ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಕಾಠಕೇ ತೃತೀಯಃ ಪ್ರಶ್ನಃ - ವೈಶ್ವಸೃಜಚಯನಮ್
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಚಾತುರ್ಹೋತ್ರಚಯನಂ-ವೈಁಶ್ವಸೃಜಚಯನ-ಞ್ಚ
ಅನುವಾಕಂ 1 - ವೈಶ್ವಸೃಜಚಯನಾಙ್ಗಭೂತಾಃ ದಿವಶ್ಶ್ಯೇನಯ ಇಷ್ಟಯಃ
ತುಭ್ಯ॒-ನ್ತಾ ಅ॑ಙ್ಗಿರಸ್ತಮ॒ ವಿಶ್ವಾ᳚-ಸ್ಸುಕ್ಷಿ॒ತಯಃ॒ ಪೃಥ॑ಕ್ । ಅಗ್ನೇ॒ ಕಾಮಾ॑ಯ ಯೇಮಿರೇ ॥ ಅ॒ಶ್ಯಾಮ॒ ತ-ಙ್ಕಾಮ॑ಮಗ್ನೇ॒ ತವೋ॒ ತ್ಯ॑ಶ್ಯಾಮ॑ ರ॒ಯಿಗ್ಂ ರ॑ಯಿವ-ಸ್ಸು॒ವೀರ᳚ಮ್ । ಅ॒ಶ್ಯಾಮ॒ ವಾಜ॑ಮ॒ಭಿ ವಾ॒ಜಯ॑ನ್ತೋ॒ ಽಶ್ಯಾಮ॑ ದ್ಯು॒ಮ್ನಮ॑ಜರಾ॒ಜರ॑-ನ್ತೇ ॥ ।
ಆಶಾ॑ನಾ-ನ್ತ್ವಾ ಽಽಶಾಪಾ॒ಲೇಭ್ಯಃ॑ । ಚ॒ತುರ್ಭ್ಯೋ॑ ಅ॒ಮೃತೇ᳚ಭ್ಯಃ । ಇ॒ದ-ಮ್ಭೂ॒ತಸ್ಯಾಧ್ಯ॑ಕ್ಷೇಭ್ಯಃ । ವಿ॒ಧೇಮ॑ ಹ॒ವಿಷಾ॑ ವ॒ಯಮ್ ॥ ವಿಶ್ವಾ॒ ಆಶಾ॒ ಮಧು॑ನಾ॒ ಸಗ್ಂಸೃ॑ಜಾಮಿ । ಅ॒ನ॒ಮೀ॒ವಾ ಆಪ॒ ಓಷ॑ಧಯೋ ಭವನ್ತು । ಅ॒ಯಂ-ಯಁಜ॑ಮಾನೋ॒ ಮೃಧೋ॒ ವ್ಯ॑ಸ್ಯತಾಂ ಅಗೃ॑ಭೀತಾಃ ಪ॒ಶವಃ॑ ಸನ್ತು॒ ಸರ್ವೇ᳚ ॥ ।
ಅನು॑ ನೋ॒-ಽದ್ಯಾ-ಽನು॑ಮತಿರ್ಯ॒ಜ್ಞ-ನ್ದೇ॒ವೇಷು॑ ಮನ್ಯತಾಮ್ । ಅ॒ಗ್ನಿಶ್ಚ॑ ಹವ್ಯ॒ವಾಹ॑ನೋ॒ ಭವ॑ತಾ-ನ್ದಾ॒ಶುಷೇ॒ ಮಯಃ॑ ॥ ಅನ್ವಿದ॑ನುಮತೇ॒ ತ್ವ-ಮ್ಮನ್ಯಾ॑ಸೈ॒ ಶಞ್ಚ॑ನಃ ಕೃಧಿ । ಕ್ರತ್ವೇ॒ ದಕ್ಷಾ॑ಯ ನೋ ಹಿನು॒ ಪ್ರಣ॒ ಆಯೂಗ್ಂ॑ಷಿ ತಾರಿಷಃ ॥ ।
ಕಾಮೋ॑ ಭೂ॒ತಸ್ಯ॒ ಭವ್ಯ॑ಸ್ಯ । ಸ॒ಮ್ರಾಡೇಕೋ॒ ವಿರಾ॑ಜತಿ । ಸ ಇ॒ದ-ಮ್ಪ್ರತಿ॑ ಪಪ್ರಥೇ । ಋ॒ತೂನು-ಥ್ಸೃ॑ಜತೇ ವ॒ಶೀ ॥ ಕಾಮ॒ಸ್ತದಗ್ರೇ॒ ಸಮ॑ವರ್ತ॒ತಾಧಿ॑ । ಮನ॑ಸೋ॒ ರೇತಃ॑ ಪ್ರಥ॒ಮಂ-ಯಁದಾಸೀ᳚ತ್ । ಸ॒ತೋ ಬನ್ಧು॒ಮಸ॑ತಿ॒ ನಿರ॑ವಿನ್ದನ್ನ್ । ಹೃ॒ದಿ ಪ್ರ॒ತೀಷ್ಯಾ॑ ಕ॒ವಯೋ॑ ಮನೀ॒ಷಾ ॥ ।
ಬ್ರಹ್ಮ॑ ಜಜ್ಞಾ॒ನ-ಮ್ಪ್ರ॑ಥ॒ಮ-ಮ್ಪು॒ರಸ್ತಾ॒ದ್ವಿ ಸೀ॑ಮ॒ತ-ಸ್ಸು॒ರುಚೋ॑ ವೇ॒ನ ಆ॑ವಃ । ಸ ಬು॒ಧ್ನಿಯಾ॑ ಉಪ॒ಮಾ ಅ॑ಸ್ಯ ವಿ॒ಷ್ಠಾ-ಸ್ಸ॒ತಶ್ಚ॒ ಯೋನಿ॒ಮಸ॑ತಶ್ಚ॒ ವಿವಃ॑ ॥ ಪಿ॒ತಾ ವಿ॒ರಾಜಾ॑ಮೃಷ॒ಭೋ ರ॑ಯೀ॒ಣಾಮ್ । ಅ॒ನ್ತರಿ॑ಕ್ಷಂ-ವಿಁ॒ಶ್ವರೂ॑ಪ॒ ಆವಿ॑ವೇಶ । ತಮ॒ರ್ಕೈ-ರ॒ಭ್ಯ॑ರ್ಚನ್ತಿ ವ॒ಥ್ಸಮ್ । ಬ್ರಹ್ಮ॒ ಸನ್ತ॒-ಮ್ಬ್ರಹ್ಮ॑ಣಾ ವ॒ರ್ಧಯ॑ನ್ತಃ ॥ ।
ಯ॒ಜ್ಞೋ ರಾ॒ಯೋ ಯ॒ಜ್ಞ ಈ॑ಶೇ॒ ವಸೂ॑ನಾಮ್ । ಯ॒ಜ್ಞ-ಸ್ಸ॒ಸ್ಯಾನಾ॑ಮು॒ತ ಸು॑ಕ್ಷಿತೀ॒ನಾಮ್ । ಯ॒ಜ್ಞ ಇ॒ಷ್ಟಃ ಪೂ॒ರ್ವಚಿ॑ತ್ತಿ-ನ್ದಧಾತು । ಯ॒ಜ್ಞೋ ಬ್ರ॑ಹ್ಮ॒ಣ್ವಾಗ್ಂ ಅಪ್ಯೇ॑ತು ದೇ॒ವಾನ್ ॥ ಅ॒ಯಂ-ಯಁ॒ಜ್ಞೋ ವ॑ರ್ಧತಾ॒-ಙ್ಗೋಭಿ॒ರಶ್ವೈಃ᳚ । ಇ॒ಯಂ-ವೇಁದಿಃ॑ ಸ್ವಪ॒ತ್ಯಾ ಸು॒ವೀರಾ᳚ । ಇ॒ದ-ಮ್ಬ॒ರ್॒ಹಿರತಿ॑ ಬ॒ರ್॒ಹೀಗ್ಷ್ಯ॒ನ್ಯಾ । ಇ॒ಮಂ-ಯಁ॒ಜ್ಞಂ-ವಿಁಶ್ವೇ॑ ಅವನ್ತು ದೇ॒ವಾಃ ॥ । ಆಪೋ॑ ಭ॒ದ್ರಾ ಘೃ॒ತಮಿದಾಪ॑ ಆಸುರ॒ಗ್ನೀ-ಷೋಮೌ॑ ಬಿಭ್ರ॒ತ್ಯಾಪ॒ ಇ-ತ್ತಾಃ । ತೀ॒ವ್ರೋ ರಸೋ॑ ಮಧು॒ಪೃಚಾ॑ ಮರಙ್ಗ॒ಮ ಆ ಮಾ᳚ ಪ್ರಾ॒ಣೇನ॑ ಸ॒ಹ ವರ್ಚ॑ಸಾ ಗನ್ನ್ ॥ ಆದಿ-ತ್ಪ॑ಶ್ಯಾಮ್ಯು॒ತ ವಾ॑ ಶೃಣೋ॒ಮ್ಯಾ ಮಾ॒ ಘೋಷೋ॑ ಗಚ್ಛತಿ॒ ವಾನ್ನ॑ ಆಸಾಮ್ । ಮನ್ಯೇ॑ ಭೇಜಾ॒ನೋ ಅ॒ಮೃತ॑ಸ್ಯ॒ ತರ್ಹಿ॒ ಹಿರ॑ಣ್ಯವರ್ಣಾ॒ ಅತೃ॑ಪಂ-ಯಁ॒ದಾ ವಃ॑ ॥ ।
ತುಭ್ಯ॑-ಮ್ಭರನ್ತಿ ಕ್ಷಿ॒ತಯೋ॑ ಯವಿಷ್ಠ । ಬ॒ಲಿಮ॑ಗ್ನೇ॒ ಅನ್ತಿ॑ ತ॒ ಓತ ದೂ॒ರಾತ್ । ಆ ಭನ್ದಿ॑ಷ್ಠಸ್ಯ ಸುಮ॒ತಿ-ಞ್ಚಿ॑ಕಿದ್ಧಿ । ಬೃ॒ಹತ್ತೇ॑ ಅಗ್ನೇ॒ ಮಹಿ॒ ಶರ್ಮ॑ ಭ॒ದ್ರಮ್ ॥ ಯೋ ದೇ॒ಹ್ಯೋ ಅನ॑ಮಯದ್ವಧ॒ಸ್ನೈಃ । ಯೋ ಅರ್ಯ॑ಪತ್ನೀ-ರು॒ಷಸ॑ಶ್ಚ॒ಕಾರ॑ । ಸ ನಿ॒ರುಧ್ಯಾ॒ ನಹು॑ಷೋ ಯ॒ಹ್ವೋ ಅ॒ಗ್ನಿಃ । ವಿಶ॑ಶ್ಚಕ್ರೇ ಬಲಿ॒ಹೃತ॒-ಸ್ಸಹೋ॑ಭಿಃ ॥ ।
ಪೂರ್ವ॑-ನ್ದೇವಾ॒ ಅಪ॑ರೇಣಾ-ನು॒ಪಶ್ಯ॒ಞ್ಜನ್ಮ॑ಭಿಃ । ಜನ್ಮಾ॒ನ್ಯವ॑ರೈಃ॒ ಪರಾ॑ಣಿ । ವೇದಾ॑ನಿ ದೇವಾ ಅ॒ಯಮ॒ಸ್ಮೀತಿ॒ ಮಾಮ್ । ಅ॒ಹಗ್ಂ ಹಿ॒ತ್ವಾ ಶರೀ॑ರ-ಞ್ಜ॒ರಸಃ॑ ಪ॒ರಸ್ತಾ᳚ತ್ ॥ ಪ್ರಾ॒ಣಾ॒ಪಾ॒ನೌ ಚಕ್ಷು॒-ಶ್ಶ್ರೋತ್ರ᳚ಮ್ । ವಾಚ॒-ಮ್ಮನ॑ಸಿ॒ ಸಮ್ಭೃ॑ತಾಮ್ । ಹಿ॒ತ್ವಾ ಶರೀ॑ರ-ಞ್ಜ॒ರಸಃ॑ ಪ॒ರಸ್ತಾ᳚ತ್ । ಆ ಭೂತಿ॒-ಮ್ಭೂತಿಂ॑-ವಁ॒ಯಮ॑ಶ್ನವಾಮಹೈ ॥ ।
ಹ॒ವ್ಯ॒ವಾಹ॑-ಮಭಿಮಾತಿ॒ಷಾ-ಽಹ᳚ಮ್ । ರ॒ಕ್ಷೋ॒ಹಣ॒-ಮ್ಪೃತ॑ನಾಸು ಜಿ॒ಷ್ಣುಮ್ । ಜ್ಯೋತಿ॑ಷ್ಮನ್ತ॒-ನ್ದೀದ್ಯ॑ತ॒-ಮ್ಪುರ॑ನ್ಧಿಮ್ । ಅ॒ಗ್ನಿಗ್ಗ್ ಸ್ವಿ॑ಷ್ಟ॒ಕೃತ॒ಮಾ ಹು॑ವೇಮ ॥ ಸ್ವಿ॑ಷ್ಟಮಗ್ನೇ ಅ॒ಭಿ ತ-ತ್ಪೃ॑ಣಾಹಿ । ವಿಶ್ವಾ॑ ದೇವ॒ ಪೃತ॑ನಾ ಅ॒ಭಿಷ್ಯ । ಉ॒ರು-ನ್ನಃ॒ ಪನ್ಥಾ᳚-ಮ್ಪ್ರದಿ॒ಶನ್ವಿ ಭಾ॑ಹಿ । ಜ್ಯೋತಿ॑ಷ್ಮದ್ಧೇಹ್ಯ॒ಜರ॑-ನ್ನ॒ ಆಯುಃ॑ ॥ ॥ 1 ॥
ತುಭ್ಯ॒-ನ್ದಶ॑ (ಅ. 1)
ಅನುವಾಕಂ 2 - ತಾಸಾ-ಮ್ಬ್ರಾಹ್ಮಣಮ್
ದೇ॒ವೇಭ್ಯೋ॒ ವೈ ಸ್ವ॒ರ್ಗೋ ಲೋ॒ಕಸ್ತಿ॒ರೋ॑-ಽಭವತ್ ।
ತೇ ಪ್ರ॒ಜಾಪ॑ತಿ-ಮಬ್ರುವನ್ನ್ ।
ಪ್ರಜಾ॑ಪತೇ ಸ್ವ॒ರ್ಗೋ ವೈ ನೋ॑ ಲೋ॒ಕಸ್ತಿ॒ರೋ॑-ಽಭೂತ್ । ತಮನ್ವಿ॒ಚ್ಛೇತಿ॑ । ತಂ-ಯಁ॑ಜ್ಞಕ್ರ॒ತುಭಿ॒-ರನ್ವೈ᳚ಚ್ಛತ್ । ತಂ-ಯಁ॑ಜ್ಞಕ್ರ॒ತುಭಿ॒-ರ್ನಾನ್ವ॑ವಿನ್ದತ್ ।
ತಮಿಷ್ಟಿ॑ಭಿ॒-ರನ್ವೈ᳚ಚ್ಛತ್ । ತಮಿಷ್ಟಿ॑ಭಿ॒-ರನ್ವ॑ವಿನ್ದತ್ ।
ತದಿಷ್ಟೀ॑ನಾ-ಮಿಷ್ಟಿ॒ತ್ವಮ್ । ಏಷ್ಟ॑ಯೋ ಹ॒ವೈ ನಾಮ॑ ।
ತಾ ಇಷ್ಟ॑ಯ॒ ಇತ್ಯಾಚ॑ಕ್ಷತೇ ಪ॒ರೋಕ್ಷೇ॑ಣ । ಪ॒ರೋಕ್ಷ॑ ಪ್ರಿಯಾ ಇವ॒ ಹಿ ದೇ॒ವಾಃ ॥ 2 ॥
ತಮಾಶಾ᳚-ಽಬ್ರವೀತ್ । ಪ್ರಜಾ॑ಪತ ಆ॒ಶಯಾ॒ ವೈ ಶ್ರಾ᳚ಮ್ಯಸಿ ।
ಅ॒ಹಮು॒ ವಾ ಆಶಾ᳚-ಽಸ್ಮಿ । ಮಾ-ನ್ನು ಯ॑ಜಸ್ವ ।
ಅಥ॑ ತೇ ಸ॒ತ್ಯಾ-ಽಽಶಾ॑ ಭವಿಷ್ಯತಿ । ಅನು॑ ಸ್ವ॒ರ್ಗಂ-ಲೋಁ॒ಕಂ-ವೇಁ॒ಥ್ಸ್ಯಸೀತಿ॑ । ಸ ಏ॒ತಮ॒ಗ್ನಯೇ॒ ಕಾಮಾ॑ಯ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ॑ವಪತ್ ।
ಆ॒ಶಾಯೈ॑ ಚ॒ರುಮ್ । ಅನು॑ಮತ್ಯೈ ಚ॒ರುಮ್ । ತತೋ॒ ವೈ ತಸ್ಯ॑ ಸ॒ತ್ಯಾ-ಽಽಶಾ॑ ಽಭವತ್ । ಅನು॑ ಸ್ವ॒ರ್ಗಂ-ಲೋಁ॒ಕ-ಮ॑ವಿನ್ದತ್ । ಸ॒ತ್ಯಾ ಹ॒ ವಾ ಅ॒ಸ್ಯಾಶಾ॑ ಭವತಿ ।
ಅನು॑ ಸ್ವ॒ರ್ಗಂ-ಲೋಁ॒ಕಂ-ವಿಁ॑ನ್ದತಿ । ಯ ಏ॒ತೇನ॑ ಹ॒ವಿಷಾ॒ ಯಜ॑ತೇ । ಯ ಉ॑ ಚೈನದೇ॒ವಂ-ವೇಁದ॑ ॥ ಸೋ-ಽತ್ರ॑ ಜುಹೋತಿ । ಅ॒ಗ್ನಯೇ॒ ಕಾಮಾ॑ಯ॒ ಸ್ವಾಹಾ॒-ಽಽಶಾಯೈ॒ ಸ್ವಾಹಾ᳚ । ಅನು॑ಮತ್ಯೈ॒ ಸ್ವಾಹಾ᳚ ಪ್ರ॒ಜಾಪ॑ತಯೇ॒ ಸ್ವಾಹಾ᳚ ।
ಸ್ವ॒ರ್ಗಾಯ॑ ಲೋ॒ಕಾಯ॒ ಸ್ವಾಹಾ॒-ಽಗ್ನಯೇ᳚ ಸ್ವಿಷ್ಟ॒ಕೃತೇ॒ ಸ್ವಾಹೇತಿ॑ ॥ 3 ॥
ತ-ಙ್ಕಾಮೋ᳚-ಽಬ್ರವೀತ್ । ಪ್ರಜಾ॑ಪತೇ॒ ಕಾಮೇ॑ನ॒ ವೈ ಶ್ರಾ᳚ಮ್ಯಸಿ । ಅ॒ಹಮು॒ವೈ ಕಾಮೋ᳚-ಽಸ್ಮಿ । ಮಾ-ನ್ನು ಯ॑ಜಸ್ವ । ಅಥ॑ ತೇ ಸ॒ತ್ಯಃ ಕಾಮೋ॑ ಭವಿಷ್ಯತಿ । ಅನು॑ ಸ್ವ॒ರ್ಗಂ-ಲೋಁ॒ಕಂ-ವೇಁ॒ಥ್ಸ್ಯಸೀತಿ॑ । ಸ ಏ॒ತಮ॒ಗ್ನಯೇ॒ ಕಾಮಾ॑ಯ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ॑ವಪತ್ । ಕಾಮಾ॑ಯ ಚ॒ರುಮ್ । ಅನು॑ಮತ್ಯೈ ಚ॒ರುಮ್ ।
ತತೋ॒ ವೈ ತಸ್ಯ॑ ಸ॒ತ್ಯಃ ಕಾಮೋ॑-ಽಭವತ್ ।
ಅನು॑ ಸ್ವ॒ರ್ಗಂ-ಲೋಁ॒ಕಮ॑ವಿನ್ದತ್ ।
ಸ॒ತ್ಯೋ ಹ॒ ವಾ ಅ॑ಸ್ಯ॒ ಕಾಮೋ॑ ಭವತಿ ।
ಅನು॑ ಸ್ವ॒ರ್ಗಂ-ಲೋಁ॒ಕಂ-ವಿಁ॑ನ್ದತಿ ।
ಯ ಏ॒ತೇನ॑ ಹ॒ವಿಷಾ॒ ಯಜ॑ತೇ ।
ಯ ಉ॑ ಚೈನದೇ॒ವಂ-ವೇಁದ॑ । ಸೋ-ಽತ್ರ॑ ಜುಹೋತಿ ।
ಅ॒ಗ್ನಯೇ॒ ಕಾಮಾ॑ಯ॒ ಸ್ವಾಹಾ॒ ಕಾಮಾ॑ಯ॒ ಸ್ವಾಹಾ᳚ ।
ಅನು॑ಮತ್ಯೈ॒ ಸ್ವಾಹಾ᳚ ಪ್ರ॒ಜಾಪ॑ತಯೇ॒ ಸ್ವಾಹಾ᳚ ।
ಸ್ವ॒ರ್ಗಾಯ॑ ಲೋ॒ಕಾಯ॒ ಸ್ವಾಹಾ॒-ಽಗ್ನಯೇ᳚ ಸ್ವಿಷ್ಟ॒ಕೃತೇ॒ ಸ್ವಾಹೇತಿ॑ ॥ 4 ॥
ತ-ಮ್ಬ್ರಹ್ಮಾ᳚-ಽಬ್ರವೀತ್ । ಪ್ರಜಾ॑ಪತೇ॒ ಬ್ರಹ್ಮ॑ಣಾ॒ ವೈಶ್ರಾ᳚ಮ್ಯಸಿ । ಅ॒ಹಮು॒ ವೈ ಬ್ರಹ್ಮಾ᳚-ಽಸ್ಮಿ ।
ಮಾ-ನ್ನು ಯ॑ಜಸ್ವ । ಅಥ॑ ತೇ ಬ್ರಹ್ಮ॒ಣ್ವಾನ್. ಯ॒ಜ್ಞೋ ಭ॑ವಿಷ್ಯತಿ । ಅನು॑ ಸ್ವ॒ರ್ಗಂ-ಲೋಁ॒ಕಂ-ವೇಁ॒ಥ್ಸ್ಯಸೀತಿ॑ । ಸ ಏ॒ತಮ॒ಗ್ನಯೇ॒ ಕಾಮಾ॑ಯ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ॑ವಪತ್ । ಬ್ರಹ್ಮ॑ಣೇ ಚ॒ರುಮ್ । ಅನು॑ಮತ್ಯೈ ಚ॒ರುಮ್ । ತತೋ॒ ವೈ ತಸ್ಯ॑ ಬ್ರಹ್ಮ॒ಣ್ವಾನ್. ಯ॒ಜ್ಞೋ॑-ಽಭವತ್ । ಅನು॑ ಸ್ವ॒ರ್ಗಂ-ಲೋಁ॒ಕಮ॑ವಿನ್ದತ್ । ಬ್ರ॒ಹ್ಮ॒ಣ್ವಾನ್. ಹ॒ ವಾ ಅ॑ಸ್ಯ ಯ॒ಜ್ಞೋ ಭ॑ವತಿ ।
ಅನು॑ ಸ್ವ॒ರ್ಗಂ-ಲೋಁ॒ಕಂ-ವಿಁ॑ನ್ದತಿ । ಯ ಏ॒ತೇನ॑ ಹ॒ವಿಷಾ॒ ಯಜ॑ತೇ । ಯ ಉ॑ಚೈನದೇ॒ವಂ-ವೇಁದ॑ । ಸೋ-ಽತ್ರ॑ ಜುಹೋತಿ । ಅ॒ಗ್ನಯೇ॒ ಕಾಮಾ॑ಯ॒ ಸ್ವಾಹಾ॒ ಬ್ರಹ್ಮ॑ಣೇ॒ ಸ್ವಾಹಾ᳚ । ಅನು॑ಮತ್ಯೈ॒ ಸ್ವಾಹಾ᳚ ಪ್ರ॒ಜಾಪ॑ತಯೇ॒ ಸ್ವಾಹಾ᳚ । ಸ್ವ॒ರ್ಗಾಯ॑ ಲೋ॒ಕಾಯ॒ ಸ್ವಾಹಾ॒ ಽಗ್ನಯೇ᳚ ಸ್ವಿಷ್ಟ॒ಕೃತೇ॒ ಸ್ವಾಹೇತಿ॑ ॥ 5 ॥
ತಂ-ಯಁ॒ಜ್ಞೋ᳚-ಽಬ್ರವೀತ್ । ಪ್ರಜಾ॑ಪತೇ ಯ॒ಜ್ಞೇನ॒ ವೈ ಶ್ರಾ᳚ಮ್ಯಸಿ । ಅ॒ಹಮು॒ ವೈ ಯ॒ಜ್ಞೋ᳚-ಽಸ್ಮಿ ।
ಮಾ-ನ್ನು ಯ॑ಜಸ್ವ । ಅಥ॑ ತೇ ಸ॒ತ್ಯೋ ಯ॒ಜ್ಞೋ ಭ॑ವಷ್ಯತಿ । ಅನು॑ ಸ್ವ॒ರ್ಗಂ-ಲೋಁ॒ಕಂ-ವೇಁ॒ಥ್ಸ್ಯಸೀತಿ॑ ।
ಸ ಏ॒ತಮ॒ಗ್ನಯೇ॒ ಕಾಮಾ॑ಯ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ॑ವಪತ್ । ಯ॒ಜ್ಞಾಯ॑ ಚ॒ರುಮ್ । ಅನು॑ಮತ್ಯೈ ಚ॒ರುಮ್ । ತತೋ॒ ವೈ ತಸ್ಯ॑ ಸ॒ತ್ಯೋ ಯ॒ಜ್ಞೋ॑-ಽಭವತ್ । ಅನು॑ ಸ್ವ॒ರ್ಗಂ-ಲೋಁ॒ಕಮ॑ವಿನ್ದತ್ । ಸ॒ತ್ಯೋ ಹ॒ ವಾ ಅ॑ಸ್ಯ ಯ॒ಜ್ಞೋ ಭ॑ವತಿ ।
ಅನು॑ ಸ್ವ॒ರ್ಗಂ-ಲೋಁ॒ಕಂ-ವಿಁ॑ನ್ದತಿ ।
ಯ ಏ॒ತೇನ॑ ಹ॒ವಿಷಾ॒ ಯಜ॑ತೇ ।
ಯ ಉ॑ಚೈನದೇ॒ವಂ-ವೇಁದ॑ । ಸೋ-ಽತ್ರ॑ ಜುಹೋತಿ ।
ಅ॒ಗ್ನಯೇ॒ ಕಾಮಾ॑ಯ॒ ಸ್ವಾಹಾ॑ ಯ॒ಜ್ಞಾಯ॒ ಸ್ವಾಹಾ᳚ ।
ಅನು॑ಮತ್ಯೈ॒ ಸ್ವಾಹಾ᳚ ಪ್ರ॒ಜಾಪ॑ತಯೇ॒ ಸ್ವಾಹಾ᳚ ।
ಸ್ವ॒ರ್ಗಾಯ॑ ಲೋ॒ಕಾಯ॒ ಸ್ವಾಹಾ॒-ಽಗ್ನಯೇ᳚ ಸ್ವಿಷ್ಟ॒ಕೃತೇ॒ ಸ್ವಾಹೇತಿ॑ ॥ 6 ॥
ತಮಾಪೋ᳚-ಽಬ್ರುವನ್ನ್ । ಪ್ರಜಾ॑ಪತೇ॒-ಽಫ್ಸು ವೈ ಸರ್ವೇ॒ ಕಾಮಾ᳚-ಶ್ಶ್ರಿ॒ತಾಃ । ವ॒ಯಮು॒ ವಾ ಆಪ॑ಸ್ಸ್ಮಃ । ಅ॒ಸ್ಮಾನ್ನು ಯ॑ಜಸ್ವ । ಅಥ॒ ತ್ವಯಿ॒ ಸರ್ವೇ॒ ಕಾಮಾ᳚-ಶ್ಶ್ರಯಿಷ್ಯನ್ತೇ । ಅನು॑ ಸ್ವ॒ರ್ಗಂ-ಲೋಁ॒ಕಂ-ವೇಁ॒ಥ್ಸ್ಯಸೀತಿ॑ ।
ಸ ಏ॒ತಮ॒ಗ್ನಯೇ॒ ಕಾಮಾ॑ಯ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ॑ವಪತ್ । ಅ॒ದ್ಭ್ಯಶ್ಚ॒ರುಮ್ ।
ಅನು॑ಮತ್ಯೈ ಚ॒ರುಮ್ । ತತೋ॒ ವೈ ತಸ್ಮಿ॒ನ್-ಥ್ಸರ್ವೇ॒ ಕಾಮಾ॑ ಅಶ್ರಯನ್ತ । ಅನು॑ ಸ್ವ॒ರ್ಗಂ-ಲೋಁ॒ಕಮ॑ವಿನ್ದತ್ । ಸರ್ವೇ॑ ಹ॒ ವಾ ಅ॑ಸ್ಮಿ॒ನ್ ಕಾಮಾ᳚-ಶ್ಶ್ರಯನ್ತೇ । ಅನು॑ ಸ್ವ॒ರ್ಗಂ-ಲೋಁ॒ಕಂ-ವಿಁ॑ನ್ದತಿ । ಯ ಏ॒ತೇನ॑ ಹ॒ವಿಷಾ॒ ಯಜ॑ತೇ ।
ಯ ಉ॑ಚೈನದೇ॒ವಂ-ವೇಁದ॑ । ಸೋ-ಽತ್ರ॑ ಜುಹೋತಿ ।
ಅ॒ಗ್ನಯೇ॒ ಕಾಮಾ॑ಯ॒ ಸ್ವಾಹಾ॒ ಽದ್ಭ್ಯ-ಸ್ಸ್ವಾಹಾ᳚ ।
ಅನು॑ಮತ್ಯೈ॒ ಸ್ವಾಹಾ᳚ ಪ್ರ॒ಜಾಪ॑ತಯೇ॒ ಸ್ವಾಹಾ᳚ ।
ಸ್ವ॒ರ್ಗಾಯ॑ ಲೋ॒ಕಾಯ॒ ಸ್ವಾಹಾ॒-ಽಗ್ನಯೇ᳚ ಸ್ವಿಷ್ಟ॒ಕೃತೇ॒ ಸ್ವಾಹೇತಿ॑ ॥ 7 ॥
ತಮ॒ಗ್ನಿ ರ್ಬ॑ಲಿ॒ಮಾನ॑ಬ್ರವೀತ್ ।
ಪ್ರಜಾ॑ಪತೇ॒ ಽಗ್ನಯೇ॒ ವೈ ಬ॑ಲಿ॒ಮತೇ॒ ಸರ್ವಾ॑ಣಿ ಭೂ॒ತಾನಿ॑ ಬ॒ಲಿಗ್ಂ ಹ॑ರನ್ತಿ । ಅ॒ಹಮು॒ ವಾ ಅ॒ಗ್ನಿ ರ್ಬ॑ಲಿ॒ಮಾನ॑ಸ್ಮಿ । ಮಾ-ನ್ನು ಯ॑ಜಸ್ವ ।
ಅಥ॑ ತೇ॒ ಸರ್ವಾ॑ಣಿ ಭೂ॒ತಾನಿ॑ ಬ॒ಲಿಗ್ಂ ಹ॑ರಿಷ್ಯನ್ತಿ ।
ಅನು॑ ಸ್ವ॒ರ್ಗಂ-ಲೋಁ॒ಕಂ-ವೇಁ॒ಥ್ಸ್ಯಸೀತಿ॑ ।
ಸ ಏ॒ತಮ॒ಗ್ನಯೇ॒ ಕಾಮಾ॑ಯ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ॑ವಪತ್ । ಅ॒ಗ್ನಯೇ॑ ಬಲಿ॒ಮತೇ॑ ಚ॒ರುಮ್ । ಅನು॑ಮತ್ಯೈ ಚ॒ರುಮ್ । ತತೋ॒ ವೈ ತಸ್ಮೈ॒ ಸರ್ವಾ॑ಣಿ ಭೂ॒ತಾನಿ॑ ಬ॒ಲಿ-ಮ॑ಹರನ್ನ್ । ಅನು॑ ಸ್ವ॒ರ್ಗಂ-ಲೋಁ॒ಕಮ॑ವಿನ್ದತ್ । ಸರ್ವಾ॑ಣಿ ಹ॒ ವಾ ಅ॑ಸ್ಮೈ ಭೂ॒ತಾನಿ॑ ಬ॒ಲಿಗ್ಂ ಹ॑ರನ್ತಿ । ಅನು॑ ಸ್ವ॒ರ್ಗಂ-ಲೋಁ॒ಕಂ-ವಿಁ॑ನ್ದತಿ । ಯ ಏ॒ತೇನ॑ ಹ॒ವಿಷಾ॒ ಯಜ॑ತೇ ।
ಯ ಉ॑ಚೈನದೇ॒ವಂ-ವೇಁದ॑ । ಸೋ-ಽತ್ರ॑ ಜುಹೋತಿ ।
ಅ॒ಗ್ನಯೇ॒ ಕಾಮಾ॑ಯ॒ ಸ್ವಾಹಾ॒ ಽಗ್ನಯೇ॑ ಬಲಿ॒ಮತೇ॒ ಸ್ವಾಹಾ᳚ । ಅನು॑ಮತ್ಯೈ॒ ಸ್ವಾಹಾ᳚ ಪ್ರ॒ಜಾಪ॑ತಯೇ॒ ಸ್ವಾಹಾ᳚ ।
ಸ್ವ॒ರ್ಗಾಯ॑ ಲೋ॒ಕಾಯ॒ ಸ್ವಾಹಾ॒-ಽಗ್ನಯೇ᳚ ಸ್ವಿಷ್ಟ॒ಕೃತೇ॒ ಸ್ವಾಹೇತಿ॑ ॥ 8 ॥
ತಮನು॑ವಿತ್ತಿರ-ಬ್ರವೀತ್ । ಪ್ರಜಾ॑ಪತೇ ಸ್ವ॒ರ್ಗಂ-ವೈಁ ಲೋ॒ಕಮನು॑-ವಿವಿಥ್ಸಸಿ । ಅ॒ಹಮು॒ ವಾ ಅನು॑ವಿತ್ತಿರಸ್ಮಿ । ಮಾ-ನ್ನು ಯ॑ಜಸ್ವ । ಅಥ॑ ತೇ ಸ॒ತ್ಯಾ ಽನು॑ವಿತ್ತಿ-ರ್ಭವಿಷ್ಯತಿ । ಅನು॑ ಸ್ವ॒ರ್ಗಂ-ಲೋಁ॒ಕಂ-ವೇಁ॒ಥ್ಸ್ಯಸೀತಿ॑ ।
ಸ ಏ॒ತಮ॒ಗ್ನಯೇ॒ ಕಾಮಾ॑ಯ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ॑ವಪತ್ ।
ಅನು॑ವಿತ್ತ್ಯೈ ಚ॒ರುಮ್ । ಅನು॑ಮತ್ಯೈ ಚ॒ರುಮ್ ।
ತತೋ॒ ವೈ ತಸ್ಯ॑ ಸ॒ತ್ಯಾ ಽನು॑ವಿತ್ತಿರಭವತ್ ।
ಅನು॑ ಸ್ವ॒ರ್ಗಂ-ಲೋಁ॒ಕ-ಮ॑ವಿನ್ದತ್ ।
ಸ॒ತ್ಯಾ ಹ॒ ವಾ ಅ॒ಸ್ಯಾನು॑ವಿತ್ತಿ-ರ್ಭವತಿ ।
ಅನು॑ ಸ್ವ॒ರ್ಗಂ-ಲೋಁ॒ಕಂ-ವಿಁ॑ನ್ದತಿ ।
ಯ ಏ॒ತೇನ॑ ಹ॒ವಿಷಾ॒ ಯಜ॑ತೇ ।
ಯ ಉ॑ಚೈನದೇ॒ವಂ-ವೇಁದ॑ । ಸೋ-ಽತ್ರ॑ ಜುಹೋತಿ ।
ಅ॒ಗ್ನಯೇ॒ ಕಾಮಾ॑ಯ॒ ಸ್ವಾಹಾ-ಽನು॑ವಿತ್ತ್ಯೈ॒ ಸ್ವಾಹಾ᳚ ।
ಅನು॑ಮತ್ಯೈ॒ ಸ್ವಾಹಾ᳚ ಪ್ರ॒ಜಾಪ॑ತಯೇ॒ ಸ್ವಾಹಾ᳚ ।
ಸ್ವ॒ರ್ಗಾಯ॑ ಲೋ॒ಕಾಯ॒ ಸ್ವಾಹಾ॒-ಽಗ್ನಯೇ᳚ ಸ್ವಿಷ್ಟ॒ಕೃತೇ॒ ಸ್ವಾಹೇತಿ॑ ॥ 9 ॥
ತಾ ವಾ ಏ॒ತಾ-ಸ್ಸ॒ಪ್ತ ಸ್ವ॒ರ್ಗಸ್ಯ॑ ಲೋ॒ಕಸ್ಯ॒ ದ್ವಾರಃ॑ ।
ದಿ॒ವ-ಶ್ಶ್ಯೇ॑ನ॒ಯೋ ಽನು॑ವಿತ್ತಯೋ॒ ನಾಮ॑ ।
ಆಶಾ᳚ ಪ್ರಥ॒ಮಾಗ್ಂ ರ॑ಕ್ಷತಿ ।
ಕಾಮೋ᳚ ದ್ವಿ॒ತೀಯಾ᳚ಮ್ । ಬ್ರಹ್ಮ॑ ತೃ॒ತೀಯಾ᳚ಮ್ । ಯ॒ಜ್ಞಶ್ಚ॑ತು॒ರ್ಥೀಮ್ । ಆಪಃ॑ ಪಞ್ಚ॒ಮೀಮ್ ।
ಅ॒ಗ್ನಿ ರ್ಬ॑ಲಿ॒ಮಾನ್-ಥ್ಷ॒ಷ್ಠೀಮ್ । ಅನು॑ವಿತ್ತಿ-ಸ್ಸಪ್ತ॒ಮೀಮ್ ।
ಅನು॑ ಹ॒ ವೈ ಸ್ವ॒ರ್ಗಂ-ಲೋಁ॒ಕಂ-ವಿಁ॑ನ್ದತಿ ।
ಕಾ॒ಮ॒ಚಾರೋ᳚-ಽಸ್ಯ ಸ್ವ॒ರ್ಗೇ ಲೋ॒ಕೇ ಭ॑ವತಿ ।
ಯ ಏ॒ತಾಭಿ॒-ರಿಷ್ಟಿ॑ಭಿ॒-ರ್ಯಜ॑ತೇ ।
ಯ ಉ॑ಚೈನಾ ಏ॒ವಂ-ವೇಁದ॑ । ತಾಸ್ವ॑ನ್ವಿ॒ಷ್ಟಿ । ಪ॒ಷ್ಠೌ॒ಹೀ॒ ವ॒ರಾ-ನ್ದ॑ದ್ಯಾ-ತ್ಕ॒ಗ್ಂ॒ ಸಞ್ಚ॑ ।
ಸ್ತ್ರಿಯೈ॑ ಚಾಭಾ॒ರಗ್ಂ ಸಮೃ॑ದ್ಧ್ಯೈ ॥ 10 ॥
ಅನುವಾಕಂ 3 - ಉಪಾಘಾ ನಾಮೇಷ್ಟಯಃ
ತಪ॑ಸಾ ದೇ॒ವಾ ದೇ॒ವತಾ॒-ಮಗ್ರ॑ ಆಯನ್ನ್ । ತಪ॒ಸರ್ಷ॑ಯ॒-ಸ್ಸ್ವ॑ರನ್ವ॑ವಿನ್ದನ್ನ್ ।
ತಪ॑ಸಾ ಸ॒ಪತ್ನಾ॒-ನ್ಪ್ರಣು॑ದಾ॒ಮಾರಾ॑ತೀಃ ।
ಯೇನೇ॒ದಂ-ವಿಁಶ್ವ॒-ಮ್ಪರಿ॑ಭೂತಂ॒-ಯಁದಸ್ತಿ॑ ॥
ಪ್ರ॒ಥ॒ಮ॒ಜ-ನ್ದೇ॒ವಗ್ಂ ಹ॒ವಿಷಾ॑ ವಿಧೇಮ । ಸ್ವ॒ಯ॒ಭು-ಮ್ಬ್ರಹ್ಮ॑ ಪರ॒ಮ-ನ್ತಪೋ॒ ಯತ್ ।
ಸ ಏ॒ವ ಪು॒ತ್ರ-ಸ್ಸ ಪಿ॒ತಾ ಸ ಮಾ॒ತಾ ।
ತಪೋ॑ ಹ ಯ॒ಕ್ಷ-ಮ್ಪ್ರ॑ಥ॒ಮಗ್ಂ ಸಮ್ಬ॑ಭೂವ ॥
ಶ್ರ॒ದ್ಧಯಾ ದೇ॑ವೋ ದೇವ॒ತ್ವ-ಮ॑ಶ್ನುತೇ ।
ಶ್ರ॒ದ್ಧಾ ಪ್ರ॑ತಿ॒ಷ್ಠಾ ಲೋ॒ಕಸ್ಯ॑ ದೇ॒ವೀ ॥ 11 ॥
ಸಾ ನೋ॑ ಜುಷಾ॒ಣೋಪ॑ ಯ॒ಜ್ಞ-ಮಾಗಾ᳚ತ್ ।
ಕಾಮ॑ವಥ್ಸಾ॒ ಽಮೃತ॒-ನ್ದುಹಾ॑ನಾ ॥
ಶ್ರ॒ದ್ಧಾ ದೇ॒ವೀ ಪ್ರ॑ಥಮ॒ಜಾ ಋ॒ತಸ್ಯ॑ ।
ವಿಶ್ವ॑ಸ್ಯ ಭ॒ರ್ತ್ರೀ ಜಗ॑ತಃ ಪ್ರತಿ॒ಷ್ಠಾ ।
ತಾಗ್ ಶ್ರ॒ದ್ಧಾಗ್ಂ ಹ॒ವಿಷಾ॑ ಯಜಾಮಹೇ ।
ಸಾ ನೋ॑ ಲೋ॒ಕ-ಮ॒ಮೃತ॑-ನ್ದಧಾತು ।
ಈಶಾ॑ನಾ ದೇ॒ವೀ ಭುವ॑ನ॒ಸ್ಯಾಧಿ॑ಪತ್ನೀ ॥ ಆಗಾ᳚ಥ್ಸ॒ತ್ಯಗ್ಂ ಹ॒ವಿರಿ॒ದ-ಞ್ಜು॑ಷಾ॒ಣಮ್ ।
ಯಸ್ಮಾ᳚ದ್ದೇ॒ವಾ ಜ॑ಜ್ಞಿರೇ॒ ಭುವ॑ನಞ್ಚ॒ ವಿಶ್ವೇ᳚ ।
ತಸ್ಮೈ॑ ವಿಧೇಮ ಹ॒ವಿಷಾ॑ ಘೃ॒ತೇನ॑ ॥ 12 ॥
ಯಥಾ॑ ದೇ॒ವೈ-ಸ್ಸ॑ಧ॒ಮಾದ॑-ಮ್ಮದೇಮ ॥
ಯಸ್ಯ॑ ಪ್ರತಿ॒ಷ್ಠೋ-ರ್ವ॑ನ್ತರಿ॑ಕ್ಷಮ್ ।
ಯಸ್ಮಾ᳚ದ್ದೇ॒ವಾ ಜ॑ಜ್ಞಿರೇ॒ ಭುವ॑ನಞ್ಚ॒ ಸರ್ವೇ᳚ ।
ತಥ್ಸ॒ತ್ಯ-ಮರ್ಚ॒ದುಪ॑ಯ॒ಜ್ಞ-ನ್ನ॒ ಆಗಾ᳚ತ್ । ಬ್ರಹ್ಮಾಹು॑ತೀ॒-ರುಪ॒ಮೋದ॑ಮಾನಮ್ ॥
ಮನ॑ಸೋ॒ ವಶೇ॒ ಸರ್ವ॑ಮಿ॒ದ-ಮ್ಬ॑ಭೂವ ।
ನಾನ್ಯಸ್ಯ॒ ಮನೋ॒ ವಶ॒ಮನ್ವಿ॑ಯಾಯ ।
ಭೀ॒ಷ್ಮೋ ಹಿ ದೇ॒ವ-ಸ್ಸಹ॑ಸ॒-ಸ್ಸಹೀ॑ಯಾನ್ ।
ಸ ನೋ॑ ಜುಷಾ॒ಣ ಉಪ॑ ಯ॒ಜ್ಞಮಾಗಾ᳚ತ್ ॥
ಆಕೂ॑ತೀನಾ॒-ಮಧಿ॑ಪತಿ॒-ಞ್ಚೇತ॑ಸಾ-ಞ್ಚ ॥ 13 ॥
ಸ॒ಙ್ಕ॒ಲ್ಪಜೂ॑ತಿ-ನ್ದೇ॒ವಂ-ವಿಁ॑ಪ॒ಶ್ಚಿಮ್ ।
ಮನೋ॒ ರಾಜಾ॑ನಮಿ॒ಹ ವ॒ರ್ಧಯ॑ನ್ತಃ ।
ಉ॒ಪ॒ಹ॒ವೇ᳚ ಽಸ್ಯ ಸುಮ॒ತೌ ಸ್ಯಾ॑ಮ ॥
ಚರ॑ಣ-ಮ್ಪ॒ವಿತ್ರಂ॒-ವಿಁತ॑ತ-ಮ್ಪುರಾ॒ಣಮ್ ।
ಯೇನ॑ ಪೂ॒ತಸ್ತರ॑ತಿ ದುಷ್ಕೃ॒ತಾನಿ॑ ।
ತೇನ॑ ಪ॒ವಿತ್ರೇ॑ಣ ಶು॒ದ್ಧೇನ॑ ಪೂ॒ತಾಃ ।
ಅತಿ॑ ಪಾ॒ಪ್ಮಾನ॒-ಮರಾ॑ತಿ-ನ್ತರೇಮ ॥
ಲೋ॒ಕಸ್ಯ॒ ದ್ವಾರ॑-ಮರ್ಚಿ॒ಮ-ತ್ಪ॒ವಿತ್ರ᳚ಮ್ ।
ಜ್ಯೋತಿ॑ಷ್ಮ॒-ದ್ಭ್ರಾಜ॑ಮಾನ॒-ಮ್ಮಹ॑ಸ್ವತ್ । ಅ॒ಮೃತ॑ಸ್ಯ॒ ಧಾರಾ॑ ಬಹು॒ಧಾ ದೋಹ॑ಮಾನಮ್ ।
ಚರ॑ಣ-ನ್ನೋ ಲೋ॒ಕೇ ಸುಧಿ॑ತಾ-ನ್ದಧಾತು ॥
ಅ॒ಗ್ನಿರ್ಮೂ॒ರ್ಧಾ ದಿ॒ವಃ ಕ॒ಕು-ತ್ಪತಿಃ॑ ಪೃಥಿ॒ವ್ಯಾ ಅ॒ಯಮ್ । ಅ॒ಪಾಗ್ಂ ರೇತಾಗ್ಂ॑ಸಿ ಜಿನ್ವತಿ ॥ ಭುವೋ॑ ಯ॒ಜ್ಞಸ್ಯ॒ ರಜ॑ಸಶ್ಚ ನೇ॒ತಾ ಯತ್ರಾ॑ ನಿ॒ಯುದ್ಭಿ॒-ಸ್ಸಚ॑ಸೇ ಶಿ॒ವಾಭಿಃ॑ । ದಿ॒ವಿ ಮೂ॒ರ್ಧಾನ॑-ನ್ದಧಿಷೇ ಸುವ॒ರ್॒ಷಾ-ಞ್ಜಿ॒ಹ್ವಾಮ॑ಗ್ನೇ ಚಕೃಷೇ ಹವ್ಯ॒ವಾಹ᳚ಮ್ ॥ ॥
ಅನು॑ ನೋ॒-ಽದ್ಯಾ-ಽನು॑ಮತಿರ್ಯ॒ಜ್ಞ-ನ್ದೇ॒ವೇಷು॑ ಮನ್ಯತಾಮ್ । ಅ॒ಗ್ನಿಶ್ಚ॑ ಹವ್ಯ॒ವಾಹ॑ನೋ॒ ಭವ॑ತಾ-ನ್ದಾ॒ಶುಷೇ॒ ಮಯಃ॑ ॥ ಅನ್ವಿದ॑ನುಮತೇ॒ ತ್ವ-ಮ್ಮನ್ಯಾ॑ಸೈ॒ ಶಞ್ಚ॑ನಃ ಕೃಧಿ । ಕ್ರತ್ವೇ॒ ದಕ್ಷಾ॑ಯ ನೋ ಹಿನು॒ ಪ್ರಣ॒ ಆಯೂಗ್ಂ॑ಷಿ ತಾರಿಷಃ ॥ ॥
ಹ॒ವ್ಯ॒ವಾಹ॑-ಮಭಿಮಾತಿ॒ಷಾ-ಽಹ᳚ಮ್ । ರ॒ಕ್ಷೋ॒ಹಣ॒-ಮ್ಪೃತ॑ನಾಸು ಜಿ॒ಷ್ಣುಮ್ । ಜ್ಯೋತಿ॑ಷ್ಮನ್ತ॒-ನ್ದೀದ್ಯ॑ತ॒-ಮ್ಪುರ॑ನ್ಧಿಮ್ । ಅ॒ಗ್ನಿಗ್ಗ್ ಸ್ವಿ॑ಷ್ಟ॒ಕೃತ॒ಮಾ ಹು॑ವೇಮ ॥ ಸ್ವಿ॑ಷ್ಟಮಗ್ನೇ ಅ॒ಭಿ ತ-ತ್ಪೃ॑ಣಾಹಿ । ವಿಶ್ವಾ॑ ದೇವ॒ ಪೃತ॑ನಾ ಅ॒ಭಿಷ್ಯ । ಉ॒ರು-ನ್ನಃ॒ ಪನ್ಥಾ᳚-ಮ್ಪ್ರದಿ॒ಶನ್ವಿ ಭಾ॑ಹಿ । ಜ್ಯೋತಿ॑ಷ್ಮದ್ಧೇಹ್ಯ॒ಜರ॑-ನ್ನ॒ ಆಯುಃ॑ ॥ ॥ 14 ॥
(ದೇ॒ವೀ - ಘೃ॒ತೇನ॒ - ಚೇತ॑ಸಾ-ಞ್ಚ॒ - ದೋಹ॑ಮಾನ-ಞ್ಚ॒ತ್ವಾರಿ॑ ಚ) (ಅ. 3)
ಅನುವಾಕಂ 4 - ತಾಸಾ-ಮ್ಬ್ರಾಹ್ಮಣಮ್
ದೇ॒ವೇಭ್ಯೋ॒ ವೈ ಸ್ವ॒ರ್ಗೋ ಲೋ॒ಕಸ್ತಿ॒ರೋ॑ ಽಭವತ್ ।
ತೇ ಪ್ರ॒ಜಾಪ॑ತಿ-ಮಬ್ರುವನ್ನ್ । ಪ್ರಜಾ॑ಪತೇ ಸ್ವ॒ರ್ಗೋ
ವೈ ನೋ॑ ಲೋ॒ಕಸ್ತಿ॒ರೋ॑-ಽಭೂತ್ । ತಮನ್ವಿ॒ಚ್ಛೇತಿ॑ ।
ತಂ-ಯಁ॑ಜ್ಞಕ್ರ॒ತುಭಿ॒-ರನ್ವೈ᳚ಚ್ಛತ್ ।
ತಂ-ಯಁ॑ಜ್ಞಕ್ರ॒ತುಭಿ॒ ರ್ನಾನ್ವ॑ವಿನ್ದತ್ ।
ತಮಿಷ್ಟಿ॑ಭಿ॒-ರನ್ವೈ᳚ಚ್ಛತ್ । ತಮಿಷ್ಟಿ॑ಭಿ॒-ರನ್ವ॑ವಿನ್ದತ್ । ತದಿಷ್ಟೀ॑ನಾ-ಮಿಷ್ಟಿ॒ತ್ವಮ್ । ಏಷ್ಟ॑ಯೋ ಹ॒ ವೈ ನಾಮ॑ । ತಾ ಇಷ್ಟ॑ಯ॒ ಇತ್ಯಾ ಚ॑ಕ್ಷತೇ ಪ॒ರೋಕ್ಷೇ॑ಣ ।
ಪ॒ರೋಕ್ಷ॑ಪ್ರಿಯಾ ಇವ॒ ಹಿ ದೇ॒ವಾಃ ॥ 15 ॥
ತ-ನ್ತಪೋ᳚-ಽ ಬ್ರವೀತ್ । ಪ್ರಜಾ॑ಪತೇ॒ ತಪ॑ಸಾ॒ ವೈ
ಶ್ರಾ᳚ಮ್ಯಸಿ । ಅ॒ಹಮು॒ ವೈ ತಪೋ᳚-ಽ ಸ್ಮಿ ।
ಮಾ-ನ್ನು ಯ॑ಜಸ್ವ ।
ಅಥ॑ ತೇ ಸ॒ತ್ಯ-ನ್ತಪೋ॑ ಭವಿಷ್ಯತಿ ।
ಅನು॑ ಸ್ವ॒ರ್ಗಂ-ಲೋಁ॒ಕಂ-ವೇಁ॒ಥ್ಸ್ಯಸೀತಿ॑ ।
ಸ ಏ॒ತಮಾ᳚ಗ್ನೇ॒ಯ-ಮ॒ಷ್ಟಾಕ॑ಪಾಲ॒-ನ್ನಿರ॑ವಪತ್ । ತಪ॑ಸೇ ಚ॒ರುಮ್ । ಅನು॑ಮತ್ಯೈ ಚ॒ರುಮ್ ।
ತತೋ॒ ವೈ ತಸ್ಯ॑ ಸ॒ತ್ಯ-ನ್ತಪೋ॑ ಽಭವತ್ ।
ಅನು॑ ಸ್ವ॒ರ್ಗಂ-ಲೋಁ॒ಕಮ॑ವಿನ್ದತ್ ।
ಸ॒ತ್ಯ ಗ್ಂ ಹ॒ ವಾ ಅ॑ಸ್ಯ॒ ತಪೋ॑ ಭವತಿ ।
ಅನು॑ ಸ್ವ॒ರ್ಗಂ-ಲೋಁ॒ಕಂ-ವಿಁ॑ನ್ದತಿ ।
ಯ ಏ॒ತೇನ॑ ಹ॒ವಿಷಾ॒ ಯಜ॑ತೇ ।
ಯ ಉ॑ ಚೈನದೇ॒ವಂ-ವೇಁದ॑ । ಸೋ-ಽತ್ರ॑ ಜುಹೋತಿ । ಅ॒ಗ್ನಯೇ॒ ಸ್ವಾಹಾ॒ ತಪ॑ಸೇ॒ ಸ್ವಾಹಾ᳚ ।
ಅನು॑ಮತ್ಯೈ॒ ಸ್ವಾಹಾ᳚ ಪ್ರ॒ಜಾಪ॑ತಯೇ॒ ಸ್ವಾಹಾ᳚ ।
ಸ್ವ॒ರ್ಗಾಯ॑ ಲೋ॒ಕಾಯ॒ ಸ್ವಾಹಾ॒-ಽಗ್ನಯೇ᳚ ಸ್ವಿಷ್ಟ॒ಕೃತೇ॒ ಸ್ವಾಹೇತಿ॑ ॥ 16 ॥
ತಗ್ಗ್ ಶ್ರ॒ದ್ಧಾ-ಽಬ್ರ॑ವೀತ್ । ಪ್ರಜಾ॑ಪತೇ ಶ್ರ॒ದ್ಧಯಾ॒ ವೈ ಶ್ರಾ᳚ಮ್ಯಸಿ । ಅ॒ಹಮು॒ ವೈ ಶ್ರ॒ದ್ಧಾ-ಽಸ್ಮಿ॑ । ಮಾ-ನ್ನು ಯ॑ಜಸ್ವ । ಅಥ॑ ತೇ ಸ॒ತ್ಯಾ ಶ್ರ॒ದ್ಧಾ ಭ॑ವಿಷ್ಯತಿ । ಅನು॑ ಸ್ವ॒ರ್ಗಂ-ಲೋಁ॒ಕಂ-ವೇಁ॒ಥ್ಸ್ಯಸೀತಿ॑ ।
ಸ ಏ॒ತಮಾ᳚-ಽಗ್ನೇ॒ಯ-ಮ॒ಷ್ಟಾಕ॑ಪಾಲ॒-ನ್ನಿರ॑ವಪತ್ । ಶ್ರ॒ದ್ಧಾಯೈ॑ ಚ॒ರುಮ್ । ಅನು॑ಮತ್ಯೈ ಚ॒ರುಮ್ । ತತೋ॒ ವೈ ತಸ್ಯ॑ ಸ॒ತ್ಯಾ ಶ್ರ॒ದ್ಧಾ-ಽಭ॑ವತ್ ।
ಅನು॑ ಸ್ವ॒ರ್ಗಂ-ಲೋಁ॒ಕಮ॑ವಿನ್ದತ್ ।
ಸ॒ತ್ಯಾ ಹ॒ ವಾ ಅ॑ಸ್ಯ ಶ್ರ॒ದ್ಧಾ ಭ॑ವತಿ ।
ಅನು॑ ಸ್ವ॒ರ್ಗಂ-ಲೋಁ॒ಕಂ-ವಿಁ॑ನ್ದತಿ ।
ಯ ಏ॒ತೇನ॑ ಹ॒ವಿಷಾ॒ ಯಜ॑ತೇ ।
ಯ ಉ॑ ಚೈನದೇ॒ವಂ-ವೇಁದ॑ । ಸೋ-ಽತ್ರ॑ ಜುಹೋತಿ । ಅ॒ಗ್ನಯೇ॒ ಸ್ವಾಹಾ᳚ ಶ್ರ॒ದ್ಧಾಯೈ॒ ಸ್ವಾಹಾ᳚ ।
ಅನು॑ಮತ್ಯೈ॒ ಸ್ವಾಹಾ᳚ ಪ್ರ॒ಜಾಪ॑ತಯೇ॒ ಸ್ವಾಹಾ᳚ ।
ಸ್ವ॒ರ್ಗಾಯ॑ ಲೋ॒ಕಾಯ॒ ಸ್ವಾಹಾ॒-ಽಗ್ನಯೇ᳚ ಸ್ವಿಷ್ಟ॒ಕೃತೇ॒ ಸ್ವಾಹೇತಿ॑ ॥ 17 ॥
ತಗ್ಂ ಸ॒ತ್ಯ-ಮ॑ಬ್ರವೀತ್ । ಪ್ರಜಾ॑ಪತೇ ಸ॒ತ್ಯೇನ॒ ವೈ ಶ್ರಾ᳚ಮ್ಯಸಿ । ಅ॒ಹಮು॒ ವೈ ಸ॒ತ್ಯಮ॑ಸ್ಮಿ । ಮಾ-ನ್ನು ಯ॑ಜಸ್ವ । ಅಥ॑ ತೇ ಸ॒ತ್ಯಗ್ಂ ಸ॒ತ್ಯ-ಮ್ಭ॑ವಿಷ್ಯತಿ । ಅನು॑ ಸ್ವ॒ರ್ಗಂ-ಲೋಁ॒ಕಂ-ವೇಁ॒ಥ್ಸ್ಯಸೀತಿ॑ ।
ಸ ಏ॒ತಮಾ᳚-ಽಗ್ನೇ॒ಯ-ಮ॒ಷ್ಟಾಕ॑ಪಾಲ॒-ನ್ನಿರ॑ವಪತ್ । ಸ॒ತ್ಯಾಯ॑ ಚ॒ರುಮ್ । ಅನು॑ಮತ್ಯೈ ಚ॒ರುಮ್ ।
ತತೋ॒ ವೈ ತಸ್ಯ॑ ಸ॒ತ್ಯಗ್ಂ ಸ॒ತ್ಯಮ॑ಭವತ್ ।
ಅನು॑ ಸ್ವ॒ರ್ಗಂ-ಲೋಁ॒ಕಮ॑ವಿನ್ದತ್ ।
ಸ॒ತ್ಯಗ್ಂ ಹ॒ ವಾ ಅ॑ಸ್ಯ ಸ॒ತ್ಯ-ಮ್ಭ॑ವತಿ ।
ಅನು॑ ಸ್ವ॒ರ್ಗಂ-ಲೋಁ॒ಕಂ-ವಿಁ॑ನ್ದತಿ ।
ಯ ಏ॒ತೇನ॑ ಹ॒ವಿಷಾ॒ ಯಜ॑ತೇ ।
ಯ ಉ॑ಚೈನದೇ॒ವಂ-ವೇಁದ॑ । ಸೋ-ಽತ್ರ॑ ಜುಹೋತಿ ।
ಅ॒ಗ್ನಯೇ॒ ಸ್ವಾಹಾ॑ ಸ॒ತ್ಯಾಯ॒ ಸ್ವಾಹಾ᳚ ।
ಅನು॑ಮತ್ಯೈ॒ ಸ್ವಾಹಾ᳚ ಪ್ರ॒ಜಾಪ॑ತಯೇ॒ ಸ್ವಾಹಾ᳚ ।
ಸ್ವ॒ರ್ಗಾಯ॑ ಲೋ॒ಕಾಯ॒ ಸ್ವಾಹಾ॒-ಽಗ್ನಯೇ᳚ ಸ್ವಿಷ್ಟ॒ಕೃತೇ॒ ಸ್ವಾಹೇತಿ॑ ॥ 18 ॥
ತ-ಮ್ಮನೋ᳚-ಽಬ್ರವೀತ್ । ಪ್ರಜಾ॑ಪತೇ॒ ಮನ॑ಸಾ॒ ವೈ ಶ್ರಾ᳚ಮ್ಯಸಿ । ಅ॒ಹಮು॒ ವೈ ಮನೋ᳚-ಽಸ್ಮಿ ।
ಮಾ-ನ್ನು ಯ॑ಜಸ್ವ ।
ಅಥ॑ ತೇ ಸ॒ತ್ಯ-ಮ್ಮನೋ॑ ಭವಿಷ್ಯತಿ ।
ಅನು॑ ಸ್ವ॒ರ್ಗಂ-ಲೋಁ॒ಕಂ-ವೇಁ॒ಥ್ಸ್ಯಸೀತಿ॑ ।
ಸ ಏ॒ತಮಾ᳚-ಽಗ್ನೇ॒ಯ-ಮ॒ಷ್ಟಾಕ॑ಪಾಲ॒-ನ್ನಿರ॑ವಪತ್ । ಮನ॑ಸೇ ಚ॒ರುಮ್ । ಅನು॑ಮತ್ಯೈ ಚ॒ರುಮ್ । ತತೋ॒ ವೈ ತಸ್ಯ॑ ಸ॒ತ್ಯ-ಮ್ಮನೋ॑-ಽಭವತ್ ।
ಅನು॑ ಸ್ವ॒ರ್ಗಂ-ಲೋಁ॒ಕಮ॑ವಿನ್ದತ್ । ಸ॒ತ್ಯಗ್ಂ ಹ॒ ವಾ ಅ॑ಸ್ಯ॒ ಮನೋ॑ ಭವತಿ । ಅನು॑ ಸ್ವ॒ರ್ಗಂ-ಲೋಁ॒ಕಂ-ವಿಁ॑ನ್ದತಿ । ಯ ಏ॒ತೇನ॑ ಹ॒ವಿಷಾ॒ ಯಜ॑ತೇ ।
ಯ ಉ॑ಚೈನ ದೇ॒ವಂ-ವೇಁದ॑ । ಸೋ-ಽತ್ರ॑ ಜುಹೋತಿ ।
ಅ॒ಗ್ನಯೇ॒ ಸ್ವಾಹಾ॒ ಮನ॑ಸೇ॒ ಸ್ವಾಹಾ᳚ ।
ಅನು॑ಮತ್ಯೈ॒ ಸ್ವಾಹಾ᳚ ಪ್ರ॒ಜಾಪ॑ತಯೇ॒ ಸ್ವಾಹಾ᳚ ।
ಸ್ವ॒ರ್ಗಾಯ॑ ಲೋ॒ಕಾಯ॒ ಸ್ವಾಹಾ॒-ಽಗ್ನಯೇ᳚ ಸ್ವಿಷ್ಟ॒ಕೃತೇ॒ ಸ್ವಾಹೇತಿ॑ ॥ 19 ॥
ತ-ಞ್ಚರ॑ಣ-ಮಬ್ರವೀತ್ । ಪ್ರಜಾ॑ಪತೇ॒ ಚರ॑ಣೇನ॒ ವೈ ಶ್ರಾ᳚ಮ್ಯಸಿ । ಅ॒ಹಮು॒ ವೈ ಚರ॑ಣಮಸ್ಮಿ । ಮಾ-ನ್ನು ಯ॑ಜಸ್ವ । ಅಥ॑ ತೇ ಸ॒ತ್ಯ-ಞ್ಚರ॑ಣ-ಮ್ಭವಿಷ್ಯತಿ । ಅನು॑ ಸ್ವ॒ರ್ಗಂ-ಲೋಁ॒ಕಂ-ವೇಁ॒ಥ್ಸ್ಯಸೀತಿ॑ ।
ಸ ಏ॒ತಮಾ᳚-ಽಗ್ನೇ॒ಯ-ಮ॒ಷ್ಟಾಕ॑ಪಾಲ॒-ನ್ನಿರ॑ವಪತ್ । ಚರ॑ಣಾಯ ಚ॒ರುಮ್ । ಅನು॑ಮತ್ಯೈ ಚ॒ರುಮ್ । ತತೋ॒ ವೈ ತಸ್ಯ॑ ಸ॒ತ್ಯ-ಞ್ಚರ॑ಣಮಭವತ್ ।
ಅನು॑ ಸ್ವ॒ರ್ಗಂ-ಲೋಁ॒ಕಮ॑ವಿನ್ದತ್ ।
ಸ॒ತ್ಯಗ್ಂ ಹ॒ ವಾ ಅ॑ಸ್ಯ॒ ಚರ॑ಣ-ಮ್ಭವತಿ ।
ಅನು॑ಸ್ವ॒ರ್ಗಂ-ಲೋಁ॒ಕಂ-ವಿಁ॑ನ್ದತಿ ।
ಯ ಏ॒ತೇನ॑ ಹ॒ವಿಷಾ॒ ಯಜ॑ತೇ ।
ಯ ಉ॑ಚೈನದೇ॒ವಂ-ವೇಁದ॑ । ಸೋ-ಽತ್ರ॑ ಜುಹೋತಿ ।
ಅ॒ಗ್ನಯೇ॒ ಸ್ವಾಹಾ॒ ಚರ॑ಣಾಯ॒ ಸ್ವಾಹಾ᳚ ।
ಅನು॑ಮತ್ಯೈ॒ ಸ್ವಾಹಾ᳚ ಪ್ರ॒ಜಾಪ॑ತಯೇ॒ ಸ್ವಾಹಾ᳚ ।
ಸ್ವ॒ರ್ಗಾಯ॑ ಲೋ॒ಕಾಯ॒ ಸ್ವಾಹಾ॒-ಽಗ್ನಯೇ᳚ ಸ್ವಿಷ್ಟ॒ಕೃತೇ॒ ಸ್ವಾಹೇತಿ॑ ॥ 20 ॥
ತಾ ವಾ ಏ॒ತಾಃ ಪಞ್ಚ॑ ಸ್ವ॒ರ್ಗಸ್ಯ॑ ಲೋ॒ಕಸ್ಯ॒ ದ್ವಾರಃ॑ ।
ಅಪಾ॑ಘಾ॒ ಅನು॑ವಿತ್ತಯೋ॒ ನಾಮ॑ । ತಪಃ॑ ಪ್ರಥ॒ಮಾಗ್ಂ ರ॑ಕ್ಷತಿ । ಶ್ರ॒ದ್ಧಾ ದ್ವಿ॒ತೀಯಾ᳚ಮ್ । ಸ॒ತ್ಯ-ನ್ತೃ॒ತೀಯಾ᳚ಮ್ ।
ಮನ॑ಶ್ಚತು॒ರ್ಥೀಮ್ । ಚರ॑ಣ-ಮ್ಪಞ್ಚ॒ಮೀಮ್ ।
ಅನು॑ ಹ॒ ವೈ ಸ್ವ॒ರ್ಗಂ-ಲೋಁ॒ಕಂ-ವಿಁ॑ನ್ದತಿ ।
ಕಾ॒ಮ॒ಚಾರೋ᳚-ಽಸ್ಯ ಸ್ವ॒ರ್ಗೇ ಲೋ॒ಕೇ ಭ॑ವತಿ ।
ಯ ಏ॒ತಾಭಿ॒-ರಿಷ್ಟಿ॑ಭಿ॒-ರ್ಯಜ॑ತೇ ।
ಯ ಉ॑ಚೈನಾ ಏ॒ವಂ-ವೇಁದ॑ ।
ಅನುವಾಕಂ 5 - ಚಾತುರ್ಹೋತ್ರಚಯನಮ್
ಬ್ರಹ್ಮ॒ ವೈ ಚತು॑ರ್ಹೋತಾರಃ । ಚತು॑ರ್ಹೋತೃ॒ಭ್ಯೋ-ಽಧಿ॑ ಯ॒ಜ್ಞೋ ನಿರ್ಮಿ॑ತಃ । ನೈನಗ್ಂ॑ ಶ॒ಪ್ತಮ್ । ನಾಭಿಚ॑ರಿತ॒-ಮಾಗ॑ಚ್ಛತಿ । ಯ ಏ॒ವಂ-ವೇಁದ॑ ॥
ಯೋ ಹ॒ ವೈ ಚತು॑ರ್ಹೋತೃಣಾ-ಞ್ಚತುರ್ಹೋತೃ॒ತ್ವಂ-ವೇಁದ॑ । ಅಥೋ॒ ಪಞ್ಚ॑ ಹೋತೃತ್ವಮ್ ।
ಸರ್ವಾ॑ ಹಾಸ್ಮೈ॒ ದಿಶಃ॑ ಕಲ್ಪನ್ತೇ ।
ವಾ॒ಚಸ್ಪತಿ॒ರ್॒ ಹೋತಾ॒ ದಶ॑ಹೋತೄಣಾಮ್ ।
ಪೃ॒ಥಿ॒ವೀ ಹೋತಾ॒ ಚತು॑ರ್ಹೋತೄಣಾಮ್ ॥ 22 ॥
ಅ॒ಗ್ನಿರ್-ಹೋತಾ॒ ಪಞ್ಚ॑ಹೋತೄಣಾಮ್ । ವಾಘೋತಾ॒ ಷಡ್ಢೋ॑ತೄಣಾಮ್ ।
ಮ॒ಹಾಹ॑ವಿ॒ರ್॒ ಹೋತಾ॑ ಸ॒ಪ್ತಹೋ॑ತೄಣಾಮ್ ।
ಏ॒ತದ್ವೈ ಚತು॑ರ್ಹೋತೃಣಾ-ಞ್ಚತುರ್ಹೋತೃ॒ತ್ವಮ್ ।
ಅಥೋ॒ ಪಞ್ಚ॑ಹೋತೃತ್ವಮ್ । ಸರ್ವಾ॑ ಹಾಸ್ಮೈ॒ ದಿಶಃ॑ ಕಲ್ಪನ್ತೇ । ಯ ಏ॒ವಂ-ವೇಁದ॑ ॥
ಏ॒ಷಾ ವೈ ಸ॑ರ್ವ ವಿ॒ದ್ಯಾ । ಏ॒ತ-ದ್ಭೇ॑ಷ॒ಜಮ್ ।
ಏ॒ಷಾ ಪ॒ಙ್ಕ್ತಿ-ಸ್ಸ್ವ॒ರ್ಗಸ್ಯ॑ ಲೋ॒ಕಸ್ಯಾ᳚-ಞ್ಜ॒ಸಾಯ॑ನಿ-ಸ್ಸ್ರು॒ತಿಃ ॥ 23 ॥
ಏ॒ತಾನ್. ಯೋ-ಽದ್ಧ್ಯೈ-ತ್ಯಛ॑ದಿರ್ದ॒ರ್॒ಶೇ ಯಾವ॑ತ್ತ॒ರಸ᳚ಮ್ । ಸ್ವ॑ರೇತಿ । ಅ॒ನ॒ಪ॒ಬ್ರ॒ವ-ಸ್ಸರ್ವ॒ಮಾಯು॑ರೇತಿ । ವಿ॒ನ್ದತೇ᳚ ಪ್ರ॒ಜಾಮ್ । ರಾ॒ಯಸ್ಪೋಷ॑-ಙ್ಗೌಪ॒ತ್ಯಮ್ ।
ಬ್ರ॒ಹ್ಮ॒ವ॒ರ್ಚ॒ಸೀ ಭ॑ವತಿ ॥ ಏ॒ತಾನ್. ಯೋ-ಽದ್ಧ್ಯೈತಿ॑ । ಸ್ಪೃ॒ಣೋತ್ಯಾ॒ತ್ಮಾನ᳚ಮ್ । ಪ್ರ॒ಜಾ-ಮ್ಪಿ॒ತೄನ್ ॥
ಏ॒ತಾನ್. ವಾ ಅ॑ರು॒ಣ ಔ॑ಪವೇ॒ಶಿ ರ್ವಿ॒ದಾಞ್ಚ॑ಕಾರ ॥ 24 ॥
ಏ॒ತೈರ॑ಧಿವಾ॒ದಮಪಾ॑ಜಯತ್ । ಅಥೋ॒ ವಿಶ್ವ॑-ಮ್ಪಾ॒ಪ್ಮಾನ᳚ಮ್ । ಸ್ವ॑ರ್ಯಯೌ । ಏ॒ತಾನ್. ಯೋ-ಽದ್ಧ್ಯೈತಿ॑ । ಅ॒ಧಿ॒ವಾ॒ದ-ಞ್ಜ॑ಯತಿ । ಅಥೋ॒ ವಿಶ್ವ॑-ಮ್ಪಾ॒ಪ್ಮಾನ᳚ಮ್ । ಸ್ವ॑ರೇತಿ ॥ ಏ॒ತೈರ॒ಗ್ನಿ-ಞ್ಚಿ॑ನ್ವೀತ ಸ್ವ॒ರ್ಗಕಾ॑ಮಃ ।
ಏ॒ತೈರಾಯು॑ಷ್ಕಾಮಃ । ಪ್ರ॒ಜಾ ಪ॒ಶುಕಾ॑ಮೋ ವಾ ॥ 25 ॥
ಪು॒ರಸ್ತಾ॒-ದ್ದಶ॑ಹೋತಾರ॒-ಮುದ॑ಞ್ಚ॒-ಮುಪ॑ದಧಾತಿ ಯಾವತ್ಪ॒ದಮ್ । ಹೃದ॑ಯಂ॒-ಯಁಜು॑ಷೀ॒ ಪತ್ನ್ಯೌ॑ ಚ । ದ॒ಕ್ಷಿ॒ಣ॒ತಃ ಪ್ರಾಞ್ಚ॒-ಞ್ಚತು॑ರ್ಹೋತಾರಮ್ ।
ಪ॒ಶ್ಚಾದುದ॑ಞ್ಚ॒-ಮ್ಪಞ್ಚ॑ ಹೋತಾರಮ್ । ಉ॒ತ್ತ॒ರ॒ತಃ ಪ್ರಾಞ್ಚ॒ಗ್ಂ॒ ಷಡ್ಢೋ॑ತಾರಮ್ ।
ಉ॒ಪರಿ॑ಷ್ಟಾ॒-ತ್ಪ್ರಾಞ್ಚಗ್ಂ॑ ಸ॒ಪ್ತಹೋ॑ತಾರಮ್ । ಹೃದ॑ಯಂ॒-ಯಁಜೂಗ್ಂ॑ಷಿ॒ ಪತ್ನ್ಯ॑ಶ್ಚ ।
ಯ॒ಥಾ॒ವ॒ಕಾ॒ಶ-ಙ್ಗ್ರಹಾನ್॑ । ಯ॒ಥಾ॒ವ॒ಕಾ॒ಶ-ಮ್ಪ್ರ॑ತಿಗ್ರ॒ಹಾನ್ ಁಲೋ॑ಕ-ಮ್ಪೃ॒ಣಾಶ್ಚ॑ ।
ಸರ್ವಾ॑ ಹಾಸ್ಯೈ॒ತಾ ದೇ॒ವತಾಃ᳚ ಪ್ರೀ॒ತಾ ಅ॒ಭೀಷ್ಟಾ॑ ಭವನ್ತಿ ॥ 26 ॥
ಸದೇ॑ವಮ॒ಗ್ನಿ-ಞ್ಚಿ॑ನುತೇ ॥
ರ॒ಥಸ॑ಮಿನ್ತ-ಶ್ಚೇತ॒ವ್ಯಃ॑ । ವಜ್ರೋ॒ ವೈ ರಥಃ॑ ।
ವಜ್ರೇ॑ಣೈ॒ವ ಪಾ॒ಪ್ಮಾನ॒-ಮ್ಭ್ರಾತೃ॑ವ್ಯಗ್ಗ್ ಸ್ತೃಣುತೇ । ಪ॒ಕ್ಷ-ಸ್ಸ॑ಮಿನ್ತ-ಶ್ಚೇತ॒ವ್ಯಃ॑ ।
ಏ॒ತಾವಾ॒ನ್॒. ವೈ ರಥಃ॑ । ಯಾವ॑ತ್ಪ॒ಕ್ಷಃ । ರ॒ಥಸ॑ಮಿನ್ತಮೇ॒ವ ಚಿ॑ನುತೇ ॥
ಇ॒ಮಮೇ॒ವ ಲೋ॒ಕ-ಮ್ಪ॑ಶುಬ॒ನ್ಧೇನಾ॒ಭಿಜ॑ಯತಿ ।
ಅಥೋ॑ ಅಗ್ನಿಷ್ಟೋ॒ಮೇನ॑ ॥ 27 ॥
ಅ॒ನ್ತರಿ॑ಕ್ಷ-ಮು॒ಕ್ಥ್ಯೇ॑ನ । ಸ್ವ॑ರತಿರಾ॒ತ್ರೇಣ॑ । ಸರ್ವಾ᳚ನ್ ಁಲೋ॒ಕಾನ॑ಹೀ॒ನೇನ॑ । ಅಥೋ॑ ಸ॒ತ್ರೇಣ॑ ॥ ವರೋ॒ ದಕ್ಷಿ॑ಣಾ । ವರೇ॑ಣೈ॒ವ ವರಗ್ಗ್॑ ಸ್ಪೃಣೋತಿ ।
ಆ॒ತ್ಮಾ ಹಿ ವರಃ॑ ॥ ಏಕ॑ವಿಗ್ಂಶತಿ॒ ರ್ದಕ್ಷಿ॑ಣಾ ದದಾತಿ ।
ಏ॒ಕ॒ವಿ॒ಗ್ಂ॒ಶೋ ವಾ ಇ॒ತ-ಸ್ಸ್ವ॒ರ್ಗೋ ಲೋ॒ಕಃ । ಪ್ರಸ್ವ॒ರ್ಗಂ-ಲೋಁ॒ಕಮಾ᳚ಪ್ನೋತಿ ॥ 28 ॥
ಅ॒ಸಾವಾ॑ದಿ॒ತ್ಯ ಏ॑ಕವಿ॒ಗ್ಂ॒ಶಃ । ಅ॒ಮುಮೇ॒ವಾ-ದಿ॒ತ್ಯಮಾ᳚ಪ್ನೋತಿ ॥ ಶ॒ತ-ನ್ದ॑ದಾತಿ । ಶ॒ತಾಯುಃ॒ ಪುರು॑ಷ-ಶ್ಶ॒ತೇನ್ದ್ರಿ॑ಯಃ । ಆಯು॑ಷ್ಯೇ॒ವೇನ್ದ್ರಿ॒ಯೇ ಪ್ರತಿ॑ತಿಷ್ಠತಿ ॥ ಸ॒ಹಸ್ರ॑-ನ್ದದಾತಿ ।
ಸ॒ಹಸ್ರ॑ ಸಮ್ಮಿತ-ಸ್ಸ್ವ॒ರ್ಗೋ ಲೋ॒ಕಃ ।
ಸ್ವ॒ರ್ಗಸ್ಯ॑ ಲೋ॒ಕಸ್ಯಾ॒-ಭಿಜಿ॑ತ್ಯೈ ॥ ಅ॒ನ್ವಿ॒ಷ್ಟ॒ಕ-ನ್ದಕ್ಷಿ॑ಣಾ ದದಾತಿ । ಸರ್ವಾ॑ಣಿ॒ ವಯಾಗ್ಂ॑ಸಿ ॥ 29 ॥
ಸರ್ವ॒ಸ್ಯಾಪ್ತ್ಯೈ᳚ । ಸರ್ವ॒ಸ್ಯಾ-ವ॑ರುದ್ಧ್ಯೈ ॥ ಯದಿ॒ ನ ವಿ॒ನ್ದೇತ॑ । ಮ॒ನ್ಥಾನೇ॑ತಾವ॒ತೋ ದ॑ದ್ಯಾದೋದ॒ನಾನ್. ವಾ᳚ । ಅ॒ಶ್ನು॒ತೇ ತ-ಙ್ಕಾಮ᳚ಮ್ । ಯಸ್ಮೈ॒ ಕಾಮಾ॑ಯಾ॒-ಗ್ನಿಶ್ಚೀ॒ಯತೇ᳚ ॥ ಪ॒ಷ್ಠೌ॒ಹೀ-ನ್ತ್ವ॒ನ್ತರ್ವ॑ತೀ-ನ್ದದ್ಯಾತ್ ।
ಸಾ ಹಿ ಸರ್ವಾ॑ಣಿ॒ ವಯಾಗ್ಂ॑ಸಿ । ಸರ್ವ॒ಸ್ಯಾಪ್ತ್ಯೈ᳚ । ಸರ್ವ॒ಸ್ಯಾ-ವ॑ರುದ್ಧ್ಯೈ ॥ 30 ॥
ಹಿರ॑ಣ್ಯ-ನ್ದದಾತಿ । ಹಿರ॑ಣ್ಯ-ಜ್ಯೋತಿರೇ॒ವ ಸ್ವ॒ರ್ಗಂ-ಲೋಁ॒ಕಮೇ॑ತಿ ॥ ವಾಸೋ॑ ದದಾತಿ । ತೇನಾಯುಃ॒ ಪ್ರತಿ॑ರತೇ ॥ ವೇ॒ದಿ॒ತೃ॒ತೀ॒ಯೇ ಯ॑ಜೇತ । ತ್ರಿಷ॑ತ್ಯಾ॒ ಹಿ ದೇ॒ವಾಃ ।
ಸ ಸ॑ತ್ಯಮ॒ಗ್ನಿ-ಞ್ಚಿ॑ನುತೇ ॥ ತದೇ॒ತ-ತ್ಪ॑ಶುಬ॒ನ್ಧೇ ಬ್ರಾಹ್ಮ॑ಣ-ಮ್ಬ್ರೂಯಾತ್ । ನೇತ॑ರೇಷು ಯ॒ಜ್ಞೇಷು॑ ॥
ಯೋ ಹ॒ ವೈ ಚತು॑ರ್ಹೋತೄ-ನನುಸವ॒ನ-ನ್ತ॑ರ್ಪಯಿತ॒ವ್ಯಾನ್॑. ವೇದ॑ ॥ 31 ॥
ತೃಪ್ಯ॑ತಿ ಪ್ರ॒ಜಯಾ॑ ಪ॒ಶುಭಿಃ॑ ।
ಉಪೈ॑ನಗ್ಂ ಸೋಮಪೀ॒ಥೋ ನ॑ಮತಿ ।
ಏ॒ತೇ ವೈ ಚತು॑ರ್ಹೋತಾರೋ ಽನುಸವ॒ನ-ನ್ತ॑ರ್ಪಯಿತ॒ವ್ಯಾಃ᳚ । ಯೇ ಬ್ರಾ᳚ಹ್ಮ॒ಣಾ ಬ॑ಹು॒ವಿದಃ॑ ।
ತೇಭ್ಯೋ॒ ಯದ್ದಕ್ಷಿ॑ಣಾ॒ ನ ನಯೇ᳚ತ್ । ದುರಿ॑ಷ್ಟಗ್ಗ್ ಸ್ಯಾತ್ । ಅ॒ಗ್ನಿಮ॑ಸ್ಯ ವೃಞ್ಜೀರನ್ನ್ ।
ತೇಭ್ಯೋ॑ ಯಥಾ ಶ್ರ॒ದ್ಧ-ನ್ದ॑ದ್ಯಾತ್ । ಸ್ವಿ॑ಷ್ಟಮೇ॒ವೈತತ್ಕ್ರಿ॑ಯತೇ ।
ನಾಸ್ಯಾ॒ಗ್ನಿಂ-ವೃಁ॑ಞ್ಜತೇ ॥ 32 ॥
ಹಿ॒ರ॒ಣ್ಯೇ॒ಷ್ಟ॒ಕೋ ಭ॑ವತಿ । ಯಾವ॑ದುತ್ತ॒ಮ-ಮ॑ಙ್ಗುಲಿ-ಕಾ॒ಣ್ಡಂ-ಯಁ॑ಜ್ಞ ಪ॒ರುಷಾ॒ ಸಮ್ಮಿ॑ತಮ್ ।
ತೇಜೋ॒ ಹಿರ॑ಣ್ಯಮ್ ॥ ಯದಿ॒ ಹಿರ॑ಣ್ಯ॒-ನ್ನ ವಿ॒ನ್ದೇತ್ । ಶರ್ಕ॑ರಾ ಅ॒ಕ್ತಾ ಉಪ॑ದದ್ಧ್ಯಾತ್ । ತೇಜೋ॑ ಘೃ॒ತಮ್ । ಸತೇ॑ಜಸಮೇ॒-ವಾಗ್ನಿ-ಞ್ಚಿ॑ನುತೇ ॥ ಅ॒ಗ್ನಿಞ್ಚಿ॒ತ್ವಾ ಸೌ᳚ತ್ರಾಮ॒ಣ್ಯಾ ಯ॑ಜೇತ ಮೈತ್ರಾವರು॒ಣ್ಯಾ ವಾ᳚ ।
ವೀ॒ರ್ಯೇ॑ಣ॒ ವಾ ಏ॒ಷ ವ್ಯೃ॑ದ್ಧ್ಯತೇ ।
ಯೋ᳚-ಽಗ್ನಿಞ್ಚಿ॑ನು॒ತೇ ॥ 33 ॥
ಯಾವ॑ದೇ॒ವ ವೀ॒ರ್ಯ᳚ಮ್ । ತದ॑ಸ್ಮಿ-ನ್ದಧಾತಿ ॥
ಬ್ರಹ್ಮ॑ಣ॒-ಸ್ಸಾಯು॑ಜ್ಯಗ್ಂ ಸಲೋ॒ಕತಾ॑-ಮಾಪ್ನೋತಿ ।
ಏ॒ತಾಸಾ॑ಮೇ॒ವ ದೇ॒ವತಾ॑ನಾ॒ಗ್ಂ॒ ಸಾಯು॑ಜ್ಯಮ್ ।
ಸಾ॒ರ್ಷ್ಟಿತಾಗ್ಂ॑ ಸಮಾನ ಲೋ॒ಕತಾ॑-ಮಾಪ್ನೋತಿ । ಯ ಏ॒ತಮ॒ಗ್ನಿ-ಞ್ಚಿ॑ನು॒ತೇ । ಯ ಉ॑ಚೈನಮೇ॒ವಂ-ವೇಁದ॑ ॥ ಏ॒ತದೇ॒ವ ಸಾ॑ವಿ॒ತ್ರೇ ಬ್ರಾಹ್ಮ॑ಣಮ್ ।
ಅಥೋ॑ ನಾಚಿಕೇ॒ತೇ ॥ 34 ॥
(ಹೋತಾ॒ ಚತು॑ರ್ಹೋತೄಣಾಗ್ - ಸ್ರು॒ತಿ - ಶ್ಚ॑ಕಾರ - ವಾ - ಭವನ್ತ್ಯ - ಗ್ನಿಷ್ಟೋ॒ಮೇನಾ᳚ - ಪ್ನೋತಿ॒ - ವಯಾಗ್ಂ॑ಸಿ॒ - ವಯಾಗ್ಂ॑ಸಿ॒ - ಸರ್ವ॒ಸ್ಯಾಪ್ತ್ಯೈ॒ ಸರ್ವ॒ಸ್ಯಾವ॑ರುದ್ಧ್ಯೈ॒ - ವೇದ॑ - ವೃಞ್ಜತೇ - ಚಿನು॒ತೇ - +ನವ॑ ಚ) (ಅ. 5)
ಅನುವಾಕಂ 6 - ವೈಶ್ವಸೃಜಚಯನಮ್
ಯಚ್ಚಾ॒ಮೃತಂ॒-ಯಁಚ್ಚ ಮರ್ತ್ಯ᳚ಮ್ । ಯಚ್ಚ॒ ಪ್ರಾಣಿ॑ತಿ॒ ಯಚ್ಚ॒ ನ । ಸರ್ವಾ॒ಸ್ತಾ ಇಷ್ಟ॑ಕಾಃ ಕೃ॒ತ್ವಾ ।
ಉಪ॑ ಕಾಮ॒ದುಘಾ॑ ದಧೇ । ತೇನರ್ಷಿ॑ಣಾ॒ ತೇನ॒ ಬ್ರಹ್ಮ॑ಣಾ । ತಯಾ॑ ದೇ॒ವತ॑ಯಾ-ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॑ದ ॥ ಸರ್ವಾ॒-ಸ್ಸ್ತ್ರಿಯ॒-ಸ್ಸರ್ವಾ᳚-ನ್ಪು॒ಗ್ಂ॒ಸಃ । ಸರ್ವ॒-ನ್ನ ಸ್ತ್ರೀ॑-ಪುಮಞ್ಚ॒ ಯತ್ ।
ಸರ್ವಾ॒ಸ್ತಾಃ ॥ ಯಾವ॑ನ್ತಃ ಪಾ॒ಗ್ಂ॒ಸವೋ॒ ಭೂಮೇಃ᳚ ॥ 35 ॥
ಸಙ್ಖ್ಯಾ॑ತಾ ದೇವಮಾ॒ಯಯಾ᳚ । ಸರ್ವಾ॒ಸ್ತಾಃ ॥ ಯಾವ॑ನ್ತ॒ ಊಷಾಃ᳚ ಪಶೂ॒ನಾಮ್ । ಪೃ॒ಥಿ॒ವ್ಯಾ-ಮ್ಪುಷ್ಟಿ॑ ರ್ಹಿ॒ತಾಃ । ಸರ್ವಾ॒ಸ್ತಾಃ ॥ ಯಾವ॑ತೀ॒-ಸ್ಸಿಕ॑ತಾ॒-ಸ್ಸರ್ವಾಃ᳚ ।
ಅ॒ಫ್ಸ್ವ॑ನ್ತಶ್ಚ॒ ಯಾ-ಶ್ಶ್ರಿ॒ತಾಃ । ಸರ್ವಾ॒ಸ್ತಾಃ ॥ ಯಾವ॑ತೀ॒-ಶ್ಶರ್ಕ॑ರಾ॒ ಧೃತ್ಯೈ᳚ । ಅ॒ಸ್ಯಾ-ಮ್ಪೃ॑ಥಿ॒ವ್ಯಾಮಧಿ॑ ॥ 36 ॥
ಸರ್ವಾ॒ಸ್ತಾಃ ॥ ಯಾವ॒ನ್ತೋ-ಽಶ್ಮಾ॑ನೋ॒-ಽಸ್ಯಾ-ಮ್ಪೃ॑ಥಿ॒ವ್ಯಾಮ್ । ಪ್ರ॒ತಿ॒ಷ್ಠಾಸು॒ ಪ್ರತಿ॑ಷ್ಠಿತಾಃ । ಸರ್ವಾ॒ಸ್ತಾಃ ॥ ಯಾವ॑ತೀ ರ್ವೀ॒ರುಧ॒-ಸ್ಸರ್ವಾಃ᳚ ।
ವಿಷ್ಠಿ॑ತಾಃ ಪೃಥಿ॒ವೀಮನು॑ । ಸರ್ವಾ॒ಸ್ತಾಃ ॥ ಯಾವ॑ತೀ॒ರೋಷ॑ಧೀ॒-ಸ್ಸರ್ವಾಃ᳚ ।
ವಿಷ್ಠಿ॑ತಾಃ ಪೃಥಿ॒ವೀಮನು॑ । ಸರ್ವಾ॒ಸ್ತಾಃ ॥ 37 ॥
ಯಾವ॑ನ್ತೋ॒ ವನ॒ಸ್ಪತ॑ಯಃ । ಅ॒ಸ್ಯಾ-ಮ್ಪೃ॑ಥಿ॒ವ್ಯಾಮಧಿ॑ । ಸರ್ವಾ॒ಸ್ತಾಃ ॥
ಯಾವ॑ನ್ತೋ ಗ್ರಾ॒ಮ್ಯಾಃ ಪ॒ಶವ॒-ಸ್ಸರ್ವೇ᳚ । ಆ॒ರ॒ಣ್ಯಾಶ್ಚ॒ ಯೇ । ಸರ್ವಾ॒ಸ್ತಾಃ ॥ ಯೇ ದ್ವಿ॒ಪಾದ॒-ಶ್ಚತು॑ಷ್ಪಾದಃ । ಅ॒ಪಾದ॑ ಉದರಸ॒ರ್ಪಿಣಃ॑ ।
ಸರ್ವಾ॒ಸ್ತಾಃ ॥ ಯಾವ॒ದಾಞ್ಜ॑-ನಮು॒ಚ್ಯತೇ᳚ ॥ 38 ॥
ದೇ॒ವ॒ತ್ರಾ ಯಚ್ಚ॑ ಮಾನು॒ಷಮ್ । ಸರ್ವಾ॒ಸ್ತಾಃ ॥ ಯಾವ॑ತ್ಕೃ॒ಷ್ಣಾಯ॑ಸ॒ಗ್ಂ॒ ಸರ್ವ᳚ಮ್ ।
ದೇ॒ವ॒ತ್ರಾ ಯಚ್ಚ॑ ಮಾನು॒ಷಮ್ । ಸರ್ವಾ॒ಸ್ತಾಃ ॥
ಯಾವ॑ ಲ್ಲೋ॒ಹಾಯ॑ಸ॒ಗ್ಂ॒ ಸರ್ವ᳚ಮ್ ।
ದೇ॒ವ॒ತ್ರಾ ಯಚ್ಚ॑ ಮಾನು॒ಷಮ್ । ಸರ್ವಾ॒ಸ್ತಾಃ ॥ ಸರ್ವ॒ಗ್ಂ॒ ಸೀಸ॒ಗ್ಂ॒ ಸರ್ವ॒-ನ್ತ್ರಪು॑ ।
ದೇ॒ವ॒ತ್ರಾ ಯಚ್ಚ॑ ಮಾನು॒ಷಮ್ ॥ 39 ॥
ಸರ್ವಾ॒ಸ್ತಾಃ ॥ ಸರ್ವ॒ಗ್ಂ॒ ಹಿರ॑ಣ್ಯಗ್ಂ ರಜ॒ತಮ್ । ದೇ॒ವ॒ತ್ರಾ ಯಚ್ಚ॑ ಮಾನು॒ಷಮ್ ।
ಸರ್ವಾ॒ಸ್ತಾಃ ॥ ಸರ್ವ॒ಗ್ಂ॒ ಸುವ॑ರ್ಣ॒ಗ್ಂ॒ ಹರಿ॑ತಮ್ । ದೇ॒ವ॒ತ್ರಾ ಯಚ್ಚ॑ ಮಾನು॒ಷಮ್ ।
ಸರ್ವಾ॒ಸ್ತಾ ಇಷ್ಟ॑ಕಾಃ ಕೃ॒ತ್ವಾ । ಉಪ॑ಕಾಮ॒ದುಘಾ॑ ದಧೇ । ತೇನರ್ಷಿ॑ಣಾ॒ ತೇನ॒ ಬ್ರಹ್ಮ॑ಣಾ ।
ತಯಾ॑ ದೇ॒ವತ॑ಯಾ-ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॑ದ ॥ 40 ॥
[ಭೂಮೇ॒ - ರಧಿ॒ - ವಿಷ್ಠಿ॑ತಾಃ ಪೃಥಿ॒ವೀಮನು॒ ಸರ್ವಾ॒ಸ್ತಾ - ಉ॒ಚ್ಯತ॑ - ಮಾನು॒ಷಗ್ಂ - ಸೀ॑ದ ] (ಅ. 6)
(ಯಚ್ಚ॒ ಸ್ತ್ರಿಯಃ॑ ಪಾ॒ಗ್ಂ॒ಸವ॒ ಊಷಾ॒-ಸ್ಸಿಕ॑ತಾ॒-ಶ್ಶರ್ಕ॑ರಾ॒ ಅಶ್ಮಾ॑ನೋ ವೀ॒ರುಧ॒ ಓಷ॑ಧೀ॒-ರ್ವನ॒ಸ್ಪತ॑ಯೋ ಗ್ರಾ॒ಮ್ಯಾ ಯೇ ದ್ವಿ॒ಪಾದೋ॒ ಯಾವ॒ದಾಞ್ಜ॑ನಂ॒-ಯಾಁವ॑-ತ್ಕೃ॒ಷ್ಣಾಯ॑ಸಂ
ಁಲೋ॒ಹಾಯ॑ಸ॒ಗ್ಂ॒ ಸೀಸ॒ಗ್ಂ॒ ಹಿರ॑ಣ್ಯ॒ಗ್ಂ॒ ಸುವ॑ರ್ಣ॒ಗ್ಂ॒ ಹರಿ॑ತಮ॒ಷ್ಟಾದ॑ಶ)
ಅನುವಾಕಂ 7 - ವೈಶ್ವಸೃಜಚಯನಮ್
ಸರ್ವಾ॒ ದಿಶೋ॑ ದಿ॒ಕ್ಷು । ಯಚ್ಚಾ॒ನ್ತ ರ್ಭೂ॒ತ-ಮ್ಪ್ರತಿ॑ಷ್ಠಿತಮ್ । ಸರ್ವಾ॒ಸ್ತಾ ಇಷ್ಟ॑ಕಾಃ ಕೃ॒ತ್ವಾ ।
ಉಪ॑ ಕಾಮ॒ದುಘಾ॑ ದಧೇ ।
ತೇನರ್ಷಿ॑ಣಾ॒ ತೇನ॒ ಬ್ರಹ್ಮ॑ಣಾ ।
ತಯಾ॑ ದೇ॒ವತ॑ಯಾ-ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॑ದ ॥
ಅ॒ನ್ತರಿ॑ಕ್ಷಞ್ಚ॒ ಕೇವ॑ಲಮ್ ।
ಯಚ್ಚಾ॒ಸ್ಮಿ-ನ್ನ॑ನ್ತ॒ರಾಹಿ॑ತಮ್ ।
ಸರ್ವಾ॒ಸ್ತಾಃ ॥ ಆ॒ನ್ತ॒ರಿ॒ಕ್ಷ್ಯ॑ಶ್ಚ॒ ಯಾಃ ಪ್ರ॒ಜಾಃ ॥ 41 ॥
ಗ॒ನ್ಧ॒ರ್ವಾ॒-ಫ್ಸ॒ರಸ॑ಶ್ಚ॒ ಯೇ । ಸರ್ವಾ॒ಸ್ತಾಃ ॥ ಸರ್ವಾ॑-ನುದಾ॒ರಾನ್-ಥ್ಸ॒ಲಿಲಾನ್॑ ।
ಅ॒ನ್ತರಿ॑ಕ್ಷೇ॒ ಪ್ರತಿ॑ಷ್ಠಿತಾನ್ । ಸರ್ವಾ॒ಸ್ತಾಃ ॥
ಸರ್ವಾ॑-ನುದಾ॒ರಾನ್-ಥ್ಸ॑ಲಿ॒ಲಾನ್ ।
ಸ್ಥಾ॒ವ॒ರಾಃ ಪ್ರೋ॒ಷ್ಯಾ᳚ಶ್ಚ॒ ಯೇ । ಸರ್ವಾ॒ಸ್ತಾಃ ॥ ಸರ್ವಾ॒-ನ್ಧುನಿ॒ಗ್ಂ॒ ಸರ್ವಾ᳚ನ್-ಧ್ವ॒ಗ್ಂ॒ಸಾನ್ ।
ಹಿ॒ಮೋ ಯಚ್ಚ॑ ಶೀ॒ಯತೇ᳚ ॥ 42 ॥
ಸರ್ವಾ॒ಸ್ತಾಃ ॥ ಸರ್ವಾ॒-ನ್ಮರೀ॑ಚೀ॒ನ್॒. ವಿತ॑ತಾನ್ । ನೀ॒ಹಾ॒ರೋ ಯಚ್ಚ॑ ಶೀ॒ಯತೇ᳚ । ಸರ್ವಾ॒ಸ್ತಾಃ ॥ ಸರ್ವಾ॑ ವಿ॒ದ್ಯುತ॒-ಸ್ಸರ್ವಾ᳚ನ್-ಥ್ಸ್ತನಯಿ॒ತ್ನೂನ್ । ಹ್ರಾ॒ದುನೀ॒ ರ್ಯಚ್ಚ॑ ಶೀ॒ಯತೇ᳚ । ಸರ್ವಾ॒ಸ್ತಾಃ ॥ ಸರ್ವಾ॒-ಸ್ಸ್ರವ॑ನ್ತೀ-ಸ್ಸ॒ರಿತಃ॑ ।
ಸರ್ವ॑ಮಫ್ಸು ಚ॒ರಞ್ಚ॒ ಯತ್ । ಸರ್ವಾ॒ಸ್ತಾಃ ॥ 43 ॥
ಯಾಶ್ಚ॒ ಕೂಪ್ಯಾ॒ ಯಾಶ್ಚ॑ ನಾ॒ದ್ಯಾ᳚-ಸ್ಸಮು॒ದ್ರಿಯಾಃ᳚ । ಯಾಶ್ಚ॑ ವೈಶ॒ನ್ತೀರು॒ತ ಪ್ರಾ॑ಸ॒ಚೀರ್ಯಾಃ ।
ಸರ್ವಾ॒ಸ್ತಾಃ ॥ ಯೇ ಚೋ॒ತ್ತಿಷ್ಠ॑ನ್ತಿ ಜೀ॒ಮೂತಾಃ᳚ ।
ಯಾಶ್ಚ॒ ವರ್ಷ॑ನ್ತಿ ವೃ॒ಷ್ಟಯಃ॑ । ಸರ್ವಾ॒ಸ್ತಾಃ ॥ ತಪ॒ಸ್ತೇಜ॑ ಆಕಾ॒ಶಮ್ । ಯಚ್ಚಾ॑ಕಾ॒ಶೇ ಪ್ರತಿ॑ಷ್ಠಿತಮ್ ।
ಸರ್ವಾ॒ಸ್ತಾಃ ॥ ವಾ॒ಯುಂ-ವಁಯಾಗ್ಂ॑ಸಿ॒ ಸರ್ವಾ॑ಣಿ ॥ 44 ॥
ಅ॒ನ್ತ॒ರಿ॒ಕ್ಷ॒ಚ॒ರಞ್ಚ॒ ಯತ್ । ಸರ್ವಾ॒ಸ್ತಾಃ ॥ ಅ॒ಗ್ನಿಗ್ಂ ಸೂರ್ಯ॑-ಞ್ಚ॒ನ್ದ್ರಮ್ । ಮಿ॒ತ್ರಂ-ವಁರು॑ಣ॒-ಮ್ಭಗ᳚ಮ್ । ಸರ್ವಾ॒ಸ್ತಾಃ ॥ ಸ॒ತ್ಯಗ್ಗ್ ಶ್ರ॒ದ್ಧಾ-ನ್ತಪೋ॒ ದಮ᳚ಮ್ ।
ನಾಮ॑ ರೂ॒ಪಞ್ಚ॑ ಭೂ॒ತಾನಾ᳚ಮ್ । ಸರ್ವಾ॒ಸ್ತಾ ಇಷ್ಟ॑ಕಾಃ ಕೃ॒ತ್ವಾ । ಉಪ॑ ಕಾಮ॒ದುಘಾ॑ ದಧೇ । ತೇನರ್ಷಿ॑ಣಾ॒ ತೇನ॒ ಬ್ರಹ್ಮ॑ಣಾ ।
ತಯಾ॑ ದೇ॒ವತ॑ಯಾ-ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॑ದ ॥ 45 ॥
(ಪ್ರ॒ಜಾ-ಹಿ॒ಮೋ ಯಚ್ಚ॑ ಶೀ॒ಯತೇ॒-ಸರ್ವಾ॒ಸ್ತಾಃ-ಸರ್ವಾ॑ಣಿ॒-ಬ್ರಹ್ಮ॒ಣೈಕ॑-ಞ್ಚ) (ಅ. 7)
(ದಿಶೋ॒-ಽನ್ತರಿ॑ಕ್ಷಮಾನ್ತರಿ॒ಕ್ಷ್ಯ॑ ಉದಾ॒ರಾನು॑ದಾ॒ರಾ-ನ್ಧುನಿ॒-ಮ್ಮರೀ॑ಚೀನ್. ವಿ॒ದ್ಯುತಃ॒
ಸ್ರವ॑ನ್ತೀ॒ರ್ಯಾಶ್ಚ॒ ಯೇ ಚ॒ ತಪೋ॑ ವಾ॒ಯುಮ॒ಗ್ನಿಗ್ಂ ಸ॒ತ್ಯ-ಮ್ಪಞ್ಚ॑ದಶ)
ಅನುವಾಕಂ 8 - ವೈಶ್ವಸೃಜಚಯನಮ್
ಸರ್ವಾ॒-ನ್ದಿವ॒ಗ್ಂ॒ ಸರ್ವಾ᳚-ನ್ದೇ॒ವಾ-ನ್ದಿ॒ವಿ ।
ಯಚ್ಚಾ॒ನ್ತ ರ್ಭೂ॒ತ-ಮ್ಪ್ರತಿ॑ಷ್ಠಿತಮ್ ।
ಸರ್ವಾ॒ಸ್ತಾ ಇಷ್ಟ॑ಕಾಃ ಕೃ॒ತ್ವಾ । ಉಪ॑ ಕಾಮ॒ದುಘಾ॑ ದಧೇ । ತೇನರ್ಷಿ॑ಣಾ॒ ತೇನ॒ ಬ್ರಹ್ಮ॑ಣಾ ।
ತಯಾ॑ ದೇ॒ವತ॑ಯಾ-ಽಙ್ಗಿರ॒ಸ್ವದ-ಧ್ರು॒ವಾ ಸೀ॑ದ ॥ ಯಾವ॑ತೀ॒ ಸ್ತಾರ॑ಕಾ॒-ಸ್ಸರ್ವಾಃ᳚ ।
ವಿತ॑ತಾ ರೋಚ॒ನೇ ದಿ॒ವಿ । ಸರ್ವಾ॒ಸ್ತಾಃ ॥ ಋಚೋ॒ ಯಜೂಗ್ಂ॑ಷಿ॒ ಸಾಮಾ॑ನಿ ॥ 46 ॥
ಅ॒ಥ॒ರ್ವಾ॒ಙ್ಗಿ॒ರಸ॑ಶ್ಚ॒ ಯೇ । ಸರ್ವಾ॒ಸ್ತಾಃ ॥ ಇ॒ತಿ॒ಹಾ॒ಸ॒ಪು॒ರಾ॒ಣಞ್ಚ॑ ।
ಸ॒ರ್ಪ॒ದೇ॒ವ॒ಜ॒ನಾಶ್ಚ॒ ಯೇ । ಸರ್ವಾ॒ಸ್ತಾಃ ॥
ಯೇ ಚ॑ ಲೋ॒ಕಾ ಯೇ ಚಾ॑ಲೋ॒ಕಾಃ ।
ಅ॒ನ್ತ ರ್ಭೂ॒ತ-ಮ್ಪ್ರತಿ॑ಷ್ಠಿತಮ್ । ಸರ್ವಾ॒ಸ್ತಾಃ ॥
ಯಚ್ಚ॒ ಬ್ರಹ್ಮ॒ ಯಚ್ಚಾ᳚ಬ್ರ॒ಹ್ಮ ।
ಅ॒ನ್ತ ರ್ಬ್ರ॒ಹ್ಮ-ನ್ಪ್ರತಿ॑ಷ್ಠಿತಮ್ ॥ 47 ॥
ಸರ್ವಾ॒ಸ್ತಾಃ ॥ ಅ॒ಹೋ॒ರಾ॒ತ್ರಾಣಿ॒ ಸರ್ವಾ॑ಣಿ । ಅ॒ದ್ರ್ಧ॒ಮಾ॒ಸಾಗ್ಶ್ಚ॒ ಕೇವ॑ಲಾನ್ ।
ಸರ್ವಾ॒ಸ್ತಾಃ ॥ ಸರ್ವಾ॑ನೃ॒ತೂನ್-ಥ್ಸರ್ವಾ᳚-ನ್ಮಾ॒ಸಾನ್ । ಸಂ॒ವಁ॒ಥ್ಸ॒ರಞ್ಚ॒ ಕೇವ॑ಲಮ್ ।
ಸರ್ವಾ॒ಸ್ತಾಃ ॥ ಸರ್ವ॒-ಮ್ಭೂತ॒ಗ್ಂ॒ ಸರ್ವ॒-ಮ್ಭವ್ಯ᳚ಮ್ । ಯಚ್ಚಾ॒ತೋ-ಽಧಿ॑ ಭವಿ॒ಷ್ಯತಿ॑ ।
ಸರ್ವಾ॒ಸ್ತಾ ಇಷ್ಟ॑ಕಾಃ ಕೃ॒ತ್ವಾ ।
ಉಪ॑ ಕಾಮ॒ದುಘಾ॑ ದಧೇ ।
ತೇನರ್ಷಿ॑ಣಾ॒ ತೇನ॒ ಬ್ರಹ್ಮ॑ಣಾ ।
ತಯಾ॑ ದೇ॒ವತ॑ಯಾ-ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॑ದ ॥ 48 ॥
(ಸಾಮಾ॑ನಿ - ಬ್ರ॒ಹ್ಮ-ನ್ಪ್ರತಿ॑ಷ್ಠಿತಂ - ಕೃ॒ತ್ವಾ ತ್ರೀಣಿ॑ ಚ) (ಅ. 8)
(ದಿವ॒-ನ್ತಾರ॑ಕಾ॒ ಋಚ॑ ಇತಿಹಾಸಪುರಾ॒ಣ-ಞ್ಚ॒ ಯೇ ಚ॒ ಯಚ್ಚಾ॑ಹೋರಾ॒ತ್ರಾಣ್ಯೃ॒ತೂ-ನ್ಭೂತ॒-ನ್ನವ॑)
ಅನುವಾಕಂ 9 - ಬ್ರಹ್ಮಾ ಸದಸ್ಯಾಸೀನೋ ವೌಶ್ವಸೃಜಾನ್ ವ್ಯಾಚಷ್ಟೇ
ಋ॒ಚಾ-ಮ್ಪ್ರಾಚೀ॑ ಮಹ॒ತೀ ದಿಗು॑ಚ್ಯತೇ ।
ದಕ್ಷಿ॑ಣಾ-ಮಾಹು॒ ರ್ಯಜು॑ಷಾಮಪಾ॒ರಾಮ್ ।
ಅಥ॑ರ್ವಣಾ॒-ಮಗ್ಂಇ॑ರಸಾ-ಮ್ಪ್ರ॒ತೀಚೀ᳚ ।
ಸಾಮ್ನಾ॒-ಮುದೀ॑ಚೀ ಮಹ॒ತೀ ದಿಗು॑ಚ್ಯತೇ ॥
ಋ॒ಗ್ಭಿಃ ಪೂ᳚ರ್ವಾ॒ಹ್ಣೇ ದಿ॒ವಿ ದೇ॒ವ ಈ॑ಯತೇ ।
ಯ॒ಜು॒ರ್ವೇ॒ದೇ ತಿ॑ಷ್ಠತಿ॒ ಮದ್ಧ್ಯೇ॒ ಅಹ್ನಃ॑ ।
ಸಾ॒ಮ॒ವೇ॒ದೇ-ನಾ᳚ಸ್ತಮ॒ಯೇ ಮಹೀ॑ಯತೇ ।
ವೇದೈ॒-ರಶೂ᳚ನ್ಯ-ಸ್ತ್ರಿ॒ಭಿರೇ॑ತಿ॒ ಸೂರ್ಯಃ॑ ॥
ಋ॒ಗ್ಭ್ಯೋ ಜಾ॒ತಾಗ್ಂ ಸ॑ರ್ವ॒ಶೋ ಮೂರ್ತಿ॑-ಮಾಹುಃ ।
ಸರ್ವಾ॒ ಗತಿ॑ ರ್ಯಾಜು॒ಷೀ ಹೈ॒ವ ಶಶ್ವ॑ತ್ ॥ 49 ॥
ಸರ್ವ॒-ನ್ತೇಜ॑ ಸ್ಸಾಮರೂ॒ಪ್ಯಗ್ಂ ಹ॑ ಶಶ್ವತ್ । ಸರ್ವಗ್ಂ॑ ಹೇ॒ದ-ಮ್ಬ್ರಹ್ಮ॑ಣಾ ಹೈ॒ವ ಸೃ॒ಷ್ಟಮ್ ॥
ಋ॒ಗ್ಭ್ಯೋ ಜಾ॒ತಂ-ವೈಁಶ್ಯಂ॒-ವಁರ್ಣ॑-ಮಾಹುಃ । ಯ॒ಜು॒ರ್ವೇ॒ದ-ಙ್ಕ್ಷ॑ತ್ರಿ॒ಯಸ್ಯಾ॑-ಹು॒ರ್ಯೋನಿ᳚ಮ್ ।
ಸಾ॒ಮ॒ವೇ॒ದೋ ಬ್ರಾ᳚ಹ್ಮ॒ಣಾನಾ॒-ಮ್ಪ್ರಸೂ॑ತಿಃ ।
ಪೂರ್ವೇ॒ ಪೂರ್ವೇ᳚ಭ್ಯೋ॒ ವಚ॑ ಏ॒ತ-ದೂ॑ಚುಃ ॥
ಆ॒ದ॒ರ್॒ಶ-ಮ॒ಗ್ನಿ-ಞ್ಚಿ॑ನ್ವಾ॒ನಾಃ ।
ಪೂರ್ವೇ॑ ವಿಶ್ವ॒ ಸೃಜೋ॒-ಽಮೃತಾಃ᳚ ।
ಶ॒ತಂ-ವಁ॑ರ್ಷ ಸಹ॒ಸ್ರಾಣಿ॑ । ದೀ॒ಕ್ಷಿ॒ತಾ-ಸ್ಸ॒ತ್ರ-ಮಾ॑ಸತ ॥ 50 ॥
ತಪ॑ ಆಸೀ-ದ್ಗೃ॒ಹಪ॑ತಿಃ । ಬ್ರಹ್ಮ॑ ಬ್ರ॒ಹ್ಮಾಭ॑ವ-ಥ್ಸ್ವ॒ಯಮ್ । ಸ॒ತ್ಯಗ್ಂ ಹ॒ ಹೋ ತೈ॑ಷಾ॒ಮಾಸೀ᳚ತ್ ।
ಯ-ದ್ವಿ॑ಶ್ವ॒ಸೃಜ॒ ಆಸ॑ತ ॥
ಅ॒ಮೃತ॑-ಮೇಭ್ಯ॒ ಉದ॑ಗಾಯತ್ ।
ಸ॒ಹಸ್ರ॑-ಮ್ಪರಿವಥ್ಸ॒ರಾನ್ ।
ಭೂ॒ತಗ್ಂ ಹ॑ ಪ್ರಸ್ತೋ॒ ತೈಷಾ॒ಮಾಸೀ᳚ತ್ ।
ಭ॒ವಿ॒ಷ್ಯ-ತ್ಪ್ರತಿ॑ ಚಾಹರತ್ ॥
ಪ್ರಾ॒ಣೋ ಅ॑ದ್ಧ್ವ॒ರ್ಯು-ರ॑ಭವತ್ ।
ಇ॒ದಗ್ಂ ಸರ್ವ॒ಗ್ಂ॒ ಸಿಷಾ॑ಸತಾಮ್ ॥ 51 ॥
ಅ॒ಪಾ॒ನೋ ವಿ॒ದ್ವಾ-ನಾ॒ವೃತಃ॑ । ಪ್ರತಿ॒ ಪ್ರಾತಿ॑ಷ್ಠ-ದದ್ಧ್ವ॒ರೇ ॥ ಆ॒ರ್ತ॒ವಾ ಉ॑ಪಗಾ॒ತಾರಃ॑ । ಸ॒ದ॒ಸ್ಯಾ॑ ಋ॒ತವೋ॑-ಽಭವನ್ನ್ । ಅ॒ರ್ಧ॒ಮಾ॒ಸಾಶ್ಚ॒ ಮಾಸಾ᳚ಶ್ಚ । ಚ॒ಮ॒ಸಾ॒-ದ್ಧ್ವ॒ರ್ಯ॒ವೋ-ಽಭ॑ವನ್ನ್ ॥
ಅಶಗ್ಂ॑ ಸ॒-ದ್ಬ್ರಹ್ಮ॑ಣ॒-ಸ್ತೇಜಃ॑ ।
ಅ॒ಚ್ಛಾ॒ವಾ॒ಕೋ ಽಭ॑ವ॒-ದ್ಯಶಃ॑ ।
ಋ॒ತ-ಮೇ॑ಷಾ-ಮ್ಪ್ರಶಾ॒ಸ್ತಾ-ಽಽಸೀ᳚ತ್ ।
ಯ-ದ್ವಿ॑ಶ್ವ॒ ಸೃಜ॒ ಆಸ॑ತ ॥ 52 ॥
ಊರ್ಗ್-ರಾಜಾ॑ನ॒-ಮುದ॑ವಹತ್ । ಧ್ರು॒ವ॒ ಗೋ॒ಪ-ಸ್ಸಹೋ॑-ಽಭವತ್ । ಓಜೋ॒-ಽಭ್ಯ॑ಷ್ಟೌ॒-ದ್ಗ್ರಾವ್.ಣ್ಣಃ॑ ।
ಯ-ದ್ವಿ॑ಶ್ವ॒ ಸೃಜ॒ ಆಸ॑ತ ॥
ಅಪ॑ಚಿತಿಃ ಪೋ॒ತ್ರೀಯಾ॑-ಮಯಜತ್ । ನೇ॒ಷ್ಟ್ರೀಯಾ॑-ಮಯಜ॒-ತ್ತ್ವಿಷಿಃ॑ । ಆಗ್ನೀ᳚ದ್ಧ್ರಾ-ದ್ವಿ॒ದುಷೀ॑ ಸ॒ತ್ಯಮ್ । ಶ್ರ॒ದ್ಧಾ ಹೈ॒ವಾ ಯ॑ಜ-ಥ್ಸ್ವ॒ಯಮ್ ॥ ಇರಾ॒ ಪತ್ನೀ॑ ವಿಶ್ವ॒ ಸೃಜಾ᳚ಮ್ । ಆಕೂ॑ತಿ-ರಪಿನಡ್ಢ॒ವಿಃ ॥ 53 ॥
ಇ॒ದ್ಧ್ಮಗ್ಂ ಹ॒ ಕ್ಷುಚ್ ಚೈ᳚ಭ್ಯ ಉ॒ಗ್ರೇ । ತೃ॒ಷ್ಣಾ ಚಾ ವ॑ಹತಾಮು॒ಭೇ ॥ ವಾಗೇ॑ಷಾಗ್ಂ ಸುಬ್ರಹ್ಮ॒ಣ್ಯಾ-ಽಽಸೀ᳚ತ್ । ಛ॒ನ್ದೋ॒ ಯೋ॒ಗಾನ್. ವಿ॑ಜಾನ॒ತೀ ।
ಕ॒ಲ್ಪ॒ತ॒ನ್ತ್ರಾಣಿ॑ ತನ್ವಾ॒ನಾ-ಽಹಃ॑ । ಸ॒ಗ್ಗ್॒ಸ್ಥಾಶ್ಚ॑ ಸರ್ವ॒ಶಃ ॥ ಅ॒ಹೋ॒ರಾ॒ತ್ರೇ ಪ॑ಶುಪಾ॒ಲ್ಯೌ । ಮು॒ಹೂ॒ರ್ತಾಃ ಪ್ರೇ॒ಷ್ಯಾ॑ ಅಭವನ್ನ್ । ಮೃ॒ತ್ಯುಸ್ ತದ॑-ಭವ-ದ್ಧಾ॒ತಾ । ಶ॒ಮಿ॒ತೋ ಗ್ರೋ ವಿ॒ಶಾ-ಮ್ಪತಿಃ॑ ॥ 54 ॥
ವಿ॒ಶ್ವ॒ಸೃಜಃ॑ ಪ್ರಥ॒ಮಾ-ಸ್ಸ॒ತ್ರ-ಮಾ॑ಸತ । ಸ॒ಹಸ್ರ॑ ಸಮ॒-ಮ್ಪ್ರಸು॑ತೇನ॒ ಯನ್ತಃ॑ ।
ತತೋ॑ ಹ ಜಜ್ಞೇ॒ ಭುವ॑ನಸ್ಯ ಗೋ॒ಪಾಃ । ಹಿ॒ರ॒ಣ್ಮಯಃ॑ ಶ॒ಕುನಿ॒ ರ್ಬ್ರಹ್ಮ॒ ನಾಮ॑ ॥ ಯೇನ॒ ಸೂರ್ಯ॒-ಸ್ತಪ॑ತಿ॒ ತೇಜ॑ಸೇ॒-ದ್ಧಃ । ಪಿ॒ತಾ ಪು॒ತ್ರೇಣ॑ ಪಿತೃ॒ಮಾನ್. ಯೋನಿ॑ಯೋನೌ । ನಾವೇ॑ದವಿ-ನ್ಮನುತೇ॒ ತ-ಮ್ಬೃ॒ಹನ್ತ᳚ಮ್ । ಸ॒ರ್ವಾ॒ನು॒ಭು-ಮಾ॒ತ್ಮಾನಗ್ಂ॑ ಸಮ್ಪರಾ॒ಯೇ ॥
ಏ॒ಷ ನಿ॒ತ್ಯೋ ಮ॑ಹಿ॒ಮಾ ಬ್ರಾ᳚ಹ್ಮ॒ಣಸ್ಯ॑ ।
ನ ಕರ್ಮ॑ಣಾ ವರ್ಧತೇ॒ ನೋ ಕನೀ॑ಯಾನ್ ॥ 55 ॥
ತಸ್ಯೈ॒ವಾತ್ಮಾ ಪ॑ದ॒ವಿತ್ತಂ-ವಿಁ॑ದಿತ್ವಾ ।
ನ ಕರ್ಮ॑ಣಾ ಲಿಪ್ಯತೇ॒ ಪಾಪ॑ಕೇನ ॥
ಪಞ್ಚ॑ಪಞ್ಚಾ॒ಶತ॑-ಸ್ತ್ರಿ॒ವೃತಃ॑ ಸಂವಁಥ್ಸ॒ರಾಃ ।
ಪಞ್ಚ॑ಪಞ್ಚಾ॒ಶತಃ॑ ಪಞ್ಚದ॒ಶಾಃ । ಪಞ್ಚ॑ಪಞ್ಚಾ॒ಶತಃ॑ ಸಪ್ತದ॒ಶಾಃ ।
ಪಞ್ಚ॑ಪಞ್ಚಾ॒ಶತ॑ ಏಕವಿ॒ಗ್ಂ॒ಶಾಃ ।
ವಿ॒ಶ್ವ॒ಸೃಜಾಗ್ಂ॑ ಸ॒ಹಸ್ರ॑ ಸಂವಁಥ್ಸರಮ್ ॥
ಏ॒ತೇನ॒ ವೈ ವಿ॑ಶ್ವ॒ಸೃಜ॑ ಇ॒ದಂ-ವಿಁಶ್ವ॑-ಮಸೃಜನ್ತ । ಯ-ದ್ವಿಶ್ವ॒-ಮಸೃ॑ಜನ್ತ । ತಸ್ಮಾ᳚-ದ್ವಿಶ್ವ॒ಸೃಜಃ॑ ॥
ವಿಶ್ವ॑-ಮೇನಾ॒-ನನು॒ ಪ್ರಜಾ॑ಯತೇ । ಬ್ರಹ್ಮ॑ಣ॒-ಸ್ಸಾಯು॑ಜ್ಯಗ್ಂ ಸಲೋ॒ಕತಾಂ᳚-ಯಁನ್ತಿ ।
ಏ॒ತಾಸಾ॑ಮೇ॒ವ ದೇ॒ವತಾ॑ನಾ॒ಗ್ಂ॒ ಸಾಯು॑ಜ್ಯಮ್ । ಸಾ॒ರ್ಷ್ಟಿತಾಗ್ಂ॑ ಸಮಾನ ಲೋ॒ಕತಾಂ᳚-ಯಁನ್ತಿ ।
ಯ ಏ॒ತ-ದು॑ಪ॒ಯನ್ತಿ॑ । ಯೇ ಚೈ॑ನ॒-ತ್ಪ್ರಾಹುಃ॑ ।
ಯೇಭ್ಯ॑-ಶ್ಚೈನ॒-ತ್ಪ್ರಾಹುಃ॑ ॥
ಓಮ್ ॥ 56 ॥
(ಶಶ್ವ॑ - ದಾಸತ॒ - ಸಿಷಾ॑ಸತಾ॒ - ಮಾಸ॑ತ - ಹ॒ವಿಷ್ - ಪತಿಃ॒ - ಕನೀ॑ಯಾ॒ನ್ - ತಸ್ಮಾ᳚-ದ್ವಿಶ್ವ॒ಸೃಜೋ॒-ಽಷ್ಟೌ ಚ॑) (ಅ. 9)
(ತುಭ್ಯಂ॑ - ದೇ॒ವೇಭ್ಯ॒ - ಸ್ತಪ॑ಸಾ - ದೇ॒ವೇಭ್ಯೋ॒ - ಬ್ರಹ್ಮ॒ ವೈ ಚತು॑ರ್ಹೋತಾರೋ॒ - ಯಚ್ಚಾ॒ಮೃತ॒ಗ್ಂ॒ - ಸರ್ವಾ॒ ದಿಶೋ॑ ದಿ॒ಕ್ಷು - ಸರ್ವಾ॒-ನ್ದಿವ॑ - ಮೃ॒ಚಾ-ಮ್ಪ್ರಾಚೀ॒ ನವ॑)
(ತುಭ್ಯಂ॒ - ತಪ॑ಸಾ॒ - ತಾ ವಾ ಏ॒ತಾಃ ಪಞ್ಚ॒ - ಹಿರ॑ಣ್ಯ-ನ್ದದಾತಿ॒ - ಸರ್ವಾ॒ ದಿಶ॒ - ಸ್ತಪ॑ ಆಸೀದ್ಗೃ॒ಹಪ॑ತಿ॒-ಷ್ಷಟ್ಪ॑ಞ್ಚಾ॒ಶತ್)
(ತುಭ್ಯ॒-ಮೋಂ)
॥ ಹರಿಃ॑ ಓಮ್ ॥
॥ ತೈತ್ತಿರೀಯ ಯಜುರ್ಬ್ರಾಹ್ಮಣೇ ಕಾಠಕೇ ತೃತೀಯ ಪ್ರಶ್ನ-ಸ್ಸಮಾಪ್ತಃ ॥
॥ ಇತಿ ತೈತ್ತಿರೀಯ ಯಜುರ್ಬ್ರಾಹ್ಮಣೇ ಕಾಠಕಂ ಸಮಾಪ್ತಮ್ ॥
Roman (IAST) Transliteration
kṛṣṇa yajurvedīya taittirīya brāhmaṇe kāṭhake tṛtīyaḥ praśnaḥ - vaiśvasṛjacayanam
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
cāturhotracayanaṃ-vai~śvasṛjacayana-ñca
anuvākaṃ 1 - vaiśvasṛjacayanāṅgabhūtāḥ divaśśyenaya iṣṭayaḥ
tubhya॒-ntā a̭ṅgirastama॒ viśvā᳚-ssukṣi॒tayaḥ॒ pṛtha̭k | agne॒ kāmā̭ya yemire || a॒śyāma॒ ta-ṅkāma̭magne॒ tavo॒ tya̭śyāma̭ ra॒yigṃ ra̭yiva-ssu॒vīra᳚m | a॒śyāma॒ vāja̭ma॒bhi vā॒jaya̭nto॒ 'śyāma̭ dyu॒mnama̭jarā॒jara̭-nte || |
āśā̭nā-ntvā ''śāpā॒lebhyaḥ̭ | ca॒turbhyo̭ a॒mṛte᳚bhyaḥ | i॒da-mbhū॒tasyādhya̭kṣebhyaḥ | vi॒dhema̭ ha॒viṣā̭ va॒yam || viśvā॒ āśā॒ madhṷnā॒ sagṃsṛ̭jāmi | a॒na॒mī॒vā āpa॒ oṣa̭dhayo bhavantu | a॒yaṃ-ya~ja̭māno॒ mṛdho॒ vya̭syatāṃ agṛ̭bhītāḥ pa॒śavaḥ̭ santu॒ sarve᳚ || |
anṷ no॒-'dyā-'nṷmatirya॒jña-nde॒veṣṷ manyatām | a॒gniśca̭ havya॒vāha̭no॒ bhava̭tā-ndā॒śuṣe॒ mayaḥ̭ || anvida̭numate॒ tva-mmanyā̭sai॒ śañca̭naḥ kṛdhi | kratve॒ dakṣā̭ya no hinu॒ praṇa॒ āyūgṃ̭ṣi tāriṣaḥ || |
kāmo̭ bhū॒tasya॒ bhavya̭sya | sa॒mrāḍeko॒ virā̭jati | sa i॒da-mprati̭ paprathe | ṛ॒tūnu-thsṛ̭jate va॒śī || kāma॒stadagre॒ sama̭varta॒tādhi̭ | mana̭so॒ retaḥ̭ pratha॒maṃ-ya~dāsī᳚t | sa॒to bandhu॒masa̭ti॒ nira̭vindann | hṛ॒di pra॒tīṣyā̭ ka॒vayo̭ manī॒ṣā || |
brahma̭ jajñā॒na-mpra̭tha॒ma-mpu॒rastā॒dvi sī̭ma॒ta-ssu॒ruco̭ ve॒na ā̭vaḥ | sa bu॒dhniyā̭ upa॒mā a̭sya vi॒ṣṭhā-ssa॒taśca॒ yoni॒masa̭taśca॒ vivaḥ̭ || pi॒tā vi॒rājā̭mṛṣa॒bho ra̭yī॒ṇām | a॒ntari̭kṣaṃ-vi~॒śvarṷ̄pa॒ āvi̭veśa | tama॒rkai-ra॒bhya̭rcanti va॒thsam | brahma॒ santa॒-mbrahma̭ṇā va॒rdhaya̭ntaḥ || |
ya॒jño rā॒yo ya॒jña ī̭śe॒ vasṷ̄nām | ya॒jña-ssa॒syānā̭mu॒ta sṷkṣitī॒nām | ya॒jña i॒ṣṭaḥ pū॒rvaci̭tti-ndadhātu | ya॒jño bra̭hma॒ṇvāgṃ apyḙtu de॒vān || a॒yaṃ-ya~॒jño va̭rdhatā॒-ṅgobhi॒raśvaiḥ᳚ | i॒yaṃ-ve~diḥ̭ svapa॒tyā su॒vīrā᳚ | i॒da-mba॒r॒hirati̭ ba॒r॒hīgṣya॒nyā | i॒maṃ-ya~॒jñaṃ-vi~śvḙ avantu de॒vāḥ || | āpo̭ bha॒drā ghṛ॒tamidāpa̭ āsura॒gnī-ṣomaṷ bibhra॒tyāpa॒ i-ttāḥ | tī॒vro raso̭ madhu॒pṛcā̭ maraṅga॒ma ā mā᳚ prā॒ṇena̭ sa॒ha varca̭sā gann || ādi-tpa̭śyāmyu॒ta vā̭ śṛṇo॒myā mā॒ ghoṣo̭ gacchati॒ vānna̭ āsām | manyḙ bhejā॒no a॒mṛta̭sya॒ tarhi॒ hira̭ṇyavarṇā॒ atṛ̭paṃ-ya~॒dā vaḥ̭ || |
tubhya̭-mbharanti kṣi॒tayo̭ yaviṣṭha | ba॒lima̭gne॒ anti̭ ta॒ ota dū॒rāt | ā bhandi̭ṣṭhasya suma॒ti-ñci̭kiddhi | bṛ॒hattḙ agne॒ mahi॒ śarma̭ bha॒dram || yo de॒hyo ana̭mayadvadha॒snaiḥ | yo arya̭patnī-ru॒ṣasa̭śca॒kāra̭ | sa ni॒rudhyā॒ nahṷṣo ya॒hvo a॒gniḥ | viśa̭ścakre bali॒hṛta॒-ssaho̭bhiḥ || |
pūrva̭-ndevā॒ apa̭reṇā-nu॒paśya॒ñjanma̭bhiḥ | janmā॒nyava̭raiḥ॒ parā̭ṇi | vedā̭ni devā a॒yama॒smīti॒ mām | a॒hagṃ hi॒tvā śarī̭ra-ñja॒rasaḥ̭ pa॒rastā᳚t || prā॒ṇā॒pā॒nau cakṣu॒-śśrotra᳚m | vāca॒-mmana̭si॒ sambhṛ̭tām | hi॒tvā śarī̭ra-ñja॒rasaḥ̭ pa॒rastā᳚t | ā bhūti॒-mbhūtiṃ̭-va~॒yama̭śnavāmahai || |
ha॒vya॒vāha̭-mabhimāti॒ṣā-'ha᳚m | ra॒kṣo॒haṇa॒-mpṛta̭nāsu ji॒ṣṇum | jyoti̭ṣmanta॒-ndīdya̭ta॒-mpura̭ndhim | a॒gnigg svi̭ṣṭa॒kṛta॒mā hṷvema || svi̭ṣṭamagne a॒bhi ta-tpṛ̭ṇāhi | viśvā̭ deva॒ pṛta̭nā a॒bhiṣya | u॒ru-nnaḥ॒ panthā᳚-mpradi॒śanvi bhā̭hi | jyoti̭ṣmaddhehya॒jara̭-nna॒ āyuḥ̭ || || 1 ||
tubhya॒-ndaśa̭ (a. 1)
anuvākaṃ 2 - tāsā-mbrāhmaṇam
de॒vebhyo॒ vai sva॒rgo lo॒kasti॒ro̭-'bhavat |
te pra॒jāpa̭ti-mabruvann |
prajā̭pate sva॒rgo vai no̭ lo॒kasti॒ro̭-'bhūt | tamanvi॒ccheti̭ | taṃ-ya~̭jñakra॒tubhi॒-ranvai᳚cchat | taṃ-ya~̭jñakra॒tubhi॒-rnānva̭vindat |
tamiṣṭi̭bhi॒-ranvai᳚cchat | tamiṣṭi̭bhi॒-ranva̭vindat |
tadiṣṭī̭nā-miṣṭi॒tvam | eṣṭa̭yo ha॒vai nāma̭ |
tā iṣṭa̭ya॒ ityāca̭kṣate pa॒rokṣḙṇa | pa॒rokṣa̭ priyā iva॒ hi de॒vāḥ || 2 ||
tamāśā᳚-'bravīt | prajā̭pata ā॒śayā॒ vai śrā᳚myasi |
a॒hamu॒ vā āśā᳚-'smi | mā-nnu ya̭jasva |
atha̭ te sa॒tyā-''śā̭ bhaviṣyati | anṷ sva॒rgaṃ-lo~॒kaṃ-ve~॒thsyasīti̭ | sa e॒tama॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnira̭vapat |
ā॒śāyai̭ ca॒rum | anṷmatyai ca॒rum | tato॒ vai tasya̭ sa॒tyā-''śā̭ 'bhavat | anṷ sva॒rgaṃ-lo~॒ka-ma̭vindat | sa॒tyā ha॒ vā a॒syāśā̭ bhavati |
anṷ sva॒rgaṃ-lo~॒kaṃ-vi~̭ndati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ || so-'tra̭ juhoti | a॒gnaye॒ kāmā̭ya॒ svāhā॒-''śāyai॒ svāhā᳚ | anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 3 ||
ta-ṅkāmo᳚-'bravīt | prajā̭pate॒ kāmḙna॒ vai śrā᳚myasi | a॒hamu॒vai kāmo᳚-'smi | mā-nnu ya̭jasva | atha̭ te sa॒tyaḥ kāmo̭ bhaviṣyati | anṷ sva॒rgaṃ-lo~॒kaṃ-ve~॒thsyasīti̭ | sa e॒tama॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnira̭vapat | kāmā̭ya ca॒rum | anṷmatyai ca॒rum |
tato॒ vai tasya̭ sa॒tyaḥ kāmo̭-'bhavat |
anṷ sva॒rgaṃ-lo~॒kama̭vindat |
sa॒tyo ha॒ vā a̭sya॒ kāmo̭ bhavati |
anṷ sva॒rgaṃ-lo~॒kaṃ-vi~̭ndati |
ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
a॒gnaye॒ kāmā̭ya॒ svāhā॒ kāmā̭ya॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 4 ||
ta-mbrahmā᳚-'bravīt | prajā̭pate॒ brahma̭ṇā॒ vaiśrā᳚myasi | a॒hamu॒ vai brahmā᳚-'smi |
mā-nnu ya̭jasva | atha̭ te brahma॒ṇvān. ya॒jño bha̭viṣyati | anṷ sva॒rgaṃ-lo~॒kaṃ-ve~॒thsyasīti̭ | sa e॒tama॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnira̭vapat | brahma̭ṇe ca॒rum | anṷmatyai ca॒rum | tato॒ vai tasya̭ brahma॒ṇvān. ya॒jño̭-'bhavat | anṷ sva॒rgaṃ-lo~॒kama̭vindat | bra॒hma॒ṇvān. ha॒ vā a̭sya ya॒jño bha̭vati |
anṷ sva॒rgaṃ-lo~॒kaṃ-vi~̭ndati | ya e॒tena̭ ha॒viṣā॒ yaja̭te | ya ṷcainade॒vaṃ-ve~da̭ | so-'tra̭ juhoti | a॒gnaye॒ kāmā̭ya॒ svāhā॒ brahma̭ṇe॒ svāhā᳚ | anṷmatyai॒ svāhā᳚ pra॒jāpa̭taye॒ svāhā᳚ | sva॒rgāya̭ lo॒kāya॒ svāhā॒ 'gnaye᳚ sviṣṭa॒kṛte॒ svāheti̭ || 5 ||
taṃ-ya~॒jño᳚-'bravīt | prajā̭pate ya॒jñena॒ vai śrā᳚myasi | a॒hamu॒ vai ya॒jño᳚-'smi |
mā-nnu ya̭jasva | atha̭ te sa॒tyo ya॒jño bha̭vaṣyati | anṷ sva॒rgaṃ-lo~॒kaṃ-ve~॒thsyasīti̭ |
sa e॒tama॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnira̭vapat | ya॒jñāya̭ ca॒rum | anṷmatyai ca॒rum | tato॒ vai tasya̭ sa॒tyo ya॒jño̭-'bhavat | anṷ sva॒rgaṃ-lo~॒kama̭vindat | sa॒tyo ha॒ vā a̭sya ya॒jño bha̭vati |
anṷ sva॒rgaṃ-lo~॒kaṃ-vi~̭ndati |
ya e॒tena̭ ha॒viṣā॒ yaja̭te |
ya ṷcainade॒vaṃ-ve~da̭ | so-'tra̭ juhoti |
a॒gnaye॒ kāmā̭ya॒ svāhā̭ ya॒jñāya॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 6 ||
tamāpo᳚-'bruvann | prajā̭pate॒-'phsu vai sarve॒ kāmā᳚-śśri॒tāḥ | va॒yamu॒ vā āpa̭ssmaḥ | a॒smānnu ya̭jasva | atha॒ tvayi॒ sarve॒ kāmā᳚-śśrayiṣyante | anṷ sva॒rgaṃ-lo~॒kaṃ-ve~॒thsyasīti̭ |
sa e॒tama॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnira̭vapat | a॒dbhyaśca॒rum |
anṷmatyai ca॒rum | tato॒ vai tasmi॒n-thsarve॒ kāmā̭ aśrayanta | anṷ sva॒rgaṃ-lo~॒kama̭vindat | sarvḙ ha॒ vā a̭smi॒n kāmā᳚-śśrayante | anṷ sva॒rgaṃ-lo~॒kaṃ-vi~̭ndati | ya e॒tena̭ ha॒viṣā॒ yaja̭te |
ya ṷcainade॒vaṃ-ve~da̭ | so-'tra̭ juhoti |
a॒gnaye॒ kāmā̭ya॒ svāhā॒ 'dbhya-ssvāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 7 ||
tama॒gni rba̭li॒māna̭bravīt |
prajā̭pate॒ 'gnaye॒ vai ba̭li॒mate॒ sarvā̭ṇi bhū॒tāni̭ ba॒ligṃ ha̭ranti | a॒hamu॒ vā a॒gni rba̭li॒māna̭smi | mā-nnu ya̭jasva |
atha̭ te॒ sarvā̭ṇi bhū॒tāni̭ ba॒ligṃ ha̭riṣyanti |
anṷ sva॒rgaṃ-lo~॒kaṃ-ve~॒thsyasīti̭ |
sa e॒tama॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnira̭vapat | a॒gnayḙ bali॒matḙ ca॒rum | anṷmatyai ca॒rum | tato॒ vai tasmai॒ sarvā̭ṇi bhū॒tāni̭ ba॒li-ma̭harann | anṷ sva॒rgaṃ-lo~॒kama̭vindat | sarvā̭ṇi ha॒ vā a̭smai bhū॒tāni̭ ba॒ligṃ ha̭ranti | anṷ sva॒rgaṃ-lo~॒kaṃ-vi~̭ndati | ya e॒tena̭ ha॒viṣā॒ yaja̭te |
ya ṷcainade॒vaṃ-ve~da̭ | so-'tra̭ juhoti |
a॒gnaye॒ kāmā̭ya॒ svāhā॒ 'gnayḙ bali॒mate॒ svāhā᳚ | anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 8 ||
tamanṷvittira-bravīt | prajā̭pate sva॒rgaṃ-vai~ lo॒kamanṷ-vivithsasi | a॒hamu॒ vā anṷvittirasmi | mā-nnu ya̭jasva | atha̭ te sa॒tyā 'nṷvitti-rbhaviṣyati | anṷ sva॒rgaṃ-lo~॒kaṃ-ve~॒thsyasīti̭ |
sa e॒tama॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnira̭vapat |
anṷvittyai ca॒rum | anṷmatyai ca॒rum |
tato॒ vai tasya̭ sa॒tyā 'nṷvittirabhavat |
anṷ sva॒rgaṃ-lo~॒ka-ma̭vindat |
sa॒tyā ha॒ vā a॒syānṷvitti-rbhavati |
anṷ sva॒rgaṃ-lo~॒kaṃ-vi~̭ndati |
ya e॒tena̭ ha॒viṣā॒ yaja̭te |
ya ṷcainade॒vaṃ-ve~da̭ | so-'tra̭ juhoti |
a॒gnaye॒ kāmā̭ya॒ svāhā-'nṷvittyai॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 9 ||
tā vā e॒tā-ssa॒pta sva॒rgasya̭ lo॒kasya॒ dvāraḥ̭ |
di॒va-śśyḙna॒yo 'nṷvittayo॒ nāma̭ |
āśā᳚ pratha॒māgṃ ra̭kṣati |
kāmo᳚ dvi॒tīyā᳚m | brahma̭ tṛ॒tīyā᳚m | ya॒jñaśca̭tu॒rthīm | āpaḥ̭ pañca॒mīm |
a॒gni rba̭li॒mān-thṣa॒ṣṭhīm | anṷvitti-ssapta॒mīm |
anṷ ha॒ vai sva॒rgaṃ-lo~॒kaṃ-vi~̭ndati |
kā॒ma॒cāro᳚-'sya sva॒rge lo॒ke bha̭vati |
ya e॒tābhi॒-riṣṭi̭bhi॒-ryaja̭te |
ya ṷcainā e॒vaṃ-ve~da̭ | tāsva̭nvi॒ṣṭi | pa॒ṣṭhau॒hī॒ va॒rā-nda̭dyā-tka॒gṃ॒ sañca̭ |
striyai̭ cābhā॒ragṃ samṛ̭ddhyai || 10 ||
anuvākaṃ 3 - upāghā nāmeṣṭayaḥ
tapa̭sā de॒vā de॒vatā॒-magra̭ āyann | tapa॒sarṣa̭ya॒-ssva̭ranva̭vindann |
tapa̭sā sa॒patnā॒-npraṇṷdā॒mārā̭tīḥ |
yene॒daṃ-vi~śva॒-mpari̭bhūtaṃ॒-ya~dasti̭ ||
pra॒tha॒ma॒ja-nde॒vagṃ ha॒viṣā̭ vidhema | sva॒ya॒bhu-mbrahma̭ para॒ma-ntapo॒ yat |
sa e॒va pu॒tra-ssa pi॒tā sa mā॒tā |
tapo̭ ha ya॒kṣa-mpra̭tha॒magṃ samba̭bhūva ||
śra॒ddhayā dḙvo deva॒tva-ma̭śnute |
śra॒ddhā pra̭ti॒ṣṭhā lo॒kasya̭ de॒vī || 11 ||
sā no̭ juṣā॒ṇopa̭ ya॒jña-māgā᳚t |
kāma̭vathsā॒ 'mṛta॒-nduhā̭nā ||
śra॒ddhā de॒vī pra̭thama॒jā ṛ॒tasya̭ |
viśva̭sya bha॒rtrī jaga̭taḥ prati॒ṣṭhā |
tāg śra॒ddhāgṃ ha॒viṣā̭ yajāmahe |
sā no̭ lo॒ka-ma॒mṛta̭-ndadhātu |
īśā̭nā de॒vī bhuva̭na॒syādhi̭patnī || āgā᳚thsa॒tyagṃ ha॒viri॒da-ñjṷṣā॒ṇam |
yasmā᳚dde॒vā ja̭jñire॒ bhuva̭nañca॒ viśve᳚ |
tasmai̭ vidhema ha॒viṣā̭ ghṛ॒tena̭ || 12 ||
yathā̭ de॒vai-ssa̭dha॒māda̭-mmadema ||
yasya̭ prati॒ṣṭho-rva̭ntari̭kṣam |
yasmā᳚dde॒vā ja̭jñire॒ bhuva̭nañca॒ sarve᳚ |
tathsa॒tya-marca॒dupa̭ya॒jña-nna॒ āgā᳚t | brahmāhṷtī॒-rupa॒moda̭mānam ||
mana̭so॒ vaśe॒ sarva̭mi॒da-mba̭bhūva |
nānyasya॒ mano॒ vaśa॒manvi̭yāya |
bhī॒ṣmo hi de॒va-ssaha̭sa॒-ssahī̭yān |
sa no̭ juṣā॒ṇa upa̭ ya॒jñamāgā᳚t ||
ākṷ̄tīnā॒-madhi̭pati॒-ñceta̭sā-ñca || 13 ||
sa॒ṅka॒lpajṷ̄ti-nde॒vaṃ-vi~̭pa॒ścim |
mano॒ rājā̭nami॒ha va॒rdhaya̭ntaḥ |
u॒pa॒ha॒ve᳚ 'sya suma॒tau syā̭ma ||
cara̭ṇa-mpa॒vitraṃ॒-vi~ta̭ta-mpurā॒ṇam |
yena̭ pū॒tastara̭ti duṣkṛ॒tāni̭ |
tena̭ pa॒vitrḙṇa śu॒ddhena̭ pū॒tāḥ |
ati̭ pā॒pmāna॒-marā̭ti-ntarema ||
lo॒kasya॒ dvāra̭-marci॒ma-tpa॒vitra᳚m |
jyoti̭ṣma॒-dbhrāja̭māna॒-mmaha̭svat | a॒mṛta̭sya॒ dhārā̭ bahu॒dhā doha̭mānam |
cara̭ṇa-nno lo॒ke sudhi̭tā-ndadhātu ||
a॒gnirmū॒rdhā di॒vaḥ ka॒ku-tpatiḥ̭ pṛthi॒vyā a॒yam | a॒pāgṃ retāgṃ̭si jinvati || bhuvo̭ ya॒jñasya॒ raja̭saśca ne॒tā yatrā̭ ni॒yudbhi॒-ssaca̭se śi॒vābhiḥ̭ | di॒vi mū॒rdhāna̭-ndadhiṣe suva॒r॒ṣā-ñji॒hvāma̭gne cakṛṣe havya॒vāha᳚m || ||
anṷ no॒-'dyā-'nṷmatirya॒jña-nde॒veṣṷ manyatām | a॒gniśca̭ havya॒vāha̭no॒ bhava̭tā-ndā॒śuṣe॒ mayaḥ̭ || anvida̭numate॒ tva-mmanyā̭sai॒ śañca̭naḥ kṛdhi | kratve॒ dakṣā̭ya no hinu॒ praṇa॒ āyūgṃ̭ṣi tāriṣaḥ || ||
ha॒vya॒vāha̭-mabhimāti॒ṣā-'ha᳚m | ra॒kṣo॒haṇa॒-mpṛta̭nāsu ji॒ṣṇum | jyoti̭ṣmanta॒-ndīdya̭ta॒-mpura̭ndhim | a॒gnigg svi̭ṣṭa॒kṛta॒mā hṷvema || svi̭ṣṭamagne a॒bhi ta-tpṛ̭ṇāhi | viśvā̭ deva॒ pṛta̭nā a॒bhiṣya | u॒ru-nnaḥ॒ panthā᳚-mpradi॒śanvi bhā̭hi | jyoti̭ṣmaddhehya॒jara̭-nna॒ āyuḥ̭ || || 14 ||
(de॒vī - ghṛ॒tena॒ - ceta̭sā-ñca॒ - doha̭māna-ñca॒tvāri̭ ca) (a. 3)
anuvākaṃ 4 - tāsā-mbrāhmaṇam
de॒vebhyo॒ vai sva॒rgo lo॒kasti॒ro̭ 'bhavat |
te pra॒jāpa̭ti-mabruvann | prajā̭pate sva॒rgo
vai no̭ lo॒kasti॒ro̭-'bhūt | tamanvi॒ccheti̭ |
taṃ-ya~̭jñakra॒tubhi॒-ranvai᳚cchat |
taṃ-ya~̭jñakra॒tubhi॒ rnānva̭vindat |
tamiṣṭi̭bhi॒-ranvai᳚cchat | tamiṣṭi̭bhi॒-ranva̭vindat | tadiṣṭī̭nā-miṣṭi॒tvam | eṣṭa̭yo ha॒ vai nāma̭ | tā iṣṭa̭ya॒ ityā ca̭kṣate pa॒rokṣḙṇa |
pa॒rokṣa̭priyā iva॒ hi de॒vāḥ || 15 ||
ta-ntapo᳚-' bravīt | prajā̭pate॒ tapa̭sā॒ vai
śrā᳚myasi | a॒hamu॒ vai tapo᳚-' smi |
mā-nnu ya̭jasva |
atha̭ te sa॒tya-ntapo̭ bhaviṣyati |
anṷ sva॒rgaṃ-lo~॒kaṃ-ve~॒thsyasīti̭ |
sa e॒tamā᳚gne॒ya-ma॒ṣṭāka̭pāla॒-nnira̭vapat | tapa̭se ca॒rum | anṷmatyai ca॒rum |
tato॒ vai tasya̭ sa॒tya-ntapo̭ 'bhavat |
anṷ sva॒rgaṃ-lo~॒kama̭vindat |
sa॒tya gṃ ha॒ vā a̭sya॒ tapo̭ bhavati |
anṷ sva॒rgaṃ-lo~॒kaṃ-vi~̭ndati |
ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti | a॒gnaye॒ svāhā॒ tapa̭se॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 16 ||
tagg śra॒ddhā-'bra̭vīt | prajā̭pate śra॒ddhayā॒ vai śrā᳚myasi | a॒hamu॒ vai śra॒ddhā-'smi̭ | mā-nnu ya̭jasva | atha̭ te sa॒tyā śra॒ddhā bha̭viṣyati | anṷ sva॒rgaṃ-lo~॒kaṃ-ve~॒thsyasīti̭ |
sa e॒tamā᳚-'gne॒ya-ma॒ṣṭāka̭pāla॒-nnira̭vapat | śra॒ddhāyai̭ ca॒rum | anṷmatyai ca॒rum | tato॒ vai tasya̭ sa॒tyā śra॒ddhā-'bha̭vat |
anṷ sva॒rgaṃ-lo~॒kama̭vindat |
sa॒tyā ha॒ vā a̭sya śra॒ddhā bha̭vati |
anṷ sva॒rgaṃ-lo~॒kaṃ-vi~̭ndati |
ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti | a॒gnaye॒ svāhā᳚ śra॒ddhāyai॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 17 ||
tagṃ sa॒tya-ma̭bravīt | prajā̭pate sa॒tyena॒ vai śrā᳚myasi | a॒hamu॒ vai sa॒tyama̭smi | mā-nnu ya̭jasva | atha̭ te sa॒tyagṃ sa॒tya-mbha̭viṣyati | anṷ sva॒rgaṃ-lo~॒kaṃ-ve~॒thsyasīti̭ |
sa e॒tamā᳚-'gne॒ya-ma॒ṣṭāka̭pāla॒-nnira̭vapat | sa॒tyāya̭ ca॒rum | anṷmatyai ca॒rum |
tato॒ vai tasya̭ sa॒tyagṃ sa॒tyama̭bhavat |
anṷ sva॒rgaṃ-lo~॒kama̭vindat |
sa॒tyagṃ ha॒ vā a̭sya sa॒tya-mbha̭vati |
anṷ sva॒rgaṃ-lo~॒kaṃ-vi~̭ndati |
ya e॒tena̭ ha॒viṣā॒ yaja̭te |
ya ṷcainade॒vaṃ-ve~da̭ | so-'tra̭ juhoti |
a॒gnaye॒ svāhā̭ sa॒tyāya॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 18 ||
ta-mmano᳚-'bravīt | prajā̭pate॒ mana̭sā॒ vai śrā᳚myasi | a॒hamu॒ vai mano᳚-'smi |
mā-nnu ya̭jasva |
atha̭ te sa॒tya-mmano̭ bhaviṣyati |
anṷ sva॒rgaṃ-lo~॒kaṃ-ve~॒thsyasīti̭ |
sa e॒tamā᳚-'gne॒ya-ma॒ṣṭāka̭pāla॒-nnira̭vapat | mana̭se ca॒rum | anṷmatyai ca॒rum | tato॒ vai tasya̭ sa॒tya-mmano̭-'bhavat |
anṷ sva॒rgaṃ-lo~॒kama̭vindat | sa॒tyagṃ ha॒ vā a̭sya॒ mano̭ bhavati | anṷ sva॒rgaṃ-lo~॒kaṃ-vi~̭ndati | ya e॒tena̭ ha॒viṣā॒ yaja̭te |
ya ṷcaina de॒vaṃ-ve~da̭ | so-'tra̭ juhoti |
a॒gnaye॒ svāhā॒ mana̭se॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 19 ||
ta-ñcara̭ṇa-mabravīt | prajā̭pate॒ cara̭ṇena॒ vai śrā᳚myasi | a॒hamu॒ vai cara̭ṇamasmi | mā-nnu ya̭jasva | atha̭ te sa॒tya-ñcara̭ṇa-mbhaviṣyati | anṷ sva॒rgaṃ-lo~॒kaṃ-ve~॒thsyasīti̭ |
sa e॒tamā᳚-'gne॒ya-ma॒ṣṭāka̭pāla॒-nnira̭vapat | cara̭ṇāya ca॒rum | anṷmatyai ca॒rum | tato॒ vai tasya̭ sa॒tya-ñcara̭ṇamabhavat |
anṷ sva॒rgaṃ-lo~॒kama̭vindat |
sa॒tyagṃ ha॒ vā a̭sya॒ cara̭ṇa-mbhavati |
anṷsva॒rgaṃ-lo~॒kaṃ-vi~̭ndati |
ya e॒tena̭ ha॒viṣā॒ yaja̭te |
ya ṷcainade॒vaṃ-ve~da̭ | so-'tra̭ juhoti |
a॒gnaye॒ svāhā॒ cara̭ṇāya॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 20 ||
tā vā e॒tāḥ pañca̭ sva॒rgasya̭ lo॒kasya॒ dvāraḥ̭ |
apā̭ghā॒ anṷvittayo॒ nāma̭ | tapaḥ̭ pratha॒māgṃ ra̭kṣati | śra॒ddhā dvi॒tīyā᳚m | sa॒tya-ntṛ॒tīyā᳚m |
mana̭ścatu॒rthīm | cara̭ṇa-mpañca॒mīm |
anṷ ha॒ vai sva॒rgaṃ-lo~॒kaṃ-vi~̭ndati |
kā॒ma॒cāro᳚-'sya sva॒rge lo॒ke bha̭vati |
ya e॒tābhi॒-riṣṭi̭bhi॒-ryaja̭te |
ya ṷcainā e॒vaṃ-ve~da̭ |
anuvākaṃ 5 - cāturhotracayanam
brahma॒ vai catṷrhotāraḥ | catṷrhotṛ॒bhyo-'dhi̭ ya॒jño nirmi̭taḥ | nainagṃ̭ śa॒ptam | nābhica̭rita॒-māga̭cchati | ya e॒vaṃ-ve~da̭ ||
yo ha॒ vai catṷrhotṛṇā-ñcaturhotṛ॒tvaṃ-ve~da̭ | atho॒ pañca̭ hotṛtvam |
sarvā̭ hāsmai॒ diśaḥ̭ kalpante |
vā॒caspati॒r॒ hotā॒ daśa̭hotṝṇām |
pṛ॒thi॒vī hotā॒ catṷrhotṝṇām || 22 ||
a॒gnir-hotā॒ pañca̭hotṝṇām | vāghotā॒ ṣaḍḍho̭tṝṇām |
ma॒hāha̭vi॒r॒ hotā̭ sa॒ptaho̭tṝṇām |
e॒tadvai catṷrhotṛṇā-ñcaturhotṛ॒tvam |
atho॒ pañca̭hotṛtvam | sarvā̭ hāsmai॒ diśaḥ̭ kalpante | ya e॒vaṃ-ve~da̭ ||
e॒ṣā vai sa̭rva vi॒dyā | e॒ta-dbhḙṣa॒jam |
e॒ṣā pa॒ṅkti-ssva॒rgasya̭ lo॒kasyā᳚-ñja॒sāya̭ni-ssru॒tiḥ || 23 ||
e॒tān. yo-'ddhyai-tyacha̭dirda॒r॒śe yāva̭tta॒rasa᳚m | sva̭reti | a॒na॒pa॒bra॒va-ssarva॒māyṷreti | vi॒ndate᳚ pra॒jām | rā॒yaspoṣa̭-ṅgaupa॒tyam |
bra॒hma॒va॒rca॒sī bha̭vati || e॒tān. yo-'ddhyaiti̭ | spṛ॒ṇotyā॒tmāna᳚m | pra॒jā-mpi॒tṝn ||
e॒tān. vā a̭ru॒ṇa aṷpave॒śi rvi॒dāñca̭kāra || 24 ||
e॒taira̭dhivā॒damapā̭jayat | atho॒ viśva̭-mpā॒pmāna᳚m | sva̭ryayau | e॒tān. yo-'ddhyaiti̭ | a॒dhi॒vā॒da-ñja̭yati | atho॒ viśva̭-mpā॒pmāna᳚m | sva̭reti || e॒taira॒gni-ñci̭nvīta sva॒rgakā̭maḥ |
e॒tairāyṷṣkāmaḥ | pra॒jā pa॒śukā̭mo vā || 25 ||
pu॒rastā॒-ddaśa̭hotāra॒-muda̭ñca॒-mupa̭dadhāti yāvatpa॒dam | hṛda̭yaṃ॒-ya~jṷṣī॒ patnyaṷ ca | da॒kṣi॒ṇa॒taḥ prāñca॒-ñcatṷrhotāram |
pa॒ścāduda̭ñca॒-mpañca̭ hotāram | u॒tta॒ra॒taḥ prāñca॒gṃ॒ ṣaḍḍho̭tāram |
u॒pari̭ṣṭā॒-tprāñcagṃ̭ sa॒ptaho̭tāram | hṛda̭yaṃ॒-ya~jūgṃ̭ṣi॒ patnya̭śca |
ya॒thā॒va॒kā॒śa-ṅgrahāṋ | ya॒thā॒va॒kā॒śa-mpra̭tigra॒hān ~lo̭ka-mpṛ॒ṇāśca̭ |
sarvā̭ hāsyai॒tā de॒vatāḥ᳚ prī॒tā a॒bhīṣṭā̭ bhavanti || 26 ||
sadḙvama॒gni-ñci̭nute ||
ra॒thasa̭minta-śceta॒vyaḥ̭ | vajro॒ vai rathaḥ̭ |
vajrḙṇai॒va pā॒pmāna॒-mbhrātṛ̭vyagg stṛṇute | pa॒kṣa-ssa̭minta-śceta॒vyaḥ̭ |
e॒tāvā॒n॒. vai rathaḥ̭ | yāva̭tpa॒kṣaḥ | ra॒thasa̭mintame॒va ci̭nute ||
i॒mame॒va lo॒ka-mpa̭śuba॒ndhenā॒bhija̭yati |
atho̭ agniṣṭo॒mena̭ || 27 ||
a॒ntari̭kṣa-mu॒kthyḙna | sva̭ratirā॒treṇa̭ | sarvā᳚n ~lo॒kāna̭hī॒nena̭ | atho̭ sa॒treṇa̭ || varo॒ dakṣi̭ṇā | varḙṇai॒va varagg̭ spṛṇoti |
ā॒tmā hi varaḥ̭ || eka̭vigṃśati॒ rdakṣi̭ṇā dadāti |
e॒ka॒vi॒gṃ॒śo vā i॒ta-ssva॒rgo lo॒kaḥ | prasva॒rgaṃ-lo~॒kamā᳚pnoti || 28 ||
a॒sāvā̭di॒tya ḙkavi॒gṃ॒śaḥ | a॒mume॒vā-di॒tyamā᳚pnoti || śa॒ta-nda̭dāti | śa॒tāyuḥ॒ purṷṣa-śśa॒tendri̭yaḥ | āyṷṣye॒vendri॒ye prati̭tiṣṭhati || sa॒hasra̭-ndadāti |
sa॒hasra̭ sammita-ssva॒rgo lo॒kaḥ |
sva॒rgasya̭ lo॒kasyā॒-bhiji̭tyai || a॒nvi॒ṣṭa॒ka-ndakṣi̭ṇā dadāti | sarvā̭ṇi॒ vayāgṃ̭si || 29 ||
sarva॒syāptyai᳚ | sarva॒syā-va̭ruddhyai || yadi॒ na vi॒ndeta̭ | ma॒nthānḙtāva॒to da̭dyādoda॒nān. vā᳚ | a॒śnu॒te ta-ṅkāma᳚m | yasmai॒ kāmā̭yā॒-gniścī॒yate᳚ || pa॒ṣṭhau॒hī-ntva॒ntarva̭tī-ndadyāt |
sā hi sarvā̭ṇi॒ vayāgṃ̭si | sarva॒syāptyai᳚ | sarva॒syā-va̭ruddhyai || 30 ||
hira̭ṇya-ndadāti | hira̭ṇya-jyotire॒va sva॒rgaṃ-lo~॒kamḙti || vāso̭ dadāti | tenāyuḥ॒ prati̭rate || ve॒di॒tṛ॒tī॒ye ya̭jeta | triṣa̭tyā॒ hi de॒vāḥ |
sa sa̭tyama॒gni-ñci̭nute || tade॒ta-tpa̭śuba॒ndhe brāhma̭ṇa-mbrūyāt | neta̭reṣu ya॒jñeṣṷ ||
yo ha॒ vai catṷrhotṝ-nanusava॒na-nta̭rpayita॒vyāṋ. veda̭ || 31 ||
tṛpya̭ti pra॒jayā̭ pa॒śubhiḥ̭ |
upai̭nagṃ somapī॒tho na̭mati |
e॒te vai catṷrhotāro 'nusava॒na-nta̭rpayita॒vyāḥ᳚ | ye brā᳚hma॒ṇā ba̭hu॒vidaḥ̭ |
tebhyo॒ yaddakṣi̭ṇā॒ na naye᳚t | duri̭ṣṭagg syāt | a॒gnima̭sya vṛñjīrann |
tebhyo̭ yathā śra॒ddha-nda̭dyāt | svi̭ṣṭame॒vaitatkri̭yate |
nāsyā॒gniṃ-vṛ~̭ñjate || 32 ||
hi॒ra॒ṇye॒ṣṭa॒ko bha̭vati | yāva̭dutta॒ma-ma̭ṅguli-kā॒ṇḍaṃ-ya~̭jña pa॒ruṣā॒ sammi̭tam |
tejo॒ hira̭ṇyam || yadi॒ hira̭ṇya॒-nna vi॒ndet | śarka̭rā a॒ktā upa̭daddhyāt | tejo̭ ghṛ॒tam | satḙjasame॒-vāgni-ñci̭nute || a॒gniñci॒tvā sau᳚trāma॒ṇyā ya̭jeta maitrāvaru॒ṇyā vā᳚ |
vī॒ryḙṇa॒ vā e॒ṣa vyṛ̭ddhyate |
yo᳚-'gniñci̭nu॒te || 33 ||
yāva̭de॒va vī॒rya᳚m | tada̭smi-ndadhāti ||
brahma̭ṇa॒-ssāyṷjyagṃ salo॒katā̭-māpnoti |
e॒tāsā̭me॒va de॒vatā̭nā॒gṃ॒ sāyṷjyam |
sā॒rṣṭitāgṃ̭ samāna lo॒katā̭-māpnoti | ya e॒tama॒gni-ñci̭nu॒te | ya ṷcainame॒vaṃ-ve~da̭ || e॒tade॒va sā̭vi॒tre brāhma̭ṇam |
atho̭ nācike॒te || 34 ||
(hotā॒ catṷrhotṝṇāg - sru॒ti - śca̭kāra - vā - bhavantya - gniṣṭo॒menā᳚ - pnoti॒ - vayāgṃ̭si॒ - vayāgṃ̭si॒ - sarva॒syāptyai॒ sarva॒syāva̭ruddhyai॒ - veda̭ - vṛñjate - cinu॒te - +nava̭ ca) (a. 5)
anuvākaṃ 6 - vaiśvasṛjacayanam
yaccā॒mṛtaṃ॒-ya~cca martya᳚m | yacca॒ prāṇi̭ti॒ yacca॒ na | sarvā॒stā iṣṭa̭kāḥ kṛ॒tvā |
upa̭ kāma॒dughā̭ dadhe | tenarṣi̭ṇā॒ tena॒ brahma̭ṇā | tayā̭ de॒vata̭yā-'ṅgira॒sva-ddhru॒vā sī̭da || sarvā॒-sstriya॒-ssarvā᳚-npu॒gṃ॒saḥ | sarva॒-nna strī̭-pumañca॒ yat |
sarvā॒stāḥ || yāva̭ntaḥ pā॒gṃ॒savo॒ bhūmeḥ᳚ || 35 ||
saṅkhyā̭tā devamā॒yayā᳚ | sarvā॒stāḥ || yāva̭nta॒ ūṣāḥ᳚ paśū॒nām | pṛ॒thi॒vyā-mpuṣṭi̭ rhi॒tāḥ | sarvā॒stāḥ || yāva̭tī॒-ssika̭tā॒-ssarvāḥ᳚ |
a॒phsva̭ntaśca॒ yā-śśri॒tāḥ | sarvā॒stāḥ || yāva̭tī॒-śśarka̭rā॒ dhṛtyai᳚ | a॒syā-mpṛ̭thi॒vyāmadhi̭ || 36 ||
sarvā॒stāḥ || yāva॒nto-'śmā̭no॒-'syā-mpṛ̭thi॒vyām | pra॒ti॒ṣṭhāsu॒ prati̭ṣṭhitāḥ | sarvā॒stāḥ || yāva̭tī rvī॒rudha॒-ssarvāḥ᳚ |
viṣṭhi̭tāḥ pṛthi॒vīmanṷ | sarvā॒stāḥ || yāva̭tī॒roṣa̭dhī॒-ssarvāḥ᳚ |
viṣṭhi̭tāḥ pṛthi॒vīmanṷ | sarvā॒stāḥ || 37 ||
yāva̭nto॒ vana॒spata̭yaḥ | a॒syā-mpṛ̭thi॒vyāmadhi̭ | sarvā॒stāḥ ||
yāva̭nto grā॒myāḥ pa॒śava॒-ssarve᳚ | ā॒ra॒ṇyāśca॒ ye | sarvā॒stāḥ || ye dvi॒pāda॒-ścatṷṣpādaḥ | a॒pāda̭ udarasa॒rpiṇaḥ̭ |
sarvā॒stāḥ || yāva॒dāñja̭-namu॒cyate᳚ || 38 ||
de॒va॒trā yacca̭ mānu॒ṣam | sarvā॒stāḥ || yāva̭tkṛ॒ṣṇāya̭sa॒gṃ॒ sarva᳚m |
de॒va॒trā yacca̭ mānu॒ṣam | sarvā॒stāḥ ||
yāva̭ llo॒hāya̭sa॒gṃ॒ sarva᳚m |
de॒va॒trā yacca̭ mānu॒ṣam | sarvā॒stāḥ || sarva॒gṃ॒ sīsa॒gṃ॒ sarva॒-ntrapṷ |
de॒va॒trā yacca̭ mānu॒ṣam || 39 ||
sarvā॒stāḥ || sarva॒gṃ॒ hira̭ṇyagṃ raja॒tam | de॒va॒trā yacca̭ mānu॒ṣam |
sarvā॒stāḥ || sarva॒gṃ॒ suva̭rṇa॒gṃ॒ hari̭tam | de॒va॒trā yacca̭ mānu॒ṣam |
sarvā॒stā iṣṭa̭kāḥ kṛ॒tvā | upa̭kāma॒dughā̭ dadhe | tenarṣi̭ṇā॒ tena॒ brahma̭ṇā |
tayā̭ de॒vata̭yā-'ṅgira॒sva-ddhru॒vā sī̭da || 40 ||
[bhūme॒ - radhi॒ - viṣṭhi̭tāḥ pṛthi॒vīmanu॒ sarvā॒stā - u॒cyata̭ - mānu॒ṣagṃ - sī̭da ] (a. 6)
(yacca॒ striyaḥ̭ pā॒gṃ॒sava॒ ūṣā॒-ssika̭tā॒-śśarka̭rā॒ aśmā̭no vī॒rudha॒ oṣa̭dhī॒-rvana॒spata̭yo grā॒myā ye dvi॒pādo॒ yāva॒dāñja̭naṃ॒-yā~va̭-tkṛ॒ṣṇāya̭saṃ
~lo॒hāya̭sa॒gṃ॒ sīsa॒gṃ॒ hira̭ṇya॒gṃ॒ suva̭rṇa॒gṃ॒ hari̭tama॒ṣṭāda̭śa)
anuvākaṃ 7 - vaiśvasṛjacayanam
sarvā॒ diśo̭ di॒kṣu | yaccā॒nta rbhū॒ta-mprati̭ṣṭhitam | sarvā॒stā iṣṭa̭kāḥ kṛ॒tvā |
upa̭ kāma॒dughā̭ dadhe |
tenarṣi̭ṇā॒ tena॒ brahma̭ṇā |
tayā̭ de॒vata̭yā-'ṅgira॒sva-ddhru॒vā sī̭da ||
a॒ntari̭kṣañca॒ keva̭lam |
yaccā॒smi-nna̭nta॒rāhi̭tam |
sarvā॒stāḥ || ā॒nta॒ri॒kṣya̭śca॒ yāḥ pra॒jāḥ || 41 ||
ga॒ndha॒rvā॒-phsa॒rasa̭śca॒ ye | sarvā॒stāḥ || sarvā̭-nudā॒rān-thsa॒lilāṋ |
a॒ntari̭kṣe॒ prati̭ṣṭhitān | sarvā॒stāḥ ||
sarvā̭-nudā॒rān-thsa̭li॒lān |
sthā॒va॒rāḥ pro॒ṣyā᳚śca॒ ye | sarvā॒stāḥ || sarvā॒-ndhuni॒gṃ॒ sarvā᳚n-dhva॒gṃ॒sān |
hi॒mo yacca̭ śī॒yate᳚ || 42 ||
sarvā॒stāḥ || sarvā॒-nmarī̭cī॒n॒. vita̭tān | nī॒hā॒ro yacca̭ śī॒yate᳚ | sarvā॒stāḥ || sarvā̭ vi॒dyuta॒-ssarvā᳚n-thstanayi॒tnūn | hrā॒dunī॒ ryacca̭ śī॒yate᳚ | sarvā॒stāḥ || sarvā॒-ssrava̭ntī-ssa॒ritaḥ̭ |
sarva̭maphsu ca॒rañca॒ yat | sarvā॒stāḥ || 43 ||
yāśca॒ kūpyā॒ yāśca̭ nā॒dyā᳚-ssamu॒driyāḥ᳚ | yāśca̭ vaiśa॒ntīru॒ta prā̭sa॒cīryāḥ |
sarvā॒stāḥ || ye co॒ttiṣṭha̭nti jī॒mūtāḥ᳚ |
yāśca॒ varṣa̭nti vṛ॒ṣṭayaḥ̭ | sarvā॒stāḥ || tapa॒steja̭ ākā॒śam | yaccā̭kā॒śe prati̭ṣṭhitam |
sarvā॒stāḥ || vā॒yuṃ-va~yāgṃ̭si॒ sarvā̭ṇi || 44 ||
a॒nta॒ri॒kṣa॒ca॒rañca॒ yat | sarvā॒stāḥ || a॒gnigṃ sūrya̭-ñca॒ndram | mi॒traṃ-va~rṷṇa॒-mbhaga᳚m | sarvā॒stāḥ || sa॒tyagg śra॒ddhā-ntapo॒ dama᳚m |
nāma̭ rū॒pañca̭ bhū॒tānā᳚m | sarvā॒stā iṣṭa̭kāḥ kṛ॒tvā | upa̭ kāma॒dughā̭ dadhe | tenarṣi̭ṇā॒ tena॒ brahma̭ṇā |
tayā̭ de॒vata̭yā-'ṅgira॒sva-ddhru॒vā sī̭da || 45 ||
(pra॒jā-hi॒mo yacca̭ śī॒yate॒-sarvā॒stāḥ-sarvā̭ṇi॒-brahma॒ṇaika̭-ñca) (a. 7)
(diśo॒-'ntari̭kṣamāntari॒kṣya̭ udā॒rānṷdā॒rā-ndhuni॒-mmarī̭cīn. vi॒dyutaḥ॒
srava̭ntī॒ryāśca॒ ye ca॒ tapo̭ vā॒yuma॒gnigṃ sa॒tya-mpañca̭daśa)
anuvākaṃ 8 - vaiśvasṛjacayanam
sarvā॒-ndiva॒gṃ॒ sarvā᳚-nde॒vā-ndi॒vi |
yaccā॒nta rbhū॒ta-mprati̭ṣṭhitam |
sarvā॒stā iṣṭa̭kāḥ kṛ॒tvā | upa̭ kāma॒dughā̭ dadhe | tenarṣi̭ṇā॒ tena॒ brahma̭ṇā |
tayā̭ de॒vata̭yā-'ṅgira॒svada-dhru॒vā sī̭da || yāva̭tī॒ stāra̭kā॒-ssarvāḥ᳚ |
vita̭tā roca॒ne di॒vi | sarvā॒stāḥ || ṛco॒ yajūgṃ̭ṣi॒ sāmā̭ni || 46 ||
a॒tha॒rvā॒ṅgi॒rasa̭śca॒ ye | sarvā॒stāḥ || i॒ti॒hā॒sa॒pu॒rā॒ṇañca̭ |
sa॒rpa॒de॒va॒ja॒nāśca॒ ye | sarvā॒stāḥ ||
ye ca̭ lo॒kā ye cā̭lo॒kāḥ |
a॒nta rbhū॒ta-mprati̭ṣṭhitam | sarvā॒stāḥ ||
yacca॒ brahma॒ yaccā᳚bra॒hma |
a॒nta rbra॒hma-nprati̭ṣṭhitam || 47 ||
sarvā॒stāḥ || a॒ho॒rā॒trāṇi॒ sarvā̭ṇi | a॒drdha॒mā॒sāgśca॒ keva̭lān |
sarvā॒stāḥ || sarvā̭nṛ॒tūn-thsarvā᳚-nmā॒sān | saṃ॒va~॒thsa॒rañca॒ keva̭lam |
sarvā॒stāḥ || sarva॒-mbhūta॒gṃ॒ sarva॒-mbhavya᳚m | yaccā॒to-'dhi̭ bhavi॒ṣyati̭ |
sarvā॒stā iṣṭa̭kāḥ kṛ॒tvā |
upa̭ kāma॒dughā̭ dadhe |
tenarṣi̭ṇā॒ tena॒ brahma̭ṇā |
tayā̭ de॒vata̭yā-'ṅgira॒sva-ddhru॒vā sī̭da || 48 ||
(sāmā̭ni - bra॒hma-nprati̭ṣṭhitaṃ - kṛ॒tvā trīṇi̭ ca) (a. 8)
(diva॒-ntāra̭kā॒ ṛca̭ itihāsapurā॒ṇa-ñca॒ ye ca॒ yaccā̭horā॒trāṇyṛ॒tū-nbhūta॒-nnava̭)
anuvākaṃ 9 - brahmā sadasyāsīno vauśvasṛjān vyācaṣṭe
ṛ॒cā-mprācī̭ maha॒tī digṷcyate |
dakṣi̭ṇā-māhu॒ ryajṷṣāmapā॒rām |
atha̭rvaṇā॒-magṃi̭rasā-mpra॒tīcī᳚ |
sāmnā॒-mudī̭cī maha॒tī digṷcyate ||
ṛ॒gbhiḥ pū᳚rvā॒hṇe di॒vi de॒va ī̭yate |
ya॒ju॒rve॒de ti̭ṣṭhati॒ maddhye॒ ahnaḥ̭ |
sā॒ma॒ve॒de-nā᳚stama॒ye mahī̭yate |
vedai॒-raśū᳚nya-stri॒bhirḙti॒ sūryaḥ̭ ||
ṛ॒gbhyo jā॒tāgṃ sa̭rva॒śo mūrti̭-māhuḥ |
sarvā॒ gati̭ ryāju॒ṣī hai॒va śaśva̭t || 49 ||
sarva॒-nteja̭ ssāmarū॒pyagṃ ha̭ śaśvat | sarvagṃ̭ he॒da-mbrahma̭ṇā hai॒va sṛ॒ṣṭam ||
ṛ॒gbhyo jā॒taṃ-vai~śyaṃ॒-va~rṇa̭-māhuḥ | ya॒ju॒rve॒da-ṅkṣa̭tri॒yasyā̭-hu॒ryoni᳚m |
sā॒ma॒ve॒do brā᳚hma॒ṇānā॒-mprasṷ̄tiḥ |
pūrve॒ pūrve᳚bhyo॒ vaca̭ e॒ta-dṷ̄cuḥ ||
ā॒da॒r॒śa-ma॒gni-ñci̭nvā॒nāḥ |
pūrvḙ viśva॒ sṛjo॒-'mṛtāḥ᳚ |
śa॒taṃ-va~̭rṣa saha॒srāṇi̭ | dī॒kṣi॒tā-ssa॒tra-mā̭sata || 50 ||
tapa̭ āsī-dgṛ॒hapa̭tiḥ | brahma̭ bra॒hmābha̭va-thsva॒yam | sa॒tyagṃ ha॒ ho tai̭ṣā॒māsī᳚t |
ya-dvi̭śva॒sṛja॒ āsa̭ta ||
a॒mṛta̭-mebhya॒ uda̭gāyat |
sa॒hasra̭-mparivathsa॒rān |
bhū॒tagṃ ha̭ prasto॒ taiṣā॒māsī᳚t |
bha॒vi॒ṣya-tprati̭ cāharat ||
prā॒ṇo a̭ddhva॒ryu-ra̭bhavat |
i॒dagṃ sarva॒gṃ॒ siṣā̭satām || 51 ||
a॒pā॒no vi॒dvā-nā॒vṛtaḥ̭ | prati॒ prāti̭ṣṭha-daddhva॒re || ā॒rta॒vā ṷpagā॒tāraḥ̭ | sa॒da॒syā̭ ṛ॒tavo̭-'bhavann | a॒rdha॒mā॒sāśca॒ māsā᳚śca | ca॒ma॒sā॒-ddhva॒rya॒vo-'bha̭vann ||
aśagṃ̭ sa॒-dbrahma̭ṇa॒-stejaḥ̭ |
a॒cchā॒vā॒ko 'bha̭va॒-dyaśaḥ̭ |
ṛ॒ta-mḙṣā-mpraśā॒stā-''sī᳚t |
ya-dvi̭śva॒ sṛja॒ āsa̭ta || 52 ||
ūrg-rājā̭na॒-muda̭vahat | dhru॒va॒ go॒pa-ssaho̭-'bhavat | ojo॒-'bhya̭ṣṭau॒-dgrāv.ṇṇaḥ̭ |
ya-dvi̭śva॒ sṛja॒ āsa̭ta ||
apa̭citiḥ po॒trīyā̭-mayajat | ne॒ṣṭrīyā̭-mayaja॒-ttviṣiḥ̭ | āgnī᳚ddhrā-dvi॒duṣī̭ sa॒tyam | śra॒ddhā hai॒vā ya̭ja-thsva॒yam || irā॒ patnī̭ viśva॒ sṛjā᳚m | ākṷ̄ti-rapinaḍḍha॒viḥ || 53 ||
i॒ddhmagṃ ha॒ kṣuc cai᳚bhya u॒gre | tṛ॒ṣṇā cā va̭hatāmu॒bhe || vāgḙṣāgṃ subrahma॒ṇyā-''sī᳚t | cha॒ndo॒ yo॒gān. vi̭jāna॒tī |
ka॒lpa॒ta॒ntrāṇi̭ tanvā॒nā-'haḥ̭ | sa॒gg॒sthāśca̭ sarva॒śaḥ || a॒ho॒rā॒tre pa̭śupā॒lyau | mu॒hū॒rtāḥ pre॒ṣyā̭ abhavann | mṛ॒tyus tada̭-bhava-ddhā॒tā | śa॒mi॒to gro vi॒śā-mpatiḥ̭ || 54 ||
vi॒śva॒sṛjaḥ̭ pratha॒mā-ssa॒tra-mā̭sata | sa॒hasra̭ sama॒-mprasṷtena॒ yantaḥ̭ |
tato̭ ha jajñe॒ bhuva̭nasya go॒pāḥ | hi॒ra॒ṇmayaḥ̭ śa॒kuni॒ rbrahma॒ nāma̭ || yena॒ sūrya॒-stapa̭ti॒ teja̭se॒-ddhaḥ | pi॒tā pu॒treṇa̭ pitṛ॒mān. yoni̭yonau | nāvḙdavi-nmanute॒ ta-mbṛ॒hanta᳚m | sa॒rvā॒nu॒bhu-mā॒tmānagṃ̭ samparā॒ye ||
e॒ṣa ni॒tyo ma̭hi॒mā brā᳚hma॒ṇasya̭ |
na karma̭ṇā vardhate॒ no kanī̭yān || 55 ||
tasyai॒vātmā pa̭da॒vittaṃ-vi~̭ditvā |
na karma̭ṇā lipyate॒ pāpa̭kena ||
pañca̭pañcā॒śata̭-stri॒vṛtaḥ̭ saṃva~thsa॒rāḥ |
pañca̭pañcā॒śataḥ̭ pañcada॒śāḥ | pañca̭pañcā॒śataḥ̭ saptada॒śāḥ |
pañca̭pañcā॒śata̭ ekavi॒gṃ॒śāḥ |
vi॒śva॒sṛjāgṃ̭ sa॒hasra̭ saṃva~thsaram ||
e॒tena॒ vai vi̭śva॒sṛja̭ i॒daṃ-vi~śva̭-masṛjanta | ya-dviśva॒-masṛ̭janta | tasmā᳚-dviśva॒sṛjaḥ̭ ||
viśva̭-menā॒-nanu॒ prajā̭yate | brahma̭ṇa॒-ssāyṷjyagṃ salo॒katāṃ᳚-ya~nti |
e॒tāsā̭me॒va de॒vatā̭nā॒gṃ॒ sāyṷjyam | sā॒rṣṭitāgṃ̭ samāna lo॒katāṃ᳚-ya~nti |
ya e॒ta-dṷpa॒yanti̭ | ye cai̭na॒-tprāhuḥ̭ |
yebhya̭-ścaina॒-tprāhuḥ̭ ||
om || 56 ||
(śaśva̭ - dāsata॒ - siṣā̭satā॒ - māsa̭ta - ha॒viṣ - patiḥ॒ - kanī̭yā॒n - tasmā᳚-dviśva॒sṛjo॒-'ṣṭau ca̭) (a. 9)
(tubhyaṃ̭ - de॒vebhya॒ - stapa̭sā - de॒vebhyo॒ - brahma॒ vai catṷrhotāro॒ - yaccā॒mṛta॒gṃ॒ - sarvā॒ diśo̭ di॒kṣu - sarvā॒-ndiva̭ - mṛ॒cā-mprācī॒ nava̭)
(tubhyaṃ॒ - tapa̭sā॒ - tā vā e॒tāḥ pañca॒ - hira̭ṇya-ndadāti॒ - sarvā॒ diśa॒ - stapa̭ āsīdgṛ॒hapa̭ti॒-ṣṣaṭpa̭ñcā॒śat)
(tubhya॒-moṃ)
|| hariḥ̭ om ||
|| taittirīya yajurbrāhmaṇe kāṭhake tṛtīya praśna-ssamāptaḥ ||
|| iti taittirīya yajurbrāhmaṇe kāṭhakaṃ samāptam ||
Sanskrit — Devanagari (original)
कृष्ण यजुर्वेदीय तैत्तिरीय ब्राह्मणे काठके तृतीयः प्रश्नः - वैश्वसृजचयनम्
ओ-न्नमः परमात्मने, श्री महागणपतये नमः,
श्री गुरुभ्यो नमः । ह॒रिः॒ ओम् ॥
चातुर्होत्रचयनं-वैँश्वसृजचयन-ञ्च
अनुवाकं 1 - वैश्वसृजचयनाङ्गभूताः दिवश्श्येनय इष्टयः
तुभ्य॒-न्ता अ॑ङ्गिरस्तम॒ विश्वा᳚-स्सुक्षि॒तयः॒ पृथ॑क् । अग्ने॒ कामा॑य येमिरे ॥ अ॒श्याम॒ त-ङ्काम॑मग्ने॒ तवो॒ त्य॑श्याम॑ र॒यिग्ं र॑यिव-स्सु॒वीर᳚म् । अ॒श्याम॒ वाज॑म॒भि वा॒जय॑न्तो॒ ऽश्याम॑ द्यु॒म्नम॑जरा॒जर॑-न्ते ॥ ।
आशा॑ना-न्त्वा ऽऽशापा॒लेभ्यः॑ । च॒तुर्भ्यो॑ अ॒मृते᳚भ्यः । इ॒द-म्भू॒तस्याध्य॑क्षेभ्यः । वि॒धेम॑ ह॒विषा॑ व॒यम् ॥ विश्वा॒ आशा॒ मधु॑ना॒ सग्ंसृ॑जामि । अ॒न॒मी॒वा आप॒ ओष॑धयो भवन्तु । अ॒यं-यँज॑मानो॒ मृधो॒ व्य॑स्यतां अगृ॑भीताः प॒शवः॑ सन्तु॒ सर्वे᳚ ॥ ।
अनु॑ नो॒-ऽद्या-ऽनु॑मतिर्य॒ज्ञ-न्दे॒वेषु॑ मन्यताम् । अ॒ग्निश्च॑ हव्य॒वाह॑नो॒ भव॑ता-न्दा॒शुषे॒ मयः॑ ॥ अन्विद॑नुमते॒ त्व-म्मन्या॑सै॒ शञ्च॑नः कृधि । क्रत्वे॒ दक्षा॑य नो हिनु॒ प्रण॒ आयूग्ं॑षि तारिषः ॥ ।
कामो॑ भू॒तस्य॒ भव्य॑स्य । स॒म्राडेको॒ विरा॑जति । स इ॒द-म्प्रति॑ पप्रथे । ऋ॒तूनु-थ्सृ॑जते व॒शी ॥ काम॒स्तदग्रे॒ सम॑वर्त॒ताधि॑ । मन॑सो॒ रेतः॑ प्रथ॒मं-यँदासी᳚त् । स॒तो बन्धु॒मस॑ति॒ निर॑विन्दन्न् । हृ॒दि प्र॒तीष्या॑ क॒वयो॑ मनी॒षा ॥ ।
ब्रह्म॑ जज्ञा॒न-म्प्र॑थ॒म-म्पु॒रस्ता॒द्वि सी॑म॒त-स्सु॒रुचो॑ वे॒न आ॑वः । स बु॒ध्निया॑ उप॒मा अ॑स्य वि॒ष्ठा-स्स॒तश्च॒ योनि॒मस॑तश्च॒ विवः॑ ॥ पि॒ता वि॒राजा॑मृष॒भो र॑यी॒णाम् । अ॒न्तरि॑क्षं-विँ॒श्वरू॑प॒ आवि॑वेश । तम॒र्कै-र॒भ्य॑र्चन्ति व॒थ्सम् । ब्रह्म॒ सन्त॒-म्ब्रह्म॑णा व॒र्धय॑न्तः ॥ ।
य॒ज्ञो रा॒यो य॒ज्ञ ई॑शे॒ वसू॑नाम् । य॒ज्ञ-स्स॒स्याना॑मु॒त सु॑क्षिती॒नाम् । य॒ज्ञ इ॒ष्टः पू॒र्वचि॑त्ति-न्दधातु । य॒ज्ञो ब्र॑ह्म॒ण्वाग्ं अप्ये॑तु दे॒वान् ॥ अ॒यं-यँ॒ज्ञो व॑र्धता॒-ङ्गोभि॒रश्वैः᳚ । इ॒यं-वेँदिः॑ स्वप॒त्या सु॒वीरा᳚ । इ॒द-म्ब॒र्॒हिरति॑ ब॒र्॒हीग्ष्य॒न्या । इ॒मं-यँ॒ज्ञं-विँश्वे॑ अवन्तु दे॒वाः ॥ । आपो॑ भ॒द्रा घृ॒तमिदाप॑ आसुर॒ग्नी-षोमौ॑ बिभ्र॒त्याप॒ इ-त्ताः । ती॒व्रो रसो॑ मधु॒पृचा॑ मरङ्ग॒म आ मा᳚ प्रा॒णेन॑ स॒ह वर्च॑सा गन्न् ॥ आदि-त्प॑श्याम्यु॒त वा॑ शृणो॒म्या मा॒ घोषो॑ गच्छति॒ वान्न॑ आसाम् । मन्ये॑ भेजा॒नो अ॒मृत॑स्य॒ तर्हि॒ हिर॑ण्यवर्णा॒ अतृ॑पं-यँ॒दा वः॑ ॥ ।
तुभ्य॑-म्भरन्ति क्षि॒तयो॑ यविष्ठ । ब॒लिम॑ग्ने॒ अन्ति॑ त॒ ओत दू॒रात् । आ भन्दि॑ष्ठस्य सुम॒ति-ञ्चि॑किद्धि । बृ॒हत्ते॑ अग्ने॒ महि॒ शर्म॑ भ॒द्रम् ॥ यो दे॒ह्यो अन॑मयद्वध॒स्नैः । यो अर्य॑पत्नी-रु॒षस॑श्च॒कार॑ । स नि॒रुध्या॒ नहु॑षो य॒ह्वो अ॒ग्निः । विश॑श्चक्रे बलि॒हृत॒-स्सहो॑भिः ॥ ।
पूर्व॑-न्देवा॒ अप॑रेणा-नु॒पश्य॒ञ्जन्म॑भिः । जन्मा॒न्यव॑रैः॒ परा॑णि । वेदा॑नि देवा अ॒यम॒स्मीति॒ माम् । अ॒हग्ं हि॒त्वा शरी॑र-ञ्ज॒रसः॑ प॒रस्ता᳚त् ॥ प्रा॒णा॒पा॒नौ चक्षु॒-श्श्रोत्र᳚म् । वाच॒-म्मन॑सि॒ सम्भृ॑ताम् । हि॒त्वा शरी॑र-ञ्ज॒रसः॑ प॒रस्ता᳚त् । आ भूति॒-म्भूतिं॑-वँ॒यम॑श्नवामहै ॥ ।
ह॒व्य॒वाह॑-मभिमाति॒षा-ऽह᳚म् । र॒क्षो॒हण॒-म्पृत॑नासु जि॒ष्णुम् । ज्योति॑ष्मन्त॒-न्दीद्य॑त॒-म्पुर॑न्धिम् । अ॒ग्निग्ग् स्वि॑ष्ट॒कृत॒मा हु॑वेम ॥ स्वि॑ष्टमग्ने अ॒भि त-त्पृ॑णाहि । विश्वा॑ देव॒ पृत॑ना अ॒भिष्य । उ॒रु-न्नः॒ पन्था᳚-म्प्रदि॒शन्वि भा॑हि । ज्योति॑ष्मद्धेह्य॒जर॑-न्न॒ आयुः॑ ॥ ॥ 1 ॥
तुभ्य॒-न्दश॑ (अ. 1)
अनुवाकं 2 - तासा-म्ब्राह्मणम्
दे॒वेभ्यो॒ वै स्व॒र्गो लो॒कस्ति॒रो॑-ऽभवत् ।
ते प्र॒जाप॑ति-मब्रुवन्न् ।
प्रजा॑पते स्व॒र्गो वै नो॑ लो॒कस्ति॒रो॑-ऽभूत् । तमन्वि॒च्छेति॑ । तं-यँ॑ज्ञक्र॒तुभि॒-रन्वै᳚च्छत् । तं-यँ॑ज्ञक्र॒तुभि॒-र्नान्व॑विन्दत् ।
तमिष्टि॑भि॒-रन्वै᳚च्छत् । तमिष्टि॑भि॒-रन्व॑विन्दत् ।
तदिष्टी॑ना-मिष्टि॒त्वम् । एष्ट॑यो ह॒वै नाम॑ ।
ता इष्ट॑य॒ इत्याच॑क्षते प॒रोक्षे॑ण । प॒रोक्ष॑ प्रिया इव॒ हि दे॒वाः ॥ 2 ॥
तमाशा᳚-ऽब्रवीत् । प्रजा॑पत आ॒शया॒ वै श्रा᳚म्यसि ।
अ॒हमु॒ वा आशा᳚-ऽस्मि । मा-न्नु य॑जस्व ।
अथ॑ ते स॒त्या-ऽऽशा॑ भविष्यति । अनु॑ स्व॒र्गं-लोँ॒कं-वेँ॒थ्स्यसीति॑ । स ए॒तम॒ग्नये॒ कामा॑य पुरो॒डाश॑-म॒ष्टाक॑पाल॒-न्निर॑वपत् ।
आ॒शायै॑ च॒रुम् । अनु॑मत्यै च॒रुम् । ततो॒ वै तस्य॑ स॒त्या-ऽऽशा॑ ऽभवत् । अनु॑ स्व॒र्गं-लोँ॒क-म॑विन्दत् । स॒त्या ह॒ वा अ॒स्याशा॑ भवति ।
अनु॑ स्व॒र्गं-लोँ॒कं-विँ॑न्दति । य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ ॥ सो-ऽत्र॑ जुहोति । अ॒ग्नये॒ कामा॑य॒ स्वाहा॒-ऽऽशायै॒ स्वाहा᳚ । अनु॑मत्यै॒ स्वाहा᳚ प्र॒जाप॑तये॒ स्वाहा᳚ ।
स्व॒र्गाय॑ लो॒काय॒ स्वाहा॒-ऽग्नये᳚ स्विष्ट॒कृते॒ स्वाहेति॑ ॥ 3 ॥
त-ङ्कामो᳚-ऽब्रवीत् । प्रजा॑पते॒ कामे॑न॒ वै श्रा᳚म्यसि । अ॒हमु॒वै कामो᳚-ऽस्मि । मा-न्नु य॑जस्व । अथ॑ ते स॒त्यः कामो॑ भविष्यति । अनु॑ स्व॒र्गं-लोँ॒कं-वेँ॒थ्स्यसीति॑ । स ए॒तम॒ग्नये॒ कामा॑य पुरो॒डाश॑-म॒ष्टाक॑पाल॒-न्निर॑वपत् । कामा॑य च॒रुम् । अनु॑मत्यै च॒रुम् ।
ततो॒ वै तस्य॑ स॒त्यः कामो॑-ऽभवत् ।
अनु॑ स्व॒र्गं-लोँ॒कम॑विन्दत् ।
स॒त्यो ह॒ वा अ॑स्य॒ कामो॑ भवति ।
अनु॑ स्व॒र्गं-लोँ॒कं-विँ॑न्दति ।
य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ । सो-ऽत्र॑ जुहोति ।
अ॒ग्नये॒ कामा॑य॒ स्वाहा॒ कामा॑य॒ स्वाहा᳚ ।
अनु॑मत्यै॒ स्वाहा᳚ प्र॒जाप॑तये॒ स्वाहा᳚ ।
स्व॒र्गाय॑ लो॒काय॒ स्वाहा॒-ऽग्नये᳚ स्विष्ट॒कृते॒ स्वाहेति॑ ॥ 4 ॥
त-म्ब्रह्मा᳚-ऽब्रवीत् । प्रजा॑पते॒ ब्रह्म॑णा॒ वैश्रा᳚म्यसि । अ॒हमु॒ वै ब्रह्मा᳚-ऽस्मि ।
मा-न्नु य॑जस्व । अथ॑ ते ब्रह्म॒ण्वान्. य॒ज्ञो भ॑विष्यति । अनु॑ स्व॒र्गं-लोँ॒कं-वेँ॒थ्स्यसीति॑ । स ए॒तम॒ग्नये॒ कामा॑य पुरो॒डाश॑-म॒ष्टाक॑पाल॒-न्निर॑वपत् । ब्रह्म॑णे च॒रुम् । अनु॑मत्यै च॒रुम् । ततो॒ वै तस्य॑ ब्रह्म॒ण्वान्. य॒ज्ञो॑-ऽभवत् । अनु॑ स्व॒र्गं-लोँ॒कम॑विन्दत् । ब्र॒ह्म॒ण्वान्. ह॒ वा अ॑स्य य॒ज्ञो भ॑वति ।
अनु॑ स्व॒र्गं-लोँ॒कं-विँ॑न्दति । य ए॒तेन॑ ह॒विषा॒ यज॑ते । य उ॑चैनदे॒वं-वेँद॑ । सो-ऽत्र॑ जुहोति । अ॒ग्नये॒ कामा॑य॒ स्वाहा॒ ब्रह्म॑णे॒ स्वाहा᳚ । अनु॑मत्यै॒ स्वाहा᳚ प्र॒जाप॑तये॒ स्वाहा᳚ । स्व॒र्गाय॑ लो॒काय॒ स्वाहा॒ ऽग्नये᳚ स्विष्ट॒कृते॒ स्वाहेति॑ ॥ 5 ॥
तं-यँ॒ज्ञो᳚-ऽब्रवीत् । प्रजा॑पते य॒ज्ञेन॒ वै श्रा᳚म्यसि । अ॒हमु॒ वै य॒ज्ञो᳚-ऽस्मि ।
मा-न्नु य॑जस्व । अथ॑ ते स॒त्यो य॒ज्ञो भ॑वष्यति । अनु॑ स्व॒र्गं-लोँ॒कं-वेँ॒थ्स्यसीति॑ ।
स ए॒तम॒ग्नये॒ कामा॑य पुरो॒डाश॑-म॒ष्टाक॑पाल॒-न्निर॑वपत् । य॒ज्ञाय॑ च॒रुम् । अनु॑मत्यै च॒रुम् । ततो॒ वै तस्य॑ स॒त्यो य॒ज्ञो॑-ऽभवत् । अनु॑ स्व॒र्गं-लोँ॒कम॑विन्दत् । स॒त्यो ह॒ वा अ॑स्य य॒ज्ञो भ॑वति ।
अनु॑ स्व॒र्गं-लोँ॒कं-विँ॑न्दति ।
य ए॒तेन॑ ह॒विषा॒ यज॑ते ।
य उ॑चैनदे॒वं-वेँद॑ । सो-ऽत्र॑ जुहोति ।
अ॒ग्नये॒ कामा॑य॒ स्वाहा॑ य॒ज्ञाय॒ स्वाहा᳚ ।
अनु॑मत्यै॒ स्वाहा᳚ प्र॒जाप॑तये॒ स्वाहा᳚ ।
स्व॒र्गाय॑ लो॒काय॒ स्वाहा॒-ऽग्नये᳚ स्विष्ट॒कृते॒ स्वाहेति॑ ॥ 6 ॥
तमापो᳚-ऽब्रुवन्न् । प्रजा॑पते॒-ऽफ्सु वै सर्वे॒ कामा᳚-श्श्रि॒ताः । व॒यमु॒ वा आप॑स्स्मः । अ॒स्मान्नु य॑जस्व । अथ॒ त्वयि॒ सर्वे॒ कामा᳚-श्श्रयिष्यन्ते । अनु॑ स्व॒र्गं-लोँ॒कं-वेँ॒थ्स्यसीति॑ ।
स ए॒तम॒ग्नये॒ कामा॑य पुरो॒डाश॑-म॒ष्टाक॑पाल॒-न्निर॑वपत् । अ॒द्भ्यश्च॒रुम् ।
अनु॑मत्यै च॒रुम् । ततो॒ वै तस्मि॒न्-थ्सर्वे॒ कामा॑ अश्रयन्त । अनु॑ स्व॒र्गं-लोँ॒कम॑विन्दत् । सर्वे॑ ह॒ वा अ॑स्मि॒न् कामा᳚-श्श्रयन्ते । अनु॑ स्व॒र्गं-लोँ॒कं-विँ॑न्दति । य ए॒तेन॑ ह॒विषा॒ यज॑ते ।
य उ॑चैनदे॒वं-वेँद॑ । सो-ऽत्र॑ जुहोति ।
अ॒ग्नये॒ कामा॑य॒ स्वाहा॒ ऽद्भ्य-स्स्वाहा᳚ ।
अनु॑मत्यै॒ स्वाहा᳚ प्र॒जाप॑तये॒ स्वाहा᳚ ।
स्व॒र्गाय॑ लो॒काय॒ स्वाहा॒-ऽग्नये᳚ स्विष्ट॒कृते॒ स्वाहेति॑ ॥ 7 ॥
तम॒ग्नि र्ब॑लि॒मान॑ब्रवीत् ।
प्रजा॑पते॒ ऽग्नये॒ वै ब॑लि॒मते॒ सर्वा॑णि भू॒तानि॑ ब॒लिग्ं ह॑रन्ति । अ॒हमु॒ वा अ॒ग्नि र्ब॑लि॒मान॑स्मि । मा-न्नु य॑जस्व ।
अथ॑ ते॒ सर्वा॑णि भू॒तानि॑ ब॒लिग्ं ह॑रिष्यन्ति ।
अनु॑ स्व॒र्गं-लोँ॒कं-वेँ॒थ्स्यसीति॑ ।
स ए॒तम॒ग्नये॒ कामा॑य पुरो॒डाश॑-म॒ष्टाक॑पाल॒-न्निर॑वपत् । अ॒ग्नये॑ बलि॒मते॑ च॒रुम् । अनु॑मत्यै च॒रुम् । ततो॒ वै तस्मै॒ सर्वा॑णि भू॒तानि॑ ब॒लि-म॑हरन्न् । अनु॑ स्व॒र्गं-लोँ॒कम॑विन्दत् । सर्वा॑णि ह॒ वा अ॑स्मै भू॒तानि॑ ब॒लिग्ं ह॑रन्ति । अनु॑ स्व॒र्गं-लोँ॒कं-विँ॑न्दति । य ए॒तेन॑ ह॒विषा॒ यज॑ते ।
य उ॑चैनदे॒वं-वेँद॑ । सो-ऽत्र॑ जुहोति ।
अ॒ग्नये॒ कामा॑य॒ स्वाहा॒ ऽग्नये॑ बलि॒मते॒ स्वाहा᳚ । अनु॑मत्यै॒ स्वाहा᳚ प्र॒जाप॑तये॒ स्वाहा᳚ ।
स्व॒र्गाय॑ लो॒काय॒ स्वाहा॒-ऽग्नये᳚ स्विष्ट॒कृते॒ स्वाहेति॑ ॥ 8 ॥
तमनु॑वित्तिर-ब्रवीत् । प्रजा॑पते स्व॒र्गं-वैँ लो॒कमनु॑-विविथ्ससि । अ॒हमु॒ वा अनु॑वित्तिरस्मि । मा-न्नु य॑जस्व । अथ॑ ते स॒त्या ऽनु॑वित्ति-र्भविष्यति । अनु॑ स्व॒र्गं-लोँ॒कं-वेँ॒थ्स्यसीति॑ ।
स ए॒तम॒ग्नये॒ कामा॑य पुरो॒डाश॑-म॒ष्टाक॑पाल॒-न्निर॑वपत् ।
अनु॑वित्त्यै च॒रुम् । अनु॑मत्यै च॒रुम् ।
ततो॒ वै तस्य॑ स॒त्या ऽनु॑वित्तिरभवत् ।
अनु॑ स्व॒र्गं-लोँ॒क-म॑विन्दत् ।
स॒त्या ह॒ वा अ॒स्यानु॑वित्ति-र्भवति ।
अनु॑ स्व॒र्गं-लोँ॒कं-विँ॑न्दति ।
य ए॒तेन॑ ह॒विषा॒ यज॑ते ।
य उ॑चैनदे॒वं-वेँद॑ । सो-ऽत्र॑ जुहोति ।
अ॒ग्नये॒ कामा॑य॒ स्वाहा-ऽनु॑वित्त्यै॒ स्वाहा᳚ ।
अनु॑मत्यै॒ स्वाहा᳚ प्र॒जाप॑तये॒ स्वाहा᳚ ।
स्व॒र्गाय॑ लो॒काय॒ स्वाहा॒-ऽग्नये᳚ स्विष्ट॒कृते॒ स्वाहेति॑ ॥ 9 ॥
ता वा ए॒ता-स्स॒प्त स्व॒र्गस्य॑ लो॒कस्य॒ द्वारः॑ ।
दि॒व-श्श्ये॑न॒यो ऽनु॑वित्तयो॒ नाम॑ ।
आशा᳚ प्रथ॒माग्ं र॑क्षति ।
कामो᳚ द्वि॒तीया᳚म् । ब्रह्म॑ तृ॒तीया᳚म् । य॒ज्ञश्च॑तु॒र्थीम् । आपः॑ पञ्च॒मीम् ।
अ॒ग्नि र्ब॑लि॒मान्-थ्ष॒ष्ठीम् । अनु॑वित्ति-स्सप्त॒मीम् ।
अनु॑ ह॒ वै स्व॒र्गं-लोँ॒कं-विँ॑न्दति ।
का॒म॒चारो᳚-ऽस्य स्व॒र्गे लो॒के भ॑वति ।
य ए॒ताभि॒-रिष्टि॑भि॒-र्यज॑ते ।
य उ॑चैना ए॒वं-वेँद॑ । तास्व॑न्वि॒ष्टि । प॒ष्ठौ॒ही॒ व॒रा-न्द॑द्या-त्क॒ग्ं॒ सञ्च॑ ।
स्त्रियै॑ चाभा॒रग्ं समृ॑द्ध्यै ॥ 10 ॥
अनुवाकं 3 - उपाघा नामेष्टयः
तप॑सा दे॒वा दे॒वता॒-मग्र॑ आयन्न् । तप॒सर्ष॑य॒-स्स्व॑रन्व॑विन्दन्न् ।
तप॑सा स॒पत्ना॒-न्प्रणु॑दा॒मारा॑तीः ।
येने॒दं-विँश्व॒-म्परि॑भूतं॒-यँदस्ति॑ ॥
प्र॒थ॒म॒ज-न्दे॒वग्ं ह॒विषा॑ विधेम । स्व॒य॒भु-म्ब्रह्म॑ पर॒म-न्तपो॒ यत् ।
स ए॒व पु॒त्र-स्स पि॒ता स मा॒ता ।
तपो॑ ह य॒क्ष-म्प्र॑थ॒मग्ं सम्ब॑भूव ॥
श्र॒द्धया दे॑वो देव॒त्व-म॑श्नुते ।
श्र॒द्धा प्र॑ति॒ष्ठा लो॒कस्य॑ दे॒वी ॥ 11 ॥
सा नो॑ जुषा॒णोप॑ य॒ज्ञ-मागा᳚त् ।
काम॑वथ्सा॒ ऽमृत॒-न्दुहा॑ना ॥
श्र॒द्धा दे॒वी प्र॑थम॒जा ऋ॒तस्य॑ ।
विश्व॑स्य भ॒र्त्री जग॑तः प्रति॒ष्ठा ।
ताग् श्र॒द्धाग्ं ह॒विषा॑ यजामहे ।
सा नो॑ लो॒क-म॒मृत॑-न्दधातु ।
ईशा॑ना दे॒वी भुव॑न॒स्याधि॑पत्नी ॥ आगा᳚थ्स॒त्यग्ं ह॒विरि॒द-ञ्जु॑षा॒णम् ।
यस्मा᳚द्दे॒वा ज॑ज्ञिरे॒ भुव॑नञ्च॒ विश्वे᳚ ।
तस्मै॑ विधेम ह॒विषा॑ घृ॒तेन॑ ॥ 12 ॥
यथा॑ दे॒वै-स्स॑ध॒माद॑-म्मदेम ॥
यस्य॑ प्रति॒ष्ठो-र्व॑न्तरि॑क्षम् ।
यस्मा᳚द्दे॒वा ज॑ज्ञिरे॒ भुव॑नञ्च॒ सर्वे᳚ ।
तथ्स॒त्य-मर्च॒दुप॑य॒ज्ञ-न्न॒ आगा᳚त् । ब्रह्माहु॑ती॒-रुप॒मोद॑मानम् ॥
मन॑सो॒ वशे॒ सर्व॑मि॒द-म्ब॑भूव ।
नान्यस्य॒ मनो॒ वश॒मन्वि॑याय ।
भी॒ष्मो हि दे॒व-स्सह॑स॒-स्सही॑यान् ।
स नो॑ जुषा॒ण उप॑ य॒ज्ञमागा᳚त् ॥
आकू॑तीना॒-मधि॑पति॒-ञ्चेत॑सा-ञ्च ॥ 13 ॥
स॒ङ्क॒ल्पजू॑ति-न्दे॒वं-विँ॑प॒श्चिम् ।
मनो॒ राजा॑नमि॒ह व॒र्धय॑न्तः ।
उ॒प॒ह॒वे᳚ ऽस्य सुम॒तौ स्या॑म ॥
चर॑ण-म्प॒वित्रं॒-विँत॑त-म्पुरा॒णम् ।
येन॑ पू॒तस्तर॑ति दुष्कृ॒तानि॑ ।
तेन॑ प॒वित्रे॑ण शु॒द्धेन॑ पू॒ताः ।
अति॑ पा॒प्मान॒-मरा॑ति-न्तरेम ॥
लो॒कस्य॒ द्वार॑-मर्चि॒म-त्प॒वित्र᳚म् ।
ज्योति॑ष्म॒-द्भ्राज॑मान॒-म्मह॑स्वत् । अ॒मृत॑स्य॒ धारा॑ बहु॒धा दोह॑मानम् ।
चर॑ण-न्नो लो॒के सुधि॑ता-न्दधातु ॥
अ॒ग्निर्मू॒र्धा दि॒वः क॒कु-त्पतिः॑ पृथि॒व्या अ॒यम् । अ॒पाग्ं रेताग्ं॑सि जिन्वति ॥ भुवो॑ य॒ज्ञस्य॒ रज॑सश्च ने॒ता यत्रा॑ नि॒युद्भि॒-स्सच॑से शि॒वाभिः॑ । दि॒वि मू॒र्धान॑-न्दधिषे सुव॒र्॒षा-ञ्जि॒ह्वाम॑ग्ने चकृषे हव्य॒वाह᳚म् ॥ ॥
अनु॑ नो॒-ऽद्या-ऽनु॑मतिर्य॒ज्ञ-न्दे॒वेषु॑ मन्यताम् । अ॒ग्निश्च॑ हव्य॒वाह॑नो॒ भव॑ता-न्दा॒शुषे॒ मयः॑ ॥ अन्विद॑नुमते॒ त्व-म्मन्या॑सै॒ शञ्च॑नः कृधि । क्रत्वे॒ दक्षा॑य नो हिनु॒ प्रण॒ आयूग्ं॑षि तारिषः ॥ ॥
ह॒व्य॒वाह॑-मभिमाति॒षा-ऽह᳚म् । र॒क्षो॒हण॒-म्पृत॑नासु जि॒ष्णुम् । ज्योति॑ष्मन्त॒-न्दीद्य॑त॒-म्पुर॑न्धिम् । अ॒ग्निग्ग् स्वि॑ष्ट॒कृत॒मा हु॑वेम ॥ स्वि॑ष्टमग्ने अ॒भि त-त्पृ॑णाहि । विश्वा॑ देव॒ पृत॑ना अ॒भिष्य । उ॒रु-न्नः॒ पन्था᳚-म्प्रदि॒शन्वि भा॑हि । ज्योति॑ष्मद्धेह्य॒जर॑-न्न॒ आयुः॑ ॥ ॥ 14 ॥
(दे॒वी - घृ॒तेन॒ - चेत॑सा-ञ्च॒ - दोह॑मान-ञ्च॒त्वारि॑ च) (अ. 3)
अनुवाकं 4 - तासा-म्ब्राह्मणम्
दे॒वेभ्यो॒ वै स्व॒र्गो लो॒कस्ति॒रो॑ ऽभवत् ।
ते प्र॒जाप॑ति-मब्रुवन्न् । प्रजा॑पते स्व॒र्गो
वै नो॑ लो॒कस्ति॒रो॑-ऽभूत् । तमन्वि॒च्छेति॑ ।
तं-यँ॑ज्ञक्र॒तुभि॒-रन्वै᳚च्छत् ।
तं-यँ॑ज्ञक्र॒तुभि॒ र्नान्व॑विन्दत् ।
तमिष्टि॑भि॒-रन्वै᳚च्छत् । तमिष्टि॑भि॒-रन्व॑विन्दत् । तदिष्टी॑ना-मिष्टि॒त्वम् । एष्ट॑यो ह॒ वै नाम॑ । ता इष्ट॑य॒ इत्या च॑क्षते प॒रोक्षे॑ण ।
प॒रोक्ष॑प्रिया इव॒ हि दे॒वाः ॥ 15 ॥
त-न्तपो᳚-ऽ ब्रवीत् । प्रजा॑पते॒ तप॑सा॒ वै
श्रा᳚म्यसि । अ॒हमु॒ वै तपो᳚-ऽ स्मि ।
मा-न्नु य॑जस्व ।
अथ॑ ते स॒त्य-न्तपो॑ भविष्यति ।
अनु॑ स्व॒र्गं-लोँ॒कं-वेँ॒थ्स्यसीति॑ ।
स ए॒तमा᳚ग्ने॒य-म॒ष्टाक॑पाल॒-न्निर॑वपत् । तप॑से च॒रुम् । अनु॑मत्यै च॒रुम् ।
ततो॒ वै तस्य॑ स॒त्य-न्तपो॑ ऽभवत् ।
अनु॑ स्व॒र्गं-लोँ॒कम॑विन्दत् ।
स॒त्य ग्ं ह॒ वा अ॑स्य॒ तपो॑ भवति ।
अनु॑ स्व॒र्गं-लोँ॒कं-विँ॑न्दति ।
य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ । सो-ऽत्र॑ जुहोति । अ॒ग्नये॒ स्वाहा॒ तप॑से॒ स्वाहा᳚ ।
अनु॑मत्यै॒ स्वाहा᳚ प्र॒जाप॑तये॒ स्वाहा᳚ ।
स्व॒र्गाय॑ लो॒काय॒ स्वाहा॒-ऽग्नये᳚ स्विष्ट॒कृते॒ स्वाहेति॑ ॥ 16 ॥
तग्ग् श्र॒द्धा-ऽब्र॑वीत् । प्रजा॑पते श्र॒द्धया॒ वै श्रा᳚म्यसि । अ॒हमु॒ वै श्र॒द्धा-ऽस्मि॑ । मा-न्नु य॑जस्व । अथ॑ ते स॒त्या श्र॒द्धा भ॑विष्यति । अनु॑ स्व॒र्गं-लोँ॒कं-वेँ॒थ्स्यसीति॑ ।
स ए॒तमा᳚-ऽग्ने॒य-म॒ष्टाक॑पाल॒-न्निर॑वपत् । श्र॒द्धायै॑ च॒रुम् । अनु॑मत्यै च॒रुम् । ततो॒ वै तस्य॑ स॒त्या श्र॒द्धा-ऽभ॑वत् ।
अनु॑ स्व॒र्गं-लोँ॒कम॑विन्दत् ।
स॒त्या ह॒ वा अ॑स्य श्र॒द्धा भ॑वति ।
अनु॑ स्व॒र्गं-लोँ॒कं-विँ॑न्दति ।
य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ । सो-ऽत्र॑ जुहोति । अ॒ग्नये॒ स्वाहा᳚ श्र॒द्धायै॒ स्वाहा᳚ ।
अनु॑मत्यै॒ स्वाहा᳚ प्र॒जाप॑तये॒ स्वाहा᳚ ।
स्व॒र्गाय॑ लो॒काय॒ स्वाहा॒-ऽग्नये᳚ स्विष्ट॒कृते॒ स्वाहेति॑ ॥ 17 ॥
तग्ं स॒त्य-म॑ब्रवीत् । प्रजा॑पते स॒त्येन॒ वै श्रा᳚म्यसि । अ॒हमु॒ वै स॒त्यम॑स्मि । मा-न्नु य॑जस्व । अथ॑ ते स॒त्यग्ं स॒त्य-म्भ॑विष्यति । अनु॑ स्व॒र्गं-लोँ॒कं-वेँ॒थ्स्यसीति॑ ।
स ए॒तमा᳚-ऽग्ने॒य-म॒ष्टाक॑पाल॒-न्निर॑वपत् । स॒त्याय॑ च॒रुम् । अनु॑मत्यै च॒रुम् ।
ततो॒ वै तस्य॑ स॒त्यग्ं स॒त्यम॑भवत् ।
अनु॑ स्व॒र्गं-लोँ॒कम॑विन्दत् ।
स॒त्यग्ं ह॒ वा अ॑स्य स॒त्य-म्भ॑वति ।
अनु॑ स्व॒र्गं-लोँ॒कं-विँ॑न्दति ।
य ए॒तेन॑ ह॒विषा॒ यज॑ते ।
य उ॑चैनदे॒वं-वेँद॑ । सो-ऽत्र॑ जुहोति ।
अ॒ग्नये॒ स्वाहा॑ स॒त्याय॒ स्वाहा᳚ ।
अनु॑मत्यै॒ स्वाहा᳚ प्र॒जाप॑तये॒ स्वाहा᳚ ।
स्व॒र्गाय॑ लो॒काय॒ स्वाहा॒-ऽग्नये᳚ स्विष्ट॒कृते॒ स्वाहेति॑ ॥ 18 ॥
त-म्मनो᳚-ऽब्रवीत् । प्रजा॑पते॒ मन॑सा॒ वै श्रा᳚म्यसि । अ॒हमु॒ वै मनो᳚-ऽस्मि ।
मा-न्नु य॑जस्व ।
अथ॑ ते स॒त्य-म्मनो॑ भविष्यति ।
अनु॑ स्व॒र्गं-लोँ॒कं-वेँ॒थ्स्यसीति॑ ।
स ए॒तमा᳚-ऽग्ने॒य-म॒ष्टाक॑पाल॒-न्निर॑वपत् । मन॑से च॒रुम् । अनु॑मत्यै च॒रुम् । ततो॒ वै तस्य॑ स॒त्य-म्मनो॑-ऽभवत् ।
अनु॑ स्व॒र्गं-लोँ॒कम॑विन्दत् । स॒त्यग्ं ह॒ वा अ॑स्य॒ मनो॑ भवति । अनु॑ स्व॒र्गं-लोँ॒कं-विँ॑न्दति । य ए॒तेन॑ ह॒विषा॒ यज॑ते ।
य उ॑चैन दे॒वं-वेँद॑ । सो-ऽत्र॑ जुहोति ।
अ॒ग्नये॒ स्वाहा॒ मन॑से॒ स्वाहा᳚ ।
अनु॑मत्यै॒ स्वाहा᳚ प्र॒जाप॑तये॒ स्वाहा᳚ ।
स्व॒र्गाय॑ लो॒काय॒ स्वाहा॒-ऽग्नये᳚ स्विष्ट॒कृते॒ स्वाहेति॑ ॥ 19 ॥
त-ञ्चर॑ण-मब्रवीत् । प्रजा॑पते॒ चर॑णेन॒ वै श्रा᳚म्यसि । अ॒हमु॒ वै चर॑णमस्मि । मा-न्नु य॑जस्व । अथ॑ ते स॒त्य-ञ्चर॑ण-म्भविष्यति । अनु॑ स्व॒र्गं-लोँ॒कं-वेँ॒थ्स्यसीति॑ ।
स ए॒तमा᳚-ऽग्ने॒य-म॒ष्टाक॑पाल॒-न्निर॑वपत् । चर॑णाय च॒रुम् । अनु॑मत्यै च॒रुम् । ततो॒ वै तस्य॑ स॒त्य-ञ्चर॑णमभवत् ।
अनु॑ स्व॒र्गं-लोँ॒कम॑विन्दत् ।
स॒त्यग्ं ह॒ वा अ॑स्य॒ चर॑ण-म्भवति ।
अनु॑स्व॒र्गं-लोँ॒कं-विँ॑न्दति ।
य ए॒तेन॑ ह॒विषा॒ यज॑ते ।
य उ॑चैनदे॒वं-वेँद॑ । सो-ऽत्र॑ जुहोति ।
अ॒ग्नये॒ स्वाहा॒ चर॑णाय॒ स्वाहा᳚ ।
अनु॑मत्यै॒ स्वाहा᳚ प्र॒जाप॑तये॒ स्वाहा᳚ ।
स्व॒र्गाय॑ लो॒काय॒ स्वाहा॒-ऽग्नये᳚ स्विष्ट॒कृते॒ स्वाहेति॑ ॥ 20 ॥
ता वा ए॒ताः पञ्च॑ स्व॒र्गस्य॑ लो॒कस्य॒ द्वारः॑ ।
अपा॑घा॒ अनु॑वित्तयो॒ नाम॑ । तपः॑ प्रथ॒माग्ं र॑क्षति । श्र॒द्धा द्वि॒तीया᳚म् । स॒त्य-न्तृ॒तीया᳚म् ।
मन॑श्चतु॒र्थीम् । चर॑ण-म्पञ्च॒मीम् ।
अनु॑ ह॒ वै स्व॒र्गं-लोँ॒कं-विँ॑न्दति ।
का॒म॒चारो᳚-ऽस्य स्व॒र्गे लो॒के भ॑वति ।
य ए॒ताभि॒-रिष्टि॑भि॒-र्यज॑ते ।
य उ॑चैना ए॒वं-वेँद॑ ।
अनुवाकं 5 - चातुर्होत्रचयनम्
ब्रह्म॒ वै चतु॑र्होतारः । चतु॑र्होतृ॒भ्यो-ऽधि॑ य॒ज्ञो निर्मि॑तः । नैनग्ं॑ श॒प्तम् । नाभिच॑रित॒-माग॑च्छति । य ए॒वं-वेँद॑ ॥
यो ह॒ वै चतु॑र्होतृणा-ञ्चतुर्होतृ॒त्वं-वेँद॑ । अथो॒ पञ्च॑ होतृत्वम् ।
सर्वा॑ हास्मै॒ दिशः॑ कल्पन्ते ।
वा॒चस्पति॒र्॒ होता॒ दश॑होतॄणाम् ।
पृ॒थि॒वी होता॒ चतु॑र्होतॄणाम् ॥ 22 ॥
अ॒ग्निर्-होता॒ पञ्च॑होतॄणाम् । वाघोता॒ षड्ढो॑तॄणाम् ।
म॒हाह॑वि॒र्॒ होता॑ स॒प्तहो॑तॄणाम् ।
ए॒तद्वै चतु॑र्होतृणा-ञ्चतुर्होतृ॒त्वम् ।
अथो॒ पञ्च॑होतृत्वम् । सर्वा॑ हास्मै॒ दिशः॑ कल्पन्ते । य ए॒वं-वेँद॑ ॥
ए॒षा वै स॑र्व वि॒द्या । ए॒त-द्भे॑ष॒जम् ।
ए॒षा प॒ङ्क्ति-स्स्व॒र्गस्य॑ लो॒कस्या᳚-ञ्ज॒साय॑नि-स्स्रु॒तिः ॥ 23 ॥
ए॒तान्. यो-ऽद्ध्यै-त्यछ॑दिर्द॒र्॒शे याव॑त्त॒रस᳚म् । स्व॑रेति । अ॒न॒प॒ब्र॒व-स्सर्व॒मायु॑रेति । वि॒न्दते᳚ प्र॒जाम् । रा॒यस्पोष॑-ङ्गौप॒त्यम् ।
ब्र॒ह्म॒व॒र्च॒सी भ॑वति ॥ ए॒तान्. यो-ऽद्ध्यैति॑ । स्पृ॒णोत्या॒त्मान᳚म् । प्र॒जा-म्पि॒तॄन् ॥
ए॒तान्. वा अ॑रु॒ण औ॑पवे॒शि र्वि॒दाञ्च॑कार ॥ 24 ॥
ए॒तैर॑धिवा॒दमपा॑जयत् । अथो॒ विश्व॑-म्पा॒प्मान᳚म् । स्व॑र्ययौ । ए॒तान्. यो-ऽद्ध्यैति॑ । अ॒धि॒वा॒द-ञ्ज॑यति । अथो॒ विश्व॑-म्पा॒प्मान᳚म् । स्व॑रेति ॥ ए॒तैर॒ग्नि-ञ्चि॑न्वीत स्व॒र्गका॑मः ।
ए॒तैरायु॑ष्कामः । प्र॒जा प॒शुका॑मो वा ॥ 25 ॥
पु॒रस्ता॒-द्दश॑होतार॒-मुद॑ञ्च॒-मुप॑दधाति यावत्प॒दम् । हृद॑यं॒-यँजु॑षी॒ पत्न्यौ॑ च । द॒क्षि॒ण॒तः प्राञ्च॒-ञ्चतु॑र्होतारम् ।
प॒श्चादुद॑ञ्च॒-म्पञ्च॑ होतारम् । उ॒त्त॒र॒तः प्राञ्च॒ग्ं॒ षड्ढो॑तारम् ।
उ॒परि॑ष्टा॒-त्प्राञ्चग्ं॑ स॒प्तहो॑तारम् । हृद॑यं॒-यँजूग्ं॑षि॒ पत्न्य॑श्च ।
य॒था॒व॒का॒श-ङ्ग्रहान्॑ । य॒था॒व॒का॒श-म्प्र॑तिग्र॒हान् ँलो॑क-म्पृ॒णाश्च॑ ।
सर्वा॑ हास्यै॒ता दे॒वताः᳚ प्री॒ता अ॒भीष्टा॑ भवन्ति ॥ 26 ॥
सदे॑वम॒ग्नि-ञ्चि॑नुते ॥
र॒थस॑मिन्त-श्चेत॒व्यः॑ । वज्रो॒ वै रथः॑ ।
वज्रे॑णै॒व पा॒प्मान॒-म्भ्रातृ॑व्यग्ग् स्तृणुते । प॒क्ष-स्स॑मिन्त-श्चेत॒व्यः॑ ।
ए॒तावा॒न्॒. वै रथः॑ । याव॑त्प॒क्षः । र॒थस॑मिन्तमे॒व चि॑नुते ॥
इ॒ममे॒व लो॒क-म्प॑शुब॒न्धेना॒भिज॑यति ।
अथो॑ अग्निष्टो॒मेन॑ ॥ 27 ॥
अ॒न्तरि॑क्ष-मु॒क्थ्ये॑न । स्व॑रतिरा॒त्रेण॑ । सर्वा᳚न् ँलो॒कान॑ही॒नेन॑ । अथो॑ स॒त्रेण॑ ॥ वरो॒ दक्षि॑णा । वरे॑णै॒व वरग्ग्॑ स्पृणोति ।
आ॒त्मा हि वरः॑ ॥ एक॑विग्ंशति॒ र्दक्षि॑णा ददाति ।
ए॒क॒वि॒ग्ं॒शो वा इ॒त-स्स्व॒र्गो लो॒कः । प्रस्व॒र्गं-लोँ॒कमा᳚प्नोति ॥ 28 ॥
अ॒सावा॑दि॒त्य ए॑कवि॒ग्ं॒शः । अ॒मुमे॒वा-दि॒त्यमा᳚प्नोति ॥ श॒त-न्द॑दाति । श॒तायुः॒ पुरु॑ष-श्श॒तेन्द्रि॑यः । आयु॑ष्ये॒वेन्द्रि॒ये प्रति॑तिष्ठति ॥ स॒हस्र॑-न्ददाति ।
स॒हस्र॑ सम्मित-स्स्व॒र्गो लो॒कः ।
स्व॒र्गस्य॑ लो॒कस्या॒-भिजि॑त्यै ॥ अ॒न्वि॒ष्ट॒क-न्दक्षि॑णा ददाति । सर्वा॑णि॒ वयाग्ं॑सि ॥ 29 ॥
सर्व॒स्याप्त्यै᳚ । सर्व॒स्या-व॑रुद्ध्यै ॥ यदि॒ न वि॒न्देत॑ । म॒न्थाने॑ताव॒तो द॑द्यादोद॒नान्. वा᳚ । अ॒श्नु॒ते त-ङ्काम᳚म् । यस्मै॒ कामा॑या॒-ग्निश्ची॒यते᳚ ॥ प॒ष्ठौ॒ही-न्त्व॒न्तर्व॑ती-न्दद्यात् ।
सा हि सर्वा॑णि॒ वयाग्ं॑सि । सर्व॒स्याप्त्यै᳚ । सर्व॒स्या-व॑रुद्ध्यै ॥ 30 ॥
हिर॑ण्य-न्ददाति । हिर॑ण्य-ज्योतिरे॒व स्व॒र्गं-लोँ॒कमे॑ति ॥ वासो॑ ददाति । तेनायुः॒ प्रति॑रते ॥ वे॒दि॒तृ॒ती॒ये य॑जेत । त्रिष॑त्या॒ हि दे॒वाः ।
स स॑त्यम॒ग्नि-ञ्चि॑नुते ॥ तदे॒त-त्प॑शुब॒न्धे ब्राह्म॑ण-म्ब्रूयात् । नेत॑रेषु य॒ज्ञेषु॑ ॥
यो ह॒ वै चतु॑र्होतॄ-ननुसव॒न-न्त॑र्पयित॒व्यान्॑. वेद॑ ॥ 31 ॥
तृप्य॑ति प्र॒जया॑ प॒शुभिः॑ ।
उपै॑नग्ं सोमपी॒थो न॑मति ।
ए॒ते वै चतु॑र्होतारो ऽनुसव॒न-न्त॑र्पयित॒व्याः᳚ । ये ब्रा᳚ह्म॒णा ब॑हु॒विदः॑ ।
तेभ्यो॒ यद्दक्षि॑णा॒ न नये᳚त् । दुरि॑ष्टग्ग् स्यात् । अ॒ग्निम॑स्य वृञ्जीरन्न् ।
तेभ्यो॑ यथा श्र॒द्ध-न्द॑द्यात् । स्वि॑ष्टमे॒वैतत्क्रि॑यते ।
नास्या॒ग्निं-वृँ॑ञ्जते ॥ 32 ॥
हि॒र॒ण्ये॒ष्ट॒को भ॑वति । याव॑दुत्त॒म-म॑ङ्गुलि-का॒ण्डं-यँ॑ज्ञ प॒रुषा॒ सम्मि॑तम् ।
तेजो॒ हिर॑ण्यम् ॥ यदि॒ हिर॑ण्य॒-न्न वि॒न्देत् । शर्क॑रा अ॒क्ता उप॑दद्ध्यात् । तेजो॑ घृ॒तम् । सते॑जसमे॒-वाग्नि-ञ्चि॑नुते ॥ अ॒ग्निञ्चि॒त्वा सौ᳚त्राम॒ण्या य॑जेत मैत्रावरु॒ण्या वा᳚ ।
वी॒र्ये॑ण॒ वा ए॒ष व्यृ॑द्ध्यते ।
यो᳚-ऽग्निञ्चि॑नु॒ते ॥ 33 ॥
याव॑दे॒व वी॒र्य᳚म् । तद॑स्मि-न्दधाति ॥
ब्रह्म॑ण॒-स्सायु॑ज्यग्ं सलो॒कता॑-माप्नोति ।
ए॒तासा॑मे॒व दे॒वता॑ना॒ग्ं॒ सायु॑ज्यम् ।
सा॒र्ष्टिताग्ं॑ समान लो॒कता॑-माप्नोति । य ए॒तम॒ग्नि-ञ्चि॑नु॒ते । य उ॑चैनमे॒वं-वेँद॑ ॥ ए॒तदे॒व सा॑वि॒त्रे ब्राह्म॑णम् ।
अथो॑ नाचिके॒ते ॥ 34 ॥
(होता॒ चतु॑र्होतॄणाग् - स्रु॒ति - श्च॑कार - वा - भवन्त्य - ग्निष्टो॒मेना᳚ - प्नोति॒ - वयाग्ं॑सि॒ - वयाग्ं॑सि॒ - सर्व॒स्याप्त्यै॒ सर्व॒स्याव॑रुद्ध्यै॒ - वेद॑ - वृञ्जते - चिनु॒ते - +नव॑ च) (अ. 5)
अनुवाकं 6 - वैश्वसृजचयनम्
यच्चा॒मृतं॒-यँच्च मर्त्य᳚म् । यच्च॒ प्राणि॑ति॒ यच्च॒ न । सर्वा॒स्ता इष्ट॑काः कृ॒त्वा ।
उप॑ काम॒दुघा॑ दधे । तेनर्षि॑णा॒ तेन॒ ब्रह्म॑णा । तया॑ दे॒वत॑या-ऽङ्गिर॒स्व-द्ध्रु॒वा सी॑द ॥ सर्वा॒-स्स्त्रिय॒-स्सर्वा᳚-न्पु॒ग्ं॒सः । सर्व॒-न्न स्त्री॑-पुमञ्च॒ यत् ।
सर्वा॒स्ताः ॥ याव॑न्तः पा॒ग्ं॒सवो॒ भूमेः᳚ ॥ 35 ॥
सङ्ख्या॑ता देवमा॒यया᳚ । सर्वा॒स्ताः ॥ याव॑न्त॒ ऊषाः᳚ पशू॒नाम् । पृ॒थि॒व्या-म्पुष्टि॑ र्हि॒ताः । सर्वा॒स्ताः ॥ याव॑ती॒-स्सिक॑ता॒-स्सर्वाः᳚ ।
अ॒फ्स्व॑न्तश्च॒ या-श्श्रि॒ताः । सर्वा॒स्ताः ॥ याव॑ती॒-श्शर्क॑रा॒ धृत्यै᳚ । अ॒स्या-म्पृ॑थि॒व्यामधि॑ ॥ 36 ॥
सर्वा॒स्ताः ॥ याव॒न्तो-ऽश्मा॑नो॒-ऽस्या-म्पृ॑थि॒व्याम् । प्र॒ति॒ष्ठासु॒ प्रति॑ष्ठिताः । सर्वा॒स्ताः ॥ याव॑ती र्वी॒रुध॒-स्सर्वाः᳚ ।
विष्ठि॑ताः पृथि॒वीमनु॑ । सर्वा॒स्ताः ॥ याव॑ती॒रोष॑धी॒-स्सर्वाः᳚ ।
विष्ठि॑ताः पृथि॒वीमनु॑ । सर्वा॒स्ताः ॥ 37 ॥
याव॑न्तो॒ वन॒स्पत॑यः । अ॒स्या-म्पृ॑थि॒व्यामधि॑ । सर्वा॒स्ताः ॥
याव॑न्तो ग्रा॒म्याः प॒शव॒-स्सर्वे᳚ । आ॒र॒ण्याश्च॒ ये । सर्वा॒स्ताः ॥ ये द्वि॒पाद॒-श्चतु॑ष्पादः । अ॒पाद॑ उदरस॒र्पिणः॑ ।
सर्वा॒स्ताः ॥ याव॒दाञ्ज॑-नमु॒च्यते᳚ ॥ 38 ॥
दे॒व॒त्रा यच्च॑ मानु॒षम् । सर्वा॒स्ताः ॥ याव॑त्कृ॒ष्णाय॑स॒ग्ं॒ सर्व᳚म् ।
दे॒व॒त्रा यच्च॑ मानु॒षम् । सर्वा॒स्ताः ॥
याव॑ ल्लो॒हाय॑स॒ग्ं॒ सर्व᳚म् ।
दे॒व॒त्रा यच्च॑ मानु॒षम् । सर्वा॒स्ताः ॥ सर्व॒ग्ं॒ सीस॒ग्ं॒ सर्व॒-न्त्रपु॑ ।
दे॒व॒त्रा यच्च॑ मानु॒षम् ॥ 39 ॥
सर्वा॒स्ताः ॥ सर्व॒ग्ं॒ हिर॑ण्यग्ं रज॒तम् । दे॒व॒त्रा यच्च॑ मानु॒षम् ।
सर्वा॒स्ताः ॥ सर्व॒ग्ं॒ सुव॑र्ण॒ग्ं॒ हरि॑तम् । दे॒व॒त्रा यच्च॑ मानु॒षम् ।
सर्वा॒स्ता इष्ट॑काः कृ॒त्वा । उप॑काम॒दुघा॑ दधे । तेनर्षि॑णा॒ तेन॒ ब्रह्म॑णा ।
तया॑ दे॒वत॑या-ऽङ्गिर॒स्व-द्ध्रु॒वा सी॑द ॥ 40 ॥
[भूमे॒ - रधि॒ - विष्ठि॑ताः पृथि॒वीमनु॒ सर्वा॒स्ता - उ॒च्यत॑ - मानु॒षग्ं - सी॑द ] (अ. 6)
(यच्च॒ स्त्रियः॑ पा॒ग्ं॒सव॒ ऊषा॒-स्सिक॑ता॒-श्शर्क॑रा॒ अश्मा॑नो वी॒रुध॒ ओष॑धी॒-र्वन॒स्पत॑यो ग्रा॒म्या ये द्वि॒पादो॒ याव॒दाञ्ज॑नं॒-याँव॑-त्कृ॒ष्णाय॑सं
ँलो॒हाय॑स॒ग्ं॒ सीस॒ग्ं॒ हिर॑ण्य॒ग्ं॒ सुव॑र्ण॒ग्ं॒ हरि॑तम॒ष्टाद॑श)
अनुवाकं 7 - वैश्वसृजचयनम्
सर्वा॒ दिशो॑ दि॒क्षु । यच्चा॒न्त र्भू॒त-म्प्रति॑ष्ठितम् । सर्वा॒स्ता इष्ट॑काः कृ॒त्वा ।
उप॑ काम॒दुघा॑ दधे ।
तेनर्षि॑णा॒ तेन॒ ब्रह्म॑णा ।
तया॑ दे॒वत॑या-ऽङ्गिर॒स्व-द्ध्रु॒वा सी॑द ॥
अ॒न्तरि॑क्षञ्च॒ केव॑लम् ।
यच्चा॒स्मि-न्न॑न्त॒राहि॑तम् ।
सर्वा॒स्ताः ॥ आ॒न्त॒रि॒क्ष्य॑श्च॒ याः प्र॒जाः ॥ 41 ॥
ग॒न्ध॒र्वा॒-फ्स॒रस॑श्च॒ ये । सर्वा॒स्ताः ॥ सर्वा॑-नुदा॒रान्-थ्स॒लिलान्॑ ।
अ॒न्तरि॑क्षे॒ प्रति॑ष्ठितान् । सर्वा॒स्ताः ॥
सर्वा॑-नुदा॒रान्-थ्स॑लि॒लान् ।
स्था॒व॒राः प्रो॒ष्या᳚श्च॒ ये । सर्वा॒स्ताः ॥ सर्वा॒-न्धुनि॒ग्ं॒ सर्वा᳚न्-ध्व॒ग्ं॒सान् ।
हि॒मो यच्च॑ शी॒यते᳚ ॥ 42 ॥
सर्वा॒स्ताः ॥ सर्वा॒-न्मरी॑ची॒न्॒. वित॑तान् । नी॒हा॒रो यच्च॑ शी॒यते᳚ । सर्वा॒स्ताः ॥ सर्वा॑ वि॒द्युत॒-स्सर्वा᳚न्-थ्स्तनयि॒त्नून् । ह्रा॒दुनी॒ र्यच्च॑ शी॒यते᳚ । सर्वा॒स्ताः ॥ सर्वा॒-स्स्रव॑न्ती-स्स॒रितः॑ ।
सर्व॑मफ्सु च॒रञ्च॒ यत् । सर्वा॒स्ताः ॥ 43 ॥
याश्च॒ कूप्या॒ याश्च॑ ना॒द्या᳚-स्समु॒द्रियाः᳚ । याश्च॑ वैश॒न्तीरु॒त प्रा॑स॒चीर्याः ।
सर्वा॒स्ताः ॥ ये चो॒त्तिष्ठ॑न्ति जी॒मूताः᳚ ।
याश्च॒ वर्ष॑न्ति वृ॒ष्टयः॑ । सर्वा॒स्ताः ॥ तप॒स्तेज॑ आका॒शम् । यच्चा॑का॒शे प्रति॑ष्ठितम् ।
सर्वा॒स्ताः ॥ वा॒युं-वँयाग्ं॑सि॒ सर्वा॑णि ॥ 44 ॥
अ॒न्त॒रि॒क्ष॒च॒रञ्च॒ यत् । सर्वा॒स्ताः ॥ अ॒ग्निग्ं सूर्य॑-ञ्च॒न्द्रम् । मि॒त्रं-वँरु॑ण॒-म्भग᳚म् । सर्वा॒स्ताः ॥ स॒त्यग्ग् श्र॒द्धा-न्तपो॒ दम᳚म् ।
नाम॑ रू॒पञ्च॑ भू॒ताना᳚म् । सर्वा॒स्ता इष्ट॑काः कृ॒त्वा । उप॑ काम॒दुघा॑ दधे । तेनर्षि॑णा॒ तेन॒ ब्रह्म॑णा ।
तया॑ दे॒वत॑या-ऽङ्गिर॒स्व-द्ध्रु॒वा सी॑द ॥ 45 ॥
(प्र॒जा-हि॒मो यच्च॑ शी॒यते॒-सर्वा॒स्ताः-सर्वा॑णि॒-ब्रह्म॒णैक॑-ञ्च) (अ. 7)
(दिशो॒-ऽन्तरि॑क्षमान्तरि॒क्ष्य॑ उदा॒रानु॑दा॒रा-न्धुनि॒-म्मरी॑चीन्. वि॒द्युतः॒
स्रव॑न्ती॒र्याश्च॒ ये च॒ तपो॑ वा॒युम॒ग्निग्ं स॒त्य-म्पञ्च॑दश)
अनुवाकं 8 - वैश्वसृजचयनम्
सर्वा॒-न्दिव॒ग्ं॒ सर्वा᳚-न्दे॒वा-न्दि॒वि ।
यच्चा॒न्त र्भू॒त-म्प्रति॑ष्ठितम् ।
सर्वा॒स्ता इष्ट॑काः कृ॒त्वा । उप॑ काम॒दुघा॑ दधे । तेनर्षि॑णा॒ तेन॒ ब्रह्म॑णा ।
तया॑ दे॒वत॑या-ऽङ्गिर॒स्वद-ध्रु॒वा सी॑द ॥ याव॑ती॒ स्तार॑का॒-स्सर्वाः᳚ ।
वित॑ता रोच॒ने दि॒वि । सर्वा॒स्ताः ॥ ऋचो॒ यजूग्ं॑षि॒ सामा॑नि ॥ 46 ॥
अ॒थ॒र्वा॒ङ्गि॒रस॑श्च॒ ये । सर्वा॒स्ताः ॥ इ॒ति॒हा॒स॒पु॒रा॒णञ्च॑ ।
स॒र्प॒दे॒व॒ज॒नाश्च॒ ये । सर्वा॒स्ताः ॥
ये च॑ लो॒का ये चा॑लो॒काः ।
अ॒न्त र्भू॒त-म्प्रति॑ष्ठितम् । सर्वा॒स्ताः ॥
यच्च॒ ब्रह्म॒ यच्चा᳚ब्र॒ह्म ।
अ॒न्त र्ब्र॒ह्म-न्प्रति॑ष्ठितम् ॥ 47 ॥
सर्वा॒स्ताः ॥ अ॒हो॒रा॒त्राणि॒ सर्वा॑णि । अ॒द्र्ध॒मा॒साग्श्च॒ केव॑लान् ।
सर्वा॒स्ताः ॥ सर्वा॑नृ॒तून्-थ्सर्वा᳚-न्मा॒सान् । सं॒वँ॒थ्स॒रञ्च॒ केव॑लम् ।
सर्वा॒स्ताः ॥ सर्व॒-म्भूत॒ग्ं॒ सर्व॒-म्भव्य᳚म् । यच्चा॒तो-ऽधि॑ भवि॒ष्यति॑ ।
सर्वा॒स्ता इष्ट॑काः कृ॒त्वा ।
उप॑ काम॒दुघा॑ दधे ।
तेनर्षि॑णा॒ तेन॒ ब्रह्म॑णा ।
तया॑ दे॒वत॑या-ऽङ्गिर॒स्व-द्ध्रु॒वा सी॑द ॥ 48 ॥
(सामा॑नि - ब्र॒ह्म-न्प्रति॑ष्ठितं - कृ॒त्वा त्रीणि॑ च) (अ. 8)
(दिव॒-न्तार॑का॒ ऋच॑ इतिहासपुरा॒ण-ञ्च॒ ये च॒ यच्चा॑होरा॒त्राण्यृ॒तू-न्भूत॒-न्नव॑)
अनुवाकं 9 - ब्रह्मा सदस्यासीनो वौश्वसृजान् व्याचष्टे
ऋ॒चा-म्प्राची॑ मह॒ती दिगु॑च्यते ।
दक्षि॑णा-माहु॒ र्यजु॑षामपा॒राम् ।
अथ॑र्वणा॒-मग्ंइ॑रसा-म्प्र॒तीची᳚ ।
साम्ना॒-मुदी॑ची मह॒ती दिगु॑च्यते ॥
ऋ॒ग्भिः पू᳚र्वा॒ह्णे दि॒वि दे॒व ई॑यते ।
य॒जु॒र्वे॒दे ति॑ष्ठति॒ मद्ध्ये॒ अह्नः॑ ।
सा॒म॒वे॒दे-ना᳚स्तम॒ये मही॑यते ।
वेदै॒-रशू᳚न्य-स्त्रि॒भिरे॑ति॒ सूर्यः॑ ॥
ऋ॒ग्भ्यो जा॒ताग्ं स॑र्व॒शो मूर्ति॑-माहुः ।
सर्वा॒ गति॑ र्याजु॒षी है॒व शश्व॑त् ॥ 49 ॥
सर्व॒-न्तेज॑ स्सामरू॒प्यग्ं ह॑ शश्वत् । सर्वग्ं॑ हे॒द-म्ब्रह्म॑णा है॒व सृ॒ष्टम् ॥
ऋ॒ग्भ्यो जा॒तं-वैँश्यं॒-वँर्ण॑-माहुः । य॒जु॒र्वे॒द-ङ्क्ष॑त्रि॒यस्या॑-हु॒र्योनि᳚म् ।
सा॒म॒वे॒दो ब्रा᳚ह्म॒णाना॒-म्प्रसू॑तिः ।
पूर्वे॒ पूर्वे᳚भ्यो॒ वच॑ ए॒त-दू॑चुः ॥
आ॒द॒र्॒श-म॒ग्नि-ञ्चि॑न्वा॒नाः ।
पूर्वे॑ विश्व॒ सृजो॒-ऽमृताः᳚ ।
श॒तं-वँ॑र्ष सह॒स्राणि॑ । दी॒क्षि॒ता-स्स॒त्र-मा॑सत ॥ 50 ॥
तप॑ आसी-द्गृ॒हप॑तिः । ब्रह्म॑ ब्र॒ह्माभ॑व-थ्स्व॒यम् । स॒त्यग्ं ह॒ हो तै॑षा॒मासी᳚त् ।
य-द्वि॑श्व॒सृज॒ आस॑त ॥
अ॒मृत॑-मेभ्य॒ उद॑गायत् ।
स॒हस्र॑-म्परिवथ्स॒रान् ।
भू॒तग्ं ह॑ प्रस्तो॒ तैषा॒मासी᳚त् ।
भ॒वि॒ष्य-त्प्रति॑ चाहरत् ॥
प्रा॒णो अ॑द्ध्व॒र्यु-र॑भवत् ।
इ॒दग्ं सर्व॒ग्ं॒ सिषा॑सताम् ॥ 51 ॥
अ॒पा॒नो वि॒द्वा-ना॒वृतः॑ । प्रति॒ प्राति॑ष्ठ-दद्ध्व॒रे ॥ आ॒र्त॒वा उ॑पगा॒तारः॑ । स॒द॒स्या॑ ऋ॒तवो॑-ऽभवन्न् । अ॒र्ध॒मा॒साश्च॒ मासा᳚श्च । च॒म॒सा॒-द्ध्व॒र्य॒वो-ऽभ॑वन्न् ॥
अशग्ं॑ स॒-द्ब्रह्म॑ण॒-स्तेजः॑ ।
अ॒च्छा॒वा॒को ऽभ॑व॒-द्यशः॑ ।
ऋ॒त-मे॑षा-म्प्रशा॒स्ता-ऽऽसी᳚त् ।
य-द्वि॑श्व॒ सृज॒ आस॑त ॥ 52 ॥
ऊर्ग्-राजा॑न॒-मुद॑वहत् । ध्रु॒व॒ गो॒प-स्सहो॑-ऽभवत् । ओजो॒-ऽभ्य॑ष्टौ॒-द्ग्राव्.ण्णः॑ ।
य-द्वि॑श्व॒ सृज॒ आस॑त ॥
अप॑चितिः पो॒त्रीया॑-मयजत् । ने॒ष्ट्रीया॑-मयज॒-त्त्विषिः॑ । आग्नी᳚द्ध्रा-द्वि॒दुषी॑ स॒त्यम् । श्र॒द्धा है॒वा य॑ज-थ्स्व॒यम् ॥ इरा॒ पत्नी॑ विश्व॒ सृजा᳚म् । आकू॑ति-रपिनड्ढ॒विः ॥ 53 ॥
इ॒द्ध्मग्ं ह॒ क्षुच् चै᳚भ्य उ॒ग्रे । तृ॒ष्णा चा व॑हतामु॒भे ॥ वागे॑षाग्ं सुब्रह्म॒ण्या-ऽऽसी᳚त् । छ॒न्दो॒ यो॒गान्. वि॑जान॒ती ।
क॒ल्प॒त॒न्त्राणि॑ तन्वा॒ना-ऽहः॑ । स॒ग्ग्॒स्थाश्च॑ सर्व॒शः ॥ अ॒हो॒रा॒त्रे प॑शुपा॒ल्यौ । मु॒हू॒र्ताः प्रे॒ष्या॑ अभवन्न् । मृ॒त्युस् तद॑-भव-द्धा॒ता । श॒मि॒तो ग्रो वि॒शा-म्पतिः॑ ॥ 54 ॥
वि॒श्व॒सृजः॑ प्रथ॒मा-स्स॒त्र-मा॑सत । स॒हस्र॑ सम॒-म्प्रसु॑तेन॒ यन्तः॑ ।
ततो॑ ह जज्ञे॒ भुव॑नस्य गो॒पाः । हि॒र॒ण्मयः॑ श॒कुनि॒ र्ब्रह्म॒ नाम॑ ॥ येन॒ सूर्य॒-स्तप॑ति॒ तेज॑से॒-द्धः । पि॒ता पु॒त्रेण॑ पितृ॒मान्. योनि॑योनौ । नावे॑दवि-न्मनुते॒ त-म्बृ॒हन्त᳚म् । स॒र्वा॒नु॒भु-मा॒त्मानग्ं॑ सम्परा॒ये ॥
ए॒ष नि॒त्यो म॑हि॒मा ब्रा᳚ह्म॒णस्य॑ ।
न कर्म॑णा वर्धते॒ नो कनी॑यान् ॥ 55 ॥
तस्यै॒वात्मा प॑द॒वित्तं-विँ॑दित्वा ।
न कर्म॑णा लिप्यते॒ पाप॑केन ॥
पञ्च॑पञ्चा॒शत॑-स्त्रि॒वृतः॑ संवँथ्स॒राः ।
पञ्च॑पञ्चा॒शतः॑ पञ्चद॒शाः । पञ्च॑पञ्चा॒शतः॑ सप्तद॒शाः ।
पञ्च॑पञ्चा॒शत॑ एकवि॒ग्ं॒शाः ।
वि॒श्व॒सृजाग्ं॑ स॒हस्र॑ संवँथ्सरम् ॥
ए॒तेन॒ वै वि॑श्व॒सृज॑ इ॒दं-विँश्व॑-मसृजन्त । य-द्विश्व॒-मसृ॑जन्त । तस्मा᳚-द्विश्व॒सृजः॑ ॥
विश्व॑-मेना॒-ननु॒ प्रजा॑यते । ब्रह्म॑ण॒-स्सायु॑ज्यग्ं सलो॒कतां᳚-यँन्ति ।
ए॒तासा॑मे॒व दे॒वता॑ना॒ग्ं॒ सायु॑ज्यम् । सा॒र्ष्टिताग्ं॑ समान लो॒कतां᳚-यँन्ति ।
य ए॒त-दु॑प॒यन्ति॑ । ये चै॑न॒-त्प्राहुः॑ ।
येभ्य॑-श्चैन॒-त्प्राहुः॑ ॥
ओम् ॥ 56 ॥
(शश्व॑ - दासत॒ - सिषा॑सता॒ - मास॑त - ह॒विष् - पतिः॒ - कनी॑या॒न् - तस्मा᳚-द्विश्व॒सृजो॒-ऽष्टौ च॑) (अ. 9)
(तुभ्यं॑ - दे॒वेभ्य॒ - स्तप॑सा - दे॒वेभ्यो॒ - ब्रह्म॒ वै चतु॑र्होतारो॒ - यच्चा॒मृत॒ग्ं॒ - सर्वा॒ दिशो॑ दि॒क्षु - सर्वा॒-न्दिव॑ - मृ॒चा-म्प्राची॒ नव॑)
(तुभ्यं॒ - तप॑सा॒ - ता वा ए॒ताः पञ्च॒ - हिर॑ण्य-न्ददाति॒ - सर्वा॒ दिश॒ - स्तप॑ आसीद्गृ॒हप॑ति॒-ष्षट्प॑ञ्चा॒शत्)
(तुभ्य॒-मों)
॥ हरिः॑ ओम् ॥
॥ तैत्तिरीय यजुर्ब्राह्मणे काठके तृतीय प्रश्न-स्समाप्तः ॥
॥ इति तैत्तिरीय यजुर्ब्राह्मणे काठकं समाप्तम् ॥
kṛṣṇa yajurvedīya taittirīya brāhmaṇe kāṭhake tṛtīyaḥ praśnaḥ - vaiśvasṛjacayanam
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
cāturhotracayanaṃ-vai~śvasṛjacayana-ñca
anuvākaṃ 1 - vaiśvasṛjacayanāṅgabhūtāḥ divaśśyenaya iṣṭayaḥ
tubhya॒-ntā a̭ṅgirastama॒ viśvā᳚-ssukṣi॒tayaḥ॒ pṛtha̭k | agne॒ kāmā̭ya yemire || a॒śyāma॒ ta-ṅkāma̭magne॒ tavo॒ tya̭śyāma̭ ra॒yigṃ ra̭yiva-ssu॒vīra᳚m | a॒śyāma॒ vāja̭ma॒bhi vā॒jaya̭nto॒ 'śyāma̭ dyu॒mnama̭jarā॒jara̭-nte || |
āśā̭nā-ntvā ''śāpā॒lebhyaḥ̭ | ca॒turbhyo̭ a॒mṛte᳚bhyaḥ | i॒da-mbhū॒tasyādhya̭kṣebhyaḥ | vi॒dhema̭ ha॒viṣā̭ va॒yam || viśvā॒ āśā॒ madhṷnā॒ sagṃsṛ̭jāmi | a॒na॒mī॒vā āpa॒ oṣa̭dhayo bhavantu | a॒yaṃ-ya~ja̭māno॒ mṛdho॒ vya̭syatāṃ agṛ̭bhītāḥ pa॒śavaḥ̭ santu॒ sarve᳚ || |
anṷ no॒-'dyā-'nṷmatirya॒jña-nde॒veṣṷ manyatām | a॒gniśca̭ havya॒vāha̭no॒ bhava̭tā-ndā॒śuṣe॒ mayaḥ̭ || anvida̭numate॒ tva-mmanyā̭sai॒ śañca̭naḥ kṛdhi | kratve॒ dakṣā̭ya no hinu॒ praṇa॒ āyūgṃ̭ṣi tāriṣaḥ || |
kāmo̭ bhū॒tasya॒ bhavya̭sya | sa॒mrāḍeko॒ virā̭jati | sa i॒da-mprati̭ paprathe | ṛ॒tūnu-thsṛ̭jate va॒śī || kāma॒stadagre॒ sama̭varta॒tādhi̭ | mana̭so॒ retaḥ̭ pratha॒maṃ-ya~dāsī᳚t | sa॒to bandhu॒masa̭ti॒ nira̭vindann | hṛ॒di pra॒tīṣyā̭ ka॒vayo̭ manī॒ṣā || |
brahma̭ jajñā॒na-mpra̭tha॒ma-mpu॒rastā॒dvi sī̭ma॒ta-ssu॒ruco̭ ve॒na ā̭vaḥ | sa bu॒dhniyā̭ upa॒mā a̭sya vi॒ṣṭhā-ssa॒taśca॒ yoni॒masa̭taśca॒ vivaḥ̭ || pi॒tā vi॒rājā̭mṛṣa॒bho ra̭yī॒ṇām | a॒ntari̭kṣaṃ-vi~॒śvarṷ̄pa॒ āvi̭veśa | tama॒rkai-ra॒bhya̭rcanti va॒thsam | brahma॒ santa॒-mbrahma̭ṇā va॒rdhaya̭ntaḥ || |
ya॒jño rā॒yo ya॒jña ī̭śe॒ vasṷ̄nām | ya॒jña-ssa॒syānā̭mu॒ta sṷkṣitī॒nām | ya॒jña i॒ṣṭaḥ pū॒rvaci̭tti-ndadhātu | ya॒jño bra̭hma॒ṇvāgṃ apyḙtu de॒vān || a॒yaṃ-ya~॒jño va̭rdhatā॒-ṅgobhi॒raśvaiḥ᳚ | i॒yaṃ-ve~diḥ̭ svapa॒tyā su॒vīrā᳚ | i॒da-mba॒r॒hirati̭ ba॒r॒hīgṣya॒nyā | i॒maṃ-ya~॒jñaṃ-vi~śvḙ avantu de॒vāḥ || | āpo̭ bha॒drā ghṛ॒tamidāpa̭ āsura॒gnī-ṣomaṷ bibhra॒tyāpa॒ i-ttāḥ | tī॒vro raso̭ madhu॒pṛcā̭ maraṅga॒ma ā mā᳚ prā॒ṇena̭ sa॒ha varca̭sā gann || ādi-tpa̭śyāmyu॒ta vā̭ śṛṇo॒myā mā॒ ghoṣo̭ gacchati॒ vānna̭ āsām | manyḙ bhejā॒no a॒mṛta̭sya॒ tarhi॒ hira̭ṇyavarṇā॒ atṛ̭paṃ-ya~॒dā vaḥ̭ || |
tubhya̭-mbharanti kṣi॒tayo̭ yaviṣṭha | ba॒lima̭gne॒ anti̭ ta॒ ota dū॒rāt | ā bhandi̭ṣṭhasya suma॒ti-ñci̭kiddhi | bṛ॒hattḙ agne॒ mahi॒ śarma̭ bha॒dram || yo de॒hyo ana̭mayadvadha॒snaiḥ | yo arya̭patnī-ru॒ṣasa̭śca॒kāra̭ | sa ni॒rudhyā॒ nahṷṣo ya॒hvo a॒gniḥ | viśa̭ścakre bali॒hṛta॒-ssaho̭bhiḥ || |
pūrva̭-ndevā॒ apa̭reṇā-nu॒paśya॒ñjanma̭bhiḥ | janmā॒nyava̭raiḥ॒ parā̭ṇi | vedā̭ni devā a॒yama॒smīti॒ mām | a॒hagṃ hi॒tvā śarī̭ra-ñja॒rasaḥ̭ pa॒rastā᳚t || prā॒ṇā॒pā॒nau cakṣu॒-śśrotra᳚m | vāca॒-mmana̭si॒ sambhṛ̭tām | hi॒tvā śarī̭ra-ñja॒rasaḥ̭ pa॒rastā᳚t | ā bhūti॒-mbhūtiṃ̭-va~॒yama̭śnavāmahai || |
ha॒vya॒vāha̭-mabhimāti॒ṣā-'ha᳚m | ra॒kṣo॒haṇa॒-mpṛta̭nāsu ji॒ṣṇum | jyoti̭ṣmanta॒-ndīdya̭ta॒-mpura̭ndhim | a॒gnigg svi̭ṣṭa॒kṛta॒mā hṷvema || svi̭ṣṭamagne a॒bhi ta-tpṛ̭ṇāhi | viśvā̭ deva॒ pṛta̭nā a॒bhiṣya | u॒ru-nnaḥ॒ panthā᳚-mpradi॒śanvi bhā̭hi | jyoti̭ṣmaddhehya॒jara̭-nna॒ āyuḥ̭ || || 1 ||
tubhya॒-ndaśa̭ (a. 1)
anuvākaṃ 2 - tāsā-mbrāhmaṇam
de॒vebhyo॒ vai sva॒rgo lo॒kasti॒ro̭-'bhavat |
te pra॒jāpa̭ti-mabruvann |
prajā̭pate sva॒rgo vai no̭ lo॒kasti॒ro̭-'bhūt | tamanvi॒ccheti̭ | taṃ-ya~̭jñakra॒tubhi॒-ranvai᳚cchat | taṃ-ya~̭jñakra॒tubhi॒-rnānva̭vindat |
tamiṣṭi̭bhi॒-ranvai᳚cchat | tamiṣṭi̭bhi॒-ranva̭vindat |
tadiṣṭī̭nā-miṣṭi॒tvam | eṣṭa̭yo ha॒vai nāma̭ |
tā iṣṭa̭ya॒ ityāca̭kṣate pa॒rokṣḙṇa | pa॒rokṣa̭ priyā iva॒ hi de॒vāḥ || 2 ||
tamāśā᳚-'bravīt | prajā̭pata ā॒śayā॒ vai śrā᳚myasi |
a॒hamu॒ vā āśā᳚-'smi | mā-nnu ya̭jasva |
atha̭ te sa॒tyā-''śā̭ bhaviṣyati | anṷ sva॒rgaṃ-lo~॒kaṃ-ve~॒thsyasīti̭ | sa e॒tama॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnira̭vapat |
ā॒śāyai̭ ca॒rum | anṷmatyai ca॒rum | tato॒ vai tasya̭ sa॒tyā-''śā̭ 'bhavat | anṷ sva॒rgaṃ-lo~॒ka-ma̭vindat | sa॒tyā ha॒ vā a॒syāśā̭ bhavati |
anṷ sva॒rgaṃ-lo~॒kaṃ-vi~̭ndati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ || so-'tra̭ juhoti | a॒gnaye॒ kāmā̭ya॒ svāhā॒-''śāyai॒ svāhā᳚ | anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 3 ||
ta-ṅkāmo᳚-'bravīt | prajā̭pate॒ kāmḙna॒ vai śrā᳚myasi | a॒hamu॒vai kāmo᳚-'smi | mā-nnu ya̭jasva | atha̭ te sa॒tyaḥ kāmo̭ bhaviṣyati | anṷ sva॒rgaṃ-lo~॒kaṃ-ve~॒thsyasīti̭ | sa e॒tama॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnira̭vapat | kāmā̭ya ca॒rum | anṷmatyai ca॒rum |
tato॒ vai tasya̭ sa॒tyaḥ kāmo̭-'bhavat |
anṷ sva॒rgaṃ-lo~॒kama̭vindat |
sa॒tyo ha॒ vā a̭sya॒ kāmo̭ bhavati |
anṷ sva॒rgaṃ-lo~॒kaṃ-vi~̭ndati |
ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
a॒gnaye॒ kāmā̭ya॒ svāhā॒ kāmā̭ya॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 4 ||
ta-mbrahmā᳚-'bravīt | prajā̭pate॒ brahma̭ṇā॒ vaiśrā᳚myasi | a॒hamu॒ vai brahmā᳚-'smi |
mā-nnu ya̭jasva | atha̭ te brahma॒ṇvān. ya॒jño bha̭viṣyati | anṷ sva॒rgaṃ-lo~॒kaṃ-ve~॒thsyasīti̭ | sa e॒tama॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnira̭vapat | brahma̭ṇe ca॒rum | anṷmatyai ca॒rum | tato॒ vai tasya̭ brahma॒ṇvān. ya॒jño̭-'bhavat | anṷ sva॒rgaṃ-lo~॒kama̭vindat | bra॒hma॒ṇvān. ha॒ vā a̭sya ya॒jño bha̭vati |
anṷ sva॒rgaṃ-lo~॒kaṃ-vi~̭ndati | ya e॒tena̭ ha॒viṣā॒ yaja̭te | ya ṷcainade॒vaṃ-ve~da̭ | so-'tra̭ juhoti | a॒gnaye॒ kāmā̭ya॒ svāhā॒ brahma̭ṇe॒ svāhā᳚ | anṷmatyai॒ svāhā᳚ pra॒jāpa̭taye॒ svāhā᳚ | sva॒rgāya̭ lo॒kāya॒ svāhā॒ 'gnaye᳚ sviṣṭa॒kṛte॒ svāheti̭ || 5 ||
taṃ-ya~॒jño᳚-'bravīt | prajā̭pate ya॒jñena॒ vai śrā᳚myasi | a॒hamu॒ vai ya॒jño᳚-'smi |
mā-nnu ya̭jasva | atha̭ te sa॒tyo ya॒jño bha̭vaṣyati | anṷ sva॒rgaṃ-lo~॒kaṃ-ve~॒thsyasīti̭ |
sa e॒tama॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnira̭vapat | ya॒jñāya̭ ca॒rum | anṷmatyai ca॒rum | tato॒ vai tasya̭ sa॒tyo ya॒jño̭-'bhavat | anṷ sva॒rgaṃ-lo~॒kama̭vindat | sa॒tyo ha॒ vā a̭sya ya॒jño bha̭vati |
anṷ sva॒rgaṃ-lo~॒kaṃ-vi~̭ndati |
ya e॒tena̭ ha॒viṣā॒ yaja̭te |
ya ṷcainade॒vaṃ-ve~da̭ | so-'tra̭ juhoti |
a॒gnaye॒ kāmā̭ya॒ svāhā̭ ya॒jñāya॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 6 ||
tamāpo᳚-'bruvann | prajā̭pate॒-'phsu vai sarve॒ kāmā᳚-śśri॒tāḥ | va॒yamu॒ vā āpa̭ssmaḥ | a॒smānnu ya̭jasva | atha॒ tvayi॒ sarve॒ kāmā᳚-śśrayiṣyante | anṷ sva॒rgaṃ-lo~॒kaṃ-ve~॒thsyasīti̭ |
sa e॒tama॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnira̭vapat | a॒dbhyaśca॒rum |
anṷmatyai ca॒rum | tato॒ vai tasmi॒n-thsarve॒ kāmā̭ aśrayanta | anṷ sva॒rgaṃ-lo~॒kama̭vindat | sarvḙ ha॒ vā a̭smi॒n kāmā᳚-śśrayante | anṷ sva॒rgaṃ-lo~॒kaṃ-vi~̭ndati | ya e॒tena̭ ha॒viṣā॒ yaja̭te |
ya ṷcainade॒vaṃ-ve~da̭ | so-'tra̭ juhoti |
a॒gnaye॒ kāmā̭ya॒ svāhā॒ 'dbhya-ssvāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 7 ||
tama॒gni rba̭li॒māna̭bravīt |
prajā̭pate॒ 'gnaye॒ vai ba̭li॒mate॒ sarvā̭ṇi bhū॒tāni̭ ba॒ligṃ ha̭ranti | a॒hamu॒ vā a॒gni rba̭li॒māna̭smi | mā-nnu ya̭jasva |
atha̭ te॒ sarvā̭ṇi bhū॒tāni̭ ba॒ligṃ ha̭riṣyanti |
anṷ sva॒rgaṃ-lo~॒kaṃ-ve~॒thsyasīti̭ |
sa e॒tama॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnira̭vapat | a॒gnayḙ bali॒matḙ ca॒rum | anṷmatyai ca॒rum | tato॒ vai tasmai॒ sarvā̭ṇi bhū॒tāni̭ ba॒li-ma̭harann | anṷ sva॒rgaṃ-lo~॒kama̭vindat | sarvā̭ṇi ha॒ vā a̭smai bhū॒tāni̭ ba॒ligṃ ha̭ranti | anṷ sva॒rgaṃ-lo~॒kaṃ-vi~̭ndati | ya e॒tena̭ ha॒viṣā॒ yaja̭te |
ya ṷcainade॒vaṃ-ve~da̭ | so-'tra̭ juhoti |
a॒gnaye॒ kāmā̭ya॒ svāhā॒ 'gnayḙ bali॒mate॒ svāhā᳚ | anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 8 ||
tamanṷvittira-bravīt | prajā̭pate sva॒rgaṃ-vai~ lo॒kamanṷ-vivithsasi | a॒hamu॒ vā anṷvittirasmi | mā-nnu ya̭jasva | atha̭ te sa॒tyā 'nṷvitti-rbhaviṣyati | anṷ sva॒rgaṃ-lo~॒kaṃ-ve~॒thsyasīti̭ |
sa e॒tama॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnira̭vapat |
anṷvittyai ca॒rum | anṷmatyai ca॒rum |
tato॒ vai tasya̭ sa॒tyā 'nṷvittirabhavat |
anṷ sva॒rgaṃ-lo~॒ka-ma̭vindat |
sa॒tyā ha॒ vā a॒syānṷvitti-rbhavati |
anṷ sva॒rgaṃ-lo~॒kaṃ-vi~̭ndati |
ya e॒tena̭ ha॒viṣā॒ yaja̭te |
ya ṷcainade॒vaṃ-ve~da̭ | so-'tra̭ juhoti |
a॒gnaye॒ kāmā̭ya॒ svāhā-'nṷvittyai॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 9 ||
tā vā e॒tā-ssa॒pta sva॒rgasya̭ lo॒kasya॒ dvāraḥ̭ |
di॒va-śśyḙna॒yo 'nṷvittayo॒ nāma̭ |
āśā᳚ pratha॒māgṃ ra̭kṣati |
kāmo᳚ dvi॒tīyā᳚m | brahma̭ tṛ॒tīyā᳚m | ya॒jñaśca̭tu॒rthīm | āpaḥ̭ pañca॒mīm |
a॒gni rba̭li॒mān-thṣa॒ṣṭhīm | anṷvitti-ssapta॒mīm |
anṷ ha॒ vai sva॒rgaṃ-lo~॒kaṃ-vi~̭ndati |
kā॒ma॒cāro᳚-'sya sva॒rge lo॒ke bha̭vati |
ya e॒tābhi॒-riṣṭi̭bhi॒-ryaja̭te |
ya ṷcainā e॒vaṃ-ve~da̭ | tāsva̭nvi॒ṣṭi | pa॒ṣṭhau॒hī॒ va॒rā-nda̭dyā-tka॒gṃ॒ sañca̭ |
striyai̭ cābhā॒ragṃ samṛ̭ddhyai || 10 ||
anuvākaṃ 3 - upāghā nāmeṣṭayaḥ
tapa̭sā de॒vā de॒vatā॒-magra̭ āyann | tapa॒sarṣa̭ya॒-ssva̭ranva̭vindann |
tapa̭sā sa॒patnā॒-npraṇṷdā॒mārā̭tīḥ |
yene॒daṃ-vi~śva॒-mpari̭bhūtaṃ॒-ya~dasti̭ ||
pra॒tha॒ma॒ja-nde॒vagṃ ha॒viṣā̭ vidhema | sva॒ya॒bhu-mbrahma̭ para॒ma-ntapo॒ yat |
sa e॒va pu॒tra-ssa pi॒tā sa mā॒tā |
tapo̭ ha ya॒kṣa-mpra̭tha॒magṃ samba̭bhūva ||
śra॒ddhayā dḙvo deva॒tva-ma̭śnute |
śra॒ddhā pra̭ti॒ṣṭhā lo॒kasya̭ de॒vī || 11 ||
sā no̭ juṣā॒ṇopa̭ ya॒jña-māgā᳚t |
kāma̭vathsā॒ 'mṛta॒-nduhā̭nā ||
śra॒ddhā de॒vī pra̭thama॒jā ṛ॒tasya̭ |
viśva̭sya bha॒rtrī jaga̭taḥ prati॒ṣṭhā |
tāg śra॒ddhāgṃ ha॒viṣā̭ yajāmahe |
sā no̭ lo॒ka-ma॒mṛta̭-ndadhātu |
īśā̭nā de॒vī bhuva̭na॒syādhi̭patnī || āgā᳚thsa॒tyagṃ ha॒viri॒da-ñjṷṣā॒ṇam |
yasmā᳚dde॒vā ja̭jñire॒ bhuva̭nañca॒ viśve᳚ |
tasmai̭ vidhema ha॒viṣā̭ ghṛ॒tena̭ || 12 ||
yathā̭ de॒vai-ssa̭dha॒māda̭-mmadema ||
yasya̭ prati॒ṣṭho-rva̭ntari̭kṣam |
yasmā᳚dde॒vā ja̭jñire॒ bhuva̭nañca॒ sarve᳚ |
tathsa॒tya-marca॒dupa̭ya॒jña-nna॒ āgā᳚t | brahmāhṷtī॒-rupa॒moda̭mānam ||
mana̭so॒ vaśe॒ sarva̭mi॒da-mba̭bhūva |
nānyasya॒ mano॒ vaśa॒manvi̭yāya |
bhī॒ṣmo hi de॒va-ssaha̭sa॒-ssahī̭yān |
sa no̭ juṣā॒ṇa upa̭ ya॒jñamāgā᳚t ||
ākṷ̄tīnā॒-madhi̭pati॒-ñceta̭sā-ñca || 13 ||
sa॒ṅka॒lpajṷ̄ti-nde॒vaṃ-vi~̭pa॒ścim |
mano॒ rājā̭nami॒ha va॒rdhaya̭ntaḥ |
u॒pa॒ha॒ve᳚ 'sya suma॒tau syā̭ma ||
cara̭ṇa-mpa॒vitraṃ॒-vi~ta̭ta-mpurā॒ṇam |
yena̭ pū॒tastara̭ti duṣkṛ॒tāni̭ |
tena̭ pa॒vitrḙṇa śu॒ddhena̭ pū॒tāḥ |
ati̭ pā॒pmāna॒-marā̭ti-ntarema ||
lo॒kasya॒ dvāra̭-marci॒ma-tpa॒vitra᳚m |
jyoti̭ṣma॒-dbhrāja̭māna॒-mmaha̭svat | a॒mṛta̭sya॒ dhārā̭ bahu॒dhā doha̭mānam |
cara̭ṇa-nno lo॒ke sudhi̭tā-ndadhātu ||
a॒gnirmū॒rdhā di॒vaḥ ka॒ku-tpatiḥ̭ pṛthi॒vyā a॒yam | a॒pāgṃ retāgṃ̭si jinvati || bhuvo̭ ya॒jñasya॒ raja̭saśca ne॒tā yatrā̭ ni॒yudbhi॒-ssaca̭se śi॒vābhiḥ̭ | di॒vi mū॒rdhāna̭-ndadhiṣe suva॒r॒ṣā-ñji॒hvāma̭gne cakṛṣe havya॒vāha᳚m || ||
anṷ no॒-'dyā-'nṷmatirya॒jña-nde॒veṣṷ manyatām | a॒gniśca̭ havya॒vāha̭no॒ bhava̭tā-ndā॒śuṣe॒ mayaḥ̭ || anvida̭numate॒ tva-mmanyā̭sai॒ śañca̭naḥ kṛdhi | kratve॒ dakṣā̭ya no hinu॒ praṇa॒ āyūgṃ̭ṣi tāriṣaḥ || ||
ha॒vya॒vāha̭-mabhimāti॒ṣā-'ha᳚m | ra॒kṣo॒haṇa॒-mpṛta̭nāsu ji॒ṣṇum | jyoti̭ṣmanta॒-ndīdya̭ta॒-mpura̭ndhim | a॒gnigg svi̭ṣṭa॒kṛta॒mā hṷvema || svi̭ṣṭamagne a॒bhi ta-tpṛ̭ṇāhi | viśvā̭ deva॒ pṛta̭nā a॒bhiṣya | u॒ru-nnaḥ॒ panthā᳚-mpradi॒śanvi bhā̭hi | jyoti̭ṣmaddhehya॒jara̭-nna॒ āyuḥ̭ || || 14 ||
(de॒vī - ghṛ॒tena॒ - ceta̭sā-ñca॒ - doha̭māna-ñca॒tvāri̭ ca) (a. 3)
anuvākaṃ 4 - tāsā-mbrāhmaṇam
de॒vebhyo॒ vai sva॒rgo lo॒kasti॒ro̭ 'bhavat |
te pra॒jāpa̭ti-mabruvann | prajā̭pate sva॒rgo
vai no̭ lo॒kasti॒ro̭-'bhūt | tamanvi॒ccheti̭ |
taṃ-ya~̭jñakra॒tubhi॒-ranvai᳚cchat |
taṃ-ya~̭jñakra॒tubhi॒ rnānva̭vindat |
tamiṣṭi̭bhi॒-ranvai᳚cchat | tamiṣṭi̭bhi॒-ranva̭vindat | tadiṣṭī̭nā-miṣṭi॒tvam | eṣṭa̭yo ha॒ vai nāma̭ | tā iṣṭa̭ya॒ ityā ca̭kṣate pa॒rokṣḙṇa |
pa॒rokṣa̭priyā iva॒ hi de॒vāḥ || 15 ||
ta-ntapo᳚-' bravīt | prajā̭pate॒ tapa̭sā॒ vai
śrā᳚myasi | a॒hamu॒ vai tapo᳚-' smi |
mā-nnu ya̭jasva |
atha̭ te sa॒tya-ntapo̭ bhaviṣyati |
anṷ sva॒rgaṃ-lo~॒kaṃ-ve~॒thsyasīti̭ |
sa e॒tamā᳚gne॒ya-ma॒ṣṭāka̭pāla॒-nnira̭vapat | tapa̭se ca॒rum | anṷmatyai ca॒rum |
tato॒ vai tasya̭ sa॒tya-ntapo̭ 'bhavat |
anṷ sva॒rgaṃ-lo~॒kama̭vindat |
sa॒tya gṃ ha॒ vā a̭sya॒ tapo̭ bhavati |
anṷ sva॒rgaṃ-lo~॒kaṃ-vi~̭ndati |
ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti | a॒gnaye॒ svāhā॒ tapa̭se॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 16 ||
tagg śra॒ddhā-'bra̭vīt | prajā̭pate śra॒ddhayā॒ vai śrā᳚myasi | a॒hamu॒ vai śra॒ddhā-'smi̭ | mā-nnu ya̭jasva | atha̭ te sa॒tyā śra॒ddhā bha̭viṣyati | anṷ sva॒rgaṃ-lo~॒kaṃ-ve~॒thsyasīti̭ |
sa e॒tamā᳚-'gne॒ya-ma॒ṣṭāka̭pāla॒-nnira̭vapat | śra॒ddhāyai̭ ca॒rum | anṷmatyai ca॒rum | tato॒ vai tasya̭ sa॒tyā śra॒ddhā-'bha̭vat |
anṷ sva॒rgaṃ-lo~॒kama̭vindat |
sa॒tyā ha॒ vā a̭sya śra॒ddhā bha̭vati |
anṷ sva॒rgaṃ-lo~॒kaṃ-vi~̭ndati |
ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti | a॒gnaye॒ svāhā᳚ śra॒ddhāyai॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 17 ||
tagṃ sa॒tya-ma̭bravīt | prajā̭pate sa॒tyena॒ vai śrā᳚myasi | a॒hamu॒ vai sa॒tyama̭smi | mā-nnu ya̭jasva | atha̭ te sa॒tyagṃ sa॒tya-mbha̭viṣyati | anṷ sva॒rgaṃ-lo~॒kaṃ-ve~॒thsyasīti̭ |
sa e॒tamā᳚-'gne॒ya-ma॒ṣṭāka̭pāla॒-nnira̭vapat | sa॒tyāya̭ ca॒rum | anṷmatyai ca॒rum |
tato॒ vai tasya̭ sa॒tyagṃ sa॒tyama̭bhavat |
anṷ sva॒rgaṃ-lo~॒kama̭vindat |
sa॒tyagṃ ha॒ vā a̭sya sa॒tya-mbha̭vati |
anṷ sva॒rgaṃ-lo~॒kaṃ-vi~̭ndati |
ya e॒tena̭ ha॒viṣā॒ yaja̭te |
ya ṷcainade॒vaṃ-ve~da̭ | so-'tra̭ juhoti |
a॒gnaye॒ svāhā̭ sa॒tyāya॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 18 ||
ta-mmano᳚-'bravīt | prajā̭pate॒ mana̭sā॒ vai śrā᳚myasi | a॒hamu॒ vai mano᳚-'smi |
mā-nnu ya̭jasva |
atha̭ te sa॒tya-mmano̭ bhaviṣyati |
anṷ sva॒rgaṃ-lo~॒kaṃ-ve~॒thsyasīti̭ |
sa e॒tamā᳚-'gne॒ya-ma॒ṣṭāka̭pāla॒-nnira̭vapat | mana̭se ca॒rum | anṷmatyai ca॒rum | tato॒ vai tasya̭ sa॒tya-mmano̭-'bhavat |
anṷ sva॒rgaṃ-lo~॒kama̭vindat | sa॒tyagṃ ha॒ vā a̭sya॒ mano̭ bhavati | anṷ sva॒rgaṃ-lo~॒kaṃ-vi~̭ndati | ya e॒tena̭ ha॒viṣā॒ yaja̭te |
ya ṷcaina de॒vaṃ-ve~da̭ | so-'tra̭ juhoti |
a॒gnaye॒ svāhā॒ mana̭se॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 19 ||
ta-ñcara̭ṇa-mabravīt | prajā̭pate॒ cara̭ṇena॒ vai śrā᳚myasi | a॒hamu॒ vai cara̭ṇamasmi | mā-nnu ya̭jasva | atha̭ te sa॒tya-ñcara̭ṇa-mbhaviṣyati | anṷ sva॒rgaṃ-lo~॒kaṃ-ve~॒thsyasīti̭ |
sa e॒tamā᳚-'gne॒ya-ma॒ṣṭāka̭pāla॒-nnira̭vapat | cara̭ṇāya ca॒rum | anṷmatyai ca॒rum | tato॒ vai tasya̭ sa॒tya-ñcara̭ṇamabhavat |
anṷ sva॒rgaṃ-lo~॒kama̭vindat |
sa॒tyagṃ ha॒ vā a̭sya॒ cara̭ṇa-mbhavati |
anṷsva॒rgaṃ-lo~॒kaṃ-vi~̭ndati |
ya e॒tena̭ ha॒viṣā॒ yaja̭te |
ya ṷcainade॒vaṃ-ve~da̭ | so-'tra̭ juhoti |
a॒gnaye॒ svāhā॒ cara̭ṇāya॒ svāhā᳚ |
anṷmatyai॒ svāhā᳚ pra॒jāpa̭taye॒ svāhā᳚ |
sva॒rgāya̭ lo॒kāya॒ svāhā॒-'gnaye᳚ sviṣṭa॒kṛte॒ svāheti̭ || 20 ||
tā vā e॒tāḥ pañca̭ sva॒rgasya̭ lo॒kasya॒ dvāraḥ̭ |
apā̭ghā॒ anṷvittayo॒ nāma̭ | tapaḥ̭ pratha॒māgṃ ra̭kṣati | śra॒ddhā dvi॒tīyā᳚m | sa॒tya-ntṛ॒tīyā᳚m |
mana̭ścatu॒rthīm | cara̭ṇa-mpañca॒mīm |
anṷ ha॒ vai sva॒rgaṃ-lo~॒kaṃ-vi~̭ndati |
kā॒ma॒cāro᳚-'sya sva॒rge lo॒ke bha̭vati |
ya e॒tābhi॒-riṣṭi̭bhi॒-ryaja̭te |
ya ṷcainā e॒vaṃ-ve~da̭ |
anuvākaṃ 5 - cāturhotracayanam
brahma॒ vai catṷrhotāraḥ | catṷrhotṛ॒bhyo-'dhi̭ ya॒jño nirmi̭taḥ | nainagṃ̭ śa॒ptam | nābhica̭rita॒-māga̭cchati | ya e॒vaṃ-ve~da̭ ||
yo ha॒ vai catṷrhotṛṇā-ñcaturhotṛ॒tvaṃ-ve~da̭ | atho॒ pañca̭ hotṛtvam |
sarvā̭ hāsmai॒ diśaḥ̭ kalpante |
vā॒caspati॒r॒ hotā॒ daśa̭hotṝṇām |
pṛ॒thi॒vī hotā॒ catṷrhotṝṇām || 22 ||
a॒gnir-hotā॒ pañca̭hotṝṇām | vāghotā॒ ṣaḍḍho̭tṝṇām |
ma॒hāha̭vi॒r॒ hotā̭ sa॒ptaho̭tṝṇām |
e॒tadvai catṷrhotṛṇā-ñcaturhotṛ॒tvam |
atho॒ pañca̭hotṛtvam | sarvā̭ hāsmai॒ diśaḥ̭ kalpante | ya e॒vaṃ-ve~da̭ ||
e॒ṣā vai sa̭rva vi॒dyā | e॒ta-dbhḙṣa॒jam |
e॒ṣā pa॒ṅkti-ssva॒rgasya̭ lo॒kasyā᳚-ñja॒sāya̭ni-ssru॒tiḥ || 23 ||
e॒tān. yo-'ddhyai-tyacha̭dirda॒r॒śe yāva̭tta॒rasa᳚m | sva̭reti | a॒na॒pa॒bra॒va-ssarva॒māyṷreti | vi॒ndate᳚ pra॒jām | rā॒yaspoṣa̭-ṅgaupa॒tyam |
bra॒hma॒va॒rca॒sī bha̭vati || e॒tān. yo-'ddhyaiti̭ | spṛ॒ṇotyā॒tmāna᳚m | pra॒jā-mpi॒tṝn ||
e॒tān. vā a̭ru॒ṇa aṷpave॒śi rvi॒dāñca̭kāra || 24 ||
e॒taira̭dhivā॒damapā̭jayat | atho॒ viśva̭-mpā॒pmāna᳚m | sva̭ryayau | e॒tān. yo-'ddhyaiti̭ | a॒dhi॒vā॒da-ñja̭yati | atho॒ viśva̭-mpā॒pmāna᳚m | sva̭reti || e॒taira॒gni-ñci̭nvīta sva॒rgakā̭maḥ |
e॒tairāyṷṣkāmaḥ | pra॒jā pa॒śukā̭mo vā || 25 ||
pu॒rastā॒-ddaśa̭hotāra॒-muda̭ñca॒-mupa̭dadhāti yāvatpa॒dam | hṛda̭yaṃ॒-ya~jṷṣī॒ patnyaṷ ca | da॒kṣi॒ṇa॒taḥ prāñca॒-ñcatṷrhotāram |
pa॒ścāduda̭ñca॒-mpañca̭ hotāram | u॒tta॒ra॒taḥ prāñca॒gṃ॒ ṣaḍḍho̭tāram |
u॒pari̭ṣṭā॒-tprāñcagṃ̭ sa॒ptaho̭tāram | hṛda̭yaṃ॒-ya~jūgṃ̭ṣi॒ patnya̭śca |
ya॒thā॒va॒kā॒śa-ṅgrahāṋ | ya॒thā॒va॒kā॒śa-mpra̭tigra॒hān ~lo̭ka-mpṛ॒ṇāśca̭ |
sarvā̭ hāsyai॒tā de॒vatāḥ᳚ prī॒tā a॒bhīṣṭā̭ bhavanti || 26 ||
sadḙvama॒gni-ñci̭nute ||
ra॒thasa̭minta-śceta॒vyaḥ̭ | vajro॒ vai rathaḥ̭ |
vajrḙṇai॒va pā॒pmāna॒-mbhrātṛ̭vyagg stṛṇute | pa॒kṣa-ssa̭minta-śceta॒vyaḥ̭ |
e॒tāvā॒n॒. vai rathaḥ̭ | yāva̭tpa॒kṣaḥ | ra॒thasa̭mintame॒va ci̭nute ||
i॒mame॒va lo॒ka-mpa̭śuba॒ndhenā॒bhija̭yati |
atho̭ agniṣṭo॒mena̭ || 27 ||
a॒ntari̭kṣa-mu॒kthyḙna | sva̭ratirā॒treṇa̭ | sarvā᳚n ~lo॒kāna̭hī॒nena̭ | atho̭ sa॒treṇa̭ || varo॒ dakṣi̭ṇā | varḙṇai॒va varagg̭ spṛṇoti |
ā॒tmā hi varaḥ̭ || eka̭vigṃśati॒ rdakṣi̭ṇā dadāti |
e॒ka॒vi॒gṃ॒śo vā i॒ta-ssva॒rgo lo॒kaḥ | prasva॒rgaṃ-lo~॒kamā᳚pnoti || 28 ||
a॒sāvā̭di॒tya ḙkavi॒gṃ॒śaḥ | a॒mume॒vā-di॒tyamā᳚pnoti || śa॒ta-nda̭dāti | śa॒tāyuḥ॒ purṷṣa-śśa॒tendri̭yaḥ | āyṷṣye॒vendri॒ye prati̭tiṣṭhati || sa॒hasra̭-ndadāti |
sa॒hasra̭ sammita-ssva॒rgo lo॒kaḥ |
sva॒rgasya̭ lo॒kasyā॒-bhiji̭tyai || a॒nvi॒ṣṭa॒ka-ndakṣi̭ṇā dadāti | sarvā̭ṇi॒ vayāgṃ̭si || 29 ||
sarva॒syāptyai᳚ | sarva॒syā-va̭ruddhyai || yadi॒ na vi॒ndeta̭ | ma॒nthānḙtāva॒to da̭dyādoda॒nān. vā᳚ | a॒śnu॒te ta-ṅkāma᳚m | yasmai॒ kāmā̭yā॒-gniścī॒yate᳚ || pa॒ṣṭhau॒hī-ntva॒ntarva̭tī-ndadyāt |
sā hi sarvā̭ṇi॒ vayāgṃ̭si | sarva॒syāptyai᳚ | sarva॒syā-va̭ruddhyai || 30 ||
hira̭ṇya-ndadāti | hira̭ṇya-jyotire॒va sva॒rgaṃ-lo~॒kamḙti || vāso̭ dadāti | tenāyuḥ॒ prati̭rate || ve॒di॒tṛ॒tī॒ye ya̭jeta | triṣa̭tyā॒ hi de॒vāḥ |
sa sa̭tyama॒gni-ñci̭nute || tade॒ta-tpa̭śuba॒ndhe brāhma̭ṇa-mbrūyāt | neta̭reṣu ya॒jñeṣṷ ||
yo ha॒ vai catṷrhotṝ-nanusava॒na-nta̭rpayita॒vyāṋ. veda̭ || 31 ||
tṛpya̭ti pra॒jayā̭ pa॒śubhiḥ̭ |
upai̭nagṃ somapī॒tho na̭mati |
e॒te vai catṷrhotāro 'nusava॒na-nta̭rpayita॒vyāḥ᳚ | ye brā᳚hma॒ṇā ba̭hu॒vidaḥ̭ |
tebhyo॒ yaddakṣi̭ṇā॒ na naye᳚t | duri̭ṣṭagg syāt | a॒gnima̭sya vṛñjīrann |
tebhyo̭ yathā śra॒ddha-nda̭dyāt | svi̭ṣṭame॒vaitatkri̭yate |
nāsyā॒gniṃ-vṛ~̭ñjate || 32 ||
hi॒ra॒ṇye॒ṣṭa॒ko bha̭vati | yāva̭dutta॒ma-ma̭ṅguli-kā॒ṇḍaṃ-ya~̭jña pa॒ruṣā॒ sammi̭tam |
tejo॒ hira̭ṇyam || yadi॒ hira̭ṇya॒-nna vi॒ndet | śarka̭rā a॒ktā upa̭daddhyāt | tejo̭ ghṛ॒tam | satḙjasame॒-vāgni-ñci̭nute || a॒gniñci॒tvā sau᳚trāma॒ṇyā ya̭jeta maitrāvaru॒ṇyā vā᳚ |
vī॒ryḙṇa॒ vā e॒ṣa vyṛ̭ddhyate |
yo᳚-'gniñci̭nu॒te || 33 ||
yāva̭de॒va vī॒rya᳚m | tada̭smi-ndadhāti ||
brahma̭ṇa॒-ssāyṷjyagṃ salo॒katā̭-māpnoti |
e॒tāsā̭me॒va de॒vatā̭nā॒gṃ॒ sāyṷjyam |
sā॒rṣṭitāgṃ̭ samāna lo॒katā̭-māpnoti | ya e॒tama॒gni-ñci̭nu॒te | ya ṷcainame॒vaṃ-ve~da̭ || e॒tade॒va sā̭vi॒tre brāhma̭ṇam |
atho̭ nācike॒te || 34 ||
(hotā॒ catṷrhotṝṇāg - sru॒ti - śca̭kāra - vā - bhavantya - gniṣṭo॒menā᳚ - pnoti॒ - vayāgṃ̭si॒ - vayāgṃ̭si॒ - sarva॒syāptyai॒ sarva॒syāva̭ruddhyai॒ - veda̭ - vṛñjate - cinu॒te - +nava̭ ca) (a. 5)
anuvākaṃ 6 - vaiśvasṛjacayanam
yaccā॒mṛtaṃ॒-ya~cca martya᳚m | yacca॒ prāṇi̭ti॒ yacca॒ na | sarvā॒stā iṣṭa̭kāḥ kṛ॒tvā |
upa̭ kāma॒dughā̭ dadhe | tenarṣi̭ṇā॒ tena॒ brahma̭ṇā | tayā̭ de॒vata̭yā-'ṅgira॒sva-ddhru॒vā sī̭da || sarvā॒-sstriya॒-ssarvā᳚-npu॒gṃ॒saḥ | sarva॒-nna strī̭-pumañca॒ yat |
sarvā॒stāḥ || yāva̭ntaḥ pā॒gṃ॒savo॒ bhūmeḥ᳚ || 35 ||
saṅkhyā̭tā devamā॒yayā᳚ | sarvā॒stāḥ || yāva̭nta॒ ūṣāḥ᳚ paśū॒nām | pṛ॒thi॒vyā-mpuṣṭi̭ rhi॒tāḥ | sarvā॒stāḥ || yāva̭tī॒-ssika̭tā॒-ssarvāḥ᳚ |
a॒phsva̭ntaśca॒ yā-śśri॒tāḥ | sarvā॒stāḥ || yāva̭tī॒-śśarka̭rā॒ dhṛtyai᳚ | a॒syā-mpṛ̭thi॒vyāmadhi̭ || 36 ||
sarvā॒stāḥ || yāva॒nto-'śmā̭no॒-'syā-mpṛ̭thi॒vyām | pra॒ti॒ṣṭhāsu॒ prati̭ṣṭhitāḥ | sarvā॒stāḥ || yāva̭tī rvī॒rudha॒-ssarvāḥ᳚ |
viṣṭhi̭tāḥ pṛthi॒vīmanṷ | sarvā॒stāḥ || yāva̭tī॒roṣa̭dhī॒-ssarvāḥ᳚ |
viṣṭhi̭tāḥ pṛthi॒vīmanṷ | sarvā॒stāḥ || 37 ||
yāva̭nto॒ vana॒spata̭yaḥ | a॒syā-mpṛ̭thi॒vyāmadhi̭ | sarvā॒stāḥ ||
yāva̭nto grā॒myāḥ pa॒śava॒-ssarve᳚ | ā॒ra॒ṇyāśca॒ ye | sarvā॒stāḥ || ye dvi॒pāda॒-ścatṷṣpādaḥ | a॒pāda̭ udarasa॒rpiṇaḥ̭ |
sarvā॒stāḥ || yāva॒dāñja̭-namu॒cyate᳚ || 38 ||
de॒va॒trā yacca̭ mānu॒ṣam | sarvā॒stāḥ || yāva̭tkṛ॒ṣṇāya̭sa॒gṃ॒ sarva᳚m |
de॒va॒trā yacca̭ mānu॒ṣam | sarvā॒stāḥ ||
yāva̭ llo॒hāya̭sa॒gṃ॒ sarva᳚m |
de॒va॒trā yacca̭ mānu॒ṣam | sarvā॒stāḥ || sarva॒gṃ॒ sīsa॒gṃ॒ sarva॒-ntrapṷ |
de॒va॒trā yacca̭ mānu॒ṣam || 39 ||
sarvā॒stāḥ || sarva॒gṃ॒ hira̭ṇyagṃ raja॒tam | de॒va॒trā yacca̭ mānu॒ṣam |
sarvā॒stāḥ || sarva॒gṃ॒ suva̭rṇa॒gṃ॒ hari̭tam | de॒va॒trā yacca̭ mānu॒ṣam |
sarvā॒stā iṣṭa̭kāḥ kṛ॒tvā | upa̭kāma॒dughā̭ dadhe | tenarṣi̭ṇā॒ tena॒ brahma̭ṇā |
tayā̭ de॒vata̭yā-'ṅgira॒sva-ddhru॒vā sī̭da || 40 ||
[bhūme॒ - radhi॒ - viṣṭhi̭tāḥ pṛthi॒vīmanu॒ sarvā॒stā - u॒cyata̭ - mānu॒ṣagṃ - sī̭da ] (a. 6)
(yacca॒ striyaḥ̭ pā॒gṃ॒sava॒ ūṣā॒-ssika̭tā॒-śśarka̭rā॒ aśmā̭no vī॒rudha॒ oṣa̭dhī॒-rvana॒spata̭yo grā॒myā ye dvi॒pādo॒ yāva॒dāñja̭naṃ॒-yā~va̭-tkṛ॒ṣṇāya̭saṃ
~lo॒hāya̭sa॒gṃ॒ sīsa॒gṃ॒ hira̭ṇya॒gṃ॒ suva̭rṇa॒gṃ॒ hari̭tama॒ṣṭāda̭śa)
anuvākaṃ 7 - vaiśvasṛjacayanam
sarvā॒ diśo̭ di॒kṣu | yaccā॒nta rbhū॒ta-mprati̭ṣṭhitam | sarvā॒stā iṣṭa̭kāḥ kṛ॒tvā |
upa̭ kāma॒dughā̭ dadhe |
tenarṣi̭ṇā॒ tena॒ brahma̭ṇā |
tayā̭ de॒vata̭yā-'ṅgira॒sva-ddhru॒vā sī̭da ||
a॒ntari̭kṣañca॒ keva̭lam |
yaccā॒smi-nna̭nta॒rāhi̭tam |
sarvā॒stāḥ || ā॒nta॒ri॒kṣya̭śca॒ yāḥ pra॒jāḥ || 41 ||
ga॒ndha॒rvā॒-phsa॒rasa̭śca॒ ye | sarvā॒stāḥ || sarvā̭-nudā॒rān-thsa॒lilāṋ |
a॒ntari̭kṣe॒ prati̭ṣṭhitān | sarvā॒stāḥ ||
sarvā̭-nudā॒rān-thsa̭li॒lān |
sthā॒va॒rāḥ pro॒ṣyā᳚śca॒ ye | sarvā॒stāḥ || sarvā॒-ndhuni॒gṃ॒ sarvā᳚n-dhva॒gṃ॒sān |
hi॒mo yacca̭ śī॒yate᳚ || 42 ||
sarvā॒stāḥ || sarvā॒-nmarī̭cī॒n॒. vita̭tān | nī॒hā॒ro yacca̭ śī॒yate᳚ | sarvā॒stāḥ || sarvā̭ vi॒dyuta॒-ssarvā᳚n-thstanayi॒tnūn | hrā॒dunī॒ ryacca̭ śī॒yate᳚ | sarvā॒stāḥ || sarvā॒-ssrava̭ntī-ssa॒ritaḥ̭ |
sarva̭maphsu ca॒rañca॒ yat | sarvā॒stāḥ || 43 ||
yāśca॒ kūpyā॒ yāśca̭ nā॒dyā᳚-ssamu॒driyāḥ᳚ | yāśca̭ vaiśa॒ntīru॒ta prā̭sa॒cīryāḥ |
sarvā॒stāḥ || ye co॒ttiṣṭha̭nti jī॒mūtāḥ᳚ |
yāśca॒ varṣa̭nti vṛ॒ṣṭayaḥ̭ | sarvā॒stāḥ || tapa॒steja̭ ākā॒śam | yaccā̭kā॒śe prati̭ṣṭhitam |
sarvā॒stāḥ || vā॒yuṃ-va~yāgṃ̭si॒ sarvā̭ṇi || 44 ||
a॒nta॒ri॒kṣa॒ca॒rañca॒ yat | sarvā॒stāḥ || a॒gnigṃ sūrya̭-ñca॒ndram | mi॒traṃ-va~rṷṇa॒-mbhaga᳚m | sarvā॒stāḥ || sa॒tyagg śra॒ddhā-ntapo॒ dama᳚m |
nāma̭ rū॒pañca̭ bhū॒tānā᳚m | sarvā॒stā iṣṭa̭kāḥ kṛ॒tvā | upa̭ kāma॒dughā̭ dadhe | tenarṣi̭ṇā॒ tena॒ brahma̭ṇā |
tayā̭ de॒vata̭yā-'ṅgira॒sva-ddhru॒vā sī̭da || 45 ||
(pra॒jā-hi॒mo yacca̭ śī॒yate॒-sarvā॒stāḥ-sarvā̭ṇi॒-brahma॒ṇaika̭-ñca) (a. 7)
(diśo॒-'ntari̭kṣamāntari॒kṣya̭ udā॒rānṷdā॒rā-ndhuni॒-mmarī̭cīn. vi॒dyutaḥ॒
srava̭ntī॒ryāśca॒ ye ca॒ tapo̭ vā॒yuma॒gnigṃ sa॒tya-mpañca̭daśa)
anuvākaṃ 8 - vaiśvasṛjacayanam
sarvā॒-ndiva॒gṃ॒ sarvā᳚-nde॒vā-ndi॒vi |
yaccā॒nta rbhū॒ta-mprati̭ṣṭhitam |
sarvā॒stā iṣṭa̭kāḥ kṛ॒tvā | upa̭ kāma॒dughā̭ dadhe | tenarṣi̭ṇā॒ tena॒ brahma̭ṇā |
tayā̭ de॒vata̭yā-'ṅgira॒svada-dhru॒vā sī̭da || yāva̭tī॒ stāra̭kā॒-ssarvāḥ᳚ |
vita̭tā roca॒ne di॒vi | sarvā॒stāḥ || ṛco॒ yajūgṃ̭ṣi॒ sāmā̭ni || 46 ||
a॒tha॒rvā॒ṅgi॒rasa̭śca॒ ye | sarvā॒stāḥ || i॒ti॒hā॒sa॒pu॒rā॒ṇañca̭ |
sa॒rpa॒de॒va॒ja॒nāśca॒ ye | sarvā॒stāḥ ||
ye ca̭ lo॒kā ye cā̭lo॒kāḥ |
a॒nta rbhū॒ta-mprati̭ṣṭhitam | sarvā॒stāḥ ||
yacca॒ brahma॒ yaccā᳚bra॒hma |
a॒nta rbra॒hma-nprati̭ṣṭhitam || 47 ||
sarvā॒stāḥ || a॒ho॒rā॒trāṇi॒ sarvā̭ṇi | a॒drdha॒mā॒sāgśca॒ keva̭lān |
sarvā॒stāḥ || sarvā̭nṛ॒tūn-thsarvā᳚-nmā॒sān | saṃ॒va~॒thsa॒rañca॒ keva̭lam |
sarvā॒stāḥ || sarva॒-mbhūta॒gṃ॒ sarva॒-mbhavya᳚m | yaccā॒to-'dhi̭ bhavi॒ṣyati̭ |
sarvā॒stā iṣṭa̭kāḥ kṛ॒tvā |
upa̭ kāma॒dughā̭ dadhe |
tenarṣi̭ṇā॒ tena॒ brahma̭ṇā |
tayā̭ de॒vata̭yā-'ṅgira॒sva-ddhru॒vā sī̭da || 48 ||
(sāmā̭ni - bra॒hma-nprati̭ṣṭhitaṃ - kṛ॒tvā trīṇi̭ ca) (a. 8)
(diva॒-ntāra̭kā॒ ṛca̭ itihāsapurā॒ṇa-ñca॒ ye ca॒ yaccā̭horā॒trāṇyṛ॒tū-nbhūta॒-nnava̭)
anuvākaṃ 9 - brahmā sadasyāsīno vauśvasṛjān vyācaṣṭe
ṛ॒cā-mprācī̭ maha॒tī digṷcyate |
dakṣi̭ṇā-māhu॒ ryajṷṣāmapā॒rām |
atha̭rvaṇā॒-magṃi̭rasā-mpra॒tīcī᳚ |
sāmnā॒-mudī̭cī maha॒tī digṷcyate ||
ṛ॒gbhiḥ pū᳚rvā॒hṇe di॒vi de॒va ī̭yate |
ya॒ju॒rve॒de ti̭ṣṭhati॒ maddhye॒ ahnaḥ̭ |
sā॒ma॒ve॒de-nā᳚stama॒ye mahī̭yate |
vedai॒-raśū᳚nya-stri॒bhirḙti॒ sūryaḥ̭ ||
ṛ॒gbhyo jā॒tāgṃ sa̭rva॒śo mūrti̭-māhuḥ |
sarvā॒ gati̭ ryāju॒ṣī hai॒va śaśva̭t || 49 ||
sarva॒-nteja̭ ssāmarū॒pyagṃ ha̭ śaśvat | sarvagṃ̭ he॒da-mbrahma̭ṇā hai॒va sṛ॒ṣṭam ||
ṛ॒gbhyo jā॒taṃ-vai~śyaṃ॒-va~rṇa̭-māhuḥ | ya॒ju॒rve॒da-ṅkṣa̭tri॒yasyā̭-hu॒ryoni᳚m |
sā॒ma॒ve॒do brā᳚hma॒ṇānā॒-mprasṷ̄tiḥ |
pūrve॒ pūrve᳚bhyo॒ vaca̭ e॒ta-dṷ̄cuḥ ||
ā॒da॒r॒śa-ma॒gni-ñci̭nvā॒nāḥ |
pūrvḙ viśva॒ sṛjo॒-'mṛtāḥ᳚ |
śa॒taṃ-va~̭rṣa saha॒srāṇi̭ | dī॒kṣi॒tā-ssa॒tra-mā̭sata || 50 ||
tapa̭ āsī-dgṛ॒hapa̭tiḥ | brahma̭ bra॒hmābha̭va-thsva॒yam | sa॒tyagṃ ha॒ ho tai̭ṣā॒māsī᳚t |
ya-dvi̭śva॒sṛja॒ āsa̭ta ||
a॒mṛta̭-mebhya॒ uda̭gāyat |
sa॒hasra̭-mparivathsa॒rān |
bhū॒tagṃ ha̭ prasto॒ taiṣā॒māsī᳚t |
bha॒vi॒ṣya-tprati̭ cāharat ||
prā॒ṇo a̭ddhva॒ryu-ra̭bhavat |
i॒dagṃ sarva॒gṃ॒ siṣā̭satām || 51 ||
a॒pā॒no vi॒dvā-nā॒vṛtaḥ̭ | prati॒ prāti̭ṣṭha-daddhva॒re || ā॒rta॒vā ṷpagā॒tāraḥ̭ | sa॒da॒syā̭ ṛ॒tavo̭-'bhavann | a॒rdha॒mā॒sāśca॒ māsā᳚śca | ca॒ma॒sā॒-ddhva॒rya॒vo-'bha̭vann ||
aśagṃ̭ sa॒-dbrahma̭ṇa॒-stejaḥ̭ |
a॒cchā॒vā॒ko 'bha̭va॒-dyaśaḥ̭ |
ṛ॒ta-mḙṣā-mpraśā॒stā-''sī᳚t |
ya-dvi̭śva॒ sṛja॒ āsa̭ta || 52 ||
ūrg-rājā̭na॒-muda̭vahat | dhru॒va॒ go॒pa-ssaho̭-'bhavat | ojo॒-'bhya̭ṣṭau॒-dgrāv.ṇṇaḥ̭ |
ya-dvi̭śva॒ sṛja॒ āsa̭ta ||
apa̭citiḥ po॒trīyā̭-mayajat | ne॒ṣṭrīyā̭-mayaja॒-ttviṣiḥ̭ | āgnī᳚ddhrā-dvi॒duṣī̭ sa॒tyam | śra॒ddhā hai॒vā ya̭ja-thsva॒yam || irā॒ patnī̭ viśva॒ sṛjā᳚m | ākṷ̄ti-rapinaḍḍha॒viḥ || 53 ||
i॒ddhmagṃ ha॒ kṣuc cai᳚bhya u॒gre | tṛ॒ṣṇā cā va̭hatāmu॒bhe || vāgḙṣāgṃ subrahma॒ṇyā-''sī᳚t | cha॒ndo॒ yo॒gān. vi̭jāna॒tī |
ka॒lpa॒ta॒ntrāṇi̭ tanvā॒nā-'haḥ̭ | sa॒gg॒sthāśca̭ sarva॒śaḥ || a॒ho॒rā॒tre pa̭śupā॒lyau | mu॒hū॒rtāḥ pre॒ṣyā̭ abhavann | mṛ॒tyus tada̭-bhava-ddhā॒tā | śa॒mi॒to gro vi॒śā-mpatiḥ̭ || 54 ||
vi॒śva॒sṛjaḥ̭ pratha॒mā-ssa॒tra-mā̭sata | sa॒hasra̭ sama॒-mprasṷtena॒ yantaḥ̭ |
tato̭ ha jajñe॒ bhuva̭nasya go॒pāḥ | hi॒ra॒ṇmayaḥ̭ śa॒kuni॒ rbrahma॒ nāma̭ || yena॒ sūrya॒-stapa̭ti॒ teja̭se॒-ddhaḥ | pi॒tā pu॒treṇa̭ pitṛ॒mān. yoni̭yonau | nāvḙdavi-nmanute॒ ta-mbṛ॒hanta᳚m | sa॒rvā॒nu॒bhu-mā॒tmānagṃ̭ samparā॒ye ||
e॒ṣa ni॒tyo ma̭hi॒mā brā᳚hma॒ṇasya̭ |
na karma̭ṇā vardhate॒ no kanī̭yān || 55 ||
tasyai॒vātmā pa̭da॒vittaṃ-vi~̭ditvā |
na karma̭ṇā lipyate॒ pāpa̭kena ||
pañca̭pañcā॒śata̭-stri॒vṛtaḥ̭ saṃva~thsa॒rāḥ |
pañca̭pañcā॒śataḥ̭ pañcada॒śāḥ | pañca̭pañcā॒śataḥ̭ saptada॒śāḥ |
pañca̭pañcā॒śata̭ ekavi॒gṃ॒śāḥ |
vi॒śva॒sṛjāgṃ̭ sa॒hasra̭ saṃva~thsaram ||
e॒tena॒ vai vi̭śva॒sṛja̭ i॒daṃ-vi~śva̭-masṛjanta | ya-dviśva॒-masṛ̭janta | tasmā᳚-dviśva॒sṛjaḥ̭ ||
viśva̭-menā॒-nanu॒ prajā̭yate | brahma̭ṇa॒-ssāyṷjyagṃ salo॒katāṃ᳚-ya~nti |
e॒tāsā̭me॒va de॒vatā̭nā॒gṃ॒ sāyṷjyam | sā॒rṣṭitāgṃ̭ samāna lo॒katāṃ᳚-ya~nti |
ya e॒ta-dṷpa॒yanti̭ | ye cai̭na॒-tprāhuḥ̭ |
yebhya̭-ścaina॒-tprāhuḥ̭ ||
om || 56 ||
(śaśva̭ - dāsata॒ - siṣā̭satā॒ - māsa̭ta - ha॒viṣ - patiḥ॒ - kanī̭yā॒n - tasmā᳚-dviśva॒sṛjo॒-'ṣṭau ca̭) (a. 9)
(tubhyaṃ̭ - de॒vebhya॒ - stapa̭sā - de॒vebhyo॒ - brahma॒ vai catṷrhotāro॒ - yaccā॒mṛta॒gṃ॒ - sarvā॒ diśo̭ di॒kṣu - sarvā॒-ndiva̭ - mṛ॒cā-mprācī॒ nava̭)
(tubhyaṃ॒ - tapa̭sā॒ - tā vā e॒tāḥ pañca॒ - hira̭ṇya-ndadāti॒ - sarvā॒ diśa॒ - stapa̭ āsīdgṛ॒hapa̭ti॒-ṣṣaṭpa̭ñcā॒śat)
(tubhya॒-moṃ)
|| hariḥ̭ om ||
|| taittirīya yajurbrāhmaṇe kāṭhake tṛtīya praśna-ssamāptaḥ ||
|| iti taittirīya yajurbrāhmaṇe kāṭhakaṃ samāptam ||
🕉️ This is the original Sanskrit rendered in Kannada script.
Pronunciation is identical to the Sanskrit Devanagari version.