വന്ദേ ഗജേന്ദ്രവദനം
വാമാങ്കാരൂഢവല്ലഭാശ്ലിഷ്ടമ് ।
കുങ്കുമപരാഗശോണം
കുവലയിനീജാരകോരകാപീഡമ് ॥ 1 ॥
സ ജയതി സുവര്ണശൈലഃ
സകലജഗച്ചക്രസങ്ഘടിതമൂര്തിഃ ।
കാഞ്ചനനികുഞ്ജവാടീ-
-കന്ദലദമരീപ്രപഞ്ചസങ്ഗീതഃ ॥ 2 ॥
ഹരിഹയനൈരൃതമാരുത-
-ഹരിതാമന്തേഷ്വവസ്ഥിതം തസ്യ ।
വിനുമഃ സാനുത്രിതയം
വിധിഹരിഗൌരീശവിഷ്ടപാധാരമ് ॥ 3 ॥
മധ്യേ പുനര്മനോഹര-
-രത്നരുചിസ്തബകരഞ്ജിതദിഗന്തമ് ।
ഉപരി ചതുഃശതയോജന-
-മുത്തുങ്ഗം ശൃങ്ഗപുങ്ഗവമുപാസേ ॥ 4 ॥
തത്ര ചതുഃശതയോജന-
-പരിണാഹം ദേവശില്പിനാ രചിതമ് ।
നാനാസാലമനോജ്ഞം
നമാമ്യഹം നഗരമാദിവിദ്യായാഃ ॥ 5 ॥
പ്രഥമം സഹസ്രപൂര്വക-
-ഷട്ശതസങ്ഖ്യാകയോജനം പരിതഃ ।
വലയീകൃതസ്വഗാത്രം
വരണം ശരണം വ്രജാമ്യയോരൂപമ് ॥ 6 ॥
തസ്യോത്തരേ സമീരണ-
-യോജനദൂരേ തരങ്ഗിതച്ഛായഃ ।
ഘടയതു മുദം ദ്വിതീയോ
ഘണ്ടാസ്തനസാരനിര്മിതഃ സാലഃ ॥ 7 ॥
ഉഭയോരന്തരസീമ-
-ന്യുദ്ദാമഭ്രമരരഞ്ജിതോദാരമ് ।
ഉപവനമുപാസ്മഹേ വയ-
-മൂരീകൃതമന്ദമാരുതസ്യന്ദമ് ॥ 8 ॥
ആലിങ്ഗ്യ ഭദ്രകാലീ-
-മാസീനസ്തത്ര ഹരിശിലാശ്യാമാമ് ।
മനസി മഹാകാലോ മേ
വിഹരതു മധുപാനവിഭ്രമന്നേത്രഃ ॥ 9 ॥
താര്തീയീകോ വരണ-
-സ്തസ്യോത്തരസീമ്നി വാതയോജനതഃ ।
താമ്രേണ രചിതമൂര്തി-
-സ്തനുതാമാചന്ദ്രതാരകം ഭദ്രമ് ॥ 10 ॥
മധ്യേ തയോശ്ച മണിമയ-
-പല്ലവശാഖാപ്രസൂനപക്ഷ്മലിതാമ് ।
കല്പാനോകഹവാടീം
കലയേ മകരന്ദപങ്കിലാവാലാമ് ॥ 11 ॥
തത്ര മധുമാധവശ്രീ-
-തരുണീഭ്യാം തരലദൃക്ചകോരാഭ്യാമ് ।
ആലിങ്ഗിതോഽവതാന്മാ-
-മനിശം പ്രഥമര്തുരാത്തപുഷ്പാസ്ത്രഃ ॥ 12 ॥
നമത തദുത്തരഭാഗേ
നാകിപഥോല്ലങ്ഘിശൃങ്ഗസങ്ഘാതമ് ।
സീസാകൃതിം തുരീയം
സിതകിരണാലോകനിര്മലം സാലമ് ॥ 13 ॥
സാലദ്വയാന്തരാലേ
സരലാലികപോതചാടുസുഭഗായാമ് ।
സന്താനവാടികായാം
സക്തം ചേതോഽസ്തു സതതമസ്മാകമ് ॥ 14 ॥
തത്ര തപനാതിരൂക്ഷഃ
സാമ്രാജ്ഞീചരണസാന്ദ്രിതസ്വാന്തഃ ।
ശുക്രശുചിശ്രീസഹിതോ
ഗ്രീഷ്മര്തുര്ദിശതു കീര്തിമാകല്പമ് ॥ 15 ॥
ഉത്തരസീമനി തസ്യോ-
-ന്നതശിഖരോത്കമ്പിഹാടകപതാകഃ ।
പ്രകടയതു പഞ്ചമോ നഃ
പ്രാകാരഃ കുശലമാരകൂടമയഃ ॥ 16 ॥
പ്രാകാരയോശ്ച മധ്യേ
പല്ലവിതാന്യഭൃതപഞ്ചമോന്മേഷാ ।
ഹരിചന്ദനദ്രുവാടീ-
-ഹരതാദാമൂലമസ്മദനുതാപമ് ॥ 17 ॥
തത്ര നഭഃ ശ്രീമുഖ്യൈ-
-സ്തരുണീവര്ഗൈഃ സമന്വിതഃ പരിതഃ ।
വജ്രാട്ടഹാസമുഖരോ
വാഞ്ഛാപൂര്തിം തനോതു വര്ഷര്തുഃ ॥ 18 ॥
മാരുതയോജനദൂരേ
മഹനീയസ്തസ്യ ചോത്തരേ ഭാഗേ ।
ഭദ്രം കൃഷീഷ്ട ഷഷ്ഠഃ
പ്രാകാരഃ പഞ്ചലോഹധാതുമയഃ ॥ 19 ॥
അനയോര്മധ്യേ സന്തത-
-മങ്കൂരദ്ദിവ്യകുസുമഗന്ധായാമ് ।
മന്ദാരവാടികായാം
മാനസമങ്ഗീകരോതു മേ വിഹൃതിമ് ॥ 20 ॥
തസ്യാമിഷോര്ജലക്ഷ്മീ-
-തരുണീഭ്യാം ശരദൃതുഃ സദാ സഹിതഃ ।
അഭ്യര്ചയന് സ ജീയാ-
-ദമ്ബാമാമോദമേദുരൈഃ കുസുമൈഃ ॥ 21 ॥
തസ്യര്ഷിസങ്ഖ്യയോജന-
-ദൂരേ ദേദീപ്യമാനശൃങ്ഗൌഘഃ ।
കലധൌതകലിതമൂര്തിഃ
കല്യാണം ദിശതു സപ്തമഃ സാലഃ ॥ 22 ॥
മധ്യേ തയോര്മരുത്പഥ
ലങ്ഘിതവിടപാഗ്രവിരുതകലകണ്ഠാ ।
ശ്രീപാരിജാതവാടീ
ശ്രിയമനിശം ദിശതു ശീതലോദ്ദേശാ ॥ 23 ॥
തസ്യാമതിപ്രിയാഭ്യാം
സഹ ഖേലന് സഹസഹസ്യലക്ഷ്മീഭ്യാമ് ।
സാമന്തോ ഝഷകേതോ-
-ര്ഹേമന്തോ ഭവതു ഹേമവൃദ്ധ്യൈ നഃ ॥ 24 ॥
ഉത്തരതസ്തസ്യ മഹാ-
-നുദ്ഭടഹുതഭുക്ശിഖാരുണമയൂഖഃ ।
തപനീയഖണ്ഡരചിത-
-സ്തനുതാദായുഷ്യമഷ്ടമോ വരണഃ ॥ 25 ॥
കാദമ്ബവിപിനവാടീ-
-മനയോര്മധ്യഭുവി കല്പിതാവാസാമ് ।
കലയാമി സൂനകോരക-
-കന്ദലിതാമോദതുന്ദിലസമീരാമ് ॥ 26 ॥
തസ്യാമതിശിശിരാകൃതി-
-രാസീനസ്തപതപസ്യലക്ഷ്മീഭ്യാമ് ।
ശിവമനിശം കുരുതാന്മേ
ശിശിരര്തുഃ സതതശീതലദിഗന്തഃ ॥ 27 ॥
തസ്യാം കദമ്ബവാട്യാം
തത്പ്രസവാമോദമിലിതമധുഗന്ധമ് ।
സപ്താവരണമനോജ്ഞം
ശരണം സമുപൈമി മന്ത്രിണീശരണമ് ॥ 28 ॥
തത്രാലയേ വിശാലേ
തപനീയാരചിതതരലസോപാനേ ।
മാണിക്യമണ്ഡപാന്ത-
-ര്മഹിതേ സിംഹാസനേ സുമണിഖചിതേ ॥ 29 ॥
ബിന്ദുത്രിപഞ്ചകോണ-
-ദ്വിപനൃപവസുവേദദലകുരേഖാഢ്യേ ।
ചക്രേ സദാ നിവിഷ്ടാം
ഷഷ്ഠ്യഷ്ടത്രിംശദക്ഷരേശാനീമ് ॥ 30 ॥
താപിഞ്ഛമേചകാഭാം
താലീദലഘടിതകര്ണതാടങ്കാമ് ।
താമ്ബൂലപൂരിതമുഖീം
താമ്രാധരബിമ്ബദൃഷ്ടദരഹാസാമ് ॥ 31 ॥
കുങ്കുമപങ്കിലദേഹാം
കുവലയജീവാതുശാവകവതംസാമ് ।
കോകനദശോണചരണാം
കോകിലനിക്വാണകോമലാലാപാമ് ॥ 32 ॥
വാമാങ്ഗഗലിതചൂലീം
വനമാല്യകദമ്ബമാലികാഭരണാമ് ।
മുക്താലലന്തികാഞ്ചിത
മുഗ്ധാലികമിലിതചിത്രകോദാരാമ് ॥ 33 ॥
കരവിധൃതകീരശാവക-
-കലനിനദവ്യക്തനിഖിലനിഗമാര്ഥാമ് ।
വാമകുചസങ്ഗിവീണാവാദന-
-സൌഖ്യാര്ധമീലിതാക്ഷിയുഗാമ് ॥ 34 ॥
ആപാടലാംശുകധരാ-
-മാദിരസോന്മേഷവാസിതകടാക്ഷാമ് ।
ആമ്നായസാരഗുലികാ-
-മാദ്യാം സങ്ഗീതമാതൃകാം വന്ദേ ॥ 35 ॥
തസ്യ ച സുവര്ണസാല-
-സ്യോത്തരതസ്തരുണകുങ്കുമച്ഛായഃ ।
ശമയതു മമ സന്താപം
സാലോ നവമഃ സ പുഷ്പരാഗമയഃ ॥ 36 ॥
അനയോരന്തരവസുധാഃ
പ്രണുമഃ പ്രത്യഗ്രപുഷ്പരാഗമയീഃ ।
സിംഹാസനേശ്വരീമനു-
-ചിന്തനനിസ്തന്ദ്രസിദ്ധനീരന്ധ്രാഃ ॥ 37 ॥
തത്സാലോത്തരദേശേ
തരുണജപാകിരണധോരണീശോണഃ ।
പ്രശമയതു പദ്മരാഗ-
-പ്രാകാരോ മമ പരാഭവം ദശമഃ ॥ 38 ॥
അന്തരഭൂകൃതവാസാ-
-നനയോരപനീതചിത്തവൈമത്യാന് ।
ചക്രേശീപദഭക്താം-
-ശ്ചാരണവര്ഗാനഹര്നിശം കലയേ ॥ 39 ॥
സാരങ്ഗവാഹയോജനദൂരേ-
-ഽസങ്ഘടിതകേതനസ്തസ്യ ।
ഗോമേദകേന രചിതോ
ഗോപായതു മാം സമുന്നതഃ സാലഃ ॥ 40 ॥
വപ്രദ്വയാന്തരോര്വ്യാം
വടുകൈര്വിവിധൈശ്ച യോഗിനീബൃന്ദൈഃ ।
സതതം സമര്ചിതായാഃ
സങ്കര്ഷണ്യാഃ പ്രണൌമി ചരണാബ്ജമ് ॥ 41 ॥
താപസയോജനദൂരേ
തസ്യ സമുത്തുങ്ഗ ഗോപുരോപേതഃ ।
വാഞ്ഛാപൂര്ത്യൈ ഭവതാ-
-ദ്വജ്രമണീനികരനിര്മിതോ വപ്രഃ ॥ 42 ॥
വരണദ്വിതയാന്തരതോ
വാസജുഷോ വിഹിതമധുരസാസ്വാദാഃ ।
രമ്ഭാദിവിബുധവേശ്യാ
രചയന്തു മഹാന്തമസ്മദാനന്ദമ് ॥ 43 ॥
തത്ര സദാ പ്രവഹന്തീ
തടിനീ വജ്രാഭിധാ ചിരം ജീയാത് ।
ചടുലോര്മിജാലനൃത്യ-
-ത്കലഹംസീകുലകലക്വണിതപുഷ്ടാ ॥ 44 ॥
രോധസി തസ്യാ രുചിരേ
വജ്രേശീ ജയതി വജ്രഭൂഷാഢ്യാ ।
വജ്രപ്രദാനതോഷിത-
-വജ്രിമുഖത്രിദശവിനുതചാരിത്രാ ॥ 45 ॥
തസ്യോദീച്യാം ഹരിതി
സ്തവകിതസുഷമാവലീഢവിയദന്തഃ ।
വൈഡൂര്യരത്നരചിതോ
വൈമല്യം ദിശതു ചേതസോ വരണഃ ॥ 46 ॥
അധിമധ്യമേതയോഃ പുന-
-രമ്ബാചരണാവലമ്ബിതസ്വാന്താന് ।
കാര്കോടകാദിനാഗാന്
കലയാമഃ കിം ച ബലിമുഖാന് ദനുജാന് ॥ 47 ॥
ഗന്ധവഹസങ്ഖ്യയോജന-
-ദൂരേ ഗഗനോര്ധ്വജാങ്ഘികസ്തസ്യ ।
വാസവമണിപ്രണീതോ
വരണോ ബഹലയതു വൈദുഷീം വിശദാമ് ॥ 48 ॥
മധ്യക്ഷോണ്യാമനയോ-
-ര്മഹേന്ദ്രനീലാത്മകാനി ച സരാംസി ।
ശാതോദരീസഹായാ-
-ന്ഭൂപാലാനപി പുനഃ പുനഃ പ്രണുമഃ ॥ 49 ॥
ആശുഗയോജനദൂരേ
തസ്യോര്ധ്വം കാന്തിധവലിതദിഗന്തഃ ।
മുക്താവിരചിതഗാത്രോ
മുഹുരസ്മാകം മുദേ ഭവതു സാലഃ ॥ 50 ॥
ആവൃത്ത്യോരധിമധ്യം
പൂര്വസ്യാം ദിശി പുരന്ദരഃ ശ്രീമാന് ।
അഭ്രമുവിടാധിരൂഢോ
വിഭ്രമമസ്മാകമനിശമാതനുതാത് ॥ 51 ॥
തത്കോണേ വ്യജനസ്രു-
-ക്തോമരപാത്രസ്രുവാന്നശക്തിധരഃ ।
സ്വാഹാസ്വധാസമേതഃ
സുഖയതു മാം ഹവ്യവാഹനഃ സുചിരമ് ॥ 52 ॥
ദക്ഷിണദിഗന്തരാലേ
ദണ്ഡധരോ നീലനീരദച്ഛായഃ ।
ത്രിപുരാപദാബ്ജഭക്തസ്തിരയതു
മമ നിഖിലമംഹസാം നികരമ് ॥ 53 ॥
തസ്യൈവ പശ്ചിമായാം
ദിശി ദലിതേന്ദീവരപ്രഭാശ്യാമഃ ।
ഖേടാസിയഷ്ടിധാരീ
ഖേദാനപനയതു യാതുധാനോ മേ ॥ 54 ॥
തസ്യാ ഉത്തരദേശേ
ധവലാങ്ഗോ വിപുലഝഷവരാരൂഢഃ ।
പാശായുധാത്തപാണിഃ
പാശീ വിദലയതു പാശജാലാനി ॥ 55 ॥
വന്ദേ തദുത്തരഹരി-
-ത്കോണേ വായും ചമൂരുവരവാഹമ് ।
കോരകിതതത്ത്വബോധാ-
-ന്ഗോരക്ഷപ്രമുഖയോഗിനോഽപി മുഹുഃ ॥ 56 ॥
തരുണീരിഡാപ്രധാനാ-
-സ്തിസ്രോ വാതസ്യ തസ്യ കൃതവാസാഃ ।
പ്രത്യഗ്രകാപിശായന-
-പാനപരിഭ്രാന്തലോചനാഃ കലയേ ॥ 57 ॥
തല്ലോകപൂര്വഭാഗേ
ധനദം ധ്യായാമി ശേവധികുലേശമ് ।
അപി മാണിഭദ്രമുഖ്യാ-
-നമ്ബാചരണാവലമ്ബിനോ യക്ഷാന് ॥ 58 ॥
തസ്യൈവ പൂര്വസീമനി
തപനീയാരചിതഗോപുരേ നഗരേ ।
കാത്യായനീസഹായം
കലയേ ശീതാംശുഖണ്ഡചൂഡാലമ് ॥ 59 ॥
തത്പുരഷോഡശവരണ-
-സ്ഥലഭാജസ്തരുണചന്ദ്രചൂഡാലാന് ।
രുദ്രാധ്യായേ പഠിതാ-
-ന്രുദ്രാണീസഹചരാന്ഭജേ രുദ്രാന് ॥ 60 ॥
പവമാനസങ്ഖ്യയോജന-
-ദൂരേ ബാലതൃണ്മേചകസ്തസ്യ ।
സാലോ മരകതരചിതഃ
സമ്പദമചലാം ശ്രിയം ച പുഷ്ണാതു ॥ 61 ॥
ആവൃതിയുഗ്മാന്തരതോ
ഹരിതമണീനിവഹമേചകേ ദേശേ ।
ഹാടകതാലീവിപിനം
ഹാലാഘടഘടിതവിടപമാകലയേ ॥ 62 ॥
തത്രൈവ മന്ത്രിണീഗൃഹ-
-പരിണാഹം തരലകേതനം സദനമ് ।
മരകതസൌധമനോജ്ഞം
ദദ്യാദായൂംഷി ദണ്ഡനാഥായാഃ ॥ 63 ॥
സദനേ തത്ര ഹരിന്മണി-
-സങ്ഘടിതേ മണ്ഡപേ ശതസ്തമ്ഭേ ।
കാര്തസ്വരമയപീഠേ
കനകമയാമ്ബുരുഹകര്ണികാമധ്യേ ॥ 64 ॥
ബിന്ദുത്രികോണവര്തുല-
-ഷഡസ്രവൃത്തദ്വയാന്വിതേ ചക്രേ ।
സഞ്ചാരിണീ ദശോത്തര-
ശതാര്ണമനുരാജകമലകലഹംസീ ॥ 65 ॥
കോലവദനാ കുശേശയ-
-നയനാ കോകാരിമണ്ഡിതശിഖണ്ഡാ ।
സന്തപ്തകാഞ്ചനാഭാ
സന്ധ്യാരുണചേലസംവൃതനിതമ്ബാ ॥ 66 ॥
ഹലമുസലശങ്ഖചക്രാ-
-ഽങ്കുശപാശാഭയവരസ്ഫുരിതഹസ്താ ।
കൂലങ്കഷാനുകമ്പാ
കുങ്കുമജമ്ബാലിതസ്തനാഭോഗാ ॥ 67 ॥
ധൂര്താനാമതിദൂരാ-
-വാര്താശേഷാവലഗ്നകമനീയാ ।
ആര്താലീശുഭദാത്രീ
വാര്താലീ ഭവതു വാഞ്ഛിതാര്ഥായ ॥ 68 ॥
തസ്യാഃ പരിതോ ദേവീഃ
സ്വപ്നേശ്യുന്മത്തഭൈരവീമുഖ്യാഃ ।
പ്രണമത ജമ്ഭിന്യാദ്യാഃ
ഭൈരവവര്ഗാംശ്ച ഹേതുകപ്രമുഖാന് ॥ 69 ॥
പൂര്വോക്തസങ്ഖ്യയോജന-
-ദൂരേ പൂയാംശുപാടലസ്തസ്യ ।
വിദ്രാവയതു മദാര്തിം
വിദ്രുമസാലോ വിശങ്കടദ്വാരഃ ॥ 70 ॥
ആവരണയോരഹര്നിശ-
-മന്തരഭൂമൌപ്രകാശശാലിന്യാമ് ।
ആസീനമമ്ബുജാസന-
-മഭിനവസിന്ദൂരഗൌരമഹമീഡേ ॥ 71 ॥
വരണസ്യ തസ്യ മാരുത-
-യോജനതോ വിപുലഗോപുരദ്വാരഃ ।
സാലോ നാനാരത്നൈഃ
സങ്ഘടിതാങ്ഗഃ കൃഷീഷ്ട മദഭീഷ്ടമ് ॥ 72 ॥
അന്തരകക്ഷ്യാമനയോ-
-രവിരലശോഭാപിചണ്ഡിലോദ്ദേശാമ് ।
മാണിക്യമണ്ഡപാഖ്യാം
മഹതീമധിഹൃദയമനിശമാകലയേ ॥ 73 ॥
തത്ര സ്ഥിതം പ്രസന്നം
തരുണതമാലപ്രവാലകിരണാഭമ് ।
കര്ണാവലമ്ബികുണ്ഡല-
-കന്ദലിതാഭീശുകവചിതകപോലമ് ॥ 74 ॥
ശോണാധരം ശുചിസ്മിത-
-മേണാങ്കവദനമേധമാനകൃപമ് ।
മുഗ്ധൈണമദവിശേഷക-
-മുദ്രിതനിടിലേന്ദുരേഖികാരുചിരമ് ॥ 75 ॥
നാലീകദലസഹോദര-
-നയനാഞ്ചലഘടിതമനസിജാകൂതമ് ।
കമലാകഠിനപയോധര-
-കസ്തൂരീഘുസൃണപങ്കിലോരസ്കമ് ॥ 76 ॥
ചാമ്പേയഗന്ധികൈശ്യം
ശമ്പാസബ്രഹ്മചാരികൌശേയമ് ।
ശ്രീവത്സകൌസ്തുഭധരം
ശ്രിതജനരക്ഷാധുരീണചരണാബ്ജമ് ॥ 77 ॥
കമ്ബുസുദര്ശനവിലസ-
-ത്കരപദ്മം കണ്ഠലോലവനമാലമ് ।
മുചുകുന്ദമോക്ഷഫലദം
മുകുന്ദമാനന്ദകന്ദമവലമ്ബേ ॥ 78 ॥
തദ്വരണോത്തരഭാഗേ
താരാപതിബിമ്ബചുമ്ബിനിജശൃങ്ഗഃ ।
വിവിധമണീഗണഘടിതോ
വിതരതു സാലോ വിനിര്മലാം ധിഷണാമ് ॥ 79 ॥
പ്രാകാരദ്വിതയാന്തര-
-കക്ഷ്യാം പൃഥുരത്നനികരസങ്കീര്ണാമ് ।
നമത സഹസ്രസ്തമ്ഭക-
-മണ്ഡപനാമ്നാതിവിശ്രുതാം ഭുവനേ ॥ 80 ॥
പ്രണുമസ്തത്ര ഭവാനീ-
-സഹചരമീശാനമിന്ദുഖണ്ഡധരമ് ।
ശൃങ്ഗാരനായികാമനു-
-ശീലനഭാജോഽപി ഭൃങ്ഗിനന്ദിമുഖാന് ॥ 81 ॥
തസ്യൈണവാഹയോജന-
-ദൂരേ വന്ദേ മനോമയം വപ്രമ് ।
അങ്കൂരന്മണികിരണാ-
-മന്തരകക്ഷ്യാം ച നിര്മലാമനയോഃ ॥ 82 ॥
തത്രൈവാമൃതവാപീം
തരലതരങ്ഗാവലീഢതടയുഗ്മാമ് ।
മുക്താമയകലഹംസീ-
-മുദ്രിതകനകാരവിന്ദസന്ദോഹാമ് ॥ 83 ॥
ശക്രോപലമയഭൃങ്ഗീ-
-സങ്ഗീതോന്മേഷഘോഷിതദിഗന്താമ് ।
കാഞ്ചനമയാങ്ഗവിലസ-
-ത്കാരണ്ഡവഷണ്ഡതാണ്ഡവമനോജ്ഞാമ് ॥ 84 ॥
കുരുവിന്ദാത്മകഹല്ലക-
-കോരകസുഷമാസമൂഹപാടലിതാമ് ।
കലയേ സുധാസ്വരൂപാം
കന്ദലിതാമന്ദകൈരവാമോദാമ് ॥ 85 ॥
തദ്വാപികാന്തരാലേ തരലേ
മണിപോതസീമ്നി വിഹരന്തീമ് ।
സിന്ദൂരപാടലാങ്ഗീം
സിതകിരണാങ്കൂരകല്പിതവതംസാമ് ॥ 86 ॥
പര്വേന്ദുബിമ്ബവദനാം
പല്ലവശോണാധരസ്ഫുരിതഹാസാമ് ।
കുടിലകബരീം കുരങ്ഗീ-
-ശിശുനയനാം കുണ്ഡലസ്ഫുരിതഗണ്ഡാമ് ॥ 87 ॥
നികടസ്ഥപോതനിലയാഃ
ശക്തീഃ ശയവിധൃതഹേമശൃങ്ഗജലൈഃ ।
പരിഷിഞ്ചന്തീം പരിത-
-സ്താരാം താരുണ്യഗര്വിതാം വന്ദേ ॥ 88 ॥
പ്രാഗുക്തസങ്ഖ്യയോജനദൂരേ
പ്രണമാമി ബുദ്ധിമയസാലമ് ।
അനയോരന്തരകക്ഷ്യാ-
-മഷ്ടാപദപുഷ്ടമേദിനീം രുചിരാമ് ॥ 89 ॥
കാദമ്ബരീനിധാനാം
കലയാമ്യാനന്ദവാപികാം തസ്യാമ് ।
ശോണാശ്മനിവഹനിര്മിത-
-സോപാനശ്രേണിശോഭമാനതടീമ് ॥ 90 ॥
മാണിക്യതരണിനിലയാം
മധ്യേ തസ്യാ മദാരുണകപോലാമ് ।
അമൃതേശീത്യഭിധാനാ-
-മന്തഃ കലയാമി വാരുണീം ദേവീമ് ॥ 91 ॥
സൌവര്ണകേനിപാതന-
-ഹസ്താഃ സൌന്ദര്യഗര്വിതാ ദേവ്യഃ ।
തത്പുരതഃ സ്ഥിതിഭാജോ
വിതരന്ത്വസ്മാകമായുഷോ വൃദ്ധിമ് ॥ 92 ॥
തസ്യ പൃഷദശ്വയോജന-
-ദൂരേഽഹങ്കാരസാലമതിതുങ്ഗമ് ।
വന്ദേ തയോശ്ച മധ്യേ
കക്ഷ്യാം വലമാനമലയപവമാനാമ് ॥ 93 ॥
വിനുമോ വിമര്ശവാപീം
സൌഷുമ്നസുധാസ്വരൂപിണീം തത്ര ।
വേലാതിലങ്ഘ്യവീചീ-
-കോലാഹലഭരിതകൂലവനവാടീമ് ॥ 94 ॥
തത്രൈവ സലിലമധ്യേ
താപിഞ്ഛദലപ്രപഞ്ചസുഷമാഭാമ് ।
ശ്യാമലകഞ്ചുകലസിതാം
ശ്യാമാവിടബിമ്ബഡമ്ബരഹരാസ്യാമ് ॥ 95 ॥
ആഭുഗ്നമസൃണചില്ലീ-
-ഹസിതായുഗ്മശരകാര്മുകവിലാസാമ് ।
മന്ദസ്മിതാഞ്ചിതമുഖീം
മണിമയതാടങ്കമണ്ഡിതകപോലാമ് ॥ 96 ॥
കുരുവിന്ദതരണിനിലയാം
കുലാചലസ്പര്ധികുചനമന്മധ്യാമ് ।
കുങ്കുമവിലിപ്തഗാത്രീം
കുരുകുല്ലാം മനസി കുര്മഹേ സതതമ് ॥ 97 ॥
തത്സാലോത്തരഭാഗേ
ഭാനുമയം വപ്രമാശ്രയേ ദീപ്തമ് ।
മധ്യം ച വിപുലമനയോ-
-ര്മന്യേ വിശ്രാന്തമാതപോദ്ഗാരമ് ॥ 98 ॥
തത്ര കുരുവിന്ദപീഠേ
താമരസേ കനകകര്ണികാഘടിതേ ।
ആസീനമരുണവാസസ-
-മമ്ലാനപ്രസവമാലികാഭരണമ് ॥ 99 ॥
ചക്ഷുഷ്മതീപ്രകാശന-
-ശക്തിച്ഛായാസമാരചിതകേലിമ് ।
മാണിക്യമുകുടരമ്യം
മന്യേ മാര്താണ്ഡഭൈരവം ഹൃദയേ ॥ 100 ॥
ഇന്ദുമയസാലമീഡേ
തസ്യോത്തരതസ്തുഷാരഗിരിഗൌരമ് ।
അത്യന്തശിശിരമാരുത-
-മനയോര്മധ്യം ച ചന്ദ്രികോദ്ഗാരമ് ॥ 101 ॥
തത്ര പ്രകാശമാനം
താരാനികരൈഃ പരിഷ്കൃതോദ്ദേശമ് ।
അമൃതമയകാന്തികന്ദല-
-മന്തഃ കലയാമി കുന്ദസിതമിന്ദുമ് ॥ 102 ॥
ശൃങ്ഗാരസാലമീഡേ
ശൃങ്ഗോല്ലസിതം തദുത്തരേ ഭാഗേ ।
മധ്യസ്ഥലേ തയോരപി
മഹിതാം ശൃങ്ഗാരപൂര്വികാം പരിഖാമ് ॥ 103 ॥
തത്ര മണിനൌസ്ഥിതാഭി-
-സ്തപനീയാവിരചിതാഗ്രഹസ്താഭിഃ ।
ശൃങ്ഗാരദേവതാഭിഃ
സഹിതം പരിഖാധിപം ഭജേ മദനമ് ॥ 104 ॥
ശൃങ്ഗാരവരണവര്യസ്യോത്തരതഃ
സകലവിബുധസംസേവ്യമ് ।
ചിന്താമണിഗണരചിതം
ചിന്താം ദൂരീകരോതു മേ സദനമ് ॥ 105 ॥
മണിസദനസാലയോരധി-
-മധ്യം ദശതാലഭൂമിരുഹദീര്ഘൈഃ ।
പര്ണൈഃ സുവര്ണവര്ണൈ-
-ര്യുക്താം കാണ്ഡൈശ്ച യോജനോത്തുങ്ഗൈഃ ॥ 106 ॥
മൃദുലൈസ്താലീപഞ്ചക-
-മാനൈര്മിലിതാം ച കേസരകദമ്ബൈഃ ।
സന്തതഗലിതമരന്ദ-
-സ്രോതോനിര്യന്മിലിന്ദസന്ദോഹാമ് ॥ 107 ॥
പാടീരപവനബാലക-
-ധാടീനിര്യത്പരാഗപിഞ്ജരിതാമ് ।
കലഹംസീകുലകലകല-
-കൂലങ്കഷനിനദനിചയകമനീയാമ് ॥ 108 ॥
പദ്മാടവീം ഭജാമഃ
പരിമലകല്ലോലപക്ഷ്മലോപാന്താമ് ।
[ ദേവ്യര്ഘ്യപാത്രധാരീ
തസ്യാഃ പൂര്വദിശി ദശകലായുക്തഃ । ]
വലയിതമൂര്തിര്ഭഗവാ-
-ന്വഹ്നിഃ ക്രോശോന്നതശ്ചിരം പായാത് ॥ 109 ॥
തത്രാധാരേ ദേവ്യാഃ
പാത്രീരൂപഃ പ്രഭാകരഃ ശ്രീമാന് ।
ദ്വാദശകലാസമേതോ
ധ്വാന്തം മമ ബഹുലമാന്തരം ഭിന്ദ്യാത് ॥ 110 ॥
തസ്മിന് ദിനേശപാത്രേ
തരങ്ഗിതാമോദമമൃതമയമര്ഘ്യമ് ।
ചന്ദ്രകലാത്മകമമൃതം
സാന്ദ്രീകുര്യാദമന്ദമാനന്ദമ് ॥ 111 ॥
അമൃതേ തസ്മിന്നഭിതോ
വിഹരന്ത്യോ വിവിധമണിതരണിഭാജഃ ।
ഷോഡശ കലാഃ സുധാംശോഃ
ശോകാദുത്താരയന്തു മാമനിശമ് ॥ 112 ॥
തത്രൈവ വിഹൃതിഭാജോ
ധാതൃമുഖാനാം ച കാരണേശാനാമ് ।
സൃഷ്ട്യാദിരൂപികാസ്താഃ
ശമയന്ത്വഖിലാഃ കലാശ്ച സന്താപമ് ॥ 113 ॥
കീനാശവരുണകിന്നര-
-രാജദിഗന്തേഷു രത്നഗേഹസ്യ ।
കലയാമി താന്യജസ്രം
കലയന്ത്വായുഷ്യമര്ഘ്യപാത്രാണി ॥ 114 ॥
പാത്രസ്ഥലസ്യ പുരതഃ
പദ്മാരമണവിധിപാര്വതീശാനാമ് ।
ഭവനാനി ശര്മണേ നോ
ഭവന്തു ഭാസാ പ്രദീപിതജഗന്തി ॥ 115 ॥
സദനസ്യാനലകോണേ
സതതം പ്രണമാമി കുണ്ഡമാഗ്നേയമ് ।
തത്ര സ്ഥിതം ച വഹ്നിം
തരലശിഖാജടിലമമ്ബികാജനകമ് ॥ 116 ॥
തസ്യാസുരദിശി താദൃശ-
-രത്നപരിസ്ഫുരിതപര്വനവകാഢ്യമ് ।
ചക്രാത്മകം ശതാങ്ഗം
ശതയോജനമുന്നതം ഭജേ ദിവ്യമ് ॥ 117 ॥
തത്രൈവ ദിശി നിഷണ്ണം
തപനീയധ്വജപരമ്പരാശ്ലിഷ്ടമ് ।
രഥമപരം ച ഭവാന്യാ
രചയാമോ മനസി രത്നമയചൂഡമ് ॥ 118 ॥
ഭവനസ്യ വായുഭാഗേ
പരിഷ്കൃതോ വിവിധവൈജയന്തീഭിഃ ।
രചയതു മുദം രഥേന്ദ്രഃ
സചിവേശാന്യാഃ സമസ്തവന്ദ്യായാഃ ॥ 119 ॥
കുര്മോഽധിഹൃദയമനിശം
ക്രോഡാസ്യായാഃ ശതാങ്ഗമൂര്ധന്യമ് ।
രുദ്രദിശി രത്നധാമ്നോ
രുചിരശലാകാപ്രപഞ്ചകഞ്ചുകിതമ് ॥ 120 ॥
പരിതോ ദേവീധാമ്നഃ
പ്രണീതവാസാ മനുസ്വരൂപിണ്യഃ ।
കുര്വന്തു രശ്മിമാലാ-
-കൃതയഃ കുശലാനി ദേവതാ നിഖിലാഃ ॥ 121 ॥
പ്രാഗ്ദ്വാരസ്യ ഭവാനീ-
-ധാമ്നഃ പാര്ശ്വദ്വയാരചിതവാസേ ।
മാതങ്ഗീകിടിമുഖ്യൌ
മണിസദനേ മനസി ഭാവയാമി ചിരമ് ॥ 122 ॥
യോജനയുഗലാഭോഗാ
തത്ക്രോശപരിണാഹയൈവ ഭിത്ത്യാ ച ।
ചിന്താമണിഗൃഹഭൂമി-
-ര്ജീയാദാമ്നായമയചതുര്ദ്വാരാ ॥ 123 ॥
ദ്വാരേ ദ്വാരേ ധാമ്നഃ
പിണ്ഡീഭൂതാ നവീനബിമ്ബാഭാഃ ।
വിദധതു വിപുലാം കീര്തിം
ദിവ്യാ ലൌഹിത്യസിദ്ധ്യോ ദേവ്യഃ ॥ 124 ॥
മണിസദനസ്യാന്തരതോ
മഹനീയേ രത്നവേദികാമധ്യേ ।
ബിന്ദുമയചക്രമീഡേ
പീഠാനാമുപരി വിരചിതാവാസമ് ॥ 125 ॥
ചക്രാണാം സകലാനാം
പ്രഥമമധഃ സീമഫലകവാസ്തവ്യാഃ ।
അണിമാദിസിദ്ധയോ മാ-
-മവന്തു ദേവീ പ്രഭാസ്വരൂപിണ്യഃ ॥ 126 ॥
അണിമാദിസിദ്ധിഫലക-
-സ്യോപരിഹരിണാങ്കഖണ്ഡകൃതചൂഡാഃ ।
ഭദ്രം പക്ഷ്മലയന്തു
ബ്രാഹ്മീപ്രമുഖാശ്ച മാതരോഽസ്മാകമ് ॥ 127 ॥
തസ്യോപരി മണിഫലകേ
താരുണ്യോത്തുങ്ഗപീനകുചഭാരാഃ ।
സങ്ക്ഷോഭിണീപ്രധാനാഃ
ഭ്രാന്തി വിദ്രാവയന്തു ദശ മുദ്രാഃ ॥ 128 ॥
ഫലകത്രയസ്വരൂപേ
പൃഥുലേ ത്രൈലോക്യമോഹനേ ചക്രേ ।
ദീവ്യന്തു പ്രകടാഖ്യാ-
-സ്താസാം കര്ത്രീം ച ഭഗവതീ ത്രിപുരാ ॥ 129 ॥
തദുപരി വിപുലേ ധിഷ്ണ്യേ
തരലദൃശസ്തരുണകോകനദഭാസഃ ।
കാമാകര്ഷിണ്യാദ്യാഃ
കലയേ ദേവീഃ കലാധരശിഖണ്ഡാഃ ॥ 130 ॥
സര്വാശാപരിപൂരകചക്രേ-
-ഽസ്മിന് ഗുപ്തയോഗിനീസേവ്യാഃ ।
ത്രിപുരേശീ മമ ദുരിതം
തുദ്യാത് കണ്ഠാവലമ്ബിമണിഹാരാ ॥ 131 ॥
തസ്യോപരി മണിപീഠേ
താമ്രാമ്ഭോരുഹദലപ്രഭാശോണാഃ ।
ധ്യായാമ്യനങ്ഗകുസുമാ-
-പ്രമുഖാ ദേവീശ്ച വിധൃതകൂര്പാസാഃ ॥ 132 ॥
സങ്ക്ഷോഭകാരകേഽസ്മിം-
-ശ്ചക്രേ ശ്രീത്രിപുരസുന്ദരീ സാക്ഷാത് ।
ഗോപ്ത്രീ ഗുപ്തതരാഖ്യാഃ
ഗോപായതു മാം കൃപാര്ദ്രയാ ദൃഷ്ട്യാ ॥ 133 ॥
സങ്ക്ഷോഭിണീപ്രധാനാഃ
ശക്തീസ്തസ്യോര്ധ്വവലയകൃതവാസാഃ ।
ആലോലനീലവേണീ-
-രന്തഃ കലയാമി യൌവനോന്മത്താഃ ॥ 134 ॥
സൌഭാഗ്യദായകേഽസ്മിം-
-ശ്ചക്രേശീ ത്രിപുരവാസിനീ ജീയാത് ।
ശക്തീശ്ച സമ്പ്രദായാഭിധാഃ
സമസ്താഃ പ്രമോദയന്ത്വനിശമ് ॥ 135 ॥
മണിപീഠോപരി താസാം
മഹതി ചതുര്ഹസ്തവിസ്തൃതേ വലയേ ।
സന്തതവിരചിതവാസാഃ
ശക്തീഃ കലയാമി സര്വസിദ്ധിമുഖാഃ ॥ 136 ॥
സര്വാര്ഥസാധകാഖ്യേ
ചക്രേഽമുഷ്മിന് സമസ്തഫലദാത്രീ ।
ത്രിപുരാ ശ്രീര്മമ കുശലം
ദിശതാദുത്തീര്ണയോഗിനീസേവ്യാ ॥ 137 ॥
താസാം നിലയസ്യോപരി
ധിഷ്ണ്യേ കൌസുമ്ഭകഞ്ചുകമനോജ്ഞാഃ ।
സര്വാജ്ഞാദ്യാഃ ദേവ്യഃ
സകലാഃ സമ്പാദയന്തു മമ കീര്തിമ് ॥ 138 ॥
ചക്രേ സമസ്തരക്ഷാ-
-കരനാമ്ന്യസ്മിന് സമസ്തജനസേവ്യാമ് ।
മനസി നിഗര്ഭാസഹിതാം
മന്യേ ശ്രീത്രിപുരമാലിനീം ദേവീമ് ॥ 139 ॥
സര്വജ്ഞാസദനസ്യോപരി
ചക്രേ വിപുലേ സമാകലിതഗേഹാഃ ।
വന്ദേ വശിനീമുഖ്യാഃ
ശക്തീഃ സിന്ദൂരരേണുരുചഃ ॥ 140 ॥
ശ്രീസര്വരോഗഹരാഖ്യ-
-ചക്രേഽസ്മിംസ്ത്രിപുരപൂര്വികാം സിദ്ധാമ് ।
വന്ദേ രഹസ്യനാമ്നാ
വേദ്യാഭിഃ ശക്തിഭിഃ സദാ സേവ്യാമ് ॥ 141 ॥
വശിനീഗൃഹോപരിഷ്ടാ-
-ദ്വിംശതിഹസ്തോന്നതേ മഹാപീഠേ ।
ശമയന്തു ശത്രുബൃന്ദം
ശസ്ത്രാണ്യസ്ത്രാണി ചാദിദമ്പത്യോഃ ॥ 142 ॥
ശസ്ത്രസദനോപരിഷ്ടാ-
-ദ്വലയേ വലവൈരിരത്നസങ്ഘടിതേ ।
കാമേശ്വരീപ്രധാനാഃ
കലയേ ദേവീഃ സമസ്തജനവന്ദ്യാഃ ॥ 143 ॥
ചക്രേഽത്ര സര്വസിദ്ധിപ്രദ-
-നാമനി സര്വഫലദാത്രീ ।
ത്രിപുരാമ്ബാവതു സതതം
പരാപരരഹസ്യയോഗിനീസേവ്യാ ॥ 144 ॥
കാമേശ്വരീഗൃഹോപരിവലയേ
വിവിധമനുസമ്പ്രദായജ്ഞാഃ ।
ചത്വാരോ യുഗനാഥാ
ജയന്തു മിത്രേശപൂര്വകാഃ ഗുരവഃ ॥ 145 ॥
നാഥഭവനോപരിഷ്ടാ-
-ന്നാനാരത്നചയമേദുരേ പീഠേ ।
കാമേശ്യാദ്യാ നിത്യാഃ
കലയന്തു മുദം തിഥിസ്വരൂപിണ്യഃ ॥ 146 ॥
നിത്യാസദനസ്യോപരി
നിര്മലമണിനിവഹവിരചിതേ ധിഷ്ണ്യേ ।
കുശലം ഷഡങ്ഗദേവ്യഃ
കലയന്ത്വസ്മാകമുത്തരലനേത്രാഃ ॥ 147 ॥
സദനസ്യോപരി താസാം
സര്വാനന്ദമയനാമകേ ബിന്ദൌ ।
പഞ്ചബ്രഹ്മാകാരാം
മഞ്ചം പ്രണമാമി മണിഗണാകീര്ണമ് ॥ 148 ॥
പരിതോ മണിമഞ്ചസ്യ
പ്രലമ്ബമാനാ നിയന്ത്രിതാ പാശൈഃ ।
മായാമയീ ജവനികാ
മമ ദുരിതം ഹരതു മേചകച്ഛായാ ॥ 149 ॥
മഞ്ചസ്യോപരി ലമ്ബ-
-ന്മദനീപുന്നാഗമാലികാഭരിതമ് ।
ഹരിഗോപമയവിതാനം
ഹരതാദാലസ്യമനിശമസ്മാകമ് ॥ 150 ॥
പര്യങ്കസ്യ ഭജാമഃ
പാദാന്ബിമ്ബാമ്ബുദേന്ദുഹേമരുചഃ ।
അജഹരിരുദ്രേശമയാ-
-നനലാസുരമാരുതേശകോണസ്ഥാന് ॥ 151 ॥
ഫലകം സദാശിവമയം
പ്രണൌമി സിന്ദൂരരേണുകിരണാഭമ് ।
ആരഭ്യാങ്ഗേശീനാം
സദനാത്കലിതം ച രത്നസോപാനമ് ॥ 152 ॥
പട്ടോപധാനഗണ്ഡക-
-ചതുഷ്ടയസ്ഫുരിതപാടലാസ്തരണമ് ।
പര്യങ്കോപരി ഘടിതം
പാതു ചിരം ഹംസതൂലശയനം നഃ ॥ 153 ॥
തസ്യോപരി നിവസന്തം
താരുണ്യശ്രീനിഷേവിതം സതതമ് ।
ആവൃന്തപുല്ലഹല്ലക-
-മരീചികാപുഞ്ജമഞ്ജുലച്ഛായമ് ॥ 154 ॥
സിന്ദൂരശോണവസനം
ശീതാംശുസ്തബകചുമ്ബിതകിരീടമ് ।
കുങ്കുമതിലകമനോഹര-
-കുടിലാലികഹസിതകുമുദബന്ധുശിശുമ് ॥ 155 ॥
പൂര്ണേന്ദുബിമ്ബവദനം
ഫുല്ലസരോജാതലോചനത്രിതയമ് ।
തരലാപാങ്ഗതരങ്ഗിത-
-ശഫരാങ്കനശാസ്ത്രസമ്പ്രദായാര്ഥമ് ॥ 156 ॥
മണിമയകുണ്ഡലപുഷ്യ-
-ന്മരീചികല്ലോലമാംസലകപോലമ് ।
വിദ്രുമസഹോദരാധര-
-വിസൃമരസുസ്മിതകിശോരസഞ്ചാരമ് ॥ 157 ॥
ആമോദികുസുമശേഖര-
-മാനീലഭ്രൂലതായുഗമനോജ്ഞമ് ।
വീടീസൌരഭവീചീ-
-ദ്വിഗുണിതവക്ത്രാരവിന്ദസൌരഭ്യമ് ॥ 158 ॥
പാശാങ്കുശേക്ഷുചാപ-
-പ്രസവശരസ്ഫുരിതകോമലകരാബ്ജമ് ।
കാശ്മീരപങ്കിലാങ്ഗം
കാമേശം മനസി കുര്മഹേ സതതമ് ॥ 159 ॥
തസ്യാങ്കഭുവി നിഷണ്ണാം
തരുണകദമ്ബപ്രസൂനകിരണാഭാമ് ।
ശീതാംശുഖണ്ഡചൂഡാം
സീമന്തന്യസ്തസാന്ദ്രസിന്ദൂരാമ് ॥ 160 ॥
കുങ്കുമലലാമഭാസ്വ-
-ന്നിടിലാം കുടിലതരചില്ലികായുഗലാമ് ।
നാലീകതുല്യനയനാം
നാസാഞ്ചലനടിതമൌക്തികാഭരണാമ് ॥ 161 ॥
അങ്കുരിതമന്ദഹാസ-
-മരുണാധരകാന്തിവിജിതബിമ്ബാഭാമ് ।
കസ്തൂരീമകരീയുത-
-കപോലസങ്ക്രാന്തകനകതാടങ്കാമ് ॥ 162 ॥
കര്പൂരസാന്ദ്രവീടീ-
-കബലിതവദനാരവിന്ദകമനീയാമ് ।
കമ്ബുസഹോദരകണ്ഠ-
-പ്രലമ്ബമാനാച്ഛമൌക്തികകലാപാമ് ॥ 163 ॥
കഹ്ലാരദാമകോമല-
-ഭുജയുഗലസ്ഫുരിതരത്നകേയൂരാമ് ।
കരപദ്മമൂലവിലസ-
-ത്കാഞ്ചനമയകടകവലയസന്ദോഹാമ് ॥ 164 ॥
പാണിചതുഷ്ടയവിലസ-
-ത്പാശാങ്കുശപുണ്ഡ്രചാപപുഷ്പാസ്ത്രാമ് ।
കൂലങ്കഷകുചശിഖരാം
കുങ്കുമകര്ദമിതരത്നകൂര്പാസാമ് ॥ 165 ॥
അണുദായാദവലഗ്നാ-
-മമ്ബുദശോഭാസനാഭിരോമലതാമ് ।
മാണിക്യഖചിതകാഞ്ചീ-
-മരീചികാക്രാന്തമാംസലനിതമ്ബാമ് ॥ 166 ॥
കരഭോരുകാണ്ഡയുഗലാം
ജങ്ഘാജിതകാമജൈത്രതൂണീരാമ് ।
പ്രപദപരിഭൂതകൂര്മാം
പല്ലവസച്ഛായപദയുഗമനോജ്ഞാമ് ॥ 167 ॥
കമലഭവകഞ്ജലോചന-
-കിരീടരത്നാംശുരഞ്ജിതപദാബ്ജാമ് ।
ഉന്മസ്തകാനുകമ്പാ-
-മുത്തരലാപാങ്ഗപോഷിതാനങ്ഗാമ് ॥ 168 ॥
ആദിമരസാവലമ്ബാ-
-മനിദം പ്രഥമോക്തിവല്ലരീകലികാമ് ।
ആബ്രഹ്മകീടജനനീ-
-മന്തഃ കലയാമി സുന്ദരീമനിശമ് ॥ 169 ॥
കസ്തു ക്ഷിതൌ പടീയാ-
-ന്വസ്തു സ്തോതും ശിവാങ്കവാസ്തവ്യമ് ।
അസ്തു ചിരന്തനസുകൃതൈഃ
പ്രസ്തുതകാമ്യായ തന്മമ പുരസ്താത് ॥ 170 ॥
പ്രഭുസമ്മിതോക്തിഗമ്യം
പരമശിവോത്സങ്ഗതുങ്ഗപര്യങ്കമ് ।
തേജഃ കിഞ്ചന ദിവ്യം
പുരതോ മേ ഭവതു പുണ്ഡ്രകോദണ്ഡമ് ॥ 171 ॥
മധുരിമഭരിതശരാസം
മകരന്ദസ്യന്ദിമാര്ഗണോദാരമ് ।
കൈരവിണീവിടചൂഡം
കൈവല്യായാസ്തു കിഞ്ചന മഹോ നഃ ॥ 172 ॥
അക്ഷുദ്രമിക്ഷുചാപം
പരോക്ഷമവലഗ്നസീമ്നി ത്ര്യക്ഷമ് ।
ക്ഷപയതു മേ ക്ഷേമേതര-
-മുക്ഷരഥപ്രേമപക്ഷ്മലം തേജഃ ॥ 173 ॥
ഭൃങ്ഗരുചിസങ്ഗരകരാപാങ്ഗം
ശൃങ്ഗാരതുങ്ഗമരുണാങ്ഗമ് ।
മങ്ഗലമഭങ്ഗുരം മേ
ഘടയതു ഗങ്ഗാധരാങ്ഗസങ്ഗി മഹഃ ॥ 174 ॥
പ്രപദാജിതകൂര്മമൂര്ജിത-
-കരുണം ഭര്മരുചിനിര്മഥനദേഹമ് ।
ശ്രിതവര്മ മര്മ ശമ്ഭോഃ
കിഞ്ചന മമ നര്മ ശര്മ നിര്മാതു ॥ 175 ॥
കാലകുരലാലികാലിമ-
-കന്ദലവിജിതാലി വിധൃതമണിവാലി ।
മിലതു ഹൃദി പുലിനജഘനം
ബഹുലിതഗലഗരലകേലി കിമപി മഹഃ ॥ 176 ॥
കുങ്കുമതിലകിതഫാലാ
കുരുവിന്ദച്ഛായപാടലദുകൂലാ ।
കരുണാപയോധിവേലാ
കാചന ചിത്തേ ചകാസ്തു മേ ലീലാ ॥ 177 ॥
പുഷ്പന്ധയരുചിവേണ്യഃ
പുലിനാഭോഗത്രപാകരശ്രേണ്യഃ ।
ജീയാസുരിക്ഷുപാണ്യഃ
കാശ്ചന കാമാരികേലിസാക്ഷിണ്യഃ ॥ 178 ॥
തപനീയാംശുകഭാംസി
ദ്രാക്ഷാമാധുര്യനാസ്തികവചാംസി ।
കതിചന ശുചം മഹാംസി
ക്ഷപയതു കപാലിതോഷിതമനാംസി ॥ 179 ॥
അസിതകചമായതാക്ഷം
കുസുമശരം കൂലമുദ്വഹകൃപാര്ദ്രമ് ।
ആദിമരസാധിദൈവത-
-മന്തഃ കലയേ ഹരാങ്കവാസി മഹഃ ॥ 180 ॥
കര്ണോപാന്തതരങ്ഗിത-
-കടാക്ഷവിസ്പന്ദികണ്ഠദഘ്നകൃപാമ് ।
കാമേശ്വരാങ്കനിലയാം
കാമപി വിദ്യാം പുരാതനീം കലയേ ॥ 181 ॥
അരവിന്ദകാന്ത്യരുന്തുദ-
-വിലോചനദ്വന്ദ്വസുന്ദരമുഖേന്ദു ।
ഛന്ദഃ കന്ദലമന്ദിര-
-മന്തഃപുരമൈന്ദുശേഖരം വന്ദേ ॥ 182 ॥
ബിമ്ബിനികുരമ്ബഡമ്ബര-
-വിഡമ്ബകച്ഛായമമ്ബരവലഗ്നമ് ।
കമ്ബുഗലമമ്ബുദകുചം
ബിമ്ബോകം കമപി ചുമ്ബതു മനോ മേ ॥ 183 ॥
കമപി കമനീയരൂപം
കലയാമ്യന്തഃ കദമ്ബകുസുമാഢ്യമ് ।
ചമ്പകരുചിരസുവേഷൈഃ
സമ്പാദിതകാന്ത്യലങ്കൃതദിഗന്തമ് ॥ 184 ॥
ശമ്പാരുചിഭര-
-ഗര്ഹാസമ്പാദകകാന്തികവചിതദിഗന്തമ് ।
സിദ്ധാന്തം നിഗമാനാം
ശുദ്ധാന്തം കിമപി ശൂലിനഃ കലയേ ॥ 185 ॥
ഉദ്യദ്ദിനകരശോണാ-
-നുത്പലബന്ധുസ്തനന്ധയാപീഡാന് ।
കരകലിതപുണ്ഡ്രചാപാ-
-ന്കലയേ കാനപി കപര്ദിനഃ പ്രാണാന് ॥ 186 ॥
രശനാലസജ്ജഘനയാ
രസനാജീവാതുചാപഭാസുരയാ ।
ഘ്രാണായുഷ്കരശരയാ
ഘ്രാതം ചിത്തം കയാപി വാസനയാ ॥ 187 ॥
സരസിജസഹയുധ്വദൃശാ
ശമ്പാലതികാസനാഭിവിഗ്രഹയാ ।
ഭാസാ കയാപി ചേതോ
നാസാമണിശോഭിവദനയാ ഭരിതമ് ॥ 188 ॥
നവയാവകാഭസിചയാന്വിതയാ
ഗജയാനയാ ദയാപരയാ ।
ധൃതയാമിനീശകലയാ
ധിയാ കയാപി ക്ഷതാമയാ ഹി വയമ് ॥ 189 ॥
അലമലമകുസുമബാണൈ-
-രബിമ്ബശോണൈരപുണ്ഡ്രകോദണ്ഡൈഃ ।
അകുമുദബാന്ധവചൂഡൈ-
-രന്യൈരിഹ ജഗതി ദൈവതം മന്യൈഃ ॥ 190 ॥
കുവലയസദൃക്ഷനയനൈഃ
കുലഗിരികൂടസ്ഥബന്ധുകുചഭാരൈഃ ।
കരുണാസ്പന്ദികടാക്ഷൈഃ
കവചിതചിത്തോഽസ്മി കതിപയൈഃ കുതുകൈഃ ॥ 191 ॥
നതജനസുലഭായ നമോ
നാലീകസനാഭിലോചനായ നമഃ ।
നന്ദിതഗിരിശായ നമോ
മഹസേ നവനീപപാടലായ നമഃ ॥ 192 ॥
കാദമ്ബകുസുമദാമ്നേ
കായച്ഛായാകണായിതാര്യമ്ണേ ।
സീമ്നേ ചിരന്തനഗിരാം
ഭൂമ്നേ കസ്മൈചിദാദദേ പ്രണതിമ് ॥ 193 ॥
കുടിലകബരീഭരേഭ്യഃ
കുങ്കുമസബ്രഹ്മചാരികിരണേഭ്യഃ ।
കൂലങ്കഷസ്തനേഭ്യഃ
കുര്മഃ പ്രണതിം കുലാദ്രികുതുകേഭ്യഃ ॥ 194 ॥
കോകനദശോണചരണാ-
-ത്കോമലകുരലാലിവിജിതശൈവാലാത് ।
ഉത്പലസഗന്ധിനയനാ-
-ദുരരീകുര്മോ ന ദേവതമാന്യാമ് ॥ 195 ॥
ആപാടലാധരാണാ-
-മാനീലസ്നിഗ്ധബര്ബരകചാനാമ് ।
ആമ്നായജീവനാനാ-
-മാകൂതാനാം ഹരസ്യ ദാസോഽഹമ് ॥ 196 ॥
പുങ്ഖിതവിലാസഹാസ-
-സ്ഫുരിതാസു പുരാഹിതാങ്കനിലയാസു ।
മഗ്നം മനോ മദീയം
കാസ്വപി കാമാരിജീവനാഡീഷു ॥ 197 ॥
ലലിതാ പാതു ശിരോ മേ
ലലാടമമ്ബാ ച മധുമതീരൂപാ ।
ഭ്രൂയുഗ്മം ച ഭവാനീ
പുഷ്പശരാ പാതു ലോചനദ്വന്ദ്വമ് ॥ 198 ॥
പായാന്നാസാം ബാലാ
സുഭഗാ ദന്താംശ്ച സുന്ദരീ ജിഹ്വാമ് ।
അധരോഷ്ഠമാദിശക്തി-
-ശ്ചക്രേശീ പാതു മേ ചിരം ചിബുകമ് ॥ 199 ॥
കാമേശ്വരീ ച കര്ണൌ
കാമാക്ഷീ പാതു ഗണ്ഡയോര്യുഗലമ് ।
ശൃങ്ഗാരനായികാവ്യാ-
-ദ്വദനം സിംഹാസനേശ്വരീ ച ഗലമ് ॥ 200 ॥
സ്കന്ദപ്രസൂശ്ച പാതു
സ്കന്ധൌ ബാഹൂ ച പാടലാങ്ഗീ മേ ।
പാണീ ച പദ്മനിലയാ
പായാദനിശം നഖാവലീര്വിജയാ ॥ 201 ॥
കോദണ്ഡിനീ ച വക്ഷഃ
കുക്ഷിം ചാവ്യാത് കുലാചലതനൂജാ ।
കല്യാണീ ച വലഗ്നം
കടിം ച പായാത്കലാധരശിഖണ്ഡാ ॥ 202 ॥
ഊരുദ്വയം ച പായാ-
-ദുമാ മൃഡാനീ ച ജാനുനീ രക്ഷേത് ।
ജങ്ഘേ ച ഷോഡശീ മേ
പായാത് പാദൌ ച പാശസൃണിഹസ്താ ॥ 203 ॥
പ്രാതഃ പാതു പരാ മാം
മധ്യാഹ്നേ പാതു മണിഗൃഹാധീശാ ।
ശര്വാണ്യവതു ച സായം
പായാദ്രാത്രൌ ച ഭൈരവീ സാക്ഷാത് ॥ 204 ॥
ഭാര്യാം രക്ഷതു ഗൌരീം
പായാത് പുത്രാംശ്ച ബിന്ദുഗൃഹപീഠാ ।
ശ്രീവിദ്യാ ച യശോ മേ
ശീലം ചാവ്യാച്ചിരം മഹാരാജ്ഞീ ॥ 205 ॥
പവനമയി പാവകമയി
ക്ഷോണീമയി ഗഗനമയി കൃപീടമയി ।
രവിമയി ശശിമയി ദിങ്മയി
സമയമയി പ്രാണമയി ശിവേ പാഹി ॥ 206 ॥
കാലി കപാലിനി ശൂലിനി
ഭൈരവി മാതങ്ഗി പഞ്ചമി ത്രിപുരേ ।
വാഗ്ദേവി വിന്ധ്യവാസിനി
ബാലേ ഭുവനേശി പാലയ ചിരം മാമ് ॥ 207 ॥
അഭിനവസിന്ദൂരാഭാ-
-മമ്ബ ത്വാം ചിന്തയന്തി യേ ഹൃദയേ ।
ഉപരി നിപതന്തി തേഷാ-
-മുത്പലനയനാകടാക്ഷകല്ലോലാഃ ॥ 208 ॥
വര്ഗാഷ്ടകമിലിതാഭി-
-ര്വശിനീമുഖ്യാഭിരാവൃതാം ഭവതീമ് ।
ചിന്തയതാം സിതവര്ണാം
വാചോ നിര്യാന്ത്യയത്നതോ വദനാത് ॥ 209 ॥
കനകശലാകാഗൌരീം
കര്ണവ്യാലോലകുണ്ഡലദ്വിതയാമ് ।
പ്രഹസിതമുഖീം ച ഭവതീം
ധ്യായന്തോ യേ ത ഏവ ഭൂധനദാഃ ॥ 210 ॥
ശീര്ഷാമ്ഭോരുഹമധ്യേ
ശീതലപീയൂഷവര്ഷിണീം ഭവതീമ് ।
അനുദിനമനുചിന്തയതാ-
-മായുഷ്യം ഭവതി പുഷ്കലമവന്യാമ് ॥ 211 ॥
മധുരസ്മിതാം മദാരുണനയനാം
മാതങ്ഗകുമ്ഭവക്ഷോജാമ് ।
ചന്ദ്രവതംസിനീം ത്വാം
സവിധേ പശ്യന്തി സുകൃതിനഃ കേചിത് ॥ 212 ॥
ലലിതായാഃ സ്തവരത്നം
ലലിതപദാഭിഃ പ്രണീതമാര്യാഭിഃ ।
പ്രതിദിനമവനൌ പഠതാം
ഫലാനി വക്തും പ്രഗല്ഭതേ സൈവ ॥ 213 ॥
സദസദനുഗ്രഹനിഗ്രഹ-
-ഗൃഹീതമുനിവിഗ്രഹോ ഭഗവാന് ।
സര്വാസാമുപനിഷദാം
ദുര്വാസാ ജയതി ദേശികഃ പ്രഥമഃ ॥ 214 ॥
ഇതി മഹര്ഷിദുര്വാസഃ വിരചിതം ശ്രീലലിതാസ്തവരത്നമ് ।
Roman (IAST) Transliteration
vande gajendravadanaṃ
vāmāṅkārūḍhavallabhāśliṣṭam |
kuṅkumaparāgaśoṇaṃ
kuvalayinījārakorakāpīḍam || 1 ||
sa jayati suvarṇaśailaḥ
sakalajagaccakrasaṅghaṭitamūrtiḥ |
kāñcananikuñjavāṭī-
-kandaladamarīprapañcasaṅgītaḥ || 2 ||
harihayanairṛtamāruta-
-haritāmanteṣvavasthitaṃ tasya |
vinumaḥ sānutritayaṃ
vidhiharigaurīśaviṣṭapādhāram || 3 ||
madhye punarmanohara-
-ratnarucistabakarañjitadigantam |
upari catuḥśatayojana-
-muttuṅgaṃ śṛṅgapuṅgavamupāse || 4 ||
tatra catuḥśatayojana-
-pariṇāhaṃ devaśilpinā racitam |
nānāsālamanojñaṃ
namāmyahaṃ nagaramādividyāyāḥ || 5 ||
prathamaṃ sahasrapūrvaka-
-ṣaṭśatasaṅkhyākayojanaṃ paritaḥ |
valayīkṛtasvagātraṃ
varaṇaṃ śaraṇaṃ vrajāmyayorūpam || 6 ||
tasyottare samīraṇa-
-yojanadūre taraṅgitacchāyaḥ |
ghaṭayatu mudaṃ dvitīyo
ghaṇṭāstanasāranirmitaḥ sālaḥ || 7 ||
ubhayorantarasīma-
-nyuddāmabhramararañjitodāram |
upavanamupāsmahe vaya-
-mūrīkṛtamandamārutasyandam || 8 ||
āliṅgya bhadrakālī-
-māsīnastatra hariśilāśyāmām |
manasi mahākālo me
viharatu madhupānavibhramannetraḥ || 9 ||
tārtīyīko varaṇa-
-stasyottarasīmni vātayojanataḥ |
tāmreṇa racitamūrti-
-stanutāmācandratārakaṃ bhadram || 10 ||
madhye tayośca maṇimaya-
-pallavaśākhāprasūnapakṣmalitām |
kalpānokahavāṭīṃ
kalaye makarandapaṅkilāvālām || 11 ||
tatra madhumādhavaśrī-
-taruṇībhyāṃ taraladṛkcakorābhyām |
āliṅgito'vatānmā-
-maniśaṃ prathamarturāttapuṣpāstraḥ || 12 ||
namata taduttarabhāge
nākipathollaṅghiśṛṅgasaṅghātam |
sīsākṛtiṃ turīyaṃ
sitakiraṇālokanirmalaṃ sālam || 13 ||
sāladvayāntarāle
saralālikapotacāṭusubhagāyām |
santānavāṭikāyāṃ
saktaṃ ceto'stu satatamasmākam || 14 ||
tatra tapanātirūkṣaḥ
sāmrājñīcaraṇasāndritasvāntaḥ |
śukraśuciśrīsahito
grīṣmarturdiśatu kīrtimākalpam || 15 ||
uttarasīmani tasyo-
-nnataśikharotkampihāṭakapatākaḥ |
prakaṭayatu pañcamo naḥ
prākāraḥ kuśalamārakūṭamayaḥ || 16 ||
prākārayośca madhye
pallavitānyabhṛtapañcamonmeṣā |
haricandanadruvāṭī-
-haratādāmūlamasmadanutāpam || 17 ||
tatra nabhaḥ śrīmukhyai-
-staruṇīvargaiḥ samanvitaḥ paritaḥ |
vajrāṭṭahāsamukharo
vāñchāpūrtiṃ tanotu varṣartuḥ || 18 ||
mārutayojanadūre
mahanīyastasya cottare bhāge |
bhadraṃ kṛṣīṣṭa ṣaṣṭhaḥ
prākāraḥ pañcalohadhātumayaḥ || 19 ||
anayormadhye santata-
-maṅkūraddivyakusumagandhāyām |
mandāravāṭikāyāṃ
mānasamaṅgīkarotu me vihṛtim || 20 ||
tasyāmiṣorjalakṣmī-
-taruṇībhyāṃ śaradṛtuḥ sadā sahitaḥ |
abhyarcayan sa jīyā-
-dambāmāmodameduraiḥ kusumaiḥ || 21 ||
tasyarṣisaṅkhyayojana-
-dūre dedīpyamānaśṛṅgaughaḥ |
kaladhautakalitamūrtiḥ
kalyāṇaṃ diśatu saptamaḥ sālaḥ || 22 ||
madhye tayormarutpatha
laṅghitaviṭapāgravirutakalakaṇṭhā |
śrīpārijātavāṭī
śriyamaniśaṃ diśatu śītaloddeśā || 23 ||
tasyāmatipriyābhyāṃ
saha khelan sahasahasyalakṣmībhyām |
sāmanto jhaṣaketo-
-rhemanto bhavatu hemavṛddhyai naḥ || 24 ||
uttaratastasya mahā-
-nudbhaṭahutabhukśikhāruṇamayūkhaḥ |
tapanīyakhaṇḍaracita-
-stanutādāyuṣyamaṣṭamo varaṇaḥ || 25 ||
kādambavipinavāṭī-
-manayormadhyabhuvi kalpitāvāsām |
kalayāmi sūnakoraka-
-kandalitāmodatundilasamīrām || 26 ||
tasyāmatiśiśirākṛti-
-rāsīnastapatapasyalakṣmībhyām |
śivamaniśaṃ kurutānme
śiśirartuḥ satataśītaladigantaḥ || 27 ||
tasyāṃ kadambavāṭyāṃ
tatprasavāmodamilitamadhugandham |
saptāvaraṇamanojñaṃ
śaraṇaṃ samupaimi mantriṇīśaraṇam || 28 ||
tatrālaye viśāle
tapanīyāracitataralasopāne |
māṇikyamaṇḍapānta-
-rmahite siṃhāsane sumaṇikhacite || 29 ||
bindutripañcakoṇa-
-dvipanṛpavasuvedadalakurekhāḍhye |
cakre sadā niviṣṭāṃ
ṣaṣṭhyaṣṭatriṃśadakṣareśānīm || 30 ||
tāpiñchamecakābhāṃ
tālīdalaghaṭitakarṇatāṭaṅkām |
tāmbūlapūritamukhīṃ
tāmrādharabimbadṛṣṭadarahāsām || 31 ||
kuṅkumapaṅkiladehāṃ
kuvalayajīvātuśāvakavataṃsām |
kokanadaśoṇacaraṇāṃ
kokilanikvāṇakomalālāpām || 32 ||
vāmāṅgagalitacūlīṃ
vanamālyakadambamālikābharaṇām |
muktālalantikāñcita
mugdhālikamilitacitrakodārām || 33 ||
karavidhṛtakīraśāvaka-
-kalaninadavyaktanikhilanigamārthām |
vāmakucasaṅgivīṇāvādana-
-saukhyārdhamīlitākṣiyugām || 34 ||
āpāṭalāṃśukadharā-
-mādirasonmeṣavāsitakaṭākṣām |
āmnāyasāragulikā-
-mādyāṃ saṅgītamātṛkāṃ vande || 35 ||
tasya ca suvarṇasāla-
-syottaratastaruṇakuṅkumacchāyaḥ |
śamayatu mama santāpaṃ
sālo navamaḥ sa puṣparāgamayaḥ || 36 ||
anayorantaravasudhāḥ
praṇumaḥ pratyagrapuṣparāgamayīḥ |
siṃhāsaneśvarīmanu-
-cintananistandrasiddhanīrandhrāḥ || 37 ||
tatsālottaradeśe
taruṇajapākiraṇadhoraṇīśoṇaḥ |
praśamayatu padmarāga-
-prākāro mama parābhavaṃ daśamaḥ || 38 ||
antarabhūkṛtavāsā-
-nanayorapanītacittavaimatyān |
cakreśīpadabhaktāṃ-
-ścāraṇavargānaharniśaṃ kalaye || 39 ||
sāraṅgavāhayojanadūre-
-'saṅghaṭitaketanastasya |
gomedakena racito
gopāyatu māṃ samunnataḥ sālaḥ || 40 ||
vapradvayāntarorvyāṃ
vaṭukairvividhaiśca yoginībṛndaiḥ |
satataṃ samarcitāyāḥ
saṅkarṣaṇyāḥ praṇaumi caraṇābjam || 41 ||
tāpasayojanadūre
tasya samuttuṅga gopuropetaḥ |
vāñchāpūrtyai bhavatā-
-dvajramaṇīnikaranirmito vapraḥ || 42 ||
varaṇadvitayāntarato
vāsajuṣo vihitamadhurasāsvādāḥ |
rambhādivibudhaveśyā
racayantu mahāntamasmadānandam || 43 ||
tatra sadā pravahantī
taṭinī vajrābhidhā ciraṃ jīyāt |
caṭulormijālanṛtya-
-tkalahaṃsīkulakalakvaṇitapuṣṭā || 44 ||
rodhasi tasyā rucire
vajreśī jayati vajrabhūṣāḍhyā |
vajrapradānatoṣita-
-vajrimukhatridaśavinutacāritrā || 45 ||
tasyodīcyāṃ hariti
stavakitasuṣamāvalīḍhaviyadantaḥ |
vaiḍūryaratnaracito
vaimalyaṃ diśatu cetaso varaṇaḥ || 46 ||
adhimadhyametayoḥ puna-
-rambācaraṇāvalambitasvāntān |
kārkoṭakādināgān
kalayāmaḥ kiṃ ca balimukhān danujān || 47 ||
gandhavahasaṅkhyayojana-
-dūre gaganordhvajāṅghikastasya |
vāsavamaṇipraṇīto
varaṇo bahalayatu vaiduṣīṃ viśadām || 48 ||
madhyakṣoṇyāmanayo-
-rmahendranīlātmakāni ca sarāṃsi |
śātodarīsahāyā-
-nbhūpālānapi punaḥ punaḥ praṇumaḥ || 49 ||
āśugayojanadūre
tasyordhvaṃ kāntidhavalitadigantaḥ |
muktāviracitagātro
muhurasmākaṃ mude bhavatu sālaḥ || 50 ||
āvṛttyoradhimadhyaṃ
pūrvasyāṃ diśi purandaraḥ śrīmān |
abhramuviṭādhirūḍho
vibhramamasmākamaniśamātanutāt || 51 ||
tatkoṇe vyajanasru-
-ktomarapātrasruvānnaśaktidharaḥ |
svāhāsvadhāsametaḥ
sukhayatu māṃ havyavāhanaḥ suciram || 52 ||
dakṣiṇadigantarāle
daṇḍadharo nīlanīradacchāyaḥ |
tripurāpadābjabhaktastirayatu
mama nikhilamaṃhasāṃ nikaram || 53 ||
tasyaiva paścimāyāṃ
diśi dalitendīvaraprabhāśyāmaḥ |
kheṭāsiyaṣṭidhārī
khedānapanayatu yātudhāno me || 54 ||
tasyā uttaradeśe
dhavalāṅgo vipulajhaṣavarārūḍhaḥ |
pāśāyudhāttapāṇiḥ
pāśī vidalayatu pāśajālāni || 55 ||
vande taduttarahari-
-tkoṇe vāyuṃ camūruvaravāham |
korakitatattvabodhā-
-ngorakṣapramukhayogino'pi muhuḥ || 56 ||
taruṇīriḍāpradhānā-
-stisro vātasya tasya kṛtavāsāḥ |
pratyagrakāpiśāyana-
-pānaparibhrāntalocanāḥ kalaye || 57 ||
tallokapūrvabhāge
dhanadaṃ dhyāyāmi śevadhikuleśam |
api māṇibhadramukhyā-
-nambācaraṇāvalambino yakṣān || 58 ||
tasyaiva pūrvasīmani
tapanīyāracitagopure nagare |
kātyāyanīsahāyaṃ
kalaye śītāṃśukhaṇḍacūḍālam || 59 ||
tatpuraṣoḍaśavaraṇa-
-sthalabhājastaruṇacandracūḍālān |
rudrādhyāye paṭhitā-
-nrudrāṇīsahacarānbhaje rudrān || 60 ||
pavamānasaṅkhyayojana-
-dūre bālatṛṇmecakastasya |
sālo marakataracitaḥ
sampadamacalāṃ śriyaṃ ca puṣṇātu || 61 ||
āvṛtiyugmāntarato
haritamaṇīnivahamecake deśe |
hāṭakatālīvipinaṃ
hālāghaṭaghaṭitaviṭapamākalaye || 62 ||
tatraiva mantriṇīgṛha-
-pariṇāhaṃ taralaketanaṃ sadanam |
marakatasaudhamanojñaṃ
dadyādāyūṃṣi daṇḍanāthāyāḥ || 63 ||
sadane tatra harinmaṇi-
-saṅghaṭite maṇḍape śatastambhe |
kārtasvaramayapīṭhe
kanakamayāmburuhakarṇikāmadhye || 64 ||
bindutrikoṇavartula-
-ṣaḍasravṛttadvayānvite cakre |
sañcāriṇī daśottara-
śatārṇamanurājakamalakalahaṃsī || 65 ||
kolavadanā kuśeśaya-
-nayanā kokārimaṇḍitaśikhaṇḍā |
santaptakāñcanābhā
sandhyāruṇacelasaṃvṛtanitambā || 66 ||
halamusalaśaṅkhacakrā-
-'ṅkuśapāśābhayavarasphuritahastā |
kūlaṅkaṣānukampā
kuṅkumajambālitastanābhogā || 67 ||
dhūrtānāmatidūrā-
-vārtāśeṣāvalagnakamanīyā |
ārtālīśubhadātrī
vārtālī bhavatu vāñchitārthāya || 68 ||
tasyāḥ parito devīḥ
svapneśyunmattabhairavīmukhyāḥ |
praṇamata jambhinyādyāḥ
bhairavavargāṃśca hetukapramukhān || 69 ||
pūrvoktasaṅkhyayojana-
-dūre pūyāṃśupāṭalastasya |
vidrāvayatu madārtiṃ
vidrumasālo viśaṅkaṭadvāraḥ || 70 ||
āvaraṇayoraharniśa-
-mantarabhūmauprakāśaśālinyām |
āsīnamambujāsana-
-mabhinavasindūragauramahamīḍe || 71 ||
varaṇasya tasya māruta-
-yojanato vipulagopuradvāraḥ |
sālo nānāratnaiḥ
saṅghaṭitāṅgaḥ kṛṣīṣṭa madabhīṣṭam || 72 ||
antarakakṣyāmanayo-
-raviralaśobhāpicaṇḍiloddeśām |
māṇikyamaṇḍapākhyāṃ
mahatīmadhihṛdayamaniśamākalaye || 73 ||
tatra sthitaṃ prasannaṃ
taruṇatamālapravālakiraṇābham |
karṇāvalambikuṇḍala-
-kandalitābhīśukavacitakapolam || 74 ||
śoṇādharaṃ śucismita-
-meṇāṅkavadanamedhamānakṛpam |
mugdhaiṇamadaviśeṣaka-
-mudritaniṭilendurekhikāruciram || 75 ||
nālīkadalasahodara-
-nayanāñcalaghaṭitamanasijākūtam |
kamalākaṭhinapayodhara-
-kastūrīghusṛṇapaṅkiloraskam || 76 ||
cāmpeyagandhikaiśyaṃ
śampāsabrahmacārikauśeyam |
śrīvatsakaustubhadharaṃ
śritajanarakṣādhurīṇacaraṇābjam || 77 ||
kambusudarśanavilasa-
-tkarapadmaṃ kaṇṭhalolavanamālam |
mucukundamokṣaphaladaṃ
mukundamānandakandamavalambe || 78 ||
tadvaraṇottarabhāge
tārāpatibimbacumbinijaśṛṅgaḥ |
vividhamaṇīgaṇaghaṭito
vitaratu sālo vinirmalāṃ dhiṣaṇām || 79 ||
prākāradvitayāntara-
-kakṣyāṃ pṛthuratnanikarasaṅkīrṇām |
namata sahasrastambhaka-
-maṇḍapanāmnātiviśrutāṃ bhuvane || 80 ||
praṇumastatra bhavānī-
-sahacaramīśānamindukhaṇḍadharam |
śṛṅgāranāyikāmanu-
-śīlanabhājo'pi bhṛṅginandimukhān || 81 ||
tasyaiṇavāhayojana-
-dūre vande manomayaṃ vapram |
aṅkūranmaṇikiraṇā-
-mantarakakṣyāṃ ca nirmalāmanayoḥ || 82 ||
tatraivāmṛtavāpīṃ
taralataraṅgāvalīḍhataṭayugmām |
muktāmayakalahaṃsī-
-mudritakanakāravindasandohām || 83 ||
śakropalamayabhṛṅgī-
-saṅgītonmeṣaghoṣitadigantām |
kāñcanamayāṅgavilasa-
-tkāraṇḍavaṣaṇḍatāṇḍavamanojñām || 84 ||
kuruvindātmakahallaka-
-korakasuṣamāsamūhapāṭalitām |
kalaye sudhāsvarūpāṃ
kandalitāmandakairavāmodām || 85 ||
tadvāpikāntarāle tarale
maṇipotasīmni viharantīm |
sindūrapāṭalāṅgīṃ
sitakiraṇāṅkūrakalpitavataṃsām || 86 ||
parvendubimbavadanāṃ
pallavaśoṇādharasphuritahāsām |
kuṭilakabarīṃ kuraṅgī-
-śiśunayanāṃ kuṇḍalasphuritagaṇḍām || 87 ||
nikaṭasthapotanilayāḥ
śaktīḥ śayavidhṛtahemaśṛṅgajalaiḥ |
pariṣiñcantīṃ parita-
-stārāṃ tāruṇyagarvitāṃ vande || 88 ||
prāguktasaṅkhyayojanadūre
praṇamāmi buddhimayasālam |
anayorantarakakṣyā-
-maṣṭāpadapuṣṭamedinīṃ rucirām || 89 ||
kādambarīnidhānāṃ
kalayāmyānandavāpikāṃ tasyām |
śoṇāśmanivahanirmita-
-sopānaśreṇiśobhamānataṭīm || 90 ||
māṇikyataraṇinilayāṃ
madhye tasyā madāruṇakapolām |
amṛteśītyabhidhānā-
-mantaḥ kalayāmi vāruṇīṃ devīm || 91 ||
sauvarṇakenipātana-
-hastāḥ saundaryagarvitā devyaḥ |
tatpurataḥ sthitibhājo
vitarantvasmākamāyuṣo vṛddhim || 92 ||
tasya pṛṣadaśvayojana-
-dūre'haṅkārasālamatituṅgam |
vande tayośca madhye
kakṣyāṃ valamānamalayapavamānām || 93 ||
vinumo vimarśavāpīṃ
sauṣumnasudhāsvarūpiṇīṃ tatra |
velātilaṅghyavīcī-
-kolāhalabharitakūlavanavāṭīm || 94 ||
tatraiva salilamadhye
tāpiñchadalaprapañcasuṣamābhām |
śyāmalakañcukalasitāṃ
śyāmāviṭabimbaḍambaraharāsyām || 95 ||
ābhugnamasṛṇacillī-
-hasitāyugmaśarakārmukavilāsām |
mandasmitāñcitamukhīṃ
maṇimayatāṭaṅkamaṇḍitakapolām || 96 ||
kuruvindataraṇinilayāṃ
kulācalaspardhikucanamanmadhyām |
kuṅkumaviliptagātrīṃ
kurukullāṃ manasi kurmahe satatam || 97 ||
tatsālottarabhāge
bhānumayaṃ vapramāśraye dīptam |
madhyaṃ ca vipulamanayo-
-rmanye viśrāntamātapodgāram || 98 ||
tatra kuruvindapīṭhe
tāmarase kanakakarṇikāghaṭite |
āsīnamaruṇavāsasa-
-mamlānaprasavamālikābharaṇam || 99 ||
cakṣuṣmatīprakāśana-
-śakticchāyāsamāracitakelim |
māṇikyamukuṭaramyaṃ
manye mārtāṇḍabhairavaṃ hṛdaye || 100 ||
indumayasālamīḍe
tasyottaratastuṣāragirigauram |
atyantaśiśiramāruta-
-manayormadhyaṃ ca candrikodgāram || 101 ||
tatra prakāśamānaṃ
tārānikaraiḥ pariṣkṛtoddeśam |
amṛtamayakāntikandala-
-mantaḥ kalayāmi kundasitamindum || 102 ||
śṛṅgārasālamīḍe
śṛṅgollasitaṃ taduttare bhāge |
madhyasthale tayorapi
mahitāṃ śṛṅgārapūrvikāṃ parikhām || 103 ||
tatra maṇinausthitābhi-
-stapanīyāviracitāgrahastābhiḥ |
śṛṅgāradevatābhiḥ
sahitaṃ parikhādhipaṃ bhaje madanam || 104 ||
śṛṅgāravaraṇavaryasyottarataḥ
sakalavibudhasaṃsevyam |
cintāmaṇigaṇaracitaṃ
cintāṃ dūrīkarotu me sadanam || 105 ||
maṇisadanasālayoradhi-
-madhyaṃ daśatālabhūmiruhadīrghaiḥ |
parṇaiḥ suvarṇavarṇai-
-ryuktāṃ kāṇḍaiśca yojanottuṅgaiḥ || 106 ||
mṛdulaistālīpañcaka-
-mānairmilitāṃ ca kesarakadambaiḥ |
santatagalitamaranda-
-srotoniryanmilindasandohām || 107 ||
pāṭīrapavanabālaka-
-dhāṭīniryatparāgapiñjaritām |
kalahaṃsīkulakalakala-
-kūlaṅkaṣaninadanicayakamanīyām || 108 ||
padmāṭavīṃ bhajāmaḥ
parimalakallolapakṣmalopāntām |
[ devyarghyapātradhārī
tasyāḥ pūrvadiśi daśakalāyuktaḥ | ]
valayitamūrtirbhagavā-
-nvahniḥ krośonnataściraṃ pāyāt || 109 ||
tatrādhāre devyāḥ
pātrīrūpaḥ prabhākaraḥ śrīmān |
dvādaśakalāsameto
dhvāntaṃ mama bahulamāntaraṃ bhindyāt || 110 ||
tasmin dineśapātre
taraṅgitāmodamamṛtamayamarghyam |
candrakalātmakamamṛtaṃ
sāndrīkuryādamandamānandam || 111 ||
amṛte tasminnabhito
viharantyo vividhamaṇitaraṇibhājaḥ |
ṣoḍaśa kalāḥ sudhāṃśoḥ
śokāduttārayantu māmaniśam || 112 ||
tatraiva vihṛtibhājo
dhātṛmukhānāṃ ca kāraṇeśānām |
sṛṣṭyādirūpikāstāḥ
śamayantvakhilāḥ kalāśca santāpam || 113 ||
kīnāśavaruṇakinnara-
-rājadiganteṣu ratnagehasya |
kalayāmi tānyajasraṃ
kalayantvāyuṣyamarghyapātrāṇi || 114 ||
pātrasthalasya purataḥ
padmāramaṇavidhipārvatīśānām |
bhavanāni śarmaṇe no
bhavantu bhāsā pradīpitajaganti || 115 ||
sadanasyānalakoṇe
satataṃ praṇamāmi kuṇḍamāgneyam |
tatra sthitaṃ ca vahniṃ
taralaśikhājaṭilamambikājanakam || 116 ||
tasyāsuradiśi tādṛśa-
-ratnaparisphuritaparvanavakāḍhyam |
cakrātmakaṃ śatāṅgaṃ
śatayojanamunnataṃ bhaje divyam || 117 ||
tatraiva diśi niṣaṇṇaṃ
tapanīyadhvajaparamparāśliṣṭam |
rathamaparaṃ ca bhavānyā
racayāmo manasi ratnamayacūḍam || 118 ||
bhavanasya vāyubhāge
pariṣkṛto vividhavaijayantībhiḥ |
racayatu mudaṃ rathendraḥ
saciveśānyāḥ samastavandyāyāḥ || 119 ||
kurmo'dhihṛdayamaniśaṃ
kroḍāsyāyāḥ śatāṅgamūrdhanyam |
rudradiśi ratnadhāmno
ruciraśalākāprapañcakañcukitam || 120 ||
parito devīdhāmnaḥ
praṇītavāsā manusvarūpiṇyaḥ |
kurvantu raśmimālā-
-kṛtayaḥ kuśalāni devatā nikhilāḥ || 121 ||
prāgdvārasya bhavānī-
-dhāmnaḥ pārśvadvayāracitavāse |
mātaṅgīkiṭimukhyau
maṇisadane manasi bhāvayāmi ciram || 122 ||
yojanayugalābhogā
tatkrośapariṇāhayaiva bhittyā ca |
cintāmaṇigṛhabhūmi-
-rjīyādāmnāyamayacaturdvārā || 123 ||
dvāre dvāre dhāmnaḥ
piṇḍībhūtā navīnabimbābhāḥ |
vidadhatu vipulāṃ kīrtiṃ
divyā lauhityasiddhyo devyaḥ || 124 ||
maṇisadanasyāntarato
mahanīye ratnavedikāmadhye |
bindumayacakramīḍe
pīṭhānāmupari viracitāvāsam || 125 ||
cakrāṇāṃ sakalānāṃ
prathamamadhaḥ sīmaphalakavāstavyāḥ |
aṇimādisiddhayo mā-
-mavantu devī prabhāsvarūpiṇyaḥ || 126 ||
aṇimādisiddhiphalaka-
-syoparihariṇāṅkakhaṇḍakṛtacūḍāḥ |
bhadraṃ pakṣmalayantu
brāhmīpramukhāśca mātaro'smākam || 127 ||
tasyopari maṇiphalake
tāruṇyottuṅgapīnakucabhārāḥ |
saṅkṣobhiṇīpradhānāḥ
bhrānti vidrāvayantu daśa mudrāḥ || 128 ||
phalakatrayasvarūpe
pṛthule trailokyamohane cakre |
dīvyantu prakaṭākhyā-
-stāsāṃ kartrīṃ ca bhagavatī tripurā || 129 ||
tadupari vipule dhiṣṇye
taraladṛśastaruṇakokanadabhāsaḥ |
kāmākarṣiṇyādyāḥ
kalaye devīḥ kalādharaśikhaṇḍāḥ || 130 ||
sarvāśāparipūrakacakre-
-'smin guptayoginīsevyāḥ |
tripureśī mama duritaṃ
tudyāt kaṇṭhāvalambimaṇihārā || 131 ||
tasyopari maṇipīṭhe
tāmrāmbhoruhadalaprabhāśoṇāḥ |
dhyāyāmyanaṅgakusumā-
-pramukhā devīśca vidhṛtakūrpāsāḥ || 132 ||
saṅkṣobhakārake'smiṃ-
-ścakre śrītripurasundarī sākṣāt |
goptrī guptatarākhyāḥ
gopāyatu māṃ kṛpārdrayā dṛṣṭyā || 133 ||
saṅkṣobhiṇīpradhānāḥ
śaktīstasyordhvavalayakṛtavāsāḥ |
ālolanīlaveṇī-
-rantaḥ kalayāmi yauvanonmattāḥ || 134 ||
saubhāgyadāyake'smiṃ-
-ścakreśī tripuravāsinī jīyāt |
śaktīśca sampradāyābhidhāḥ
samastāḥ pramodayantvaniśam || 135 ||
maṇipīṭhopari tāsāṃ
mahati caturhastavistṛte valaye |
santataviracitavāsāḥ
śaktīḥ kalayāmi sarvasiddhimukhāḥ || 136 ||
sarvārthasādhakākhye
cakre'muṣmin samastaphaladātrī |
tripurā śrīrmama kuśalaṃ
diśatāduttīrṇayoginīsevyā || 137 ||
tāsāṃ nilayasyopari
dhiṣṇye kausumbhakañcukamanojñāḥ |
sarvājñādyāḥ devyaḥ
sakalāḥ sampādayantu mama kīrtim || 138 ||
cakre samastarakṣā-
-karanāmnyasmin samastajanasevyām |
manasi nigarbhāsahitāṃ
manye śrītripuramālinīṃ devīm || 139 ||
sarvajñāsadanasyopari
cakre vipule samākalitagehāḥ |
vande vaśinīmukhyāḥ
śaktīḥ sindūrareṇurucaḥ || 140 ||
śrīsarvarogaharākhya-
-cakre'smiṃstripurapūrvikāṃ siddhām |
vande rahasyanāmnā
vedyābhiḥ śaktibhiḥ sadā sevyām || 141 ||
vaśinīgṛhopariṣṭā-
-dviṃśatihastonnate mahāpīṭhe |
śamayantu śatrubṛndaṃ
śastrāṇyastrāṇi cādidampatyoḥ || 142 ||
śastrasadanopariṣṭā-
-dvalaye valavairiratnasaṅghaṭite |
kāmeśvarīpradhānāḥ
kalaye devīḥ samastajanavandyāḥ || 143 ||
cakre'tra sarvasiddhiprada-
-nāmani sarvaphaladātrī |
tripurāmbāvatu satataṃ
parāpararahasyayoginīsevyā || 144 ||
kāmeśvarīgṛhoparivalaye
vividhamanusampradāyajñāḥ |
catvāro yuganāthā
jayantu mitreśapūrvakāḥ guravaḥ || 145 ||
nāthabhavanopariṣṭā-
-nnānāratnacayamedure pīṭhe |
kāmeśyādyā nityāḥ
kalayantu mudaṃ tithisvarūpiṇyaḥ || 146 ||
nityāsadanasyopari
nirmalamaṇinivahaviracite dhiṣṇye |
kuśalaṃ ṣaḍaṅgadevyaḥ
kalayantvasmākamuttaralanetrāḥ || 147 ||
sadanasyopari tāsāṃ
sarvānandamayanāmake bindau |
pañcabrahmākārāṃ
mañcaṃ praṇamāmi maṇigaṇākīrṇam || 148 ||
parito maṇimañcasya
pralambamānā niyantritā pāśaiḥ |
māyāmayī javanikā
mama duritaṃ haratu mecakacchāyā || 149 ||
mañcasyopari lamba-
-nmadanīpunnāgamālikābharitam |
harigopamayavitānaṃ
haratādālasyamaniśamasmākam || 150 ||
paryaṅkasya bhajāmaḥ
pādānbimbāmbudenduhemarucaḥ |
ajaharirudreśamayā-
-nanalāsuramāruteśakoṇasthān || 151 ||
phalakaṃ sadāśivamayaṃ
praṇaumi sindūrareṇukiraṇābham |
ārabhyāṅgeśīnāṃ
sadanātkalitaṃ ca ratnasopānam || 152 ||
paṭṭopadhānagaṇḍaka-
-catuṣṭayasphuritapāṭalāstaraṇam |
paryaṅkopari ghaṭitaṃ
pātu ciraṃ haṃsatūlaśayanaṃ naḥ || 153 ||
tasyopari nivasantaṃ
tāruṇyaśrīniṣevitaṃ satatam |
āvṛntapullahallaka-
-marīcikāpuñjamañjulacchāyam || 154 ||
sindūraśoṇavasanaṃ
śītāṃśustabakacumbitakirīṭam |
kuṅkumatilakamanohara-
-kuṭilālikahasitakumudabandhuśiśum || 155 ||
pūrṇendubimbavadanaṃ
phullasarojātalocanatritayam |
taralāpāṅgataraṅgita-
-śapharāṅkanaśāstrasampradāyārtham || 156 ||
maṇimayakuṇḍalapuṣya-
-nmarīcikallolamāṃsalakapolam |
vidrumasahodarādhara-
-visṛmarasusmitakiśorasañcāram || 157 ||
āmodikusumaśekhara-
-mānīlabhrūlatāyugamanojñam |
vīṭīsaurabhavīcī-
-dviguṇitavaktrāravindasaurabhyam || 158 ||
pāśāṅkuśekṣucāpa-
-prasavaśarasphuritakomalakarābjam |
kāśmīrapaṅkilāṅgaṃ
kāmeśaṃ manasi kurmahe satatam || 159 ||
tasyāṅkabhuvi niṣaṇṇāṃ
taruṇakadambaprasūnakiraṇābhām |
śītāṃśukhaṇḍacūḍāṃ
sīmantanyastasāndrasindūrām || 160 ||
kuṅkumalalāmabhāsva-
-nniṭilāṃ kuṭilataracillikāyugalām |
nālīkatulyanayanāṃ
nāsāñcalanaṭitamauktikābharaṇām || 161 ||
aṅkuritamandahāsa-
-maruṇādharakāntivijitabimbābhām |
kastūrīmakarīyuta-
-kapolasaṅkrāntakanakatāṭaṅkām || 162 ||
karpūrasāndravīṭī-
-kabalitavadanāravindakamanīyām |
kambusahodarakaṇṭha-
-pralambamānācchamauktikakalāpām || 163 ||
kahlāradāmakomala-
-bhujayugalasphuritaratnakeyūrām |
karapadmamūlavilasa-
-tkāñcanamayakaṭakavalayasandohām || 164 ||
pāṇicatuṣṭayavilasa-
-tpāśāṅkuśapuṇḍracāpapuṣpāstrām |
kūlaṅkaṣakucaśikharāṃ
kuṅkumakardamitaratnakūrpāsām || 165 ||
aṇudāyādavalagnā-
-mambudaśobhāsanābhiromalatām |
māṇikyakhacitakāñcī-
-marīcikākrāntamāṃsalanitambām || 166 ||
karabhorukāṇḍayugalāṃ
jaṅghājitakāmajaitratūṇīrām |
prapadaparibhūtakūrmāṃ
pallavasacchāyapadayugamanojñām || 167 ||
kamalabhavakañjalocana-
-kirīṭaratnāṃśurañjitapadābjām |
unmastakānukampā-
-muttaralāpāṅgapoṣitānaṅgām || 168 ||
ādimarasāvalambā-
-manidaṃ prathamoktivallarīkalikām |
ābrahmakīṭajananī-
-mantaḥ kalayāmi sundarīmaniśam || 169 ||
kastu kṣitau paṭīyā-
-nvastu stotuṃ śivāṅkavāstavyam |
astu cirantanasukṛtaiḥ
prastutakāmyāya tanmama purastāt || 170 ||
prabhusammitoktigamyaṃ
paramaśivotsaṅgatuṅgaparyaṅkam |
tejaḥ kiñcana divyaṃ
purato me bhavatu puṇḍrakodaṇḍam || 171 ||
madhurimabharitaśarāsaṃ
makarandasyandimārgaṇodāram |
kairaviṇīviṭacūḍaṃ
kaivalyāyāstu kiñcana maho naḥ || 172 ||
akṣudramikṣucāpaṃ
parokṣamavalagnasīmni tryakṣam |
kṣapayatu me kṣemetara-
-mukṣarathapremapakṣmalaṃ tejaḥ || 173 ||
bhṛṅgarucisaṅgarakarāpāṅgaṃ
śṛṅgāratuṅgamaruṇāṅgam |
maṅgalamabhaṅguraṃ me
ghaṭayatu gaṅgādharāṅgasaṅgi mahaḥ || 174 ||
prapadājitakūrmamūrjita-
-karuṇaṃ bharmarucinirmathanadeham |
śritavarma marma śambhoḥ
kiñcana mama narma śarma nirmātu || 175 ||
kālakuralālikālima-
-kandalavijitāli vidhṛtamaṇivāli |
milatu hṛdi pulinajaghanaṃ
bahulitagalagaralakeli kimapi mahaḥ || 176 ||
kuṅkumatilakitaphālā
kuruvindacchāyapāṭaladukūlā |
karuṇāpayodhivelā
kācana citte cakāstu me līlā || 177 ||
puṣpandhayaruciveṇyaḥ
pulinābhogatrapākaraśreṇyaḥ |
jīyāsurikṣupāṇyaḥ
kāścana kāmārikelisākṣiṇyaḥ || 178 ||
tapanīyāṃśukabhāṃsi
drākṣāmādhuryanāstikavacāṃsi |
katicana śucaṃ mahāṃsi
kṣapayatu kapālitoṣitamanāṃsi || 179 ||
asitakacamāyatākṣaṃ
kusumaśaraṃ kūlamudvahakṛpārdram |
ādimarasādhidaivata-
-mantaḥ kalaye harāṅkavāsi mahaḥ || 180 ||
karṇopāntataraṅgita-
-kaṭākṣavispandikaṇṭhadaghnakṛpām |
kāmeśvarāṅkanilayāṃ
kāmapi vidyāṃ purātanīṃ kalaye || 181 ||
aravindakāntyaruntuda-
-vilocanadvandvasundaramukhendu |
chandaḥ kandalamandira-
-mantaḥpuramainduśekharaṃ vande || 182 ||
bimbinikurambaḍambara-
-viḍambakacchāyamambaravalagnam |
kambugalamambudakucaṃ
bimbokaṃ kamapi cumbatu mano me || 183 ||
kamapi kamanīyarūpaṃ
kalayāmyantaḥ kadambakusumāḍhyam |
campakarucirasuveṣaiḥ
sampāditakāntyalaṅkṛtadigantam || 184 ||
śampārucibhara-
-garhāsampādakakāntikavacitadigantam |
siddhāntaṃ nigamānāṃ
śuddhāntaṃ kimapi śūlinaḥ kalaye || 185 ||
udyaddinakaraśoṇā-
-nutpalabandhustanandhayāpīḍān |
karakalitapuṇḍracāpā-
-nkalaye kānapi kapardinaḥ prāṇān || 186 ||
raśanālasajjaghanayā
rasanājīvātucāpabhāsurayā |
ghrāṇāyuṣkaraśarayā
ghrātaṃ cittaṃ kayāpi vāsanayā || 187 ||
sarasijasahayudhvadṛśā
śampālatikāsanābhivigrahayā |
bhāsā kayāpi ceto
nāsāmaṇiśobhivadanayā bharitam || 188 ||
navayāvakābhasicayānvitayā
gajayānayā dayāparayā |
dhṛtayāminīśakalayā
dhiyā kayāpi kṣatāmayā hi vayam || 189 ||
alamalamakusumabāṇai-
-rabimbaśoṇairapuṇḍrakodaṇḍaiḥ |
akumudabāndhavacūḍai-
-ranyairiha jagati daivataṃ manyaiḥ || 190 ||
kuvalayasadṛkṣanayanaiḥ
kulagirikūṭasthabandhukucabhāraiḥ |
karuṇāspandikaṭākṣaiḥ
kavacitacitto'smi katipayaiḥ kutukaiḥ || 191 ||
natajanasulabhāya namo
nālīkasanābhilocanāya namaḥ |
nanditagiriśāya namo
mahase navanīpapāṭalāya namaḥ || 192 ||
kādambakusumadāmne
kāyacchāyākaṇāyitāryamṇe |
sīmne cirantanagirāṃ
bhūmne kasmaicidādade praṇatim || 193 ||
kuṭilakabarībharebhyaḥ
kuṅkumasabrahmacārikiraṇebhyaḥ |
kūlaṅkaṣastanebhyaḥ
kurmaḥ praṇatiṃ kulādrikutukebhyaḥ || 194 ||
kokanadaśoṇacaraṇā-
-tkomalakuralālivijitaśaivālāt |
utpalasagandhinayanā-
-durarīkurmo na devatamānyām || 195 ||
āpāṭalādharāṇā-
-mānīlasnigdhabarbarakacānām |
āmnāyajīvanānā-
-mākūtānāṃ harasya dāso'ham || 196 ||
puṅkhitavilāsahāsa-
-sphuritāsu purāhitāṅkanilayāsu |
magnaṃ mano madīyaṃ
kāsvapi kāmārijīvanāḍīṣu || 197 ||
lalitā pātu śiro me
lalāṭamambā ca madhumatīrūpā |
bhrūyugmaṃ ca bhavānī
puṣpaśarā pātu locanadvandvam || 198 ||
pāyānnāsāṃ bālā
subhagā dantāṃśca sundarī jihvām |
adharoṣṭhamādiśakti-
-ścakreśī pātu me ciraṃ cibukam || 199 ||
kāmeśvarī ca karṇau
kāmākṣī pātu gaṇḍayoryugalam |
śṛṅgāranāyikāvyā-
-dvadanaṃ siṃhāsaneśvarī ca galam || 200 ||
skandaprasūśca pātu
skandhau bāhū ca pāṭalāṅgī me |
pāṇī ca padmanilayā
pāyādaniśaṃ nakhāvalīrvijayā || 201 ||
kodaṇḍinī ca vakṣaḥ
kukṣiṃ cāvyāt kulācalatanūjā |
kalyāṇī ca valagnaṃ
kaṭiṃ ca pāyātkalādharaśikhaṇḍā || 202 ||
ūrudvayaṃ ca pāyā-
-dumā mṛḍānī ca jānunī rakṣet |
jaṅghe ca ṣoḍaśī me
pāyāt pādau ca pāśasṛṇihastā || 203 ||
prātaḥ pātu parā māṃ
madhyāhne pātu maṇigṛhādhīśā |
śarvāṇyavatu ca sāyaṃ
pāyādrātrau ca bhairavī sākṣāt || 204 ||
bhāryāṃ rakṣatu gaurīṃ
pāyāt putrāṃśca bindugṛhapīṭhā |
śrīvidyā ca yaśo me
śīlaṃ cāvyācciraṃ mahārājñī || 205 ||
pavanamayi pāvakamayi
kṣoṇīmayi gaganamayi kṛpīṭamayi |
ravimayi śaśimayi diṅmayi
samayamayi prāṇamayi śive pāhi || 206 ||
kāli kapālini śūlini
bhairavi mātaṅgi pañcami tripure |
vāgdevi vindhyavāsini
bāle bhuvaneśi pālaya ciraṃ mām || 207 ||
abhinavasindūrābhā-
-mamba tvāṃ cintayanti ye hṛdaye |
upari nipatanti teṣā-
-mutpalanayanākaṭākṣakallolāḥ || 208 ||
vargāṣṭakamilitābhi-
-rvaśinīmukhyābhirāvṛtāṃ bhavatīm |
cintayatāṃ sitavarṇāṃ
vāco niryāntyayatnato vadanāt || 209 ||
kanakaśalākāgaurīṃ
karṇavyālolakuṇḍaladvitayām |
prahasitamukhīṃ ca bhavatīṃ
dhyāyanto ye ta eva bhūdhanadāḥ || 210 ||
śīrṣāmbhoruhamadhye
śītalapīyūṣavarṣiṇīṃ bhavatīm |
anudinamanucintayatā-
-māyuṣyaṃ bhavati puṣkalamavanyām || 211 ||
madhurasmitāṃ madāruṇanayanāṃ
mātaṅgakumbhavakṣojām |
candravataṃsinīṃ tvāṃ
savidhe paśyanti sukṛtinaḥ kecit || 212 ||
lalitāyāḥ stavaratnaṃ
lalitapadābhiḥ praṇītamāryābhiḥ |
pratidinamavanau paṭhatāṃ
phalāni vaktuṃ pragalbhate saiva || 213 ||
sadasadanugrahanigraha-
-gṛhītamunivigraho bhagavān |
sarvāsāmupaniṣadāṃ
durvāsā jayati deśikaḥ prathamaḥ || 214 ||
iti maharṣidurvāsaḥ viracitaṃ śrīlalitāstavaratnam |
Sanskrit — Devanagari (original)
वन्दे गजेन्द्रवदनं
वामाङ्कारूढवल्लभाश्लिष्टम् ।
कुङ्कुमपरागशोणं
कुवलयिनीजारकोरकापीडम् ॥ 1 ॥
स जयति सुवर्णशैलः
सकलजगच्चक्रसङ्घटितमूर्तिः ।
काञ्चननिकुञ्जवाटी-
-कन्दलदमरीप्रपञ्चसङ्गीतः ॥ 2 ॥
हरिहयनैरृतमारुत-
-हरितामन्तेष्ववस्थितं तस्य ।
विनुमः सानुत्रितयं
विधिहरिगौरीशविष्टपाधारम् ॥ 3 ॥
मध्ये पुनर्मनोहर-
-रत्नरुचिस्तबकरञ्जितदिगन्तम् ।
उपरि चतुःशतयोजन-
-मुत्तुङ्गं शृङ्गपुङ्गवमुपासे ॥ 4 ॥
तत्र चतुःशतयोजन-
-परिणाहं देवशिल्पिना रचितम् ।
नानासालमनोज्ञं
नमाम्यहं नगरमादिविद्यायाः ॥ 5 ॥
प्रथमं सहस्रपूर्वक-
-षट्शतसङ्ख्याकयोजनं परितः ।
वलयीकृतस्वगात्रं
वरणं शरणं व्रजाम्ययोरूपम् ॥ 6 ॥
तस्योत्तरे समीरण-
-योजनदूरे तरङ्गितच्छायः ।
घटयतु मुदं द्वितीयो
घण्टास्तनसारनिर्मितः सालः ॥ 7 ॥
उभयोरन्तरसीम-
-न्युद्दामभ्रमररञ्जितोदारम् ।
उपवनमुपास्महे वय-
-मूरीकृतमन्दमारुतस्यन्दम् ॥ 8 ॥
आलिङ्ग्य भद्रकाली-
-मासीनस्तत्र हरिशिलाश्यामाम् ।
मनसि महाकालो मे
विहरतु मधुपानविभ्रमन्नेत्रः ॥ 9 ॥
तार्तीयीको वरण-
-स्तस्योत्तरसीम्नि वातयोजनतः ।
ताम्रेण रचितमूर्ति-
-स्तनुतामाचन्द्रतारकं भद्रम् ॥ 10 ॥
मध्ये तयोश्च मणिमय-
-पल्लवशाखाप्रसूनपक्ष्मलिताम् ।
कल्पानोकहवाटीं
कलये मकरन्दपङ्किलावालाम् ॥ 11 ॥
तत्र मधुमाधवश्री-
-तरुणीभ्यां तरलदृक्चकोराभ्याम् ।
आलिङ्गितोऽवतान्मा-
-मनिशं प्रथमर्तुरात्तपुष्पास्त्रः ॥ 12 ॥
नमत तदुत्तरभागे
नाकिपथोल्लङ्घिशृङ्गसङ्घातम् ।
सीसाकृतिं तुरीयं
सितकिरणालोकनिर्मलं सालम् ॥ 13 ॥
सालद्वयान्तराले
सरलालिकपोतचाटुसुभगायाम् ।
सन्तानवाटिकायां
सक्तं चेतोऽस्तु सततमस्माकम् ॥ 14 ॥
तत्र तपनातिरूक्षः
साम्राज्ञीचरणसान्द्रितस्वान्तः ।
शुक्रशुचिश्रीसहितो
ग्रीष्मर्तुर्दिशतु कीर्तिमाकल्पम् ॥ 15 ॥
उत्तरसीमनि तस्यो-
-न्नतशिखरोत्कम्पिहाटकपताकः ।
प्रकटयतु पञ्चमो नः
प्राकारः कुशलमारकूटमयः ॥ 16 ॥
प्राकारयोश्च मध्ये
पल्लवितान्यभृतपञ्चमोन्मेषा ।
हरिचन्दनद्रुवाटी-
-हरतादामूलमस्मदनुतापम् ॥ 17 ॥
तत्र नभः श्रीमुख्यै-
-स्तरुणीवर्गैः समन्वितः परितः ।
वज्राट्टहासमुखरो
वाञ्छापूर्तिं तनोतु वर्षर्तुः ॥ 18 ॥
मारुतयोजनदूरे
महनीयस्तस्य चोत्तरे भागे ।
भद्रं कृषीष्ट षष्ठः
प्राकारः पञ्चलोहधातुमयः ॥ 19 ॥
अनयोर्मध्ये सन्तत-
-मङ्कूरद्दिव्यकुसुमगन्धायाम् ।
मन्दारवाटिकायां
मानसमङ्गीकरोतु मे विहृतिम् ॥ 20 ॥
तस्यामिषोर्जलक्ष्मी-
-तरुणीभ्यां शरदृतुः सदा सहितः ।
अभ्यर्चयन् स जीया-
-दम्बामामोदमेदुरैः कुसुमैः ॥ 21 ॥
तस्यर्षिसङ्ख्ययोजन-
-दूरे देदीप्यमानशृङ्गौघः ।
कलधौतकलितमूर्तिः
कल्याणं दिशतु सप्तमः सालः ॥ 22 ॥
मध्ये तयोर्मरुत्पथ
लङ्घितविटपाग्रविरुतकलकण्ठा ।
श्रीपारिजातवाटी
श्रियमनिशं दिशतु शीतलोद्देशा ॥ 23 ॥
तस्यामतिप्रियाभ्यां
सह खेलन् सहसहस्यलक्ष्मीभ्याम् ।
सामन्तो झषकेतो-
-र्हेमन्तो भवतु हेमवृद्ध्यै नः ॥ 24 ॥
उत्तरतस्तस्य महा-
-नुद्भटहुतभुक्शिखारुणमयूखः ।
तपनीयखण्डरचित-
-स्तनुतादायुष्यमष्टमो वरणः ॥ 25 ॥
कादम्बविपिनवाटी-
-मनयोर्मध्यभुवि कल्पितावासाम् ।
कलयामि सूनकोरक-
-कन्दलितामोदतुन्दिलसमीराम् ॥ 26 ॥
तस्यामतिशिशिराकृति-
-रासीनस्तपतपस्यलक्ष्मीभ्याम् ।
शिवमनिशं कुरुतान्मे
शिशिरर्तुः सततशीतलदिगन्तः ॥ 27 ॥
तस्यां कदम्बवाट्यां
तत्प्रसवामोदमिलितमधुगन्धम् ।
सप्तावरणमनोज्ञं
शरणं समुपैमि मन्त्रिणीशरणम् ॥ 28 ॥
तत्रालये विशाले
तपनीयारचिततरलसोपाने ।
माणिक्यमण्डपान्त-
-र्महिते सिंहासने सुमणिखचिते ॥ 29 ॥
बिन्दुत्रिपञ्चकोण-
-द्विपनृपवसुवेददलकुरेखाढ्ये ।
चक्रे सदा निविष्टां
षष्ठ्यष्टत्रिंशदक्षरेशानीम् ॥ 30 ॥
तापिञ्छमेचकाभां
तालीदलघटितकर्णताटङ्काम् ।
ताम्बूलपूरितमुखीं
ताम्राधरबिम्बदृष्टदरहासाम् ॥ 31 ॥
कुङ्कुमपङ्किलदेहां
कुवलयजीवातुशावकवतंसाम् ।
कोकनदशोणचरणां
कोकिलनिक्वाणकोमलालापाम् ॥ 32 ॥
वामाङ्गगलितचूलीं
वनमाल्यकदम्बमालिकाभरणाम् ।
मुक्ताललन्तिकाञ्चित
मुग्धालिकमिलितचित्रकोदाराम् ॥ 33 ॥
करविधृतकीरशावक-
-कलनिनदव्यक्तनिखिलनिगमार्थाम् ।
वामकुचसङ्गिवीणावादन-
-सौख्यार्धमीलिताक्षियुगाम् ॥ 34 ॥
आपाटलांशुकधरा-
-मादिरसोन्मेषवासितकटाक्षाम् ।
आम्नायसारगुलिका-
-माद्यां सङ्गीतमातृकां वन्दे ॥ 35 ॥
तस्य च सुवर्णसाल-
-स्योत्तरतस्तरुणकुङ्कुमच्छायः ।
शमयतु मम सन्तापं
सालो नवमः स पुष्परागमयः ॥ 36 ॥
अनयोरन्तरवसुधाः
प्रणुमः प्रत्यग्रपुष्परागमयीः ।
सिंहासनेश्वरीमनु-
-चिन्तननिस्तन्द्रसिद्धनीरन्ध्राः ॥ 37 ॥
तत्सालोत्तरदेशे
तरुणजपाकिरणधोरणीशोणः ।
प्रशमयतु पद्मराग-
-प्राकारो मम पराभवं दशमः ॥ 38 ॥
अन्तरभूकृतवासा-
-ननयोरपनीतचित्तवैमत्यान् ।
चक्रेशीपदभक्तां-
-श्चारणवर्गानहर्निशं कलये ॥ 39 ॥
सारङ्गवाहयोजनदूरे-
-ऽसङ्घटितकेतनस्तस्य ।
गोमेदकेन रचितो
गोपायतु मां समुन्नतः सालः ॥ 40 ॥
वप्रद्वयान्तरोर्व्यां
वटुकैर्विविधैश्च योगिनीबृन्दैः ।
सततं समर्चितायाः
सङ्कर्षण्याः प्रणौमि चरणाब्जम् ॥ 41 ॥
तापसयोजनदूरे
तस्य समुत्तुङ्ग गोपुरोपेतः ।
वाञ्छापूर्त्यै भवता-
-द्वज्रमणीनिकरनिर्मितो वप्रः ॥ 42 ॥
वरणद्वितयान्तरतो
वासजुषो विहितमधुरसास्वादाः ।
रम्भादिविबुधवेश्या
रचयन्तु महान्तमस्मदानन्दम् ॥ 43 ॥
तत्र सदा प्रवहन्ती
तटिनी वज्राभिधा चिरं जीयात् ।
चटुलोर्मिजालनृत्य-
-त्कलहंसीकुलकलक्वणितपुष्टा ॥ 44 ॥
रोधसि तस्या रुचिरे
वज्रेशी जयति वज्रभूषाढ्या ।
वज्रप्रदानतोषित-
-वज्रिमुखत्रिदशविनुतचारित्रा ॥ 45 ॥
तस्योदीच्यां हरिति
स्तवकितसुषमावलीढवियदन्तः ।
वैडूर्यरत्नरचितो
वैमल्यं दिशतु चेतसो वरणः ॥ 46 ॥
अधिमध्यमेतयोः पुन-
-रम्बाचरणावलम्बितस्वान्तान् ।
कार्कोटकादिनागान्
कलयामः किं च बलिमुखान् दनुजान् ॥ 47 ॥
गन्धवहसङ्ख्ययोजन-
-दूरे गगनोर्ध्वजाङ्घिकस्तस्य ।
वासवमणिप्रणीतो
वरणो बहलयतु वैदुषीं विशदाम् ॥ 48 ॥
मध्यक्षोण्यामनयो-
-र्महेन्द्रनीलात्मकानि च सरांसि ।
शातोदरीसहाया-
-न्भूपालानपि पुनः पुनः प्रणुमः ॥ 49 ॥
आशुगयोजनदूरे
तस्योर्ध्वं कान्तिधवलितदिगन्तः ।
मुक्ताविरचितगात्रो
मुहुरस्माकं मुदे भवतु सालः ॥ 50 ॥
आवृत्त्योरधिमध्यं
पूर्वस्यां दिशि पुरन्दरः श्रीमान् ।
अभ्रमुविटाधिरूढो
विभ्रममस्माकमनिशमातनुतात् ॥ 51 ॥
तत्कोणे व्यजनस्रु-
-क्तोमरपात्रस्रुवान्नशक्तिधरः ।
स्वाहास्वधासमेतः
सुखयतु मां हव्यवाहनः सुचिरम् ॥ 52 ॥
दक्षिणदिगन्तराले
दण्डधरो नीलनीरदच्छायः ।
त्रिपुरापदाब्जभक्तस्तिरयतु
मम निखिलमंहसां निकरम् ॥ 53 ॥
तस्यैव पश्चिमायां
दिशि दलितेन्दीवरप्रभाश्यामः ।
खेटासियष्टिधारी
खेदानपनयतु यातुधानो मे ॥ 54 ॥
तस्या उत्तरदेशे
धवलाङ्गो विपुलझषवरारूढः ।
पाशायुधात्तपाणिः
पाशी विदलयतु पाशजालानि ॥ 55 ॥
वन्दे तदुत्तरहरि-
-त्कोणे वायुं चमूरुवरवाहम् ।
कोरकिततत्त्वबोधा-
-न्गोरक्षप्रमुखयोगिनोऽपि मुहुः ॥ 56 ॥
तरुणीरिडाप्रधाना-
-स्तिस्रो वातस्य तस्य कृतवासाः ।
प्रत्यग्रकापिशायन-
-पानपरिभ्रान्तलोचनाः कलये ॥ 57 ॥
तल्लोकपूर्वभागे
धनदं ध्यायामि शेवधिकुलेशम् ।
अपि माणिभद्रमुख्या-
-नम्बाचरणावलम्बिनो यक्षान् ॥ 58 ॥
तस्यैव पूर्वसीमनि
तपनीयारचितगोपुरे नगरे ।
कात्यायनीसहायं
कलये शीतांशुखण्डचूडालम् ॥ 59 ॥
तत्पुरषोडशवरण-
-स्थलभाजस्तरुणचन्द्रचूडालान् ।
रुद्राध्याये पठिता-
-न्रुद्राणीसहचरान्भजे रुद्रान् ॥ 60 ॥
पवमानसङ्ख्ययोजन-
-दूरे बालतृण्मेचकस्तस्य ।
सालो मरकतरचितः
सम्पदमचलां श्रियं च पुष्णातु ॥ 61 ॥
आवृतियुग्मान्तरतो
हरितमणीनिवहमेचके देशे ।
हाटकतालीविपिनं
हालाघटघटितविटपमाकलये ॥ 62 ॥
तत्रैव मन्त्रिणीगृह-
-परिणाहं तरलकेतनं सदनम् ।
मरकतसौधमनोज्ञं
दद्यादायूंषि दण्डनाथायाः ॥ 63 ॥
सदने तत्र हरिन्मणि-
-सङ्घटिते मण्डपे शतस्तम्भे ।
कार्तस्वरमयपीठे
कनकमयाम्बुरुहकर्णिकामध्ये ॥ 64 ॥
बिन्दुत्रिकोणवर्तुल-
-षडस्रवृत्तद्वयान्विते चक्रे ।
सञ्चारिणी दशोत्तर-
शतार्णमनुराजकमलकलहंसी ॥ 65 ॥
कोलवदना कुशेशय-
-नयना कोकारिमण्डितशिखण्डा ।
सन्तप्तकाञ्चनाभा
सन्ध्यारुणचेलसंवृतनितम्बा ॥ 66 ॥
हलमुसलशङ्खचक्रा-
-ऽङ्कुशपाशाभयवरस्फुरितहस्ता ।
कूलङ्कषानुकम्पा
कुङ्कुमजम्बालितस्तनाभोगा ॥ 67 ॥
धूर्तानामतिदूरा-
-वार्ताशेषावलग्नकमनीया ।
आर्तालीशुभदात्री
वार्ताली भवतु वाञ्छितार्थाय ॥ 68 ॥
तस्याः परितो देवीः
स्वप्नेश्युन्मत्तभैरवीमुख्याः ।
प्रणमत जम्भिन्याद्याः
भैरववर्गांश्च हेतुकप्रमुखान् ॥ 69 ॥
पूर्वोक्तसङ्ख्ययोजन-
-दूरे पूयांशुपाटलस्तस्य ।
विद्रावयतु मदार्तिं
विद्रुमसालो विशङ्कटद्वारः ॥ 70 ॥
आवरणयोरहर्निश-
-मन्तरभूमौप्रकाशशालिन्याम् ।
आसीनमम्बुजासन-
-मभिनवसिन्दूरगौरमहमीडे ॥ 71 ॥
वरणस्य तस्य मारुत-
-योजनतो विपुलगोपुरद्वारः ।
सालो नानारत्नैः
सङ्घटिताङ्गः कृषीष्ट मदभीष्टम् ॥ 72 ॥
अन्तरकक्ष्यामनयो-
-रविरलशोभापिचण्डिलोद्देशाम् ।
माणिक्यमण्डपाख्यां
महतीमधिहृदयमनिशमाकलये ॥ 73 ॥
तत्र स्थितं प्रसन्नं
तरुणतमालप्रवालकिरणाभम् ।
कर्णावलम्बिकुण्डल-
-कन्दलिताभीशुकवचितकपोलम् ॥ 74 ॥
शोणाधरं शुचिस्मित-
-मेणाङ्कवदनमेधमानकृपम् ।
मुग्धैणमदविशेषक-
-मुद्रितनिटिलेन्दुरेखिकारुचिरम् ॥ 75 ॥
नालीकदलसहोदर-
-नयनाञ्चलघटितमनसिजाकूतम् ।
कमलाकठिनपयोधर-
-कस्तूरीघुसृणपङ्किलोरस्कम् ॥ 76 ॥
चाम्पेयगन्धिकैश्यं
शम्पासब्रह्मचारिकौशेयम् ।
श्रीवत्सकौस्तुभधरं
श्रितजनरक्षाधुरीणचरणाब्जम् ॥ 77 ॥
कम्बुसुदर्शनविलस-
-त्करपद्मं कण्ठलोलवनमालम् ।
मुचुकुन्दमोक्षफलदं
मुकुन्दमानन्दकन्दमवलम्बे ॥ 78 ॥
तद्वरणोत्तरभागे
तारापतिबिम्बचुम्बिनिजशृङ्गः ।
विविधमणीगणघटितो
वितरतु सालो विनिर्मलां धिषणाम् ॥ 79 ॥
प्राकारद्वितयान्तर-
-कक्ष्यां पृथुरत्ननिकरसङ्कीर्णाम् ।
नमत सहस्रस्तम्भक-
-मण्डपनाम्नातिविश्रुतां भुवने ॥ 80 ॥
प्रणुमस्तत्र भवानी-
-सहचरमीशानमिन्दुखण्डधरम् ।
शृङ्गारनायिकामनु-
-शीलनभाजोऽपि भृङ्गिनन्दिमुखान् ॥ 81 ॥
तस्यैणवाहयोजन-
-दूरे वन्दे मनोमयं वप्रम् ।
अङ्कूरन्मणिकिरणा-
-मन्तरकक्ष्यां च निर्मलामनयोः ॥ 82 ॥
तत्रैवामृतवापीं
तरलतरङ्गावलीढतटयुग्माम् ।
मुक्तामयकलहंसी-
-मुद्रितकनकारविन्दसन्दोहाम् ॥ 83 ॥
शक्रोपलमयभृङ्गी-
-सङ्गीतोन्मेषघोषितदिगन्ताम् ।
काञ्चनमयाङ्गविलस-
-त्कारण्डवषण्डताण्डवमनोज्ञाम् ॥ 84 ॥
कुरुविन्दात्मकहल्लक-
-कोरकसुषमासमूहपाटलिताम् ।
कलये सुधास्वरूपां
कन्दलितामन्दकैरवामोदाम् ॥ 85 ॥
तद्वापिकान्तराले तरले
मणिपोतसीम्नि विहरन्तीम् ।
सिन्दूरपाटलाङ्गीं
सितकिरणाङ्कूरकल्पितवतंसाम् ॥ 86 ॥
पर्वेन्दुबिम्बवदनां
पल्लवशोणाधरस्फुरितहासाम् ।
कुटिलकबरीं कुरङ्गी-
-शिशुनयनां कुण्डलस्फुरितगण्डाम् ॥ 87 ॥
निकटस्थपोतनिलयाः
शक्तीः शयविधृतहेमशृङ्गजलैः ।
परिषिञ्चन्तीं परित-
-स्तारां तारुण्यगर्वितां वन्दे ॥ 88 ॥
प्रागुक्तसङ्ख्ययोजनदूरे
प्रणमामि बुद्धिमयसालम् ।
अनयोरन्तरकक्ष्या-
-मष्टापदपुष्टमेदिनीं रुचिराम् ॥ 89 ॥
कादम्बरीनिधानां
कलयाम्यानन्दवापिकां तस्याम् ।
शोणाश्मनिवहनिर्मित-
-सोपानश्रेणिशोभमानतटीम् ॥ 90 ॥
माणिक्यतरणिनिलयां
मध्ये तस्या मदारुणकपोलाम् ।
अमृतेशीत्यभिधाना-
-मन्तः कलयामि वारुणीं देवीम् ॥ 91 ॥
सौवर्णकेनिपातन-
-हस्ताः सौन्दर्यगर्विता देव्यः ।
तत्पुरतः स्थितिभाजो
वितरन्त्वस्माकमायुषो वृद्धिम् ॥ 92 ॥
तस्य पृषदश्वयोजन-
-दूरेऽहङ्कारसालमतितुङ्गम् ।
वन्दे तयोश्च मध्ये
कक्ष्यां वलमानमलयपवमानाम् ॥ 93 ॥
विनुमो विमर्शवापीं
सौषुम्नसुधास्वरूपिणीं तत्र ।
वेलातिलङ्घ्यवीची-
-कोलाहलभरितकूलवनवाटीम् ॥ 94 ॥
तत्रैव सलिलमध्ये
तापिञ्छदलप्रपञ्चसुषमाभाम् ।
श्यामलकञ्चुकलसितां
श्यामाविटबिम्बडम्बरहरास्याम् ॥ 95 ॥
आभुग्नमसृणचिल्ली-
-हसितायुग्मशरकार्मुकविलासाम् ।
मन्दस्मिताञ्चितमुखीं
मणिमयताटङ्कमण्डितकपोलाम् ॥ 96 ॥
कुरुविन्दतरणिनिलयां
कुलाचलस्पर्धिकुचनमन्मध्याम् ।
कुङ्कुमविलिप्तगात्रीं
कुरुकुल्लां मनसि कुर्महे सततम् ॥ 97 ॥
तत्सालोत्तरभागे
भानुमयं वप्रमाश्रये दीप्तम् ।
मध्यं च विपुलमनयो-
-र्मन्ये विश्रान्तमातपोद्गारम् ॥ 98 ॥
तत्र कुरुविन्दपीठे
तामरसे कनककर्णिकाघटिते ।
आसीनमरुणवासस-
-मम्लानप्रसवमालिकाभरणम् ॥ 99 ॥
चक्षुष्मतीप्रकाशन-
-शक्तिच्छायासमारचितकेलिम् ।
माणिक्यमुकुटरम्यं
मन्ये मार्ताण्डभैरवं हृदये ॥ 100 ॥
इन्दुमयसालमीडे
तस्योत्तरतस्तुषारगिरिगौरम् ।
अत्यन्तशिशिरमारुत-
-मनयोर्मध्यं च चन्द्रिकोद्गारम् ॥ 101 ॥
तत्र प्रकाशमानं
तारानिकरैः परिष्कृतोद्देशम् ।
अमृतमयकान्तिकन्दल-
-मन्तः कलयामि कुन्दसितमिन्दुम् ॥ 102 ॥
शृङ्गारसालमीडे
शृङ्गोल्लसितं तदुत्तरे भागे ।
मध्यस्थले तयोरपि
महितां शृङ्गारपूर्विकां परिखाम् ॥ 103 ॥
तत्र मणिनौस्थिताभि-
-स्तपनीयाविरचिताग्रहस्ताभिः ।
शृङ्गारदेवताभिः
सहितं परिखाधिपं भजे मदनम् ॥ 104 ॥
शृङ्गारवरणवर्यस्योत्तरतः
सकलविबुधसंसेव्यम् ।
चिन्तामणिगणरचितं
चिन्तां दूरीकरोतु मे सदनम् ॥ 105 ॥
मणिसदनसालयोरधि-
-मध्यं दशतालभूमिरुहदीर्घैः ।
पर्णैः सुवर्णवर्णै-
-र्युक्तां काण्डैश्च योजनोत्तुङ्गैः ॥ 106 ॥
मृदुलैस्तालीपञ्चक-
-मानैर्मिलितां च केसरकदम्बैः ।
सन्ततगलितमरन्द-
-स्रोतोनिर्यन्मिलिन्दसन्दोहाम् ॥ 107 ॥
पाटीरपवनबालक-
-धाटीनिर्यत्परागपिञ्जरिताम् ।
कलहंसीकुलकलकल-
-कूलङ्कषनिनदनिचयकमनीयाम् ॥ 108 ॥
पद्माटवीं भजामः
परिमलकल्लोलपक्ष्मलोपान्ताम् ।
[ देव्यर्घ्यपात्रधारी
तस्याः पूर्वदिशि दशकलायुक्तः । ]
वलयितमूर्तिर्भगवा-
-न्वह्निः क्रोशोन्नतश्चिरं पायात् ॥ 109 ॥
तत्राधारे देव्याः
पात्रीरूपः प्रभाकरः श्रीमान् ।
द्वादशकलासमेतो
ध्वान्तं मम बहुलमान्तरं भिन्द्यात् ॥ 110 ॥
तस्मिन् दिनेशपात्रे
तरङ्गितामोदममृतमयमर्घ्यम् ।
चन्द्रकलात्मकममृतं
सान्द्रीकुर्यादमन्दमानन्दम् ॥ 111 ॥
अमृते तस्मिन्नभितो
विहरन्त्यो विविधमणितरणिभाजः ।
षोडश कलाः सुधांशोः
शोकादुत्तारयन्तु मामनिशम् ॥ 112 ॥
तत्रैव विहृतिभाजो
धातृमुखानां च कारणेशानाम् ।
सृष्ट्यादिरूपिकास्ताः
शमयन्त्वखिलाः कलाश्च सन्तापम् ॥ 113 ॥
कीनाशवरुणकिन्नर-
-राजदिगन्तेषु रत्नगेहस्य ।
कलयामि तान्यजस्रं
कलयन्त्वायुष्यमर्घ्यपात्राणि ॥ 114 ॥
पात्रस्थलस्य पुरतः
पद्मारमणविधिपार्वतीशानाम् ।
भवनानि शर्मणे नो
भवन्तु भासा प्रदीपितजगन्ति ॥ 115 ॥
सदनस्यानलकोणे
सततं प्रणमामि कुण्डमाग्नेयम् ।
तत्र स्थितं च वह्निं
तरलशिखाजटिलमम्बिकाजनकम् ॥ 116 ॥
तस्यासुरदिशि तादृश-
-रत्नपरिस्फुरितपर्वनवकाढ्यम् ।
चक्रात्मकं शताङ्गं
शतयोजनमुन्नतं भजे दिव्यम् ॥ 117 ॥
तत्रैव दिशि निषण्णं
तपनीयध्वजपरम्पराश्लिष्टम् ।
रथमपरं च भवान्या
रचयामो मनसि रत्नमयचूडम् ॥ 118 ॥
भवनस्य वायुभागे
परिष्कृतो विविधवैजयन्तीभिः ।
रचयतु मुदं रथेन्द्रः
सचिवेशान्याः समस्तवन्द्यायाः ॥ 119 ॥
कुर्मोऽधिहृदयमनिशं
क्रोडास्यायाः शताङ्गमूर्धन्यम् ।
रुद्रदिशि रत्नधाम्नो
रुचिरशलाकाप्रपञ्चकञ्चुकितम् ॥ 120 ॥
परितो देवीधाम्नः
प्रणीतवासा मनुस्वरूपिण्यः ।
कुर्वन्तु रश्मिमाला-
-कृतयः कुशलानि देवता निखिलाः ॥ 121 ॥
प्राग्द्वारस्य भवानी-
-धाम्नः पार्श्वद्वयारचितवासे ।
मातङ्गीकिटिमुख्यौ
मणिसदने मनसि भावयामि चिरम् ॥ 122 ॥
योजनयुगलाभोगा
तत्क्रोशपरिणाहयैव भित्त्या च ।
चिन्तामणिगृहभूमि-
-र्जीयादाम्नायमयचतुर्द्वारा ॥ 123 ॥
द्वारे द्वारे धाम्नः
पिण्डीभूता नवीनबिम्बाभाः ।
विदधतु विपुलां कीर्तिं
दिव्या लौहित्यसिद्ध्यो देव्यः ॥ 124 ॥
मणिसदनस्यान्तरतो
महनीये रत्नवेदिकामध्ये ।
बिन्दुमयचक्रमीडे
पीठानामुपरि विरचितावासम् ॥ 125 ॥
चक्राणां सकलानां
प्रथममधः सीमफलकवास्तव्याः ।
अणिमादिसिद्धयो मा-
-मवन्तु देवी प्रभास्वरूपिण्यः ॥ 126 ॥
अणिमादिसिद्धिफलक-
-स्योपरिहरिणाङ्कखण्डकृतचूडाः ।
भद्रं पक्ष्मलयन्तु
ब्राह्मीप्रमुखाश्च मातरोऽस्माकम् ॥ 127 ॥
तस्योपरि मणिफलके
तारुण्योत्तुङ्गपीनकुचभाराः ।
सङ्क्षोभिणीप्रधानाः
भ्रान्ति विद्रावयन्तु दश मुद्राः ॥ 128 ॥
फलकत्रयस्वरूपे
पृथुले त्रैलोक्यमोहने चक्रे ।
दीव्यन्तु प्रकटाख्या-
-स्तासां कर्त्रीं च भगवती त्रिपुरा ॥ 129 ॥
तदुपरि विपुले धिष्ण्ये
तरलदृशस्तरुणकोकनदभासः ।
कामाकर्षिण्याद्याः
कलये देवीः कलाधरशिखण्डाः ॥ 130 ॥
सर्वाशापरिपूरकचक्रे-
-ऽस्मिन् गुप्तयोगिनीसेव्याः ।
त्रिपुरेशी मम दुरितं
तुद्यात् कण्ठावलम्बिमणिहारा ॥ 131 ॥
तस्योपरि मणिपीठे
ताम्राम्भोरुहदलप्रभाशोणाः ।
ध्यायाम्यनङ्गकुसुमा-
-प्रमुखा देवीश्च विधृतकूर्पासाः ॥ 132 ॥
सङ्क्षोभकारकेऽस्मिं-
-श्चक्रे श्रीत्रिपुरसुन्दरी साक्षात् ।
गोप्त्री गुप्ततराख्याः
गोपायतु मां कृपार्द्रया दृष्ट्या ॥ 133 ॥
सङ्क्षोभिणीप्रधानाः
शक्तीस्तस्योर्ध्ववलयकृतवासाः ।
आलोलनीलवेणी-
-रन्तः कलयामि यौवनोन्मत्ताः ॥ 134 ॥
सौभाग्यदायकेऽस्मिं-
-श्चक्रेशी त्रिपुरवासिनी जीयात् ।
शक्तीश्च सम्प्रदायाभिधाः
समस्ताः प्रमोदयन्त्वनिशम् ॥ 135 ॥
मणिपीठोपरि तासां
महति चतुर्हस्तविस्तृते वलये ।
सन्ततविरचितवासाः
शक्तीः कलयामि सर्वसिद्धिमुखाः ॥ 136 ॥
सर्वार्थसाधकाख्ये
चक्रेऽमुष्मिन् समस्तफलदात्री ।
त्रिपुरा श्रीर्मम कुशलं
दिशतादुत्तीर्णयोगिनीसेव्या ॥ 137 ॥
तासां निलयस्योपरि
धिष्ण्ये कौसुम्भकञ्चुकमनोज्ञाः ।
सर्वाज्ञाद्याः देव्यः
सकलाः सम्पादयन्तु मम कीर्तिम् ॥ 138 ॥
चक्रे समस्तरक्षा-
-करनाम्न्यस्मिन् समस्तजनसेव्याम् ।
मनसि निगर्भासहितां
मन्ये श्रीत्रिपुरमालिनीं देवीम् ॥ 139 ॥
सर्वज्ञासदनस्योपरि
चक्रे विपुले समाकलितगेहाः ।
वन्दे वशिनीमुख्याः
शक्तीः सिन्दूररेणुरुचः ॥ 140 ॥
श्रीसर्वरोगहराख्य-
-चक्रेऽस्मिंस्त्रिपुरपूर्विकां सिद्धाम् ।
वन्दे रहस्यनाम्ना
वेद्याभिः शक्तिभिः सदा सेव्याम् ॥ 141 ॥
वशिनीगृहोपरिष्टा-
-द्विंशतिहस्तोन्नते महापीठे ।
शमयन्तु शत्रुबृन्दं
शस्त्राण्यस्त्राणि चादिदम्पत्योः ॥ 142 ॥
शस्त्रसदनोपरिष्टा-
-द्वलये वलवैरिरत्नसङ्घटिते ।
कामेश्वरीप्रधानाः
कलये देवीः समस्तजनवन्द्याः ॥ 143 ॥
चक्रेऽत्र सर्वसिद्धिप्रद-
-नामनि सर्वफलदात्री ।
त्रिपुराम्बावतु सततं
परापररहस्ययोगिनीसेव्या ॥ 144 ॥
कामेश्वरीगृहोपरिवलये
विविधमनुसम्प्रदायज्ञाः ।
चत्वारो युगनाथा
जयन्तु मित्रेशपूर्वकाः गुरवः ॥ 145 ॥
नाथभवनोपरिष्टा-
-न्नानारत्नचयमेदुरे पीठे ।
कामेश्याद्या नित्याः
कलयन्तु मुदं तिथिस्वरूपिण्यः ॥ 146 ॥
नित्यासदनस्योपरि
निर्मलमणिनिवहविरचिते धिष्ण्ये ।
कुशलं षडङ्गदेव्यः
कलयन्त्वस्माकमुत्तरलनेत्राः ॥ 147 ॥
सदनस्योपरि तासां
सर्वानन्दमयनामके बिन्दौ ।
पञ्चब्रह्माकारां
मञ्चं प्रणमामि मणिगणाकीर्णम् ॥ 148 ॥
परितो मणिमञ्चस्य
प्रलम्बमाना नियन्त्रिता पाशैः ।
मायामयी जवनिका
मम दुरितं हरतु मेचकच्छाया ॥ 149 ॥
मञ्चस्योपरि लम्ब-
-न्मदनीपुन्नागमालिकाभरितम् ।
हरिगोपमयवितानं
हरतादालस्यमनिशमस्माकम् ॥ 150 ॥
पर्यङ्कस्य भजामः
पादान्बिम्बाम्बुदेन्दुहेमरुचः ।
अजहरिरुद्रेशमया-
-ननलासुरमारुतेशकोणस्थान् ॥ 151 ॥
फलकं सदाशिवमयं
प्रणौमि सिन्दूररेणुकिरणाभम् ।
आरभ्याङ्गेशीनां
सदनात्कलितं च रत्नसोपानम् ॥ 152 ॥
पट्टोपधानगण्डक-
-चतुष्टयस्फुरितपाटलास्तरणम् ।
पर्यङ्कोपरि घटितं
पातु चिरं हंसतूलशयनं नः ॥ 153 ॥
तस्योपरि निवसन्तं
तारुण्यश्रीनिषेवितं सततम् ।
आवृन्तपुल्लहल्लक-
-मरीचिकापुञ्जमञ्जुलच्छायम् ॥ 154 ॥
सिन्दूरशोणवसनं
शीतांशुस्तबकचुम्बितकिरीटम् ।
कुङ्कुमतिलकमनोहर-
-कुटिलालिकहसितकुमुदबन्धुशिशुम् ॥ 155 ॥
पूर्णेन्दुबिम्बवदनं
फुल्लसरोजातलोचनत्रितयम् ।
तरलापाङ्गतरङ्गित-
-शफराङ्कनशास्त्रसम्प्रदायार्थम् ॥ 156 ॥
मणिमयकुण्डलपुष्य-
-न्मरीचिकल्लोलमांसलकपोलम् ।
विद्रुमसहोदराधर-
-विसृमरसुस्मितकिशोरसञ्चारम् ॥ 157 ॥
आमोदिकुसुमशेखर-
-मानीलभ्रूलतायुगमनोज्ञम् ।
वीटीसौरभवीची-
-द्विगुणितवक्त्रारविन्दसौरभ्यम् ॥ 158 ॥
पाशाङ्कुशेक्षुचाप-
-प्रसवशरस्फुरितकोमलकराब्जम् ।
काश्मीरपङ्किलाङ्गं
कामेशं मनसि कुर्महे सततम् ॥ 159 ॥
तस्याङ्कभुवि निषण्णां
तरुणकदम्बप्रसूनकिरणाभाम् ।
शीतांशुखण्डचूडां
सीमन्तन्यस्तसान्द्रसिन्दूराम् ॥ 160 ॥
कुङ्कुमललामभास्व-
-न्निटिलां कुटिलतरचिल्लिकायुगलाम् ।
नालीकतुल्यनयनां
नासाञ्चलनटितमौक्तिकाभरणाम् ॥ 161 ॥
अङ्कुरितमन्दहास-
-मरुणाधरकान्तिविजितबिम्बाभाम् ।
कस्तूरीमकरीयुत-
-कपोलसङ्क्रान्तकनकताटङ्काम् ॥ 162 ॥
कर्पूरसान्द्रवीटी-
-कबलितवदनारविन्दकमनीयाम् ।
कम्बुसहोदरकण्ठ-
-प्रलम्बमानाच्छमौक्तिककलापाम् ॥ 163 ॥
कह्लारदामकोमल-
-भुजयुगलस्फुरितरत्नकेयूराम् ।
करपद्ममूलविलस-
-त्काञ्चनमयकटकवलयसन्दोहाम् ॥ 164 ॥
पाणिचतुष्टयविलस-
-त्पाशाङ्कुशपुण्ड्रचापपुष्पास्त्राम् ।
कूलङ्कषकुचशिखरां
कुङ्कुमकर्दमितरत्नकूर्पासाम् ॥ 165 ॥
अणुदायादवलग्ना-
-मम्बुदशोभासनाभिरोमलताम् ।
माणिक्यखचितकाञ्ची-
-मरीचिकाक्रान्तमांसलनितम्बाम् ॥ 166 ॥
करभोरुकाण्डयुगलां
जङ्घाजितकामजैत्रतूणीराम् ।
प्रपदपरिभूतकूर्मां
पल्लवसच्छायपदयुगमनोज्ञाम् ॥ 167 ॥
कमलभवकञ्जलोचन-
-किरीटरत्नांशुरञ्जितपदाब्जाम् ।
उन्मस्तकानुकम्पा-
-मुत्तरलापाङ्गपोषितानङ्गाम् ॥ 168 ॥
आदिमरसावलम्बा-
-मनिदं प्रथमोक्तिवल्लरीकलिकाम् ।
आब्रह्मकीटजननी-
-मन्तः कलयामि सुन्दरीमनिशम् ॥ 169 ॥
कस्तु क्षितौ पटीया-
-न्वस्तु स्तोतुं शिवाङ्कवास्तव्यम् ।
अस्तु चिरन्तनसुकृतैः
प्रस्तुतकाम्याय तन्मम पुरस्तात् ॥ 170 ॥
प्रभुसम्मितोक्तिगम्यं
परमशिवोत्सङ्गतुङ्गपर्यङ्कम् ।
तेजः किञ्चन दिव्यं
पुरतो मे भवतु पुण्ड्रकोदण्डम् ॥ 171 ॥
मधुरिमभरितशरासं
मकरन्दस्यन्दिमार्गणोदारम् ।
कैरविणीविटचूडं
कैवल्यायास्तु किञ्चन महो नः ॥ 172 ॥
अक्षुद्रमिक्षुचापं
परोक्षमवलग्नसीम्नि त्र्यक्षम् ।
क्षपयतु मे क्षेमेतर-
-मुक्षरथप्रेमपक्ष्मलं तेजः ॥ 173 ॥
भृङ्गरुचिसङ्गरकरापाङ्गं
शृङ्गारतुङ्गमरुणाङ्गम् ।
मङ्गलमभङ्गुरं मे
घटयतु गङ्गाधराङ्गसङ्गि महः ॥ 174 ॥
प्रपदाजितकूर्ममूर्जित-
-करुणं भर्मरुचिनिर्मथनदेहम् ।
श्रितवर्म मर्म शम्भोः
किञ्चन मम नर्म शर्म निर्मातु ॥ 175 ॥
कालकुरलालिकालिम-
-कन्दलविजितालि विधृतमणिवालि ।
मिलतु हृदि पुलिनजघनं
बहुलितगलगरलकेलि किमपि महः ॥ 176 ॥
कुङ्कुमतिलकितफाला
कुरुविन्दच्छायपाटलदुकूला ।
करुणापयोधिवेला
काचन चित्ते चकास्तु मे लीला ॥ 177 ॥
पुष्पन्धयरुचिवेण्यः
पुलिनाभोगत्रपाकरश्रेण्यः ।
जीयासुरिक्षुपाण्यः
काश्चन कामारिकेलिसाक्षिण्यः ॥ 178 ॥
तपनीयांशुकभांसि
द्राक्षामाधुर्यनास्तिकवचांसि ।
कतिचन शुचं महांसि
क्षपयतु कपालितोषितमनांसि ॥ 179 ॥
असितकचमायताक्षं
कुसुमशरं कूलमुद्वहकृपार्द्रम् ।
आदिमरसाधिदैवत-
-मन्तः कलये हराङ्कवासि महः ॥ 180 ॥
कर्णोपान्ततरङ्गित-
-कटाक्षविस्पन्दिकण्ठदघ्नकृपाम् ।
कामेश्वराङ्कनिलयां
कामपि विद्यां पुरातनीं कलये ॥ 181 ॥
अरविन्दकान्त्यरुन्तुद-
-विलोचनद्वन्द्वसुन्दरमुखेन्दु ।
छन्दः कन्दलमन्दिर-
-मन्तःपुरमैन्दुशेखरं वन्दे ॥ 182 ॥
बिम्बिनिकुरम्बडम्बर-
-विडम्बकच्छायमम्बरवलग्नम् ।
कम्बुगलमम्बुदकुचं
बिम्बोकं कमपि चुम्बतु मनो मे ॥ 183 ॥
कमपि कमनीयरूपं
कलयाम्यन्तः कदम्बकुसुमाढ्यम् ।
चम्पकरुचिरसुवेषैः
सम्पादितकान्त्यलङ्कृतदिगन्तम् ॥ 184 ॥
शम्पारुचिभर-
-गर्हासम्पादककान्तिकवचितदिगन्तम् ।
सिद्धान्तं निगमानां
शुद्धान्तं किमपि शूलिनः कलये ॥ 185 ॥
उद्यद्दिनकरशोणा-
-नुत्पलबन्धुस्तनन्धयापीडान् ।
करकलितपुण्ड्रचापा-
-न्कलये कानपि कपर्दिनः प्राणान् ॥ 186 ॥
रशनालसज्जघनया
रसनाजीवातुचापभासुरया ।
घ्राणायुष्करशरया
घ्रातं चित्तं कयापि वासनया ॥ 187 ॥
सरसिजसहयुध्वदृशा
शम्पालतिकासनाभिविग्रहया ।
भासा कयापि चेतो
नासामणिशोभिवदनया भरितम् ॥ 188 ॥
नवयावकाभसिचयान्वितया
गजयानया दयापरया ।
धृतयामिनीशकलया
धिया कयापि क्षतामया हि वयम् ॥ 189 ॥
अलमलमकुसुमबाणै-
-रबिम्बशोणैरपुण्ड्रकोदण्डैः ।
अकुमुदबान्धवचूडै-
-रन्यैरिह जगति दैवतं मन्यैः ॥ 190 ॥
कुवलयसदृक्षनयनैः
कुलगिरिकूटस्थबन्धुकुचभारैः ।
करुणास्पन्दिकटाक्षैः
कवचितचित्तोऽस्मि कतिपयैः कुतुकैः ॥ 191 ॥
नतजनसुलभाय नमो
नालीकसनाभिलोचनाय नमः ।
नन्दितगिरिशाय नमो
महसे नवनीपपाटलाय नमः ॥ 192 ॥
कादम्बकुसुमदाम्ने
कायच्छायाकणायितार्यम्णे ।
सीम्ने चिरन्तनगिरां
भूम्ने कस्मैचिदाददे प्रणतिम् ॥ 193 ॥
कुटिलकबरीभरेभ्यः
कुङ्कुमसब्रह्मचारिकिरणेभ्यः ।
कूलङ्कषस्तनेभ्यः
कुर्मः प्रणतिं कुलाद्रिकुतुकेभ्यः ॥ 194 ॥
कोकनदशोणचरणा-
-त्कोमलकुरलालिविजितशैवालात् ।
उत्पलसगन्धिनयना-
-दुररीकुर्मो न देवतमान्याम् ॥ 195 ॥
आपाटलाधराणा-
-मानीलस्निग्धबर्बरकचानाम् ।
आम्नायजीवनाना-
-माकूतानां हरस्य दासोऽहम् ॥ 196 ॥
पुङ्खितविलासहास-
-स्फुरितासु पुराहिताङ्कनिलयासु ।
मग्नं मनो मदीयं
कास्वपि कामारिजीवनाडीषु ॥ 197 ॥
ललिता पातु शिरो मे
ललाटमम्बा च मधुमतीरूपा ।
भ्रूयुग्मं च भवानी
पुष्पशरा पातु लोचनद्वन्द्वम् ॥ 198 ॥
पायान्नासां बाला
सुभगा दन्तांश्च सुन्दरी जिह्वाम् ।
अधरोष्ठमादिशक्ति-
-श्चक्रेशी पातु मे चिरं चिबुकम् ॥ 199 ॥
कामेश्वरी च कर्णौ
कामाक्षी पातु गण्डयोर्युगलम् ।
शृङ्गारनायिकाव्या-
-द्वदनं सिंहासनेश्वरी च गलम् ॥ 200 ॥
स्कन्दप्रसूश्च पातु
स्कन्धौ बाहू च पाटलाङ्गी मे ।
पाणी च पद्मनिलया
पायादनिशं नखावलीर्विजया ॥ 201 ॥
कोदण्डिनी च वक्षः
कुक्षिं चाव्यात् कुलाचलतनूजा ।
कल्याणी च वलग्नं
कटिं च पायात्कलाधरशिखण्डा ॥ 202 ॥
ऊरुद्वयं च पाया-
-दुमा मृडानी च जानुनी रक्षेत् ।
जङ्घे च षोडशी मे
पायात् पादौ च पाशसृणिहस्ता ॥ 203 ॥
प्रातः पातु परा मां
मध्याह्ने पातु मणिगृहाधीशा ।
शर्वाण्यवतु च सायं
पायाद्रात्रौ च भैरवी साक्षात् ॥ 204 ॥
भार्यां रक्षतु गौरीं
पायात् पुत्रांश्च बिन्दुगृहपीठा ।
श्रीविद्या च यशो मे
शीलं चाव्याच्चिरं महाराज्ञी ॥ 205 ॥
पवनमयि पावकमयि
क्षोणीमयि गगनमयि कृपीटमयि ।
रविमयि शशिमयि दिङ्मयि
समयमयि प्राणमयि शिवे पाहि ॥ 206 ॥
कालि कपालिनि शूलिनि
भैरवि मातङ्गि पञ्चमि त्रिपुरे ।
वाग्देवि विन्ध्यवासिनि
बाले भुवनेशि पालय चिरं माम् ॥ 207 ॥
अभिनवसिन्दूराभा-
-मम्ब त्वां चिन्तयन्ति ये हृदये ।
उपरि निपतन्ति तेषा-
-मुत्पलनयनाकटाक्षकल्लोलाः ॥ 208 ॥
वर्गाष्टकमिलिताभि-
-र्वशिनीमुख्याभिरावृतां भवतीम् ।
चिन्तयतां सितवर्णां
वाचो निर्यान्त्ययत्नतो वदनात् ॥ 209 ॥
कनकशलाकागौरीं
कर्णव्यालोलकुण्डलद्वितयाम् ।
प्रहसितमुखीं च भवतीं
ध्यायन्तो ये त एव भूधनदाः ॥ 210 ॥
शीर्षाम्भोरुहमध्ये
शीतलपीयूषवर्षिणीं भवतीम् ।
अनुदिनमनुचिन्तयता-
-मायुष्यं भवति पुष्कलमवन्याम् ॥ 211 ॥
मधुरस्मितां मदारुणनयनां
मातङ्गकुम्भवक्षोजाम् ।
चन्द्रवतंसिनीं त्वां
सविधे पश्यन्ति सुकृतिनः केचित् ॥ 212 ॥
ललितायाः स्तवरत्नं
ललितपदाभिः प्रणीतमार्याभिः ।
प्रतिदिनमवनौ पठतां
फलानि वक्तुं प्रगल्भते सैव ॥ 213 ॥
सदसदनुग्रहनिग्रह-
-गृहीतमुनिविग्रहो भगवान् ।
सर्वासामुपनिषदां
दुर्वासा जयति देशिकः प्रथमः ॥ 214 ॥
इति महर्षिदुर्वासः विरचितं श्रीललितास्तवरत्नम् ।
vande gajendravadanaṃ
vāmāṅkārūḍhavallabhāśliṣṭam |
kuṅkumaparāgaśoṇaṃ
kuvalayinījārakorakāpīḍam || 1 ||
sa jayati suvarṇaśailaḥ
sakalajagaccakrasaṅghaṭitamūrtiḥ |
kāñcananikuñjavāṭī-
-kandaladamarīprapañcasaṅgītaḥ || 2 ||
harihayanairṛtamāruta-
-haritāmanteṣvavasthitaṃ tasya |
vinumaḥ sānutritayaṃ
vidhiharigaurīśaviṣṭapādhāram || 3 ||
madhye punarmanohara-
-ratnarucistabakarañjitadigantam |
upari catuḥśatayojana-
-muttuṅgaṃ śṛṅgapuṅgavamupāse || 4 ||
tatra catuḥśatayojana-
-pariṇāhaṃ devaśilpinā racitam |
nānāsālamanojñaṃ
namāmyahaṃ nagaramādividyāyāḥ || 5 ||
prathamaṃ sahasrapūrvaka-
-ṣaṭśatasaṅkhyākayojanaṃ paritaḥ |
valayīkṛtasvagātraṃ
varaṇaṃ śaraṇaṃ vrajāmyayorūpam || 6 ||
tasyottare samīraṇa-
-yojanadūre taraṅgitacchāyaḥ |
ghaṭayatu mudaṃ dvitīyo
ghaṇṭāstanasāranirmitaḥ sālaḥ || 7 ||
ubhayorantarasīma-
-nyuddāmabhramararañjitodāram |
upavanamupāsmahe vaya-
-mūrīkṛtamandamārutasyandam || 8 ||
āliṅgya bhadrakālī-
-māsīnastatra hariśilāśyāmām |
manasi mahākālo me
viharatu madhupānavibhramannetraḥ || 9 ||
tārtīyīko varaṇa-
-stasyottarasīmni vātayojanataḥ |
tāmreṇa racitamūrti-
-stanutāmācandratārakaṃ bhadram || 10 ||
madhye tayośca maṇimaya-
-pallavaśākhāprasūnapakṣmalitām |
kalpānokahavāṭīṃ
kalaye makarandapaṅkilāvālām || 11 ||
tatra madhumādhavaśrī-
-taruṇībhyāṃ taraladṛkcakorābhyām |
āliṅgito'vatānmā-
-maniśaṃ prathamarturāttapuṣpāstraḥ || 12 ||
namata taduttarabhāge
nākipathollaṅghiśṛṅgasaṅghātam |
sīsākṛtiṃ turīyaṃ
sitakiraṇālokanirmalaṃ sālam || 13 ||
sāladvayāntarāle
saralālikapotacāṭusubhagāyām |
santānavāṭikāyāṃ
saktaṃ ceto'stu satatamasmākam || 14 ||
tatra tapanātirūkṣaḥ
sāmrājñīcaraṇasāndritasvāntaḥ |
śukraśuciśrīsahito
grīṣmarturdiśatu kīrtimākalpam || 15 ||
uttarasīmani tasyo-
-nnataśikharotkampihāṭakapatākaḥ |
prakaṭayatu pañcamo naḥ
prākāraḥ kuśalamārakūṭamayaḥ || 16 ||
prākārayośca madhye
pallavitānyabhṛtapañcamonmeṣā |
haricandanadruvāṭī-
-haratādāmūlamasmadanutāpam || 17 ||
tatra nabhaḥ śrīmukhyai-
-staruṇīvargaiḥ samanvitaḥ paritaḥ |
vajrāṭṭahāsamukharo
vāñchāpūrtiṃ tanotu varṣartuḥ || 18 ||
mārutayojanadūre
mahanīyastasya cottare bhāge |
bhadraṃ kṛṣīṣṭa ṣaṣṭhaḥ
prākāraḥ pañcalohadhātumayaḥ || 19 ||
anayormadhye santata-
-maṅkūraddivyakusumagandhāyām |
mandāravāṭikāyāṃ
mānasamaṅgīkarotu me vihṛtim || 20 ||
tasyāmiṣorjalakṣmī-
-taruṇībhyāṃ śaradṛtuḥ sadā sahitaḥ |
abhyarcayan sa jīyā-
-dambāmāmodameduraiḥ kusumaiḥ || 21 ||
tasyarṣisaṅkhyayojana-
-dūre dedīpyamānaśṛṅgaughaḥ |
kaladhautakalitamūrtiḥ
kalyāṇaṃ diśatu saptamaḥ sālaḥ || 22 ||
madhye tayormarutpatha
laṅghitaviṭapāgravirutakalakaṇṭhā |
śrīpārijātavāṭī
śriyamaniśaṃ diśatu śītaloddeśā || 23 ||
tasyāmatipriyābhyāṃ
saha khelan sahasahasyalakṣmībhyām |
sāmanto jhaṣaketo-
-rhemanto bhavatu hemavṛddhyai naḥ || 24 ||
uttaratastasya mahā-
-nudbhaṭahutabhukśikhāruṇamayūkhaḥ |
tapanīyakhaṇḍaracita-
-stanutādāyuṣyamaṣṭamo varaṇaḥ || 25 ||
kādambavipinavāṭī-
-manayormadhyabhuvi kalpitāvāsām |
kalayāmi sūnakoraka-
-kandalitāmodatundilasamīrām || 26 ||
tasyāmatiśiśirākṛti-
-rāsīnastapatapasyalakṣmībhyām |
śivamaniśaṃ kurutānme
śiśirartuḥ satataśītaladigantaḥ || 27 ||
tasyāṃ kadambavāṭyāṃ
tatprasavāmodamilitamadhugandham |
saptāvaraṇamanojñaṃ
śaraṇaṃ samupaimi mantriṇīśaraṇam || 28 ||
tatrālaye viśāle
tapanīyāracitataralasopāne |
māṇikyamaṇḍapānta-
-rmahite siṃhāsane sumaṇikhacite || 29 ||
bindutripañcakoṇa-
-dvipanṛpavasuvedadalakurekhāḍhye |
cakre sadā niviṣṭāṃ
ṣaṣṭhyaṣṭatriṃśadakṣareśānīm || 30 ||
tāpiñchamecakābhāṃ
tālīdalaghaṭitakarṇatāṭaṅkām |
tāmbūlapūritamukhīṃ
tāmrādharabimbadṛṣṭadarahāsām || 31 ||
kuṅkumapaṅkiladehāṃ
kuvalayajīvātuśāvakavataṃsām |
kokanadaśoṇacaraṇāṃ
kokilanikvāṇakomalālāpām || 32 ||
vāmāṅgagalitacūlīṃ
vanamālyakadambamālikābharaṇām |
muktālalantikāñcita
mugdhālikamilitacitrakodārām || 33 ||
karavidhṛtakīraśāvaka-
-kalaninadavyaktanikhilanigamārthām |
vāmakucasaṅgivīṇāvādana-
-saukhyārdhamīlitākṣiyugām || 34 ||
āpāṭalāṃśukadharā-
-mādirasonmeṣavāsitakaṭākṣām |
āmnāyasāragulikā-
-mādyāṃ saṅgītamātṛkāṃ vande || 35 ||
tasya ca suvarṇasāla-
-syottaratastaruṇakuṅkumacchāyaḥ |
śamayatu mama santāpaṃ
sālo navamaḥ sa puṣparāgamayaḥ || 36 ||
anayorantaravasudhāḥ
praṇumaḥ pratyagrapuṣparāgamayīḥ |
siṃhāsaneśvarīmanu-
-cintananistandrasiddhanīrandhrāḥ || 37 ||
tatsālottaradeśe
taruṇajapākiraṇadhoraṇīśoṇaḥ |
praśamayatu padmarāga-
-prākāro mama parābhavaṃ daśamaḥ || 38 ||
antarabhūkṛtavāsā-
-nanayorapanītacittavaimatyān |
cakreśīpadabhaktāṃ-
-ścāraṇavargānaharniśaṃ kalaye || 39 ||
sāraṅgavāhayojanadūre-
-'saṅghaṭitaketanastasya |
gomedakena racito
gopāyatu māṃ samunnataḥ sālaḥ || 40 ||
vapradvayāntarorvyāṃ
vaṭukairvividhaiśca yoginībṛndaiḥ |
satataṃ samarcitāyāḥ
saṅkarṣaṇyāḥ praṇaumi caraṇābjam || 41 ||
tāpasayojanadūre
tasya samuttuṅga gopuropetaḥ |
vāñchāpūrtyai bhavatā-
-dvajramaṇīnikaranirmito vapraḥ || 42 ||
varaṇadvitayāntarato
vāsajuṣo vihitamadhurasāsvādāḥ |
rambhādivibudhaveśyā
racayantu mahāntamasmadānandam || 43 ||
tatra sadā pravahantī
taṭinī vajrābhidhā ciraṃ jīyāt |
caṭulormijālanṛtya-
-tkalahaṃsīkulakalakvaṇitapuṣṭā || 44 ||
rodhasi tasyā rucire
vajreśī jayati vajrabhūṣāḍhyā |
vajrapradānatoṣita-
-vajrimukhatridaśavinutacāritrā || 45 ||
tasyodīcyāṃ hariti
stavakitasuṣamāvalīḍhaviyadantaḥ |
vaiḍūryaratnaracito
vaimalyaṃ diśatu cetaso varaṇaḥ || 46 ||
adhimadhyametayoḥ puna-
-rambācaraṇāvalambitasvāntān |
kārkoṭakādināgān
kalayāmaḥ kiṃ ca balimukhān danujān || 47 ||
gandhavahasaṅkhyayojana-
-dūre gaganordhvajāṅghikastasya |
vāsavamaṇipraṇīto
varaṇo bahalayatu vaiduṣīṃ viśadām || 48 ||
madhyakṣoṇyāmanayo-
-rmahendranīlātmakāni ca sarāṃsi |
śātodarīsahāyā-
-nbhūpālānapi punaḥ punaḥ praṇumaḥ || 49 ||
āśugayojanadūre
tasyordhvaṃ kāntidhavalitadigantaḥ |
muktāviracitagātro
muhurasmākaṃ mude bhavatu sālaḥ || 50 ||
āvṛttyoradhimadhyaṃ
pūrvasyāṃ diśi purandaraḥ śrīmān |
abhramuviṭādhirūḍho
vibhramamasmākamaniśamātanutāt || 51 ||
tatkoṇe vyajanasru-
-ktomarapātrasruvānnaśaktidharaḥ |
svāhāsvadhāsametaḥ
sukhayatu māṃ havyavāhanaḥ suciram || 52 ||
dakṣiṇadigantarāle
daṇḍadharo nīlanīradacchāyaḥ |
tripurāpadābjabhaktastirayatu
mama nikhilamaṃhasāṃ nikaram || 53 ||
tasyaiva paścimāyāṃ
diśi dalitendīvaraprabhāśyāmaḥ |
kheṭāsiyaṣṭidhārī
khedānapanayatu yātudhāno me || 54 ||
tasyā uttaradeśe
dhavalāṅgo vipulajhaṣavarārūḍhaḥ |
pāśāyudhāttapāṇiḥ
pāśī vidalayatu pāśajālāni || 55 ||
vande taduttarahari-
-tkoṇe vāyuṃ camūruvaravāham |
korakitatattvabodhā-
-ngorakṣapramukhayogino'pi muhuḥ || 56 ||
taruṇīriḍāpradhānā-
-stisro vātasya tasya kṛtavāsāḥ |
pratyagrakāpiśāyana-
-pānaparibhrāntalocanāḥ kalaye || 57 ||
tallokapūrvabhāge
dhanadaṃ dhyāyāmi śevadhikuleśam |
api māṇibhadramukhyā-
-nambācaraṇāvalambino yakṣān || 58 ||
tasyaiva pūrvasīmani
tapanīyāracitagopure nagare |
kātyāyanīsahāyaṃ
kalaye śītāṃśukhaṇḍacūḍālam || 59 ||
tatpuraṣoḍaśavaraṇa-
-sthalabhājastaruṇacandracūḍālān |
rudrādhyāye paṭhitā-
-nrudrāṇīsahacarānbhaje rudrān || 60 ||
pavamānasaṅkhyayojana-
-dūre bālatṛṇmecakastasya |
sālo marakataracitaḥ
sampadamacalāṃ śriyaṃ ca puṣṇātu || 61 ||
āvṛtiyugmāntarato
haritamaṇīnivahamecake deśe |
hāṭakatālīvipinaṃ
hālāghaṭaghaṭitaviṭapamākalaye || 62 ||
tatraiva mantriṇīgṛha-
-pariṇāhaṃ taralaketanaṃ sadanam |
marakatasaudhamanojñaṃ
dadyādāyūṃṣi daṇḍanāthāyāḥ || 63 ||
sadane tatra harinmaṇi-
-saṅghaṭite maṇḍape śatastambhe |
kārtasvaramayapīṭhe
kanakamayāmburuhakarṇikāmadhye || 64 ||
bindutrikoṇavartula-
-ṣaḍasravṛttadvayānvite cakre |
sañcāriṇī daśottara-
śatārṇamanurājakamalakalahaṃsī || 65 ||
kolavadanā kuśeśaya-
-nayanā kokārimaṇḍitaśikhaṇḍā |
santaptakāñcanābhā
sandhyāruṇacelasaṃvṛtanitambā || 66 ||
halamusalaśaṅkhacakrā-
-'ṅkuśapāśābhayavarasphuritahastā |
kūlaṅkaṣānukampā
kuṅkumajambālitastanābhogā || 67 ||
dhūrtānāmatidūrā-
-vārtāśeṣāvalagnakamanīyā |
ārtālīśubhadātrī
vārtālī bhavatu vāñchitārthāya || 68 ||
tasyāḥ parito devīḥ
svapneśyunmattabhairavīmukhyāḥ |
praṇamata jambhinyādyāḥ
bhairavavargāṃśca hetukapramukhān || 69 ||
pūrvoktasaṅkhyayojana-
-dūre pūyāṃśupāṭalastasya |
vidrāvayatu madārtiṃ
vidrumasālo viśaṅkaṭadvāraḥ || 70 ||
āvaraṇayoraharniśa-
-mantarabhūmauprakāśaśālinyām |
āsīnamambujāsana-
-mabhinavasindūragauramahamīḍe || 71 ||
varaṇasya tasya māruta-
-yojanato vipulagopuradvāraḥ |
sālo nānāratnaiḥ
saṅghaṭitāṅgaḥ kṛṣīṣṭa madabhīṣṭam || 72 ||
antarakakṣyāmanayo-
-raviralaśobhāpicaṇḍiloddeśām |
māṇikyamaṇḍapākhyāṃ
mahatīmadhihṛdayamaniśamākalaye || 73 ||
tatra sthitaṃ prasannaṃ
taruṇatamālapravālakiraṇābham |
karṇāvalambikuṇḍala-
-kandalitābhīśukavacitakapolam || 74 ||
śoṇādharaṃ śucismita-
-meṇāṅkavadanamedhamānakṛpam |
mugdhaiṇamadaviśeṣaka-
-mudritaniṭilendurekhikāruciram || 75 ||
nālīkadalasahodara-
-nayanāñcalaghaṭitamanasijākūtam |
kamalākaṭhinapayodhara-
-kastūrīghusṛṇapaṅkiloraskam || 76 ||
cāmpeyagandhikaiśyaṃ
śampāsabrahmacārikauśeyam |
śrīvatsakaustubhadharaṃ
śritajanarakṣādhurīṇacaraṇābjam || 77 ||
kambusudarśanavilasa-
-tkarapadmaṃ kaṇṭhalolavanamālam |
mucukundamokṣaphaladaṃ
mukundamānandakandamavalambe || 78 ||
tadvaraṇottarabhāge
tārāpatibimbacumbinijaśṛṅgaḥ |
vividhamaṇīgaṇaghaṭito
vitaratu sālo vinirmalāṃ dhiṣaṇām || 79 ||
prākāradvitayāntara-
-kakṣyāṃ pṛthuratnanikarasaṅkīrṇām |
namata sahasrastambhaka-
-maṇḍapanāmnātiviśrutāṃ bhuvane || 80 ||
praṇumastatra bhavānī-
-sahacaramīśānamindukhaṇḍadharam |
śṛṅgāranāyikāmanu-
-śīlanabhājo'pi bhṛṅginandimukhān || 81 ||
tasyaiṇavāhayojana-
-dūre vande manomayaṃ vapram |
aṅkūranmaṇikiraṇā-
-mantarakakṣyāṃ ca nirmalāmanayoḥ || 82 ||
tatraivāmṛtavāpīṃ
taralataraṅgāvalīḍhataṭayugmām |
muktāmayakalahaṃsī-
-mudritakanakāravindasandohām || 83 ||
śakropalamayabhṛṅgī-
-saṅgītonmeṣaghoṣitadigantām |
kāñcanamayāṅgavilasa-
-tkāraṇḍavaṣaṇḍatāṇḍavamanojñām || 84 ||
kuruvindātmakahallaka-
-korakasuṣamāsamūhapāṭalitām |
kalaye sudhāsvarūpāṃ
kandalitāmandakairavāmodām || 85 ||
tadvāpikāntarāle tarale
maṇipotasīmni viharantīm |
sindūrapāṭalāṅgīṃ
sitakiraṇāṅkūrakalpitavataṃsām || 86 ||
parvendubimbavadanāṃ
pallavaśoṇādharasphuritahāsām |
kuṭilakabarīṃ kuraṅgī-
-śiśunayanāṃ kuṇḍalasphuritagaṇḍām || 87 ||
nikaṭasthapotanilayāḥ
śaktīḥ śayavidhṛtahemaśṛṅgajalaiḥ |
pariṣiñcantīṃ parita-
-stārāṃ tāruṇyagarvitāṃ vande || 88 ||
prāguktasaṅkhyayojanadūre
praṇamāmi buddhimayasālam |
anayorantarakakṣyā-
-maṣṭāpadapuṣṭamedinīṃ rucirām || 89 ||
kādambarīnidhānāṃ
kalayāmyānandavāpikāṃ tasyām |
śoṇāśmanivahanirmita-
-sopānaśreṇiśobhamānataṭīm || 90 ||
māṇikyataraṇinilayāṃ
madhye tasyā madāruṇakapolām |
amṛteśītyabhidhānā-
-mantaḥ kalayāmi vāruṇīṃ devīm || 91 ||
sauvarṇakenipātana-
-hastāḥ saundaryagarvitā devyaḥ |
tatpurataḥ sthitibhājo
vitarantvasmākamāyuṣo vṛddhim || 92 ||
tasya pṛṣadaśvayojana-
-dūre'haṅkārasālamatituṅgam |
vande tayośca madhye
kakṣyāṃ valamānamalayapavamānām || 93 ||
vinumo vimarśavāpīṃ
sauṣumnasudhāsvarūpiṇīṃ tatra |
velātilaṅghyavīcī-
-kolāhalabharitakūlavanavāṭīm || 94 ||
tatraiva salilamadhye
tāpiñchadalaprapañcasuṣamābhām |
śyāmalakañcukalasitāṃ
śyāmāviṭabimbaḍambaraharāsyām || 95 ||
ābhugnamasṛṇacillī-
-hasitāyugmaśarakārmukavilāsām |
mandasmitāñcitamukhīṃ
maṇimayatāṭaṅkamaṇḍitakapolām || 96 ||
kuruvindataraṇinilayāṃ
kulācalaspardhikucanamanmadhyām |
kuṅkumaviliptagātrīṃ
kurukullāṃ manasi kurmahe satatam || 97 ||
tatsālottarabhāge
bhānumayaṃ vapramāśraye dīptam |
madhyaṃ ca vipulamanayo-
-rmanye viśrāntamātapodgāram || 98 ||
tatra kuruvindapīṭhe
tāmarase kanakakarṇikāghaṭite |
āsīnamaruṇavāsasa-
-mamlānaprasavamālikābharaṇam || 99 ||
cakṣuṣmatīprakāśana-
-śakticchāyāsamāracitakelim |
māṇikyamukuṭaramyaṃ
manye mārtāṇḍabhairavaṃ hṛdaye || 100 ||
indumayasālamīḍe
tasyottaratastuṣāragirigauram |
atyantaśiśiramāruta-
-manayormadhyaṃ ca candrikodgāram || 101 ||
tatra prakāśamānaṃ
tārānikaraiḥ pariṣkṛtoddeśam |
amṛtamayakāntikandala-
-mantaḥ kalayāmi kundasitamindum || 102 ||
śṛṅgārasālamīḍe
śṛṅgollasitaṃ taduttare bhāge |
madhyasthale tayorapi
mahitāṃ śṛṅgārapūrvikāṃ parikhām || 103 ||
tatra maṇinausthitābhi-
-stapanīyāviracitāgrahastābhiḥ |
śṛṅgāradevatābhiḥ
sahitaṃ parikhādhipaṃ bhaje madanam || 104 ||
śṛṅgāravaraṇavaryasyottarataḥ
sakalavibudhasaṃsevyam |
cintāmaṇigaṇaracitaṃ
cintāṃ dūrīkarotu me sadanam || 105 ||
maṇisadanasālayoradhi-
-madhyaṃ daśatālabhūmiruhadīrghaiḥ |
parṇaiḥ suvarṇavarṇai-
-ryuktāṃ kāṇḍaiśca yojanottuṅgaiḥ || 106 ||
mṛdulaistālīpañcaka-
-mānairmilitāṃ ca kesarakadambaiḥ |
santatagalitamaranda-
-srotoniryanmilindasandohām || 107 ||
pāṭīrapavanabālaka-
-dhāṭīniryatparāgapiñjaritām |
kalahaṃsīkulakalakala-
-kūlaṅkaṣaninadanicayakamanīyām || 108 ||
padmāṭavīṃ bhajāmaḥ
parimalakallolapakṣmalopāntām |
[ devyarghyapātradhārī
tasyāḥ pūrvadiśi daśakalāyuktaḥ | ]
valayitamūrtirbhagavā-
-nvahniḥ krośonnataściraṃ pāyāt || 109 ||
tatrādhāre devyāḥ
pātrīrūpaḥ prabhākaraḥ śrīmān |
dvādaśakalāsameto
dhvāntaṃ mama bahulamāntaraṃ bhindyāt || 110 ||
tasmin dineśapātre
taraṅgitāmodamamṛtamayamarghyam |
candrakalātmakamamṛtaṃ
sāndrīkuryādamandamānandam || 111 ||
amṛte tasminnabhito
viharantyo vividhamaṇitaraṇibhājaḥ |
ṣoḍaśa kalāḥ sudhāṃśoḥ
śokāduttārayantu māmaniśam || 112 ||
tatraiva vihṛtibhājo
dhātṛmukhānāṃ ca kāraṇeśānām |
sṛṣṭyādirūpikāstāḥ
śamayantvakhilāḥ kalāśca santāpam || 113 ||
kīnāśavaruṇakinnara-
-rājadiganteṣu ratnagehasya |
kalayāmi tānyajasraṃ
kalayantvāyuṣyamarghyapātrāṇi || 114 ||
pātrasthalasya purataḥ
padmāramaṇavidhipārvatīśānām |
bhavanāni śarmaṇe no
bhavantu bhāsā pradīpitajaganti || 115 ||
sadanasyānalakoṇe
satataṃ praṇamāmi kuṇḍamāgneyam |
tatra sthitaṃ ca vahniṃ
taralaśikhājaṭilamambikājanakam || 116 ||
tasyāsuradiśi tādṛśa-
-ratnaparisphuritaparvanavakāḍhyam |
cakrātmakaṃ śatāṅgaṃ
śatayojanamunnataṃ bhaje divyam || 117 ||
tatraiva diśi niṣaṇṇaṃ
tapanīyadhvajaparamparāśliṣṭam |
rathamaparaṃ ca bhavānyā
racayāmo manasi ratnamayacūḍam || 118 ||
bhavanasya vāyubhāge
pariṣkṛto vividhavaijayantībhiḥ |
racayatu mudaṃ rathendraḥ
saciveśānyāḥ samastavandyāyāḥ || 119 ||
kurmo'dhihṛdayamaniśaṃ
kroḍāsyāyāḥ śatāṅgamūrdhanyam |
rudradiśi ratnadhāmno
ruciraśalākāprapañcakañcukitam || 120 ||
parito devīdhāmnaḥ
praṇītavāsā manusvarūpiṇyaḥ |
kurvantu raśmimālā-
-kṛtayaḥ kuśalāni devatā nikhilāḥ || 121 ||
prāgdvārasya bhavānī-
-dhāmnaḥ pārśvadvayāracitavāse |
mātaṅgīkiṭimukhyau
maṇisadane manasi bhāvayāmi ciram || 122 ||
yojanayugalābhogā
tatkrośapariṇāhayaiva bhittyā ca |
cintāmaṇigṛhabhūmi-
-rjīyādāmnāyamayacaturdvārā || 123 ||
dvāre dvāre dhāmnaḥ
piṇḍībhūtā navīnabimbābhāḥ |
vidadhatu vipulāṃ kīrtiṃ
divyā lauhityasiddhyo devyaḥ || 124 ||
maṇisadanasyāntarato
mahanīye ratnavedikāmadhye |
bindumayacakramīḍe
pīṭhānāmupari viracitāvāsam || 125 ||
cakrāṇāṃ sakalānāṃ
prathamamadhaḥ sīmaphalakavāstavyāḥ |
aṇimādisiddhayo mā-
-mavantu devī prabhāsvarūpiṇyaḥ || 126 ||
aṇimādisiddhiphalaka-
-syoparihariṇāṅkakhaṇḍakṛtacūḍāḥ |
bhadraṃ pakṣmalayantu
brāhmīpramukhāśca mātaro'smākam || 127 ||
tasyopari maṇiphalake
tāruṇyottuṅgapīnakucabhārāḥ |
saṅkṣobhiṇīpradhānāḥ
bhrānti vidrāvayantu daśa mudrāḥ || 128 ||
phalakatrayasvarūpe
pṛthule trailokyamohane cakre |
dīvyantu prakaṭākhyā-
-stāsāṃ kartrīṃ ca bhagavatī tripurā || 129 ||
tadupari vipule dhiṣṇye
taraladṛśastaruṇakokanadabhāsaḥ |
kāmākarṣiṇyādyāḥ
kalaye devīḥ kalādharaśikhaṇḍāḥ || 130 ||
sarvāśāparipūrakacakre-
-'smin guptayoginīsevyāḥ |
tripureśī mama duritaṃ
tudyāt kaṇṭhāvalambimaṇihārā || 131 ||
tasyopari maṇipīṭhe
tāmrāmbhoruhadalaprabhāśoṇāḥ |
dhyāyāmyanaṅgakusumā-
-pramukhā devīśca vidhṛtakūrpāsāḥ || 132 ||
saṅkṣobhakārake'smiṃ-
-ścakre śrītripurasundarī sākṣāt |
goptrī guptatarākhyāḥ
gopāyatu māṃ kṛpārdrayā dṛṣṭyā || 133 ||
saṅkṣobhiṇīpradhānāḥ
śaktīstasyordhvavalayakṛtavāsāḥ |
ālolanīlaveṇī-
-rantaḥ kalayāmi yauvanonmattāḥ || 134 ||
saubhāgyadāyake'smiṃ-
-ścakreśī tripuravāsinī jīyāt |
śaktīśca sampradāyābhidhāḥ
samastāḥ pramodayantvaniśam || 135 ||
maṇipīṭhopari tāsāṃ
mahati caturhastavistṛte valaye |
santataviracitavāsāḥ
śaktīḥ kalayāmi sarvasiddhimukhāḥ || 136 ||
sarvārthasādhakākhye
cakre'muṣmin samastaphaladātrī |
tripurā śrīrmama kuśalaṃ
diśatāduttīrṇayoginīsevyā || 137 ||
tāsāṃ nilayasyopari
dhiṣṇye kausumbhakañcukamanojñāḥ |
sarvājñādyāḥ devyaḥ
sakalāḥ sampādayantu mama kīrtim || 138 ||
cakre samastarakṣā-
-karanāmnyasmin samastajanasevyām |
manasi nigarbhāsahitāṃ
manye śrītripuramālinīṃ devīm || 139 ||
sarvajñāsadanasyopari
cakre vipule samākalitagehāḥ |
vande vaśinīmukhyāḥ
śaktīḥ sindūrareṇurucaḥ || 140 ||
śrīsarvarogaharākhya-
-cakre'smiṃstripurapūrvikāṃ siddhām |
vande rahasyanāmnā
vedyābhiḥ śaktibhiḥ sadā sevyām || 141 ||
vaśinīgṛhopariṣṭā-
-dviṃśatihastonnate mahāpīṭhe |
śamayantu śatrubṛndaṃ
śastrāṇyastrāṇi cādidampatyoḥ || 142 ||
śastrasadanopariṣṭā-
-dvalaye valavairiratnasaṅghaṭite |
kāmeśvarīpradhānāḥ
kalaye devīḥ samastajanavandyāḥ || 143 ||
cakre'tra sarvasiddhiprada-
-nāmani sarvaphaladātrī |
tripurāmbāvatu satataṃ
parāpararahasyayoginīsevyā || 144 ||
kāmeśvarīgṛhoparivalaye
vividhamanusampradāyajñāḥ |
catvāro yuganāthā
jayantu mitreśapūrvakāḥ guravaḥ || 145 ||
nāthabhavanopariṣṭā-
-nnānāratnacayamedure pīṭhe |
kāmeśyādyā nityāḥ
kalayantu mudaṃ tithisvarūpiṇyaḥ || 146 ||
nityāsadanasyopari
nirmalamaṇinivahaviracite dhiṣṇye |
kuśalaṃ ṣaḍaṅgadevyaḥ
kalayantvasmākamuttaralanetrāḥ || 147 ||
sadanasyopari tāsāṃ
sarvānandamayanāmake bindau |
pañcabrahmākārāṃ
mañcaṃ praṇamāmi maṇigaṇākīrṇam || 148 ||
parito maṇimañcasya
pralambamānā niyantritā pāśaiḥ |
māyāmayī javanikā
mama duritaṃ haratu mecakacchāyā || 149 ||
mañcasyopari lamba-
-nmadanīpunnāgamālikābharitam |
harigopamayavitānaṃ
haratādālasyamaniśamasmākam || 150 ||
paryaṅkasya bhajāmaḥ
pādānbimbāmbudenduhemarucaḥ |
ajaharirudreśamayā-
-nanalāsuramāruteśakoṇasthān || 151 ||
phalakaṃ sadāśivamayaṃ
praṇaumi sindūrareṇukiraṇābham |
ārabhyāṅgeśīnāṃ
sadanātkalitaṃ ca ratnasopānam || 152 ||
paṭṭopadhānagaṇḍaka-
-catuṣṭayasphuritapāṭalāstaraṇam |
paryaṅkopari ghaṭitaṃ
pātu ciraṃ haṃsatūlaśayanaṃ naḥ || 153 ||
tasyopari nivasantaṃ
tāruṇyaśrīniṣevitaṃ satatam |
āvṛntapullahallaka-
-marīcikāpuñjamañjulacchāyam || 154 ||
sindūraśoṇavasanaṃ
śītāṃśustabakacumbitakirīṭam |
kuṅkumatilakamanohara-
-kuṭilālikahasitakumudabandhuśiśum || 155 ||
pūrṇendubimbavadanaṃ
phullasarojātalocanatritayam |
taralāpāṅgataraṅgita-
-śapharāṅkanaśāstrasampradāyārtham || 156 ||
maṇimayakuṇḍalapuṣya-
-nmarīcikallolamāṃsalakapolam |
vidrumasahodarādhara-
-visṛmarasusmitakiśorasañcāram || 157 ||
āmodikusumaśekhara-
-mānīlabhrūlatāyugamanojñam |
vīṭīsaurabhavīcī-
-dviguṇitavaktrāravindasaurabhyam || 158 ||
pāśāṅkuśekṣucāpa-
-prasavaśarasphuritakomalakarābjam |
kāśmīrapaṅkilāṅgaṃ
kāmeśaṃ manasi kurmahe satatam || 159 ||
tasyāṅkabhuvi niṣaṇṇāṃ
taruṇakadambaprasūnakiraṇābhām |
śītāṃśukhaṇḍacūḍāṃ
sīmantanyastasāndrasindūrām || 160 ||
kuṅkumalalāmabhāsva-
-nniṭilāṃ kuṭilataracillikāyugalām |
nālīkatulyanayanāṃ
nāsāñcalanaṭitamauktikābharaṇām || 161 ||
aṅkuritamandahāsa-
-maruṇādharakāntivijitabimbābhām |
kastūrīmakarīyuta-
-kapolasaṅkrāntakanakatāṭaṅkām || 162 ||
karpūrasāndravīṭī-
-kabalitavadanāravindakamanīyām |
kambusahodarakaṇṭha-
-pralambamānācchamauktikakalāpām || 163 ||
kahlāradāmakomala-
-bhujayugalasphuritaratnakeyūrām |
karapadmamūlavilasa-
-tkāñcanamayakaṭakavalayasandohām || 164 ||
pāṇicatuṣṭayavilasa-
-tpāśāṅkuśapuṇḍracāpapuṣpāstrām |
kūlaṅkaṣakucaśikharāṃ
kuṅkumakardamitaratnakūrpāsām || 165 ||
aṇudāyādavalagnā-
-mambudaśobhāsanābhiromalatām |
māṇikyakhacitakāñcī-
-marīcikākrāntamāṃsalanitambām || 166 ||
karabhorukāṇḍayugalāṃ
jaṅghājitakāmajaitratūṇīrām |
prapadaparibhūtakūrmāṃ
pallavasacchāyapadayugamanojñām || 167 ||
kamalabhavakañjalocana-
-kirīṭaratnāṃśurañjitapadābjām |
unmastakānukampā-
-muttaralāpāṅgapoṣitānaṅgām || 168 ||
ādimarasāvalambā-
-manidaṃ prathamoktivallarīkalikām |
ābrahmakīṭajananī-
-mantaḥ kalayāmi sundarīmaniśam || 169 ||
kastu kṣitau paṭīyā-
-nvastu stotuṃ śivāṅkavāstavyam |
astu cirantanasukṛtaiḥ
prastutakāmyāya tanmama purastāt || 170 ||
prabhusammitoktigamyaṃ
paramaśivotsaṅgatuṅgaparyaṅkam |
tejaḥ kiñcana divyaṃ
purato me bhavatu puṇḍrakodaṇḍam || 171 ||
madhurimabharitaśarāsaṃ
makarandasyandimārgaṇodāram |
kairaviṇīviṭacūḍaṃ
kaivalyāyāstu kiñcana maho naḥ || 172 ||
akṣudramikṣucāpaṃ
parokṣamavalagnasīmni tryakṣam |
kṣapayatu me kṣemetara-
-mukṣarathapremapakṣmalaṃ tejaḥ || 173 ||
bhṛṅgarucisaṅgarakarāpāṅgaṃ
śṛṅgāratuṅgamaruṇāṅgam |
maṅgalamabhaṅguraṃ me
ghaṭayatu gaṅgādharāṅgasaṅgi mahaḥ || 174 ||
prapadājitakūrmamūrjita-
-karuṇaṃ bharmarucinirmathanadeham |
śritavarma marma śambhoḥ
kiñcana mama narma śarma nirmātu || 175 ||
kālakuralālikālima-
-kandalavijitāli vidhṛtamaṇivāli |
milatu hṛdi pulinajaghanaṃ
bahulitagalagaralakeli kimapi mahaḥ || 176 ||
kuṅkumatilakitaphālā
kuruvindacchāyapāṭaladukūlā |
karuṇāpayodhivelā
kācana citte cakāstu me līlā || 177 ||
puṣpandhayaruciveṇyaḥ
pulinābhogatrapākaraśreṇyaḥ |
jīyāsurikṣupāṇyaḥ
kāścana kāmārikelisākṣiṇyaḥ || 178 ||
tapanīyāṃśukabhāṃsi
drākṣāmādhuryanāstikavacāṃsi |
katicana śucaṃ mahāṃsi
kṣapayatu kapālitoṣitamanāṃsi || 179 ||
asitakacamāyatākṣaṃ
kusumaśaraṃ kūlamudvahakṛpārdram |
ādimarasādhidaivata-
-mantaḥ kalaye harāṅkavāsi mahaḥ || 180 ||
karṇopāntataraṅgita-
-kaṭākṣavispandikaṇṭhadaghnakṛpām |
kāmeśvarāṅkanilayāṃ
kāmapi vidyāṃ purātanīṃ kalaye || 181 ||
aravindakāntyaruntuda-
-vilocanadvandvasundaramukhendu |
chandaḥ kandalamandira-
-mantaḥpuramainduśekharaṃ vande || 182 ||
bimbinikurambaḍambara-
-viḍambakacchāyamambaravalagnam |
kambugalamambudakucaṃ
bimbokaṃ kamapi cumbatu mano me || 183 ||
kamapi kamanīyarūpaṃ
kalayāmyantaḥ kadambakusumāḍhyam |
campakarucirasuveṣaiḥ
sampāditakāntyalaṅkṛtadigantam || 184 ||
śampārucibhara-
-garhāsampādakakāntikavacitadigantam |
siddhāntaṃ nigamānāṃ
śuddhāntaṃ kimapi śūlinaḥ kalaye || 185 ||
udyaddinakaraśoṇā-
-nutpalabandhustanandhayāpīḍān |
karakalitapuṇḍracāpā-
-nkalaye kānapi kapardinaḥ prāṇān || 186 ||
raśanālasajjaghanayā
rasanājīvātucāpabhāsurayā |
ghrāṇāyuṣkaraśarayā
ghrātaṃ cittaṃ kayāpi vāsanayā || 187 ||
sarasijasahayudhvadṛśā
śampālatikāsanābhivigrahayā |
bhāsā kayāpi ceto
nāsāmaṇiśobhivadanayā bharitam || 188 ||
navayāvakābhasicayānvitayā
gajayānayā dayāparayā |
dhṛtayāminīśakalayā
dhiyā kayāpi kṣatāmayā hi vayam || 189 ||
alamalamakusumabāṇai-
-rabimbaśoṇairapuṇḍrakodaṇḍaiḥ |
akumudabāndhavacūḍai-
-ranyairiha jagati daivataṃ manyaiḥ || 190 ||
kuvalayasadṛkṣanayanaiḥ
kulagirikūṭasthabandhukucabhāraiḥ |
karuṇāspandikaṭākṣaiḥ
kavacitacitto'smi katipayaiḥ kutukaiḥ || 191 ||
natajanasulabhāya namo
nālīkasanābhilocanāya namaḥ |
nanditagiriśāya namo
mahase navanīpapāṭalāya namaḥ || 192 ||
kādambakusumadāmne
kāyacchāyākaṇāyitāryamṇe |
sīmne cirantanagirāṃ
bhūmne kasmaicidādade praṇatim || 193 ||
kuṭilakabarībharebhyaḥ
kuṅkumasabrahmacārikiraṇebhyaḥ |
kūlaṅkaṣastanebhyaḥ
kurmaḥ praṇatiṃ kulādrikutukebhyaḥ || 194 ||
kokanadaśoṇacaraṇā-
-tkomalakuralālivijitaśaivālāt |
utpalasagandhinayanā-
-durarīkurmo na devatamānyām || 195 ||
āpāṭalādharāṇā-
-mānīlasnigdhabarbarakacānām |
āmnāyajīvanānā-
-mākūtānāṃ harasya dāso'ham || 196 ||
puṅkhitavilāsahāsa-
-sphuritāsu purāhitāṅkanilayāsu |
magnaṃ mano madīyaṃ
kāsvapi kāmārijīvanāḍīṣu || 197 ||
lalitā pātu śiro me
lalāṭamambā ca madhumatīrūpā |
bhrūyugmaṃ ca bhavānī
puṣpaśarā pātu locanadvandvam || 198 ||
pāyānnāsāṃ bālā
subhagā dantāṃśca sundarī jihvām |
adharoṣṭhamādiśakti-
-ścakreśī pātu me ciraṃ cibukam || 199 ||
kāmeśvarī ca karṇau
kāmākṣī pātu gaṇḍayoryugalam |
śṛṅgāranāyikāvyā-
-dvadanaṃ siṃhāsaneśvarī ca galam || 200 ||
skandaprasūśca pātu
skandhau bāhū ca pāṭalāṅgī me |
pāṇī ca padmanilayā
pāyādaniśaṃ nakhāvalīrvijayā || 201 ||
kodaṇḍinī ca vakṣaḥ
kukṣiṃ cāvyāt kulācalatanūjā |
kalyāṇī ca valagnaṃ
kaṭiṃ ca pāyātkalādharaśikhaṇḍā || 202 ||
ūrudvayaṃ ca pāyā-
-dumā mṛḍānī ca jānunī rakṣet |
jaṅghe ca ṣoḍaśī me
pāyāt pādau ca pāśasṛṇihastā || 203 ||
prātaḥ pātu parā māṃ
madhyāhne pātu maṇigṛhādhīśā |
śarvāṇyavatu ca sāyaṃ
pāyādrātrau ca bhairavī sākṣāt || 204 ||
bhāryāṃ rakṣatu gaurīṃ
pāyāt putrāṃśca bindugṛhapīṭhā |
śrīvidyā ca yaśo me
śīlaṃ cāvyācciraṃ mahārājñī || 205 ||
pavanamayi pāvakamayi
kṣoṇīmayi gaganamayi kṛpīṭamayi |
ravimayi śaśimayi diṅmayi
samayamayi prāṇamayi śive pāhi || 206 ||
kāli kapālini śūlini
bhairavi mātaṅgi pañcami tripure |
vāgdevi vindhyavāsini
bāle bhuvaneśi pālaya ciraṃ mām || 207 ||
abhinavasindūrābhā-
-mamba tvāṃ cintayanti ye hṛdaye |
upari nipatanti teṣā-
-mutpalanayanākaṭākṣakallolāḥ || 208 ||
vargāṣṭakamilitābhi-
-rvaśinīmukhyābhirāvṛtāṃ bhavatīm |
cintayatāṃ sitavarṇāṃ
vāco niryāntyayatnato vadanāt || 209 ||
kanakaśalākāgaurīṃ
karṇavyālolakuṇḍaladvitayām |
prahasitamukhīṃ ca bhavatīṃ
dhyāyanto ye ta eva bhūdhanadāḥ || 210 ||
śīrṣāmbhoruhamadhye
śītalapīyūṣavarṣiṇīṃ bhavatīm |
anudinamanucintayatā-
-māyuṣyaṃ bhavati puṣkalamavanyām || 211 ||
madhurasmitāṃ madāruṇanayanāṃ
mātaṅgakumbhavakṣojām |
candravataṃsinīṃ tvāṃ
savidhe paśyanti sukṛtinaḥ kecit || 212 ||
lalitāyāḥ stavaratnaṃ
lalitapadābhiḥ praṇītamāryābhiḥ |
pratidinamavanau paṭhatāṃ
phalāni vaktuṃ pragalbhate saiva || 213 ||
sadasadanugrahanigraha-
-gṛhītamunivigraho bhagavān |
sarvāsāmupaniṣadāṃ
durvāsā jayati deśikaḥ prathamaḥ || 214 ||
iti maharṣidurvāsaḥ viracitaṃ śrīlalitāstavaratnam |
🕉️ This is the original Sanskrit rendered in Malayalam script.
Pronunciation is identical to the Sanskrit Devanagari version.