಾ-ಞ್ಚಾಧಿ॑ ಶ್ರಯ॒ತ್ಯವ॑ ಚ॒ ಹನ್ತಿ॑ ದೃ॒ಷದೌ॑ ಚ ಸ॒ಮಾಹ॒ನ್ತ್ಯಧಿ॑ ಚ॒ ವಪ॑ತೇ ಕ॒ಪಾಲಾ॑ನಿ॒ ಚೋಪ॑ ದಧಾತಿ ಪುರೋ॒ಡಾಶ॑-ಞ್ಚಾ- [ಪುರೋ॒ಡಾಶ॑-ಞ್ಚ, ಅ॒ಧಿ॒ಶ್ರಯ॒ತ್ಯಾಜ್ಯ॑-ಞ್ಚ] 31

-ಽಧಿ॒ಶ್ರಯ॒ತ್ಯಾಜ್ಯ॑-ಞ್ಚ ಸ್ತಮ್ಬಯ॒ಜುಶ್ಚ॒ ಹರ॑ತ್ಯ॒ಭಿ ಚ॑ ಗೃಹ್ಣಾತಿ॒ ವೇದಿ॑-ಞ್ಚ ಪರಿ ಗೃ॒ಹ್ಣಾತಿ॒ ಪತ್ನೀ᳚-ಞ್ಚ॒ ಸನ್ನ॑ಹ್ಯತಿ॒ ಪ್ರೋಕ್ಷ॑ಣೀಶ್ಚಾ ಽಽಸಾ॒ದಯ॒ತ್ಯಾಜ್ಯ॑-ಞ್ಚೈ॒ತಾನಿ॒ ವೈ ದ್ವಾದ॑ಶ ದ್ವ॒ನ್ದ್ವಾನಿ॑ ದರ್ಶಪೂರ್ಣಮಾ॒ಸಯೋ॒ಸ್ತಾನಿ॒ ಯ ಏ॒ವಗ್ಂ ಸ॒ಮ್ಪಾದ್ಯ॒ ಯಜ॑ತೇ॒ ಪ್ರಜಾ॑ತೇನೈ॒ವ ಯ॒ಜ್ಞೇನ॑ ಯಜತೇ॒ ಪ್ರ ಪ್ರ॒ಜಯಾ॑ ಪ॒ಶುಭಿ॑-ರ್ಮಿಥು॒ನೈ-ರ್ಜಾ॑ಯತೇ ॥ 32 ॥

(ಉ॒ಕ್ಥ್ಯೇ॑ನೋಪಾ॒ಪ್ನೋತ್ಯ॑-ಗಚ್ಛತಾಂ॒-ಯಃ ಁ- ಪು॑ರೋ॒ಡಾಶಂ॑-ಚತ್ವಾರಿ॒ಗ್ಂ॒ಶಚ್ಚ॑) (ಅ. 9)

ಧ್ರು॒ವೋ॑-ಽಸಿ ಧ್ರು॒ವೋ॑-ಽಹಗ್ಂ ಸ॑ಜಾ॒ತೇಷು॑ ಭೂಯಾಸ॒ಮಿತ್ಯಾ॑ಹ ಧ್ರು॒ವಾನೇ॒ವೈನಾ᳚ನ್ ಕುರುತ ಉ॒ಗ್ರೋ᳚-ಽಸ್ಯು॒ಗ್ರೋ॑-ಽಹಗ್ಂ ಸ॑ಜಾ॒ತೇಷು॑ ಭೂಯಾಸ॒-ಮಿತ್ಯಾ॒ಹಾಪ್ರ॑ತಿವಾದಿನ ಏ॒ವೈನಾ᳚ನ್ ಕುರುತೇ-ಽಭಿ॒ಭೂರ॑ಸ್ಯಭಿ॒ಭೂರ॒ಹಗ್ಂ ಸ॑ಜಾ॒ತೇಷು॑ ಭೂಯಾಸ॒ಮಿತ್ಯಾ॑ಹ॒ ಯ ಏ॒ವೈನ॑-ಮ್ಪ್ರತ್ಯು॒ತ್ಪಿಪೀ॑ತೇ॒ ತಮುಪಾ᳚ಸ್ಯತೇ ಯು॒ನಜ್ಮಿ॑ ತ್ವಾ॒ ಬ್ರಹ್ಮ॑ಣಾ॒ ದೈವ್ಯೇ॒ನೇತ್ಯಾ॑ಹೈ॒ಷ ವಾಅ॒ಗ್ನೇರ್ಯೋಗ॒ಸ್ತೇನೈ॒ - [ವಾಅ॒ಗ್ನೇರ್ಯೋಗ॒ಸ್ತೇನ॑, ಏ॒ವೈನಂ॑-ಯುಁನಕ್ತಿ] 33

ವೈನಂ॑-ಯುಁನಕ್ತಿ ಯ॒ಜ್ಞಸ್ಯ॒ ವೈ ಸಮೃ॑ದ್ಧೇನ ದೇ॒ವಾ-ಸ್ಸು॑ವ॒ರ್ಗಂ-ಲೋಁ॒ಕಮಾ॑ಯನ್. ಯ॒ಜ್ಞಸ್ಯ॒ ವ್ಯೃ॑ದ್ಧೇ॒ನಾಸು॑ರಾ॒-ನ್ಪರಾ॑ಭಾವಯ॒ನ್. ಯನ್ಮೇ॑ ಅಗ್ನೇ ಅ॒ಸ್ಯ ಯ॒ಜ್ಞಸ್ಯ॒ ರಿಷ್ಯಾ॒ದಿತ್ಯಾ॑ಹ ಯ॒ಜ್ಞಸ್ಯೈ॒ವ ತಥ್ಸಮೃ॑ದ್ಧೇನ॒ ಯಜ॑ಮಾನ-ಸ್ಸುವ॒ರ್ಗಂ-ಲೋಁ॒ಕಮೇ॑ತಿ ಯ॒ಜ್ಞಸ್ಯ॒ ವ್ಯೃ॑ದ್ಧೇನ॒ ಭ್ರಾತೃ॑ವ್ಯಾ॒-ನ್ಪರಾ॑ ಭಾವಯತ್ಯಗ್ನಿಹೋ॒ತ್ರ-ಮೇ॒ತಾಭಿ॒-ರ್ವ್ಯಾಹೃ॑ತೀಭಿ॒ರುಪ॑ ಸಾದಯೇದ್ಯಜ್ಞಮು॒ಖಂ-ವಾಁ ಅ॑ಗ್ನಿಹೋ॒ತ್ರ-ಮ್ಬ್ರಹ್ಮೈ॒ತಾ ವ್ಯಾಹೃ॑ತಯೋ ಯಜ್ಞಮು॒ಖ ಏ॒ವ ಬ್ರಹ್ಮ॑ - [ಬ್ರಹ್ಮ॑, ಕು॒ರು॒ತೇ॒ ಸಂ॒ವಁ॒ಥ್ಸ॒ರೇ] 34

ಕುರುತೇ ಸಂವಁಥ್ಸ॒ರೇ ಪ॒ರ್ಯಾಗ॑ತ ಏ॒ತಾಭಿ॑ರೇ॒ವೋಪ॑ ಸಾದಯೇ॒-ದ್ಬ್ರಹ್ಮ॑ಣೈ॒ವೋಭ॒ಯತಃ॑ ಸಂವಁಥ್ಸ॒ರ-ಮ್ಪರಿ॑ ಗೃಹ್ಣಾತಿ ದರ್ಶಪೂರ್ಣಮಾ॒ಸೌ ಚಾ॑ತುರ್ಮಾ॒ಸ್ಯಾನ್ಯಾ॒ಲಭ॑ಮಾನ ಏ॒ತಾಭಿ॒-ರ್ವ್ಯಾಹೃ॑ತೀಭಿರ್-ಹ॒ವೀಗ್ಷ್ಯಾಸಾ॑ದಯೇ-ದ್ಯಜ್ಞಮು॒ಖಂ-ವೈಁ ದ॑ರ್ಶಪೂರ್ಣಮಾ॒ಸೌ ಚಾ॑ತುರ್ಮಾ॒ಸ್ಯಾನಿ॒ ಬ್ರಹ್ಮೈ॒ತಾ ವ್ಯಾಹೃ॑ತಯೋ ಯಜ್ಞಮು॒ಖ ಏ॒ವ ಬ್ರಹ್ಮ॑ ಕುರುತೇ ಸಂವಁಥ್ಸ॒ರೇ ಪ॒ರ್ಯಾಗ॑ತ ಏ॒ತಾಭಿ॑ರೇ॒ವಾಸಾ॑ದಯೇ॒-ದ್ಬ್ರಹ್ಮ॑ಣೈ॒ವೋಭ॒ಯತಃ॑ ಸಂವಁಥ್ಸ॒ರ-ಮ್ಪರಿ॑ಗೃಹ್ಣಾತಿ॒ ಯದ್ವೈ ಯ॒ಜ್ಞಸ್ಯ॒ ಸಾಮ್ನಾ᳚ ಕ್ರಿ॒ಯತೇ॑ ರಾ॒ಷ್ಟ್ರಂ- [ರಾ॒ಷ್ಟ್ರಮ್, ಯ॒ಜ್ಞಸ್ಯಾ॒-ಶೀರ್ಗ॑ಚ್ಛತಿ॒] 35

-ಁಯ॒ಜ್ಞಸ್ಯಾ॒-ಶೀರ್ಗ॑ಚ್ಛತಿ॒ ಯದೃ॒ಚಾ ವಿಶಂ॑-ಯಁ॒ಜ್ಞಸ್ಯಾ॒- ಶೀರ್ಗ॑ಚ್ಛ॒ತ್ಯಥ॑ ಬ್ರಾಹ್ಮ॒ಣೋ॑-ಽನಾ॒ಶೀರ್ಕೇ॑ಣ ಯ॒ಜ್ಞೇನ॑ ಯಜತೇ ಸಾಮಿಧೇ॒ನೀ-ರ॑ನುವ॒ಕ್ಷ್ಯನ್ನೇ॒ತಾ ವ್ಯಾಹೃ॑ತೀಃ ಪು॒ರಸ್ತಾ᳚ದ್ದದ್ಧ್ಯಾ॒-ದ್ಬ್ರಹ್ಮೈ॒ವ ಪ್ರ॑ತಿ॒ಪದ॑-ಙ್ಕುರುತೇ॒ ತಥಾ᳚ ಬ್ರಾಹ್ಮ॒ಣ-ಸ್ಸಾಶೀ᳚ರ್ಕೇಣ ಯ॒ಜ್ಞೇನ॑ ಯಜತೇ॒ ಯ-ಙ್ಕಾ॒ಮಯೇ॑ತ॒ ಯಜ॑ಮಾನ॒-ಮ್ಭ್ರಾತೃ॑ವ್ಯಮಸ್ಯ ಯ॒ಜ್ಞಸ್ಯಾ॒ಶೀರ್ಗ॑ಚ್ಛೇ॒ದಿತಿ॒ ತಸ್ಯೈ॒ತಾ ವ್ಯಾಹೃ॑ತೀಃ ಪುರೋನುವಾ॒ಕ್ಯಾ॑ಯಾ-ನ್ದದ್ಧ್ಯಾ-ದ್ಭ್ರಾತೃವ್ಯದೇವ॒ತ್ಯಾ॑ ವೈ ಪು॑ರೋನುವಾ॒ಕ್ಯಾ᳚ ಭ್ರಾತೃ॑ವ್ಯಮೇ॒ವಾಸ್ಯ॑ ಯ॒ಜ್ಞಸ್ಯಾ॒-[ಯ॒ಜ್ಞಸ್ಯಾ॑, ಆ॒ಶೀರ್ಗ॑ಚ್ಛತಿ॒] 36

-ಽಽಶೀರ್ಗ॑ಚ್ಛತಿ॒ ಯಾನ್ ಕಾ॒ಮಯೇ॑ತ॒ ಯಜ॑ಮಾನಾನ್-ಥ್ಸ॒ಮಾವ॑ತ್ಯೇನಾನ್ ಯ॒ಜ್ಞಸ್ಯಾ॒ ಽಽಶೀರ್ಗ॑ಚ್ಛೇ॒ದಿತಿ॒ ತೇಷಾ॑ಮೇ॒ತಾ ವ್ಯಾಹೃ॑ತೀಃ ಪುರೋನುವಾ॒ಕ್ಯಾ॑ಯಾ ಅರ್ಧ॒ರ್ಚ ಏಕಾ᳚-ನ್ದದ್ಧ್ಯಾ-ದ್ಯಾ॒ಜ್ಯಾ॑ಯೈ ಪು॒ರಸ್ತಾ॒ದೇಕಾಂ᳚-ಯಾಁ॒ಜ್ಯಾ॑ಯಾ ಅರ್ಧ॒ರ್ಚ ಏಕಾ॒-ನ್ತಥೈ॑ನಾನ್-ಥ್ಸ॒ಮಾವ॑ತೀ ಯ॒ಜ್ಞಸ್ಯಾ॒ ಽಽಶೀರ್ಗ॑ಚ್ಛತಿ॒ ಯಥಾ॒ ವೈ ಪ॒ರ್ಜನ್ಯ॒-ಸ್ಸುವೃ॑ಷ್ಟಂ॒-ವಁರ್ಷ॑ತ್ಯೇ॒ವಂ-ಯಁ॒ಜ್ಞೋ ಯಜ॑ಮಾನಾಯ ವರ್ಷತಿ॒ ಸ್ಥಲ॑ಯೋದ॒ಕ-ಮ್ಪ॑ರಿಗೃ॒ಹ್ಣನ್ತ್ಯಾ॒ಶಿಷಾ॑ ಯ॒ಜ್ಞಂ-ಯಁಜ॑ಮಾನಃ॒ ಪರಿ॑ ಗೃಹ್ಣಾತಿ॒ ಮನೋ॑-ಽಸಿ ಪ್ರಾಜಾಪ॒ತ್ಯಂ- [ಪ್ರಾಜಾಪ॒ತ್ಯಮ್, ಮನ॑ಸಾ] 37

-ಮನ॑ಸಾ ಮಾ ಭೂ॒ತೇನಾ-ಽಽವಿ॒ಶೇತ್ಯಾ॑ಹ॒ ಮನೋ॒ ವೈ ಪ್ರಾ॑ಜಾಪ॒ತ್ಯ-ಮ್ಪ್ರಾ॑ಜಾಪ॒ತ್ಯೋ ಯ॒ಜ್ಞೋ ಮನ॑ ಏ॒ವ ಯ॒ಜ್ಞಮಾ॒ತ್ಮ-ನ್ಧ॑ತ್ತೇ॒ ವಾಗ॑ಸ್ಯೈ॒ನ್ದ್ರೀ ಸ॑ಪತ್ನ॒ಕ್ಷಯ॑ಣೀ ವಾ॒ಚಾ ಮೇ᳚ನ್ದ್ರಿ॒ಯೇಣಾ-ಽಽವಿ॒ಶೇತ್ಯಾ॑ಹೈ॒ನ್ದ್ರೀ ವೈ ವಾಗ್ವಾಚ॑-ಮೇ॒ವೈನ್ದ್ರೀ- ಮಾ॒ತ್ಮ-ನ್ಧ॑ತ್ತೇ ॥ 38 ॥

(ತೇನೈ॒-ವ ಬ್ರಹ್ಮ॑- ರಾ॒ಷ್ಟ್ರಮೇ॒-ವಾಸ್ಯ॑ ಯ॒ಜ್ಞಸ್ಯ॑-ಪ್ರಾಜಾಪ॒ತ್ಯಗ್ಂ-ಷಟ್ತ್ರಿಗ್ಂ॑ಶಚ್ಚ) (ಅ. 10)

ಯೋ ವೈ ಸ॑ಪ್ತದ॒ಶ-ಮ್ಪ್ರ॒ಜಾಪ॑ತಿಂ-ಯಁ॒ಜ್ಞಮ॒ನ್ವಾಯ॑ತ್ತಂ॒-ವೇಁದ॒ ಪ್ರತಿ॑ ಯ॒ಜ್ಞೇನ॑ ತಿಷ್ಠತಿ॒ ನ ಯ॒ಜ್ಞಾ-ದ್ಭ್ರಗ್ಂ॑ಶತ॒ ಆ ಶ್ರಾ॑ವ॒ಯೇತಿ॒ ಚತು॑ರಕ್ಷರ॒ಮಸ್ತು॒ ಶ್ರೌಷ॒ಡಿತಿ॒ ಚತು॑ರಕ್ಷರಂ॒-ಯಁಜೇತಿ॒ ದ್ವ್ಯ॑ಕ್ಷರಂ॒-ಯೇಁ ಯಜಾ॑ಮಹ॒ ಇತಿ॒ ಪಞ್ಚಾ᳚ಕ್ಷರ-ನ್ದ್ವ್ಯಕ್ಷ॒ರೋ ವ॑ಷಟ್ಕಾ॒ರ ಏ॒ಷ ವೈ ಸ॑ಪ್ತದ॒ಶಃ ಪ್ರ॒ಜಾಪ॑ತಿ-ರ್ಯ॒ಜ್ಞಮ॒ನ್ವಾಯ॑ತ್ತೋ॒ ಯ ಏ॒ವಂ-ವೇಁದ॒ ಪ್ರತಿ॑ ಯ॒ಜ್ಞೇನ॑ ತಿಷ್ಠತಿ॒ ನ ಯ॒ಜ್ಞಾದ್- ಭ್ರಗ್ಂ॑ಶತೇ॒ ಯೋ ವೈ ಯ॒ಜ್ಞಸ್ಯ॒ ಪ್ರಾಯ॑ಣ-ಮ್ಪ್ರತಿ॒ಷ್ಠಾ- [ಪ್ರತಿ॒ಷ್ಠಾಮ್, ಉ॒ದಯ॑ನಂ॒-ವೇಁದ॒] 39

ಮು॒ದಯ॑ನಂ॒-ವೇಁದ॒ ಪ್ರತಿ॑ಷ್ಠಿತೇ॒ನಾರಿ॑ಷ್ಟೇನ ಯ॒ಜ್ಞೇನ॑ ಸ॒ಗ್ಗ್॒ಸ್ಥಾ-ಙ್ಗ॑ಚ್ಛ॒ತ್ಯಾಶ್ರಾ॑ವ॒ಯಾಸ್ತು॒ ಶ್ರೌಷ॒ಡ್ಯಜ॒ ಯೇ ಯಜಾ॑ಮಹೇ ವಷಟ್ಕಾ॒ರ ಏ॒ತದ್ವೈ ಯ॒ಜ್ಞಸ್ಯ॒ ಪ್ರಾಯ॑ಣಮೇ॒ಷಾ ಪ್ರ॑ತಿ॒ಷ್ಠೈತದು॒ದಯ॑ನಂ॒-ಯಁ ಏ॒ವಂ-ವೇಁದ॒ ಪ್ರತಿ॑ಷ್ಠಿತೇ॒ನಾ-ಽರಿ॑ಷ್ಟೇನ ಯ॒ಜ್ಞೇನ॑ ಸ॒ಗ್ಗ್॒ಸ್ಥಾ-ಙ್ಗ॑ಚ್ಛತಿ॒ ಯೋ ವೈ ಸೂ॒ನೃತಾ॑ಯೈ॒ ದೋಹಂ॒-ವೇಁದ॑ ದು॒ಹ ಏ॒ವೈನಾಂ᳚-ಯಁ॒ಜ್ಞೋ ವೈ ಸೂ॒ನೃತಾ ಽಽ ಶ್ರಾ॑ವ॒ಯೇತ್ಯೈವೈನಾ॑-ಮಹ್ವ॒ದಸ್ತು॒ [-ಮಹ್ವ॒ದಸ್ತು॑, ಶ್ರೌಷ॒ಡಿತ್ಯು॒ಪಾವಾ᳚ಸ್ರಾ॒-] 40

ಶ್ರೌಷ॒ಡಿತ್ಯು॒ಪಾವಾ᳚ಸ್ರಾ॒-ಗ್ಯಜೇತ್ಯುದ॑ನೈಷೀ॒ದ್ಯೇ ಯಜಾ॑ಮಹ॒ ಇತ್ಯುಪಾ॑-ಽಸದ-ದ್ವಷಟ್ಕಾ॒ರೇಣ॑ ದೋಗ್ದ್ಧ್ಯೇ॒ಷ ವೈ ಸೂ॒ನೃತಾ॑ಯೈ॒ ದೋಹೋ॒ ಯ ಏ॒ವಂ-ವೇಁದ॑ ದು॒ಹ ಏ॒ವೈನಾ᳚-ನ್ದೇ॒ವಾ ವೈ ಸ॒ತ್ರಮಾ॑ಸತ॒ ತೇಷಾ॒-ನ್ದಿಶೋ॑-ಽದಸ್ಯ॒ನ್ತ ಏ॒ತಾಮಾ॒ರ್ದ್ರಾ-ಮ್ಪ॒ಙ್ಕ್ತಿಮ॑ಪಶ್ಯ॒ನ್ನಾ ಶ್ರಾ॑ವ॒ಯೇತಿ॑ ಪುರೋವಾ॒ತ-ಮ॑ಜನಯ॒ನ್ನಸ್ತು॒ ಶ್ರೌಷ॒ಡಿತ್ಯ॒ಭ್ರಗ್ಂ ಸಮ॑ಪ್ಲಾವಯ॒ನ್॒. ಯಜೇತಿ॑ ವಿ॒ದ್ಯುತ॑- [ವಿ॒ದ್ಯುತ॑ಮ್, ಅ॒ಜ॒ನ॒ಯ॒ನ್॒ ಯೇ] 41

ಮಜನಯ॒ನ್॒ ಯೇ ಯಜಾ॑ಮಹ॒ ಇತಿ॒ ಪ್ರಾವ॑ರ್ಷಯನ್ನ॒ಭ್ಯ॑ಸ್ತನಯನ್ ವಷಟ್ಕಾ॒ರೇಣ॒ ತತೋ॒ ವೈ ತೇಭ್ಯೋ॒ ದಿಶಃ॒ ಪ್ರಾಪ್ಯಾ॑ಯನ್ತ॒ ಯ ಏ॒ವಂ-ವೇಁದ॒ ಪ್ರಾಸ್ಮೈ॒ ದಿಶಃ॑ ಪ್ಯಾಯನ್ತೇ ಪ್ರ॒ಜಾಪ॑ತಿ-ನ್ತ್ವೋ॒ವೇದ॑ ಪ್ರ॒ಜಾಪ॑ತಿ ಸ್ತ್ವಂವೇಁದ॒ ಯ-ಮ್ಪ್ರ॒ಜಾಪ॑ತಿ॒-ರ್ವೇದ॒ ಸ ಪುಣ್ಯೋ॑ ಭವತ್ಯೇ॒ಷ ವೈ ಛ॑ನ್ದ॒ಸ್ಯಃ॑ ಪ್ರ॒ಜಾಪ॑ತಿ॒ರಾ ಶ್ರಾ॑ವ॒ಯಾ-ಽಸ್ತು॒ ಶ್ರೌಷ॒ಡ್ಯಜ॒ ಯೇ ಯಜಾ॑ಮಹೇ ವಷಟ್ಕಾ॒ರೋ ಯ ಏ॒ವಂ-ವೇಁದ॒ ಪುಣ್ಯೋ॑ ಭವತಿ ವಸ॒ನ್ತ- [ವಸ॒ನ್ತಮ್, ಋ॒ತೂ॒ನಾಂ] 42

-ಮೃ॑ತೂ॒ನಾ-ಮ್ಪ್ರೀ॑ಣಾ॒ಮೀತ್ಯಾ॑ಹ॒ರ್ತವೋ॒ ವೈ ಪ್ರ॑ಯಾ॒ಜಾ ಋ॒ತೂನೇ॒ವ ಪ್ರೀ॑ಣಾತಿ॒ ತೇ᳚-ಽಸ್ಮೈ ಪ್ರೀ॒ತಾ ಯ॑ಥಾಪೂ॒ರ್ವ-ಙ್ಕ॑ಲ್ಪನ್ತೇ॒ ಕಲ್ಪ॑ನ್ತೇ-ಽಸ್ಮಾ ಋ॒ತವೋ॒ ಯ ಏ॒ವಂ-ವೇಁದಾ॒ಗ್ನೀಷೋಮ॑ಯೋರ॒ಹ-ನ್ದೇ॑ವಯ॒ಜ್ಯಯಾ॒ ಚಕ್ಷು॑ಷ್ಮಾ-ನ್ಭೂಯಾಸ॒ಮಿತ್ಯಾ॑-ಹಾ॒ಗ್ನೀಷೋಮಾ᳚ಭ್ಯಾಂ॒-ವೈಁ ಯ॒ಜ್ಞಶ್ಚಕ್ಷು॑ಷ್ಮಾ॒-ನ್ತಾಭ್ಯಾ॑ಮೇ॒ವ ಚಕ್ಷು॑ರಾ॒ತ್ಮ-ನ್ಧ॑ತ್ತೇ॒ ಽಗ್ನೇರ॒ಹ-ನ್ದೇ॑ವಯ॒ಜ್ಯಯಾ᳚-ಽನ್ನಾ॒ದೋ ಭೂ॑ಯಾಸ॒ಮಿತ್ಯಾ॑ಹಾ॒ಗ್ನಿರ್ವೈ ದೇ॒ವಾನಾ॑-ಮನ್ನಾ॒ದಸ್ತೇ ನೈ॒ವಾ- [ಮನ್ನಾ॒ದಸ್ತೇ ನೈ॒ವಾ, ಅ॒ನ್ನಾದ್ಯ॑ಮಾ॒ತ್ಮನ್] 43

-ಽನ್ನಾದ್ಯ॑ಮಾ॒ತ್ಮ-ನ್ಧ॑ತ್ತೇ॒ ದಬ್ಧಿ॑ರ॒ಸ್ಯದ॑ಬ್ಧೋ ಭೂಯಾಸಮ॒ಮು-ನ್ದ॑ಭೇಯ॒ಮಿತ್ಯಾ॑ಹೈ॒ತಯಾ॒ ವೈ ದಬ್ದ್ಧ್ಯಾ॑ ದೇ॒ವಾ ಅಸು॑ರಾನದಭ್ನುವ॒ನ್ತಯೈ॒ವ ಭ್ರಾತೃ॑ವ್ಯ-ನ್ದಭ್ನೋತ್ಯ॒ಗ್ನೀಷೋಮ॑ಯೋರ॒ಹ-ನ್ದೇ॑ವಯ॒ಜ್ಯಯಾ॑ ವೃತ್ರ॒ಹಾ ಭೂ॑ಯಾಸ॒ಮಿತ್ಯಾ॑ಹಾ॒-ಽಗ್ನೀಷೋಮಾ᳚ಭ್ಯಾಂ॒-ವಾಁ ಇನ್ದ್ರೋ॑ ವೃ॒ತ್ರಮ॑ಹ॒ನ್ತಾಭ್ಯಾ॑ಮೇ॒ವ ಭ್ರಾತೃ॑ವ್ಯಗ್ಗ್ ಸ್ತೃಣುತ ಇನ್ದ್ರಾಗ್ನಿ॒ಯೋರ॒ಹ-ನ್ದೇ॑ವಯ॒ಜ್ಯಯೇ᳚ನ್ದ್ರಿಯಾ॒ವ್ಯ॑ನ್ನಾ॒ದೋ ಭೂ॑ಯಾಸ॒ಮಿತ್ಯಾ॑ಹೇನ್ದ್ರಿಯಾ॒ವ್ಯೇ॑ವಾನ್ನಾ॒ದೋ ಭ॑ವ॒ತೀನ್ದ್ರ॑ಸ್ಯಾ॒- [ಭ॑ವ॒ತೀನ್ದ್ರ॑ಸ್ಯ, ಅ॒ಹ-ನ್ದೇ॑ವಯ॒ಜ್ಯಯೇ᳚ನ್ದ್ರಿಯಾ॒ವೀ] 44

-ಽಹ-ನ್ದೇ॑ವಯ॒ಜ್ಯಯೇ᳚ನ್ದ್ರಿಯಾ॒ವೀ ಭೂ॑ಯಾಸ॒ಮಿತ್ಯಾ॑ಹೇನ್ದ್ರಿಯಾ॒ವ್ಯೇ॑ವ ಭ॑ವತಿ ಮಹೇ॒ನ್ದ್ರಸ್ಯಾ॒-ಽಹ-ನ್ದೇ॑ವಯ॒ಜ್ಯಯಾ॑ ಜೇ॒ಮಾನ॑-ಮ್ಮಹಿ॒ಮಾನ॑-ಙ್ಗಮೇಯ॒ಮಿತ್ಯಾ॑ಹ ಜೇ॒ಮಾನ॑ಮೇ॒ವ ಮ॑ಹಿ॒ಮಾನ॑-ಙ್ಗಚ್ಛತ್ಯ॒ಗ್ನೇ-ಸ್ಸ್ವಿ॑ಷ್ಟ॒ಕೃತೋ॒-ಽಹ-ನ್ದೇ॑ವಯ॒ಜ್ಯಯಾ ಽಽಯು॑ಷ್ಮಾನ್. ಯ॒ಜ್ಞೇನ॑ ಪ್ರತಿ॒ಷ್ಠಾ-ಙ್ಗ॑ಮೇಯ॒ಮಿತ್ಯಾ॒-ಹಾಯು॑ರೇ॒ವಾತ್ಮ-ನ್ಧ॑ತ್ತೇ॒ ಪ್ರತಿ॑ ಯ॒ಜ್ಞೇನ॑ -ತಿಷ್ಠತಿ ॥ 45 ॥

( ಪ್ರ॒ತಿ॒ಷ್ಠಾ-ಮ॑ಹ್ವ॒ದಸ್ತು॑-ವಿ॒ದ್ಯುತಂ॑ವಁಸ॒ನ್ತನ್-ತೇನೈ॒ವೇ-ನ್ದ್ರ॑ಸ್ಯಾ॒-ಽಷ್ಟಾತ್ರಿಗ್ಂ॑ಶಚ್ಚ) (ಅ. 11)

ಇನ್ದ್ರಂ॑-ವೋಁ ವಿ॒ಶ್ವತ॒ಸ್ಪರಿ॒ ಹವಾ॑ಮಹೇ॒ ಜನೇ᳚ಭ್ಯಃ । ಅ॒ಸ್ಮಾಕ॑ಮಸ್ತು॒ ಕೇವ॑ಲಃ ॥ ಇನ್ದ್ರ॒-ನ್ನರೋ॑ ನೇ॒ಮಧಿ॑ತಾ ಹವನ್ತೇ॒ ಯತ್ಪಾರ್ಯಾ॑ ಯು॒ನಜ॑ತೇ॒ ಧಿಯ॒ಸ್ತಾಃ । ಶೂರೋ॒ ನೃಷಾ॑ತಾ॒ ಶವ॑ಸಶ್ಚಕಾ॒ನ ಆ ಗೋಮ॑ತಿ ವ್ರ॒ಜೇ ಭ॑ಜಾ॒ ತ್ವನ್ನಃ॑ ॥ ಇ॒ನ್ದ್ರಿ॒ಯಾಣಿ॑ ಶತಕ್ರತೋ॒ ಯಾ ತೇ॒ ಜನೇ॑ಷು ಪ॒ಞ್ಚಸು॑ ॥ ಇನ್ದ್ರ॒ ತಾನಿ॑ ತ॒ ಆ ವೃ॑ಣೇ ॥ ಅನು॑ ತೇ ದಾಯಿ ಮ॒ಹ ಇ॑ನ್ದ್ರಿ॒ಯಾಯ॑ ಸ॒ತ್ರಾ ತೇ॒ ವಿಶ್ವ॒ಮನು॑ ವೃತ್ರ॒ಹತ್ಯೇ᳚ । ಅನು॑ [ ] 46

ಕ್ಷ॒ತ್ರಮನು॒ ಸಹೋ॑ ಯಜ॒ತ್ರೇನ್ದ್ರ॑ ದೇ॒ವೇಭಿ॒ರನು॑ ತೇ ನೃ॒ಷಹ್ಯೇ᳚ ॥ ಆಯಸ್ಮಿ᳚ನ್-ಥ್ಸ॒ಪ್ತವಾ॑ಸ॒ವಾ ಸ್ತಿಷ್ಠ॑ನ್ತಿ ಸ್ವಾ॒ರುಹೋ॑ ಯಥಾ । ಋಷಿ॑ರ್ಹ ದೀರ್ಘ॒ಶ್ರುತ್ತ॑ಮ॒ ಇನ್ದ್ರ॑ಸ್ಯ ಘ॒ರ್ಮೋ ಅತಿ॑ಥಿಃ ॥ ಆ॒ಮಾಸು॑ ಪ॒ಕ್ವಮೈರ॑ಯ॒ ಆ ಸೂರ್ಯಗ್ಂ॑ ರೋಹಯೋ ದಿ॒ವಿ । ಘ॒ರ್ಮ-ನ್ನ ಸಾಮ॑-ನ್ತಪತಾ ಸುವೃ॒ಕ್ತಿಭಿ॒-ರ್ಜುಷ್ಟ॒-ಙ್ಗಿರ್ವ॑ಣಸೇ॒ ಗಿರಃ॑ ॥ ಇನ್ದ್ರ॒ಮಿ-ದ್ಗಾ॒ಥಿನೋ॑ ಬೃ॒ಹದಿನ್ದ್ರ॑-ಮ॒ರ್ಕೇಭಿ॑-ರ॒ರ್ಕಿಣಃ॑ । ಇನ್ದ್ರಂ॒-ವಾಁಣೀ॑ರನೂಷತ ॥ ಗಾಯ॑ನ್ತಿ ತ್ವಾ ಗಾಯ॒ತ್ರಿಣೋ- [ಗಾಯ॒ತ್ರಿಣಃ॑, ಅರ್ಚ॑ನ್ತ್ಯ॒ರ್ಕ-ಮ॒ರ್ಕಿಣಃ॑ ।] 47

-ಽರ್ಚ॑ನ್ತ್ಯ॒ರ್ಕ-ಮ॒ರ್ಕಿಣಃ॑ । ಬ್ರ॒ಹ್ಮಾಣ॑ಸ್ತ್ವಾ ಶತಕ್ರತ॒ವು-ದ್ವ॒ಗ್ಂ॒ಶ-ಮಿ॑ವ ಯೇಮಿರೇ ॥ ಅ॒ಗ್ಂ॒ಹೋ॒ಮುಚೇ॒ ಪ್ರ ಭ॑ರೇಮಾ ಮನೀ॒ಷಾಮೋ॑ಷಿಷ್ಠ॒ದಾವಂನೇ॑ ಸುಮ॒ತಿ-ಙ್ಗೃ॑ಣಾ॒ನಾಃ । ಇ॒ದಮಿ॑ನ್ದ್ರ॒ ಪ್ರತಿ॑ ಹ॒ವ್ಯ-ಙ್ಗೃ॑ಭಾಯ ಸ॒ತ್ಯಾ-ಸ್ಸ॑ನ್ತು॒ ಯಜ॑ಮಾನಸ್ಯ॒ ಕಾಮಾಃ᳚ ॥ ವಿ॒ವೇಷ॒ ಯನ್ಮಾ॑ ಧಿ॒ಷಣಾ॑ ಜ॒ಜಾನ॒ ಸ್ತವೈ॑ ಪು॒ರಾ ಪಾರ್ಯಾ॒ದಿನ್ದ್ರ॒-ಮಹ್ನಃ॑ । ಅಗ್ಂಹ॑ಸೋ॒ ಯತ್ರ॑ ಪೀ॒ಪರ॒ದ್ಯಥಾ॑ ನೋ ನಾ॒ವೇವ॒ ಯಾನ್ತ॑ ಮು॒ಭಯೇ॑ ಹವನ್ತೇ ॥ ಪ್ರ ಸ॒ಮ್ರಾಜ॑-ಮ್ಪ್ರಥ॒ಮ-ಮ॑ದ್ಧ್ವ॒ರಾಣಾ॑- [ಮ॑ದ್ಧ್ವ॒ರಾಣಾ᳚ಮ್, ಅ॒ಗ್ಂ॒ಹೋ॒ಮುಚಂ॑] 48

-ಮಗ್ಂಹೋ॒ಮುಚಂ॑-ವೃಁಷ॒ಭಂ-ಯಁ॒ಜ್ಞಿಯಾ॑ನಾಮ್ । ಅ॒ಪಾ-ನ್ನಪಾ॑ತಮಶ್ವಿನಾ॒ ಹಯ॑ನ್ತ-ಮ॒ಸ್ಮಿನ್ನ॑ರ ಇನ್ದ್ರಿ॒ಯ-ನ್ಧ॑ತ್ತ॒ಮೋಜಃ॑ ॥ ವಿ ನ॑ ಇನ್ದ್ರ॒ ಮೃಧೋ॑ ಜಹಿ ನೀ॒ಚಾ ಯ॑ಚ್ಛ ಪೃತನ್ಯ॒ತಃ । ಅ॒ಧ॒ಸ್ಪ॒ದ-ನ್ತಮೀ᳚-ಙ್ಕೃಧಿ॒ ಯೋ ಅ॒ಸ್ಮಾಗ್ಂ ಅ॑ಭಿ॒ದಾಸ॑ತಿ ॥ ಇನ್ದ್ರ॑ ಕ್ಷ॒ತ್ರಮ॒ಭಿ ವಾ॒ಮಮೋಜೋ ಽಜಾ॑ಯಥಾ ವೃಷಭ ಚರ್ಷಣೀ॒ನಾಮ್ । ಅಪಾ॑ನುದೋ॒ ಜನ॑-ಮಮಿತ್ರ॒ಯನ್ತ॑-ಮು॒ರು-ನ್ದೇ॒ವೇಭ್ಯೋ॑ ಅಕೃಣೋ-ರು ಲೋ॒ಕಮ್ ॥ ಮೃ॒ಗೋ ನ ಭೀ॒ಮಃ ಕು॑ಚ॒ರೋ ಗಿ॑ರಿ॒ಷ್ಠಾಃ ಪ॑ರಾ॒ವತ [ಪ॑ರಾ॒ವತಃ॑, ಆ ಜ॑ಗಾಮಾ॒ ಪರ॑ಸ್ಯಾಃ ।] 49

ಆ ಜ॑ಗಾಮಾ॒ ಪರ॑ಸ್ಯಾಃ । ಸೃ॒ಕಗ್ಂ ಸ॒ಗ್ಂ॒ಶಾಯ॑ ಪ॒ವಿಮಿ॑ನ್ದ್ರ ತಿ॒ಗ್ಮಂ-ವಿಁ ಶತ್ರೂ᳚-ನ್ತಾಢಿ॒ ವಿಮೃಧೋ॑ ನುದಸ್ವ ॥ ವಿ ಶತ್ರೂ॒ನ್॒. ವಿ ಮೃಧೋ॑ ನುದ॒ ವಿವೃ॒ತ್ರಸ್ಯ॒ ಹನೂ॑ ರುಜ । ವಿ ಮ॒ನ್ಯುಮಿ॑ನ್ದ್ರ ಭಾಮಿ॒ತೋ॑-ಽಮಿತ್ರ॑ಸ್ಯಾ-ಽಭಿ॒ದಾಸ॑ತಃ ॥ ತ್ರಾ॒ತಾರ॒-ಮಿನ್ದ್ರ॑-ಮವಿ॒ತಾರ॒-ಮಿನ್ದ್ರ॒ಗ್ಂ॒ ಹವೇ॑ಹವೇ ಸು॒ಹವ॒ಗ್ಂ॒ ಶೂರ॒ಮಿನ್ದ್ರ᳚ಮ್ । ಹು॒ವೇ ನು ಶ॒ಕ್ರ-ಮ್ಪು॑ರುಹೂ॒ತಮಿನ್ದ್ರಗ್ಗ್॑ ಸ್ವ॒ಸ್ತಿ ನೋ॑ ಮ॒ಘವಾ॑ ಧಾ॒ತ್ವಿನ್ದ್ರಃ॑ ॥ ಮಾ ತೇ॑ ಅ॒ಸ್ಯಾಗ್ಂ [ಅ॒ಸ್ಯಾಗ್ಂ, ಸ॒ಹ॒ಸಾ॒ವ॒-ನ್ಪರಿ॑ಷ್ಟಾವ॒ಘಾಯ॑] 50

ಸ॑ಹಸಾವ॒-ನ್ಪರಿ॑ಷ್ಟಾವ॒ಘಾಯ॑ ಭೂಮ ಹರಿವಃ ಪರಾ॒ದೈ । ತ್ರಾಯ॑ಸ್ವ ನೋ ಽವೃ॒ಕೇಭಿ॒-ರ್ವರೂ॑ಥೈ॒-ಸ್ತವ॑ ಪ್ರಿ॒ಯಾಸಃ॑ ಸೂ॒ರಿಷು॑ ಸ್ಯಾಮ ॥ ಅನ॑ವಸ್ತೇ॒ ರಥ॒ಮಶ್ವಾ॑ಯ ತಕ್ಷ॒-ನ್ತ್ವಷ್ಟಾ॒ ವಜ್ರ॑-ಮ್ಪುರುಹೂತ ದ್ಯು॒ಮನ್ತ᳚ಮ್ । ಬ್ರ॒ಹ್ಮಾಣ॒ ಇನ್ದ್ರ॑-ಮ್ಮ॒ಹಯ॑ನ್ತೋ ಅ॒ರ್ಕೈರವ॑ರ್ಧಯ॒ನ್ನಹ॑ಯೇ॒ ಹನ್ತ॒ವಾ ಉ॑ ॥ ವೃಷ್ಣೇ॒ ಯ-ತ್ತೇ॒ ವೃಷ॑ಣೋ ಅ॒ರ್ಕಮರ್ಚಾ॒ನಿನ್ದ್ರ॒ ಗ್ರಾವಾ॑ಣೋ॒ ಅದಿ॑ತಿ-ಸ್ಸ॒ಜೋಷಾಃ᳚ । ಅ॒ನ॒ಶ್ವಾಸೋ॒ ಯೇ ಪ॒ವಯೋ॑-ಽರ॒ಥಾ ಇನ್ದ್ರೇ॑ಷಿತಾ ಅ॒ಭ್ಯವ॑ರ್ತ ನ್ತ॒ ದಸ್ಯೂನ್॑ ॥ 51 ॥

(ವೃ॒ತ್ರ॒ಹತ್ಯೇ-ಽನು॑-ಗಾಯ॒ತ್ರಿಣೋ᳚-ಽದ್ಧ॒ರಾಣಾಂ᳚-ಪರಾ॒ವತೋ॒-ಽಸ್ಯಾ-ಮ॒ಷ್ಟಾಚ॑ತ್ವಾರಿಗ್ಂಶಚ್ಚ) (ಅ. 12)

(ಸನ್ತ್ವಾ॑ ಸಿಞ್ಚಾಮಿ-ಧ್ರು॒ವೋ᳚-ಽಸ್ಯ॒ಗ್ನಿರ್ಮಾ॑-ಬ॒ರ್॒ಹಿಷೋ॒-ಽಹ-ಮಾ ಪ್ಯಾ॑ಯತಾ॒-ಮಗ॑ನ್ಮ॒-ಯಥಾ॒ ವೈ-ಯೋ ವೈ ಶ್ರ॒ದ್ಧಾಂ- ಪ್ರ॒ಜಾಪ॑ತಿ॒-ರ್ಯಜ್ಞಾನ್-ಧ್ರು॒ವೋ॑-ಽಸೀತ್ಯಾ॑ಹ॒-ಯೋ ವೈ ಸ॑ಪ್ತದ॒ಶ-ಮಿನ್ದ್ರಂ॑-ವೋಁ॒-ದ್ವಾದ॑ಶ । )

(ಸನ್ತ್ವಾ॑-ಬ॒ರ್॒ಹಿಷೋ॒-ಽಹಂಯಁಥಾ॒ ವಾ-ಏ॒ವಂ-ವಿಁ॒ದ್ವಾ-ಞ್ಛ್ರೌಷ॑ಟ್-ಥ್ಸಾಹಸಾವ॒-ನ್ನೇಕ॑ಪಞ್ಚಾ॒ಶತ್ ।)

(ಸನ್ತ್ವಾ॑, ಸಿಞ್ಚಾಮಿ॒ ದಸ್ಯೂನ್॑)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪ್ರಥಮಕಾಣ್ಡೇ ಷಷ್ಠಃ ಪ್ರಶ್ನ-ಸ್ಸಮಾಪ್ತಃ ॥

Roman (IAST) Transliteration

kṛṣṇa yajurvedīya taittirīya saṃhitāyā-mprathamakāṇḍe ṣaṣṭhaḥ praśnaḥ - yājamānakāṇḍaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

sa-ntvā̭ siñcāmi॒ yajṷṣā pra॒jāmāyu॒rdhana̭-ñca | bṛha॒spati̭prasūto॒ yaja̭māna i॒ha mā ri̭ṣat || ājya̭masi sa॒tyama̭si sa॒tyasyāddhya̭kṣamasi ha॒vira̭si vaiśvāna॒raṃ-vai~᳚śvade॒va-mutpṷ̄taśuṣmagṃ sa॒tyaujā॒-ssaho̭-'si॒ saha̭mānamasi॒ saha॒svārā̭tī॒-ssaha̭svārātīya॒ta-ssaha̭sva॒ pṛta̭nā॒-ssaha̭sva pṛtanya॒taḥ | sa॒hasra̭vīryamasi॒ tanmā̭ ji॒nvājya॒syājya̭masi sa॒tyasya̭ sa॒tyama̭si sa॒tyāyṷ- [sa॒tyāyuḥ̭, a॒si॒ sa॒tyaśṷṣmamasi] 1

-rasi sa॒tyaśṷṣmamasi sa॒tyena̭ tvā॒-'bhi ghā̭rayāmi॒ tasya̭ te bhakṣīya pañcā॒nā-ntvā॒ vātā̭nāṃ-ya~॒ntrāya̭ dha॒rtrāya̭ gṛhṇāmi pañcā॒nā-ntva̭rtū॒nāṃ-ya~॒ntrāya̭ dha॒rtrāya̭ gṛhṇāmi pañcā॒nā-ntvā̭ di॒śāṃ-ya~॒ntrāya̭ dha॒rtrāya̭ gṛhṇāmi pañcā॒nā-ntvā̭ pañcaja॒nānāṃ᳚-ya~॒ntrāya̭ dha॒rtrāya̭ gṛhṇāmi ca॒rostvā॒ pañca̭bilasya ya॒ntrāya̭ dha॒rtrāya̭ gṛhṇāmi॒ brahma̭ṇastvā॒ teja̭se ya॒ntrāya̭ dha॒rtrāya̭ gṛhṇāmi kṣa॒trasya॒ tvauja̭se ya॒ntrāya̭ [ ] 2

dha॒rtrāya̭ gṛhṇāmi vi॒śe tvā̭ ya॒ntrāya̭ dha॒rtrāya̭ gṛhṇāmi su॒vīryā̭ya tvā gṛhṇāmi suprajā॒stvāya̭ tvā gṛhṇāmi rā॒yaspoṣā̭ya tvā gṛhṇāmi brahmavarca॒sāya̭ tvā gṛhṇāmi॒ bhūra॒smākagṃ̭ ha॒virde॒vānā̭-mā॒śiṣo॒ yaja̭mānasya de॒vānā᳚-ntvā de॒vatā᳚bhyo gṛhṇāmi॒ kāmā̭ya tvā gṛhṇāmi || 3 ||

(sa॒tyāyu॒-roja̭se ya॒ntrāya॒-traya̭strigṃśacca) (a. 1)

dhru॒vo̭-'si dhru॒vo̭-'hagṃ sa̭jā॒teṣṷ bhūyāsa॒-ndhīra॒ścettā̭ vasu॒vidu॒gro᳚-'syu॒gro̭-'hagṃ sa̭jā॒teṣṷ bhūyāsa-mu॒graścettā̭ vasu॒vida̭bhi॒-bhūra̭syabhi॒bhūra॒hagṃ sa̭jā॒teṣṷ bhūyāsamabhi॒bhūścettā̭ vasu॒vi-dyu॒najmi̭ tvā॒ brahma̭ṇā॒ daivyḙna ha॒vyāyā॒smai voḍha॒ve jā̭tavedaḥ || indhā̭nāstvā supra॒jasaḥ̭ su॒vīrā॒ jyogjī̭vema bali॒hṛto̭ va॒ya-nte᳚ || yanmḙ agne a॒sya ya॒jñasya॒ riṣyā॒- [riṣyā᳚t, dyadvā॒] 4

-dyadvā॒ skandā॒-dājya̭syo॒ta vi̭ṣṇo | tena̭ hanmi sa॒patna̭-ndurmarā॒yumaina̭-ndadhāmi॒ nir-ṛ̭tyā u॒pasthe᳚ | bhū-rbhuva॒-ssuva॒rucchṷṣmo agne॒ yaja̭mānāyaidhi॒ niśṷṣmo abhi॒dāsa̭te | agne॒ deve᳚ddha॒ manvi̭ddha॒ mandra̭ji॒hvā-ma̭rtyasya te hotarmū॒rdhannā ji̭gharmi rā॒yaspoṣā̭ya suprajā॒stvāya̭ su॒vīryā̭ya॒ mano̭-'si prājāpa॒tya-mmana̭sā mā bhū॒tenā vi̭śa॒ vāga̭syai॒ndrī sa̭patna॒kṣaya̭ṇī [ ] 5

vā॒cā me᳚ndri॒yeṇā vi̭śa vasa॒ntamṛ̭tū॒nā-mprī̭ṇāmi॒ sa mā᳚ prī॒taḥ prī̭ṇātu grī॒ṣmamṛ̭tū॒nā-mprī̭ṇāmi॒ sa mā᳚ prī॒taḥ prī̭ṇātu va॒r॒ṣā ṛ̭tū॒nā-mprī̭ṇāmi॒ tā mā᳚ prī॒tāḥ prī̭ṇantu śa॒rada̭mṛtū॒nā-mprī̭ṇāmi॒ sā mā᳚ prī॒tā prī̭ṇātu hemantaśiśi॒rāvṛ̭tū॒nā-mprī̭ṇāmi॒ tau mā᳚ prī॒tau prī̭ṇītā-ma॒gnīṣoma̭yo-ra॒ha-ndḙvaya॒jyayā॒ cakṣṷṣmā-nbhūyāsama॒gnera॒ha-ndḙvaya॒jyayā᳚-'nnā॒do bhṷ̄yāsa॒- [bhṷ̄yāsam, dabdhi̭ra॒syada̭bdho] 6

-ndabdhi̭ra॒syada̭bdho bhūyāsama॒mu-nda̭bheya-ma॒gnīṣoma̭yo-ra॒ha-ndḙvaya॒jyayā̭ vṛtra॒hā bhṷ̄yāsamindrāgni॒yora॒ha-ndḙvaya॒jyaye᳚ndriyā॒vya̭nnā॒do bhṷ̄yāsa॒mindra̭syā॒-'ha-ndḙvaya॒jyaye᳚ndriyā॒vī bhṷ̄yāsa-mmahe॒ndrasyā॒-'ha-ndḙvaya॒jyayā̭ je॒māna̭-mmahi॒māna̭-ṅgameyama॒gne-ssvi̭ṣṭa॒kṛto॒-'ha-ndḙvaya॒jyayā ''yṷṣmān. ya॒jñena̭ prati॒ṣṭhā-ṅga̭meyam || 7 ||

(riṣyā᳚-thsapatna॒kṣaya̭ṇya-nnā॒do bhṷ̄yāsa॒gṃ॒-ṣaṭtrigṃ̭śacca) (a. 2)

a॒gnirmā॒ duri̭ṣṭā-tpātu savi॒tā-'ghaśagṃ̭sā॒dyo me-'nti̭ dū॒rḙ-'rātī॒yati॒ tame॒tena̭ jeṣa॒gṃ॒ surṷ̄pavarṣavarṇa॒ ehī॒mā-nbha॒drā-nduryāgṃ̭ a॒bhyehi॒ māmanṷvratā॒ nyṷ śī॒r॒ṣāṇi̭ mṛḍhva॒miḍa॒ ehyadi̭ta॒ ehi॒ sara̭sva॒tyehi॒ ranti̭rasi॒ rama̭tirasi sū॒narya̭si॒ juṣṭe॒ juṣṭi̭-nte-'śī॒yopa̭hūta upaha॒va- [upaha॒vam, te॒-'śī॒ya॒ sā ] 8

-ntḙ-'śīya॒ sā mḙ sa॒tyā-''śīra॒sya ya॒jñasya̭ bhūyā॒darḙḍatā॒ mana̭sā॒ taccha̭keyaṃ-ya~॒jño divagṃ̭ rohatu ya॒jño diva̭-ṅgacchatu॒ yo dḙva॒yānaḥ॒ panthā॒stena̭ ya॒jño de॒vāgṃ apye᳚tva॒smāsvindra̭ indri॒ya-nda̭dhātva॒smānrāya̭ u॒ta ya॒jñā-ssa̭cantāma॒smāsṷ santvā॒śiṣa॒-ssā naḥ̭ pri॒yā su॒pratū᳚rtirma॒ghonī॒ juṣṭi̭rasi ju॒ṣasva̭ no॒ juṣṭā̭ no- [juṣṭā̭ naḥ, a॒si॒ juṣṭi̭-nte] 9

-'si॒ juṣṭi̭-nte gameya॒-mmano॒ jyoti̭-rjuṣatā॒mājyaṃ॒-vi~cchi̭nnaṃ-ya~॒jñagṃ sami॒ma-nda̭dhātu | bṛha॒spati̭-stanutāmi॒manno॒ viśvḙ de॒vā i॒ha mā̭dayantām || braddhna॒ pinva̭sva॒ dada̭to me॒ mā kṣā̭yi kurva॒to me॒ mopa̭ dasa-tpra॒jāpa̭te-rbhā॒go᳚-'syūrja̭svā॒-npaya̭svā-nprāṇāpā॒nau mḙ pāhi samānavyā॒nau mḙ pāhyudānavyā॒nau mḙ pā॒hyakṣi̭to॒-'syakṣi̭tyai tvā॒ mā me᳚ kṣeṣṭhā a॒mutrā॒muṣmi̭n ~lo॒ke || 10 ||

(u॒pa॒ha॒vaṃ-juṣṭā̭na-stvā॒ ṣaṭ ca̭) (a. 3)

ba॒r॒hiṣo॒-'ha-ndḙvaya॒jyayā᳚ pra॒jāvā᳚-nbhūyāsa॒-nnarā॒śagṃsa̭syā॒ha-ndḙvaya॒jyayā̭ paśu॒mā-nbhṷ̄yāsama॒gne-ssvi̭ṣṭa॒kṛto॒-'ha-ndḙvaya॒jyayā-''yṷṣmān. ya॒jñena̭ prati॒ṣṭhā-ṅga̭meyama॒gnera॒ha-mujji̭ti॒-manūjjḙṣa॒gṃ॒ soma̭syā॒ha - mujji̭ti॒-manūjjḙṣama॒gnera॒ha-mujji̭ti॒-manūjjḙṣa-ma॒gnīṣoma̭yora॒ha-mujji̭ti॒-manūjjḙṣa-mindrāgni॒yora॒ha-mujji̭ti॒-manūjjḙṣa॒-mindra̭syā॒-'ha- [-mindra̭syā॒-'ham, ujji̭ti॒manūjjḙṣaṃ] 11

-mujji̭ti॒manūjjḙṣa-mmahe॒ndrasyā॒hamujji̭ti॒- manūjjḙṣama॒gne-ssvi̭ṣṭa॒kṛto॒-'ha mujji̭ti॒-manūjjḙṣaṃ॒-vā~ja̭sya mā prasa॒veno᳚-dgrā॒bheṇoda̭grabhīt | athā̭ sa॒patnā॒gṃ॒ indro̭ me nigrā॒bheṇādha̭rāgṃ akaḥ || u॒dgrā॒bha-ñca̭ nigrā॒bha-ñca॒ brahma̭ de॒vā a̭vīvṛdhann | athā̭ sa॒patnā̭nindrā॒gnī mḙ viṣū॒cīnā॒n vya̭syatām || emā a̭gmannā॒śiṣo॒ doha̭kāmā॒ indra̭vanto [indra̭vantaḥ, va॒nā॒ma॒he॒ dhu॒kṣī॒mahi̭] 12

vanāmahe dhukṣī॒mahi̭ pra॒jāmiṣa᳚m || rohi̭tena tvā॒-'gni-rde॒vatā᳚-ṅgamayatu॒ hari̭bhyā॒-ntvendro̭ de॒vatā᳚-ṅgamaya॒tveta̭śena tvā॒ sūryo̭ de॒vatā᳚-ṅgamayatu॒ vi tḙ muñcāmi raśa॒nā vi ra॒śmīn vi yoktrā॒ yāni̭ pari॒carta̭nāni dha॒ttāda॒smāsu॒ dravi̭ṇaṃ॒-ya~cca̭ bha॒dra-mpra ṇo᳚ brūtā-dbhāga॒dhā-nde॒vatā̭su || viṣṇo᳚-śśaṃ॒yo~ra॒ha-ndḙvaya॒jyayā̭ ya॒jñena̭ prati॒ṣṭhā-ṅga̭meya॒gṃ॒ soma̭syā॒ha-ndḙvaya॒jyayā̭ [dḙvaya॒jyayā᳚, su॒retā॒] 13

su॒retā॒ reto̭ dhiṣīya॒ tvaṣṭṷra॒ha-ndḙvaya॒jyayā̭ paśū॒nāgṃ rū॒pa-mpṷṣeya-nde॒vānā॒-mpatnī̭ra॒gni-rgṛ॒hapa̭ti-rya॒jñasya̭ mithu॒na-ntayo̭ra॒ha-ndḙvaya॒jyayā̭ mithu॒nena॒ prabhṷ̄yāsaṃ-ve~॒do̭-'si॒ vitti̭rasi vi॒deya॒ karmā̭-'si ka॒ruṇa̭masi kri॒yāsagṃ̭ sa॒nira̭si sani॒tā-'si̭ sa॒neya̭-ṅghṛ॒tava̭nta-ṅkulā॒yinagṃ̭ rā॒yaspoṣagṃ̭ saha॒sriṇaṃ̭-ve~॒do da̭dātu vā॒jina᳚m || 14 ||

(indra̭syā॒ha-mindra̭vantaḥ॒-soma̭syā॒ha-ndḙvaya॒jyayā॒-catṷścatvārigṃśacca) (a. 4)

ā pyā̭yatā-ndhru॒vā ghṛ॒tena̭ ya॒jñaṃya~̭jña॒-mprati̭ deva॒yadbhyaḥ̭ | sū॒ryāyā॒ ūdho-'di̭tyā u॒pastha̭ u॒rudhā̭rā pṛthi॒vī ya॒jñe a॒sminn || pra॒jāpa̭te-rvi॒bhānnāma̭ lo॒kastasmigg̭stvā dadhāmi sa॒ha yaja̭mānena॒ sada̭si॒ sanmḙ bhūyā॒-ssarva̭masi॒ sarva̭-mme bhūyāḥ pū॒rṇama̭si pū॒rṇa-mmḙ bhūyā॒ akṣi̭tamasi॒ mā me᳚ kṣeṣṭhāḥ॒ prācyā᳚-ndi॒śi de॒vā ṛ॒tvijo̭ mārjayantā॒-ndakṣi̭ṇāyā- [dakṣi̭ṇāyām, di॒śi] 15

ndi॒śi māsāḥ᳚ pi॒taro̭ mārjayantā-mpra॒tīcyā᳚-ndi॒śi gṛ॒hāḥ pa॒śavo̭ mārjayantā॒mudī᳚cyā-ndi॒śyāpa॒ oṣa̭dhayo॒ vana॒spata̭yo mārjayantāmū॒rdhvāyā᳚-ndi॒śi ya॒jña-ssaṃ̭va~thsa॒ro ya॒jñapa̭ti-rmārjayantāṃ॒-vi~ṣṇoḥ॒ kramo᳚-'syabhimāti॒hā gā̭ya॒treṇa॒ chanda̭sā pṛthi॒vīmanu॒ vi kra̭me॒ nirbha̭kta॒-ssa ya-ndvi॒ṣmo viṣṇoḥ॒ kramo᳚-'syabhiśasti॒hā traiṣṭṷbhena॒ chanda̭sā॒ 'ntari̭kṣa॒manu॒ vi kra̭me॒ nirbha̭kta॒-ssa ya-ndvi॒ṣmo viṣṇoḥ॒ kramo᳚-'syarātīya॒to ha॒ntā jāga̭tena॒ chanda̭sā॒ diva॒manu॒ vi kra̭me॒ nirbha̭kta॒-ssa ya-ndvi॒ṣmo viṣṇoḥ॒ kramo̭-'si śatrūya॒to ha॒ntā-''nṷṣṭubhena॒ chanda̭sā॒ diśo-'nu॒ vi kra̭me॒ nirbha̭kta॒-ssa ya-ndvi॒ṣmaḥ || 16 ||

(dakṣi̭ṇāyā - ma॒ntari̭kṣa॒manu॒ vi kra̭me॒ nirbha̭kta॒-ssa ya-ndvi॒ṣmo viṣṇo॒- rekā॒nnatri॒gṃ॒śacca̭) (a. 5)

aga̭nma॒ suva॒-ssuva̭raganma sa॒ndṛśa̭ste॒ mā chi̭thsi॒ yatte॒ tapa॒stasmai̭ te॒ mā-'' vṛ̭kṣi su॒bhūra̭si॒ śreṣṭho̭ raśmī॒nāmā̭yu॒rdhā a॒syāyṷrme dhehi varco॒dhā a̭si॒ varco॒ mayi̭ dhehī॒dama॒hama॒mu-mbhrātṛ̭vyamā॒bhyo di॒gbhyo᳚-'syai di॒vo᳚-'smāda॒ntari̭kṣāda॒syai pṛ̭thi॒vyā a॒smāda॒nnādyā॒nnirbha̭jāmi॒ nirbha̭kta॒-ssa ya-ndvi॒ṣmaḥ || 17 ||

sa-ñjyoti̭ṣā-'bhūvamai॒ndrī-mā॒vṛta̭-ma॒nvāva̭rte॒ sama॒ha-mpra॒jayā॒ sa-mmayā᳚ pra॒jā sama॒hagṃ rā॒yaspoṣḙṇa॒ sa-mmayā̭ rā॒yaspoṣa॒-ssami̭ddho agne me dīdihi same॒ddhā tḙ agne dīdyāsaṃ॒-va~sṷmān. ya॒jño vasī̭yā-nbhūyāsa॒magna॒ āyūgṃ̭ṣi pavasa॒ ā su॒vorja॒miṣa̭-ñca naḥ | ā॒re bā̭dhasva du॒cchunā᳚m || agne॒ pava̭sva॒ svapā̭ a॒sme varcaḥ̭ su॒vīrya᳚m || 18 ||

dadha॒tpoṣagṃ̭ ra॒yi-mmayi̭ | agnḙ gṛhapate sugṛhapa॒tira॒ha-ntvayā̭ gṛ॒hapa̭tinā bhūyāsagṃ sugṛhapa॒tirmayā॒ tva-ṅgṛ॒hapa̭tinā bhūyā-śśa॒tagṃ himā॒stāmā॒śiṣa॒mā śā̭se॒ tanta̭ve॒ jyoti̭ṣmatī॒-ntāmā॒śiṣa॒mā śā̭se॒-'muṣmai॒ jyoti̭ṣmatī॒-ṅkastvā̭ yunakti॒ sa tvā॒ vimṷñca॒tvagne᳚ vratapate vra॒tama̭cāriṣa॒-ntada̭śaka॒-ntanmḙ-'rādhi ya॒jño ba̭bhūva॒ sa ā [sa ā, ba॒bhū॒va॒ sa] 19

ba̭bhūva॒ sa praja̭jñe॒ sa vā̭vṛdhe | sa de॒vānā॒madhi̭pati-rbabhūva॒ so a॒smāgṃ adhi̭patīn karotu va॒yagg syā̭ma॒ pata̭yo rayī॒ṇām || gomāgṃ̭ a॒gne-'vi̭māgṃ a॒śvī ya॒jño nṛ॒vathsa̭khā॒ sada॒mida̭pramṛ॒ṣyaḥ |iḍā̭vāgṃ e॒ṣo a̭sura pra॒jāvā᳚-ndī॒rgho ra॒yiḥ pṛ̭thubu॒ddhna-ssa॒bhāvāṋ || 20 ||

(dvi॒ṣmaḥ-su॒vīrya॒gṃ॒-sa ā-pañca̭trigṃśacca) (a. 6)

yathā॒ vai sa̭mṛtaso॒mā e॒vaṃ-vā~ e॒te sa̭mṛtaya॒jñā yadda̭rśapūrṇamā॒sau kasya॒ vā-'ha̭ de॒vā ya॒jñamā॒gaccha̭nti॒ kasya̭ vā॒ na ba̭hū॒nāṃ-ya~ja̭mānānāṃ॒-yo~ vai de॒vatāḥ॒ pūrvaḥ̭ parigṛ॒hṇāti॒ sa ḙnā॒-śśvo bhū॒te ya̭jata e॒tadvai de॒vānā̭-mā॒yata̭naṃ॒-ya~dā̭hava॒nīyo᳚-'nta॒rā-'gnī pa̭śū॒nā-ṅgārha̭patyo manu॒ṣyā̭ṇā-manvāhārya॒paca̭naḥ pitṛ॒ṇāma॒gni-ṅgṛ̭hṇāti॒ sva e॒vāyata̭ne de॒vatāḥ॒ pari̭ [de॒vatāḥ॒ pari̭, gṛ॒hṇā॒ti॒ tā-śśvo] 21

gṛhṇāti॒ tā-śśvo bhū॒te ya̭jate vra॒tena॒ vai meddhyo॒ -'gni-rvra॒tapa̭ti-rbrāhma॒ṇo vra̭ta॒bhṛ-dvra॒ta-mṷpai॒ṣya-nbrṷ̄yā॒dagne᳚ vratapate vra॒ta-ñca̭riṣyā॒mītya॒gni-rvai de॒vānāṃ᳚-vra~॒tapa̭ti॒stasmā̭ e॒va pra̭ti॒procya̭ vra॒tamā la̭bhate ba॒r॒hiṣā̭ pū॒rṇamā̭se vra॒tamupai̭ti va॒thsaira̭māvā॒syā̭yāme॒taddhyḙtayo̭-rā॒yata̭namupa॒stīryaḥ॒ pūrva̭ścā॒gnirapa̭ra॒ścetyā̭hu-rmanu॒ṣyā̭ [-rmanu॒ṣyāḥ᳚, innvā] 22

innvā upa̭stīrṇa-mi॒cchanti॒ kimṷ de॒vā yeṣā॒-nnavā̭vasāna॒-mupā᳚smi॒ñchvo ya॒kṣyamā̭ṇe de॒vatā̭ vasanti॒ ya e॒vaṃ-vi~॒dvāna॒gni-mṷpastṛ॒ṇāti॒ yaja̭mānena grā॒myāśca̭ pa॒śavo̭-'va॒ruddhyā̭ āra॒ṇyāścetyā̭hu॒-rya-dgrā॒myānṷpa॒vasa̭ti॒ tena̭ grā॒myānava̭ rundhe॒ yadā̭ra॒ṇyasyā॒-'śñāti॒ tenā̭ra॒ṇyān. yadanā᳚śvā-nupa॒vase᳚-tpitṛdeva॒tyaḥ̭ syādāra॒ṇyasyā᳚-śñātīndri॒yaṃ- [śñātīndri॒yam, vā ā̭ra॒ṇyaṃ-] 23

-~vā ā̭ra॒ṇya-mi̭ndri॒ya-me॒vā-''tma-ndha̭tte॒ yadanā᳚śvā-nupa॒vase॒-tkṣodhṷka-ssyā॒dya-da̭śñī॒yādru॒-dro᳚-'sya pa॒śūna॒bhi ma̭nyetā॒-'po᳚-'śñāti॒ tannevā̭śi॒ta-nnevā-'na̭śita॒-nna kṣodhṷko॒ bhava̭ti॒ nāsya̭ ru॒draḥ pa॒śūna॒bhi ma̭nyate॒ vajro॒ vai ya॒jñaḥ, kṣu-tkhalu॒ vai ma̭nu॒ṣya̭sya॒ bhrātṛ̭vyo॒ yadanā᳚-'śvānupa॒vasa̭ti॒ vajrḙṇai॒va sā॒kṣā-tkṣudha॒-mbhrātṛ̭vyagṃ hanti || 24 ||

(pari̭-manu॒ṣyā̭-indri॒yagṃ-sā॒kṣāt-trīṇi̭ ca) (a. 7)

yo vai śra॒ddhāmanā̭rabhya ya॒jñena॒ yaja̭te॒ nāsye॒ṣṭāya॒ śradda̭dhate॒-'paḥ pra ṇa̭yati śra॒ddhā vā āpaḥ̭ śra॒ddhāme॒vā-''rabhya̭ ya॒jñena̭ yajata u॒bhaye᳚-'sya devamanu॒ṣyā i॒ṣṭāya॒ śradda̭dhate॒ tadā̭hu॒rati॒ vā e॒tā vartra̭-nneda॒ntyati॒ vāca॒-mmano॒ vāvaitā nāti̭ neda॒ntīti॒ mana̭sā॒ pra ṇa̭yatī॒yaṃ-vai~ mano॒- [manaḥ̭, a॒nayai॒vaināḥ॒] 25

-'nayai॒vaināḥ॒ pra ṇa̭ya॒tya-ska̭nnahavi-rbhavati॒ ya e॒vaṃ-ve~da̭ yajñāyu॒dhāni॒ sa-mbha̭rati ya॒jño vai ya̭jñāyu॒dhāni̭ ya॒jñame॒va tathsa-mbha̭rati॒ yadeka̭mekagṃ sa॒mbhare᳚t-pitṛdeva॒tyā̭ni syu॒rya-thsa॒ha sarvā̭ṇi mānu॒ṣāṇi॒ dvedve॒ sambha̭rati yājyānuvā॒kya̭yore॒va rū॒pa-ṅka̭ro॒tyatho̭ mithu॒name॒vayo vai daśa̭ yajñāyu॒dhāni॒ veda̭ mukha॒to᳚-'sya ya॒jñaḥ ka̭lpate॒ sphya- [ka̭lpate॒ sphyaḥ, ca॒ ka॒pālā̭ni] 26

-śca̭ ka॒pālā̭ni cāgnihotra॒hava̭ṇī ca॒ śūrpa̭-ñca kṛṣṇāji॒na-ñca॒ śamyā̭ co॒lūkha̭la-ñca॒ musa̭la-ñca dṛ॒ṣaccopa̭lā cai॒tāni॒ vai daśa̭ yajñāyu॒dhāni॒ ya e॒vaṃ-ve~da̭ mukha॒to᳚-'sya ya॒jñaḥ ka̭lpate॒ yo vai de॒vebhyaḥ̭ prati॒procya̭ ya॒jñena॒ yaja̭te ju॒ṣante᳚-'sya de॒vā ha॒vyagṃ ha॒vi-rni̭ru॒pyamā̭ṇama॒bhi ma̭ntrayetā॒-'gnigṃ hotā̭rami॒ha tagṃ hṷva॒ iti̭ [ ] 27

de॒vebhya̭ e॒va pra̭ti॒procya̭ ya॒jñena̭ yajate ju॒ṣante᳚-'sya de॒vā ha॒vyame॒ṣa vai ya॒jñasya॒ graho̭ gṛhī॒tvaiva ya॒jñena̭ yajate॒ tadṷdi॒tvā vācaṃ̭-ya~cchati ya॒jñasya॒ dhṛtyā॒ atho॒ mana̭sā॒ vai pra॒jāpa̭ti-rya॒jñama̭tanuta॒ mana̭sai॒va ta-dya॒jña-nta̭nute॒ rakṣa̭sā॒-mana̭nvavacārāya॒ yo vai ya॒jñaṃ-yo~ga॒ āga̭te yu॒nakti̭ yu॒ṅkte yṷñjā॒neṣu॒ kastvā̭ yunakti॒ sa tvā̭ yuna॒ktvi-( ) -tyā̭ha pra॒jāpa̭ti॒-rvai kaḥ pra॒jāpa̭tinai॒vainaṃ̭-yu~nakti yu॒ṅkte yṷñjā॒neṣṷ || 28 ||

(vaima॒naḥ-sphya-iti̭-yuna॒ktve-kā̭daśa ca) (a. 8)

pra॒jāpa̭ti-rya॒jñāna̭sṛjatā-gniho॒tra-ñcā᳚gniṣṭo॒ma-ñca̭ paurṇamā॒sī-ñco॒kthya̭-ñcāmāvā॒syā᳚-ñcātirā॒tra-ñca॒ tānuda̭mimīta॒ yāva̭dagniho॒tra-māsī॒-ttāvā̭nagniṣṭo॒mo yāva̭tī paurṇamā॒sī tāvā̭nu॒kthyo̭ yāva̭tyamāvā॒syā̭ tāvā̭natirā॒tro ya e॒vaṃ-vi~॒dvāna̭gniho॒tra-ñju॒hoti॒ yāva̭dagniṣṭo॒meno̭ pā॒pnoti॒ tāva॒dupā᳚-''pnoti॒ ya e॒vaṃ-vi~॒dvā-npau᳚rṇamā॒sīṃ-ya~ja̭te॒ yāva̭du॒kthyḙnopā॒pnoti॒ [yāva̭du॒kthyḙnopā॒pnoti̭, tāva॒dupā᳚-''pnoti॒] 29

tāva॒dupā᳚-''pnoti॒ ya e॒vaṃ-vi~॒dvāna̭māvā॒syāṃ᳚-ya~ja̭te॒ yāva̭datirā॒treṇo̭pā॒pnoti॒ tāva॒dupā᳚-''pnoti parame॒ṣṭhino॒ vā e॒ṣa ya॒jño-'gra̭ āsī॒-ttena॒ sa pa̭ra॒mā-ṅkāṣṭhā̭magaccha॒-ttena̭ pra॒jāpa̭ti-nni॒ravā̭sāyaya॒-ttena̭ pra॒jāpa̭tiḥ para॒mā-ṅkāṣṭhā̭magaccha॒-ttenendra̭-nni॒ravā̭sāyaya॒-ttenendraḥ̭ para॒mā-ṅkāṣṭhā̭magaccha॒-ttenā॒-'gnīṣomaṷ ni॒ravā̭sāyaya॒-ttenā॒gnīṣomaṷ pa॒ramā-ṅkāṣṭhā̭magacchatāṃ॒-ya~ [kāṣṭhā̭magacchatāṃ॒-yaḥ, ~e॒vaṃ-vi~॒dvā-nda̭rśapūrṇamā॒sau] 30

e॒vaṃ-vi~॒dvā-nda̭rśapūrṇamā॒sau yaja̭te para॒māme॒va kāṣṭhā᳚-ṅgacchati॒ yo vai prajā̭tena ya॒jñena॒ yaja̭te॒ pra pra॒jayā̭ pa॒śubhi̭-rmithu॒nai-rjā̭yate॒ dvāda̭śa॒ māsā᳚-ssaṃva~thsa॒ro dvāda̭śa dva॒ndvāni̭ darśapūrṇamā॒sayo॒stāni̭ sa॒mpādyā॒nītyā̭hu-rva॒thsa-ñco̭pāvasṛ॒jatyu॒khā-ñcādhi̭ śraya॒tyava̭ ca॒ hanti̭ dṛ॒ṣadaṷ ca sa॒māha॒ntyadhi̭ ca॒ vapa̭te ka॒pālā̭ni॒ copa̭ dadhāti puro॒ḍāśa̭-ñcā- [puro॒ḍāśa̭-ñca, a॒dhi॒śraya॒tyājya̭-ñca] 31

-'dhi॒śraya॒tyājya̭-ñca stambaya॒juśca॒ hara̭tya॒bhi ca̭ gṛhṇāti॒ vedi̭-ñca pari gṛ॒hṇāti॒ patnī᳚-ñca॒ sanna̭hyati॒ prokṣa̭ṇīścā ''sā॒daya॒tyājya̭-ñcai॒tāni॒ vai dvāda̭śa dva॒ndvāni̭ darśapūrṇamā॒sayo॒stāni॒ ya e॒vagṃ sa॒mpādya॒ yaja̭te॒ prajā̭tenai॒va ya॒jñena̭ yajate॒ pra pra॒jayā̭ pa॒śubhi̭-rmithu॒nai-rjā̭yate || 32 ||

(u॒kthyḙnopā॒pnotya̭-gacchatāṃ॒-yaḥ ~- pṷro॒ḍāśaṃ̭-catvāri॒gṃ॒śacca̭) (a. 9)

dhru॒vo̭-'si dhru॒vo̭-'hagṃ sa̭jā॒teṣṷ bhūyāsa॒mityā̭ha dhru॒vāne॒vainā᳚n kuruta u॒gro᳚-'syu॒gro̭-'hagṃ sa̭jā॒teṣṷ bhūyāsa॒-mityā॒hāpra̭tivādina e॒vainā᳚n kurute-'bhi॒bhūra̭syabhi॒bhūra॒hagṃ sa̭jā॒teṣṷ bhūyāsa॒mityā̭ha॒ ya e॒vaina̭-mpratyu॒tpipī̭te॒ tamupā᳚syate yu॒najmi̭ tvā॒ brahma̭ṇā॒ daivye॒netyā̭hai॒ṣa vāa॒gneryoga॒stenai॒ - [vāa॒gneryoga॒stena̭, e॒vainaṃ̭-yu~nakti] 33

vainaṃ̭-yu~nakti ya॒jñasya॒ vai samṛ̭ddhena de॒vā-ssṷva॒rgaṃ-lo~॒kamā̭yan. ya॒jñasya॒ vyṛ̭ddhe॒nāsṷrā॒-nparā̭bhāvaya॒n. yanmḙ agne a॒sya ya॒jñasya॒ riṣyā॒dityā̭ha ya॒jñasyai॒va tathsamṛ̭ddhena॒ yaja̭māna-ssuva॒rgaṃ-lo~॒kamḙti ya॒jñasya॒ vyṛ̭ddhena॒ bhrātṛ̭vyā॒-nparā̭ bhāvayatyagniho॒tra-me॒tābhi॒-rvyāhṛ̭tībhi॒rupa̭ sādayedyajñamu॒khaṃ-vā~ a̭gniho॒tra-mbrahmai॒tā vyāhṛ̭tayo yajñamu॒kha e॒va brahma̭ - [brahma̭, ku॒ru॒te॒ saṃ॒va~॒thsa॒re] 34

kurute saṃva~thsa॒re pa॒ryāga̭ta e॒tābhi̭re॒vopa̭ sādaye॒-dbrahma̭ṇai॒vobha॒yataḥ̭ saṃva~thsa॒ra-mpari̭ gṛhṇāti darśapūrṇamā॒sau cā̭turmā॒syānyā॒labha̭māna e॒tābhi॒-rvyāhṛ̭tībhir-ha॒vīgṣyāsā̭daye-dyajñamu॒khaṃ-vai~ da̭rśapūrṇamā॒sau cā̭turmā॒syāni॒ brahmai॒tā vyāhṛ̭tayo yajñamu॒kha e॒va brahma̭ kurute saṃva~thsa॒re pa॒ryāga̭ta e॒tābhi̭re॒vāsā̭daye॒-dbrahma̭ṇai॒vobha॒yataḥ̭ saṃva~thsa॒ra-mpari̭gṛhṇāti॒ yadvai ya॒jñasya॒ sāmnā᳚ kri॒yatḙ rā॒ṣṭraṃ- [rā॒ṣṭram, ya॒jñasyā॒-śīrga̭cchati॒] 35

-~ya॒jñasyā॒-śīrga̭cchati॒ yadṛ॒cā viśaṃ̭-ya~॒jñasyā॒- śīrga̭ccha॒tyatha̭ brāhma॒ṇo̭-'nā॒śīrkḙṇa ya॒jñena̭ yajate sāmidhe॒nī-ra̭nuva॒kṣyanne॒tā vyāhṛ̭tīḥ pu॒rastā᳚ddaddhyā॒-dbrahmai॒va pra̭ti॒pada̭-ṅkurute॒ tathā᳚ brāhma॒ṇa-ssāśī᳚rkeṇa ya॒jñena̭ yajate॒ ya-ṅkā॒mayḙta॒ yaja̭māna॒-mbhrātṛ̭vyamasya ya॒jñasyā॒śīrga̭cche॒diti॒ tasyai॒tā vyāhṛ̭tīḥ puronuvā॒kyā̭yā-ndaddhyā-dbhrātṛvyadeva॒tyā̭ vai pṷronuvā॒kyā᳚ bhrātṛ̭vyame॒vāsya̭ ya॒jñasyā॒-[ya॒jñasyā̭, ā॒śīrga̭cchati॒] 36

-''śīrga̭cchati॒ yān kā॒mayḙta॒ yaja̭mānān-thsa॒māva̭tyenān ya॒jñasyā॒ ''śīrga̭cche॒diti॒ teṣā̭me॒tā vyāhṛ̭tīḥ puronuvā॒kyā̭yā ardha॒rca ekā᳚-ndaddhyā-dyā॒jyā̭yai pu॒rastā॒dekāṃ᳚-yā~॒jyā̭yā ardha॒rca ekā॒-ntathai̭nān-thsa॒māva̭tī ya॒jñasyā॒ ''śīrga̭cchati॒ yathā॒ vai pa॒rjanya॒-ssuvṛ̭ṣṭaṃ॒-va~rṣa̭tye॒vaṃ-ya~॒jño yaja̭mānāya varṣati॒ sthala̭yoda॒ka-mpa̭rigṛ॒hṇantyā॒śiṣā̭ ya॒jñaṃ-ya~ja̭mānaḥ॒ pari̭ gṛhṇāti॒ mano̭-'si prājāpa॒tyaṃ- [prājāpa॒tyam, mana̭sā] 37

-mana̭sā mā bhū॒tenā-''vi॒śetyā̭ha॒ mano॒ vai prā̭jāpa॒tya-mprā̭jāpa॒tyo ya॒jño mana̭ e॒va ya॒jñamā॒tma-ndha̭tte॒ vāga̭syai॒ndrī sa̭patna॒kṣaya̭ṇī vā॒cā me᳚ndri॒yeṇā-''vi॒śetyā̭hai॒ndrī vai vāgvāca̭-me॒vaindrī- mā॒tma-ndha̭tte || 38 ||

(tenai॒-va brahma̭- rā॒ṣṭrame॒-vāsya̭ ya॒jñasya̭-prājāpa॒tyagṃ-ṣaṭtrigṃ̭śacca) (a. 10)

yo vai sa̭ptada॒śa-mpra॒jāpa̭tiṃ-ya~॒jñama॒nvāya̭ttaṃ॒-ve~da॒ prati̭ ya॒jñena̭ tiṣṭhati॒ na ya॒jñā-dbhragṃ̭śata॒ ā śrā̭va॒yeti॒ catṷrakṣara॒mastu॒ śrauṣa॒ḍiti॒ catṷrakṣaraṃ॒-ya~jeti॒ dvya̭kṣaraṃ॒-ye~ yajā̭maha॒ iti॒ pañcā᳚kṣara-ndvyakṣa॒ro va̭ṣaṭkā॒ra e॒ṣa vai sa̭ptada॒śaḥ pra॒jāpa̭ti-rya॒jñama॒nvāya̭tto॒ ya e॒vaṃ-ve~da॒ prati̭ ya॒jñena̭ tiṣṭhati॒ na ya॒jñād- bhragṃ̭śate॒ yo vai ya॒jñasya॒ prāya̭ṇa-mprati॒ṣṭhā- [prati॒ṣṭhām, u॒daya̭naṃ॒-ve~da॒] 39

mu॒daya̭naṃ॒-ve~da॒ prati̭ṣṭhite॒nāri̭ṣṭena ya॒jñena̭ sa॒gg॒sthā-ṅga̭ccha॒tyāśrā̭va॒yāstu॒ śrauṣa॒ḍyaja॒ ye yajā̭mahe vaṣaṭkā॒ra e॒tadvai ya॒jñasya॒ prāya̭ṇame॒ṣā pra̭ti॒ṣṭhaitadu॒daya̭naṃ॒-ya~ e॒vaṃ-ve~da॒ prati̭ṣṭhite॒nā-'ri̭ṣṭena ya॒jñena̭ sa॒gg॒sthā-ṅga̭cchati॒ yo vai sū॒nṛtā̭yai॒ dohaṃ॒-ve~da̭ du॒ha e॒vaināṃ᳚-ya~॒jño vai sū॒nṛtā '' śrā̭va॒yetyaivainā̭-mahva॒dastu॒ [-mahva॒dastṷ, śrauṣa॒ḍityu॒pāvā᳚srā॒-] 40

śrauṣa॒ḍityu॒pāvā᳚srā॒-gyajetyuda̭naiṣī॒dye yajā̭maha॒ ityupā̭-'sada-dvaṣaṭkā॒reṇa̭ dogddhye॒ṣa vai sū॒nṛtā̭yai॒ doho॒ ya e॒vaṃ-ve~da̭ du॒ha e॒vainā᳚-nde॒vā vai sa॒tramā̭sata॒ teṣā॒-ndiśo̭-'dasya॒nta e॒tāmā॒rdrā-mpa॒ṅktima̭paśya॒nnā śrā̭va॒yeti̭ purovā॒ta-ma̭janaya॒nnastu॒ śrauṣa॒ḍitya॒bhragṃ sama̭plāvaya॒n॒. yajeti̭ vi॒dyuta̭- [vi॒dyuta̭m, a॒ja॒na॒ya॒n॒ ye] 41

majanaya॒n॒ ye yajā̭maha॒ iti॒ prāva̭rṣayanna॒bhya̭stanayan vaṣaṭkā॒reṇa॒ tato॒ vai tebhyo॒ diśaḥ॒ prāpyā̭yanta॒ ya e॒vaṃ-ve~da॒ prāsmai॒ diśaḥ̭ pyāyante pra॒jāpa̭ti-ntvo॒veda̭ pra॒jāpa̭ti stvaṃve~da॒ ya-mpra॒jāpa̭ti॒-rveda॒ sa puṇyo̭ bhavatye॒ṣa vai cha̭nda॒syaḥ̭ pra॒jāpa̭ti॒rā śrā̭va॒yā-'stu॒ śrauṣa॒ḍyaja॒ ye yajā̭mahe vaṣaṭkā॒ro ya e॒vaṃ-ve~da॒ puṇyo̭ bhavati vasa॒nta- [vasa॒ntam, ṛ॒tū॒nāṃ] 42

-mṛ̭tū॒nā-mprī̭ṇā॒mītyā̭ha॒rtavo॒ vai pra̭yā॒jā ṛ॒tūne॒va prī̭ṇāti॒ te᳚-'smai prī॒tā ya̭thāpū॒rva-ṅka̭lpante॒ kalpa̭nte-'smā ṛ॒tavo॒ ya e॒vaṃ-ve~dā॒gnīṣoma̭yora॒ha-ndḙvaya॒jyayā॒ cakṣṷṣmā-nbhūyāsa॒mityā̭-hā॒gnīṣomā᳚bhyāṃ॒-vai~ ya॒jñaścakṣṷṣmā॒-ntābhyā̭me॒va cakṣṷrā॒tma-ndha̭tte॒ 'gnera॒ha-ndḙvaya॒jyayā᳚-'nnā॒do bhṷ̄yāsa॒mityā̭hā॒gnirvai de॒vānā̭-mannā॒daste nai॒vā- [mannā॒daste nai॒vā, a॒nnādya̭mā॒tman] 43

-'nnādya̭mā॒tma-ndha̭tte॒ dabdhi̭ra॒syada̭bdho bhūyāsama॒mu-nda̭bheya॒mityā̭hai॒tayā॒ vai dabddhyā̭ de॒vā asṷrānadabhnuva॒ntayai॒va bhrātṛ̭vya-ndabhnotya॒gnīṣoma̭yora॒ha-ndḙvaya॒jyayā̭ vṛtra॒hā bhṷ̄yāsa॒mityā̭hā॒-'gnīṣomā᳚bhyāṃ॒-vā~ indro̭ vṛ॒trama̭ha॒ntābhyā̭me॒va bhrātṛ̭vyagg stṛṇuta indrāgni॒yora॒ha-ndḙvaya॒jyaye᳚ndriyā॒vya̭nnā॒do bhṷ̄yāsa॒mityā̭hendriyā॒vyḙvānnā॒do bha̭va॒tīndra̭syā॒- [bha̭va॒tīndra̭sya, a॒ha-ndḙvaya॒jyaye᳚ndriyā॒vī] 44

-'ha-ndḙvaya॒jyaye᳚ndriyā॒vī bhṷ̄yāsa॒mityā̭hendriyā॒vyḙva bha̭vati mahe॒ndrasyā॒-'ha-ndḙvaya॒jyayā̭ je॒māna̭-mmahi॒māna̭-ṅgameya॒mityā̭ha je॒māna̭me॒va ma̭hi॒māna̭-ṅgacchatya॒gne-ssvi̭ṣṭa॒kṛto॒-'ha-ndḙvaya॒jyayā ''yṷṣmān. ya॒jñena̭ prati॒ṣṭhā-ṅga̭meya॒mityā॒-hāyṷre॒vātma-ndha̭tte॒ prati̭ ya॒jñena̭ -tiṣṭhati || 45 ||

( pra॒ti॒ṣṭhā-ma̭hva॒dastṷ-vi॒dyutaṃ̭va~sa॒ntan-tenai॒ve-ndra̭syā॒-'ṣṭātrigṃ̭śacca) (a. 11)

indraṃ̭-vo~ vi॒śvata॒spari॒ havā̭mahe॒ jane᳚bhyaḥ | a॒smāka̭mastu॒ keva̭laḥ || indra॒-nnaro̭ ne॒madhi̭tā havante॒ yatpāryā̭ yu॒naja̭te॒ dhiya॒stāḥ | śūro॒ nṛṣā̭tā॒ śava̭saścakā॒na ā goma̭ti vra॒je bha̭jā॒ tvannaḥ̭ || i॒ndri॒yāṇi̭ śatakrato॒ yā te॒ janḙṣu pa॒ñcasṷ || indra॒ tāni̭ ta॒ ā vṛ̭ṇe || anṷ te dāyi ma॒ha i̭ndri॒yāya̭ sa॒trā te॒ viśva॒manṷ vṛtra॒hatye᳚ | anṷ [ ] 46

kṣa॒tramanu॒ saho̭ yaja॒trendra̭ de॒vebhi॒ranṷ te nṛ॒ṣahye᳚ || āyasmi᳚n-thsa॒ptavā̭sa॒vā stiṣṭha̭nti svā॒ruho̭ yathā | ṛṣi̭rha dīrgha॒śrutta̭ma॒ indra̭sya gha॒rmo ati̭thiḥ || ā॒māsṷ pa॒kvamaira̭ya॒ ā sūryagṃ̭ rohayo di॒vi | gha॒rma-nna sāma̭-ntapatā suvṛ॒ktibhi॒-rjuṣṭa॒-ṅgirva̭ṇase॒ giraḥ̭ || indra॒mi-dgā॒thino̭ bṛ॒hadindra̭-ma॒rkebhi̭-ra॒rkiṇaḥ̭ | indraṃ॒-vā~ṇī̭ranūṣata || gāya̭nti tvā gāya॒triṇo- [gāya॒triṇaḥ̭, arca̭ntya॒rka-ma॒rkiṇaḥ̭ |] 47

-'rca̭ntya॒rka-ma॒rkiṇaḥ̭ | bra॒hmāṇa̭stvā śatakrata॒vu-dva॒gṃ॒śa-mi̭va yemire || a॒gṃ॒ho॒muce॒ pra bha̭remā manī॒ṣāmo̭ṣiṣṭha॒dāvaṃnḙ suma॒ti-ṅgṛ̭ṇā॒nāḥ | i॒dami̭ndra॒ prati̭ ha॒vya-ṅgṛ̭bhāya sa॒tyā-ssa̭ntu॒ yaja̭mānasya॒ kāmāḥ᳚ || vi॒veṣa॒ yanmā̭ dhi॒ṣaṇā̭ ja॒jāna॒ stavai̭ pu॒rā pāryā॒dindra॒-mahnaḥ̭ | agṃha̭so॒ yatra̭ pī॒para॒dyathā̭ no nā॒veva॒ yānta̭ mu॒bhayḙ havante || pra sa॒mrāja̭-mpratha॒ma-ma̭ddhva॒rāṇā̭- [ma̭ddhva॒rāṇā᳚m, a॒gṃ॒ho॒mucaṃ̭] 48

-magṃho॒mucaṃ̭-vṛ~ṣa॒bhaṃ-ya~॒jñiyā̭nām | a॒pā-nnapā̭tamaśvinā॒ haya̭nta-ma॒sminna̭ra indri॒ya-ndha̭tta॒mojaḥ̭ || vi na̭ indra॒ mṛdho̭ jahi nī॒cā ya̭ccha pṛtanya॒taḥ | a॒dha॒spa॒da-ntamī᳚-ṅkṛdhi॒ yo a॒smāgṃ a̭bhi॒dāsa̭ti || indra̭ kṣa॒trama॒bhi vā॒mamojo 'jā̭yathā vṛṣabha carṣaṇī॒nām | apā̭nudo॒ jana̭-mamitra॒yanta̭-mu॒ru-nde॒vebhyo̭ akṛṇo-ru lo॒kam || mṛ॒go na bhī॒maḥ kṷca॒ro gi̭ri॒ṣṭhāḥ pa̭rā॒vata [pa̭rā॒vataḥ̭, ā ja̭gāmā॒ para̭syāḥ |] 49

ā ja̭gāmā॒ para̭syāḥ | sṛ॒kagṃ sa॒gṃ॒śāya̭ pa॒vimi̭ndra ti॒gmaṃ-vi~ śatrū᳚-ntāḍhi॒ vimṛdho̭ nudasva || vi śatrū॒n॒. vi mṛdho̭ nuda॒ vivṛ॒trasya॒ hanṷ̄ ruja | vi ma॒nyumi̭ndra bhāmi॒to̭-'mitra̭syā-'bhi॒dāsa̭taḥ || trā॒tāra॒-mindra̭-mavi॒tāra॒-mindra॒gṃ॒ havḙhave su॒hava॒gṃ॒ śūra॒mindra᳚m | hu॒ve nu śa॒kra-mpṷruhū॒tamindragg̭ sva॒sti no̭ ma॒ghavā̭ dhā॒tvindraḥ̭ || mā tḙ a॒syāgṃ [a॒syāgṃ, sa॒ha॒sā॒va॒-npari̭ṣṭāva॒ghāya̭] 50

sa̭hasāva॒-npari̭ṣṭāva॒ghāya̭ bhūma harivaḥ parā॒dai | trāya̭sva no 'vṛ॒kebhi॒-rvarṷ̄thai॒-stava̭ pri॒yāsaḥ̭ sū॒riṣṷ syāma || ana̭vaste॒ ratha॒maśvā̭ya takṣa॒-ntvaṣṭā॒ vajra̭-mpuruhūta dyu॒manta᳚m | bra॒hmāṇa॒ indra̭-mma॒haya̭nto a॒rkairava̭rdhaya॒nnaha̭ye॒ hanta॒vā ṷ || vṛṣṇe॒ ya-tte॒ vṛṣa̭ṇo a॒rkamarcā॒nindra॒ grāvā̭ṇo॒ adi̭ti-ssa॒joṣāḥ᳚ | a॒na॒śvāso॒ ye pa॒vayo̭-'ra॒thā indrḙṣitā a॒bhyava̭rta nta॒ dasyūṋ || 51 ||

(vṛ॒tra॒hatye-'nṷ-gāya॒triṇo᳚-'ddha॒rāṇāṃ᳚-parā॒vato॒-'syā-ma॒ṣṭāca̭tvārigṃśacca) (a. 12)

(santvā̭ siñcāmi-dhru॒vo᳚-'sya॒gnirmā̭-ba॒r॒hiṣo॒-'ha-mā pyā̭yatā॒-maga̭nma॒-yathā॒ vai-yo vai śra॒ddhāṃ- pra॒jāpa̭ti॒-ryajñān-dhru॒vo̭-'sītyā̭ha॒-yo vai sa̭ptada॒śa-mindraṃ̭-vo~॒-dvāda̭śa | )

(santvā̭-ba॒r॒hiṣo॒-'haṃya~thā॒ vā-e॒vaṃ-vi~॒dvā-ñchrauṣa̭ṭ-thsāhasāva॒-nneka̭pañcā॒śat |)

(santvā̭, siñcāmi॒ dasyūṋ)

|| hariḥ̭ om ||

|| kṛṣṇa yajurvedīya taittirīya saṃhitāyā-mprathamakāṇḍe ṣaṣṭhaḥ praśna-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय संहिताया-म्प्रथमकाण्डे षष्ठः प्रश्नः - याजमानकाण्डं

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

स-न्त्वा॑ सिञ्चामि॒ यजु॑षा प्र॒जामायु॒र्धन॑-ञ्च । बृह॒स्पति॑प्रसूतो॒ यज॑मान इ॒ह मा रि॑षत् ॥ आज्य॑मसि स॒त्यम॑सि स॒त्यस्याद्ध्य॑क्षमसि ह॒विर॑सि वैश्वान॒रं-वैँ᳚श्वदे॒व-मुत्पू॑तशुष्मग्ं स॒त्यौजा॒-स्सहो॑-ऽसि॒ सह॑मानमसि॒ सह॒स्वारा॑ती॒-स्सह॑स्वारातीय॒त-स्सह॑स्व॒ पृत॑ना॒-स्सह॑स्व पृतन्य॒तः । स॒हस्र॑वीर्यमसि॒ तन्मा॑ जि॒न्वाज्य॒स्याज्य॑मसि स॒त्यस्य॑ स॒त्यम॑सि स॒त्यायु॑- [स॒त्यायुः॑, अ॒सि॒ स॒त्यशु॑ष्ममसि] 1

-रसि स॒त्यशु॑ष्ममसि स॒त्येन॑ त्वा॒-ऽभि घा॑रयामि॒ तस्य॑ ते भक्षीय पञ्चा॒ना-न्त्वा॒ वाता॑नां-यँ॒न्त्राय॑ ध॒र्त्राय॑ गृह्णामि पञ्चा॒ना-न्त्व॑र्तू॒नां-यँ॒न्त्राय॑ ध॒र्त्राय॑ गृह्णामि पञ्चा॒ना-न्त्वा॑ दि॒शां-यँ॒न्त्राय॑ ध॒र्त्राय॑ गृह्णामि पञ्चा॒ना-न्त्वा॑ पञ्चज॒नानां᳚-यँ॒न्त्राय॑ ध॒र्त्राय॑ गृह्णामि च॒रोस्त्वा॒ पञ्च॑बिलस्य य॒न्त्राय॑ ध॒र्त्राय॑ गृह्णामि॒ ब्रह्म॑णस्त्वा॒ तेज॑से य॒न्त्राय॑ ध॒र्त्राय॑ गृह्णामि क्ष॒त्रस्य॒ त्वौज॑से य॒न्त्राय॑ [ ] 2

ध॒र्त्राय॑ गृह्णामि वि॒शे त्वा॑ य॒न्त्राय॑ ध॒र्त्राय॑ गृह्णामि सु॒वीर्या॑य त्वा गृह्णामि सुप्रजा॒स्त्वाय॑ त्वा गृह्णामि रा॒यस्पोषा॑य त्वा गृह्णामि ब्रह्मवर्च॒साय॑ त्वा गृह्णामि॒ भूर॒स्माकग्ं॑ ह॒विर्दे॒वाना॑-मा॒शिषो॒ यज॑मानस्य दे॒वाना᳚-न्त्वा दे॒वता᳚भ्यो गृह्णामि॒ कामा॑य त्वा गृह्णामि ॥ 3 ॥

(स॒त्यायु॒-रोज॑से य॒न्त्राय॒-त्रय॑स्त्रिग्ंशच्च) (अ. 1)

ध्रु॒वो॑-ऽसि ध्रु॒वो॑-ऽहग्ं स॑जा॒तेषु॑ भूयास॒-न्धीर॒श्चेत्ता॑ वसु॒विदु॒ग्रो᳚-ऽस्यु॒ग्रो॑-ऽहग्ं स॑जा॒तेषु॑ भूयास-मु॒ग्रश्चेत्ता॑ वसु॒विद॑भि॒-भूर॑स्यभि॒भूर॒हग्ं स॑जा॒तेषु॑ भूयासमभि॒भूश्चेत्ता॑ वसु॒वि-द्यु॒नज्मि॑ त्वा॒ ब्रह्म॑णा॒ दैव्ये॑न ह॒व्याया॒स्मै वोढ॒वे जा॑तवेदः ॥ इन्धा॑नास्त्वा सुप्र॒जसः॑ सु॒वीरा॒ ज्योग्जी॑वेम बलि॒हृतो॑ व॒य-न्ते᳚ ॥ यन्मे॑ अग्ने अ॒स्य य॒ज्ञस्य॒ रिष्या॒- [रिष्या᳚त्, द्यद्वा॒] 4

-द्यद्वा॒ स्कन्दा॒-दाज्य॑स्यो॒त वि॑ष्णो । तेन॑ हन्मि स॒पत्न॑-न्दुर्मरा॒युमैन॑-न्दधामि॒ निर्-ऋ॑त्या उ॒पस्थे᳚ । भू-र्भुव॒-स्सुव॒रुच्छु॑ष्मो अग्ने॒ यज॑मानायैधि॒ निशु॑ष्मो अभि॒दास॑ते । अग्ने॒ देवे᳚द्ध॒ मन्वि॑द्ध॒ मन्द्र॑जि॒ह्वा-म॑र्त्यस्य ते होतर्मू॒र्धन्ना जि॑घर्मि रा॒यस्पोषा॑य सुप्रजा॒स्त्वाय॑ सु॒वीर्या॑य॒ मनो॑-ऽसि प्राजाप॒त्य-म्मन॑सा मा भू॒तेना वि॑श॒ वाग॑स्यै॒न्द्री स॑पत्न॒क्षय॑णी [ ] 5

वा॒चा मे᳚न्द्रि॒येणा वि॑श वस॒न्तमृ॑तू॒ना-म्प्री॑णामि॒ स मा᳚ प्री॒तः प्री॑णातु ग्री॒ष्ममृ॑तू॒ना-म्प्री॑णामि॒ स मा᳚ प्री॒तः प्री॑णातु व॒र्॒षा ऋ॑तू॒ना-म्प्री॑णामि॒ ता मा᳚ प्री॒ताः प्री॑णन्तु श॒रद॑मृतू॒ना-म्प्री॑णामि॒ सा मा᳚ प्री॒ता प्री॑णातु हेमन्तशिशि॒रावृ॑तू॒ना-म्प्री॑णामि॒ तौ मा᳚ प्री॒तौ प्री॑णीता-म॒ग्नीषोम॑यो-र॒ह-न्दे॑वय॒ज्यया॒ चक्षु॑ष्मा-न्भूयासम॒ग्नेर॒ह-न्दे॑वय॒ज्यया᳚-ऽन्ना॒दो भू॑यास॒- [भू॑यासम्, दब्धि॑र॒स्यद॑ब्धो] 6

-न्दब्धि॑र॒स्यद॑ब्धो भूयासम॒मु-न्द॑भेय-म॒ग्नीषोम॑यो-र॒ह-न्दे॑वय॒ज्यया॑ वृत्र॒हा भू॑यासमिन्द्राग्नि॒योर॒ह-न्दे॑वय॒ज्यये᳚न्द्रिया॒व्य॑न्ना॒दो भू॑यास॒मिन्द्र॑स्या॒-ऽह-न्दे॑वय॒ज्यये᳚न्द्रिया॒वी भू॑यास-म्महे॒न्द्रस्या॒-ऽह-न्दे॑वय॒ज्यया॑ जे॒मान॑-म्महि॒मान॑-ङ्गमेयम॒ग्ने-स्स्वि॑ष्ट॒कृतो॒-ऽह-न्दे॑वय॒ज्यया ऽऽयु॑ष्मान्. य॒ज्ञेन॑ प्रति॒ष्ठा-ङ्ग॑मेयम् ॥ 7 ॥

(रिष्या᳚-थ्सपत्न॒क्षय॑ण्य-न्ना॒दो भू॑यास॒ग्ं॒-षट्त्रिग्ं॑शच्च) (अ. 2)

अ॒ग्निर्मा॒ दुरि॑ष्टा-त्पातु सवि॒ता-ऽघशग्ं॑सा॒द्यो मे-ऽन्ति॑ दू॒रे॑-ऽराती॒यति॒ तमे॒तेन॑ जेष॒ग्ं॒ सुरू॑पवर्षवर्ण॒ एही॒मा-न्भ॒द्रा-न्दुर्याग्ं॑ अ॒भ्येहि॒ मामनु॑व्रता॒ न्यु॑ शी॒र्॒षाणि॑ मृढ्व॒मिड॒ एह्यदि॑त॒ एहि॒ सर॑स्व॒त्येहि॒ रन्ति॑रसि॒ रम॑तिरसि सू॒नर्य॑सि॒ जुष्टे॒ जुष्टि॑-न्ते-ऽशी॒योप॑हूत उपह॒व- [उपह॒वम्, ते॒-ऽशी॒य॒ सा ] 8

-न्ते॑-ऽशीय॒ सा मे॑ स॒त्या-ऽऽशीर॒स्य य॒ज्ञस्य॑ भूया॒दरे॑डता॒ मन॑सा॒ तच्छ॑केयं-यँ॒ज्ञो दिवग्ं॑ रोहतु य॒ज्ञो दिव॑-ङ्गच्छतु॒ यो दे॑व॒यानः॒ पन्था॒स्तेन॑ य॒ज्ञो दे॒वाग्ं अप्ये᳚त्व॒स्मास्विन्द्र॑ इन्द्रि॒य-न्द॑धात्व॒स्मान्राय॑ उ॒त य॒ज्ञा-स्स॑चन्ताम॒स्मासु॑ सन्त्वा॒शिष॒-स्सा नः॑ प्रि॒या सु॒प्रतू᳚र्तिर्म॒घोनी॒ जुष्टि॑रसि जु॒षस्व॑ नो॒ जुष्टा॑ नो- [जुष्टा॑ नः, अ॒सि॒ जुष्टि॑-न्ते] 9

-ऽसि॒ जुष्टि॑-न्ते गमेय॒-म्मनो॒ ज्योति॑-र्जुषता॒माज्यं॒-विँच्छि॑न्नं-यँ॒ज्ञग्ं समि॒म-न्द॑धातु । बृह॒स्पति॑-स्तनुतामि॒मन्नो॒ विश्वे॑ दे॒वा इ॒ह मा॑दयन्ताम् ॥ ब्रद्ध्न॒ पिन्व॑स्व॒ दद॑तो मे॒ मा क्षा॑यि कुर्व॒तो मे॒ मोप॑ दस-त्प्र॒जाप॑ते-र्भा॒गो᳚-ऽस्यूर्ज॑स्वा॒-न्पय॑स्वा-न्प्राणापा॒नौ मे॑ पाहि समानव्या॒नौ मे॑ पाह्युदानव्या॒नौ मे॑ पा॒ह्यक्षि॑तो॒-ऽस्यक्षि॑त्यै त्वा॒ मा मे᳚ क्षेष्ठा अ॒मुत्रा॒मुष्मि॑न् ँलो॒के ॥ 10 ॥

(उ॒प॒ह॒वं-जुष्टा॑न-स्त्वा॒ षट् च॑) (अ. 3)

ब॒र्॒हिषो॒-ऽह-न्दे॑वय॒ज्यया᳚ प्र॒जावा᳚-न्भूयास॒-न्नरा॒शग्ंस॑स्या॒ह-न्दे॑वय॒ज्यया॑ पशु॒मा-न्भू॑यासम॒ग्ने-स्स्वि॑ष्ट॒कृतो॒-ऽह-न्दे॑वय॒ज्यया-ऽऽयु॑ष्मान्. य॒ज्ञेन॑ प्रति॒ष्ठा-ङ्ग॑मेयम॒ग्नेर॒ह-मुज्जि॑ति॒-मनूज्जे॑ष॒ग्ं॒ सोम॑स्या॒ह - मुज्जि॑ति॒-मनूज्जे॑षम॒ग्नेर॒ह-मुज्जि॑ति॒-मनूज्जे॑ष-म॒ग्नीषोम॑योर॒ह-मुज्जि॑ति॒-मनूज्जे॑ष-मिन्द्राग्नि॒योर॒ह-मुज्जि॑ति॒-मनूज्जे॑ष॒-मिन्द्र॑स्या॒-ऽह- [-मिन्द्र॑स्या॒-ऽहम्, उज्जि॑ति॒मनूज्जे॑षं] 11

-मुज्जि॑ति॒मनूज्जे॑ष-म्महे॒न्द्रस्या॒हमुज्जि॑ति॒- मनूज्जे॑षम॒ग्ने-स्स्वि॑ष्ट॒कृतो॒-ऽह मुज्जि॑ति॒-मनूज्जे॑षं॒-वाँज॑स्य मा प्रस॒वेनो᳚-द्ग्रा॒भेणोद॑ग्रभीत् । अथा॑ स॒पत्ना॒ग्ं॒ इन्द्रो॑ मे निग्रा॒भेणाध॑राग्ं अकः ॥ उ॒द्ग्रा॒भ-ञ्च॑ निग्रा॒भ-ञ्च॒ ब्रह्म॑ दे॒वा अ॑वीवृधन्न् । अथा॑ स॒पत्ना॑निन्द्रा॒ग्नी मे॑ विषू॒चीना॒न् व्य॑स्यताम् ॥ एमा अ॑ग्मन्ना॒शिषो॒ दोह॑कामा॒ इन्द्र॑वन्तो [इन्द्र॑वन्तः, व॒ना॒म॒हे॒ धु॒क्षी॒महि॑] 12

वनामहे धुक्षी॒महि॑ प्र॒जामिष᳚म् ॥ रोहि॑तेन त्वा॒-ऽग्नि-र्दे॒वता᳚-ङ्गमयतु॒ हरि॑भ्या॒-न्त्वेन्द्रो॑ दे॒वता᳚-ङ्गमय॒त्वेत॑शेन त्वा॒ सूर्यो॑ दे॒वता᳚-ङ्गमयतु॒ वि ते॑ मुञ्चामि रश॒ना वि र॒श्मीन् वि योक्त्रा॒ यानि॑ परि॒चर्त॑नानि ध॒त्ताद॒स्मासु॒ द्रवि॑णं॒-यँच्च॑ भ॒द्र-म्प्र णो᳚ ब्रूता-द्भाग॒धा-न्दे॒वता॑सु ॥ विष्णो᳚-श्शं॒योँर॒ह-न्दे॑वय॒ज्यया॑ य॒ज्ञेन॑ प्रति॒ष्ठा-ङ्ग॑मेय॒ग्ं॒ सोम॑स्या॒ह-न्दे॑वय॒ज्यया॑ [दे॑वय॒ज्यया᳚, सु॒रेता॒] 13

सु॒रेता॒ रेतो॑ धिषीय॒ त्वष्टु॑र॒ह-न्दे॑वय॒ज्यया॑ पशू॒नाग्ं रू॒प-म्पु॑षेय-न्दे॒वाना॒-म्पत्नी॑र॒ग्नि-र्गृ॒हप॑ति-र्य॒ज्ञस्य॑ मिथु॒न-न्तयो॑र॒ह-न्दे॑वय॒ज्यया॑ मिथु॒नेन॒ प्रभू॑यासं-वेँ॒दो॑-ऽसि॒ वित्ति॑रसि वि॒देय॒ कर्मा॑-ऽसि क॒रुण॑मसि क्रि॒यासग्ं॑ स॒निर॑सि सनि॒ता-ऽसि॑ स॒नेय॑-ङ्घृ॒तव॑न्त-ङ्कुला॒यिनग्ं॑ रा॒यस्पोषग्ं॑ सह॒स्रिणं॑-वेँ॒दो द॑दातु वा॒जिन᳚म् ॥ 14 ॥

(इन्द्र॑स्या॒ह-मिन्द्र॑वन्तः॒-सोम॑स्या॒ह-न्दे॑वय॒ज्यया॒-चतु॑श्चत्वारिग्ंशच्च) (अ. 4)

आ प्या॑यता-न्ध्रु॒वा घृ॒तेन॑ य॒ज्ञंयँ॑ज्ञ॒-म्प्रति॑ देव॒यद्भ्यः॑ । सू॒र्याया॒ ऊधो-ऽदि॑त्या उ॒पस्थ॑ उ॒रुधा॑रा पृथि॒वी य॒ज्ञे अ॒स्मिन्न् ॥ प्र॒जाप॑ते-र्वि॒भान्नाम॑ लो॒कस्तस्मिग्ग्॑स्त्वा दधामि स॒ह यज॑मानेन॒ सद॑सि॒ सन्मे॑ भूया॒-स्सर्व॑मसि॒ सर्व॑-म्मे भूयाः पू॒र्णम॑सि पू॒र्ण-म्मे॑ भूया॒ अक्षि॑तमसि॒ मा मे᳚ क्षेष्ठाः॒ प्राच्या᳚-न्दि॒शि दे॒वा ऋ॒त्विजो॑ मार्जयन्ता॒-न्दक्षि॑णाया- [दक्षि॑णायाम्, दि॒शि] 15

न्दि॒शि मासाः᳚ पि॒तरो॑ मार्जयन्ता-म्प्र॒तीच्या᳚-न्दि॒शि गृ॒हाः प॒शवो॑ मार्जयन्ता॒मुदी᳚च्या-न्दि॒श्याप॒ ओष॑धयो॒ वन॒स्पत॑यो मार्जयन्तामू॒र्ध्वाया᳚-न्दि॒शि य॒ज्ञ-स्सं॑वँथ्स॒रो य॒ज्ञप॑ति-र्मार्जयन्तां॒-विँष्णोः॒ क्रमो᳚-ऽस्यभिमाति॒हा गा॑य॒त्रेण॒ छन्द॑सा पृथि॒वीमनु॒ वि क्र॑मे॒ निर्भ॑क्त॒-स्स य-न्द्वि॒ष्मो विष्णोः॒ क्रमो᳚-ऽस्यभिशस्ति॒हा त्रैष्टु॑भेन॒ छन्द॑सा॒ ऽन्तरि॑क्ष॒मनु॒ वि क्र॑मे॒ निर्भ॑क्त॒-स्स य-न्द्वि॒ष्मो विष्णोः॒ क्रमो᳚-ऽस्यरातीय॒तो ह॒न्ता जाग॑तेन॒ छन्द॑सा॒ दिव॒मनु॒ वि क्र॑मे॒ निर्भ॑क्त॒-स्स य-न्द्वि॒ष्मो विष्णोः॒ क्रमो॑-ऽसि शत्रूय॒तो ह॒न्ता-ऽऽनु॑ष्टुभेन॒ छन्द॑सा॒ दिशो-ऽनु॒ वि क्र॑मे॒ निर्भ॑क्त॒-स्स य-न्द्वि॒ष्मः ॥ 16 ॥

(दक्षि॑णाया - म॒न्तरि॑क्ष॒मनु॒ वि क्र॑मे॒ निर्भ॑क्त॒-स्स य-न्द्वि॒ष्मो विष्णो॒- रेका॒न्नत्रि॒ग्ं॒शच्च॑) (अ. 5)

अग॑न्म॒ सुव॒-स्सुव॑रगन्म स॒न्दृश॑स्ते॒ मा छि॑थ्सि॒ यत्ते॒ तप॒स्तस्मै॑ ते॒ मा-ऽऽ वृ॑क्षि सु॒भूर॑सि॒ श्रेष्ठो॑ रश्मी॒नामा॑यु॒र्धा अ॒स्यायु॑र्मे धेहि वर्चो॒धा अ॑सि॒ वर्चो॒ मयि॑ धेही॒दम॒हम॒मु-म्भ्रातृ॑व्यमा॒भ्यो दि॒ग्भ्यो᳚-ऽस्यै दि॒वो᳚-ऽस्माद॒न्तरि॑क्षाद॒स्यै पृ॑थि॒व्या अ॒स्माद॒न्नाद्या॒न्निर्भ॑जामि॒ निर्भ॑क्त॒-स्स य-न्द्वि॒ष्मः ॥ 17 ॥

स-ञ्ज्योति॑षा-ऽभूवमै॒न्द्री-मा॒वृत॑-म॒न्वाव॑र्ते॒ सम॒ह-म्प्र॒जया॒ स-म्मया᳚ प्र॒जा सम॒हग्ं रा॒यस्पोषे॑ण॒ स-म्मया॑ रा॒यस्पोष॒-स्समि॑द्धो अग्ने मे दीदिहि समे॒द्धा ते॑ अग्ने दीद्यासं॒-वँसु॑मान्. य॒ज्ञो वसी॑या-न्भूयास॒मग्न॒ आयूग्ं॑षि पवस॒ आ सु॒वोर्ज॒मिष॑-ञ्च नः । आ॒रे बा॑धस्व दु॒च्छुना᳚म् ॥ अग्ने॒ पव॑स्व॒ स्वपा॑ अ॒स्मे वर्चः॑ सु॒वीर्य᳚म् ॥ 18 ॥

दध॒त्पोषग्ं॑ र॒यि-म्मयि॑ । अग्ने॑ गृहपते सुगृहप॒तिर॒ह-न्त्वया॑ गृ॒हप॑तिना भूयासग्ं सुगृहप॒तिर्मया॒ त्व-ङ्गृ॒हप॑तिना भूया-श्श॒तग्ं हिमा॒स्तामा॒शिष॒मा शा॑से॒ तन्त॑वे॒ ज्योति॑ष्मती॒-न्तामा॒शिष॒मा शा॑से॒-ऽमुष्मै॒ ज्योति॑ष्मती॒-ङ्कस्त्वा॑ युनक्ति॒ स त्वा॒ विमु॑ञ्च॒त्वग्ने᳚ व्रतपते व्र॒तम॑चारिष॒-न्तद॑शक॒-न्तन्मे॑-ऽराधि य॒ज्ञो ब॑भूव॒ स आ [स आ, ब॒भू॒व॒ स] 19

ब॑भूव॒ स प्रज॑ज्ञे॒ स वा॑वृधे । स दे॒वाना॒मधि॑पति-र्बभूव॒ सो अ॒स्माग्ं अधि॑पतीन् करोतु व॒यग्ग् स्या॑म॒ पत॑यो रयी॒णाम् ॥ गोमाग्ं॑ अ॒ग्ने-ऽवि॑माग्ं अ॒श्वी य॒ज्ञो नृ॒वथ्स॑खा॒ सद॒मिद॑प्रमृ॒ष्यः ।इडा॑वाग्ं ए॒षो अ॑सुर प्र॒जावा᳚-न्दी॒र्घो र॒यिः पृ॑थुबु॒द्ध्न-स्स॒भावान्॑ ॥ 20 ॥

(द्वि॒ष्मः-सु॒वीर्य॒ग्ं॒-स आ-पञ्च॑त्रिग्ंशच्च) (अ. 6)

यथा॒ वै स॑मृतसो॒मा ए॒वं-वाँ ए॒ते स॑मृतय॒ज्ञा यद्द॑र्शपूर्णमा॒सौ कस्य॒ वा-ऽह॑ दे॒वा य॒ज्ञमा॒गच्छ॑न्ति॒ कस्य॑ वा॒ न ब॑हू॒नां-यँज॑मानानां॒-योँ वै दे॒वताः॒ पूर्वः॑ परिगृ॒ह्णाति॒ स ए॑ना॒-श्श्वो भू॒ते य॑जत ए॒तद्वै दे॒वाना॑-मा॒यत॑नं॒-यँदा॑हव॒नीयो᳚-ऽन्त॒रा-ऽग्नी प॑शू॒ना-ङ्गार्ह॑पत्यो मनु॒ष्या॑णा-मन्वाहार्य॒पच॑नः पितृ॒णाम॒ग्नि-ङ्गृ॑ह्णाति॒ स्व ए॒वायत॑ने दे॒वताः॒ परि॑ [दे॒वताः॒ परि॑, गृ॒ह्णा॒ति॒ ता-श्श्वो] 21

गृह्णाति॒ ता-श्श्वो भू॒ते य॑जते व्र॒तेन॒ वै मेद्ध्यो॒ -ऽग्नि-र्व्र॒तप॑ति-र्ब्राह्म॒णो व्र॑त॒भृ-द्व्र॒त-मु॑पै॒ष्य-न्ब्रू॑या॒दग्ने᳚ व्रतपते व्र॒त-ञ्च॑रिष्या॒मीत्य॒ग्नि-र्वै दे॒वानां᳚-व्रँ॒तप॑ति॒स्तस्मा॑ ए॒व प्र॑ति॒प्रोच्य॑ व्र॒तमा ल॑भते ब॒र्॒हिषा॑ पू॒र्णमा॑से व्र॒तमुपै॑ति व॒थ्सैर॑मावा॒स्या॑यामे॒तद्ध्ये॑तयो॑-रा॒यत॑नमुप॒स्तीर्यः॒ पूर्व॑श्चा॒ग्निरप॑र॒श्चेत्या॑हु-र्मनु॒ष्या॑ [-र्मनु॒ष्याः᳚, इन्न्वा] 22

इन्न्वा उप॑स्तीर्ण-मि॒च्छन्ति॒ किमु॑ दे॒वा येषा॒-न्नवा॑वसान॒-मुपा᳚स्मि॒ञ्छ्वो य॒क्ष्यमा॑णे दे॒वता॑ वसन्ति॒ य ए॒वं-विँ॒द्वान॒ग्नि-मु॑पस्तृ॒णाति॒ यज॑मानेन ग्रा॒म्याश्च॑ प॒शवो॑-ऽव॒रुद्ध्या॑ आर॒ण्याश्चेत्या॑हु॒-र्य-द्ग्रा॒म्यानु॑प॒वस॑ति॒ तेन॑ ग्रा॒म्यानव॑ रुन्धे॒ यदा॑र॒ण्यस्या॒-ऽश्ञाति॒ तेना॑र॒ण्यान्. यदना᳚श्वा-नुप॒वसे᳚-त्पितृदेव॒त्यः॑ स्यादार॒ण्यस्या᳚-श्ञातीन्द्रि॒यं- [श्ञातीन्द्रि॒यम्, वा आ॑र॒ण्यं-] 23

-ँवा आ॑र॒ण्य-मि॑न्द्रि॒य-मे॒वा-ऽऽत्म-न्ध॑त्ते॒ यदना᳚श्वा-नुप॒वसे॒-त्क्षोधु॑क-स्स्या॒द्य-द॑श्ञी॒याद्रु॒-द्रो᳚-ऽस्य प॒शून॒भि म॑न्येता॒-ऽपो᳚-ऽश्ञाति॒ तन्नेवा॑शि॒त-न्नेवा-ऽन॑शित॒-न्न क्षोधु॑को॒ भव॑ति॒ नास्य॑ रु॒द्रः प॒शून॒भि म॑न्यते॒ वज्रो॒ वै य॒ज्ञः, क्षु-त्खलु॒ वै म॑नु॒ष्य॑स्य॒ भ्रातृ॑व्यो॒ यदना᳚-ऽश्वानुप॒वस॑ति॒ वज्रे॑णै॒व सा॒क्षा-त्क्षुध॒-म्भ्रातृ॑व्यग्ं हन्ति ॥ 24 ॥

(परि॑-मनु॒ष्या॑-इन्द्रि॒यग्ं-सा॒क्षात्-त्रीणि॑ च) (अ. 7)

यो वै श्र॒द्धामना॑रभ्य य॒ज्ञेन॒ यज॑ते॒ नास्ये॒ष्टाय॒ श्रद्द॑धते॒-ऽपः प्र ण॑यति श्र॒द्धा वा आपः॑ श्र॒द्धामे॒वा-ऽऽरभ्य॑ य॒ज्ञेन॑ यजत उ॒भये᳚-ऽस्य देवमनु॒ष्या इ॒ष्टाय॒ श्रद्द॑धते॒ तदा॑हु॒रति॒ वा ए॒ता वर्त्र॑-न्नेद॒न्त्यति॒ वाच॒-म्मनो॒ वावैता नाति॑ नेद॒न्तीति॒ मन॑सा॒ प्र ण॑यती॒यं-वैँ मनो॒- [मनः॑, अ॒नयै॒वैनाः॒] 25

-ऽनयै॒वैनाः॒ प्र ण॑य॒त्य-स्क॑न्नहवि-र्भवति॒ य ए॒वं-वेँद॑ यज्ञायु॒धानि॒ स-म्भ॑रति य॒ज्ञो वै य॑ज्ञायु॒धानि॑ य॒ज्ञमे॒व तथ्स-म्भ॑रति॒ यदेक॑मेकग्ं स॒म्भरे᳚त्-पितृदेव॒त्या॑नि स्यु॒र्य-थ्स॒ह सर्वा॑णि मानु॒षाणि॒ द्वेद्वे॒ सम्भ॑रति याज्यानुवा॒क्य॑योरे॒व रू॒प-ङ्क॑रो॒त्यथो॑ मिथु॒नमे॒वयो वै दश॑ यज्ञायु॒धानि॒ वेद॑ मुख॒तो᳚-ऽस्य य॒ज्ञः क॑ल्पते॒ स्फ्य- [क॑ल्पते॒ स्फ्यः, च॒ क॒पाला॑नि] 26

-श्च॑ क॒पाला॑नि चाग्निहोत्र॒हव॑णी च॒ शूर्प॑-ञ्च कृष्णाजि॒न-ञ्च॒ शम्या॑ चो॒लूख॑ल-ञ्च॒ मुस॑ल-ञ्च दृ॒षच्चोप॑ला चै॒तानि॒ वै दश॑ यज्ञायु॒धानि॒ य ए॒वं-वेँद॑ मुख॒तो᳚-ऽस्य य॒ज्ञः क॑ल्पते॒ यो वै दे॒वेभ्यः॑ प्रति॒प्रोच्य॑ य॒ज्ञेन॒ यज॑ते जु॒षन्ते᳚-ऽस्य दे॒वा ह॒व्यग्ं ह॒वि-र्नि॑रु॒प्यमा॑णम॒भि म॑न्त्रयेता॒-ऽग्निग्ं होता॑रमि॒ह तग्ं हु॑व॒ इति॑ [ ] 27

दे॒वेभ्य॑ ए॒व प्र॑ति॒प्रोच्य॑ य॒ज्ञेन॑ यजते जु॒षन्ते᳚-ऽस्य दे॒वा ह॒व्यमे॒ष वै य॒ज्ञस्य॒ ग्रहो॑ गृही॒त्वैव य॒ज्ञेन॑ यजते॒ तदु॑दि॒त्वा वाचं॑-यँच्छति य॒ज्ञस्य॒ धृत्या॒ अथो॒ मन॑सा॒ वै प्र॒जाप॑ति-र्य॒ज्ञम॑तनुत॒ मन॑सै॒व त-द्य॒ज्ञ-न्त॑नुते॒ रक्ष॑सा॒-मन॑न्ववचाराय॒ यो वै य॒ज्ञं-योँग॒ आग॑ते यु॒नक्ति॑ यु॒ङ्क्ते यु॑ञ्जा॒नेषु॒ कस्त्वा॑ युनक्ति॒ स त्वा॑ युन॒क्त्वि-( ) -त्या॑ह प्र॒जाप॑ति॒-र्वै कः प्र॒जाप॑तिनै॒वैनं॑-युँनक्ति यु॒ङ्क्ते यु॑ञ्जा॒नेषु॑ ॥ 28 ॥

(वैम॒नः-स्फ्य-इति॑-युन॒क्त्वे-का॑दश च) (अ. 8)

प्र॒जाप॑ति-र्य॒ज्ञान॑सृजता-ग्निहो॒त्र-ञ्चा᳚ग्निष्टो॒म-ञ्च॑ पौर्णमा॒सी-ञ्चो॒क्थ्य॑-ञ्चामावा॒स्या᳚-ञ्चातिरा॒त्र-ञ्च॒ तानुद॑मिमीत॒ याव॑दग्निहो॒त्र-मासी॒-त्तावा॑नग्निष्टो॒मो याव॑ती पौर्णमा॒सी तावा॑नु॒क्थ्यो॑ याव॑त्यमावा॒स्या॑ तावा॑नतिरा॒त्रो य ए॒वं-विँ॒द्वान॑ग्निहो॒त्र-ञ्जु॒होति॒ याव॑दग्निष्टो॒मेनो॑ पा॒प्नोति॒ ताव॒दुपा᳚-ऽऽप्नोति॒ य ए॒वं-विँ॒द्वा-न्पौ᳚र्णमा॒सीं-यँज॑ते॒ याव॑दु॒क्थ्ये॑नोपा॒प्नोति॒ [याव॑दु॒क्थ्ये॑नोपा॒प्नोति॑, ताव॒दुपा᳚-ऽऽप्नोति॒] 29

ताव॒दुपा᳚-ऽऽप्नोति॒ य ए॒वं-विँ॒द्वान॑मावा॒स्यां᳚-यँज॑ते॒ याव॑दतिरा॒त्रेणो॑पा॒प्नोति॒ ताव॒दुपा᳚-ऽऽप्नोति परमे॒ष्ठिनो॒ वा ए॒ष य॒ज्ञो-ऽग्र॑ आसी॒-त्तेन॒ स प॑र॒मा-ङ्काष्ठा॑मगच्छ॒-त्तेन॑ प्र॒जाप॑ति-न्नि॒रवा॑सायय॒-त्तेन॑ प्र॒जाप॑तिः पर॒मा-ङ्काष्ठा॑मगच्छ॒-त्तेनेन्द्र॑-न्नि॒रवा॑सायय॒-त्तेनेन्द्रः॑ पर॒मा-ङ्काष्ठा॑मगच्छ॒-त्तेना॒-ऽग्नीषोमौ॑ नि॒रवा॑सायय॒-त्तेना॒ग्नीषोमौ॑ प॒रमा-ङ्काष्ठा॑मगच्छतां॒-यँ [काष्ठा॑मगच्छतां॒-यः, ँए॒वं-विँ॒द्वा-न्द॑र्शपूर्णमा॒सौ] 30

ए॒वं-विँ॒द्वा-न्द॑र्शपूर्णमा॒सौ यज॑ते पर॒मामे॒व काष्ठा᳚-ङ्गच्छति॒ यो वै प्रजा॑तेन य॒ज्ञेन॒ यज॑ते॒ प्र प्र॒जया॑ प॒शुभि॑-र्मिथु॒नै-र्जा॑यते॒ द्वाद॑श॒ मासा᳚-स्संवँथ्स॒रो द्वाद॑श द्व॒न्द्वानि॑ दर्शपूर्णमा॒सयो॒स्तानि॑ स॒म्पाद्या॒नीत्या॑हु-र्व॒थ्स-ञ्चो॑पावसृ॒जत्यु॒खा-ञ्चाधि॑ श्रय॒त्यव॑ च॒ हन्ति॑ दृ॒षदौ॑ च स॒माह॒न्त्यधि॑ च॒ वप॑ते क॒पाला॑नि॒ चोप॑ दधाति पुरो॒डाश॑-ञ्चा- [पुरो॒डाश॑-ञ्च, अ॒धि॒श्रय॒त्याज्य॑-ञ्च] 31

-ऽधि॒श्रय॒त्याज्य॑-ञ्च स्तम्बय॒जुश्च॒ हर॑त्य॒भि च॑ गृह्णाति॒ वेदि॑-ञ्च परि गृ॒ह्णाति॒ पत्नी᳚-ञ्च॒ सन्न॑ह्यति॒ प्रोक्ष॑णीश्चा ऽऽसा॒दय॒त्याज्य॑-ञ्चै॒तानि॒ वै द्वाद॑श द्व॒न्द्वानि॑ दर्शपूर्णमा॒सयो॒स्तानि॒ य ए॒वग्ं स॒म्पाद्य॒ यज॑ते॒ प्रजा॑तेनै॒व य॒ज्ञेन॑ यजते॒ प्र प्र॒जया॑ प॒शुभि॑-र्मिथु॒नै-र्जा॑यते ॥ 32 ॥

(उ॒क्थ्ये॑नोपा॒प्नोत्य॑-गच्छतां॒-यः ँ- पु॑रो॒डाशं॑-चत्वारि॒ग्ं॒शच्च॑) (अ. 9)

ध्रु॒वो॑-ऽसि ध्रु॒वो॑-ऽहग्ं स॑जा॒तेषु॑ भूयास॒मित्या॑ह ध्रु॒वाने॒वैना᳚न् कुरुत उ॒ग्रो᳚-ऽस्यु॒ग्रो॑-ऽहग्ं स॑जा॒तेषु॑ भूयास॒-मित्या॒हाप्र॑तिवादिन ए॒वैना᳚न् कुरुते-ऽभि॒भूर॑स्यभि॒भूर॒हग्ं स॑जा॒तेषु॑ भूयास॒मित्या॑ह॒ य ए॒वैन॑-म्प्रत्यु॒त्पिपी॑ते॒ तमुपा᳚स्यते यु॒नज्मि॑ त्वा॒ ब्रह्म॑णा॒ दैव्ये॒नेत्या॑है॒ष वाअ॒ग्नेर्योग॒स्तेनै॒ - [वाअ॒ग्नेर्योग॒स्तेन॑, ए॒वैनं॑-युँनक्ति] 33

वैनं॑-युँनक्ति य॒ज्ञस्य॒ वै समृ॑द्धेन दे॒वा-स्सु॑व॒र्गं-लोँ॒कमा॑यन्. य॒ज्ञस्य॒ व्यृ॑द्धे॒नासु॑रा॒-न्परा॑भावय॒न्. यन्मे॑ अग्ने अ॒स्य य॒ज्ञस्य॒ रिष्या॒दित्या॑ह य॒ज्ञस्यै॒व तथ्समृ॑द्धेन॒ यज॑मान-स्सुव॒र्गं-लोँ॒कमे॑ति य॒ज्ञस्य॒ व्यृ॑द्धेन॒ भ्रातृ॑व्या॒-न्परा॑ भावयत्यग्निहो॒त्र-मे॒ताभि॒-र्व्याहृ॑तीभि॒रुप॑ सादयेद्यज्ञमु॒खं-वाँ अ॑ग्निहो॒त्र-म्ब्रह्मै॒ता व्याहृ॑तयो यज्ञमु॒ख ए॒व ब्रह्म॑ - [ब्रह्म॑, कु॒रु॒ते॒ सं॒वँ॒थ्स॒रे] 34

कुरुते संवँथ्स॒रे प॒र्याग॑त ए॒ताभि॑रे॒वोप॑ सादये॒-द्ब्रह्म॑णै॒वोभ॒यतः॑ संवँथ्स॒र-म्परि॑ गृह्णाति दर्शपूर्णमा॒सौ चा॑तुर्मा॒स्यान्या॒लभ॑मान ए॒ताभि॒-र्व्याहृ॑तीभिर्-ह॒वीग्ष्यासा॑दये-द्यज्ञमु॒खं-वैँ द॑र्शपूर्णमा॒सौ चा॑तुर्मा॒स्यानि॒ ब्रह्मै॒ता व्याहृ॑तयो यज्ञमु॒ख ए॒व ब्रह्म॑ कुरुते संवँथ्स॒रे प॒र्याग॑त ए॒ताभि॑रे॒वासा॑दये॒-द्ब्रह्म॑णै॒वोभ॒यतः॑ संवँथ्स॒र-म्परि॑गृह्णाति॒ यद्वै य॒ज्ञस्य॒ साम्ना᳚ क्रि॒यते॑ रा॒ष्ट्रं- [रा॒ष्ट्रम्, य॒ज्ञस्या॒-शीर्ग॑च्छति॒] 35

-ँय॒ज्ञस्या॒-शीर्ग॑च्छति॒ यदृ॒चा विशं॑-यँ॒ज्ञस्या॒- शीर्ग॑च्छ॒त्यथ॑ ब्राह्म॒णो॑-ऽना॒शीर्के॑ण य॒ज्ञेन॑ यजते सामिधे॒नी-र॑नुव॒क्ष्यन्ने॒ता व्याहृ॑तीः पु॒रस्ता᳚द्दद्ध्या॒-द्ब्रह्मै॒व प्र॑ति॒पद॑-ङ्कुरुते॒ तथा᳚ ब्राह्म॒ण-स्साशी᳚र्केण य॒ज्ञेन॑ यजते॒ य-ङ्का॒मये॑त॒ यज॑मान॒-म्भ्रातृ॑व्यमस्य य॒ज्ञस्या॒शीर्ग॑च्छे॒दिति॒ तस्यै॒ता व्याहृ॑तीः पुरोनुवा॒क्या॑या-न्दद्ध्या-द्भ्रातृव्यदेव॒त्या॑ वै पु॑रोनुवा॒क्या᳚ भ्रातृ॑व्यमे॒वास्य॑ य॒ज्ञस्या॒-[य॒ज्ञस्या॑, आ॒शीर्ग॑च्छति॒] 36

-ऽऽशीर्ग॑च्छति॒ यान् का॒मये॑त॒ यज॑मानान्-थ्स॒माव॑त्येनान् य॒ज्ञस्या॒ ऽऽशीर्ग॑च्छे॒दिति॒ तेषा॑मे॒ता व्याहृ॑तीः पुरोनुवा॒क्या॑या अर्ध॒र्च एका᳚-न्दद्ध्या-द्या॒ज्या॑यै पु॒रस्ता॒देकां᳚-याँ॒ज्या॑या अर्ध॒र्च एका॒-न्तथै॑नान्-थ्स॒माव॑ती य॒ज्ञस्या॒ ऽऽशीर्ग॑च्छति॒ यथा॒ वै प॒र्जन्य॒-स्सुवृ॑ष्टं॒-वँर्ष॑त्ये॒वं-यँ॒ज्ञो यज॑मानाय वर्षति॒ स्थल॑योद॒क-म्प॑रिगृ॒ह्णन्त्या॒शिषा॑ य॒ज्ञं-यँज॑मानः॒ परि॑ गृह्णाति॒ मनो॑-ऽसि प्राजाप॒त्यं- [प्राजाप॒त्यम्, मन॑सा] 37

-मन॑सा मा भू॒तेना-ऽऽवि॒शेत्या॑ह॒ मनो॒ वै प्रा॑जाप॒त्य-म्प्रा॑जाप॒त्यो य॒ज्ञो मन॑ ए॒व य॒ज्ञमा॒त्म-न्ध॑त्ते॒ वाग॑स्यै॒न्द्री स॑पत्न॒क्षय॑णी वा॒चा मे᳚न्द्रि॒येणा-ऽऽवि॒शेत्या॑है॒न्द्री वै वाग्वाच॑-मे॒वैन्द्री- मा॒त्म-न्ध॑त्ते ॥ 38 ॥

(तेनै॒-व ब्रह्म॑- रा॒ष्ट्रमे॒-वास्य॑ य॒ज्ञस्य॑-प्राजाप॒त्यग्ं-षट्त्रिग्ं॑शच्च) (अ. 10)

यो वै स॑प्तद॒श-म्प्र॒जाप॑तिं-यँ॒ज्ञम॒न्वाय॑त्तं॒-वेँद॒ प्रति॑ य॒ज्ञेन॑ तिष्ठति॒ न य॒ज्ञा-द्भ्रग्ं॑शत॒ आ श्रा॑व॒येति॒ चतु॑रक्षर॒मस्तु॒ श्रौष॒डिति॒ चतु॑रक्षरं॒-यँजेति॒ द्व्य॑क्षरं॒-येँ यजा॑मह॒ इति॒ पञ्चा᳚क्षर-न्द्व्यक्ष॒रो व॑षट्का॒र ए॒ष वै स॑प्तद॒शः प्र॒जाप॑ति-र्य॒ज्ञम॒न्वाय॑त्तो॒ य ए॒वं-वेँद॒ प्रति॑ य॒ज्ञेन॑ तिष्ठति॒ न य॒ज्ञाद्- भ्रग्ं॑शते॒ यो वै य॒ज्ञस्य॒ प्राय॑ण-म्प्रति॒ष्ठा- [प्रति॒ष्ठाम्, उ॒दय॑नं॒-वेँद॒] 39

मु॒दय॑नं॒-वेँद॒ प्रति॑ष्ठिते॒नारि॑ष्टेन य॒ज्ञेन॑ स॒ग्ग्॒स्था-ङ्ग॑च्छ॒त्याश्रा॑व॒यास्तु॒ श्रौष॒ड्यज॒ ये यजा॑महे वषट्का॒र ए॒तद्वै य॒ज्ञस्य॒ प्राय॑णमे॒षा प्र॑ति॒ष्ठैतदु॒दय॑नं॒-यँ ए॒वं-वेँद॒ प्रति॑ष्ठिते॒ना-ऽरि॑ष्टेन य॒ज्ञेन॑ स॒ग्ग्॒स्था-ङ्ग॑च्छति॒ यो वै सू॒नृता॑यै॒ दोहं॒-वेँद॑ दु॒ह ए॒वैनां᳚-यँ॒ज्ञो वै सू॒नृता ऽऽ श्रा॑व॒येत्यैवैना॑-मह्व॒दस्तु॒ [-मह्व॒दस्तु॑, श्रौष॒डित्यु॒पावा᳚स्रा॒-] 40

श्रौष॒डित्यु॒पावा᳚स्रा॒-ग्यजेत्युद॑नैषी॒द्ये यजा॑मह॒ इत्युपा॑-ऽसद-द्वषट्का॒रेण॑ दोग्द्ध्ये॒ष वै सू॒नृता॑यै॒ दोहो॒ य ए॒वं-वेँद॑ दु॒ह ए॒वैना᳚-न्दे॒वा वै स॒त्रमा॑सत॒ तेषा॒-न्दिशो॑-ऽदस्य॒न्त ए॒तामा॒र्द्रा-म्प॒ङ्क्तिम॑पश्य॒न्ना श्रा॑व॒येति॑ पुरोवा॒त-म॑जनय॒न्नस्तु॒ श्रौष॒डित्य॒भ्रग्ं सम॑प्लावय॒न्॒. यजेति॑ वि॒द्युत॑- [वि॒द्युत॑म्, अ॒ज॒न॒य॒न्॒ ये] 41

मजनय॒न्॒ ये यजा॑मह॒ इति॒ प्राव॑र्षयन्न॒भ्य॑स्तनयन् वषट्का॒रेण॒ ततो॒ वै तेभ्यो॒ दिशः॒ प्राप्या॑यन्त॒ य ए॒वं-वेँद॒ प्रास्मै॒ दिशः॑ प्यायन्ते प्र॒जाप॑ति-न्त्वो॒वेद॑ प्र॒जाप॑ति स्त्वंवेँद॒ य-म्प्र॒जाप॑ति॒-र्वेद॒ स पुण्यो॑ भवत्ये॒ष वै छ॑न्द॒स्यः॑ प्र॒जाप॑ति॒रा श्रा॑व॒या-ऽस्तु॒ श्रौष॒ड्यज॒ ये यजा॑महे वषट्का॒रो य ए॒वं-वेँद॒ पुण्यो॑ भवति वस॒न्त- [वस॒न्तम्, ऋ॒तू॒नां] 42

-मृ॑तू॒ना-म्प्री॑णा॒मीत्या॑ह॒र्तवो॒ वै प्र॑या॒जा ऋ॒तूने॒व प्री॑णाति॒ ते᳚-ऽस्मै प्री॒ता य॑थापू॒र्व-ङ्क॑ल्पन्ते॒ कल्प॑न्ते-ऽस्मा ऋ॒तवो॒ य ए॒वं-वेँदा॒ग्नीषोम॑योर॒ह-न्दे॑वय॒ज्यया॒ चक्षु॑ष्मा-न्भूयास॒मित्या॑-हा॒ग्नीषोमा᳚भ्यां॒-वैँ य॒ज्ञश्चक्षु॑ष्मा॒-न्ताभ्या॑मे॒व चक्षु॑रा॒त्म-न्ध॑त्ते॒ ऽग्नेर॒ह-न्दे॑वय॒ज्यया᳚-ऽन्ना॒दो भू॑यास॒मित्या॑हा॒ग्निर्वै दे॒वाना॑-मन्ना॒दस्ते नै॒वा- [मन्ना॒दस्ते नै॒वा, अ॒न्नाद्य॑मा॒त्मन्] 43

-ऽन्नाद्य॑मा॒त्म-न्ध॑त्ते॒ दब्धि॑र॒स्यद॑ब्धो भूयासम॒मु-न्द॑भेय॒मित्या॑है॒तया॒ वै दब्द्ध्या॑ दे॒वा असु॑रानदभ्नुव॒न्तयै॒व भ्रातृ॑व्य-न्दभ्नोत्य॒ग्नीषोम॑योर॒ह-न्दे॑वय॒ज्यया॑ वृत्र॒हा भू॑यास॒मित्या॑हा॒-ऽग्नीषोमा᳚भ्यां॒-वाँ इन्द्रो॑ वृ॒त्रम॑ह॒न्ताभ्या॑मे॒व भ्रातृ॑व्यग्ग् स्तृणुत इन्द्राग्नि॒योर॒ह-न्दे॑वय॒ज्यये᳚न्द्रिया॒व्य॑न्ना॒दो भू॑यास॒मित्या॑हेन्द्रिया॒व्ये॑वान्ना॒दो भ॑व॒तीन्द्र॑स्या॒- [भ॑व॒तीन्द्र॑स्य, अ॒ह-न्दे॑वय॒ज्यये᳚न्द्रिया॒वी] 44

-ऽह-न्दे॑वय॒ज्यये᳚न्द्रिया॒वी भू॑यास॒मित्या॑हेन्द्रिया॒व्ये॑व भ॑वति महे॒न्द्रस्या॒-ऽह-न्दे॑वय॒ज्यया॑ जे॒मान॑-म्महि॒मान॑-ङ्गमेय॒मित्या॑ह जे॒मान॑मे॒व म॑हि॒मान॑-ङ्गच्छत्य॒ग्ने-स्स्वि॑ष्ट॒कृतो॒-ऽह-न्दे॑वय॒ज्यया ऽऽयु॑ष्मान्. य॒ज्ञेन॑ प्रति॒ष्ठा-ङ्ग॑मेय॒मित्या॒-हायु॑रे॒वात्म-न्ध॑त्ते॒ प्रति॑ य॒ज्ञेन॑ -तिष्ठति ॥ 45 ॥

( प्र॒ति॒ष्ठा-म॑ह्व॒दस्तु॑-वि॒द्युतं॑वँस॒न्तन्-तेनै॒वे-न्द्र॑स्या॒-ऽष्टात्रिग्ं॑शच्च) (अ. 11)

इन्द्रं॑-वोँ वि॒श्वत॒स्परि॒ हवा॑महे॒ जने᳚भ्यः । अ॒स्माक॑मस्तु॒ केव॑लः ॥ इन्द्र॒-न्नरो॑ ने॒मधि॑ता हवन्ते॒ यत्पार्या॑ यु॒नज॑ते॒ धिय॒स्ताः । शूरो॒ नृषा॑ता॒ शव॑सश्चका॒न आ गोम॑ति व्र॒जे भ॑जा॒ त्वन्नः॑ ॥ इ॒न्द्रि॒याणि॑ शतक्रतो॒ या ते॒ जने॑षु प॒ञ्चसु॑ ॥ इन्द्र॒ तानि॑ त॒ आ वृ॑णे ॥ अनु॑ ते दायि म॒ह इ॑न्द्रि॒याय॑ स॒त्रा ते॒ विश्व॒मनु॑ वृत्र॒हत्ये᳚ । अनु॑ [ ] 46

क्ष॒त्रमनु॒ सहो॑ यज॒त्रेन्द्र॑ दे॒वेभि॒रनु॑ ते नृ॒षह्ये᳚ ॥ आयस्मि᳚न्-थ्स॒प्तवा॑स॒वा स्तिष्ठ॑न्ति स्वा॒रुहो॑ यथा । ऋषि॑र्ह दीर्घ॒श्रुत्त॑म॒ इन्द्र॑स्य घ॒र्मो अति॑थिः ॥ आ॒मासु॑ प॒क्वमैर॑य॒ आ सूर्यग्ं॑ रोहयो दि॒वि । घ॒र्म-न्न साम॑-न्तपता सुवृ॒क्तिभि॒-र्जुष्ट॒-ङ्गिर्व॑णसे॒ गिरः॑ ॥ इन्द्र॒मि-द्गा॒थिनो॑ बृ॒हदिन्द्र॑-म॒र्केभि॑-र॒र्किणः॑ । इन्द्रं॒-वाँणी॑रनूषत ॥ गाय॑न्ति त्वा गाय॒त्रिणो- [गाय॒त्रिणः॑, अर्च॑न्त्य॒र्क-म॒र्किणः॑ ।] 47

-ऽर्च॑न्त्य॒र्क-म॒र्किणः॑ । ब्र॒ह्माण॑स्त्वा शतक्रत॒वु-द्व॒ग्ं॒श-मि॑व येमिरे ॥ अ॒ग्ं॒हो॒मुचे॒ प्र भ॑रेमा मनी॒षामो॑षिष्ठ॒दावंने॑ सुम॒ति-ङ्गृ॑णा॒नाः । इ॒दमि॑न्द्र॒ प्रति॑ ह॒व्य-ङ्गृ॑भाय स॒त्या-स्स॑न्तु॒ यज॑मानस्य॒ कामाः᳚ ॥ वि॒वेष॒ यन्मा॑ धि॒षणा॑ ज॒जान॒ स्तवै॑ पु॒रा पार्या॒दिन्द्र॒-मह्नः॑ । अग्ंह॑सो॒ यत्र॑ पी॒पर॒द्यथा॑ नो ना॒वेव॒ यान्त॑ मु॒भये॑ हवन्ते ॥ प्र स॒म्राज॑-म्प्रथ॒म-म॑द्ध्व॒राणा॑- [म॑द्ध्व॒राणा᳚म्, अ॒ग्ं॒हो॒मुचं॑] 48

-मग्ंहो॒मुचं॑-वृँष॒भं-यँ॒ज्ञिया॑नाम् । अ॒पा-न्नपा॑तमश्विना॒ हय॑न्त-म॒स्मिन्न॑र इन्द्रि॒य-न्ध॑त्त॒मोजः॑ ॥ वि न॑ इन्द्र॒ मृधो॑ जहि नी॒चा य॑च्छ पृतन्य॒तः । अ॒ध॒स्प॒द-न्तमी᳚-ङ्कृधि॒ यो अ॒स्माग्ं अ॑भि॒दास॑ति ॥ इन्द्र॑ क्ष॒त्रम॒भि वा॒ममोजो ऽजा॑यथा वृषभ चर्षणी॒नाम् । अपा॑नुदो॒ जन॑-ममित्र॒यन्त॑-मु॒रु-न्दे॒वेभ्यो॑ अकृणो-रु लो॒कम् ॥ मृ॒गो न भी॒मः कु॑च॒रो गि॑रि॒ष्ठाः प॑रा॒वत [प॑रा॒वतः॑, आ ज॑गामा॒ पर॑स्याः ।] 49

आ ज॑गामा॒ पर॑स्याः । सृ॒कग्ं स॒ग्ं॒शाय॑ प॒विमि॑न्द्र ति॒ग्मं-विँ शत्रू᳚-न्ताढि॒ विमृधो॑ नुदस्व ॥ वि शत्रू॒न्॒. वि मृधो॑ नुद॒ विवृ॒त्रस्य॒ हनू॑ रुज । वि म॒न्युमि॑न्द्र भामि॒तो॑-ऽमित्र॑स्या-ऽभि॒दास॑तः ॥ त्रा॒तार॒-मिन्द्र॑-मवि॒तार॒-मिन्द्र॒ग्ं॒ हवे॑हवे सु॒हव॒ग्ं॒ शूर॒मिन्द्र᳚म् । हु॒वे नु श॒क्र-म्पु॑रुहू॒तमिन्द्रग्ग्॑ स्व॒स्ति नो॑ म॒घवा॑ धा॒त्विन्द्रः॑ ॥ मा ते॑ अ॒स्याग्ं [अ॒स्याग्ं, स॒ह॒सा॒व॒-न्परि॑ष्टाव॒घाय॑] 50

स॑हसाव॒-न्परि॑ष्टाव॒घाय॑ भूम हरिवः परा॒दै । त्राय॑स्व नो ऽवृ॒केभि॒-र्वरू॑थै॒-स्तव॑ प्रि॒यासः॑ सू॒रिषु॑ स्याम ॥ अन॑वस्ते॒ रथ॒मश्वा॑य तक्ष॒-न्त्वष्टा॒ वज्र॑-म्पुरुहूत द्यु॒मन्त᳚म् । ब्र॒ह्माण॒ इन्द्र॑-म्म॒हय॑न्तो अ॒र्कैरव॑र्धय॒न्नह॑ये॒ हन्त॒वा उ॑ ॥ वृष्णे॒ य-त्ते॒ वृष॑णो अ॒र्कमर्चा॒निन्द्र॒ ग्रावा॑णो॒ अदि॑ति-स्स॒जोषाः᳚ । अ॒न॒श्वासो॒ ये प॒वयो॑-ऽर॒था इन्द्रे॑षिता अ॒भ्यव॑र्त न्त॒ दस्यून्॑ ॥ 51 ॥

(वृ॒त्र॒हत्ये-ऽनु॑-गाय॒त्रिणो᳚-ऽद्ध॒राणां᳚-परा॒वतो॒-ऽस्या-म॒ष्टाच॑त्वारिग्ंशच्च) (अ. 12)

(सन्त्वा॑ सिञ्चामि-ध्रु॒वो᳚-ऽस्य॒ग्निर्मा॑-ब॒र्॒हिषो॒-ऽह-मा प्या॑यता॒-मग॑न्म॒-यथा॒ वै-यो वै श्र॒द्धां- प्र॒जाप॑ति॒-र्यज्ञान्-ध्रु॒वो॑-ऽसीत्या॑ह॒-यो वै स॑प्तद॒श-मिन्द्रं॑-वोँ॒-द्वाद॑श । )

(सन्त्वा॑-ब॒र्॒हिषो॒-ऽहंयँथा॒ वा-ए॒वं-विँ॒द्वा-ञ्छ्रौष॑ट्-थ्साहसाव॒-न्नेक॑पञ्चा॒शत् ।)

(सन्त्वा॑, सिञ्चामि॒ दस्यून्॑)

॥ हरिः॑ ओम् ॥

॥ कृष्ण यजुर्वेदीय तैत्तिरीय संहिताया-म्प्रथमकाण्डे षष्ठः प्रश्न-स्समाप्तः ॥