Shri Lalita Stavaratnam (arya Dvishati) — Sinhala Script

වන්දේ ගජේන්ද්රවදනං

වාමාඞ්කාරූඪවල්ලභාශ්ලිෂ්ටම් .

කුඞ්කුමපරාගශෝණං

කුවලයිනීජාරකෝරකාපීඩම් .. 1 ..

ස ජයති සුවර්ණශෛලඃ

සකලජගච්චක්රසඞ්ඝටිතමූර්තිඃ .

කාඤ්චනනිකුඤ්ජවාටී-

-කන්දලදමරීප්රපඤ්චසඞ්ගීතඃ .. 2 ..

හරිහයනෛරෘතමාරුත-

-හරිතාමන්තේෂ්වවස්ථිතං තස්ය .

විනුමඃ සානුත්රිතයං

විධිහරිගෞරීශවිෂ්ටපාධාරම් .. 3 ..

මධ්යේ පුනර්මනෝහර-

-රත්නරුචිස්තබකරඤ්ජිතදිගන්තම් .

උපරි චතුඃශතයෝජන-

-මුත්තුඞ්ගං ශෘඞ්ගපුඞ්ගවමුපාසේ .. 4 ..

තත්ර චතුඃශතයෝජන-

-පරිණාහං දේවශිල්පිනා රචිතම් .

නානාසාලමනෝජ්ඤං

නමාම්යහං නගරමාදිවිද්යායාඃ .. 5 ..

ප්රථමං සහස්රපූර්වක-

-ෂට්ශතසඞ්ඛ්යාකයෝජනං පරිතඃ .

වලයීකෘතස්වගාත්රං

වරණං ශරණං ව්රජාම්යයෝරූපම් .. 6 ..

තස්යෝත්තරේ සමීරණ-

-යෝජනදූරේ තරඞ්ගිතච්ඡායඃ .

ඝටයතු මුදං ද්විතීයෝ

ඝණ්ටාස්තනසාරනිර්මිතඃ සාලඃ .. 7 ..

උභයෝරන්තරසීම-

-න්යුද්දාමභ්රමරරඤ්ජිතෝදාරම් .

උපවනමුපාස්මහේ වය-

-මූරීකෘතමන්දමාරුතස්යන්දම් .. 8 ..

ආලිඞ්ග්ය භද්රකාලී-

-මාසීනස්තත්ර හරිශිලාශ්යාමාම් .

මනසි මහාකාලෝ මේ

විහරතු මධුපානවිභ්රමන්නේත්රඃ .. 9 ..

තාර්තීයීකෝ වරණ-

-ස්තස්යෝත්තරසීම්නි වාතයෝජනතඃ .

තාම්රේණ රචිතමූර්ති-

-ස්තනුතාමාචන්ද්රතාරකං භද්රම් .. 10 ..

මධ්යේ තයෝශ්ච මණිමය-

-පල්ලවශාඛාප්රසූනපක්ෂ්මලිතාම් .

කල්පානෝකහවාටීං

කලයේ මකරන්දපඞ්කිලාවාලාම් .. 11 ..

තත්ර මධුමාධවශ්රී-

-තරුණීභ්යාං තරලදෘක්චකෝරාභ්යාම් .

ආලිඞ්ගිතෝ(අ)වතාන්මා-

-මනිශං ප්රථමර්තුරාත්තපුෂ්පාස්ත්රඃ .. 12 ..

නමත තදුත්තරභාගේ

නාකිපථෝල්ලඞ්ඝිශෘඞ්ගසඞ්ඝාතම් .

සීසාකෘතිං තුරීයං

සිතකිරණාලෝකනිර්මලං සාලම් .. 13 ..

සාලද්වයාන්තරාලේ

සරලාලිකපෝතචාටුසුභගායාම් .

සන්තානවාටිකායාං

සක්තං චේතෝ(අ)ස්තු සතතමස්මාකම් .. 14 ..

තත්ර තපනාතිරූක්ෂඃ

සාම්රාජ්ඤීචරණසාන්ද්රිතස්වාන්තඃ .

ශුක්රශුචිශ්රීසහිතෝ

ග්රීෂ්මර්තුර්දිශතු කීර්තිමාකල්පම් .. 15 ..

උත්තරසීමනි තස්යෝ-

-න්නතශිඛරෝත්කම්පිහාටකපතාකඃ .

ප්රකටයතු පඤ්චමෝ නඃ

ප්රාකාරඃ කුශලමාරකූටමයඃ .. 16 ..

ප්රාකාරයෝශ්ච මධ්යේ

පල්ලවිතාන්යභෘතපඤ්චමෝන්මේෂා .

හරිචන්දනද්රුවාටී-

-හරතාදාමූලමස්මදනුතාපම් .. 17 ..

තත්ර නභඃ ශ්රීමුඛ්යෛ-

-ස්තරුණීවර්ගෛඃ සමන්විතඃ පරිතඃ .

වජ්රාට්ටහාසමුඛරෝ

වාඤ්ඡාපූර්තිං තනෝතු වර්ෂර්තුඃ .. 18 ..

මාරුතයෝජනදූරේ

මහනීයස්තස්ය චෝත්තරේ භාගේ .

භද්රං කෘෂීෂ්ට ෂෂ්ඨඃ

ප්රාකාරඃ පඤ්චලෝහධාතුමයඃ .. 19 ..

අනයෝර්මධ්යේ සන්තත-

-මඞ්කූරද්දිව්යකුසුමගන්ධායාම් .

මන්දාරවාටිකායාං

මානසමඞ්ගීකරෝතු මේ විහෘතිම් .. 20 ..

තස්යාමිෂෝර්ජලක්ෂ්මී-

-තරුණීභ්යාං ශරදෘතුඃ සදා සහිතඃ .

අභ්යර්චයන් ස ජීයා-

-දම්බාමාමෝදමේදුරෛඃ කුසුමෛඃ .. 21 ..

තස්යර්ෂිසඞ්ඛ්යයෝජන-

-දූරේ දේදීප්යමානශෘඞ්ගෞඝඃ .

කලධෞතකලිතමූර්තිඃ

කල්යාණං දිශතු සප්තමඃ සාලඃ .. 22 ..

මධ්යේ තයෝර්මරුත්පථ

ලඞ්ඝිතවිටපාග්රවිරුතකලකණ්ඨා .

ශ්රීපාරිජාතවාටී

ශ්රියමනිශං දිශතු ශීතලෝද්දේශා .. 23 ..

තස්යාමතිප්රියාභ්යාං

සහ ඛේලන් සහසහස්යලක්ෂ්මීභ්යාම් .

සාමන්තෝ ඣෂකේතෝ-

-ර්හේමන්තෝ භවතු හේමවෘද්ධ්යෛ නඃ .. 24 ..

උත්තරතස්තස්ය මහා-

-නුද්භටහුතභුක්ශිඛාරුණමයූඛඃ .

තපනීයඛණ්ඩරචිත-

-ස්තනුතාදායුෂ්යමෂ්ටමෝ වරණඃ .. 25 ..

කාදම්බවිපිනවාටී-

-මනයෝර්මධ්යභුවි කල්පිතාවාසාම් .

කලයාමි සූනකෝරක-

-කන්දලිතාමෝදතුන්දිලසමීරාම් .. 26 ..

තස්යාමතිශිශිරාකෘති-

-රාසීනස්තපතපස්යලක්ෂ්මීභ්යාම් .

ශිවමනිශං කුරුතාන්මේ

ශිශිරර්තුඃ සතතශීතලදිගන්තඃ .. 27 ..

තස්යාං කදම්බවාට්යාං

තත්ප්රසවාමෝදමිලිතමධුගන්ධම් .

සප්තාවරණමනෝජ්ඤං

ශරණං සමුපෛමි මන්ත්රිණීශරණම් .. 28 ..

තත්රාලයේ විශාලේ

තපනීයාරචිතතරලසෝපානේ .

මාණික්යමණ්ඩපාන්ත-

-ර්මහිතේ සිංහාසනේ සුමණිඛචිතේ .. 29 ..

බින්දුත්රිපඤ්චකෝණ-

-ද්විපනෘපවසුවේදදලකුරේඛාඪ්යේ .

චක්රේ සදා නිවිෂ්ටාං

ෂෂ්ඨ්යෂ්ටත්රිංශදක්ෂරේශානීම් .. 30 ..

තාපිඤ්ඡමේචකාභාං

තාලීදලඝටිතකර්ණතාටඞ්කාම් .

තාම්බූලපූරිතමුඛීං

තාම්රාධරබිම්බදෘෂ්ටදරහාසාම් .. 31 ..

කුඞ්කුමපඞ්කිලදේහාං

කුවලයජීවාතුශාවකවතංසාම් .

කෝකනදශෝණචරණාං

කෝකිලනික්වාණකෝමලාලාපාම් .. 32 ..

වාමාඞ්ගගලිතචූලීං

වනමාල්යකදම්බමාලිකාභරණාම් .

මුක්තාලලන්තිකාඤ්චිත

මුග්ධාලිකමිලිතචිත්රකෝදාරාම් .. 33 ..

කරවිධෘතකීරශාවක-

-කලනිනදව්යක්තනිඛිලනිගමාර්ථාම් .

වාමකුචසඞ්ගිවීණාවාදන-

-සෞඛ්යාර්ධමීලිතාක්ෂියුගාම් .. 34 ..

ආපාටලාංශුකධරා-

-මාදිරසෝන්මේෂවාසිතකටාක්ෂාම් .

ආම්නායසාරගුලිකා-

-මාද්යාං සඞ්ගීතමාතෘකාං වන්දේ .. 35 ..

තස්ය ච සුවර්ණසාල-

-ස්යෝත්තරතස්තරුණකුඞ්කුමච්ඡායඃ .

ශමයතු මම සන්තාපං

සාලෝ නවමඃ ස පුෂ්පරාගමයඃ .. 36 ..

අනයෝරන්තරවසුධාඃ

ප්රණුමඃ ප්රත්යග්රපුෂ්පරාගමයීඃ .

සිංහාසනේශ්වරීමනු-

-චින්තනනිස්තන්ද්රසිද්ධනීරන්ධ්රාඃ .. 37 ..

තත්සාලෝත්තරදේශේ

තරුණජපාකිරණධෝරණීශෝණඃ .

ප්රශමයතු පද්මරාග-

-ප්රාකාරෝ මම පරාභවං දශමඃ .. 38 ..

අන්තරභූකෘතවාසා-

-නනයෝරපනීතචිත්තවෛමත්යාන් .

චක්රේශීපදභක්තාං-

-ශ්චාරණවර්ගානහර්නිශං කලයේ .. 39 ..

සාරඞ්ගවාහයෝජනදූරේ-

-(අ)සඞ්ඝටිතකේතනස්තස්ය .

ගෝමේදකේන රචිතෝ

ගෝපායතු මාං සමුන්නතඃ සාලඃ .. 40 ..

වප්රද්වයාන්තරෝර්ව්යාං

වටුකෛර්විවිධෛශ්ච යෝගිනීබෘන්දෛඃ .

සතතං සමර්චිතායාඃ

සඞ්කර්ෂණ්යාඃ ප්රණෞමි චරණාබ්ජම් .. 41 ..

තාපසයෝජනදූරේ

තස්ය සමුත්තුඞ්ග ගෝපුරෝපේතඃ .

වාඤ්ඡාපූර්ත්යෛ භවතා-

-ද්වජ්රමණීනිකරනිර්මිතෝ වප්රඃ .. 42 ..

වරණද්විතයාන්තරතෝ

වාසජුෂෝ විහිතමධුරසාස්වාදාඃ .

රම්භාදිවිබුධවේශ්යා

රචයන්තු මහාන්තමස්මදානන්දම් .. 43 ..

තත්ර සදා ප්රවහන්තී

තටිනී වජ්රාභිධා චිරං ජීයාත් .

චටුලෝර්මිජාලනෘත්ය-

-ත්කලහංසීකුලකලක්වණිතපුෂ්ටා .. 44 ..

රෝධසි තස්යා රුචිරේ

වජ්රේශී ජයති වජ්රභූෂාඪ්යා .

වජ්රප්රදානතෝෂිත-

-වජ්රිමුඛත්රිදශවිනුතචාරිත්රා .. 45 ..

තස්යෝදීච්යාං හරිති

ස්තවකිතසුෂමාවලීඪවියදන්තඃ .

වෛඩූර්යරත්නරචිතෝ

වෛමල්යං දිශතු චේතසෝ වරණඃ .. 46 ..

අධිමධ්යමේතයෝඃ පුන-

-රම්බාචරණාවලම්බිතස්වාන්තාන් .

කාර්කෝටකාදිනාගාන්

කලයාමඃ කිං ච බලිමුඛාන් දනුජාන් .. 47 ..

ගන්ධවහසඞ්ඛ්යයෝජන-

-දූරේ ගගනෝර්ධ්වජාඞ්ඝිකස්තස්ය .

වාසවමණිප්රණීතෝ

වරණෝ බහලයතු වෛදුෂීං විශදාම් .. 48 ..

මධ්යක්ෂෝණ්යාමනයෝ-

-ර්මහේන්ද්රනීලාත්මකානි ච සරාංසි .

ශාතෝදරීසහායා-

-න්භූපාලානපි පුනඃ පුනඃ ප්රණුමඃ .. 49 ..

ආශුගයෝජනදූරේ

තස්යෝර්ධ්වං කාන්තිධවලිතදිගන්තඃ .

මුක්තාවිරචිතගාත්රෝ

මුහුරස්මාකං මුදේ භවතු සාලඃ .. 50 ..

ආවෘත්ත්යෝරධිමධ්යං

පූර්වස්යාං දිශි පුරන්දරඃ ශ්රීමාන් .

අභ්රමුවිටාධිරූඪෝ

විභ්රමමස්මාකමනිශමාතනුතාත් .. 51 ..

තත්කෝණේ ව්යජනස්රු-

-ක්තෝමරපාත්රස්රුවාන්නශක්තිධරඃ .

ස්වාහාස්වධාසමේතඃ

සුඛයතු මාං හව්යවාහනඃ සුචිරම් .. 52 ..

දක්ෂිණදිගන්තරාලේ

දණ්ඩධරෝ නීලනීරදච්ඡායඃ .

ත්රිපුරාපදාබ්ජභක්තස්තිරයතු

මම නිඛිලමංහසාං නිකරම් .. 53 ..

තස්යෛව පශ්චිමායාං

දිශි දලිතේන්දීවරප්රභාශ්යාමඃ .

ඛේටාසියෂ්ටිධාරී

ඛේදානපනයතු යාතුධානෝ මේ .. 54 ..

තස්යා උත්තරදේශේ

ධවලාඞ්ගෝ විපුලඣෂවරාරූඪඃ .

පාශායුධාත්තපාණිඃ

පාශී විදලයතු පාශජාලානි .. 55 ..

වන්දේ තදුත්තරහරි-

-ත්කෝණේ වායුං චමූරුවරවාහම් .

කෝරකිතතත්ත්වබෝධා-

-න්ගෝරක්ෂප්රමුඛයෝගිනෝ(අ)පි මුහුඃ .. 56 ..

තරුණීරිඩාප්රධානා-

-ස්තිස්රෝ වාතස්ය තස්ය කෘතවාසාඃ .

ප්රත්යග්රකාපිශායන-

-පානපරිභ්රාන්තලෝචනාඃ කලයේ .. 57 ..

තල්ලෝකපූර්වභාගේ

ධනදං ධ්යායාමි ශේවධිකුලේශම් .

අපි මාණිභද්රමුඛ්යා-

-නම්බාචරණාවලම්බිනෝ යක්ෂාන් .. 58 ..

තස්යෛව පූර්වසීමනි

තපනීයාරචිතගෝපුරේ නගරේ .

කාත්යායනීසහායං

කලයේ ශීතාංශුඛණ්ඩචූඩාලම් .. 59 ..

තත්පුරෂෝඩශවරණ-

-ස්ථලභාජස්තරුණචන්ද්රචූඩාලාන් .

රුද්රාධ්යායේ පඨිතා-

-න්රුද්රාණීසහචරාන්භජේ රුද්රාන් .. 60 ..

පවමානසඞ්ඛ්යයෝජන-

-දූරේ බාලතෘණ්මේචකස්තස්ය .

සාලෝ මරකතරචිතඃ

සම්පදමචලාං ශ්රියං ච පුෂ්ණාතු .. 61 ..

ආවෘතියුග්මාන්තරතෝ

හරිතමණීනිවහමේචකේ දේශේ .

හාටකතාලීවිපිනං

හාලාඝටඝටිතවිටපමාකලයේ .. 62 ..

තත්රෛව මන්ත්රිණීගෘහ-

-පරිණාහං තරලකේතනං සදනම් .

මරකතසෞධමනෝජ්ඤං

දද්යාදායූංෂි දණ්ඩනාථායාඃ .. 63 ..

සදනේ තත්ර හරින්මණි-

-සඞ්ඝටිතේ මණ්ඩපේ ශතස්තම්භේ .

කාර්තස්වරමයපීඨේ

කනකමයාම්බුරුහකර්ණිකාමධ්යේ .. 64 ..

බින්දුත්රිකෝණවර්තුල-

-ෂඩස්රවෘත්තද්වයාන්විතේ චක්රේ .

සඤ්චාරිණී දශෝත්තර-

ශතාර්ණමනුරාජකමලකලහංසී .. 65 ..

කෝලවදනා කුශේශය-

-නයනා කෝකාරිමණ්ඩිතශිඛණ්ඩා .

සන්තප්තකාඤ්චනාභා

සන්ධ්යාරුණචේලසංවෘතනිතම්බා .. 66 ..

හලමුසලශඞ්ඛචක්රා-

-(අ)ඞ්කුශපාශාභයවරස්ඵුරිතහස්තා .

කූලඞ්කෂානුකම්පා

කුඞ්කුමජම්බාලිතස්තනාභෝගා .. 67 ..

ධූර්තානාමතිදූරා-

-වාර්තාශේෂාවලග්නකමනීයා .

ආර්තාලීශුභදාත්රී

වාර්තාලී භවතු වාඤ්ඡිතාර්ථාය .. 68 ..

තස්යාඃ පරිතෝ දේවීඃ

ස්වප්නේශ්යුන්මත්තභෛරවීමුඛ්යාඃ .

ප්රණමත ජම්භින්යාද්යාඃ

භෛරවවර්ගාංශ්ච හේතුකප්රමුඛාන් .. 69 ..

පූර්වෝක්තසඞ්ඛ්යයෝජන-

-දූරේ පූයාංශුපාටලස්තස්ය .

විද්රාවයතු මදාර්තිං

විද්රුමසාලෝ විශඞ්කටද්වාරඃ .. 70 ..

ආවරණයෝරහර්නිශ-

-මන්තරභූමෞප්රකාශශාලින්යාම් .

ආසීනමම්බුජාසන-

-මභිනවසින්දූරගෞරමහමීඩේ .. 71 ..

වරණස්ය තස්ය මාරුත-

-යෝජනතෝ විපුලගෝපුරද්වාරඃ .

සාලෝ නානාරත්නෛඃ

සඞ්ඝටිතාඞ්ගඃ කෘෂීෂ්ට මදභීෂ්ටම් .. 72 ..

අන්තරකක්ෂ්යාමනයෝ-

-රවිරලශෝභාපිචණ්ඩිලෝද්දේශාම් .

මාණික්යමණ්ඩපාඛ්යාං

මහතීමධිහෘදයමනිශමාකලයේ .. 73 ..

තත්ර ස්ථිතං ප්රසන්නං

තරුණතමාලප්රවාලකිරණාභම් .

කර්ණාවලම්බිකුණ්ඩල-

-කන්දලිතාභීශුකවචිතකපෝලම් .. 74 ..

ශෝණාධරං ශුචිස්මිත-

-මේණාඞ්කවදනමේධමානකෘපම් .

මුග්ධෛණමදවිශේෂක-

-මුද්රිතනිටිලේන්දුරේඛිකාරුචිරම් .. 75 ..

නාලීකදලසහෝදර-

-නයනාඤ්චලඝටිතමනසිජාකූතම් .

කමලාකඨිනපයෝධර-

-කස්තූරීඝුසෘණපඞ්කිලෝරස්කම් .. 76 ..

චාම්පේයගන්ධිකෛශ්යං

ශම්පාසබ්රහ්මචාරිකෞශේයම් .

ශ්රීවත්සකෞස්තුභධරං

ශ්රිතජනරක්ෂාධුරීණචරණාබ්ජම් .. 77 ..

කම්බුසුදර්ශනවිලස-

-ත්කරපද්මං කණ්ඨලෝලවනමාලම් .

මුචුකුන්දමෝක්ෂඵලදං

මුකුන්දමානන්දකන්දමවලම්බේ .. 78 ..

තද්වරණෝත්තරභාගේ

තාරාපතිබිම්බචුම්බිනිජශෘඞ්ගඃ .

විවිධමණීගණඝටිතෝ

විතරතු සාලෝ විනිර්මලාං ධිෂණාම් .. 79 ..

ප්රාකාරද්විතයාන්තර-

-කක්ෂ්යාං පෘථුරත්නනිකරසඞ්කීර්ණාම් .

නමත සහස්රස්තම්භක-

-මණ්ඩපනාම්නාතිවිශ්රුතාං භුවනේ .. 80 ..

ප්රණුමස්තත්ර භවානී-

-සහචරමීශානමින්දුඛණ්ඩධරම් .

ශෘඞ්ගාරනායිකාමනු-

-ශීලනභාජෝ(අ)පි භෘඞ්ගිනන්දිමුඛාන් .. 81 ..

තස්යෛණවාහයෝජන-

-දූරේ වන්දේ මනෝමයං වප්රම් .

අඞ්කූරන්මණිකිරණා-

-මන්තරකක්ෂ්යාං ච නිර්මලාමනයෝඃ .. 82 ..

තත්රෛවාමෘතවාපීං

තරලතරඞ්ගාවලීඪතටයුග්මාම් .

මුක්තාමයකලහංසී-

-මුද්රිතකනකාරවින්දසන්දෝහාම් .. 83 ..

ශක්රෝපලමයභෘඞ්ගී-

-සඞ්ගීතෝන්මේෂඝෝෂිතදිගන්තාම් .

කාඤ්චනමයාඞ්ගවිලස-

-ත්කාරණ්ඩවෂණ්ඩතාණ්ඩවමනෝජ්ඤාම් .. 84 ..

කුරුවින්දාත්මකහල්ලක-

-කෝරකසුෂමාසමූහපාටලිතාම් .

කලයේ සුධාස්වරූපාං

කන්දලිතාමන්දකෛරවාමෝදාම් .. 85 ..

තද්වාපිකාන්තරාලේ තරලේ

මණිපෝතසීම්නි විහරන්තීම් .

සින්දූරපාටලාඞ්ගීං

සිතකිරණාඞ්කූරකල්පිතවතංසාම් .. 86 ..

පර්වේන්දුබිම්බවදනාං

පල්ලවශෝණාධරස්ඵුරිතහාසාම් .

කුටිලකබරීං කුරඞ්ගී-

-ශිශුනයනාං කුණ්ඩලස්ඵුරිතගණ්ඩාම් .. 87 ..

නිකටස්ථපෝතනිලයාඃ

ශක්තීඃ ශයවිධෘතහේමශෘඞ්ගජලෛඃ .

පරිෂිඤ්චන්තීං පරිත-

-ස්තාරාං තාරුණ්යගර්විතාං වන්දේ .. 88 ..

ප්රාගුක්තසඞ්ඛ්යයෝජනදූරේ

ප්රණමාමි බුද්ධිමයසාලම් .

අනයෝරන්තරකක්ෂ්යා-

-මෂ්ටාපදපුෂ්ටමේදිනීං රුචිරාම් .. 89 ..

කාදම්බරීනිධානාං

කලයාම්යානන්දවාපිකාං තස්යාම් .

ශෝණාශ්මනිවහනිර්මිත-

-සෝපානශ්රේණිශෝභමානතටීම් .. 90 ..

මාණික්යතරණිනිලයාං

මධ්යේ තස්යා මදාරුණකපෝලාම් .

අමෘතේශීත්යභිධානා-

-මන්තඃ කලයාමි වාරුණීං දේවීම් .. 91 ..

සෞවර්ණකේනිපාතන-

-හස්තාඃ සෞන්දර්යගර්විතා දේව්යඃ .

තත්පුරතඃ ස්ථිතිභාජෝ

විතරන්ත්වස්මාකමායුෂෝ වෘද්ධිම් .. 92 ..

තස්ය පෘෂදශ්වයෝජන-

-දූරේ(අ)හඞ්කාරසාලමතිතුඞ්ගම් .

වන්දේ තයෝශ්ච මධ්යේ

කක්ෂ්යාං වලමානමලයපවමානාම් .. 93 ..

විනුමෝ විමර්ශවාපීං

සෞෂුම්නසුධාස්වරූපිණීං තත්ර .

වේලාතිලඞ්ඝ්යවීචී-

-කෝලාහලභරිතකූලවනවාටීම් .. 94 ..

තත්රෛව සලිලමධ්යේ

තාපිඤ්ඡදලප්රපඤ්චසුෂමාභාම් .

ශ්යාමලකඤ්චුකලසිතාං

ශ්යාමාවිටබිම්බඩම්බරහරාස්යාම් .. 95 ..

ආභුග්නමසෘණචිල්ලී-

-හසිතායුග්මශරකාර්මුකවිලාසාම් .

මන්දස්මිතාඤ්චිතමුඛීං

මණිමයතාටඞ්කමණ්ඩිතකපෝලාම් .. 96 ..

කුරුවින්දතරණිනිලයාං

කුලාචලස්පර්ධිකුචනමන්මධ්යාම් .

කුඞ්කුමවිලිප්තගාත්රීං

කුරුකුල්ලාං මනසි කුර්මහේ සතතම් .. 97 ..

තත්සාලෝත්තරභාගේ

භානුමයං වප්රමාශ්රයේ දීප්තම් .

මධ්යං ච විපුලමනයෝ-

-ර්මන්යේ විශ්රාන්තමාතපෝද්ගාරම් .. 98 ..

තත්ර කුරුවින්දපීඨේ

තාමරසේ කනකකර්ණිකාඝටිතේ .

ආසීනමරුණවාසස-

-මම්ලානප්රසවමාලිකාභරණම් .. 99 ..

චක්ෂුෂ්මතීප්රකාශන-

-ශක්තිච්ඡායාසමාරචිතකේලිම් .

මාණික්යමුකුටරම්යං

මන්යේ මාර්තාණ්ඩභෛරවං හෘදයේ .. 100 ..

ඉන්දුමයසාලමීඩේ

තස්යෝත්තරතස්තුෂාරගිරිගෞරම් .

අත්යන්තශිශිරමාරුත-

-මනයෝර්මධ්යං ච චන්ද්රිකෝද්ගාරම් .. 101 ..

තත්ර ප්රකාශමානං

තාරානිකරෛඃ පරිෂ්කෘතෝද්දේශම් .

අමෘතමයකාන්තිකන්දල-

-මන්තඃ කලයාමි කුන්දසිතමින්දුම් .. 102 ..

ශෘඞ්ගාරසාලමීඩේ

ශෘඞ්ගෝල්ලසිතං තදුත්තරේ භාගේ .

මධ්යස්ථලේ තයෝරපි

මහිතාං ශෘඞ්ගාරපූර්විකාං පරිඛාම් .. 103 ..

තත්ර මණිනෞස්ථිතාභි-

-ස්තපනීයාවිරචිතාග්රහස්තාභිඃ .

ශෘඞ්ගාරදේවතාභිඃ

සහිතං පරිඛාධිපං භජේ මදනම් .. 104 ..

ශෘඞ්ගාරවරණවර්යස්යෝත්තරතඃ

සකලවිබුධසංසේව්යම් .

චින්තාමණිගණරචිතං

චින්තාං දූරීකරෝතු මේ සදනම් .. 105 ..

මණිසදනසාලයෝරධි-

-මධ්යං දශතාලභූමිරුහදීර්ඝෛඃ .

පර්ණෛඃ සුවර්ණවර්ණෛ-

-ර්යුක්තාං කාණ්ඩෛශ්ච යෝජනෝත්තුඞ්ගෛඃ .. 106 ..

මෘදුලෛස්තාලීපඤ්චක-

-මානෛර්මිලිතාං ච කේසරකදම්බෛඃ .

සන්තතගලිතමරන්ද-

-ස්රෝතෝනිර්යන්මිලින්දසන්දෝහාම් .. 107 ..

පාටීරපවනබාලක-

-ධාටීනිර්යත්පරාගපිඤ්ජරිතාම් .

කලහංසීකුලකලකල-

-කූලඞ්කෂනිනදනිචයකමනීයාම් .. 108 ..

පද්මාටවීං භජාමඃ

පරිමලකල්ලෝලපක්ෂ්මලෝපාන්තාම් .

[ දේව්යර්ඝ්යපාත්රධාරී

තස්යාඃ පූර්වදිශි දශකලායුක්තඃ . ]

වලයිතමූර්තිර්භගවා-

-න්වහ්නිඃ ක්රෝශෝන්නතශ්චිරං පායාත් .. 109 ..

තත්රාධාරේ දේව්යාඃ

පාත්රීරූපඃ ප්රභාකරඃ ශ්රීමාන් .

ද්වාදශකලාසමේතෝ

ධ්වාන්තං මම බහුලමාන්තරං භින්ද්යාත් .. 110 ..

තස්මින් දිනේශපාත්රේ

තරඞ්ගිතාමෝදමමෘතමයමර්ඝ්යම් .

චන්ද්රකලාත්මකමමෘතං

සාන්ද්රීකුර්යාදමන්දමානන්දම් .. 111 ..

අමෘතේ තස්මින්නභිතෝ

විහරන්ත්යෝ විවිධමණිතරණිභාජඃ .

ෂෝඩශ කලාඃ සුධාංශෝඃ

ශෝකාදුත්තාරයන්තු මාමනිශම් .. 112 ..

තත්රෛව විහෘතිභාජෝ

ධාතෘමුඛානාං ච කාරණේශානාම් .

සෘෂ්ට්යාදිරූපිකාස්තාඃ

ශමයන්ත්වඛිලාඃ කලාශ්ච සන්තාපම් .. 113 ..

කීනාශවරුණකින්නර-

-රාජදිගන්තේෂු රත්නගේහස්ය .

කලයාමි තාන්යජස්රං

කලයන්ත්වායුෂ්යමර්ඝ්යපාත්රාණි .. 114 ..

පාත්රස්ථලස්ය පුරතඃ

පද්මාරමණවිධිපාර්වතීශානාම් .

භවනානි ශර්මණේ නෝ

භවන්තු භාසා ප්රදීපිතජගන්ති .. 115 ..

සදනස්යානලකෝණේ

සතතං ප්රණමාමි කුණ්ඩමාග්නේයම් .

තත්ර ස්ථිතං ච වහ්නිං

තරලශිඛාජටිලමම්බිකාජනකම් .. 116 ..

තස්යාසුරදිශි තාදෘශ-

-රත්නපරිස්ඵුරිතපර්වනවකාඪ්යම් .

චක්රාත්මකං ශතාඞ්ගං

ශතයෝජනමුන්නතං භජේ දිව්යම් .. 117 ..

තත්රෛව දිශි නිෂණ්ණං

තපනීයධ්වජපරම්පරාශ්ලිෂ්ටම් .

රථමපරං ච භවාන්යා

රචයාමෝ මනසි රත්නමයචූඩම් .. 118 ..

භවනස්ය වායුභාගේ

පරිෂ්කෘතෝ විවිධවෛජයන්තීභිඃ .

රචයතු මුදං රථේන්ද්රඃ

සචිවේශාන්යාඃ සමස්තවන්ද්යායාඃ .. 119 ..

කුර්මෝ(අ)ධිහෘදයමනිශං

ක්රෝඩාස්යායාඃ ශතාඞ්ගමූර්ධන්යම් .

රුද්රදිශි රත්නධාම්නෝ

රුචිරශලාකාප්රපඤ්චකඤ්චුකිතම් .. 120 ..

පරිතෝ දේවීධාම්නඃ

ප්රණීතවාසා මනුස්වරූපිණ්යඃ .

කුර්වන්තු රශ්මිමාලා-

-කෘතයඃ කුශලානි දේවතා නිඛිලාඃ .. 121 ..

ප්රාග්ද්වාරස්ය භවානී-

-ධාම්නඃ පාර්ශ්වද්වයාරචිතවාසේ .

මාතඞ්ගීකිටිමුඛ්යෞ

මණිසදනේ මනසි භාවයාමි චිරම් .. 122 ..

යෝජනයුගලාභෝගා

තත්ක්රෝශපරිණාහයෛව භිත්ත්යා ච .

චින්තාමණිගෘහභූමි-

-ර්ජීයාදාම්නායමයචතුර්ද්වාරා .. 123 ..

ද්වාරේ ද්වාරේ ධාම්නඃ

පිණ්ඩීභූතා නවීනබිම්බාභාඃ .

විදධතු විපුලාං කීර්තිං

දිව්යා ලෞහිත්යසිද්ධ්යෝ දේව්යඃ .. 124 ..

මණිසදනස්යාන්තරතෝ

මහනීයේ රත්නවේදිකාමධ්යේ .

බින්දුමයචක්රමීඩේ

පීඨානාමුපරි විරචිතාවාසම් .. 125 ..

චක්රාණාං සකලානාං

ප්රථමමධඃ සීමඵලකවාස්තව්යාඃ .

අණිමාදිසිද්ධයෝ මා-

-මවන්තු දේවී ප්රභාස්වරූපිණ්යඃ .. 126 ..

අණිමාදිසිද්ධිඵලක-

-ස්යෝපරිහරිණාඞ්කඛණ්ඩකෘතචූඩාඃ .

භද්රං පක්ෂ්මලයන්තු

බ්රාහ්මීප්රමුඛාශ්ච මාතරෝ(අ)ස්මාකම් .. 127 ..

තස්යෝපරි මණිඵලකේ

තාරුණ්යෝත්තුඞ්ගපීනකුචභාරාඃ .

සඞ්ක්ෂෝභිණීප්රධානාඃ

භ්රාන්ති විද්රාවයන්තු දශ මුද්රාඃ .. 128 ..

ඵලකත්රයස්වරූපේ

පෘථුලේ ත්රෛලෝක්යමෝහනේ චක්රේ .

දීව්යන්තු ප්රකටාඛ්යා-

-ස්තාසාං කර්ත්රීං ච භගවතී ත්රිපුරා .. 129 ..

තදුපරි විපුලේ ධිෂ්ණ්යේ

තරලදෘශස්තරුණකෝකනදභාසඃ .

කාමාකර්ෂිණ්යාද්යාඃ

කලයේ දේවීඃ කලාධරශිඛණ්ඩාඃ .. 130 ..

සර්වාශාපරිපූරකචක්රේ-

-(අ)ස්මින් ගුප්තයෝගිනීසේව්යාඃ .

ත්රිපුරේශී මම දුරිතං

තුද්යාත් කණ්ඨාවලම්බිමණිහාරා .. 131 ..

තස්යෝපරි මණිපීඨේ

තාම්රාම්භෝරුහදලප්රභාශෝණාඃ .

ධ්යායාම්යනඞ්ගකුසුමා-

-ප්රමුඛා දේවීශ්ච විධෘතකූර්පාසාඃ .. 132 ..

සඞ්ක්ෂෝභකාරකේ(අ)ස්මිං-

-ශ්චක්රේ ශ්රීත්රිපුරසුන්දරී සාක්ෂාත් .

ගෝප්ත්රී ගුප්තතරාඛ්යාඃ

ගෝපායතු මාං කෘපාර්ද්රයා දෘෂ්ට්යා .. 133 ..

සඞ්ක්ෂෝභිණීප්රධානාඃ

ශක්තීස්තස්යෝර්ධ්වවලයකෘතවාසාඃ .

ආලෝලනීලවේණී-

-රන්තඃ කලයාමි යෞවනෝන්මත්තාඃ .. 134 ..

සෞභාග්යදායකේ(අ)ස්මිං-

-ශ්චක්රේශී ත්රිපුරවාසිනී ජීයාත් .

ශක්තීශ්ච සම්ප්රදායාභිධාඃ

සමස්තාඃ ප්රමෝදයන්ත්වනිශම් .. 135 ..

මණිපීඨෝපරි තාසාං

මහති චතුර්හස්තවිස්තෘතේ වලයේ .

සන්තතවිරචිතවාසාඃ

ශක්තීඃ කලයාමි සර්වසිද්ධිමුඛාඃ .. 136 ..

සර්වාර්ථසාධකාඛ්යේ

චක්රේ(අ)මුෂ්මින් සමස්තඵලදාත්රී .

ත්රිපුරා ශ්රීර්මම කුශලං

දිශතාදුත්තීර්ණයෝගිනීසේව්යා .. 137 ..

තාසාං නිලයස්යෝපරි

ධිෂ්ණ්යේ කෞසුම්භකඤ්චුකමනෝජ්ඤාඃ .

සර්වාජ්ඤාද්යාඃ දේව්යඃ

සකලාඃ සම්පාදයන්තු මම කීර්තිම් .. 138 ..

චක්රේ සමස්තරක්ෂා-

-කරනාම්න්යස්මින් සමස්තජනසේව්යාම් .

මනසි නිගර්භාසහිතාං

මන්යේ ශ්රීත්රිපුරමාලිනීං දේවීම් .. 139 ..

සර්වජ්ඤාසදනස්යෝපරි

චක්රේ විපුලේ සමාකලිතගේහාඃ .

වන්දේ වශිනීමුඛ්යාඃ

ශක්තීඃ සින්දූරරේණුරුචඃ .. 140 ..

ශ්රීසර්වරෝගහරාඛ්ය-

-චක්රේ(අ)ස්මිංස්ත්රිපුරපූර්විකාං සිද්ධාම් .

වන්දේ රහස්යනාම්නා

වේද්යාභිඃ ශක්තිභිඃ සදා සේව්යාම් .. 141 ..

වශිනීගෘහෝපරිෂ්ටා-

-ද්විංශතිහස්තෝන්නතේ මහාපීඨේ .

ශමයන්තු ශත්රුබෘන්දං

ශස්ත්රාණ්යස්ත්රාණි චාදිදම්පත්යෝඃ .. 142 ..

ශස්ත්රසදනෝපරිෂ්ටා-

-ද්වලයේ වලවෛරිරත්නසඞ්ඝටිතේ .

කාමේශ්වරීප්රධානාඃ

කලයේ දේවීඃ සමස්තජනවන්ද්යාඃ .. 143 ..

චක්රේ(අ)ත්ර සර්වසිද්ධිප්රද-

-නාමනි සර්වඵලදාත්රී .

ත්රිපුරාම්බාවතු සතතං

පරාපරරහස්යයෝගිනීසේව්යා .. 144 ..

කාමේශ්වරීගෘහෝපරිවලයේ

විවිධමනුසම්ප්රදායජ්ඤාඃ .

චත්වාරෝ යුගනාථා

ජයන්තු මිත්රේශපූර්වකාඃ ගුරවඃ .. 145 ..

නාථභවනෝපරිෂ්ටා-

-න්නානාරත්නචයමේදුරේ පීඨේ .

කාමේශ්යාද්යා නිත්යාඃ

කලයන්තු මුදං තිථිස්වරූපිණ්යඃ .. 146 ..

නිත්යාසදනස්යෝපරි

නිර්මලමණිනිවහවිරචිතේ ධිෂ්ණ්යේ .

කුශලං ෂඩඞ්ගදේව්යඃ

කලයන්ත්වස්මාකමුත්තරලනේත්රාඃ .. 147 ..

සදනස්යෝපරි තාසාං

සර්වානන්දමයනාමකේ බින්දෞ .

පඤ්චබ්රහ්මාකාරාං

මඤ්චං ප්රණමාමි මණිගණාකීර්ණම් .. 148 ..

පරිතෝ මණිමඤ්චස්ය

ප්රලම්බමානා නියන්ත්රිතා පාශෛඃ .

මායාමයී ජවනිකා

මම දුරිතං හරතු මේචකච්ඡායා .. 149 ..

මඤ්චස්යෝපරි ලම්බ-

-න්මදනීපුන්නාගමාලිකාභරිතම් .

හරිගෝපමයවිතානං

හරතාදාලස්යමනිශමස්මාකම් .. 150 ..

පර්යඞ්කස්ය භජාමඃ

පාදාන්බිම්බාම්බුදේන්දුහේමරුචඃ .

අජහරිරුද්රේශමයා-

-නනලාසුරමාරුතේශකෝණස්ථාන් .. 151 ..

ඵලකං සදාශිවමයං

ප්රණෞමි සින්දූරරේණුකිරණාභම් .

ආරභ්යාඞ්ගේශීනාං

සදනාත්කලිතං ච රත්නසෝපානම් .. 152 ..

පට්ටෝපධානගණ්ඩක-

-චතුෂ්ටයස්ඵුරිතපාටලාස්තරණම් .

පර්යඞ්කෝපරි ඝටිතං

පාතු චිරං හංසතූලශයනං නඃ .. 153 ..

තස්යෝපරි නිවසන්තං

තාරුණ්යශ්රීනිෂේවිතං සතතම් .

ආවෘන්තපුල්ලහල්ලක-

-මරීචිකාපුඤ්ජමඤ්ජුලච්ඡායම් .. 154 ..

සින්දූරශෝණවසනං

ශීතාංශුස්තබකචුම්බිතකිරීටම් .

කුඞ්කුමතිලකමනෝහර-

-කුටිලාලිකහසිතකුමුදබන්ධුශිශුම් .. 155 ..

පූර්ණේන්දුබිම්බවදනං

ඵුල්ලසරෝජාතලෝචනත්රිතයම් .

තරලාපාඞ්ගතරඞ්ගිත-

-ශඵරාඞ්කනශාස්ත්රසම්ප්රදායාර්ථම් .. 156 ..

මණිමයකුණ්ඩලපුෂ්ය-

-න්මරීචිකල්ලෝලමාංසලකපෝලම් .

විද්රුමසහෝදරාධර-

-විසෘමරසුස්මිතකිශෝරසඤ්චාරම් .. 157 ..

ආමෝදිකුසුමශේඛර-

-මානීලභ්රූලතායුගමනෝජ්ඤම් .

වීටීසෞරභවීචී-

-ද්විගුණිතවක්ත්රාරවින්දසෞරභ්යම් .. 158 ..

පාශාඞ්කුශේක්ෂුචාප-

-ප්රසවශරස්ඵුරිතකෝමලකරාබ්ජම් .

කාශ්මීරපඞ්කිලාඞ්ගං

කාමේශං මනසි කුර්මහේ සතතම් .. 159 ..

තස්යාඞ්කභුවි නිෂණ්ණාං

තරුණකදම්බප්රසූනකිරණාභාම් .

ශීතාංශුඛණ්ඩචූඩාං

සීමන්තන්යස්තසාන්ද්රසින්දූරාම් .. 160 ..

කුඞ්කුමලලාමභාස්ව-

-න්නිටිලාං කුටිලතරචිල්ලිකායුගලාම් .

නාලීකතුල්යනයනාං

නාසාඤ්චලනටිතමෞක්තිකාභරණාම් .. 161 ..

අඞ්කුරිතමන්දහාස-

-මරුණාධරකාන්තිවිජිතබිම්බාභාම් .

කස්තූරීමකරීයුත-

-කපෝලසඞ්ක්රාන්තකනකතාටඞ්කාම් .. 162 ..

කර්පූරසාන්ද්රවීටී-

-කබලිතවදනාරවින්දකමනීයාම් .

කම්බුසහෝදරකණ්ඨ-

-ප්රලම්බමානාච්ඡමෞක්තිකකලාපාම් .. 163 ..

කහ්ලාරදාමකෝමල-

-භුජයුගලස්ඵුරිතරත්නකේයූරාම් .

කරපද්මමූලවිලස-

-ත්කාඤ්චනමයකටකවලයසන්දෝහාම් .. 164 ..

පාණිචතුෂ්ටයවිලස-

-ත්පාශාඞ්කුශපුණ්ඩ්රචාපපුෂ්පාස්ත්රාම් .

කූලඞ්කෂකුචශිඛරාං

කුඞ්කුමකර්දමිතරත්නකූර්පාසාම් .. 165 ..

අණුදායාදවලග්නා-

-මම්බුදශෝභාසනාභිරෝමලතාම් .

මාණික්යඛචිතකාඤ්චී-

-මරීචිකාක්රාන්තමාංසලනිතම්බාම් .. 166 ..

කරභෝරුකාණ්ඩයුගලාං

ජඞ්ඝාජිතකාමජෛත්රතූණීරාම් .

ප්රපදපරිභූතකූර්මාං

පල්ලවසච්ඡායපදයුගමනෝජ්ඤාම් .. 167 ..

කමලභවකඤ්ජලෝචන-

-කිරීටරත්නාංශුරඤ්ජිතපදාබ්ජාම් .

උන්මස්තකානුකම්පා-

-මුත්තරලාපාඞ්ගපෝෂිතානඞ්ගාම් .. 168 ..

ආදිමරසාවලම්බා-

-මනිදං ප්රථමෝක්තිවල්ලරීකලිකාම් .

ආබ්රහ්මකීටජනනී-

-මන්තඃ කලයාමි සුන්දරීමනිශම් .. 169 ..

කස්තු ක්ෂිතෞ පටීයා-

-න්වස්තු ස්තෝතුං ශිවාඞ්කවාස්තව්යම් .

අස්තු චිරන්තනසුකෘතෛඃ

ප්රස්තුතකාම්යාය තන්මම පුරස්තාත් .. 170 ..

ප්රභුසම්මිතෝක්තිගම්යං

පරමශිවෝත්සඞ්ගතුඞ්ගපර්යඞ්කම් .

තේජඃ කිඤ්චන දිව්යං

පුරතෝ මේ භවතු පුණ්ඩ්රකෝදණ්ඩම් .. 171 ..

මධුරිමභරිතශරාසං

මකරන්දස්යන්දිමාර්ගණෝදාරම් .

කෛරවිණීවිටචූඩං

කෛවල්යායාස්තු කිඤ්චන මහෝ නඃ .. 172 ..

අක්ෂුද්රමික්ෂුචාපං

පරෝක්ෂමවලග්නසීම්නි ත්ර්යක්ෂම් .

ක්ෂපයතු මේ ක්ෂේමේතර-

-මුක්ෂරථප්රේමපක්ෂ්මලං තේජඃ .. 173 ..

භෘඞ්ගරුචිසඞ්ගරකරාපාඞ්ගං

ශෘඞ්ගාරතුඞ්ගමරුණාඞ්ගම් .

මඞ්ගලමභඞ්ගුරං මේ

ඝටයතු ගඞ්ගාධරාඞ්ගසඞ්ගි මහඃ .. 174 ..

ප්රපදාජිතකූර්මමූර්ජිත-

-කරුණං භර්මරුචිනිර්මථනදේහම් .

ශ්රිතවර්ම මර්ම ශම්භෝඃ

කිඤ්චන මම නර්ම ශර්ම නිර්මාතු .. 175 ..

කාලකුරලාලිකාලිම-

-කන්දලවිජිතාලි විධෘතමණිවාලි .

මිලතු හෘදි පුලිනජඝනං

බහුලිතගලගරලකේලි කිමපි මහඃ .. 176 ..

කුඞ්කුමතිලකිතඵාලා

කුරුවින්දච්ඡායපාටලදුකූලා .

කරුණාපයෝධිවේලා

කාචන චිත්තේ චකාස්තු මේ ලීලා .. 177 ..

පුෂ්පන්ධයරුචිවේණ්යඃ

පුලිනාභෝගත්රපාකරශ්රේණ්යඃ .

ජීයාසුරික්ෂුපාණ්යඃ

කාශ්චන කාමාරිකේලිසාක්ෂිණ්යඃ .. 178 ..

තපනීයාංශුකභාංසි

ද්රාක්ෂාමාධුර්යනාස්තිකවචාංසි .

කතිචන ශුචං මහාංසි

ක්ෂපයතු කපාලිතෝෂිතමනාංසි .. 179 ..

අසිතකචමායතාක්ෂං

කුසුමශරං කූලමුද්වහකෘපාර්ද්රම් .

ආදිමරසාධිදෛවත-

-මන්තඃ කලයේ හරාඞ්කවාසි මහඃ .. 180 ..

කර්ණෝපාන්තතරඞ්ගිත-

-කටාක්ෂවිස්පන්දිකණ්ඨදඝ්නකෘපාම් .

කාමේශ්වරාඞ්කනිලයාං

කාමපි විද්යාං පුරාතනීං කලයේ .. 181 ..

අරවින්දකාන්ත්යරුන්තුද-

-විලෝචනද්වන්ද්වසුන්දරමුඛේන්දු .

ඡන්දඃ කන්දලමන්දිර-

-මන්තඃපුරමෛන්දුශේඛරං වන්දේ .. 182 ..

බිම්බිනිකුරම්බඩම්බර-

-විඩම්බකච්ඡායමම්බරවලග්නම් .

කම්බුගලමම්බුදකුචං

බිම්බෝකං කමපි චුම්බතු මනෝ මේ .. 183 ..

කමපි කමනීයරූපං

කලයාම්යන්තඃ කදම්බකුසුමාඪ්යම් .

චම්පකරුචිරසුවේෂෛඃ

සම්පාදිතකාන්ත්යලඞ්කෘතදිගන්තම් .. 184 ..

ශම්පාරුචිභර-

-ගර්හාසම්පාදකකාන්තිකවචිතදිගන්තම් .

සිද්ධාන්තං නිගමානාං

ශුද්ධාන්තං කිමපි ශූලිනඃ කලයේ .. 185 ..

උද්යද්දිනකරශෝණා-

-නුත්පලබන්ධුස්තනන්ධයාපීඩාන් .

කරකලිතපුණ්ඩ්රචාපා-

-න්කලයේ කානපි කපර්දිනඃ ප්රාණාන් .. 186 ..

රශනාලසජ්ජඝනයා

රසනාජීවාතුචාපභාසුරයා .

ඝ්රාණායුෂ්කරශරයා

ඝ්රාතං චිත්තං කයාපි වාසනයා .. 187 ..

සරසිජසහයුධ්වදෘශා

ශම්පාලතිකාසනාභිවිග්රහයා .

භාසා කයාපි චේතෝ

නාසාමණිශෝභිවදනයා භරිතම් .. 188 ..

නවයාවකාභසිචයාන්විතයා

ගජයානයා දයාපරයා .

ධෘතයාමිනීශකලයා

ධියා කයාපි ක්ෂතාමයා හි වයම් .. 189 ..

අලමලමකුසුමබාණෛ-

-රබිම්බශෝණෛරපුණ්ඩ්රකෝදණ්ඩෛඃ .

අකුමුදබාන්ධවචූඩෛ-

-රන්යෛරිහ ජගති දෛවතං මන්යෛඃ .. 190 ..

කුවලයසදෘක්ෂනයනෛඃ

කුලගිරිකූටස්ථබන්ධුකුචභාරෛඃ .

කරුණාස්පන්දිකටාක්ෂෛඃ

කවචිතචිත්තෝ(අ)ස්මි කතිපයෛඃ කුතුකෛඃ .. 191 ..

නතජනසුලභාය නමෝ

නාලීකසනාභිලෝචනාය නමඃ .

නන්දිතගිරිශාය නමෝ

මහසේ නවනීපපාටලාය නමඃ .. 192 ..

කාදම්බකුසුමදාම්නේ

කායච්ඡායාකණායිතාර්යම්ණේ .

සීම්නේ චිරන්තනගිරාං

භූම්නේ කස්මෛචිදාදදේ ප්රණතිම් .. 193 ..

කුටිලකබරීභරේභ්යඃ

කුඞ්කුමසබ්රහ්මචාරිකිරණේභ්යඃ .

කූලඞ්කෂස්තනේභ්යඃ

කුර්මඃ ප්රණතිං කුලාද්රිකුතුකේභ්යඃ .. 194 ..

කෝකනදශෝණචරණා-

-ත්කෝමලකුරලාලිවිජිතශෛවාලාත් .

උත්පලසගන්ධිනයනා-

-දුරරීකුර්මෝ න දේවතමාන්යාම් .. 195 ..

ආපාටලාධරාණා-

-මානීලස්නිග්ධබර්බරකචානාම් .

ආම්නායජීවනානා-

-මාකූතානාං හරස්ය දාසෝ(අ)හම් .. 196 ..

පුඞ්ඛිතවිලාසහාස-

-ස්ඵුරිතාසු පුරාහිතාඞ්කනිලයාසු .

මග්නං මනෝ මදීයං

කාස්වපි කාමාරිජීවනාඩීෂු .. 197 ..

ලලිතා පාතු ශිරෝ මේ

ලලාටමම්බා ච මධුමතීරූපා .

භ්රූයුග්මං ච භවානී

පුෂ්පශරා පාතු ලෝචනද්වන්ද්වම් .. 198 ..

පායාන්නාසාං බාලා

සුභගා දන්තාංශ්ච සුන්දරී ජිහ්වාම් .

අධරෝෂ්ඨමාදිශක්ති-

-ශ්චක්රේශී පාතු මේ චිරං චිබුකම් .. 199 ..

කාමේශ්වරී ච කර්ණෞ

කාමාක්ෂී පාතු ගණ්ඩයෝර්යුගලම් .

ශෘඞ්ගාරනායිකාව්යා-

-ද්වදනං සිංහාසනේශ්වරී ච ගලම් .. 200 ..

ස්කන්දප්රසූශ්ච පාතු

ස්කන්ධෞ බාහූ ච පාටලාඞ්ගී මේ .

පාණී ච පද්මනිලයා

පායාදනිශං නඛාවලීර්විජයා .. 201 ..

කෝදණ්ඩිනී ච වක්ෂඃ

කුක්ෂිං චාව්යාත් කුලාචලතනූජා .

කල්යාණී ච වලග්නං

කටිං ච පායාත්කලාධරශිඛණ්ඩා .. 202 ..

ඌරුද්වයං ච පායා-

-දුමා මෘඩානී ච ජානුනී රක්ෂේත් .

ජඞ්ඝේ ච ෂෝඩශී මේ

පායාත් පාදෞ ච පාශසෘණිහස්තා .. 203 ..

ප්රාතඃ පාතු පරා මාං

මධ්යාහ්නේ පාතු මණිගෘහාධීශා .

ශර්වාණ්යවතු ච සායං

පායාද්රාත්රෞ ච භෛරවී සාක්ෂාත් .. 204 ..

භාර්යාං රක්ෂතු ගෞරීං

පායාත් පුත්රාංශ්ච බින්දුගෘහපීඨා .

ශ්රීවිද්යා ච යශෝ මේ

ශීලං චාව්යාච්චිරං මහාරාජ්ඤී .. 205 ..

පවනමයි පාවකමයි

ක්ෂෝණීමයි ගගනමයි කෘපීටමයි .

රවිමයි ශශිමයි දිඞ්මයි

සමයමයි ප්රාණමයි ශිවේ පාහි .. 206 ..

කාලි කපාලිනි ශූලිනි

භෛරවි මාතඞ්ගි පඤ්චමි ත්රිපුරේ .

වාග්දේවි වින්ධ්යවාසිනි

බාලේ භුවනේශි පාලය චිරං මාම් .. 207 ..

අභිනවසින්දූරාභා-

-මම්බ ත්වාං චින්තයන්ති යේ හෘදයේ .

උපරි නිපතන්ති තේෂා-

-මුත්පලනයනාකටාක්ෂකල්ලෝලාඃ .. 208 ..

වර්ගාෂ්ටකමිලිතාභි-

-ර්වශිනීමුඛ්යාභිරාවෘතාං භවතීම් .

චින්තයතාං සිතවර්ණාං

වාචෝ නිර්යාන්ත්යයත්නතෝ වදනාත් .. 209 ..

කනකශලාකාගෞරීං

කර්ණව්යාලෝලකුණ්ඩලද්විතයාම් .

ප්රහසිතමුඛීං ච භවතීං

ධ්යායන්තෝ යේ ත ඒව භූධනදාඃ .. 210 ..

ශීර්ෂාම්භෝරුහමධ්යේ

ශීතලපීයූෂවර්ෂිණීං භවතීම් .

අනුදිනමනුචින්තයතා-

-මායුෂ්යං භවති පුෂ්කලමවන්යාම් .. 211 ..

මධුරස්මිතාං මදාරුණනයනාං

මාතඞ්ගකුම්භවක්ෂෝජාම් .

චන්ද්රවතංසිනීං ත්වාං

සවිධේ පශ්යන්ති සුකෘතිනඃ කේචිත් .. 212 ..

ලලිතායාඃ ස්තවරත්නං

ලලිතපදාභිඃ ප්රණීතමාර්යාභිඃ .

ප්රතිදිනමවනෞ පඨතාං

ඵලානි වක්තුං ප්රගල්භතේ සෛව .. 213 ..

සදසදනුග්රහනිග්රහ-

-ගෘහීතමුනිවිග්රහෝ භගවාන් .

සර්වාසාමුපනිෂදාං

දුර්වාසා ජයති දේශිකඃ ප්රථමඃ .. 214 ..

ඉති මහර්ෂිදුර්වාසඃ විරචිතං ශ්රීලලිතාස්තවරත්නම් .

Roman (IAST) Transliteration

vande gajendravadanaṃ

vāmāṅkārūḍhavallabhāśliṣṭam |

kuṅkumaparāgaśoṇaṃ

kuvalayinījārakorakāpīḍam || 1 ||

sa jayati suvarṇaśailaḥ

sakalajagaccakrasaṅghaṭitamūrtiḥ |

kāñcananikuñjavāṭī-

-kandaladamarīprapañcasaṅgītaḥ || 2 ||

harihayanairṛtamāruta-

-haritāmanteṣvavasthitaṃ tasya |

vinumaḥ sānutritayaṃ

vidhiharigaurīśaviṣṭapādhāram || 3 ||

madhye punarmanohara-

-ratnarucistabakarañjitadigantam |

upari catuḥśatayojana-

-muttuṅgaṃ śṛṅgapuṅgavamupāse || 4 ||

tatra catuḥśatayojana-

-pariṇāhaṃ devaśilpinā racitam |

nānāsālamanojñaṃ

namāmyahaṃ nagaramādividyāyāḥ || 5 ||

prathamaṃ sahasrapūrvaka-

-ṣaṭśatasaṅkhyākayojanaṃ paritaḥ |

valayīkṛtasvagātraṃ

varaṇaṃ śaraṇaṃ vrajāmyayorūpam || 6 ||

tasyottare samīraṇa-

-yojanadūre taraṅgitacchāyaḥ |

ghaṭayatu mudaṃ dvitīyo

ghaṇṭāstanasāranirmitaḥ sālaḥ || 7 ||

ubhayorantarasīma-

-nyuddāmabhramararañjitodāram |

upavanamupāsmahe vaya-

-mūrīkṛtamandamārutasyandam || 8 ||

āliṅgya bhadrakālī-

-māsīnastatra hariśilāśyāmām |

manasi mahākālo me

viharatu madhupānavibhramannetraḥ || 9 ||

tārtīyīko varaṇa-

-stasyottarasīmni vātayojanataḥ |

tāmreṇa racitamūrti-

-stanutāmācandratārakaṃ bhadram || 10 ||

madhye tayośca maṇimaya-

-pallavaśākhāprasūnapakṣmalitām |

kalpānokahavāṭīṃ

kalaye makarandapaṅkilāvālām || 11 ||

tatra madhumādhavaśrī-

-taruṇībhyāṃ taraladṛkcakorābhyām |

āliṅgito'vatānmā-

-maniśaṃ prathamarturāttapuṣpāstraḥ || 12 ||

namata taduttarabhāge

nākipathollaṅghiśṛṅgasaṅghātam |

sīsākṛtiṃ turīyaṃ

sitakiraṇālokanirmalaṃ sālam || 13 ||

sāladvayāntarāle

saralālikapotacāṭusubhagāyām |

santānavāṭikāyāṃ

saktaṃ ceto'stu satatamasmākam || 14 ||

tatra tapanātirūkṣaḥ

sāmrājñīcaraṇasāndritasvāntaḥ |

śukraśuciśrīsahito

grīṣmarturdiśatu kīrtimākalpam || 15 ||

uttarasīmani tasyo-

-nnataśikharotkampihāṭakapatākaḥ |

prakaṭayatu pañcamo naḥ

prākāraḥ kuśalamārakūṭamayaḥ || 16 ||

prākārayośca madhye

pallavitānyabhṛtapañcamonmeṣā |

haricandanadruvāṭī-

-haratādāmūlamasmadanutāpam || 17 ||

tatra nabhaḥ śrīmukhyai-

-staruṇīvargaiḥ samanvitaḥ paritaḥ |

vajrāṭṭahāsamukharo

vāñchāpūrtiṃ tanotu varṣartuḥ || 18 ||

mārutayojanadūre

mahanīyastasya cottare bhāge |

bhadraṃ kṛṣīṣṭa ṣaṣṭhaḥ

prākāraḥ pañcalohadhātumayaḥ || 19 ||

anayormadhye santata-

-maṅkūraddivyakusumagandhāyām |

mandāravāṭikāyāṃ

mānasamaṅgīkarotu me vihṛtim || 20 ||

tasyāmiṣorjalakṣmī-

-taruṇībhyāṃ śaradṛtuḥ sadā sahitaḥ |

abhyarcayan sa jīyā-

-dambāmāmodameduraiḥ kusumaiḥ || 21 ||

tasyarṣisaṅkhyayojana-

-dūre dedīpyamānaśṛṅgaughaḥ |

kaladhautakalitamūrtiḥ

kalyāṇaṃ diśatu saptamaḥ sālaḥ || 22 ||

madhye tayormarutpatha

laṅghitaviṭapāgravirutakalakaṇṭhā |

śrīpārijātavāṭī

śriyamaniśaṃ diśatu śītaloddeśā || 23 ||

tasyāmatipriyābhyāṃ

saha khelan sahasahasyalakṣmībhyām |

sāmanto jhaṣaketo-

-rhemanto bhavatu hemavṛddhyai naḥ || 24 ||

uttaratastasya mahā-

-nudbhaṭahutabhukśikhāruṇamayūkhaḥ |

tapanīyakhaṇḍaracita-

-stanutādāyuṣyamaṣṭamo varaṇaḥ || 25 ||

kādambavipinavāṭī-

-manayormadhyabhuvi kalpitāvāsām |

kalayāmi sūnakoraka-

-kandalitāmodatundilasamīrām || 26 ||

tasyāmatiśiśirākṛti-

-rāsīnastapatapasyalakṣmībhyām |

śivamaniśaṃ kurutānme

śiśirartuḥ satataśītaladigantaḥ || 27 ||

tasyāṃ kadambavāṭyāṃ

tatprasavāmodamilitamadhugandham |

saptāvaraṇamanojñaṃ

śaraṇaṃ samupaimi mantriṇīśaraṇam || 28 ||

tatrālaye viśāle

tapanīyāracitataralasopāne |

māṇikyamaṇḍapānta-

-rmahite siṃhāsane sumaṇikhacite || 29 ||

bindutripañcakoṇa-

-dvipanṛpavasuvedadalakurekhāḍhye |

cakre sadā niviṣṭāṃ

ṣaṣṭhyaṣṭatriṃśadakṣareśānīm || 30 ||

tāpiñchamecakābhāṃ

tālīdalaghaṭitakarṇatāṭaṅkām |

tāmbūlapūritamukhīṃ

tāmrādharabimbadṛṣṭadarahāsām || 31 ||

kuṅkumapaṅkiladehāṃ

kuvalayajīvātuśāvakavataṃsām |

kokanadaśoṇacaraṇāṃ

kokilanikvāṇakomalālāpām || 32 ||

vāmāṅgagalitacūlīṃ

vanamālyakadambamālikābharaṇām |

muktālalantikāñcita

mugdhālikamilitacitrakodārām || 33 ||

karavidhṛtakīraśāvaka-

-kalaninadavyaktanikhilanigamārthām |

vāmakucasaṅgivīṇāvādana-

-saukhyārdhamīlitākṣiyugām || 34 ||

āpāṭalāṃśukadharā-

-mādirasonmeṣavāsitakaṭākṣām |

āmnāyasāragulikā-

-mādyāṃ saṅgītamātṛkāṃ vande || 35 ||

tasya ca suvarṇasāla-

-syottaratastaruṇakuṅkumacchāyaḥ |

śamayatu mama santāpaṃ

sālo navamaḥ sa puṣparāgamayaḥ || 36 ||

anayorantaravasudhāḥ

praṇumaḥ pratyagrapuṣparāgamayīḥ |

siṃhāsaneśvarīmanu-

-cintananistandrasiddhanīrandhrāḥ || 37 ||

tatsālottaradeśe

taruṇajapākiraṇadhoraṇīśoṇaḥ |

praśamayatu padmarāga-

-prākāro mama parābhavaṃ daśamaḥ || 38 ||

antarabhūkṛtavāsā-

-nanayorapanītacittavaimatyān |

cakreśīpadabhaktāṃ-

-ścāraṇavargānaharniśaṃ kalaye || 39 ||

sāraṅgavāhayojanadūre-

-'saṅghaṭitaketanastasya |

gomedakena racito

gopāyatu māṃ samunnataḥ sālaḥ || 40 ||

vapradvayāntarorvyāṃ

vaṭukairvividhaiśca yoginībṛndaiḥ |

satataṃ samarcitāyāḥ

saṅkarṣaṇyāḥ praṇaumi caraṇābjam || 41 ||

tāpasayojanadūre

tasya samuttuṅga gopuropetaḥ |

vāñchāpūrtyai bhavatā-

-dvajramaṇīnikaranirmito vapraḥ || 42 ||

varaṇadvitayāntarato

vāsajuṣo vihitamadhurasāsvādāḥ |

rambhādivibudhaveśyā

racayantu mahāntamasmadānandam || 43 ||

tatra sadā pravahantī

taṭinī vajrābhidhā ciraṃ jīyāt |

caṭulormijālanṛtya-

-tkalahaṃsīkulakalakvaṇitapuṣṭā || 44 ||

rodhasi tasyā rucire

vajreśī jayati vajrabhūṣāḍhyā |

vajrapradānatoṣita-

-vajrimukhatridaśavinutacāritrā || 45 ||

tasyodīcyāṃ hariti

stavakitasuṣamāvalīḍhaviyadantaḥ |

vaiḍūryaratnaracito

vaimalyaṃ diśatu cetaso varaṇaḥ || 46 ||

adhimadhyametayoḥ puna-

-rambācaraṇāvalambitasvāntān |

kārkoṭakādināgān

kalayāmaḥ kiṃ ca balimukhān danujān || 47 ||

gandhavahasaṅkhyayojana-

-dūre gaganordhvajāṅghikastasya |

vāsavamaṇipraṇīto

varaṇo bahalayatu vaiduṣīṃ viśadām || 48 ||

madhyakṣoṇyāmanayo-

-rmahendranīlātmakāni ca sarāṃsi |

śātodarīsahāyā-

-nbhūpālānapi punaḥ punaḥ praṇumaḥ || 49 ||

āśugayojanadūre

tasyordhvaṃ kāntidhavalitadigantaḥ |

muktāviracitagātro

muhurasmākaṃ mude bhavatu sālaḥ || 50 ||

āvṛttyoradhimadhyaṃ

pūrvasyāṃ diśi purandaraḥ śrīmān |

abhramuviṭādhirūḍho

vibhramamasmākamaniśamātanutāt || 51 ||

tatkoṇe vyajanasru-

-ktomarapātrasruvānnaśaktidharaḥ |

svāhāsvadhāsametaḥ

sukhayatu māṃ havyavāhanaḥ suciram || 52 ||

dakṣiṇadigantarāle

daṇḍadharo nīlanīradacchāyaḥ |

tripurāpadābjabhaktastirayatu

mama nikhilamaṃhasāṃ nikaram || 53 ||

tasyaiva paścimāyāṃ

diśi dalitendīvaraprabhāśyāmaḥ |

kheṭāsiyaṣṭidhārī

khedānapanayatu yātudhāno me || 54 ||

tasyā uttaradeśe

dhavalāṅgo vipulajhaṣavarārūḍhaḥ |

pāśāyudhāttapāṇiḥ

pāśī vidalayatu pāśajālāni || 55 ||

vande taduttarahari-

-tkoṇe vāyuṃ camūruvaravāham |

korakitatattvabodhā-

-ngorakṣapramukhayogino'pi muhuḥ || 56 ||

taruṇīriḍāpradhānā-

-stisro vātasya tasya kṛtavāsāḥ |

pratyagrakāpiśāyana-

-pānaparibhrāntalocanāḥ kalaye || 57 ||

tallokapūrvabhāge

dhanadaṃ dhyāyāmi śevadhikuleśam |

api māṇibhadramukhyā-

-nambācaraṇāvalambino yakṣān || 58 ||

tasyaiva pūrvasīmani

tapanīyāracitagopure nagare |

kātyāyanīsahāyaṃ

kalaye śītāṃśukhaṇḍacūḍālam || 59 ||

tatpuraṣoḍaśavaraṇa-

-sthalabhājastaruṇacandracūḍālān |

rudrādhyāye paṭhitā-

-nrudrāṇīsahacarānbhaje rudrān || 60 ||

pavamānasaṅkhyayojana-

-dūre bālatṛṇmecakastasya |

sālo marakataracitaḥ

sampadamacalāṃ śriyaṃ ca puṣṇātu || 61 ||

āvṛtiyugmāntarato

haritamaṇīnivahamecake deśe |

hāṭakatālīvipinaṃ

hālāghaṭaghaṭitaviṭapamākalaye || 62 ||

tatraiva mantriṇīgṛha-

-pariṇāhaṃ taralaketanaṃ sadanam |

marakatasaudhamanojñaṃ

dadyādāyūṃṣi daṇḍanāthāyāḥ || 63 ||

sadane tatra harinmaṇi-

-saṅghaṭite maṇḍape śatastambhe |

kārtasvaramayapīṭhe

kanakamayāmburuhakarṇikāmadhye || 64 ||

bindutrikoṇavartula-

-ṣaḍasravṛttadvayānvite cakre |

sañcāriṇī daśottara-

śatārṇamanurājakamalakalahaṃsī || 65 ||

kolavadanā kuśeśaya-

-nayanā kokārimaṇḍitaśikhaṇḍā |

santaptakāñcanābhā

sandhyāruṇacelasaṃvṛtanitambā || 66 ||

halamusalaśaṅkhacakrā-

-'ṅkuśapāśābhayavarasphuritahastā |

kūlaṅkaṣānukampā

kuṅkumajambālitastanābhogā || 67 ||

dhūrtānāmatidūrā-

-vārtāśeṣāvalagnakamanīyā |

ārtālīśubhadātrī

vārtālī bhavatu vāñchitārthāya || 68 ||

tasyāḥ parito devīḥ

svapneśyunmattabhairavīmukhyāḥ |

praṇamata jambhinyādyāḥ

bhairavavargāṃśca hetukapramukhān || 69 ||

pūrvoktasaṅkhyayojana-

-dūre pūyāṃśupāṭalastasya |

vidrāvayatu madārtiṃ

vidrumasālo viśaṅkaṭadvāraḥ || 70 ||

āvaraṇayoraharniśa-

-mantarabhūmauprakāśaśālinyām |

āsīnamambujāsana-

-mabhinavasindūragauramahamīḍe || 71 ||

varaṇasya tasya māruta-

-yojanato vipulagopuradvāraḥ |

sālo nānāratnaiḥ

saṅghaṭitāṅgaḥ kṛṣīṣṭa madabhīṣṭam || 72 ||

antarakakṣyāmanayo-

-raviralaśobhāpicaṇḍiloddeśām |

māṇikyamaṇḍapākhyāṃ

mahatīmadhihṛdayamaniśamākalaye || 73 ||

tatra sthitaṃ prasannaṃ

taruṇatamālapravālakiraṇābham |

karṇāvalambikuṇḍala-

-kandalitābhīśukavacitakapolam || 74 ||

śoṇādharaṃ śucismita-

-meṇāṅkavadanamedhamānakṛpam |

mugdhaiṇamadaviśeṣaka-

-mudritaniṭilendurekhikāruciram || 75 ||

nālīkadalasahodara-

-nayanāñcalaghaṭitamanasijākūtam |

kamalākaṭhinapayodhara-

-kastūrīghusṛṇapaṅkiloraskam || 76 ||

cāmpeyagandhikaiśyaṃ

śampāsabrahmacārikauśeyam |

śrīvatsakaustubhadharaṃ

śritajanarakṣādhurīṇacaraṇābjam || 77 ||

kambusudarśanavilasa-

-tkarapadmaṃ kaṇṭhalolavanamālam |

mucukundamokṣaphaladaṃ

mukundamānandakandamavalambe || 78 ||

tadvaraṇottarabhāge

tārāpatibimbacumbinijaśṛṅgaḥ |

vividhamaṇīgaṇaghaṭito

vitaratu sālo vinirmalāṃ dhiṣaṇām || 79 ||

prākāradvitayāntara-

-kakṣyāṃ pṛthuratnanikarasaṅkīrṇām |

namata sahasrastambhaka-

-maṇḍapanāmnātiviśrutāṃ bhuvane || 80 ||

praṇumastatra bhavānī-

-sahacaramīśānamindukhaṇḍadharam |

śṛṅgāranāyikāmanu-

-śīlanabhājo'pi bhṛṅginandimukhān || 81 ||

tasyaiṇavāhayojana-

-dūre vande manomayaṃ vapram |

aṅkūranmaṇikiraṇā-

-mantarakakṣyāṃ ca nirmalāmanayoḥ || 82 ||

tatraivāmṛtavāpīṃ

taralataraṅgāvalīḍhataṭayugmām |

muktāmayakalahaṃsī-

-mudritakanakāravindasandohām || 83 ||

śakropalamayabhṛṅgī-

-saṅgītonmeṣaghoṣitadigantām |

kāñcanamayāṅgavilasa-

-tkāraṇḍavaṣaṇḍatāṇḍavamanojñām || 84 ||

kuruvindātmakahallaka-

-korakasuṣamāsamūhapāṭalitām |

kalaye sudhāsvarūpāṃ

kandalitāmandakairavāmodām || 85 ||

tadvāpikāntarāle tarale

maṇipotasīmni viharantīm |

sindūrapāṭalāṅgīṃ

sitakiraṇāṅkūrakalpitavataṃsām || 86 ||

parvendubimbavadanāṃ

pallavaśoṇādharasphuritahāsām |

kuṭilakabarīṃ kuraṅgī-

-śiśunayanāṃ kuṇḍalasphuritagaṇḍām || 87 ||

nikaṭasthapotanilayāḥ

śaktīḥ śayavidhṛtahemaśṛṅgajalaiḥ |

pariṣiñcantīṃ parita-

-stārāṃ tāruṇyagarvitāṃ vande || 88 ||

prāguktasaṅkhyayojanadūre

praṇamāmi buddhimayasālam |

anayorantarakakṣyā-

-maṣṭāpadapuṣṭamedinīṃ rucirām || 89 ||

kādambarīnidhānāṃ

kalayāmyānandavāpikāṃ tasyām |

śoṇāśmanivahanirmita-

-sopānaśreṇiśobhamānataṭīm || 90 ||

māṇikyataraṇinilayāṃ

madhye tasyā madāruṇakapolām |

amṛteśītyabhidhānā-

-mantaḥ kalayāmi vāruṇīṃ devīm || 91 ||

sauvarṇakenipātana-

-hastāḥ saundaryagarvitā devyaḥ |

tatpurataḥ sthitibhājo

vitarantvasmākamāyuṣo vṛddhim || 92 ||

tasya pṛṣadaśvayojana-

-dūre'haṅkārasālamatituṅgam |

vande tayośca madhye

kakṣyāṃ valamānamalayapavamānām || 93 ||

vinumo vimarśavāpīṃ

sauṣumnasudhāsvarūpiṇīṃ tatra |

velātilaṅghyavīcī-

-kolāhalabharitakūlavanavāṭīm || 94 ||

tatraiva salilamadhye

tāpiñchadalaprapañcasuṣamābhām |

śyāmalakañcukalasitāṃ

śyāmāviṭabimbaḍambaraharāsyām || 95 ||

ābhugnamasṛṇacillī-

-hasitāyugmaśarakārmukavilāsām |

mandasmitāñcitamukhīṃ

maṇimayatāṭaṅkamaṇḍitakapolām || 96 ||

kuruvindataraṇinilayāṃ

kulācalaspardhikucanamanmadhyām |

kuṅkumaviliptagātrīṃ

kurukullāṃ manasi kurmahe satatam || 97 ||

tatsālottarabhāge

bhānumayaṃ vapramāśraye dīptam |

madhyaṃ ca vipulamanayo-

-rmanye viśrāntamātapodgāram || 98 ||

tatra kuruvindapīṭhe

tāmarase kanakakarṇikāghaṭite |

āsīnamaruṇavāsasa-

-mamlānaprasavamālikābharaṇam || 99 ||

cakṣuṣmatīprakāśana-

-śakticchāyāsamāracitakelim |

māṇikyamukuṭaramyaṃ

manye mārtāṇḍabhairavaṃ hṛdaye || 100 ||

indumayasālamīḍe

tasyottaratastuṣāragirigauram |

atyantaśiśiramāruta-

-manayormadhyaṃ ca candrikodgāram || 101 ||

tatra prakāśamānaṃ

tārānikaraiḥ pariṣkṛtoddeśam |

amṛtamayakāntikandala-

-mantaḥ kalayāmi kundasitamindum || 102 ||

śṛṅgārasālamīḍe

śṛṅgollasitaṃ taduttare bhāge |

madhyasthale tayorapi

mahitāṃ śṛṅgārapūrvikāṃ parikhām || 103 ||

tatra maṇinausthitābhi-

-stapanīyāviracitāgrahastābhiḥ |

śṛṅgāradevatābhiḥ

sahitaṃ parikhādhipaṃ bhaje madanam || 104 ||

śṛṅgāravaraṇavaryasyottarataḥ

sakalavibudhasaṃsevyam |

cintāmaṇigaṇaracitaṃ

cintāṃ dūrīkarotu me sadanam || 105 ||

maṇisadanasālayoradhi-

-madhyaṃ daśatālabhūmiruhadīrghaiḥ |

parṇaiḥ suvarṇavarṇai-

-ryuktāṃ kāṇḍaiśca yojanottuṅgaiḥ || 106 ||

mṛdulaistālīpañcaka-

-mānairmilitāṃ ca kesarakadambaiḥ |

santatagalitamaranda-

-srotoniryanmilindasandohām || 107 ||

pāṭīrapavanabālaka-

-dhāṭīniryatparāgapiñjaritām |

kalahaṃsīkulakalakala-

-kūlaṅkaṣaninadanicayakamanīyām || 108 ||

padmāṭavīṃ bhajāmaḥ

parimalakallolapakṣmalopāntām |

[ devyarghyapātradhārī

tasyāḥ pūrvadiśi daśakalāyuktaḥ | ]

valayitamūrtirbhagavā-

-nvahniḥ krośonnataściraṃ pāyāt || 109 ||

tatrādhāre devyāḥ

pātrīrūpaḥ prabhākaraḥ śrīmān |

dvādaśakalāsameto

dhvāntaṃ mama bahulamāntaraṃ bhindyāt || 110 ||

tasmin dineśapātre

taraṅgitāmodamamṛtamayamarghyam |

candrakalātmakamamṛtaṃ

sāndrīkuryādamandamānandam || 111 ||

amṛte tasminnabhito

viharantyo vividhamaṇitaraṇibhājaḥ |

ṣoḍaśa kalāḥ sudhāṃśoḥ

śokāduttārayantu māmaniśam || 112 ||

tatraiva vihṛtibhājo

dhātṛmukhānāṃ ca kāraṇeśānām |

sṛṣṭyādirūpikāstāḥ

śamayantvakhilāḥ kalāśca santāpam || 113 ||

kīnāśavaruṇakinnara-

-rājadiganteṣu ratnagehasya |

kalayāmi tānyajasraṃ

kalayantvāyuṣyamarghyapātrāṇi || 114 ||

pātrasthalasya purataḥ

padmāramaṇavidhipārvatīśānām |

bhavanāni śarmaṇe no

bhavantu bhāsā pradīpitajaganti || 115 ||

sadanasyānalakoṇe

satataṃ praṇamāmi kuṇḍamāgneyam |

tatra sthitaṃ ca vahniṃ

taralaśikhājaṭilamambikājanakam || 116 ||

tasyāsuradiśi tādṛśa-

-ratnaparisphuritaparvanavakāḍhyam |

cakrātmakaṃ śatāṅgaṃ

śatayojanamunnataṃ bhaje divyam || 117 ||

tatraiva diśi niṣaṇṇaṃ

tapanīyadhvajaparamparāśliṣṭam |

rathamaparaṃ ca bhavānyā

racayāmo manasi ratnamayacūḍam || 118 ||

bhavanasya vāyubhāge

pariṣkṛto vividhavaijayantībhiḥ |

racayatu mudaṃ rathendraḥ

saciveśānyāḥ samastavandyāyāḥ || 119 ||

kurmo'dhihṛdayamaniśaṃ

kroḍāsyāyāḥ śatāṅgamūrdhanyam |

rudradiśi ratnadhāmno

ruciraśalākāprapañcakañcukitam || 120 ||

parito devīdhāmnaḥ

praṇītavāsā manusvarūpiṇyaḥ |

kurvantu raśmimālā-

-kṛtayaḥ kuśalāni devatā nikhilāḥ || 121 ||

prāgdvārasya bhavānī-

-dhāmnaḥ pārśvadvayāracitavāse |

mātaṅgīkiṭimukhyau

maṇisadane manasi bhāvayāmi ciram || 122 ||

yojanayugalābhogā

tatkrośapariṇāhayaiva bhittyā ca |

cintāmaṇigṛhabhūmi-

-rjīyādāmnāyamayacaturdvārā || 123 ||

dvāre dvāre dhāmnaḥ

piṇḍībhūtā navīnabimbābhāḥ |

vidadhatu vipulāṃ kīrtiṃ

divyā lauhityasiddhyo devyaḥ || 124 ||

maṇisadanasyāntarato

mahanīye ratnavedikāmadhye |

bindumayacakramīḍe

pīṭhānāmupari viracitāvāsam || 125 ||

cakrāṇāṃ sakalānāṃ

prathamamadhaḥ sīmaphalakavāstavyāḥ |

aṇimādisiddhayo mā-

-mavantu devī prabhāsvarūpiṇyaḥ || 126 ||

aṇimādisiddhiphalaka-

-syoparihariṇāṅkakhaṇḍakṛtacūḍāḥ |

bhadraṃ pakṣmalayantu

brāhmīpramukhāśca mātaro'smākam || 127 ||

tasyopari maṇiphalake

tāruṇyottuṅgapīnakucabhārāḥ |

saṅkṣobhiṇīpradhānāḥ

bhrānti vidrāvayantu daśa mudrāḥ || 128 ||

phalakatrayasvarūpe

pṛthule trailokyamohane cakre |

dīvyantu prakaṭākhyā-

-stāsāṃ kartrīṃ ca bhagavatī tripurā || 129 ||

tadupari vipule dhiṣṇye

taraladṛśastaruṇakokanadabhāsaḥ |

kāmākarṣiṇyādyāḥ

kalaye devīḥ kalādharaśikhaṇḍāḥ || 130 ||

sarvāśāparipūrakacakre-

-'smin guptayoginīsevyāḥ |

tripureśī mama duritaṃ

tudyāt kaṇṭhāvalambimaṇihārā || 131 ||

tasyopari maṇipīṭhe

tāmrāmbhoruhadalaprabhāśoṇāḥ |

dhyāyāmyanaṅgakusumā-

-pramukhā devīśca vidhṛtakūrpāsāḥ || 132 ||

saṅkṣobhakārake'smiṃ-

-ścakre śrītripurasundarī sākṣāt |

goptrī guptatarākhyāḥ

gopāyatu māṃ kṛpārdrayā dṛṣṭyā || 133 ||

saṅkṣobhiṇīpradhānāḥ

śaktīstasyordhvavalayakṛtavāsāḥ |

ālolanīlaveṇī-

-rantaḥ kalayāmi yauvanonmattāḥ || 134 ||

saubhāgyadāyake'smiṃ-

-ścakreśī tripuravāsinī jīyāt |

śaktīśca sampradāyābhidhāḥ

samastāḥ pramodayantvaniśam || 135 ||

maṇipīṭhopari tāsāṃ

mahati caturhastavistṛte valaye |

santataviracitavāsāḥ

śaktīḥ kalayāmi sarvasiddhimukhāḥ || 136 ||

sarvārthasādhakākhye

cakre'muṣmin samastaphaladātrī |

tripurā śrīrmama kuśalaṃ

diśatāduttīrṇayoginīsevyā || 137 ||

tāsāṃ nilayasyopari

dhiṣṇye kausumbhakañcukamanojñāḥ |

sarvājñādyāḥ devyaḥ

sakalāḥ sampādayantu mama kīrtim || 138 ||

cakre samastarakṣā-

-karanāmnyasmin samastajanasevyām |

manasi nigarbhāsahitāṃ

manye śrītripuramālinīṃ devīm || 139 ||

sarvajñāsadanasyopari

cakre vipule samākalitagehāḥ |

vande vaśinīmukhyāḥ

śaktīḥ sindūrareṇurucaḥ || 140 ||

śrīsarvarogaharākhya-

-cakre'smiṃstripurapūrvikāṃ siddhām |

vande rahasyanāmnā

vedyābhiḥ śaktibhiḥ sadā sevyām || 141 ||

vaśinīgṛhopariṣṭā-

-dviṃśatihastonnate mahāpīṭhe |

śamayantu śatrubṛndaṃ

śastrāṇyastrāṇi cādidampatyoḥ || 142 ||

śastrasadanopariṣṭā-

-dvalaye valavairiratnasaṅghaṭite |

kāmeśvarīpradhānāḥ

kalaye devīḥ samastajanavandyāḥ || 143 ||

cakre'tra sarvasiddhiprada-

-nāmani sarvaphaladātrī |

tripurāmbāvatu satataṃ

parāpararahasyayoginīsevyā || 144 ||

kāmeśvarīgṛhoparivalaye

vividhamanusampradāyajñāḥ |

catvāro yuganāthā

jayantu mitreśapūrvakāḥ guravaḥ || 145 ||

nāthabhavanopariṣṭā-

-nnānāratnacayamedure pīṭhe |

kāmeśyādyā nityāḥ

kalayantu mudaṃ tithisvarūpiṇyaḥ || 146 ||

nityāsadanasyopari

nirmalamaṇinivahaviracite dhiṣṇye |

kuśalaṃ ṣaḍaṅgadevyaḥ

kalayantvasmākamuttaralanetrāḥ || 147 ||

sadanasyopari tāsāṃ

sarvānandamayanāmake bindau |

pañcabrahmākārāṃ

mañcaṃ praṇamāmi maṇigaṇākīrṇam || 148 ||

parito maṇimañcasya

pralambamānā niyantritā pāśaiḥ |

māyāmayī javanikā

mama duritaṃ haratu mecakacchāyā || 149 ||

mañcasyopari lamba-

-nmadanīpunnāgamālikābharitam |

harigopamayavitānaṃ

haratādālasyamaniśamasmākam || 150 ||

paryaṅkasya bhajāmaḥ

pādānbimbāmbudenduhemarucaḥ |

ajaharirudreśamayā-

-nanalāsuramāruteśakoṇasthān || 151 ||

phalakaṃ sadāśivamayaṃ

praṇaumi sindūrareṇukiraṇābham |

ārabhyāṅgeśīnāṃ

sadanātkalitaṃ ca ratnasopānam || 152 ||

paṭṭopadhānagaṇḍaka-

-catuṣṭayasphuritapāṭalāstaraṇam |

paryaṅkopari ghaṭitaṃ

pātu ciraṃ haṃsatūlaśayanaṃ naḥ || 153 ||

tasyopari nivasantaṃ

tāruṇyaśrīniṣevitaṃ satatam |

āvṛntapullahallaka-

-marīcikāpuñjamañjulacchāyam || 154 ||

sindūraśoṇavasanaṃ

śītāṃśustabakacumbitakirīṭam |

kuṅkumatilakamanohara-

-kuṭilālikahasitakumudabandhuśiśum || 155 ||

pūrṇendubimbavadanaṃ

phullasarojātalocanatritayam |

taralāpāṅgataraṅgita-

-śapharāṅkanaśāstrasampradāyārtham || 156 ||

maṇimayakuṇḍalapuṣya-

-nmarīcikallolamāṃsalakapolam |

vidrumasahodarādhara-

-visṛmarasusmitakiśorasañcāram || 157 ||

āmodikusumaśekhara-

-mānīlabhrūlatāyugamanojñam |

vīṭīsaurabhavīcī-

-dviguṇitavaktrāravindasaurabhyam || 158 ||

pāśāṅkuśekṣucāpa-

-prasavaśarasphuritakomalakarābjam |

kāśmīrapaṅkilāṅgaṃ

kāmeśaṃ manasi kurmahe satatam || 159 ||

tasyāṅkabhuvi niṣaṇṇāṃ

taruṇakadambaprasūnakiraṇābhām |

śītāṃśukhaṇḍacūḍāṃ

sīmantanyastasāndrasindūrām || 160 ||

kuṅkumalalāmabhāsva-

-nniṭilāṃ kuṭilataracillikāyugalām |

nālīkatulyanayanāṃ

nāsāñcalanaṭitamauktikābharaṇām || 161 ||

aṅkuritamandahāsa-

-maruṇādharakāntivijitabimbābhām |

kastūrīmakarīyuta-

-kapolasaṅkrāntakanakatāṭaṅkām || 162 ||

karpūrasāndravīṭī-

-kabalitavadanāravindakamanīyām |

kambusahodarakaṇṭha-

-pralambamānācchamauktikakalāpām || 163 ||

kahlāradāmakomala-

-bhujayugalasphuritaratnakeyūrām |

karapadmamūlavilasa-

-tkāñcanamayakaṭakavalayasandohām || 164 ||

pāṇicatuṣṭayavilasa-

-tpāśāṅkuśapuṇḍracāpapuṣpāstrām |

kūlaṅkaṣakucaśikharāṃ

kuṅkumakardamitaratnakūrpāsām || 165 ||

aṇudāyādavalagnā-

-mambudaśobhāsanābhiromalatām |

māṇikyakhacitakāñcī-

-marīcikākrāntamāṃsalanitambām || 166 ||

karabhorukāṇḍayugalāṃ

jaṅghājitakāmajaitratūṇīrām |

prapadaparibhūtakūrmāṃ

pallavasacchāyapadayugamanojñām || 167 ||

kamalabhavakañjalocana-

-kirīṭaratnāṃśurañjitapadābjām |

unmastakānukampā-

-muttaralāpāṅgapoṣitānaṅgām || 168 ||

ādimarasāvalambā-

-manidaṃ prathamoktivallarīkalikām |

ābrahmakīṭajananī-

-mantaḥ kalayāmi sundarīmaniśam || 169 ||

kastu kṣitau paṭīyā-

-nvastu stotuṃ śivāṅkavāstavyam |

astu cirantanasukṛtaiḥ

prastutakāmyāya tanmama purastāt || 170 ||

prabhusammitoktigamyaṃ

paramaśivotsaṅgatuṅgaparyaṅkam |

tejaḥ kiñcana divyaṃ

purato me bhavatu puṇḍrakodaṇḍam || 171 ||

madhurimabharitaśarāsaṃ

makarandasyandimārgaṇodāram |

kairaviṇīviṭacūḍaṃ

kaivalyāyāstu kiñcana maho naḥ || 172 ||

akṣudramikṣucāpaṃ

parokṣamavalagnasīmni tryakṣam |

kṣapayatu me kṣemetara-

-mukṣarathapremapakṣmalaṃ tejaḥ || 173 ||

bhṛṅgarucisaṅgarakarāpāṅgaṃ

śṛṅgāratuṅgamaruṇāṅgam |

maṅgalamabhaṅguraṃ me

ghaṭayatu gaṅgādharāṅgasaṅgi mahaḥ || 174 ||

prapadājitakūrmamūrjita-

-karuṇaṃ bharmarucinirmathanadeham |

śritavarma marma śambhoḥ

kiñcana mama narma śarma nirmātu || 175 ||

kālakuralālikālima-

-kandalavijitāli vidhṛtamaṇivāli |

milatu hṛdi pulinajaghanaṃ

bahulitagalagaralakeli kimapi mahaḥ || 176 ||

kuṅkumatilakitaphālā

kuruvindacchāyapāṭaladukūlā |

karuṇāpayodhivelā

kācana citte cakāstu me līlā || 177 ||

puṣpandhayaruciveṇyaḥ

pulinābhogatrapākaraśreṇyaḥ |

jīyāsurikṣupāṇyaḥ

kāścana kāmārikelisākṣiṇyaḥ || 178 ||

tapanīyāṃśukabhāṃsi

drākṣāmādhuryanāstikavacāṃsi |

katicana śucaṃ mahāṃsi

kṣapayatu kapālitoṣitamanāṃsi || 179 ||

asitakacamāyatākṣaṃ

kusumaśaraṃ kūlamudvahakṛpārdram |

ādimarasādhidaivata-

-mantaḥ kalaye harāṅkavāsi mahaḥ || 180 ||

karṇopāntataraṅgita-

-kaṭākṣavispandikaṇṭhadaghnakṛpām |

kāmeśvarāṅkanilayāṃ

kāmapi vidyāṃ purātanīṃ kalaye || 181 ||

aravindakāntyaruntuda-

-vilocanadvandvasundaramukhendu |

chandaḥ kandalamandira-

-mantaḥpuramainduśekharaṃ vande || 182 ||

bimbinikurambaḍambara-

-viḍambakacchāyamambaravalagnam |

kambugalamambudakucaṃ

bimbokaṃ kamapi cumbatu mano me || 183 ||

kamapi kamanīyarūpaṃ

kalayāmyantaḥ kadambakusumāḍhyam |

campakarucirasuveṣaiḥ

sampāditakāntyalaṅkṛtadigantam || 184 ||

śampārucibhara-

-garhāsampādakakāntikavacitadigantam |

siddhāntaṃ nigamānāṃ

śuddhāntaṃ kimapi śūlinaḥ kalaye || 185 ||

udyaddinakaraśoṇā-

-nutpalabandhustanandhayāpīḍān |

karakalitapuṇḍracāpā-

-nkalaye kānapi kapardinaḥ prāṇān || 186 ||

raśanālasajjaghanayā

rasanājīvātucāpabhāsurayā |

ghrāṇāyuṣkaraśarayā

ghrātaṃ cittaṃ kayāpi vāsanayā || 187 ||

sarasijasahayudhvadṛśā

śampālatikāsanābhivigrahayā |

bhāsā kayāpi ceto

nāsāmaṇiśobhivadanayā bharitam || 188 ||

navayāvakābhasicayānvitayā

gajayānayā dayāparayā |

dhṛtayāminīśakalayā

dhiyā kayāpi kṣatāmayā hi vayam || 189 ||

alamalamakusumabāṇai-

-rabimbaśoṇairapuṇḍrakodaṇḍaiḥ |

akumudabāndhavacūḍai-

-ranyairiha jagati daivataṃ manyaiḥ || 190 ||

kuvalayasadṛkṣanayanaiḥ

kulagirikūṭasthabandhukucabhāraiḥ |

karuṇāspandikaṭākṣaiḥ

kavacitacitto'smi katipayaiḥ kutukaiḥ || 191 ||

natajanasulabhāya namo

nālīkasanābhilocanāya namaḥ |

nanditagiriśāya namo

mahase navanīpapāṭalāya namaḥ || 192 ||

kādambakusumadāmne

kāyacchāyākaṇāyitāryamṇe |

sīmne cirantanagirāṃ

bhūmne kasmaicidādade praṇatim || 193 ||

kuṭilakabarībharebhyaḥ

kuṅkumasabrahmacārikiraṇebhyaḥ |

kūlaṅkaṣastanebhyaḥ

kurmaḥ praṇatiṃ kulādrikutukebhyaḥ || 194 ||

kokanadaśoṇacaraṇā-

-tkomalakuralālivijitaśaivālāt |

utpalasagandhinayanā-

-durarīkurmo na devatamānyām || 195 ||

āpāṭalādharāṇā-

-mānīlasnigdhabarbarakacānām |

āmnāyajīvanānā-

-mākūtānāṃ harasya dāso'ham || 196 ||

puṅkhitavilāsahāsa-

-sphuritāsu purāhitāṅkanilayāsu |

magnaṃ mano madīyaṃ

kāsvapi kāmārijīvanāḍīṣu || 197 ||

lalitā pātu śiro me

lalāṭamambā ca madhumatīrūpā |

bhrūyugmaṃ ca bhavānī

puṣpaśarā pātu locanadvandvam || 198 ||

pāyānnāsāṃ bālā

subhagā dantāṃśca sundarī jihvām |

adharoṣṭhamādiśakti-

-ścakreśī pātu me ciraṃ cibukam || 199 ||

kāmeśvarī ca karṇau

kāmākṣī pātu gaṇḍayoryugalam |

śṛṅgāranāyikāvyā-

-dvadanaṃ siṃhāsaneśvarī ca galam || 200 ||

skandaprasūśca pātu

skandhau bāhū ca pāṭalāṅgī me |

pāṇī ca padmanilayā

pāyādaniśaṃ nakhāvalīrvijayā || 201 ||

kodaṇḍinī ca vakṣaḥ

kukṣiṃ cāvyāt kulācalatanūjā |

kalyāṇī ca valagnaṃ

kaṭiṃ ca pāyātkalādharaśikhaṇḍā || 202 ||

ūrudvayaṃ ca pāyā-

-dumā mṛḍānī ca jānunī rakṣet |

jaṅghe ca ṣoḍaśī me

pāyāt pādau ca pāśasṛṇihastā || 203 ||

prātaḥ pātu parā māṃ

madhyāhne pātu maṇigṛhādhīśā |

śarvāṇyavatu ca sāyaṃ

pāyādrātrau ca bhairavī sākṣāt || 204 ||

bhāryāṃ rakṣatu gaurīṃ

pāyāt putrāṃśca bindugṛhapīṭhā |

śrīvidyā ca yaśo me

śīlaṃ cāvyācciraṃ mahārājñī || 205 ||

pavanamayi pāvakamayi

kṣoṇīmayi gaganamayi kṛpīṭamayi |

ravimayi śaśimayi diṅmayi

samayamayi prāṇamayi śive pāhi || 206 ||

kāli kapālini śūlini

bhairavi mātaṅgi pañcami tripure |

vāgdevi vindhyavāsini

bāle bhuvaneśi pālaya ciraṃ mām || 207 ||

abhinavasindūrābhā-

-mamba tvāṃ cintayanti ye hṛdaye |

upari nipatanti teṣā-

-mutpalanayanākaṭākṣakallolāḥ || 208 ||

vargāṣṭakamilitābhi-

-rvaśinīmukhyābhirāvṛtāṃ bhavatīm |

cintayatāṃ sitavarṇāṃ

vāco niryāntyayatnato vadanāt || 209 ||

kanakaśalākāgaurīṃ

karṇavyālolakuṇḍaladvitayām |

prahasitamukhīṃ ca bhavatīṃ

dhyāyanto ye ta eva bhūdhanadāḥ || 210 ||

śīrṣāmbhoruhamadhye

śītalapīyūṣavarṣiṇīṃ bhavatīm |

anudinamanucintayatā-

-māyuṣyaṃ bhavati puṣkalamavanyām || 211 ||

madhurasmitāṃ madāruṇanayanāṃ

mātaṅgakumbhavakṣojām |

candravataṃsinīṃ tvāṃ

savidhe paśyanti sukṛtinaḥ kecit || 212 ||

lalitāyāḥ stavaratnaṃ

lalitapadābhiḥ praṇītamāryābhiḥ |

pratidinamavanau paṭhatāṃ

phalāni vaktuṃ pragalbhate saiva || 213 ||

sadasadanugrahanigraha-

-gṛhītamunivigraho bhagavān |

sarvāsāmupaniṣadāṃ

durvāsā jayati deśikaḥ prathamaḥ || 214 ||

iti maharṣidurvāsaḥ viracitaṃ śrīlalitāstavaratnam |

Sanskrit — Devanagari (original)

वन्दे गजेन्द्रवदनं

वामाङ्कारूढवल्लभाश्लिष्टम् ।

कुङ्कुमपरागशोणं

कुवलयिनीजारकोरकापीडम् ॥ 1 ॥

स जयति सुवर्णशैलः

सकलजगच्चक्रसङ्घटितमूर्तिः ।

काञ्चननिकुञ्जवाटी-

-कन्दलदमरीप्रपञ्चसङ्गीतः ॥ 2 ॥

हरिहयनैरृतमारुत-

-हरितामन्तेष्ववस्थितं तस्य ।

विनुमः सानुत्रितयं

विधिहरिगौरीशविष्टपाधारम् ॥ 3 ॥

मध्ये पुनर्मनोहर-

-रत्नरुचिस्तबकरञ्जितदिगन्तम् ।

उपरि चतुःशतयोजन-

-मुत्तुङ्गं शृङ्गपुङ्गवमुपासे ॥ 4 ॥

तत्र चतुःशतयोजन-

-परिणाहं देवशिल्पिना रचितम् ।

नानासालमनोज्ञं

नमाम्यहं नगरमादिविद्यायाः ॥ 5 ॥

प्रथमं सहस्रपूर्वक-

-षट्शतसङ्ख्याकयोजनं परितः ।

वलयीकृतस्वगात्रं

वरणं शरणं व्रजाम्ययोरूपम् ॥ 6 ॥

तस्योत्तरे समीरण-

-योजनदूरे तरङ्गितच्छायः ।

घटयतु मुदं द्वितीयो

घण्टास्तनसारनिर्मितः सालः ॥ 7 ॥

उभयोरन्तरसीम-

-न्युद्दामभ्रमररञ्जितोदारम् ।

उपवनमुपास्महे वय-

-मूरीकृतमन्दमारुतस्यन्दम् ॥ 8 ॥

आलिङ्ग्य भद्रकाली-

-मासीनस्तत्र हरिशिलाश्यामाम् ।

मनसि महाकालो मे

विहरतु मधुपानविभ्रमन्नेत्रः ॥ 9 ॥

तार्तीयीको वरण-

-स्तस्योत्तरसीम्नि वातयोजनतः ।

ताम्रेण रचितमूर्ति-

-स्तनुतामाचन्द्रतारकं भद्रम् ॥ 10 ॥

मध्ये तयोश्च मणिमय-

-पल्लवशाखाप्रसूनपक्ष्मलिताम् ।

कल्पानोकहवाटीं

कलये मकरन्दपङ्किलावालाम् ॥ 11 ॥

तत्र मधुमाधवश्री-

-तरुणीभ्यां तरलदृक्चकोराभ्याम् ।

आलिङ्गितोऽवतान्मा-

-मनिशं प्रथमर्तुरात्तपुष्पास्त्रः ॥ 12 ॥

नमत तदुत्तरभागे

नाकिपथोल्लङ्घिशृङ्गसङ्घातम् ।

सीसाकृतिं तुरीयं

सितकिरणालोकनिर्मलं सालम् ॥ 13 ॥

सालद्वयान्तराले

सरलालिकपोतचाटुसुभगायाम् ।

सन्तानवाटिकायां

सक्तं चेतोऽस्तु सततमस्माकम् ॥ 14 ॥

तत्र तपनातिरूक्षः

साम्राज्ञीचरणसान्द्रितस्वान्तः ।

शुक्रशुचिश्रीसहितो

ग्रीष्मर्तुर्दिशतु कीर्तिमाकल्पम् ॥ 15 ॥

उत्तरसीमनि तस्यो-

-न्नतशिखरोत्कम्पिहाटकपताकः ।

प्रकटयतु पञ्चमो नः

प्राकारः कुशलमारकूटमयः ॥ 16 ॥

प्राकारयोश्च मध्ये

पल्लवितान्यभृतपञ्चमोन्मेषा ।

हरिचन्दनद्रुवाटी-

-हरतादामूलमस्मदनुतापम् ॥ 17 ॥

तत्र नभः श्रीमुख्यै-

-स्तरुणीवर्गैः समन्वितः परितः ।

वज्राट्टहासमुखरो

वाञ्छापूर्तिं तनोतु वर्षर्तुः ॥ 18 ॥

मारुतयोजनदूरे

महनीयस्तस्य चोत्तरे भागे ।

भद्रं कृषीष्ट षष्ठः

प्राकारः पञ्चलोहधातुमयः ॥ 19 ॥

अनयोर्मध्ये सन्तत-

-मङ्कूरद्दिव्यकुसुमगन्धायाम् ।

मन्दारवाटिकायां

मानसमङ्गीकरोतु मे विहृतिम् ॥ 20 ॥

तस्यामिषोर्जलक्ष्मी-

-तरुणीभ्यां शरदृतुः सदा सहितः ।

अभ्यर्चयन् स जीया-

-दम्बामामोदमेदुरैः कुसुमैः ॥ 21 ॥

तस्यर्षिसङ्ख्ययोजन-

-दूरे देदीप्यमानशृङ्गौघः ।

कलधौतकलितमूर्तिः

कल्याणं दिशतु सप्तमः सालः ॥ 22 ॥

मध्ये तयोर्मरुत्पथ

लङ्घितविटपाग्रविरुतकलकण्ठा ।

श्रीपारिजातवाटी

श्रियमनिशं दिशतु शीतलोद्देशा ॥ 23 ॥

तस्यामतिप्रियाभ्यां

सह खेलन् सहसहस्यलक्ष्मीभ्याम् ।

सामन्तो झषकेतो-

-र्हेमन्तो भवतु हेमवृद्ध्यै नः ॥ 24 ॥

उत्तरतस्तस्य महा-

-नुद्भटहुतभुक्शिखारुणमयूखः ।

तपनीयखण्डरचित-

-स्तनुतादायुष्यमष्टमो वरणः ॥ 25 ॥

कादम्बविपिनवाटी-

-मनयोर्मध्यभुवि कल्पितावासाम् ।

कलयामि सूनकोरक-

-कन्दलितामोदतुन्दिलसमीराम् ॥ 26 ॥

तस्यामतिशिशिराकृति-

-रासीनस्तपतपस्यलक्ष्मीभ्याम् ।

शिवमनिशं कुरुतान्मे

शिशिरर्तुः सततशीतलदिगन्तः ॥ 27 ॥

तस्यां कदम्बवाट्यां

तत्प्रसवामोदमिलितमधुगन्धम् ।

सप्तावरणमनोज्ञं

शरणं समुपैमि मन्त्रिणीशरणम् ॥ 28 ॥

तत्रालये विशाले

तपनीयारचिततरलसोपाने ।

माणिक्यमण्डपान्त-

-र्महिते सिंहासने सुमणिखचिते ॥ 29 ॥

बिन्दुत्रिपञ्चकोण-

-द्विपनृपवसुवेददलकुरेखाढ्ये ।

चक्रे सदा निविष्टां

षष्ठ्यष्टत्रिंशदक्षरेशानीम् ॥ 30 ॥

तापिञ्छमेचकाभां

तालीदलघटितकर्णताटङ्काम् ।

ताम्बूलपूरितमुखीं

ताम्राधरबिम्बदृष्टदरहासाम् ॥ 31 ॥

कुङ्कुमपङ्किलदेहां

कुवलयजीवातुशावकवतंसाम् ।

कोकनदशोणचरणां

कोकिलनिक्वाणकोमलालापाम् ॥ 32 ॥

वामाङ्गगलितचूलीं

वनमाल्यकदम्बमालिकाभरणाम् ।

मुक्ताललन्तिकाञ्चित

मुग्धालिकमिलितचित्रकोदाराम् ॥ 33 ॥

करविधृतकीरशावक-

-कलनिनदव्यक्तनिखिलनिगमार्थाम् ।

वामकुचसङ्गिवीणावादन-

-सौख्यार्धमीलिताक्षियुगाम् ॥ 34 ॥

आपाटलांशुकधरा-

-मादिरसोन्मेषवासितकटाक्षाम् ।

आम्नायसारगुलिका-

-माद्यां सङ्गीतमातृकां वन्दे ॥ 35 ॥

तस्य च सुवर्णसाल-

-स्योत्तरतस्तरुणकुङ्कुमच्छायः ।

शमयतु मम सन्तापं

सालो नवमः स पुष्परागमयः ॥ 36 ॥

अनयोरन्तरवसुधाः

प्रणुमः प्रत्यग्रपुष्परागमयीः ।

सिंहासनेश्वरीमनु-

-चिन्तननिस्तन्द्रसिद्धनीरन्ध्राः ॥ 37 ॥

तत्सालोत्तरदेशे

तरुणजपाकिरणधोरणीशोणः ।

प्रशमयतु पद्मराग-

-प्राकारो मम पराभवं दशमः ॥ 38 ॥

अन्तरभूकृतवासा-

-ननयोरपनीतचित्तवैमत्यान् ।

चक्रेशीपदभक्तां-

-श्चारणवर्गानहर्निशं कलये ॥ 39 ॥

सारङ्गवाहयोजनदूरे-

-ऽसङ्घटितकेतनस्तस्य ।

गोमेदकेन रचितो

गोपायतु मां समुन्नतः सालः ॥ 40 ॥

वप्रद्वयान्तरोर्व्यां

वटुकैर्विविधैश्च योगिनीबृन्दैः ।

सततं समर्चितायाः

सङ्कर्षण्याः प्रणौमि चरणाब्जम् ॥ 41 ॥

तापसयोजनदूरे

तस्य समुत्तुङ्ग गोपुरोपेतः ।

वाञ्छापूर्त्यै भवता-

-द्वज्रमणीनिकरनिर्मितो वप्रः ॥ 42 ॥

वरणद्वितयान्तरतो

वासजुषो विहितमधुरसास्वादाः ।

रम्भादिविबुधवेश्या

रचयन्तु महान्तमस्मदानन्दम् ॥ 43 ॥

तत्र सदा प्रवहन्ती

तटिनी वज्राभिधा चिरं जीयात् ।

चटुलोर्मिजालनृत्य-

-त्कलहंसीकुलकलक्वणितपुष्टा ॥ 44 ॥

रोधसि तस्या रुचिरे

वज्रेशी जयति वज्रभूषाढ्या ।

वज्रप्रदानतोषित-

-वज्रिमुखत्रिदशविनुतचारित्रा ॥ 45 ॥

तस्योदीच्यां हरिति

स्तवकितसुषमावलीढवियदन्तः ।

वैडूर्यरत्नरचितो

वैमल्यं दिशतु चेतसो वरणः ॥ 46 ॥

अधिमध्यमेतयोः पुन-

-रम्बाचरणावलम्बितस्वान्तान् ।

कार्कोटकादिनागान्

कलयामः किं च बलिमुखान् दनुजान् ॥ 47 ॥

गन्धवहसङ्ख्ययोजन-

-दूरे गगनोर्ध्वजाङ्घिकस्तस्य ।

वासवमणिप्रणीतो

वरणो बहलयतु वैदुषीं विशदाम् ॥ 48 ॥

मध्यक्षोण्यामनयो-

-र्महेन्द्रनीलात्मकानि च सरांसि ।

शातोदरीसहाया-

-न्भूपालानपि पुनः पुनः प्रणुमः ॥ 49 ॥

आशुगयोजनदूरे

तस्योर्ध्वं कान्तिधवलितदिगन्तः ।

मुक्ताविरचितगात्रो

मुहुरस्माकं मुदे भवतु सालः ॥ 50 ॥

आवृत्त्योरधिमध्यं

पूर्वस्यां दिशि पुरन्दरः श्रीमान् ।

अभ्रमुविटाधिरूढो

विभ्रममस्माकमनिशमातनुतात् ॥ 51 ॥

तत्कोणे व्यजनस्रु-

-क्तोमरपात्रस्रुवान्नशक्तिधरः ।

स्वाहास्वधासमेतः

सुखयतु मां हव्यवाहनः सुचिरम् ॥ 52 ॥

दक्षिणदिगन्तराले

दण्डधरो नीलनीरदच्छायः ।

त्रिपुरापदाब्जभक्तस्तिरयतु

मम निखिलमंहसां निकरम् ॥ 53 ॥

तस्यैव पश्चिमायां

दिशि दलितेन्दीवरप्रभाश्यामः ।

खेटासियष्टिधारी

खेदानपनयतु यातुधानो मे ॥ 54 ॥

तस्या उत्तरदेशे

धवलाङ्गो विपुलझषवरारूढः ।

पाशायुधात्तपाणिः

पाशी विदलयतु पाशजालानि ॥ 55 ॥

वन्दे तदुत्तरहरि-

-त्कोणे वायुं चमूरुवरवाहम् ।

कोरकिततत्त्वबोधा-

-न्गोरक्षप्रमुखयोगिनोऽपि मुहुः ॥ 56 ॥

तरुणीरिडाप्रधाना-

-स्तिस्रो वातस्य तस्य कृतवासाः ।

प्रत्यग्रकापिशायन-

-पानपरिभ्रान्तलोचनाः कलये ॥ 57 ॥

तल्लोकपूर्वभागे

धनदं ध्यायामि शेवधिकुलेशम् ।

अपि माणिभद्रमुख्या-

-नम्बाचरणावलम्बिनो यक्षान् ॥ 58 ॥

तस्यैव पूर्वसीमनि

तपनीयारचितगोपुरे नगरे ।

कात्यायनीसहायं

कलये शीतांशुखण्डचूडालम् ॥ 59 ॥

तत्पुरषोडशवरण-

-स्थलभाजस्तरुणचन्द्रचूडालान् ।

रुद्राध्याये पठिता-

-न्रुद्राणीसहचरान्भजे रुद्रान् ॥ 60 ॥

पवमानसङ्ख्ययोजन-

-दूरे बालतृण्मेचकस्तस्य ।

सालो मरकतरचितः

सम्पदमचलां श्रियं च पुष्णातु ॥ 61 ॥

आवृतियुग्मान्तरतो

हरितमणीनिवहमेचके देशे ।

हाटकतालीविपिनं

हालाघटघटितविटपमाकलये ॥ 62 ॥

तत्रैव मन्त्रिणीगृह-

-परिणाहं तरलकेतनं सदनम् ।

मरकतसौधमनोज्ञं

दद्यादायूंषि दण्डनाथायाः ॥ 63 ॥

सदने तत्र हरिन्मणि-

-सङ्घटिते मण्डपे शतस्तम्भे ।

कार्तस्वरमयपीठे

कनकमयाम्बुरुहकर्णिकामध्ये ॥ 64 ॥

बिन्दुत्रिकोणवर्तुल-

-षडस्रवृत्तद्वयान्विते चक्रे ।

सञ्चारिणी दशोत्तर-

शतार्णमनुराजकमलकलहंसी ॥ 65 ॥

कोलवदना कुशेशय-

-नयना कोकारिमण्डितशिखण्डा ।

सन्तप्तकाञ्चनाभा

सन्ध्यारुणचेलसंवृतनितम्बा ॥ 66 ॥

हलमुसलशङ्खचक्रा-

-ऽङ्कुशपाशाभयवरस्फुरितहस्ता ।

कूलङ्कषानुकम्पा

कुङ्कुमजम्बालितस्तनाभोगा ॥ 67 ॥

धूर्तानामतिदूरा-

-वार्ताशेषावलग्नकमनीया ।

आर्तालीशुभदात्री

वार्ताली भवतु वाञ्छितार्थाय ॥ 68 ॥

तस्याः परितो देवीः

स्वप्नेश्युन्मत्तभैरवीमुख्याः ।

प्रणमत जम्भिन्याद्याः

भैरववर्गांश्च हेतुकप्रमुखान् ॥ 69 ॥

पूर्वोक्तसङ्ख्ययोजन-

-दूरे पूयांशुपाटलस्तस्य ।

विद्रावयतु मदार्तिं

विद्रुमसालो विशङ्कटद्वारः ॥ 70 ॥

आवरणयोरहर्निश-

-मन्तरभूमौप्रकाशशालिन्याम् ।

आसीनमम्बुजासन-

-मभिनवसिन्दूरगौरमहमीडे ॥ 71 ॥

वरणस्य तस्य मारुत-

-योजनतो विपुलगोपुरद्वारः ।

सालो नानारत्नैः

सङ्घटिताङ्गः कृषीष्ट मदभीष्टम् ॥ 72 ॥

अन्तरकक्ष्यामनयो-

-रविरलशोभापिचण्डिलोद्देशाम् ।

माणिक्यमण्डपाख्यां

महतीमधिहृदयमनिशमाकलये ॥ 73 ॥

तत्र स्थितं प्रसन्नं

तरुणतमालप्रवालकिरणाभम् ।

कर्णावलम्बिकुण्डल-

-कन्दलिताभीशुकवचितकपोलम् ॥ 74 ॥

शोणाधरं शुचिस्मित-

-मेणाङ्कवदनमेधमानकृपम् ।

मुग्धैणमदविशेषक-

-मुद्रितनिटिलेन्दुरेखिकारुचिरम् ॥ 75 ॥

नालीकदलसहोदर-

-नयनाञ्चलघटितमनसिजाकूतम् ।

कमलाकठिनपयोधर-

-कस्तूरीघुसृणपङ्किलोरस्कम् ॥ 76 ॥

चाम्पेयगन्धिकैश्यं

शम्पासब्रह्मचारिकौशेयम् ।

श्रीवत्सकौस्तुभधरं

श्रितजनरक्षाधुरीणचरणाब्जम् ॥ 77 ॥

कम्बुसुदर्शनविलस-

-त्करपद्मं कण्ठलोलवनमालम् ।

मुचुकुन्दमोक्षफलदं

मुकुन्दमानन्दकन्दमवलम्बे ॥ 78 ॥

तद्वरणोत्तरभागे

तारापतिबिम्बचुम्बिनिजशृङ्गः ।

विविधमणीगणघटितो

वितरतु सालो विनिर्मलां धिषणाम् ॥ 79 ॥

प्राकारद्वितयान्तर-

-कक्ष्यां पृथुरत्ननिकरसङ्कीर्णाम् ।

नमत सहस्रस्तम्भक-

-मण्डपनाम्नातिविश्रुतां भुवने ॥ 80 ॥

प्रणुमस्तत्र भवानी-

-सहचरमीशानमिन्दुखण्डधरम् ।

शृङ्गारनायिकामनु-

-शीलनभाजोऽपि भृङ्गिनन्दिमुखान् ॥ 81 ॥

तस्यैणवाहयोजन-

-दूरे वन्दे मनोमयं वप्रम् ।

अङ्कूरन्मणिकिरणा-

-मन्तरकक्ष्यां च निर्मलामनयोः ॥ 82 ॥

तत्रैवामृतवापीं

तरलतरङ्गावलीढतटयुग्माम् ।

मुक्तामयकलहंसी-

-मुद्रितकनकारविन्दसन्दोहाम् ॥ 83 ॥

शक्रोपलमयभृङ्गी-

-सङ्गीतोन्मेषघोषितदिगन्ताम् ।

काञ्चनमयाङ्गविलस-

-त्कारण्डवषण्डताण्डवमनोज्ञाम् ॥ 84 ॥

कुरुविन्दात्मकहल्लक-

-कोरकसुषमासमूहपाटलिताम् ।

कलये सुधास्वरूपां

कन्दलितामन्दकैरवामोदाम् ॥ 85 ॥

तद्वापिकान्तराले तरले

मणिपोतसीम्नि विहरन्तीम् ।

सिन्दूरपाटलाङ्गीं

सितकिरणाङ्कूरकल्पितवतंसाम् ॥ 86 ॥

पर्वेन्दुबिम्बवदनां

पल्लवशोणाधरस्फुरितहासाम् ।

कुटिलकबरीं कुरङ्गी-

-शिशुनयनां कुण्डलस्फुरितगण्डाम् ॥ 87 ॥

निकटस्थपोतनिलयाः

शक्तीः शयविधृतहेमशृङ्गजलैः ।

परिषिञ्चन्तीं परित-

-स्तारां तारुण्यगर्वितां वन्दे ॥ 88 ॥

प्रागुक्तसङ्ख्ययोजनदूरे

प्रणमामि बुद्धिमयसालम् ।

अनयोरन्तरकक्ष्या-

-मष्टापदपुष्टमेदिनीं रुचिराम् ॥ 89 ॥

कादम्बरीनिधानां

कलयाम्यानन्दवापिकां तस्याम् ।

शोणाश्मनिवहनिर्मित-

-सोपानश्रेणिशोभमानतटीम् ॥ 90 ॥

माणिक्यतरणिनिलयां

मध्ये तस्या मदारुणकपोलाम् ।

अमृतेशीत्यभिधाना-

-मन्तः कलयामि वारुणीं देवीम् ॥ 91 ॥

सौवर्णकेनिपातन-

-हस्ताः सौन्दर्यगर्विता देव्यः ।

तत्पुरतः स्थितिभाजो

वितरन्त्वस्माकमायुषो वृद्धिम् ॥ 92 ॥

तस्य पृषदश्वयोजन-

-दूरेऽहङ्कारसालमतितुङ्गम् ।

वन्दे तयोश्च मध्ये

कक्ष्यां वलमानमलयपवमानाम् ॥ 93 ॥

विनुमो विमर्शवापीं

सौषुम्नसुधास्वरूपिणीं तत्र ।

वेलातिलङ्घ्यवीची-

-कोलाहलभरितकूलवनवाटीम् ॥ 94 ॥

तत्रैव सलिलमध्ये

तापिञ्छदलप्रपञ्चसुषमाभाम् ।

श्यामलकञ्चुकलसितां

श्यामाविटबिम्बडम्बरहरास्याम् ॥ 95 ॥

आभुग्नमसृणचिल्ली-

-हसितायुग्मशरकार्मुकविलासाम् ।

मन्दस्मिताञ्चितमुखीं

मणिमयताटङ्कमण्डितकपोलाम् ॥ 96 ॥

कुरुविन्दतरणिनिलयां

कुलाचलस्पर्धिकुचनमन्मध्याम् ।

कुङ्कुमविलिप्तगात्रीं

कुरुकुल्लां मनसि कुर्महे सततम् ॥ 97 ॥

तत्सालोत्तरभागे

भानुमयं वप्रमाश्रये दीप्तम् ।

मध्यं च विपुलमनयो-

-र्मन्ये विश्रान्तमातपोद्गारम् ॥ 98 ॥

तत्र कुरुविन्दपीठे

तामरसे कनककर्णिकाघटिते ।

आसीनमरुणवासस-

-मम्लानप्रसवमालिकाभरणम् ॥ 99 ॥

चक्षुष्मतीप्रकाशन-

-शक्तिच्छायासमारचितकेलिम् ।

माणिक्यमुकुटरम्यं

मन्ये मार्ताण्डभैरवं हृदये ॥ 100 ॥

इन्दुमयसालमीडे

तस्योत्तरतस्तुषारगिरिगौरम् ।

अत्यन्तशिशिरमारुत-

-मनयोर्मध्यं च चन्द्रिकोद्गारम् ॥ 101 ॥

तत्र प्रकाशमानं

तारानिकरैः परिष्कृतोद्देशम् ।

अमृतमयकान्तिकन्दल-

-मन्तः कलयामि कुन्दसितमिन्दुम् ॥ 102 ॥

शृङ्गारसालमीडे

शृङ्गोल्लसितं तदुत्तरे भागे ।

मध्यस्थले तयोरपि

महितां शृङ्गारपूर्विकां परिखाम् ॥ 103 ॥

तत्र मणिनौस्थिताभि-

-स्तपनीयाविरचिताग्रहस्ताभिः ।

शृङ्गारदेवताभिः

सहितं परिखाधिपं भजे मदनम् ॥ 104 ॥

शृङ्गारवरणवर्यस्योत्तरतः

सकलविबुधसंसेव्यम् ।

चिन्तामणिगणरचितं

चिन्तां दूरीकरोतु मे सदनम् ॥ 105 ॥

मणिसदनसालयोरधि-

-मध्यं दशतालभूमिरुहदीर्घैः ।

पर्णैः सुवर्णवर्णै-

-र्युक्तां काण्डैश्च योजनोत्तुङ्गैः ॥ 106 ॥

मृदुलैस्तालीपञ्चक-

-मानैर्मिलितां च केसरकदम्बैः ।

सन्ततगलितमरन्द-

-स्रोतोनिर्यन्मिलिन्दसन्दोहाम् ॥ 107 ॥

पाटीरपवनबालक-

-धाटीनिर्यत्परागपिञ्जरिताम् ।

कलहंसीकुलकलकल-

-कूलङ्कषनिनदनिचयकमनीयाम् ॥ 108 ॥

पद्माटवीं भजामः

परिमलकल्लोलपक्ष्मलोपान्ताम् ।

[ देव्यर्घ्यपात्रधारी

तस्याः पूर्वदिशि दशकलायुक्तः । ]

वलयितमूर्तिर्भगवा-

-न्वह्निः क्रोशोन्नतश्चिरं पायात् ॥ 109 ॥

तत्राधारे देव्याः

पात्रीरूपः प्रभाकरः श्रीमान् ।

द्वादशकलासमेतो

ध्वान्तं मम बहुलमान्तरं भिन्द्यात् ॥ 110 ॥

तस्मिन् दिनेशपात्रे

तरङ्गितामोदममृतमयमर्घ्यम् ।

चन्द्रकलात्मकममृतं

सान्द्रीकुर्यादमन्दमानन्दम् ॥ 111 ॥

अमृते तस्मिन्नभितो

विहरन्त्यो विविधमणितरणिभाजः ।

षोडश कलाः सुधांशोः

शोकादुत्तारयन्तु मामनिशम् ॥ 112 ॥

तत्रैव विहृतिभाजो

धातृमुखानां च कारणेशानाम् ।

सृष्ट्यादिरूपिकास्ताः

शमयन्त्वखिलाः कलाश्च सन्तापम् ॥ 113 ॥

कीनाशवरुणकिन्नर-

-राजदिगन्तेषु रत्नगेहस्य ।

कलयामि तान्यजस्रं

कलयन्त्वायुष्यमर्घ्यपात्राणि ॥ 114 ॥

पात्रस्थलस्य पुरतः

पद्मारमणविधिपार्वतीशानाम् ।

भवनानि शर्मणे नो

भवन्तु भासा प्रदीपितजगन्ति ॥ 115 ॥

सदनस्यानलकोणे

सततं प्रणमामि कुण्डमाग्नेयम् ।

तत्र स्थितं च वह्निं

तरलशिखाजटिलमम्बिकाजनकम् ॥ 116 ॥

तस्यासुरदिशि तादृश-

-रत्नपरिस्फुरितपर्वनवकाढ्यम् ।

चक्रात्मकं शताङ्गं

शतयोजनमुन्नतं भजे दिव्यम् ॥ 117 ॥

तत्रैव दिशि निषण्णं

तपनीयध्वजपरम्पराश्लिष्टम् ।

रथमपरं च भवान्या

रचयामो मनसि रत्नमयचूडम् ॥ 118 ॥

भवनस्य वायुभागे

परिष्कृतो विविधवैजयन्तीभिः ।

रचयतु मुदं रथेन्द्रः

सचिवेशान्याः समस्तवन्द्यायाः ॥ 119 ॥

कुर्मोऽधिहृदयमनिशं

क्रोडास्यायाः शताङ्गमूर्धन्यम् ।

रुद्रदिशि रत्नधाम्नो

रुचिरशलाकाप्रपञ्चकञ्चुकितम् ॥ 120 ॥

परितो देवीधाम्नः

प्रणीतवासा मनुस्वरूपिण्यः ।

कुर्वन्तु रश्मिमाला-

-कृतयः कुशलानि देवता निखिलाः ॥ 121 ॥

प्राग्द्वारस्य भवानी-

-धाम्नः पार्श्वद्वयारचितवासे ।

मातङ्गीकिटिमुख्यौ

मणिसदने मनसि भावयामि चिरम् ॥ 122 ॥

योजनयुगलाभोगा

तत्क्रोशपरिणाहयैव भित्त्या च ।

चिन्तामणिगृहभूमि-

-र्जीयादाम्नायमयचतुर्द्वारा ॥ 123 ॥

द्वारे द्वारे धाम्नः

पिण्डीभूता नवीनबिम्बाभाः ।

विदधतु विपुलां कीर्तिं

दिव्या लौहित्यसिद्ध्यो देव्यः ॥ 124 ॥

मणिसदनस्यान्तरतो

महनीये रत्नवेदिकामध्ये ।

बिन्दुमयचक्रमीडे

पीठानामुपरि विरचितावासम् ॥ 125 ॥

चक्राणां सकलानां

प्रथममधः सीमफलकवास्तव्याः ।

अणिमादिसिद्धयो मा-

-मवन्तु देवी प्रभास्वरूपिण्यः ॥ 126 ॥

अणिमादिसिद्धिफलक-

-स्योपरिहरिणाङ्कखण्डकृतचूडाः ।

भद्रं पक्ष्मलयन्तु

ब्राह्मीप्रमुखाश्च मातरोऽस्माकम् ॥ 127 ॥

तस्योपरि मणिफलके

तारुण्योत्तुङ्गपीनकुचभाराः ।

सङ्क्षोभिणीप्रधानाः

भ्रान्ति विद्रावयन्तु दश मुद्राः ॥ 128 ॥

फलकत्रयस्वरूपे

पृथुले त्रैलोक्यमोहने चक्रे ।

दीव्यन्तु प्रकटाख्या-

-स्तासां कर्त्रीं च भगवती त्रिपुरा ॥ 129 ॥

तदुपरि विपुले धिष्ण्ये

तरलदृशस्तरुणकोकनदभासः ।

कामाकर्षिण्याद्याः

कलये देवीः कलाधरशिखण्डाः ॥ 130 ॥

सर्वाशापरिपूरकचक्रे-

-ऽस्मिन् गुप्तयोगिनीसेव्याः ।

त्रिपुरेशी मम दुरितं

तुद्यात् कण्ठावलम्बिमणिहारा ॥ 131 ॥

तस्योपरि मणिपीठे

ताम्राम्भोरुहदलप्रभाशोणाः ।

ध्यायाम्यनङ्गकुसुमा-

-प्रमुखा देवीश्च विधृतकूर्पासाः ॥ 132 ॥

सङ्क्षोभकारकेऽस्मिं-

-श्चक्रे श्रीत्रिपुरसुन्दरी साक्षात् ।

गोप्त्री गुप्ततराख्याः

गोपायतु मां कृपार्द्रया दृष्ट्या ॥ 133 ॥

सङ्क्षोभिणीप्रधानाः

शक्तीस्तस्योर्ध्ववलयकृतवासाः ।

आलोलनीलवेणी-

-रन्तः कलयामि यौवनोन्मत्ताः ॥ 134 ॥

सौभाग्यदायकेऽस्मिं-

-श्चक्रेशी त्रिपुरवासिनी जीयात् ।

शक्तीश्च सम्प्रदायाभिधाः

समस्ताः प्रमोदयन्त्वनिशम् ॥ 135 ॥

मणिपीठोपरि तासां

महति चतुर्हस्तविस्तृते वलये ।

सन्ततविरचितवासाः

शक्तीः कलयामि सर्वसिद्धिमुखाः ॥ 136 ॥

सर्वार्थसाधकाख्ये

चक्रेऽमुष्मिन् समस्तफलदात्री ।

त्रिपुरा श्रीर्मम कुशलं

दिशतादुत्तीर्णयोगिनीसेव्या ॥ 137 ॥

तासां निलयस्योपरि

धिष्ण्ये कौसुम्भकञ्चुकमनोज्ञाः ।

सर्वाज्ञाद्याः देव्यः

सकलाः सम्पादयन्तु मम कीर्तिम् ॥ 138 ॥

चक्रे समस्तरक्षा-

-करनाम्न्यस्मिन् समस्तजनसेव्याम् ।

मनसि निगर्भासहितां

मन्ये श्रीत्रिपुरमालिनीं देवीम् ॥ 139 ॥

सर्वज्ञासदनस्योपरि

चक्रे विपुले समाकलितगेहाः ।

वन्दे वशिनीमुख्याः

शक्तीः सिन्दूररेणुरुचः ॥ 140 ॥

श्रीसर्वरोगहराख्य-

-चक्रेऽस्मिंस्त्रिपुरपूर्विकां सिद्धाम् ।

वन्दे रहस्यनाम्ना

वेद्याभिः शक्तिभिः सदा सेव्याम् ॥ 141 ॥

वशिनीगृहोपरिष्टा-

-द्विंशतिहस्तोन्नते महापीठे ।

शमयन्तु शत्रुबृन्दं

शस्त्राण्यस्त्राणि चादिदम्पत्योः ॥ 142 ॥

शस्त्रसदनोपरिष्टा-

-द्वलये वलवैरिरत्नसङ्घटिते ।

कामेश्वरीप्रधानाः

कलये देवीः समस्तजनवन्द्याः ॥ 143 ॥

चक्रेऽत्र सर्वसिद्धिप्रद-

-नामनि सर्वफलदात्री ।

त्रिपुराम्बावतु सततं

परापररहस्ययोगिनीसेव्या ॥ 144 ॥

कामेश्वरीगृहोपरिवलये

विविधमनुसम्प्रदायज्ञाः ।

चत्वारो युगनाथा

जयन्तु मित्रेशपूर्वकाः गुरवः ॥ 145 ॥

नाथभवनोपरिष्टा-

-न्नानारत्नचयमेदुरे पीठे ।

कामेश्याद्या नित्याः

कलयन्तु मुदं तिथिस्वरूपिण्यः ॥ 146 ॥

नित्यासदनस्योपरि

निर्मलमणिनिवहविरचिते धिष्ण्ये ।

कुशलं षडङ्गदेव्यः

कलयन्त्वस्माकमुत्तरलनेत्राः ॥ 147 ॥

सदनस्योपरि तासां

सर्वानन्दमयनामके बिन्दौ ।

पञ्चब्रह्माकारां

मञ्चं प्रणमामि मणिगणाकीर्णम् ॥ 148 ॥

परितो मणिमञ्चस्य

प्रलम्बमाना नियन्त्रिता पाशैः ।

मायामयी जवनिका

मम दुरितं हरतु मेचकच्छाया ॥ 149 ॥

मञ्चस्योपरि लम्ब-

-न्मदनीपुन्नागमालिकाभरितम् ।

हरिगोपमयवितानं

हरतादालस्यमनिशमस्माकम् ॥ 150 ॥

पर्यङ्कस्य भजामः

पादान्बिम्बाम्बुदेन्दुहेमरुचः ।

अजहरिरुद्रेशमया-

-ननलासुरमारुतेशकोणस्थान् ॥ 151 ॥

फलकं सदाशिवमयं

प्रणौमि सिन्दूररेणुकिरणाभम् ।

आरभ्याङ्गेशीनां

सदनात्कलितं च रत्नसोपानम् ॥ 152 ॥

पट्टोपधानगण्डक-

-चतुष्टयस्फुरितपाटलास्तरणम् ।

पर्यङ्कोपरि घटितं

पातु चिरं हंसतूलशयनं नः ॥ 153 ॥

तस्योपरि निवसन्तं

तारुण्यश्रीनिषेवितं सततम् ।

आवृन्तपुल्लहल्लक-

-मरीचिकापुञ्जमञ्जुलच्छायम् ॥ 154 ॥

सिन्दूरशोणवसनं

शीतांशुस्तबकचुम्बितकिरीटम् ।

कुङ्कुमतिलकमनोहर-

-कुटिलालिकहसितकुमुदबन्धुशिशुम् ॥ 155 ॥

पूर्णेन्दुबिम्बवदनं

फुल्लसरोजातलोचनत्रितयम् ।

तरलापाङ्गतरङ्गित-

-शफराङ्कनशास्त्रसम्प्रदायार्थम् ॥ 156 ॥

मणिमयकुण्डलपुष्य-

-न्मरीचिकल्लोलमांसलकपोलम् ।

विद्रुमसहोदराधर-

-विसृमरसुस्मितकिशोरसञ्चारम् ॥ 157 ॥

आमोदिकुसुमशेखर-

-मानीलभ्रूलतायुगमनोज्ञम् ।

वीटीसौरभवीची-

-द्विगुणितवक्त्रारविन्दसौरभ्यम् ॥ 158 ॥

पाशाङ्कुशेक्षुचाप-

-प्रसवशरस्फुरितकोमलकराब्जम् ।

काश्मीरपङ्किलाङ्गं

कामेशं मनसि कुर्महे सततम् ॥ 159 ॥

तस्याङ्कभुवि निषण्णां

तरुणकदम्बप्रसूनकिरणाभाम् ।

शीतांशुखण्डचूडां

सीमन्तन्यस्तसान्द्रसिन्दूराम् ॥ 160 ॥

कुङ्कुमललामभास्व-

-न्निटिलां कुटिलतरचिल्लिकायुगलाम् ।

नालीकतुल्यनयनां

नासाञ्चलनटितमौक्तिकाभरणाम् ॥ 161 ॥

अङ्कुरितमन्दहास-

-मरुणाधरकान्तिविजितबिम्बाभाम् ।

कस्तूरीमकरीयुत-

-कपोलसङ्क्रान्तकनकताटङ्काम् ॥ 162 ॥

कर्पूरसान्द्रवीटी-

-कबलितवदनारविन्दकमनीयाम् ।

कम्बुसहोदरकण्ठ-

-प्रलम्बमानाच्छमौक्तिककलापाम् ॥ 163 ॥

कह्लारदामकोमल-

-भुजयुगलस्फुरितरत्नकेयूराम् ।

करपद्ममूलविलस-

-त्काञ्चनमयकटकवलयसन्दोहाम् ॥ 164 ॥

पाणिचतुष्टयविलस-

-त्पाशाङ्कुशपुण्ड्रचापपुष्पास्त्राम् ।

कूलङ्कषकुचशिखरां

कुङ्कुमकर्दमितरत्नकूर्पासाम् ॥ 165 ॥

अणुदायादवलग्ना-

-मम्बुदशोभासनाभिरोमलताम् ।

माणिक्यखचितकाञ्ची-

-मरीचिकाक्रान्तमांसलनितम्बाम् ॥ 166 ॥

करभोरुकाण्डयुगलां

जङ्घाजितकामजैत्रतूणीराम् ।

प्रपदपरिभूतकूर्मां

पल्लवसच्छायपदयुगमनोज्ञाम् ॥ 167 ॥

कमलभवकञ्जलोचन-

-किरीटरत्नांशुरञ्जितपदाब्जाम् ।

उन्मस्तकानुकम्पा-

-मुत्तरलापाङ्गपोषितानङ्गाम् ॥ 168 ॥

आदिमरसावलम्बा-

-मनिदं प्रथमोक्तिवल्लरीकलिकाम् ।

आब्रह्मकीटजननी-

-मन्तः कलयामि सुन्दरीमनिशम् ॥ 169 ॥

कस्तु क्षितौ पटीया-

-न्वस्तु स्तोतुं शिवाङ्कवास्तव्यम् ।

अस्तु चिरन्तनसुकृतैः

प्रस्तुतकाम्याय तन्मम पुरस्तात् ॥ 170 ॥

प्रभुसम्मितोक्तिगम्यं

परमशिवोत्सङ्गतुङ्गपर्यङ्कम् ।

तेजः किञ्चन दिव्यं

पुरतो मे भवतु पुण्ड्रकोदण्डम् ॥ 171 ॥

मधुरिमभरितशरासं

मकरन्दस्यन्दिमार्गणोदारम् ।

कैरविणीविटचूडं

कैवल्यायास्तु किञ्चन महो नः ॥ 172 ॥

अक्षुद्रमिक्षुचापं

परोक्षमवलग्नसीम्नि त्र्यक्षम् ।

क्षपयतु मे क्षेमेतर-

-मुक्षरथप्रेमपक्ष्मलं तेजः ॥ 173 ॥

भृङ्गरुचिसङ्गरकरापाङ्गं

शृङ्गारतुङ्गमरुणाङ्गम् ।

मङ्गलमभङ्गुरं मे

घटयतु गङ्गाधराङ्गसङ्गि महः ॥ 174 ॥

प्रपदाजितकूर्ममूर्जित-

-करुणं भर्मरुचिनिर्मथनदेहम् ।

श्रितवर्म मर्म शम्भोः

किञ्चन मम नर्म शर्म निर्मातु ॥ 175 ॥

कालकुरलालिकालिम-

-कन्दलविजितालि विधृतमणिवालि ।

मिलतु हृदि पुलिनजघनं

बहुलितगलगरलकेलि किमपि महः ॥ 176 ॥

कुङ्कुमतिलकितफाला

कुरुविन्दच्छायपाटलदुकूला ।

करुणापयोधिवेला

काचन चित्ते चकास्तु मे लीला ॥ 177 ॥

पुष्पन्धयरुचिवेण्यः

पुलिनाभोगत्रपाकरश्रेण्यः ।

जीयासुरिक्षुपाण्यः

काश्चन कामारिकेलिसाक्षिण्यः ॥ 178 ॥

तपनीयांशुकभांसि

द्राक्षामाधुर्यनास्तिकवचांसि ।

कतिचन शुचं महांसि

क्षपयतु कपालितोषितमनांसि ॥ 179 ॥

असितकचमायताक्षं

कुसुमशरं कूलमुद्वहकृपार्द्रम् ।

आदिमरसाधिदैवत-

-मन्तः कलये हराङ्कवासि महः ॥ 180 ॥

कर्णोपान्ततरङ्गित-

-कटाक्षविस्पन्दिकण्ठदघ्नकृपाम् ।

कामेश्वराङ्कनिलयां

कामपि विद्यां पुरातनीं कलये ॥ 181 ॥

अरविन्दकान्त्यरुन्तुद-

-विलोचनद्वन्द्वसुन्दरमुखेन्दु ।

छन्दः कन्दलमन्दिर-

-मन्तःपुरमैन्दुशेखरं वन्दे ॥ 182 ॥

बिम्बिनिकुरम्बडम्बर-

-विडम्बकच्छायमम्बरवलग्नम् ।

कम्बुगलमम्बुदकुचं

बिम्बोकं कमपि चुम्बतु मनो मे ॥ 183 ॥

कमपि कमनीयरूपं

कलयाम्यन्तः कदम्बकुसुमाढ्यम् ।

चम्पकरुचिरसुवेषैः

सम्पादितकान्त्यलङ्कृतदिगन्तम् ॥ 184 ॥

शम्पारुचिभर-

-गर्हासम्पादककान्तिकवचितदिगन्तम् ।

सिद्धान्तं निगमानां

शुद्धान्तं किमपि शूलिनः कलये ॥ 185 ॥

उद्यद्दिनकरशोणा-

-नुत्पलबन्धुस्तनन्धयापीडान् ।

करकलितपुण्ड्रचापा-

-न्कलये कानपि कपर्दिनः प्राणान् ॥ 186 ॥

रशनालसज्जघनया

रसनाजीवातुचापभासुरया ।

घ्राणायुष्करशरया

घ्रातं चित्तं कयापि वासनया ॥ 187 ॥

सरसिजसहयुध्वदृशा

शम्पालतिकासनाभिविग्रहया ।

भासा कयापि चेतो

नासामणिशोभिवदनया भरितम् ॥ 188 ॥

नवयावकाभसिचयान्वितया

गजयानया दयापरया ।

धृतयामिनीशकलया

धिया कयापि क्षतामया हि वयम् ॥ 189 ॥

अलमलमकुसुमबाणै-

-रबिम्बशोणैरपुण्ड्रकोदण्डैः ।

अकुमुदबान्धवचूडै-

-रन्यैरिह जगति दैवतं मन्यैः ॥ 190 ॥

कुवलयसदृक्षनयनैः

कुलगिरिकूटस्थबन्धुकुचभारैः ।

करुणास्पन्दिकटाक्षैः

कवचितचित्तोऽस्मि कतिपयैः कुतुकैः ॥ 191 ॥

नतजनसुलभाय नमो

नालीकसनाभिलोचनाय नमः ।

नन्दितगिरिशाय नमो

महसे नवनीपपाटलाय नमः ॥ 192 ॥

कादम्बकुसुमदाम्ने

कायच्छायाकणायितार्यम्णे ।

सीम्ने चिरन्तनगिरां

भूम्ने कस्मैचिदाददे प्रणतिम् ॥ 193 ॥

कुटिलकबरीभरेभ्यः

कुङ्कुमसब्रह्मचारिकिरणेभ्यः ।

कूलङ्कषस्तनेभ्यः

कुर्मः प्रणतिं कुलाद्रिकुतुकेभ्यः ॥ 194 ॥

कोकनदशोणचरणा-

-त्कोमलकुरलालिविजितशैवालात् ।

उत्पलसगन्धिनयना-

-दुररीकुर्मो न देवतमान्याम् ॥ 195 ॥

आपाटलाधराणा-

-मानीलस्निग्धबर्बरकचानाम् ।

आम्नायजीवनाना-

-माकूतानां हरस्य दासोऽहम् ॥ 196 ॥

पुङ्खितविलासहास-

-स्फुरितासु पुराहिताङ्कनिलयासु ।

मग्नं मनो मदीयं

कास्वपि कामारिजीवनाडीषु ॥ 197 ॥

ललिता पातु शिरो मे

ललाटमम्बा च मधुमतीरूपा ।

भ्रूयुग्मं च भवानी

पुष्पशरा पातु लोचनद्वन्द्वम् ॥ 198 ॥

पायान्नासां बाला

सुभगा दन्तांश्च सुन्दरी जिह्वाम् ।

अधरोष्ठमादिशक्ति-

-श्चक्रेशी पातु मे चिरं चिबुकम् ॥ 199 ॥

कामेश्वरी च कर्णौ

कामाक्षी पातु गण्डयोर्युगलम् ।

शृङ्गारनायिकाव्या-

-द्वदनं सिंहासनेश्वरी च गलम् ॥ 200 ॥

स्कन्दप्रसूश्च पातु

स्कन्धौ बाहू च पाटलाङ्गी मे ।

पाणी च पद्मनिलया

पायादनिशं नखावलीर्विजया ॥ 201 ॥

कोदण्डिनी च वक्षः

कुक्षिं चाव्यात् कुलाचलतनूजा ।

कल्याणी च वलग्नं

कटिं च पायात्कलाधरशिखण्डा ॥ 202 ॥

ऊरुद्वयं च पाया-

-दुमा मृडानी च जानुनी रक्षेत् ।

जङ्घे च षोडशी मे

पायात् पादौ च पाशसृणिहस्ता ॥ 203 ॥

प्रातः पातु परा मां

मध्याह्ने पातु मणिगृहाधीशा ।

शर्वाण्यवतु च सायं

पायाद्रात्रौ च भैरवी साक्षात् ॥ 204 ॥

भार्यां रक्षतु गौरीं

पायात् पुत्रांश्च बिन्दुगृहपीठा ।

श्रीविद्या च यशो मे

शीलं चाव्याच्चिरं महाराज्ञी ॥ 205 ॥

पवनमयि पावकमयि

क्षोणीमयि गगनमयि कृपीटमयि ।

रविमयि शशिमयि दिङ्मयि

समयमयि प्राणमयि शिवे पाहि ॥ 206 ॥

कालि कपालिनि शूलिनि

भैरवि मातङ्गि पञ्चमि त्रिपुरे ।

वाग्देवि विन्ध्यवासिनि

बाले भुवनेशि पालय चिरं माम् ॥ 207 ॥

अभिनवसिन्दूराभा-

-मम्ब त्वां चिन्तयन्ति ये हृदये ।

उपरि निपतन्ति तेषा-

-मुत्पलनयनाकटाक्षकल्लोलाः ॥ 208 ॥

वर्गाष्टकमिलिताभि-

-र्वशिनीमुख्याभिरावृतां भवतीम् ।

चिन्तयतां सितवर्णां

वाचो निर्यान्त्ययत्नतो वदनात् ॥ 209 ॥

कनकशलाकागौरीं

कर्णव्यालोलकुण्डलद्वितयाम् ।

प्रहसितमुखीं च भवतीं

ध्यायन्तो ये त एव भूधनदाः ॥ 210 ॥

शीर्षाम्भोरुहमध्ये

शीतलपीयूषवर्षिणीं भवतीम् ।

अनुदिनमनुचिन्तयता-

-मायुष्यं भवति पुष्कलमवन्याम् ॥ 211 ॥

मधुरस्मितां मदारुणनयनां

मातङ्गकुम्भवक्षोजाम् ।

चन्द्रवतंसिनीं त्वां

सविधे पश्यन्ति सुकृतिनः केचित् ॥ 212 ॥

ललितायाः स्तवरत्नं

ललितपदाभिः प्रणीतमार्याभिः ।

प्रतिदिनमवनौ पठतां

फलानि वक्तुं प्रगल्भते सैव ॥ 213 ॥

सदसदनुग्रहनिग्रह-

-गृहीतमुनिविग्रहो भगवान् ।

सर्वासामुपनिषदां

दुर्वासा जयति देशिकः प्रथमः ॥ 214 ॥

इति महर्षिदुर्वासः विरचितं श्रीललितास्तवरत्नम् ।

vande gajendravadanaṃ

vāmāṅkārūḍhavallabhāśliṣṭam |

kuṅkumaparāgaśoṇaṃ

kuvalayinījārakorakāpīḍam || 1 ||

sa jayati suvarṇaśailaḥ

sakalajagaccakrasaṅghaṭitamūrtiḥ |

kāñcananikuñjavāṭī-

-kandaladamarīprapañcasaṅgītaḥ || 2 ||

harihayanairṛtamāruta-

-haritāmanteṣvavasthitaṃ tasya |

vinumaḥ sānutritayaṃ

vidhiharigaurīśaviṣṭapādhāram || 3 ||

madhye punarmanohara-

-ratnarucistabakarañjitadigantam |

upari catuḥśatayojana-

-muttuṅgaṃ śṛṅgapuṅgavamupāse || 4 ||

tatra catuḥśatayojana-

-pariṇāhaṃ devaśilpinā racitam |

nānāsālamanojñaṃ

namāmyahaṃ nagaramādividyāyāḥ || 5 ||

prathamaṃ sahasrapūrvaka-

-ṣaṭśatasaṅkhyākayojanaṃ paritaḥ |

valayīkṛtasvagātraṃ

varaṇaṃ śaraṇaṃ vrajāmyayorūpam || 6 ||

tasyottare samīraṇa-

-yojanadūre taraṅgitacchāyaḥ |

ghaṭayatu mudaṃ dvitīyo

ghaṇṭāstanasāranirmitaḥ sālaḥ || 7 ||

ubhayorantarasīma-

-nyuddāmabhramararañjitodāram |

upavanamupāsmahe vaya-

-mūrīkṛtamandamārutasyandam || 8 ||

āliṅgya bhadrakālī-

-māsīnastatra hariśilāśyāmām |

manasi mahākālo me

viharatu madhupānavibhramannetraḥ || 9 ||

tārtīyīko varaṇa-

-stasyottarasīmni vātayojanataḥ |

tāmreṇa racitamūrti-

-stanutāmācandratārakaṃ bhadram || 10 ||

madhye tayośca maṇimaya-

-pallavaśākhāprasūnapakṣmalitām |

kalpānokahavāṭīṃ

kalaye makarandapaṅkilāvālām || 11 ||

tatra madhumādhavaśrī-

-taruṇībhyāṃ taraladṛkcakorābhyām |

āliṅgito'vatānmā-

-maniśaṃ prathamarturāttapuṣpāstraḥ || 12 ||

namata taduttarabhāge

nākipathollaṅghiśṛṅgasaṅghātam |

sīsākṛtiṃ turīyaṃ

sitakiraṇālokanirmalaṃ sālam || 13 ||

sāladvayāntarāle

saralālikapotacāṭusubhagāyām |

santānavāṭikāyāṃ

saktaṃ ceto'stu satatamasmākam || 14 ||

tatra tapanātirūkṣaḥ

sāmrājñīcaraṇasāndritasvāntaḥ |

śukraśuciśrīsahito

grīṣmarturdiśatu kīrtimākalpam || 15 ||

uttarasīmani tasyo-

-nnataśikharotkampihāṭakapatākaḥ |

prakaṭayatu pañcamo naḥ

prākāraḥ kuśalamārakūṭamayaḥ || 16 ||

prākārayośca madhye

pallavitānyabhṛtapañcamonmeṣā |

haricandanadruvāṭī-

-haratādāmūlamasmadanutāpam || 17 ||

tatra nabhaḥ śrīmukhyai-

-staruṇīvargaiḥ samanvitaḥ paritaḥ |

vajrāṭṭahāsamukharo

vāñchāpūrtiṃ tanotu varṣartuḥ || 18 ||

mārutayojanadūre

mahanīyastasya cottare bhāge |

bhadraṃ kṛṣīṣṭa ṣaṣṭhaḥ

prākāraḥ pañcalohadhātumayaḥ || 19 ||

anayormadhye santata-

-maṅkūraddivyakusumagandhāyām |

mandāravāṭikāyāṃ

mānasamaṅgīkarotu me vihṛtim || 20 ||

tasyāmiṣorjalakṣmī-

-taruṇībhyāṃ śaradṛtuḥ sadā sahitaḥ |

abhyarcayan sa jīyā-

-dambāmāmodameduraiḥ kusumaiḥ || 21 ||

tasyarṣisaṅkhyayojana-

-dūre dedīpyamānaśṛṅgaughaḥ |

kaladhautakalitamūrtiḥ

kalyāṇaṃ diśatu saptamaḥ sālaḥ || 22 ||

madhye tayormarutpatha

laṅghitaviṭapāgravirutakalakaṇṭhā |

śrīpārijātavāṭī

śriyamaniśaṃ diśatu śītaloddeśā || 23 ||

tasyāmatipriyābhyāṃ

saha khelan sahasahasyalakṣmībhyām |

sāmanto jhaṣaketo-

-rhemanto bhavatu hemavṛddhyai naḥ || 24 ||

uttaratastasya mahā-

-nudbhaṭahutabhukśikhāruṇamayūkhaḥ |

tapanīyakhaṇḍaracita-

-stanutādāyuṣyamaṣṭamo varaṇaḥ || 25 ||

kādambavipinavāṭī-

-manayormadhyabhuvi kalpitāvāsām |

kalayāmi sūnakoraka-

-kandalitāmodatundilasamīrām || 26 ||

tasyāmatiśiśirākṛti-

-rāsīnastapatapasyalakṣmībhyām |

śivamaniśaṃ kurutānme

śiśirartuḥ satataśītaladigantaḥ || 27 ||

tasyāṃ kadambavāṭyāṃ

tatprasavāmodamilitamadhugandham |

saptāvaraṇamanojñaṃ

śaraṇaṃ samupaimi mantriṇīśaraṇam || 28 ||

tatrālaye viśāle

tapanīyāracitataralasopāne |

māṇikyamaṇḍapānta-

-rmahite siṃhāsane sumaṇikhacite || 29 ||

bindutripañcakoṇa-

-dvipanṛpavasuvedadalakurekhāḍhye |

cakre sadā niviṣṭāṃ

ṣaṣṭhyaṣṭatriṃśadakṣareśānīm || 30 ||

tāpiñchamecakābhāṃ

tālīdalaghaṭitakarṇatāṭaṅkām |

tāmbūlapūritamukhīṃ

tāmrādharabimbadṛṣṭadarahāsām || 31 ||

kuṅkumapaṅkiladehāṃ

kuvalayajīvātuśāvakavataṃsām |

kokanadaśoṇacaraṇāṃ

kokilanikvāṇakomalālāpām || 32 ||

vāmāṅgagalitacūlīṃ

vanamālyakadambamālikābharaṇām |

muktālalantikāñcita

mugdhālikamilitacitrakodārām || 33 ||

karavidhṛtakīraśāvaka-

-kalaninadavyaktanikhilanigamārthām |

vāmakucasaṅgivīṇāvādana-

-saukhyārdhamīlitākṣiyugām || 34 ||

āpāṭalāṃśukadharā-

-mādirasonmeṣavāsitakaṭākṣām |

āmnāyasāragulikā-

-mādyāṃ saṅgītamātṛkāṃ vande || 35 ||

tasya ca suvarṇasāla-

-syottaratastaruṇakuṅkumacchāyaḥ |

śamayatu mama santāpaṃ

sālo navamaḥ sa puṣparāgamayaḥ || 36 ||

anayorantaravasudhāḥ

praṇumaḥ pratyagrapuṣparāgamayīḥ |

siṃhāsaneśvarīmanu-

-cintananistandrasiddhanīrandhrāḥ || 37 ||

tatsālottaradeśe

taruṇajapākiraṇadhoraṇīśoṇaḥ |

praśamayatu padmarāga-

-prākāro mama parābhavaṃ daśamaḥ || 38 ||

antarabhūkṛtavāsā-

-nanayorapanītacittavaimatyān |

cakreśīpadabhaktāṃ-

-ścāraṇavargānaharniśaṃ kalaye || 39 ||

sāraṅgavāhayojanadūre-

-'saṅghaṭitaketanastasya |

gomedakena racito

gopāyatu māṃ samunnataḥ sālaḥ || 40 ||

vapradvayāntarorvyāṃ

vaṭukairvividhaiśca yoginībṛndaiḥ |

satataṃ samarcitāyāḥ

saṅkarṣaṇyāḥ praṇaumi caraṇābjam || 41 ||

tāpasayojanadūre

tasya samuttuṅga gopuropetaḥ |

vāñchāpūrtyai bhavatā-

-dvajramaṇīnikaranirmito vapraḥ || 42 ||

varaṇadvitayāntarato

vāsajuṣo vihitamadhurasāsvādāḥ |

rambhādivibudhaveśyā

racayantu mahāntamasmadānandam || 43 ||

tatra sadā pravahantī

taṭinī vajrābhidhā ciraṃ jīyāt |

caṭulormijālanṛtya-

-tkalahaṃsīkulakalakvaṇitapuṣṭā || 44 ||

rodhasi tasyā rucire

vajreśī jayati vajrabhūṣāḍhyā |

vajrapradānatoṣita-

-vajrimukhatridaśavinutacāritrā || 45 ||

tasyodīcyāṃ hariti

stavakitasuṣamāvalīḍhaviyadantaḥ |

vaiḍūryaratnaracito

vaimalyaṃ diśatu cetaso varaṇaḥ || 46 ||

adhimadhyametayoḥ puna-

-rambācaraṇāvalambitasvāntān |

kārkoṭakādināgān

kalayāmaḥ kiṃ ca balimukhān danujān || 47 ||

gandhavahasaṅkhyayojana-

-dūre gaganordhvajāṅghikastasya |

vāsavamaṇipraṇīto

varaṇo bahalayatu vaiduṣīṃ viśadām || 48 ||

madhyakṣoṇyāmanayo-

-rmahendranīlātmakāni ca sarāṃsi |

śātodarīsahāyā-

-nbhūpālānapi punaḥ punaḥ praṇumaḥ || 49 ||

āśugayojanadūre

tasyordhvaṃ kāntidhavalitadigantaḥ |

muktāviracitagātro

muhurasmākaṃ mude bhavatu sālaḥ || 50 ||

āvṛttyoradhimadhyaṃ

pūrvasyāṃ diśi purandaraḥ śrīmān |

abhramuviṭādhirūḍho

vibhramamasmākamaniśamātanutāt || 51 ||

tatkoṇe vyajanasru-

-ktomarapātrasruvānnaśaktidharaḥ |

svāhāsvadhāsametaḥ

sukhayatu māṃ havyavāhanaḥ suciram || 52 ||

dakṣiṇadigantarāle

daṇḍadharo nīlanīradacchāyaḥ |

tripurāpadābjabhaktastirayatu

mama nikhilamaṃhasāṃ nikaram || 53 ||

tasyaiva paścimāyāṃ

diśi dalitendīvaraprabhāśyāmaḥ |

kheṭāsiyaṣṭidhārī

khedānapanayatu yātudhāno me || 54 ||

tasyā uttaradeśe

dhavalāṅgo vipulajhaṣavarārūḍhaḥ |

pāśāyudhāttapāṇiḥ

pāśī vidalayatu pāśajālāni || 55 ||

vande taduttarahari-

-tkoṇe vāyuṃ camūruvaravāham |

korakitatattvabodhā-

-ngorakṣapramukhayogino'pi muhuḥ || 56 ||

taruṇīriḍāpradhānā-

-stisro vātasya tasya kṛtavāsāḥ |

pratyagrakāpiśāyana-

-pānaparibhrāntalocanāḥ kalaye || 57 ||

tallokapūrvabhāge

dhanadaṃ dhyāyāmi śevadhikuleśam |

api māṇibhadramukhyā-

-nambācaraṇāvalambino yakṣān || 58 ||

tasyaiva pūrvasīmani

tapanīyāracitagopure nagare |

kātyāyanīsahāyaṃ

kalaye śītāṃśukhaṇḍacūḍālam || 59 ||

tatpuraṣoḍaśavaraṇa-

-sthalabhājastaruṇacandracūḍālān |

rudrādhyāye paṭhitā-

-nrudrāṇīsahacarānbhaje rudrān || 60 ||

pavamānasaṅkhyayojana-

-dūre bālatṛṇmecakastasya |

sālo marakataracitaḥ

sampadamacalāṃ śriyaṃ ca puṣṇātu || 61 ||

āvṛtiyugmāntarato

haritamaṇīnivahamecake deśe |

hāṭakatālīvipinaṃ

hālāghaṭaghaṭitaviṭapamākalaye || 62 ||

tatraiva mantriṇīgṛha-

-pariṇāhaṃ taralaketanaṃ sadanam |

marakatasaudhamanojñaṃ

dadyādāyūṃṣi daṇḍanāthāyāḥ || 63 ||

sadane tatra harinmaṇi-

-saṅghaṭite maṇḍape śatastambhe |

kārtasvaramayapīṭhe

kanakamayāmburuhakarṇikāmadhye || 64 ||

bindutrikoṇavartula-

-ṣaḍasravṛttadvayānvite cakre |

sañcāriṇī daśottara-

śatārṇamanurājakamalakalahaṃsī || 65 ||

kolavadanā kuśeśaya-

-nayanā kokārimaṇḍitaśikhaṇḍā |

santaptakāñcanābhā

sandhyāruṇacelasaṃvṛtanitambā || 66 ||

halamusalaśaṅkhacakrā-

-'ṅkuśapāśābhayavarasphuritahastā |

kūlaṅkaṣānukampā

kuṅkumajambālitastanābhogā || 67 ||

dhūrtānāmatidūrā-

-vārtāśeṣāvalagnakamanīyā |

ārtālīśubhadātrī

vārtālī bhavatu vāñchitārthāya || 68 ||

tasyāḥ parito devīḥ

svapneśyunmattabhairavīmukhyāḥ |

praṇamata jambhinyādyāḥ

bhairavavargāṃśca hetukapramukhān || 69 ||

pūrvoktasaṅkhyayojana-

-dūre pūyāṃśupāṭalastasya |

vidrāvayatu madārtiṃ

vidrumasālo viśaṅkaṭadvāraḥ || 70 ||

āvaraṇayoraharniśa-

-mantarabhūmauprakāśaśālinyām |

āsīnamambujāsana-

-mabhinavasindūragauramahamīḍe || 71 ||

varaṇasya tasya māruta-

-yojanato vipulagopuradvāraḥ |

sālo nānāratnaiḥ

saṅghaṭitāṅgaḥ kṛṣīṣṭa madabhīṣṭam || 72 ||

antarakakṣyāmanayo-

-raviralaśobhāpicaṇḍiloddeśām |

māṇikyamaṇḍapākhyāṃ

mahatīmadhihṛdayamaniśamākalaye || 73 ||

tatra sthitaṃ prasannaṃ

taruṇatamālapravālakiraṇābham |

karṇāvalambikuṇḍala-

-kandalitābhīśukavacitakapolam || 74 ||

śoṇādharaṃ śucismita-

-meṇāṅkavadanamedhamānakṛpam |

mugdhaiṇamadaviśeṣaka-

-mudritaniṭilendurekhikāruciram || 75 ||

nālīkadalasahodara-

-nayanāñcalaghaṭitamanasijākūtam |

kamalākaṭhinapayodhara-

-kastūrīghusṛṇapaṅkiloraskam || 76 ||

cāmpeyagandhikaiśyaṃ

śampāsabrahmacārikauśeyam |

śrīvatsakaustubhadharaṃ

śritajanarakṣādhurīṇacaraṇābjam || 77 ||

kambusudarśanavilasa-

-tkarapadmaṃ kaṇṭhalolavanamālam |

mucukundamokṣaphaladaṃ

mukundamānandakandamavalambe || 78 ||

tadvaraṇottarabhāge

tārāpatibimbacumbinijaśṛṅgaḥ |

vividhamaṇīgaṇaghaṭito

vitaratu sālo vinirmalāṃ dhiṣaṇām || 79 ||

prākāradvitayāntara-

-kakṣyāṃ pṛthuratnanikarasaṅkīrṇām |

namata sahasrastambhaka-

-maṇḍapanāmnātiviśrutāṃ bhuvane || 80 ||

praṇumastatra bhavānī-

-sahacaramīśānamindukhaṇḍadharam |

śṛṅgāranāyikāmanu-

-śīlanabhājo'pi bhṛṅginandimukhān || 81 ||

tasyaiṇavāhayojana-

-dūre vande manomayaṃ vapram |

aṅkūranmaṇikiraṇā-

-mantarakakṣyāṃ ca nirmalāmanayoḥ || 82 ||

tatraivāmṛtavāpīṃ

taralataraṅgāvalīḍhataṭayugmām |

muktāmayakalahaṃsī-

-mudritakanakāravindasandohām || 83 ||

śakropalamayabhṛṅgī-

-saṅgītonmeṣaghoṣitadigantām |

kāñcanamayāṅgavilasa-

-tkāraṇḍavaṣaṇḍatāṇḍavamanojñām || 84 ||

kuruvindātmakahallaka-

-korakasuṣamāsamūhapāṭalitām |

kalaye sudhāsvarūpāṃ

kandalitāmandakairavāmodām || 85 ||

tadvāpikāntarāle tarale

maṇipotasīmni viharantīm |

sindūrapāṭalāṅgīṃ

sitakiraṇāṅkūrakalpitavataṃsām || 86 ||

parvendubimbavadanāṃ

pallavaśoṇādharasphuritahāsām |

kuṭilakabarīṃ kuraṅgī-

-śiśunayanāṃ kuṇḍalasphuritagaṇḍām || 87 ||

nikaṭasthapotanilayāḥ

śaktīḥ śayavidhṛtahemaśṛṅgajalaiḥ |

pariṣiñcantīṃ parita-

-stārāṃ tāruṇyagarvitāṃ vande || 88 ||

prāguktasaṅkhyayojanadūre

praṇamāmi buddhimayasālam |

anayorantarakakṣyā-

-maṣṭāpadapuṣṭamedinīṃ rucirām || 89 ||

kādambarīnidhānāṃ

kalayāmyānandavāpikāṃ tasyām |

śoṇāśmanivahanirmita-

-sopānaśreṇiśobhamānataṭīm || 90 ||

māṇikyataraṇinilayāṃ

madhye tasyā madāruṇakapolām |

amṛteśītyabhidhānā-

-mantaḥ kalayāmi vāruṇīṃ devīm || 91 ||

sauvarṇakenipātana-

-hastāḥ saundaryagarvitā devyaḥ |

tatpurataḥ sthitibhājo

vitarantvasmākamāyuṣo vṛddhim || 92 ||

tasya pṛṣadaśvayojana-

-dūre'haṅkārasālamatituṅgam |

vande tayośca madhye

kakṣyāṃ valamānamalayapavamānām || 93 ||

vinumo vimarśavāpīṃ

sauṣumnasudhāsvarūpiṇīṃ tatra |

velātilaṅghyavīcī-

-kolāhalabharitakūlavanavāṭīm || 94 ||

tatraiva salilamadhye

tāpiñchadalaprapañcasuṣamābhām |

śyāmalakañcukalasitāṃ

śyāmāviṭabimbaḍambaraharāsyām || 95 ||

ābhugnamasṛṇacillī-

-hasitāyugmaśarakārmukavilāsām |

mandasmitāñcitamukhīṃ

maṇimayatāṭaṅkamaṇḍitakapolām || 96 ||

kuruvindataraṇinilayāṃ

kulācalaspardhikucanamanmadhyām |

kuṅkumaviliptagātrīṃ

kurukullāṃ manasi kurmahe satatam || 97 ||

tatsālottarabhāge

bhānumayaṃ vapramāśraye dīptam |

madhyaṃ ca vipulamanayo-

-rmanye viśrāntamātapodgāram || 98 ||

tatra kuruvindapīṭhe

tāmarase kanakakarṇikāghaṭite |

āsīnamaruṇavāsasa-

-mamlānaprasavamālikābharaṇam || 99 ||

cakṣuṣmatīprakāśana-

-śakticchāyāsamāracitakelim |

māṇikyamukuṭaramyaṃ

manye mārtāṇḍabhairavaṃ hṛdaye || 100 ||

indumayasālamīḍe

tasyottaratastuṣāragirigauram |

atyantaśiśiramāruta-

-manayormadhyaṃ ca candrikodgāram || 101 ||

tatra prakāśamānaṃ

tārānikaraiḥ pariṣkṛtoddeśam |

amṛtamayakāntikandala-

-mantaḥ kalayāmi kundasitamindum || 102 ||

śṛṅgārasālamīḍe

śṛṅgollasitaṃ taduttare bhāge |

madhyasthale tayorapi

mahitāṃ śṛṅgārapūrvikāṃ parikhām || 103 ||

tatra maṇinausthitābhi-

-stapanīyāviracitāgrahastābhiḥ |

śṛṅgāradevatābhiḥ

sahitaṃ parikhādhipaṃ bhaje madanam || 104 ||

śṛṅgāravaraṇavaryasyottarataḥ

sakalavibudhasaṃsevyam |

cintāmaṇigaṇaracitaṃ

cintāṃ dūrīkarotu me sadanam || 105 ||

maṇisadanasālayoradhi-

-madhyaṃ daśatālabhūmiruhadīrghaiḥ |

parṇaiḥ suvarṇavarṇai-

-ryuktāṃ kāṇḍaiśca yojanottuṅgaiḥ || 106 ||

mṛdulaistālīpañcaka-

-mānairmilitāṃ ca kesarakadambaiḥ |

santatagalitamaranda-

-srotoniryanmilindasandohām || 107 ||

pāṭīrapavanabālaka-

-dhāṭīniryatparāgapiñjaritām |

kalahaṃsīkulakalakala-

-kūlaṅkaṣaninadanicayakamanīyām || 108 ||

padmāṭavīṃ bhajāmaḥ

parimalakallolapakṣmalopāntām |

[ devyarghyapātradhārī

tasyāḥ pūrvadiśi daśakalāyuktaḥ | ]

valayitamūrtirbhagavā-

-nvahniḥ krośonnataściraṃ pāyāt || 109 ||

tatrādhāre devyāḥ

pātrīrūpaḥ prabhākaraḥ śrīmān |

dvādaśakalāsameto

dhvāntaṃ mama bahulamāntaraṃ bhindyāt || 110 ||

tasmin dineśapātre

taraṅgitāmodamamṛtamayamarghyam |

candrakalātmakamamṛtaṃ

sāndrīkuryādamandamānandam || 111 ||

amṛte tasminnabhito

viharantyo vividhamaṇitaraṇibhājaḥ |

ṣoḍaśa kalāḥ sudhāṃśoḥ

śokāduttārayantu māmaniśam || 112 ||

tatraiva vihṛtibhājo

dhātṛmukhānāṃ ca kāraṇeśānām |

sṛṣṭyādirūpikāstāḥ

śamayantvakhilāḥ kalāśca santāpam || 113 ||

kīnāśavaruṇakinnara-

-rājadiganteṣu ratnagehasya |

kalayāmi tānyajasraṃ

kalayantvāyuṣyamarghyapātrāṇi || 114 ||

pātrasthalasya purataḥ

padmāramaṇavidhipārvatīśānām |

bhavanāni śarmaṇe no

bhavantu bhāsā pradīpitajaganti || 115 ||

sadanasyānalakoṇe

satataṃ praṇamāmi kuṇḍamāgneyam |

tatra sthitaṃ ca vahniṃ

taralaśikhājaṭilamambikājanakam || 116 ||

tasyāsuradiśi tādṛśa-

-ratnaparisphuritaparvanavakāḍhyam |

cakrātmakaṃ śatāṅgaṃ

śatayojanamunnataṃ bhaje divyam || 117 ||

tatraiva diśi niṣaṇṇaṃ

tapanīyadhvajaparamparāśliṣṭam |

rathamaparaṃ ca bhavānyā

racayāmo manasi ratnamayacūḍam || 118 ||

bhavanasya vāyubhāge

pariṣkṛto vividhavaijayantībhiḥ |

racayatu mudaṃ rathendraḥ

saciveśānyāḥ samastavandyāyāḥ || 119 ||

kurmo'dhihṛdayamaniśaṃ

kroḍāsyāyāḥ śatāṅgamūrdhanyam |

rudradiśi ratnadhāmno

ruciraśalākāprapañcakañcukitam || 120 ||

parito devīdhāmnaḥ

praṇītavāsā manusvarūpiṇyaḥ |

kurvantu raśmimālā-

-kṛtayaḥ kuśalāni devatā nikhilāḥ || 121 ||

prāgdvārasya bhavānī-

-dhāmnaḥ pārśvadvayāracitavāse |

mātaṅgīkiṭimukhyau

maṇisadane manasi bhāvayāmi ciram || 122 ||

yojanayugalābhogā

tatkrośapariṇāhayaiva bhittyā ca |

cintāmaṇigṛhabhūmi-

-rjīyādāmnāyamayacaturdvārā || 123 ||

dvāre dvāre dhāmnaḥ

piṇḍībhūtā navīnabimbābhāḥ |

vidadhatu vipulāṃ kīrtiṃ

divyā lauhityasiddhyo devyaḥ || 124 ||

maṇisadanasyāntarato

mahanīye ratnavedikāmadhye |

bindumayacakramīḍe

pīṭhānāmupari viracitāvāsam || 125 ||

cakrāṇāṃ sakalānāṃ

prathamamadhaḥ sīmaphalakavāstavyāḥ |

aṇimādisiddhayo mā-

-mavantu devī prabhāsvarūpiṇyaḥ || 126 ||

aṇimādisiddhiphalaka-

-syoparihariṇāṅkakhaṇḍakṛtacūḍāḥ |

bhadraṃ pakṣmalayantu

brāhmīpramukhāśca mātaro'smākam || 127 ||

tasyopari maṇiphalake

tāruṇyottuṅgapīnakucabhārāḥ |

saṅkṣobhiṇīpradhānāḥ

bhrānti vidrāvayantu daśa mudrāḥ || 128 ||

phalakatrayasvarūpe

pṛthule trailokyamohane cakre |

dīvyantu prakaṭākhyā-

-stāsāṃ kartrīṃ ca bhagavatī tripurā || 129 ||

tadupari vipule dhiṣṇye

taraladṛśastaruṇakokanadabhāsaḥ |

kāmākarṣiṇyādyāḥ

kalaye devīḥ kalādharaśikhaṇḍāḥ || 130 ||

sarvāśāparipūrakacakre-

-'smin guptayoginīsevyāḥ |

tripureśī mama duritaṃ

tudyāt kaṇṭhāvalambimaṇihārā || 131 ||

tasyopari maṇipīṭhe

tāmrāmbhoruhadalaprabhāśoṇāḥ |

dhyāyāmyanaṅgakusumā-

-pramukhā devīśca vidhṛtakūrpāsāḥ || 132 ||

saṅkṣobhakārake'smiṃ-

-ścakre śrītripurasundarī sākṣāt |

goptrī guptatarākhyāḥ

gopāyatu māṃ kṛpārdrayā dṛṣṭyā || 133 ||

saṅkṣobhiṇīpradhānāḥ

śaktīstasyordhvavalayakṛtavāsāḥ |

ālolanīlaveṇī-

-rantaḥ kalayāmi yauvanonmattāḥ || 134 ||

saubhāgyadāyake'smiṃ-

-ścakreśī tripuravāsinī jīyāt |

śaktīśca sampradāyābhidhāḥ

samastāḥ pramodayantvaniśam || 135 ||

maṇipīṭhopari tāsāṃ

mahati caturhastavistṛte valaye |

santataviracitavāsāḥ

śaktīḥ kalayāmi sarvasiddhimukhāḥ || 136 ||

sarvārthasādhakākhye

cakre'muṣmin samastaphaladātrī |

tripurā śrīrmama kuśalaṃ

diśatāduttīrṇayoginīsevyā || 137 ||

tāsāṃ nilayasyopari

dhiṣṇye kausumbhakañcukamanojñāḥ |

sarvājñādyāḥ devyaḥ

sakalāḥ sampādayantu mama kīrtim || 138 ||

cakre samastarakṣā-

-karanāmnyasmin samastajanasevyām |

manasi nigarbhāsahitāṃ

manye śrītripuramālinīṃ devīm || 139 ||

sarvajñāsadanasyopari

cakre vipule samākalitagehāḥ |

vande vaśinīmukhyāḥ

śaktīḥ sindūrareṇurucaḥ || 140 ||

śrīsarvarogaharākhya-

-cakre'smiṃstripurapūrvikāṃ siddhām |

vande rahasyanāmnā

vedyābhiḥ śaktibhiḥ sadā sevyām || 141 ||

vaśinīgṛhopariṣṭā-

-dviṃśatihastonnate mahāpīṭhe |

śamayantu śatrubṛndaṃ

śastrāṇyastrāṇi cādidampatyoḥ || 142 ||

śastrasadanopariṣṭā-

-dvalaye valavairiratnasaṅghaṭite |

kāmeśvarīpradhānāḥ

kalaye devīḥ samastajanavandyāḥ || 143 ||

cakre'tra sarvasiddhiprada-

-nāmani sarvaphaladātrī |

tripurāmbāvatu satataṃ

parāpararahasyayoginīsevyā || 144 ||

kāmeśvarīgṛhoparivalaye

vividhamanusampradāyajñāḥ |

catvāro yuganāthā

jayantu mitreśapūrvakāḥ guravaḥ || 145 ||

nāthabhavanopariṣṭā-

-nnānāratnacayamedure pīṭhe |

kāmeśyādyā nityāḥ

kalayantu mudaṃ tithisvarūpiṇyaḥ || 146 ||

nityāsadanasyopari

nirmalamaṇinivahaviracite dhiṣṇye |

kuśalaṃ ṣaḍaṅgadevyaḥ

kalayantvasmākamuttaralanetrāḥ || 147 ||

sadanasyopari tāsāṃ

sarvānandamayanāmake bindau |

pañcabrahmākārāṃ

mañcaṃ praṇamāmi maṇigaṇākīrṇam || 148 ||

parito maṇimañcasya

pralambamānā niyantritā pāśaiḥ |

māyāmayī javanikā

mama duritaṃ haratu mecakacchāyā || 149 ||

mañcasyopari lamba-

-nmadanīpunnāgamālikābharitam |

harigopamayavitānaṃ

haratādālasyamaniśamasmākam || 150 ||

paryaṅkasya bhajāmaḥ

pādānbimbāmbudenduhemarucaḥ |

ajaharirudreśamayā-

-nanalāsuramāruteśakoṇasthān || 151 ||

phalakaṃ sadāśivamayaṃ

praṇaumi sindūrareṇukiraṇābham |

ārabhyāṅgeśīnāṃ

sadanātkalitaṃ ca ratnasopānam || 152 ||

paṭṭopadhānagaṇḍaka-

-catuṣṭayasphuritapāṭalāstaraṇam |

paryaṅkopari ghaṭitaṃ

pātu ciraṃ haṃsatūlaśayanaṃ naḥ || 153 ||

tasyopari nivasantaṃ

tāruṇyaśrīniṣevitaṃ satatam |

āvṛntapullahallaka-

-marīcikāpuñjamañjulacchāyam || 154 ||

sindūraśoṇavasanaṃ

śītāṃśustabakacumbitakirīṭam |

kuṅkumatilakamanohara-

-kuṭilālikahasitakumudabandhuśiśum || 155 ||

pūrṇendubimbavadanaṃ

phullasarojātalocanatritayam |

taralāpāṅgataraṅgita-

-śapharāṅkanaśāstrasampradāyārtham || 156 ||

maṇimayakuṇḍalapuṣya-

-nmarīcikallolamāṃsalakapolam |

vidrumasahodarādhara-

-visṛmarasusmitakiśorasañcāram || 157 ||

āmodikusumaśekhara-

-mānīlabhrūlatāyugamanojñam |

vīṭīsaurabhavīcī-

-dviguṇitavaktrāravindasaurabhyam || 158 ||

pāśāṅkuśekṣucāpa-

-prasavaśarasphuritakomalakarābjam |

kāśmīrapaṅkilāṅgaṃ

kāmeśaṃ manasi kurmahe satatam || 159 ||

tasyāṅkabhuvi niṣaṇṇāṃ

taruṇakadambaprasūnakiraṇābhām |

śītāṃśukhaṇḍacūḍāṃ

sīmantanyastasāndrasindūrām || 160 ||

kuṅkumalalāmabhāsva-

-nniṭilāṃ kuṭilataracillikāyugalām |

nālīkatulyanayanāṃ

nāsāñcalanaṭitamauktikābharaṇām || 161 ||

aṅkuritamandahāsa-

-maruṇādharakāntivijitabimbābhām |

kastūrīmakarīyuta-

-kapolasaṅkrāntakanakatāṭaṅkām || 162 ||

karpūrasāndravīṭī-

-kabalitavadanāravindakamanīyām |

kambusahodarakaṇṭha-

-pralambamānācchamauktikakalāpām || 163 ||

kahlāradāmakomala-

-bhujayugalasphuritaratnakeyūrām |

karapadmamūlavilasa-

-tkāñcanamayakaṭakavalayasandohām || 164 ||

pāṇicatuṣṭayavilasa-

-tpāśāṅkuśapuṇḍracāpapuṣpāstrām |

kūlaṅkaṣakucaśikharāṃ

kuṅkumakardamitaratnakūrpāsām || 165 ||

aṇudāyādavalagnā-

-mambudaśobhāsanābhiromalatām |

māṇikyakhacitakāñcī-

-marīcikākrāntamāṃsalanitambām || 166 ||

karabhorukāṇḍayugalāṃ

jaṅghājitakāmajaitratūṇīrām |

prapadaparibhūtakūrmāṃ

pallavasacchāyapadayugamanojñām || 167 ||

kamalabhavakañjalocana-

-kirīṭaratnāṃśurañjitapadābjām |

unmastakānukampā-

-muttaralāpāṅgapoṣitānaṅgām || 168 ||

ādimarasāvalambā-

-manidaṃ prathamoktivallarīkalikām |

ābrahmakīṭajananī-

-mantaḥ kalayāmi sundarīmaniśam || 169 ||

kastu kṣitau paṭīyā-

-nvastu stotuṃ śivāṅkavāstavyam |

astu cirantanasukṛtaiḥ

prastutakāmyāya tanmama purastāt || 170 ||

prabhusammitoktigamyaṃ

paramaśivotsaṅgatuṅgaparyaṅkam |

tejaḥ kiñcana divyaṃ

purato me bhavatu puṇḍrakodaṇḍam || 171 ||

madhurimabharitaśarāsaṃ

makarandasyandimārgaṇodāram |

kairaviṇīviṭacūḍaṃ

kaivalyāyāstu kiñcana maho naḥ || 172 ||

akṣudramikṣucāpaṃ

parokṣamavalagnasīmni tryakṣam |

kṣapayatu me kṣemetara-

-mukṣarathapremapakṣmalaṃ tejaḥ || 173 ||

bhṛṅgarucisaṅgarakarāpāṅgaṃ

śṛṅgāratuṅgamaruṇāṅgam |

maṅgalamabhaṅguraṃ me

ghaṭayatu gaṅgādharāṅgasaṅgi mahaḥ || 174 ||

prapadājitakūrmamūrjita-

-karuṇaṃ bharmarucinirmathanadeham |

śritavarma marma śambhoḥ

kiñcana mama narma śarma nirmātu || 175 ||

kālakuralālikālima-

-kandalavijitāli vidhṛtamaṇivāli |

milatu hṛdi pulinajaghanaṃ

bahulitagalagaralakeli kimapi mahaḥ || 176 ||

kuṅkumatilakitaphālā

kuruvindacchāyapāṭaladukūlā |

karuṇāpayodhivelā

kācana citte cakāstu me līlā || 177 ||

puṣpandhayaruciveṇyaḥ

pulinābhogatrapākaraśreṇyaḥ |

jīyāsurikṣupāṇyaḥ

kāścana kāmārikelisākṣiṇyaḥ || 178 ||

tapanīyāṃśukabhāṃsi

drākṣāmādhuryanāstikavacāṃsi |

katicana śucaṃ mahāṃsi

kṣapayatu kapālitoṣitamanāṃsi || 179 ||

asitakacamāyatākṣaṃ

kusumaśaraṃ kūlamudvahakṛpārdram |

ādimarasādhidaivata-

-mantaḥ kalaye harāṅkavāsi mahaḥ || 180 ||

karṇopāntataraṅgita-

-kaṭākṣavispandikaṇṭhadaghnakṛpām |

kāmeśvarāṅkanilayāṃ

kāmapi vidyāṃ purātanīṃ kalaye || 181 ||

aravindakāntyaruntuda-

-vilocanadvandvasundaramukhendu |

chandaḥ kandalamandira-

-mantaḥpuramainduśekharaṃ vande || 182 ||

bimbinikurambaḍambara-

-viḍambakacchāyamambaravalagnam |

kambugalamambudakucaṃ

bimbokaṃ kamapi cumbatu mano me || 183 ||

kamapi kamanīyarūpaṃ

kalayāmyantaḥ kadambakusumāḍhyam |

campakarucirasuveṣaiḥ

sampāditakāntyalaṅkṛtadigantam || 184 ||

śampārucibhara-

-garhāsampādakakāntikavacitadigantam |

siddhāntaṃ nigamānāṃ

śuddhāntaṃ kimapi śūlinaḥ kalaye || 185 ||

udyaddinakaraśoṇā-

-nutpalabandhustanandhayāpīḍān |

karakalitapuṇḍracāpā-

-nkalaye kānapi kapardinaḥ prāṇān || 186 ||

raśanālasajjaghanayā

rasanājīvātucāpabhāsurayā |

ghrāṇāyuṣkaraśarayā

ghrātaṃ cittaṃ kayāpi vāsanayā || 187 ||

sarasijasahayudhvadṛśā

śampālatikāsanābhivigrahayā |

bhāsā kayāpi ceto

nāsāmaṇiśobhivadanayā bharitam || 188 ||

navayāvakābhasicayānvitayā

gajayānayā dayāparayā |

dhṛtayāminīśakalayā

dhiyā kayāpi kṣatāmayā hi vayam || 189 ||

alamalamakusumabāṇai-

-rabimbaśoṇairapuṇḍrakodaṇḍaiḥ |

akumudabāndhavacūḍai-

-ranyairiha jagati daivataṃ manyaiḥ || 190 ||

kuvalayasadṛkṣanayanaiḥ

kulagirikūṭasthabandhukucabhāraiḥ |

karuṇāspandikaṭākṣaiḥ

kavacitacitto'smi katipayaiḥ kutukaiḥ || 191 ||

natajanasulabhāya namo

nālīkasanābhilocanāya namaḥ |

nanditagiriśāya namo

mahase navanīpapāṭalāya namaḥ || 192 ||

kādambakusumadāmne

kāyacchāyākaṇāyitāryamṇe |

sīmne cirantanagirāṃ

bhūmne kasmaicidādade praṇatim || 193 ||

kuṭilakabarībharebhyaḥ

kuṅkumasabrahmacārikiraṇebhyaḥ |

kūlaṅkaṣastanebhyaḥ

kurmaḥ praṇatiṃ kulādrikutukebhyaḥ || 194 ||

kokanadaśoṇacaraṇā-

-tkomalakuralālivijitaśaivālāt |

utpalasagandhinayanā-

-durarīkurmo na devatamānyām || 195 ||

āpāṭalādharāṇā-

-mānīlasnigdhabarbarakacānām |

āmnāyajīvanānā-

-mākūtānāṃ harasya dāso'ham || 196 ||

puṅkhitavilāsahāsa-

-sphuritāsu purāhitāṅkanilayāsu |

magnaṃ mano madīyaṃ

kāsvapi kāmārijīvanāḍīṣu || 197 ||

lalitā pātu śiro me

lalāṭamambā ca madhumatīrūpā |

bhrūyugmaṃ ca bhavānī

puṣpaśarā pātu locanadvandvam || 198 ||

pāyānnāsāṃ bālā

subhagā dantāṃśca sundarī jihvām |

adharoṣṭhamādiśakti-

-ścakreśī pātu me ciraṃ cibukam || 199 ||

kāmeśvarī ca karṇau

kāmākṣī pātu gaṇḍayoryugalam |

śṛṅgāranāyikāvyā-

-dvadanaṃ siṃhāsaneśvarī ca galam || 200 ||

skandaprasūśca pātu

skandhau bāhū ca pāṭalāṅgī me |

pāṇī ca padmanilayā

pāyādaniśaṃ nakhāvalīrvijayā || 201 ||

kodaṇḍinī ca vakṣaḥ

kukṣiṃ cāvyāt kulācalatanūjā |

kalyāṇī ca valagnaṃ

kaṭiṃ ca pāyātkalādharaśikhaṇḍā || 202 ||

ūrudvayaṃ ca pāyā-

-dumā mṛḍānī ca jānunī rakṣet |

jaṅghe ca ṣoḍaśī me

pāyāt pādau ca pāśasṛṇihastā || 203 ||

prātaḥ pātu parā māṃ

madhyāhne pātu maṇigṛhādhīśā |

śarvāṇyavatu ca sāyaṃ

pāyādrātrau ca bhairavī sākṣāt || 204 ||

bhāryāṃ rakṣatu gaurīṃ

pāyāt putrāṃśca bindugṛhapīṭhā |

śrīvidyā ca yaśo me

śīlaṃ cāvyācciraṃ mahārājñī || 205 ||

pavanamayi pāvakamayi

kṣoṇīmayi gaganamayi kṛpīṭamayi |

ravimayi śaśimayi diṅmayi

samayamayi prāṇamayi śive pāhi || 206 ||

kāli kapālini śūlini

bhairavi mātaṅgi pañcami tripure |

vāgdevi vindhyavāsini

bāle bhuvaneśi pālaya ciraṃ mām || 207 ||

abhinavasindūrābhā-

-mamba tvāṃ cintayanti ye hṛdaye |

upari nipatanti teṣā-

-mutpalanayanākaṭākṣakallolāḥ || 208 ||

vargāṣṭakamilitābhi-

-rvaśinīmukhyābhirāvṛtāṃ bhavatīm |

cintayatāṃ sitavarṇāṃ

vāco niryāntyayatnato vadanāt || 209 ||

kanakaśalākāgaurīṃ

karṇavyālolakuṇḍaladvitayām |

prahasitamukhīṃ ca bhavatīṃ

dhyāyanto ye ta eva bhūdhanadāḥ || 210 ||

śīrṣāmbhoruhamadhye

śītalapīyūṣavarṣiṇīṃ bhavatīm |

anudinamanucintayatā-

-māyuṣyaṃ bhavati puṣkalamavanyām || 211 ||

madhurasmitāṃ madāruṇanayanāṃ

mātaṅgakumbhavakṣojām |

candravataṃsinīṃ tvāṃ

savidhe paśyanti sukṛtinaḥ kecit || 212 ||

lalitāyāḥ stavaratnaṃ

lalitapadābhiḥ praṇītamāryābhiḥ |

pratidinamavanau paṭhatāṃ

phalāni vaktuṃ pragalbhate saiva || 213 ||

sadasadanugrahanigraha-

-gṛhītamunivigraho bhagavān |

sarvāsāmupaniṣadāṃ

durvāsā jayati deśikaḥ prathamaḥ || 214 ||

iti maharṣidurvāsaḥ viracitaṃ śrīlalitāstavaratnam |

🕉️ This is the original Sanskrit rendered in Sinhala script. Pronunciation is identical to the Sanskrit Devanagari version.

ශ්රී ලලිතා ස්තවරත්නම් (ආර්යා ද්විශතී)