5.4 - Devasura Samyatta Asann - Krishna Yajurveda Taittiriya Samhita Pathah — Sinhala Script

කෘෂ්ණ යජුර්වේදීය තෛත්තිරීය සංහිතායා-ම්පඤ්චමකාණ්ඩේ චතුර්ථඃ ප්රශ්නඃ - ඉෂ්ටකාත්රයාභිධානං

ඕ-න්නමඃ පරමාත්මනේ, ශ්රී මහාගණපතයේ නමඃ,

ශ්රී ගුරුභ්යෝ නමඃ . හ॒රිඃ॒ ඕම් ..

දේ॒වා॒සු॒රා-ස්සංයँ॑ත්තා ආස॒-න්තේ න ව්ය॑ජයන්ත॒ ස ඒ॒තා ඉන්ද්ර॑ස්ත॒නූර॑පශ්ය॒-ත්තා උපා॑ධත්ත॒ තාභි॒ර්වෛ ස ත॒නුව॑මින්ද්රි॒යං-වීँ॒ර්ය॑මා॒ත්මන්න॑ධත්ත॒ තතෝ॑ දේ॒වා අභ॑ව॒-න්පරා-(අ)සු॑රා॒ යදි॑න්ද්රත॒නූරු॑ප॒දධා॑ති ත॒නුව॑මේ॒ව තාභි॑රින්ද්රි॒යං-වීँ॒ර්යං॑-යँජ॑මාන ආ॒ත්ම-න්ධ॒ත්තේ-(අ)ථෝ॒ සේන්ද්ර॑මේ॒වාග්නිග්ං සත॑නු-ඤ්චිනුතේ॒ භව॑ත්යා॒ත්මනා॒ පරා᳚-(අ)ස්ය॒ භ්රාතෘ॑ව්යෝ [භ්රාතෘ॑ව්යඃ, භ॒ව॒ති॒ ය॒ජ්ඤෝ] 1

භවති ය॒ජ්ඤෝ දේ॒වේභ්යෝ-(අ)පා᳚ක්රාම॒-ත්තම॑ව॒රුධ॒-න්නාශ॑ක්නුව॒න්ත ඒ॒තා ය॑ජ්ඤත॒නූර॑පශ්ය॒-න්තා උපා॑දධත॒ තාභි॒ර්වෛ තේ ය॒ජ්ඤමවා॑රුන්ධත॒ ය-ද්ය॑ජ්ඤත॒නූරු॑ප॒දධා॑ති ය॒ජ්ඤමේ॒ව තාභි॒ර්යජ॑මා॒නෝ-(අ)ව॑ රුන්ධේ॒ ත්රය॑ස්ත්රිග්ං ශත॒මුප॑ දධාති॒ ත්රය॑ස්ත්රිග්ංශ॒ද්වෛ දේ॒වතා॑ දේ॒වතා॑ ඒ॒වාව॑ රු॒න්ධේ (අ)ථෝ॒ සාත්මා॑නමේ॒වාග්නිග්ං සත॑නු-ඤ්චිනුතේ॒ සාත්මා॒-(අ)මුෂ්මි॑-ල්ලෝँ॒කේ [-(අ)මුෂ්මි॑-ල්ලෝँ॒කේ, භ॒ව॒ති॒ ය] 2

භ॑වති॒ ය ඒ॒වං-වේँද॒ ජ්යෝති॑ෂ්මතී॒රුප॑ දධාති॒ ජ්යෝති॑රේ॒වාස්මි॑-න්දධාත්යේ॒තාභි॒ර්වා අ॒ග්නිශ්චි॒තෝ ජ්ව॑ලති॒ තාභි॑රේ॒වෛන॒ග්ං॒ සමි॑න්ධ උ॒භයෝ॑රස්මෛ ලෝ॒කයෝ॒ර්ජ්යෝති॑ර්භවති නක්ෂත්රේෂ්ට॒කා උප॑ දධාත්යේ॒තානි॒ වෛ දි॒වෝ ජ්යෝතීග්ං॑ෂි॒ තාන්යේ॒වාව॑ රුන්ධේ සු॒කෘතාං॒-වාँ ඒ॒තානි॒ ජ්යෝතීග්ං॑ෂි॒ යන්නක්ෂ॑ත්රාණි॒ තාන්යේ॒වා-(අ)(අ)ප්නෝ॒ත්යථෝ॑ අනූකා॒ශ-මේ॒වෛතානි॒ [-මේ॒වෛතානි॑, ජ්යෝතීග්ං॑ෂි කුරුතේ] 3

ජ්යෝතීග්ං॑ෂි කුරුතේ සුව॒ර්ගස්ය॑ ලෝ॒කස්යානු॑ඛ්යාත්යෛ॒ ය-ථ්සග්ග්ස්පෘ॑ෂ්ටා උපද॒ද්ධ්යා-ද්වෘෂ්ට්යෛ॑ ලෝ॒කමපි॑ දද්ධ්යා॒දව॑ර්ෂුකඃ ප॒ර්ජන්යඃ॑ ස්යා॒දසග්ග්॑ස්පෘෂ්ටා॒ උප॑ දධාති॒ වෘෂ්ට්යා॑ ඒ॒ව ලෝ॒ක-ඞ්ක॑රෝති॒ වර්ෂු॑කඃ ප॒ර්ජන්යෝ॑ භවති පු॒රස්තා॑ද॒න්යාඃ ප්ර॒තීචී॒රුප॑ දධාති ප॒ශ්චාද॒න්යාඃ ප්රාචී॒ස්තස්මා᳚-ත්ප්රා॒චීනා॑නි ච ප්රතී॒චීනා॑නි ච॒ නක්ෂ॑ත්රා॒ණ්යා ව॑ර්තන්තේ .. 4 ..

(භ්රාතෘ॑ව්යෝ - ලෝ॒ක - ඒ॒වෛතාන්යේ - ක॑චත්වාරිග්ංශච්ච) (අ. 1)

ඍ॒ත॒ව්යා॑ උප॑ දධාත්යෘතූ॒නා-ඞ්කෟප්ත්යෛ᳚ ද්ව॒ද්වම්මුප॑ දධාති॒ තස්මා᳚-ද්ද්ව॒න්ද්වමෘ॒තවෝ (අ)ධෘ॑තේව॒ වා ඒ॒ෂා යන්ම॑ද්ධ්ය॒මා චිති॑ර॒න්තරි॑ක්ෂමිව॒ වා ඒ॒ෂා ද්ව॒ද්වම්ම॒න්යාසු॒ චිතී॒ෂූප॑ දධාති॒ චත॑ස්රෝ॒ මද්ධ්යේ॒ ධෘත්යා॑ අන්ත॒ශ්ශ්ලේෂ॑ණං॒-වාँ ඒ॒තාශ්චිතී॑නාං॒-යँදෘ॑ත॒ව්යා॑ යදෘ॑ත॒ව්යා॑ උප॒දධා॑ති॒ චිතී॑නාං॒-විँධෘ॑ත්යා॒ අව॑කා॒මනූප॑ දධාත්යේ॒ෂා වා අ॒ග්නේර්යෝනි॒-ස්සයෝ॑නි- [අ॒ග්නේර්යෝනි॒-ස්සයෝ॑නිම්, ඒ॒වාග්නි-] 5

-මේ॒වාග්නි-ඤ්චි॑නුත උ॒වාච॑ හ වි॒ශ්වාමි॒ත්රෝ (අ)ද॒දි-ථ්ස බ්රහ්ම॒ණා-(අ)න්නං॒-යँස්යෛ॒තා උ॑පධී॒යාන්තෛ॒ ය උ॑ චෛනා ඒ॒වං-වේँද॒දිති॑ සංවँථ්ස॒රෝ වා ඒ॒ත-ම්ප්ර॑ති॒ෂ්ඨායෛ॑ නුදතේ॒ යෝ᳚-(අ)ග්නි-ඤ්චි॒ත්වා න ප්ර॑ති॒තිෂ්ඨ॑ති॒ පඤ්ච॒ පූර්වා॒ශ්චිත॑යෝ භව॒න්ත්යථ॑ ෂ॒ෂ්ඨී-ඤ්චිති॑-ඤ්චිනුතේ॒ ෂඩ්වා ඍ॒තවඃ॑ සංවँථ්ස॒ර ඍ॒තුෂ්වේ॒ව සං॑වँථ්ස॒රේ ප්රති॑තිෂ්ඨත්යේ॒ තා වා [ප්රති॑තිෂ්ඨත්යේ॒ තා වා, අධි॑පත්නී॒ර්නාමේෂ්ට॑කා॒] 6

අධි॑පත්නී॒ර්නාමේෂ්ට॑කා॒ යස්යෛ॒තා උ॑පධී॒යන්තේ-(අ)ධි॑පතිරේ॒ව ස॑මා॒නානා᳚-ම්භවති॒ ය-න්ද්වි॒ෂ්යා-ත්තමු॑ප॒දධ॑-ද්ධ්යායේදේ॒තාභ්ය॑ ඒ॒වෛන॑-න්දේ॒වතා᳚භ්ය॒ ආ වෘ॑ශ්චති තා॒ජගාර්ති॒මාර්ච්ඡ॒ත්යඞ්ගි॑රස-ස්සුව॒ර්ගං-ලෝँ॒කං-යँන්තෝ॒ යා ය॒ජ්ඤස්ය॒ නිෂ්කෘ॑ති॒රාසී॒-ත්තාමෘෂි॑භ්යඃ॒ ප්රත්යෞ॑හ॒-න්තද්ධිර॑ණ්යමභව॒ද්ය-ද්ධි॑රණ්යශ॒ල්කෛඃ ප්රෝ॒ක්ෂති॑ ය॒ජ්ඤස්ය॒ නිෂ්කෘ॑ත්යා॒ අථෝ॑ භේෂ॒ජමේ॒වා-(අ)ස්මෛ॑ කරෝ॒- [-(අ)ස්මෛ॑ කරෝති, අථෝ॑ රූ॒පේණෛ॒වෛන॒ග්ං॒] 7

-ත්යථෝ॑ රූ॒පේණෛ॒වෛන॒ග්ං॒ සම॑ර්ධය॒ත්යථෝ॒ හිර॑ණ්යජ්යෝතිෂෛ॒ව සු॑ව॒ර්ගං-ලෝँ॒කමේ॑ති සාහ॒ස්රව॑තා॒ ප්රෝක්ෂ॑ති සාහ॒ස්රඃ ප්ර॒ජාප॑තිඃ ප්ර॒ජාප॑තේ॒රාප්ත්යා॑ ඉ॒මා මේ॑ අග්න॒ ඉෂ්ට॑කා ධේ॒නවඃ॑ ස॒න්ත්විත්යා॑හ ධේ॒නූරේ॒වෛනාඃ᳚ කුරුතේ॒ තා ඒ॑න-ඞ්කාම॒දුඝා॑ අ॒මුත්රා॒මුෂ්මි॑න් ँලෝ॒ක උප॑ තිෂ්ඨන්තේ .. 8 ..

(සයෝ॑නි - මේ॒තා වෛ - ක॑රෝ॒ත්යේ - කා॒න්නච॑ත්වාරි॒ග්ං॒ශච්ච॑) (අ. 2)

රු॒ද්රෝ වා ඒ॒ෂ යද॒ග්නි-ස්ස ඒ॒තර්හි॑ ජා॒තෝ යර්හි॒ සර්ව॑ශ්චි॒ත-ස්ස යථා॑ ව॒ථ්සෝ ජා॒ත-ස්ස්තන॑-ම්ප්රේ॒ඵ්සත්යේ॒වං-වාँ ඒ॒ෂ ඒ॒තර්හි॑ භාග॒ධේය॒-ම්ප්රේඵ්ස॑ති॒ තස්මෛ॒ යදාහු॑ති॒-න්න ජු॑හු॒යාද॑ද්ධ්ව॒ර්යු-ඤ්ච॒ යජ॑මාන-ඤ්ච ධ්යායේච්ඡතරු॒ද්රීය॑-ඤ්ජුහෝති භාග॒ධේයේ॑නෛ॒වෛනග්ං॑ ශමයති॒ නා-(අ)(අ)ර්ති॒මාර්ච්ඡ॑ත්යද්ධ්ව॒ර්යුර්න යජ॑මානෝ॒ ය-ද්ග්රා॒ම්යාණා᳚-ම්පශූ॒නා- [ය-ද්ග්රා॒ම්යාණා᳚-ම්පශූ॒නාම්, පය॑සා ජුහු॒යා-] 9

-ම්පය॑සා ජුහු॒යා-ද්ග්රා॒ම්යා-න්ප॒ශූඤ්ඡු॒චා (අ)ර්පයේ॒-ද්යදා॑ර॒ණ්යානා॑-මාර॒ණ්යාන් ජ॑ර්තිලයවා॒ග්වා॑ වා ජුහු॒යා-ද්ග॑වීධුකයවා॒ග්වා॑ වා॒ න ග්රා॒ම්යා-න්ප॒ශූන්. හි॒නස්ති॒ නා-(අ)(අ)ර॒ණ්යානථෝ॒ ඛල්වා॑හු॒රනා॑හුති॒ර්වෛ ජ॒ර්තිලා᳚ශ්ච ග॒වීධු॑කා॒ශ්චේත්ය॑ ජක්ෂී॒රේණ॑ ජුහෝත්යාග්නේ॒යී වා ඒ॒ෂා යද॒ජා-(අ)(අ)හු॑ත්යෛ॒ව ජු॑හෝති॒ න ග්රා॒ම්යා-න්ප॒ශූන්. හි॒නස්ති॒ නා-(අ)(අ)ර॒ණ්යානඞ්ගි॑රස-ස්සුව॒ර්ගං-ලෝँ॒කං-යँන්තෝ॒- [-ँලෝ॒කං-යँන්තඃ॑, අ॒ජායා᳚-ඞ්ඝ॒ර්ම-] 10

-(අ)ජායා᳚-ඞ්ඝ॒ර්ම-ම්ප්රාසි॑ඤ්ච॒න්ථ්සා ශෝච॑න්තී ප॒ර්ණ-ම්පරා॑-(අ)ජිහීත॒ සෝ᳚(1॒)-(අ)ර්කෝ॑-(අ)භව॒-ත්තද॒ර්කස්යා᳚-ර්ක॒ත්වම॑ර්කප॒ර්ණේන॑ ජුහෝති සයෝනි॒ත්වායෝද॒-න්තිෂ්ඨ॑න් ජුහෝත්යේ॒ෂා වෛ රු॒ද්රස්ය॒ දි-ඛ්ස්වායා॑මේ॒ව දි॒ශි රු॒ද්ර-න්නි॒රව॑දයතේ චර॒මායා॒මිෂ්ට॑කායා-ඤ්ජුහෝත්යන්ත॒ත ඒ॒ව රු॒ද්ර-න්නි॒රව॑දයතේ ත්රේධාවිභ॒ක්ත-ඤ්ජු॑හෝති॒ ත්රය॑ ඉ॒මේ ලෝ॒කා ඉ॒මානේ॒ව ලෝ॒කාන්-ථ්ස॒මාව॑ද්වීර්යාන් කරෝ॒තීය॒ත්යග්රේ॑ ජුහෝ॒- [ජුහෝති, අථේය॒ත්යථේය॑ති॒] 11

-ත්යථේය॒ත්යථේය॑ති॒ ත්රය॑ ඉ॒මේ ලෝ॒කා ඒ॒භ්ය ඒ॒වෛනං॑-ලෝँ॒කේභ්යඃ॑ ශමයති ති॒ස්ර උත්ත॑රා॒ ආහු॑තීර්ජුහෝති॒ ෂ-ට්ථ්ස-ම්ප॑ද්යන්තේ॒ ෂ-ඩ්වා ඍ॒තව॑ ඍ॒තුභි॑රේ॒වෛනග්ං॑ ශමයති॒ යද॑නුපරි॒ක්රාම॑-ඤ්ජුහු॒යාද॑න්තරවචා॒රිණග්ං॑ රු॒ද්ර-ඞ්කු॑ර්යා॒දථෝ॒ ඛල්වා॑හුඃ॒ කස්යාං॒-වාँ-(අ)හ॑ දි॒ශි රු॒ද්රඃ කස්යාං॒-වේँත්ය॑නුපරි॒ක්රාම॑මේ॒ව හෝ॑ත॒ව්ය॑-මප॑රිවර්ගමේ॒වෛනග්ං॑ ශමය- [ශමයති, ඒ॒තාවෛ] 12

-ත්යේ॒තාවෛ දේ॒වතා᳚-ස්සුව॒ර්ග්යා॑යා උ॑ත්ත॒මාස්තා යජ॑මානං-වාँචයති॒ තාභි॑රේ॒වෛනග්ං॑ සුව॒ර්ගං-ලෝँ॒ක-ඞ්ග॑මයති॒ ය-න්ද්වි॒ෂ්යා-ත්තස්ය॑ සඤ්ච॒රේ ප॑ශූ॒නා-න්න්ය॑ස්යේ॒-ද්යඃ ප්ර॑ථ॒මඃ ප॒ශුර॑භි॒තිෂ්ඨ॑ති॒ ස ආර්ති॒මාර්ච්ඡ॑ති .. 13 ..

(ප॒ශූ॒නාං - ँයන්තෝ - (අ)ග්නේ॑ ජුහෝ॒ත්ය - ප॑රිවර්ගමේ॒වෛනග්ං॑ ශමයති - ත්රි॒ග්ං॒ශච්ච॑) (අ. 3)

අශ්ම॒න්නූර්ජ॒මිති॒ පරි॑ ෂිඤ්චති මා॒ර්ජය॑ත්යේ॒වෛන॒මථෝ॑ ත॒ර්පය॑ත්යේ॒ව ස ඒ॑න-න්තෘ॒ප්තෝ (අ)ක්ෂු॑ද්ධ්ය॒-න්නශෝ॑ච-න්න॒මුෂ්මි॑න් ँලෝ॒ක උප॑ තිෂ්ඨතේ॒ තෘප්ය॑ති ප්ර॒ජයා॑ ප॒ශුභි॒ර්ය ඒ॒වං-වේँද॒ තා-න්න॒ ඉෂ॒මූර්ජ॑-න්ධත්ත මරුත-ස්සග්ංරරා॒ණා ඉත්යා॒හාන්නං॒-වාँ ඌර්ගන්න॑-ම්ම॒රුතෝ-(අ)න්න॑මේ॒වාව॑ රු॒න්ධේ (අ)ශ්මග්ග්॑ස්තේ॒ ක්ෂුද॒මු-න්තේ॒ ශු- [ක්ෂුද॒මු-න්තේ॒ ශුක්, ඍ॒ච්ඡ॒තු॒ ය-න්ද්වි॒ෂ්ම] 14

-ගෘ॑ච්ඡතු॒ ය-න්ද්වි॒ෂ්ම ඉත්යා॑හ॒ යමේ॒ව ද්වේෂ්ටි॒ තම॑ස්ය ක්ෂු॒ධා ච॑ ශු॒චා චා᳚ර්පයති॒ ත්රිඃ ප॑රිෂි॒ඤ්ච-න්පර්යේ॑ති ත්රි॒වෘද්වා අ॒ග්නිර්යාවා॑නේ॒වා-ග්නිස්තස්ය॒ ශුචග්ං॑ ශමයති॒ ත්රිඃ පුනඃ॒ පර්යේ॑ති॒ ෂ-ට්ථ්ස-ම්ප॑ද්යන්තේ॒ ෂ-ඩ්වා ඍ॒තව॑ ඍ॒තුභි॑රේ॒වාස්ය॒ ශුචග්ං॑ ශමයත්ය॒පාං-වාँ ඒ॒ත-ත්පුෂ්පං॒-යँද්වේ॑ත॒සෝ॑-(අ)පාග්ං - [යද්වේ॑ත॒සෝ॑-(අ)පාම්, ශරෝ-(අ)ව॑කා] 15

ශරෝ-(අ)ව॑කා වේතසශා॒ඛයා॒ චාව॑කාභිශ්ච॒ වි ක॑ර්ෂ॒ත්යාපෝ॒ වෛ ශා॒න්තා-ශ්ශා॒න්තාභි॑රේ॒වාස්ය॒ ශුචග්ං॑ ශමයති॒ යෝ වා අ॒ග්නි-ඤ්චි॒ත-ම්ප්ර॑ථ॒මඃ ප॒ශුර॑ධි॒ක්රාම॑තීශ්ව॒රෝ වෛ තග්ං ශු॒චා ප්ර॒දහෝ॑ ම॒ණ්ඩූකේ॑න॒ වික॑ර්ෂත්යේ॒ෂ වෛ ප॑ශූ॒නා-ම॑නුපජීවනී॒යෝ න වා ඒ॒ෂ ග්රා॒ම්යේෂු॑ ප॒ශුෂු॑ හි॒තෝ නා-(අ)(අ)ර॒ණ්යේෂු॒ තමේ॒ව ශු॒චා-(අ)ර්ප॑යත්යෂ්ටා॒භි-ර්වි ක॑ර්ෂ- [-ර්වි ක॑ර්ෂති, අ॒ෂ්ටාක්ෂ॑රා] 16

-ත්ය॒ෂ්ටාක්ෂ॑රා ගාය॒ත්රී ගා॑ය॒ත්රෝ᳚-(අ)ග්නිර්යාවා॑-නේ॒වා-(අ)ග්නිස්තස්ය॒ ශුචග්ං॑ ශමයති පාව॒කව॑තීභි॒රන්නං॒-වෛँ පා॑ව॒කෝ-(අ)න්නේ॑නෛ॒වාස්ය॒ ශුචග්ං॑ ශමයති මෘ॒ත්යුර්වා ඒ॒ෂ යද॒ග්නිර්බ්රහ්ම॑ණ ඒ॒තද්රූ॒පං-යँ-ත්කෘ॑ෂ්ණාජි॒න-ඞ්කාර්ෂ්ණී॑ උපා॒නහා॒වුප॑ මුඤ්චතේ॒ බ්රහ්ම॑ණෛ॒ව මෘ॒ත්යෝර॒න්තර්ධ॑ත්තේ॒ (අ)න්තර්මෘ॒ත්යෝර්ධ॑ත්තේ॒ (අ)න්තර॒න්නාද්යා॒-දිත්යා॑හුර॒න්යා-මු॑පමු॒ඤ්චතේ॒-(අ)න්යා-න්නාන්ත- [-(අ)න්යා-න්නාන්තඃ, ඒ॒ව මෘ॒ත්යෝර්ධ॒ත්තේ] 17

-රේ॒ව මෘ॒ත්යෝර්ධ॒ත්තේ (අ)වා॒-(අ)න්නාද්යග්ං॑ රුන්ධේ॒ නම॑ස්තේ॒ හර॑සේ ශෝ॒චිෂ॒ ඉත්යා॑හ නම॒ස්කෘත්ය॒ හි වසී॑යාග්ං සමුප॒චර॑න්ත්ය॒න්ය-න්තේ॑ අ॒ස්ම-ත්ත॑පන්තු හේ॒තය॒ ඉත්යා॑හ॒ යමේ॒ව ද්වේෂ්ටි॒ තම॑ස්ය ශු॒චා-(අ)ර්ප॑යති පාව॒කෝ අ॒ස්මභ්යග්ං॑ ශි॒වෝ භ॒වේත්යා॒හාන්නං॒-වෛँ පා॑ව॒කෝ-(අ)න්න॑මේ॒වාව॑ රුන්ධේ॒ ද්වාභ්යා॒මධි॑ ක්රාමති॒ ප්රති॑ෂ්ඨිත්යා අප॒ස්ය॑වතීභ්යා॒ග්ං॒ ශාන්ත්යෛ᳚ .. 18 ..

(ශු - ග්වේ॑ත॒සෝ॑-(අ)පා - ම॑ෂ්ටා॒භිර්වි ක॑ර්ෂති॒ - නාන්ත - රේකා॒න්න ප॑ඤ්චා॒ශච්ච॑) (අ. 4)

නෘ॒ෂදේ॒ වඩිති॒ ව්යාඝා॑රයති ප॒ඞ්ක්ත්යා-(අ)(අ)හු॑ත්යා යජ්ඤමු॒ඛමා ර॑භතේ (අ)ක්ෂ්ණ॒යා ව්යාඝා॑රයති॒ තස්මා॑දක්ෂ්ණ॒යා ප॒ශවෝ-(අ)ඞ්ගා॑නි॒ ප්රහ॑රන්ති॒ ප්රති॑ෂ්ඨිත්යෛ॒ යද්ව॑ෂට්කු॒ර්යා-ද්යා॒තයා॑මා-(අ)ස්ය වෂට්කා॒ර-ස්ස්යා॒ද්යන්න ව॑ෂට්කු॒ර්යා-ද්රක්ෂාග්ං॑සි ය॒ජ්ඤග්ං හ॑න්යු॒ර්වඩිත්යා॑හ ප॒රෝක්ෂ॑මේ॒ව වෂ॑-ට්කරෝති॒ නාස්ය॑ යා॒තයා॑මා වෂට්කා॒රෝ භව॑ති॒ න ය॒ජ්ඤග්ං රක්ෂාග්ං॑සි ඝ්නන්ති හු॒තාදෝ॒ වා අ॒න්යේ දේ॒වා [අ॒න්යේ දේ॒වාඃ, අ॒හු॒තාදෝ॒-(අ)න්යේ] 19

අ॑හු॒තාදෝ॒-(අ)න්යේ තාන॑ග්නි॒චිදේ॒වෝභයා᳚-න්ප්රීණාති॒ යේ දේ॒වා දේ॒වානා॒මිති॑ ද॒ද්ධ්නා ම॑ධුමි॒ශ්රේණාවෝ᳚ක්ෂති හු॒තාද॑ශ්චෛ॒ව දේ॒වාන॑හු॒තාද॑ශ්ච॒ යජ॑මානඃ ප්රීණාති॒ තේ යජ॑මාන-ම්ප්රීණන්ති ද॒ද්ධ්නෛව හු॒තාදඃ॑ ප්රී॒ණාති॒ මධු॑ෂා (අ)හු॒තාදෝ᳚ ග්රා॒ම්යං-වාँ ඒ॒තදන්නං॒-යँද්දද්ධ්යා॑ර॒ණ්ය-ම්මධු॒ යද්ද॒ධ්නා ම॑ධුමි॒ශ්රේණා॒-වෝක්ෂ॑ත්යු॒භය॒ස්යා-(අ)ව॑රුද්ධ්යෛ ග්රුමු॒ෂ්ටිනා-(අ)වෝ᳚ක්ෂති ප්රාජාප॒ත්යෝ [ප්රාජාප॒ත්යඃ, වෛ ග්රු॑මු॒ෂ්ටි-] 20

වෛ ග්රු॑මු॒ෂ්ටි-ස්ස॑යෝනි॒ත්වාය॒ ද්වාභ්යා॒-ම්ප්රති॑ෂ්ඨිත්යා අනුපරි॒චාර॒-මවෝ᳚ක්ෂ॒ත්ය-ප॑රිවර්ගමේ॒වෛනා᳚-න්ප්රීණාති॒ වි වා ඒ॒ෂ ප්රා॒ණෛඃ ප්ර॒ජයා॑ ප॒ශුභි॑ර්-ඍද්ධ්යතේ॒ යෝ᳚-(අ)ග්නි-ඤ්චි॒න්වන්න॑ධි॒ක්රාම॑ති ප්රාණ॒දා අ॑පාන॒දා ඉත්යා॑හ ප්රා॒ණානේ॒වා-(අ)(අ)ත්ම-න්ධ॑ත්තේ වර්චෝ॒දා ව॑රිවෝ॒දා ඉත්යා॑හ ප්ර॒ජා වෛ වර්චඃ॑ ප॒ශවෝ॒ වරි॑වඃ ප්ර॒ජාමේ॒ව ප॒ශූනා॒ත්ම-න්ධ॑ත්ත॒ ඉන්ද්රෝ॑ වෘ॒ත්රම॑හ॒න්තං-වෘँ॒ත්රෝ [වෘ॒ත්රම॑හ॒න්තං-වෘँ॒ත්රඃ, හ॒ත-ෂ්ෂෝ॑ඩ॒ශභි॑-] 21

හ॒ත-ෂ්ෂෝ॑ඩ॒ශභි॑-ර්භෝ॒ගෛර॑සිනා॒-ථ්ස ඒ॒තාම॒ග්නයේ-(අ)නී॑කවත॒ ආහු॑තිමපශ්ය॒-ත්තාම॑ජුහෝ॒-ත්තස්යා॒ග්නිරනී॑ කවා॒න්ථ්ස්වේන॑ භාග॒ධේයේ॑න ප්රී॒ත-ෂ්ෂෝ॑ඩශ॒ධා වෘ॒ත්රස්ය॑ භෝ॒ගානප්ය॑දහ-ද්වෛශ්වකර්ම॒ණේන॑ පා॒ප්මනෝ॒ නිර॑මුච්යත॒ යද॒ග්නයේ-(අ)නී॑කවත॒ ආහු॑ති-ඤ්ජු॒හෝත්ය॒ග්නිරේ॒වා-(අ)ස්යානී॑කවා॒න්ථ්ස්වේන॑ භාග॒ධේයේ॑න ප්රී॒තඃ පා॒ප්මාන॒මපි॑ දහති වෛශ්වකර්ම॒ණේන॑ පා॒ප්මනෝ॒ නිර්මු॑ච්යතේ॒ ය-ඞ්කා॒මයේ॑ත චි॒ර-ම්පා॒ප්මනෝ॒ [චි॒ර-ම්පා॒ප්මනඃ॑, නිර්මු॑ච්යේ॒තේත්යේකෛ॑ක॒-] 22

නිර්මු॑ච්යේ॒තේත්යේකෛ॑ක॒-න්තස්ය॑ ජුහුයාච්චි॒රමේ॒ව පා॒ප්මනෝ॒ නිර්මු॑ච්යතේ॒ ය-ඞ්කා॒මයේ॑ත තා॒ජ-ක්පා॒ප්මනෝ॒ නිර්මු॑ච්යේ॒තේති॒ සර්වා॑ණි॒ තස්යා॑නු॒ද්රුත්ය॑ ජුහුයා-ත්තා॒ජගේ॒ව පා॒ප්මනෝ॒ නිර්මු॑ච්ය॒තේ-(අ)ථෝ॒ ඛලු॒ නානෛ॒ව සූ॒ක්තාභ්යා᳚-ඤ්ජුහෝති॒ නානෛ॒ව සූ॒ක්තයෝ᳚ර්වී॒ර්ය॑-න්දධා॒ත්යථෝ॒ ප්රති॑ෂ්ඨිත්යෛ .. 23 ..

(දේ॒වාඃ - ප්රා॑ජාප॒ත්යෝ-වෘ॒ත්ර - ශ්චි॒ර-ම්පා॒ප්මන॑ - ශ්චත්වාරි॒ග්ං॒ශච්ච॑) (අ. 5)

උදේ॑නමුත්ත॒රා-න්න॒යේති॑ ස॒මිධ॒ ආ ද॑ධාති॒ යථා॒ ජනං॑-යँ॒තේ॑-(අ)ව॒ස-ඞ්ක॒රෝති॑ තා॒දෘගේ॒ව ත-ත්ති॒ස්ර ආ ද॑ධාති ත්රි॒වෘද්වා අ॒ග්නිර්යාවා॑නේ॒-වාග්නිස්තස්මෛ॑ භාග॒ධේය॑-ඞ්කරෝ॒ත්යෞදු॑ම්බරී-ර්භව॒න්ත්යූර්ග්වා උ॑දු॒ම්බර॒ ඌර්ජ॑මේ॒වාස්මා॒ අපි॑ දධා॒ත්යුදු॑ ත්වා॒ විශ්වේ॑ දේ॒වා ඉත්යා॑හ ප්රා॒ණා වෛ විශ්වේ॑ දේ॒වාඃ ප්රා॒ණෛ- [ප්රා॒ණෛඃ, ඒ॒වෛන॒-] 24

-රේ॒වෛන॒-මුද්ය॑ච්ඡ॒තේ (අ)ග්නේ॒ භර॑න්තු॒ චිත්ති॑භි॒රිත්යා॑හ॒ යස්මා॑ ඒ॒වෛන॑-ඤ්චි॒ත්තායෝ॒ද්යච්ඡ॑තේ॒ තේනෛ॒වෛන॒ග්ං॒ සම॑ර්ධයති॒ පඤ්ච॒ දිශෝ॒ දෛවී᳚ර්ය॒ජ්ඤම॑වන්තු දේ॒වීරිත්යා॑හ॒ දිශෝ॒ හ්යේ॑ෂෝ-(අ)නු॑ ප්ර॒ච්යව॒තේ (අ)පාම॑ති-න්දුර්ම॒ති-ම්බාධ॑මානා॒ ඉත්යා॑හ॒ රක්ෂ॑සා॒මප॑හත්යෛ රා॒යස්පෝෂේ॑ ය॒ජ්ඤප॑ති-මා॒භජ॑න්තී॒රිත්යා॑හ ප॒ශවෝ॒ වෛ රා॒යස්පෝෂඃ॑ [රා॒යස්පෝෂඃ॑, ප॒ශූනේ॒වාව॑] 25

ප॒ශූනේ॒වාව॑ රුන්ධේ ෂ॒ඩ්භිර්හ॑රති॒ ෂ-ඩ්වා ඍ॒තව॑ ඍ॒තුභි॑රේ॒වෛනග්ං॑ හරති॒ ද්වේ ප॑රි॒ගෘහ්ය॑වතී භවතෝ॒ රක්ෂ॑සා॒මප॑හත්යෛ॒ සූර්ය॑රශ්මි॒ර්॒හරි॑කේශඃ පු॒රස්තා॒දිත්යා॑හ॒ ප්රසූ᳚ත්යෛ॒ තතඃ॑ පාව॒කා ආ॒ශිෂෝ॑ නෝ ජුෂන්තා॒මිත්යා॒හාන්නං॒-වෛँ පා॑ව॒කෝ-(අ)න්න॑මේ॒වාව॑ රුන්ධේ දේවාසු॒රා-ස්සංයँ॑ත්තා ආස॒-න්තේ දේ॒වා ඒ॒ත-දප්ර॑තිරථ-මපශ්ය॒-න්තේන॒ වෛ තේ᳚ ප්ර॒- [වෛ තේ᳚ ප්ර॒ති, අසු॑රානජය॒-න්ත-] 26

-ත්යසු॑රානජය॒-න්ත-දප්ර॑තිරථස්යා-ප්රතිරථ॒ත්වං-යँදප්ර॑තිරථ-න්ද්වි॒තීයෝ॒ හෝතා॒-(අ)න්වාහා᳚ප්ර॒ත්යේ॑ව තේන॒ යජ॑මානෝ॒ භ්රාතෘ॑ව්යාන් ජය॒ත්යථෝ॒ අන॑භිජිතමේ॒වාභි ජ॑යති දශ॒ර්ච-ම්භ॑වති॒ දශා᳚ක්ෂරා වි॒රා-ඩ්වි॒රාජේ॒මෞ ලෝ॒කෞ විධෘ॑තා ව॒නයෝ᳚ර්ලෝ॒කයෝ॒ර්විධෘ॑ත්යා॒ අථෝ॒ දශා᳚ක්ෂරා වි॒රාඩන්නං॑-විँ॒රා-ඩ්වි॒රාජ්යේ॒වාන්නාද්යේ॒ ප්රති॑තිෂ්ඨ॒ත්යස॑දිව॒ වා අ॒න්තරි॑ක්ෂම॒න්තරි॑ක්ෂමි॒වා (අ)(අ)ග්නී᳚ද්ධ්ර॒-මාග්නී॒ද්ධ්රේ- [-මාග්නී᳚ද්ධ්රේ, අශ්මා॑න॒-න්නි ද॑ධාති] 27

-(අ)ශ්මා॑න॒-න්නි ද॑ධාති ස॒ත්ත්වාය॒ ද්වාභ්යා॒-ම්ප්රති॑ෂ්ඨිත්යෛ වි॒මාන॑ ඒ॒ෂ දි॒වෝ මද්ධ්ය॑ ආස්ත॒ ඉත්යා॑හ॒ ව්යේ॑වෛතයා॑ මිමීතේ॒ මද්ධ්යේ॑ දි॒වෝ නිහි॑තඃ॒ පෘශ්ඤි॒රශ්මේත්යා॒හාන්නං॒-වෛँ පෘශ්ඤ්යන්න॑මේ॒වාව॑ රුන්ධේ චත॒සෘභි॒රා පුච්ඡා॑දේති ච॒ත්වාරි॒ ඡන්දාග්ං॑සි॒ ඡන්දෝ॑භිරේ॒වේන්ද්රං॒-විँශ්වා॑ අවීවෘධ॒න්නිත්යා॑හ॒ වෘද්ධි॑මේ॒වෝපාව॑ර්තතේ॒ වාජා॑නා॒ග්ං॒ සත්ප॑ති॒-ම්පති॒- [සත්ප॑ති॒-ම්පති᳚ම්, ඉත්යා॒හා-(අ)න්නං॒-වෛँ] 28

-මිත්යා॒හා-(අ)න්නං॒-වෛँ වාජෝ-(අ)න්න॑මේ॒වාව॑ රුන්ධේ සුම්න॒හූර්ය॒ජ්ඤෝ දේ॒වාග්ං ආ ච॑ වක්ෂ॒දිත්යා॑හ ප්ර॒ජා වෛ ප॒ශවඃ॑ සු॒ම්න-ම්ප්ර॒ජාමේ॒ව ප॒ශූනා॒ත්ම-න්ධ॑ත්තේ॒ යක්ෂ॑ද॒ග්නිර්දේ॒වෝ දේ॒වාග්ං ආ ච॑ වක්ෂ॒දිත්යා॑හ ස්ව॒ගාකෘ॑ත්යෛ॒ වාජ॑ස්ය මා ප්රස॒වේනෝ᳚-ද්ග්රා॒භේණෝද॑ග්රභී॒දිත්යා॑හා॒සෞ වා ආ॑දි॒ත්ය උ॒ද්යන්නු॑ද්ග්රා॒භ ඒ॒ෂ නි॒ම්රෝච॑-න්නිග්රා॒භෝ බ්රහ්ම॑ණෛ॒වා-(අ)(අ)ත්මාන॑මු-ද්ගෘ॒හ්ණාති॒ බ්රහ්ම॑ණා॒ භ්රාතෘ॑ව්ය॒-න්නි ගෘ॑හ්ණාති .. 29 ..

(ප්රා॒ණෛඃ - පෝෂෝ᳚ - ප්ර॒ත්යා - ග්නී᳚ද්ධේ॒ - පති॑ - මේ॒ෂ - දශ॑ ච) (අ. 6)

ප්රාචී॒මනු॑ ප්ර॒දිශ॒-ම්ප්රේහි॑ වි॒ද්වානිත්යා॑හ දේවලෝ॒ක-මේ॒වෛතයෝ॒පාව॑ර්තතේ॒ ක්රම॑ද්ධ්වම॒ග්නිනා॒ නාක॒-මිත්යා॑හේ॒මානේ॒වෛතයා॑ ලෝ॒කාන් ක්ර॑මතේ පෘථි॒ව්යා අ॒හමුද॒න්තරි॑ක්ෂ॒මා (අ)රු॑හ॒මිත්යා॑හේ॒මානේ॒වෛතයා॑ ලෝ॒කාන්-ථ්ස॒මාරෝ॑හති॒ සුව॒ර්යන්තෝ॒ නාපේ᳚ක්ෂන්ත॒ ඉත්යා॑හ සුව॒ර්ගමේ॒වෛතයා॑ ලෝ॒කමේ॒ත්යග්නේ॒ ප්රේහි॑ [ප්රේහි॑, ප්ර॒ථ॒මෝ] 30

ප්රථ॒මෝ දේ॑වය॒තා-මිත්යා॑හෝ॒භයේ᳚ෂ්වේ॒වෛතයා॑ දේවමනු॒ෂ්යේෂු॒ චක්ෂු॑ර්දධාති ප॒ඤ්චභි॒රධි॑ ක්රාමති॒ පාඞ්ක්තෝ॑ ය॒ජ්ඤෝ යාවා॑නේ॒ව ය॒ජ්ඤස්තේන॑ ස॒හ සු॑ව॒ර්ගං-ලෝँ॒කමේ॑ති॒ නක්තෝ॒ෂාසේති॑ පුරෝ-(අ)නුවා॒ක්යා॑මන්වා॑හ॒ ප්රත්යා॒ අග්නේ॑ සහස්රා॒ක්ෂේත්යා॑හ සාහ॒ස්රඃ ප්ර॒ජාප॑තිඃ ප්ර॒ජාප॑තේ॒රාප්ත්යෛ॒ තස්මෛ॑ තේ විධේම॒ වාජා॑ය॒ ස්වාහේත්යා॒හාන්නං॒-වෛँ වාජෝ-(අ)න්න॑-මේ॒වාව॑ [වාජෝ-(අ)න්න॑-මේ॒වාව॑, රු॒න්ධේ॒ ද॒ද්ධ්නඃ] 31

රුන්ධේ ද॒ද්ධ්නඃ පූ॒ර්ණාමෞදු॑ම්බරීග් ස්වයමාතෘ॒ණ්ණායා᳚-ඤ්ජුහෝ॒ත්යූර්ග්වෛ දද්ධ්යූර්ගු॑දු॒ම්බරෝ॒-(අ)සෞ ස්ව॑යමාතෘ॒ණ්ණා (අ)මුෂ්යා॑මේ॒වෝර්ජ॑-න්දධාති॒ තස්මා॑ද॒මුතෝ॒-(අ)ර්වාචී॒මූර්ජ॒මුප॑ ජීවාමස්ති॒සෘභිඃ॑ සාදයති ත්රි॒වෘද්වා අ॒ග්නිර්යාවා॑නේ॒වාග්නිස්ත-ම්ප්ර॑ති॒ෂ්ඨා-ඞ්ග॑මයති॒ ප්රේද්ධෝ॑ අග්නේ දීදිහි පු॒රෝ න॒ ඉත්යෞදු॑ම්බරී॒මා ද॑ධාත්යේ॒ෂා වෛ සූ॒ර්මී කර්ණ॑කාවත්යේ॒තයා॑ හ ස්ම॒ [හ ස්ම, වෛ] 32

වෛ දේ॒වා අසු॑රාණාග්ං ශතත॒ර්॒හාග් ස්තෘග්ං॑හන්ති॒ යදේ॒තයා॑ ස॒මිධ॑මා॒දධා॑ති॒ වජ්ර॑මේ॒වෛතච්ඡ॑ත॒ඝ්නීං-යँජ॑මානෝ॒ භ්රාතෘ॑ව්යාය॒ ප්රහ॑රති॒ ස්තෘත්යා॒ අඡ॑ම්බට්කාරං-විँ॒ධේම॑ තේ පර॒මේ ජන්ම॑න්නග්න॒ ඉති॒ වෛක॑ඞ්කතී॒මා ද॑ධාති॒ භා ඒ॒වාව॑ රුන්ධේ॒ තාග්ං ස॑වි॒තුර්වරේ᳚ණ්යස්ය චි॒ත්රාමිති॑ ශමී॒මයී॒ග්ං॒ ශාන්ත්යා॑ අ॒ග්නිර්වා॑ හ॒ වා අ॑ග්නි॒චිත॑-න්දු॒හේ᳚-(අ)ග්නි॒චිද්වා॒-(අ)ග්නි-න්දු॑හේ॒ තාග්ං [තාම්, ස॒වි॒තු-] 33

ස॑වි॒තු-ර්වරේ᳚ණ්යස්ය චි॒ත්රාමිත්යා॑හෛ॒ෂ වා අ॒ග්නේර්දෝහ॒ස්තම॑ස්ය॒ කණ්ව॑ ඒ॒ව ශ්රා॑ය॒සෝ॑-(අ)වේ॒-ත්තේන॑ හ ස්මෛන॒ග්ං॒ ස දු॑හේ॒ යදේ॒තයා॑ ස॒මිධ॑-මා॒දධා᳚ත්යග්නි॒චිදේ॒ව තද॒ග්නි-න්දු॑හේ ස॒ප්ත තේ॑ අග්නේ ස॒මිධඃ॑ ස॒ප්තජි॒හ්වා ඉත්යා॑හ ස॒ප්තෛවාස්ය॒ සාප්තා॑නි ප්රීණාති පූ॒ර්ණයා॑ ජුහෝති පූ॒ර්ණ ඉ॑ව॒ හි ප්ර॒ජාප॑තිඃ ප්ර॒ජාප॑තේ॒- [ප්ර॒ජාප॑තේඃ, ආප්ත්යෛ॒] 34

-රාප්ත්යෛ॒ න්යූ॑නයා ජුහෝති॒ න්යූ॑නා॒ද්ධි ප්ර॒ජාප॑තිඃ ප්ර॒ජා අසෘ॑ජත ප්ර॒ජානා॒ග්ං॒ සෘෂ්ට්යා॑ අ॒ග්නිර්දේ॒වේභ්යෝ॒ නිලා॑යත॒ ස දිශෝ-(අ)නු॒ ප්රා-(අ)වි॑ශ॒ජ්ජුහ්ව॒න්මන॑සා॒ දිශෝ᳚ ද්ධ්යායේ ද්දි॒ග්භ්ය ඒ॒වෛන॒මව॑ රුන්ධේ ද॒ද්ධ්නා පු॒රස්තා᳚ජ්ජුහෝ॒ත්යා-ජ්යේ॑නෝ॒පරි॑ෂ්ටා॒-ත්තේජ॑ශ්චෛ॒වාස්මා॑ ඉන්ද්රි॒ය-ඤ්ච॑ ස॒මීචී॑ දධාති॒ ද්වාද॑ශකපාලෝ වෛශ්වාන॒රෝ භ॑වති॒ ද්වාද॑ශ॒ මාසා᳚-ස්සංවँථ්ස॒ර-ස්සං॑වँථ්ස॒රෝ᳚-(අ)ග්නිර්වෛ᳚ශ්වාන॒ර-ස්සා॒ක්ෂා- [-(අ)ග්නිර්වෛ᳚ශ්වාන॒ර-ස්සා॒ක්ෂාත්, ඒ॒ව වෛ᳚ශ්වාන॒රමව॑] 35

-දේ॒ව වෛ᳚ශ්වාන॒රමව॑ රුන්ධේ॒ ය-ත්ප්ර॑යාජානූයා॒ජාන් කු॒ර්යාද්වික॑ස්ති॒-ස්සා ය॒ජ්ඤස්ය॑ දර්විහෝ॒ම-ඞ්ක॑රෝති ය॒ජ්ඤස්ය॒ ප්රති॑ෂ්ඨිත්යෛ රා॒ෂ්ට්රං-වෛँ වෛ᳚ශ්වාන॒රෝ විණ්ම॒රුතෝ॑ වෛශ්වාන॒රග්ං හු॒ත්වා මා॑රු॒තාන් ජු॑හෝති රා॒ෂ්ට්ර ඒ॒ව විශ॒මනු॑ බද්ධ්නාත්යු॒ච්චෛ-ර්වෛ᳚ශ්වාන॒රස්යා-(අ)(අ) ශ්රා॑වයත්යුපා॒ග්ං॒ශු මා॑රු॒තාන් ජු॑හෝති॒ තස්මා᳚-ද්රා॒ෂ්ට්රං-විँශ॒මති॑ වදති මාරු॒තා භ॑වන්ති ම॒රුතෝ॒ වෛ දේ॒වානාං॒-විँශෝ॑ දේවවි॒ශේනෛ॒වාස්මෛ॑ මනුෂ්යවි॒ශ -මව॑ රුන්ධේ ස॒ප්ත භ॑වන්ති ස॒ප්තග॑ණා॒ වෛ ම॒රුතෝ॑ ගණ॒ශ ඒ॒ව විශ॒මව॑ රුන්ධේ ග॒ණේන॑ ග॒ණම॑නු॒ද්රුත්ය॑ ජුහෝති॒ විශ॑මේ॒වාස්මා॒ අනු॑වර්ත්මාන-ඞ්කරෝති .. 36 ..

(අග්නේ॒ ප්රේහ්ය - ව॑ - ස්ම - දුහේ॒ තාං - ප්ර॒ජාප॑තේඃ - සා॒ක්ෂාන් - ම॑නුෂ්යවි॒ශ - මේක॑විග්ංශතිශ්ච) (අ. 7)

වසෝ॒ර්ධාරා᳚-ඤ්ජුහෝති॒ වසෝ᳚ර්මේ॒ ධාරා॑-(අ)ස॒දිති॒ වා ඒ॒ෂා හූ॑යතේ ඝෘ॒තස්ය॒ වා ඒ॑නමේ॒ෂා ධාරා॒-(අ)මුෂ්මි॑න් ँලෝ॒කේ පින්ව॑මා॒නෝප॑ තිෂ්ඨත॒ ආජ්යේ॑න ජුහෝති॒ තේජෝ॒ වා ආජ්ය॒-න්තේජෝ॒ වසෝ॒ර්ධාරා॒ තේජ॑සෛ॒වාස්මෛ॒ තේජෝ-(අ)ව॑ රු॒න්ධේ-(අ)ථෝ॒ කාමා॒ වෛ වසෝ॒ර්ධාරා॒ කාමා॑නේ॒වාව॑ රුන්ධේ॒ ය-ඞ්කා॒මයේ॑ත ප්රා॒ණාන॑ස්යා॒-(අ)න්නාද්යං॒-විँ- [-(අ)න්නාද්යං॒-විँ, ඡි॒න්ද්යා॒මිති॑] 37

-ච්ඡි॑න්ද්යා॒මිති॑ වි॒ග්රාහ॒-න්තස්ය॑ ජුහුයා-ත්ප්රා॒ණානේ॒වාස්යා॒න්නාද්යං॒-විँච්ඡි॑නත්ති॒ ය-ඞ්කා॒මයේ॑ත ප්රා॒ණාන॑ස්යා॒න්නාද්ය॒ග්ං॒ ස-න්ත॑නුයා॒මිති॒ ස-න්ත॑තා॒-න්තස්ය॑ ජුහුයා-ත්ප්රා॒ණානේ॒වාස්යා॒න්නාද්ය॒ග්ං॒ ස-න්ත॑නෝති॒ ද්වාද॑ශ ද්වාද॒ශානි॑ ජුහෝති॒ ද්වාද॑ශ॒ මාසා᳚-ස්සංවँථ්ස॒ර-ස්සං॑වँථ්ස॒රේණෛ॒ වාස්මා॒ අන්න॒මව॑ රු॒න්ධේ (අ)න්න॑-ඤ්ච॒ මේ-(අ)ක්ෂු॑ච්ච ම॒ ඉත්යා॑හෛ॒ ත-ද්වා [ඉත්යා॑හෛ॒ ත-ද්වෛ, අන්න॑ස්ය රූ॒පග්ං] 38

අන්න॑ස්ය රූ॒පග්ං රූ॒පේණෛ॒වාන්න॒මව॑ රුන්ධේ॒ (අ)ග්නිශ්ච॑ ම॒ ආප॑ශ්ච ම॒ ඉත්යා॑හෛ॒ෂා වා අන්න॑ස්ය॒ යෝනි॒-ස්සයෝ᳚න්යේ॒වාන්න॒මව॑ රුන්ධේ-(අ)ර්ධේ॒න්ද්රාණි॑ ජුහෝති දේ॒වතා॑ ඒ॒වාව॑ රුන්ධේ॒ ය-ථ්සර්වේ॑ෂා-ම॒ර්ධමින්ද්රඃ॒ ප්රති॒ තස්මා॒දින්ද්රෝ॑ දේ॒වතා॑නා-ම්භූයිෂ්ඨ॒භාක්ත॑ම॒ ඉන්ද්ර॒මුත්ත॑රමාහේ-න්ද්රි॒යමේ॒වාස්මි॑-න්නු॒පරි॑ෂ්ටා-ද්දධාති යජ්ඤායු॒ධානි॑ ජුහෝති ය॒ජ්ඤෝ [ය॒ජ්ඤඃ, වෛ ය॑ජ්ඤායු॒ධානි॑] 39

වෛ ය॑ජ්ඤායු॒ධානි॑ ය॒ජ්ඤමේ॒වාව॑ රු॒න්ධේ-(අ)ථෝ॑ ඒ॒තද්වෛ ය॒ජ්ඤස්ය॑ රූ॒පග්ං රූ॒පේණෛ॒ව ය॒ජ්ඤමව॑ රුන්ධේ (අ)වභෘ॒ථශ්ච॑ මේ ස්වගාකා॒රශ්ච॑ ම॒ ඉත්යා॑හ ස්ව॒ගාකෘ॑ත්යා අ॒ග්නිශ්ච॑ මේ ඝ॒ර්මශ්ච॑ ම॒ ඉත්යා॑හෛ॒ත-ද්වෛ බ්ර॑හ්මවර්ච॒සස්ය॑ රූ॒පග්ං රූ॒පේණෛ॒ව බ්ර॑හ්මවර්ච॒සමව॑ රුන්ධ॒ ඍක්ච॑ මේ॒ සාම॑ ච ම॒ ඉත්යා॑හෛ॒- [ම॒ ඉත්යා॑හ, ඒ॒තද්වෛ ඡන්ද॑සාග්ං] 40

-තද්වෛ ඡන්ද॑සාග්ං රූ॒පග්ං රූ॒පේණෛ॒ව ඡන්දා॒ග්॒ස්යව॑ රුන්ධේ॒ ගර්භා᳚ශ්ච මේ ව॒ථ්සාශ්ච॑ ම॒ ඉත්යා॑හෛ॒ත-ද්වෛ ප॑ශූ॒නාග්ං රූ॒පග්ං රූ॒පේණෛ॒ව ප॒ශූනව॑ රුන්ධේ॒ කල්පා᳚න් ජුහෝ॒ත්ය කෟ॑ප්තස්ය॒ කෟප්ත්යෛ॑ යුග්මදයු॒ජේ ජු॑හෝති මිථුන॒ත්වායෝ᳚-ත්ත॒රාව॑තී භවතෝ॒-(අ)භික්රා᳚න්ත්යා॒ ඒකා॑ ච මේ ති॒ස්රශ්ච॑ ම॒ ඉත්යා॑හ දේවඡන්ද॒සං-වාँ ඒකා॑ ච ති॒ස්රශ්ච॑ [ති॒ස්රශ්ච॑, ම॒නු॒ෂ්ය॒ඡ॒න්ද॒ස-ඤ්චත॑ස්රශ්චා॒-(අ)ෂ්ටෞ] 41

මනුෂ්යඡන්ද॒ස-ඤ්චත॑ස්රශ්චා॒-(අ)ෂ්ටෞ ච॑ දේවඡන්ද॒ස-ඤ්චෛ॒ව ම॑නුෂ්ය ඡන්ද॒සඤ්චා-(අ)ව॑ රුන්ධ॒ ආ ත්රය॑ස්ත්රිග්ං ශතෝ ජුහෝති॒ ත්රය॑ස්ත්රිග්ංශ॒ද්වෛ දේ॒වතා॑ දේ॒වතා॑ ඒ॒වාව॑ රුන්ධ॒ ආ-(අ)ෂ්ටාච॑ත්වාරිග්ංශතෝ ජුහෝත්ය॒ෂ්ටාච॑ත්වාරිග්ං-ශදක්ෂරා॒ ජග॑තී॒ ජාග॑තාඃ ප॒ශවෝ॒ ජග॑ත්යෛ॒වාස්මෛ॑ ප॒ශූනව॑ රුන්ධේ॒ වාජ॑ශ්ච ප්රස॒වශ්චේති॑ ද්වාද॒ශ-ඤ්ජු॑හෝති॒ ද්වාද॑ශ॒ මාසා᳚-ස්සංවँථ්ස॒ර-ස්සං॑වँථ්ස॒ර ඒ॒ව ප්රති॑ තිෂ්ඨති .. 42 ..

(වි - වෛ - ය॒ජ්ඤඃ-සාම॑ ච ම॒ ඉත්යා॑හ - ච ති॒ස්ර - ශ්චෛකා॒න්න ප॑ඤ්චා॒ශච්ච॑) (අ. 8)

අ॒ග්නිර්දේ॒වේභ්යෝ (අ)පා᳚ක්රාම-ද්භාග॒ධේය॑මි॒ච්ඡමා॑න॒ස්ත-න්දේ॒වා අ॑බ්රුව॒න්නුප॑ න॒ ආ ව॑ර්තස්ව හ॒ව්ය-න්නෝ॑ ව॒හේති॒ සෝ᳚-(අ)බ්රවී॒-ද්වරං॑-වෘँණෛ॒ මහ්ය॑මේ॒ව වා॑ජප්රස॒වීය॑-ඤ්ජුහව॒න්නිති॒ තස්මා॑ද॒ග්නයේ॑ වාජප්රස॒වීය॑-ඤ්ජුහ්වති॒ ය-ද්වා॑ජප්රස॒වීය॑-ඤ්ජු॒හෝත්ය॒ග්නිමේ॒ව ත-ද්භා॑ග॒ධේයේ॑න॒ සම॑ර්ධය॒ත්යථෝ॑ අභිෂේ॒ක ඒ॒වාස්ය॒ ස ච॑තුර්ද॒ශභි॑ර්ජුහෝති ස॒ප්ත ග්රා॒ම්යා ඕෂ॑ධය-ස්ස॒ප්තා- [ඕෂ॑ධය-ස්ස॒ප්ත, අ॒ර॒ණ්යා උ॒භයී॑ෂා॒-] 43

-(අ)(අ)ර॒ණ්යා උ॒භයී॑ෂා॒-මව॑රුද්ධ්යා॒ අන්න॑ස්යාන්නස්ය ජුහෝ॒ත්යන්න॑ස්යාන්න॒ස්යා-ව॑රුද්ධ්යා॒ ඖදු॑ම්බරේණ ස්රු॒වේණ॑ ජුහෝ॒ත්යූර්ග්වා උ॑දු॒ම්බර॒ ඌර්ගන්න॑මූ॒ර්ජෛවාස්මා॒ ඌර්ජ॒මන්න॒මව॑ රුන්ධේ॒ (අ)ග්නිර්වෛ දේ॒වානා॑-ම॒භිෂි॑ක්තෝ-(අ)ග්නි॒චි-න්ම॑නු॒ෂ්යා॑ණා॒-න්තස්මා॑දග්නි॒චි-ද්වර්ෂ॑ති॒ න ධා॑වේ॒දව॑රුද්ධ॒ග්ග්॒ හ්ය॑ස්යා-න්න॒මන්න॑මිව॒ ඛලු॒ වෛ ව॒ර්॒ෂං-යँද්ධාවේ॑-ද॒න්නාද්යා᳚ද්ධාවේ-දු॒පාව॑ර්තේතා॒-(අ)න්නාද්ය॑-මේ॒වා-(අ)භ්යු॒- [-(අ)න්නාද්ය॑-මේ॒වා-(අ)භි, උ॒පාව॑ර්තතේ॒] 44

-පාව॑ර්තතේ॒ නක්තෝ॒ෂාසේති॑ කෘ॒ෂ්ණායෛ᳚ ශ්වේ॒තව॑ථ්සායෛ॒ පය॑සා ජුහෝ॒ත්යහ්නෛ॒වාස්මෛ॒ රාත්රි॒-ම්ප්රදා॑පයති॒ රාත්රි॒යා-(අ)හ॑රහෝරා॒ත්රේ ඒ॒වාස්මෛ॒ ප්රත්තේ॒ කාම॑ම॒න්නාද්ය॑-න්දුහාතේ රාෂ්ට්ර॒භෘතෝ॑ ජුහෝති රා॒ෂ්ට්රමේ॒වාව॑ රුන්ධේ ෂ॒ඩ්භිර්ජු॑හෝති॒ ෂඩ්වා ඍ॒තව॑ ඍ॒තුෂ්වේ॒ව ප්රති॑තිෂ්ඨති॒ භුව॑නස්ය පත॒ ඉති॑ රථමු॒ඛේ පඤ්චා-(අ)(අ)හු॑තීර්ජුහෝති॒ වජ්රෝ॒ වෛ රථෝ॒ වජ්රේ॑ණෛ॒ව දිශෝ॒- [වජ්රේ॑ණෛ॒ව දිශඃ॑, අ॒භි ජ॑යත්යග්නි॒චිතග්ං॑] 45

-(අ)භි ජ॑යත්යග්නි॒චිතග්ං॑ හ॒ වා අ॒මුෂ්මි॑න් ँලෝ॒කේ වාතෝ॒-(අ)භි ප॑වතේ වාතනා॒මානි॑ ජුහෝත්ය॒භ්යේ॑වෛන॑-ම॒මුෂ්මි॑න් ँලෝ॒කේ වාතඃ॑ පවතේ॒ ත්රීණි॑ ජුහෝති॒ ත්රය॑ ඉ॒මේ ලෝ॒කා ඒ॒භ්ය ඒ॒ව ලෝ॒කේභ්යෝ॒ වාත॒මව॑ රුන්ධේ සමු॒ද්රෝ॑-(අ)සි॒ නභ॑ස්වා॒නිත්යා॑හෛ॒තද්වෛ වාත॑ස්ය රූ॒පග්ං රූ॒පේණෛ॒ව වාත॒මව॑ රුන්ධේ (අ)ඤ්ජ॒ලිනා॑ ජුහෝති॒ න හ්යේ॑තේෂා॑ම॒න්යථා (අ)(අ)හු॑තිරව॒කල්ප॑තේ .. 46 ..

(ඕෂ॑ධය-ස්ස॒ප්තා - භි - දිශෝ॒ - (අ)න්යථා॒ - ද්වේ ච॑) (අ. 9)

සු॒ව॒ර්ගාය॒ වෛ ලෝ॒කාය॑ දේවර॒ථෝ යු॑ජ්යතේ යත්රාකූ॒තාය॑ මනුෂ්යර॒ථ ඒ॒ෂ ඛලු॒ වෛ දේ॑වර॒ථෝ යද॒ග්නිර॒ග්නිං-යුँ॑නජ්මි॒ ශව॑සා ඝෘ॒තේනේත්යා॑හ යු॒නක්ත්යේ॒වෛන॒ග්ං॒ ස ඒ॑නං-යුँ॒ක්ත-ස්සු॑ව॒ර්ගං-ලෝँ॒කම॒භි ව॑හති॒ ය-ථ්සර්වා॑භිඃ ප॒ඤ්චභි॑-ර්යු॒ඤ්ජ්යා-ද්යු॒ක්තෝ᳚-(අ)ස්යා॒-(අ)ග්නිඃ ප්රච්යු॑ත-ස්ස්යා॒දප්ර॑තිෂ්ඨිතා॒ ආහු॑තය॒-ස්ස්යුරප්ර॑තිෂ්ඨිතා॒-ස්ස්තෝමා॒ අප්ර॑තිෂ්ඨිතාන්යු॒ක්ථානි॑ ති॒සෘභිඃ॑ ප්රාතස්සව॒නේ॑-(අ)භි මෘ॑ශති ත්රි॒වෘ- [ත්රි॒වෘත්, වා අ॒ග්නිර්යාවා॑නේ॒වා-] 47

-ද්වා අ॒ග්නිර්යාවා॑නේ॒වා-ග්නිස්තං-යුँ॑නක්ති॒ යථා-(අ)න॑සි යු॒ක්ත ආ॑ධී॒යත॑ ඒ॒වමේ॒ව ත-ත්ප්රත්යාහු॑තය॒ස්තිෂ්ඨ॑න්ති॒ ප්රති॒ ස්තෝමාඃ॒ ප්රත්යු॒ක්ථානි॑ යජ්ඤාය॒ජ්ඤිය॑ස්ය ස්තෝ॒ත්රේ ද්වාභ්යා॑ම॒භි මෘ॑ශත්යේ॒තාවා॒න්॒ වෛ ය॒ජ්ඤෝ යාවා॑නග්නිෂ්ටෝ॒මෝ භූ॒මා ත්වා අ॒ස්යාත॑ ඌ॒ර්ධ්වඃ ක්රි॑යතේ॒ යාවා॑නේ॒ව ය॒ජ්ඤස්තම॑න්ත॒තෝ᳚ (අ)න්වාරෝ॑හති॒ ද්වාභ්යා॒-ම්ප්රති॑ෂ්ඨිත්යා॒ ඒක॒යා-(අ)ප්ර॑ස්තුත॒-ම්භව॒ත්යථා॒- [-(අ)ප්ර॑ස්තුත॒-ම්භව॒ත්යථ॑, අ॒භි මෘ॑ශ॒ත්යුපෛ॑න॒-] 48

-(අ)භි මෘ॑ශ॒ත්යුපෛ॑න॒-මුත්ත॑රෝ ය॒ජ්ඤෝ න॑ම॒ත්යථෝ॒ සන්ත॑ත්යෛ॒ ප්ර වා ඒ॒ෂෝ᳚-(අ)ස්මාල්ලෝ॒කා-ච්ච්ය॑වතේ॒ යෝ᳚-(අ)ග්නි-ඤ්චි॑නු॒තේ න වා ඒ॒තස්යා॑නිෂ්ට॒ක ආහු॑ති॒රව॑ කල්පතේ॒ යාං-වාँ ඒ॒ෂෝ॑-(අ)නිෂ්ට॒ක ආහු॑ති-ඤ්ජු॒හෝති॒ ස්රව॑ති॒ වෛ සා තාග් ස්රව॑න්තීං-යँ॒ජ්ඤෝ-(අ)නු॒ පරා॑ භවති ය॒ජ්ඤං-යँජ॑මානෝ॒ ය-ත්පු॑නශ්චි॒ති-ඤ්චි॑නු॒ත ආහු॑තීනා॒-ම්ප්රති॑ෂ්ඨිත්යෛ॒ ප්රත්යාහු॑තය॒ස්තිෂ්ඨ॑න්ති॒ [ප්රත්යාහු॑තය॒ස්තිෂ්ඨ॑න්ති, න ය॒ජ්ඤඃ] 49

න ය॒ජ්ඤඃ ප॑රා॒භව॑ති॒ න යජ॑මානෝ॒ (අ)ෂ්ටාවුප॑ දධාත්ය॒ෂ්ටාක්ෂ॑රා ගාය॒ත්රී ගා॑ය॒ත්රේණෛ॒වෛන॒-ඤ්ඡන්ද॑සා චිනුතේ॒ යදේකා॑දශ॒ ත්රෛෂ්ටු॑භේන॒ ය-ද්ද්වාද॑ශ॒ ජාග॑තේන॒ ඡන්දෝ॑භිරේ॒වෛන॑-ඤ්චිනුතේ නපා॒ත්කෝ වෛනාමෛ॒ෂෝ᳚-(අ)ග්නිර්ය-ත්පු॑නශ්චි॒තිර්ය ඒ॒වං-විँ॒ද්වා-න්පු॑නශ්චි॒ති-ඤ්චි॑නු॒ත ආ තෘ॒තීයා॒-ත්පුරු॑ෂා॒දන්න॑මත්ති॒ යථා॒ වෛ පු॑නරා॒ධේය॑ ඒ॒ව-ම්පු॑නශ්චි॒තිර්යෝ᳚-(අ)-ග්න්යා॒ධේයේ॑න॒ න- [-ග්න්යා॒ධේයේ॑න॒ න, ඍ॒ධ්නෝති॒ ස] 50

-ර්ධ්නෝති॒ ස පු॑නරා॒ධේය॒මා ධ॑ත්තේ॒ යෝ᳚-(අ)ග්නි-ඤ්චි॒ත්වා නර්ධ්නෝති॒ ස පු॑නශ්චි॒ති-ඤ්චි॑නුතේ॒ ය-ත්පු॑නශ්චි॒ති-ඤ්චි॑නු॒ත ඍද්ධ්යා॒ අථෝ॒ ඛල්වා॑හු॒ර්න චේ॑ත॒ව්යේති॑ රු॒ද්රෝ වා ඒ॒ෂ යද॒ග්නිර්යථා᳚ ව්යා॒ඝ්රග්ං සු॒ප්ත-ම්බෝ॒ධය॑ති තා॒දෘගේ॒ව තදථෝ॒ ඛල්වා॑හුශ්චේත॒ව්යේති॒ යථා॒ වසී॑යාග්ංස-ම්භාග॒ධේයේ॑න බෝ॒ධය॑ති තා॒දෘගේ॒ව තන්මනු॑ර॒ග්නිම॑චිනුත॒ තේන॒ නා-(අ)(අ)ර්ධ්නෝ॒ථ්ස ඒ॒තා-ම්පු॑නශ්චි॒තිම॑පශ්ය॒-ත්තාම॑චිනුත॒ තයා॒ වෛ ස ආ᳚ර්ධ්නෝ॒ද්ය-ත්පු॑නශ්චි॒ති-ඤ්චි॑නු॒ත ඍද්ධ්යෛ᳚ .. 51 ..

(ත්රි॒වෘ-දථ॒-තිෂ්ඨ॑-න්ත්යග්න්යා॒ධේයේ॑න॒ නා-චි॑නුත-ස॒ප්තද॑ශ- ච) (අ. 10)

ඡ॒න්ද॒ශ්චිත॑-ඤ්චින්වීත ප॒ශුකා॑මඃ ප॒ශවෝ॒ වෛ ඡන්දාග්ං॑සි පශු॒මානේ॒ව භ॑වති ශ්යේන॒චිත॑-ඤ්චින්වීත සුව॒ර්ගකා॑ම-ශ්ශ්යේ॒නෝ වෛ වය॑සා॒-ම්පති॑ෂ්ඨ-ශ්ශ්යේ॒න ඒ॒ව භූ॒ත්වා සු॑ව॒ර්ගං-ලෝँ॒ක-ම්ප॑තති කඞ්ක॒චිත॑-ඤ්චින්වීත॒ යඃ කා॒මයේ॑ත ශීර්ෂ॒ණ්වාන॒මුෂ්මි॑න් ँලෝ॒කේ ස්යා॒මිති॑ ශීර්ෂ॒ණ්වානේ॒වා-(අ)මුෂ්මි॑න් ँලෝ॒කේ භ॑වත්යලජ॒චිත॑-ඤ්චින්වීත॒ චතු॑ස්සීත-ම්ප්රති॒ෂ්ඨාකා॑ම॒ශ්චත॑ස්රෝ॒ දිශෝ॑ දි॒ක්ෂ්වේ॑ව ප්රති॑ තිෂ්ඨති ප්රෞග॒චිත॑-ඤ්චින්වීත॒ භ්රාතෘ॑ව්යවා॒-න්ප්රෛ- [භ්රාතෘ॑ව්යවා॒-න්ප්ර, ඒ॒ව භ්රාතෘ॑ව්යා-න්නුදත] 52

-ව භ්රාතෘ॑ව්යා-න්නුදත උභ॒යතඃ॑ ප්රෞග-ඤ්චින්වීත॒යඃ කා॒මයේ॑ත॒ ප්රජා॒තා-න්භ්රාතෘ॑ව්යා-න්නු॒දේය॒ ප්රති॑ ජනි॒ෂ්යමා॑ණා॒නිති॒ ප්රෛව ජා॒තා-න්භ්රාතෘ॑ව්යා-න්නු॒දතේ॒ ප්රති॑ ජනි॒ෂ්යමා॑ණා-න්රථචක්ර॒චිත॑-ඤ්චින්වීත॒ භ්රාතෘ॑ව්යවා॒න්॒ වජ්රෝ॒ වෛ රථෝ॒ වජ්ර॑මේ॒ව භ්රාතෘ॑ව්යේභ්යඃ॒ ප්රහ॑රති ද්රෝණ॒චිත॑-ඤ්චින්වී॒තාන්න॑කාමෝ॒ ද්රෝණේ॒ වා අන්න॑-ම්භ්රියතේ॒ සයෝ᳚න්යේ॒වාන්න॒මව॑ රුන්ධේ සමූ॒හ්ය॑-ඤ්චින්වීත ප॒ශුකා॑මඃ පශු॒මානේ॒ව භ॑වති [පශු॒මානේ॒ව භ॑වති, ප॒රි॒චා॒ය්ය॑-ඤ්චින්වීත॒] 53

පරිචා॒ය්ය॑-ඤ්චින්වීත॒ ග්රාම॑කාමෝ ග්රා॒ම්යේ॑ව භ॑වති ශ්මශාන॒චිත॑-ඤ්චින්වීත॒ යඃ කා॒මයේ॑ත පිතෘලෝ॒ක ඍ॑ද්ධ්නුයා॒මිති॑ පිතෘලෝ॒ක ඒ॒වර්ධ්නෝ॑ති විශ්වාමිත්රජමද॒ග්නී වසි॑ෂ්ඨේනා-(අ)ස්පර්ධේතා॒ග්ං॒ ස ඒ॒තා ජ॒මද॑ග්නිර්විහ॒ව්යා॑ අපශ්ය॒-ත්තා උපා॑ධත්ත॒ තාභි॒ර්වෛ ස වසි॑ෂ්ඨස්යේන්ද්රි॒යං-වීँ॒ර්ය॑මවෘඞ්ක්ත॒ ය-ද්වි॑හ॒ව්යා॑ උප॒දධා॑තීන්ද්රි॒යමේ॒ව තාභි॑ර්වී॒ර්යං॑-යँජ॑මානෝ॒ භ්රාතෘ॑ව්යස්ය වෘඞ්ක්තේ॒ හෝතු॒ර්ධිෂ්ණි॑ය॒ උප॑ දධාති යජමානායත॒නං-වෛँ [ ] 54

හෝතා॒ ස්ව ඒ॒වාස්මා॑ ආ॒යත॑න ඉන්ද්රි॒යං-වීँ॒ර්ය॑මව॑ රුන්ධේ॒ ද්වාද॒ශෝප॑ දධාති॒ ද්වාද॑ශාක්ෂරා॒ ජග॑තී॒ ජාග॑තාඃ ප॒ශවෝ॒ ජග॑ත්යෛ॒වාස්මෛ॑ ප॒ශූනව॑ රුන්ධේ॒ (අ)ෂ්ටාව॑ෂ්ටාව॒න්යේෂු॒ ධිෂ්ණි॑යේ॒ෂූප॑ දධාත්ය॒ෂ්ටාශ॑ඵාඃ ප॒ශවඃ॑ ප॒ශූනේ॒වාව॑ රුන්ධේ॒ ෂණ්මා᳚ර්ජා॒ලීයේ॒ ෂ-ඩ්වා ඍ॒තව॑ ඍ॒තවඃ॒ ඛලු॒ වෛ දේ॒වාඃ පි॒තර॑ ඍ॒තූනේ॒ව දේ॒වා-න්පි॒තෲ-න්ප්රී॑ණාති .. 55 ..

(ප්ර - භ॑වති - යජමානායත॒නං-වාँ - අ॒ෂ්ටාච॑ත්වාරිග්ංශච්ච) (අ. 11)

පව॑ස්ව॒ වාජ॑සාතය॒ ඉත්ය॑නු॒ෂ්ටු-ක්ප්ර॑ති॒පද්භ॑වති ති॒ර්සෝ॑-(අ)නු॒ෂ්ටුභ॒ශ්චත॑ස්රෝ ගාය॒ත්රියෝ॒ ය-ත්ති॒ස්රෝ॑-(අ)නු॒ෂ්ටුභ॒-ස්තස්මා॒-දශ්ව॑ස්ත්රි॒භිස්තිෂ්ඨග්ග්॑ ස්තිෂ්ඨති॒ යච්චත॑ස්රෝ ගාය॒ත්රිය॒ස්තස්මා॒-ථ්සර්වාග්॑ ශ්ච॒තුරඃ॑ ප॒දඃ ප්ර॑ති॒දධ॒-ත්පලා॑යතේ පර॒මා වා ඒ॒ෂා ඡන්ද॑සාං॒-යँද॑නු॒ෂ්ටු-ක්ප॑ර॒මශ්ච॑තුෂ්ටෝ॒ම-ස්ස්තෝමා॑නා-ම්පර॒මස්ත්රි॑රා॒ත්රෝ ය॒ජ්ඤානා᳚-ම්පර॒මෝ-(අ)ශ්වඃ॑ පශූ॒නා-ම්ප॑ර॒මේණෛ॒වෛන॑-ම්පර॒මතා᳚-ඞ්ගමයත්යේකවි॒ග්ං॒ශ-මහ॑ර්භවති॒ [-මහ॑ර්භවති, යස්මි॒න්නශ්ව॑] 56

යස්මි॒න්නශ්ව॑ ආල॒භ්යතේ॒ ද්වාද॑ශ॒ මාසාඃ॒ පඤ්ච॒ර්තව॒ස්ත්රය॑ ඉ॒මේ ලෝ॒කා අ॒සාවා॑දි॒ත්ය ඒ॑කවි॒ග්ං॒ශ ඒ॒ෂ ප්ර॒ජාප॑තිඃ ප්රාජාප॒ත්යෝ-(අ)ශ්ව॒ස්තමේ॒ව සා॒ක්ෂාදෘ॑ද්ධ්නෝති॒ ශක්ව॑රයඃ පෘ॒ෂ්ඨ-ම්භ॑වන්ත්ය॒න්-යද॑න්ය॒-ච්ඡන්දෝ॒-(අ)න්යේ᳚න්යේ॒ වා ඒ॒තේ ප॒ශව॒ ආ ල॑භ්යන්ත උ॒තේව॑ ග්රා॒ම්යා උ॒තේවා॑-(අ)(අ)ර॒ණ්යා යච්ඡක්ව॑රයඃ පෘ॒ෂ්ඨ-ම්භව॒න්ත්යශ්ව॑ස්ය සර්ව॒ත්වාය॑ පාර්ථුර॒ශ්ම-ම්බ්ර॑හ්මසා॒ම-ම්භ॑වති ර॒ශ්මිනා॒ වා අශ්වෝ॑ [ර॒ශ්මිනා॒ වා අශ්වඃ॑, ය॒ත ඊ᳚ශ්ව॒රෝ] 57

ය॒ත ඊ᳚ශ්ව॒රෝ වා අශ්වෝ-(අ)ය॒තෝ-(අ)ප්ර॑තිෂ්ඨිතඃ॒ පරා᳚-ම්පරා॒වත॒-ඞ්ගන්තෝ॒ර්ය-ත්පා᳚ර්ථුර॒ශ්ම-ම්බ්ර॑හ්මසා॒ම-ම්භව॒ත්යශ්ව॑ස්ය॒ යත්යෛ॒ ධෘත්යෛ॒ සඞ්කෘ॑ත්යච්ඡාවාකසා॒ම-ම්භ॑වත්යුථ්සන්නය॒ජ්ඤෝ වා ඒ॒ෂ යද॑ශ්වමේ॒ධඃ කස්තද්වේ॒දේත්යා॑හු॒ර්යදි॒ සර්වෝ॑ වා ක්රි॒යතේ॒ න වා॒ සර්ව॒ ඉති॒ ය-ථ්සඞ්කෘ॑ත්යච්ඡාවාකසා॒ම-ම්භව॒ත්යශ්ව॑ස්ය සර්ව॒ත්වාය॒ පර්යා᳚ප්ත්යා॒ අන॑න්තරායාය॒ සර්ව॑ස්තෝමෝ-(අ)තිරා॒ත්ර උ॑ත්ත॒මමහ॑ර්භවති॒ සර්ව॒ස්යා-(අ)(අ)ප්ත්යෛ॒ සර්ව॑ස්ය॒ ජිත්යෛ॒ සර්ව॑මේ॒ව තේනා᳚-(අ)(අ)ප්නෝති॒ සර්ව॑-ඤ්ජයති .. 58 ..

(අහ॑ර්භවති॒ - වා අශ්වෝ - (අ)හ॑ර්භවති॒ - දශ॑ ච) (අ. 12)

(දේ॒වා॒සු॒රාස්තේන - ර්ත॒ව්යා॑ - රු॒ද්රෝ - (අ)ශ්ම॑ - න්නෘ॒ෂදේ॒ ව - ඩුදේ॑නං॒ - ප්රාචී॒මිති॒ - වසෝ॒ර්ධාරා॑ - ම॒ග්නිර්දේ॒වේභ්යඃ॑ - සුව॒ර්ගාය॑ යත්රාකූ॒තාය॑ - ඡන්ද॒ශ්චිතං॒ - පව॑ස්ව॒ - ද්වාද॑ශ )

(දේ॒වා॒සු॒රා - අ॒ජායාං॒ - ँවෛ ග්රු॑මු॒ෂ්ටිඃ - ප්ර॑ථ॒මෝ දේ॑වය॒තාමේ॒ - තද්වෛ ඡන්ද॑සා - මෘ॒ධ්නෝ - ත්ය॒ෂ්ටෞ ප॑ඤ්චා॒ශත්)

(දේ॒වා॒සු॒රා, ස්සර්ව॑-ඤ්ජයති)

.. හරිඃ॑ ඕම් ..

.. කෘෂ්ණ යජුර්වේදීය තෛත්තිරීය සංහිතායා-ම්පඤ්චමකාණ්ඩේ චතුර්ථඃ ප්රශ්න-ස්සමාප්තඃ ..

Roman (IAST) Transliteration

kṛṣṇa yajurvedīya taittirīya saṃhitāyā-mpañcamakāṇḍe caturthaḥ praśnaḥ - iṣṭakātrayābhidhānaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

de॒vā॒su॒rā-ssaṃya~̭ttā āsa॒-nte na vya̭jayanta॒ sa e॒tā indra̭sta॒nūra̭paśya॒-ttā upā̭dhatta॒ tābhi॒rvai sa ta॒nuva̭mindri॒yaṃ-vī~॒rya̭mā॒tmanna̭dhatta॒ tato̭ de॒vā abha̭va॒-nparā-'sṷrā॒ yadi̭ndrata॒nūrṷpa॒dadhā̭ti ta॒nuva̭me॒va tābhi̭rindri॒yaṃ-vī~॒ryaṃ̭-ya~ja̭māna ā॒tma-ndha॒tte-'tho॒ sendra̭me॒vāgnigṃ sata̭nu-ñcinute॒ bhava̭tyā॒tmanā॒ parā᳚-'sya॒ bhrātṛ̭vyo [bhrātṛ̭vyaḥ, bha॒va॒ti॒ ya॒jño] 1

bhavati ya॒jño de॒vebhyo-'pā᳚krāma॒-ttama̭va॒rudha॒-nnāśa̭knuva॒nta e॒tā ya̭jñata॒nūra̭paśya॒-ntā upā̭dadhata॒ tābhi॒rvai te ya॒jñamavā̭rundhata॒ ya-dya̭jñata॒nūrṷpa॒dadhā̭ti ya॒jñame॒va tābhi॒ryaja̭mā॒no-'va̭ rundhe॒ traya̭strigṃ śata॒mupa̭ dadhāti॒ traya̭strigṃśa॒dvai de॒vatā̭ de॒vatā̭ e॒vāva̭ ru॒ndhe 'tho॒ sātmā̭name॒vāgnigṃ sata̭nu-ñcinute॒ sātmā॒-'muṣmi̭-llo~॒ke [-'muṣmi̭-llo~॒ke, bha॒va॒ti॒ ya] 2

bha̭vati॒ ya e॒vaṃ-ve~da॒ jyoti̭ṣmatī॒rupa̭ dadhāti॒ jyoti̭re॒vāsmi̭-ndadhātye॒tābhi॒rvā a॒gniści॒to jva̭lati॒ tābhi̭re॒vaina॒gṃ॒ sami̭ndha u॒bhayo̭rasmai lo॒kayo॒rjyoti̭rbhavati nakṣatreṣṭa॒kā upa̭ dadhātye॒tāni॒ vai di॒vo jyotīgṃ̭ṣi॒ tānye॒vāva̭ rundhe su॒kṛtāṃ॒-vā~ e॒tāni॒ jyotīgṃ̭ṣi॒ yannakṣa̭trāṇi॒ tānye॒vā-''pno॒tyatho̭ anūkā॒śa-me॒vaitāni॒ [-me॒vaitāni̭, jyotīgṃ̭ṣi kurute] 3

jyotīgṃ̭ṣi kurute suva॒rgasya̭ lo॒kasyānṷkhyātyai॒ ya-thsaggspṛ̭ṣṭā upada॒ddhyā-dvṛṣṭyai̭ lo॒kamapi̭ daddhyā॒dava̭rṣukaḥ pa॒rjanyaḥ̭ syā॒dasagg̭spṛṣṭā॒ upa̭ dadhāti॒ vṛṣṭyā̭ e॒va lo॒ka-ṅka̭roti॒ varṣṷkaḥ pa॒rjanyo̭ bhavati pu॒rastā̭da॒nyāḥ pra॒tīcī॒rupa̭ dadhāti pa॒ścāda॒nyāḥ prācī॒stasmā᳚-tprā॒cīnā̭ni ca pratī॒cīnā̭ni ca॒ nakṣa̭trā॒ṇyā va̭rtante || 4 ||

(bhrātṛ̭vyo - lo॒ka - e॒vaitānye - ka̭catvārigṃśacca) (a. 1)

ṛ॒ta॒vyā̭ upa̭ dadhātyṛtū॒nā-ṅkḷptyai᳚ dva॒dvammupa̭ dadhāti॒ tasmā᳚-ddva॒ndvamṛ॒tavo 'dhṛ̭teva॒ vā e॒ṣā yanma̭ddhya॒mā citi̭ra॒ntari̭kṣamiva॒ vā e॒ṣā dva॒dvamma॒nyāsu॒ citī॒ṣūpa̭ dadhāti॒ cata̭sro॒ maddhye॒ dhṛtyā̭ anta॒śśleṣa̭ṇaṃ॒-vā~ e॒tāścitī̭nāṃ॒-ya~dṛ̭ta॒vyā̭ yadṛ̭ta॒vyā̭ upa॒dadhā̭ti॒ citī̭nāṃ॒-vi~dhṛ̭tyā॒ ava̭kā॒manūpa̭ dadhātye॒ṣā vā a॒gneryoni॒-ssayo̭ni- [a॒gneryoni॒-ssayo̭nim, e॒vāgni-] 5

-me॒vāgni-ñci̭nuta u॒vāca̭ ha vi॒śvāmi॒tro 'da॒di-thsa brahma॒ṇā-'nnaṃ॒-ya~syai॒tā ṷpadhī॒yāntai॒ ya ṷ cainā e॒vaṃ-ve~da॒diti̭ saṃva~thsa॒ro vā e॒ta-mpra̭ti॒ṣṭhāyai̭ nudate॒ yo᳚-'gni-ñci॒tvā na pra̭ti॒tiṣṭha̭ti॒ pañca॒ pūrvā॒ścita̭yo bhava॒ntyatha̭ ṣa॒ṣṭhī-ñciti̭-ñcinute॒ ṣaḍvā ṛ॒tavaḥ̭ saṃva~thsa॒ra ṛ॒tuṣve॒va saṃ̭va~thsa॒re prati̭tiṣṭhatye॒ tā vā [prati̭tiṣṭhatye॒ tā vā, adhi̭patnī॒rnāmeṣṭa̭kā॒] 6

adhi̭patnī॒rnāmeṣṭa̭kā॒ yasyai॒tā ṷpadhī॒yante-'dhi̭patire॒va sa̭mā॒nānā᳚-mbhavati॒ ya-ndvi॒ṣyā-ttamṷpa॒dadha̭-ddhyāyede॒tābhya̭ e॒vaina̭-nde॒vatā᳚bhya॒ ā vṛ̭ścati tā॒jagārti॒mārccha॒tyaṅgi̭rasa-ssuva॒rgaṃ-lo~॒kaṃ-ya~nto॒ yā ya॒jñasya॒ niṣkṛ̭ti॒rāsī॒-ttāmṛṣi̭bhyaḥ॒ pratyaṷha॒-ntaddhira̭ṇyamabhava॒dya-ddhi̭raṇyaśa॒lkaiḥ pro॒kṣati̭ ya॒jñasya॒ niṣkṛ̭tyā॒ atho̭ bheṣa॒jame॒vā-'smai̭ karo॒- [-'smai̭ karoti, atho̭ rū॒peṇai॒vaina॒gṃ॒] 7

-tyatho̭ rū॒peṇai॒vaina॒gṃ॒ sama̭rdhaya॒tyatho॒ hira̭ṇyajyotiṣai॒va sṷva॒rgaṃ-lo~॒kamḙti sāha॒srava̭tā॒ prokṣa̭ti sāha॒sraḥ pra॒jāpa̭tiḥ pra॒jāpa̭te॒rāptyā̭ i॒mā mḙ agna॒ iṣṭa̭kā dhe॒navaḥ̭ sa॒ntvityā̭ha dhe॒nūre॒vaināḥ᳚ kurute॒ tā ḙna-ṅkāma॒dughā̭ a॒mutrā॒muṣmi̭n ~lo॒ka upa̭ tiṣṭhante || 8 ||

(sayo̭ni - me॒tā vai - ka̭ro॒tye - kā॒nnaca̭tvāri॒gṃ॒śacca̭) (a. 2)

ru॒dro vā e॒ṣa yada॒gni-ssa e॒tarhi̭ jā॒to yarhi॒ sarva̭ści॒ta-ssa yathā̭ va॒thso jā॒ta-sstana̭-mpre॒phsatye॒vaṃ-vā~ e॒ṣa e॒tarhi̭ bhāga॒dheya॒-mprephsa̭ti॒ tasmai॒ yadāhṷti॒-nna jṷhu॒yāda̭ddhva॒ryu-ñca॒ yaja̭māna-ñca dhyāyecchataru॒drīya̭-ñjuhoti bhāga॒dheyḙnai॒vainagṃ̭ śamayati॒ nā-''rti॒mārccha̭tyaddhva॒ryurna yaja̭māno॒ ya-dgrā॒myāṇā᳚-mpaśū॒nā- [ya-dgrā॒myāṇā᳚-mpaśū॒nām, paya̭sā juhu॒yā-] 9

-mpaya̭sā juhu॒yā-dgrā॒myā-npa॒śūñchu॒cā 'rpaye॒-dyadā̭ra॒ṇyānā̭-māra॒ṇyān ja̭rtilayavā॒gvā̭ vā juhu॒yā-dga̭vīdhukayavā॒gvā̭ vā॒ na grā॒myā-npa॒śūn. hi॒nasti॒ nā-''ra॒ṇyānatho॒ khalvā̭hu॒ranā̭huti॒rvai ja॒rtilā᳚śca ga॒vīdhṷkā॒ścetya̭ jakṣī॒reṇa̭ juhotyāgne॒yī vā e॒ṣā yada॒jā-''hṷtyai॒va jṷhoti॒ na grā॒myā-npa॒śūn. hi॒nasti॒ nā-''ra॒ṇyānaṅgi̭rasa-ssuva॒rgaṃ-lo~॒kaṃ-ya~nto॒- [-~lo॒kaṃ-ya~ntaḥ̭, a॒jāyā᳚-ṅgha॒rma-] 10

-'jāyā᳚-ṅgha॒rma-mprāsi̭ñca॒nthsā śoca̭ntī pa॒rṇa-mparā̭-'jihīta॒ so᳚(1॒)-'rko̭-'bhava॒-ttada॒rkasyā᳚-rka॒tvama̭rkapa॒rṇena̭ juhoti sayoni॒tvāyoda॒-ntiṣṭha̭n juhotye॒ṣā vai ru॒drasya॒ di-khsvāyā̭me॒va di॒śi ru॒dra-nni॒rava̭dayate cara॒māyā॒miṣṭa̭kāyā-ñjuhotyanta॒ta e॒va ru॒dra-nni॒rava̭dayate tredhāvibha॒kta-ñjṷhoti॒ traya̭ i॒me lo॒kā i॒māne॒va lo॒kān-thsa॒māva̭dvīryān karo॒tīya॒tyagrḙ juho॒- [juhoti, atheya॒tyatheya̭ti॒] 11

-tyatheya॒tyatheya̭ti॒ traya̭ i॒me lo॒kā e॒bhya e॒vainaṃ̭-lo~॒kebhyaḥ̭ śamayati ti॒sra utta̭rā॒ āhṷtīrjuhoti॒ ṣa-ṭthsa-mpa̭dyante॒ ṣa-ḍvā ṛ॒tava̭ ṛ॒tubhi̭re॒vainagṃ̭ śamayati॒ yada̭nupari॒krāma̭-ñjuhu॒yāda̭ntaravacā॒riṇagṃ̭ ru॒dra-ṅkṷryā॒datho॒ khalvā̭huḥ॒ kasyāṃ॒-vā~-'ha̭ di॒śi ru॒draḥ kasyāṃ॒-ve~tya̭nupari॒krāma̭me॒va ho̭ta॒vya̭-mapa̭rivargame॒vainagṃ̭ śamaya- [śamayati, e॒tāvai] 12

-tye॒tāvai de॒vatā᳚-ssuva॒rgyā̭yā ṷtta॒māstā yaja̭mānaṃ-vā~cayati॒ tābhi̭re॒vainagṃ̭ suva॒rgaṃ-lo~॒ka-ṅga̭mayati॒ ya-ndvi॒ṣyā-ttasya̭ sañca॒re pa̭śū॒nā-nnya̭sye॒-dyaḥ pra̭tha॒maḥ pa॒śura̭bhi॒tiṣṭha̭ti॒ sa ārti॒mārccha̭ti || 13 ||

(pa॒śū॒nāṃ - ~yanto - 'gnḙ juho॒tya - pa̭rivargame॒vainagṃ̭ śamayati - tri॒gṃ॒śacca̭) (a. 3)

aśma॒nnūrja॒miti॒ pari̭ ṣiñcati mā॒rjaya̭tye॒vaina॒matho̭ ta॒rpaya̭tye॒va sa ḙna-ntṛ॒pto 'kṣṷddhya॒-nnaśo̭ca-nna॒muṣmi̭n ~lo॒ka upa̭ tiṣṭhate॒ tṛpya̭ti pra॒jayā̭ pa॒śubhi॒rya e॒vaṃ-ve~da॒ tā-nna॒ iṣa॒mūrja̭-ndhatta maruta-ssagṃrarā॒ṇā ityā॒hānnaṃ॒-vā~ ūrganna̭-mma॒ruto-'nna̭me॒vāva̭ ru॒ndhe 'śmagg̭ste॒ kṣuda॒mu-nte॒ śu- [kṣuda॒mu-nte॒ śuk, ṛ॒ccha॒tu॒ ya-ndvi॒ṣma] 14

-gṛ̭cchatu॒ ya-ndvi॒ṣma ityā̭ha॒ yame॒va dveṣṭi॒ tama̭sya kṣu॒dhā ca̭ śu॒cā cā᳚rpayati॒ triḥ pa̭riṣi॒ñca-nparyḙti tri॒vṛdvā a॒gniryāvā̭ne॒vā-gnistasya॒ śucagṃ̭ śamayati॒ triḥ punaḥ॒ paryḙti॒ ṣa-ṭthsa-mpa̭dyante॒ ṣa-ḍvā ṛ॒tava̭ ṛ॒tubhi̭re॒vāsya॒ śucagṃ̭ śamayatya॒pāṃ-vā~ e॒ta-tpuṣpaṃ॒-ya~dvḙta॒so̭-'pāgṃ - [yadvḙta॒so̭-'pām, śaro-'va̭kā] 15

śaro-'va̭kā vetasaśā॒khayā॒ cāva̭kābhiśca॒ vi ka̭rṣa॒tyāpo॒ vai śā॒ntā-śśā॒ntābhi̭re॒vāsya॒ śucagṃ̭ śamayati॒ yo vā a॒gni-ñci॒ta-mpra̭tha॒maḥ pa॒śura̭dhi॒krāma̭tīśva॒ro vai tagṃ śu॒cā pra॒daho̭ ma॒ṇḍūkḙna॒ vika̭rṣatye॒ṣa vai pa̭śū॒nā-ma̭nupajīvanī॒yo na vā e॒ṣa grā॒myeṣṷ pa॒śuṣṷ hi॒to nā-''ra॒ṇyeṣu॒ tame॒va śu॒cā-'rpa̭yatyaṣṭā॒bhi-rvi ka̭rṣa- [-rvi ka̭rṣati, a॒ṣṭākṣa̭rā] 16

-tya॒ṣṭākṣa̭rā gāya॒trī gā̭ya॒tro᳚-'gniryāvā̭-ne॒vā-'gnistasya॒ śucagṃ̭ śamayati pāva॒kava̭tībhi॒rannaṃ॒-vai~ pā̭va॒ko-'nnḙnai॒vāsya॒ śucagṃ̭ śamayati mṛ॒tyurvā e॒ṣa yada॒gnirbrahma̭ṇa e॒tadrū॒paṃ-ya~-tkṛ̭ṣṇāji॒na-ṅkārṣṇī̭ upā॒nahā॒vupa̭ muñcate॒ brahma̭ṇai॒va mṛ॒tyora॒ntardha̭tte॒ 'ntarmṛ॒tyordha̭tte॒ 'ntara॒nnādyā॒-dityā̭hura॒nyā-mṷpamu॒ñcate॒-'nyā-nnānta- [-'nyā-nnāntaḥ, e॒va mṛ॒tyordha॒tte] 17

-re॒va mṛ॒tyordha॒tte 'vā॒-'nnādyagṃ̭ rundhe॒ nama̭ste॒ hara̭se śo॒ciṣa॒ ityā̭ha nama॒skṛtya॒ hi vasī̭yāgṃ samupa॒cara̭ntya॒nya-ntḙ a॒sma-tta̭pantu he॒taya॒ ityā̭ha॒ yame॒va dveṣṭi॒ tama̭sya śu॒cā-'rpa̭yati pāva॒ko a॒smabhyagṃ̭ śi॒vo bha॒vetyā॒hānnaṃ॒-vai~ pā̭va॒ko-'nna̭me॒vāva̭ rundhe॒ dvābhyā॒madhi̭ krāmati॒ prati̭ṣṭhityā apa॒sya̭vatībhyā॒gṃ॒ śāntyai᳚ || 18 ||

(śu - gvḙta॒so̭-'pā - ma̭ṣṭā॒bhirvi ka̭rṣati॒ - nānta - rekā॒nna pa̭ñcā॒śacca̭) (a. 4)

nṛ॒ṣade॒ vaḍiti॒ vyāghā̭rayati pa॒ṅktyā-''hṷtyā yajñamu॒khamā ra̭bhate 'kṣṇa॒yā vyāghā̭rayati॒ tasmā̭dakṣṇa॒yā pa॒śavo-'ṅgā̭ni॒ praha̭ranti॒ prati̭ṣṭhityai॒ yadva̭ṣaṭku॒ryā-dyā॒tayā̭mā-'sya vaṣaṭkā॒ra-ssyā॒dyanna va̭ṣaṭku॒ryā-drakṣāgṃ̭si ya॒jñagṃ ha̭nyu॒rvaḍityā̭ha pa॒rokṣa̭me॒va vaṣa̭-ṭkaroti॒ nāsya̭ yā॒tayā̭mā vaṣaṭkā॒ro bhava̭ti॒ na ya॒jñagṃ rakṣāgṃ̭si ghnanti hu॒tādo॒ vā a॒nye de॒vā [a॒nye de॒vāḥ, a॒hu॒tādo॒-'nye] 19

a̭hu॒tādo॒-'nye tāna̭gni॒cide॒vobhayā᳚-nprīṇāti॒ ye de॒vā de॒vānā॒miti̭ da॒ddhnā ma̭dhumi॒śreṇāvo᳚kṣati hu॒tāda̭ścai॒va de॒vāna̭hu॒tāda̭śca॒ yaja̭mānaḥ prīṇāti॒ te yaja̭māna-mprīṇanti da॒ddhnaiva hu॒tādaḥ̭ prī॒ṇāti॒ madhṷṣā 'hu॒tādo᳚ grā॒myaṃ-vā~ e॒tadannaṃ॒-ya~ddaddhyā̭ra॒ṇya-mmadhu॒ yadda॒dhnā ma̭dhumi॒śreṇā॒-vokṣa̭tyu॒bhaya॒syā-'va̭ruddhyai grumu॒ṣṭinā-'vo᳚kṣati prājāpa॒tyo [prājāpa॒tyaḥ, vai grṷmu॒ṣṭi-] 20

vai grṷmu॒ṣṭi-ssa̭yoni॒tvāya॒ dvābhyā॒-mprati̭ṣṭhityā anupari॒cāra॒-mavo᳚kṣa॒tya-pa̭rivargame॒vainā᳚-nprīṇāti॒ vi vā e॒ṣa prā॒ṇaiḥ pra॒jayā̭ pa॒śubhi̭r-ṛddhyate॒ yo᳚-'gni-ñci॒nvanna̭dhi॒krāma̭ti prāṇa॒dā a̭pāna॒dā ityā̭ha prā॒ṇāne॒vā-''tma-ndha̭tte varco॒dā va̭rivo॒dā ityā̭ha pra॒jā vai varcaḥ̭ pa॒śavo॒ vari̭vaḥ pra॒jāme॒va pa॒śūnā॒tma-ndha̭tta॒ indro̭ vṛ॒trama̭ha॒ntaṃ-vṛ~॒tro [vṛ॒trama̭ha॒ntaṃ-vṛ~॒traḥ, ha॒ta-ṣṣo̭ḍa॒śabhi̭-] 21

ha॒ta-ṣṣo̭ḍa॒śabhi̭-rbho॒gaira̭sinā॒-thsa e॒tāma॒gnaye-'nī̭kavata॒ āhṷtimapaśya॒-ttāma̭juho॒-ttasyā॒gniranī̭ kavā॒nthsvena̭ bhāga॒dheyḙna prī॒ta-ṣṣo̭ḍaśa॒dhā vṛ॒trasya̭ bho॒gānapya̭daha-dvaiśvakarma॒ṇena̭ pā॒pmano॒ nira̭mucyata॒ yada॒gnaye-'nī̭kavata॒ āhṷti-ñju॒hotya॒gnire॒vā-'syānī̭kavā॒nthsvena̭ bhāga॒dheyḙna prī॒taḥ pā॒pmāna॒mapi̭ dahati vaiśvakarma॒ṇena̭ pā॒pmano॒ nirmṷcyate॒ ya-ṅkā॒mayḙta ci॒ra-mpā॒pmano॒ [ci॒ra-mpā॒pmanaḥ̭, nirmṷcye॒tetyekai̭ka॒-] 22

nirmṷcye॒tetyekai̭ka॒-ntasya̭ juhuyācci॒rame॒va pā॒pmano॒ nirmṷcyate॒ ya-ṅkā॒mayḙta tā॒ja-kpā॒pmano॒ nirmṷcye॒teti॒ sarvā̭ṇi॒ tasyā̭nu॒drutya̭ juhuyā-ttā॒jage॒va pā॒pmano॒ nirmṷcya॒te-'tho॒ khalu॒ nānai॒va sū॒ktābhyā᳚-ñjuhoti॒ nānai॒va sū॒ktayo᳚rvī॒rya̭-ndadhā॒tyatho॒ prati̭ṣṭhityai || 23 ||

(de॒vāḥ - prā̭jāpa॒tyo-vṛ॒tra - ści॒ra-mpā॒pmana̭ - ścatvāri॒gṃ॒śacca̭) (a. 5)

udḙnamutta॒rā-nna॒yeti̭ sa॒midha॒ ā da̭dhāti॒ yathā॒ janaṃ̭-ya~॒tḙ-'va॒sa-ṅka॒roti̭ tā॒dṛge॒va ta-tti॒sra ā da̭dhāti tri॒vṛdvā a॒gniryāvā̭ne॒-vāgnistasmai̭ bhāga॒dheya̭-ṅkaro॒tyaudṷmbarī-rbhava॒ntyūrgvā ṷdu॒mbara॒ ūrja̭me॒vāsmā॒ api̭ dadhā॒tyudṷ tvā॒ viśvḙ de॒vā ityā̭ha prā॒ṇā vai viśvḙ de॒vāḥ prā॒ṇai- [prā॒ṇaiḥ, e॒vaina॒-] 24

-re॒vaina॒-mudya̭ccha॒te 'gne॒ bhara̭ntu॒ citti̭bhi॒rityā̭ha॒ yasmā̭ e॒vaina̭-ñci॒ttāyo॒dyaccha̭te॒ tenai॒vaina॒gṃ॒ sama̭rdhayati॒ pañca॒ diśo॒ daivī᳚rya॒jñama̭vantu de॒vīrityā̭ha॒ diśo॒ hyḙṣo-'nṷ pra॒cyava॒te 'pāma̭ti-ndurma॒ti-mbādha̭mānā॒ ityā̭ha॒ rakṣa̭sā॒mapa̭hatyai rā॒yaspoṣḙ ya॒jñapa̭ti-mā॒bhaja̭ntī॒rityā̭ha pa॒śavo॒ vai rā॒yaspoṣaḥ̭ [rā॒yaspoṣaḥ̭, pa॒śūne॒vāva̭] 25

pa॒śūne॒vāva̭ rundhe ṣa॒ḍbhirha̭rati॒ ṣa-ḍvā ṛ॒tava̭ ṛ॒tubhi̭re॒vainagṃ̭ harati॒ dve pa̭ri॒gṛhya̭vatī bhavato॒ rakṣa̭sā॒mapa̭hatyai॒ sūrya̭raśmi॒r॒hari̭keśaḥ pu॒rastā॒dityā̭ha॒ prasū᳚tyai॒ tataḥ̭ pāva॒kā ā॒śiṣo̭ no juṣantā॒mityā॒hānnaṃ॒-vai~ pā̭va॒ko-'nna̭me॒vāva̭ rundhe devāsu॒rā-ssaṃya~̭ttā āsa॒-nte de॒vā e॒ta-dapra̭tiratha-mapaśya॒-ntena॒ vai te᳚ pra॒- [vai te᳚ pra॒ti, asṷrānajaya॒-nta-] 26

-tyasṷrānajaya॒-nta-dapra̭tirathasyā-pratiratha॒tvaṃ-ya~dapra̭tiratha-ndvi॒tīyo॒ hotā॒-'nvāhā᳚pra॒tyḙva tena॒ yaja̭māno॒ bhrātṛ̭vyān jaya॒tyatho॒ ana̭bhijitame॒vābhi ja̭yati daśa॒rca-mbha̭vati॒ daśā᳚kṣarā vi॒rā-ḍvi॒rāje॒mau lo॒kau vidhṛ̭tā va॒nayo᳚rlo॒kayo॒rvidhṛ̭tyā॒ atho॒ daśā᳚kṣarā vi॒rāḍannaṃ̭-vi~॒rā-ḍvi॒rājye॒vānnādye॒ prati̭tiṣṭha॒tyasa̭diva॒ vā a॒ntari̭kṣama॒ntari̭kṣami॒vā ''gnī᳚ddhra॒-māgnī॒ddhre- [-māgnī᳚ddhre, aśmā̭na॒-nni da̭dhāti] 27

-'śmā̭na॒-nni da̭dhāti sa॒ttvāya॒ dvābhyā॒-mprati̭ṣṭhityai vi॒māna̭ e॒ṣa di॒vo maddhya̭ āsta॒ ityā̭ha॒ vyḙvaitayā̭ mimīte॒ maddhyḙ di॒vo nihi̭taḥ॒ pṛśñi॒raśmetyā॒hānnaṃ॒-vai~ pṛśñyanna̭me॒vāva̭ rundhe cata॒sṛbhi॒rā pucchā̭deti ca॒tvāri॒ chandāgṃ̭si॒ chando̭bhire॒vendraṃ॒-vi~śvā̭ avīvṛdha॒nnityā̭ha॒ vṛddhi̭me॒vopāva̭rtate॒ vājā̭nā॒gṃ॒ satpa̭ti॒-mpati॒- [satpa̭ti॒-mpati᳚m, ityā॒hā-'nnaṃ॒-vai~] 28

-mityā॒hā-'nnaṃ॒-vai~ vājo-'nna̭me॒vāva̭ rundhe sumna॒hūrya॒jño de॒vāgṃ ā ca̭ vakṣa॒dityā̭ha pra॒jā vai pa॒śavaḥ̭ su॒mna-mpra॒jāme॒va pa॒śūnā॒tma-ndha̭tte॒ yakṣa̭da॒gnirde॒vo de॒vāgṃ ā ca̭ vakṣa॒dityā̭ha sva॒gākṛ̭tyai॒ vāja̭sya mā prasa॒veno᳚-dgrā॒bheṇoda̭grabhī॒dityā̭hā॒sau vā ā̭di॒tya u॒dyannṷdgrā॒bha e॒ṣa ni॒mroca̭-nnigrā॒bho brahma̭ṇai॒vā-''tmāna̭mu-dgṛ॒hṇāti॒ brahma̭ṇā॒ bhrātṛ̭vya॒-nni gṛ̭hṇāti || 29 ||

(prā॒ṇaiḥ - poṣo᳚ - pra॒tyā - gnī᳚ddhe॒ - pati̭ - me॒ṣa - daśa̭ ca) (a. 6)

prācī॒manṷ pra॒diśa॒-mprehi̭ vi॒dvānityā̭ha devalo॒ka-me॒vaitayo॒pāva̭rtate॒ krama̭ddhvama॒gninā॒ nāka॒-mityā̭he॒māne॒vaitayā̭ lo॒kān kra̭mate pṛthi॒vyā a॒hamuda॒ntari̭kṣa॒mā 'rṷha॒mityā̭he॒māne॒vaitayā̭ lo॒kān-thsa॒māro̭hati॒ suva॒ryanto॒ nāpe᳚kṣanta॒ ityā̭ha suva॒rgame॒vaitayā̭ lo॒kame॒tyagne॒ prehi̭ [prehi̭, pra॒tha॒mo] 30

pratha॒mo dḙvaya॒tā-mityā̭ho॒bhaye᳚ṣve॒vaitayā̭ devamanu॒ṣyeṣu॒ cakṣṷrdadhāti pa॒ñcabhi॒radhi̭ krāmati॒ pāṅkto̭ ya॒jño yāvā̭ne॒va ya॒jñastena̭ sa॒ha sṷva॒rgaṃ-lo~॒kamḙti॒ nakto॒ṣāseti̭ puro-'nuvā॒kyā̭manvā̭ha॒ pratyā॒ agnḙ sahasrā॒kṣetyā̭ha sāha॒sraḥ pra॒jāpa̭tiḥ pra॒jāpa̭te॒rāptyai॒ tasmai̭ te vidhema॒ vājā̭ya॒ svāhetyā॒hānnaṃ॒-vai~ vājo-'nna̭-me॒vāva̭ [vājo-'nna̭-me॒vāva̭, ru॒ndhe॒ da॒ddhnaḥ] 31

rundhe da॒ddhnaḥ pū॒rṇāmaudṷmbarīg svayamātṛ॒ṇṇāyā᳚-ñjuho॒tyūrgvai daddhyūrgṷdu॒mbaro॒-'sau sva̭yamātṛ॒ṇṇā 'muṣyā̭me॒vorja̭-ndadhāti॒ tasmā̭da॒muto॒-'rvācī॒mūrja॒mupa̭ jīvāmasti॒sṛbhiḥ̭ sādayati tri॒vṛdvā a॒gniryāvā̭ne॒vāgnista-mpra̭ti॒ṣṭhā-ṅga̭mayati॒ preddho̭ agne dīdihi pu॒ro na॒ ityaudṷmbarī॒mā da̭dhātye॒ṣā vai sū॒rmī karṇa̭kāvatye॒tayā̭ ha sma॒ [ha sma, vai] 32

vai de॒vā asṷrāṇāgṃ śatata॒r॒hāg stṛgṃ̭hanti॒ yade॒tayā̭ sa॒midha̭mā॒dadhā̭ti॒ vajra̭me॒vaitaccha̭ta॒ghnīṃ-ya~ja̭māno॒ bhrātṛ̭vyāya॒ praha̭rati॒ stṛtyā॒ acha̭mbaṭkāraṃ-vi~॒dhema̭ te para॒me janma̭nnagna॒ iti॒ vaika̭ṅkatī॒mā da̭dhāti॒ bhā e॒vāva̭ rundhe॒ tāgṃ sa̭vi॒turvare᳚ṇyasya ci॒trāmiti̭ śamī॒mayī॒gṃ॒ śāntyā̭ a॒gnirvā̭ ha॒ vā a̭gni॒cita̭-ndu॒he᳚-'gni॒cidvā॒-'gni-ndṷhe॒ tāgṃ [tām, sa॒vi॒tu-] 33

sa̭vi॒tu-rvare᳚ṇyasya ci॒trāmityā̭hai॒ṣa vā a॒gnerdoha॒stama̭sya॒ kaṇva̭ e॒va śrā̭ya॒so̭-'ve॒-ttena̭ ha smaina॒gṃ॒ sa dṷhe॒ yade॒tayā̭ sa॒midha̭-mā॒dadhā᳚tyagni॒cide॒va tada॒gni-ndṷhe sa॒pta tḙ agne sa॒midhaḥ̭ sa॒ptaji॒hvā ityā̭ha sa॒ptaivāsya॒ sāptā̭ni prīṇāti pū॒rṇayā̭ juhoti pū॒rṇa i̭va॒ hi pra॒jāpa̭tiḥ pra॒jāpa̭te॒- [pra॒jāpa̭teḥ, āptyai॒] 34

-rāptyai॒ nyṷ̄nayā juhoti॒ nyṷ̄nā॒ddhi pra॒jāpa̭tiḥ pra॒jā asṛ̭jata pra॒jānā॒gṃ॒ sṛṣṭyā̭ a॒gnirde॒vebhyo॒ nilā̭yata॒ sa diśo-'nu॒ prā-'vi̭śa॒jjuhva॒nmana̭sā॒ diśo᳚ ddhyāye ddi॒gbhya e॒vaina॒mava̭ rundhe da॒ddhnā pu॒rastā᳚jjuho॒tyā-jyḙno॒pari̭ṣṭā॒-tteja̭ścai॒vāsmā̭ indri॒ya-ñca̭ sa॒mīcī̭ dadhāti॒ dvāda̭śakapālo vaiśvāna॒ro bha̭vati॒ dvāda̭śa॒ māsā᳚-ssaṃva~thsa॒ra-ssaṃ̭va~thsa॒ro᳚-'gnirvai᳚śvāna॒ra-ssā॒kṣā- [-'gnirvai᳚śvāna॒ra-ssā॒kṣāt, e॒va vai᳚śvāna॒ramava̭] 35

-de॒va vai᳚śvāna॒ramava̭ rundhe॒ ya-tpra̭yājānūyā॒jān ku॒ryādvika̭sti॒-ssā ya॒jñasya̭ darviho॒ma-ṅka̭roti ya॒jñasya॒ prati̭ṣṭhityai rā॒ṣṭraṃ-vai~ vai᳚śvāna॒ro viṇma॒ruto̭ vaiśvāna॒ragṃ hu॒tvā mā̭ru॒tān jṷhoti rā॒ṣṭra e॒va viśa॒manṷ baddhnātyu॒ccai-rvai᳚śvāna॒rasyā-'' śrā̭vayatyupā॒gṃ॒śu mā̭ru॒tān jṷhoti॒ tasmā᳚-drā॒ṣṭraṃ-vi~śa॒mati̭ vadati māru॒tā bha̭vanti ma॒ruto॒ vai de॒vānāṃ॒-vi~śo̭ devavi॒śenai॒vāsmai̭ manuṣyavi॒śa -mava̭ rundhe sa॒pta bha̭vanti sa॒ptaga̭ṇā॒ vai ma॒ruto̭ gaṇa॒śa e॒va viśa॒mava̭ rundhe ga॒ṇena̭ ga॒ṇama̭nu॒drutya̭ juhoti॒ viśa̭me॒vāsmā॒ anṷvartmāna-ṅkaroti || 36 ||

(agne॒ prehya - va̭ - sma - duhe॒ tāṃ - pra॒jāpa̭teḥ - sā॒kṣān - ma̭nuṣyavi॒śa - meka̭vigṃśatiśca) (a. 7)

vaso॒rdhārā᳚-ñjuhoti॒ vaso᳚rme॒ dhārā̭-'sa॒diti॒ vā e॒ṣā hṷ̄yate ghṛ॒tasya॒ vā ḙname॒ṣā dhārā॒-'muṣmi̭n ~lo॒ke pinva̭mā॒nopa̭ tiṣṭhata॒ ājyḙna juhoti॒ tejo॒ vā ājya॒-ntejo॒ vaso॒rdhārā॒ teja̭sai॒vāsmai॒ tejo-'va̭ ru॒ndhe-'tho॒ kāmā॒ vai vaso॒rdhārā॒ kāmā̭ne॒vāva̭ rundhe॒ ya-ṅkā॒mayḙta prā॒ṇāna̭syā॒-'nnādyaṃ॒-vi~- [-'nnādyaṃ॒-vi~, chi॒ndyā॒miti̭] 37

-cchi̭ndyā॒miti̭ vi॒grāha॒-ntasya̭ juhuyā-tprā॒ṇāne॒vāsyā॒nnādyaṃ॒-vi~cchi̭natti॒ ya-ṅkā॒mayḙta prā॒ṇāna̭syā॒nnādya॒gṃ॒ sa-nta̭nuyā॒miti॒ sa-nta̭tā॒-ntasya̭ juhuyā-tprā॒ṇāne॒vāsyā॒nnādya॒gṃ॒ sa-nta̭noti॒ dvāda̭śa dvāda॒śāni̭ juhoti॒ dvāda̭śa॒ māsā᳚-ssaṃva~thsa॒ra-ssaṃ̭va~thsa॒reṇai॒ vāsmā॒ anna॒mava̭ ru॒ndhe 'nna̭-ñca॒ me-'kṣṷcca ma॒ ityā̭hai॒ ta-dvā [ityā̭hai॒ ta-dvai, anna̭sya rū॒pagṃ] 38

anna̭sya rū॒pagṃ rū॒peṇai॒vānna॒mava̭ rundhe॒ 'gniśca̭ ma॒ āpa̭śca ma॒ ityā̭hai॒ṣā vā anna̭sya॒ yoni॒-ssayo᳚nye॒vānna॒mava̭ rundhe-'rdhe॒ndrāṇi̭ juhoti de॒vatā̭ e॒vāva̭ rundhe॒ ya-thsarvḙṣā-ma॒rdhamindraḥ॒ prati॒ tasmā॒dindro̭ de॒vatā̭nā-mbhūyiṣṭha॒bhākta̭ma॒ indra॒mutta̭ramāhe-ndri॒yame॒vāsmi̭-nnu॒pari̭ṣṭā-ddadhāti yajñāyu॒dhāni̭ juhoti ya॒jño [ya॒jñaḥ, vai ya̭jñāyu॒dhāni̭] 39

vai ya̭jñāyu॒dhāni̭ ya॒jñame॒vāva̭ ru॒ndhe-'tho̭ e॒tadvai ya॒jñasya̭ rū॒pagṃ rū॒peṇai॒va ya॒jñamava̭ rundhe 'vabhṛ॒thaśca̭ me svagākā॒raśca̭ ma॒ ityā̭ha sva॒gākṛ̭tyā a॒gniśca̭ me gha॒rmaśca̭ ma॒ ityā̭hai॒ta-dvai bra̭hmavarca॒sasya̭ rū॒pagṃ rū॒peṇai॒va bra̭hmavarca॒samava̭ rundha॒ ṛkca̭ me॒ sāma̭ ca ma॒ ityā̭hai॒- [ma॒ ityā̭ha, e॒tadvai chanda̭sāgṃ] 40

-tadvai chanda̭sāgṃ rū॒pagṃ rū॒peṇai॒va chandā॒g॒syava̭ rundhe॒ garbhā᳚śca me va॒thsāśca̭ ma॒ ityā̭hai॒ta-dvai pa̭śū॒nāgṃ rū॒pagṃ rū॒peṇai॒va pa॒śūnava̭ rundhe॒ kalpā᳚n juho॒tya kḷ̭ptasya॒ kḷptyai̭ yugmadayu॒je jṷhoti mithuna॒tvāyo᳚-tta॒rāva̭tī bhavato॒-'bhikrā᳚ntyā॒ ekā̭ ca me ti॒sraśca̭ ma॒ ityā̭ha devachanda॒saṃ-vā~ ekā̭ ca ti॒sraśca̭ [ti॒sraśca̭, ma॒nu॒ṣya॒cha॒nda॒sa-ñcata̭sraścā॒-'ṣṭau] 41

manuṣyachanda॒sa-ñcata̭sraścā॒-'ṣṭau ca̭ devachanda॒sa-ñcai॒va ma̭nuṣya chanda॒sañcā-'va̭ rundha॒ ā traya̭strigṃ śato juhoti॒ traya̭strigṃśa॒dvai de॒vatā̭ de॒vatā̭ e॒vāva̭ rundha॒ ā-'ṣṭāca̭tvārigṃśato juhotya॒ṣṭāca̭tvārigṃ-śadakṣarā॒ jaga̭tī॒ jāga̭tāḥ pa॒śavo॒ jaga̭tyai॒vāsmai̭ pa॒śūnava̭ rundhe॒ vāja̭śca prasa॒vaśceti̭ dvāda॒śa-ñjṷhoti॒ dvāda̭śa॒ māsā᳚-ssaṃva~thsa॒ra-ssaṃ̭va~thsa॒ra e॒va prati̭ tiṣṭhati || 42 ||

(vi - vai - ya॒jñaḥ-sāma̭ ca ma॒ ityā̭ha - ca ti॒sra - ścaikā॒nna pa̭ñcā॒śacca̭) (a. 8)

a॒gnirde॒vebhyo 'pā᳚krāma-dbhāga॒dheya̭mi॒cchamā̭na॒sta-nde॒vā a̭bruva॒nnupa̭ na॒ ā va̭rtasva ha॒vya-nno̭ va॒heti॒ so᳚-'bravī॒-dvaraṃ̭-vṛ~ṇai॒ mahya̭me॒va vā̭japrasa॒vīya̭-ñjuhava॒nniti॒ tasmā̭da॒gnayḙ vājaprasa॒vīya̭-ñjuhvati॒ ya-dvā̭japrasa॒vīya̭-ñju॒hotya॒gnime॒va ta-dbhā̭ga॒dheyḙna॒ sama̭rdhaya॒tyatho̭ abhiṣe॒ka e॒vāsya॒ sa ca̭turda॒śabhi̭rjuhoti sa॒pta grā॒myā oṣa̭dhaya-ssa॒ptā- [oṣa̭dhaya-ssa॒pta, a॒ra॒ṇyā u॒bhayī̭ṣā॒-] 43

-''ra॒ṇyā u॒bhayī̭ṣā॒-mava̭ruddhyā॒ anna̭syānnasya juho॒tyanna̭syānna॒syā-va̭ruddhyā॒ audṷmbareṇa sru॒veṇa̭ juho॒tyūrgvā ṷdu॒mbara॒ ūrganna̭mū॒rjaivāsmā॒ ūrja॒manna॒mava̭ rundhe॒ 'gnirvai de॒vānā̭-ma॒bhiṣi̭kto-'gni॒ci-nma̭nu॒ṣyā̭ṇā॒-ntasmā̭dagni॒ci-dvarṣa̭ti॒ na dhā̭ve॒dava̭ruddha॒gg॒ hya̭syā-nna॒manna̭miva॒ khalu॒ vai va॒r॒ṣaṃ-ya~ddhāvḙ-da॒nnādyā᳚ddhāve-du॒pāva̭rtetā॒-'nnādya̭-me॒vā-'bhyu॒- [-'nnādya̭-me॒vā-'bhi, u॒pāva̭rtate॒] 44

-pāva̭rtate॒ nakto॒ṣāseti̭ kṛ॒ṣṇāyai᳚ śve॒tava̭thsāyai॒ paya̭sā juho॒tyahnai॒vāsmai॒ rātri॒-mpradā̭payati॒ rātri॒yā-'ha̭rahorā॒tre e॒vāsmai॒ pratte॒ kāma̭ma॒nnādya̭-nduhāte rāṣṭra॒bhṛto̭ juhoti rā॒ṣṭrame॒vāva̭ rundhe ṣa॒ḍbhirjṷhoti॒ ṣaḍvā ṛ॒tava̭ ṛ॒tuṣve॒va prati̭tiṣṭhati॒ bhuva̭nasya pata॒ iti̭ rathamu॒khe pañcā-''hṷtīrjuhoti॒ vajro॒ vai ratho॒ vajrḙṇai॒va diśo॒- [vajrḙṇai॒va diśaḥ̭, a॒bhi ja̭yatyagni॒citagṃ̭] 45

-'bhi ja̭yatyagni॒citagṃ̭ ha॒ vā a॒muṣmi̭n ~lo॒ke vāto॒-'bhi pa̭vate vātanā॒māni̭ juhotya॒bhyḙvaina̭-ma॒muṣmi̭n ~lo॒ke vātaḥ̭ pavate॒ trīṇi̭ juhoti॒ traya̭ i॒me lo॒kā e॒bhya e॒va lo॒kebhyo॒ vāta॒mava̭ rundhe samu॒dro̭-'si॒ nabha̭svā॒nityā̭hai॒tadvai vāta̭sya rū॒pagṃ rū॒peṇai॒va vāta॒mava̭ rundhe 'ñja॒linā̭ juhoti॒ na hyḙteṣā̭ma॒nyathā ''hṷtirava॒kalpa̭te || 46 ||

(oṣa̭dhaya-ssa॒ptā - bhi - diśo॒ - 'nyathā॒ - dve ca̭) (a. 9)

su॒va॒rgāya॒ vai lo॒kāya̭ devara॒tho yṷjyate yatrākū॒tāya̭ manuṣyara॒tha e॒ṣa khalu॒ vai dḙvara॒tho yada॒gnira॒gniṃ-yu~̭najmi॒ śava̭sā ghṛ॒tenetyā̭ha yu॒naktye॒vaina॒gṃ॒ sa ḙnaṃ-yu~॒kta-ssṷva॒rgaṃ-lo~॒kama॒bhi va̭hati॒ ya-thsarvā̭bhiḥ pa॒ñcabhi̭-ryu॒ñjyā-dyu॒kto᳚-'syā॒-'gniḥ pracyṷta-ssyā॒dapra̭tiṣṭhitā॒ āhṷtaya॒-ssyurapra̭tiṣṭhitā॒-sstomā॒ apra̭tiṣṭhitānyu॒kthāni̭ ti॒sṛbhiḥ̭ prātassava॒nḙ-'bhi mṛ̭śati tri॒vṛ- [tri॒vṛt, vā a॒gniryāvā̭ne॒vā-] 47

-dvā a॒gniryāvā̭ne॒vā-gnistaṃ-yu~̭nakti॒ yathā-'na̭si yu॒kta ā̭dhī॒yata̭ e॒vame॒va ta-tpratyāhṷtaya॒stiṣṭha̭nti॒ prati॒ stomāḥ॒ pratyu॒kthāni̭ yajñāya॒jñiya̭sya sto॒tre dvābhyā̭ma॒bhi mṛ̭śatye॒tāvā॒n॒ vai ya॒jño yāvā̭nagniṣṭo॒mo bhū॒mā tvā a॒syāta̭ ū॒rdhvaḥ kri̭yate॒ yāvā̭ne॒va ya॒jñastama̭nta॒to᳚ 'nvāro̭hati॒ dvābhyā॒-mprati̭ṣṭhityā॒ eka॒yā-'pra̭stuta॒-mbhava॒tyathā॒- [-'pra̭stuta॒-mbhava॒tyatha̭, a॒bhi mṛ̭śa॒tyupai̭na॒-] 48

-'bhi mṛ̭śa॒tyupai̭na॒-mutta̭ro ya॒jño na̭ma॒tyatho॒ santa̭tyai॒ pra vā e॒ṣo᳚-'smāllo॒kā-ccya̭vate॒ yo᳚-'gni-ñci̭nu॒te na vā e॒tasyā̭niṣṭa॒ka āhṷti॒rava̭ kalpate॒ yāṃ-vā~ e॒ṣo̭-'niṣṭa॒ka āhṷti-ñju॒hoti॒ srava̭ti॒ vai sā tāg srava̭ntīṃ-ya~॒jño-'nu॒ parā̭ bhavati ya॒jñaṃ-ya~ja̭māno॒ ya-tpṷnaści॒ti-ñci̭nu॒ta āhṷtīnā॒-mprati̭ṣṭhityai॒ pratyāhṷtaya॒stiṣṭha̭nti॒ [pratyāhṷtaya॒stiṣṭha̭nti, na ya॒jñaḥ] 49

na ya॒jñaḥ pa̭rā॒bhava̭ti॒ na yaja̭māno॒ 'ṣṭāvupa̭ dadhātya॒ṣṭākṣa̭rā gāya॒trī gā̭ya॒treṇai॒vaina॒-ñchanda̭sā cinute॒ yadekā̭daśa॒ traiṣṭṷbhena॒ ya-ddvāda̭śa॒ jāga̭tena॒ chando̭bhire॒vaina̭-ñcinute napā॒tko vaināmai॒ṣo᳚-'gnirya-tpṷnaści॒tirya e॒vaṃ-vi~॒dvā-npṷnaści॒ti-ñci̭nu॒ta ā tṛ॒tīyā॒-tpurṷṣā॒danna̭matti॒ yathā॒ vai pṷnarā॒dheya̭ e॒va-mpṷnaści॒tiryo᳚-'-gnyā॒dheyḙna॒ na- [-gnyā॒dheyḙna॒ na, ṛ॒dhnoti॒ sa] 50

-rdhnoti॒ sa pṷnarā॒dheya॒mā dha̭tte॒ yo᳚-'gni-ñci॒tvā nardhnoti॒ sa pṷnaści॒ti-ñci̭nute॒ ya-tpṷnaści॒ti-ñci̭nu॒ta ṛddhyā॒ atho॒ khalvā̭hu॒rna cḙta॒vyeti̭ ru॒dro vā e॒ṣa yada॒gniryathā᳚ vyā॒ghragṃ su॒pta-mbo॒dhaya̭ti tā॒dṛge॒va tadatho॒ khalvā̭huśceta॒vyeti॒ yathā॒ vasī̭yāgṃsa-mbhāga॒dheyḙna bo॒dhaya̭ti tā॒dṛge॒va tanmanṷra॒gnima̭cinuta॒ tena॒ nā-''rdhno॒thsa e॒tā-mpṷnaści॒tima̭paśya॒-ttāma̭cinuta॒ tayā॒ vai sa ā᳚rdhno॒dya-tpṷnaści॒ti-ñci̭nu॒ta ṛddhyai᳚ || 51 ||

(tri॒vṛ-datha॒-tiṣṭha̭-ntyagnyā॒dheyḙna॒ nā-ci̭nuta-sa॒ptada̭śa- ca) (a. 10)

cha॒nda॒ścita̭-ñcinvīta pa॒śukā̭maḥ pa॒śavo॒ vai chandāgṃ̭si paśu॒māne॒va bha̭vati śyena॒cita̭-ñcinvīta suva॒rgakā̭ma-śśye॒no vai vaya̭sā॒-mpati̭ṣṭha-śśye॒na e॒va bhū॒tvā sṷva॒rgaṃ-lo~॒ka-mpa̭tati kaṅka॒cita̭-ñcinvīta॒ yaḥ kā॒mayḙta śīrṣa॒ṇvāna॒muṣmi̭n ~lo॒ke syā॒miti̭ śīrṣa॒ṇvāne॒vā-'muṣmi̭n ~lo॒ke bha̭vatyalaja॒cita̭-ñcinvīta॒ catṷssīta-mprati॒ṣṭhākā̭ma॒ścata̭sro॒ diśo̭ di॒kṣvḙva prati̭ tiṣṭhati prauga॒cita̭-ñcinvīta॒ bhrātṛ̭vyavā॒-nprai- [bhrātṛ̭vyavā॒-npra, e॒va bhrātṛ̭vyā-nnudata] 52

-va bhrātṛ̭vyā-nnudata ubha॒yataḥ̭ prauga-ñcinvīta॒yaḥ kā॒mayḙta॒ prajā॒tā-nbhrātṛ̭vyā-nnu॒deya॒ prati̭ jani॒ṣyamā̭ṇā॒niti॒ praiva jā॒tā-nbhrātṛ̭vyā-nnu॒date॒ prati̭ jani॒ṣyamā̭ṇā-nrathacakra॒cita̭-ñcinvīta॒ bhrātṛ̭vyavā॒n॒ vajro॒ vai ratho॒ vajra̭me॒va bhrātṛ̭vyebhyaḥ॒ praha̭rati droṇa॒cita̭-ñcinvī॒tānna̭kāmo॒ droṇe॒ vā anna̭-mbhriyate॒ sayo᳚nye॒vānna॒mava̭ rundhe samū॒hya̭-ñcinvīta pa॒śukā̭maḥ paśu॒māne॒va bha̭vati [paśu॒māne॒va bha̭vati, pa॒ri॒cā॒yya̭-ñcinvīta॒] 53

paricā॒yya̭-ñcinvīta॒ grāma̭kāmo grā॒myḙva bha̭vati śmaśāna॒cita̭-ñcinvīta॒ yaḥ kā॒mayḙta pitṛlo॒ka ṛ̭ddhnuyā॒miti̭ pitṛlo॒ka e॒vardhno̭ti viśvāmitrajamada॒gnī vasi̭ṣṭhenā-'spardhetā॒gṃ॒ sa e॒tā ja॒mada̭gnirviha॒vyā̭ apaśya॒-ttā upā̭dhatta॒ tābhi॒rvai sa vasi̭ṣṭhasyendri॒yaṃ-vī~॒rya̭mavṛṅkta॒ ya-dvi̭ha॒vyā̭ upa॒dadhā̭tīndri॒yame॒va tābhi̭rvī॒ryaṃ̭-ya~ja̭māno॒ bhrātṛ̭vyasya vṛṅkte॒ hotu॒rdhiṣṇi̭ya॒ upa̭ dadhāti yajamānāyata॒naṃ-vai~ [ ] 54

hotā॒ sva e॒vāsmā̭ ā॒yata̭na indri॒yaṃ-vī~॒rya̭mava̭ rundhe॒ dvāda॒śopa̭ dadhāti॒ dvāda̭śākṣarā॒ jaga̭tī॒ jāga̭tāḥ pa॒śavo॒ jaga̭tyai॒vāsmai̭ pa॒śūnava̭ rundhe॒ 'ṣṭāva̭ṣṭāva॒nyeṣu॒ dhiṣṇi̭ye॒ṣūpa̭ dadhātya॒ṣṭāśa̭phāḥ pa॒śavaḥ̭ pa॒śūne॒vāva̭ rundhe॒ ṣaṇmā᳚rjā॒līye॒ ṣa-ḍvā ṛ॒tava̭ ṛ॒tavaḥ॒ khalu॒ vai de॒vāḥ pi॒tara̭ ṛ॒tūne॒va de॒vā-npi॒tṝ-nprī̭ṇāti || 55 ||

(pra - bha̭vati - yajamānāyata॒naṃ-vā~ - a॒ṣṭāca̭tvārigṃśacca) (a. 11)

pava̭sva॒ vāja̭sātaya॒ itya̭nu॒ṣṭu-kpra̭ti॒padbha̭vati ti॒rso̭-'nu॒ṣṭubha॒ścata̭sro gāya॒triyo॒ ya-tti॒sro̭-'nu॒ṣṭubha॒-stasmā॒-daśva̭stri॒bhistiṣṭhagg̭ stiṣṭhati॒ yaccata̭sro gāya॒triya॒stasmā॒-thsarvāg̭ śca॒turaḥ̭ pa॒daḥ pra̭ti॒dadha॒-tpalā̭yate para॒mā vā e॒ṣā chanda̭sāṃ॒-ya~da̭nu॒ṣṭu-kpa̭ra॒maśca̭tuṣṭo॒ma-sstomā̭nā-mpara॒mastri̭rā॒tro ya॒jñānā᳚-mpara॒mo-'śvaḥ̭ paśū॒nā-mpa̭ra॒meṇai॒vaina̭-mpara॒matā᳚-ṅgamayatyekavi॒gṃ॒śa-maha̭rbhavati॒ [-maha̭rbhavati, yasmi॒nnaśva̭] 56

yasmi॒nnaśva̭ āla॒bhyate॒ dvāda̭śa॒ māsāḥ॒ pañca॒rtava॒straya̭ i॒me lo॒kā a॒sāvā̭di॒tya ḙkavi॒gṃ॒śa e॒ṣa pra॒jāpa̭tiḥ prājāpa॒tyo-'śva॒stame॒va sā॒kṣādṛ̭ddhnoti॒ śakva̭rayaḥ pṛ॒ṣṭha-mbha̭vantya॒n-yada̭nya॒-cchando॒-'nye᳚nye॒ vā e॒te pa॒śava॒ ā la̭bhyanta u॒teva̭ grā॒myā u॒tevā̭-''ra॒ṇyā yacchakva̭rayaḥ pṛ॒ṣṭha-mbhava॒ntyaśva̭sya sarva॒tvāya̭ pārthura॒śma-mbra̭hmasā॒ma-mbha̭vati ra॒śminā॒ vā aśvo̭ [ra॒śminā॒ vā aśvaḥ̭, ya॒ta ī᳚śva॒ro] 57

ya॒ta ī᳚śva॒ro vā aśvo-'ya॒to-'pra̭tiṣṭhitaḥ॒ parā᳚-mparā॒vata॒-ṅganto॒rya-tpā᳚rthura॒śma-mbra̭hmasā॒ma-mbhava॒tyaśva̭sya॒ yatyai॒ dhṛtyai॒ saṅkṛ̭tyacchāvākasā॒ma-mbha̭vatyuthsannaya॒jño vā e॒ṣa yada̭śvame॒dhaḥ kastadve॒detyā̭hu॒ryadi॒ sarvo̭ vā kri॒yate॒ na vā॒ sarva॒ iti॒ ya-thsaṅkṛ̭tyacchāvākasā॒ma-mbhava॒tyaśva̭sya sarva॒tvāya॒ paryā᳚ptyā॒ ana̭ntarāyāya॒ sarva̭stomo-'tirā॒tra ṷtta॒mamaha̭rbhavati॒ sarva॒syā-''ptyai॒ sarva̭sya॒ jityai॒ sarva̭me॒va tenā᳚-''pnoti॒ sarva̭-ñjayati || 58 ||

(aha̭rbhavati॒ - vā aśvo - 'ha̭rbhavati॒ - daśa̭ ca) (a. 12)

(de॒vā॒su॒rāstena - rta॒vyā̭ - ru॒dro - 'śma̭ - nnṛ॒ṣade॒ va - ḍudḙnaṃ॒ - prācī॒miti॒ - vaso॒rdhārā̭ - ma॒gnirde॒vebhyaḥ̭ - suva॒rgāya̭ yatrākū॒tāya̭ - chanda॒ścitaṃ॒ - pava̭sva॒ - dvāda̭śa )

(de॒vā॒su॒rā - a॒jāyāṃ॒ - ~vai grṷmu॒ṣṭiḥ - pra̭tha॒mo dḙvaya॒tāme॒ - tadvai chanda̭sā - mṛ॒dhno - tya॒ṣṭau pa̭ñcā॒śat)

(de॒vā॒su॒rā, ssarva̭-ñjayati)

|| hariḥ̭ om ||

|| kṛṣṇa yajurvedīya taittirīya saṃhitāyā-mpañcamakāṇḍe caturthaḥ praśna-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय संहिताया-म्पञ्चमकाण्डे चतुर्थः प्रश्नः - इष्टकात्रयाभिधानं

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

दे॒वा॒सु॒रा-स्संयँ॑त्ता आस॒-न्ते न व्य॑जयन्त॒ स ए॒ता इन्द्र॑स्त॒नूर॑पश्य॒-त्ता उपा॑धत्त॒ ताभि॒र्वै स त॒नुव॑मिन्द्रि॒यं-वीँ॒र्य॑मा॒त्मन्न॑धत्त॒ ततो॑ दे॒वा अभ॑व॒-न्परा-ऽसु॑रा॒ यदि॑न्द्रत॒नूरु॑प॒दधा॑ति त॒नुव॑मे॒व ताभि॑रिन्द्रि॒यं-वीँ॒र्यं॑-यँज॑मान आ॒त्म-न्ध॒त्ते-ऽथो॒ सेन्द्र॑मे॒वाग्निग्ं सत॑नु-ञ्चिनुते॒ भव॑त्या॒त्मना॒ परा᳚-ऽस्य॒ भ्रातृ॑व्यो [भ्रातृ॑व्यः, भ॒व॒ति॒ य॒ज्ञो] 1

भवति य॒ज्ञो दे॒वेभ्यो-ऽपा᳚क्राम॒-त्तम॑व॒रुध॒-न्नाश॑क्नुव॒न्त ए॒ता य॑ज्ञत॒नूर॑पश्य॒-न्ता उपा॑दधत॒ ताभि॒र्वै ते य॒ज्ञमवा॑रुन्धत॒ य-द्य॑ज्ञत॒नूरु॑प॒दधा॑ति य॒ज्ञमे॒व ताभि॒र्यज॑मा॒नो-ऽव॑ रुन्धे॒ त्रय॑स्त्रिग्ं शत॒मुप॑ दधाति॒ त्रय॑स्त्रिग्ंश॒द्वै दे॒वता॑ दे॒वता॑ ए॒वाव॑ रु॒न्धे ऽथो॒ सात्मा॑नमे॒वाग्निग्ं सत॑नु-ञ्चिनुते॒ सात्मा॒-ऽमुष्मि॑-ल्लोँ॒के [-ऽमुष्मि॑-ल्लोँ॒के, भ॒व॒ति॒ य] 2

भ॑वति॒ य ए॒वं-वेँद॒ ज्योति॑ष्मती॒रुप॑ दधाति॒ ज्योति॑रे॒वास्मि॑-न्दधात्ये॒ताभि॒र्वा अ॒ग्निश्चि॒तो ज्व॑लति॒ ताभि॑रे॒वैन॒ग्ं॒ समि॑न्ध उ॒भयो॑रस्मै लो॒कयो॒र्ज्योति॑र्भवति नक्षत्रेष्ट॒का उप॑ दधात्ये॒तानि॒ वै दि॒वो ज्योतीग्ं॑षि॒ तान्ये॒वाव॑ रुन्धे सु॒कृतां॒-वाँ ए॒तानि॒ ज्योतीग्ं॑षि॒ यन्नक्ष॑त्राणि॒ तान्ये॒वा-ऽऽप्नो॒त्यथो॑ अनूका॒श-मे॒वैतानि॒ [-मे॒वैतानि॑, ज्योतीग्ं॑षि कुरुते] 3

ज्योतीग्ं॑षि कुरुते सुव॒र्गस्य॑ लो॒कस्यानु॑ख्यात्यै॒ य-थ्सग्ग्स्पृ॑ष्टा उपद॒द्ध्या-द्वृष्ट्यै॑ लो॒कमपि॑ दद्ध्या॒दव॑र्षुकः प॒र्जन्यः॑ स्या॒दसग्ग्॑स्पृष्टा॒ उप॑ दधाति॒ वृष्ट्या॑ ए॒व लो॒क-ङ्क॑रोति॒ वर्षु॑कः प॒र्जन्यो॑ भवति पु॒रस्ता॑द॒न्याः प्र॒तीची॒रुप॑ दधाति प॒श्चाद॒न्याः प्राची॒स्तस्मा᳚-त्प्रा॒चीना॑नि च प्रती॒चीना॑नि च॒ नक्ष॑त्रा॒ण्या व॑र्तन्ते ॥ 4 ॥

(भ्रातृ॑व्यो - लो॒क - ए॒वैतान्ये - क॑चत्वारिग्ंशच्च) (अ. 1)

ऋ॒त॒व्या॑ उप॑ दधात्यृतू॒ना-ङ्कॢप्त्यै᳚ द्व॒द्वम्मुप॑ दधाति॒ तस्मा᳚-द्द्व॒न्द्वमृ॒तवो ऽधृ॑तेव॒ वा ए॒षा यन्म॑द्ध्य॒मा चिति॑र॒न्तरि॑क्षमिव॒ वा ए॒षा द्व॒द्वम्म॒न्यासु॒ चिती॒षूप॑ दधाति॒ चत॑स्रो॒ मद्ध्ये॒ धृत्या॑ अन्त॒श्श्लेष॑णं॒-वाँ ए॒ताश्चिती॑नां॒-यँदृ॑त॒व्या॑ यदृ॑त॒व्या॑ उप॒दधा॑ति॒ चिती॑नां॒-विँधृ॑त्या॒ अव॑का॒मनूप॑ दधात्ये॒षा वा अ॒ग्नेर्योनि॒-स्सयो॑नि- [अ॒ग्नेर्योनि॒-स्सयो॑निम्, ए॒वाग्नि-] 5

-मे॒वाग्नि-ञ्चि॑नुत उ॒वाच॑ ह वि॒श्वामि॒त्रो ऽद॒दि-थ्स ब्रह्म॒णा-ऽन्नं॒-यँस्यै॒ता उ॑पधी॒यान्तै॒ य उ॑ चैना ए॒वं-वेँद॒दिति॑ संवँथ्स॒रो वा ए॒त-म्प्र॑ति॒ष्ठायै॑ नुदते॒ यो᳚-ऽग्नि-ञ्चि॒त्वा न प्र॑ति॒तिष्ठ॑ति॒ पञ्च॒ पूर्वा॒श्चित॑यो भव॒न्त्यथ॑ ष॒ष्ठी-ञ्चिति॑-ञ्चिनुते॒ षड्वा ऋ॒तवः॑ संवँथ्स॒र ऋ॒तुष्वे॒व सं॑वँथ्स॒रे प्रति॑तिष्ठत्ये॒ ता वा [प्रति॑तिष्ठत्ये॒ ता वा, अधि॑पत्नी॒र्नामेष्ट॑का॒] 6

अधि॑पत्नी॒र्नामेष्ट॑का॒ यस्यै॒ता उ॑पधी॒यन्ते-ऽधि॑पतिरे॒व स॑मा॒नाना᳚-म्भवति॒ य-न्द्वि॒ष्या-त्तमु॑प॒दध॑-द्ध्यायेदे॒ताभ्य॑ ए॒वैन॑-न्दे॒वता᳚भ्य॒ आ वृ॑श्चति ता॒जगार्ति॒मार्च्छ॒त्यङ्गि॑रस-स्सुव॒र्गं-लोँ॒कं-यँन्तो॒ या य॒ज्ञस्य॒ निष्कृ॑ति॒रासी॒-त्तामृषि॑भ्यः॒ प्रत्यौ॑ह॒-न्तद्धिर॑ण्यमभव॒द्य-द्धि॑रण्यश॒ल्कैः प्रो॒क्षति॑ य॒ज्ञस्य॒ निष्कृ॑त्या॒ अथो॑ भेष॒जमे॒वा-ऽस्मै॑ करो॒- [-ऽस्मै॑ करोति, अथो॑ रू॒पेणै॒वैन॒ग्ं॒] 7

-त्यथो॑ रू॒पेणै॒वैन॒ग्ं॒ सम॑र्धय॒त्यथो॒ हिर॑ण्यज्योतिषै॒व सु॑व॒र्गं-लोँ॒कमे॑ति साह॒स्रव॑ता॒ प्रोक्ष॑ति साह॒स्रः प्र॒जाप॑तिः प्र॒जाप॑ते॒राप्त्या॑ इ॒मा मे॑ अग्न॒ इष्ट॑का धे॒नवः॑ स॒न्त्वित्या॑ह धे॒नूरे॒वैनाः᳚ कुरुते॒ ता ए॑न-ङ्काम॒दुघा॑ अ॒मुत्रा॒मुष्मि॑न् ँलो॒क उप॑ तिष्ठन्ते ॥ 8 ॥

(सयो॑नि - मे॒ता वै - क॑रो॒त्ये - का॒न्नच॑त्वारि॒ग्ं॒शच्च॑) (अ. 2)

रु॒द्रो वा ए॒ष यद॒ग्नि-स्स ए॒तर्हि॑ जा॒तो यर्हि॒ सर्व॑श्चि॒त-स्स यथा॑ व॒थ्सो जा॒त-स्स्तन॑-म्प्रे॒फ्सत्ये॒वं-वाँ ए॒ष ए॒तर्हि॑ भाग॒धेय॒-म्प्रेफ्स॑ति॒ तस्मै॒ यदाहु॑ति॒-न्न जु॑हु॒याद॑द्ध्व॒र्यु-ञ्च॒ यज॑मान-ञ्च ध्यायेच्छतरु॒द्रीय॑-ञ्जुहोति भाग॒धेये॑नै॒वैनग्ं॑ शमयति॒ ना-ऽऽर्ति॒मार्च्छ॑त्यद्ध्व॒र्युर्न यज॑मानो॒ य-द्ग्रा॒म्याणा᳚-म्पशू॒ना- [य-द्ग्रा॒म्याणा᳚-म्पशू॒नाम्, पय॑सा जुहु॒या-] 9

-म्पय॑सा जुहु॒या-द्ग्रा॒म्या-न्प॒शूञ्छु॒चा ऽर्पये॒-द्यदा॑र॒ण्याना॑-मार॒ण्यान् ज॑र्तिलयवा॒ग्वा॑ वा जुहु॒या-द्ग॑वीधुकयवा॒ग्वा॑ वा॒ न ग्रा॒म्या-न्प॒शून्. हि॒नस्ति॒ ना-ऽऽर॒ण्यानथो॒ खल्वा॑हु॒रना॑हुति॒र्वै ज॒र्तिला᳚श्च ग॒वीधु॑का॒श्चेत्य॑ जक्षी॒रेण॑ जुहोत्याग्ने॒यी वा ए॒षा यद॒जा-ऽऽहु॑त्यै॒व जु॑होति॒ न ग्रा॒म्या-न्प॒शून्. हि॒नस्ति॒ ना-ऽऽर॒ण्यानङ्गि॑रस-स्सुव॒र्गं-लोँ॒कं-यँन्तो॒- [-ँलो॒कं-यँन्तः॑, अ॒जाया᳚-ङ्घ॒र्म-] 10

-ऽजाया᳚-ङ्घ॒र्म-म्प्रासि॑ञ्च॒न्थ्सा शोच॑न्ती प॒र्ण-म्परा॑-ऽजिहीत॒ सो᳚(1॒)-ऽर्को॑-ऽभव॒-त्तद॒र्कस्या᳚-र्क॒त्वम॑र्कप॒र्णेन॑ जुहोति सयोनि॒त्वायोद॒-न्तिष्ठ॑न् जुहोत्ये॒षा वै रु॒द्रस्य॒ दि-ख्स्वाया॑मे॒व दि॒शि रु॒द्र-न्नि॒रव॑दयते चर॒माया॒मिष्ट॑काया-ञ्जुहोत्यन्त॒त ए॒व रु॒द्र-न्नि॒रव॑दयते त्रेधाविभ॒क्त-ञ्जु॑होति॒ त्रय॑ इ॒मे लो॒का इ॒माने॒व लो॒कान्-थ्स॒माव॑द्वीर्यान् करो॒तीय॒त्यग्रे॑ जुहो॒- [जुहोति, अथेय॒त्यथेय॑ति॒] 11

-त्यथेय॒त्यथेय॑ति॒ त्रय॑ इ॒मे लो॒का ए॒भ्य ए॒वैनं॑-लोँ॒केभ्यः॑ शमयति ति॒स्र उत्त॑रा॒ आहु॑तीर्जुहोति॒ ष-ट्थ्स-म्प॑द्यन्ते॒ ष-ड्वा ऋ॒तव॑ ऋ॒तुभि॑रे॒वैनग्ं॑ शमयति॒ यद॑नुपरि॒क्राम॑-ञ्जुहु॒याद॑न्तरवचा॒रिणग्ं॑ रु॒द्र-ङ्कु॑र्या॒दथो॒ खल्वा॑हुः॒ कस्यां॒-वाँ-ऽह॑ दि॒शि रु॒द्रः कस्यां॒-वेँत्य॑नुपरि॒क्राम॑मे॒व हो॑त॒व्य॑-मप॑रिवर्गमे॒वैनग्ं॑ शमय- [शमयति, ए॒तावै] 12

-त्ये॒तावै दे॒वता᳚-स्सुव॒र्ग्या॑या उ॑त्त॒मास्ता यज॑मानं-वाँचयति॒ ताभि॑रे॒वैनग्ं॑ सुव॒र्गं-लोँ॒क-ङ्ग॑मयति॒ य-न्द्वि॒ष्या-त्तस्य॑ सञ्च॒रे प॑शू॒ना-न्न्य॑स्ये॒-द्यः प्र॑थ॒मः प॒शुर॑भि॒तिष्ठ॑ति॒ स आर्ति॒मार्च्छ॑ति ॥ 13 ॥

(प॒शू॒नां - ँयन्तो - ऽग्ने॑ जुहो॒त्य - प॑रिवर्गमे॒वैनग्ं॑ शमयति - त्रि॒ग्ं॒शच्च॑) (अ. 3)

अश्म॒न्नूर्ज॒मिति॒ परि॑ षिञ्चति मा॒र्जय॑त्ये॒वैन॒मथो॑ त॒र्पय॑त्ये॒व स ए॑न-न्तृ॒प्तो ऽक्षु॑द्ध्य॒-न्नशो॑च-न्न॒मुष्मि॑न् ँलो॒क उप॑ तिष्ठते॒ तृप्य॑ति प्र॒जया॑ प॒शुभि॒र्य ए॒वं-वेँद॒ ता-न्न॒ इष॒मूर्ज॑-न्धत्त मरुत-स्सग्ंररा॒णा इत्या॒हान्नं॒-वाँ ऊर्गन्न॑-म्म॒रुतो-ऽन्न॑मे॒वाव॑ रु॒न्धे ऽश्मग्ग्॑स्ते॒ क्षुद॒मु-न्ते॒ शु- [क्षुद॒मु-न्ते॒ शुक्, ऋ॒च्छ॒तु॒ य-न्द्वि॒ष्म] 14

-गृ॑च्छतु॒ य-न्द्वि॒ष्म इत्या॑ह॒ यमे॒व द्वेष्टि॒ तम॑स्य क्षु॒धा च॑ शु॒चा चा᳚र्पयति॒ त्रिः प॑रिषि॒ञ्च-न्पर्ये॑ति त्रि॒वृद्वा अ॒ग्निर्यावा॑ने॒वा-ग्निस्तस्य॒ शुचग्ं॑ शमयति॒ त्रिः पुनः॒ पर्ये॑ति॒ ष-ट्थ्स-म्प॑द्यन्ते॒ ष-ड्वा ऋ॒तव॑ ऋ॒तुभि॑रे॒वास्य॒ शुचग्ं॑ शमयत्य॒पां-वाँ ए॒त-त्पुष्पं॒-यँद्वे॑त॒सो॑-ऽपाग्ं - [यद्वे॑त॒सो॑-ऽपाम्, शरो-ऽव॑का] 15

शरो-ऽव॑का वेतसशा॒खया॒ चाव॑काभिश्च॒ वि क॑र्ष॒त्यापो॒ वै शा॒न्ता-श्शा॒न्ताभि॑रे॒वास्य॒ शुचग्ं॑ शमयति॒ यो वा अ॒ग्नि-ञ्चि॒त-म्प्र॑थ॒मः प॒शुर॑धि॒क्राम॑तीश्व॒रो वै तग्ं शु॒चा प्र॒दहो॑ म॒ण्डूके॑न॒ विक॑र्षत्ये॒ष वै प॑शू॒ना-म॑नुपजीवनी॒यो न वा ए॒ष ग्रा॒म्येषु॑ प॒शुषु॑ हि॒तो ना-ऽऽर॒ण्येषु॒ तमे॒व शु॒चा-ऽर्प॑यत्यष्टा॒भि-र्वि क॑र्ष- [-र्वि क॑र्षति, अ॒ष्टाक्ष॑रा] 16

-त्य॒ष्टाक्ष॑रा गाय॒त्री गा॑य॒त्रो᳚-ऽग्निर्यावा॑-ने॒वा-ऽग्निस्तस्य॒ शुचग्ं॑ शमयति पाव॒कव॑तीभि॒रन्नं॒-वैँ पा॑व॒को-ऽन्ने॑नै॒वास्य॒ शुचग्ं॑ शमयति मृ॒त्युर्वा ए॒ष यद॒ग्निर्ब्रह्म॑ण ए॒तद्रू॒पं-यँ-त्कृ॑ष्णाजि॒न-ङ्कार्ष्णी॑ उपा॒नहा॒वुप॑ मुञ्चते॒ ब्रह्म॑णै॒व मृ॒त्योर॒न्तर्ध॑त्ते॒ ऽन्तर्मृ॒त्योर्ध॑त्ते॒ ऽन्तर॒न्नाद्या॒-दित्या॑हुर॒न्या-मु॑पमु॒ञ्चते॒-ऽन्या-न्नान्त- [-ऽन्या-न्नान्तः, ए॒व मृ॒त्योर्ध॒त्ते] 17

-रे॒व मृ॒त्योर्ध॒त्ते ऽवा॒-ऽन्नाद्यग्ं॑ रुन्धे॒ नम॑स्ते॒ हर॑से शो॒चिष॒ इत्या॑ह नम॒स्कृत्य॒ हि वसी॑याग्ं समुप॒चर॑न्त्य॒न्य-न्ते॑ अ॒स्म-त्त॑पन्तु हे॒तय॒ इत्या॑ह॒ यमे॒व द्वेष्टि॒ तम॑स्य शु॒चा-ऽर्प॑यति पाव॒को अ॒स्मभ्यग्ं॑ शि॒वो भ॒वेत्या॒हान्नं॒-वैँ पा॑व॒को-ऽन्न॑मे॒वाव॑ रुन्धे॒ द्वाभ्या॒मधि॑ क्रामति॒ प्रति॑ष्ठित्या अप॒स्य॑वतीभ्या॒ग्ं॒ शान्त्यै᳚ ॥ 18 ॥

(शु - ग्वे॑त॒सो॑-ऽपा - म॑ष्टा॒भिर्वि क॑र्षति॒ - नान्त - रेका॒न्न प॑ञ्चा॒शच्च॑) (अ. 4)

नृ॒षदे॒ वडिति॒ व्याघा॑रयति प॒ङ्क्त्या-ऽऽहु॑त्या यज्ञमु॒खमा र॑भते ऽक्ष्ण॒या व्याघा॑रयति॒ तस्मा॑दक्ष्ण॒या प॒शवो-ऽङ्गा॑नि॒ प्रह॑रन्ति॒ प्रति॑ष्ठित्यै॒ यद्व॑षट्कु॒र्या-द्या॒तया॑मा-ऽस्य वषट्का॒र-स्स्या॒द्यन्न व॑षट्कु॒र्या-द्रक्षाग्ं॑सि य॒ज्ञग्ं ह॑न्यु॒र्वडित्या॑ह प॒रोक्ष॑मे॒व वष॑-ट्करोति॒ नास्य॑ या॒तया॑मा वषट्का॒रो भव॑ति॒ न य॒ज्ञग्ं रक्षाग्ं॑सि घ्नन्ति हु॒तादो॒ वा अ॒न्ये दे॒वा [अ॒न्ये दे॒वाः, अ॒हु॒तादो॒-ऽन्ये] 19

अ॑हु॒तादो॒-ऽन्ये तान॑ग्नि॒चिदे॒वोभया᳚-न्प्रीणाति॒ ये दे॒वा दे॒वाना॒मिति॑ द॒द्ध्ना म॑धुमि॒श्रेणावो᳚क्षति हु॒ताद॑श्चै॒व दे॒वान॑हु॒ताद॑श्च॒ यज॑मानः प्रीणाति॒ ते यज॑मान-म्प्रीणन्ति द॒द्ध्नैव हु॒तादः॑ प्री॒णाति॒ मधु॑षा ऽहु॒तादो᳚ ग्रा॒म्यं-वाँ ए॒तदन्नं॒-यँद्दद्ध्या॑र॒ण्य-म्मधु॒ यद्द॒ध्ना म॑धुमि॒श्रेणा॒-वोक्ष॑त्यु॒भय॒स्या-ऽव॑रुद्ध्यै ग्रुमु॒ष्टिना-ऽवो᳚क्षति प्राजाप॒त्यो [प्राजाप॒त्यः, वै ग्रु॑मु॒ष्टि-] 20

वै ग्रु॑मु॒ष्टि-स्स॑योनि॒त्वाय॒ द्वाभ्या॒-म्प्रति॑ष्ठित्या अनुपरि॒चार॒-मवो᳚क्ष॒त्य-प॑रिवर्गमे॒वैना᳚-न्प्रीणाति॒ वि वा ए॒ष प्रा॒णैः प्र॒जया॑ प॒शुभि॑र्-ऋद्ध्यते॒ यो᳚-ऽग्नि-ञ्चि॒न्वन्न॑धि॒क्राम॑ति प्राण॒दा अ॑पान॒दा इत्या॑ह प्रा॒णाने॒वा-ऽऽत्म-न्ध॑त्ते वर्चो॒दा व॑रिवो॒दा इत्या॑ह प्र॒जा वै वर्चः॑ प॒शवो॒ वरि॑वः प्र॒जामे॒व प॒शूना॒त्म-न्ध॑त्त॒ इन्द्रो॑ वृ॒त्रम॑ह॒न्तं-वृँ॒त्रो [वृ॒त्रम॑ह॒न्तं-वृँ॒त्रः, ह॒त-ष्षो॑ड॒शभि॑-] 21

ह॒त-ष्षो॑ड॒शभि॑-र्भो॒गैर॑सिना॒-थ्स ए॒ताम॒ग्नये-ऽनी॑कवत॒ आहु॑तिमपश्य॒-त्ताम॑जुहो॒-त्तस्या॒ग्निरनी॑ कवा॒न्थ्स्वेन॑ भाग॒धेये॑न प्री॒त-ष्षो॑डश॒धा वृ॒त्रस्य॑ भो॒गानप्य॑दह-द्वैश्वकर्म॒णेन॑ पा॒प्मनो॒ निर॑मुच्यत॒ यद॒ग्नये-ऽनी॑कवत॒ आहु॑ति-ञ्जु॒होत्य॒ग्निरे॒वा-ऽस्यानी॑कवा॒न्थ्स्वेन॑ भाग॒धेये॑न प्री॒तः पा॒प्मान॒मपि॑ दहति वैश्वकर्म॒णेन॑ पा॒प्मनो॒ निर्मु॑च्यते॒ य-ङ्का॒मये॑त चि॒र-म्पा॒प्मनो॒ [चि॒र-म्पा॒प्मनः॑, निर्मु॑च्ये॒तेत्येकै॑क॒-] 22

निर्मु॑च्ये॒तेत्येकै॑क॒-न्तस्य॑ जुहुयाच्चि॒रमे॒व पा॒प्मनो॒ निर्मु॑च्यते॒ य-ङ्का॒मये॑त ता॒ज-क्पा॒प्मनो॒ निर्मु॑च्ये॒तेति॒ सर्वा॑णि॒ तस्या॑नु॒द्रुत्य॑ जुहुया-त्ता॒जगे॒व पा॒प्मनो॒ निर्मु॑च्य॒ते-ऽथो॒ खलु॒ नानै॒व सू॒क्ताभ्या᳚-ञ्जुहोति॒ नानै॒व सू॒क्तयो᳚र्वी॒र्य॑-न्दधा॒त्यथो॒ प्रति॑ष्ठित्यै ॥ 23 ॥

(दे॒वाः - प्रा॑जाप॒त्यो-वृ॒त्र - श्चि॒र-म्पा॒प्मन॑ - श्चत्वारि॒ग्ं॒शच्च॑) (अ. 5)

उदे॑नमुत्त॒रा-न्न॒येति॑ स॒मिध॒ आ द॑धाति॒ यथा॒ जनं॑-यँ॒ते॑-ऽव॒स-ङ्क॒रोति॑ ता॒दृगे॒व त-त्ति॒स्र आ द॑धाति त्रि॒वृद्वा अ॒ग्निर्यावा॑ने॒-वाग्निस्तस्मै॑ भाग॒धेय॑-ङ्करो॒त्यौदु॑म्बरी-र्भव॒न्त्यूर्ग्वा उ॑दु॒म्बर॒ ऊर्ज॑मे॒वास्मा॒ अपि॑ दधा॒त्युदु॑ त्वा॒ विश्वे॑ दे॒वा इत्या॑ह प्रा॒णा वै विश्वे॑ दे॒वाः प्रा॒णै- [प्रा॒णैः, ए॒वैन॒-] 24

-रे॒वैन॒-मुद्य॑च्छ॒ते ऽग्ने॒ भर॑न्तु॒ चित्ति॑भि॒रित्या॑ह॒ यस्मा॑ ए॒वैन॑-ञ्चि॒त्तायो॒द्यच्छ॑ते॒ तेनै॒वैन॒ग्ं॒ सम॑र्धयति॒ पञ्च॒ दिशो॒ दैवी᳚र्य॒ज्ञम॑वन्तु दे॒वीरित्या॑ह॒ दिशो॒ ह्ये॑षो-ऽनु॑ प्र॒च्यव॒ते ऽपाम॑ति-न्दुर्म॒ति-म्बाध॑माना॒ इत्या॑ह॒ रक्ष॑सा॒मप॑हत्यै रा॒यस्पोषे॑ य॒ज्ञप॑ति-मा॒भज॑न्ती॒रित्या॑ह प॒शवो॒ वै रा॒यस्पोषः॑ [रा॒यस्पोषः॑, प॒शूने॒वाव॑] 25

प॒शूने॒वाव॑ रुन्धे ष॒ड्भिर्ह॑रति॒ ष-ड्वा ऋ॒तव॑ ऋ॒तुभि॑रे॒वैनग्ं॑ हरति॒ द्वे प॑रि॒गृह्य॑वती भवतो॒ रक्ष॑सा॒मप॑हत्यै॒ सूर्य॑रश्मि॒र्॒हरि॑केशः पु॒रस्ता॒दित्या॑ह॒ प्रसू᳚त्यै॒ ततः॑ पाव॒का आ॒शिषो॑ नो जुषन्ता॒मित्या॒हान्नं॒-वैँ पा॑व॒को-ऽन्न॑मे॒वाव॑ रुन्धे देवासु॒रा-स्संयँ॑त्ता आस॒-न्ते दे॒वा ए॒त-दप्र॑तिरथ-मपश्य॒-न्तेन॒ वै ते᳚ प्र॒- [वै ते᳚ प्र॒ति, असु॑रानजय॒-न्त-] 26

-त्यसु॑रानजय॒-न्त-दप्र॑तिरथस्या-प्रतिरथ॒त्वं-यँदप्र॑तिरथ-न्द्वि॒तीयो॒ होता॒-ऽन्वाहा᳚प्र॒त्ये॑व तेन॒ यज॑मानो॒ भ्रातृ॑व्यान् जय॒त्यथो॒ अन॑भिजितमे॒वाभि ज॑यति दश॒र्च-म्भ॑वति॒ दशा᳚क्षरा वि॒रा-ड्वि॒राजे॒मौ लो॒कौ विधृ॑ता व॒नयो᳚र्लो॒कयो॒र्विधृ॑त्या॒ अथो॒ दशा᳚क्षरा वि॒राडन्नं॑-विँ॒रा-ड्वि॒राज्ये॒वान्नाद्ये॒ प्रति॑तिष्ठ॒त्यस॑दिव॒ वा अ॒न्तरि॑क्षम॒न्तरि॑क्षमि॒वा ऽऽग्नी᳚द्ध्र॒-माग्नी॒द्ध्रे- [-माग्नी᳚द्ध्रे, अश्मा॑न॒-न्नि द॑धाति] 27

-ऽश्मा॑न॒-न्नि द॑धाति स॒त्त्वाय॒ द्वाभ्या॒-म्प्रति॑ष्ठित्यै वि॒मान॑ ए॒ष दि॒वो मद्ध्य॑ आस्त॒ इत्या॑ह॒ व्ये॑वैतया॑ मिमीते॒ मद्ध्ये॑ दि॒वो निहि॑तः॒ पृश्ञि॒रश्मेत्या॒हान्नं॒-वैँ पृश्ञ्यन्न॑मे॒वाव॑ रुन्धे चत॒सृभि॒रा पुच्छा॑देति च॒त्वारि॒ छन्दाग्ं॑सि॒ छन्दो॑भिरे॒वेन्द्रं॒-विँश्वा॑ अवीवृध॒न्नित्या॑ह॒ वृद्धि॑मे॒वोपाव॑र्तते॒ वाजा॑ना॒ग्ं॒ सत्प॑ति॒-म्पति॒- [सत्प॑ति॒-म्पति᳚म्, इत्या॒हा-ऽन्नं॒-वैँ] 28

-मित्या॒हा-ऽन्नं॒-वैँ वाजो-ऽन्न॑मे॒वाव॑ रुन्धे सुम्न॒हूर्य॒ज्ञो दे॒वाग्ं आ च॑ वक्ष॒दित्या॑ह प्र॒जा वै प॒शवः॑ सु॒म्न-म्प्र॒जामे॒व प॒शूना॒त्म-न्ध॑त्ते॒ यक्ष॑द॒ग्निर्दे॒वो दे॒वाग्ं आ च॑ वक्ष॒दित्या॑ह स्व॒गाकृ॑त्यै॒ वाज॑स्य मा प्रस॒वेनो᳚-द्ग्रा॒भेणोद॑ग्रभी॒दित्या॑हा॒सौ वा आ॑दि॒त्य उ॒द्यन्नु॑द्ग्रा॒भ ए॒ष नि॒म्रोच॑-न्निग्रा॒भो ब्रह्म॑णै॒वा-ऽऽत्मान॑मु-द्गृ॒ह्णाति॒ ब्रह्म॑णा॒ भ्रातृ॑व्य॒-न्नि गृ॑ह्णाति ॥ 29 ॥

(प्रा॒णैः - पोषो᳚ - प्र॒त्या - ग्नी᳚द्धे॒ - पति॑ - मे॒ष - दश॑ च) (अ. 6)

प्राची॒मनु॑ प्र॒दिश॒-म्प्रेहि॑ वि॒द्वानित्या॑ह देवलो॒क-मे॒वैतयो॒पाव॑र्तते॒ क्रम॑द्ध्वम॒ग्निना॒ नाक॒-मित्या॑हे॒माने॒वैतया॑ लो॒कान् क्र॑मते पृथि॒व्या अ॒हमुद॒न्तरि॑क्ष॒मा ऽरु॑ह॒मित्या॑हे॒माने॒वैतया॑ लो॒कान्-थ्स॒मारो॑हति॒ सुव॒र्यन्तो॒ नापे᳚क्षन्त॒ इत्या॑ह सुव॒र्गमे॒वैतया॑ लो॒कमे॒त्यग्ने॒ प्रेहि॑ [प्रेहि॑, प्र॒थ॒मो] 30

प्रथ॒मो दे॑वय॒ता-मित्या॑हो॒भये᳚ष्वे॒वैतया॑ देवमनु॒ष्येषु॒ चक्षु॑र्दधाति प॒ञ्चभि॒रधि॑ क्रामति॒ पाङ्क्तो॑ य॒ज्ञो यावा॑ने॒व य॒ज्ञस्तेन॑ स॒ह सु॑व॒र्गं-लोँ॒कमे॑ति॒ नक्तो॒षासेति॑ पुरो-ऽनुवा॒क्या॑मन्वा॑ह॒ प्रत्या॒ अग्ने॑ सहस्रा॒क्षेत्या॑ह साह॒स्रः प्र॒जाप॑तिः प्र॒जाप॑ते॒राप्त्यै॒ तस्मै॑ ते विधेम॒ वाजा॑य॒ स्वाहेत्या॒हान्नं॒-वैँ वाजो-ऽन्न॑-मे॒वाव॑ [वाजो-ऽन्न॑-मे॒वाव॑, रु॒न्धे॒ द॒द्ध्नः] 31

रुन्धे द॒द्ध्नः पू॒र्णामौदु॑म्बरीग् स्वयमातृ॒ण्णाया᳚-ञ्जुहो॒त्यूर्ग्वै दद्ध्यूर्गु॑दु॒म्बरो॒-ऽसौ स्व॑यमातृ॒ण्णा ऽमुष्या॑मे॒वोर्ज॑-न्दधाति॒ तस्मा॑द॒मुतो॒-ऽर्वाची॒मूर्ज॒मुप॑ जीवामस्ति॒सृभिः॑ सादयति त्रि॒वृद्वा अ॒ग्निर्यावा॑ने॒वाग्निस्त-म्प्र॑ति॒ष्ठा-ङ्ग॑मयति॒ प्रेद्धो॑ अग्ने दीदिहि पु॒रो न॒ इत्यौदु॑म्बरी॒मा द॑धात्ये॒षा वै सू॒र्मी कर्ण॑कावत्ये॒तया॑ ह स्म॒ [ह स्म, वै] 32

वै दे॒वा असु॑राणाग्ं शतत॒र्॒हाग् स्तृग्ं॑हन्ति॒ यदे॒तया॑ स॒मिध॑मा॒दधा॑ति॒ वज्र॑मे॒वैतच्छ॑त॒घ्नीं-यँज॑मानो॒ भ्रातृ॑व्याय॒ प्रह॑रति॒ स्तृत्या॒ अछ॑म्बट्कारं-विँ॒धेम॑ ते पर॒मे जन्म॑न्नग्न॒ इति॒ वैक॑ङ्कती॒मा द॑धाति॒ भा ए॒वाव॑ रुन्धे॒ ताग्ं स॑वि॒तुर्वरे᳚ण्यस्य चि॒त्रामिति॑ शमी॒मयी॒ग्ं॒ शान्त्या॑ अ॒ग्निर्वा॑ ह॒ वा अ॑ग्नि॒चित॑-न्दु॒हे᳚-ऽग्नि॒चिद्वा॒-ऽग्नि-न्दु॑हे॒ ताग्ं [ताम्, स॒वि॒तु-] 33

स॑वि॒तु-र्वरे᳚ण्यस्य चि॒त्रामित्या॑है॒ष वा अ॒ग्नेर्दोह॒स्तम॑स्य॒ कण्व॑ ए॒व श्रा॑य॒सो॑-ऽवे॒-त्तेन॑ ह स्मैन॒ग्ं॒ स दु॑हे॒ यदे॒तया॑ स॒मिध॑-मा॒दधा᳚त्यग्नि॒चिदे॒व तद॒ग्नि-न्दु॑हे स॒प्त ते॑ अग्ने स॒मिधः॑ स॒प्तजि॒ह्वा इत्या॑ह स॒प्तैवास्य॒ साप्ता॑नि प्रीणाति पू॒र्णया॑ जुहोति पू॒र्ण इ॑व॒ हि प्र॒जाप॑तिः प्र॒जाप॑ते॒- [प्र॒जाप॑तेः, आप्त्यै॒] 34

-राप्त्यै॒ न्यू॑नया जुहोति॒ न्यू॑ना॒द्धि प्र॒जाप॑तिः प्र॒जा असृ॑जत प्र॒जाना॒ग्ं॒ सृष्ट्या॑ अ॒ग्निर्दे॒वेभ्यो॒ निला॑यत॒ स दिशो-ऽनु॒ प्रा-ऽवि॑श॒ज्जुह्व॒न्मन॑सा॒ दिशो᳚ द्ध्याये द्दि॒ग्भ्य ए॒वैन॒मव॑ रुन्धे द॒द्ध्ना पु॒रस्ता᳚ज्जुहो॒त्या-ज्ये॑नो॒परि॑ष्टा॒-त्तेज॑श्चै॒वास्मा॑ इन्द्रि॒य-ञ्च॑ स॒मीची॑ दधाति॒ द्वाद॑शकपालो वैश्वान॒रो भ॑वति॒ द्वाद॑श॒ मासा᳚-स्संवँथ्स॒र-स्सं॑वँथ्स॒रो᳚-ऽग्निर्वै᳚श्वान॒र-स्सा॒क्षा- [-ऽग्निर्वै᳚श्वान॒र-स्सा॒क्षात्, ए॒व वै᳚श्वान॒रमव॑] 35

-दे॒व वै᳚श्वान॒रमव॑ रुन्धे॒ य-त्प्र॑याजानूया॒जान् कु॒र्याद्विक॑स्ति॒-स्सा य॒ज्ञस्य॑ दर्विहो॒म-ङ्क॑रोति य॒ज्ञस्य॒ प्रति॑ष्ठित्यै रा॒ष्ट्रं-वैँ वै᳚श्वान॒रो विण्म॒रुतो॑ वैश्वान॒रग्ं हु॒त्वा मा॑रु॒तान् जु॑होति रा॒ष्ट्र ए॒व विश॒मनु॑ बद्ध्नात्यु॒च्चै-र्वै᳚श्वान॒रस्या-ऽऽ श्रा॑वयत्युपा॒ग्ं॒शु मा॑रु॒तान् जु॑होति॒ तस्मा᳚-द्रा॒ष्ट्रं-विँश॒मति॑ वदति मारु॒ता भ॑वन्ति म॒रुतो॒ वै दे॒वानां॒-विँशो॑ देववि॒शेनै॒वास्मै॑ मनुष्यवि॒श -मव॑ रुन्धे स॒प्त भ॑वन्ति स॒प्तग॑णा॒ वै म॒रुतो॑ गण॒श ए॒व विश॒मव॑ रुन्धे ग॒णेन॑ ग॒णम॑नु॒द्रुत्य॑ जुहोति॒ विश॑मे॒वास्मा॒ अनु॑वर्त्मान-ङ्करोति ॥ 36 ॥

(अग्ने॒ प्रेह्य - व॑ - स्म - दुहे॒ तां - प्र॒जाप॑तेः - सा॒क्षान् - म॑नुष्यवि॒श - मेक॑विग्ंशतिश्च) (अ. 7)

वसो॒र्धारा᳚-ञ्जुहोति॒ वसो᳚र्मे॒ धारा॑-ऽस॒दिति॒ वा ए॒षा हू॑यते घृ॒तस्य॒ वा ए॑नमे॒षा धारा॒-ऽमुष्मि॑न् ँलो॒के पिन्व॑मा॒नोप॑ तिष्ठत॒ आज्ये॑न जुहोति॒ तेजो॒ वा आज्य॒-न्तेजो॒ वसो॒र्धारा॒ तेज॑सै॒वास्मै॒ तेजो-ऽव॑ रु॒न्धे-ऽथो॒ कामा॒ वै वसो॒र्धारा॒ कामा॑ने॒वाव॑ रुन्धे॒ य-ङ्का॒मये॑त प्रा॒णान॑स्या॒-ऽन्नाद्यं॒-विँ- [-ऽन्नाद्यं॒-विँ, छि॒न्द्या॒मिति॑] 37

-च्छि॑न्द्या॒मिति॑ वि॒ग्राह॒-न्तस्य॑ जुहुया-त्प्रा॒णाने॒वास्या॒न्नाद्यं॒-विँच्छि॑नत्ति॒ य-ङ्का॒मये॑त प्रा॒णान॑स्या॒न्नाद्य॒ग्ं॒ स-न्त॑नुया॒मिति॒ स-न्त॑ता॒-न्तस्य॑ जुहुया-त्प्रा॒णाने॒वास्या॒न्नाद्य॒ग्ं॒ स-न्त॑नोति॒ द्वाद॑श द्वाद॒शानि॑ जुहोति॒ द्वाद॑श॒ मासा᳚-स्संवँथ्स॒र-स्सं॑वँथ्स॒रेणै॒ वास्मा॒ अन्न॒मव॑ रु॒न्धे ऽन्न॑-ञ्च॒ मे-ऽक्षु॑च्च म॒ इत्या॑है॒ त-द्वा [इत्या॑है॒ त-द्वै, अन्न॑स्य रू॒पग्ं] 38

अन्न॑स्य रू॒पग्ं रू॒पेणै॒वान्न॒मव॑ रुन्धे॒ ऽग्निश्च॑ म॒ आप॑श्च म॒ इत्या॑है॒षा वा अन्न॑स्य॒ योनि॒-स्सयो᳚न्ये॒वान्न॒मव॑ रुन्धे-ऽर्धे॒न्द्राणि॑ जुहोति दे॒वता॑ ए॒वाव॑ रुन्धे॒ य-थ्सर्वे॑षा-म॒र्धमिन्द्रः॒ प्रति॒ तस्मा॒दिन्द्रो॑ दे॒वता॑ना-म्भूयिष्ठ॒भाक्त॑म॒ इन्द्र॒मुत्त॑रमाहे-न्द्रि॒यमे॒वास्मि॑-न्नु॒परि॑ष्टा-द्दधाति यज्ञायु॒धानि॑ जुहोति य॒ज्ञो [य॒ज्ञः, वै य॑ज्ञायु॒धानि॑] 39

वै य॑ज्ञायु॒धानि॑ य॒ज्ञमे॒वाव॑ रु॒न्धे-ऽथो॑ ए॒तद्वै य॒ज्ञस्य॑ रू॒पग्ं रू॒पेणै॒व य॒ज्ञमव॑ रुन्धे ऽवभृ॒थश्च॑ मे स्वगाका॒रश्च॑ म॒ इत्या॑ह स्व॒गाकृ॑त्या अ॒ग्निश्च॑ मे घ॒र्मश्च॑ म॒ इत्या॑है॒त-द्वै ब्र॑ह्मवर्च॒सस्य॑ रू॒पग्ं रू॒पेणै॒व ब्र॑ह्मवर्च॒समव॑ रुन्ध॒ ऋक्च॑ मे॒ साम॑ च म॒ इत्या॑है॒- [म॒ इत्या॑ह, ए॒तद्वै छन्द॑साग्ं] 40

-तद्वै छन्द॑साग्ं रू॒पग्ं रू॒पेणै॒व छन्दा॒ग्॒स्यव॑ रुन्धे॒ गर्भा᳚श्च मे व॒थ्साश्च॑ म॒ इत्या॑है॒त-द्वै प॑शू॒नाग्ं रू॒पग्ं रू॒पेणै॒व प॒शूनव॑ रुन्धे॒ कल्पा᳚न् जुहो॒त्य कॢ॑प्तस्य॒ कॢप्त्यै॑ युग्मदयु॒जे जु॑होति मिथुन॒त्वायो᳚-त्त॒राव॑ती भवतो॒-ऽभिक्रा᳚न्त्या॒ एका॑ च मे ति॒स्रश्च॑ म॒ इत्या॑ह देवछन्द॒सं-वाँ एका॑ च ति॒स्रश्च॑ [ति॒स्रश्च॑, म॒नु॒ष्य॒छ॒न्द॒स-ञ्चत॑स्रश्चा॒-ऽष्टौ] 41

मनुष्यछन्द॒स-ञ्चत॑स्रश्चा॒-ऽष्टौ च॑ देवछन्द॒स-ञ्चै॒व म॑नुष्य छन्द॒सञ्चा-ऽव॑ रुन्ध॒ आ त्रय॑स्त्रिग्ं शतो जुहोति॒ त्रय॑स्त्रिग्ंश॒द्वै दे॒वता॑ दे॒वता॑ ए॒वाव॑ रुन्ध॒ आ-ऽष्टाच॑त्वारिग्ंशतो जुहोत्य॒ष्टाच॑त्वारिग्ं-शदक्षरा॒ जग॑ती॒ जाग॑ताः प॒शवो॒ जग॑त्यै॒वास्मै॑ प॒शूनव॑ रुन्धे॒ वाज॑श्च प्रस॒वश्चेति॑ द्वाद॒श-ञ्जु॑होति॒ द्वाद॑श॒ मासा᳚-स्संवँथ्स॒र-स्सं॑वँथ्स॒र ए॒व प्रति॑ तिष्ठति ॥ 42 ॥

(वि - वै - य॒ज्ञः-साम॑ च म॒ इत्या॑ह - च ति॒स्र - श्चैका॒न्न प॑ञ्चा॒शच्च॑) (अ. 8)

अ॒ग्निर्दे॒वेभ्यो ऽपा᳚क्राम-द्भाग॒धेय॑मि॒च्छमा॑न॒स्त-न्दे॒वा अ॑ब्रुव॒न्नुप॑ न॒ आ व॑र्तस्व ह॒व्य-न्नो॑ व॒हेति॒ सो᳚-ऽब्रवी॒-द्वरं॑-वृँणै॒ मह्य॑मे॒व वा॑जप्रस॒वीय॑-ञ्जुहव॒न्निति॒ तस्मा॑द॒ग्नये॑ वाजप्रस॒वीय॑-ञ्जुह्वति॒ य-द्वा॑जप्रस॒वीय॑-ञ्जु॒होत्य॒ग्निमे॒व त-द्भा॑ग॒धेये॑न॒ सम॑र्धय॒त्यथो॑ अभिषे॒क ए॒वास्य॒ स च॑तुर्द॒शभि॑र्जुहोति स॒प्त ग्रा॒म्या ओष॑धय-स्स॒प्ता- [ओष॑धय-स्स॒प्त, अ॒र॒ण्या उ॒भयी॑षा॒-] 43

-ऽऽर॒ण्या उ॒भयी॑षा॒-मव॑रुद्ध्या॒ अन्न॑स्यान्नस्य जुहो॒त्यन्न॑स्यान्न॒स्या-व॑रुद्ध्या॒ औदु॑म्बरेण स्रु॒वेण॑ जुहो॒त्यूर्ग्वा उ॑दु॒म्बर॒ ऊर्गन्न॑मू॒र्जैवास्मा॒ ऊर्ज॒मन्न॒मव॑ रुन्धे॒ ऽग्निर्वै दे॒वाना॑-म॒भिषि॑क्तो-ऽग्नि॒चि-न्म॑नु॒ष्या॑णा॒-न्तस्मा॑दग्नि॒चि-द्वर्ष॑ति॒ न धा॑वे॒दव॑रुद्ध॒ग्ग्॒ ह्य॑स्या-न्न॒मन्न॑मिव॒ खलु॒ वै व॒र्॒षं-यँद्धावे॑-द॒न्नाद्या᳚द्धावे-दु॒पाव॑र्तेता॒-ऽन्नाद्य॑-मे॒वा-ऽभ्यु॒- [-ऽन्नाद्य॑-मे॒वा-ऽभि, उ॒पाव॑र्तते॒] 44

-पाव॑र्तते॒ नक्तो॒षासेति॑ कृ॒ष्णायै᳚ श्वे॒तव॑थ्सायै॒ पय॑सा जुहो॒त्यह्नै॒वास्मै॒ रात्रि॒-म्प्रदा॑पयति॒ रात्रि॒या-ऽह॑रहोरा॒त्रे ए॒वास्मै॒ प्रत्ते॒ काम॑म॒न्नाद्य॑-न्दुहाते राष्ट्र॒भृतो॑ जुहोति रा॒ष्ट्रमे॒वाव॑ रुन्धे ष॒ड्भिर्जु॑होति॒ षड्वा ऋ॒तव॑ ऋ॒तुष्वे॒व प्रति॑तिष्ठति॒ भुव॑नस्य पत॒ इति॑ रथमु॒खे पञ्चा-ऽऽहु॑तीर्जुहोति॒ वज्रो॒ वै रथो॒ वज्रे॑णै॒व दिशो॒- [वज्रे॑णै॒व दिशः॑, अ॒भि ज॑यत्यग्नि॒चितग्ं॑] 45

-ऽभि ज॑यत्यग्नि॒चितग्ं॑ ह॒ वा अ॒मुष्मि॑न् ँलो॒के वातो॒-ऽभि प॑वते वातना॒मानि॑ जुहोत्य॒भ्ये॑वैन॑-म॒मुष्मि॑न् ँलो॒के वातः॑ पवते॒ त्रीणि॑ जुहोति॒ त्रय॑ इ॒मे लो॒का ए॒भ्य ए॒व लो॒केभ्यो॒ वात॒मव॑ रुन्धे समु॒द्रो॑-ऽसि॒ नभ॑स्वा॒नित्या॑है॒तद्वै वात॑स्य रू॒पग्ं रू॒पेणै॒व वात॒मव॑ रुन्धे ऽञ्ज॒लिना॑ जुहोति॒ न ह्ये॑तेषा॑म॒न्यथा ऽऽहु॑तिरव॒कल्प॑ते ॥ 46 ॥

(ओष॑धय-स्स॒प्ता - भि - दिशो॒ - ऽन्यथा॒ - द्वे च॑) (अ. 9)

सु॒व॒र्गाय॒ वै लो॒काय॑ देवर॒थो यु॑ज्यते यत्राकू॒ताय॑ मनुष्यर॒थ ए॒ष खलु॒ वै दे॑वर॒थो यद॒ग्निर॒ग्निं-युँ॑नज्मि॒ शव॑सा घृ॒तेनेत्या॑ह यु॒नक्त्ये॒वैन॒ग्ं॒ स ए॑नं-युँ॒क्त-स्सु॑व॒र्गं-लोँ॒कम॒भि व॑हति॒ य-थ्सर्वा॑भिः प॒ञ्चभि॑-र्यु॒ञ्ज्या-द्यु॒क्तो᳚-ऽस्या॒-ऽग्निः प्रच्यु॑त-स्स्या॒दप्र॑तिष्ठिता॒ आहु॑तय॒-स्स्युरप्र॑तिष्ठिता॒-स्स्तोमा॒ अप्र॑तिष्ठितान्यु॒क्थानि॑ ति॒सृभिः॑ प्रातस्सव॒ने॑-ऽभि मृ॑शति त्रि॒वृ- [त्रि॒वृत्, वा अ॒ग्निर्यावा॑ने॒वा-] 47

-द्वा अ॒ग्निर्यावा॑ने॒वा-ग्निस्तं-युँ॑नक्ति॒ यथा-ऽन॑सि यु॒क्त आ॑धी॒यत॑ ए॒वमे॒व त-त्प्रत्याहु॑तय॒स्तिष्ठ॑न्ति॒ प्रति॒ स्तोमाः॒ प्रत्यु॒क्थानि॑ यज्ञाय॒ज्ञिय॑स्य स्तो॒त्रे द्वाभ्या॑म॒भि मृ॑शत्ये॒तावा॒न्॒ वै य॒ज्ञो यावा॑नग्निष्टो॒मो भू॒मा त्वा अ॒स्यात॑ ऊ॒र्ध्वः क्रि॑यते॒ यावा॑ने॒व य॒ज्ञस्तम॑न्त॒तो᳚ ऽन्वारो॑हति॒ द्वाभ्या॒-म्प्रति॑ष्ठित्या॒ एक॒या-ऽप्र॑स्तुत॒-म्भव॒त्यथा॒- [-ऽप्र॑स्तुत॒-म्भव॒त्यथ॑, अ॒भि मृ॑श॒त्युपै॑न॒-] 48

-ऽभि मृ॑श॒त्युपै॑न॒-मुत्त॑रो य॒ज्ञो न॑म॒त्यथो॒ सन्त॑त्यै॒ प्र वा ए॒षो᳚-ऽस्माल्लो॒का-च्च्य॑वते॒ यो᳚-ऽग्नि-ञ्चि॑नु॒ते न वा ए॒तस्या॑निष्ट॒क आहु॑ति॒रव॑ कल्पते॒ यां-वाँ ए॒षो॑-ऽनिष्ट॒क आहु॑ति-ञ्जु॒होति॒ स्रव॑ति॒ वै सा ताग् स्रव॑न्तीं-यँ॒ज्ञो-ऽनु॒ परा॑ भवति य॒ज्ञं-यँज॑मानो॒ य-त्पु॑नश्चि॒ति-ञ्चि॑नु॒त आहु॑तीना॒-म्प्रति॑ष्ठित्यै॒ प्रत्याहु॑तय॒स्तिष्ठ॑न्ति॒ [प्रत्याहु॑तय॒स्तिष्ठ॑न्ति, न य॒ज्ञः] 49

न य॒ज्ञः प॑रा॒भव॑ति॒ न यज॑मानो॒ ऽष्टावुप॑ दधात्य॒ष्टाक्ष॑रा गाय॒त्री गा॑य॒त्रेणै॒वैन॒-ञ्छन्द॑सा चिनुते॒ यदेका॑दश॒ त्रैष्टु॑भेन॒ य-द्द्वाद॑श॒ जाग॑तेन॒ छन्दो॑भिरे॒वैन॑-ञ्चिनुते नपा॒त्को वैनामै॒षो᳚-ऽग्निर्य-त्पु॑नश्चि॒तिर्य ए॒वं-विँ॒द्वा-न्पु॑नश्चि॒ति-ञ्चि॑नु॒त आ तृ॒तीया॒-त्पुरु॑षा॒दन्न॑मत्ति॒ यथा॒ वै पु॑नरा॒धेय॑ ए॒व-म्पु॑नश्चि॒तिर्यो᳚-ऽ-ग्न्या॒धेये॑न॒ न- [-ग्न्या॒धेये॑न॒ न, ऋ॒ध्नोति॒ स] 50

-र्ध्नोति॒ स पु॑नरा॒धेय॒मा ध॑त्ते॒ यो᳚-ऽग्नि-ञ्चि॒त्वा नर्ध्नोति॒ स पु॑नश्चि॒ति-ञ्चि॑नुते॒ य-त्पु॑नश्चि॒ति-ञ्चि॑नु॒त ऋद्ध्या॒ अथो॒ खल्वा॑हु॒र्न चे॑त॒व्येति॑ रु॒द्रो वा ए॒ष यद॒ग्निर्यथा᳚ व्या॒घ्रग्ं सु॒प्त-म्बो॒धय॑ति ता॒दृगे॒व तदथो॒ खल्वा॑हुश्चेत॒व्येति॒ यथा॒ वसी॑याग्ंस-म्भाग॒धेये॑न बो॒धय॑ति ता॒दृगे॒व तन्मनु॑र॒ग्निम॑चिनुत॒ तेन॒ ना-ऽऽर्ध्नो॒थ्स ए॒ता-म्पु॑नश्चि॒तिम॑पश्य॒-त्ताम॑चिनुत॒ तया॒ वै स आ᳚र्ध्नो॒द्य-त्पु॑नश्चि॒ति-ञ्चि॑नु॒त ऋद्ध्यै᳚ ॥ 51 ॥

(त्रि॒वृ-दथ॒-तिष्ठ॑-न्त्यग्न्या॒धेये॑न॒ ना-चि॑नुत-स॒प्तद॑श- च) (अ. 10)

छ॒न्द॒श्चित॑-ञ्चिन्वीत प॒शुका॑मः प॒शवो॒ वै छन्दाग्ं॑सि पशु॒माने॒व भ॑वति श्येन॒चित॑-ञ्चिन्वीत सुव॒र्गका॑म-श्श्ये॒नो वै वय॑सा॒-म्पति॑ष्ठ-श्श्ये॒न ए॒व भू॒त्वा सु॑व॒र्गं-लोँ॒क-म्प॑तति कङ्क॒चित॑-ञ्चिन्वीत॒ यः का॒मये॑त शीर्ष॒ण्वान॒मुष्मि॑न् ँलो॒के स्या॒मिति॑ शीर्ष॒ण्वाने॒वा-ऽमुष्मि॑न् ँलो॒के भ॑वत्यलज॒चित॑-ञ्चिन्वीत॒ चतु॑स्सीत-म्प्रति॒ष्ठाका॑म॒श्चत॑स्रो॒ दिशो॑ दि॒क्ष्वे॑व प्रति॑ तिष्ठति प्रौग॒चित॑-ञ्चिन्वीत॒ भ्रातृ॑व्यवा॒-न्प्रै- [भ्रातृ॑व्यवा॒-न्प्र, ए॒व भ्रातृ॑व्या-न्नुदत] 52

-व भ्रातृ॑व्या-न्नुदत उभ॒यतः॑ प्रौग-ञ्चिन्वीत॒यः का॒मये॑त॒ प्रजा॒ता-न्भ्रातृ॑व्या-न्नु॒देय॒ प्रति॑ जनि॒ष्यमा॑णा॒निति॒ प्रैव जा॒ता-न्भ्रातृ॑व्या-न्नु॒दते॒ प्रति॑ जनि॒ष्यमा॑णा-न्रथचक्र॒चित॑-ञ्चिन्वीत॒ भ्रातृ॑व्यवा॒न्॒ वज्रो॒ वै रथो॒ वज्र॑मे॒व भ्रातृ॑व्येभ्यः॒ प्रह॑रति द्रोण॒चित॑-ञ्चिन्वी॒तान्न॑कामो॒ द्रोणे॒ वा अन्न॑-म्भ्रियते॒ सयो᳚न्ये॒वान्न॒मव॑ रुन्धे समू॒ह्य॑-ञ्चिन्वीत प॒शुका॑मः पशु॒माने॒व भ॑वति [पशु॒माने॒व भ॑वति, प॒रि॒चा॒य्य॑-ञ्चिन्वीत॒] 53

परिचा॒य्य॑-ञ्चिन्वीत॒ ग्राम॑कामो ग्रा॒म्ये॑व भ॑वति श्मशान॒चित॑-ञ्चिन्वीत॒ यः का॒मये॑त पितृलो॒क ऋ॑द्ध्नुया॒मिति॑ पितृलो॒क ए॒वर्ध्नो॑ति विश्वामित्रजमद॒ग्नी वसि॑ष्ठेना-ऽस्पर्धेता॒ग्ं॒ स ए॒ता ज॒मद॑ग्निर्विह॒व्या॑ अपश्य॒-त्ता उपा॑धत्त॒ ताभि॒र्वै स वसि॑ष्ठस्येन्द्रि॒यं-वीँ॒र्य॑मवृङ्क्त॒ य-द्वि॑ह॒व्या॑ उप॒दधा॑तीन्द्रि॒यमे॒व ताभि॑र्वी॒र्यं॑-यँज॑मानो॒ भ्रातृ॑व्यस्य वृङ्क्ते॒ होतु॒र्धिष्णि॑य॒ उप॑ दधाति यजमानायत॒नं-वैँ [ ] 54

होता॒ स्व ए॒वास्मा॑ आ॒यत॑न इन्द्रि॒यं-वीँ॒र्य॑मव॑ रुन्धे॒ द्वाद॒शोप॑ दधाति॒ द्वाद॑शाक्षरा॒ जग॑ती॒ जाग॑ताः प॒शवो॒ जग॑त्यै॒वास्मै॑ प॒शूनव॑ रुन्धे॒ ऽष्टाव॑ष्टाव॒न्येषु॒ धिष्णि॑ये॒षूप॑ दधात्य॒ष्टाश॑फाः प॒शवः॑ प॒शूने॒वाव॑ रुन्धे॒ षण्मा᳚र्जा॒लीये॒ ष-ड्वा ऋ॒तव॑ ऋ॒तवः॒ खलु॒ वै दे॒वाः पि॒तर॑ ऋ॒तूने॒व दे॒वा-न्पि॒तॄ-न्प्री॑णाति ॥ 55 ॥

(प्र - भ॑वति - यजमानायत॒नं-वाँ - अ॒ष्टाच॑त्वारिग्ंशच्च) (अ. 11)

पव॑स्व॒ वाज॑सातय॒ इत्य॑नु॒ष्टु-क्प्र॑ति॒पद्भ॑वति ति॒र्सो॑-ऽनु॒ष्टुभ॒श्चत॑स्रो गाय॒त्रियो॒ य-त्ति॒स्रो॑-ऽनु॒ष्टुभ॒-स्तस्मा॒-दश्व॑स्त्रि॒भिस्तिष्ठग्ग्॑ स्तिष्ठति॒ यच्चत॑स्रो गाय॒त्रिय॒स्तस्मा॒-थ्सर्वाग्॑ श्च॒तुरः॑ प॒दः प्र॑ति॒दध॒-त्पला॑यते पर॒मा वा ए॒षा छन्द॑सां॒-यँद॑नु॒ष्टु-क्प॑र॒मश्च॑तुष्टो॒म-स्स्तोमा॑ना-म्पर॒मस्त्रि॑रा॒त्रो य॒ज्ञाना᳚-म्पर॒मो-ऽश्वः॑ पशू॒ना-म्प॑र॒मेणै॒वैन॑-म्पर॒मता᳚-ङ्गमयत्येकवि॒ग्ं॒श-मह॑र्भवति॒ [-मह॑र्भवति, यस्मि॒न्नश्व॑] 56

यस्मि॒न्नश्व॑ आल॒भ्यते॒ द्वाद॑श॒ मासाः॒ पञ्च॒र्तव॒स्त्रय॑ इ॒मे लो॒का अ॒सावा॑दि॒त्य ए॑कवि॒ग्ं॒श ए॒ष प्र॒जाप॑तिः प्राजाप॒त्यो-ऽश्व॒स्तमे॒व सा॒क्षादृ॑द्ध्नोति॒ शक्व॑रयः पृ॒ष्ठ-म्भ॑वन्त्य॒न्-यद॑न्य॒-च्छन्दो॒-ऽन्ये᳚न्ये॒ वा ए॒ते प॒शव॒ आ ल॑भ्यन्त उ॒तेव॑ ग्रा॒म्या उ॒तेवा॑-ऽऽर॒ण्या यच्छक्व॑रयः पृ॒ष्ठ-म्भव॒न्त्यश्व॑स्य सर्व॒त्वाय॑ पार्थुर॒श्म-म्ब्र॑ह्मसा॒म-म्भ॑वति र॒श्मिना॒ वा अश्वो॑ [र॒श्मिना॒ वा अश्वः॑, य॒त ई᳚श्व॒रो] 57

य॒त ई᳚श्व॒रो वा अश्वो-ऽय॒तो-ऽप्र॑तिष्ठितः॒ परा᳚-म्परा॒वत॒-ङ्गन्तो॒र्य-त्पा᳚र्थुर॒श्म-म्ब्र॑ह्मसा॒म-म्भव॒त्यश्व॑स्य॒ यत्यै॒ धृत्यै॒ सङ्कृ॑त्यच्छावाकसा॒म-म्भ॑वत्युथ्सन्नय॒ज्ञो वा ए॒ष यद॑श्वमे॒धः कस्तद्वे॒देत्या॑हु॒र्यदि॒ सर्वो॑ वा क्रि॒यते॒ न वा॒ सर्व॒ इति॒ य-थ्सङ्कृ॑त्यच्छावाकसा॒म-म्भव॒त्यश्व॑स्य सर्व॒त्वाय॒ पर्या᳚प्त्या॒ अन॑न्तरायाय॒ सर्व॑स्तोमो-ऽतिरा॒त्र उ॑त्त॒ममह॑र्भवति॒ सर्व॒स्या-ऽऽप्त्यै॒ सर्व॑स्य॒ जित्यै॒ सर्व॑मे॒व तेना᳚-ऽऽप्नोति॒ सर्व॑-ञ्जयति ॥ 58 ॥

(अह॑र्भवति॒ - वा अश्वो - ऽह॑र्भवति॒ - दश॑ च) (अ. 12)

(दे॒वा॒सु॒रास्तेन - र्त॒व्या॑ - रु॒द्रो - ऽश्म॑ - न्नृ॒षदे॒ व - डुदे॑नं॒ - प्राची॒मिति॒ - वसो॒र्धारा॑ - म॒ग्निर्दे॒वेभ्यः॑ - सुव॒र्गाय॑ यत्राकू॒ताय॑ - छन्द॒श्चितं॒ - पव॑स्व॒ - द्वाद॑श )

(दे॒वा॒सु॒रा - अ॒जायां॒ - ँवै ग्रु॑मु॒ष्टिः - प्र॑थ॒मो दे॑वय॒तामे॒ - तद्वै छन्द॑सा - मृ॒ध्नो - त्य॒ष्टौ प॑ञ्चा॒शत्)

(दे॒वा॒सु॒रा, स्सर्व॑-ञ्जयति)

॥ हरिः॑ ओम् ॥

॥ कृष्ण यजुर्वेदीय तैत्तिरीय संहिताया-म्पञ्चमकाण्डे चतुर्थः प्रश्न-स्समाप्तः ॥