ವನ್ದೇ ಗಜೇನ್ದ್ರವದನಂ
ವಾಮಾಙ್ಕಾರೂಢವಲ್ಲಭಾಶ್ಲಿಷ್ಟಮ್ ।
ಕುಙ್ಕುಮಪರಾಗಶೋಣಂ
ಕುವಲಯಿನೀಜಾರಕೋರಕಾಪೀಡಮ್ ॥ 1 ॥
ಸ ಜಯತಿ ಸುವರ್ಣಶೈಲಃ
ಸಕಲಜಗಚ್ಚಕ್ರಸಙ್ಘಟಿತಮೂರ್ತಿಃ ।
ಕಾಞ್ಚನನಿಕುಞ್ಜವಾಟೀ-
-ಕನ್ದಲದಮರೀಪ್ರಪಞ್ಚಸಙ್ಗೀತಃ ॥ 2 ॥
ಹರಿಹಯನೈರೃತಮಾರುತ-
-ಹರಿತಾಮನ್ತೇಷ್ವವಸ್ಥಿತಂ ತಸ್ಯ ।
ವಿನುಮಃ ಸಾನುತ್ರಿತಯಂ
ವಿಧಿಹರಿಗೌರೀಶವಿಷ್ಟಪಾಧಾರಮ್ ॥ 3 ॥
ಮಧ್ಯೇ ಪುನರ್ಮನೋಹರ-
-ರತ್ನರುಚಿಸ್ತಬಕರಞ್ಜಿತದಿಗನ್ತಮ್ ।
ಉಪರಿ ಚತುಃಶತಯೋಜನ-
-ಮುತ್ತುಙ್ಗಂ ಶೃಙ್ಗಪುಙ್ಗವಮುಪಾಸೇ ॥ 4 ॥
ತತ್ರ ಚತುಃಶತಯೋಜನ-
-ಪರಿಣಾಹಂ ದೇವಶಿಲ್ಪಿನಾ ರಚಿತಮ್ ।
ನಾನಾಸಾಲಮನೋಜ್ಞಂ
ನಮಾಮ್ಯಹಂ ನಗರಮಾದಿವಿದ್ಯಾಯಾಃ ॥ 5 ॥
ಪ್ರಥಮಂ ಸಹಸ್ರಪೂರ್ವಕ-
-ಷಟ್ಶತಸಙ್ಖ್ಯಾಕಯೋಜನಂ ಪರಿತಃ ।
ವಲಯೀಕೃತಸ್ವಗಾತ್ರಂ
ವರಣಂ ಶರಣಂ ವ್ರಜಾಮ್ಯಯೋರೂಪಮ್ ॥ 6 ॥
ತಸ್ಯೋತ್ತರೇ ಸಮೀರಣ-
-ಯೋಜನದೂರೇ ತರಙ್ಗಿತಚ್ಛಾಯಃ ।
ಘಟಯತು ಮುದಂ ದ್ವಿತೀಯೋ
ಘಣ್ಟಾಸ್ತನಸಾರನಿರ್ಮಿತಃ ಸಾಲಃ ॥ 7 ॥
ಉಭಯೋರನ್ತರಸೀಮ-
-ನ್ಯುದ್ದಾಮಭ್ರಮರರಞ್ಜಿತೋದಾರಮ್ ।
ಉಪವನಮುಪಾಸ್ಮಹೇ ವಯ-
-ಮೂರೀಕೃತಮನ್ದಮಾರುತಸ್ಯನ್ದಮ್ ॥ 8 ॥
ಆಲಿಙ್ಗ್ಯ ಭದ್ರಕಾಲೀ-
-ಮಾಸೀನಸ್ತತ್ರ ಹರಿಶಿಲಾಶ್ಯಾಮಾಮ್ ।
ಮನಸಿ ಮಹಾಕಾಲೋ ಮೇ
ವಿಹರತು ಮಧುಪಾನವಿಭ್ರಮನ್ನೇತ್ರಃ ॥ 9 ॥
ತಾರ್ತೀಯೀಕೋ ವರಣ-
-ಸ್ತಸ್ಯೋತ್ತರಸೀಮ್ನಿ ವಾತಯೋಜನತಃ ।
ತಾಮ್ರೇಣ ರಚಿತಮೂರ್ತಿ-
-ಸ್ತನುತಾಮಾಚನ್ದ್ರತಾರಕಂ ಭದ್ರಮ್ ॥ 10 ॥
ಮಧ್ಯೇ ತಯೋಶ್ಚ ಮಣಿಮಯ-
-ಪಲ್ಲವಶಾಖಾಪ್ರಸೂನಪಕ್ಷ್ಮಲಿತಾಮ್ ।
ಕಲ್ಪಾನೋಕಹವಾಟೀಂ
ಕಲಯೇ ಮಕರನ್ದಪಙ್ಕಿಲಾವಾಲಾಮ್ ॥ 11 ॥
ತತ್ರ ಮಧುಮಾಧವಶ್ರೀ-
-ತರುಣೀಭ್ಯಾಂ ತರಲದೃಕ್ಚಕೋರಾಭ್ಯಾಮ್ ।
ಆಲಿಙ್ಗಿತೋಽವತಾನ್ಮಾ-
-ಮನಿಶಂ ಪ್ರಥಮರ್ತುರಾತ್ತಪುಷ್ಪಾಸ್ತ್ರಃ ॥ 12 ॥
ನಮತ ತದುತ್ತರಭಾಗೇ
ನಾಕಿಪಥೋಲ್ಲಙ್ಘಿಶೃಙ್ಗಸಙ್ಘಾತಮ್ ।
ಸೀಸಾಕೃತಿಂ ತುರೀಯಂ
ಸಿತಕಿರಣಾಲೋಕನಿರ್ಮಲಂ ಸಾಲಮ್ ॥ 13 ॥
ಸಾಲದ್ವಯಾನ್ತರಾಲೇ
ಸರಲಾಲಿಕಪೋತಚಾಟುಸುಭಗಾಯಾಮ್ ।
ಸನ್ತಾನವಾಟಿಕಾಯಾಂ
ಸಕ್ತಂ ಚೇತೋಽಸ್ತು ಸತತಮಸ್ಮಾಕಮ್ ॥ 14 ॥
ತತ್ರ ತಪನಾತಿರೂಕ್ಷಃ
ಸಾಮ್ರಾಜ್ಞೀಚರಣಸಾನ್ದ್ರಿತಸ್ವಾನ್ತಃ ।
ಶುಕ್ರಶುಚಿಶ್ರೀಸಹಿತೋ
ಗ್ರೀಷ್ಮರ್ತುರ್ದಿಶತು ಕೀರ್ತಿಮಾಕಲ್ಪಮ್ ॥ 15 ॥
ಉತ್ತರಸೀಮನಿ ತಸ್ಯೋ-
-ನ್ನತಶಿಖರೋತ್ಕಮ್ಪಿಹಾಟಕಪತಾಕಃ ।
ಪ್ರಕಟಯತು ಪಞ್ಚಮೋ ನಃ
ಪ್ರಾಕಾರಃ ಕುಶಲಮಾರಕೂಟಮಯಃ ॥ 16 ॥
ಪ್ರಾಕಾರಯೋಶ್ಚ ಮಧ್ಯೇ
ಪಲ್ಲವಿತಾನ್ಯಭೃತಪಞ್ಚಮೋನ್ಮೇಷಾ ।
ಹರಿಚನ್ದನದ್ರುವಾಟೀ-
-ಹರತಾದಾಮೂಲಮಸ್ಮದನುತಾಪಮ್ ॥ 17 ॥
ತತ್ರ ನಭಃ ಶ್ರೀಮುಖ್ಯೈ-
-ಸ್ತರುಣೀವರ್ಗೈಃ ಸಮನ್ವಿತಃ ಪರಿತಃ ।
ವಜ್ರಾಟ್ಟಹಾಸಮುಖರೋ
ವಾಞ್ಛಾಪೂರ್ತಿಂ ತನೋತು ವರ್ಷರ್ತುಃ ॥ 18 ॥
ಮಾರುತಯೋಜನದೂರೇ
ಮಹನೀಯಸ್ತಸ್ಯ ಚೋತ್ತರೇ ಭಾಗೇ ।
ಭದ್ರಂ ಕೃಷೀಷ್ಟ ಷಷ್ಠಃ
ಪ್ರಾಕಾರಃ ಪಞ್ಚಲೋಹಧಾತುಮಯಃ ॥ 19 ॥
ಅನಯೋರ್ಮಧ್ಯೇ ಸನ್ತತ-
-ಮಙ್ಕೂರದ್ದಿವ್ಯಕುಸುಮಗನ್ಧಾಯಾಮ್ ।
ಮನ್ದಾರವಾಟಿಕಾಯಾಂ
ಮಾನಸಮಙ್ಗೀಕರೋತು ಮೇ ವಿಹೃತಿಮ್ ॥ 20 ॥
ತಸ್ಯಾಮಿಷೋರ್ಜಲಕ್ಷ್ಮೀ-
-ತರುಣೀಭ್ಯಾಂ ಶರದೃತುಃ ಸದಾ ಸಹಿತಃ ।
ಅಭ್ಯರ್ಚಯನ್ ಸ ಜೀಯಾ-
-ದಮ್ಬಾಮಾಮೋದಮೇದುರೈಃ ಕುಸುಮೈಃ ॥ 21 ॥
ತಸ್ಯರ್ಷಿಸಙ್ಖ್ಯಯೋಜನ-
-ದೂರೇ ದೇದೀಪ್ಯಮಾನಶೃಙ್ಗೌಘಃ ।
ಕಲಧೌತಕಲಿತಮೂರ್ತಿಃ
ಕಲ್ಯಾಣಂ ದಿಶತು ಸಪ್ತಮಃ ಸಾಲಃ ॥ 22 ॥
ಮಧ್ಯೇ ತಯೋರ್ಮರುತ್ಪಥ
ಲಙ್ಘಿತವಿಟಪಾಗ್ರವಿರುತಕಲಕಣ್ಠಾ ।
ಶ್ರೀಪಾರಿಜಾತವಾಟೀ
ಶ್ರಿಯಮನಿಶಂ ದಿಶತು ಶೀತಲೋದ್ದೇಶಾ ॥ 23 ॥
ತಸ್ಯಾಮತಿಪ್ರಿಯಾಭ್ಯಾಂ
ಸಹ ಖೇಲನ್ ಸಹಸಹಸ್ಯಲಕ್ಷ್ಮೀಭ್ಯಾಮ್ ।
ಸಾಮನ್ತೋ ಝಷಕೇತೋ-
-ರ್ಹೇಮನ್ತೋ ಭವತು ಹೇಮವೃದ್ಧ್ಯೈ ನಃ ॥ 24 ॥
ಉತ್ತರತಸ್ತಸ್ಯ ಮಹಾ-
-ನುದ್ಭಟಹುತಭುಕ್ಶಿಖಾರುಣಮಯೂಖಃ ।
ತಪನೀಯಖಣ್ಡರಚಿತ-
-ಸ್ತನುತಾದಾಯುಷ್ಯಮಷ್ಟಮೋ ವರಣಃ ॥ 25 ॥
ಕಾದಮ್ಬವಿಪಿನವಾಟೀ-
-ಮನಯೋರ್ಮಧ್ಯಭುವಿ ಕಲ್ಪಿತಾವಾಸಾಮ್ ।
ಕಲಯಾಮಿ ಸೂನಕೋರಕ-
-ಕನ್ದಲಿತಾಮೋದತುನ್ದಿಲಸಮೀರಾಮ್ ॥ 26 ॥
ತಸ್ಯಾಮತಿಶಿಶಿರಾಕೃತಿ-
-ರಾಸೀನಸ್ತಪತಪಸ್ಯಲಕ್ಷ್ಮೀಭ್ಯಾಮ್ ।
ಶಿವಮನಿಶಂ ಕುರುತಾನ್ಮೇ
ಶಿಶಿರರ್ತುಃ ಸತತಶೀತಲದಿಗನ್ತಃ ॥ 27 ॥
ತಸ್ಯಾಂ ಕದಮ್ಬವಾಟ್ಯಾಂ
ತತ್ಪ್ರಸವಾಮೋದಮಿಲಿತಮಧುಗನ್ಧಮ್ ।
ಸಪ್ತಾವರಣಮನೋಜ್ಞಂ
ಶರಣಂ ಸಮುಪೈಮಿ ಮನ್ತ್ರಿಣೀಶರಣಮ್ ॥ 28 ॥
ತತ್ರಾಲಯೇ ವಿಶಾಲೇ
ತಪನೀಯಾರಚಿತತರಲಸೋಪಾನೇ ।
ಮಾಣಿಕ್ಯಮಣ್ಡಪಾನ್ತ-
-ರ್ಮಹಿತೇ ಸಿಂಹಾಸನೇ ಸುಮಣಿಖಚಿತೇ ॥ 29 ॥
ಬಿನ್ದುತ್ರಿಪಞ್ಚಕೋಣ-
-ದ್ವಿಪನೃಪವಸುವೇದದಲಕುರೇಖಾಢ್ಯೇ ।
ಚಕ್ರೇ ಸದಾ ನಿವಿಷ್ಟಾಂ
ಷಷ್ಠ್ಯಷ್ಟತ್ರಿಂಶದಕ್ಷರೇಶಾನೀಮ್ ॥ 30 ॥
ತಾಪಿಞ್ಛಮೇಚಕಾಭಾಂ
ತಾಲೀದಲಘಟಿತಕರ್ಣತಾಟಙ್ಕಾಮ್ ।
ತಾಮ್ಬೂಲಪೂರಿತಮುಖೀಂ
ತಾಮ್ರಾಧರಬಿಮ್ಬದೃಷ್ಟದರಹಾಸಾಮ್ ॥ 31 ॥
ಕುಙ್ಕುಮಪಙ್ಕಿಲದೇಹಾಂ
ಕುವಲಯಜೀವಾತುಶಾವಕವತಂಸಾಮ್ ।
ಕೋಕನದಶೋಣಚರಣಾಂ
ಕೋಕಿಲನಿಕ್ವಾಣಕೋಮಲಾಲಾಪಾಮ್ ॥ 32 ॥
ವಾಮಾಙ್ಗಗಲಿತಚೂಲೀಂ
ವನಮಾಲ್ಯಕದಮ್ಬಮಾಲಿಕಾಭರಣಾಮ್ ।
ಮುಕ್ತಾಲಲನ್ತಿಕಾಞ್ಚಿತ
ಮುಗ್ಧಾಲಿಕಮಿಲಿತಚಿತ್ರಕೋದಾರಾಮ್ ॥ 33 ॥
ಕರವಿಧೃತಕೀರಶಾವಕ-
-ಕಲನಿನದವ್ಯಕ್ತನಿಖಿಲನಿಗಮಾರ್ಥಾಮ್ ।
ವಾಮಕುಚಸಙ್ಗಿವೀಣಾವಾದನ-
-ಸೌಖ್ಯಾರ್ಧಮೀಲಿತಾಕ್ಷಿಯುಗಾಮ್ ॥ 34 ॥
ಆಪಾಟಲಾಂಶುಕಧರಾ-
-ಮಾದಿರಸೋನ್ಮೇಷವಾಸಿತಕಟಾಕ್ಷಾಮ್ ।
ಆಮ್ನಾಯಸಾರಗುಲಿಕಾ-
-ಮಾದ್ಯಾಂ ಸಙ್ಗೀತಮಾತೃಕಾಂ ವನ್ದೇ ॥ 35 ॥
ತಸ್ಯ ಚ ಸುವರ್ಣಸಾಲ-
-ಸ್ಯೋತ್ತರತಸ್ತರುಣಕುಙ್ಕುಮಚ್ಛಾಯಃ ।
ಶಮಯತು ಮಮ ಸನ್ತಾಪಂ
ಸಾಲೋ ನವಮಃ ಸ ಪುಷ್ಪರಾಗಮಯಃ ॥ 36 ॥
ಅನಯೋರನ್ತರವಸುಧಾಃ
ಪ್ರಣುಮಃ ಪ್ರತ್ಯಗ್ರಪುಷ್ಪರಾಗಮಯೀಃ ।
ಸಿಂಹಾಸನೇಶ್ವರೀಮನು-
-ಚಿನ್ತನನಿಸ್ತನ್ದ್ರಸಿದ್ಧನೀರನ್ಧ್ರಾಃ ॥ 37 ॥
ತತ್ಸಾಲೋತ್ತರದೇಶೇ
ತರುಣಜಪಾಕಿರಣಧೋರಣೀಶೋಣಃ ।
ಪ್ರಶಮಯತು ಪದ್ಮರಾಗ-
-ಪ್ರಾಕಾರೋ ಮಮ ಪರಾಭವಂ ದಶಮಃ ॥ 38 ॥
ಅನ್ತರಭೂಕೃತವಾಸಾ-
-ನನಯೋರಪನೀತಚಿತ್ತವೈಮತ್ಯಾನ್ ।
ಚಕ್ರೇಶೀಪದಭಕ್ತಾಂ-
-ಶ್ಚಾರಣವರ್ಗಾನಹರ್ನಿಶಂ ಕಲಯೇ ॥ 39 ॥
ಸಾರಙ್ಗವಾಹಯೋಜನದೂರೇ-
-ಽಸಙ್ಘಟಿತಕೇತನಸ್ತಸ್ಯ ।
ಗೋಮೇದಕೇನ ರಚಿತೋ
ಗೋಪಾಯತು ಮಾಂ ಸಮುನ್ನತಃ ಸಾಲಃ ॥ 40 ॥
ವಪ್ರದ್ವಯಾನ್ತರೋರ್ವ್ಯಾಂ
ವಟುಕೈರ್ವಿವಿಧೈಶ್ಚ ಯೋಗಿನೀಬೃನ್ದೈಃ ।
ಸತತಂ ಸಮರ್ಚಿತಾಯಾಃ
ಸಙ್ಕರ್ಷಣ್ಯಾಃ ಪ್ರಣೌಮಿ ಚರಣಾಬ್ಜಮ್ ॥ 41 ॥
ತಾಪಸಯೋಜನದೂರೇ
ತಸ್ಯ ಸಮುತ್ತುಙ್ಗ ಗೋಪುರೋಪೇತಃ ।
ವಾಞ್ಛಾಪೂರ್ತ್ಯೈ ಭವತಾ-
-ದ್ವಜ್ರಮಣೀನಿಕರನಿರ್ಮಿತೋ ವಪ್ರಃ ॥ 42 ॥
ವರಣದ್ವಿತಯಾನ್ತರತೋ
ವಾಸಜುಷೋ ವಿಹಿತಮಧುರಸಾಸ್ವಾದಾಃ ।
ರಮ್ಭಾದಿವಿಬುಧವೇಶ್ಯಾ
ರಚಯನ್ತು ಮಹಾನ್ತಮಸ್ಮದಾನನ್ದಮ್ ॥ 43 ॥
ತತ್ರ ಸದಾ ಪ್ರವಹನ್ತೀ
ತಟಿನೀ ವಜ್ರಾಭಿಧಾ ಚಿರಂ ಜೀಯಾತ್ ।
ಚಟುಲೋರ್ಮಿಜಾಲನೃತ್ಯ-
-ತ್ಕಲಹಂಸೀಕುಲಕಲಕ್ವಣಿತಪುಷ್ಟಾ ॥ 44 ॥
ರೋಧಸಿ ತಸ್ಯಾ ರುಚಿರೇ
ವಜ್ರೇಶೀ ಜಯತಿ ವಜ್ರಭೂಷಾಢ್ಯಾ ।
ವಜ್ರಪ್ರದಾನತೋಷಿತ-
-ವಜ್ರಿಮುಖತ್ರಿದಶವಿನುತಚಾರಿತ್ರಾ ॥ 45 ॥
ತಸ್ಯೋದೀಚ್ಯಾಂ ಹರಿತಿ
ಸ್ತವಕಿತಸುಷಮಾವಲೀಢವಿಯದನ್ತಃ ।
ವೈಡೂರ್ಯರತ್ನರಚಿತೋ
ವೈಮಲ್ಯಂ ದಿಶತು ಚೇತಸೋ ವರಣಃ ॥ 46 ॥
ಅಧಿಮಧ್ಯಮೇತಯೋಃ ಪುನ-
-ರಮ್ಬಾಚರಣಾವಲಮ್ಬಿತಸ್ವಾನ್ತಾನ್ ।
ಕಾರ್ಕೋಟಕಾದಿನಾಗಾನ್
ಕಲಯಾಮಃ ಕಿಂ ಚ ಬಲಿಮುಖಾನ್ ದನುಜಾನ್ ॥ 47 ॥
ಗನ್ಧವಹಸಙ್ಖ್ಯಯೋಜನ-
-ದೂರೇ ಗಗನೋರ್ಧ್ವಜಾಙ್ಘಿಕಸ್ತಸ್ಯ ।
ವಾಸವಮಣಿಪ್ರಣೀತೋ
ವರಣೋ ಬಹಲಯತು ವೈದುಷೀಂ ವಿಶದಾಮ್ ॥ 48 ॥
ಮಧ್ಯಕ್ಷೋಣ್ಯಾಮನಯೋ-
-ರ್ಮಹೇನ್ದ್ರನೀಲಾತ್ಮಕಾನಿ ಚ ಸರಾಂಸಿ ।
ಶಾತೋದರೀಸಹಾಯಾ-
-ನ್ಭೂಪಾಲಾನಪಿ ಪುನಃ ಪುನಃ ಪ್ರಣುಮಃ ॥ 49 ॥
ಆಶುಗಯೋಜನದೂರೇ
ತಸ್ಯೋರ್ಧ್ವಂ ಕಾನ್ತಿಧವಲಿತದಿಗನ್ತಃ ।
ಮುಕ್ತಾವಿರಚಿತಗಾತ್ರೋ
ಮುಹುರಸ್ಮಾಕಂ ಮುದೇ ಭವತು ಸಾಲಃ ॥ 50 ॥
ಆವೃತ್ತ್ಯೋರಧಿಮಧ್ಯಂ
ಪೂರ್ವಸ್ಯಾಂ ದಿಶಿ ಪುರನ್ದರಃ ಶ್ರೀಮಾನ್ ।
ಅಭ್ರಮುವಿಟಾಧಿರೂಢೋ
ವಿಭ್ರಮಮಸ್ಮಾಕಮನಿಶಮಾತನುತಾತ್ ॥ 51 ॥
ತತ್ಕೋಣೇ ವ್ಯಜನಸ್ರು-
-ಕ್ತೋಮರಪಾತ್ರಸ್ರುವಾನ್ನಶಕ್ತಿಧರಃ ।
ಸ್ವಾಹಾಸ್ವಧಾಸಮೇತಃ
ಸುಖಯತು ಮಾಂ ಹವ್ಯವಾಹನಃ ಸುಚಿರಮ್ ॥ 52 ॥
ದಕ್ಷಿಣದಿಗನ್ತರಾಲೇ
ದಣ್ಡಧರೋ ನೀಲನೀರದಚ್ಛಾಯಃ ।
ತ್ರಿಪುರಾಪದಾಬ್ಜಭಕ್ತಸ್ತಿರಯತು
ಮಮ ನಿಖಿಲಮಂಹಸಾಂ ನಿಕರಮ್ ॥ 53 ॥
ತಸ್ಯೈವ ಪಶ್ಚಿಮಾಯಾಂ
ದಿಶಿ ದಲಿತೇನ್ದೀವರಪ್ರಭಾಶ್ಯಾಮಃ ।
ಖೇಟಾಸಿಯಷ್ಟಿಧಾರೀ
ಖೇದಾನಪನಯತು ಯಾತುಧಾನೋ ಮೇ ॥ 54 ॥
ತಸ್ಯಾ ಉತ್ತರದೇಶೇ
ಧವಲಾಙ್ಗೋ ವಿಪುಲಝಷವರಾರೂಢಃ ।
ಪಾಶಾಯುಧಾತ್ತಪಾಣಿಃ
ಪಾಶೀ ವಿದಲಯತು ಪಾಶಜಾಲಾನಿ ॥ 55 ॥
ವನ್ದೇ ತದುತ್ತರಹರಿ-
-ತ್ಕೋಣೇ ವಾಯುಂ ಚಮೂರುವರವಾಹಮ್ ।
ಕೋರಕಿತತತ್ತ್ವಬೋಧಾ-
-ನ್ಗೋರಕ್ಷಪ್ರಮುಖಯೋಗಿನೋಽಪಿ ಮುಹುಃ ॥ 56 ॥
ತರುಣೀರಿಡಾಪ್ರಧಾನಾ-
-ಸ್ತಿಸ್ರೋ ವಾತಸ್ಯ ತಸ್ಯ ಕೃತವಾಸಾಃ ।
ಪ್ರತ್ಯಗ್ರಕಾಪಿಶಾಯನ-
-ಪಾನಪರಿಭ್ರಾನ್ತಲೋಚನಾಃ ಕಲಯೇ ॥ 57 ॥
ತಲ್ಲೋಕಪೂರ್ವಭಾಗೇ
ಧನದಂ ಧ್ಯಾಯಾಮಿ ಶೇವಧಿಕುಲೇಶಮ್ ।
ಅಪಿ ಮಾಣಿಭದ್ರಮುಖ್ಯಾ-
-ನಮ್ಬಾಚರಣಾವಲಮ್ಬಿನೋ ಯಕ್ಷಾನ್ ॥ 58 ॥
ತಸ್ಯೈವ ಪೂರ್ವಸೀಮನಿ
ತಪನೀಯಾರಚಿತಗೋಪುರೇ ನಗರೇ ।
ಕಾತ್ಯಾಯನೀಸಹಾಯಂ
ಕಲಯೇ ಶೀತಾಂಶುಖಣ್ಡಚೂಡಾಲಮ್ ॥ 59 ॥
ತತ್ಪುರಷೋಡಶವರಣ-
-ಸ್ಥಲಭಾಜಸ್ತರುಣಚನ್ದ್ರಚೂಡಾಲಾನ್ ।
ರುದ್ರಾಧ್ಯಾಯೇ ಪಠಿತಾ-
-ನ್ರುದ್ರಾಣೀಸಹಚರಾನ್ಭಜೇ ರುದ್ರಾನ್ ॥ 60 ॥
ಪವಮಾನಸಙ್ಖ್ಯಯೋಜನ-
-ದೂರೇ ಬಾಲತೃಣ್ಮೇಚಕಸ್ತಸ್ಯ ।
ಸಾಲೋ ಮರಕತರಚಿತಃ
ಸಮ್ಪದಮಚಲಾಂ ಶ್ರಿಯಂ ಚ ಪುಷ್ಣಾತು ॥ 61 ॥
ಆವೃತಿಯುಗ್ಮಾನ್ತರತೋ
ಹರಿತಮಣೀನಿವಹಮೇಚಕೇ ದೇಶೇ ।
ಹಾಟಕತಾಲೀವಿಪಿನಂ
ಹಾಲಾಘಟಘಟಿತವಿಟಪಮಾಕಲಯೇ ॥ 62 ॥
ತತ್ರೈವ ಮನ್ತ್ರಿಣೀಗೃಹ-
-ಪರಿಣಾಹಂ ತರಲಕೇತನಂ ಸದನಮ್ ।
ಮರಕತಸೌಧಮನೋಜ್ಞಂ
ದದ್ಯಾದಾಯೂಂಷಿ ದಣ್ಡನಾಥಾಯಾಃ ॥ 63 ॥
ಸದನೇ ತತ್ರ ಹರಿನ್ಮಣಿ-
-ಸಙ್ಘಟಿತೇ ಮಣ್ಡಪೇ ಶತಸ್ತಮ್ಭೇ ।
ಕಾರ್ತಸ್ವರಮಯಪೀಠೇ
ಕನಕಮಯಾಮ್ಬುರುಹಕರ್ಣಿಕಾಮಧ್ಯೇ ॥ 64 ॥
ಬಿನ್ದುತ್ರಿಕೋಣವರ್ತುಲ-
-ಷಡಸ್ರವೃತ್ತದ್ವಯಾನ್ವಿತೇ ಚಕ್ರೇ ।
ಸಞ್ಚಾರಿಣೀ ದಶೋತ್ತರ-
ಶತಾರ್ಣಮನುರಾಜಕಮಲಕಲಹಂಸೀ ॥ 65 ॥
ಕೋಲವದನಾ ಕುಶೇಶಯ-
-ನಯನಾ ಕೋಕಾರಿಮಣ್ಡಿತಶಿಖಣ್ಡಾ ।
ಸನ್ತಪ್ತಕಾಞ್ಚನಾಭಾ
ಸನ್ಧ್ಯಾರುಣಚೇಲಸಂವೃತನಿತಮ್ಬಾ ॥ 66 ॥
ಹಲಮುಸಲಶಙ್ಖಚಕ್ರಾ-
-ಽಙ್ಕುಶಪಾಶಾಭಯವರಸ್ಫುರಿತಹಸ್ತಾ ।
ಕೂಲಙ್ಕಷಾನುಕಮ್ಪಾ
ಕುಙ್ಕುಮಜಮ್ಬಾಲಿತಸ್ತನಾಭೋಗಾ ॥ 67 ॥
ಧೂರ್ತಾನಾಮತಿದೂರಾ-
-ವಾರ್ತಾಶೇಷಾವಲಗ್ನಕಮನೀಯಾ ।
ಆರ್ತಾಲೀಶುಭದಾತ್ರೀ
ವಾರ್ತಾಲೀ ಭವತು ವಾಞ್ಛಿತಾರ್ಥಾಯ ॥ 68 ॥
ತಸ್ಯಾಃ ಪರಿತೋ ದೇವೀಃ
ಸ್ವಪ್ನೇಶ್ಯುನ್ಮತ್ತಭೈರವೀಮುಖ್ಯಾಃ ।
ಪ್ರಣಮತ ಜಮ್ಭಿನ್ಯಾದ್ಯಾಃ
ಭೈರವವರ್ಗಾಂಶ್ಚ ಹೇತುಕಪ್ರಮುಖಾನ್ ॥ 69 ॥
ಪೂರ್ವೋಕ್ತಸಙ್ಖ್ಯಯೋಜನ-
-ದೂರೇ ಪೂಯಾಂಶುಪಾಟಲಸ್ತಸ್ಯ ।
ವಿದ್ರಾವಯತು ಮದಾರ್ತಿಂ
ವಿದ್ರುಮಸಾಲೋ ವಿಶಙ್ಕಟದ್ವಾರಃ ॥ 70 ॥
ಆವರಣಯೋರಹರ್ನಿಶ-
-ಮನ್ತರಭೂಮೌಪ್ರಕಾಶಶಾಲಿನ್ಯಾಮ್ ।
ಆಸೀನಮಮ್ಬುಜಾಸನ-
-ಮಭಿನವಸಿನ್ದೂರಗೌರಮಹಮೀಡೇ ॥ 71 ॥
ವರಣಸ್ಯ ತಸ್ಯ ಮಾರುತ-
-ಯೋಜನತೋ ವಿಪುಲಗೋಪುರದ್ವಾರಃ ।
ಸಾಲೋ ನಾನಾರತ್ನೈಃ
ಸಙ್ಘಟಿತಾಙ್ಗಃ ಕೃಷೀಷ್ಟ ಮದಭೀಷ್ಟಮ್ ॥ 72 ॥
ಅನ್ತರಕಕ್ಷ್ಯಾಮನಯೋ-
-ರವಿರಲಶೋಭಾಪಿಚಣ್ಡಿಲೋದ್ದೇಶಾಮ್ ।
ಮಾಣಿಕ್ಯಮಣ್ಡಪಾಖ್ಯಾಂ
ಮಹತೀಮಧಿಹೃದಯಮನಿಶಮಾಕಲಯೇ ॥ 73 ॥
ತತ್ರ ಸ್ಥಿತಂ ಪ್ರಸನ್ನಂ
ತರುಣತಮಾಲಪ್ರವಾಲಕಿರಣಾಭಮ್ ।
ಕರ್ಣಾವಲಮ್ಬಿಕುಣ್ಡಲ-
-ಕನ್ದಲಿತಾಭೀಶುಕವಚಿತಕಪೋಲಮ್ ॥ 74 ॥
ಶೋಣಾಧರಂ ಶುಚಿಸ್ಮಿತ-
-ಮೇಣಾಙ್ಕವದನಮೇಧಮಾನಕೃಪಮ್ ।
ಮುಗ್ಧೈಣಮದವಿಶೇಷಕ-
-ಮುದ್ರಿತನಿಟಿಲೇನ್ದುರೇಖಿಕಾರುಚಿರಮ್ ॥ 75 ॥
ನಾಲೀಕದಲಸಹೋದರ-
-ನಯನಾಞ್ಚಲಘಟಿತಮನಸಿಜಾಕೂತಮ್ ।
ಕಮಲಾಕಠಿನಪಯೋಧರ-
-ಕಸ್ತೂರೀಘುಸೃಣಪಙ್ಕಿಲೋರಸ್ಕಮ್ ॥ 76 ॥
ಚಾಮ್ಪೇಯಗನ್ಧಿಕೈಶ್ಯಂ
ಶಮ್ಪಾಸಬ್ರಹ್ಮಚಾರಿಕೌಶೇಯಮ್ ।
ಶ್ರೀವತ್ಸಕೌಸ್ತುಭಧರಂ
ಶ್ರಿತಜನರಕ್ಷಾಧುರೀಣಚರಣಾಬ್ಜಮ್ ॥ 77 ॥
ಕಮ್ಬುಸುದರ್ಶನವಿಲಸ-
-ತ್ಕರಪದ್ಮಂ ಕಣ್ಠಲೋಲವನಮಾಲಮ್ ।
ಮುಚುಕುನ್ದಮೋಕ್ಷಫಲದಂ
ಮುಕುನ್ದಮಾನನ್ದಕನ್ದಮವಲಮ್ಬೇ ॥ 78 ॥
ತದ್ವರಣೋತ್ತರಭಾಗೇ
ತಾರಾಪತಿಬಿಮ್ಬಚುಮ್ಬಿನಿಜಶೃಙ್ಗಃ ।
ವಿವಿಧಮಣೀಗಣಘಟಿತೋ
ವಿತರತು ಸಾಲೋ ವಿನಿರ್ಮಲಾಂ ಧಿಷಣಾಮ್ ॥ 79 ॥
ಪ್ರಾಕಾರದ್ವಿತಯಾನ್ತರ-
-ಕಕ್ಷ್ಯಾಂ ಪೃಥುರತ್ನನಿಕರಸಙ್ಕೀರ್ಣಾಮ್ ।
ನಮತ ಸಹಸ್ರಸ್ತಮ್ಭಕ-
-ಮಣ್ಡಪನಾಮ್ನಾತಿವಿಶ್ರುತಾಂ ಭುವನೇ ॥ 80 ॥
ಪ್ರಣುಮಸ್ತತ್ರ ಭವಾನೀ-
-ಸಹಚರಮೀಶಾನಮಿನ್ದುಖಣ್ಡಧರಮ್ ।
ಶೃಙ್ಗಾರನಾಯಿಕಾಮನು-
-ಶೀಲನಭಾಜೋಽಪಿ ಭೃಙ್ಗಿನನ್ದಿಮುಖಾನ್ ॥ 81 ॥
ತಸ್ಯೈಣವಾಹಯೋಜನ-
-ದೂರೇ ವನ್ದೇ ಮನೋಮಯಂ ವಪ್ರಮ್ ।
ಅಙ್ಕೂರನ್ಮಣಿಕಿರಣಾ-
-ಮನ್ತರಕಕ್ಷ್ಯಾಂ ಚ ನಿರ್ಮಲಾಮನಯೋಃ ॥ 82 ॥
ತತ್ರೈವಾಮೃತವಾಪೀಂ
ತರಲತರಙ್ಗಾವಲೀಢತಟಯುಗ್ಮಾಮ್ ।
ಮುಕ್ತಾಮಯಕಲಹಂಸೀ-
-ಮುದ್ರಿತಕನಕಾರವಿನ್ದಸನ್ದೋಹಾಮ್ ॥ 83 ॥
ಶಕ್ರೋಪಲಮಯಭೃಙ್ಗೀ-
-ಸಙ್ಗೀತೋನ್ಮೇಷಘೋಷಿತದಿಗನ್ತಾಮ್ ।
ಕಾಞ್ಚನಮಯಾಙ್ಗವಿಲಸ-
-ತ್ಕಾರಣ್ಡವಷಣ್ಡತಾಣ್ಡವಮನೋಜ್ಞಾಮ್ ॥ 84 ॥
ಕುರುವಿನ್ದಾತ್ಮಕಹಲ್ಲಕ-
-ಕೋರಕಸುಷಮಾಸಮೂಹಪಾಟಲಿತಾಮ್ ।
ಕಲಯೇ ಸುಧಾಸ್ವರೂಪಾಂ
ಕನ್ದಲಿತಾಮನ್ದಕೈರವಾಮೋದಾಮ್ ॥ 85 ॥
ತದ್ವಾಪಿಕಾನ್ತರಾಲೇ ತರಲೇ
ಮಣಿಪೋತಸೀಮ್ನಿ ವಿಹರನ್ತೀಮ್ ।
ಸಿನ್ದೂರಪಾಟಲಾಙ್ಗೀಂ
ಸಿತಕಿರಣಾಙ್ಕೂರಕಲ್ಪಿತವತಂಸಾಮ್ ॥ 86 ॥
ಪರ್ವೇನ್ದುಬಿಮ್ಬವದನಾಂ
ಪಲ್ಲವಶೋಣಾಧರಸ್ಫುರಿತಹಾಸಾಮ್ ।
ಕುಟಿಲಕಬರೀಂ ಕುರಙ್ಗೀ-
-ಶಿಶುನಯನಾಂ ಕುಣ್ಡಲಸ್ಫುರಿತಗಣ್ಡಾಮ್ ॥ 87 ॥
ನಿಕಟಸ್ಥಪೋತನಿಲಯಾಃ
ಶಕ್ತೀಃ ಶಯವಿಧೃತಹೇಮಶೃಙ್ಗಜಲೈಃ ।
ಪರಿಷಿಞ್ಚನ್ತೀಂ ಪರಿತ-
-ಸ್ತಾರಾಂ ತಾರುಣ್ಯಗರ್ವಿತಾಂ ವನ್ದೇ ॥ 88 ॥
ಪ್ರಾಗುಕ್ತಸಙ್ಖ್ಯಯೋಜನದೂರೇ
ಪ್ರಣಮಾಮಿ ಬುದ್ಧಿಮಯಸಾಲಮ್ ।
ಅನಯೋರನ್ತರಕಕ್ಷ್ಯಾ-
-ಮಷ್ಟಾಪದಪುಷ್ಟಮೇದಿನೀಂ ರುಚಿರಾಮ್ ॥ 89 ॥
ಕಾದಮ್ಬರೀನಿಧಾನಾಂ
ಕಲಯಾಮ್ಯಾನನ್ದವಾಪಿಕಾಂ ತಸ್ಯಾಮ್ ।
ಶೋಣಾಶ್ಮನಿವಹನಿರ್ಮಿತ-
-ಸೋಪಾನಶ್ರೇಣಿಶೋಭಮಾನತಟೀಮ್ ॥ 90 ॥
ಮಾಣಿಕ್ಯತರಣಿನಿಲಯಾಂ
ಮಧ್ಯೇ ತಸ್ಯಾ ಮದಾರುಣಕಪೋಲಾಮ್ ।
ಅಮೃತೇಶೀತ್ಯಭಿಧಾನಾ-
-ಮನ್ತಃ ಕಲಯಾಮಿ ವಾರುಣೀಂ ದೇವೀಮ್ ॥ 91 ॥
ಸೌವರ್ಣಕೇನಿಪಾತನ-
-ಹಸ್ತಾಃ ಸೌನ್ದರ್ಯಗರ್ವಿತಾ ದೇವ್ಯಃ ।
ತತ್ಪುರತಃ ಸ್ಥಿತಿಭಾಜೋ
ವಿತರನ್ತ್ವಸ್ಮಾಕಮಾಯುಷೋ ವೃದ್ಧಿಮ್ ॥ 92 ॥
ತಸ್ಯ ಪೃಷದಶ್ವಯೋಜನ-
-ದೂರೇಽಹಙ್ಕಾರಸಾಲಮತಿತುಙ್ಗಮ್ ।
ವನ್ದೇ ತಯೋಶ್ಚ ಮಧ್ಯೇ
ಕಕ್ಷ್ಯಾಂ ವಲಮಾನಮಲಯಪವಮಾನಾಮ್ ॥ 93 ॥
ವಿನುಮೋ ವಿಮರ್ಶವಾಪೀಂ
ಸೌಷುಮ್ನಸುಧಾಸ್ವರೂಪಿಣೀಂ ತತ್ರ ।
ವೇಲಾತಿಲಙ್ಘ್ಯವೀಚೀ-
-ಕೋಲಾಹಲಭರಿತಕೂಲವನವಾಟೀಮ್ ॥ 94 ॥
ತತ್ರೈವ ಸಲಿಲಮಧ್ಯೇ
ತಾಪಿಞ್ಛದಲಪ್ರಪಞ್ಚಸುಷಮಾಭಾಮ್ ।
ಶ್ಯಾಮಲಕಞ್ಚುಕಲಸಿತಾಂ
ಶ್ಯಾಮಾವಿಟಬಿಮ್ಬಡಮ್ಬರಹರಾಸ್ಯಾಮ್ ॥ 95 ॥
ಆಭುಗ್ನಮಸೃಣಚಿಲ್ಲೀ-
-ಹಸಿತಾಯುಗ್ಮಶರಕಾರ್ಮುಕವಿಲಾಸಾಮ್ ।
ಮನ್ದಸ್ಮಿತಾಞ್ಚಿತಮುಖೀಂ
ಮಣಿಮಯತಾಟಙ್ಕಮಣ್ಡಿತಕಪೋಲಾಮ್ ॥ 96 ॥
ಕುರುವಿನ್ದತರಣಿನಿಲಯಾಂ
ಕುಲಾಚಲಸ್ಪರ್ಧಿಕುಚನಮನ್ಮಧ್ಯಾಮ್ ।
ಕುಙ್ಕುಮವಿಲಿಪ್ತಗಾತ್ರೀಂ
ಕುರುಕುಲ್ಲಾಂ ಮನಸಿ ಕುರ್ಮಹೇ ಸತತಮ್ ॥ 97 ॥
ತತ್ಸಾಲೋತ್ತರಭಾಗೇ
ಭಾನುಮಯಂ ವಪ್ರಮಾಶ್ರಯೇ ದೀಪ್ತಮ್ ।
ಮಧ್ಯಂ ಚ ವಿಪುಲಮನಯೋ-
-ರ್ಮನ್ಯೇ ವಿಶ್ರಾನ್ತಮಾತಪೋದ್ಗಾರಮ್ ॥ 98 ॥
ತತ್ರ ಕುರುವಿನ್ದಪೀಠೇ
ತಾಮರಸೇ ಕನಕಕರ್ಣಿಕಾಘಟಿತೇ ।
ಆಸೀನಮರುಣವಾಸಸ-
-ಮಮ್ಲಾನಪ್ರಸವಮಾಲಿಕಾಭರಣಮ್ ॥ 99 ॥
ಚಕ್ಷುಷ್ಮತೀಪ್ರಕಾಶನ-
-ಶಕ್ತಿಚ್ಛಾಯಾಸಮಾರಚಿತಕೇಲಿಮ್ ।
ಮಾಣಿಕ್ಯಮುಕುಟರಮ್ಯಂ
ಮನ್ಯೇ ಮಾರ್ತಾಣ್ಡಭೈರವಂ ಹೃದಯೇ ॥ 100 ॥
ಇನ್ದುಮಯಸಾಲಮೀಡೇ
ತಸ್ಯೋತ್ತರತಸ್ತುಷಾರಗಿರಿಗೌರಮ್ ।
ಅತ್ಯನ್ತಶಿಶಿರಮಾರುತ-
-ಮನಯೋರ್ಮಧ್ಯಂ ಚ ಚನ್ದ್ರಿಕೋದ್ಗಾರಮ್ ॥ 101 ॥
ತತ್ರ ಪ್ರಕಾಶಮಾನಂ
ತಾರಾನಿಕರೈಃ ಪರಿಷ್ಕೃತೋದ್ದೇಶಮ್ ।
ಅಮೃತಮಯಕಾನ್ತಿಕನ್ದಲ-
-ಮನ್ತಃ ಕಲಯಾಮಿ ಕುನ್ದಸಿತಮಿನ್ದುಮ್ ॥ 102 ॥
ಶೃಙ್ಗಾರಸಾಲಮೀಡೇ
ಶೃಙ್ಗೋಲ್ಲಸಿತಂ ತದುತ್ತರೇ ಭಾಗೇ ।
ಮಧ್ಯಸ್ಥಲೇ ತಯೋರಪಿ
ಮಹಿತಾಂ ಶೃಙ್ಗಾರಪೂರ್ವಿಕಾಂ ಪರಿಖಾಮ್ ॥ 103 ॥
ತತ್ರ ಮಣಿನೌಸ್ಥಿತಾಭಿ-
-ಸ್ತಪನೀಯಾವಿರಚಿತಾಗ್ರಹಸ್ತಾಭಿಃ ।
ಶೃಙ್ಗಾರದೇವತಾಭಿಃ
ಸಹಿತಂ ಪರಿಖಾಧಿಪಂ ಭಜೇ ಮದನಮ್ ॥ 104 ॥
ಶೃಙ್ಗಾರವರಣವರ್ಯಸ್ಯೋತ್ತರತಃ
ಸಕಲವಿಬುಧಸಂಸೇವ್ಯಮ್ ।
ಚಿನ್ತಾಮಣಿಗಣರಚಿತಂ
ಚಿನ್ತಾಂ ದೂರೀಕರೋತು ಮೇ ಸದನಮ್ ॥ 105 ॥
ಮಣಿಸದನಸಾಲಯೋರಧಿ-
-ಮಧ್ಯಂ ದಶತಾಲಭೂಮಿರುಹದೀರ್ಘೈಃ ।
ಪರ್ಣೈಃ ಸುವರ್ಣವರ್ಣೈ-
-ರ್ಯುಕ್ತಾಂ ಕಾಣ್ಡೈಶ್ಚ ಯೋಜನೋತ್ತುಙ್ಗೈಃ ॥ 106 ॥
ಮೃದುಲೈಸ್ತಾಲೀಪಞ್ಚಕ-
-ಮಾನೈರ್ಮಿಲಿತಾಂ ಚ ಕೇಸರಕದಮ್ಬೈಃ ।
ಸನ್ತತಗಲಿತಮರನ್ದ-
-ಸ್ರೋತೋನಿರ್ಯನ್ಮಿಲಿನ್ದಸನ್ದೋಹಾಮ್ ॥ 107 ॥
ಪಾಟೀರಪವನಬಾಲಕ-
-ಧಾಟೀನಿರ್ಯತ್ಪರಾಗಪಿಞ್ಜರಿತಾಮ್ ।
ಕಲಹಂಸೀಕುಲಕಲಕಲ-
-ಕೂಲಙ್ಕಷನಿನದನಿಚಯಕಮನೀಯಾಮ್ ॥ 108 ॥
ಪದ್ಮಾಟವೀಂ ಭಜಾಮಃ
ಪರಿಮಲಕಲ್ಲೋಲಪಕ್ಷ್ಮಲೋಪಾನ್ತಾಮ್ ।
[ ದೇವ್ಯರ್ಘ್ಯಪಾತ್ರಧಾರೀ
ತಸ್ಯಾಃ ಪೂರ್ವದಿಶಿ ದಶಕಲಾಯುಕ್ತಃ । ]
ವಲಯಿತಮೂರ್ತಿರ್ಭಗವಾ-
-ನ್ವಹ್ನಿಃ ಕ್ರೋಶೋನ್ನತಶ್ಚಿರಂ ಪಾಯಾತ್ ॥ 109 ॥
ತತ್ರಾಧಾರೇ ದೇವ್ಯಾಃ
ಪಾತ್ರೀರೂಪಃ ಪ್ರಭಾಕರಃ ಶ್ರೀಮಾನ್ ।
ದ್ವಾದಶಕಲಾಸಮೇತೋ
ಧ್ವಾನ್ತಂ ಮಮ ಬಹುಲಮಾನ್ತರಂ ಭಿನ್ದ್ಯಾತ್ ॥ 110 ॥
ತಸ್ಮಿನ್ ದಿನೇಶಪಾತ್ರೇ
ತರಙ್ಗಿತಾಮೋದಮಮೃತಮಯಮರ್ಘ್ಯಮ್ ।
ಚನ್ದ್ರಕಲಾತ್ಮಕಮಮೃತಂ
ಸಾನ್ದ್ರೀಕುರ್ಯಾದಮನ್ದಮಾನನ್ದಮ್ ॥ 111 ॥
ಅಮೃತೇ ತಸ್ಮಿನ್ನಭಿತೋ
ವಿಹರನ್ತ್ಯೋ ವಿವಿಧಮಣಿತರಣಿಭಾಜಃ ।
ಷೋಡಶ ಕಲಾಃ ಸುಧಾಂಶೋಃ
ಶೋಕಾದುತ್ತಾರಯನ್ತು ಮಾಮನಿಶಮ್ ॥ 112 ॥
ತತ್ರೈವ ವಿಹೃತಿಭಾಜೋ
ಧಾತೃಮುಖಾನಾಂ ಚ ಕಾರಣೇಶಾನಾಮ್ ।
ಸೃಷ್ಟ್ಯಾದಿರೂಪಿಕಾಸ್ತಾಃ
ಶಮಯನ್ತ್ವಖಿಲಾಃ ಕಲಾಶ್ಚ ಸನ್ತಾಪಮ್ ॥ 113 ॥
ಕೀನಾಶವರುಣಕಿನ್ನರ-
-ರಾಜದಿಗನ್ತೇಷು ರತ್ನಗೇಹಸ್ಯ ।
ಕಲಯಾಮಿ ತಾನ್ಯಜಸ್ರಂ
ಕಲಯನ್ತ್ವಾಯುಷ್ಯಮರ್ಘ್ಯಪಾತ್ರಾಣಿ ॥ 114 ॥
ಪಾತ್ರಸ್ಥಲಸ್ಯ ಪುರತಃ
ಪದ್ಮಾರಮಣವಿಧಿಪಾರ್ವತೀಶಾನಾಮ್ ।
ಭವನಾನಿ ಶರ್ಮಣೇ ನೋ
ಭವನ್ತು ಭಾಸಾ ಪ್ರದೀಪಿತಜಗನ್ತಿ ॥ 115 ॥
ಸದನಸ್ಯಾನಲಕೋಣೇ
ಸತತಂ ಪ್ರಣಮಾಮಿ ಕುಣ್ಡಮಾಗ್ನೇಯಮ್ ।
ತತ್ರ ಸ್ಥಿತಂ ಚ ವಹ್ನಿಂ
ತರಲಶಿಖಾಜಟಿಲಮಮ್ಬಿಕಾಜನಕಮ್ ॥ 116 ॥
ತಸ್ಯಾಸುರದಿಶಿ ತಾದೃಶ-
-ರತ್ನಪರಿಸ್ಫುರಿತಪರ್ವನವಕಾಢ್ಯಮ್ ।
ಚಕ್ರಾತ್ಮಕಂ ಶತಾಙ್ಗಂ
ಶತಯೋಜನಮುನ್ನತಂ ಭಜೇ ದಿವ್ಯಮ್ ॥ 117 ॥
ತತ್ರೈವ ದಿಶಿ ನಿಷಣ್ಣಂ
ತಪನೀಯಧ್ವಜಪರಮ್ಪರಾಶ್ಲಿಷ್ಟಮ್ ।
ರಥಮಪರಂ ಚ ಭವಾನ್ಯಾ
ರಚಯಾಮೋ ಮನಸಿ ರತ್ನಮಯಚೂಡಮ್ ॥ 118 ॥
ಭವನಸ್ಯ ವಾಯುಭಾಗೇ
ಪರಿಷ್ಕೃತೋ ವಿವಿಧವೈಜಯನ್ತೀಭಿಃ ।
ರಚಯತು ಮುದಂ ರಥೇನ್ದ್ರಃ
ಸಚಿವೇಶಾನ್ಯಾಃ ಸಮಸ್ತವನ್ದ್ಯಾಯಾಃ ॥ 119 ॥
ಕುರ್ಮೋಽಧಿಹೃದಯಮನಿಶಂ
ಕ್ರೋಡಾಸ್ಯಾಯಾಃ ಶತಾಙ್ಗಮೂರ್ಧನ್ಯಮ್ ।
ರುದ್ರದಿಶಿ ರತ್ನಧಾಮ್ನೋ
ರುಚಿರಶಲಾಕಾಪ್ರಪಞ್ಚಕಞ್ಚುಕಿತಮ್ ॥ 120 ॥
ಪರಿತೋ ದೇವೀಧಾಮ್ನಃ
ಪ್ರಣೀತವಾಸಾ ಮನುಸ್ವರೂಪಿಣ್ಯಃ ।
ಕುರ್ವನ್ತು ರಶ್ಮಿಮಾಲಾ-
-ಕೃತಯಃ ಕುಶಲಾನಿ ದೇವತಾ ನಿಖಿಲಾಃ ॥ 121 ॥
ಪ್ರಾಗ್ದ್ವಾರಸ್ಯ ಭವಾನೀ-
-ಧಾಮ್ನಃ ಪಾರ್ಶ್ವದ್ವಯಾರಚಿತವಾಸೇ ।
ಮಾತಙ್ಗೀಕಿಟಿಮುಖ್ಯೌ
ಮಣಿಸದನೇ ಮನಸಿ ಭಾವಯಾಮಿ ಚಿರಮ್ ॥ 122 ॥
ಯೋಜನಯುಗಲಾಭೋಗಾ
ತತ್ಕ್ರೋಶಪರಿಣಾಹಯೈವ ಭಿತ್ತ್ಯಾ ಚ ।
ಚಿನ್ತಾಮಣಿಗೃಹಭೂಮಿ-
-ರ್ಜೀಯಾದಾಮ್ನಾಯಮಯಚತುರ್ದ್ವಾರಾ ॥ 123 ॥
ದ್ವಾರೇ ದ್ವಾರೇ ಧಾಮ್ನಃ
ಪಿಣ್ಡೀಭೂತಾ ನವೀನಬಿಮ್ಬಾಭಾಃ ।
ವಿದಧತು ವಿಪುಲಾಂ ಕೀರ್ತಿಂ
ದಿವ್ಯಾ ಲೌಹಿತ್ಯಸಿದ್ಧ್ಯೋ ದೇವ್ಯಃ ॥ 124 ॥
ಮಣಿಸದನಸ್ಯಾನ್ತರತೋ
ಮಹನೀಯೇ ರತ್ನವೇದಿಕಾಮಧ್ಯೇ ।
ಬಿನ್ದುಮಯಚಕ್ರಮೀಡೇ
ಪೀಠಾನಾಮುಪರಿ ವಿರಚಿತಾವಾಸಮ್ ॥ 125 ॥
ಚಕ್ರಾಣಾಂ ಸಕಲಾನಾಂ
ಪ್ರಥಮಮಧಃ ಸೀಮಫಲಕವಾಸ್ತವ್ಯಾಃ ।
ಅಣಿಮಾದಿಸಿದ್ಧಯೋ ಮಾ-
-ಮವನ್ತು ದೇವೀ ಪ್ರಭಾಸ್ವರೂಪಿಣ್ಯಃ ॥ 126 ॥
ಅಣಿಮಾದಿಸಿದ್ಧಿಫಲಕ-
-ಸ್ಯೋಪರಿಹರಿಣಾಙ್ಕಖಣ್ಡಕೃತಚೂಡಾಃ ।
ಭದ್ರಂ ಪಕ್ಷ್ಮಲಯನ್ತು
ಬ್ರಾಹ್ಮೀಪ್ರಮುಖಾಶ್ಚ ಮಾತರೋಽಸ್ಮಾಕಮ್ ॥ 127 ॥
ತಸ್ಯೋಪರಿ ಮಣಿಫಲಕೇ
ತಾರುಣ್ಯೋತ್ತುಙ್ಗಪೀನಕುಚಭಾರಾಃ ।
ಸಙ್ಕ್ಷೋಭಿಣೀಪ್ರಧಾನಾಃ
ಭ್ರಾನ್ತಿ ವಿದ್ರಾವಯನ್ತು ದಶ ಮುದ್ರಾಃ ॥ 128 ॥
ಫಲಕತ್ರಯಸ್ವರೂಪೇ
ಪೃಥುಲೇ ತ್ರೈಲೋಕ್ಯಮೋಹನೇ ಚಕ್ರೇ ।
ದೀವ್ಯನ್ತು ಪ್ರಕಟಾಖ್ಯಾ-
-ಸ್ತಾಸಾಂ ಕರ್ತ್ರೀಂ ಚ ಭಗವತೀ ತ್ರಿಪುರಾ ॥ 129 ॥
ತದುಪರಿ ವಿಪುಲೇ ಧಿಷ್ಣ್ಯೇ
ತರಲದೃಶಸ್ತರುಣಕೋಕನದಭಾಸಃ ।
ಕಾಮಾಕರ್ಷಿಣ್ಯಾದ್ಯಾಃ
ಕಲಯೇ ದೇವೀಃ ಕಲಾಧರಶಿಖಣ್ಡಾಃ ॥ 130 ॥
ಸರ್ವಾಶಾಪರಿಪೂರಕಚಕ್ರೇ-
-ಽಸ್ಮಿನ್ ಗುಪ್ತಯೋಗಿನೀಸೇವ್ಯಾಃ ।
ತ್ರಿಪುರೇಶೀ ಮಮ ದುರಿತಂ
ತುದ್ಯಾತ್ ಕಣ್ಠಾವಲಮ್ಬಿಮಣಿಹಾರಾ ॥ 131 ॥
ತಸ್ಯೋಪರಿ ಮಣಿಪೀಠೇ
ತಾಮ್ರಾಮ್ಭೋರುಹದಲಪ್ರಭಾಶೋಣಾಃ ।
ಧ್ಯಾಯಾಮ್ಯನಙ್ಗಕುಸುಮಾ-
-ಪ್ರಮುಖಾ ದೇವೀಶ್ಚ ವಿಧೃತಕೂರ್ಪಾಸಾಃ ॥ 132 ॥
ಸಙ್ಕ್ಷೋಭಕಾರಕೇಽಸ್ಮಿಂ-
-ಶ್ಚಕ್ರೇ ಶ್ರೀತ್ರಿಪುರಸುನ್ದರೀ ಸಾಕ್ಷಾತ್ ।
ಗೋಪ್ತ್ರೀ ಗುಪ್ತತರಾಖ್ಯಾಃ
ಗೋಪಾಯತು ಮಾಂ ಕೃಪಾರ್ದ್ರಯಾ ದೃಷ್ಟ್ಯಾ ॥ 133 ॥
ಸಙ್ಕ್ಷೋಭಿಣೀಪ್ರಧಾನಾಃ
ಶಕ್ತೀಸ್ತಸ್ಯೋರ್ಧ್ವವಲಯಕೃತವಾಸಾಃ ।
ಆಲೋಲನೀಲವೇಣೀ-
-ರನ್ತಃ ಕಲಯಾಮಿ ಯೌವನೋನ್ಮತ್ತಾಃ ॥ 134 ॥
ಸೌಭಾಗ್ಯದಾಯಕೇಽಸ್ಮಿಂ-
-ಶ್ಚಕ್ರೇಶೀ ತ್ರಿಪುರವಾಸಿನೀ ಜೀಯಾತ್ ।
ಶಕ್ತೀಶ್ಚ ಸಮ್ಪ್ರದಾಯಾಭಿಧಾಃ
ಸಮಸ್ತಾಃ ಪ್ರಮೋದಯನ್ತ್ವನಿಶಮ್ ॥ 135 ॥
ಮಣಿಪೀಠೋಪರಿ ತಾಸಾಂ
ಮಹತಿ ಚತುರ್ಹಸ್ತವಿಸ್ತೃತೇ ವಲಯೇ ।
ಸನ್ತತವಿರಚಿತವಾಸಾಃ
ಶಕ್ತೀಃ ಕಲಯಾಮಿ ಸರ್ವಸಿದ್ಧಿಮುಖಾಃ ॥ 136 ॥
ಸರ್ವಾರ್ಥಸಾಧಕಾಖ್ಯೇ
ಚಕ್ರೇಽಮುಷ್ಮಿನ್ ಸಮಸ್ತಫಲದಾತ್ರೀ ।
ತ್ರಿಪುರಾ ಶ್ರೀರ್ಮಮ ಕುಶಲಂ
ದಿಶತಾದುತ್ತೀರ್ಣಯೋಗಿನೀಸೇವ್ಯಾ ॥ 137 ॥
ತಾಸಾಂ ನಿಲಯಸ್ಯೋಪರಿ
ಧಿಷ್ಣ್ಯೇ ಕೌಸುಮ್ಭಕಞ್ಚುಕಮನೋಜ್ಞಾಃ ।
ಸರ್ವಾಜ್ಞಾದ್ಯಾಃ ದೇವ್ಯಃ
ಸಕಲಾಃ ಸಮ್ಪಾದಯನ್ತು ಮಮ ಕೀರ್ತಿಮ್ ॥ 138 ॥
ಚಕ್ರೇ ಸಮಸ್ತರಕ್ಷಾ-
-ಕರನಾಮ್ನ್ಯಸ್ಮಿನ್ ಸಮಸ್ತಜನಸೇವ್ಯಾಮ್ ।
ಮನಸಿ ನಿಗರ್ಭಾಸಹಿತಾಂ
ಮನ್ಯೇ ಶ್ರೀತ್ರಿಪುರಮಾಲಿನೀಂ ದೇವೀಮ್ ॥ 139 ॥
ಸರ್ವಜ್ಞಾಸದನಸ್ಯೋಪರಿ
ಚಕ್ರೇ ವಿಪುಲೇ ಸಮಾಕಲಿತಗೇಹಾಃ ।
ವನ್ದೇ ವಶಿನೀಮುಖ್ಯಾಃ
ಶಕ್ತೀಃ ಸಿನ್ದೂರರೇಣುರುಚಃ ॥ 140 ॥
ಶ್ರೀಸರ್ವರೋಗಹರಾಖ್ಯ-
-ಚಕ್ರೇಽಸ್ಮಿಂಸ್ತ್ರಿಪುರಪೂರ್ವಿಕಾಂ ಸಿದ್ಧಾಮ್ ।
ವನ್ದೇ ರಹಸ್ಯನಾಮ್ನಾ
ವೇದ್ಯಾಭಿಃ ಶಕ್ತಿಭಿಃ ಸದಾ ಸೇವ್ಯಾಮ್ ॥ 141 ॥
ವಶಿನೀಗೃಹೋಪರಿಷ್ಟಾ-
-ದ್ವಿಂಶತಿಹಸ್ತೋನ್ನತೇ ಮಹಾಪೀಠೇ ।
ಶಮಯನ್ತು ಶತ್ರುಬೃನ್ದಂ
ಶಸ್ತ್ರಾಣ್ಯಸ್ತ್ರಾಣಿ ಚಾದಿದಮ್ಪತ್ಯೋಃ ॥ 142 ॥
ಶಸ್ತ್ರಸದನೋಪರಿಷ್ಟಾ-
-ದ್ವಲಯೇ ವಲವೈರಿರತ್ನಸಙ್ಘಟಿತೇ ।
ಕಾಮೇಶ್ವರೀಪ್ರಧಾನಾಃ
ಕಲಯೇ ದೇವೀಃ ಸಮಸ್ತಜನವನ್ದ್ಯಾಃ ॥ 143 ॥
ಚಕ್ರೇಽತ್ರ ಸರ್ವಸಿದ್ಧಿಪ್ರದ-
-ನಾಮನಿ ಸರ್ವಫಲದಾತ್ರೀ ।
ತ್ರಿಪುರಾಮ್ಬಾವತು ಸತತಂ
ಪರಾಪರರಹಸ್ಯಯೋಗಿನೀಸೇವ್ಯಾ ॥ 144 ॥
ಕಾಮೇಶ್ವರೀಗೃಹೋಪರಿವಲಯೇ
ವಿವಿಧಮನುಸಮ್ಪ್ರದಾಯಜ್ಞಾಃ ।
ಚತ್ವಾರೋ ಯುಗನಾಥಾ
ಜಯನ್ತು ಮಿತ್ರೇಶಪೂರ್ವಕಾಃ ಗುರವಃ ॥ 145 ॥
ನಾಥಭವನೋಪರಿಷ್ಟಾ-
-ನ್ನಾನಾರತ್ನಚಯಮೇದುರೇ ಪೀಠೇ ।
ಕಾಮೇಶ್ಯಾದ್ಯಾ ನಿತ್ಯಾಃ
ಕಲಯನ್ತು ಮುದಂ ತಿಥಿಸ್ವರೂಪಿಣ್ಯಃ ॥ 146 ॥
ನಿತ್ಯಾಸದನಸ್ಯೋಪರಿ
ನಿರ್ಮಲಮಣಿನಿವಹವಿರಚಿತೇ ಧಿಷ್ಣ್ಯೇ ।
ಕುಶಲಂ ಷಡಙ್ಗದೇವ್ಯಃ
ಕಲಯನ್ತ್ವಸ್ಮಾಕಮುತ್ತರಲನೇತ್ರಾಃ ॥ 147 ॥
ಸದನಸ್ಯೋಪರಿ ತಾಸಾಂ
ಸರ್ವಾನನ್ದಮಯನಾಮಕೇ ಬಿನ್ದೌ ।
ಪಞ್ಚಬ್ರಹ್ಮಾಕಾರಾಂ
ಮಞ್ಚಂ ಪ್ರಣಮಾಮಿ ಮಣಿಗಣಾಕೀರ್ಣಮ್ ॥ 148 ॥
ಪರಿತೋ ಮಣಿಮಞ್ಚಸ್ಯ
ಪ್ರಲಮ್ಬಮಾನಾ ನಿಯನ್ತ್ರಿತಾ ಪಾಶೈಃ ।
ಮಾಯಾಮಯೀ ಜವನಿಕಾ
ಮಮ ದುರಿತಂ ಹರತು ಮೇಚಕಚ್ಛಾಯಾ ॥ 149 ॥
ಮಞ್ಚಸ್ಯೋಪರಿ ಲಮ್ಬ-
-ನ್ಮದನೀಪುನ್ನಾಗಮಾಲಿಕಾಭರಿತಮ್ ।
ಹರಿಗೋಪಮಯವಿತಾನಂ
ಹರತಾದಾಲಸ್ಯಮನಿಶಮಸ್ಮಾಕಮ್ ॥ 150 ॥
ಪರ್ಯಙ್ಕಸ್ಯ ಭಜಾಮಃ
ಪಾದಾನ್ಬಿಮ್ಬಾಮ್ಬುದೇನ್ದುಹೇಮರುಚಃ ।
ಅಜಹರಿರುದ್ರೇಶಮಯಾ-
-ನನಲಾಸುರಮಾರುತೇಶಕೋಣಸ್ಥಾನ್ ॥ 151 ॥
ಫಲಕಂ ಸದಾಶಿವಮಯಂ
ಪ್ರಣೌಮಿ ಸಿನ್ದೂರರೇಣುಕಿರಣಾಭಮ್ ।
ಆರಭ್ಯಾಙ್ಗೇಶೀನಾಂ
ಸದನಾತ್ಕಲಿತಂ ಚ ರತ್ನಸೋಪಾನಮ್ ॥ 152 ॥
ಪಟ್ಟೋಪಧಾನಗಣ್ಡಕ-
-ಚತುಷ್ಟಯಸ್ಫುರಿತಪಾಟಲಾಸ್ತರಣಮ್ ।
ಪರ್ಯಙ್ಕೋಪರಿ ಘಟಿತಂ
ಪಾತು ಚಿರಂ ಹಂಸತೂಲಶಯನಂ ನಃ ॥ 153 ॥
ತಸ್ಯೋಪರಿ ನಿವಸನ್ತಂ
ತಾರುಣ್ಯಶ್ರೀನಿಷೇವಿತಂ ಸತತಮ್ ।
ಆವೃನ್ತಪುಲ್ಲಹಲ್ಲಕ-
-ಮರೀಚಿಕಾಪುಞ್ಜಮಞ್ಜುಲಚ್ಛಾಯಮ್ ॥ 154 ॥
ಸಿನ್ದೂರಶೋಣವಸನಂ
ಶೀತಾಂಶುಸ್ತಬಕಚುಮ್ಬಿತಕಿರೀಟಮ್ ।
ಕುಙ್ಕುಮತಿಲಕಮನೋಹರ-
-ಕುಟಿಲಾಲಿಕಹಸಿತಕುಮುದಬನ್ಧುಶಿಶುಮ್ ॥ 155 ॥
ಪೂರ್ಣೇನ್ದುಬಿಮ್ಬವದನಂ
ಫುಲ್ಲಸರೋಜಾತಲೋಚನತ್ರಿತಯಮ್ ।
ತರಲಾಪಾಙ್ಗತರಙ್ಗಿತ-
-ಶಫರಾಙ್ಕನಶಾಸ್ತ್ರಸಮ್ಪ್ರದಾಯಾರ್ಥಮ್ ॥ 156 ॥
ಮಣಿಮಯಕುಣ್ಡಲಪುಷ್ಯ-
-ನ್ಮರೀಚಿಕಲ್ಲೋಲಮಾಂಸಲಕಪೋಲಮ್ ।
ವಿದ್ರುಮಸಹೋದರಾಧರ-
-ವಿಸೃಮರಸುಸ್ಮಿತಕಿಶೋರಸಞ್ಚಾರಮ್ ॥ 157 ॥
ಆಮೋದಿಕುಸುಮಶೇಖರ-
-ಮಾನೀಲಭ್ರೂಲತಾಯುಗಮನೋಜ್ಞಮ್ ।
ವೀಟೀಸೌರಭವೀಚೀ-
-ದ್ವಿಗುಣಿತವಕ್ತ್ರಾರವಿನ್ದಸೌರಭ್ಯಮ್ ॥ 158 ॥
ಪಾಶಾಙ್ಕುಶೇಕ್ಷುಚಾಪ-
-ಪ್ರಸವಶರಸ್ಫುರಿತಕೋಮಲಕರಾಬ್ಜಮ್ ।
ಕಾಶ್ಮೀರಪಙ್ಕಿಲಾಙ್ಗಂ
ಕಾಮೇಶಂ ಮನಸಿ ಕುರ್ಮಹೇ ಸತತಮ್ ॥ 159 ॥
ತಸ್ಯಾಙ್ಕಭುವಿ ನಿಷಣ್ಣಾಂ
ತರುಣಕದಮ್ಬಪ್ರಸೂನಕಿರಣಾಭಾಮ್ ।
ಶೀತಾಂಶುಖಣ್ಡಚೂಡಾಂ
ಸೀಮನ್ತನ್ಯಸ್ತಸಾನ್ದ್ರಸಿನ್ದೂರಾಮ್ ॥ 160 ॥
ಕುಙ್ಕುಮಲಲಾಮಭಾಸ್ವ-
-ನ್ನಿಟಿಲಾಂ ಕುಟಿಲತರಚಿಲ್ಲಿಕಾಯುಗಲಾಮ್ ।
ನಾಲೀಕತುಲ್ಯನಯನಾಂ
ನಾಸಾಞ್ಚಲನಟಿತಮೌಕ್ತಿಕಾಭರಣಾಮ್ ॥ 161 ॥
ಅಙ್ಕುರಿತಮನ್ದಹಾಸ-
-ಮರುಣಾಧರಕಾನ್ತಿವಿಜಿತಬಿಮ್ಬಾಭಾಮ್ ।
ಕಸ್ತೂರೀಮಕರೀಯುತ-
-ಕಪೋಲಸಙ್ಕ್ರಾನ್ತಕನಕತಾಟಙ್ಕಾಮ್ ॥ 162 ॥
ಕರ್ಪೂರಸಾನ್ದ್ರವೀಟೀ-
-ಕಬಲಿತವದನಾರವಿನ್ದಕಮನೀಯಾಮ್ ।
ಕಮ್ಬುಸಹೋದರಕಣ್ಠ-
-ಪ್ರಲಮ್ಬಮಾನಾಚ್ಛಮೌಕ್ತಿಕಕಲಾಪಾಮ್ ॥ 163 ॥
ಕಹ್ಲಾರದಾಮಕೋಮಲ-
-ಭುಜಯುಗಲಸ್ಫುರಿತರತ್ನಕೇಯೂರಾಮ್ ।
ಕರಪದ್ಮಮೂಲವಿಲಸ-
-ತ್ಕಾಞ್ಚನಮಯಕಟಕವಲಯಸನ್ದೋಹಾಮ್ ॥ 164 ॥
ಪಾಣಿಚತುಷ್ಟಯವಿಲಸ-
-ತ್ಪಾಶಾಙ್ಕುಶಪುಣ್ಡ್ರಚಾಪಪುಷ್ಪಾಸ್ತ್ರಾಮ್ ।
ಕೂಲಙ್ಕಷಕುಚಶಿಖರಾಂ
ಕುಙ್ಕುಮಕರ್ದಮಿತರತ್ನಕೂರ್ಪಾಸಾಮ್ ॥ 165 ॥
ಅಣುದಾಯಾದವಲಗ್ನಾ-
-ಮಮ್ಬುದಶೋಭಾಸನಾಭಿರೋಮಲತಾಮ್ ।
ಮಾಣಿಕ್ಯಖಚಿತಕಾಞ್ಚೀ-
-ಮರೀಚಿಕಾಕ್ರಾನ್ತಮಾಂಸಲನಿತಮ್ಬಾಮ್ ॥ 166 ॥
ಕರಭೋರುಕಾಣ್ಡಯುಗಲಾಂ
ಜಙ್ಘಾಜಿತಕಾಮಜೈತ್ರತೂಣೀರಾಮ್ ।
ಪ್ರಪದಪರಿಭೂತಕೂರ್ಮಾಂ
ಪಲ್ಲವಸಚ್ಛಾಯಪದಯುಗಮನೋಜ್ಞಾಮ್ ॥ 167 ॥
ಕಮಲಭವಕಞ್ಜಲೋಚನ-
-ಕಿರೀಟರತ್ನಾಂಶುರಞ್ಜಿತಪದಾಬ್ಜಾಮ್ ।
ಉನ್ಮಸ್ತಕಾನುಕಮ್ಪಾ-
-ಮುತ್ತರಲಾಪಾಙ್ಗಪೋಷಿತಾನಙ್ಗಾಮ್ ॥ 168 ॥
ಆದಿಮರಸಾವಲಮ್ಬಾ-
-ಮನಿದಂ ಪ್ರಥಮೋಕ್ತಿವಲ್ಲರೀಕಲಿಕಾಮ್ ।
ಆಬ್ರಹ್ಮಕೀಟಜನನೀ-
-ಮನ್ತಃ ಕಲಯಾಮಿ ಸುನ್ದರೀಮನಿಶಮ್ ॥ 169 ॥
ಕಸ್ತು ಕ್ಷಿತೌ ಪಟೀಯಾ-
-ನ್ವಸ್ತು ಸ್ತೋತುಂ ಶಿವಾಙ್ಕವಾಸ್ತವ್ಯಮ್ ।
ಅಸ್ತು ಚಿರನ್ತನಸುಕೃತೈಃ
ಪ್ರಸ್ತುತಕಾಮ್ಯಾಯ ತನ್ಮಮ ಪುರಸ್ತಾತ್ ॥ 170 ॥
ಪ್ರಭುಸಮ್ಮಿತೋಕ್ತಿಗಮ್ಯಂ
ಪರಮಶಿವೋತ್ಸಙ್ಗತುಙ್ಗಪರ್ಯಙ್ಕಮ್ ।
ತೇಜಃ ಕಿಞ್ಚನ ದಿವ್ಯಂ
ಪುರತೋ ಮೇ ಭವತು ಪುಣ್ಡ್ರಕೋದಣ್ಡಮ್ ॥ 171 ॥
ಮಧುರಿಮಭರಿತಶರಾಸಂ
ಮಕರನ್ದಸ್ಯನ್ದಿಮಾರ್ಗಣೋದಾರಮ್ ।
ಕೈರವಿಣೀವಿಟಚೂಡಂ
ಕೈವಲ್ಯಾಯಾಸ್ತು ಕಿಞ್ಚನ ಮಹೋ ನಃ ॥ 172 ॥
ಅಕ್ಷುದ್ರಮಿಕ್ಷುಚಾಪಂ
ಪರೋಕ್ಷಮವಲಗ್ನಸೀಮ್ನಿ ತ್ರ್ಯಕ್ಷಮ್ ।
ಕ್ಷಪಯತು ಮೇ ಕ್ಷೇಮೇತರ-
-ಮುಕ್ಷರಥಪ್ರೇಮಪಕ್ಷ್ಮಲಂ ತೇಜಃ ॥ 173 ॥
ಭೃಙ್ಗರುಚಿಸಙ್ಗರಕರಾಪಾಙ್ಗಂ
ಶೃಙ್ಗಾರತುಙ್ಗಮರುಣಾಙ್ಗಮ್ ।
ಮಙ್ಗಲಮಭಙ್ಗುರಂ ಮೇ
ಘಟಯತು ಗಙ್ಗಾಧರಾಙ್ಗಸಙ್ಗಿ ಮಹಃ ॥ 174 ॥
ಪ್ರಪದಾಜಿತಕೂರ್ಮಮೂರ್ಜಿತ-
-ಕರುಣಂ ಭರ್ಮರುಚಿನಿರ್ಮಥನದೇಹಮ್ ।
ಶ್ರಿತವರ್ಮ ಮರ್ಮ ಶಮ್ಭೋಃ
ಕಿಞ್ಚನ ಮಮ ನರ್ಮ ಶರ್ಮ ನಿರ್ಮಾತು ॥ 175 ॥
ಕಾಲಕುರಲಾಲಿಕಾಲಿಮ-
-ಕನ್ದಲವಿಜಿತಾಲಿ ವಿಧೃತಮಣಿವಾಲಿ ।
ಮಿಲತು ಹೃದಿ ಪುಲಿನಜಘನಂ
ಬಹುಲಿತಗಲಗರಲಕೇಲಿ ಕಿಮಪಿ ಮಹಃ ॥ 176 ॥
ಕುಙ್ಕುಮತಿಲಕಿತಫಾಲಾ
ಕುರುವಿನ್ದಚ್ಛಾಯಪಾಟಲದುಕೂಲಾ ।
ಕರುಣಾಪಯೋಧಿವೇಲಾ
ಕಾಚನ ಚಿತ್ತೇ ಚಕಾಸ್ತು ಮೇ ಲೀಲಾ ॥ 177 ॥
ಪುಷ್ಪನ್ಧಯರುಚಿವೇಣ್ಯಃ
ಪುಲಿನಾಭೋಗತ್ರಪಾಕರಶ್ರೇಣ್ಯಃ ।
ಜೀಯಾಸುರಿಕ್ಷುಪಾಣ್ಯಃ
ಕಾಶ್ಚನ ಕಾಮಾರಿಕೇಲಿಸಾಕ್ಷಿಣ್ಯಃ ॥ 178 ॥
ತಪನೀಯಾಂಶುಕಭಾಂಸಿ
ದ್ರಾಕ್ಷಾಮಾಧುರ್ಯನಾಸ್ತಿಕವಚಾಂಸಿ ।
ಕತಿಚನ ಶುಚಂ ಮಹಾಂಸಿ
ಕ್ಷಪಯತು ಕಪಾಲಿತೋಷಿತಮನಾಂಸಿ ॥ 179 ॥
ಅಸಿತಕಚಮಾಯತಾಕ್ಷಂ
ಕುಸುಮಶರಂ ಕೂಲಮುದ್ವಹಕೃಪಾರ್ದ್ರಮ್ ।
ಆದಿಮರಸಾಧಿದೈವತ-
-ಮನ್ತಃ ಕಲಯೇ ಹರಾಙ್ಕವಾಸಿ ಮಹಃ ॥ 180 ॥
ಕರ್ಣೋಪಾನ್ತತರಙ್ಗಿತ-
-ಕಟಾಕ್ಷವಿಸ್ಪನ್ದಿಕಣ್ಠದಘ್ನಕೃಪಾಮ್ ।
ಕಾಮೇಶ್ವರಾಙ್ಕನಿಲಯಾಂ
ಕಾಮಪಿ ವಿದ್ಯಾಂ ಪುರಾತನೀಂ ಕಲಯೇ ॥ 181 ॥
ಅರವಿನ್ದಕಾನ್ತ್ಯರುನ್ತುದ-
-ವಿಲೋಚನದ್ವನ್ದ್ವಸುನ್ದರಮುಖೇನ್ದು ।
ಛನ್ದಃ ಕನ್ದಲಮನ್ದಿರ-
-ಮನ್ತಃಪುರಮೈನ್ದುಶೇಖರಂ ವನ್ದೇ ॥ 182 ॥
ಬಿಮ್ಬಿನಿಕುರಮ್ಬಡಮ್ಬರ-
-ವಿಡಮ್ಬಕಚ್ಛಾಯಮಮ್ಬರವಲಗ್ನಮ್ ।
ಕಮ್ಬುಗಲಮಮ್ಬುದಕುಚಂ
ಬಿಮ್ಬೋಕಂ ಕಮಪಿ ಚುಮ್ಬತು ಮನೋ ಮೇ ॥ 183 ॥
ಕಮಪಿ ಕಮನೀಯರೂಪಂ
ಕಲಯಾಮ್ಯನ್ತಃ ಕದಮ್ಬಕುಸುಮಾಢ್ಯಮ್ ।
ಚಮ್ಪಕರುಚಿರಸುವೇಷೈಃ
ಸಮ್ಪಾದಿತಕಾನ್ತ್ಯಲಙ್ಕೃತದಿಗನ್ತಮ್ ॥ 184 ॥
ಶಮ್ಪಾರುಚಿಭರ-
-ಗರ್ಹಾಸಮ್ಪಾದಕಕಾನ್ತಿಕವಚಿತದಿಗನ್ತಮ್ ।
ಸಿದ್ಧಾನ್ತಂ ನಿಗಮಾನಾಂ
ಶುದ್ಧಾನ್ತಂ ಕಿಮಪಿ ಶೂಲಿನಃ ಕಲಯೇ ॥ 185 ॥
ಉದ್ಯದ್ದಿನಕರಶೋಣಾ-
-ನುತ್ಪಲಬನ್ಧುಸ್ತನನ್ಧಯಾಪೀಡಾನ್ ।
ಕರಕಲಿತಪುಣ್ಡ್ರಚಾಪಾ-
-ನ್ಕಲಯೇ ಕಾನಪಿ ಕಪರ್ದಿನಃ ಪ್ರಾಣಾನ್ ॥ 186 ॥
ರಶನಾಲಸಜ್ಜಘನಯಾ
ರಸನಾಜೀವಾತುಚಾಪಭಾಸುರಯಾ ।
ಘ್ರಾಣಾಯುಷ್ಕರಶರಯಾ
ಘ್ರಾತಂ ಚಿತ್ತಂ ಕಯಾಪಿ ವಾಸನಯಾ ॥ 187 ॥
ಸರಸಿಜಸಹಯುಧ್ವದೃಶಾ
ಶಮ್ಪಾಲತಿಕಾಸನಾಭಿವಿಗ್ರಹಯಾ ।
ಭಾಸಾ ಕಯಾಪಿ ಚೇತೋ
ನಾಸಾಮಣಿಶೋಭಿವದನಯಾ ಭರಿತಮ್ ॥ 188 ॥
ನವಯಾವಕಾಭಸಿಚಯಾನ್ವಿತಯಾ
ಗಜಯಾನಯಾ ದಯಾಪರಯಾ ।
ಧೃತಯಾಮಿನೀಶಕಲಯಾ
ಧಿಯಾ ಕಯಾಪಿ ಕ್ಷತಾಮಯಾ ಹಿ ವಯಮ್ ॥ 189 ॥
ಅಲಮಲಮಕುಸುಮಬಾಣೈ-
-ರಬಿಮ್ಬಶೋಣೈರಪುಣ್ಡ್ರಕೋದಣ್ಡೈಃ ।
ಅಕುಮುದಬಾನ್ಧವಚೂಡೈ-
-ರನ್ಯೈರಿಹ ಜಗತಿ ದೈವತಂ ಮನ್ಯೈಃ ॥ 190 ॥
ಕುವಲಯಸದೃಕ್ಷನಯನೈಃ
ಕುಲಗಿರಿಕೂಟಸ್ಥಬನ್ಧುಕುಚಭಾರೈಃ ।
ಕರುಣಾಸ್ಪನ್ದಿಕಟಾಕ್ಷೈಃ
ಕವಚಿತಚಿತ್ತೋಽಸ್ಮಿ ಕತಿಪಯೈಃ ಕುತುಕೈಃ ॥ 191 ॥
ನತಜನಸುಲಭಾಯ ನಮೋ
ನಾಲೀಕಸನಾಭಿಲೋಚನಾಯ ನಮಃ ।
ನನ್ದಿತಗಿರಿಶಾಯ ನಮೋ
ಮಹಸೇ ನವನೀಪಪಾಟಲಾಯ ನಮಃ ॥ 192 ॥
ಕಾದಮ್ಬಕುಸುಮದಾಮ್ನೇ
ಕಾಯಚ್ಛಾಯಾಕಣಾಯಿತಾರ್ಯಮ್ಣೇ ।
ಸೀಮ್ನೇ ಚಿರನ್ತನಗಿರಾಂ
ಭೂಮ್ನೇ ಕಸ್ಮೈಚಿದಾದದೇ ಪ್ರಣತಿಮ್ ॥ 193 ॥
ಕುಟಿಲಕಬರೀಭರೇಭ್ಯಃ
ಕುಙ್ಕುಮಸಬ್ರಹ್ಮಚಾರಿಕಿರಣೇಭ್ಯಃ ।
ಕೂಲಙ್ಕಷಸ್ತನೇಭ್ಯಃ
ಕುರ್ಮಃ ಪ್ರಣತಿಂ ಕುಲಾದ್ರಿಕುತುಕೇಭ್ಯಃ ॥ 194 ॥
ಕೋಕನದಶೋಣಚರಣಾ-
-ತ್ಕೋಮಲಕುರಲಾಲಿವಿಜಿತಶೈವಾಲಾತ್ ।
ಉತ್ಪಲಸಗನ್ಧಿನಯನಾ-
-ದುರರೀಕುರ್ಮೋ ನ ದೇವತಮಾನ್ಯಾಮ್ ॥ 195 ॥
ಆಪಾಟಲಾಧರಾಣಾ-
-ಮಾನೀಲಸ್ನಿಗ್ಧಬರ್ಬರಕಚಾನಾಮ್ ।
ಆಮ್ನಾಯಜೀವನಾನಾ-
-ಮಾಕೂತಾನಾಂ ಹರಸ್ಯ ದಾಸೋಽಹಮ್ ॥ 196 ॥
ಪುಙ್ಖಿತವಿಲಾಸಹಾಸ-
-ಸ್ಫುರಿತಾಸು ಪುರಾಹಿತಾಙ್ಕನಿಲಯಾಸು ।
ಮಗ್ನಂ ಮನೋ ಮದೀಯಂ
ಕಾಸ್ವಪಿ ಕಾಮಾರಿಜೀವನಾಡೀಷು ॥ 197 ॥
ಲಲಿತಾ ಪಾತು ಶಿರೋ ಮೇ
ಲಲಾಟಮಮ್ಬಾ ಚ ಮಧುಮತೀರೂಪಾ ।
ಭ್ರೂಯುಗ್ಮಂ ಚ ಭವಾನೀ
ಪುಷ್ಪಶರಾ ಪಾತು ಲೋಚನದ್ವನ್ದ್ವಮ್ ॥ 198 ॥
ಪಾಯಾನ್ನಾಸಾಂ ಬಾಲಾ
ಸುಭಗಾ ದನ್ತಾಂಶ್ಚ ಸುನ್ದರೀ ಜಿಹ್ವಾಮ್ ।
ಅಧರೋಷ್ಠಮಾದಿಶಕ್ತಿ-
-ಶ್ಚಕ್ರೇಶೀ ಪಾತು ಮೇ ಚಿರಂ ಚಿಬುಕಮ್ ॥ 199 ॥
ಕಾಮೇಶ್ವರೀ ಚ ಕರ್ಣೌ
ಕಾಮಾಕ್ಷೀ ಪಾತು ಗಣ್ಡಯೋರ್ಯುಗಲಮ್ ।
ಶೃಙ್ಗಾರನಾಯಿಕಾವ್ಯಾ-
-ದ್ವದನಂ ಸಿಂಹಾಸನೇಶ್ವರೀ ಚ ಗಲಮ್ ॥ 200 ॥
ಸ್ಕನ್ದಪ್ರಸೂಶ್ಚ ಪಾತು
ಸ್ಕನ್ಧೌ ಬಾಹೂ ಚ ಪಾಟಲಾಙ್ಗೀ ಮೇ ।
ಪಾಣೀ ಚ ಪದ್ಮನಿಲಯಾ
ಪಾಯಾದನಿಶಂ ನಖಾವಲೀರ್ವಿಜಯಾ ॥ 201 ॥
ಕೋದಣ್ಡಿನೀ ಚ ವಕ್ಷಃ
ಕುಕ್ಷಿಂ ಚಾವ್ಯಾತ್ ಕುಲಾಚಲತನೂಜಾ ।
ಕಲ್ಯಾಣೀ ಚ ವಲಗ್ನಂ
ಕಟಿಂ ಚ ಪಾಯಾತ್ಕಲಾಧರಶಿಖಣ್ಡಾ ॥ 202 ॥
ಊರುದ್ವಯಂ ಚ ಪಾಯಾ-
-ದುಮಾ ಮೃಡಾನೀ ಚ ಜಾನುನೀ ರಕ್ಷೇತ್ ।
ಜಙ್ಘೇ ಚ ಷೋಡಶೀ ಮೇ
ಪಾಯಾತ್ ಪಾದೌ ಚ ಪಾಶಸೃಣಿಹಸ್ತಾ ॥ 203 ॥
ಪ್ರಾತಃ ಪಾತು ಪರಾ ಮಾಂ
ಮಧ್ಯಾಹ್ನೇ ಪಾತು ಮಣಿಗೃಹಾಧೀಶಾ ।
ಶರ್ವಾಣ್ಯವತು ಚ ಸಾಯಂ
ಪಾಯಾದ್ರಾತ್ರೌ ಚ ಭೈರವೀ ಸಾಕ್ಷಾತ್ ॥ 204 ॥
ಭಾರ್ಯಾಂ ರಕ್ಷತು ಗೌರೀಂ
ಪಾಯಾತ್ ಪುತ್ರಾಂಶ್ಚ ಬಿನ್ದುಗೃಹಪೀಠಾ ।
ಶ್ರೀವಿದ್ಯಾ ಚ ಯಶೋ ಮೇ
ಶೀಲಂ ಚಾವ್ಯಾಚ್ಚಿರಂ ಮಹಾರಾಜ್ಞೀ ॥ 205 ॥
ಪವನಮಯಿ ಪಾವಕಮಯಿ
ಕ್ಷೋಣೀಮಯಿ ಗಗನಮಯಿ ಕೃಪೀಟಮಯಿ ।
ರವಿಮಯಿ ಶಶಿಮಯಿ ದಿಙ್ಮಯಿ
ಸಮಯಮಯಿ ಪ್ರಾಣಮಯಿ ಶಿವೇ ಪಾಹಿ ॥ 206 ॥
ಕಾಲಿ ಕಪಾಲಿನಿ ಶೂಲಿನಿ
ಭೈರವಿ ಮಾತಙ್ಗಿ ಪಞ್ಚಮಿ ತ್ರಿಪುರೇ ।
ವಾಗ್ದೇವಿ ವಿನ್ಧ್ಯವಾಸಿನಿ
ಬಾಲೇ ಭುವನೇಶಿ ಪಾಲಯ ಚಿರಂ ಮಾಮ್ ॥ 207 ॥
ಅಭಿನವಸಿನ್ದೂರಾಭಾ-
-ಮಮ್ಬ ತ್ವಾಂ ಚಿನ್ತಯನ್ತಿ ಯೇ ಹೃದಯೇ ।
ಉಪರಿ ನಿಪತನ್ತಿ ತೇಷಾ-
-ಮುತ್ಪಲನಯನಾಕಟಾಕ್ಷಕಲ್ಲೋಲಾಃ ॥ 208 ॥
ವರ್ಗಾಷ್ಟಕಮಿಲಿತಾಭಿ-
-ರ್ವಶಿನೀಮುಖ್ಯಾಭಿರಾವೃತಾಂ ಭವತೀಮ್ ।
ಚಿನ್ತಯತಾಂ ಸಿತವರ್ಣಾಂ
ವಾಚೋ ನಿರ್ಯಾನ್ತ್ಯಯತ್ನತೋ ವದನಾತ್ ॥ 209 ॥
ಕನಕಶಲಾಕಾಗೌರೀಂ
ಕರ್ಣವ್ಯಾಲೋಲಕುಣ್ಡಲದ್ವಿತಯಾಮ್ ।
ಪ್ರಹಸಿತಮುಖೀಂ ಚ ಭವತೀಂ
ಧ್ಯಾಯನ್ತೋ ಯೇ ತ ಏವ ಭೂಧನದಾಃ ॥ 210 ॥
ಶೀರ್ಷಾಮ್ಭೋರುಹಮಧ್ಯೇ
ಶೀತಲಪೀಯೂಷವರ್ಷಿಣೀಂ ಭವತೀಮ್ ।
ಅನುದಿನಮನುಚಿನ್ತಯತಾ-
-ಮಾಯುಷ್ಯಂ ಭವತಿ ಪುಷ್ಕಲಮವನ್ಯಾಮ್ ॥ 211 ॥
ಮಧುರಸ್ಮಿತಾಂ ಮದಾರುಣನಯನಾಂ
ಮಾತಙ್ಗಕುಮ್ಭವಕ್ಷೋಜಾಮ್ ।
ಚನ್ದ್ರವತಂಸಿನೀಂ ತ್ವಾಂ
ಸವಿಧೇ ಪಶ್ಯನ್ತಿ ಸುಕೃತಿನಃ ಕೇಚಿತ್ ॥ 212 ॥
ಲಲಿತಾಯಾಃ ಸ್ತವರತ್ನಂ
ಲಲಿತಪದಾಭಿಃ ಪ್ರಣೀತಮಾರ್ಯಾಭಿಃ ।
ಪ್ರತಿದಿನಮವನೌ ಪಠತಾಂ
ಫಲಾನಿ ವಕ್ತುಂ ಪ್ರಗಲ್ಭತೇ ಸೈವ ॥ 213 ॥
ಸದಸದನುಗ್ರಹನಿಗ್ರಹ-
-ಗೃಹೀತಮುನಿವಿಗ್ರಹೋ ಭಗವಾನ್ ।
ಸರ್ವಾಸಾಮುಪನಿಷದಾಂ
ದುರ್ವಾಸಾ ಜಯತಿ ದೇಶಿಕಃ ಪ್ರಥಮಃ ॥ 214 ॥
ಇತಿ ಮಹರ್ಷಿದುರ್ವಾಸಃ ವಿರಚಿತಂ ಶ್ರೀಲಲಿತಾಸ್ತವರತ್ನಮ್ ।
Roman (IAST) Transliteration
vande gajendravadanaṃ
vāmāṅkārūḍhavallabhāśliṣṭam |
kuṅkumaparāgaśoṇaṃ
kuvalayinījārakorakāpīḍam || 1 ||
sa jayati suvarṇaśailaḥ
sakalajagaccakrasaṅghaṭitamūrtiḥ |
kāñcananikuñjavāṭī-
-kandaladamarīprapañcasaṅgītaḥ || 2 ||
harihayanairṛtamāruta-
-haritāmanteṣvavasthitaṃ tasya |
vinumaḥ sānutritayaṃ
vidhiharigaurīśaviṣṭapādhāram || 3 ||
madhye punarmanohara-
-ratnarucistabakarañjitadigantam |
upari catuḥśatayojana-
-muttuṅgaṃ śṛṅgapuṅgavamupāse || 4 ||
tatra catuḥśatayojana-
-pariṇāhaṃ devaśilpinā racitam |
nānāsālamanojñaṃ
namāmyahaṃ nagaramādividyāyāḥ || 5 ||
prathamaṃ sahasrapūrvaka-
-ṣaṭśatasaṅkhyākayojanaṃ paritaḥ |
valayīkṛtasvagātraṃ
varaṇaṃ śaraṇaṃ vrajāmyayorūpam || 6 ||
tasyottare samīraṇa-
-yojanadūre taraṅgitacchāyaḥ |
ghaṭayatu mudaṃ dvitīyo
ghaṇṭāstanasāranirmitaḥ sālaḥ || 7 ||
ubhayorantarasīma-
-nyuddāmabhramararañjitodāram |
upavanamupāsmahe vaya-
-mūrīkṛtamandamārutasyandam || 8 ||
āliṅgya bhadrakālī-
-māsīnastatra hariśilāśyāmām |
manasi mahākālo me
viharatu madhupānavibhramannetraḥ || 9 ||
tārtīyīko varaṇa-
-stasyottarasīmni vātayojanataḥ |
tāmreṇa racitamūrti-
-stanutāmācandratārakaṃ bhadram || 10 ||
madhye tayośca maṇimaya-
-pallavaśākhāprasūnapakṣmalitām |
kalpānokahavāṭīṃ
kalaye makarandapaṅkilāvālām || 11 ||
tatra madhumādhavaśrī-
-taruṇībhyāṃ taraladṛkcakorābhyām |
āliṅgito'vatānmā-
-maniśaṃ prathamarturāttapuṣpāstraḥ || 12 ||
namata taduttarabhāge
nākipathollaṅghiśṛṅgasaṅghātam |
sīsākṛtiṃ turīyaṃ
sitakiraṇālokanirmalaṃ sālam || 13 ||
sāladvayāntarāle
saralālikapotacāṭusubhagāyām |
santānavāṭikāyāṃ
saktaṃ ceto'stu satatamasmākam || 14 ||
tatra tapanātirūkṣaḥ
sāmrājñīcaraṇasāndritasvāntaḥ |
śukraśuciśrīsahito
grīṣmarturdiśatu kīrtimākalpam || 15 ||
uttarasīmani tasyo-
-nnataśikharotkampihāṭakapatākaḥ |
prakaṭayatu pañcamo naḥ
prākāraḥ kuśalamārakūṭamayaḥ || 16 ||
prākārayośca madhye
pallavitānyabhṛtapañcamonmeṣā |
haricandanadruvāṭī-
-haratādāmūlamasmadanutāpam || 17 ||
tatra nabhaḥ śrīmukhyai-
-staruṇīvargaiḥ samanvitaḥ paritaḥ |
vajrāṭṭahāsamukharo
vāñchāpūrtiṃ tanotu varṣartuḥ || 18 ||
mārutayojanadūre
mahanīyastasya cottare bhāge |
bhadraṃ kṛṣīṣṭa ṣaṣṭhaḥ
prākāraḥ pañcalohadhātumayaḥ || 19 ||
anayormadhye santata-
-maṅkūraddivyakusumagandhāyām |
mandāravāṭikāyāṃ
mānasamaṅgīkarotu me vihṛtim || 20 ||
tasyāmiṣorjalakṣmī-
-taruṇībhyāṃ śaradṛtuḥ sadā sahitaḥ |
abhyarcayan sa jīyā-
-dambāmāmodameduraiḥ kusumaiḥ || 21 ||
tasyarṣisaṅkhyayojana-
-dūre dedīpyamānaśṛṅgaughaḥ |
kaladhautakalitamūrtiḥ
kalyāṇaṃ diśatu saptamaḥ sālaḥ || 22 ||
madhye tayormarutpatha
laṅghitaviṭapāgravirutakalakaṇṭhā |
śrīpārijātavāṭī
śriyamaniśaṃ diśatu śītaloddeśā || 23 ||
tasyāmatipriyābhyāṃ
saha khelan sahasahasyalakṣmībhyām |
sāmanto jhaṣaketo-
-rhemanto bhavatu hemavṛddhyai naḥ || 24 ||
uttaratastasya mahā-
-nudbhaṭahutabhukśikhāruṇamayūkhaḥ |
tapanīyakhaṇḍaracita-
-stanutādāyuṣyamaṣṭamo varaṇaḥ || 25 ||
kādambavipinavāṭī-
-manayormadhyabhuvi kalpitāvāsām |
kalayāmi sūnakoraka-
-kandalitāmodatundilasamīrām || 26 ||
tasyāmatiśiśirākṛti-
-rāsīnastapatapasyalakṣmībhyām |
śivamaniśaṃ kurutānme
śiśirartuḥ satataśītaladigantaḥ || 27 ||
tasyāṃ kadambavāṭyāṃ
tatprasavāmodamilitamadhugandham |
saptāvaraṇamanojñaṃ
śaraṇaṃ samupaimi mantriṇīśaraṇam || 28 ||
tatrālaye viśāle
tapanīyāracitataralasopāne |
māṇikyamaṇḍapānta-
-rmahite siṃhāsane sumaṇikhacite || 29 ||
bindutripañcakoṇa-
-dvipanṛpavasuvedadalakurekhāḍhye |
cakre sadā niviṣṭāṃ
ṣaṣṭhyaṣṭatriṃśadakṣareśānīm || 30 ||
tāpiñchamecakābhāṃ
tālīdalaghaṭitakarṇatāṭaṅkām |
tāmbūlapūritamukhīṃ
tāmrādharabimbadṛṣṭadarahāsām || 31 ||
kuṅkumapaṅkiladehāṃ
kuvalayajīvātuśāvakavataṃsām |
kokanadaśoṇacaraṇāṃ
kokilanikvāṇakomalālāpām || 32 ||
vāmāṅgagalitacūlīṃ
vanamālyakadambamālikābharaṇām |
muktālalantikāñcita
mugdhālikamilitacitrakodārām || 33 ||
karavidhṛtakīraśāvaka-
-kalaninadavyaktanikhilanigamārthām |
vāmakucasaṅgivīṇāvādana-
-saukhyārdhamīlitākṣiyugām || 34 ||
āpāṭalāṃśukadharā-
-mādirasonmeṣavāsitakaṭākṣām |
āmnāyasāragulikā-
-mādyāṃ saṅgītamātṛkāṃ vande || 35 ||
tasya ca suvarṇasāla-
-syottaratastaruṇakuṅkumacchāyaḥ |
śamayatu mama santāpaṃ
sālo navamaḥ sa puṣparāgamayaḥ || 36 ||
anayorantaravasudhāḥ
praṇumaḥ pratyagrapuṣparāgamayīḥ |
siṃhāsaneśvarīmanu-
-cintananistandrasiddhanīrandhrāḥ || 37 ||
tatsālottaradeśe
taruṇajapākiraṇadhoraṇīśoṇaḥ |
praśamayatu padmarāga-
-prākāro mama parābhavaṃ daśamaḥ || 38 ||
antarabhūkṛtavāsā-
-nanayorapanītacittavaimatyān |
cakreśīpadabhaktāṃ-
-ścāraṇavargānaharniśaṃ kalaye || 39 ||
sāraṅgavāhayojanadūre-
-'saṅghaṭitaketanastasya |
gomedakena racito
gopāyatu māṃ samunnataḥ sālaḥ || 40 ||
vapradvayāntarorvyāṃ
vaṭukairvividhaiśca yoginībṛndaiḥ |
satataṃ samarcitāyāḥ
saṅkarṣaṇyāḥ praṇaumi caraṇābjam || 41 ||
tāpasayojanadūre
tasya samuttuṅga gopuropetaḥ |
vāñchāpūrtyai bhavatā-
-dvajramaṇīnikaranirmito vapraḥ || 42 ||
varaṇadvitayāntarato
vāsajuṣo vihitamadhurasāsvādāḥ |
rambhādivibudhaveśyā
racayantu mahāntamasmadānandam || 43 ||
tatra sadā pravahantī
taṭinī vajrābhidhā ciraṃ jīyāt |
caṭulormijālanṛtya-
-tkalahaṃsīkulakalakvaṇitapuṣṭā || 44 ||
rodhasi tasyā rucire
vajreśī jayati vajrabhūṣāḍhyā |
vajrapradānatoṣita-
-vajrimukhatridaśavinutacāritrā || 45 ||
tasyodīcyāṃ hariti
stavakitasuṣamāvalīḍhaviyadantaḥ |
vaiḍūryaratnaracito
vaimalyaṃ diśatu cetaso varaṇaḥ || 46 ||
adhimadhyametayoḥ puna-
-rambācaraṇāvalambitasvāntān |
kārkoṭakādināgān
kalayāmaḥ kiṃ ca balimukhān danujān || 47 ||
gandhavahasaṅkhyayojana-
-dūre gaganordhvajāṅghikastasya |
vāsavamaṇipraṇīto
varaṇo bahalayatu vaiduṣīṃ viśadām || 48 ||
madhyakṣoṇyāmanayo-
-rmahendranīlātmakāni ca sarāṃsi |
śātodarīsahāyā-
-nbhūpālānapi punaḥ punaḥ praṇumaḥ || 49 ||
āśugayojanadūre
tasyordhvaṃ kāntidhavalitadigantaḥ |
muktāviracitagātro
muhurasmākaṃ mude bhavatu sālaḥ || 50 ||
āvṛttyoradhimadhyaṃ
pūrvasyāṃ diśi purandaraḥ śrīmān |
abhramuviṭādhirūḍho
vibhramamasmākamaniśamātanutāt || 51 ||
tatkoṇe vyajanasru-
-ktomarapātrasruvānnaśaktidharaḥ |
svāhāsvadhāsametaḥ
sukhayatu māṃ havyavāhanaḥ suciram || 52 ||
dakṣiṇadigantarāle
daṇḍadharo nīlanīradacchāyaḥ |
tripurāpadābjabhaktastirayatu
mama nikhilamaṃhasāṃ nikaram || 53 ||
tasyaiva paścimāyāṃ
diśi dalitendīvaraprabhāśyāmaḥ |
kheṭāsiyaṣṭidhārī
khedānapanayatu yātudhāno me || 54 ||
tasyā uttaradeśe
dhavalāṅgo vipulajhaṣavarārūḍhaḥ |
pāśāyudhāttapāṇiḥ
pāśī vidalayatu pāśajālāni || 55 ||
vande taduttarahari-
-tkoṇe vāyuṃ camūruvaravāham |
korakitatattvabodhā-
-ngorakṣapramukhayogino'pi muhuḥ || 56 ||
taruṇīriḍāpradhānā-
-stisro vātasya tasya kṛtavāsāḥ |
pratyagrakāpiśāyana-
-pānaparibhrāntalocanāḥ kalaye || 57 ||
tallokapūrvabhāge
dhanadaṃ dhyāyāmi śevadhikuleśam |
api māṇibhadramukhyā-
-nambācaraṇāvalambino yakṣān || 58 ||
tasyaiva pūrvasīmani
tapanīyāracitagopure nagare |
kātyāyanīsahāyaṃ
kalaye śītāṃśukhaṇḍacūḍālam || 59 ||
tatpuraṣoḍaśavaraṇa-
-sthalabhājastaruṇacandracūḍālān |
rudrādhyāye paṭhitā-
-nrudrāṇīsahacarānbhaje rudrān || 60 ||
pavamānasaṅkhyayojana-
-dūre bālatṛṇmecakastasya |
sālo marakataracitaḥ
sampadamacalāṃ śriyaṃ ca puṣṇātu || 61 ||
āvṛtiyugmāntarato
haritamaṇīnivahamecake deśe |
hāṭakatālīvipinaṃ
hālāghaṭaghaṭitaviṭapamākalaye || 62 ||
tatraiva mantriṇīgṛha-
-pariṇāhaṃ taralaketanaṃ sadanam |
marakatasaudhamanojñaṃ
dadyādāyūṃṣi daṇḍanāthāyāḥ || 63 ||
sadane tatra harinmaṇi-
-saṅghaṭite maṇḍape śatastambhe |
kārtasvaramayapīṭhe
kanakamayāmburuhakarṇikāmadhye || 64 ||
bindutrikoṇavartula-
-ṣaḍasravṛttadvayānvite cakre |
sañcāriṇī daśottara-
śatārṇamanurājakamalakalahaṃsī || 65 ||
kolavadanā kuśeśaya-
-nayanā kokārimaṇḍitaśikhaṇḍā |
santaptakāñcanābhā
sandhyāruṇacelasaṃvṛtanitambā || 66 ||
halamusalaśaṅkhacakrā-
-'ṅkuśapāśābhayavarasphuritahastā |
kūlaṅkaṣānukampā
kuṅkumajambālitastanābhogā || 67 ||
dhūrtānāmatidūrā-
-vārtāśeṣāvalagnakamanīyā |
ārtālīśubhadātrī
vārtālī bhavatu vāñchitārthāya || 68 ||
tasyāḥ parito devīḥ
svapneśyunmattabhairavīmukhyāḥ |
praṇamata jambhinyādyāḥ
bhairavavargāṃśca hetukapramukhān || 69 ||
pūrvoktasaṅkhyayojana-
-dūre pūyāṃśupāṭalastasya |
vidrāvayatu madārtiṃ
vidrumasālo viśaṅkaṭadvāraḥ || 70 ||
āvaraṇayoraharniśa-
-mantarabhūmauprakāśaśālinyām |
āsīnamambujāsana-
-mabhinavasindūragauramahamīḍe || 71 ||
varaṇasya tasya māruta-
-yojanato vipulagopuradvāraḥ |
sālo nānāratnaiḥ
saṅghaṭitāṅgaḥ kṛṣīṣṭa madabhīṣṭam || 72 ||
antarakakṣyāmanayo-
-raviralaśobhāpicaṇḍiloddeśām |
māṇikyamaṇḍapākhyāṃ
mahatīmadhihṛdayamaniśamākalaye || 73 ||
tatra sthitaṃ prasannaṃ
taruṇatamālapravālakiraṇābham |
karṇāvalambikuṇḍala-
-kandalitābhīśukavacitakapolam || 74 ||
śoṇādharaṃ śucismita-
-meṇāṅkavadanamedhamānakṛpam |
mugdhaiṇamadaviśeṣaka-
-mudritaniṭilendurekhikāruciram || 75 ||
nālīkadalasahodara-
-nayanāñcalaghaṭitamanasijākūtam |
kamalākaṭhinapayodhara-
-kastūrīghusṛṇapaṅkiloraskam || 76 ||
cāmpeyagandhikaiśyaṃ
śampāsabrahmacārikauśeyam |
śrīvatsakaustubhadharaṃ
śritajanarakṣādhurīṇacaraṇābjam || 77 ||
kambusudarśanavilasa-
-tkarapadmaṃ kaṇṭhalolavanamālam |
mucukundamokṣaphaladaṃ
mukundamānandakandamavalambe || 78 ||
tadvaraṇottarabhāge
tārāpatibimbacumbinijaśṛṅgaḥ |
vividhamaṇīgaṇaghaṭito
vitaratu sālo vinirmalāṃ dhiṣaṇām || 79 ||
prākāradvitayāntara-
-kakṣyāṃ pṛthuratnanikarasaṅkīrṇām |
namata sahasrastambhaka-
-maṇḍapanāmnātiviśrutāṃ bhuvane || 80 ||
praṇumastatra bhavānī-
-sahacaramīśānamindukhaṇḍadharam |
śṛṅgāranāyikāmanu-
-śīlanabhājo'pi bhṛṅginandimukhān || 81 ||
tasyaiṇavāhayojana-
-dūre vande manomayaṃ vapram |
aṅkūranmaṇikiraṇā-
-mantarakakṣyāṃ ca nirmalāmanayoḥ || 82 ||
tatraivāmṛtavāpīṃ
taralataraṅgāvalīḍhataṭayugmām |
muktāmayakalahaṃsī-
-mudritakanakāravindasandohām || 83 ||
śakropalamayabhṛṅgī-
-saṅgītonmeṣaghoṣitadigantām |
kāñcanamayāṅgavilasa-
-tkāraṇḍavaṣaṇḍatāṇḍavamanojñām || 84 ||
kuruvindātmakahallaka-
-korakasuṣamāsamūhapāṭalitām |
kalaye sudhāsvarūpāṃ
kandalitāmandakairavāmodām || 85 ||
tadvāpikāntarāle tarale
maṇipotasīmni viharantīm |
sindūrapāṭalāṅgīṃ
sitakiraṇāṅkūrakalpitavataṃsām || 86 ||
parvendubimbavadanāṃ
pallavaśoṇādharasphuritahāsām |
kuṭilakabarīṃ kuraṅgī-
-śiśunayanāṃ kuṇḍalasphuritagaṇḍām || 87 ||
nikaṭasthapotanilayāḥ
śaktīḥ śayavidhṛtahemaśṛṅgajalaiḥ |
pariṣiñcantīṃ parita-
-stārāṃ tāruṇyagarvitāṃ vande || 88 ||
prāguktasaṅkhyayojanadūre
praṇamāmi buddhimayasālam |
anayorantarakakṣyā-
-maṣṭāpadapuṣṭamedinīṃ rucirām || 89 ||
kādambarīnidhānāṃ
kalayāmyānandavāpikāṃ tasyām |
śoṇāśmanivahanirmita-
-sopānaśreṇiśobhamānataṭīm || 90 ||
māṇikyataraṇinilayāṃ
madhye tasyā madāruṇakapolām |
amṛteśītyabhidhānā-
-mantaḥ kalayāmi vāruṇīṃ devīm || 91 ||
sauvarṇakenipātana-
-hastāḥ saundaryagarvitā devyaḥ |
tatpurataḥ sthitibhājo
vitarantvasmākamāyuṣo vṛddhim || 92 ||
tasya pṛṣadaśvayojana-
-dūre'haṅkārasālamatituṅgam |
vande tayośca madhye
kakṣyāṃ valamānamalayapavamānām || 93 ||
vinumo vimarśavāpīṃ
sauṣumnasudhāsvarūpiṇīṃ tatra |
velātilaṅghyavīcī-
-kolāhalabharitakūlavanavāṭīm || 94 ||
tatraiva salilamadhye
tāpiñchadalaprapañcasuṣamābhām |
śyāmalakañcukalasitāṃ
śyāmāviṭabimbaḍambaraharāsyām || 95 ||
ābhugnamasṛṇacillī-
-hasitāyugmaśarakārmukavilāsām |
mandasmitāñcitamukhīṃ
maṇimayatāṭaṅkamaṇḍitakapolām || 96 ||
kuruvindataraṇinilayāṃ
kulācalaspardhikucanamanmadhyām |
kuṅkumaviliptagātrīṃ
kurukullāṃ manasi kurmahe satatam || 97 ||
tatsālottarabhāge
bhānumayaṃ vapramāśraye dīptam |
madhyaṃ ca vipulamanayo-
-rmanye viśrāntamātapodgāram || 98 ||
tatra kuruvindapīṭhe
tāmarase kanakakarṇikāghaṭite |
āsīnamaruṇavāsasa-
-mamlānaprasavamālikābharaṇam || 99 ||
cakṣuṣmatīprakāśana-
-śakticchāyāsamāracitakelim |
māṇikyamukuṭaramyaṃ
manye mārtāṇḍabhairavaṃ hṛdaye || 100 ||
indumayasālamīḍe
tasyottaratastuṣāragirigauram |
atyantaśiśiramāruta-
-manayormadhyaṃ ca candrikodgāram || 101 ||
tatra prakāśamānaṃ
tārānikaraiḥ pariṣkṛtoddeśam |
amṛtamayakāntikandala-
-mantaḥ kalayāmi kundasitamindum || 102 ||
śṛṅgārasālamīḍe
śṛṅgollasitaṃ taduttare bhāge |
madhyasthale tayorapi
mahitāṃ śṛṅgārapūrvikāṃ parikhām || 103 ||
tatra maṇinausthitābhi-
-stapanīyāviracitāgrahastābhiḥ |
śṛṅgāradevatābhiḥ
sahitaṃ parikhādhipaṃ bhaje madanam || 104 ||
śṛṅgāravaraṇavaryasyottarataḥ
sakalavibudhasaṃsevyam |
cintāmaṇigaṇaracitaṃ
cintāṃ dūrīkarotu me sadanam || 105 ||
maṇisadanasālayoradhi-
-madhyaṃ daśatālabhūmiruhadīrghaiḥ |
parṇaiḥ suvarṇavarṇai-
-ryuktāṃ kāṇḍaiśca yojanottuṅgaiḥ || 106 ||
mṛdulaistālīpañcaka-
-mānairmilitāṃ ca kesarakadambaiḥ |
santatagalitamaranda-
-srotoniryanmilindasandohām || 107 ||
pāṭīrapavanabālaka-
-dhāṭīniryatparāgapiñjaritām |
kalahaṃsīkulakalakala-
-kūlaṅkaṣaninadanicayakamanīyām || 108 ||
padmāṭavīṃ bhajāmaḥ
parimalakallolapakṣmalopāntām |
[ devyarghyapātradhārī
tasyāḥ pūrvadiśi daśakalāyuktaḥ | ]
valayitamūrtirbhagavā-
-nvahniḥ krośonnataściraṃ pāyāt || 109 ||
tatrādhāre devyāḥ
pātrīrūpaḥ prabhākaraḥ śrīmān |
dvādaśakalāsameto
dhvāntaṃ mama bahulamāntaraṃ bhindyāt || 110 ||
tasmin dineśapātre
taraṅgitāmodamamṛtamayamarghyam |
candrakalātmakamamṛtaṃ
sāndrīkuryādamandamānandam || 111 ||
amṛte tasminnabhito
viharantyo vividhamaṇitaraṇibhājaḥ |
ṣoḍaśa kalāḥ sudhāṃśoḥ
śokāduttārayantu māmaniśam || 112 ||
tatraiva vihṛtibhājo
dhātṛmukhānāṃ ca kāraṇeśānām |
sṛṣṭyādirūpikāstāḥ
śamayantvakhilāḥ kalāśca santāpam || 113 ||
kīnāśavaruṇakinnara-
-rājadiganteṣu ratnagehasya |
kalayāmi tānyajasraṃ
kalayantvāyuṣyamarghyapātrāṇi || 114 ||
pātrasthalasya purataḥ
padmāramaṇavidhipārvatīśānām |
bhavanāni śarmaṇe no
bhavantu bhāsā pradīpitajaganti || 115 ||
sadanasyānalakoṇe
satataṃ praṇamāmi kuṇḍamāgneyam |
tatra sthitaṃ ca vahniṃ
taralaśikhājaṭilamambikājanakam || 116 ||
tasyāsuradiśi tādṛśa-
-ratnaparisphuritaparvanavakāḍhyam |
cakrātmakaṃ śatāṅgaṃ
śatayojanamunnataṃ bhaje divyam || 117 ||
tatraiva diśi niṣaṇṇaṃ
tapanīyadhvajaparamparāśliṣṭam |
rathamaparaṃ ca bhavānyā
racayāmo manasi ratnamayacūḍam || 118 ||
bhavanasya vāyubhāge
pariṣkṛto vividhavaijayantībhiḥ |
racayatu mudaṃ rathendraḥ
saciveśānyāḥ samastavandyāyāḥ || 119 ||
kurmo'dhihṛdayamaniśaṃ
kroḍāsyāyāḥ śatāṅgamūrdhanyam |
rudradiśi ratnadhāmno
ruciraśalākāprapañcakañcukitam || 120 ||
parito devīdhāmnaḥ
praṇītavāsā manusvarūpiṇyaḥ |
kurvantu raśmimālā-
-kṛtayaḥ kuśalāni devatā nikhilāḥ || 121 ||
prāgdvārasya bhavānī-
-dhāmnaḥ pārśvadvayāracitavāse |
mātaṅgīkiṭimukhyau
maṇisadane manasi bhāvayāmi ciram || 122 ||
yojanayugalābhogā
tatkrośapariṇāhayaiva bhittyā ca |
cintāmaṇigṛhabhūmi-
-rjīyādāmnāyamayacaturdvārā || 123 ||
dvāre dvāre dhāmnaḥ
piṇḍībhūtā navīnabimbābhāḥ |
vidadhatu vipulāṃ kīrtiṃ
divyā lauhityasiddhyo devyaḥ || 124 ||
maṇisadanasyāntarato
mahanīye ratnavedikāmadhye |
bindumayacakramīḍe
pīṭhānāmupari viracitāvāsam || 125 ||
cakrāṇāṃ sakalānāṃ
prathamamadhaḥ sīmaphalakavāstavyāḥ |
aṇimādisiddhayo mā-
-mavantu devī prabhāsvarūpiṇyaḥ || 126 ||
aṇimādisiddhiphalaka-
-syoparihariṇāṅkakhaṇḍakṛtacūḍāḥ |
bhadraṃ pakṣmalayantu
brāhmīpramukhāśca mātaro'smākam || 127 ||
tasyopari maṇiphalake
tāruṇyottuṅgapīnakucabhārāḥ |
saṅkṣobhiṇīpradhānāḥ
bhrānti vidrāvayantu daśa mudrāḥ || 128 ||
phalakatrayasvarūpe
pṛthule trailokyamohane cakre |
dīvyantu prakaṭākhyā-
-stāsāṃ kartrīṃ ca bhagavatī tripurā || 129 ||
tadupari vipule dhiṣṇye
taraladṛśastaruṇakokanadabhāsaḥ |
kāmākarṣiṇyādyāḥ
kalaye devīḥ kalādharaśikhaṇḍāḥ || 130 ||
sarvāśāparipūrakacakre-
-'smin guptayoginīsevyāḥ |
tripureśī mama duritaṃ
tudyāt kaṇṭhāvalambimaṇihārā || 131 ||
tasyopari maṇipīṭhe
tāmrāmbhoruhadalaprabhāśoṇāḥ |
dhyāyāmyanaṅgakusumā-
-pramukhā devīśca vidhṛtakūrpāsāḥ || 132 ||
saṅkṣobhakārake'smiṃ-
-ścakre śrītripurasundarī sākṣāt |
goptrī guptatarākhyāḥ
gopāyatu māṃ kṛpārdrayā dṛṣṭyā || 133 ||
saṅkṣobhiṇīpradhānāḥ
śaktīstasyordhvavalayakṛtavāsāḥ |
ālolanīlaveṇī-
-rantaḥ kalayāmi yauvanonmattāḥ || 134 ||
saubhāgyadāyake'smiṃ-
-ścakreśī tripuravāsinī jīyāt |
śaktīśca sampradāyābhidhāḥ
samastāḥ pramodayantvaniśam || 135 ||
maṇipīṭhopari tāsāṃ
mahati caturhastavistṛte valaye |
santataviracitavāsāḥ
śaktīḥ kalayāmi sarvasiddhimukhāḥ || 136 ||
sarvārthasādhakākhye
cakre'muṣmin samastaphaladātrī |
tripurā śrīrmama kuśalaṃ
diśatāduttīrṇayoginīsevyā || 137 ||
tāsāṃ nilayasyopari
dhiṣṇye kausumbhakañcukamanojñāḥ |
sarvājñādyāḥ devyaḥ
sakalāḥ sampādayantu mama kīrtim || 138 ||
cakre samastarakṣā-
-karanāmnyasmin samastajanasevyām |
manasi nigarbhāsahitāṃ
manye śrītripuramālinīṃ devīm || 139 ||
sarvajñāsadanasyopari
cakre vipule samākalitagehāḥ |
vande vaśinīmukhyāḥ
śaktīḥ sindūrareṇurucaḥ || 140 ||
śrīsarvarogaharākhya-
-cakre'smiṃstripurapūrvikāṃ siddhām |
vande rahasyanāmnā
vedyābhiḥ śaktibhiḥ sadā sevyām || 141 ||
vaśinīgṛhopariṣṭā-
-dviṃśatihastonnate mahāpīṭhe |
śamayantu śatrubṛndaṃ
śastrāṇyastrāṇi cādidampatyoḥ || 142 ||
śastrasadanopariṣṭā-
-dvalaye valavairiratnasaṅghaṭite |
kāmeśvarīpradhānāḥ
kalaye devīḥ samastajanavandyāḥ || 143 ||
cakre'tra sarvasiddhiprada-
-nāmani sarvaphaladātrī |
tripurāmbāvatu satataṃ
parāpararahasyayoginīsevyā || 144 ||
kāmeśvarīgṛhoparivalaye
vividhamanusampradāyajñāḥ |
catvāro yuganāthā
jayantu mitreśapūrvakāḥ guravaḥ || 145 ||
nāthabhavanopariṣṭā-
-nnānāratnacayamedure pīṭhe |
kāmeśyādyā nityāḥ
kalayantu mudaṃ tithisvarūpiṇyaḥ || 146 ||
nityāsadanasyopari
nirmalamaṇinivahaviracite dhiṣṇye |
kuśalaṃ ṣaḍaṅgadevyaḥ
kalayantvasmākamuttaralanetrāḥ || 147 ||
sadanasyopari tāsāṃ
sarvānandamayanāmake bindau |
pañcabrahmākārāṃ
mañcaṃ praṇamāmi maṇigaṇākīrṇam || 148 ||
parito maṇimañcasya
pralambamānā niyantritā pāśaiḥ |
māyāmayī javanikā
mama duritaṃ haratu mecakacchāyā || 149 ||
mañcasyopari lamba-
-nmadanīpunnāgamālikābharitam |
harigopamayavitānaṃ
haratādālasyamaniśamasmākam || 150 ||
paryaṅkasya bhajāmaḥ
pādānbimbāmbudenduhemarucaḥ |
ajaharirudreśamayā-
-nanalāsuramāruteśakoṇasthān || 151 ||
phalakaṃ sadāśivamayaṃ
praṇaumi sindūrareṇukiraṇābham |
ārabhyāṅgeśīnāṃ
sadanātkalitaṃ ca ratnasopānam || 152 ||
paṭṭopadhānagaṇḍaka-
-catuṣṭayasphuritapāṭalāstaraṇam |
paryaṅkopari ghaṭitaṃ
pātu ciraṃ haṃsatūlaśayanaṃ naḥ || 153 ||
tasyopari nivasantaṃ
tāruṇyaśrīniṣevitaṃ satatam |
āvṛntapullahallaka-
-marīcikāpuñjamañjulacchāyam || 154 ||
sindūraśoṇavasanaṃ
śītāṃśustabakacumbitakirīṭam |
kuṅkumatilakamanohara-
-kuṭilālikahasitakumudabandhuśiśum || 155 ||
pūrṇendubimbavadanaṃ
phullasarojātalocanatritayam |
taralāpāṅgataraṅgita-
-śapharāṅkanaśāstrasampradāyārtham || 156 ||
maṇimayakuṇḍalapuṣya-
-nmarīcikallolamāṃsalakapolam |
vidrumasahodarādhara-
-visṛmarasusmitakiśorasañcāram || 157 ||
āmodikusumaśekhara-
-mānīlabhrūlatāyugamanojñam |
vīṭīsaurabhavīcī-
-dviguṇitavaktrāravindasaurabhyam || 158 ||
pāśāṅkuśekṣucāpa-
-prasavaśarasphuritakomalakarābjam |
kāśmīrapaṅkilāṅgaṃ
kāmeśaṃ manasi kurmahe satatam || 159 ||
tasyāṅkabhuvi niṣaṇṇāṃ
taruṇakadambaprasūnakiraṇābhām |
śītāṃśukhaṇḍacūḍāṃ
sīmantanyastasāndrasindūrām || 160 ||
kuṅkumalalāmabhāsva-
-nniṭilāṃ kuṭilataracillikāyugalām |
nālīkatulyanayanāṃ
nāsāñcalanaṭitamauktikābharaṇām || 161 ||
aṅkuritamandahāsa-
-maruṇādharakāntivijitabimbābhām |
kastūrīmakarīyuta-
-kapolasaṅkrāntakanakatāṭaṅkām || 162 ||
karpūrasāndravīṭī-
-kabalitavadanāravindakamanīyām |
kambusahodarakaṇṭha-
-pralambamānācchamauktikakalāpām || 163 ||
kahlāradāmakomala-
-bhujayugalasphuritaratnakeyūrām |
karapadmamūlavilasa-
-tkāñcanamayakaṭakavalayasandohām || 164 ||
pāṇicatuṣṭayavilasa-
-tpāśāṅkuśapuṇḍracāpapuṣpāstrām |
kūlaṅkaṣakucaśikharāṃ
kuṅkumakardamitaratnakūrpāsām || 165 ||
aṇudāyādavalagnā-
-mambudaśobhāsanābhiromalatām |
māṇikyakhacitakāñcī-
-marīcikākrāntamāṃsalanitambām || 166 ||
karabhorukāṇḍayugalāṃ
jaṅghājitakāmajaitratūṇīrām |
prapadaparibhūtakūrmāṃ
pallavasacchāyapadayugamanojñām || 167 ||
kamalabhavakañjalocana-
-kirīṭaratnāṃśurañjitapadābjām |
unmastakānukampā-
-muttaralāpāṅgapoṣitānaṅgām || 168 ||
ādimarasāvalambā-
-manidaṃ prathamoktivallarīkalikām |
ābrahmakīṭajananī-
-mantaḥ kalayāmi sundarīmaniśam || 169 ||
kastu kṣitau paṭīyā-
-nvastu stotuṃ śivāṅkavāstavyam |
astu cirantanasukṛtaiḥ
prastutakāmyāya tanmama purastāt || 170 ||
prabhusammitoktigamyaṃ
paramaśivotsaṅgatuṅgaparyaṅkam |
tejaḥ kiñcana divyaṃ
purato me bhavatu puṇḍrakodaṇḍam || 171 ||
madhurimabharitaśarāsaṃ
makarandasyandimārgaṇodāram |
kairaviṇīviṭacūḍaṃ
kaivalyāyāstu kiñcana maho naḥ || 172 ||
akṣudramikṣucāpaṃ
parokṣamavalagnasīmni tryakṣam |
kṣapayatu me kṣemetara-
-mukṣarathapremapakṣmalaṃ tejaḥ || 173 ||
bhṛṅgarucisaṅgarakarāpāṅgaṃ
śṛṅgāratuṅgamaruṇāṅgam |
maṅgalamabhaṅguraṃ me
ghaṭayatu gaṅgādharāṅgasaṅgi mahaḥ || 174 ||
prapadājitakūrmamūrjita-
-karuṇaṃ bharmarucinirmathanadeham |
śritavarma marma śambhoḥ
kiñcana mama narma śarma nirmātu || 175 ||
kālakuralālikālima-
-kandalavijitāli vidhṛtamaṇivāli |
milatu hṛdi pulinajaghanaṃ
bahulitagalagaralakeli kimapi mahaḥ || 176 ||
kuṅkumatilakitaphālā
kuruvindacchāyapāṭaladukūlā |
karuṇāpayodhivelā
kācana citte cakāstu me līlā || 177 ||
puṣpandhayaruciveṇyaḥ
pulinābhogatrapākaraśreṇyaḥ |
jīyāsurikṣupāṇyaḥ
kāścana kāmārikelisākṣiṇyaḥ || 178 ||
tapanīyāṃśukabhāṃsi
drākṣāmādhuryanāstikavacāṃsi |
katicana śucaṃ mahāṃsi
kṣapayatu kapālitoṣitamanāṃsi || 179 ||
asitakacamāyatākṣaṃ
kusumaśaraṃ kūlamudvahakṛpārdram |
ādimarasādhidaivata-
-mantaḥ kalaye harāṅkavāsi mahaḥ || 180 ||
karṇopāntataraṅgita-
-kaṭākṣavispandikaṇṭhadaghnakṛpām |
kāmeśvarāṅkanilayāṃ
kāmapi vidyāṃ purātanīṃ kalaye || 181 ||
aravindakāntyaruntuda-
-vilocanadvandvasundaramukhendu |
chandaḥ kandalamandira-
-mantaḥpuramainduśekharaṃ vande || 182 ||
bimbinikurambaḍambara-
-viḍambakacchāyamambaravalagnam |
kambugalamambudakucaṃ
bimbokaṃ kamapi cumbatu mano me || 183 ||
kamapi kamanīyarūpaṃ
kalayāmyantaḥ kadambakusumāḍhyam |
campakarucirasuveṣaiḥ
sampāditakāntyalaṅkṛtadigantam || 184 ||
śampārucibhara-
-garhāsampādakakāntikavacitadigantam |
siddhāntaṃ nigamānāṃ
śuddhāntaṃ kimapi śūlinaḥ kalaye || 185 ||
udyaddinakaraśoṇā-
-nutpalabandhustanandhayāpīḍān |
karakalitapuṇḍracāpā-
-nkalaye kānapi kapardinaḥ prāṇān || 186 ||
raśanālasajjaghanayā
rasanājīvātucāpabhāsurayā |
ghrāṇāyuṣkaraśarayā
ghrātaṃ cittaṃ kayāpi vāsanayā || 187 ||
sarasijasahayudhvadṛśā
śampālatikāsanābhivigrahayā |
bhāsā kayāpi ceto
nāsāmaṇiśobhivadanayā bharitam || 188 ||
navayāvakābhasicayānvitayā
gajayānayā dayāparayā |
dhṛtayāminīśakalayā
dhiyā kayāpi kṣatāmayā hi vayam || 189 ||
alamalamakusumabāṇai-
-rabimbaśoṇairapuṇḍrakodaṇḍaiḥ |
akumudabāndhavacūḍai-
-ranyairiha jagati daivataṃ manyaiḥ || 190 ||
kuvalayasadṛkṣanayanaiḥ
kulagirikūṭasthabandhukucabhāraiḥ |
karuṇāspandikaṭākṣaiḥ
kavacitacitto'smi katipayaiḥ kutukaiḥ || 191 ||
natajanasulabhāya namo
nālīkasanābhilocanāya namaḥ |
nanditagiriśāya namo
mahase navanīpapāṭalāya namaḥ || 192 ||
kādambakusumadāmne
kāyacchāyākaṇāyitāryamṇe |
sīmne cirantanagirāṃ
bhūmne kasmaicidādade praṇatim || 193 ||
kuṭilakabarībharebhyaḥ
kuṅkumasabrahmacārikiraṇebhyaḥ |
kūlaṅkaṣastanebhyaḥ
kurmaḥ praṇatiṃ kulādrikutukebhyaḥ || 194 ||
kokanadaśoṇacaraṇā-
-tkomalakuralālivijitaśaivālāt |
utpalasagandhinayanā-
-durarīkurmo na devatamānyām || 195 ||
āpāṭalādharāṇā-
-mānīlasnigdhabarbarakacānām |
āmnāyajīvanānā-
-mākūtānāṃ harasya dāso'ham || 196 ||
puṅkhitavilāsahāsa-
-sphuritāsu purāhitāṅkanilayāsu |
magnaṃ mano madīyaṃ
kāsvapi kāmārijīvanāḍīṣu || 197 ||
lalitā pātu śiro me
lalāṭamambā ca madhumatīrūpā |
bhrūyugmaṃ ca bhavānī
puṣpaśarā pātu locanadvandvam || 198 ||
pāyānnāsāṃ bālā
subhagā dantāṃśca sundarī jihvām |
adharoṣṭhamādiśakti-
-ścakreśī pātu me ciraṃ cibukam || 199 ||
kāmeśvarī ca karṇau
kāmākṣī pātu gaṇḍayoryugalam |
śṛṅgāranāyikāvyā-
-dvadanaṃ siṃhāsaneśvarī ca galam || 200 ||
skandaprasūśca pātu
skandhau bāhū ca pāṭalāṅgī me |
pāṇī ca padmanilayā
pāyādaniśaṃ nakhāvalīrvijayā || 201 ||
kodaṇḍinī ca vakṣaḥ
kukṣiṃ cāvyāt kulācalatanūjā |
kalyāṇī ca valagnaṃ
kaṭiṃ ca pāyātkalādharaśikhaṇḍā || 202 ||
ūrudvayaṃ ca pāyā-
-dumā mṛḍānī ca jānunī rakṣet |
jaṅghe ca ṣoḍaśī me
pāyāt pādau ca pāśasṛṇihastā || 203 ||
prātaḥ pātu parā māṃ
madhyāhne pātu maṇigṛhādhīśā |
śarvāṇyavatu ca sāyaṃ
pāyādrātrau ca bhairavī sākṣāt || 204 ||
bhāryāṃ rakṣatu gaurīṃ
pāyāt putrāṃśca bindugṛhapīṭhā |
śrīvidyā ca yaśo me
śīlaṃ cāvyācciraṃ mahārājñī || 205 ||
pavanamayi pāvakamayi
kṣoṇīmayi gaganamayi kṛpīṭamayi |
ravimayi śaśimayi diṅmayi
samayamayi prāṇamayi śive pāhi || 206 ||
kāli kapālini śūlini
bhairavi mātaṅgi pañcami tripure |
vāgdevi vindhyavāsini
bāle bhuvaneśi pālaya ciraṃ mām || 207 ||
abhinavasindūrābhā-
-mamba tvāṃ cintayanti ye hṛdaye |
upari nipatanti teṣā-
-mutpalanayanākaṭākṣakallolāḥ || 208 ||
vargāṣṭakamilitābhi-
-rvaśinīmukhyābhirāvṛtāṃ bhavatīm |
cintayatāṃ sitavarṇāṃ
vāco niryāntyayatnato vadanāt || 209 ||
kanakaśalākāgaurīṃ
karṇavyālolakuṇḍaladvitayām |
prahasitamukhīṃ ca bhavatīṃ
dhyāyanto ye ta eva bhūdhanadāḥ || 210 ||
śīrṣāmbhoruhamadhye
śītalapīyūṣavarṣiṇīṃ bhavatīm |
anudinamanucintayatā-
-māyuṣyaṃ bhavati puṣkalamavanyām || 211 ||
madhurasmitāṃ madāruṇanayanāṃ
mātaṅgakumbhavakṣojām |
candravataṃsinīṃ tvāṃ
savidhe paśyanti sukṛtinaḥ kecit || 212 ||
lalitāyāḥ stavaratnaṃ
lalitapadābhiḥ praṇītamāryābhiḥ |
pratidinamavanau paṭhatāṃ
phalāni vaktuṃ pragalbhate saiva || 213 ||
sadasadanugrahanigraha-
-gṛhītamunivigraho bhagavān |
sarvāsāmupaniṣadāṃ
durvāsā jayati deśikaḥ prathamaḥ || 214 ||
iti maharṣidurvāsaḥ viracitaṃ śrīlalitāstavaratnam |
Sanskrit — Devanagari (original)
वन्दे गजेन्द्रवदनं
वामाङ्कारूढवल्लभाश्लिष्टम् ।
कुङ्कुमपरागशोणं
कुवलयिनीजारकोरकापीडम् ॥ 1 ॥
स जयति सुवर्णशैलः
सकलजगच्चक्रसङ्घटितमूर्तिः ।
काञ्चननिकुञ्जवाटी-
-कन्दलदमरीप्रपञ्चसङ्गीतः ॥ 2 ॥
हरिहयनैरृतमारुत-
-हरितामन्तेष्ववस्थितं तस्य ।
विनुमः सानुत्रितयं
विधिहरिगौरीशविष्टपाधारम् ॥ 3 ॥
मध्ये पुनर्मनोहर-
-रत्नरुचिस्तबकरञ्जितदिगन्तम् ।
उपरि चतुःशतयोजन-
-मुत्तुङ्गं शृङ्गपुङ्गवमुपासे ॥ 4 ॥
तत्र चतुःशतयोजन-
-परिणाहं देवशिल्पिना रचितम् ।
नानासालमनोज्ञं
नमाम्यहं नगरमादिविद्यायाः ॥ 5 ॥
प्रथमं सहस्रपूर्वक-
-षट्शतसङ्ख्याकयोजनं परितः ।
वलयीकृतस्वगात्रं
वरणं शरणं व्रजाम्ययोरूपम् ॥ 6 ॥
तस्योत्तरे समीरण-
-योजनदूरे तरङ्गितच्छायः ।
घटयतु मुदं द्वितीयो
घण्टास्तनसारनिर्मितः सालः ॥ 7 ॥
उभयोरन्तरसीम-
-न्युद्दामभ्रमररञ्जितोदारम् ।
उपवनमुपास्महे वय-
-मूरीकृतमन्दमारुतस्यन्दम् ॥ 8 ॥
आलिङ्ग्य भद्रकाली-
-मासीनस्तत्र हरिशिलाश्यामाम् ।
मनसि महाकालो मे
विहरतु मधुपानविभ्रमन्नेत्रः ॥ 9 ॥
तार्तीयीको वरण-
-स्तस्योत्तरसीम्नि वातयोजनतः ।
ताम्रेण रचितमूर्ति-
-स्तनुतामाचन्द्रतारकं भद्रम् ॥ 10 ॥
मध्ये तयोश्च मणिमय-
-पल्लवशाखाप्रसूनपक्ष्मलिताम् ।
कल्पानोकहवाटीं
कलये मकरन्दपङ्किलावालाम् ॥ 11 ॥
तत्र मधुमाधवश्री-
-तरुणीभ्यां तरलदृक्चकोराभ्याम् ।
आलिङ्गितोऽवतान्मा-
-मनिशं प्रथमर्तुरात्तपुष्पास्त्रः ॥ 12 ॥
नमत तदुत्तरभागे
नाकिपथोल्लङ्घिशृङ्गसङ्घातम् ।
सीसाकृतिं तुरीयं
सितकिरणालोकनिर्मलं सालम् ॥ 13 ॥
सालद्वयान्तराले
सरलालिकपोतचाटुसुभगायाम् ।
सन्तानवाटिकायां
सक्तं चेतोऽस्तु सततमस्माकम् ॥ 14 ॥
तत्र तपनातिरूक्षः
साम्राज्ञीचरणसान्द्रितस्वान्तः ।
शुक्रशुचिश्रीसहितो
ग्रीष्मर्तुर्दिशतु कीर्तिमाकल्पम् ॥ 15 ॥
उत्तरसीमनि तस्यो-
-न्नतशिखरोत्कम्पिहाटकपताकः ।
प्रकटयतु पञ्चमो नः
प्राकारः कुशलमारकूटमयः ॥ 16 ॥
प्राकारयोश्च मध्ये
पल्लवितान्यभृतपञ्चमोन्मेषा ।
हरिचन्दनद्रुवाटी-
-हरतादामूलमस्मदनुतापम् ॥ 17 ॥
तत्र नभः श्रीमुख्यै-
-स्तरुणीवर्गैः समन्वितः परितः ।
वज्राट्टहासमुखरो
वाञ्छापूर्तिं तनोतु वर्षर्तुः ॥ 18 ॥
मारुतयोजनदूरे
महनीयस्तस्य चोत्तरे भागे ।
भद्रं कृषीष्ट षष्ठः
प्राकारः पञ्चलोहधातुमयः ॥ 19 ॥
अनयोर्मध्ये सन्तत-
-मङ्कूरद्दिव्यकुसुमगन्धायाम् ।
मन्दारवाटिकायां
मानसमङ्गीकरोतु मे विहृतिम् ॥ 20 ॥
तस्यामिषोर्जलक्ष्मी-
-तरुणीभ्यां शरदृतुः सदा सहितः ।
अभ्यर्चयन् स जीया-
-दम्बामामोदमेदुरैः कुसुमैः ॥ 21 ॥
तस्यर्षिसङ्ख्ययोजन-
-दूरे देदीप्यमानशृङ्गौघः ।
कलधौतकलितमूर्तिः
कल्याणं दिशतु सप्तमः सालः ॥ 22 ॥
मध्ये तयोर्मरुत्पथ
लङ्घितविटपाग्रविरुतकलकण्ठा ।
श्रीपारिजातवाटी
श्रियमनिशं दिशतु शीतलोद्देशा ॥ 23 ॥
तस्यामतिप्रियाभ्यां
सह खेलन् सहसहस्यलक्ष्मीभ्याम् ।
सामन्तो झषकेतो-
-र्हेमन्तो भवतु हेमवृद्ध्यै नः ॥ 24 ॥
उत्तरतस्तस्य महा-
-नुद्भटहुतभुक्शिखारुणमयूखः ।
तपनीयखण्डरचित-
-स्तनुतादायुष्यमष्टमो वरणः ॥ 25 ॥
कादम्बविपिनवाटी-
-मनयोर्मध्यभुवि कल्पितावासाम् ।
कलयामि सूनकोरक-
-कन्दलितामोदतुन्दिलसमीराम् ॥ 26 ॥
तस्यामतिशिशिराकृति-
-रासीनस्तपतपस्यलक्ष्मीभ्याम् ।
शिवमनिशं कुरुतान्मे
शिशिरर्तुः सततशीतलदिगन्तः ॥ 27 ॥
तस्यां कदम्बवाट्यां
तत्प्रसवामोदमिलितमधुगन्धम् ।
सप्तावरणमनोज्ञं
शरणं समुपैमि मन्त्रिणीशरणम् ॥ 28 ॥
तत्रालये विशाले
तपनीयारचिततरलसोपाने ।
माणिक्यमण्डपान्त-
-र्महिते सिंहासने सुमणिखचिते ॥ 29 ॥
बिन्दुत्रिपञ्चकोण-
-द्विपनृपवसुवेददलकुरेखाढ्ये ।
चक्रे सदा निविष्टां
षष्ठ्यष्टत्रिंशदक्षरेशानीम् ॥ 30 ॥
तापिञ्छमेचकाभां
तालीदलघटितकर्णताटङ्काम् ।
ताम्बूलपूरितमुखीं
ताम्राधरबिम्बदृष्टदरहासाम् ॥ 31 ॥
कुङ्कुमपङ्किलदेहां
कुवलयजीवातुशावकवतंसाम् ।
कोकनदशोणचरणां
कोकिलनिक्वाणकोमलालापाम् ॥ 32 ॥
वामाङ्गगलितचूलीं
वनमाल्यकदम्बमालिकाभरणाम् ।
मुक्ताललन्तिकाञ्चित
मुग्धालिकमिलितचित्रकोदाराम् ॥ 33 ॥
करविधृतकीरशावक-
-कलनिनदव्यक्तनिखिलनिगमार्थाम् ।
वामकुचसङ्गिवीणावादन-
-सौख्यार्धमीलिताक्षियुगाम् ॥ 34 ॥
आपाटलांशुकधरा-
-मादिरसोन्मेषवासितकटाक्षाम् ।
आम्नायसारगुलिका-
-माद्यां सङ्गीतमातृकां वन्दे ॥ 35 ॥
तस्य च सुवर्णसाल-
-स्योत्तरतस्तरुणकुङ्कुमच्छायः ।
शमयतु मम सन्तापं
सालो नवमः स पुष्परागमयः ॥ 36 ॥
अनयोरन्तरवसुधाः
प्रणुमः प्रत्यग्रपुष्परागमयीः ।
सिंहासनेश्वरीमनु-
-चिन्तननिस्तन्द्रसिद्धनीरन्ध्राः ॥ 37 ॥
तत्सालोत्तरदेशे
तरुणजपाकिरणधोरणीशोणः ।
प्रशमयतु पद्मराग-
-प्राकारो मम पराभवं दशमः ॥ 38 ॥
अन्तरभूकृतवासा-
-ननयोरपनीतचित्तवैमत्यान् ।
चक्रेशीपदभक्तां-
-श्चारणवर्गानहर्निशं कलये ॥ 39 ॥
सारङ्गवाहयोजनदूरे-
-ऽसङ्घटितकेतनस्तस्य ।
गोमेदकेन रचितो
गोपायतु मां समुन्नतः सालः ॥ 40 ॥
वप्रद्वयान्तरोर्व्यां
वटुकैर्विविधैश्च योगिनीबृन्दैः ।
सततं समर्चितायाः
सङ्कर्षण्याः प्रणौमि चरणाब्जम् ॥ 41 ॥
तापसयोजनदूरे
तस्य समुत्तुङ्ग गोपुरोपेतः ।
वाञ्छापूर्त्यै भवता-
-द्वज्रमणीनिकरनिर्मितो वप्रः ॥ 42 ॥
वरणद्वितयान्तरतो
वासजुषो विहितमधुरसास्वादाः ।
रम्भादिविबुधवेश्या
रचयन्तु महान्तमस्मदानन्दम् ॥ 43 ॥
तत्र सदा प्रवहन्ती
तटिनी वज्राभिधा चिरं जीयात् ।
चटुलोर्मिजालनृत्य-
-त्कलहंसीकुलकलक्वणितपुष्टा ॥ 44 ॥
रोधसि तस्या रुचिरे
वज्रेशी जयति वज्रभूषाढ्या ।
वज्रप्रदानतोषित-
-वज्रिमुखत्रिदशविनुतचारित्रा ॥ 45 ॥
तस्योदीच्यां हरिति
स्तवकितसुषमावलीढवियदन्तः ।
वैडूर्यरत्नरचितो
वैमल्यं दिशतु चेतसो वरणः ॥ 46 ॥
अधिमध्यमेतयोः पुन-
-रम्बाचरणावलम्बितस्वान्तान् ।
कार्कोटकादिनागान्
कलयामः किं च बलिमुखान् दनुजान् ॥ 47 ॥
गन्धवहसङ्ख्ययोजन-
-दूरे गगनोर्ध्वजाङ्घिकस्तस्य ।
वासवमणिप्रणीतो
वरणो बहलयतु वैदुषीं विशदाम् ॥ 48 ॥
मध्यक्षोण्यामनयो-
-र्महेन्द्रनीलात्मकानि च सरांसि ।
शातोदरीसहाया-
-न्भूपालानपि पुनः पुनः प्रणुमः ॥ 49 ॥
आशुगयोजनदूरे
तस्योर्ध्वं कान्तिधवलितदिगन्तः ।
मुक्ताविरचितगात्रो
मुहुरस्माकं मुदे भवतु सालः ॥ 50 ॥
आवृत्त्योरधिमध्यं
पूर्वस्यां दिशि पुरन्दरः श्रीमान् ।
अभ्रमुविटाधिरूढो
विभ्रममस्माकमनिशमातनुतात् ॥ 51 ॥
तत्कोणे व्यजनस्रु-
-क्तोमरपात्रस्रुवान्नशक्तिधरः ।
स्वाहास्वधासमेतः
सुखयतु मां हव्यवाहनः सुचिरम् ॥ 52 ॥
दक्षिणदिगन्तराले
दण्डधरो नीलनीरदच्छायः ।
त्रिपुरापदाब्जभक्तस्तिरयतु
मम निखिलमंहसां निकरम् ॥ 53 ॥
तस्यैव पश्चिमायां
दिशि दलितेन्दीवरप्रभाश्यामः ।
खेटासियष्टिधारी
खेदानपनयतु यातुधानो मे ॥ 54 ॥
तस्या उत्तरदेशे
धवलाङ्गो विपुलझषवरारूढः ।
पाशायुधात्तपाणिः
पाशी विदलयतु पाशजालानि ॥ 55 ॥
वन्दे तदुत्तरहरि-
-त्कोणे वायुं चमूरुवरवाहम् ।
कोरकिततत्त्वबोधा-
-न्गोरक्षप्रमुखयोगिनोऽपि मुहुः ॥ 56 ॥
तरुणीरिडाप्रधाना-
-स्तिस्रो वातस्य तस्य कृतवासाः ।
प्रत्यग्रकापिशायन-
-पानपरिभ्रान्तलोचनाः कलये ॥ 57 ॥
तल्लोकपूर्वभागे
धनदं ध्यायामि शेवधिकुलेशम् ।
अपि माणिभद्रमुख्या-
-नम्बाचरणावलम्बिनो यक्षान् ॥ 58 ॥
तस्यैव पूर्वसीमनि
तपनीयारचितगोपुरे नगरे ।
कात्यायनीसहायं
कलये शीतांशुखण्डचूडालम् ॥ 59 ॥
तत्पुरषोडशवरण-
-स्थलभाजस्तरुणचन्द्रचूडालान् ।
रुद्राध्याये पठिता-
-न्रुद्राणीसहचरान्भजे रुद्रान् ॥ 60 ॥
पवमानसङ्ख्ययोजन-
-दूरे बालतृण्मेचकस्तस्य ।
सालो मरकतरचितः
सम्पदमचलां श्रियं च पुष्णातु ॥ 61 ॥
आवृतियुग्मान्तरतो
हरितमणीनिवहमेचके देशे ।
हाटकतालीविपिनं
हालाघटघटितविटपमाकलये ॥ 62 ॥
तत्रैव मन्त्रिणीगृह-
-परिणाहं तरलकेतनं सदनम् ।
मरकतसौधमनोज्ञं
दद्यादायूंषि दण्डनाथायाः ॥ 63 ॥
सदने तत्र हरिन्मणि-
-सङ्घटिते मण्डपे शतस्तम्भे ।
कार्तस्वरमयपीठे
कनकमयाम्बुरुहकर्णिकामध्ये ॥ 64 ॥
बिन्दुत्रिकोणवर्तुल-
-षडस्रवृत्तद्वयान्विते चक्रे ।
सञ्चारिणी दशोत्तर-
शतार्णमनुराजकमलकलहंसी ॥ 65 ॥
कोलवदना कुशेशय-
-नयना कोकारिमण्डितशिखण्डा ।
सन्तप्तकाञ्चनाभा
सन्ध्यारुणचेलसंवृतनितम्बा ॥ 66 ॥
हलमुसलशङ्खचक्रा-
-ऽङ्कुशपाशाभयवरस्फुरितहस्ता ।
कूलङ्कषानुकम्पा
कुङ्कुमजम्बालितस्तनाभोगा ॥ 67 ॥
धूर्तानामतिदूरा-
-वार्ताशेषावलग्नकमनीया ।
आर्तालीशुभदात्री
वार्ताली भवतु वाञ्छितार्थाय ॥ 68 ॥
तस्याः परितो देवीः
स्वप्नेश्युन्मत्तभैरवीमुख्याः ।
प्रणमत जम्भिन्याद्याः
भैरववर्गांश्च हेतुकप्रमुखान् ॥ 69 ॥
पूर्वोक्तसङ्ख्ययोजन-
-दूरे पूयांशुपाटलस्तस्य ।
विद्रावयतु मदार्तिं
विद्रुमसालो विशङ्कटद्वारः ॥ 70 ॥
आवरणयोरहर्निश-
-मन्तरभूमौप्रकाशशालिन्याम् ।
आसीनमम्बुजासन-
-मभिनवसिन्दूरगौरमहमीडे ॥ 71 ॥
वरणस्य तस्य मारुत-
-योजनतो विपुलगोपुरद्वारः ।
सालो नानारत्नैः
सङ्घटिताङ्गः कृषीष्ट मदभीष्टम् ॥ 72 ॥
अन्तरकक्ष्यामनयो-
-रविरलशोभापिचण्डिलोद्देशाम् ।
माणिक्यमण्डपाख्यां
महतीमधिहृदयमनिशमाकलये ॥ 73 ॥
तत्र स्थितं प्रसन्नं
तरुणतमालप्रवालकिरणाभम् ।
कर्णावलम्बिकुण्डल-
-कन्दलिताभीशुकवचितकपोलम् ॥ 74 ॥
शोणाधरं शुचिस्मित-
-मेणाङ्कवदनमेधमानकृपम् ।
मुग्धैणमदविशेषक-
-मुद्रितनिटिलेन्दुरेखिकारुचिरम् ॥ 75 ॥
नालीकदलसहोदर-
-नयनाञ्चलघटितमनसिजाकूतम् ।
कमलाकठिनपयोधर-
-कस्तूरीघुसृणपङ्किलोरस्कम् ॥ 76 ॥
चाम्पेयगन्धिकैश्यं
शम्पासब्रह्मचारिकौशेयम् ।
श्रीवत्सकौस्तुभधरं
श्रितजनरक्षाधुरीणचरणाब्जम् ॥ 77 ॥
कम्बुसुदर्शनविलस-
-त्करपद्मं कण्ठलोलवनमालम् ।
मुचुकुन्दमोक्षफलदं
मुकुन्दमानन्दकन्दमवलम्बे ॥ 78 ॥
तद्वरणोत्तरभागे
तारापतिबिम्बचुम्बिनिजशृङ्गः ।
विविधमणीगणघटितो
वितरतु सालो विनिर्मलां धिषणाम् ॥ 79 ॥
प्राकारद्वितयान्तर-
-कक्ष्यां पृथुरत्ननिकरसङ्कीर्णाम् ।
नमत सहस्रस्तम्भक-
-मण्डपनाम्नातिविश्रुतां भुवने ॥ 80 ॥
प्रणुमस्तत्र भवानी-
-सहचरमीशानमिन्दुखण्डधरम् ।
शृङ्गारनायिकामनु-
-शीलनभाजोऽपि भृङ्गिनन्दिमुखान् ॥ 81 ॥
तस्यैणवाहयोजन-
-दूरे वन्दे मनोमयं वप्रम् ।
अङ्कूरन्मणिकिरणा-
-मन्तरकक्ष्यां च निर्मलामनयोः ॥ 82 ॥
तत्रैवामृतवापीं
तरलतरङ्गावलीढतटयुग्माम् ।
मुक्तामयकलहंसी-
-मुद्रितकनकारविन्दसन्दोहाम् ॥ 83 ॥
शक्रोपलमयभृङ्गी-
-सङ्गीतोन्मेषघोषितदिगन्ताम् ।
काञ्चनमयाङ्गविलस-
-त्कारण्डवषण्डताण्डवमनोज्ञाम् ॥ 84 ॥
कुरुविन्दात्मकहल्लक-
-कोरकसुषमासमूहपाटलिताम् ।
कलये सुधास्वरूपां
कन्दलितामन्दकैरवामोदाम् ॥ 85 ॥
तद्वापिकान्तराले तरले
मणिपोतसीम्नि विहरन्तीम् ।
सिन्दूरपाटलाङ्गीं
सितकिरणाङ्कूरकल्पितवतंसाम् ॥ 86 ॥
पर्वेन्दुबिम्बवदनां
पल्लवशोणाधरस्फुरितहासाम् ।
कुटिलकबरीं कुरङ्गी-
-शिशुनयनां कुण्डलस्फुरितगण्डाम् ॥ 87 ॥
निकटस्थपोतनिलयाः
शक्तीः शयविधृतहेमशृङ्गजलैः ।
परिषिञ्चन्तीं परित-
-स्तारां तारुण्यगर्वितां वन्दे ॥ 88 ॥
प्रागुक्तसङ्ख्ययोजनदूरे
प्रणमामि बुद्धिमयसालम् ।
अनयोरन्तरकक्ष्या-
-मष्टापदपुष्टमेदिनीं रुचिराम् ॥ 89 ॥
कादम्बरीनिधानां
कलयाम्यानन्दवापिकां तस्याम् ।
शोणाश्मनिवहनिर्मित-
-सोपानश्रेणिशोभमानतटीम् ॥ 90 ॥
माणिक्यतरणिनिलयां
मध्ये तस्या मदारुणकपोलाम् ।
अमृतेशीत्यभिधाना-
-मन्तः कलयामि वारुणीं देवीम् ॥ 91 ॥
सौवर्णकेनिपातन-
-हस्ताः सौन्दर्यगर्विता देव्यः ।
तत्पुरतः स्थितिभाजो
वितरन्त्वस्माकमायुषो वृद्धिम् ॥ 92 ॥
तस्य पृषदश्वयोजन-
-दूरेऽहङ्कारसालमतितुङ्गम् ।
वन्दे तयोश्च मध्ये
कक्ष्यां वलमानमलयपवमानाम् ॥ 93 ॥
विनुमो विमर्शवापीं
सौषुम्नसुधास्वरूपिणीं तत्र ।
वेलातिलङ्घ्यवीची-
-कोलाहलभरितकूलवनवाटीम् ॥ 94 ॥
तत्रैव सलिलमध्ये
तापिञ्छदलप्रपञ्चसुषमाभाम् ।
श्यामलकञ्चुकलसितां
श्यामाविटबिम्बडम्बरहरास्याम् ॥ 95 ॥
आभुग्नमसृणचिल्ली-
-हसितायुग्मशरकार्मुकविलासाम् ।
मन्दस्मिताञ्चितमुखीं
मणिमयताटङ्कमण्डितकपोलाम् ॥ 96 ॥
कुरुविन्दतरणिनिलयां
कुलाचलस्पर्धिकुचनमन्मध्याम् ।
कुङ्कुमविलिप्तगात्रीं
कुरुकुल्लां मनसि कुर्महे सततम् ॥ 97 ॥
तत्सालोत्तरभागे
भानुमयं वप्रमाश्रये दीप्तम् ।
मध्यं च विपुलमनयो-
-र्मन्ये विश्रान्तमातपोद्गारम् ॥ 98 ॥
तत्र कुरुविन्दपीठे
तामरसे कनककर्णिकाघटिते ।
आसीनमरुणवासस-
-मम्लानप्रसवमालिकाभरणम् ॥ 99 ॥
चक्षुष्मतीप्रकाशन-
-शक्तिच्छायासमारचितकेलिम् ।
माणिक्यमुकुटरम्यं
मन्ये मार्ताण्डभैरवं हृदये ॥ 100 ॥
इन्दुमयसालमीडे
तस्योत्तरतस्तुषारगिरिगौरम् ।
अत्यन्तशिशिरमारुत-
-मनयोर्मध्यं च चन्द्रिकोद्गारम् ॥ 101 ॥
तत्र प्रकाशमानं
तारानिकरैः परिष्कृतोद्देशम् ।
अमृतमयकान्तिकन्दल-
-मन्तः कलयामि कुन्दसितमिन्दुम् ॥ 102 ॥
शृङ्गारसालमीडे
शृङ्गोल्लसितं तदुत्तरे भागे ।
मध्यस्थले तयोरपि
महितां शृङ्गारपूर्विकां परिखाम् ॥ 103 ॥
तत्र मणिनौस्थिताभि-
-स्तपनीयाविरचिताग्रहस्ताभिः ।
शृङ्गारदेवताभिः
सहितं परिखाधिपं भजे मदनम् ॥ 104 ॥
शृङ्गारवरणवर्यस्योत्तरतः
सकलविबुधसंसेव्यम् ।
चिन्तामणिगणरचितं
चिन्तां दूरीकरोतु मे सदनम् ॥ 105 ॥
मणिसदनसालयोरधि-
-मध्यं दशतालभूमिरुहदीर्घैः ।
पर्णैः सुवर्णवर्णै-
-र्युक्तां काण्डैश्च योजनोत्तुङ्गैः ॥ 106 ॥
मृदुलैस्तालीपञ्चक-
-मानैर्मिलितां च केसरकदम्बैः ।
सन्ततगलितमरन्द-
-स्रोतोनिर्यन्मिलिन्दसन्दोहाम् ॥ 107 ॥
पाटीरपवनबालक-
-धाटीनिर्यत्परागपिञ्जरिताम् ।
कलहंसीकुलकलकल-
-कूलङ्कषनिनदनिचयकमनीयाम् ॥ 108 ॥
पद्माटवीं भजामः
परिमलकल्लोलपक्ष्मलोपान्ताम् ।
[ देव्यर्घ्यपात्रधारी
तस्याः पूर्वदिशि दशकलायुक्तः । ]
वलयितमूर्तिर्भगवा-
-न्वह्निः क्रोशोन्नतश्चिरं पायात् ॥ 109 ॥
तत्राधारे देव्याः
पात्रीरूपः प्रभाकरः श्रीमान् ।
द्वादशकलासमेतो
ध्वान्तं मम बहुलमान्तरं भिन्द्यात् ॥ 110 ॥
तस्मिन् दिनेशपात्रे
तरङ्गितामोदममृतमयमर्घ्यम् ।
चन्द्रकलात्मकममृतं
सान्द्रीकुर्यादमन्दमानन्दम् ॥ 111 ॥
अमृते तस्मिन्नभितो
विहरन्त्यो विविधमणितरणिभाजः ।
षोडश कलाः सुधांशोः
शोकादुत्तारयन्तु मामनिशम् ॥ 112 ॥
तत्रैव विहृतिभाजो
धातृमुखानां च कारणेशानाम् ।
सृष्ट्यादिरूपिकास्ताः
शमयन्त्वखिलाः कलाश्च सन्तापम् ॥ 113 ॥
कीनाशवरुणकिन्नर-
-राजदिगन्तेषु रत्नगेहस्य ।
कलयामि तान्यजस्रं
कलयन्त्वायुष्यमर्घ्यपात्राणि ॥ 114 ॥
पात्रस्थलस्य पुरतः
पद्मारमणविधिपार्वतीशानाम् ।
भवनानि शर्मणे नो
भवन्तु भासा प्रदीपितजगन्ति ॥ 115 ॥
सदनस्यानलकोणे
सततं प्रणमामि कुण्डमाग्नेयम् ।
तत्र स्थितं च वह्निं
तरलशिखाजटिलमम्बिकाजनकम् ॥ 116 ॥
तस्यासुरदिशि तादृश-
-रत्नपरिस्फुरितपर्वनवकाढ्यम् ।
चक्रात्मकं शताङ्गं
शतयोजनमुन्नतं भजे दिव्यम् ॥ 117 ॥
तत्रैव दिशि निषण्णं
तपनीयध्वजपरम्पराश्लिष्टम् ।
रथमपरं च भवान्या
रचयामो मनसि रत्नमयचूडम् ॥ 118 ॥
भवनस्य वायुभागे
परिष्कृतो विविधवैजयन्तीभिः ।
रचयतु मुदं रथेन्द्रः
सचिवेशान्याः समस्तवन्द्यायाः ॥ 119 ॥
कुर्मोऽधिहृदयमनिशं
क्रोडास्यायाः शताङ्गमूर्धन्यम् ।
रुद्रदिशि रत्नधाम्नो
रुचिरशलाकाप्रपञ्चकञ्चुकितम् ॥ 120 ॥
परितो देवीधाम्नः
प्रणीतवासा मनुस्वरूपिण्यः ।
कुर्वन्तु रश्मिमाला-
-कृतयः कुशलानि देवता निखिलाः ॥ 121 ॥
प्राग्द्वारस्य भवानी-
-धाम्नः पार्श्वद्वयारचितवासे ।
मातङ्गीकिटिमुख्यौ
मणिसदने मनसि भावयामि चिरम् ॥ 122 ॥
योजनयुगलाभोगा
तत्क्रोशपरिणाहयैव भित्त्या च ।
चिन्तामणिगृहभूमि-
-र्जीयादाम्नायमयचतुर्द्वारा ॥ 123 ॥
द्वारे द्वारे धाम्नः
पिण्डीभूता नवीनबिम्बाभाः ।
विदधतु विपुलां कीर्तिं
दिव्या लौहित्यसिद्ध्यो देव्यः ॥ 124 ॥
मणिसदनस्यान्तरतो
महनीये रत्नवेदिकामध्ये ।
बिन्दुमयचक्रमीडे
पीठानामुपरि विरचितावासम् ॥ 125 ॥
चक्राणां सकलानां
प्रथममधः सीमफलकवास्तव्याः ।
अणिमादिसिद्धयो मा-
-मवन्तु देवी प्रभास्वरूपिण्यः ॥ 126 ॥
अणिमादिसिद्धिफलक-
-स्योपरिहरिणाङ्कखण्डकृतचूडाः ।
भद्रं पक्ष्मलयन्तु
ब्राह्मीप्रमुखाश्च मातरोऽस्माकम् ॥ 127 ॥
तस्योपरि मणिफलके
तारुण्योत्तुङ्गपीनकुचभाराः ।
सङ्क्षोभिणीप्रधानाः
भ्रान्ति विद्रावयन्तु दश मुद्राः ॥ 128 ॥
फलकत्रयस्वरूपे
पृथुले त्रैलोक्यमोहने चक्रे ।
दीव्यन्तु प्रकटाख्या-
-स्तासां कर्त्रीं च भगवती त्रिपुरा ॥ 129 ॥
तदुपरि विपुले धिष्ण्ये
तरलदृशस्तरुणकोकनदभासः ।
कामाकर्षिण्याद्याः
कलये देवीः कलाधरशिखण्डाः ॥ 130 ॥
सर्वाशापरिपूरकचक्रे-
-ऽस्मिन् गुप्तयोगिनीसेव्याः ।
त्रिपुरेशी मम दुरितं
तुद्यात् कण्ठावलम्बिमणिहारा ॥ 131 ॥
तस्योपरि मणिपीठे
ताम्राम्भोरुहदलप्रभाशोणाः ।
ध्यायाम्यनङ्गकुसुमा-
-प्रमुखा देवीश्च विधृतकूर्पासाः ॥ 132 ॥
सङ्क्षोभकारकेऽस्मिं-
-श्चक्रे श्रीत्रिपुरसुन्दरी साक्षात् ।
गोप्त्री गुप्ततराख्याः
गोपायतु मां कृपार्द्रया दृष्ट्या ॥ 133 ॥
सङ्क्षोभिणीप्रधानाः
शक्तीस्तस्योर्ध्ववलयकृतवासाः ।
आलोलनीलवेणी-
-रन्तः कलयामि यौवनोन्मत्ताः ॥ 134 ॥
सौभाग्यदायकेऽस्मिं-
-श्चक्रेशी त्रिपुरवासिनी जीयात् ।
शक्तीश्च सम्प्रदायाभिधाः
समस्ताः प्रमोदयन्त्वनिशम् ॥ 135 ॥
मणिपीठोपरि तासां
महति चतुर्हस्तविस्तृते वलये ।
सन्ततविरचितवासाः
शक्तीः कलयामि सर्वसिद्धिमुखाः ॥ 136 ॥
सर्वार्थसाधकाख्ये
चक्रेऽमुष्मिन् समस्तफलदात्री ।
त्रिपुरा श्रीर्मम कुशलं
दिशतादुत्तीर्णयोगिनीसेव्या ॥ 137 ॥
तासां निलयस्योपरि
धिष्ण्ये कौसुम्भकञ्चुकमनोज्ञाः ।
सर्वाज्ञाद्याः देव्यः
सकलाः सम्पादयन्तु मम कीर्तिम् ॥ 138 ॥
चक्रे समस्तरक्षा-
-करनाम्न्यस्मिन् समस्तजनसेव्याम् ।
मनसि निगर्भासहितां
मन्ये श्रीत्रिपुरमालिनीं देवीम् ॥ 139 ॥
सर्वज्ञासदनस्योपरि
चक्रे विपुले समाकलितगेहाः ।
वन्दे वशिनीमुख्याः
शक्तीः सिन्दूररेणुरुचः ॥ 140 ॥
श्रीसर्वरोगहराख्य-
-चक्रेऽस्मिंस्त्रिपुरपूर्विकां सिद्धाम् ।
वन्दे रहस्यनाम्ना
वेद्याभिः शक्तिभिः सदा सेव्याम् ॥ 141 ॥
वशिनीगृहोपरिष्टा-
-द्विंशतिहस्तोन्नते महापीठे ।
शमयन्तु शत्रुबृन्दं
शस्त्राण्यस्त्राणि चादिदम्पत्योः ॥ 142 ॥
शस्त्रसदनोपरिष्टा-
-द्वलये वलवैरिरत्नसङ्घटिते ।
कामेश्वरीप्रधानाः
कलये देवीः समस्तजनवन्द्याः ॥ 143 ॥
चक्रेऽत्र सर्वसिद्धिप्रद-
-नामनि सर्वफलदात्री ।
त्रिपुराम्बावतु सततं
परापररहस्ययोगिनीसेव्या ॥ 144 ॥
कामेश्वरीगृहोपरिवलये
विविधमनुसम्प्रदायज्ञाः ।
चत्वारो युगनाथा
जयन्तु मित्रेशपूर्वकाः गुरवः ॥ 145 ॥
नाथभवनोपरिष्टा-
-न्नानारत्नचयमेदुरे पीठे ।
कामेश्याद्या नित्याः
कलयन्तु मुदं तिथिस्वरूपिण्यः ॥ 146 ॥
नित्यासदनस्योपरि
निर्मलमणिनिवहविरचिते धिष्ण्ये ।
कुशलं षडङ्गदेव्यः
कलयन्त्वस्माकमुत्तरलनेत्राः ॥ 147 ॥
सदनस्योपरि तासां
सर्वानन्दमयनामके बिन्दौ ।
पञ्चब्रह्माकारां
मञ्चं प्रणमामि मणिगणाकीर्णम् ॥ 148 ॥
परितो मणिमञ्चस्य
प्रलम्बमाना नियन्त्रिता पाशैः ।
मायामयी जवनिका
मम दुरितं हरतु मेचकच्छाया ॥ 149 ॥
मञ्चस्योपरि लम्ब-
-न्मदनीपुन्नागमालिकाभरितम् ।
हरिगोपमयवितानं
हरतादालस्यमनिशमस्माकम् ॥ 150 ॥
पर्यङ्कस्य भजामः
पादान्बिम्बाम्बुदेन्दुहेमरुचः ।
अजहरिरुद्रेशमया-
-ननलासुरमारुतेशकोणस्थान् ॥ 151 ॥
फलकं सदाशिवमयं
प्रणौमि सिन्दूररेणुकिरणाभम् ।
आरभ्याङ्गेशीनां
सदनात्कलितं च रत्नसोपानम् ॥ 152 ॥
पट्टोपधानगण्डक-
-चतुष्टयस्फुरितपाटलास्तरणम् ।
पर्यङ्कोपरि घटितं
पातु चिरं हंसतूलशयनं नः ॥ 153 ॥
तस्योपरि निवसन्तं
तारुण्यश्रीनिषेवितं सततम् ।
आवृन्तपुल्लहल्लक-
-मरीचिकापुञ्जमञ्जुलच्छायम् ॥ 154 ॥
सिन्दूरशोणवसनं
शीतांशुस्तबकचुम्बितकिरीटम् ।
कुङ्कुमतिलकमनोहर-
-कुटिलालिकहसितकुमुदबन्धुशिशुम् ॥ 155 ॥
पूर्णेन्दुबिम्बवदनं
फुल्लसरोजातलोचनत्रितयम् ।
तरलापाङ्गतरङ्गित-
-शफराङ्कनशास्त्रसम्प्रदायार्थम् ॥ 156 ॥
मणिमयकुण्डलपुष्य-
-न्मरीचिकल्लोलमांसलकपोलम् ।
विद्रुमसहोदराधर-
-विसृमरसुस्मितकिशोरसञ्चारम् ॥ 157 ॥
आमोदिकुसुमशेखर-
-मानीलभ्रूलतायुगमनोज्ञम् ।
वीटीसौरभवीची-
-द्विगुणितवक्त्रारविन्दसौरभ्यम् ॥ 158 ॥
पाशाङ्कुशेक्षुचाप-
-प्रसवशरस्फुरितकोमलकराब्जम् ।
काश्मीरपङ्किलाङ्गं
कामेशं मनसि कुर्महे सततम् ॥ 159 ॥
तस्याङ्कभुवि निषण्णां
तरुणकदम्बप्रसूनकिरणाभाम् ।
शीतांशुखण्डचूडां
सीमन्तन्यस्तसान्द्रसिन्दूराम् ॥ 160 ॥
कुङ्कुमललामभास्व-
-न्निटिलां कुटिलतरचिल्लिकायुगलाम् ।
नालीकतुल्यनयनां
नासाञ्चलनटितमौक्तिकाभरणाम् ॥ 161 ॥
अङ्कुरितमन्दहास-
-मरुणाधरकान्तिविजितबिम्बाभाम् ।
कस्तूरीमकरीयुत-
-कपोलसङ्क्रान्तकनकताटङ्काम् ॥ 162 ॥
कर्पूरसान्द्रवीटी-
-कबलितवदनारविन्दकमनीयाम् ।
कम्बुसहोदरकण्ठ-
-प्रलम्बमानाच्छमौक्तिककलापाम् ॥ 163 ॥
कह्लारदामकोमल-
-भुजयुगलस्फुरितरत्नकेयूराम् ।
करपद्ममूलविलस-
-त्काञ्चनमयकटकवलयसन्दोहाम् ॥ 164 ॥
पाणिचतुष्टयविलस-
-त्पाशाङ्कुशपुण्ड्रचापपुष्पास्त्राम् ।
कूलङ्कषकुचशिखरां
कुङ्कुमकर्दमितरत्नकूर्पासाम् ॥ 165 ॥
अणुदायादवलग्ना-
-मम्बुदशोभासनाभिरोमलताम् ।
माणिक्यखचितकाञ्ची-
-मरीचिकाक्रान्तमांसलनितम्बाम् ॥ 166 ॥
करभोरुकाण्डयुगलां
जङ्घाजितकामजैत्रतूणीराम् ।
प्रपदपरिभूतकूर्मां
पल्लवसच्छायपदयुगमनोज्ञाम् ॥ 167 ॥
कमलभवकञ्जलोचन-
-किरीटरत्नांशुरञ्जितपदाब्जाम् ।
उन्मस्तकानुकम्पा-
-मुत्तरलापाङ्गपोषितानङ्गाम् ॥ 168 ॥
आदिमरसावलम्बा-
-मनिदं प्रथमोक्तिवल्लरीकलिकाम् ।
आब्रह्मकीटजननी-
-मन्तः कलयामि सुन्दरीमनिशम् ॥ 169 ॥
कस्तु क्षितौ पटीया-
-न्वस्तु स्तोतुं शिवाङ्कवास्तव्यम् ।
अस्तु चिरन्तनसुकृतैः
प्रस्तुतकाम्याय तन्मम पुरस्तात् ॥ 170 ॥
प्रभुसम्मितोक्तिगम्यं
परमशिवोत्सङ्गतुङ्गपर्यङ्कम् ।
तेजः किञ्चन दिव्यं
पुरतो मे भवतु पुण्ड्रकोदण्डम् ॥ 171 ॥
मधुरिमभरितशरासं
मकरन्दस्यन्दिमार्गणोदारम् ।
कैरविणीविटचूडं
कैवल्यायास्तु किञ्चन महो नः ॥ 172 ॥
अक्षुद्रमिक्षुचापं
परोक्षमवलग्नसीम्नि त्र्यक्षम् ।
क्षपयतु मे क्षेमेतर-
-मुक्षरथप्रेमपक्ष्मलं तेजः ॥ 173 ॥
भृङ्गरुचिसङ्गरकरापाङ्गं
शृङ्गारतुङ्गमरुणाङ्गम् ।
मङ्गलमभङ्गुरं मे
घटयतु गङ्गाधराङ्गसङ्गि महः ॥ 174 ॥
प्रपदाजितकूर्ममूर्जित-
-करुणं भर्मरुचिनिर्मथनदेहम् ।
श्रितवर्म मर्म शम्भोः
किञ्चन मम नर्म शर्म निर्मातु ॥ 175 ॥
कालकुरलालिकालिम-
-कन्दलविजितालि विधृतमणिवालि ।
मिलतु हृदि पुलिनजघनं
बहुलितगलगरलकेलि किमपि महः ॥ 176 ॥
कुङ्कुमतिलकितफाला
कुरुविन्दच्छायपाटलदुकूला ।
करुणापयोधिवेला
काचन चित्ते चकास्तु मे लीला ॥ 177 ॥
पुष्पन्धयरुचिवेण्यः
पुलिनाभोगत्रपाकरश्रेण्यः ।
जीयासुरिक्षुपाण्यः
काश्चन कामारिकेलिसाक्षिण्यः ॥ 178 ॥
तपनीयांशुकभांसि
द्राक्षामाधुर्यनास्तिकवचांसि ।
कतिचन शुचं महांसि
क्षपयतु कपालितोषितमनांसि ॥ 179 ॥
असितकचमायताक्षं
कुसुमशरं कूलमुद्वहकृपार्द्रम् ।
आदिमरसाधिदैवत-
-मन्तः कलये हराङ्कवासि महः ॥ 180 ॥
कर्णोपान्ततरङ्गित-
-कटाक्षविस्पन्दिकण्ठदघ्नकृपाम् ।
कामेश्वराङ्कनिलयां
कामपि विद्यां पुरातनीं कलये ॥ 181 ॥
अरविन्दकान्त्यरुन्तुद-
-विलोचनद्वन्द्वसुन्दरमुखेन्दु ।
छन्दः कन्दलमन्दिर-
-मन्तःपुरमैन्दुशेखरं वन्दे ॥ 182 ॥
बिम्बिनिकुरम्बडम्बर-
-विडम्बकच्छायमम्बरवलग्नम् ।
कम्बुगलमम्बुदकुचं
बिम्बोकं कमपि चुम्बतु मनो मे ॥ 183 ॥
कमपि कमनीयरूपं
कलयाम्यन्तः कदम्बकुसुमाढ्यम् ।
चम्पकरुचिरसुवेषैः
सम्पादितकान्त्यलङ्कृतदिगन्तम् ॥ 184 ॥
शम्पारुचिभर-
-गर्हासम्पादककान्तिकवचितदिगन्तम् ।
सिद्धान्तं निगमानां
शुद्धान्तं किमपि शूलिनः कलये ॥ 185 ॥
उद्यद्दिनकरशोणा-
-नुत्पलबन्धुस्तनन्धयापीडान् ।
करकलितपुण्ड्रचापा-
-न्कलये कानपि कपर्दिनः प्राणान् ॥ 186 ॥
रशनालसज्जघनया
रसनाजीवातुचापभासुरया ।
घ्राणायुष्करशरया
घ्रातं चित्तं कयापि वासनया ॥ 187 ॥
सरसिजसहयुध्वदृशा
शम्पालतिकासनाभिविग्रहया ।
भासा कयापि चेतो
नासामणिशोभिवदनया भरितम् ॥ 188 ॥
नवयावकाभसिचयान्वितया
गजयानया दयापरया ।
धृतयामिनीशकलया
धिया कयापि क्षतामया हि वयम् ॥ 189 ॥
अलमलमकुसुमबाणै-
-रबिम्बशोणैरपुण्ड्रकोदण्डैः ।
अकुमुदबान्धवचूडै-
-रन्यैरिह जगति दैवतं मन्यैः ॥ 190 ॥
कुवलयसदृक्षनयनैः
कुलगिरिकूटस्थबन्धुकुचभारैः ।
करुणास्पन्दिकटाक्षैः
कवचितचित्तोऽस्मि कतिपयैः कुतुकैः ॥ 191 ॥
नतजनसुलभाय नमो
नालीकसनाभिलोचनाय नमः ।
नन्दितगिरिशाय नमो
महसे नवनीपपाटलाय नमः ॥ 192 ॥
कादम्बकुसुमदाम्ने
कायच्छायाकणायितार्यम्णे ।
सीम्ने चिरन्तनगिरां
भूम्ने कस्मैचिदाददे प्रणतिम् ॥ 193 ॥
कुटिलकबरीभरेभ्यः
कुङ्कुमसब्रह्मचारिकिरणेभ्यः ।
कूलङ्कषस्तनेभ्यः
कुर्मः प्रणतिं कुलाद्रिकुतुकेभ्यः ॥ 194 ॥
कोकनदशोणचरणा-
-त्कोमलकुरलालिविजितशैवालात् ।
उत्पलसगन्धिनयना-
-दुररीकुर्मो न देवतमान्याम् ॥ 195 ॥
आपाटलाधराणा-
-मानीलस्निग्धबर्बरकचानाम् ।
आम्नायजीवनाना-
-माकूतानां हरस्य दासोऽहम् ॥ 196 ॥
पुङ्खितविलासहास-
-स्फुरितासु पुराहिताङ्कनिलयासु ।
मग्नं मनो मदीयं
कास्वपि कामारिजीवनाडीषु ॥ 197 ॥
ललिता पातु शिरो मे
ललाटमम्बा च मधुमतीरूपा ।
भ्रूयुग्मं च भवानी
पुष्पशरा पातु लोचनद्वन्द्वम् ॥ 198 ॥
पायान्नासां बाला
सुभगा दन्तांश्च सुन्दरी जिह्वाम् ।
अधरोष्ठमादिशक्ति-
-श्चक्रेशी पातु मे चिरं चिबुकम् ॥ 199 ॥
कामेश्वरी च कर्णौ
कामाक्षी पातु गण्डयोर्युगलम् ।
शृङ्गारनायिकाव्या-
-द्वदनं सिंहासनेश्वरी च गलम् ॥ 200 ॥
स्कन्दप्रसूश्च पातु
स्कन्धौ बाहू च पाटलाङ्गी मे ।
पाणी च पद्मनिलया
पायादनिशं नखावलीर्विजया ॥ 201 ॥
कोदण्डिनी च वक्षः
कुक्षिं चाव्यात् कुलाचलतनूजा ।
कल्याणी च वलग्नं
कटिं च पायात्कलाधरशिखण्डा ॥ 202 ॥
ऊरुद्वयं च पाया-
-दुमा मृडानी च जानुनी रक्षेत् ।
जङ्घे च षोडशी मे
पायात् पादौ च पाशसृणिहस्ता ॥ 203 ॥
प्रातः पातु परा मां
मध्याह्ने पातु मणिगृहाधीशा ।
शर्वाण्यवतु च सायं
पायाद्रात्रौ च भैरवी साक्षात् ॥ 204 ॥
भार्यां रक्षतु गौरीं
पायात् पुत्रांश्च बिन्दुगृहपीठा ।
श्रीविद्या च यशो मे
शीलं चाव्याच्चिरं महाराज्ञी ॥ 205 ॥
पवनमयि पावकमयि
क्षोणीमयि गगनमयि कृपीटमयि ।
रविमयि शशिमयि दिङ्मयि
समयमयि प्राणमयि शिवे पाहि ॥ 206 ॥
कालि कपालिनि शूलिनि
भैरवि मातङ्गि पञ्चमि त्रिपुरे ।
वाग्देवि विन्ध्यवासिनि
बाले भुवनेशि पालय चिरं माम् ॥ 207 ॥
अभिनवसिन्दूराभा-
-मम्ब त्वां चिन्तयन्ति ये हृदये ।
उपरि निपतन्ति तेषा-
-मुत्पलनयनाकटाक्षकल्लोलाः ॥ 208 ॥
वर्गाष्टकमिलिताभि-
-र्वशिनीमुख्याभिरावृतां भवतीम् ।
चिन्तयतां सितवर्णां
वाचो निर्यान्त्ययत्नतो वदनात् ॥ 209 ॥
कनकशलाकागौरीं
कर्णव्यालोलकुण्डलद्वितयाम् ।
प्रहसितमुखीं च भवतीं
ध्यायन्तो ये त एव भूधनदाः ॥ 210 ॥
शीर्षाम्भोरुहमध्ये
शीतलपीयूषवर्षिणीं भवतीम् ।
अनुदिनमनुचिन्तयता-
-मायुष्यं भवति पुष्कलमवन्याम् ॥ 211 ॥
मधुरस्मितां मदारुणनयनां
मातङ्गकुम्भवक्षोजाम् ।
चन्द्रवतंसिनीं त्वां
सविधे पश्यन्ति सुकृतिनः केचित् ॥ 212 ॥
ललितायाः स्तवरत्नं
ललितपदाभिः प्रणीतमार्याभिः ।
प्रतिदिनमवनौ पठतां
फलानि वक्तुं प्रगल्भते सैव ॥ 213 ॥
सदसदनुग्रहनिग्रह-
-गृहीतमुनिविग्रहो भगवान् ।
सर्वासामुपनिषदां
दुर्वासा जयति देशिकः प्रथमः ॥ 214 ॥
इति महर्षिदुर्वासः विरचितं श्रीललितास्तवरत्नम् ।
vande gajendravadanaṃ
vāmāṅkārūḍhavallabhāśliṣṭam |
kuṅkumaparāgaśoṇaṃ
kuvalayinījārakorakāpīḍam || 1 ||
sa jayati suvarṇaśailaḥ
sakalajagaccakrasaṅghaṭitamūrtiḥ |
kāñcananikuñjavāṭī-
-kandaladamarīprapañcasaṅgītaḥ || 2 ||
harihayanairṛtamāruta-
-haritāmanteṣvavasthitaṃ tasya |
vinumaḥ sānutritayaṃ
vidhiharigaurīśaviṣṭapādhāram || 3 ||
madhye punarmanohara-
-ratnarucistabakarañjitadigantam |
upari catuḥśatayojana-
-muttuṅgaṃ śṛṅgapuṅgavamupāse || 4 ||
tatra catuḥśatayojana-
-pariṇāhaṃ devaśilpinā racitam |
nānāsālamanojñaṃ
namāmyahaṃ nagaramādividyāyāḥ || 5 ||
prathamaṃ sahasrapūrvaka-
-ṣaṭśatasaṅkhyākayojanaṃ paritaḥ |
valayīkṛtasvagātraṃ
varaṇaṃ śaraṇaṃ vrajāmyayorūpam || 6 ||
tasyottare samīraṇa-
-yojanadūre taraṅgitacchāyaḥ |
ghaṭayatu mudaṃ dvitīyo
ghaṇṭāstanasāranirmitaḥ sālaḥ || 7 ||
ubhayorantarasīma-
-nyuddāmabhramararañjitodāram |
upavanamupāsmahe vaya-
-mūrīkṛtamandamārutasyandam || 8 ||
āliṅgya bhadrakālī-
-māsīnastatra hariśilāśyāmām |
manasi mahākālo me
viharatu madhupānavibhramannetraḥ || 9 ||
tārtīyīko varaṇa-
-stasyottarasīmni vātayojanataḥ |
tāmreṇa racitamūrti-
-stanutāmācandratārakaṃ bhadram || 10 ||
madhye tayośca maṇimaya-
-pallavaśākhāprasūnapakṣmalitām |
kalpānokahavāṭīṃ
kalaye makarandapaṅkilāvālām || 11 ||
tatra madhumādhavaśrī-
-taruṇībhyāṃ taraladṛkcakorābhyām |
āliṅgito'vatānmā-
-maniśaṃ prathamarturāttapuṣpāstraḥ || 12 ||
namata taduttarabhāge
nākipathollaṅghiśṛṅgasaṅghātam |
sīsākṛtiṃ turīyaṃ
sitakiraṇālokanirmalaṃ sālam || 13 ||
sāladvayāntarāle
saralālikapotacāṭusubhagāyām |
santānavāṭikāyāṃ
saktaṃ ceto'stu satatamasmākam || 14 ||
tatra tapanātirūkṣaḥ
sāmrājñīcaraṇasāndritasvāntaḥ |
śukraśuciśrīsahito
grīṣmarturdiśatu kīrtimākalpam || 15 ||
uttarasīmani tasyo-
-nnataśikharotkampihāṭakapatākaḥ |
prakaṭayatu pañcamo naḥ
prākāraḥ kuśalamārakūṭamayaḥ || 16 ||
prākārayośca madhye
pallavitānyabhṛtapañcamonmeṣā |
haricandanadruvāṭī-
-haratādāmūlamasmadanutāpam || 17 ||
tatra nabhaḥ śrīmukhyai-
-staruṇīvargaiḥ samanvitaḥ paritaḥ |
vajrāṭṭahāsamukharo
vāñchāpūrtiṃ tanotu varṣartuḥ || 18 ||
mārutayojanadūre
mahanīyastasya cottare bhāge |
bhadraṃ kṛṣīṣṭa ṣaṣṭhaḥ
prākāraḥ pañcalohadhātumayaḥ || 19 ||
anayormadhye santata-
-maṅkūraddivyakusumagandhāyām |
mandāravāṭikāyāṃ
mānasamaṅgīkarotu me vihṛtim || 20 ||
tasyāmiṣorjalakṣmī-
-taruṇībhyāṃ śaradṛtuḥ sadā sahitaḥ |
abhyarcayan sa jīyā-
-dambāmāmodameduraiḥ kusumaiḥ || 21 ||
tasyarṣisaṅkhyayojana-
-dūre dedīpyamānaśṛṅgaughaḥ |
kaladhautakalitamūrtiḥ
kalyāṇaṃ diśatu saptamaḥ sālaḥ || 22 ||
madhye tayormarutpatha
laṅghitaviṭapāgravirutakalakaṇṭhā |
śrīpārijātavāṭī
śriyamaniśaṃ diśatu śītaloddeśā || 23 ||
tasyāmatipriyābhyāṃ
saha khelan sahasahasyalakṣmībhyām |
sāmanto jhaṣaketo-
-rhemanto bhavatu hemavṛddhyai naḥ || 24 ||
uttaratastasya mahā-
-nudbhaṭahutabhukśikhāruṇamayūkhaḥ |
tapanīyakhaṇḍaracita-
-stanutādāyuṣyamaṣṭamo varaṇaḥ || 25 ||
kādambavipinavāṭī-
-manayormadhyabhuvi kalpitāvāsām |
kalayāmi sūnakoraka-
-kandalitāmodatundilasamīrām || 26 ||
tasyāmatiśiśirākṛti-
-rāsīnastapatapasyalakṣmībhyām |
śivamaniśaṃ kurutānme
śiśirartuḥ satataśītaladigantaḥ || 27 ||
tasyāṃ kadambavāṭyāṃ
tatprasavāmodamilitamadhugandham |
saptāvaraṇamanojñaṃ
śaraṇaṃ samupaimi mantriṇīśaraṇam || 28 ||
tatrālaye viśāle
tapanīyāracitataralasopāne |
māṇikyamaṇḍapānta-
-rmahite siṃhāsane sumaṇikhacite || 29 ||
bindutripañcakoṇa-
-dvipanṛpavasuvedadalakurekhāḍhye |
cakre sadā niviṣṭāṃ
ṣaṣṭhyaṣṭatriṃśadakṣareśānīm || 30 ||
tāpiñchamecakābhāṃ
tālīdalaghaṭitakarṇatāṭaṅkām |
tāmbūlapūritamukhīṃ
tāmrādharabimbadṛṣṭadarahāsām || 31 ||
kuṅkumapaṅkiladehāṃ
kuvalayajīvātuśāvakavataṃsām |
kokanadaśoṇacaraṇāṃ
kokilanikvāṇakomalālāpām || 32 ||
vāmāṅgagalitacūlīṃ
vanamālyakadambamālikābharaṇām |
muktālalantikāñcita
mugdhālikamilitacitrakodārām || 33 ||
karavidhṛtakīraśāvaka-
-kalaninadavyaktanikhilanigamārthām |
vāmakucasaṅgivīṇāvādana-
-saukhyārdhamīlitākṣiyugām || 34 ||
āpāṭalāṃśukadharā-
-mādirasonmeṣavāsitakaṭākṣām |
āmnāyasāragulikā-
-mādyāṃ saṅgītamātṛkāṃ vande || 35 ||
tasya ca suvarṇasāla-
-syottaratastaruṇakuṅkumacchāyaḥ |
śamayatu mama santāpaṃ
sālo navamaḥ sa puṣparāgamayaḥ || 36 ||
anayorantaravasudhāḥ
praṇumaḥ pratyagrapuṣparāgamayīḥ |
siṃhāsaneśvarīmanu-
-cintananistandrasiddhanīrandhrāḥ || 37 ||
tatsālottaradeśe
taruṇajapākiraṇadhoraṇīśoṇaḥ |
praśamayatu padmarāga-
-prākāro mama parābhavaṃ daśamaḥ || 38 ||
antarabhūkṛtavāsā-
-nanayorapanītacittavaimatyān |
cakreśīpadabhaktāṃ-
-ścāraṇavargānaharniśaṃ kalaye || 39 ||
sāraṅgavāhayojanadūre-
-'saṅghaṭitaketanastasya |
gomedakena racito
gopāyatu māṃ samunnataḥ sālaḥ || 40 ||
vapradvayāntarorvyāṃ
vaṭukairvividhaiśca yoginībṛndaiḥ |
satataṃ samarcitāyāḥ
saṅkarṣaṇyāḥ praṇaumi caraṇābjam || 41 ||
tāpasayojanadūre
tasya samuttuṅga gopuropetaḥ |
vāñchāpūrtyai bhavatā-
-dvajramaṇīnikaranirmito vapraḥ || 42 ||
varaṇadvitayāntarato
vāsajuṣo vihitamadhurasāsvādāḥ |
rambhādivibudhaveśyā
racayantu mahāntamasmadānandam || 43 ||
tatra sadā pravahantī
taṭinī vajrābhidhā ciraṃ jīyāt |
caṭulormijālanṛtya-
-tkalahaṃsīkulakalakvaṇitapuṣṭā || 44 ||
rodhasi tasyā rucire
vajreśī jayati vajrabhūṣāḍhyā |
vajrapradānatoṣita-
-vajrimukhatridaśavinutacāritrā || 45 ||
tasyodīcyāṃ hariti
stavakitasuṣamāvalīḍhaviyadantaḥ |
vaiḍūryaratnaracito
vaimalyaṃ diśatu cetaso varaṇaḥ || 46 ||
adhimadhyametayoḥ puna-
-rambācaraṇāvalambitasvāntān |
kārkoṭakādināgān
kalayāmaḥ kiṃ ca balimukhān danujān || 47 ||
gandhavahasaṅkhyayojana-
-dūre gaganordhvajāṅghikastasya |
vāsavamaṇipraṇīto
varaṇo bahalayatu vaiduṣīṃ viśadām || 48 ||
madhyakṣoṇyāmanayo-
-rmahendranīlātmakāni ca sarāṃsi |
śātodarīsahāyā-
-nbhūpālānapi punaḥ punaḥ praṇumaḥ || 49 ||
āśugayojanadūre
tasyordhvaṃ kāntidhavalitadigantaḥ |
muktāviracitagātro
muhurasmākaṃ mude bhavatu sālaḥ || 50 ||
āvṛttyoradhimadhyaṃ
pūrvasyāṃ diśi purandaraḥ śrīmān |
abhramuviṭādhirūḍho
vibhramamasmākamaniśamātanutāt || 51 ||
tatkoṇe vyajanasru-
-ktomarapātrasruvānnaśaktidharaḥ |
svāhāsvadhāsametaḥ
sukhayatu māṃ havyavāhanaḥ suciram || 52 ||
dakṣiṇadigantarāle
daṇḍadharo nīlanīradacchāyaḥ |
tripurāpadābjabhaktastirayatu
mama nikhilamaṃhasāṃ nikaram || 53 ||
tasyaiva paścimāyāṃ
diśi dalitendīvaraprabhāśyāmaḥ |
kheṭāsiyaṣṭidhārī
khedānapanayatu yātudhāno me || 54 ||
tasyā uttaradeśe
dhavalāṅgo vipulajhaṣavarārūḍhaḥ |
pāśāyudhāttapāṇiḥ
pāśī vidalayatu pāśajālāni || 55 ||
vande taduttarahari-
-tkoṇe vāyuṃ camūruvaravāham |
korakitatattvabodhā-
-ngorakṣapramukhayogino'pi muhuḥ || 56 ||
taruṇīriḍāpradhānā-
-stisro vātasya tasya kṛtavāsāḥ |
pratyagrakāpiśāyana-
-pānaparibhrāntalocanāḥ kalaye || 57 ||
tallokapūrvabhāge
dhanadaṃ dhyāyāmi śevadhikuleśam |
api māṇibhadramukhyā-
-nambācaraṇāvalambino yakṣān || 58 ||
tasyaiva pūrvasīmani
tapanīyāracitagopure nagare |
kātyāyanīsahāyaṃ
kalaye śītāṃśukhaṇḍacūḍālam || 59 ||
tatpuraṣoḍaśavaraṇa-
-sthalabhājastaruṇacandracūḍālān |
rudrādhyāye paṭhitā-
-nrudrāṇīsahacarānbhaje rudrān || 60 ||
pavamānasaṅkhyayojana-
-dūre bālatṛṇmecakastasya |
sālo marakataracitaḥ
sampadamacalāṃ śriyaṃ ca puṣṇātu || 61 ||
āvṛtiyugmāntarato
haritamaṇīnivahamecake deśe |
hāṭakatālīvipinaṃ
hālāghaṭaghaṭitaviṭapamākalaye || 62 ||
tatraiva mantriṇīgṛha-
-pariṇāhaṃ taralaketanaṃ sadanam |
marakatasaudhamanojñaṃ
dadyādāyūṃṣi daṇḍanāthāyāḥ || 63 ||
sadane tatra harinmaṇi-
-saṅghaṭite maṇḍape śatastambhe |
kārtasvaramayapīṭhe
kanakamayāmburuhakarṇikāmadhye || 64 ||
bindutrikoṇavartula-
-ṣaḍasravṛttadvayānvite cakre |
sañcāriṇī daśottara-
śatārṇamanurājakamalakalahaṃsī || 65 ||
kolavadanā kuśeśaya-
-nayanā kokārimaṇḍitaśikhaṇḍā |
santaptakāñcanābhā
sandhyāruṇacelasaṃvṛtanitambā || 66 ||
halamusalaśaṅkhacakrā-
-'ṅkuśapāśābhayavarasphuritahastā |
kūlaṅkaṣānukampā
kuṅkumajambālitastanābhogā || 67 ||
dhūrtānāmatidūrā-
-vārtāśeṣāvalagnakamanīyā |
ārtālīśubhadātrī
vārtālī bhavatu vāñchitārthāya || 68 ||
tasyāḥ parito devīḥ
svapneśyunmattabhairavīmukhyāḥ |
praṇamata jambhinyādyāḥ
bhairavavargāṃśca hetukapramukhān || 69 ||
pūrvoktasaṅkhyayojana-
-dūre pūyāṃśupāṭalastasya |
vidrāvayatu madārtiṃ
vidrumasālo viśaṅkaṭadvāraḥ || 70 ||
āvaraṇayoraharniśa-
-mantarabhūmauprakāśaśālinyām |
āsīnamambujāsana-
-mabhinavasindūragauramahamīḍe || 71 ||
varaṇasya tasya māruta-
-yojanato vipulagopuradvāraḥ |
sālo nānāratnaiḥ
saṅghaṭitāṅgaḥ kṛṣīṣṭa madabhīṣṭam || 72 ||
antarakakṣyāmanayo-
-raviralaśobhāpicaṇḍiloddeśām |
māṇikyamaṇḍapākhyāṃ
mahatīmadhihṛdayamaniśamākalaye || 73 ||
tatra sthitaṃ prasannaṃ
taruṇatamālapravālakiraṇābham |
karṇāvalambikuṇḍala-
-kandalitābhīśukavacitakapolam || 74 ||
śoṇādharaṃ śucismita-
-meṇāṅkavadanamedhamānakṛpam |
mugdhaiṇamadaviśeṣaka-
-mudritaniṭilendurekhikāruciram || 75 ||
nālīkadalasahodara-
-nayanāñcalaghaṭitamanasijākūtam |
kamalākaṭhinapayodhara-
-kastūrīghusṛṇapaṅkiloraskam || 76 ||
cāmpeyagandhikaiśyaṃ
śampāsabrahmacārikauśeyam |
śrīvatsakaustubhadharaṃ
śritajanarakṣādhurīṇacaraṇābjam || 77 ||
kambusudarśanavilasa-
-tkarapadmaṃ kaṇṭhalolavanamālam |
mucukundamokṣaphaladaṃ
mukundamānandakandamavalambe || 78 ||
tadvaraṇottarabhāge
tārāpatibimbacumbinijaśṛṅgaḥ |
vividhamaṇīgaṇaghaṭito
vitaratu sālo vinirmalāṃ dhiṣaṇām || 79 ||
prākāradvitayāntara-
-kakṣyāṃ pṛthuratnanikarasaṅkīrṇām |
namata sahasrastambhaka-
-maṇḍapanāmnātiviśrutāṃ bhuvane || 80 ||
praṇumastatra bhavānī-
-sahacaramīśānamindukhaṇḍadharam |
śṛṅgāranāyikāmanu-
-śīlanabhājo'pi bhṛṅginandimukhān || 81 ||
tasyaiṇavāhayojana-
-dūre vande manomayaṃ vapram |
aṅkūranmaṇikiraṇā-
-mantarakakṣyāṃ ca nirmalāmanayoḥ || 82 ||
tatraivāmṛtavāpīṃ
taralataraṅgāvalīḍhataṭayugmām |
muktāmayakalahaṃsī-
-mudritakanakāravindasandohām || 83 ||
śakropalamayabhṛṅgī-
-saṅgītonmeṣaghoṣitadigantām |
kāñcanamayāṅgavilasa-
-tkāraṇḍavaṣaṇḍatāṇḍavamanojñām || 84 ||
kuruvindātmakahallaka-
-korakasuṣamāsamūhapāṭalitām |
kalaye sudhāsvarūpāṃ
kandalitāmandakairavāmodām || 85 ||
tadvāpikāntarāle tarale
maṇipotasīmni viharantīm |
sindūrapāṭalāṅgīṃ
sitakiraṇāṅkūrakalpitavataṃsām || 86 ||
parvendubimbavadanāṃ
pallavaśoṇādharasphuritahāsām |
kuṭilakabarīṃ kuraṅgī-
-śiśunayanāṃ kuṇḍalasphuritagaṇḍām || 87 ||
nikaṭasthapotanilayāḥ
śaktīḥ śayavidhṛtahemaśṛṅgajalaiḥ |
pariṣiñcantīṃ parita-
-stārāṃ tāruṇyagarvitāṃ vande || 88 ||
prāguktasaṅkhyayojanadūre
praṇamāmi buddhimayasālam |
anayorantarakakṣyā-
-maṣṭāpadapuṣṭamedinīṃ rucirām || 89 ||
kādambarīnidhānāṃ
kalayāmyānandavāpikāṃ tasyām |
śoṇāśmanivahanirmita-
-sopānaśreṇiśobhamānataṭīm || 90 ||
māṇikyataraṇinilayāṃ
madhye tasyā madāruṇakapolām |
amṛteśītyabhidhānā-
-mantaḥ kalayāmi vāruṇīṃ devīm || 91 ||
sauvarṇakenipātana-
-hastāḥ saundaryagarvitā devyaḥ |
tatpurataḥ sthitibhājo
vitarantvasmākamāyuṣo vṛddhim || 92 ||
tasya pṛṣadaśvayojana-
-dūre'haṅkārasālamatituṅgam |
vande tayośca madhye
kakṣyāṃ valamānamalayapavamānām || 93 ||
vinumo vimarśavāpīṃ
sauṣumnasudhāsvarūpiṇīṃ tatra |
velātilaṅghyavīcī-
-kolāhalabharitakūlavanavāṭīm || 94 ||
tatraiva salilamadhye
tāpiñchadalaprapañcasuṣamābhām |
śyāmalakañcukalasitāṃ
śyāmāviṭabimbaḍambaraharāsyām || 95 ||
ābhugnamasṛṇacillī-
-hasitāyugmaśarakārmukavilāsām |
mandasmitāñcitamukhīṃ
maṇimayatāṭaṅkamaṇḍitakapolām || 96 ||
kuruvindataraṇinilayāṃ
kulācalaspardhikucanamanmadhyām |
kuṅkumaviliptagātrīṃ
kurukullāṃ manasi kurmahe satatam || 97 ||
tatsālottarabhāge
bhānumayaṃ vapramāśraye dīptam |
madhyaṃ ca vipulamanayo-
-rmanye viśrāntamātapodgāram || 98 ||
tatra kuruvindapīṭhe
tāmarase kanakakarṇikāghaṭite |
āsīnamaruṇavāsasa-
-mamlānaprasavamālikābharaṇam || 99 ||
cakṣuṣmatīprakāśana-
-śakticchāyāsamāracitakelim |
māṇikyamukuṭaramyaṃ
manye mārtāṇḍabhairavaṃ hṛdaye || 100 ||
indumayasālamīḍe
tasyottaratastuṣāragirigauram |
atyantaśiśiramāruta-
-manayormadhyaṃ ca candrikodgāram || 101 ||
tatra prakāśamānaṃ
tārānikaraiḥ pariṣkṛtoddeśam |
amṛtamayakāntikandala-
-mantaḥ kalayāmi kundasitamindum || 102 ||
śṛṅgārasālamīḍe
śṛṅgollasitaṃ taduttare bhāge |
madhyasthale tayorapi
mahitāṃ śṛṅgārapūrvikāṃ parikhām || 103 ||
tatra maṇinausthitābhi-
-stapanīyāviracitāgrahastābhiḥ |
śṛṅgāradevatābhiḥ
sahitaṃ parikhādhipaṃ bhaje madanam || 104 ||
śṛṅgāravaraṇavaryasyottarataḥ
sakalavibudhasaṃsevyam |
cintāmaṇigaṇaracitaṃ
cintāṃ dūrīkarotu me sadanam || 105 ||
maṇisadanasālayoradhi-
-madhyaṃ daśatālabhūmiruhadīrghaiḥ |
parṇaiḥ suvarṇavarṇai-
-ryuktāṃ kāṇḍaiśca yojanottuṅgaiḥ || 106 ||
mṛdulaistālīpañcaka-
-mānairmilitāṃ ca kesarakadambaiḥ |
santatagalitamaranda-
-srotoniryanmilindasandohām || 107 ||
pāṭīrapavanabālaka-
-dhāṭīniryatparāgapiñjaritām |
kalahaṃsīkulakalakala-
-kūlaṅkaṣaninadanicayakamanīyām || 108 ||
padmāṭavīṃ bhajāmaḥ
parimalakallolapakṣmalopāntām |
[ devyarghyapātradhārī
tasyāḥ pūrvadiśi daśakalāyuktaḥ | ]
valayitamūrtirbhagavā-
-nvahniḥ krośonnataściraṃ pāyāt || 109 ||
tatrādhāre devyāḥ
pātrīrūpaḥ prabhākaraḥ śrīmān |
dvādaśakalāsameto
dhvāntaṃ mama bahulamāntaraṃ bhindyāt || 110 ||
tasmin dineśapātre
taraṅgitāmodamamṛtamayamarghyam |
candrakalātmakamamṛtaṃ
sāndrīkuryādamandamānandam || 111 ||
amṛte tasminnabhito
viharantyo vividhamaṇitaraṇibhājaḥ |
ṣoḍaśa kalāḥ sudhāṃśoḥ
śokāduttārayantu māmaniśam || 112 ||
tatraiva vihṛtibhājo
dhātṛmukhānāṃ ca kāraṇeśānām |
sṛṣṭyādirūpikāstāḥ
śamayantvakhilāḥ kalāśca santāpam || 113 ||
kīnāśavaruṇakinnara-
-rājadiganteṣu ratnagehasya |
kalayāmi tānyajasraṃ
kalayantvāyuṣyamarghyapātrāṇi || 114 ||
pātrasthalasya purataḥ
padmāramaṇavidhipārvatīśānām |
bhavanāni śarmaṇe no
bhavantu bhāsā pradīpitajaganti || 115 ||
sadanasyānalakoṇe
satataṃ praṇamāmi kuṇḍamāgneyam |
tatra sthitaṃ ca vahniṃ
taralaśikhājaṭilamambikājanakam || 116 ||
tasyāsuradiśi tādṛśa-
-ratnaparisphuritaparvanavakāḍhyam |
cakrātmakaṃ śatāṅgaṃ
śatayojanamunnataṃ bhaje divyam || 117 ||
tatraiva diśi niṣaṇṇaṃ
tapanīyadhvajaparamparāśliṣṭam |
rathamaparaṃ ca bhavānyā
racayāmo manasi ratnamayacūḍam || 118 ||
bhavanasya vāyubhāge
pariṣkṛto vividhavaijayantībhiḥ |
racayatu mudaṃ rathendraḥ
saciveśānyāḥ samastavandyāyāḥ || 119 ||
kurmo'dhihṛdayamaniśaṃ
kroḍāsyāyāḥ śatāṅgamūrdhanyam |
rudradiśi ratnadhāmno
ruciraśalākāprapañcakañcukitam || 120 ||
parito devīdhāmnaḥ
praṇītavāsā manusvarūpiṇyaḥ |
kurvantu raśmimālā-
-kṛtayaḥ kuśalāni devatā nikhilāḥ || 121 ||
prāgdvārasya bhavānī-
-dhāmnaḥ pārśvadvayāracitavāse |
mātaṅgīkiṭimukhyau
maṇisadane manasi bhāvayāmi ciram || 122 ||
yojanayugalābhogā
tatkrośapariṇāhayaiva bhittyā ca |
cintāmaṇigṛhabhūmi-
-rjīyādāmnāyamayacaturdvārā || 123 ||
dvāre dvāre dhāmnaḥ
piṇḍībhūtā navīnabimbābhāḥ |
vidadhatu vipulāṃ kīrtiṃ
divyā lauhityasiddhyo devyaḥ || 124 ||
maṇisadanasyāntarato
mahanīye ratnavedikāmadhye |
bindumayacakramīḍe
pīṭhānāmupari viracitāvāsam || 125 ||
cakrāṇāṃ sakalānāṃ
prathamamadhaḥ sīmaphalakavāstavyāḥ |
aṇimādisiddhayo mā-
-mavantu devī prabhāsvarūpiṇyaḥ || 126 ||
aṇimādisiddhiphalaka-
-syoparihariṇāṅkakhaṇḍakṛtacūḍāḥ |
bhadraṃ pakṣmalayantu
brāhmīpramukhāśca mātaro'smākam || 127 ||
tasyopari maṇiphalake
tāruṇyottuṅgapīnakucabhārāḥ |
saṅkṣobhiṇīpradhānāḥ
bhrānti vidrāvayantu daśa mudrāḥ || 128 ||
phalakatrayasvarūpe
pṛthule trailokyamohane cakre |
dīvyantu prakaṭākhyā-
-stāsāṃ kartrīṃ ca bhagavatī tripurā || 129 ||
tadupari vipule dhiṣṇye
taraladṛśastaruṇakokanadabhāsaḥ |
kāmākarṣiṇyādyāḥ
kalaye devīḥ kalādharaśikhaṇḍāḥ || 130 ||
sarvāśāparipūrakacakre-
-'smin guptayoginīsevyāḥ |
tripureśī mama duritaṃ
tudyāt kaṇṭhāvalambimaṇihārā || 131 ||
tasyopari maṇipīṭhe
tāmrāmbhoruhadalaprabhāśoṇāḥ |
dhyāyāmyanaṅgakusumā-
-pramukhā devīśca vidhṛtakūrpāsāḥ || 132 ||
saṅkṣobhakārake'smiṃ-
-ścakre śrītripurasundarī sākṣāt |
goptrī guptatarākhyāḥ
gopāyatu māṃ kṛpārdrayā dṛṣṭyā || 133 ||
saṅkṣobhiṇīpradhānāḥ
śaktīstasyordhvavalayakṛtavāsāḥ |
ālolanīlaveṇī-
-rantaḥ kalayāmi yauvanonmattāḥ || 134 ||
saubhāgyadāyake'smiṃ-
-ścakreśī tripuravāsinī jīyāt |
śaktīśca sampradāyābhidhāḥ
samastāḥ pramodayantvaniśam || 135 ||
maṇipīṭhopari tāsāṃ
mahati caturhastavistṛte valaye |
santataviracitavāsāḥ
śaktīḥ kalayāmi sarvasiddhimukhāḥ || 136 ||
sarvārthasādhakākhye
cakre'muṣmin samastaphaladātrī |
tripurā śrīrmama kuśalaṃ
diśatāduttīrṇayoginīsevyā || 137 ||
tāsāṃ nilayasyopari
dhiṣṇye kausumbhakañcukamanojñāḥ |
sarvājñādyāḥ devyaḥ
sakalāḥ sampādayantu mama kīrtim || 138 ||
cakre samastarakṣā-
-karanāmnyasmin samastajanasevyām |
manasi nigarbhāsahitāṃ
manye śrītripuramālinīṃ devīm || 139 ||
sarvajñāsadanasyopari
cakre vipule samākalitagehāḥ |
vande vaśinīmukhyāḥ
śaktīḥ sindūrareṇurucaḥ || 140 ||
śrīsarvarogaharākhya-
-cakre'smiṃstripurapūrvikāṃ siddhām |
vande rahasyanāmnā
vedyābhiḥ śaktibhiḥ sadā sevyām || 141 ||
vaśinīgṛhopariṣṭā-
-dviṃśatihastonnate mahāpīṭhe |
śamayantu śatrubṛndaṃ
śastrāṇyastrāṇi cādidampatyoḥ || 142 ||
śastrasadanopariṣṭā-
-dvalaye valavairiratnasaṅghaṭite |
kāmeśvarīpradhānāḥ
kalaye devīḥ samastajanavandyāḥ || 143 ||
cakre'tra sarvasiddhiprada-
-nāmani sarvaphaladātrī |
tripurāmbāvatu satataṃ
parāpararahasyayoginīsevyā || 144 ||
kāmeśvarīgṛhoparivalaye
vividhamanusampradāyajñāḥ |
catvāro yuganāthā
jayantu mitreśapūrvakāḥ guravaḥ || 145 ||
nāthabhavanopariṣṭā-
-nnānāratnacayamedure pīṭhe |
kāmeśyādyā nityāḥ
kalayantu mudaṃ tithisvarūpiṇyaḥ || 146 ||
nityāsadanasyopari
nirmalamaṇinivahaviracite dhiṣṇye |
kuśalaṃ ṣaḍaṅgadevyaḥ
kalayantvasmākamuttaralanetrāḥ || 147 ||
sadanasyopari tāsāṃ
sarvānandamayanāmake bindau |
pañcabrahmākārāṃ
mañcaṃ praṇamāmi maṇigaṇākīrṇam || 148 ||
parito maṇimañcasya
pralambamānā niyantritā pāśaiḥ |
māyāmayī javanikā
mama duritaṃ haratu mecakacchāyā || 149 ||
mañcasyopari lamba-
-nmadanīpunnāgamālikābharitam |
harigopamayavitānaṃ
haratādālasyamaniśamasmākam || 150 ||
paryaṅkasya bhajāmaḥ
pādānbimbāmbudenduhemarucaḥ |
ajaharirudreśamayā-
-nanalāsuramāruteśakoṇasthān || 151 ||
phalakaṃ sadāśivamayaṃ
praṇaumi sindūrareṇukiraṇābham |
ārabhyāṅgeśīnāṃ
sadanātkalitaṃ ca ratnasopānam || 152 ||
paṭṭopadhānagaṇḍaka-
-catuṣṭayasphuritapāṭalāstaraṇam |
paryaṅkopari ghaṭitaṃ
pātu ciraṃ haṃsatūlaśayanaṃ naḥ || 153 ||
tasyopari nivasantaṃ
tāruṇyaśrīniṣevitaṃ satatam |
āvṛntapullahallaka-
-marīcikāpuñjamañjulacchāyam || 154 ||
sindūraśoṇavasanaṃ
śītāṃśustabakacumbitakirīṭam |
kuṅkumatilakamanohara-
-kuṭilālikahasitakumudabandhuśiśum || 155 ||
pūrṇendubimbavadanaṃ
phullasarojātalocanatritayam |
taralāpāṅgataraṅgita-
-śapharāṅkanaśāstrasampradāyārtham || 156 ||
maṇimayakuṇḍalapuṣya-
-nmarīcikallolamāṃsalakapolam |
vidrumasahodarādhara-
-visṛmarasusmitakiśorasañcāram || 157 ||
āmodikusumaśekhara-
-mānīlabhrūlatāyugamanojñam |
vīṭīsaurabhavīcī-
-dviguṇitavaktrāravindasaurabhyam || 158 ||
pāśāṅkuśekṣucāpa-
-prasavaśarasphuritakomalakarābjam |
kāśmīrapaṅkilāṅgaṃ
kāmeśaṃ manasi kurmahe satatam || 159 ||
tasyāṅkabhuvi niṣaṇṇāṃ
taruṇakadambaprasūnakiraṇābhām |
śītāṃśukhaṇḍacūḍāṃ
sīmantanyastasāndrasindūrām || 160 ||
kuṅkumalalāmabhāsva-
-nniṭilāṃ kuṭilataracillikāyugalām |
nālīkatulyanayanāṃ
nāsāñcalanaṭitamauktikābharaṇām || 161 ||
aṅkuritamandahāsa-
-maruṇādharakāntivijitabimbābhām |
kastūrīmakarīyuta-
-kapolasaṅkrāntakanakatāṭaṅkām || 162 ||
karpūrasāndravīṭī-
-kabalitavadanāravindakamanīyām |
kambusahodarakaṇṭha-
-pralambamānācchamauktikakalāpām || 163 ||
kahlāradāmakomala-
-bhujayugalasphuritaratnakeyūrām |
karapadmamūlavilasa-
-tkāñcanamayakaṭakavalayasandohām || 164 ||
pāṇicatuṣṭayavilasa-
-tpāśāṅkuśapuṇḍracāpapuṣpāstrām |
kūlaṅkaṣakucaśikharāṃ
kuṅkumakardamitaratnakūrpāsām || 165 ||
aṇudāyādavalagnā-
-mambudaśobhāsanābhiromalatām |
māṇikyakhacitakāñcī-
-marīcikākrāntamāṃsalanitambām || 166 ||
karabhorukāṇḍayugalāṃ
jaṅghājitakāmajaitratūṇīrām |
prapadaparibhūtakūrmāṃ
pallavasacchāyapadayugamanojñām || 167 ||
kamalabhavakañjalocana-
-kirīṭaratnāṃśurañjitapadābjām |
unmastakānukampā-
-muttaralāpāṅgapoṣitānaṅgām || 168 ||
ādimarasāvalambā-
-manidaṃ prathamoktivallarīkalikām |
ābrahmakīṭajananī-
-mantaḥ kalayāmi sundarīmaniśam || 169 ||
kastu kṣitau paṭīyā-
-nvastu stotuṃ śivāṅkavāstavyam |
astu cirantanasukṛtaiḥ
prastutakāmyāya tanmama purastāt || 170 ||
prabhusammitoktigamyaṃ
paramaśivotsaṅgatuṅgaparyaṅkam |
tejaḥ kiñcana divyaṃ
purato me bhavatu puṇḍrakodaṇḍam || 171 ||
madhurimabharitaśarāsaṃ
makarandasyandimārgaṇodāram |
kairaviṇīviṭacūḍaṃ
kaivalyāyāstu kiñcana maho naḥ || 172 ||
akṣudramikṣucāpaṃ
parokṣamavalagnasīmni tryakṣam |
kṣapayatu me kṣemetara-
-mukṣarathapremapakṣmalaṃ tejaḥ || 173 ||
bhṛṅgarucisaṅgarakarāpāṅgaṃ
śṛṅgāratuṅgamaruṇāṅgam |
maṅgalamabhaṅguraṃ me
ghaṭayatu gaṅgādharāṅgasaṅgi mahaḥ || 174 ||
prapadājitakūrmamūrjita-
-karuṇaṃ bharmarucinirmathanadeham |
śritavarma marma śambhoḥ
kiñcana mama narma śarma nirmātu || 175 ||
kālakuralālikālima-
-kandalavijitāli vidhṛtamaṇivāli |
milatu hṛdi pulinajaghanaṃ
bahulitagalagaralakeli kimapi mahaḥ || 176 ||
kuṅkumatilakitaphālā
kuruvindacchāyapāṭaladukūlā |
karuṇāpayodhivelā
kācana citte cakāstu me līlā || 177 ||
puṣpandhayaruciveṇyaḥ
pulinābhogatrapākaraśreṇyaḥ |
jīyāsurikṣupāṇyaḥ
kāścana kāmārikelisākṣiṇyaḥ || 178 ||
tapanīyāṃśukabhāṃsi
drākṣāmādhuryanāstikavacāṃsi |
katicana śucaṃ mahāṃsi
kṣapayatu kapālitoṣitamanāṃsi || 179 ||
asitakacamāyatākṣaṃ
kusumaśaraṃ kūlamudvahakṛpārdram |
ādimarasādhidaivata-
-mantaḥ kalaye harāṅkavāsi mahaḥ || 180 ||
karṇopāntataraṅgita-
-kaṭākṣavispandikaṇṭhadaghnakṛpām |
kāmeśvarāṅkanilayāṃ
kāmapi vidyāṃ purātanīṃ kalaye || 181 ||
aravindakāntyaruntuda-
-vilocanadvandvasundaramukhendu |
chandaḥ kandalamandira-
-mantaḥpuramainduśekharaṃ vande || 182 ||
bimbinikurambaḍambara-
-viḍambakacchāyamambaravalagnam |
kambugalamambudakucaṃ
bimbokaṃ kamapi cumbatu mano me || 183 ||
kamapi kamanīyarūpaṃ
kalayāmyantaḥ kadambakusumāḍhyam |
campakarucirasuveṣaiḥ
sampāditakāntyalaṅkṛtadigantam || 184 ||
śampārucibhara-
-garhāsampādakakāntikavacitadigantam |
siddhāntaṃ nigamānāṃ
śuddhāntaṃ kimapi śūlinaḥ kalaye || 185 ||
udyaddinakaraśoṇā-
-nutpalabandhustanandhayāpīḍān |
karakalitapuṇḍracāpā-
-nkalaye kānapi kapardinaḥ prāṇān || 186 ||
raśanālasajjaghanayā
rasanājīvātucāpabhāsurayā |
ghrāṇāyuṣkaraśarayā
ghrātaṃ cittaṃ kayāpi vāsanayā || 187 ||
sarasijasahayudhvadṛśā
śampālatikāsanābhivigrahayā |
bhāsā kayāpi ceto
nāsāmaṇiśobhivadanayā bharitam || 188 ||
navayāvakābhasicayānvitayā
gajayānayā dayāparayā |
dhṛtayāminīśakalayā
dhiyā kayāpi kṣatāmayā hi vayam || 189 ||
alamalamakusumabāṇai-
-rabimbaśoṇairapuṇḍrakodaṇḍaiḥ |
akumudabāndhavacūḍai-
-ranyairiha jagati daivataṃ manyaiḥ || 190 ||
kuvalayasadṛkṣanayanaiḥ
kulagirikūṭasthabandhukucabhāraiḥ |
karuṇāspandikaṭākṣaiḥ
kavacitacitto'smi katipayaiḥ kutukaiḥ || 191 ||
natajanasulabhāya namo
nālīkasanābhilocanāya namaḥ |
nanditagiriśāya namo
mahase navanīpapāṭalāya namaḥ || 192 ||
kādambakusumadāmne
kāyacchāyākaṇāyitāryamṇe |
sīmne cirantanagirāṃ
bhūmne kasmaicidādade praṇatim || 193 ||
kuṭilakabarībharebhyaḥ
kuṅkumasabrahmacārikiraṇebhyaḥ |
kūlaṅkaṣastanebhyaḥ
kurmaḥ praṇatiṃ kulādrikutukebhyaḥ || 194 ||
kokanadaśoṇacaraṇā-
-tkomalakuralālivijitaśaivālāt |
utpalasagandhinayanā-
-durarīkurmo na devatamānyām || 195 ||
āpāṭalādharāṇā-
-mānīlasnigdhabarbarakacānām |
āmnāyajīvanānā-
-mākūtānāṃ harasya dāso'ham || 196 ||
puṅkhitavilāsahāsa-
-sphuritāsu purāhitāṅkanilayāsu |
magnaṃ mano madīyaṃ
kāsvapi kāmārijīvanāḍīṣu || 197 ||
lalitā pātu śiro me
lalāṭamambā ca madhumatīrūpā |
bhrūyugmaṃ ca bhavānī
puṣpaśarā pātu locanadvandvam || 198 ||
pāyānnāsāṃ bālā
subhagā dantāṃśca sundarī jihvām |
adharoṣṭhamādiśakti-
-ścakreśī pātu me ciraṃ cibukam || 199 ||
kāmeśvarī ca karṇau
kāmākṣī pātu gaṇḍayoryugalam |
śṛṅgāranāyikāvyā-
-dvadanaṃ siṃhāsaneśvarī ca galam || 200 ||
skandaprasūśca pātu
skandhau bāhū ca pāṭalāṅgī me |
pāṇī ca padmanilayā
pāyādaniśaṃ nakhāvalīrvijayā || 201 ||
kodaṇḍinī ca vakṣaḥ
kukṣiṃ cāvyāt kulācalatanūjā |
kalyāṇī ca valagnaṃ
kaṭiṃ ca pāyātkalādharaśikhaṇḍā || 202 ||
ūrudvayaṃ ca pāyā-
-dumā mṛḍānī ca jānunī rakṣet |
jaṅghe ca ṣoḍaśī me
pāyāt pādau ca pāśasṛṇihastā || 203 ||
prātaḥ pātu parā māṃ
madhyāhne pātu maṇigṛhādhīśā |
śarvāṇyavatu ca sāyaṃ
pāyādrātrau ca bhairavī sākṣāt || 204 ||
bhāryāṃ rakṣatu gaurīṃ
pāyāt putrāṃśca bindugṛhapīṭhā |
śrīvidyā ca yaśo me
śīlaṃ cāvyācciraṃ mahārājñī || 205 ||
pavanamayi pāvakamayi
kṣoṇīmayi gaganamayi kṛpīṭamayi |
ravimayi śaśimayi diṅmayi
samayamayi prāṇamayi śive pāhi || 206 ||
kāli kapālini śūlini
bhairavi mātaṅgi pañcami tripure |
vāgdevi vindhyavāsini
bāle bhuvaneśi pālaya ciraṃ mām || 207 ||
abhinavasindūrābhā-
-mamba tvāṃ cintayanti ye hṛdaye |
upari nipatanti teṣā-
-mutpalanayanākaṭākṣakallolāḥ || 208 ||
vargāṣṭakamilitābhi-
-rvaśinīmukhyābhirāvṛtāṃ bhavatīm |
cintayatāṃ sitavarṇāṃ
vāco niryāntyayatnato vadanāt || 209 ||
kanakaśalākāgaurīṃ
karṇavyālolakuṇḍaladvitayām |
prahasitamukhīṃ ca bhavatīṃ
dhyāyanto ye ta eva bhūdhanadāḥ || 210 ||
śīrṣāmbhoruhamadhye
śītalapīyūṣavarṣiṇīṃ bhavatīm |
anudinamanucintayatā-
-māyuṣyaṃ bhavati puṣkalamavanyām || 211 ||
madhurasmitāṃ madāruṇanayanāṃ
mātaṅgakumbhavakṣojām |
candravataṃsinīṃ tvāṃ
savidhe paśyanti sukṛtinaḥ kecit || 212 ||
lalitāyāḥ stavaratnaṃ
lalitapadābhiḥ praṇītamāryābhiḥ |
pratidinamavanau paṭhatāṃ
phalāni vaktuṃ pragalbhate saiva || 213 ||
sadasadanugrahanigraha-
-gṛhītamunivigraho bhagavān |
sarvāsāmupaniṣadāṃ
durvāsā jayati deśikaḥ prathamaḥ || 214 ||
iti maharṣidurvāsaḥ viracitaṃ śrīlalitāstavaratnam |
🕉️ This is the original Sanskrit rendered in Kannada script.
Pronunciation is identical to the Sanskrit Devanagari version.