1.6 - Santva Sinchami Yajusha - Krishna Yajurveda Taittiriya Samhita Pathah — Telugu Script

కృష్ణ యజుర్వేదీయ తైత్తిరీయ సంహితాయా-మ్ప్రథమకాణ్డే షష్ఠః ప్రశ్నః - యాజమానకాణ్డం

ఓ-న్నమః పరమాత్మనే, శ్రీ మహాగణపతయే నమః,

శ్రీ గురుభ్యో నమః । హ॒రిః॒ ఓమ్ ॥

స-న్త్వా॑ సిఞ్చామి॒ యజు॑షా ప్ర॒జామాయు॒ర్ధన॑-ఞ్చ । బృహ॒స్పతి॑ప్రసూతో॒ యజ॑మాన ఇ॒హ మా రి॑షత్ ॥ ఆజ్య॑మసి స॒త్యమ॑సి స॒త్యస్యాద్ధ్య॑క్షమసి హ॒విర॑సి వైశ్వాన॒రం-వైఁ᳚శ్వదే॒వ-ముత్పూ॑తశుష్మగ్ం స॒త్యౌజా॒-స్సహో॑-ఽసి॒ సహ॑మానమసి॒ సహ॒స్వారా॑తీ॒-స్సహ॑స్వారాతీయ॒త-స్సహ॑స్వ॒ పృత॑నా॒-స్సహ॑స్వ పృతన్య॒తః । స॒హస్ర॑వీర్యమసి॒ తన్మా॑ జి॒న్వాజ్య॒స్యాజ్య॑మసి స॒త్యస్య॑ స॒త్యమ॑సి స॒త్యాయు॑- [స॒త్యాయుః॑, అ॒సి॒ స॒త్యశు॑ష్మమసి] 1

-రసి స॒త్యశు॑ష్మమసి స॒త్యేన॑ త్వా॒-ఽభి ఘా॑రయామి॒ తస్య॑ తే భక్షీయ పఞ్చా॒నా-న్త్వా॒ వాతా॑నాం-యఁ॒న్త్రాయ॑ ధ॒ర్త్రాయ॑ గృహ్ణామి పఞ్చా॒నా-న్త్వ॑ర్తూ॒నాం-యఁ॒న్త్రాయ॑ ధ॒ర్త్రాయ॑ గృహ్ణామి పఞ్చా॒నా-న్త్వా॑ ది॒శాం-యఁ॒న్త్రాయ॑ ధ॒ర్త్రాయ॑ గృహ్ణామి పఞ్చా॒నా-న్త్వా॑ పఞ్చజ॒నానాం᳚-యఁ॒న్త్రాయ॑ ధ॒ర్త్రాయ॑ గృహ్ణామి చ॒రోస్త్వా॒ పఞ్చ॑బిలస్య య॒న్త్రాయ॑ ధ॒ర్త్రాయ॑ గృహ్ణామి॒ బ్రహ్మ॑ణస్త్వా॒ తేజ॑సే య॒న్త్రాయ॑ ధ॒ర్త్రాయ॑ గృహ్ణామి క్ష॒త్రస్య॒ త్వౌజ॑సే య॒న్త్రాయ॑ [ ] 2

ధ॒ర్త్రాయ॑ గృహ్ణామి వి॒శే త్వా॑ య॒న్త్రాయ॑ ధ॒ర్త్రాయ॑ గృహ్ణామి సు॒వీర్యా॑య త్వా గృహ్ణామి సుప్రజా॒స్త్వాయ॑ త్వా గృహ్ణామి రా॒యస్పోషా॑య త్వా గృహ్ణామి బ్రహ్మవర్చ॒సాయ॑ త్వా గృహ్ణామి॒ భూర॒స్మాకగ్ం॑ హ॒విర్దే॒వానా॑-మా॒శిషో॒ యజ॑మానస్య దే॒వానా᳚-న్త్వా దే॒వతా᳚భ్యో గృహ్ణామి॒ కామా॑య త్వా గృహ్ణామి ॥ 3 ॥

(స॒త్యాయు॒-రోజ॑సే య॒న్త్రాయ॒-త్రయ॑స్త్రిగ్ంశచ్చ) (అ. 1)

ధ్రు॒వో॑-ఽసి ధ్రు॒వో॑-ఽహగ్ం స॑జా॒తేషు॑ భూయాస॒-న్ధీర॒శ్చేత్తా॑ వసు॒విదు॒గ్రో᳚-ఽస్యు॒గ్రో॑-ఽహగ్ం స॑జా॒తేషు॑ భూయాస-ము॒గ్రశ్చేత్తా॑ వసు॒విద॑భి॒-భూర॑స్యభి॒భూర॒హగ్ం స॑జా॒తేషు॑ భూయాసమభి॒భూశ్చేత్తా॑ వసు॒వి-ద్యు॒నజ్మి॑ త్వా॒ బ్రహ్మ॑ణా॒ దైవ్యే॑న హ॒వ్యాయా॒స్మై వోఢ॒వే జా॑తవేదః ॥ ఇన్ధా॑నాస్త్వా సుప్ర॒జసః॑ సు॒వీరా॒ జ్యోగ్జీ॑వేమ బలి॒హృతో॑ వ॒య-న్తే᳚ ॥ యన్మే॑ అగ్నే అ॒స్య య॒జ్ఞస్య॒ రిష్యా॒- [రిష్యా᳚త్, ద్యద్వా॒] 4

-ద్యద్వా॒ స్కన్దా॒-దాజ్య॑స్యో॒త వి॑ష్ణో । తేన॑ హన్మి స॒పత్న॑-న్దుర్మరా॒యుమైన॑-న్దధామి॒ నిర్-ఋ॑త్యా ఉ॒పస్థే᳚ । భూ-ర్భువ॒-స్సువ॒రుచ్ఛు॑ష్మో అగ్నే॒ యజ॑మానాయైధి॒ నిశు॑ష్మో అభి॒దాస॑తే । అగ్నే॒ దేవే᳚ద్ధ॒ మన్వి॑ద్ధ॒ మన్ద్ర॑జి॒హ్వా-మ॑ర్త్యస్య తే హోతర్మూ॒ర్ధన్నా జి॑ఘర్మి రా॒యస్పోషా॑య సుప్రజా॒స్త్వాయ॑ సు॒వీర్యా॑య॒ మనో॑-ఽసి ప్రాజాప॒త్య-మ్మన॑సా మా భూ॒తేనా వి॑శ॒ వాగ॑స్యై॒న్ద్రీ స॑పత్న॒క్షయ॑ణీ [ ] 5

వా॒చా మే᳚న్ద్రి॒యేణా వి॑శ వస॒న్తమృ॑తూ॒నా-మ్ప్రీ॑ణామి॒ స మా᳚ ప్రీ॒తః ప్రీ॑ణాతు గ్రీ॒ష్మమృ॑తూ॒నా-మ్ప్రీ॑ణామి॒ స మా᳚ ప్రీ॒తః ప్రీ॑ణాతు వ॒ర్॒షా ఋ॑తూ॒నా-మ్ప్రీ॑ణామి॒ తా మా᳚ ప్రీ॒తాః ప్రీ॑ణన్తు శ॒రద॑మృతూ॒నా-మ్ప్రీ॑ణామి॒ సా మా᳚ ప్రీ॒తా ప్రీ॑ణాతు హేమన్తశిశి॒రావృ॑తూ॒నా-మ్ప్రీ॑ణామి॒ తౌ మా᳚ ప్రీ॒తౌ ప్రీ॑ణీతా-మ॒గ్నీషోమ॑యో-ర॒హ-న్దే॑వయ॒జ్యయా॒ చక్షు॑ష్మా-న్భూయాసమ॒గ్నేర॒హ-న్దే॑వయ॒జ్యయా᳚-ఽన్నా॒దో భూ॑యాస॒- [భూ॑యాసమ్, దబ్ధి॑ర॒స్యద॑బ్ధో] 6

-న్దబ్ధి॑ర॒స్యద॑బ్ధో భూయాసమ॒ము-న్ద॑భేయ-మ॒గ్నీషోమ॑యో-ర॒హ-న్దే॑వయ॒జ్యయా॑ వృత్ర॒హా భూ॑యాసమిన్ద్రాగ్ని॒యోర॒హ-న్దే॑వయ॒జ్యయే᳚న్ద్రియా॒వ్య॑న్నా॒దో భూ॑యాస॒మిన్ద్ర॑స్యా॒-ఽహ-న్దే॑వయ॒జ్యయే᳚న్ద్రియా॒వీ భూ॑యాస-మ్మహే॒న్ద్రస్యా॒-ఽహ-న్దే॑వయ॒జ్యయా॑ జే॒మాన॑-మ్మహి॒మాన॑-ఙ్గమేయమ॒గ్నే-స్స్వి॑ష్ట॒కృతో॒-ఽహ-న్దే॑వయ॒జ్యయా ఽఽయు॑ష్మాన్. య॒జ్ఞేన॑ ప్రతి॒ష్ఠా-ఙ్గ॑మేయమ్ ॥ 7 ॥

(రిష్యా᳚-థ్సపత్న॒క్షయ॑ణ్య-న్నా॒దో భూ॑యాస॒గ్ం॒-షట్త్రిగ్ం॑శచ్చ) (అ. 2)

అ॒గ్నిర్మా॒ దురి॑ష్టా-త్పాతు సవి॒తా-ఽఘశగ్ం॑సా॒ద్యో మే-ఽన్తి॑ దూ॒రే॑-ఽరాతీ॒యతి॒ తమే॒తేన॑ జేష॒గ్ం॒ సురూ॑పవర్షవర్ణ॒ ఏహీ॒మా-న్భ॒ద్రా-న్దుర్యాగ్ం॑ అ॒భ్యేహి॒ మామను॑వ్రతా॒ న్యు॑ శీ॒ర్॒షాణి॑ మృఢ్వ॒మిడ॒ ఏహ్యది॑త॒ ఏహి॒ సర॑స్వ॒త్యేహి॒ రన్తి॑రసి॒ రమ॑తిరసి సూ॒నర్య॑సి॒ జుష్టే॒ జుష్టి॑-న్తే-ఽశీ॒యోప॑హూత ఉపహ॒వ- [ఉపహ॒వమ్, తే॒-ఽశీ॒య॒ సా ] 8

-న్తే॑-ఽశీయ॒ సా మే॑ స॒త్యా-ఽఽశీర॒స్య య॒జ్ఞస్య॑ భూయా॒దరే॑డతా॒ మన॑సా॒ తచ్ఛ॑కేయం-యఁ॒జ్ఞో దివగ్ం॑ రోహతు య॒జ్ఞో దివ॑-ఙ్గచ్ఛతు॒ యో దే॑వ॒యానః॒ పన్థా॒స్తేన॑ య॒జ్ఞో దే॒వాగ్ం అప్యే᳚త్వ॒స్మాస్విన్ద్ర॑ ఇన్ద్రి॒య-న్ద॑ధాత్వ॒స్మాన్రాయ॑ ఉ॒త య॒జ్ఞా-స్స॑చన్తామ॒స్మాసు॑ సన్త్వా॒శిష॒-స్సా నః॑ ప్రి॒యా సు॒ప్రతూ᳚ర్తిర్మ॒ఘోనీ॒ జుష్టి॑రసి జు॒షస్వ॑ నో॒ జుష్టా॑ నో- [జుష్టా॑ నః, అ॒సి॒ జుష్టి॑-న్తే] 9

-ఽసి॒ జుష్టి॑-న్తే గమేయ॒-మ్మనో॒ జ్యోతి॑-ర్జుషతా॒మాజ్యం॒-విఁచ్ఛి॑న్నం-యఁ॒జ్ఞగ్ం సమి॒మ-న్ద॑ధాతు । బృహ॒స్పతి॑-స్తనుతామి॒మన్నో॒ విశ్వే॑ దే॒వా ఇ॒హ మా॑దయన్తామ్ ॥ బ్రద్ధ్న॒ పిన్వ॑స్వ॒ దద॑తో మే॒ మా క్షా॑యి కుర్వ॒తో మే॒ మోప॑ దస-త్ప్ర॒జాప॑తే-ర్భా॒గో᳚-ఽస్యూర్జ॑స్వా॒-న్పయ॑స్వా-న్ప్రాణాపా॒నౌ మే॑ పాహి సమానవ్యా॒నౌ మే॑ పాహ్యుదానవ్యా॒నౌ మే॑ పా॒హ్యక్షి॑తో॒-ఽస్యక్షి॑త్యై త్వా॒ మా మే᳚ క్షేష్ఠా అ॒ముత్రా॒ముష్మి॑న్ ఁలో॒కే ॥ 10 ॥

(ఉ॒ప॒హ॒వం-జుష్టా॑న-స్త్వా॒ షట్ చ॑) (అ. 3)

బ॒ర్॒హిషో॒-ఽహ-న్దే॑వయ॒జ్యయా᳚ ప్ర॒జావా᳚-న్భూయాస॒-న్నరా॒శగ్ంస॑స్యా॒హ-న్దే॑వయ॒జ్యయా॑ పశు॒మా-న్భూ॑యాసమ॒గ్నే-స్స్వి॑ష్ట॒కృతో॒-ఽహ-న్దే॑వయ॒జ్యయా-ఽఽయు॑ష్మాన్. య॒జ్ఞేన॑ ప్రతి॒ష్ఠా-ఙ్గ॑మేయమ॒గ్నేర॒హ-ముజ్జి॑తి॒-మనూజ్జే॑ష॒గ్ం॒ సోమ॑స్యా॒హ - ముజ్జి॑తి॒-మనూజ్జే॑షమ॒గ్నేర॒హ-ముజ్జి॑తి॒-మనూజ్జే॑ష-మ॒గ్నీషోమ॑యోర॒హ-ముజ్జి॑తి॒-మనూజ్జే॑ష-మిన్ద్రాగ్ని॒యోర॒హ-ముజ్జి॑తి॒-మనూజ్జే॑ష॒-మిన్ద్ర॑స్యా॒-ఽహ- [-మిన్ద్ర॑స్యా॒-ఽహమ్, ఉజ్జి॑తి॒మనూజ్జే॑షం] 11

-ముజ్జి॑తి॒మనూజ్జే॑ష-మ్మహే॒న్ద్రస్యా॒హముజ్జి॑తి॒- మనూజ్జే॑షమ॒గ్నే-స్స్వి॑ష్ట॒కృతో॒-ఽహ ముజ్జి॑తి॒-మనూజ్జే॑షం॒-వాఁజ॑స్య మా ప్రస॒వేనో᳚-ద్గ్రా॒భేణోద॑గ్రభీత్ । అథా॑ స॒పత్నా॒గ్ం॒ ఇన్ద్రో॑ మే నిగ్రా॒భేణాధ॑రాగ్ం అకః ॥ ఉ॒ద్గ్రా॒భ-ఞ్చ॑ నిగ్రా॒భ-ఞ్చ॒ బ్రహ్మ॑ దే॒వా అ॑వీవృధన్న్ । అథా॑ స॒పత్నా॑నిన్ద్రా॒గ్నీ మే॑ విషూ॒చీనా॒న్ వ్య॑స్యతామ్ ॥ ఏమా అ॑గ్మన్నా॒శిషో॒ దోహ॑కామా॒ ఇన్ద్ర॑వన్తో [ఇన్ద్ర॑వన్తః, వ॒నా॒మ॒హే॒ ధు॒క్షీ॒మహి॑] 12

వనామహే ధుక్షీ॒మహి॑ ప్ర॒జామిష᳚మ్ ॥ రోహి॑తేన త్వా॒-ఽగ్ని-ర్దే॒వతా᳚-ఙ్గమయతు॒ హరి॑భ్యా॒-న్త్వేన్ద్రో॑ దే॒వతా᳚-ఙ్గమయ॒త్వేత॑శేన త్వా॒ సూర్యో॑ దే॒వతా᳚-ఙ్గమయతు॒ వి తే॑ ముఞ్చామి రశ॒నా వి ర॒శ్మీన్ వి యోక్త్రా॒ యాని॑ పరి॒చర్త॑నాని ధ॒త్తాద॒స్మాసు॒ ద్రవి॑ణం॒-యఁచ్చ॑ భ॒ద్ర-మ్ప్ర ణో᳚ బ్రూతా-ద్భాగ॒ధా-న్దే॒వతా॑సు ॥ విష్ణో᳚-శ్శం॒యోఁర॒హ-న్దే॑వయ॒జ్యయా॑ య॒జ్ఞేన॑ ప్రతి॒ష్ఠా-ఙ్గ॑మేయ॒గ్ం॒ సోమ॑స్యా॒హ-న్దే॑వయ॒జ్యయా॑ [దే॑వయ॒జ్యయా᳚, సు॒రేతా॒] 13

సు॒రేతా॒ రేతో॑ ధిషీయ॒ త్వష్టు॑ర॒హ-న్దే॑వయ॒జ్యయా॑ పశూ॒నాగ్ం రూ॒ప-మ్పు॑షేయ-న్దే॒వానా॒-మ్పత్నీ॑ర॒గ్ని-ర్గృ॒హప॑తి-ర్య॒జ్ఞస్య॑ మిథు॒న-న్తయో॑ర॒హ-న్దే॑వయ॒జ్యయా॑ మిథు॒నేన॒ ప్రభూ॑యాసం-వేఁ॒దో॑-ఽసి॒ విత్తి॑రసి వి॒దేయ॒ కర్మా॑-ఽసి క॒రుణ॑మసి క్రి॒యాసగ్ం॑ స॒నిర॑సి సని॒తా-ఽసి॑ స॒నేయ॑-ఙ్ఘృ॒తవ॑న్త-ఙ్కులా॒యినగ్ం॑ రా॒యస్పోషగ్ం॑ సహ॒స్రిణం॑-వేఁ॒దో ద॑దాతు వా॒జిన᳚మ్ ॥ 14 ॥

(ఇన్ద్ర॑స్యా॒హ-మిన్ద్ర॑వన్తః॒-సోమ॑స్యా॒హ-న్దే॑వయ॒జ్యయా॒-చతు॑శ్చత్వారిగ్ంశచ్చ) (అ. 4)

ఆ ప్యా॑యతా-న్ధ్రు॒వా ఘృ॒తేన॑ య॒జ్ఞంయఁ॑జ్ఞ॒-మ్ప్రతి॑ దేవ॒యద్భ్యః॑ । సూ॒ర్యాయా॒ ఊధో-ఽది॑త్యా ఉ॒పస్థ॑ ఉ॒రుధా॑రా పృథి॒వీ య॒జ్ఞే అ॒స్మిన్న్ ॥ ప్ర॒జాప॑తే-ర్వి॒భాన్నామ॑ లో॒కస్తస్మిగ్గ్॑స్త్వా దధామి స॒హ యజ॑మానేన॒ సద॑సి॒ సన్మే॑ భూయా॒-స్సర్వ॑మసి॒ సర్వ॑-మ్మే భూయాః పూ॒ర్ణమ॑సి పూ॒ర్ణ-మ్మే॑ భూయా॒ అక్షి॑తమసి॒ మా మే᳚ క్షేష్ఠాః॒ ప్రాచ్యా᳚-న్ది॒శి దే॒వా ఋ॒త్విజో॑ మార్జయన్తా॒-న్దక్షి॑ణాయా- [దక్షి॑ణాయామ్, ది॒శి] 15

న్ది॒శి మాసాః᳚ పి॒తరో॑ మార్జయన్తా-మ్ప్ర॒తీచ్యా᳚-న్ది॒శి గృ॒హాః ప॒శవో॑ మార్జయన్తా॒ముదీ᳚చ్యా-న్ది॒శ్యాప॒ ఓష॑ధయో॒ వన॒స్పత॑యో మార్జయన్తామూ॒ర్ధ్వాయా᳚-న్ది॒శి య॒జ్ఞ-స్సం॑వఁథ్స॒రో య॒జ్ఞప॑తి-ర్మార్జయన్తాం॒-విఁష్ణోః॒ క్రమో᳚-ఽస్యభిమాతి॒హా గా॑య॒త్రేణ॒ ఛన్ద॑సా పృథి॒వీమను॒ వి క్ర॑మే॒ నిర్భ॑క్త॒-స్స య-న్ద్వి॒ష్మో విష్ణోః॒ క్రమో᳚-ఽస్యభిశస్తి॒హా త్రైష్టు॑భేన॒ ఛన్ద॑సా॒ ఽన్తరి॑క్ష॒మను॒ వి క్ర॑మే॒ నిర్భ॑క్త॒-స్స య-న్ద్వి॒ష్మో విష్ణోః॒ క్రమో᳚-ఽస్యరాతీయ॒తో హ॒న్తా జాగ॑తేన॒ ఛన్ద॑సా॒ దివ॒మను॒ వి క్ర॑మే॒ నిర్భ॑క్త॒-స్స య-న్ద్వి॒ష్మో విష్ణోః॒ క్రమో॑-ఽసి శత్రూయ॒తో హ॒న్తా-ఽఽను॑ష్టుభేన॒ ఛన్ద॑సా॒ దిశో-ఽను॒ వి క్ర॑మే॒ నిర్భ॑క్త॒-స్స య-న్ద్వి॒ష్మః ॥ 16 ॥

(దక్షి॑ణాయా - మ॒న్తరి॑క్ష॒మను॒ వి క్ర॑మే॒ నిర్భ॑క్త॒-స్స య-న్ద్వి॒ష్మో విష్ణో॒- రేకా॒న్నత్రి॒గ్ం॒శచ్చ॑) (అ. 5)

అగ॑న్మ॒ సువ॒-స్సువ॑రగన్మ స॒న్దృశ॑స్తే॒ మా ఛి॑థ్సి॒ యత్తే॒ తప॒స్తస్మై॑ తే॒ మా-ఽఽ వృ॑క్షి సు॒భూర॑సి॒ శ్రేష్ఠో॑ రశ్మీ॒నామా॑యు॒ర్ధా అ॒స్యాయు॑ర్మే ధేహి వర్చో॒ధా అ॑సి॒ వర్చో॒ మయి॑ ధేహీ॒దమ॒హమ॒ము-మ్భ్రాతృ॑వ్యమా॒భ్యో ది॒గ్భ్యో᳚-ఽస్యై ది॒వో᳚-ఽస్మాద॒న్తరి॑క్షాద॒స్యై పృ॑థి॒వ్యా అ॒స్మాద॒న్నాద్యా॒న్నిర్భ॑జామి॒ నిర్భ॑క్త॒-స్స య-న్ద్వి॒ష్మః ॥ 17 ॥

స-ఞ్జ్యోతి॑షా-ఽభూవమై॒న్ద్రీ-మా॒వృత॑-మ॒న్వావ॑ర్తే॒ సమ॒హ-మ్ప్ర॒జయా॒ స-మ్మయా᳚ ప్ర॒జా సమ॒హగ్ం రా॒యస్పోషే॑ణ॒ స-మ్మయా॑ రా॒యస్పోష॒-స్సమి॑ద్ధో అగ్నే మే దీదిహి సమే॒ద్ధా తే॑ అగ్నే దీద్యాసం॒-వఁసు॑మాన్. య॒జ్ఞో వసీ॑యా-న్భూయాస॒మగ్న॒ ఆయూగ్ం॑షి పవస॒ ఆ సు॒వోర్జ॒మిష॑-ఞ్చ నః । ఆ॒రే బా॑ధస్వ దు॒చ్ఛునా᳚మ్ ॥ అగ్నే॒ పవ॑స్వ॒ స్వపా॑ అ॒స్మే వర్చః॑ సు॒వీర్య᳚మ్ ॥ 18 ॥

దధ॒త్పోషగ్ం॑ ర॒యి-మ్మయి॑ । అగ్నే॑ గృహపతే సుగృహప॒తిర॒హ-న్త్వయా॑ గృ॒హప॑తినా భూయాసగ్ం సుగృహప॒తిర్మయా॒ త్వ-ఙ్గృ॒హప॑తినా భూయా-శ్శ॒తగ్ం హిమా॒స్తామా॒శిష॒మా శా॑సే॒ తన్త॑వే॒ జ్యోతి॑ష్మతీ॒-న్తామా॒శిష॒మా శా॑సే॒-ఽముష్మై॒ జ్యోతి॑ష్మతీ॒-ఙ్కస్త్వా॑ యునక్తి॒ స త్వా॒ విము॑ఞ్చ॒త్వగ్నే᳚ వ్రతపతే వ్ర॒తమ॑చారిష॒-న్తద॑శక॒-న్తన్మే॑-ఽరాధి య॒జ్ఞో బ॑భూవ॒ స ఆ [స ఆ, బ॒భూ॒వ॒ స] 19

బ॑భూవ॒ స ప్రజ॑జ్ఞే॒ స వా॑వృధే । స దే॒వానా॒మధి॑పతి-ర్బభూవ॒ సో అ॒స్మాగ్ం అధి॑పతీన్ కరోతు వ॒యగ్గ్ స్యా॑మ॒ పత॑యో రయీ॒ణామ్ ॥ గోమాగ్ం॑ అ॒గ్నే-ఽవి॑మాగ్ం అ॒శ్వీ య॒జ్ఞో నృ॒వథ్స॑ఖా॒ సద॒మిద॑ప్రమృ॒ష్యః ।ఇడా॑వాగ్ం ఏ॒షో అ॑సుర ప్ర॒జావా᳚-న్దీ॒ర్ఘో ర॒యిః పృ॑థుబు॒ద్ధ్న-స్స॒భావాన్॑ ॥ 20 ॥

(ద్వి॒ష్మః-సు॒వీర్య॒గ్ం॒-స ఆ-పఞ్చ॑త్రిగ్ంశచ్చ) (అ. 6)

యథా॒ వై స॑మృతసో॒మా ఏ॒వం-వాఁ ఏ॒తే స॑మృతయ॒జ్ఞా యద్ద॑ర్శపూర్ణమా॒సౌ కస్య॒ వా-ఽహ॑ దే॒వా య॒జ్ఞమా॒గచ్ఛ॑న్తి॒ కస్య॑ వా॒ న బ॑హూ॒నాం-యఁజ॑మానానాం॒-యోఁ వై దే॒వతాః॒ పూర్వః॑ పరిగృ॒హ్ణాతి॒ స ఏ॑నా॒-శ్శ్వో భూ॒తే య॑జత ఏ॒తద్వై దే॒వానా॑-మా॒యత॑నం॒-యఁదా॑హవ॒నీయో᳚-ఽన్త॒రా-ఽగ్నీ ప॑శూ॒నా-ఙ్గార్హ॑పత్యో మను॒ష్యా॑ణా-మన్వాహార్య॒పచ॑నః పితృ॒ణామ॒గ్ని-ఙ్గృ॑హ్ణాతి॒ స్వ ఏ॒వాయత॑నే దే॒వతాః॒ పరి॑ [దే॒వతాః॒ పరి॑, గృ॒హ్ణా॒తి॒ తా-శ్శ్వో] 21

గృహ్ణాతి॒ తా-శ్శ్వో భూ॒తే య॑జతే వ్ర॒తేన॒ వై మేద్ధ్యో॒ -ఽగ్ని-ర్వ్ర॒తప॑తి-ర్బ్రాహ్మ॒ణో వ్ర॑త॒భృ-ద్వ్ర॒త-ము॑పై॒ష్య-న్బ్రూ॑యా॒దగ్నే᳚ వ్రతపతే వ్ర॒త-ఞ్చ॑రిష్యా॒మీత్య॒గ్ని-ర్వై దే॒వానాం᳚-వ్రఁ॒తప॑తి॒స్తస్మా॑ ఏ॒వ ప్ర॑తి॒ప్రోచ్య॑ వ్ర॒తమా ల॑భతే బ॒ర్॒హిషా॑ పూ॒ర్ణమా॑సే వ్ర॒తముపై॑తి వ॒థ్సైర॑మావా॒స్యా॑యామే॒తద్ధ్యే॑తయో॑-రా॒యత॑నముప॒స్తీర్యః॒ పూర్వ॑శ్చా॒గ్నిరప॑ర॒శ్చేత్యా॑హు-ర్మను॒ష్యా॑ [-ర్మను॒ష్యాః᳚, ఇన్న్వా] 22

ఇన్న్వా ఉప॑స్తీర్ణ-మి॒చ్ఛన్తి॒ కిము॑ దే॒వా యేషా॒-న్నవా॑వసాన॒-ముపా᳚స్మి॒ఞ్ఛ్వో య॒క్ష్యమా॑ణే దే॒వతా॑ వసన్తి॒ య ఏ॒వం-విఁ॒ద్వాన॒గ్ని-ము॑పస్తృ॒ణాతి॒ యజ॑మానేన గ్రా॒మ్యాశ్చ॑ ప॒శవో॑-ఽవ॒రుద్ధ్యా॑ ఆర॒ణ్యాశ్చేత్యా॑హు॒-ర్య-ద్గ్రా॒మ్యాను॑ప॒వస॑తి॒ తేన॑ గ్రా॒మ్యానవ॑ రున్ధే॒ యదా॑ర॒ణ్యస్యా॒-ఽశ్ఞాతి॒ తేనా॑ర॒ణ్యాన్. యదనా᳚శ్వా-నుప॒వసే᳚-త్పితృదేవ॒త్యః॑ స్యాదార॒ణ్యస్యా᳚-శ్ఞాతీన్ద్రి॒యం- [శ్ఞాతీన్ద్రి॒యమ్, వా ఆ॑ర॒ణ్యం-] 23

-ఁవా ఆ॑ర॒ణ్య-మి॑న్ద్రి॒య-మే॒వా-ఽఽత్మ-న్ధ॑త్తే॒ యదనా᳚శ్వా-నుప॒వసే॒-త్క్షోధు॑క-స్స్యా॒ద్య-ద॑శ్ఞీ॒యాద్రు॒-ద్రో᳚-ఽస్య ప॒శూన॒భి మ॑న్యేతా॒-ఽపో᳚-ఽశ్ఞాతి॒ తన్నేవా॑శి॒త-న్నేవా-ఽన॑శిత॒-న్న క్షోధు॑కో॒ భవ॑తి॒ నాస్య॑ రు॒ద్రః ప॒శూన॒భి మ॑న్యతే॒ వజ్రో॒ వై య॒జ్ఞః, క్షు-త్ఖలు॒ వై మ॑ను॒ష్య॑స్య॒ భ్రాతృ॑వ్యో॒ యదనా᳚-ఽశ్వానుప॒వస॑తి॒ వజ్రే॑ణై॒వ సా॒క్షా-త్క్షుధ॒-మ్భ్రాతృ॑వ్యగ్ం హన్తి ॥ 24 ॥

(పరి॑-మను॒ష్యా॑-ఇన్ద్రి॒యగ్ం-సా॒క్షాత్-త్రీణి॑ చ) (అ. 7)

యో వై శ్ర॒ద్ధామనా॑రభ్య య॒జ్ఞేన॒ యజ॑తే॒ నాస్యే॒ష్టాయ॒ శ్రద్ద॑ధతే॒-ఽపః ప్ర ణ॑యతి శ్ర॒ద్ధా వా ఆపః॑ శ్ర॒ద్ధామే॒వా-ఽఽరభ్య॑ య॒జ్ఞేన॑ యజత ఉ॒భయే᳚-ఽస్య దేవమను॒ష్యా ఇ॒ష్టాయ॒ శ్రద్ద॑ధతే॒ తదా॑హు॒రతి॒ వా ఏ॒తా వర్త్ర॑-న్నేద॒న్త్యతి॒ వాచ॒-మ్మనో॒ వావైతా నాతి॑ నేద॒న్తీతి॒ మన॑సా॒ ప్ర ణ॑యతీ॒యం-వైఁ మనో॒- [మనః॑, అ॒నయై॒వైనాః॒] 25

-ఽనయై॒వైనాః॒ ప్ర ణ॑య॒త్య-స్క॑న్నహవి-ర్భవతి॒ య ఏ॒వం-వేఁద॑ యజ్ఞాయు॒ధాని॒ స-మ్భ॑రతి య॒జ్ఞో వై య॑జ్ఞాయు॒ధాని॑ య॒జ్ఞమే॒వ తథ్స-మ్భ॑రతి॒ యదేక॑మేకగ్ం స॒మ్భరే᳚త్-పితృదేవ॒త్యా॑ని స్యు॒ర్య-థ్స॒హ సర్వా॑ణి మాను॒షాణి॒ ద్వేద్వే॒ సమ్భ॑రతి యాజ్యానువా॒క్య॑యోరే॒వ రూ॒ప-ఙ్క॑రో॒త్యథో॑ మిథు॒నమే॒వయో వై దశ॑ యజ్ఞాయు॒ధాని॒ వేద॑ ముఖ॒తో᳚-ఽస్య య॒జ్ఞః క॑ల్పతే॒ స్ఫ్య- [క॑ల్పతే॒ స్ఫ్యః, చ॒ క॒పాలా॑ని] 26

-శ్చ॑ క॒పాలా॑ని చాగ్నిహోత్ర॒హవ॑ణీ చ॒ శూర్ప॑-ఞ్చ కృష్ణాజి॒న-ఞ్చ॒ శమ్యా॑ చో॒లూఖ॑ల-ఞ్చ॒ ముస॑ల-ఞ్చ దృ॒షచ్చోప॑లా చై॒తాని॒ వై దశ॑ యజ్ఞాయు॒ధాని॒ య ఏ॒వం-వేఁద॑ ముఖ॒తో᳚-ఽస్య య॒జ్ఞః క॑ల్పతే॒ యో వై దే॒వేభ్యః॑ ప్రతి॒ప్రోచ్య॑ య॒జ్ఞేన॒ యజ॑తే జు॒షన్తే᳚-ఽస్య దే॒వా హ॒వ్యగ్ం హ॒వి-ర్ని॑రు॒ప్యమా॑ణమ॒భి మ॑న్త్రయేతా॒-ఽగ్నిగ్ం హోతా॑రమి॒హ తగ్ం హు॑వ॒ ఇతి॑ [ ] 27

దే॒వేభ్య॑ ఏ॒వ ప్ర॑తి॒ప్రోచ్య॑ య॒జ్ఞేన॑ యజతే జు॒షన్తే᳚-ఽస్య దే॒వా హ॒వ్యమే॒ష వై య॒జ్ఞస్య॒ గ్రహో॑ గృహీ॒త్వైవ య॒జ్ఞేన॑ యజతే॒ తదు॑ది॒త్వా వాచం॑-యఁచ్ఛతి య॒జ్ఞస్య॒ ధృత్యా॒ అథో॒ మన॑సా॒ వై ప్ర॒జాప॑తి-ర్య॒జ్ఞమ॑తనుత॒ మన॑సై॒వ త-ద్య॒జ్ఞ-న్త॑నుతే॒ రక్ష॑సా॒-మన॑న్వవచారాయ॒ యో వై య॒జ్ఞం-యోఁగ॒ ఆగ॑తే యు॒నక్తి॑ యు॒ఙ్క్తే యు॑ఞ్జా॒నేషు॒ కస్త్వా॑ యునక్తి॒ స త్వా॑ యున॒క్త్వి-( ) -త్యా॑హ ప్ర॒జాప॑తి॒-ర్వై కః ప్ర॒జాప॑తినై॒వైనం॑-యుఁనక్తి యు॒ఙ్క్తే యు॑ఞ్జా॒నేషు॑ ॥ 28 ॥

(వైమ॒నః-స్ఫ్య-ఇతి॑-యున॒క్త్వే-కా॑దశ చ) (అ. 8)

ప్ర॒జాప॑తి-ర్య॒జ్ఞాన॑సృజతా-గ్నిహో॒త్ర-ఞ్చా᳚గ్నిష్టో॒మ-ఞ్చ॑ పౌర్ణమా॒సీ-ఞ్చో॒క్థ్య॑-ఞ్చామావా॒స్యా᳚-ఞ్చాతిరా॒త్ర-ఞ్చ॒ తానుద॑మిమీత॒ యావ॑దగ్నిహో॒త్ర-మాసీ॒-త్తావా॑నగ్నిష్టో॒మో యావ॑తీ పౌర్ణమా॒సీ తావా॑ను॒క్థ్యో॑ యావ॑త్యమావా॒స్యా॑ తావా॑నతిరా॒త్రో య ఏ॒వం-విఁ॒ద్వాన॑గ్నిహో॒త్ర-ఞ్జు॒హోతి॒ యావ॑దగ్నిష్టో॒మేనో॑ పా॒ప్నోతి॒ తావ॒దుపా᳚-ఽఽప్నోతి॒ య ఏ॒వం-విఁ॒ద్వా-న్పౌ᳚ర్ణమా॒సీం-యఁజ॑తే॒ యావ॑దు॒క్థ్యే॑నోపా॒ప్నోతి॒ [యావ॑దు॒క్థ్యే॑నోపా॒ప్నోతి॑, తావ॒దుపా᳚-ఽఽప్నోతి॒] 29

తావ॒దుపా᳚-ఽఽప్నోతి॒ య ఏ॒వం-విఁ॒ద్వాన॑మావా॒స్యాం᳚-యఁజ॑తే॒ యావ॑దతిరా॒త్రేణో॑పా॒ప్నోతి॒ తావ॒దుపా᳚-ఽఽప్నోతి పరమే॒ష్ఠినో॒ వా ఏ॒ష య॒జ్ఞో-ఽగ్ర॑ ఆసీ॒-త్తేన॒ స ప॑ర॒మా-ఙ్కాష్ఠా॑మగచ్ఛ॒-త్తేన॑ ప్ర॒జాప॑తి-న్ని॒రవా॑సాయయ॒-త్తేన॑ ప్ర॒జాప॑తిః పర॒మా-ఙ్కాష్ఠా॑మగచ్ఛ॒-త్తేనేన్ద్ర॑-న్ని॒రవా॑సాయయ॒-త్తేనేన్ద్రః॑ పర॒మా-ఙ్కాష్ఠా॑మగచ్ఛ॒-త్తేనా॒-ఽగ్నీషోమౌ॑ ని॒రవా॑సాయయ॒-త్తేనా॒గ్నీషోమౌ॑ ప॒రమా-ఙ్కాష్ఠా॑మగచ్ఛతాం॒-యఁ [కాష్ఠా॑మగచ్ఛతాం॒-యః, ఁఏ॒వం-విఁ॒ద్వా-న్ద॑ర్శపూర్ణమా॒సౌ] 30

ఏ॒వం-విఁ॒ద్వా-న్ద॑ర్శపూర్ణమా॒సౌ యజ॑తే పర॒మామే॒వ కాష్ఠా᳚-ఙ్గచ్ఛతి॒ యో వై ప్రజా॑తేన య॒జ్ఞేన॒ యజ॑తే॒ ప్ర ప్ర॒జయా॑ ప॒శుభి॑-ర్మిథు॒నై-ర్జా॑యతే॒ ద్వాద॑శ॒ మాసా᳚-స్సంవఁథ్స॒రో ద్వాద॑శ ద్వ॒న్ద్వాని॑ దర్శపూర్ణమా॒సయో॒స్తాని॑ స॒మ్పాద్యా॒నీత్యా॑హు-ర్వ॒థ్స-ఞ్చో॑పావసృ॒జత్యు॒ఖా-ఞ్చాధి॑ శ్రయ॒త్యవ॑ చ॒ హన్తి॑ దృ॒షదౌ॑ చ స॒మాహ॒న్త్యధి॑ చ॒ వప॑తే క॒పాలా॑ని॒ చోప॑ దధాతి పురో॒డాశ॑-ఞ్చా- [పురో॒డాశ॑-ఞ్చ, అ॒ధి॒శ్రయ॒త్యాజ్య॑-ఞ్చ] 31

-ఽధి॒శ్రయ॒త్యాజ్య॑-ఞ్చ స్తమ్బయ॒జుశ్చ॒ హర॑త్య॒భి చ॑ గృహ్ణాతి॒ వేది॑-ఞ్చ పరి గృ॒హ్ణాతి॒ పత్నీ᳚-ఞ్చ॒ సన్న॑హ్యతి॒ ప్రోక్ష॑ణీశ్చా ఽఽసా॒దయ॒త్యాజ్య॑-ఞ్చై॒తాని॒ వై ద్వాద॑శ ద్వ॒న్ద్వాని॑ దర్శపూర్ణమా॒సయో॒స్తాని॒ య ఏ॒వగ్ం స॒మ్పాద్య॒ యజ॑తే॒ ప్రజా॑తేనై॒వ య॒జ్ఞేన॑ యజతే॒ ప్ర ప్ర॒జయా॑ ప॒శుభి॑-ర్మిథు॒నై-ర్జా॑యతే ॥ 32 ॥

(ఉ॒క్థ్యే॑నోపా॒ప్నోత్య॑-గచ్ఛతాం॒-యః ఁ- పు॑రో॒డాశం॑-చత్వారి॒గ్ం॒శచ్చ॑) (అ. 9)

ధ్రు॒వో॑-ఽసి ధ్రు॒వో॑-ఽహగ్ం స॑జా॒తేషు॑ భూయాస॒మిత్యా॑హ ధ్రు॒వానే॒వైనా᳚న్ కురుత ఉ॒గ్రో᳚-ఽస్యు॒గ్రో॑-ఽహగ్ం స॑జా॒తేషు॑ భూయాస॒-మిత్యా॒హాప్ర॑తివాదిన ఏ॒వైనా᳚న్ కురుతే-ఽభి॒భూర॑స్యభి॒భూర॒హగ్ం స॑జా॒తేషు॑ భూయాస॒మిత్యా॑హ॒ య ఏ॒వైన॑-మ్ప్రత్యు॒త్పిపీ॑తే॒ తముపా᳚స్యతే యు॒నజ్మి॑ త్వా॒ బ్రహ్మ॑ణా॒ దైవ్యే॒నేత్యా॑హై॒ష వాఅ॒గ్నేర్యోగ॒స్తేనై॒ - [వాఅ॒గ్నేర్యోగ॒స్తేన॑, ఏ॒వైనం॑-యుఁనక్తి] 33

వైనం॑-యుఁనక్తి య॒జ్ఞస్య॒ వై సమృ॑ద్ధేన దే॒వా-స్సు॑వ॒ర్గం-లోఁ॒కమా॑యన్. య॒జ్ఞస్య॒ వ్యృ॑ద్ధే॒నాసు॑రా॒-న్పరా॑భావయ॒న్. యన్మే॑ అగ్నే అ॒స్య య॒జ్ఞస్య॒ రిష్యా॒దిత్యా॑హ య॒జ్ఞస్యై॒వ తథ్సమృ॑ద్ధేన॒ యజ॑మాన-స్సువ॒ర్గం-లోఁ॒కమే॑తి య॒జ్ఞస్య॒ వ్యృ॑ద్ధేన॒ భ్రాతృ॑వ్యా॒-న్పరా॑ భావయత్యగ్నిహో॒త్ర-మే॒తాభి॒-ర్వ్యాహృ॑తీభి॒రుప॑ సాదయేద్యజ్ఞము॒ఖం-వాఁ అ॑గ్నిహో॒త్ర-మ్బ్రహ్మై॒తా వ్యాహృ॑తయో యజ్ఞము॒ఖ ఏ॒వ బ్రహ్మ॑ - [బ్రహ్మ॑, కు॒రు॒తే॒ సం॒వఁ॒థ్స॒రే] 34

కురుతే సంవఁథ్స॒రే ప॒ర్యాగ॑త ఏ॒తాభి॑రే॒వోప॑ సాదయే॒-ద్బ్రహ్మ॑ణై॒వోభ॒యతః॑ సంవఁథ్స॒ర-మ్పరి॑ గృహ్ణాతి దర్శపూర్ణమా॒సౌ చా॑తుర్మా॒స్యాన్యా॒లభ॑మాన ఏ॒తాభి॒-ర్వ్యాహృ॑తీభిర్-హ॒వీగ్ష్యాసా॑దయే-ద్యజ్ఞము॒ఖం-వైఁ ద॑ర్శపూర్ణమా॒సౌ చా॑తుర్మా॒స్యాని॒ బ్రహ్మై॒తా వ్యాహృ॑తయో యజ్ఞము॒ఖ ఏ॒వ బ్రహ్మ॑ కురుతే సంవఁథ్స॒రే ప॒ర్యాగ॑త ఏ॒తాభి॑రే॒వాసా॑దయే॒-ద్బ్రహ్మ॑ణై॒వోభ॒యతః॑ సంవఁథ్స॒ర-మ్పరి॑గృహ్ణాతి॒ యద్వై య॒జ్ఞస్య॒ సామ్నా᳚ క్రి॒యతే॑ రా॒ష్ట్రం- [రా॒ష్ట్రమ్, య॒జ్ఞస్యా॒-శీర్గ॑చ్ఛతి॒] 35

-ఁయ॒జ్ఞస్యా॒-శీర్గ॑చ్ఛతి॒ యదృ॒చా విశం॑-యఁ॒జ్ఞస్యా॒- శీర్గ॑చ్ఛ॒త్యథ॑ బ్రాహ్మ॒ణో॑-ఽనా॒శీర్కే॑ణ య॒జ్ఞేన॑ యజతే సామిధే॒నీ-ర॑నువ॒క్ష్యన్నే॒తా వ్యాహృ॑తీః పు॒రస్తా᳚ద్దద్ధ్యా॒-ద్బ్రహ్మై॒వ ప్ర॑తి॒పద॑-ఙ్కురుతే॒ తథా᳚ బ్రాహ్మ॒ణ-స్సాశీ᳚ర్కేణ య॒జ్ఞేన॑ యజతే॒ య-ఙ్కా॒మయే॑త॒ యజ॑మాన॒-మ్భ్రాతృ॑వ్యమస్య య॒జ్ఞస్యా॒శీర్గ॑చ్ఛే॒దితి॒ తస్యై॒తా వ్యాహృ॑తీః పురోనువా॒క్యా॑యా-న్దద్ధ్యా-ద్భ్రాతృవ్యదేవ॒త్యా॑ వై పు॑రోనువా॒క్యా᳚ భ్రాతృ॑వ్యమే॒వాస్య॑ య॒జ్ఞస్యా॒-[య॒జ్ఞస్యా॑, ఆ॒శీర్గ॑చ్ఛతి॒] 36

-ఽఽశీర్గ॑చ్ఛతి॒ యాన్ కా॒మయే॑త॒ యజ॑మానాన్-థ్స॒మావ॑త్యేనాన్ య॒జ్ఞస్యా॒ ఽఽశీర్గ॑చ్ఛే॒దితి॒ తేషా॑మే॒తా వ్యాహృ॑తీః పురోనువా॒క్యా॑యా అర్ధ॒ర్చ ఏకా᳚-న్దద్ధ్యా-ద్యా॒జ్యా॑యై పు॒రస్తా॒దేకాం᳚-యాఁ॒జ్యా॑యా అర్ధ॒ర్చ ఏకా॒-న్తథై॑నాన్-థ్స॒మావ॑తీ య॒జ్ఞస్యా॒ ఽఽశీర్గ॑చ్ఛతి॒ యథా॒ వై ప॒ర్జన్య॒-స్సువృ॑ష్టం॒-వఁర్ష॑త్యే॒వం-యఁ॒జ్ఞో యజ॑మానాయ వర్షతి॒ స్థల॑యోద॒క-మ్ప॑రిగృ॒హ్ణన్త్యా॒శిషా॑ య॒జ్ఞం-యఁజ॑మానః॒ పరి॑ గృహ్ణాతి॒ మనో॑-ఽసి ప్రాజాప॒త్యం- [ప్రాజాప॒త్యమ్, మన॑సా] 37

-మన॑సా మా భూ॒తేనా-ఽఽవి॒శేత్యా॑హ॒ మనో॒ వై ప్రా॑జాప॒త్య-మ్ప్రా॑జాప॒త్యో య॒జ్ఞో మన॑ ఏ॒వ య॒జ్ఞమా॒త్మ-న్ధ॑త్తే॒ వాగ॑స్యై॒న్ద్రీ స॑పత్న॒క్షయ॑ణీ వా॒చా మే᳚న్ద్రి॒యేణా-ఽఽవి॒శేత్యా॑హై॒న్ద్రీ వై వాగ్వాచ॑-మే॒వైన్ద్రీ- మా॒త్మ-న్ధ॑త్తే ॥ 38 ॥

(తేనై॒-వ బ్రహ్మ॑- రా॒ష్ట్రమే॒-వాస్య॑ య॒జ్ఞస్య॑-ప్రాజాప॒త్యగ్ం-షట్త్రిగ్ం॑శచ్చ) (అ. 10)

యో వై స॑ప్తద॒శ-మ్ప్ర॒జాప॑తిం-యఁ॒జ్ఞమ॒న్వాయ॑త్తం॒-వేఁద॒ ప్రతి॑ య॒జ్ఞేన॑ తిష్ఠతి॒ న య॒జ్ఞా-ద్భ్రగ్ం॑శత॒ ఆ శ్రా॑వ॒యేతి॒ చతు॑రక్షర॒మస్తు॒ శ్రౌష॒డితి॒ చతు॑రక్షరం॒-యఁజేతి॒ ద్వ్య॑క్షరం॒-యేఁ యజా॑మహ॒ ఇతి॒ పఞ్చా᳚క్షర-న్ద్వ్యక్ష॒రో వ॑షట్కా॒ర ఏ॒ష వై స॑ప్తద॒శః ప్ర॒జాప॑తి-ర్య॒జ్ఞమ॒న్వాయ॑త్తో॒ య ఏ॒వం-వేఁద॒ ప్రతి॑ య॒జ్ఞేన॑ తిష్ఠతి॒ న య॒జ్ఞాద్- భ్రగ్ం॑శతే॒ యో వై య॒జ్ఞస్య॒ ప్రాయ॑ణ-మ్ప్రతి॒ష్ఠా- [ప్రతి॒ష్ఠామ్, ఉ॒దయ॑నం॒-వేఁద॒] 39

ము॒దయ॑నం॒-వేఁద॒ ప్రతి॑ష్ఠితే॒నారి॑ష్టేన య॒జ్ఞేన॑ స॒గ్గ్॒స్థా-ఙ్గ॑చ్ఛ॒త్యాశ్రా॑వ॒యాస్తు॒ శ్రౌష॒డ్యజ॒ యే యజా॑మహే వషట్కా॒ర ఏ॒తద్వై య॒జ్ఞస్య॒ ప్రాయ॑ణమే॒షా ప్ర॑తి॒ష్ఠైతదు॒దయ॑నం॒-యఁ ఏ॒వం-వేఁద॒ ప్రతి॑ష్ఠితే॒నా-ఽరి॑ష్టేన య॒జ్ఞేన॑ స॒గ్గ్॒స్థా-ఙ్గ॑చ్ఛతి॒ యో వై సూ॒నృతా॑యై॒ దోహం॒-వేఁద॑ దు॒హ ఏ॒వైనాం᳚-యఁ॒జ్ఞో వై సూ॒నృతా ఽఽ శ్రా॑వ॒యేత్యైవైనా॑-మహ్వ॒దస్తు॒ [-మహ్వ॒దస్తు॑, శ్రౌష॒డిత్యు॒పావా᳚స్రా॒-] 40

శ్రౌష॒డిత్యు॒పావా᳚స్రా॒-గ్యజేత్యుద॑నైషీ॒ద్యే యజా॑మహ॒ ఇత్యుపా॑-ఽసద-ద్వషట్కా॒రేణ॑ దోగ్ద్ధ్యే॒ష వై సూ॒నృతా॑యై॒ దోహో॒ య ఏ॒వం-వేఁద॑ దు॒హ ఏ॒వైనా᳚-న్దే॒వా వై స॒త్రమా॑సత॒ తేషా॒-న్దిశో॑-ఽదస్య॒న్త ఏ॒తామా॒ర్ద్రా-మ్ప॒ఙ్క్తిమ॑పశ్య॒న్నా శ్రా॑వ॒యేతి॑ పురోవా॒త-మ॑జనయ॒న్నస్తు॒ శ్రౌష॒డిత్య॒భ్రగ్ం సమ॑ప్లావయ॒న్॒. యజేతి॑ వి॒ద్యుత॑- [వి॒ద్యుత॑మ్, అ॒జ॒న॒య॒న్॒ యే] 41

మజనయ॒న్॒ యే యజా॑మహ॒ ఇతి॒ ప్రావ॑ర్షయన్న॒భ్య॑స్తనయన్ వషట్కా॒రేణ॒ తతో॒ వై తేభ్యో॒ దిశః॒ ప్రాప్యా॑యన్త॒ య ఏ॒వం-వేఁద॒ ప్రాస్మై॒ దిశః॑ ప్యాయన్తే ప్ర॒జాప॑తి-న్త్వో॒వేద॑ ప్ర॒జాప॑తి స్త్వంవేఁద॒ య-మ్ప్ర॒జాప॑తి॒-ర్వేద॒ స పుణ్యో॑ భవత్యే॒ష వై ఛ॑న్ద॒స్యః॑ ప్ర॒జాప॑తి॒రా శ్రా॑వ॒యా-ఽస్తు॒ శ్రౌష॒డ్యజ॒ యే యజా॑మహే వషట్కా॒రో య ఏ॒వం-వేఁద॒ పుణ్యో॑ భవతి వస॒న్త- [వస॒న్తమ్, ఋ॒తూ॒నాం] 42

-మృ॑తూ॒నా-మ్ప్రీ॑ణా॒మీత్యా॑హ॒ర్తవో॒ వై ప్ర॑యా॒జా ఋ॒తూనే॒వ ప్రీ॑ణాతి॒ తే᳚-ఽస్మై ప్రీ॒తా య॑థాపూ॒ర్వ-ఙ్క॑ల్పన్తే॒ కల్ప॑న్తే-ఽస్మా ఋ॒తవో॒ య ఏ॒వం-వేఁదా॒గ్నీషోమ॑యోర॒హ-న్దే॑వయ॒జ్యయా॒ చక్షు॑ష్మా-న్భూయాస॒మిత్యా॑-హా॒గ్నీషోమా᳚భ్యాం॒-వైఁ య॒జ్ఞశ్చక్షు॑ష్మా॒-న్తాభ్యా॑మే॒వ చక్షు॑రా॒త్మ-న్ధ॑త్తే॒ ఽగ్నేర॒హ-న్దే॑వయ॒జ్యయా᳚-ఽన్నా॒దో భూ॑యాస॒మిత్యా॑హా॒గ్నిర్వై దే॒వానా॑-మన్నా॒దస్తే నై॒వా- [మన్నా॒దస్తే నై॒వా, అ॒న్నాద్య॑మా॒త్మన్] 43

-ఽన్నాద్య॑మా॒త్మ-న్ధ॑త్తే॒ దబ్ధి॑ర॒స్యద॑బ్ధో భూయాసమ॒ము-న్ద॑భేయ॒మిత్యా॑హై॒తయా॒ వై దబ్ద్ధ్యా॑ దే॒వా అసు॑రానదభ్నువ॒న్తయై॒వ భ్రాతృ॑వ్య-న్దభ్నోత్య॒గ్నీషోమ॑యోర॒హ-న్దే॑వయ॒జ్యయా॑ వృత్ర॒హా భూ॑యాస॒మిత్యా॑హా॒-ఽగ్నీషోమా᳚భ్యాం॒-వాఁ ఇన్ద్రో॑ వృ॒త్రమ॑హ॒న్తాభ్యా॑మే॒వ భ్రాతృ॑వ్యగ్గ్ స్తృణుత ఇన్ద్రాగ్ని॒యోర॒హ-న్దే॑వయ॒జ్యయే᳚న్ద్రియా॒వ్య॑న్నా॒దో భూ॑యాస॒మిత్యా॑హేన్ద్రియా॒వ్యే॑వాన్నా॒దో భ॑వ॒తీన్ద్ర॑స్యా॒- [భ॑వ॒తీన్ద్ర॑స్య, అ॒హ-న్దే॑వయ॒జ్యయే᳚న్ద్రియా॒వీ] 44

-ఽహ-న్దే॑వయ॒జ్యయే᳚న్ద్రియా॒వీ భూ॑యాస॒మిత్యా॑హేన్ద్రియా॒వ్యే॑వ భ॑వతి మహే॒న్ద్రస్యా॒-ఽహ-న్దే॑వయ॒జ్యయా॑ జే॒మాన॑-మ్మహి॒మాన॑-ఙ్గమేయ॒మిత్యా॑హ జే॒మాన॑మే॒వ మ॑హి॒మాన॑-ఙ్గచ్ఛత్య॒గ్నే-స్స్వి॑ష్ట॒కృతో॒-ఽహ-న్దే॑వయ॒జ్యయా ఽఽయు॑ష్మాన్. య॒జ్ఞేన॑ ప్రతి॒ష్ఠా-ఙ్గ॑మేయ॒మిత్యా॒-హాయు॑రే॒వాత్మ-న్ధ॑త్తే॒ ప్రతి॑ య॒జ్ఞేన॑ -తిష్ఠతి ॥ 45 ॥

( ప్ర॒తి॒ష్ఠా-మ॑హ్వ॒దస్తు॑-వి॒ద్యుతం॑వఁస॒న్తన్-తేనై॒వే-న్ద్ర॑స్యా॒-ఽష్టాత్రిగ్ం॑శచ్చ) (అ. 11)

ఇన్ద్రం॑-వోఁ వి॒శ్వత॒స్పరి॒ హవా॑మహే॒ జనే᳚భ్యః । అ॒స్మాక॑మస్తు॒ కేవ॑లః ॥ ఇన్ద్ర॒-న్నరో॑ నే॒మధి॑తా హవన్తే॒ యత్పార్యా॑ యు॒నజ॑తే॒ ధియ॒స్తాః । శూరో॒ నృషా॑తా॒ శవ॑సశ్చకా॒న ఆ గోమ॑తి వ్ర॒జే భ॑జా॒ త్వన్నః॑ ॥ ఇ॒న్ద్రి॒యాణి॑ శతక్రతో॒ యా తే॒ జనే॑షు ప॒ఞ్చసు॑ ॥ ఇన్ద్ర॒ తాని॑ త॒ ఆ వృ॑ణే ॥ అను॑ తే దాయి మ॒హ ఇ॑న్ద్రి॒యాయ॑ స॒త్రా తే॒ విశ్వ॒మను॑ వృత్ర॒హత్యే᳚ । అను॑ [ ] 46

క్ష॒త్రమను॒ సహో॑ యజ॒త్రేన్ద్ర॑ దే॒వేభి॒రను॑ తే నృ॒షహ్యే᳚ ॥ ఆయస్మి᳚న్-థ్స॒ప్తవా॑స॒వా స్తిష్ఠ॑న్తి స్వా॒రుహో॑ యథా । ఋషి॑ర్హ దీర్ఘ॒శ్రుత్త॑మ॒ ఇన్ద్ర॑స్య ఘ॒ర్మో అతి॑థిః ॥ ఆ॒మాసు॑ ప॒క్వమైర॑య॒ ఆ సూర్యగ్ం॑ రోహయో ది॒వి । ఘ॒ర్మ-న్న సామ॑-న్తపతా సువృ॒క్తిభి॒-ర్జుష్ట॒-ఙ్గిర్వ॑ణసే॒ గిరః॑ ॥ ఇన్ద్ర॒మి-ద్గా॒థినో॑ బృ॒హదిన్ద్ర॑-మ॒ర్కేభి॑-ర॒ర్కిణః॑ । ఇన్ద్రం॒-వాఁణీ॑రనూషత ॥ గాయ॑న్తి త్వా గాయ॒త్రిణో- [గాయ॒త్రిణః॑, అర్చ॑న్త్య॒ర్క-మ॒ర్కిణః॑ ।] 47

-ఽర్చ॑న్త్య॒ర్క-మ॒ర్కిణః॑ । బ్ర॒హ్మాణ॑స్త్వా శతక్రత॒వు-ద్వ॒గ్ం॒శ-మి॑వ యేమిరే ॥ అ॒గ్ం॒హో॒ముచే॒ ప్ర భ॑రేమా మనీ॒షామో॑షిష్ఠ॒దావంనే॑ సుమ॒తి-ఙ్గృ॑ణా॒నాః । ఇ॒దమి॑న్ద్ర॒ ప్రతి॑ హ॒వ్య-ఙ్గృ॑భాయ స॒త్యా-స్స॑న్తు॒ యజ॑మానస్య॒ కామాః᳚ ॥ వి॒వేష॒ యన్మా॑ ధి॒షణా॑ జ॒జాన॒ స్తవై॑ పు॒రా పార్యా॒దిన్ద్ర॒-మహ్నః॑ । అగ్ంహ॑సో॒ యత్ర॑ పీ॒పర॒ద్యథా॑ నో నా॒వేవ॒ యాన్త॑ ము॒భయే॑ హవన్తే ॥ ప్ర స॒మ్రాజ॑-మ్ప్రథ॒మ-మ॑ద్ధ్వ॒రాణా॑- [మ॑ద్ధ్వ॒రాణా᳚మ్, అ॒గ్ం॒హో॒ముచం॑] 48

-మగ్ంహో॒ముచం॑-వృఁష॒భం-యఁ॒జ్ఞియా॑నామ్ । అ॒పా-న్నపా॑తమశ్వినా॒ హయ॑న్త-మ॒స్మిన్న॑ర ఇన్ద్రి॒య-న్ధ॑త్త॒మోజః॑ ॥ వి న॑ ఇన్ద్ర॒ మృధో॑ జహి నీ॒చా య॑చ్ఛ పృతన్య॒తః । అ॒ధ॒స్ప॒ద-న్తమీ᳚-ఙ్కృధి॒ యో అ॒స్మాగ్ం అ॑భి॒దాస॑తి ॥ ఇన్ద్ర॑ క్ష॒త్రమ॒భి వా॒మమోజో ఽజా॑యథా వృషభ చర్షణీ॒నామ్ । అపా॑నుదో॒ జన॑-మమిత్ర॒యన్త॑-ము॒రు-న్దే॒వేభ్యో॑ అకృణో-రు లో॒కమ్ ॥ మృ॒గో న భీ॒మః కు॑చ॒రో గి॑రి॒ష్ఠాః ప॑రా॒వత [ప॑రా॒వతః॑, ఆ జ॑గామా॒ పర॑స్యాః ।] 49

ఆ జ॑గామా॒ పర॑స్యాః । సృ॒కగ్ం స॒గ్ం॒శాయ॑ ప॒విమి॑న్ద్ర తి॒గ్మం-విఁ శత్రూ᳚-న్తాఢి॒ విమృధో॑ నుదస్వ ॥ వి శత్రూ॒న్॒. వి మృధో॑ నుద॒ వివృ॒త్రస్య॒ హనూ॑ రుజ । వి మ॒న్యుమి॑న్ద్ర భామి॒తో॑-ఽమిత్ర॑స్యా-ఽభి॒దాస॑తః ॥ త్రా॒తార॒-మిన్ద్ర॑-మవి॒తార॒-మిన్ద్ర॒గ్ం॒ హవే॑హవే సు॒హవ॒గ్ం॒ శూర॒మిన్ద్ర᳚మ్ । హు॒వే ను శ॒క్ర-మ్పు॑రుహూ॒తమిన్ద్రగ్గ్॑ స్వ॒స్తి నో॑ మ॒ఘవా॑ ధా॒త్విన్ద్రః॑ ॥ మా తే॑ అ॒స్యాగ్ం [అ॒స్యాగ్ం, స॒హ॒సా॒వ॒-న్పరి॑ష్టావ॒ఘాయ॑] 50

స॑హసావ॒-న్పరి॑ష్టావ॒ఘాయ॑ భూమ హరివః పరా॒దై । త్రాయ॑స్వ నో ఽవృ॒కేభి॒-ర్వరూ॑థై॒-స్తవ॑ ప్రి॒యాసః॑ సూ॒రిషు॑ స్యామ ॥ అన॑వస్తే॒ రథ॒మశ్వా॑య తక్ష॒-న్త్వష్టా॒ వజ్ర॑-మ్పురుహూత ద్యు॒మన్త᳚మ్ । బ్ర॒హ్మాణ॒ ఇన్ద్ర॑-మ్మ॒హయ॑న్తో అ॒ర్కైరవ॑ర్ధయ॒న్నహ॑యే॒ హన్త॒వా ఉ॑ ॥ వృష్ణే॒ య-త్తే॒ వృష॑ణో అ॒ర్కమర్చా॒నిన్ద్ర॒ గ్రావా॑ణో॒ అది॑తి-స్స॒జోషాః᳚ । అ॒న॒శ్వాసో॒ యే ప॒వయో॑-ఽర॒థా ఇన్ద్రే॑షితా అ॒భ్యవ॑ర్త న్త॒ దస్యూన్॑ ॥ 51 ॥

(వృ॒త్ర॒హత్యే-ఽను॑-గాయ॒త్రిణో᳚-ఽద్ధ॒రాణాం᳚-పరా॒వతో॒-ఽస్యా-మ॒ష్టాచ॑త్వారిగ్ంశచ్చ) (అ. 12)

(సన్త్వా॑ సిఞ్చామి-ధ్రు॒వో᳚-ఽస్య॒గ్నిర్మా॑-బ॒ర్॒హిషో॒-ఽహ-మా ప్యా॑యతా॒-మగ॑న్మ॒-యథా॒ వై-యో వై శ్ర॒ద్ధాం- ప్ర॒జాప॑తి॒-ర్యజ్ఞాన్-ధ్రు॒వో॑-ఽసీత్యా॑హ॒-యో వై స॑ప్తద॒శ-మిన్ద్రం॑-వోఁ॒-ద్వాద॑శ । )

(సన్త్వా॑-బ॒ర్॒హిషో॒-ఽహంయఁథా॒ వా-ఏ॒వం-విఁ॒ద్వా-ఞ్ఛ్రౌష॑ట్-థ్సాహసావ॒-న్నేక॑పఞ్చా॒శత్ ।)

(సన్త్వా॑, సిఞ్చామి॒ దస్యూన్॑)

॥ హరిః॑ ఓమ్ ॥

॥ కృష్ణ యజుర్వేదీయ తైత్తిరీయ సంహితాయా-మ్ప్రథమకాణ్డే షష్ఠః ప్రశ్న-స్సమాప్తః ॥

Roman (IAST) Transliteration

kṛṣṇa yajurvedīya taittirīya saṃhitāyā-mprathamakāṇḍe ṣaṣṭhaḥ praśnaḥ - yājamānakāṇḍaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

sa-ntvā̭ siñcāmi॒ yajṷṣā pra॒jāmāyu॒rdhana̭-ñca | bṛha॒spati̭prasūto॒ yaja̭māna i॒ha mā ri̭ṣat || ājya̭masi sa॒tyama̭si sa॒tyasyāddhya̭kṣamasi ha॒vira̭si vaiśvāna॒raṃ-vai~᳚śvade॒va-mutpṷ̄taśuṣmagṃ sa॒tyaujā॒-ssaho̭-'si॒ saha̭mānamasi॒ saha॒svārā̭tī॒-ssaha̭svārātīya॒ta-ssaha̭sva॒ pṛta̭nā॒-ssaha̭sva pṛtanya॒taḥ | sa॒hasra̭vīryamasi॒ tanmā̭ ji॒nvājya॒syājya̭masi sa॒tyasya̭ sa॒tyama̭si sa॒tyāyṷ- [sa॒tyāyuḥ̭, a॒si॒ sa॒tyaśṷṣmamasi] 1

-rasi sa॒tyaśṷṣmamasi sa॒tyena̭ tvā॒-'bhi ghā̭rayāmi॒ tasya̭ te bhakṣīya pañcā॒nā-ntvā॒ vātā̭nāṃ-ya~॒ntrāya̭ dha॒rtrāya̭ gṛhṇāmi pañcā॒nā-ntva̭rtū॒nāṃ-ya~॒ntrāya̭ dha॒rtrāya̭ gṛhṇāmi pañcā॒nā-ntvā̭ di॒śāṃ-ya~॒ntrāya̭ dha॒rtrāya̭ gṛhṇāmi pañcā॒nā-ntvā̭ pañcaja॒nānāṃ᳚-ya~॒ntrāya̭ dha॒rtrāya̭ gṛhṇāmi ca॒rostvā॒ pañca̭bilasya ya॒ntrāya̭ dha॒rtrāya̭ gṛhṇāmi॒ brahma̭ṇastvā॒ teja̭se ya॒ntrāya̭ dha॒rtrāya̭ gṛhṇāmi kṣa॒trasya॒ tvauja̭se ya॒ntrāya̭ [ ] 2

dha॒rtrāya̭ gṛhṇāmi vi॒śe tvā̭ ya॒ntrāya̭ dha॒rtrāya̭ gṛhṇāmi su॒vīryā̭ya tvā gṛhṇāmi suprajā॒stvāya̭ tvā gṛhṇāmi rā॒yaspoṣā̭ya tvā gṛhṇāmi brahmavarca॒sāya̭ tvā gṛhṇāmi॒ bhūra॒smākagṃ̭ ha॒virde॒vānā̭-mā॒śiṣo॒ yaja̭mānasya de॒vānā᳚-ntvā de॒vatā᳚bhyo gṛhṇāmi॒ kāmā̭ya tvā gṛhṇāmi || 3 ||

(sa॒tyāyu॒-roja̭se ya॒ntrāya॒-traya̭strigṃśacca) (a. 1)

dhru॒vo̭-'si dhru॒vo̭-'hagṃ sa̭jā॒teṣṷ bhūyāsa॒-ndhīra॒ścettā̭ vasu॒vidu॒gro᳚-'syu॒gro̭-'hagṃ sa̭jā॒teṣṷ bhūyāsa-mu॒graścettā̭ vasu॒vida̭bhi॒-bhūra̭syabhi॒bhūra॒hagṃ sa̭jā॒teṣṷ bhūyāsamabhi॒bhūścettā̭ vasu॒vi-dyu॒najmi̭ tvā॒ brahma̭ṇā॒ daivyḙna ha॒vyāyā॒smai voḍha॒ve jā̭tavedaḥ || indhā̭nāstvā supra॒jasaḥ̭ su॒vīrā॒ jyogjī̭vema bali॒hṛto̭ va॒ya-nte᳚ || yanmḙ agne a॒sya ya॒jñasya॒ riṣyā॒- [riṣyā᳚t, dyadvā॒] 4

-dyadvā॒ skandā॒-dājya̭syo॒ta vi̭ṣṇo | tena̭ hanmi sa॒patna̭-ndurmarā॒yumaina̭-ndadhāmi॒ nir-ṛ̭tyā u॒pasthe᳚ | bhū-rbhuva॒-ssuva॒rucchṷṣmo agne॒ yaja̭mānāyaidhi॒ niśṷṣmo abhi॒dāsa̭te | agne॒ deve᳚ddha॒ manvi̭ddha॒ mandra̭ji॒hvā-ma̭rtyasya te hotarmū॒rdhannā ji̭gharmi rā॒yaspoṣā̭ya suprajā॒stvāya̭ su॒vīryā̭ya॒ mano̭-'si prājāpa॒tya-mmana̭sā mā bhū॒tenā vi̭śa॒ vāga̭syai॒ndrī sa̭patna॒kṣaya̭ṇī [ ] 5

vā॒cā me᳚ndri॒yeṇā vi̭śa vasa॒ntamṛ̭tū॒nā-mprī̭ṇāmi॒ sa mā᳚ prī॒taḥ prī̭ṇātu grī॒ṣmamṛ̭tū॒nā-mprī̭ṇāmi॒ sa mā᳚ prī॒taḥ prī̭ṇātu va॒r॒ṣā ṛ̭tū॒nā-mprī̭ṇāmi॒ tā mā᳚ prī॒tāḥ prī̭ṇantu śa॒rada̭mṛtū॒nā-mprī̭ṇāmi॒ sā mā᳚ prī॒tā prī̭ṇātu hemantaśiśi॒rāvṛ̭tū॒nā-mprī̭ṇāmi॒ tau mā᳚ prī॒tau prī̭ṇītā-ma॒gnīṣoma̭yo-ra॒ha-ndḙvaya॒jyayā॒ cakṣṷṣmā-nbhūyāsama॒gnera॒ha-ndḙvaya॒jyayā᳚-'nnā॒do bhṷ̄yāsa॒- [bhṷ̄yāsam, dabdhi̭ra॒syada̭bdho] 6

-ndabdhi̭ra॒syada̭bdho bhūyāsama॒mu-nda̭bheya-ma॒gnīṣoma̭yo-ra॒ha-ndḙvaya॒jyayā̭ vṛtra॒hā bhṷ̄yāsamindrāgni॒yora॒ha-ndḙvaya॒jyaye᳚ndriyā॒vya̭nnā॒do bhṷ̄yāsa॒mindra̭syā॒-'ha-ndḙvaya॒jyaye᳚ndriyā॒vī bhṷ̄yāsa-mmahe॒ndrasyā॒-'ha-ndḙvaya॒jyayā̭ je॒māna̭-mmahi॒māna̭-ṅgameyama॒gne-ssvi̭ṣṭa॒kṛto॒-'ha-ndḙvaya॒jyayā ''yṷṣmān. ya॒jñena̭ prati॒ṣṭhā-ṅga̭meyam || 7 ||

(riṣyā᳚-thsapatna॒kṣaya̭ṇya-nnā॒do bhṷ̄yāsa॒gṃ॒-ṣaṭtrigṃ̭śacca) (a. 2)

a॒gnirmā॒ duri̭ṣṭā-tpātu savi॒tā-'ghaśagṃ̭sā॒dyo me-'nti̭ dū॒rḙ-'rātī॒yati॒ tame॒tena̭ jeṣa॒gṃ॒ surṷ̄pavarṣavarṇa॒ ehī॒mā-nbha॒drā-nduryāgṃ̭ a॒bhyehi॒ māmanṷvratā॒ nyṷ śī॒r॒ṣāṇi̭ mṛḍhva॒miḍa॒ ehyadi̭ta॒ ehi॒ sara̭sva॒tyehi॒ ranti̭rasi॒ rama̭tirasi sū॒narya̭si॒ juṣṭe॒ juṣṭi̭-nte-'śī॒yopa̭hūta upaha॒va- [upaha॒vam, te॒-'śī॒ya॒ sā ] 8

-ntḙ-'śīya॒ sā mḙ sa॒tyā-''śīra॒sya ya॒jñasya̭ bhūyā॒darḙḍatā॒ mana̭sā॒ taccha̭keyaṃ-ya~॒jño divagṃ̭ rohatu ya॒jño diva̭-ṅgacchatu॒ yo dḙva॒yānaḥ॒ panthā॒stena̭ ya॒jño de॒vāgṃ apye᳚tva॒smāsvindra̭ indri॒ya-nda̭dhātva॒smānrāya̭ u॒ta ya॒jñā-ssa̭cantāma॒smāsṷ santvā॒śiṣa॒-ssā naḥ̭ pri॒yā su॒pratū᳚rtirma॒ghonī॒ juṣṭi̭rasi ju॒ṣasva̭ no॒ juṣṭā̭ no- [juṣṭā̭ naḥ, a॒si॒ juṣṭi̭-nte] 9

-'si॒ juṣṭi̭-nte gameya॒-mmano॒ jyoti̭-rjuṣatā॒mājyaṃ॒-vi~cchi̭nnaṃ-ya~॒jñagṃ sami॒ma-nda̭dhātu | bṛha॒spati̭-stanutāmi॒manno॒ viśvḙ de॒vā i॒ha mā̭dayantām || braddhna॒ pinva̭sva॒ dada̭to me॒ mā kṣā̭yi kurva॒to me॒ mopa̭ dasa-tpra॒jāpa̭te-rbhā॒go᳚-'syūrja̭svā॒-npaya̭svā-nprāṇāpā॒nau mḙ pāhi samānavyā॒nau mḙ pāhyudānavyā॒nau mḙ pā॒hyakṣi̭to॒-'syakṣi̭tyai tvā॒ mā me᳚ kṣeṣṭhā a॒mutrā॒muṣmi̭n ~lo॒ke || 10 ||

(u॒pa॒ha॒vaṃ-juṣṭā̭na-stvā॒ ṣaṭ ca̭) (a. 3)

ba॒r॒hiṣo॒-'ha-ndḙvaya॒jyayā᳚ pra॒jāvā᳚-nbhūyāsa॒-nnarā॒śagṃsa̭syā॒ha-ndḙvaya॒jyayā̭ paśu॒mā-nbhṷ̄yāsama॒gne-ssvi̭ṣṭa॒kṛto॒-'ha-ndḙvaya॒jyayā-''yṷṣmān. ya॒jñena̭ prati॒ṣṭhā-ṅga̭meyama॒gnera॒ha-mujji̭ti॒-manūjjḙṣa॒gṃ॒ soma̭syā॒ha - mujji̭ti॒-manūjjḙṣama॒gnera॒ha-mujji̭ti॒-manūjjḙṣa-ma॒gnīṣoma̭yora॒ha-mujji̭ti॒-manūjjḙṣa-mindrāgni॒yora॒ha-mujji̭ti॒-manūjjḙṣa॒-mindra̭syā॒-'ha- [-mindra̭syā॒-'ham, ujji̭ti॒manūjjḙṣaṃ] 11

-mujji̭ti॒manūjjḙṣa-mmahe॒ndrasyā॒hamujji̭ti॒- manūjjḙṣama॒gne-ssvi̭ṣṭa॒kṛto॒-'ha mujji̭ti॒-manūjjḙṣaṃ॒-vā~ja̭sya mā prasa॒veno᳚-dgrā॒bheṇoda̭grabhīt | athā̭ sa॒patnā॒gṃ॒ indro̭ me nigrā॒bheṇādha̭rāgṃ akaḥ || u॒dgrā॒bha-ñca̭ nigrā॒bha-ñca॒ brahma̭ de॒vā a̭vīvṛdhann | athā̭ sa॒patnā̭nindrā॒gnī mḙ viṣū॒cīnā॒n vya̭syatām || emā a̭gmannā॒śiṣo॒ doha̭kāmā॒ indra̭vanto [indra̭vantaḥ, va॒nā॒ma॒he॒ dhu॒kṣī॒mahi̭] 12

vanāmahe dhukṣī॒mahi̭ pra॒jāmiṣa᳚m || rohi̭tena tvā॒-'gni-rde॒vatā᳚-ṅgamayatu॒ hari̭bhyā॒-ntvendro̭ de॒vatā᳚-ṅgamaya॒tveta̭śena tvā॒ sūryo̭ de॒vatā᳚-ṅgamayatu॒ vi tḙ muñcāmi raśa॒nā vi ra॒śmīn vi yoktrā॒ yāni̭ pari॒carta̭nāni dha॒ttāda॒smāsu॒ dravi̭ṇaṃ॒-ya~cca̭ bha॒dra-mpra ṇo᳚ brūtā-dbhāga॒dhā-nde॒vatā̭su || viṣṇo᳚-śśaṃ॒yo~ra॒ha-ndḙvaya॒jyayā̭ ya॒jñena̭ prati॒ṣṭhā-ṅga̭meya॒gṃ॒ soma̭syā॒ha-ndḙvaya॒jyayā̭ [dḙvaya॒jyayā᳚, su॒retā॒] 13

su॒retā॒ reto̭ dhiṣīya॒ tvaṣṭṷra॒ha-ndḙvaya॒jyayā̭ paśū॒nāgṃ rū॒pa-mpṷṣeya-nde॒vānā॒-mpatnī̭ra॒gni-rgṛ॒hapa̭ti-rya॒jñasya̭ mithu॒na-ntayo̭ra॒ha-ndḙvaya॒jyayā̭ mithu॒nena॒ prabhṷ̄yāsaṃ-ve~॒do̭-'si॒ vitti̭rasi vi॒deya॒ karmā̭-'si ka॒ruṇa̭masi kri॒yāsagṃ̭ sa॒nira̭si sani॒tā-'si̭ sa॒neya̭-ṅghṛ॒tava̭nta-ṅkulā॒yinagṃ̭ rā॒yaspoṣagṃ̭ saha॒sriṇaṃ̭-ve~॒do da̭dātu vā॒jina᳚m || 14 ||

(indra̭syā॒ha-mindra̭vantaḥ॒-soma̭syā॒ha-ndḙvaya॒jyayā॒-catṷścatvārigṃśacca) (a. 4)

ā pyā̭yatā-ndhru॒vā ghṛ॒tena̭ ya॒jñaṃya~̭jña॒-mprati̭ deva॒yadbhyaḥ̭ | sū॒ryāyā॒ ūdho-'di̭tyā u॒pastha̭ u॒rudhā̭rā pṛthi॒vī ya॒jñe a॒sminn || pra॒jāpa̭te-rvi॒bhānnāma̭ lo॒kastasmigg̭stvā dadhāmi sa॒ha yaja̭mānena॒ sada̭si॒ sanmḙ bhūyā॒-ssarva̭masi॒ sarva̭-mme bhūyāḥ pū॒rṇama̭si pū॒rṇa-mmḙ bhūyā॒ akṣi̭tamasi॒ mā me᳚ kṣeṣṭhāḥ॒ prācyā᳚-ndi॒śi de॒vā ṛ॒tvijo̭ mārjayantā॒-ndakṣi̭ṇāyā- [dakṣi̭ṇāyām, di॒śi] 15

ndi॒śi māsāḥ᳚ pi॒taro̭ mārjayantā-mpra॒tīcyā᳚-ndi॒śi gṛ॒hāḥ pa॒śavo̭ mārjayantā॒mudī᳚cyā-ndi॒śyāpa॒ oṣa̭dhayo॒ vana॒spata̭yo mārjayantāmū॒rdhvāyā᳚-ndi॒śi ya॒jña-ssaṃ̭va~thsa॒ro ya॒jñapa̭ti-rmārjayantāṃ॒-vi~ṣṇoḥ॒ kramo᳚-'syabhimāti॒hā gā̭ya॒treṇa॒ chanda̭sā pṛthi॒vīmanu॒ vi kra̭me॒ nirbha̭kta॒-ssa ya-ndvi॒ṣmo viṣṇoḥ॒ kramo᳚-'syabhiśasti॒hā traiṣṭṷbhena॒ chanda̭sā॒ 'ntari̭kṣa॒manu॒ vi kra̭me॒ nirbha̭kta॒-ssa ya-ndvi॒ṣmo viṣṇoḥ॒ kramo᳚-'syarātīya॒to ha॒ntā jāga̭tena॒ chanda̭sā॒ diva॒manu॒ vi kra̭me॒ nirbha̭kta॒-ssa ya-ndvi॒ṣmo viṣṇoḥ॒ kramo̭-'si śatrūya॒to ha॒ntā-''nṷṣṭubhena॒ chanda̭sā॒ diśo-'nu॒ vi kra̭me॒ nirbha̭kta॒-ssa ya-ndvi॒ṣmaḥ || 16 ||

(dakṣi̭ṇāyā - ma॒ntari̭kṣa॒manu॒ vi kra̭me॒ nirbha̭kta॒-ssa ya-ndvi॒ṣmo viṣṇo॒- rekā॒nnatri॒gṃ॒śacca̭) (a. 5)

aga̭nma॒ suva॒-ssuva̭raganma sa॒ndṛśa̭ste॒ mā chi̭thsi॒ yatte॒ tapa॒stasmai̭ te॒ mā-'' vṛ̭kṣi su॒bhūra̭si॒ śreṣṭho̭ raśmī॒nāmā̭yu॒rdhā a॒syāyṷrme dhehi varco॒dhā a̭si॒ varco॒ mayi̭ dhehī॒dama॒hama॒mu-mbhrātṛ̭vyamā॒bhyo di॒gbhyo᳚-'syai di॒vo᳚-'smāda॒ntari̭kṣāda॒syai pṛ̭thi॒vyā a॒smāda॒nnādyā॒nnirbha̭jāmi॒ nirbha̭kta॒-ssa ya-ndvi॒ṣmaḥ || 17 ||

sa-ñjyoti̭ṣā-'bhūvamai॒ndrī-mā॒vṛta̭-ma॒nvāva̭rte॒ sama॒ha-mpra॒jayā॒ sa-mmayā᳚ pra॒jā sama॒hagṃ rā॒yaspoṣḙṇa॒ sa-mmayā̭ rā॒yaspoṣa॒-ssami̭ddho agne me dīdihi same॒ddhā tḙ agne dīdyāsaṃ॒-va~sṷmān. ya॒jño vasī̭yā-nbhūyāsa॒magna॒ āyūgṃ̭ṣi pavasa॒ ā su॒vorja॒miṣa̭-ñca naḥ | ā॒re bā̭dhasva du॒cchunā᳚m || agne॒ pava̭sva॒ svapā̭ a॒sme varcaḥ̭ su॒vīrya᳚m || 18 ||

dadha॒tpoṣagṃ̭ ra॒yi-mmayi̭ | agnḙ gṛhapate sugṛhapa॒tira॒ha-ntvayā̭ gṛ॒hapa̭tinā bhūyāsagṃ sugṛhapa॒tirmayā॒ tva-ṅgṛ॒hapa̭tinā bhūyā-śśa॒tagṃ himā॒stāmā॒śiṣa॒mā śā̭se॒ tanta̭ve॒ jyoti̭ṣmatī॒-ntāmā॒śiṣa॒mā śā̭se॒-'muṣmai॒ jyoti̭ṣmatī॒-ṅkastvā̭ yunakti॒ sa tvā॒ vimṷñca॒tvagne᳚ vratapate vra॒tama̭cāriṣa॒-ntada̭śaka॒-ntanmḙ-'rādhi ya॒jño ba̭bhūva॒ sa ā [sa ā, ba॒bhū॒va॒ sa] 19

ba̭bhūva॒ sa praja̭jñe॒ sa vā̭vṛdhe | sa de॒vānā॒madhi̭pati-rbabhūva॒ so a॒smāgṃ adhi̭patīn karotu va॒yagg syā̭ma॒ pata̭yo rayī॒ṇām || gomāgṃ̭ a॒gne-'vi̭māgṃ a॒śvī ya॒jño nṛ॒vathsa̭khā॒ sada॒mida̭pramṛ॒ṣyaḥ |iḍā̭vāgṃ e॒ṣo a̭sura pra॒jāvā᳚-ndī॒rgho ra॒yiḥ pṛ̭thubu॒ddhna-ssa॒bhāvāṋ || 20 ||

(dvi॒ṣmaḥ-su॒vīrya॒gṃ॒-sa ā-pañca̭trigṃśacca) (a. 6)

yathā॒ vai sa̭mṛtaso॒mā e॒vaṃ-vā~ e॒te sa̭mṛtaya॒jñā yadda̭rśapūrṇamā॒sau kasya॒ vā-'ha̭ de॒vā ya॒jñamā॒gaccha̭nti॒ kasya̭ vā॒ na ba̭hū॒nāṃ-ya~ja̭mānānāṃ॒-yo~ vai de॒vatāḥ॒ pūrvaḥ̭ parigṛ॒hṇāti॒ sa ḙnā॒-śśvo bhū॒te ya̭jata e॒tadvai de॒vānā̭-mā॒yata̭naṃ॒-ya~dā̭hava॒nīyo᳚-'nta॒rā-'gnī pa̭śū॒nā-ṅgārha̭patyo manu॒ṣyā̭ṇā-manvāhārya॒paca̭naḥ pitṛ॒ṇāma॒gni-ṅgṛ̭hṇāti॒ sva e॒vāyata̭ne de॒vatāḥ॒ pari̭ [de॒vatāḥ॒ pari̭, gṛ॒hṇā॒ti॒ tā-śśvo] 21

gṛhṇāti॒ tā-śśvo bhū॒te ya̭jate vra॒tena॒ vai meddhyo॒ -'gni-rvra॒tapa̭ti-rbrāhma॒ṇo vra̭ta॒bhṛ-dvra॒ta-mṷpai॒ṣya-nbrṷ̄yā॒dagne᳚ vratapate vra॒ta-ñca̭riṣyā॒mītya॒gni-rvai de॒vānāṃ᳚-vra~॒tapa̭ti॒stasmā̭ e॒va pra̭ti॒procya̭ vra॒tamā la̭bhate ba॒r॒hiṣā̭ pū॒rṇamā̭se vra॒tamupai̭ti va॒thsaira̭māvā॒syā̭yāme॒taddhyḙtayo̭-rā॒yata̭namupa॒stīryaḥ॒ pūrva̭ścā॒gnirapa̭ra॒ścetyā̭hu-rmanu॒ṣyā̭ [-rmanu॒ṣyāḥ᳚, innvā] 22

innvā upa̭stīrṇa-mi॒cchanti॒ kimṷ de॒vā yeṣā॒-nnavā̭vasāna॒-mupā᳚smi॒ñchvo ya॒kṣyamā̭ṇe de॒vatā̭ vasanti॒ ya e॒vaṃ-vi~॒dvāna॒gni-mṷpastṛ॒ṇāti॒ yaja̭mānena grā॒myāśca̭ pa॒śavo̭-'va॒ruddhyā̭ āra॒ṇyāścetyā̭hu॒-rya-dgrā॒myānṷpa॒vasa̭ti॒ tena̭ grā॒myānava̭ rundhe॒ yadā̭ra॒ṇyasyā॒-'śñāti॒ tenā̭ra॒ṇyān. yadanā᳚śvā-nupa॒vase᳚-tpitṛdeva॒tyaḥ̭ syādāra॒ṇyasyā᳚-śñātīndri॒yaṃ- [śñātīndri॒yam, vā ā̭ra॒ṇyaṃ-] 23

-~vā ā̭ra॒ṇya-mi̭ndri॒ya-me॒vā-''tma-ndha̭tte॒ yadanā᳚śvā-nupa॒vase॒-tkṣodhṷka-ssyā॒dya-da̭śñī॒yādru॒-dro᳚-'sya pa॒śūna॒bhi ma̭nyetā॒-'po᳚-'śñāti॒ tannevā̭śi॒ta-nnevā-'na̭śita॒-nna kṣodhṷko॒ bhava̭ti॒ nāsya̭ ru॒draḥ pa॒śūna॒bhi ma̭nyate॒ vajro॒ vai ya॒jñaḥ, kṣu-tkhalu॒ vai ma̭nu॒ṣya̭sya॒ bhrātṛ̭vyo॒ yadanā᳚-'śvānupa॒vasa̭ti॒ vajrḙṇai॒va sā॒kṣā-tkṣudha॒-mbhrātṛ̭vyagṃ hanti || 24 ||

(pari̭-manu॒ṣyā̭-indri॒yagṃ-sā॒kṣāt-trīṇi̭ ca) (a. 7)

yo vai śra॒ddhāmanā̭rabhya ya॒jñena॒ yaja̭te॒ nāsye॒ṣṭāya॒ śradda̭dhate॒-'paḥ pra ṇa̭yati śra॒ddhā vā āpaḥ̭ śra॒ddhāme॒vā-''rabhya̭ ya॒jñena̭ yajata u॒bhaye᳚-'sya devamanu॒ṣyā i॒ṣṭāya॒ śradda̭dhate॒ tadā̭hu॒rati॒ vā e॒tā vartra̭-nneda॒ntyati॒ vāca॒-mmano॒ vāvaitā nāti̭ neda॒ntīti॒ mana̭sā॒ pra ṇa̭yatī॒yaṃ-vai~ mano॒- [manaḥ̭, a॒nayai॒vaināḥ॒] 25

-'nayai॒vaināḥ॒ pra ṇa̭ya॒tya-ska̭nnahavi-rbhavati॒ ya e॒vaṃ-ve~da̭ yajñāyu॒dhāni॒ sa-mbha̭rati ya॒jño vai ya̭jñāyu॒dhāni̭ ya॒jñame॒va tathsa-mbha̭rati॒ yadeka̭mekagṃ sa॒mbhare᳚t-pitṛdeva॒tyā̭ni syu॒rya-thsa॒ha sarvā̭ṇi mānu॒ṣāṇi॒ dvedve॒ sambha̭rati yājyānuvā॒kya̭yore॒va rū॒pa-ṅka̭ro॒tyatho̭ mithu॒name॒vayo vai daśa̭ yajñāyu॒dhāni॒ veda̭ mukha॒to᳚-'sya ya॒jñaḥ ka̭lpate॒ sphya- [ka̭lpate॒ sphyaḥ, ca॒ ka॒pālā̭ni] 26

-śca̭ ka॒pālā̭ni cāgnihotra॒hava̭ṇī ca॒ śūrpa̭-ñca kṛṣṇāji॒na-ñca॒ śamyā̭ co॒lūkha̭la-ñca॒ musa̭la-ñca dṛ॒ṣaccopa̭lā cai॒tāni॒ vai daśa̭ yajñāyu॒dhāni॒ ya e॒vaṃ-ve~da̭ mukha॒to᳚-'sya ya॒jñaḥ ka̭lpate॒ yo vai de॒vebhyaḥ̭ prati॒procya̭ ya॒jñena॒ yaja̭te ju॒ṣante᳚-'sya de॒vā ha॒vyagṃ ha॒vi-rni̭ru॒pyamā̭ṇama॒bhi ma̭ntrayetā॒-'gnigṃ hotā̭rami॒ha tagṃ hṷva॒ iti̭ [ ] 27

de॒vebhya̭ e॒va pra̭ti॒procya̭ ya॒jñena̭ yajate ju॒ṣante᳚-'sya de॒vā ha॒vyame॒ṣa vai ya॒jñasya॒ graho̭ gṛhī॒tvaiva ya॒jñena̭ yajate॒ tadṷdi॒tvā vācaṃ̭-ya~cchati ya॒jñasya॒ dhṛtyā॒ atho॒ mana̭sā॒ vai pra॒jāpa̭ti-rya॒jñama̭tanuta॒ mana̭sai॒va ta-dya॒jña-nta̭nute॒ rakṣa̭sā॒-mana̭nvavacārāya॒ yo vai ya॒jñaṃ-yo~ga॒ āga̭te yu॒nakti̭ yu॒ṅkte yṷñjā॒neṣu॒ kastvā̭ yunakti॒ sa tvā̭ yuna॒ktvi-( ) -tyā̭ha pra॒jāpa̭ti॒-rvai kaḥ pra॒jāpa̭tinai॒vainaṃ̭-yu~nakti yu॒ṅkte yṷñjā॒neṣṷ || 28 ||

(vaima॒naḥ-sphya-iti̭-yuna॒ktve-kā̭daśa ca) (a. 8)

pra॒jāpa̭ti-rya॒jñāna̭sṛjatā-gniho॒tra-ñcā᳚gniṣṭo॒ma-ñca̭ paurṇamā॒sī-ñco॒kthya̭-ñcāmāvā॒syā᳚-ñcātirā॒tra-ñca॒ tānuda̭mimīta॒ yāva̭dagniho॒tra-māsī॒-ttāvā̭nagniṣṭo॒mo yāva̭tī paurṇamā॒sī tāvā̭nu॒kthyo̭ yāva̭tyamāvā॒syā̭ tāvā̭natirā॒tro ya e॒vaṃ-vi~॒dvāna̭gniho॒tra-ñju॒hoti॒ yāva̭dagniṣṭo॒meno̭ pā॒pnoti॒ tāva॒dupā᳚-''pnoti॒ ya e॒vaṃ-vi~॒dvā-npau᳚rṇamā॒sīṃ-ya~ja̭te॒ yāva̭du॒kthyḙnopā॒pnoti॒ [yāva̭du॒kthyḙnopā॒pnoti̭, tāva॒dupā᳚-''pnoti॒] 29

tāva॒dupā᳚-''pnoti॒ ya e॒vaṃ-vi~॒dvāna̭māvā॒syāṃ᳚-ya~ja̭te॒ yāva̭datirā॒treṇo̭pā॒pnoti॒ tāva॒dupā᳚-''pnoti parame॒ṣṭhino॒ vā e॒ṣa ya॒jño-'gra̭ āsī॒-ttena॒ sa pa̭ra॒mā-ṅkāṣṭhā̭magaccha॒-ttena̭ pra॒jāpa̭ti-nni॒ravā̭sāyaya॒-ttena̭ pra॒jāpa̭tiḥ para॒mā-ṅkāṣṭhā̭magaccha॒-ttenendra̭-nni॒ravā̭sāyaya॒-ttenendraḥ̭ para॒mā-ṅkāṣṭhā̭magaccha॒-ttenā॒-'gnīṣomaṷ ni॒ravā̭sāyaya॒-ttenā॒gnīṣomaṷ pa॒ramā-ṅkāṣṭhā̭magacchatāṃ॒-ya~ [kāṣṭhā̭magacchatāṃ॒-yaḥ, ~e॒vaṃ-vi~॒dvā-nda̭rśapūrṇamā॒sau] 30

e॒vaṃ-vi~॒dvā-nda̭rśapūrṇamā॒sau yaja̭te para॒māme॒va kāṣṭhā᳚-ṅgacchati॒ yo vai prajā̭tena ya॒jñena॒ yaja̭te॒ pra pra॒jayā̭ pa॒śubhi̭-rmithu॒nai-rjā̭yate॒ dvāda̭śa॒ māsā᳚-ssaṃva~thsa॒ro dvāda̭śa dva॒ndvāni̭ darśapūrṇamā॒sayo॒stāni̭ sa॒mpādyā॒nītyā̭hu-rva॒thsa-ñco̭pāvasṛ॒jatyu॒khā-ñcādhi̭ śraya॒tyava̭ ca॒ hanti̭ dṛ॒ṣadaṷ ca sa॒māha॒ntyadhi̭ ca॒ vapa̭te ka॒pālā̭ni॒ copa̭ dadhāti puro॒ḍāśa̭-ñcā- [puro॒ḍāśa̭-ñca, a॒dhi॒śraya॒tyājya̭-ñca] 31

-'dhi॒śraya॒tyājya̭-ñca stambaya॒juśca॒ hara̭tya॒bhi ca̭ gṛhṇāti॒ vedi̭-ñca pari gṛ॒hṇāti॒ patnī᳚-ñca॒ sanna̭hyati॒ prokṣa̭ṇīścā ''sā॒daya॒tyājya̭-ñcai॒tāni॒ vai dvāda̭śa dva॒ndvāni̭ darśapūrṇamā॒sayo॒stāni॒ ya e॒vagṃ sa॒mpādya॒ yaja̭te॒ prajā̭tenai॒va ya॒jñena̭ yajate॒ pra pra॒jayā̭ pa॒śubhi̭-rmithu॒nai-rjā̭yate || 32 ||

(u॒kthyḙnopā॒pnotya̭-gacchatāṃ॒-yaḥ ~- pṷro॒ḍāśaṃ̭-catvāri॒gṃ॒śacca̭) (a. 9)

dhru॒vo̭-'si dhru॒vo̭-'hagṃ sa̭jā॒teṣṷ bhūyāsa॒mityā̭ha dhru॒vāne॒vainā᳚n kuruta u॒gro᳚-'syu॒gro̭-'hagṃ sa̭jā॒teṣṷ bhūyāsa॒-mityā॒hāpra̭tivādina e॒vainā᳚n kurute-'bhi॒bhūra̭syabhi॒bhūra॒hagṃ sa̭jā॒teṣṷ bhūyāsa॒mityā̭ha॒ ya e॒vaina̭-mpratyu॒tpipī̭te॒ tamupā᳚syate yu॒najmi̭ tvā॒ brahma̭ṇā॒ daivye॒netyā̭hai॒ṣa vāa॒gneryoga॒stenai॒ - [vāa॒gneryoga॒stena̭, e॒vainaṃ̭-yu~nakti] 33

vainaṃ̭-yu~nakti ya॒jñasya॒ vai samṛ̭ddhena de॒vā-ssṷva॒rgaṃ-lo~॒kamā̭yan. ya॒jñasya॒ vyṛ̭ddhe॒nāsṷrā॒-nparā̭bhāvaya॒n. yanmḙ agne a॒sya ya॒jñasya॒ riṣyā॒dityā̭ha ya॒jñasyai॒va tathsamṛ̭ddhena॒ yaja̭māna-ssuva॒rgaṃ-lo~॒kamḙti ya॒jñasya॒ vyṛ̭ddhena॒ bhrātṛ̭vyā॒-nparā̭ bhāvayatyagniho॒tra-me॒tābhi॒-rvyāhṛ̭tībhi॒rupa̭ sādayedyajñamu॒khaṃ-vā~ a̭gniho॒tra-mbrahmai॒tā vyāhṛ̭tayo yajñamu॒kha e॒va brahma̭ - [brahma̭, ku॒ru॒te॒ saṃ॒va~॒thsa॒re] 34

kurute saṃva~thsa॒re pa॒ryāga̭ta e॒tābhi̭re॒vopa̭ sādaye॒-dbrahma̭ṇai॒vobha॒yataḥ̭ saṃva~thsa॒ra-mpari̭ gṛhṇāti darśapūrṇamā॒sau cā̭turmā॒syānyā॒labha̭māna e॒tābhi॒-rvyāhṛ̭tībhir-ha॒vīgṣyāsā̭daye-dyajñamu॒khaṃ-vai~ da̭rśapūrṇamā॒sau cā̭turmā॒syāni॒ brahmai॒tā vyāhṛ̭tayo yajñamu॒kha e॒va brahma̭ kurute saṃva~thsa॒re pa॒ryāga̭ta e॒tābhi̭re॒vāsā̭daye॒-dbrahma̭ṇai॒vobha॒yataḥ̭ saṃva~thsa॒ra-mpari̭gṛhṇāti॒ yadvai ya॒jñasya॒ sāmnā᳚ kri॒yatḙ rā॒ṣṭraṃ- [rā॒ṣṭram, ya॒jñasyā॒-śīrga̭cchati॒] 35

-~ya॒jñasyā॒-śīrga̭cchati॒ yadṛ॒cā viśaṃ̭-ya~॒jñasyā॒- śīrga̭ccha॒tyatha̭ brāhma॒ṇo̭-'nā॒śīrkḙṇa ya॒jñena̭ yajate sāmidhe॒nī-ra̭nuva॒kṣyanne॒tā vyāhṛ̭tīḥ pu॒rastā᳚ddaddhyā॒-dbrahmai॒va pra̭ti॒pada̭-ṅkurute॒ tathā᳚ brāhma॒ṇa-ssāśī᳚rkeṇa ya॒jñena̭ yajate॒ ya-ṅkā॒mayḙta॒ yaja̭māna॒-mbhrātṛ̭vyamasya ya॒jñasyā॒śīrga̭cche॒diti॒ tasyai॒tā vyāhṛ̭tīḥ puronuvā॒kyā̭yā-ndaddhyā-dbhrātṛvyadeva॒tyā̭ vai pṷronuvā॒kyā᳚ bhrātṛ̭vyame॒vāsya̭ ya॒jñasyā॒-[ya॒jñasyā̭, ā॒śīrga̭cchati॒] 36

-''śīrga̭cchati॒ yān kā॒mayḙta॒ yaja̭mānān-thsa॒māva̭tyenān ya॒jñasyā॒ ''śīrga̭cche॒diti॒ teṣā̭me॒tā vyāhṛ̭tīḥ puronuvā॒kyā̭yā ardha॒rca ekā᳚-ndaddhyā-dyā॒jyā̭yai pu॒rastā॒dekāṃ᳚-yā~॒jyā̭yā ardha॒rca ekā॒-ntathai̭nān-thsa॒māva̭tī ya॒jñasyā॒ ''śīrga̭cchati॒ yathā॒ vai pa॒rjanya॒-ssuvṛ̭ṣṭaṃ॒-va~rṣa̭tye॒vaṃ-ya~॒jño yaja̭mānāya varṣati॒ sthala̭yoda॒ka-mpa̭rigṛ॒hṇantyā॒śiṣā̭ ya॒jñaṃ-ya~ja̭mānaḥ॒ pari̭ gṛhṇāti॒ mano̭-'si prājāpa॒tyaṃ- [prājāpa॒tyam, mana̭sā] 37

-mana̭sā mā bhū॒tenā-''vi॒śetyā̭ha॒ mano॒ vai prā̭jāpa॒tya-mprā̭jāpa॒tyo ya॒jño mana̭ e॒va ya॒jñamā॒tma-ndha̭tte॒ vāga̭syai॒ndrī sa̭patna॒kṣaya̭ṇī vā॒cā me᳚ndri॒yeṇā-''vi॒śetyā̭hai॒ndrī vai vāgvāca̭-me॒vaindrī- mā॒tma-ndha̭tte || 38 ||

(tenai॒-va brahma̭- rā॒ṣṭrame॒-vāsya̭ ya॒jñasya̭-prājāpa॒tyagṃ-ṣaṭtrigṃ̭śacca) (a. 10)

yo vai sa̭ptada॒śa-mpra॒jāpa̭tiṃ-ya~॒jñama॒nvāya̭ttaṃ॒-ve~da॒ prati̭ ya॒jñena̭ tiṣṭhati॒ na ya॒jñā-dbhragṃ̭śata॒ ā śrā̭va॒yeti॒ catṷrakṣara॒mastu॒ śrauṣa॒ḍiti॒ catṷrakṣaraṃ॒-ya~jeti॒ dvya̭kṣaraṃ॒-ye~ yajā̭maha॒ iti॒ pañcā᳚kṣara-ndvyakṣa॒ro va̭ṣaṭkā॒ra e॒ṣa vai sa̭ptada॒śaḥ pra॒jāpa̭ti-rya॒jñama॒nvāya̭tto॒ ya e॒vaṃ-ve~da॒ prati̭ ya॒jñena̭ tiṣṭhati॒ na ya॒jñād- bhragṃ̭śate॒ yo vai ya॒jñasya॒ prāya̭ṇa-mprati॒ṣṭhā- [prati॒ṣṭhām, u॒daya̭naṃ॒-ve~da॒] 39

mu॒daya̭naṃ॒-ve~da॒ prati̭ṣṭhite॒nāri̭ṣṭena ya॒jñena̭ sa॒gg॒sthā-ṅga̭ccha॒tyāśrā̭va॒yāstu॒ śrauṣa॒ḍyaja॒ ye yajā̭mahe vaṣaṭkā॒ra e॒tadvai ya॒jñasya॒ prāya̭ṇame॒ṣā pra̭ti॒ṣṭhaitadu॒daya̭naṃ॒-ya~ e॒vaṃ-ve~da॒ prati̭ṣṭhite॒nā-'ri̭ṣṭena ya॒jñena̭ sa॒gg॒sthā-ṅga̭cchati॒ yo vai sū॒nṛtā̭yai॒ dohaṃ॒-ve~da̭ du॒ha e॒vaināṃ᳚-ya~॒jño vai sū॒nṛtā '' śrā̭va॒yetyaivainā̭-mahva॒dastu॒ [-mahva॒dastṷ, śrauṣa॒ḍityu॒pāvā᳚srā॒-] 40

śrauṣa॒ḍityu॒pāvā᳚srā॒-gyajetyuda̭naiṣī॒dye yajā̭maha॒ ityupā̭-'sada-dvaṣaṭkā॒reṇa̭ dogddhye॒ṣa vai sū॒nṛtā̭yai॒ doho॒ ya e॒vaṃ-ve~da̭ du॒ha e॒vainā᳚-nde॒vā vai sa॒tramā̭sata॒ teṣā॒-ndiśo̭-'dasya॒nta e॒tāmā॒rdrā-mpa॒ṅktima̭paśya॒nnā śrā̭va॒yeti̭ purovā॒ta-ma̭janaya॒nnastu॒ śrauṣa॒ḍitya॒bhragṃ sama̭plāvaya॒n॒. yajeti̭ vi॒dyuta̭- [vi॒dyuta̭m, a॒ja॒na॒ya॒n॒ ye] 41

majanaya॒n॒ ye yajā̭maha॒ iti॒ prāva̭rṣayanna॒bhya̭stanayan vaṣaṭkā॒reṇa॒ tato॒ vai tebhyo॒ diśaḥ॒ prāpyā̭yanta॒ ya e॒vaṃ-ve~da॒ prāsmai॒ diśaḥ̭ pyāyante pra॒jāpa̭ti-ntvo॒veda̭ pra॒jāpa̭ti stvaṃve~da॒ ya-mpra॒jāpa̭ti॒-rveda॒ sa puṇyo̭ bhavatye॒ṣa vai cha̭nda॒syaḥ̭ pra॒jāpa̭ti॒rā śrā̭va॒yā-'stu॒ śrauṣa॒ḍyaja॒ ye yajā̭mahe vaṣaṭkā॒ro ya e॒vaṃ-ve~da॒ puṇyo̭ bhavati vasa॒nta- [vasa॒ntam, ṛ॒tū॒nāṃ] 42

-mṛ̭tū॒nā-mprī̭ṇā॒mītyā̭ha॒rtavo॒ vai pra̭yā॒jā ṛ॒tūne॒va prī̭ṇāti॒ te᳚-'smai prī॒tā ya̭thāpū॒rva-ṅka̭lpante॒ kalpa̭nte-'smā ṛ॒tavo॒ ya e॒vaṃ-ve~dā॒gnīṣoma̭yora॒ha-ndḙvaya॒jyayā॒ cakṣṷṣmā-nbhūyāsa॒mityā̭-hā॒gnīṣomā᳚bhyāṃ॒-vai~ ya॒jñaścakṣṷṣmā॒-ntābhyā̭me॒va cakṣṷrā॒tma-ndha̭tte॒ 'gnera॒ha-ndḙvaya॒jyayā᳚-'nnā॒do bhṷ̄yāsa॒mityā̭hā॒gnirvai de॒vānā̭-mannā॒daste nai॒vā- [mannā॒daste nai॒vā, a॒nnādya̭mā॒tman] 43

-'nnādya̭mā॒tma-ndha̭tte॒ dabdhi̭ra॒syada̭bdho bhūyāsama॒mu-nda̭bheya॒mityā̭hai॒tayā॒ vai dabddhyā̭ de॒vā asṷrānadabhnuva॒ntayai॒va bhrātṛ̭vya-ndabhnotya॒gnīṣoma̭yora॒ha-ndḙvaya॒jyayā̭ vṛtra॒hā bhṷ̄yāsa॒mityā̭hā॒-'gnīṣomā᳚bhyāṃ॒-vā~ indro̭ vṛ॒trama̭ha॒ntābhyā̭me॒va bhrātṛ̭vyagg stṛṇuta indrāgni॒yora॒ha-ndḙvaya॒jyaye᳚ndriyā॒vya̭nnā॒do bhṷ̄yāsa॒mityā̭hendriyā॒vyḙvānnā॒do bha̭va॒tīndra̭syā॒- [bha̭va॒tīndra̭sya, a॒ha-ndḙvaya॒jyaye᳚ndriyā॒vī] 44

-'ha-ndḙvaya॒jyaye᳚ndriyā॒vī bhṷ̄yāsa॒mityā̭hendriyā॒vyḙva bha̭vati mahe॒ndrasyā॒-'ha-ndḙvaya॒jyayā̭ je॒māna̭-mmahi॒māna̭-ṅgameya॒mityā̭ha je॒māna̭me॒va ma̭hi॒māna̭-ṅgacchatya॒gne-ssvi̭ṣṭa॒kṛto॒-'ha-ndḙvaya॒jyayā ''yṷṣmān. ya॒jñena̭ prati॒ṣṭhā-ṅga̭meya॒mityā॒-hāyṷre॒vātma-ndha̭tte॒ prati̭ ya॒jñena̭ -tiṣṭhati || 45 ||

( pra॒ti॒ṣṭhā-ma̭hva॒dastṷ-vi॒dyutaṃ̭va~sa॒ntan-tenai॒ve-ndra̭syā॒-'ṣṭātrigṃ̭śacca) (a. 11)

indraṃ̭-vo~ vi॒śvata॒spari॒ havā̭mahe॒ jane᳚bhyaḥ | a॒smāka̭mastu॒ keva̭laḥ || indra॒-nnaro̭ ne॒madhi̭tā havante॒ yatpāryā̭ yu॒naja̭te॒ dhiya॒stāḥ | śūro॒ nṛṣā̭tā॒ śava̭saścakā॒na ā goma̭ti vra॒je bha̭jā॒ tvannaḥ̭ || i॒ndri॒yāṇi̭ śatakrato॒ yā te॒ janḙṣu pa॒ñcasṷ || indra॒ tāni̭ ta॒ ā vṛ̭ṇe || anṷ te dāyi ma॒ha i̭ndri॒yāya̭ sa॒trā te॒ viśva॒manṷ vṛtra॒hatye᳚ | anṷ [ ] 46

kṣa॒tramanu॒ saho̭ yaja॒trendra̭ de॒vebhi॒ranṷ te nṛ॒ṣahye᳚ || āyasmi᳚n-thsa॒ptavā̭sa॒vā stiṣṭha̭nti svā॒ruho̭ yathā | ṛṣi̭rha dīrgha॒śrutta̭ma॒ indra̭sya gha॒rmo ati̭thiḥ || ā॒māsṷ pa॒kvamaira̭ya॒ ā sūryagṃ̭ rohayo di॒vi | gha॒rma-nna sāma̭-ntapatā suvṛ॒ktibhi॒-rjuṣṭa॒-ṅgirva̭ṇase॒ giraḥ̭ || indra॒mi-dgā॒thino̭ bṛ॒hadindra̭-ma॒rkebhi̭-ra॒rkiṇaḥ̭ | indraṃ॒-vā~ṇī̭ranūṣata || gāya̭nti tvā gāya॒triṇo- [gāya॒triṇaḥ̭, arca̭ntya॒rka-ma॒rkiṇaḥ̭ |] 47

-'rca̭ntya॒rka-ma॒rkiṇaḥ̭ | bra॒hmāṇa̭stvā śatakrata॒vu-dva॒gṃ॒śa-mi̭va yemire || a॒gṃ॒ho॒muce॒ pra bha̭remā manī॒ṣāmo̭ṣiṣṭha॒dāvaṃnḙ suma॒ti-ṅgṛ̭ṇā॒nāḥ | i॒dami̭ndra॒ prati̭ ha॒vya-ṅgṛ̭bhāya sa॒tyā-ssa̭ntu॒ yaja̭mānasya॒ kāmāḥ᳚ || vi॒veṣa॒ yanmā̭ dhi॒ṣaṇā̭ ja॒jāna॒ stavai̭ pu॒rā pāryā॒dindra॒-mahnaḥ̭ | agṃha̭so॒ yatra̭ pī॒para॒dyathā̭ no nā॒veva॒ yānta̭ mu॒bhayḙ havante || pra sa॒mrāja̭-mpratha॒ma-ma̭ddhva॒rāṇā̭- [ma̭ddhva॒rāṇā᳚m, a॒gṃ॒ho॒mucaṃ̭] 48

-magṃho॒mucaṃ̭-vṛ~ṣa॒bhaṃ-ya~॒jñiyā̭nām | a॒pā-nnapā̭tamaśvinā॒ haya̭nta-ma॒sminna̭ra indri॒ya-ndha̭tta॒mojaḥ̭ || vi na̭ indra॒ mṛdho̭ jahi nī॒cā ya̭ccha pṛtanya॒taḥ | a॒dha॒spa॒da-ntamī᳚-ṅkṛdhi॒ yo a॒smāgṃ a̭bhi॒dāsa̭ti || indra̭ kṣa॒trama॒bhi vā॒mamojo 'jā̭yathā vṛṣabha carṣaṇī॒nām | apā̭nudo॒ jana̭-mamitra॒yanta̭-mu॒ru-nde॒vebhyo̭ akṛṇo-ru lo॒kam || mṛ॒go na bhī॒maḥ kṷca॒ro gi̭ri॒ṣṭhāḥ pa̭rā॒vata [pa̭rā॒vataḥ̭, ā ja̭gāmā॒ para̭syāḥ |] 49

ā ja̭gāmā॒ para̭syāḥ | sṛ॒kagṃ sa॒gṃ॒śāya̭ pa॒vimi̭ndra ti॒gmaṃ-vi~ śatrū᳚-ntāḍhi॒ vimṛdho̭ nudasva || vi śatrū॒n॒. vi mṛdho̭ nuda॒ vivṛ॒trasya॒ hanṷ̄ ruja | vi ma॒nyumi̭ndra bhāmi॒to̭-'mitra̭syā-'bhi॒dāsa̭taḥ || trā॒tāra॒-mindra̭-mavi॒tāra॒-mindra॒gṃ॒ havḙhave su॒hava॒gṃ॒ śūra॒mindra᳚m | hu॒ve nu śa॒kra-mpṷruhū॒tamindragg̭ sva॒sti no̭ ma॒ghavā̭ dhā॒tvindraḥ̭ || mā tḙ a॒syāgṃ [a॒syāgṃ, sa॒ha॒sā॒va॒-npari̭ṣṭāva॒ghāya̭] 50

sa̭hasāva॒-npari̭ṣṭāva॒ghāya̭ bhūma harivaḥ parā॒dai | trāya̭sva no 'vṛ॒kebhi॒-rvarṷ̄thai॒-stava̭ pri॒yāsaḥ̭ sū॒riṣṷ syāma || ana̭vaste॒ ratha॒maśvā̭ya takṣa॒-ntvaṣṭā॒ vajra̭-mpuruhūta dyu॒manta᳚m | bra॒hmāṇa॒ indra̭-mma॒haya̭nto a॒rkairava̭rdhaya॒nnaha̭ye॒ hanta॒vā ṷ || vṛṣṇe॒ ya-tte॒ vṛṣa̭ṇo a॒rkamarcā॒nindra॒ grāvā̭ṇo॒ adi̭ti-ssa॒joṣāḥ᳚ | a॒na॒śvāso॒ ye pa॒vayo̭-'ra॒thā indrḙṣitā a॒bhyava̭rta nta॒ dasyūṋ || 51 ||

(vṛ॒tra॒hatye-'nṷ-gāya॒triṇo᳚-'ddha॒rāṇāṃ᳚-parā॒vato॒-'syā-ma॒ṣṭāca̭tvārigṃśacca) (a. 12)

(santvā̭ siñcāmi-dhru॒vo᳚-'sya॒gnirmā̭-ba॒r॒hiṣo॒-'ha-mā pyā̭yatā॒-maga̭nma॒-yathā॒ vai-yo vai śra॒ddhāṃ- pra॒jāpa̭ti॒-ryajñān-dhru॒vo̭-'sītyā̭ha॒-yo vai sa̭ptada॒śa-mindraṃ̭-vo~॒-dvāda̭śa | )

(santvā̭-ba॒r॒hiṣo॒-'haṃya~thā॒ vā-e॒vaṃ-vi~॒dvā-ñchrauṣa̭ṭ-thsāhasāva॒-nneka̭pañcā॒śat |)

(santvā̭, siñcāmi॒ dasyūṋ)

|| hariḥ̭ om ||

|| kṛṣṇa yajurvedīya taittirīya saṃhitāyā-mprathamakāṇḍe ṣaṣṭhaḥ praśna-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय संहिताया-म्प्रथमकाण्डे षष्ठः प्रश्नः - याजमानकाण्डं

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

स-न्त्वा॑ सिञ्चामि॒ यजु॑षा प्र॒जामायु॒र्धन॑-ञ्च । बृह॒स्पति॑प्रसूतो॒ यज॑मान इ॒ह मा रि॑षत् ॥ आज्य॑मसि स॒त्यम॑सि स॒त्यस्याद्ध्य॑क्षमसि ह॒विर॑सि वैश्वान॒रं-वैँ᳚श्वदे॒व-मुत्पू॑तशुष्मग्ं स॒त्यौजा॒-स्सहो॑-ऽसि॒ सह॑मानमसि॒ सह॒स्वारा॑ती॒-स्सह॑स्वारातीय॒त-स्सह॑स्व॒ पृत॑ना॒-स्सह॑स्व पृतन्य॒तः । स॒हस्र॑वीर्यमसि॒ तन्मा॑ जि॒न्वाज्य॒स्याज्य॑मसि स॒त्यस्य॑ स॒त्यम॑सि स॒त्यायु॑- [स॒त्यायुः॑, अ॒सि॒ स॒त्यशु॑ष्ममसि] 1

-रसि स॒त्यशु॑ष्ममसि स॒त्येन॑ त्वा॒-ऽभि घा॑रयामि॒ तस्य॑ ते भक्षीय पञ्चा॒ना-न्त्वा॒ वाता॑नां-यँ॒न्त्राय॑ ध॒र्त्राय॑ गृह्णामि पञ्चा॒ना-न्त्व॑र्तू॒नां-यँ॒न्त्राय॑ ध॒र्त्राय॑ गृह्णामि पञ्चा॒ना-न्त्वा॑ दि॒शां-यँ॒न्त्राय॑ ध॒र्त्राय॑ गृह्णामि पञ्चा॒ना-न्त्वा॑ पञ्चज॒नानां᳚-यँ॒न्त्राय॑ ध॒र्त्राय॑ गृह्णामि च॒रोस्त्वा॒ पञ्च॑बिलस्य य॒न्त्राय॑ ध॒र्त्राय॑ गृह्णामि॒ ब्रह्म॑णस्त्वा॒ तेज॑से य॒न्त्राय॑ ध॒र्त्राय॑ गृह्णामि क्ष॒त्रस्य॒ त्वौज॑से य॒न्त्राय॑ [ ] 2

ध॒र्त्राय॑ गृह्णामि वि॒शे त्वा॑ य॒न्त्राय॑ ध॒र्त्राय॑ गृह्णामि सु॒वीर्या॑य त्वा गृह्णामि सुप्रजा॒स्त्वाय॑ त्वा गृह्णामि रा॒यस्पोषा॑य त्वा गृह्णामि ब्रह्मवर्च॒साय॑ त्वा गृह्णामि॒ भूर॒स्माकग्ं॑ ह॒विर्दे॒वाना॑-मा॒शिषो॒ यज॑मानस्य दे॒वाना᳚-न्त्वा दे॒वता᳚भ्यो गृह्णामि॒ कामा॑य त्वा गृह्णामि ॥ 3 ॥

(स॒त्यायु॒-रोज॑से य॒न्त्राय॒-त्रय॑स्त्रिग्ंशच्च) (अ. 1)

ध्रु॒वो॑-ऽसि ध्रु॒वो॑-ऽहग्ं स॑जा॒तेषु॑ भूयास॒-न्धीर॒श्चेत्ता॑ वसु॒विदु॒ग्रो᳚-ऽस्यु॒ग्रो॑-ऽहग्ं स॑जा॒तेषु॑ भूयास-मु॒ग्रश्चेत्ता॑ वसु॒विद॑भि॒-भूर॑स्यभि॒भूर॒हग्ं स॑जा॒तेषु॑ भूयासमभि॒भूश्चेत्ता॑ वसु॒वि-द्यु॒नज्मि॑ त्वा॒ ब्रह्म॑णा॒ दैव्ये॑न ह॒व्याया॒स्मै वोढ॒वे जा॑तवेदः ॥ इन्धा॑नास्त्वा सुप्र॒जसः॑ सु॒वीरा॒ ज्योग्जी॑वेम बलि॒हृतो॑ व॒य-न्ते᳚ ॥ यन्मे॑ अग्ने अ॒स्य य॒ज्ञस्य॒ रिष्या॒- [रिष्या᳚त्, द्यद्वा॒] 4

-द्यद्वा॒ स्कन्दा॒-दाज्य॑स्यो॒त वि॑ष्णो । तेन॑ हन्मि स॒पत्न॑-न्दुर्मरा॒युमैन॑-न्दधामि॒ निर्-ऋ॑त्या उ॒पस्थे᳚ । भू-र्भुव॒-स्सुव॒रुच्छु॑ष्मो अग्ने॒ यज॑मानायैधि॒ निशु॑ष्मो अभि॒दास॑ते । अग्ने॒ देवे᳚द्ध॒ मन्वि॑द्ध॒ मन्द्र॑जि॒ह्वा-म॑र्त्यस्य ते होतर्मू॒र्धन्ना जि॑घर्मि रा॒यस्पोषा॑य सुप्रजा॒स्त्वाय॑ सु॒वीर्या॑य॒ मनो॑-ऽसि प्राजाप॒त्य-म्मन॑सा मा भू॒तेना वि॑श॒ वाग॑स्यै॒न्द्री स॑पत्न॒क्षय॑णी [ ] 5

वा॒चा मे᳚न्द्रि॒येणा वि॑श वस॒न्तमृ॑तू॒ना-म्प्री॑णामि॒ स मा᳚ प्री॒तः प्री॑णातु ग्री॒ष्ममृ॑तू॒ना-म्प्री॑णामि॒ स मा᳚ प्री॒तः प्री॑णातु व॒र्॒षा ऋ॑तू॒ना-म्प्री॑णामि॒ ता मा᳚ प्री॒ताः प्री॑णन्तु श॒रद॑मृतू॒ना-म्प्री॑णामि॒ सा मा᳚ प्री॒ता प्री॑णातु हेमन्तशिशि॒रावृ॑तू॒ना-म्प्री॑णामि॒ तौ मा᳚ प्री॒तौ प्री॑णीता-म॒ग्नीषोम॑यो-र॒ह-न्दे॑वय॒ज्यया॒ चक्षु॑ष्मा-न्भूयासम॒ग्नेर॒ह-न्दे॑वय॒ज्यया᳚-ऽन्ना॒दो भू॑यास॒- [भू॑यासम्, दब्धि॑र॒स्यद॑ब्धो] 6

-न्दब्धि॑र॒स्यद॑ब्धो भूयासम॒मु-न्द॑भेय-म॒ग्नीषोम॑यो-र॒ह-न्दे॑वय॒ज्यया॑ वृत्र॒हा भू॑यासमिन्द्राग्नि॒योर॒ह-न्दे॑वय॒ज्यये᳚न्द्रिया॒व्य॑न्ना॒दो भू॑यास॒मिन्द्र॑स्या॒-ऽह-न्दे॑वय॒ज्यये᳚न्द्रिया॒वी भू॑यास-म्महे॒न्द्रस्या॒-ऽह-न्दे॑वय॒ज्यया॑ जे॒मान॑-म्महि॒मान॑-ङ्गमेयम॒ग्ने-स्स्वि॑ष्ट॒कृतो॒-ऽह-न्दे॑वय॒ज्यया ऽऽयु॑ष्मान्. य॒ज्ञेन॑ प्रति॒ष्ठा-ङ्ग॑मेयम् ॥ 7 ॥

(रिष्या᳚-थ्सपत्न॒क्षय॑ण्य-न्ना॒दो भू॑यास॒ग्ं॒-षट्त्रिग्ं॑शच्च) (अ. 2)

अ॒ग्निर्मा॒ दुरि॑ष्टा-त्पातु सवि॒ता-ऽघशग्ं॑सा॒द्यो मे-ऽन्ति॑ दू॒रे॑-ऽराती॒यति॒ तमे॒तेन॑ जेष॒ग्ं॒ सुरू॑पवर्षवर्ण॒ एही॒मा-न्भ॒द्रा-न्दुर्याग्ं॑ अ॒भ्येहि॒ मामनु॑व्रता॒ न्यु॑ शी॒र्॒षाणि॑ मृढ्व॒मिड॒ एह्यदि॑त॒ एहि॒ सर॑स्व॒त्येहि॒ रन्ति॑रसि॒ रम॑तिरसि सू॒नर्य॑सि॒ जुष्टे॒ जुष्टि॑-न्ते-ऽशी॒योप॑हूत उपह॒व- [उपह॒वम्, ते॒-ऽशी॒य॒ सा ] 8

-न्ते॑-ऽशीय॒ सा मे॑ स॒त्या-ऽऽशीर॒स्य य॒ज्ञस्य॑ भूया॒दरे॑डता॒ मन॑सा॒ तच्छ॑केयं-यँ॒ज्ञो दिवग्ं॑ रोहतु य॒ज्ञो दिव॑-ङ्गच्छतु॒ यो दे॑व॒यानः॒ पन्था॒स्तेन॑ य॒ज्ञो दे॒वाग्ं अप्ये᳚त्व॒स्मास्विन्द्र॑ इन्द्रि॒य-न्द॑धात्व॒स्मान्राय॑ उ॒त य॒ज्ञा-स्स॑चन्ताम॒स्मासु॑ सन्त्वा॒शिष॒-स्सा नः॑ प्रि॒या सु॒प्रतू᳚र्तिर्म॒घोनी॒ जुष्टि॑रसि जु॒षस्व॑ नो॒ जुष्टा॑ नो- [जुष्टा॑ नः, अ॒सि॒ जुष्टि॑-न्ते] 9

-ऽसि॒ जुष्टि॑-न्ते गमेय॒-म्मनो॒ ज्योति॑-र्जुषता॒माज्यं॒-विँच्छि॑न्नं-यँ॒ज्ञग्ं समि॒म-न्द॑धातु । बृह॒स्पति॑-स्तनुतामि॒मन्नो॒ विश्वे॑ दे॒वा इ॒ह मा॑दयन्ताम् ॥ ब्रद्ध्न॒ पिन्व॑स्व॒ दद॑तो मे॒ मा क्षा॑यि कुर्व॒तो मे॒ मोप॑ दस-त्प्र॒जाप॑ते-र्भा॒गो᳚-ऽस्यूर्ज॑स्वा॒-न्पय॑स्वा-न्प्राणापा॒नौ मे॑ पाहि समानव्या॒नौ मे॑ पाह्युदानव्या॒नौ मे॑ पा॒ह्यक्षि॑तो॒-ऽस्यक्षि॑त्यै त्वा॒ मा मे᳚ क्षेष्ठा अ॒मुत्रा॒मुष्मि॑न् ँलो॒के ॥ 10 ॥

(उ॒प॒ह॒वं-जुष्टा॑न-स्त्वा॒ षट् च॑) (अ. 3)

ब॒र्॒हिषो॒-ऽह-न्दे॑वय॒ज्यया᳚ प्र॒जावा᳚-न्भूयास॒-न्नरा॒शग्ंस॑स्या॒ह-न्दे॑वय॒ज्यया॑ पशु॒मा-न्भू॑यासम॒ग्ने-स्स्वि॑ष्ट॒कृतो॒-ऽह-न्दे॑वय॒ज्यया-ऽऽयु॑ष्मान्. य॒ज्ञेन॑ प्रति॒ष्ठा-ङ्ग॑मेयम॒ग्नेर॒ह-मुज्जि॑ति॒-मनूज्जे॑ष॒ग्ं॒ सोम॑स्या॒ह - मुज्जि॑ति॒-मनूज्जे॑षम॒ग्नेर॒ह-मुज्जि॑ति॒-मनूज्जे॑ष-म॒ग्नीषोम॑योर॒ह-मुज्जि॑ति॒-मनूज्जे॑ष-मिन्द्राग्नि॒योर॒ह-मुज्जि॑ति॒-मनूज्जे॑ष॒-मिन्द्र॑स्या॒-ऽह- [-मिन्द्र॑स्या॒-ऽहम्, उज्जि॑ति॒मनूज्जे॑षं] 11

-मुज्जि॑ति॒मनूज्जे॑ष-म्महे॒न्द्रस्या॒हमुज्जि॑ति॒- मनूज्जे॑षम॒ग्ने-स्स्वि॑ष्ट॒कृतो॒-ऽह मुज्जि॑ति॒-मनूज्जे॑षं॒-वाँज॑स्य मा प्रस॒वेनो᳚-द्ग्रा॒भेणोद॑ग्रभीत् । अथा॑ स॒पत्ना॒ग्ं॒ इन्द्रो॑ मे निग्रा॒भेणाध॑राग्ं अकः ॥ उ॒द्ग्रा॒भ-ञ्च॑ निग्रा॒भ-ञ्च॒ ब्रह्म॑ दे॒वा अ॑वीवृधन्न् । अथा॑ स॒पत्ना॑निन्द्रा॒ग्नी मे॑ विषू॒चीना॒न् व्य॑स्यताम् ॥ एमा अ॑ग्मन्ना॒शिषो॒ दोह॑कामा॒ इन्द्र॑वन्तो [इन्द्र॑वन्तः, व॒ना॒म॒हे॒ धु॒क्षी॒महि॑] 12

वनामहे धुक्षी॒महि॑ प्र॒जामिष᳚म् ॥ रोहि॑तेन त्वा॒-ऽग्नि-र्दे॒वता᳚-ङ्गमयतु॒ हरि॑भ्या॒-न्त्वेन्द्रो॑ दे॒वता᳚-ङ्गमय॒त्वेत॑शेन त्वा॒ सूर्यो॑ दे॒वता᳚-ङ्गमयतु॒ वि ते॑ मुञ्चामि रश॒ना वि र॒श्मीन् वि योक्त्रा॒ यानि॑ परि॒चर्त॑नानि ध॒त्ताद॒स्मासु॒ द्रवि॑णं॒-यँच्च॑ भ॒द्र-म्प्र णो᳚ ब्रूता-द्भाग॒धा-न्दे॒वता॑सु ॥ विष्णो᳚-श्शं॒योँर॒ह-न्दे॑वय॒ज्यया॑ य॒ज्ञेन॑ प्रति॒ष्ठा-ङ्ग॑मेय॒ग्ं॒ सोम॑स्या॒ह-न्दे॑वय॒ज्यया॑ [दे॑वय॒ज्यया᳚, सु॒रेता॒] 13

सु॒रेता॒ रेतो॑ धिषीय॒ त्वष्टु॑र॒ह-न्दे॑वय॒ज्यया॑ पशू॒नाग्ं रू॒प-म्पु॑षेय-न्दे॒वाना॒-म्पत्नी॑र॒ग्नि-र्गृ॒हप॑ति-र्य॒ज्ञस्य॑ मिथु॒न-न्तयो॑र॒ह-न्दे॑वय॒ज्यया॑ मिथु॒नेन॒ प्रभू॑यासं-वेँ॒दो॑-ऽसि॒ वित्ति॑रसि वि॒देय॒ कर्मा॑-ऽसि क॒रुण॑मसि क्रि॒यासग्ं॑ स॒निर॑सि सनि॒ता-ऽसि॑ स॒नेय॑-ङ्घृ॒तव॑न्त-ङ्कुला॒यिनग्ं॑ रा॒यस्पोषग्ं॑ सह॒स्रिणं॑-वेँ॒दो द॑दातु वा॒जिन᳚म् ॥ 14 ॥

(इन्द्र॑स्या॒ह-मिन्द्र॑वन्तः॒-सोम॑स्या॒ह-न्दे॑वय॒ज्यया॒-चतु॑श्चत्वारिग्ंशच्च) (अ. 4)

आ प्या॑यता-न्ध्रु॒वा घृ॒तेन॑ य॒ज्ञंयँ॑ज्ञ॒-म्प्रति॑ देव॒यद्भ्यः॑ । सू॒र्याया॒ ऊधो-ऽदि॑त्या उ॒पस्थ॑ उ॒रुधा॑रा पृथि॒वी य॒ज्ञे अ॒स्मिन्न् ॥ प्र॒जाप॑ते-र्वि॒भान्नाम॑ लो॒कस्तस्मिग्ग्॑स्त्वा दधामि स॒ह यज॑मानेन॒ सद॑सि॒ सन्मे॑ भूया॒-स्सर्व॑मसि॒ सर्व॑-म्मे भूयाः पू॒र्णम॑सि पू॒र्ण-म्मे॑ भूया॒ अक्षि॑तमसि॒ मा मे᳚ क्षेष्ठाः॒ प्राच्या᳚-न्दि॒शि दे॒वा ऋ॒त्विजो॑ मार्जयन्ता॒-न्दक्षि॑णाया- [दक्षि॑णायाम्, दि॒शि] 15

न्दि॒शि मासाः᳚ पि॒तरो॑ मार्जयन्ता-म्प्र॒तीच्या᳚-न्दि॒शि गृ॒हाः प॒शवो॑ मार्जयन्ता॒मुदी᳚च्या-न्दि॒श्याप॒ ओष॑धयो॒ वन॒स्पत॑यो मार्जयन्तामू॒र्ध्वाया᳚-न्दि॒शि य॒ज्ञ-स्सं॑वँथ्स॒रो य॒ज्ञप॑ति-र्मार्जयन्तां॒-विँष्णोः॒ क्रमो᳚-ऽस्यभिमाति॒हा गा॑य॒त्रेण॒ छन्द॑सा पृथि॒वीमनु॒ वि क्र॑मे॒ निर्भ॑क्त॒-स्स य-न्द्वि॒ष्मो विष्णोः॒ क्रमो᳚-ऽस्यभिशस्ति॒हा त्रैष्टु॑भेन॒ छन्द॑सा॒ ऽन्तरि॑क्ष॒मनु॒ वि क्र॑मे॒ निर्भ॑क्त॒-स्स य-न्द्वि॒ष्मो विष्णोः॒ क्रमो᳚-ऽस्यरातीय॒तो ह॒न्ता जाग॑तेन॒ छन्द॑सा॒ दिव॒मनु॒ वि क्र॑मे॒ निर्भ॑क्त॒-स्स य-न्द्वि॒ष्मो विष्णोः॒ क्रमो॑-ऽसि शत्रूय॒तो ह॒न्ता-ऽऽनु॑ष्टुभेन॒ छन्द॑सा॒ दिशो-ऽनु॒ वि क्र॑मे॒ निर्भ॑क्त॒-स्स य-न्द्वि॒ष्मः ॥ 16 ॥

(दक्षि॑णाया - म॒न्तरि॑क्ष॒मनु॒ वि क्र॑मे॒ निर्भ॑क्त॒-स्स य-न्द्वि॒ष्मो विष्णो॒- रेका॒न्नत्रि॒ग्ं॒शच्च॑) (अ. 5)

अग॑न्म॒ सुव॒-स्सुव॑रगन्म स॒न्दृश॑स्ते॒ मा छि॑थ्सि॒ यत्ते॒ तप॒स्तस्मै॑ ते॒ मा-ऽऽ वृ॑क्षि सु॒भूर॑सि॒ श्रेष्ठो॑ रश्मी॒नामा॑यु॒र्धा अ॒स्यायु॑र्मे धेहि वर्चो॒धा अ॑सि॒ वर्चो॒ मयि॑ धेही॒दम॒हम॒मु-म्भ्रातृ॑व्यमा॒भ्यो दि॒ग्भ्यो᳚-ऽस्यै दि॒वो᳚-ऽस्माद॒न्तरि॑क्षाद॒स्यै पृ॑थि॒व्या अ॒स्माद॒न्नाद्या॒न्निर्भ॑जामि॒ निर्भ॑क्त॒-स्स य-न्द्वि॒ष्मः ॥ 17 ॥

स-ञ्ज्योति॑षा-ऽभूवमै॒न्द्री-मा॒वृत॑-म॒न्वाव॑र्ते॒ सम॒ह-म्प्र॒जया॒ स-म्मया᳚ प्र॒जा सम॒हग्ं रा॒यस्पोषे॑ण॒ स-म्मया॑ रा॒यस्पोष॒-स्समि॑द्धो अग्ने मे दीदिहि समे॒द्धा ते॑ अग्ने दीद्यासं॒-वँसु॑मान्. य॒ज्ञो वसी॑या-न्भूयास॒मग्न॒ आयूग्ं॑षि पवस॒ आ सु॒वोर्ज॒मिष॑-ञ्च नः । आ॒रे बा॑धस्व दु॒च्छुना᳚म् ॥ अग्ने॒ पव॑स्व॒ स्वपा॑ अ॒स्मे वर्चः॑ सु॒वीर्य᳚म् ॥ 18 ॥

दध॒त्पोषग्ं॑ र॒यि-म्मयि॑ । अग्ने॑ गृहपते सुगृहप॒तिर॒ह-न्त्वया॑ गृ॒हप॑तिना भूयासग्ं सुगृहप॒तिर्मया॒ त्व-ङ्गृ॒हप॑तिना भूया-श्श॒तग्ं हिमा॒स्तामा॒शिष॒मा शा॑से॒ तन्त॑वे॒ ज्योति॑ष्मती॒-न्तामा॒शिष॒मा शा॑से॒-ऽमुष्मै॒ ज्योति॑ष्मती॒-ङ्कस्त्वा॑ युनक्ति॒ स त्वा॒ विमु॑ञ्च॒त्वग्ने᳚ व्रतपते व्र॒तम॑चारिष॒-न्तद॑शक॒-न्तन्मे॑-ऽराधि य॒ज्ञो ब॑भूव॒ स आ [स आ, ब॒भू॒व॒ स] 19

ब॑भूव॒ स प्रज॑ज्ञे॒ स वा॑वृधे । स दे॒वाना॒मधि॑पति-र्बभूव॒ सो अ॒स्माग्ं अधि॑पतीन् करोतु व॒यग्ग् स्या॑म॒ पत॑यो रयी॒णाम् ॥ गोमाग्ं॑ अ॒ग्ने-ऽवि॑माग्ं अ॒श्वी य॒ज्ञो नृ॒वथ्स॑खा॒ सद॒मिद॑प्रमृ॒ष्यः ।इडा॑वाग्ं ए॒षो अ॑सुर प्र॒जावा᳚-न्दी॒र्घो र॒यिः पृ॑थुबु॒द्ध्न-स्स॒भावान्॑ ॥ 20 ॥

(द्वि॒ष्मः-सु॒वीर्य॒ग्ं॒-स आ-पञ्च॑त्रिग्ंशच्च) (अ. 6)

यथा॒ वै स॑मृतसो॒मा ए॒वं-वाँ ए॒ते स॑मृतय॒ज्ञा यद्द॑र्शपूर्णमा॒सौ कस्य॒ वा-ऽह॑ दे॒वा य॒ज्ञमा॒गच्छ॑न्ति॒ कस्य॑ वा॒ न ब॑हू॒नां-यँज॑मानानां॒-योँ वै दे॒वताः॒ पूर्वः॑ परिगृ॒ह्णाति॒ स ए॑ना॒-श्श्वो भू॒ते य॑जत ए॒तद्वै दे॒वाना॑-मा॒यत॑नं॒-यँदा॑हव॒नीयो᳚-ऽन्त॒रा-ऽग्नी प॑शू॒ना-ङ्गार्ह॑पत्यो मनु॒ष्या॑णा-मन्वाहार्य॒पच॑नः पितृ॒णाम॒ग्नि-ङ्गृ॑ह्णाति॒ स्व ए॒वायत॑ने दे॒वताः॒ परि॑ [दे॒वताः॒ परि॑, गृ॒ह्णा॒ति॒ ता-श्श्वो] 21

गृह्णाति॒ ता-श्श्वो भू॒ते य॑जते व्र॒तेन॒ वै मेद्ध्यो॒ -ऽग्नि-र्व्र॒तप॑ति-र्ब्राह्म॒णो व्र॑त॒भृ-द्व्र॒त-मु॑पै॒ष्य-न्ब्रू॑या॒दग्ने᳚ व्रतपते व्र॒त-ञ्च॑रिष्या॒मीत्य॒ग्नि-र्वै दे॒वानां᳚-व्रँ॒तप॑ति॒स्तस्मा॑ ए॒व प्र॑ति॒प्रोच्य॑ व्र॒तमा ल॑भते ब॒र्॒हिषा॑ पू॒र्णमा॑से व्र॒तमुपै॑ति व॒थ्सैर॑मावा॒स्या॑यामे॒तद्ध्ये॑तयो॑-रा॒यत॑नमुप॒स्तीर्यः॒ पूर्व॑श्चा॒ग्निरप॑र॒श्चेत्या॑हु-र्मनु॒ष्या॑ [-र्मनु॒ष्याः᳚, इन्न्वा] 22

इन्न्वा उप॑स्तीर्ण-मि॒च्छन्ति॒ किमु॑ दे॒वा येषा॒-न्नवा॑वसान॒-मुपा᳚स्मि॒ञ्छ्वो य॒क्ष्यमा॑णे दे॒वता॑ वसन्ति॒ य ए॒वं-विँ॒द्वान॒ग्नि-मु॑पस्तृ॒णाति॒ यज॑मानेन ग्रा॒म्याश्च॑ प॒शवो॑-ऽव॒रुद्ध्या॑ आर॒ण्याश्चेत्या॑हु॒-र्य-द्ग्रा॒म्यानु॑प॒वस॑ति॒ तेन॑ ग्रा॒म्यानव॑ रुन्धे॒ यदा॑र॒ण्यस्या॒-ऽश्ञाति॒ तेना॑र॒ण्यान्. यदना᳚श्वा-नुप॒वसे᳚-त्पितृदेव॒त्यः॑ स्यादार॒ण्यस्या᳚-श्ञातीन्द्रि॒यं- [श्ञातीन्द्रि॒यम्, वा आ॑र॒ण्यं-] 23

-ँवा आ॑र॒ण्य-मि॑न्द्रि॒य-मे॒वा-ऽऽत्म-न्ध॑त्ते॒ यदना᳚श्वा-नुप॒वसे॒-त्क्षोधु॑क-स्स्या॒द्य-द॑श्ञी॒याद्रु॒-द्रो᳚-ऽस्य प॒शून॒भि म॑न्येता॒-ऽपो᳚-ऽश्ञाति॒ तन्नेवा॑शि॒त-न्नेवा-ऽन॑शित॒-न्न क्षोधु॑को॒ भव॑ति॒ नास्य॑ रु॒द्रः प॒शून॒भि म॑न्यते॒ वज्रो॒ वै य॒ज्ञः, क्षु-त्खलु॒ वै म॑नु॒ष्य॑स्य॒ भ्रातृ॑व्यो॒ यदना᳚-ऽश्वानुप॒वस॑ति॒ वज्रे॑णै॒व सा॒क्षा-त्क्षुध॒-म्भ्रातृ॑व्यग्ं हन्ति ॥ 24 ॥

(परि॑-मनु॒ष्या॑-इन्द्रि॒यग्ं-सा॒क्षात्-त्रीणि॑ च) (अ. 7)

यो वै श्र॒द्धामना॑रभ्य य॒ज्ञेन॒ यज॑ते॒ नास्ये॒ष्टाय॒ श्रद्द॑धते॒-ऽपः प्र ण॑यति श्र॒द्धा वा आपः॑ श्र॒द्धामे॒वा-ऽऽरभ्य॑ य॒ज्ञेन॑ यजत उ॒भये᳚-ऽस्य देवमनु॒ष्या इ॒ष्टाय॒ श्रद्द॑धते॒ तदा॑हु॒रति॒ वा ए॒ता वर्त्र॑-न्नेद॒न्त्यति॒ वाच॒-म्मनो॒ वावैता नाति॑ नेद॒न्तीति॒ मन॑सा॒ प्र ण॑यती॒यं-वैँ मनो॒- [मनः॑, अ॒नयै॒वैनाः॒] 25

-ऽनयै॒वैनाः॒ प्र ण॑य॒त्य-स्क॑न्नहवि-र्भवति॒ य ए॒वं-वेँद॑ यज्ञायु॒धानि॒ स-म्भ॑रति य॒ज्ञो वै य॑ज्ञायु॒धानि॑ य॒ज्ञमे॒व तथ्स-म्भ॑रति॒ यदेक॑मेकग्ं स॒म्भरे᳚त्-पितृदेव॒त्या॑नि स्यु॒र्य-थ्स॒ह सर्वा॑णि मानु॒षाणि॒ द्वेद्वे॒ सम्भ॑रति याज्यानुवा॒क्य॑योरे॒व रू॒प-ङ्क॑रो॒त्यथो॑ मिथु॒नमे॒वयो वै दश॑ यज्ञायु॒धानि॒ वेद॑ मुख॒तो᳚-ऽस्य य॒ज्ञः क॑ल्पते॒ स्फ्य- [क॑ल्पते॒ स्फ्यः, च॒ क॒पाला॑नि] 26

-श्च॑ क॒पाला॑नि चाग्निहोत्र॒हव॑णी च॒ शूर्प॑-ञ्च कृष्णाजि॒न-ञ्च॒ शम्या॑ चो॒लूख॑ल-ञ्च॒ मुस॑ल-ञ्च दृ॒षच्चोप॑ला चै॒तानि॒ वै दश॑ यज्ञायु॒धानि॒ य ए॒वं-वेँद॑ मुख॒तो᳚-ऽस्य य॒ज्ञः क॑ल्पते॒ यो वै दे॒वेभ्यः॑ प्रति॒प्रोच्य॑ य॒ज्ञेन॒ यज॑ते जु॒षन्ते᳚-ऽस्य दे॒वा ह॒व्यग्ं ह॒वि-र्नि॑रु॒प्यमा॑णम॒भि म॑न्त्रयेता॒-ऽग्निग्ं होता॑रमि॒ह तग्ं हु॑व॒ इति॑ [ ] 27

दे॒वेभ्य॑ ए॒व प्र॑ति॒प्रोच्य॑ य॒ज्ञेन॑ यजते जु॒षन्ते᳚-ऽस्य दे॒वा ह॒व्यमे॒ष वै य॒ज्ञस्य॒ ग्रहो॑ गृही॒त्वैव य॒ज्ञेन॑ यजते॒ तदु॑दि॒त्वा वाचं॑-यँच्छति य॒ज्ञस्य॒ धृत्या॒ अथो॒ मन॑सा॒ वै प्र॒जाप॑ति-र्य॒ज्ञम॑तनुत॒ मन॑सै॒व त-द्य॒ज्ञ-न्त॑नुते॒ रक्ष॑सा॒-मन॑न्ववचाराय॒ यो वै य॒ज्ञं-योँग॒ आग॑ते यु॒नक्ति॑ यु॒ङ्क्ते यु॑ञ्जा॒नेषु॒ कस्त्वा॑ युनक्ति॒ स त्वा॑ युन॒क्त्वि-( ) -त्या॑ह प्र॒जाप॑ति॒-र्वै कः प्र॒जाप॑तिनै॒वैनं॑-युँनक्ति यु॒ङ्क्ते यु॑ञ्जा॒नेषु॑ ॥ 28 ॥

(वैम॒नः-स्फ्य-इति॑-युन॒क्त्वे-का॑दश च) (अ. 8)

प्र॒जाप॑ति-र्य॒ज्ञान॑सृजता-ग्निहो॒त्र-ञ्चा᳚ग्निष्टो॒म-ञ्च॑ पौर्णमा॒सी-ञ्चो॒क्थ्य॑-ञ्चामावा॒स्या᳚-ञ्चातिरा॒त्र-ञ्च॒ तानुद॑मिमीत॒ याव॑दग्निहो॒त्र-मासी॒-त्तावा॑नग्निष्टो॒मो याव॑ती पौर्णमा॒सी तावा॑नु॒क्थ्यो॑ याव॑त्यमावा॒स्या॑ तावा॑नतिरा॒त्रो य ए॒वं-विँ॒द्वान॑ग्निहो॒त्र-ञ्जु॒होति॒ याव॑दग्निष्टो॒मेनो॑ पा॒प्नोति॒ ताव॒दुपा᳚-ऽऽप्नोति॒ य ए॒वं-विँ॒द्वा-न्पौ᳚र्णमा॒सीं-यँज॑ते॒ याव॑दु॒क्थ्ये॑नोपा॒प्नोति॒ [याव॑दु॒क्थ्ये॑नोपा॒प्नोति॑, ताव॒दुपा᳚-ऽऽप्नोति॒] 29

ताव॒दुपा᳚-ऽऽप्नोति॒ य ए॒वं-विँ॒द्वान॑मावा॒स्यां᳚-यँज॑ते॒ याव॑दतिरा॒त्रेणो॑पा॒प्नोति॒ ताव॒दुपा᳚-ऽऽप्नोति परमे॒ष्ठिनो॒ वा ए॒ष य॒ज्ञो-ऽग्र॑ आसी॒-त्तेन॒ स प॑र॒मा-ङ्काष्ठा॑मगच्छ॒-त्तेन॑ प्र॒जाप॑ति-न्नि॒रवा॑सायय॒-त्तेन॑ प्र॒जाप॑तिः पर॒मा-ङ्काष्ठा॑मगच्छ॒-त्तेनेन्द्र॑-न्नि॒रवा॑सायय॒-त्तेनेन्द्रः॑ पर॒मा-ङ्काष्ठा॑मगच्छ॒-त्तेना॒-ऽग्नीषोमौ॑ नि॒रवा॑सायय॒-त्तेना॒ग्नीषोमौ॑ प॒रमा-ङ्काष्ठा॑मगच्छतां॒-यँ [काष्ठा॑मगच्छतां॒-यः, ँए॒वं-विँ॒द्वा-न्द॑र्शपूर्णमा॒सौ] 30

ए॒वं-विँ॒द्वा-न्द॑र्शपूर्णमा॒सौ यज॑ते पर॒मामे॒व काष्ठा᳚-ङ्गच्छति॒ यो वै प्रजा॑तेन य॒ज्ञेन॒ यज॑ते॒ प्र प्र॒जया॑ प॒शुभि॑-र्मिथु॒नै-र्जा॑यते॒ द्वाद॑श॒ मासा᳚-स्संवँथ्स॒रो द्वाद॑श द्व॒न्द्वानि॑ दर्शपूर्णमा॒सयो॒स्तानि॑ स॒म्पाद्या॒नीत्या॑हु-र्व॒थ्स-ञ्चो॑पावसृ॒जत्यु॒खा-ञ्चाधि॑ श्रय॒त्यव॑ च॒ हन्ति॑ दृ॒षदौ॑ च स॒माह॒न्त्यधि॑ च॒ वप॑ते क॒पाला॑नि॒ चोप॑ दधाति पुरो॒डाश॑-ञ्चा- [पुरो॒डाश॑-ञ्च, अ॒धि॒श्रय॒त्याज्य॑-ञ्च] 31

-ऽधि॒श्रय॒त्याज्य॑-ञ्च स्तम्बय॒जुश्च॒ हर॑त्य॒भि च॑ गृह्णाति॒ वेदि॑-ञ्च परि गृ॒ह्णाति॒ पत्नी᳚-ञ्च॒ सन्न॑ह्यति॒ प्रोक्ष॑णीश्चा ऽऽसा॒दय॒त्याज्य॑-ञ्चै॒तानि॒ वै द्वाद॑श द्व॒न्द्वानि॑ दर्शपूर्णमा॒सयो॒स्तानि॒ य ए॒वग्ं स॒म्पाद्य॒ यज॑ते॒ प्रजा॑तेनै॒व य॒ज्ञेन॑ यजते॒ प्र प्र॒जया॑ प॒शुभि॑-र्मिथु॒नै-र्जा॑यते ॥ 32 ॥

(उ॒क्थ्ये॑नोपा॒प्नोत्य॑-गच्छतां॒-यः ँ- पु॑रो॒डाशं॑-चत्वारि॒ग्ं॒शच्च॑) (अ. 9)

ध्रु॒वो॑-ऽसि ध्रु॒वो॑-ऽहग्ं स॑जा॒तेषु॑ भूयास॒मित्या॑ह ध्रु॒वाने॒वैना᳚न् कुरुत उ॒ग्रो᳚-ऽस्यु॒ग्रो॑-ऽहग्ं स॑जा॒तेषु॑ भूयास॒-मित्या॒हाप्र॑तिवादिन ए॒वैना᳚न् कुरुते-ऽभि॒भूर॑स्यभि॒भूर॒हग्ं स॑जा॒तेषु॑ भूयास॒मित्या॑ह॒ य ए॒वैन॑-म्प्रत्यु॒त्पिपी॑ते॒ तमुपा᳚स्यते यु॒नज्मि॑ त्वा॒ ब्रह्म॑णा॒ दैव्ये॒नेत्या॑है॒ष वाअ॒ग्नेर्योग॒स्तेनै॒ - [वाअ॒ग्नेर्योग॒स्तेन॑, ए॒वैनं॑-युँनक्ति] 33

वैनं॑-युँनक्ति य॒ज्ञस्य॒ वै समृ॑द्धेन दे॒वा-स्सु॑व॒र्गं-लोँ॒कमा॑यन्. य॒ज्ञस्य॒ व्यृ॑द्धे॒नासु॑रा॒-न्परा॑भावय॒न्. यन्मे॑ अग्ने अ॒स्य य॒ज्ञस्य॒ रिष्या॒दित्या॑ह य॒ज्ञस्यै॒व तथ्समृ॑द्धेन॒ यज॑मान-स्सुव॒र्गं-लोँ॒कमे॑ति य॒ज्ञस्य॒ व्यृ॑द्धेन॒ भ्रातृ॑व्या॒-न्परा॑ भावयत्यग्निहो॒त्र-मे॒ताभि॒-र्व्याहृ॑तीभि॒रुप॑ सादयेद्यज्ञमु॒खं-वाँ अ॑ग्निहो॒त्र-म्ब्रह्मै॒ता व्याहृ॑तयो यज्ञमु॒ख ए॒व ब्रह्म॑ - [ब्रह्म॑, कु॒रु॒ते॒ सं॒वँ॒थ्स॒रे] 34

कुरुते संवँथ्स॒रे प॒र्याग॑त ए॒ताभि॑रे॒वोप॑ सादये॒-द्ब्रह्म॑णै॒वोभ॒यतः॑ संवँथ्स॒र-म्परि॑ गृह्णाति दर्शपूर्णमा॒सौ चा॑तुर्मा॒स्यान्या॒लभ॑मान ए॒ताभि॒-र्व्याहृ॑तीभिर्-ह॒वीग्ष्यासा॑दये-द्यज्ञमु॒खं-वैँ द॑र्शपूर्णमा॒सौ चा॑तुर्मा॒स्यानि॒ ब्रह्मै॒ता व्याहृ॑तयो यज्ञमु॒ख ए॒व ब्रह्म॑ कुरुते संवँथ्स॒रे प॒र्याग॑त ए॒ताभि॑रे॒वासा॑दये॒-द्ब्रह्म॑णै॒वोभ॒यतः॑ संवँथ्स॒र-म्परि॑गृह्णाति॒ यद्वै य॒ज्ञस्य॒ साम्ना᳚ क्रि॒यते॑ रा॒ष्ट्रं- [रा॒ष्ट्रम्, य॒ज्ञस्या॒-शीर्ग॑च्छति॒] 35

-ँय॒ज्ञस्या॒-शीर्ग॑च्छति॒ यदृ॒चा विशं॑-यँ॒ज्ञस्या॒- शीर्ग॑च्छ॒त्यथ॑ ब्राह्म॒णो॑-ऽना॒शीर्के॑ण य॒ज्ञेन॑ यजते सामिधे॒नी-र॑नुव॒क्ष्यन्ने॒ता व्याहृ॑तीः पु॒रस्ता᳚द्दद्ध्या॒-द्ब्रह्मै॒व प्र॑ति॒पद॑-ङ्कुरुते॒ तथा᳚ ब्राह्म॒ण-स्साशी᳚र्केण य॒ज्ञेन॑ यजते॒ य-ङ्का॒मये॑त॒ यज॑मान॒-म्भ्रातृ॑व्यमस्य य॒ज्ञस्या॒शीर्ग॑च्छे॒दिति॒ तस्यै॒ता व्याहृ॑तीः पुरोनुवा॒क्या॑या-न्दद्ध्या-द्भ्रातृव्यदेव॒त्या॑ वै पु॑रोनुवा॒क्या᳚ भ्रातृ॑व्यमे॒वास्य॑ य॒ज्ञस्या॒-[य॒ज्ञस्या॑, आ॒शीर्ग॑च्छति॒] 36

-ऽऽशीर्ग॑च्छति॒ यान् का॒मये॑त॒ यज॑मानान्-थ्स॒माव॑त्येनान् य॒ज्ञस्या॒ ऽऽशीर्ग॑च्छे॒दिति॒ तेषा॑मे॒ता व्याहृ॑तीः पुरोनुवा॒क्या॑या अर्ध॒र्च एका᳚-न्दद्ध्या-द्या॒ज्या॑यै पु॒रस्ता॒देकां᳚-याँ॒ज्या॑या अर्ध॒र्च एका॒-न्तथै॑नान्-थ्स॒माव॑ती य॒ज्ञस्या॒ ऽऽशीर्ग॑च्छति॒ यथा॒ वै प॒र्जन्य॒-स्सुवृ॑ष्टं॒-वँर्ष॑त्ये॒वं-यँ॒ज्ञो यज॑मानाय वर्षति॒ स्थल॑योद॒क-म्प॑रिगृ॒ह्णन्त्या॒शिषा॑ य॒ज्ञं-यँज॑मानः॒ परि॑ गृह्णाति॒ मनो॑-ऽसि प्राजाप॒त्यं- [प्राजाप॒त्यम्, मन॑सा] 37

-मन॑सा मा भू॒तेना-ऽऽवि॒शेत्या॑ह॒ मनो॒ वै प्रा॑जाप॒त्य-म्प्रा॑जाप॒त्यो य॒ज्ञो मन॑ ए॒व य॒ज्ञमा॒त्म-न्ध॑त्ते॒ वाग॑स्यै॒न्द्री स॑पत्न॒क्षय॑णी वा॒चा मे᳚न्द्रि॒येणा-ऽऽवि॒शेत्या॑है॒न्द्री वै वाग्वाच॑-मे॒वैन्द्री- मा॒त्म-न्ध॑त्ते ॥ 38 ॥

(तेनै॒-व ब्रह्म॑- रा॒ष्ट्रमे॒-वास्य॑ य॒ज्ञस्य॑-प्राजाप॒त्यग्ं-षट्त्रिग्ं॑शच्च) (अ. 10)

यो वै स॑प्तद॒श-म्प्र॒जाप॑तिं-यँ॒ज्ञम॒न्वाय॑त्तं॒-वेँद॒ प्रति॑ य॒ज्ञेन॑ तिष्ठति॒ न य॒ज्ञा-द्भ्रग्ं॑शत॒ आ श्रा॑व॒येति॒ चतु॑रक्षर॒मस्तु॒ श्रौष॒डिति॒ चतु॑रक्षरं॒-यँजेति॒ द्व्य॑क्षरं॒-येँ यजा॑मह॒ इति॒ पञ्चा᳚क्षर-न्द्व्यक्ष॒रो व॑षट्का॒र ए॒ष वै स॑प्तद॒शः प्र॒जाप॑ति-र्य॒ज्ञम॒न्वाय॑त्तो॒ य ए॒वं-वेँद॒ प्रति॑ य॒ज्ञेन॑ तिष्ठति॒ न य॒ज्ञाद्- भ्रग्ं॑शते॒ यो वै य॒ज्ञस्य॒ प्राय॑ण-म्प्रति॒ष्ठा- [प्रति॒ष्ठाम्, उ॒दय॑नं॒-वेँद॒] 39

मु॒दय॑नं॒-वेँद॒ प्रति॑ष्ठिते॒नारि॑ष्टेन य॒ज्ञेन॑ स॒ग्ग्॒स्था-ङ्ग॑च्छ॒त्याश्रा॑व॒यास्तु॒ श्रौष॒ड्यज॒ ये यजा॑महे वषट्का॒र ए॒तद्वै य॒ज्ञस्य॒ प्राय॑णमे॒षा प्र॑ति॒ष्ठैतदु॒दय॑नं॒-यँ ए॒वं-वेँद॒ प्रति॑ष्ठिते॒ना-ऽरि॑ष्टेन य॒ज्ञेन॑ स॒ग्ग्॒स्था-ङ्ग॑च्छति॒ यो वै सू॒नृता॑यै॒ दोहं॒-वेँद॑ दु॒ह ए॒वैनां᳚-यँ॒ज्ञो वै सू॒नृता ऽऽ श्रा॑व॒येत्यैवैना॑-मह्व॒दस्तु॒ [-मह्व॒दस्तु॑, श्रौष॒डित्यु॒पावा᳚स्रा॒-] 40

श्रौष॒डित्यु॒पावा᳚स्रा॒-ग्यजेत्युद॑नैषी॒द्ये यजा॑मह॒ इत्युपा॑-ऽसद-द्वषट्का॒रेण॑ दोग्द्ध्ये॒ष वै सू॒नृता॑यै॒ दोहो॒ य ए॒वं-वेँद॑ दु॒ह ए॒वैना᳚-न्दे॒वा वै स॒त्रमा॑सत॒ तेषा॒-न्दिशो॑-ऽदस्य॒न्त ए॒तामा॒र्द्रा-म्प॒ङ्क्तिम॑पश्य॒न्ना श्रा॑व॒येति॑ पुरोवा॒त-म॑जनय॒न्नस्तु॒ श्रौष॒डित्य॒भ्रग्ं सम॑प्लावय॒न्॒. यजेति॑ वि॒द्युत॑- [वि॒द्युत॑म्, अ॒ज॒न॒य॒न्॒ ये] 41

मजनय॒न्॒ ये यजा॑मह॒ इति॒ प्राव॑र्षयन्न॒भ्य॑स्तनयन् वषट्का॒रेण॒ ततो॒ वै तेभ्यो॒ दिशः॒ प्राप्या॑यन्त॒ य ए॒वं-वेँद॒ प्रास्मै॒ दिशः॑ प्यायन्ते प्र॒जाप॑ति-न्त्वो॒वेद॑ प्र॒जाप॑ति स्त्वंवेँद॒ य-म्प्र॒जाप॑ति॒-र्वेद॒ स पुण्यो॑ भवत्ये॒ष वै छ॑न्द॒स्यः॑ प्र॒जाप॑ति॒रा श्रा॑व॒या-ऽस्तु॒ श्रौष॒ड्यज॒ ये यजा॑महे वषट्का॒रो य ए॒वं-वेँद॒ पुण्यो॑ भवति वस॒न्त- [वस॒न्तम्, ऋ॒तू॒नां] 42

-मृ॑तू॒ना-म्प्री॑णा॒मीत्या॑ह॒र्तवो॒ वै प्र॑या॒जा ऋ॒तूने॒व प्री॑णाति॒ ते᳚-ऽस्मै प्री॒ता य॑थापू॒र्व-ङ्क॑ल्पन्ते॒ कल्प॑न्ते-ऽस्मा ऋ॒तवो॒ य ए॒वं-वेँदा॒ग्नीषोम॑योर॒ह-न्दे॑वय॒ज्यया॒ चक्षु॑ष्मा-न्भूयास॒मित्या॑-हा॒ग्नीषोमा᳚भ्यां॒-वैँ य॒ज्ञश्चक्षु॑ष्मा॒-न्ताभ्या॑मे॒व चक्षु॑रा॒त्म-न्ध॑त्ते॒ ऽग्नेर॒ह-न्दे॑वय॒ज्यया᳚-ऽन्ना॒दो भू॑यास॒मित्या॑हा॒ग्निर्वै दे॒वाना॑-मन्ना॒दस्ते नै॒वा- [मन्ना॒दस्ते नै॒वा, अ॒न्नाद्य॑मा॒त्मन्] 43

-ऽन्नाद्य॑मा॒त्म-न्ध॑त्ते॒ दब्धि॑र॒स्यद॑ब्धो भूयासम॒मु-न्द॑भेय॒मित्या॑है॒तया॒ वै दब्द्ध्या॑ दे॒वा असु॑रानदभ्नुव॒न्तयै॒व भ्रातृ॑व्य-न्दभ्नोत्य॒ग्नीषोम॑योर॒ह-न्दे॑वय॒ज्यया॑ वृत्र॒हा भू॑यास॒मित्या॑हा॒-ऽग्नीषोमा᳚भ्यां॒-वाँ इन्द्रो॑ वृ॒त्रम॑ह॒न्ताभ्या॑मे॒व भ्रातृ॑व्यग्ग् स्तृणुत इन्द्राग्नि॒योर॒ह-न्दे॑वय॒ज्यये᳚न्द्रिया॒व्य॑न्ना॒दो भू॑यास॒मित्या॑हेन्द्रिया॒व्ये॑वान्ना॒दो भ॑व॒तीन्द्र॑स्या॒- [भ॑व॒तीन्द्र॑स्य, अ॒ह-न्दे॑वय॒ज्यये᳚न्द्रिया॒वी] 44

-ऽह-न्दे॑वय॒ज्यये᳚न्द्रिया॒वी भू॑यास॒मित्या॑हेन्द्रिया॒व्ये॑व भ॑वति महे॒न्द्रस्या॒-ऽह-न्दे॑वय॒ज्यया॑ जे॒मान॑-म्महि॒मान॑-ङ्गमेय॒मित्या॑ह जे॒मान॑मे॒व म॑हि॒मान॑-ङ्गच्छत्य॒ग्ने-स्स्वि॑ष्ट॒कृतो॒-ऽह-न्दे॑वय॒ज्यया ऽऽयु॑ष्मान्. य॒ज्ञेन॑ प्रति॒ष्ठा-ङ्ग॑मेय॒मित्या॒-हायु॑रे॒वात्म-न्ध॑त्ते॒ प्रति॑ य॒ज्ञेन॑ -तिष्ठति ॥ 45 ॥

( प्र॒ति॒ष्ठा-म॑ह्व॒दस्तु॑-वि॒द्युतं॑वँस॒न्तन्-तेनै॒वे-न्द्र॑स्या॒-ऽष्टात्रिग्ं॑शच्च) (अ. 11)

इन्द्रं॑-वोँ वि॒श्वत॒स्परि॒ हवा॑महे॒ जने᳚भ्यः । अ॒स्माक॑मस्तु॒ केव॑लः ॥ इन्द्र॒-न्नरो॑ ने॒मधि॑ता हवन्ते॒ यत्पार्या॑ यु॒नज॑ते॒ धिय॒स्ताः । शूरो॒ नृषा॑ता॒ शव॑सश्चका॒न आ गोम॑ति व्र॒जे भ॑जा॒ त्वन्नः॑ ॥ इ॒न्द्रि॒याणि॑ शतक्रतो॒ या ते॒ जने॑षु प॒ञ्चसु॑ ॥ इन्द्र॒ तानि॑ त॒ आ वृ॑णे ॥ अनु॑ ते दायि म॒ह इ॑न्द्रि॒याय॑ स॒त्रा ते॒ विश्व॒मनु॑ वृत्र॒हत्ये᳚ । अनु॑ [ ] 46

क्ष॒त्रमनु॒ सहो॑ यज॒त्रेन्द्र॑ दे॒वेभि॒रनु॑ ते नृ॒षह्ये᳚ ॥ आयस्मि᳚न्-थ्स॒प्तवा॑स॒वा स्तिष्ठ॑न्ति स्वा॒रुहो॑ यथा । ऋषि॑र्ह दीर्घ॒श्रुत्त॑म॒ इन्द्र॑स्य घ॒र्मो अति॑थिः ॥ आ॒मासु॑ प॒क्वमैर॑य॒ आ सूर्यग्ं॑ रोहयो दि॒वि । घ॒र्म-न्न साम॑-न्तपता सुवृ॒क्तिभि॒-र्जुष्ट॒-ङ्गिर्व॑णसे॒ गिरः॑ ॥ इन्द्र॒मि-द्गा॒थिनो॑ बृ॒हदिन्द्र॑-म॒र्केभि॑-र॒र्किणः॑ । इन्द्रं॒-वाँणी॑रनूषत ॥ गाय॑न्ति त्वा गाय॒त्रिणो- [गाय॒त्रिणः॑, अर्च॑न्त्य॒र्क-म॒र्किणः॑ ।] 47

-ऽर्च॑न्त्य॒र्क-म॒र्किणः॑ । ब्र॒ह्माण॑स्त्वा शतक्रत॒वु-द्व॒ग्ं॒श-मि॑व येमिरे ॥ अ॒ग्ं॒हो॒मुचे॒ प्र भ॑रेमा मनी॒षामो॑षिष्ठ॒दावंने॑ सुम॒ति-ङ्गृ॑णा॒नाः । इ॒दमि॑न्द्र॒ प्रति॑ ह॒व्य-ङ्गृ॑भाय स॒त्या-स्स॑न्तु॒ यज॑मानस्य॒ कामाः᳚ ॥ वि॒वेष॒ यन्मा॑ धि॒षणा॑ ज॒जान॒ स्तवै॑ पु॒रा पार्या॒दिन्द्र॒-मह्नः॑ । अग्ंह॑सो॒ यत्र॑ पी॒पर॒द्यथा॑ नो ना॒वेव॒ यान्त॑ मु॒भये॑ हवन्ते ॥ प्र स॒म्राज॑-म्प्रथ॒म-म॑द्ध्व॒राणा॑- [म॑द्ध्व॒राणा᳚म्, अ॒ग्ं॒हो॒मुचं॑] 48

-मग्ंहो॒मुचं॑-वृँष॒भं-यँ॒ज्ञिया॑नाम् । अ॒पा-न्नपा॑तमश्विना॒ हय॑न्त-म॒स्मिन्न॑र इन्द्रि॒य-न्ध॑त्त॒मोजः॑ ॥ वि न॑ इन्द्र॒ मृधो॑ जहि नी॒चा य॑च्छ पृतन्य॒तः । अ॒ध॒स्प॒द-न्तमी᳚-ङ्कृधि॒ यो अ॒स्माग्ं अ॑भि॒दास॑ति ॥ इन्द्र॑ क्ष॒त्रम॒भि वा॒ममोजो ऽजा॑यथा वृषभ चर्षणी॒नाम् । अपा॑नुदो॒ जन॑-ममित्र॒यन्त॑-मु॒रु-न्दे॒वेभ्यो॑ अकृणो-रु लो॒कम् ॥ मृ॒गो न भी॒मः कु॑च॒रो गि॑रि॒ष्ठाः प॑रा॒वत [प॑रा॒वतः॑, आ ज॑गामा॒ पर॑स्याः ।] 49

आ ज॑गामा॒ पर॑स्याः । सृ॒कग्ं स॒ग्ं॒शाय॑ प॒विमि॑न्द्र ति॒ग्मं-विँ शत्रू᳚-न्ताढि॒ विमृधो॑ नुदस्व ॥ वि शत्रू॒न्॒. वि मृधो॑ नुद॒ विवृ॒त्रस्य॒ हनू॑ रुज । वि म॒न्युमि॑न्द्र भामि॒तो॑-ऽमित्र॑स्या-ऽभि॒दास॑तः ॥ त्रा॒तार॒-मिन्द्र॑-मवि॒तार॒-मिन्द्र॒ग्ं॒ हवे॑हवे सु॒हव॒ग्ं॒ शूर॒मिन्द्र᳚म् । हु॒वे नु श॒क्र-म्पु॑रुहू॒तमिन्द्रग्ग्॑ स्व॒स्ति नो॑ म॒घवा॑ धा॒त्विन्द्रः॑ ॥ मा ते॑ अ॒स्याग्ं [अ॒स्याग्ं, स॒ह॒सा॒व॒-न्परि॑ष्टाव॒घाय॑] 50

स॑हसाव॒-न्परि॑ष्टाव॒घाय॑ भूम हरिवः परा॒दै । त्राय॑स्व नो ऽवृ॒केभि॒-र्वरू॑थै॒-स्तव॑ प्रि॒यासः॑ सू॒रिषु॑ स्याम ॥ अन॑वस्ते॒ रथ॒मश्वा॑य तक्ष॒-न्त्वष्टा॒ वज्र॑-म्पुरुहूत द्यु॒मन्त᳚म् । ब्र॒ह्माण॒ इन्द्र॑-म्म॒हय॑न्तो अ॒र्कैरव॑र्धय॒न्नह॑ये॒ हन्त॒वा उ॑ ॥ वृष्णे॒ य-त्ते॒ वृष॑णो अ॒र्कमर्चा॒निन्द्र॒ ग्रावा॑णो॒ अदि॑ति-स्स॒जोषाः᳚ । अ॒न॒श्वासो॒ ये प॒वयो॑-ऽर॒था इन्द्रे॑षिता अ॒भ्यव॑र्त न्त॒ दस्यून्॑ ॥ 51 ॥

(वृ॒त्र॒हत्ये-ऽनु॑-गाय॒त्रिणो᳚-ऽद्ध॒राणां᳚-परा॒वतो॒-ऽस्या-म॒ष्टाच॑त्वारिग्ंशच्च) (अ. 12)

(सन्त्वा॑ सिञ्चामि-ध्रु॒वो᳚-ऽस्य॒ग्निर्मा॑-ब॒र्॒हिषो॒-ऽह-मा प्या॑यता॒-मग॑न्म॒-यथा॒ वै-यो वै श्र॒द्धां- प्र॒जाप॑ति॒-र्यज्ञान्-ध्रु॒वो॑-ऽसीत्या॑ह॒-यो वै स॑प्तद॒श-मिन्द्रं॑-वोँ॒-द्वाद॑श । )

(सन्त्वा॑-ब॒र्॒हिषो॒-ऽहंयँथा॒ वा-ए॒वं-विँ॒द्वा-ञ्छ्रौष॑ट्-थ्साहसाव॒-न्नेक॑पञ्चा॒शत् ।)

(सन्त्वा॑, सिञ्चामि॒ दस्यून्॑)

॥ हरिः॑ ओम् ॥

॥ कृष्ण यजुर्वेदीय तैत्तिरीय संहिताया-म्प्रथमकाण्डे षष्ठः प्रश्न-स्समाप्तः ॥