বন্দে গজেন্দ্রবদনং
বামাঙ্কারূঢবল্লভাশ্লিষ্টম্ ।
কুঙ্কুমপরাগশোণং
কুবলযিনীজারকোরকাপীডম্ ॥ 1 ॥
স জযতি সুবর্ণশৈলঃ
সকলজগচ্চক্রসঙ্ঘটিতমূর্তিঃ ।
কাঞ্চননিকুঞ্জবাটী-
-কন্দলদমরীপ্রপঞ্চসঙ্গীতঃ ॥ 2 ॥
হরিহযনৈরৃতমারুত-
-হরিতামন্তেষ্ববস্থিতং তস্য ।
বিনুমঃ সানুত্রিতযং
বিধিহরিগৌরীশবিষ্টপাধারম্ ॥ 3 ॥
মধ্যে পুনর্মনোহর-
-রত্নরুচিস্তবকরঞ্জিতদিগন্তম্ ।
উপরি চতুঃশতযোজন-
-মুত্তুঙ্গং শৃঙ্গপুঙ্গবমুপাসে ॥ 4 ॥
তত্র চতুঃশতযোজন-
-পরিণাহং দেবশিল্পিনা রচিতম্ ।
নানাসালমনোজ্ঞং
নমাম্যহং নগরমাদিবিদ্যাযাঃ ॥ 5 ॥
প্রথমং সহস্রপূর্বক-
-ষট্শতসঙ্খ্যাকযোজনং পরিতঃ ।
বলযীকৃতস্বগাত্রং
বরণং শরণং ব্রজাম্যযোরূপম্ ॥ 6 ॥
তস্যোত্তরে সমীরণ-
-যোজনদূরে তরঙ্গিতচ্ছাযঃ ।
ঘটযতু মুদং দ্বিতীযো
ঘণ্টাস্তনসারনির্মিতঃ সালঃ ॥ 7 ॥
উভযোরন্তরসীম-
-ন্যুদ্দামভ্রমররঞ্জিতোদারম্ ।
উপবনমুপাস্মহে বয-
-মূরীকৃতমন্দমারুতস্যন্দম্ ॥ 8 ॥
আলিঙ্গ্য ভদ্রকালী-
-মাসীনস্তত্র হরিশিলাশ্যামাম্ ।
মনসি মহাকালো মে
বিহরতু মধুপানবিভ্রমন্নেত্রঃ ॥ 9 ॥
তার্তীযীকো বরণ-
-স্তস্যোত্তরসীম্নি বাতযোজনতঃ ।
তাম্রেণ রচিতমূর্তি-
-স্তনুতামাচন্দ্রতারকং ভদ্রম্ ॥ 10 ॥
মধ্যে তযোশ্চ মণিময-
-পল্লবশাখাপ্রসূনপক্ষ্মলিতাম্ ।
কল্পানোকহবাটীং
কলযে মকরন্দপঙ্কিলাবালাম্ ॥ 11 ॥
তত্র মধুমাধবশ্রী-
-তরুণীভ্যাং তরলদৃক্চকোরাভ্যাম্ ।
আলিঙ্গিতোঽবতান্মা-
-মনিশং প্রথমর্তুরাত্তপুষ্পাস্ত্রঃ ॥ 12 ॥
নমত তদুত্তরভাগে
নাকিপথোল্লঙ্ঘিশৃঙ্গসঙ্ঘাতম্ ।
সীসাকৃতিং তুরীযং
সিতকিরণালোকনির্মলং সালম্ ॥ 13 ॥
সালদ্বযান্তরালে
সরলালিকপোতচাটুসুভগাযাম্ ।
সন্তানবাটিকাযাং
সক্তং চেতোঽস্তু সততমস্মাকম্ ॥ 14 ॥
তত্র তপনাতিরূক্ষঃ
সাম্রাজ্ঞীচরণসান্দ্রিতস্বান্তঃ ।
শুক্রশুচিশ্রীসহিতো
গ্রীষ্মর্তুর্দিশতু কীর্তিমাকল্পম্ ॥ 15 ॥
উত্তরসীমনি তস্যো-
-ন্নতশিখরোত্কম্পিহাটকপতাকঃ ।
প্রকটযতু পঞ্চমো নঃ
প্রাকারঃ কুশলমারকূটমযঃ ॥ 16 ॥
প্রাকারযোশ্চ মধ্যে
পল্লবিতান্যভৃতপঞ্চমোন্মেষা ।
হরিচন্দনদ্রুবাটী-
-হরতাদামূলমস্মদনুতাপম্ ॥ 17 ॥
তত্র নভঃ শ্রীমুখ্যৈ-
-স্তরুণীবর্গৈঃ সমন্বিতঃ পরিতঃ ।
বজ্রাট্টহাসমুখরো
বাঞ্ছাপূর্তিং তনোতু বর্ষর্তুঃ ॥ 18 ॥
মারুতযোজনদূরে
মহনীযস্তস্য চোত্তরে ভাগে ।
ভদ্রং কৃষীষ্ট ষষ্ঠঃ
প্রাকারঃ পঞ্চলোহধাতুমযঃ ॥ 19 ॥
অনযোর্মধ্যে সন্তত-
-মঙ্কূরদ্দিব্যকুসুমগন্ধাযাম্ ।
মন্দারবাটিকাযাং
মানসমঙ্গীকরোতু মে বিহৃতিম্ ॥ 20 ॥
তস্যামিষোর্জলক্ষ্মী-
-তরুণীভ্যাং শরদৃতুঃ সদা সহিতঃ ।
অভ্যর্চযন্ স জীযা-
-দম্বামামোদমেদুরৈঃ কুসুমৈঃ ॥ 21 ॥
তস্যর্ষিসঙ্খ্যযোজন-
-দূরে দেদীপ্যমানশৃঙ্গৌঘঃ ।
কলধৌতকলিতমূর্তিঃ
কল্যাণং দিশতু সপ্তমঃ সালঃ ॥ 22 ॥
মধ্যে তযোর্মরুত্পথ
লঙ্ঘিতবিটপাগ্রবিরুতকলকণ্ঠা ।
শ্রীপারিজাতবাটী
শ্রিযমনিশং দিশতু শীতলোদ্দেশা ॥ 23 ॥
তস্যামতিপ্রিযাভ্যাং
সহ খেলন্ সহসহস্যলক্ষ্মীভ্যাম্ ।
সামন্তো ঝষকেতো-
-র্হেমন্তো ভবতু হেমবৃদ্ধ্যৈ নঃ ॥ 24 ॥
উত্তরতস্তস্য মহা-
-নুদ্ভটহুতভুক্শিখারুণমযূখঃ ।
তপনীযখণ্ডরচিত-
-স্তনুতাদাযুষ্যমষ্টমো বরণঃ ॥ 25 ॥
কাদম্ববিপিনবাটী-
-মনযোর্মধ্যভুবি কল্পিতাবাসাম্ ।
কলযামি সূনকোরক-
-কন্দলিতামোদতুন্দিলসমীরাম্ ॥ 26 ॥
তস্যামতিশিশিরাকৃতি-
-রাসীনস্তপতপস্যলক্ষ্মীভ্যাম্ ।
শিবমনিশং কুরুতান্মে
শিশিরর্তুঃ সততশীতলদিগন্তঃ ॥ 27 ॥
তস্যাং কদম্ববাট্যাং
তত্প্রসবামোদমিলিতমধুগন্ধম্ ।
সপ্তাবরণমনোজ্ঞং
শরণং সমুপৈমি মন্ত্রিণীশরণম্ ॥ 28 ॥
তত্রালযে বিশালে
তপনীযারচিততরলসোপানে ।
মাণিক্যমণ্ডপান্ত-
-র্মহিতে সিংহাসনে সুমণিখচিতে ॥ 29 ॥
বিন্দুত্রিপঞ্চকোণ-
-দ্বিপনৃপবসুবেদদলকুরেখাঢ্যে ।
চক্রে সদা নিবিষ্টাং
ষষ্ঠ্যষ্টত্রিংশদক্ষরেশানীম্ ॥ 30 ॥
তাপিঞ্ছমেচকাভাং
তালীদলঘটিতকর্ণতাটঙ্কাম্ ।
তাম্বূলপূরিতমুখীং
তাম্রাধরবিম্বদৃষ্টদরহাসাম্ ॥ 31 ॥
কুঙ্কুমপঙ্কিলদেহাং
কুবলযজীবাতুশাবকবতংসাম্ ।
কোকনদশোণচরণাং
কোকিলনিক্বাণকোমলালাপাম্ ॥ 32 ॥
বামাঙ্গগলিতচূলীং
বনমাল্যকদম্বমালিকাভরণাম্ ।
মুক্তাললন্তিকাঞ্চিত
মুগ্ধালিকমিলিতচিত্রকোদারাম্ ॥ 33 ॥
করবিধৃতকীরশাবক-
-কলনিনদব্যক্তনিখিলনিগমার্থাম্ ।
বামকুচসঙ্গিবীণাবাদন-
-সৌখ্যার্ধমীলিতাক্ষিযুগাম্ ॥ 34 ॥
আপাটলাংশুকধরা-
-মাদিরসোন্মেষবাসিতকটাক্ষাম্ ।
আম্নাযসারগুলিকা-
-মাদ্যাং সঙ্গীতমাতৃকাং বন্দে ॥ 35 ॥
তস্য চ সুবর্ণসাল-
-স্যোত্তরতস্তরুণকুঙ্কুমচ্ছাযঃ ।
শমযতু মম সন্তাপং
সালো নবমঃ স পুষ্পরাগমযঃ ॥ 36 ॥
অনযোরন্তরবসুধাঃ
প্রণুমঃ প্রত্যগ্রপুষ্পরাগমযীঃ ।
সিংহাসনেশ্বরীমনু-
-চিন্তননিস্তন্দ্রসিদ্ধনীরন্ধ্রাঃ ॥ 37 ॥
তত্সালোত্তরদেশে
তরুণজপাকিরণধোরণীশোণঃ ।
প্রশমযতু পদ্মরাগ-
-প্রাকারো মম পরাভবং দশমঃ ॥ 38 ॥
অন্তরভূকৃতবাসা-
-ননযোরপনীতচিত্তবৈমত্যান্ ।
চক্রেশীপদভক্তাং-
-শ্চারণবর্গানহর্নিশং কলযে ॥ 39 ॥
সারঙ্গবাহযোজনদূরে-
-ঽসঙ্ঘটিতকেতনস্তস্য ।
গোমেদকেন রচিতো
গোপাযতু মাং সমুন্নতঃ সালঃ ॥ 40 ॥
বপ্রদ্বযান্তরোর্ব্যাং
বটুকৈর্বিবিধৈশ্চ যোগিনীবৃন্দৈঃ ।
সততং সমর্চিতাযাঃ
সঙ্কর্ষণ্যাঃ প্রণৌমি চরণাব্জম্ ॥ 41 ॥
তাপসযোজনদূরে
তস্য সমুত্তুঙ্গ গোপুরোপেতঃ ।
বাঞ্ছাপূর্ত্যৈ ভবতা-
-দ্বজ্রমণীনিকরনির্মিতো বপ্রঃ ॥ 42 ॥
বরণদ্বিতযান্তরতো
বাসজুষো বিহিতমধুরসাস্বাদাঃ ।
রম্ভাদিবিবুধবেশ্যা
রচযন্তু মহান্তমস্মদানন্দম্ ॥ 43 ॥
তত্র সদা প্রবহন্তী
তটিনী বজ্রাভিধা চিরং জীযাত্ ।
চটুলোর্মিজালনৃত্য-
-ত্কলহংসীকুলকলক্বণিতপুষ্টা ॥ 44 ॥
রোধসি তস্যা রুচিরে
বজ্রেশী জযতি বজ্রভূষাঢ্যা ।
বজ্রপ্রদানতোষিত-
-বজ্রিমুখত্রিদশবিনুতচারিত্রা ॥ 45 ॥
তস্যোদীচ্যাং হরিতি
স্তবকিতসুষমাবলীঢবিযদন্তঃ ।
বৈডূর্যরত্নরচিতো
বৈমল্যং দিশতু চেতসো বরণঃ ॥ 46 ॥
অধিমধ্যমেতযোঃ পুন-
-রম্বাচরণাবলম্বিতস্বান্তান্ ।
কার্কোটকাদিনাগান্
কলযামঃ কিং চ বলিমুখান্ দনুজান্ ॥ 47 ॥
গন্ধবহসঙ্খ্যযোজন-
-দূরে গগনোর্ধ্বজাঙ্ঘিকস্তস্য ।
বাসবমণিপ্রণীতো
বরণো বহলযতু বৈদুষীং বিশদাম্ ॥ 48 ॥
মধ্যক্ষোণ্যামনযো-
-র্মহেন্দ্রনীলাত্মকানি চ সরাংসি ।
শাতোদরীসহাযা-
-ন্ভূপালানপি পুনঃ পুনঃ প্রণুমঃ ॥ 49 ॥
আশুগযোজনদূরে
তস্যোর্ধ্বং কান্তিধবলিতদিগন্তঃ ।
মুক্তাবিরচিতগাত্রো
মুহুরস্মাকং মুদে ভবতু সালঃ ॥ 50 ॥
আবৃত্ত্যোরধিমধ্যং
পূর্বস্যাং দিশি পুরন্দরঃ শ্রীমান্ ।
অভ্রমুবিটাধিরূঢো
বিভ্রমমস্মাকমনিশমাতনুতাত্ ॥ 51 ॥
তত্কোণে ব্যজনস্রু-
-ক্তোমরপাত্রস্রুবান্নশক্তিধরঃ ।
স্বাহাস্বধাসমেতঃ
সুখযতু মাং হব্যবাহনঃ সুচিরম্ ॥ 52 ॥
দক্ষিণদিগন্তরালে
দণ্ডধরো নীলনীরদচ্ছাযঃ ।
ত্রিপুরাপদাব্জভক্তস্তিরযতু
মম নিখিলমংহসাং নিকরম্ ॥ 53 ॥
তস্যৈব পশ্চিমাযাং
দিশি দলিতেন্দীবরপ্রভাশ্যামঃ ।
খেটাসিযষ্টিধারী
খেদানপনযতু যাতুধানো মে ॥ 54 ॥
তস্যা উত্তরদেশে
ধবলাঙ্গো বিপুলঝষবরারূঢঃ ।
পাশাযুধাত্তপাণিঃ
পাশী বিদলযতু পাশজালানি ॥ 55 ॥
বন্দে তদুত্তরহরি-
-ত্কোণে বাযুং চমূরুবরবাহম্ ।
কোরকিততত্ত্ববোধা-
-ন্গোরক্ষপ্রমুখযোগিনোঽপি মুহুঃ ॥ 56 ॥
তরুণীরিডাপ্রধানা-
-স্তিস্রো বাতস্য তস্য কৃতবাসাঃ ।
প্রত্যগ্রকাপিশাযন-
-পানপরিভ্রান্তলোচনাঃ কলযে ॥ 57 ॥
তল্লোকপূর্বভাগে
ধনদং ধ্যাযামি শেবধিকুলেশম্ ।
অপি মাণিভদ্রমুখ্যা-
-নম্বাচরণাবলম্বিনো যক্ষান্ ॥ 58 ॥
তস্যৈব পূর্বসীমনি
তপনীযারচিতগোপুরে নগরে ।
কাত্যাযনীসহাযং
কলযে শীতাংশুখণ্ডচূডালম্ ॥ 59 ॥
তত্পুরষোডশবরণ-
-স্থলভাজস্তরুণচন্দ্রচূডালান্ ।
রুদ্রাধ্যাযে পঠিতা-
-ন্রুদ্রাণীসহচরান্ভজে রুদ্রান্ ॥ 60 ॥
পবমানসঙ্খ্যযোজন-
-দূরে বালতৃণ্মেচকস্তস্য ।
সালো মরকতরচিতঃ
সম্পদমচলাং শ্রিযং চ পুষ্ণাতু ॥ 61 ॥
আবৃতিযুগ্মান্তরতো
হরিতমণীনিবহমেচকে দেশে ।
হাটকতালীবিপিনং
হালাঘটঘটিতবিটপমাকলযে ॥ 62 ॥
তত্রৈব মন্ত্রিণীগৃহ-
-পরিণাহং তরলকেতনং সদনম্ ।
মরকতসৌধমনোজ্ঞং
দদ্যাদাযূংষি দণ্ডনাথাযাঃ ॥ 63 ॥
সদনে তত্র হরিন্মণি-
-সঙ্ঘটিতে মণ্ডপে শতস্তম্ভে ।
কার্তস্বরমযপীঠে
কনকমযাম্বুরুহকর্ণিকামধ্যে ॥ 64 ॥
বিন্দুত্রিকোণবর্তুল-
-ষডস্রবৃত্তদ্বযান্বিতে চক্রে ।
সঞ্চারিণী দশোত্তর-
শতার্ণমনুরাজকমলকলহংসী ॥ 65 ॥
কোলবদনা কুশেশয-
-নযনা কোকারিমণ্ডিতশিখণ্ডা ।
সন্তপ্তকাঞ্চনাভা
সন্ধ্যারুণচেলসংবৃতনিতম্বা ॥ 66 ॥
হলমুসলশঙ্খচক্রা-
-ঽঙ্কুশপাশাভযবরস্ফুরিতহস্তা ।
কূলঙ্কষানুকম্পা
কুঙ্কুমজম্বালিতস্তনাভোগা ॥ 67 ॥
ধূর্তানামতিদূরা-
-বার্তাশেষাবলগ্নকমনীযা ।
আর্তালীশুভদাত্রী
বার্তালী ভবতু বাঞ্ছিতার্থায ॥ 68 ॥
তস্যাঃ পরিতো দেবীঃ
স্বপ্নেশ্যুন্মত্তভৈরবীমুখ্যাঃ ।
প্রণমত জম্ভিন্যাদ্যাঃ
ভৈরববর্গাংশ্চ হেতুকপ্রমুখান্ ॥ 69 ॥
পূর্বোক্তসঙ্খ্যযোজন-
-দূরে পূযাংশুপাটলস্তস্য ।
বিদ্রাবযতু মদার্তিং
বিদ্রুমসালো বিশঙ্কটদ্বারঃ ॥ 70 ॥
আবরণযোরহর্নিশ-
-মন্তরভূমৌপ্রকাশশালিন্যাম্ ।
আসীনমম্বুজাসন-
-মভিনবসিন্দূরগৌরমহমীডে ॥ 71 ॥
বরণস্য তস্য মারুত-
-যোজনতো বিপুলগোপুরদ্বারঃ ।
সালো নানারত্নৈঃ
সঙ্ঘটিতাঙ্গঃ কৃষীষ্ট মদভীষ্টম্ ॥ 72 ॥
অন্তরকক্ষ্যামনযো-
-রবিরলশোভাপিচণ্ডিলোদ্দেশাম্ ।
মাণিক্যমণ্ডপাখ্যাং
মহতীমধিহৃদযমনিশমাকলযে ॥ 73 ॥
তত্র স্থিতং প্রসন্নং
তরুণতমালপ্রবালকিরণাভম্ ।
কর্ণাবলম্বিকুণ্ডল-
-কন্দলিতাভীশুকবচিতকপোলম্ ॥ 74 ॥
শোণাধরং শুচিস্মিত-
-মেণাঙ্কবদনমেধমানকৃপম্ ।
মুগ্ধৈণমদবিশেষক-
-মুদ্রিতনিটিলেন্দুরেখিকারুচিরম্ ॥ 75 ॥
নালীকদলসহোদর-
-নযনাঞ্চলঘটিতমনসিজাকূতম্ ।
কমলাকঠিনপযোধর-
-কস্তূরীঘুসৃণপঙ্কিলোরস্কম্ ॥ 76 ॥
চাম্পেযগন্ধিকৈশ্যং
শম্পাসব্রহ্মচারিকৌশেযম্ ।
শ্রীবত্সকৌস্তুভধরং
শ্রিতজনরক্ষাধুরীণচরণাব্জম্ ॥ 77 ॥
কম্বুসুদর্শনবিলস-
-ত্করপদ্মং কণ্ঠলোলবনমালম্ ।
মুচুকুন্দমোক্ষফলদং
মুকুন্দমানন্দকন্দমবলম্বে ॥ 78 ॥
তদ্বরণোত্তরভাগে
তারাপতিবিম্বচুম্বিনিজশৃঙ্গঃ ।
বিবিধমণীগণঘটিতো
বিতরতু সালো বিনির্মলাং ধিষণাম্ ॥ 79 ॥
প্রাকারদ্বিতযান্তর-
-কক্ষ্যাং পৃথুরত্ননিকরসঙ্কীর্ণাম্ ।
নমত সহস্রস্তম্ভক-
-মণ্ডপনাম্নাতিবিশ্রুতাং ভুবনে ॥ 80 ॥
প্রণুমস্তত্র ভবানী-
-সহচরমীশানমিন্দুখণ্ডধরম্ ।
শৃঙ্গারনাযিকামনু-
-শীলনভাজোঽপি ভৃঙ্গিনন্দিমুখান্ ॥ 81 ॥
তস্যৈণবাহযোজন-
-দূরে বন্দে মনোমযং বপ্রম্ ।
অঙ্কূরন্মণিকিরণা-
-মন্তরকক্ষ্যাং চ নির্মলামনযোঃ ॥ 82 ॥
তত্রৈবামৃতবাপীং
তরলতরঙ্গাবলীঢতটযুগ্মাম্ ।
মুক্তামযকলহংসী-
-মুদ্রিতকনকারবিন্দসন্দোহাম্ ॥ 83 ॥
শক্রোপলমযভৃঙ্গী-
-সঙ্গীতোন্মেষঘোষিতদিগন্তাম্ ।
কাঞ্চনমযাঙ্গবিলস-
-ত্কারণ্ডবষণ্ডতাণ্ডবমনোজ্ঞাম্ ॥ 84 ॥
কুরুবিন্দাত্মকহল্লক-
-কোরকসুষমাসমূহপাটলিতাম্ ।
কলযে সুধাস্বরূপাং
কন্দলিতামন্দকৈরবামোদাম্ ॥ 85 ॥
তদ্বাপিকান্তরালে তরলে
মণিপোতসীম্নি বিহরন্তীম্ ।
সিন্দূরপাটলাঙ্গীং
সিতকিরণাঙ্কূরকল্পিতবতংসাম্ ॥ 86 ॥
পর্বেন্দুবিম্ববদনাং
পল্লবশোণাধরস্ফুরিতহাসাম্ ।
কুটিলকবরীং কুরঙ্গী-
-শিশুনযনাং কুণ্ডলস্ফুরিতগণ্ডাম্ ॥ 87 ॥
নিকটস্থপোতনিলযাঃ
শক্তীঃ শযবিধৃতহেমশৃঙ্গজলৈঃ ।
পরিষিঞ্চন্তীং পরিত-
-স্তারাং তারুণ্যগর্বিতাং বন্দে ॥ 88 ॥
প্রাগুক্তসঙ্খ্যযোজনদূরে
প্রণমামি বুদ্ধিমযসালম্ ।
অনযোরন্তরকক্ষ্যা-
-মষ্টাপদপুষ্টমেদিনীং রুচিরাম্ ॥ 89 ॥
কাদম্বরীনিধানাং
কলযাম্যানন্দবাপিকাং তস্যাম্ ।
শোণাশ্মনিবহনির্মিত-
-সোপানশ্রেণিশোভমানতটীম্ ॥ 90 ॥
মাণিক্যতরণিনিলযাং
মধ্যে তস্যা মদারুণকপোলাম্ ।
অমৃতেশীত্যভিধানা-
-মন্তঃ কলযামি বারুণীং দেবীম্ ॥ 91 ॥
সৌবর্ণকেনিপাতন-
-হস্তাঃ সৌন্দর্যগর্বিতা দেব্যঃ ।
তত্পুরতঃ স্থিতিভাজো
বিতরন্ত্বস্মাকমাযুষো বৃদ্ধিম্ ॥ 92 ॥
তস্য পৃষদশ্বযোজন-
-দূরেঽহঙ্কারসালমতিতুঙ্গম্ ।
বন্দে তযোশ্চ মধ্যে
কক্ষ্যাং বলমানমলযপবমানাম্ ॥ 93 ॥
বিনুমো বিমর্শবাপীং
সৌষুম্নসুধাস্বরূপিণীং তত্র ।
বেলাতিলঙ্ঘ্যবীচী-
-কোলাহলভরিতকূলবনবাটীম্ ॥ 94 ॥
তত্রৈব সলিলমধ্যে
তাপিঞ্ছদলপ্রপঞ্চসুষমাভাম্ ।
শ্যামলকঞ্চুকলসিতাং
শ্যামাবিটবিম্বডম্বরহরাস্যাম্ ॥ 95 ॥
আভুগ্নমসৃণচিল্লী-
-হসিতাযুগ্মশরকার্মুকবিলাসাম্ ।
মন্দস্মিতাঞ্চিতমুখীং
মণিমযতাটঙ্কমণ্ডিতকপোলাম্ ॥ 96 ॥
কুরুবিন্দতরণিনিলযাং
কুলাচলস্পর্ধিকুচনমন্মধ্যাম্ ।
কুঙ্কুমবিলিপ্তগাত্রীং
কুরুকুল্লাং মনসি কুর্মহে সততম্ ॥ 97 ॥
তত্সালোত্তরভাগে
ভানুমযং বপ্রমাশ্রযে দীপ্তম্ ।
মধ্যং চ বিপুলমনযো-
-র্মন্যে বিশ্রান্তমাতপোদ্গারম্ ॥ 98 ॥
তত্র কুরুবিন্দপীঠে
তামরসে কনককর্ণিকাঘটিতে ।
আসীনমরুণবাসস-
-মম্লানপ্রসবমালিকাভরণম্ ॥ 99 ॥
চক্ষুষ্মতীপ্রকাশন-
-শক্তিচ্ছাযাসমারচিতকেলিম্ ।
মাণিক্যমুকুটরম্যং
মন্যে মার্তাণ্ডভৈরবং হৃদযে ॥ 100 ॥
ইন্দুমযসালমীডে
তস্যোত্তরতস্তুষারগিরিগৌরম্ ।
অত্যন্তশিশিরমারুত-
-মনযোর্মধ্যং চ চন্দ্রিকোদ্গারম্ ॥ 101 ॥
তত্র প্রকাশমানং
তারানিকরৈঃ পরিষ্কৃতোদ্দেশম্ ।
অমৃতমযকান্তিকন্দল-
-মন্তঃ কলযামি কুন্দসিতমিন্দুম্ ॥ 102 ॥
শৃঙ্গারসালমীডে
শৃঙ্গোল্লসিতং তদুত্তরে ভাগে ।
মধ্যস্থলে তযোরপি
মহিতাং শৃঙ্গারপূর্বিকাং পরিখাম্ ॥ 103 ॥
তত্র মণিনৌস্থিতাভি-
-স্তপনীযাবিরচিতাগ্রহস্তাভিঃ ।
শৃঙ্গারদেবতাভিঃ
সহিতং পরিখাধিপং ভজে মদনম্ ॥ 104 ॥
শৃঙ্গারবরণবর্যস্যোত্তরতঃ
সকলবিবুধসংসেব্যম্ ।
চিন্তামণিগণরচিতং
চিন্তাং দূরীকরোতু মে সদনম্ ॥ 105 ॥
মণিসদনসালযোরধি-
-মধ্যং দশতালভূমিরুহদীর্ঘৈঃ ।
পর্ণৈঃ সুবর্ণবর্ণৈ-
-র্যুক্তাং কাণ্ডৈশ্চ যোজনোত্তুঙ্গৈঃ ॥ 106 ॥
মৃদুলৈস্তালীপঞ্চক-
-মানৈর্মিলিতাং চ কেসরকদম্বৈঃ ।
সন্ততগলিতমরন্দ-
-স্রোতোনির্যন্মিলিন্দসন্দোহাম্ ॥ 107 ॥
পাটীরপবনবালক-
-ধাটীনির্যত্পরাগপিঞ্জরিতাম্ ।
কলহংসীকুলকলকল-
-কূলঙ্কষনিনদনিচযকমনীযাম্ ॥ 108 ॥
পদ্মাটবীং ভজামঃ
পরিমলকল্লোলপক্ষ্মলোপান্তাম্ ।
[ দেব্যর্ঘ্যপাত্রধারী
তস্যাঃ পূর্বদিশি দশকলাযুক্তঃ । ]
বলযিতমূর্তির্ভগবা-
-ন্বহ্নিঃ ক্রোশোন্নতশ্চিরং পাযাত্ ॥ 109 ॥
তত্রাধারে দেব্যাঃ
পাত্রীরূপঃ প্রভাকরঃ শ্রীমান্ ।
দ্বাদশকলাসমেতো
ধ্বান্তং মম বহুলমান্তরং ভিন্দ্যাত্ ॥ 110 ॥
তস্মিন্ দিনেশপাত্রে
তরঙ্গিতামোদমমৃতমযমর্ঘ্যম্ ।
চন্দ্রকলাত্মকমমৃতং
সান্দ্রীকুর্যাদমন্দমানন্দম্ ॥ 111 ॥
অমৃতে তস্মিন্নভিতো
বিহরন্ত্যো বিবিধমণিতরণিভাজঃ ।
ষোডশ কলাঃ সুধাংশোঃ
শোকাদুত্তারযন্তু মামনিশম্ ॥ 112 ॥
তত্রৈব বিহৃতিভাজো
ধাতৃমুখানাং চ কারণেশানাম্ ।
সৃষ্ট্যাদিরূপিকাস্তাঃ
শমযন্ত্বখিলাঃ কলাশ্চ সন্তাপম্ ॥ 113 ॥
কীনাশবরুণকিন্নর-
-রাজদিগন্তেষু রত্নগেহস্য ।
কলযামি তান্যজস্রং
কলযন্ত্বাযুষ্যমর্ঘ্যপাত্রাণি ॥ 114 ॥
পাত্রস্থলস্য পুরতঃ
পদ্মারমণবিধিপার্বতীশানাম্ ।
ভবনানি শর্মণে নো
ভবন্তু ভাসা প্রদীপিতজগন্তি ॥ 115 ॥
সদনস্যানলকোণে
সততং প্রণমামি কুণ্ডমাগ্নেযম্ ।
তত্র স্থিতং চ বহ্নিং
তরলশিখাজটিলমম্বিকাজনকম্ ॥ 116 ॥
তস্যাসুরদিশি তাদৃশ-
-রত্নপরিস্ফুরিতপর্বনবকাঢ্যম্ ।
চক্রাত্মকং শতাঙ্গং
শতযোজনমুন্নতং ভজে দিব্যম্ ॥ 117 ॥
তত্রৈব দিশি নিষণ্ণং
তপনীযধ্বজপরম্পরাশ্লিষ্টম্ ।
রথমপরং চ ভবান্যা
রচযামো মনসি রত্নমযচূডম্ ॥ 118 ॥
ভবনস্য বাযুভাগে
পরিষ্কৃতো বিবিধবৈজযন্তীভিঃ ।
রচযতু মুদং রথেন্দ্রঃ
সচিবেশান্যাঃ সমস্তবন্দ্যাযাঃ ॥ 119 ॥
কুর্মোঽধিহৃদযমনিশং
ক্রোডাস্যাযাঃ শতাঙ্গমূর্ধন্যম্ ।
রুদ্রদিশি রত্নধাম্নো
রুচিরশলাকাপ্রপঞ্চকঞ্চুকিতম্ ॥ 120 ॥
পরিতো দেবীধাম্নঃ
প্রণীতবাসা মনুস্বরূপিণ্যঃ ।
কুর্বন্তু রশ্মিমালা-
-কৃতযঃ কুশলানি দেবতা নিখিলাঃ ॥ 121 ॥
প্রাগ্দ্বারস্য ভবানী-
-ধাম্নঃ পার্শ্বদ্বযারচিতবাসে ।
মাতঙ্গীকিটিমুখ্যৌ
মণিসদনে মনসি ভাবযামি চিরম্ ॥ 122 ॥
যোজনযুগলাভোগা
তত্ক্রোশপরিণাহযৈব ভিত্ত্যা চ ।
চিন্তামণিগৃহভূমি-
-র্জীযাদাম্নাযমযচতুর্দ্বারা ॥ 123 ॥
দ্বারে দ্বারে ধাম্নঃ
পিণ্ডীভূতা নবীনবিম্বাভাঃ ।
বিদধতু বিপুলাং কীর্তিং
দিব্যা লৌহিত্যসিদ্ধ্যো দেব্যঃ ॥ 124 ॥
মণিসদনস্যান্তরতো
মহনীযে রত্নবেদিকামধ্যে ।
বিন্দুমযচক্রমীডে
পীঠানামুপরি বিরচিতাবাসম্ ॥ 125 ॥
চক্রাণাং সকলানাং
প্রথমমধঃ সীমফলকবাস্তব্যাঃ ।
অণিমাদিসিদ্ধযো মা-
-মবন্তু দেবী প্রভাস্বরূপিণ্যঃ ॥ 126 ॥
অণিমাদিসিদ্ধিফলক-
-স্যোপরিহরিণাঙ্কখণ্ডকৃতচূডাঃ ।
ভদ্রং পক্ষ্মলযন্তু
ব্রাহ্মীপ্রমুখাশ্চ মাতরোঽস্মাকম্ ॥ 127 ॥
তস্যোপরি মণিফলকে
তারুণ্যোত্তুঙ্গপীনকুচভারাঃ ।
সঙ্ক্ষোভিণীপ্রধানাঃ
ভ্রান্তি বিদ্রাবযন্তু দশ মুদ্রাঃ ॥ 128 ॥
ফলকত্রযস্বরূপে
পৃথুলে ত্রৈলোক্যমোহনে চক্রে ।
দীব্যন্তু প্রকটাখ্যা-
-স্তাসাং কর্ত্রীং চ ভগবতী ত্রিপুরা ॥ 129 ॥
তদুপরি বিপুলে ধিষ্ণ্যে
তরলদৃশস্তরুণকোকনদভাসঃ ।
কামাকর্ষিণ্যাদ্যাঃ
কলযে দেবীঃ কলাধরশিখণ্ডাঃ ॥ 130 ॥
সর্বাশাপরিপূরকচক্রে-
-ঽস্মিন্ গুপ্তযোগিনীসেব্যাঃ ।
ত্রিপুরেশী মম দুরিতং
তুদ্যাত্ কণ্ঠাবলম্বিমণিহারা ॥ 131 ॥
তস্যোপরি মণিপীঠে
তাম্রাম্ভোরুহদলপ্রভাশোণাঃ ।
ধ্যাযাম্যনঙ্গকুসুমা-
-প্রমুখা দেবীশ্চ বিধৃতকূর্পাসাঃ ॥ 132 ॥
সঙ্ক্ষোভকারকেঽস্মিং-
-শ্চক্রে শ্রীত্রিপুরসুন্দরী সাক্ষাত্ ।
গোপ্ত্রী গুপ্ততরাখ্যাঃ
গোপাযতু মাং কৃপার্দ্রযা দৃষ্ট্যা ॥ 133 ॥
সঙ্ক্ষোভিণীপ্রধানাঃ
শক্তীস্তস্যোর্ধ্ববলযকৃতবাসাঃ ।
আলোলনীলবেণী-
-রন্তঃ কলযামি যৌবনোন্মত্তাঃ ॥ 134 ॥
সৌভাগ্যদাযকেঽস্মিং-
-শ্চক্রেশী ত্রিপুরবাসিনী জীযাত্ ।
শক্তীশ্চ সম্প্রদাযাভিধাঃ
সমস্তাঃ প্রমোদযন্ত্বনিশম্ ॥ 135 ॥
মণিপীঠোপরি তাসাং
মহতি চতুর্হস্তবিস্তৃতে বলযে ।
সন্ততবিরচিতবাসাঃ
শক্তীঃ কলযামি সর্বসিদ্ধিমুখাঃ ॥ 136 ॥
সর্বার্থসাধকাখ্যে
চক্রেঽমুষ্মিন্ সমস্তফলদাত্রী ।
ত্রিপুরা শ্রীর্মম কুশলং
দিশতাদুত্তীর্ণযোগিনীসেব্যা ॥ 137 ॥
তাসাং নিলযস্যোপরি
ধিষ্ণ্যে কৌসুম্ভকঞ্চুকমনোজ্ঞাঃ ।
সর্বাজ্ঞাদ্যাঃ দেব্যঃ
সকলাঃ সম্পাদযন্তু মম কীর্তিম্ ॥ 138 ॥
চক্রে সমস্তরক্ষা-
-করনাম্ন্যস্মিন্ সমস্তজনসেব্যাম্ ।
মনসি নিগর্ভাসহিতাং
মন্যে শ্রীত্রিপুরমালিনীং দেবীম্ ॥ 139 ॥
সর্বজ্ঞাসদনস্যোপরি
চক্রে বিপুলে সমাকলিতগেহাঃ ।
বন্দে বশিনীমুখ্যাঃ
শক্তীঃ সিন্দূররেণুরুচঃ ॥ 140 ॥
শ্রীসর্বরোগহরাখ্য-
-চক্রেঽস্মিংস্ত্রিপুরপূর্বিকাং সিদ্ধাম্ ।
বন্দে রহস্যনাম্না
বেদ্যাভিঃ শক্তিভিঃ সদা সেব্যাম্ ॥ 141 ॥
বশিনীগৃহোপরিষ্টা-
-দ্বিংশতিহস্তোন্নতে মহাপীঠে ।
শমযন্তু শত্রুবৃন্দং
শস্ত্রাণ্যস্ত্রাণি চাদিদম্পত্যোঃ ॥ 142 ॥
শস্ত্রসদনোপরিষ্টা-
-দ্বলযে বলবৈরিরত্নসঙ্ঘটিতে ।
কামেশ্বরীপ্রধানাঃ
কলযে দেবীঃ সমস্তজনবন্দ্যাঃ ॥ 143 ॥
চক্রেঽত্র সর্বসিদ্ধিপ্রদ-
-নামনি সর্বফলদাত্রী ।
ত্রিপুরাম্বাবতু সততং
পরাপররহস্যযোগিনীসেব্যা ॥ 144 ॥
কামেশ্বরীগৃহোপরিবলযে
বিবিধমনুসম্প্রদাযজ্ঞাঃ ।
চত্বারো যুগনাথা
জযন্তু মিত্রেশপূর্বকাঃ গুরবঃ ॥ 145 ॥
নাথভবনোপরিষ্টা-
-ন্নানারত্নচযমেদুরে পীঠে ।
কামেশ্যাদ্যা নিত্যাঃ
কলযন্তু মুদং তিথিস্বরূপিণ্যঃ ॥ 146 ॥
নিত্যাসদনস্যোপরি
নির্মলমণিনিবহবিরচিতে ধিষ্ণ্যে ।
কুশলং ষডঙ্গদেব্যঃ
কলযন্ত্বস্মাকমুত্তরলনেত্রাঃ ॥ 147 ॥
সদনস্যোপরি তাসাং
সর্বানন্দমযনামকে বিন্দৌ ।
পঞ্চব্রহ্মাকারাং
মঞ্চং প্রণমামি মণিগণাকীর্ণম্ ॥ 148 ॥
পরিতো মণিমঞ্চস্য
প্রলম্বমানা নিযন্ত্রিতা পাশৈঃ ।
মাযামযী জবনিকা
মম দুরিতং হরতু মেচকচ্ছাযা ॥ 149 ॥
মঞ্চস্যোপরি লম্ব-
-ন্মদনীপুন্নাগমালিকাভরিতম্ ।
হরিগোপমযবিতানং
হরতাদালস্যমনিশমস্মাকম্ ॥ 150 ॥
পর্যঙ্কস্য ভজামঃ
পাদান্বিম্বাম্বুদেন্দুহেমরুচঃ ।
অজহরিরুদ্রেশমযা-
-ননলাসুরমারুতেশকোণস্থান্ ॥ 151 ॥
ফলকং সদাশিবমযং
প্রণৌমি সিন্দূররেণুকিরণাভম্ ।
আরভ্যাঙ্গেশীনাং
সদনাত্কলিতং চ রত্নসোপানম্ ॥ 152 ॥
পট্টোপধানগণ্ডক-
-চতুষ্টযস্ফুরিতপাটলাস্তরণম্ ।
পর্যঙ্কোপরি ঘটিতং
পাতু চিরং হংসতূলশযনং নঃ ॥ 153 ॥
তস্যোপরি নিবসন্তং
তারুণ্যশ্রীনিষেবিতং সততম্ ।
আবৃন্তপুল্লহল্লক-
-মরীচিকাপুঞ্জমঞ্জুলচ্ছাযম্ ॥ 154 ॥
সিন্দূরশোণবসনং
শীতাংশুস্তবকচুম্বিতকিরীটম্ ।
কুঙ্কুমতিলকমনোহর-
-কুটিলালিকহসিতকুমুদবন্ধুশিশুম্ ॥ 155 ॥
পূর্ণেন্দুবিম্ববদনং
ফুল্লসরোজাতলোচনত্রিতযম্ ।
তরলাপাঙ্গতরঙ্গিত-
-শফরাঙ্কনশাস্ত্রসম্প্রদাযার্থম্ ॥ 156 ॥
মণিমযকুণ্ডলপুষ্য-
-ন্মরীচিকল্লোলমাংসলকপোলম্ ।
বিদ্রুমসহোদরাধর-
-বিসৃমরসুস্মিতকিশোরসঞ্চারম্ ॥ 157 ॥
আমোদিকুসুমশেখর-
-মানীলভ্রূলতাযুগমনোজ্ঞম্ ।
বীটীসৌরভবীচী-
-দ্বিগুণিতবক্ত্রারবিন্দসৌরভ্যম্ ॥ 158 ॥
পাশাঙ্কুশেক্ষুচাপ-
-প্রসবশরস্ফুরিতকোমলকরাব্জম্ ।
কাশ্মীরপঙ্কিলাঙ্গং
কামেশং মনসি কুর্মহে সততম্ ॥ 159 ॥
তস্যাঙ্কভুবি নিষণ্ণাং
তরুণকদম্বপ্রসূনকিরণাভাম্ ।
শীতাংশুখণ্ডচূডাং
সীমন্তন্যস্তসান্দ্রসিন্দূরাম্ ॥ 160 ॥
কুঙ্কুমললামভাস্ব-
-ন্নিটিলাং কুটিলতরচিল্লিকাযুগলাম্ ।
নালীকতুল্যনযনাং
নাসাঞ্চলনটিতমৌক্তিকাভরণাম্ ॥ 161 ॥
অঙ্কুরিতমন্দহাস-
-মরুণাধরকান্তিবিজিতবিম্বাভাম্ ।
কস্তূরীমকরীযুত-
-কপোলসঙ্ক্রান্তকনকতাটঙ্কাম্ ॥ 162 ॥
কর্পূরসান্দ্রবীটী-
-কবলিতবদনারবিন্দকমনীযাম্ ।
কম্বুসহোদরকণ্ঠ-
-প্রলম্বমানাচ্ছমৌক্তিককলাপাম্ ॥ 163 ॥
কহ্লারদামকোমল-
-ভুজযুগলস্ফুরিতরত্নকেযূরাম্ ।
করপদ্মমূলবিলস-
-ত্কাঞ্চনমযকটকবলযসন্দোহাম্ ॥ 164 ॥
পাণিচতুষ্টযবিলস-
-ত্পাশাঙ্কুশপুণ্ড্রচাপপুষ্পাস্ত্রাম্ ।
কূলঙ্কষকুচশিখরাং
কুঙ্কুমকর্দমিতরত্নকূর্পাসাম্ ॥ 165 ॥
অণুদাযাদবলগ্না-
-মম্বুদশোভাসনাভিরোমলতাম্ ।
মাণিক্যখচিতকাঞ্চী-
-মরীচিকাক্রান্তমাংসলনিতম্বাম্ ॥ 166 ॥
করভোরুকাণ্ডযুগলাং
জঙ্ঘাজিতকামজৈত্রতূণীরাম্ ।
প্রপদপরিভূতকূর্মাং
পল্লবসচ্ছাযপদযুগমনোজ্ঞাম্ ॥ 167 ॥
কমলভবকঞ্জলোচন-
-কিরীটরত্নাংশুরঞ্জিতপদাব্জাম্ ।
উন্মস্তকানুকম্পা-
-মুত্তরলাপাঙ্গপোষিতানঙ্গাম্ ॥ 168 ॥
আদিমরসাবলম্বা-
-মনিদং প্রথমোক্তিবল্লরীকলিকাম্ ।
আব্রহ্মকীটজননী-
-মন্তঃ কলযামি সুন্দরীমনিশম্ ॥ 169 ॥
কস্তু ক্ষিতৌ পটীযা-
-ন্বস্তু স্তোতুং শিবাঙ্কবাস্তব্যম্ ।
অস্তু চিরন্তনসুকৃতৈঃ
প্রস্তুতকাম্যায তন্মম পুরস্তাত্ ॥ 170 ॥
প্রভুসম্মিতোক্তিগম্যং
পরমশিবোত্সঙ্গতুঙ্গপর্যঙ্কম্ ।
তেজঃ কিঞ্চন দিব্যং
পুরতো মে ভবতু পুণ্ড্রকোদণ্ডম্ ॥ 171 ॥
মধুরিমভরিতশরাসং
মকরন্দস্যন্দিমার্গণোদারম্ ।
কৈরবিণীবিটচূডং
কৈবল্যাযাস্তু কিঞ্চন মহো নঃ ॥ 172 ॥
অক্ষুদ্রমিক্ষুচাপং
পরোক্ষমবলগ্নসীম্নি ত্র্যক্ষম্ ।
ক্ষপযতু মে ক্ষেমেতর-
-মুক্ষরথপ্রেমপক্ষ্মলং তেজঃ ॥ 173 ॥
ভৃঙ্গরুচিসঙ্গরকরাপাঙ্গং
শৃঙ্গারতুঙ্গমরুণাঙ্গম্ ।
মঙ্গলমভঙ্গুরং মে
ঘটযতু গঙ্গাধরাঙ্গসঙ্গি মহঃ ॥ 174 ॥
প্রপদাজিতকূর্মমূর্জিত-
-করুণং ভর্মরুচিনির্মথনদেহম্ ।
শ্রিতবর্ম মর্ম শম্ভোঃ
কিঞ্চন মম নর্ম শর্ম নির্মাতু ॥ 175 ॥
কালকুরলালিকালিম-
-কন্দলবিজিতালি বিধৃতমণিবালি ।
মিলতু হৃদি পুলিনজঘনং
বহুলিতগলগরলকেলি কিমপি মহঃ ॥ 176 ॥
কুঙ্কুমতিলকিতফালা
কুরুবিন্দচ্ছাযপাটলদুকূলা ।
করুণাপযোধিবেলা
কাচন চিত্তে চকাস্তু মে লীলা ॥ 177 ॥
পুষ্পন্ধযরুচিবেণ্যঃ
পুলিনাভোগত্রপাকরশ্রেণ্যঃ ।
জীযাসুরিক্ষুপাণ্যঃ
কাশ্চন কামারিকেলিসাক্ষিণ্যঃ ॥ 178 ॥
তপনীযাংশুকভাংসি
দ্রাক্ষামাধুর্যনাস্তিকবচাংসি ।
কতিচন শুচং মহাংসি
ক্ষপযতু কপালিতোষিতমনাংসি ॥ 179 ॥
অসিতকচমাযতাক্ষং
কুসুমশরং কূলমুদ্বহকৃপার্দ্রম্ ।
আদিমরসাধিদৈবত-
-মন্তঃ কলযে হরাঙ্কবাসি মহঃ ॥ 180 ॥
কর্ণোপান্ততরঙ্গিত-
-কটাক্ষবিস্পন্দিকণ্ঠদঘ্নকৃপাম্ ।
কামেশ্বরাঙ্কনিলযাং
কামপি বিদ্যাং পুরাতনীং কলযে ॥ 181 ॥
অরবিন্দকান্ত্যরুন্তুদ-
-বিলোচনদ্বন্দ্বসুন্দরমুখেন্দু ।
ছন্দঃ কন্দলমন্দির-
-মন্তঃপুরমৈন্দুশেখরং বন্দে ॥ 182 ॥
বিম্বিনিকুরম্বডম্বর-
-বিডম্বকচ্ছাযমম্বরবলগ্নম্ ।
কম্বুগলমম্বুদকুচং
বিম্বোকং কমপি চুম্বতু মনো মে ॥ 183 ॥
কমপি কমনীযরূপং
কলযাম্যন্তঃ কদম্বকুসুমাঢ্যম্ ।
চম্পকরুচিরসুবেষৈঃ
সম্পাদিতকান্ত্যলঙ্কৃতদিগন্তম্ ॥ 184 ॥
শম্পারুচিভর-
-গর্হাসম্পাদককান্তিকবচিতদিগন্তম্ ।
সিদ্ধান্তং নিগমানাং
শুদ্ধান্তং কিমপি শূলিনঃ কলযে ॥ 185 ॥
উদ্যদ্দিনকরশোণা-
-নুত্পলবন্ধুস্তনন্ধযাপীডান্ ।
করকলিতপুণ্ড্রচাপা-
-ন্কলযে কানপি কপর্দিনঃ প্রাণান্ ॥ 186 ॥
রশনালসজ্জঘনযা
রসনাজীবাতুচাপভাসুরযা ।
ঘ্রাণাযুষ্করশরযা
ঘ্রাতং চিত্তং কযাপি বাসনযা ॥ 187 ॥
সরসিজসহযুধ্বদৃশা
শম্পালতিকাসনাভিবিগ্রহযা ।
ভাসা কযাপি চেতো
নাসামণিশোভিবদনযা ভরিতম্ ॥ 188 ॥
নবযাবকাভসিচযান্বিতযা
গজযানযা দযাপরযা ।
ধৃতযামিনীশকলযা
ধিযা কযাপি ক্ষতামযা হি বযম্ ॥ 189 ॥
অলমলমকুসুমবাণৈ-
-রবিম্বশোণৈরপুণ্ড্রকোদণ্ডৈঃ ।
অকুমুদবান্ধবচূডৈ-
-রন্যৈরিহ জগতি দৈবতং মন্যৈঃ ॥ 190 ॥
কুবলযসদৃক্ষনযনৈঃ
কুলগিরিকূটস্থবন্ধুকুচভারৈঃ ।
করুণাস্পন্দিকটাক্ষৈঃ
কবচিতচিত্তোঽস্মি কতিপযৈঃ কুতুকৈঃ ॥ 191 ॥
নতজনসুলভায নমো
নালীকসনাভিলোচনায নমঃ ।
নন্দিতগিরিশায নমো
মহসে নবনীপপাটলায নমঃ ॥ 192 ॥
কাদম্বকুসুমদাম্নে
কাযচ্ছাযাকণাযিতার্যম্ণে ।
সীম্নে চিরন্তনগিরাং
ভূম্নে কস্মৈচিদাদদে প্রণতিম্ ॥ 193 ॥
কুটিলকবরীভরেভ্যঃ
কুঙ্কুমসব্রহ্মচারিকিরণেভ্যঃ ।
কূলঙ্কষস্তনেভ্যঃ
কুর্মঃ প্রণতিং কুলাদ্রিকুতুকেভ্যঃ ॥ 194 ॥
কোকনদশোণচরণা-
-ত্কোমলকুরলালিবিজিতশৈবালাত্ ।
উত্পলসগন্ধিনযনা-
-দুররীকুর্মো ন দেবতমান্যাম্ ॥ 195 ॥
আপাটলাধরাণা-
-মানীলস্নিগ্ধবর্বরকচানাম্ ।
আম্নাযজীবনানা-
-মাকূতানাং হরস্য দাসোঽহম্ ॥ 196 ॥
পুঙ্খিতবিলাসহাস-
-স্ফুরিতাসু পুরাহিতাঙ্কনিলযাসু ।
মগ্নং মনো মদীযং
কাস্বপি কামারিজীবনাডীষু ॥ 197 ॥
ললিতা পাতু শিরো মে
ললাটমম্বা চ মধুমতীরূপা ।
ভ্রূযুগ্মং চ ভবানী
পুষ্পশরা পাতু লোচনদ্বন্দ্বম্ ॥ 198 ॥
পাযান্নাসাং বালা
সুভগা দন্তাংশ্চ সুন্দরী জিহ্বাম্ ।
অধরোষ্ঠমাদিশক্তি-
-শ্চক্রেশী পাতু মে চিরং চিবুকম্ ॥ 199 ॥
কামেশ্বরী চ কর্ণৌ
কামাক্ষী পাতু গণ্ডযোর্যুগলম্ ।
শৃঙ্গারনাযিকাব্যা-
-দ্বদনং সিংহাসনেশ্বরী চ গলম্ ॥ 200 ॥
স্কন্দপ্রসূশ্চ পাতু
স্কন্ধৌ বাহূ চ পাটলাঙ্গী মে ।
পাণী চ পদ্মনিলযা
পাযাদনিশং নখাবলীর্বিজযা ॥ 201 ॥
কোদণ্ডিনী চ বক্ষঃ
কুক্ষিং চাব্যাত্ কুলাচলতনূজা ।
কল্যাণী চ বলগ্নং
কটিং চ পাযাত্কলাধরশিখণ্ডা ॥ 202 ॥
ঊরুদ্বযং চ পাযা-
-দুমা মৃডানী চ জানুনী রক্ষেত্ ।
জঙ্ঘে চ ষোডশী মে
পাযাত্ পাদৌ চ পাশসৃণিহস্তা ॥ 203 ॥
প্রাতঃ পাতু পরা মাং
মধ্যাহ্নে পাতু মণিগৃহাধীশা ।
শর্বাণ্যবতু চ সাযং
পাযাদ্রাত্রৌ চ ভৈরবী সাক্ষাত্ ॥ 204 ॥
ভার্যাং রক্ষতু গৌরীং
পাযাত্ পুত্রাংশ্চ বিন্দুগৃহপীঠা ।
শ্রীবিদ্যা চ যশো মে
শীলং চাব্যাচ্চিরং মহারাজ্ঞী ॥ 205 ॥
পবনমযি পাবকমযি
ক্ষোণীমযি গগনমযি কৃপীটমযি ।
রবিমযি শশিমযি দিঙ্মযি
সমযমযি প্রাণমযি শিবে পাহি ॥ 206 ॥
কালি কপালিনি শূলিনি
ভৈরবি মাতঙ্গি পঞ্চমি ত্রিপুরে ।
বাগ্দেবি বিন্ধ্যবাসিনি
বালে ভুবনেশি পালয চিরং মাম্ ॥ 207 ॥
অভিনবসিন্দূরাভা-
-মম্ব ত্বাং চিন্তযন্তি যে হৃদযে ।
উপরি নিপতন্তি তেষা-
-মুত্পলনযনাকটাক্ষকল্লোলাঃ ॥ 208 ॥
বর্গাষ্টকমিলিতাভি-
-র্বশিনীমুখ্যাভিরাবৃতাং ভবতীম্ ।
চিন্তযতাং সিতবর্ণাং
বাচো নির্যান্ত্যযত্নতো বদনাত্ ॥ 209 ॥
কনকশলাকাগৌরীং
কর্ণব্যালোলকুণ্ডলদ্বিতযাম্ ।
প্রহসিতমুখীং চ ভবতীং
ধ্যাযন্তো যে ত এব ভূধনদাঃ ॥ 210 ॥
শীর্ষাম্ভোরুহমধ্যে
শীতলপীযূষবর্ষিণীং ভবতীম্ ।
অনুদিনমনুচিন্তযতা-
-মাযুষ্যং ভবতি পুষ্কলমবন্যাম্ ॥ 211 ॥
মধুরস্মিতাং মদারুণনযনাং
মাতঙ্গকুম্ভবক্ষোজাম্ ।
চন্দ্রবতংসিনীং ত্বাং
সবিধে পশ্যন্তি সুকৃতিনঃ কেচিত্ ॥ 212 ॥
ললিতাযাঃ স্তবরত্নং
ললিতপদাভিঃ প্রণীতমার্যাভিঃ ।
প্রতিদিনমবনৌ পঠতাং
ফলানি বক্তুং প্রগল্ভতে সৈব ॥ 213 ॥
সদসদনুগ্রহনিগ্রহ-
-গৃহীতমুনিবিগ্রহো ভগবান্ ।
সর্বাসামুপনিষদাং
দুর্বাসা জযতি দেশিকঃ প্রথমঃ ॥ 214 ॥
ইতি মহর্ষিদুর্বাসঃ বিরচিতং শ্রীললিতাস্তবরত্নম্ ।
Roman (IAST) Transliteration
vande gajendravadanaṃ
vāmāṅkārūḍhavallabhāśliṣṭam |
kuṅkumaparāgaśoṇaṃ
kuvalayinījārakorakāpīḍam || 1 ||
sa jayati suvarṇaśailaḥ
sakalajagaccakrasaṅghaṭitamūrtiḥ |
kāñcananikuñjavāṭī-
-kandaladamarīprapañcasaṅgītaḥ || 2 ||
harihayanairṛtamāruta-
-haritāmanteṣvavasthitaṃ tasya |
vinumaḥ sānutritayaṃ
vidhiharigaurīśaviṣṭapādhāram || 3 ||
madhye punarmanohara-
-ratnarucistabakarañjitadigantam |
upari catuḥśatayojana-
-muttuṅgaṃ śṛṅgapuṅgavamupāse || 4 ||
tatra catuḥśatayojana-
-pariṇāhaṃ devaśilpinā racitam |
nānāsālamanojñaṃ
namāmyahaṃ nagaramādividyāyāḥ || 5 ||
prathamaṃ sahasrapūrvaka-
-ṣaṭśatasaṅkhyākayojanaṃ paritaḥ |
valayīkṛtasvagātraṃ
varaṇaṃ śaraṇaṃ vrajāmyayorūpam || 6 ||
tasyottare samīraṇa-
-yojanadūre taraṅgitacchāyaḥ |
ghaṭayatu mudaṃ dvitīyo
ghaṇṭāstanasāranirmitaḥ sālaḥ || 7 ||
ubhayorantarasīma-
-nyuddāmabhramararañjitodāram |
upavanamupāsmahe vaya-
-mūrīkṛtamandamārutasyandam || 8 ||
āliṅgya bhadrakālī-
-māsīnastatra hariśilāśyāmām |
manasi mahākālo me
viharatu madhupānavibhramannetraḥ || 9 ||
tārtīyīko varaṇa-
-stasyottarasīmni vātayojanataḥ |
tāmreṇa racitamūrti-
-stanutāmācandratārakaṃ bhadram || 10 ||
madhye tayośca maṇimaya-
-pallavaśākhāprasūnapakṣmalitām |
kalpānokahavāṭīṃ
kalaye makarandapaṅkilāvālām || 11 ||
tatra madhumādhavaśrī-
-taruṇībhyāṃ taraladṛkcakorābhyām |
āliṅgito'vatānmā-
-maniśaṃ prathamarturāttapuṣpāstraḥ || 12 ||
namata taduttarabhāge
nākipathollaṅghiśṛṅgasaṅghātam |
sīsākṛtiṃ turīyaṃ
sitakiraṇālokanirmalaṃ sālam || 13 ||
sāladvayāntarāle
saralālikapotacāṭusubhagāyām |
santānavāṭikāyāṃ
saktaṃ ceto'stu satatamasmākam || 14 ||
tatra tapanātirūkṣaḥ
sāmrājñīcaraṇasāndritasvāntaḥ |
śukraśuciśrīsahito
grīṣmarturdiśatu kīrtimākalpam || 15 ||
uttarasīmani tasyo-
-nnataśikharotkampihāṭakapatākaḥ |
prakaṭayatu pañcamo naḥ
prākāraḥ kuśalamārakūṭamayaḥ || 16 ||
prākārayośca madhye
pallavitānyabhṛtapañcamonmeṣā |
haricandanadruvāṭī-
-haratādāmūlamasmadanutāpam || 17 ||
tatra nabhaḥ śrīmukhyai-
-staruṇīvargaiḥ samanvitaḥ paritaḥ |
vajrāṭṭahāsamukharo
vāñchāpūrtiṃ tanotu varṣartuḥ || 18 ||
mārutayojanadūre
mahanīyastasya cottare bhāge |
bhadraṃ kṛṣīṣṭa ṣaṣṭhaḥ
prākāraḥ pañcalohadhātumayaḥ || 19 ||
anayormadhye santata-
-maṅkūraddivyakusumagandhāyām |
mandāravāṭikāyāṃ
mānasamaṅgīkarotu me vihṛtim || 20 ||
tasyāmiṣorjalakṣmī-
-taruṇībhyāṃ śaradṛtuḥ sadā sahitaḥ |
abhyarcayan sa jīyā-
-dambāmāmodameduraiḥ kusumaiḥ || 21 ||
tasyarṣisaṅkhyayojana-
-dūre dedīpyamānaśṛṅgaughaḥ |
kaladhautakalitamūrtiḥ
kalyāṇaṃ diśatu saptamaḥ sālaḥ || 22 ||
madhye tayormarutpatha
laṅghitaviṭapāgravirutakalakaṇṭhā |
śrīpārijātavāṭī
śriyamaniśaṃ diśatu śītaloddeśā || 23 ||
tasyāmatipriyābhyāṃ
saha khelan sahasahasyalakṣmībhyām |
sāmanto jhaṣaketo-
-rhemanto bhavatu hemavṛddhyai naḥ || 24 ||
uttaratastasya mahā-
-nudbhaṭahutabhukśikhāruṇamayūkhaḥ |
tapanīyakhaṇḍaracita-
-stanutādāyuṣyamaṣṭamo varaṇaḥ || 25 ||
kādambavipinavāṭī-
-manayormadhyabhuvi kalpitāvāsām |
kalayāmi sūnakoraka-
-kandalitāmodatundilasamīrām || 26 ||
tasyāmatiśiśirākṛti-
-rāsīnastapatapasyalakṣmībhyām |
śivamaniśaṃ kurutānme
śiśirartuḥ satataśītaladigantaḥ || 27 ||
tasyāṃ kadambavāṭyāṃ
tatprasavāmodamilitamadhugandham |
saptāvaraṇamanojñaṃ
śaraṇaṃ samupaimi mantriṇīśaraṇam || 28 ||
tatrālaye viśāle
tapanīyāracitataralasopāne |
māṇikyamaṇḍapānta-
-rmahite siṃhāsane sumaṇikhacite || 29 ||
bindutripañcakoṇa-
-dvipanṛpavasuvedadalakurekhāḍhye |
cakre sadā niviṣṭāṃ
ṣaṣṭhyaṣṭatriṃśadakṣareśānīm || 30 ||
tāpiñchamecakābhāṃ
tālīdalaghaṭitakarṇatāṭaṅkām |
tāmbūlapūritamukhīṃ
tāmrādharabimbadṛṣṭadarahāsām || 31 ||
kuṅkumapaṅkiladehāṃ
kuvalayajīvātuśāvakavataṃsām |
kokanadaśoṇacaraṇāṃ
kokilanikvāṇakomalālāpām || 32 ||
vāmāṅgagalitacūlīṃ
vanamālyakadambamālikābharaṇām |
muktālalantikāñcita
mugdhālikamilitacitrakodārām || 33 ||
karavidhṛtakīraśāvaka-
-kalaninadavyaktanikhilanigamārthām |
vāmakucasaṅgivīṇāvādana-
-saukhyārdhamīlitākṣiyugām || 34 ||
āpāṭalāṃśukadharā-
-mādirasonmeṣavāsitakaṭākṣām |
āmnāyasāragulikā-
-mādyāṃ saṅgītamātṛkāṃ vande || 35 ||
tasya ca suvarṇasāla-
-syottaratastaruṇakuṅkumacchāyaḥ |
śamayatu mama santāpaṃ
sālo navamaḥ sa puṣparāgamayaḥ || 36 ||
anayorantaravasudhāḥ
praṇumaḥ pratyagrapuṣparāgamayīḥ |
siṃhāsaneśvarīmanu-
-cintananistandrasiddhanīrandhrāḥ || 37 ||
tatsālottaradeśe
taruṇajapākiraṇadhoraṇīśoṇaḥ |
praśamayatu padmarāga-
-prākāro mama parābhavaṃ daśamaḥ || 38 ||
antarabhūkṛtavāsā-
-nanayorapanītacittavaimatyān |
cakreśīpadabhaktāṃ-
-ścāraṇavargānaharniśaṃ kalaye || 39 ||
sāraṅgavāhayojanadūre-
-'saṅghaṭitaketanastasya |
gomedakena racito
gopāyatu māṃ samunnataḥ sālaḥ || 40 ||
vapradvayāntarorvyāṃ
vaṭukairvividhaiśca yoginībṛndaiḥ |
satataṃ samarcitāyāḥ
saṅkarṣaṇyāḥ praṇaumi caraṇābjam || 41 ||
tāpasayojanadūre
tasya samuttuṅga gopuropetaḥ |
vāñchāpūrtyai bhavatā-
-dvajramaṇīnikaranirmito vapraḥ || 42 ||
varaṇadvitayāntarato
vāsajuṣo vihitamadhurasāsvādāḥ |
rambhādivibudhaveśyā
racayantu mahāntamasmadānandam || 43 ||
tatra sadā pravahantī
taṭinī vajrābhidhā ciraṃ jīyāt |
caṭulormijālanṛtya-
-tkalahaṃsīkulakalakvaṇitapuṣṭā || 44 ||
rodhasi tasyā rucire
vajreśī jayati vajrabhūṣāḍhyā |
vajrapradānatoṣita-
-vajrimukhatridaśavinutacāritrā || 45 ||
tasyodīcyāṃ hariti
stavakitasuṣamāvalīḍhaviyadantaḥ |
vaiḍūryaratnaracito
vaimalyaṃ diśatu cetaso varaṇaḥ || 46 ||
adhimadhyametayoḥ puna-
-rambācaraṇāvalambitasvāntān |
kārkoṭakādināgān
kalayāmaḥ kiṃ ca balimukhān danujān || 47 ||
gandhavahasaṅkhyayojana-
-dūre gaganordhvajāṅghikastasya |
vāsavamaṇipraṇīto
varaṇo bahalayatu vaiduṣīṃ viśadām || 48 ||
madhyakṣoṇyāmanayo-
-rmahendranīlātmakāni ca sarāṃsi |
śātodarīsahāyā-
-nbhūpālānapi punaḥ punaḥ praṇumaḥ || 49 ||
āśugayojanadūre
tasyordhvaṃ kāntidhavalitadigantaḥ |
muktāviracitagātro
muhurasmākaṃ mude bhavatu sālaḥ || 50 ||
āvṛttyoradhimadhyaṃ
pūrvasyāṃ diśi purandaraḥ śrīmān |
abhramuviṭādhirūḍho
vibhramamasmākamaniśamātanutāt || 51 ||
tatkoṇe vyajanasru-
-ktomarapātrasruvānnaśaktidharaḥ |
svāhāsvadhāsametaḥ
sukhayatu māṃ havyavāhanaḥ suciram || 52 ||
dakṣiṇadigantarāle
daṇḍadharo nīlanīradacchāyaḥ |
tripurāpadābjabhaktastirayatu
mama nikhilamaṃhasāṃ nikaram || 53 ||
tasyaiva paścimāyāṃ
diśi dalitendīvaraprabhāśyāmaḥ |
kheṭāsiyaṣṭidhārī
khedānapanayatu yātudhāno me || 54 ||
tasyā uttaradeśe
dhavalāṅgo vipulajhaṣavarārūḍhaḥ |
pāśāyudhāttapāṇiḥ
pāśī vidalayatu pāśajālāni || 55 ||
vande taduttarahari-
-tkoṇe vāyuṃ camūruvaravāham |
korakitatattvabodhā-
-ngorakṣapramukhayogino'pi muhuḥ || 56 ||
taruṇīriḍāpradhānā-
-stisro vātasya tasya kṛtavāsāḥ |
pratyagrakāpiśāyana-
-pānaparibhrāntalocanāḥ kalaye || 57 ||
tallokapūrvabhāge
dhanadaṃ dhyāyāmi śevadhikuleśam |
api māṇibhadramukhyā-
-nambācaraṇāvalambino yakṣān || 58 ||
tasyaiva pūrvasīmani
tapanīyāracitagopure nagare |
kātyāyanīsahāyaṃ
kalaye śītāṃśukhaṇḍacūḍālam || 59 ||
tatpuraṣoḍaśavaraṇa-
-sthalabhājastaruṇacandracūḍālān |
rudrādhyāye paṭhitā-
-nrudrāṇīsahacarānbhaje rudrān || 60 ||
pavamānasaṅkhyayojana-
-dūre bālatṛṇmecakastasya |
sālo marakataracitaḥ
sampadamacalāṃ śriyaṃ ca puṣṇātu || 61 ||
āvṛtiyugmāntarato
haritamaṇīnivahamecake deśe |
hāṭakatālīvipinaṃ
hālāghaṭaghaṭitaviṭapamākalaye || 62 ||
tatraiva mantriṇīgṛha-
-pariṇāhaṃ taralaketanaṃ sadanam |
marakatasaudhamanojñaṃ
dadyādāyūṃṣi daṇḍanāthāyāḥ || 63 ||
sadane tatra harinmaṇi-
-saṅghaṭite maṇḍape śatastambhe |
kārtasvaramayapīṭhe
kanakamayāmburuhakarṇikāmadhye || 64 ||
bindutrikoṇavartula-
-ṣaḍasravṛttadvayānvite cakre |
sañcāriṇī daśottara-
śatārṇamanurājakamalakalahaṃsī || 65 ||
kolavadanā kuśeśaya-
-nayanā kokārimaṇḍitaśikhaṇḍā |
santaptakāñcanābhā
sandhyāruṇacelasaṃvṛtanitambā || 66 ||
halamusalaśaṅkhacakrā-
-'ṅkuśapāśābhayavarasphuritahastā |
kūlaṅkaṣānukampā
kuṅkumajambālitastanābhogā || 67 ||
dhūrtānāmatidūrā-
-vārtāśeṣāvalagnakamanīyā |
ārtālīśubhadātrī
vārtālī bhavatu vāñchitārthāya || 68 ||
tasyāḥ parito devīḥ
svapneśyunmattabhairavīmukhyāḥ |
praṇamata jambhinyādyāḥ
bhairavavargāṃśca hetukapramukhān || 69 ||
pūrvoktasaṅkhyayojana-
-dūre pūyāṃśupāṭalastasya |
vidrāvayatu madārtiṃ
vidrumasālo viśaṅkaṭadvāraḥ || 70 ||
āvaraṇayoraharniśa-
-mantarabhūmauprakāśaśālinyām |
āsīnamambujāsana-
-mabhinavasindūragauramahamīḍe || 71 ||
varaṇasya tasya māruta-
-yojanato vipulagopuradvāraḥ |
sālo nānāratnaiḥ
saṅghaṭitāṅgaḥ kṛṣīṣṭa madabhīṣṭam || 72 ||
antarakakṣyāmanayo-
-raviralaśobhāpicaṇḍiloddeśām |
māṇikyamaṇḍapākhyāṃ
mahatīmadhihṛdayamaniśamākalaye || 73 ||
tatra sthitaṃ prasannaṃ
taruṇatamālapravālakiraṇābham |
karṇāvalambikuṇḍala-
-kandalitābhīśukavacitakapolam || 74 ||
śoṇādharaṃ śucismita-
-meṇāṅkavadanamedhamānakṛpam |
mugdhaiṇamadaviśeṣaka-
-mudritaniṭilendurekhikāruciram || 75 ||
nālīkadalasahodara-
-nayanāñcalaghaṭitamanasijākūtam |
kamalākaṭhinapayodhara-
-kastūrīghusṛṇapaṅkiloraskam || 76 ||
cāmpeyagandhikaiśyaṃ
śampāsabrahmacārikauśeyam |
śrīvatsakaustubhadharaṃ
śritajanarakṣādhurīṇacaraṇābjam || 77 ||
kambusudarśanavilasa-
-tkarapadmaṃ kaṇṭhalolavanamālam |
mucukundamokṣaphaladaṃ
mukundamānandakandamavalambe || 78 ||
tadvaraṇottarabhāge
tārāpatibimbacumbinijaśṛṅgaḥ |
vividhamaṇīgaṇaghaṭito
vitaratu sālo vinirmalāṃ dhiṣaṇām || 79 ||
prākāradvitayāntara-
-kakṣyāṃ pṛthuratnanikarasaṅkīrṇām |
namata sahasrastambhaka-
-maṇḍapanāmnātiviśrutāṃ bhuvane || 80 ||
praṇumastatra bhavānī-
-sahacaramīśānamindukhaṇḍadharam |
śṛṅgāranāyikāmanu-
-śīlanabhājo'pi bhṛṅginandimukhān || 81 ||
tasyaiṇavāhayojana-
-dūre vande manomayaṃ vapram |
aṅkūranmaṇikiraṇā-
-mantarakakṣyāṃ ca nirmalāmanayoḥ || 82 ||
tatraivāmṛtavāpīṃ
taralataraṅgāvalīḍhataṭayugmām |
muktāmayakalahaṃsī-
-mudritakanakāravindasandohām || 83 ||
śakropalamayabhṛṅgī-
-saṅgītonmeṣaghoṣitadigantām |
kāñcanamayāṅgavilasa-
-tkāraṇḍavaṣaṇḍatāṇḍavamanojñām || 84 ||
kuruvindātmakahallaka-
-korakasuṣamāsamūhapāṭalitām |
kalaye sudhāsvarūpāṃ
kandalitāmandakairavāmodām || 85 ||
tadvāpikāntarāle tarale
maṇipotasīmni viharantīm |
sindūrapāṭalāṅgīṃ
sitakiraṇāṅkūrakalpitavataṃsām || 86 ||
parvendubimbavadanāṃ
pallavaśoṇādharasphuritahāsām |
kuṭilakabarīṃ kuraṅgī-
-śiśunayanāṃ kuṇḍalasphuritagaṇḍām || 87 ||
nikaṭasthapotanilayāḥ
śaktīḥ śayavidhṛtahemaśṛṅgajalaiḥ |
pariṣiñcantīṃ parita-
-stārāṃ tāruṇyagarvitāṃ vande || 88 ||
prāguktasaṅkhyayojanadūre
praṇamāmi buddhimayasālam |
anayorantarakakṣyā-
-maṣṭāpadapuṣṭamedinīṃ rucirām || 89 ||
kādambarīnidhānāṃ
kalayāmyānandavāpikāṃ tasyām |
śoṇāśmanivahanirmita-
-sopānaśreṇiśobhamānataṭīm || 90 ||
māṇikyataraṇinilayāṃ
madhye tasyā madāruṇakapolām |
amṛteśītyabhidhānā-
-mantaḥ kalayāmi vāruṇīṃ devīm || 91 ||
sauvarṇakenipātana-
-hastāḥ saundaryagarvitā devyaḥ |
tatpurataḥ sthitibhājo
vitarantvasmākamāyuṣo vṛddhim || 92 ||
tasya pṛṣadaśvayojana-
-dūre'haṅkārasālamatituṅgam |
vande tayośca madhye
kakṣyāṃ valamānamalayapavamānām || 93 ||
vinumo vimarśavāpīṃ
sauṣumnasudhāsvarūpiṇīṃ tatra |
velātilaṅghyavīcī-
-kolāhalabharitakūlavanavāṭīm || 94 ||
tatraiva salilamadhye
tāpiñchadalaprapañcasuṣamābhām |
śyāmalakañcukalasitāṃ
śyāmāviṭabimbaḍambaraharāsyām || 95 ||
ābhugnamasṛṇacillī-
-hasitāyugmaśarakārmukavilāsām |
mandasmitāñcitamukhīṃ
maṇimayatāṭaṅkamaṇḍitakapolām || 96 ||
kuruvindataraṇinilayāṃ
kulācalaspardhikucanamanmadhyām |
kuṅkumaviliptagātrīṃ
kurukullāṃ manasi kurmahe satatam || 97 ||
tatsālottarabhāge
bhānumayaṃ vapramāśraye dīptam |
madhyaṃ ca vipulamanayo-
-rmanye viśrāntamātapodgāram || 98 ||
tatra kuruvindapīṭhe
tāmarase kanakakarṇikāghaṭite |
āsīnamaruṇavāsasa-
-mamlānaprasavamālikābharaṇam || 99 ||
cakṣuṣmatīprakāśana-
-śakticchāyāsamāracitakelim |
māṇikyamukuṭaramyaṃ
manye mārtāṇḍabhairavaṃ hṛdaye || 100 ||
indumayasālamīḍe
tasyottaratastuṣāragirigauram |
atyantaśiśiramāruta-
-manayormadhyaṃ ca candrikodgāram || 101 ||
tatra prakāśamānaṃ
tārānikaraiḥ pariṣkṛtoddeśam |
amṛtamayakāntikandala-
-mantaḥ kalayāmi kundasitamindum || 102 ||
śṛṅgārasālamīḍe
śṛṅgollasitaṃ taduttare bhāge |
madhyasthale tayorapi
mahitāṃ śṛṅgārapūrvikāṃ parikhām || 103 ||
tatra maṇinausthitābhi-
-stapanīyāviracitāgrahastābhiḥ |
śṛṅgāradevatābhiḥ
sahitaṃ parikhādhipaṃ bhaje madanam || 104 ||
śṛṅgāravaraṇavaryasyottarataḥ
sakalavibudhasaṃsevyam |
cintāmaṇigaṇaracitaṃ
cintāṃ dūrīkarotu me sadanam || 105 ||
maṇisadanasālayoradhi-
-madhyaṃ daśatālabhūmiruhadīrghaiḥ |
parṇaiḥ suvarṇavarṇai-
-ryuktāṃ kāṇḍaiśca yojanottuṅgaiḥ || 106 ||
mṛdulaistālīpañcaka-
-mānairmilitāṃ ca kesarakadambaiḥ |
santatagalitamaranda-
-srotoniryanmilindasandohām || 107 ||
pāṭīrapavanabālaka-
-dhāṭīniryatparāgapiñjaritām |
kalahaṃsīkulakalakala-
-kūlaṅkaṣaninadanicayakamanīyām || 108 ||
padmāṭavīṃ bhajāmaḥ
parimalakallolapakṣmalopāntām |
[ devyarghyapātradhārī
tasyāḥ pūrvadiśi daśakalāyuktaḥ | ]
valayitamūrtirbhagavā-
-nvahniḥ krośonnataściraṃ pāyāt || 109 ||
tatrādhāre devyāḥ
pātrīrūpaḥ prabhākaraḥ śrīmān |
dvādaśakalāsameto
dhvāntaṃ mama bahulamāntaraṃ bhindyāt || 110 ||
tasmin dineśapātre
taraṅgitāmodamamṛtamayamarghyam |
candrakalātmakamamṛtaṃ
sāndrīkuryādamandamānandam || 111 ||
amṛte tasminnabhito
viharantyo vividhamaṇitaraṇibhājaḥ |
ṣoḍaśa kalāḥ sudhāṃśoḥ
śokāduttārayantu māmaniśam || 112 ||
tatraiva vihṛtibhājo
dhātṛmukhānāṃ ca kāraṇeśānām |
sṛṣṭyādirūpikāstāḥ
śamayantvakhilāḥ kalāśca santāpam || 113 ||
kīnāśavaruṇakinnara-
-rājadiganteṣu ratnagehasya |
kalayāmi tānyajasraṃ
kalayantvāyuṣyamarghyapātrāṇi || 114 ||
pātrasthalasya purataḥ
padmāramaṇavidhipārvatīśānām |
bhavanāni śarmaṇe no
bhavantu bhāsā pradīpitajaganti || 115 ||
sadanasyānalakoṇe
satataṃ praṇamāmi kuṇḍamāgneyam |
tatra sthitaṃ ca vahniṃ
taralaśikhājaṭilamambikājanakam || 116 ||
tasyāsuradiśi tādṛśa-
-ratnaparisphuritaparvanavakāḍhyam |
cakrātmakaṃ śatāṅgaṃ
śatayojanamunnataṃ bhaje divyam || 117 ||
tatraiva diśi niṣaṇṇaṃ
tapanīyadhvajaparamparāśliṣṭam |
rathamaparaṃ ca bhavānyā
racayāmo manasi ratnamayacūḍam || 118 ||
bhavanasya vāyubhāge
pariṣkṛto vividhavaijayantībhiḥ |
racayatu mudaṃ rathendraḥ
saciveśānyāḥ samastavandyāyāḥ || 119 ||
kurmo'dhihṛdayamaniśaṃ
kroḍāsyāyāḥ śatāṅgamūrdhanyam |
rudradiśi ratnadhāmno
ruciraśalākāprapañcakañcukitam || 120 ||
parito devīdhāmnaḥ
praṇītavāsā manusvarūpiṇyaḥ |
kurvantu raśmimālā-
-kṛtayaḥ kuśalāni devatā nikhilāḥ || 121 ||
prāgdvārasya bhavānī-
-dhāmnaḥ pārśvadvayāracitavāse |
mātaṅgīkiṭimukhyau
maṇisadane manasi bhāvayāmi ciram || 122 ||
yojanayugalābhogā
tatkrośapariṇāhayaiva bhittyā ca |
cintāmaṇigṛhabhūmi-
-rjīyādāmnāyamayacaturdvārā || 123 ||
dvāre dvāre dhāmnaḥ
piṇḍībhūtā navīnabimbābhāḥ |
vidadhatu vipulāṃ kīrtiṃ
divyā lauhityasiddhyo devyaḥ || 124 ||
maṇisadanasyāntarato
mahanīye ratnavedikāmadhye |
bindumayacakramīḍe
pīṭhānāmupari viracitāvāsam || 125 ||
cakrāṇāṃ sakalānāṃ
prathamamadhaḥ sīmaphalakavāstavyāḥ |
aṇimādisiddhayo mā-
-mavantu devī prabhāsvarūpiṇyaḥ || 126 ||
aṇimādisiddhiphalaka-
-syoparihariṇāṅkakhaṇḍakṛtacūḍāḥ |
bhadraṃ pakṣmalayantu
brāhmīpramukhāśca mātaro'smākam || 127 ||
tasyopari maṇiphalake
tāruṇyottuṅgapīnakucabhārāḥ |
saṅkṣobhiṇīpradhānāḥ
bhrānti vidrāvayantu daśa mudrāḥ || 128 ||
phalakatrayasvarūpe
pṛthule trailokyamohane cakre |
dīvyantu prakaṭākhyā-
-stāsāṃ kartrīṃ ca bhagavatī tripurā || 129 ||
tadupari vipule dhiṣṇye
taraladṛśastaruṇakokanadabhāsaḥ |
kāmākarṣiṇyādyāḥ
kalaye devīḥ kalādharaśikhaṇḍāḥ || 130 ||
sarvāśāparipūrakacakre-
-'smin guptayoginīsevyāḥ |
tripureśī mama duritaṃ
tudyāt kaṇṭhāvalambimaṇihārā || 131 ||
tasyopari maṇipīṭhe
tāmrāmbhoruhadalaprabhāśoṇāḥ |
dhyāyāmyanaṅgakusumā-
-pramukhā devīśca vidhṛtakūrpāsāḥ || 132 ||
saṅkṣobhakārake'smiṃ-
-ścakre śrītripurasundarī sākṣāt |
goptrī guptatarākhyāḥ
gopāyatu māṃ kṛpārdrayā dṛṣṭyā || 133 ||
saṅkṣobhiṇīpradhānāḥ
śaktīstasyordhvavalayakṛtavāsāḥ |
ālolanīlaveṇī-
-rantaḥ kalayāmi yauvanonmattāḥ || 134 ||
saubhāgyadāyake'smiṃ-
-ścakreśī tripuravāsinī jīyāt |
śaktīśca sampradāyābhidhāḥ
samastāḥ pramodayantvaniśam || 135 ||
maṇipīṭhopari tāsāṃ
mahati caturhastavistṛte valaye |
santataviracitavāsāḥ
śaktīḥ kalayāmi sarvasiddhimukhāḥ || 136 ||
sarvārthasādhakākhye
cakre'muṣmin samastaphaladātrī |
tripurā śrīrmama kuśalaṃ
diśatāduttīrṇayoginīsevyā || 137 ||
tāsāṃ nilayasyopari
dhiṣṇye kausumbhakañcukamanojñāḥ |
sarvājñādyāḥ devyaḥ
sakalāḥ sampādayantu mama kīrtim || 138 ||
cakre samastarakṣā-
-karanāmnyasmin samastajanasevyām |
manasi nigarbhāsahitāṃ
manye śrītripuramālinīṃ devīm || 139 ||
sarvajñāsadanasyopari
cakre vipule samākalitagehāḥ |
vande vaśinīmukhyāḥ
śaktīḥ sindūrareṇurucaḥ || 140 ||
śrīsarvarogaharākhya-
-cakre'smiṃstripurapūrvikāṃ siddhām |
vande rahasyanāmnā
vedyābhiḥ śaktibhiḥ sadā sevyām || 141 ||
vaśinīgṛhopariṣṭā-
-dviṃśatihastonnate mahāpīṭhe |
śamayantu śatrubṛndaṃ
śastrāṇyastrāṇi cādidampatyoḥ || 142 ||
śastrasadanopariṣṭā-
-dvalaye valavairiratnasaṅghaṭite |
kāmeśvarīpradhānāḥ
kalaye devīḥ samastajanavandyāḥ || 143 ||
cakre'tra sarvasiddhiprada-
-nāmani sarvaphaladātrī |
tripurāmbāvatu satataṃ
parāpararahasyayoginīsevyā || 144 ||
kāmeśvarīgṛhoparivalaye
vividhamanusampradāyajñāḥ |
catvāro yuganāthā
jayantu mitreśapūrvakāḥ guravaḥ || 145 ||
nāthabhavanopariṣṭā-
-nnānāratnacayamedure pīṭhe |
kāmeśyādyā nityāḥ
kalayantu mudaṃ tithisvarūpiṇyaḥ || 146 ||
nityāsadanasyopari
nirmalamaṇinivahaviracite dhiṣṇye |
kuśalaṃ ṣaḍaṅgadevyaḥ
kalayantvasmākamuttaralanetrāḥ || 147 ||
sadanasyopari tāsāṃ
sarvānandamayanāmake bindau |
pañcabrahmākārāṃ
mañcaṃ praṇamāmi maṇigaṇākīrṇam || 148 ||
parito maṇimañcasya
pralambamānā niyantritā pāśaiḥ |
māyāmayī javanikā
mama duritaṃ haratu mecakacchāyā || 149 ||
mañcasyopari lamba-
-nmadanīpunnāgamālikābharitam |
harigopamayavitānaṃ
haratādālasyamaniśamasmākam || 150 ||
paryaṅkasya bhajāmaḥ
pādānbimbāmbudenduhemarucaḥ |
ajaharirudreśamayā-
-nanalāsuramāruteśakoṇasthān || 151 ||
phalakaṃ sadāśivamayaṃ
praṇaumi sindūrareṇukiraṇābham |
ārabhyāṅgeśīnāṃ
sadanātkalitaṃ ca ratnasopānam || 152 ||
paṭṭopadhānagaṇḍaka-
-catuṣṭayasphuritapāṭalāstaraṇam |
paryaṅkopari ghaṭitaṃ
pātu ciraṃ haṃsatūlaśayanaṃ naḥ || 153 ||
tasyopari nivasantaṃ
tāruṇyaśrīniṣevitaṃ satatam |
āvṛntapullahallaka-
-marīcikāpuñjamañjulacchāyam || 154 ||
sindūraśoṇavasanaṃ
śītāṃśustabakacumbitakirīṭam |
kuṅkumatilakamanohara-
-kuṭilālikahasitakumudabandhuśiśum || 155 ||
pūrṇendubimbavadanaṃ
phullasarojātalocanatritayam |
taralāpāṅgataraṅgita-
-śapharāṅkanaśāstrasampradāyārtham || 156 ||
maṇimayakuṇḍalapuṣya-
-nmarīcikallolamāṃsalakapolam |
vidrumasahodarādhara-
-visṛmarasusmitakiśorasañcāram || 157 ||
āmodikusumaśekhara-
-mānīlabhrūlatāyugamanojñam |
vīṭīsaurabhavīcī-
-dviguṇitavaktrāravindasaurabhyam || 158 ||
pāśāṅkuśekṣucāpa-
-prasavaśarasphuritakomalakarābjam |
kāśmīrapaṅkilāṅgaṃ
kāmeśaṃ manasi kurmahe satatam || 159 ||
tasyāṅkabhuvi niṣaṇṇāṃ
taruṇakadambaprasūnakiraṇābhām |
śītāṃśukhaṇḍacūḍāṃ
sīmantanyastasāndrasindūrām || 160 ||
kuṅkumalalāmabhāsva-
-nniṭilāṃ kuṭilataracillikāyugalām |
nālīkatulyanayanāṃ
nāsāñcalanaṭitamauktikābharaṇām || 161 ||
aṅkuritamandahāsa-
-maruṇādharakāntivijitabimbābhām |
kastūrīmakarīyuta-
-kapolasaṅkrāntakanakatāṭaṅkām || 162 ||
karpūrasāndravīṭī-
-kabalitavadanāravindakamanīyām |
kambusahodarakaṇṭha-
-pralambamānācchamauktikakalāpām || 163 ||
kahlāradāmakomala-
-bhujayugalasphuritaratnakeyūrām |
karapadmamūlavilasa-
-tkāñcanamayakaṭakavalayasandohām || 164 ||
pāṇicatuṣṭayavilasa-
-tpāśāṅkuśapuṇḍracāpapuṣpāstrām |
kūlaṅkaṣakucaśikharāṃ
kuṅkumakardamitaratnakūrpāsām || 165 ||
aṇudāyādavalagnā-
-mambudaśobhāsanābhiromalatām |
māṇikyakhacitakāñcī-
-marīcikākrāntamāṃsalanitambām || 166 ||
karabhorukāṇḍayugalāṃ
jaṅghājitakāmajaitratūṇīrām |
prapadaparibhūtakūrmāṃ
pallavasacchāyapadayugamanojñām || 167 ||
kamalabhavakañjalocana-
-kirīṭaratnāṃśurañjitapadābjām |
unmastakānukampā-
-muttaralāpāṅgapoṣitānaṅgām || 168 ||
ādimarasāvalambā-
-manidaṃ prathamoktivallarīkalikām |
ābrahmakīṭajananī-
-mantaḥ kalayāmi sundarīmaniśam || 169 ||
kastu kṣitau paṭīyā-
-nvastu stotuṃ śivāṅkavāstavyam |
astu cirantanasukṛtaiḥ
prastutakāmyāya tanmama purastāt || 170 ||
prabhusammitoktigamyaṃ
paramaśivotsaṅgatuṅgaparyaṅkam |
tejaḥ kiñcana divyaṃ
purato me bhavatu puṇḍrakodaṇḍam || 171 ||
madhurimabharitaśarāsaṃ
makarandasyandimārgaṇodāram |
kairaviṇīviṭacūḍaṃ
kaivalyāyāstu kiñcana maho naḥ || 172 ||
akṣudramikṣucāpaṃ
parokṣamavalagnasīmni tryakṣam |
kṣapayatu me kṣemetara-
-mukṣarathapremapakṣmalaṃ tejaḥ || 173 ||
bhṛṅgarucisaṅgarakarāpāṅgaṃ
śṛṅgāratuṅgamaruṇāṅgam |
maṅgalamabhaṅguraṃ me
ghaṭayatu gaṅgādharāṅgasaṅgi mahaḥ || 174 ||
prapadājitakūrmamūrjita-
-karuṇaṃ bharmarucinirmathanadeham |
śritavarma marma śambhoḥ
kiñcana mama narma śarma nirmātu || 175 ||
kālakuralālikālima-
-kandalavijitāli vidhṛtamaṇivāli |
milatu hṛdi pulinajaghanaṃ
bahulitagalagaralakeli kimapi mahaḥ || 176 ||
kuṅkumatilakitaphālā
kuruvindacchāyapāṭaladukūlā |
karuṇāpayodhivelā
kācana citte cakāstu me līlā || 177 ||
puṣpandhayaruciveṇyaḥ
pulinābhogatrapākaraśreṇyaḥ |
jīyāsurikṣupāṇyaḥ
kāścana kāmārikelisākṣiṇyaḥ || 178 ||
tapanīyāṃśukabhāṃsi
drākṣāmādhuryanāstikavacāṃsi |
katicana śucaṃ mahāṃsi
kṣapayatu kapālitoṣitamanāṃsi || 179 ||
asitakacamāyatākṣaṃ
kusumaśaraṃ kūlamudvahakṛpārdram |
ādimarasādhidaivata-
-mantaḥ kalaye harāṅkavāsi mahaḥ || 180 ||
karṇopāntataraṅgita-
-kaṭākṣavispandikaṇṭhadaghnakṛpām |
kāmeśvarāṅkanilayāṃ
kāmapi vidyāṃ purātanīṃ kalaye || 181 ||
aravindakāntyaruntuda-
-vilocanadvandvasundaramukhendu |
chandaḥ kandalamandira-
-mantaḥpuramainduśekharaṃ vande || 182 ||
bimbinikurambaḍambara-
-viḍambakacchāyamambaravalagnam |
kambugalamambudakucaṃ
bimbokaṃ kamapi cumbatu mano me || 183 ||
kamapi kamanīyarūpaṃ
kalayāmyantaḥ kadambakusumāḍhyam |
campakarucirasuveṣaiḥ
sampāditakāntyalaṅkṛtadigantam || 184 ||
śampārucibhara-
-garhāsampādakakāntikavacitadigantam |
siddhāntaṃ nigamānāṃ
śuddhāntaṃ kimapi śūlinaḥ kalaye || 185 ||
udyaddinakaraśoṇā-
-nutpalabandhustanandhayāpīḍān |
karakalitapuṇḍracāpā-
-nkalaye kānapi kapardinaḥ prāṇān || 186 ||
raśanālasajjaghanayā
rasanājīvātucāpabhāsurayā |
ghrāṇāyuṣkaraśarayā
ghrātaṃ cittaṃ kayāpi vāsanayā || 187 ||
sarasijasahayudhvadṛśā
śampālatikāsanābhivigrahayā |
bhāsā kayāpi ceto
nāsāmaṇiśobhivadanayā bharitam || 188 ||
navayāvakābhasicayānvitayā
gajayānayā dayāparayā |
dhṛtayāminīśakalayā
dhiyā kayāpi kṣatāmayā hi vayam || 189 ||
alamalamakusumabāṇai-
-rabimbaśoṇairapuṇḍrakodaṇḍaiḥ |
akumudabāndhavacūḍai-
-ranyairiha jagati daivataṃ manyaiḥ || 190 ||
kuvalayasadṛkṣanayanaiḥ
kulagirikūṭasthabandhukucabhāraiḥ |
karuṇāspandikaṭākṣaiḥ
kavacitacitto'smi katipayaiḥ kutukaiḥ || 191 ||
natajanasulabhāya namo
nālīkasanābhilocanāya namaḥ |
nanditagiriśāya namo
mahase navanīpapāṭalāya namaḥ || 192 ||
kādambakusumadāmne
kāyacchāyākaṇāyitāryamṇe |
sīmne cirantanagirāṃ
bhūmne kasmaicidādade praṇatim || 193 ||
kuṭilakabarībharebhyaḥ
kuṅkumasabrahmacārikiraṇebhyaḥ |
kūlaṅkaṣastanebhyaḥ
kurmaḥ praṇatiṃ kulādrikutukebhyaḥ || 194 ||
kokanadaśoṇacaraṇā-
-tkomalakuralālivijitaśaivālāt |
utpalasagandhinayanā-
-durarīkurmo na devatamānyām || 195 ||
āpāṭalādharāṇā-
-mānīlasnigdhabarbarakacānām |
āmnāyajīvanānā-
-mākūtānāṃ harasya dāso'ham || 196 ||
puṅkhitavilāsahāsa-
-sphuritāsu purāhitāṅkanilayāsu |
magnaṃ mano madīyaṃ
kāsvapi kāmārijīvanāḍīṣu || 197 ||
lalitā pātu śiro me
lalāṭamambā ca madhumatīrūpā |
bhrūyugmaṃ ca bhavānī
puṣpaśarā pātu locanadvandvam || 198 ||
pāyānnāsāṃ bālā
subhagā dantāṃśca sundarī jihvām |
adharoṣṭhamādiśakti-
-ścakreśī pātu me ciraṃ cibukam || 199 ||
kāmeśvarī ca karṇau
kāmākṣī pātu gaṇḍayoryugalam |
śṛṅgāranāyikāvyā-
-dvadanaṃ siṃhāsaneśvarī ca galam || 200 ||
skandaprasūśca pātu
skandhau bāhū ca pāṭalāṅgī me |
pāṇī ca padmanilayā
pāyādaniśaṃ nakhāvalīrvijayā || 201 ||
kodaṇḍinī ca vakṣaḥ
kukṣiṃ cāvyāt kulācalatanūjā |
kalyāṇī ca valagnaṃ
kaṭiṃ ca pāyātkalādharaśikhaṇḍā || 202 ||
ūrudvayaṃ ca pāyā-
-dumā mṛḍānī ca jānunī rakṣet |
jaṅghe ca ṣoḍaśī me
pāyāt pādau ca pāśasṛṇihastā || 203 ||
prātaḥ pātu parā māṃ
madhyāhne pātu maṇigṛhādhīśā |
śarvāṇyavatu ca sāyaṃ
pāyādrātrau ca bhairavī sākṣāt || 204 ||
bhāryāṃ rakṣatu gaurīṃ
pāyāt putrāṃśca bindugṛhapīṭhā |
śrīvidyā ca yaśo me
śīlaṃ cāvyācciraṃ mahārājñī || 205 ||
pavanamayi pāvakamayi
kṣoṇīmayi gaganamayi kṛpīṭamayi |
ravimayi śaśimayi diṅmayi
samayamayi prāṇamayi śive pāhi || 206 ||
kāli kapālini śūlini
bhairavi mātaṅgi pañcami tripure |
vāgdevi vindhyavāsini
bāle bhuvaneśi pālaya ciraṃ mām || 207 ||
abhinavasindūrābhā-
-mamba tvāṃ cintayanti ye hṛdaye |
upari nipatanti teṣā-
-mutpalanayanākaṭākṣakallolāḥ || 208 ||
vargāṣṭakamilitābhi-
-rvaśinīmukhyābhirāvṛtāṃ bhavatīm |
cintayatāṃ sitavarṇāṃ
vāco niryāntyayatnato vadanāt || 209 ||
kanakaśalākāgaurīṃ
karṇavyālolakuṇḍaladvitayām |
prahasitamukhīṃ ca bhavatīṃ
dhyāyanto ye ta eva bhūdhanadāḥ || 210 ||
śīrṣāmbhoruhamadhye
śītalapīyūṣavarṣiṇīṃ bhavatīm |
anudinamanucintayatā-
-māyuṣyaṃ bhavati puṣkalamavanyām || 211 ||
madhurasmitāṃ madāruṇanayanāṃ
mātaṅgakumbhavakṣojām |
candravataṃsinīṃ tvāṃ
savidhe paśyanti sukṛtinaḥ kecit || 212 ||
lalitāyāḥ stavaratnaṃ
lalitapadābhiḥ praṇītamāryābhiḥ |
pratidinamavanau paṭhatāṃ
phalāni vaktuṃ pragalbhate saiva || 213 ||
sadasadanugrahanigraha-
-gṛhītamunivigraho bhagavān |
sarvāsāmupaniṣadāṃ
durvāsā jayati deśikaḥ prathamaḥ || 214 ||
iti maharṣidurvāsaḥ viracitaṃ śrīlalitāstavaratnam |
Sanskrit — Devanagari (original)
वन्दे गजेन्द्रवदनं
वामाङ्कारूढवल्लभाश्लिष्टम् ।
कुङ्कुमपरागशोणं
कुवलयिनीजारकोरकापीडम् ॥ 1 ॥
स जयति सुवर्णशैलः
सकलजगच्चक्रसङ्घटितमूर्तिः ।
काञ्चननिकुञ्जवाटी-
-कन्दलदमरीप्रपञ्चसङ्गीतः ॥ 2 ॥
हरिहयनैरृतमारुत-
-हरितामन्तेष्ववस्थितं तस्य ।
विनुमः सानुत्रितयं
विधिहरिगौरीशविष्टपाधारम् ॥ 3 ॥
मध्ये पुनर्मनोहर-
-रत्नरुचिस्तबकरञ्जितदिगन्तम् ।
उपरि चतुःशतयोजन-
-मुत्तुङ्गं शृङ्गपुङ्गवमुपासे ॥ 4 ॥
तत्र चतुःशतयोजन-
-परिणाहं देवशिल्पिना रचितम् ।
नानासालमनोज्ञं
नमाम्यहं नगरमादिविद्यायाः ॥ 5 ॥
प्रथमं सहस्रपूर्वक-
-षट्शतसङ्ख्याकयोजनं परितः ।
वलयीकृतस्वगात्रं
वरणं शरणं व्रजाम्ययोरूपम् ॥ 6 ॥
तस्योत्तरे समीरण-
-योजनदूरे तरङ्गितच्छायः ।
घटयतु मुदं द्वितीयो
घण्टास्तनसारनिर्मितः सालः ॥ 7 ॥
उभयोरन्तरसीम-
-न्युद्दामभ्रमररञ्जितोदारम् ।
उपवनमुपास्महे वय-
-मूरीकृतमन्दमारुतस्यन्दम् ॥ 8 ॥
आलिङ्ग्य भद्रकाली-
-मासीनस्तत्र हरिशिलाश्यामाम् ।
मनसि महाकालो मे
विहरतु मधुपानविभ्रमन्नेत्रः ॥ 9 ॥
तार्तीयीको वरण-
-स्तस्योत्तरसीम्नि वातयोजनतः ।
ताम्रेण रचितमूर्ति-
-स्तनुतामाचन्द्रतारकं भद्रम् ॥ 10 ॥
मध्ये तयोश्च मणिमय-
-पल्लवशाखाप्रसूनपक्ष्मलिताम् ।
कल्पानोकहवाटीं
कलये मकरन्दपङ्किलावालाम् ॥ 11 ॥
तत्र मधुमाधवश्री-
-तरुणीभ्यां तरलदृक्चकोराभ्याम् ।
आलिङ्गितोऽवतान्मा-
-मनिशं प्रथमर्तुरात्तपुष्पास्त्रः ॥ 12 ॥
नमत तदुत्तरभागे
नाकिपथोल्लङ्घिशृङ्गसङ्घातम् ।
सीसाकृतिं तुरीयं
सितकिरणालोकनिर्मलं सालम् ॥ 13 ॥
सालद्वयान्तराले
सरलालिकपोतचाटुसुभगायाम् ।
सन्तानवाटिकायां
सक्तं चेतोऽस्तु सततमस्माकम् ॥ 14 ॥
तत्र तपनातिरूक्षः
साम्राज्ञीचरणसान्द्रितस्वान्तः ।
शुक्रशुचिश्रीसहितो
ग्रीष्मर्तुर्दिशतु कीर्तिमाकल्पम् ॥ 15 ॥
उत्तरसीमनि तस्यो-
-न्नतशिखरोत्कम्पिहाटकपताकः ।
प्रकटयतु पञ्चमो नः
प्राकारः कुशलमारकूटमयः ॥ 16 ॥
प्राकारयोश्च मध्ये
पल्लवितान्यभृतपञ्चमोन्मेषा ।
हरिचन्दनद्रुवाटी-
-हरतादामूलमस्मदनुतापम् ॥ 17 ॥
तत्र नभः श्रीमुख्यै-
-स्तरुणीवर्गैः समन्वितः परितः ।
वज्राट्टहासमुखरो
वाञ्छापूर्तिं तनोतु वर्षर्तुः ॥ 18 ॥
मारुतयोजनदूरे
महनीयस्तस्य चोत्तरे भागे ।
भद्रं कृषीष्ट षष्ठः
प्राकारः पञ्चलोहधातुमयः ॥ 19 ॥
अनयोर्मध्ये सन्तत-
-मङ्कूरद्दिव्यकुसुमगन्धायाम् ।
मन्दारवाटिकायां
मानसमङ्गीकरोतु मे विहृतिम् ॥ 20 ॥
तस्यामिषोर्जलक्ष्मी-
-तरुणीभ्यां शरदृतुः सदा सहितः ।
अभ्यर्चयन् स जीया-
-दम्बामामोदमेदुरैः कुसुमैः ॥ 21 ॥
तस्यर्षिसङ्ख्ययोजन-
-दूरे देदीप्यमानशृङ्गौघः ।
कलधौतकलितमूर्तिः
कल्याणं दिशतु सप्तमः सालः ॥ 22 ॥
मध्ये तयोर्मरुत्पथ
लङ्घितविटपाग्रविरुतकलकण्ठा ।
श्रीपारिजातवाटी
श्रियमनिशं दिशतु शीतलोद्देशा ॥ 23 ॥
तस्यामतिप्रियाभ्यां
सह खेलन् सहसहस्यलक्ष्मीभ्याम् ।
सामन्तो झषकेतो-
-र्हेमन्तो भवतु हेमवृद्ध्यै नः ॥ 24 ॥
उत्तरतस्तस्य महा-
-नुद्भटहुतभुक्शिखारुणमयूखः ।
तपनीयखण्डरचित-
-स्तनुतादायुष्यमष्टमो वरणः ॥ 25 ॥
कादम्बविपिनवाटी-
-मनयोर्मध्यभुवि कल्पितावासाम् ।
कलयामि सूनकोरक-
-कन्दलितामोदतुन्दिलसमीराम् ॥ 26 ॥
तस्यामतिशिशिराकृति-
-रासीनस्तपतपस्यलक्ष्मीभ्याम् ।
शिवमनिशं कुरुतान्मे
शिशिरर्तुः सततशीतलदिगन्तः ॥ 27 ॥
तस्यां कदम्बवाट्यां
तत्प्रसवामोदमिलितमधुगन्धम् ।
सप्तावरणमनोज्ञं
शरणं समुपैमि मन्त्रिणीशरणम् ॥ 28 ॥
तत्रालये विशाले
तपनीयारचिततरलसोपाने ।
माणिक्यमण्डपान्त-
-र्महिते सिंहासने सुमणिखचिते ॥ 29 ॥
बिन्दुत्रिपञ्चकोण-
-द्विपनृपवसुवेददलकुरेखाढ्ये ।
चक्रे सदा निविष्टां
षष्ठ्यष्टत्रिंशदक्षरेशानीम् ॥ 30 ॥
तापिञ्छमेचकाभां
तालीदलघटितकर्णताटङ्काम् ।
ताम्बूलपूरितमुखीं
ताम्राधरबिम्बदृष्टदरहासाम् ॥ 31 ॥
कुङ्कुमपङ्किलदेहां
कुवलयजीवातुशावकवतंसाम् ।
कोकनदशोणचरणां
कोकिलनिक्वाणकोमलालापाम् ॥ 32 ॥
वामाङ्गगलितचूलीं
वनमाल्यकदम्बमालिकाभरणाम् ।
मुक्ताललन्तिकाञ्चित
मुग्धालिकमिलितचित्रकोदाराम् ॥ 33 ॥
करविधृतकीरशावक-
-कलनिनदव्यक्तनिखिलनिगमार्थाम् ।
वामकुचसङ्गिवीणावादन-
-सौख्यार्धमीलिताक्षियुगाम् ॥ 34 ॥
आपाटलांशुकधरा-
-मादिरसोन्मेषवासितकटाक्षाम् ।
आम्नायसारगुलिका-
-माद्यां सङ्गीतमातृकां वन्दे ॥ 35 ॥
तस्य च सुवर्णसाल-
-स्योत्तरतस्तरुणकुङ्कुमच्छायः ।
शमयतु मम सन्तापं
सालो नवमः स पुष्परागमयः ॥ 36 ॥
अनयोरन्तरवसुधाः
प्रणुमः प्रत्यग्रपुष्परागमयीः ।
सिंहासनेश्वरीमनु-
-चिन्तननिस्तन्द्रसिद्धनीरन्ध्राः ॥ 37 ॥
तत्सालोत्तरदेशे
तरुणजपाकिरणधोरणीशोणः ।
प्रशमयतु पद्मराग-
-प्राकारो मम पराभवं दशमः ॥ 38 ॥
अन्तरभूकृतवासा-
-ननयोरपनीतचित्तवैमत्यान् ।
चक्रेशीपदभक्तां-
-श्चारणवर्गानहर्निशं कलये ॥ 39 ॥
सारङ्गवाहयोजनदूरे-
-ऽसङ्घटितकेतनस्तस्य ।
गोमेदकेन रचितो
गोपायतु मां समुन्नतः सालः ॥ 40 ॥
वप्रद्वयान्तरोर्व्यां
वटुकैर्विविधैश्च योगिनीबृन्दैः ।
सततं समर्चितायाः
सङ्कर्षण्याः प्रणौमि चरणाब्जम् ॥ 41 ॥
तापसयोजनदूरे
तस्य समुत्तुङ्ग गोपुरोपेतः ।
वाञ्छापूर्त्यै भवता-
-द्वज्रमणीनिकरनिर्मितो वप्रः ॥ 42 ॥
वरणद्वितयान्तरतो
वासजुषो विहितमधुरसास्वादाः ।
रम्भादिविबुधवेश्या
रचयन्तु महान्तमस्मदानन्दम् ॥ 43 ॥
तत्र सदा प्रवहन्ती
तटिनी वज्राभिधा चिरं जीयात् ।
चटुलोर्मिजालनृत्य-
-त्कलहंसीकुलकलक्वणितपुष्टा ॥ 44 ॥
रोधसि तस्या रुचिरे
वज्रेशी जयति वज्रभूषाढ्या ।
वज्रप्रदानतोषित-
-वज्रिमुखत्रिदशविनुतचारित्रा ॥ 45 ॥
तस्योदीच्यां हरिति
स्तवकितसुषमावलीढवियदन्तः ।
वैडूर्यरत्नरचितो
वैमल्यं दिशतु चेतसो वरणः ॥ 46 ॥
अधिमध्यमेतयोः पुन-
-रम्बाचरणावलम्बितस्वान्तान् ।
कार्कोटकादिनागान्
कलयामः किं च बलिमुखान् दनुजान् ॥ 47 ॥
गन्धवहसङ्ख्ययोजन-
-दूरे गगनोर्ध्वजाङ्घिकस्तस्य ।
वासवमणिप्रणीतो
वरणो बहलयतु वैदुषीं विशदाम् ॥ 48 ॥
मध्यक्षोण्यामनयो-
-र्महेन्द्रनीलात्मकानि च सरांसि ।
शातोदरीसहाया-
-न्भूपालानपि पुनः पुनः प्रणुमः ॥ 49 ॥
आशुगयोजनदूरे
तस्योर्ध्वं कान्तिधवलितदिगन्तः ।
मुक्ताविरचितगात्रो
मुहुरस्माकं मुदे भवतु सालः ॥ 50 ॥
आवृत्त्योरधिमध्यं
पूर्वस्यां दिशि पुरन्दरः श्रीमान् ।
अभ्रमुविटाधिरूढो
विभ्रममस्माकमनिशमातनुतात् ॥ 51 ॥
तत्कोणे व्यजनस्रु-
-क्तोमरपात्रस्रुवान्नशक्तिधरः ।
स्वाहास्वधासमेतः
सुखयतु मां हव्यवाहनः सुचिरम् ॥ 52 ॥
दक्षिणदिगन्तराले
दण्डधरो नीलनीरदच्छायः ।
त्रिपुरापदाब्जभक्तस्तिरयतु
मम निखिलमंहसां निकरम् ॥ 53 ॥
तस्यैव पश्चिमायां
दिशि दलितेन्दीवरप्रभाश्यामः ।
खेटासियष्टिधारी
खेदानपनयतु यातुधानो मे ॥ 54 ॥
तस्या उत्तरदेशे
धवलाङ्गो विपुलझषवरारूढः ।
पाशायुधात्तपाणिः
पाशी विदलयतु पाशजालानि ॥ 55 ॥
वन्दे तदुत्तरहरि-
-त्कोणे वायुं चमूरुवरवाहम् ।
कोरकिततत्त्वबोधा-
-न्गोरक्षप्रमुखयोगिनोऽपि मुहुः ॥ 56 ॥
तरुणीरिडाप्रधाना-
-स्तिस्रो वातस्य तस्य कृतवासाः ।
प्रत्यग्रकापिशायन-
-पानपरिभ्रान्तलोचनाः कलये ॥ 57 ॥
तल्लोकपूर्वभागे
धनदं ध्यायामि शेवधिकुलेशम् ।
अपि माणिभद्रमुख्या-
-नम्बाचरणावलम्बिनो यक्षान् ॥ 58 ॥
तस्यैव पूर्वसीमनि
तपनीयारचितगोपुरे नगरे ।
कात्यायनीसहायं
कलये शीतांशुखण्डचूडालम् ॥ 59 ॥
तत्पुरषोडशवरण-
-स्थलभाजस्तरुणचन्द्रचूडालान् ।
रुद्राध्याये पठिता-
-न्रुद्राणीसहचरान्भजे रुद्रान् ॥ 60 ॥
पवमानसङ्ख्ययोजन-
-दूरे बालतृण्मेचकस्तस्य ।
सालो मरकतरचितः
सम्पदमचलां श्रियं च पुष्णातु ॥ 61 ॥
आवृतियुग्मान्तरतो
हरितमणीनिवहमेचके देशे ।
हाटकतालीविपिनं
हालाघटघटितविटपमाकलये ॥ 62 ॥
तत्रैव मन्त्रिणीगृह-
-परिणाहं तरलकेतनं सदनम् ।
मरकतसौधमनोज्ञं
दद्यादायूंषि दण्डनाथायाः ॥ 63 ॥
सदने तत्र हरिन्मणि-
-सङ्घटिते मण्डपे शतस्तम्भे ।
कार्तस्वरमयपीठे
कनकमयाम्बुरुहकर्णिकामध्ये ॥ 64 ॥
बिन्दुत्रिकोणवर्तुल-
-षडस्रवृत्तद्वयान्विते चक्रे ।
सञ्चारिणी दशोत्तर-
शतार्णमनुराजकमलकलहंसी ॥ 65 ॥
कोलवदना कुशेशय-
-नयना कोकारिमण्डितशिखण्डा ।
सन्तप्तकाञ्चनाभा
सन्ध्यारुणचेलसंवृतनितम्बा ॥ 66 ॥
हलमुसलशङ्खचक्रा-
-ऽङ्कुशपाशाभयवरस्फुरितहस्ता ।
कूलङ्कषानुकम्पा
कुङ्कुमजम्बालितस्तनाभोगा ॥ 67 ॥
धूर्तानामतिदूरा-
-वार्ताशेषावलग्नकमनीया ।
आर्तालीशुभदात्री
वार्ताली भवतु वाञ्छितार्थाय ॥ 68 ॥
तस्याः परितो देवीः
स्वप्नेश्युन्मत्तभैरवीमुख्याः ।
प्रणमत जम्भिन्याद्याः
भैरववर्गांश्च हेतुकप्रमुखान् ॥ 69 ॥
पूर्वोक्तसङ्ख्ययोजन-
-दूरे पूयांशुपाटलस्तस्य ।
विद्रावयतु मदार्तिं
विद्रुमसालो विशङ्कटद्वारः ॥ 70 ॥
आवरणयोरहर्निश-
-मन्तरभूमौप्रकाशशालिन्याम् ।
आसीनमम्बुजासन-
-मभिनवसिन्दूरगौरमहमीडे ॥ 71 ॥
वरणस्य तस्य मारुत-
-योजनतो विपुलगोपुरद्वारः ।
सालो नानारत्नैः
सङ्घटिताङ्गः कृषीष्ट मदभीष्टम् ॥ 72 ॥
अन्तरकक्ष्यामनयो-
-रविरलशोभापिचण्डिलोद्देशाम् ।
माणिक्यमण्डपाख्यां
महतीमधिहृदयमनिशमाकलये ॥ 73 ॥
तत्र स्थितं प्रसन्नं
तरुणतमालप्रवालकिरणाभम् ।
कर्णावलम्बिकुण्डल-
-कन्दलिताभीशुकवचितकपोलम् ॥ 74 ॥
शोणाधरं शुचिस्मित-
-मेणाङ्कवदनमेधमानकृपम् ।
मुग्धैणमदविशेषक-
-मुद्रितनिटिलेन्दुरेखिकारुचिरम् ॥ 75 ॥
नालीकदलसहोदर-
-नयनाञ्चलघटितमनसिजाकूतम् ।
कमलाकठिनपयोधर-
-कस्तूरीघुसृणपङ्किलोरस्कम् ॥ 76 ॥
चाम्पेयगन्धिकैश्यं
शम्पासब्रह्मचारिकौशेयम् ।
श्रीवत्सकौस्तुभधरं
श्रितजनरक्षाधुरीणचरणाब्जम् ॥ 77 ॥
कम्बुसुदर्शनविलस-
-त्करपद्मं कण्ठलोलवनमालम् ।
मुचुकुन्दमोक्षफलदं
मुकुन्दमानन्दकन्दमवलम्बे ॥ 78 ॥
तद्वरणोत्तरभागे
तारापतिबिम्बचुम्बिनिजशृङ्गः ।
विविधमणीगणघटितो
वितरतु सालो विनिर्मलां धिषणाम् ॥ 79 ॥
प्राकारद्वितयान्तर-
-कक्ष्यां पृथुरत्ननिकरसङ्कीर्णाम् ।
नमत सहस्रस्तम्भक-
-मण्डपनाम्नातिविश्रुतां भुवने ॥ 80 ॥
प्रणुमस्तत्र भवानी-
-सहचरमीशानमिन्दुखण्डधरम् ।
शृङ्गारनायिकामनु-
-शीलनभाजोऽपि भृङ्गिनन्दिमुखान् ॥ 81 ॥
तस्यैणवाहयोजन-
-दूरे वन्दे मनोमयं वप्रम् ।
अङ्कूरन्मणिकिरणा-
-मन्तरकक्ष्यां च निर्मलामनयोः ॥ 82 ॥
तत्रैवामृतवापीं
तरलतरङ्गावलीढतटयुग्माम् ।
मुक्तामयकलहंसी-
-मुद्रितकनकारविन्दसन्दोहाम् ॥ 83 ॥
शक्रोपलमयभृङ्गी-
-सङ्गीतोन्मेषघोषितदिगन्ताम् ।
काञ्चनमयाङ्गविलस-
-त्कारण्डवषण्डताण्डवमनोज्ञाम् ॥ 84 ॥
कुरुविन्दात्मकहल्लक-
-कोरकसुषमासमूहपाटलिताम् ।
कलये सुधास्वरूपां
कन्दलितामन्दकैरवामोदाम् ॥ 85 ॥
तद्वापिकान्तराले तरले
मणिपोतसीम्नि विहरन्तीम् ।
सिन्दूरपाटलाङ्गीं
सितकिरणाङ्कूरकल्पितवतंसाम् ॥ 86 ॥
पर्वेन्दुबिम्बवदनां
पल्लवशोणाधरस्फुरितहासाम् ।
कुटिलकबरीं कुरङ्गी-
-शिशुनयनां कुण्डलस्फुरितगण्डाम् ॥ 87 ॥
निकटस्थपोतनिलयाः
शक्तीः शयविधृतहेमशृङ्गजलैः ।
परिषिञ्चन्तीं परित-
-स्तारां तारुण्यगर्वितां वन्दे ॥ 88 ॥
प्रागुक्तसङ्ख्ययोजनदूरे
प्रणमामि बुद्धिमयसालम् ।
अनयोरन्तरकक्ष्या-
-मष्टापदपुष्टमेदिनीं रुचिराम् ॥ 89 ॥
कादम्बरीनिधानां
कलयाम्यानन्दवापिकां तस्याम् ।
शोणाश्मनिवहनिर्मित-
-सोपानश्रेणिशोभमानतटीम् ॥ 90 ॥
माणिक्यतरणिनिलयां
मध्ये तस्या मदारुणकपोलाम् ।
अमृतेशीत्यभिधाना-
-मन्तः कलयामि वारुणीं देवीम् ॥ 91 ॥
सौवर्णकेनिपातन-
-हस्ताः सौन्दर्यगर्विता देव्यः ।
तत्पुरतः स्थितिभाजो
वितरन्त्वस्माकमायुषो वृद्धिम् ॥ 92 ॥
तस्य पृषदश्वयोजन-
-दूरेऽहङ्कारसालमतितुङ्गम् ।
वन्दे तयोश्च मध्ये
कक्ष्यां वलमानमलयपवमानाम् ॥ 93 ॥
विनुमो विमर्शवापीं
सौषुम्नसुधास्वरूपिणीं तत्र ।
वेलातिलङ्घ्यवीची-
-कोलाहलभरितकूलवनवाटीम् ॥ 94 ॥
तत्रैव सलिलमध्ये
तापिञ्छदलप्रपञ्चसुषमाभाम् ।
श्यामलकञ्चुकलसितां
श्यामाविटबिम्बडम्बरहरास्याम् ॥ 95 ॥
आभुग्नमसृणचिल्ली-
-हसितायुग्मशरकार्मुकविलासाम् ।
मन्दस्मिताञ्चितमुखीं
मणिमयताटङ्कमण्डितकपोलाम् ॥ 96 ॥
कुरुविन्दतरणिनिलयां
कुलाचलस्पर्धिकुचनमन्मध्याम् ।
कुङ्कुमविलिप्तगात्रीं
कुरुकुल्लां मनसि कुर्महे सततम् ॥ 97 ॥
तत्सालोत्तरभागे
भानुमयं वप्रमाश्रये दीप्तम् ।
मध्यं च विपुलमनयो-
-र्मन्ये विश्रान्तमातपोद्गारम् ॥ 98 ॥
तत्र कुरुविन्दपीठे
तामरसे कनककर्णिकाघटिते ।
आसीनमरुणवासस-
-मम्लानप्रसवमालिकाभरणम् ॥ 99 ॥
चक्षुष्मतीप्रकाशन-
-शक्तिच्छायासमारचितकेलिम् ।
माणिक्यमुकुटरम्यं
मन्ये मार्ताण्डभैरवं हृदये ॥ 100 ॥
इन्दुमयसालमीडे
तस्योत्तरतस्तुषारगिरिगौरम् ।
अत्यन्तशिशिरमारुत-
-मनयोर्मध्यं च चन्द्रिकोद्गारम् ॥ 101 ॥
तत्र प्रकाशमानं
तारानिकरैः परिष्कृतोद्देशम् ।
अमृतमयकान्तिकन्दल-
-मन्तः कलयामि कुन्दसितमिन्दुम् ॥ 102 ॥
शृङ्गारसालमीडे
शृङ्गोल्लसितं तदुत्तरे भागे ।
मध्यस्थले तयोरपि
महितां शृङ्गारपूर्विकां परिखाम् ॥ 103 ॥
तत्र मणिनौस्थिताभि-
-स्तपनीयाविरचिताग्रहस्ताभिः ।
शृङ्गारदेवताभिः
सहितं परिखाधिपं भजे मदनम् ॥ 104 ॥
शृङ्गारवरणवर्यस्योत्तरतः
सकलविबुधसंसेव्यम् ।
चिन्तामणिगणरचितं
चिन्तां दूरीकरोतु मे सदनम् ॥ 105 ॥
मणिसदनसालयोरधि-
-मध्यं दशतालभूमिरुहदीर्घैः ।
पर्णैः सुवर्णवर्णै-
-र्युक्तां काण्डैश्च योजनोत्तुङ्गैः ॥ 106 ॥
मृदुलैस्तालीपञ्चक-
-मानैर्मिलितां च केसरकदम्बैः ।
सन्ततगलितमरन्द-
-स्रोतोनिर्यन्मिलिन्दसन्दोहाम् ॥ 107 ॥
पाटीरपवनबालक-
-धाटीनिर्यत्परागपिञ्जरिताम् ।
कलहंसीकुलकलकल-
-कूलङ्कषनिनदनिचयकमनीयाम् ॥ 108 ॥
पद्माटवीं भजामः
परिमलकल्लोलपक्ष्मलोपान्ताम् ।
[ देव्यर्घ्यपात्रधारी
तस्याः पूर्वदिशि दशकलायुक्तः । ]
वलयितमूर्तिर्भगवा-
-न्वह्निः क्रोशोन्नतश्चिरं पायात् ॥ 109 ॥
तत्राधारे देव्याः
पात्रीरूपः प्रभाकरः श्रीमान् ।
द्वादशकलासमेतो
ध्वान्तं मम बहुलमान्तरं भिन्द्यात् ॥ 110 ॥
तस्मिन् दिनेशपात्रे
तरङ्गितामोदममृतमयमर्घ्यम् ।
चन्द्रकलात्मकममृतं
सान्द्रीकुर्यादमन्दमानन्दम् ॥ 111 ॥
अमृते तस्मिन्नभितो
विहरन्त्यो विविधमणितरणिभाजः ।
षोडश कलाः सुधांशोः
शोकादुत्तारयन्तु मामनिशम् ॥ 112 ॥
तत्रैव विहृतिभाजो
धातृमुखानां च कारणेशानाम् ।
सृष्ट्यादिरूपिकास्ताः
शमयन्त्वखिलाः कलाश्च सन्तापम् ॥ 113 ॥
कीनाशवरुणकिन्नर-
-राजदिगन्तेषु रत्नगेहस्य ।
कलयामि तान्यजस्रं
कलयन्त्वायुष्यमर्घ्यपात्राणि ॥ 114 ॥
पात्रस्थलस्य पुरतः
पद्मारमणविधिपार्वतीशानाम् ।
भवनानि शर्मणे नो
भवन्तु भासा प्रदीपितजगन्ति ॥ 115 ॥
सदनस्यानलकोणे
सततं प्रणमामि कुण्डमाग्नेयम् ।
तत्र स्थितं च वह्निं
तरलशिखाजटिलमम्बिकाजनकम् ॥ 116 ॥
तस्यासुरदिशि तादृश-
-रत्नपरिस्फुरितपर्वनवकाढ्यम् ।
चक्रात्मकं शताङ्गं
शतयोजनमुन्नतं भजे दिव्यम् ॥ 117 ॥
तत्रैव दिशि निषण्णं
तपनीयध्वजपरम्पराश्लिष्टम् ।
रथमपरं च भवान्या
रचयामो मनसि रत्नमयचूडम् ॥ 118 ॥
भवनस्य वायुभागे
परिष्कृतो विविधवैजयन्तीभिः ।
रचयतु मुदं रथेन्द्रः
सचिवेशान्याः समस्तवन्द्यायाः ॥ 119 ॥
कुर्मोऽधिहृदयमनिशं
क्रोडास्यायाः शताङ्गमूर्धन्यम् ।
रुद्रदिशि रत्नधाम्नो
रुचिरशलाकाप्रपञ्चकञ्चुकितम् ॥ 120 ॥
परितो देवीधाम्नः
प्रणीतवासा मनुस्वरूपिण्यः ।
कुर्वन्तु रश्मिमाला-
-कृतयः कुशलानि देवता निखिलाः ॥ 121 ॥
प्राग्द्वारस्य भवानी-
-धाम्नः पार्श्वद्वयारचितवासे ।
मातङ्गीकिटिमुख्यौ
मणिसदने मनसि भावयामि चिरम् ॥ 122 ॥
योजनयुगलाभोगा
तत्क्रोशपरिणाहयैव भित्त्या च ।
चिन्तामणिगृहभूमि-
-र्जीयादाम्नायमयचतुर्द्वारा ॥ 123 ॥
द्वारे द्वारे धाम्नः
पिण्डीभूता नवीनबिम्बाभाः ।
विदधतु विपुलां कीर्तिं
दिव्या लौहित्यसिद्ध्यो देव्यः ॥ 124 ॥
मणिसदनस्यान्तरतो
महनीये रत्नवेदिकामध्ये ।
बिन्दुमयचक्रमीडे
पीठानामुपरि विरचितावासम् ॥ 125 ॥
चक्राणां सकलानां
प्रथममधः सीमफलकवास्तव्याः ।
अणिमादिसिद्धयो मा-
-मवन्तु देवी प्रभास्वरूपिण्यः ॥ 126 ॥
अणिमादिसिद्धिफलक-
-स्योपरिहरिणाङ्कखण्डकृतचूडाः ।
भद्रं पक्ष्मलयन्तु
ब्राह्मीप्रमुखाश्च मातरोऽस्माकम् ॥ 127 ॥
तस्योपरि मणिफलके
तारुण्योत्तुङ्गपीनकुचभाराः ।
सङ्क्षोभिणीप्रधानाः
भ्रान्ति विद्रावयन्तु दश मुद्राः ॥ 128 ॥
फलकत्रयस्वरूपे
पृथुले त्रैलोक्यमोहने चक्रे ।
दीव्यन्तु प्रकटाख्या-
-स्तासां कर्त्रीं च भगवती त्रिपुरा ॥ 129 ॥
तदुपरि विपुले धिष्ण्ये
तरलदृशस्तरुणकोकनदभासः ।
कामाकर्षिण्याद्याः
कलये देवीः कलाधरशिखण्डाः ॥ 130 ॥
सर्वाशापरिपूरकचक्रे-
-ऽस्मिन् गुप्तयोगिनीसेव्याः ।
त्रिपुरेशी मम दुरितं
तुद्यात् कण्ठावलम्बिमणिहारा ॥ 131 ॥
तस्योपरि मणिपीठे
ताम्राम्भोरुहदलप्रभाशोणाः ।
ध्यायाम्यनङ्गकुसुमा-
-प्रमुखा देवीश्च विधृतकूर्पासाः ॥ 132 ॥
सङ्क्षोभकारकेऽस्मिं-
-श्चक्रे श्रीत्रिपुरसुन्दरी साक्षात् ।
गोप्त्री गुप्ततराख्याः
गोपायतु मां कृपार्द्रया दृष्ट्या ॥ 133 ॥
सङ्क्षोभिणीप्रधानाः
शक्तीस्तस्योर्ध्ववलयकृतवासाः ।
आलोलनीलवेणी-
-रन्तः कलयामि यौवनोन्मत्ताः ॥ 134 ॥
सौभाग्यदायकेऽस्मिं-
-श्चक्रेशी त्रिपुरवासिनी जीयात् ।
शक्तीश्च सम्प्रदायाभिधाः
समस्ताः प्रमोदयन्त्वनिशम् ॥ 135 ॥
मणिपीठोपरि तासां
महति चतुर्हस्तविस्तृते वलये ।
सन्ततविरचितवासाः
शक्तीः कलयामि सर्वसिद्धिमुखाः ॥ 136 ॥
सर्वार्थसाधकाख्ये
चक्रेऽमुष्मिन् समस्तफलदात्री ।
त्रिपुरा श्रीर्मम कुशलं
दिशतादुत्तीर्णयोगिनीसेव्या ॥ 137 ॥
तासां निलयस्योपरि
धिष्ण्ये कौसुम्भकञ्चुकमनोज्ञाः ।
सर्वाज्ञाद्याः देव्यः
सकलाः सम्पादयन्तु मम कीर्तिम् ॥ 138 ॥
चक्रे समस्तरक्षा-
-करनाम्न्यस्मिन् समस्तजनसेव्याम् ।
मनसि निगर्भासहितां
मन्ये श्रीत्रिपुरमालिनीं देवीम् ॥ 139 ॥
सर्वज्ञासदनस्योपरि
चक्रे विपुले समाकलितगेहाः ।
वन्दे वशिनीमुख्याः
शक्तीः सिन्दूररेणुरुचः ॥ 140 ॥
श्रीसर्वरोगहराख्य-
-चक्रेऽस्मिंस्त्रिपुरपूर्विकां सिद्धाम् ।
वन्दे रहस्यनाम्ना
वेद्याभिः शक्तिभिः सदा सेव्याम् ॥ 141 ॥
वशिनीगृहोपरिष्टा-
-द्विंशतिहस्तोन्नते महापीठे ।
शमयन्तु शत्रुबृन्दं
शस्त्राण्यस्त्राणि चादिदम्पत्योः ॥ 142 ॥
शस्त्रसदनोपरिष्टा-
-द्वलये वलवैरिरत्नसङ्घटिते ।
कामेश्वरीप्रधानाः
कलये देवीः समस्तजनवन्द्याः ॥ 143 ॥
चक्रेऽत्र सर्वसिद्धिप्रद-
-नामनि सर्वफलदात्री ।
त्रिपुराम्बावतु सततं
परापररहस्ययोगिनीसेव्या ॥ 144 ॥
कामेश्वरीगृहोपरिवलये
विविधमनुसम्प्रदायज्ञाः ।
चत्वारो युगनाथा
जयन्तु मित्रेशपूर्वकाः गुरवः ॥ 145 ॥
नाथभवनोपरिष्टा-
-न्नानारत्नचयमेदुरे पीठे ।
कामेश्याद्या नित्याः
कलयन्तु मुदं तिथिस्वरूपिण्यः ॥ 146 ॥
नित्यासदनस्योपरि
निर्मलमणिनिवहविरचिते धिष्ण्ये ।
कुशलं षडङ्गदेव्यः
कलयन्त्वस्माकमुत्तरलनेत्राः ॥ 147 ॥
सदनस्योपरि तासां
सर्वानन्दमयनामके बिन्दौ ।
पञ्चब्रह्माकारां
मञ्चं प्रणमामि मणिगणाकीर्णम् ॥ 148 ॥
परितो मणिमञ्चस्य
प्रलम्बमाना नियन्त्रिता पाशैः ।
मायामयी जवनिका
मम दुरितं हरतु मेचकच्छाया ॥ 149 ॥
मञ्चस्योपरि लम्ब-
-न्मदनीपुन्नागमालिकाभरितम् ।
हरिगोपमयवितानं
हरतादालस्यमनिशमस्माकम् ॥ 150 ॥
पर्यङ्कस्य भजामः
पादान्बिम्बाम्बुदेन्दुहेमरुचः ।
अजहरिरुद्रेशमया-
-ननलासुरमारुतेशकोणस्थान् ॥ 151 ॥
फलकं सदाशिवमयं
प्रणौमि सिन्दूररेणुकिरणाभम् ।
आरभ्याङ्गेशीनां
सदनात्कलितं च रत्नसोपानम् ॥ 152 ॥
पट्टोपधानगण्डक-
-चतुष्टयस्फुरितपाटलास्तरणम् ।
पर्यङ्कोपरि घटितं
पातु चिरं हंसतूलशयनं नः ॥ 153 ॥
तस्योपरि निवसन्तं
तारुण्यश्रीनिषेवितं सततम् ।
आवृन्तपुल्लहल्लक-
-मरीचिकापुञ्जमञ्जुलच्छायम् ॥ 154 ॥
सिन्दूरशोणवसनं
शीतांशुस्तबकचुम्बितकिरीटम् ।
कुङ्कुमतिलकमनोहर-
-कुटिलालिकहसितकुमुदबन्धुशिशुम् ॥ 155 ॥
पूर्णेन्दुबिम्बवदनं
फुल्लसरोजातलोचनत्रितयम् ।
तरलापाङ्गतरङ्गित-
-शफराङ्कनशास्त्रसम्प्रदायार्थम् ॥ 156 ॥
मणिमयकुण्डलपुष्य-
-न्मरीचिकल्लोलमांसलकपोलम् ।
विद्रुमसहोदराधर-
-विसृमरसुस्मितकिशोरसञ्चारम् ॥ 157 ॥
आमोदिकुसुमशेखर-
-मानीलभ्रूलतायुगमनोज्ञम् ।
वीटीसौरभवीची-
-द्विगुणितवक्त्रारविन्दसौरभ्यम् ॥ 158 ॥
पाशाङ्कुशेक्षुचाप-
-प्रसवशरस्फुरितकोमलकराब्जम् ।
काश्मीरपङ्किलाङ्गं
कामेशं मनसि कुर्महे सततम् ॥ 159 ॥
तस्याङ्कभुवि निषण्णां
तरुणकदम्बप्रसूनकिरणाभाम् ।
शीतांशुखण्डचूडां
सीमन्तन्यस्तसान्द्रसिन्दूराम् ॥ 160 ॥
कुङ्कुमललामभास्व-
-न्निटिलां कुटिलतरचिल्लिकायुगलाम् ।
नालीकतुल्यनयनां
नासाञ्चलनटितमौक्तिकाभरणाम् ॥ 161 ॥
अङ्कुरितमन्दहास-
-मरुणाधरकान्तिविजितबिम्बाभाम् ।
कस्तूरीमकरीयुत-
-कपोलसङ्क्रान्तकनकताटङ्काम् ॥ 162 ॥
कर्पूरसान्द्रवीटी-
-कबलितवदनारविन्दकमनीयाम् ।
कम्बुसहोदरकण्ठ-
-प्रलम्बमानाच्छमौक्तिककलापाम् ॥ 163 ॥
कह्लारदामकोमल-
-भुजयुगलस्फुरितरत्नकेयूराम् ।
करपद्ममूलविलस-
-त्काञ्चनमयकटकवलयसन्दोहाम् ॥ 164 ॥
पाणिचतुष्टयविलस-
-त्पाशाङ्कुशपुण्ड्रचापपुष्पास्त्राम् ।
कूलङ्कषकुचशिखरां
कुङ्कुमकर्दमितरत्नकूर्पासाम् ॥ 165 ॥
अणुदायादवलग्ना-
-मम्बुदशोभासनाभिरोमलताम् ।
माणिक्यखचितकाञ्ची-
-मरीचिकाक्रान्तमांसलनितम्बाम् ॥ 166 ॥
करभोरुकाण्डयुगलां
जङ्घाजितकामजैत्रतूणीराम् ।
प्रपदपरिभूतकूर्मां
पल्लवसच्छायपदयुगमनोज्ञाम् ॥ 167 ॥
कमलभवकञ्जलोचन-
-किरीटरत्नांशुरञ्जितपदाब्जाम् ।
उन्मस्तकानुकम्पा-
-मुत्तरलापाङ्गपोषितानङ्गाम् ॥ 168 ॥
आदिमरसावलम्बा-
-मनिदं प्रथमोक्तिवल्लरीकलिकाम् ।
आब्रह्मकीटजननी-
-मन्तः कलयामि सुन्दरीमनिशम् ॥ 169 ॥
कस्तु क्षितौ पटीया-
-न्वस्तु स्तोतुं शिवाङ्कवास्तव्यम् ।
अस्तु चिरन्तनसुकृतैः
प्रस्तुतकाम्याय तन्मम पुरस्तात् ॥ 170 ॥
प्रभुसम्मितोक्तिगम्यं
परमशिवोत्सङ्गतुङ्गपर्यङ्कम् ।
तेजः किञ्चन दिव्यं
पुरतो मे भवतु पुण्ड्रकोदण्डम् ॥ 171 ॥
मधुरिमभरितशरासं
मकरन्दस्यन्दिमार्गणोदारम् ।
कैरविणीविटचूडं
कैवल्यायास्तु किञ्चन महो नः ॥ 172 ॥
अक्षुद्रमिक्षुचापं
परोक्षमवलग्नसीम्नि त्र्यक्षम् ।
क्षपयतु मे क्षेमेतर-
-मुक्षरथप्रेमपक्ष्मलं तेजः ॥ 173 ॥
भृङ्गरुचिसङ्गरकरापाङ्गं
शृङ्गारतुङ्गमरुणाङ्गम् ।
मङ्गलमभङ्गुरं मे
घटयतु गङ्गाधराङ्गसङ्गि महः ॥ 174 ॥
प्रपदाजितकूर्ममूर्जित-
-करुणं भर्मरुचिनिर्मथनदेहम् ।
श्रितवर्म मर्म शम्भोः
किञ्चन मम नर्म शर्म निर्मातु ॥ 175 ॥
कालकुरलालिकालिम-
-कन्दलविजितालि विधृतमणिवालि ।
मिलतु हृदि पुलिनजघनं
बहुलितगलगरलकेलि किमपि महः ॥ 176 ॥
कुङ्कुमतिलकितफाला
कुरुविन्दच्छायपाटलदुकूला ।
करुणापयोधिवेला
काचन चित्ते चकास्तु मे लीला ॥ 177 ॥
पुष्पन्धयरुचिवेण्यः
पुलिनाभोगत्रपाकरश्रेण्यः ।
जीयासुरिक्षुपाण्यः
काश्चन कामारिकेलिसाक्षिण्यः ॥ 178 ॥
तपनीयांशुकभांसि
द्राक्षामाधुर्यनास्तिकवचांसि ।
कतिचन शुचं महांसि
क्षपयतु कपालितोषितमनांसि ॥ 179 ॥
असितकचमायताक्षं
कुसुमशरं कूलमुद्वहकृपार्द्रम् ।
आदिमरसाधिदैवत-
-मन्तः कलये हराङ्कवासि महः ॥ 180 ॥
कर्णोपान्ततरङ्गित-
-कटाक्षविस्पन्दिकण्ठदघ्नकृपाम् ।
कामेश्वराङ्कनिलयां
कामपि विद्यां पुरातनीं कलये ॥ 181 ॥
अरविन्दकान्त्यरुन्तुद-
-विलोचनद्वन्द्वसुन्दरमुखेन्दु ।
छन्दः कन्दलमन्दिर-
-मन्तःपुरमैन्दुशेखरं वन्दे ॥ 182 ॥
बिम्बिनिकुरम्बडम्बर-
-विडम्बकच्छायमम्बरवलग्नम् ।
कम्बुगलमम्बुदकुचं
बिम्बोकं कमपि चुम्बतु मनो मे ॥ 183 ॥
कमपि कमनीयरूपं
कलयाम्यन्तः कदम्बकुसुमाढ्यम् ।
चम्पकरुचिरसुवेषैः
सम्पादितकान्त्यलङ्कृतदिगन्तम् ॥ 184 ॥
शम्पारुचिभर-
-गर्हासम्पादककान्तिकवचितदिगन्तम् ।
सिद्धान्तं निगमानां
शुद्धान्तं किमपि शूलिनः कलये ॥ 185 ॥
उद्यद्दिनकरशोणा-
-नुत्पलबन्धुस्तनन्धयापीडान् ।
करकलितपुण्ड्रचापा-
-न्कलये कानपि कपर्दिनः प्राणान् ॥ 186 ॥
रशनालसज्जघनया
रसनाजीवातुचापभासुरया ।
घ्राणायुष्करशरया
घ्रातं चित्तं कयापि वासनया ॥ 187 ॥
सरसिजसहयुध्वदृशा
शम्पालतिकासनाभिविग्रहया ।
भासा कयापि चेतो
नासामणिशोभिवदनया भरितम् ॥ 188 ॥
नवयावकाभसिचयान्वितया
गजयानया दयापरया ।
धृतयामिनीशकलया
धिया कयापि क्षतामया हि वयम् ॥ 189 ॥
अलमलमकुसुमबाणै-
-रबिम्बशोणैरपुण्ड्रकोदण्डैः ।
अकुमुदबान्धवचूडै-
-रन्यैरिह जगति दैवतं मन्यैः ॥ 190 ॥
कुवलयसदृक्षनयनैः
कुलगिरिकूटस्थबन्धुकुचभारैः ।
करुणास्पन्दिकटाक्षैः
कवचितचित्तोऽस्मि कतिपयैः कुतुकैः ॥ 191 ॥
नतजनसुलभाय नमो
नालीकसनाभिलोचनाय नमः ।
नन्दितगिरिशाय नमो
महसे नवनीपपाटलाय नमः ॥ 192 ॥
कादम्बकुसुमदाम्ने
कायच्छायाकणायितार्यम्णे ।
सीम्ने चिरन्तनगिरां
भूम्ने कस्मैचिदाददे प्रणतिम् ॥ 193 ॥
कुटिलकबरीभरेभ्यः
कुङ्कुमसब्रह्मचारिकिरणेभ्यः ।
कूलङ्कषस्तनेभ्यः
कुर्मः प्रणतिं कुलाद्रिकुतुकेभ्यः ॥ 194 ॥
कोकनदशोणचरणा-
-त्कोमलकुरलालिविजितशैवालात् ।
उत्पलसगन्धिनयना-
-दुररीकुर्मो न देवतमान्याम् ॥ 195 ॥
आपाटलाधराणा-
-मानीलस्निग्धबर्बरकचानाम् ।
आम्नायजीवनाना-
-माकूतानां हरस्य दासोऽहम् ॥ 196 ॥
पुङ्खितविलासहास-
-स्फुरितासु पुराहिताङ्कनिलयासु ।
मग्नं मनो मदीयं
कास्वपि कामारिजीवनाडीषु ॥ 197 ॥
ललिता पातु शिरो मे
ललाटमम्बा च मधुमतीरूपा ।
भ्रूयुग्मं च भवानी
पुष्पशरा पातु लोचनद्वन्द्वम् ॥ 198 ॥
पायान्नासां बाला
सुभगा दन्तांश्च सुन्दरी जिह्वाम् ।
अधरोष्ठमादिशक्ति-
-श्चक्रेशी पातु मे चिरं चिबुकम् ॥ 199 ॥
कामेश्वरी च कर्णौ
कामाक्षी पातु गण्डयोर्युगलम् ।
शृङ्गारनायिकाव्या-
-द्वदनं सिंहासनेश्वरी च गलम् ॥ 200 ॥
स्कन्दप्रसूश्च पातु
स्कन्धौ बाहू च पाटलाङ्गी मे ।
पाणी च पद्मनिलया
पायादनिशं नखावलीर्विजया ॥ 201 ॥
कोदण्डिनी च वक्षः
कुक्षिं चाव्यात् कुलाचलतनूजा ।
कल्याणी च वलग्नं
कटिं च पायात्कलाधरशिखण्डा ॥ 202 ॥
ऊरुद्वयं च पाया-
-दुमा मृडानी च जानुनी रक्षेत् ।
जङ्घे च षोडशी मे
पायात् पादौ च पाशसृणिहस्ता ॥ 203 ॥
प्रातः पातु परा मां
मध्याह्ने पातु मणिगृहाधीशा ।
शर्वाण्यवतु च सायं
पायाद्रात्रौ च भैरवी साक्षात् ॥ 204 ॥
भार्यां रक्षतु गौरीं
पायात् पुत्रांश्च बिन्दुगृहपीठा ।
श्रीविद्या च यशो मे
शीलं चाव्याच्चिरं महाराज्ञी ॥ 205 ॥
पवनमयि पावकमयि
क्षोणीमयि गगनमयि कृपीटमयि ।
रविमयि शशिमयि दिङ्मयि
समयमयि प्राणमयि शिवे पाहि ॥ 206 ॥
कालि कपालिनि शूलिनि
भैरवि मातङ्गि पञ्चमि त्रिपुरे ।
वाग्देवि विन्ध्यवासिनि
बाले भुवनेशि पालय चिरं माम् ॥ 207 ॥
अभिनवसिन्दूराभा-
-मम्ब त्वां चिन्तयन्ति ये हृदये ।
उपरि निपतन्ति तेषा-
-मुत्पलनयनाकटाक्षकल्लोलाः ॥ 208 ॥
वर्गाष्टकमिलिताभि-
-र्वशिनीमुख्याभिरावृतां भवतीम् ।
चिन्तयतां सितवर्णां
वाचो निर्यान्त्ययत्नतो वदनात् ॥ 209 ॥
कनकशलाकागौरीं
कर्णव्यालोलकुण्डलद्वितयाम् ।
प्रहसितमुखीं च भवतीं
ध्यायन्तो ये त एव भूधनदाः ॥ 210 ॥
शीर्षाम्भोरुहमध्ये
शीतलपीयूषवर्षिणीं भवतीम् ।
अनुदिनमनुचिन्तयता-
-मायुष्यं भवति पुष्कलमवन्याम् ॥ 211 ॥
मधुरस्मितां मदारुणनयनां
मातङ्गकुम्भवक्षोजाम् ।
चन्द्रवतंसिनीं त्वां
सविधे पश्यन्ति सुकृतिनः केचित् ॥ 212 ॥
ललितायाः स्तवरत्नं
ललितपदाभिः प्रणीतमार्याभिः ।
प्रतिदिनमवनौ पठतां
फलानि वक्तुं प्रगल्भते सैव ॥ 213 ॥
सदसदनुग्रहनिग्रह-
-गृहीतमुनिविग्रहो भगवान् ।
सर्वासामुपनिषदां
दुर्वासा जयति देशिकः प्रथमः ॥ 214 ॥
इति महर्षिदुर्वासः विरचितं श्रीललितास्तवरत्नम् ।
vande gajendravadanaṃ
vāmāṅkārūḍhavallabhāśliṣṭam |
kuṅkumaparāgaśoṇaṃ
kuvalayinījārakorakāpīḍam || 1 ||
sa jayati suvarṇaśailaḥ
sakalajagaccakrasaṅghaṭitamūrtiḥ |
kāñcananikuñjavāṭī-
-kandaladamarīprapañcasaṅgītaḥ || 2 ||
harihayanairṛtamāruta-
-haritāmanteṣvavasthitaṃ tasya |
vinumaḥ sānutritayaṃ
vidhiharigaurīśaviṣṭapādhāram || 3 ||
madhye punarmanohara-
-ratnarucistabakarañjitadigantam |
upari catuḥśatayojana-
-muttuṅgaṃ śṛṅgapuṅgavamupāse || 4 ||
tatra catuḥśatayojana-
-pariṇāhaṃ devaśilpinā racitam |
nānāsālamanojñaṃ
namāmyahaṃ nagaramādividyāyāḥ || 5 ||
prathamaṃ sahasrapūrvaka-
-ṣaṭśatasaṅkhyākayojanaṃ paritaḥ |
valayīkṛtasvagātraṃ
varaṇaṃ śaraṇaṃ vrajāmyayorūpam || 6 ||
tasyottare samīraṇa-
-yojanadūre taraṅgitacchāyaḥ |
ghaṭayatu mudaṃ dvitīyo
ghaṇṭāstanasāranirmitaḥ sālaḥ || 7 ||
ubhayorantarasīma-
-nyuddāmabhramararañjitodāram |
upavanamupāsmahe vaya-
-mūrīkṛtamandamārutasyandam || 8 ||
āliṅgya bhadrakālī-
-māsīnastatra hariśilāśyāmām |
manasi mahākālo me
viharatu madhupānavibhramannetraḥ || 9 ||
tārtīyīko varaṇa-
-stasyottarasīmni vātayojanataḥ |
tāmreṇa racitamūrti-
-stanutāmācandratārakaṃ bhadram || 10 ||
madhye tayośca maṇimaya-
-pallavaśākhāprasūnapakṣmalitām |
kalpānokahavāṭīṃ
kalaye makarandapaṅkilāvālām || 11 ||
tatra madhumādhavaśrī-
-taruṇībhyāṃ taraladṛkcakorābhyām |
āliṅgito'vatānmā-
-maniśaṃ prathamarturāttapuṣpāstraḥ || 12 ||
namata taduttarabhāge
nākipathollaṅghiśṛṅgasaṅghātam |
sīsākṛtiṃ turīyaṃ
sitakiraṇālokanirmalaṃ sālam || 13 ||
sāladvayāntarāle
saralālikapotacāṭusubhagāyām |
santānavāṭikāyāṃ
saktaṃ ceto'stu satatamasmākam || 14 ||
tatra tapanātirūkṣaḥ
sāmrājñīcaraṇasāndritasvāntaḥ |
śukraśuciśrīsahito
grīṣmarturdiśatu kīrtimākalpam || 15 ||
uttarasīmani tasyo-
-nnataśikharotkampihāṭakapatākaḥ |
prakaṭayatu pañcamo naḥ
prākāraḥ kuśalamārakūṭamayaḥ || 16 ||
prākārayośca madhye
pallavitānyabhṛtapañcamonmeṣā |
haricandanadruvāṭī-
-haratādāmūlamasmadanutāpam || 17 ||
tatra nabhaḥ śrīmukhyai-
-staruṇīvargaiḥ samanvitaḥ paritaḥ |
vajrāṭṭahāsamukharo
vāñchāpūrtiṃ tanotu varṣartuḥ || 18 ||
mārutayojanadūre
mahanīyastasya cottare bhāge |
bhadraṃ kṛṣīṣṭa ṣaṣṭhaḥ
prākāraḥ pañcalohadhātumayaḥ || 19 ||
anayormadhye santata-
-maṅkūraddivyakusumagandhāyām |
mandāravāṭikāyāṃ
mānasamaṅgīkarotu me vihṛtim || 20 ||
tasyāmiṣorjalakṣmī-
-taruṇībhyāṃ śaradṛtuḥ sadā sahitaḥ |
abhyarcayan sa jīyā-
-dambāmāmodameduraiḥ kusumaiḥ || 21 ||
tasyarṣisaṅkhyayojana-
-dūre dedīpyamānaśṛṅgaughaḥ |
kaladhautakalitamūrtiḥ
kalyāṇaṃ diśatu saptamaḥ sālaḥ || 22 ||
madhye tayormarutpatha
laṅghitaviṭapāgravirutakalakaṇṭhā |
śrīpārijātavāṭī
śriyamaniśaṃ diśatu śītaloddeśā || 23 ||
tasyāmatipriyābhyāṃ
saha khelan sahasahasyalakṣmībhyām |
sāmanto jhaṣaketo-
-rhemanto bhavatu hemavṛddhyai naḥ || 24 ||
uttaratastasya mahā-
-nudbhaṭahutabhukśikhāruṇamayūkhaḥ |
tapanīyakhaṇḍaracita-
-stanutādāyuṣyamaṣṭamo varaṇaḥ || 25 ||
kādambavipinavāṭī-
-manayormadhyabhuvi kalpitāvāsām |
kalayāmi sūnakoraka-
-kandalitāmodatundilasamīrām || 26 ||
tasyāmatiśiśirākṛti-
-rāsīnastapatapasyalakṣmībhyām |
śivamaniśaṃ kurutānme
śiśirartuḥ satataśītaladigantaḥ || 27 ||
tasyāṃ kadambavāṭyāṃ
tatprasavāmodamilitamadhugandham |
saptāvaraṇamanojñaṃ
śaraṇaṃ samupaimi mantriṇīśaraṇam || 28 ||
tatrālaye viśāle
tapanīyāracitataralasopāne |
māṇikyamaṇḍapānta-
-rmahite siṃhāsane sumaṇikhacite || 29 ||
bindutripañcakoṇa-
-dvipanṛpavasuvedadalakurekhāḍhye |
cakre sadā niviṣṭāṃ
ṣaṣṭhyaṣṭatriṃśadakṣareśānīm || 30 ||
tāpiñchamecakābhāṃ
tālīdalaghaṭitakarṇatāṭaṅkām |
tāmbūlapūritamukhīṃ
tāmrādharabimbadṛṣṭadarahāsām || 31 ||
kuṅkumapaṅkiladehāṃ
kuvalayajīvātuśāvakavataṃsām |
kokanadaśoṇacaraṇāṃ
kokilanikvāṇakomalālāpām || 32 ||
vāmāṅgagalitacūlīṃ
vanamālyakadambamālikābharaṇām |
muktālalantikāñcita
mugdhālikamilitacitrakodārām || 33 ||
karavidhṛtakīraśāvaka-
-kalaninadavyaktanikhilanigamārthām |
vāmakucasaṅgivīṇāvādana-
-saukhyārdhamīlitākṣiyugām || 34 ||
āpāṭalāṃśukadharā-
-mādirasonmeṣavāsitakaṭākṣām |
āmnāyasāragulikā-
-mādyāṃ saṅgītamātṛkāṃ vande || 35 ||
tasya ca suvarṇasāla-
-syottaratastaruṇakuṅkumacchāyaḥ |
śamayatu mama santāpaṃ
sālo navamaḥ sa puṣparāgamayaḥ || 36 ||
anayorantaravasudhāḥ
praṇumaḥ pratyagrapuṣparāgamayīḥ |
siṃhāsaneśvarīmanu-
-cintananistandrasiddhanīrandhrāḥ || 37 ||
tatsālottaradeśe
taruṇajapākiraṇadhoraṇīśoṇaḥ |
praśamayatu padmarāga-
-prākāro mama parābhavaṃ daśamaḥ || 38 ||
antarabhūkṛtavāsā-
-nanayorapanītacittavaimatyān |
cakreśīpadabhaktāṃ-
-ścāraṇavargānaharniśaṃ kalaye || 39 ||
sāraṅgavāhayojanadūre-
-'saṅghaṭitaketanastasya |
gomedakena racito
gopāyatu māṃ samunnataḥ sālaḥ || 40 ||
vapradvayāntarorvyāṃ
vaṭukairvividhaiśca yoginībṛndaiḥ |
satataṃ samarcitāyāḥ
saṅkarṣaṇyāḥ praṇaumi caraṇābjam || 41 ||
tāpasayojanadūre
tasya samuttuṅga gopuropetaḥ |
vāñchāpūrtyai bhavatā-
-dvajramaṇīnikaranirmito vapraḥ || 42 ||
varaṇadvitayāntarato
vāsajuṣo vihitamadhurasāsvādāḥ |
rambhādivibudhaveśyā
racayantu mahāntamasmadānandam || 43 ||
tatra sadā pravahantī
taṭinī vajrābhidhā ciraṃ jīyāt |
caṭulormijālanṛtya-
-tkalahaṃsīkulakalakvaṇitapuṣṭā || 44 ||
rodhasi tasyā rucire
vajreśī jayati vajrabhūṣāḍhyā |
vajrapradānatoṣita-
-vajrimukhatridaśavinutacāritrā || 45 ||
tasyodīcyāṃ hariti
stavakitasuṣamāvalīḍhaviyadantaḥ |
vaiḍūryaratnaracito
vaimalyaṃ diśatu cetaso varaṇaḥ || 46 ||
adhimadhyametayoḥ puna-
-rambācaraṇāvalambitasvāntān |
kārkoṭakādināgān
kalayāmaḥ kiṃ ca balimukhān danujān || 47 ||
gandhavahasaṅkhyayojana-
-dūre gaganordhvajāṅghikastasya |
vāsavamaṇipraṇīto
varaṇo bahalayatu vaiduṣīṃ viśadām || 48 ||
madhyakṣoṇyāmanayo-
-rmahendranīlātmakāni ca sarāṃsi |
śātodarīsahāyā-
-nbhūpālānapi punaḥ punaḥ praṇumaḥ || 49 ||
āśugayojanadūre
tasyordhvaṃ kāntidhavalitadigantaḥ |
muktāviracitagātro
muhurasmākaṃ mude bhavatu sālaḥ || 50 ||
āvṛttyoradhimadhyaṃ
pūrvasyāṃ diśi purandaraḥ śrīmān |
abhramuviṭādhirūḍho
vibhramamasmākamaniśamātanutāt || 51 ||
tatkoṇe vyajanasru-
-ktomarapātrasruvānnaśaktidharaḥ |
svāhāsvadhāsametaḥ
sukhayatu māṃ havyavāhanaḥ suciram || 52 ||
dakṣiṇadigantarāle
daṇḍadharo nīlanīradacchāyaḥ |
tripurāpadābjabhaktastirayatu
mama nikhilamaṃhasāṃ nikaram || 53 ||
tasyaiva paścimāyāṃ
diśi dalitendīvaraprabhāśyāmaḥ |
kheṭāsiyaṣṭidhārī
khedānapanayatu yātudhāno me || 54 ||
tasyā uttaradeśe
dhavalāṅgo vipulajhaṣavarārūḍhaḥ |
pāśāyudhāttapāṇiḥ
pāśī vidalayatu pāśajālāni || 55 ||
vande taduttarahari-
-tkoṇe vāyuṃ camūruvaravāham |
korakitatattvabodhā-
-ngorakṣapramukhayogino'pi muhuḥ || 56 ||
taruṇīriḍāpradhānā-
-stisro vātasya tasya kṛtavāsāḥ |
pratyagrakāpiśāyana-
-pānaparibhrāntalocanāḥ kalaye || 57 ||
tallokapūrvabhāge
dhanadaṃ dhyāyāmi śevadhikuleśam |
api māṇibhadramukhyā-
-nambācaraṇāvalambino yakṣān || 58 ||
tasyaiva pūrvasīmani
tapanīyāracitagopure nagare |
kātyāyanīsahāyaṃ
kalaye śītāṃśukhaṇḍacūḍālam || 59 ||
tatpuraṣoḍaśavaraṇa-
-sthalabhājastaruṇacandracūḍālān |
rudrādhyāye paṭhitā-
-nrudrāṇīsahacarānbhaje rudrān || 60 ||
pavamānasaṅkhyayojana-
-dūre bālatṛṇmecakastasya |
sālo marakataracitaḥ
sampadamacalāṃ śriyaṃ ca puṣṇātu || 61 ||
āvṛtiyugmāntarato
haritamaṇīnivahamecake deśe |
hāṭakatālīvipinaṃ
hālāghaṭaghaṭitaviṭapamākalaye || 62 ||
tatraiva mantriṇīgṛha-
-pariṇāhaṃ taralaketanaṃ sadanam |
marakatasaudhamanojñaṃ
dadyādāyūṃṣi daṇḍanāthāyāḥ || 63 ||
sadane tatra harinmaṇi-
-saṅghaṭite maṇḍape śatastambhe |
kārtasvaramayapīṭhe
kanakamayāmburuhakarṇikāmadhye || 64 ||
bindutrikoṇavartula-
-ṣaḍasravṛttadvayānvite cakre |
sañcāriṇī daśottara-
śatārṇamanurājakamalakalahaṃsī || 65 ||
kolavadanā kuśeśaya-
-nayanā kokārimaṇḍitaśikhaṇḍā |
santaptakāñcanābhā
sandhyāruṇacelasaṃvṛtanitambā || 66 ||
halamusalaśaṅkhacakrā-
-'ṅkuśapāśābhayavarasphuritahastā |
kūlaṅkaṣānukampā
kuṅkumajambālitastanābhogā || 67 ||
dhūrtānāmatidūrā-
-vārtāśeṣāvalagnakamanīyā |
ārtālīśubhadātrī
vārtālī bhavatu vāñchitārthāya || 68 ||
tasyāḥ parito devīḥ
svapneśyunmattabhairavīmukhyāḥ |
praṇamata jambhinyādyāḥ
bhairavavargāṃśca hetukapramukhān || 69 ||
pūrvoktasaṅkhyayojana-
-dūre pūyāṃśupāṭalastasya |
vidrāvayatu madārtiṃ
vidrumasālo viśaṅkaṭadvāraḥ || 70 ||
āvaraṇayoraharniśa-
-mantarabhūmauprakāśaśālinyām |
āsīnamambujāsana-
-mabhinavasindūragauramahamīḍe || 71 ||
varaṇasya tasya māruta-
-yojanato vipulagopuradvāraḥ |
sālo nānāratnaiḥ
saṅghaṭitāṅgaḥ kṛṣīṣṭa madabhīṣṭam || 72 ||
antarakakṣyāmanayo-
-raviralaśobhāpicaṇḍiloddeśām |
māṇikyamaṇḍapākhyāṃ
mahatīmadhihṛdayamaniśamākalaye || 73 ||
tatra sthitaṃ prasannaṃ
taruṇatamālapravālakiraṇābham |
karṇāvalambikuṇḍala-
-kandalitābhīśukavacitakapolam || 74 ||
śoṇādharaṃ śucismita-
-meṇāṅkavadanamedhamānakṛpam |
mugdhaiṇamadaviśeṣaka-
-mudritaniṭilendurekhikāruciram || 75 ||
nālīkadalasahodara-
-nayanāñcalaghaṭitamanasijākūtam |
kamalākaṭhinapayodhara-
-kastūrīghusṛṇapaṅkiloraskam || 76 ||
cāmpeyagandhikaiśyaṃ
śampāsabrahmacārikauśeyam |
śrīvatsakaustubhadharaṃ
śritajanarakṣādhurīṇacaraṇābjam || 77 ||
kambusudarśanavilasa-
-tkarapadmaṃ kaṇṭhalolavanamālam |
mucukundamokṣaphaladaṃ
mukundamānandakandamavalambe || 78 ||
tadvaraṇottarabhāge
tārāpatibimbacumbinijaśṛṅgaḥ |
vividhamaṇīgaṇaghaṭito
vitaratu sālo vinirmalāṃ dhiṣaṇām || 79 ||
prākāradvitayāntara-
-kakṣyāṃ pṛthuratnanikarasaṅkīrṇām |
namata sahasrastambhaka-
-maṇḍapanāmnātiviśrutāṃ bhuvane || 80 ||
praṇumastatra bhavānī-
-sahacaramīśānamindukhaṇḍadharam |
śṛṅgāranāyikāmanu-
-śīlanabhājo'pi bhṛṅginandimukhān || 81 ||
tasyaiṇavāhayojana-
-dūre vande manomayaṃ vapram |
aṅkūranmaṇikiraṇā-
-mantarakakṣyāṃ ca nirmalāmanayoḥ || 82 ||
tatraivāmṛtavāpīṃ
taralataraṅgāvalīḍhataṭayugmām |
muktāmayakalahaṃsī-
-mudritakanakāravindasandohām || 83 ||
śakropalamayabhṛṅgī-
-saṅgītonmeṣaghoṣitadigantām |
kāñcanamayāṅgavilasa-
-tkāraṇḍavaṣaṇḍatāṇḍavamanojñām || 84 ||
kuruvindātmakahallaka-
-korakasuṣamāsamūhapāṭalitām |
kalaye sudhāsvarūpāṃ
kandalitāmandakairavāmodām || 85 ||
tadvāpikāntarāle tarale
maṇipotasīmni viharantīm |
sindūrapāṭalāṅgīṃ
sitakiraṇāṅkūrakalpitavataṃsām || 86 ||
parvendubimbavadanāṃ
pallavaśoṇādharasphuritahāsām |
kuṭilakabarīṃ kuraṅgī-
-śiśunayanāṃ kuṇḍalasphuritagaṇḍām || 87 ||
nikaṭasthapotanilayāḥ
śaktīḥ śayavidhṛtahemaśṛṅgajalaiḥ |
pariṣiñcantīṃ parita-
-stārāṃ tāruṇyagarvitāṃ vande || 88 ||
prāguktasaṅkhyayojanadūre
praṇamāmi buddhimayasālam |
anayorantarakakṣyā-
-maṣṭāpadapuṣṭamedinīṃ rucirām || 89 ||
kādambarīnidhānāṃ
kalayāmyānandavāpikāṃ tasyām |
śoṇāśmanivahanirmita-
-sopānaśreṇiśobhamānataṭīm || 90 ||
māṇikyataraṇinilayāṃ
madhye tasyā madāruṇakapolām |
amṛteśītyabhidhānā-
-mantaḥ kalayāmi vāruṇīṃ devīm || 91 ||
sauvarṇakenipātana-
-hastāḥ saundaryagarvitā devyaḥ |
tatpurataḥ sthitibhājo
vitarantvasmākamāyuṣo vṛddhim || 92 ||
tasya pṛṣadaśvayojana-
-dūre'haṅkārasālamatituṅgam |
vande tayośca madhye
kakṣyāṃ valamānamalayapavamānām || 93 ||
vinumo vimarśavāpīṃ
sauṣumnasudhāsvarūpiṇīṃ tatra |
velātilaṅghyavīcī-
-kolāhalabharitakūlavanavāṭīm || 94 ||
tatraiva salilamadhye
tāpiñchadalaprapañcasuṣamābhām |
śyāmalakañcukalasitāṃ
śyāmāviṭabimbaḍambaraharāsyām || 95 ||
ābhugnamasṛṇacillī-
-hasitāyugmaśarakārmukavilāsām |
mandasmitāñcitamukhīṃ
maṇimayatāṭaṅkamaṇḍitakapolām || 96 ||
kuruvindataraṇinilayāṃ
kulācalaspardhikucanamanmadhyām |
kuṅkumaviliptagātrīṃ
kurukullāṃ manasi kurmahe satatam || 97 ||
tatsālottarabhāge
bhānumayaṃ vapramāśraye dīptam |
madhyaṃ ca vipulamanayo-
-rmanye viśrāntamātapodgāram || 98 ||
tatra kuruvindapīṭhe
tāmarase kanakakarṇikāghaṭite |
āsīnamaruṇavāsasa-
-mamlānaprasavamālikābharaṇam || 99 ||
cakṣuṣmatīprakāśana-
-śakticchāyāsamāracitakelim |
māṇikyamukuṭaramyaṃ
manye mārtāṇḍabhairavaṃ hṛdaye || 100 ||
indumayasālamīḍe
tasyottaratastuṣāragirigauram |
atyantaśiśiramāruta-
-manayormadhyaṃ ca candrikodgāram || 101 ||
tatra prakāśamānaṃ
tārānikaraiḥ pariṣkṛtoddeśam |
amṛtamayakāntikandala-
-mantaḥ kalayāmi kundasitamindum || 102 ||
śṛṅgārasālamīḍe
śṛṅgollasitaṃ taduttare bhāge |
madhyasthale tayorapi
mahitāṃ śṛṅgārapūrvikāṃ parikhām || 103 ||
tatra maṇinausthitābhi-
-stapanīyāviracitāgrahastābhiḥ |
śṛṅgāradevatābhiḥ
sahitaṃ parikhādhipaṃ bhaje madanam || 104 ||
śṛṅgāravaraṇavaryasyottarataḥ
sakalavibudhasaṃsevyam |
cintāmaṇigaṇaracitaṃ
cintāṃ dūrīkarotu me sadanam || 105 ||
maṇisadanasālayoradhi-
-madhyaṃ daśatālabhūmiruhadīrghaiḥ |
parṇaiḥ suvarṇavarṇai-
-ryuktāṃ kāṇḍaiśca yojanottuṅgaiḥ || 106 ||
mṛdulaistālīpañcaka-
-mānairmilitāṃ ca kesarakadambaiḥ |
santatagalitamaranda-
-srotoniryanmilindasandohām || 107 ||
pāṭīrapavanabālaka-
-dhāṭīniryatparāgapiñjaritām |
kalahaṃsīkulakalakala-
-kūlaṅkaṣaninadanicayakamanīyām || 108 ||
padmāṭavīṃ bhajāmaḥ
parimalakallolapakṣmalopāntām |
[ devyarghyapātradhārī
tasyāḥ pūrvadiśi daśakalāyuktaḥ | ]
valayitamūrtirbhagavā-
-nvahniḥ krośonnataściraṃ pāyāt || 109 ||
tatrādhāre devyāḥ
pātrīrūpaḥ prabhākaraḥ śrīmān |
dvādaśakalāsameto
dhvāntaṃ mama bahulamāntaraṃ bhindyāt || 110 ||
tasmin dineśapātre
taraṅgitāmodamamṛtamayamarghyam |
candrakalātmakamamṛtaṃ
sāndrīkuryādamandamānandam || 111 ||
amṛte tasminnabhito
viharantyo vividhamaṇitaraṇibhājaḥ |
ṣoḍaśa kalāḥ sudhāṃśoḥ
śokāduttārayantu māmaniśam || 112 ||
tatraiva vihṛtibhājo
dhātṛmukhānāṃ ca kāraṇeśānām |
sṛṣṭyādirūpikāstāḥ
śamayantvakhilāḥ kalāśca santāpam || 113 ||
kīnāśavaruṇakinnara-
-rājadiganteṣu ratnagehasya |
kalayāmi tānyajasraṃ
kalayantvāyuṣyamarghyapātrāṇi || 114 ||
pātrasthalasya purataḥ
padmāramaṇavidhipārvatīśānām |
bhavanāni śarmaṇe no
bhavantu bhāsā pradīpitajaganti || 115 ||
sadanasyānalakoṇe
satataṃ praṇamāmi kuṇḍamāgneyam |
tatra sthitaṃ ca vahniṃ
taralaśikhājaṭilamambikājanakam || 116 ||
tasyāsuradiśi tādṛśa-
-ratnaparisphuritaparvanavakāḍhyam |
cakrātmakaṃ śatāṅgaṃ
śatayojanamunnataṃ bhaje divyam || 117 ||
tatraiva diśi niṣaṇṇaṃ
tapanīyadhvajaparamparāśliṣṭam |
rathamaparaṃ ca bhavānyā
racayāmo manasi ratnamayacūḍam || 118 ||
bhavanasya vāyubhāge
pariṣkṛto vividhavaijayantībhiḥ |
racayatu mudaṃ rathendraḥ
saciveśānyāḥ samastavandyāyāḥ || 119 ||
kurmo'dhihṛdayamaniśaṃ
kroḍāsyāyāḥ śatāṅgamūrdhanyam |
rudradiśi ratnadhāmno
ruciraśalākāprapañcakañcukitam || 120 ||
parito devīdhāmnaḥ
praṇītavāsā manusvarūpiṇyaḥ |
kurvantu raśmimālā-
-kṛtayaḥ kuśalāni devatā nikhilāḥ || 121 ||
prāgdvārasya bhavānī-
-dhāmnaḥ pārśvadvayāracitavāse |
mātaṅgīkiṭimukhyau
maṇisadane manasi bhāvayāmi ciram || 122 ||
yojanayugalābhogā
tatkrośapariṇāhayaiva bhittyā ca |
cintāmaṇigṛhabhūmi-
-rjīyādāmnāyamayacaturdvārā || 123 ||
dvāre dvāre dhāmnaḥ
piṇḍībhūtā navīnabimbābhāḥ |
vidadhatu vipulāṃ kīrtiṃ
divyā lauhityasiddhyo devyaḥ || 124 ||
maṇisadanasyāntarato
mahanīye ratnavedikāmadhye |
bindumayacakramīḍe
pīṭhānāmupari viracitāvāsam || 125 ||
cakrāṇāṃ sakalānāṃ
prathamamadhaḥ sīmaphalakavāstavyāḥ |
aṇimādisiddhayo mā-
-mavantu devī prabhāsvarūpiṇyaḥ || 126 ||
aṇimādisiddhiphalaka-
-syoparihariṇāṅkakhaṇḍakṛtacūḍāḥ |
bhadraṃ pakṣmalayantu
brāhmīpramukhāśca mātaro'smākam || 127 ||
tasyopari maṇiphalake
tāruṇyottuṅgapīnakucabhārāḥ |
saṅkṣobhiṇīpradhānāḥ
bhrānti vidrāvayantu daśa mudrāḥ || 128 ||
phalakatrayasvarūpe
pṛthule trailokyamohane cakre |
dīvyantu prakaṭākhyā-
-stāsāṃ kartrīṃ ca bhagavatī tripurā || 129 ||
tadupari vipule dhiṣṇye
taraladṛśastaruṇakokanadabhāsaḥ |
kāmākarṣiṇyādyāḥ
kalaye devīḥ kalādharaśikhaṇḍāḥ || 130 ||
sarvāśāparipūrakacakre-
-'smin guptayoginīsevyāḥ |
tripureśī mama duritaṃ
tudyāt kaṇṭhāvalambimaṇihārā || 131 ||
tasyopari maṇipīṭhe
tāmrāmbhoruhadalaprabhāśoṇāḥ |
dhyāyāmyanaṅgakusumā-
-pramukhā devīśca vidhṛtakūrpāsāḥ || 132 ||
saṅkṣobhakārake'smiṃ-
-ścakre śrītripurasundarī sākṣāt |
goptrī guptatarākhyāḥ
gopāyatu māṃ kṛpārdrayā dṛṣṭyā || 133 ||
saṅkṣobhiṇīpradhānāḥ
śaktīstasyordhvavalayakṛtavāsāḥ |
ālolanīlaveṇī-
-rantaḥ kalayāmi yauvanonmattāḥ || 134 ||
saubhāgyadāyake'smiṃ-
-ścakreśī tripuravāsinī jīyāt |
śaktīśca sampradāyābhidhāḥ
samastāḥ pramodayantvaniśam || 135 ||
maṇipīṭhopari tāsāṃ
mahati caturhastavistṛte valaye |
santataviracitavāsāḥ
śaktīḥ kalayāmi sarvasiddhimukhāḥ || 136 ||
sarvārthasādhakākhye
cakre'muṣmin samastaphaladātrī |
tripurā śrīrmama kuśalaṃ
diśatāduttīrṇayoginīsevyā || 137 ||
tāsāṃ nilayasyopari
dhiṣṇye kausumbhakañcukamanojñāḥ |
sarvājñādyāḥ devyaḥ
sakalāḥ sampādayantu mama kīrtim || 138 ||
cakre samastarakṣā-
-karanāmnyasmin samastajanasevyām |
manasi nigarbhāsahitāṃ
manye śrītripuramālinīṃ devīm || 139 ||
sarvajñāsadanasyopari
cakre vipule samākalitagehāḥ |
vande vaśinīmukhyāḥ
śaktīḥ sindūrareṇurucaḥ || 140 ||
śrīsarvarogaharākhya-
-cakre'smiṃstripurapūrvikāṃ siddhām |
vande rahasyanāmnā
vedyābhiḥ śaktibhiḥ sadā sevyām || 141 ||
vaśinīgṛhopariṣṭā-
-dviṃśatihastonnate mahāpīṭhe |
śamayantu śatrubṛndaṃ
śastrāṇyastrāṇi cādidampatyoḥ || 142 ||
śastrasadanopariṣṭā-
-dvalaye valavairiratnasaṅghaṭite |
kāmeśvarīpradhānāḥ
kalaye devīḥ samastajanavandyāḥ || 143 ||
cakre'tra sarvasiddhiprada-
-nāmani sarvaphaladātrī |
tripurāmbāvatu satataṃ
parāpararahasyayoginīsevyā || 144 ||
kāmeśvarīgṛhoparivalaye
vividhamanusampradāyajñāḥ |
catvāro yuganāthā
jayantu mitreśapūrvakāḥ guravaḥ || 145 ||
nāthabhavanopariṣṭā-
-nnānāratnacayamedure pīṭhe |
kāmeśyādyā nityāḥ
kalayantu mudaṃ tithisvarūpiṇyaḥ || 146 ||
nityāsadanasyopari
nirmalamaṇinivahaviracite dhiṣṇye |
kuśalaṃ ṣaḍaṅgadevyaḥ
kalayantvasmākamuttaralanetrāḥ || 147 ||
sadanasyopari tāsāṃ
sarvānandamayanāmake bindau |
pañcabrahmākārāṃ
mañcaṃ praṇamāmi maṇigaṇākīrṇam || 148 ||
parito maṇimañcasya
pralambamānā niyantritā pāśaiḥ |
māyāmayī javanikā
mama duritaṃ haratu mecakacchāyā || 149 ||
mañcasyopari lamba-
-nmadanīpunnāgamālikābharitam |
harigopamayavitānaṃ
haratādālasyamaniśamasmākam || 150 ||
paryaṅkasya bhajāmaḥ
pādānbimbāmbudenduhemarucaḥ |
ajaharirudreśamayā-
-nanalāsuramāruteśakoṇasthān || 151 ||
phalakaṃ sadāśivamayaṃ
praṇaumi sindūrareṇukiraṇābham |
ārabhyāṅgeśīnāṃ
sadanātkalitaṃ ca ratnasopānam || 152 ||
paṭṭopadhānagaṇḍaka-
-catuṣṭayasphuritapāṭalāstaraṇam |
paryaṅkopari ghaṭitaṃ
pātu ciraṃ haṃsatūlaśayanaṃ naḥ || 153 ||
tasyopari nivasantaṃ
tāruṇyaśrīniṣevitaṃ satatam |
āvṛntapullahallaka-
-marīcikāpuñjamañjulacchāyam || 154 ||
sindūraśoṇavasanaṃ
śītāṃśustabakacumbitakirīṭam |
kuṅkumatilakamanohara-
-kuṭilālikahasitakumudabandhuśiśum || 155 ||
pūrṇendubimbavadanaṃ
phullasarojātalocanatritayam |
taralāpāṅgataraṅgita-
-śapharāṅkanaśāstrasampradāyārtham || 156 ||
maṇimayakuṇḍalapuṣya-
-nmarīcikallolamāṃsalakapolam |
vidrumasahodarādhara-
-visṛmarasusmitakiśorasañcāram || 157 ||
āmodikusumaśekhara-
-mānīlabhrūlatāyugamanojñam |
vīṭīsaurabhavīcī-
-dviguṇitavaktrāravindasaurabhyam || 158 ||
pāśāṅkuśekṣucāpa-
-prasavaśarasphuritakomalakarābjam |
kāśmīrapaṅkilāṅgaṃ
kāmeśaṃ manasi kurmahe satatam || 159 ||
tasyāṅkabhuvi niṣaṇṇāṃ
taruṇakadambaprasūnakiraṇābhām |
śītāṃśukhaṇḍacūḍāṃ
sīmantanyastasāndrasindūrām || 160 ||
kuṅkumalalāmabhāsva-
-nniṭilāṃ kuṭilataracillikāyugalām |
nālīkatulyanayanāṃ
nāsāñcalanaṭitamauktikābharaṇām || 161 ||
aṅkuritamandahāsa-
-maruṇādharakāntivijitabimbābhām |
kastūrīmakarīyuta-
-kapolasaṅkrāntakanakatāṭaṅkām || 162 ||
karpūrasāndravīṭī-
-kabalitavadanāravindakamanīyām |
kambusahodarakaṇṭha-
-pralambamānācchamauktikakalāpām || 163 ||
kahlāradāmakomala-
-bhujayugalasphuritaratnakeyūrām |
karapadmamūlavilasa-
-tkāñcanamayakaṭakavalayasandohām || 164 ||
pāṇicatuṣṭayavilasa-
-tpāśāṅkuśapuṇḍracāpapuṣpāstrām |
kūlaṅkaṣakucaśikharāṃ
kuṅkumakardamitaratnakūrpāsām || 165 ||
aṇudāyādavalagnā-
-mambudaśobhāsanābhiromalatām |
māṇikyakhacitakāñcī-
-marīcikākrāntamāṃsalanitambām || 166 ||
karabhorukāṇḍayugalāṃ
jaṅghājitakāmajaitratūṇīrām |
prapadaparibhūtakūrmāṃ
pallavasacchāyapadayugamanojñām || 167 ||
kamalabhavakañjalocana-
-kirīṭaratnāṃśurañjitapadābjām |
unmastakānukampā-
-muttaralāpāṅgapoṣitānaṅgām || 168 ||
ādimarasāvalambā-
-manidaṃ prathamoktivallarīkalikām |
ābrahmakīṭajananī-
-mantaḥ kalayāmi sundarīmaniśam || 169 ||
kastu kṣitau paṭīyā-
-nvastu stotuṃ śivāṅkavāstavyam |
astu cirantanasukṛtaiḥ
prastutakāmyāya tanmama purastāt || 170 ||
prabhusammitoktigamyaṃ
paramaśivotsaṅgatuṅgaparyaṅkam |
tejaḥ kiñcana divyaṃ
purato me bhavatu puṇḍrakodaṇḍam || 171 ||
madhurimabharitaśarāsaṃ
makarandasyandimārgaṇodāram |
kairaviṇīviṭacūḍaṃ
kaivalyāyāstu kiñcana maho naḥ || 172 ||
akṣudramikṣucāpaṃ
parokṣamavalagnasīmni tryakṣam |
kṣapayatu me kṣemetara-
-mukṣarathapremapakṣmalaṃ tejaḥ || 173 ||
bhṛṅgarucisaṅgarakarāpāṅgaṃ
śṛṅgāratuṅgamaruṇāṅgam |
maṅgalamabhaṅguraṃ me
ghaṭayatu gaṅgādharāṅgasaṅgi mahaḥ || 174 ||
prapadājitakūrmamūrjita-
-karuṇaṃ bharmarucinirmathanadeham |
śritavarma marma śambhoḥ
kiñcana mama narma śarma nirmātu || 175 ||
kālakuralālikālima-
-kandalavijitāli vidhṛtamaṇivāli |
milatu hṛdi pulinajaghanaṃ
bahulitagalagaralakeli kimapi mahaḥ || 176 ||
kuṅkumatilakitaphālā
kuruvindacchāyapāṭaladukūlā |
karuṇāpayodhivelā
kācana citte cakāstu me līlā || 177 ||
puṣpandhayaruciveṇyaḥ
pulinābhogatrapākaraśreṇyaḥ |
jīyāsurikṣupāṇyaḥ
kāścana kāmārikelisākṣiṇyaḥ || 178 ||
tapanīyāṃśukabhāṃsi
drākṣāmādhuryanāstikavacāṃsi |
katicana śucaṃ mahāṃsi
kṣapayatu kapālitoṣitamanāṃsi || 179 ||
asitakacamāyatākṣaṃ
kusumaśaraṃ kūlamudvahakṛpārdram |
ādimarasādhidaivata-
-mantaḥ kalaye harāṅkavāsi mahaḥ || 180 ||
karṇopāntataraṅgita-
-kaṭākṣavispandikaṇṭhadaghnakṛpām |
kāmeśvarāṅkanilayāṃ
kāmapi vidyāṃ purātanīṃ kalaye || 181 ||
aravindakāntyaruntuda-
-vilocanadvandvasundaramukhendu |
chandaḥ kandalamandira-
-mantaḥpuramainduśekharaṃ vande || 182 ||
bimbinikurambaḍambara-
-viḍambakacchāyamambaravalagnam |
kambugalamambudakucaṃ
bimbokaṃ kamapi cumbatu mano me || 183 ||
kamapi kamanīyarūpaṃ
kalayāmyantaḥ kadambakusumāḍhyam |
campakarucirasuveṣaiḥ
sampāditakāntyalaṅkṛtadigantam || 184 ||
śampārucibhara-
-garhāsampādakakāntikavacitadigantam |
siddhāntaṃ nigamānāṃ
śuddhāntaṃ kimapi śūlinaḥ kalaye || 185 ||
udyaddinakaraśoṇā-
-nutpalabandhustanandhayāpīḍān |
karakalitapuṇḍracāpā-
-nkalaye kānapi kapardinaḥ prāṇān || 186 ||
raśanālasajjaghanayā
rasanājīvātucāpabhāsurayā |
ghrāṇāyuṣkaraśarayā
ghrātaṃ cittaṃ kayāpi vāsanayā || 187 ||
sarasijasahayudhvadṛśā
śampālatikāsanābhivigrahayā |
bhāsā kayāpi ceto
nāsāmaṇiśobhivadanayā bharitam || 188 ||
navayāvakābhasicayānvitayā
gajayānayā dayāparayā |
dhṛtayāminīśakalayā
dhiyā kayāpi kṣatāmayā hi vayam || 189 ||
alamalamakusumabāṇai-
-rabimbaśoṇairapuṇḍrakodaṇḍaiḥ |
akumudabāndhavacūḍai-
-ranyairiha jagati daivataṃ manyaiḥ || 190 ||
kuvalayasadṛkṣanayanaiḥ
kulagirikūṭasthabandhukucabhāraiḥ |
karuṇāspandikaṭākṣaiḥ
kavacitacitto'smi katipayaiḥ kutukaiḥ || 191 ||
natajanasulabhāya namo
nālīkasanābhilocanāya namaḥ |
nanditagiriśāya namo
mahase navanīpapāṭalāya namaḥ || 192 ||
kādambakusumadāmne
kāyacchāyākaṇāyitāryamṇe |
sīmne cirantanagirāṃ
bhūmne kasmaicidādade praṇatim || 193 ||
kuṭilakabarībharebhyaḥ
kuṅkumasabrahmacārikiraṇebhyaḥ |
kūlaṅkaṣastanebhyaḥ
kurmaḥ praṇatiṃ kulādrikutukebhyaḥ || 194 ||
kokanadaśoṇacaraṇā-
-tkomalakuralālivijitaśaivālāt |
utpalasagandhinayanā-
-durarīkurmo na devatamānyām || 195 ||
āpāṭalādharāṇā-
-mānīlasnigdhabarbarakacānām |
āmnāyajīvanānā-
-mākūtānāṃ harasya dāso'ham || 196 ||
puṅkhitavilāsahāsa-
-sphuritāsu purāhitāṅkanilayāsu |
magnaṃ mano madīyaṃ
kāsvapi kāmārijīvanāḍīṣu || 197 ||
lalitā pātu śiro me
lalāṭamambā ca madhumatīrūpā |
bhrūyugmaṃ ca bhavānī
puṣpaśarā pātu locanadvandvam || 198 ||
pāyānnāsāṃ bālā
subhagā dantāṃśca sundarī jihvām |
adharoṣṭhamādiśakti-
-ścakreśī pātu me ciraṃ cibukam || 199 ||
kāmeśvarī ca karṇau
kāmākṣī pātu gaṇḍayoryugalam |
śṛṅgāranāyikāvyā-
-dvadanaṃ siṃhāsaneśvarī ca galam || 200 ||
skandaprasūśca pātu
skandhau bāhū ca pāṭalāṅgī me |
pāṇī ca padmanilayā
pāyādaniśaṃ nakhāvalīrvijayā || 201 ||
kodaṇḍinī ca vakṣaḥ
kukṣiṃ cāvyāt kulācalatanūjā |
kalyāṇī ca valagnaṃ
kaṭiṃ ca pāyātkalādharaśikhaṇḍā || 202 ||
ūrudvayaṃ ca pāyā-
-dumā mṛḍānī ca jānunī rakṣet |
jaṅghe ca ṣoḍaśī me
pāyāt pādau ca pāśasṛṇihastā || 203 ||
prātaḥ pātu parā māṃ
madhyāhne pātu maṇigṛhādhīśā |
śarvāṇyavatu ca sāyaṃ
pāyādrātrau ca bhairavī sākṣāt || 204 ||
bhāryāṃ rakṣatu gaurīṃ
pāyāt putrāṃśca bindugṛhapīṭhā |
śrīvidyā ca yaśo me
śīlaṃ cāvyācciraṃ mahārājñī || 205 ||
pavanamayi pāvakamayi
kṣoṇīmayi gaganamayi kṛpīṭamayi |
ravimayi śaśimayi diṅmayi
samayamayi prāṇamayi śive pāhi || 206 ||
kāli kapālini śūlini
bhairavi mātaṅgi pañcami tripure |
vāgdevi vindhyavāsini
bāle bhuvaneśi pālaya ciraṃ mām || 207 ||
abhinavasindūrābhā-
-mamba tvāṃ cintayanti ye hṛdaye |
upari nipatanti teṣā-
-mutpalanayanākaṭākṣakallolāḥ || 208 ||
vargāṣṭakamilitābhi-
-rvaśinīmukhyābhirāvṛtāṃ bhavatīm |
cintayatāṃ sitavarṇāṃ
vāco niryāntyayatnato vadanāt || 209 ||
kanakaśalākāgaurīṃ
karṇavyālolakuṇḍaladvitayām |
prahasitamukhīṃ ca bhavatīṃ
dhyāyanto ye ta eva bhūdhanadāḥ || 210 ||
śīrṣāmbhoruhamadhye
śītalapīyūṣavarṣiṇīṃ bhavatīm |
anudinamanucintayatā-
-māyuṣyaṃ bhavati puṣkalamavanyām || 211 ||
madhurasmitāṃ madāruṇanayanāṃ
mātaṅgakumbhavakṣojām |
candravataṃsinīṃ tvāṃ
savidhe paśyanti sukṛtinaḥ kecit || 212 ||
lalitāyāḥ stavaratnaṃ
lalitapadābhiḥ praṇītamāryābhiḥ |
pratidinamavanau paṭhatāṃ
phalāni vaktuṃ pragalbhate saiva || 213 ||
sadasadanugrahanigraha-
-gṛhītamunivigraho bhagavān |
sarvāsāmupaniṣadāṃ
durvāsā jayati deśikaḥ prathamaḥ || 214 ||
iti maharṣidurvāsaḥ viracitaṃ śrīlalitāstavaratnam |
🕉️ This is the original Sanskrit rendered in Bengali script.
Pronunciation is identical to the Sanskrit Devanagari version.