ଵନ୍ଦେ ଗଜେନ୍ଦ୍ରଵଦନଂ
ଵାମାଙ୍କାରୂଢଵଲ୍ଲଭାଶ୍ଲିଷ୍ଟମ୍ ।
କୁଙ୍କୁମପରାଗଶୋଣଂ
କୁଵଲଯିନୀଜାରକୋରକାପୀଡମ୍ ॥ 1 ॥
ସ ଜଯତି ସୁଵର୍ଣଶୈଲଃ
ସକଲଜଗଚ୍ଚକ୍ରସଙ୍ଘଟିତମୂର୍ତିଃ ।
କାଞ୍ଚନନିକୁଞ୍ଜଵାଟୀ-
-କନ୍ଦଲଦମରୀପ୍ରପଞ୍ଚସଙ୍ଗୀତଃ ॥ 2 ॥
ହରିହଯନୈରୃତମାରୁତ-
-ହରିତାମନ୍ତେଷ୍ଵଵସ୍ଥିତଂ ତସ୍ଯ ।
ଵିନୁମଃ ସାନୁତ୍ରିତଯଂ
ଵିଧିହରିଗୌରୀଶଵିଷ୍ଟପାଧାରମ୍ ॥ 3 ॥
ମଧ୍ଯେ ପୁନର୍ମନୋହର-
-ରତ୍ନରୁଚିସ୍ତବକରଞ୍ଜିତଦିଗନ୍ତମ୍ ।
ଉପରି ଚତୁଃଶତଯୋଜନ-
-ମୁତ୍ତୁଙ୍ଗଂ ଶୃଙ୍ଗପୁଙ୍ଗଵମୁପାସେ ॥ 4 ॥
ତତ୍ର ଚତୁଃଶତଯୋଜନ-
-ପରିଣାହଂ ଦେଵଶିଲ୍ପିନା ରଚିତମ୍ ।
ନାନାସାଲମନୋଜ୍ଞଂ
ନମାମ୍ଯହଂ ନଗରମାଦିଵିଦ୍ଯାଯାଃ ॥ 5 ॥
ପ୍ରଥମଂ ସହସ୍ରପୂର୍ଵକ-
-ଷଟ୍ଶତସଙ୍ଖ୍ଯାକଯୋଜନଂ ପରିତଃ ।
ଵଲଯୀକୃତସ୍ଵଗାତ୍ରଂ
ଵରଣଂ ଶରଣଂ ଵ୍ରଜାମ୍ଯଯୋରୂପମ୍ ॥ 6 ॥
ତସ୍ଯୋତ୍ତରେ ସମୀରଣ-
-ଯୋଜନଦୂରେ ତରଙ୍ଗିତଚ୍ଛାଯଃ ।
ଘଟଯତୁ ମୁଦଂ ଦ୍ଵିତୀଯୋ
ଘଣ୍ଟାସ୍ତନସାରନିର୍ମିତଃ ସାଲଃ ॥ 7 ॥
ଉଭଯୋରନ୍ତରସୀମ-
-ନ୍ଯୁଦ୍ଦାମଭ୍ରମରରଞ୍ଜିତୋଦାରମ୍ ।
ଉପଵନମୁପାସ୍ମହେ ଵଯ-
-ମୂରୀକୃତମନ୍ଦମାରୁତସ୍ଯନ୍ଦମ୍ ॥ 8 ॥
ଆଲିଙ୍ଗ୍ଯ ଭଦ୍ରକାଲୀ-
-ମାସୀନସ୍ତତ୍ର ହରିଶିଲାଶ୍ଯାମାମ୍ ।
ମନସି ମହାକାଲୋ ମେ
ଵିହରତୁ ମଧୁପାନଵିଭ୍ରମନ୍ନେତ୍ରଃ ॥ 9 ॥
ତାର୍ତୀଯୀକୋ ଵରଣ-
-ସ୍ତସ୍ଯୋତ୍ତରସୀମ୍ନି ଵାତଯୋଜନତଃ ।
ତାମ୍ରେଣ ରଚିତମୂର୍ତି-
-ସ୍ତନୁତାମାଚନ୍ଦ୍ରତାରକଂ ଭଦ୍ରମ୍ ॥ 10 ॥
ମଧ୍ଯେ ତଯୋଶ୍ଚ ମଣିମଯ-
-ପଲ୍ଲଵଶାଖାପ୍ରସୂନପକ୍ଷ୍ମଲିତାମ୍ ।
କଲ୍ପାନୋକହଵାଟୀଂ
କଲଯେ ମକରନ୍ଦପଙ୍କିଲାଵାଲାମ୍ ॥ 11 ॥
ତତ୍ର ମଧୁମାଧଵଶ୍ରୀ-
-ତରୁଣୀଭ୍ଯାଂ ତରଲଦୃକ୍ଚକୋରାଭ୍ଯାମ୍ ।
ଆଲିଙ୍ଗିତୋଽଵତାନ୍ମା-
-ମନିଶଂ ପ୍ରଥମର୍ତୁରାତ୍ତପୁଷ୍ପାସ୍ତ୍ରଃ ॥ 12 ॥
ନମତ ତଦୁତ୍ତରଭାଗେ
ନାକିପଥୋଲ୍ଲଙ୍ଘିଶୃଙ୍ଗସଙ୍ଘାତମ୍ ।
ସୀସାକୃତିଂ ତୁରୀଯଂ
ସିତକିରଣାଲୋକନିର୍ମଲଂ ସାଲମ୍ ॥ 13 ॥
ସାଲଦ୍ଵଯାନ୍ତରାଲେ
ସରଲାଲିକପୋତଚାଟୁସୁଭଗାଯାମ୍ ।
ସନ୍ତାନଵାଟିକାଯାଂ
ସକ୍ତଂ ଚେତୋଽସ୍ତୁ ସତତମସ୍ମାକମ୍ ॥ 14 ॥
ତତ୍ର ତପନାତିରୂକ୍ଷଃ
ସାମ୍ରାଜ୍ଞୀଚରଣସାନ୍ଦ୍ରିତସ୍ଵାନ୍ତଃ ।
ଶୁକ୍ରଶୁଚିଶ୍ରୀସହିତୋ
ଗ୍ରୀଷ୍ମର୍ତୁର୍ଦିଶତୁ କୀର୍ତିମାକଲ୍ପମ୍ ॥ 15 ॥
ଉତ୍ତରସୀମନି ତସ୍ଯୋ-
-ନ୍ନତଶିଖରୋତ୍କମ୍ପିହାଟକପତାକଃ ।
ପ୍ରକଟଯତୁ ପଞ୍ଚମୋ ନଃ
ପ୍ରାକାରଃ କୁଶଲମାରକୂଟମଯଃ ॥ 16 ॥
ପ୍ରାକାରଯୋଶ୍ଚ ମଧ୍ଯେ
ପଲ୍ଲଵିତାନ୍ଯଭୃତପଞ୍ଚମୋନ୍ମେଷା ।
ହରିଚନ୍ଦନଦ୍ରୁଵାଟୀ-
-ହରତାଦାମୂଲମସ୍ମଦନୁତାପମ୍ ॥ 17 ॥
ତତ୍ର ନଭଃ ଶ୍ରୀମୁଖ୍ଯୈ-
-ସ୍ତରୁଣୀଵର୍ଗୈଃ ସମନ୍ଵିତଃ ପରିତଃ ।
ଵଜ୍ରାଟ୍ଟହାସମୁଖରୋ
ଵାଞ୍ଛାପୂର୍ତିଂ ତନୋତୁ ଵର୍ଷର୍ତୁଃ ॥ 18 ॥
ମାରୁତଯୋଜନଦୂରେ
ମହନୀଯସ୍ତସ୍ଯ ଚୋତ୍ତରେ ଭାଗେ ।
ଭଦ୍ରଂ କୃଷୀଷ୍ଟ ଷଷ୍ଠଃ
ପ୍ରାକାରଃ ପଞ୍ଚଲୋହଧାତୁମଯଃ ॥ 19 ॥
ଅନଯୋର୍ମଧ୍ଯେ ସନ୍ତତ-
-ମଙ୍କୂରଦ୍ଦିଵ୍ଯକୁସୁମଗନ୍ଧାଯାମ୍ ।
ମନ୍ଦାରଵାଟିକାଯାଂ
ମାନସମଙ୍ଗୀକରୋତୁ ମେ ଵିହୃତିମ୍ ॥ 20 ॥
ତସ୍ଯାମିଷୋର୍ଜଲକ୍ଷ୍ମୀ-
-ତରୁଣୀଭ୍ଯାଂ ଶରଦୃତୁଃ ସଦା ସହିତଃ ।
ଅଭ୍ଯର୍ଚଯନ୍ ସ ଜୀଯା-
-ଦମ୍ବାମାମୋଦମେଦୁରୈଃ କୁସୁମୈଃ ॥ 21 ॥
ତସ୍ଯର୍ଷିସଙ୍ଖ୍ଯଯୋଜନ-
-ଦୂରେ ଦେଦୀପ୍ଯମାନଶୃଙ୍ଗୌଘଃ ।
କଲଧୌତକଲିତମୂର୍ତିଃ
କଲ୍ଯାଣଂ ଦିଶତୁ ସପ୍ତମଃ ସାଲଃ ॥ 22 ॥
ମଧ୍ଯେ ତଯୋର୍ମରୁତ୍ପଥ
ଲଙ୍ଘିତଵିଟପାଗ୍ରଵିରୁତକଲକଣ୍ଠା ।
ଶ୍ରୀପାରିଜାତଵାଟୀ
ଶ୍ରିଯମନିଶଂ ଦିଶତୁ ଶୀତଲୋଦ୍ଦେଶା ॥ 23 ॥
ତସ୍ଯାମତିପ୍ରିଯାଭ୍ଯାଂ
ସହ ଖେଲନ୍ ସହସହସ୍ଯଲକ୍ଷ୍ମୀଭ୍ଯାମ୍ ।
ସାମନ୍ତୋ ଝଷକେତୋ-
-ର୍ହେମନ୍ତୋ ଭଵତୁ ହେମଵୃଦ୍ଧ୍ଯୈ ନଃ ॥ 24 ॥
ଉତ୍ତରତସ୍ତସ୍ଯ ମହା-
-ନୁଦ୍ଭଟହୁତଭୁକ୍ଶିଖାରୁଣମଯୂଖଃ ।
ତପନୀଯଖଣ୍ଡରଚିତ-
-ସ୍ତନୁତାଦାଯୁଷ୍ଯମଷ୍ଟମୋ ଵରଣଃ ॥ 25 ॥
କାଦମ୍ବଵିପିନଵାଟୀ-
-ମନଯୋର୍ମଧ୍ଯଭୁଵି କଲ୍ପିତାଵାସାମ୍ ।
କଲଯାମି ସୂନକୋରକ-
-କନ୍ଦଲିତାମୋଦତୁନ୍ଦିଲସମୀରାମ୍ ॥ 26 ॥
ତସ୍ଯାମତିଶିଶିରାକୃତି-
-ରାସୀନସ୍ତପତପସ୍ଯଲକ୍ଷ୍ମୀଭ୍ଯାମ୍ ।
ଶିଵମନିଶଂ କୁରୁତାନ୍ମେ
ଶିଶିରର୍ତୁଃ ସତତଶୀତଲଦିଗନ୍ତଃ ॥ 27 ॥
ତସ୍ଯାଂ କଦମ୍ବଵାଟ୍ଯାଂ
ତତ୍ପ୍ରସଵାମୋଦମିଲିତମଧୁଗନ୍ଧମ୍ ।
ସପ୍ତାଵରଣମନୋଜ୍ଞଂ
ଶରଣଂ ସମୁପୈମି ମନ୍ତ୍ରିଣୀଶରଣମ୍ ॥ 28 ॥
ତତ୍ରାଲଯେ ଵିଶାଲେ
ତପନୀଯାରଚିତତରଲସୋପାନେ ।
ମାଣିକ୍ଯମଣ୍ଡପାନ୍ତ-
-ର୍ମହିତେ ସିଂହାସନେ ସୁମଣିଖଚିତେ ॥ 29 ॥
ବିନ୍ଦୁତ୍ରିପଞ୍ଚକୋଣ-
-ଦ୍ଵିପନୃପଵସୁଵେଦଦଲକୁରେଖାଢ୍ଯେ ।
ଚକ୍ରେ ସଦା ନିଵିଷ୍ଟାଂ
ଷଷ୍ଠ୍ଯଷ୍ଟତ୍ରିଂଶଦକ୍ଷରେଶାନୀମ୍ ॥ 30 ॥
ତାପିଞ୍ଛମେଚକାଭାଂ
ତାଲୀଦଲଘଟିତକର୍ଣତାଟଙ୍କାମ୍ ।
ତାମ୍ବୂଲପୂରିତମୁଖୀଂ
ତାମ୍ରାଧରବିମ୍ବଦୃଷ୍ଟଦରହାସାମ୍ ॥ 31 ॥
କୁଙ୍କୁମପଙ୍କିଲଦେହାଂ
କୁଵଲଯଜୀଵାତୁଶାଵକଵତଂସାମ୍ ।
କୋକନଦଶୋଣଚରଣାଂ
କୋକିଲନିକ୍ଵାଣକୋମଲାଲାପାମ୍ ॥ 32 ॥
ଵାମାଙ୍ଗଗଲିତଚୂଲୀଂ
ଵନମାଲ୍ଯକଦମ୍ବମାଲିକାଭରଣାମ୍ ।
ମୁକ୍ତାଲଲନ୍ତିକାଞ୍ଚିତ
ମୁଗ୍ଧାଲିକମିଲିତଚିତ୍ରକୋଦାରାମ୍ ॥ 33 ॥
କରଵିଧୃତକୀରଶାଵକ-
-କଲନିନଦଵ୍ଯକ୍ତନିଖିଲନିଗମାର୍ଥାମ୍ ।
ଵାମକୁଚସଙ୍ଗିଵୀଣାଵାଦନ-
-ସୌଖ୍ଯାର୍ଧମୀଲିତାକ୍ଷିଯୁଗାମ୍ ॥ 34 ॥
ଆପାଟଲାଂଶୁକଧରା-
-ମାଦିରସୋନ୍ମେଷଵାସିତକଟାକ୍ଷାମ୍ ।
ଆମ୍ନାଯସାରଗୁଲିକା-
-ମାଦ୍ଯାଂ ସଙ୍ଗୀତମାତୃକାଂ ଵନ୍ଦେ ॥ 35 ॥
ତସ୍ଯ ଚ ସୁଵର୍ଣସାଲ-
-ସ୍ଯୋତ୍ତରତସ୍ତରୁଣକୁଙ୍କୁମଚ୍ଛାଯଃ ।
ଶମଯତୁ ମମ ସନ୍ତାପଂ
ସାଲୋ ନଵମଃ ସ ପୁଷ୍ପରାଗମଯଃ ॥ 36 ॥
ଅନଯୋରନ୍ତରଵସୁଧାଃ
ପ୍ରଣୁମଃ ପ୍ରତ୍ଯଗ୍ରପୁଷ୍ପରାଗମଯୀଃ ।
ସିଂହାସନେଶ୍ଵରୀମନୁ-
-ଚିନ୍ତନନିସ୍ତନ୍ଦ୍ରସିଦ୍ଧନୀରନ୍ଧ୍ରାଃ ॥ 37 ॥
ତତ୍ସାଲୋତ୍ତରଦେଶେ
ତରୁଣଜପାକିରଣଧୋରଣୀଶୋଣଃ ।
ପ୍ରଶମଯତୁ ପଦ୍ମରାଗ-
-ପ୍ରାକାରୋ ମମ ପରାଭଵଂ ଦଶମଃ ॥ 38 ॥
ଅନ୍ତରଭୂକୃତଵାସା-
-ନନଯୋରପନୀତଚିତ୍ତଵୈମତ୍ଯାନ୍ ।
ଚକ୍ରେଶୀପଦଭକ୍ତାଂ-
-ଶ୍ଚାରଣଵର୍ଗାନହର୍ନିଶଂ କଲଯେ ॥ 39 ॥
ସାରଙ୍ଗଵାହଯୋଜନଦୂରେ-
-ଽସଙ୍ଘଟିତକେତନସ୍ତସ୍ଯ ।
ଗୋମେଦକେନ ରଚିତୋ
ଗୋପାଯତୁ ମାଂ ସମୁନ୍ନତଃ ସାଲଃ ॥ 40 ॥
ଵପ୍ରଦ୍ଵଯାନ୍ତରୋର୍ଵ୍ଯାଂ
ଵଟୁକୈର୍ଵିଵିଧୈଶ୍ଚ ଯୋଗିନୀବୃନ୍ଦୈଃ ।
ସତତଂ ସମର୍ଚିତାଯାଃ
ସଙ୍କର୍ଷଣ୍ଯାଃ ପ୍ରଣୌମି ଚରଣାବ୍ଜମ୍ ॥ 41 ॥
ତାପସଯୋଜନଦୂରେ
ତସ୍ଯ ସମୁତ୍ତୁଙ୍ଗ ଗୋପୁରୋପେତଃ ।
ଵାଞ୍ଛାପୂର୍ତ୍ଯୈ ଭଵତା-
-ଦ୍ଵଜ୍ରମଣୀନିକରନିର୍ମିତୋ ଵପ୍ରଃ ॥ 42 ॥
ଵରଣଦ୍ଵିତଯାନ୍ତରତୋ
ଵାସଜୁଷୋ ଵିହିତମଧୁରସାସ୍ଵାଦାଃ ।
ରମ୍ଭାଦିଵିବୁଧଵେଶ୍ଯା
ରଚଯନ୍ତୁ ମହାନ୍ତମସ୍ମଦାନନ୍ଦମ୍ ॥ 43 ॥
ତତ୍ର ସଦା ପ୍ରଵହନ୍ତୀ
ତଟିନୀ ଵଜ୍ରାଭିଧା ଚିରଂ ଜୀଯାତ୍ ।
ଚଟୁଲୋର୍ମିଜାଲନୃତ୍ଯ-
-ତ୍କଲହଂସୀକୁଲକଲକ୍ଵଣିତପୁଷ୍ଟା ॥ 44 ॥
ରୋଧସି ତସ୍ଯା ରୁଚିରେ
ଵଜ୍ରେଶୀ ଜଯତି ଵଜ୍ରଭୂଷାଢ୍ଯା ।
ଵଜ୍ରପ୍ରଦାନତୋଷିତ-
-ଵଜ୍ରିମୁଖତ୍ରିଦଶଵିନୁତଚାରିତ୍ରା ॥ 45 ॥
ତସ୍ଯୋଦୀଚ୍ଯାଂ ହରିତି
ସ୍ତଵକିତସୁଷମାଵଲୀଢଵିଯଦନ୍ତଃ ।
ଵୈଡୂର୍ଯରତ୍ନରଚିତୋ
ଵୈମଲ୍ଯଂ ଦିଶତୁ ଚେତସୋ ଵରଣଃ ॥ 46 ॥
ଅଧିମଧ୍ଯମେତଯୋଃ ପୁନ-
-ରମ୍ବାଚରଣାଵଲମ୍ବିତସ୍ଵାନ୍ତାନ୍ ।
କାର୍କୋଟକାଦିନାଗାନ୍
କଲଯାମଃ କିଂ ଚ ବଲିମୁଖାନ୍ ଦନୁଜାନ୍ ॥ 47 ॥
ଗନ୍ଧଵହସଙ୍ଖ୍ଯଯୋଜନ-
-ଦୂରେ ଗଗନୋର୍ଧ୍ଵଜାଙ୍ଘିକସ୍ତସ୍ଯ ।
ଵାସଵମଣିପ୍ରଣୀତୋ
ଵରଣୋ ବହଲଯତୁ ଵୈଦୁଷୀଂ ଵିଶଦାମ୍ ॥ 48 ॥
ମଧ୍ଯକ୍ଷୋଣ୍ଯାମନଯୋ-
-ର୍ମହେନ୍ଦ୍ରନୀଲାତ୍ମକାନି ଚ ସରାଂସି ।
ଶାତୋଦରୀସହାଯା-
-ନ୍ଭୂପାଲାନପି ପୁନଃ ପୁନଃ ପ୍ରଣୁମଃ ॥ 49 ॥
ଆଶୁଗଯୋଜନଦୂରେ
ତସ୍ଯୋର୍ଧ୍ଵଂ କାନ୍ତିଧଵଲିତଦିଗନ୍ତଃ ।
ମୁକ୍ତାଵିରଚିତଗାତ୍ରୋ
ମୁହୁରସ୍ମାକଂ ମୁଦେ ଭଵତୁ ସାଲଃ ॥ 50 ॥
ଆଵୃତ୍ତ୍ଯୋରଧିମଧ୍ଯଂ
ପୂର୍ଵସ୍ଯାଂ ଦିଶି ପୁରନ୍ଦରଃ ଶ୍ରୀମାନ୍ ।
ଅଭ୍ରମୁଵିଟାଧିରୂଢୋ
ଵିଭ୍ରମମସ୍ମାକମନିଶମାତନୁତାତ୍ ॥ 51 ॥
ତତ୍କୋଣେ ଵ୍ଯଜନସ୍ରୁ-
-କ୍ତୋମରପାତ୍ରସ୍ରୁଵାନ୍ନଶକ୍ତିଧରଃ ।
ସ୍ଵାହାସ୍ଵଧାସମେତଃ
ସୁଖଯତୁ ମାଂ ହଵ୍ଯଵାହନଃ ସୁଚିରମ୍ ॥ 52 ॥
ଦକ୍ଷିଣଦିଗନ୍ତରାଲେ
ଦଣ୍ଡଧରୋ ନୀଲନୀରଦଚ୍ଛାଯଃ ।
ତ୍ରିପୁରାପଦାବ୍ଜଭକ୍ତସ୍ତିରଯତୁ
ମମ ନିଖିଲମଂହସାଂ ନିକରମ୍ ॥ 53 ॥
ତସ୍ଯୈଵ ପଶ୍ଚିମାଯାଂ
ଦିଶି ଦଲିତେନ୍ଦୀଵରପ୍ରଭାଶ୍ଯାମଃ ।
ଖେଟାସିଯଷ୍ଟିଧାରୀ
ଖେଦାନପନଯତୁ ଯାତୁଧାନୋ ମେ ॥ 54 ॥
ତସ୍ଯା ଉତ୍ତରଦେଶେ
ଧଵଲାଙ୍ଗୋ ଵିପୁଲଝଷଵରାରୂଢଃ ।
ପାଶାଯୁଧାତ୍ତପାଣିଃ
ପାଶୀ ଵିଦଲଯତୁ ପାଶଜାଲାନି ॥ 55 ॥
ଵନ୍ଦେ ତଦୁତ୍ତରହରି-
-ତ୍କୋଣେ ଵାଯୁଂ ଚମୂରୁଵରଵାହମ୍ ।
କୋରକିତତତ୍ତ୍ଵବୋଧା-
-ନ୍ଗୋରକ୍ଷପ୍ରମୁଖଯୋଗିନୋଽପି ମୁହୁଃ ॥ 56 ॥
ତରୁଣୀରିଡାପ୍ରଧାନା-
-ସ୍ତିସ୍ରୋ ଵାତସ୍ଯ ତସ୍ଯ କୃତଵାସାଃ ।
ପ୍ରତ୍ଯଗ୍ରକାପିଶାଯନ-
-ପାନପରିଭ୍ରାନ୍ତଲୋଚନାଃ କଲଯେ ॥ 57 ॥
ତଲ୍ଲୋକପୂର୍ଵଭାଗେ
ଧନଦଂ ଧ୍ଯାଯାମି ଶେଵଧିକୁଲେଶମ୍ ।
ଅପି ମାଣିଭଦ୍ରମୁଖ୍ଯା-
-ନମ୍ବାଚରଣାଵଲମ୍ବିନୋ ଯକ୍ଷାନ୍ ॥ 58 ॥
ତସ୍ଯୈଵ ପୂର୍ଵସୀମନି
ତପନୀଯାରଚିତଗୋପୁରେ ନଗରେ ।
କାତ୍ଯାଯନୀସହାଯଂ
କଲଯେ ଶୀତାଂଶୁଖଣ୍ଡଚୂଡାଲମ୍ ॥ 59 ॥
ତତ୍ପୁରଷୋଡଶଵରଣ-
-ସ୍ଥଲଭାଜସ୍ତରୁଣଚନ୍ଦ୍ରଚୂଡାଲାନ୍ ।
ରୁଦ୍ରାଧ୍ଯାଯେ ପଠିତା-
-ନ୍ରୁଦ୍ରାଣୀସହଚରାନ୍ଭଜେ ରୁଦ୍ରାନ୍ ॥ 60 ॥
ପଵମାନସଙ୍ଖ୍ଯଯୋଜନ-
-ଦୂରେ ବାଲତୃଣ୍ମେଚକସ୍ତସ୍ଯ ।
ସାଲୋ ମରକତରଚିତଃ
ସମ୍ପଦମଚଲାଂ ଶ୍ରିଯଂ ଚ ପୁଷ୍ଣାତୁ ॥ 61 ॥
ଆଵୃତିଯୁଗ୍ମାନ୍ତରତୋ
ହରିତମଣୀନିଵହମେଚକେ ଦେଶେ ।
ହାଟକତାଲୀଵିପିନଂ
ହାଲାଘଟଘଟିତଵିଟପମାକଲଯେ ॥ 62 ॥
ତତ୍ରୈଵ ମନ୍ତ୍ରିଣୀଗୃହ-
-ପରିଣାହଂ ତରଲକେତନଂ ସଦନମ୍ ।
ମରକତସୌଧମନୋଜ୍ଞଂ
ଦଦ୍ଯାଦାଯୂଂଷି ଦଣ୍ଡନାଥାଯାଃ ॥ 63 ॥
ସଦନେ ତତ୍ର ହରିନ୍ମଣି-
-ସଙ୍ଘଟିତେ ମଣ୍ଡପେ ଶତସ୍ତମ୍ଭେ ।
କାର୍ତସ୍ଵରମଯପୀଠେ
କନକମଯାମ୍ବୁରୁହକର୍ଣିକାମଧ୍ଯେ ॥ 64 ॥
ବିନ୍ଦୁତ୍ରିକୋଣଵର୍ତୁଲ-
-ଷଡସ୍ରଵୃତ୍ତଦ୍ଵଯାନ୍ଵିତେ ଚକ୍ରେ ।
ସଞ୍ଚାରିଣୀ ଦଶୋତ୍ତର-
ଶତାର୍ଣମନୁରାଜକମଲକଲହଂସୀ ॥ 65 ॥
କୋଲଵଦନା କୁଶେଶଯ-
-ନଯନା କୋକାରିମଣ୍ଡିତଶିଖଣ୍ଡା ।
ସନ୍ତପ୍ତକାଞ୍ଚନାଭା
ସନ୍ଧ୍ଯାରୁଣଚେଲସଂଵୃତନିତମ୍ବା ॥ 66 ॥
ହଲମୁସଲଶଙ୍ଖଚକ୍ରା-
-ଽଙ୍କୁଶପାଶାଭଯଵରସ୍ଫୁରିତହସ୍ତା ।
କୂଲଙ୍କଷାନୁକମ୍ପା
କୁଙ୍କୁମଜମ୍ବାଲିତସ୍ତନାଭୋଗା ॥ 67 ॥
ଧୂର୍ତାନାମତିଦୂରା-
-ଵାର୍ତାଶେଷାଵଲଗ୍ନକମନୀଯା ।
ଆର୍ତାଲୀଶୁଭଦାତ୍ରୀ
ଵାର୍ତାଲୀ ଭଵତୁ ଵାଞ୍ଛିତାର୍ଥାଯ ॥ 68 ॥
ତସ୍ଯାଃ ପରିତୋ ଦେଵୀଃ
ସ୍ଵପ୍ନେଶ୍ଯୁନ୍ମତ୍ତଭୈରଵୀମୁଖ୍ଯାଃ ।
ପ୍ରଣମତ ଜମ୍ଭିନ୍ଯାଦ୍ଯାଃ
ଭୈରଵଵର୍ଗାଂଶ୍ଚ ହେତୁକପ୍ରମୁଖାନ୍ ॥ 69 ॥
ପୂର୍ଵୋକ୍ତସଙ୍ଖ୍ଯଯୋଜନ-
-ଦୂରେ ପୂଯାଂଶୁପାଟଲସ୍ତସ୍ଯ ।
ଵିଦ୍ରାଵଯତୁ ମଦାର୍ତିଂ
ଵିଦ୍ରୁମସାଲୋ ଵିଶଙ୍କଟଦ୍ଵାରଃ ॥ 70 ॥
ଆଵରଣଯୋରହର୍ନିଶ-
-ମନ୍ତରଭୂମୌପ୍ରକାଶଶାଲିନ୍ଯାମ୍ ।
ଆସୀନମମ୍ବୁଜାସନ-
-ମଭିନଵସିନ୍ଦୂରଗୌରମହମୀଡେ ॥ 71 ॥
ଵରଣସ୍ଯ ତସ୍ଯ ମାରୁତ-
-ଯୋଜନତୋ ଵିପୁଲଗୋପୁରଦ୍ଵାରଃ ।
ସାଲୋ ନାନାରତ୍ନୈଃ
ସଙ୍ଘଟିତାଙ୍ଗଃ କୃଷୀଷ୍ଟ ମଦଭୀଷ୍ଟମ୍ ॥ 72 ॥
ଅନ୍ତରକକ୍ଷ୍ଯାମନଯୋ-
-ରଵିରଲଶୋଭାପିଚଣ୍ଡିଲୋଦ୍ଦେଶାମ୍ ।
ମାଣିକ୍ଯମଣ୍ଡପାଖ୍ଯାଂ
ମହତୀମଧିହୃଦଯମନିଶମାକଲଯେ ॥ 73 ॥
ତତ୍ର ସ୍ଥିତଂ ପ୍ରସନ୍ନଂ
ତରୁଣତମାଲପ୍ରଵାଲକିରଣାଭମ୍ ।
କର୍ଣାଵଲମ୍ବିକୁଣ୍ଡଲ-
-କନ୍ଦଲିତାଭୀଶୁକଵଚିତକପୋଲମ୍ ॥ 74 ॥
ଶୋଣାଧରଂ ଶୁଚିସ୍ମିତ-
-ମେଣାଙ୍କଵଦନମେଧମାନକୃପମ୍ ।
ମୁଗ୍ଧୈଣମଦଵିଶେଷକ-
-ମୁଦ୍ରିତନିଟିଲେନ୍ଦୁରେଖିକାରୁଚିରମ୍ ॥ 75 ॥
ନାଲୀକଦଲସହୋଦର-
-ନଯନାଞ୍ଚଲଘଟିତମନସିଜାକୂତମ୍ ।
କମଲାକଠିନପଯୋଧର-
-କସ୍ତୂରୀଘୁସୃଣପଙ୍କିଲୋରସ୍କମ୍ ॥ 76 ॥
ଚାମ୍ପେଯଗନ୍ଧିକୈଶ୍ଯଂ
ଶମ୍ପାସବ୍ରହ୍ମଚାରିକୌଶେଯମ୍ ।
ଶ୍ରୀଵତ୍ସକୌସ୍ତୁଭଧରଂ
ଶ୍ରିତଜନରକ୍ଷାଧୁରୀଣଚରଣାବ୍ଜମ୍ ॥ 77 ॥
କମ୍ବୁସୁଦର୍ଶନଵିଲସ-
-ତ୍କରପଦ୍ମଂ କଣ୍ଠଲୋଲଵନମାଲମ୍ ।
ମୁଚୁକୁନ୍ଦମୋକ୍ଷଫଲଦଂ
ମୁକୁନ୍ଦମାନନ୍ଦକନ୍ଦମଵଲମ୍ବେ ॥ 78 ॥
ତଦ୍ଵରଣୋତ୍ତରଭାଗେ
ତାରାପତିବିମ୍ବଚୁମ୍ବିନିଜଶୃଙ୍ଗଃ ।
ଵିଵିଧମଣୀଗଣଘଟିତୋ
ଵିତରତୁ ସାଲୋ ଵିନିର୍ମଲାଂ ଧିଷଣାମ୍ ॥ 79 ॥
ପ୍ରାକାରଦ୍ଵିତଯାନ୍ତର-
-କକ୍ଷ୍ଯାଂ ପୃଥୁରତ୍ନନିକରସଙ୍କୀର୍ଣାମ୍ ।
ନମତ ସହସ୍ରସ୍ତମ୍ଭକ-
-ମଣ୍ଡପନାମ୍ନାତିଵିଶ୍ରୁତାଂ ଭୁଵନେ ॥ 80 ॥
ପ୍ରଣୁମସ୍ତତ୍ର ଭଵାନୀ-
-ସହଚରମୀଶାନମିନ୍ଦୁଖଣ୍ଡଧରମ୍ ।
ଶୃଙ୍ଗାରନାଯିକାମନୁ-
-ଶୀଲନଭାଜୋଽପି ଭୃଙ୍ଗିନନ୍ଦିମୁଖାନ୍ ॥ 81 ॥
ତସ୍ଯୈଣଵାହଯୋଜନ-
-ଦୂରେ ଵନ୍ଦେ ମନୋମଯଂ ଵପ୍ରମ୍ ।
ଅଙ୍କୂରନ୍ମଣିକିରଣା-
-ମନ୍ତରକକ୍ଷ୍ଯାଂ ଚ ନିର୍ମଲାମନଯୋଃ ॥ 82 ॥
ତତ୍ରୈଵାମୃତଵାପୀଂ
ତରଲତରଙ୍ଗାଵଲୀଢତଟଯୁଗ୍ମାମ୍ ।
ମୁକ୍ତାମଯକଲହଂସୀ-
-ମୁଦ୍ରିତକନକାରଵିନ୍ଦସନ୍ଦୋହାମ୍ ॥ 83 ॥
ଶକ୍ରୋପଲମଯଭୃଙ୍ଗୀ-
-ସଙ୍ଗୀତୋନ୍ମେଷଘୋଷିତଦିଗନ୍ତାମ୍ ।
କାଞ୍ଚନମଯାଙ୍ଗଵିଲସ-
-ତ୍କାରଣ୍ଡଵଷଣ୍ଡତାଣ୍ଡଵମନୋଜ୍ଞାମ୍ ॥ 84 ॥
କୁରୁଵିନ୍ଦାତ୍ମକହଲ୍ଲକ-
-କୋରକସୁଷମାସମୂହପାଟଲିତାମ୍ ।
କଲଯେ ସୁଧାସ୍ଵରୂପାଂ
କନ୍ଦଲିତାମନ୍ଦକୈରଵାମୋଦାମ୍ ॥ 85 ॥
ତଦ୍ଵାପିକାନ୍ତରାଲେ ତରଲେ
ମଣିପୋତସୀମ୍ନି ଵିହରନ୍ତୀମ୍ ।
ସିନ୍ଦୂରପାଟଲାଙ୍ଗୀଂ
ସିତକିରଣାଙ୍କୂରକଲ୍ପିତଵତଂସାମ୍ ॥ 86 ॥
ପର୍ଵେନ୍ଦୁବିମ୍ବଵଦନାଂ
ପଲ୍ଲଵଶୋଣାଧରସ୍ଫୁରିତହାସାମ୍ ।
କୁଟିଲକବରୀଂ କୁରଙ୍ଗୀ-
-ଶିଶୁନଯନାଂ କୁଣ୍ଡଲସ୍ଫୁରିତଗଣ୍ଡାମ୍ ॥ 87 ॥
ନିକଟସ୍ଥପୋତନିଲଯାଃ
ଶକ୍ତୀଃ ଶଯଵିଧୃତହେମଶୃଙ୍ଗଜଲୈଃ ।
ପରିଷିଞ୍ଚନ୍ତୀଂ ପରିତ-
-ସ୍ତାରାଂ ତାରୁଣ୍ଯଗର୍ଵିତାଂ ଵନ୍ଦେ ॥ 88 ॥
ପ୍ରାଗୁକ୍ତସଙ୍ଖ୍ଯଯୋଜନଦୂରେ
ପ୍ରଣମାମି ବୁଦ୍ଧିମଯସାଲମ୍ ।
ଅନଯୋରନ୍ତରକକ୍ଷ୍ଯା-
-ମଷ୍ଟାପଦପୁଷ୍ଟମେଦିନୀଂ ରୁଚିରାମ୍ ॥ 89 ॥
କାଦମ୍ବରୀନିଧାନାଂ
କଲଯାମ୍ଯାନନ୍ଦଵାପିକାଂ ତସ୍ଯାମ୍ ।
ଶୋଣାଶ୍ମନିଵହନିର୍ମିତ-
-ସୋପାନଶ୍ରେଣିଶୋଭମାନତଟୀମ୍ ॥ 90 ॥
ମାଣିକ୍ଯତରଣିନିଲଯାଂ
ମଧ୍ଯେ ତସ୍ଯା ମଦାରୁଣକପୋଲାମ୍ ।
ଅମୃତେଶୀତ୍ଯଭିଧାନା-
-ମନ୍ତଃ କଲଯାମି ଵାରୁଣୀଂ ଦେଵୀମ୍ ॥ 91 ॥
ସୌଵର୍ଣକେନିପାତନ-
-ହସ୍ତାଃ ସୌନ୍ଦର୍ଯଗର୍ଵିତା ଦେଵ୍ଯଃ ।
ତତ୍ପୁରତଃ ସ୍ଥିତିଭାଜୋ
ଵିତରନ୍ତ୍ଵସ୍ମାକମାଯୁଷୋ ଵୃଦ୍ଧିମ୍ ॥ 92 ॥
ତସ୍ଯ ପୃଷଦଶ୍ଵଯୋଜନ-
-ଦୂରେଽହଙ୍କାରସାଲମତିତୁଙ୍ଗମ୍ ।
ଵନ୍ଦେ ତଯୋଶ୍ଚ ମଧ୍ଯେ
କକ୍ଷ୍ଯାଂ ଵଲମାନମଲଯପଵମାନାମ୍ ॥ 93 ॥
ଵିନୁମୋ ଵିମର୍ଶଵାପୀଂ
ସୌଷୁମ୍ନସୁଧାସ୍ଵରୂପିଣୀଂ ତତ୍ର ।
ଵେଲାତିଲଙ୍ଘ୍ଯଵୀଚୀ-
-କୋଲାହଲଭରିତକୂଲଵନଵାଟୀମ୍ ॥ 94 ॥
ତତ୍ରୈଵ ସଲିଲମଧ୍ଯେ
ତାପିଞ୍ଛଦଲପ୍ରପଞ୍ଚସୁଷମାଭାମ୍ ।
ଶ୍ଯାମଲକଞ୍ଚୁକଲସିତାଂ
ଶ୍ଯାମାଵିଟବିମ୍ବଡମ୍ବରହରାସ୍ଯାମ୍ ॥ 95 ॥
ଆଭୁଗ୍ନମସୃଣଚିଲ୍ଲୀ-
-ହସିତାଯୁଗ୍ମଶରକାର୍ମୁକଵିଲାସାମ୍ ।
ମନ୍ଦସ୍ମିତାଞ୍ଚିତମୁଖୀଂ
ମଣିମଯତାଟଙ୍କମଣ୍ଡିତକପୋଲାମ୍ ॥ 96 ॥
କୁରୁଵିନ୍ଦତରଣିନିଲଯାଂ
କୁଲାଚଲସ୍ପର୍ଧିକୁଚନମନ୍ମଧ୍ଯାମ୍ ।
କୁଙ୍କୁମଵିଲିପ୍ତଗାତ୍ରୀଂ
କୁରୁକୁଲ୍ଲାଂ ମନସି କୁର୍ମହେ ସତତମ୍ ॥ 97 ॥
ତତ୍ସାଲୋତ୍ତରଭାଗେ
ଭାନୁମଯଂ ଵପ୍ରମାଶ୍ରଯେ ଦୀପ୍ତମ୍ ।
ମଧ୍ଯଂ ଚ ଵିପୁଲମନଯୋ-
-ର୍ମନ୍ଯେ ଵିଶ୍ରାନ୍ତମାତପୋଦ୍ଗାରମ୍ ॥ 98 ॥
ତତ୍ର କୁରୁଵିନ୍ଦପୀଠେ
ତାମରସେ କନକକର୍ଣିକାଘଟିତେ ।
ଆସୀନମରୁଣଵାସସ-
-ମମ୍ଲାନପ୍ରସଵମାଲିକାଭରଣମ୍ ॥ 99 ॥
ଚକ୍ଷୁଷ୍ମତୀପ୍ରକାଶନ-
-ଶକ୍ତିଚ୍ଛାଯାସମାରଚିତକେଲିମ୍ ।
ମାଣିକ୍ଯମୁକୁଟରମ୍ଯଂ
ମନ୍ଯେ ମାର୍ତାଣ୍ଡଭୈରଵଂ ହୃଦଯେ ॥ 100 ॥
ଇନ୍ଦୁମଯସାଲମୀଡେ
ତସ୍ଯୋତ୍ତରତସ୍ତୁଷାରଗିରିଗୌରମ୍ ।
ଅତ୍ଯନ୍ତଶିଶିରମାରୁତ-
-ମନଯୋର୍ମଧ୍ଯଂ ଚ ଚନ୍ଦ୍ରିକୋଦ୍ଗାରମ୍ ॥ 101 ॥
ତତ୍ର ପ୍ରକାଶମାନଂ
ତାରାନିକରୈଃ ପରିଷ୍କୃତୋଦ୍ଦେଶମ୍ ।
ଅମୃତମଯକାନ୍ତିକନ୍ଦଲ-
-ମନ୍ତଃ କଲଯାମି କୁନ୍ଦସିତମିନ୍ଦୁମ୍ ॥ 102 ॥
ଶୃଙ୍ଗାରସାଲମୀଡେ
ଶୃଙ୍ଗୋଲ୍ଲସିତଂ ତଦୁତ୍ତରେ ଭାଗେ ।
ମଧ୍ଯସ୍ଥଲେ ତଯୋରପି
ମହିତାଂ ଶୃଙ୍ଗାରପୂର୍ଵିକାଂ ପରିଖାମ୍ ॥ 103 ॥
ତତ୍ର ମଣିନୌସ୍ଥିତାଭି-
-ସ୍ତପନୀଯାଵିରଚିତାଗ୍ରହସ୍ତାଭିଃ ।
ଶୃଙ୍ଗାରଦେଵତାଭିଃ
ସହିତଂ ପରିଖାଧିପଂ ଭଜେ ମଦନମ୍ ॥ 104 ॥
ଶୃଙ୍ଗାରଵରଣଵର୍ଯସ୍ଯୋତ୍ତରତଃ
ସକଲଵିବୁଧସଂସେଵ୍ଯମ୍ ।
ଚିନ୍ତାମଣିଗଣରଚିତଂ
ଚିନ୍ତାଂ ଦୂରୀକରୋତୁ ମେ ସଦନମ୍ ॥ 105 ॥
ମଣିସଦନସାଲଯୋରଧି-
-ମଧ୍ଯଂ ଦଶତାଲଭୂମିରୁହଦୀର୍ଘୈଃ ।
ପର୍ଣୈଃ ସୁଵର୍ଣଵର୍ଣୈ-
-ର୍ଯୁକ୍ତାଂ କାଣ୍ଡୈଶ୍ଚ ଯୋଜନୋତ୍ତୁଙ୍ଗୈଃ ॥ 106 ॥
ମୃଦୁଲୈସ୍ତାଲୀପଞ୍ଚକ-
-ମାନୈର୍ମିଲିତାଂ ଚ କେସରକଦମ୍ବୈଃ ।
ସନ୍ତତଗଲିତମରନ୍ଦ-
-ସ୍ରୋତୋନିର୍ଯନ୍ମିଲିନ୍ଦସନ୍ଦୋହାମ୍ ॥ 107 ॥
ପାଟୀରପଵନବାଲକ-
-ଧାଟୀନିର୍ଯତ୍ପରାଗପିଞ୍ଜରିତାମ୍ ।
କଲହଂସୀକୁଲକଲକଲ-
-କୂଲଙ୍କଷନିନଦନିଚଯକମନୀଯାମ୍ ॥ 108 ॥
ପଦ୍ମାଟଵୀଂ ଭଜାମଃ
ପରିମଲକଲ୍ଲୋଲପକ୍ଷ୍ମଲୋପାନ୍ତାମ୍ ।
[ ଦେଵ୍ଯର୍ଘ୍ଯପାତ୍ରଧାରୀ
ତସ୍ଯାଃ ପୂର୍ଵଦିଶି ଦଶକଲାଯୁକ୍ତଃ । ]
ଵଲଯିତମୂର୍ତିର୍ଭଗଵା-
-ନ୍ଵହ୍ନିଃ କ୍ରୋଶୋନ୍ନତଶ୍ଚିରଂ ପାଯାତ୍ ॥ 109 ॥
ତତ୍ରାଧାରେ ଦେଵ୍ଯାଃ
ପାତ୍ରୀରୂପଃ ପ୍ରଭାକରଃ ଶ୍ରୀମାନ୍ ।
ଦ୍ଵାଦଶକଲାସମେତୋ
ଧ୍ଵାନ୍ତଂ ମମ ବହୁଲମାନ୍ତରଂ ଭିନ୍ଦ୍ଯାତ୍ ॥ 110 ॥
ତସ୍ମିନ୍ ଦିନେଶପାତ୍ରେ
ତରଙ୍ଗିତାମୋଦମମୃତମଯମର୍ଘ୍ଯମ୍ ।
ଚନ୍ଦ୍ରକଲାତ୍ମକମମୃତଂ
ସାନ୍ଦ୍ରୀକୁର୍ଯାଦମନ୍ଦମାନନ୍ଦମ୍ ॥ 111 ॥
ଅମୃତେ ତସ୍ମିନ୍ନଭିତୋ
ଵିହରନ୍ତ୍ଯୋ ଵିଵିଧମଣିତରଣିଭାଜଃ ।
ଷୋଡଶ କଲାଃ ସୁଧାଂଶୋଃ
ଶୋକାଦୁତ୍ତାରଯନ୍ତୁ ମାମନିଶମ୍ ॥ 112 ॥
ତତ୍ରୈଵ ଵିହୃତିଭାଜୋ
ଧାତୃମୁଖାନାଂ ଚ କାରଣେଶାନାମ୍ ।
ସୃଷ୍ଟ୍ଯାଦିରୂପିକାସ୍ତାଃ
ଶମଯନ୍ତ୍ଵଖିଲାଃ କଲାଶ୍ଚ ସନ୍ତାପମ୍ ॥ 113 ॥
କୀନାଶଵରୁଣକିନ୍ନର-
-ରାଜଦିଗନ୍ତେଷୁ ରତ୍ନଗେହସ୍ଯ ।
କଲଯାମି ତାନ୍ଯଜସ୍ରଂ
କଲଯନ୍ତ୍ଵାଯୁଷ୍ଯମର୍ଘ୍ଯପାତ୍ରାଣି ॥ 114 ॥
ପାତ୍ରସ୍ଥଲସ୍ଯ ପୁରତଃ
ପଦ୍ମାରମଣଵିଧିପାର୍ଵତୀଶାନାମ୍ ।
ଭଵନାନି ଶର୍ମଣେ ନୋ
ଭଵନ୍ତୁ ଭାସା ପ୍ରଦୀପିତଜଗନ୍ତି ॥ 115 ॥
ସଦନସ୍ଯାନଲକୋଣେ
ସତତଂ ପ୍ରଣମାମି କୁଣ୍ଡମାଗ୍ନେଯମ୍ ।
ତତ୍ର ସ୍ଥିତଂ ଚ ଵହ୍ନିଂ
ତରଲଶିଖାଜଟିଲମମ୍ବିକାଜନକମ୍ ॥ 116 ॥
ତସ୍ଯାସୁରଦିଶି ତାଦୃଶ-
-ରତ୍ନପରିସ୍ଫୁରିତପର୍ଵନଵକାଢ୍ଯମ୍ ।
ଚକ୍ରାତ୍ମକଂ ଶତାଙ୍ଗଂ
ଶତଯୋଜନମୁନ୍ନତଂ ଭଜେ ଦିଵ୍ଯମ୍ ॥ 117 ॥
ତତ୍ରୈଵ ଦିଶି ନିଷଣ୍ଣଂ
ତପନୀଯଧ୍ଵଜପରମ୍ପରାଶ୍ଲିଷ୍ଟମ୍ ।
ରଥମପରଂ ଚ ଭଵାନ୍ଯା
ରଚଯାମୋ ମନସି ରତ୍ନମଯଚୂଡମ୍ ॥ 118 ॥
ଭଵନସ୍ଯ ଵାଯୁଭାଗେ
ପରିଷ୍କୃତୋ ଵିଵିଧଵୈଜଯନ୍ତୀଭିଃ ।
ରଚଯତୁ ମୁଦଂ ରଥେନ୍ଦ୍ରଃ
ସଚିଵେଶାନ୍ଯାଃ ସମସ୍ତଵନ୍ଦ୍ଯାଯାଃ ॥ 119 ॥
କୁର୍ମୋଽଧିହୃଦଯମନିଶଂ
କ୍ରୋଡାସ୍ଯାଯାଃ ଶତାଙ୍ଗମୂର୍ଧନ୍ଯମ୍ ।
ରୁଦ୍ରଦିଶି ରତ୍ନଧାମ୍ନୋ
ରୁଚିରଶଲାକାପ୍ରପଞ୍ଚକଞ୍ଚୁକିତମ୍ ॥ 120 ॥
ପରିତୋ ଦେଵୀଧାମ୍ନଃ
ପ୍ରଣୀତଵାସା ମନୁସ୍ଵରୂପିଣ୍ଯଃ ।
କୁର୍ଵନ୍ତୁ ରଶ୍ମିମାଲା-
-କୃତଯଃ କୁଶଲାନି ଦେଵତା ନିଖିଲାଃ ॥ 121 ॥
ପ୍ରାଗ୍ଦ୍ଵାରସ୍ଯ ଭଵାନୀ-
-ଧାମ୍ନଃ ପାର୍ଶ୍ଵଦ୍ଵଯାରଚିତଵାସେ ।
ମାତଙ୍ଗୀକିଟିମୁଖ୍ଯୌ
ମଣିସଦନେ ମନସି ଭାଵଯାମି ଚିରମ୍ ॥ 122 ॥
ଯୋଜନଯୁଗଲାଭୋଗା
ତତ୍କ୍ରୋଶପରିଣାହଯୈଵ ଭିତ୍ତ୍ଯା ଚ ।
ଚିନ୍ତାମଣିଗୃହଭୂମି-
-ର୍ଜୀଯାଦାମ୍ନାଯମଯଚତୁର୍ଦ୍ଵାରା ॥ 123 ॥
ଦ୍ଵାରେ ଦ୍ଵାରେ ଧାମ୍ନଃ
ପିଣ୍ଡୀଭୂତା ନଵୀନବିମ୍ବାଭାଃ ।
ଵିଦଧତୁ ଵିପୁଲାଂ କୀର୍ତିଂ
ଦିଵ୍ଯା ଲୌହିତ୍ଯସିଦ୍ଧ୍ଯୋ ଦେଵ୍ଯଃ ॥ 124 ॥
ମଣିସଦନସ୍ଯାନ୍ତରତୋ
ମହନୀଯେ ରତ୍ନଵେଦିକାମଧ୍ଯେ ।
ବିନ୍ଦୁମଯଚକ୍ରମୀଡେ
ପୀଠାନାମୁପରି ଵିରଚିତାଵାସମ୍ ॥ 125 ॥
ଚକ୍ରାଣାଂ ସକଲାନାଂ
ପ୍ରଥମମଧଃ ସୀମଫଲକଵାସ୍ତଵ୍ଯାଃ ।
ଅଣିମାଦିସିଦ୍ଧଯୋ ମା-
-ମଵନ୍ତୁ ଦେଵୀ ପ୍ରଭାସ୍ଵରୂପିଣ୍ଯଃ ॥ 126 ॥
ଅଣିମାଦିସିଦ୍ଧିଫଲକ-
-ସ୍ଯୋପରିହରିଣାଙ୍କଖଣ୍ଡକୃତଚୂଡାଃ ।
ଭଦ୍ରଂ ପକ୍ଷ୍ମଲଯନ୍ତୁ
ବ୍ରାହ୍ମୀପ୍ରମୁଖାଶ୍ଚ ମାତରୋଽସ୍ମାକମ୍ ॥ 127 ॥
ତସ୍ଯୋପରି ମଣିଫଲକେ
ତାରୁଣ୍ଯୋତ୍ତୁଙ୍ଗପୀନକୁଚଭାରାଃ ।
ସଙ୍କ୍ଷୋଭିଣୀପ୍ରଧାନାଃ
ଭ୍ରାନ୍ତି ଵିଦ୍ରାଵଯନ୍ତୁ ଦଶ ମୁଦ୍ରାଃ ॥ 128 ॥
ଫଲକତ୍ରଯସ୍ଵରୂପେ
ପୃଥୁଲେ ତ୍ରୈଲୋକ୍ଯମୋହନେ ଚକ୍ରେ ।
ଦୀଵ୍ଯନ୍ତୁ ପ୍ରକଟାଖ୍ଯା-
-ସ୍ତାସାଂ କର୍ତ୍ରୀଂ ଚ ଭଗଵତୀ ତ୍ରିପୁରା ॥ 129 ॥
ତଦୁପରି ଵିପୁଲେ ଧିଷ୍ଣ୍ଯେ
ତରଲଦୃଶସ୍ତରୁଣକୋକନଦଭାସଃ ।
କାମାକର୍ଷିଣ୍ଯାଦ୍ଯାଃ
କଲଯେ ଦେଵୀଃ କଲାଧରଶିଖଣ୍ଡାଃ ॥ 130 ॥
ସର୍ଵାଶାପରିପୂରକଚକ୍ରେ-
-ଽସ୍ମିନ୍ ଗୁପ୍ତଯୋଗିନୀସେଵ୍ଯାଃ ।
ତ୍ରିପୁରେଶୀ ମମ ଦୁରିତଂ
ତୁଦ୍ଯାତ୍ କଣ୍ଠାଵଲମ୍ବିମଣିହାରା ॥ 131 ॥
ତସ୍ଯୋପରି ମଣିପୀଠେ
ତାମ୍ରାମ୍ଭୋରୁହଦଲପ୍ରଭାଶୋଣାଃ ।
ଧ୍ଯାଯାମ୍ଯନଙ୍ଗକୁସୁମା-
-ପ୍ରମୁଖା ଦେଵୀଶ୍ଚ ଵିଧୃତକୂର୍ପାସାଃ ॥ 132 ॥
ସଙ୍କ୍ଷୋଭକାରକେଽସ୍ମିଂ-
-ଶ୍ଚକ୍ରେ ଶ୍ରୀତ୍ରିପୁରସୁନ୍ଦରୀ ସାକ୍ଷାତ୍ ।
ଗୋପ୍ତ୍ରୀ ଗୁପ୍ତତରାଖ୍ଯାଃ
ଗୋପାଯତୁ ମାଂ କୃପାର୍ଦ୍ରଯା ଦୃଷ୍ଟ୍ଯା ॥ 133 ॥
ସଙ୍କ୍ଷୋଭିଣୀପ୍ରଧାନାଃ
ଶକ୍ତୀସ୍ତସ୍ଯୋର୍ଧ୍ଵଵଲଯକୃତଵାସାଃ ।
ଆଲୋଲନୀଲଵେଣୀ-
-ରନ୍ତଃ କଲଯାମି ଯୌଵନୋନ୍ମତ୍ତାଃ ॥ 134 ॥
ସୌଭାଗ୍ଯଦାଯକେଽସ୍ମିଂ-
-ଶ୍ଚକ୍ରେଶୀ ତ୍ରିପୁରଵାସିନୀ ଜୀଯାତ୍ ।
ଶକ୍ତୀଶ୍ଚ ସମ୍ପ୍ରଦାଯାଭିଧାଃ
ସମସ୍ତାଃ ପ୍ରମୋଦଯନ୍ତ୍ଵନିଶମ୍ ॥ 135 ॥
ମଣିପୀଠୋପରି ତାସାଂ
ମହତି ଚତୁର୍ହସ୍ତଵିସ୍ତୃତେ ଵଲଯେ ।
ସନ୍ତତଵିରଚିତଵାସାଃ
ଶକ୍ତୀଃ କଲଯାମି ସର୍ଵସିଦ୍ଧିମୁଖାଃ ॥ 136 ॥
ସର୍ଵାର୍ଥସାଧକାଖ୍ଯେ
ଚକ୍ରେଽମୁଷ୍ମିନ୍ ସମସ୍ତଫଲଦାତ୍ରୀ ।
ତ୍ରିପୁରା ଶ୍ରୀର୍ମମ କୁଶଲଂ
ଦିଶତାଦୁତ୍ତୀର୍ଣଯୋଗିନୀସେଵ୍ଯା ॥ 137 ॥
ତାସାଂ ନିଲଯସ୍ଯୋପରି
ଧିଷ୍ଣ୍ଯେ କୌସୁମ୍ଭକଞ୍ଚୁକମନୋଜ୍ଞାଃ ।
ସର୍ଵାଜ୍ଞାଦ୍ଯାଃ ଦେଵ୍ଯଃ
ସକଲାଃ ସମ୍ପାଦଯନ୍ତୁ ମମ କୀର୍ତିମ୍ ॥ 138 ॥
ଚକ୍ରେ ସମସ୍ତରକ୍ଷା-
-କରନାମ୍ନ୍ଯସ୍ମିନ୍ ସମସ୍ତଜନସେଵ୍ଯାମ୍ ।
ମନସି ନିଗର୍ଭାସହିତାଂ
ମନ୍ଯେ ଶ୍ରୀତ୍ରିପୁରମାଲିନୀଂ ଦେଵୀମ୍ ॥ 139 ॥
ସର୍ଵଜ୍ଞାସଦନସ୍ଯୋପରି
ଚକ୍ରେ ଵିପୁଲେ ସମାକଲିତଗେହାଃ ।
ଵନ୍ଦେ ଵଶିନୀମୁଖ୍ଯାଃ
ଶକ୍ତୀଃ ସିନ୍ଦୂରରେଣୁରୁଚଃ ॥ 140 ॥
ଶ୍ରୀସର୍ଵରୋଗହରାଖ୍ଯ-
-ଚକ୍ରେଽସ୍ମିଂସ୍ତ୍ରିପୁରପୂର୍ଵିକାଂ ସିଦ୍ଧାମ୍ ।
ଵନ୍ଦେ ରହସ୍ଯନାମ୍ନା
ଵେଦ୍ଯାଭିଃ ଶକ୍ତିଭିଃ ସଦା ସେଵ୍ଯାମ୍ ॥ 141 ॥
ଵଶିନୀଗୃହୋପରିଷ୍ଟା-
-ଦ୍ଵିଂଶତିହସ୍ତୋନ୍ନତେ ମହାପୀଠେ ।
ଶମଯନ୍ତୁ ଶତ୍ରୁବୃନ୍ଦଂ
ଶସ୍ତ୍ରାଣ୍ଯସ୍ତ୍ରାଣି ଚାଦିଦମ୍ପତ୍ଯୋଃ ॥ 142 ॥
ଶସ୍ତ୍ରସଦନୋପରିଷ୍ଟା-
-ଦ୍ଵଲଯେ ଵଲଵୈରିରତ୍ନସଙ୍ଘଟିତେ ।
କାମେଶ୍ଵରୀପ୍ରଧାନାଃ
କଲଯେ ଦେଵୀଃ ସମସ୍ତଜନଵନ୍ଦ୍ଯାଃ ॥ 143 ॥
ଚକ୍ରେଽତ୍ର ସର୍ଵସିଦ୍ଧିପ୍ରଦ-
-ନାମନି ସର୍ଵଫଲଦାତ୍ରୀ ।
ତ୍ରିପୁରାମ୍ବାଵତୁ ସତତଂ
ପରାପରରହସ୍ଯଯୋଗିନୀସେଵ୍ଯା ॥ 144 ॥
କାମେଶ୍ଵରୀଗୃହୋପରିଵଲଯେ
ଵିଵିଧମନୁସମ୍ପ୍ରଦାଯଜ୍ଞାଃ ।
ଚତ୍ଵାରୋ ଯୁଗନାଥା
ଜଯନ୍ତୁ ମିତ୍ରେଶପୂର୍ଵକାଃ ଗୁରଵଃ ॥ 145 ॥
ନାଥଭଵନୋପରିଷ୍ଟା-
-ନ୍ନାନାରତ୍ନଚଯମେଦୁରେ ପୀଠେ ।
କାମେଶ୍ଯାଦ୍ଯା ନିତ୍ଯାଃ
କଲଯନ୍ତୁ ମୁଦଂ ତିଥିସ୍ଵରୂପିଣ୍ଯଃ ॥ 146 ॥
ନିତ୍ଯାସଦନସ୍ଯୋପରି
ନିର୍ମଲମଣିନିଵହଵିରଚିତେ ଧିଷ୍ଣ୍ଯେ ।
କୁଶଲଂ ଷଡଙ୍ଗଦେଵ୍ଯଃ
କଲଯନ୍ତ୍ଵସ୍ମାକମୁତ୍ତରଲନେତ୍ରାଃ ॥ 147 ॥
ସଦନସ୍ଯୋପରି ତାସାଂ
ସର୍ଵାନନ୍ଦମଯନାମକେ ବିନ୍ଦୌ ।
ପଞ୍ଚବ୍ରହ୍ମାକାରାଂ
ମଞ୍ଚଂ ପ୍ରଣମାମି ମଣିଗଣାକୀର୍ଣମ୍ ॥ 148 ॥
ପରିତୋ ମଣିମଞ୍ଚସ୍ଯ
ପ୍ରଲମ୍ବମାନା ନିଯନ୍ତ୍ରିତା ପାଶୈଃ ।
ମାଯାମଯୀ ଜଵନିକା
ମମ ଦୁରିତଂ ହରତୁ ମେଚକଚ୍ଛାଯା ॥ 149 ॥
ମଞ୍ଚସ୍ଯୋପରି ଲମ୍ବ-
-ନ୍ମଦନୀପୁନ୍ନାଗମାଲିକାଭରିତମ୍ ।
ହରିଗୋପମଯଵିତାନଂ
ହରତାଦାଲସ୍ଯମନିଶମସ୍ମାକମ୍ ॥ 150 ॥
ପର୍ଯଙ୍କସ୍ଯ ଭଜାମଃ
ପାଦାନ୍ବିମ୍ବାମ୍ବୁଦେନ୍ଦୁହେମରୁଚଃ ।
ଅଜହରିରୁଦ୍ରେଶମଯା-
-ନନଲାସୁରମାରୁତେଶକୋଣସ୍ଥାନ୍ ॥ 151 ॥
ଫଲକଂ ସଦାଶିଵମଯଂ
ପ୍ରଣୌମି ସିନ୍ଦୂରରେଣୁକିରଣାଭମ୍ ।
ଆରଭ୍ଯାଙ୍ଗେଶୀନାଂ
ସଦନାତ୍କଲିତଂ ଚ ରତ୍ନସୋପାନମ୍ ॥ 152 ॥
ପଟ୍ଟୋପଧାନଗଣ୍ଡକ-
-ଚତୁଷ୍ଟଯସ୍ଫୁରିତପାଟଲାସ୍ତରଣମ୍ ।
ପର୍ଯଙ୍କୋପରି ଘଟିତଂ
ପାତୁ ଚିରଂ ହଂସତୂଲଶଯନଂ ନଃ ॥ 153 ॥
ତସ୍ଯୋପରି ନିଵସନ୍ତଂ
ତାରୁଣ୍ଯଶ୍ରୀନିଷେଵିତଂ ସତତମ୍ ।
ଆଵୃନ୍ତପୁଲ୍ଲହଲ୍ଲକ-
-ମରୀଚିକାପୁଞ୍ଜମଞ୍ଜୁଲଚ୍ଛାଯମ୍ ॥ 154 ॥
ସିନ୍ଦୂରଶୋଣଵସନଂ
ଶୀତାଂଶୁସ୍ତବକଚୁମ୍ବିତକିରୀଟମ୍ ।
କୁଙ୍କୁମତିଲକମନୋହର-
-କୁଟିଲାଲିକହସିତକୁମୁଦବନ୍ଧୁଶିଶୁମ୍ ॥ 155 ॥
ପୂର୍ଣେନ୍ଦୁବିମ୍ବଵଦନଂ
ଫୁଲ୍ଲସରୋଜାତଲୋଚନତ୍ରିତଯମ୍ ।
ତରଲାପାଙ୍ଗତରଙ୍ଗିତ-
-ଶଫରାଙ୍କନଶାସ୍ତ୍ରସମ୍ପ୍ରଦାଯାର୍ଥମ୍ ॥ 156 ॥
ମଣିମଯକୁଣ୍ଡଲପୁଷ୍ଯ-
-ନ୍ମରୀଚିକଲ୍ଲୋଲମାଂସଲକପୋଲମ୍ ।
ଵିଦ୍ରୁମସହୋଦରାଧର-
-ଵିସୃମରସୁସ୍ମିତକିଶୋରସଞ୍ଚାରମ୍ ॥ 157 ॥
ଆମୋଦିକୁସୁମଶେଖର-
-ମାନୀଲଭ୍ରୂଲତାଯୁଗମନୋଜ୍ଞମ୍ ।
ଵୀଟୀସୌରଭଵୀଚୀ-
-ଦ୍ଵିଗୁଣିତଵକ୍ତ୍ରାରଵିନ୍ଦସୌରଭ୍ଯମ୍ ॥ 158 ॥
ପାଶାଙ୍କୁଶେକ୍ଷୁଚାପ-
-ପ୍ରସଵଶରସ୍ଫୁରିତକୋମଲକରାବ୍ଜମ୍ ।
କାଶ୍ମୀରପଙ୍କିଲାଙ୍ଗଂ
କାମେଶଂ ମନସି କୁର୍ମହେ ସତତମ୍ ॥ 159 ॥
ତସ୍ଯାଙ୍କଭୁଵି ନିଷଣ୍ଣାଂ
ତରୁଣକଦମ୍ବପ୍ରସୂନକିରଣାଭାମ୍ ।
ଶୀତାଂଶୁଖଣ୍ଡଚୂଡାଂ
ସୀମନ୍ତନ୍ଯସ୍ତସାନ୍ଦ୍ରସିନ୍ଦୂରାମ୍ ॥ 160 ॥
କୁଙ୍କୁମଲଲାମଭାସ୍ଵ-
-ନ୍ନିଟିଲାଂ କୁଟିଲତରଚିଲ୍ଲିକାଯୁଗଲାମ୍ ।
ନାଲୀକତୁଲ୍ଯନଯନାଂ
ନାସାଞ୍ଚଲନଟିତମୌକ୍ତିକାଭରଣାମ୍ ॥ 161 ॥
ଅଙ୍କୁରିତମନ୍ଦହାସ-
-ମରୁଣାଧରକାନ୍ତିଵିଜିତବିମ୍ବାଭାମ୍ ।
କସ୍ତୂରୀମକରୀଯୁତ-
-କପୋଲସଙ୍କ୍ରାନ୍ତକନକତାଟଙ୍କାମ୍ ॥ 162 ॥
କର୍ପୂରସାନ୍ଦ୍ରଵୀଟୀ-
-କବଲିତଵଦନାରଵିନ୍ଦକମନୀଯାମ୍ ।
କମ୍ବୁସହୋଦରକଣ୍ଠ-
-ପ୍ରଲମ୍ବମାନାଚ୍ଛମୌକ୍ତିକକଲାପାମ୍ ॥ 163 ॥
କହ୍ଲାରଦାମକୋମଲ-
-ଭୁଜଯୁଗଲସ୍ଫୁରିତରତ୍ନକେଯୂରାମ୍ ।
କରପଦ୍ମମୂଲଵିଲସ-
-ତ୍କାଞ୍ଚନମଯକଟକଵଲଯସନ୍ଦୋହାମ୍ ॥ 164 ॥
ପାଣିଚତୁଷ୍ଟଯଵିଲସ-
-ତ୍ପାଶାଙ୍କୁଶପୁଣ୍ଡ୍ରଚାପପୁଷ୍ପାସ୍ତ୍ରାମ୍ ।
କୂଲଙ୍କଷକୁଚଶିଖରାଂ
କୁଙ୍କୁମକର୍ଦମିତରତ୍ନକୂର୍ପାସାମ୍ ॥ 165 ॥
ଅଣୁଦାଯାଦଵଲଗ୍ନା-
-ମମ୍ବୁଦଶୋଭାସନାଭିରୋମଲତାମ୍ ।
ମାଣିକ୍ଯଖଚିତକାଞ୍ଚୀ-
-ମରୀଚିକାକ୍ରାନ୍ତମାଂସଲନିତମ୍ବାମ୍ ॥ 166 ॥
କରଭୋରୁକାଣ୍ଡଯୁଗଲାଂ
ଜଙ୍ଘାଜିତକାମଜୈତ୍ରତୂଣୀରାମ୍ ।
ପ୍ରପଦପରିଭୂତକୂର୍ମାଂ
ପଲ୍ଲଵସଚ୍ଛାଯପଦଯୁଗମନୋଜ୍ଞାମ୍ ॥ 167 ॥
କମଲଭଵକଞ୍ଜଲୋଚନ-
-କିରୀଟରତ୍ନାଂଶୁରଞ୍ଜିତପଦାବ୍ଜାମ୍ ।
ଉନ୍ମସ୍ତକାନୁକମ୍ପା-
-ମୁତ୍ତରଲାପାଙ୍ଗପୋଷିତାନଙ୍ଗାମ୍ ॥ 168 ॥
ଆଦିମରସାଵଲମ୍ବା-
-ମନିଦଂ ପ୍ରଥମୋକ୍ତିଵଲ୍ଲରୀକଲିକାମ୍ ।
ଆବ୍ରହ୍ମକୀଟଜନନୀ-
-ମନ୍ତଃ କଲଯାମି ସୁନ୍ଦରୀମନିଶମ୍ ॥ 169 ॥
କସ୍ତୁ କ୍ଷିତୌ ପଟୀଯା-
-ନ୍ଵସ୍ତୁ ସ୍ତୋତୁଂ ଶିଵାଙ୍କଵାସ୍ତଵ୍ଯମ୍ ।
ଅସ୍ତୁ ଚିରନ୍ତନସୁକୃତୈଃ
ପ୍ରସ୍ତୁତକାମ୍ଯାଯ ତନ୍ମମ ପୁରସ୍ତାତ୍ ॥ 170 ॥
ପ୍ରଭୁସମ୍ମିତୋକ୍ତିଗମ୍ଯଂ
ପରମଶିଵୋତ୍ସଙ୍ଗତୁଙ୍ଗପର୍ଯଙ୍କମ୍ ।
ତେଜଃ କିଞ୍ଚନ ଦିଵ୍ଯଂ
ପୁରତୋ ମେ ଭଵତୁ ପୁଣ୍ଡ୍ରକୋଦଣ୍ଡମ୍ ॥ 171 ॥
ମଧୁରିମଭରିତଶରାସଂ
ମକରନ୍ଦସ୍ଯନ୍ଦିମାର୍ଗଣୋଦାରମ୍ ।
କୈରଵିଣୀଵିଟଚୂଡଂ
କୈଵଲ୍ଯାଯାସ୍ତୁ କିଞ୍ଚନ ମହୋ ନଃ ॥ 172 ॥
ଅକ୍ଷୁଦ୍ରମିକ୍ଷୁଚାପଂ
ପରୋକ୍ଷମଵଲଗ୍ନସୀମ୍ନି ତ୍ର୍ଯକ୍ଷମ୍ ।
କ୍ଷପଯତୁ ମେ କ୍ଷେମେତର-
-ମୁକ୍ଷରଥପ୍ରେମପକ୍ଷ୍ମଲଂ ତେଜଃ ॥ 173 ॥
ଭୃଙ୍ଗରୁଚିସଙ୍ଗରକରାପାଙ୍ଗଂ
ଶୃଙ୍ଗାରତୁଙ୍ଗମରୁଣାଙ୍ଗମ୍ ।
ମଙ୍ଗଲମଭଙ୍ଗୁରଂ ମେ
ଘଟଯତୁ ଗଙ୍ଗାଧରାଙ୍ଗସଙ୍ଗି ମହଃ ॥ 174 ॥
ପ୍ରପଦାଜିତକୂର୍ମମୂର୍ଜିତ-
-କରୁଣଂ ଭର୍ମରୁଚିନିର୍ମଥନଦେହମ୍ ।
ଶ୍ରିତଵର୍ମ ମର୍ମ ଶମ୍ଭୋଃ
କିଞ୍ଚନ ମମ ନର୍ମ ଶର୍ମ ନିର୍ମାତୁ ॥ 175 ॥
କାଲକୁରଲାଲିକାଲିମ-
-କନ୍ଦଲଵିଜିତାଲି ଵିଧୃତମଣିଵାଲି ।
ମିଲତୁ ହୃଦି ପୁଲିନଜଘନଂ
ବହୁଲିତଗଲଗରଲକେଲି କିମପି ମହଃ ॥ 176 ॥
କୁଙ୍କୁମତିଲକିତଫାଲା
କୁରୁଵିନ୍ଦଚ୍ଛାଯପାଟଲଦୁକୂଲା ।
କରୁଣାପଯୋଧିଵେଲା
କାଚନ ଚିତ୍ତେ ଚକାସ୍ତୁ ମେ ଲୀଲା ॥ 177 ॥
ପୁଷ୍ପନ୍ଧଯରୁଚିଵେଣ୍ଯଃ
ପୁଲିନାଭୋଗତ୍ରପାକରଶ୍ରେଣ୍ଯଃ ।
ଜୀଯାସୁରିକ୍ଷୁପାଣ୍ଯଃ
କାଶ୍ଚନ କାମାରିକେଲିସାକ୍ଷିଣ୍ଯଃ ॥ 178 ॥
ତପନୀଯାଂଶୁକଭାଂସି
ଦ୍ରାକ୍ଷାମାଧୁର୍ଯନାସ୍ତିକଵଚାଂସି ।
କତିଚନ ଶୁଚଂ ମହାଂସି
କ୍ଷପଯତୁ କପାଲିତୋଷିତମନାଂସି ॥ 179 ॥
ଅସିତକଚମାଯତାକ୍ଷଂ
କୁସୁମଶରଂ କୂଲମୁଦ୍ଵହକୃପାର୍ଦ୍ରମ୍ ।
ଆଦିମରସାଧିଦୈଵତ-
-ମନ୍ତଃ କଲଯେ ହରାଙ୍କଵାସି ମହଃ ॥ 180 ॥
କର୍ଣୋପାନ୍ତତରଙ୍ଗିତ-
-କଟାକ୍ଷଵିସ୍ପନ୍ଦିକଣ୍ଠଦଘ୍ନକୃପାମ୍ ।
କାମେଶ୍ଵରାଙ୍କନିଲଯାଂ
କାମପି ଵିଦ୍ଯାଂ ପୁରାତନୀଂ କଲଯେ ॥ 181 ॥
ଅରଵିନ୍ଦକାନ୍ତ୍ଯରୁନ୍ତୁଦ-
-ଵିଲୋଚନଦ୍ଵନ୍ଦ୍ଵସୁନ୍ଦରମୁଖେନ୍ଦୁ ।
ଛନ୍ଦଃ କନ୍ଦଲମନ୍ଦିର-
-ମନ୍ତଃପୁରମୈନ୍ଦୁଶେଖରଂ ଵନ୍ଦେ ॥ 182 ॥
ବିମ୍ବିନିକୁରମ୍ବଡମ୍ବର-
-ଵିଡମ୍ବକଚ୍ଛାଯମମ୍ବରଵଲଗ୍ନମ୍ ।
କମ୍ବୁଗଲମମ୍ବୁଦକୁଚଂ
ବିମ୍ବୋକଂ କମପି ଚୁମ୍ବତୁ ମନୋ ମେ ॥ 183 ॥
କମପି କମନୀଯରୂପଂ
କଲଯାମ୍ଯନ୍ତଃ କଦମ୍ବକୁସୁମାଢ୍ଯମ୍ ।
ଚମ୍ପକରୁଚିରସୁଵେଷୈଃ
ସମ୍ପାଦିତକାନ୍ତ୍ଯଲଙ୍କୃତଦିଗନ୍ତମ୍ ॥ 184 ॥
ଶମ୍ପାରୁଚିଭର-
-ଗର୍ହାସମ୍ପାଦକକାନ୍ତିକଵଚିତଦିଗନ୍ତମ୍ ।
ସିଦ୍ଧାନ୍ତଂ ନିଗମାନାଂ
ଶୁଦ୍ଧାନ୍ତଂ କିମପି ଶୂଲିନଃ କଲଯେ ॥ 185 ॥
ଉଦ୍ଯଦ୍ଦିନକରଶୋଣା-
-ନୁତ୍ପଲବନ୍ଧୁସ୍ତନନ୍ଧଯାପୀଡାନ୍ ।
କରକଲିତପୁଣ୍ଡ୍ରଚାପା-
-ନ୍କଲଯେ କାନପି କପର୍ଦିନଃ ପ୍ରାଣାନ୍ ॥ 186 ॥
ରଶନାଲସଜ୍ଜଘନଯା
ରସନାଜୀଵାତୁଚାପଭାସୁରଯା ।
ଘ୍ରାଣାଯୁଷ୍କରଶରଯା
ଘ୍ରାତଂ ଚିତ୍ତଂ କଯାପି ଵାସନଯା ॥ 187 ॥
ସରସିଜସହଯୁଧ୍ଵଦୃଶା
ଶମ୍ପାଲତିକାସନାଭିଵିଗ୍ରହଯା ।
ଭାସା କଯାପି ଚେତୋ
ନାସାମଣିଶୋଭିଵଦନଯା ଭରିତମ୍ ॥ 188 ॥
ନଵଯାଵକାଭସିଚଯାନ୍ଵିତଯା
ଗଜଯାନଯା ଦଯାପରଯା ।
ଧୃତଯାମିନୀଶକଲଯା
ଧିଯା କଯାପି କ୍ଷତାମଯା ହି ଵଯମ୍ ॥ 189 ॥
ଅଲମଲମକୁସୁମବାଣୈ-
-ରବିମ୍ବଶୋଣୈରପୁଣ୍ଡ୍ରକୋଦଣ୍ଡୈଃ ।
ଅକୁମୁଦବାନ୍ଧଵଚୂଡୈ-
-ରନ୍ଯୈରିହ ଜଗତି ଦୈଵତଂ ମନ୍ଯୈଃ ॥ 190 ॥
କୁଵଲଯସଦୃକ୍ଷନଯନୈଃ
କୁଲଗିରିକୂଟସ୍ଥବନ୍ଧୁକୁଚଭାରୈଃ ।
କରୁଣାସ୍ପନ୍ଦିକଟାକ୍ଷୈଃ
କଵଚିତଚିତ୍ତୋଽସ୍ମି କତିପଯୈଃ କୁତୁକୈଃ ॥ 191 ॥
ନତଜନସୁଲଭାଯ ନମୋ
ନାଲୀକସନାଭିଲୋଚନାଯ ନମଃ ।
ନନ୍ଦିତଗିରିଶାଯ ନମୋ
ମହସେ ନଵନୀପପାଟଲାଯ ନମଃ ॥ 192 ॥
କାଦମ୍ବକୁସୁମଦାମ୍ନେ
କାଯଚ୍ଛାଯାକଣାଯିତାର୍ଯମ୍ଣେ ।
ସୀମ୍ନେ ଚିରନ୍ତନଗିରାଂ
ଭୂମ୍ନେ କସ୍ମୈଚିଦାଦଦେ ପ୍ରଣତିମ୍ ॥ 193 ॥
କୁଟିଲକବରୀଭରେଭ୍ଯଃ
କୁଙ୍କୁମସବ୍ରହ୍ମଚାରିକିରଣେଭ୍ଯଃ ।
କୂଲଙ୍କଷସ୍ତନେଭ୍ଯଃ
କୁର୍ମଃ ପ୍ରଣତିଂ କୁଲାଦ୍ରିକୁତୁକେଭ୍ଯଃ ॥ 194 ॥
କୋକନଦଶୋଣଚରଣା-
-ତ୍କୋମଲକୁରଲାଲିଵିଜିତଶୈଵାଲାତ୍ ।
ଉତ୍ପଲସଗନ୍ଧିନଯନା-
-ଦୁରରୀକୁର୍ମୋ ନ ଦେଵତମାନ୍ଯାମ୍ ॥ 195 ॥
ଆପାଟଲାଧରାଣା-
-ମାନୀଲସ୍ନିଗ୍ଧବର୍ବରକଚାନାମ୍ ।
ଆମ୍ନାଯଜୀଵନାନା-
-ମାକୂତାନାଂ ହରସ୍ଯ ଦାସୋଽହମ୍ ॥ 196 ॥
ପୁଙ୍ଖିତଵିଲାସହାସ-
-ସ୍ଫୁରିତାସୁ ପୁରାହିତାଙ୍କନିଲଯାସୁ ।
ମଗ୍ନଂ ମନୋ ମଦୀଯଂ
କାସ୍ଵପି କାମାରିଜୀଵନାଡୀଷୁ ॥ 197 ॥
ଲଲିତା ପାତୁ ଶିରୋ ମେ
ଲଲାଟମମ୍ବା ଚ ମଧୁମତୀରୂପା ।
ଭ୍ରୂଯୁଗ୍ମଂ ଚ ଭଵାନୀ
ପୁଷ୍ପଶରା ପାତୁ ଲୋଚନଦ୍ଵନ୍ଦ୍ଵମ୍ ॥ 198 ॥
ପାଯାନ୍ନାସାଂ ବାଲା
ସୁଭଗା ଦନ୍ତାଂଶ୍ଚ ସୁନ୍ଦରୀ ଜିହ୍ଵାମ୍ ।
ଅଧରୋଷ୍ଠମାଦିଶକ୍ତି-
-ଶ୍ଚକ୍ରେଶୀ ପାତୁ ମେ ଚିରଂ ଚିବୁକମ୍ ॥ 199 ॥
କାମେଶ୍ଵରୀ ଚ କର୍ଣୌ
କାମାକ୍ଷୀ ପାତୁ ଗଣ୍ଡଯୋର୍ଯୁଗଲମ୍ ।
ଶୃଙ୍ଗାରନାଯିକାଵ୍ଯା-
-ଦ୍ଵଦନଂ ସିଂହାସନେଶ୍ଵରୀ ଚ ଗଲମ୍ ॥ 200 ॥
ସ୍କନ୍ଦପ୍ରସୂଶ୍ଚ ପାତୁ
ସ୍କନ୍ଧୌ ବାହୂ ଚ ପାଟଲାଙ୍ଗୀ ମେ ।
ପାଣୀ ଚ ପଦ୍ମନିଲଯା
ପାଯାଦନିଶଂ ନଖାଵଲୀର୍ଵିଜଯା ॥ 201 ॥
କୋଦଣ୍ଡିନୀ ଚ ଵକ୍ଷଃ
କୁକ୍ଷିଂ ଚାଵ୍ଯାତ୍ କୁଲାଚଲତନୂଜା ।
କଲ୍ଯାଣୀ ଚ ଵଲଗ୍ନଂ
କଟିଂ ଚ ପାଯାତ୍କଲାଧରଶିଖଣ୍ଡା ॥ 202 ॥
ଊରୁଦ୍ଵଯଂ ଚ ପାଯା-
-ଦୁମା ମୃଡାନୀ ଚ ଜାନୁନୀ ରକ୍ଷେତ୍ ।
ଜଙ୍ଘେ ଚ ଷୋଡଶୀ ମେ
ପାଯାତ୍ ପାଦୌ ଚ ପାଶସୃଣିହସ୍ତା ॥ 203 ॥
ପ୍ରାତଃ ପାତୁ ପରା ମାଂ
ମଧ୍ଯାହ୍ନେ ପାତୁ ମଣିଗୃହାଧୀଶା ।
ଶର୍ଵାଣ୍ଯଵତୁ ଚ ସାଯଂ
ପାଯାଦ୍ରାତ୍ରୌ ଚ ଭୈରଵୀ ସାକ୍ଷାତ୍ ॥ 204 ॥
ଭାର୍ଯାଂ ରକ୍ଷତୁ ଗୌରୀଂ
ପାଯାତ୍ ପୁତ୍ରାଂଶ୍ଚ ବିନ୍ଦୁଗୃହପୀଠା ।
ଶ୍ରୀଵିଦ୍ଯା ଚ ଯଶୋ ମେ
ଶୀଲଂ ଚାଵ୍ଯାଚ୍ଚିରଂ ମହାରାଜ୍ଞୀ ॥ 205 ॥
ପଵନମଯି ପାଵକମଯି
କ୍ଷୋଣୀମଯି ଗଗନମଯି କୃପୀଟମଯି ।
ରଵିମଯି ଶଶିମଯି ଦିଙ୍ମଯି
ସମଯମଯି ପ୍ରାଣମଯି ଶିଵେ ପାହି ॥ 206 ॥
କାଲି କପାଲିନି ଶୂଲିନି
ଭୈରଵି ମାତଙ୍ଗି ପଞ୍ଚମି ତ୍ରିପୁରେ ।
ଵାଗ୍ଦେଵି ଵିନ୍ଧ୍ଯଵାସିନି
ବାଲେ ଭୁଵନେଶି ପାଲଯ ଚିରଂ ମାମ୍ ॥ 207 ॥
ଅଭିନଵସିନ୍ଦୂରାଭା-
-ମମ୍ବ ତ୍ଵାଂ ଚିନ୍ତଯନ୍ତି ଯେ ହୃଦଯେ ।
ଉପରି ନିପତନ୍ତି ତେଷା-
-ମୁତ୍ପଲନଯନାକଟାକ୍ଷକଲ୍ଲୋଲାଃ ॥ 208 ॥
ଵର୍ଗାଷ୍ଟକମିଲିତାଭି-
-ର୍ଵଶିନୀମୁଖ୍ଯାଭିରାଵୃତାଂ ଭଵତୀମ୍ ।
ଚିନ୍ତଯତାଂ ସିତଵର୍ଣାଂ
ଵାଚୋ ନିର୍ଯାନ୍ତ୍ଯଯତ୍ନତୋ ଵଦନାତ୍ ॥ 209 ॥
କନକଶଲାକାଗୌରୀଂ
କର୍ଣଵ୍ଯାଲୋଲକୁଣ୍ଡଲଦ୍ଵିତଯାମ୍ ।
ପ୍ରହସିତମୁଖୀଂ ଚ ଭଵତୀଂ
ଧ୍ଯାଯନ୍ତୋ ଯେ ତ ଏଵ ଭୂଧନଦାଃ ॥ 210 ॥
ଶୀର୍ଷାମ୍ଭୋରୁହମଧ୍ଯେ
ଶୀତଲପୀଯୂଷଵର୍ଷିଣୀଂ ଭଵତୀମ୍ ।
ଅନୁଦିନମନୁଚିନ୍ତଯତା-
-ମାଯୁଷ୍ଯଂ ଭଵତି ପୁଷ୍କଲମଵନ୍ଯାମ୍ ॥ 211 ॥
ମଧୁରସ୍ମିତାଂ ମଦାରୁଣନଯନାଂ
ମାତଙ୍ଗକୁମ୍ଭଵକ୍ଷୋଜାମ୍ ।
ଚନ୍ଦ୍ରଵତଂସିନୀଂ ତ୍ଵାଂ
ସଵିଧେ ପଶ୍ଯନ୍ତି ସୁକୃତିନଃ କେଚିତ୍ ॥ 212 ॥
ଲଲିତାଯାଃ ସ୍ତଵରତ୍ନଂ
ଲଲିତପଦାଭିଃ ପ୍ରଣୀତମାର୍ଯାଭିଃ ।
ପ୍ରତିଦିନମଵନୌ ପଠତାଂ
ଫଲାନି ଵକ୍ତୁଂ ପ୍ରଗଲ୍ଭତେ ସୈଵ ॥ 213 ॥
ସଦସଦନୁଗ୍ରହନିଗ୍ରହ-
-ଗୃହୀତମୁନିଵିଗ୍ରହୋ ଭଗଵାନ୍ ।
ସର୍ଵାସାମୁପନିଷଦାଂ
ଦୁର୍ଵାସା ଜଯତି ଦେଶିକଃ ପ୍ରଥମଃ ॥ 214 ॥
ଇତି ମହର୍ଷିଦୁର୍ଵାସଃ ଵିରଚିତଂ ଶ୍ରୀଲଲିତାସ୍ତଵରତ୍ନମ୍ ।
Roman (IAST) Transliteration
vande gajendravadanaṃ
vāmāṅkārūḍhavallabhāśliṣṭam |
kuṅkumaparāgaśoṇaṃ
kuvalayinījārakorakāpīḍam || 1 ||
sa jayati suvarṇaśailaḥ
sakalajagaccakrasaṅghaṭitamūrtiḥ |
kāñcananikuñjavāṭī-
-kandaladamarīprapañcasaṅgītaḥ || 2 ||
harihayanairṛtamāruta-
-haritāmanteṣvavasthitaṃ tasya |
vinumaḥ sānutritayaṃ
vidhiharigaurīśaviṣṭapādhāram || 3 ||
madhye punarmanohara-
-ratnarucistabakarañjitadigantam |
upari catuḥśatayojana-
-muttuṅgaṃ śṛṅgapuṅgavamupāse || 4 ||
tatra catuḥśatayojana-
-pariṇāhaṃ devaśilpinā racitam |
nānāsālamanojñaṃ
namāmyahaṃ nagaramādividyāyāḥ || 5 ||
prathamaṃ sahasrapūrvaka-
-ṣaṭśatasaṅkhyākayojanaṃ paritaḥ |
valayīkṛtasvagātraṃ
varaṇaṃ śaraṇaṃ vrajāmyayorūpam || 6 ||
tasyottare samīraṇa-
-yojanadūre taraṅgitacchāyaḥ |
ghaṭayatu mudaṃ dvitīyo
ghaṇṭāstanasāranirmitaḥ sālaḥ || 7 ||
ubhayorantarasīma-
-nyuddāmabhramararañjitodāram |
upavanamupāsmahe vaya-
-mūrīkṛtamandamārutasyandam || 8 ||
āliṅgya bhadrakālī-
-māsīnastatra hariśilāśyāmām |
manasi mahākālo me
viharatu madhupānavibhramannetraḥ || 9 ||
tārtīyīko varaṇa-
-stasyottarasīmni vātayojanataḥ |
tāmreṇa racitamūrti-
-stanutāmācandratārakaṃ bhadram || 10 ||
madhye tayośca maṇimaya-
-pallavaśākhāprasūnapakṣmalitām |
kalpānokahavāṭīṃ
kalaye makarandapaṅkilāvālām || 11 ||
tatra madhumādhavaśrī-
-taruṇībhyāṃ taraladṛkcakorābhyām |
āliṅgito'vatānmā-
-maniśaṃ prathamarturāttapuṣpāstraḥ || 12 ||
namata taduttarabhāge
nākipathollaṅghiśṛṅgasaṅghātam |
sīsākṛtiṃ turīyaṃ
sitakiraṇālokanirmalaṃ sālam || 13 ||
sāladvayāntarāle
saralālikapotacāṭusubhagāyām |
santānavāṭikāyāṃ
saktaṃ ceto'stu satatamasmākam || 14 ||
tatra tapanātirūkṣaḥ
sāmrājñīcaraṇasāndritasvāntaḥ |
śukraśuciśrīsahito
grīṣmarturdiśatu kīrtimākalpam || 15 ||
uttarasīmani tasyo-
-nnataśikharotkampihāṭakapatākaḥ |
prakaṭayatu pañcamo naḥ
prākāraḥ kuśalamārakūṭamayaḥ || 16 ||
prākārayośca madhye
pallavitānyabhṛtapañcamonmeṣā |
haricandanadruvāṭī-
-haratādāmūlamasmadanutāpam || 17 ||
tatra nabhaḥ śrīmukhyai-
-staruṇīvargaiḥ samanvitaḥ paritaḥ |
vajrāṭṭahāsamukharo
vāñchāpūrtiṃ tanotu varṣartuḥ || 18 ||
mārutayojanadūre
mahanīyastasya cottare bhāge |
bhadraṃ kṛṣīṣṭa ṣaṣṭhaḥ
prākāraḥ pañcalohadhātumayaḥ || 19 ||
anayormadhye santata-
-maṅkūraddivyakusumagandhāyām |
mandāravāṭikāyāṃ
mānasamaṅgīkarotu me vihṛtim || 20 ||
tasyāmiṣorjalakṣmī-
-taruṇībhyāṃ śaradṛtuḥ sadā sahitaḥ |
abhyarcayan sa jīyā-
-dambāmāmodameduraiḥ kusumaiḥ || 21 ||
tasyarṣisaṅkhyayojana-
-dūre dedīpyamānaśṛṅgaughaḥ |
kaladhautakalitamūrtiḥ
kalyāṇaṃ diśatu saptamaḥ sālaḥ || 22 ||
madhye tayormarutpatha
laṅghitaviṭapāgravirutakalakaṇṭhā |
śrīpārijātavāṭī
śriyamaniśaṃ diśatu śītaloddeśā || 23 ||
tasyāmatipriyābhyāṃ
saha khelan sahasahasyalakṣmībhyām |
sāmanto jhaṣaketo-
-rhemanto bhavatu hemavṛddhyai naḥ || 24 ||
uttaratastasya mahā-
-nudbhaṭahutabhukśikhāruṇamayūkhaḥ |
tapanīyakhaṇḍaracita-
-stanutādāyuṣyamaṣṭamo varaṇaḥ || 25 ||
kādambavipinavāṭī-
-manayormadhyabhuvi kalpitāvāsām |
kalayāmi sūnakoraka-
-kandalitāmodatundilasamīrām || 26 ||
tasyāmatiśiśirākṛti-
-rāsīnastapatapasyalakṣmībhyām |
śivamaniśaṃ kurutānme
śiśirartuḥ satataśītaladigantaḥ || 27 ||
tasyāṃ kadambavāṭyāṃ
tatprasavāmodamilitamadhugandham |
saptāvaraṇamanojñaṃ
śaraṇaṃ samupaimi mantriṇīśaraṇam || 28 ||
tatrālaye viśāle
tapanīyāracitataralasopāne |
māṇikyamaṇḍapānta-
-rmahite siṃhāsane sumaṇikhacite || 29 ||
bindutripañcakoṇa-
-dvipanṛpavasuvedadalakurekhāḍhye |
cakre sadā niviṣṭāṃ
ṣaṣṭhyaṣṭatriṃśadakṣareśānīm || 30 ||
tāpiñchamecakābhāṃ
tālīdalaghaṭitakarṇatāṭaṅkām |
tāmbūlapūritamukhīṃ
tāmrādharabimbadṛṣṭadarahāsām || 31 ||
kuṅkumapaṅkiladehāṃ
kuvalayajīvātuśāvakavataṃsām |
kokanadaśoṇacaraṇāṃ
kokilanikvāṇakomalālāpām || 32 ||
vāmāṅgagalitacūlīṃ
vanamālyakadambamālikābharaṇām |
muktālalantikāñcita
mugdhālikamilitacitrakodārām || 33 ||
karavidhṛtakīraśāvaka-
-kalaninadavyaktanikhilanigamārthām |
vāmakucasaṅgivīṇāvādana-
-saukhyārdhamīlitākṣiyugām || 34 ||
āpāṭalāṃśukadharā-
-mādirasonmeṣavāsitakaṭākṣām |
āmnāyasāragulikā-
-mādyāṃ saṅgītamātṛkāṃ vande || 35 ||
tasya ca suvarṇasāla-
-syottaratastaruṇakuṅkumacchāyaḥ |
śamayatu mama santāpaṃ
sālo navamaḥ sa puṣparāgamayaḥ || 36 ||
anayorantaravasudhāḥ
praṇumaḥ pratyagrapuṣparāgamayīḥ |
siṃhāsaneśvarīmanu-
-cintananistandrasiddhanīrandhrāḥ || 37 ||
tatsālottaradeśe
taruṇajapākiraṇadhoraṇīśoṇaḥ |
praśamayatu padmarāga-
-prākāro mama parābhavaṃ daśamaḥ || 38 ||
antarabhūkṛtavāsā-
-nanayorapanītacittavaimatyān |
cakreśīpadabhaktāṃ-
-ścāraṇavargānaharniśaṃ kalaye || 39 ||
sāraṅgavāhayojanadūre-
-'saṅghaṭitaketanastasya |
gomedakena racito
gopāyatu māṃ samunnataḥ sālaḥ || 40 ||
vapradvayāntarorvyāṃ
vaṭukairvividhaiśca yoginībṛndaiḥ |
satataṃ samarcitāyāḥ
saṅkarṣaṇyāḥ praṇaumi caraṇābjam || 41 ||
tāpasayojanadūre
tasya samuttuṅga gopuropetaḥ |
vāñchāpūrtyai bhavatā-
-dvajramaṇīnikaranirmito vapraḥ || 42 ||
varaṇadvitayāntarato
vāsajuṣo vihitamadhurasāsvādāḥ |
rambhādivibudhaveśyā
racayantu mahāntamasmadānandam || 43 ||
tatra sadā pravahantī
taṭinī vajrābhidhā ciraṃ jīyāt |
caṭulormijālanṛtya-
-tkalahaṃsīkulakalakvaṇitapuṣṭā || 44 ||
rodhasi tasyā rucire
vajreśī jayati vajrabhūṣāḍhyā |
vajrapradānatoṣita-
-vajrimukhatridaśavinutacāritrā || 45 ||
tasyodīcyāṃ hariti
stavakitasuṣamāvalīḍhaviyadantaḥ |
vaiḍūryaratnaracito
vaimalyaṃ diśatu cetaso varaṇaḥ || 46 ||
adhimadhyametayoḥ puna-
-rambācaraṇāvalambitasvāntān |
kārkoṭakādināgān
kalayāmaḥ kiṃ ca balimukhān danujān || 47 ||
gandhavahasaṅkhyayojana-
-dūre gaganordhvajāṅghikastasya |
vāsavamaṇipraṇīto
varaṇo bahalayatu vaiduṣīṃ viśadām || 48 ||
madhyakṣoṇyāmanayo-
-rmahendranīlātmakāni ca sarāṃsi |
śātodarīsahāyā-
-nbhūpālānapi punaḥ punaḥ praṇumaḥ || 49 ||
āśugayojanadūre
tasyordhvaṃ kāntidhavalitadigantaḥ |
muktāviracitagātro
muhurasmākaṃ mude bhavatu sālaḥ || 50 ||
āvṛttyoradhimadhyaṃ
pūrvasyāṃ diśi purandaraḥ śrīmān |
abhramuviṭādhirūḍho
vibhramamasmākamaniśamātanutāt || 51 ||
tatkoṇe vyajanasru-
-ktomarapātrasruvānnaśaktidharaḥ |
svāhāsvadhāsametaḥ
sukhayatu māṃ havyavāhanaḥ suciram || 52 ||
dakṣiṇadigantarāle
daṇḍadharo nīlanīradacchāyaḥ |
tripurāpadābjabhaktastirayatu
mama nikhilamaṃhasāṃ nikaram || 53 ||
tasyaiva paścimāyāṃ
diśi dalitendīvaraprabhāśyāmaḥ |
kheṭāsiyaṣṭidhārī
khedānapanayatu yātudhāno me || 54 ||
tasyā uttaradeśe
dhavalāṅgo vipulajhaṣavarārūḍhaḥ |
pāśāyudhāttapāṇiḥ
pāśī vidalayatu pāśajālāni || 55 ||
vande taduttarahari-
-tkoṇe vāyuṃ camūruvaravāham |
korakitatattvabodhā-
-ngorakṣapramukhayogino'pi muhuḥ || 56 ||
taruṇīriḍāpradhānā-
-stisro vātasya tasya kṛtavāsāḥ |
pratyagrakāpiśāyana-
-pānaparibhrāntalocanāḥ kalaye || 57 ||
tallokapūrvabhāge
dhanadaṃ dhyāyāmi śevadhikuleśam |
api māṇibhadramukhyā-
-nambācaraṇāvalambino yakṣān || 58 ||
tasyaiva pūrvasīmani
tapanīyāracitagopure nagare |
kātyāyanīsahāyaṃ
kalaye śītāṃśukhaṇḍacūḍālam || 59 ||
tatpuraṣoḍaśavaraṇa-
-sthalabhājastaruṇacandracūḍālān |
rudrādhyāye paṭhitā-
-nrudrāṇīsahacarānbhaje rudrān || 60 ||
pavamānasaṅkhyayojana-
-dūre bālatṛṇmecakastasya |
sālo marakataracitaḥ
sampadamacalāṃ śriyaṃ ca puṣṇātu || 61 ||
āvṛtiyugmāntarato
haritamaṇīnivahamecake deśe |
hāṭakatālīvipinaṃ
hālāghaṭaghaṭitaviṭapamākalaye || 62 ||
tatraiva mantriṇīgṛha-
-pariṇāhaṃ taralaketanaṃ sadanam |
marakatasaudhamanojñaṃ
dadyādāyūṃṣi daṇḍanāthāyāḥ || 63 ||
sadane tatra harinmaṇi-
-saṅghaṭite maṇḍape śatastambhe |
kārtasvaramayapīṭhe
kanakamayāmburuhakarṇikāmadhye || 64 ||
bindutrikoṇavartula-
-ṣaḍasravṛttadvayānvite cakre |
sañcāriṇī daśottara-
śatārṇamanurājakamalakalahaṃsī || 65 ||
kolavadanā kuśeśaya-
-nayanā kokārimaṇḍitaśikhaṇḍā |
santaptakāñcanābhā
sandhyāruṇacelasaṃvṛtanitambā || 66 ||
halamusalaśaṅkhacakrā-
-'ṅkuśapāśābhayavarasphuritahastā |
kūlaṅkaṣānukampā
kuṅkumajambālitastanābhogā || 67 ||
dhūrtānāmatidūrā-
-vārtāśeṣāvalagnakamanīyā |
ārtālīśubhadātrī
vārtālī bhavatu vāñchitārthāya || 68 ||
tasyāḥ parito devīḥ
svapneśyunmattabhairavīmukhyāḥ |
praṇamata jambhinyādyāḥ
bhairavavargāṃśca hetukapramukhān || 69 ||
pūrvoktasaṅkhyayojana-
-dūre pūyāṃśupāṭalastasya |
vidrāvayatu madārtiṃ
vidrumasālo viśaṅkaṭadvāraḥ || 70 ||
āvaraṇayoraharniśa-
-mantarabhūmauprakāśaśālinyām |
āsīnamambujāsana-
-mabhinavasindūragauramahamīḍe || 71 ||
varaṇasya tasya māruta-
-yojanato vipulagopuradvāraḥ |
sālo nānāratnaiḥ
saṅghaṭitāṅgaḥ kṛṣīṣṭa madabhīṣṭam || 72 ||
antarakakṣyāmanayo-
-raviralaśobhāpicaṇḍiloddeśām |
māṇikyamaṇḍapākhyāṃ
mahatīmadhihṛdayamaniśamākalaye || 73 ||
tatra sthitaṃ prasannaṃ
taruṇatamālapravālakiraṇābham |
karṇāvalambikuṇḍala-
-kandalitābhīśukavacitakapolam || 74 ||
śoṇādharaṃ śucismita-
-meṇāṅkavadanamedhamānakṛpam |
mugdhaiṇamadaviśeṣaka-
-mudritaniṭilendurekhikāruciram || 75 ||
nālīkadalasahodara-
-nayanāñcalaghaṭitamanasijākūtam |
kamalākaṭhinapayodhara-
-kastūrīghusṛṇapaṅkiloraskam || 76 ||
cāmpeyagandhikaiśyaṃ
śampāsabrahmacārikauśeyam |
śrīvatsakaustubhadharaṃ
śritajanarakṣādhurīṇacaraṇābjam || 77 ||
kambusudarśanavilasa-
-tkarapadmaṃ kaṇṭhalolavanamālam |
mucukundamokṣaphaladaṃ
mukundamānandakandamavalambe || 78 ||
tadvaraṇottarabhāge
tārāpatibimbacumbinijaśṛṅgaḥ |
vividhamaṇīgaṇaghaṭito
vitaratu sālo vinirmalāṃ dhiṣaṇām || 79 ||
prākāradvitayāntara-
-kakṣyāṃ pṛthuratnanikarasaṅkīrṇām |
namata sahasrastambhaka-
-maṇḍapanāmnātiviśrutāṃ bhuvane || 80 ||
praṇumastatra bhavānī-
-sahacaramīśānamindukhaṇḍadharam |
śṛṅgāranāyikāmanu-
-śīlanabhājo'pi bhṛṅginandimukhān || 81 ||
tasyaiṇavāhayojana-
-dūre vande manomayaṃ vapram |
aṅkūranmaṇikiraṇā-
-mantarakakṣyāṃ ca nirmalāmanayoḥ || 82 ||
tatraivāmṛtavāpīṃ
taralataraṅgāvalīḍhataṭayugmām |
muktāmayakalahaṃsī-
-mudritakanakāravindasandohām || 83 ||
śakropalamayabhṛṅgī-
-saṅgītonmeṣaghoṣitadigantām |
kāñcanamayāṅgavilasa-
-tkāraṇḍavaṣaṇḍatāṇḍavamanojñām || 84 ||
kuruvindātmakahallaka-
-korakasuṣamāsamūhapāṭalitām |
kalaye sudhāsvarūpāṃ
kandalitāmandakairavāmodām || 85 ||
tadvāpikāntarāle tarale
maṇipotasīmni viharantīm |
sindūrapāṭalāṅgīṃ
sitakiraṇāṅkūrakalpitavataṃsām || 86 ||
parvendubimbavadanāṃ
pallavaśoṇādharasphuritahāsām |
kuṭilakabarīṃ kuraṅgī-
-śiśunayanāṃ kuṇḍalasphuritagaṇḍām || 87 ||
nikaṭasthapotanilayāḥ
śaktīḥ śayavidhṛtahemaśṛṅgajalaiḥ |
pariṣiñcantīṃ parita-
-stārāṃ tāruṇyagarvitāṃ vande || 88 ||
prāguktasaṅkhyayojanadūre
praṇamāmi buddhimayasālam |
anayorantarakakṣyā-
-maṣṭāpadapuṣṭamedinīṃ rucirām || 89 ||
kādambarīnidhānāṃ
kalayāmyānandavāpikāṃ tasyām |
śoṇāśmanivahanirmita-
-sopānaśreṇiśobhamānataṭīm || 90 ||
māṇikyataraṇinilayāṃ
madhye tasyā madāruṇakapolām |
amṛteśītyabhidhānā-
-mantaḥ kalayāmi vāruṇīṃ devīm || 91 ||
sauvarṇakenipātana-
-hastāḥ saundaryagarvitā devyaḥ |
tatpurataḥ sthitibhājo
vitarantvasmākamāyuṣo vṛddhim || 92 ||
tasya pṛṣadaśvayojana-
-dūre'haṅkārasālamatituṅgam |
vande tayośca madhye
kakṣyāṃ valamānamalayapavamānām || 93 ||
vinumo vimarśavāpīṃ
sauṣumnasudhāsvarūpiṇīṃ tatra |
velātilaṅghyavīcī-
-kolāhalabharitakūlavanavāṭīm || 94 ||
tatraiva salilamadhye
tāpiñchadalaprapañcasuṣamābhām |
śyāmalakañcukalasitāṃ
śyāmāviṭabimbaḍambaraharāsyām || 95 ||
ābhugnamasṛṇacillī-
-hasitāyugmaśarakārmukavilāsām |
mandasmitāñcitamukhīṃ
maṇimayatāṭaṅkamaṇḍitakapolām || 96 ||
kuruvindataraṇinilayāṃ
kulācalaspardhikucanamanmadhyām |
kuṅkumaviliptagātrīṃ
kurukullāṃ manasi kurmahe satatam || 97 ||
tatsālottarabhāge
bhānumayaṃ vapramāśraye dīptam |
madhyaṃ ca vipulamanayo-
-rmanye viśrāntamātapodgāram || 98 ||
tatra kuruvindapīṭhe
tāmarase kanakakarṇikāghaṭite |
āsīnamaruṇavāsasa-
-mamlānaprasavamālikābharaṇam || 99 ||
cakṣuṣmatīprakāśana-
-śakticchāyāsamāracitakelim |
māṇikyamukuṭaramyaṃ
manye mārtāṇḍabhairavaṃ hṛdaye || 100 ||
indumayasālamīḍe
tasyottaratastuṣāragirigauram |
atyantaśiśiramāruta-
-manayormadhyaṃ ca candrikodgāram || 101 ||
tatra prakāśamānaṃ
tārānikaraiḥ pariṣkṛtoddeśam |
amṛtamayakāntikandala-
-mantaḥ kalayāmi kundasitamindum || 102 ||
śṛṅgārasālamīḍe
śṛṅgollasitaṃ taduttare bhāge |
madhyasthale tayorapi
mahitāṃ śṛṅgārapūrvikāṃ parikhām || 103 ||
tatra maṇinausthitābhi-
-stapanīyāviracitāgrahastābhiḥ |
śṛṅgāradevatābhiḥ
sahitaṃ parikhādhipaṃ bhaje madanam || 104 ||
śṛṅgāravaraṇavaryasyottarataḥ
sakalavibudhasaṃsevyam |
cintāmaṇigaṇaracitaṃ
cintāṃ dūrīkarotu me sadanam || 105 ||
maṇisadanasālayoradhi-
-madhyaṃ daśatālabhūmiruhadīrghaiḥ |
parṇaiḥ suvarṇavarṇai-
-ryuktāṃ kāṇḍaiśca yojanottuṅgaiḥ || 106 ||
mṛdulaistālīpañcaka-
-mānairmilitāṃ ca kesarakadambaiḥ |
santatagalitamaranda-
-srotoniryanmilindasandohām || 107 ||
pāṭīrapavanabālaka-
-dhāṭīniryatparāgapiñjaritām |
kalahaṃsīkulakalakala-
-kūlaṅkaṣaninadanicayakamanīyām || 108 ||
padmāṭavīṃ bhajāmaḥ
parimalakallolapakṣmalopāntām |
[ devyarghyapātradhārī
tasyāḥ pūrvadiśi daśakalāyuktaḥ | ]
valayitamūrtirbhagavā-
-nvahniḥ krośonnataściraṃ pāyāt || 109 ||
tatrādhāre devyāḥ
pātrīrūpaḥ prabhākaraḥ śrīmān |
dvādaśakalāsameto
dhvāntaṃ mama bahulamāntaraṃ bhindyāt || 110 ||
tasmin dineśapātre
taraṅgitāmodamamṛtamayamarghyam |
candrakalātmakamamṛtaṃ
sāndrīkuryādamandamānandam || 111 ||
amṛte tasminnabhito
viharantyo vividhamaṇitaraṇibhājaḥ |
ṣoḍaśa kalāḥ sudhāṃśoḥ
śokāduttārayantu māmaniśam || 112 ||
tatraiva vihṛtibhājo
dhātṛmukhānāṃ ca kāraṇeśānām |
sṛṣṭyādirūpikāstāḥ
śamayantvakhilāḥ kalāśca santāpam || 113 ||
kīnāśavaruṇakinnara-
-rājadiganteṣu ratnagehasya |
kalayāmi tānyajasraṃ
kalayantvāyuṣyamarghyapātrāṇi || 114 ||
pātrasthalasya purataḥ
padmāramaṇavidhipārvatīśānām |
bhavanāni śarmaṇe no
bhavantu bhāsā pradīpitajaganti || 115 ||
sadanasyānalakoṇe
satataṃ praṇamāmi kuṇḍamāgneyam |
tatra sthitaṃ ca vahniṃ
taralaśikhājaṭilamambikājanakam || 116 ||
tasyāsuradiśi tādṛśa-
-ratnaparisphuritaparvanavakāḍhyam |
cakrātmakaṃ śatāṅgaṃ
śatayojanamunnataṃ bhaje divyam || 117 ||
tatraiva diśi niṣaṇṇaṃ
tapanīyadhvajaparamparāśliṣṭam |
rathamaparaṃ ca bhavānyā
racayāmo manasi ratnamayacūḍam || 118 ||
bhavanasya vāyubhāge
pariṣkṛto vividhavaijayantībhiḥ |
racayatu mudaṃ rathendraḥ
saciveśānyāḥ samastavandyāyāḥ || 119 ||
kurmo'dhihṛdayamaniśaṃ
kroḍāsyāyāḥ śatāṅgamūrdhanyam |
rudradiśi ratnadhāmno
ruciraśalākāprapañcakañcukitam || 120 ||
parito devīdhāmnaḥ
praṇītavāsā manusvarūpiṇyaḥ |
kurvantu raśmimālā-
-kṛtayaḥ kuśalāni devatā nikhilāḥ || 121 ||
prāgdvārasya bhavānī-
-dhāmnaḥ pārśvadvayāracitavāse |
mātaṅgīkiṭimukhyau
maṇisadane manasi bhāvayāmi ciram || 122 ||
yojanayugalābhogā
tatkrośapariṇāhayaiva bhittyā ca |
cintāmaṇigṛhabhūmi-
-rjīyādāmnāyamayacaturdvārā || 123 ||
dvāre dvāre dhāmnaḥ
piṇḍībhūtā navīnabimbābhāḥ |
vidadhatu vipulāṃ kīrtiṃ
divyā lauhityasiddhyo devyaḥ || 124 ||
maṇisadanasyāntarato
mahanīye ratnavedikāmadhye |
bindumayacakramīḍe
pīṭhānāmupari viracitāvāsam || 125 ||
cakrāṇāṃ sakalānāṃ
prathamamadhaḥ sīmaphalakavāstavyāḥ |
aṇimādisiddhayo mā-
-mavantu devī prabhāsvarūpiṇyaḥ || 126 ||
aṇimādisiddhiphalaka-
-syoparihariṇāṅkakhaṇḍakṛtacūḍāḥ |
bhadraṃ pakṣmalayantu
brāhmīpramukhāśca mātaro'smākam || 127 ||
tasyopari maṇiphalake
tāruṇyottuṅgapīnakucabhārāḥ |
saṅkṣobhiṇīpradhānāḥ
bhrānti vidrāvayantu daśa mudrāḥ || 128 ||
phalakatrayasvarūpe
pṛthule trailokyamohane cakre |
dīvyantu prakaṭākhyā-
-stāsāṃ kartrīṃ ca bhagavatī tripurā || 129 ||
tadupari vipule dhiṣṇye
taraladṛśastaruṇakokanadabhāsaḥ |
kāmākarṣiṇyādyāḥ
kalaye devīḥ kalādharaśikhaṇḍāḥ || 130 ||
sarvāśāparipūrakacakre-
-'smin guptayoginīsevyāḥ |
tripureśī mama duritaṃ
tudyāt kaṇṭhāvalambimaṇihārā || 131 ||
tasyopari maṇipīṭhe
tāmrāmbhoruhadalaprabhāśoṇāḥ |
dhyāyāmyanaṅgakusumā-
-pramukhā devīśca vidhṛtakūrpāsāḥ || 132 ||
saṅkṣobhakārake'smiṃ-
-ścakre śrītripurasundarī sākṣāt |
goptrī guptatarākhyāḥ
gopāyatu māṃ kṛpārdrayā dṛṣṭyā || 133 ||
saṅkṣobhiṇīpradhānāḥ
śaktīstasyordhvavalayakṛtavāsāḥ |
ālolanīlaveṇī-
-rantaḥ kalayāmi yauvanonmattāḥ || 134 ||
saubhāgyadāyake'smiṃ-
-ścakreśī tripuravāsinī jīyāt |
śaktīśca sampradāyābhidhāḥ
samastāḥ pramodayantvaniśam || 135 ||
maṇipīṭhopari tāsāṃ
mahati caturhastavistṛte valaye |
santataviracitavāsāḥ
śaktīḥ kalayāmi sarvasiddhimukhāḥ || 136 ||
sarvārthasādhakākhye
cakre'muṣmin samastaphaladātrī |
tripurā śrīrmama kuśalaṃ
diśatāduttīrṇayoginīsevyā || 137 ||
tāsāṃ nilayasyopari
dhiṣṇye kausumbhakañcukamanojñāḥ |
sarvājñādyāḥ devyaḥ
sakalāḥ sampādayantu mama kīrtim || 138 ||
cakre samastarakṣā-
-karanāmnyasmin samastajanasevyām |
manasi nigarbhāsahitāṃ
manye śrītripuramālinīṃ devīm || 139 ||
sarvajñāsadanasyopari
cakre vipule samākalitagehāḥ |
vande vaśinīmukhyāḥ
śaktīḥ sindūrareṇurucaḥ || 140 ||
śrīsarvarogaharākhya-
-cakre'smiṃstripurapūrvikāṃ siddhām |
vande rahasyanāmnā
vedyābhiḥ śaktibhiḥ sadā sevyām || 141 ||
vaśinīgṛhopariṣṭā-
-dviṃśatihastonnate mahāpīṭhe |
śamayantu śatrubṛndaṃ
śastrāṇyastrāṇi cādidampatyoḥ || 142 ||
śastrasadanopariṣṭā-
-dvalaye valavairiratnasaṅghaṭite |
kāmeśvarīpradhānāḥ
kalaye devīḥ samastajanavandyāḥ || 143 ||
cakre'tra sarvasiddhiprada-
-nāmani sarvaphaladātrī |
tripurāmbāvatu satataṃ
parāpararahasyayoginīsevyā || 144 ||
kāmeśvarīgṛhoparivalaye
vividhamanusampradāyajñāḥ |
catvāro yuganāthā
jayantu mitreśapūrvakāḥ guravaḥ || 145 ||
nāthabhavanopariṣṭā-
-nnānāratnacayamedure pīṭhe |
kāmeśyādyā nityāḥ
kalayantu mudaṃ tithisvarūpiṇyaḥ || 146 ||
nityāsadanasyopari
nirmalamaṇinivahaviracite dhiṣṇye |
kuśalaṃ ṣaḍaṅgadevyaḥ
kalayantvasmākamuttaralanetrāḥ || 147 ||
sadanasyopari tāsāṃ
sarvānandamayanāmake bindau |
pañcabrahmākārāṃ
mañcaṃ praṇamāmi maṇigaṇākīrṇam || 148 ||
parito maṇimañcasya
pralambamānā niyantritā pāśaiḥ |
māyāmayī javanikā
mama duritaṃ haratu mecakacchāyā || 149 ||
mañcasyopari lamba-
-nmadanīpunnāgamālikābharitam |
harigopamayavitānaṃ
haratādālasyamaniśamasmākam || 150 ||
paryaṅkasya bhajāmaḥ
pādānbimbāmbudenduhemarucaḥ |
ajaharirudreśamayā-
-nanalāsuramāruteśakoṇasthān || 151 ||
phalakaṃ sadāśivamayaṃ
praṇaumi sindūrareṇukiraṇābham |
ārabhyāṅgeśīnāṃ
sadanātkalitaṃ ca ratnasopānam || 152 ||
paṭṭopadhānagaṇḍaka-
-catuṣṭayasphuritapāṭalāstaraṇam |
paryaṅkopari ghaṭitaṃ
pātu ciraṃ haṃsatūlaśayanaṃ naḥ || 153 ||
tasyopari nivasantaṃ
tāruṇyaśrīniṣevitaṃ satatam |
āvṛntapullahallaka-
-marīcikāpuñjamañjulacchāyam || 154 ||
sindūraśoṇavasanaṃ
śītāṃśustabakacumbitakirīṭam |
kuṅkumatilakamanohara-
-kuṭilālikahasitakumudabandhuśiśum || 155 ||
pūrṇendubimbavadanaṃ
phullasarojātalocanatritayam |
taralāpāṅgataraṅgita-
-śapharāṅkanaśāstrasampradāyārtham || 156 ||
maṇimayakuṇḍalapuṣya-
-nmarīcikallolamāṃsalakapolam |
vidrumasahodarādhara-
-visṛmarasusmitakiśorasañcāram || 157 ||
āmodikusumaśekhara-
-mānīlabhrūlatāyugamanojñam |
vīṭīsaurabhavīcī-
-dviguṇitavaktrāravindasaurabhyam || 158 ||
pāśāṅkuśekṣucāpa-
-prasavaśarasphuritakomalakarābjam |
kāśmīrapaṅkilāṅgaṃ
kāmeśaṃ manasi kurmahe satatam || 159 ||
tasyāṅkabhuvi niṣaṇṇāṃ
taruṇakadambaprasūnakiraṇābhām |
śītāṃśukhaṇḍacūḍāṃ
sīmantanyastasāndrasindūrām || 160 ||
kuṅkumalalāmabhāsva-
-nniṭilāṃ kuṭilataracillikāyugalām |
nālīkatulyanayanāṃ
nāsāñcalanaṭitamauktikābharaṇām || 161 ||
aṅkuritamandahāsa-
-maruṇādharakāntivijitabimbābhām |
kastūrīmakarīyuta-
-kapolasaṅkrāntakanakatāṭaṅkām || 162 ||
karpūrasāndravīṭī-
-kabalitavadanāravindakamanīyām |
kambusahodarakaṇṭha-
-pralambamānācchamauktikakalāpām || 163 ||
kahlāradāmakomala-
-bhujayugalasphuritaratnakeyūrām |
karapadmamūlavilasa-
-tkāñcanamayakaṭakavalayasandohām || 164 ||
pāṇicatuṣṭayavilasa-
-tpāśāṅkuśapuṇḍracāpapuṣpāstrām |
kūlaṅkaṣakucaśikharāṃ
kuṅkumakardamitaratnakūrpāsām || 165 ||
aṇudāyādavalagnā-
-mambudaśobhāsanābhiromalatām |
māṇikyakhacitakāñcī-
-marīcikākrāntamāṃsalanitambām || 166 ||
karabhorukāṇḍayugalāṃ
jaṅghājitakāmajaitratūṇīrām |
prapadaparibhūtakūrmāṃ
pallavasacchāyapadayugamanojñām || 167 ||
kamalabhavakañjalocana-
-kirīṭaratnāṃśurañjitapadābjām |
unmastakānukampā-
-muttaralāpāṅgapoṣitānaṅgām || 168 ||
ādimarasāvalambā-
-manidaṃ prathamoktivallarīkalikām |
ābrahmakīṭajananī-
-mantaḥ kalayāmi sundarīmaniśam || 169 ||
kastu kṣitau paṭīyā-
-nvastu stotuṃ śivāṅkavāstavyam |
astu cirantanasukṛtaiḥ
prastutakāmyāya tanmama purastāt || 170 ||
prabhusammitoktigamyaṃ
paramaśivotsaṅgatuṅgaparyaṅkam |
tejaḥ kiñcana divyaṃ
purato me bhavatu puṇḍrakodaṇḍam || 171 ||
madhurimabharitaśarāsaṃ
makarandasyandimārgaṇodāram |
kairaviṇīviṭacūḍaṃ
kaivalyāyāstu kiñcana maho naḥ || 172 ||
akṣudramikṣucāpaṃ
parokṣamavalagnasīmni tryakṣam |
kṣapayatu me kṣemetara-
-mukṣarathapremapakṣmalaṃ tejaḥ || 173 ||
bhṛṅgarucisaṅgarakarāpāṅgaṃ
śṛṅgāratuṅgamaruṇāṅgam |
maṅgalamabhaṅguraṃ me
ghaṭayatu gaṅgādharāṅgasaṅgi mahaḥ || 174 ||
prapadājitakūrmamūrjita-
-karuṇaṃ bharmarucinirmathanadeham |
śritavarma marma śambhoḥ
kiñcana mama narma śarma nirmātu || 175 ||
kālakuralālikālima-
-kandalavijitāli vidhṛtamaṇivāli |
milatu hṛdi pulinajaghanaṃ
bahulitagalagaralakeli kimapi mahaḥ || 176 ||
kuṅkumatilakitaphālā
kuruvindacchāyapāṭaladukūlā |
karuṇāpayodhivelā
kācana citte cakāstu me līlā || 177 ||
puṣpandhayaruciveṇyaḥ
pulinābhogatrapākaraśreṇyaḥ |
jīyāsurikṣupāṇyaḥ
kāścana kāmārikelisākṣiṇyaḥ || 178 ||
tapanīyāṃśukabhāṃsi
drākṣāmādhuryanāstikavacāṃsi |
katicana śucaṃ mahāṃsi
kṣapayatu kapālitoṣitamanāṃsi || 179 ||
asitakacamāyatākṣaṃ
kusumaśaraṃ kūlamudvahakṛpārdram |
ādimarasādhidaivata-
-mantaḥ kalaye harāṅkavāsi mahaḥ || 180 ||
karṇopāntataraṅgita-
-kaṭākṣavispandikaṇṭhadaghnakṛpām |
kāmeśvarāṅkanilayāṃ
kāmapi vidyāṃ purātanīṃ kalaye || 181 ||
aravindakāntyaruntuda-
-vilocanadvandvasundaramukhendu |
chandaḥ kandalamandira-
-mantaḥpuramainduśekharaṃ vande || 182 ||
bimbinikurambaḍambara-
-viḍambakacchāyamambaravalagnam |
kambugalamambudakucaṃ
bimbokaṃ kamapi cumbatu mano me || 183 ||
kamapi kamanīyarūpaṃ
kalayāmyantaḥ kadambakusumāḍhyam |
campakarucirasuveṣaiḥ
sampāditakāntyalaṅkṛtadigantam || 184 ||
śampārucibhara-
-garhāsampādakakāntikavacitadigantam |
siddhāntaṃ nigamānāṃ
śuddhāntaṃ kimapi śūlinaḥ kalaye || 185 ||
udyaddinakaraśoṇā-
-nutpalabandhustanandhayāpīḍān |
karakalitapuṇḍracāpā-
-nkalaye kānapi kapardinaḥ prāṇān || 186 ||
raśanālasajjaghanayā
rasanājīvātucāpabhāsurayā |
ghrāṇāyuṣkaraśarayā
ghrātaṃ cittaṃ kayāpi vāsanayā || 187 ||
sarasijasahayudhvadṛśā
śampālatikāsanābhivigrahayā |
bhāsā kayāpi ceto
nāsāmaṇiśobhivadanayā bharitam || 188 ||
navayāvakābhasicayānvitayā
gajayānayā dayāparayā |
dhṛtayāminīśakalayā
dhiyā kayāpi kṣatāmayā hi vayam || 189 ||
alamalamakusumabāṇai-
-rabimbaśoṇairapuṇḍrakodaṇḍaiḥ |
akumudabāndhavacūḍai-
-ranyairiha jagati daivataṃ manyaiḥ || 190 ||
kuvalayasadṛkṣanayanaiḥ
kulagirikūṭasthabandhukucabhāraiḥ |
karuṇāspandikaṭākṣaiḥ
kavacitacitto'smi katipayaiḥ kutukaiḥ || 191 ||
natajanasulabhāya namo
nālīkasanābhilocanāya namaḥ |
nanditagiriśāya namo
mahase navanīpapāṭalāya namaḥ || 192 ||
kādambakusumadāmne
kāyacchāyākaṇāyitāryamṇe |
sīmne cirantanagirāṃ
bhūmne kasmaicidādade praṇatim || 193 ||
kuṭilakabarībharebhyaḥ
kuṅkumasabrahmacārikiraṇebhyaḥ |
kūlaṅkaṣastanebhyaḥ
kurmaḥ praṇatiṃ kulādrikutukebhyaḥ || 194 ||
kokanadaśoṇacaraṇā-
-tkomalakuralālivijitaśaivālāt |
utpalasagandhinayanā-
-durarīkurmo na devatamānyām || 195 ||
āpāṭalādharāṇā-
-mānīlasnigdhabarbarakacānām |
āmnāyajīvanānā-
-mākūtānāṃ harasya dāso'ham || 196 ||
puṅkhitavilāsahāsa-
-sphuritāsu purāhitāṅkanilayāsu |
magnaṃ mano madīyaṃ
kāsvapi kāmārijīvanāḍīṣu || 197 ||
lalitā pātu śiro me
lalāṭamambā ca madhumatīrūpā |
bhrūyugmaṃ ca bhavānī
puṣpaśarā pātu locanadvandvam || 198 ||
pāyānnāsāṃ bālā
subhagā dantāṃśca sundarī jihvām |
adharoṣṭhamādiśakti-
-ścakreśī pātu me ciraṃ cibukam || 199 ||
kāmeśvarī ca karṇau
kāmākṣī pātu gaṇḍayoryugalam |
śṛṅgāranāyikāvyā-
-dvadanaṃ siṃhāsaneśvarī ca galam || 200 ||
skandaprasūśca pātu
skandhau bāhū ca pāṭalāṅgī me |
pāṇī ca padmanilayā
pāyādaniśaṃ nakhāvalīrvijayā || 201 ||
kodaṇḍinī ca vakṣaḥ
kukṣiṃ cāvyāt kulācalatanūjā |
kalyāṇī ca valagnaṃ
kaṭiṃ ca pāyātkalādharaśikhaṇḍā || 202 ||
ūrudvayaṃ ca pāyā-
-dumā mṛḍānī ca jānunī rakṣet |
jaṅghe ca ṣoḍaśī me
pāyāt pādau ca pāśasṛṇihastā || 203 ||
prātaḥ pātu parā māṃ
madhyāhne pātu maṇigṛhādhīśā |
śarvāṇyavatu ca sāyaṃ
pāyādrātrau ca bhairavī sākṣāt || 204 ||
bhāryāṃ rakṣatu gaurīṃ
pāyāt putrāṃśca bindugṛhapīṭhā |
śrīvidyā ca yaśo me
śīlaṃ cāvyācciraṃ mahārājñī || 205 ||
pavanamayi pāvakamayi
kṣoṇīmayi gaganamayi kṛpīṭamayi |
ravimayi śaśimayi diṅmayi
samayamayi prāṇamayi śive pāhi || 206 ||
kāli kapālini śūlini
bhairavi mātaṅgi pañcami tripure |
vāgdevi vindhyavāsini
bāle bhuvaneśi pālaya ciraṃ mām || 207 ||
abhinavasindūrābhā-
-mamba tvāṃ cintayanti ye hṛdaye |
upari nipatanti teṣā-
-mutpalanayanākaṭākṣakallolāḥ || 208 ||
vargāṣṭakamilitābhi-
-rvaśinīmukhyābhirāvṛtāṃ bhavatīm |
cintayatāṃ sitavarṇāṃ
vāco niryāntyayatnato vadanāt || 209 ||
kanakaśalākāgaurīṃ
karṇavyālolakuṇḍaladvitayām |
prahasitamukhīṃ ca bhavatīṃ
dhyāyanto ye ta eva bhūdhanadāḥ || 210 ||
śīrṣāmbhoruhamadhye
śītalapīyūṣavarṣiṇīṃ bhavatīm |
anudinamanucintayatā-
-māyuṣyaṃ bhavati puṣkalamavanyām || 211 ||
madhurasmitāṃ madāruṇanayanāṃ
mātaṅgakumbhavakṣojām |
candravataṃsinīṃ tvāṃ
savidhe paśyanti sukṛtinaḥ kecit || 212 ||
lalitāyāḥ stavaratnaṃ
lalitapadābhiḥ praṇītamāryābhiḥ |
pratidinamavanau paṭhatāṃ
phalāni vaktuṃ pragalbhate saiva || 213 ||
sadasadanugrahanigraha-
-gṛhītamunivigraho bhagavān |
sarvāsāmupaniṣadāṃ
durvāsā jayati deśikaḥ prathamaḥ || 214 ||
iti maharṣidurvāsaḥ viracitaṃ śrīlalitāstavaratnam |
Sanskrit — Devanagari (original)
वन्दे गजेन्द्रवदनं
वामाङ्कारूढवल्लभाश्लिष्टम् ।
कुङ्कुमपरागशोणं
कुवलयिनीजारकोरकापीडम् ॥ 1 ॥
स जयति सुवर्णशैलः
सकलजगच्चक्रसङ्घटितमूर्तिः ।
काञ्चननिकुञ्जवाटी-
-कन्दलदमरीप्रपञ्चसङ्गीतः ॥ 2 ॥
हरिहयनैरृतमारुत-
-हरितामन्तेष्ववस्थितं तस्य ।
विनुमः सानुत्रितयं
विधिहरिगौरीशविष्टपाधारम् ॥ 3 ॥
मध्ये पुनर्मनोहर-
-रत्नरुचिस्तबकरञ्जितदिगन्तम् ।
उपरि चतुःशतयोजन-
-मुत्तुङ्गं शृङ्गपुङ्गवमुपासे ॥ 4 ॥
तत्र चतुःशतयोजन-
-परिणाहं देवशिल्पिना रचितम् ।
नानासालमनोज्ञं
नमाम्यहं नगरमादिविद्यायाः ॥ 5 ॥
प्रथमं सहस्रपूर्वक-
-षट्शतसङ्ख्याकयोजनं परितः ।
वलयीकृतस्वगात्रं
वरणं शरणं व्रजाम्ययोरूपम् ॥ 6 ॥
तस्योत्तरे समीरण-
-योजनदूरे तरङ्गितच्छायः ।
घटयतु मुदं द्वितीयो
घण्टास्तनसारनिर्मितः सालः ॥ 7 ॥
उभयोरन्तरसीम-
-न्युद्दामभ्रमररञ्जितोदारम् ।
उपवनमुपास्महे वय-
-मूरीकृतमन्दमारुतस्यन्दम् ॥ 8 ॥
आलिङ्ग्य भद्रकाली-
-मासीनस्तत्र हरिशिलाश्यामाम् ।
मनसि महाकालो मे
विहरतु मधुपानविभ्रमन्नेत्रः ॥ 9 ॥
तार्तीयीको वरण-
-स्तस्योत्तरसीम्नि वातयोजनतः ।
ताम्रेण रचितमूर्ति-
-स्तनुतामाचन्द्रतारकं भद्रम् ॥ 10 ॥
मध्ये तयोश्च मणिमय-
-पल्लवशाखाप्रसूनपक्ष्मलिताम् ।
कल्पानोकहवाटीं
कलये मकरन्दपङ्किलावालाम् ॥ 11 ॥
तत्र मधुमाधवश्री-
-तरुणीभ्यां तरलदृक्चकोराभ्याम् ।
आलिङ्गितोऽवतान्मा-
-मनिशं प्रथमर्तुरात्तपुष्पास्त्रः ॥ 12 ॥
नमत तदुत्तरभागे
नाकिपथोल्लङ्घिशृङ्गसङ्घातम् ।
सीसाकृतिं तुरीयं
सितकिरणालोकनिर्मलं सालम् ॥ 13 ॥
सालद्वयान्तराले
सरलालिकपोतचाटुसुभगायाम् ।
सन्तानवाटिकायां
सक्तं चेतोऽस्तु सततमस्माकम् ॥ 14 ॥
तत्र तपनातिरूक्षः
साम्राज्ञीचरणसान्द्रितस्वान्तः ।
शुक्रशुचिश्रीसहितो
ग्रीष्मर्तुर्दिशतु कीर्तिमाकल्पम् ॥ 15 ॥
उत्तरसीमनि तस्यो-
-न्नतशिखरोत्कम्पिहाटकपताकः ।
प्रकटयतु पञ्चमो नः
प्राकारः कुशलमारकूटमयः ॥ 16 ॥
प्राकारयोश्च मध्ये
पल्लवितान्यभृतपञ्चमोन्मेषा ।
हरिचन्दनद्रुवाटी-
-हरतादामूलमस्मदनुतापम् ॥ 17 ॥
तत्र नभः श्रीमुख्यै-
-स्तरुणीवर्गैः समन्वितः परितः ।
वज्राट्टहासमुखरो
वाञ्छापूर्तिं तनोतु वर्षर्तुः ॥ 18 ॥
मारुतयोजनदूरे
महनीयस्तस्य चोत्तरे भागे ।
भद्रं कृषीष्ट षष्ठः
प्राकारः पञ्चलोहधातुमयः ॥ 19 ॥
अनयोर्मध्ये सन्तत-
-मङ्कूरद्दिव्यकुसुमगन्धायाम् ।
मन्दारवाटिकायां
मानसमङ्गीकरोतु मे विहृतिम् ॥ 20 ॥
तस्यामिषोर्जलक्ष्मी-
-तरुणीभ्यां शरदृतुः सदा सहितः ।
अभ्यर्चयन् स जीया-
-दम्बामामोदमेदुरैः कुसुमैः ॥ 21 ॥
तस्यर्षिसङ्ख्ययोजन-
-दूरे देदीप्यमानशृङ्गौघः ।
कलधौतकलितमूर्तिः
कल्याणं दिशतु सप्तमः सालः ॥ 22 ॥
मध्ये तयोर्मरुत्पथ
लङ्घितविटपाग्रविरुतकलकण्ठा ।
श्रीपारिजातवाटी
श्रियमनिशं दिशतु शीतलोद्देशा ॥ 23 ॥
तस्यामतिप्रियाभ्यां
सह खेलन् सहसहस्यलक्ष्मीभ्याम् ।
सामन्तो झषकेतो-
-र्हेमन्तो भवतु हेमवृद्ध्यै नः ॥ 24 ॥
उत्तरतस्तस्य महा-
-नुद्भटहुतभुक्शिखारुणमयूखः ।
तपनीयखण्डरचित-
-स्तनुतादायुष्यमष्टमो वरणः ॥ 25 ॥
कादम्बविपिनवाटी-
-मनयोर्मध्यभुवि कल्पितावासाम् ।
कलयामि सूनकोरक-
-कन्दलितामोदतुन्दिलसमीराम् ॥ 26 ॥
तस्यामतिशिशिराकृति-
-रासीनस्तपतपस्यलक्ष्मीभ्याम् ।
शिवमनिशं कुरुतान्मे
शिशिरर्तुः सततशीतलदिगन्तः ॥ 27 ॥
तस्यां कदम्बवाट्यां
तत्प्रसवामोदमिलितमधुगन्धम् ।
सप्तावरणमनोज्ञं
शरणं समुपैमि मन्त्रिणीशरणम् ॥ 28 ॥
तत्रालये विशाले
तपनीयारचिततरलसोपाने ।
माणिक्यमण्डपान्त-
-र्महिते सिंहासने सुमणिखचिते ॥ 29 ॥
बिन्दुत्रिपञ्चकोण-
-द्विपनृपवसुवेददलकुरेखाढ्ये ।
चक्रे सदा निविष्टां
षष्ठ्यष्टत्रिंशदक्षरेशानीम् ॥ 30 ॥
तापिञ्छमेचकाभां
तालीदलघटितकर्णताटङ्काम् ।
ताम्बूलपूरितमुखीं
ताम्राधरबिम्बदृष्टदरहासाम् ॥ 31 ॥
कुङ्कुमपङ्किलदेहां
कुवलयजीवातुशावकवतंसाम् ।
कोकनदशोणचरणां
कोकिलनिक्वाणकोमलालापाम् ॥ 32 ॥
वामाङ्गगलितचूलीं
वनमाल्यकदम्बमालिकाभरणाम् ।
मुक्ताललन्तिकाञ्चित
मुग्धालिकमिलितचित्रकोदाराम् ॥ 33 ॥
करविधृतकीरशावक-
-कलनिनदव्यक्तनिखिलनिगमार्थाम् ।
वामकुचसङ्गिवीणावादन-
-सौख्यार्धमीलिताक्षियुगाम् ॥ 34 ॥
आपाटलांशुकधरा-
-मादिरसोन्मेषवासितकटाक्षाम् ।
आम्नायसारगुलिका-
-माद्यां सङ्गीतमातृकां वन्दे ॥ 35 ॥
तस्य च सुवर्णसाल-
-स्योत्तरतस्तरुणकुङ्कुमच्छायः ।
शमयतु मम सन्तापं
सालो नवमः स पुष्परागमयः ॥ 36 ॥
अनयोरन्तरवसुधाः
प्रणुमः प्रत्यग्रपुष्परागमयीः ।
सिंहासनेश्वरीमनु-
-चिन्तननिस्तन्द्रसिद्धनीरन्ध्राः ॥ 37 ॥
तत्सालोत्तरदेशे
तरुणजपाकिरणधोरणीशोणः ।
प्रशमयतु पद्मराग-
-प्राकारो मम पराभवं दशमः ॥ 38 ॥
अन्तरभूकृतवासा-
-ननयोरपनीतचित्तवैमत्यान् ।
चक्रेशीपदभक्तां-
-श्चारणवर्गानहर्निशं कलये ॥ 39 ॥
सारङ्गवाहयोजनदूरे-
-ऽसङ्घटितकेतनस्तस्य ।
गोमेदकेन रचितो
गोपायतु मां समुन्नतः सालः ॥ 40 ॥
वप्रद्वयान्तरोर्व्यां
वटुकैर्विविधैश्च योगिनीबृन्दैः ।
सततं समर्चितायाः
सङ्कर्षण्याः प्रणौमि चरणाब्जम् ॥ 41 ॥
तापसयोजनदूरे
तस्य समुत्तुङ्ग गोपुरोपेतः ।
वाञ्छापूर्त्यै भवता-
-द्वज्रमणीनिकरनिर्मितो वप्रः ॥ 42 ॥
वरणद्वितयान्तरतो
वासजुषो विहितमधुरसास्वादाः ।
रम्भादिविबुधवेश्या
रचयन्तु महान्तमस्मदानन्दम् ॥ 43 ॥
तत्र सदा प्रवहन्ती
तटिनी वज्राभिधा चिरं जीयात् ।
चटुलोर्मिजालनृत्य-
-त्कलहंसीकुलकलक्वणितपुष्टा ॥ 44 ॥
रोधसि तस्या रुचिरे
वज्रेशी जयति वज्रभूषाढ्या ।
वज्रप्रदानतोषित-
-वज्रिमुखत्रिदशविनुतचारित्रा ॥ 45 ॥
तस्योदीच्यां हरिति
स्तवकितसुषमावलीढवियदन्तः ।
वैडूर्यरत्नरचितो
वैमल्यं दिशतु चेतसो वरणः ॥ 46 ॥
अधिमध्यमेतयोः पुन-
-रम्बाचरणावलम्बितस्वान्तान् ।
कार्कोटकादिनागान्
कलयामः किं च बलिमुखान् दनुजान् ॥ 47 ॥
गन्धवहसङ्ख्ययोजन-
-दूरे गगनोर्ध्वजाङ्घिकस्तस्य ।
वासवमणिप्रणीतो
वरणो बहलयतु वैदुषीं विशदाम् ॥ 48 ॥
मध्यक्षोण्यामनयो-
-र्महेन्द्रनीलात्मकानि च सरांसि ।
शातोदरीसहाया-
-न्भूपालानपि पुनः पुनः प्रणुमः ॥ 49 ॥
आशुगयोजनदूरे
तस्योर्ध्वं कान्तिधवलितदिगन्तः ।
मुक्ताविरचितगात्रो
मुहुरस्माकं मुदे भवतु सालः ॥ 50 ॥
आवृत्त्योरधिमध्यं
पूर्वस्यां दिशि पुरन्दरः श्रीमान् ।
अभ्रमुविटाधिरूढो
विभ्रममस्माकमनिशमातनुतात् ॥ 51 ॥
तत्कोणे व्यजनस्रु-
-क्तोमरपात्रस्रुवान्नशक्तिधरः ।
स्वाहास्वधासमेतः
सुखयतु मां हव्यवाहनः सुचिरम् ॥ 52 ॥
दक्षिणदिगन्तराले
दण्डधरो नीलनीरदच्छायः ।
त्रिपुरापदाब्जभक्तस्तिरयतु
मम निखिलमंहसां निकरम् ॥ 53 ॥
तस्यैव पश्चिमायां
दिशि दलितेन्दीवरप्रभाश्यामः ।
खेटासियष्टिधारी
खेदानपनयतु यातुधानो मे ॥ 54 ॥
तस्या उत्तरदेशे
धवलाङ्गो विपुलझषवरारूढः ।
पाशायुधात्तपाणिः
पाशी विदलयतु पाशजालानि ॥ 55 ॥
वन्दे तदुत्तरहरि-
-त्कोणे वायुं चमूरुवरवाहम् ।
कोरकिततत्त्वबोधा-
-न्गोरक्षप्रमुखयोगिनोऽपि मुहुः ॥ 56 ॥
तरुणीरिडाप्रधाना-
-स्तिस्रो वातस्य तस्य कृतवासाः ।
प्रत्यग्रकापिशायन-
-पानपरिभ्रान्तलोचनाः कलये ॥ 57 ॥
तल्लोकपूर्वभागे
धनदं ध्यायामि शेवधिकुलेशम् ।
अपि माणिभद्रमुख्या-
-नम्बाचरणावलम्बिनो यक्षान् ॥ 58 ॥
तस्यैव पूर्वसीमनि
तपनीयारचितगोपुरे नगरे ।
कात्यायनीसहायं
कलये शीतांशुखण्डचूडालम् ॥ 59 ॥
तत्पुरषोडशवरण-
-स्थलभाजस्तरुणचन्द्रचूडालान् ।
रुद्राध्याये पठिता-
-न्रुद्राणीसहचरान्भजे रुद्रान् ॥ 60 ॥
पवमानसङ्ख्ययोजन-
-दूरे बालतृण्मेचकस्तस्य ।
सालो मरकतरचितः
सम्पदमचलां श्रियं च पुष्णातु ॥ 61 ॥
आवृतियुग्मान्तरतो
हरितमणीनिवहमेचके देशे ।
हाटकतालीविपिनं
हालाघटघटितविटपमाकलये ॥ 62 ॥
तत्रैव मन्त्रिणीगृह-
-परिणाहं तरलकेतनं सदनम् ।
मरकतसौधमनोज्ञं
दद्यादायूंषि दण्डनाथायाः ॥ 63 ॥
सदने तत्र हरिन्मणि-
-सङ्घटिते मण्डपे शतस्तम्भे ।
कार्तस्वरमयपीठे
कनकमयाम्बुरुहकर्णिकामध्ये ॥ 64 ॥
बिन्दुत्रिकोणवर्तुल-
-षडस्रवृत्तद्वयान्विते चक्रे ।
सञ्चारिणी दशोत्तर-
शतार्णमनुराजकमलकलहंसी ॥ 65 ॥
कोलवदना कुशेशय-
-नयना कोकारिमण्डितशिखण्डा ।
सन्तप्तकाञ्चनाभा
सन्ध्यारुणचेलसंवृतनितम्बा ॥ 66 ॥
हलमुसलशङ्खचक्रा-
-ऽङ्कुशपाशाभयवरस्फुरितहस्ता ।
कूलङ्कषानुकम्पा
कुङ्कुमजम्बालितस्तनाभोगा ॥ 67 ॥
धूर्तानामतिदूरा-
-वार्ताशेषावलग्नकमनीया ।
आर्तालीशुभदात्री
वार्ताली भवतु वाञ्छितार्थाय ॥ 68 ॥
तस्याः परितो देवीः
स्वप्नेश्युन्मत्तभैरवीमुख्याः ।
प्रणमत जम्भिन्याद्याः
भैरववर्गांश्च हेतुकप्रमुखान् ॥ 69 ॥
पूर्वोक्तसङ्ख्ययोजन-
-दूरे पूयांशुपाटलस्तस्य ।
विद्रावयतु मदार्तिं
विद्रुमसालो विशङ्कटद्वारः ॥ 70 ॥
आवरणयोरहर्निश-
-मन्तरभूमौप्रकाशशालिन्याम् ।
आसीनमम्बुजासन-
-मभिनवसिन्दूरगौरमहमीडे ॥ 71 ॥
वरणस्य तस्य मारुत-
-योजनतो विपुलगोपुरद्वारः ।
सालो नानारत्नैः
सङ्घटिताङ्गः कृषीष्ट मदभीष्टम् ॥ 72 ॥
अन्तरकक्ष्यामनयो-
-रविरलशोभापिचण्डिलोद्देशाम् ।
माणिक्यमण्डपाख्यां
महतीमधिहृदयमनिशमाकलये ॥ 73 ॥
तत्र स्थितं प्रसन्नं
तरुणतमालप्रवालकिरणाभम् ।
कर्णावलम्बिकुण्डल-
-कन्दलिताभीशुकवचितकपोलम् ॥ 74 ॥
शोणाधरं शुचिस्मित-
-मेणाङ्कवदनमेधमानकृपम् ।
मुग्धैणमदविशेषक-
-मुद्रितनिटिलेन्दुरेखिकारुचिरम् ॥ 75 ॥
नालीकदलसहोदर-
-नयनाञ्चलघटितमनसिजाकूतम् ।
कमलाकठिनपयोधर-
-कस्तूरीघुसृणपङ्किलोरस्कम् ॥ 76 ॥
चाम्पेयगन्धिकैश्यं
शम्पासब्रह्मचारिकौशेयम् ।
श्रीवत्सकौस्तुभधरं
श्रितजनरक्षाधुरीणचरणाब्जम् ॥ 77 ॥
कम्बुसुदर्शनविलस-
-त्करपद्मं कण्ठलोलवनमालम् ।
मुचुकुन्दमोक्षफलदं
मुकुन्दमानन्दकन्दमवलम्बे ॥ 78 ॥
तद्वरणोत्तरभागे
तारापतिबिम्बचुम्बिनिजशृङ्गः ।
विविधमणीगणघटितो
वितरतु सालो विनिर्मलां धिषणाम् ॥ 79 ॥
प्राकारद्वितयान्तर-
-कक्ष्यां पृथुरत्ननिकरसङ्कीर्णाम् ।
नमत सहस्रस्तम्भक-
-मण्डपनाम्नातिविश्रुतां भुवने ॥ 80 ॥
प्रणुमस्तत्र भवानी-
-सहचरमीशानमिन्दुखण्डधरम् ।
शृङ्गारनायिकामनु-
-शीलनभाजोऽपि भृङ्गिनन्दिमुखान् ॥ 81 ॥
तस्यैणवाहयोजन-
-दूरे वन्दे मनोमयं वप्रम् ।
अङ्कूरन्मणिकिरणा-
-मन्तरकक्ष्यां च निर्मलामनयोः ॥ 82 ॥
तत्रैवामृतवापीं
तरलतरङ्गावलीढतटयुग्माम् ।
मुक्तामयकलहंसी-
-मुद्रितकनकारविन्दसन्दोहाम् ॥ 83 ॥
शक्रोपलमयभृङ्गी-
-सङ्गीतोन्मेषघोषितदिगन्ताम् ।
काञ्चनमयाङ्गविलस-
-त्कारण्डवषण्डताण्डवमनोज्ञाम् ॥ 84 ॥
कुरुविन्दात्मकहल्लक-
-कोरकसुषमासमूहपाटलिताम् ।
कलये सुधास्वरूपां
कन्दलितामन्दकैरवामोदाम् ॥ 85 ॥
तद्वापिकान्तराले तरले
मणिपोतसीम्नि विहरन्तीम् ।
सिन्दूरपाटलाङ्गीं
सितकिरणाङ्कूरकल्पितवतंसाम् ॥ 86 ॥
पर्वेन्दुबिम्बवदनां
पल्लवशोणाधरस्फुरितहासाम् ।
कुटिलकबरीं कुरङ्गी-
-शिशुनयनां कुण्डलस्फुरितगण्डाम् ॥ 87 ॥
निकटस्थपोतनिलयाः
शक्तीः शयविधृतहेमशृङ्गजलैः ।
परिषिञ्चन्तीं परित-
-स्तारां तारुण्यगर्वितां वन्दे ॥ 88 ॥
प्रागुक्तसङ्ख्ययोजनदूरे
प्रणमामि बुद्धिमयसालम् ।
अनयोरन्तरकक्ष्या-
-मष्टापदपुष्टमेदिनीं रुचिराम् ॥ 89 ॥
कादम्बरीनिधानां
कलयाम्यानन्दवापिकां तस्याम् ।
शोणाश्मनिवहनिर्मित-
-सोपानश्रेणिशोभमानतटीम् ॥ 90 ॥
माणिक्यतरणिनिलयां
मध्ये तस्या मदारुणकपोलाम् ।
अमृतेशीत्यभिधाना-
-मन्तः कलयामि वारुणीं देवीम् ॥ 91 ॥
सौवर्णकेनिपातन-
-हस्ताः सौन्दर्यगर्विता देव्यः ।
तत्पुरतः स्थितिभाजो
वितरन्त्वस्माकमायुषो वृद्धिम् ॥ 92 ॥
तस्य पृषदश्वयोजन-
-दूरेऽहङ्कारसालमतितुङ्गम् ।
वन्दे तयोश्च मध्ये
कक्ष्यां वलमानमलयपवमानाम् ॥ 93 ॥
विनुमो विमर्शवापीं
सौषुम्नसुधास्वरूपिणीं तत्र ।
वेलातिलङ्घ्यवीची-
-कोलाहलभरितकूलवनवाटीम् ॥ 94 ॥
तत्रैव सलिलमध्ये
तापिञ्छदलप्रपञ्चसुषमाभाम् ।
श्यामलकञ्चुकलसितां
श्यामाविटबिम्बडम्बरहरास्याम् ॥ 95 ॥
आभुग्नमसृणचिल्ली-
-हसितायुग्मशरकार्मुकविलासाम् ।
मन्दस्मिताञ्चितमुखीं
मणिमयताटङ्कमण्डितकपोलाम् ॥ 96 ॥
कुरुविन्दतरणिनिलयां
कुलाचलस्पर्धिकुचनमन्मध्याम् ।
कुङ्कुमविलिप्तगात्रीं
कुरुकुल्लां मनसि कुर्महे सततम् ॥ 97 ॥
तत्सालोत्तरभागे
भानुमयं वप्रमाश्रये दीप्तम् ।
मध्यं च विपुलमनयो-
-र्मन्ये विश्रान्तमातपोद्गारम् ॥ 98 ॥
तत्र कुरुविन्दपीठे
तामरसे कनककर्णिकाघटिते ।
आसीनमरुणवासस-
-मम्लानप्रसवमालिकाभरणम् ॥ 99 ॥
चक्षुष्मतीप्रकाशन-
-शक्तिच्छायासमारचितकेलिम् ।
माणिक्यमुकुटरम्यं
मन्ये मार्ताण्डभैरवं हृदये ॥ 100 ॥
इन्दुमयसालमीडे
तस्योत्तरतस्तुषारगिरिगौरम् ।
अत्यन्तशिशिरमारुत-
-मनयोर्मध्यं च चन्द्रिकोद्गारम् ॥ 101 ॥
तत्र प्रकाशमानं
तारानिकरैः परिष्कृतोद्देशम् ।
अमृतमयकान्तिकन्दल-
-मन्तः कलयामि कुन्दसितमिन्दुम् ॥ 102 ॥
शृङ्गारसालमीडे
शृङ्गोल्लसितं तदुत्तरे भागे ।
मध्यस्थले तयोरपि
महितां शृङ्गारपूर्विकां परिखाम् ॥ 103 ॥
तत्र मणिनौस्थिताभि-
-स्तपनीयाविरचिताग्रहस्ताभिः ।
शृङ्गारदेवताभिः
सहितं परिखाधिपं भजे मदनम् ॥ 104 ॥
शृङ्गारवरणवर्यस्योत्तरतः
सकलविबुधसंसेव्यम् ।
चिन्तामणिगणरचितं
चिन्तां दूरीकरोतु मे सदनम् ॥ 105 ॥
मणिसदनसालयोरधि-
-मध्यं दशतालभूमिरुहदीर्घैः ।
पर्णैः सुवर्णवर्णै-
-र्युक्तां काण्डैश्च योजनोत्तुङ्गैः ॥ 106 ॥
मृदुलैस्तालीपञ्चक-
-मानैर्मिलितां च केसरकदम्बैः ।
सन्ततगलितमरन्द-
-स्रोतोनिर्यन्मिलिन्दसन्दोहाम् ॥ 107 ॥
पाटीरपवनबालक-
-धाटीनिर्यत्परागपिञ्जरिताम् ।
कलहंसीकुलकलकल-
-कूलङ्कषनिनदनिचयकमनीयाम् ॥ 108 ॥
पद्माटवीं भजामः
परिमलकल्लोलपक्ष्मलोपान्ताम् ।
[ देव्यर्घ्यपात्रधारी
तस्याः पूर्वदिशि दशकलायुक्तः । ]
वलयितमूर्तिर्भगवा-
-न्वह्निः क्रोशोन्नतश्चिरं पायात् ॥ 109 ॥
तत्राधारे देव्याः
पात्रीरूपः प्रभाकरः श्रीमान् ।
द्वादशकलासमेतो
ध्वान्तं मम बहुलमान्तरं भिन्द्यात् ॥ 110 ॥
तस्मिन् दिनेशपात्रे
तरङ्गितामोदममृतमयमर्घ्यम् ।
चन्द्रकलात्मकममृतं
सान्द्रीकुर्यादमन्दमानन्दम् ॥ 111 ॥
अमृते तस्मिन्नभितो
विहरन्त्यो विविधमणितरणिभाजः ।
षोडश कलाः सुधांशोः
शोकादुत्तारयन्तु मामनिशम् ॥ 112 ॥
तत्रैव विहृतिभाजो
धातृमुखानां च कारणेशानाम् ।
सृष्ट्यादिरूपिकास्ताः
शमयन्त्वखिलाः कलाश्च सन्तापम् ॥ 113 ॥
कीनाशवरुणकिन्नर-
-राजदिगन्तेषु रत्नगेहस्य ।
कलयामि तान्यजस्रं
कलयन्त्वायुष्यमर्घ्यपात्राणि ॥ 114 ॥
पात्रस्थलस्य पुरतः
पद्मारमणविधिपार्वतीशानाम् ।
भवनानि शर्मणे नो
भवन्तु भासा प्रदीपितजगन्ति ॥ 115 ॥
सदनस्यानलकोणे
सततं प्रणमामि कुण्डमाग्नेयम् ।
तत्र स्थितं च वह्निं
तरलशिखाजटिलमम्बिकाजनकम् ॥ 116 ॥
तस्यासुरदिशि तादृश-
-रत्नपरिस्फुरितपर्वनवकाढ्यम् ।
चक्रात्मकं शताङ्गं
शतयोजनमुन्नतं भजे दिव्यम् ॥ 117 ॥
तत्रैव दिशि निषण्णं
तपनीयध्वजपरम्पराश्लिष्टम् ।
रथमपरं च भवान्या
रचयामो मनसि रत्नमयचूडम् ॥ 118 ॥
भवनस्य वायुभागे
परिष्कृतो विविधवैजयन्तीभिः ।
रचयतु मुदं रथेन्द्रः
सचिवेशान्याः समस्तवन्द्यायाः ॥ 119 ॥
कुर्मोऽधिहृदयमनिशं
क्रोडास्यायाः शताङ्गमूर्धन्यम् ।
रुद्रदिशि रत्नधाम्नो
रुचिरशलाकाप्रपञ्चकञ्चुकितम् ॥ 120 ॥
परितो देवीधाम्नः
प्रणीतवासा मनुस्वरूपिण्यः ।
कुर्वन्तु रश्मिमाला-
-कृतयः कुशलानि देवता निखिलाः ॥ 121 ॥
प्राग्द्वारस्य भवानी-
-धाम्नः पार्श्वद्वयारचितवासे ।
मातङ्गीकिटिमुख्यौ
मणिसदने मनसि भावयामि चिरम् ॥ 122 ॥
योजनयुगलाभोगा
तत्क्रोशपरिणाहयैव भित्त्या च ।
चिन्तामणिगृहभूमि-
-र्जीयादाम्नायमयचतुर्द्वारा ॥ 123 ॥
द्वारे द्वारे धाम्नः
पिण्डीभूता नवीनबिम्बाभाः ।
विदधतु विपुलां कीर्तिं
दिव्या लौहित्यसिद्ध्यो देव्यः ॥ 124 ॥
मणिसदनस्यान्तरतो
महनीये रत्नवेदिकामध्ये ।
बिन्दुमयचक्रमीडे
पीठानामुपरि विरचितावासम् ॥ 125 ॥
चक्राणां सकलानां
प्रथममधः सीमफलकवास्तव्याः ।
अणिमादिसिद्धयो मा-
-मवन्तु देवी प्रभास्वरूपिण्यः ॥ 126 ॥
अणिमादिसिद्धिफलक-
-स्योपरिहरिणाङ्कखण्डकृतचूडाः ।
भद्रं पक्ष्मलयन्तु
ब्राह्मीप्रमुखाश्च मातरोऽस्माकम् ॥ 127 ॥
तस्योपरि मणिफलके
तारुण्योत्तुङ्गपीनकुचभाराः ।
सङ्क्षोभिणीप्रधानाः
भ्रान्ति विद्रावयन्तु दश मुद्राः ॥ 128 ॥
फलकत्रयस्वरूपे
पृथुले त्रैलोक्यमोहने चक्रे ।
दीव्यन्तु प्रकटाख्या-
-स्तासां कर्त्रीं च भगवती त्रिपुरा ॥ 129 ॥
तदुपरि विपुले धिष्ण्ये
तरलदृशस्तरुणकोकनदभासः ।
कामाकर्षिण्याद्याः
कलये देवीः कलाधरशिखण्डाः ॥ 130 ॥
सर्वाशापरिपूरकचक्रे-
-ऽस्मिन् गुप्तयोगिनीसेव्याः ।
त्रिपुरेशी मम दुरितं
तुद्यात् कण्ठावलम्बिमणिहारा ॥ 131 ॥
तस्योपरि मणिपीठे
ताम्राम्भोरुहदलप्रभाशोणाः ।
ध्यायाम्यनङ्गकुसुमा-
-प्रमुखा देवीश्च विधृतकूर्पासाः ॥ 132 ॥
सङ्क्षोभकारकेऽस्मिं-
-श्चक्रे श्रीत्रिपुरसुन्दरी साक्षात् ।
गोप्त्री गुप्ततराख्याः
गोपायतु मां कृपार्द्रया दृष्ट्या ॥ 133 ॥
सङ्क्षोभिणीप्रधानाः
शक्तीस्तस्योर्ध्ववलयकृतवासाः ।
आलोलनीलवेणी-
-रन्तः कलयामि यौवनोन्मत्ताः ॥ 134 ॥
सौभाग्यदायकेऽस्मिं-
-श्चक्रेशी त्रिपुरवासिनी जीयात् ।
शक्तीश्च सम्प्रदायाभिधाः
समस्ताः प्रमोदयन्त्वनिशम् ॥ 135 ॥
मणिपीठोपरि तासां
महति चतुर्हस्तविस्तृते वलये ।
सन्ततविरचितवासाः
शक्तीः कलयामि सर्वसिद्धिमुखाः ॥ 136 ॥
सर्वार्थसाधकाख्ये
चक्रेऽमुष्मिन् समस्तफलदात्री ।
त्रिपुरा श्रीर्मम कुशलं
दिशतादुत्तीर्णयोगिनीसेव्या ॥ 137 ॥
तासां निलयस्योपरि
धिष्ण्ये कौसुम्भकञ्चुकमनोज्ञाः ।
सर्वाज्ञाद्याः देव्यः
सकलाः सम्पादयन्तु मम कीर्तिम् ॥ 138 ॥
चक्रे समस्तरक्षा-
-करनाम्न्यस्मिन् समस्तजनसेव्याम् ।
मनसि निगर्भासहितां
मन्ये श्रीत्रिपुरमालिनीं देवीम् ॥ 139 ॥
सर्वज्ञासदनस्योपरि
चक्रे विपुले समाकलितगेहाः ।
वन्दे वशिनीमुख्याः
शक्तीः सिन्दूररेणुरुचः ॥ 140 ॥
श्रीसर्वरोगहराख्य-
-चक्रेऽस्मिंस्त्रिपुरपूर्विकां सिद्धाम् ।
वन्दे रहस्यनाम्ना
वेद्याभिः शक्तिभिः सदा सेव्याम् ॥ 141 ॥
वशिनीगृहोपरिष्टा-
-द्विंशतिहस्तोन्नते महापीठे ।
शमयन्तु शत्रुबृन्दं
शस्त्राण्यस्त्राणि चादिदम्पत्योः ॥ 142 ॥
शस्त्रसदनोपरिष्टा-
-द्वलये वलवैरिरत्नसङ्घटिते ।
कामेश्वरीप्रधानाः
कलये देवीः समस्तजनवन्द्याः ॥ 143 ॥
चक्रेऽत्र सर्वसिद्धिप्रद-
-नामनि सर्वफलदात्री ।
त्रिपुराम्बावतु सततं
परापररहस्ययोगिनीसेव्या ॥ 144 ॥
कामेश्वरीगृहोपरिवलये
विविधमनुसम्प्रदायज्ञाः ।
चत्वारो युगनाथा
जयन्तु मित्रेशपूर्वकाः गुरवः ॥ 145 ॥
नाथभवनोपरिष्टा-
-न्नानारत्नचयमेदुरे पीठे ।
कामेश्याद्या नित्याः
कलयन्तु मुदं तिथिस्वरूपिण्यः ॥ 146 ॥
नित्यासदनस्योपरि
निर्मलमणिनिवहविरचिते धिष्ण्ये ।
कुशलं षडङ्गदेव्यः
कलयन्त्वस्माकमुत्तरलनेत्राः ॥ 147 ॥
सदनस्योपरि तासां
सर्वानन्दमयनामके बिन्दौ ।
पञ्चब्रह्माकारां
मञ्चं प्रणमामि मणिगणाकीर्णम् ॥ 148 ॥
परितो मणिमञ्चस्य
प्रलम्बमाना नियन्त्रिता पाशैः ।
मायामयी जवनिका
मम दुरितं हरतु मेचकच्छाया ॥ 149 ॥
मञ्चस्योपरि लम्ब-
-न्मदनीपुन्नागमालिकाभरितम् ।
हरिगोपमयवितानं
हरतादालस्यमनिशमस्माकम् ॥ 150 ॥
पर्यङ्कस्य भजामः
पादान्बिम्बाम्बुदेन्दुहेमरुचः ।
अजहरिरुद्रेशमया-
-ननलासुरमारुतेशकोणस्थान् ॥ 151 ॥
फलकं सदाशिवमयं
प्रणौमि सिन्दूररेणुकिरणाभम् ।
आरभ्याङ्गेशीनां
सदनात्कलितं च रत्नसोपानम् ॥ 152 ॥
पट्टोपधानगण्डक-
-चतुष्टयस्फुरितपाटलास्तरणम् ।
पर्यङ्कोपरि घटितं
पातु चिरं हंसतूलशयनं नः ॥ 153 ॥
तस्योपरि निवसन्तं
तारुण्यश्रीनिषेवितं सततम् ।
आवृन्तपुल्लहल्लक-
-मरीचिकापुञ्जमञ्जुलच्छायम् ॥ 154 ॥
सिन्दूरशोणवसनं
शीतांशुस्तबकचुम्बितकिरीटम् ।
कुङ्कुमतिलकमनोहर-
-कुटिलालिकहसितकुमुदबन्धुशिशुम् ॥ 155 ॥
पूर्णेन्दुबिम्बवदनं
फुल्लसरोजातलोचनत्रितयम् ।
तरलापाङ्गतरङ्गित-
-शफराङ्कनशास्त्रसम्प्रदायार्थम् ॥ 156 ॥
मणिमयकुण्डलपुष्य-
-न्मरीचिकल्लोलमांसलकपोलम् ।
विद्रुमसहोदराधर-
-विसृमरसुस्मितकिशोरसञ्चारम् ॥ 157 ॥
आमोदिकुसुमशेखर-
-मानीलभ्रूलतायुगमनोज्ञम् ।
वीटीसौरभवीची-
-द्विगुणितवक्त्रारविन्दसौरभ्यम् ॥ 158 ॥
पाशाङ्कुशेक्षुचाप-
-प्रसवशरस्फुरितकोमलकराब्जम् ।
काश्मीरपङ्किलाङ्गं
कामेशं मनसि कुर्महे सततम् ॥ 159 ॥
तस्याङ्कभुवि निषण्णां
तरुणकदम्बप्रसूनकिरणाभाम् ।
शीतांशुखण्डचूडां
सीमन्तन्यस्तसान्द्रसिन्दूराम् ॥ 160 ॥
कुङ्कुमललामभास्व-
-न्निटिलां कुटिलतरचिल्लिकायुगलाम् ।
नालीकतुल्यनयनां
नासाञ्चलनटितमौक्तिकाभरणाम् ॥ 161 ॥
अङ्कुरितमन्दहास-
-मरुणाधरकान्तिविजितबिम्बाभाम् ।
कस्तूरीमकरीयुत-
-कपोलसङ्क्रान्तकनकताटङ्काम् ॥ 162 ॥
कर्पूरसान्द्रवीटी-
-कबलितवदनारविन्दकमनीयाम् ।
कम्बुसहोदरकण्ठ-
-प्रलम्बमानाच्छमौक्तिककलापाम् ॥ 163 ॥
कह्लारदामकोमल-
-भुजयुगलस्फुरितरत्नकेयूराम् ।
करपद्ममूलविलस-
-त्काञ्चनमयकटकवलयसन्दोहाम् ॥ 164 ॥
पाणिचतुष्टयविलस-
-त्पाशाङ्कुशपुण्ड्रचापपुष्पास्त्राम् ।
कूलङ्कषकुचशिखरां
कुङ्कुमकर्दमितरत्नकूर्पासाम् ॥ 165 ॥
अणुदायादवलग्ना-
-मम्बुदशोभासनाभिरोमलताम् ।
माणिक्यखचितकाञ्ची-
-मरीचिकाक्रान्तमांसलनितम्बाम् ॥ 166 ॥
करभोरुकाण्डयुगलां
जङ्घाजितकामजैत्रतूणीराम् ।
प्रपदपरिभूतकूर्मां
पल्लवसच्छायपदयुगमनोज्ञाम् ॥ 167 ॥
कमलभवकञ्जलोचन-
-किरीटरत्नांशुरञ्जितपदाब्जाम् ।
उन्मस्तकानुकम्पा-
-मुत्तरलापाङ्गपोषितानङ्गाम् ॥ 168 ॥
आदिमरसावलम्बा-
-मनिदं प्रथमोक्तिवल्लरीकलिकाम् ।
आब्रह्मकीटजननी-
-मन्तः कलयामि सुन्दरीमनिशम् ॥ 169 ॥
कस्तु क्षितौ पटीया-
-न्वस्तु स्तोतुं शिवाङ्कवास्तव्यम् ।
अस्तु चिरन्तनसुकृतैः
प्रस्तुतकाम्याय तन्मम पुरस्तात् ॥ 170 ॥
प्रभुसम्मितोक्तिगम्यं
परमशिवोत्सङ्गतुङ्गपर्यङ्कम् ।
तेजः किञ्चन दिव्यं
पुरतो मे भवतु पुण्ड्रकोदण्डम् ॥ 171 ॥
मधुरिमभरितशरासं
मकरन्दस्यन्दिमार्गणोदारम् ।
कैरविणीविटचूडं
कैवल्यायास्तु किञ्चन महो नः ॥ 172 ॥
अक्षुद्रमिक्षुचापं
परोक्षमवलग्नसीम्नि त्र्यक्षम् ।
क्षपयतु मे क्षेमेतर-
-मुक्षरथप्रेमपक्ष्मलं तेजः ॥ 173 ॥
भृङ्गरुचिसङ्गरकरापाङ्गं
शृङ्गारतुङ्गमरुणाङ्गम् ।
मङ्गलमभङ्गुरं मे
घटयतु गङ्गाधराङ्गसङ्गि महः ॥ 174 ॥
प्रपदाजितकूर्ममूर्जित-
-करुणं भर्मरुचिनिर्मथनदेहम् ।
श्रितवर्म मर्म शम्भोः
किञ्चन मम नर्म शर्म निर्मातु ॥ 175 ॥
कालकुरलालिकालिम-
-कन्दलविजितालि विधृतमणिवालि ।
मिलतु हृदि पुलिनजघनं
बहुलितगलगरलकेलि किमपि महः ॥ 176 ॥
कुङ्कुमतिलकितफाला
कुरुविन्दच्छायपाटलदुकूला ।
करुणापयोधिवेला
काचन चित्ते चकास्तु मे लीला ॥ 177 ॥
पुष्पन्धयरुचिवेण्यः
पुलिनाभोगत्रपाकरश्रेण्यः ।
जीयासुरिक्षुपाण्यः
काश्चन कामारिकेलिसाक्षिण्यः ॥ 178 ॥
तपनीयांशुकभांसि
द्राक्षामाधुर्यनास्तिकवचांसि ।
कतिचन शुचं महांसि
क्षपयतु कपालितोषितमनांसि ॥ 179 ॥
असितकचमायताक्षं
कुसुमशरं कूलमुद्वहकृपार्द्रम् ।
आदिमरसाधिदैवत-
-मन्तः कलये हराङ्कवासि महः ॥ 180 ॥
कर्णोपान्ततरङ्गित-
-कटाक्षविस्पन्दिकण्ठदघ्नकृपाम् ।
कामेश्वराङ्कनिलयां
कामपि विद्यां पुरातनीं कलये ॥ 181 ॥
अरविन्दकान्त्यरुन्तुद-
-विलोचनद्वन्द्वसुन्दरमुखेन्दु ।
छन्दः कन्दलमन्दिर-
-मन्तःपुरमैन्दुशेखरं वन्दे ॥ 182 ॥
बिम्बिनिकुरम्बडम्बर-
-विडम्बकच्छायमम्बरवलग्नम् ।
कम्बुगलमम्बुदकुचं
बिम्बोकं कमपि चुम्बतु मनो मे ॥ 183 ॥
कमपि कमनीयरूपं
कलयाम्यन्तः कदम्बकुसुमाढ्यम् ।
चम्पकरुचिरसुवेषैः
सम्पादितकान्त्यलङ्कृतदिगन्तम् ॥ 184 ॥
शम्पारुचिभर-
-गर्हासम्पादककान्तिकवचितदिगन्तम् ।
सिद्धान्तं निगमानां
शुद्धान्तं किमपि शूलिनः कलये ॥ 185 ॥
उद्यद्दिनकरशोणा-
-नुत्पलबन्धुस्तनन्धयापीडान् ।
करकलितपुण्ड्रचापा-
-न्कलये कानपि कपर्दिनः प्राणान् ॥ 186 ॥
रशनालसज्जघनया
रसनाजीवातुचापभासुरया ।
घ्राणायुष्करशरया
घ्रातं चित्तं कयापि वासनया ॥ 187 ॥
सरसिजसहयुध्वदृशा
शम्पालतिकासनाभिविग्रहया ।
भासा कयापि चेतो
नासामणिशोभिवदनया भरितम् ॥ 188 ॥
नवयावकाभसिचयान्वितया
गजयानया दयापरया ।
धृतयामिनीशकलया
धिया कयापि क्षतामया हि वयम् ॥ 189 ॥
अलमलमकुसुमबाणै-
-रबिम्बशोणैरपुण्ड्रकोदण्डैः ।
अकुमुदबान्धवचूडै-
-रन्यैरिह जगति दैवतं मन्यैः ॥ 190 ॥
कुवलयसदृक्षनयनैः
कुलगिरिकूटस्थबन्धुकुचभारैः ।
करुणास्पन्दिकटाक्षैः
कवचितचित्तोऽस्मि कतिपयैः कुतुकैः ॥ 191 ॥
नतजनसुलभाय नमो
नालीकसनाभिलोचनाय नमः ।
नन्दितगिरिशाय नमो
महसे नवनीपपाटलाय नमः ॥ 192 ॥
कादम्बकुसुमदाम्ने
कायच्छायाकणायितार्यम्णे ।
सीम्ने चिरन्तनगिरां
भूम्ने कस्मैचिदाददे प्रणतिम् ॥ 193 ॥
कुटिलकबरीभरेभ्यः
कुङ्कुमसब्रह्मचारिकिरणेभ्यः ।
कूलङ्कषस्तनेभ्यः
कुर्मः प्रणतिं कुलाद्रिकुतुकेभ्यः ॥ 194 ॥
कोकनदशोणचरणा-
-त्कोमलकुरलालिविजितशैवालात् ।
उत्पलसगन्धिनयना-
-दुररीकुर्मो न देवतमान्याम् ॥ 195 ॥
आपाटलाधराणा-
-मानीलस्निग्धबर्बरकचानाम् ।
आम्नायजीवनाना-
-माकूतानां हरस्य दासोऽहम् ॥ 196 ॥
पुङ्खितविलासहास-
-स्फुरितासु पुराहिताङ्कनिलयासु ।
मग्नं मनो मदीयं
कास्वपि कामारिजीवनाडीषु ॥ 197 ॥
ललिता पातु शिरो मे
ललाटमम्बा च मधुमतीरूपा ।
भ्रूयुग्मं च भवानी
पुष्पशरा पातु लोचनद्वन्द्वम् ॥ 198 ॥
पायान्नासां बाला
सुभगा दन्तांश्च सुन्दरी जिह्वाम् ।
अधरोष्ठमादिशक्ति-
-श्चक्रेशी पातु मे चिरं चिबुकम् ॥ 199 ॥
कामेश्वरी च कर्णौ
कामाक्षी पातु गण्डयोर्युगलम् ।
शृङ्गारनायिकाव्या-
-द्वदनं सिंहासनेश्वरी च गलम् ॥ 200 ॥
स्कन्दप्रसूश्च पातु
स्कन्धौ बाहू च पाटलाङ्गी मे ।
पाणी च पद्मनिलया
पायादनिशं नखावलीर्विजया ॥ 201 ॥
कोदण्डिनी च वक्षः
कुक्षिं चाव्यात् कुलाचलतनूजा ।
कल्याणी च वलग्नं
कटिं च पायात्कलाधरशिखण्डा ॥ 202 ॥
ऊरुद्वयं च पाया-
-दुमा मृडानी च जानुनी रक्षेत् ।
जङ्घे च षोडशी मे
पायात् पादौ च पाशसृणिहस्ता ॥ 203 ॥
प्रातः पातु परा मां
मध्याह्ने पातु मणिगृहाधीशा ।
शर्वाण्यवतु च सायं
पायाद्रात्रौ च भैरवी साक्षात् ॥ 204 ॥
भार्यां रक्षतु गौरीं
पायात् पुत्रांश्च बिन्दुगृहपीठा ।
श्रीविद्या च यशो मे
शीलं चाव्याच्चिरं महाराज्ञी ॥ 205 ॥
पवनमयि पावकमयि
क्षोणीमयि गगनमयि कृपीटमयि ।
रविमयि शशिमयि दिङ्मयि
समयमयि प्राणमयि शिवे पाहि ॥ 206 ॥
कालि कपालिनि शूलिनि
भैरवि मातङ्गि पञ्चमि त्रिपुरे ।
वाग्देवि विन्ध्यवासिनि
बाले भुवनेशि पालय चिरं माम् ॥ 207 ॥
अभिनवसिन्दूराभा-
-मम्ब त्वां चिन्तयन्ति ये हृदये ।
उपरि निपतन्ति तेषा-
-मुत्पलनयनाकटाक्षकल्लोलाः ॥ 208 ॥
वर्गाष्टकमिलिताभि-
-र्वशिनीमुख्याभिरावृतां भवतीम् ।
चिन्तयतां सितवर्णां
वाचो निर्यान्त्ययत्नतो वदनात् ॥ 209 ॥
कनकशलाकागौरीं
कर्णव्यालोलकुण्डलद्वितयाम् ।
प्रहसितमुखीं च भवतीं
ध्यायन्तो ये त एव भूधनदाः ॥ 210 ॥
शीर्षाम्भोरुहमध्ये
शीतलपीयूषवर्षिणीं भवतीम् ।
अनुदिनमनुचिन्तयता-
-मायुष्यं भवति पुष्कलमवन्याम् ॥ 211 ॥
मधुरस्मितां मदारुणनयनां
मातङ्गकुम्भवक्षोजाम् ।
चन्द्रवतंसिनीं त्वां
सविधे पश्यन्ति सुकृतिनः केचित् ॥ 212 ॥
ललितायाः स्तवरत्नं
ललितपदाभिः प्रणीतमार्याभिः ।
प्रतिदिनमवनौ पठतां
फलानि वक्तुं प्रगल्भते सैव ॥ 213 ॥
सदसदनुग्रहनिग्रह-
-गृहीतमुनिविग्रहो भगवान् ।
सर्वासामुपनिषदां
दुर्वासा जयति देशिकः प्रथमः ॥ 214 ॥
इति महर्षिदुर्वासः विरचितं श्रीललितास्तवरत्नम् ।
vande gajendravadanaṃ
vāmāṅkārūḍhavallabhāśliṣṭam |
kuṅkumaparāgaśoṇaṃ
kuvalayinījārakorakāpīḍam || 1 ||
sa jayati suvarṇaśailaḥ
sakalajagaccakrasaṅghaṭitamūrtiḥ |
kāñcananikuñjavāṭī-
-kandaladamarīprapañcasaṅgītaḥ || 2 ||
harihayanairṛtamāruta-
-haritāmanteṣvavasthitaṃ tasya |
vinumaḥ sānutritayaṃ
vidhiharigaurīśaviṣṭapādhāram || 3 ||
madhye punarmanohara-
-ratnarucistabakarañjitadigantam |
upari catuḥśatayojana-
-muttuṅgaṃ śṛṅgapuṅgavamupāse || 4 ||
tatra catuḥśatayojana-
-pariṇāhaṃ devaśilpinā racitam |
nānāsālamanojñaṃ
namāmyahaṃ nagaramādividyāyāḥ || 5 ||
prathamaṃ sahasrapūrvaka-
-ṣaṭśatasaṅkhyākayojanaṃ paritaḥ |
valayīkṛtasvagātraṃ
varaṇaṃ śaraṇaṃ vrajāmyayorūpam || 6 ||
tasyottare samīraṇa-
-yojanadūre taraṅgitacchāyaḥ |
ghaṭayatu mudaṃ dvitīyo
ghaṇṭāstanasāranirmitaḥ sālaḥ || 7 ||
ubhayorantarasīma-
-nyuddāmabhramararañjitodāram |
upavanamupāsmahe vaya-
-mūrīkṛtamandamārutasyandam || 8 ||
āliṅgya bhadrakālī-
-māsīnastatra hariśilāśyāmām |
manasi mahākālo me
viharatu madhupānavibhramannetraḥ || 9 ||
tārtīyīko varaṇa-
-stasyottarasīmni vātayojanataḥ |
tāmreṇa racitamūrti-
-stanutāmācandratārakaṃ bhadram || 10 ||
madhye tayośca maṇimaya-
-pallavaśākhāprasūnapakṣmalitām |
kalpānokahavāṭīṃ
kalaye makarandapaṅkilāvālām || 11 ||
tatra madhumādhavaśrī-
-taruṇībhyāṃ taraladṛkcakorābhyām |
āliṅgito'vatānmā-
-maniśaṃ prathamarturāttapuṣpāstraḥ || 12 ||
namata taduttarabhāge
nākipathollaṅghiśṛṅgasaṅghātam |
sīsākṛtiṃ turīyaṃ
sitakiraṇālokanirmalaṃ sālam || 13 ||
sāladvayāntarāle
saralālikapotacāṭusubhagāyām |
santānavāṭikāyāṃ
saktaṃ ceto'stu satatamasmākam || 14 ||
tatra tapanātirūkṣaḥ
sāmrājñīcaraṇasāndritasvāntaḥ |
śukraśuciśrīsahito
grīṣmarturdiśatu kīrtimākalpam || 15 ||
uttarasīmani tasyo-
-nnataśikharotkampihāṭakapatākaḥ |
prakaṭayatu pañcamo naḥ
prākāraḥ kuśalamārakūṭamayaḥ || 16 ||
prākārayośca madhye
pallavitānyabhṛtapañcamonmeṣā |
haricandanadruvāṭī-
-haratādāmūlamasmadanutāpam || 17 ||
tatra nabhaḥ śrīmukhyai-
-staruṇīvargaiḥ samanvitaḥ paritaḥ |
vajrāṭṭahāsamukharo
vāñchāpūrtiṃ tanotu varṣartuḥ || 18 ||
mārutayojanadūre
mahanīyastasya cottare bhāge |
bhadraṃ kṛṣīṣṭa ṣaṣṭhaḥ
prākāraḥ pañcalohadhātumayaḥ || 19 ||
anayormadhye santata-
-maṅkūraddivyakusumagandhāyām |
mandāravāṭikāyāṃ
mānasamaṅgīkarotu me vihṛtim || 20 ||
tasyāmiṣorjalakṣmī-
-taruṇībhyāṃ śaradṛtuḥ sadā sahitaḥ |
abhyarcayan sa jīyā-
-dambāmāmodameduraiḥ kusumaiḥ || 21 ||
tasyarṣisaṅkhyayojana-
-dūre dedīpyamānaśṛṅgaughaḥ |
kaladhautakalitamūrtiḥ
kalyāṇaṃ diśatu saptamaḥ sālaḥ || 22 ||
madhye tayormarutpatha
laṅghitaviṭapāgravirutakalakaṇṭhā |
śrīpārijātavāṭī
śriyamaniśaṃ diśatu śītaloddeśā || 23 ||
tasyāmatipriyābhyāṃ
saha khelan sahasahasyalakṣmībhyām |
sāmanto jhaṣaketo-
-rhemanto bhavatu hemavṛddhyai naḥ || 24 ||
uttaratastasya mahā-
-nudbhaṭahutabhukśikhāruṇamayūkhaḥ |
tapanīyakhaṇḍaracita-
-stanutādāyuṣyamaṣṭamo varaṇaḥ || 25 ||
kādambavipinavāṭī-
-manayormadhyabhuvi kalpitāvāsām |
kalayāmi sūnakoraka-
-kandalitāmodatundilasamīrām || 26 ||
tasyāmatiśiśirākṛti-
-rāsīnastapatapasyalakṣmībhyām |
śivamaniśaṃ kurutānme
śiśirartuḥ satataśītaladigantaḥ || 27 ||
tasyāṃ kadambavāṭyāṃ
tatprasavāmodamilitamadhugandham |
saptāvaraṇamanojñaṃ
śaraṇaṃ samupaimi mantriṇīśaraṇam || 28 ||
tatrālaye viśāle
tapanīyāracitataralasopāne |
māṇikyamaṇḍapānta-
-rmahite siṃhāsane sumaṇikhacite || 29 ||
bindutripañcakoṇa-
-dvipanṛpavasuvedadalakurekhāḍhye |
cakre sadā niviṣṭāṃ
ṣaṣṭhyaṣṭatriṃśadakṣareśānīm || 30 ||
tāpiñchamecakābhāṃ
tālīdalaghaṭitakarṇatāṭaṅkām |
tāmbūlapūritamukhīṃ
tāmrādharabimbadṛṣṭadarahāsām || 31 ||
kuṅkumapaṅkiladehāṃ
kuvalayajīvātuśāvakavataṃsām |
kokanadaśoṇacaraṇāṃ
kokilanikvāṇakomalālāpām || 32 ||
vāmāṅgagalitacūlīṃ
vanamālyakadambamālikābharaṇām |
muktālalantikāñcita
mugdhālikamilitacitrakodārām || 33 ||
karavidhṛtakīraśāvaka-
-kalaninadavyaktanikhilanigamārthām |
vāmakucasaṅgivīṇāvādana-
-saukhyārdhamīlitākṣiyugām || 34 ||
āpāṭalāṃśukadharā-
-mādirasonmeṣavāsitakaṭākṣām |
āmnāyasāragulikā-
-mādyāṃ saṅgītamātṛkāṃ vande || 35 ||
tasya ca suvarṇasāla-
-syottaratastaruṇakuṅkumacchāyaḥ |
śamayatu mama santāpaṃ
sālo navamaḥ sa puṣparāgamayaḥ || 36 ||
anayorantaravasudhāḥ
praṇumaḥ pratyagrapuṣparāgamayīḥ |
siṃhāsaneśvarīmanu-
-cintananistandrasiddhanīrandhrāḥ || 37 ||
tatsālottaradeśe
taruṇajapākiraṇadhoraṇīśoṇaḥ |
praśamayatu padmarāga-
-prākāro mama parābhavaṃ daśamaḥ || 38 ||
antarabhūkṛtavāsā-
-nanayorapanītacittavaimatyān |
cakreśīpadabhaktāṃ-
-ścāraṇavargānaharniśaṃ kalaye || 39 ||
sāraṅgavāhayojanadūre-
-'saṅghaṭitaketanastasya |
gomedakena racito
gopāyatu māṃ samunnataḥ sālaḥ || 40 ||
vapradvayāntarorvyāṃ
vaṭukairvividhaiśca yoginībṛndaiḥ |
satataṃ samarcitāyāḥ
saṅkarṣaṇyāḥ praṇaumi caraṇābjam || 41 ||
tāpasayojanadūre
tasya samuttuṅga gopuropetaḥ |
vāñchāpūrtyai bhavatā-
-dvajramaṇīnikaranirmito vapraḥ || 42 ||
varaṇadvitayāntarato
vāsajuṣo vihitamadhurasāsvādāḥ |
rambhādivibudhaveśyā
racayantu mahāntamasmadānandam || 43 ||
tatra sadā pravahantī
taṭinī vajrābhidhā ciraṃ jīyāt |
caṭulormijālanṛtya-
-tkalahaṃsīkulakalakvaṇitapuṣṭā || 44 ||
rodhasi tasyā rucire
vajreśī jayati vajrabhūṣāḍhyā |
vajrapradānatoṣita-
-vajrimukhatridaśavinutacāritrā || 45 ||
tasyodīcyāṃ hariti
stavakitasuṣamāvalīḍhaviyadantaḥ |
vaiḍūryaratnaracito
vaimalyaṃ diśatu cetaso varaṇaḥ || 46 ||
adhimadhyametayoḥ puna-
-rambācaraṇāvalambitasvāntān |
kārkoṭakādināgān
kalayāmaḥ kiṃ ca balimukhān danujān || 47 ||
gandhavahasaṅkhyayojana-
-dūre gaganordhvajāṅghikastasya |
vāsavamaṇipraṇīto
varaṇo bahalayatu vaiduṣīṃ viśadām || 48 ||
madhyakṣoṇyāmanayo-
-rmahendranīlātmakāni ca sarāṃsi |
śātodarīsahāyā-
-nbhūpālānapi punaḥ punaḥ praṇumaḥ || 49 ||
āśugayojanadūre
tasyordhvaṃ kāntidhavalitadigantaḥ |
muktāviracitagātro
muhurasmākaṃ mude bhavatu sālaḥ || 50 ||
āvṛttyoradhimadhyaṃ
pūrvasyāṃ diśi purandaraḥ śrīmān |
abhramuviṭādhirūḍho
vibhramamasmākamaniśamātanutāt || 51 ||
tatkoṇe vyajanasru-
-ktomarapātrasruvānnaśaktidharaḥ |
svāhāsvadhāsametaḥ
sukhayatu māṃ havyavāhanaḥ suciram || 52 ||
dakṣiṇadigantarāle
daṇḍadharo nīlanīradacchāyaḥ |
tripurāpadābjabhaktastirayatu
mama nikhilamaṃhasāṃ nikaram || 53 ||
tasyaiva paścimāyāṃ
diśi dalitendīvaraprabhāśyāmaḥ |
kheṭāsiyaṣṭidhārī
khedānapanayatu yātudhāno me || 54 ||
tasyā uttaradeśe
dhavalāṅgo vipulajhaṣavarārūḍhaḥ |
pāśāyudhāttapāṇiḥ
pāśī vidalayatu pāśajālāni || 55 ||
vande taduttarahari-
-tkoṇe vāyuṃ camūruvaravāham |
korakitatattvabodhā-
-ngorakṣapramukhayogino'pi muhuḥ || 56 ||
taruṇīriḍāpradhānā-
-stisro vātasya tasya kṛtavāsāḥ |
pratyagrakāpiśāyana-
-pānaparibhrāntalocanāḥ kalaye || 57 ||
tallokapūrvabhāge
dhanadaṃ dhyāyāmi śevadhikuleśam |
api māṇibhadramukhyā-
-nambācaraṇāvalambino yakṣān || 58 ||
tasyaiva pūrvasīmani
tapanīyāracitagopure nagare |
kātyāyanīsahāyaṃ
kalaye śītāṃśukhaṇḍacūḍālam || 59 ||
tatpuraṣoḍaśavaraṇa-
-sthalabhājastaruṇacandracūḍālān |
rudrādhyāye paṭhitā-
-nrudrāṇīsahacarānbhaje rudrān || 60 ||
pavamānasaṅkhyayojana-
-dūre bālatṛṇmecakastasya |
sālo marakataracitaḥ
sampadamacalāṃ śriyaṃ ca puṣṇātu || 61 ||
āvṛtiyugmāntarato
haritamaṇīnivahamecake deśe |
hāṭakatālīvipinaṃ
hālāghaṭaghaṭitaviṭapamākalaye || 62 ||
tatraiva mantriṇīgṛha-
-pariṇāhaṃ taralaketanaṃ sadanam |
marakatasaudhamanojñaṃ
dadyādāyūṃṣi daṇḍanāthāyāḥ || 63 ||
sadane tatra harinmaṇi-
-saṅghaṭite maṇḍape śatastambhe |
kārtasvaramayapīṭhe
kanakamayāmburuhakarṇikāmadhye || 64 ||
bindutrikoṇavartula-
-ṣaḍasravṛttadvayānvite cakre |
sañcāriṇī daśottara-
śatārṇamanurājakamalakalahaṃsī || 65 ||
kolavadanā kuśeśaya-
-nayanā kokārimaṇḍitaśikhaṇḍā |
santaptakāñcanābhā
sandhyāruṇacelasaṃvṛtanitambā || 66 ||
halamusalaśaṅkhacakrā-
-'ṅkuśapāśābhayavarasphuritahastā |
kūlaṅkaṣānukampā
kuṅkumajambālitastanābhogā || 67 ||
dhūrtānāmatidūrā-
-vārtāśeṣāvalagnakamanīyā |
ārtālīśubhadātrī
vārtālī bhavatu vāñchitārthāya || 68 ||
tasyāḥ parito devīḥ
svapneśyunmattabhairavīmukhyāḥ |
praṇamata jambhinyādyāḥ
bhairavavargāṃśca hetukapramukhān || 69 ||
pūrvoktasaṅkhyayojana-
-dūre pūyāṃśupāṭalastasya |
vidrāvayatu madārtiṃ
vidrumasālo viśaṅkaṭadvāraḥ || 70 ||
āvaraṇayoraharniśa-
-mantarabhūmauprakāśaśālinyām |
āsīnamambujāsana-
-mabhinavasindūragauramahamīḍe || 71 ||
varaṇasya tasya māruta-
-yojanato vipulagopuradvāraḥ |
sālo nānāratnaiḥ
saṅghaṭitāṅgaḥ kṛṣīṣṭa madabhīṣṭam || 72 ||
antarakakṣyāmanayo-
-raviralaśobhāpicaṇḍiloddeśām |
māṇikyamaṇḍapākhyāṃ
mahatīmadhihṛdayamaniśamākalaye || 73 ||
tatra sthitaṃ prasannaṃ
taruṇatamālapravālakiraṇābham |
karṇāvalambikuṇḍala-
-kandalitābhīśukavacitakapolam || 74 ||
śoṇādharaṃ śucismita-
-meṇāṅkavadanamedhamānakṛpam |
mugdhaiṇamadaviśeṣaka-
-mudritaniṭilendurekhikāruciram || 75 ||
nālīkadalasahodara-
-nayanāñcalaghaṭitamanasijākūtam |
kamalākaṭhinapayodhara-
-kastūrīghusṛṇapaṅkiloraskam || 76 ||
cāmpeyagandhikaiśyaṃ
śampāsabrahmacārikauśeyam |
śrīvatsakaustubhadharaṃ
śritajanarakṣādhurīṇacaraṇābjam || 77 ||
kambusudarśanavilasa-
-tkarapadmaṃ kaṇṭhalolavanamālam |
mucukundamokṣaphaladaṃ
mukundamānandakandamavalambe || 78 ||
tadvaraṇottarabhāge
tārāpatibimbacumbinijaśṛṅgaḥ |
vividhamaṇīgaṇaghaṭito
vitaratu sālo vinirmalāṃ dhiṣaṇām || 79 ||
prākāradvitayāntara-
-kakṣyāṃ pṛthuratnanikarasaṅkīrṇām |
namata sahasrastambhaka-
-maṇḍapanāmnātiviśrutāṃ bhuvane || 80 ||
praṇumastatra bhavānī-
-sahacaramīśānamindukhaṇḍadharam |
śṛṅgāranāyikāmanu-
-śīlanabhājo'pi bhṛṅginandimukhān || 81 ||
tasyaiṇavāhayojana-
-dūre vande manomayaṃ vapram |
aṅkūranmaṇikiraṇā-
-mantarakakṣyāṃ ca nirmalāmanayoḥ || 82 ||
tatraivāmṛtavāpīṃ
taralataraṅgāvalīḍhataṭayugmām |
muktāmayakalahaṃsī-
-mudritakanakāravindasandohām || 83 ||
śakropalamayabhṛṅgī-
-saṅgītonmeṣaghoṣitadigantām |
kāñcanamayāṅgavilasa-
-tkāraṇḍavaṣaṇḍatāṇḍavamanojñām || 84 ||
kuruvindātmakahallaka-
-korakasuṣamāsamūhapāṭalitām |
kalaye sudhāsvarūpāṃ
kandalitāmandakairavāmodām || 85 ||
tadvāpikāntarāle tarale
maṇipotasīmni viharantīm |
sindūrapāṭalāṅgīṃ
sitakiraṇāṅkūrakalpitavataṃsām || 86 ||
parvendubimbavadanāṃ
pallavaśoṇādharasphuritahāsām |
kuṭilakabarīṃ kuraṅgī-
-śiśunayanāṃ kuṇḍalasphuritagaṇḍām || 87 ||
nikaṭasthapotanilayāḥ
śaktīḥ śayavidhṛtahemaśṛṅgajalaiḥ |
pariṣiñcantīṃ parita-
-stārāṃ tāruṇyagarvitāṃ vande || 88 ||
prāguktasaṅkhyayojanadūre
praṇamāmi buddhimayasālam |
anayorantarakakṣyā-
-maṣṭāpadapuṣṭamedinīṃ rucirām || 89 ||
kādambarīnidhānāṃ
kalayāmyānandavāpikāṃ tasyām |
śoṇāśmanivahanirmita-
-sopānaśreṇiśobhamānataṭīm || 90 ||
māṇikyataraṇinilayāṃ
madhye tasyā madāruṇakapolām |
amṛteśītyabhidhānā-
-mantaḥ kalayāmi vāruṇīṃ devīm || 91 ||
sauvarṇakenipātana-
-hastāḥ saundaryagarvitā devyaḥ |
tatpurataḥ sthitibhājo
vitarantvasmākamāyuṣo vṛddhim || 92 ||
tasya pṛṣadaśvayojana-
-dūre'haṅkārasālamatituṅgam |
vande tayośca madhye
kakṣyāṃ valamānamalayapavamānām || 93 ||
vinumo vimarśavāpīṃ
sauṣumnasudhāsvarūpiṇīṃ tatra |
velātilaṅghyavīcī-
-kolāhalabharitakūlavanavāṭīm || 94 ||
tatraiva salilamadhye
tāpiñchadalaprapañcasuṣamābhām |
śyāmalakañcukalasitāṃ
śyāmāviṭabimbaḍambaraharāsyām || 95 ||
ābhugnamasṛṇacillī-
-hasitāyugmaśarakārmukavilāsām |
mandasmitāñcitamukhīṃ
maṇimayatāṭaṅkamaṇḍitakapolām || 96 ||
kuruvindataraṇinilayāṃ
kulācalaspardhikucanamanmadhyām |
kuṅkumaviliptagātrīṃ
kurukullāṃ manasi kurmahe satatam || 97 ||
tatsālottarabhāge
bhānumayaṃ vapramāśraye dīptam |
madhyaṃ ca vipulamanayo-
-rmanye viśrāntamātapodgāram || 98 ||
tatra kuruvindapīṭhe
tāmarase kanakakarṇikāghaṭite |
āsīnamaruṇavāsasa-
-mamlānaprasavamālikābharaṇam || 99 ||
cakṣuṣmatīprakāśana-
-śakticchāyāsamāracitakelim |
māṇikyamukuṭaramyaṃ
manye mārtāṇḍabhairavaṃ hṛdaye || 100 ||
indumayasālamīḍe
tasyottaratastuṣāragirigauram |
atyantaśiśiramāruta-
-manayormadhyaṃ ca candrikodgāram || 101 ||
tatra prakāśamānaṃ
tārānikaraiḥ pariṣkṛtoddeśam |
amṛtamayakāntikandala-
-mantaḥ kalayāmi kundasitamindum || 102 ||
śṛṅgārasālamīḍe
śṛṅgollasitaṃ taduttare bhāge |
madhyasthale tayorapi
mahitāṃ śṛṅgārapūrvikāṃ parikhām || 103 ||
tatra maṇinausthitābhi-
-stapanīyāviracitāgrahastābhiḥ |
śṛṅgāradevatābhiḥ
sahitaṃ parikhādhipaṃ bhaje madanam || 104 ||
śṛṅgāravaraṇavaryasyottarataḥ
sakalavibudhasaṃsevyam |
cintāmaṇigaṇaracitaṃ
cintāṃ dūrīkarotu me sadanam || 105 ||
maṇisadanasālayoradhi-
-madhyaṃ daśatālabhūmiruhadīrghaiḥ |
parṇaiḥ suvarṇavarṇai-
-ryuktāṃ kāṇḍaiśca yojanottuṅgaiḥ || 106 ||
mṛdulaistālīpañcaka-
-mānairmilitāṃ ca kesarakadambaiḥ |
santatagalitamaranda-
-srotoniryanmilindasandohām || 107 ||
pāṭīrapavanabālaka-
-dhāṭīniryatparāgapiñjaritām |
kalahaṃsīkulakalakala-
-kūlaṅkaṣaninadanicayakamanīyām || 108 ||
padmāṭavīṃ bhajāmaḥ
parimalakallolapakṣmalopāntām |
[ devyarghyapātradhārī
tasyāḥ pūrvadiśi daśakalāyuktaḥ | ]
valayitamūrtirbhagavā-
-nvahniḥ krośonnataściraṃ pāyāt || 109 ||
tatrādhāre devyāḥ
pātrīrūpaḥ prabhākaraḥ śrīmān |
dvādaśakalāsameto
dhvāntaṃ mama bahulamāntaraṃ bhindyāt || 110 ||
tasmin dineśapātre
taraṅgitāmodamamṛtamayamarghyam |
candrakalātmakamamṛtaṃ
sāndrīkuryādamandamānandam || 111 ||
amṛte tasminnabhito
viharantyo vividhamaṇitaraṇibhājaḥ |
ṣoḍaśa kalāḥ sudhāṃśoḥ
śokāduttārayantu māmaniśam || 112 ||
tatraiva vihṛtibhājo
dhātṛmukhānāṃ ca kāraṇeśānām |
sṛṣṭyādirūpikāstāḥ
śamayantvakhilāḥ kalāśca santāpam || 113 ||
kīnāśavaruṇakinnara-
-rājadiganteṣu ratnagehasya |
kalayāmi tānyajasraṃ
kalayantvāyuṣyamarghyapātrāṇi || 114 ||
pātrasthalasya purataḥ
padmāramaṇavidhipārvatīśānām |
bhavanāni śarmaṇe no
bhavantu bhāsā pradīpitajaganti || 115 ||
sadanasyānalakoṇe
satataṃ praṇamāmi kuṇḍamāgneyam |
tatra sthitaṃ ca vahniṃ
taralaśikhājaṭilamambikājanakam || 116 ||
tasyāsuradiśi tādṛśa-
-ratnaparisphuritaparvanavakāḍhyam |
cakrātmakaṃ śatāṅgaṃ
śatayojanamunnataṃ bhaje divyam || 117 ||
tatraiva diśi niṣaṇṇaṃ
tapanīyadhvajaparamparāśliṣṭam |
rathamaparaṃ ca bhavānyā
racayāmo manasi ratnamayacūḍam || 118 ||
bhavanasya vāyubhāge
pariṣkṛto vividhavaijayantībhiḥ |
racayatu mudaṃ rathendraḥ
saciveśānyāḥ samastavandyāyāḥ || 119 ||
kurmo'dhihṛdayamaniśaṃ
kroḍāsyāyāḥ śatāṅgamūrdhanyam |
rudradiśi ratnadhāmno
ruciraśalākāprapañcakañcukitam || 120 ||
parito devīdhāmnaḥ
praṇītavāsā manusvarūpiṇyaḥ |
kurvantu raśmimālā-
-kṛtayaḥ kuśalāni devatā nikhilāḥ || 121 ||
prāgdvārasya bhavānī-
-dhāmnaḥ pārśvadvayāracitavāse |
mātaṅgīkiṭimukhyau
maṇisadane manasi bhāvayāmi ciram || 122 ||
yojanayugalābhogā
tatkrośapariṇāhayaiva bhittyā ca |
cintāmaṇigṛhabhūmi-
-rjīyādāmnāyamayacaturdvārā || 123 ||
dvāre dvāre dhāmnaḥ
piṇḍībhūtā navīnabimbābhāḥ |
vidadhatu vipulāṃ kīrtiṃ
divyā lauhityasiddhyo devyaḥ || 124 ||
maṇisadanasyāntarato
mahanīye ratnavedikāmadhye |
bindumayacakramīḍe
pīṭhānāmupari viracitāvāsam || 125 ||
cakrāṇāṃ sakalānāṃ
prathamamadhaḥ sīmaphalakavāstavyāḥ |
aṇimādisiddhayo mā-
-mavantu devī prabhāsvarūpiṇyaḥ || 126 ||
aṇimādisiddhiphalaka-
-syoparihariṇāṅkakhaṇḍakṛtacūḍāḥ |
bhadraṃ pakṣmalayantu
brāhmīpramukhāśca mātaro'smākam || 127 ||
tasyopari maṇiphalake
tāruṇyottuṅgapīnakucabhārāḥ |
saṅkṣobhiṇīpradhānāḥ
bhrānti vidrāvayantu daśa mudrāḥ || 128 ||
phalakatrayasvarūpe
pṛthule trailokyamohane cakre |
dīvyantu prakaṭākhyā-
-stāsāṃ kartrīṃ ca bhagavatī tripurā || 129 ||
tadupari vipule dhiṣṇye
taraladṛśastaruṇakokanadabhāsaḥ |
kāmākarṣiṇyādyāḥ
kalaye devīḥ kalādharaśikhaṇḍāḥ || 130 ||
sarvāśāparipūrakacakre-
-'smin guptayoginīsevyāḥ |
tripureśī mama duritaṃ
tudyāt kaṇṭhāvalambimaṇihārā || 131 ||
tasyopari maṇipīṭhe
tāmrāmbhoruhadalaprabhāśoṇāḥ |
dhyāyāmyanaṅgakusumā-
-pramukhā devīśca vidhṛtakūrpāsāḥ || 132 ||
saṅkṣobhakārake'smiṃ-
-ścakre śrītripurasundarī sākṣāt |
goptrī guptatarākhyāḥ
gopāyatu māṃ kṛpārdrayā dṛṣṭyā || 133 ||
saṅkṣobhiṇīpradhānāḥ
śaktīstasyordhvavalayakṛtavāsāḥ |
ālolanīlaveṇī-
-rantaḥ kalayāmi yauvanonmattāḥ || 134 ||
saubhāgyadāyake'smiṃ-
-ścakreśī tripuravāsinī jīyāt |
śaktīśca sampradāyābhidhāḥ
samastāḥ pramodayantvaniśam || 135 ||
maṇipīṭhopari tāsāṃ
mahati caturhastavistṛte valaye |
santataviracitavāsāḥ
śaktīḥ kalayāmi sarvasiddhimukhāḥ || 136 ||
sarvārthasādhakākhye
cakre'muṣmin samastaphaladātrī |
tripurā śrīrmama kuśalaṃ
diśatāduttīrṇayoginīsevyā || 137 ||
tāsāṃ nilayasyopari
dhiṣṇye kausumbhakañcukamanojñāḥ |
sarvājñādyāḥ devyaḥ
sakalāḥ sampādayantu mama kīrtim || 138 ||
cakre samastarakṣā-
-karanāmnyasmin samastajanasevyām |
manasi nigarbhāsahitāṃ
manye śrītripuramālinīṃ devīm || 139 ||
sarvajñāsadanasyopari
cakre vipule samākalitagehāḥ |
vande vaśinīmukhyāḥ
śaktīḥ sindūrareṇurucaḥ || 140 ||
śrīsarvarogaharākhya-
-cakre'smiṃstripurapūrvikāṃ siddhām |
vande rahasyanāmnā
vedyābhiḥ śaktibhiḥ sadā sevyām || 141 ||
vaśinīgṛhopariṣṭā-
-dviṃśatihastonnate mahāpīṭhe |
śamayantu śatrubṛndaṃ
śastrāṇyastrāṇi cādidampatyoḥ || 142 ||
śastrasadanopariṣṭā-
-dvalaye valavairiratnasaṅghaṭite |
kāmeśvarīpradhānāḥ
kalaye devīḥ samastajanavandyāḥ || 143 ||
cakre'tra sarvasiddhiprada-
-nāmani sarvaphaladātrī |
tripurāmbāvatu satataṃ
parāpararahasyayoginīsevyā || 144 ||
kāmeśvarīgṛhoparivalaye
vividhamanusampradāyajñāḥ |
catvāro yuganāthā
jayantu mitreśapūrvakāḥ guravaḥ || 145 ||
nāthabhavanopariṣṭā-
-nnānāratnacayamedure pīṭhe |
kāmeśyādyā nityāḥ
kalayantu mudaṃ tithisvarūpiṇyaḥ || 146 ||
nityāsadanasyopari
nirmalamaṇinivahaviracite dhiṣṇye |
kuśalaṃ ṣaḍaṅgadevyaḥ
kalayantvasmākamuttaralanetrāḥ || 147 ||
sadanasyopari tāsāṃ
sarvānandamayanāmake bindau |
pañcabrahmākārāṃ
mañcaṃ praṇamāmi maṇigaṇākīrṇam || 148 ||
parito maṇimañcasya
pralambamānā niyantritā pāśaiḥ |
māyāmayī javanikā
mama duritaṃ haratu mecakacchāyā || 149 ||
mañcasyopari lamba-
-nmadanīpunnāgamālikābharitam |
harigopamayavitānaṃ
haratādālasyamaniśamasmākam || 150 ||
paryaṅkasya bhajāmaḥ
pādānbimbāmbudenduhemarucaḥ |
ajaharirudreśamayā-
-nanalāsuramāruteśakoṇasthān || 151 ||
phalakaṃ sadāśivamayaṃ
praṇaumi sindūrareṇukiraṇābham |
ārabhyāṅgeśīnāṃ
sadanātkalitaṃ ca ratnasopānam || 152 ||
paṭṭopadhānagaṇḍaka-
-catuṣṭayasphuritapāṭalāstaraṇam |
paryaṅkopari ghaṭitaṃ
pātu ciraṃ haṃsatūlaśayanaṃ naḥ || 153 ||
tasyopari nivasantaṃ
tāruṇyaśrīniṣevitaṃ satatam |
āvṛntapullahallaka-
-marīcikāpuñjamañjulacchāyam || 154 ||
sindūraśoṇavasanaṃ
śītāṃśustabakacumbitakirīṭam |
kuṅkumatilakamanohara-
-kuṭilālikahasitakumudabandhuśiśum || 155 ||
pūrṇendubimbavadanaṃ
phullasarojātalocanatritayam |
taralāpāṅgataraṅgita-
-śapharāṅkanaśāstrasampradāyārtham || 156 ||
maṇimayakuṇḍalapuṣya-
-nmarīcikallolamāṃsalakapolam |
vidrumasahodarādhara-
-visṛmarasusmitakiśorasañcāram || 157 ||
āmodikusumaśekhara-
-mānīlabhrūlatāyugamanojñam |
vīṭīsaurabhavīcī-
-dviguṇitavaktrāravindasaurabhyam || 158 ||
pāśāṅkuśekṣucāpa-
-prasavaśarasphuritakomalakarābjam |
kāśmīrapaṅkilāṅgaṃ
kāmeśaṃ manasi kurmahe satatam || 159 ||
tasyāṅkabhuvi niṣaṇṇāṃ
taruṇakadambaprasūnakiraṇābhām |
śītāṃśukhaṇḍacūḍāṃ
sīmantanyastasāndrasindūrām || 160 ||
kuṅkumalalāmabhāsva-
-nniṭilāṃ kuṭilataracillikāyugalām |
nālīkatulyanayanāṃ
nāsāñcalanaṭitamauktikābharaṇām || 161 ||
aṅkuritamandahāsa-
-maruṇādharakāntivijitabimbābhām |
kastūrīmakarīyuta-
-kapolasaṅkrāntakanakatāṭaṅkām || 162 ||
karpūrasāndravīṭī-
-kabalitavadanāravindakamanīyām |
kambusahodarakaṇṭha-
-pralambamānācchamauktikakalāpām || 163 ||
kahlāradāmakomala-
-bhujayugalasphuritaratnakeyūrām |
karapadmamūlavilasa-
-tkāñcanamayakaṭakavalayasandohām || 164 ||
pāṇicatuṣṭayavilasa-
-tpāśāṅkuśapuṇḍracāpapuṣpāstrām |
kūlaṅkaṣakucaśikharāṃ
kuṅkumakardamitaratnakūrpāsām || 165 ||
aṇudāyādavalagnā-
-mambudaśobhāsanābhiromalatām |
māṇikyakhacitakāñcī-
-marīcikākrāntamāṃsalanitambām || 166 ||
karabhorukāṇḍayugalāṃ
jaṅghājitakāmajaitratūṇīrām |
prapadaparibhūtakūrmāṃ
pallavasacchāyapadayugamanojñām || 167 ||
kamalabhavakañjalocana-
-kirīṭaratnāṃśurañjitapadābjām |
unmastakānukampā-
-muttaralāpāṅgapoṣitānaṅgām || 168 ||
ādimarasāvalambā-
-manidaṃ prathamoktivallarīkalikām |
ābrahmakīṭajananī-
-mantaḥ kalayāmi sundarīmaniśam || 169 ||
kastu kṣitau paṭīyā-
-nvastu stotuṃ śivāṅkavāstavyam |
astu cirantanasukṛtaiḥ
prastutakāmyāya tanmama purastāt || 170 ||
prabhusammitoktigamyaṃ
paramaśivotsaṅgatuṅgaparyaṅkam |
tejaḥ kiñcana divyaṃ
purato me bhavatu puṇḍrakodaṇḍam || 171 ||
madhurimabharitaśarāsaṃ
makarandasyandimārgaṇodāram |
kairaviṇīviṭacūḍaṃ
kaivalyāyāstu kiñcana maho naḥ || 172 ||
akṣudramikṣucāpaṃ
parokṣamavalagnasīmni tryakṣam |
kṣapayatu me kṣemetara-
-mukṣarathapremapakṣmalaṃ tejaḥ || 173 ||
bhṛṅgarucisaṅgarakarāpāṅgaṃ
śṛṅgāratuṅgamaruṇāṅgam |
maṅgalamabhaṅguraṃ me
ghaṭayatu gaṅgādharāṅgasaṅgi mahaḥ || 174 ||
prapadājitakūrmamūrjita-
-karuṇaṃ bharmarucinirmathanadeham |
śritavarma marma śambhoḥ
kiñcana mama narma śarma nirmātu || 175 ||
kālakuralālikālima-
-kandalavijitāli vidhṛtamaṇivāli |
milatu hṛdi pulinajaghanaṃ
bahulitagalagaralakeli kimapi mahaḥ || 176 ||
kuṅkumatilakitaphālā
kuruvindacchāyapāṭaladukūlā |
karuṇāpayodhivelā
kācana citte cakāstu me līlā || 177 ||
puṣpandhayaruciveṇyaḥ
pulinābhogatrapākaraśreṇyaḥ |
jīyāsurikṣupāṇyaḥ
kāścana kāmārikelisākṣiṇyaḥ || 178 ||
tapanīyāṃśukabhāṃsi
drākṣāmādhuryanāstikavacāṃsi |
katicana śucaṃ mahāṃsi
kṣapayatu kapālitoṣitamanāṃsi || 179 ||
asitakacamāyatākṣaṃ
kusumaśaraṃ kūlamudvahakṛpārdram |
ādimarasādhidaivata-
-mantaḥ kalaye harāṅkavāsi mahaḥ || 180 ||
karṇopāntataraṅgita-
-kaṭākṣavispandikaṇṭhadaghnakṛpām |
kāmeśvarāṅkanilayāṃ
kāmapi vidyāṃ purātanīṃ kalaye || 181 ||
aravindakāntyaruntuda-
-vilocanadvandvasundaramukhendu |
chandaḥ kandalamandira-
-mantaḥpuramainduśekharaṃ vande || 182 ||
bimbinikurambaḍambara-
-viḍambakacchāyamambaravalagnam |
kambugalamambudakucaṃ
bimbokaṃ kamapi cumbatu mano me || 183 ||
kamapi kamanīyarūpaṃ
kalayāmyantaḥ kadambakusumāḍhyam |
campakarucirasuveṣaiḥ
sampāditakāntyalaṅkṛtadigantam || 184 ||
śampārucibhara-
-garhāsampādakakāntikavacitadigantam |
siddhāntaṃ nigamānāṃ
śuddhāntaṃ kimapi śūlinaḥ kalaye || 185 ||
udyaddinakaraśoṇā-
-nutpalabandhustanandhayāpīḍān |
karakalitapuṇḍracāpā-
-nkalaye kānapi kapardinaḥ prāṇān || 186 ||
raśanālasajjaghanayā
rasanājīvātucāpabhāsurayā |
ghrāṇāyuṣkaraśarayā
ghrātaṃ cittaṃ kayāpi vāsanayā || 187 ||
sarasijasahayudhvadṛśā
śampālatikāsanābhivigrahayā |
bhāsā kayāpi ceto
nāsāmaṇiśobhivadanayā bharitam || 188 ||
navayāvakābhasicayānvitayā
gajayānayā dayāparayā |
dhṛtayāminīśakalayā
dhiyā kayāpi kṣatāmayā hi vayam || 189 ||
alamalamakusumabāṇai-
-rabimbaśoṇairapuṇḍrakodaṇḍaiḥ |
akumudabāndhavacūḍai-
-ranyairiha jagati daivataṃ manyaiḥ || 190 ||
kuvalayasadṛkṣanayanaiḥ
kulagirikūṭasthabandhukucabhāraiḥ |
karuṇāspandikaṭākṣaiḥ
kavacitacitto'smi katipayaiḥ kutukaiḥ || 191 ||
natajanasulabhāya namo
nālīkasanābhilocanāya namaḥ |
nanditagiriśāya namo
mahase navanīpapāṭalāya namaḥ || 192 ||
kādambakusumadāmne
kāyacchāyākaṇāyitāryamṇe |
sīmne cirantanagirāṃ
bhūmne kasmaicidādade praṇatim || 193 ||
kuṭilakabarībharebhyaḥ
kuṅkumasabrahmacārikiraṇebhyaḥ |
kūlaṅkaṣastanebhyaḥ
kurmaḥ praṇatiṃ kulādrikutukebhyaḥ || 194 ||
kokanadaśoṇacaraṇā-
-tkomalakuralālivijitaśaivālāt |
utpalasagandhinayanā-
-durarīkurmo na devatamānyām || 195 ||
āpāṭalādharāṇā-
-mānīlasnigdhabarbarakacānām |
āmnāyajīvanānā-
-mākūtānāṃ harasya dāso'ham || 196 ||
puṅkhitavilāsahāsa-
-sphuritāsu purāhitāṅkanilayāsu |
magnaṃ mano madīyaṃ
kāsvapi kāmārijīvanāḍīṣu || 197 ||
lalitā pātu śiro me
lalāṭamambā ca madhumatīrūpā |
bhrūyugmaṃ ca bhavānī
puṣpaśarā pātu locanadvandvam || 198 ||
pāyānnāsāṃ bālā
subhagā dantāṃśca sundarī jihvām |
adharoṣṭhamādiśakti-
-ścakreśī pātu me ciraṃ cibukam || 199 ||
kāmeśvarī ca karṇau
kāmākṣī pātu gaṇḍayoryugalam |
śṛṅgāranāyikāvyā-
-dvadanaṃ siṃhāsaneśvarī ca galam || 200 ||
skandaprasūśca pātu
skandhau bāhū ca pāṭalāṅgī me |
pāṇī ca padmanilayā
pāyādaniśaṃ nakhāvalīrvijayā || 201 ||
kodaṇḍinī ca vakṣaḥ
kukṣiṃ cāvyāt kulācalatanūjā |
kalyāṇī ca valagnaṃ
kaṭiṃ ca pāyātkalādharaśikhaṇḍā || 202 ||
ūrudvayaṃ ca pāyā-
-dumā mṛḍānī ca jānunī rakṣet |
jaṅghe ca ṣoḍaśī me
pāyāt pādau ca pāśasṛṇihastā || 203 ||
prātaḥ pātu parā māṃ
madhyāhne pātu maṇigṛhādhīśā |
śarvāṇyavatu ca sāyaṃ
pāyādrātrau ca bhairavī sākṣāt || 204 ||
bhāryāṃ rakṣatu gaurīṃ
pāyāt putrāṃśca bindugṛhapīṭhā |
śrīvidyā ca yaśo me
śīlaṃ cāvyācciraṃ mahārājñī || 205 ||
pavanamayi pāvakamayi
kṣoṇīmayi gaganamayi kṛpīṭamayi |
ravimayi śaśimayi diṅmayi
samayamayi prāṇamayi śive pāhi || 206 ||
kāli kapālini śūlini
bhairavi mātaṅgi pañcami tripure |
vāgdevi vindhyavāsini
bāle bhuvaneśi pālaya ciraṃ mām || 207 ||
abhinavasindūrābhā-
-mamba tvāṃ cintayanti ye hṛdaye |
upari nipatanti teṣā-
-mutpalanayanākaṭākṣakallolāḥ || 208 ||
vargāṣṭakamilitābhi-
-rvaśinīmukhyābhirāvṛtāṃ bhavatīm |
cintayatāṃ sitavarṇāṃ
vāco niryāntyayatnato vadanāt || 209 ||
kanakaśalākāgaurīṃ
karṇavyālolakuṇḍaladvitayām |
prahasitamukhīṃ ca bhavatīṃ
dhyāyanto ye ta eva bhūdhanadāḥ || 210 ||
śīrṣāmbhoruhamadhye
śītalapīyūṣavarṣiṇīṃ bhavatīm |
anudinamanucintayatā-
-māyuṣyaṃ bhavati puṣkalamavanyām || 211 ||
madhurasmitāṃ madāruṇanayanāṃ
mātaṅgakumbhavakṣojām |
candravataṃsinīṃ tvāṃ
savidhe paśyanti sukṛtinaḥ kecit || 212 ||
lalitāyāḥ stavaratnaṃ
lalitapadābhiḥ praṇītamāryābhiḥ |
pratidinamavanau paṭhatāṃ
phalāni vaktuṃ pragalbhate saiva || 213 ||
sadasadanugrahanigraha-
-gṛhītamunivigraho bhagavān |
sarvāsāmupaniṣadāṃ
durvāsā jayati deśikaḥ prathamaḥ || 214 ||
iti maharṣidurvāsaḥ viracitaṃ śrīlalitāstavaratnam |
🕉️ This is the original Sanskrit rendered in Oriya script.
Pronunciation is identical to the Sanskrit Devanagari version.