க்ரு'ஷ்ண யஜுர்வேதீய தைத்திரீய ஸம்ஹிதாயா-ம்ப்ரதமகாண்டே ஷஷ்டஃ ப்ரஶ்நஃ - யாஜமாநகாண்டம்
ஓ-ந்நமஃ பரமாத்மநே, ஶ்ரீ மஹாகணபதயே நமஃ,
ஶ்ரீ குருப்யோ நமஃ । ஹ॒ரிஃ॒ ஓம் ॥
ஸ-ந்த்வா॑ ஸிஞ்சாமி॒ யஜு॑ஷா ப்ர॒ஜாமாயு॒ர்தந॑-ஞ்ச । ப்ரு'ஹ॒ஸ்பதி॑ப்ரஸூதோ॒ யஜ॑மாந இ॒ஹ மா ரி॑ஷத் ॥ ஆஜ்ய॑மஸி ஸ॒த்யம॑ஸி ஸ॒த்யஸ்யாத்த்ய॑க்ஷமஸி ஹ॒விர॑ஸி வைஶ்வாந॒ரம்-வைँ᳚ஶ்வதே॒வ-முத்பூ॑தஶுஷ்மக்ம் ஸ॒த்யௌஜா॒-ஸ்ஸஹோ॑-ऽஸி॒ ஸஹ॑மாநமஸி॒ ஸஹ॒ஸ்வாரா॑தீ॒-ஸ்ஸஹ॑ஸ்வாராதீய॒த-ஸ்ஸஹ॑ஸ்வ॒ ப்ரு'த॑நா॒-ஸ்ஸஹ॑ஸ்வ ப்ரு'தந்ய॒தஃ । ஸ॒ஹஸ்ர॑வீர்யமஸி॒ தந்மா॑ ஜி॒ந்வாஜ்ய॒ஸ்யாஜ்ய॑மஸி ஸ॒த்யஸ்ய॑ ஸ॒த்யம॑ஸி ஸ॒த்யாயு॑- [ஸ॒த்யாயுஃ॑, அ॒ஸி॒ ஸ॒த்யஶு॑ஷ்மமஸி] 1
-ரஸி ஸ॒த்யஶு॑ஷ்மமஸி ஸ॒த்யேந॑ த்வா॒-ऽபி கா॑ரயாமி॒ தஸ்ய॑ தே பக்ஷீய பஞ்சா॒நா-ந்த்வா॒ வாதா॑நாம்-யँ॒ந்த்ராய॑ த॒ர்த்ராய॑ க்ரு'ஹ்ணாமி பஞ்சா॒நா-ந்த்வ॑ர்தூ॒நாம்-யँ॒ந்த்ராய॑ த॒ர்த்ராய॑ க்ரு'ஹ்ணாமி பஞ்சா॒நா-ந்த்வா॑ தி॒ஶாம்-யँ॒ந்த்ராய॑ த॒ர்த்ராய॑ க்ரு'ஹ்ணாமி பஞ்சா॒நா-ந்த்வா॑ பஞ்சஜ॒நாநாம்᳚-யँ॒ந்த்ராய॑ த॒ர்த்ராய॑ க்ரு'ஹ்ணாமி ச॒ரோஸ்த்வா॒ பஞ்ச॑பிலஸ்ய ய॒ந்த்ராய॑ த॒ர்த்ராய॑ க்ரு'ஹ்ணாமி॒ ப்ரஹ்ம॑ணஸ்த்வா॒ தேஜ॑ஸே ய॒ந்த்ராய॑ த॒ர்த்ராய॑ க்ரு'ஹ்ணாமி க்ஷ॒த்ரஸ்ய॒ த்வௌஜ॑ஸே ய॒ந்த்ராய॑ [ ] 2
த॒ர்த்ராய॑ க்ரு'ஹ்ணாமி வி॒ஶே த்வா॑ ய॒ந்த்ராய॑ த॒ர்த்ராய॑ க்ரு'ஹ்ணாமி ஸு॒வீர்யா॑ய த்வா க்ரு'ஹ்ணாமி ஸுப்ரஜா॒ஸ்த்வாய॑ த்வா க்ரு'ஹ்ணாமி ரா॒யஸ்போஷா॑ய த்வா க்ரு'ஹ்ணாமி ப்ரஹ்மவர்ச॒ஸாய॑ த்வா க்ரு'ஹ்ணாமி॒ பூர॒ஸ்மாகக்ம்॑ ஹ॒விர்தே॒வாநா॑-மா॒ஶிஷோ॒ யஜ॑மாநஸ்ய தே॒வாநா᳚-ந்த்வா தே॒வதா᳚ப்யோ க்ரு'ஹ்ணாமி॒ காமா॑ய த்வா க்ரு'ஹ்ணாமி ॥ 3 ॥
(ஸ॒த்யாயு॒-ரோஜ॑ஸே ய॒ந்த்ராய॒-த்ரய॑ஸ்த்ரிக்ம்ஶச்ச) (அ. 1)
த்ரு॒வோ॑-ऽஸி த்ரு॒வோ॑-ऽஹக்ம் ஸ॑ஜா॒தேஷு॑ பூயாஸ॒-ந்தீர॒ஶ்சேத்தா॑ வஸு॒விது॒க்ரோ᳚-ऽஸ்யு॒க்ரோ॑-ऽஹக்ம் ஸ॑ஜா॒தேஷு॑ பூயாஸ-மு॒க்ரஶ்சேத்தா॑ வஸு॒வித॑பி॒-பூர॑ஸ்யபி॒பூர॒ஹக்ம் ஸ॑ஜா॒தேஷு॑ பூயாஸமபி॒பூஶ்சேத்தா॑ வஸு॒வி-த்யு॒நஜ்மி॑ த்வா॒ ப்ரஹ்ம॑ணா॒ தைவ்யே॑ந ஹ॒வ்யாயா॒ஸ்மை வோட॒வே ஜா॑தவேதஃ ॥ இந்தா॑நாஸ்த்வா ஸுப்ர॒ஜஸஃ॑ ஸு॒வீரா॒ ஜ்யோக்ஜீ॑வேம பலி॒ஹ்ரு'தோ॑ வ॒ய-ந்தே᳚ ॥ யந்மே॑ அக்நே அ॒ஸ்ய ய॒ஜ்ஞஸ்ய॒ ரிஷ்யா॒- [ரிஷ்யா᳚த், த்யத்வா॒] 4
-த்யத்வா॒ ஸ்கந்தா॒-தாஜ்ய॑ஸ்யோ॒த வி॑ஷ்ணோ । தேந॑ ஹந்மி ஸ॒பத்ந॑-ந்துர்மரா॒யுமைந॑-ந்ததாமி॒ நிர்-ரு'॑த்யா உ॒பஸ்தே᳚ । பூ-ர்புவ॒-ஸ்ஸுவ॒ருச்சு॑ஷ்மோ அக்நே॒ யஜ॑மாநாயைதி॒ நிஶு॑ஷ்மோ அபி॒தாஸ॑தே । அக்நே॒ தேவே᳚த்த॒ மந்வி॑த்த॒ மந்த்ர॑ஜி॒ஹ்வா-ம॑ர்த்யஸ்ய தே ஹோதர்மூ॒ர்தந்நா ஜி॑கர்மி ரா॒யஸ்போஷா॑ய ஸுப்ரஜா॒ஸ்த்வாய॑ ஸு॒வீர்யா॑ய॒ மநோ॑-ऽஸி ப்ராஜாப॒த்ய-ம்மந॑ஸா மா பூ॒தேநா வி॑ஶ॒ வாக॑ஸ்யை॒ந்த்ரீ ஸ॑பத்ந॒க்ஷய॑ணீ [ ] 5
வா॒சா மே᳚ந்த்ரி॒யேணா வி॑ஶ வஸ॒ந்தம்ரு'॑தூ॒நா-ம்ப்ரீ॑ணாமி॒ ஸ மா᳚ ப்ரீ॒தஃ ப்ரீ॑ணாது க்ரீ॒ஷ்மம்ரு'॑தூ॒நா-ம்ப்ரீ॑ணாமி॒ ஸ மா᳚ ப்ரீ॒தஃ ப்ரீ॑ணாது வ॒ர்॒ஷா ரு'॑தூ॒நா-ம்ப்ரீ॑ணாமி॒ தா மா᳚ ப்ரீ॒தாஃ ப்ரீ॑ணந்து ஶ॒ரத॑ம்ரு'தூ॒நா-ம்ப்ரீ॑ணாமி॒ ஸா மா᳚ ப்ரீ॒தா ப்ரீ॑ணாது ஹேமந்தஶிஶி॒ராவ்ரு'॑தூ॒நா-ம்ப்ரீ॑ணாமி॒ தௌ மா᳚ ப்ரீ॒தௌ ப்ரீ॑ணீதா-ம॒க்நீஷோம॑யோ-ர॒ஹ-ந்தே॑வய॒ஜ்யயா॒ சக்ஷு॑ஷ்மா-ந்பூயாஸம॒க்நேர॒ஹ-ந்தே॑வய॒ஜ்யயா᳚-ऽந்நா॒தோ பூ॑யாஸ॒- [பூ॑யாஸம், தப்தி॑ர॒ஸ்யத॑ப்தோ] 6
-ந்தப்தி॑ர॒ஸ்யத॑ப்தோ பூயாஸம॒மு-ந்த॑பேய-ம॒க்நீஷோம॑யோ-ர॒ஹ-ந்தே॑வய॒ஜ்யயா॑ வ்ரு'த்ர॒ஹா பூ॑யாஸமிந்த்ராக்நி॒யோர॒ஹ-ந்தே॑வய॒ஜ்யயே᳚ந்த்ரியா॒வ்ய॑ந்நா॒தோ பூ॑யாஸ॒மிந்த்ர॑ஸ்யா॒-ऽஹ-ந்தே॑வய॒ஜ்யயே᳚ந்த்ரியா॒வீ பூ॑யாஸ-ம்மஹே॒ந்த்ரஸ்யா॒-ऽஹ-ந்தே॑வய॒ஜ்யயா॑ ஜே॒மாந॑-ம்மஹி॒மாந॑-ங்கமேயம॒க்நே-ஸ்ஸ்வி॑ஷ்ட॒க்ரு'தோ॒-ऽஹ-ந்தே॑வய॒ஜ்யயா ऽऽயு॑ஷ்மாந். ய॒ஜ்ஞேந॑ ப்ரதி॒ஷ்டா-ங்க॑மேயம் ॥ 7 ॥
(ரிஷ்யா᳚-த்ஸபத்ந॒க்ஷய॑ண்ய-ந்நா॒தோ பூ॑யாஸ॒க்ம்॒-ஷட்த்ரிக்ம்॑ஶச்ச) (அ. 2)
அ॒க்நிர்மா॒ துரி॑ஷ்டா-த்பாது ஸவி॒தா-ऽகஶக்ம்॑ஸா॒த்யோ மே-ऽந்தி॑ தூ॒ரே॑-ऽராதீ॒யதி॒ தமே॒தேந॑ ஜேஷ॒க்ம்॒ ஸுரூ॑பவர்ஷவர்ண॒ ஏஹீ॒மா-ந்ப॒த்ரா-ந்துர்யாக்ம்॑ அ॒ப்யேஹி॒ மாமநு॑வ்ரதா॒ ந்யு॑ ஶீ॒ர்॒ஷாணி॑ ம்ரு'ட்வ॒மிட॒ ஏஹ்யதி॑த॒ ஏஹி॒ ஸர॑ஸ்வ॒த்யேஹி॒ ரந்தி॑ரஸி॒ ரம॑திரஸி ஸூ॒நர்ய॑ஸி॒ ஜுஷ்டே॒ ஜுஷ்டி॑-ந்தே-ऽஶீ॒யோப॑ஹூத உபஹ॒வ- [உபஹ॒வம், தே॒-ऽஶீ॒ய॒ ஸா ] 8
-ந்தே॑-ऽஶீய॒ ஸா மே॑ ஸ॒த்யா-ऽऽஶீர॒ஸ்ய ய॒ஜ்ஞஸ்ய॑ பூயா॒தரே॑டதா॒ மந॑ஸா॒ தச்ச॑கேயம்-யँ॒ஜ்ஞோ திவக்ம்॑ ரோஹது ய॒ஜ்ஞோ திவ॑-ங்கச்சது॒ யோ தே॑வ॒யாநஃ॒ பந்தா॒ஸ்தேந॑ ய॒ஜ்ஞோ தே॒வாக்ம் அப்யே᳚த்வ॒ஸ்மாஸ்விந்த்ர॑ இந்த்ரி॒ய-ந்த॑தாத்வ॒ஸ்மாந்ராய॑ உ॒த ய॒ஜ்ஞா-ஸ்ஸ॑சந்தாம॒ஸ்மாஸு॑ ஸந்த்வா॒ஶிஷ॒-ஸ்ஸா நஃ॑ ப்ரி॒யா ஸு॒ப்ரதூ᳚ர்திர்ம॒கோநீ॒ ஜுஷ்டி॑ரஸி ஜு॒ஷஸ்வ॑ நோ॒ ஜுஷ்டா॑ நோ- [ஜுஷ்டா॑ நஃ, அ॒ஸி॒ ஜுஷ்டி॑-ந்தே] 9
-ऽஸி॒ ஜுஷ்டி॑-ந்தே கமேய॒-ம்மநோ॒ ஜ்யோதி॑-ர்ஜுஷதா॒மாஜ்யம்॒-விँச்சி॑ந்நம்-யँ॒ஜ்ஞக்ம் ஸமி॒ம-ந்த॑தாது । ப்ரு'ஹ॒ஸ்பதி॑-ஸ்தநுதாமி॒மந்நோ॒ விஶ்வே॑ தே॒வா இ॒ஹ மா॑தயந்தாம் ॥ ப்ரத்த்ந॒ பிந்வ॑ஸ்வ॒ தத॑தோ மே॒ மா க்ஷா॑யி குர்வ॒தோ மே॒ மோப॑ தஸ-த்ப்ர॒ஜாப॑தே-ர்பா॒கோ᳚-ऽஸ்யூர்ஜ॑ஸ்வா॒-ந்பய॑ஸ்வா-ந்ப்ராணாபா॒நௌ மே॑ பாஹி ஸமாநவ்யா॒நௌ மே॑ பாஹ்யுதாநவ்யா॒நௌ மே॑ பா॒ஹ்யக்ஷி॑தோ॒-ऽஸ்யக்ஷி॑த்யை த்வா॒ மா மே᳚ க்ஷேஷ்டா அ॒முத்ரா॒முஷ்மி॑ந் ँலோ॒கே ॥ 10 ॥
(உ॒ப॒ஹ॒வம்-ஜுஷ்டா॑ந-ஸ்த்வா॒ ஷட் ச॑) (அ. 3)
ப॒ர்॒ஹிஷோ॒-ऽஹ-ந்தே॑வய॒ஜ்யயா᳚ ப்ர॒ஜாவா᳚-ந்பூயாஸ॒-ந்நரா॒ஶக்ம்ஸ॑ஸ்யா॒ஹ-ந்தே॑வய॒ஜ்யயா॑ பஶு॒மா-ந்பூ॑யாஸம॒க்நே-ஸ்ஸ்வி॑ஷ்ட॒க்ரு'தோ॒-ऽஹ-ந்தே॑வய॒ஜ்யயா-ऽऽயு॑ஷ்மாந். ய॒ஜ்ஞேந॑ ப்ரதி॒ஷ்டா-ங்க॑மேயம॒க்நேர॒ஹ-முஜ்ஜி॑தி॒-மநூஜ்ஜே॑ஷ॒க்ம்॒ ஸோம॑ஸ்யா॒ஹ - முஜ்ஜி॑தி॒-மநூஜ்ஜே॑ஷம॒க்நேர॒ஹ-முஜ்ஜி॑தி॒-மநூஜ்ஜே॑ஷ-ம॒க்நீஷோம॑யோர॒ஹ-முஜ்ஜி॑தி॒-மநூஜ்ஜே॑ஷ-மிந்த்ராக்நி॒யோர॒ஹ-முஜ்ஜி॑தி॒-மநூஜ்ஜே॑ஷ॒-மிந்த்ர॑ஸ்யா॒-ऽஹ- [-மிந்த்ர॑ஸ்யா॒-ऽஹம், உஜ்ஜி॑தி॒மநூஜ்ஜே॑ஷம்] 11
-முஜ்ஜி॑தி॒மநூஜ்ஜே॑ஷ-ம்மஹே॒ந்த்ரஸ்யா॒ஹமுஜ்ஜி॑தி॒- மநூஜ்ஜே॑ஷம॒க்நே-ஸ்ஸ்வி॑ஷ்ட॒க்ரு'தோ॒-ऽஹ முஜ்ஜி॑தி॒-மநூஜ்ஜே॑ஷம்॒-வாँஜ॑ஸ்ய மா ப்ரஸ॒வேநோ᳚-த்க்ரா॒பேணோத॑க்ரபீத் । அதா॑ ஸ॒பத்நா॒க்ம்॒ இந்த்ரோ॑ மே நிக்ரா॒பேணாத॑ராக்ம் அகஃ ॥ உ॒த்க்ரா॒ப-ஞ்ச॑ நிக்ரா॒ப-ஞ்ச॒ ப்ரஹ்ம॑ தே॒வா அ॑வீவ்ரு'தந்ந் । அதா॑ ஸ॒பத்நா॑நிந்த்ரா॒க்நீ மே॑ விஷூ॒சீநா॒ந் வ்ய॑ஸ்யதாம் ॥ ஏமா அ॑க்மந்நா॒ஶிஷோ॒ தோஹ॑காமா॒ இந்த்ர॑வந்தோ [இந்த்ர॑வந்தஃ, வ॒நா॒ம॒ஹே॒ து॒க்ஷீ॒மஹி॑] 12
வநாமஹே துக்ஷீ॒மஹி॑ ப்ர॒ஜாமிஷ᳚ம் ॥ ரோஹி॑தேந த்வா॒-ऽக்நி-ர்தே॒வதா᳚-ங்கமயது॒ ஹரி॑ப்யா॒-ந்த்வேந்த்ரோ॑ தே॒வதா᳚-ங்கமய॒த்வேத॑ஶேந த்வா॒ ஸூர்யோ॑ தே॒வதா᳚-ங்கமயது॒ வி தே॑ முஞ்சாமி ரஶ॒நா வி ர॒ஶ்மீந் வி யோக்த்ரா॒ யாநி॑ பரி॒சர்த॑நாநி த॒த்தாத॒ஸ்மாஸு॒ த்ரவி॑ணம்॒-யँச்ச॑ ப॒த்ர-ம்ப்ர ணோ᳚ ப்ரூதா-த்பாக॒தா-ந்தே॒வதா॑ஸு ॥ விஷ்ணோ᳚-ஶ்ஶம்॒யோँர॒ஹ-ந்தே॑வய॒ஜ்யயா॑ ய॒ஜ்ஞேந॑ ப்ரதி॒ஷ்டா-ங்க॑மேய॒க்ம்॒ ஸோம॑ஸ்யா॒ஹ-ந்தே॑வய॒ஜ்யயா॑ [தே॑வய॒ஜ்யயா᳚, ஸு॒ரேதா॒] 13
ஸு॒ரேதா॒ ரேதோ॑ திஷீய॒ த்வஷ்டு॑ர॒ஹ-ந்தே॑வய॒ஜ்யயா॑ பஶூ॒நாக்ம் ரூ॒ப-ம்பு॑ஷேய-ந்தே॒வாநா॒-ம்பத்நீ॑ர॒க்நி-ர்க்ரு'॒ஹப॑தி-ர்ய॒ஜ்ஞஸ்ய॑ மிது॒ந-ந்தயோ॑ர॒ஹ-ந்தே॑வய॒ஜ்யயா॑ மிது॒நேந॒ ப்ரபூ॑யாஸம்-வேँ॒தோ॑-ऽஸி॒ வித்தி॑ரஸி வி॒தேய॒ கர்மா॑-ऽஸி க॒ருண॑மஸி க்ரி॒யாஸக்ம்॑ ஸ॒நிர॑ஸி ஸநி॒தா-ऽஸி॑ ஸ॒நேய॑-ங்க்ரு'॒தவ॑ந்த-ங்குலா॒யிநக்ம்॑ ரா॒யஸ்போஷக்ம்॑ ஸஹ॒ஸ்ரிணம்॑-வேँ॒தோ த॑தாது வா॒ஜிந᳚ம் ॥ 14 ॥
(இந்த்ர॑ஸ்யா॒ஹ-மிந்த்ர॑வந்தஃ॒-ஸோம॑ஸ்யா॒ஹ-ந்தே॑வய॒ஜ்யயா॒-சது॑ஶ்சத்வாரிக்ம்ஶச்ச) (அ. 4)
ஆ ப்யா॑யதா-ந்த்ரு॒வா க்ரு'॒தேந॑ ய॒ஜ்ஞம்யँ॑ஜ்ஞ॒-ம்ப்ரதி॑ தேவ॒யத்ப்யஃ॑ । ஸூ॒ர்யாயா॒ ஊதோ-ऽதி॑த்யா உ॒பஸ்த॑ உ॒ருதா॑ரா ப்ரு'தி॒வீ ய॒ஜ்ஞே அ॒ஸ்மிந்ந் ॥ ப்ர॒ஜாப॑தே-ர்வி॒பாந்நாம॑ லோ॒கஸ்தஸ்மிக்க்॑ஸ்த்வா ததாமி ஸ॒ஹ யஜ॑மாநேந॒ ஸத॑ஸி॒ ஸந்மே॑ பூயா॒-ஸ்ஸர்வ॑மஸி॒ ஸர்வ॑-ம்மே பூயாஃ பூ॒ர்ணம॑ஸி பூ॒ர்ண-ம்மே॑ பூயா॒ அக்ஷி॑தமஸி॒ மா மே᳚ க்ஷேஷ்டாஃ॒ ப்ராச்யா᳚-ந்தி॒ஶி தே॒வா ரு'॒த்விஜோ॑ மார்ஜயந்தா॒-ந்தக்ஷி॑ணாயா- [தக்ஷி॑ணாயாம், தி॒ஶி] 15
ந்தி॒ஶி மாஸாஃ᳚ பி॒தரோ॑ மார்ஜயந்தா-ம்ப்ர॒தீச்யா᳚-ந்தி॒ஶி க்ரு'॒ஹாஃ ப॒ஶவோ॑ மார்ஜயந்தா॒முதீ᳚ச்யா-ந்தி॒ஶ்யாப॒ ஓஷ॑தயோ॒ வந॒ஸ்பத॑யோ மார்ஜயந்தாமூ॒ர்த்வாயா᳚-ந்தி॒ஶி ய॒ஜ்ஞ-ஸ்ஸம்॑வँத்ஸ॒ரோ ய॒ஜ்ஞப॑தி-ர்மார்ஜயந்தாம்॒-விँஷ்ணோஃ॒ க்ரமோ᳚-ऽஸ்யபிமாதி॒ஹா கா॑ய॒த்ரேண॒ சந்த॑ஸா ப்ரு'தி॒வீமநு॒ வி க்ர॑மே॒ நிர்ப॑க்த॒-ஸ்ஸ ய-ந்த்வி॒ஷ்மோ விஷ்ணோஃ॒ க்ரமோ᳚-ऽஸ்யபிஶஸ்தி॒ஹா த்ரைஷ்டு॑பேந॒ சந்த॑ஸா॒ ऽந்தரி॑க்ஷ॒மநு॒ வி க்ர॑மே॒ நிர்ப॑க்த॒-ஸ்ஸ ய-ந்த்வி॒ஷ்மோ விஷ்ணோஃ॒ க்ரமோ᳚-ऽஸ்யராதீய॒தோ ஹ॒ந்தா ஜாக॑தேந॒ சந்த॑ஸா॒ திவ॒மநு॒ வி க்ர॑மே॒ நிர்ப॑க்த॒-ஸ்ஸ ய-ந்த்வி॒ஷ்மோ விஷ்ணோஃ॒ க்ரமோ॑-ऽஸி ஶத்ரூய॒தோ ஹ॒ந்தா-ऽऽநு॑ஷ்டுபேந॒ சந்த॑ஸா॒ திஶோ-ऽநு॒ வி க்ர॑மே॒ நிர்ப॑க்த॒-ஸ்ஸ ய-ந்த்வி॒ஷ்மஃ ॥ 16 ॥
(தக்ஷி॑ணாயா - ம॒ந்தரி॑க்ஷ॒மநு॒ வி க்ர॑மே॒ நிர்ப॑க்த॒-ஸ்ஸ ய-ந்த்வி॒ஷ்மோ விஷ்ணோ॒- ரேகா॒ந்நத்ரி॒க்ம்॒ஶச்ச॑) (அ. 5)
அக॑ந்ம॒ ஸுவ॒-ஸ்ஸுவ॑ரகந்ம ஸ॒ந்த்ரு'ஶ॑ஸ்தே॒ மா சி॑த்ஸி॒ யத்தே॒ தப॒ஸ்தஸ்மை॑ தே॒ மா-ऽऽ வ்ரு'॑க்ஷி ஸு॒பூர॑ஸி॒ ஶ்ரேஷ்டோ॑ ரஶ்மீ॒நாமா॑யு॒ர்தா அ॒ஸ்யாயு॑ர்மே தேஹி வர்சோ॒தா அ॑ஸி॒ வர்சோ॒ மயி॑ தேஹீ॒தம॒ஹம॒மு-ம்ப்ராத்ரு'॑வ்யமா॒ப்யோ தி॒க்ப்யோ᳚-ऽஸ்யை தி॒வோ᳚-ऽஸ்மாத॒ந்தரி॑க்ஷாத॒ஸ்யை ப்ரு'॑தி॒வ்யா அ॒ஸ்மாத॒ந்நாத்யா॒ந்நிர்ப॑ஜாமி॒ நிர்ப॑க்த॒-ஸ்ஸ ய-ந்த்வி॒ஷ்மஃ ॥ 17 ॥
ஸ-ஞ்ஜ்யோதி॑ஷா-ऽபூவமை॒ந்த்ரீ-மா॒வ்ரு'த॑-ம॒ந்வாவ॑ர்தே॒ ஸம॒ஹ-ம்ப்ர॒ஜயா॒ ஸ-ம்மயா᳚ ப்ர॒ஜா ஸம॒ஹக்ம் ரா॒யஸ்போஷே॑ண॒ ஸ-ம்மயா॑ ரா॒யஸ்போஷ॒-ஸ்ஸமி॑த்தோ அக்நே மே தீதிஹி ஸமே॒த்தா தே॑ அக்நே தீத்யாஸம்॒-வँஸு॑மாந். ய॒ஜ்ஞோ வஸீ॑யா-ந்பூயாஸ॒மக்ந॒ ஆயூக்ம்॑ஷி பவஸ॒ ஆ ஸு॒வோர்ஜ॒மிஷ॑-ஞ்ச நஃ । ஆ॒ரே பா॑தஸ்வ து॒ச்சுநா᳚ம் ॥ அக்நே॒ பவ॑ஸ்வ॒ ஸ்வபா॑ அ॒ஸ்மே வர்சஃ॑ ஸு॒வீர்ய᳚ம் ॥ 18 ॥
தத॒த்போஷக்ம்॑ ர॒யி-ம்மயி॑ । அக்நே॑ க்ரு'ஹபதே ஸுக்ரு'ஹப॒திர॒ஹ-ந்த்வயா॑ க்ரு'॒ஹப॑திநா பூயாஸக்ம் ஸுக்ரு'ஹப॒திர்மயா॒ த்வ-ங்க்ரு'॒ஹப॑திநா பூயா-ஶ்ஶ॒தக்ம் ஹிமா॒ஸ்தாமா॒ஶிஷ॒மா ஶா॑ஸே॒ தந்த॑வே॒ ஜ்யோதி॑ஷ்மதீ॒-ந்தாமா॒ஶிஷ॒மா ஶா॑ஸே॒-ऽமுஷ்மை॒ ஜ்யோதி॑ஷ்மதீ॒-ங்கஸ்த்வா॑ யுநக்தி॒ ஸ த்வா॒ விமு॑ஞ்ச॒த்வக்நே᳚ வ்ரதபதே வ்ர॒தம॑சாரிஷ॒-ந்தத॑ஶக॒-ந்தந்மே॑-ऽராதி ய॒ஜ்ஞோ ப॑பூவ॒ ஸ ஆ [ஸ ஆ, ப॒பூ॒வ॒ ஸ] 19
ப॑பூவ॒ ஸ ப்ரஜ॑ஜ்ஞே॒ ஸ வா॑வ்ரு'தே । ஸ தே॒வாநா॒மதி॑பதி-ர்பபூவ॒ ஸோ அ॒ஸ்மாக்ம் அதி॑பதீந் கரோது வ॒யக்க் ஸ்யா॑ம॒ பத॑யோ ரயீ॒ணாம் ॥ கோமாக்ம்॑ அ॒க்நே-ऽவி॑மாக்ம் அ॒ஶ்வீ ய॒ஜ்ஞோ ந்ரு'॒வத்ஸ॑கா॒ ஸத॒மித॑ப்ரம்ரு'॒ஷ்யஃ ।இடா॑வாக்ம் ஏ॒ஷோ அ॑ஸுர ப்ர॒ஜாவா᳚-ந்தீ॒ர்கோ ர॒யிஃ ப்ரு'॑துபு॒த்த்ந-ஸ்ஸ॒பாவாந்॑ ॥ 20 ॥
(த்வி॒ஷ்மஃ-ஸு॒வீர்ய॒க்ம்॒-ஸ ஆ-பஞ்ச॑த்ரிக்ம்ஶச்ச) (அ. 6)
யதா॒ வை ஸ॑ம்ரு'தஸோ॒மா ஏ॒வம்-வாँ ஏ॒தே ஸ॑ம்ரு'தய॒ஜ்ஞா யத்த॑ர்ஶபூர்ணமா॒ஸௌ கஸ்ய॒ வா-ऽஹ॑ தே॒வா ய॒ஜ்ஞமா॒கச்ச॑ந்தி॒ கஸ்ய॑ வா॒ ந ப॑ஹூ॒நாம்-யँஜ॑மாநாநாம்॒-யோँ வை தே॒வதாஃ॒ பூர்வஃ॑ பரிக்ரு'॒ஹ்ணாதி॒ ஸ ஏ॑நா॒-ஶ்ஶ்வோ பூ॒தே ய॑ஜத ஏ॒தத்வை தே॒வாநா॑-மா॒யத॑நம்॒-யँதா॑ஹவ॒நீயோ᳚-ऽந்த॒ரா-ऽக்நீ ப॑ஶூ॒நா-ங்கார்ஹ॑பத்யோ மநு॒ஷ்யா॑ணா-மந்வாஹார்ய॒பச॑நஃ பித்ரு'॒ணாம॒க்நி-ங்க்ரு'॑ஹ்ணாதி॒ ஸ்வ ஏ॒வாயத॑நே தே॒வதாஃ॒ பரி॑ [தே॒வதாஃ॒ பரி॑, க்ரு'॒ஹ்ணா॒தி॒ தா-ஶ்ஶ்வோ] 21
க்ரு'ஹ்ணாதி॒ தா-ஶ்ஶ்வோ பூ॒தே ய॑ஜதே வ்ர॒தேந॒ வை மேத்த்யோ॒ -ऽக்நி-ர்வ்ர॒தப॑தி-ர்ப்ராஹ்ம॒ணோ வ்ர॑த॒ப்ரு'-த்வ்ர॒த-மு॑பை॒ஷ்ய-ந்ப்ரூ॑யா॒தக்நே᳚ வ்ரதபதே வ்ர॒த-ஞ்ச॑ரிஷ்யா॒மீத்ய॒க்நி-ர்வை தே॒வாநாம்᳚-வ்ரँ॒தப॑தி॒ஸ்தஸ்மா॑ ஏ॒வ ப்ர॑தி॒ப்ரோச்ய॑ வ்ர॒தமா ல॑பதே ப॒ர்॒ஹிஷா॑ பூ॒ர்ணமா॑ஸே வ்ர॒தமுபை॑தி வ॒த்ஸைர॑மாவா॒ஸ்யா॑யாமே॒தத்த்யே॑தயோ॑-ரா॒யத॑நமுப॒ஸ்தீர்யஃ॒ பூர்வ॑ஶ்சா॒க்நிரப॑ர॒ஶ்சேத்யா॑ஹு-ர்மநு॒ஷ்யா॑ [-ர்மநு॒ஷ்யாஃ᳚, இந்ந்வா] 22
இந்ந்வா உப॑ஸ்தீர்ண-மி॒ச்சந்தி॒ கிமு॑ தே॒வா யேஷா॒-ந்நவா॑வஸாந॒-முபா᳚ஸ்மி॒ஞ்ச்வோ ய॒க்ஷ்யமா॑ணே தே॒வதா॑ வஸந்தி॒ ய ஏ॒வம்-விँ॒த்வாந॒க்நி-மு॑பஸ்த்ரு'॒ணாதி॒ யஜ॑மாநேந க்ரா॒ம்யாஶ்ச॑ ப॒ஶவோ॑-ऽவ॒ருத்த்யா॑ ஆர॒ண்யாஶ்சேத்யா॑ஹு॒-ர்ய-த்க்ரா॒ம்யாநு॑ப॒வஸ॑தி॒ தேந॑ க்ரா॒ம்யாநவ॑ ருந்தே॒ யதா॑ர॒ண்யஸ்யா॒-ऽஶ்ஞாதி॒ தேநா॑ர॒ண்யாந். யதநா᳚ஶ்வா-நுப॒வஸே᳚-த்பித்ரு'தேவ॒த்யஃ॑ ஸ்யாதார॒ண்யஸ்யா᳚-ஶ்ஞாதீந்த்ரி॒யம்- [ஶ்ஞாதீந்த்ரி॒யம், வா ஆ॑ர॒ண்யம்-] 23
-ँவா ஆ॑ர॒ண்ய-மி॑ந்த்ரி॒ய-மே॒வா-ऽऽத்ம-ந்த॑த்தே॒ யதநா᳚ஶ்வா-நுப॒வஸே॒-த்க்ஷோது॑க-ஸ்ஸ்யா॒த்ய-த॑ஶ்ஞீ॒யாத்ரு॒-த்ரோ᳚-ऽஸ்ய ப॒ஶூந॒பி ம॑ந்யேதா॒-ऽபோ᳚-ऽஶ்ஞாதி॒ தந்நேவா॑ஶி॒த-ந்நேவா-ऽந॑ஶித॒-ந்ந க்ஷோது॑கோ॒ பவ॑தி॒ நாஸ்ய॑ ரு॒த்ரஃ ப॒ஶூந॒பி ம॑ந்யதே॒ வஜ்ரோ॒ வை ய॒ஜ்ஞஃ, க்ஷு-த்கலு॒ வை ம॑நு॒ஷ்ய॑ஸ்ய॒ ப்ராத்ரு'॑வ்யோ॒ யதநா᳚-ऽஶ்வாநுப॒வஸ॑தி॒ வஜ்ரே॑ணை॒வ ஸா॒க்ஷா-த்க்ஷுத॒-ம்ப்ராத்ரு'॑வ்யக்ம் ஹந்தி ॥ 24 ॥
(பரி॑-மநு॒ஷ்யா॑-இந்த்ரி॒யக்ம்-ஸா॒க்ஷாத்-த்ரீணி॑ ச) (அ. 7)
யோ வை ஶ்ர॒த்தாமநா॑ரப்ய ய॒ஜ்ஞேந॒ யஜ॑தே॒ நாஸ்யே॒ஷ்டாய॒ ஶ்ரத்த॑ததே॒-ऽபஃ ப்ர ண॑யதி ஶ்ர॒த்தா வா ஆபஃ॑ ஶ்ர॒த்தாமே॒வா-ऽऽரப்ய॑ ய॒ஜ்ஞேந॑ யஜத உ॒பயே᳚-ऽஸ்ய தேவமநு॒ஷ்யா இ॒ஷ்டாய॒ ஶ்ரத்த॑ததே॒ ததா॑ஹு॒ரதி॒ வா ஏ॒தா வர்த்ர॑-ந்நேத॒ந்த்யதி॒ வாச॒-ம்மநோ॒ வாவைதா நாதி॑ நேத॒ந்தீதி॒ மந॑ஸா॒ ப்ர ண॑யதீ॒யம்-வைँ மநோ॒- [மநஃ॑, அ॒நயை॒வைநாஃ॒] 25
-ऽநயை॒வைநாஃ॒ ப்ர ண॑ய॒த்ய-ஸ்க॑ந்நஹவி-ர்பவதி॒ ய ஏ॒வம்-வேँத॑ யஜ்ஞாயு॒தாநி॒ ஸ-ம்ப॑ரதி ய॒ஜ்ஞோ வை ய॑ஜ்ஞாயு॒தாநி॑ ய॒ஜ்ஞமே॒வ தத்ஸ-ம்ப॑ரதி॒ யதேக॑மேகக்ம் ஸ॒ம்பரே᳚த்-பித்ரு'தேவ॒த்யா॑நி ஸ்யு॒ர்ய-த்ஸ॒ஹ ஸர்வா॑ணி மாநு॒ஷாணி॒ த்வேத்வே॒ ஸம்ப॑ரதி யாஜ்யாநுவா॒க்ய॑யோரே॒வ ரூ॒ப-ங்க॑ரோ॒த்யதோ॑ மிது॒நமே॒வயோ வை தஶ॑ யஜ்ஞாயு॒தாநி॒ வேத॑ முக॒தோ᳚-ऽஸ்ய ய॒ஜ்ஞஃ க॑ல்பதே॒ ஸ்ப்ய- [க॑ல்பதே॒ ஸ்ப்யஃ, ச॒ க॒பாலா॑நி] 26
-ஶ்ச॑ க॒பாலா॑நி சாக்நிஹோத்ர॒ஹவ॑ணீ ச॒ ஶூர்ப॑-ஞ்ச க்ரு'ஷ்ணாஜி॒ந-ஞ்ச॒ ஶம்யா॑ சோ॒லூக॑ல-ஞ்ச॒ முஸ॑ல-ஞ்ச த்ரு'॒ஷச்சோப॑லா சை॒தாநி॒ வை தஶ॑ யஜ்ஞாயு॒தாநி॒ ய ஏ॒வம்-வேँத॑ முக॒தோ᳚-ऽஸ்ய ய॒ஜ்ஞஃ க॑ல்பதே॒ யோ வை தே॒வேப்யஃ॑ ப்ரதி॒ப்ரோச்ய॑ ய॒ஜ்ஞேந॒ யஜ॑தே ஜு॒ஷந்தே᳚-ऽஸ்ய தே॒வா ஹ॒வ்யக்ம் ஹ॒வி-ர்நி॑ரு॒ப்யமா॑ணம॒பி ம॑ந்த்ரயேதா॒-ऽக்நிக்ம் ஹோதா॑ரமி॒ஹ தக்ம் ஹு॑வ॒ இதி॑ [ ] 27
தே॒வேப்ய॑ ஏ॒வ ப்ர॑தி॒ப்ரோச்ய॑ ய॒ஜ்ஞேந॑ யஜதே ஜு॒ஷந்தே᳚-ऽஸ்ய தே॒வா ஹ॒வ்யமே॒ஷ வை ய॒ஜ்ஞஸ்ய॒ க்ரஹோ॑ க்ரு'ஹீ॒த்வைவ ய॒ஜ்ஞேந॑ யஜதே॒ தது॑தி॒த்வா வாசம்॑-யँச்சதி ய॒ஜ்ஞஸ்ய॒ த்ரு'த்யா॒ அதோ॒ மந॑ஸா॒ வை ப்ர॒ஜாப॑தி-ர்ய॒ஜ்ஞம॑தநுத॒ மந॑ஸை॒வ த-த்ய॒ஜ்ஞ-ந்த॑நுதே॒ ரக்ஷ॑ஸா॒-மந॑ந்வவசாராய॒ யோ வை ய॒ஜ்ஞம்-யோँக॒ ஆக॑தே யு॒நக்தி॑ யு॒ங்க்தே யு॑ஞ்ஜா॒நேஷு॒ கஸ்த்வா॑ யுநக்தி॒ ஸ த்வா॑ யுந॒க்த்வி-( ) -த்யா॑ஹ ப்ர॒ஜாப॑தி॒-ர்வை கஃ ப்ர॒ஜாப॑திநை॒வைநம்॑-யுँநக்தி யு॒ங்க்தே யு॑ஞ்ஜா॒நேஷு॑ ॥ 28 ॥
(வைம॒நஃ-ஸ்ப்ய-இதி॑-யுந॒க்த்வே-கா॑தஶ ச) (அ. 8)
ப்ர॒ஜாப॑தி-ர்ய॒ஜ்ஞாந॑ஸ்ரு'ஜதா-க்நிஹோ॒த்ர-ஞ்சா᳚க்நிஷ்டோ॒ம-ஞ்ச॑ பௌர்ணமா॒ஸீ-ஞ்சோ॒க்த்ய॑-ஞ்சாமாவா॒ஸ்யா᳚-ஞ்சாதிரா॒த்ர-ஞ்ச॒ தாநுத॑மிமீத॒ யாவ॑தக்நிஹோ॒த்ர-மாஸீ॒-த்தாவா॑நக்நிஷ்டோ॒மோ யாவ॑தீ பௌர்ணமா॒ஸீ தாவா॑நு॒க்த்யோ॑ யாவ॑த்யமாவா॒ஸ்யா॑ தாவா॑நதிரா॒த்ரோ ய ஏ॒வம்-விँ॒த்வாந॑க்நிஹோ॒த்ர-ஞ்ஜு॒ஹோதி॒ யாவ॑தக்நிஷ்டோ॒மேநோ॑ பா॒ப்நோதி॒ தாவ॒துபா᳚-ऽऽப்நோதி॒ ய ஏ॒வம்-விँ॒த்வா-ந்பௌ᳚ர்ணமா॒ஸீம்-யँஜ॑தே॒ யாவ॑து॒க்த்யே॑நோபா॒ப்நோதி॒ [யாவ॑து॒க்த்யே॑நோபா॒ப்நோதி॑, தாவ॒துபா᳚-ऽऽப்நோதி॒] 29
தாவ॒துபா᳚-ऽऽப்நோதி॒ ய ஏ॒வம்-விँ॒த்வாந॑மாவா॒ஸ்யாம்᳚-யँஜ॑தே॒ யாவ॑ததிரா॒த்ரேணோ॑பா॒ப்நோதி॒ தாவ॒துபா᳚-ऽऽப்நோதி பரமே॒ஷ்டிநோ॒ வா ஏ॒ஷ ய॒ஜ்ஞோ-ऽக்ர॑ ஆஸீ॒-த்தேந॒ ஸ ப॑ர॒மா-ங்காஷ்டா॑மகச்ச॒-த்தேந॑ ப்ர॒ஜாப॑தி-ந்நி॒ரவா॑ஸாயய॒-த்தேந॑ ப்ர॒ஜாப॑திஃ பர॒மா-ங்காஷ்டா॑மகச்ச॒-த்தேநேந்த்ர॑-ந்நி॒ரவா॑ஸாயய॒-த்தேநேந்த்ரஃ॑ பர॒மா-ங்காஷ்டா॑மகச்ச॒-த்தேநா॒-ऽக்நீஷோமௌ॑ நி॒ரவா॑ஸாயய॒-த்தேநா॒க்நீஷோமௌ॑ ப॒ரமா-ங்காஷ்டா॑மகச்சதாம்॒-யँ [காஷ்டா॑மகச்சதாம்॒-யஃ, ँஏ॒வம்-விँ॒த்வா-ந்த॑ர்ஶபூர்ணமா॒ஸௌ] 30
ஏ॒வம்-விँ॒த்வா-ந்த॑ர்ஶபூர்ணமா॒ஸௌ யஜ॑தே பர॒மாமே॒வ காஷ்டா᳚-ங்கச்சதி॒ யோ வை ப்ரஜா॑தேந ய॒ஜ்ஞேந॒ யஜ॑தே॒ ப்ர ப்ர॒ஜயா॑ ப॒ஶுபி॑-ர்மிது॒நை-ர்ஜா॑யதே॒ த்வாத॑ஶ॒ மாஸா᳚-ஸ்ஸம்வँத்ஸ॒ரோ த்வாத॑ஶ த்வ॒ந்த்வாநி॑ தர்ஶபூர்ணமா॒ஸயோ॒ஸ்தாநி॑ ஸ॒ம்பாத்யா॒நீத்யா॑ஹு-ர்வ॒த்ஸ-ஞ்சோ॑பாவஸ்ரு'॒ஜத்யு॒கா-ஞ்சாதி॑ ஶ்ரய॒த்யவ॑ ச॒ ஹந்தி॑ த்ரு'॒ஷதௌ॑ ச ஸ॒மாஹ॒ந்த்யதி॑ ச॒ வப॑தே க॒பாலா॑நி॒ சோப॑ ததாதி புரோ॒டாஶ॑-ஞ்சா- [புரோ॒டாஶ॑-ஞ்ச, அ॒தி॒ஶ்ரய॒த்யாஜ்ய॑-ஞ்ச] 31
-ऽதி॒ஶ்ரய॒த்யாஜ்ய॑-ஞ்ச ஸ்தம்பய॒ஜுஶ்ச॒ ஹர॑த்ய॒பி ச॑ க்ரு'ஹ்ணாதி॒ வேதி॑-ஞ்ச பரி க்ரு'॒ஹ்ணாதி॒ பத்நீ᳚-ஞ்ச॒ ஸந்ந॑ஹ்யதி॒ ப்ரோக்ஷ॑ணீஶ்சா ऽऽஸா॒தய॒த்யாஜ்ய॑-ஞ்சை॒தாநி॒ வை த்வாத॑ஶ த்வ॒ந்த்வாநி॑ தர்ஶபூர்ணமா॒ஸயோ॒ஸ்தாநி॒ ய ஏ॒வக்ம் ஸ॒ம்பாத்ய॒ யஜ॑தே॒ ப்ரஜா॑தேநை॒வ ய॒ஜ்ஞேந॑ யஜதே॒ ப்ர ப்ர॒ஜயா॑ ப॒ஶுபி॑-ர்மிது॒நை-ர்ஜா॑யதே ॥ 32 ॥
(உ॒க்த்யே॑நோபா॒ப்நோத்ய॑-கச்சதாம்॒-யஃ ँ- பு॑ரோ॒டாஶம்॑-சத்வாரி॒க்ம்॒ஶச்ச॑) (அ. 9)
த்ரு॒வோ॑-ऽஸி த்ரு॒வோ॑-ऽஹக்ம் ஸ॑ஜா॒தேஷு॑ பூயாஸ॒மித்யா॑ஹ த்ரு॒வாநே॒வைநா᳚ந் குருத உ॒க்ரோ᳚-ऽஸ்யு॒க்ரோ॑-ऽஹக்ம் ஸ॑ஜா॒தேஷு॑ பூயாஸ॒-மித்யா॒ஹாப்ர॑திவாதிந ஏ॒வைநா᳚ந் குருதே-ऽபி॒பூர॑ஸ்யபி॒பூர॒ஹக்ம் ஸ॑ஜா॒தேஷு॑ பூயாஸ॒மித்யா॑ஹ॒ ய ஏ॒வைந॑-ம்ப்ரத்யு॒த்பிபீ॑தே॒ தமுபா᳚ஸ்யதே யு॒நஜ்மி॑ த்வா॒ ப்ரஹ்ம॑ணா॒ தைவ்யே॒நேத்யா॑ஹை॒ஷ வாஅ॒க்நேர்யோக॒ஸ்தேநை॒ - [வாஅ॒க்நேர்யோக॒ஸ்தேந॑, ஏ॒வைநம்॑-யுँநக்தி] 33
வைநம்॑-யுँநக்தி ய॒ஜ்ஞஸ்ய॒ வை ஸம்ரு'॑த்தேந தே॒வா-ஸ்ஸு॑வ॒ர்கம்-லோँ॒கமா॑யந். ய॒ஜ்ஞஸ்ய॒ வ்ய்ரு'॑த்தே॒நாஸு॑ரா॒-ந்பரா॑பாவய॒ந். யந்மே॑ அக்நே அ॒ஸ்ய ய॒ஜ்ஞஸ்ய॒ ரிஷ்யா॒தித்யா॑ஹ ய॒ஜ்ஞஸ்யை॒வ தத்ஸம்ரு'॑த்தேந॒ யஜ॑மாந-ஸ்ஸுவ॒ர்கம்-லோँ॒கமே॑தி ய॒ஜ்ஞஸ்ய॒ வ்ய்ரு'॑த்தேந॒ ப்ராத்ரு'॑வ்யா॒-ந்பரா॑ பாவயத்யக்நிஹோ॒த்ர-மே॒தாபி॒-ர்வ்யாஹ்ரு'॑தீபி॒ருப॑ ஸாதயேத்யஜ்ஞமு॒கம்-வாँ அ॑க்நிஹோ॒த்ர-ம்ப்ரஹ்மை॒தா வ்யாஹ்ரு'॑தயோ யஜ்ஞமு॒க ஏ॒வ ப்ரஹ்ம॑ - [ப்ரஹ்ம॑, கு॒ரு॒தே॒ ஸம்॒வँ॒த்ஸ॒ரே] 34
குருதே ஸம்வँத்ஸ॒ரே ப॒ர்யாக॑த ஏ॒தாபி॑ரே॒வோப॑ ஸாதயே॒-த்ப்ரஹ்ம॑ணை॒வோப॒யதஃ॑ ஸம்வँத்ஸ॒ர-ம்பரி॑ க்ரு'ஹ்ணாதி தர்ஶபூர்ணமா॒ஸௌ சா॑துர்மா॒ஸ்யாந்யா॒லப॑மாந ஏ॒தாபி॒-ர்வ்யாஹ்ரு'॑தீபிர்-ஹ॒வீக்ஷ்யாஸா॑தயே-த்யஜ்ஞமு॒கம்-வைँ த॑ர்ஶபூர்ணமா॒ஸௌ சா॑துர்மா॒ஸ்யாநி॒ ப்ரஹ்மை॒தா வ்யாஹ்ரு'॑தயோ யஜ்ஞமு॒க ஏ॒வ ப்ரஹ்ம॑ குருதே ஸம்வँத்ஸ॒ரே ப॒ர்யாக॑த ஏ॒தாபி॑ரே॒வாஸா॑தயே॒-த்ப்ரஹ்ம॑ணை॒வோப॒யதஃ॑ ஸம்வँத்ஸ॒ர-ம்பரி॑க்ரு'ஹ்ணாதி॒ யத்வை ய॒ஜ்ஞஸ்ய॒ ஸாம்நா᳚ க்ரி॒யதே॑ ரா॒ஷ்ட்ரம்- [ரா॒ஷ்ட்ரம், ய॒ஜ்ஞஸ்யா॒-ஶீர்க॑ச்சதி॒] 35
-ँய॒ஜ்ஞஸ்யா॒-ஶீர்க॑ச்சதி॒ யத்ரு'॒சா விஶம்॑-யँ॒ஜ்ஞஸ்யா॒- ஶீர்க॑ச்ச॒த்யத॑ ப்ராஹ்ம॒ணோ॑-ऽநா॒ஶீர்கே॑ண ய॒ஜ்ஞேந॑ யஜதே ஸாமிதே॒நீ-ர॑நுவ॒க்ஷ்யந்நே॒தா வ்யாஹ்ரு'॑தீஃ பு॒ரஸ்தா᳚த்தத்த்யா॒-த்ப்ரஹ்மை॒வ ப்ர॑தி॒பத॑-ங்குருதே॒ ததா᳚ ப்ராஹ்ம॒ண-ஸ்ஸாஶீ᳚ர்கேண ய॒ஜ்ஞேந॑ யஜதே॒ ய-ங்கா॒மயே॑த॒ யஜ॑மாந॒-ம்ப்ராத்ரு'॑வ்யமஸ்ய ய॒ஜ்ஞஸ்யா॒ஶீர்க॑ச்சே॒திதி॒ தஸ்யை॒தா வ்யாஹ்ரு'॑தீஃ புரோநுவா॒க்யா॑யா-ந்தத்த்யா-த்ப்ராத்ரு'வ்யதேவ॒த்யா॑ வை பு॑ரோநுவா॒க்யா᳚ ப்ராத்ரு'॑வ்யமே॒வாஸ்ய॑ ய॒ஜ்ஞஸ்யா॒-[ய॒ஜ்ஞஸ்யா॑, ஆ॒ஶீர்க॑ச்சதி॒] 36
-ऽऽஶீர்க॑ச்சதி॒ யாந் கா॒மயே॑த॒ யஜ॑மாநாந்-த்ஸ॒மாவ॑த்யேநாந் ய॒ஜ்ஞஸ்யா॒ ऽऽஶீர்க॑ச்சே॒திதி॒ தேஷா॑மே॒தா வ்யாஹ்ரு'॑தீஃ புரோநுவா॒க்யா॑யா அர்த॒ர்ச ஏகா᳚-ந்தத்த்யா-த்யா॒ஜ்யா॑யை பு॒ரஸ்தா॒தேகாம்᳚-யாँ॒ஜ்யா॑யா அர்த॒ர்ச ஏகா॒-ந்ததை॑நாந்-த்ஸ॒மாவ॑தீ ய॒ஜ்ஞஸ்யா॒ ऽऽஶீர்க॑ச்சதி॒ யதா॒ வை ப॒ர்ஜந்ய॒-ஸ்ஸுவ்ரு'॑ஷ்டம்॒-வँர்ஷ॑த்யே॒வம்-யँ॒ஜ்ஞோ யஜ॑மாநாய வர்ஷதி॒ ஸ்தல॑யோத॒க-ம்ப॑ரிக்ரு'॒ஹ்ணந்த்யா॒ஶிஷா॑ ய॒ஜ்ஞம்-யँஜ॑மாநஃ॒ பரி॑ க்ரு'ஹ்ணாதி॒ மநோ॑-ऽஸி ப்ராஜாப॒த்யம்- [ப்ராஜாப॒த்யம், மந॑ஸா] 37
-மந॑ஸா மா பூ॒தேநா-ऽऽவி॒ஶேத்யா॑ஹ॒ மநோ॒ வை ப்ரா॑ஜாப॒த்ய-ம்ப்ரா॑ஜாப॒த்யோ ய॒ஜ்ஞோ மந॑ ஏ॒வ ய॒ஜ்ஞமா॒த்ம-ந்த॑த்தே॒ வாக॑ஸ்யை॒ந்த்ரீ ஸ॑பத்ந॒க்ஷய॑ணீ வா॒சா மே᳚ந்த்ரி॒யேணா-ऽऽவி॒ஶேத்யா॑ஹை॒ந்த்ரீ வை வாக்வாச॑-மே॒வைந்த்ரீ- மா॒த்ம-ந்த॑த்தே ॥ 38 ॥
(தேநை॒-வ ப்ரஹ்ம॑- ரா॒ஷ்ட்ரமே॒-வாஸ்ய॑ ய॒ஜ்ஞஸ்ய॑-ப்ராஜாப॒த்யக்ம்-ஷட்த்ரிக்ம்॑ஶச்ச) (அ. 10)
யோ வை ஸ॑ப்தத॒ஶ-ம்ப்ர॒ஜாப॑திம்-யँ॒ஜ்ஞம॒ந்வாய॑த்தம்॒-வேँத॒ ப்ரதி॑ ய॒ஜ்ஞேந॑ திஷ்டதி॒ ந ய॒ஜ்ஞா-த்ப்ரக்ம்॑ஶத॒ ஆ ஶ்ரா॑வ॒யேதி॒ சது॑ரக்ஷர॒மஸ்து॒ ஶ்ரௌஷ॒டிதி॒ சது॑ரக்ஷரம்॒-யँஜேதி॒ த்வ்ய॑க்ஷரம்॒-யேँ யஜா॑மஹ॒ இதி॒ பஞ்சா᳚க்ஷர-ந்த்வ்யக்ஷ॒ரோ வ॑ஷட்கா॒ர ஏ॒ஷ வை ஸ॑ப்தத॒ஶஃ ப்ர॒ஜாப॑தி-ர்ய॒ஜ்ஞம॒ந்வாய॑த்தோ॒ ய ஏ॒வம்-வேँத॒ ப்ரதி॑ ய॒ஜ்ஞேந॑ திஷ்டதி॒ ந ய॒ஜ்ஞாத்- ப்ரக்ம்॑ஶதே॒ யோ வை ய॒ஜ்ஞஸ்ய॒ ப்ராய॑ண-ம்ப்ரதி॒ஷ்டா- [ப்ரதி॒ஷ்டாம், உ॒தய॑நம்॒-வேँத॒] 39
மு॒தய॑நம்॒-வேँத॒ ப்ரதி॑ஷ்டிதே॒நாரி॑ஷ்டேந ய॒ஜ்ஞேந॑ ஸ॒க்க்॒ஸ்தா-ங்க॑ச்ச॒த்யாஶ்ரா॑வ॒யாஸ்து॒ ஶ்ரௌஷ॒ட்யஜ॒ யே யஜா॑மஹே வஷட்கா॒ர ஏ॒தத்வை ய॒ஜ்ஞஸ்ய॒ ப்ராய॑ணமே॒ஷா ப்ர॑தி॒ஷ்டைதது॒தய॑நம்॒-யँ ஏ॒வம்-வேँத॒ ப்ரதி॑ஷ்டிதே॒நா-ऽரி॑ஷ்டேந ய॒ஜ்ஞேந॑ ஸ॒க்க்॒ஸ்தா-ங்க॑ச்சதி॒ யோ வை ஸூ॒ந்ரு'தா॑யை॒ தோஹம்॒-வேँத॑ து॒ஹ ஏ॒வைநாம்᳚-யँ॒ஜ்ஞோ வை ஸூ॒ந்ரு'தா ऽऽ ஶ்ரா॑வ॒யேத்யைவைநா॑-மஹ்வ॒தஸ்து॒ [-மஹ்வ॒தஸ்து॑, ஶ்ரௌஷ॒டித்யு॒பாவா᳚ஸ்ரா॒-] 40
ஶ்ரௌஷ॒டித்யு॒பாவா᳚ஸ்ரா॒-க்யஜேத்யுத॑நைஷீ॒த்யே யஜா॑மஹ॒ இத்யுபா॑-ऽஸத-த்வஷட்கா॒ரேண॑ தோக்த்த்யே॒ஷ வை ஸூ॒ந்ரு'தா॑யை॒ தோஹோ॒ ய ஏ॒வம்-வேँத॑ து॒ஹ ஏ॒வைநா᳚-ந்தே॒வா வை ஸ॒த்ரமா॑ஸத॒ தேஷா॒-ந்திஶோ॑-ऽதஸ்ய॒ந்த ஏ॒தாமா॒ர்த்ரா-ம்ப॒ங்க்திம॑பஶ்ய॒ந்நா ஶ்ரா॑வ॒யேதி॑ புரோவா॒த-ம॑ஜநய॒ந்நஸ்து॒ ஶ்ரௌஷ॒டித்ய॒ப்ரக்ம் ஸம॑ப்லாவய॒ந்॒. யஜேதி॑ வி॒த்யுத॑- [வி॒த்யுத॑ம், அ॒ஜ॒ந॒ய॒ந்॒ யே] 41
மஜநய॒ந்॒ யே யஜா॑மஹ॒ இதி॒ ப்ராவ॑ர்ஷயந்ந॒ப்ய॑ஸ்தநயந் வஷட்கா॒ரேண॒ ததோ॒ வை தேப்யோ॒ திஶஃ॒ ப்ராப்யா॑யந்த॒ ய ஏ॒வம்-வேँத॒ ப்ராஸ்மை॒ திஶஃ॑ ப்யாயந்தே ப்ர॒ஜாப॑தி-ந்த்வோ॒வேத॑ ப்ர॒ஜாப॑தி ஸ்த்வம்வேँத॒ ய-ம்ப்ர॒ஜாப॑தி॒-ர்வேத॒ ஸ புண்யோ॑ பவத்யே॒ஷ வை ச॑ந்த॒ஸ்யஃ॑ ப்ர॒ஜாப॑தி॒ரா ஶ்ரா॑வ॒யா-ऽஸ்து॒ ஶ்ரௌஷ॒ட்யஜ॒ யே யஜா॑மஹே வஷட்கா॒ரோ ய ஏ॒வம்-வேँத॒ புண்யோ॑ பவதி வஸ॒ந்த- [வஸ॒ந்தம், ரு'॒தூ॒நாம்] 42
-ம்ரு'॑தூ॒நா-ம்ப்ரீ॑ணா॒மீத்யா॑ஹ॒ர்தவோ॒ வை ப்ர॑யா॒ஜா ரு'॒தூநே॒வ ப்ரீ॑ணாதி॒ தே᳚-ऽஸ்மை ப்ரீ॒தா ய॑தாபூ॒ர்வ-ங்க॑ல்பந்தே॒ கல்ப॑ந்தே-ऽஸ்மா ரு'॒தவோ॒ ய ஏ॒வம்-வேँதா॒க்நீஷோம॑யோர॒ஹ-ந்தே॑வய॒ஜ்யயா॒ சக்ஷு॑ஷ்மா-ந்பூயாஸ॒மித்யா॑-ஹா॒க்நீஷோமா᳚ப்யாம்॒-வைँ ய॒ஜ்ஞஶ்சக்ஷு॑ஷ்மா॒-ந்தாப்யா॑மே॒வ சக்ஷு॑ரா॒த்ம-ந்த॑த்தே॒ ऽக்நேர॒ஹ-ந்தே॑வய॒ஜ்யயா᳚-ऽந்நா॒தோ பூ॑யாஸ॒மித்யா॑ஹா॒க்நிர்வை தே॒வாநா॑-மந்நா॒தஸ்தே நை॒வா- [மந்நா॒தஸ்தே நை॒வா, அ॒ந்நாத்ய॑மா॒த்மந்] 43
-ऽந்நாத்ய॑மா॒த்ம-ந்த॑த்தே॒ தப்தி॑ர॒ஸ்யத॑ப்தோ பூயாஸம॒மு-ந்த॑பேய॒மித்யா॑ஹை॒தயா॒ வை தப்த்த்யா॑ தே॒வா அஸு॑ராநதப்நுவ॒ந்தயை॒வ ப்ராத்ரு'॑வ்ய-ந்தப்நோத்ய॒க்நீஷோம॑யோர॒ஹ-ந்தே॑வய॒ஜ்யயா॑ வ்ரு'த்ர॒ஹா பூ॑யாஸ॒மித்யா॑ஹா॒-ऽக்நீஷோமா᳚ப்யாம்॒-வாँ இந்த்ரோ॑ வ்ரு'॒த்ரம॑ஹ॒ந்தாப்யா॑மே॒வ ப்ராத்ரு'॑வ்யக்க் ஸ்த்ரு'ணுத இந்த்ராக்நி॒யோர॒ஹ-ந்தே॑வய॒ஜ்யயே᳚ந்த்ரியா॒வ்ய॑ந்நா॒தோ பூ॑யாஸ॒மித்யா॑ஹேந்த்ரியா॒வ்யே॑வாந்நா॒தோ ப॑வ॒தீந்த்ர॑ஸ்யா॒- [ப॑வ॒தீந்த்ர॑ஸ்ய, அ॒ஹ-ந்தே॑வய॒ஜ்யயே᳚ந்த்ரியா॒வீ] 44
-ऽஹ-ந்தே॑வய॒ஜ்யயே᳚ந்த்ரியா॒வீ பூ॑யாஸ॒மித்யா॑ஹேந்த்ரியா॒வ்யே॑வ ப॑வதி மஹே॒ந்த்ரஸ்யா॒-ऽஹ-ந்தே॑வய॒ஜ்யயா॑ ஜே॒மாந॑-ம்மஹி॒மாந॑-ங்கமேய॒மித்யா॑ஹ ஜே॒மாந॑மே॒வ ம॑ஹி॒மாந॑-ங்கச்சத்ய॒க்நே-ஸ்ஸ்வி॑ஷ்ட॒க்ரு'தோ॒-ऽஹ-ந்தே॑வய॒ஜ்யயா ऽऽயு॑ஷ்மாந். ய॒ஜ்ஞேந॑ ப்ரதி॒ஷ்டா-ங்க॑மேய॒மித்யா॒-ஹாயு॑ரே॒வாத்ம-ந்த॑த்தே॒ ப்ரதி॑ ய॒ஜ்ஞேந॑ -திஷ்டதி ॥ 45 ॥
( ப்ர॒தி॒ஷ்டா-ம॑ஹ்வ॒தஸ்து॑-வி॒த்யுதம்॑வँஸ॒ந்தந்-தேநை॒வே-ந்த்ர॑ஸ்யா॒-ऽஷ்டாத்ரிக்ம்॑ஶச்ச) (அ. 11)
இந்த்ரம்॑-வோँ வி॒ஶ்வத॒ஸ்பரி॒ ஹவா॑மஹே॒ ஜநே᳚ப்யஃ । அ॒ஸ்மாக॑மஸ்து॒ கேவ॑லஃ ॥ இந்த்ர॒-ந்நரோ॑ நே॒மதி॑தா ஹவந்தே॒ யத்பார்யா॑ யு॒நஜ॑தே॒ திய॒ஸ்தாஃ । ஶூரோ॒ ந்ரு'ஷா॑தா॒ ஶவ॑ஸஶ்சகா॒ந ஆ கோம॑தி வ்ர॒ஜே ப॑ஜா॒ த்வந்நஃ॑ ॥ இ॒ந்த்ரி॒யாணி॑ ஶதக்ரதோ॒ யா தே॒ ஜநே॑ஷு ப॒ஞ்சஸு॑ ॥ இந்த்ர॒ தாநி॑ த॒ ஆ வ்ரு'॑ணே ॥ அநு॑ தே தாயி ம॒ஹ இ॑ந்த்ரி॒யாய॑ ஸ॒த்ரா தே॒ விஶ்வ॒மநு॑ வ்ரு'த்ர॒ஹத்யே᳚ । அநு॑ [ ] 46
க்ஷ॒த்ரமநு॒ ஸஹோ॑ யஜ॒த்ரேந்த்ர॑ தே॒வேபி॒ரநு॑ தே ந்ரு'॒ஷஹ்யே᳚ ॥ ஆயஸ்மி᳚ந்-த்ஸ॒ப்தவா॑ஸ॒வா ஸ்திஷ்ட॑ந்தி ஸ்வா॒ருஹோ॑ யதா । ரு'ஷி॑ர்ஹ தீர்க॒ஶ்ருத்த॑ம॒ இந்த்ர॑ஸ்ய க॒ர்மோ அதி॑திஃ ॥ ஆ॒மாஸு॑ ப॒க்வமைர॑ய॒ ஆ ஸூர்யக்ம்॑ ரோஹயோ தி॒வி । க॒ர்ம-ந்ந ஸாம॑-ந்தபதா ஸுவ்ரு'॒க்திபி॒-ர்ஜுஷ்ட॒-ங்கிர்வ॑ணஸே॒ கிரஃ॑ ॥ இந்த்ர॒மி-த்கா॒திநோ॑ ப்ரு'॒ஹதிந்த்ர॑-ம॒ர்கேபி॑-ர॒ர்கிணஃ॑ । இந்த்ரம்॒-வாँணீ॑ரநூஷத ॥ காய॑ந்தி த்வா காய॒த்ரிணோ- [காய॒த்ரிணஃ॑, அர்ச॑ந்த்ய॒ர்க-ம॒ர்கிணஃ॑ ।] 47
-ऽர்ச॑ந்த்ய॒ர்க-ம॒ர்கிணஃ॑ । ப்ர॒ஹ்மாண॑ஸ்த்வா ஶதக்ரத॒வு-த்வ॒க்ம்॒ஶ-மி॑வ யேமிரே ॥ அ॒க்ம்॒ஹோ॒முசே॒ ப்ர ப॑ரேமா மநீ॒ஷாமோ॑ஷிஷ்ட॒தாவம்நே॑ ஸும॒தி-ங்க்ரு'॑ணா॒நாஃ । இ॒தமி॑ந்த்ர॒ ப்ரதி॑ ஹ॒வ்ய-ங்க்ரு'॑பாய ஸ॒த்யா-ஸ்ஸ॑ந்து॒ யஜ॑மாநஸ்ய॒ காமாஃ᳚ ॥ வி॒வேஷ॒ யந்மா॑ தி॒ஷணா॑ ஜ॒ஜாந॒ ஸ்தவை॑ பு॒ரா பார்யா॒திந்த்ர॒-மஹ்நஃ॑ । அக்ம்ஹ॑ஸோ॒ யத்ர॑ பீ॒பர॒த்யதா॑ நோ நா॒வேவ॒ யாந்த॑ மு॒பயே॑ ஹவந்தே ॥ ப்ர ஸ॒ம்ராஜ॑-ம்ப்ரத॒ம-ம॑த்த்வ॒ராணா॑- [ம॑த்த்வ॒ராணா᳚ம், அ॒க்ம்॒ஹோ॒முசம்॑] 48
-மக்ம்ஹோ॒முசம்॑-வ்ரு'ँஷ॒பம்-யँ॒ஜ்ஞியா॑நாம் । அ॒பா-ந்நபா॑தமஶ்விநா॒ ஹய॑ந்த-ம॒ஸ்மிந்ந॑ர இந்த்ரி॒ய-ந்த॑த்த॒மோஜஃ॑ ॥ வி ந॑ இந்த்ர॒ ம்ரு'தோ॑ ஜஹி நீ॒சா ய॑ச்ச ப்ரு'தந்ய॒தஃ । அ॒த॒ஸ்ப॒த-ந்தமீ᳚-ங்க்ரு'தி॒ யோ அ॒ஸ்மாக்ம் அ॑பி॒தாஸ॑தி ॥ இந்த்ர॑ க்ஷ॒த்ரம॒பி வா॒மமோஜோ ऽஜா॑யதா வ்ரு'ஷப சர்ஷணீ॒நாம் । அபா॑நுதோ॒ ஜந॑-மமித்ர॒யந்த॑-மு॒ரு-ந்தே॒வேப்யோ॑ அக்ரு'ணோ-ரு லோ॒கம் ॥ ம்ரு'॒கோ ந பீ॒மஃ கு॑ச॒ரோ கி॑ரி॒ஷ்டாஃ ப॑ரா॒வத [ப॑ரா॒வதஃ॑, ஆ ஜ॑காமா॒ பர॑ஸ்யாஃ ।] 49
ஆ ஜ॑காமா॒ பர॑ஸ்யாஃ । ஸ்ரு'॒கக்ம் ஸ॒க்ம்॒ஶாய॑ ப॒விமி॑ந்த்ர தி॒க்மம்-விँ ஶத்ரூ᳚-ந்தாடி॒ விம்ரு'தோ॑ நுதஸ்வ ॥ வி ஶத்ரூ॒ந்॒. வி ம்ரு'தோ॑ நுத॒ விவ்ரு'॒த்ரஸ்ய॒ ஹநூ॑ ருஜ । வி ம॒ந்யுமி॑ந்த்ர பாமி॒தோ॑-ऽமித்ர॑ஸ்யா-ऽபி॒தாஸ॑தஃ ॥ த்ரா॒தார॒-மிந்த்ர॑-மவி॒தார॒-மிந்த்ர॒க்ம்॒ ஹவே॑ஹவே ஸு॒ஹவ॒க்ம்॒ ஶூர॒மிந்த்ர᳚ம் । ஹு॒வே நு ஶ॒க்ர-ம்பு॑ருஹூ॒தமிந்த்ரக்க்॑ ஸ்வ॒ஸ்தி நோ॑ ம॒கவா॑ தா॒த்விந்த்ரஃ॑ ॥ மா தே॑ அ॒ஸ்யாக்ம் [அ॒ஸ்யாக்ம், ஸ॒ஹ॒ஸா॒வ॒-ந்பரி॑ஷ்டாவ॒காய॑] 50
ஸ॑ஹஸாவ॒-ந்பரி॑ஷ்டாவ॒காய॑ பூம ஹரிவஃ பரா॒தை । த்ராய॑ஸ்வ நோ ऽவ்ரு'॒கேபி॒-ர்வரூ॑தை॒-ஸ்தவ॑ ப்ரி॒யாஸஃ॑ ஸூ॒ரிஷு॑ ஸ்யாம ॥ அந॑வஸ்தே॒ ரத॒மஶ்வா॑ய தக்ஷ॒-ந்த்வஷ்டா॒ வஜ்ர॑-ம்புருஹூத த்யு॒மந்த᳚ம் । ப்ர॒ஹ்மாண॒ இந்த்ர॑-ம்ம॒ஹய॑ந்தோ அ॒ர்கைரவ॑ர்தய॒ந்நஹ॑யே॒ ஹந்த॒வா உ॑ ॥ வ்ரு'ஷ்ணே॒ ய-த்தே॒ வ்ரு'ஷ॑ணோ அ॒ர்கமர்சா॒நிந்த்ர॒ க்ராவா॑ணோ॒ அதி॑தி-ஸ்ஸ॒ஜோஷாஃ᳚ । அ॒ந॒ஶ்வாஸோ॒ யே ப॒வயோ॑-ऽர॒தா இந்த்ரே॑ஷிதா அ॒ப்யவ॑ர்த ந்த॒ தஸ்யூந்॑ ॥ 51 ॥
(வ்ரு'॒த்ர॒ஹத்யே-ऽநு॑-காய॒த்ரிணோ᳚-ऽத்த॒ராணாம்᳚-பரா॒வதோ॒-ऽஸ்யா-ம॒ஷ்டாச॑த்வாரிக்ம்ஶச்ச) (அ. 12)
(ஸந்த்வா॑ ஸிஞ்சாமி-த்ரு॒வோ᳚-ऽஸ்ய॒க்நிர்மா॑-ப॒ர்॒ஹிஷோ॒-ऽஹ-மா ப்யா॑யதா॒-மக॑ந்ம॒-யதா॒ வை-யோ வை ஶ்ர॒த்தாம்- ப்ர॒ஜாப॑தி॒-ர்யஜ்ஞாந்-த்ரு॒வோ॑-ऽஸீத்யா॑ஹ॒-யோ வை ஸ॑ப்தத॒ஶ-மிந்த்ரம்॑-வோँ॒-த்வாத॑ஶ । )
(ஸந்த்வா॑-ப॒ர்॒ஹிஷோ॒-ऽஹம்யँதா॒ வா-ஏ॒வம்-விँ॒த்வா-ஞ்ச்ரௌஷ॑ட்-த்ஸாஹஸாவ॒-ந்நேக॑பஞ்சா॒ஶத் ।)
(ஸந்த்வா॑, ஸிஞ்சாமி॒ தஸ்யூந்॑)
॥ ஹரிஃ॑ ஓம் ॥
॥ க்ரு'ஷ்ண யஜுர்வேதீய தைத்திரீய ஸம்ஹிதாயா-ம்ப்ரதமகாண்டே ஷஷ்டஃ ப்ரஶ்ந-ஸ்ஸமாப்தஃ ॥
Roman (IAST) Transliteration
kṛṣṇa yajurvedīya taittirīya saṃhitāyā-mprathamakāṇḍe ṣaṣṭhaḥ praśnaḥ - yājamānakāṇḍaṃ
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
sa-ntvā̭ siñcāmi॒ yajṷṣā pra॒jāmāyu॒rdhana̭-ñca | bṛha॒spati̭prasūto॒ yaja̭māna i॒ha mā ri̭ṣat || ājya̭masi sa॒tyama̭si sa॒tyasyāddhya̭kṣamasi ha॒vira̭si vaiśvāna॒raṃ-vai~᳚śvade॒va-mutpṷ̄taśuṣmagṃ sa॒tyaujā॒-ssaho̭-'si॒ saha̭mānamasi॒ saha॒svārā̭tī॒-ssaha̭svārātīya॒ta-ssaha̭sva॒ pṛta̭nā॒-ssaha̭sva pṛtanya॒taḥ | sa॒hasra̭vīryamasi॒ tanmā̭ ji॒nvājya॒syājya̭masi sa॒tyasya̭ sa॒tyama̭si sa॒tyāyṷ- [sa॒tyāyuḥ̭, a॒si॒ sa॒tyaśṷṣmamasi] 1
-rasi sa॒tyaśṷṣmamasi sa॒tyena̭ tvā॒-'bhi ghā̭rayāmi॒ tasya̭ te bhakṣīya pañcā॒nā-ntvā॒ vātā̭nāṃ-ya~॒ntrāya̭ dha॒rtrāya̭ gṛhṇāmi pañcā॒nā-ntva̭rtū॒nāṃ-ya~॒ntrāya̭ dha॒rtrāya̭ gṛhṇāmi pañcā॒nā-ntvā̭ di॒śāṃ-ya~॒ntrāya̭ dha॒rtrāya̭ gṛhṇāmi pañcā॒nā-ntvā̭ pañcaja॒nānāṃ᳚-ya~॒ntrāya̭ dha॒rtrāya̭ gṛhṇāmi ca॒rostvā॒ pañca̭bilasya ya॒ntrāya̭ dha॒rtrāya̭ gṛhṇāmi॒ brahma̭ṇastvā॒ teja̭se ya॒ntrāya̭ dha॒rtrāya̭ gṛhṇāmi kṣa॒trasya॒ tvauja̭se ya॒ntrāya̭ [ ] 2
dha॒rtrāya̭ gṛhṇāmi vi॒śe tvā̭ ya॒ntrāya̭ dha॒rtrāya̭ gṛhṇāmi su॒vīryā̭ya tvā gṛhṇāmi suprajā॒stvāya̭ tvā gṛhṇāmi rā॒yaspoṣā̭ya tvā gṛhṇāmi brahmavarca॒sāya̭ tvā gṛhṇāmi॒ bhūra॒smākagṃ̭ ha॒virde॒vānā̭-mā॒śiṣo॒ yaja̭mānasya de॒vānā᳚-ntvā de॒vatā᳚bhyo gṛhṇāmi॒ kāmā̭ya tvā gṛhṇāmi || 3 ||
(sa॒tyāyu॒-roja̭se ya॒ntrāya॒-traya̭strigṃśacca) (a. 1)
dhru॒vo̭-'si dhru॒vo̭-'hagṃ sa̭jā॒teṣṷ bhūyāsa॒-ndhīra॒ścettā̭ vasu॒vidu॒gro᳚-'syu॒gro̭-'hagṃ sa̭jā॒teṣṷ bhūyāsa-mu॒graścettā̭ vasu॒vida̭bhi॒-bhūra̭syabhi॒bhūra॒hagṃ sa̭jā॒teṣṷ bhūyāsamabhi॒bhūścettā̭ vasu॒vi-dyu॒najmi̭ tvā॒ brahma̭ṇā॒ daivyḙna ha॒vyāyā॒smai voḍha॒ve jā̭tavedaḥ || indhā̭nāstvā supra॒jasaḥ̭ su॒vīrā॒ jyogjī̭vema bali॒hṛto̭ va॒ya-nte᳚ || yanmḙ agne a॒sya ya॒jñasya॒ riṣyā॒- [riṣyā᳚t, dyadvā॒] 4
-dyadvā॒ skandā॒-dājya̭syo॒ta vi̭ṣṇo | tena̭ hanmi sa॒patna̭-ndurmarā॒yumaina̭-ndadhāmi॒ nir-ṛ̭tyā u॒pasthe᳚ | bhū-rbhuva॒-ssuva॒rucchṷṣmo agne॒ yaja̭mānāyaidhi॒ niśṷṣmo abhi॒dāsa̭te | agne॒ deve᳚ddha॒ manvi̭ddha॒ mandra̭ji॒hvā-ma̭rtyasya te hotarmū॒rdhannā ji̭gharmi rā॒yaspoṣā̭ya suprajā॒stvāya̭ su॒vīryā̭ya॒ mano̭-'si prājāpa॒tya-mmana̭sā mā bhū॒tenā vi̭śa॒ vāga̭syai॒ndrī sa̭patna॒kṣaya̭ṇī [ ] 5
vā॒cā me᳚ndri॒yeṇā vi̭śa vasa॒ntamṛ̭tū॒nā-mprī̭ṇāmi॒ sa mā᳚ prī॒taḥ prī̭ṇātu grī॒ṣmamṛ̭tū॒nā-mprī̭ṇāmi॒ sa mā᳚ prī॒taḥ prī̭ṇātu va॒r॒ṣā ṛ̭tū॒nā-mprī̭ṇāmi॒ tā mā᳚ prī॒tāḥ prī̭ṇantu śa॒rada̭mṛtū॒nā-mprī̭ṇāmi॒ sā mā᳚ prī॒tā prī̭ṇātu hemantaśiśi॒rāvṛ̭tū॒nā-mprī̭ṇāmi॒ tau mā᳚ prī॒tau prī̭ṇītā-ma॒gnīṣoma̭yo-ra॒ha-ndḙvaya॒jyayā॒ cakṣṷṣmā-nbhūyāsama॒gnera॒ha-ndḙvaya॒jyayā᳚-'nnā॒do bhṷ̄yāsa॒- [bhṷ̄yāsam, dabdhi̭ra॒syada̭bdho] 6
-ndabdhi̭ra॒syada̭bdho bhūyāsama॒mu-nda̭bheya-ma॒gnīṣoma̭yo-ra॒ha-ndḙvaya॒jyayā̭ vṛtra॒hā bhṷ̄yāsamindrāgni॒yora॒ha-ndḙvaya॒jyaye᳚ndriyā॒vya̭nnā॒do bhṷ̄yāsa॒mindra̭syā॒-'ha-ndḙvaya॒jyaye᳚ndriyā॒vī bhṷ̄yāsa-mmahe॒ndrasyā॒-'ha-ndḙvaya॒jyayā̭ je॒māna̭-mmahi॒māna̭-ṅgameyama॒gne-ssvi̭ṣṭa॒kṛto॒-'ha-ndḙvaya॒jyayā ''yṷṣmān. ya॒jñena̭ prati॒ṣṭhā-ṅga̭meyam || 7 ||
(riṣyā᳚-thsapatna॒kṣaya̭ṇya-nnā॒do bhṷ̄yāsa॒gṃ॒-ṣaṭtrigṃ̭śacca) (a. 2)
a॒gnirmā॒ duri̭ṣṭā-tpātu savi॒tā-'ghaśagṃ̭sā॒dyo me-'nti̭ dū॒rḙ-'rātī॒yati॒ tame॒tena̭ jeṣa॒gṃ॒ surṷ̄pavarṣavarṇa॒ ehī॒mā-nbha॒drā-nduryāgṃ̭ a॒bhyehi॒ māmanṷvratā॒ nyṷ śī॒r॒ṣāṇi̭ mṛḍhva॒miḍa॒ ehyadi̭ta॒ ehi॒ sara̭sva॒tyehi॒ ranti̭rasi॒ rama̭tirasi sū॒narya̭si॒ juṣṭe॒ juṣṭi̭-nte-'śī॒yopa̭hūta upaha॒va- [upaha॒vam, te॒-'śī॒ya॒ sā ] 8
-ntḙ-'śīya॒ sā mḙ sa॒tyā-''śīra॒sya ya॒jñasya̭ bhūyā॒darḙḍatā॒ mana̭sā॒ taccha̭keyaṃ-ya~॒jño divagṃ̭ rohatu ya॒jño diva̭-ṅgacchatu॒ yo dḙva॒yānaḥ॒ panthā॒stena̭ ya॒jño de॒vāgṃ apye᳚tva॒smāsvindra̭ indri॒ya-nda̭dhātva॒smānrāya̭ u॒ta ya॒jñā-ssa̭cantāma॒smāsṷ santvā॒śiṣa॒-ssā naḥ̭ pri॒yā su॒pratū᳚rtirma॒ghonī॒ juṣṭi̭rasi ju॒ṣasva̭ no॒ juṣṭā̭ no- [juṣṭā̭ naḥ, a॒si॒ juṣṭi̭-nte] 9
-'si॒ juṣṭi̭-nte gameya॒-mmano॒ jyoti̭-rjuṣatā॒mājyaṃ॒-vi~cchi̭nnaṃ-ya~॒jñagṃ sami॒ma-nda̭dhātu | bṛha॒spati̭-stanutāmi॒manno॒ viśvḙ de॒vā i॒ha mā̭dayantām || braddhna॒ pinva̭sva॒ dada̭to me॒ mā kṣā̭yi kurva॒to me॒ mopa̭ dasa-tpra॒jāpa̭te-rbhā॒go᳚-'syūrja̭svā॒-npaya̭svā-nprāṇāpā॒nau mḙ pāhi samānavyā॒nau mḙ pāhyudānavyā॒nau mḙ pā॒hyakṣi̭to॒-'syakṣi̭tyai tvā॒ mā me᳚ kṣeṣṭhā a॒mutrā॒muṣmi̭n ~lo॒ke || 10 ||
(u॒pa॒ha॒vaṃ-juṣṭā̭na-stvā॒ ṣaṭ ca̭) (a. 3)
ba॒r॒hiṣo॒-'ha-ndḙvaya॒jyayā᳚ pra॒jāvā᳚-nbhūyāsa॒-nnarā॒śagṃsa̭syā॒ha-ndḙvaya॒jyayā̭ paśu॒mā-nbhṷ̄yāsama॒gne-ssvi̭ṣṭa॒kṛto॒-'ha-ndḙvaya॒jyayā-''yṷṣmān. ya॒jñena̭ prati॒ṣṭhā-ṅga̭meyama॒gnera॒ha-mujji̭ti॒-manūjjḙṣa॒gṃ॒ soma̭syā॒ha - mujji̭ti॒-manūjjḙṣama॒gnera॒ha-mujji̭ti॒-manūjjḙṣa-ma॒gnīṣoma̭yora॒ha-mujji̭ti॒-manūjjḙṣa-mindrāgni॒yora॒ha-mujji̭ti॒-manūjjḙṣa॒-mindra̭syā॒-'ha- [-mindra̭syā॒-'ham, ujji̭ti॒manūjjḙṣaṃ] 11
-mujji̭ti॒manūjjḙṣa-mmahe॒ndrasyā॒hamujji̭ti॒- manūjjḙṣama॒gne-ssvi̭ṣṭa॒kṛto॒-'ha mujji̭ti॒-manūjjḙṣaṃ॒-vā~ja̭sya mā prasa॒veno᳚-dgrā॒bheṇoda̭grabhīt | athā̭ sa॒patnā॒gṃ॒ indro̭ me nigrā॒bheṇādha̭rāgṃ akaḥ || u॒dgrā॒bha-ñca̭ nigrā॒bha-ñca॒ brahma̭ de॒vā a̭vīvṛdhann | athā̭ sa॒patnā̭nindrā॒gnī mḙ viṣū॒cīnā॒n vya̭syatām || emā a̭gmannā॒śiṣo॒ doha̭kāmā॒ indra̭vanto [indra̭vantaḥ, va॒nā॒ma॒he॒ dhu॒kṣī॒mahi̭] 12
vanāmahe dhukṣī॒mahi̭ pra॒jāmiṣa᳚m || rohi̭tena tvā॒-'gni-rde॒vatā᳚-ṅgamayatu॒ hari̭bhyā॒-ntvendro̭ de॒vatā᳚-ṅgamaya॒tveta̭śena tvā॒ sūryo̭ de॒vatā᳚-ṅgamayatu॒ vi tḙ muñcāmi raśa॒nā vi ra॒śmīn vi yoktrā॒ yāni̭ pari॒carta̭nāni dha॒ttāda॒smāsu॒ dravi̭ṇaṃ॒-ya~cca̭ bha॒dra-mpra ṇo᳚ brūtā-dbhāga॒dhā-nde॒vatā̭su || viṣṇo᳚-śśaṃ॒yo~ra॒ha-ndḙvaya॒jyayā̭ ya॒jñena̭ prati॒ṣṭhā-ṅga̭meya॒gṃ॒ soma̭syā॒ha-ndḙvaya॒jyayā̭ [dḙvaya॒jyayā᳚, su॒retā॒] 13
su॒retā॒ reto̭ dhiṣīya॒ tvaṣṭṷra॒ha-ndḙvaya॒jyayā̭ paśū॒nāgṃ rū॒pa-mpṷṣeya-nde॒vānā॒-mpatnī̭ra॒gni-rgṛ॒hapa̭ti-rya॒jñasya̭ mithu॒na-ntayo̭ra॒ha-ndḙvaya॒jyayā̭ mithu॒nena॒ prabhṷ̄yāsaṃ-ve~॒do̭-'si॒ vitti̭rasi vi॒deya॒ karmā̭-'si ka॒ruṇa̭masi kri॒yāsagṃ̭ sa॒nira̭si sani॒tā-'si̭ sa॒neya̭-ṅghṛ॒tava̭nta-ṅkulā॒yinagṃ̭ rā॒yaspoṣagṃ̭ saha॒sriṇaṃ̭-ve~॒do da̭dātu vā॒jina᳚m || 14 ||
(indra̭syā॒ha-mindra̭vantaḥ॒-soma̭syā॒ha-ndḙvaya॒jyayā॒-catṷścatvārigṃśacca) (a. 4)
ā pyā̭yatā-ndhru॒vā ghṛ॒tena̭ ya॒jñaṃya~̭jña॒-mprati̭ deva॒yadbhyaḥ̭ | sū॒ryāyā॒ ūdho-'di̭tyā u॒pastha̭ u॒rudhā̭rā pṛthi॒vī ya॒jñe a॒sminn || pra॒jāpa̭te-rvi॒bhānnāma̭ lo॒kastasmigg̭stvā dadhāmi sa॒ha yaja̭mānena॒ sada̭si॒ sanmḙ bhūyā॒-ssarva̭masi॒ sarva̭-mme bhūyāḥ pū॒rṇama̭si pū॒rṇa-mmḙ bhūyā॒ akṣi̭tamasi॒ mā me᳚ kṣeṣṭhāḥ॒ prācyā᳚-ndi॒śi de॒vā ṛ॒tvijo̭ mārjayantā॒-ndakṣi̭ṇāyā- [dakṣi̭ṇāyām, di॒śi] 15
ndi॒śi māsāḥ᳚ pi॒taro̭ mārjayantā-mpra॒tīcyā᳚-ndi॒śi gṛ॒hāḥ pa॒śavo̭ mārjayantā॒mudī᳚cyā-ndi॒śyāpa॒ oṣa̭dhayo॒ vana॒spata̭yo mārjayantāmū॒rdhvāyā᳚-ndi॒śi ya॒jña-ssaṃ̭va~thsa॒ro ya॒jñapa̭ti-rmārjayantāṃ॒-vi~ṣṇoḥ॒ kramo᳚-'syabhimāti॒hā gā̭ya॒treṇa॒ chanda̭sā pṛthi॒vīmanu॒ vi kra̭me॒ nirbha̭kta॒-ssa ya-ndvi॒ṣmo viṣṇoḥ॒ kramo᳚-'syabhiśasti॒hā traiṣṭṷbhena॒ chanda̭sā॒ 'ntari̭kṣa॒manu॒ vi kra̭me॒ nirbha̭kta॒-ssa ya-ndvi॒ṣmo viṣṇoḥ॒ kramo᳚-'syarātīya॒to ha॒ntā jāga̭tena॒ chanda̭sā॒ diva॒manu॒ vi kra̭me॒ nirbha̭kta॒-ssa ya-ndvi॒ṣmo viṣṇoḥ॒ kramo̭-'si śatrūya॒to ha॒ntā-''nṷṣṭubhena॒ chanda̭sā॒ diśo-'nu॒ vi kra̭me॒ nirbha̭kta॒-ssa ya-ndvi॒ṣmaḥ || 16 ||
(dakṣi̭ṇāyā - ma॒ntari̭kṣa॒manu॒ vi kra̭me॒ nirbha̭kta॒-ssa ya-ndvi॒ṣmo viṣṇo॒- rekā॒nnatri॒gṃ॒śacca̭) (a. 5)
aga̭nma॒ suva॒-ssuva̭raganma sa॒ndṛśa̭ste॒ mā chi̭thsi॒ yatte॒ tapa॒stasmai̭ te॒ mā-'' vṛ̭kṣi su॒bhūra̭si॒ śreṣṭho̭ raśmī॒nāmā̭yu॒rdhā a॒syāyṷrme dhehi varco॒dhā a̭si॒ varco॒ mayi̭ dhehī॒dama॒hama॒mu-mbhrātṛ̭vyamā॒bhyo di॒gbhyo᳚-'syai di॒vo᳚-'smāda॒ntari̭kṣāda॒syai pṛ̭thi॒vyā a॒smāda॒nnādyā॒nnirbha̭jāmi॒ nirbha̭kta॒-ssa ya-ndvi॒ṣmaḥ || 17 ||
sa-ñjyoti̭ṣā-'bhūvamai॒ndrī-mā॒vṛta̭-ma॒nvāva̭rte॒ sama॒ha-mpra॒jayā॒ sa-mmayā᳚ pra॒jā sama॒hagṃ rā॒yaspoṣḙṇa॒ sa-mmayā̭ rā॒yaspoṣa॒-ssami̭ddho agne me dīdihi same॒ddhā tḙ agne dīdyāsaṃ॒-va~sṷmān. ya॒jño vasī̭yā-nbhūyāsa॒magna॒ āyūgṃ̭ṣi pavasa॒ ā su॒vorja॒miṣa̭-ñca naḥ | ā॒re bā̭dhasva du॒cchunā᳚m || agne॒ pava̭sva॒ svapā̭ a॒sme varcaḥ̭ su॒vīrya᳚m || 18 ||
dadha॒tpoṣagṃ̭ ra॒yi-mmayi̭ | agnḙ gṛhapate sugṛhapa॒tira॒ha-ntvayā̭ gṛ॒hapa̭tinā bhūyāsagṃ sugṛhapa॒tirmayā॒ tva-ṅgṛ॒hapa̭tinā bhūyā-śśa॒tagṃ himā॒stāmā॒śiṣa॒mā śā̭se॒ tanta̭ve॒ jyoti̭ṣmatī॒-ntāmā॒śiṣa॒mā śā̭se॒-'muṣmai॒ jyoti̭ṣmatī॒-ṅkastvā̭ yunakti॒ sa tvā॒ vimṷñca॒tvagne᳚ vratapate vra॒tama̭cāriṣa॒-ntada̭śaka॒-ntanmḙ-'rādhi ya॒jño ba̭bhūva॒ sa ā [sa ā, ba॒bhū॒va॒ sa] 19
ba̭bhūva॒ sa praja̭jñe॒ sa vā̭vṛdhe | sa de॒vānā॒madhi̭pati-rbabhūva॒ so a॒smāgṃ adhi̭patīn karotu va॒yagg syā̭ma॒ pata̭yo rayī॒ṇām || gomāgṃ̭ a॒gne-'vi̭māgṃ a॒śvī ya॒jño nṛ॒vathsa̭khā॒ sada॒mida̭pramṛ॒ṣyaḥ |iḍā̭vāgṃ e॒ṣo a̭sura pra॒jāvā᳚-ndī॒rgho ra॒yiḥ pṛ̭thubu॒ddhna-ssa॒bhāvāṋ || 20 ||
(dvi॒ṣmaḥ-su॒vīrya॒gṃ॒-sa ā-pañca̭trigṃśacca) (a. 6)
yathā॒ vai sa̭mṛtaso॒mā e॒vaṃ-vā~ e॒te sa̭mṛtaya॒jñā yadda̭rśapūrṇamā॒sau kasya॒ vā-'ha̭ de॒vā ya॒jñamā॒gaccha̭nti॒ kasya̭ vā॒ na ba̭hū॒nāṃ-ya~ja̭mānānāṃ॒-yo~ vai de॒vatāḥ॒ pūrvaḥ̭ parigṛ॒hṇāti॒ sa ḙnā॒-śśvo bhū॒te ya̭jata e॒tadvai de॒vānā̭-mā॒yata̭naṃ॒-ya~dā̭hava॒nīyo᳚-'nta॒rā-'gnī pa̭śū॒nā-ṅgārha̭patyo manu॒ṣyā̭ṇā-manvāhārya॒paca̭naḥ pitṛ॒ṇāma॒gni-ṅgṛ̭hṇāti॒ sva e॒vāyata̭ne de॒vatāḥ॒ pari̭ [de॒vatāḥ॒ pari̭, gṛ॒hṇā॒ti॒ tā-śśvo] 21
gṛhṇāti॒ tā-śśvo bhū॒te ya̭jate vra॒tena॒ vai meddhyo॒ -'gni-rvra॒tapa̭ti-rbrāhma॒ṇo vra̭ta॒bhṛ-dvra॒ta-mṷpai॒ṣya-nbrṷ̄yā॒dagne᳚ vratapate vra॒ta-ñca̭riṣyā॒mītya॒gni-rvai de॒vānāṃ᳚-vra~॒tapa̭ti॒stasmā̭ e॒va pra̭ti॒procya̭ vra॒tamā la̭bhate ba॒r॒hiṣā̭ pū॒rṇamā̭se vra॒tamupai̭ti va॒thsaira̭māvā॒syā̭yāme॒taddhyḙtayo̭-rā॒yata̭namupa॒stīryaḥ॒ pūrva̭ścā॒gnirapa̭ra॒ścetyā̭hu-rmanu॒ṣyā̭ [-rmanu॒ṣyāḥ᳚, innvā] 22
innvā upa̭stīrṇa-mi॒cchanti॒ kimṷ de॒vā yeṣā॒-nnavā̭vasāna॒-mupā᳚smi॒ñchvo ya॒kṣyamā̭ṇe de॒vatā̭ vasanti॒ ya e॒vaṃ-vi~॒dvāna॒gni-mṷpastṛ॒ṇāti॒ yaja̭mānena grā॒myāśca̭ pa॒śavo̭-'va॒ruddhyā̭ āra॒ṇyāścetyā̭hu॒-rya-dgrā॒myānṷpa॒vasa̭ti॒ tena̭ grā॒myānava̭ rundhe॒ yadā̭ra॒ṇyasyā॒-'śñāti॒ tenā̭ra॒ṇyān. yadanā᳚śvā-nupa॒vase᳚-tpitṛdeva॒tyaḥ̭ syādāra॒ṇyasyā᳚-śñātīndri॒yaṃ- [śñātīndri॒yam, vā ā̭ra॒ṇyaṃ-] 23
-~vā ā̭ra॒ṇya-mi̭ndri॒ya-me॒vā-''tma-ndha̭tte॒ yadanā᳚śvā-nupa॒vase॒-tkṣodhṷka-ssyā॒dya-da̭śñī॒yādru॒-dro᳚-'sya pa॒śūna॒bhi ma̭nyetā॒-'po᳚-'śñāti॒ tannevā̭śi॒ta-nnevā-'na̭śita॒-nna kṣodhṷko॒ bhava̭ti॒ nāsya̭ ru॒draḥ pa॒śūna॒bhi ma̭nyate॒ vajro॒ vai ya॒jñaḥ, kṣu-tkhalu॒ vai ma̭nu॒ṣya̭sya॒ bhrātṛ̭vyo॒ yadanā᳚-'śvānupa॒vasa̭ti॒ vajrḙṇai॒va sā॒kṣā-tkṣudha॒-mbhrātṛ̭vyagṃ hanti || 24 ||
(pari̭-manu॒ṣyā̭-indri॒yagṃ-sā॒kṣāt-trīṇi̭ ca) (a. 7)
yo vai śra॒ddhāmanā̭rabhya ya॒jñena॒ yaja̭te॒ nāsye॒ṣṭāya॒ śradda̭dhate॒-'paḥ pra ṇa̭yati śra॒ddhā vā āpaḥ̭ śra॒ddhāme॒vā-''rabhya̭ ya॒jñena̭ yajata u॒bhaye᳚-'sya devamanu॒ṣyā i॒ṣṭāya॒ śradda̭dhate॒ tadā̭hu॒rati॒ vā e॒tā vartra̭-nneda॒ntyati॒ vāca॒-mmano॒ vāvaitā nāti̭ neda॒ntīti॒ mana̭sā॒ pra ṇa̭yatī॒yaṃ-vai~ mano॒- [manaḥ̭, a॒nayai॒vaināḥ॒] 25
-'nayai॒vaināḥ॒ pra ṇa̭ya॒tya-ska̭nnahavi-rbhavati॒ ya e॒vaṃ-ve~da̭ yajñāyu॒dhāni॒ sa-mbha̭rati ya॒jño vai ya̭jñāyu॒dhāni̭ ya॒jñame॒va tathsa-mbha̭rati॒ yadeka̭mekagṃ sa॒mbhare᳚t-pitṛdeva॒tyā̭ni syu॒rya-thsa॒ha sarvā̭ṇi mānu॒ṣāṇi॒ dvedve॒ sambha̭rati yājyānuvā॒kya̭yore॒va rū॒pa-ṅka̭ro॒tyatho̭ mithu॒name॒vayo vai daśa̭ yajñāyu॒dhāni॒ veda̭ mukha॒to᳚-'sya ya॒jñaḥ ka̭lpate॒ sphya- [ka̭lpate॒ sphyaḥ, ca॒ ka॒pālā̭ni] 26
-śca̭ ka॒pālā̭ni cāgnihotra॒hava̭ṇī ca॒ śūrpa̭-ñca kṛṣṇāji॒na-ñca॒ śamyā̭ co॒lūkha̭la-ñca॒ musa̭la-ñca dṛ॒ṣaccopa̭lā cai॒tāni॒ vai daśa̭ yajñāyu॒dhāni॒ ya e॒vaṃ-ve~da̭ mukha॒to᳚-'sya ya॒jñaḥ ka̭lpate॒ yo vai de॒vebhyaḥ̭ prati॒procya̭ ya॒jñena॒ yaja̭te ju॒ṣante᳚-'sya de॒vā ha॒vyagṃ ha॒vi-rni̭ru॒pyamā̭ṇama॒bhi ma̭ntrayetā॒-'gnigṃ hotā̭rami॒ha tagṃ hṷva॒ iti̭ [ ] 27
de॒vebhya̭ e॒va pra̭ti॒procya̭ ya॒jñena̭ yajate ju॒ṣante᳚-'sya de॒vā ha॒vyame॒ṣa vai ya॒jñasya॒ graho̭ gṛhī॒tvaiva ya॒jñena̭ yajate॒ tadṷdi॒tvā vācaṃ̭-ya~cchati ya॒jñasya॒ dhṛtyā॒ atho॒ mana̭sā॒ vai pra॒jāpa̭ti-rya॒jñama̭tanuta॒ mana̭sai॒va ta-dya॒jña-nta̭nute॒ rakṣa̭sā॒-mana̭nvavacārāya॒ yo vai ya॒jñaṃ-yo~ga॒ āga̭te yu॒nakti̭ yu॒ṅkte yṷñjā॒neṣu॒ kastvā̭ yunakti॒ sa tvā̭ yuna॒ktvi-( ) -tyā̭ha pra॒jāpa̭ti॒-rvai kaḥ pra॒jāpa̭tinai॒vainaṃ̭-yu~nakti yu॒ṅkte yṷñjā॒neṣṷ || 28 ||
(vaima॒naḥ-sphya-iti̭-yuna॒ktve-kā̭daśa ca) (a. 8)
pra॒jāpa̭ti-rya॒jñāna̭sṛjatā-gniho॒tra-ñcā᳚gniṣṭo॒ma-ñca̭ paurṇamā॒sī-ñco॒kthya̭-ñcāmāvā॒syā᳚-ñcātirā॒tra-ñca॒ tānuda̭mimīta॒ yāva̭dagniho॒tra-māsī॒-ttāvā̭nagniṣṭo॒mo yāva̭tī paurṇamā॒sī tāvā̭nu॒kthyo̭ yāva̭tyamāvā॒syā̭ tāvā̭natirā॒tro ya e॒vaṃ-vi~॒dvāna̭gniho॒tra-ñju॒hoti॒ yāva̭dagniṣṭo॒meno̭ pā॒pnoti॒ tāva॒dupā᳚-''pnoti॒ ya e॒vaṃ-vi~॒dvā-npau᳚rṇamā॒sīṃ-ya~ja̭te॒ yāva̭du॒kthyḙnopā॒pnoti॒ [yāva̭du॒kthyḙnopā॒pnoti̭, tāva॒dupā᳚-''pnoti॒] 29
tāva॒dupā᳚-''pnoti॒ ya e॒vaṃ-vi~॒dvāna̭māvā॒syāṃ᳚-ya~ja̭te॒ yāva̭datirā॒treṇo̭pā॒pnoti॒ tāva॒dupā᳚-''pnoti parame॒ṣṭhino॒ vā e॒ṣa ya॒jño-'gra̭ āsī॒-ttena॒ sa pa̭ra॒mā-ṅkāṣṭhā̭magaccha॒-ttena̭ pra॒jāpa̭ti-nni॒ravā̭sāyaya॒-ttena̭ pra॒jāpa̭tiḥ para॒mā-ṅkāṣṭhā̭magaccha॒-ttenendra̭-nni॒ravā̭sāyaya॒-ttenendraḥ̭ para॒mā-ṅkāṣṭhā̭magaccha॒-ttenā॒-'gnīṣomaṷ ni॒ravā̭sāyaya॒-ttenā॒gnīṣomaṷ pa॒ramā-ṅkāṣṭhā̭magacchatāṃ॒-ya~ [kāṣṭhā̭magacchatāṃ॒-yaḥ, ~e॒vaṃ-vi~॒dvā-nda̭rśapūrṇamā॒sau] 30
e॒vaṃ-vi~॒dvā-nda̭rśapūrṇamā॒sau yaja̭te para॒māme॒va kāṣṭhā᳚-ṅgacchati॒ yo vai prajā̭tena ya॒jñena॒ yaja̭te॒ pra pra॒jayā̭ pa॒śubhi̭-rmithu॒nai-rjā̭yate॒ dvāda̭śa॒ māsā᳚-ssaṃva~thsa॒ro dvāda̭śa dva॒ndvāni̭ darśapūrṇamā॒sayo॒stāni̭ sa॒mpādyā॒nītyā̭hu-rva॒thsa-ñco̭pāvasṛ॒jatyu॒khā-ñcādhi̭ śraya॒tyava̭ ca॒ hanti̭ dṛ॒ṣadaṷ ca sa॒māha॒ntyadhi̭ ca॒ vapa̭te ka॒pālā̭ni॒ copa̭ dadhāti puro॒ḍāśa̭-ñcā- [puro॒ḍāśa̭-ñca, a॒dhi॒śraya॒tyājya̭-ñca] 31
-'dhi॒śraya॒tyājya̭-ñca stambaya॒juśca॒ hara̭tya॒bhi ca̭ gṛhṇāti॒ vedi̭-ñca pari gṛ॒hṇāti॒ patnī᳚-ñca॒ sanna̭hyati॒ prokṣa̭ṇīścā ''sā॒daya॒tyājya̭-ñcai॒tāni॒ vai dvāda̭śa dva॒ndvāni̭ darśapūrṇamā॒sayo॒stāni॒ ya e॒vagṃ sa॒mpādya॒ yaja̭te॒ prajā̭tenai॒va ya॒jñena̭ yajate॒ pra pra॒jayā̭ pa॒śubhi̭-rmithu॒nai-rjā̭yate || 32 ||
(u॒kthyḙnopā॒pnotya̭-gacchatāṃ॒-yaḥ ~- pṷro॒ḍāśaṃ̭-catvāri॒gṃ॒śacca̭) (a. 9)
dhru॒vo̭-'si dhru॒vo̭-'hagṃ sa̭jā॒teṣṷ bhūyāsa॒mityā̭ha dhru॒vāne॒vainā᳚n kuruta u॒gro᳚-'syu॒gro̭-'hagṃ sa̭jā॒teṣṷ bhūyāsa॒-mityā॒hāpra̭tivādina e॒vainā᳚n kurute-'bhi॒bhūra̭syabhi॒bhūra॒hagṃ sa̭jā॒teṣṷ bhūyāsa॒mityā̭ha॒ ya e॒vaina̭-mpratyu॒tpipī̭te॒ tamupā᳚syate yu॒najmi̭ tvā॒ brahma̭ṇā॒ daivye॒netyā̭hai॒ṣa vāa॒gneryoga॒stenai॒ - [vāa॒gneryoga॒stena̭, e॒vainaṃ̭-yu~nakti] 33
vainaṃ̭-yu~nakti ya॒jñasya॒ vai samṛ̭ddhena de॒vā-ssṷva॒rgaṃ-lo~॒kamā̭yan. ya॒jñasya॒ vyṛ̭ddhe॒nāsṷrā॒-nparā̭bhāvaya॒n. yanmḙ agne a॒sya ya॒jñasya॒ riṣyā॒dityā̭ha ya॒jñasyai॒va tathsamṛ̭ddhena॒ yaja̭māna-ssuva॒rgaṃ-lo~॒kamḙti ya॒jñasya॒ vyṛ̭ddhena॒ bhrātṛ̭vyā॒-nparā̭ bhāvayatyagniho॒tra-me॒tābhi॒-rvyāhṛ̭tībhi॒rupa̭ sādayedyajñamu॒khaṃ-vā~ a̭gniho॒tra-mbrahmai॒tā vyāhṛ̭tayo yajñamu॒kha e॒va brahma̭ - [brahma̭, ku॒ru॒te॒ saṃ॒va~॒thsa॒re] 34
kurute saṃva~thsa॒re pa॒ryāga̭ta e॒tābhi̭re॒vopa̭ sādaye॒-dbrahma̭ṇai॒vobha॒yataḥ̭ saṃva~thsa॒ra-mpari̭ gṛhṇāti darśapūrṇamā॒sau cā̭turmā॒syānyā॒labha̭māna e॒tābhi॒-rvyāhṛ̭tībhir-ha॒vīgṣyāsā̭daye-dyajñamu॒khaṃ-vai~ da̭rśapūrṇamā॒sau cā̭turmā॒syāni॒ brahmai॒tā vyāhṛ̭tayo yajñamu॒kha e॒va brahma̭ kurute saṃva~thsa॒re pa॒ryāga̭ta e॒tābhi̭re॒vāsā̭daye॒-dbrahma̭ṇai॒vobha॒yataḥ̭ saṃva~thsa॒ra-mpari̭gṛhṇāti॒ yadvai ya॒jñasya॒ sāmnā᳚ kri॒yatḙ rā॒ṣṭraṃ- [rā॒ṣṭram, ya॒jñasyā॒-śīrga̭cchati॒] 35
-~ya॒jñasyā॒-śīrga̭cchati॒ yadṛ॒cā viśaṃ̭-ya~॒jñasyā॒- śīrga̭ccha॒tyatha̭ brāhma॒ṇo̭-'nā॒śīrkḙṇa ya॒jñena̭ yajate sāmidhe॒nī-ra̭nuva॒kṣyanne॒tā vyāhṛ̭tīḥ pu॒rastā᳚ddaddhyā॒-dbrahmai॒va pra̭ti॒pada̭-ṅkurute॒ tathā᳚ brāhma॒ṇa-ssāśī᳚rkeṇa ya॒jñena̭ yajate॒ ya-ṅkā॒mayḙta॒ yaja̭māna॒-mbhrātṛ̭vyamasya ya॒jñasyā॒śīrga̭cche॒diti॒ tasyai॒tā vyāhṛ̭tīḥ puronuvā॒kyā̭yā-ndaddhyā-dbhrātṛvyadeva॒tyā̭ vai pṷronuvā॒kyā᳚ bhrātṛ̭vyame॒vāsya̭ ya॒jñasyā॒-[ya॒jñasyā̭, ā॒śīrga̭cchati॒] 36
-''śīrga̭cchati॒ yān kā॒mayḙta॒ yaja̭mānān-thsa॒māva̭tyenān ya॒jñasyā॒ ''śīrga̭cche॒diti॒ teṣā̭me॒tā vyāhṛ̭tīḥ puronuvā॒kyā̭yā ardha॒rca ekā᳚-ndaddhyā-dyā॒jyā̭yai pu॒rastā॒dekāṃ᳚-yā~॒jyā̭yā ardha॒rca ekā॒-ntathai̭nān-thsa॒māva̭tī ya॒jñasyā॒ ''śīrga̭cchati॒ yathā॒ vai pa॒rjanya॒-ssuvṛ̭ṣṭaṃ॒-va~rṣa̭tye॒vaṃ-ya~॒jño yaja̭mānāya varṣati॒ sthala̭yoda॒ka-mpa̭rigṛ॒hṇantyā॒śiṣā̭ ya॒jñaṃ-ya~ja̭mānaḥ॒ pari̭ gṛhṇāti॒ mano̭-'si prājāpa॒tyaṃ- [prājāpa॒tyam, mana̭sā] 37
-mana̭sā mā bhū॒tenā-''vi॒śetyā̭ha॒ mano॒ vai prā̭jāpa॒tya-mprā̭jāpa॒tyo ya॒jño mana̭ e॒va ya॒jñamā॒tma-ndha̭tte॒ vāga̭syai॒ndrī sa̭patna॒kṣaya̭ṇī vā॒cā me᳚ndri॒yeṇā-''vi॒śetyā̭hai॒ndrī vai vāgvāca̭-me॒vaindrī- mā॒tma-ndha̭tte || 38 ||
(tenai॒-va brahma̭- rā॒ṣṭrame॒-vāsya̭ ya॒jñasya̭-prājāpa॒tyagṃ-ṣaṭtrigṃ̭śacca) (a. 10)
yo vai sa̭ptada॒śa-mpra॒jāpa̭tiṃ-ya~॒jñama॒nvāya̭ttaṃ॒-ve~da॒ prati̭ ya॒jñena̭ tiṣṭhati॒ na ya॒jñā-dbhragṃ̭śata॒ ā śrā̭va॒yeti॒ catṷrakṣara॒mastu॒ śrauṣa॒ḍiti॒ catṷrakṣaraṃ॒-ya~jeti॒ dvya̭kṣaraṃ॒-ye~ yajā̭maha॒ iti॒ pañcā᳚kṣara-ndvyakṣa॒ro va̭ṣaṭkā॒ra e॒ṣa vai sa̭ptada॒śaḥ pra॒jāpa̭ti-rya॒jñama॒nvāya̭tto॒ ya e॒vaṃ-ve~da॒ prati̭ ya॒jñena̭ tiṣṭhati॒ na ya॒jñād- bhragṃ̭śate॒ yo vai ya॒jñasya॒ prāya̭ṇa-mprati॒ṣṭhā- [prati॒ṣṭhām, u॒daya̭naṃ॒-ve~da॒] 39
mu॒daya̭naṃ॒-ve~da॒ prati̭ṣṭhite॒nāri̭ṣṭena ya॒jñena̭ sa॒gg॒sthā-ṅga̭ccha॒tyāśrā̭va॒yāstu॒ śrauṣa॒ḍyaja॒ ye yajā̭mahe vaṣaṭkā॒ra e॒tadvai ya॒jñasya॒ prāya̭ṇame॒ṣā pra̭ti॒ṣṭhaitadu॒daya̭naṃ॒-ya~ e॒vaṃ-ve~da॒ prati̭ṣṭhite॒nā-'ri̭ṣṭena ya॒jñena̭ sa॒gg॒sthā-ṅga̭cchati॒ yo vai sū॒nṛtā̭yai॒ dohaṃ॒-ve~da̭ du॒ha e॒vaināṃ᳚-ya~॒jño vai sū॒nṛtā '' śrā̭va॒yetyaivainā̭-mahva॒dastu॒ [-mahva॒dastṷ, śrauṣa॒ḍityu॒pāvā᳚srā॒-] 40
śrauṣa॒ḍityu॒pāvā᳚srā॒-gyajetyuda̭naiṣī॒dye yajā̭maha॒ ityupā̭-'sada-dvaṣaṭkā॒reṇa̭ dogddhye॒ṣa vai sū॒nṛtā̭yai॒ doho॒ ya e॒vaṃ-ve~da̭ du॒ha e॒vainā᳚-nde॒vā vai sa॒tramā̭sata॒ teṣā॒-ndiśo̭-'dasya॒nta e॒tāmā॒rdrā-mpa॒ṅktima̭paśya॒nnā śrā̭va॒yeti̭ purovā॒ta-ma̭janaya॒nnastu॒ śrauṣa॒ḍitya॒bhragṃ sama̭plāvaya॒n॒. yajeti̭ vi॒dyuta̭- [vi॒dyuta̭m, a॒ja॒na॒ya॒n॒ ye] 41
majanaya॒n॒ ye yajā̭maha॒ iti॒ prāva̭rṣayanna॒bhya̭stanayan vaṣaṭkā॒reṇa॒ tato॒ vai tebhyo॒ diśaḥ॒ prāpyā̭yanta॒ ya e॒vaṃ-ve~da॒ prāsmai॒ diśaḥ̭ pyāyante pra॒jāpa̭ti-ntvo॒veda̭ pra॒jāpa̭ti stvaṃve~da॒ ya-mpra॒jāpa̭ti॒-rveda॒ sa puṇyo̭ bhavatye॒ṣa vai cha̭nda॒syaḥ̭ pra॒jāpa̭ti॒rā śrā̭va॒yā-'stu॒ śrauṣa॒ḍyaja॒ ye yajā̭mahe vaṣaṭkā॒ro ya e॒vaṃ-ve~da॒ puṇyo̭ bhavati vasa॒nta- [vasa॒ntam, ṛ॒tū॒nāṃ] 42
-mṛ̭tū॒nā-mprī̭ṇā॒mītyā̭ha॒rtavo॒ vai pra̭yā॒jā ṛ॒tūne॒va prī̭ṇāti॒ te᳚-'smai prī॒tā ya̭thāpū॒rva-ṅka̭lpante॒ kalpa̭nte-'smā ṛ॒tavo॒ ya e॒vaṃ-ve~dā॒gnīṣoma̭yora॒ha-ndḙvaya॒jyayā॒ cakṣṷṣmā-nbhūyāsa॒mityā̭-hā॒gnīṣomā᳚bhyāṃ॒-vai~ ya॒jñaścakṣṷṣmā॒-ntābhyā̭me॒va cakṣṷrā॒tma-ndha̭tte॒ 'gnera॒ha-ndḙvaya॒jyayā᳚-'nnā॒do bhṷ̄yāsa॒mityā̭hā॒gnirvai de॒vānā̭-mannā॒daste nai॒vā- [mannā॒daste nai॒vā, a॒nnādya̭mā॒tman] 43
-'nnādya̭mā॒tma-ndha̭tte॒ dabdhi̭ra॒syada̭bdho bhūyāsama॒mu-nda̭bheya॒mityā̭hai॒tayā॒ vai dabddhyā̭ de॒vā asṷrānadabhnuva॒ntayai॒va bhrātṛ̭vya-ndabhnotya॒gnīṣoma̭yora॒ha-ndḙvaya॒jyayā̭ vṛtra॒hā bhṷ̄yāsa॒mityā̭hā॒-'gnīṣomā᳚bhyāṃ॒-vā~ indro̭ vṛ॒trama̭ha॒ntābhyā̭me॒va bhrātṛ̭vyagg stṛṇuta indrāgni॒yora॒ha-ndḙvaya॒jyaye᳚ndriyā॒vya̭nnā॒do bhṷ̄yāsa॒mityā̭hendriyā॒vyḙvānnā॒do bha̭va॒tīndra̭syā॒- [bha̭va॒tīndra̭sya, a॒ha-ndḙvaya॒jyaye᳚ndriyā॒vī] 44
-'ha-ndḙvaya॒jyaye᳚ndriyā॒vī bhṷ̄yāsa॒mityā̭hendriyā॒vyḙva bha̭vati mahe॒ndrasyā॒-'ha-ndḙvaya॒jyayā̭ je॒māna̭-mmahi॒māna̭-ṅgameya॒mityā̭ha je॒māna̭me॒va ma̭hi॒māna̭-ṅgacchatya॒gne-ssvi̭ṣṭa॒kṛto॒-'ha-ndḙvaya॒jyayā ''yṷṣmān. ya॒jñena̭ prati॒ṣṭhā-ṅga̭meya॒mityā॒-hāyṷre॒vātma-ndha̭tte॒ prati̭ ya॒jñena̭ -tiṣṭhati || 45 ||
( pra॒ti॒ṣṭhā-ma̭hva॒dastṷ-vi॒dyutaṃ̭va~sa॒ntan-tenai॒ve-ndra̭syā॒-'ṣṭātrigṃ̭śacca) (a. 11)
indraṃ̭-vo~ vi॒śvata॒spari॒ havā̭mahe॒ jane᳚bhyaḥ | a॒smāka̭mastu॒ keva̭laḥ || indra॒-nnaro̭ ne॒madhi̭tā havante॒ yatpāryā̭ yu॒naja̭te॒ dhiya॒stāḥ | śūro॒ nṛṣā̭tā॒ śava̭saścakā॒na ā goma̭ti vra॒je bha̭jā॒ tvannaḥ̭ || i॒ndri॒yāṇi̭ śatakrato॒ yā te॒ janḙṣu pa॒ñcasṷ || indra॒ tāni̭ ta॒ ā vṛ̭ṇe || anṷ te dāyi ma॒ha i̭ndri॒yāya̭ sa॒trā te॒ viśva॒manṷ vṛtra॒hatye᳚ | anṷ [ ] 46
kṣa॒tramanu॒ saho̭ yaja॒trendra̭ de॒vebhi॒ranṷ te nṛ॒ṣahye᳚ || āyasmi᳚n-thsa॒ptavā̭sa॒vā stiṣṭha̭nti svā॒ruho̭ yathā | ṛṣi̭rha dīrgha॒śrutta̭ma॒ indra̭sya gha॒rmo ati̭thiḥ || ā॒māsṷ pa॒kvamaira̭ya॒ ā sūryagṃ̭ rohayo di॒vi | gha॒rma-nna sāma̭-ntapatā suvṛ॒ktibhi॒-rjuṣṭa॒-ṅgirva̭ṇase॒ giraḥ̭ || indra॒mi-dgā॒thino̭ bṛ॒hadindra̭-ma॒rkebhi̭-ra॒rkiṇaḥ̭ | indraṃ॒-vā~ṇī̭ranūṣata || gāya̭nti tvā gāya॒triṇo- [gāya॒triṇaḥ̭, arca̭ntya॒rka-ma॒rkiṇaḥ̭ |] 47
-'rca̭ntya॒rka-ma॒rkiṇaḥ̭ | bra॒hmāṇa̭stvā śatakrata॒vu-dva॒gṃ॒śa-mi̭va yemire || a॒gṃ॒ho॒muce॒ pra bha̭remā manī॒ṣāmo̭ṣiṣṭha॒dāvaṃnḙ suma॒ti-ṅgṛ̭ṇā॒nāḥ | i॒dami̭ndra॒ prati̭ ha॒vya-ṅgṛ̭bhāya sa॒tyā-ssa̭ntu॒ yaja̭mānasya॒ kāmāḥ᳚ || vi॒veṣa॒ yanmā̭ dhi॒ṣaṇā̭ ja॒jāna॒ stavai̭ pu॒rā pāryā॒dindra॒-mahnaḥ̭ | agṃha̭so॒ yatra̭ pī॒para॒dyathā̭ no nā॒veva॒ yānta̭ mu॒bhayḙ havante || pra sa॒mrāja̭-mpratha॒ma-ma̭ddhva॒rāṇā̭- [ma̭ddhva॒rāṇā᳚m, a॒gṃ॒ho॒mucaṃ̭] 48
-magṃho॒mucaṃ̭-vṛ~ṣa॒bhaṃ-ya~॒jñiyā̭nām | a॒pā-nnapā̭tamaśvinā॒ haya̭nta-ma॒sminna̭ra indri॒ya-ndha̭tta॒mojaḥ̭ || vi na̭ indra॒ mṛdho̭ jahi nī॒cā ya̭ccha pṛtanya॒taḥ | a॒dha॒spa॒da-ntamī᳚-ṅkṛdhi॒ yo a॒smāgṃ a̭bhi॒dāsa̭ti || indra̭ kṣa॒trama॒bhi vā॒mamojo 'jā̭yathā vṛṣabha carṣaṇī॒nām | apā̭nudo॒ jana̭-mamitra॒yanta̭-mu॒ru-nde॒vebhyo̭ akṛṇo-ru lo॒kam || mṛ॒go na bhī॒maḥ kṷca॒ro gi̭ri॒ṣṭhāḥ pa̭rā॒vata [pa̭rā॒vataḥ̭, ā ja̭gāmā॒ para̭syāḥ |] 49
ā ja̭gāmā॒ para̭syāḥ | sṛ॒kagṃ sa॒gṃ॒śāya̭ pa॒vimi̭ndra ti॒gmaṃ-vi~ śatrū᳚-ntāḍhi॒ vimṛdho̭ nudasva || vi śatrū॒n॒. vi mṛdho̭ nuda॒ vivṛ॒trasya॒ hanṷ̄ ruja | vi ma॒nyumi̭ndra bhāmi॒to̭-'mitra̭syā-'bhi॒dāsa̭taḥ || trā॒tāra॒-mindra̭-mavi॒tāra॒-mindra॒gṃ॒ havḙhave su॒hava॒gṃ॒ śūra॒mindra᳚m | hu॒ve nu śa॒kra-mpṷruhū॒tamindragg̭ sva॒sti no̭ ma॒ghavā̭ dhā॒tvindraḥ̭ || mā tḙ a॒syāgṃ [a॒syāgṃ, sa॒ha॒sā॒va॒-npari̭ṣṭāva॒ghāya̭] 50
sa̭hasāva॒-npari̭ṣṭāva॒ghāya̭ bhūma harivaḥ parā॒dai | trāya̭sva no 'vṛ॒kebhi॒-rvarṷ̄thai॒-stava̭ pri॒yāsaḥ̭ sū॒riṣṷ syāma || ana̭vaste॒ ratha॒maśvā̭ya takṣa॒-ntvaṣṭā॒ vajra̭-mpuruhūta dyu॒manta᳚m | bra॒hmāṇa॒ indra̭-mma॒haya̭nto a॒rkairava̭rdhaya॒nnaha̭ye॒ hanta॒vā ṷ || vṛṣṇe॒ ya-tte॒ vṛṣa̭ṇo a॒rkamarcā॒nindra॒ grāvā̭ṇo॒ adi̭ti-ssa॒joṣāḥ᳚ | a॒na॒śvāso॒ ye pa॒vayo̭-'ra॒thā indrḙṣitā a॒bhyava̭rta nta॒ dasyūṋ || 51 ||
(vṛ॒tra॒hatye-'nṷ-gāya॒triṇo᳚-'ddha॒rāṇāṃ᳚-parā॒vato॒-'syā-ma॒ṣṭāca̭tvārigṃśacca) (a. 12)
(santvā̭ siñcāmi-dhru॒vo᳚-'sya॒gnirmā̭-ba॒r॒hiṣo॒-'ha-mā pyā̭yatā॒-maga̭nma॒-yathā॒ vai-yo vai śra॒ddhāṃ- pra॒jāpa̭ti॒-ryajñān-dhru॒vo̭-'sītyā̭ha॒-yo vai sa̭ptada॒śa-mindraṃ̭-vo~॒-dvāda̭śa | )
(santvā̭-ba॒r॒hiṣo॒-'haṃya~thā॒ vā-e॒vaṃ-vi~॒dvā-ñchrauṣa̭ṭ-thsāhasāva॒-nneka̭pañcā॒śat |)
(santvā̭, siñcāmi॒ dasyūṋ)
|| hariḥ̭ om ||
|| kṛṣṇa yajurvedīya taittirīya saṃhitāyā-mprathamakāṇḍe ṣaṣṭhaḥ praśna-ssamāptaḥ ||
Sanskrit — Devanagari (original)
कृष्ण यजुर्वेदीय तैत्तिरीय संहिताया-म्प्रथमकाण्डे षष्ठः प्रश्नः - याजमानकाण्डं
ओ-न्नमः परमात्मने, श्री महागणपतये नमः,
श्री गुरुभ्यो नमः । ह॒रिः॒ ओम् ॥
स-न्त्वा॑ सिञ्चामि॒ यजु॑षा प्र॒जामायु॒र्धन॑-ञ्च । बृह॒स्पति॑प्रसूतो॒ यज॑मान इ॒ह मा रि॑षत् ॥ आज्य॑मसि स॒त्यम॑सि स॒त्यस्याद्ध्य॑क्षमसि ह॒विर॑सि वैश्वान॒रं-वैँ᳚श्वदे॒व-मुत्पू॑तशुष्मग्ं स॒त्यौजा॒-स्सहो॑-ऽसि॒ सह॑मानमसि॒ सह॒स्वारा॑ती॒-स्सह॑स्वारातीय॒त-स्सह॑स्व॒ पृत॑ना॒-स्सह॑स्व पृतन्य॒तः । स॒हस्र॑वीर्यमसि॒ तन्मा॑ जि॒न्वाज्य॒स्याज्य॑मसि स॒त्यस्य॑ स॒त्यम॑सि स॒त्यायु॑- [स॒त्यायुः॑, अ॒सि॒ स॒त्यशु॑ष्ममसि] 1
-रसि स॒त्यशु॑ष्ममसि स॒त्येन॑ त्वा॒-ऽभि घा॑रयामि॒ तस्य॑ ते भक्षीय पञ्चा॒ना-न्त्वा॒ वाता॑नां-यँ॒न्त्राय॑ ध॒र्त्राय॑ गृह्णामि पञ्चा॒ना-न्त्व॑र्तू॒नां-यँ॒न्त्राय॑ ध॒र्त्राय॑ गृह्णामि पञ्चा॒ना-न्त्वा॑ दि॒शां-यँ॒न्त्राय॑ ध॒र्त्राय॑ गृह्णामि पञ्चा॒ना-न्त्वा॑ पञ्चज॒नानां᳚-यँ॒न्त्राय॑ ध॒र्त्राय॑ गृह्णामि च॒रोस्त्वा॒ पञ्च॑बिलस्य य॒न्त्राय॑ ध॒र्त्राय॑ गृह्णामि॒ ब्रह्म॑णस्त्वा॒ तेज॑से य॒न्त्राय॑ ध॒र्त्राय॑ गृह्णामि क्ष॒त्रस्य॒ त्वौज॑से य॒न्त्राय॑ [ ] 2
ध॒र्त्राय॑ गृह्णामि वि॒शे त्वा॑ य॒न्त्राय॑ ध॒र्त्राय॑ गृह्णामि सु॒वीर्या॑य त्वा गृह्णामि सुप्रजा॒स्त्वाय॑ त्वा गृह्णामि रा॒यस्पोषा॑य त्वा गृह्णामि ब्रह्मवर्च॒साय॑ त्वा गृह्णामि॒ भूर॒स्माकग्ं॑ ह॒विर्दे॒वाना॑-मा॒शिषो॒ यज॑मानस्य दे॒वाना᳚-न्त्वा दे॒वता᳚भ्यो गृह्णामि॒ कामा॑य त्वा गृह्णामि ॥ 3 ॥
(स॒त्यायु॒-रोज॑से य॒न्त्राय॒-त्रय॑स्त्रिग्ंशच्च) (अ. 1)
ध्रु॒वो॑-ऽसि ध्रु॒वो॑-ऽहग्ं स॑जा॒तेषु॑ भूयास॒-न्धीर॒श्चेत्ता॑ वसु॒विदु॒ग्रो᳚-ऽस्यु॒ग्रो॑-ऽहग्ं स॑जा॒तेषु॑ भूयास-मु॒ग्रश्चेत्ता॑ वसु॒विद॑भि॒-भूर॑स्यभि॒भूर॒हग्ं स॑जा॒तेषु॑ भूयासमभि॒भूश्चेत्ता॑ वसु॒वि-द्यु॒नज्मि॑ त्वा॒ ब्रह्म॑णा॒ दैव्ये॑न ह॒व्याया॒स्मै वोढ॒वे जा॑तवेदः ॥ इन्धा॑नास्त्वा सुप्र॒जसः॑ सु॒वीरा॒ ज्योग्जी॑वेम बलि॒हृतो॑ व॒य-न्ते᳚ ॥ यन्मे॑ अग्ने अ॒स्य य॒ज्ञस्य॒ रिष्या॒- [रिष्या᳚त्, द्यद्वा॒] 4
-द्यद्वा॒ स्कन्दा॒-दाज्य॑स्यो॒त वि॑ष्णो । तेन॑ हन्मि स॒पत्न॑-न्दुर्मरा॒युमैन॑-न्दधामि॒ निर्-ऋ॑त्या उ॒पस्थे᳚ । भू-र्भुव॒-स्सुव॒रुच्छु॑ष्मो अग्ने॒ यज॑मानायैधि॒ निशु॑ष्मो अभि॒दास॑ते । अग्ने॒ देवे᳚द्ध॒ मन्वि॑द्ध॒ मन्द्र॑जि॒ह्वा-म॑र्त्यस्य ते होतर्मू॒र्धन्ना जि॑घर्मि रा॒यस्पोषा॑य सुप्रजा॒स्त्वाय॑ सु॒वीर्या॑य॒ मनो॑-ऽसि प्राजाप॒त्य-म्मन॑सा मा भू॒तेना वि॑श॒ वाग॑स्यै॒न्द्री स॑पत्न॒क्षय॑णी [ ] 5
वा॒चा मे᳚न्द्रि॒येणा वि॑श वस॒न्तमृ॑तू॒ना-म्प्री॑णामि॒ स मा᳚ प्री॒तः प्री॑णातु ग्री॒ष्ममृ॑तू॒ना-म्प्री॑णामि॒ स मा᳚ प्री॒तः प्री॑णातु व॒र्॒षा ऋ॑तू॒ना-म्प्री॑णामि॒ ता मा᳚ प्री॒ताः प्री॑णन्तु श॒रद॑मृतू॒ना-म्प्री॑णामि॒ सा मा᳚ प्री॒ता प्री॑णातु हेमन्तशिशि॒रावृ॑तू॒ना-म्प्री॑णामि॒ तौ मा᳚ प्री॒तौ प्री॑णीता-म॒ग्नीषोम॑यो-र॒ह-न्दे॑वय॒ज्यया॒ चक्षु॑ष्मा-न्भूयासम॒ग्नेर॒ह-न्दे॑वय॒ज्यया᳚-ऽन्ना॒दो भू॑यास॒- [भू॑यासम्, दब्धि॑र॒स्यद॑ब्धो] 6
-न्दब्धि॑र॒स्यद॑ब्धो भूयासम॒मु-न्द॑भेय-म॒ग्नीषोम॑यो-र॒ह-न्दे॑वय॒ज्यया॑ वृत्र॒हा भू॑यासमिन्द्राग्नि॒योर॒ह-न्दे॑वय॒ज्यये᳚न्द्रिया॒व्य॑न्ना॒दो भू॑यास॒मिन्द्र॑स्या॒-ऽह-न्दे॑वय॒ज्यये᳚न्द्रिया॒वी भू॑यास-म्महे॒न्द्रस्या॒-ऽह-न्दे॑वय॒ज्यया॑ जे॒मान॑-म्महि॒मान॑-ङ्गमेयम॒ग्ने-स्स्वि॑ष्ट॒कृतो॒-ऽह-न्दे॑वय॒ज्यया ऽऽयु॑ष्मान्. य॒ज्ञेन॑ प्रति॒ष्ठा-ङ्ग॑मेयम् ॥ 7 ॥
(रिष्या᳚-थ्सपत्न॒क्षय॑ण्य-न्ना॒दो भू॑यास॒ग्ं॒-षट्त्रिग्ं॑शच्च) (अ. 2)
अ॒ग्निर्मा॒ दुरि॑ष्टा-त्पातु सवि॒ता-ऽघशग्ं॑सा॒द्यो मे-ऽन्ति॑ दू॒रे॑-ऽराती॒यति॒ तमे॒तेन॑ जेष॒ग्ं॒ सुरू॑पवर्षवर्ण॒ एही॒मा-न्भ॒द्रा-न्दुर्याग्ं॑ अ॒भ्येहि॒ मामनु॑व्रता॒ न्यु॑ शी॒र्॒षाणि॑ मृढ्व॒मिड॒ एह्यदि॑त॒ एहि॒ सर॑स्व॒त्येहि॒ रन्ति॑रसि॒ रम॑तिरसि सू॒नर्य॑सि॒ जुष्टे॒ जुष्टि॑-न्ते-ऽशी॒योप॑हूत उपह॒व- [उपह॒वम्, ते॒-ऽशी॒य॒ सा ] 8
-न्ते॑-ऽशीय॒ सा मे॑ स॒त्या-ऽऽशीर॒स्य य॒ज्ञस्य॑ भूया॒दरे॑डता॒ मन॑सा॒ तच्छ॑केयं-यँ॒ज्ञो दिवग्ं॑ रोहतु य॒ज्ञो दिव॑-ङ्गच्छतु॒ यो दे॑व॒यानः॒ पन्था॒स्तेन॑ य॒ज्ञो दे॒वाग्ं अप्ये᳚त्व॒स्मास्विन्द्र॑ इन्द्रि॒य-न्द॑धात्व॒स्मान्राय॑ उ॒त य॒ज्ञा-स्स॑चन्ताम॒स्मासु॑ सन्त्वा॒शिष॒-स्सा नः॑ प्रि॒या सु॒प्रतू᳚र्तिर्म॒घोनी॒ जुष्टि॑रसि जु॒षस्व॑ नो॒ जुष्टा॑ नो- [जुष्टा॑ नः, अ॒सि॒ जुष्टि॑-न्ते] 9
-ऽसि॒ जुष्टि॑-न्ते गमेय॒-म्मनो॒ ज्योति॑-र्जुषता॒माज्यं॒-विँच्छि॑न्नं-यँ॒ज्ञग्ं समि॒म-न्द॑धातु । बृह॒स्पति॑-स्तनुतामि॒मन्नो॒ विश्वे॑ दे॒वा इ॒ह मा॑दयन्ताम् ॥ ब्रद्ध्न॒ पिन्व॑स्व॒ दद॑तो मे॒ मा क्षा॑यि कुर्व॒तो मे॒ मोप॑ दस-त्प्र॒जाप॑ते-र्भा॒गो᳚-ऽस्यूर्ज॑स्वा॒-न्पय॑स्वा-न्प्राणापा॒नौ मे॑ पाहि समानव्या॒नौ मे॑ पाह्युदानव्या॒नौ मे॑ पा॒ह्यक्षि॑तो॒-ऽस्यक्षि॑त्यै त्वा॒ मा मे᳚ क्षेष्ठा अ॒मुत्रा॒मुष्मि॑न् ँलो॒के ॥ 10 ॥
(उ॒प॒ह॒वं-जुष्टा॑न-स्त्वा॒ षट् च॑) (अ. 3)
ब॒र्॒हिषो॒-ऽह-न्दे॑वय॒ज्यया᳚ प्र॒जावा᳚-न्भूयास॒-न्नरा॒शग्ंस॑स्या॒ह-न्दे॑वय॒ज्यया॑ पशु॒मा-न्भू॑यासम॒ग्ने-स्स्वि॑ष्ट॒कृतो॒-ऽह-न्दे॑वय॒ज्यया-ऽऽयु॑ष्मान्. य॒ज्ञेन॑ प्रति॒ष्ठा-ङ्ग॑मेयम॒ग्नेर॒ह-मुज्जि॑ति॒-मनूज्जे॑ष॒ग्ं॒ सोम॑स्या॒ह - मुज्जि॑ति॒-मनूज्जे॑षम॒ग्नेर॒ह-मुज्जि॑ति॒-मनूज्जे॑ष-म॒ग्नीषोम॑योर॒ह-मुज्जि॑ति॒-मनूज्जे॑ष-मिन्द्राग्नि॒योर॒ह-मुज्जि॑ति॒-मनूज्जे॑ष॒-मिन्द्र॑स्या॒-ऽह- [-मिन्द्र॑स्या॒-ऽहम्, उज्जि॑ति॒मनूज्जे॑षं] 11
-मुज्जि॑ति॒मनूज्जे॑ष-म्महे॒न्द्रस्या॒हमुज्जि॑ति॒- मनूज्जे॑षम॒ग्ने-स्स्वि॑ष्ट॒कृतो॒-ऽह मुज्जि॑ति॒-मनूज्जे॑षं॒-वाँज॑स्य मा प्रस॒वेनो᳚-द्ग्रा॒भेणोद॑ग्रभीत् । अथा॑ स॒पत्ना॒ग्ं॒ इन्द्रो॑ मे निग्रा॒भेणाध॑राग्ं अकः ॥ उ॒द्ग्रा॒भ-ञ्च॑ निग्रा॒भ-ञ्च॒ ब्रह्म॑ दे॒वा अ॑वीवृधन्न् । अथा॑ स॒पत्ना॑निन्द्रा॒ग्नी मे॑ विषू॒चीना॒न् व्य॑स्यताम् ॥ एमा अ॑ग्मन्ना॒शिषो॒ दोह॑कामा॒ इन्द्र॑वन्तो [इन्द्र॑वन्तः, व॒ना॒म॒हे॒ धु॒क्षी॒महि॑] 12
वनामहे धुक्षी॒महि॑ प्र॒जामिष᳚म् ॥ रोहि॑तेन त्वा॒-ऽग्नि-र्दे॒वता᳚-ङ्गमयतु॒ हरि॑भ्या॒-न्त्वेन्द्रो॑ दे॒वता᳚-ङ्गमय॒त्वेत॑शेन त्वा॒ सूर्यो॑ दे॒वता᳚-ङ्गमयतु॒ वि ते॑ मुञ्चामि रश॒ना वि र॒श्मीन् वि योक्त्रा॒ यानि॑ परि॒चर्त॑नानि ध॒त्ताद॒स्मासु॒ द्रवि॑णं॒-यँच्च॑ भ॒द्र-म्प्र णो᳚ ब्रूता-द्भाग॒धा-न्दे॒वता॑सु ॥ विष्णो᳚-श्शं॒योँर॒ह-न्दे॑वय॒ज्यया॑ य॒ज्ञेन॑ प्रति॒ष्ठा-ङ्ग॑मेय॒ग्ं॒ सोम॑स्या॒ह-न्दे॑वय॒ज्यया॑ [दे॑वय॒ज्यया᳚, सु॒रेता॒] 13
सु॒रेता॒ रेतो॑ धिषीय॒ त्वष्टु॑र॒ह-न्दे॑वय॒ज्यया॑ पशू॒नाग्ं रू॒प-म्पु॑षेय-न्दे॒वाना॒-म्पत्नी॑र॒ग्नि-र्गृ॒हप॑ति-र्य॒ज्ञस्य॑ मिथु॒न-न्तयो॑र॒ह-न्दे॑वय॒ज्यया॑ मिथु॒नेन॒ प्रभू॑यासं-वेँ॒दो॑-ऽसि॒ वित्ति॑रसि वि॒देय॒ कर्मा॑-ऽसि क॒रुण॑मसि क्रि॒यासग्ं॑ स॒निर॑सि सनि॒ता-ऽसि॑ स॒नेय॑-ङ्घृ॒तव॑न्त-ङ्कुला॒यिनग्ं॑ रा॒यस्पोषग्ं॑ सह॒स्रिणं॑-वेँ॒दो द॑दातु वा॒जिन᳚म् ॥ 14 ॥
(इन्द्र॑स्या॒ह-मिन्द्र॑वन्तः॒-सोम॑स्या॒ह-न्दे॑वय॒ज्यया॒-चतु॑श्चत्वारिग्ंशच्च) (अ. 4)
आ प्या॑यता-न्ध्रु॒वा घृ॒तेन॑ य॒ज्ञंयँ॑ज्ञ॒-म्प्रति॑ देव॒यद्भ्यः॑ । सू॒र्याया॒ ऊधो-ऽदि॑त्या उ॒पस्थ॑ उ॒रुधा॑रा पृथि॒वी य॒ज्ञे अ॒स्मिन्न् ॥ प्र॒जाप॑ते-र्वि॒भान्नाम॑ लो॒कस्तस्मिग्ग्॑स्त्वा दधामि स॒ह यज॑मानेन॒ सद॑सि॒ सन्मे॑ भूया॒-स्सर्व॑मसि॒ सर्व॑-म्मे भूयाः पू॒र्णम॑सि पू॒र्ण-म्मे॑ भूया॒ अक्षि॑तमसि॒ मा मे᳚ क्षेष्ठाः॒ प्राच्या᳚-न्दि॒शि दे॒वा ऋ॒त्विजो॑ मार्जयन्ता॒-न्दक्षि॑णाया- [दक्षि॑णायाम्, दि॒शि] 15
न्दि॒शि मासाः᳚ पि॒तरो॑ मार्जयन्ता-म्प्र॒तीच्या᳚-न्दि॒शि गृ॒हाः प॒शवो॑ मार्जयन्ता॒मुदी᳚च्या-न्दि॒श्याप॒ ओष॑धयो॒ वन॒स्पत॑यो मार्जयन्तामू॒र्ध्वाया᳚-न्दि॒शि य॒ज्ञ-स्सं॑वँथ्स॒रो य॒ज्ञप॑ति-र्मार्जयन्तां॒-विँष्णोः॒ क्रमो᳚-ऽस्यभिमाति॒हा गा॑य॒त्रेण॒ छन्द॑सा पृथि॒वीमनु॒ वि क्र॑मे॒ निर्भ॑क्त॒-स्स य-न्द्वि॒ष्मो विष्णोः॒ क्रमो᳚-ऽस्यभिशस्ति॒हा त्रैष्टु॑भेन॒ छन्द॑सा॒ ऽन्तरि॑क्ष॒मनु॒ वि क्र॑मे॒ निर्भ॑क्त॒-स्स य-न्द्वि॒ष्मो विष्णोः॒ क्रमो᳚-ऽस्यरातीय॒तो ह॒न्ता जाग॑तेन॒ छन्द॑सा॒ दिव॒मनु॒ वि क्र॑मे॒ निर्भ॑क्त॒-स्स य-न्द्वि॒ष्मो विष्णोः॒ क्रमो॑-ऽसि शत्रूय॒तो ह॒न्ता-ऽऽनु॑ष्टुभेन॒ छन्द॑सा॒ दिशो-ऽनु॒ वि क्र॑मे॒ निर्भ॑क्त॒-स्स य-न्द्वि॒ष्मः ॥ 16 ॥
(दक्षि॑णाया - म॒न्तरि॑क्ष॒मनु॒ वि क्र॑मे॒ निर्भ॑क्त॒-स्स य-न्द्वि॒ष्मो विष्णो॒- रेका॒न्नत्रि॒ग्ं॒शच्च॑) (अ. 5)
अग॑न्म॒ सुव॒-स्सुव॑रगन्म स॒न्दृश॑स्ते॒ मा छि॑थ्सि॒ यत्ते॒ तप॒स्तस्मै॑ ते॒ मा-ऽऽ वृ॑क्षि सु॒भूर॑सि॒ श्रेष्ठो॑ रश्मी॒नामा॑यु॒र्धा अ॒स्यायु॑र्मे धेहि वर्चो॒धा अ॑सि॒ वर्चो॒ मयि॑ धेही॒दम॒हम॒मु-म्भ्रातृ॑व्यमा॒भ्यो दि॒ग्भ्यो᳚-ऽस्यै दि॒वो᳚-ऽस्माद॒न्तरि॑क्षाद॒स्यै पृ॑थि॒व्या अ॒स्माद॒न्नाद्या॒न्निर्भ॑जामि॒ निर्भ॑क्त॒-स्स य-न्द्वि॒ष्मः ॥ 17 ॥
स-ञ्ज्योति॑षा-ऽभूवमै॒न्द्री-मा॒वृत॑-म॒न्वाव॑र्ते॒ सम॒ह-म्प्र॒जया॒ स-म्मया᳚ प्र॒जा सम॒हग्ं रा॒यस्पोषे॑ण॒ स-म्मया॑ रा॒यस्पोष॒-स्समि॑द्धो अग्ने मे दीदिहि समे॒द्धा ते॑ अग्ने दीद्यासं॒-वँसु॑मान्. य॒ज्ञो वसी॑या-न्भूयास॒मग्न॒ आयूग्ं॑षि पवस॒ आ सु॒वोर्ज॒मिष॑-ञ्च नः । आ॒रे बा॑धस्व दु॒च्छुना᳚म् ॥ अग्ने॒ पव॑स्व॒ स्वपा॑ अ॒स्मे वर्चः॑ सु॒वीर्य᳚म् ॥ 18 ॥
दध॒त्पोषग्ं॑ र॒यि-म्मयि॑ । अग्ने॑ गृहपते सुगृहप॒तिर॒ह-न्त्वया॑ गृ॒हप॑तिना भूयासग्ं सुगृहप॒तिर्मया॒ त्व-ङ्गृ॒हप॑तिना भूया-श्श॒तग्ं हिमा॒स्तामा॒शिष॒मा शा॑से॒ तन्त॑वे॒ ज्योति॑ष्मती॒-न्तामा॒शिष॒मा शा॑से॒-ऽमुष्मै॒ ज्योति॑ष्मती॒-ङ्कस्त्वा॑ युनक्ति॒ स त्वा॒ विमु॑ञ्च॒त्वग्ने᳚ व्रतपते व्र॒तम॑चारिष॒-न्तद॑शक॒-न्तन्मे॑-ऽराधि य॒ज्ञो ब॑भूव॒ स आ [स आ, ब॒भू॒व॒ स] 19
ब॑भूव॒ स प्रज॑ज्ञे॒ स वा॑वृधे । स दे॒वाना॒मधि॑पति-र्बभूव॒ सो अ॒स्माग्ं अधि॑पतीन् करोतु व॒यग्ग् स्या॑म॒ पत॑यो रयी॒णाम् ॥ गोमाग्ं॑ अ॒ग्ने-ऽवि॑माग्ं अ॒श्वी य॒ज्ञो नृ॒वथ्स॑खा॒ सद॒मिद॑प्रमृ॒ष्यः ।इडा॑वाग्ं ए॒षो अ॑सुर प्र॒जावा᳚-न्दी॒र्घो र॒यिः पृ॑थुबु॒द्ध्न-स्स॒भावान्॑ ॥ 20 ॥
(द्वि॒ष्मः-सु॒वीर्य॒ग्ं॒-स आ-पञ्च॑त्रिग्ंशच्च) (अ. 6)
यथा॒ वै स॑मृतसो॒मा ए॒वं-वाँ ए॒ते स॑मृतय॒ज्ञा यद्द॑र्शपूर्णमा॒सौ कस्य॒ वा-ऽह॑ दे॒वा य॒ज्ञमा॒गच्छ॑न्ति॒ कस्य॑ वा॒ न ब॑हू॒नां-यँज॑मानानां॒-योँ वै दे॒वताः॒ पूर्वः॑ परिगृ॒ह्णाति॒ स ए॑ना॒-श्श्वो भू॒ते य॑जत ए॒तद्वै दे॒वाना॑-मा॒यत॑नं॒-यँदा॑हव॒नीयो᳚-ऽन्त॒रा-ऽग्नी प॑शू॒ना-ङ्गार्ह॑पत्यो मनु॒ष्या॑णा-मन्वाहार्य॒पच॑नः पितृ॒णाम॒ग्नि-ङ्गृ॑ह्णाति॒ स्व ए॒वायत॑ने दे॒वताः॒ परि॑ [दे॒वताः॒ परि॑, गृ॒ह्णा॒ति॒ ता-श्श्वो] 21
गृह्णाति॒ ता-श्श्वो भू॒ते य॑जते व्र॒तेन॒ वै मेद्ध्यो॒ -ऽग्नि-र्व्र॒तप॑ति-र्ब्राह्म॒णो व्र॑त॒भृ-द्व्र॒त-मु॑पै॒ष्य-न्ब्रू॑या॒दग्ने᳚ व्रतपते व्र॒त-ञ्च॑रिष्या॒मीत्य॒ग्नि-र्वै दे॒वानां᳚-व्रँ॒तप॑ति॒स्तस्मा॑ ए॒व प्र॑ति॒प्रोच्य॑ व्र॒तमा ल॑भते ब॒र्॒हिषा॑ पू॒र्णमा॑से व्र॒तमुपै॑ति व॒थ्सैर॑मावा॒स्या॑यामे॒तद्ध्ये॑तयो॑-रा॒यत॑नमुप॒स्तीर्यः॒ पूर्व॑श्चा॒ग्निरप॑र॒श्चेत्या॑हु-र्मनु॒ष्या॑ [-र्मनु॒ष्याः᳚, इन्न्वा] 22
इन्न्वा उप॑स्तीर्ण-मि॒च्छन्ति॒ किमु॑ दे॒वा येषा॒-न्नवा॑वसान॒-मुपा᳚स्मि॒ञ्छ्वो य॒क्ष्यमा॑णे दे॒वता॑ वसन्ति॒ य ए॒वं-विँ॒द्वान॒ग्नि-मु॑पस्तृ॒णाति॒ यज॑मानेन ग्रा॒म्याश्च॑ प॒शवो॑-ऽव॒रुद्ध्या॑ आर॒ण्याश्चेत्या॑हु॒-र्य-द्ग्रा॒म्यानु॑प॒वस॑ति॒ तेन॑ ग्रा॒म्यानव॑ रुन्धे॒ यदा॑र॒ण्यस्या॒-ऽश्ञाति॒ तेना॑र॒ण्यान्. यदना᳚श्वा-नुप॒वसे᳚-त्पितृदेव॒त्यः॑ स्यादार॒ण्यस्या᳚-श्ञातीन्द्रि॒यं- [श्ञातीन्द्रि॒यम्, वा आ॑र॒ण्यं-] 23
-ँवा आ॑र॒ण्य-मि॑न्द्रि॒य-मे॒वा-ऽऽत्म-न्ध॑त्ते॒ यदना᳚श्वा-नुप॒वसे॒-त्क्षोधु॑क-स्स्या॒द्य-द॑श्ञी॒याद्रु॒-द्रो᳚-ऽस्य प॒शून॒भि म॑न्येता॒-ऽपो᳚-ऽश्ञाति॒ तन्नेवा॑शि॒त-न्नेवा-ऽन॑शित॒-न्न क्षोधु॑को॒ भव॑ति॒ नास्य॑ रु॒द्रः प॒शून॒भि म॑न्यते॒ वज्रो॒ वै य॒ज्ञः, क्षु-त्खलु॒ वै म॑नु॒ष्य॑स्य॒ भ्रातृ॑व्यो॒ यदना᳚-ऽश्वानुप॒वस॑ति॒ वज्रे॑णै॒व सा॒क्षा-त्क्षुध॒-म्भ्रातृ॑व्यग्ं हन्ति ॥ 24 ॥
(परि॑-मनु॒ष्या॑-इन्द्रि॒यग्ं-सा॒क्षात्-त्रीणि॑ च) (अ. 7)
यो वै श्र॒द्धामना॑रभ्य य॒ज्ञेन॒ यज॑ते॒ नास्ये॒ष्टाय॒ श्रद्द॑धते॒-ऽपः प्र ण॑यति श्र॒द्धा वा आपः॑ श्र॒द्धामे॒वा-ऽऽरभ्य॑ य॒ज्ञेन॑ यजत उ॒भये᳚-ऽस्य देवमनु॒ष्या इ॒ष्टाय॒ श्रद्द॑धते॒ तदा॑हु॒रति॒ वा ए॒ता वर्त्र॑-न्नेद॒न्त्यति॒ वाच॒-म्मनो॒ वावैता नाति॑ नेद॒न्तीति॒ मन॑सा॒ प्र ण॑यती॒यं-वैँ मनो॒- [मनः॑, अ॒नयै॒वैनाः॒] 25
-ऽनयै॒वैनाः॒ प्र ण॑य॒त्य-स्क॑न्नहवि-र्भवति॒ य ए॒वं-वेँद॑ यज्ञायु॒धानि॒ स-म्भ॑रति य॒ज्ञो वै य॑ज्ञायु॒धानि॑ य॒ज्ञमे॒व तथ्स-म्भ॑रति॒ यदेक॑मेकग्ं स॒म्भरे᳚त्-पितृदेव॒त्या॑नि स्यु॒र्य-थ्स॒ह सर्वा॑णि मानु॒षाणि॒ द्वेद्वे॒ सम्भ॑रति याज्यानुवा॒क्य॑योरे॒व रू॒प-ङ्क॑रो॒त्यथो॑ मिथु॒नमे॒वयो वै दश॑ यज्ञायु॒धानि॒ वेद॑ मुख॒तो᳚-ऽस्य य॒ज्ञः क॑ल्पते॒ स्फ्य- [क॑ल्पते॒ स्फ्यः, च॒ क॒पाला॑नि] 26
-श्च॑ क॒पाला॑नि चाग्निहोत्र॒हव॑णी च॒ शूर्प॑-ञ्च कृष्णाजि॒न-ञ्च॒ शम्या॑ चो॒लूख॑ल-ञ्च॒ मुस॑ल-ञ्च दृ॒षच्चोप॑ला चै॒तानि॒ वै दश॑ यज्ञायु॒धानि॒ य ए॒वं-वेँद॑ मुख॒तो᳚-ऽस्य य॒ज्ञः क॑ल्पते॒ यो वै दे॒वेभ्यः॑ प्रति॒प्रोच्य॑ य॒ज्ञेन॒ यज॑ते जु॒षन्ते᳚-ऽस्य दे॒वा ह॒व्यग्ं ह॒वि-र्नि॑रु॒प्यमा॑णम॒भि म॑न्त्रयेता॒-ऽग्निग्ं होता॑रमि॒ह तग्ं हु॑व॒ इति॑ [ ] 27
दे॒वेभ्य॑ ए॒व प्र॑ति॒प्रोच्य॑ य॒ज्ञेन॑ यजते जु॒षन्ते᳚-ऽस्य दे॒वा ह॒व्यमे॒ष वै य॒ज्ञस्य॒ ग्रहो॑ गृही॒त्वैव य॒ज्ञेन॑ यजते॒ तदु॑दि॒त्वा वाचं॑-यँच्छति य॒ज्ञस्य॒ धृत्या॒ अथो॒ मन॑सा॒ वै प्र॒जाप॑ति-र्य॒ज्ञम॑तनुत॒ मन॑सै॒व त-द्य॒ज्ञ-न्त॑नुते॒ रक्ष॑सा॒-मन॑न्ववचाराय॒ यो वै य॒ज्ञं-योँग॒ आग॑ते यु॒नक्ति॑ यु॒ङ्क्ते यु॑ञ्जा॒नेषु॒ कस्त्वा॑ युनक्ति॒ स त्वा॑ युन॒क्त्वि-( ) -त्या॑ह प्र॒जाप॑ति॒-र्वै कः प्र॒जाप॑तिनै॒वैनं॑-युँनक्ति यु॒ङ्क्ते यु॑ञ्जा॒नेषु॑ ॥ 28 ॥
(वैम॒नः-स्फ्य-इति॑-युन॒क्त्वे-का॑दश च) (अ. 8)
प्र॒जाप॑ति-र्य॒ज्ञान॑सृजता-ग्निहो॒त्र-ञ्चा᳚ग्निष्टो॒म-ञ्च॑ पौर्णमा॒सी-ञ्चो॒क्थ्य॑-ञ्चामावा॒स्या᳚-ञ्चातिरा॒त्र-ञ्च॒ तानुद॑मिमीत॒ याव॑दग्निहो॒त्र-मासी॒-त्तावा॑नग्निष्टो॒मो याव॑ती पौर्णमा॒सी तावा॑नु॒क्थ्यो॑ याव॑त्यमावा॒स्या॑ तावा॑नतिरा॒त्रो य ए॒वं-विँ॒द्वान॑ग्निहो॒त्र-ञ्जु॒होति॒ याव॑दग्निष्टो॒मेनो॑ पा॒प्नोति॒ ताव॒दुपा᳚-ऽऽप्नोति॒ य ए॒वं-विँ॒द्वा-न्पौ᳚र्णमा॒सीं-यँज॑ते॒ याव॑दु॒क्थ्ये॑नोपा॒प्नोति॒ [याव॑दु॒क्थ्ये॑नोपा॒प्नोति॑, ताव॒दुपा᳚-ऽऽप्नोति॒] 29
ताव॒दुपा᳚-ऽऽप्नोति॒ य ए॒वं-विँ॒द्वान॑मावा॒स्यां᳚-यँज॑ते॒ याव॑दतिरा॒त्रेणो॑पा॒प्नोति॒ ताव॒दुपा᳚-ऽऽप्नोति परमे॒ष्ठिनो॒ वा ए॒ष य॒ज्ञो-ऽग्र॑ आसी॒-त्तेन॒ स प॑र॒मा-ङ्काष्ठा॑मगच्छ॒-त्तेन॑ प्र॒जाप॑ति-न्नि॒रवा॑सायय॒-त्तेन॑ प्र॒जाप॑तिः पर॒मा-ङ्काष्ठा॑मगच्छ॒-त्तेनेन्द्र॑-न्नि॒रवा॑सायय॒-त्तेनेन्द्रः॑ पर॒मा-ङ्काष्ठा॑मगच्छ॒-त्तेना॒-ऽग्नीषोमौ॑ नि॒रवा॑सायय॒-त्तेना॒ग्नीषोमौ॑ प॒रमा-ङ्काष्ठा॑मगच्छतां॒-यँ [काष्ठा॑मगच्छतां॒-यः, ँए॒वं-विँ॒द्वा-न्द॑र्शपूर्णमा॒सौ] 30
ए॒वं-विँ॒द्वा-न्द॑र्शपूर्णमा॒सौ यज॑ते पर॒मामे॒व काष्ठा᳚-ङ्गच्छति॒ यो वै प्रजा॑तेन य॒ज्ञेन॒ यज॑ते॒ प्र प्र॒जया॑ प॒शुभि॑-र्मिथु॒नै-र्जा॑यते॒ द्वाद॑श॒ मासा᳚-स्संवँथ्स॒रो द्वाद॑श द्व॒न्द्वानि॑ दर्शपूर्णमा॒सयो॒स्तानि॑ स॒म्पाद्या॒नीत्या॑हु-र्व॒थ्स-ञ्चो॑पावसृ॒जत्यु॒खा-ञ्चाधि॑ श्रय॒त्यव॑ च॒ हन्ति॑ दृ॒षदौ॑ च स॒माह॒न्त्यधि॑ च॒ वप॑ते क॒पाला॑नि॒ चोप॑ दधाति पुरो॒डाश॑-ञ्चा- [पुरो॒डाश॑-ञ्च, अ॒धि॒श्रय॒त्याज्य॑-ञ्च] 31
-ऽधि॒श्रय॒त्याज्य॑-ञ्च स्तम्बय॒जुश्च॒ हर॑त्य॒भि च॑ गृह्णाति॒ वेदि॑-ञ्च परि गृ॒ह्णाति॒ पत्नी᳚-ञ्च॒ सन्न॑ह्यति॒ प्रोक्ष॑णीश्चा ऽऽसा॒दय॒त्याज्य॑-ञ्चै॒तानि॒ वै द्वाद॑श द्व॒न्द्वानि॑ दर्शपूर्णमा॒सयो॒स्तानि॒ य ए॒वग्ं स॒म्पाद्य॒ यज॑ते॒ प्रजा॑तेनै॒व य॒ज्ञेन॑ यजते॒ प्र प्र॒जया॑ प॒शुभि॑-र्मिथु॒नै-र्जा॑यते ॥ 32 ॥
(उ॒क्थ्ये॑नोपा॒प्नोत्य॑-गच्छतां॒-यः ँ- पु॑रो॒डाशं॑-चत्वारि॒ग्ं॒शच्च॑) (अ. 9)
ध्रु॒वो॑-ऽसि ध्रु॒वो॑-ऽहग्ं स॑जा॒तेषु॑ भूयास॒मित्या॑ह ध्रु॒वाने॒वैना᳚न् कुरुत उ॒ग्रो᳚-ऽस्यु॒ग्रो॑-ऽहग्ं स॑जा॒तेषु॑ भूयास॒-मित्या॒हाप्र॑तिवादिन ए॒वैना᳚न् कुरुते-ऽभि॒भूर॑स्यभि॒भूर॒हग्ं स॑जा॒तेषु॑ भूयास॒मित्या॑ह॒ य ए॒वैन॑-म्प्रत्यु॒त्पिपी॑ते॒ तमुपा᳚स्यते यु॒नज्मि॑ त्वा॒ ब्रह्म॑णा॒ दैव्ये॒नेत्या॑है॒ष वाअ॒ग्नेर्योग॒स्तेनै॒ - [वाअ॒ग्नेर्योग॒स्तेन॑, ए॒वैनं॑-युँनक्ति] 33
वैनं॑-युँनक्ति य॒ज्ञस्य॒ वै समृ॑द्धेन दे॒वा-स्सु॑व॒र्गं-लोँ॒कमा॑यन्. य॒ज्ञस्य॒ व्यृ॑द्धे॒नासु॑रा॒-न्परा॑भावय॒न्. यन्मे॑ अग्ने अ॒स्य य॒ज्ञस्य॒ रिष्या॒दित्या॑ह य॒ज्ञस्यै॒व तथ्समृ॑द्धेन॒ यज॑मान-स्सुव॒र्गं-लोँ॒कमे॑ति य॒ज्ञस्य॒ व्यृ॑द्धेन॒ भ्रातृ॑व्या॒-न्परा॑ भावयत्यग्निहो॒त्र-मे॒ताभि॒-र्व्याहृ॑तीभि॒रुप॑ सादयेद्यज्ञमु॒खं-वाँ अ॑ग्निहो॒त्र-म्ब्रह्मै॒ता व्याहृ॑तयो यज्ञमु॒ख ए॒व ब्रह्म॑ - [ब्रह्म॑, कु॒रु॒ते॒ सं॒वँ॒थ्स॒रे] 34
कुरुते संवँथ्स॒रे प॒र्याग॑त ए॒ताभि॑रे॒वोप॑ सादये॒-द्ब्रह्म॑णै॒वोभ॒यतः॑ संवँथ्स॒र-म्परि॑ गृह्णाति दर्शपूर्णमा॒सौ चा॑तुर्मा॒स्यान्या॒लभ॑मान ए॒ताभि॒-र्व्याहृ॑तीभिर्-ह॒वीग्ष्यासा॑दये-द्यज्ञमु॒खं-वैँ द॑र्शपूर्णमा॒सौ चा॑तुर्मा॒स्यानि॒ ब्रह्मै॒ता व्याहृ॑तयो यज्ञमु॒ख ए॒व ब्रह्म॑ कुरुते संवँथ्स॒रे प॒र्याग॑त ए॒ताभि॑रे॒वासा॑दये॒-द्ब्रह्म॑णै॒वोभ॒यतः॑ संवँथ्स॒र-म्परि॑गृह्णाति॒ यद्वै य॒ज्ञस्य॒ साम्ना᳚ क्रि॒यते॑ रा॒ष्ट्रं- [रा॒ष्ट्रम्, य॒ज्ञस्या॒-शीर्ग॑च्छति॒] 35
-ँय॒ज्ञस्या॒-शीर्ग॑च्छति॒ यदृ॒चा विशं॑-यँ॒ज्ञस्या॒- शीर्ग॑च्छ॒त्यथ॑ ब्राह्म॒णो॑-ऽना॒शीर्के॑ण य॒ज्ञेन॑ यजते सामिधे॒नी-र॑नुव॒क्ष्यन्ने॒ता व्याहृ॑तीः पु॒रस्ता᳚द्दद्ध्या॒-द्ब्रह्मै॒व प्र॑ति॒पद॑-ङ्कुरुते॒ तथा᳚ ब्राह्म॒ण-स्साशी᳚र्केण य॒ज्ञेन॑ यजते॒ य-ङ्का॒मये॑त॒ यज॑मान॒-म्भ्रातृ॑व्यमस्य य॒ज्ञस्या॒शीर्ग॑च्छे॒दिति॒ तस्यै॒ता व्याहृ॑तीः पुरोनुवा॒क्या॑या-न्दद्ध्या-द्भ्रातृव्यदेव॒त्या॑ वै पु॑रोनुवा॒क्या᳚ भ्रातृ॑व्यमे॒वास्य॑ य॒ज्ञस्या॒-[य॒ज्ञस्या॑, आ॒शीर्ग॑च्छति॒] 36
-ऽऽशीर्ग॑च्छति॒ यान् का॒मये॑त॒ यज॑मानान्-थ्स॒माव॑त्येनान् य॒ज्ञस्या॒ ऽऽशीर्ग॑च्छे॒दिति॒ तेषा॑मे॒ता व्याहृ॑तीः पुरोनुवा॒क्या॑या अर्ध॒र्च एका᳚-न्दद्ध्या-द्या॒ज्या॑यै पु॒रस्ता॒देकां᳚-याँ॒ज्या॑या अर्ध॒र्च एका॒-न्तथै॑नान्-थ्स॒माव॑ती य॒ज्ञस्या॒ ऽऽशीर्ग॑च्छति॒ यथा॒ वै प॒र्जन्य॒-स्सुवृ॑ष्टं॒-वँर्ष॑त्ये॒वं-यँ॒ज्ञो यज॑मानाय वर्षति॒ स्थल॑योद॒क-म्प॑रिगृ॒ह्णन्त्या॒शिषा॑ य॒ज्ञं-यँज॑मानः॒ परि॑ गृह्णाति॒ मनो॑-ऽसि प्राजाप॒त्यं- [प्राजाप॒त्यम्, मन॑सा] 37
-मन॑सा मा भू॒तेना-ऽऽवि॒शेत्या॑ह॒ मनो॒ वै प्रा॑जाप॒त्य-म्प्रा॑जाप॒त्यो य॒ज्ञो मन॑ ए॒व य॒ज्ञमा॒त्म-न्ध॑त्ते॒ वाग॑स्यै॒न्द्री स॑पत्न॒क्षय॑णी वा॒चा मे᳚न्द्रि॒येणा-ऽऽवि॒शेत्या॑है॒न्द्री वै वाग्वाच॑-मे॒वैन्द्री- मा॒त्म-न्ध॑त्ते ॥ 38 ॥
(तेनै॒-व ब्रह्म॑- रा॒ष्ट्रमे॒-वास्य॑ य॒ज्ञस्य॑-प्राजाप॒त्यग्ं-षट्त्रिग्ं॑शच्च) (अ. 10)
यो वै स॑प्तद॒श-म्प्र॒जाप॑तिं-यँ॒ज्ञम॒न्वाय॑त्तं॒-वेँद॒ प्रति॑ य॒ज्ञेन॑ तिष्ठति॒ न य॒ज्ञा-द्भ्रग्ं॑शत॒ आ श्रा॑व॒येति॒ चतु॑रक्षर॒मस्तु॒ श्रौष॒डिति॒ चतु॑रक्षरं॒-यँजेति॒ द्व्य॑क्षरं॒-येँ यजा॑मह॒ इति॒ पञ्चा᳚क्षर-न्द्व्यक्ष॒रो व॑षट्का॒र ए॒ष वै स॑प्तद॒शः प्र॒जाप॑ति-र्य॒ज्ञम॒न्वाय॑त्तो॒ य ए॒वं-वेँद॒ प्रति॑ य॒ज्ञेन॑ तिष्ठति॒ न य॒ज्ञाद्- भ्रग्ं॑शते॒ यो वै य॒ज्ञस्य॒ प्राय॑ण-म्प्रति॒ष्ठा- [प्रति॒ष्ठाम्, उ॒दय॑नं॒-वेँद॒] 39
मु॒दय॑नं॒-वेँद॒ प्रति॑ष्ठिते॒नारि॑ष्टेन य॒ज्ञेन॑ स॒ग्ग्॒स्था-ङ्ग॑च्छ॒त्याश्रा॑व॒यास्तु॒ श्रौष॒ड्यज॒ ये यजा॑महे वषट्का॒र ए॒तद्वै य॒ज्ञस्य॒ प्राय॑णमे॒षा प्र॑ति॒ष्ठैतदु॒दय॑नं॒-यँ ए॒वं-वेँद॒ प्रति॑ष्ठिते॒ना-ऽरि॑ष्टेन य॒ज्ञेन॑ स॒ग्ग्॒स्था-ङ्ग॑च्छति॒ यो वै सू॒नृता॑यै॒ दोहं॒-वेँद॑ दु॒ह ए॒वैनां᳚-यँ॒ज्ञो वै सू॒नृता ऽऽ श्रा॑व॒येत्यैवैना॑-मह्व॒दस्तु॒ [-मह्व॒दस्तु॑, श्रौष॒डित्यु॒पावा᳚स्रा॒-] 40
श्रौष॒डित्यु॒पावा᳚स्रा॒-ग्यजेत्युद॑नैषी॒द्ये यजा॑मह॒ इत्युपा॑-ऽसद-द्वषट्का॒रेण॑ दोग्द्ध्ये॒ष वै सू॒नृता॑यै॒ दोहो॒ य ए॒वं-वेँद॑ दु॒ह ए॒वैना᳚-न्दे॒वा वै स॒त्रमा॑सत॒ तेषा॒-न्दिशो॑-ऽदस्य॒न्त ए॒तामा॒र्द्रा-म्प॒ङ्क्तिम॑पश्य॒न्ना श्रा॑व॒येति॑ पुरोवा॒त-म॑जनय॒न्नस्तु॒ श्रौष॒डित्य॒भ्रग्ं सम॑प्लावय॒न्॒. यजेति॑ वि॒द्युत॑- [वि॒द्युत॑म्, अ॒ज॒न॒य॒न्॒ ये] 41
मजनय॒न्॒ ये यजा॑मह॒ इति॒ प्राव॑र्षयन्न॒भ्य॑स्तनयन् वषट्का॒रेण॒ ततो॒ वै तेभ्यो॒ दिशः॒ प्राप्या॑यन्त॒ य ए॒वं-वेँद॒ प्रास्मै॒ दिशः॑ प्यायन्ते प्र॒जाप॑ति-न्त्वो॒वेद॑ प्र॒जाप॑ति स्त्वंवेँद॒ य-म्प्र॒जाप॑ति॒-र्वेद॒ स पुण्यो॑ भवत्ये॒ष वै छ॑न्द॒स्यः॑ प्र॒जाप॑ति॒रा श्रा॑व॒या-ऽस्तु॒ श्रौष॒ड्यज॒ ये यजा॑महे वषट्का॒रो य ए॒वं-वेँद॒ पुण्यो॑ भवति वस॒न्त- [वस॒न्तम्, ऋ॒तू॒नां] 42
-मृ॑तू॒ना-म्प्री॑णा॒मीत्या॑ह॒र्तवो॒ वै प्र॑या॒जा ऋ॒तूने॒व प्री॑णाति॒ ते᳚-ऽस्मै प्री॒ता य॑थापू॒र्व-ङ्क॑ल्पन्ते॒ कल्प॑न्ते-ऽस्मा ऋ॒तवो॒ य ए॒वं-वेँदा॒ग्नीषोम॑योर॒ह-न्दे॑वय॒ज्यया॒ चक्षु॑ष्मा-न्भूयास॒मित्या॑-हा॒ग्नीषोमा᳚भ्यां॒-वैँ य॒ज्ञश्चक्षु॑ष्मा॒-न्ताभ्या॑मे॒व चक्षु॑रा॒त्म-न्ध॑त्ते॒ ऽग्नेर॒ह-न्दे॑वय॒ज्यया᳚-ऽन्ना॒दो भू॑यास॒मित्या॑हा॒ग्निर्वै दे॒वाना॑-मन्ना॒दस्ते नै॒वा- [मन्ना॒दस्ते नै॒वा, अ॒न्नाद्य॑मा॒त्मन्] 43
-ऽन्नाद्य॑मा॒त्म-न्ध॑त्ते॒ दब्धि॑र॒स्यद॑ब्धो भूयासम॒मु-न्द॑भेय॒मित्या॑है॒तया॒ वै दब्द्ध्या॑ दे॒वा असु॑रानदभ्नुव॒न्तयै॒व भ्रातृ॑व्य-न्दभ्नोत्य॒ग्नीषोम॑योर॒ह-न्दे॑वय॒ज्यया॑ वृत्र॒हा भू॑यास॒मित्या॑हा॒-ऽग्नीषोमा᳚भ्यां॒-वाँ इन्द्रो॑ वृ॒त्रम॑ह॒न्ताभ्या॑मे॒व भ्रातृ॑व्यग्ग् स्तृणुत इन्द्राग्नि॒योर॒ह-न्दे॑वय॒ज्यये᳚न्द्रिया॒व्य॑न्ना॒दो भू॑यास॒मित्या॑हेन्द्रिया॒व्ये॑वान्ना॒दो भ॑व॒तीन्द्र॑स्या॒- [भ॑व॒तीन्द्र॑स्य, अ॒ह-न्दे॑वय॒ज्यये᳚न्द्रिया॒वी] 44
-ऽह-न्दे॑वय॒ज्यये᳚न्द्रिया॒वी भू॑यास॒मित्या॑हेन्द्रिया॒व्ये॑व भ॑वति महे॒न्द्रस्या॒-ऽह-न्दे॑वय॒ज्यया॑ जे॒मान॑-म्महि॒मान॑-ङ्गमेय॒मित्या॑ह जे॒मान॑मे॒व म॑हि॒मान॑-ङ्गच्छत्य॒ग्ने-स्स्वि॑ष्ट॒कृतो॒-ऽह-न्दे॑वय॒ज्यया ऽऽयु॑ष्मान्. य॒ज्ञेन॑ प्रति॒ष्ठा-ङ्ग॑मेय॒मित्या॒-हायु॑रे॒वात्म-न्ध॑त्ते॒ प्रति॑ य॒ज्ञेन॑ -तिष्ठति ॥ 45 ॥
( प्र॒ति॒ष्ठा-म॑ह्व॒दस्तु॑-वि॒द्युतं॑वँस॒न्तन्-तेनै॒वे-न्द्र॑स्या॒-ऽष्टात्रिग्ं॑शच्च) (अ. 11)
इन्द्रं॑-वोँ वि॒श्वत॒स्परि॒ हवा॑महे॒ जने᳚भ्यः । अ॒स्माक॑मस्तु॒ केव॑लः ॥ इन्द्र॒-न्नरो॑ ने॒मधि॑ता हवन्ते॒ यत्पार्या॑ यु॒नज॑ते॒ धिय॒स्ताः । शूरो॒ नृषा॑ता॒ शव॑सश्चका॒न आ गोम॑ति व्र॒जे भ॑जा॒ त्वन्नः॑ ॥ इ॒न्द्रि॒याणि॑ शतक्रतो॒ या ते॒ जने॑षु प॒ञ्चसु॑ ॥ इन्द्र॒ तानि॑ त॒ आ वृ॑णे ॥ अनु॑ ते दायि म॒ह इ॑न्द्रि॒याय॑ स॒त्रा ते॒ विश्व॒मनु॑ वृत्र॒हत्ये᳚ । अनु॑ [ ] 46
क्ष॒त्रमनु॒ सहो॑ यज॒त्रेन्द्र॑ दे॒वेभि॒रनु॑ ते नृ॒षह्ये᳚ ॥ आयस्मि᳚न्-थ्स॒प्तवा॑स॒वा स्तिष्ठ॑न्ति स्वा॒रुहो॑ यथा । ऋषि॑र्ह दीर्घ॒श्रुत्त॑म॒ इन्द्र॑स्य घ॒र्मो अति॑थिः ॥ आ॒मासु॑ प॒क्वमैर॑य॒ आ सूर्यग्ं॑ रोहयो दि॒वि । घ॒र्म-न्न साम॑-न्तपता सुवृ॒क्तिभि॒-र्जुष्ट॒-ङ्गिर्व॑णसे॒ गिरः॑ ॥ इन्द्र॒मि-द्गा॒थिनो॑ बृ॒हदिन्द्र॑-म॒र्केभि॑-र॒र्किणः॑ । इन्द्रं॒-वाँणी॑रनूषत ॥ गाय॑न्ति त्वा गाय॒त्रिणो- [गाय॒त्रिणः॑, अर्च॑न्त्य॒र्क-म॒र्किणः॑ ।] 47
-ऽर्च॑न्त्य॒र्क-म॒र्किणः॑ । ब्र॒ह्माण॑स्त्वा शतक्रत॒वु-द्व॒ग्ं॒श-मि॑व येमिरे ॥ अ॒ग्ं॒हो॒मुचे॒ प्र भ॑रेमा मनी॒षामो॑षिष्ठ॒दावंने॑ सुम॒ति-ङ्गृ॑णा॒नाः । इ॒दमि॑न्द्र॒ प्रति॑ ह॒व्य-ङ्गृ॑भाय स॒त्या-स्स॑न्तु॒ यज॑मानस्य॒ कामाः᳚ ॥ वि॒वेष॒ यन्मा॑ धि॒षणा॑ ज॒जान॒ स्तवै॑ पु॒रा पार्या॒दिन्द्र॒-मह्नः॑ । अग्ंह॑सो॒ यत्र॑ पी॒पर॒द्यथा॑ नो ना॒वेव॒ यान्त॑ मु॒भये॑ हवन्ते ॥ प्र स॒म्राज॑-म्प्रथ॒म-म॑द्ध्व॒राणा॑- [म॑द्ध्व॒राणा᳚म्, अ॒ग्ं॒हो॒मुचं॑] 48
-मग्ंहो॒मुचं॑-वृँष॒भं-यँ॒ज्ञिया॑नाम् । अ॒पा-न्नपा॑तमश्विना॒ हय॑न्त-म॒स्मिन्न॑र इन्द्रि॒य-न्ध॑त्त॒मोजः॑ ॥ वि न॑ इन्द्र॒ मृधो॑ जहि नी॒चा य॑च्छ पृतन्य॒तः । अ॒ध॒स्प॒द-न्तमी᳚-ङ्कृधि॒ यो अ॒स्माग्ं अ॑भि॒दास॑ति ॥ इन्द्र॑ क्ष॒त्रम॒भि वा॒ममोजो ऽजा॑यथा वृषभ चर्षणी॒नाम् । अपा॑नुदो॒ जन॑-ममित्र॒यन्त॑-मु॒रु-न्दे॒वेभ्यो॑ अकृणो-रु लो॒कम् ॥ मृ॒गो न भी॒मः कु॑च॒रो गि॑रि॒ष्ठाः प॑रा॒वत [प॑रा॒वतः॑, आ ज॑गामा॒ पर॑स्याः ।] 49
आ ज॑गामा॒ पर॑स्याः । सृ॒कग्ं स॒ग्ं॒शाय॑ प॒विमि॑न्द्र ति॒ग्मं-विँ शत्रू᳚-न्ताढि॒ विमृधो॑ नुदस्व ॥ वि शत्रू॒न्॒. वि मृधो॑ नुद॒ विवृ॒त्रस्य॒ हनू॑ रुज । वि म॒न्युमि॑न्द्र भामि॒तो॑-ऽमित्र॑स्या-ऽभि॒दास॑तः ॥ त्रा॒तार॒-मिन्द्र॑-मवि॒तार॒-मिन्द्र॒ग्ं॒ हवे॑हवे सु॒हव॒ग्ं॒ शूर॒मिन्द्र᳚म् । हु॒वे नु श॒क्र-म्पु॑रुहू॒तमिन्द्रग्ग्॑ स्व॒स्ति नो॑ म॒घवा॑ धा॒त्विन्द्रः॑ ॥ मा ते॑ अ॒स्याग्ं [अ॒स्याग्ं, स॒ह॒सा॒व॒-न्परि॑ष्टाव॒घाय॑] 50
स॑हसाव॒-न्परि॑ष्टाव॒घाय॑ भूम हरिवः परा॒दै । त्राय॑स्व नो ऽवृ॒केभि॒-र्वरू॑थै॒-स्तव॑ प्रि॒यासः॑ सू॒रिषु॑ स्याम ॥ अन॑वस्ते॒ रथ॒मश्वा॑य तक्ष॒-न्त्वष्टा॒ वज्र॑-म्पुरुहूत द्यु॒मन्त᳚म् । ब्र॒ह्माण॒ इन्द्र॑-म्म॒हय॑न्तो अ॒र्कैरव॑र्धय॒न्नह॑ये॒ हन्त॒वा उ॑ ॥ वृष्णे॒ य-त्ते॒ वृष॑णो अ॒र्कमर्चा॒निन्द्र॒ ग्रावा॑णो॒ अदि॑ति-स्स॒जोषाः᳚ । अ॒न॒श्वासो॒ ये प॒वयो॑-ऽर॒था इन्द्रे॑षिता अ॒भ्यव॑र्त न्त॒ दस्यून्॑ ॥ 51 ॥
(वृ॒त्र॒हत्ये-ऽनु॑-गाय॒त्रिणो᳚-ऽद्ध॒राणां᳚-परा॒वतो॒-ऽस्या-म॒ष्टाच॑त्वारिग्ंशच्च) (अ. 12)
(सन्त्वा॑ सिञ्चामि-ध्रु॒वो᳚-ऽस्य॒ग्निर्मा॑-ब॒र्॒हिषो॒-ऽह-मा प्या॑यता॒-मग॑न्म॒-यथा॒ वै-यो वै श्र॒द्धां- प्र॒जाप॑ति॒-र्यज्ञान्-ध्रु॒वो॑-ऽसीत्या॑ह॒-यो वै स॑प्तद॒श-मिन्द्रं॑-वोँ॒-द्वाद॑श । )
(सन्त्वा॑-ब॒र्॒हिषो॒-ऽहंयँथा॒ वा-ए॒वं-विँ॒द्वा-ञ्छ्रौष॑ट्-थ्साहसाव॒-न्नेक॑पञ्चा॒शत् ।)
(सन्त्वा॑, सिञ्चामि॒ दस्यून्॑)
॥ हरिः॑ ओम् ॥
॥ कृष्ण यजुर्वेदीय तैत्तिरीय संहिताया-म्प्रथमकाण्डे षष्ठः प्रश्न-स्समाप्तः ॥
kṛṣṇa yajurvedīya taittirīya saṃhitāyā-mprathamakāṇḍe ṣaṣṭhaḥ praśnaḥ - yājamānakāṇḍaṃ
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
sa-ntvā̭ siñcāmi॒ yajṷṣā pra॒jāmāyu॒rdhana̭-ñca | bṛha॒spati̭prasūto॒ yaja̭māna i॒ha mā ri̭ṣat || ājya̭masi sa॒tyama̭si sa॒tyasyāddhya̭kṣamasi ha॒vira̭si vaiśvāna॒raṃ-vai~᳚śvade॒va-mutpṷ̄taśuṣmagṃ sa॒tyaujā॒-ssaho̭-'si॒ saha̭mānamasi॒ saha॒svārā̭tī॒-ssaha̭svārātīya॒ta-ssaha̭sva॒ pṛta̭nā॒-ssaha̭sva pṛtanya॒taḥ | sa॒hasra̭vīryamasi॒ tanmā̭ ji॒nvājya॒syājya̭masi sa॒tyasya̭ sa॒tyama̭si sa॒tyāyṷ- [sa॒tyāyuḥ̭, a॒si॒ sa॒tyaśṷṣmamasi] 1
-rasi sa॒tyaśṷṣmamasi sa॒tyena̭ tvā॒-'bhi ghā̭rayāmi॒ tasya̭ te bhakṣīya pañcā॒nā-ntvā॒ vātā̭nāṃ-ya~॒ntrāya̭ dha॒rtrāya̭ gṛhṇāmi pañcā॒nā-ntva̭rtū॒nāṃ-ya~॒ntrāya̭ dha॒rtrāya̭ gṛhṇāmi pañcā॒nā-ntvā̭ di॒śāṃ-ya~॒ntrāya̭ dha॒rtrāya̭ gṛhṇāmi pañcā॒nā-ntvā̭ pañcaja॒nānāṃ᳚-ya~॒ntrāya̭ dha॒rtrāya̭ gṛhṇāmi ca॒rostvā॒ pañca̭bilasya ya॒ntrāya̭ dha॒rtrāya̭ gṛhṇāmi॒ brahma̭ṇastvā॒ teja̭se ya॒ntrāya̭ dha॒rtrāya̭ gṛhṇāmi kṣa॒trasya॒ tvauja̭se ya॒ntrāya̭ [ ] 2
dha॒rtrāya̭ gṛhṇāmi vi॒śe tvā̭ ya॒ntrāya̭ dha॒rtrāya̭ gṛhṇāmi su॒vīryā̭ya tvā gṛhṇāmi suprajā॒stvāya̭ tvā gṛhṇāmi rā॒yaspoṣā̭ya tvā gṛhṇāmi brahmavarca॒sāya̭ tvā gṛhṇāmi॒ bhūra॒smākagṃ̭ ha॒virde॒vānā̭-mā॒śiṣo॒ yaja̭mānasya de॒vānā᳚-ntvā de॒vatā᳚bhyo gṛhṇāmi॒ kāmā̭ya tvā gṛhṇāmi || 3 ||
(sa॒tyāyu॒-roja̭se ya॒ntrāya॒-traya̭strigṃśacca) (a. 1)
dhru॒vo̭-'si dhru॒vo̭-'hagṃ sa̭jā॒teṣṷ bhūyāsa॒-ndhīra॒ścettā̭ vasu॒vidu॒gro᳚-'syu॒gro̭-'hagṃ sa̭jā॒teṣṷ bhūyāsa-mu॒graścettā̭ vasu॒vida̭bhi॒-bhūra̭syabhi॒bhūra॒hagṃ sa̭jā॒teṣṷ bhūyāsamabhi॒bhūścettā̭ vasu॒vi-dyu॒najmi̭ tvā॒ brahma̭ṇā॒ daivyḙna ha॒vyāyā॒smai voḍha॒ve jā̭tavedaḥ || indhā̭nāstvā supra॒jasaḥ̭ su॒vīrā॒ jyogjī̭vema bali॒hṛto̭ va॒ya-nte᳚ || yanmḙ agne a॒sya ya॒jñasya॒ riṣyā॒- [riṣyā᳚t, dyadvā॒] 4
-dyadvā॒ skandā॒-dājya̭syo॒ta vi̭ṣṇo | tena̭ hanmi sa॒patna̭-ndurmarā॒yumaina̭-ndadhāmi॒ nir-ṛ̭tyā u॒pasthe᳚ | bhū-rbhuva॒-ssuva॒rucchṷṣmo agne॒ yaja̭mānāyaidhi॒ niśṷṣmo abhi॒dāsa̭te | agne॒ deve᳚ddha॒ manvi̭ddha॒ mandra̭ji॒hvā-ma̭rtyasya te hotarmū॒rdhannā ji̭gharmi rā॒yaspoṣā̭ya suprajā॒stvāya̭ su॒vīryā̭ya॒ mano̭-'si prājāpa॒tya-mmana̭sā mā bhū॒tenā vi̭śa॒ vāga̭syai॒ndrī sa̭patna॒kṣaya̭ṇī [ ] 5
vā॒cā me᳚ndri॒yeṇā vi̭śa vasa॒ntamṛ̭tū॒nā-mprī̭ṇāmi॒ sa mā᳚ prī॒taḥ prī̭ṇātu grī॒ṣmamṛ̭tū॒nā-mprī̭ṇāmi॒ sa mā᳚ prī॒taḥ prī̭ṇātu va॒r॒ṣā ṛ̭tū॒nā-mprī̭ṇāmi॒ tā mā᳚ prī॒tāḥ prī̭ṇantu śa॒rada̭mṛtū॒nā-mprī̭ṇāmi॒ sā mā᳚ prī॒tā prī̭ṇātu hemantaśiśi॒rāvṛ̭tū॒nā-mprī̭ṇāmi॒ tau mā᳚ prī॒tau prī̭ṇītā-ma॒gnīṣoma̭yo-ra॒ha-ndḙvaya॒jyayā॒ cakṣṷṣmā-nbhūyāsama॒gnera॒ha-ndḙvaya॒jyayā᳚-'nnā॒do bhṷ̄yāsa॒- [bhṷ̄yāsam, dabdhi̭ra॒syada̭bdho] 6
-ndabdhi̭ra॒syada̭bdho bhūyāsama॒mu-nda̭bheya-ma॒gnīṣoma̭yo-ra॒ha-ndḙvaya॒jyayā̭ vṛtra॒hā bhṷ̄yāsamindrāgni॒yora॒ha-ndḙvaya॒jyaye᳚ndriyā॒vya̭nnā॒do bhṷ̄yāsa॒mindra̭syā॒-'ha-ndḙvaya॒jyaye᳚ndriyā॒vī bhṷ̄yāsa-mmahe॒ndrasyā॒-'ha-ndḙvaya॒jyayā̭ je॒māna̭-mmahi॒māna̭-ṅgameyama॒gne-ssvi̭ṣṭa॒kṛto॒-'ha-ndḙvaya॒jyayā ''yṷṣmān. ya॒jñena̭ prati॒ṣṭhā-ṅga̭meyam || 7 ||
(riṣyā᳚-thsapatna॒kṣaya̭ṇya-nnā॒do bhṷ̄yāsa॒gṃ॒-ṣaṭtrigṃ̭śacca) (a. 2)
a॒gnirmā॒ duri̭ṣṭā-tpātu savi॒tā-'ghaśagṃ̭sā॒dyo me-'nti̭ dū॒rḙ-'rātī॒yati॒ tame॒tena̭ jeṣa॒gṃ॒ surṷ̄pavarṣavarṇa॒ ehī॒mā-nbha॒drā-nduryāgṃ̭ a॒bhyehi॒ māmanṷvratā॒ nyṷ śī॒r॒ṣāṇi̭ mṛḍhva॒miḍa॒ ehyadi̭ta॒ ehi॒ sara̭sva॒tyehi॒ ranti̭rasi॒ rama̭tirasi sū॒narya̭si॒ juṣṭe॒ juṣṭi̭-nte-'śī॒yopa̭hūta upaha॒va- [upaha॒vam, te॒-'śī॒ya॒ sā ] 8
-ntḙ-'śīya॒ sā mḙ sa॒tyā-''śīra॒sya ya॒jñasya̭ bhūyā॒darḙḍatā॒ mana̭sā॒ taccha̭keyaṃ-ya~॒jño divagṃ̭ rohatu ya॒jño diva̭-ṅgacchatu॒ yo dḙva॒yānaḥ॒ panthā॒stena̭ ya॒jño de॒vāgṃ apye᳚tva॒smāsvindra̭ indri॒ya-nda̭dhātva॒smānrāya̭ u॒ta ya॒jñā-ssa̭cantāma॒smāsṷ santvā॒śiṣa॒-ssā naḥ̭ pri॒yā su॒pratū᳚rtirma॒ghonī॒ juṣṭi̭rasi ju॒ṣasva̭ no॒ juṣṭā̭ no- [juṣṭā̭ naḥ, a॒si॒ juṣṭi̭-nte] 9
-'si॒ juṣṭi̭-nte gameya॒-mmano॒ jyoti̭-rjuṣatā॒mājyaṃ॒-vi~cchi̭nnaṃ-ya~॒jñagṃ sami॒ma-nda̭dhātu | bṛha॒spati̭-stanutāmi॒manno॒ viśvḙ de॒vā i॒ha mā̭dayantām || braddhna॒ pinva̭sva॒ dada̭to me॒ mā kṣā̭yi kurva॒to me॒ mopa̭ dasa-tpra॒jāpa̭te-rbhā॒go᳚-'syūrja̭svā॒-npaya̭svā-nprāṇāpā॒nau mḙ pāhi samānavyā॒nau mḙ pāhyudānavyā॒nau mḙ pā॒hyakṣi̭to॒-'syakṣi̭tyai tvā॒ mā me᳚ kṣeṣṭhā a॒mutrā॒muṣmi̭n ~lo॒ke || 10 ||
(u॒pa॒ha॒vaṃ-juṣṭā̭na-stvā॒ ṣaṭ ca̭) (a. 3)
ba॒r॒hiṣo॒-'ha-ndḙvaya॒jyayā᳚ pra॒jāvā᳚-nbhūyāsa॒-nnarā॒śagṃsa̭syā॒ha-ndḙvaya॒jyayā̭ paśu॒mā-nbhṷ̄yāsama॒gne-ssvi̭ṣṭa॒kṛto॒-'ha-ndḙvaya॒jyayā-''yṷṣmān. ya॒jñena̭ prati॒ṣṭhā-ṅga̭meyama॒gnera॒ha-mujji̭ti॒-manūjjḙṣa॒gṃ॒ soma̭syā॒ha - mujji̭ti॒-manūjjḙṣama॒gnera॒ha-mujji̭ti॒-manūjjḙṣa-ma॒gnīṣoma̭yora॒ha-mujji̭ti॒-manūjjḙṣa-mindrāgni॒yora॒ha-mujji̭ti॒-manūjjḙṣa॒-mindra̭syā॒-'ha- [-mindra̭syā॒-'ham, ujji̭ti॒manūjjḙṣaṃ] 11
-mujji̭ti॒manūjjḙṣa-mmahe॒ndrasyā॒hamujji̭ti॒- manūjjḙṣama॒gne-ssvi̭ṣṭa॒kṛto॒-'ha mujji̭ti॒-manūjjḙṣaṃ॒-vā~ja̭sya mā prasa॒veno᳚-dgrā॒bheṇoda̭grabhīt | athā̭ sa॒patnā॒gṃ॒ indro̭ me nigrā॒bheṇādha̭rāgṃ akaḥ || u॒dgrā॒bha-ñca̭ nigrā॒bha-ñca॒ brahma̭ de॒vā a̭vīvṛdhann | athā̭ sa॒patnā̭nindrā॒gnī mḙ viṣū॒cīnā॒n vya̭syatām || emā a̭gmannā॒śiṣo॒ doha̭kāmā॒ indra̭vanto [indra̭vantaḥ, va॒nā॒ma॒he॒ dhu॒kṣī॒mahi̭] 12
vanāmahe dhukṣī॒mahi̭ pra॒jāmiṣa᳚m || rohi̭tena tvā॒-'gni-rde॒vatā᳚-ṅgamayatu॒ hari̭bhyā॒-ntvendro̭ de॒vatā᳚-ṅgamaya॒tveta̭śena tvā॒ sūryo̭ de॒vatā᳚-ṅgamayatu॒ vi tḙ muñcāmi raśa॒nā vi ra॒śmīn vi yoktrā॒ yāni̭ pari॒carta̭nāni dha॒ttāda॒smāsu॒ dravi̭ṇaṃ॒-ya~cca̭ bha॒dra-mpra ṇo᳚ brūtā-dbhāga॒dhā-nde॒vatā̭su || viṣṇo᳚-śśaṃ॒yo~ra॒ha-ndḙvaya॒jyayā̭ ya॒jñena̭ prati॒ṣṭhā-ṅga̭meya॒gṃ॒ soma̭syā॒ha-ndḙvaya॒jyayā̭ [dḙvaya॒jyayā᳚, su॒retā॒] 13
su॒retā॒ reto̭ dhiṣīya॒ tvaṣṭṷra॒ha-ndḙvaya॒jyayā̭ paśū॒nāgṃ rū॒pa-mpṷṣeya-nde॒vānā॒-mpatnī̭ra॒gni-rgṛ॒hapa̭ti-rya॒jñasya̭ mithu॒na-ntayo̭ra॒ha-ndḙvaya॒jyayā̭ mithu॒nena॒ prabhṷ̄yāsaṃ-ve~॒do̭-'si॒ vitti̭rasi vi॒deya॒ karmā̭-'si ka॒ruṇa̭masi kri॒yāsagṃ̭ sa॒nira̭si sani॒tā-'si̭ sa॒neya̭-ṅghṛ॒tava̭nta-ṅkulā॒yinagṃ̭ rā॒yaspoṣagṃ̭ saha॒sriṇaṃ̭-ve~॒do da̭dātu vā॒jina᳚m || 14 ||
(indra̭syā॒ha-mindra̭vantaḥ॒-soma̭syā॒ha-ndḙvaya॒jyayā॒-catṷścatvārigṃśacca) (a. 4)
ā pyā̭yatā-ndhru॒vā ghṛ॒tena̭ ya॒jñaṃya~̭jña॒-mprati̭ deva॒yadbhyaḥ̭ | sū॒ryāyā॒ ūdho-'di̭tyā u॒pastha̭ u॒rudhā̭rā pṛthi॒vī ya॒jñe a॒sminn || pra॒jāpa̭te-rvi॒bhānnāma̭ lo॒kastasmigg̭stvā dadhāmi sa॒ha yaja̭mānena॒ sada̭si॒ sanmḙ bhūyā॒-ssarva̭masi॒ sarva̭-mme bhūyāḥ pū॒rṇama̭si pū॒rṇa-mmḙ bhūyā॒ akṣi̭tamasi॒ mā me᳚ kṣeṣṭhāḥ॒ prācyā᳚-ndi॒śi de॒vā ṛ॒tvijo̭ mārjayantā॒-ndakṣi̭ṇāyā- [dakṣi̭ṇāyām, di॒śi] 15
ndi॒śi māsāḥ᳚ pi॒taro̭ mārjayantā-mpra॒tīcyā᳚-ndi॒śi gṛ॒hāḥ pa॒śavo̭ mārjayantā॒mudī᳚cyā-ndi॒śyāpa॒ oṣa̭dhayo॒ vana॒spata̭yo mārjayantāmū॒rdhvāyā᳚-ndi॒śi ya॒jña-ssaṃ̭va~thsa॒ro ya॒jñapa̭ti-rmārjayantāṃ॒-vi~ṣṇoḥ॒ kramo᳚-'syabhimāti॒hā gā̭ya॒treṇa॒ chanda̭sā pṛthi॒vīmanu॒ vi kra̭me॒ nirbha̭kta॒-ssa ya-ndvi॒ṣmo viṣṇoḥ॒ kramo᳚-'syabhiśasti॒hā traiṣṭṷbhena॒ chanda̭sā॒ 'ntari̭kṣa॒manu॒ vi kra̭me॒ nirbha̭kta॒-ssa ya-ndvi॒ṣmo viṣṇoḥ॒ kramo᳚-'syarātīya॒to ha॒ntā jāga̭tena॒ chanda̭sā॒ diva॒manu॒ vi kra̭me॒ nirbha̭kta॒-ssa ya-ndvi॒ṣmo viṣṇoḥ॒ kramo̭-'si śatrūya॒to ha॒ntā-''nṷṣṭubhena॒ chanda̭sā॒ diśo-'nu॒ vi kra̭me॒ nirbha̭kta॒-ssa ya-ndvi॒ṣmaḥ || 16 ||
(dakṣi̭ṇāyā - ma॒ntari̭kṣa॒manu॒ vi kra̭me॒ nirbha̭kta॒-ssa ya-ndvi॒ṣmo viṣṇo॒- rekā॒nnatri॒gṃ॒śacca̭) (a. 5)
aga̭nma॒ suva॒-ssuva̭raganma sa॒ndṛśa̭ste॒ mā chi̭thsi॒ yatte॒ tapa॒stasmai̭ te॒ mā-'' vṛ̭kṣi su॒bhūra̭si॒ śreṣṭho̭ raśmī॒nāmā̭yu॒rdhā a॒syāyṷrme dhehi varco॒dhā a̭si॒ varco॒ mayi̭ dhehī॒dama॒hama॒mu-mbhrātṛ̭vyamā॒bhyo di॒gbhyo᳚-'syai di॒vo᳚-'smāda॒ntari̭kṣāda॒syai pṛ̭thi॒vyā a॒smāda॒nnādyā॒nnirbha̭jāmi॒ nirbha̭kta॒-ssa ya-ndvi॒ṣmaḥ || 17 ||
sa-ñjyoti̭ṣā-'bhūvamai॒ndrī-mā॒vṛta̭-ma॒nvāva̭rte॒ sama॒ha-mpra॒jayā॒ sa-mmayā᳚ pra॒jā sama॒hagṃ rā॒yaspoṣḙṇa॒ sa-mmayā̭ rā॒yaspoṣa॒-ssami̭ddho agne me dīdihi same॒ddhā tḙ agne dīdyāsaṃ॒-va~sṷmān. ya॒jño vasī̭yā-nbhūyāsa॒magna॒ āyūgṃ̭ṣi pavasa॒ ā su॒vorja॒miṣa̭-ñca naḥ | ā॒re bā̭dhasva du॒cchunā᳚m || agne॒ pava̭sva॒ svapā̭ a॒sme varcaḥ̭ su॒vīrya᳚m || 18 ||
dadha॒tpoṣagṃ̭ ra॒yi-mmayi̭ | agnḙ gṛhapate sugṛhapa॒tira॒ha-ntvayā̭ gṛ॒hapa̭tinā bhūyāsagṃ sugṛhapa॒tirmayā॒ tva-ṅgṛ॒hapa̭tinā bhūyā-śśa॒tagṃ himā॒stāmā॒śiṣa॒mā śā̭se॒ tanta̭ve॒ jyoti̭ṣmatī॒-ntāmā॒śiṣa॒mā śā̭se॒-'muṣmai॒ jyoti̭ṣmatī॒-ṅkastvā̭ yunakti॒ sa tvā॒ vimṷñca॒tvagne᳚ vratapate vra॒tama̭cāriṣa॒-ntada̭śaka॒-ntanmḙ-'rādhi ya॒jño ba̭bhūva॒ sa ā [sa ā, ba॒bhū॒va॒ sa] 19
ba̭bhūva॒ sa praja̭jñe॒ sa vā̭vṛdhe | sa de॒vānā॒madhi̭pati-rbabhūva॒ so a॒smāgṃ adhi̭patīn karotu va॒yagg syā̭ma॒ pata̭yo rayī॒ṇām || gomāgṃ̭ a॒gne-'vi̭māgṃ a॒śvī ya॒jño nṛ॒vathsa̭khā॒ sada॒mida̭pramṛ॒ṣyaḥ |iḍā̭vāgṃ e॒ṣo a̭sura pra॒jāvā᳚-ndī॒rgho ra॒yiḥ pṛ̭thubu॒ddhna-ssa॒bhāvāṋ || 20 ||
(dvi॒ṣmaḥ-su॒vīrya॒gṃ॒-sa ā-pañca̭trigṃśacca) (a. 6)
yathā॒ vai sa̭mṛtaso॒mā e॒vaṃ-vā~ e॒te sa̭mṛtaya॒jñā yadda̭rśapūrṇamā॒sau kasya॒ vā-'ha̭ de॒vā ya॒jñamā॒gaccha̭nti॒ kasya̭ vā॒ na ba̭hū॒nāṃ-ya~ja̭mānānāṃ॒-yo~ vai de॒vatāḥ॒ pūrvaḥ̭ parigṛ॒hṇāti॒ sa ḙnā॒-śśvo bhū॒te ya̭jata e॒tadvai de॒vānā̭-mā॒yata̭naṃ॒-ya~dā̭hava॒nīyo᳚-'nta॒rā-'gnī pa̭śū॒nā-ṅgārha̭patyo manu॒ṣyā̭ṇā-manvāhārya॒paca̭naḥ pitṛ॒ṇāma॒gni-ṅgṛ̭hṇāti॒ sva e॒vāyata̭ne de॒vatāḥ॒ pari̭ [de॒vatāḥ॒ pari̭, gṛ॒hṇā॒ti॒ tā-śśvo] 21
gṛhṇāti॒ tā-śśvo bhū॒te ya̭jate vra॒tena॒ vai meddhyo॒ -'gni-rvra॒tapa̭ti-rbrāhma॒ṇo vra̭ta॒bhṛ-dvra॒ta-mṷpai॒ṣya-nbrṷ̄yā॒dagne᳚ vratapate vra॒ta-ñca̭riṣyā॒mītya॒gni-rvai de॒vānāṃ᳚-vra~॒tapa̭ti॒stasmā̭ e॒va pra̭ti॒procya̭ vra॒tamā la̭bhate ba॒r॒hiṣā̭ pū॒rṇamā̭se vra॒tamupai̭ti va॒thsaira̭māvā॒syā̭yāme॒taddhyḙtayo̭-rā॒yata̭namupa॒stīryaḥ॒ pūrva̭ścā॒gnirapa̭ra॒ścetyā̭hu-rmanu॒ṣyā̭ [-rmanu॒ṣyāḥ᳚, innvā] 22
innvā upa̭stīrṇa-mi॒cchanti॒ kimṷ de॒vā yeṣā॒-nnavā̭vasāna॒-mupā᳚smi॒ñchvo ya॒kṣyamā̭ṇe de॒vatā̭ vasanti॒ ya e॒vaṃ-vi~॒dvāna॒gni-mṷpastṛ॒ṇāti॒ yaja̭mānena grā॒myāśca̭ pa॒śavo̭-'va॒ruddhyā̭ āra॒ṇyāścetyā̭hu॒-rya-dgrā॒myānṷpa॒vasa̭ti॒ tena̭ grā॒myānava̭ rundhe॒ yadā̭ra॒ṇyasyā॒-'śñāti॒ tenā̭ra॒ṇyān. yadanā᳚śvā-nupa॒vase᳚-tpitṛdeva॒tyaḥ̭ syādāra॒ṇyasyā᳚-śñātīndri॒yaṃ- [śñātīndri॒yam, vā ā̭ra॒ṇyaṃ-] 23
-~vā ā̭ra॒ṇya-mi̭ndri॒ya-me॒vā-''tma-ndha̭tte॒ yadanā᳚śvā-nupa॒vase॒-tkṣodhṷka-ssyā॒dya-da̭śñī॒yādru॒-dro᳚-'sya pa॒śūna॒bhi ma̭nyetā॒-'po᳚-'śñāti॒ tannevā̭śi॒ta-nnevā-'na̭śita॒-nna kṣodhṷko॒ bhava̭ti॒ nāsya̭ ru॒draḥ pa॒śūna॒bhi ma̭nyate॒ vajro॒ vai ya॒jñaḥ, kṣu-tkhalu॒ vai ma̭nu॒ṣya̭sya॒ bhrātṛ̭vyo॒ yadanā᳚-'śvānupa॒vasa̭ti॒ vajrḙṇai॒va sā॒kṣā-tkṣudha॒-mbhrātṛ̭vyagṃ hanti || 24 ||
(pari̭-manu॒ṣyā̭-indri॒yagṃ-sā॒kṣāt-trīṇi̭ ca) (a. 7)
yo vai śra॒ddhāmanā̭rabhya ya॒jñena॒ yaja̭te॒ nāsye॒ṣṭāya॒ śradda̭dhate॒-'paḥ pra ṇa̭yati śra॒ddhā vā āpaḥ̭ śra॒ddhāme॒vā-''rabhya̭ ya॒jñena̭ yajata u॒bhaye᳚-'sya devamanu॒ṣyā i॒ṣṭāya॒ śradda̭dhate॒ tadā̭hu॒rati॒ vā e॒tā vartra̭-nneda॒ntyati॒ vāca॒-mmano॒ vāvaitā nāti̭ neda॒ntīti॒ mana̭sā॒ pra ṇa̭yatī॒yaṃ-vai~ mano॒- [manaḥ̭, a॒nayai॒vaināḥ॒] 25
-'nayai॒vaināḥ॒ pra ṇa̭ya॒tya-ska̭nnahavi-rbhavati॒ ya e॒vaṃ-ve~da̭ yajñāyu॒dhāni॒ sa-mbha̭rati ya॒jño vai ya̭jñāyu॒dhāni̭ ya॒jñame॒va tathsa-mbha̭rati॒ yadeka̭mekagṃ sa॒mbhare᳚t-pitṛdeva॒tyā̭ni syu॒rya-thsa॒ha sarvā̭ṇi mānu॒ṣāṇi॒ dvedve॒ sambha̭rati yājyānuvā॒kya̭yore॒va rū॒pa-ṅka̭ro॒tyatho̭ mithu॒name॒vayo vai daśa̭ yajñāyu॒dhāni॒ veda̭ mukha॒to᳚-'sya ya॒jñaḥ ka̭lpate॒ sphya- [ka̭lpate॒ sphyaḥ, ca॒ ka॒pālā̭ni] 26
-śca̭ ka॒pālā̭ni cāgnihotra॒hava̭ṇī ca॒ śūrpa̭-ñca kṛṣṇāji॒na-ñca॒ śamyā̭ co॒lūkha̭la-ñca॒ musa̭la-ñca dṛ॒ṣaccopa̭lā cai॒tāni॒ vai daśa̭ yajñāyu॒dhāni॒ ya e॒vaṃ-ve~da̭ mukha॒to᳚-'sya ya॒jñaḥ ka̭lpate॒ yo vai de॒vebhyaḥ̭ prati॒procya̭ ya॒jñena॒ yaja̭te ju॒ṣante᳚-'sya de॒vā ha॒vyagṃ ha॒vi-rni̭ru॒pyamā̭ṇama॒bhi ma̭ntrayetā॒-'gnigṃ hotā̭rami॒ha tagṃ hṷva॒ iti̭ [ ] 27
de॒vebhya̭ e॒va pra̭ti॒procya̭ ya॒jñena̭ yajate ju॒ṣante᳚-'sya de॒vā ha॒vyame॒ṣa vai ya॒jñasya॒ graho̭ gṛhī॒tvaiva ya॒jñena̭ yajate॒ tadṷdi॒tvā vācaṃ̭-ya~cchati ya॒jñasya॒ dhṛtyā॒ atho॒ mana̭sā॒ vai pra॒jāpa̭ti-rya॒jñama̭tanuta॒ mana̭sai॒va ta-dya॒jña-nta̭nute॒ rakṣa̭sā॒-mana̭nvavacārāya॒ yo vai ya॒jñaṃ-yo~ga॒ āga̭te yu॒nakti̭ yu॒ṅkte yṷñjā॒neṣu॒ kastvā̭ yunakti॒ sa tvā̭ yuna॒ktvi-( ) -tyā̭ha pra॒jāpa̭ti॒-rvai kaḥ pra॒jāpa̭tinai॒vainaṃ̭-yu~nakti yu॒ṅkte yṷñjā॒neṣṷ || 28 ||
(vaima॒naḥ-sphya-iti̭-yuna॒ktve-kā̭daśa ca) (a. 8)
pra॒jāpa̭ti-rya॒jñāna̭sṛjatā-gniho॒tra-ñcā᳚gniṣṭo॒ma-ñca̭ paurṇamā॒sī-ñco॒kthya̭-ñcāmāvā॒syā᳚-ñcātirā॒tra-ñca॒ tānuda̭mimīta॒ yāva̭dagniho॒tra-māsī॒-ttāvā̭nagniṣṭo॒mo yāva̭tī paurṇamā॒sī tāvā̭nu॒kthyo̭ yāva̭tyamāvā॒syā̭ tāvā̭natirā॒tro ya e॒vaṃ-vi~॒dvāna̭gniho॒tra-ñju॒hoti॒ yāva̭dagniṣṭo॒meno̭ pā॒pnoti॒ tāva॒dupā᳚-''pnoti॒ ya e॒vaṃ-vi~॒dvā-npau᳚rṇamā॒sīṃ-ya~ja̭te॒ yāva̭du॒kthyḙnopā॒pnoti॒ [yāva̭du॒kthyḙnopā॒pnoti̭, tāva॒dupā᳚-''pnoti॒] 29
tāva॒dupā᳚-''pnoti॒ ya e॒vaṃ-vi~॒dvāna̭māvā॒syāṃ᳚-ya~ja̭te॒ yāva̭datirā॒treṇo̭pā॒pnoti॒ tāva॒dupā᳚-''pnoti parame॒ṣṭhino॒ vā e॒ṣa ya॒jño-'gra̭ āsī॒-ttena॒ sa pa̭ra॒mā-ṅkāṣṭhā̭magaccha॒-ttena̭ pra॒jāpa̭ti-nni॒ravā̭sāyaya॒-ttena̭ pra॒jāpa̭tiḥ para॒mā-ṅkāṣṭhā̭magaccha॒-ttenendra̭-nni॒ravā̭sāyaya॒-ttenendraḥ̭ para॒mā-ṅkāṣṭhā̭magaccha॒-ttenā॒-'gnīṣomaṷ ni॒ravā̭sāyaya॒-ttenā॒gnīṣomaṷ pa॒ramā-ṅkāṣṭhā̭magacchatāṃ॒-ya~ [kāṣṭhā̭magacchatāṃ॒-yaḥ, ~e॒vaṃ-vi~॒dvā-nda̭rśapūrṇamā॒sau] 30
e॒vaṃ-vi~॒dvā-nda̭rśapūrṇamā॒sau yaja̭te para॒māme॒va kāṣṭhā᳚-ṅgacchati॒ yo vai prajā̭tena ya॒jñena॒ yaja̭te॒ pra pra॒jayā̭ pa॒śubhi̭-rmithu॒nai-rjā̭yate॒ dvāda̭śa॒ māsā᳚-ssaṃva~thsa॒ro dvāda̭śa dva॒ndvāni̭ darśapūrṇamā॒sayo॒stāni̭ sa॒mpādyā॒nītyā̭hu-rva॒thsa-ñco̭pāvasṛ॒jatyu॒khā-ñcādhi̭ śraya॒tyava̭ ca॒ hanti̭ dṛ॒ṣadaṷ ca sa॒māha॒ntyadhi̭ ca॒ vapa̭te ka॒pālā̭ni॒ copa̭ dadhāti puro॒ḍāśa̭-ñcā- [puro॒ḍāśa̭-ñca, a॒dhi॒śraya॒tyājya̭-ñca] 31
-'dhi॒śraya॒tyājya̭-ñca stambaya॒juśca॒ hara̭tya॒bhi ca̭ gṛhṇāti॒ vedi̭-ñca pari gṛ॒hṇāti॒ patnī᳚-ñca॒ sanna̭hyati॒ prokṣa̭ṇīścā ''sā॒daya॒tyājya̭-ñcai॒tāni॒ vai dvāda̭śa dva॒ndvāni̭ darśapūrṇamā॒sayo॒stāni॒ ya e॒vagṃ sa॒mpādya॒ yaja̭te॒ prajā̭tenai॒va ya॒jñena̭ yajate॒ pra pra॒jayā̭ pa॒śubhi̭-rmithu॒nai-rjā̭yate || 32 ||
(u॒kthyḙnopā॒pnotya̭-gacchatāṃ॒-yaḥ ~- pṷro॒ḍāśaṃ̭-catvāri॒gṃ॒śacca̭) (a. 9)
dhru॒vo̭-'si dhru॒vo̭-'hagṃ sa̭jā॒teṣṷ bhūyāsa॒mityā̭ha dhru॒vāne॒vainā᳚n kuruta u॒gro᳚-'syu॒gro̭-'hagṃ sa̭jā॒teṣṷ bhūyāsa॒-mityā॒hāpra̭tivādina e॒vainā᳚n kurute-'bhi॒bhūra̭syabhi॒bhūra॒hagṃ sa̭jā॒teṣṷ bhūyāsa॒mityā̭ha॒ ya e॒vaina̭-mpratyu॒tpipī̭te॒ tamupā᳚syate yu॒najmi̭ tvā॒ brahma̭ṇā॒ daivye॒netyā̭hai॒ṣa vāa॒gneryoga॒stenai॒ - [vāa॒gneryoga॒stena̭, e॒vainaṃ̭-yu~nakti] 33
vainaṃ̭-yu~nakti ya॒jñasya॒ vai samṛ̭ddhena de॒vā-ssṷva॒rgaṃ-lo~॒kamā̭yan. ya॒jñasya॒ vyṛ̭ddhe॒nāsṷrā॒-nparā̭bhāvaya॒n. yanmḙ agne a॒sya ya॒jñasya॒ riṣyā॒dityā̭ha ya॒jñasyai॒va tathsamṛ̭ddhena॒ yaja̭māna-ssuva॒rgaṃ-lo~॒kamḙti ya॒jñasya॒ vyṛ̭ddhena॒ bhrātṛ̭vyā॒-nparā̭ bhāvayatyagniho॒tra-me॒tābhi॒-rvyāhṛ̭tībhi॒rupa̭ sādayedyajñamu॒khaṃ-vā~ a̭gniho॒tra-mbrahmai॒tā vyāhṛ̭tayo yajñamu॒kha e॒va brahma̭ - [brahma̭, ku॒ru॒te॒ saṃ॒va~॒thsa॒re] 34
kurute saṃva~thsa॒re pa॒ryāga̭ta e॒tābhi̭re॒vopa̭ sādaye॒-dbrahma̭ṇai॒vobha॒yataḥ̭ saṃva~thsa॒ra-mpari̭ gṛhṇāti darśapūrṇamā॒sau cā̭turmā॒syānyā॒labha̭māna e॒tābhi॒-rvyāhṛ̭tībhir-ha॒vīgṣyāsā̭daye-dyajñamu॒khaṃ-vai~ da̭rśapūrṇamā॒sau cā̭turmā॒syāni॒ brahmai॒tā vyāhṛ̭tayo yajñamu॒kha e॒va brahma̭ kurute saṃva~thsa॒re pa॒ryāga̭ta e॒tābhi̭re॒vāsā̭daye॒-dbrahma̭ṇai॒vobha॒yataḥ̭ saṃva~thsa॒ra-mpari̭gṛhṇāti॒ yadvai ya॒jñasya॒ sāmnā᳚ kri॒yatḙ rā॒ṣṭraṃ- [rā॒ṣṭram, ya॒jñasyā॒-śīrga̭cchati॒] 35
-~ya॒jñasyā॒-śīrga̭cchati॒ yadṛ॒cā viśaṃ̭-ya~॒jñasyā॒- śīrga̭ccha॒tyatha̭ brāhma॒ṇo̭-'nā॒śīrkḙṇa ya॒jñena̭ yajate sāmidhe॒nī-ra̭nuva॒kṣyanne॒tā vyāhṛ̭tīḥ pu॒rastā᳚ddaddhyā॒-dbrahmai॒va pra̭ti॒pada̭-ṅkurute॒ tathā᳚ brāhma॒ṇa-ssāśī᳚rkeṇa ya॒jñena̭ yajate॒ ya-ṅkā॒mayḙta॒ yaja̭māna॒-mbhrātṛ̭vyamasya ya॒jñasyā॒śīrga̭cche॒diti॒ tasyai॒tā vyāhṛ̭tīḥ puronuvā॒kyā̭yā-ndaddhyā-dbhrātṛvyadeva॒tyā̭ vai pṷronuvā॒kyā᳚ bhrātṛ̭vyame॒vāsya̭ ya॒jñasyā॒-[ya॒jñasyā̭, ā॒śīrga̭cchati॒] 36
-''śīrga̭cchati॒ yān kā॒mayḙta॒ yaja̭mānān-thsa॒māva̭tyenān ya॒jñasyā॒ ''śīrga̭cche॒diti॒ teṣā̭me॒tā vyāhṛ̭tīḥ puronuvā॒kyā̭yā ardha॒rca ekā᳚-ndaddhyā-dyā॒jyā̭yai pu॒rastā॒dekāṃ᳚-yā~॒jyā̭yā ardha॒rca ekā॒-ntathai̭nān-thsa॒māva̭tī ya॒jñasyā॒ ''śīrga̭cchati॒ yathā॒ vai pa॒rjanya॒-ssuvṛ̭ṣṭaṃ॒-va~rṣa̭tye॒vaṃ-ya~॒jño yaja̭mānāya varṣati॒ sthala̭yoda॒ka-mpa̭rigṛ॒hṇantyā॒śiṣā̭ ya॒jñaṃ-ya~ja̭mānaḥ॒ pari̭ gṛhṇāti॒ mano̭-'si prājāpa॒tyaṃ- [prājāpa॒tyam, mana̭sā] 37
-mana̭sā mā bhū॒tenā-''vi॒śetyā̭ha॒ mano॒ vai prā̭jāpa॒tya-mprā̭jāpa॒tyo ya॒jño mana̭ e॒va ya॒jñamā॒tma-ndha̭tte॒ vāga̭syai॒ndrī sa̭patna॒kṣaya̭ṇī vā॒cā me᳚ndri॒yeṇā-''vi॒śetyā̭hai॒ndrī vai vāgvāca̭-me॒vaindrī- mā॒tma-ndha̭tte || 38 ||
(tenai॒-va brahma̭- rā॒ṣṭrame॒-vāsya̭ ya॒jñasya̭-prājāpa॒tyagṃ-ṣaṭtrigṃ̭śacca) (a. 10)
yo vai sa̭ptada॒śa-mpra॒jāpa̭tiṃ-ya~॒jñama॒nvāya̭ttaṃ॒-ve~da॒ prati̭ ya॒jñena̭ tiṣṭhati॒ na ya॒jñā-dbhragṃ̭śata॒ ā śrā̭va॒yeti॒ catṷrakṣara॒mastu॒ śrauṣa॒ḍiti॒ catṷrakṣaraṃ॒-ya~jeti॒ dvya̭kṣaraṃ॒-ye~ yajā̭maha॒ iti॒ pañcā᳚kṣara-ndvyakṣa॒ro va̭ṣaṭkā॒ra e॒ṣa vai sa̭ptada॒śaḥ pra॒jāpa̭ti-rya॒jñama॒nvāya̭tto॒ ya e॒vaṃ-ve~da॒ prati̭ ya॒jñena̭ tiṣṭhati॒ na ya॒jñād- bhragṃ̭śate॒ yo vai ya॒jñasya॒ prāya̭ṇa-mprati॒ṣṭhā- [prati॒ṣṭhām, u॒daya̭naṃ॒-ve~da॒] 39
mu॒daya̭naṃ॒-ve~da॒ prati̭ṣṭhite॒nāri̭ṣṭena ya॒jñena̭ sa॒gg॒sthā-ṅga̭ccha॒tyāśrā̭va॒yāstu॒ śrauṣa॒ḍyaja॒ ye yajā̭mahe vaṣaṭkā॒ra e॒tadvai ya॒jñasya॒ prāya̭ṇame॒ṣā pra̭ti॒ṣṭhaitadu॒daya̭naṃ॒-ya~ e॒vaṃ-ve~da॒ prati̭ṣṭhite॒nā-'ri̭ṣṭena ya॒jñena̭ sa॒gg॒sthā-ṅga̭cchati॒ yo vai sū॒nṛtā̭yai॒ dohaṃ॒-ve~da̭ du॒ha e॒vaināṃ᳚-ya~॒jño vai sū॒nṛtā '' śrā̭va॒yetyaivainā̭-mahva॒dastu॒ [-mahva॒dastṷ, śrauṣa॒ḍityu॒pāvā᳚srā॒-] 40
śrauṣa॒ḍityu॒pāvā᳚srā॒-gyajetyuda̭naiṣī॒dye yajā̭maha॒ ityupā̭-'sada-dvaṣaṭkā॒reṇa̭ dogddhye॒ṣa vai sū॒nṛtā̭yai॒ doho॒ ya e॒vaṃ-ve~da̭ du॒ha e॒vainā᳚-nde॒vā vai sa॒tramā̭sata॒ teṣā॒-ndiśo̭-'dasya॒nta e॒tāmā॒rdrā-mpa॒ṅktima̭paśya॒nnā śrā̭va॒yeti̭ purovā॒ta-ma̭janaya॒nnastu॒ śrauṣa॒ḍitya॒bhragṃ sama̭plāvaya॒n॒. yajeti̭ vi॒dyuta̭- [vi॒dyuta̭m, a॒ja॒na॒ya॒n॒ ye] 41
majanaya॒n॒ ye yajā̭maha॒ iti॒ prāva̭rṣayanna॒bhya̭stanayan vaṣaṭkā॒reṇa॒ tato॒ vai tebhyo॒ diśaḥ॒ prāpyā̭yanta॒ ya e॒vaṃ-ve~da॒ prāsmai॒ diśaḥ̭ pyāyante pra॒jāpa̭ti-ntvo॒veda̭ pra॒jāpa̭ti stvaṃve~da॒ ya-mpra॒jāpa̭ti॒-rveda॒ sa puṇyo̭ bhavatye॒ṣa vai cha̭nda॒syaḥ̭ pra॒jāpa̭ti॒rā śrā̭va॒yā-'stu॒ śrauṣa॒ḍyaja॒ ye yajā̭mahe vaṣaṭkā॒ro ya e॒vaṃ-ve~da॒ puṇyo̭ bhavati vasa॒nta- [vasa॒ntam, ṛ॒tū॒nāṃ] 42
-mṛ̭tū॒nā-mprī̭ṇā॒mītyā̭ha॒rtavo॒ vai pra̭yā॒jā ṛ॒tūne॒va prī̭ṇāti॒ te᳚-'smai prī॒tā ya̭thāpū॒rva-ṅka̭lpante॒ kalpa̭nte-'smā ṛ॒tavo॒ ya e॒vaṃ-ve~dā॒gnīṣoma̭yora॒ha-ndḙvaya॒jyayā॒ cakṣṷṣmā-nbhūyāsa॒mityā̭-hā॒gnīṣomā᳚bhyāṃ॒-vai~ ya॒jñaścakṣṷṣmā॒-ntābhyā̭me॒va cakṣṷrā॒tma-ndha̭tte॒ 'gnera॒ha-ndḙvaya॒jyayā᳚-'nnā॒do bhṷ̄yāsa॒mityā̭hā॒gnirvai de॒vānā̭-mannā॒daste nai॒vā- [mannā॒daste nai॒vā, a॒nnādya̭mā॒tman] 43
-'nnādya̭mā॒tma-ndha̭tte॒ dabdhi̭ra॒syada̭bdho bhūyāsama॒mu-nda̭bheya॒mityā̭hai॒tayā॒ vai dabddhyā̭ de॒vā asṷrānadabhnuva॒ntayai॒va bhrātṛ̭vya-ndabhnotya॒gnīṣoma̭yora॒ha-ndḙvaya॒jyayā̭ vṛtra॒hā bhṷ̄yāsa॒mityā̭hā॒-'gnīṣomā᳚bhyāṃ॒-vā~ indro̭ vṛ॒trama̭ha॒ntābhyā̭me॒va bhrātṛ̭vyagg stṛṇuta indrāgni॒yora॒ha-ndḙvaya॒jyaye᳚ndriyā॒vya̭nnā॒do bhṷ̄yāsa॒mityā̭hendriyā॒vyḙvānnā॒do bha̭va॒tīndra̭syā॒- [bha̭va॒tīndra̭sya, a॒ha-ndḙvaya॒jyaye᳚ndriyā॒vī] 44
-'ha-ndḙvaya॒jyaye᳚ndriyā॒vī bhṷ̄yāsa॒mityā̭hendriyā॒vyḙva bha̭vati mahe॒ndrasyā॒-'ha-ndḙvaya॒jyayā̭ je॒māna̭-mmahi॒māna̭-ṅgameya॒mityā̭ha je॒māna̭me॒va ma̭hi॒māna̭-ṅgacchatya॒gne-ssvi̭ṣṭa॒kṛto॒-'ha-ndḙvaya॒jyayā ''yṷṣmān. ya॒jñena̭ prati॒ṣṭhā-ṅga̭meya॒mityā॒-hāyṷre॒vātma-ndha̭tte॒ prati̭ ya॒jñena̭ -tiṣṭhati || 45 ||
( pra॒ti॒ṣṭhā-ma̭hva॒dastṷ-vi॒dyutaṃ̭va~sa॒ntan-tenai॒ve-ndra̭syā॒-'ṣṭātrigṃ̭śacca) (a. 11)
indraṃ̭-vo~ vi॒śvata॒spari॒ havā̭mahe॒ jane᳚bhyaḥ | a॒smāka̭mastu॒ keva̭laḥ || indra॒-nnaro̭ ne॒madhi̭tā havante॒ yatpāryā̭ yu॒naja̭te॒ dhiya॒stāḥ | śūro॒ nṛṣā̭tā॒ śava̭saścakā॒na ā goma̭ti vra॒je bha̭jā॒ tvannaḥ̭ || i॒ndri॒yāṇi̭ śatakrato॒ yā te॒ janḙṣu pa॒ñcasṷ || indra॒ tāni̭ ta॒ ā vṛ̭ṇe || anṷ te dāyi ma॒ha i̭ndri॒yāya̭ sa॒trā te॒ viśva॒manṷ vṛtra॒hatye᳚ | anṷ [ ] 46
kṣa॒tramanu॒ saho̭ yaja॒trendra̭ de॒vebhi॒ranṷ te nṛ॒ṣahye᳚ || āyasmi᳚n-thsa॒ptavā̭sa॒vā stiṣṭha̭nti svā॒ruho̭ yathā | ṛṣi̭rha dīrgha॒śrutta̭ma॒ indra̭sya gha॒rmo ati̭thiḥ || ā॒māsṷ pa॒kvamaira̭ya॒ ā sūryagṃ̭ rohayo di॒vi | gha॒rma-nna sāma̭-ntapatā suvṛ॒ktibhi॒-rjuṣṭa॒-ṅgirva̭ṇase॒ giraḥ̭ || indra॒mi-dgā॒thino̭ bṛ॒hadindra̭-ma॒rkebhi̭-ra॒rkiṇaḥ̭ | indraṃ॒-vā~ṇī̭ranūṣata || gāya̭nti tvā gāya॒triṇo- [gāya॒triṇaḥ̭, arca̭ntya॒rka-ma॒rkiṇaḥ̭ |] 47
-'rca̭ntya॒rka-ma॒rkiṇaḥ̭ | bra॒hmāṇa̭stvā śatakrata॒vu-dva॒gṃ॒śa-mi̭va yemire || a॒gṃ॒ho॒muce॒ pra bha̭remā manī॒ṣāmo̭ṣiṣṭha॒dāvaṃnḙ suma॒ti-ṅgṛ̭ṇā॒nāḥ | i॒dami̭ndra॒ prati̭ ha॒vya-ṅgṛ̭bhāya sa॒tyā-ssa̭ntu॒ yaja̭mānasya॒ kāmāḥ᳚ || vi॒veṣa॒ yanmā̭ dhi॒ṣaṇā̭ ja॒jāna॒ stavai̭ pu॒rā pāryā॒dindra॒-mahnaḥ̭ | agṃha̭so॒ yatra̭ pī॒para॒dyathā̭ no nā॒veva॒ yānta̭ mu॒bhayḙ havante || pra sa॒mrāja̭-mpratha॒ma-ma̭ddhva॒rāṇā̭- [ma̭ddhva॒rāṇā᳚m, a॒gṃ॒ho॒mucaṃ̭] 48
-magṃho॒mucaṃ̭-vṛ~ṣa॒bhaṃ-ya~॒jñiyā̭nām | a॒pā-nnapā̭tamaśvinā॒ haya̭nta-ma॒sminna̭ra indri॒ya-ndha̭tta॒mojaḥ̭ || vi na̭ indra॒ mṛdho̭ jahi nī॒cā ya̭ccha pṛtanya॒taḥ | a॒dha॒spa॒da-ntamī᳚-ṅkṛdhi॒ yo a॒smāgṃ a̭bhi॒dāsa̭ti || indra̭ kṣa॒trama॒bhi vā॒mamojo 'jā̭yathā vṛṣabha carṣaṇī॒nām | apā̭nudo॒ jana̭-mamitra॒yanta̭-mu॒ru-nde॒vebhyo̭ akṛṇo-ru lo॒kam || mṛ॒go na bhī॒maḥ kṷca॒ro gi̭ri॒ṣṭhāḥ pa̭rā॒vata [pa̭rā॒vataḥ̭, ā ja̭gāmā॒ para̭syāḥ |] 49
ā ja̭gāmā॒ para̭syāḥ | sṛ॒kagṃ sa॒gṃ॒śāya̭ pa॒vimi̭ndra ti॒gmaṃ-vi~ śatrū᳚-ntāḍhi॒ vimṛdho̭ nudasva || vi śatrū॒n॒. vi mṛdho̭ nuda॒ vivṛ॒trasya॒ hanṷ̄ ruja | vi ma॒nyumi̭ndra bhāmi॒to̭-'mitra̭syā-'bhi॒dāsa̭taḥ || trā॒tāra॒-mindra̭-mavi॒tāra॒-mindra॒gṃ॒ havḙhave su॒hava॒gṃ॒ śūra॒mindra᳚m | hu॒ve nu śa॒kra-mpṷruhū॒tamindragg̭ sva॒sti no̭ ma॒ghavā̭ dhā॒tvindraḥ̭ || mā tḙ a॒syāgṃ [a॒syāgṃ, sa॒ha॒sā॒va॒-npari̭ṣṭāva॒ghāya̭] 50
sa̭hasāva॒-npari̭ṣṭāva॒ghāya̭ bhūma harivaḥ parā॒dai | trāya̭sva no 'vṛ॒kebhi॒-rvarṷ̄thai॒-stava̭ pri॒yāsaḥ̭ sū॒riṣṷ syāma || ana̭vaste॒ ratha॒maśvā̭ya takṣa॒-ntvaṣṭā॒ vajra̭-mpuruhūta dyu॒manta᳚m | bra॒hmāṇa॒ indra̭-mma॒haya̭nto a॒rkairava̭rdhaya॒nnaha̭ye॒ hanta॒vā ṷ || vṛṣṇe॒ ya-tte॒ vṛṣa̭ṇo a॒rkamarcā॒nindra॒ grāvā̭ṇo॒ adi̭ti-ssa॒joṣāḥ᳚ | a॒na॒śvāso॒ ye pa॒vayo̭-'ra॒thā indrḙṣitā a॒bhyava̭rta nta॒ dasyūṋ || 51 ||
(vṛ॒tra॒hatye-'nṷ-gāya॒triṇo᳚-'ddha॒rāṇāṃ᳚-parā॒vato॒-'syā-ma॒ṣṭāca̭tvārigṃśacca) (a. 12)
(santvā̭ siñcāmi-dhru॒vo᳚-'sya॒gnirmā̭-ba॒r॒hiṣo॒-'ha-mā pyā̭yatā॒-maga̭nma॒-yathā॒ vai-yo vai śra॒ddhāṃ- pra॒jāpa̭ti॒-ryajñān-dhru॒vo̭-'sītyā̭ha॒-yo vai sa̭ptada॒śa-mindraṃ̭-vo~॒-dvāda̭śa | )
(santvā̭-ba॒r॒hiṣo॒-'haṃya~thā॒ vā-e॒vaṃ-vi~॒dvā-ñchrauṣa̭ṭ-thsāhasāva॒-nneka̭pañcā॒śat |)
(santvā̭, siñcāmi॒ dasyūṋ)
|| hariḥ̭ om ||
|| kṛṣṇa yajurvedīya taittirīya saṃhitāyā-mprathamakāṇḍe ṣaṣṭhaḥ praśna-ssamāptaḥ ||
🕉️ This is the original Sanskrit rendered in Tamil script.
Pronunciation is identical to the Sanskrit Devanagari version.